മധ്യപ്രദേശിൽ കോൺഗ്രസിനെതിരേ എസ്പി മത്സരിക്കുന്നു
Tuesday, October 22, 2024 2:14 AM IST
ഭോപ്പാൽ: മധ്യപ്രദേശിലെ ബുധ്നി മണ്ഡലത്തിൽ കോൺഗ്രസിനെതിരേ സ്ഥാനാർഥിയെ നിർത്തി ഇന്ത്യ മുന്നണി ഘടകകക്ഷിയായ സമാജ്വാദി പാർട്ടി. അർജുൻ ആര്യയാണ് എസ്പി സ്ഥാനാർഥി.
മുൻ മുഖ്യമന്ത്രി ശിവരാജ് സിംഗ് ചൗഹാൻ രാജിവച്ച ഒഴിവിലാണ് ബുധ്നിയിൽ ഉപതെരഞ്ഞെടുപ്പ്. മുൻ മന്ത്രി രാജ്കുമാർ പട്ടേൽ ആണു കോൺഗ്രസ് സ്ഥാനാർഥി. മുൻ എംപി രമാകാന്ത് ഭാർഗവ ബിജെപി ടിക്കറ്റിൽ മത്സരിക്കുന്നു.
2018ൽ എസ്പി വിട്ട് കോൺഗ്രസിൽ ചേർന്ന അർജുൻ ആര്യ കഴിഞ്ഞദിവസമാണ് എസ്പിയിൽ തിരിച്ചെത്തിയത്. അതേസമയം, മധ്യപ്രദേശിൽ ഉപതെരഞ്ഞെടുപ്പ് നടക്കുന്ന മറ്റൊരു മണ്ഡലമായ വിജയപുരിൽ സമാജ്വാദി പാർട്ടി മത്സരിക്കുന്നില്ല.