ADVERTISEMENT

ADVERTISEMENT

പിണറായി സർക്കാരിന്‍റെ ദുർഭരണ ദിനങ്ങൾ എണ്ണപ്പെട്ടു: വി.എം. സുധീരൻ

ഫോർട്ടുകൊച്ചി: കുത്തഴിഞ്ഞ ഭരണമാണ് നാട്ടിൽ നടക്കുന്നതെന്നും പോലീസിനെ കൊണ്ട് കോൺഗ്രസ് പ്രവർത്തകർക്കെതിരെ തല്ലി ചോരപുഴ ഒഴുക്കുന്ന പിണറായി സർക്കാരിന്‍റെ ദുർ ഭരണ ദിനങ്ങൾ എണ്ണ പെട്ടന്നും മുൻകെപിസിസി പ്രസിഡന്‍റ് വി.എം. സുധീരൻ അഭിയെപ്പെട്ടു

ഷാഫി പറമ്പിൽ എംപിയെ മർദിച്ച പോലീസിന്‍റെ കിരത നടപടിക്കെതിരെ കൊച്ചി സൗത്ത്, നോർത്ത് ബ്ലോക്ക് കോൺഗ്രസ് കമ്മിറ്റികളുടെ നേതൃത്വത്തിൽ സംഘടിപ്പിച്ച പ്രതിഷേധജാഥയും സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

ബ്ലോക്ക് പ്രസിഡന്‍റ് പി.പി. ജേക്കബ് അധ്യക്ഷത വഹിച്ചു. മുൻമന്ത്രി ഡൊമിനിക് പ്രസന്‍റേഷൻ, കെപിസിസി സെക്രട്ടറി തമ്പി സുബ്രഹ്മണ്യൻ, ഡിസിസി സെക്രട്ടറി അജിത്ത് അമീർ ബാവ, നോർത്ത് ബ്ലോക്ക് പ്രസിഡന്‍റ് വി.എച്ച്. ശിഹാബുദ്ദീൻ,

മുൻ ബ്ലോക്ക് പ്രസിഡന്‍റ് ഷാജി കുറുപ്പശേരി, കൗൺസിലർ ഷൈല തദേവൂസ്, അഗസ്റ്റസ് സിറിൾ, ഇ.ജെ. അവരാച്ചൻ, ടി.എം. റിഫാസ്, എം.എച്ച്. ഹരീഷ്, ടി.എഫ്. ജോർജ്, പി.എം. അബ്ദുൾ ഖാദർ ജബ്ബാർ, സോളി ജോസഫ് തുടങ്ങിയവർ സംസാരിച്ചു.

ADVERTISEMENT

കോൺഗ്രസ് ജനപക്ഷ യാത്ര

ഇലഞ്ഞി: ഇലഞ്ഞി മണ്ഡലം കോൺഗ്രസ് കമ്മിറ്റിയുടെ നേത്യത്വത്തിൽ ജനപക്ഷ യാത്ര നടത്തി. എരപ്പാംകുഴിയിൽനിന്നും ആരംഭിച്ച ജനപക്ഷ യാത്ര പിറവം ബ്ലോക്ക് കോൺഗ്രസ് പ്രസിഡന്‍റ് പി.സി.ജോസ് ജാഥാ ക്യാപ്റ്റന് പതാക കൈമാറി ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് സിജുമോൻ പുല്ലംപറയിൽ അധ്യഷത വഹിച്ചു.

കേരള കോൺഗ്രസ് മണ്ഡലം കൺവൻഷൻ

വാഴക്കുളം: കേരള കോൺഗ്രസ് ആവോലി മണ്ഡലം കൺവൻഷൻ നടത്തി. ആനിക്കാട് ചിറപ്പടിയിൽ ഡെപ്യൂട്ടി ചെയർമാൻ കെ.ഫ്രാൻസിസ് ജോർജ് എംപി കൺവൻഷൻ ഉദ്ഘാടനം ചെയ്തു. മണ്ഡലം പ്രസിഡന്‍റ് രാജു കണിമറ്റം അധ്യക്ഷത വഹിച്ചു. കേരള കോൺഗ്രസ് സംസ്ഥാന കോ-ഓർഡിനേറ്റർ അപു ജോൺ ജോസഫ് മുഖ്യ പ്രഭാഷണം നടത്തി. നിയോജക മണ്ഡലം പ്രസിഡന്‍റ് ഷൈസൺ മാങ്ങഴ, യൂത്ത് ഫ്രണ്ട് സംസ്ഥാന സെക്രട്ടറി കെ.എം. ജോർജ്, ജേക്കബ് ഇരമംഗലം, ജോയി കാക്കനാട്ട്, ഫ്രാൻസിസ് ഇലഞ്ഞേടത്ത്, കുര്യാച്ചൻ കളമ്പാട്ടുപറമ്പിൽ തുടങ്ങിയവർ പ്രസംഗിച്ചു.

കീരംപാറയിലെ കാട്ടാന ശല്യം; അധികൃതർ ഇടപെടണമെന്ന്

കോതമംഗലം: കീരംപാറ പഞ്ചായത്തിലെ ചീക്കോട്, കൂവപ്പാറ, ചാരുപാറ മേഖലയിലെ കാട്ടാന ശല്യം പരിഹരിക്കാൻ അധികൃതർ അടിയന്തിരമായി ഇടപെടണമെന്ന് സിപിഐ വീട്ടുമുറ്റ സദസ് ആവശ്യപ്പെട്ടു. സിപിഐ മണ്ഡലം സെക്രട്ടറി പി.റ്റി. ബെന്നി പരിപാടി ഉദ്ഘാടനം ചെയ്തു. ലോക്കൽ കമ്മറ്റി അസിസ്റ്റന്‍റ് സെക്രട്ടറി മനോജ് മത്തായി അധ്യക്ഷത വഹിച്ചു. മണ്ഡലം സെക്രട്ടറിയേറ്റ് മെമ്പർ കെ.എസ്. ജ്യോതികുമാർ, ലോക്കൽ കമ്മിറ്റി അംഗങ്ങളായ കെ.പി. തോമസ്, എൻ.എ. മാത്യു, ബെന്നി മാത്യു, പഞ്ചായത്ത് വികസന കാര്യ സ്ഥിരം സമിതി ചെയർപേഴ്സൺ സിനി ബിജു, ബിജു ഫ്രാൻസീസ്, എന്നിവർ പ്രസംഗിച്ചു.

പോളിയോ നിർമാർജന യജ്ഞം

മൂവാറ്റുപുഴ: മൂവാറ്റുപുഴ നഗരസഭയുടെ ആഭിമുഖ്യത്തില്‍ പോളിയോ വൈറസ് നിര്‍മാര്‍ജനം ലക്ഷ്യമിട്ട് നടത്തുന്ന ദേശീയ പോളിയോ നിർമാർജന തീവ്ര യജ്ഞ പരിപാടി സംഘടിപ്പിച്ചു. ഭാരതത്തെ പോളിയോ വിമുക്തമാക്കുന്നതിനായി നടത്തുന്ന തീവ്ര യജ്ഞ പരിപാടിയുടെ ഭാഗമായാണ് മൂവാറ്റുപുഴ ജനറല്‍ ആശുപത്രിയിലും പോളിയോ തുള്ളി മരുന്ന് വിതരണം സംഘടിപ്പിച്ചത്. ജനറല്‍ ആശുപത്രിക്ക് പുറമേ നഗരസഭയുടെ അഭിമുഖത്തില്‍ 28 കേന്ദ്രങ്ങളിലും പോളിയോ തുള്ളി മരുന്ന് വിതരണം നടത്തി. അഞ്ച് വയസില്‍ താഴെ പ്രായമുള്ള കുട്ടികള്‍ക്കാണ് രാവിലെ എട്ടു മുതല്‍ വൈകിട്ട് അഞ്ച് വരെ പോളിയോ തുല്യമരുന്ന് വിതരണം നടത്തിയത്. കോതമംഗലം: മാർ ബസേലിയോസ്‌ ആശുപത്രിയിൽ സംഘടിപ്പിച്ച പൾസ് പോളിയോ ഇമ്യൂണൈസേഷൻ ആന്‍റണി ജോൺ എംഎൽഎ ഉദ്ഘാടനം ചെയ്തു. ആർബിഎസ്കെ നേഴ്സ് സി.എം. ബിന്ദു, ആശാവർക്കർ സിന്ധു ചാക്കോച്ചൻ എന്നിവർ പങ്കെടുത്തു.

പെരുമറ്റം പാലത്തിന്‍റെ വീതി കൂട്ടുന്നു

മൂവാറ്റുപുഴ: കൊച്ചി-ധനുഷ്‌കോടി ദേശീയപാതയിലെ പ്രധാന പാലങ്ങളില്‍ ഒന്നായ പെരുമറ്റം പാലത്തിന്‍റെ വീതി കൂട്ടുന്നതിനുള്ള നിര്‍മാണ പ്രവര്‍ത്തനങ്ങള്‍ ആരംഭിച്ചു. 16 മീറ്റര്‍ നീളവും 7 മീറ്റര്‍ വീതിയുമുള്ള പാലത്തിനോട് ചേര്‍ന്ന് നാലുമീറ്റര്‍ കൂട്ടി ചേര്‍ത്താണ് വീതി വര്‍ധിപ്പിക്കുന്നത്. മൂന്ന് സ്പാനുകളില്‍ ആയിട്ടാണ് പുതുതായി ചേര്‍ക്കുന്ന പാലത്തിന്‍റെ സ്ലാബുകള്‍ ഉറപ്പിക്കുന്നത്. ഒറ്റവരി ഗതാഗതം മാത്രം സാധിക്കുന്ന ഈ പാലത്തില്‍ ഗതാഗതക്കുരുക്ക് അനുഭവപ്പെടുന്നതോടെ മൂന്ന് പതിറ്റാണ്ടുകള്‍ക്ക് മുമ്പാണ് പാലം വീതി കൂട്ടിയത്. മുളവൂരില്‍നിന്ന് ആരംഭിച്ച് മൂവാറ്റുപുഴയാറില്‍ കടവുംപാട് തോട്ടിലെ വെള്ളച്ചാട്ടത്തിന് മുകളിലായിട്ടാണ് പാലം നിര്‍മിച്ചിരിക്കുന്നത്. മൂന്നാറിലേക്ക് പോകുന്ന വിനോദസഞ്ചാരികള്‍ ഉള്‍പ്പെടെ യാത്രക്കാരെ ആകര്‍ഷിക്കുന്നതാണ് ഈ വെള്ളച്ചാട്ടം. വെള്ളച്ചാട്ടത്തിന്‍റെ മനോഹാരിത നിലനിര്‍ത്തിയാകും പാലത്തിന്‍റെ നിര്‍മാണം.

കിഴുമുറി പള്ളിയിലെ അമൂല്യ നാണയങ്ങൾ

പിറവം: രാമമംഗലം കിഴുമുറി സെന്‍റ് ജോർജ് ഓർത്തഡോക്സ് വലിയ പള്ളിയിലെ മേമ്പൂട്ടിൽ കഴിഞ്ഞ നൂറ്റി മുപ്പത് വർഷത്തോളമായി സൂക്ഷിച്ചിരുന്ന അമൂല്യ നാണയ ശേഖരം പുറത്തെടുത്ത് പ്രദർശിപ്പിച്ചു. ദേവലായത്തിൽ മേമ്പൂട്ടിൽ സൂക്ഷിച്ചിരുന്ന നാണയങ്ങൾ ശുചിയാക്കുന്നതിനായാണ് പുറത്തെടുത്തത്. വിശ്വാസികളും, നാട്ടുകാരുമടക്കം നിരവധി പേരാണ് ഇത് കാണുന്നതിനായി എത്തിയത്. കിഴുമുറിയിൽ പള്ളി കൂദാശ ചെയ്ത 1894 മുതൽ വിശ്വാസികൾ കാണിക്കയായി ഭണ്ഡാരത്തിൽ നിക്ഷേപിച്ചതും പള്ളിക്ക് സമർപ്പിച്ചതുമായ നാണയങ്ങളാണിത്. പണ്ടുണ്ടായിരുന്ന വിവിധതരം കാശുകൾ, കാലണ, ഒരണ, ഓട്ടക്കാലണ തുടങ്ങിയ നാണയങ്ങൾക്കൊപ്പം മൊറോക്കോ, ഫ്രാൻസ്, ഓസ്ട്രേലിയ, ഇസ്രായേൽ, ബ്രസീൽ, മലേഷ്യ, തുടങ്ങിയ വിദേശ രാജ്യങ്ങളിലെ നാണയങ്ങളും, വെള്ളി കൂടുതലായിട്ടുള്ള നാണയങ്ങളുമെല്ലാം ശേഖരത്തിലുണ്ട്. ഇപ്പോൾ വിനിമയ മൂല്യവും, പൗരാണികമൂല്യമുള്ള പല നാണയങ്ങളും വലിയ തുകയ്ക്ക് ലേലം ചെയ്തിട്ടുള്ളവയാണ്. വികാരി ഫാ. ജോസഫ് മലയിൽ, ട്രസ്റ്റി റോയ് കുര്യൻ, സെക്രട്ടറി ബിനോയ് സ്ക്കറിയ, കൺവീനർമാരായ സാബു മാത്യു പാടത്ത്, ഐസക് ടി. പോൾ, ഷാജു ജോൺ തുടങ്ങിയവർ ചേർന്ന് പുറത്തെടുത്ത നാണയങ്ങൾ കഴുകി വൃത്തിയാക്കി. പള്ളിയിലെത്തുന്നവർക്ക് കാണാൻ കഴിയുന്ന തരത്തിൽ നാണയങ്ങൾ പ്രദർശിപ്പിക്കാനാണ് സമിതി ഉദ്ദേശിക്കുന്നത്. പരുമല തിരുമേനിയായ മാർ ഗ്രീഗോറിയോസ് മെത്രാപ്പോലീത്ത, മലങ്കരയിലെ പ്രഥമ കാതോലിക്ക ബസേലിയോസ് പൗലോസ് പ്രഥമൻ ബാവ, മലങ്കര മെത്രോലീത്തയായിരുന്ന പുലിക്കോട്ടിൽ ജോസഫ് മാർ ദിവന്നാസിയോസ്, എന്നിവർ ചേർന്ന് തറക്കല്ലിട്ട് നിർമാണമാരംഭിച്ച പള്ളി 1894ൽ ഇവർ തന്നെയാണ് കൂദാശ നടത്തിയത്. നാണായ ശേഖരം കാണുന്നതിന് ജാതി - മത ഭേദമന്യേ ധാരാളമാളുകൾ ഇവിടെയെത്തുന്നുണ്ട്.

ശബരിമല സ്വര്‍ണപ്പാളി മോഷണ വിവാദം; കോൺഗ്രസ് പ്രതിഷേധിച്ചു

മൂവാറ്റുപുഴ: വിശ്വാസികള്‍ക്ക് എതിരായ നിലപാടാണ് സിപിഎം എല്ലാ കാലവും കൈകൊണ്ടിട്ടുള്ളതെന്ന് അയ്യപ്പ സേവാ സംഘം അഖിലേന്ത്യാ വൈസ് പ്രസിഡന്‍റ് ഡി. വിജയകുമാര്‍. ശബരിമലയില്‍ സര്‍ക്കാര്‍ എടുക്കുന്ന തീരുമാനങ്ങള്‍ വിശ്വാസികള്‍ക്ക് വേദനയുണ്ടാക്കുന്നതാണ്. ശബരിമല സ്വര്‍ണപ്പാളി മോഷണ വിവാദത്തില്‍ കോണ്‍ഗ്രസ് മൂവാറ്റുപുഴ, മഞ്ഞള്ളൂര്‍ ബ്ലോക്ക് കമ്മിറ്റികള്‍ സംഘടിപ്പിച്ച അയ്യന്‍ സാക്ഷി നൈറ്റ് മാര്‍ച്ച് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സ്ത്രീകളെ ശബരിമലയില്‍ പ്രവേശിപ്പിക്കാന്‍ നടത്തിയ ശ്രമങ്ങള്‍ മുതല്‍ എല്‍ഡിഎഫ് സര്‍ക്കാര്‍ വിശ്വാസികളെ ദ്രോഹിക്കുകയാണ്. യുഡിഎഫ് സര്‍ക്കാരിന്‍റെ കാലത്താണ് ശബരിമലയില്‍ വികസന പ്രവര്‍ത്തനങ്ങള്‍ നടന്നത്. യുഡിഎഫ് ശബരിമലയെ പുണ്യഭൂമിയായി കാണുന്നത് കൊണ്ടാണെന്ന് ഇതെന്നും വിജയകുമാര്‍ പറഞ്ഞു. മൂവാറ്റുപുഴ കെഎസ്ആര്‍ടിസി ജംഗ്ഷനില്‍നിന്നും ആരംഭിച്ച മാര്‍ച്ച് കെപിസിസി രാഷ്ട്രീയ കാര്യ സമിതി അംഗം ജോസഫ് വാഴക്കന്‍, മാത്യു കുഴല്‍നാടന്‍ എംഎല്‍എക്ക് പതാക കൈമാറി ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സാബു ജോണ്‍ അധ്യക്ഷത വഹിച്ചു. വെള്ളൂര്‍ക്കുന്നം വരെയാണ് നൈറ്റ് മാര്‍ച്ച് സംഘടിപ്പിച്ചത്. തുടർന്ന് ടൗണ്‍ ഹാളില്‍ നടന്ന പരിപാടിയിൽ സാബു ജോണ്‍ അധ്യക്ഷത വഹിച്ചു. സുഭാഷ് കടയ്‌ക്കോട്, കെ.എം. സലിം, പി.പി. എല്‍ദോസ്, കെ.എം. പരീത് തുടങ്ങിയവരും പങ്കെടുത്തു.

എംബിറ്റ്സ് എൻജിനീയറിംഗ് കോളജിന് പുരസ്കാരം

കോതമംഗലം: മോർഫൈൻ മോട്ടോർ സ്പോർട്സ് സീരീസ് 2025-ലെ ബെസ്റ്റ് എമർജിംഗ് ടീം അവാർഡ് നെല്ലിമറ്റം എംബിറ്റ്സ് എൻജിനീയറിംഗ് കോളജ് മെക്കാനിക്കൽ വിദ്യാർഥികൾ നേടി. ദേശീയതലത്തിൽ നടന്ന ഇന്‍റർ കോളജ് ഗോ-കാർട്ട് ഡിസൈനിംഗ്, നിർമാണ, റേസിംഗ് മത്സരങ്ങൾ പൂനെയിലെ റാഫ്റ്റർ ഗോ-കാർട്ടിംഗ് ട്രാക്കിൽ ആണ് നടന്നത്. മികച്ച പ്രകടനം, സാങ്കേതിക മികവ്, ടീമിന്‍റെ കൂട്ടായ പരിശ്രമം എന്നിവയെ അടിസ്ഥാനമാക്കിയാണ് എംബിറ്റ്സിലെ അഞ്ചാം സെമസ്റ്റർ മെക്കാനിക്കൽ എൻജിനീയറിംഗ് വിദ്യാർഥികളുടെ ടീമിന് ബഹുമതി ലഭിച്ചത്. രാജ്യത്തെ വിവിധ സംസ്ഥാനങ്ങളിൽ നിന്നുമായി 25 ടീമുകളാണ് മത്സരത്തിൽ പങ്കെടുത്തത്. കേരളത്തിൽനിന്നും പങ്കെടുത്ത ഏക ടീമും എംബിറ്റ്സ് കോളജ് ആണ്. പോയിന്‍റ് പട്ടികയിൽ 10-ാം സ്ഥാനവും എംബിറ്റ്സ് കോളജിന് ലഭിച്ചു. ആദി സന്തോഷ്, ആനന്ദ് സുകുമാരൻ, അർജുൻ അശോകൻ, അതുൽ പ്രസാദ്, ബേസിൽ ഏലിയാസ്, ബേസിൽ സി. ഏലിയാസ്, ബേസിൽ എൽദോസ്, എം.എസ്. ധ്രുവൻ , ജോയൽ വർഗീസ്, കെവിൻ എസ്. ദേവ്, മാർട്ടിൻ ആന്‍റണി, നവീൻ ടോണി, വർഗീസ് ബിജു, ആൻഡ്രൂ സ്കറിയ, മിഥുൻ എം. നായർ, എം. വരുൺ, ജ്യോതിഷ് എന്നീ വിദ്യാർഥികൾ അധ്യാപകരായ കെ.വി. അഭിലാഷ്, ബിനീഷ് ജോയ് എന്നിവരുടെ നേതൃത്വത്തിൽ രണ്ട് മാസം കൊണ്ട് ഒന്നര ലക്ഷം രൂപ ചിലവിലാണ് ഗോ കാർട്ട് തയാറാക്കിയത്.

കെഎസ്എസ്പിഎ മണ്ഡലം വാർഷികം

കോതമംഗലം: കെഎസ്എസ്പിഎ പിണ്ടിമന മണ്ഡലം വാർഷികം മുത്തംകുഴി കുമാരനാശാൻ മെമ്മോറിയൽ നാഷണൽ ലൈബ്രറിയിൽ നടത്തി. പഞ്ചായത്ത് പ്രസിഡന്‍റ് ജെസി സാജു ഉദ്ഘാടനം ചെയ്തു. മണ്ഡലം പ്രസിഡന്‍റ് ബേബി പോൾ അധ്യക്ഷത വഹിച്ചു. സെക്രട്ടറി എം.ടി. സ്‌കറിയ, ട്രഷറർ ടി.എസ്. ജോളി, കോൺഗ്രസ്‌ മണ്ഡലം പ്രസിഡന്‍റ് മത്തായി കോട്ടക്കുന്നേൽ, ജില്ലാ സെക്രട്ടറി സി.എ. അലിക്കുഞ്ഞ്, നിയോജക മണ്ഡലം പ്രസിഡന്‍റ് സിബി ജെ. അടപ്പൂർ, സെക്രട്ടറി പി.വി. പൗലോസ്, രക്ഷാധികാരി കെ.എ. ജോസഫ്, എം. മുത്തുകുഞ്ഞ്, പി. ബാലൻ എന്നിവർ പ്രസംഗിച്ചു. പുതിയ ഭാരവാഹികളെ തെരഞ്ഞെടുത്തു.

ഒലിയപ്പുറത്തെ വൈദ്യുതി ലൈൻ മാറ്റും

തിരുമാറാടി: ഒലിയപ്പുറത്ത് സ്വകാര്യ വ്യക്തികളുടെ പറമ്പിലൂടെ കടന്നുപോകുന്ന വൈദ്യുതി ലൈൻ മാറ്റി സ്ഥാപിക്കുന്നതിന് പദ്ധതി പൂർത്തിയായി. ഒലിയപ്പുറം നിരപ്പത്താഴം കട്ടേമല താന്നിച്ചുവട്ടിൽ പ്രദേശത്തെ പുരയിടങ്ങളിലൂടെ കടന്നുപോകുന്ന വൈദ്യുതി ലൈനുകൾ മാറ്റി സ്ഥാപിക്കാൻ പദ്ധതി പൂർത്തിയായതായി പഞ്ചായത്ത് അംഗം നെവിൻ ജോർജ് അറിയിച്ചു. മരങ്ങൾക്കിടയിലൂടെയും പുരയിടത്തിലൂടെയും ഇലക്ട്രിക് ലൈനുകൾ കടന്നു പോകുന്ന നിരപ്പത്താഴം കട്ടമല, ഒലിയപുറം ഇല്ലംപടി, താന്നിച്ചുവട്ടിൽ താഴം പ്രദേശത്ത് നിരന്തരമായി വൈദ്യുതി മുടക്കം ഉണ്ടാകുന്നതിന് പരിഹാരം കാണണമെന്ന പ്രദേശവാസികളുടെ ആവശ്യത്തെ തുടർന്ന് വാർഡ് മെമ്പർ കെഎസ്ഇബി അധികൃതർക്ക് പരാതി നൽകിയിരുന്നു. ഇതേ തുടർന്ന് കെഎസ്ഇബി ഉദ്യോഗസ്ഥർ പ്രദേശത്ത് എത്തി പരിശോധനകൾ നടത്തി എസ്റ്റിമേറ്റ് തയാറാക്കി എക്സിക്യൂട്ടീവ് എൻജിനീയർക്ക് നൽകുകയും ചെയ്തിരുന്നു. ഈ പ്രദേശത്തെ റോഡുകൾ ഉണ്ടാകുന്നതിനു മുന്പേ പുരയിടങ്ങളിലൂടെ സ്ഥാപിച്ചിരുന്ന ഇലക്ട്രിക് പോസ്റ്റുകളും ഇലക്ട്രിക് ലൈനുകളും പുരയിടങ്ങളിൽനിന്ന് മാറ്റി സ്ഥാപിക്കുന്നതിനായുള്ള ജനറൽ വർക്ക് ലിസ്റ്റിൽ ഉൾപ്പെടുത്തിയതായി കൂത്താട്ടുകുളം കെഎസ്ഇബി അധികൃതർ അറിയിച്ചു.

കാടുകയറി മൂവാറ്റുപുഴ ഡ്രീം ലാൻഡ് പാർക്ക്

മൂവാറ്റുപുഴ: അതിമനോഹരമായ മൂവാറ്റുപുഴ ഡ്രീം ലാൻഡ് പാർക്ക് കാടുകയറിയും കളി ഉപകരണങ്ങൾ തുരുമ്പെടുത്തും നശിക്കുന്നു. ദിവസേന കുട്ടികൾ അടക്കമുള്ള ധാരാളം ആളുകളാണ് പാർക്കിൽ എത്തിയിരുന്നത്. എന്നാൽ ഇപ്പോൾ കാടുകയറിയത്തോടെ ഇഴജന്തുക്കളെ ഭയന്ന് ആളുകൾക്ക് കുട്ടികളുമൊത്ത് പാർക്കിൽ വരാൻ ഭയക്കുകയാണ്. പാർക്കിലെ കളി ഉപകരണങ്ങൾക്ക് ആവശ്യമായ അറ്റകുറ്റ പണികൾ നടത്താതെ വന്നതോടെ തുരുമ്പെടുത്തു. ഉപകരണങ്ങളിൽ ചിലത് ഉപയോഗ്യതശൂന്യമായിട്ടുണ്ട്. മുവാറ്റുപുഴ നഗരസഭയുടെ കീഴിലുള്ള രണ്ട് പാർക്കുകളിൽ ഒന്നാണ് ഇത്തരത്തിൽ നശിക്കുന്നത്. തിരക്കേറിയ നഗരത്തിൽ വിശ്രമത്തിനും വിനോദത്തിനുമായി നിരവധി ആളുകളാണ് ഈ പാർക്കിനെ ആശ്രയിച്ചിരുന്നത്. നഗരസഭയ്ക്ക് തനത് വരുമാനം ലഭിച്ചിരുന്ന ഈ പാർക്ക് നശിച്ചത് യുഡിഎഫ് ഭരണ സമിതിയുടെ കെടുകാര്യസ്ഥത മൂലമാണെന്ന് സിപിഎം മുവാറ്റുപുഴ ഏരിയ കമ്മിറ്റി അംഗം സജി ജോർജ് കുറ്റപ്പെടുത്തി.

കട്ടേപ്പാടത്ത് തുടർച്ചയായ അഞ്ചാം വർഷവും നെല്ലുവിളയും

ആലുവ : ചൂർണിക്കര ഗ്രാമപഞ്ചായത്ത് കൃഷിഭവനും പാടശേഖര സമിതിയും ചേർന്ന് കട്ടേപ്പാടം പാടശേഖരത്തിൽ അഞ്ചാം വർഷവും നെൽക്കൃഷി ആരംഭിച്ചു. ചൂർണിക്കര ഗ്രാമപഞ്ചായത്ത് വൈസ് പ്രസിഡന്‍റ് ബാബു പുത്തനങ്ങാടി വിത്ത് വിതയ്ക്കൽ ഉദ്ഘാടനം ചെയ്തു. സ്റ്റാൻഡിംഗ് കമ്മിറ്റി ചെയർമാൻ മുഹമ്മദ് ഷെഫീക്ക് അധ്യക്ഷത വഹിച്ചു. കൃഷി ഓഫീസർ അമൃത ലക്ഷ്മി, പാടശേഖര സമിതി ഭാരവാഹികൾ തുടങ്ങിയവർ പ്രസംഗിച്ചു. ഉമ നെൽവിത്താണ് വിതക്കുന്ന പാടത്ത് കുട്ടനാടൻ കർഷകരാണ് കൃഷി ചെയ്യുന്നത്.

ഗ്രാമീണ പഠനക്യാമ്പ് സംഘടിപ്പിച്ചു

അങ്കമാലി : ഡീ പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിലെ ഒന്നാം വർഷ എം എസ്‌ഡബ്ല്യു വിദ്യാർഥികൾ തൊണ്ടർനാട് ഗ്രാമ പഞ്ചായത്തുമായി സഹകരിച്ച് മക്കിയാട് ഗ്രാമത്തിൽ "ഇരുൾ മൂടിയ ഭൂമിക്ക് തളിരു ചാർത്താൻ ഇതൾ'എന്ന പ്രമേയ വാക്യവുമായി ഒരാഴ്ച നീണ്ടുനിന്ന ഗ്രാമീണ പഠനക്യാമ്പ് “ഇതൾ ” സംഘടിപ്പിച്ചു. മക്കിയാട് സെന്‍റ് ജൂഡ് ഇടവക വികാരി ഫാ. സന്തോഷ്‌ കാവുങ്കൽ ഉദ്ഘാടനം നിർവഹിച്ചു. സോഷ്യൽ വർക്ക്‌ വിഭാഗം എച്ച്ഒഡി ഡോ. എം. എസ്. അനീഷ് അധ്യക്ഷത വഹിച്ചു, വാർഡ് മെമ്പർ പി. എ ബാബു ആശംസയർപ്പിച്ചു. സോഷ്യൽ വർക്ക്‌ വിഭാഗം അധ്യാപകൻ ഫാ. ജോൺ കൊല്ലക്കോട്ടിൽ ക്യാമ്പിന് നേതൃത്വം നൽകി.

വിശ്വാസ സംരക്ഷണ യാത്രയ്ക്ക് 16ന് സ്വീകരണം

ആലുവ: ശബരിമലയിലെ സ്വർണക്കൊള്ളയ്ക്കും വിശ്വാസ വഞ്ചനയ്ക്കുമെതിരെ കെപിസിസിയുടെ നേതൃത്വത്തിൽ കോൺഗ്രസ് വർക്കിംഗ് കമ്മിറ്റിയംഗം കൊടിക്കുന്നിൽ സുരേഷ് എംപി നയിക്കുന്ന വിശ്വാസ സംരക്ഷണ യാത്ര 16ന് ആലുവയിൽ എത്തും. രാവിലെ 10.30 ന് ഉമ്മൻചാണ്ടി സ്‌ക്വയറിൽ സ്വീകരണം നൽകുമെന്ന് ഭാരവാഹികൾ അറിയിച്ചു. ആലുവ, അങ്കമാലി, കളമശേരി, വൈപ്പിൻ, പറവൂർ എന്നീ നിയോജക മണ്ഡലത്തിൽ നിന്നുള്ള പ്രവർത്തകർ പങ്കെടുക്കും.

മയക്കുമരുന്നിനെതിരെ ഗാനമേളയുമായി റൂറൽ ജില്ലാ പോലീസ്

നെടുമ്പാശേരി: മയക്കുമരുന്നിനെതിരെ ജനമനസിനെ പാടിയുണർത്താൻ റൂറൽ ജില്ലാ പോലീസിന്‍റെ ഒരാഴ്ച നീണ്ടുനിൽക്കുന്ന "പാടാം ഒരു ഗാനം" എന്ന സംഗീത പരിപാടിക്ക് ഇന്ന് അത്താണി സിഗ്നൽ ജംഗ്ഷനിൽ ആരംഭിക്കും. ആലുവ സബ്ഡിവിഷന്‍റെ നേതൃത്വത്തിലാണ് പരിപാടി സംഘടിപ്പിക്കുന്നത്. സ്റ്റേജിൽ ആർക്കുവെണമെങ്കിലും പാടാം. ട്രാക്ക് ഗാനമേളയാണ് നടക്കുന്നത്. പ്രത്യേക സൗണ്ട് സിസ്റ്റം ഇതിനായി ഒരുക്കിയിട്ടുണ്ട്. ആലുവ സബ്ഡിവിഷനിലെ മുതിർന്ന പോലീസുദ്യോഗസ്ഥരും, റൂറൽ ജില്ലയിലെ പോലീസുകാരിലെ പാട്ടുകാരും, പാടാൻ താത്പര്യമുള്ള പൊതുജനങ്ങളും ഈ പരിപാടിയിൽ പങ്കാളിയാകും. ആദ്യ ദിവസം സ്റ്റാർ സിംഗർ ഗായകൻ ജോബി ജോൺ മുഖ്യതിഥിയാകും. വൈകുന്നേരം അഞ്ച് മുതൽ രാത്രി 9:30 വരെയാണ് ഗാനമേള. 18ന് സമാപിക്കും. ജില്ലാ പോലീസ് മേധാവി എം. ഹേമലതയുടെ നേതൃത്വത്തിൽ റൂറൽ ജില്ലയിൽ നടക്കുന്ന ലഹരി വിരുദ്ധ പരിപാടികളുടെ ഭാഗമായാണ് പാടാം ഒരു ഗാനം സംഘടിപ്പിച്ചിട്ടുള്ളതെന്ന് ആലുവ ഡിവൈഎസ്പി ടി.ആർ. രാജേഷ് പറഞ്ഞു.

നെല്‍ കെജി കേരളത്തിനാകെ മാതൃക: മന്ത്രി പി. പ്രസാദ്

പെരുമ്പാവൂര്‍: പെരുമ്പാവൂര്‍ മണ്ഡലത്തിലെ സ്‌കൂളുകളില്‍ നടക്കുന്ന നെല്‍ കെജി കൃഷി കേരളത്തിന് ആകെ മാതൃകയാണെന്നും പാഠപുസ്തകത്തിന് പുറത്തെ കൃഷി പാഠമാണ് നെല്‍ കെജിയെന്നും മന്ത്രി പി. പ്രസാദ്. എംഎല്‍എ ഇന്‍സ്‌പെയര്‍ വിദ്യാഭ്യാസ പദ്ധതിയുടെ ഭാഗമായി നടപ്പിലാക്കിയ നെല്‍ കെജി നെല്‍ക്കതിര്‍ പദ്ധതിയിലെ കുട്ടി കര്‍ഷക സംഗമവും വിളവെടുപ്പ് മഹോത്സവവും വേങ്ങൂര്‍ മാര്‍ കൗമ ഹയര്‍ സെക്കന്‍ഡറി സ്‌കൂളില്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. എല്‍ദോസ് കുന്നപ്പിള്ളി എംഎല്‍എ അധ്യക്ഷത വഹിച്ച ചടങ്ങില്‍ മാത്യൂസ് മാര്‍ അഫ്രേം മെത്രാപ്പോലീത്ത പ്രഭാഷണം നടത്തി. ത്രിതല പഞ്ചായത്ത് പ്രസിഡന്‍റുമാര്‍ അംഗങ്ങള്‍ എന്നിവര്‍ക്ക് പുറമേ എന്‍.പി. ആന്‍റണി പവിഴം, ജില്ലാ കൃഷി ഓഫീസര്‍ ഇന്ദു പി. നായര്‍, കൃഷി അസിസ്റ്റന്‍റ് ഡയറക്ടര്‍ വി.ജി. സിബി, കൃഷി ഓഫീസര്‍മാര്‍ തുടങ്ങിയവരും സംസാരിച്ചു.

കുറുപ്പംപടി ഫൊറോന കൺവൻഷൻ

കോതമംഗലം: ഫാമിലി അപ്പോസ്തലേറ്റിന്‍റെയും ദീപിക ഫ്രണ്ട്സ് ക്ലബ്ബിന്‍റെയും കുറുപ്പംപടി ഫൊറോന കൺവൻഷൻ സെന്‍റ് പീറ്റർ ആൻഡ് പോൾസ് ഫൊറോന പള്ളിയിൽ നടന്നു. പാരിഷ് ഹാളിൽ നടത്തിയ കൺവൻഷൻ ഫാമിലി അപ്പോസ്തലേറ്റ്, ഡിഎഫ്സി രൂപത ഡയറക്ടർ റവ. ഡോ. ആന്‍റണി പുത്തൻകുളം ഉദ്ഘാടനം ചെയ്തു. ഫൊറോന വികാരി ഫാ. ജെയിംസ് കക്കുഴിയിൽ അധ്യക്ഷത വഹിച്ചു. ദീപിക സർക്കുലേഷൻ ജനറൽ മാനേജർ ഫാ. ജിനോ പുന്നമറ്റത്തിൽ, ഡിഎഫ്സി രൂപത പ്രസിഡന്‍റ് ഡിഗോൾ ജോർജ്, ഫാമിലി അപ്പോസ്തലേറ്റ് ഫൊറോന പ്രസിഡന്‍റ് കെ.കെ. ജോൺ, ഡിഎഫ്സി വനിതാ ഫോറം രൂപത വൈസ് പ്രസിഡന്‍റ് എൽസി പത്രോസ് കാളാംപറമ്പിൽ, ഫൊറോന സെക്രട്ടറി രാജു മാങ്കുഴ, ഷൈജു ഇഞ്ചയ്ക്കൽ എന്നിവർ പ്രസംഗിച്ചു. കുടുംബ കൂട്ടായ്മകളുടെ ആവശ്യകതയെക്കുറിച്ചും സമുദായ ശാക്തീകരണം ദീപികയിലൂടെ എന്ന വിഷയവും കൺവൻഷൻ ചർച്ച ചെയ്തു. കുറുപ്പംപടി ഫൊറോനയിലെ വിവിധ ഇടവകകളിൽ നിന്നുള്ള ഫാമിലി അപ്പോസ്തലേറ്റ്, ഡിഎഫ്സി എന്നിവയുടെ ഭാരവാഹികളും കുടുംബ കൂട്ടായ്മ ഭാരവാഹികളും കൺവൻഷനിൽ പങ്കെടുത്തു.

ഇന്ത്യന്‍ സാമ്പത്തിക രംഗം വളരുന്നത് അതിവേഗം: ശ്യാം ജഗന്നാഥ്

കൊച്ചി: 2027 ആകുമ്പോഴേക്കും ലോകത്തിലെ മൂന്നാമത്തെ സാമ്പത്തിക ശക്തിയായി ഇന്ത്യ മാറുന്നതിനോടൊപ്പം യുവജനസംഖ്യയുള്ള ജനാധിപത്യ രാജ്യം കൂടിയാകുമെന്ന് ഷിപ്പിംഗ് ഡയറക്ടര്‍ ഓഫ് ജനറല്‍ ശ്യാം ജഗന്നാഥ് പറഞ്ഞു. നെട്ടൂരില്‍ ആരംഭിച്ച എസ് എച്ച് എം അക്കാദമി മാരിടൈം സേഫ്റ്റി ഉദ്ഘാടനം ചെയ്യുകയായിരുന്നു അദ്ദേഹം. ഇന്ത്യന്‍ സാമ്പത്തിക രംഗം വളരെ വേഗത്തിലാണ് വളരുന്നത്. അതിൽ മാരിടൈം ചെലുത്തുന്ന സ്വാധീനം ചെറുതല്ലെന്നും അദ്ദേഹം പറഞ്ഞു. ഡി.ജെ. സെന്തിൽ കുമാർ, കൃഷ്ണ വൈകുണ്ഠം, സൈഫുദ്ദീന്‍ ഹാജി, പി. പ്രസാദ് , എ.ശിവകുമാര്‍ എന്നിവര്‍ പ്രസംഗിച്ചു.

ഗ്ലോ കൊച്ചി ബ്രോഷർ പ്രകാശനം ചെയ്തു

കൊച്ചി: വെളിച്ചവും സംസ്‌കാരവും സാമൂഹിക കൂട്ടായ്മയും ഒത്തുചേരുന്ന ഗ്ലോ കൊച്ചി ആഘോഷം 18, 19 തിയതികളില്‍ എറണാകുളം രാജേന്ദ്ര മൈതാനിയില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. വൈകുന്നേരം മൂന്നു മുതല്‍ അര്‍ധരാത്രി വരെയാണ് പരിപാടി. ഹൈബി ഈഡൻ എം പി ഉദ്ഘാടനം ചെയ്യും. ചലച്ചിത്ര താരം അർജുൻ രാധാകൃഷ്ണൻ പങ്കെടുക്കും. വാര്‍ത്താ സമ്മേളനത്തില്‍ ഷർമിള, രാഖി ജയശങ്കർ, നമിൻ ഹിലാൽ, ലിൻഡ രാകേഷ്, ഫാഷൻ ഡിസൈനർ മെൽവിൻ എന്നിവർ പങ്കെടുത്തു. ഗ്ലോ കൊച്ചി ബ്രോഷർ പ്രകാശനം ചെയ്തു.

ഓങ്കോപാത്ത് 3.0 ദേശീയ സമ്മേളനം

കൊച്ചി: ആലുവ രാജഗിരി ആശുപത്രിയില്‍ ഓങ്കോപാത്ത് 3.0 ദേശീയ സമ്മേളനം സംഘടിപ്പിച്ചു. രാജഗിരി കാന്‍സര്‍ സെന്‍ററും രാജഗിരി പത്തോളജി വിഭാഗവും സംയുക്തമായി സംഘടിപ്പിച്ച സമ്മേളനം രാജഗിരി എക്‌സിക്യൂട്ടീവ് ഡയറക്ടറും സിഇഒയുമായ ഫാ. ജോണ്‍സണ്‍ വാഴപ്പിള്ളി ഉദ്ഘാടനം ചെയ്തു. കാന്‍സര്‍ രോഗ നിര്‍ണയത്തിലെ പുതിയ സാങ്കേതിക വിദ്യകളും, വെല്ലുവിളികളും സമ്മേളനത്തില്‍ ചര്‍ച്ച ചെയ്തു. ഇന്ത്യയിലെ പ്രശസ്തരായ കാന്‍സര്‍ രോഗ വിദഗ്ധരും പത്തോളജിസ്റ്റുകളും ക്ലാസുകള്‍ നയിച്ചു. മെഡിക്കല്‍ പിജി വിദ്യാര്‍ഥികളടക്കം ഇരുന്നൂറോളം പേര്‍ സമ്മേളനത്തിന്‍റെ ഭാഗമായി. രാജഗിരി മെഡിക്കല്‍ ഓങ്കോളജി വിഭാഗം മേധാവി ഡോ. സഞ്ജു സിറിയക്, പത്തോളജി വിഭാഗം മേധാവി ഡോ. ലത കെ. അബ്രഹാം, റേഡിയോളജി വിഭാഗം മേധാവി അജിത് ടോംസ്, ഐഎപിഎം കേരള ചാപ്റ്റര്‍ പ്രസിഡന്‍റ് ഡോ. കവിത രവി എന്നിവര്‍ പ്രസംഗിച്ചു.

സ്തനാര്‍ബുദ ബോധവല്‍ക്കരണം നടത്തി

കൊച്ചി: കേരള ഫെഡറേഷന്‍ ഓഫ് ഒബ്സ്റ്റട്രിക് ആന്‍ഡ് ഗൈനക്കോളജി (കെഎഫ്ഒജി), അസോസിയേഷന്‍ ഓഫ് ഗൈനക്കോളജിക്കല്‍ ഓങ്കോളജിസ്റ്റ് ഓഫ് ഇന്ത്യ കേരള ചാപ്റ്റര്‍ എന്നിവയുടെ സഹകരണത്തോടെ കൊച്ചി ഒബ്സ്റ്റട്രിക്‌സ് ആന്‍ഡ് ഗൈനക്കോളജിക്കല്‍ സൊസൈറ്റിയും ലേക്ക്‌ഷോര്‍ ആശുപത്രിയും സംയുക്തമായി എറണാകുളം മറൈൻ ഡ്രൈവില്‍ സംഘടിപ്പിച്ച ബോധവല്‍ക്കരണ പരിപാടി ടി.ജെ. വിനോദ് എംഎല്‍എ ഉദ്ഘാടനം ചെയ്തു. സ്തനാര്‍ബുദം പ്രതിരോധവുമായി ബന്ധപ്പെട്ട ലഘുലേഖയുടെ പ്രകാശനവും അദ്ദേഹം നിര്‍വഹിച്ചു. ബോധവല്‍ക്കരണ പരിപാടിയുടെ ഭാഗമായി കൊച്ചിക്കായലില്‍ സംഘടിപ്പിച്ച കയാക്കിംഗും ദീപ ശിഖ കൈമാറലും എറണാകുളം അസിസ്റ്റന്‍റ് കളക്ടര്‍ പാര്‍വതി ഗോപകുമാര്‍ ഉദ്ഘാടനം ചെയ്തു. സ്തനാര്‍ബുദത്തെ അതിജീവിച്ച 25 പേരെ ചടങ്ങില്‍ ആദരിച്ചു. കെഎഫ്ഒജി പ്രസിഡന്‍റ് ഡോ. സുചിത്ര സുധീര്‍ അധ്യക്ഷത വഹിച്ചു. നിഷാ ജോസ് കെ. മാണി, ഡോ. കെ. ചിത്രതാര, ഡോ. ഉഷാ മേനോന്‍, ഡോ. ഗേസ്രി തോമസ്, ഡോ. മിനി ബാലകൃഷ്ണന്‍ തുടങ്ങിയവര്‍ സംസാരിച്ചു.

പാദരക്ഷാ വിലവ്യത്യാസം: സർക്കാർ ഇടപെടണമെന്ന് വ്യാപാരികൾ

ആലുവ: കേന്ദ്ര സർക്കാർ ജിഎസ് ടിയിൽ വരുത്തിയ കുറവ് നല്കുന്നില്ലെന്ന പേരിൽ പാദരക്ഷാ വ്യാപാര സ്ഥാപനങ്ങളിൽ ഉപഭോക്താക്കളുമായി തർക്കം ഉണ്ടാകുന്നതായി വ്യാപാരികൾ. ജിഎസ്ടി 12 ശതമാനത്തിൽ നിന്നും അഞ്ചു ശതമാനത്തിലേക്ക് മാറിയതിലുള്ള ആശയക്കുഴപ്പം മാറ്റാൻ സർക്കാർ അടിയന്തിരമായി ഇടപെടണമെന്ന് കേരള റീട്ടെയിൽ ഫുട്‌വെയേഴ്സ് അസോസിയേഷൻ ആവശ്യപ്പെട്ടു. പന്ത്രണ്ട് ശതമാനം ജിഎസ് ടിയിൽ സ്റ്റോക്കുള്ള ഉൽപന്നങ്ങൾ 2026 മാർച്ച് 31 വരെ വിറ്റഴിക്കാൻ സർക്കാർ അനുമതിയുള്ളപ്പോഴാണ് ഈ രീതിയിലുള്ള പ്രശ്നങ്ങൾ ഉണ്ടാകുന്നതെന്ന് വ്യാപാരികൾ പറയുന്നു. ഇത് സമ്മർദത്തിലാക്കുന്നതായാണ് വ്യാപാരികളുടെ വിശദീകരണം. ഈ വിഷയത്തിൽ ഉപഭോക്താക്കളെ വ്യക്തമായി ബോധ്യപ്പെടുത്തുന്ന രീതിയിൽ അറിയിപ്പുകളോ സർക്കുലറുകളോ പുറപ്പെടുവിച്ച് സംഘർഷാവസ്ഥ ഒഴിവാക്കി തരണമെന്ന് ആലുവയിൽ ചേർന്ന എറണാകുളം ജില്ലാ കെആർഎഫ് എ. പ്രതിനിധി സമ്മേളനം കേന്ദ്ര, സംസ്ഥാന സർക്കാരുകളോട് ആവശ്യപ്പെട്ടു. ഹുസൈൻ കുന്നുകര അധ്യക്ഷത വഹിച്ചു. എറണാകുളം ജില്ലാ ഭാരവാഹികളായി ഹുസൈൻ കുന്നുകര -പ്രസിഡന്‍റ്, ജൈജു വർഗീസ് -ജനറൽ സെക്രട്ടറി, മുഹമ്മദ് കാസിം -ട്രഷറർഎന്നിവരെ തെരഞ്ഞെടുത്തു.

ജോസ് മാവേലിക്ക് ആദരം

ആലുവ: ചേരികളിലും തെരുവോരങ്ങളിലും കഴിയുന്ന കുട്ടികളുടെ വിദ്യാഭ്യാസത്തിനായി ജനസേവ ശിശുഭവൻ ദേശീയതലത്തിൽ നടത്തുന്ന പ്രവർത്തനങ്ങളുടെ അടിസ്ഥാനത്തിൽ ചെയർമാൻ ജോസ് മാവേലിക്ക് സെന്‍റ് സേവ്യേഴ്സ് കോളജിന്‍റെ ആദരം. കോളജിൽ നടന്ന ചടങ്ങിൽ ജസ്റ്റീസ് സി.കെ. അബ്ദുൾ റഹീം മെമന്‍റോ നൽകി ആദരിച്ചു. സെന്‍റ് സേവ്യേഴ്സ് കോളജ് മാനേജർ സിസ്റ്റർ എം. ചാൾസ് അധ്യക്ഷത വഹിച്ചു. പ്രിൻസിപ്പൽ ഡോ. മിലൻ ഫ്രാൻസ്, എൻഎസ്എസ് പ്രോഗ്രാം ഓഫീസർമാർ തുടങ്ങിയവർ സംസാരിച്ചു.

ആലുവ പാർക്ക് റോഡിലെ അനധികൃത പിരിവ് നിർത്തിച്ചു

ആലുവ: ആലുവ മുനിസിപ്പൽ പാർക്കിനു മുന്നിൽ കരാറുകാരൻ നടത്തിവന്നിരുന്ന അനധികൃത പിരിവ് പ്രതിഷേധത്തെ തുടർന്ന് നിർത്തി. നഗരസഭാ പാർക്കിൽ കരാറെടുത്തിരുന്നയാൾ പാർക്കിനു മുന്നിലെ പൊതുവഴി കൈയേറി പേ ആൻഡ് പാർക്ക് ബോർഡുകൾ സ്ഥാപിക്കുകയും ഇവിടെ എത്തുന്ന വാഹനങ്ങളിൽനിന്ന് അനധികൃതമായി പാർക്കിംഗ് ഫീസ് വാങ്ങുകയും ചെയ്തിരുന്നതായാണ് പരാതി. ഇതിനെതിരെ ബിജെപി മുനിസിപ്പൽ പ്രസിഡന്‍റ് ആർ. പത്മകുമാറിന്‍റെ നേതൃത്വത്തിലാണ് ഇന്നലെ പ്രതിഷേധം നടന്നത്. മുനിസിപ്പൽ പാർക്കിന് സമീപത്തെ വീടുകളിലേക്ക് പോകുന്നവരെ തടഞ്ഞ് ഭീഷണിപ്പെടുത്തുന്നതും പണം ആവശ്യപ്പെടുന്നതും പതിവായിരുന്നെന്ന് നാട്ടുകാർ ആരോപിച്ചു. പൊതുവഴിയിൽ പേ ആൻഡ് പാർക്ക് ബോർഡുകളും പണപ്പിരിവും അനുവദിക്കില്ലെന്നും അനുവദിച്ച സ്ഥലത്ത് മാത്രമേ പണപ്പിരിവ് നടത്താൻ അനുവദിക്കുകയുള്ളു എന്നും കൗൺസിലർമാരായ എൻ. ശ്രീകാന്ത്, ശ്രീലത രാധാകൃഷ്ണൻ അറിയിച്ചു.

പീച്ചാനിക്കാട് സെന്‍റ് മേരീസ് പള്ളി പുനർനിർമാണം; ശിലാസ്ഥാപനം നടത്തി

അങ്കമാലി: പീച്ചാനിക്കാട് സെന്‍റ് മേരീസ് പള്ളി പുനർനിർമാണം ആരംഭിച്ചു. ആർച്ചു ബിഷപ് മാർ ആന്‍റണി കരിയിൽ ശിലാസ്ഥാപന കർമം നിർവഹിച്ചു. വികാരി ഫാ. ജോസ് മാടൻ, ഫാ. ജോസഫ് പാറേക്കാട്ടിൽ എന്നിവർ അനുബന്ധ കർമ്മങ്ങൾക്ക് നേതൃത്വം വഹിച്ചു. ഇന്നലെ രാവിലെ ദിവ്യബലിയെ തുടർന്നാണ് ശിലാസ്ഥാപന ചടങ്ങ് നടത്തിയത്.

സമ്പൂർണ ബൈബിൾ പകർത്തിയെഴുതി മൂത്തേടം ഇടവക

മരട്: സമ്പൂർണ ബൈബിൾ പകർത്തിയെഴുതി മൂത്തേടം ഇടവക. ദൈവദാസൻ ജോർജ് വാകയിലച്ചന്‍റെ 94-ാം അനുസ്മരണത്തോടനുബന്ധിച്ചാണ് ഇടവകയിലെ 1243 കുടുംബങ്ങളിൽ നിന്നും ഓരോരുത്തർ വീതം ബൈബിൾ ഭാഗങ്ങൾ പകർത്തിയത്. ബൈബിൾ പ്രതിഷ്ഠയോടെയാണ് ഇന്നലെ രാവിലെ 10.30 ന് പകർത്തിയെഴുത്ത് ആരംഭിച്ചത്. ഒരു മണിക്കൂർ കൊണ്ട് ബൈബിൾ പൂർണമായും പകർത്തിയെഴുതിക്കഴിഞ്ഞു. ഫാ. ഷൈജു തോപ്പിൽ, ഫാ. മിറാഷ് പുത്തൻപുരക്കൽ, ഫാ. സുജിത്ത് സ്റ്റാൻലി നടുവിലവീട്ടിൽ, ജനറൽ കൺവീനർ സാംസൺ കളത്തിപ്പറമ്പിൽ തുടങ്ങിയവർ നേതൃത്വം നൽകി. 26ന് ആരംഭിക്കുന്ന മൂത്തേടം ബൈബിൾ കൺവൻഷനിൽ പകർത്തിയെഴുതിയ ബൈബിളിന്‍റെ പ്രതിഷ്ഠ നടത്തും

വിശ്വാസപരിശീലകരുടെ സേവനം മഹത്തരം: മേജര്‍ ആര്‍ച്ച്ബിഷപ്

കാഞ്ഞൂര്‍: സഭയുടെ പ്രബോധന ശുശ്രൂഷയില്‍ സുപ്രാധാനമായ സേവനം ചെയ്യുന്നവരാണ് വിശ്വാസ പരിശീലകരെന്നു സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ പറഞ്ഞു. വളര്‍ന്നുവരുന്ന തലമുറയില്‍ കിസ്തുകേന്ദ്രീകൃതമായ വിശ്വാസസാക്ഷ്യവും മൂല്യാധിഷ്ഠിതമായ ജീവിതവും ക്രമപ്പെടുത്തുന്നതില്‍ വിശ്വാസപരിശീലകര്‍ നിര്‍വഹിക്കുന്ന ദൗത്യം മഹത്തരമാണെന്നും മാര്‍ തട്ടില്‍ പറഞ്ഞു. എറണാകുളം-അങ്കമാലി അതിരൂപത വിശ്വാസ പരിശീലന കേന്ദ്രത്തിന്‍റെ ആഭിമുഖ്യത്തില്‍ കാഞ്ഞൂര്‍ സെന്‍റെ മേരീസ് ഫൊറോന പള്ളിയില്‍ നടന്ന വിശ്വാസ പരിശീലകരുടെ മേഖലാ കണ്‍വന്‍ഷനില്‍ സമാപന സന്ദേശം നല്‍കുകയായിരുന്നു അദ്ദേഹം. വിശ്വാസത്തിന്‍റെ വിത്തു വിതയ്ക്കുന്ന സഭയുടെ ശ്രേഷ്ഠരായ പങ്കാളികളാണ് വിശ്വാസ പരിശീലകരെന്നും മേജര്‍ ആര്‍ച്ച്ബിഷപ് ഓര്‍മിപ്പിച്ചു. അതിരൂപതാതലത്തില്‍ മികച്ച വിജയം നേടിയ വിദ്യാര്‍ഥികളെയും വിശ്വാസ പരിശീലനത്തിന്‍റെ സുവര്‍ണ, റൂബി, രജത ജൂബിലി ആഘോഷിക്കുന്ന അധ്യാപകരെയും ആദരിച്ചു. അതിരൂപത ഡയറക്ടര്‍ റവ.ഡോ. പോള്‍ മൊറേലി, മഞ്ഞപ്ര ഫൊറോന വികാരി റവ. ഡോ. വര്‍ഗീസ് പൊട്ടയ്ക്കല്‍, ഫാ. നിഖില്‍ പാലാട്ടി, സിസ്റ്റര്‍ ലിസ് ലറ്റ്, സിസ്റ്റര്‍ ഐറിന്‍, സിസ്റ്റര്‍ അമല, ഷാജു ഏര്‍ത്തടത്തില്‍, സിനു പുത്തന്‍പുരയ്ക്കല്‍ എന്നിവര്‍ പ്രസംഗിച്ചു. നേരത്തെ റവ. ഡോ. ആന്‍റോ ചാലിശേരി കണ്‍വന്‍ഷന്‍ ഉദ്ഘാടനം ചെയ്തു. റവ. ഡോ. അഗസ്റ്റിന്‍ കല്ലേലി ക്ലാസ് നയിച്ചു. കാഞ്ഞൂര്‍, വല്ലം, മഞ്ഞപ്ര ഫൊറോനകളിലെ വിശ്വാസ പരിശീലകര്‍ പങ്കെടുത്തു.

ജില്ലയില്‍ കെ ഫോണ്‍ കണക്ഷന്‍ 9,000 ലേക്ക്

കൊച്ചി: സംസ്ഥാനത്തിന്‍റെ സ്വന്തം ഇന്‍റര്‍നെറ്റ് ബ്രോഡ്ബാന്‍ഡ് കണക്ഷനായ കേരള ഫൈബര്‍ ഒപ്റ്റിക് നെറ്റ്‌വര്‍ക്ക്(കെ ഫോണ്‍)പദ്ധതിയില്‍ ജില്ലയിലെ കണക്ഷനുകളുടെ എണ്ണം 9,000 ലേക്ക്. ഇതുവരെ 8,723 കണക്ഷനുകളാണ് നല്‍കിയത്. വീടുകളില്‍ മാത്രം 6,128 നല്‍കിയത് കണക്ഷനുകളാണ്. ദാരിദ്ര്യരേഖയ്ക്കു താഴെയുള്ള 995 വീടുകളില്‍ ഇന്‍റര്‍നെറ്റ് സൗകര്യം ലഭ്യമാക്കി. ഇതുകൂടാതെ 1,570 സര്‍ക്കാര്‍ സ്ഥാപനങ്ങളിലും കെ ഫോണ്‍ കണക്ഷന്‍ നല്‍കിയിട്ടുണ്ട്. 30 ഓളം ഇതര സ്വകാര്യ സ്ഥാപനങ്ങളിലും കണക്ഷനുകള്‍ നല്‍കാന്‍ കഴിഞ്ഞു. കെ ഫോണ്‍ ബേസിക്, ബേസിക് പ്ലസ്, മാസ്, ടര്‍ബോ, ടര്‍ബോ സൂപ്പര്‍, സെനിത്ത്, സെനിത്ത് സൂപ്പര്‍ തുടങ്ങി വിവിധ വേഗത്തിലുള്ള ഇന്‍റര്‍നെറ്റ് കണക്ഷനുകള്‍ കെ ഫോണ്‍ വഴി ലഭ്യമാണ്. 299 രൂപയാണ് പ്രതിമാസ ബേസിക് പ്ലാനുകളുടെ നിരക്ക്. പുതിയ കണക്ഷനുകള്‍ ലഭിക്കുന്നതിനായി https://selfcare.kfon.co.in/dm.php എന്ന ലിങ്ക് വഴി രജിസ്റ്റര്‍ ചെയ്‌തോ 18005704466 എന്ന നമ്പറില്‍ ബന്ധപ്പെട്ടോ enteKfon ആപ് വഴിയോ അപേക്ഷിക്കാം.

കോൺഗ്രസ് നേതാവിനെതിരേ ഫ്ലക്സ് വച്ച യുവാവിന് മർദനം

ആലങ്ങാട്: കോൺഗ്രസ് നേതാവിനെതിരേ റോഡിൽ ഫ്ലക്സ് വച്ച സംഭവത്തിൽ യുവാവിന് മർദനം. യുവാവിനെ ആക്രമിച്ചു പരിക്കേല്‍പ്പിച്ച സംഭവത്തില്‍ കോണ്‍ഗ്രസ് കരുമാലൂര്‍ ഈസ്റ്റ് മണ്ഡലം ജനറല്‍ സെക്രട്ടറി വെളിയത്തുനാട് കാരാടിക്കോടത്ത് വീട്ടില്‍ ഉബൈദുല്ലയെ ആലുവ പൊലീസ് അറസ്റ്റ് ചെയ്തു. ശനിയാഴ്ച രാത്രി ഒന്‍പതരയോടെയാണു സംഭവം നടന്നത്. കോണ്‍ഗ്രസ് നേതാവിനെതിരെ റോഡില്‍ ഫ്‌ളക്‌സ് വച്ചതിലുള്ള വിരോധമാണ് സംഭവത്തിനു പിന്നിലെന്നാണ് ആരോപണം.

വിജയ മധുരം നുകർന്ന് ഇരട്ടകള്‍

കൊച്ചി: ജൂണിയര്‍ പെണ്‍കുട്ടികളുടെ 100 മീറ്റര്‍ ഹര്‍ഡില്‍സില്‍ ഒന്നും മൂന്നും സ്ഥാനം നേടിയത് ഇരട്ടകളായ ഏയ്ഞ്ചലിനയും ഏയ്ഞ്ചലിയയും. കോതമംഗലം മാര്‍ ബേസിലിന്‍റെ താരങ്ങളാണ് തൃശൂര്‍ സ്വദേശികളായ ഇരുവരും. ലോംഗ്ജംപില്‍ ഏയ്ഞ്ചലിയ രണ്ടാംസ്ഥാനം നേടിയിരുന്നു. 400 മീറ്റര്‍ ഹര്‍ഡില്‍സില്‍ ഏയ്ഞ്ചലിയയ്ക്ക് ഇന്ന് മത്സരമുണ്ട്. ഏയ്ഞ്ചലിന 200 മീറ്ററില്‍ ഇന്നിറങ്ങും.

ട്രിപ്പിൾ മികവിൽ അദബിയ, ഡാനിയൽ

കൊച്ചി: മത്സരിച്ച മൂന്ന് ഇനങ്ങളിലും സ്വര്‍ണം നേടി കീരമ്പാറ സെന്‍റ് സ്റ്റീഫന്‍സ് എച്ച്എസ്എസിലെ പ്ലസ് വണ്‍ വിദ്യാര്‍ഥിനി അദബിയ ഫര്‍ഹാന്‍. ഇന്നലെ ജൂണിയര്‍ പെണ്‍കുട്ടികളുടെ ട്രിപ്പില്‍ ജംപിലാണ് അദബിയ ട്രിപ്പിൾ തികച്ചത്. എതിരാളികളെ ഏറെ പിന്നിലാക്കി 11.08 മീറ്റര്‍ കുറിച്ചാണ് സ്വര്‍ണമണിഞ്ഞത്. ജില്ലാ ജൂണിയര്‍ അത്‌ലറ്റിക് മീറ്റില്‍ 11.93 മീറ്റര്‍ കുറിച്ചതാണ് കരിയറിലെ മികച്ച പ്രകടനം. ആദ്യദിനം ലോംഗ് ജംപിലും 100 മീറ്ററിലും അദബിയ സ്വര്‍ണം നേടിയിരുന്നു. എം.എ. ജോര്‍ജിന്‍റെ കീഴിലാണ് പരിശീലനം. മാര്‍ ബേസിലിലെ ഡാനിയല്‍ ഷാജിയും ട്രിപ്പിൾ സ്വര്‍ണം സ്വന്തമാക്കി. ഇന്നലെ ജൂണിയര്‍ ആണ്‍കൂട്ടികളുടെ 400, 1500 മീറ്ററിലാണ് ഡാനിയൽ ട്രിപ്പിൾ തികച്ചത്. ആദ്യദിനം നടന്ന 800 മീറ്ററില്‍ സ്വര്‍ണം നേടിയിരുന്നു. മാര്‍ ബേസിലിലെ കായികാധ്യാപിക ഷിബി മാത്യുവിന്‍റെ ശിക്ഷണത്തിലാണ് പരിശീലനം.

പരിശീലനമില്ലാതെ സ്വര്‍ണം നേടി അനഹയും അനിലയും

കൊച്ചി: ഏതെങ്കിലും കായികാധ്യാപകന്‍റെ കീഴില്‍ ശാസ്ത്രീയമായ പരിശീനലമില്ലാതെ ജില്ലാ സ്‌കൂള്‍ മീറ്റില്‍ മത്സരിച്ച് സ്വര്‍ണം നേടി അനഹയും അനിലയും. വനിതകളുടെ ഹൈജംപ് ജൂണിയര്‍ വിഭാഗത്തിലാണ് കറുകുറ്റി സെന്‍റ് ജോസഫ്‌സ് ജിഎച്ച്എസിലെ എട്ടാംക്ലാസ് വിദ്യാര്‍ഥി അനഹ ഷാജു സ്വര്‍ണം നേടിയത്. മാണിക്കമംഗലം എന്‍എസ്എസ് എച്ച്എസ്എസിലെ പ്ലസ്ടു വിദ്യാര്‍ഥിനി അനില പോളച്ചന്‍റെ സ്വര്‍ണ നേട്ടം ഇതേ ഇനത്തില്‍ സീനിയര്‍ വിഭാഗത്തിലും. കായിക വിദ്യാഭ്യാസത്തിന് കാര്യമായ സൗകര്യങ്ങളില്ലാത്ത സ്‌കൂളുകളില്‍ നിന്നാണ് ഇരുവരുടെയും വരുന്നത്. ചെറുപ്പം മുതല്‍ക്കെ കായിക മത്സരങ്ങളില്‍ പങ്കെടുക്കുമായിരുന്ന ഇരുവരും ആരുടെയും ഉപദേശപ്രകാരമല്ലാതെ സ്വന്തം നിലയ്ക്കാണ് ഹൈജംപ് ഇഷ്ട ഇനമായി തെരഞ്ഞെടുത്തത്. ജില്ലാ മീറ്റിലെ ഇരുവരുടെയും ആദ്യ സ്വര്‍ണ നേട്ടവുമാണിത്.

ജോവിയ ട്രാക്കില്‍ രചിച്ചത് കരളുറപ്പിന്‍റെ കഥ

കൊച്ചി: മരണക്കിടക്കയില്‍ നിന്ന് കരളുറപ്പിന്‍റെ കനത്തില്‍ ട്രാക്കിലേക്ക് മടങ്ങിയെത്തിയ ഒമ്പതാംക്ലാസുകാരി ജോവിയ ജോര്‍ജിന് പറയാനുള്ളത് തന്‍റെ പുതുജീവിതത്തിന്‍റെ കഥകൂടിയാണ്. അണുബാധ മൂലം ദിവസങ്ങളോളം ആശുപത്രി വെന്‍റഇലേറ്ററിലും ഐസിയുവിലും കഴിഞ്ഞ് രോഗസാഹചര്യങ്ങളോട് പടവെട്ടി ജിവിതത്തിന്‍റെ ട്രാക്കിലേക്ക് മടങ്ങിവന്ന വിജയത്തിന്‍റെ കഥ. അമ്മൂമ്മയുടെ കൈപിടിച്ച് ജില്ലാ സ്‌കൂള്‍ മീറ്റിലെത്തി സീനിയര്‍ പെണ‍കുട്ടികളുടെ 400 മീറ്ററില്‍ സ്വര്‍ണം നേടുമ്പോള്‍ കായിക ലോകത്തിന് നല്‍കുന്ന തിരിച്ചുവരവിന്‍റെ ത്രില്ലർ കൂടിയാണ് ജോവിയ പറഞ്ഞു വച്ചത്. ചെറുപ്പം മുതല്‍ക്കേ ഓട്ടം ഇഷ്ടഇനമായിരുന്ന ജോവിയ കഴിഞ്ഞ വര്‍ഷം ജില്ലാ മീറ്റിനായി പരിശീലിക്കുന്നതിനിടെയാണ് മതിലില്‍ തട്ടി കൈവിരലിനു താഴെ മുറിവുണ്ടായത്. ആ മുറിവ് പതിയെ പനിയിലേക്കും അണുബാധയിലേക്കും എത്തി. പനിക്കിടക്കയില്‍ നിന്നാണ് ജില്ലാ മീറ്റിന് എത്തിയത്. പിന്നാലെ പനി മൂര്‍ച്ഛിച്ച് ആശുപത്രിയിലായി. അണുബാധ ശ്വാസകോശം, വൃക്ക, ഹൃദയം എന്നിവയെയെല്ലാം ബാധിച്ചിരുന്നു. ആലുവയിലെ സ്വകാര്യ ആശുപത്രിയില്‍ നാലു ദിവസം വെന്‍റിലേറ്ററിലും രണ്ടാഴ്ച ഐസിയുവിലും കിടന്ന ശേഷമാണ് ജീവിതത്തിലേക്ക് തിരിച്ചെത്തിയത്. ഏറെക്കാലത്തെ വിശ്രമത്തിനും ചികിത്സയ്ക്കും ശേഷം ഇക്കഴിഞ്ഞ ഫെബ്രുവരിയിലാണ് വീണ്ടും പരിശീലന ഗ്രൗണ്ടിലേക്കിറങ്ങിയത്. ബുദ്ധിമുട്ടാണെങ്കില്‍ പിന്നീട് ഇറങ്ങാമെന്ന് അധ്യാപകര്‍ പറഞ്ഞെങ്കിലും ഓടാതിരിക്കാന്‍ അവള്‍ക്കാവില്ലായിരുന്നു. 14 വയസുള്ള ജോവിയ മത്സരിക്കേണ്ടത് ജൂണിയര്‍ വിഭാഗത്തിലാണ്. എന്നാല്‍, സീനിയര്‍ വിഭാഗത്തില്‍ ഇറങ്ങി 1:12:9 സെക്കന്‍ഡില്‍ മുതിര്‍ന്നവരെ പിന്തള്ളിയാണ് ഒന്നാമതെത്തിയത്. ഇന്ന് 200 മീറ്ററില്‍ ജോവിയയ്ക്ക് മത്സരമുണ്ട്. സ്വകാര്യ കമ്പനി ഉദ്യോഗസ്ഥനായ പാങ്കോട് തോട്ടത്തില്‍ ജോര്‍ജിന്‍റെയും കുവൈറ്റില്‍ ജോലിചെയ്യുന്ന ദിവ്യയുടെയും മകളാണ്.

കാത്തിരിപ്പിനൊടുവിൽ കന്നിപ്പൊന്ന്

കൊച്ചി: അത്‌ലറ്റിക് മീറ്റുകളില്‍ പതിവായി പങ്കെടുക്കാറുണ്ടെങ്കിലും പുത്തന്‍വേലിക്കര വിസിഎസ് എച്ച്എസ്എസിലെ പ്ലസ് ടു വിദ്യാര്‍ഥി വി.ബി. വിഗ്നേശ്വറിന് സ്വര്‍ണം അണിയാനുള്ള ഭാഗ്യം മുമ്പ് ഉണ്ടായിരുന്നില്ല. ഇത്തവണ പക്ഷെ ആ കുറവ് നികത്തി. സീനിയര്‍ ആണ്‍കുട്ടികളുടെ ലോംഗ്ജംപില്‍ മികച്ച പ്രകടനം നടത്തിയാണ് ഏറെ നാളത്തെ കാത്തിരിപ്പിന് വിരാമമിട്ട് ജില്ലാ സ്‌കൂള്‍ മീറ്റിലെ തന്‍റെ ആദ്യ കന്നിപ്പൊന്ന് സ്വന്തമാക്കിയത്. ആദ്യ റൗണ്ടിലെ ഒന്നും മൂന്നും അവസരങ്ങള്‍ പാഴാക്കിയ വിഗ്നേശ്വര്‍ രണ്ടാം അവസരത്തില്‍ കുറിച്ച 5.65 മീറ്ററിന്‍റെ പിന്‍ബലത്തിലാണ് ഒന്നാമതെത്തിയത്. സ്‌കൂളില്‍ മികച്ച ജംപ് പിറ്റ് ഇല്ലാത്തതിനാല്‍ ആഴ്ചയില്‍ മൂന്ന് ദിവസം മഹാരാജാസ് കോളജ് ഗ്രൗണ്ടിലെ പിറ്റിലായിരുന്നു പരിശീലനം. സബ്ജില്ലാതല മത്സരത്തില്‍ 5.83 മീറ്റര്‍ കുറിച്ചതാണ് കരിയറിലെ മികച്ച പ്രകടനം. പുത്തന്‍വേലിക്കര ബിനേഷ്‌കുമാര്‍-രാജി ദമ്പതികളുടെ മകനാണ്. ജീഷ്‌കുമാറാണ് കോച്ച്.

ഹാട്രിക് മണിമുത്തം

കൊച്ചി: തുടര്‍ച്ചയായി മൂന്ന് ജില്ലാ സ്‌കൂള്‍ മീറ്റുകളില്‍ ഒരേ ഇനത്തില്‍ ഒന്നാമതെത്തി ഹാര്‍ട്രിക് സ്വര്‍ണ നേട്ടവുമായി മാര്‍ ബേസിലിലെ പ്ലസ് വണ്‍ വിദ്യാര്‍ഥി സനു നന്ദ. ജൂണിയര്‍ പെണ്‍കുട്ടികളുടെ 400 മീറ്ററിലാണ് സനു സ്വര്‍ണമണിഞ്ഞത്. കഴിഞ്ഞ വര്‍ഷങ്ങളിലും ഇതേ ഇനത്തില്‍ സനുവിനായിരുന്നു സ്വര്‍ണം. കഴിഞ്ഞ വര്‍ഷം 200 മീറ്ററിലും സ്വര്‍ണം നേടിയിരുന്നു. പരിക്ക് പിടിപെട്ടതിനാല്‍ സംസ്ഥാന മീറ്റില്‍ പങ്കെടുക്കാന്‍ കഴിഞ്ഞില്ല. കണ്ണൂര്‍ അച്ചേരിക്കുഴിയില്‍ സുഭാഷ്-സിജി ദമ്പതികളുടെ മകളാണ്.

ജില്ലാ സ്കൂൾ കായികമേള : കപ്പിനോടടുത്ത് കോതമംഗലം

കൊച്ചി: ട്രാക്കിലും പിറ്റിലും കൗമാര താരങ്ങള്‍ ജ്വലിച്ച ജില്ലാ സ്‌കൂള്‍ മീറ്റിന്‍റെ രണ്ടാം ദിനത്തിലും നിലവിലെ ചാമ്പ്യൻമാരായ കോതമംഗലം ഉപജില്ല എതിരാളികളില്ലാതെ കുതിപ്പ് തുടരുന്നു. ഇന്നലെ 14 സ്വര്‍ണംകൂടി പട്ടികയില്‍ ചേര്‍ത്ത് ആകെ മെഡല്‍ നേട്ടം 44 ആക്കി. 24 സ്വര്‍ണവും 14 വെള്ളിയും ആറ് വെങ്കലവുമുള്‍പ്പെടെ 169 പോയന്‍റാണ് കോതമംഗലത്തിന്‍റെ സമ്പാദ്യം. 11 സ്വര്‍ണവും ആറു വെള്ളിയും ഒന്‍പത് വെങ്കലവുമായി 102 പോയിന്‍റുള്ള അങ്കമാലി രണ്ടാം സ്ഥാനത്തും 44 പോയൻോടെ വൈപ്പിന്‍ ഉപജില്ല മൂന്നാം സ്ഥാനത്തുമുണ്ട്. മൂന്ന് സ്വര്‍ണവും ആറ് വെള്ളിയും നാല് വെങ്കലവുമാണ് വൈപ്പിനുള്ളത്. സ്‌കൂള്‍ പോയിന്‍റ് പട്ടികയില്‍ കോതമംഗലം മാര്‍ ബേസില്‍ എച്ച്എസ്എസിനും എതിരില്ല. 18 സ്വര്‍ണവും 10 വെള്ളിയും അഞ്ച് വെങ്കലവും അടക്കം 125 പോയന്‍റാണ് രണ്ട് ദിനങ്ങളിലായി മാര്‍ ബേസില്‍ വാരിക്കൂട്ടിയത്. രണ്ടാം സ്ഥാനത്തുള്ള ഉപജില്ല നേടിയ പോയിന്‍റിനേക്കാൾ കൂടുതലാണ് ഇതെന്നതു കണക്കിലെടുക്കുമ്പോൾ തന്നെ മാർ ബേസിലിന്‍റെ ആദിപത്യം വ്യകാതമാകും. സ്കൂളുകളിൽ കീരമ്പാറ സെന്‍റ് സ്റ്റീഫന്‍സ് എച്ച്എസ്എസാണ് രണ്ടാം സ്ഥാനത്ത്. ആറു സ്വര്‍ണമുള്‍പ്പെടെ 39 പോയന്‍റാണവർക്ക്. 27 പോയിന്‍റുമായി അങ്കമാലി മൂക്കന്നൂര്‍ സേക്രഡ് ഹാര്‍ട്ട് ഓര്‍ഫനേജ് എച്ച്എസാണ് മൂന്നാം സ്ഥാനത്ത്. എറണാകുളം മഹാരാജാസ് കോളജ് ഗ്രൗണ്ടില്‍ നടക്കുന്ന മീറ്റിന്‍റെ രണ്ടാംദിനവും വൈകിയാണ് മത്സരങ്ങള്‍ ആരംഭിച്ചത്. താളംതെറ്റിയ മത്സരക്രമത്തില്‍ പൊരിവെയിലത്ത് മത്സരിക്കേണ്ടി വരുന്നത് കുട്ടികളുടെ പ്രകടനത്തെ കാര്യമായി ബാധിക്കുന്നുണ്ട്. സ്‌പൈക്ക്‌സ് പോലുമില്ലാതെയാണ് പല മത്സരാര്‍ഥികളും ട്രാക്ക് ഇനങ്ങളില്‍ മത്സരിക്കുന്നത്. പലരും പരിക്കോടെയാണ് ട്രാക്ക് വിടുന്നതും. മഹാരാജാസ് ഗ്രൗണ്ടിലെ ട്രാക്ക്, ജംപ് ഇനങ്ങള്‍ ഇന്ന് പൂര്‍ത്തിയാവും. നാളെ മുതല്‍ കോതമംഗലം എംഎ കോളജിലാണ് ത്രോ മത്സരങ്ങള്‍. പോള്‍വോള്‍ട്ടും ഇതോടൊപ്പം നടക്കും. ആദ്യ റിക്കാര്‍ഡില്‍ ആശയക്കുഴപ്പം കൊച്ചി: ജില്ലാ സ്‌കൂള്‍ മീറ്റില്‍ പിറന്ന ആദ്യ റിക്കാര്‍ഡിനെ ചൊല്ലി ആശയക്കുഴപ്പം. രണ്ടാം ദിനമായ ഇന്നലെ ജൂണിയര്‍ ആണ്‍കുട്ടികളുടെ 4x100 മീറ്റര്‍ റിലേയില്‍ അങ്കമാലി ഉപജില്ലാ ടീം സ്ഥാപിച്ച റിക്കാർഡിനെ ചൊല്ലിയാണ് ആശയക്കുഴപ്പം ഉണ്ടായത്. ഇതേ തുടര്‍ന്ന് റിക്കാര്‍ഡ് ഔദ്യോഗികമായി രേഖപ്പെടുത്തിയില്ല. 2025 ദേശീയ ഗെയിംസില്‍ 40.73 സെക്കന്‍ഡിൽ കേരള പുരുഷ ടീം സ്ഥാപിച്ച റിക്കാർഡിന് അടുത്ത സമയത്തിലാണ് അങ്കമാലി ഉപജില്ല (41.6) ഫിനിഷ് ചെയ്തത്. ഇത് ഫിനിഷിംഗ് ഒഫീഷ്യല്‍സ് സമയം രേഖപ്പെടുത്തിയതിലെ പിഴവാണെന്ന സംശയം ഉയരാൻ കാരണമായി. 45 സെക്കന്‍ഡാണ് നിലവിലെ സ്‌കൂള്‍ മീറ്റ് റിക്കാർഡ്. ആശയക്കുഴപ്പം മൂലം സമയം ഔദ്യോഗികമായി രേഖപ്പെടുത്തിയിട്ടില്ല.

സ്വന്തം മക്കളിലൂടെ വാക്‌സിനേഷൻ സന്ദേശം പകര്‍ന്ന് ജില്ലാ കളക്ടര്‍

കൊച്ചി: പള്‍സ് പോളിയോ ദിനത്തില്‍ തേവര അര്‍ബന്‍ കമ്യൂണിറ്റി ഹെല്‍ത്ത് സെന്‍ററിലത്തി തന്‍റെ രണ്ടു മക്കള്‍ക്കും പോളിയോ തുള്ളിമരുന്ന് നല്‍കി ജില്ലാ കളക്ടര്‍ ജി. പ്രിയങ്ക. വാക്‌സിനേഷന്‍റെ പ്രാധാന്യം മനസിലാക്കി എല്ലാ രക്ഷിതാക്കളും കുട്ടികള്‍ക്ക് അത് ഉറപ്പുവരുത്തണമെന്ന് പള്‍സ് പോളിയോ ദിന ജില്ലാതല പരിപാടി ഉദ്ഘാടനം ചെയ്ത് ജില്ലാ കളക്ടര്‍ പറഞ്ഞു. പോളിയോ രോഗം നമ്മുടെ രാജ്യത്ത് ഇന്ന് ഇല്ലെങ്കിൽകൂടി അയല്‍ രാജ്യങ്ങളിലെ രോഗസാന്നിധ്യം കാരണം നാം ജാഗ്രത തുടരണം. എല്ലാ കുട്ടികള്‍ക്കും പോളിയോ തുള്ളിമരുന്ന് ലഭിക്കുന്നുണ്ടെന്ന് ഉറപ്പാക്കണമെന്നും കളക്ടര്‍ പറഞ്ഞു. കൗണ്‍സിലര്‍ പി.ആര്‍. റെനിഷ് അധ്യക്ഷത വഹിച്ച പരിപാടിയില്‍ ജില്ലാ മെഡിക്കല്‍ ഓഫീസര്‍ (ആരോഗ്യം ) ഡോ. ആശാദേവി മുഖ്യപ്രഭാഷണം നടത്തി. സ്റ്റേറ്റ് ഒബ്‌സെര്‍വര്‍മാരായ ഡോ. വി.ആര്‍. വനജ, ഡോ. ആശ വിജയന്‍ എന്നിവര്‍ പോളിയോ തുള്ളി മരുന്നിന്‍റെ പ്രാധാന്യത്തെക്കുറിച്ച് സംസാരിച്ചു.

കേബിളിൽ തട്ടി വീണ് സ്‌കൂട്ടർ യാത്രികയ്ക്ക് പരിക്ക്

തൃപ്പൂണിത്തുറ: അലക്ഷ്യമായി തൂണിൽ കെട്ടിയിരുന്ന കേബിളിൽ തട്ടി വീണ് സ്‌കൂട്ടർ യാത്രികയ്ക്കു പരിക്കേറ്റു. എരൂർ പുല്ലംതുരുത്ത് വീട്ടിൽ അമൃതയ്ക്കാണ് പരിക്കേറ്റത്. ഞായറാഴ്ച വൈകിട്ട് വടക്കേക്കോട്ട ചക്കാലമുട്ട് റോഡിലായിരുന്നു അപകടം. കാലിനു പൊട്ടലുണ്ടായ യുവതി സ്വകാര്യ ആശുപത്രിയിൽ ചികിത്സയിലാണ്. വീഴ്ചയുടെ ആഘാതത്തിൽ യുവതിയുടെ മുഖത്തിനും പരിക്കുണ്ട്. വടക്കേക്കോട്ട ഭാഗത്തു നിന്നെത്തിയ യുവതി, താഴ്ന്നു കിടന്നിരുന്ന സ്വകാര്യ ഇന്‍റർനെറ്റ് സേവന ദാതാവിന്‍റെ കേബിളിൽ കുടുങ്ങി വീഴുകയായിരുന്നുവെന്ന് നാട്ടുകാർ പറഞ്ഞു.

ഹൈബ്രിഡ് കഞ്ചാവുമായി ആശുപത്രി ജീവനക്കാരൻ പിടിയിൽ

വരാപ്പുഴ : വിൽപ്പനയ്ക്ക് സൂക്ഷിച്ചിരുന്ന ഹൈബ്രിഡ് കഞ്ചാവുമായി സ്വകാര്യ ആശുപത്രിയിലെ ജീവനക്കാരൻ പിടിയിൽ. കോതാട് കോരാമ്പാടം പാല്യത്ത് റോഡിൽ വാടകയ്ക്കു താമസിക്കുന്ന കൊട്ടാരക്കര ഉമ്മന്നൂർ പ്ലാപ്പിള്ളി കളിക്കൽ പുത്തൻവീട്ടിൽ അലൻ കോശി (25)യെയാണ് വരാപ്പുഴ പോലീസ് അറസ്റ്റ് ചെയ്തത്. സ്വകാര്യ ആശുപത്രിയിലെ ലിവർ കെയർ അസിസ്റ്റന്‍റ് ഫിസിഷ്യനാണ് അലൻ. ഇയാളിൽ നിന്നു 2.23 ഗ്രാം ഹൈബ്രിഡ് കഞ്ചാവും 8.24 ഗ്രാം കഞ്ചാവും കണ്ടെടുത്തു. നാലു കവറുകളിലാണു കഞ്ചാവ് സൂക്ഷിച്ചിരുന്നത്. തൂക്കാൻ ഉപയോഗിക്കുന്ന ചൈനീസ് നിർമിത ത്രാസും കണ്ടെടുത്തു. കണ്ടെയ്നർ റോഡിലും ചിറ്റൂർ കുട്ടി സാഹിബ് റോഡിലും നടത്തിയ പരിശോധനകളിൽനിന്ന് ലഭിച്ച വിവരത്തിന്‍റെ അടിസ്ഥാനത്തിലാണു പോലീസ് ഇയാളുടെ വാടകവീട്ടിൽ പരിശോധന നടത്തിയത്.

കാര്‍ത്തിക് ലൈവ്: ഡിസം. 19ന് കൊച്ചിയില്‍

കൊച്ചി: സംഗീത പ്രേമികളെ ആവേശത്തിലാക്കാന്‍ പുതിയ മ്യൂസിക് ടൂറുമായി (കാര്‍ത്തിക് ലൈവ്) പ്രശസ്ത ഗായകനും സംഗീത സംവിധായകനുമായ കാര്‍ത്തിക് കൊച്ചിയിലെത്തുന്നു. ബുക്ക് മൈഷോയുടെ സഹസംരംഭമായ ട്രൈബ്‌വൈബ് എന്‍റര്‍ടെയ്ൻമെന്‍റ് ഒരുക്കുന്ന ഈ ടൂര്‍ ദക്ഷിണേന്ത്യയിലെ പ്രധാന പതിനൊന്ന് നഗരങ്ങളില്‍ അരങ്ങേറും. നവംബര്‍ 30ന് ആരംഭിക്കുന്ന മ്യൂസിക് ടൂര്‍ തിരുപ്പതി, വിശാഖപട്ടണം, കോയമ്പത്തൂര്‍, കൊച്ചി, രാജമുണ്ഡ്രി, ബംഗളൂരു, ഹൈദരാബാദ്, വിജയവാഡ, ചെന്നൈ, മധുര, വാറങ്കല്‍ എന്നീ നഗരങ്ങളിലാണ് അരങ്ങേറുക. ഡിസംബര്‍ 19നാണ് കൊച്ചിയിലെ ഷോ.

പള്‍സ് പോളിയോ : ആദ്യദിനം ജില്ലയിൽ 1,71,983 കുട്ടികള്‍ക്ക് നല്‍കി

കൊച്ചി: പള്‍സ് പോളിയോ ദിനത്തില്‍ ജില്ലയില്‍ മികച്ച നേട്ടം. ജില്ലയില്‍ അഞ്ചു വയസിൽ താഴെയുള്ള 1,89,737 കുട്ടികള്‍ക്കാണ് പള്‍സ് പോളിയോ തുള്ളിമരുന്ന് നല്‍കാന്‍ ലക്ഷ്യമിട്ടത്. ഇതില്‍ 1,71,983 കുട്ടികള്‍ക്ക് ഇന്നലെ പള്‍സ് പോളിയോ തുള്ളിമരുന്ന് നല്‍കി. ഇതില്‍ 5,083 ഇതരസംസ്ഥാന തൊഴിലാളികളുടെ കുട്ടികളും ഉള്‍പ്പെടും. 1,947 ബൂത്തുകളാണ് ജില്ലയില്‍ ഇതിനായി സജ്ജീകരിച്ചത്. സര്‍ക്കാര്‍ ആശുപത്രികള്‍, സ്വകാര്യ ആശുപത്രികള്‍, അങ്കണവാടികള്‍, ജനകീയ ആരോഗ്യ കേന്ദ്രങ്ങള്‍ എന്നിവ കൂടാതെ ബസ്‌സ്റ്റാന്‍ഡുകള്‍, റെയില്‍വേ സ്റ്റേഷനുകള്‍, ബോട്ട് ജെട്ടികള്‍, മെട്രോ സ്റ്റേഷനുകള്‍, എയര്‍പോര്‍ട്ട് എന്നിവിടങ്ങളിലായി 51 കേന്ദ്രങ്ങളില്‍ ട്രാന്‍സിറ്റ് ബൂത്തുകളും പ്രവര്‍ത്തിച്ചു. ആളുകള്‍ക്ക് എത്തിച്ചേരാന്‍ ബുദ്ധിമുട്ടുള്ള പ്രദേശങ്ങളിലും ഇതര സംസ്ഥാന തൊഴിലാളി ക്യാമ്പുകളിലും, കുട്ടികള്‍ക്ക് തുള്ളിമരുന്ന് നല്‍കുന്നതിനായി 64 മൊബൈല്‍ ടീമുകളെ സജ്ജമാക്കിയിരുന്നു. കുട്ടികള്‍ക്ക് ഇന്നലെ തുള്ളിമരുന്ന് നല്‍കാന്‍ സാധിക്കാത്തവര്‍ക്ക് ആരോഗ്യ പ്രവര്‍ത്തകര്‍ അടുത്ത രണ്ടു ദിവസങ്ങളില്‍ വീടുകളിലെത്തി വാക്‌സിന്‍ നല്‍കുന്നതായിരിക്കും.

മലമ്പാമ്പിനെ പിടികൂടി

മൂവാറ്റുപുഴ: ബ്ലോക്ക് ഓഫീസിന്‍റെ ഗേറ്റിനു മുമ്പില്‍നിന്നും മലമ്പാമ്പിനെ പിടികൂടി. കഴിഞ്ഞദിവസം രാത്രി എട്ടോടെ നാട്ടുകാര്‍ അറിയിച്ചതിനെ തുടര്‍ന്ന് പാമ്പുപിടിത്ത പരിശീലനം നേടിയ പൊതുപ്രവര്‍ത്തകനും ഓട്ടോ തൊഴിലാളിയുമായ വാഴപ്പിള്ളി മുണ്ടയ്ക്കല്‍ എം.ജെ. ഷാജിയാണ് മലമ്പാമ്പിനെ പിടികൂടിയത്. പിന്നീട് വനംവകുപ്പിന് കൈമാറി. കഴിഞ്ഞ ഏതാനും മാസങ്ങള്‍ക്കകം ഇവിടെനിന്നും പിടികൂടുന്ന മൂന്നാമത്തെ മലമ്പാമ്പാണിത്.

സ്വർണമാല മോഷണം പോയെന്ന് പരാതി

കൂത്താട്ടുകുളം: രാത്രി ഉറങ്ങാൻ കിടന്ന യുവാവിന്‍റെ കഴുത്തിൽനിന്നും സ്വർണമാല മോഷണം പോയതായി പരാതി. മാറിക കുട്ടികവലയ്ക്ക് സമീപം മാളിയേക്കൽ ചന്ദ്രന്‍റെ വീട്ടിൽനിന്നാണ് സ്വർണമാല മോഷണം പോയത്. ശനിയാഴ്ച വെളുപ്പിന് രണ്ടിനാണ് സംഭവം. ചന്ദ്രനും ഭാര്യക്കും കൂട്ടുകിടക്കാൻ എത്തിയ സഹോദര പുത്രന്‍റെ കഴുത്തിൽനിന്നാണ് മാല മോഷ്ടിക്കപ്പെട്ടത്. വീടിന്‍റെ പിൻവശത്തെ ജനലിലൂടെ കൈകടത്തി വാതിലിന്‍റെ കുറ്റി തുറന്നശേഷം മോഷ്ടാവ് അകത്തു കയറി മോഷണം നടത്തിയെന്നാണ് കരുതുന്നത്. വീടിനുള്ളിൽ മേശയിൽ സൂക്ഷിച്ചിരുന്ന 1,000 രൂപയും മോഷണം പോയിട്ടുണ്ട്. ചന്ദ്രന്‍റെ പരാതിയെ തുടർന്ന് കൂത്താട്ടുകുളം പോലീസ് കേസെടുത്ത് അന്വേഷണം ആരംഭിച്ചു. ഡോഗ് സ്ക്വാഡും സ്ഥലത്തെത്തി പരിശോധ നടത്തി.

കെഎസ്എസ്പിഎ വാര്‍ഷിക സമ്മേളനം നടത്തി

മൂവാറ്റുപുഴ: കെഎസ്എസ്പിഎ മൂവാറ്റുപുഴ മുനിസിപ്പല്‍ മേഖല വാര്‍ഷിക സമ്മേളനം നടത്തി. കെ. കരുണാകരന്‍ സപ്തതി മന്ദിര ഹാളില്‍ നടന്ന സമ്മേളനത്തില്‍ മുനിസിപ്പല്‍ മേഖലാ പ്രസിഡന്‍റ് ബേബി ജോര്‍ജ് പതാക ഉയര്‍ത്തി. കോതമംഗലം രൂപത ഫാമിലി അപ്പോസ്തലേറ്റ് ഡയറക്ടര്‍ റവ.ഡോ. ആന്‍റണി പുത്തന്‍കുളം വാര്‍ഷിക സമ്മേളനം ഉദ്ഘാടനം ചെയ്തു. മൂവാറ്റുപുഴ നിയോജക മണ്ഡലം പ്രസിഡന്‍റ് ഒ.എം തങ്കച്ചന്‍ മുഖ്യപ്രഭാഷണം നടത്തി. കാര്യക്ഷമമായ സംഘടനാ പ്രവര്‍ത്തനം എന്ന വിഷയത്തെക്കുറിച്ച് എന്‍ജിഒ അസോസിയേഷന്‍ മുന്‍ സംസ്ഥാന പ്രസിഡന്‍റ് പി.എസ്.എ. ലത്തീഫ് ക്ലാസ് നയിച്ചു. ജില്ലാ വനിതാ ഫോറം പ്രസിഡന്‍റ് ആലീസ് സ്‌കറിയ വിവിധ മേഖലകളില്‍ കഴിവ് തെളിയിച്ച പ്രതിഭകളായ പി.ബി. ഗോപകുമാര്‍, പുഷ്പ ജോസഫ്, ലക്ഷ്മി സജീവന്‍, എസ്. കീര്‍ത്തന എന്നിവരെ ചടങ്ങില്‍ ആദരിച്ചു. കോണ്‍ഗ്രസ് ടൗണ്‍ മണ്ഡലം പ്രസിഡന്‍റ് കെ.എ. അബ്ദുള്‍ സലാം, കെഎസ്എസ്പിഎ സംസ്ഥാന കൗണ്‍സില്‍ അംഗം മാത്യു ഫിലിപ്പ്, നിയോജക മണ്ഡലം സെക്രട്ടറി വി.എം നാസര്‍ ഖാന്‍, നിയോജകമണ്ഡലം ട്രഷറര്‍ ടോമി ജേക്കബ്, നിയോജക മണ്ഡലം വനിതാ ഫോറം പ്രസിഡന്‍റ് റാണി പി. എല്‍ദോ, നിയോജകമണ്ഡലം ജോയിന്‍റ് സെക്രട്ടറി പി.എസ്. ഷബീബ്, വനിതാ ഫോറം മുന്‍ ജില്ലാ പ്രസിഡന്‍റ് കെ.എം റജീന, മുനിസിപ്പല്‍ മേഖല ജോയിന്‍റ് സെക്രട്ടറി എം.യു. ഷാജി, മുനിസിപ്പല്‍ മേഖല വനിത ഫോറം പ്രസിഡന്‍റ് എന്‍.എന്‍. മല്ലിക, സെക്രട്ടറി ബിനു കെ. പീറ്റര്‍, ട്രഷറര്‍ കെ.സി. ബോസ്, കെഎസ്എസ്പിഎ ജില്ലാ വൈസ് പ്രസിഡന്‍റ് ഡൊമിനിക് തോമസ് എന്നിവര്‍ പ്രസംഗിച്ചു.

ചാത്തമറ്റം പള്ളി കൂദാശ ചെയ്തു

പോത്താനിക്കാട്: ചാത്തമറ്റം സെന്‍റ് പീറ്റേഴ്സ് ആന്‍ഡ് സെന്‍റ് പോള്‍സ് ഓര്‍ത്തഡോക്സ് പള്ളി പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതിയന്‍ കാതോലിക്ക ബാവ കൂദാശ ചെയ്തു. ഇതോടനുബന്ധിച്ച് നടത്തിയ പൊതുസമ്മേളനം യൂഹാനോന്‍ മാര്‍ പോളിക്കാര്‍പ്പോസ് മെത്രാപ്പോലീത്ത അധ്യക്ഷത വഹിച്ചു. ഡീന്‍ കുര്യാക്കോസ് എംപി മുഖ്യപ്രഭാഷണം നടത്തി. മാത്യു കുഴല്‍നാടന്‍ എംഎല്‍എ ഇടവകയിലെ ഉന്നത വിജയം കരസ്ഥമാക്കിയ കുട്ടികള്‍ക്ക് സ്കോളര്‍ഷിപ്പുകള്‍ വിതരണം ചെയ്തു. പിന്നണി ഗായകന്‍ കെ.ജി. മാര്‍ക്കോസ് ദേവാലയം നിര്‍മിച്ചു നല്‍കിയ ഭവനങ്ങളുടെ താക്കോല്‍ ദാനം നിര്‍വഹിച്ചു. ഡോ. തോമസ് മാര്‍ അത്താനാസിയോസ് മെത്രാപ്പോലീത്ത, ഡോ. യൂഹാനോന്‍ മാര്‍ ദീയസ്കോറോസ് മെത്രാപ്പോലീത്ത, ജോഷ്വാ മാര്‍ നിക്കോദീമോസ് മെത്രാപ്പൊലീത്ത, വൈദീക ട്രസ്റ്റി ഡോ. തോമസ് വര്‍ഗീസ് അമയില്‍, അല്‍മായ ട്രസ്റ്റി ബിജു ഉമ്മന്‍, പോത്താനിക്കാട് പഞ്ചായത്ത് പ്രസിഡന്‍റ് സജി കെ. വര്‍ഗീസ്, വികാരി ഫാ. എല്‍ദോ കുര്യാക്കോസ്, ഫാ. കെ.കെ. മര്‍ക്കൊസ്, ട്രസ്റ്റിമാരായ വില്‍സണ്‍ വര്‍ഗീസ്, ഡെന്‍സണ്‍ കെ. പോള്‍, സെക്രട്ടറി ബേസില്‍ ജോര്‍ജ് എന്നിവര്‍ പ്രസംഗിച്ചു.

ഷാഫിക്കുനേരേ മർദനം: കോണ്‍ഗ്രസ് പ്രതിഷേധിച്ചു

മൂവാറ്റുപുഴ: കെപിസിസി വര്‍ക്കിംഗ് പ്രസിഡന്‍റും വടകര എംപിയുമായ ഷാഫി പറമ്പില്‍, കോഴിക്കോട് ഡിസിസി അധ്യക്ഷന്‍ കെ. പ്രവീണ്‍ കുമാര്‍ ഉള്‍പ്പെടെയുള്ള നേതാക്കള്‍ക്കെതിരേ പേരാമ്പ്രയിലുണ്ടായ പോലീസ് അതിക്രമത്തില്‍ പ്രതിഷേധിച്ച് യൂത്ത് കോണ്‍ഗ്രസ് മൂവാറ്റുപുഴ നിയോജക മണ്ഡലം കമ്മിറ്റിയുടെ നേതൃത്വത്തില്‍ നൈറ്റ് മാര്‍ച്ചും, റോഡ് ഉപരോധവും സംഘടിപ്പിച്ചു. കച്ചേരിത്താഴത്ത് നിന്നാരംഭിച്ച നൈറ്റ് മാര്‍ച്ച് വെള്ളൂര്‍ക്കുന്നത്ത് സമാപിച്ചു. തുടര്‍ന്ന് പ്രവര്‍ത്തകര്‍ അരമണിക്കൂറോളം റോഡ് ഉപരോധിക്കുകയും, ടയര്‍ കത്തിച്ച് പ്രതിഷേധിക്കുകയും ചെയ്തു. കോതമംഗലം: കോൺഗ്രസ് കോതമംഗലം ബ്ളോക്ക് കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും യോഗവും നടത്തി. ചെറിയ പള്ളിത്താഴത്ത് നടന്ന പ്രതിഷേധയോഗത്തിൽ ബ്ളോക്ക് പ്രസിഡന്‍റ് ഷമീർ പനക്കൽ അധ്യക്ഷത വഹിച്ചു . കെപിസിസി മെമ്പർ എ.ജി. ജോർജ് ഉദ്ഘാടനം ചെയ്തു.

അമിത വേഗതയിലും ഹോണടിച്ചും പോകുന്ന ബസുകള്‍ കണ്ട് ക്ഷുഭിതനായി മന്ത്രി

കോതമംഗലം: കോതമംഗലത്ത് മന്ത്രിയുടെ ഉദ്ഘാടന പരിപാടി നടക്കുന്ന സമയത്ത് തൊട്ടുടത്ത ഹൈറേഞ്ച് സ്റ്റാന്‍ഡിലേക്ക് അമിത വേഗതയിലും ഹോണടിച്ചും പോകുന്ന ബസുകള്‍ കണ്ട് മന്ത്രി ക്ഷുഭിതനായി. രണ്ട് സ്വകാര്യ ബസുകള്‍ക്കെതിരെ നടപടിക്കും ഉത്തരവിട്ടു. ഇതിന്‍റെ പേരില്‍ സമരം ചെയ്താല്‍ നൂറ് ബസ് ഇറക്കുമെന്നും മന്ത്രിയുടെ മുന്നറിയിപ്പും. കോതമംഗലത്ത് കെഎസ്ആര്‍ടിസി സ്റ്റാന്‍ഡില്‍ പുതിയ ബസ് ടെര്‍മിനലിന്‍റെ ഉദ്ഘാടനം നടക്കുന്നതിനിടെയാണ് നാടകീയ സംഭവങ്ങള്‍. മന്ത്രി കെ.ബി. ഗണേഷ്‌കുമാറായിരുന്നു ഉദ്ഘാടകന്‍. മന്ത്രിയുടെ പ്രസംഗത്തിന് മുമ്പ് ആന്‍റണി ജോണ്‍ എംഎല്‍എയുടെ അധ്യക്ഷപ്രസംഗം നടക്കുമ്പോഴാണ് ഒരു സ്വകാര്യ ബസ് നിര്‍ത്താതെ ഹോണടിച്ച് വേഗതയില്‍ പോയത്. ഫയര്‍ എന്‍ജിന്‍ വരുന്ന പോലെയായിരുന്നു ഹോണടിച്ചുള്ള ബസിന്‍റെ വരവ്. ഉദ്ഘാടന പ്രസംഗത്തില്‍ മന്ത്രി ഇക്കാര്യം പരാമര്‍ശിക്കുകയും ചെയ്തു. നിറച്ച് ആളെയും വച്ചോണ്ട് റോക്കറ്റ് പോലെയല്ലേ പോക്ക്. എവിടിട്ട് പിടിക്കാമെന്ന് നോക്കിയിരിക്കുമ്പോഴാണ് അതിനേക്കാള്‍ വേഗത്തില്‍ തിരിച്ച് പോകുന്നത്. ബ്രേക്ക് വല്ലതും പോയി പാഞ്ഞ് പോകുന്നതാണെന്നാണ് തെറ്റിദ്ധരിച്ചത്. അദേഹത്തിന്‍റെ പെര്‍മിറ്റ് പോയെന്ന് മാത്രമേ ഇപ്പോള്‍ പറയാനുള്ളൂവെന്നും മന്ത്രി പറഞ്ഞു. പ്രസംഗിച്ചുകൊണ്ടിരിക്കുന്നനിടെ അപ്പുറത്തെ സ്റ്റാന്‍ഡില്‍നിന്ന് മറ്റൊരു സ്വകാര്യ ബസ് പുറത്തേക്ക് അമിത വേഗതയില്‍ ഓടിച്ച് പോകുന്നതും മന്ത്രിയുടെ ശ്രദ്ധയില്‍പ്പെട്ടു. ഇവിടെ ഇതാണ് സ്പീഡ് എങ്കില്‍ റോഡില്‍ എന്തായിരിക്കുമെന്ന് സ്പീഡെന്നും മന്ത്രി ചോദിച്ചു. എന്തായാലും രണ്ട് ബസുകള്‍ക്കെതിരേയും നടപടിയെടുക്കാന്‍ പ്രസംഗത്തിനിടെ മൈക്കിലൂടെ തന്നെ മന്ത്രി ഉത്തരവിട്ടു. അതേസമയം ഹോണടിച്ച് വന്ന ബസിന്‍റെ ഹോണ്‍ സ്റ്റക്കായതാണെന്നും നിര്‍ത്താതെ ഹോണ്‍ മുഴങ്ങിയപ്പോള്‍ ഡ്രൈവര്‍ അങ്കലാപ്പിലായി വേഗത കൂടിയതാണെന്നുമാണ് ബസ് തൊഴിലാളികളും കണ്ടു നിന്നവരും പറയുന്നത്.

കോതമംഗലം ഡിപ്പോയിൽനിന്നും പുതിയ സർവീസുകൾ ആരംഭിക്കും: ഗതാഗത മന്ത്രി

കോതമംഗലം: നവംബർ പത്ത് മുതൽ കോതമംഗലത്തു നിന്ന് തിരുവനന്തപുരത്തേക്ക് പുതിയ കെഎസ്ആർടിസി പ്രീമിയം എസി സൂപ്പർ ഫാസ്റ്റ് സർവീസ് ആരംഭിക്കുമെന്ന് ഗതാഗത മന്ത്രി കെ.ബി. ഗണേഷ് കുമാർ. കോതമംഗലത്ത് പുതുതായി നിർമിച്ച ആധുനിക കെഎസ്ആർടിസി ബസ് ടെർമിനൽ ഉദ്ഘാടനം ചെയ്ത് സംസാരിക്കുകയായിരുന്നു. കമ്പം -തേനി ഭാഗത്തേക്ക് രണ്ടു ബസുകൾ വേണമെന്ന് ആവശ്യമുയർന്നിരുന്നു. അതിൽ കമ്പത്തേക്കു പുതിയ സർവീസ് ആരംഭിക്കാൻ തീരുമാനിച്ചിട്ടുണ്ട്. ഫാസ്റ്റ് പാസഞ്ചർ സർവീസ് ആണ് അനുവദിക്കുക. വൈകാതെ തന്നെ ആരംഭിക്കും. കോട്ടപ്പടി വഴി ഗുരുവായൂർക്ക് പുതിയ ലിങ്ക് ബസ് സർവീസ് ആരംഭിക്കും. ഒരുമാസം പരീക്ഷണാടിസ്ഥാനത്തിൽ നോക്കിയശേഷം, വിജയമാണെങ്കിൽ ഇത് തുടർന്നു കൊണ്ടു പോകും. നിലവിൽ ഒരു ലിങ്ക് ബസ് കോതമംഗലത്തിന് അനുവദിച്ചിട്ടുണ്ട്. അതുകൂടാതെയാണ് പുതിയ ബസ് വരുന്നത്. കളമശേരി മെഡിക്കൽ കോളജിലേക്ക് പുതിയൊരു സർവീസ് ആരംഭിക്കാനും തീരുമാനമായിട്ടുണ്ട്. കോതമംഗലത്തുനിന്ന് ഗോത്രമേഖലയിലേക്ക് പുതിയ സർവീസ് ആരംഭിച്ചിരുന്നു. ഇതിനോട് നല്ല പ്രതികരണമാണ് ലഭിച്ചത്. ഭാവിയിൽ നിലവിലെ ബസിന് പകരം പുതിയ മിനി ബസ് അനുവദിക്കുന്ന കാര്യം പരിഗണിക്കും. രാത്രി വരെ പെർമിറ്റ് ഉള്ള സ്വകാര്യ ബസുകൾ നേരത്തെ സർവീസ് അവസാനിപ്പിച്ച് ട്രിപ്പ് മുടക്കുന്നു എന്ന പരാതി ഉണ്ട്. ഇത്തരത്തിൽ സർവീസ് മുടക്കുന്ന സ്വകാര്യ ബസുകൾക്കെതിരേ കർശന നടപടി സ്വീകരിക്കും. ഇതിനായി അടുത്ത ദിവസം മുതൽ മോട്ടോർ വാഹന വകുപ്പിന്‍റെ പരിശോധന ആരംഭിക്കാൻ ഉദ്യോഗസ്ഥർക്ക് നിർദേശം നൽകിയിട്ടുണ്ട്. ബസ് ടർമിനൽ യാഥാർഥ്യമാക്കാൻ വിവിധതരത്തിൽ സഹായിച്ച വ്യക്തികളെയും സംഘടനകളെയും സ്ഥാപനങ്ങളെയും ചടങ്ങിൽ മന്ത്രി ആദരിച്ചു. ആന്‍റണി ജോൺ എംഎൽഎ അധ്യക്ഷത വഹിച്ചു. നഗരസഭ ചെയർമാൻ കെ.കെ. ടോമി മുഖ്യാതിഥിയായി. കെഎസ്ആർടിസി എംഡി ഡോ. പി.എസ്. പ്രമോജ് ങ്കർ, പഞ്ചായത്ത് പ്രസിഡന്‍റുമാരായ പി.കെ. ചന്ദ്രശേഖരൻ നായർ, മിനി ഗോപി, ജെസി സാജു, ഷിബു പടപ്പറമ്പത്ത്, എം.പി. ഗോപി, എഫ്ഐടി ചെയർമാൻ ആർ. അനിൽകുമാർ, എംപിഐ ചെയർമാൻ ഇ.കെ. ശിവൻ, മോട്ടോർ തൊഴിലാളി ക്ഷേമനിധി ബോർഡ് ചെയർമാൻ സി.കെ. ഹരികൃഷ്ണൻ, മറ്റ് ജനപ്രതിനിധികൾ, വിവിധ രാഷ്ട്രീയകക്ഷി പ്രതിനിധികൾ, ഉദ്യോഗസ്ഥർ എന്നിവർ പങ്കെടുത്തു

ആരക്കുഴയിൽ യുഡിഎഫിൽ വിള്ളൽ

മൂവാറ്റുപുഴ: ആരക്കുഴ പഞ്ചായത്തിൽ യുഡിഎഫ് മുന്നണി ബന്ധത്തിന് വിള്ളൽ വീഴുന്നു. പഞ്ചായത്തു തെരഞ്ഞെടുപ്പ് അടുത്തപ്പോൾ യുഡിഎഫ് എന്ന പേരു ചേർക്കാതെ ഇൻന്ത്യൻ നാഷണൽ കോൺഗ്രസ് ആരക്കുഴ മണ്ഡലം കേന്ദ്ര തെരഞ്ഞെടുപ്പ് കമ്മിറ്റി ഓഫീസ് എന്ന പേരിൽ ആരക്കുഴ പെരുമ്പല്ലൂരിൽ ഓഫീസ് തുറന്നത് കേരള കോൺഗ്രസിനെ അവഗണിച്ചു കൊണ്ടാണെന്നാണ് ആരോപണം ഉയർന്നിട്ടുള്ളത്. മുന്നണി ബന്ധം ഉപേക്ഷിച്ചു ഒറ്റക്ക് മത്സരിക്കാനുള്ള കോൺഗ്രസ് നീക്കമാണിതെന്നും കേരളാ കോൺഗ്രസ്‌ ഇതിനെതിരേ പ്രതികരിക്കുന്നതായും മുവാറ്റുപുഴ നിയോജക മണ്ഡലം പ്രസിഡന്‍റ് ഷൈസൺ പി. മാങ്ങഴ അറിയിച്ചു. വാർഡ് നറുക്കെടുപ്പ് ഈയാഴ്ച നടക്കാനിരിക്കെ അതിനു ശേഷം മുന്നണി ചർച്ച നടത്തി സീറ്റുകൾ തീരുമാനിക്കാമെന്ന നിലപാടിലായിരുന്നു നേതൃത്വം. എന്നാൽ അതിനു മുമ്പേ കോൺഗ്രസ്‌ കേന്ദ്ര തെരഞ്ഞെടുപ്പ് കമ്മിറ്റി ഓഫീസ് എന്ന പേരിൽ ഓഫീസ് തുറന്നതാണ് കേരള കോൺഗ്രസ് നേതൃത്വത്തെ ചൊടിപ്പിച്ചത്. മുന്നണി മര്യാദ പാലിക്കാൻ കോൺഗ്രസ് തയാറാകുന്നില്ലെങ്കിൽ ഒപ്പം സഹകരിക്കാൻ തയാറുള്ള കോൺഗ്രസ്‌ പ്രവർത്തകരെയും സമാന ചിന്താഗതിയുള്ള ഇതര സംഘടനകളെയും കക്ഷികളെയും ഉൾപ്പെടുത്തി ഐക്യ ജനാധിപത്യ മുന്നണി ശക്തിപ്പെടുത്താൻ കേരളാ കോൺഗ്രസ്‌ പാർട്ടി പ്രതിജ്ഞാബദ്ധമാകുമെന്നും വേണ്ടിവന്നാൽ എല്ലാ വാർഡുകളിലും സ്ഥാനാർഥികളെ മത്സരിപ്പിക്കുമെന്നും ഷൈസൺ പി. മാങ്ങഴ അറിയിച്ചു. എന്നാൽ തെരഞ്ഞെടുപ്പ് പ്രാബല്യത്തിലാകും മുമ്പ് മുന്നൊരുക്കമെന്ന നിലയിൽ പ്രവർത്തകർ സൗകര്യപ്രദമായ ഒരു ഓഫീസ് തുറന്നതാണ് ഇതെന്ന് കോൺഗ്രസ് നേതൃത്വം പറയുന്നു. വാർഡുകൾ പുനർനിർണയിച്ച് സ്ഥാനാർഥി ചർച്ച ആരംഭിക്കുമ്പോഴാണ് മുന്നണി ബന്ധം തീരുമാനമാകൂ എന്നും മുന്നണി വ്യവസ്ഥകൾ പാലിക്കാൻ എല്ലാവർക്കും കടമയുണ്ടെന്നും കോൺഗ്രസ് ആരക്കുഴ മണ്ഡലം പ്രസിഡന്‍റ് പോൾ ലൂയിസ് അറിയിച്ചു. നിലവിലുള്ള ഭരണസമിതിക്കു മുമ്പുള്ള തവണ മുന്നണിക്കു ഭരണം ലഭിച്ചപ്പോൾ രണ്ടര വർഷത്തിൽ പ്രസിഡന്‍റ് സ്ഥാനം കൈമാറാമെന്ന വ്യവസ്ഥയുണ്ടായിരുന്നതായും എന്നാൽ ഇക്കാര്യം പാലിക്കപ്പെടാതെ പോയതും മണ്ഡലം പ്രസിഡന്‍റ് ചൂണ്ടിക്കാണിച്ചു. തുടർന്നു വന്ന തെരഞ്ഞെടുപ്പിൽ പതിമൂന്നിൽ പത്തു സീറ്റും നേടി കോൺഗ്രസ് പഞ്ചായത്തു ഭരണത്തിലെത്തുകയായിരുന്നു.

കെഎസ്ആർടിസി ബസ് സ്റ്റാൻഡ് വിദ്യാർഥികൾ ശുചീകരിച്ചു

ആലുവ: കെഎസ്ആർടിസി ബസ് സ്റ്റാൻഡിൽ ശുചീകരണ പ്രവർത്തനം നടത്തി എടത്തല അൽ അമീൻ കോളേജ് എൻഎസ്എസ് യൂണിറ്റ് വിദ്യാർഥികൾ. ക്ലീനിംഗ് ഡ്രൈവ് പരിപാടി കെഎസ്ആർടിസി സ്റ്റേറ്റ് ഹൗസ്‌കീപ്പിംഗ് കോ ഓർഡിനേറ്റർ ശശികല ഗജ്ജാർ ഉദ്ഘാടനം ചെയ്തു. പ്രോഗ്രാം ഓഫീസർ ഡോ. നിഷാ ജോസഫ് അധ്യക്ഷത വഹിച്ചു. ജനറൽ കൺട്രോളിംഗ് ഇൻസ്‌പെക്ടർ ബിനിൽ ആന്‍റണി, ആർ. പ്രദീപ് കുമാർ, ബിനു സെവിയർ എന്നിവര്‍ സംസാരിച്ചു. എൻഎസ്എസ് സന്നദ്ധപ്രവർത്തകർ ബസ് സ്റ്റാൻഡ് പരിസരം വൃത്തിയാക്കി. മാലിന്യങ്ങൾ വേർതിരിച്ച് ശേഖരിക്കുകയും, പ്ലാസ്റ്റിക് മാലിന്യങ്ങൾ ശരിയായ രീതിയിൽ നീക്കം ചെയ്യുകയും ചെയ്തു. പ്രവർത്തനത്തിനിടെ യാത്രക്കാരെയും വ്യാപാരികളെയും ശുചിത്വത്തിന്‍റെ പ്രാധാന്യം ബോധ്യപ്പെടുത്തുന്ന പ്രചാരണ പ്രവർത്തനങ്ങളും നടത്തി.

വൈഎംസിഎ ഇന്‍റര്‍ സ്‌കൂള്‍ ചെസ് ചാമ്പ്യന്‍ഷിപ്പിന് തുടക്കം

കൊച്ചി: എറണാകുളം വൈഎംസിഎ സൗത്ത് ബ്രാഞ്ചിന്‍റെ ആഭിമുഖ്യത്തില്‍ നടത്തുന്ന ഇന്‍റര്‍ സ്‌കൂള്‍ ചെസ് ചാമ്പ്യന്‍ഷിപ്പ് വൈഎംസിഎ പ്രസിഡന്‍റ് മാത്യു മുണ്ടാട്ട് ഉദ്ഘാടനം ചെയ്തു. സൗത്ത് ബ്രാഞ്ച് ചെയര്‍മാന്‍ സി.എ. ഷോണ്‍ ജെഫ് ക്രിസ്റ്റഫര്‍ അധ്യക്ഷത വഹിച്ചു. എം.ഡി. ആന്‍റണി, ജനറല്‍ സെക്രട്ടറി ആന്‍റോ ജോസഫ്, ബ്രിസ്‌റ്റോ ജെയിംസ് എന്നിവര്‍ സംസാരിച്ചു .

പതിനാലുകാരനെ മർദിച്ച സംഭവം: ഡിവൈഎസ്പി ഓഫീസ് മാർച്ച് നടത്തും

പറവൂർ: ഞാറയ്ക്കൽ മഞ്ഞനക്കാട് മാരാത്തറ സാജുവിന്‍റെ 14 വയസുള്ള മകനെ മർദിച്ച കേസിലെ പ്രതികളെ സംരക്ഷിക്കുന്ന പോലീസ് നിലപാടിൽ പ്രതിഷേധിച്ച് പട്ടികജാതി- വർഗ സംയുക്ത വേദിയുടെ നേതൃത്വത്തിൽ ചൊവ്വാഴ്ച രാവിലെ 10ന് മുനമ്പം ഡിവൈഎസ്പി ഓഫീസ് മാർച്ച് സംഘടിപ്പിക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. കോട്ടയം ജിവി രാജ സ്പോർട്സ് സ്കൂൾ വിദ്യാർഥിയും ഫുട്ബോൾ പ്രതിഭയുമായ സാജുവിന്‍റെ മകനെ ജൂൺ 27നാണ് എട്ടംഗ സംഘം വീട്ടിൽ നിന്ന് വിളിച്ചിറക്കി ക്രൂരമായി മർദിച്ചത്. ജുവനൈൽ ജസ്റ്റിസ് ആക്ടും, പട്ടികജാതി പീഡന നിരോധന നിയമവും ചുമത്താതെ പ്രതികൾക്ക് സ്‌റ്റേഷൻ ജാമ്യം നൽകിയതിനെതിരെ സിപിഎം ഉൾപ്പടെയുള്ള ഇടതുപാർട്ടികളും മറ്റ് സംഘടനകളും സമരരംഗത്തു വന്നിരുന്നു. കേസ് അട്ടിമറിക്കാൻ ശ്രമിക്കുന്ന പോലീസ് നിലപാട്‌ ചൂണ്ടിക്കാട്ടി ജൂലൈയിൽ മുഖ്യമന്ത്രിക്ക് പരാതി നൽകി. ഡിജിപിയുടെ ഉത്തരവിന്‍റെ അടിസ്ഥാനത്തിൽ മുനമ്പം ഡിവൈഎസ്പി എസ് ജയകൃഷ്ണനെ അന്വേഷണ ഉദ്യോഗസ്ഥനായി നിശ്ചയിച്ച് ആഗസ്റ്റ് 18ന് നിശ്ചയിച്ചെങ്കിലും യാതൊരു തരത്തിലുള്ള തുടരന്വേഷണവും ഉണ്ടായിട്ടില്ലെന്ന് ഭാരവാഹികൾ പറഞ്ഞു. സർക്കാർ തീരുമാനം അട്ടിമറിക്കാനാണ് പോലീസിന്‍റെ ശ്രമമെന്നും ഭാരവാഹികൾ കുറ്റപ്പെടുത്തി. പുല്ലംകുളം അംബേദ്കർ പാർക്കിന് മുന്നിൽ നിന്നും പ്രകടനം തുടങ്ങും. കെപിഎംഎസ് സംസ്ഥാന ജനറൽ സെക്രട്ടറി ബൈജു കലാശാല ഉദ്ഘാടനം ചെയ്യും. മറ്റ് സാമുദായിക സാംസ്കാരിക നായകർ സംസാരിക്കുമെന്ന് ജനറൽ കൺവീനർ വി.എസ്. രാധാകൃഷ്ണൻ, വൈസ് ചെയർമാൻ പ്രശോഭ് ഞാവേലി, കൺവീനർ എൻ.ജി. രതീഷ്, കെ.എസ്. ശ്രീരാജ്, എം.കെ. വിജയൻ എന്നിവർ പത്രസമ്മേളനത്തിൽ പങ്കെടുത്തു.

യൂത്ത് കോൺഗ്രസ് ദേശീയപാത ഉപരോധിച്ചു

ആലുവ: പേരാമ്പ്രയിൽ ഷാഫി പറമ്പിൽ എംപിയെ കൈയേറ്റം ചെയ്തതിൽ പ്രതിഷേധിച്ച് ആലുവയിൽ ഹൈവേ ഉപരോധിച്ച് യൂത്ത് കോൺഗ്രസ് പ്രതിഷേധം. ടയർ കത്തിച്ച് പ്രതിഷേധിക്കാനുള്ള പ്രവർത്തകരുടെ ശ്രമം പോലീസ് തടയാൻ ശ്രമിച്ചത് നേരിയ സംഘർഷത്തിനിടയായി. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ലിന്‍റോ പി. ആന്‍റു പ്രതിഷേധം ഉദ്ഘാടനം ചെയ്തു. യൂത്ത് കോൺഗ്രസ് ആലുവ നിയോജക മണ്ഡലം പ്രസിഡന്‍റ് പി.എച്ച് അസ്ലം അധ്യക്ഷത വഹിച്ചു.

ലോകമാനസികാരോഗ്യ ദിനാചരണം നടത്തി

കൊച്ചി : എറണാകുളം സൈക്യാട്രിക് സൊസൈറ്റി (ഇപിഎസ്), ഇന്ത്യന്‍ സൈക്യാട്രിക് സൊസൈറ്റി (ഐപിഎസ്) കേരള ഘടകം, ഇന്ത്യന്‍ മെഡിക്കല്‍ അസോസിയേഷന്‍ (ഐഎംഎ) സംസ്ഥാന ശാഖ എന്നിവരുടെ സഹകരണത്തോടെ ലോകമാനസികാരോഗ്യ ദിനാചരണം നടത്തി. കലൂര്‍ ഐഎംഎ ഹൗസില്‍ നടന്ന ചടങ്ങ് കോട്ടയം മെഡിക്കല്‍ കോളജ് പ്രിന്‍സിപ്പൽ ഡോ. വര്‍ഗീസ് പി. പുന്നൂസ് ഉദ്ഘാടനം ചെയ്തു. ഡോ. അനൂപ് വിന്‍സെന്‍റ് അധ്യക്ഷത വഹിച്ചു. ഐഎംഎ സംസ്ഥാന പ്രസിഡന്‍റ് ഡോ. കെ.എ. ശ്രീവിലാസന്‍ മുഖ്യ പ്രഭാഷണം നടത്തി.

ബ്ലൈൻഡ് സ്കൂൾ ബോയ്സ് ഹോസ്റ്റൽ പ്രവർത്തനമാരംഭിച്ചു

ആലുവ: കേരള ബ്ലൈൻഡ് സ്കൂൾ സൊസൈറ്റിയുടെ എംപ്ലോയബിലിറ്റി സെന്‍റർ ബോയ്സ് ഹോസ്റ്റൽ പ്രവർത്തനമാരംഭിച്ചു. സിന്തൈറ്റ് ഗ്രൂപ്പ് മാനേജിംഗ് ഡയറക്ടർ അജു ജേക്കബ് ഉദ്ഘാടനം ചെയ്തു. ആലുവ ഫെലോഷിപ്പ് ഹൗസ് റസിഡന്‍റ് മാനേജർ ഫാ. ജോൺ കെ. ജേക്കബ് കൂദാശ കർമം നിർവഹിച്ചു. കേരള ബ്ലൈൻഡ് സ്കൂൾ സൊസൈറ്റി പ്രസിഡന്‍റ് രാജു വർഗീസ്, ഓർബിക് കമ്മിറ്റി ചെയർമാൻ പി.ടി. മാത്യു, പ്രഫ. ഡോ. തോമസ് മാത്യു, ഹെഡ്മിസ്ട്രസ് ജിജി വർഗീസ്, പവിത്രൻ നായർ എന്നിവർ പ്രസംഗിച്ചു. സിന്തൈറ്റ് ഗ്രൂപ്പ് 35 ലക്ഷം രൂപ ചെലവഴിച്ചാണ് ഹോസ്റ്റൽ നിർമിച്ചത്. കാഴ്ചപരമായ വെല്ലുവിളി നേരിടുന്ന ഉദ്യോഗാർഥികൾക്ക് കംപ്യൂട്ടർ, ഇംഗ്ലീഷ് ആശയ വിനിമയം, മൊബിലിറ്റി തുടങ്ങി തൊഴിൽ വൈദഗ്ദ്യ പരിശീലനം നൽകി വരുന്ന സ്ഥാപനമാണ് ഓർബിക് എനേബിൾ ഇന്ത്യ പരിവർത്തൻ സെന്‍റർ. താമസം, ഭക്ഷണം, പരിശീലനം പൂർണമായും സൗജന്യമാണ്. കംപ്യൂട്ടർ അധിഷ്ഠിത പരിശീലനത്തിന്‍റെ ഓൺലൈൻ കോഴ്സുകളും ഓഫ് ലൈൻ കോഴ്സുകളും ഇവിടെ നടക്കുന്നു. ഇവിടെ നിന്നും പരിശീലനം നേടിയ വിദ്യാർത്ഥികൾ വിവിധ കമ്പനികളിൽ പ്രവർത്തിച്ചു വരുന്നു.

ആതിര ജ്വല്ലറി തട്ടിപ്പ്: ഒരു കേസ് കൂടി രജിസ്റ്റർ ചെയ്തു

വൈപ്പിൻ : ആതിര ജ്വല്ലറി തട്ടിപ്പ് കേസിൽ ജ്വല്ലറി ഉടമ പള്ളിപ്പുറം രണ്ടുതൈക്കൽ ആന്‍റണിക്കെതിരെ മുനമ്പം പോലീസ് പുതിയ ഒരു കേസ് കൂടി ചാർജ് ചെയ്തു. നായരമ്പലം സ്വദേശി ജോർജ് ഞാറക്കൽ മജിസ്ട്രേറ്റ് കോടതിയിൽ നൽകിയ സ്വകാര്യ ഹർജിയിലെ ഉത്തരവിന്‍റെ അടിസ്ഥാനത്തിലാണ് പോലീസ് പുതിയ കേസെടുത്തിട്ടുള്ളത്. 2023 ൽ ഹർജിക്കാരന്‍റെ മകളുടെയും ഭാര്യയുടെയും ഏഴ് പവനോളം വരുന്ന സ്വർണാഭരണങ്ങൾ ജ്വല്ലറിയുടെ ഗോൾഡ് ബെനിഫിറ്റ് സ്കീമിൽ നിക്ഷേപമായി സ്വീകരിക്കുകയും സർട്ടിഫിക്കറ്റ് നൽകുകയും ചെയ്തിരുന്നു. എന്നാൽ കാലാവധി കഴിഞ്ഞിട്ടും ആഭരണങ്ങൾ തിരികെ തരാതെ വന്നതിനെ തുടർന്നാണ് നിക്ഷേപകൻ കോടതിയെ സമീപിച്ചതും പോലീസ് കേസടുത്തതും. ഇതോടെ എറണാകുളം സെൻട്രൽ പോലീസ് സ്റ്റേഷൻ കൂടാതെ ആറിൽപരം കേസുകളാണ് ആതിര ജ്വല്ലറിയുടെ തട്ടിപ്പുമായി ബന്ധപ്പെട്ട് മുനമ്പം പോലീസ് രജിസ്റ്റർ ചെയ്തിട്ടുള്ളതെന്ന് പോലീസ് അറിയിച്ചു.

ജാതിക്കൃഷി നാശം: മൊബൈല്‍ മണ്ണ് പരിശോധന ക്ലിനിക്കിന്‍റെ സേവനം ലഭ്യമാക്കണമെന്ന്

അങ്കമാലി: അതിവര്‍ഷം മൂലം വ്യാപകമായി നാശം സംഭവിച്ച ജാതി കൃഷിത്തോട്ടങ്ങളിലെ മണ്ണ് പരിശോധിക്കുന്നതിന് അങ്കമാലി നിയോജകമണ്ഡലത്തിലെ ഒന്പതു കൃഷിഭവനുകളിലും കൃഷിവകുപ്പിന്‍റെ മൊബൈല്‍ മണ്ണ് പരിശോധന ക്ലിനിക്കിന്‍റെ സേവനം സൗജന്യമായി ലഭ്യമാക്കണമെന്ന് ആനപ്പാറ കേന്ദ്രമായി പ്രവര്‍ത്തിക്കുന്ന കൊച്ചിന്‍ നട്ട് മെഗ് ഫാര്‍മേഴ്‌സ് പ്രൊഡ്യൂസര്‍ കമ്പനി പൊതുയോഗം സര്‍ക്കാരിനോടാവശ്യപ്പെട്ടു. അതിവര്‍ഷം മൂലം മണ്ണിന്‍റെ പോഷകഘടനയില്‍ ഉണ്ടായിട്ടുള്ള ശോഷണം കണ്ടെത്തി അതിനനുസൃതമായ പ്രതിരോധ നടപടികള്‍ ചെയ്താല്‍ മാത്രമേ അവശേഷിക്കുന്ന ജാതിമരങ്ങളെ സംരക്ഷിക്കാന്‍ കഴിയുവെന്ന് യോഗം വ്യക്തമാക്കി. ആനപ്പാറ അഗ്രിക്കള്‍ച്ചര്‍ ഇംപ്രൂവ്മെന്‍റ് സഹകരണസംഘം ഹാളില്‍ നടന്നയോഗം തുറവൂര്‍ ഗ്രാമപഞ്ചായത്ത് പ്രസിഡന്‍റ് ജെസി ജോയി ഉദ്ഘാടനം ചെയ്തു. കമ്പനി ചെയര്‍മാന്‍ എം. ടി. ജോര്‍ജ് അധ്യക്ഷത വഹിച്ചു. ജാതിക്കൃഷി രോഗനിര്‍ണയവും പരിഹാര മാര്‍ഗങ്ങളും എന്ന വിഷയത്തെക്കുറിച്ച് റിട്ട. കൃഷി അസിസ്റ്റന്‍റ് ഡയറക്ടര്‍ ബിജി മോന്‍ സഖറിയ ക്ലാസെടുത്തു. കാര്‍ഷിക മേഖലയില്‍ മികവ് പ്രകടിപ്പിച്ച കെ.ഒ. പൗലോസ്, കെ.പി. ദേവസി, പി.എം. വര്‍ഗീസ് എന്നിവരെ ആദരിച്ചു. ജോര്‍ജ് തോമസ്, ടോം ജോസഫ്, ജോസ് മാടന്‍, പി. വി. പൗലോസ്, എം. എം. ജോയ്‌സണ്‍ വര്‍ഗീസ് പുളിയ്ക്കല്‍, ജോര്‍ജ് ജോസഫ്, സി. കെ. വര്‍ഗീസ്, കെ. പി. ദേവസി എന്നിവര്‍ പ്രസംഗിച്ചു.

പഞ്ചായത്ത് മെമ്പറെ അയോഗ്യനാക്കാൻ കത്ത് നൽകി

കിഴക്കമ്പലം: പഞ്ചായത്ത് മെമ്പറെ അയോഗ്യനാക്കാൻ പഞ്ചായത്ത് സെക്രട്ടറി നോട്ടീസ് നൽകി. കുന്നത്തുനാട് പഞ്ചായത്ത് പെരിങ്ങാല സൗത്ത് വാർഡ് അംഗം സിപിഎമ്മിന്‍റെ നിസാർ ഇബ്രാഹിം തുടർച്ചയായി മൂന്നു മാസം പഞ്ചായത്ത് കമ്മിറ്റിയിൽ ഹാജരാകാതെയിരുന്നതിനാൽ അയോഗ്യനായതായി ഇപ്പോഴത്തെ സെക്രട്ടറി ആരതി ബാബു കത്ത് നൽകി. 2023 ലും തുടർച്ചയായി പഞ്ചായത്ത് കമ്മിറ്റികളിൽ ഹാജരാകരുതിരുന്നതിന് നിസാർ ഇബ്രാഹിം അയോഗ്യനായിരുന്നു.

അങ്കമാലിയിലെ ശ്മശാന നിർമാണത്തിനെതിരേ പ്രതിഷേധവുമായി സംയുക്ത സമരസമിതി

അങ്കമാലി: ജനസാന്ദ്രതയുള്ള മുനിസിപ്പൽ ബസ് സ്റ്റാൻഡ്, റെയിൽവേ സ്റ്റേഷൻ എന്നിവയോട് ചേർന്നുള്ള സ്ഥലത്ത് നഗരസഭ ആരംഭിക്കുവാനിരിക്കുന്ന പൊതുശ്മശാനം അവിടെനിന്നു മാറ്റിസ്ഥാപിക്കണമെന്നാവശ്യപ്പെട്ട് റെയിൽവേ സ്റ്റേഷൻ നഗർ റസിഡന്‍റ്സ് അസോസിയേഷനും പ്രൈവറ്റ് ബസ് ഓപ്പറേറ്റേഴ്സ് അസോസിയേഷനും അങ്കമാലി മർച്ചന്‍റ്സ് യൂണിയനും സംയുക്തമായി സായാഹ്ന ധർണ സംഘടിപ്പിച്ചു. റെയിൽവേ സ്റ്റേഷൻ ജംഗ്ഷനിൽ റസിഡന്‍റ്സ് അസോസിയേഷൻ പ്രസിഡന്‍റ് റിന്‍റോ ഡേവിസിന്‍റെ അധ്യക്ഷതയിൽ കൂടിയ പ്രതിഷേധയോഗം കുസാറ്റ് റിസർച്ചർ ഡോ. ജി.ഡി. മാർട്ടിൻ ഉദ്ഘാടനം ചെയ്തു. പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ സെക്രട്ടറി ബി.ഒ .ഡേവിസ്, മർച്ചന്‍റ്സ് യൂണിയൻ പ്രസിഡന്‍റ് ആന്‍റു മാത്യു, ജിൻസി ജിമ്മി, പി.കെ. പുന്നൻ, സി.വി. മാർട്ടിൻ, ജിമ്മി ജോൺ, ജിബി വർഗീസ് എന്നിവർ പ്രസംഗിച്ചു. ജനവാസം താരതമേന്യ കുറഞ്ഞ സ്ഥലങ്ങൾ വേറെ ഉണ്ടെന്നിരിക്കെ നഗരസഭ ഇത്രയും പ്രാധാന്യമേറിയ സ്ഥലത്ത് തന്നെ കുറഞ്ഞ വിസ്തൃതിയിൽ ശ്മശാനം സ്ഥാപിക്കാൻ എടുത്ത തീരുമാനത്തിനെതിരെ ശക്തമായ നിലപാടുമായി മുന്നോട്ടുപോകുമെന്ന് സമരസമിതി നേതാക്കൾ വ്യക്തമാക്കി.

ചാവറയിൽ "ചക്കപ്പറമ്പിലെ വിശേഷങ്ങള്‍' നാടകാവതരണം നടത്തി

കൊച്ചി: ചാവറ കള്‍ച്ചറല്‍ സെന്‍ററിന്‍റെയും ചാവറ ഫിലിം സ്‌കൂളിന്‍റെയും ആഭിമുഖ്യത്തില്‍ വില്ലുവണ്ടി തിയേറ്റേഴ്‌സ് മൂവ്‌മെന്‍റ് ചക്കപ്പറമ്പിലെ വിശേഷങ്ങള്‍ നാടകം അവതരിപ്പിച്ചു. ചാവറ കള്‍ച്ചറല്‍ സെന്‍റര്‍ തീയറ്റര്‍ ഹാളില്‍ നടന്ന നാടകത്തില്‍ സാജു നവോദയ (പാഷാണം ഷാജി) മുഖ്യ കഥാപാത്രമായിരുന്നു. സമകാലിക സമൂഹത്തില്‍ ഏറെ പ്രസക്തമായ വിഷയമാണ് നാടകത്തിലൂടെ സംവിധായകന്‍ വിപിന്‍ എന്‍. വേലായുധന്‍ അവതരിപ്പിച്ചത്. രശ്മി സാജു, ഷിബുരാജ് എരമല്ലൂര്‍, ആതിര ഉണ്ണി, പുഷ്‌കരന്‍, നീതു വിപിന്‍, വിനീഷ്, ജയകൃഷ്ണന്‍, മനോജ് എന്നിവര്‍ അഭിനയിച്ചു. അഭിനേതാക്കളുടെ മികവും ലൈവ് സംഗീതവും ഏറെ ശ്രദ്ധേയമായി. അമ്മ പ്രസിഡന്‍റ് ശ്വേത മേനോന്‍, സെക്രട്ടറി കുക്കു പരമേശ്വരന്‍, നടന്‍ ടിനി ടോം, സംവിധായകന്‍ നാദിര്‍ഷ, കെ.എസ്. പ്രസാദ്, കലാഭവന്‍ ഷാജോണ്‍, പയ്യന്നൂര്‍ മുരളി, സന്തോഷ് കീഴാറ്റൂര്‍, വിപിന്‍ ജോര്‍ജ്, മണികണ്ഠന്‍, സംവിധായകന്‍ പ്രജേഷ് സെന്‍, ചാവറ കള്‍ച്ചറല്‍ സെന്‍റര്‍ ഡയറക്ടര്‍ ഫാ. അനില്‍ ഫിലിപ്പ് എന്നിവര്‍ പ്രസംഗിച്ചു.

ടിങ്കർ ഫെസ്റ്റ് നാലാം എഡിഷൻ സംഘടിപ്പിച്ചു

വരാപ്പുഴ: എറണാകുളം-അങ്കമാലി അതിരൂപത കോർപ്പറേറ്റ് വിദ്യാഭ്യാസ ഏജൻസിയുടെ കീഴിലുള്ള സ്കൂളുകളെ പങ്കെടുപ്പിച്ച് സംഘ‌ടിപ്പിച്ച ടിങ്കർഫെസ്റ്റ്-2025ന് മേലൂർ സെന്‍റ് ജോസഫ്സ് എച്ച്എസ്എസ് ആതിഥേയത്വം വഹിച്ചു. റീച്ചിംഗ് ഔട്ട് ക്വാളിറ്റി ലൈഫ് ത്രൂ സസ്റ്റൈനബിൾ ഡെവലപ്മെന്‍റ് എന്ന വിശാലമായ വിഷയത്തെ അടിസ്ഥാനപ്പെടുത്തി തൃശൂർ, എറണാകുളം, ആലപ്പുഴ ,കോട്ടയം എന്നീ നാല് ജില്ലകളിൽ നിന്നുള്ള വിദ്യാർഥികൾപ്രോജക്ടുകൾ അവതരിപ്പിച്ചു. വെബ് ആൻഡ് ക്രാഫ്റ്റ്സ് കമ്പനി സിഇഒ ജിലു ജോസഫ് ഉദ്ഘാടനം നിർവഹിച്ചു. കോർപറേറ്റ് മാനേജർ ഫാ. തോമസ് നങ്ങേലിമാലിൽ അധ്യക്ഷത വഹിച്ചു. പ്രിൻസിപ്പൽ ഡോ. മേഴ്സി തോമസ് , മാനേജർ ഫാ. ജോസ് പൊള്ളയിൽ, അസിസ്റ്റന്‍റ് കോർപറേറ്റ് മാനേജർ ഫാ. വർഗീസ് പാലാട്ടി, ഹെഡ്മാസ്റ്റർ സോണി ജോസഫ് ,പിടിഎ പ്രസിഡന്‍റ് ടി. ബെന്നി, എ ടി എൽ കോ൪ഡിനേറ്റർ ഡോ. പി. ആശ, ജയ്റോസ് പാപ്പച്ചൻ എന്നിവർ ആശംസകൾ അർപ്പിച്ചു സംസാരിച്ചു . വിദ്യാർഥികൾ അതിനൂതന സാങ്കേതികവിദ്യയുടെ സഹായത്തോടെ നൂതനാശയങ്ങൾ അവതരിപ്പിക്കുന്ന ഫെസ്റ്റിന് എവറോളിംഗ് ട്രോഫികൾ പ്രഫ . ഫ്രാൻസിസ് ജോസഫ് സമ്മാനിച്ചു. വിവിധ വിഭാഗങ്ങളിലായി നൂറോളം വിദ്യാർഥികൾ മാറ്റുരച്ച ഫെസ്റ്റിൽ യു പി വിഭാഗത്തിൽ തൃക്കാക്കര കാ൪ഡിനൽ സ്കൂൾ, ഹൈസ്കൂൾ വിഭാഗത്തിൽ കലൂർ സെന്‍റ് അഗസ്റ്റിൻ സ്കൂൾ, ഹയ൪ സെക്കൻഡറി വിഭാഗത്തിൽ പുത്തൻ പള്ളി സെന്‍റ് ജോ൪ജ് സ്കൂൾ എന്നിവ൪ ഒന്നാം സ്ഥാനം നേടി. ഒന്നും രണ്ടും മൂന്നും സ്ഥാനം നേടിയവ൪ക്ക് കാഷ് അവാർഡും മെമെന്‍റോയും സർട്ടിഫിക്കറ്റും നല്കി.

സംഘാടന മികവിൽ തിളങ്ങി തേവര എസ്എച്ച്

കൊച്ചി: മികവടയാളങ്ങളും പുതുമകളും സിബിഎസ്എ കൊച്ചി മെട്രോ സഹോദയ കലോത്സവം കൊടിയിറങ്ങുമ്പോൾ ആതിഥേയരായ തേവര സേക്രഡ് ഹാർട്ട്‌ സിഎംഐ പബ്ലിക് സ്കൂളിനും തിളക്കം. അർധരാത്രിയോളം മത്സരങ്ങൾ നീണ്ടു പോവുന്ന കലോത്സവ പതിവ് തെറ്റിച്ച്, ചിട്ടയോടെയും തർക്കങ്ങളില്ലാതെയും, വിരുന്നെത്തിയവർക്ക് ഹൃദ്യമായി സ്വീകരണമൊരുക്കിയും കലോത്സവം പരിസമാപ്തിയിലെത്തിച്ചതിന്‍റെ അഭിമാന നേട്ടത്തിലാണ് സ്കൂൾ. 2003ൽ സ്ഥാപിതമായ തേവര സ്കൂൾ ആദ്യമായാണ് ഒരു സഹോദയ കലോത്സവത്തിന് വേദിയാവുന്നത്. വിദ്യാർഥികളും അധ്യാപകരും രക്ഷാകർത്താക്കളും പരിശീലകരുമായി പതിനായിരത്തിലധികം പേർ പങ്കെടുക്കുന്ന കലാ മാമാങ്കത്തിന് ആതിഥേയത്വം വഹിക്കാൻ കൊച്ചി മെട്രോ സഹോദയ നേതൃത്വം ആവശ്യപ്പെട്ടപ്പോൾ സ്കൂൾ പ്രിൻസിപ്പൽ റവ. ഡോ. വർഗീസ് കാച്ചപ്പിള്ളി അതേറ്റെടുക്കുകയായിരുന്നു. കഴിഞ്ഞ രണ്ടര വർഷം കൊണ്ട് സ്കൂളിൽ അദ്ദേഹം അവതരിപ്പിച്ച വലിയ മാറ്റങ്ങളുടെ തുടർച്ചയായിരുന്നു മികവാർന്ന കലോത്സവത്തിന്‍റെ ആതിഥേയത്വവുമെന്ന് അധ്യാപകർ പറയുന്നു.

കൊച്ചി-മുസിരിസ് ബിനാലെ: 20 രാജ്യങ്ങളില്‍നിന്നു പ്രതിനിധികളെത്തും

കൊച്ചി: കൊച്ചി ബിനാലെ ഫൗണ്ടേഷന്‍ നടത്തുന്ന കൊച്ചി-മുസിരിസ് ബിനാലെ ആറാം ലക്കത്തിൽ 20 രാജ്യങ്ങളില്‍ നിന്നു കലാകാരന്മാരും കൂട്ടായ്മകളും പങ്കെടുക്കും. ഡിസംബര്‍ 12 ന് ആരംഭിച്ച് മാര്‍ച്ച് 31 ന് അവസാനിക്കുന്ന 110 ദിവസം നീണ്ടു നില്‍ക്കുന്നതാണ് ഇക്കുറി ബിനാലെ. അബുൽ ഹിഷാം, ആദിത്യ പുത്തൂർ, അഡ്രിയാൻ വില്ലാർ റോജാസ്, പി.എൻ. അലി അക്ബർ , ആന്യ ഇബ്ഷ്- ഗ്രുന്‍റാലെർ, ആരതി കദം, അഥിന കൂമ്പറൂളി, ബാനി അബിദി-അനുപമ കുണ്ഡൂ, ഭാഷ ചക്രബർത്തി, ബിരാജ് ദോഡിയ, ബിരേന്ദർ യാദവ്, സിന്ധ്യ മാർസെല്‍, ധീരജ് റാഭ, ദിമ സ്രൂജി-പിയേറോ തോമസോണി എന്നിവർ ബിനാലെയ്ക്കെത്തുന്ന കലാപ്രവർത്തകരുടെ പട്ടികയിലുണ്ട്. പ്രശസ്ത കലാകാരനായ നിഖില്‍ ചോപ്രയും അദ്ദേഹം ഉള്‍പ്പെടുന്ന എച്ച്എച്ച് ആര്‍ട്ട് സ്പേസസ്‌ ഗോവയുമാണ് ബിനാലെ ആറാം ലക്കം ക്യൂറേറ്റ് ചെയ്യുന്നത്. ദക്ഷിണേഷ്യയിലെ ഏറ്റവും വലിയ സമകാലീന കലാമേളയാണ് കൊച്ചി-മുസിരിസ് ബിനാലെ. ഫോര്‍ ദി ടൈം ബീയിംഗ് എന്നതാണ് ആറാം ലക്കത്തിന്‍റെ പ്രമേയം.

വ്യാജ വിമാന ടിക്കറ്റ്: യാത്രക്കാരൻ പിടിയിൽ

നെടുമ്പാശേരി : കൊച്ചി അന്താരാഷ്ട്ര വിമാനത്താവളം വഴി വ്യാജ ടിക്കറ്റുമായി കുവൈത്തിലേക്ക് പോകാനെത്തിയ യാത്രക്കാരനെ വിമാന താവളത്തിലെ പരിശോധന വിഭാഗം പിടികൂടി. ഇന്നലെരാവിലെ എട്ടിനുള്ള കുവൈത്ത് എയർവേയ്സ് വിമാനത്തിൽ പോകാനെത്തിയ എറണാകുളം ചെല്ലാനം സ്വദേശി ജീമോൻ എന്ന 26 കാരനെയാണ് പിടികൂടിയത്. വ്യാജ ടിക്കറ്റ് കാണിച്ച് കൊച്ചി അന്താരാഷ്ട്ര വിമാനത്താവള ടെർമിനലിനകത്തു കയറിയതിനു ശേഷം പരിശോധനയ്ക്ക് വിധേയമായപ്പോഴാണ് യാത്രാ ടിക്കറ്റ് വ്യാജമാണെന്ന് അധികൃതർ അറിഞ്ഞത് . തനിക്ക് മറ്റൊരാൾ എടുത്തു തന്നതാണ് ഈ ടിക്കറ്റെന്ന് ഇയാൾ മൊഴിനൽകിയിട്ടുണ്ട്. ഇയാളെ നെടുമ്പാശേരി പോലീസിന് കൈമാറി .

സിബിഎസ്ഇ കൊച്ചി മെട്രോ സഹോദയ കലോത്സവം സമാപിച്ചു : തേവക്കല്‍ വിദ്യോദയ സ്‌കൂള്‍ ഓവറോള്‍ ചാമ്പ്യന്മാര്‍

കൊച്ചി: തേവര സേക്രഡ് ഹാര്‍ട്ട് സിഎംഐ പബ്ലിക് സ്‌കൂളില്‍ സംഘടിപ്പിച്ച സിബിഎസ്ഇ കൊച്ചി മെട്രോ സഹോദയ കലോത്സവം സമാപിച്ചു. 818 പോയിന്‍റ് നേടി തേവക്കല്‍ വിദ്യോദയ സ്‌കൂള്‍ ഓവറോള്‍ ചാമ്പ്യന്മാരായി. അങ്കമാലി വിശ്വജ്യോതി പബ്ലിക് സ്‌കൂള്‍ 774 പോയിന്‍റോടെയും, കാലടി ശ്രീശാരദ വിദ്യാലയ 754 പോയിന്‍റോടെയും രണ്ടും മൂന്നും സ്ഥാനങ്ങള്‍ നേടി. സമാപന സമ്മേളനത്തില്‍ സിനിമാ താരങ്ങളായ ഷറഫുദീനും മീനാക്ഷി മാധവിയും വിജയികള്‍ക്ക് ട്രോഫികള്‍ സമ്മാനിച്ചു. എസ്എച്ച് ഇന്‍സ്റ്റിറ്റ്യൂഷന്‍സ് മാനേജറും തേവര സേക്രഡ് ഹാര്‍ട്ട് സിഎംഐ പബ്ലിക് സ്‌കൂള്‍ പ്രിന്‍സിപ്പലുമായ റവ. ഡോ. വര്‍ഗീസ് കാച്ചപ്പിള്ളി, കൊച്ചി മെട്രോ സഹോദയ പ്രസിഡന്‍റും കേരള മാനേജ്‌മെന്‍റ് അസോസിയേഷന്‍ സ്ഥാപക പ്രസിഡന്‍റുമായ അഡ്വ. ടി.പി.എം. ഇബ്രാഹിം ഖാന്‍, കേരള സഹോദയ കോണ്‍ഫെഡറേഷന്‍ ജനറല്‍ സെക്രട്ടറി ഡോ. ദീപ ചന്ദ്രന്‍, കൊച്ചി മെട്രോ സഹോദയ ജനറല്‍ സെക്രട്ടറി ജുബി പോള്‍, വി.പി. പ്രതീത, എം.ഐ. ജയലക്ഷ്മി, സൂസന്‍ ബാരിദ്, കെ.പി. ഡിന്‍റോ, കവിത അലക്‌സാണ്ടര്‍ എന്നിവര്‍ സമാപന ചടങ്ങില്‍ പങ്കെടുത്തു. 65 സ്‌കൂളുകളില്‍ നിന്നായി 4,400ലധികം മത്സരാര്‍ഥികളും, അധ്യാപകരും രക്ഷാകര്‍ത്താക്കളുമായി പതിനായിരത്തിലധികം ആളുകളും ആറ് ദിവസങ്ങളിലായി നടന്ന കലോത്സവത്തില്‍ പങ്കെടുത്തു.

മുനമ്പം വിഷയം : യുഡിഎഫ് നിലപാട് ശരിയെന്ന് തെളിഞ്ഞെന്ന് മുഹമ്മദ് ഷിയാസ്

കൊച്ചി: സമൂഹത്തില്‍ അരക്ഷിതാവസ്ഥ സൃഷ്ടിച്ച് അതില്‍ നിന്ന് രാഷ്ട്രീയ ലാഭം ഉണ്ടാക്കാനുള്ള സിപിഎം-ബിജെപി ശ്രമങ്ങളാണ് മുനമ്പത്തേത് വഖഫ് ഭൂമിയല്ലെന്ന ഹൈക്കോടതി വിധിയിലൂടെ ഇല്ലാതായതെന്ന് ഡിസിസി പ്രസിഡന്‍റ് മുഹമ്മദ് ഷിയാസ്. മുനമ്പം വഖഫ് ഭൂമിയല്ലെന്ന് തുടക്കം മുതല്‍ നിലപാടെടുത്തത് കോണ്‍ഗ്രസും യുഡിഎഫുമാണ്. മുനമ്പത്ത് നിന്ന് ഒരാളെയും ഇറക്കി വിടില്ലെന്നും കോണ്‍ഗ്രസ് ഉറപ്പും നല്‍കിയിരുന്നു. എന്നാല്‍ ഇരു സമുദായങ്ങളെയും തമ്മില്‍ തല്ലിച്ചു രാഷ്ട്രീയ ലാഭം ഉണ്ടാക്കാനാണ് സിപിഎമ്മും ബിജെപിയും ശ്രമിച്ചത്. എരിതീയില്‍ എണ്ണയൊഴിക്കുന്ന നിലപാടാണ് സംസ്ഥാന സര്‍ക്കാര്‍ സ്വീകരിച്ചത്. ബിജെപിയാകട്ടെ കേന്ദ്ര ഭരണം മറയാക്കി മുനമ്പത്തെ സാധാരണക്കാരായ ജനങ്ങളെ വഞ്ചിച്ചു. ഹൈക്കോടതി വിധിയോടെ കോണ്‍ഗ്രസും യുഡിഎഫും തുടക്കം സ്വീകരിച്ച നിലപാട് ശരിയാണെന്ന് തെളിഞ്ഞതായും ഷിയാസ് പറഞ്ഞു. മുനമ്പം നിവാസികളുടെ റവന്യു അവകാശങ്ങൾ പുനസ്ഥാപിക്കണം: ടോമി കെ. തോമസ് കൊച്ചി: മുനമ്പം തർക്കഭൂമി സംബന്ധിച്ച ഹൈക്കോടതി വിധിയുടെ പശ്ചാത്തലത്തിൽ മുനമ്പം നിവാസികളുടെ തടഞ്ഞുവച്ചിരിക്കുന്ന എല്ലാ റവന്യു അവകാശങ്ങളും എത്രയും വേഗം പുനസ്ഥാപിക്കണമെന്ന് കേരള കോൺഗ്രസ്-എം ജനറൽ സെക്രട്ടറി ടോമി കെ. തോമസ് ആവശ്യപ്പെട്ടു. ആവശ്യമായ പരിശോധനയോ സർക്കാർ ഉത്തരവോ ഇല്ലാതെയാണ് റവന്യു അധികൃതർ റവന്യു അവകാശങ്ങൾ തടസപ്പെടുത്തിയത്. ഹൈക്കോടതി വിധി ഉണ്ടായ സാഹചര്യത്തിൽ വർഷങ്ങളായി ദുരിതം പേറുന്ന മുനമ്പം ജനതയുടെ കണ്ണീർ തുടയ്ക്കാനാണ് നടപടി ഉണ്ടാവേണ്ടതെന്നും അദ്ദേഹം പറഞ്ഞു.

ജില്ലാകോടതി സമുച്ചയത്തിന് ബോംബ് ഭീഷണി; പോലീസ് അന്വേഷണം ആരംഭിച്ചു

കൊച്ചി: എറണാകുളം ജില്ലാകോടതി സമുച്ചയത്തിന് ബോംബ് ഭീഷണി ഉണ്ടായ സംഭവത്തില്‍ എറണാകുളം സെന്‍ട്രല്‍ പോലീസ് കേസെടുത്ത് അന്വേഷണം ആരംഭിച്ചു. വ്യാജ സന്ദേശത്തിനു പിന്നിലുള്ളവരെ കണ്ടെത്താൻ പോലീസ് അന്വേഷണം ഊര്‍ജിതമാക്കി. ജില്ലാ കോടതിയുടെ ഔദ്യോഗിക മെയിലില്‍ വെള്ളിയാഴ്ച പുലര്‍ച്ചെ 4.43നാണ് കോടതിയില്‍ ബോംബ് സ്ഥാപിച്ചിട്ടുണ്ടെന്നും സ്‌ഫോടനം നടക്കുമെന്നും സന്ദേശമെത്തിയത്. ഉച്ചയ്ക്ക് സന്ദേശം ശ്രദ്ധയില്‍പ്പെട്ടയുടന്‍ ജില്ലാ ജഡ്ജിയുടെ ഓഫീസ് എറണാകുളം സെന്‍ട്രല്‍ പോലീസില്‍ വിവരം അറിയിക്കുകയായിരുന്നു. തുടര്‍ന്ന് പോലീസ് സംഘവും ബോംബ് സ്‌ക്വാഡും ഡോഗ് സ്‌ക്വാഡും രണ്ട് മണിക്കൂര്‍ കോടതി കെട്ടിടത്തില്‍ പരിശോധന നടത്തിയെങ്കിലും ബോംബ് കണ്ടെത്താനായില്ല. ബോംബ് ഭീഷണിയെ തുടര്‍ന്ന് സമുച്ചയത്തിലെ കോടതികളുടെ പ്രവര്‍ത്തനം രണ്ട് മണിക്കൂറിലേറെ തടസപ്പെട്ടു. സ്‌ഫോടന സാധ്യതയില്ലെന്ന് ജില്ലാ ജഡ്ജിയെ പോലീസ് അറിയിച്ചശേഷം വൈകിട്ട് മൂന്നോടെയായിരുന്നു കോടതികളുടെ പ്രവര്‍ത്തനം പുനരാരംഭിച്ചത്.

വാട്ടര്‍ മെട്രോ പശ്ചിമകൊച്ചിയുടെ മുഖച്ഛായ മാറ്റും: മുഖ്യമന്ത്രി

കൊച്ചി: മട്ടാഞ്ചേരിയിലേക്ക് വാട്ടര്‍ മെട്രോ എത്തുന്നതോടെ പശ്ചിമ കൊച്ചിയുടെ മുഖഛായ വലിയ തോതില്‍ മാറുമെന്ന് മുഖ്യമന്ത്രി പിണറായി വിജയന്‍. മട്ടാഞ്ചേരി, വെല്ലിംഗ്ടണ്‍ ഐലൻഡ് വാട്ടര്‍ മെട്രോ ടെര്‍മിനലുകളുടെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. കേരളത്തിന്‍റെ അടിസ്ഥാന സൗകര്യ വികസന രംഗത്തെ നിര്‍ണായക ചുവടുവയ്പാണ് വാട്ടര്‍മെട്രോ. യാത്രാ സംവിധാനങ്ങള്‍ ഒരുക്കുന്നതിനൊപ്പം ഫോര്‍ട്ട് കൊച്ചിയും മട്ടാഞ്ചേരിയും അടങ്ങുന്ന വൈവിധ്യപൂര്‍ണമായ പ്രദേശങ്ങളെ പരസ്പരം ബന്ധിപ്പിക്കുന്ന കണ്ണിയായും വാട്ടര്‍മെട്രോ മാറും. നഗരത്തിലെ ജനങ്ങള്‍ക്കും നഗരത്തിനു ചുറ്റുമുള്ള ദ്വീപ് നിവാസികള്‍ക്കും ഇവിടേക്ക് വരുന്ന വിനോദ സഞ്ചാരികള്‍ക്കും ഒരുപോലെ പ്രയോജനപ്പെടുന്ന സംവിധാനമാണിതെന്നും മുഖ്യമന്ത്രി വ്യക്തമാക്കി. ആഗോള നിലവാരമുള്ള ജലഗതാഗത സംവിധാനമാണ് ഒരുക്കിയിട്ടുള്ളത്. ഇടക്കൊച്ചിയിലും തോപ്പുംപടിയിലും പുതിയ ടെര്‍മിനലുകള്‍ നിര്‍മിക്കുന്നതിനുള്ള ടെന്‍ഡര്‍ നടപടികള്‍ ആരംഭിച്ചിട്ടുണ്ട്. കടമക്കുടിയിലെ ടെര്‍മിനലിന്‍റെ നിര്‍മാണം അന്തിമഘട്ടത്തിലാണ്. ഇവ യാഥാര്‍ഥ്യമാകുന്നതോടെ എറണാകുളം, തോപ്പുംപടി, മട്ടാഞ്ചേരി, കുമ്പളം, ഇടക്കൊച്ചി എന്നിവയെ പരസ്പരം ബന്ധിപ്പിക്കുന്ന പുതിയൊരു ജലഗതാഗത സംവിധാനം രൂപം കൊള്ളും. ഇതൊരു വാട്ടര്‍ സര്‍ക്യൂട്ടായി മാറുമെന്നും മുഖ്യമന്ത്രി പറഞ്ഞു. മട്ടാഞ്ചേരി വാട്ടര്‍ മെട്രോ സ്റ്റേഷനില്‍ നടന്ന ഉദ്ഘാടന സമ്മേളനത്തില്‍ മന്ത്രി പി. രാജീവ് അധ്യക്ഷനായി. സംസ്ഥാന സര്‍ക്കാരിന്‍റെ ഡല്‍ഹിയിലെ പ്രത്യേക പ്രതിനിധി പ്രഫ. കെ.വി. തോമസ്, എംഎല്‍എമാരായ കെ.ജെ മാക്‌സി, ടി.ജെ. വിനോദ്, മേയര്‍ അഡ്വ. എം. അനില്‍കുമാര്‍, ഡെപ്യൂട്ടി മേയര്‍ കെ.എ. അന്‍സിയ, കൊച്ചി മെട്രോ റെയില്‍ ലിമിറ്റഡ് മാനേജിംഗ് ഡയറക്ടര്‍ ലോകനാഥ് ബഹ്‌റ, കൗണ്‍സിലര്‍ ടി. പത്മകുമാരി, കൊച്ചി മെട്രോ ഡയറക്ടര്‍ (പ്രോജക്ട്) ഡോ. എം.പി. രാംനവാസ് തുടങ്ങിയവര്‍ പങ്കെടുത്തു. വരാപ്പുഴ അതിരൂപതയ്ക്ക് നന്ദി വാട്ടര്‍ മെട്രോ ടെര്‍മിനല്‍ നിര്‍മിക്കുന്നതിനായി ഭൂമി വിട്ടു നല്‍കിയ വരാപ്പുഴ അതിരൂപതക്ക് മുഖ്യമന്ത്രി നന്ദി പറഞ്ഞു. 22 സെന്‍റ് ഭൂമിയായിരുന്നു സംഭാവനയായി നല്‍കിയത്. നാടിന്‍റെ വികസനത്തിനായി സര്‍ക്കാരില്‍ പൂര്‍ണ വിശ്വാസമര്‍പ്പിച്ചാണ് വരാപ്പുഴ അതിരൂപത ഭൂമി നല്‍കിയതെന്ന് മുഖ്യമന്ത്രി പറഞ്ഞു.

യുവാവ് കുവൈറ്റിൽ മരിച്ചു

മൂവാറ്റുപുഴ: മൂവാറ്റുപുഴ സ്വദേശിയായ യുവാവ് കുവൈറ്റില്‍ മരിച്ചു. ഉറവക്കുഴി ഉദിനാട്ട് ബഷീറിന്‍റെ (അസീസ്) മകന്‍ ബിന്‍സാദ് (23) ആണ് ഹൃദയാഘാതത്തെ തുടര്‍ന്ന് മരിച്ചത്. ഇന്നലെ രാവിലെയായിരുന്നു സംഭവം. കുവൈറ്റ് അബ്ബാസിയയില്‍ സീ ഷെല്‍ ഫുഡ് കമ്പനിയിലെ ജീവനക്കാരനായിരുന്നു. മാതാവ് : ഹാജറ. സഹോദരങ്ങള്‍: ഒസാമ ബഷീര്‍, സൈബ ബഷീര്‍. മൃതദേഹം നാട്ടിലേയ്ക്ക് കൊണ്ടുവരുവാനുള്ള ശ്രമങ്ങള്‍ പുരോഗമിക്കുകയാണ്.

ഇറിഗേഷൻ സൂപ്രണ്ട് മരിച്ചനിലയില്‍

മൂവാറ്റുപുഴ: മുടവൂരില്‍ ഇറിഗേഷൻ വകുപ്പ് ജൂണിയർ സൂപ്രണ്ടിനെ മരിച്ചനിലയില്‍ കണ്ടെത്തി. മുടവൂര്‍ വെളിയത്ത്പടി ആണിച്ചിറയില്‍ കൊല്ലം സ്വദേശി പേഴയ്ക്കാപ്പിള്ളി പള്ളിപടിയില്‍ വാടകയ്ക്കുതാമസിക്കുന്ന അനൂപി (46)നെയാണ് ഇന്നലെ രാവിലെ എട്ടിന് മരിച്ചനിലയില്‍ കണ്ടെത്തിയത്. കുളത്തിലെ കല്‍പ്പടവില്‍ കമഴ്ന്നുകിടക്കുന്ന നിലയിലാണ് മൃതദേഹം കണ്ടെത്തിയത്. അനൂപിന്‍റെ മൊബൈല്‍ ഫോണ്‍ സമീപത്തെ വീടിന്‍റെ സംരക്ഷണഭിത്തിയില്‍ നിന്ന് കണ്ടെത്തി. മൂവാറ്റുപുഴ പോലീസ് സ്ഥലത്തെത്തി മേല്‍ നടപടികള്‍ പൂര്‍ത്തികരിച്ച് മൃതദേഹം പോസ്റ്റുമോര്‍ട്ടത്തിനായി കളമശേരി മെഡിക്കല്‍ കോളജ് ആശുപത്രിയിലേക്ക് മാറ്റി. വെള്ളിയാഴ്ച ഓഫീസില്‍ എത്താത്തതിനെ തുടര്‍ന്ന് മേലുദ്യോഗസ്ഥര്‍ വിളിച്ച് അന്വേഷിച്ചപ്പോള്‍ അല്പ സമയത്തിനുള്ളില്‍ എത്തുമെന്നാണ് അനൂപ് അറിയിച്ചിരുന്നു. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്.

മരിച്ചനിലയിൽ കണ്ടെത്തി

നെടുമ്പാശേരി: ഡോക്ടറെ കാണാൻ ആശുപത്രിയിലേക്ക് പോയ ശേഷം കാണാതായ വയോധികയുടെ മൃതദേഹം പുഴയിൽ കണ്ടെത്തി. പാറക്കടവ് പുളിയനം കുന്നിൽ കുഴുപ്പിള്ളി വീട്ടിൽ പരേതനായ കുറുമ്പന്‍റെ ഭാര്യ കുറുമ്പയുടെ (89) മൃതദേഹമാണ് ചാലക്കുടിപ്പുഴയുടെ കൈവഴിയായ പുവ്വത്തുശേരി പാലിപ്പുഴ കടവിൽ നിന്ന് ഇന്നലെ രാവിലെ കണ്ടെത്തിയത്. മൂത്ത മകനായ പരേതനായ വേലായുധന്‍റെ വീട്ടിൽ നിന്നാണ് വെള്ളിയാഴ്ച രാവിലെ ആശുപത്രിയിലേക്കെന്ന് പറഞ്ഞ് പോയത്. വൈകുന്നേരമായിട്ടും തിരിച്ച് വരാതെയായതോടെ വീട്ടുകാർ അങ്കമാലി പോലീസിൽ പരാതി നൽകി. തുടർന്ന് പലയിടത്തും അന്വേഷിച്ചെങ്കിലും കാണാനായില്ല. തുടർന്ന് ഇന്നലെ മുങ്ങൽ വിദഗ്ദർ പുഴയിൽ നടത്തിയ തിരച്ചിലിലാണ് മൃതദേഹം കണ്ടെടുത്തത്. കുറുമ്പക്ക് ഓർമക്കുറവുള്ളതായി പറയുന്നു. മറ്റ് മക്കൾ: പരേതനായ രവി, അമ്മിണി, ലീല. മരുമക്കൾ: ഓമന, വത്സ, മോഹനൻ, വാസു. കളമശേരി മെഡിക്കൽ കോളജിൽ പോസ്റ്റ് മോർട്ടം നടത്തിയ മൃതദേഹം ബന്ധുക്കൾക്ക് വിട്ടുകൊടുത്തു. സംസ്കാരം നടത്തി.

കല്ലൂർക്കാട് ഉപജില്ലാ ശാസ്ത്രമേള ആനിക്കാട് സ്കൂളിന് ഓവറോൾ

വാഴക്കുളം: സെന്‍റ് ലിറ്റിൽ തെരേസാസ് ഹൈസ്കൂളിൽ നടത്തിയ കല്ലൂർക്കാട് ഉപജില്ലാ ശാസ്ത്ര മേള സമാപിച്ചു. 1055 പോയിന്‍റു നേടി ആനിക്കാട് സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂൾ ഓവറോൾ നേടി. 1050 പോയിന്‍റു നേടിയ കദളിക്കാട് വിമല മാതാ ഹയർ സെക്കൻഡറി സ്കൂൾ രണ്ടാം സ്ഥാനവും 853 പോയിന്‍റു നേടിയ കല്ലൂർക്കാട് സെന്‍റ് അഗസ്റ്റിൻസ് ഹയർസെക്കൻഡറി സ്കൂൾ മൂന്നാം സ്ഥാനവും നേടി. വാഴക്കുളം സെന്‍റ് ലിറ്റിൽ തെരേസാസ് ഹൈസ്കൂൾ എച്ച്എസ് വിഭാഗം ഗണിതശാസ്ത്രം, സയൻസ് ഐടി മേളകളിൽ ഒന്നാം സ്ഥാനം നേടി. വാഴക്കുളം സെന്‍റ് ലിറ്റിൽ തെരേസാസ് എൽപി സ്കൂൾ എൽപി വിഭാഗം ഗണിത ശാസ്ത്രം, പ്രവൃത്തിപരിചയം വിഭാഗങ്ങളിൽ ഒന്നാം സ്ഥാനം നേടി. ഹയർ സെക്കൻഡറി ഐടി, സോഷ്യൽ സയൻസ് വിഭാഗങ്ങളിൽ കല്ലൂർക്കാട് സെന്‍റ് അഗസ്റ്റിൻസ് ഹയർ സെക്കൻഡറി സ്കൂൾ ഒന്നാം സ്ഥാനം നേടി. കദളിക്കാട് വിമലമാതാ ഹയർ സെക്കൻഡറി സ്കൂളിന് യുപി വിഭാഗം സയൻസ്, സോഷ്യൽ സയൻസ്, ഗണിതം, പ്രവൃത്തിപരിചയമേളയിലും ഹൈസ്കൂൾ വിഭാഗം പ്രവൃത്തിപരിചയമേളയിലും ഒന്നാം സ്ഥാനവും ലഭിച്ചു. മഞ്ഞള്ളൂർ പഞ്ചായത്ത് പ്രസിഡന്‍റ് ആൻസി ജോസ് സമാപന സമ്മേളനം ഉദ്ഘാടനം ചെയ്തു. എഇഒ കെ.എം രാജേഷ്, പഞ്ചായത്തംഗം പി.എസ് സുധാകരൻ, പിറ്റിഎ പ്രസിഡന്‍റ് സിജു സെബാസ്റ്റ്യൻ, ജനറൽ കൺവീനർ സിസ്റ്റർ മെറിൻ എന്നിവർ പ്രസംഗിച്ചു.

കാർമൽ സ്കൂളിൽ സയൻസ് എക്സിബിഷൻ

വാഴക്കുളം: കാർമൽ സിഎംഐ പബ്ലിക് സ്കൂളിൽ സയൻസ് എക്സിബിഷൻ നടത്തി. വാഴക്കുളം വിശ്വജ്യോതി കോളജ് പ്രിൻസിപ്പൽ ഡോ. കെ.കെ. രാജൻ ഉദ്ഘാടനം ചെയ്തു. സ്കൂൾ മാനേജർ ഫാ. തോമസ് മഞ്ഞക്കുന്നേൽ, പ്രിൻസിപ്പൽ ഫാ.ജോൺസൺ വെട്ടിക്കുഴിയിൽ,വൈസ് പ്രിൻസിപ്പൽ ഫാ.ബിഖിൽ അരഞ്ഞാണിയിൽ, ഫാ.ജോമോൻ ജോസഫ്, ഫാ.ജോൺ ആനിക്കോട്ടിൽ തുടങ്ങിയവർ പങ്കെടുത്തു. കാർമൽ ഇൻഡോർ സ്റ്റേഡിയത്തിൽ വിവിധ വിഭാഗങ്ങളിലുള്ള വിദ്യാർഥികൾക്ക് മത്സരമായാണ് പരിപാടി സംഘടിപ്പിച്ചത്. വിവിധയിനം വർക്കിംഗ്, സ്റ്റിൽ മോഡലുകൾ, പുരാവസ്തുക്കൾ, സ്റ്റാമ്പ്, നാണയ ശേഖരങ്ങൾ, ആർട് വർക്കുകൾ, പെയിന്‍റിംഗുകൾ, പാഴ് വസ്തുക്കൾ ഉപയോഗിച്ച് നിർമിച്ച കരകൗശല വസ്തുക്കൾ, ആഭരണ നിർമിതികൾ, മിനിയേച്ചർ മോഡലുകൾ തുടങ്ങിയവയുടെ പ്രദർശനമാണ് നടന്നത്.

മാർ ബസേലിയോസ് ഡെന്‍റൽ കോളജിൽ ഗ്രാജുവേഷൻ

കോതമംഗലം: മാർ ബസേലിയോസ് ഡെന്‍റൽ കോളജിൽ 18-ാം ബാച്ച് ബിഡിഎസ് വിദ്യാർഥികളുടെ ഗ്രാജുവേഷൻ ചടങ്ങ് കേരള ആരോഗ്യ ശാസ്ത്ര സർവകലാശാല പ്രോ വൈസ് ചാൻസലർ ഡോ. സി.പി. വിജയൻ ഉദ്ഘാടനം ചെയ്തു. എലിയാസ് മാർ യൂലിയോസ് മെത്രാപ്പോലീത്ത അധ്യക്ഷത വഹിച്ചു. എലിയാസ് മാർ അത്താനാസിയോസ് മെത്രാപ്പോലീത്ത അനുഗ്രഹപ്രഭാഷണം നടത്തി. പ്രിൻസിപ്പൽ ഡോ. ബൈജു പോൾ കുര്യൻ ബിരുദധാരികൾക്ക് സത്യവാചകം ചൊല്ലിക്കൊടുത്തു. അക്കാഡമിക് മികവിനുള്ള അവാർഡുകൾ ഡോ. സി.പി. വിജയൻ വിതരണം ചെയ്തു. മാർത്തോമാ ചെറിയ പള്ളി വികാരി ഫാ. ജോസ് പരത്തുവയലിൽ, എംബിഎംഎം അസോസിയേഷൻ വൈസ് പ്രസിഡന്‍റ് കെ.ഒ. ഷാജി, സെക്രട്ടറി സലിം ചെറിയാൻ, ട്രെഷറർ ബിബിൻ ജോൺ, മാർത്തോമ്മാ ചെറിയ പള്ളി ട്രസ്റ്റിമാരായ എബി ചേലാട്ട്, കെ.കെ. ജോസഫ്, എം ബിറ്റ്സ് എൻജിനീയറിംഗ് കോളജ് സെക്രട്ടറി ബിനോയ് മണ്ണഞ്ചേരിൽ, മാർ ബേസിൽ സ്കൂൾ മാനേജർ ബാബു കൈപ്പിള്ളിൽ, ചെറിയപള്ളി സെലക്ഷൻ ബോർഡ് ചെയർമാൻ വിപിൻ തോമസ്, കോളജ് ഡീൻ ഡോ. വർഗീസ് മാണി, കോളജ് അഡ്മിനിസ്ട്രേറ്റർ ഡോ. കെംത്തോസ്‌ പോൾ, എംബിഎംഎം ഹോസ്പിറ്റൽ അഡ്മിനിസ്ട്രേറ്റർ സനീബ് രാഘുനാഥൻ , ഡോ. പ്രമോദ് ഫിലിപ്പ് മാത്യൂസ്, ഡോ. അരുൺ ജോർജ്, ഡോ. ദിയ എബി, ഡോ. നിഖിൽ പോൾസ് എന്നിവർ പ്രസംഗിച്ചു.

കോതമംഗലം കെഎസ്ആർടിസി ടെർമിനൽ ഉദ്ഘാടനം ഇന്ന്

കോതമംഗലം: കെഎസ്ആർടിസി ബസ് സ്റ്റാൻഡിൽ പുതിയതായി പണികഴിപ്പിച്ച ബസ് ടെർമിനലിന്‍റെയും ശീതീകരിച്ച യാത്രക്കാരുടെ വിശ്രമമുറിയുടെയും ഉദ്ഘാടനം ഇന്ന് വൈകുന്നേരം നാലിന് മന്ത്രി കെ.ബി. ഗണേഷ് കുമാർ നിർവഹിക്കും. ആന്‍റണി ജോൺ എംഎൽഎ അധ്യക്ഷത വഹിക്കും. മുനിസിപ്പൽ ചെയർമാൻ കെ.കെ. ടോമി, ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ എന്നിവർ മുഖ്യ അതിഥികളായിരിക്കും. കെഎസ്ആർടിസി ചെയർമാൻ ആൻഡ് മാനേജിംഗ് ഡയറക്ടർ പി.എസ്. പ്രമോദ് ശങ്കർ, പഞ്ചായത്ത് പ്രസിഡന്‍റുമാർ, മുൻസിപ്പൽ കൗൺസിൽ ഭാരവാഹികൾ, വിവിധ രാഷ്ട്രീയ കക്ഷി പ്രതിനിധികൾ യൂണിയൻ പ്രതിനിധികൾ എന്നിവർ പ്രസംഗിക്കും. ആന്‍റണി ജോൺ എംഎൽഎയുടെ ആസ്തി വികസന ഫണ്ടിൽ നിന്നും 2.34 കോടി രൂപ ചെലവഴിച്ചാണ് നിർമാണം പൂർത്തീകരിച്ചത്. കെഎസ്ആർടിസിയെ വിവിധതരത്തിൽ സഹായിച്ച വ്യക്തികൾക്കും സംഘടനകൾക്കും ഉള്ള ആദരവ് ചടങ്ങിൽ നൽകും.

മൂവാറ്റുപുഴയിൽ മീഡിയന്‍ നിര്‍മാണം ആരംഭിച്ചു

മൂവാറ്റുപുഴ: നഗരവികസന പ്രവര്‍ത്തനങ്ങളുടെ ഭാഗമായി റോഡ് നിര്‍മാണം പൂര്‍ത്തിയാക്കിയ എംസി റോഡില്‍ മീഡിയന്‍ നിര്‍മാണം ആരംഭിച്ചു. പിഒ ജംഗ്ഷന്‍ മുതല്‍ കച്ചേരിത്താഴം വരെയാണ് മീഡിയന്‍ നിര്‍മാണം ആരംഭിച്ചിരിക്കുന്നത്. 20 സെന്‍റിമീറ്റര്‍ ഉയരത്തില്‍ 80 സെന്‍റിമീറ്റര്‍ വീതിയില്‍ നിര്‍മിക്കുന്ന മീഡയനിന്‍റെ മധ്യഭാഗത്തെ 50 സെന്‍റീമീറ്റര്‍ ഭാഗത്ത് പൂച്ചെടികള്‍ നട്ട് മനോഹരമാക്കും. അരമനപടി, എസ്എന്‍ഡിപി ജംഗ്ഷന്‍, കച്ചേരിത്താഴം എന്നിവിടങ്ങളിലാണ് വാഹനങ്ങള്‍ക്ക് യൂടേണ്‍ സൗകര്യം ഒരുക്കിയിരിക്കുന്നത്. കോണ്‍ക്രീറ്റ് മിക്സ് കൊണ്ടുവന്ന് യന്ത്രത്തിന്റെ സഹയത്തോടെയാണ് നിര്‍മാണം നടത്തിവരുന്നത്. ഏകദേശം ഒരാഴ്ചയ്ക്കുള്ളില്‍ നിര്‍മാണം പൂര്‍ത്തിയാക്കാന്‍ സാധിക്കുമെന്ന് കരാറുകര്‍ പറഞ്ഞു. ഇതോടെ ഗതാഗതകുരുക്കും അപകടവും കുറയുവെന്ന പ്രതീക്ഷയിലാണ് അധികൃതര്‍.

മുറിക്കല്ല് ബൈപ്പാസ് നിർമാണം വൈകൽ : പ്രശ്നം നിയമസഭയില്‍ അവതരിപ്പിച്ചു

മൂവാറ്റുപുഴ: മൂവാറ്റുപുഴയുടെ സ്വപ്ന പദ്ധതിയായ മുറിക്കല്ല് ബൈപ്പാസിന്‍റെ നിര്‍മാണം വൈകുന്നതിനെതിരേ നിയമസഭയില്‍ മാത്യു കുഴല്‍നാടന്‍ എംഎല്‍എ സബ്മിഷന്‍ ഉന്നയിച്ച് ആശങ്കകള്‍ അറിയിച്ചു. കരാര്‍ ഒപ്പുവയ്ക്കുന്നത് സംബന്ധിച്ചുള്ള നടപടിക്രമങ്ങള്‍ വൈകുന്നതിനെതിരേയാണ് നിയമസഭയില്‍ എംഎല്‍എ സബ്മിഷന്‍ ഉന്നയിച്ചത്. ടെന്‍ഡര്‍ നടപടികള്‍ നാല് മാസം മുമ്പ് പൂര്‍ത്തീകരിച്ചുവെങ്കിലും കുറഞ്ഞ തുക രേഖപ്പെടുത്തിയ കരാര്‍ കമ്പനി ഇതുവരെ നിര്‍മാണ പ്രവൃത്തി ആരംഭിക്കുവാന്‍ തയാറായിട്ടില്ല. ഏറെക്കാലത്തെ പരിശ്രമങ്ങള്‍ക്ക് ശേഷമാണ് ടെന്‍ഡര്‍ നടപടികള്‍ വരെ പൂര്‍ത്തീകരിച്ചുള്ള പ്രവര്‍ത്തിയിലേക്ക് മുറിക്കല്ല് ബൈപ്പാസ് എത്തിച്ചതെന്നും തുടര്‍നടപടിക്രമങ്ങള്‍ എത്രയും വേഗം പൂര്‍ത്തീകരിച്ച് പണി ആരംഭിക്കുന്നതിനുള്ള നടപടികള്‍ കൈക്കൊള്ളണമെന്നും എംഎല്‍എ പറഞ്ഞു. പദ്ധതിയുടെ പഴയ ഡിപിആറിലും രൂപരേഖയിലും സമ്പൂര്‍ണ മാറ്റം വരുത്തിയാണ് ടെന്‍ഡര്‍ ചെയ്തത്. മുമ്പുണ്ടായിരുന്ന വളവുകള്‍ നിവര്‍ത്തി. നിലവിലെ പാലത്തിന് സമാന്തരമായി നാല് വരിയില്‍ പാലം നിര്‍മിക്കുന്നതിനും നീരൊഴുക്കുകള്‍ തടസപ്പെടാതിരിക്കാന്‍ ലാന്‍ഡ് സ്പാനുകളും കള്‍വേര്‍ട്ടുകളും ഉള്‍പ്പെടുത്തിയുമാണ് പുതിയ രൂപരേഖ തയാറാക്കിയത്. മുമ്പ് 59.98 കോടിയായിരുന്നു പദ്ധതി ചെലവ്. സമ്പൂര്‍ണമായ ഡിപിആര്‍ ഭേദഗതിയോടെ 117 കോടിയായി പദ്ധതി ചെലവ് ഉയര്‍ത്തിയാണ് ഇപ്പോള്‍ ടെന്‍ഡര്‍ ആയിരിക്കുന്നത്.

എഴുത്തുകാരുടെ കൂട്ടായ്മയും സാനുമാസ്റ്റര്‍ അനുസ്മരണവും

അങ്കമാലി: ബ്ലോക്ക് റൈറ്റേഴ്‌സ് ഫോറത്തിന്‍റെ നേതൃത്വത്തില്‍ എഴുത്തുകാരുടെ കൂട്ടായ്മയും എം.കെ. സാനുമാസ്റ്റര്‍ അനുസ്മരണവും ഇന്ന് വൈകിട്ട് മൂന്നിന് അങ്കമാലി ജീവധാര ഫൗണ്ടേഷൻ ഹാളില്‍ നടക്കും. കവി. ഡോ. ജോണ്‍ ജോര്‍ജ് ഉദ്ഘാടനം നിർവഹിക്കും. ഫോറം ഡയറക്ടര്‍ ടോം ജോസ് മാസ്റ്റര്‍ അധ്യക്ഷത വഹിക്കും. കവി ഡോ. സുരേഷ് മൂക്കന്നൂര്‍ മുഖ്യപ്രഭാഷണം നടത്തും.

അങ്കമാലിയിലെ പൊതു ശ്മശാന നിർമാണം: പ്രതിഷേധ ധർണ ഇന്ന്

അങ്കമാലി: ജനസാന്ദ്രതയുള്ളതും സ്വകാര്യ ബസ് സ്റ്റാൻഡിനും റെയിൽവേ സ്റ്റേഷനും തൊട്ടുചേർന്ന സ്ഥലത്ത് പൊതുശ്മശാനം സ്ഥാപിക്കാനുള്ള നടപടിക്കെതിരെ ഇന്ന് വൈകുന്നേരം 4 .30-ന് റെയിൽവേ സ്റ്റേഷൻ ജംഗ്ഷനിൽ പ്രതിഷേധ ധർണ നടക്കും. ശ്മശാനം നിർമിക്കുന്നതിന് തങ്ങൾ എതിരല്ലെന്നും ജനസാന്ദ്രതയുള്ള ഈ സ്ഥലത്ത് ആരംഭിക്കരുതെന്നുമാണ് സമരക്കാരുടെ ആവശ്യം. സംയുക്ത സമരസമിതി ഭാരവാഹികളായ റെയിൽവേ സ്റ്റേഷൻ നഗർ അസോസിയേഷൻ പ്രസിഡന്‍റ് റിന്‍റോ ഡേവിസ്, സെക്രട്ടറി ഗ്ലാഡ്സൺ ജോർജ്, പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ പ്രസിഡന്‍റ് എ.പി. ജിബി, സെക്രട്ടറി ബി. ഒ ഡേവിസ്, മർച്ചന്‍റ്സ് യൂണിയൻ പ്രസിഡന്‍റ് ആന്‍റു മാത്യു, സെക്രട്ടറി സി.വി. മാർട്ടിൻ എന്നിവർ പ്രതിഷേധ ധർണയ്ക്ക് നേതൃത്വം നൽകും.

കറുകുറ്റി സ്റ്റാർ ജീസസ് ഹൈസ്കൂളിൽ ലഹരിവിരുദ്ധ എക്സിബിഷൻ

അങ്കമാലി: കറുകുറ്റി സ്റ്റാർ ജീസസ് ഹൈസ്കൂളിൽ 'ലഹരിക്കെതിരെ കൈകോർക്കാം' എന്ന പേരിൽ ബോധവത്കരണ എക്സിബിഷൻ സംഘടിപ്പിച്ചു. രാജഗിരി കൊച്ചി പ്രൊവിൻഷ്യാളും പൂർവവിദ്യാർത്ഥിയുമായ ഫാ. ബെന്നി നൽക്കര ഉദ്ഘാടനം നിർവഹിച്ചു. സ്കൂൾ മാനേജർ ഫാ. ജെയ്സൻ ചിറേപ്പടിയ്ക്കൽ അധ്യക്ഷത വഹിച്ചു. കറുകുറ്റി കൊവേന്ത ഇടവകയിലെ മതപഠന വിഭാഗം ഒരുക്കിയ ഈ എക്സിബിഷൻ രണ്ടാഴ്ച ഉണ്ടാകും. ഇത് ഒരുക്കുന്നതിന് വിജയകൃഷ്ണൻ എ.ജി, വർഗീസ് വി.ടി, ലിജോ ജോസ് എന്നിവർ നേതൃത്വം നല്കി. സ്കൂൾ ഹെഡ്മാസ്റ്റർ ഫാ. ജോണി ചിറയ്ക്കൽ സ്വാഗതവും സ്കൂൾ ലീഡർ ജോസഫ് ഫ്രാൻസിസ് നന്ദിയും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]