രാജസ്ഥാനിൽ ആരുമായും സഖ്യമില്ലെന്നു കോൺഗ്രസ്
Tuesday, October 22, 2024 2:14 AM IST
ജയ്പുർ: രാജസ്ഥാനിൽ ഉപതെരഞ്ഞെടുപ്പ് നടക്കുന്ന ഏഴു നിയമസഭാ മണ്ഡലങ്ങളിൽ ആരുമായും സഖ്യമില്ലെന്നു പിസിസി അധ്യക്ഷൻ ഗോവിന്ദ് സിംഗ് ദോതസര.
സ്ഥാനാർഥികളുടെ പട്ടിക ഹൈക്കമാൻഡിനു സമർപ്പിച്ചെന്ന് അദ്ദേഹം പറഞ്ഞു. ലോക്സഭാ തെരഞ്ഞെടുപ്പിൽ ആർഎൽപി, സിപിഎം, പാർട്ടികളുമായി സഖ്യമുണ്ടാക്കിയിരുന്നു.
നാഗൗറിൽ വിജയിച്ച ആർഎൽപി കൺവീനർ ഹനുമാൻ ബേനിവാൾ ഒഴിഞ്ഞ ഖിൻവ്സർ മണ്ഡലത്തിൽ ഉൾപ്പെടെയാണ് ഉപതെരഞ്ഞെടുപ്പ് നടക്കുന്നത്.
ഖിൻവ്സർ മണ്ഡലം ആർഎൽപിക്കു കോൺഗ്രസ് വിട്ടുനല്കുമെന്ന് റിപ്പോർട്ടുണ്ടായിരുന്നു. ബൻസ്വാര-ദുംഗാർപുർ മണ്ഡലത്തിൽനിന്നു വിജയിച്ച ബിഎപി നേതാവ് രാജ്കുമാർ റോവത് രാജിവച്ച ചൊരാസി മണ്ഡലത്തിലും ഉപതെരഞ്ഞെടുപ്പ് നടക്കുന്നുണ്ട്.
ലോക്സഭാ തെരഞ്ഞെടുപ്പിൽ ബിഎപിയുമായി കോൺഗ്രസ് സഖ്യമുണ്ടാക്കിയില്ലെങ്കിലും സ്ഥാനാർഥിയെ പിൻവലിച്ച് ബിഎപി പിന്തുണ നല്കിയിരുന്നു. ഉപതെരഞ്ഞെടുപ്പ് നടക്കുന്ന ഏഴു മണ്ഡലങ്ങളിൽ നാലെണ്ണം കോൺഗ്രസിന്റെ സിറ്റിംഗ് മണ്ഡലങ്ങളാണ്. ബിജെപി, ബിഎപി, ആർഎൽപി കക്ഷികൾക്ക് ഓരോ മണ്ഡലം വീതമുണ്ട്.