നിക്ഷേപകന്‍റെ ആത്മഹത്യ ഒറ്റപ്പെട്ടതല്ല: പ്രതിപക്ഷ നേതാവ്
Sunday, December 22, 2024 1:15 AM IST
കൊച്ചി: കട്ടപ്പനയിൽ നിക്ഷേപകൻ സാബുവിന്‍റെ ആത്മഹത്യ ഒറ്റപ്പെട്ട സംഭവമല്ലെന്നു പ്രതിപക്ഷ നേതാവ് വി.ഡി. സതീശൻ.
നിക്ഷേപിച്ച പണം നല്‍കിയില്ലെന്നു മാത്രമല്ല, സിപിഎം ഏരിയ സെക്രട്ടറി ഉള്‍പ്പെടെയുള്ളവര്‍ ഫോണില്‍ വിളിച്ച് സാബുവിനെ ഭീഷണിപ്പെടുത്തി. നിക്ഷേപകന്‍ പണം തിരിച്ചു ചോദിക്കുമ്പോള്‍ ഭീഷണിപ്പെടുത്തുന്നുവെന്നത് സിപിഎം എത്രത്തോളം അധഃപതിച്ചു എന്നതിന്‍റെ ഉദാഹരണമാണ്.
അപകടകരമായ നിലയിലേക്കാണ് സഹകരണരംഗം പോകുന്നത്. സഹകരണമേഖലയിലെ പ്രതിസന്ധി പരിഹരിക്കാന്‍ സര്‍ക്കാര്‍ ഒന്നും ചെയ്യുന്നില്ല. പല ബാങ്കുകളും പ്രതിസന്ധിയിലാണ്.
സഹകരണ മേഖലയില്‍ ഐക്യം വേണമെന്നു സര്‍ക്കാര്‍ പ്രതിപക്ഷത്തോട് ആവശ്യപ്പെടുമ്പോഴാണ് പോലീസിനെയും ഗുണ്ടകളെയും ഉപയോഗിച്ച് യുഡിഎഫ് ഭരിക്കുന്ന സഹകരണസ്ഥാപനങ്ങള്‍ പിടിച്ചെടുക്കുന്നത്.
അത്തരത്തില്‍ കോണ്‍ഗ്രസില്‍നിന്നു പിടിച്ചെടുത്ത സ്ഥാപനമാണ് കട്ടപ്പന റൂറല്‍ ഡെവലപ്മെന്‍റ് കോ- ഓപ്പറേറ്റീവ് സൊസൈറ്റി. നിസാര കാര്യങ്ങള്‍ക്കുപോലും യുഡിഎഫ് ഭരിക്കുന്ന ബാങ്കുകള്‍ക്കെതിരേ അന്വേഷണത്തിന് ഉത്തരവിടുകയാണ്. അതിന്‍റെ തൊട്ടടുത്ത ദിവസം സിപിഎമ്മിനെക്കൊണ്ടു മാര്‍ച്ച് നടത്തിക്കും. ഇതോടെ പണം നിക്ഷേപിച്ചിരിക്കുന്നവര്‍ക്ക് ഭയമാകും.
സിപിഎം തന്നെയാണു സംസ്ഥാനത്ത് സഹകരണ ബാങ്കുകള്‍ തകര്‍ക്കുന്നതിന് നേതൃത്വം നല്‍കുന്നതെന്നും വി.ഡി. സതീശൻ കുറ്റപ്പെടുത്തി.