കേജരിവാളിന്റേത് അത്യാഡംബര ജീവിതം: ബിജെപി
Tuesday, October 22, 2024 2:14 AM IST
ന്യൂഡൽഹി: അധികാരത്തിൽ വന്നപ്പോൾ ബംഗ്ലാവുകളിൽ താമസിക്കില്ലെന്നു പ്രഖ്യാപിച്ച അരവിന്ദ് കേജരിവാൾ മുഖ്യമന്ത്രിയായിരിക്കെ ആഡംബരജീവിതമാണു നയിച്ചതെന്ന് ബിജെപി.
മുഖ്യമന്ത്രിയായിരിക്കെ അരവിന്ദ് കേജരിവാൾ താമസിച്ചിരുന്ന വസതിയിലെ ആഡംബരവസ്തുക്കളുടെ കണക്കുകൾ പൊതുമരാമത്തുവകുപ്പ് പുറത്തുവിട്ടതിനു പിന്നാലെയാണ് ബിജെപിയുടെ ആരോപണം.
വസതിയിൽ ലക്ഷങ്ങൾ വിലവരുന്ന സ്മാർട്ട് ടോയ്ലറ്റുകളാണ് ഉപയോഗിച്ചിരുന്നതെന്നു പരിഹസിച്ച ബിജെപി ദേശീയ വക്താവ് സംബിത് പത്ര, വസതിയൊഴിഞ്ഞപ്പോൾ കേജരിവാൾ ടോയ്ലലറ്റും കൂടെക്കൊണ്ടുപോയെന്നും ആരോപിച്ചു. ബംഗ്ലാവിൽ താമസിക്കില്ലെന്ന് 2013ൽ സത്യവാങ്മൂലത്തിൽ പറഞ്ഞ കേജരിവാളിന്റെ അത്യാഡംബരജീവിതത്തിനു ജനങ്ങൾ തെരഞ്ഞെടുപ്പിൽ മറുപടി നൽകുമെന്ന് സംബിത് പത്ര പറഞ്ഞു
മുഖ്യമന്ത്രിയായിരിക്കെ കേജരിവാളിന്റെ ഔദ്യോഗിക വസതിയിൽ 64 ലക്ഷം രൂപ വിലവരുന്ന 16 ടിവികളും നാലു കോടിയിലധികം രൂപ വില വരുന്ന മോട്ടോർ ഘടിപ്പിച്ച കർട്ടനുകളടക്കമുള്ള ആഡംബരവസ്തുക്കളുണ്ടെന്ന് നേരത്തെ പൊതുമരാമത്ത് വകുപ്പ് വെളിപ്പെടുത്തിയിരുന്നു.
ലക്ഷങ്ങൾ വിലവരുന്ന മസാജ് കസേരകൾ, റഫ്രിജറേറ്ററുകൾ, സ്മാർട്ട് എൽഇഡി ലൈറ്റുകൾ, യുവി രശ്മി പുറപ്പെടുവിക്കുന്ന ടോയ്ലറ്റുകൾ എന്നിവ കേജരിവാൾ ഉപയോഗിച്ചിരുന്നുവെന്ന് പൊതുമരാമത്ത് വകുപ്പ് പറയുന്നു.
നൂറു കോടിയിലധികം വിലവരുന്ന വസ്തുക്കൾ കേജരിവാൾ ഉപയോഗിച്ചിരുന്നുവെന്നാണ് ബിജെപി ആരോപിക്കുന്നത്.