പിഒസിയിലെ വൈദികരും കേരളസഭയിലെ പണ്ഡിതരും ഫാ. കുരുക്കൂരിനെ സ്‌നേഹപൂര്‍വം ഗുരുജി എന്നു വിളിച്ചു. പിഒസിയുടെ ഓരോ സ്പന്ദനങ്ങളും കുരുക്കൂരച്ചന്‍റേതുകൂടിയായിരുന്നു.
പിഒസിയുടെയും സഭയുടെയും ഏത് ആവശ്യത്തിനും എപ്പോഴും ലഭ്യമാകുന്നതിനും ഏതു സംശയങ്ങള്‍ക്കും ഉത്തരമേകുന്നതിനും ഫാ. കുരുക്കൂര്‍ പുലര്‍ത്തിയ ശ്രദ്ധ വൈദികസമൂഹത്തിനാകെ മാതൃകയാണെന്ന് കെസിബിസി ഡെപ്യൂട്ടി സെക്രട്ടറിയും പിഒസി ഡയറക്‌ടറുമായ ഫാ. ജേക്കബ് ജി. പാലയ്ക്കാപ്പിള്ളി പറഞ്ഞു. 2021 ലാണ് വിശ്രമജീവിതത്തിനായി ഫാ. കുരുക്കൂര്‍ മാതൃരൂപതയിലേക്കു മടങ്ങിയത്.
സവിശേഷ ശുശ്രൂഷകള്‍ വത്തിക്കാന്‍ രേഖകളുടെ വിവര്‍ത്തകന്‍, പിഒസി അസി. ഡയറക്ടര്‍, പിഒസി പബ്ലിക്കേഷന്‍സിന്‍റെ ജനറല്‍ എഡിറ്റര്‍, അധ്യാപകന്‍, താലന്ത് എഡിറ്റര്‍, എന്നീ നിലകളില്‍ ഫാ. കുരുക്കൂര്‍ സേവനം ചെയ്തു.
മാര്‍പാപ്പമാരുടെ ചാക്രിക ലേഖനങ്ങള്‍, അപ്പസ്‌തോലിക പ്രബോധനങ്ങള്‍ തുടങ്ങി ഇരുനൂറോളം ഡോക്യുമെന്‍റുകള്‍ വിവര്‍ത്തനം ചെയ്തിട്ടുണ്ട്. പിഒസി ബൈബിളിന്‍റെ തര്‍ജമയിലും അദ്ദേഹം സഹകാരിയായിരുന്നു. മതബോധന പുസ്തകങ്ങളും സന്മാര്‍ഗപാഠാവലികളും എഡിറ്റ് ചെയ്തിട്ടുണ്ട്.
‘ക്രൈസ്തവ ശബ്‌ദകോശം’, സംസ്ഥാന സര്‍ക്കാരിന്‍റെ ചരിത്ര കൗണ്‍സില്‍ പുരസ്‌കാരം നേടിയ ‘ഒരു വംശവും പലനാടുകളും’ തുടങ്ങി പത്തു കൃതികള്‍ രചിച്ചു.