ADVERTISEMENT

ADVERTISEMENT

ഏറ്റുമാനൂര്‍ ഉപജില്ലാ മെഗാ സയന്‍സ് ക്വിസ്: കിടങ്ങൂര്‍ ഭാരതീയ വിദ്യാമന്ദിരം സ്‌കൂളിന് ഒന്നാം സ്ഥാനം

കുടല്ലൂര്‍: കൂടല്ലൂര്‍ സെന്‍റ് ജോസഫ്‌സ് യുപി സ്‌കൂളില്‍ സംഘടിപ്പിച്ച ഏറ്റുമാനൂര്‍ ഉപജില്ലാ മെഗാ സയന്‍സ് ക്വിസ് ‘ബ്രയിന്‍ ബ്ലാസ്റ്റ് 2 കെ 25’ മത്സരത്തില്‍ കിടങ്ങൂര്‍ ഭാരതീയ വിദ്യാമന്ദിരം സ്‌കൂള്‍ ഒന്നാം സ്ഥാനം നേടി. മാന്നാനം സെന്‍റ് ജോസഫ്‌സ് യുപിഎസ് രണ്ടാം സ്ഥാനവും കൂടല്ലൂര്‍ സെന്‍റ് ജോസഫ്‌സ് യുപിഎസ് മൂന്നാം സ്ഥാനവും വെട്ടിമുകള്‍ സെന്‍റ് പോള്‍സ് ഹൈസ്‌കൂള്‍ നാലാം സ്ഥാനവും കരസ്ഥമാക്കി.

ഏറ്റുമാനൂര്‍ ഉപജില്ലാ വിദ്യാഭ്യാസ ഓഫീസര്‍ ശ്രീജ പി. ഗോപാല്‍ ക്വിസ് മത്സരം ഉദ്ഘാടനം ചെയ്തു. കോട്ടയം അതിരൂപത കോര്‍പറേറ്റ് എഡ്യൂക്കേഷണല്‍ സെക്രട്ടറി ഫാ. തോമസ് പുതിയകുന്നേല്‍ അധ്യക്ഷത വഹിച്ചു.

സ്‌കൂള്‍ മാനേജര്‍ ഫാ. ജോസ് പൂതൃക്കയില്‍, പഞ്ചായത്തംഗം സിബി സിബി, ഹെഡ്മിസ്ട്രസ് സിസ്റ്റര്‍ ജോണ്‍സിയ, പിടിഎ പ്രസിഡന്‍റ് പി. ജോണ്‍സണ്‍, പ്രോഗ്രാം കോ-ഓർഡിനേറ്റര്‍ സിസ്റ്റര്‍ സജിത എന്നിവര്‍ പ്രസംഗിച്ചു. ഡോ. ഏബ്രഹാം ജോസ് ക്വിസ് മാസ്റ്ററായിരുന്നു. വിവിധ സ്‌കൂളുകളില്‍നിന്ന് 17 ടീമുകള്‍ പങ്കെടുത്തു.

ADVERTISEMENT

കാര്‍ഷികവിളകള്‍ മോഷണം പോകുന്നതായി പരാതി

കുറുമ്പനാടം: കുറുമ്പനാടം വത്തിക്കാന്‍ ഭാഗത്ത് കാര്‍ഷികവിളകള്‍ മോഷണം പോകുന്നത് പതിവാകുന്നു. തൂമ്പുങ്കല്‍ ടി.ടി. ബാബുവിന്‍റെ പുരയിടത്തിലെ ഏഴ് വാഴക്കുലകള്‍, ആറുപറയില്‍ ഷാജി ജോസഫിന്‍റെ പുരയിടത്തിലെ തേങ്ങ, വാഴക്കുല തുടങ്ങിയവയാണ് മോഷണം പോയത്. വയോജനങ്ങള്‍ മാത്രമുള്ള വീടുകള്‍ കേന്ദ്രീകരിച്ചും മോഷണസംഘങ്ങളുടെ ശല്യമുണ്ട്. നാട്ടുകാര്‍ തൃക്കൊടിത്താനം പോലീസില്‍ പരാതി നല്‍കി.

നെല്ല്, റബര്‍, ക്ഷീര മേഖലകളെ തകര്‍ക്കരുത്: പി.സി. തോമസ്

ചങ്ങനാശേരി: നെല്ല്, റബര്‍, ക്ഷീര മേഖലയെ തകര്‍ക്കുന്ന നയങ്ങളില്‍നിന്നു സര്‍ക്കാര്‍ പിന്തിരിയണമെന്ന് കേരള കോണ്‍ഗ്രസ് വര്‍ക്കിംഗ് ചെയര്‍മാന്‍ പി.സി. തോമസ്. ഈ മേഖലകളെ സംരക്ഷിക്കാന്‍ സര്‍ക്കാര്‍ അടിയന്തരമായി ഇടപെടണമെന്നും പി.സി. തോമസ് ആവശ്യപ്പെട്ടു. കേരള കോണ്‍ഗ്രസ് വാഴപ്പള്ളി മണ്ഡലം കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. മണ്ഡലം പ്രസിഡന്‍റ് ബിനു മൂലയില്‍ അധ്യക്ഷത വഹിച്ചു. ജില്ലാ പ്രസിഡന്‍റ് ജെയ്‌സണ്‍ ജോസഫ്, വൈസ് ചെയര്‍മാന്‍ കെ.എഫ്. വര്‍ഗീസ്, നിയോജക മണ്ഡലം പ്രസിഡന്‍റ് മാത്തുകുട്ടി പ്ലാത്താനം, ഉന്നതാധികാര സമിതി അംഗങ്ങളായ വി.ജെ. ലാലി, സി.ഡി. വത്സപ്പന്‍, ചെറിയാന്‍ ചാക്കോ, പഞ്ചായത്ത് പ്രസിഡന്‍റ് മിനി വിജയകുമാര്‍, ജോര്‍ജ്കുട്ടി മാപ്പിളശേരി, ആര്‍. ശശിധരന്‍ നായര്‍, സിബി ചാമക്കാല, കെ.എ. തോമസ്, ജോര്‍ജുകുട്ടി വാരിക്കാടന്‍, കുര്യന്‍ തൂമ്പുങ്കല്‍, ഡോ. ജോബിന്‍ എസ്. കൊട്ടാരം എന്നിവര്‍ പ്രസംഗിച്ചു.

രണ്ടാംനമ്പര്‍ പെരുന്ന ബസ് സ്റ്റാന്‍ഡ് നാശോന്മുഖം : സാമൂഹ്യവിരുദ്ധർ സ്റ്റാൻഡ് വിടണം

ചങ്ങനാശേരി: അറ്റകുറ്റപ്പണികളില്ല, ശുചീകരണവുമില്ല, നോക്കാനും പറയാനും ആളുമില്ല. രണ്ടാംനമ്പര്‍ പെരുന്ന ബസ് സ്റ്റാന്‍ഡ് നാശോന്മുഖം. യാത്രക്കാര്‍ക്കുള്ള ഇരിപ്പിടങ്ങള്‍ തകര്‍ന്ന നിലയിലായിട്ടു വര്‍ഷങ്ങള്‍ പിന്നിടുന്നു. രാത്രികാലങ്ങളില്‍ വേണ്ടത്ര വെളിച്ചമില്ല. പകലും രാത്രിയും മദ്യപരുടെയും സാമൂഹ്യ വിരുദ്ധരുടെയും വിഹാര കേന്ദ്രമാണ്. ഭിക്ഷാടന മാഫിയകളും ഈ ബസ് സ്റ്റാന്‍ഡ് താവളമാക്കുകയാണ്. ഇവരുടെ കിടപ്പും അലക്കും കുളിയും ഉറക്കവുമെല്ലാം ഇവിടെത്തന്നെയാണ്. ബസ് സ്റ്റാന്‍ഡ് കോംപ്ലക്‌സിന്‍റെ ഇടനാഴികളിലേക്കും വരാന്തകളിലേക്കും വ്യാപാരസ്ഥാപനങ്ങളിലെ സാധനസാമഗ്രികളും ബോര്‍ഡുകളും ഇറക്കിവച്ചിരിക്കുന്നത് യാത്രക്കാര്‍ക്ക് ഏറെ ബുദ്ധിമുട്ട് സൃഷ്ടിക്കുന്നുണ്ട്. 2002 ൽ ആണ് നഗരസഭ പെരുന്നയില്‍ ബസ് സ്റ്റാന്‍ഡ് കം ഷോപ്പിംഗ് കോംപ്ലക്സ് നിര്‍മിച്ചത്. പോലീസിന്‍റെ സാന്നിധ്യം ഉറപ്പാക്കണം സാമൂഹ്യവിരുദ്ധ ക്രിമിനല്‍സംഘങ്ങള്‍ താവളമാക്കിയ സാഹചര്യത്തില്‍ പെരുന്ന ബസ് സ്റ്റാന്‍ഡില്‍ പോലീസിന്‍റെ സാന്നിധ്യം ഉറപ്പാക്കണമെന്ന ആവശ്യം ശക്തമാണ്. നൂറിലേറെ സ്വകാര്യബസുകളും കെഎസ്ആര്‍ടിസി ബസുകളും ഓപ്പറേറ്റ് ചെയ്യുന്ന ഈ ബസ് സ്റ്റാന്‍ഡില്‍ വിദ്യാര്‍ഥികളടക്കം ആയിരക്കണക്കിന് യാത്രക്കാര്‍ എത്തുന്നുണ്ട്. വൈകുന്നേരങ്ങളില്‍ കുട്ടിക്കുറ്റവാളി സംഘങ്ങളെത്തുന്നതും പെണ്‍കുട്ടികള്‍ക്കും യാത്രക്കാര്‍ക്കും ശല്യമാണ്. ഇക്കൂട്ടരില്‍ ചിലര്‍ ലഹരി വില്‍പ്പന നടത്തുന്നതായും സൂചനകളുണ്ട്. ഇവിടത്തെ പോലീസ് എയ്ഡ്‌പോസ്റ്റ് പലപ്പോഴും അടഞ്ഞുകിടക്കുകയാണ്. ആര്‍ക്കും വേണ്ടാതെ ഒരു ഓഡിറ്റോറിയം ബസ് സ്റ്റാന്‍ഡ് കോംപ്ലക്‌സിന്‍റെ മുകളില്‍ പത്തുവര്‍ഷംമുമ്പ് ഇഎംഎസിന്‍റെ പേരിൽ ഓഡിറ്റോറിയം നിര്‍മിച്ചെങ്കിലും നഗരസഭയ്ക്ക് വാടക നല്‍കി വിരലിലെണ്ണാവുന്ന പരിപാടികള്‍ മാത്രമാണ് നടത്തിയിട്ടുള്ളത്. നിര്‍മാണത്തിന് ഒന്നരക്കോടിയോളം രൂപ മുടക്കിയെങ്കില്‍ കാര്യമായ ഒരുവരുമാനവും ഈ ഓഡിറ്റോറിയത്തില്‍നിന്നു ലഭിച്ചിട്ടില്ല. നഗരസഭയുടെ കേരളോത്സവം പോലുള്ള പരിപാടികള്‍ മാത്രമാണ് ഇവിടെ നടക്കാറുള്ളത്. ഓഡിറ്റോറിയത്തിലെ എസികള്‍ തുരുന്പെടുത്ത നിലയിലും സീലിംഗ് പൊളിഞ്ഞനിലയിലുമാണ്. ദുര്‍ഗന്ധപൂരിതം ഓഡിറ്റോറിയത്തിന് അകത്തും പുറത്തും പ്രാവും മറ്റ് പക്ഷികളും കാഷടമിട്ട് ദുര്‍ഗന്ധപൂരിതമാണ്. ഒന്നാംനിലയില്‍ കടമുറികളില്ലാതെ കിടക്കുന്ന ഭാഗത്ത് മാലിന്യം കുന്നുകൂടിക്കിടക്കുകയാണ്. ഒരു ഭാഗത്ത് പ്ലാസ്റ്റിക് കുപ്പികളുടെ കൂമ്പാരമാണ്. ബസ് സ്റ്റാന്‍ഡിലെത്തുന്ന യാത്രക്കാര്‍ക്ക് സാംക്രമിക രോഗങ്ങള്‍ പടരാന്‍ ഇടയുണ്ടെന്നാണ് ആളുകള്‍ ചൂണ്ടിക്കാട്ടുന്നത്. ഒക്‌ടോബര്‍ രണ്ടുവരെ നഗരസഭ ആഘോഷിക്കുന്ന സ്വച്ഛത ഹി സേവ കാമ്പയിനിലെങ്കിലും ഈ ബസ് സ്റ്റാന്‍ഡ് ഒന്നു തൂത്തുവാരുമോ എന്ന ചോദ്യമാണ് യാത്രക്കാരുടെ ഇടയില്‍നിന്നുയരുന്നത്. ഓഡിറ്റോറിയം നിറഞ്ഞ് മാലിന്യസംസ്‌കരണ ബിന്നുകള്‍ നഗരസഭ ലക്ഷക്കണക്കിനു രൂപ മുടക്കി വീടുകളിലെ ഉറവിട മാലിന്യസംസ്‌കരണത്തിനായി വാങ്ങിക്കൂട്ടിയ ബിന്നുകള്‍ പെരുന്ന ബസ് സ്റ്റാന്‍ഡിനു മുകളിലുള്ള ഇഎംഎസ് ഓഡിറ്റോറിയത്തില്‍ നിറച്ചിരിക്കുകയാണ്. രണ്ട് ലെയര്‍ ഡ്രം, മൂന്നു ലെയര്‍ ഡ്രം എന്നിങ്ങനെ രണ്ട് ഇനങ്ങളിലായി വീടുകളില്‍ നല്‍കുന്നതിനായി വാങ്ങിയ നൂറുകണക്കിന് ഉറവിട മാലിന്യസംസ്‌കരണ ബിന്നുകളാണ് ഓഡിറ്റോറിയത്തില്‍ വച്ചിരുക്കുന്നത്. നഗരസഭയുടെ പ്രോജക്ട്പ്രകാരം ഗുണഭോക്താക്കളില്‍നിന്ന് അപേക്ഷകള്‍ സ്വീകരിച്ചാണ് പണംമുടക്കി ബിന്നുകള്‍ വാങ്ങിയത്. ആദ്യം ഈ ബിന്നുകള്‍ പെരുന്നയിലെ നഗരസഭാ സെക്രട്ടറിയുടെ ക്വാര്‍ട്ടേഴ്‌സിലാണ് സൂക്ഷിച്ചിരുന്നത്. പുതിയ സെക്രട്ടറി താമസത്തിനായി എത്തിയതോടെയാണ് ഈ ബിന്നുകള്‍ ഇഎംഎസ് ഓഡിറ്റോറിയത്തില്‍ സ്ഥാനം പിടിച്ചത്. നടപടിക്രമങ്ങളിലെ കാലതാമസമാണ് ബിന്നുകള്‍ ഓഡിറ്റോറിയത്തില്‍ കുന്നുകൂടിക്കിടക്കാന്‍ കാരണമെന്നാണ് നഗരസഭാധികൃതര്‍ ചൂണ്ടിക്കാട്ടുന്നത്. 2014 കാലഘട്ടത്തില്‍ നഗരസഭ വാങ്ങിക്കൂട്ടിയ മാലിന്യ സംസ്‌കരണ ബിന്നുകൾ എസ്ബി കോളജിനു സമീപത്തുള്ള മുനിസിപ്പല്‍ ടൗണ്‍ഹാളിന്‍റെ ബാല്‍ക്കണിയിലും കൂട്ടിയിട്ടിട്ടുണ്ട്.

അയ്യപ്പസംഗമം: വൈക്കത്ത് വിളംബര ഘോഷയാത്ര

വൈക്കം: തിരുവിതാംകൂർ ദേവസ്വം ബോർഡിന്‍റെ ആഭിമുഖ്യത്തിൽ 20ന് പമ്പയിൽ നടത്തുന്ന ആഗോള അയ്യപ്പ സംഗമത്തിനു മുന്നോടിയായി വൈക്കം ഗ്രൂപ്പിലെ ജീവനക്കാരുടെയും ക്ഷേത്ര കലാപീഠത്തിന്‍റെയും നേതൃത്വത്തിൽ വിളംബര ഘോഷയാത്ര നടത്തി. മുൻ ശബരിമല മേൽശാന്തി ഇണ്ടംതുരുത്തി മന മുരളിധരൻ നമ്പൂതിരി ഉദ്ഘാടനം നിർവഹിച്ചു. വടക്കേ കൊട്ടാരത്തിൽ നടന്ന യോഗത്തിൽ ഡപ്യൂട്ടി കമ്മിഷണർ എൻ. ശ്രീധര ശർമ, അസിസ്റ്റന്‍റ് കമ്മീഷണർ സി.എസ്. പ്രവീൺ കുമാർ, അഡ്മിനിസ്ട്രേറ്റിവ് ഓഫിസർ ജെ.എസ്. വിഷ്ണു, ഇണ്ടംതുരുത്തിമന ഹരിഹരൻ നമ്പൂതിരി, ടിഡിഇസിഎഫ് സംസ്ഥാന സെക്രട്ടേറിയറ്റംഗം എം.സി. കൃഷ്ണകുമാർ തുടങ്ങിയവർ പങ്കെടുത്തു. കൊട്ടാരത്തിൽനിന്ന് ആരംഭിച്ച ഘോഷയാത്ര നഗരം ചുറ്റി ബോട്ടുജെട്ടിയിൽ സമാപിച്ചു.

വിശ്വകർമ സമൂഹത്തിന്‍റെ സേവനം മഹത്തരം: ഫ്രാൻസിസ് ജോർജ്

വൈക്കം: അഖില കേരള വിശ്വകർമ മഹാസഭ വൈക്കം താലൂക്ക് യൂണിയന്‍റെ ആഭിമുഖ്യത്തിൽ വിശ്വകർമ ദിനം ആഘോഷിച്ചു. വൈക്കം സത്യഗ്രഹ സ്മാരക ഹാളിൽ യൂണിയൻ പ്രസിഡന്‍റ് പി.ജി. ശിവദാസന്‍റെ അധ്യക്ഷതയിൽ നടന്ന സമ്മേളനം അഡ്വ. ഫ്രാൻസിസ് ജോർജ് എംപി ഉദ്ഘാടനം ചെയ്തു. നൂതന സാങ്കേതികവിദ്യയുടെ പിൻബലത്തോടെ നിർമിക്കുന്ന നിർമിതികൾ തകർന്നുവീഴുമ്പോഴും നൂറ്റാണ്ടുകൾക്കു മുമ്പ് സാങ്കേതികവിദ്യയുടെ സഹായമില്ലാതെ കെട്ടിപ്പൊക്കിയ ആരാധനാലയങ്ങളും കൊട്ടാരങ്ങളും കേടുകൂടാതെ നിൽക്കുന്നതിനു പിന്നിൽ വിശ്വകർമ സമൂഹത്തിന്‍റെ കരവിരുതാണെന്നും അദ്ദേഹം അഭിപ്രായപ്പെട്ടു. ഒന്നിച്ചുനിൽക്കാത്തതാണ് എസ്എൻഡിപി, കെപിഎംഎസ് അടക്കമുള്ള ഹിന്ദു സംഘടനകളുടെ അപചയത്തിനുകാരണമെന്നും പിന്നാക്കമെന്ന ലക്ഷ്മണരേഖ മുറിച്ചുകടന്നാൽ മാത്രമേ സാമുദായികമായി പുരോഗതി കൈവരിക്കാനാകുകയുള്ളൂവെന്നും മുഖ്യപ്രഭാഷണം നടത്തിയ പ്രീതി നടേശൻ പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, കെ.കെ. സുരേഷ്, സണ്ണി എം. കപിക്കാട്, പി.ജി.എം. നായർ, തുടങ്ങിയവർ പ്രസംഗിച്ചു. സമ്മേളനത്തിന് മുന്നോടിയായി നടന്ന റാലിയിൽ നൂറുകണകിനു സ്ത്രീപുരുഷൻമാർ പങ്കെടുത്തു. റാലിക്ക് യൂണിയൻ പ്രസിഡന്‍റ് പി.ജി. ശിവദാസൻ, എസ്. ശ്രീകുമാർ, എസ്. കൃഷ്ണൻ, രുഗ്മിണിനാരായണൻ, ജയശ്രീ ലക്ഷ്മണൻ, ബിന്ദുമോഹനൻ തുടങ്ങിയവർ നേതൃത്വം നൽകി.

വൈക്കം-വെച്ചൂർ റോഡിൽ വൻ കുഴികൾ; കോൺഗ്രസ് പ്രക്ഷോഭത്തിലേക്ക്

വൈക്കം: വൈക്കം -വെച്ചൂർ റോഡ് വൻ കുഴികൾ രൂപപ്പെട്ട് ഗതാഗതം ദുരിതപൂർണമായി. തകർന്ന റോഡിൽ വൻ ഗതാഗതകുരുക്കും വാഹനാപകടങ്ങളും പതിവാണ്. വൈക്കത്തുനിന്നു കോട്ടയം, കുമരകം, ചേർത്തല, ആലപ്പുഴ തുടങ്ങിയ സ്ഥലങ്ങളിലേക്ക് ദിനംപ്രതി ആയിരക്കണക്കിന് വാഹനങ്ങളാണ് ഇതുവഴി കടന്നുപോകുന്നത്. ആലപ്പുഴയിൽ ദേശിയപാതയുടെ നിർമാണം നടക്കുന്നതിനാൽ നിർമാണസാമഗ്രികളുമായി ടോറസടക്കം നൂറുകണക്കിനു ഭാരവണ്ടികൾ കടന്നുപോകുന്നതും റോഡ് തകരുന്നതിനിടയാക്കി. മഴ കനത്തതോടെ റോഡിലുടനീളം വൻകുഴികൾ രൂപപ്പെട്ടു. 13 കിലോമീറ്റർ ദൂരമുള്ള റോഡിലെ തോട്ടകം പള്ളി മുതൽ മാടപ്പള്ളി ഭാഗം വരെ റോഡിൽ അഗാധമായ കുഴികൾ രൂപപ്പെട്ടിട്ട് മാസങ്ങളായി. അടിയന്തരമായി റോഡിലെ കുഴിയടച്ചു സഞ്ചാരയോഗ്യമാക്കാൻ സി.കെ. ആശ എംൽഎ നടപടി സ്വീകരിച്ചില്ലെങ്കിൽ റോഡ് ഉപരോധം ഉൾപ്പെടെയുള്ള സമരപരിപാടികൾക്കു നേതൃത്വം നൽകുമെന്ന് കോൺഗ്രസ്‌ വൈക്കം ബ്ലോക്ക്‌ വൈസ് പ്രസിഡന്‍റ് യു. ബേബി അറിയിച്ചു.

ടാങ്കര്‍ലോറിയിടിച്ച് പെട്ടിക്കട തകര്‍ന്നു

കടുത്തുരുത്തി: നിയന്ത്രണംവിട്ട ടാങ്കര്‍ ലോറിയിടിച്ചു റോഡരികിലിരുന്ന പെട്ടിക്കട തകര്‍ന്നു. ഇന്നലെ രാവിലെ 11‌ന് ഏറ്റുമാനൂര്‍-എറണാകുളം റോഡില്‍ ആപ്പാഞ്ചിറ, മാന്നാര്‍ ജംഗ്ഷനിലെ വളവിലാണ് അപകടം. തൃപ്പൂണിത്തുറ ഇരുമ്പനത്തുനിന്നു കോട്ടയം ഭാഗത്തേക്ക് ഇന്ധനവുമായി പോകുകയായിരുന്ന ടാങ്കര്‍ ലോറിയാണ് പെട്ടിക്കട ഇടിച്ചുതകര്‍ത്തത്. വളവു തിരിഞ്ഞുവരുന്നതിനിടെ മുന്നില്‍പ്പോയ സ്‌കൂട്ടര്‍ യാത്രികന്‍ പെട്ടന്ന് വാഹനം നിര്‍ത്തിയതിനെത്തുടര്‍ന്ന് അപകടം ഒഴിവാക്കാന്‍ ടാങ്കര്‍ ലോറി വെട്ടിച്ചതാണ് അപകടത്തിനു കാരണം. പൂഴിക്കോല്‍ സ്വദേശിയായ സെയ്ഫുദീന്‍ എന്നയാള്‍ മാന്നാറിനു സമീപം തട്ടുകട നടത്താന്‍ പുതുതായി വാങ്ങിയ പെട്ടിക്കടയാണ് തകര്‍ന്നത്.

ഈ ദുരിതം ഇനിയും സഹിക്കണോ? കുടുത്തുരുത്തിയിലെ വിവാദ ലാറ്റക്സ് ഫാക്‌ടറി പ്രദേശവാസികള്‍ നാളെ വളയും

കടുത്തുരുത്തി: നാട്ടുകാര്‍ക്ക് ദുരിതമായി കടുത്തുരുത്തി പഞ്ചായത്ത് എട്ടാം വാര്‍ഡില്‍ പ്രവര്‍ത്തിക്കുന്ന ലാറ്റക്സ് കമ്പനി പ്രദേശവാസികള്‍ നാളെ വളയും. ഇവിടെനിന്ന് ഒഴുകുന്ന മലിനജലം നാട്ടുകാരെ മാരകരോഗങ്ങളിലേക്ക് തള്ളിവിടുകയും വായുവും ജലവും ഭൂമിയും മനുഷ്യ ഉപയോഗത്തിന് പറ്റാതാക്കിയിരിക്കുകയാണെന്ന് പ്രതിഷേധക്കാര്‍ പറയുന്നു. പഞ്ചായത്ത് ലൈസന്‍സ് നല്‍കാതെ പ്രവര്‍ത്തനാനുമതി നിഷേധിച്ചു സ്റ്റോപ്പ് മെമ്മോ നല്‍കുകയും പൊല്യുഷന്‍ കണ്‍ട്രോള്‍ ബോര്‍ഡ് ലൈസന്‍സ് റദ്ദാക്കുകയും ചെയ്തിട്ടും അധികാരികളുടെ മൗനസമ്മതത്തോടെയാണ് ഫാക്ടറി പ്രവര്‍ത്തിക്കുന്നത്. പ്രദേശവാസികള്‍ ഒന്നടങ്കം സ്ത്രീകളും കുട്ടികളുമുൾപ്പെടെ മുട്ടുചിറയില്‍നിന്നു പദയാത്രയായി കടുത്തുരുത്തിയിലെത്തി പഞ്ചായത്തിന് ഭീമഹര്‍ജി നല്‍കിയ ശേഷവും ഫാക്ടറി പൊതുതോട്ടിലേക്ക് മലിനജലം ഒഴുക്കിയും രൂക്ഷദുര്‍ഗന്ധം പരത്തിയും വീണ്ടും ബുദ്ധിമുട്ടിക്കുകയാണെന്ന് സമരസമിതി ആരോപിച്ചു. ഇതില്‍ പ്രതിഷേധിച്ചാണ് ഇന്ന് ഫാക്ടറിയിലേക്ക് മാര്‍ച്ച് നടത്തുന്നതെന്നും പരിസ്ഥിതി സംരക്ഷണസമിതി ഭാരവാഹികള്‍ പത്രസമ്മേളനത്തില്‍ അറിയിച്ചു. ഇന്ന് രാവിലെ പത്തിന് മുട്ടുച്ചിറയിൽനിന്ന് ഫാക്ടറിയിലേക്ക് നടത്തുന്ന പ്രതിഷേധ മാര്‍ച്ച് പരിസ്ഥിതി സാമൂഹ്യ പ്രവര്‍ത്തകന്‍ സി.ആര്‍. നീലകണ്ഠന്‍ ഉദ്ഘാടനം ചെയ്യും. കടുത്തുരുത്തിയില്‍ നടത്തിയ പത്രസമ്മേളനത്തില്‍ സിറിയക് വര്‍ഗീസ്, അഡ്വ. റോയി ജോര്‍ജ്, പഞ്ചായത്തംഗം ജാന്‍സി സണ്ണി, ബിജു പോള്‍, മോള്‍സി ജോസഫ്, ലൈസമ്മ ജോസ്, പഞ്ചായത്തംഗം ജാന്‍സി സണ്ണി തുടങ്ങിയവര്‍ പങ്കെടുത്തു.

ഒടുവില്‍ അധികൃതര്‍ കണ്ണു തുറന്നു : കടുത്തുരുത്തി-ആപ്പുഴ തീരദേശ റോഡില്‍ പൈപ്പുപൊട്ടലിന് പരിഹാരമായി

കടുത്തുരുത്തി: ഒടുവില്‍ അധികൃതര്‍ കണ്ണു തുറന്നു. കടുത്തുരുത്തി - ആപ്പുഴ തീരദേശ റോഡില്‍ പൈപ്പ് പൊട്ടി വെള്ളം ഒഴുകി നശിക്കുന്നതിന് പരിഹാരമായി. പൊട്ടിയ പൈപ്പ് മാറ്റി പ്രശ്‌നം പരിഹരിച്ചു. തകര്‍ന്നുകിടക്കുന്ന തീരദേശ റോഡിനെ കൂടുതല്‍ തകര്‍ച്ചയിലാക്കി വാട്ടര്‍ അഥോറിറ്റിയുടെ പൈപ്പ് പൊട്ടല്‍ എന്നത് കഴിഞ്ഞ ദിവസം ചിത്രം സഹിതം ദീപിക പ്രസിദ്ധീകരിച്ചിരുന്നു. ഇതേത്തുടര്‍ന്നാണ് ഇന്നലെ ജീവനക്കാരെത്തി പൊട്ടിയ പൈപ്പ് മുറിച്ചുമാറ്റി ലീക്ക് പരിഹരിച്ചത്. റെയില്‍വേ മേല്‍പാലത്തിനു സമീപത്തായിട്ടാണ് ദിവസങ്ങളായി പൈപ്പ് പൊട്ടി വെള്ളം റോഡിലൂടെ ഒഴുകിയിരുന്നത്. ഈ ഭാഗത്ത് ഇതു മൂന്നാം തവണയാണ് പൈപ്പ് പൊട്ടുന്നത്. വാട്ടര്‍ അഥോറിറ്റിയുടെ നേതൃത്വത്തില്‍ റോഡിലൂടെ കടത്തിവിട്ടിരിക്കുന്ന പൈപ്പ് പൊട്ടി റോഡില്‍ വലിയ ഗര്‍ത്തം രൂപപ്പെട്ട അവസ്ഥയിലായിരുന്നു. പൈപ്പ് പൊട്ടി റോഡിലൂടെ വെള്ളം ഒഴുകാന്‍ തുടങ്ങിയിട്ട് ദിവസങ്ങളായി. ദിവസം ചെല്ലുന്തോറും പുറത്തേക്കു വരുന്ന വെള്ളത്തിന്‍റെ ശക്തി വര്‍ധിച്ചുവരികയായിരുന്നു. ഇതു റോഡിന്‍റെ തകര്‍ച്ചയ്ക്കും കാരണമാകുന്ന സ്ഥിതിയായിരുന്നു. ഈ ഭാഗത്ത് രൂപപ്പെട്ടിരിക്കുന്ന കുഴികള്‍ ഇരുചക്രവാഹനങ്ങള്‍ക്ക് അപകടക്കെണിയായി മാറിയിരിക്കുകയാണ്. മീറ്ററുകളോളം ദൂരത്തില്‍ വെള്ളം കെട്ടിനില്‍ക്കുന്നതിനാല്‍ കാൽനടയാത്ര പോലും പറ്റാത്ത അവസ്ഥയായിരുന്നു. തീരദേശ റോഡിലൂടെ കടത്തി വിട്ടിരിക്കുന്ന വാട്ടര്‍ അഥോറിറ്റിയുടെ പുതിയ പൈപ്പ് ലൈനില്‍ പല സ്ഥലത്തായി ഇതിനോടകം പൊട്ടലുണ്ടായി റോഡിന് നാശമുണ്ടാക്കിയിട്ടുണ്ട്. വാട്ടര്‍ അഥോറിറ്റിയുടെ പൈപ്പ് സ്ഥാപിക്കുന്നതിനായി കുഴിയെടുത്തതോടെയാണ് തകര്‍ന്നുകിടന്ന തീരദേശ റോഡിന്‍റെ നാശം പൂര്‍ണാവസ്ഥയിലാക്കിയത്.

പുളിഞ്ചുവട്-നക്കംതുരുത്ത് റോഡ് തകർന്നു; യാത്ര ദുരിതം

വൈക്കം:പുളിഞ്ചുവട്-പരുത്തുമുടി-നക്കംതുരുത്ത് റോഡ് തകർന്ന് ഗതാഗതം ദുരിപൂർണമായി. വൻ കുഴികൾ രൂപപ്പെട്ട് റോഡ് തകർന്നിട്ട് രണ്ടു വർഷമായി. കാൽനട പോലും ദുഷ്കരമായ റോഡ് ഗതാഗതയോഗ്യമാക്കണമെന്ന് പ്രദേശവാസികൾ നിരന്തരം ആവശ്യപ്പെട്ടിട്ടും അധികൃതർ മുഖവിലയ്ക്കെടുക്കുന്നില്ലെന്ന് നാട്ടുകാർ ആരോപിക്കുന്നു. ഇരുചക്രവാഹനയാത്രികർ റോഡിലെ കുഴികളിൽ വീണ് പരിക്കേൽക്കുന്നത് പതിവാകുകയാണ്. സ്കൂട്ടറിൽ ഭാഗ്യക്കുറി വിൽപന നടത്തുന്ന പുളിഞ്ചുവട് സ്വദേശി ബേബി (63) കഴിഞ്ഞ ദിവസം രാവിലെ റോഡിലെ കുഴിയിൽ വീണ് പരിക്കേറ്റിരുന്നു. കുഴികളിലകപ്പെട്ട് ഓട്ടോറിക്ഷകൾ തകരാറിലാകുന്നതിനാൽ രോഗികളെ ആശുപത്രിയിലെത്തിക്കാൻ വിളിച്ചാൽപോലും ഓട്ടോറിക്ഷക്കാർ എത്താത്ത സ്ഥിതിയാണ്. റോഡിലെ കുഴികളടച്ച് ഗതാഗതം സുരക്ഷിതമാക്കാൻ അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

തെരുവുനായഭീതി മാറാതെ നഗരം; ഏതു നിമിഷവും കടിയേൽക്കാം

കോട്ടയം: നായഭീതി വിട്ടൊഴിയാതെ നഗരം. കഴിഞ്ഞ ദിവസം നാലു വയസുകാരന്‍ ഉള്‍പ്പടെ 11 പേര്‍ക്കു കൂടി കടിയേറ്റതോടെ കാൽനട യാത്രികരടക്കം ഭീതിയോടെയാണ് നഗരത്തിലൂടെ സഞ്ചരിക്കുന്നത്. ബുധനാഴ്ച രാത്രി 7.30ന് കുര്യന്‍ ഉതുപ്പ് റോഡിലാണ് ഏറ്റവുമൊടുവിലായി നായ ആക്രമണം നടന്നത്. 11 പേരെ കടിച്ച നായയെ നെഹ്‌റു പാര്‍ക്കിനു സമീപത്തുനിന്നു രാത്രിയില്‍ പിടികൂടി സുരക്ഷാ കേന്ദ്രത്തിലേക്കു മാറ്റി. കുറിച്ചി ഷാജി വില്ലയില്‍ അജീഷയുടെയും ശിവയുടെയും മകന്‍ അര്‍ഷിതിനു (നാല്) ഇന്‍ഡോര്‍ സ്റ്റേഡിയത്തിനു സമീപത്തുനിന്നാണു കടിയേറ്റത്. അമ്മയോടൊപ്പം ഇതുവഴി നടന്നുവരുകയായിരുന്നു. പ്രകോപനം ഒന്നുമില്ലാതെ ഇവരുടെ സമീപത്തുകൂടി കടന്നുപോയ നായ പെട്ടെന്നു തിരികെ ഓടിയെത്തി കടിക്കുകയായിരുന്നു. കുട്ടിയുടെ കൈയിലാണ് കടിയേറ്റത്. പ്രഥമിക ചികിത്സ നല്‍കിയ കുട്ടിയെ ഇന്നലെ സര്‍ജറി വിഭാഗത്തില്‍ പ്രവേശിപ്പിച്ചു. പള്ളം സ്വദേശി നിധിന്‍ (29), അയര്‍ക്കുന്നം സ്വദേശികളായ രാഹുല്‍ (29), ഏലിയാസ് (53), പി.ടി. ഷാജി (49), കൈനടി സ്വദേശി പ്രതിഭ (17), ചങ്ങനാശേരി സ്വദേശി വിനീഷ് (18), തിരുവനന്തപുരം സ്വദേശി ഷാക്കീര്‍ (35), തിരുവനന്തപുരത്ത് താമസിക്കുന്ന ഇതരസംസ്ഥാനത്തൊഴിലാളികളായ ലുക്കു (42), ദിനേശ് കുമാര്‍ (30), പത്തനംതിട്ട ആനയടി സ്വദേശി പി. പത്മലോചന്‍ (65) എന്നിവര്‍ക്കും കടിയേറ്റു. എല്‍ഐസി ഓഫീസിന്‍റെ ഭാഗത്തുവച്ചാണ് രണ്ടു പേരെ നായ ആക്രമിച്ചത്. വിവരം അറിഞ്ഞ് ഓടിക്കൂടിയ നാട്ടുകാരും ഓട്ടോറിക്ഷ ഡ്രൈവര്‍മാരും ചേര്‍ന്നു കല്ലെറിഞ്ഞു നായയെ ഓടിച്ചു. തുടര്‍ന്നു നാഗമ്പടം ബസ് സ്റ്റാന്‍ഡ് ഭാഗത്തുവച്ചാണ് മറ്റുള്ളവര്‍ക്കു കടിയേറ്റത്. മൂന്നു പേരെ മെഡിക്കല്‍ കോളജ് ആശുപത്രിയിലും മറ്റുള്ളവരെ മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. ഏറ്റുമാനൂരില്‍നിന്നു ഡോഗ് ക്യാച്ചര്‍ ജയകുമാറിനെ വരുത്തിയാണ് നായയെ പിടികൂടിയത്. നഗരസഭ ഹെല്‍ത്ത് വിഭാഗം ഉദ്യോഗസ്ഥരും സ്ഥലത്തെത്തിയിരുന്നു. കോടിമത എബിസി സെന്‍ററില്‍ നായയെ എത്തിച്ചു.

കേബിള്‍ സേവനത്തില്‍ വീഴ്ച: ദാതാവിന് 5,000 രൂപ പിഴ

കോട്ടയം: കാലവധി പൂര്‍ത്തിയാകുംമുമ്പേ പ്രീ പെയ്ഡ് കേബിള്‍ ടി.വി. കണക്‌ഷന്‍ ഡിസ്‌കണക്ട് ചെയ്തതിന് ചങ്ങനാശേരി ഏഷ്യാനെറ്റ് സാറ്റലൈറ്റ് കമ്യൂണിക്കേഷന് 5000 രൂപ പിഴയിട്ട് കോട്ടയം ഉപഭോക്തൃ തര്‍ക്ക പരിഹാര കമ്മീഷന്‍. തൃക്കൊടിത്താനം സ്വദേശി സോമസുന്ദരം നല്‍കിയ പരാതിയിലാണ് നടപടി. 2025 ഫെബ്രുവരി 25 വരെ കാലാവധിയില്‍ 4,800 രൂപ മുടക്കി ഒരുവര്‍ഷത്തെ പ്രീ പെയ്ഡ് കണക്‌ഷന്‍ എടുത്തത് 2024 നവംബര്‍ 18ന് ഡിസ്‌കണക്ട് ആയെന്നും തൊട്ടടുത്തദിവസം തന്നെ ഫോണ്‍ മുഖേനെയും ഓഫീസില്‍ നേരിട്ടെത്തിയും പരാതി നല്‍കിയിട്ടും പരിഹരിച്ചില്ല എന്നുമാണ് കമ്മിഷനു മുന്നിലെത്തിയ കേസ്. സെറ്റ്ടോപ് ബോക്‌സിന്‍റെ തകരാര്‍ മൂലമാണ് ഡിസ്‌കണക്ടായതെന്നു സ്ഥാപനം വാദിച്ചെങ്കിലും തെളിവു ഹാജരാക്കാനായില്ല. പരാതിക്കാരന്‍ 2019ലെ ഉപഭോക്തൃസംരക്ഷണ നിയമപ്രകാരമുള്ള ഉപഭോക്താവല്ലെന്ന വാദവും കമ്മീഷന്‍ നിരാകരിച്ചു. 1995ലെ കേബിള്‍ നെറ്റ്‌വര്‍ക്ക് ആക്ട് പ്രകാരം തടസമില്ലാത്ത സേവനം നല്‍കുന്നതില്‍ സ്ഥാപനത്തിനു വീഴ്ച വന്നെന്നും സേവനന്യൂനതയ്ക്ക് 5,000 രൂപ പരാതിക്കാരനു നല്‍കണമെന്നും അഡ്വ. വി.എസ്. മനുലാല്‍ പ്രസിഡന്‍റും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള കമ്മീഷന്‍ ഉത്തരവിട്ടു.

മെഡി. കോളജ് ആശുപത്രിയിൽ രോഗീസന്ദർശന പാസ് ക്രമീകരണം : ഇതരജില്ലകളിലെ സന്ദർശകർ വലയുന്നു

ഗാന്ധിനഗർ: മെഡിക്കൽ കോളജ് ആശുപത്രിയിൽ രോഗി സന്ദർശകർക്ക് പുതിയ ക്രമീകരണം ഏർപ്പെടുത്തിയത് സന്ദർശകരെ വലയ്ക്കുന്നു. ഇതുമൂലം ഇടുക്കി, പത്തനംതിട്ട, എറണാകുളം തുടങ്ങിയ ദൂര ജില്ലകളിൽനിന്നു വരുന്ന സന്ദർശകരെ വിഷമത്തിലാക്കുകയാണ്. കഴിഞ്ഞ ദിവസം മുതൽ പാസ് നൽകുന്ന കൗണ്ടറിൽ കംപ്യൂട്ടർ വത്കരണം നടത്തിയിരുന്നു. ഇനി മുതൽ ആശുപത്രിയിൽ കിടത്തി ചികിത്സയിലുള്ള രോഗികളെ കാണാൻ പാസെടുക്കാൻ ക്യൂവിൽ നിൽക്കുന്ന സന്ദർശകർക്ക് രോഗിയുടെ പേര്, വാർഡ്, ഐപി നമ്പർ, ഫോൺ നമ്പർ എന്നിവയെല്ലാം അറിഞ്ഞിരിക്കണം. പാസ് നൽകുന്ന കൗണ്ടറിൽ സന്ദർകരോട് രോഗിയെ സംബന്ധിച്ചുള്ള ഈ വിവരങ്ങൾ തിരിക്കി കംപ്യൂട്ടറിൽ രേഖപ്പെടുത്തിയതിന് ശേഷമേ പാസ് നൽകുകയുള്ളൂ. ഒരാൾക്ക് മൂന്ന് പാസ് മാത്രമേ നൽകുകയുള്ളൂ. 10 രൂപയാണ് പാസ് നിരക്ക്. ഒരു രോഗിയുടെ പേരിൽ മൂന്ന് സന്ദർശകർ പാസെടുത്ത് വാർഡിലേക്ക് കയറി പോയി കഴിഞ്ഞാൽ ഒരു മണിക്കൂർ കഴിഞ്ഞു മാത്രമേ ആ രോഗിയെ കാണാൻ വരുന്ന മറ്റു സന്ദർശകർക്ക് പാസ് നൽകുകയുള്ളൂ. ഇത് ദൂര ജില്ലകളിൽനിന്നു വരുന്ന സന്ദർശരെ വിഷമത്തിലാകും. ഇതര ജില്ലയിൽനിന്ന് ഒരു രോഗിയെ കാണാൻ അഞ്ച് ബന്ധുക്കളായ സന്ദർശകരെത്തിയാൽ ഇവരിൽ മൂന്നുപേർക്ക് മാത്രമേ പാസ് ലഭിക്കുകയുള്ളു. രണ്ടു പേർക്ക് രോഗിയെ കാണമെങ്കിൽ കൂടെ വന്നവർ പുറത്തിറങ്ങണം. ഈ രോഗിയെ കാണാൻ മറ്റു ചില ബന്ധുക്കളെത്തി പാസ് എടുക്കുന്ന ക്യൂവിന്‍റെ മുൻനിരയിൽ ഇടം പിടിച്ചാൽ ഇതര ജില്ലയിൽനിന്നുവന്ന രണ്ട് പേർക്ക് പാസ് കിട്ടാതെ വീണ്ടും കുഴയും. ഇത്തരത്തിൽ ദൂരെ സ്ഥലങ്ങളിൽനിന്നു മെഡിക്കൽ കോളജ് ആശുപത്രിയിലെത്തി ബന്ധുവായ രോഗിയെ കണ്ട് ഉടനെ തിരിച്ചുപോകാം എന്നു കരുതി വരുന്നവർക്ക് പുതിയ ക്രമീകരണം വലിയ തിരിച്ചടിയാണ് നൽകുന്നത്. ഒരു സമയം മൂന്നു സന്ദർശകർക്കു മാത്രമേ പ്രവേശന പാസ് നൽകുകയുള്ളുവെന്ന ആശുപത്രി അധികൃതരുടെ നടപടി പുനഃപരിശോധിക്കണമെന്ന ആവശ്യം ശക്തമാണ്. ഉച്ചയ്ക്ക് ഒന്നര മുതൽ പാസ് നൽകി തുടങ്ങും. എന്നാൽ രോഗിയുടെ പേരും വാർഡും മാത്രമേ ഒട്ടുമിക്ക സന്ദർശകർക്ക് അറിയാൻ കഴിയൂ. ഐപി നമ്പരോ, ഫോൺ നമ്പരോ മറ്റോ അറിയാൻ സാധിക്കില്ല. ഇത് അറിയാത്ത ബന്ധുക്കളും പാസ് കിട്ടാൻ വിഷമിക്കേണ്ടിവരും. പുതിയ ക്രമീകരണം ഏർപ്പെടുത്തിയതോടെ പാസ് കൗണ്ടറിന് മുമ്പിൽ വലിയ ക്യൂവാണ് അനുഭവപ്പെടുന്നത്.

മണിയാറ്റുങ്കല്‍ അപകടവളവ് നിവരുന്നു

തിരുവഞ്ചൂര്‍: അയര്‍ക്കുന്നം-തിരുവഞ്ചൂര്‍ റോഡിലെ മണിയാറ്റുങ്കല്‍ ജംഗ്ഷനില്‍ ദിനംപ്രതി അപകടം നടക്കുന്ന കൊടുംവളവ് നിവരുന്നു. പഞ്ചായത്ത് അംഗം കെ.സി. ഐപ്പിന്‍റെ ശ്രമഫലമായി വസ്തു ഉടമകളായ വിനോദ് നൈനാന്‍ വടക്കേപറമ്പില്‍, തിരുവഞ്ചൂര്‍ സെന്‍റ് തോമസ് പള്ളി എന്നിവിടങ്ങളിനിന്നും വളവ് നിവര്‍ത്തുന്നതിനുള്ള സ്ഥലം സൗജന്യമായി നല്‍കി. കൊടുംവളവ് മൂലം എതിരേ വരുന്ന വാഹനം കാണാന്‍ കഴിയാതെ നിത്യേന നിരവധി അപകടങ്ങള്‍ ഇവിടെ പതിവായിരുന്നു. നാട്ടുകാരുടെ നിരന്തരമായ പരാതികള്‍ക്ക് ശാശ്വത പരിഹാരം കാണാന്‍ വാര്‍ഡ് അംഗം കെ.സി. ഐപ്പ് മുന്നിട്ടിറങ്ങി വസ്തു ഉടമകളെക്കൊണ്ട് സമ്മതിപ്പിച്ച് പിഡബ്ല്യുഡി അധികൃതരുടെ അനുവാദത്തോടെയാണ് വളവ് നിവര്‍ത്തുന്ന നടപടി ആരംഭിച്ചത്. വളവു നിവര്‍ത്തുന്നതിന് നടപടി സ്വീകരിച്ച വാര്‍ഡ് അംഗത്തെ നാട്ടുകാര്‍ അനുമോദിച്ചു.

ഇന്‍റര്‍ ഹയര്‍ സെക്കന്‍ഡറി ഫെസ്റ്റ് ‘ട്രിവിയം 2കെ25’ ഇന്ന്

കോട്ടയം: വടവാതൂര്‍ ഗിരിദീപം കോളജിലെ കൊമേഴ്‌സ് ഡിപ്പാര്‍ട്ട്മെന്‍റ് സംഘടിപ്പിക്കുന്ന ഇന്‍റര്‍ ഹയര്‍ സെക്കന്‍ഡറി ഫെസ്റ്റ് ട്രിവിയം 2കെ25 ഇന്നു നടക്കും. ചലച്ചിത്രതാരം വിനോദ് ബോസ് ഉദ്ഘാടനം ചെയ്യും. ഗിരിദീപം ഗ്രൂപ്പ് ഡയറക്ടര്‍ ഫാ. മാത്യു ഏബ്രഹാം മോഡിയില്‍ അധ്യക്ഷത വഹിക്കും. കോളജ് ഡയറക്ടര്‍ ഫാ. റോബിന്‍ ഇട്ടിതടത്തില്‍, ഫാ. സത്യന്‍ തോമസ്, ഫാ. സൈജു കുര്യന്‍, പ്രിന്‍സിപ്പല്‍ ഡോ. ആന്‍റണി തോമസ്, ഡോ. ജോമോന്‍ ചാക്കോ എന്നിവര്‍ പ്രസംഗിക്കും. വിവിധ മത്സരങ്ങളില്‍ വിജയിക്കുന്നവര്‍ക്ക് സര്‍ട്ടിഫിക്കറ്റുകളും കാഷ് പ്രൈസുകളും നല്കും.

മുട്ടമ്പലം റെയില്‍വേ അടിപ്പാതയ്ക്ക് സമീപത്തെ വെള്ളക്കെട്ടിന് ഉടൻ പരിഹാരം: എംപി

കോട്ടയം: മുട്ടമ്പലം റെയില്‍വേ ക്രോസിംഗില്‍ പുതിയ അടിപ്പാത നിര്‍മിച്ചതിനെ തുടര്‍ന്നുണ്ടായിരിക്കുന്ന വെള്ളക്കെട്ട് പരിഹരിക്കാന്‍ അടിയന്തരമായി നടപടി സ്വീകരിക്കുമെന്ന് ഫ്രാന്‍സിസ് ജോര്‍ജ് എംപി. ഇതു സംബന്ധിച്ച് റെസിഡന്‍സ് അസോസിയേഷന്‍ നല്‍കിയ പരാതിയുടെ അടിസ്ഥാനത്തില്‍ എംപി സ്ഥലം സന്ദര്‍ശിക്കുകയും റെയില്‍വേ അധികൃതരുമായി ഫോണിന്‍ ചര്‍ച്ച നടത്തുകയും ചെയ്തു. അടിപ്പാത നിര്‍മാണ സമയത്ത് നിലവില്‍ വെള്ളം ഒഴുകുന്നതിനായി ഉണ്ടായിരുന്ന പൈപ്പുകള്‍ മണ്ണും ചെളിയും മാലിന്യങ്ങളും മൂലം അടയുകയും വെള്ളത്തിന്‍റെ ഒഴുക്കിനെ തടസപ്പെടുത്തുകയും ചെയ്തു. ഇത് നീക്കം ചെയ്താല്‍ നിലവിലുള്ള വെള്ളക്കെട്ട് ഒഴിവാക്കാന്‍ സാധിക്കും. ഇക്കാര്യം എത്രയും വേഗം ചെയ്യാന്‍ എംപി റെയില്‍വേ അധികൃതര്‍ക്ക് നിര്‍ദേശം നല്‍കി. അടിപ്പാതയോടു ചേര്‍ന്നുണ്ടായിരുന്ന മലങ്കര ക്വാര്‍ട്ടേഴ്‌സിലേക്കുള്ള റോഡ് അടിപ്പാത നിര്‍മാണ സമയത്ത് തകര്‍ന്നതാണ്. ഇതു നന്നാക്കാന്‍ ഇതുവരെ റെയില്‍വേ യാതൊരു നടപടിയും സ്വീകരിച്ചിട്ടില്ല. വെള്ളത്തിന്‍റെ ഒഴുക്കിനെ തടസപ്പെടുത്തുന്ന മണ്ണും ചെളിയും ഉടന്‍ നീക്കം ചെയ്യാന്‍ റെയില്‍വേ അധികൃതരോട് എംപി നിര്‍ദേശിച്ചു. അടിപ്പാതയോടു ചേര്‍ന്നുണ്ടായിരുന്ന മലങ്കര ക്വാര്‍ട്ടേഴ്‌സ് വഴിയുള്ള റോഡ് അടിപ്പാത നിര്‍മാണ സമയത്ത് തകര്‍ന്ന് സഞ്ചാര യോഗ്യമല്ലാതായിരിക്കുകയാണ്. ഇതോടൊപ്പം ഓടയുടെ സമീപം അനാവശ്യമായി ഉയര്‍ത്തി നിര്‍മിച്ച സംരക്ഷണഭിത്തി ഗതാഗതത്തിന് തടസമായി നില്‍ക്കുകയാണ്. ഇതു പൊളിച്ച് നീക്കി സ്ലാബ് ഇടുകയും റോഡ് ടാര്‍ ചെയ്യുകയും ചെയ്താല്‍ ഗതാഗതതടസം ഒഴിവാകും. ഇതിനാവശ്യമായ നടപടികള്‍ സ്വീകരിക്കണമെന്നും ഫ്രാന്‍സിസ് ജോര്‍ജ് റെയില്‍വേ അധികൃതരോട് ആവശ്യപ്പെട്ടു. റെയില്‍വേ എന്‍ജിനിയര്‍മാരും ബന്ധപ്പെട്ട ഉദ്യോഗസ്ഥരും സ്ഥലത്ത് നേരിട്ട് സന്ദര്‍ശനം നടത്തി പഠിച്ച് റിപ്പോര്‍ട്ട് നല്‍കാനും എംപി. ആവശ്യപ്പെട്ടു. വാര്‍ഡ് കൗണ്‍സിലര്‍ പി.ഡി. സുരേഷ്, കോണ്‍ഗ്രസ് മണ്ഡലം പ്രസിഡന്‍റ് ഷീബാ പുന്നന്‍, എ.കെ. ജോസഫ് ലാലു, ജോമോന്‍ ജോസഫ്, സാജന്‍, എം.ജെ. ജയിംസ്, ശ്രീകുമാര്‍, ബാബു ഫിലിപ്പ്, പ്രകാശ് ഏബ്രഹാം, ബാബു നെല്ലിക്കല്‍, കെ.വി. തോമസ്,എം.ടി. ജോര്‍ജ്, പി.പി. സണ്ണി, പി.പി. ബാബു എന്നിവരും എംപിക്കൊപ്പമുണ്ടായിരുന്നു.

ബൈക്കിൽ കാർ ഇടിച്ച് അപകടം: ചികിത്സയിലിരുന്നഗൃഹനാഥൻ മരിച്ചു

അതിരമ്പുഴ: മുണ്ടക്കയം പെരുവന്താനത്തിനു സമീപം കൊടുകുത്തിയിൽ ബൈക്കിൽ കാർ ഇടിച്ചുണ്ടായ അപകടത്തിൽ പരിക്കേറ്റ് ചികിത്സയിലിരുന്നയാൾ മരിച്ചു. അതിരമ്പുഴ വടക്കനോടിയിൽ ബെന്നി ഡേവിഡ് (55) ആണ് മരിച്ചത്.കഴിഞ്ഞ ചൊവ്വാഴ്ച രാവിലെ 11നാണ് അപകടം സംഭവിച്ചത്. ജോലിസ്ഥലത്തേക്ക് ബൈക്കിൽ പോകുന്പോൾ എതിരേ വന്ന കാർഇടിക്കുകയായിരുന്നു. കാർ നിർത്താതെ പോയി. പരിക്കേറ്റ ബെന്നി മൂന്നു മണിക്കൂറോളം റോഡിൽ അബോധാവസ്ഥയിൽ കിടന്നു.വഴിയാത്രക്കാരാണ് മുണ്ടക്കയത്തെ ആശുപത്രിയിൽ എത്തിച്ചത്. അവിടെനിന്ന് തെള്ളകത്തെ സ്വകാര്യാശുപത്രിയിൽ എത്തിച്ച് ചികിത്സയിൽ കഴിയുന്നതിനിടെ ബുധനാഴ്ച രാത്രിയിലാണ് മരിച്ചത്. സംസ്കാരം ഇന്ന് രാവിലെ 11ന് അതിരമ്പുഴ സെന്‍റ് മേരീസ് ഫൊറോനാ പള്ളിയിൽ.ഭാര്യ സാലി കൈപ്പുഴമുട്ട് കായ്ച്ചിറ കുടുംബാംഗം. മക്കൾ: കിരൺ (സൗദി അറേബ്യ), കീർത്തി (സൗദി അറേബ്യ). മരുമക്കൾ: ടോണ പള്ളിക്കുന്നേൽ മാമ്മൂട്, സാജു അരുണാമൂലയിൽ കാണക്കാരി.

ജില്ലയിലെ പട്ടയപ്രശ്‌നങ്ങള്‍ക്ക് പരിഹാരം കാണും: റവന്യു മന്ത്രി

കോട്ടയം: ജില്ലയിലെ സങ്കീര്‍ണമായിരുന്ന പട്ടയ പ്രശ്‌നങ്ങള്‍ക്ക് പരിഹാരം നിര്‍ദേശിച്ച് മന്ത്രി കെ. രാജന്‍. തിരുവനന്തപുരത്ത് ഐഎല്‍ഡിഎമ്മില്‍ മന്ത്രിയുടെ അധ്യക്ഷതയില്‍ നടന്ന ജില്ലാ റവന്യു അസംബ്ലിയില്‍ എംഎല്‍എമാര്‍ ചൂണ്ടിക്കാട്ടിയ പട്ടയ പ്രശ്‌നങ്ങള്‍ക്കാണ് പരിഹാരമാകുന്നത്. 2998 പട്ടയങ്ങളാണ് കോട്ടയത്ത് ഇതിനകം വിതരണം ചെയ്തത്. കാഞ്ഞിരപ്പള്ളിയിലെ പട്ടയം സ്‌പെഷല്‍ ഓഫീസിന്‍റെ പ്രവര്‍ത്തനം കാര്യക്ഷമമാക്കല്‍, നോഡല്‍ ഓഫീസര്‍മാരുടെ സേവനം എന്നിവ ഊര്‍ജിതമാക്കണം. 2025 ജനുവരിക്ക് മുമ്പ് കൂടുതല്‍ പട്ടയങ്ങള്‍ വിതരണം ചെയ്യുന്നതിനുള്ള നടപടികള്‍ക്കാണ് മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കിയത്. ജില്ലയില്‍ ചില കേന്ദ്രങ്ങളില്‍ ഭൂമി കൈയേറ്റം വ്യാപകമായി റിപ്പോര്‍ട്ട് ചെയ്യുന്നുണ്ടെന്നും അടിയന്തരമായി പരിശോധിച്ച് തിരിച്ചുപിടിക്കണമെന്നും യോഗത്തില്‍ മന്ത്രി നിര്‍ദേശിച്ചു. എംഎല്‍എമാര്‍ ചൂണ്ടിക്കാട്ടിയ സര്‍ക്കാര്‍ ഭൂമി തിരിച്ചെടുക്കുന്നതിനുള്ള നടപടി സ്വീകരിക്കാനും മന്ത്രി ജില്ലാ റവന്യു ഉദ്യോഗസ്ഥരെ ചുമതലപ്പെടുത്തി. ചീഫ് വിപ്പ് ഡോ. എന്‍. ജയരാജ്, തിരുവഞ്ചൂര്‍ രാധാകൃഷ്ണന്‍, മോന്‍സ് ജോസഫ്, മാണി സി. കാപ്പന്‍, സി.കെ. ആശ, സെബാസ്റ്റ്യന്‍ കുളത്തിങ്കല്‍, ജോബ് മൈക്കിള്‍ എന്നീ എംഎല്‍എമാരാണ് അസംബ്ലിയില്‍ പട്ടയം ഉള്‍പ്പെടെ വിവിധ വിഷയങ്ങള്‍ ഉന്നയിച്ചത്. മന്ത്രി വി.എന്‍. വാസവന്‍ രേഖാമൂലം കൈമാറിയ ആവശ്യങ്ങളും റവന്യൂ അസംബ്ലി പരിഗണിച്ചു. എംഎല്‍എ ഡാഷ് ബോര്‍ഡില്‍ ലഭിച്ച 304 അപേക്ഷകളില്‍ 191 എണ്ണത്തില്‍ തീര്‍പ്പാക്കിയിട്ടുണ്ട്.ജില്ലയില്‍ ഭൂമി തരം മാറ്റത്തിന് 22,273 അപേക്ഷകളാണ് ആകെ ഉള്ളത്. ഇതില്‍ 4,987 അപേക്ഷകള്‍ തീര്‍പ്പാക്കിയിട്ടുണ്ട്. ശേഷിക്കുന്നവ വേഗത്തില്‍ തീര്‍പ്പാക്കാനുള്ള നടപടികള്‍ പുരോഗമിക്കുന്നതായി ജില്ലയുടെ സ്ഥിതിവിവര റിപ്പോര്‍ട്ട് അവതരിപ്പിച്ചുകൊണ്ട് ജില്ലാ കളക്ടര്‍ ചേതന്‍ കുമാര്‍ മീണ അറിയിച്ചു. ലാന്‍ഡ് റവന്യു കമ്മീഷണര്‍ ജീവന്‍ ബാബു കെ, സര്‍വേ ഡയറക്ടര്‍ സീറാം സാംബശിവ റാവു, റവന്യൂ വകുപ്പ് അഡീഷണല്‍ സെക്രട്ടറി എ. ഗീത തുടങ്ങിയവരും വിവിധ വിഷയങ്ങളില്‍ വിശദീകരണം നല്‍കി.

റബര്‍വില കനിയുന്നില്ല; മാര്‍ക്കറ്റില്‍ അനിശ്ചിതത്വം

കോട്ടയം: ഓഗസ്റ്റില്‍ തുടങ്ങിയ റബര്‍വില മാന്ദ്യം സെപ്റ്റംബര്‍ പകുതി പിന്നിടുമ്പോഴും തുടരുന്നു. ജൂലൈ മൂന്നാം വാരമാണ് ഷീറ്റിനും ലാറ്റക്‌സിനും ഒട്ടുപാലിനും ഇക്കൊല്ലത്തെ ഉയര്‍ന്ന വില ലഭിച്ചത്. ഷീറ്റിന് 215, ലാറ്റക്‌സ് 207, ഒട്ടുപാല്‍ 128 നിരക്കിലേക്ക് വില ഉയര്‍ന്നു. ഒന്നര മാസം പിന്നിടുമ്പോള്‍ ഷീറ്റിന് 186, ലാറ്റക്‌സ് 167, ഒട്ടുപാല്‍ 108 തോതിലാണ് നിരക്ക്. കേന്ദ്ര സര്‍ക്കാരിന്‍റെ നികുതി വെട്ടിക്കുറയ്ക്കല്‍ ഓരോ ഉത്പന്നത്തിനും ഏതു നിരക്കിലായിരിക്കും എന്നതിലെ അനിശ്ചിതത്വത്തില്‍ വ്യവസായികള്‍ ടയര്‍ മുതല്‍ റബര്‍ ബാന്‍ഡ് വരെയുള്ള സാമഗ്രികളുടെ ഉത്പാദനം കുറച്ചു. ട്രംപിന്‍റെ പ്രഹരച്ചുങ്കം മാര്‍ക്കറ്റിലും വ്യവസായത്തിലും പ്രത്യാഘാതവും അനിശ്ചിതത്വവുമുണ്ടാക്കി. കഴിഞ്ഞ മാസം പകുതിക്കുശേഷം ടയര്‍ കമ്പനികള്‍ മാര്‍ക്കറ്റില്‍ നിന്ന് കാര്യമായി ഷീറ്റ് വാങ്ങാന്‍ താത്പര്യപ്പെടുന്നില്ല. മഴക്കാലത്ത് സംസ്‌കരണത്തിനുള്ള അധിക ചെലവും ദുരിതവും കാരണം ഷീറ്റ് ഒഴിവാക്കി കര്‍ഷകര്‍ ലാറ്റക്‌സും ഒട്ടുപാലുമായി വില്‍ക്കാന്‍ താത്പര്യപ്പെടുന്നു. ക്രീപ്പ്, ക്രംബ് കമ്പനികള്‍ക്ക് വേണ്ടതിലധികം ഒട്ടുപാല്‍ ലഭ്യമായതും മാര്‍ക്കറ്റിലേക്ക് ചരക്കുവരവ് കൂടിയതുമാണ് ഒട്ടുപാല്‍ വില കുറയാന്‍ കാരണമായത്. ചൈനയില്‍നിന്നടക്കം ആവശ്യകത മുന്‍വര്‍ഷത്തെക്കാള്‍ ഉയരുമെന്ന റിപ്പോര്‍ട്ടുകള്‍ വരുന്നുണ്ട്. അങ്ങനെയെങ്കില്‍ വരുംമാസങ്ങളില്‍ വില മെച്ചപ്പെടാനാണ് സാധ്യത. തുലാമഴ നീണ്ടുനിന്നാല്‍ ഉത്പാദനം കുറഞ്ഞ് വിലയില്‍ നേട്ടമുണ്ടാകാം. വിദേശവിലയും ആഭ്യന്തരവിലയും ഏറെക്കുറെ ഇപ്പോള്‍ ഒരേ നിരക്കിലാണ്. ക്വലാലംപുര്‍ മാര്‍ക്കറ്റ് വില ഇന്നലെ ഇവിടത്തെ വിലയെക്കാൾ മൂന്നു രൂപ മാത്രം കൂടുതലാണ്. ഈ സാഹചര്യത്തില്‍ 25 ശതമാനം തീരുവ അടച്ച് വ്യവസായികള്‍ ഇറക്കുമതി ചെയ്യാനുള്ള സാധ്യതയില്ല. അതേസമയം തുച്ഛമായ തീരുവ അടച്ചും അയയ്ക്കാതെയും മാസം ഇരുപതിനായിരം ടണ്‍ വീതം കോമ്പൗണ്ട് റബര്‍ ഇറക്കുമതി തുടരുന്നുണ്ട്. കോമ്പൗണ്ട് റബറിന്‍റെ അനിയന്ത്രിതമായ ഇറക്കുമതി മൂലമാണ് ഷീറ്റ് വില മെച്ചപ്പെടാത്തത്.

മെഡി. കോളജ് ആശുപത്രിയിൽ കൂട്ടിരിപ്പുകാരിയുടെ കാലിൽ കോൺക്രീറ്റ് പാളി അടർന്നുവീണു

ഗാന്ധിനഗർ: കോട്ടയം മെഡിക്കൽ കോളജ് ആശുപത്രിയിൽ ഉറങ്ങിക്കിടന്ന കൂട്ടിരിപ്പുകാരിയുടെ കാലിന് സമീപം കോൺക്രീറ്റ് പാളി അടർന്നുവീണ് അപകടം. എംഐസിയുവിൽ ചികിത്സയിലുള്ള രോഗിയുടെ കൂട്ടിരിപ്പുകാരിയായ ചീപ്പുങ്കൽ സ്വദേശിനി കൊച്ചുമോളുടെ കാലിലാണ് കോൺക്രീറ്റ് പാളി അടർന്നുവീണത്. ഇന്നലെ രാവിലെ 6.30ഓടെയാണ് സംഭവം. മെഡിക്കൽ കോളജിലെ എംഐസിയുവിനു സമീപം ഇന്നലെ രാവിലെ കൊച്ചുമോൾ കിടന്നുറങ്ങുകയായിരുന്നു. ഈ സമയം മുകളിലെ വാർക്കയിൽ നിന്നും കോൺക്രീറ്റ് പാളി അടർന്നു വീഴുകയായിരുന്നു. കാലിന്‍റെ ഭാഗത്തേക്കാണ് കോൺക്രീറ്റ് പാളി അടർന്നുവീണത്. സംഭവം ആശങ്കയ്ക്ക് ഇടയാക്കിയെങ്കിലും കെട്ടിടത്തിന് ബലക്ഷയമില്ലെന്നാണ് ആശുപത്രി അധികൃതരുടെ നിഗമനം. രണ്ടു മാസം മുമ്പ് രണ്ടാം വാർഡിലെ ഇസിജി മുറിയിലെ കോൺക്രീറ്റ് പാളി അടർന്നു വീണിരുന്നു. ഈ സമയം ഇസിജി എടുക്കുന്ന രണ്ട് ജീവനക്കാരികളും വാർഡിലേക്ക് പോയതിനാൽ അപകടം ഒഴിവായി. അന്നുതന്നെ ഇസിജി മുറി പുതിയ ബ്ലോക്കിലേക്ക് മാറ്റി. ജൂലൈ മൂന്നിന് മെഡിക്കൽ കോളജ് ആശുപത്രിയിലെ 14 -ാം വാർഡിന് സമീപത്തെ ശുചിമുറി തകർന്നുവീണ് തലയോലപ്പറമ്പ് സ്വദേശിനിയായ ബിന്ദുവെന്ന വീട്ടമ്മ മരണപ്പെട്ടിരുന്നു. സംഭവം വൻ വിവാദമാകുകയും ചെയ്തു. 10 മുതൽ 17 വരെയുള്ള വാർഡുകൾ പ്രവർത്തിച്ചിരുന്ന കെട്ടിടത്തിലെ ശുചിമുറിയാണ് തകർന്നുവീണത്. തുടർന്ന് ഈ വാർഡുകൾ പുതിയ സർജിക്കൽ ബ്ലോക്കിലേക്ക് മാറ്റിയിരിക്കുകയാണ്. എന്നാൽ മെഡിക്കൽ കോളജ് ആശുപത്രിയിൽ കെട്ടിടം തകർന്നുവീണിട്ട് മുന്നു മാസമായിട്ടും കാലപ്പഴക്കം ചെന്ന കെട്ടിടം പൊളിക്കുന്ന കാര്യത്തിൽ തീരുമാനമായില്ല. കെട്ടിടം പൊളിക്കുന്നത് സംബന്ധിച്ച് ആരോഗ്യവകുപ്പും ഡിഎംഇയും ഗാന്ധിനഗർ പൊതുമരാമത്ത് കെട്ടിടവിഭാഗം അധികൃതരുമായി ചർച്ചകൾ നടക്കുന്നുണ്ട്. കെട്ടിടം പൂർണമായും പൊളിച്ചു നീക്കണമോ വേണ്ടയോ എന്നു തീരുമാനമെടുക്കാൻ കെട്ടിടത്തിന്‍റെ ബലക്ഷയം സംബന്ധിച്ച പരിശോധനകൾ നടന്നു. കെട്ടിടം ഭാഗികമായി പൊളിച്ചുനീക്കി അപകടകരമല്ലാത്ത ഭാഗം ഉപയോഗിക്കാൻ കഴിയുമോ എന്നാണ് അധികൃതർ നോക്കുന്നത്. എന്നാൽ ഇക്കാര്യത്തിൽ അന്തിമ തീരുമാനമായിട്ടില്ല. അതേസമയം കെട്ടിടം പൊളിച്ചുനീക്കുന്നതിന് 1.4 കോടിയുടെ പദ്ധതി പൊതുമരാമത്ത് കെട്ടിട വിഭാഗം സമർപ്പിച്ചിട്ടുണ്ട്. ആരോഗ്യവകുപ്പിന്‍റെയും ഡിഎംഇയുടെ അനുമതി ലഭിച്ചാൽ മാത്രമേ കെട്ടിടം പൊളിച്ചുനീക്കാൻ സാധിക്കുകയുള്ളൂ.

സ്വാഗതനൃത്തത്തിലൂടെ കൈയടി നേടി ഏറ്റുമാനൂര്‍ എംആര്‍എസിലെ കുട്ടികള്‍

കോട്ടയം: മാമ്മന്‍ മാപ്പിള ഹാളില്‍ നടക്കുന്ന സ്ത്രീപക്ഷ നവകേരളം പരിപാടിയുടെ ഉദ്ഘാടനവേദിയെ ശ്രദ്ധേയമാക്കി ആദിവാസി വിഭാഗത്തില്‍നിന്നുള്ള ഒന്‍പതു കുട്ടികളുടെ നൃത്തം. ഉദ്ഘാടനച്ചടങ്ങിനു മുന്നോടിയായുള്ള സ്വാഗതനൃത്തം അവതരിപ്പിച്ചാണ് ഏറ്റുമാനൂര്‍ മോഡല്‍ റസിഡന്‍ഷ്യല്‍ സ്‌കൂളിലെ പെണ്‍കുട്ടികള്‍ കൈയടി നേടിയത്. സ്ത്രീകള്‍ പൊതുവിടങ്ങളിലും വീടുകള്‍ക്കുള്ളിലും നേരിടേണ്ടിവരുന്ന പ്രയാസങ്ങളും പീഡനങ്ങളും സമകാലിക സംഭവങ്ങളുടെ പശ്ചാത്തലത്തില്‍ നൃത്തമായി അവതരിപ്പിക്കുകയായിരുന്നു വേദിയില്‍. സ്‌കൂളിലെ നൃത്താധ്യാപിക വിദ്യാ വിജയന്റെ നേതൃത്വത്തിലായിരുന്നു പരിശീലനം. കേരളത്തിന്‍റെ വിവിധ ഭാഗങ്ങളില്‍നിന്നെത്തി ഏറ്റുമാനൂരിലെ എംആര്‍എസില്‍ പഠിക്കുന്ന വിജി വിജയന്‍, റാണി മഞ്ജുഷ, അര്‍ച്ചന അനൂപ്, ആര്യ ബാബു, എസ്. പ്രീതി, അപര്‍ണ സലി, അഭിനയ മധുകുമാര്‍, ആദിത്യ കുഞ്ഞിക്കുട്ടന്‍, അക്ഷയ രാജേന്ദ്രന്‍ എന്നിവരാണ് അരങ്ങിലെത്തിയത്. കാഞ്ഞിരപ്പള്ളി ഐടിഡിപി ഓഫീസിനുകീഴില്‍ പ്രവര്‍ത്തിക്കുന്ന സ്‌കൂളില്‍ 300 കുട്ടികളാണ് പഠിക്കുന്നത്.

പാൽവില വർധന: മന്ത്രിയുടെ നിലപാടിൽ പ്രതീക്ഷയർപ്പിച്ച് ക്ഷീരകര്‍ഷകര്‍

കോട്ടയം: മില്‍മ ഫെഡറേഷന്‍ തിരുവനന്തപുരത്ത് ചേര്‍ന്ന യോഗത്തില്‍ പാൽവില വര്‍ധിപ്പിക്കേണ്ടെന്ന് തീരുമാനമെടുത്തെങ്കിലും ഇന്നലെ മന്ത്രി ജെ. ചിഞ്ചുറാണി വിലവര്‍ധിപ്പിക്കുമെന്ന് നിയമസഭയില്‍ പറഞ്ഞത് കര്‍ഷകര്‍ക്ക് പ്രതീക്ഷ നല്‍കുന്നു. പാലിനും പാല്‍ ഉത്പന്നങ്ങള്‍ക്കും ജിഎസ്ടി ഒഴിവാക്കിയ സാഹചര്യത്തിലാണു വില കൂട്ടേണ്ടതില്ലെന്നും വില വര്‍ധിപ്പിച്ച് ഉപയോക്താക്കളെ ബുദ്ധിമുട്ടിക്കേണ്ടെന്നും മില്‍മ ഫെഡറേഷന്‍ തീരുമാനിച്ചത്. എന്നാല്‍ വില വര്‍ധിപ്പിച്ച് കര്‍ഷകരെ സഹായിക്കുമെന്ന നിലപാട് മന്ത്രി ജെ. ചിഞ്ചുറാണി സ്വീകരിച്ചതോടെ ആശ്വാസത്തിലാണ് കര്‍ഷകര്‍. അഞ്ചു രൂപ കൂട്ടുമോ? 2026 ജനുവരി, ഫെബ്രുവരി മാസങ്ങളില്‍ പാല്‍വില വര്‍ധിപ്പിക്കണമെന്ന ശിപാര്‍ശയാണു കഴിഞ്ഞ ദിവസത്തെ യോഗത്തില്‍ ഫെഡറേഷന്‍ നല്കിയത്. പാല്‍ വില ലിറ്ററിന് അഞ്ചു രൂപവരെ വര്‍ധിപ്പിക്കുമെന്ന പ്രതീക്ഷയിലായിരുന്നു കര്‍ഷകര്‍. 2022 ഡിസംബറിലാണ് ഇതിനു മുമ്പ് മില്‍മ വില കൂട്ടിയത്. അന്ന് ലിറ്ററിന് ആറു രൂപ കൂട്ടിയിരുന്നു. തദ്ദേശ സ്വയംഭരണ തെരഞ്ഞെടുപ്പ് മുന്നില്‍ക്കണ്ടു സര്‍ക്കാരിന്‍റെ ചട്ടുകമായി മില്‍മ ചെയര്‍മാന്‍ പ്രവര്‍ത്തിക്കുകയാണെന്ന് ക്ഷീരകര്‍ഷകര്‍ ആരോപിക്കുന്നു. പാല്‍വില അഞ്ചു രൂപ വര്‍ധിപ്പിക്കണമെന്ന ആവശ്യം പരിഗണിക്കാതെ ചര്‍ച്ചയെ വഴിതിരിച്ചു വിട്ട ചെയര്‍മാന്‍റെ നടപടിയിലും കര്‍ഷകര്‍ക്കു കടുത്ത അമര്‍ഷമുണ്ട്. നിലവില്‍ ക്ഷീരസംഘങ്ങളില്‍ വില്‍ക്കുന്ന പാലിനും മൃഗസംരക്ഷണ വകുപ്പിന്‍റെ കീഴില്‍ പ്രവര്‍ത്തിക്കുന്ന ഫാമുകളിലും പാല്‍ വില ഉയര്‍ത്തിയിട്ടുണ്ട്. ക്ഷീര മേഖലയില്‍നിന്നും 50 ശതമാനം കര്‍ഷകര്‍ വിട്ടുപോയെന്നു സര്‍ക്കാര്‍തന്നെ കണ്ടെത്തിയ സാഹചര്യത്തിലും അവരെ തിരികെ കൊണ്ടുവരുന്നതിനുള്ള യാതൊരു നടപടിയും മില്‍മയോ സര്‍ക്കാരോ സ്വീകരിക്കാത്തതിനു പിന്നില്‍ സര്‍ക്കാരിലെ ഉന്നതരുടെ പിന്തുണയുള്ള മറ്റൊരു കമ്പനിയെ സഹായിക്കാനാണെന്നും ആക്ഷേപമുണ്ട്. മന്ത്രിയുടെ പ്രഖ്യാപനം ഇന്നലെ വന്നെങ്കിലും എന്ന്, എത്ര രൂപ വര്‍ധിപ്പിക്കുമെന്നതില്‍ വ്യക്തതയില്ല. നിലവില്‍ കര്‍ഷകര്‍ക്ക് ഒരുലിറ്റര്‍ പാലിന് ലഭിക്കുന്നത് 45 രൂപ മുതല്‍ 49 രൂപ വരെയാണ്. പുറംവിപണിയില്‍ ലിറ്ററിന് 60-65 രൂപയ്ക്കാണ് വില്പന. ലിറ്ററിന് 10 രൂപയുടെയെങ്കിലും വര്‍ധന ഉണ്ടെങ്കിലേ പിടിച്ചുനില്‍ക്കാന്‍ കഴിയൂ. കാലിത്തീറ്റ വിലവര്‍ധനയും വെറ്റിനറി മരുന്നുകളുടെ വിലവർധനവും കര്‍ഷകര്‍ക്ക് വലിയ തിരിച്ചടിയാണുണ്ടാക്കുന്നത്. 50 കിലോഗ്രാം തൂക്കം വരുന്ന ഒരു ചാക്ക് കാലിത്തീറ്റയുടെ വില 1400 രൂപയ്ക്കു മുകളിലാണ്. പുല്ലിനേക്കാളും കാലിത്തീറ്റയാണ് കന്നുകാലികള്‍ക്ക് കര്‍ഷകര്‍ നല്‍കുന്നത്. വൈക്കോലിനു ക്ഷാമം പാടശേഖരങ്ങളില്‍ കൊയ്ത്തുമെതി യന്ത്രമുപയോഗിച്ചു വിളവെടുക്കുന്നതിനാല്‍ സീസണിലേക്ക് ആവശ്യമായ വൈക്കോല്‍ സംഭരിച്ചുവയ്ക്കാനും കഴിയുന്നില്ല. കാലവര്‍ഷത്തില്‍ നിരന്തരമായ വെള്ളപ്പൊക്കം കാരണം പുല്ലിന്‍റെ ലഭ്യത ഇല്ലാതാകുന്നതും വലിയ വെല്ലുവിളിയാണ്. അടുത്ത കാലത്ത് അകിടുവീക്കം, തൈലേറിയ തുടങ്ങിയ രോഗങ്ങളും കൂടിവരുന്നു. കര്‍ഷകര്‍ ക്ഷീരമേഖലയെ കൈവിട്ടതോടെ സംസ്ഥാനത്ത് പാല്‍ ഉത്പാദനത്തില്‍ വന്‍ കുറവാണ് ഉണ്ടായിരിക്കുന്നത്. മൊത്തം ആവശ്യത്തിന്‍റെ പകുതിപോലും ഉത്പാദിപ്പിക്കാന്‍ കഴിയുന്നില്ല. പല സൊസൈറ്റികളും വന്‍ സാമ്പത്തിക പ്രതിസന്ധിയിലൂടെയാണു കടന്നുപോകുന്നത്. ക്ഷീര കര്‍ഷകര്‍ നിലനില്‍പ്പിനായി നെട്ടോട്ടമോടുമ്പോള്‍ ജിഎസ്ടിയുടെ പേരുപറഞ്ഞ് ഈ മേഖലയില്‍ യഥാര്‍ഥ പ്രശ്‌നങ്ങളെ മറച്ചുവച്ച മില്‍മ ചെയര്‍മാന്‍റെ നടപടി ഇരുട്ടുകൊണ്ട് ഓട്ട അടയ്ക്കുന്നതിനു സമാനമാണെന്ന് കര്‍ഷക കോണ്‍ഗ്രസ് ക്ഷീര സെല്‍ ജില്ലാ ചെയ്‍മാന്‍ എബി ഐപ്പ് ആരോപിച്ചു. പാലിന്‍റെ വില വര്‍ധിപ്പിക്കാന്‍ ഉടന്‍ നടപടി എടുത്തില്ലെങ്കില്‍ ശക്തമായ സമരപരിപാടികള്‍ ആരംഭിക്കുമെന്നും എബി ഐപ്പ് പറഞ്ഞു.

എരുമേലിയിലെ സ്റ്റാൻഡ് വേണം; അപ്പീലുമായി കെഎസ്ആർടിസി

എരുമേലി: കെഎസ്ആർടിസിയുടെ എരുമേലിയിൽ പ്രവർത്തിക്കുന്ന ബസ് സ്റ്റാൻഡും സ്ഥലവും മൂന്നു മാസത്തിനകം സ്വകാര്യ വ്യക്തിക്ക് ഒഴിഞ്ഞു നൽകണമെന്ന പാലാ സബ് കോടതിയുടെ വിധി സ്റ്റേ ചെയ്യണമെന്ന ആവശ്യവുമായി കെഎസ്ആർടിസി നൽകിയ അപ്പീൽ ഹർജി കോട്ടയം ജില്ലാ കോടതി ഫയലിൽ സ്വീകരിച്ചു. തുടർന്ന് ഹർജി പാലായിലെ ജില്ലാ കോടതിയുടെ ബഞ്ചിലേക്കു നൽകി. ഹർജി പരിഗണിച്ച പാലായിലെ ബഞ്ച് കേസിൽ വാദം കേൾക്കാനായി അവധിക്കു വച്ചു. പാലാ സബ് കോടതിയിൽനിന്ന് അനുകൂല വിധി നേടിയ സ്വകാര്യ വ്യക്തി നേരത്തെ ജില്ലാ കോടതിയിൽ കെഎസ്ആർടിസിയുടെ അപ്പീൽ ഹർജിക്കു തടസവാദം അറിയിച്ച് ഹർജി നൽകിയിരുന്നതിനെത്തുടർന്നാണ് കേസിൽ സ്വകാര്യ വ്യക്തിയുടെ വാദം കേൾക്കാനായി പാലായിലെ ജില്ലാ കോടതി ബഞ്ച് അപ്പീൽ ഹർജി പരിഗണിച്ച ശേഷം അവധിക്കു വച്ചത്. കെഎസ്ആർടിസിയുടെ അപ്പീൽ ഹർജിയിൽ കക്ഷി ചേരാൻ ദേവസ്വം ബോർഡ് തീരുമാനിച്ചിട്ടുണ്ട്. വിധി നിർണായകം അപ്പീൽ ഹർജിയിൽ തീരുമാനം ആകുന്നതുവരെ സബ് കോടതിയുടെ ഉത്തരവ് നടപ്പാക്കില്ല എന്നതാണ് നിലവിൽ കെഎസ്ആർടിസിക്കു ലഭിച്ചിരിക്കുന്ന ആശ്വാസം. അതേസമയം, സ്വകാര്യ വ്യക്തിക്ക് അനുകൂല വിധി ഉണ്ടായാൽ എരുമേലിയിലെ സ്റ്റാൻഡും സ്ഥലവും കൈവിടേണ്ടി വരും. സബ് കോടതി ഉത്തരവ് സ്റ്റേ ചെയ്യുകയും തത്‌സ്ഥിതി തുടരാൻ ഉത്തരവുണ്ടാവുകയും ചെയ്താൽ ഇത്തവണത്തെ ശബരിമല സീസണിൽ ബസ് സ്റ്റാൻഡ് ഒഴിഞ്ഞു കൊടുക്കേണ്ടി വരില്ല. നിലവിലുള്ള ബസ് സ്റ്റാൻഡ് അതേപടി നിലനിർത്തി ഓഫീസ് മാത്രം തൊട്ടടുത്തുള്ള ദേവസ്വം വക കെട്ടിടത്തിലേക്കു മാറ്റാനാണ് കെഎസ്ആർടിസി ഒരുങ്ങുന്നത്. എന്നാൽ, ജില്ലാ കോടതി ബഞ്ചിൽനിന്നു തീരുമാനം ആകാതെ ഇക്കാര്യത്തിൽ കൂടുതൽ നടപടികളുണ്ടാവില്ല. നിലവിൽ ബലക്ഷയം മൂലം സ്റ്റാൻഡിലെ പ്രധാന കെട്ടിടം അപകടത്തിലായതിനാൽ ശുചിമുറി സമുച്ചയവും വർക്ക് ഷോപ്പ് യൂണിറ്റുകളും ഉൾപ്പെടുന്ന കെട്ടിടങ്ങൾ പൊളിച്ചു നീക്കേണ്ടതുണ്ട്. ഇത് ഇടിഞ്ഞു വീണ് അപകടമുണ്ടായേക്കുമെന്നു പരിശോധന നടത്തിയ പൊതുമരാമത്ത് വിഭാഗം മുന്നറിയിപ്പ് നൽകിയിട്ടുണ്ട്. ഇതു മുൻനിർത്തി കെട്ടിടങ്ങൾ പൊളിച്ചുനീക്കണമെങ്കിൽ അപ്പീൽ ഹർജിയിലെ ഉത്തരവ് അനുകൂലമായാലാണ് സാധിക്കുക. അതേസമയം, ഓഫീസ് പ്രവർത്തിക്കുന്ന പ്രധാന കെട്ടിടവും വെയ്റ്റിംഗ് ഷെഡും അപകട ഭീഷണിയിലല്ലാത്തതിനാൽ നിലനിർത്താനാകുമെന്നാണ് കരുതുന്നത്. ദേവസ്വം മുറികൾ കിട്ടണം ശബരിമല സീസണിൽ ഓഫീസ് ഉൾപ്പെടെ പ്രവർത്തനം മാറ്റാൻ കെഎസ്ആർടിസിക്കു തൊട്ടടുത്ത ദേവസ്വം ബോർഡിന്‍റെ കെട്ടിടത്തിലെ മൂന്നു മുറികൾ വിട്ടുനൽകണമെന്ന് ആവശ്യപ്പെട്ടു ദേവസ്വം ബോർഡിനു സെബാസ്റ്റ്യൻ കുളത്തുങ്കൽ എംഎൽഎ കത്ത് നൽകിയിട്ടുണ്ട്. എന്നാൽ, ഇതു സംബന്ധിച്ച് ദേവസ്വം ബോർഡ് തീരുമാനം ഇനിയും ആയിട്ടില്ല. പൊൻകുന്നം ചിറക്കടവ് വൃന്ദാവൻ വീട്ടിൽ ഗോപി രാജഗോപാലും മക്കളും നൽകിയ ഹർജിയിലാണ് കെഎസ്ആർടിസി ബസ് സ്റ്റാൻഡും സ്ഥലവും മൂന്നു മാസത്തിനകം ഒഴിയണമെന്ന് പാലാ സബ് കോടതി വിധി നൽകിയത്. ധർമശാസ്താ ക്ഷേത്രത്തിനു സമീപം 50 സെന്‍റ് സ്ഥലത്ത് 25 സർവീസുകളും 130 ജീവനക്കാരുമുള്ള ഓപ്പറേറ്റിംഗ് സെന്‍ററിന്‍റെ പ്രവർത്തനം ഇതോടെ പ്രതിസന്ധിയിലാവുകയായിരുന്നു. ഗോപി രാജഗോപാലിന്‍റെ ഭർത്താവ് പരേതനായ പി.ആർ. രാജഗോപാൽ 1977ൽ 50 സെന്‍റ് സ്ഥലം താത്കാലിക ഉപയോഗത്തിനായി കെഎസ്ആർടിസിക്കു വാക്കാൽ അനുവദിച്ചതാണെന്നും ശബരിമല തീർഥാടന കാലത്തു നഗരത്തിലെ ഗതാഗതക്കുരുക്ക് ഒഴിവാക്കാനായിരുന്നു ഇതെന്നും 1996ൽ പട്ടയം കിട്ടിയതാണെന്നും സ്ഥലം തിരിച്ചുകിട്ടണമെന്നു പലതവണ ആവശ്യപ്പെട്ടെങ്കിലും ഒഴിയാൻ കെഎസ്ആർടിസി തയാറായില്ലെന്നുമായിരുന്നു ഹർജി. പൊട്ടിപ്പൊളിഞ്ഞ് സ്റ്റാൻഡ് ശബരിമല സീസൺ ആരംഭിക്കാനിരിക്കെ കെഎസ്ആർടിസിയുടെ സ്റ്റാൻഡ് കുഴികൾ നിറഞ്ഞ് ചെളി മൂടി പൊട്ടിപ്പൊളിഞ്ഞ നിലയിലാണ്. സ്റ്റാൻഡും സ്ഥലവും ഉടനെ ഒഴിയണമെന്ന കോടതി വിധിയുള്ളതിനാൽ അറ്റകുറ്റപ്പണികൾ നടത്താൻ നിയമപ്രകാരം സാധ്യമല്ല. ശബരിമല സീസൺ ആകുമ്പോൾ സ്റ്റാൻഡ് ടാർ ചെയ്തു കുഴികൾ നികത്തുമായിരുന്നു. പഞ്ചായത്ത്‌ ആണ് ഇത് ചെയ്യാറുള്ളത്. എന്നാൽ, സ്വകാര്യ വ്യക്തിയുടെ സ്ഥലം ആണെന്നു സബ് കോടതി വിധി നൽകിയിട്ടുള്ളതിനാൽ പൊതു ഫണ്ട് ഉപയോഗിച്ചു നവീകരണം നടത്താനാകില്ല. സ്റ്റാൻഡിലെ കെട്ടിടങ്ങളുടെ പെയിന്‍റിംഗ്, ശുചിമുറികളുടെ അറ്റകുറ്റപ്പണികൾ, അയ്യപ്പഭക്തർക്കു വിശ്രമസൗകര്യം തുടങ്ങിയവയ്ക്ക് ഫണ്ട് ഉപയോഗിക്കാൻ ഇനി കഴിയില്ല. ഇതു പ്രതിസന്ധി സൃഷ്‌ടിച്ചിരിക്കുകയാണ്.

കേബിള്‍ സേവനത്തില്‍ വീഴ്ച: ഏഷ്യാനെറ്റ് സാറ്റലൈറ്റ് കമ്യൂണിക്കേഷന് 5000 രൂപ പിഴ

കോട്ടയം: കാലവധി പൂര്‍ത്തിയാകുംമുമ്പേ പ്രീ പെയ്ഡ് കേബിള്‍ ടി.വി. കണക്‌ഷന്‍ ഡിസ്‌കണക്ട് ചെയ്തതിന് ചങ്ങനാശേരി ഏഷ്യാനെറ്റ് സാറ്റലൈറ്റ് കമ്യൂണിക്കേഷന് 5000 രൂപ പിഴയിട്ട് കോട്ടയം ഉപഭോക്തൃ തര്‍ക്ക പരിഹാര കമ്മീഷന്‍. തൃക്കൊടിത്താനം സ്വദേശി സോമസുന്ദരം നല്‍കിയ പരാതിയിലാണ് നടപടി. 2025 ഫെബ്രുവരി 25 വരെ കാലാവധിയില്‍ 4,800 രൂപ മുടക്കി ഒരുവര്‍ഷത്തെ പ്രീ പെയ്ഡ് കണക്‌ഷന്‍ എടുത്തത് 2024 നവംബര്‍ 18ന് ഡിസ്‌കണക്ട് ആയെന്നും തൊട്ടടുത്തദിവസം തന്നെ ഫോണ്‍ മുഖേനെയും ഓഫീസില്‍ നേരിട്ടെത്തിയും പരാതി നല്‍കിയിട്ടും പരിഹരിച്ചില്ല എന്നുമാണ് കമ്മിഷനു മുന്നിലെത്തിയ കേസ്. സെറ്റ്ടോപ് ബോക്‌സിന്‍റെ തകരാര്‍ മൂലമാണ് ഡിസ്‌കണക്ടായതെന്നു സ്ഥാപനം വാദിച്ചെങ്കിലും തെളിവു ഹാജരാക്കാനായില്ല. പരാതിക്കാരന്‍ 2019ലെ ഉപഭോക്തൃസംരക്ഷണ നിയമപ്രകാരമുള്ള ഉപഭോക്താവല്ലെന്ന വാദവും കമ്മീഷന്‍ നിരാകരിച്ചു. 1995ലെ കേബിള്‍ നെറ്റ്‌വര്‍ക്ക് ആക്ട് പ്രകാരം തടസമില്ലാത്ത സേവനം നല്‍കുന്നതില്‍ സ്ഥാപനത്തിനു വീഴ്ച വന്നെന്നും സേവനന്യൂനതയ്ക്ക് 5,000 രൂപ പരാതിക്കാരനു നല്‍കണമെന്നും അഡ്വ. വി.എസ്. മനുലാല്‍ പ്രസിഡന്‍റും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള കമ്മീഷന്‍ ഉത്തരവിട്ടു.

പുത്തൻചന്ത ഭാഗത്ത് റോഡിലെ കുഴി അപകടസാധ്യത വർധിപ്പിക്കുന്നു

മുണ്ടക്കയം: പൂഞ്ഞാർ - എരുമേലി സംസ്ഥാനപാതയിൽ മുണ്ടക്കയം പുത്തൻചന്ത ഭാഗത്ത് റോഡിലെ കുഴികൾ അപകടസാധ്യത വർധിപ്പിക്കുന്നു. വാട്ടർ അഥോറിറ്റിയുടെ പൈപ്പുലൈനുകൾ കാലപ്പഴക്കത്തിൽ പൊട്ടുന്നത് പരിഹരിക്കാൻ റോഡിൽ കുഴികളെടുക്കുന്നതാണ് പലപ്പോഴും റോഡ് തകരാൻ കാരണമാകുന്നത്. പൈപ്പുലൈനുകളുടെ നവീകരണത്തിനായി റോഡിൽ കുഴിയെടുക്കുകയും പിന്നീട് ഇവിടം കോൺക്രീറ്റ് ചെയ്തു നവീകരിക്കുകയും ചെയ്യും. എന്നാൽ ഏതാനും ദിവസം കഴിയുന്നതോടെ കോൺക്രീറ്റിംഗ് തകർന്ന് റോഡിന്‍റെ ഈ ഭാഗത്ത് കുഴി രൂപപ്പെടും. പുത്തൻചന്ത ടൗൺ ഭാഗത്ത് നിരവധി ഇടങ്ങളിലാണ് ഇത്തരത്തിൽ കുഴികൾ രൂപപ്പെട്ട് അപകടഭീഷണി ഉയർത്തുന്നത്. പുത്തൻചന്ത ടൗണിൽനിന്നു വേങ്ങക്കുന്ന് ഭാഗത്തേക്കു തിരിയുന്ന റോഡിന്‍റെ ഭാഗത്തുള്ള കുഴി പലപ്പോഴും അപകടങ്ങൾക്ക് വഴിവയ്ക്കുകയാണ്. മഴ പെയ്യുന്നതോടെ കുഴിയിൽ വെള്ളം കെട്ടിനിൽക്കുകയും അപകട സാധ്യത വർധിക്കുകയുമാണ്. കൂടുതലും ഇരുചക്ര വാഹനങ്ങളാണ് അപകടത്തിൽപ്പെടുന്നത്. കുഴിയിൽ വീഴാതിരിക്കാൻ വാഹനങ്ങൾ വെട്ടിച്ചു മാറ്റുന്നതും അപകട സാധ്യത വർധിപ്പിക്കുന്നുണ്ട്. അധികാരികളുടെ അവഗണനയ്ക്കെതിരേ എസ്ഡിപിഐയുടെ നേതൃത്വത്തിൽ റോഡിൽ വാഴ നട്ട് പ്രതിഷേധിച്ചു. അടിയന്തരമായി റോഡിലെ കുഴി അടയ്ക്കാൻ അധികാരികൾ തയാറായില്ലെങ്കിൽ ശക്തമായ പ്രതിഷേധ പരിപാടികൾ സംഘടിപ്പിക്കാനാണ് നാട്ടുകാരുടെ തീരുമാനം.

ഇടച്ചോറ്റി ക്ഷേത്രത്തിൽ നവരാത്രി ആഘോഷവും വിദ്യാരംഭവും

കാഞ്ഞിരപ്പള്ളി: ഇടച്ചോറ്റി ശ്രീ സരസ്വതി ദേവി ക്ഷേത്രത്തിൽ നവരാത്രി ആഘോഷവും ദേവി ഭാഗവത നവാഹയജ്ഞവും വിദ്യാരംഭവും 21 മുതൽ ഒക്ടോബർ രണ്ടുവരെ നടക്കും. 21ന് വൈകുന്നേരം നാലിന് ക്ഷേത്രാങ്കണത്തിൽ നടക്കുന്ന നവരാത്രി ആഘോഷ പരിപാടി സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. ക്ഷേത്രം മുഖ്യകാര്യദർശി ശ്രീമദ് സരസ്വതി തീർഥ പാദസ്വാമികൾ അധ്യക്ഷത വഹിക്കും. ടി.ആർ. രാമനാഥൻ വടക്കൻ പറവൂർ അനുഗ്രഹപ്രഭാഷണം നടത്തും. ജില്ലാ പഞ്ചായത്തംഗം പി.ആർ. അനുപമ യജ്ഞ സന്ദേശം നൽകും. ഈ വർഷത്തെ വനമിത്ര അവാർഡിന് അർഹനായ സുനിൽ സുരേന്ദ്രൻ, പ്രഭാഷകയും സാമൂഹിക പ്രവർത്തകനുമായ ഡോ. ഗീത അനിയൻ എന്നിവരെ ബ്ലോക്ക് പഞ്ചായത്തംഗം സാജൻ കുന്നത്ത് മൊമെന്‍റോ നൽകി ആദരിക്കും. പാറത്തോട് പഞ്ചായത്ത് പ്രസിഡന്‍റ് കെ.കെ. ശശികുമാർ, വൈസ് പ്രസിഡന്‍റ് സോഫി ജോസഫ്, പഞ്ചായത്തംഗം വിജയമ്മ വിജയലാൽ, കെ.കെ. ബാബു കല്ലുംപുറത്ത്, സുധാകരൻ ആലഞ്ചേരി, വി.ഡി. ചന്ദ്രബാബു തുടങ്ങിയവർ പ്രസംഗിക്കും. 6.30ന് ദീപാരാധന, രാത്രി ഏഴിന് ധ്വജാരോഹണം, 7.30ന് ആചാര്യവരണം, തുടർന്ന് ശ്രീമദേവി ഭാഗവത മാഹാത്മ്യം. 22 മുതൽ എല്ലാ ദിവസവും രാവിലെ അഞ്ചിന് മഹാഗണപതി ഹോമം, ആറിന് സമൂഹ പ്രാർഥന, 6.15ന് ലളിതാസഹസ്രനാമം, ശ്രീമദ് ദേവീഭാഗവത പാരായണം, 11.30ന് പ്രഭാഷണം, ഉച്ചയ്ക്ക് ഒന്നിന് അമൃതഭോജനം, രണ്ടിന് പാരായണം, വൈകുന്നേരം 6.30ന് ദീപാരാധന, ഏഴിന് ഭക്തിഗാനാമൃതം. 28ന് 11.30ന് ഷഷ്ടിപൂജ തുടർന്ന് പ്രഭാഷണം, വൈകുന്നേരം നാലിന് വിദ്യാവിജയപൂജ. 29ന് രാവിലെ പത്തിന് സുബ്രഹ്മണ്യ അവതാരകഥ, വൈകുന്നേരം നാലിന് കുമാരി പൂജ, ആറിന് പൂജവയ്പ്. 30ന് വൈകുന്നേരം നാലിന് മഹാസർവെശ്വര്യ പൂജ. ഒക്ടോബർ ഒന്നിന് രാവിലെ 10ന് പ്രഭാഷണം, തുടർന്ന് യജ്ഞസമർപ്പണം, ആചാര്യദക്ഷിണ, വൈകുന്നേരം 6.30ന് വിശേഷാൽ ദീപരാധന, ഏഴിന് നൃത്ത നൃത്യങ്ങൾ. രണ്ടിന് രാവിലെ അഞ്ചിന് പൂജയെടുപ്പ്, തുടർന്ന് വിദ്യാരംഭം, 9.30ന് ചാക്യാർകൂത്ത്, 11ന് സംഗീതാമൃതം, 11.30ന് കുട്ടികളുടെ കലാപരിപാടികൾ, ഉച്ചയ്ക്ക് ഒന്നിന് മഹാപ്രസാദമൂട്ട്. പത്രസമ്മേളനത്തിൽ ക്ഷേത്രം മുഖ്യകാര്യദർശി ശ്രീമദ് സരസ്വതി തീർഥപാദ സ്വാമികൾ, ട്രസ്റ്റ് സെക്രട്ടറി ബാബു കല്ലുംപുറത്ത്, ഉപദേശക സമിതി അംഗം ബിജു മിഷ്യൻപറമ്പിൽ, ആഘോഷകമ്മിറ്റി കൺവീനർ വി.ഡി. ചന്ദ്രബാബു തുടങ്ങിയവർ പങ്കെടുത്തു.

പഴയിടം സെന്‍റ് മൈക്കിൾസ് പള്ളിയിൽ തിരുനാൾ

പഴയിടം: പഴയിടം സെന്‍റ് മൈക്കിൾസ് പള്ളിയിൽ വിശുദ്ധ മിഖായേൽ മാലാഖയുടെ നവനാൾ പ്രാർഥനയും തിരുനാളും ഇന്നു മുതൽ 28 വരെ നടക്കുമെന്ന് വികാരി ഫാ. ജോസ് മാത്യു പറപ്പള്ളിൽ അറിയിച്ചു. ഇന്ന് വൈകുന്നേരം നാലിന് കൊടിയേറ്റ്, 4.15ന് ആരാധന, നൊവേന, വിശുദ്ധ കുർബാന, സന്ദേശം. നാളെ വൈകുന്നേരം 4.15ന് ആരാധന, നൊവേന, വിശുദ്ധ കുർബാന, സന്ദേശം. 21ന് രാവിലെ 6.15ന് നൊവേന, വിശുദ്ധ കുർബാന, സന്ദേശം, 9.15ന് നൊവേന, 9.30ന് വിശുദ്ധ കുർബാന, സന്ദേശം. 22 മുതൽ 27 വരെ വൈകുന്നേരം 4.15ന് ആരാധന, നൊവേന, വിശുദ്ധ കുർബാന, സന്ദേശം. 28ന് രാവിലെ 6.15ന് നൊവേന, വിശുദ്ധ കുർബാന, സന്ദേശം, 9.15ന് നൊവേന, 9.30ന് വിശുദ്ധ കുർബാന, സന്ദേശം, ഉച്ചയ്ക്ക് 12.30ന് കുരിശടി ചുറ്റി പ്രദക്ഷിണം, 1.30ന് കൊടിയിറക്ക്.

ഭിന്നശേഷി കുട്ടികളുടെ കലോത്സവം ഇന്ന്

കാഞ്ഞിരപ്പള്ളി: ബ്ലോക്ക് പഞ്ചായത്തിന്‍റെ 2025-26 സാമ്പത്തിക വര്‍ഷത്തെ ജനകീയാസൂത്രണ പദ്ധതിയായ ഭിന്നശേഷി കുട്ടികളുടെ കലോത്സവം - ശലഭോത്സവം 2025 കാഞ്ഞിരപ്പളളി സെന്‍റ് ഡൊമിനിക്സ് കോളജ് ഓഡിറ്റോറിയത്തില്‍ ഇന്നു രാവിലെ എട്ടു മുതൽ വൈകുന്നേരം അഞ്ചുവരെ നടക്കും. രാവിലെ 11.30ന് സമ്മേളനം സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് അജിതാ രതീഷ് അധ്യക്ഷത വഹിക്കും. സെന്‍റ് ഡൊമിനിക്സ് കോളജ് ബർസാർ റവ.ഡോ. മനോജ് പാലക്കുടി അനുഗ്രഹപ്രഭാഷണം നടത്തും. ജില്ലാ പഞ്ചായത്തംഗങ്ങളായ പി.ആർ. അനുപമ, ശുഭേഷ് സുധാകരൻ, ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, പഞ്ചായത്ത് പ്രസിഡന്‍റുമാരായ കെ.കെ. ശശികുമാർ, കെ.ആർ. തങ്കപ്പൻ, സിറിൽ തോമസ്, രേഖാദാസ്, ജാൻസി സാബു, സുബി സണ്ണി, ബ്ലോക്ക്, ഗ്രാമ പഞ്ചായത്തംഗങ്ങൾ തുടങ്ങിയവർ പ്രസംഗിക്കും. ഉച്ചകഴിഞ്ഞ് 3.30ന് നടക്കുന്ന സമാപന സമ്മേളനവും അവാർഡ് ദാനവും ചീഫ് വിപ്പ് ഡോ.എൻ. ജയരാജ് ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് അജിതാ രതീഷ് അധ്യക്ഷത വഹിക്കും. ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, സെക്രട്ടറി എസ്. സജീഷ്, ബിആർസി ബ്ലോക്ക് പ്രോഗ്രാം ഓഫീസർ വി.എം. അജാസ്, മിനി ജോസഫ്, ബ്ലോക്ക്, ഗ്രാമ പഞ്ചായത്തംഗങ്ങൾ തുടങ്ങിയവർ പ്രസംഗിക്കും. തുടർന്ന് തുടി - ബഹുജന സംഗീത പരിപാടി നടക്കും. ഭിന്നശേഷികുട്ടികളുടെ സര്‍ഗവാസനകളെ പ്രോത്സാഹിപ്പിക്കുന്നതിനായി കാഞ്ഞിരപ്പളളി ബ്ലോക്ക് പഞ്ചായത്ത് പരിധിയിലുളള ഏഴ് പഞ്ചായത്തുകളില്‍ നിന്നുള്ള മത്സരാർഥികള്‍ കലോത്സവത്തില്‍ പങ്കെടുക്കും.

പൂതക്കുഴി ക്ഷേത്രത്തിൽ ഭക്തരുടെ പ്രിയതാരമായി ഇനി അമ്പാടിയും

പുങ്കന്നൂർ കുള്ളൻ ഇനത്തിൽപ്പെട്ട മൂരി പഴയിടം: പൂതക്കുഴി ശ്രീകൃഷ്ണസ്വാമി ക്ഷേത്രത്തിൽ ഭക്തർക്കു പ്രിയപ്പെട്ടവനായി അമ്പാടി എന്ന മൂരിക്കിടാവെത്തി. ഒരു ഭക്തൻ നടയ്ക്കിരുത്തിയ പുങ്കന്നൂർ കുള്ളൻ ഇനത്തിൽപെട്ട മൂരിക്കിടാവിനെ അമ്പാടി എന്ന പേരിട്ട് ഭഗവാന്‍റെ സന്നിധിയിലേക്ക് സ്വീകരിച്ചു. പഴയിടം ആറ്റുപുറത്ത് ഭാസ്‌കരൻ നായരാണ് മൂരിക്കിടാവിനെ സമർപ്പിച്ചത്. ഏഷ്യയിലെ പൊക്കം കുറഞ്ഞ നാടൻ ഇനത്തിൽപെട്ട മൂരിക്കിടാവാണിത്. പ്രത്യേക വഴിപാടായി ഇതിനെ വാങ്ങി സമർപ്പിക്കുകയായിരുന്നു. ആന്ധ്രപ്രദേശിലെ ചിറ്റൂർ ജില്ലയിൽ പുങ്കന്നൂർ താലൂക്കിലും സമീപ പ്രദേശങ്ങളിലും മാത്രം കണ്ടുവരുന്നതിനാലാണ് ഈയിനം പശുക്കൾക്കും മൂരിക്കിടാവുകൾക്കും പുങ്കന്നൂർ കുള്ളൻ എന്ന പേര് പതിഞ്ഞത്. ദേവസ്വം പ്രതിനിധികളായ എൻ.പി. ശശിധരൻനായർ, രഞ്ജിത് എസ്. നായർ, പ്രതീഷ് മുണ്ടപ്ലാവിൽ, ഹരികൃഷ്ണൻ ശ്രീകുമാർ, അർജുൻ തട്ടാരാത്ത്, സതീശൻ പാലമറ്റം എന്നിവർ ചേർന്ന് അമ്പാടിയെ സ്വീകരിച്ചു. മേൽശാന്തി സുജിത്ത് നാരായണൻ നമ്പൂതിരി പൂജ നടത്തി മാല അണിയിച്ചു. ക്ഷേത്രസന്നിധിയിൽ അമ്പാടിയെ പരിപാലിക്കാനാണ് തീരുമാനം. സുരേഷ് അമ്പഴത്തിനാൽ എന്നയാൾ അമ്പാടിക്കായി കൂടു നിർമിച്ചുനൽകും.

മാര്‍ സ്ലീവാ മെഡിസിറ്റിയില്‍ കാന്‍സര്‍ ബോധവത്്കരണ ക്ലാസ്്

ചേര്‍പ്പുങ്കല്‍: മാര്‍ സ്ലീവാ കാന്‍സര്‍ കെയര്‍ ആന്‍ഡ് റിസര്‍ച്ച് സെന്‍ററിന്‍റെ നേതൃത്വത്തില്‍ ചേര്‍പ്പുങ്കല്‍ ബിവിഎം കോളജ് എന്‍എസ്എസ് യൂണിറ്റുമായി സഹകരിച്ച് മാര്‍ സ്ലീവാ മെഡിസിറ്റിയില്‍ കാന്‍സര്‍ ബോധവത്കരണ പ്രോഗ്രാം നടത്തി. ആശുപത്രി ഹ്യൂമന്‍ റിസോഴ്‌സസ് ആന്‍ഡ് നഴ്‌സിംഗ് വിഭാഗം ഡയറക്ടര്‍ റവ.ഡോ.ജോസഫ് കരികുളം ഉദ്ഘാടനം ചെയ്തു. കാന്‍സറിനെക്കുറിച്ച് സമൂഹത്തിനുള്ള തെറ്റിദ്ധാരണകള്‍ മാറ്റാനും ബോധവത്കരണ സന്ദേശം ജനങ്ങളില്‍ എത്തിക്കാനും എന്‍എസ്എസ് വിദ്യാര്‍ഥികളും മുന്നിട്ടറങ്ങണമെന്ന് അദ്ദേഹം പറഞ്ഞു. ഓങ്കോളജി വിഭാഗം മേധാവി ഡോ. റോണി ബെന്‍സണ്‍ ക്ലാസിന് നേതൃത്വം നല്‍കി. വിദ്യാര്‍ഥികളുടെ നേതൃത്വത്തില്‍ കാന്‍സര്‍ കെയര്‍ ആന്‍ഡ് റിസര്‍ച്ച് സെന്‍റര്‍ സന്ദര്‍ശിക്കുകയും പ്രവര്‍ത്തനങ്ങള്‍ മനസിലാക്കുകയും ചെയ്തു. പ്രിന്‍സിപ്പല്‍ റവ.ഡോ.ബേബി സെബാസ്റ്റ്യന്‍ തോണിക്കുഴി, ബര്‍സാര്‍ ഫാ. മാര്‍ട്ടിന്‍ കല്ലറക്കല്‍, എന്‍എസ്എസ്‌പ്രോഗ്രാം ഓഫീസര്‍മാരായ ജിബിന്‍ അലക്‌സ്, ഷെറിന്‍ ജോസഫ് എന്നിവര്‍ നേതൃത്വം നല്‍കി.

അല്‍ഫോന്‍സാ കോളേജിന് സംസ്ഥാന സര്‍ക്കാര്‍ പുരസ്‌കാരം

പാലാ: അല്‍ഫോന്‍സാ കോളജിന് സംസ്ഥാന സര്‍ക്കാരിന്‍റെ ഉന്നത വിദ്യാഭ്യാസ വകുപ്പ് നല്‍കുന്ന മിനിസ്റ്റേഴ്‌സ് എക്‌സലന്‍സ് അവാര്‍ഡ് ലഭിച്ചു. നാക് ഫിഫ്ത് സൈക്കിള്‍ റി അക്രഡിറ്റേഷനില്‍ എ പ്ലസ് നേടിയ കോളജിന് അഭിമാന മുഹൂര്‍ത്തമായി മാറി അവാര്‍ഡ്ദാനച്ചടങ്ങ്. തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങിൽ ഉന്നത വിദ്യാഭ്യാസ വകുപ്പ് മന്ത്രി ഡോ. ആര്‍. ബിന്ദുവില്‍നിന്ന് കോളജ് പ്രിന്‍സിപ്പല്‍ പ്രഫ. ഡോ .സിസ്റ്റര്‍ മിനിമോള്‍ മാത്യു, ഐക്യുഎസി അംഗം ഡോ. റോസ്‌മേരി ഫിലിപ്പ് എന്നിവര്‍ ചേര്‍ന്ന് അവാര്‍ഡ് ഏറ്റുവാങ്ങി. പാഠ്യ-പാഠ്യേതര മേഖലയിലും കലാകായിക രംഗങ്ങളിലും തനതായ വ്യക്തിമുദ്ര പതിപ്പിച്ചു മുന്നേറുന്ന കോളജിന്‍റെ വളര്‍ച്ചയ്ക്കായി കൂടുതല്‍ തീക്ഷ്ണമായി പ്രവര്‍ത്തിക്കാന്‍ അവാര്‍ഡ് ഊര്‍ജമേകുമെന്ന് പ്രിന്‍സിപ്പല്‍ ഡോ.സി. മിനിമോള്‍ മാത്യു, വൈസ് പ്രിന്‍സിപ്പല്‍മാരായ ഡോ. സി. മഞ്ജു എലിസബത്ത് കുരുവിള, മിസ് മഞ്ജു ജോസ്, ബര്‍സാര്‍ ഫാ. കുര്യാക്കോസ് വെള്ളച്ചാലില്‍ എന്നിവര്‍ പറഞ്ഞു. കോളജിലെ അധ്യാപക- വിദ്യാര്‍ഥിനി സമൂഹത്തെ കോളജ് മാനേജ്‌മെന്‍റ് അഭിനന്ദിച്ചു.

ഏറ്റുമാനൂര്‍ ഉപജില്ലാ മെഗാ സയന്‍സ് ക്വിസ്: ഭാരതീയ വിദ്യാമന്ദിരം സ്കൂളിന് ഒന്നാം സ്ഥാനം

കൂടല്ലൂര്‍: കൂടല്ലൂര്‍ സെന്‍റ് ജോസഫ്‌സ് യുപി സ്‌കൂളില്‍ സംഘടിപ്പിച്ച ഏറ്റുമാനൂര്‍ ഉപജില്ലാ മെഗാ സയന്‍സ് ക്വിസ് ബ്രയിന്‍ ബ്ലാസ്റ്റ് 2 കെ 25 മത്സരത്തില്‍ കിടങ്ങൂര്‍ ഭാരതീയ വിദ്യാമന്ദിരം സ്‌കൂള്‍ ഒന്നാം സ്ഥാനം നേടി. മാന്നാനം സെന്‍റ് ജോസഫ്‌സ് യുപി സ്‌കൂള്‍ രണ്ടാം സ്ഥാനവും കൂടല്ലൂര്‍ സെന്‍റ് ജോസഫ്‌സ് യുപി. സ്‌കൂള്‍ മൂന്നാം സ്ഥാനവും വെട്ടിമുകള്‍ സെന്‍റ് പോള്‍സ് ഹൈസ്‌കൂള്‍ നാലാം സ്ഥാനവും കരസ്ഥമാക്കി. ഏറ്റുമാനൂര്‍ ഉപജില്ലാ വിദ്യാഭ്യാസ ഓഫീസര്‍ ശ്രീജ പി. ഗോപാല്‍ ക്വിസ് മത്സരം ഉദ്ഘാടനം ചെയ്തു. കോട്ടയം അതിരൂപത കോര്‍പറേറ്റ് എഡ്യൂക്കേഷനല്‍ സെക്രട്ടറി ഫാ. തോമസ് പുതിയകുന്നേല്‍ അധ്യക്ഷത വഹിച്ചു. സ്‌കൂള്‍ മാനേജര്‍ ഫാ. ജോസ് പൂതൃക്കയില്‍, പഞ്ചായത്തംഗം സിബി സിബി, ഹെഡ്മിസ്ട്രസ് സിസ്റ്റര്‍ ജോണ്‍സിയ, പിടിഎ പ്രസിഡന്‍റ് പി. ജോണ്‍സണ്‍, പ്രോഗ്രാം കോ-ഓർഡിനേറ്റര്‍ സിസ്റ്റര്‍ സജിത എന്നിവര്‍ പ്രസംഗിച്ചു. ഡോ. ഏബ്രഹാം ജോസ് ക്വിസ് മാസ്റ്ററായിരുന്നു. വിവിധ സ്‌കൂളുകളില്‍ നിന്നുള്ള 17 ടീമുകള്‍ പങ്കെടുത്തു.

കര്‍ഷക യൂണിയന്‍-എം കര്‍ഷകര്‍ക്കായി പ്രവര്‍ത്തിക്കുന്ന പ്രസ്ഥാനം: ജോസ് കെ. മാണി എംപി

പാലാ: കേരളത്തിലെ കര്‍ഷകര്‍ക്കായി പ്രവര്‍ത്തിക്കുന്ന പ്രസ്ഥാനമാണ് കര്‍ഷക യൂണിയന്‍-എം എന്ന് കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി. കേരള കര്‍ഷക യൂണിയന്‍-എം പാലാ നിയോജക മണ്ഡലം കണ്‍വന്‍ഷനും അനുസ്മരണവും മികച്ച കര്‍ഷകരെ ആദരിക്കലും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പാലാ നിയോജകമണ്ഡലം പ്രസിഡന്‍റ് അപ്പച്ചന്‍ നെടുമ്പള്ളില്‍ അധ്യക്ഷത വഹിച്ചു. മണ്‍മറഞ്ഞ മുതിര്‍ന്ന കര്‍ഷക യൂണിയന്‍-എം നേതാക്കളായ ജോസഫ് മാണി മാണിക്കൊമ്പില്‍, എം ടി ജോസഫ് എട്ടിയില്‍, അപ്പച്ചന്‍ പ്ലാശനാല്‍, തോമസ് കവിയില്‍, എം.എ. ജോസ് മണക്കാട്ട് മറ്റം എന്നിവരെ അനുസ്മരിച്ചു. പാലാ നിയോജകമണ്ഡലത്തിലെ വിവിധ പഞ്ചായത്തുകളിൽനിന്നു മികച്ച കര്‍ഷകരായി തെരഞ്ഞെടുക്കപ്പെട്ടവരെ ആദരിച്ചു. കര്‍ഷക സെമിനാറില്‍ റിട്ട.അഗ്രികള്‍ച്ചര്‍ ഓഫീസര്‍ സി.കെ. ഹരിഹരന്‍ ക്ലാസ് നയിച്ചു.

ഭിന്നശേഷിക്കാരുടെ ആരോപണം അടിസ്ഥാനരഹിതമെന്ന്

മീനച്ചില്‍: പഞ്ചായത്ത് ഭിന്നശേഷിക്കാരുടെ നീതി നിഷേധിക്കുന്നെന്ന ആരോപണം തികച്ചും അടിസ്ഥാനരഹിതമെന്ന് പഞ്ചായത്ത് പ്രസിഡന്‍റ് സോജന്‍ തൊടുക. ഭിന്നശേഷിക്കാര്‍ക്ക് തൊഴില്‍ സംരംഭങ്ങള്‍ക്കായും അടിസ്ഥാന തൊഴില്‍ പരിശീലനം നടത്തുന്നതിനും പൈകയിലുള്ള ഷോപ്പിംഗ് കോംപ്ലക്‌സിന്‍റെ താഴത്തെ നിലയില്‍ സൗകര്യം നല്‍കാന്‍ പഞ്ചായത്ത് തീരുമാനിച്ചിട്ടുള്ളതാണ്. ഇടമറ്റത്ത് ജനകീയ ഹോട്ടല്‍ നടത്തുന്ന മുറിതന്നെ വേണമെന്നാണ് ഇവരുടെ ആവശ്യം. ഇടമറ്റത്തെ അപേക്ഷിച്ച് കൂടുതല്‍ സാധ്യതകളുള്ള പൈക ടൗണിലെ പഞ്ചായത്ത് ഷോപ്പിംഗ് കോംപ്ലക്‌സില്‍ നല്‍കാമെന്ന് പറഞ്ഞ മുറി വേണ്ട എന്ന് പറയുന്നതിന് പിന്നിലെ കാരണം വ്യക്തമാക്കണമെന്നും സോജന്‍ തൊടുക ആവശ്യപ്പെട്ടു. ഭിന്നശേഷിക്കാര്‍ക്ക് പഞ്ചായത്തിന്‍റെ മൂന്നുനില കെട്ടിടത്തിന്‍റെ മുകള്‍ നിലയില്‍ മുറി അനുവദിച്ചു എന്ന വാദവും തെറ്റാണ്. പൈകയിലെ പഞ്ചായത്ത് കെട്ടിടത്തിന് മൂന്ന് നില ഇല്ല.ഒന്നാം നിലയില്‍ ജിംനേഷ്യം പ്രവര്‍ത്തിക്കുന്നു. തെറ്റായ കാര്യങ്ങള്‍ ഭിന്നശേഷി സംഘടന മാധ്യമങ്ങളിലൂടെ പ്രചരിപ്പിക്കുന്നത് മറ്റ് ചില അജൻഡകളുടെ ഭാഗമാണെന്ന് മനസിലാക്കേണ്ടിയിരിക്കുന്നു. പൈകയിലെ ഷോപ്പിംഗ് കോംപ്ലക്‌സിന്‍റെ താഴത്തെ മുറി വിട്ടുനല്‍കാന്‍ പഞ്ചായത്ത് ഇപ്പോഴും തയാറാണെന്നും അദ്ദേഹം വ്യക്തമാക്കി.

സ്‌നേഹദീപത്തിന്‍റെ സ്‌നേഹവീടുകള്‍ 62 ലേക്ക്

പാലാ: ജില്ലാ പഞ്ചായത്ത് മെമ്പര്‍ ജോസ്‌മോന്‍ മുണ്ടയ്ക്കല്‍ നേതൃത്വം നല്കുന്ന സ്‌നേഹദീപം ഭവന പദ്ധതി 62 സ്‌നേഹവീടുകളിലേക്കു കടക്കുന്നു. കെഴുവംകുളം സ്വദേശി നല്കിയ രണ്ടു ലക്ഷം രൂപയില്‍നിന്നു തുടക്കംകുറിച്ച സ്‌നേഹദീപം ഭവനപദ്ധതി കൊഴുവനാല്‍, മുത്തോലി, കിടങ്ങൂര്‍, മീനച്ചില്‍ അകലക്കുന്നം, എലിക്കുളം, കരൂര്‍ പഞ്ചായത്തുകളിലായി 57 വീടുകളുടെ നിര്‍മാണമാണ് ഏറ്റെടുത്തത്. സ്‌നേഹദീപത്തിലെ 58 മുതല്‍ 62 വരെയുള്ള അഞ്ച് വീടുകളുടെ നിര്‍മാണത്തിനാണ് ഇപ്പോള്‍ തുടക്കം കുറിക്കുന്നത്. സ്‌നേഹദീപത്തിലെ 38 മുതല്‍ 62 വരെയുള്ള വീടുകളുടെ ശിലാസ്ഥാപനവും സ്‌നേഹദീപം പദ്ധതിയിലെ 51-ാമത്തെതും കൊഴുവനാല്‍ സ്‌നേഹദീപത്തിന്‍റെ നേത്യത്വത്തില്‍ നിര്‍മിച്ച കൊഴുവനാല്‍ പഞ്ചായത്തിലെ 26-ാമത്തെതുമായ വീടിന്‍റെ താക്കോല്‍ സമര്‍പ്പണവും 21ന് ഉച്ചകഴിഞ്ഞ് രണ്ടിന് ചേര്‍പ്പുങ്കല്‍ ഹോളിക്രോസ് സ്‌കൂള്‍ ഓഡിറ്റോറിയത്തില്‍ നടത്തും. സാമൂഹ്യപ്രവര്‍ത്തക ദയാബായി ചടങ്ങില്‍ മുഖ്യാതിഥിയായി പങ്കെടുത്ത് അഞ്ച് വീടുകളുടെ ശിലാസ്ഥാപനകര്‍മം നടത്തും. ജോസ് കെ.മാണി എംപി. 51-ാമത്തെ സ്‌നേഹവീടിന്‍റെ താക്കോല്‍ സമര്‍പ്പണവും അഡ്വ. മോന്‍സ് ജോസഫ് എംഎല്‍എ സ്‌നേഹദീപം പദ്ധതിയുടെ സുമനസുകളെ ആദരിക്കുന്നതും മാണി സി. കാപ്പന്‍ എംഎല്‍എ മുഖ്യപ്രഭാഷണവും ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ആമുഖപ്രസംഗവും നടത്തും. ജില്ലാ പഞ്ചായത്തംഗം ജോസ്‌മോന്‍ മുണ്ടയ്ക്കല്‍, ബ്ലോക്ക് പഞ്ചായത്ത് മെമ്പര്‍ ജോസി പൊയ്കയില്‍, സ്‌നേഹദീപം പ്രസിഡ‌ന്‍റുമാരായ ഡോ. മേഴ്‌സി ജോണ്‍, ഷിബു പൂവേലില്‍, സന്തോഷ് കാവുകാട്ട്, പി.ജി. ജഗന്നിവാസന്‍ പിടിക്കാപറമ്പില്‍, ഗിരീഷ് കുമാര്‍ ഇലവുങ്കല്‍ എന്നിവര്‍ പത്രസമ്മേളനത്തില്‍ പങ്കെടുത്തു.

പട്ടിത്താനം-കടപ്പൂർ റോഡ് യാത്രായോഗ്യമാക്കൽ പ്രവൃത്തി ഇന്ന് തുടങ്ങും: മോൻസ് ജോസഫ്

കുറവിലങ്ങാട്: ജല അഥോറിറ്റി പൈപ്പ് സ്ഥാപിക്കുന്നതിനായി വെട്ടിപ്പൊളിച്ച പട്ടിത്താനം ചുമടുതാങ്ങി - കടപ്പൂര് റോഡ് സഞ്ചാര യോഗ്യമാക്കുന്ന പ്രവൃത്തി ഇന്ന് ആരംഭിക്കുമെന്ന് മോൻസ് ജോസഫ് എംഎൽഎ. ജല അഥോറിറ്റി പൈപ്പ് ഇട്ടതിനെ തുടർന്ന് റോഡ് നന്നാക്കാൻ ഫണ്ട് അടയ്ക്കണമെന്നായിരുന്നു വകുപ്പുകൾ വ്യവസ്ഥ ചെയ്തിരുന്നത്. ദീർഘകാലമായിട്ടും ഫണ്ട് അടയ്ക്കാൻ വാട്ടർ അഥോറിറ്റിക്ക് കഴിയാത്ത സാഹചര്യം തുടരുന്ന സ്ഥിതിയിലാണ് റോഡിന്‍റെ ദയനീയാവസ്ഥ പരിഹരിക്കേണ്ടതിന്‍റെ ആവശ്യകത സർക്കാരിനെ ബോധ്യപ്പെടുത്തിയതെന്ന് എംഎൽഎ വ്യക്താക്കി. മന്ത്രി മുഹമ്മദ് റിയാസ് പ്രശ്‌നത്തിന്‍റെ ഗൗരവവും ജനങ്ങളുടെ യാത്രാദുരിതവും കണക്കിലെടുത്ത് അടിയന്തര പരിഹാര നടപടിക്ക് നിർദേശം നൽകുകയായിരുന്നെന്നും എംഎൽഎ പറഞ്ഞു. മന്ത്രി വി. എൻ വസവനും ആവശ്യമായ ഇടപെടൽ സർക്കാർ തലത്തിൽ നടത്തി. രണ്ടാം ഘട്ടമായി റീ ടാറിംഗ് ജോലികൾക്ക് ആവശ്യമായ ഫണ്ട് കണ്ടെത്താൻ സർക്കാർ തലത്തിൽ ശ്രമം നടത്തുമെന്നും എംഎൽഎ അറിയിച്ചു.

പ്ലൈവുഡ് ഫാക്ടറി വേണ്ടെന്ന് നാട്ടുകാർ

പ്ലാശനാൽ: തലപ്പലം പഞ്ചായത്തിൽ അഞ്ഞൂറ്റിമംഗലം വാർഡിൽ പ്ലൈവുഡ് ഫാക്‌ടറി സ്ഥാപിക്കാനുള്ള നീക്കത്തിനെതിരേ ജനകീയ സമര പ്രഖ്യാപനം. പഞ്ചായത്ത് പ്രസിഡന്‍റ് ആനന്ദ് ജോസഫ് ഉദ്ഘാടനം ചെയ്തു. വാർഡ് മെംബർ കെ.ജെ. സെബാസ്റ്റ്യൻ അധ്യക്ഷത വഹിച്ചു പരിസ്ഥിതി പ്രവർത്തകൻ സി.ആർ. നീലകണ്ഠൻ മുഖ്യപ്രഭാഷണം നടത്തി. പഞ്ചായത്ത് വൈസ് പ്രസിഡന്‍റ് സ്റ്റെല്ലാ ജോയി, ഭരണങ്ങാനം പഞ്ചായത്ത് വൈസ് പ്രസിഡന്‍റ് സോഫി സണ്ണി, കയ്യൂർ ക്രിസ്തുരാജ് പള്ളിവികാരി ഫാ. ജീവൻ കാളിക്കാട്ടിൽ, പഞ്ചായത്തംഗ ങ്ങളായ കെ.ബി. സതീഷ്, പി.കെ. സുരേഷ്, കെ.കെ. ബിജു എന്നിവർ പ്രസംഗിച്ചു. നാല് മലകളാൽ ചുറ്റപ്പെട്ട പ്രദേശത്തിന്‍റെ താഴ്‌വാരത്ത് ഫാക്ടറി സ്ഥാപിച്ചാൽ ഫാക്ടറിയിൽനിന്നു പുറത്തുവരുന്ന വിഷവാതകങ്ങൾ തങ്ങിനിന്ന് കാൻസർ ഉൾപ്പെടെയുള്ള ഗുരുതര ആരോഗ്യ പ്രശ്നങ്ങൾക്ക് കാരണമാകുമെന്നും ഫാക്ടറിയിൽനിന്നുള്ള രാസമാലിന്യങ്ങൾ കലർന്ന മലിനജലം നിർദിഷ്ട ഫാക്ടറിക്കു സമീപത്തുകൂടി ഒഴുകുന്ന മാതാക്കൽ തോട്ടിൽ എത്തുമെന്നും അതിനാൽ ജനങ്ങൾക്ക് നിത്യദുരിതം തരുന്ന പ്ലൈവുഡ് ഫാക്‌ടറി അനുവദിക്കരുതെന്നാണ് നാട്ടുകാരുടെ ആവശ്യം.

പച്ചത്തുരുത്ത് അവാർഡ് തിളക്കത്തിൽ അരുവിത്തുറ കോളജും കിടങ്ങൂർ പഞ്ചായത്തും

അരുവിത്തുറ: ഹരിതകേരള മിഷന്‍റെ നേതൃത്വത്തിൽ സംസ്ഥാനത്ത് നടപ്പാക്കിയ പച്ചത്തുരുത്ത് പദ്ധതിയിൽ കോട്ടയം ജില്ലയിലെ ഏറ്റവും മികച്ച പച്ചത്തുരുത്തായി അരുവിത്തുറ സെന്‍റ് ജോർജ് കോളജിലെ പച്ചത്തുരുത്ത് തെരഞ്ഞെടുക്കപ്പെട്ടു. കാമ്പസിനുള്ളിലെ 25 സെന്‍റ് സ്ഥലത്താണ് ബോട്ടണി വിഭാഗത്തിന്‍റെ നേതൃത്വത്തിൽ സംസ്ഥാന സാമൂഹിക വനവത്കരണ വിഭാഗത്തിന്‍റെ സഹകരണത്തോടെ പച്ചത്തുരുത്ത് തയാറാക്കിയത്. ഒരു കാലത്ത് ഈ പ്രദേശങ്ങളിലെ നിറസാന്നിധ്യമായിരുന്നതും ഇപ്പോൾ വംശനാശ ഭീഷണി നേടുന്നതുമായ അപൂർവ സസ്യങ്ങൾ ഉൾപ്പെടെ അന്പതി ൽപരം ഇനങ്ങളിലായി നൂറോളം സസ്യങ്ങളാണ് ഈ പച്ചത്തുരുത്ത് വനത്തിൽ ഉള്ളത്. ബോട്ടണി വിഭാഗത്തിലെ അധ്യാപകരും വിദ്യാർഥികളും ചേർന്നാണ് വനത്തിന്‍റെ സംരക്ഷണവും പരിപാലനവും. തിരുവനന്തപുരത്ത് മുഖ്യമന്ത്രി പിണറായി വിജയന്‍റെ അധ്യക്ഷതയിൽ ചേർന്ന ചടങ്ങിൽ ബോട്ടണി വിഭാഗം മേധാവി ജോബി ജോസഫ്, എൻഎസ്എസ് പ്രോഗ്രാം ഓഫീസർ ഡോ. ഡെന്നി തോമസ് എന്നിവർ ചേർന്ന് പുരസ്കാരം ഏറ്റുവാങ്ങി. കോളജിന് പുരസ്കാരം ലഭ്യമാക്കിയ അധ്യാപകരെയും വിദ്യാർഥികളെയും കോളജ് മാനേജർ ഫാ. സെബാസ്റ്റ്യൻ വെട്ടുകല്ലേൽ, പ്രിൻസിപ്പൽ പ്രഫ. ഡോ. സിബി ജോസഫ്, ബർസാർ ആൻഡ് കോഴ്സ് കോ-ഓർഡിനേറ്റർ ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ എന്നിവർ അഭിനന്ദിച്ചു. കിടങ്ങൂര്‍: മികച്ച പച്ചത്തുരുത്തിനുള്ള പുരസ്‌കാരം കിടങ്ങൂര്‍ പഞ്ചായത്തിലെ കാവാലിപ്പുഴ മുളന്തുരുത്തിന് ലഭിച്ചു. തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ പദ്ധതി നിര്‍വഹണ വിലയിരുത്തല്‍ നിരീക്ഷണ വകുപ്പ് സെക്രട്ടറി എസ്. ഹരികിഷോറില്‍നിന്നു കിടങ്ങൂര്‍ പഞ്ചായത്ത് പ്രസിഡന്‍റ് ഇ.എം. ബിനു അവര്‍ഡ് എറ്റുവാങ്ങി. മുളന്തുരുത്ത് വിഭാഗത്തില്‍ മികച്ച അവതരണത്തിനും അനുമോദനം ലഭിച്ചു. ചടങ്ങില്‍ പഞ്ചായത്ത് വൈസ് പ്രസിഡന്‍റ് ടീനാ മാളിയേക്കല്‍, അംഗങ്ങളായ ഹേമ രാജു, സുനി അശോകന്‍, സെക്രട്ടറി എസ്.കെ. രാജീവ്, എന്‍ആര്‍ഇജി എ.ഇ. അരുണ്‍ മോഹന്‍, അനീഷ് തുടങ്ങിവര്‍ പങ്കെടുത്തു. 2023ലാണ് മീനിച്ചിലാറിന്‍റെ തീരത്ത് പഞ്ചായത്തിലെ 4, 5, 7, 9 വാര്‍ഡുകളില്‍ ലാത്തിമുളകള്‍ നട്ടത്. സോഷ്യല്‍ ഫോറസ്ട്രിയില്‍നിന്നു ലഭിച്ച രണ്ടായിരം ലാത്തിമുളകളാണ് തൊഴിലുറപ്പ് വിഭാഗത്തിന്‍റെയും ഹരിതകേരള മിഷന്‍റെയും സഹകരണത്തോടെ കാവിലിപ്പുഴയോരത്ത് നട്ടത്. ബ്ലോക്ക് പഞ്ചായത്ത് വൈസ് പ്രസിഡന്‍റ് അശോക് കുമാര്‍ പൂതമനയാണ് ഉദ്ഘാടനം നിര്‍വഹിച്ചത്. പദ്ധതി നടത്തിപ്പിലൂടെ ആയിരത്തി അറുനൂറോളം തൊഴില്‍ദിനങ്ങള്‍ തൊഴിലുറപ്പ് തൊഴിലാളികള്‍ക്ക് ലഭിച്ചു. ലാത്തിമുളകള്‍ പടര്‍ന്നു പന്തലിച്ചതോടെ മറ്റ് ജീവജാലങ്ങള്‍ക്ക് ആവാസവ്യവസ്ഥ സൃഷ്ടിക്കാനും കഴിഞ്ഞു. മീനിച്ചിലാറിന്‍റെ തീരത്ത് മാലിന്യം നിറഞ്ഞ സ്ഥലം വൃത്തിയാക്കി മിനി പാര്‍ക്കും പഞ്ചായത്ത് നിര്‍മിച്ചിട്ടുണ്ട്.

അരുവിത്തുറ കോളജിന് മുഖ്യമന്ത്രിയുടെ മികച്ച പച്ചത്തുരുത്തിനുള്ള അവാർഡ്

അരുവിത്തുറ: ഹരിത കേരള മിഷന്‍റെ നേതൃത്വത്തിൽ സംസ്ഥാനത്ത് നടപ്പിലാക്കിയ പച്ചത്തുരുത്ത് പദ്ധതിയിൽ കോട്ടയം ജില്ലയിലെ ഏറ്റവും മികച്ച പച്ചത്തുരുത്തായി അരുവിത്തുറ സെന്‍റ് ജോർജ് കോളജിലെ പച്ചത്തുരുത്ത് തെരഞ്ഞെടുക്കപ്പെട്ടു. കാമ്പസിനുള്ളിൽ മാനേജ്മെന്‍റ് അനുവദിച്ച് നൽകിയ 25 സെന്‍റ് സ്ഥലത്താണ് കോളജിലെ ബോട്ടണി വിഭാഗത്തിന്‍റെ നേതൃത്വത്തിൽ സംസ്ഥാന സാമൂഹിക വനവത്കരണ വിഭാഗത്തിന്‍റെ സഹകരണത്തോടെ പച്ചത്തുരുത്ത് തയാറാക്കിയത്. ഒരു കാലത്ത് ഈ പ്രദേശങ്ങളിലെ നിറസാന്നിധ്യമായിരുന്നതും ഇപ്പോൾ വംശനാശ ഭീഷണി നേടുന്നതുമായ അപൂർവ സസ്യങ്ങൾ ഉൾപ്പെടെ 50ൽ പരം ഇനങ്ങളിലായി നൂറോളം സസ്യങ്ങളാണ് ഈ പച്ചത്തുരുത്ത് വനത്തിലുള്ളത്. ബോട്ടണി വിഭാഗത്തിലെ അധ്യാപകരും വിദ്യാർഥികളും ചേർന്നാണ് ഈ വനത്തിന്‍റെ സംരക്ഷണവും പരിപാലനവും നടപ്പിലാക്കുന്നത്. തിരുവനന്തപുരത്ത് മുഖ്യമന്ത്രി പിണറായി വിജയന്‍റെ അധ്യക്ഷതയിൽ ചേർന്ന ചടങ്ങിൽ ബോട്ടണി വിഭാഗം മേധാവി ജോബി ജോസഫ്, എൻഎസ്എസ് പ്രോഗ്രാം ഓഫീസർ ഡോ. ഡെന്നി തോമസ് എന്നിവർ ചേർന്ന് പുരസ്കാരം ഏറ്റുവാങ്ങി. ഹരിതാഭയും കാർഷിക സംസ്കാരവും പാഠപുസ്തകങ്ങളോട് ചേർത്തുവച്ചിട്ടുള്ള അരുവിത്തുറ കോളജിന്‍റെ ജൈവ പരിസരം മുൻപും അംഗീകാരങ്ങൾക്ക് അർഹത നേടിയിട്ടുണ്ട്. പുരസ്കാരം ലഭിക്കാൻ കാരണക്കാരായ അധ്യാപകരെയും വിദ്യാർഥികളെയും കോളജ് മാനേജർ വെരി റവ.ഫാ. സെബാസ്റ്റ്യൻ വെട്ടുകല്ലേൽ, പ്രിൻസിപ്പൽ പ്രഫ.ഡോ. സിബി ജോസഫ്, ബർസാർ ആൻഡ് കോഴ്സ് കോഓർഡിനേറ്റർ റവ.ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ എന്നിവർ അഭിനന്ദിച്ചു.

കലുങ്ക് അടഞ്ഞു; ചക്കാമ്പുഴ ആശുപത്രി ജംഗ്ഷനിൽ റോഡിലൂടെ വെള്ളപ്പാച്ചിൽ

ചക്കാമ്പുഴ: ആശുപത്രി ജംഗ്ഷനിൽ മഴവെള്ളം ഒഴുകിപ്പോകാനായി നിർമിച്ചിരുന്ന കലുങ്ക് പൂർണമായും അടഞ്ഞതോടെ വെള്ളപ്പാച്ചിലിൽ പൊറുതിമുട്ടി ജനങ്ങൾ. ശക്തമായ മഴ പെയ്താൽ റോഡിലൂടെയുള്ള ഗതാഗതം പോലും സ്തംഭിക്കും വിധമാണ് ഒഴുക്ക് തുടരുന്നത്. സ്കൂൾ വിദ്യാർഥികൾ ഉൾപ്പെടെ നിരവധി ആളുകൾ കാൽനടയായി സഞ്ചരിക്കുന്ന റോഡാണിത്. ശക്തമായി ഒഴുകിയെത്തുന്ന വെള്ളം നേരിട്ട് തോട്ടിലേയ്ക്കാണ് പതിക്കുന്നത്. ഇത് അപകടത്തിന് കാരണമായേക്കാം.

കലുങ്കിനുള്ളിൽ വെള്ളം കെട്ടി നിൽക്കുന്നതിലൂടെ സമീപത്തെ കിണറുകളിൽ മലിനജലം എത്തുന്ന സാഹചര്യവുമുണ്ട്. വലിയ തോതിൽ മഴവെള്ളം ഒഴുകിയെത്തുന്നത് ആശുപത്രി ജംഗ്ഷനിലെ വ്യാപാര സ്ഥാപനങ്ങൾക്കും പ്രതിസന്ധിയാണ്. കലുങ്കിനടിയിൽ കെട്ടിക്കിടക്കുന്ന മാലിന്യങ്ങൾ നീക്കം ചെയ്ത് കാന തെളിച്ച് വെള്ളമൊഴുക്ക് സുഗമമാക്കണമെന്ന് നാട്ടുകാർ ആവശ്യപ്പെട്ടു.

ലയണ്‍സ് ക്ലബ് കുടുംബസംഗമം

ചിങ്ങവനം: ചിങ്ങവനം ലയണ്‍സ് ക്ലബ്ബിന്‍റെ കുടുംബസംഗമം കോ-ഓര്‍ഡിനേറ്റര്‍ ആര്‍. രാജേഷ് ഉദ്ഘാടനം ചെയ്തു. പ്രസിഡന്‍റ് തമ്പി തോമസ് അധ്യക്ഷത വഹിച്ചു. മത്സരവിജയികള്‍ക്ക് ആര്‍. രാജേഷ് സമ്മാനങ്ങള്‍ വിതരണം ചെയ്തു. നിര്‍ധന കുടുംബങ്ങള്‍ക്ക് ഓണക്കിറ്റുകളും നൽകി. ഡോ. ഈപ്പന്‍ സി. കുര്യന്‍ ആരോഗ്യ ബോധവത്കരണവും ടി.കെ. സുരേഷ് കുമാര്‍ തൊഴിലുറപ്പ് വനിതകള്‍ക്കായി വനിതാവകാശ ക്ലാസും നടത്തി. കെ.കെ. കുരുവിള, ബിനോയി കുര്യന്‍, സെക്രട്ടറി ബാജി കെ. വര്‍ഗീസ് എന്നിവര്‍ പ്രസംഗിച്ചു.

ചങ്ങനാശേരി കെഎസ്ആര്‍ടിസി ഡിപ്പോയില്‍ ട്രാവല്‍ കാര്‍ഡ് വിതരണം

ചങ്ങനാശേരി: യാത്രകാര്‍ക്ക് മെച്ചപ്പെട്ട യാത്രാസൗകര്യമൊരുക്കുന്നതോടൊപ്പം ചില്ലറയുടെ പേരില്‍ ജീവനക്കാരും യാത്രക്കാരും തമ്മിലുണ്ടാകുന്ന തർക്കങ്ങൾക്കും ശാശ്വത പരിഹാരമായി കെഎസ്ആര്‍ടിസി ആരംഭിച്ച ട്രാവല്‍ കാര്‍ഡ് ചങ്ങനാശേരി ഡിപ്പോയിലുമെത്തി. കാര്‍ഡ് ആവശ്യമുള്ള യാത്രക്കാര്‍ക്ക് ഡിപ്പോയില്‍നിന്നു ലഭ്യമാണ്. ഡ്യൂട്ടിയില്‍ വരുന്ന കണ്ടക്ടര്‍മാരില്‍നിന്നോ ഓഫീസില്‍നിന്നോ 100 രൂപ നല്‍കി കാര്‍ഡ് വാങ്ങാവുന്നതാണ്. ഡിപ്പോയിലെ വിതരണോദ്ഘാടനം അസിസ്റ്റന്‍റ് ട്രാന്‍സ്പോര്‍ട്ട് ഓഫീസര്‍ പി.എ. അഭിലാഷ്, കണ്ടക്ടര്‍ വി.എ. ജോബിന് നല്‍കി നിര്‍വഹിച്ചു. ജനറല്‍ കണ്‍ട്രോളിംഗ് ഇന്‍സ്പെക്ടര്‍ കെ.എ. തങ്കച്ചന്‍ അധ്യക്ഷത വഹിച്ചു. കെ.ആര്‍. നിമ്മി, ഷെജി സജിത്ത്, ആശ മേരി വര്‍ക്കി, സിജോ ജോസ്, മനോജ് തോമസ്, മഞ്ജു രാമചന്ദ്രന്‍ എന്നിവര്‍ പ്രസംഗിച്ചു.

വെരൂര്‍ ഇന്‍ഡസ്ട്രിയല്‍ എസ്റ്റേറ്റിലെ ഭൂമി സംബന്ധമായ പ്രശ്‌നങ്ങള്‍ പരിഹരിക്കും: മന്ത്രി രാജീവ്

ചങ്ങനാശേരി: വെരൂര്‍ ഇന്‍ഡസ്ട്രിയല്‍ എസ്റ്റേറ്റിലെ ഭൂമി സംബന്ധമായ പ്രശ്‌നങ്ങള്‍ പരിഹരിക്കുമെന്ന് മന്ത്രി പി. രാജീവ് നിയമസഭയില്‍ അറിയിച്ചു. ജോബ് മൈക്കിള്‍ എംഎല്‍എയുടെ ചോദ്യത്തിനു മറുപടിയായാണ് മന്ത്രി നിയമസഭയില്‍ ഇതു വ്യക്തമാക്കിയത്. ഒരാള്‍പോലും നേരില്‍ വരാതെ രേഖകള്‍ ഓണ്‍ലൈനായി നല്‍കാനുള്ള നടപടികള്‍ സര്‍ക്കാര്‍ സ്വീകരിച്ചിട്ടുണ്ടെന്നും മുഖ്യമന്ത്രിയുടെയും റവന്യു മന്ത്രിയുടെയും വ്യവസായ മന്ത്രിയുടെയും നേതൃത്വത്തില്‍ കൂടിയ യോഗത്തില്‍ ഇതു സംബന്ധിച്ച തീരുമാനമെടുത്തിട്ടുള്ളതാണെന്നും മന്ത്രി പറഞ്ഞു. ഉടമസ്ഥാവകാശം മാറണമെങ്കില്‍ 25,000 രൂപ അടച്ച് മാറാനുള്ള സൗകര്യമുണ്ടാകും. 10,000 രൂപ അടച്ചാല്‍ ആക്ടിവിറ്റി മാറാനുള്ള സൗകര്യവും ലഭ്യമാണെന്നും മന്ത്രി അറിയിച്ചു. കേസുകളില്‍ നില്‍ക്കുന്ന സംരംഭകരുടെ വിഷയങ്ങള്‍ കോടതിയുടെ അനുമതിയോടുകൂടി പരിഹരിക്കുന്നതിനുവേണ്ടി ഡയറക്ടറേറ്റിന്‍റെ കീഴില്‍ ഒരു സെൽ പ്രവര്‍ത്തിക്കുന്നുണ്ടെന്നും ആയതിലേക്ക് ഒരു ജിപിയെ അഡ്വക്കേറ്റ് ജനറല്‍ അനുവദിച്ചിട്ടുണ്ടെന്നും അതു പരിഹരിച്ച് കഴിഞ്ഞാല്‍ ഇന്‍ഡസ്ട്രിയല്‍ എസ്റ്റേറ്റിലെ എല്ലാ ഭൂമിയിലും വ്യവസായങ്ങള്‍ പ്രവര്‍ത്തിക്കുന്നു എന്ന സ്ഥിതി ഉറപ്പുവരുത്താന്‍ കഴിയുമെന്നും മന്ത്രി കൂട്ടിച്ചേര്‍ത്തു.

ഇന്‍ഷ്വറന്‍സ് നിഷേധം: നീലംപേരൂര്‍ കൃഷിഭവനു മുമ്പില്‍ നാളെ ധര്‍ണ

ചങ്ങനാശേരി: ഇന്‍ഷ്വറന്‍സ് നിഷേധത്തിനെതിരേ കിളിയങ്കാവ് പാടശേഖരത്തിലെ കര്‍ഷകര്‍ നാളെ നീലംപേരൂര്‍ കൃഷിഭവനു മുമ്പില്‍ ധര്‍ണ നടത്തും. കൃഷി ഓഫീസിലെ ജീവനക്കാരുടെ അനാസ്ഥ മൂലമാണ് ഇന്‍ഷ്വറന്‍സ് നടപടികള്‍ വൈകിയതെന്ന് കര്‍ഷകര്‍ ആരോപിച്ചു. 124 കര്‍ഷകരില്‍ 79 പേരുടെ അപേക്ഷകള്‍ മാത്രമേ സ്വീകരിച്ചിട്ടുള്ളൂ. നാളെ രാവിലെ 10.30ന് ധര്‍ണ ആരംഭിക്കും. പ്രസിഡന്‍റ് ജെ. ഗോപിദാസ്, സെക്രട്ടറി കെ. ഗോപകുമാര്‍, കണ്‍വീനര്‍ തുളസീധരന്‍പിള്ള എന്നിവര്‍ നേതൃത്വം നല്‍കും.

ബ്രേക്ക് തകരാർ: നിയന്ത്രണം വിട്ട കെഎസ്ആര്‍ടിസി ബസ് മതിലില്‍ ഇടിപ്പിച്ചുനിര്‍ത്തി

ചങ്ങനാശേരി: ബ്രേക്ക് തകരാറിലായതിനെ തുടര്‍ന്നു കെഎസ്ആര്‍ടിസി ബസ് നിയന്ത്രണം വിട്ട് മതിലില്‍ ഇടിപ്പിച്ചു നിര്‍ത്തി. ഇന്നലെ വൈകുന്നേരം 4.30ന് തുരുത്തി ഫൊറോന പള്ളിക്കു സമീപത്തെ ഇരട്ടക്കുളം റോഡിലാണ് അപകടം. കാവാലത്തുനിന്നും ചങ്ങനാശേരിക്ക് വരികയായിരുന്ന ബസാണ് അപകടത്തില്‍പ്പെട്ടത്. യാത്രക്കാരുടെ സുരക്ഷ കണക്കിലെടുത്ത് ഡ്രൈവര്‍ മനോജ് ബസ് മതിലിനോട് ചേര്‍ത്ത് നിര്‍ത്തിയതിനാല്‍ അപകടം ഒഴിവായി. യാത്രക്കാരില്‍ ആര്‍ക്കും പരുക്കില്ല. അഞ്ചരയോടെ ബസ് റോഡില്‍നിന്നു നീക്കി ഗതാഗതം പുനഃസ്ഥാപിച്ചു. കലുങ്ക് നിര്‍മാണത്തെത്തുടര്‍ന്നു കാവാലം ബസുകള്‍ ഇരട്ടക്കുളം റോഡിലൂടെയാണ് സര്‍വീസ് നടത്തുന്നത്.

യുവജനങ്ങള്‍ക്ക് തൊഴില്‍ നല്‍കാന്‍ ഭരണകൂടങ്ങള്‍ക്ക് കഴിയാത്തത് നിര്‍ഭാഗ്യകരം: മാര്‍ തോമസ് തറയില്‍

ചങ്ങനാശേരി: ഇന്ത്യയിലെ യുവജനങ്ങള്‍ക്ക് തൊഴില്‍ നല്‍കാന്‍ ഭരണകൂടങ്ങള്‍ക്കു കഴിയാത്തത് നിര്‍ഭാഗ്യകരമെന്ന് ആര്‍ച്ച്ബിഷപ് മാര്‍ തോമസ് തറയില്‍. ചങ്ങനാശേരി സെന്‍റ് ജോസഫ്‌സ് ഗേള്‍സ് സ്‌കൂളിലെ ഹയര്‍ സെക്കന്‍ഡറി വിഭാഗത്തിന്‍റെ രജതജൂബിലി സമാപന സമ്മേളനം ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ്. യുവജനങ്ങള്‍ സ്വപ്നങ്ങളുള്ളവരും സമൂഹത്തിനു നന്മ ചെയ്യുന്നവരുമായി മാറണമെന്നും ആര്‍ച്ച്ബിഷപ് ചൂണ്ടിക്കാട്ടി. പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ ഡോ. സോഫി റോസ് സിഎംസി അധ്യക്ഷത വഹിച്ചു. കിഫ്ബി അഡീഷണല്‍ സിഇഒ മിനി ആന്‍റണി മുഖ്യപ്രഭാഷണവും സ്മരണികയുടെ പ്രകാശനവും നിര്‍വഹിച്ചു. ജൂബിലി ആഘോഷങ്ങളുടെ ഭാഗമായി തെരഞ്ഞെടുത്ത 15 കുട്ടികള്‍ക്കുള്ള സ്‌കോളര്‍ഷിപ്പുകള്‍ കൊടിക്കുന്നില്‍ സുരേഷ് എംപി വിതരണം ചെയ്തു. കോട്ടയം ജില്ലയിലെ ബെസ്റ്റ് ഗൈഡ് യൂണിറ്റ് അവാര്‍ഡ് തുടര്‍ച്ചയായി അഞ്ചുവര്‍ഷം സെന്‍റ് ജോസഫ്‌സിനു നേടിത്തന്ന ഗൈഡ് ക്യാപ്റ്റന്‍ ജിജി തോമസിനെ ആദരിച്ചു. ഹോളിക്വീന്‍സ് എഡ്യൂക്കേഷന്‍ കൗണ്‍സിലര്‍ സിസ്റ്റര്‍ ആനി തോമസ് സിഎംസി, മാനേജര്‍ സിസ്റ്റര്‍ ലിസാ കുര്യന്‍ സിഎംസി, വാര്‍ഡ് കൗണ്‍സിലര്‍ ബീന ജോബി, അസംപ്ഷന്‍ കോളജ് പ്രഫസര്‍ ആന്‍ മേരി മാത്യു, പിടിഎ പ്രസിഡന്‍റ് വര്‍ഗീസ് ആന്‍റണി, പ്രിന്‍സിപ്പല്‍ സിസ്റ്റര്‍ ലില്ലി തെരേസ്, ഹെഡ്മിസ്ട്രസ് സിസ്റ്റര്‍ ധന്യ തെരേസ് എന്നിവര്‍ പ്രസംഗിച്ചു.

തെങ്ങണ സ്വര്‍ണക്കടയിലെ മോഷണം : ഇതരസംസ്ഥാന തൊഴിലാളികളെ കേന്ദ്രീകരിച്ച് അന്വേഷണം

ചങ്ങനാശേരി: നിയന്ത്രണങ്ങളില്ലാതെയുള്ള ഇതരസംസ്ഥാന തൊഴിലാളികളുടെ പ്രവാഹം ഭീഷണിയാകുന്നു. മോഷണവും ലഹരിവ്യാപനവും ശക്തിപ്പെടുന്നു. നടപടികള്‍ സ്വീകരിക്കാനാകാതെ പോലീസ് സേന. പായിപ്പാട്, മുണ്ടുകോട്ടാല്‍, നാലുകോടി, തെങ്ങണ, മാമ്മൂട്, കറുകച്ചാല്‍, നെടുംകുന്നം മേഖലകളിലാണ് പേരും വിലാസവുമില്ലാതെ വന്‍തോതില്‍ ഇതരസംസ്ഥാന തൊഴിലാളികള്‍ പാർക്കുന്നത്. ആഴ്ച തോറും വന്നുപോകുന്ന ഇതരസംസ്ഥാന തൊഴിലാളികളാണ് പ്രശ്നങ്ങള്‍ സൃഷ്ടിക്കുന്നത്. ഇവരുടെ പേരുവിവരങ്ങള്‍ സൂക്ഷിക്കാനും കൃത്യമായി കൈകാര്യം ചെയ്യാനും അധികൃതര്‍ക്ക് കഴിയുന്നില്ല. തെങ്ങണയില്‍ കഴിഞ്ഞദിവസം സ്വര്‍ണക്കടയില്‍ നടന്ന മോഷണത്തിന്‍റെ അന്വേഷണവും ഇതരസംസ്ഥാന തൊഴിലാളികളെ കേന്ദ്രീകരിച്ചാണ് നീങ്ങുന്നത്. മോഷ്ടാക്കളെന്നു കരുതുന്ന രണ്ട് ഇതരസംസ്ഥാന തൊഴിലാളികളുടെ സിസിടിവിയില്‍ പതിഞ്ഞ ദൃശ്യങ്ങളാണ് പോലീസ് നിരീക്ഷിക്കുന്നത്. തെങ്ങണ ജംഗ്ഷനിലുള്ള ഉമ ജൂവലറിയുടെ ഷട്ടറിന്‍റെ പൂട്ടുപൊളിച്ച് അകത്തു കടന്ന മോഷണസംഘം നാലേമുക്കലാല്‍ പവന്‍ സ്വർണവും ഒരു കിലോ വെള്ളിയുമാണ് മോഷ്ടിച്ചത്. കടയിലെ അലമാരയില്‍ പ്ലാസ്റ്റിക് ബാഗില്‍ പൊതിഞ്ഞുവച്ചിരുന്ന സ്വര്‍ണവും വെള്ളിയുമാണ് മോഷണം പോയത്. കടയെക്കുറിച്ച് വ്യക്തമായ അറിവുള്ളവരാണ് മോഷണത്തിനു പിന്നിലുള്ളതെന്നു പോലീസ് കരുതുന്നു. തൃക്കൊടിത്താനം പോലീസാണ് കേസ് അന്വേഷിക്കുന്നത്. ഇതരസംസ്ഥാന തൊഴിലാളി ബാഹുല്യമുള്ള മേഖലകളില്‍ പോലീസിന്‍റെ നിരീക്ഷണം ശക്തമാക്കണമെന്ന ആവശ്യം ഉയര്‍ന്നിട്ടുണ്ട്.

പോക്സോ കേസിൽ അറസ്റ്റിൽ

വൈക്കം: പ്രായപൂർത്തിയാകാത്ത പെൺകുട്ടിയെ ശാരീരികമായി ദുരുപയോഗം ചെയ്ത കേസിൽ ഹോട്ടൽ മാനേജ്മെന്‍റ് വിദ്യാർഥിയെ പോലീസ് പിടികൂടി. മുളക്കുളം നോർത്ത് പാറേക്കാട്ടുകുഴി സ്വദേശി എൽജോ ജോയി (24) യെയാണ് ചേർത്തല പോലീസ് അറസ്റ്റ് ചെയ്തത്. പ്രതിയുടെ കാമുകിയുടെ കൂട്ടുകാരിയായ പ്ലസ് വൺ വിദ്യാർഥിനിയെ വസ്ത്രം വാങ്ങിക്കൊടുക്കാമെന്നു പറഞ്ഞ് പ്രലോഭിപ്പിച്ച് വൈക്കത്ത് എത്തിച്ച് ഇയാൾ പാർക്കിനോടു ചേർന്ന കുറ്റിക്കാട്ടിൽ പെൺകുട്ടിയെ കൊണ്ടുപോയി പീഡിപ്പിക്കുകയായിരുന്നു. വിദ്യാർഥിനി നൽകിയ പരാതിയെത്തുടർന്ന് ചേർത്തല പോലീസ് കേസെടുത്ത് നടത്തിയ അന്വേഷണത്തിൽ ഇയാളെ പോക്സോ നിയമപ്രകാരം അറസ്റ്റ് ചെയ്ത് റിമാൻഡ് ചെയ്യുകയുമായിരുന്നു. തുടർന്ന് ചേർത്തല പോലീസ് പ്രതിയെ കസ്റ്റഡിയിൽ വാങ്ങി വൈക്കത്ത് പാർക്കിനടുത്ത് എത്തിച്ച് തെളിവെടുപ്പു നടത്തി.

ബസ് കണ്ടക്ടറും ലോറി ഡ്രൈവറും തമ്മില്‍ വാക്കേറ്റവും കൈയാങ്കളിയും

കടുത്തുരുത്തി: സ്വകാര്യബസ് കണ്ടക്ടറും ടാങ്കര്‍ ലോറി ഡ്രൈവറും തമ്മില്‍ വാക്കേറ്റവും കൈ യാങ്കളിയും. കഴിഞ്ഞദിവസം കുറുപ്പന്തറ കവലയ്ക്കു സമീപത്താണ് സംഭവം. തലയോലപ്പറമ്പ് ആശുപത്രി കവല മുതല്‍ കോട്ടയത്തേക്കു പോകുകയായിരുന്ന അലക്സ്മോന്‍ ബസിനു മുന്നില്‍ ടാങ്കര്‍ ലോറി കോട്ടയം ഭാഗത്തേക്കു പോകുന്നുണ്ടായിരുന്നു. ബസിനെ മറികടക്കാന്‍ അനുവദിക്കാതെ വേഗത കുറച്ച് പോയ ടാങ്കര്‍ ലോറി വലതുവശത്തേക്കു വെട്ടിച്ചാണ് സഞ്ചരിച്ചത്. മാന്നാര്‍ ജംഗ്ഷനു സമീപത്തുവച്ചു സ്വകാര്യ ബസ് ലോറിയെ മറികടന്നു മുന്നോട്ടു പോയി. വീണ്ടും ആപ്പാഞ്ചിറ സ്റ്റോപ്പില്‍വച്ച് ലോറി ബസിനെ മറികടന്നു. തുടര്‍ന്ന് എതിര്‍ദിശയില്‍നിന്ന് വാഹനമില്ലാത്ത സമയത്തും ബസിനെ കടത്തിവിടാതെ തടസമുണ്ടാക്കിയാണ് ഓടിച്ചിരുന്നത്. മുട്ടുചിറ പട്ടാളമുക്കിനു സമീപത്തുവച്ച് ബസ് ജീവനക്കാര്‍ ഇതു ചോദ്യം ചെയ്തു. ടാങ്കര്‍ ലോറി ഡ്രൈവറും ബസ് കണ്ടക്ടറും തമ്മില്‍ ഇതുസംബന്ധിച്ചു വാക്കേറ്റമുണ്ടായി. ഇരുവരും തമ്മില്‍ കൈയാങ്കളിക്കും ശ്രമമുണ്ടായി. ഇതിനിടെ ലോറിയുടെ വലതുവശത്തെ ഗ്ലാസ് തകര്‍ന്നു. തുടര്‍ന്ന് ബസ് മുന്നോട്ടുപോയെങ്കിലും കുറുപ്പന്തറയ്ക്കു സമീപം ബസിനെ മറികടന്നെത്തിയ ലോറിയുടെ ഡ്രൈവര്‍ വീണ്ടും കണ്ടക്ടറുമായി വാക്കേറ്റമുണ്ടായി. ബസിന്‍റെ വലതുവശത്തെ ഗ്ലാസും ഇതിനിടെ തകര്‍ന്നു. ഇരുകൂട്ടര്‍ക്കും പരാതിയില്ലാത്തതിനാല്‍ പോലീസ് കേസെടുത്തില്ല.

കളഞ്ഞുകിട്ടിയ 15,000 രൂപ ഉടമയ്ക്ക് കൈമാറി യുവാവ് മാതൃകയായി

വെച്ചൂർ: കളഞ്ഞുകിട്ടിയ തുക ഉടമയ്ക്കു കൈമാറി ബാഗ് നിർമാണ യൂണിറ്റുകാരനായ യുവാവ് നാടിന് മാതൃകയായി. ഒറ്റപ്പാലത്തുനിന്നെത്തി വെച്ചൂർ പുത്തൻപാലത്ത് ബാഗ് നിർമാണ യൂണിറ്റ് നടത്തുന്ന രമേഷാണ് പ്ലാസ്റ്റിക് കവറിൽ പൊതിഞ്ഞ നിലയിൽ റോഡിൽ കിടന്ന 15,000 രൂപ ഉടമയ്ക്കു കൈമാറി സത്യസന്ധത കാട്ടിയത്. കഴിഞ്ഞ ദിവസം രാത്രി പുത്തൻപാലത്തെ വസ്ത്രവ്യാപാരശാല പൂട്ടി വീട്ടിലേക്കു മടങ്ങിയ ദിനിമോളുടെ ബാഗിൽനിന്നാണ് പണം നഷ്ടപ്പെട്ടത്. പിറ്റേന്ന് ബാങ്കിൽ പണം അടയ്ക്കാൻ നോക്കിയപ്പോഴാണ് ബാഗിൽനിന്ന് തുക നഷ്ടപ്പെട്ട കാര്യം അറിയുന്നത്. പണം ലഭിച്ച രമേഷ് തുക ഭദ്രമായി വെച്ചൂർഗ്രാമം ഫെയ്സ്ബുക്ക് ഗ്രൂപ്പ് അഡ്മിൻമാരിലൊരാളായ സുരേഷ്ബാബുവിനെ ഏൽപ്പിച്ചു. ഇവർ അന്വേഷണം നടത്തുന്നതിനിടയിൽ ദിനിമോൾ സുരേഷ്ബാബുവിനെ സമീപിച്ച് അടയാളസഹിതം കാര്യങ്ങൾ ധരിപ്പിച്ചു. സുരേഷ് ബാബു രമേഷിനെ വരുത്തി ദിനിമോൾക്കു തുക കൈമാറി. വർഷങ്ങൾക്കു മുമ്പ് സഹോദരിയുടെ വിവാഹാവശ്യത്തിനായി കരുതിയ 53,000 രൂപ കളഞ്ഞുപോയതിന്‍റെ നൊമ്പരം ഇപ്പോഴും നെഞ്ചിലേറ്റുന്ന തനിക്ക് പണം നഷ്ടമാകുന്നതിന്‍റെ വേദന മറ്റാരേക്കാളും അറിയാമെന്നും യഥാർഥ ഉടമയ്ക്കു പണം തിരിച്ചുനൽകിയപ്പോഴാണ് തന്‍റെ ഉള്ളിലെ നീറ്റൽ ശമിച്ചതെന്നും രമേഷ് പറഞ്ഞു.

പെരുവയിൽ ഉയരവിളക്ക് മിഴിയടച്ചിട്ട് മാസങ്ങൾ

പെരുവ: ഉയരവിളക്ക് മിഴി അടച്ചിട്ട് മാസങ്ങള്‍ പിന്നിടുന്നു. വിളക്ക് തെളിക്കാന്‍ നടപടിയെടുക്കാതെ അധികൃതര്‍. മുളക്കുളം പഞ്ചായത്തിലെ പെരുവ മാര്‍ക്കറ്റ് ജംഗ്ഷനില്‍ നില്‍ക്കുന്ന ഹൈമാസ്റ്റ് ലൈറ്റാണ് തെളിയാതെ നില്‍ക്കുന്നത്. പെരുവയിലെ പ്രധാനപ്പെട്ട മറ്റൊരു സ്ഥലമാണ് മാര്‍ക്കറ്റ് ജംഗ്ഷന്‍. ജില്ലാ പഞ്ചായത്ത് ഫണ്ട് ഉപയോഗിച്ചു സ്ഥാപിച്ച ലൈറ്റാണിത്. എന്നാല്‍, ഇതിന്‍റെ പരിപാലനവും അറ്റകുറ്റപ്പണിയും വൈദ്യുതി ബില്ലും അടയ്‌ക്കേണ്ടത് പഞ്ചായത്താണ്. പഞ്ചായത്ത് അധികൃതരെ പലതവണ വിവരം അറിയിച്ചിട്ടും യാതൊരു നടപടിയും ഉണ്ടായില്ലെന്ന് വ്യാപാരികളും നാട്ടുകാരും പറയുന്നു. വ്യാപാരസ്ഥാപനങ്ങള്‍ അടച്ചാല്‍ ഇവിടം കൂരിരുട്ടാകും. ആറു മാസം മുമ്പ് മാര്‍ക്കറ്റ് ജംഗ്ഷനിലെ പലചരക്ക്, പച്ചക്കറിക്കട തുടങ്ങിയ സ്ഥാപനങ്ങളില്‍ മോഷണം നടന്നിരുന്നു. പഞ്ചായത്ത് മാര്‍ക്കറ്റില്‍ സ്ഥാപിച്ചിരുന്ന ബയോഗ്യാസ് പ്ലാന്‍റില്‍നിന്നും വൈദ്യുതി ഉത്പാദിപ്പിച്ച് ഇവിടങ്ങളില്‍ ലൈറ്റ് തെളിച്ചിരുന്നു. എന്നാല്‍, അതും ഇപ്പോള്‍ പ്രവര്‍ത്തിക്കാതെയായി. തകരാറായിക്കിടക്കുന്ന ഹൈമാസ്റ്റ് ലൈറ്റുകള്‍ തെളിക്കാന്‍ അടിയന്ത‌ര നടപടി സ്വീകരിക്കണമെന്ന് വ്യാപാരികളും നാട്ടുകാരും ആവശ്യപ്പെട്ടു.

ഉദ്ഘാടനം കഴിഞ്ഞിട്ട് ഒരു മാസം : പഞ്ചായത്ത് കമ്യൂണിറ്റി ഹാളിന്‍റെ സീലിംഗ് ഇളകിവീണു

ഞീഴൂര്‍: ഉദ്ഘാടനം കഴിഞ്ഞ് ഒരു മാസം കഴിയും മുമ്പേ നവീകരിച്ച പഞ്ചായത്ത് കമ്യൂണിറ്റി ഹാളിന്‍റെ സീലിംഗ് ഇളകിവീണു. 25 ലക്ഷം രൂപ മുടക്കി നവീകരിച്ച ഞീഴൂര്‍ പഞ്ചായത്തിന്‍റെ കമ്യൂണിറ്റി ഹാളിന്‍റെ മുൻവശത്തെ സീലിംഗാണ് ഇന്നലെ രാവിലെ പെയ്ത ശക്തമായ മഴയില്‍ വെള്ളം കെട്ടിനിന്നതിനെത്തുടര്‍ന്ന് അടര്‍ന്ന് തൂങ്ങിക്കിടന്നത്. ഈ സമയം താഴെ ആളുകള്‍ ഇല്ലാതിരുന്നതിനാല്‍ അപകടമുണ്ടായില്ല. മഴവെള്ളം ഒഴുകിപ്പോകാന്‍ പൈപ്പുകള്‍ സ്ഥാപിച്ചിരുന്നതാണെങ്കിലും സീലിംഗിനിടെ വെള്ളം കെട്ടിനിന്നതോടെയാണ് അടന്‍ന്നുവീഴാനിടയാക്കിയത്. നിര്‍മാണത്തില്‍ അപാകതയുണ്ടെന്ന് ആരോപണവുമായി പഞ്ചായത്തംഗങ്ങള്‍തന്നെ രംഗത്തുവന്നിട്ടുണ്ട്. മോന്‍സ് ജോസഫ് എംഎല്‍എയുടെ പ്രാദേശിക വികസന ഫണ്ടില്‍നിന്ന് അനുവദിച്ച 25 ലക്ഷം രൂപ ഉപയോഗിച്ചാണ് ഞീഴൂര്‍ പഞ്ചായത്ത് കമ്യൂണിറ്റി ഹാളിന്‍റെ നവീകരണം പൂര്‍ത്തിയാക്കിയത്. ഇതിന്‍റെ ഉദ്ഘാടനം അടുത്തിടെ മോന്‍സ് ജോസഫ് എംഎല്‍എ നിര്‍വഹിച്ചിരുന്നു.

സിഎംഎസിൽ പ്രകൃതി സൗഹൃദ ആരാധന

കോട്ടയം: പ്രകൃതിയുടെ സംരക്ഷണം സന്ദേശമാക്കി, സിഎംഎസ് കോളജില്‍ പ്രകൃതി സൗഹൃദ ആരാധന സംഘടിപ്പിച്ചു. കോളജ് അങ്കണത്തില്‍ നടന്ന പരിപാടി മധ്യകേരള മഹായിടവക ബിഷപ് ഡോ. മലയില്‍ സാബു ചെറിയാന്‍ കോശി മണ്‍ചിരാത് തെളിച്ച് ഉദ്ഘാടനം ചെയ്തു. ലോകമെമ്പാടുമുള്ള ക്രൈസ്തവ സമൂഹം സൃഷ്ടിയുടെ കാലമായി ആചരിക്കുന്ന പരിസ്ഥിതി സൗഹൃദ ദിനങ്ങള്‍ക്ക് ഐക്യദാര്‍ഢ്യം പ്രഖ്യാപിച്ചാണ് സിഎസ്‌ഐ മധ്യകേരള മഹായിടവക പരിസ്ഥിതി വകുപ്പിന്‍റെ സഹകരണത്തോടെ കോളജില്‍ പ്രകൃതി സൗഹൃദ ആരാധന സംഘടിപ്പിച്ചത്. പ്രകൃതിയുടെ സംരക്ഷകനായ വിശുദ്ധ ഫ്രാന്‍സിസ് അസീസിയുടെ ഓര്‍മത്തിരുനാള്‍ ദിനമായ ഒക്‌ടോബര്‍ നാലു വരെയാണ് ആചരണം. ഈ ദിനങ്ങളില്‍ പൊതുഭവനമായ ഭൂമിയുടെ സംരക്ഷണം, പ്രകൃതിയുമായുള്ള മനുഷ്യന്‍റെ ബന്ധം എന്നിവയ്ക്ക് പ്രാധാന്യം നല്‍കും. ആരാധനയ്ക്ക് സിഎസ്‌ഐ മധ്യകേരള മഹായിടവക ബിഷപ് ഡോ. മലയില്‍ സാബു കോശി ചെറിയാന്‍ തുടക്കംകുറിച്ചു. ഈശ്വരന്‍ വരദാനമായി തന്ന പ്രകൃതിയുടെ സംരക്ഷണം എന്ന സന്ദേശം പകരുകയുമാണ് പ്രകൃതി സൗഹൃദ ആരാധനയിലൂടെ ഉദ്ദേശിക്കുന്നതെന്ന് ബിഷപ് പറഞ്ഞു. പ്രകൃതിയുമായി ചേര്‍ന്നു നില്‍ക്കുന്ന ആരാധനയില്‍ ബിഷപ്പും വൈദികരും വിദ്യാര്‍ഥികളും ഉള്‍പ്പെടെയുള്ളവര്‍ കോളജ് പുല്‍ത്തകിടിയില്‍ ഇരുന്നാണ് പങ്കെടുത്തത്. പ്രകൃതി സൗഹൃദ ഗാനങ്ങള്‍, ഭജന്‍, പ്രാര്‍ഥനകള്‍, വേദവായന എന്നിവയും ആരാധനയുടെ ഭാഗമായി നടന്നു. റവ. ഡോ. വിജി വര്‍ഗീസ് ഈപ്പന്‍ ദൂത് നല്‍കി. ആരാധനയെത്തുടർന്ന് പ്രകൃതി സംരക്ഷണ സന്ദേശം ഉയര്‍ത്തിപ്പിടിച്ച് ബിഷപ് കോളജ് കാമ്പസില്‍ വൃക്ഷത്തൈയും നട്ടു. കോളജ് പ്രിന്‍സിപ്പല്‍ ഡോ. അഞ്ജു ശോശന്‍ ജോര്‍ജ്, മഹായിടവക പരിസ്ഥിതി വകുപ്പ് ഡയറക്ടര്‍ ഡോ. മാത്യു കോശി പുന്നയ്ക്കാട്, കോളജ് ബര്‍സാര്‍ റവ. ഡോ. ഷിജു സാമുവല്‍, ചാപ്ലയിന്‍ റവ. ടിബു ഉമ്മന്‍ ജോര്‍ജ്, പരിസ്ഥിതി വകുപ്പ് കണ്‍വീനര്‍ റവ. അനില്‍ തോമസ് എന്നിവര്‍ നേതൃത്വം നല്‍കി.

ഗാന്ധിനഗറിലെ ഹൈമാസ്റ്റ് ലൈറ്റ് തെളിയുന്നില്ലെന്ന് പരാതി

ഗാന്ധിനഗർ: ഗാന്ധിനഗർ ഭാഗത്തു വഴിവിളക്ക് മാസങ്ങളായി തെളിയുന്നില്ലെന്നു പരാതി. മെഡിക്കൽ കോളജ്-ഗാന്ധിനഗർ റോഡിൽനിന്നും എംസി റോഡിലേക്ക് പ്രവേശിക്കുന്ന ഭാഗത്തെ ഹൈമാസ്റ്റ് ലൈറ്റ് മാസങ്ങളായി കണ്ണടച്ചിരിക്കുകയാണെന്നു പ്രദേശവാസികൾ പറയുന്നു. ഇതേത്തുടർന്ന് പ്രദേശം ഇരുട്ടിലാണ്. ഇത് അപകടങ്ങൾക്കു കാരണമാകുന്നുണ്ട്. എംസി റോഡിൽ നിന്നു മെഡിക്കൽ കോളജ് റോഡിലേക്ക് തിരിയുന്ന വാഹനങ്ങൾക്കും മെഡിക്കൽ കോളജ് റോഡിൽനിന്നും എംസി റോഡിലേക്ക് പ്രവേശിക്കുന്ന വാഹനങ്ങൾക്കും ഇവിടെ വെളിച്ചമില്ലാത്തത് പ്രതിസന്ധി സൃഷ്ടിക്കുന്നുണ്ടെന്ന് നാട്ടുകാർ ചൂണ്ടിക്കാട്ടി. എല്ലാ സമയത്തും ആംബുലൻസ് അടക്കം കടന്നുപോകുന്ന റോഡാണിത്. ഇവിടെത്തെ ഹൈമാസ്റ്റ് ലൈറ്റ് തെളിക്കുന്നതിന് അടിയന്തര നടപടി സ്വീകരിക്കണമെന്ന ആവശ്യം ശക്തമാണ്. മെഡിക്കൽ കോളജ് ആശുപത്രി അത്യാഹിത വിഭാഗത്തിലേക്ക് പ്രവേശിക്കുന്ന ഭാഗത്ത് എട്ടുലക്ഷം ചെലവഴിച്ച് ഹൈമാസ്റ്റ് ലൈറ്റ് സ്ഥാപിച്ചിട്ട് മാസങ്ങൾ പിന്നിട്ടെങ്കിലും പ്രവർത്തിപ്പിച്ചു തുടങ്ങിട്ടില്ല.

നവീകരിച്ച പുതിയ റീഡിംഗ് ഹാളിന് ഉമ്മന്‍ ചാണ്ടിയുടെ പേര് നല്‍കി

കോട്ടയം: പുന്നയ്ക്കല്‍ ചുങ്കം ലൈബ്രറിയില്‍ നവീകരിച്ച പുതിയ റീഡിംഗ് ഹാളിന് മുന്‍ മുഖ്യമന്ത്രി ഉമ്മന്‍ ചാണ്ടിയുടെ പേരു നല്‍കി. ജില്ലാ പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്തംഗം പി.കെ. വൈശാഖ് തന്‍റെ ഡിവിഷന്‍ ഫണ്ടില്‍നിന്ന് 22 ലക്ഷം രൂപ ചെലവഴിച്ചാണ് ലെെബ്രറിയുടെയും ചുറ്റുമതിലിന്‍റെയും പുനരുദ്ധാരണ പ്രവര്‍ത്തനങ്ങള്‍ പൂര്‍ത്തീകരിച്ചത്. ജില്ലാ പഞ്ചായത്ത് ഡിവിഷന്‍ ഫണ്ട് ഉപയോഗിച്ച് നവീകരിക്കുന്ന രണ്ടാമത്തെ ലൈബ്രറിയാണ് പുന്നയ്ക്കല്‍ ചുങ്കത്തേത്. ഗ്രന്ഥശാലാ പ്രസ്ഥാനങ്ങളുടെ ഉന്നമനത്തിനുവേണ്ടി മാത്രം 57 ലക്ഷം രൂപയാണ് ഡിവിഷന്‍ ഫണ്ടില്‍നിന്ന് ഇതുവരെ അനുവദിച്ചതെന്ന് പി.കെ. വൈശാഖ് പറഞ്ഞു. നവീകരിച്ച പുതിയ ലൈബ്രറിയുടെയും ഉമ്മന്‍ചാണ്ടി മെമ്മോറിയല്‍ റീഡിംഗ് ഹാളിന്‍റെയും ഉദ്ഘാടനം തിരുവഞ്ചൂര്‍ രാധാകൃഷ്ണന്‍ എംഎല്‍എ നിര്‍വഹിച്ചു. ലൈബ്രറി പ്രസിഡന്‍റ് മാത്യു കുര്യന്‍ അധ്യക്ഷത വഹിച്ചു. വിദ്യാഭ്യാസ അവാര്‍ഡ് വിതരണം പനച്ചിക്കാട് പഞ്ചായത്ത് പ്രസിഡന്‍റ് ആനി മാമ്മന്‍ നിര്‍വഹിച്ചു. ജില്ലാ പഞ്ചായത്ത് മെംബര്‍ പി.കെ. വൈശാഖ് മുഖ്യപ്രഭാഷണം നടത്തി. ബ്ലോക്ക് പഞ്ചായത്തംഗം സിബി ജോണ്‍, വാര്‍ഡ് മെംബര്‍ മിനി ഇട്ടിക്കുഞ്ഞ്, കെ.യു. രഘു, ബി. ശശികുമാര്‍, ഷൈജു തെക്കുംചേരി തുടങ്ങിയവര്‍ പ്രസംഗിച്ചു.

അതിരമ്പുഴ പള്ളിയിൽ ദർശനത്തിരുനാളിന് കൊടിയേറി

അതിരമ്പുഴ: സെന്‍റ് മേരീസ് ഫൊറോന പള്ളിയിൽ പരിശുദ്ധ വ്യാകുലമാതാവിന്‍റെ ദർശനത്തിരുനാളിന് കൊടിയേറി. വികാരി ഫാ. മാത്യു പടിഞ്ഞാറേക്കുറ്റ് കൊടിയേറ്റി. ആധ്യാത്മിക പിതാവ് ഫാ. ഏബ്രഹാം കാടാത്തുകുളം, അസിസ്റ്റന്‍റ് വികാരിമാരായ ഫാ. അനീഷ് കാമിച്ചേരി, ഫാ. അലൻ മാലിത്തറ, ഫാ. ടോണി മണക്കുന്നേൽ എന്നിവർ സഹകാർമികരായിരുന്നു. കൊടിയേറ്റിനെത്തുടർന്ന് ഫാ. മാർട്ടിൻ തൈപ്പറമ്പിൽ വിശുദ്ധ കുർബാന അർപ്പിച്ചു. ഇന്ന് പ്രസുദേന്തി തെരഞ്ഞെടുപ്പും നാളെ പ്രസുദേന്തി വാഴ്ചയും നടത്തും. പൂർവിക സ്മരണാ ദിനമായ നാളെ വൈകുന്നേരം സെമിത്തേരി സന്ദർശനവും പ്രാർഥനയും നടത്തും. പ്രധാന തിരുനാൾ ദിനങ്ങളായ ശനി, ഞായർ ദിവസങ്ങളിൽ തിരുനാൾ പ്രദക്ഷിണങ്ങൾ നടത്തും. ശനിയാഴ്ച വൈകുന്നേരം വലിയപള്ളിക്കു വലംവച്ചും ഞായറാഴ്ച വൈകുന്നേരം വലിയപള്ളിക്കും ചെറിയപള്ളിക്കും വലംവച്ചുമാണ് പ്രദക്ഷിണം നടത്തുന്നത്. പരിശുദ്ധ വ്യാകുല മാതാവിന്‍റെയും വിശുദ്ധ സെബസ്ത്യാനോസിന്‍റെയും തിരുസ്വരൂപങ്ങൾ ഞായറാഴ്ച രാവിലെ മോണ്ടളത്തിൽ പ്രതിഷ്ഠിക്കും.

അസംപ്ഷന്‍ സോഷ്യല്‍വര്‍ക്ക് വിഭാഗം ക്യാമ്പ് അതിരമ്പുഴയില്‍

ചങ്ങനാശേരി: അസംപ്ഷന്‍ കോളജ് സാമൂഹികപ്രവര്‍ത്തന വിഭാഗത്തിന്‍റെ ആഭിമുഖ്യത്തില്‍ നടത്തുന്ന സപ്തദിന സഹവാസ ക്യാമ്പ് “ലയം-2025’’ന്‍റെ ഉദ്ഘാടനം ഒതളമറ്റം അങ്കണവാടി ഹാളില്‍ നടന്നു. അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം ഉദ്ഘാടനം നിര്‍വഹിച്ചു. വൈസ് പ്രസിഡന്‍റ് ഷിമി സജി അധ്യക്ഷത വഹിച്ചു. സിഎസ്ആര്‍ഡി തൃശൂര്‍ പ്രോജക്ട് കോ-ഓര്‍ഡിനേറ്റര്‍ ജയരാജന്‍, വാര്‍ഡ് മെംബര്‍ ജോഷി ഇലഞ്ഞിയില്‍, അസംപ്ഷന്‍ കോളജ് സാമൂഹിക സേവന വകുപ്പ് മേധാവി സിസ്റ്റര്‍ ശാലിനി സിഎംസി, ക്യാമ്പ് ലീഡര്‍ ടെല്‍ന, ക്യാമ്പ് സെക്രട്ടറി സ്‌നേഹ എന്നിവര്‍ പ്രസംഗിച്ചു. ഏഴു ദിവസത്തെ ക്യാമ്പിന്‍റെ ഭാഗമായി വിവിധ സാംസ്‌കാരിക-സാമൂഹിക പ്രവര്‍ത്തനങ്ങളും ബോധവത്കരണ ക്ലാസുകളും സംഘടിപ്പിക്കുമെന്ന് സംഘാടകര്‍ അറിയിച്ചു.

കുടുംബശ്രീയുടെ ‘മാ കെയര്‍’ പദ്ധതി കൂടുതല്‍ സ്‌കൂളുകളിലേക്ക്

കോട്ടയം: കുടുംബശ്രീയുടെ ‘മാ കെയര്’‍ പദ്ധതി ജില്ലയില്‍ എട്ടു സ്‌കൂളുകളില്‍ കൂടി ആരംഭിക്കും. ഏറ്റുമാനൂര്‍, പള്ളം, മാടപ്പള്ളി, പാമ്പാടി, ഈരാറ്റുപേട്ട ബ്ലോക്കുകള്‍ക്ക് കീഴിലെ സ്‌കൂളുകളിലാണ് പുതിയ കേന്ദ്രങ്ങള്‍ തുറക്കുകയെന്ന് കുടുംബശ്രീ ജില്ലാമിഷന്‍ കോ ഓര്‍ഡിനേറ്റര്‍ അഭിലാഷ് കെ. ദിവാകര്‍ അറിയിച്ചു. സംസ്ഥാനത്ത് വിദ്യാഭ്യാസവകുപ്പിനു കീഴിലുള്ള സ്‌കൂളുകളില്‍ വിദ്യാര്‍ഥികള്‍ക്ക് ആരോഗ്യകരവും പോഷക സമ്പുഷ്‌ടവുമായ ലഘുഭക്ഷണങ്ങള്‍, പാനീയങ്ങള്‍, സ്‌കൂള്‍ സ്റ്റേഷനറി ഐറ്റങ്ങള്‍, സാനിറ്ററി നാപ്കിനുകള്‍ എന്നിവ ലഭ്യമാക്കുന്നതാണ് മാ കെയര്‍ പദ്ധതി. തദ്ദേശസ്വയംഭരണ വകുപ്പും വിദ്യാഭ്യാസവകുപ്പും സംയുക്തമായി ജില്ലയില്‍ ഓഗസ്റ്റ് മാസത്തിലാണ് പദ്ധതി ആരംഭിച്ചത്. നിലവിൽ 16 സ്‌കൂളുകളില്‍ ആരംഭിച്ച പദ്ധതി വിജയകരമായതിനെത്തുടര്‍ന്നാണ് കൂടുതല്‍ സ്‌കൂളുകളിലേക്ക് വ്യാപിപ്പിക്കുന്നത്. ഒരു സ്‌കൂളില്‍ പ്രതിമാസം 45,000 രൂപ വരെ വിറ്റുവരവ് കുടുംബശ്രീക്ക് ലഭിക്കുന്നുണ്ട്. സ്റ്റേഷനറി സാധനങ്ങള്‍ ഉള്‍പ്പെടെ ലഭ്യമാക്കുന്നതിനാല്‍ സ്‌കൂള്‍ സമയത്ത് കുട്ടികള്‍ ഇവ വാങ്ങുന്നതിന് പുറത്തുപോകുന്നത് ഒഴിവാക്കാം. വിദ്യാര്‍ഥികള്‍ക്കും അധ്യാപകര്‍ക്കും ജീവനക്കാര്‍ക്കും ഇവിടെനിന്ന് ലഘുഭക്ഷണങ്ങളും മറ്റു സാധനങ്ങളും മിതമായ നിരക്കില്‍ വാങ്ങാം. ആരോഗ്യകരമല്ലാത്ത ഭക്ഷണം കഴിക്കുന്ന സാഹചര്യം ഒഴിവാക്കാനും ഇതുവഴി സാധിക്കും.

സഭകളെ ഒന്നിപ്പിക്കുന്ന നിഖ്യാ വിശ്വാസപ്രമാണം അഭിമാനം: മാര്‍ തോമസ് തറയില്‍

കോട്ടയം: സഭകളെ തമ്മില്‍ ഒന്നിപ്പിക്കുന്ന ഘടകമായി നിഖ്യാ വിശ്വാസപ്രമാണം പതിനേഴ് നൂറ്റാണ്ടുകളായി നിലനില്‍ക്കുന്നത് അഭിമാനകരമെന്ന് ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍. ബിഷപ് മാണി ഫൗണ്ടേഷനും ബിഷപ് മാണി തിയോളജിക്കല്‍ ഇന്‍സ്റ്റിറ്റ്യൂട്ടും സംയുക്തമായി സംഘടിപ്പിച്ച നിഖ്യാ വിശ്വാസപ്രമാണത്തിന്‍റെ 1700-ാമത് വാര്‍ഷികാഘോഷങ്ങള്‍ ഉദ്ഘാടനം ചെയ്യുകയായിരുന്നു ബിഷപ് മാർ തറയിൽ. തലമുറകളായി വിവിധ ക്രൈസ്തവ സഭകളുടെ ആരാധന ക്രമത്തില്‍ ഐക്യത്തിന്‍റെ പ്രതീകമായാണ് നിഖ്യാ വിശ്വാസപ്രമാണം നിലനില്‍ക്കുന്നതെന്ന് സമ്മേളനത്തില്‍ അധ്യക്ഷത വഹിച്ച ബിഷപ് ഡോ. മലയില്‍ സാബു കോശി ചെറിയാന്‍ പറഞ്ഞു. ഓര്‍ത്തഡോക്‌സ് സെമിനാരി മുന്‍ പ്രിന്‍സിപ്പല്‍ റവ.ഡോ. കെ.എം. ജോര്‍ജ്, ഓര്‍ത്തഡോക്‌സ് സഭ ഭദ്രാസന മെത്രാപ്പോലീത്ത ഡോ. യൂഹാനോന്‍ മാര്‍ ദിയസ്‌കോറസ്, യാക്കോബായ സുറിയാനി സഭ സുന്നഹദോസ് സെക്രട്ടറി ഡോ. തോമസ് മാര്‍ തീമോത്തിയോസ് എന്നിവര്‍ വിഷയാവതരണം നടത്തി. മാര്‍ത്തോമ്മ സഭ കോട്ടയം ഭദ്രാസനാധിപന്‍ ഡോ. തോമസ് മാര്‍ തിമോത്തിയോസിന്‍റെ സന്ദേശം സെക്രട്ടറി റവ. അജിന്‍ മാത്യു ജോര്‍ജ് വായിച്ചു. റവ.ബിഷപ് മാണി തിയോളജിക്കല്‍ ഇന്‍സ്റ്റിറ്റ്യൂട്ട് പ്രിന്‍സിപ്പല്‍ റവ. വിജി വർഗീസ് ഈപ്പന്‍, രജിസ്ട്രാര്‍ റവ. നെബു സ്‌കറിയ, റവ. മാത്യു വര്‍ക്കി, ബിഷപ് മാണി ഫൗണ്ടേഷന്‍ ചെയര്‍മാന്‍ എം.എം. ഫിലിപ്പ്, സെക്രട്ടറി ജോര്‍ജ് വർഗീസ്, പിആര്‍ഒ കുര്യന്‍ ഡാനിയേല്‍, എം.വി. റോയി, ആനി പീറ്റര്‍ എന്നിവര്‍ പ്രസംഗിച്ചു.

ഓര്‍മച്ചെപ്പില്‍ "ദൈവസ്‌നേഹത്തിന്‍റെ വിളക്കുമാടം’

റെജി ജോസഫ് കോട്ടയം: കാലംചെയ്ത മുന്‍ തൃശൂര്‍ ആര്‍ച്ച് ബിഷപ് മാര്‍ ജേക്കബ് തൂങ്കുഴിയെക്കുറിച്ചുള്ള കുറിപ്പുകളുടെ സമാഹാരമാണ് ‘’ദൈവസ്‌നേഹത്തിന്‍റെ വിളക്കുമാടം’’. തൂങ്കുഴി കുടുംബാംഗങ്ങളെയും പാലാ രൂപതയിലെ വിളക്കുമാടം സെന്‍റ് സേവ്യേഴ്‌സ് മാതൃ ഇടവകയെയും കരുതലോടെ സ്‌നേഹിച്ച പിതാവായിരുന്നു കാലംചെയ്ത മാര്‍ ജേക്കബ് തൂങ്കുഴി. കുടുംബയോഗത്തിന്‍റെ രക്ഷാധികാരിയുമായിരുന്നു പിതാവ്. ആരോഗ്യപ്രശ്‌നങ്ങളുണ്ടായിരിക്കെയും അദ്ദേഹത്തിന്‍റെ ആഗ്രഹപ്രകാരം ഇക്കൊല്ലം മാര്‍ച്ചില്‍ കുടുംബയോഗസമ്മേളനം നടത്തിയത് വിശ്രമ ജീവിതം നയിച്ചിരുന്ന തൃശൂരിലാണ്. വീല്‍ ചെയറില്‍ എത്തി കുടുംബാംഗങ്ങോളോട് കുശലം പറഞ്ഞും അനുഗ്രഹം ചൊരിഞ്ഞും സ്‌നേഹവിരുന്നില്‍ പങ്കെടുത്തുമാണ് പിതാവ് പിരിഞ്ഞതെന്ന് കുടുംബയോഗം സെക്രട്ടറി മാത്യു സഖറിയാസ് തൂങ്കുഴി അനുസ്മരിച്ചു. വിളക്കുമാടം തൂങ്കുഴി കുര്യന്‍-മാമ്മി ദമ്പതികളുടെ പുത്രനായ മാര്‍ ജേക്കബ് തൂങ്കുഴി (ചാക്കോച്ചന്‍) യുടെ പ്രൈമറി വിദ്യാഭ്യാസം വിളക്കുമാടത്തും ഹൈസ്‌കൂള്‍ പഠനം ഭരണങ്ങാനത്തുമായിരുന്നു. ഇതിനുശേഷമാണ് സെമിനാരി പഠനത്തിന് പോയത്. പാലാ രൂപതയിലെയും വിളക്കുമാടം ഇടവകയിലെയും നിരവധി പരിപാടികള്‍ക്ക് മാര്‍ തൂങ്കുഴിയുടെ സാന്നിധ്യമുണ്ടായിരുന്നു. മാതൃ ഇടവകയില്‍ നിരവധി തവണ വിശുദ്ധ കുര്‍ബാന അര്‍പ്പിക്കുകയും ചെയ്തു. റോമില്‍നിന്ന് ഉപരിപഠനത്തിനുശേഷം തിരികെ വന്ന് തലശേരി അതിരൂപതയുടെ പ്രഥമ ബിഷപ്പും പാലാ രൂപത കുടക്കച്ചിറ ഇടവകാംഗവുമായിരുന്ന മാര്‍ സെബാസ്റ്റ്യന്‍ വള്ളോപ്പള്ളിയുടെ സെക്രട്ടറിയായും രൂപത ചാന്‍സലറുമായും സേവനമനുഷ്ഠിച്ചു. തുടര്‍ന്നാണ് അവിടെ മൈനര്‍ സെമിനാരി റെക്ടറായത്.

കോട്ടയം സ്വദേശിയില്‍നിന്ന് ഒന്നേകാല്‍ കോടി തട്ടിയെടുത്ത ഉത്തർപ്രദേശുകാരൻ അറസ്റ്റില്‍

കോട്ടയം: ഗോള്‍ഡ് മൈനിംഗ് കമ്പനിയില്‍ പണം നിക്ഷേപിച്ചാല്‍ കൂടുതല്‍ ലാഭം ലഭിക്കുമെന്ന് പറഞ്ഞു വിശ്വസിപ്പിച്ച് കളത്തിപ്പടി സ്വദേശിയില്‍നിന്ന് ഒന്നേകാല്‍ കോടി രൂപ തട്ടിയെടുത്ത ഉത്തർപ്രദേശ് സ്വദേശി അറസ്റ്റില്‍. ഉത്തര്‍പ്രദേശ് സ്വദേശി ദീപേഷാ(25)ണ് അറസ്റ്റിലായത്. 2024 ലാണു കേസിനാസ്പദമായ സംഭവം. ദീപേഷിന്‍റെ ഫോണ്‍ നമ്പരില്‍നിന്നും വാട്സ് ആപ്പ് കോള്‍ വിളിച്ച് ന്യു മൗണ്ട് ഗോള്‍ഡ് കാപ്പിറ്റല്‍ ഗോള്‍ഡ് മൈനിംഗ് കമ്പനിയെക്കുറിച്ചു വിശദീകരിച്ചും ഈ കമ്പനിയില്‍ പണം ഇന്‍വെസ്റ്റ് ചെയ്താല്‍ ഷെയര്‍ മാര്‍ക്കറ്റിലെപ്പോലെ റിസ്‌കില്ലാതെ സ്ഥിരമായി വലിയ തുക കിട്ടുമെന്നു പറഞ്ഞുവിശ്വസിപ്പിച്ചുമാണ് തട്ടിപ്പ് നടത്തിയത്. തുടര്‍ന്ന് ഇടപാടുകാരന്‍ മലയാളി ആണെന്നറിഞ്ഞ് മലയാളത്തില്‍ ഇതേ കാര്യങ്ങളെപ്പറ്റി ഫോണില്‍ സംസാരിച്ചു. ഫോണിലൂടെ നല്‍കിയ ഒരു ആപ്പ് ഡൗണ്‍ലോഡ് ചെയ്യിച്ച് അതിലൂടെ പല തവണകളായി പല അക്കൗണ്ടുകളിലേക്ക് പണം വാങ്ങുകയായിരുന്നു. വിശ്വാസ്യതയ്ക്കായി ലാഭവിഹിതവും വിശ്വാസ്യതയ്ക്കായി ചെറിയ തുകകള്‍ ലാഭവിഹിതം എന്ന പേരില്‍ തിരികെ നല്‍കുകയും ചെയ്തിരുന്നു. കഴിഞ്ഞ ഓഗസ്റ്റ് 19നു പണം നഷ്ടപ്പെട്ട വ്യക്തി 4300 ഡോളര്‍ പിന്‍വലിക്കാന്‍ അപേക്ഷ കൊടുത്തപ്പോള്‍ പണം അക്കൗണ്ടില്‍ ലഭിച്ചില്ല. തുടര്‍ന്ന് പ്രതികളുടെ ഫോണ്‍ നമ്പരിലേക്കു വിളിച്ചപ്പോള്‍ നമ്പര്‍ നിലവിലില്ലെന്ന് അറിഞ്ഞതോടെയാണ് പറ്റിക്കപ്പെടുകയാണെന്നു വ്യക്തമായത്. പലതവണയായി 1,17,78,700 രൂപ നിക്ഷേപിച്ചിരുന്നു. പരാതിയെ തുടര്‍ന്നു കോട്ടയം ഈസ്റ്റ് സ്റ്റേഷനില്‍ രജിസ്റ്റര്‍ ചെയ്ത കേസില്‍ ജില്ലാ പോലീസ് മേധാവിയുടെ നിര്‍ദേശപ്രകാരം ജില്ലാ ക്രൈം ബ്രാഞ്ച് അന്വേഷണം നടത്തുകയായിരുന്നു. കേസില്‍ ഉള്‍പ്പെട്ട ദീപേഷ് ഉത്തര്‍പ്രദേശില്‍ ഉണ്ടെന്ന് കണ്ടെത്തുകയും പ്രതിയുടെ താമസസ്ഥലത്തുനിന്നും അറസ്റ്റ് ചെയ്യുകയുമായിരുന്നു.

ജില്ലയിലെ മൂന്ന് പച്ചത്തുരുത്തുകള്‍ക്ക് സംസ്ഥാനതല അംഗീകാരം

കോട്ടയം: ജില്ലയിലെ മൂന്ന് പച്ചത്തുരുത്തുകള്‍ക്ക് സംസ്ഥാനതല അംഗീകാരം ലഭിച്ചു. തദ്ദേശ സ്വയംഭരണ വിഭാഗത്തില്‍ കല്ലറ പഞ്ചായത്തിന് അഞ്ചാം സ്ഥാനവും ഇതേ വിഭാഗത്തില്‍ കടനാട് പഞ്ചായത്തിന് പ്രത്യേക ജൂറി പുരസ്‌കാരവും വാഴൂര്‍ പഞ്ചായത്തിനു പ്രത്യേക ബഹുമതിയും ലഭിച്ചു. തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ മുഖ്യമന്ത്രി പിണറായി വിജയന്‍ പുരസ്‌കാരവും ബഹുമതിപത്രവും നല്‍കി. കല്ലറ പഞ്ചായത്തിലെ പെരുന്തുരുത്ത് എസ്‌കെവി യുപിഎസ് ഗ്രൗണ്ടിന് സമീപം 25 സെന്‍റ് ഭൂമിയില്‍ ഒരുക്കിയിട്ടുള്ള പച്ചത്തുരുത്ത് ജൈവവൈവിധ്യത്തിന്‍റെയും ഔഷധസസ്യ സമൃദ്ധിയുടെയും വേറിട്ട കാഴ്ചയായി കണ്ടെത്തി. 52 ഇനങ്ങളിലുള്ള ഇരുനൂറിലധികം സസ്യങ്ങളാണ് ഇവിടെയുള്ളത്. ജില്ലാതലത്തില്‍ ഒന്നാം സ്ഥാനവും കല്ലറയിലെ പച്ചത്തുരുത്തിനായിരുന്നു. കടനാട് തോടിന്‍റെ ഇരുകരകളിലുമായി കടനാട് പഞ്ചായത്ത് വച്ചുപിടിപ്പിച്ച പച്ചത്തുരുത്തിനാണ് പ്രത്യേക ജൂറി പുരസ്‌കാരം ലഭിച്ചത്.

ജില്ലാ പഞ്ചായത്ത് സ്ത്രീപക്ഷ നവകേരളം; സംവാദവും വിപണനമേളയും ഇന്നുമുതല്‍

കോട്ടയം: ജില്ലാ പഞ്ചായത്ത് സ്ത്രീപക്ഷ നവകേരളം എന്നപേരില്‍ സംവാദവും വിപണന മേളയും ഇന്നുമുതല്‍ 20 വരെ കോട്ടയം മാമ്മന്‍ മാപ്പിള ഹാളില്‍ രാവിലെ 10മുതല്‍ വൈകുന്നേരം അഞ്ചുവരെ നടത്തും. വനിതാ ശിശുവികസന വകുപ്പ് മുഖേനയാണ് മൂന്നു ദിവസത്തെ സ്ത്രീപക്ഷ ലിംഗ സമത്വ കാഴ്ചപ്പാടുള്ള നവകേരള സൃഷ്ടിക്കായി സംവാദം നടത്തുന്നത്. ഇന്നു രാവിലെ 10ന് ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലയുടെ അധ്യക്ഷതയില്‍ ചേരുന്ന സമ്മേളനത്തില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം ചെയ്യും. ജില്ലാ പോലീസ് ചീഫ് ഷാഹുല്‍ ഹമീദ് മുഖ്യപ്രഭാഷണം നടത്തും. നിഷ ജോസ് കെ. മാണി വിശിഷ്ടാതിഥിയായിരിക്കും. തുടര്‍ന്ന് ജനാധിപത്യ പ്രക്രിയയില്‍ സ്ത്രീകളുടെ പങ്കാളിത്തം എന്നവിഷയത്തില്‍ പാനല്‍ ചര്‍ച്ച നടത്തും. ഇ.എസ്. ബിജിമോള്‍, ലതികാ സുഭാഷ്, ഷീജ അനില്‍, പ്രഫ. റോണി കെ. ബേബി, ഡോ. പി.എം. ആരതി എന്നിവര്‍ പങ്കെടുക്കും. ഉച്ചകഴിഞ്ഞ് രണ്ടുമുതല്‍ മഴവില്‍ ഫിലിം സൊസൈറ്റിയുടെ നേതൃത്വത്തില്‍ നടത്തപ്പെടുന്ന സിനിമ പ്രദര്‍ശനവും പാനല്‍ ചര്‍ച്ചയും നടക്കും. നാളെ രാവിലെ ജില്ലാ പഞ്ചായത്ത് പ്രസിഡന്‍റിന്‍റെ അധ്യക്ഷതയില്‍ കൂടുന്ന സമ്മേളനം സാമൂഹ്യ പ്രവര്‍ത്തക ദയാബായി ഉദ്ഘാടനം ചെയ്യും. ജില്ലാ കളക്ടര്‍ ചേതന്‍ കുമാര്‍ മീണ മുഖ്യപ്രഭാഷണം നടത്തും. തുടര്‍ന്ന് അതിജീവിതമാര്‍ അനുഭവങ്ങള്‍ പങ്കുവയ്ക്കും. ഉച്ചകഴിഞ്ഞ് രണ്ടു മുതല്‍ ഡിജിറ്റല്‍ മാര്‍ക്കറ്റിംഗിനെക്കുറിച്ചു ക്ലാസ്. തുടര്‍ന്ന് മാതംഗി സത്യമൂര്‍ത്തിയുടെ കര്‍ണാട്ടിക് മ്യൂസിക്. 20നു രാവിലെ ഒമ്പതിന് യോഗ ക്ലാസും യോഗ ഡെമോണ്‍സ്‌ട്രേഷനും. തുടര്‍ന്ന് സ്ത്രീയും മാനസിക ആരോഗ്യവും എന്ന വിഷയത്തില്‍ ക്ലാസും ചര്‍ച്ചയും- ഡോ. എം.കെ. അരുഷ്മ നേതൃത്വ നല്‍കും. വൈകുന്നേരം നടക്കുന്ന സമാപന സമ്മേളനത്തില്‍ ജില്ലാ പഞ്ചായത്ത് മുന്‍ പ്രസിഡന്‍റ് കെ.വി. ബിന്ദു അധ്യക്ഷത വഹിക്കും. കോട്ടയം മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ മുഖ്യാതിഥിയായിരിക്കും. തുടര്‍ന്ന് വിവിധ കലാപരിപാടികളും അരങ്ങേറും. പത്രസമ്മേളനത്തില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, വൈസ് പ്രസിഡന്‍റ് ജോസ് പുത്തന്‍കാല, ജില്ലാ പഞ്ചായത്ത് അംഗം പി.എം. മാത്യു, ജില്ലാ വനിത ശിശു വികസന ഓഫീസര്‍ ടിജു റേച്ചല്‍ തോമസ് എന്നിവര്‍ പങ്കെടുത്തു.

സ്ത്രീ ക്ലിനിക്കുകള്‍ പ്രവര്‍ത്തനം തുടങ്ങി

കോട്ടയം: ജില്ലയിലെ എല്ലാ ജനകീയ ആരോഗ്യകേന്ദ്രങ്ങളിലും സ്ത്രീകള്‍ക്കായുള്ള പ്രത്യേക ക്ലിനിക്കുകള്‍ക്കു തുടക്കമായി. സ്ത്രീകളുടെ സമഗ്ര ആരോഗ്യസംരക്ഷണവും സൗകര്യപ്രദമായ ചികിത്സാലഭ്യതയും ഉറപ്പാക്കുന്നതിനായി ആരംഭിച്ചതാണ് പ്രത്യേക വനിത വെല്‍നെസ് ക്ലിനിക്. എല്ലാ ചൊവ്വാഴ്ചകളിലുമാണ് ജനകീയ ആരോഗ്യകേന്ദ്രങ്ങളില്‍ ക്ലിനിക്കുകള്‍ പ്രവര്‍ത്തിക്കുന്നത്. സ്ത്രീകളിലുണ്ടാകുന്ന വിളര്‍ച്ച, പ്രമേഹം, രക്താതിമര്‍ദം, കാന്‍സര്‍ സ്‌ക്രീനിംഗ് തുടങ്ങിയവയും മറ്റ് ആരോഗ്യ പ്രശ്‌നങ്ങളും ക്ലിനിക്കുകളിലൂടെ കണ്ടെത്താൻ സാധിക്കും. ജനകീയ ആരോഗ്യകേന്ദ്രങ്ങള്‍ കേന്ദ്രീകരിച്ച് സ്ത്രീകള്‍ക്കും കുട്ടികള്‍ക്കുമായി ക്ലിനിക്കുകള്‍, അയല്‍ക്കൂട്ട സ്‌ക്രീനിംഗ് ക്യാമ്പുകള്‍, വിദഗ്ധ സ്പെഷലിസ്റ്റ് സേവനങ്ങള്‍ എന്നിവ സ്ത്രീ ക്ലിനിക്കുകളുടെ നേതൃത്വത്തില്‍ നടത്തും. ആരോഗ്യമുള്ള സ്ത്രീകള്‍, ശക്തമായ സമൂഹം എന്ന പ്രമേയത്തെ അടിസ്ഥാനമാക്കി 2026 മാര്‍ച്ച് എട്ടു വരെ ആരോഗ്യവകുപ്പ് സ്ത്രീകളുടെയും കുട്ടികളുടെയും ആരോഗ്യത്തിനായി സ്ത്രീ കാമ്പയിന്‍ സംഘടിപ്പിക്കുന്നുണ്ട്. ഇതിന്‍റെ ആദ്യ ഘട്ടമായാണ് സ്ത്രീ ക്ലിനിക് നടപ്പാക്കുന്നത്. കൂടാതെ അയല്‍ക്കൂട്ട സ്‌ക്രീനിംഗ് ക്യാമ്പുകള്‍, വിദഗ്ധ പരിശോധനാ ക്യാമ്പുകള്‍, തുടര്‍ ചികിത്സ (റഫറല്‍ സംവിധാനം), ബോധവത്കരണ പ്രവര്‍ത്തനങ്ങള്‍ എന്നിവയും കാമ്പയിന്‍റെ ഭാഗമായി നടത്തുന്നുണ്ട്.

വേമ്പനാട്ട് കായലില്‍ മത്സ്യ കണക്കെടുപ്പും പരിസ്ഥിതി സര്‍വേയും 26ന്

കോട്ടയം: അന്തര്‍ദേശീയ പ്രാധാന്യമുള്ള നീര്‍ത്തടമായ വേമ്പനാട് കായലില്‍ 26ന് വാര്‍ഷിക മത്സ്യ കണക്കെടുപ്പ് നടത്തും. മത്സ്യ ഇനങ്ങള്‍, മത്സ്യ ലഭ്യത എന്നിവ സംബന്ധിച്ച് പരിസ്ഥിതി സംഘടനകളായ അശോക ട്രസ്റ്റ് ഫോര്‍ റിസര്‍ച്ച് ഇന്‍ ഇക്കോളജി ആന്‍ഡ് എന്‍വയണ്‍മെന്‍റ്, കമ്യൂണിറ്റി എന്‍വയണ്‍മെന്‍റല്‍ റിസര്‍ച്ച് എന്നിവ സംസ്ഥാന തണ്ണീര്‍ത്തട അഥോറിറ്റിയുടെ സഹായത്തോടെയാണു കണക്കെടുക്കുന്നത്. ഗവേഷകരുടെയും വിദ്യാര്‍ഥികളുടെയും മത്സ്യത്തൊഴിലാളികളുടെയും പരിസ്ഥിതി പ്രവര്‍ത്തകരുടെയും സഹകരണത്തോടെയാണ് വിവിധ പ്രദേശങ്ങള്‍ കേന്ദ്രീകരിച്ചുള്ള സര്‍വേ. 26ന് വൈകുന്നേരം തണ്ണീര്‍മുക്കം കെടിഡിസിയില്‍ നടക്കുന്ന സമ്മേളനത്തില്‍ പ്രാഥമിക റിപ്പോര്‍ട്ടും കണ്ടെത്തലുകളും അവതരിപ്പിക്കും. കേരള യൂണിവേഴ്‌സിറ്റി ഓഫ് ഫിഷറീസ് ആന്‍ഡ് ഓഷ്യന്‍ സ്റ്റഡീസ് (കുഫോസ്) വൈസ് ചാന്‍സലര്‍ ഉദ്ഘാടനം ചെയ്യും. വേമ്പനാട്ട് കായലില്‍ മത്സ്യ ഇനങ്ങള്‍ വര്‍ധിച്ചതായാണു കഴിഞ്ഞ സര്‍വേ വ്യക്തമാക്കുന്നത്. 2023ല്‍ 41 ഇനം മത്സ്യങ്ങളെ കണ്ടെത്തിയ സ്ഥാനത്ത് കഴിഞ്ഞ വര്‍ഷം 85 ഇനങ്ങളെ കണ്ടെത്തി. ഇവയില്‍ 71 ഇനം ചിറകുമത്സ്യങ്ങളും 11 ഇനം തോടുമത്സ്യങ്ങളും ഉള്‍പ്പെടും. അതേസമയം മത്സ്യലഭ്യതയിലും മത്സ്യങ്ങളുടെ തൂക്കത്തിലും കുറവുവന്നു. 500-600 ഗ്രാം തൂക്കം ലഭിച്ചിരുന്ന ആറ്റുകൊഞ്ചിന്‍റെ ശരാശരി തൂക്കം 300 ഗ്രാമിലേക്കു കുറഞ്ഞു. കായല്‍ മലിനീകരണമാണു തൂക്കവും ലഭ്യതയും കുറയാന്‍ കാരണം. വിവിധയിനം വലകള്‍ ഉപയോഗിച്ചു നടത്തിയ കണക്കെടുപ്പില്‍ ഏറ്റവും ഇനങ്ങള്‍ ലഭിച്ചത് അറിഞ്ഞില്‍, പരല്‍ ഇനങ്ങളാണ്. കുട്ടനാട് ആര്‍ ബ്ലോക്കില്‍ പുല്ലന്‍ മത്സ്യം കൂടുതലായി കണ്ടെത്തിയിരുന്നു. മത്സ്യ സര്‍വേയ്ക്കു പുറമെ വെള്ളത്തിന്‍റെ ഗുണമേന്മ, താപനില, മലിനീകരണ തോത്, കളകള്‍, ജൈവസമ്പത്ത് തുടങ്ങിയവയുടെ കണക്കെടുപ്പും നൂറംഗ സംഘം നടത്തും.

വടംവലി മത്സരം; ജയിക്കാൻ‍ പലതുണ്ട് വിദ്യകൾ‍

ജെവിന്‍ കോട്ടൂര്‍ കോട്ടയം: ഫുട്‌ബോളും ക്രിക്കറ്റുംപോലെ നാട്ടിന്‍പുറങ്ങളില്‍ ആവേശമാണ് വടംവലി മത്സരം. ഓരോ പ്രദേശത്തുമുണ്ട് പ്രശസ്തമായ ഒരു വടംവലി ടീം. വടംവലിയാണ് ഓണക്കളിയിലെ കേമന്‍. ആണുങ്ങൾക്കൊപ്പം പെണ്ണുങ്ങളും വടംവലിക്കിറങ്ങാന്‍ മടിക്കാറില്ല. ക്ലബ്ബുകളും സ്ഥാപനങ്ങളും സംഘടനകളും പതിനായിരങ്ങൾ സമ്മാനത്തുകയുള്ള വടംവലി മത്സരം സംഘടിപ്പിക്കുന്നുണ്ട്. എണ്‍പതും നൂറും ടീമുകള്‍ അണിനിരക്കുന്ന വീറുറ്റ മത്സരം രണ്ടും മൂന്നും ദിവസം നീളുന്ന സാഹചര്യം. കൈയടിച്ചും ആര്‍ത്തുവിളിച്ചും വടംവലിക്കാര്‍ക്ക് ഉശിരുപകരുന്ന പരിശീലകരുടെ ശരീരഭാഷ കാണാന്‍ അതിലേറെ രസം. കൈയൂക്കും തടിമിടുക്കും മാത്രമല്ല, പതിയെ കയറിപ്പിടിക്കുന്ന ചുവടുകളും ആവേശ അനൗണ്‍സ്‌മെന്‍റും ഒന്നിച്ചെത്തുമ്പോഴാണ് വടംവലി മത്സരം അതിരുവിട്ടുകയറുന്നത്. ആരോഗ്യത്തിനൊപ്പം ബുദ്ധിയും ചടുലതയും ഒന്നിച്ചാണ് മത്സരത്തിലെ വിധി നിര്‍ണയിക്കുക. സംസ്ഥാനത്ത് 400ല്‍പ്പരം പ്രഫഷണല്‍ വടംവലി ക്ലബ്ബുകള്‍ പ്രവര്‍ത്തിക്കുന്നതായാണ് കണക്ക്. എല്ലാ ജില്ലകളിലും വടംവലി അസോസിയേഷനുകളും അവയുടെ പ്രവര്‍ത്തനങ്ങളും സജീവം. ഒരുലക്ഷം രൂപയും പോത്തുകുട്ടിയും വരെ ഒന്നാം സമ്മാനം നല്‍കുന്ന മത്സരങ്ങള്‍ കേരളത്തില്‍ നടക്കുന്നുണ്ട്. പ്രഫഷണല്‍ മത്സരങ്ങളില്‍ എതിര്‍ ടീമിനെ വലിച്ചു നിലംപൊത്തിക്കാന്‍ ചിലപ്പോള്‍ സമയമേറെ എടുക്കും. ക്ഷമയോടെ, കാത്തിരുന്ന് ചെറുചുവടുകളായി എതിര്‍ ടീമിനെ വരുതിയിലാക്കുന്നതാണ് വലിയ മത്സരങ്ങളിലെ പതിവു രീതി. ഇതാണ് കാഴ്ചക്കാരില്‍ ആവേശം നിറയ്ക്കുന്നത്. വടംവലി മത്സരത്തിലെ ഓരോ ടീമിലും ഏഴു പേരുണ്ടാകും. മത്സരത്തിനു വിവിധ ഭാര, വര്‍ഗീകരണങ്ങളുണ്ട്. കൂടാതെ ഏഴു പേരുടെയും ഭാരം അവര്‍ ഉള്‍പ്പെടുന്ന വിഭാഗം അനുസരിച്ച് നിര്‍ണയിക്കപ്പെടുന്നതിനേക്കാള്‍ കൂടുതലാകരുത്. ടീം അംഗങ്ങളുടെ ആകെ തൂക്കം പരമാവധി 450 മുതല്‍ 460 കിലോഗ്രാം വരെയായിരിക്കണം. പ്രഫഷണല്‍ ടീമുകള്‍ വമ്പന്‍ മത്സരങ്ങള്‍ക്കു പോകുമ്പോള്‍ കൂടുതല്‍ മത്സരാര്‍ഥികള്‍ ഉണ്ടാകും. അതില്‍നിന്നും നിശ്ചയിച്ചിരിക്കുന്ന ടീമംഗങ്ങളുടെ തൂക്കം കണക്കാക്കിയായിരിക്കും ഏഴു പേര്‍ വലിക്കാനിറങ്ങുക. അതേസമയം എട്ടു പേരടങ്ങുന്ന വടംവലി മത്സരവുമുണ്ട്. ഇതു മത്സരാര്‍ഥികള്‍ നേരെ നിന്നു വലിക്കുന്നതാണ്. ഈ മത്സരത്തില്‍ അംഗങ്ങളുടെ പരമാവധി ഭാരം 520 കിലോഗ്രാമാണ്. ഇരു ടീമുകളും ഒരു കോര്‍ട്ടില്‍ വടത്തിന് ഇരുവശത്തുമായി അണിനിരക്കും. വടത്തിന് സാധാരണമായി 10 സെന്‍റിമീറ്റര്‍ വ്യാസമുണ്ടാകും. വടത്തിന്‍റെ നടുവില്‍ അടയാളമായി നിറമുള്ള തൂവാല കെട്ടാറുണ്ട്. ഈ അടയാളത്തില്‍ നിന്നും മീറ്റര്‍ അകലത്തില്‍ ഇരുവശത്തേക്കും ഓരോ അടയാളങ്ങളും ഉണ്ടാകും. ഏത് ടീമാണോ എതിര്‍ ടീമിനെ ആദ്യം തങ്ങളുടെ വശത്തേക്കു വലിച്ച് വശങ്ങളിലെ അടയാളങ്ങളെ നടുവിലത്തെ വരയില്‍നിന്ന് ക്രോസ് ചെയ്യിപ്പിക്കുന്നത് അവരാണ് വിജയി. 1920 വരെ ഒളിമ്പിക്‌സില്‍ വടംവലി ഉള്‍പ്പെടുത്തിയിരുന്നെങ്കിലും പിന്നീട് നിരവധിയായ പ്രശ്‌നങ്ങളെ തുടര്‍ന്നും പങ്കെടുക്കുന്ന രാജ്യങ്ങളുടെ എണ്ണം കുറഞ്ഞതോടെയും ഒഴിവാക്കുകയായിരുന്നു. പരിശീലനം പ്രധാനം പ്രഫഷണല്‍ വടംവലി മത്സരങ്ങളില്‍ ടീമുകള്‍ പരിശീലനത്തിനു വലിയ പ്രാധാന്യം നല്കുന്നുണ്ട്. മാസങ്ങള്‍ക്കു മുന്‍പേ തൂക്കം കൃത്യമാക്കാനുള്ള ശ്രമവും പരിശീലനവും തുടങ്ങും. ഭക്ഷണം നിയന്ത്രിച്ചാലേ ഇതു സാധ്യമാകൂ. തോളിലേക്കു വടം ഇട്ടുള്ള വലിക്കാണ് ഏറെ പ്രചാരം. മത്സരക്കളത്തില്‍ ഹരിയാന എന്നാണ് ഇതിന്‍റെ പേര്. എല്ലാ ദിവസവും ടീമംഗങ്ങളുടെ തൂക്കം നോക്കിയാണു പരിശീലനം. ടീമിന്‍റെ ആകെ ഭാരം നിശ്ചിത പരിധിയില്‍നിന്നു 30 കിലോഗ്രാമില്‍ ഏറിയാല്‍ ഭക്ഷണക്രമം മാറും. തൂക്കം കൂടിയ ആള്‍ക്കു ഭക്ഷണം പരിമിതപ്പെടുത്തും. അവര്‍ക്കു ചോറ് ഒഴിവാക്കി ചപ്പാത്തി നല്‍കും. നോണ്‍ വെജിറ്റേറിയന്‍ വര്‍ജിക്കേണ്ടി വരും. ഉണക്കിയെടുക്കല്‍ എന്നാണ് ഇതിനു കളിക്കാര്‍ പറയുന്നത്. കൈക്കുഴയുടെയും കാല്‍ക്കുഴയുടെയും പേശികളുടെയും ബലം കൂട്ടാന്‍ പ്രത്യേകതരം വ്യായാമമുറകളുണ്ട്. കൊയ്‌ത്തൊഴിഞ്ഞ പാടത്തും തിരക്കില്ലാത്ത മണ്ണുറോഡിലും മൈതാനങ്ങളിലും വടംവലിച്ചുള്ള പഴയ രീതി മാറി. ഇപ്പോള്‍ ന്യൂജെന്‍ ഇനത്തില്‍ കാലുറപ്പിച്ച് നില്‍ക്കാന്‍ റെഡിമെയ്ഡ് ട്രാക്കുകള്‍ റെഡി.

പൊന്‍കുന്നം-തമ്പലക്കാട്-കപ്പാട് റോഡ് നവീകരണം ഇടവേളയില്ലാതെ പൂര്‍ത്തിയാക്കണമെന്ന് പ്രദേശവാസികൾ

കാഞ്ഞിരപ്പള്ളി: പൊന്‍കുന്നം-തമ്പലക്കാട്-കപ്പാട് റോഡ് നവീകരണം ഇടവേളയില്ലാതെ പൂര്‍ത്തിയാക്കണമെന്ന ആവശ്യവുമായി പ്രദേശവാസികൾ. ആറുമാസം മുന്പ് നവീകരണം നിലച്ച റോഡിന്‍റെ നിര്‍മാണം വീണ്ടും പുനരാരംഭിക്കാനിരിക്കെയാണ് പ്രദേശവാസികള്‍ ആവശ്യം ഉന്നയിച്ചത്. കാഞ്ഞിരപ്പള്ളി-ഈരാറ്റുപേട്ട റോഡില്‍നിന്ന് കപ്പാട് മുതല്‍ പൊന്‍കുന്നം വരെയുള്ള ഭാഗത്തെ എട്ടു കിലോമീറ്റര്‍ ദൂരത്തെ നവീകരണ പ്രവര്‍ത്തനങ്ങളാണ് മുടങ്ങിക്കിടക്കുന്നത്. നാട്ടുകാരുടെ പ്രതിഷേധത്തെത്തുടര്‍ന്ന് നിര്‍മാണം ആരംഭിച്ചെങ്കിലും നാലു മാസം മുന്പ് നിലച്ചു. പൊന്‍കുന്നത്ത് തുടങ്ങുന്ന ഒരു കിലോമീറ്റര്‍ ഭാഗവും തമ്പലക്കാട് മേഖലയില്‍ ചെറിയ ഭാഗങ്ങളിലായി ഇടയ്ക്കിടയ്ക്കുമായി കുറച്ച് ഭാഗങ്ങളാണ് ടാര്‍ ചെയ്തിരിക്കുന്നത്. ഇതില്‍ തമ്പലക്കാട് ഷാപ്പ്പടി-കപ്പാട് റോഡില്‍ ഒരു കിലോമീറ്ററോളം ദൂരം ഒരു വശം മാത്രമാണ് ടാര്‍ ചെയ്തിരിക്കുന്നത്. പദ്ധതിക്കായി 2022-23 ബജറ്റില്‍ ഒരു കോടി രൂപയും 2024ല്‍ 1.75 കോടി രൂപയും വകയിരുത്തിയതായി അധികൃതര്‍ അറിയിച്ചിരുന്നു. വൻ കുഴികളായിരുന്ന ഭാഗത്ത് ടാറിംഗ് ചെയ്യുന്നതിനായി മെറ്റല്‍ നിരത്തിയെങ്കിലും ടാറിംഗ് നിലച്ചതോടെ ഇവ ഇളകിപ്പോയിത്തുടങ്ങിയിരുന്നു. ഇവ വീണ്ടും മെറ്റലിട്ട് മൂടിയിട്ടുണ്ട്. ദേശീയപാത വഴി എത്തുന്ന വാഹനങ്ങള്‍ക്ക് കാഞ്ഞിരപ്പള്ളി ടൗണില്‍ പ്രവേശിക്കാതെ പൊന്‍കുന്നത്തുനിന്ന് കപ്പാട് എത്തി ഈരാറ്റുപേട്ട ഭാഗത്തേക്കു പോകാന്‍ കഴിയുന്ന എളുപ്പ വഴി കൂടിയാണിത്. ഇനിയും ഘട്ടം ഘട്ടമായി നിര്‍മാണം നടത്താതെ എത്രയും വേഗം റോഡ് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം.

പൈക തിയറ്റർപ്പടി-ഉരുളികുന്നം ഭജനമന്ദിരം റോഡ് പുനർനിർമാണം തുടങ്ങി

എലിക്കുളം: പഞ്ചായത്ത് ഒന്നാം വാർഡിലെ പൈക തീയറ്റർപ്പടി-ഉരുളികുന്നം ഭജനമന്ദിരം റോഡിന്‍റെ നവീകരണം തുടങ്ങി. കയറ്റവും വീതിക്കുറവും മൂലം യാത്രാദുരിതമേറെയായിരുന്ന റോഡിന്‍റെ വികസനം പ്രദേശവാസികൾക്ക് ഗുണമാകും. പഞ്ചായത്ത് ഫണ്ട് 9.50 ലക്ഷം രൂപയും ജോസ് കെ. മാണി എംപിയുടെ ഫണ്ട് അഞ്ചുലക്ഷം രൂപയും വിനിയോഗിച്ചാണ് നിർമാണം. ഇടപ്പാടി കയറ്റം കുറച്ച് വീതികൂട്ടി നിർമാണം നടത്തുകയാണ്. റോഡരികിലെ സ്ഥലം കൂടി വികസനത്തിന് ലഭിച്ചതോടെ വീതി കൂട്ടുന്നതിന്‍റെയും കയറ്റം കുറയ്ക്കുന്നതിന്‍റെയും ജോലികൾ അവസാന ഘട്ടത്തിലായി. ഏതാനും ദിവസങ്ങൾക്കുള്ളിൽ കോൺക്രീറ്റിംഗ് നടത്തുമെന്ന് വാർഡംഗം സിനി ജോയി അറിയിച്ചു. ഒന്നര കിലോമീറ്റർ ദൂരമുള്ള റോഡിന്‍റെ പൊളിഞ്ഞ മറ്റു ഭാഗങ്ങൾ മുമ്പ് പുനർനിർമിച്ചിരുന്നു.

തിലകന്‍റെ പേര് മോശമാക്കാൻ ഒരു പാർക്കും ലേക്കും!

മുണ്ടക്കയം ഈസ്റ്റ്‌: മഹാനടൻ തിലകന്‍റെ സ്മരണയ്ക്കായി ജന്മനാടായ മണിക്കല്ലിൽ നിർമിച്ച തിലകൻ സ്മാരക ലേക്ക് ആൻഡ് പാർക്ക് നാശത്തിന്‍റെ വക്കിൽ. ഉൾനാടൻ ടൂറിസം സാധ്യത തുറക്കുന്നതായിരുന്നു പെരുവന്താനം പഞ്ചായത്തിലെ മണിക്കല്ലിൽ ആരംഭിച്ച തിലകൻ സ്മാരക ലേക്ക് ആൻഡ് പാർക്ക്. മണിക്കൽ റബർ എസ്റ്റേറ്റിലെ ജീവനക്കാരനായിരുന്നു തിലകന്‍റെ പിതാവ്. തിലകൻ പ്രാഥമിക വിദ്യാഭ്യാസം നടത്തിയതും നാടകാഭിനയത്തിന് തുടക്കംകുറിച്ചതും മണിക്കലിലാണ്. തുടക്കം ഗംഭീരം പെരുവന്താനം പഞ്ചായത്ത് 1.15 കോടി രൂപ ചെലവഴിച്ചാണ് പാർക്ക് നിർമിച്ചത്. 2020 സെപ്റ്റംബർ 14ന് അന്നത്തെ എൽഡിഎഫ് ഭരണസമിതിയാണ് പാർക്ക് തുറന്നത്. ഓപ്പൺ തിയറ്റർ, കൊട്ടവഞ്ചി, ഇരിപ്പിടങ്ങൾ, പെഡൽ ബോട്ട് എന്നിവ ഒരുക്കി. കൂടാതെ സ്ത്രീകൾക്കും പുരുഷന്മാർക്കും ടോയ്‌ലറ്റ് സൗകര്യവും കോഫിഷോപ്പും ഉണ്ടായിരുന്നു. ഓരോ ദിവസവും നൂറുകണക്കിന് ആളുകളാണ് പാർക്കിലെത്തി ആസ്വദിച്ച് മടങ്ങിയിരുന്നത്. മൂന്നു സിനിമകളുടെ ഷൂട്ടിംഗ് ലൊക്കേഷനായും പാർക്ക് മാറി. പ്രധാന ടൂറിസ്റ്റ് കേന്ദ്രമായ പാഞ്ചാലിമേട്ടിലേക്കുള്ള യാത്രയിൽ പല ആളുകളും വിശ്രമകേന്ദ്രമായി മണിക്കൽ പാർക്ക് തെരഞ്ഞെടുത്തു. ഇതോടെ മാണിക്കൽ പാർക്കിനു പ്രസിദ്ധിയും ലഭിച്ചു. ഉപേക്ഷിക്കപ്പെട്ടപ്പോൾ ആദ്യ സമയത്തു പ്രവേശന ഫീസ് ഇനത്തിൽ പ്രതിദിനം 8,500 രൂപ വരെ ലഭിച്ചിരുന്നു. തദ്ദേശീയരായ അഞ്ചു പേർക്ക് ജോലിയും നൽകി. എന്നാൽ, ഒരു വർഷം പിന്നിടും മുമ്പേ കോവിഡ് നിയന്ത്രണങ്ങളുടെ ഭാഗമായി പാർക്ക് അടച്ചു. പിന്നീടുവന്ന യുഡിഎഫ് പെരുവന്താനം പഞ്ചായത്ത് ഭരണസമിതി പാർക്ക് തുറന്നു പ്രവർത്തിക്കാൻ നടപടി സ്വീകരിച്ചില്ല. ഇതിനെതിരേ വലിയ വിമർശനം ഉയർന്നു. ഇതോടെ സ്വകാര്യ വ്യക്തിക്ക് കരാർ അടിസ്ഥാനത്തിൽ പാർക്കിന്‍റെ ചുമതല നൽകാൻ നീക്കമുണ്ടായി. എന്നാൽ, പ്രതിഷേധം ഉയർന്നതോടെ ഇതു നിലച്ചു. പാർക്ക് തുറക്കുമെന്നു നിലവിലെ ഭരണസമിതി നിരവധി തവണ പ്രഖ്യാപനം നടത്തിയെങ്കിലും ഒന്നുമുണ്ടായില്ല. നിലച്ചിട്ട് അഞ്ചു വർഷം; ലക്ഷങ്ങളുടെ മുതൽ പാർക്കിന്‍റെ പ്രവർത്തനം നിലച്ചിട്ട് അഞ്ചു വർഷം. കൊട്ടവഞ്ചിയും ബോട്ടുകളുമെല്ലാം തുരുമ്പെടുത്തു നശിക്കുന്നു. ലക്ഷങ്ങൾ മുടക്കി പണിത കെട്ടിടവും വെറുതേ കിടന്നു നശിക്കുന്നു. പാർക്കിലെ ഇരിപ്പിടങ്ങളും പൂന്തോട്ടവുമെല്ലാം കാടുകയറി. പൊതുഖജനാവിൽനിന്ന് ഒന്നേകാൽ കോടിയോളം രൂപ മുടക്കി നിർമിച്ച പാർക്കും അനുബന്ധ സൗകര്യങ്ങളും വെറുതേ കിടന്നു നശിക്കാൻ കാരണം രാഷ്‌ട്രീയപ്പോര് തന്നെ. ഇടതുമുന്നണി കൊണ്ടുവന്ന പദ്ധതി പഞ്ചായത്ത് നേരിട്ടാണ് നടത്തിയിരുന്നത്. ഇതിനായി താത്കാലിക ജീവനക്കാരെയും നിയോഗിച്ചിരുന്നു. പിന്നീട് വന്ന യുഡിഎഫ് ഭരണസമിതി നിലവിൽ ഉണ്ടായിരുന്ന താത്കാലിക ജീവനക്കാരെ മാറ്റി കരാറടിസ്ഥാനത്തിൽ സ്വകാര്യ വ്യക്തിക്കു നടത്തിപ്പ് കൊടുക്കാൻ തീരുമാനിച്ചതോടെയാണ് പോരു തുടങ്ങിയത്. പാർക്ക് തുറന്നു പ്രവർത്തിച്ചാൽ മുൻ എൽഡിഎഫ് ഭരണസമിതി ഇതിന്‍റെ നേട്ടം കൊയ്യുമെന്ന രാഷ്‌ട്രീയ നിലപാടാണ് പിന്നീട് വന്ന യുഡിഎഫ് ഭരണസമിതി ഇതു തുറക്കാൻ മുൻകൈയെടുക്കാത്തതിനു കാരണമെന്നു നാട്ടുകാർ കുറ്റപ്പെടുത്തുന്നു. ഏകയവും കയത്തിൽ മണിക്കൽ ലേക്ക് ആൻഡ് പാർക്ക് പദ്ധതിക്ക് ഒപ്പം പെരുവന്താനം പഞ്ചായത്തിൽ കൊണ്ടുവന്ന മറ്റൊരു പ്രധാന പദ്ധതിയായിരുന്നു ഏകയം ടൂറിസം പദ്ധതി. മുൻ പഞ്ചായത്ത് പ്രസിഡന്‍റ് കെ.ടി. ബിനുവിന്‍റെ നേതൃത്വത്തിലായിരുന്നു പാഞ്ചാലിമേട് ടൂറിസ്റ്റ് കേന്ദ്രത്തിനൊപ്പം ഏകയം ടൂറിസം പദ്ധതിയും ആവിഷ്കരിച്ചത്. പുലിമുരുകൻ അടക്കമുള്ള പ്രധാന സിനിമകളുടെ ലൊക്കേഷനായ ഇവിടം ടൂറിസത്തിന്‍റെ അനന്ത സാധ്യതകൾ നിലനിൽക്കുന്ന പ്രദേശമാണ്. എന്നാൽ, ഇവിടെ വലിയ ടൂറിസം പദ്ധതി വിഭാവനം ചെയ്തെങ്കിലും പിന്നീട് വന്ന ഭരണസമിതി ഇതിനുവേണ്ടി ഒന്നും ചെയ്തില്ല.

ഉഴവൂർ കോളജ് വോളി: മാള ഹോളിഗ്രെയ്സും ചങ്ങനാശേരി അസംപ്ഷനും ജേതാക്കൾ

ഉഴവൂർ: സെന്‍റ് സ്റ്റീഫൻസ് കോളജിന്‍റെ നേതൃത്വത്തിലുള്ള ഇന്‍റർ കൊളീജിയറ്റ് വോളിബോളിൽ പുരുഷ വിഭാഗത്തിൽ മാള ഹോളിഗ്രെയ്സ് കോളജും വനിതാ വിഭാഗത്തിൽ ചങ്ങനാശേരി അസംപ്ഷൻ കോളജും ജേതാക്കളായി. 22-25, 25-23, 25-22, 27-25 എന്ന സ്‌കോറിന് എസ്എൻജി കോളജ് ചേലന്നൂരിനെ തോൽപ്പിച്ചാണ് ഹോളിഗ്രെയ്സ് കോളജ് 35-ാമത് ബിഷപ് തറയിൽ മെമ്മോറിയൽ ട്രോഫിയിൽ മുത്തമിട്ടത്. പാലാ അൽഫോൻസ കോളജിനെ നേരിട്ടുള്ള ഗെയിമുകൾക്ക് അടിയറവു പറയിച്ചാണ് അസംപ്ഷൻ കോളജ് വനിതാ വിഭാഗത്തിൽ സിസ്റ്റർ ഗോരേത്തി മെമ്മോറിയൽ ട്രോഫി നേടിയത്. സ്‌കോർ: 25-22, 25-22, 25-16. സമാപന സമ്മേളനത്തിൽ പ്രിൻസിപ്പൽ ഡോ. സിൻസി ജോസഫ് അധ്യക്ഷത വഹിച്ചു. പൂർവവിദ്യാർഥിയും വോളിബോൾ മുൻ ദേശീയതാരവുമായിരുന്ന പോലീസ് സർക്കിൾ ഇൻസ്പെക്ടർ ജിജോ ജോർജ് വിജയികൾക്ക് ട്രോഫികൾ വിതരണം ചെയ്തു. പഞ്ചായത്ത് പ്രസിഡന്‍റ് ഇൻ ചാർജ് കെ.എം. തങ്കച്ചൻ, മുൻ പ്രിൻസിപ്പൽ ഡോ. സ്റ്റീഫൻ മാത്യൂസ്, ടൂർണമെന്‍റ് കൺവീനർ ക്യാപ്റ്റൻ ജെയ്സ് കുര്യൻ, കായികവിഭാഗം മേധാവിയും ടൂർണമെന്‍റ് സെക്രട്ടറിയുമായ ഡോ. മാത്യൂസ് ഏബ്രഹാം എന്നിവർ പ്രസംഗിച്ചു. ഇന്നും നാളെയുമായി 18-ാമത് ബിഷപ് കുന്നശേരി മെമ്മോറിയൽ ഫുട്‌ബോൾ ടൂർണമെന്‍റും പത്താമത് ഗോൾഡൻ ജൂബിലി മെമ്മോറിയൽ ടൂർണമെന്‍റും നടക്കും.

ഉഴവൂർ കെ.ആർ. നാരായണൻ ആശുപത്രിയിൽ ഇ-ഹെൽത്ത് പദ്ധതിക്ക് തുടക്കം

ഉഴവൂർ: ഡോ. കെ.ആർ. നാരായണൻ സ്മാരക സ്‌പെഷാലിറ്റി ആശുപത്രിയിൽ ഇ-ഹെൽത്ത് പദ്ധതിക്കു തുടക്കമായി. ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ ചിറ്റേത്ത് ഉദ്ഘാടനം നിർവഹിച്ചു. യുഎച്ച്‌ഐഡി കാർഡുകളും വിതരണം ചെയ്തു. പുതിയ പദ്ധതി യാഥാർഥ്യമായതോടെ ഒപി ടിക്കറ്റ് കൗണ്ടർ പൂർണമായും കംപ്യൂട്ടർവത്കരിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡോ. സിന്ധുമോൾ ജേക്കബ് അധ്യക്ഷത വഹിച്ചു. പി.എൻ. രാമചന്ദ്രൻ, കെ.എം. തങ്കച്ചൻ, ഡോ. സി.ജെ. സിതാര, ബൈജു ജോൺ, ഷെറി മാത്യു, വിനോദ് പുളിക്കനിരപ്പേൽ, ഡോ. റെക്സൺ പോൾ, ഡോ. വിപിൻ മോഹൻ, പി. പ്രിയ, രാജേഷ് രാജൻ എന്നിവർ പ്രസംഗിച്ചു.

സെന്‍റ് ജോസഫ്‌സ് കോളജില്‍ അസ്ത്ര ഫെസ്റ്റ്

പാലാ: ദേശീയതല ടെക്‌നിക്കല്‍ ഫെസ്റ്റ് "അസ്ത്ര' 19, 20 തീയതികളില്‍ ചൂണ്ടച്ചേരി സെന്‍റ് ജോസഫ്‌സ് എന്‍ജിനിയറിംഗ് കോളജില്‍ നടത്തും. ടെക്‌നിക്കല്‍, ജനറല്‍, ഇന്‍ഫോര്‍മല്‍ എന്നീ വിഭാഗങ്ങളിലായി വിവിധ മത്സരങ്ങള്‍ ഉള്‍പ്പെടുത്തിയിരിക്കുന്ന ഈ പരിപാടി രാജ്യത്തിന്‍റെ വിവിധ ഭാഗങ്ങളില്‍നിന്നുള്ള വിദ്യാര്‍ഥികളുടെ പങ്കാളിത്തം കൊണ്ട് ശ്രദ്ധേയമാണ്. ഇതിനകം തന്നെ നൂറിലധികം രജിസ്‌ട്രേഷനുകള്‍ ലഭിച്ചതായി സംഘാടകര്‍ പറഞ്ഞു. പുതുതായി ഉള്‍പ്പെടുത്തിയിട്ടുള്ള ടീം-ബേസ്ഡ് ഇവന്‍റുകള്‍ മത്സരാര്‍ഥികളില്‍ സഹകരണം, സൃഷ്ടിപരമായ ചിന്ത, പ്രശ്‌നപരിഹാര ശേഷി എന്നിവ വളര്‍ത്തുന്നതിനും പ്രോത്സാഹിപ്പിക്കുന്നതിനും സഹായകരമായിരിക്കും. ദേശീയ ടെക് ഫെസ്റ്റായ അസ്ത്ര വിദ്യാര്‍ഥികള്‍ക്ക് അവരുടെ കഴിവുകള്‍ പ്രകടിപ്പിക്കാനും ആശയങ്ങള്‍ കൈമാറാനും സഹപാഠികളുമായും വ്യവസായ വിദഗ്ധരുമായും ബന്ധം സ്ഥാപിക്കാനും ഒരു മികച്ച വേദിയായി മാറുന്നുവെന്നും രജിസ്‌ട്രേഷന്‍ www.asthra.sjcet.in എന്ന വെബ്സൈറ്റ് വഴി ചെയ്യാമെന്നും ഡോ. അനുജ ജോര്‍ജ്, ആഷ്‌ലി തോമസ്, ഡോ. നേവി ജോര്‍ജ്, ജോബി ജോര്‍ജ് എന്നിവര്‍ പറഞ്ഞു.

മിനിസ്റ്റേഴ്സ് എക്‌സലന്‍സ് അവാര്‍ഡ്

അരുവിത്തുറ സെന്‍റ് ജോർജ് കോളജ് അരുവിത്തുറ: ഉന്നത വിദ്യാഭ്യാസ രംഗത്തെ മികവിന്‍റെ നിറവിന് അരുവിത്തുറ സെന്‍റ് ജോർജ് കോളജ് സംസ്ഥാന സർക്കാർ പുരസ്കാരം നേടി. നാക് റീ അക്രഡിറ്റേഷന്‍റെ പുതിയ മാനദണ്ഡങ്ങൾ അനുസരിച്ച് ജില്ലയിൽ ആദ്യമായി ഏഴുവർഷം കലാവധിയോടെ എ പ്ലസ് പ്ലസ് അംഗീകാരം നേടിയതും അന്താരാഷ്‌ട്ര നിലവാരമുള്ള കാമ്പസും പഠനസൗകര്യങ്ങളും നാക് നിർദേശിക്കുന്ന ഏഴിന യോഗ്യതകളും പരിപൂർണമായും നടപ്പിലാക്കിയതും പരിഗണിച്ചാണ് ഉന്നത വിദ്യാഭ്യാസ വകുപ്പിന്‍റെ മിനിസ്റ്റേഴ്സ് എക്സലൻസ് അവാർഡ് കോളജ് നേടിയത്. തിരുവനന്തപുരം ടാഗോർ തിയറ്ററിൽ നടന്ന ചടങ്ങിൽ ഉന്നത വിദ്യാഭ്യാസ വകുപ്പുമന്ത്രി ഡോ. ആർ. ബിന്ദുവിൽനിന്നു കോളജ് വൈസ് പ്രിൻസിപ്പൽ ഡോ. ജിലു ആനി ജോൺ, ബർസാർ ആൻഡ് കോഴ്സ് കോ-ഓർഡിനേറ്റർ ഫാ. ബിജു കുന്നക്കാട്ട്, ഐക്യുഎസി കോ-ഓർഡിനേറ്റർ ഡോ. സുമേഷ് ജോർജ്, നാക് കോ-ഓർ‌ഡിനേറ്റർ ഡോ. മിഥുൻ ജോൺ, അനധ്യാപക പ്രതിനിധി ബെഞ്ജിത്ത് സേവ്യർ തുടങ്ങിയവർ ചേർന്ന് പുരസ്കാരം ഏറ്റുവാങ്ങി. പാലാ സെന്‍റ് തോമസ് കോളജ് ഓഫ് ടീച്ചര്‍ എഡ്യൂക്കേഷൻ പാലാ: ഉന്നത വിദ്യാഭ്യാസ വകുപ്പിന്‍റെ കീഴില്‍ പ്രവര്‍ത്തിക്കുന്ന കോളജുകളില്‍ ദേശീയ തലത്തില്‍ ഉയര്‍ന്ന നിലവാരം പുലര്‍ത്തുന്ന കോളജുകള്‍ക്ക് ഏര്‍പ്പെടുത്തിയ മിനിസ്റ്റേഴ്സ് ഏക്‌സലന്‍സ് അവാര്‍ഡ് പാലാ സെന്‍റ് തോമസ് കോളജ് ഓഫ് ടീച്ചര്‍ എഡ്യൂക്കേഷന് ലഭിച്ചു.തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ ഉന്നത വിദ്യാഭ്യാസ വകുപ്പുമന്ത്രി ഡോ. ആര്‍. ബിന്ദുവില്‍ നിന്ന് പ്രിന്‍സിപ്പല്‍ പ്രഫ. ടി.സി. തങ്കച്ചന്‍, ഐക്യുഎസി കോ-ഓര്‍ഡിനേറ്ററും വൈസ് പ്രിന്‍സിപ്പലുമായ ഡോ. ലവിന ഡൊമിനിക് എന്നിവര്‍ ചേര്‍ന്ന് പുരസ്‌കാരം ഏറ്റുവാങ്ങി നാക് അക്രഡിറ്റേഷനിലെ നാലാമത്തെ സൈക്കിളില്‍ 3.35 പോയിന്‍റോടെ എ പ്ലസ് ഗ്രേഡ് ലഭിച്ചു. കേരളത്തിലെ അധ്യാപക പരിശീലന കേന്ദ്രങ്ങളില്‍ ഏറ്റവും ഉയര്‍ന്ന അംഗീകാരമാണിത്. അതോടൊപ്പം കേരള ഇന്‍സ്റ്റിറ്റ്യൂഷണല്‍ റാങ്ക് ഫ്രെയിംവര്‍ക്കില്‍ ആറാം സ്ഥാനമുള്ള കോളജ് മഹാത്മാഗാന്ധി യൂണിവേഴ്സിറ്റിയുടെ കിഴിലുള്ള അംഗീകൃത ഗവേഷണകേന്ദ്രം കൂടിയാണ്.

മഞ്ഞപ്പിത്തം: വലവൂര്‍ ഐഐഐടിയില്‍ പരിശോധന

പാലാ: വിദ്യാര്‍ഥികളില്‍ മഞ്ഞപ്പിത്തം വ്യാപകമായതിനെത്തുടര്‍ന്ന് പഠനം നിര്‍ത്തിവച്ച വലവൂരിലെ ട്രിപ്പിള്‍ ഐഐടി കാമ്പസില്‍ വിവിധ വകുപ്പ് അധികൃതരുടെ നേതൃത്വത്തില്‍ പരിശോധന നടത്തി. കോട്ടയത്തുനിന്നെത്തിയ ഡെപ്യൂട്ടി ഡിഎംഒ ഡോ. ജെസി പരിശോധനകള്‍ക്കു നേതൃത്വം നല്‍കി. കാമ്പസിലെ കുടിവെള്ള വിതരണ സംവിധാനങ്ങള്‍ പരിശോധിച്ച് സാമ്പിളുകളെടുത്തു. റവന്യൂ, പഞ്ചായത്ത്, ഭക്ഷ്യസുരക്ഷാ വകുപ്പ്, പൊലൂഷന്‍ കണ്‍ട്രോള്‍ ഉദ്യോഗസ്ഥര്‍ തുടങ്ങി‍യവർ പരിശോധനാ സംഘത്തിലുണ്ടായിരുന്നു. ജില്ലാ കളക്‌ടറുടെ നിര്‍ദേശപ്രകാരമാണ് ഉദ്യോഗസ്ഥസംഘം പരിശോധന നടത്തിയത്. ശൗചാലയ സംവിധാനങ്ങളും കാമ്പസിലെ ഹോസ്റ്റലുകളും സംഘം പരിശോധിച്ചു. എടുത്ത സാമ്പിളുകളുടെ പരിശോധനാഫലം വന്നതിനു ശേഷമേ രോഗം വ്യാപകമായതു സംബന്ധിച്ച് കൃത്യമായ നിഗമനത്തിലെത്താൻ കഴിയൂയെന്ന് ആരോഗ്യവകുപ്പ് ജീവനക്കാര്‍ പറഞ്ഞു. ഇന്നും പരിശോധനകള്‍ തുടരും. ഹോസ്റ്റലുകളും പരിശോധിക്കും അതേസമയം, കാമ്പസിനു പുറത്തു വിദ്യാര്‍ഥികള്‍ കൂടുതലായി താമസിക്കുന്ന സ്വകാര്യ ഹോസ്റ്റലുകളിലും പരിശോധന നടത്തണമെന്നു നാട്ടുകാര്‍ ആവശ്യപ്പെട്ടു. ചില ഹോസ്റ്റലുകളില്‍ 200ലധികം വിദ്യാര്‍ഥികള്‍ താമസിക്കുന്നുണ്ട്. സ്വകാര്യ ഹോസ്റ്റലുകളിലെ കുടിവെള്ള സ്രോതസുകള്‍, മാലിന്യ സംസ്‌കരണം എന്നിവ സംബന്ധിച്ച് മുമ്പും പരാതികള്‍ ഉയര്‍ന്നിരുന്നു. ഒക്ടോബര്‍ 16 വരെയാണ് കാമ്പസിന് അവധി നല്‍കിയിരിക്കുന്നത്.

കെ.എം. മാണി കാന്‍സര്‍ സെന്‍റര്‍ റേഡിയേഷന്‍ ബ്ലോക്കിന് തറക്കല്ലിട്ടു

പാലാ: റേഡിയേഷന്‍ ഓങ്കാളജി ബ്ലോക്കിനു പാലാ കെ.എം. മാണി സ്മാരക ഗവ. ജനറല്‍ ആശുപത്രിയില്‍ തറക്കല്ലിട്ടു. ഇന്നലെ ആശുപത്രി അങ്കണത്തില്‍ നടന്ന ചടങ്ങില്‍ ജോസ് കെ. മാണി എംപിയാണ് ശിലാസ്ഥാപനം നടത്തി. എംപി ഫണ്ടില്‍നിന്ന് അനുവദിച്ച 2.45 കോടി രൂപ വിനിയോഗിച്ചാണ് കെട്ടിടം നിര്‍മിക്കുന്നത്. വര്‍ധിച്ചുവരുന്ന കാന്‍സര്‍ രോഗം കണ്ടെത്തി മുന്‍കൂട്ടി പ്രതിരോധിക്കാനും ചെലവേറിയ ചികിത്സകളില്‍നിന്നു മോചനവും ലക്ഷ്യമാക്കി പ്രദേശിക തലത്തില്‍ ആദ്യമായാണ് ഇങ്ങനെ ഒരു സമഗ്ര പദ്ധതി തയാറാക്കുന്നതെന്ന് അദ്ദേഹം പറഞ്ഞു. ശിലാസ്ഥാപനച്ചടങ്ങില്‍ നഗരസഭാ ചെയര്‍പേഴ്‌സണ്‍ തോമസ് പീറ്റര്‍ അധ്യക്ഷത വഹിച്ചു. വൈസ് ചെയര്‍പേഴ്‌സണ്‍ ബിജി ജോജോ, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജോസ് പുത്തന്‍കാലാ, രാജേഷ് വാളിപ്ലാക്കല്‍, ഡോ. ടി.പി. അഭിലാഷ്, ഡോ. വാസ് സുകുമാരന്‍, ലിസിക്കുട്ടി മാത്യു, ഡോ. അന്‍സാര്‍ മുഹമ്മദ്, ഡോ. പി.എസ്. ശബരീനാഥ്, ജയ്‌സണ്‍ മാന്തോട്ടം തുടങ്ങിയവര്‍ പ്രസംഗിച്ചു.

യുവജാഗരൺ കലാജാഥയ്ക്ക് അരുവിത്തുറ കോളജിൽ സ്വീകരണം

അരുവിത്തുറ: നാഷണൽ സർവീസ് സ്കീമിന്‍റെയും സംസ്ഥാന എയ്ഡ്സ് കൺട്രോൾ സൊസൈറ്റിയുടെയും കെഎസ്ആർടിസിയുടെയും ആഭിമുഖ്യത്തിൽ സംഘടിപ്പിച്ച യുവജാഗരൺ കലാജാഥയ്ക്കും എയ്ഡ്സ് ബോധവത്കരണ കാക്കാരശി നാടകത്തിനും അരുവിത്തുറ സെന്‍റ് ജോർജ് കോളജിൽ സ്വീകരണം നൽകി. സമഗ്ര ആരോഗ്യ സുരക്ഷാ കാമ്പയിന്‍റെയും എയ്ഡ്സ് ബോധവത്കരണത്തിന്‍റെയും ഭാഗമായാണ് യാത്ര സംഘടിപ്പിച്ചത്. ബോധവത്കരണ പരിപാടി സെന്‍റ് ജോർജസ് കോളജ് ബർസാർ റവ.ഫാ. ബിജു കുന്നയ്ക്കാട്ട് ഉദ്ഘാടനം ചെയ്തു. ചടങ്ങിൽ വൈസ് പ്രിൻസിപ്പൽ ഡോ. ജിലു ആനി ജോൺ, എൻഎസ്എസ് പ്രോഗ്രാം ഓഫീസർമാരായ ഡോ. ഡെന്നി തോമസ്, മരിയ ജോസ് എന്നിവർ പ്രസംഗിച്ചു. വോളന്‍റിയർ സെക്രട്ടറിമാരായ നിർമ്മൽ പ്രകാശ്, ഏയ്ഞ്ചൽ മരിയ ജോസ്, അബിനേഷ് രാജേഷ്, ജ്വാല അന്ന ജോർജ് എന്നിവർ നേതൃത്വം നൽകി. എയ്ഡ്സ് രോഗത്തിന്‍റെ കാരണങ്ങൾ, രോഗാവസ്ഥ, മുൻ കരുതലുകൾ, ചികിത്സ തുടങ്ങിയ വിഷയങ്ങൾ പരാമർശിക്കുന്ന കാക്കാശേരി നാടകം വിദ്യാർഥികൾക്ക് പുതിയ അനുഭവമായി.

ചെമ്പിന്‍റെ ഫോട്ടോഗ്രഫർ വിജയന്‍റെ ജീവൻ രക്ഷിക്കാൻ ഗ്രാമം കൈകോർക്കും

വൈക്കം: ചെമ്പിന്‍റെ ഗ്രാമകാഴ്ചകളും കായൽ മനോഹാരിതയും ഒപ്പിയെടുത്ത് നിരവധി അവാർഡുകൾ വാരിക്കൂട്ടിയ ചെമ്പിന്‍റെ പ്രിയഫോട്ടോഗ്രഫർ കെ.ബി. വിജയന്‍റെ ചികിത്സയ്ക്കായി ചെമ്പ് ഗ്രാമംകൈകോർക്കുന്നു. രക്താർബുദബാധയെത്തുടർന്നു ചികിത്സയ്ക്കു വിധേയനായ വിജയന് രക്താർബുദത്തെ തത്കാലത്തേക്കു പ്രതിരോധിക്കാനായെങ്കിലും രോഗം പൂർണമായി മാറ്റണമെങ്കിൽ മജ്ജ മാറ്റിവയ്ക്കേണ്ടത് അനിവാര്യമാണെന്നു ഡോക്ടർ പറഞ്ഞു. തികച്ചും നിർധനനായ വിജയന് കൂട്ടായി ഭാര്യ മാത്രമേയുള്ളൂ. മജ്ജമാറ്റിവയ്ക്കൽ ശസ്ത്രക്രിയയ്ക്കായി ലക്ഷങ്ങൾ ചെലവുവരും. ചെമ്പിന്‍റെ ഖ്യാതി പുറംലോകത്തെത്തിച്ച കലാകാരന്‍റെ ജീവൻ തിരിച്ചുപിടിക്കാൻ സുമനസുകളുടെ സഹായം തേടാൻ ചികിത്സാ സഹായനിധി രൂപീകരിക്കാൻ ശ്രമം നടന്നുവരികയാണെന്നു പഞ്ചായത്ത് പ്രസിഡന്‍റ് സുകന്യ സുകുമാരൻ, വൈസ് പ്രസിഡന്‍റ് കെ.കെ. രമേശൻ എന്നിവർ പറഞ്ഞു. K.B. vijayan, A/C No. 2013962108, IFSC CODE. CBIN0280958.

കേരള ഭാഗ്യക്കുറി സംരക്ഷണ സമിതി സമരപ്രഖ്യാപന കണ്‍വന്‍ഷന്‍

കോട്ടയം: ലോട്ടറിയുടെ ജിഎസ്ടി 40 ശതമാനമായി വര്‍ധിപ്പിക്കാനുള്ള തീരുമാനത്തില്‍നിന്നു കേന്ദ്രസര്‍ക്കാര്‍ പിന്തിരിയണമെന്നു കേരള ഭാഗ്യക്കുറി സംരക്ഷണ സമിതി സംസ്ഥാന സമരപ്രഖ്യാപന കണ്‍വന്‍ഷന്‍ കേന്ദ്രസര്‍ക്കാരിനോടാവശ്യപ്പെട്ടു. നിലവില്‍ ലോട്ടറിക്ക് ജിഎസ്ടി 28 ശതമാനമാണ്. അത് 40 ശതമാനമാക്കിയത് കേരള ഭാഗ്യക്കുറിയെ തകര്‍ക്കും. തൊഴിലാളികളുടെ വരുമാനത്തെ ബാധിക്കും. 2017-ല്‍ ജിഎസ്ടി ആരംഭിച്ചതു മുതല്‍ 12 ശതമാനം മാത്രമായിരുന്നു ലോട്ടറിക്കുള്ള നികുതി. 2020-ല്‍ അത് 28 ശതമാനമാക്കി വര്‍ധിപ്പിച്ചു. ഇപ്പോഴത് 40 ശതമാനമാക്കി. ഫലത്തില്‍, 350 ശതമാനത്തിന്‍റെ വര്‍ധന. മറ്റൊരു മേഖലയിലും ഇത്തരമൊരു ഭീമമായ വര്‍ധനയില്ല. ലോട്ടറിയുടെ ജിഎസ്ടി വര്‍ധിപ്പിക്കാനുള്ള നീക്കത്തില്‍നിന്നു പിന്തിരിയണമെന്നാവശ്യപ്പെട്ട് ഭാഗ്യക്കുറി സംരക്ഷണസമിതിയുടെ നേതൃത്വത്തില്‍ നാളെ രാവിലെ 10നു കോട്ടയം ഹെഡ്പോസ്റ്റ് ഓഫീസിലേക്ക് മാര്‍ച്ചും ധര്‍ണയും നടത്തും. പത്രസമ്മേളനത്തില്‍ ടി.എസ്.എന്‍. ഇളയത്, സിജോ പ്ലാത്തോട്ടം, ചന്ദ്രിക ഉണ്ണിക്കൃഷ്ണന്‍, പി.കെ. ആനന്ദക്കുട്ടന്‍ എന്നിവര്‍ പങ്കെടുത്തു.

മനയ്ക്കച്ചിറ-ചങ്ങനാശേരി അഞ്ചുവിളക്ക് റോഡില്‍ പോത്തോട് ഭാഗത്ത് റോഡ് ഉയര്‍ത്തുന്നു

ചങ്ങനാശേരി: എസി റോഡില്‍ മനയ്ക്കച്ചിറയില്‍ ആരംഭിച്ച് ചങ്ങനാശേരി അഞ്ചുവിളക്ക് ജംഗ്ഷനില്‍ സമാപിക്കുന്ന റോഡിന്‍റെ പോത്തോട് ഭാഗത്ത് റോഡ് ഉയര്‍ത്തുന്ന ജോലികള്‍ക്ക് തുടക്കമായി. ഇരുവശവും പാടത്തെ വെള്ളത്താല്‍ ചുറ്റപ്പെട്ടു കിടക്കുന്ന ഈ ഭാഗത്ത് 60 മീറ്റര്‍ നീളത്തിൽ 40 സെന്‍റിമീറ്റര്‍ മെറ്റലിട്ട് ഉയര്‍ത്തി ഇന്‍റര്‍ലോക്ക് പാകിയാണ് നവീകരിക്കുന്നത്. പൊതുമരാമത്ത് വകുപ്പാണ് റോഡ് നവീകരണം നടത്തുന്നത്. മഴക്കാലത്ത് റോഡിന്‍റെ ഈ ഭാഗത്ത് വെള്ളക്കെട്ടുണ്ടായി, ഇരുചക്രവാഹനങ്ങളുള്‍പ്പെടെ വാഹനങ്ങളുടെ ഗതാഗതവും കാല്‍നടപ്പും ദുഃസഹമാകുന്നതു പതിവാണ്. ഇത്തവണ ജൂണ്‍ മുതല്‍ ഓഗസ്റ്റ് വരെയുള്ള മാസങ്ങളിലുണ്ടായ മഴയത്ത് നിരവധി ദിവസങ്ങളില്‍ ഇവിടെ രൂക്ഷമായ വെള്ളക്കെട്ടാണ് അനുഭവപ്പെട്ടത്. ഇതോടെ പോത്തോട് ഭാഗത്തെ നിരവധി വീടുകളും വെള്ളത്തിലാകുന്നതും സാധാരണമാണ്. ഈ റോഡിന്‍റെ ശോച്യാവസ്ഥ ദീപിക റിപ്പോര്‍ട്ട് ചെയ്തിരുന്നു. ഇതിന്‍റെ അടിസ്ഥാനത്തില്‍ വാര്‍ഡ് കൗണ്‍സിലര്‍ സന്തോഷ് ആന്‍റണി നല്‍കിയ നിവേദനത്തെത്തുടര്‍ന്നാണ് റോഡ് ഉയര്‍ത്തുന്നതിന് പൊതുമരാമത്തുവകുപ്പ് പണം അനുവദിച്ചത്. ഈയാഴ്ച അവസാനത്തോടെ റോഡില്‍ ഇന്‍റര്‍ലോക്ക് പാകുന്ന ജോലികള്‍ പൂര്‍ത്തിയാകും. പണ്ടകശാല പാലം മുതല്‍ പോത്തോട് കലുങ്കു വരെ റോഡ് വികസനത്തിനു പദ്ധതി ഈ റോഡിലെ പണ്ടകശാല പാലം മുതല്‍ പോത്തോട് കലുങ്കു വരെയുള്ള ഇരുനൂറ് മീറ്റര്‍ വീതി കൂട്ടുന്ന പദ്ധതികളുടെ നടപടികള്‍ പുരോഗമിക്കുകയാണ്. മുന്‍ എംഎല്‍എ സി.എഫ്. തോമസ് ഈ പദ്ധതിക്കായി 2017ല്‍ 1.25 കോടി രൂപ അനുവദിച്ചിരുന്നു. ജോബ് മൈക്കിള്‍ എംഎല്‍എയുടെ ഇടപെടലിലാണ് പദ്ധതിയുടെ നടപടികള്‍ പുരോഗമിക്കുന്നത്. ഇത്രയും ഭാഗത്ത് റോഡ് നവീകരണം പൂര്‍ത്തിയായാല്‍ ഈ റോഡിലെ യാത്ര സുഗമമാകും. റോഡ് ഉയര്‍ത്തുന്നത് വാഹനസഞ്ചാരത്തിന് ഏറെ ഗുണകരമാകും പോത്തോട് ഭാഗത്ത് 60 മീറ്റര്‍ ഭാഗത്ത് റോഡ് ഉയര്‍ത്തുന്നത് മാര്‍ക്കറ്റിലേക്കുള്ള വാഹന സഞ്ചാരത്തിന് ഏറെ ഉപകരിക്കും. ജനങ്ങളുടെ ബുദ്ധിമുട്ട് മനസിലാക്കി പൊതുമരാമത്തുവകുപ്പില്‍ നിരന്തരമായ ഇടപെടലുകള്‍ നടത്തിയാണ് പദ്ധതി പ്രാബല്യത്തിലാക്കിയത്. തിങ്കളാഴ്ചയോടെ നിര്‍മാണം പൂര്‍ത്തിയാകും. സന്തോഷ് ആന്‍റണി മുണ്ടയ്ക്കല്‍ വാര്‍ഡ് കൗണ്‍സിലര്‍, ചങ്ങനാശേരി നഗരസഭ പോത്തോട് നിവാസികള്‍ക്ക് വലിയ ആശ്വാസം ഈ റോഡുണ്ടായിട്ട് 40 വര്‍ഷത്തോളമായി. പാടം നികത്തി നിര്‍മിച്ച റോഡിലെ വെള്ളക്കെട്ട് പോത്തോട് നിവാസികളുടെ ജീവിതത്തിന് ഏറെ ദുരിതമായിരുന്നു. വാഹനത്തിലും കാല്‍നടയായും സഞ്ചരിക്കാനാവാത്ത അവസ്ഥയായിരുന്നു. ഇതിനു പരിഹാരമുണ്ടായത് ആശ്വാസം. ടി.ടി. മനോജ് തൈപ്പറമ്പില്‍ പോത്തോട് നിവാസി

പുതിയ ബസ് വേണം; തിരുനെൽവേലിക്ക് പോകാൻ

ചങ്ങനാശേരി ഡിപ്പോയിലെ തിരുനെല്‍വേലി ബസിന് എന്‍ജിന്‍ പണി ചങ്ങനാശേരി: ചങ്ങനാശേരി ഡിപ്പോയില്‍നിന്നും തിരുനെല്‍വേലിക്കുള്ള ഫാസ്റ്റ് പാസഞ്ചര്‍ ബസ് എന്‍ജിന്‍ തകരാറിനെത്തുടര്‍ന്ന് പണിക്കു കയറ്റി. സര്‍വീസ് നടത്തുന്നതിനിടെ ചെങ്ങന്നൂരില്‍വച്ച് കേടായ ഈ ബസ് അവിടെ സര്‍വീസ് അവസാനിപ്പിക്കുകയായിരുന്നു. കാല്‍ നൂറ്റാണ്ടിലധികമായി ചങ്ങനാശേരി ഡിപ്പോയില്‍നിന്നും സര്‍വീസ് നടത്തുന്ന ഇന്‍റര്‍സ്റ്റേറ്റ് സര്‍വീസുകളിലൊന്നാണിത്. ഇന്‍റര്‍‌സ്റ്റേറ്റ് പെര്‍മിറ്റുള്ള ബസ് പുനലൂര്‍ ഡിപ്പോയില്‍നിന്നും പകരം വരുത്തിയാണ് ഇപ്പോള്‍ സര്‍വീസ് നടത്തുന്നത്. തിരുനെല്‍വേലി സര്‍വീസിന് പുതിയ ബസ് അനുവദിക്കണമെന്നാണ് ആവശ്യം. രാവിലെ 7.15ന് ചങ്ങനാശേരിയില്‍ നിന്നാരംഭിച്ച് ചെങ്ങന്നൂര്‍, പന്തളം, അടൂര്‍, പത്തനാപുരം, പുനലൂര്‍, തെന്മല, ആര്യങ്കാവ്, തെങ്കാശിവഴി 1.30ന് തിരുനെല്‍വേലിയില്‍ എത്തുന്നതാണ് ഈ സര്‍വീസ്. അവിടെനിന്നും 2.30ന് തിരികെ കോട്ടയത്തേക്കുപോയി രാത്രി പത്തിന് ചങ്ങനാശേരിയിലെത്തി അവസാനിക്കുന്ന സര്‍വീസാണിത്. വിദ്യാര്‍ഥികള്‍, ഉദ്യോഗസ്ഥർ, വ്യാപാരികള്‍ ഉള്‍പ്പെട്ട നിരവധി യാത്രക്കാര്‍ ആര്യങ്കാവ്, ചെങ്കോട്ട, തെങ്കാശി, തിരുനെല്‍വേലി തുടങ്ങിയ ഭാഗങ്ങളിലേക്ക് യാത്രചെയ്യുന്ന ബസാണിത്. പഴക്കംചെന്ന ബസാണ് ഈ റൂട്ടില്‍ സര്‍വീസ് നടത്തുന്നത്. 425 കിലോമീറ്റര്‍ ദൂരമുള്ള ഈ സര്‍വീസിന് ഇരുപതിനായിരത്തോളം രൂപ കളക്‌ഷനുണ്ട്. അടുത്തിടെ കെഎസ്ആര്‍ടിസി പുതിയ ബസുകള്‍ ഇറക്കിയെങ്കിലും പേരിനുപോലും ഒരു ബസ് ചങ്ങനാശേരിക്ക് ലഭിച്ചിരുന്നില്ല. വേളാങ്കണ്ണി സര്‍വീസിന് സൂപ്പര്‍ എക്‌സ്പ്രസ് ബസ് അനുവദിക്കണം മറ്റൊരു ഇന്‍റര്‍‌സ്റ്റേറ്റ് സര്‍വീസായ വേളാങ്കണ്ണി സര്‍വീസ് സ്വിഫ്റ്റ് ഏറ്റെടുത്തതോടെ പ്രതിസന്ധിയിലാണ് നീങ്ങുന്നത്. ഡീലക്‌സ് ബസാണ് സര്‍വീസ് നടത്തുന്നത്. ഈ സര്‍വീസിനായി സൂപ്പര്‍ എക്‌സ്പ്രസ് നല്‍കാമെന്ന് മുഖ്യമന്ത്രിയും ഗതാഗതമന്ത്രിയും ഉറപ്പ് നല്‍കിയെങ്കിലും ബസ് എത്തിയിട്ടില്ല. അതേസമയം, പാലക്കാട് ഡിപ്പോയില്‍നിന്നു വേളാങ്കണ്ണിക്ക് പുതിയ ഇന്‍റര്‍‌സ്റ്റേറ്റ് സര്‍വീസിന് പ്രെപ്പോസല്‍ കെഎസ്ആര്‍ടിസി ചീഫ് ഓഫീസില്‍ അനുമതിക്കായി നല്‍കിയിരിക്കുകയാണ്. അതേ സമയം, വരുമാനക്കുറവു പറഞ്ഞ് ചങ്ങനാശേരി ഡിപ്പോയില്‍നിന്നുള്ള പളനി, കോയമ്പത്തൂര്‍ സര്‍വീസുകള്‍ നിര്‍ത്തലാക്കിയിരുന്നു. ചങ്ങനാശേരിയില്‍നിന്നു ബംഗളൂരുവിലേക്ക് ബസ് സര്‍വീസ് ആരംഭിക്കണമെന്ന ആവശ്യം ശക്തമായിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]