ADVERTISEMENT

ADVERTISEMENT

ഫാ. വലിയവീട്ടില്‍ പുരസ്‌കാരം ജോസ് വെങ്ങാന്തറയ്ക്ക്

ചങ്ങനാശേരി: ഫാ. ജോര്‍ജ് വലിയവീട്ടില്‍ സ്മാരക മനുഷ്യമിത്ര പ്രഥമ പുരസ്‌കാരം ജോസ് ജോണ്‍ വെങ്ങാന്തറയ്ക്ക്.

തരിശുകിടന്ന കായല്‍നിലങ്ങളില്‍ കൃഷിയിറക്കാന്‍ ജോസ് ജോണ്‍ തയാറായപ്പോള്‍ സര്‍ക്കാരും കൃഷി ഉദ്യോഗസ്ഥരും പിന്തുണ നല്‍കി. റാണി, ചിത്തിര കായലുകളിലായി 1000 ഏക്കറില്‍ നൂറുമേനി കൊയ്ത് ഇദ്ദേഹം വിജയം നേടി.

ഇന്നു മൂന്നിന് ചങ്ങനാശേരി സെന്‍റ് വിന്‍സന്‍റ് പുവര്‍ ഹോമില്‍ നടക്കുന്ന ചടങ്ങില്‍ ജോബ് മൈക്കിള്‍ എംഎല്‍എ അവാര്‍ഡ് സമ്മാനിക്കും. അനുസ്മരണ സമിതി ചെയര്‍മാന്‍ അലക്സ് മാത്യു, കണ്‍വീനര്‍ ഔസേപ്പച്ചന്‍ ചെറുകാട്, സെക്രട്ടറി അമ്പിളി ജോസ് എന്നിവര്‍ പ്രസംഗിക്കും.

ADVERTISEMENT

കോട്ടയം മെഡിക്കൽ കോളജ് ആശുപത്രിയിൽ ജീവനക്കാരുടെ ക്വാർട്ടേഴ്സ് തകർന്ന നിലയിൽ

ഗാന്ധിനഗർ: കോട്ടയം മെഡിക്കൽ കോളജ് ആശുപത്രിയിലെ ജീവനക്കാരുടെ ക്വാർട്ടേഴ്സും പൊട്ടിപ്പൊളിഞ്ഞ നിലയിൽ. പതിറ്റാണ്ടുകൾ പഴക്കം ചെന്ന ക്വാർട്ടേഴ്സിലാണ് ആശുപത്രി നഴ്സിംഗ് അസിസ്റ്റന്‍റുമാർ, അറ്റൻഡർമാർ തുടങ്ങിയ ജീവനക്കാർ താമസിക്കുന്നത്. ചാത്തുണ്ണിപ്പാറ ഭാഗത്ത് 34 ജി ടൈപ്പ് ക്വാർട്ടേഴ്സാണുള്ളത്. ഇവിടെ അപകട സാഹചര്യം മുന്നിൽ കണ്ടാണ് ജീവനക്കാർ താമസിക്കുന്നത്. ക്വാർട്ടേഴ്സിന്‍റെ ഉൾഭാഗത്ത് തറയും സീലിംഗുമെല്ലാം പൊട്ടിപ്പൊളിഞ്ഞ നിലയിലാണ്. എലി ശല്യവും ഏറെയാണ്. ഒട്ടുമിക്ക ക്വാർട്ടേഴ്സിലെയും അടുക്കളയും ശുചിമുറിയും തകർന്ന നിലയിലാണ്. ശുചിമുറിയുടെ ഭാഗം പൊട്ടിയൊലിക്കാൻ തുടങ്ങിട്ട് മാസങ്ങളായി. ദുർഗന്ധം സഹിച്ചാണ് ഇവർ താമസിക്കുന്നത്. പല ക്വാർട്ടേഴ്സും ചോർന്നൊലിക്കുകയാണ്. ജനൽപാളികൾ തകർന്നതും ജനൽ കമ്പികൾ തുരുമ്പ് പിടിച്ചതുമാണ്. വയറിംഗും സ്വിച്ച് ബോർഡും തകർന്ന നിലയിലാണ്. നാല് ക്വാർട്ടേഴ്സുകൾ ഉപയോഗശൂന്യമായ സ്ഥിതിയിലാണ്. പരിസരം കാടുകയറിയ നിലയിലുമാണ്. മുമ്പ് ഇടയ്ക്കിടെ ക്വാർട്ടേഴ്സിൽ മെയിന്‍റനൻസും പെയിന്‍റിംഗും പിഡബ്ല്യുഡി നടത്തിയിരുന്നു. നിലവിൽ വർഷങ്ങളായി മെയിന്‍റനൻസ് നടക്കുന്നില്ല. ജീവനക്കാർക്ക് മറ്റു മാർഗമില്ലാത്തതു കൊണ്ട് സ്വന്തം പണം മുടക്കി അറ്റകുറ്റപ്പണി നടത്തിയാണ് താമസിക്കുന്നത്. പരിസരം കാടുകയറാതിരിക്കാൻ ചില ജീവനക്കാർ ക്വാർട്ടേഴ്സ് പരിസരത്ത് പച്ചക്കറി കൃഷി നടത്തിയിരുന്നു. എന്നാൽ ആശുപത്രി അധികാരികളുടെ നിർദേശപ്രകാരം കൃഷി നിർത്തിവയ്പിച്ചതായും പറയപ്പെടുന്നു. ഇഴജന്തുക്കളുടെ ശല്യവും ഏറെയാണ്. ജീവനക്കാരുടെ കുട്ടികളും പ്രായമായ മാതാപിതാക്കൾ വരെ ഇവിടെ താമസിക്കുന്നുണ്ട്. അതേസമയം ജീവനക്കാർ മെഡിക്കൽ കോളജ് പ്രിൻസിപ്പലിനും പിഡബ്ല്യുഡി അധികാരികൾക്കും ശോച്യാവസ്ഥ പരിഹരിക്കാൻ അപേക്ഷ നൽകിട്ടും ഒരു നടപടിയുമില്ലെന്നാണ് വിവരം.

കോമ്രേഡ്‌സ് മാരത്തണില്‍ ഇരട്ട മെഡല്‍ നേട്ടവുമായി മറ്റക്കര സ്വദേശിനി

മറ്റക്കര: ദക്ഷിണാഫ്രിക്കയില്‍ നടന്ന 98-ാമത് കോമ്രേഡ്‌സ് മാരത്തണില്‍ ഇരട്ട മെഡല്‍ നേട്ടവുമായി മറ്റക്കര സ്വദേശിനിയും മുംബൈ മലയാളിയുമായ സുനി ആന്‍ സെബാസ്റ്റ്യന്‍. കോമ്രേഡ്‌സ് മാരത്തണ്‍ ദക്ഷിണാഫ്രിക്കയിലെ ഡര്‍ബന്‍, പീറ്റര്‍ മാരിറ്റ്‌സ്ബര്‍ഗ് എന്നീ നഗരങ്ങള്‍ക്കിടയിലെ മലനിരകള്‍ക്കിടയില്‍ 90 കിലോമീറ്റര്‍ ദൈര്‍ഘ്യമുള്ള പാതയിലാണ് നടക്കുന്നത്. വിവിധ രാജ്യങ്ങളില്‍നിന്നുള്ള ഇരുപതിനായിരത്തില്‍പ്പരം മത്സരാര്‍ഥികള്‍ പങ്കെടുക്കും. ഈ വര്‍ഷത്തെ മാരത്തണില്‍ 417 ഇന്ത്യക്കാരാണ് പങ്കെടുത്തത്. 11 മണിക്കൂര്‍ 41 മിനിറ്റിലാണ് സുനി നിശ്ചിതദൂരം പൂര്‍ത്തിയാക്കിയത്. കഴിഞ്ഞ വര്‍ഷവും ഇതേ നേട്ടം കൈവരിച്ച സുനി തുടര്‍ച്ചയായ രണ്ടു വര്‍ഷങ്ങളില്‍ കോമ്രേഡ്‌സ് മാരത്തണ്‍ മെഡല്‍ നേടിയ ആദ്യ മലയാളി വനിതയാണ്. ഭര്‍ത്താവ് ടോംസി ചെറിയാന്‍ അള്‍ട്രാ റണ്ണര്‍ കൂടിയാണ്. നെടുംകുന്നം ചമ്പന്നൂര്‍ കുടുംബാംഗമായ സുനി മറ്റക്കര മണ്ണനാല്‍ സെബാസ്റ്റ്യന്‍-ആനി ദമ്പതികളുടെ മകളാണ്.

ബസ് യാത്രക്കാരന്‍റെ മൊബൈല്‍ ഫോണ്‍ മോഷ്ടിച്ച പ്രതികള്‍ അറസ്റ്റില്‍

കോട്ടയം: ബസിൽനിന്ന് യാത്രക്കാരന്‍റെ മൊബൈല്‍ ഫോണ്‍ മോഷ്ടിച്ച കേസിലെ പ്രതികള്‍ അറസ്റ്റില്‍. തിരുവനന്തപുരം സ്വദേശിയായ അന്‍സില്‍ (62) മുണ്ടക്കയം സ്വദേശി സുഭാഷ് (47) എന്നിവരെയാണ് മണര്‍കാട് പോലീസ് അറസ്റ്റ് ചെയ്ത്. ഇക്കഴിഞ്ഞ ആറിന് രാവിലെ 10.30ന് കോട്ടയം പാലാ റൂട്ടില്‍ സര്‍വീസ് നടത്തുന്ന എവറസ്റ്റ് ബസിലായിരുന്നു കേസിനാസ്പദമായ സംഭവം. ഈ ബസിലെ യാത്രക്കാരനായ പറവൂര്‍ സ്വദേശിയായ അജി എന്നയാളുടെ മൊബൈല്‍ ഫോണാണ് മോഷണം പോയത്. മോഷ്ടിച്ച മൊബൈല്‍ ഫോണ്‍ പാലായിലുള്ള കടയില്‍ വില്‍ക്കാന്‍ ശ്രമിക്കുന്നതായി ജില്ലാ പോലീസ് മേധാവിക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തില്‍ പാലാ പോലീസിന്‍റെ സഹായത്തോടെ മണര്‍കാട് പോലീസ് സംഘം നടത്തിയ അന്വേഷണത്തിലാണ് പ്രതികളെ പിടികൂടിയത്. ഇവരില്‍നിന്ന് ആപ്പിള്‍ ഐഫോണ്‍ ഉള്‍പ്പെടെ മൂന്നു ഫോണുകള്‍ പോലീസ് കണ്ടെടുത്തു. സ്ഥിരം മോഷ്ടാക്കളായ ഇരുവരുടെയും പേരില്‍ സംസ്ഥാനത്തെ വിവിധ സ്റ്റേഷനുകളിലായി നിരവധിക്കേസുകള്‍ നിലവിലുണ്ട്. അന്‍സില്‍ 12 കേസുകളിലും സുഭാഷ് 19 കേസുകളിലും പ്രതിയാണ്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

ട്രെയിൻ യാത്രക്കാരുടെ മൊബൈൽ ഫോണും പണവും മോഷ്ടിച്ച പ്രതി പിടിയിൽ

കോട്ടയം: ട്രെയിൻ യാത്രക്കാരുടെ മൊബൈൽ ഫോണും പണവും മോഷ്ടിച്ച കേസിൽ പ്രതി പിടിയിൽ. കൊച്ചുവേളി ലോകമാന്യ തിലക് ട്രെയിനിൽ യാത്ര ചെയ്ത യാത്രക്കാരിയുടെ മൊബൈൽ ഫോൺ മോഷ്ടിച്ച കേസിലാണ് ഈരാറ്റുപേട്ട അരുവിത്തുറ കുരുവിക്കാട്ടിൽ ചെല്ലൈദുരെ (65)യെ പിടികൂടിയത്. റെയിൽവേ പോലീസ് നടത്തിയ സംയുക്ത പരിശോധനയിലാണ് പ്രതിയെ പിടികൂടിയത്. ഇന്നലെയായിരുന്നു കേസിനാസ്പദമായ സംഭവം. റെയിൽവേ പ്ലാറ്റ്‌ഫോമിൽ പരിശോധന നടത്തിയ പോലീസ് സംഘം ഗുഡ്‌ഷെഡിനു സമീപത്ത് സംശയാസ്പദമായ രീതിയിൽ ഇയാളെ കണ്ടത്. ചോദ്യം ചെയ്തതോടെയാണ് മോഷണവിവരം പുറത്തുവന്നത്. തുടർന്ന് നടത്തിയ പരിശോധനയിൽ ഇയാളുടെ ബാഗിൽനിന്ന് മൊബൈൽ ഫോണുകൾ കണ്ടെടുക്കുകയായിരുന്നു. കൊച്ചുവേളി-ലോകമാന്യ തിലക് എക്‌സ്പ്രസിൽ മുംബൈയ്ക്ക് യാത്ര ചെയ്ത യാത്രക്കാരിയുടെ ബാഗ് മോഷണം പോയിരുന്നു. ഈ ബാഗും ഇതിൽ സൂക്ഷിച്ചിരുന്ന മൊബൈൽ ഫോണും പോലീസ് സംഘം പരിശോധനയിൽ കണ്ടെത്തി. കൂടാതെ ആപ്പിൾ ഐപാഡും, പണവും ബാഗിനുള്ളിലുണ്ടായിരുന്നു. ചെങ്ങന്നൂർ റെയിൽവേ സ്റ്റേഷനിൽനിന്നു മോഷണം പോയതെന്ന് പരാതി ഉയർന്ന ഒരു ലക്ഷം രൂപ വിലവരുന്ന ആപ്പിൾ ഐ ഫോണും ബാഗിൽനിന്നു കണ്ടെത്തി. കോടതിയിൽ ഹാജരാക്കിയ പ്രതിയ റിമാൻഡ് ചെയ്തു.

കോട്ടയം അതിരൂപതയിലെ വൈദികരുടെ സമ്മേളനത്തിന് തൂവാനിസയില്‍ തുടക്കം

കോതനല്ലൂര്‍: കോട്ടയം അതിരൂപതയില്‍ ശുശ്രൂഷ ചെയ്യുന്ന വൈദികരുടെ സമ്മേളനത്തിന് കോതനല്ലൂര്‍ തൂവാനിസാ പ്രാര്‍ഥനാലയത്തില്‍ തുടക്കമായി. ആര്‍ച്ച്ബിഷപ് മാര്‍ മാത്യു മൂലക്കാട്ട് ഉദ്ഘാടനം ചെയ്തു. വിവിധ വിഷയങ്ങളില്‍ ക്ലാസുകളും ചര്‍ച്ചകളും ക്രമീകരിച്ചിട്ടുണ്ട്. ആത്മീയ സംയോജനവും വൈകാരിക പക്വതയും പുരോഹിതര്‍ക്കിടയിലെ മാനസികാരോഗ്യ പ്രശ്നങ്ങളും എന്ന വിഷയത്തില്‍ ഫാ. അനീഷ് ഏറ്റക്കാക്കുന്നേല്‍, പൗരോഹിത്യ ശുശ്രൂഷയെക്കുറിച്ച് സാധാരണക്കാരുടെ പ്രതീക്ഷകള്‍ എന്ന വിഷയത്തില്‍ ഷിജി ജോണ്‍സണ്‍ തകിടിപ്പുറം എന്നിവരും പൗരോഹിത്യത്തിലേക്കുള്ള ആത്മപരിശോധന, വര്‍ത്തമാന, ഭാവി വെല്ലുവിളികള്‍ എന്ന വിഷയത്തില്‍ മാര്‍ ജോസഫ് പണ്ടാരശേരിലും ക്ലാസുകള്‍ നയിക്കും. കോട്ടയം അതിരൂപതയില്‍ ശുശ്രൂഷ ചെയ്യുന്ന 140 വൈദികര്‍ സമ്മേളനത്തില്‍ പങ്കെടുക്കുന്നുണ്ട്.

ചങ്ങനാശേരി റെയില്‍വേ സ്റ്റേഷനില്‍ നിര്‍മാണങ്ങൾ അവസാനഘട്ടത്തില്‍

ചങ്ങനാശേരി: തകര്‍ന്നുകിടക്കുന്ന റെയില്‍വേ ഗുഡ്‌സ് ഷെഡ് പുനര്‍നിര്‍മിക്കുന്നതിന് റെയില്‍വേ 58 ലക്ഷം രൂപ അനുവദിച്ചതായി കൊടിക്കുന്നില്‍ സുരേഷ് എംപി അറിയിച്ചു. ഇതു സംബന്ധിച്ച് ഡിവിഷണല്‍ റെയില്‍വേ മാനേജരുടെ അനുമതി ഉടന്‍ ലഭിക്കും. വൈകാതെ നിര്‍മാണം ആരംഭിക്കും. കേന്ദ്ര റെയില്‍ മന്ത്രാലയം ചങ്ങനാശേരി റെയില്‍വേ സ്‌റ്റേഷനില്‍ നടപ്പാക്കുന്ന അമൃത് ഭാരത് പദ്ധതിയില്‍ ഉള്‍പ്പെടുത്തി നിര്‍മാണം പുരോഗമിക്കുന്ന പ്രവൃത്തികളുടെ പുരോഗതി വിലയിരുത്തുന്നതിന് കൊടിക്കുന്നില്‍ സുരേഷ് എംപി വിളിച്ചുചേര്‍ത്ത യോഗത്തിലാണ് വിവിധ പദ്ധതികള്‍ സംബന്ധിച്ച കാര്യങ്ങള്‍ വ്യക്തമാക്കിയത്. ടെര്‍മിനലിലേക്ക് ആവശ്യമായ ഫര്‍ണിച്ചറുകളും എത്തിക്കും. നിര്‍മാണം പുരോഗമിക്കുന്ന ആറരക്കോടിയുടെ വികസന പ്രവര്‍ത്തനങ്ങള്‍ ഓഗസ്റ്റ് 15നകം പൂര്‍ത്തിയാക്കാന്‍ കഴിയുമെന്നാണ് പ്രതീക്ഷിക്കുന്നത്. അവലോകന യോഗത്തില്‍ റെയില്‍വേ എന്‍ജിനിയറിംഗ് വിഭാഗം ഉദ്യോഗസ്ഥരും വിവിധ ജനപ്രതിനിധികളും റെയില്‍വേ യാത്രക്കാരുടെ പ്രതിനിധികളും പങ്കെടുത്തു. ഒന്നാം പ്ലാറ്റ് ഫോമില്‍ ട്രെയിനുകള്‍ നിര്‍ത്തുന്ന കാര്യം പരിഗണിക്കണം ചങ്ങനാശേരി: ചങ്ങനാശേരി റെയില്‍വേ സ്റ്റേഷനിലെ ഒന്നാം പ്ലാറ്റ്‌ഫോമില്‍ അത്യാവശ്യ ട്രെയിനുകളെങ്കിലും നിര്‍ത്താന്‍ നടപടി വേണമെന്ന് കൊടിക്കുന്നില്‍ സുരേഷ് എംപി വിളിച്ചുചേര്‍ത്ത യോഗത്തില്‍ നിര്‍ദേശം ഉയര്‍ന്നു. വെയിറ്റിംഗ്‌ റൂം ശൗചാലയങ്ങള്‍ ഉള്‍പ്പെടെ സൗകര്യങ്ങള്‍ ഒന്നാം പ്ലാറ്റ് ഫോമിലാണ്. ഈ പ്ലാറ്റ്‌ഫോമില്‍ ട്രെയിനുകള്‍ നിര്‍ത്താത്തത് യാത്രക്കാര്‍ക്ക് ബുദ്ധിമുട്ടാകുന്നതായും യാത്രക്കാര്‍ ചൂണ്ടിക്കാട്ടി. യാത്രക്കാര്‍ ഉന്നയിച്ച ഈ ആവശ്യത്തെ എംപിയും പിന്തുണച്ചു. എന്നാല്‍, ഫാസ്റ്റ് ട്രെയിനുകള്‍ക്ക് കടന്നുപോകാനുള്ള ലൂപ്പ് ലൈനായതിനാല്‍ ഈ പ്ലാറ്റ്‌ഫോമില്‍ ട്രെയിനുകള്‍ നിര്‍ത്തുന്നതിന് ബുദ്ധിമുട്ടുണ്ടെന്നും ഇക്കാര്യം ഉന്നതാധികാരികളെ അറിയിക്കുമെന്നും റെയില്‍വേ ഉദ്യോഗസ്ഥര്‍ പറഞ്ഞു. റെയില്‍വേ സ്‌റ്റേഷനില്‍ സജ്ജമാകുന്ന സംവിധാനങ്ങള്‍ • റെയില്‍വേ സ്‌റ്റേഷനു മുമ്പില്‍ അഭിമാനസ്തംഭമായി ദേശീയപതാക സ്ഥാപിക്കും. • ചങ്ങനാശേരി ബൈപാസില്‍നിന്നു റെയില്‍വേ സ്റ്റേഷനിലേക്ക് വാഹനങ്ങള്‍ വരുന്നതിനും പോകുന്നതിനുമുള്ള റോഡും ആധുനിക കവാടവും പൂര്‍ത്തിയായി. • നൂറുകണക്കിനു വാഹനങ്ങള്‍ക്കുള്ള വിപുലമായ പാര്‍ക്കിംഗ് സംവിധാനം ഒരുങ്ങി. • പ്ലാറ്റ്‌ഫോമുകള്‍ മാര്‍ബിള്‍ പാകി. ഇരിപ്പിടങ്ങള്‍ മനോഹരമാക്കി. • മീറ്റിംഗ് റൂമും വിഐപി ലോഞ്ചും നിര്‍മാണം പൂര്‍ത്തിയായി. • ഇന്‍ഫര്‍മേഷന്‍ ഡിസ്‌പ്ലേ ബോര്‍ഡും കോച്ച് പൊസിഷന്‍ വിവരങ്ങള്‍ ലഭിക്കുന്നതിനുള്ള ഡിജിറ്റല്‍ ബോര്‍ഡും സ്ഥാപിച്ചു. • രണ്ടാമത്തെ ഫുട് ഓവര്‍ബ്രിഡ്ജ് നിര്‍മാണം പൂര്‍ത്തിയാക്കി. • ഇതിനോട് ചേര്‍ന്നുള്ള ലിഫ്റ്റിന്‍റെ നിര്‍മാണം പുരോഗമിക്കുന്നു. • പ്രധാന കവാടത്തില്‍ ഹൈമാസ്റ്റ്, ഗുഡ്‌സ്‌ഷെഡ് റോഡില്‍ മിനിമാസറ്റ് വിളക്കുകള്‍ സ്ഥാപിക്കും. നിർദേശങ്ങൾ • നിര്‍മാണത്തിലിരിക്കുന്ന നടപ്പാലം വാഴൂര്‍ റോഡില്‍നിന്നെത്തുന്ന യാത്രക്കാര്‍ക്ക് എളുപ്പത്തില്‍ സ്റ്റേഷനിലേക്ക് പ്രവേശിക്കാവുന്നവിധം മൂന്നാം പ്ലാറ്റ്‌ഫോംവരെ ദീര്‍ഘിപ്പിക്കണം. • പ്ലാറ്റ് ഫോമുകളില്‍ കോച്ച് പൊസിഷന്‍ അറിയാനുള്ള ബോര്‍ഡുകള്‍ സ്ഥാപിക്കണം. • മൂന്നാം പ്ലാറ്റ് ഫോമില്‍ വെന്‍ഡിംഗ് മെഷീന്‍ സജ്ജമാക്കണം. • കോവിഡ്കാലത്ത് നിര്‍ത്തലാക്കിയ മംഗലാപുരം-തിരുവനന്തപുരം ട്രെയിനിന് ചങ്ങനാശേരിയിലെ സ്‌റ്റോപ്പ് പുനഃസ്ഥാപിക്കണം. • ഒന്നാം പ്ലാറ്റ്‌ഫോം നവീകരണത്തിന്‍റെ ഭാഗമായി തറയില്‍ സ്ഥാപിച്ച ടൈലുകള്‍ നനയുമ്പോള്‍ യാത്രക്കാര്‍ തെന്നിവീഴുന്നതിന് പരിഹാരം വേണം. • വാഴൂര്‍ റോഡിലെയും കവിയൂര്‍ റോഡിലെ ഫാത്തിമാപുരം മേല്‍പ്പാലങ്ങളില്‍ അപ്രോച്ച് റോഡുകള്‍ക്കുണ്ടായിരിക്കുന്ന വിള്ളല്‍ പരിശോധിക്കണം. • പെരുംതുരുത്തി-ഏറ്റുമാനൂര്‍ ബൈപാസില്‍ നാലുകോടി റെയില്‍വേ മേല്‍പ്പാലത്തിന്‍റെ നിര്‍മാണ നടപടികള്‍ വേഗത്തിലാക്കണം.

വേളാങ്കണ്ണി എക്സ്പ്രസിന് സ്വീകരണം നല്‍കി

ചങ്ങനാശേരി: കൊടിക്കുന്നില്‍ സുരേഷ് എംപിയുടെ ശ്രമഫലമായി പുതുതായി അനുവദിച്ച എല്‍എച്ച്ബി കോച്ച് ഉപയോഗിച്ച് നടത്തുന്ന എറണാകുളം വേളാങ്കണ്ണി എക്സ്പ്രസിന്‍റെ ആദ്യയാത്രയില്‍ ട്രെയിനിന് ചങ്ങനാശേരി റെയില്‍വേ സ്റ്റേഷനില്‍ കൊടിക്കുന്നില്‍ സുരേഷ് എംപിയുടെ നേതൃത്വത്തില്‍ സ്വീകരണം നല്‍കി. വേളാങ്കണ്ണി എക്‌സ്പ്രസിന്‍റെ രണ്ട് കമ്പാര്‍ട്ടുമെന്‍റുകള്‍ പ്രകൃതിസൗന്ദര്യം ആസ്വദിക്കുന്ന രീതിയില്‍ സജ്ജമാക്കും ചങ്ങനാശേരി: പരമ്പരാഗത ഐസിഎഫ് കോച്ചുകളില്‍ സര്‍വീസ് നടത്തിയിരുന്ന എറണാകുളം വേളാങ്കണ്ണി എക്‌സ്പ്രസ് യാത്ര കൂടുതല്‍ സുഖകരമാകുന്നതിനായി ആധുനിക എല്‍എച്ച്ബി കോച്ചുകള്‍ ഉപയോഗിച്ച് സര്‍വീസ് ആരംഭിച്ചു. ഇക്കാര്യം ആവശ്യപ്പെട്ട് നേരത്തെ കൊടിക്കുന്നില്‍ സുരേഷി എംപി കേന്ദ്ര റെയില്‍വേ മന്ത്രിക്ക് നിവേദനം നല്‍കിയിരുന്നു. എഴുകോണ്‍, ആവണീശ്വരം എന്നീ സ്റ്റേഷനുകളിലെ പ്ലാറ്റ്‌ഫോമുകളുടെ നീളം കൂട്ടുന്ന മുറയ്ക്ക് ട്രെയിനില്‍ 22 കോച്ചുകള്‍ ഏര്‍പ്പെടുത്തുമെന്നും താമസിക്കാതെ ദിവസവും സര്‍വീസ് നടത്തുന്ന ഡെയിലി എക്‌സ്പ്രസ് ട്രെയിനായി എറണാകുളം വേളാങ്കണ്ണി എക്‌സ്പ്രസ് മാറുമെന്നും കൊടിക്കുന്നില്‍ സുരേഷ് എംപി അറിയിച്ചു. പുനലൂര്‍ മുതല്‍ ചെങ്കോട്ടവരെയുള്ള സഹ്യപര്‍വത നിരയിലെ പ്രകൃതി സൗന്ദര്യം ആസ്വദിക്കുന്ന രീതിയില്‍ ഈ ട്രെയിനിന്‍റെ രണ്ട് കമ്പാര്‍ട്ടുമെന്‍റുകള്‍ സജ്ജമാക്കും.

നാലുകോടി സഹകരണ ബാങ്ക് വിദ്യാജ്യോതി അവാര്‍ഡ് നല്‍കി

നാലുകോടി: എസ്എസ്എല്‍സി, പ്ലസ്ടു പരീക്ഷകളില്‍ എല്ലാ വിഷയങ്ങള്‍ക്കും എപ്ലസ് ലഭിച്ച ബാങ്ക് അംഗങ്ങളുടെ മക്കള്‍ക്ക് നാലുകോടി സര്‍വീസ് സഹകരണ ബാങ്ക് നല്‍കുന്ന ഉമ്മന്‍ ചാണ്ടി വിദ്യാജോതി കാഷ് അവാര്‍ഡും മെമന്‍റോയും ഫ്രാന്‍സിസ് ജോര്‍ജ് എംപി സമ്മാനിച്ചു. പതിനൊന്നുതവണ നൂറു ശതമാനം വിജയം കരസ്ഥമാക്കിയ പായിപ്പാട് സെന്‍റ് ജോസഫ്‌സ് ഹൈസ്‌കൂളിനെയും ആരോഗ്യമേഖലയില്‍ സേവനം ചെയ്യുന്ന ആശ വര്‍ക്കര്‍മാരെയും മാടപ്പള്ളി ബ്ലോക്ക് പഞ്ചായത്തിലെ മികച്ച ഹരിത കര്‍മസേന, പായിപ്പാട് പഞ്ചായത്ത് ഹരിത കര്‍മസേന, സിഡിഎസ്, പ്രതീക്ഷ കുടുംബശ്രീ എന്നിവരെയും ആദരിച്ചു. ബാങ്ക് പ്രസിഡന്‍റ് ജയിംസ് വേഷ്ണാലിന്‍റെ അധ്യക്ഷതയില്‍ ചേര്‍ന്ന യോഗത്തില്‍ പഞ്ചായത്ത് പ്രസിഡന്‍റ് കെ.ഡി. മോഹനന്‍ , ബ്ലോക്ക് പഞ്ചായത്ത് അംഗം ടീനാമോള്‍ റോബി, പഞ്ചായത്ത് അംഗങ്ങളായ കെ.എ. പാപ്പച്ചന്‍, ജെസി തോമസ്, ഡാര്‍ലി ടെജി, രജനി ശ്രീജിത്, ബാങ്ക് വൈസ് പ്രസിഡന്‍റ് പോത്തന്‍ ജോസഫ്, ബാങ്ക് ഭരണസമിതി അംഗം ജോഷി സെബാസ്റ്റ്യന്‍, സെക്രട്ടറി ബേബി മാത്യു എന്നിവര്‍ പ്രസംഗിച്ചു.

എസ്‌ഐയെ ആക്രമിച്ചത് അപലപനീയം: യുഡിഎഫ് പാര്‍ലമെന്‍ററി കമ്മിറ്റി

ചങ്ങനാശേരി: ചങ്ങനാശേരി പോലീസ് സ്റ്റേഷനിലെ ജൂണിയര്‍ എസ്‌ഐ ടിനുവിനെ ആക്രമിച്ച സിപിഎം ഏരിയ കമ്മിറ്റി അംഗവും നഗരസഭാ സ്ഥിരംസമിതി അധ്യക്ഷനുമായ പി.എ. നിസാറിന്‍റെ നടപടി ഒരു ജനപ്രതിനിധിക്ക് ചേര്‍ന്നതല്ലയെന്ന് യുഡിഎഫ് നഗരസഭാ പാര്‍ലമെന്‍ററി പാര്‍ട്ടി യോഗം കുറ്റപ്പെടുത്തി. നഗരമധ്യത്തില്‍ കൃത്യനിര്‍വഹണത്തില്‍ ഏര്‍പ്പെട്ടിരിക്കുന്ന ഒരു ഉദ്യോഗസ്ഥനെ മര്‍ദിക്കുകയും അസഭ്യം പറയുകയും ചെയ്തു നടപടി ഒരിക്കലും അംഗീകരിക്കാന്‍ കഴിയുകയില്ലെന്നും അതിനെ പ്രതിരോധിക്കാന്‍ നഗരസഭാ കൗണ്‍സിലിനെ മറയാക്കാന്‍ അനുവദിക്കില്ലെന്നും നേതാക്കള്‍ പറഞ്ഞു. അതിനാലാണ് കൗണ്‍സില്‍ യോഗത്തില്‍നിന്നു‌ യുഡിഎഫ് വിട്ടുനിന്നതെന്നും യുഡിഎഫ് പാര്‍ലമെന്‍ററി പാര്‍ട്ടി ലീഡര്‍ ജോമി ജോസഫ് ഉപനേതാവ് സന്തോഷ് ആന്‍റണി എന്നിവര്‍ പറഞ്ഞു. അറസ്റ്റ് ചെയ്യണം: കോണ്‍ഗ്രസ് ചങ്ങനാശേരി: നഗര മധ്യത്തില്‍ ഏറ്റവും തിരക്കുള്ള കാവാലം ബസാറില്‍ മദ്യപിച്ച് വാഹനമോടിക്കുന്നവരെ പിടികൂടുന്നതിന് തന്‍റെ കൃത്യം നിര്‍വഹണത്തില്‍ ഏര്‍പ്പെട്ടിരുന്ന എസ്‌ഐയെ അകാരണമായി മര്‍ദിക്കുകയും ഭീഷണിപ്പെടുത്തുകയും ചെയ്ത സിപിഎം ഏരിയ കമ്മിറ്റി അംഗവും നഗരസഭാ കൗണ്‍സിലറുമായ പി.എ. നിസാറിനെ അറസ്റ്റ് ചെയ്യണമെന്ന് കോണ്‍ഗ്രസ് ബ്ലോക്ക് കമ്മിറ്റി ആവശ്യപ്പെട്ടു. ഇദ്ദേഹത്തെ അറസ്റ്റ് ചെയ്യണമെന്ന് ആവശ്യപ്പെട്ട് കോണ്‍ഗ്രസ് പ്രക്ഷോഭത്തിലേക്ക് നീങ്ങുമെന്നും ബ്ലോക്ക് പ്രസിഡന്‍റുമാരായ കെ.എ. ജോസഫ്, ബാബു കോയിപ്പുറം എന്നിവര്‍ അറിയിച്ചു.

വാകത്താനം കമ്മ്യൂണിറ്റി ഹെല്‍ത്ത് സെന്‍റർ രോഗശയ്യയില്‍

വാകത്താനം: ഒരുകാലത്ത് രോഗികളെ കിടത്തിചികിത്സിച്ചിരുന്ന വാകത്താനം ഗവ. ആശുപത്രി രോഗശയ്യയില്‍.ആശുപത്രി പ്രവര്‍ത്തിക്കുന്നത് വി.ജെ. സഖറിയ മെമ്മോറിയല്‍ കെട്ടിടത്തിലാണ്. ജീവനക്കാര്‍ക്കും രോഗികള്‍ക്കും നിന്നുതിരിയാന്‍ ഇടമില്ല. പഴയ കെട്ടിടം പൊളിച്ചുകളഞ്ഞു. നാട്ടുകാര്‍ പിരിവെടുത്തുവാങ്ങിയ സ്ഥലത്ത് പുതിയ കെട്ടിടം പണിയാന്‍ ആരംഭിച്ചെങ്കിലും ഏതാനും തുരുമ്പിച്ച ഇരുമ്പുകമ്പികള്‍ മാത്രം അവശേഷിച്ച നിലയിലാണ്. തുടര്‍ന്ന് പണിയാന്‍ ഫണ്ടില്ല എന്നാണ് അധികൃതരുടെ മറുപടി. ചെയ്ത പണിയുടെ തുക ലഭിക്കാഞ്ഞതിനാല്‍ കരാറുകാരും ഉപേക്ഷിച്ചു പോയി. മാടപ്പള്ളി ബ്ലോക്ക് പഞ്ചായത്തിന്‍റെ കീഴിലാണ് ഈ ആശുപത്രി പ്രവര്‍ത്തിക്കുന്നത്. നൂറുകണക്കിന് രോഗികള്‍ ആശ്രയിക്കുന്ന ഈ ആശുപത്രിയിലെത്തുന്നവര്‍ മഴയത്തും വെയിലത്തും മണിക്കൂറുകളോളം കാത്തുനില്‍ക്കേണ്ടുന്ന ഗതികേടിലാണ്. ആശുപത്രിയുടെ നിര്‍മാണ പ്രവര്‍ത്തനങ്ങള്‍ പുനരാരംഭിക്കാനുള്ള നടപടികള്‍ സര്‍ക്കാരിന്‍റെയും ജനപ്രതിനിധികളുടെയും ഭാഗത്തുനിന്നുണ്ടാകണമെന്ന് കേരള കോണ്‍ഗ്രസ് വാകത്താനം മണ്ഡലം കമ്മിറ്റി ആവശ്യപ്പെട്ടു. പ്രസിഡന്‍റ് ജോസ് മാത്യു അധ്യക്ഷത വഹിച്ചു. വിനോ വാഴയ്ക്കല്‍, സിബി പാറപ്പ, ബാബു കുര്യന്‍, മാത്യു ഏബ്രഹാം എന്നിവര്‍ പ്രസംഗിച്ചു.

കുണ്ടും കുഴിയുമായി വൈക്കം-വെച്ചൂർ റോഡ്

വൈക്കം: വൈക്കം-വെച്ചൂർ റോഡിൽ വ്യാപകമായി കുഴികൾ രൂപപ്പെട്ടതോടെ ഗതാഗതം ദുരിതപൂർണമായി. മാസങ്ങൾക്കു മുമ്പ് അറ്റകുറ്റപ്പണി നടത്തിയ റോഡ് കനത്ത മഴയെത്തുടർന്ന് വെള്ളം കെട്ടിനിന്നാണ് തകർന്നത്.ദിനംപ്രതി ഭാരവാഹനങ്ങളടക്കമുള്ള നൂറുകണക്കിനു വാഹനങ്ങളുടെ നിരന്തര ഓട്ടത്തെത്തുടർന്നാണ് റോഡിൽ വലിയ കുഴികൾ രൂപപ്പെട്ടത്. വൈക്കം തോട്ടകം അട്ടാറ പാലത്തിന്‍റെ സമീപ റോഡിലും പാലത്തിനു നടുവിലും ബാറിനു മുന്നിലും തോട്ടകം ഗവൺമെന്‍റ് എൽപി സ്കൂളിനു സമീപത്തെ വളവിലും തലയാഴം സർവീസ് സഹകരണ ബാങ്കിനും കൃഷിഭവനും മുന്നിലും വലിയകുഴികളാണുള്ളത്. വൈക്കം മുതൽ ബണ്ട് റോഡ് ജംഗ്ഷൻ വരെയുള്ള റോഡിൽ രൂപപ്പെട്ട കുഴികൾ ദിനംപ്രതി വലുതാകുകയാണ്. കുഴികളിൽ അകപ്പെടാതിരിക്കാൻ വെട്ടിച്ചു മാറ്റുന്നതിനിടയിൽ നിയന്ത്രണം വിട്ട് ഇരുചക്രവാഹനങ്ങൾ മറിഞ്ഞു യാത്രികർക്ക് പരിക്കേൽക്കുന്നതും പതിവാകുകയാണ്. റോഡിലെ കുഴികളടച്ച് ഗതാഗതം സുരക്ഷിതമാക്കാൻ അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

വാറ്റുചാരായവും കോടയുമായി യുവാക്കൾ പിടിയിൽ

കടുത്തുരുത്തി: വാറ്റുചാരായവും കോടയുമായി യുവാക്കൾ പിടിയിൽ. വെള്ളൂര്‍ ഇറുമ്പയം ഭാഗത്തുനിന്നാണ് 2.6 ലിറ്റര്‍ വാറ്റുചാരായവും 85 ലിറ്റര്‍ കോടയും വാറ്റുപകരണങ്ങളുമായി യുവാക്കളെ കടുത്തുരുത്തി എക്‌സൈസ് പിടികൂടിയത്. വെള്ളൂര്‍ ഇരുമ്പയം ഭാഗത്ത് ചെമ്മാടിയില്‍ വീട്ടില്‍ സി.ആര്‍. ജീവരാജ് (24), തോന്നല്ലൂര്‍ സ്രാങ്കുഴയില്‍ എസ്.എ. സിജിമോന്‍ (22) എന്നിവരെയാണ് അറസ്റ്റ് ചെയ്തത്. കടുത്തുരുത്തി എക്‌സൈസ് ഇന്‍സ്‌പെക്ടര്‍ കെ.എസ്. അനില്‍കുമാറിന്‍റെ നേതൃത്വത്തിൽ നടന്ന പരിശോധനയില്‍ അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍മാരായ വി.ആര്‍. രാജേഷ്, ജി. രാജേഷ്, കെ. സുരേഷ്, പ്രിവന്‍റീവ് ഓഫീസര്‍മാരായ എം.ആര്‍. രജനീഷ്, സിവില്‍ എക്‌സൈസ് ഓഫീസര്‍മാരായ കെ.ജെ. ജിയാസ് മോന്‍, കെ.എച്ച്. ഹരികൃഷ്ണന്‍, എം.എ. അമൃത്, വനിതാ സിവില്‍ എക്‌സൈസ് ഓഫീസര്‍ എ.ജെ. സിബി, കെ. പ്രീതി, എക്‌സൈസ് ഡ്രൈവര്‍ ലിജേഷ് ലക്ഷ്മണന്‍ എന്നിവര്‍ പങ്കെടുത്തു

പിക്കപ് വാൻ ഇടിച്ച് വീട്ടമ്മ മരിച്ചു

രാമപുരം: പാലാ-തൊടുപുഴ റോഡില്‍ പിഴകിന് സമീപം ആറാംമൈലില്‍ പിക്കപ്പ് വാന്‍ ഇടിച്ച് വീട്ടമ്മ മരിച്ചു. പിഴക് വടക്കേക്കുന്നേല്‍ ദേവസ്യയുടെ ഭാര്യ എലിസബത്ത് (68) ആണ് മരിച്ചത്. ഇന്നലെ രാവിലെ എട്ടിനാണ് അപകടം നടന്നത്. മൂവാറ്റുപുഴയില്‍നിന്നു പാലാ ഭാഗത്തേക്ക് പോവുകയായിരുന്ന പിക്കപ്പ് വാന്‍ നിയന്ത്രണംവിട്ട് വൈദ്യുതിപോസ്റ്റില്‍ ഇടിച്ചശേഷം വഴിയിലൂടെ നടന്നുപോവുകയായിരുന്ന എലിസബത്തിനെ ഇടിച്ചിട്ട് മുന്നോട്ടു നീങ്ങിയ വാഹനം എതിര്‍വശത്തെ തിട്ടയിലിടിച്ച് നിന്നു. പരേത കരിങ്കുന്നം മെയ്യാറ്റുംകുന്നേല്‍ കുടുംബാംഗം. മക്കള്‍: ബിന്ദു, ബിനേഷ്. മരുമക്കള്‍ ബിജു, ജൂലി. സംസ്‌കാരം ഇന്നു രാവിലെ 11ന് പിഴക് സെന്‍റ് ജോണ്‍ ദ് ബാപ്റ്റിസ്റ്റ് പള്ളിയില്‍.

മോൺ. ഡോ. ജോസഫ് തടത്തിൽകുടുംബക്കൂട്ടായ്മാ ഭാരവാഹികൾ തീക്ഷ്ണതയോടെ പ്രവർത്തിക്കണം:

കുറവിലങ്ങാട്: കുടുംബകൂട്ടായ്മാ ഭാരവാഹികൾ തീക്ഷ്ണതയോടെ പ്രവർത്തിക്കണമെന്ന് പാലാ രൂപത മുഖ്യവികാരി ജനറാൾ മോൺ.ഡോ. ജോസഫ് തടത്തിൽ. മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ കുടുംബക്കൂട്ടായ്മാ പ്രവർത്തനങ്ങളുടെ ഉദ്ഘാടനം ‘കെൻശ് ബയ്‌ത്തേ’ നിർവഹിക്കുകയായിരുന്നു അദ്ദേഹം. ആർച്ച് പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു. ഇടവകയുടെ പുതുക്കിയ വെബ്‌സൈറ്റിന്‍റെ ഉദ്ഘാടനവും കുടുംബ കൂട്ടായ്മാ ഗാനത്തിന്‍റെ അവതരണവും നടത്തി. കുടുംബ കൂട്ടായ്മ പാലാ രൂപത ഡയറക്ടർ ഡോ.ജോസഫ് അരിമറ്റത്ത് ഇടവക കുടുംബ കൂട്ടായ്മ കൈപ്പുസ്തകത്തിന്‍റെ പ്രകാശനം നിർവഹിച്ചു. രൂപത പ്രസിഡന്‍റ് സെബാസ്റ്റ്യൻ പയ്യാനിമണ്ഡപം, കുടുംബ കൂട്ടായ്മ ഡയറക്ടർ ഫാ. പോൾ കുന്നുംപുറത്ത്, ഫാ. ജോസഫ് മണിയഞ്ചിറ, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമല, പാസ്റ്ററൽ അസിസ്റ്റന്‍റ് ഫാ. ജോസ് കോട്ടയിൽ, ജനറൽ ലീഡർ ബോബിച്ചൻ നിധീരി, കൂട്ടായ്മ മേഖലാ പ്രസിഡന്‍റ് ബിജു താന്നിക്കത്തറപ്പേൽ, സോൺ ലീഡർ ഷൈജു പാവുത്തിയേൽ, സെക്രട്ടറി ഷൈനി സാബു മഞ്ഞപ്പള്ളി എന്നിവർ പ്രസംഗിച്ചു.

ജൈവഗ്രാമം പദ്ധതിക്ക് തുടക്കം

തലയാഴം: വിഷരഹിത പച്ചക്കറി ഉത്പാദനം വർധിപ്പിച്ച് കർഷർക്ക് വരുമാനം ലഭ്യമാക്കുന്നതിനും പച്ചക്കറി ഉത്പന്നങ്ങൾക്ക് വിപണി കണ്ടെത്താനും ജൈവഗ്രാമം നൂറുമേനി ജനകീയ കൂട്ടായ്മയുമായി വൈക്കം ബ്ലോക്ക് ഫാർമേഴ്സ് പ്രൊഡ്യൂസേഴ്സ് ആൻഡ് മാർക്കറ്റിംഗ് സഹകരണ സംഘം. തലയാഴം പഞ്ചായത്ത് രണ്ടാം വാർഡിൽ പദ്ധതിയുടെ ഉദ്ഘാടനം വൈക്കം ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു നിർവഹിച്ചു. സംഘം പ്രസിഡന്‍റ് എ.സി. ജോസഫ് അധ്യക്ഷത വഹിച്ചു. തലയാഴം പഞ്ചായത്ത് പ്രസിഡന്‍റ് രമേഷ് പി. ദാസ്,മുൻ ബ്ലോക്ക് പഞ്ചായത്ത് പ്രസിഡന്‍റ് എം.ഡി. ബാബുരാജ്, വാർഡ് മെംബർ എം.എസ്. ധന്യ, സംഘം സെക്രട്ടറി കെ.എ. കാസ്ടോ തുടങ്ങിയവർ പ്രസംഗിച്ചു.

സെമിനാര്‍

കടുത്തുരുത്തി: അടിയന്തരാവസ്ഥയുടെ അന്‍പതാം വാര്‍ഷികം എന്ന വിഷയത്തില്‍ കടുത്തുരുത്തി കെ.കെ. ജോസഫ് മന്ദിരത്തില്‍ നടന്ന സെമിനാര്‍ മുന്‍ എംപി അഡ്വ. കെ. സുരേഷ് കുറുപ്പ് ഉദ്ഘാടനം ചെയ്തു. സിപിഎം കടുത്തുരുത്തി ഏരിയാ സെക്രട്ടറി കെ. ജയകൃഷ്ണന്‍ അധ്യക്ഷതവഹിച്ചു. ജില്ലാ സെക്രട്ടേറിയറ്റംഗം പി.വി.സുനില്‍, ഏരിയാ കമ്മിറ്റിയംഗങ്ങളായ റ്റി.സി. വിനോദ്, ബെന്നി ജോസഫ് എന്നിവര്‍ പ്രസംഗിച്ചു. അടിയന്തരാവസ്ഥകാലത്ത് ജയില്‍വാസം അനുഭവിച്ച കെ.യു. വര്‍ഗീസിനെ സെമിനാറില്‍ ആദരിച്ചു.

സ്വച്ഛ് സര്‍വേക്ഷണ്‍ ഗ്രാമീണ്‍ സര്‍വേയ്ക്ക് ജില്ലയില്‍ തുടക്കം

കോട്ടയം: രാജ്യത്തെ ഏറ്റവും വൃത്തിയുള്ള സംസ്ഥാനത്തെയും ജില്ലയെയും കണ്ടെത്തുന്നതിനും ഗ്രാമീണജനതയുടെ ശുചിത്വശീലങ്ങള്‍ വിലയിരുത്തുന്നതിനുമുള്ള സ്വച്ഛ് സര്‍വേക്ഷണ്‍ ഗ്രാമീണ്‍ സര്‍വേയ്ക്ക് ജില്ലയില്‍ തുടക്കമായി. സര്‍വേയില്‍ വീടുകളിലെ ശൗചാലയ സൗകര്യങ്ങള്‍, വെളിയിടവിസര്‍ജ്ജന മുക്തമാണോ, കൈ കഴുകല്‍ സംവിധാനങ്ങള്‍, ജൈവ-അജൈവ മാലിന്യ സംസ്‌കരണം, മലിനജല പരിപാലനം, പ്ലാസ്റ്റിക് മാലിന്യ സംസ്‌കരണം തുടങ്ങിയവ വിലയിരുത്തും. വീടുകള്‍ക്ക് പുറമേ പൊതുയിടങ്ങള്‍, ബസ് സ്റ്റാന്‍ഡുകള്‍, പഞ്ചായത്ത് പരിസരങ്ങള്‍, സ്‌കൂളുകള്‍, അങ്കണവാടികള്‍, ആരാധനാലയങ്ങള്‍, മാര്‍ക്കറ്റുകള്‍ എന്നിവിടങ്ങളിലെയും ശുചിത്വനിലവാരം പരിശോധിക്കും. അംഗീകൃത ദേശീയ ഏജന്‍സികളാണ് സര്‍വേ നടത്തുന്നത്. സര്‍വേയ്ക്കായി പ്രത്യേകമായി 1000 മാര്‍ക്കുള്ള ശുചിത്വ മാനദണ്ഡങ്ങള്‍ നിര്‍ദേശിച്ചിട്ടുണ്ട്. ഓരോ വില്ലേജിലെയും ശുചിത്വ പ്രവര്‍ത്തനങ്ങളെ അടിസ്ഥാനമാക്കിയാകും റാങ്ക് നിശ്ചയിക്കുക. പൊതുജനങ്ങളുടെ ആശയങ്ങളും അഭിപ്രായങ്ങളും സര്‍വേയില്‍ ഉള്‍പ്പെടുത്തുന്നതിനായി ആരംഭിച്ച സ്വച്ഛ് സര്‍വേക്ഷന്‍ ഗ്രാമീണ്‍ 2025 മൊബൈല്‍ ആപ്ലിക്കേഷനിലൂടെയാ കും പൊതുജനങ്ങളുടെ പ്രതികരണങ്ങളും അഭിപ്രായങ്ങളും ശേഖരിക്കുക. ജില്ലയുടെ ശുചിത്വ നിലവാരം നിങ്ങള്‍ക്കും വിലയിരുത്താം സ്വച്ഛ് സര്‍വേക്ഷണ്‍ ഗ്രാമീണ്‍-2025 ന്‍റെ ഭാഗമായി പൊതുജനങ്ങള്‍ക്കും ജില്ലയിലെ ശുചിത്വ നിലവാരം സംബന്ധിച്ച അഭിപ്രായവും നിര്‍ദേശങ്ങളും എസ്എസ്ജി 25 ആപ്പിലൂടെ രേഖപ്പെടുത്താം. ജില്ലയുടെ റാങ്കിംഗ് നിര്‍ണയിക്കുന്നതില്‍ ജില്ലയിലെ കൂടുതല്‍ ആളുകള്‍ ആപ്പ് വഴി അഭിപ്രായം രേഖപ്പെടുത്തുന്നത് ഒരു പ്രധാന ഘടകമാണ്. അതിനാല്‍ എല്ലാവരും അഭിപ്രായം രേഖപ്പെടുത്തണമെന്ന് ശുചിത്വമിഷന്‍ ജില്ലാ കോ-ഓര്‍ഡിനേറ്റര്‍ അറിയിച്ചു.

റോഡരികിൽ കക്കൂസ് മാലിന്യം തള്ളി

പാമ്പാടി: രാത്രിയുടെ മറവിൽ റോഡരികിൽ കക്കൂസ് മാലിന്യം തള്ളി. ഇന്നലെ രാത്രിയിൽ ആയിരുന്നു സംഭവം. ആലാമ്പള്ളി കരിയിലക്കുളം ഭാഗത്ത് റോഡിനോട് ചേർന്നുള്ള തോട്ടിലും റോഡിലുമായാണ് കക്കൂസ് മാലിന്യം നിക്ഷേപിച്ചത്. തൊഴിലുറപ്പ് തൊഴിലാളികൾ വൃത്തിയാക്കിയ തോട്ടിലാണ് മാലിന്യം നിക്ഷേപിച്ചത്. നാട്ടുകാർ വിവരം അറിയിച്ചതിനെത്തുടർന്ന് വാർഡ് മെംബ ർ ഉഷാകുമാരിയുടെ നേതൃത്വത്തിൽ അണുനശീകരണം നടത്തി. ഈ ഭാഗത്ത് തെരുവുവിളക്കുകൾ കത്താറില്ലെന്ന് നാട്ടുകാർ പറഞ്ഞു.

മന്ത്രിമാർ രാജി വയ്ക്കുന്നതുവരെ സമരം: നാട്ടകം സുരേഷ്

ഗാന്ധിനഗർ: കോട്ടയം മെഡിക്കൽ കോളജിലെ ശുചിമുറി തകർന്നുവീണ് വീട്ടമ്മ മരിക്കാനിടയായ സംഭവത്തിൽ ആരോഗ്യ മന്ത്രി വീണാ ജോർജ്, മന്ത്രി വി.എൻ. വാസവൻ എന്നിവർ രാജിവയ്ക്കണമെന്നും ഇവർ രാജിവയ്ക്കുംവരെ സമരം തുടരുമെന്നും കോൺഗ്രസ് ജില്ലാ പ്രസിഡന്‍റ് നാട്ടകം സുരേഷ്. കോൺഗ്രസ് ആർപ്പൂക്കര മണ്ഡലം കമ്മിറ്റിയുടെ നേതൃത്വത്തിൽ മെഡിക്കൽ കോളജിലേക്ക് നടത്തിയ സായാഹ്ന ധർണ ഉദ്ഘാടനം ചെയ്യുകയായിരുന്നു അദ്ദേഹം. ജോൺസൺ ജോസഫ് ചിറ്റേട്ട് അധ്യക്ഷത വഹിച്ചു.

അമലഗിരി ബികെ കോളജില്‍ ആണ്‍കുട്ടികള്‍ക്കും പ്രവേശനം

അമലഗിരി: ബികെ കോളജില്‍ ഇനിമുതല്‍ ആണ്‍കുട്ടികള്‍ക്കും പ്രവേശനം ലഭിക്കും. ബികോം ഓണേഴ്‌സ് (ഫിനാന്‍സ് ആന്‍ഡ് ടാക്‌സേഷന്‍, ലോജിസ്റ്റക്‌സ് മാനേജ്‌മെന്‍റ്), ബിഎസ്്‌സി ഓണേഴ്‌സ് ജിയോളജി, എംഎസ്്‌സി കെമസ്ട്രി, എംഎസ്്‌സി ഫുഡ് ആന്‍ഡ് ഇന്‍സ്ട്രിയല്‍ മൈക്രോബയോളജി എന്നീ വിഷയങ്ങളില്‍ ആണ്‍കുട്ടികള്‍ക്കു പ്രവേശനം ലഭിക്കും. ഇന്നു മുതല്‍ പത്തുവരെ എംജി യൂണിവേഴ്‌സിറ്റി നടത്തുന്ന ക്യാപ് രജിസ്‌ട്രേഷന്‍ മുഖേന വിദ്യാര്‍ഥികള്‍ക്ക് അപേക്ഷ നല്കാം. 7559097384, 9895658081, 9947576344.

മെഡിക്കൽ കോളജിനു മുന്പിൽ ജനകീയ കൂട്ടായ്മ

കോട്ടയം: ആരോഗ്യമന്ത്രിക്കും മെഡിക്കൽ കോളജ് ആശുപത്രികൾക്കും നേരേ നടത്തുന്ന അടിസ്ഥാന രഹിതമായ സമരങ്ങൾക്കും കോട്ടയം മെഡിക്കൽ കോളജിനെ തകർക്കുന്ന രീതിയിലുള്ള പ്രചാരണങ്ങൾക്കുമെതിരേ എൽഡിഎഫിന്‍റെ നേതൃത്വത്തിൽ ഇന്ന് മെഡിക്കൽ കോളജിനു മുന്പിൽ ജനകയീ കൂട്ടായ്മ നടത്തും. വൈകുന്നേരം അഞ്ചിന് മെഡിക്കൽ കോളജിനു മുന്പിൽ നടക്കുന്ന കൂട്ടായ്മ മന്ത്രി വി.എൻ. വാസവൻ ഉദ്ഘാടനം ചെയ്യും. എൽഡിഎഫ് എംഎൽഎമാർ, നേതാക്കൾ തുടങ്ങിയവർ പങ്കെടുക്കും.

പ്രധാനമന്ത്രി നാഷണല്‍ അപ്രന്‍റിസ്ഷിപ്പ് മേള സംഘടിപ്പിച്ചു

കോട്ടയം: ആര്‍ഐ സെന്‍റര്‍ കോട്ടയം ഓഫീസിന്‍റെ നേതൃത്വത്തില്‍ ഏറ്റുമാനൂര്‍ ഗവ. ഐടിഐയില്‍ പ്രധാനമന്ത്രി നാഷണല്‍ അപ്രന്‍റീസ്ഷിപ്പ് മേള സംഘടിപ്പിച്ചു. അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം ഉദ്ഘാടനം ചെയ്തു. കോട്ടയം മേഖലാ ടെയിനിംഗ് ഇന്‍സ്പെക്ടര്‍ എം.എഫ്. സാംരാജ് അധ്യക്ഷത വഹിച്ചു. 21 സ്ഥാപനങ്ങളും 112 ഉദ്യോഗാര്‍ഥികളും മേളയില്‍ പങ്കെടുത്തു. ആര്‍ഐ സെന്‍റര്‍ കോട്ടയം ഓഫീസ് ട്രെയിനിംഗ് ഓഫീസര്‍ സാബു ജോസഫ്, ആര്‍ഡിഎസ്ഡിഇ ട്രെയിനിംഗ് അസി. ഡയറക്ടര്‍ ഡി. ബ്രഹ്‌മേശ്വരി, ഏറ്റുമാനൂര്‍ നോഡല്‍ ഐടിഐ പ്രിന്‍സിപ്പല്‍ കെ. സന്തോഷ് കുമാര്‍, വൈസ് പ്രിന്‍സിപ്പല്‍ സിനി എം. മാത്യുസ്, ആര്‍ഐ സെന്‍റര്‍ ജൂണിയര്‍ അപ്രന്‍റീസ്ഷിപ്പ് അഡ്‌വൈസര്‍ രാജേഷ് വി. സ്‌കറിയ എന്നിവര്‍ പങ്കെടുത്തു.

ഹെപ്പറ്റൈറ്റിസ്-എ രോഗബാധ: ജാഗ്രത വേണം

കോട്ടയം: ജില്ലയില്‍ പലയിടത്തും ഹെപ്പറ്റൈറ്റിസ്-എ രോഗബാധ റിപ്പോര്‍ട്ട് ചെയ്ത സാഹചര്യത്തില്‍ ജനങ്ങള്‍ ജാഗ്രത പുലര്‍ത്തണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. എന്‍. പ്രിയ അറിയിച്ചു. കരളിനെ ബാധിക്കുന്ന വൈറസ് രോഗമാണ് വൈറല്‍ ഹെപ്പറ്റൈറ്റിസ്. മലിനമായ ആഹാരവും കുടിവെള്ളവും വഴി പകരുന്ന വൈറല്‍ ഹെപ്പറ്റൈറ്റിസിന്‍റെ എ, ഇ വിഭാഗങ്ങളാണ് കൂടുതലായി കണ്ടുവരുന്നത്. ശരീരവേദനയോടു കൂടിയ പനി, തലവേദന, ക്ഷീണം, ഓക്കാനം, ഛര്‍ദി തുടങ്ങിയവയാണ് പ്രാരംഭ രോഗലക്ഷണങ്ങള്‍. പിന്നീട് മൂത്രത്തിനും കണ്ണിനും മറ്റ് ശരീരഭാഗങ്ങളിലും മഞ്ഞനിറം ഉണ്ടാകും. മലിനമായ ജലസ്രോതസുകളിലൂടെയും ശുദ്ധമല്ലാത്ത വെള്ളം ഉപയോഗിച്ച് തയാറാക്കുന്ന ഭക്ഷണ പാനീയങ്ങളിലൂടെയും രോഗം ബാധിച്ചവരുമായിഅടുത്ത സമ്പര്‍ക്കം പുലര്‍ത്തുന്നതിലൂടെയുമാണ് രോഗം പകരുന്നത്. പ്രതിരോധ പ്രവര്‍ത്തനങ്ങള്‍ തുടക്കത്തിലേ ആരംഭിച്ചാല്‍ രോഗബാധ തടയാനാകും. ആഘോഷങ്ങള്‍, വിനോദയാത്ര, ഉത്സവങ്ങള്‍ എന്നീ വേളകളില്‍ ഭക്ഷണ പാനീയ ശുചിത്വത്തില്‍ പ്രത്യേക ശ്രദ്ധ വേണമെന്നും ജില്ലാ മെഡിക്കല്‍ ഓഫീസര്‍ അറിയിച്ചു. പ്രതിരോധ മാര്‍ഗങ്ങള്‍ *വ്യക്തിശുചിത്വവും പരിസര ശുചിത്വവും പാലിക്കണം * ആഹാരം കഴിക്കുന്നതിനുമുന്‍പും മലവിസര്‍ജനത്തിനുശേഷവും കൈകള്‍ സോപ്പുപയോഗിച്ച് കഴുകണം. * നഖങ്ങള്‍ വൃത്തിയാക്കി സൂക്ഷിക്കണം. * മലമൂത്രവിസര്‍ജനം കക്കൂസുകളില്‍ മാത്രം ചെയ്യണം * കുഞ്ഞുങ്ങളുടെ വിസര്‍ജ്യങ്ങള്‍ സുരക്ഷിതമായി നീക്കണം * തിളപ്പിച്ചാറ്റിയ വെള്ളം മാത്രം കുടിക്കാന്‍ ഉപയോഗിക്കണം * ആഹാര സാധനങ്ങളും കുടിവെള്ളവും അടച്ചുസൂക്ഷിക്കണം * പഴകിയ ആഹാരം കഴിക്കരുത് * പഴവര്‍ഗങ്ങളും പച്ചക്കറികളും നന്നായി കഴുകി ഉപയോഗിക്കണം * കിണര്‍ വെള്ളം നിശ്ചിത ഇടവേളകളില്‍ ക്ലോറിനേറ്റ് ചെയ്യണം. * സെപ്റ്റിക് ടാങ്കും കിണറും തമ്മില്‍ നിശ്ചിത അകലമുണ്ടെന്ന് ഉറപ്പുവരുത്തണം * ശുദ്ധത ഉറപ്പില്ലാത്ത ഐസ്‌ക്രീം, സിപ്പ് അപ്പ്, മറ്റ് ശീതളപാനീയങ്ങള്‍ തുടങ്ങിയവ കഴിക്കരുത് രോഗപ്പകര്‍ച്ച തടയാന്‍ശ്രദ്ധിക്കേണ്ട കാര്യങ്ങള്‍ * രോഗമുള്ളവര്‍ ഭക്ഷണം പാചകം ചെയ്യുകയോ വിളമ്പുകയോ ചെയ്യരുത് * കുഞ്ഞുങ്ങളെയും പ്രായമായവരെയും പരിചരിക്കുന്നതില്‍നിന്ന് ഒഴിഞ്ഞു നില്‍ക്കണം * രോഗി ഉപയോഗിച്ച പാത്രങ്ങള്‍, വസ്ത്രങ്ങള്‍ എന്നിവ മറ്റുള്ളവര്‍ ഉപയോഗിക്കരുത് * കൈകള്‍ സോപ്പുപയോഗിച്ച് ഇടയ്ക്കിടെ കഴുകണം * രോഗി പൊതുകുളങ്ങളോ നീന്തല്‍ കുളങ്ങളോ ഉപയോഗിക്കരുത് രോഗലക്ഷണങ്ങള്‍ കണ്ടാല്‍ സ്വയം ചികിത്സ ഒഴിവാക്കി ഉടന്‍ ആരോഗ്യ പ്രവര്‍ത്തകരെ വിവരമറിയിക്കണമെന്നും ജില്ലാ മെഡിക്കല്‍ ഓഫീസര്‍ അറിയിച്ചു.

മെഡിക്കൽ കോളജിലേക്ക് ബിജെപി മാർച്ച്; പോലീസ് ജലപീരങ്കി പ്രയോഗിച്ചു

ഗാന്ധിനഗര്‍: കോട്ടയം മെഡിക്കല്‍ കോളജ് ആശുപത്രിയിലേക്ക് ബിജെപി ഈസ്റ്റ്-വെസ്റ്റ് ജില്ലാ കമ്മിറ്റികളുടെ നേതൃത്വത്തില്‍ മാര്‍ച്ച് നടത്തി. മെഡിക്കല്‍ കോളജില്‍ കെട്ടിടം തകര്‍ന്നുവീണ് വീട്ടമ്മ മരിച്ച സംഭവത്തില്‍ പ്രതിഷേധിച്ചാണ് ബിജെപി മാര്‍ച്ച് സംഘടിപ്പിച്ചത്. മാര്‍ച്ച് ഗാന്ധിനഗര്‍ പോലീസ് സ്റ്റേഷന്‍ പരിസരത്തുനിന്ന് ആശുപത്രി കവാടത്തില്‍ എത്തിയപ്പോള്‍ പോലീസ് ബാരിക്കേഡ്‌വച്ച് തടഞ്ഞു. തുടര്‍ന്ന് പ്രവര്‍ത്തകര്‍ ബാരിക്കേഡിന് മുകളില്‍ കയറിനിന്നു പ്രതിഷേധിച്ചു. ഇതോടെ പോലീസ് പ്രവര്‍ത്തകര്‍ക്ക് നേരേ ജലപീരങ്കി പ്രയോഗിച്ചു. പിന്നീട് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ മാര്‍ച്ചും ധര്‍ണയും ഉദ്ഘാടനം ചെയ്തു. ആശുപത്രി കെട്ടിടം തകര്‍ന്നുവീണ് ബിന്ദു എന്ന വീട്ടമ്മ മരിക്കാനിടയായത് കുറ്റകരമായ അനാസ്ഥ കൊണ്ടാണെന്ന് അദേഹം പറഞ്ഞു. രക്ഷാപ്രവര്‍ത്തനം വൈകിയത് രണ്ട് മന്ത്രിമാരുടെ നിരുത്തരവാദിത്വം കൊണ്ടാണ്. മന്ത്രിമാരായ വീണാ ജോര്‍ജും വി.എന്‍. വാസവനും രാജിവയ്ക്കണം. ബിന്ദുവിന്‍റെ കുടുംബത്തിന് 25 ലക്ഷം രൂപ നല്‍കണം. മകന് ജോലി കൊടുക്കണമെന്നും അദേഹം പറഞ്ഞു. കെട്ടിടം ഇടിഞ്ഞതു സംബന്ധിച്ച് അന്വേഷണം നടത്തണമെന്നും ആവശ്യപ്പെട്ടു. തുടര്‍ന്ന് സംസാരിച്ച ബിജെപി നേതാവ് പി.സി. ജോര്‍ജ് മുഖ്യമന്ത്രി പിണറായി വിജയന്‍ രാജിവയ്ക്കണമെന്ന് ആവശ്യപ്പെട്ടു. ജില്ലാ പ്രസിഡന്‍റുമാരായ ജി. ലിജിന്‍ ലാല്‍, റോയി ചാക്കോ, നേതാക്കളായ നാരായണന്‍ നമ്പൂതിരി, ജയസൂര്യന്‍, ജി. രാമന്‍ നായര്‍, ഷോണ്‍ ജോര്‍ജ്, ബി. രാധാകൃഷ്ണമേനോന്‍ തുടങ്ങിയവര്‍ നേതൃത്വം നല്‍കി.

സ്വകാര്യബസുകള്‍ ഇന്നു പണിമുടക്കും

കോട്ടയം: ജില്ലയിലെ 950 സ്വകാര്യബസുകള്‍ ഇന്ന് പണിമുടക്കും. സമീപ ജില്ലകളില്‍നിന്ന് കോട്ടയം ജില്ലയിലെത്തുന്ന മൂന്നൂറില്‍പ്പരം ബസുകളും മുടക്കമായിരിക്കും. കെഎസ്ആര്‍ടിസി ഏതാനും റൂട്ടുകളില്‍ അധികസര്‍വീസുകള്‍ ഓടിക്കുമെങ്കിലും ബസ് ഗതാഗതം ഇന്ന് സാരമായി തടസപ്പെടും. സൂചനാ പണിമുടക്കിന് പിന്നാലെ 22 മുതല്‍ അനിശ്ചിതകാല സമരത്തിനും തയാറെടുക്കുകയാണ് ബസുടമകള്‍. ലിമിറ്റഡ് സ്റ്റോപ്പ്, ദീര്‍ഘദൂര ബസ് പെര്‍മിറ്റുകള്‍ അതേപടി പുതുക്കി നല്‍കുക, വിദ്യാര്‍ഥികളുടെ ടിക്കറ്റ് നിരക്ക് വര്‍ധിപ്പിക്കുക, ഇ ചെല്ലാന്‍ വഴിയുള്ള പിഴ ചുമത്തല്‍ അവസാനിപ്പിക്കുക തുടങ്ങിയ ആവശ്യങ്ങളാണ് ഉന്നയിക്കുന്നത്. 2011ല്‍ നിശ്ചയിച്ച ഒരു രൂപയാണു വിദ്യാര്‍ഥികളുടെ മിനിമം നിരക്ക്. അന്ന് ഒരു ലിറ്റര്‍ ഡീസലിന് 41.39 രൂപ. ഇപ്പോള്‍ വില 95 രൂപ. ടയര്‍, സ്‌പെയര്‍ പാര്‍ട്‌സ് വില പതിന്മടങ്ങ് വര്‍ധിച്ചു. സ്പീഡ് ഗവർണര്‍, ജിപിഎസ്, കാമറ തുടങ്ങിയ പുതിയ ചെലവുകളുമുണ്ടായി. ഇവയുടെ റീചാര്‍ജിംഗിന് മാസം ആയിരം രൂപ വേറെയും കണ്ടെത്തണം. സ്വകാര്യ ബസുടമകളും ജീവനക്കാരും നേരിടുന്ന പ്രശ്‌നങ്ങള്‍ പഠിക്കാന്‍ നിയോഗിക്കപ്പെട്ട വിവിധ കമ്മീഷനുകളുടെ റിപ്പോര്‍ട്ടുകളും പരിഗണനയ്ക്ക് എടുത്തിട്ടില്ല. ബസ് വ്യവസായം ഭാരിച്ച നഷ്ടത്തിലായതോടെ നിരവധി പേര്‍ ഈ മേഖലയില്‍നിന്നു പിന്‍മാറി.

അഖിലേന്ത്യാ പണിമുടക്ക് ഇന്ന് അര്‍ധരാത്രി മുതൽ; പൊതുഗതാഗതം സ്തംഭിക്കും

കോട്ടയം: കേന്ദ്രസര്‍ക്കാരിന്‍റെ തൊഴിലാളി വിരുദ്ധ നയങ്ങള്‍ക്കെതിരേ സംയുക്ത കേന്ദ്ര ട്രേഡ് യൂണിയനുകളും ജീവനക്കാരുടെ ഫെഡറേഷനുകളും ആഹ്വാനം ചെയ്ത 24 മണിക്കൂർ അഖിലേന്ത്യാ പണിമുടക്ക് ഇന്ന് അര്‍ധരാത്രി ആരംഭിക്കും. ദേശീയ പണിമുടക്കിനോട് അനുഭാവം പ്രകടിപ്പിച്ച് സ്വകാര്യ ബസിലെ ജീവനക്കാരും കെഎസ്ആര്‍ടിസി ജീവനക്കാരും പണിമുടക്കുന്നതോടെ പൊതുഗതാഗതം സ്തംഭിക്കും. വ്യാപാരികളും പണിമുടക്കില്‍ പങ്കെടുക്കാനാണ് സാധ്യത. ജീവനക്കാരുടെ ഫെഡറേഷനുകളും പണിമുടക്കില്‍ പങ്കെടുക്കുന്നതോടെ സര്‍ക്കാര്‍ ഓഫീസുകളില്‍ ജീവനക്കാരുടെ എണ്ണം കുറവായിരിക്കും. കര്‍ഷകരും കര്‍ഷകത്തൊഴിലാളികളും കേന്ദ്ര, സംസ്ഥാന സര്‍ക്കാര്‍ ജീവനക്കാരും അധ്യാപകരും പൊതുമേഖലാ ജീവനക്കാരും ബാങ്കിംഗ്, ഇന്‍ഷ്വറന്‍സ് ജീവനക്കാരും പണിമുടക്കില്‍ പങ്കെടുക്കുമെന്ന് അറിയിച്ചിട്ടുണ്ട്. ഇതോടെ നാളത്തെ പണിമുടക്കില്‍ ജനജീവിതം സ്തംഭിക്കുമെന്നുറപ്പായിരിക്കുകയാണ്. അവശ്യ സര്‍വീസുകളായ ആശുപത്രി, പാല്‍, പത്രം എന്നിവയെ പണിമുടക്കില്‍ നിന്നൊഴിവാക്കിയിട്ടുണ്ട്. പണിമുടക്കിന്‍റെ ഭാഗമായി സംയുക്ത ട്രേഡ് യൂണിയന്‍ ജില്ലാ കോഓര്‍ഡിനേഷന്‍ കമ്മിറ്റിയുടെ ആഭിമുഖ്യത്തില്‍ ജില്ലാതല പ്രകടനം കോട്ടയത്ത് രാവിലെ നടക്കും. പാലാ, ഈരാറ്റുപേട്ട, കാഞ്ഞിരപ്പള്ളി, ചങ്ങനാശേരി, ഏറ്റുമാനൂര്‍, കടുത്തുരുത്തി, വൈക്കം, പാമ്പാടി നിയോജക മണ്ഡല കേന്ദ്രങ്ങളിലും പ്രദേശികതലങ്ങളിലും കേന്ദ്ര സര്‍ക്കാര്‍ ഓഫീസുകള്‍ക്കു മുമ്പില്‍ പ്രകടനവും പ്രതിഷേധ കൂട്ടായ്മകളും സംഘടിപ്പിച്ചിട്ടുണ്ട്. ഇന്ന് അര്‍ധരാത്രിമുതല്‍ നാളെ അര്‍ധരാത്രി വരെ 24 മണിക്കൂറാണു പണിമുടക്ക്. വിലക്കയറ്റം തടയുക, ലേബര്‍കോഡുകള്‍ പിന്‍വലിക്കുക, പൊതുമേഖലാ ഓഹരിവില്‍പ്പന അവസാനിപ്പിക്കുക, മിനിമം വേതനം 26,000 രൂപയായും പെന്‍ഷന്‍ 9000 രൂപയായും നിശ്ചയിക്കുക സ്‌കീം വര്‍ക്കര്‍മാരെ തൊഴിലാളികളായി അംഗീകരിക്കുക തുടങ്ങിയ ആവശ്യങ്ങളുയര്‍ത്തിയാണു പൊതുപണിമുടക്ക്. പണിമുടക്കിന്‍റെ ഭാഗമായി ഇന്നലെ പഞ്ചായത്ത്, മുനിസിപ്പല്‍ കേന്ദ്രങ്ങളില്‍ വിളംബര ജാഥയും പന്തംകൊളുത്തി പ്രകടനവും നടന്നു. പൊരുതി നേടിയ തൊഴിലവകാശങ്ങള്‍ കവര്‍ന്നെടുക്കാന്‍ ആരെയും അനുവദിക്കില്ലെന്നും തൊഴിലാളികളുടെ താക്കീതായി പൊതുപണിമുടക്ക് മാറുമെന്നും സംയുക്ത ട്രേഡ് യൂണിയന്‍ നേതാക്കളായ സിഐടിയു ജില്ലാ സെക്രട്ടറി കെ. അനില്‍കുമാര്‍, ജില്ലാ പ്രസിഡന്‍റ് റെജി സഖറിയ, എഐടിയുസി ജില്ലാ സെക്രട്ടറി വി.കെ. സന്തോഷ്‌കുമാര്‍, പൗലോസ് കടന്പംകുഴി (കെടിയുസി-എം), റഷീദ് കോട്ടപ്പള്ളി (എന്‍എല്‍സി), സി.കെ. സുഹൈബ (സേവ), സി.എസ്. രാജു (ടിയുസിഐ) എന്നിവര്‍ പത്രസമ്മേളനത്തില്‍ പറഞ്ഞു.

നവമിയെയും അലീനയെയും ആശുപത്രിയിൽ സന്ദർശിച്ച് മന്ത്രി വി.എൻ. വാസവൻ

കോട്ടയം: നവമിക്കും അലീനയ്ക്കും ചികിത്സയടക്കം സർക്കാർ എല്ലാ സഹായവും ഉറപ്പാക്കുമെന്ന് മന്ത്രി വി.എൻ. വാസവൻ. കോട്ടയം മെഡിക്കൽ കോളജ് ആശുപത്രിയിലെ കെട്ടിടഭാഗം തകർന്നുണ്ടായ അപകടത്തിൽ പരിക്കേറ്റ് ചികിത്സയിൽ കഴിയുന്ന വയനാട് മീനങ്ങാടി സ്വദേശി അലീന വിൻസന്‍റിനെയും അപകടത്തിൽ മരിച്ച തലയോലപ്പറമ്പ് ഉമ്മാംകുന്ന് മേൽപോത്ത്കുന്നേൽ ഡി. ബിന്ദുവിന്‍റെ മകൾ നവമിയെയും ആശുപത്രിയിലെത്തി സന്ദർശിക്കുകയായിരുന്നു മന്ത്രി. നവമിയുടെ ചികിത്സയ്ക്കായി എത്തിയപ്പോഴാണ് ബിന്ദു അപകടത്തിൽപ്പെട്ടത്. പത്താംവാർഡിൽ ചികിത്സയിൽ കഴിയുന്ന മുത്തശി ത്രേസ്യാമ്മയ്ക്ക് കൂട്ടിരിപ്പിന് എത്തിയതായിരുന്നു അലീന. ഇരുവരുടെയും ബന്ധുക്കളുമായും മന്ത്രി സംസാരിച്ചു. സർക്കാർ ഇരുവരുടെയും കുടുംബങ്ങൾക്ക് ഒപ്പമുണ്ടെന്ന് മന്ത്രി പറഞ്ഞു. മെഡിക്കൽ കോളജ് പ്രിൻസിപ്പൽ ഡോ. വർഗീസ് പി. പുന്നൂസ്, സൂപ്രണ്ട് ഡോ. ടി.കെ. ജയകുമാർ എന്നിവർ ഒപ്പമുണ്ടായിരുന്നു. അലീന വിൻസന്‍റ് നെഗറ്റീവ് പ്രഷർ ഇന്‍റൻസീവ് കെയർ യൂണിറ്റിലാണ് ചികിത്സയിലുള്ളത്.

താങ്ങായി അമ്മയില്ലാതെ നവമി ചികിത്സയിൽ പ്രവേശിച്ചു

ഗാന്ധിനഗര്‍: കഴിഞ്ഞ വ്യാഴാഴ്ച രാവിലെവരെ തന്‍റെ ചികിത്സയ്ക്കു താങ്ങും തണലുമായി കൂടെ ഉണ്ടായിരുന്ന അമ്മയുടെ വേര്‍പാടില്‍ മനംനൊന്ത് നവമി ഇന്നലെ വീണ്ടും മെഡിക്കല്‍ കോളജ് ആശുപത്രിയില്‍ തുടര്‍ചികിത്സയ്ക്കു പ്രവേശിച്ചു. കോട്ടയം മെഡിക്കല്‍ കോളജ് ആശുപത്രിയില്‍ കെട്ടിടം തകര്‍ന്നുണ്ടായ അപകടത്തില്‍ മരിച്ച തലയോലപ്പറമ്പ് സ്വദേശിനി ബിന്ദുവിന്‍റെ മകള്‍ നവമിയാണ് ഇന്നലെ ഭക്ഷണം വിളമ്പിത്തരാനും താങ്ങിപ്പിടിക്കാനും അമ്മ ഇല്ലാതെ ആശുപത്രിയിലെത്തിയത്. ഇന്നലെ രാവിലെ 8.30നാണു നവമി വീണ്ടും മെഡിക്കല്‍ കോളജില്‍ ചികിത്സയ്ക്കെത്തിയത്. മെഡിക്കല്‍ കോളജില്‍ ന്യൂറോസര്‍ജന്‍ അടങ്ങുന്ന വിദഗ്ധസംഘമാണ് നവമിയെ ചികിത്സിക്കുന്നത്. അമ്മ ബിന്ദുവിന്‍റെ സഹോദരിയുടെ മകള്‍ ദിവ്യയും ഭര്‍ത്താവ് ഗിരീഷുമാണ് നവമിക്കൊപ്പം എത്തിയിരിക്കുന്നത്. കഴുത്തിന് പുറകിലും നട്ടെല്ലിന്‍റെ ഭാഗത്തും വേദന അനുഭവപ്പെട്ടാണ് നവമി മെഡിക്കല്‍ കോളജ് ആശുപത്രിയില്‍ ചികിത്സ തേടുന്നത്. തുടര്‍ന്ന് പരിശോധിച്ച ഡോക്ടര്‍മാര്‍ ആശുപത്രിയില്‍ അഡ്മിറ്റാകാനും മൂന്നാഴ്ചത്തേക്ക് മരുന്ന് നല്‍കാമെന്നും ഇതുകൊണ്ട് മാറിയില്ലെങ്കില്‍ ഓപ്പറേഷന്‍ നടത്താമെന്നും അറിയിച്ചിരുന്നു. ഇതേത്തുടര്‍ന്നാണ് ഈ മാസം ഒന്നിന് നവമി 14-ാം വാര്‍ഡില്‍ അഡ്മിറ്റായത്. കൂട്ടിന് അമ്മ ബിന്ദുവും പിതാവ് വിശ്രുതനും ഉണ്ടായിരുന്നു. എന്നാല്‍ കഴിഞ്ഞ വ്യാഴാഴ്ച രാവിലെ 10.30 ഓടെ ജനങ്ങളെ നടുക്കിയ സംഭവമുണ്ടായി. മെഡിക്കല്‍ കോളജ് ആശുപത്രിയുടെ കെട്ടിട ഭാഗങ്ങള്‍ ഇടിഞ്ഞ് നവമിയുടെ അമ്മ ബിന്ദു മരണപ്പെട്ടു. തുടര്‍ന്ന് അമ്മയുടെ മൃതദേഹത്തിനൊപ്പം വീട്ടിലേക്ക് പോയ നവമി ഇന്നലെയാണ് ആശുപത്രിയില്‍ തിരിച്ചെത്തിയത്. ജില്ലാ കളക്ടര്‍ ജോണ്‍ വി. സാമുവലിന്‍റെ നേതൃത്വത്തിലുള്ള സംഘം നവമിയെ സന്ദര്‍ശിച്ചശേഷം ചികിത്സയ്ക്ക് എല്ലാ സൗകര്യവും ഒരുക്കിയതായി അറിയിച്ചു. അത്യാഹിത വിഭാഗം സിഎല്‍ മൂന്ന് വിഭാഗത്തിലാണ് നവമിയെ പ്രവേശിപ്പിച്ചിരിക്കുന്നത്. മെഡിക്കല്‍ കോളജ് പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ്, സൂപ്രണ്ട് ഡോ. ടി.കെ. ജയകുമാര്‍, എഡിഎം എസ്. ശ്രീജിത്ത്, ജില്ലാ ഇന്‍ഫര്‍മേഷന്‍ ഓഫീസര്‍ എ. അരുണ്‍ കുമാര്‍ എന്നിവരും ഒപ്പമുണ്ടായിരുന്നു.

മെഡിക്കല്‍ കോളജ് അപകടം: മുഖം മിനുക്കാന്‍ സിപിഎം

കോട്ടയം: മെഡിക്കല്‍ കോളജ് ആശുപത്രിയില്‍ കെട്ടിടം വീണ് തലയോലപ്പറമ്പ് സ്വദേശിനി ബിന്ദു (52) മരിച്ച സംഭവം സിപിഎമ്മിനുണ്ടാക്കിയ ആഘാതം തടയാന്‍ പാര്‍ട്ടി സംവിധാനം ഒരുങ്ങുന്നു. സര്‍ക്കാര്‍ ചെലവില്‍ അറ്റകുറ്റപ്പണി, ഫണ്ട് പിരിവിലൂടെ പുതിയ വീട്, അമ്മയുടെ ക്ഷേമത്തിന് ഫണ്ട് അനുവദിക്കുക, മകള്‍ നവമിയുടെ ചികിത്സ, വിദ്യാഭ്യാസം എന്നിവയിലൂടെ നഷ്ടപ്പെട്ട ഇമേജ് വീണ്ടെടുക്കാനാണ് ശ്രമം. ഇടിഞ്ഞുവീണ കെട്ടിടത്തിനുള്ളില്‍ ആരുമില്ലെന്നും ആ ഭാഗം ഉപേക്ഷിക്കപ്പെട്ടതാണെന്നും ആരോഗ്യമന്ത്രി വീണാ ജോര്‍ജും സ്ഥലം എംഎല്‍എകൂടിയായ മന്ത്രി വി.എന്‍. വാസവനും നടത്തിയ നിരുത്തരവാദപരമായ പ്രസ്താവനകളാണ് തെരച്ചില്‍ ഒഴിവാക്കാനും ബിന്ദു മണ്ണിനടിയില്‍ മരിക്കാനും ഇടയാക്കിയതെന്ന പൊതുവിമര്‍ശനത്തെ ചെറുക്കാനാണ് പാര്‍ട്ടി ശ്രമം. രണ്ടു മന്ത്രിമാരും പാര്‍ട്ടി സുരക്ഷയില്‍ ബിന്ദുവിന്‍റെ വീട് സന്ദര്‍ശിച്ചെങ്കിലും ഇതൊന്നും കുടുംബത്തിന്‍റെ വേദനയ്ക്കും സമൂഹത്തിന്‍റെ വിമര്‍ശനത്തിനും പരിഹാരമാകുന്നില്ല. തനിക്ക് ഗുരുതര വീഴ് പറ്റിയെന്നും സംഭവത്തില്‍ ഖേദിക്കുന്നുവെന്നും പറയാനുള്ള ധാര്‍മികത മന്ത്രി വീണ കാണിച്ചില്ലെന്ന് ബന്ധുക്കള്‍ക്കും പരാതിയുണ്ട്. മകള്‍ നവമിയെ വിഐപി പരിഗണനയില്‍ ഇന്നലെ മെഡിക്കല്‍ കോളജില്‍ ശസ്ത്രക്രിയയ്ക്ക് പ്രവേശിപ്പിക്കുകയും വിദഗ്ധ ഡോക്ടര്‍മാരുടെ ടീം ശസ്ത്രക്രിയാ ചുമതല ഏറ്റെടുക്കുകയും ചെയ്തു. സര്‍ക്കാരാണ് ചികിത്സാ ചെലവ് വഹിക്കുന്നത്. ജില്ലാ കളക്ടറും ഇന്നലെ ആശുപത്രിയിലെത്തി. മകന്‍ നവനീതിന് കോട്ടയം മെഡിക്കല്‍ കോളജില്‍ താത്കാലിക ജോലി നല്‍കി മുഖം രക്ഷിക്കാനുള്ള ശ്രമം വീട്ടുകള്‍ തള്ളിക്കളഞ്ഞു. പതിറ്റാണ്ടുകളായി താത്കാലിക ജോലി ചെയ്യുന്ന ഒട്ടേറെപേര്‍ മെഡിക്കല്‍ കോളജിലുണ്ടെന്നിരിക്കെ ഒരിക്കലും സ്ഥിരം നിയമനം ലഭിക്കില്ല. ബിന്ദുവിന്‍റെ മരണശേഷം മെഡിക്കല്‍ കോളജിലും വിവിധയിടങ്ങളിലുമുണ്ടായ പ്രതിഷേധങ്ങളെ സിപിഎം പ്രവര്‍ത്തകരെ നേരിട്ടിറക്കി പ്രതിരോധിക്കാനാണ് നീക്കം. ശക്തമായ പ്രതിഷേധം ഭയന്ന് പുതിയ സര്‍ജറി ബ്ലോക്ക് ഉദ്ഘാടനം മുന്നോട്ടുവയ്ക്കാനാണ് തീരുമാനം. ചടങ്ങുകളൊന്നുമില്ലാതെ അവിടെ അടുത്തയാഴ്ച മുതല്‍ പ്രവര്‍ത്തനം തുടങ്ങുകയും ചെയ്യും. മന്ത്രി വീണയുടെ ജില്ലയിലെ എല്ലാ പരിപാടികളിലും കരിങ്കൊടി കാണിക്കാനും പ്രതിഷേധം ശക്തിപ്പെടുത്താനുമാണ് തീരുമാനം. മെഡിക്കല്‍ കോളജിലുണ്ടായ ദാരുണ സംഭവം പൊതുസമൂഹത്തില്‍ സര്‍ക്കാര്‍ വിരുദ്ധ വികാരം ഉണ്ടാക്കിയതായി സിപിഐയും കേരള കോണ്‍ഗ്രസ്-എമ്മും കരുതുന്നു. അടുത്തുവരുന്ന തദ്ദേശതെരഞ്ഞെടുപ്പിലും നിയമസഭാ തെരഞ്ഞെടുപ്പിലും മെഡിക്കല്‍ കോളജ് അപകടം തിരിച്ചടിയുണ്ടാക്കുമെന്നാണ് ഇരുപാര്‍ട്ടികളിലും ഉയരുന്ന അഭിപ്രായം.

സൗജന്യ മെഗാ മെഡിക്കൽ ക്യാമ്പ്

കോരുത്തോട്: കരുണാഭവൻ മെഡിക്കൽ സെന്‍ററിന്‍റെ ആഭിമുഖ്യത്തിൽ മുണ്ടക്കയം മെഡിക്കൽ ട്രസ്റ്റ് ആശുപത്രിയുടെ സഹകരണത്തോടെ സൗജന്യ മെഗാ മെഡിക്കൽ ക്യാമ്പ് സംഘടിപ്പിച്ചു. കോരുത്തോട് കരുണാഭവൻ മെഡിക്കൽ സെന്‍ററിൽ നടത്തിയ മെഡിക്കൽ ക്യാമ്പ് സെന്‍റ് ജോർജ് പള്ളി അസി. വികാരി ഫാ. നോയൽ കളപുരയ്ക്കൽ ഉദ്ഘാടനം ചെയ്തു. മുണ്ടക്കയം മെഡിക്കൽ ട്രസ്റ്റ് ആശുപത്രി അഡ്മിനിസ്ട്രേറ്റർ ഫാ. ദീപു പുത്തൻപുര അധ്യക്ഷത വഹിച്ചു. ആരാധനാ സന്യാസിനി സമൂഹം കാഞ്ഞിരപ്പള്ളി പ്രൊവിൻഷ്യൽ സിസ്റ്റർ അമല കിടങ്ങത്താഴെ മുഖ്യപ്രഭാഷണം നടത്തി. ആശുപത്രി അസിസ്റ്റന്‍റ് ഡയറക്ടർ ഫാ. ആൻഡ്രൂസ് പേഴുംകാട്ടിൽ, കരുണാഭവൻ മെഡിക്കൽ സെന്‍റർ അഡ്മിനിസ്ട്രേറ്റർ സിസ്റ്റർ ക്ലെറിൻ, കോരുത്തോട് പഞ്ചായത്ത് മുൻ വൈസ് പ്രസിഡന്‍റ് ടോംസ് കുര്യൻ എന്നിവർ പ്രസംഗിച്ചു. ക്യാന്പിൽ ജനറൽ മെഡിസിൻ, ഗൈനക്കോളജി, ശിശുരോഗം, അസ്ഥിരോഗം, ഇഎൻടി, ശ്വാസകോശ രോഗം തുടങ്ങിയ വിഭാഗങ്ങളിലെ വിദഗ്ധരായ ഡോക്ടർമാരുടെ സേവനം ലഭ്യമായിരുന്നു. ഫിസിയോതെറാപ്പി വിഭാഗത്തിന്‍റെ വിവിധ സേവനങ്ങളും രക്തഗ്രൂപ്പ് നിർണയം, പ്രമേഹ പരിശോധന, കൊളസ്ട്രോൾ പരിശോധന തുടങ്ങിയ ലാബ് സേവനങ്ങളും ക്യാമ്പിനോടനുബന്ധിച്ച് സൗജന്യമായി ലഭ്യമാക്കി.

റബർമരങ്ങൾ വൈദ്യുതിലൈനിലേക്ക് ചാഞ്ഞുനിൽക്കുന്നതു ഭീഷണിയാകുന്നു

പൊൻകുന്നം: റബർമരങ്ങൾ വൈദ്യുതി ലൈനിലേക്ക് ചാഞ്ഞു നിൽക്കുന്നത് ഭീഷണിയാകുന്നു. ഇരുപതാംമൈൽ പുളിക്കൽ ഗേറ്റ്-പന്നിക്കുഴി റോഡിലാണ് റബർ മരങ്ങൾ ഭീഷണിയാകുന്നത്. ചെറിയ കാറ്റ് വീശിയാൽ പോലും ലൈനിലേക്ക് മരങ്ങൾ ഒടിഞ്ഞു വീഴുന്നത് പതിവാണ്. കഴിഞ്ഞ ദിവസം ലൈനിൽ മരം വീണതിനെത്തുടർന്ന് മൂന്നു ദിവസത്തോളം വൈദ്യുതി മുടങ്ങിയിരുന്നു. അപകടാവസ്ഥയിലുള്ള മരങ്ങൾ വെട്ടിമാറ്റണമെന്നാവശ്യപ്പെട്ട് പ്രദേശവാസികൾ ചിറക്കടവ് പഞ്ചായത്ത് സെക്രട്ടറിക്കും വാർഡ് മെംബർക്കും കഴിഞ്ഞദിവസം പരാതി നൽകിയിരുന്നു. എന്നാൽ, ഇരുവരെ നടപടിയായിട്ടില്ലെന്നു നാട്ടുകാർ ആരോപിക്കുന്നു.

കെവിഎംഎസ് കവലയിൽ ദേശീയപാതയോരം കാടുമൂടി

പൊൻകുന്നം: കെവിഎംഎസ് കവല മുതൽ ഗവൺമെന്‍റ് ഹൈസ്‌കൂൾ വരെയുള്ള ഭാഗത്ത് നടപ്പാതയും ഓടയുടെ മുകളിലെ സ്ലാബും മൂടി കാടുവളർന്നു. നാലു വർഷത്തിനിടെ മൂന്നുപേർ അപകടത്തിൽ മരിച്ച ഭാഗത്ത് ഇപ്പോൾ കാൽനടയാത്രക്കാർ റോഡിലൂടെ ഇറങ്ങി നടക്കേണ്ട ഗതികേടിലാണ്. സദാസമയവും കാൽനടയാത്രക്കാരുടെ തിരക്കാണിവിടെ. പൊൻകുന്നം ഗവ. വിഎച്ച്എസ്എസിലെ വിദ്യാർഥികൾ രാവിലെയും വൈകുന്നേരവും കൂട്ടമായി നടന്നുപോകുന്ന ഭാഗത്തെ നടപ്പാതയിലെ കാടുതെളിക്കാൻ നടപടിയെടുക്കണമെന്ന ആവശ്യം ശക്തമായിട്ടുണ്ട്. ദേശീയപാതയോരം തെളിക്കാൻ ദേശീയപാതാവിഭാഗം തയാറാകുന്നില്ലെന്ന് കാലങ്ങളായി വ്യാപാരികളും പൊതുജനങ്ങളും പരാതിപ്പെടുന്നതാണ്.

ഫിറ്റ്നസ് സർട്ടിഫിക്കറ്റുകൾ പരിശോധിക്കണമെന്ന്

കാഞ്ഞിരപ്പള്ളി: കോട്ടയം മെഡിക്കൽ കോളജിലുണ്ടായ ദാരുണ സംഭവത്തിന്‍റെ പശ്ചാത്തലത്തിൽ സർക്കാരിന് കീഴിലുള്ള എല്ലാ പൊതുസ്ഥാപനങ്ങളുടെയും ഫിറ്റ്നസ് സർട്ടിഫിക്കറ്റുകൾ അടിയന്തരമായി പൊതുമരാമത്ത് വകുപ്പോ ബന്ധപ്പെട്ട അധികൃതരോ പരിശോധിച്ച് മേൽനടപടികൾ സ്വീകരിക്കണമെന്ന് കാഞ്ഞിരപ്പള്ളി യംഗ് മെൻസ് അസോസിയേഷൻ ഓർഗനൈസിംഗ് കമ്മിറ്റി യോഗം ആവശ്യപ്പെട്ടു. സ്വകാര്യ മേഖലയിൽ പ്രവർത്തിക്കുന്ന സ്ഥാപനങ്ങളിൽ വിവിധ തരത്തിലുള്ള പരിശോധനകൾ നടത്തി ബുദ്ധിമുട്ടിക്കാൻ മത്സരിക്കുന്ന ഉദ്യോഗസ്ഥവൃന്ദം കാലപ്പഴക്കം ചെന്ന ഇത്തരം സംവിധാനങ്ങൾ പൊതുജനങ്ങളുടെ ജീവൻവച്ച് പന്താടുന്നതിന് മൗനാനുവാദം നൽകുന്നത് അങ്ങേയറ്റം ഞെട്ടിപ്പിക്കുന്നതാണെന്നു യോഗം പാസാക്കിയ പ്രമേയം പറഞ്ഞു. യോഗത്തിൽ പ്രസിഡന്‍റ് ജയിംസ് പള്ളിവാതുക്കൽ അധ്യക്ഷത വഹിച്ചു. അഭിലാഷ് ചന്ദ്രൻ, മാത്തച്ചൻ വെള്ളാത്തോട്ടം, സെബാൻ കടപ്ലാക്കൽ, വി.എം. താജുദീൻ, ബിമൽ ആന്‍റണി, കെ.ഐ. ഷെമീർ ഖാൻ, ബിജു മുണ്ടുവേലിക്കുന്നേൽ, കൊച്ചുമോൻ ഒട്ടയ്ക്കൻ, മാർട്ടിൻ മാത്യു, സിബി വെങ്ങാലൂർ എന്നിവർ പ്രസംഗിച്ചു.

വായനപക്ഷാചരണവും ഐ.വി. ദാസ് അനുസ്മരണവും

തെക്കേത്തുകവല: ഗ്രാമീണ ഗ്രന്ഥശാലയുടെ വായനപക്ഷാചരണ സമാപനവും ഐ.വി. ദാസ് അനുസ്മരണവും വാഴൂർ ബ്ലോക്ക് പഞ്ചായത്തംഗം ഷാജി പാമ്പൂരി ഉദ്ഘാടനം ചെയ്തു. ഗ്രന്ഥശാലാ പ്രസിഡന്‍റ് പി.കെ. ബാബുലാൽ അധ്യക്ഷത വഹിച്ചു. താലൂക്ക് ലൈബ്രറി കൗൺസിൽ വൈസ്പ്രസിഡന്‍റ് ടി.വി. ഹർഷകുമാർ അനുസ്മരണപ്രഭാഷണം നടത്തി. വായനമത്സര വിജയികളായ വി.ജി. ആദിനാഥ്, ശ്രത അനിൽ, ആത്മിക പ്രകാശ്, അരുണിമ അനിൽ എന്നിവർക്ക് സമ്മാനങ്ങൾ വിതരണം ചെയ്തു. പ്രശാന്ത്, അർച്ചന സദാശിവൻ, വി.ആർ. അനിൽ, കെ.ആർ. അഭിജിത്ത് എന്നിവർ പ്രസംഗിച്ചു.

മഹാത്മാഗാന്ധി ഗ്രാമ സ്വരാജ് വികസന സെമിനാർ

പെരുവന്താനം: കോൺഗ്രസ് പെരുവന്താനം മണ്ഡലം കമ്മിറ്റിയുടെ നേതൃത്വത്തിൽ മഹാത്മാഗാന്ധി ഗ്രാമ സ്വരാജ് വികസന സെമിനാർ പെരുവന്താനം പഞ്ചായത്ത് കമ്യൂണിറ്റി ഹാളിൽ നടത്തി. കെപിസിസി ജനറൽ സെക്രട്ടറി എസ്. അശോകൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ഷിനോജ് ജേക്കബ് അധ്യക്ഷത വഹിച്ചു. ഡിസിസി ജനറൽ സെക്രട്ടറി സിറിയക് തോമസ്, അഴുത ബ്ലോക്ക് പഞ്ചായത്ത് മെംബർ കെ.ആർ. വിജയൻ, ഡിസിസി സെക്രട്ടറി പി.എ. അബ്ദുൾ റഷീദ്, കോൺഗ്രസ് ഏലപ്പാറ ബ്ലോക്ക് കമ്മിറ്റി പ്രസിഡന്‍റ് ജോർജ് ജോസഫ് കൂറുംപുറം, തൊടുപുഴ ബ്ലോക്ക്‌ പ്രസിഡന്‍റ് ഷിബിലി സാഹിബ്, എം.കെ. ഷാജഹാൻ മഠത്തിൽ, പഞ്ചായത്ത് പ്രസിഡന്‍റ് നിജിനി ഷംസുദീൻ, പഞ്ചായത്ത് വൈസ് പ്രസിഡന്‍റ് ഇ.ആർ. ബൈജു തുടങ്ങിയവർ പ്രസംഗിച്ചു.

മുണ്ടക്കയത്ത് കഞ്ചാവുമായി ഒരാൾ പിടിയിൽ

മുണ്ടക്കയം: മുണ്ടക്കയത്ത് കഞ്ചാവുമായി ഒരാൾ പിടിയിൽ. ഇതരസംസ്ഥാനങ്ങളിൽനിന്ന് കഞ്ചാവ് ഇറക്കുമതി ചെയ്തു വില്പന നടത്തിവന്ന അഘോരി എന്നറിയപ്പെടുന്ന കോരുത്തോട് കൊമ്പുകുത്തി സ്വദേശി ഹരികൃഷ്ണനെയാണ് കാഞ്ഞിരപ്പള്ളി എക്‌സൈസ് പിടികൂടിയത്. ഇയാളിൽനിന്ന് 1.40 കിലോ കഞ്ചാവ് പിടിച്ചെടുത്തു. ഒഡീഷയിൽനിന്ന് വൻതോതിൽ കഞ്ചാവ് സംസ്ഥാനത്ത് എത്തിച്ച് മുണ്ടക്കയത്തും സമീപ പ്രദേശങ്ങളിലും മൊത്തമായും ചില്ലറയായും വില്പന നടത്തി വന്നിരുന്ന അഘോരി മയക്കുമരുന്ന് മാഫിയയുടെ പ്രധാന കണ്ണിയാണ്. കുറച്ചു നാളുകളായി ഇ‍യാളുടെ നീക്കങ്ങൾ കാഞ്ഞിരപ്പള്ളി എക്‌സൈസ് സംഘത്തിന്‍റെ നിരീക്ഷണത്തിലായിരുന്നു. ഇയാൾ ഒഡീഷയിൽനിന്ന് കഞ്ചാവുമായി ട്രെയിൻമാർഗം സംസ്ഥാന അതിർത്തി കടക്കുകയും പിന്നീട് പല ബസുകളിലായി സഞ്ചരിച്ച് മുണ്ടക്കയം ബസ് സ്റ്റാൻഡിൽ എത്തുകയുമായിരുന്നു. ഈ സമയം കാത്തുനിന്ന എക്‌സൈസ് സംഘം ഇയാളെ പിടികൂടുകയായിരുന്നു. കാഞ്ഞിരപ്പള്ളി എക്‌സൈസ് ഇൻസ്‌പെക്ടർ സുധി കെ. സത്യപാലൻ, പ്രിവന്‍റീവ് ഓഫീസർമാരായ ഇ.സി. അരുൺകുമാർ, കെഎൻ. സുരേഷ് കുമാർ, സിവിൽ എക്‌സൈസ് ഓഫീസർമാരായ പി.എ. ഷൈജു, കെ.വി. വിശാഖ്, സനൽ മോഹൻദാസ്, പി.എം. അമൽ, ആനന്ദ് ബാബു, ടി.എസ്. രതീഷ്, സി.ജെ. നിയാസ്, വനിതാ സിവിൽ എക്‌സൈസ് ഓഫീസർ മീര എം. നായർ, സിവിൽ എക്‌സൈസ് ഓഫീസർ ഡ്രൈവർ ജോഷി എന്നിവരുടെ നേതൃത്വത്തിലാണ് പ്രതിയെ പിടികൂടിയത്.

വിദ്യാഭ്യാസമന്ത്രിയുടെ പ്രസ്താവന അപലപനീയം: കത്തോലിക്ക കോൺഗ്രസ്

കാഞ്ഞിരപ്പള്ളി: മതന്യൂനപക്ഷ വിദ്യാലയങ്ങളിലെ മതപ്രാർഥനകൾ നിർത്തലാക്കാനുള്ള ശ്രമത്തിന്‍റെ ഭാഗമായുള്ള വിദ്യാഭ്യാസമന്ത്രിയുടെ പ്രസ്താവന അപലപനീയമെന്ന് കത്തോലിക്ക കോൺഗ്രസ് കാഞ്ഞിരപ്പള്ളി രൂപതാസമിതി. പള്ളിക്കൊപ്പം പള്ളിക്കൂടം എന്ന നയം സ്വീകരിച്ച് കേരളത്തിന്‍റെ എല്ലാ മേഖലകളിലുമുള്ളവർക്ക് ജാതിമത ഭേദമെന്യേ വിദ്യാഭ്യാസം എത്തിച്ച ചാവറയച്ചന്‍റെ പാരമ്പര്യം പിന്തുടരുന്നവരാണ് കേരള കത്തോലിക്കാ സമൂഹം. കത്തോലിക്കാ സ്ഥാപനങ്ങളിൽ അന്യമതസ്ഥരുടെ മേൽ ക്രിസ്ത്യൻ പ്രാർഥനകൾ അടിച്ചേൽപ്പിക്കാറില്ലെന്നും കേട്ടുകേൾവിയുടെ പുറത്ത് പതിറ്റാണ്ടുകളായി നടന്നുവരുന്ന പാരമ്പര്യം ഒറ്റയടിക്ക് നിർത്താനുള്ള നീക്കം ശരിയായില്ലെന്നും രൂപതാസമിതി വിലയിരുത്തി. രൂപത ഡയറക്ടർ ഫാ. ജസ്റ്റിൻ മതിയത്ത് യോഗം ഉദ്ഘാടനം ചെയ്തു. രൂപത പ്രസിഡന്‍റ് കെ.കെ. ബേബി കണ്ടത്തിൽ അധ്യക്ഷത വഹിച്ചു. ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, ഗ്ലോബൽ സമിതിയംഗം ടെസി ബിജു പാഴിയാങ്കൽ, രൂപത ഭാരവാഹികളായ ജോസഫ് പണ്ടാരക്കളം, ജോജോ തെക്കുംചേരിക്കുന്നേൽ, സണ്ണിക്കുട്ടി അഴകംപ്രായിൽ, സിനി ജിബു നീറനാക്കുന്നേൽ എന്നിവർ പ്രസംഗിച്ചു.

എരുമേലി ബസ് സ്റ്റാൻഡിലെ കെട്ടിടം സുരക്ഷിതമല്ല: ആർഡിഒ സന്ദർശിച്ചു

എരുമേലി: പ്രൈവറ്റ് ബസ് സ്റ്റാൻഡിലെ പഞ്ചായത്ത്‌ വക ഷോപ്പിംഗ് കോംപ്ലക്സ് കെട്ടിടം സുരക്ഷിതമല്ലെന്നു കോട്ടയം ആർഡിഒ രഞ്ജിത്ത് വിലയിരുത്തി. ഇന്നലെ പഞ്ചായത്തംഗങ്ങളുടെയും ഉദ്യോഗസ്ഥരുടെയും സാന്നിധ്യത്തിലാണ് ആർഡിഒ കെട്ടിടം പരിശോധിച്ചത്. കെട്ടിടം സുരക്ഷിതമല്ലാത്തതിനാൽ രണ്ടാം നിലയിൽ പ്രവർത്തിക്കുന്ന വില്ലേജ് ഓഫീസ്, പൊതുമരാമത്ത് സെക്‌ഷൻ ഓഫീസ്, ലൈബ്രറി ഉൾപ്പെടെയുള്ളവ മാറ്റി സ്ഥാപിക്കേണ്ടിവരുമെന്നു പരിശോധനയിൽ വിലയിരുത്തി. പത്തോളം കടമുറികൾ, ശുചിമുറികൾ, യാത്രക്കാരുടെ വിശ്രമ ഇരിപ്പിടങ്ങൾ ഉൾപ്പെടെയാണ് താഴെ നിലയിലുള്ളത്. ഇത് അപകട സാധ്യതയിലാണെന്നു പഞ്ചായത്ത്‌ പ്രസിഡന്‍റ് മറിയാമ്മ സണ്ണി പറഞ്ഞു. ഇതു സംബന്ധിച്ച് റിപ്പോർട്ട് തയാറാക്കി നൽകാൻ ആർഡിഒ പഞ്ചായത്ത് പ്രസിഡന്‍റിനു നിർദേശം നൽകി. കെട്ടിടത്തിന്‍റെ മേൽക്കൂരയിലെ കോൺക്രീറ്റ് ദുർബലമാണ്. കോൺക്രീറ്റ് കഷണങ്ങൾ തുടർച്ചയായി അടർന്നുവീഴുകയാണ്. തറയിലെ ടൈലുകൾ പൊട്ടിപ്പൊളിഞ്ഞ നിലയിലാണ്. യാത്രക്കാരുടെ ഇരിപ്പിടങ്ങളുടെ ഭാഗത്ത്‌ പൊട്ടിപ്പൊളിഞ്ഞ ടൈലുകളിൽ ചവിട്ടി ആളുകൾ വീഴാതിരിക്കാൻ മുന്നറിയിപ്പായി കയർ കെട്ടിയിട്ടുണ്ട്. അര നൂറ്റാണ്ടിലധികം പഴക്കമുണ്ട് എരുമേലി പ്രൈവറ്റ് ബസ് സ്റ്റാൻഡ് കെട്ടിടത്തിന്. കെട്ടിടം സുരക്ഷിതമല്ലെന്നു കഴിഞ്ഞ ദിവസം ദീപിക വാർത്ത പ്രസിദ്ധീകരിച്ചിരുന്നു. കെട്ടിടം അൺഫിറ്റ്‌ ആണെന്നു പഞ്ചായത്ത്‌ അസിസ്റ്റന്‍റ് എൻജിനിയർ വർഷങ്ങൾക്ക് മുമ്പ് സർട്ടിഫിക്കറ്റ് നൽകിയതാണ്. പല തവണ പഞ്ചായത്ത്‌ ബജറ്റുകളിൽ പുതിയ കെട്ടിടം നിർമിക്കാൻ പദ്ധതികൾ പ്രഖ്യാപിച്ചതാണ്. മോളി മാത്യു പഞ്ചായത്ത്‌ പ്രസിഡന്‍റായിരുന്ന മുൻ യുഡിഎഫ് ഭരണത്തിൽ പുതിയ കെട്ടിടം നിർമിക്കാൻ നഗര ധനകാര്യ വികസന കോർപറേഷൻ വായ്പ അനുവദിച്ചതുമാണ്. സ്റ്റാൻഡ് പ്രവർത്തിക്കുന്ന സ്ഥലം ഈട് നൽകിയാലാണ് വായ്പ നൽകുമെന്ന് ഉറപ്പ് ലഭിച്ചത്. എന്നാൽ, സ്ഥലത്തിന്‍റെ രേഖകൾ പൂർണമായും ലഭിക്കാത്തതിനാൽ വായ്പ വാങ്ങാൻ കഴിഞ്ഞില്ല. ഇതോടെ പുതിയ കെട്ടിടം നിർമിക്കാനുള്ള നീക്കം പിന്നീട് ബജറ്റിലെ പ്രഖ്യാപനങ്ങളിൽ മാത്രമായി മാറുകയായിരുന്നു. ഇന്നലെ ആർഡിഒ നടത്തിയ പരിശോധനയിൽ പഞ്ചായത്ത്‌ വൈസ് പ്രസിഡന്‍റ് വി.ഐ. അജി, അസിസ്റ്റന്‍റ് എൻജിനിയർ എസ്. കൃഷ്ണനുണ്ണി, അസിസ്റ്റന്‍റ് സെക്രട്ടറി മുഹമ്മദ്‌ ഷാഫി, ഓവർസിയർ രഞ്ജിത്ത്, അഞ്ജന എന്നിവർ പങ്കെടുത്തു.

ലാബ് ഉദ്ഘാടനം ചെയ്തു

മരങ്ങാട്ടുപിള്ളി: മരങ്ങാട്ടുപിള്ളി പഞ്ചായത്തിലെ ആണ്ടൂര്‍ ആയുര്‍വേദിക് ഡിസ്‌പെന്‍സറിയിൽ കേന്ദ്രസര്‍ക്കാരിന്‍റെ കീഴില്‍ പ്രവര്‍ത്തിക്കുന്ന രാജീവ് ഗാന്ധി സെന്‍റര്‍ ഫോര്‍ ബയോ ടെക്‌നോളജി ലാബിന്‍റെ ഉദ്ഘാടനം ജോസ് കെ. മാണി എംപി നിർവഹിച്ചു. പഞ്ചായത്ത് പ്രസിഡന്‍റ് ബെല്‍ജി ഇമ്മാനുവല്‍ അധ്യക്ഷത വഹിച്ചു. ജില്ലാ പഞ്ചായത്ത് മെംബര്‍ പി.എം. മാത്യു, സഹകരണബാങ്ക് പ്രസിഡന്‍റ് എം.എം. തോമസ്, ബ്ലോക്ക് മെംബര്‍മാരായ ജോണ്‍സണ്‍ ജോസഫ് പുളിക്കല്‍, പി.എന്‍. രാമചന്ദ്രന്‍, വൈസ് പ്രസിഡന്‍റ് ഉഷാ രാജു, സ്ഥിരം സമിതി അംഗങ്ങളായ സിറിയക് മാത്യു, മെഡിക്കല്‍ ഓഫീസര്‍ തുഷാര മാത്തുക്കുട്ടി,രാജീവ് ഗാന്ധി സെന്‍റര്‍ ഫോര്‍ ബയോ ടെക്‌നോളജി പ്രതിനിധി സാബു, പഞ്ചായത്ത് മെംബർമാർ തുടങ്ങിയവര്‍ പ്രസംഗിച്ചു.

47-ാം സ്നേഹവീടിന്‍റെ താക്കോൽദാനം

കൊഴുവനാല്‍: മനുഷ്യനെ സ്നേഹിക്കുകയും സേവിക്കുകയും ചെയ്യുന്നതാണ് ഏറ്റവും വലിയ ഈശ്വരപൂജയെന്ന് അരുണാപുരം ശ്രീരാമകൃഷ്ണ ആശ്രമം മഠാധിപതി സ്വാമി വീതസംഗാനന്ദ. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നേതൃത്വം നൽകുന്ന സ്നേഹദീപം പദ്ധതി പ്രകാരമുള്ള 47-ാം സ്നേഹവീടിന്‍റെ താക്കോല്‍ സമര്‍പ്പണം മേവടയില്‍ നിര്‍വഹിക്കുകയായിരുന്നു സ്വാമി വീതസംഗാനന്ദ. യോഗത്തില്‍ ചേര്‍പ്പുങ്കല്‍ പബ്ലിക് ലൈബ്രറി പ്രസിഡന്‍റ് കെ.ജെ. ജോണ്‍ കോയിക്കല്‍ അധ്യക്ഷത വഹിച്ചു. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍, പഞ്ചായത്ത് മെംബര്‍മാരായ ആനീസ് കുര്യന്‍, മെര്‍ലിന്‍ ജയിംസ്, സ്നേഹദീപം സൊസൈറ്റി ഭാരവാഹികളായ ജോസ് ടി. ജോണ്‍ തോണക്കരപ്പാറയില്‍, പി.ജി. ജഗന്നിവാസന്‍ പിടിക്കാപ്പറമ്പില്‍, സിബി പുറ്റനാനിക്കല്‍, ജയിംസ് കോയിപ്ര, മാത്തുക്കുട്ടി വലിയപറമ്പില്‍, ഷാജി ഗണപതിപ്ലാക്കല്‍, കെ.എം. ജോര്‍ജ് കോയിപ്പുറം എന്നിവര്‍ പ്രസംഗിച്ചു.

അസംഘടിത തൊഴിലാളി സംഗമം

പാലാ: പ്ലാറ്റിനം ജൂബിലി വര്‍ഷത്തില്‍ അസംഘടിത തൊഴിലാളികള്‍ക്ക് താങ്ങും തണലുമായി പാലാ രൂപത. പ്ലാറ്റിനം ജൂബിലി വര്‍ഷത്തോടനുബന്ധിച്ച് നടന്ന അസംഘടിത തൊഴിലാളികളുടെ പ്രാതിനിധ്യ സ്വഭാവത്തോടെയുള്ള സമ്മേളനം മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്തു. സമ്മേളനത്തില്‍ 75 അസംഘടിത തൊഴിലാളി പ്രതിനിധികള്‍ പങ്കെടുത്തു. കേരള ലേബര്‍ മൂവ്മെന്‍റിന്‍റെ പ്രവര്‍ത്തനങ്ങളെ ശ്ലാഘിച്ച മാര്‍ കല്ലറങ്ങാട്ട്, കൂടുതല്‍ തൊഴിലാളികളെ മുന്നേറ്റത്തിലേക്കു കൊണ്ടുവരാന്‍ ശ്രമിക്കണമെന്നും അസംഘടിതരായി നില്‍ക്കുമ്പോള്‍ നാം ബലഹീനരാണെന്നും അസംഘടിത മേഖലയിലെ തൊഴിലാളികള്‍ക്ക് കൂടുതല്‍ സ്വാതന്ത്ര്യമുണ്ടെങ്കിലും തങ്ങളുടെ അവകാശങ്ങള്‍ നേടിയെടുക്കാന്‍ ഒന്നിച്ചു നില്‍ക്കേണ്ടത് അനിവാര്യമാണെന്നും പറഞ്ഞു. ഡയറക്ടര്‍ ഫാ. ജോര്‍ജ് നെല്ലിക്കുന്നുചെരിവുപുരയിടം ആമുഖ സന്ദേശം നല്കി. രൂപത പുരുഷ വിഭാഗം പ്രസിഡന്‍റ് ജോയിക്കുട്ടി മാനുവല്‍, വനിതാ വിഭാഗം പ്രസിഡന്‍റ് സ്വപ്ന ജോര്‍ജ്, ഡെയ്‌സി ജിബു, എല്‍സിറ്റ് സാബു, ഡോണ മരിയ പോള്‍ എന്നിവര്‍ നേതൃത്വം നൽകി.

ധന്യൻ മാർ ഈവാനിയോസ് കബറിട പദയാത്രാസംഘം മുത്തിയമ്മയ്ക്കരുകിൽ

കുറവിലങ്ങാട്: ധന്യൻ ആർച്ച്ബിഷപ് മാർ ഇവാനിയോസിന്‍റെ കബറിടത്തിലേക്കുള്ള പദയാത്രാ സംഘം മധ്യസ്ഥതയും അനുഗ്രഹവും തേടി മുത്തിയമ്മയ്ക്കരുകിലെത്തി. സീറോ മലങ്കര സഭ മൂവാറ്റുപുഴ ഭദ്രാസനത്തിൽനിന്നുള്ള തീർഥാടക സംഘമാണ് ആദ്യദിനം മുത്തിയമ്മയുടെ തിരുസന്നിധിയിലെത്തി വിശ്രമിച്ചത്. മൂവാറ്റുപുഴയിൽനിന്ന് ആരംഭിച്ച തീർഥാടന പദയാത്ര 14ന് തിരുവനന്തപുരം പട്ടം സെന്‍റ് മേരീസ് ആർക്കി എപ്പിസ്കോപ്പൽ കത്തീഡ്രൽ ദേവാലയത്തിൽ സമാപിക്കും. മൂവാറ്റുപുഴ രൂപത ചാൻസലർ ഫാ. അനൂപ് പന്തീരായിതടത്തിൽ, ഫാ. ജോസ് കുറ്റിക്കേരിൽ, ഫാ. ജോസഫ് പന്നിവിഴ എന്നിവരുടെ നേതൃത്വത്തിലുള്ള 50 അംഗ സംഘമാണ് എത്തിയത്. തീർഥാടകസംഘത്തെ മേജർ ആർക്കി എപ്പിസ്കോപ്പൽ മർത്ത്മറിയം അർ ക്കദിയാക്കോൻ തീർഥാടനകേന്ദ്രം ആർച്ച്പ്രീസ്റ്റ് റവ. ഡോ. തോമസ് മേനാച്ചേരിയുടെ നേതൃത്വത്തിൽ വൈദികർ സ്വീകരിച്ചു.

വാഹനമിടിച്ച് വീട്ടമ്മ മരിച്ചു

രാമപുരം: പാലാ-തൊടുപുഴ റോഡില്‍ പിഴകിന് സമീപം ആറാംമൈലില്‍ പിക്കപ്പ് വാന്‍ ഇടിച്ച് വീട്ടമ്മ മരിച്ചു. പിഴക് വടക്കേക്കുന്നേല്‍ ദേവസ്യയുടെ ഭാര്യ എലിസബത്ത് (68) ആണ് മരിച്ചത്. ഇന്നലെ രാവിലെ എട്ടിനാണ് അപകടം നടന്നത്. മൂവാറ്റുപുഴയില്‍നിന്നു പാലാ ഭാഗത്തേക്ക് പോവുകയായിരുന്ന പിക്കപ്പ് വാന്‍ നിയന്ത്രണംവിട്ട് വൈദ്യുതിപോസ്റ്റില്‍ ഇടിച്ചശേഷം വഴിയിലൂടെ നടന്നുപോവുകയായിരുന്ന എലിസബത്തിനെ ഇടിച്ചതിനുശേഷം എതിര്‍വശത്തെ തിട്ടയിലിടിച്ച് നില്‍ക്കുകയായിരുന്നു. പരേത കരിങ്കുന്നം മെയ്യാറ്റുംകുന്നേല്‍ കുടുംബാംഗം. മക്കള്‍: ബിന്ദു, ബിനേഷ്. മരുമക്കള്‍ ബിജു, ജൂലി. സംസ്‌കാരം ഇന്നു രാവിലെ 11ന് പിഴക് സെന്‍റ് ജോണ്‍സ് ബാപ്റ്റിസ്റ്റ് പള്ളിയില്‍.

രാമപുരം ഗവ. ആശുപത്രിയിലെ സൗകര്യക്കുറവ്: താലൂക്ക് വികസനസമിതിയില്‍ പരാതി നല്‍കി

രാമപുരം: പാലാ നിയോജകമണ്ഡലത്തിലെ ഏറ്റവും ജനസംഖ്യയുള്ള പഞ്ചായത്തായ രാമപുരം പഞ്ചായത്തിലെ ഏക ചികിത്സാകേന്ദ്രമായ രാമപുരം ഗവ. ആശുപത്രിയുടെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ട് താലൂക്ക് വികസനസമിതിയില്‍ പരാതി നല്‍കി. ആശുപത്രിക്ക് വലിയൊരു കെട്ടിടമുണ്ടെങ്കിലും മറ്റ് സൗകര്യങ്ങള്‍ വളരെ കുറവാണ്. ഒപി സേവനത്തിനായി നൂറുകണക്കിന് രോഗികള്‍ ദിവസവും ഇവിടെ എത്തുന്നുണ്ട്. എക്സ്റേ എടുക്കണമെങ്കില്‍ പാലായിലോ മറ്റെവിടെയെങ്കിലുമോ രോഗികള്‍ പോകണം. രാത്രിയില്‍ ഡോക്ടറുടെ സേവനവും ഇവിടെ ലഭ്യമല്ല. രാത്രിയില്‍ ആര്‍ക്കെങ്കിലും അസുഖം വന്നാല്‍ പാലാ, കൂത്താട്ടുകുളം, തൊടുപുഴ തുടങ്ങിയ സ്ഥലങ്ങളില്‍ പോകേണ്ടിവരും. നേരത്തേ വളരെ ഉയര്‍ന്ന നിലയില്‍ പ്രവര്‍ത്തിച്ചിരുന്ന ആശുപത്രിയിൽ ഇത്രയും വലിയ കെട്ടിടം ഇല്ലായിരുന്നെങ്കിലും പ്രസവം, പോസ്റ്റ്മോര്‍ട്ടം തുടങ്ങിയവ നടത്തിയിരുന്നു. ഇപ്പോള്‍ ആവശ്യമായ സ്റ്റാഫുകളോ രാത്രി ചികിത്സയ്ക്കായി ഡോക്ടര്‍മാരോ ലഭ്യമല്ല. ഓരോ വര്‍ഷം കഴിയുന്തോറും ആശുപത്രിയുടെ പ്രവര്‍ത്തനങ്ങള്‍ താഴേയ്ക്കാണ് പൊയ്ക്കൊണ്ടിരിക്കുന്നത്. രാത്രിയില്‍ ചികിത്സയ്ക്കായി ഡോക്ടറെ നിയമിക്കണമെന്നും എക്സ്റേ പോലുള്ള സൗകര്യങ്ങള്‍ ഏര്‍പ്പെടുത്തുകയും ചെയ്യണമെന്നും കാണിച്ച് കേരള കോണ്‍ഗ്രസ് ഉന്നതാധികാര സമിതി അംഗം തോമസ് ഉഴുന്നാലിലാണ് താലൂക്ക് വികസനസമിതിയില്‍ പരാതി നല്‍കിയത്.

പാലാ മതമൈത്രിയുടെ മണ്ണ്: മാര്‍ ജോസഫ് കല്ലറങ്ങാട്ട്

പാലാ: മതമൈത്രിയുടെ നാടാണ് പാലായെന്നും ക്രൈസ്തവ വിദ്യാഭ്യാസ സ്ഥാപനങ്ങള്‍ സകല വിഭാഗം ജനങ്ങളുടെയും ഉന്നമനം ലക്ഷ്യമാക്കിയാണ് സ്ഥാപിതമായിട്ടുളളതെന്നും ബിഷപ് മാര്‍ ജോസഫ് കല്ലറങ്ങാട്ട്. സിവില്‍ സര്‍വീസ് ഇന്‍സ്റ്റിറ്റ്യൂട്ടിലെ വിജയദിനാഘോഷവും ബിഎ പബ്ലിക് അഡ്മിനിഷ്‌ട്രേഷന്‍ ആന്‍ഡ് സിവില്‍ സര്‍വീസ് കോച്ചിംഗ് ഇന്‍റഗ്രേറ്റഡ് കോഴ്‌സും ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. രാജ്യസ്‌നേഹവും വേദന അനുഭവിക്കുന്ന ജനങ്ങളുടെ പക്ഷത്തായിരിക്കാനുള്ള മനസുമാണ് സിവില്‍ സര്‍വീസിന്‍റെ മികവ് നിര്‍ണയിക്കുന്നത്. സമൂഹത്തിലെ വേര്‍തിരിവുകളുടെ ഭിത്തികള്‍ തകര്‍ത്ത് ഒരുമയുടെ പാലങ്ങള്‍ പണിയാന്‍ അവര്‍ നേതൃത്വം നല്‍കണമെന്നും മാർ കല്ലറങ്ങാട്ട് പറഞ്ഞു. യോഗത്തില്‍ മന്ത്രി റോഷി അഗസ്റ്റിന്‍ മുഖ്യാതിഥിയായിരുന്നു. മാണി സി. കാപ്പന്‍ എംഎല്‍എ, കെ.ജെ. മാത്യു ഐഎഎസ് അനുസ്മരണ പ്രഭാഷണം നടത്തി. കെ.ജെ. മാത്യു മെമോറിയല്‍ സ്വര്‍ണമെഡല്‍ സിവില്‍ സര്‍വീസ് പരീക്ഷയിലെ കേരള ടോപ്പര്‍ ആല്‍ഫ്രഡ് തോമസിന് (റാങ്ക്-33) മാര്‍ ജോസഫ് കല്ലറങ്ങാട്ട് സമ്മാനിച്ചു. മറ്റു വിജയികളായ മൈക്കിള്‍ ജിം (റാങ്ക്-415), ആനന്ദ് പ്യാരെലാല്‍ (റാങ്ക്-703), ആദില്‍ ഷുക്കൂര്‍ (റാങ്ക്-822), അദീല ഷാഫി (സിഎപിഎഫ് റാങ്ക്-78), അമല്‍ രാജു (സിഎപിഎഫ് റാങ്ക്-409) എന്നിവരെയും യോഗത്തില്‍ ആദരിച്ചു. മുന്‍ ഡിജിപി ജേക്കബ് പുന്നൂസ്, ഇന്‍സ്റ്റിറ്റ്യൂട്ട് മാനേജര്‍ മോണ്‍. സെബാസ്റ്റ്യന്‍ വേത്താനത്ത്, പ്രിന്‍സിപ്പല്‍ ഡോ. വി.വി. ജോര്‍ജുകുട്ടി ഒട്ടലാങ്കല്‍, വൈസ് പ്രിന്‍സിപ്പല്‍ ഫാ. സെബാസ്റ്റ്യന്‍ ചാമക്കാലായില്‍, അക്കാദമിക് ‌കോ-ഓര്‍ഡിനേറ്റര്‍ ജുബിന്‍ ജയിംസ് എന്നിവരും വിജയികളായ വിദ്യാര്‍ഥികളും പ്രസംഗിച്ചു.

മണ്ണെടുപ്പിനെതിരേയുള്ള നിയമപോരാട്ടത്തിനു തുക കണ്ടെത്താന്‍ ബിരിയാണി ചലഞ്ച്

നെടുംകുന്നം: മണ്ണും പ്രകൃതിയും സംരക്ഷിക്കാനുള്ള നിയമ പോരാട്ടത്തിനായി പഞ്ചായത്തും ജനകീയ സമിതിയും ചേർന്നു നടത്തിയ മെഗാ ബിരിയാണി ചലഞ്ച് നെഞ്ചിലേറ്റി നെടുംകുന്നം. നെടുംകുന്നം പഞ്ചായത്തിലെ വീരൻ മല ചമ്പന്നൂർപ്പടിയിലെ മണ്ണെടുപ്പിനെതിരേ നിയമ പോരാട്ടം നടത്താൻ ജനകീയ സമിതിയും പഞ്ചായത്തും ചേർന്ന് ഇന്നലെ നടത്തിയ ബിരിയാണി ചലഞ്ചിൽ 2500 ഓളം ബോക്സുകളാണ് തയറാക്കിയത്. ഇവ പഞ്ചായത്തംഗങ്ങളും സമിതി അംഗങ്ങളും ചേർന്ന് 15 വാർഡുകളിലായി വിതരണം ചെയ്തു. ബിരിയാണി വിൽപ്പനയിലൂടെ ലഭിക്കുന്ന തുക മണ്ണെടുപ്പിനെതിരേ പഞ്ചായത്ത് കോടതിയിൽ നടത്തുന്ന നിയമപോരാട്ടത്തിനായി ചെലവഴിക്കും. പഞ്ചായത്ത് പ്രസിഡന്‍റ് രാജമ്മ രവീന്ദ്രൻ ജനകീയ സമിതി കൺവീനർ തോമസ് പീലിയാനിക്കലിന് ബിരിയാണി കൈമാറി വിതരണോദ്ഘാടനം നടത്തി. വൈസ് പ്രസിഡന്‍റ് വി.എം. ഗോപകുമാർ അധ്യക്ഷത വഹിച്ചു. പഞ്ചായത്തംഗങ്ങളായ മാത്യു വർഗീസ്, ബീനാ വർഗീസ്, ഷിനുമോൾ ജോസഫ്, സി.ജെ. ബീനാ, റോയി നെച്ചുകാട്ട്, വീണാ ബി. നായർ, പ്രിയാ ശ്രീരാജ്, ശ്രീജാ മനു, മേഴ്‌സി റെൻ, ജനകീയ സമിതിയംഗങ്ങൾ തുടങ്ങിയവർ നേതൃത്വം നൽകി.

ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ആരംഭിക്കും: മന്ത്രി

കോട്ടയം: മാറിയ പാഠപുസ്തകത്തിനനുസരിച്ച് ഒന്നു മുതല്‍ 10 വരെ ക്ലാസുകള്‍ക്കുള്ള ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ആരംഭിക്കുമെന്ന് മന്ത്രി വി. ശിവന്‍കുട്ടി. കുട്ടികള്‍ക്കുള്ള അധിക പിന്തുണ എന്ന തരത്തിലാണ് ഈ ക്ലാസുകള്‍ തയാറാക്കിയിട്ടുള്ളത്. സമഗ്രഗുണമേന്മ വിദ്യാഭ്യാസ പദ്ധതിയുടെ ഭാഗമായി അക്കാദമിക് മോണിറ്ററിംഗ് പ്ലാറ്റ്‌ഫോമുകള്‍ പരിചയപ്പെടുത്താന്‍ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍റെ (കൈറ്റ്) നേതൃത്വത്തില്‍ ജില്ലയില്‍ നടന്ന ഹൈസ്‌കൂള്‍ പ്രഥമാധ്യാപക ശില്പശാലയില്‍ വീഡിയോ കോണ്‍ഫറന്‍സിംഗിലൂടെ പ്രസംഗിക്കുകയായിരുന്നു മന്ത്രി. കൈറ്റ് സിഇഒ കെ. അന്‍വര്‍ സാദത്തും പങ്കെടുത്തു. സമഗ്ര പ്ലസ് (www.samagra. kite.kerala.gov.in) പോര്‍ട്ടലിലൂടെ ടീച്ചര്‍ക്ക് ഡിജിറ്റല്‍ പ്ലാനുകള്‍ തയാറാക്കി സൂക്ഷിക്കാനും പ്രഥമാധ്യാപകര്‍ക്ക് സമര്‍പ്പിക്കാനും കഴിയും. അതോടൊപ്പം ഈ പോര്‍ട്ടലിലുള്ള ഡിജിറ്റല്‍ റിസോഴ്‌സുകള്‍ ലേണിംഗ് റൂം സംവിധാനം വഴി കുട്ടികള്‍ക്കും രക്ഷിതാക്കള്‍ക്കും ഒരുപോലെ പ്രയോജനപ്പെടുത്താനുമാവും. സ്‌കീം ഓഫ് വര്‍ക്കിനനുസരിച്ചാണോ തന്‍റെ പ്രവര്‍ത്തനങ്ങള്‍ മുന്നോട്ടു പോകുന്നതെന്ന് ടീച്ചര്‍ക്ക് സ്വയം വിലയിരുത്താം. നേരത്തേ വിദ്യാഭ്യാസ ഓഫീസര്‍മാര്‍ക്കും പ്രൈമറി സ്‌കൂളിലെ പ്രഥമാധ്യാപകര്‍, ഐ.ടി. കോ-ഓര്‍ഡിനേറ്റര്‍മാര്‍, എസ്. ആര്‍.ജി. കണ്‍വീനര്‍മാര്‍ തുടങ്ങിയവര്‍ക്കും കൈറ്റ് പരിശീലനം നല്‍കിയിരുന്നു. ശില്പശാലയില്‍ ജില്ലയിലെ 243 ഹൈസ്‌കൂള്‍ പ്രഥമാധ്യാപകര്‍ പങ്കെടുത്തു. തുടര്‍ന്ന് ഹൈസ്‌കൂള്‍ വിഭാഗം ഐടി കോ-ഓര്‍ഡിനേറ്റര്‍മാര്‍ക്കും എസ്.ആര്‍.ജി. കണ്‍വീനര്‍മാര്‍ക്കും പരിശീലനം നല്‍കും. ഇവരാണ് സ്‌കൂളുകളിലെ മറ്റ് അധ്യാപകര്‍ക്ക് പരിശീലനം നല്‍കുക.

സെന്‍റ് പീറ്റേഴ്‌സില്‍ പ്രതിഭാ സംഗമം

കുറുമ്പനാടം: സെന്‍റ് പീറ്റേഴ്‌സ് സ്‌കൂള്‍ ഹയര്‍ സെക്കന്‍ഡറി വിഭാഗം പ്രതിഭാ സംഗമം ലൊറേറ്റ്‌സ് ഡേ 2025 അസംപ്ഷന്‍ കോളജ് പ്രിന്‍സിപ്പല്‍ ഡോ. റാണി മരിയ തോമസ് ഉദ്ഘാടനം ചെയ്തു. സ്‌കൂള്‍ മാനേജര്‍ റവ. ഡോ. ജോബി കറുകപ്പറമ്പില്‍ അധ്യക്ഷത വഹിച്ചു. പ്രിന്‍സിപ്പല്‍ ജയിംസ് കെ. മാളിയേക്കല്‍, ഹെഡ്മാസ്റ്റര്‍ എം.സി. മാത്യു, പിടിഎ പ്രസിഡന്‍റ് ജയ്‌സണ്‍ ചെറിയാന്‍, എം.സി. ബിനു, ജോണിയാ ഗ്രേസ് ജോസഫ്, സുബിമോള്‍ സിബിച്ചന്‍, തെരേസ് തോമസ്, സോനു പ്രീത് എന്നിവര്‍ പ്രസംഗിച്ചു.

മെറിറ്റ് അവാര്‍ഡ് വിതരണം

ചങ്ങനാശേരി: എസ്എസ്എല്‍സി, പ്ലസ് ടു പരീക്ഷകളിലും മറ്റ് മത്സര പരീക്ഷകളിലും ഉന്നതവിജയം കരസ്ഥമാക്കിയ വിദ്യാര്‍ഥികള്‍ക്ക് പുതൂര്‍ പള്ളി മുസ്‌ലിം ജമാഅത്ത് വക മെറിറ്റ് അവാര്‍ഡും ജമാ അത്ത് മുന്‍ പ്രസിഡന്‍റ് തരകന്‍ വീട്ടില്‍ ടി.എന്‍. അഹമ്മദ്കണ്ണ് റാവുത്തര്‍ മെമ്മോറിയല്‍ കാഷ് അവാര്‍ഡും വിതരണം ചെയ്തു. കട്ടപ്പന ഡിവൈഎസ്പി നിഷാദ്മോന്‍ ഉദ്ഘാടനം ചെയ്തു. ജമാഅത്ത് പ്രസിഡന്‍റ് അഡ്വ. ടി.പി. അബ്ദുല്‍ ഹമീദ് അധ്യക്ഷത വഹിച്ചു. കോട്ടയം മെഡിക്കല്‍ കോളജ് കാര്‍ഡിയോളജി വിഭാഗം മുന്‍ മേധാവി ഡോ. എസ്. അബ്ദുല്‍ ഖാദര്‍, ജമാഅത്ത് സെക്രട്ടറി സാജിത് മുഹമ്മദ്, ഖജാന്‍ജി അഡ്വ. റിയാസ് മമ്മറാന്‍, തന്‍സിം ആലയില്‍, സിനാജ് പറക്കവെട്ടി എന്നിവര്‍ പ്രസംഗിച്ചു.

സീനിയര്‍ ചേംബര്‍ ഡോക്ടേഴ്‌സ് ദിനാചരണം

ചങ്ങനാശേരി: സീനിയര്‍ ചേംബര്‍ ഇന്‍റര്‍നാഷണല്‍ ചങ്ങനാശേരി ലീജിയന്‍ ഡോക്ടേഴ്‌സ് ദിനാചരണം നടത്തി. വിവിധ മേഖലകളില്‍ സേവനമനുഷ്ഠിക്കുന്ന ഡോക്ടര്‍മാരെ ആദരിച്ചു. പ്രസിഡന്‍റ് ജയിംസുകുട്ടി ഞാലിയില്‍ അധ്യക്ഷത വഹിച്ചു. ഡോ. മനോജ് വാടപ്പറമ്പില്‍, ഡോ. ഹരീഷ് കോനാടന്‍, ഡോ. മനോജ് അയ്യപ്പന്‍ എന്നിവരെ ആദരിച്ചു. മാത്യു ജോസഫ് പുന്നശേരി, സാജു പൊട്ടുകളം, ജോണി ജോസഫ് കൊല്ലമന, ബിജു നെടിയകാലാപറമ്പില്‍, സോണി പാലത്തിങ്കല്‍ എന്നിവര്‍ പ്രസംഗിച്ചു.

ചങ്ങനാശേരി റെയില്‍വേ സ്റ്റേഷന്‍ : നിര്‍മാണപ്രവര്‍ത്തനങ്ങളുടെ അവലോകനം ഇന്ന്

ചങ്ങനാശേരി: കൊടിക്കുന്നില്‍ സുരേഷ് എംപിയുടെ നേതൃത്വത്തില്‍ ചങ്ങനാശേരി റെയില്‍വേ സ്റ്റേഷനില്‍ നടന്നുവരുന്ന അമൃത് ഭാരത് പദ്ധതി പ്രകാരമുള്ള നിര്‍മാണപ്രവര്‍ത്തനങ്ങളുടെ അവലോകനം ഇന്ന് 2.30ന് റെയില്‍വേ സ്റ്റേഷനില്‍ നടക്കും. അമൃത് ഭാരത് പദ്ധതി പ്രകാരം 90 ശതമാനത്തിലധികം നിര്‍മാണപ്രവര്‍ത്തനങ്ങള്‍ പൂര്‍ത്തിയായ സ്റ്റേഷനില്‍ അവസാനവട്ട ക്രമീകരണങ്ങള്‍ നേരില്‍ കാണുന്നതിനും വിലയിരുത്തുന്നതിനുമാണ് യോഗം വിളിച്ചുചേര്‍ത്തതെന്ന് കൊടിക്കുന്നില്‍ സുരേഷ് എംപി പറഞ്ഞു. യോഗത്തില്‍ ദക്ഷിണ റെയില്‍വേ തിരുവനന്തപുരം ഡിവിഷനിലെ ഉന്നത ഉദ്യോഗസ്ഥരും അമൃത് ഭാരത് പദ്ധതി നടപ്പിലാക്കുന്ന നിര്‍വഹണ ഉദ്യോഗസ്ഥരും പങ്കെടുക്കും. യാത്രക്കാര്‍ക്കും പരിസരവാസികള്‍ക്കും നിര്‍ദേശം നല്‍കാനുള്ള അവസരം ഉണ്ടായിരിക്കുന്നതാണെന്നും എംപി കൂട്ടിച്ചേര്‍ത്തു. ആവശ്യങ്ങള്‍ ഒട്ടനവധി ചങ്ങനാശേരി: ചങ്ങനാശേരി റെയില്‍വേ സ്‌റ്റേഷനില്‍നിന്നു ഗുഡ്‌സ്‌ഷെഡ് റോഡിലേക്കുള്ള രണ്ടാം കവാടം തുറക്കണമെന്ന ആവശ്യത്തിനു പ്രസക്തിയേറുന്നു. വാഴൂര്‍ റോഡില്‍നിന്ന് എത്തുന്ന യാത്രക്കാര്‍ക്കും ട്രെയിനില്‍നിന്നിറങ്ങി വാഴൂര്‍ റോഡ് ഭാഗത്തേക്കു പോകേണ്ട യാത്രക്കാര്‍ക്കും ഇതു ഗുണകരമാകും. ഒന്നും രണ്ടും പ്ലാറ്റ്ഫോമുകളെ ബന്ധിപ്പിച്ച് എസ്‌കലേറ്റര്‍ നിര്‍മിക്കണം. തകര്‍ന്നുകിടക്കുന്ന ഗുഡ്‌സ്‌ഷെഡ് റോഡിന്‍റെ അറ്റകുറ്റപ്പണികള്‍ വേഗത്തിലാക്കി ഗതാഗതം സുഗമമാക്കണം. ഗുഡ്‌സ്‌ഷെഡ് റോഡിന്‍റെ വശങ്ങളിലും റെയില്‍വേ സ്‌റ്റേഷന്‍ വളപ്പിലും അപകടകരമായ സാഹചര്യത്തില്‍ നില്‍ക്കുന്ന മരങ്ങളും ശിഖരങ്ങളും വെട്ടിമാറ്റണം. വാഴൂര്‍ റോഡിലെയും ഫാത്തിമാപുരത്തെയും മേല്‍പ്പാലങ്ങളുടെ അപ്രോച്ചിന്‍റെ തകര്‍ച്ച പരിശോധിക്കണം. സെന്‍റ് ആന്‍സ് സ്‌കൂളില്‍നിന്ന് ആനന്ദാശ്രമത്തിലേക്കുള്ള പാവനാശ്രമം റോഡിന്‍റെ റെയില്‍വേ അധീനതയിലുള്ള ഭാഗത്തെ അറ്റകുറ്റപ്പണികള്‍ നടത്തണം. വടക്കേക്കര റെയില്‍വേ ക്രോസില്‍ മേല്‍പ്പാലം നിര്‍മിക്കണമെന്ന ആവശ്യവും ശക്തമാണ്. പെരുന്തുരുത്തി-ഏറ്റുമാനൂര്‍ ബൈപാസിലെ നാലുകോടി റെയില്‍വേ ഓവര്‍ബ്രിഡ്ജിന്‍റെ നിര്‍മാണത്തിനുള്ള നടപടികള്‍ വേഗത്തിലാക്കണമെന്ന ആവശ്യവും ഉയര്‍ന്നിട്ടുണ്ട്. സ്റ്റേറ്റഷനിലെ ഒന്നാം പ്ലാറ്റ്ഫോമില്‍ ബാക്കിയുള്ള ഭാഗത്തുകൂടിയുള്ള മേല്‍ക്കൂര നിര്‍മാണം, പ്ലാറ്റ് ഫോമിലെ യാത്രക്കാര്‍ക്കുള്ള ബെഞ്ചുകള്‍, നിര്‍മാണത്തിലിരിക്കുന്ന ലിഫ്റ്റ്, പാര്‍ക്കിംഗ് ഏരിയ വികസനം, പ്രധാന കവാടം തുടങ്ങിയ നിര്‍മാണങ്ങള്‍ എന്നിവയും കൊടിക്കുന്നില്‍ സുരേഷ് എംപിയുടെ നേതൃത്വത്തിലെത്തുന്ന റെയില്‍വേ ഉദ്യോഗസ്ഥ സംഘം വിലയിരുത്തും. വേളാങ്കണ്ണി എക്‌സ്പ്രസിനു സ്വീകരണം ഇന്ന് ചങ്ങനാശേരി: കൊടിക്കുന്നില്‍ സുരേഷ് എംപിയുടെ ശ്രമഫലമായി പുതുതായി അനുവദിച്ച എല്‍എച്ച്ബി കോച്ച് ഉപയോഗിച്ച് നടത്തുന്ന എറണാകുളം വേളാങ്കണ്ണി എക്‌സ്പ്രസിന്‍റെ ആദ്യയാത്രയില്‍ ട്രെയിനിന് ചങ്ങനാശേരി റെയില്‍വേ സ്റ്റേഷനില്‍ ഇന്ന് സ്വീകരണം നല്‍കും. ഉച്ചകഴിഞ്ഞ് 2.30നാണ് ട്രെയിന്‍ ചങ്ങനാശേരി സ്റ്റേഷനില്‍ എത്തുന്നത്.

കുടുംബക്കൂട്ടായ്മ ഭാരവാഹികൾക്ക് പരിശീലനമൊരുക്കി ഇഗ്‌നൈറ്റ്-2025

കുറവിലങ്ങാട്: ഇടവകയിലെ കൂടംബക്കൂട്ടായ്മ പ്രവർത്തനങ്ങൾ സജീവമാക്കാനായി കൂട്ടായ്മ ഭാരവാഹികൾക്കായി ഇഗ്‌നൈറ്റ്-2025 എന്ന പേരിൽ പഠനപരിശീലന കളരിയൊരുക്കി. ഇടവകയിലെ യോഗപ്രതിനിധികൾ, കൂട്ടായ്മ സമ്മേളനങ്ങളിൽ പങ്കെടുക്കുന്ന സന്യാസിനിമാർ, 81 കൂട്ടായ്മ യൂണിറ്റുകളിലെ പ്രസിഡന്‍റുമാർ, സെക്രട്ടറിമാർ എന്നിവർ പരിശീലന പരിപാടിയിൽ പങ്കെടുത്തു. പരിപാടി ആർച്ച്പ്രീസ്റ്റ് റവ.ഡോ. തോമസ് മേനാച്ചേരി ഉദ്ഘാടനം ചെയ്തു. ഒരു വർഷത്തേക്കുള്ള കർമപരിപാടികളുടെ ചർച്ചയും പ്രവർത്തന രൂപീകരണവും നടത്തി. കൂട്ടായ്മ ഡയറക്ടർ അസി. വികാരി ഫാ. പോൾ കുന്നുംപുറത്ത് അധ്യക്ഷത വഹിച്ചു. സീനിയർ അസി.വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, കൂട്ടായ്മ ജനറൽ ലീഡർ ബോബിച്ചൻ നിധീരി, ഡോ. സിമിമോൾ സെബാസ്റ്റ്യൻ, സിസ്റ്റർ റീജ മരിയ, ബിജു താന്നിക്കതറപ്പേൽ എന്നിവർ പ്രസംഗിച്ചു. കുടുംബകൂട്ടായ്മ രൂപത റിസോഴ്സ് ടീം അംഗങ്ങളായ സണ്ണി വടക്കേടത്ത്, ലിജോ മുക്കത്ത്, പള്ളിയോഗം സെക്രട്ടറി ബെന്നി കോച്ചേരി എന്നിവർ ക്ലാസിന് നേതൃത്വം നൽകി. സോൺ ഭാരവാഹികളായ ഷൈജു പാവുത്തിയേൽ, ജിയോ കരികുളം, ജോസ് സി. മണക്കാട്ട്, സണ്ണി വെട്ടിക്കാട്ടിൽ, ജോളി ടോമി എണ്ണംപ്രായിൽ, ഷൈനി സാബു മഞ്ഞപ്പള്ളിൽ, സ്മിത ഷിജു പുതിയിടത്ത്, ആശ വിക്‌ടർ കുന്നുമല എന്നിവർ നേതൃത്വം നൽകി.

നാലമ്പല തീര്‍ഥാടനം: മുളക്കുളത്ത് ആലോചനാ യോഗം

പെരുവ: മുളക്കുളം ലക്ഷ്മണ സ്വാമി ക്ഷേത്രത്തില്‍ കര്‍ക്കിടകം ഒന്നാം തീയതി ആരംഭിക്കുന്ന നാലമ്പല തീര്‍ഥാടനത്തിന്‍റെ മുന്നൊരുക്കങ്ങള്‍ വിലയിരുത്തുന്നതിനുള്ള ആലോചനാ യോഗം ക്ഷേത്രം അന്നദാനമണ്ഡപത്തില്‍ നടന്നു. ക്ഷേത്രോപദേശക പ്രസിഡന്‍റ് സുധീഷ് പുളിക്കക്കുഴി അധ്യക്ഷത വഹിച്ചു. മുളക്കുളം പഞ്ചായത്തംഗം അജിത് കുമാര്‍ ഉദ്ഘാടനം ചെയ്തു. സബ് ഗ്രൂപ്പ് ഓഫീസര്‍ രാമചന്ദ്രന്‍, ഉപദേശക സമിതി വൈസ് പ്രസിഡന്‍റ് രഘുനാഥ്, സെക്രട്ടറി സൂരജ് വണ്ടാനത്ത് തുടങ്ങിയവര്‍ പ്രസംഗിച്ചു. തീര്‍ഥാടകരുടെ വാഹനങ്ങള്‍ സുഗമമായി എത്തിച്ചേരാന്‍ പെരുവ-മുളക്കുളം റോഡിലെ കുഴികളടച്ചു താത്കാലിക അറ്റകുറ്റപ്പണികള്‍ അടിയന്തരമായി നടത്തണമെന്ന് അധികാരികളോട് ആവശ്യപ്പെടാന്‍ യോഗം തീരുമാനിച്ചു. ക്ഷേത്രത്തില്‍ തീര്‍ഥാടകര്‍ക്ക് മുന്‍വര്‍ഷങ്ങളില്‍ നല്‍കിയിട്ടുള്ള സേവനങ്ങള്‍ ഈ വര്‍ഷവും നടത്തുന്നതിനു നിശ്ചയിച്ചു. എല്ലാ ദിവസവും മുന്‍കാലങ്ങളിലെ പോലെ രാവിലെ മുതല്‍ തന്നെ അന്നദാനവും നടത്തും.

ബഷീർ അനുസ്മരണം നടത്തി ‌

തലയോലപ്പറമ്പ്: വൈക്കം മുഹമ്മദ് ബഷീറിന്‍റെ 31-ാം ചരമ വാർഷിക ദിനാചരണം തലയോലപ്പറമ്പിലെ വൈക്കം മുഹമ്മദ് ബഷീര്‍ സ്മാരക മന്ദിരത്തില്‍ നടത്തി. അനുസ്മരണ സമ്മേളനം മഹാത്മാഗാന്ധി സർവകലാശാല സ്കൂൾ ഓഫ് ലെറ്റേഴ്സ് ഡയറക്ടർ പ്രഫ. ജോസ് കെ. മാനുവൽ ഉദ്ഘാടനം ചെയ്തു. മുൻ പഞ്ചായത്ത് പ്രസിഡന്‍റ് ടി.കെ. ഗോപി അധ്യക്ഷത വഹിച്ചു. തലയോലപ്പറമ്പ് ദേവസ്വം ബോര്‍ഡ് കോളജ് ഇംഗ്ലീഷ് വിഭാഗം അധ്യാപകൻ ആശിഷ് മാർട്ടിൻ ടോം, കടുത്തുരുത്തി സെൻട്രൽ സ്കൂൾ അധ്യാപകൻ കെ.വി. രാജേഷ്, വൈക്കം മുഹമ്മദ് ബഷീർ സ്മാരക ട്രസ്റ്റ് സെക്രട്ടറി ഡോ. സി.എം. കുസുമൻ, ആർ. പ്രസന്നന്‍, സുഭാഷ് പുഞ്ചക്കോട്ടിൽ, ബ്ലോക്ക് പഞ്ചായത്ത് അംഗങ്ങളായ തങ്കമ്മ വർഗീസ്, രേഷ്മ പ്രവീൺ, എം. അനിൽകുമാർ, നാസർ മൂസ, വി.സി. ലൂക്കോസ്, കെ. വിജയൻ, വി.എൻ. ബാബു എന്നിവർ പ്രസംഗിച്ചു. കായംകുളം ജോൺ എഫ്. കെന്നഡി ഹയർ സെക്കന്‍ഡറി സ്കൂള്‍, പിറവം എം.കെ.എം. ഹൈസ്കൂൾ, പെരുവ ഗവൺമെന്‍റ് ഹയർ സെക്കൻഡറി സ്കൂള്‍, കാഞ്ഞിരപ്പള്ളി ചിറക്കടവ് വി.എസ്.യു.പി. സ്കൂൾ തുടങ്ങിയ സ്കൂളുകളിലെ വിദ്യാർഥികളും അധ്യാപകരും ബഷീർ സ്മാരക കേന്ദ്രത്തിലെ ആർട്ട് ഗാലറിയും ഗവേഷണ കേന്ദ്രവും ബഷീർ പ്രതിമയും മറ്റും കാണുന്നതിന് എത്തിയിരുന്നു.

ഉദയഗിരിയിലെ അനധികൃത മാലിന്യ സംഭരണ യൂണിറ്റിന് 50,000 രൂപ പിഴ ചുമത്തി

കടുത്തുരുത്തി: മുളക്കുളം പഞ്ചായത്തിലെ പതിനൊന്നാം വാര്‍ഡില്‍ ഉദയഗിരി പ്രദേശത്ത് റബര്‍ തോട്ടത്തില്‍ അനധികൃതമായി പ്രവര്‍ത്തിച്ചിരുന്ന മാലിന്യസംഭരണ യൂണിറ്റിന് പഞ്ചായത്ത് പിഴ ചുമത്തി. പഞ്ചായത്ത് രാജ് നിയമത്തിലെ വിവിധ വകുപ്പുകള്‍ പ്രകാരം 50,000 രൂപയാണ് പിഴ ഈടാക്കിയത്. ആലപ്പുഴ അമ്പലപ്പുഴ പുഷ്പഭവനില്‍ വിപിന്‍ രാജിന്‍റെ ഉടമസ്ഥതയിലുള്ള അക്സോ അഗ്രോ സോള്‍ജിയര്‍ പ്രൈവറ്റ് ലിമിറ്റഡിനാണ് പഞ്ചായത്ത് പിഴയിട്ടത്. ഡെങ്കിപ്പനി നിയന്ത്രണ പ്രവര്‍ത്തനങ്ങളുടെ ഭാഗമായി നടന്നുവന്ന പരിശോധനയില്‍ ആരോഗ്യവകുപ്പാണ് കഴിഞ്ഞ മെയ് 28ന് ഗുരുതരമായ നിയമലംഘനം കണ്ടെത്തിയത്. കമ്പോസ്റ്റ് വളം നിര്‍മാണത്തിനാണ് എറണാകുളം ജില്ലയില്‍നിന്ന് ഇവിടേക്ക് മാലിന്യങ്ങള്‍ ശേഖരിച്ചിരുന്നത്. മുട്ടുചിറ നീരാക്കല്‍ എെജുവിന്‍റെ ഉടമസ്ഥതയിലുള്ള 25 ഏക്കര്‍ സ്ഥലത്തില്‍നിന്നു അഞ്ചേക്കര്‍ പാട്ടത്തിനെടുത്താണ് യൂണിറ്റിന്‍റെ പ്രവര്‍ത്തനം തുടങ്ങിയത്. ഒന്നര ഏക്കറോളം പ്രദേശത്ത് അശാസ്ത്രീയമായി ജൈവ-അജൈവ മാലിന്യങ്ങള്‍ കൂട്ടിയിട്ടിരിക്കുന്നതായാണ് ആരോഗ്യവകുപ്പ് പരിശോധനയില്‍ കണ്ടെത്തിയത്. ഈ പ്രദേശത്തുനിന്നു മാലിന്യങ്ങള്‍ പൂര്‍ണമായി നീക്കം ചെയ്ത് അണുവിമുക്തമാക്കുന്ന പ്രവര്‍ത്തനങ്ങള്‍ ഉള്‍പെടെ സ്ഥാപന ഉടമകളെ കൊണ്ട് പഞ്ചായത്ത് ചെയ്യിപ്പിച്ചു.കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി, മുളക്കുളം പഞ്ചായത്ത് പ്രസിഡന്‍റ് ടി.കെ. വാസുദേവന്‍ നായര്‍ എന്നിവരുടെ നേരിട്ടുള്ള ഇടപെടലാണ് നിയമലംഘനത്തിനെതിരേ ശക്തമായ നടപടികള്‍ വേഗത്തിലാക്കിയത്.

വൈദ്യുതി പോസ്റ്റ് വലിച്ചു കെട്ടിയ കമ്പിയിലൂടെ കാട് കയറുന്നത് അപകടഭീഷണി ഉയര്‍ത്തുന്നു

കീഴൂര്‍: വൈദ്യുതി പോസ്റ്റ് വലിച്ചു കെട്ടിയ കമ്പിയിലൂടെ കാട് കയറുന്നത് അപകട ഭീഷണി ഉയര്‍ത്തുന്നു. തലയോലപ്പറമ്പ്-പെരുവ റോഡില്‍ കീഴൂര്‍ പ്ലാംചുവട് ക്ഷേത്രത്തിനു മുന്‍വശത്തു നില്‍ക്കുന്ന വൈദ്യുത പോസ്റ്റിന്‍റെ കമ്പിയിലാണ് വള്ളിച്ചെടികള്‍ വളര്‍ന്നു കയറുന്നത്. സമീപത്തെ ട്രാന്‍സ്‌ഫോര്‍മറിലേക്ക് പോകുന്ന 11 കെവി ലൈനാണ് ഈ പോസ്റ്റിലൂടെ പോകുന്നത്. നിരവധിതവണ കെഎസ്ഇബി അധികൃതരെ വിവരം അറിയിച്ചെങ്കിലും നടപടിയുണ്ടായില്ലെന്ന് നാട്ടുകാര്‍ പറയുന്നു.

വൈക്കം ആയുർവേദ ആശുപത്രിയിലെ കെട്ടിടങ്ങൾ ജീർണാവസ്ഥയിൽ

വൈക്കം: വൈക്കം താലൂക്ക് ആയുർവേദ ആശുപത്രിയിലെ കെട്ടിടം ജീർണാവസ്ഥയിലെന്ന് പരാതി. ജില്ലയിലെ ആയുർവേദ ആശുപത്രികളിൽ ഏറ്റവും പഴക്കമേറിയ ആശുപത്രിയാണ് വൈക്കം താലൂക്ക് ആയുർവേദ ആശുപത്രി. സമീപ ജില്ലകളിൽ നിന്നടക്കം രോഗികൾ ഇവിടെ ചികിത്സ തേടുന്നുണ്ട്. സ്ഥല പരിമിതിയുള്ളതിനാൽ ഇവിടെ കെട്ടിടങ്ങൾ അടുത്തടുത്താണ് സ്ഥിതി ചെയ്യുന്നത്. 10 വർഷങ്ങൾക്ക് മുമ്പ് കെ. അജിത് എംഎൽഎ ആയിരുന്നപ്പോൾ മൂന്നു നിലകളിലായി നിർമിച്ച പേയ്മെന്‍റ് ബ്ലോക്ക് ഇപ്പോൾ അപകടാവസ്ഥയിലാണ്. ഇതിലെ സ്യൂട്ടുകളും സിങ്കിൾ മുറികളും തീർത്തും ഉപയോഗശൂന്യമാണ്. സ്യൂട്ട് ഇതുവരെ ആരും എടുക്കുകയോ ഉപയോഗിക്കുകയോ ചെയ്തിട്ടില്ല. കെട്ടിടത്തിൽ പതിക്കുന്ന മഴവെള്ളം മുഴുവനും കെട്ടിടത്തിനുള്ളിലേക്ക് വീഴുന്ന സ്ഥിതിയാണ്. ആശുപത്രിയുടെ തുടക്ക കാലത്ത് ഉണ്ടായിരുന്ന പഴയ കെട്ടിടം ഇപ്പോൾ പൊളിച്ചു നീക്കിയിട്ടുണ്ട്. കേന്ദ്ര പദ്ധതിയിൽ ഒരു കോടി രൂപ പുതിയ കെട്ടിടം പണിയാൻ അനുവദിച്ചിട്ടുണ്ട്. ഇപ്പോഴത്തെ ഫാർമസിയും കഞ്ഞിവെപ്പ് മുറിയും മരുന്ന് സ്റ്റോർ മുറിയും അതിനോടു ചേർന്നുള്ള ശുചിമുറികളും ചോർന്നൊലിക്കുകയാണ്. കഷായപ്പാത്രങ്ങളും മരുന്നു പൊടികളും കുടയുടെ അടിയിൽ ഭദ്രമായി സൂക്ഷിച്ചാണ് ജോലിക്കാർ വിതരണം നടത്തുന്നത്. ഈ കെട്ടിടത്തിന് ഇപ്പോഴും ഉദ്യോഗസ്ഥർ ഫിറ്റ്നസ് സർട്ടിഫിക്കറ്റ് നൽകുന്നുണ്ടെന്ന് നാട്ടുകാർ ആരോപിക്കുന്നു.

ഭൂമിശാസ്ത്രം സയന്‍സ് പാഠ്യവിഷയത്തില്‍ ഉള്‍പ്പെടുത്തണം: ഡോ. എം.ജി. മനോജ്

കോട്ടയം: കാലാവസ്ഥാ വ്യതിയാനം ഭൂവിനിയോഗപ്രശ്‌നങ്ങള്‍ എന്നിവ നിലനില്‍ക്കുന്ന സാഹചര്യത്തില്‍ ഹ്യുമാനിറ്റീസ് വിഭാഗത്തിലുള്ള ഭൂമിശാസ്ത്ര വിഷയം സയന്‍സ് വിഭാഗത്തില്‍ ഉള്‍പ്പെടുത്തുന്നതിനെക്കുറിച്ച് ഗൗരവമായി ചിന്തിക്കണമെന്ന് കൊച്ചിന്‍ യൂണിവേഴ്‌സിറ്റി അറ്റ്‌മോസ്ഫെറിക് റഡാര്‍ റിസര്‍ച്ച് സെന്‍റര്‍ ശാസ്ത്രജ്ഞന്‍ ഡോ. എം.ജി. മനോജ്. ജില്ലാ ജ്യോഗ്രഫി ടീച്ചേഴ്‌സ് അസോസിയേഷന്‍ നടത്തിയ അനുമോദന സമ്മേളനത്തില്‍ മുഖ്യപ്രഭാഷണവും ജില്ലാതല ജ്യോഗ്രഫി ക്ലബിന്‍റെ ഉദ്ഘാടനവും നിര്‍വഹിച്ചു പ്രസംഗിക്കുകയായിരുന്നു അദ്ദേഹം. അസോസിയേഷന്‍ 2024-25 അധ്യയന വര്‍ഷത്തില്‍ ഒന്നാം വര്‍ഷ ഹയര്‍ സെക്കന്‍ഡറി പരീക്ഷയില്‍ ജില്ലയില്‍ ഉന്നത വിജയം നേടിയ വിദ്യാര്‍ഥികളെ ആദരിച്ചു. ഉദ്ഘാടന സമ്മേളനം കോട്ടയം നഗരസഭ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ നിര്‍വഹിച്ചു. അസോസിയേഷന്‍ പ്രസിഡന്‍റ് കെ.വി. സുരേഷ് അധ്യക്ഷത വഹിച്ചു. നഗരസഭാംഗം കെ. ശങ്കരന്‍, സെക്രട്ടറി വി.എന്‍. സായിരാജ്, വിദ്യ പി. നായര്‍, എന്‍. രവി, പി. ബാബു, എസ്. അഖില്‍, പി.ആര്‍. പ്രിജു എന്നിവര്‍ പ്രസംഗിച്ചു.

കാഞ്ഞിരത്തിൻമൂട്-വെന്നിമല റോഡ് പണി ; നിരാഹാരസമരം നടത്തി

പയ്യപ്പാടി: അഞ്ചു കോടി രൂപ അനുവദിച്ചിട്ടും കാഞ്ഞിരത്തിൻ മൂട്-വെന്നിമല റോഡ് നിർമാണം ആരംഭിക്കാത്തത് സർക്കാരിന്‍റെ അവഗണനകാരണമെന്ന് ചാണ്ടി ഉമ്മൻ എംഎൽഎ. പയ്യപ്പാടി കവലയിൽ അഞ്ചാം വാർഡ് മെംബർ മോനിച്ചൻ കുറ്റിപ്പുറം നടത്തിയ 12 മണിക്കൂർ നിരാഹാരസസമരം ഉദ്ഘാടനം ചെയ്യുകയായിരുന്നു അദ്ദേഹം. കെപിസിസി നിർവാഹകസമിതിയംഗം ജോഷി ഫിലിപ്, നേതാക്കളായ കുഞ്ഞ് ഇല്ലമ്പള്ളി, പ്രഫ. സി. മാമച്ചൻ, ജിനു കെ. പോൾ, തമ്പി ചന്ദ്രൻ, വത്സമ്മ മാണി, വർഗീസ് ചാക്കോ, പി.എം. സ്കറിയ, സാബു പുതുപ്പറമ്പിൽ, കെ.ബി. ഗിരീശൻ, സാം കെ. വർക്കി, ഇ.കെ. പ്രകാശൻ, അജിത് പി. കുര്യൻ, രാധാകൃഷ്ണൻ നായർ, വിനീഷ് ബെന്നി, ബിനീഷ് ബെന്നി, ജസ്റ്റിൻ ജോൺ, വിനു വരയപ്പള്ളി എന്നിവർ പ്രസംഗിച്ചു.

വിലക്കയറ്റത്തിനെതിരേ സമരവുമായി മഹിളാ മോർച്ച

പള്ളിക്കത്തോട് :വിലക്കയറ്റത്തിനെതിരേ പള്ളിക്കത്തോട് മഹിളാ മോർച്ചയുടെ നേതൃത്വത്തിൽ സിവിൽ സപ്ലൈസ് സൂപ്പർ മാർക്കറ്റിലേക്ക് നടത്തിയ പ്രതിഷേധ മാർച്ചും ധർണയും ബിജെപി മധ്യമേഖല പ്രസിഡന്‍റ് എൻ. ഹരി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് മഞ്ജു ബിജു അധ്യക്ഷത വഹിച്ചു. പഞ്ചായത്തംഗങ്ങളായ അശ്വതി സതീഷ്, പഞ്ചായത്തംഗം ആശ ഗിരീഷ്, മഹിളാ മോർച്ച ജില്ലാ ജനറൽ സെക്രട്ടറി ജ്യോതി ബിനു, സന്ധ്യാ അജികുമാർ, അഖിൽ രവീന്ദ്രൻ, ടി.ബി. ബിനു, സതീഷ് ചന്ദ്രൻ എന്നിവർ പ്രസംഗിച്ചു.

ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ചെയ്യും: മന്ത്രി

കോട്ടയം: മാറിയ പാഠപുസ്തകത്തിനനുസരിച്ച് ഒന്നു മുതല്‍ 10 വരെ ക്ലാസുകള്‍ക്കുള്ള ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ആരംഭിക്കുമെന്ന് മന്ത്രി വി. ശിവന്‍കുട്ടി. കുട്ടികള്‍ക്കുള്ള അധിക പിന്തുണ എന്ന തരത്തിലാണ് ഈ ക്ലാസുകള്‍ തയാറാക്കിയിട്ടുള്ളത്. സമഗ്രഗുണമേന്മ വിദ്യാഭ്യാസ പദ്ധതിയുടെ ഭാഗമായി അക്കാദമിക് മോണിറ്ററിംഗ് പ്ലാറ്റ്‌ഫോമുകള്‍ പരിചയപ്പെടുത്താന്‍ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍റെ (കൈറ്റ്) നേതൃത്വത്തില്‍ ജില്ലയില്‍ നടന്ന ഹൈസ്‌കൂള്‍ പ്രഥമാധ്യാപക ശില്പശാലയില്‍ വീഡിയോ കോണ്‍ഫറന്‍സിംഗിലൂടെ പ്രസംഗിക്കുകയായിരുന്നു മന്ത്രി. കൈറ്റ് സിഇഒ കെ. അന്‍വര്‍ സാദത്തും പങ്കെടുത്തു. സമഗ്ര പ്ലസ് (www.samagra. kite.kerala.gov.in) പോര്‍ട്ടലിലൂടെ ടീച്ചര്‍ക്ക് ഡിജിറ്റല്‍ പ്ലാനുകള്‍ തയാറാക്കി സൂക്ഷിക്കാനും പ്രഥമാധ്യാപകര്‍ക്ക് സമര്‍പ്പിക്കാനും കഴിയും. അതോടൊപ്പം ഈ പോര്‍ട്ടലിലുള്ള ഡിജിറ്റല്‍ റിസോഴ്‌സുകള്‍ ലേണിംഗ് റൂം സംവിധാനം വഴി കുട്ടികള്‍ക്കും രക്ഷിതാക്കള്‍ക്കും ഒരുപോലെ പ്രയോജനപ്പെടുത്താനുമാവും. സ്‌കീം ഓഫ് വര്‍ക്കിനനുസരിച്ചാണോ തന്‍റെ പ്രവര്‍ത്തനങ്ങള്‍ മുന്നോട്ടു പോകുന്നതെന്ന് ടീച്ചര്‍ക്ക് സ്വയം വിലയിരുത്താം. നേരത്തേ വിദ്യാഭ്യാസ ഓഫീസര്‍മാര്‍ക്കും പ്രൈമറി സ്‌കൂളിലെ പ്രഥമാധ്യാപകര്‍, ഐ.ടി. കോ-ഓര്‍ഡിനേറ്റര്‍മാര്‍, എസ്. ആര്‍.ജി. കണ്‍വീനര്‍മാര്‍ തുടങ്ങിയവര്‍ക്കും കൈറ്റ് പരിശീലനം നല്‍കിയിരുന്നു. ശില്പശാലയില്‍ ജില്ലയിലെ 243 ഹൈസ്‌കൂള്‍ പ്രഥമാധ്യാപകര്‍ പങ്കെടുത്തു. തുടര്‍ന്ന് ഹൈസ്‌കൂള്‍ വിഭാഗം ഐടി കോ-ഓര്‍ഡിനേറ്റര്‍മാര്‍ക്കും എസ്.ആര്‍.ജി. കണ്‍വീനര്‍മാര്‍ക്കും പരിശീലനം നല്‍കും. ഇവരാണ് സ്‌കൂളുകളിലെ മറ്റ് അധ്യാപകര്‍ക്ക് പരിശീലനം നല്‍കുക. ജില്ലയില്‍ ശില്പശാലയ്ക്ക് ജില്ലാ കോ-ഓര്‍ഡിനേറ്റര്‍ തോമസ് വര്‍ഗീസ് നേതൃത്വം നല്‍കി. ജില്ലയിലെ മാസ്റ്റര്‍ ട്രയിനര്‍മാര്‍ വിവിധ വിഷയങ്ങളില്‍ ക്ലാസുകള്‍ നയിച്ചു.

കേരള കത്തോലിക്കാ സഭയില്‍ മലങ്കര റീത്ത് അനുവദിച്ചതിന്‍റെ വാര്‍ഷികാഘോഷം

കല്ലിശേരി: ക്‌നാനായ മലങ്കര പുനരൈക്യത്തിന്‍റെയും കേരള കത്തോലിക്കാ സഭയില്‍ അന്ത്യോക്യന്‍ സുറിയാനി റീത്ത് (മലങ്കര റീത്ത്) അനുവദിച്ചതിന്‍റെയും 104-ാം വാര്‍ഷികാഘാഷം നടത്തി. ഉമയാറ്റുകര ഓര്‍ത്തഡോക്‌സ് ഇടവക കുരിശടിയില്‍നിന്നു പുനരൈക്യ റാലിയോടെ പരിപാടികള്‍ക്കു തുടക്കമായി. കോട്ടയം അതിരൂപത സഹായമെത്രാന്‍ ഗീവര്‍ഗീസ് മാര്‍ അപ്രേമിന്‍റെ അധ്യക്ഷതയില്‍ ചേര്‍ന്ന സമ്മേളനം സഹായ മെത്രാന്‍ മാര്‍ ജോസഫ് പണ്ടാരശേരില്‍ ഉദ്ഘാടനം ചെയ്തു. ഫാ. തോമസ് ആനിമൂട്ടില്‍, ഫാ. റെന്നി കട്ടേല്‍, സാബു പാറാനിക്കല്‍, സല്‍വി തയ്യില്‍, ഏയ്ബു നെടിയുഴത്തില്‍, ജെസി ചെറുമണത്ത് എന്നിവര്‍ പ്രസംഗിച്ചു. വിവിധ മേഖലകളില്‍ പ്രാഗത്ഭ്യം തെളിയിച്ച മലങ്കര ഫൊറോന അംഗങ്ങളെ ആദരിച്ചു.

പുസ്തകപ്രേമികള്‍ക്കു സന്തോഷിക്കാം : കോട്ടയം പബ്ലിക് ലൈബ്രറിയിലെ പഴയ പുസ്തകങ്ങള്‍ ഡിജിറ്റലാക്കുന്നു

കോട്ടയം: പഴക്കമുള്ള പുസ്തകങ്ങള്‍ ഇനി ലോകത്തിന്‍റെ ഏതു കോണിലിരുന്നും വായിക്കാം. കോട്ടയം പബ്ലിക് ലൈബ്രറിയിലെ 1960ന് മുമ്പുള്ള എല്ലാ പുസ്തകങ്ങളും ഡിജിറ്റലാക്കുന്ന ജോലികള്‍ പുരോഗമിക്കുകയാണ്. ലൈബ്രറിയില്‍ സൂക്ഷിച്ചിരിക്കുന്ന വര്‍ഷങ്ങള്‍ പഴക്കമുള്ള മലയാളം, ഇംഗ്ലീഷ് ഭാഷകളിലുള്ള തെരഞ്ഞെടുത്ത 30,000 പുസ്തകങ്ങളാണ് ആദ്യഘട്ടത്തില്‍ ഡിജിറ്റല്‍ രൂപത്തിലാക്കുന്നത്. പാലക്കാട് മണ്ണാര്‍ക്കാട് കേന്ദ്രമായി പ്രവര്‍ത്തിക്കുന്ന ഇന്‍ഡിക് ഡിജിറ്റല്‍ ആര്‍ക്കൈവ് ഫൗണ്ടേഷന്‍ പ്രവര്‍ത്തകരുടെ നേതൃത്വത്തിലാണ് ഡിജിറ്റലൈസേഷന്‍ പ്രവര്‍ത്തനങ്ങള്‍ ആരംഭിച്ചിരിക്കുന്നത്. ആദ്യഘട്ടത്തില്‍ തെരഞ്ഞെടുത്തിരിക്കുന്ന 30,000 പുസ്തകങ്ങള്‍ ഡിജിറ്റലാക്കുന്ന പ്രവര്‍ത്തനങ്ങള്‍ അടുത്ത ദിവസം ആരംഭിക്കും. വലിയ ഡിജിറ്റല്‍ സ്‌കാനര്‍ ഉപയോഗിച്ചാണ് പുസ്തകങ്ങള്‍ സ്‌കാന്‍ ചെയ്യുന്നത്. ഫൗണ്ടേഷന്‍റെ രണ്ടു പ്രവര്‍ത്തകര്‍ പുസ്തങ്ങള്‍ സ്‌കാന്‍ ചെയ്യുന്നതു പൂര്‍ത്തിയാക്കി. ചുരുങ്ങിയ ദിവസങ്ങള്‍ക്കുള്ളില്‍ പുസ്തകങ്ങള്‍ ഡിജിറ്റല്‍ രൂപത്തിലാക്കും. ഏതാണ്ട് ആറു മാസത്തിനുള്ളില്‍ പുസ്തകങ്ങള്‍ ഡിജിറ്റലാക്കി കോട്ടയം പബ്ലിക് ലൈബ്രറിയുടെ വെബ്‌സൈറ്റില്‍ പ്രസിദ്ധീകരിക്കും. ഇതിനു പുറമേ ഇന്‍ഡിക് ഡിജിറ്റല്‍ ആര്‍ക്കൈവ് ഫൗണ്ടേഷന്‍റെ ഗ്രന്ഥപ്പുര എന്ന വെബ്‌സൈറ്റിലും പുസ്തങ്ങള്‍ പ്രസിദ്ധീകരിക്കുന്നുണ്ട്. ലോകത്തെവിടെയുമുള്ള ആളുകള്‍ക്കും സൗജന്യമായി പുസ്തകങ്ങള്‍ വായിക്കാം. ഇതിന് ലൈബ്രറിയുടെ അംഗത്വം ആവശ്യമില്ല. രണ്ടാം ഘട്ടമായി മറ്റു പുസ്തകങ്ങളും ഡിജിറ്റലാക്കുന്ന ജോലികള്‍ ആരംഭിക്കും. ലൈബ്രറിയില്‍ ഇപ്പോള്‍ മലയാളത്തിലും ഇംഗ്ലീഷിലുമായി രണ്ടരലക്ഷത്തില്‍പ്പരം പുസ്തകങ്ങളാണുള്ളത്. ഇവയില്‍ ആറുപതിനായിരത്തോളം പുസ്തകങ്ങള്‍ ഡിജിറ്റലാക്കാനാണ് ഇപ്പോള്‍ തീരുമാനിച്ചിരിക്കുന്നത്. മോഹവിലയുള്ള പുസ്തകങ്ങള്‍ക്കു പുറമേ 1950ല്‍ പ്രസിദ്ധീകരിച്ച കേരള പാഠാവലി, 70 വര്‍ഷത്തിലേറെ പഴക്കമുള്ള വര്‍ത്തമാന പത്രങ്ങള്‍, മാസികകള്‍, സുവനീറുകള്‍, നോട്ടീസുകള്‍ എന്നിവയും ഡിജിറ്റലാക്കുന്നുണ്ട്. ഏതെങ്കിലും പുസ്തകത്തിന്‍റെ ഗ്രന്ഥകര്‍ത്താവ് ജീവിച്ചിരിപ്പുണ്ടെങ്കില്‍ ഡിജിറ്റൈസ് ചെയ്യാന്‍ അനുമതി വാങ്ങുകയും ചെയ്യും. വിലമതിക്കാനാവാത്ത പുസ്തകങ്ങള്‍ ഡിജിറ്റല്‍ രൂപത്തിലാക്കുന്നതു ഗവേഷണ വിദ്യാര്‍ഥികള്‍ ഉള്‍പ്പെടെയുള്ളവര്‍ക്കു വലിയ പ്രയോജനമാകും. കോട്ടയം സിഎംഎസ് പ്രസില്‍ അച്ചടിച്ച മലയാളത്തിലെ ആദ്യത്തെ പുസ്തകം മുതല്‍ 1960 മുമ്പ് അച്ചടിച്ച അപൂര്‍വ പുസ്തകങ്ങളുടെ വലിയ ശേഖരമാണ് പബ്ലിക് ലൈബ്രറിയിലുള്ളത്. ഇവയെല്ലാം ഓണ്‍ലൈനില്‍ സൗജന്യമായി ലഭ്യമാകുന്നത് അക്ഷരപ്രേമികള്‍ക്കും യുവ തലമുറയ്ക്കും വലിയ മുതല്‍ക്കൂട്ടാകും. ഇന്‍ഡിക് ഡിജിറ്റല്‍ ആര്‍ക്കൈവ് ഫൗണ്ടേഷന്‍ സൗജന്യമായിട്ടാണ് ഡിജിറ്റലാക്കുന്നതിനുള്ള പ്രവര്‍ത്തനങ്ങള്‍ ചെയ്യുന്നത്. ഉദ്ഘാടനം ഇന്ന് കോട്ടയം: പബ്ലിക് ലൈബ്രറിയില്‍ പഴയ പുസ്തകങ്ങള്‍ ഡിജിറ്റൈസ് ചെയ്യുന്നതിന്‍റെ ഉദ്ഘാടനം ഇന്നു ഉച്ചകഴിഞ്ഞു രണ്ടിനു നടക്കും. ലൈബ്രറി പ്രസിഡന്‍റ് ഏബ്രഹാം ഇട്ടിച്ചെറിയ ഉദ്ഘാടനം ചെയ്യും. സംസ്ഥാനത്ത് ഗ്രന്ഥശേഖരം വരും തലമുറയ്ക്കു നഷ്ടമാകാതെ ഡിജിറ്റൈസ് ചെയ്ത് സംരക്ഷിക്കുന്ന ആദ്യ ലൈബ്രറിയാണ് കോട്ടയം പബ്ലിക് ലൈബ്രറി.

ബേക്കര്‍ ജംഗ്ഷനിൽ വീണ്ടും ഗതാഗത പരിഷ്‌കാരം

പഴയ ഗതാഗത പരിഷ്‌കാരം പിന്‍വലിച്ചു കോട്ടയം: നഗരത്തില്‍ വീണ്ടും ഗതാഗത പരിഷ്‌കാരവുമായി പോലീസ്. ബേക്കര്‍ ജംഗ്ഷനിലാണ് കുരുക്കൊഴിവാക്കാന്‍ പുതിയ പരിഷ്‌കാരം ഏര്‍പ്പെടുത്തുന്നത്. കഴിഞ്ഞ മൂന്നാഴ്ച പരീക്ഷണാടിസ്ഥാനത്തില്‍ നടപ്പാക്കിയ പരിഷ്‌കാരങ്ങള്‍ കുരുക്കൊഴിവാക്കാന്‍ കാര്യമായി പ്രയോജനപ്പെട്ടില്ലെന്നു മാത്രമല്ല, യാത്രക്കാര്‍ക്കും പൊതുജനങ്ങള്‍ക്കും കൂടുതല്‍ ബുദ്ധിമുട്ടുണ്ടാക്കുകയാണ് ചെയ്തത്. ഇതു പരിഗണിച്ചാണ് ജില്ലാ പോലീസ് ചീഫിന്‍റെ നിര്‍ദേശ പ്രകാരം ഇന്നു മുതല്‍ പുതിയ പരിഷ്‌കാരം നടപ്പാക്കുന്നത്. ഇതിന്‍പ്രകാരം കുമരകം, അയ്മനം, കുടമാളൂര്‍ ഭാഗത്തുനിന്നു വരുന്ന സ്വകാര്യ ബസുകളും കെഎസ്ആര്‍ടിസി ബസുകളും എംസി റോഡില്‍ ഇറക്കി നിര്‍ത്താതെ സൂഡിയോ കടയുടെ മുന്‍വശത്തു നിര്‍ത്തി യാത്രക്കാരെ ഇറക്കി സീസേഴ്‌സ് ജംഗ്ഷന്‍ വഴി നാഗമ്പടം സ്റ്റാന്‍ഡിലേക്ക് പോകണം. ഈ ഭാഗത്തുനിന്നു വരുന്ന ബസുകള്‍ ബേക്കര്‍ ജംഗ്ഷനിലെത്തി ശാസ്ത്രീ റോഡ് ബസ്‌റ്റോപ്പില്‍ ആളെ ഇറക്കി കുര്യന്‍ ഉതുപ്പ് റോഡുവഴി നാഗമ്പടത്തേക്ക് പോകുന്ന രീതിയായിരുന്നു മൂന്നാഴ്ച നടപ്പാക്കിയിരുന്നത്. ഇതു യാത്രക്കാരെ വലച്ചിരുന്നു. എംസി റോഡു വഴി ഏറ്റുമാനൂര്‍, മെഡിക്കല്‍ കോളജ് ഭാഗങ്ങളിലേക്ക് പോകുന്ന സ്വകാര്യ ബസുകളും കെഎസ്ആര്‍ടിസി ബസുകളും ശക്തി ഹോട്ടലിനു സമീപമുള്ള വെയിറ്റിംഗ് ഷെഡിനു മുന്‍വശം നിര്‍ത്തി യാത്രക്കാരെ കയറ്റി ഉടന്‍ തന്നെ പേകണം. ഇതാണ് പുതിയ പരിഷ്‌കാരം. പരിഷ്‌കാരത്തിന്‍റെ ഭാഗമായി ബേക്കര്‍ ജംഗ്ഷനില്‍ ഇപ്പോള്‍ ബസ് നിര്‍ത്തുന്ന എവിജി പമ്പിനു സമീപം ട്രാഫിക് കോണ്‍ ഉപയോഗിച്ച് കയര്‍ കെട്ടി ബ്ലോക്ക് ചെയ്തിട്ടുണ്ട്. യാത്രക്കാര്‍ മുന്നോട്ടു മാറി വെയിറ്റിംഗ് ഷെഡിൽ നില്‍ക്കണമെന്ന ബോര്‍ഡുമുണ്ട്. പുതിയ ഗതാഗത പരിഷ്‌കാരങ്ങള്‍ നടപ്പാക്കാനും നിയന്ത്രിക്കാനും ഇന്നു മുതല്‍ പോലീസന്‍റെ നിരീക്ഷണവുമുണ്ടാകും. പരിഷ്‌കാരങ്ങള്‍ ഏര്‍പ്പെടുത്തിയാലും പലപ്പോഴും പാലിക്കപ്പെടാതെ പോകുന്നതയാണ് കാണാന്‍ കഴിയുന്നത്. ബേക്കര്‍ ജംഗ്ഷനിലെ ബസ്റ്റോപ്പ് മാറ്റം എത്രത്തോളം പ്രായോഗികമാകുമെന്ന് കണ്ടറിയേണ്ടതാണ്. ഇവിടെ പോലീസിന്‍റെ നിയന്ത്രണം ഉണ്ടെങ്കിലേ പരിഷ്‌കാരം വിജയിക്കുകയുള്ളൂ. അല്ലെങ്കില്‍ ബസുകള്‍ തോന്നും പടി നിര്‍ത്തും. ബേക്കര്‍ ജംഗ്ഷനില്‍ ശക്തി ഹോട്ടലിനു മുന്‍വശത്തു വാഹനങ്ങള്‍ യുടേണ്‍ എടുക്കുന്നതും ഗതാഗതക്കുരുക്കിനു കാരണമാകുന്നുണ്ട്. ഇത് നിയന്ത്രിക്കാന്‍ പോലീസ് തയാറാകുന്നില്ല. അതേപോലെ, കുമരകം റോഡിലും ട്രാഫിക് കോണുകള്‍ തീരുന്ന ഭാഗത്ത് വാഹനങ്ങള്‍ യുടേണ്‍ എടുക്കുന്നു. ഇതു നിയന്ത്രിക്കണം. സൂഡിയോയ്ക്കു മുമ്പിലുടെയുള്ള റോഡില്‍ ഓട്ടോറിക്ഷ സ്റ്റാന്‍ഡുമുണ്ട്. ഇവിടെ പലപ്പോഴും രണ്ടു വരിയായിട്ടാണ് ഓട്ടോറിക്ഷകള്‍ പാര്‍ക്കു ചെയ്യുന്നത്. കഷ്ടിച്ച് ഒരു വാഹനത്തിനു മാത്രം കടന്നു പോകാനേ സാധിക്കുന്നുള്ളൂ. അതേപോലെ വണ്‍വേയായ റോഡില്‍ കൂടി വാഹനങ്ങള്‍ കയറി വരുന്നതും കുരുക്കുണ്ടാക്കുന്നുണ്ട്. ഇവിടെ വണ്‍വേയാണെന്നുള്ള ബോര്‍ഡ് പോലുമില്ല.

നീർനായയുടെ കടിയേറ്റ വീട്ടമ്മ കുഴഞ്ഞുവീണ് മരിച്ചു

കോട്ടയം: നീർനായയുടെ (കഴുന്ന) കടിയേറ്റ വീട്ടമ്മ കുഴഞ്ഞുവീണു മരിച്ചു. വേളൂർ പാണംപടി കലയംകേരിൽ ഇബ്രാഹിംകുട്ടിയുടെ ഭാര്യ നിസാനി (53) ആണ് മരിച്ചത്. ഇന്നലെ രാവിലെ 10.30 ഓടെ ആറ്റിൽ തുണി കഴുകുന്നതിനിടെ നീർനായ കടിക്കുകയായിരുന്നു. തുടർന്ന് ജനറൽ ആശുപത്രിയിൽ പ്രാഥമിക ചികിത്സയ്ക്ക് ശേഷം വീട്ടിലേക്കു മടങ്ങി. പിന്നീട്, വൈകുന്നേരം കുഴഞ്ഞ് വീണതിനെ തുടർന്ന് കോട്ടയം മെഡിക്കൽ കോളജ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഫോറസ്റ്റ് ഡിപ്പാർട്ട്‌മെന്‍റിൽ വിവരം അറിയിച്ചു. പോസ്റ്റുമോർട്ടം റിപ്പോർട്ട് ലഭിച്ചാൽ മാത്രമേ മരണകാരണം വ്യക്തമാകൂ. മകൾ: ജാസ്മിൻ. മരുമകൻ: മുബാറക്. കബറടക്കം ഇന്ന് വൈകുന്നേരം മൂന്നിന് താഴത്തങ്ങാടി ജുമാ മസ്ജിദ് കബർസ്ഥാനിൽ.

വിശുദ്ധ തോമ്മാശ്ലീഹായുടെ ധീരമായ മാതൃക അനുകരിക്കണം: മാര്‍ തോമസ് തറയില്‍

നിരണം: ക്രിസ്തുശിഷ്യനായ മാര്‍ തോമ്മാശ്ലീഹായുടെ പാദസ്പര്‍ശത്താല്‍ പവിത്രമായ നിരണം തീര്‍ഥാടനകേന്ദ്രത്തിലേക്കുള്ള തീര്‍ഥാടനം ഭക്തജനപ്രവാഹമായി. ചങ്ങനാശേരി അതിരൂപത യുവദീപ്തി എസ്എംവൈഎമ്മിന്‍റെ നേതൃത്വത്തില്‍ പത്തൊമ്പതാമത് നിരണം തീര്‍ഥാടനമാണ് ഭക്തജനനിബിഡമായത്. അതിരൂപതയുടെ 18 ഫൊറോനകളില്‍ നിന്നുള്ള യുവജനങ്ങളും മുതിര്‍ന്നവരുമായ വിശാസികളാണ് കോരിച്ചൊരിഞ്ഞ മഴയെ അവഗണിച്ച് പ്രാര്‍ഥനാപൂര്‍വം തീര്‍ഥാടനത്തില്‍ അണിചേര്‍ന്നത്. രാവിലെ ഏഴിന് ചങ്ങനാശേരി സെന്‍റ് മേരീസ് മെത്രാപ്പോലീത്തന്‍പള്ളിയിലെ അഭിവന്ദ്യ പിതാക്കന്മാരുടെ കബറിട പള്ളിയില്‍ അര്‍പ്പിച്ച വിശുദ്ധ കുര്‍ബാനയ്ക്കുശേഷം തീര്‍ഥാടനത്തിനു തുടക്കംകുറിച്ചു. അതിരൂപത വികാരി ജനറാൾ മോണ്‍. ആന്‍റണി എത്തയ്ക്കാട്ട് കത്തിച്ചതിരി പ്രസിഡന്‍റ് അരുണ്‍ ടോം തോപ്പിലിനും യുവദീപ്തി പതാക ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസിനും കൈമാറി തീര്‍ഥാടനം ഉദ്ഘാടനം ചെയ്തു. അതിരൂപത ഡയറക്ടര്‍ ഫാ. സാവിയോ മാനാട്ട് ആമുഖപ്രസംഗവും കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍ അനുഗ്രഹ പ്രഭാഷണവും നടത്തി. ചങ്ങനാശേരി സെന്‍ട്രല്‍ ജംഗ്ഷന്‍, ളായിക്കാട്, ഇടിഞ്ഞില്ലം, വേങ്ങല്‍, കാവുംഭാഗം, പൊടിയാടിവഴിയാണ് തീര്‍ഥാടകര്‍ നിരണത്ത് എത്തിച്ചേര്‍ന്നത്. ആര്‍ച്ച്ബിഷപ് മാര്‍ തോമസ് തറയില്‍ പൊടിയാടിമുതല്‍ തീര്‍ഥാടകരോടൊപ്പം ചേര്‍ന്നത് യുവജനങ്ങള്‍ക്ക് ആവേശമായി. നിരണം തീര്‍ഥാടന കേന്ദ്രത്തില്‍ തീര്‍ഥാടനം എത്തിയശേഷം മാര്‍ തോമസ് തറയില്‍ കല്‍വിളക്കില്‍ തിരി തെളിച്ചു. ക്രിസ്തുശിഷ്യനായ ഭാരതത്തിന്‍റെ അപ്പസ്‌തോലന്‍ വിശുദ്ധ തോമ്മാശ്ലീഹായുടെ ധീരതയും മാതൃകയും വിശ്വാസ തീര്‍ഥാടനത്തില്‍ യുവജനങ്ങള്‍ മാതൃകയാക്കണമെന്ന് മാര്‍ തോമസ് തറയില്‍ സന്ദേശത്തില്‍ പറഞ്ഞു. മാര്‍ത്തോമ്മാ ശ്ലീഹായുടെ തിരുശേഷിപ്പ് കൂടാരത്തിലെ പ്രാര്‍ഥനയ്ക്ക് ശേഷം തീര്‍ഥാടകര്‍ക്ക് നേര്‍ച്ചഭക്ഷണം വിതരണം ചെയ്തു. അതിരൂപത ഡയറക്ടര്‍ ഫാ. സാവിയോ മാനാട്ട് പ്രാര്‍ഥന നയിച്ചു. ഫാ.ടോണി പുതുവീട്ടില്‍ക്കളം, ക്രിസ്റ്റി കെ. കുഞ്ഞുമോന്‍, അലക്സ് മഞ്ഞുമേല്‍, ലാലിച്ചന്‍ മറ്റത്തില്‍, സിസ്റ്റര്‍ തെരസീന, ക്രിസ്റ്റിന്‍ സേവ്യര്‍, ജോയല്‍ ജോണ്‍ റോയി, ലൂസി ഫിലിപ്പോസ്, ഡെന്നി തോമസ്, റിയ പുന്നശേരി എന്നിവര്‍ നേതൃത്വം നല്‍കി. തീര്‍ഥാടനകേന്ദ്രത്തില്‍ രാവിലെ ആര്‍ച്ച്ബിഷപ് മാര്‍ ജോസഫ് പെരുന്തോട്ടം വിശുദ്ധകുര്‍ബാന അര്‍പ്പിച്ച് സന്ദേശം നല്‍കി. തീര്‍ഥാടനകേന്ദ്രം റെക്ടര്‍ ഫാ.ജോര്‍ജ് മൂലംകുന്നം, സ്പിരിച്വല്‍ ഡയറക്ടര്‍ ഫാ.ജോര്‍ജ് വല്ലയില്‍ എന്നിവര്‍ തീര്‍ഥാടകരെ സ്വീകരിച്ചു. കൊടിയിറക്കോടെ തീര്‍ഥാടനത്തിനു പ്രൗഢസമാപനമായി.

പാലാ സാന്തോം ഫുഡ് ഫാക്ടറി 14ന് ഉദ്ഘാടനം ചെയ്യും

കോട്ടയം: പാലാ രൂപതയുടെ പ്ലാറ്റിനം ജൂബിലി സ്മാരകമായി ഫുഡ് ഫാക്ടറി യാഥാര്‍ഥ്യമാകുന്നു. രൂപത ആവിഷ്‌കരിച്ച കര്‍ഷക ശക്തീകരണ പദ്ധതിയായ കര്‍ഷക ബാങ്കിന്‍റെ 10-ാം വാര്‍ഷിക മേളയില്‍ കാര്‍ഷിക മൂല്യവര്‍ധിത സംരംഭം എന്ന വിധത്തിലാണ് പാലാ സാന്തോം എന്ന പേരില്‍ ഫുഡ് ഫാക്ടറി യാഥാര്‍ഥ്യമാക്കിയിരിക്കുന്നത്. രൂപതയുടെ ഉടമസ്ഥതയിലൂള്ള കരൂര്‍ മുണ്ടുപാലം സ്റ്റീല്‍ ഇന്ത്യ കാമ്പസിലെ ആറേക്കറോളം സ്ഥാലത്തുള്ള അഗ്രോ ഇന്‍ഡസ്ട്രിയല്‍ പാര്‍ക്കിലാണ് ഫുഡ് ഫാക്ടറി. കൃഷി വകുപ്പില്‍നിന്നു രൂപതയ്ക്ക് അനുവദിച്ച് പാലാ രൂപത സോഷ്യല്‍ വെല്‍ഫെയര്‍ സൊസൈറ്റി പ്രമോട്ട് ചെയ്യുന്ന പാലാ സാന്തോം ഫാര്‍മേഴ്‌സ് പ്രൊഡ്യൂസര്‍ കമ്പനിയുടെ നേതൃത്വത്തില്‍ ആരംഭിക്കുന്ന സാന്തോം ഫുഡ് ഫാക്ടറിയുടെ ഉദ്ഘാടനം 14ന് നടക്കും. മീനച്ചില്‍ താലൂക്കിലും പരിസരത്തും സുലഭമായുള്ള ചക്കയും കപ്പയും കൈതച്ചക്കയും ഏത്തയ്ക്കയും ഇതര പഴവര്‍ഗങ്ങളും പച്ചക്കറികളും കര്‍ഷകരില്‍നിന്നു ന്യായവിലയ്ക്ക് സംഭരിച്ച് മൂല്യവര്‍ധിത ഉത്പന്നങ്ങളാക്കി വിപണിയിലിറക്കുക എന്നതാണ് ഫുഡ് ഫാക്ടറിയിലൂടെ ലക്ഷ്യമിടുന്നത്. വിദേശ രാജ്യങ്ങളിലേക്കും വിപണി ശൃംഖല വ്യാപിപ്പിച്ച് ഗുണമേന്മമുള്ള ഭക്ഷ്യ വസ്തുക്കള്‍ ലോകത്തിന്‍റെ വിവിധ ഭാഗങ്ങളില്‍ എത്തിക്കാനും ലക്ഷ്യമിടുന്നു. കൃഷി വകുപ്പിന്‍റെ സ്‌മോള്‍ ഫാര്‍മേഴ്‌സ് അഗ്രി ബിസിനസ് കണ്‍സോര്‍ഷ്യമെന്ന എസ്എഫ്എസിയില്‍ നിന്നും ജില്ലയില്‍ അനുവദിച്ച നാല് എഫ്പിഒകളില്‍ ഒന്നാണ് സാന്തോം എഫ്പിഒ. രൂപതയിലെ വിവിധ ഇടവകകളില്‍ പ്രവര്‍ത്തിക്കുന്ന ഉത്പാദക സംഘടനകള്‍, കമ്പനികള്‍, കര്‍ഷക ദള ഫെഡറേഷനുകള്‍, ഫാര്‍മേഴ്‌സ് ക്ലബുകള്‍, സ്വാശ്രയ സംഘങ്ങള്‍ തുടങ്ങിയവര്‍ ഉത്പാദിപ്പിക്കുന്ന മൂല്യവര്‍ധിത ഉത്പന്നങ്ങള്‍ തനതു ബ്രാന്‍ഡില്‍ ആഭ്യന്തര, വിദേശ വിപണനത്തിനു സാധ്യമാക്കും. ആധുനിക സാങ്കേതികവിദ്യയോടുകൂടിയ 18 യന്ത്രസാമഗ്രികളാണ് ഫാക്ടറിയിലുള്ളത്. അത്യാധുനികവും വിശാലവുമായ കോള്‍ഡ് സ്‌റ്റോജ്, ഡീ ഹൈഡ്രേറ്റ് യൂണിറ്റ്, പള്‍പ്പിംഗ്, വറ, പൊരി, പൗഡറിംഗ് യൂണിറ്റുകളും ഫാക്ടറിയിലുണ്ട്. കര്‍ഷകര്‍ക്ക് അവരുടെ വിളകളും ഉത്പന്നങ്ങളും ഉണങ്ങുവാനുള്ള യൂണിറ്റിനപ്പുറം ന്യായവില ഉറപ്പാക്കി മൂല്യവർധിത ഉത്പന്നങ്ങളാക്കി മാറ്റുന്നതിനുള്ള സാധ്യതയാണ് ഫാക്ടറി ഉറപ്പുതരുന്നത്. പാലാ സോഷ്യല്‍ സര്‍വീസ് സൊസൈറ്റിയുടെ നേതൃത്വത്തില്‍ നിലവില്‍ കാഞ്ഞിരമറ്റം അഗ്രോ പ്രൊഡ്യൂസര്‍ കമ്പനിയുടെ കാന്‍ വേ പ്രൊഡക്‌ഷന്‍സ് യൂണിറ്റ്, മൂഴൂര്‍ കര്‍ഷക ദള ഫെഡറേഷന്‍റെ കാര്‍ഷിക മൂല്യവര്‍ധിത സംഭരണ കേന്ദ്രവും മൂഴൂര്‍ മിത്രം പ്രൊഡക്‌ഷന്‍ യൂണിറ്റും, മാന്‍വെട്ടം, വയലാ, വെള്ളിയാമറ്റം എന്നിവിടങ്ങളിലെ സംസ്‌കരണ കേന്ദ്രങ്ങളില്‍ ആയിരക്കണക്കിനു കിലോ കാര്‍ഷിക വിളകളുടെ സംസ്‌കരണം എന്നിവയും നടന്നുവരുന്നുണ്ട്. 14ന് ഉച്ചകഴിഞ്ഞ് മൂന്നിന് സ്റ്റീല്‍ ഇന്ത്യാ കാമ്പസില്‍ നടക്കുന്ന ചടങ്ങില്‍ കൃഷിമന്ത്രി പി. പ്രസാദ് ഫാക്ടറി ഉദ്ഘാടനം ചെയ്യും. ബിഷപ് മാര്‍ ജോസഫ് കല്ലറങ്ങാട്ട് അധ്യക്ഷത വഹിക്കും. മന്ത്രിമാരും ജനപ്രതിനിധികളും യോഗത്തില്‍ പങ്കെടുക്കും. സമ്മേളനത്തില്‍ രൂപതയുടെ പ്ലാറ്റിനം ജൂബിലിയോടനുബന്ധിച്ച് 75 മാതൃകാ കര്‍ഷകരെ ആദരിക്കും. കൃഷിയിടങ്ങള്‍ പാഴായി കിടക്കാതെ സംഘകൃഷി സാധ്യതകള്‍ വളര്‍ത്തി വിഷരഹിത കൃഷിയിലൂടെ മായം കലരാത്ത ഉത്പന്നങ്ങൾ നാട്ടുകാര്‍ക്കും പ്രവാസി സമൂഹത്തിനും എത്തിക്കാനാണ് ഫുഡ് ഫാക്ടറി ലക്ഷ്യമിടുന്നതെന്ന് പാലാ രൂപത സോഷ്യല്‍ വെല്‍ഫെയര്‍ സൊസൈറ്റി ഡയറക്ടര്‍ ഫാ. തോമസ് കിഴക്കേല്‍ പറഞ്ഞു.

ജില്ലാ അതിർത്തിയിൽ പോലീസ് പരിശോധന

മുണ്ടക്കയം: കോട്ടയം - ഇടുക്കി ജില്ലകൾ അതിർത്തി പങ്കിടുന്ന മുണ്ടക്കയത്ത് ശനിയാഴ്ച രാത്രിയിൽ പോലീസിന്‍റെ വ്യാപക പരിശോധന. ലഹരി സംഘങ്ങളെ പിടികൂടുകയെന്ന ലക്ഷ്യത്തോടെയാണ് പരിശോധന നടത്തിയത്. രാത്രി ഒന്പതോടെ ലോക്കൽ പോലീസിനെ കൂടാതെ സ്പെഷൽ സ്ക്വാഡും ഡോഗ് സ്ക്വാഡും അടങ്ങുന്ന വൻ പോലീസ് സന്നാഹത്തിന്‍റെ നേതൃത്വത്തിലായിരുന്നു പരിശോധന. കെഎസ്ആർടിസി, സ്വകാര്യ ബസുകൾ, ടൂറിസ്റ്റ് ബസുകൾ, ചരക്കു ലോറികൾ തുടങ്ങിയ വാഹനങ്ങളിൽ കയറി ഡോഗ് സ്ക്വാഡ് പരിശോധന നടത്തി. ടൂ വീലർ, സ്വകാര്യ, ടാക്സി വാഹനങ്ങളും തടഞ്ഞുനിർത്തി പോലീസ് പരിശോധിച്ചു. വാഹന പരിശോധനയിൽ മദ്യപിച്ച് വാഹനമോടിച്ചെത്തിയവരും പോലീസ് വലയിലായി. അയൽ സംസ്ഥാനങ്ങളിൽനിന്നു വ്യാപകമായാണ് കോട്ടയം, ഇടുക്കി ജില്ലകളിലേക്ക് കഞ്ചാവ് ഉൾപ്പെടെയുള്ള ലഹരി മരുന്നുകൾ ഒഴുകുന്നത്. ഇരുചക്രവാഹനത്തിലും ചരക്കുവാഹനങ്ങളിലുമാണ് കൂടുതലായും മയക്കുമരുന്ന് കടത്തുന്നത്. ഇത്തരം സംഘങ്ങളെ പിടികൂടുകയെന്ന ലക്ഷ്യത്തോടെയാണ് പരിശോധന നടത്തിയതെന്നും വരുംദിവസങ്ങളിലും പരിശോധന തുടരുമെന്നും പോലീസ് അധികാരികൾ അറിയിച്ചു.

ബിന്ദുവിന്‍റെ കുടുംബത്തിന് ധനസഹായവുമായി ടെക്‌സ്റ്റൈൽസ് ഉടമ

തലയോലപ്പറമ്പ്: കോട്ടയം മെഡി. കോളജ് ആശുപത്രിയിൽ കെട്ടിടം തകർന്നു വീണു മരിച്ച ഡി.ബിന്ദുവിന്‍റെ കുടുംബത്തിന് സാമ്പത്തിക സഹായവുമായി ബിന്ദു ജോലി ചെയ്തിരുന്ന ടെക്സ്റ്റൈൽസ് ഉടമ എത്തി. തലയോലപ്പറമ്പിലെ ശിവാസ് ടെക്സ്റ്റൈൽസ് ഉടമ ആനന്ദാക്ഷനാണ് ഇന്നലെ രാവിലെ വീട്ടിലെത്തി ഒരു ലക്ഷം രൂപ കൈമാറിയത്. പുറമെ മാസംതോറും 5000 രൂപ ബിന്ദുവിന്‍റെ മാതാവിന് നൽകുമെന്നും ആനന്ദാക്ഷൻ പറഞ്ഞു.

രമേശ് ചെന്നിത്തല ബിന്ദുവിന്‍റെ വീട് സന്ദർശിച്ചു

തലയോലപ്പറമ്പ്: കോട്ടയം മെഡിക്കൽ കോളജ് ആശുപത്രി കെട്ടിടം ഇടിഞ്ഞ് വീണുണ്ടായ അപകടത്തിൽ മരിച്ച ബിന്ദുവിന്‍റെ കുടുംബത്തിന് സംസ്ഥാന സർക്കാർ 25 ലക്ഷം രൂപ അനുവദിക്കണമെന്നും സിവിൽ എൻജിനിയറിംഗ് പാസായ മകൻ നവനീതിന് സ്ഥിരം നിയമനം നൽകണമെന്നും എഐസിസി വർക്കിംഗ് കമ്മിറ്റി അംഗം രമേശ് ചെന്നിത്തല ആവശ്യപ്പെട്ടു. തലയോലപ്പറമ്പ് ഉമ്മാംകുന്നിലുള്ള ബിന്ദുവിന്‍റെ വീട്ടിലെത്തി കുടുംബാംഗങ്ങളെ ആശ്വസിപ്പിച്ച ശേഷമാണ് മാധ്യമപ്രവർത്തകരുടെ ചോദ്യത്തിന് മറുപടിയായി അദ്ദേഹം കുടുംബത്തിന് സഹായധനം ലഭ്യമാക്കണമെന്ന് പറഞ്ഞത്. ഇന്നലെ വൈകുന്നേരമാണ് ചെന്നിത്തല തലയോലപ്പറമ്പിലെ വീട്ടിൽ എത്തിയത്. കെപിസിസി സെക്രട്ടറി ഫിലിപ്പ് ജോസഫ്, പി.വി. പ്രസാദ്, എം.കെ.ഷിബു, എം.വി. മനോജ്, വിജയമ്മ ബാബു, വി.ടി. ജയിംസ്, ഇടവട്ടം ജയകുമാർ, അക്കരപ്പാടം ശശി, കെ.ഡി. ദേവരാജൻ, പി .എം മക്കാർ തുടങ്ങിയവർ ചെന്നിത്തലയ്ക്കൊപ്പമെത്തിയിരുന്നു. നേരത്തെ കോട്ടയം മെഡിക്കൽ കോളജ് ആശുപത്രി സന്ദർശിച്ച അദ്ദേഹം ആശുപത്രിയിലെ കെട്ടിടം ഇടിഞ്ഞ സ്ഥലം സന്ദർശിച്ചു. സംസ്ഥാനത്തെ ആരോഗ്യമേഖല കുത്തഴിഞ്ഞു കിടക്കുകയാണെന്ന് അദ്ദേഹം പറഞ്ഞു.

ബിന്ദുവിന്‍റെ കുടുംബത്തിന് 25 ലക്ഷം നഷ്ടപരിഹാരം കൊടുക്കണം: തിരുവഞ്ചൂർ

കോട്ടയം: മെഡിക്കൽ കോളജിൽ കെട്ടിടം തകർന്നുവീണ് മരിച്ച ബിന്ദുവിന്‍റെ കുടുംബത്തിന് 25 ലക്ഷം രൂപ നഷ്ടപരിഹാരം കൊടുക്കണമെന്ന് തിരുവഞ്ചൂർ രാധാകൃഷ്ണൻ എംഎൽഎ. ബിന്ദുവിന്‍റെ മകന് സ്ഥിരം ജോലി നൽകണമെന്നും മകളുടെ ചികിത്സ സൗജന്യമാക്കണമെന്നും തിരുവഞ്ചൂർ രാധാകൃഷ്ണൻ ആവശ്യപ്പെട്ടു. മെഡിക്കൽ കോളജിലെ എച്ച്എംസി ചേർന്നിട്ട് രണ്ട് വർഷമായി. എന്നാൽ ഫണ്ട് ചെലവഴിക്കുന്നുണ്ട്. എച്ച്എംസി ചേരാതെ ഫണ്ട് ചെലവാക്കിയതെങ്ങനെയെന്ന് ജനങ്ങളോട് വിശദീകരിക്കണം. എച്ച്എംസി ചേരാൻ നടപടിയെടുക്കണം. ഒൻപതു വർഷത്തെ എച്ച്പിസി ഫണ്ട് എന്തുചെയ്തുവെന്നും വിശദീകരിക്കണം. അടിയന്തരമായി 12 ഓപ്പറേഷൻ തിയറ്ററും സജ്ജമാക്കാൻ നടപടിയെടുക്കണം. ഇപ്പോൾ നാലെണ്ണമാണ് പ്രവർത്തിക്കുന്നതെന്ന് പറയുന്നു. എന്നാൽ നാലെണ്ണത്തിൽ രണ്ട് തിയറ്റർ പ്രവർത്തിക്കുന്നില്ല. കാരണം രണ്ട് തിയറ്റർ അണുവിമുക്തമല്ല. ഇക്കാര്യത്തിൽ ബാക്ടീരിയോളജി, മൈക്രോബയോളജി വിഭാഗങ്ങളുടെ റിപ്പോർട്ട് കിട്ടിയിട്ടുണ്ടോയെന്ന് അധികൃതർ വ്യക്തമാക്കണം. ട്രോമാ കെയർ പ്രവർത്തിക്കുന്ന വാർഡ് 26 ഉൾപ്പെട്ട കെട്ടിടം ചോർന്നൊലിക്കുകയാണ്. 2023 ൽ പുതിയ കെട്ടിടത്തിന് തീ പിടിച്ചു. ബിൽഡിംഗ് ചട്ടങ്ങൾ പാലിക്കാതെയാണ് കെട്ടിടം പണിതതെന്ന് അന്ന് ബോധ്യപ്പെട്ടിട്ടും നടപടിയെടുത്തില്ല. കെട്ടിടങ്ങളുടെ ശോച്യാവസ്ഥ പരിഹരിച്ച് സുരക്ഷ ഉറപ്പാക്കണമെന്ന് തിരുവഞ്ചൂർ രാധാകൃഷ്ണൻ ആവശ്യപ്പെട്ടു. ഡിസിസി പ്രസിഡന്‍റ് നാട്ടകം സുരേഷ്, യുഡിഎഫ് ജില്ലാ കൺവീനർ ഫിൽസൺ മാത്യൂസ് എന്നിവരും പത്രസമ്മേളനത്തിൽ പങ്കെടുത്തു.

ഗ്രാമീണറോഡുകളുടെ നവീകരണം സെപ്റ്റംബറില്‍ പൂര്‍ത്തിയാക്കും

കോട്ടയം: മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തിയ ജില്ലയിലെ ഗ്രാമീണറോഡുകളുടെ നവീകരണം സെപ്റ്റംബറില്‍ പൂര്‍ത്തിയാക്കും. ജില്ലയില്‍ 234 റോഡുകളാണ് സിഎംഎല്‍ആര്‍ആര്‍പിക്കു കീഴില്‍ വരുന്നത്. ഇതില്‍ 192 എണ്ണത്തിന്‍റെ നവീകരണത്തിന് സാങ്കേതികാനുമതി ലഭിച്ചിട്ടുണ്ടെന്ന് കോട്ടയത്തു നടന്ന മുഖ്യ മന്ത്രിയുടെ മേഖലാ അവലോ കന യോഗത്തിൽ ജില്ലാ കളക്ടര്‍ ജോണ്‍ വി. സാമുവല്‍ പറഞ്ഞു. 156 റോഡുകള്‍ക്ക് കരാര്‍ നല്‍കാനായിട്ടുണ്ട്. ഇതില്‍ 96 റോഡുകളുടെ (41 ശതമാനം) നവീകരണ പ്രവൃത്തികള്‍ ആരംഭിച്ചിട്ടുണ്ട്. ജില്ലയില്‍ 13 ഗ്രാമീണറോഡുകള്‍ക്കാണ് നവീകരണവുമായി ബന്ധപ്പെട്ട് എന്‍ഒസി. അടക്കമുള്ള പ്രശ്നങ്ങള്‍ നേരിടുന്നത്. ആസ്തി രജിസ്റ്ററില്‍ ഉള്‍പ്പെട്ടിട്ടില്ലാത്ത റോഡുകള്‍ ആസ്തി രജിസ്റ്ററില്‍ ഉള്‍പ്പെടുത്തുന്നതിനുള്ള നടപടികള്‍, ഭരണാനുമതി ലഭിച്ച പ്രവൃത്തികള്‍ക്ക് പേരിലും തുകയിലും വരുത്തേണ്ട ഭേദഗതികള്‍, 2021ല്‍ പുതുക്കിയ ഡിഎസ്ഒആര്‍ നിരക്ക് വന്നിട്ടുള്ളതിനാല്‍ ഇനി ടെന്‍ഡര്‍ ചെയ്യാനുള്ള പ്രവൃത്തികള്‍ക്ക് പുതുക്കിയ നിരക്കുകള്‍ ഉപയോഗിക്കാനുള്ള ഉത്തരവ് ലഭ്യമാകല്‍ തുടങ്ങിയവയാണ് പ്രവൃത്തികള്‍ പൂര്‍ത്തീകരിക്കുന്നതിന് നിലവില്‍ നേരിട്ടിരുന്ന തടസങ്ങള്‍. നിരക്കുകള്‍ പുതുക്കിയിട്ടുണ്ടെന്നും ഇതു സംബന്ധിച്ച വ്യക്തമായ നിര്‍ദേശങ്ങള്‍ ചീഫ് സെക്രട്ടറി തലത്തില്‍ പുറപ്പെടുവിച്ച് താഴേത്തട്ടിലേക്കു നല്‍കണമെന്നും യോഗത്തില്‍ മുഖമന്ത്രി പിണറായി വിജയന്‍ നിര്‍ദേശം നല്‍കിയിട്ടുണ്ട്. ജില്ലയില്‍ മൂന്നുറോഡുകളാണ് ആസ്തി രജിസ്റ്ററില്‍ ചേര്‍ക്കാനുണ്ടായിരുന്നത്. 15 റോഡുകളുടെ പേരുമാറ്റവും 24 റോഡുകള്‍ക്ക് പുതിയ ഡിഎസ്ഒആര്‍ നിരക്കും ലഭ്യമാക്കണമായിരുന്നു. ഓഗസ്റ്റോടെ ഇവ പൂര്‍ത്തീകരിച്ച് സെപ്റ്റംബറോടെ ജില്ലയിലെ 234 ഗ്രാമീണറോഡുകളുടെ നവീകരണം പൂര്‍ത്തിയാക്കാന്‍ സാധിക്കുമെന്നു ജില്ലാ കളക്ടര്‍ ജോണ്‍ വി. സാമുവല്‍ അറിയിച്ചു.

കർഷകസഭയും ഞാറ്റുവേലയും

എരുമേലി: പഞ്ചായത്തിന്‍റെയും കൃഷിഭവന്‍റെയും സംയുക്ത നേതൃത്വത്തിൽ കൃഷിഭവനിൽ കർഷക സഭയും ഞാറ്റുവേലച്ചന്തയും നടത്തി. മുതിർന്ന കർഷകനായ കെ.കെ. ഭാസ്കരൻ പിള്ളയ്ക്ക് തൈകൾ നൽകി കർഷകർക്കുള്ള പച്ചക്കറിത്തൈ വിതരണത്തിന്‍റെ ഉദ്ഘാടനം കനകപ്പലം വാർഡ് അംഗം സുനിൽ ചെറിയാൻ നിർവഹിച്ചു. നേർച്ചപ്പാറ വാർഡ് അംഗം ജസ്‌ന നജീബ് അധ്യക്ഷത വഹിച്ചു. കൃഷി ഓഫീസർ അനില, കാർഷിക വികസനസമിതി അംഗങ്ങളായ ടി.വി. ജോസഫ്, കെ.ജെ. ഏബ്രഹാം, കൃഷി അസിസ്റ്റന്‍റ് അമൃത വിജയൻ എന്നിവർ പ്രസംഗിച്ചു. ഞാറ്റുവേലയുടെ പ്രാധാന്യത്തെക്കുറിച്ചും പ്രകൃതി കൃഷിയെക്കുറിച്ചും കൃഷി അസിസ്റ്റന്‍റ് ബോബൻ ക്ലാസ് നയിച്ചു. കർഷകർ നേരിടുന്ന വിവിധ പ്രശ്നങ്ങൾ കർഷകസഭയിൽ ചർച്ചയായി. കർഷകർ കൊണ്ടുവന്ന ഉത്പന്നങ്ങൾ വില്പന നടത്തി. 50 ശതമാനം സബ്‌സിഡിയിൽ തെങ്ങിൻതൈ വിതരണവും പച്ചക്കറിവിത്ത്, തൈ എന്നിവയുടെ വിതരണവും നടത്തി. കൂട്ടിക്കൽ: പഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തിൽ കർഷകസഭയും ഞാറ്റുവേലച്ചന്തയും നടത്തി. പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം ഉദ്ഘാടനം നിർവഹിച്ചു. വാർഡ് മെംബർമാരായ എം.വി. ഹരിഹരൻ, രജനി സലിലൻ, സിന്ധു മുരളീധരൻ, കെ.എൻ. വിനോദ്, പി.എസ്. സജിമോൻ, സൗമ്യ കനി, കെ.എസ്. മോഹനൻ, ബ്ലോക്ക് മെംബർ അനു ഷിജു, ഫാ. സേവ്യർ മാമ്മൂട്ടിൽ, ജോണി മാത്യു പൊട്ടംകുളം, കൃഷി ഓഫീസർ ആർ. രമ്യ, കൃഷി അസിസ്റ്റന്‍റുമാരായ കെ.എ. നവാസ്, എം.വി. വിനു, ഫെസിലിറ്റേറ്റർ അഖിൽ തുടങ്ങിയവർ പ്രസംഗിച്ചു. കാർഷിക വികസനസമിതി അംഗങ്ങൾ, കർഷക മാർക്കറ്റ്, കാർഷിക സേവന കേന്ദ്രം, ഫാം ക്ലബ് അംഗങ്ങൾ തുടങ്ങിയവർ പങ്കെടുത്തു.

പുലിയെ കണ്ടതായി പ്രചാരണം; പിന്നാലെ മോഷണം

മുണ്ടക്കയം: മലയോര മേഖലയിൽ വർധിച്ചുവരുന്ന വന്യമൃഗശല്യം മുതലെടുത്ത് മോഷ്ടാക്കളും സാമൂഹ്യവിരുദ്ധരും. പുലിയടക്കമുള്ള വന്യമൃഗങ്ങളെ കണ്ടെന്നു പ്രചരിപ്പിക്കുകയും തൊട്ടുപിന്നാലെ രാത്രിയിൽ മോഷണം നടത്തുന്നതും മലയോരമേഖലയിൽ വ്യാപകമാകുകയാണ്. യഥാർഥത്തിൽ പുലി ഇറങ്ങിയോ ഇല്ലയോ എന്ന് തിരിച്ചറിയുവാൻ കഴിയാത്ത അവസ്ഥയിലാണ് പൊതുജനം. പുലിപ്പേടി മുതലെടുത്ത് മോഷണം കഴിഞ്ഞ മാസം പെരുവന്താനം പഞ്ചായത്തിലെ അമ്പലംഭാഗത്ത് പുലിക്കു സമാനമായ ജീവിയുടെ കാൽപ്പാട് കണ്ടെത്തിയിരുന്നു. ഇതോടെ പുലിയിറങ്ങിയതായി വ്യാപക പ്രചാരണം നടന്നു. ഭയപ്പാടിലായ നാട്ടുകാർ രാത്രികാലങ്ങളിലുള്ള പുറത്തിറക്കം കുറച്ചു. പിന്നാലെ മേഖലയിൽ മോഷണവും പതിവായി. പ്രദേശത്തെ നിരവധി സോളാർ വഴിവിളക്കുകളുടെ ബാറ്ററികളാണ് സാമൂഹ്യവിരുദ്ധർ രാത്രിയിൽ കവർന്നത്. പുലിയെ കണ്ടെന്ന് അഭ്യൂഹം പെരുകുന്നു കഴിഞ്ഞ ശനിയാഴ്ച രാത്രിയിൽ കൊക്കയാർ ഭാഗത്തും പുലിയെ കണ്ടതായി വ്യാപകമായ പ്രചാരണം നടക്കുന്നുണ്ട്. എന്നാൽ, വനം വകുപ്പോ മറ്റ് അധികാരികളോ പുലിയുടെ സാന്നിധ്യം സ്ഥിരീകരിച്ചിട്ടില്ല. മാസങ്ങൾക്കു മുമ്പ് കൂട്ടിക്കൽ പഞ്ചായത്തിലെ ഉറുമ്പിക്കരയിൽ പുലിയെ ചത്ത നിലയിൽ കണ്ടെത്തിയിരുന്നു. ഇതിനു പിന്നാലെ കൂട്ടിക്കൽ തേൻപുഴയിൽ പുലിയെ കണ്ടതായി പ്രചാരണം നടന്നു. പിന്നീട് പറത്താനത്തും അമലഗിരിയിലും പുലിയെ കണ്ടതായി വ്യാപക പ്രചാരണം നടന്നിരുന്നു. ഇതിന് പിന്നിലെ സത്യമെന്തെന്നും വെളിവായിട്ടില്ല. പുലിയുടെ സാന്നിധ്യം സ്ഥിരീകരിച്ച് വനം വകുപ്പ് പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ പല ഭാഗങ്ങളിലും പുലിയുടെയും കടുവയുടെയും സാന്നിധ്യം മുന്പ് വനം വകുപ്പ് സ്ഥിരീകരിച്ചിട്ടുണ്ട്. ചില സ്ഥലങ്ങളിൽ വളർത്തുമൃഗങ്ങളെ പുലി ആക്രമിക്കുകയും വനം വകുപ്പ് ഉദ്യോഗസ്ഥരെത്തി കാമറ സ്ഥാപിച്ച് പുലിയുടെ സാന്നിധ്യം സ്ഥിരീകരിക്കുകയും ചെയ്യുന്നുണ്ട്. എന്നാൽ, മറ്റ് ചില സ്ഥലങ്ങളിൽ എത്തിയത് പുലിയാണെങ്കിലും പിന്നീട് മേഖലയിൽ സ്വീകരിക്കേണ്ട നടപടിക്രമങ്ങളോർത്ത് വനം വകുപ്പ് പുറത്തുപറയാറുമില്ല. ഇതെല്ലാം ഇപ്പോൾ സാമൂഹ്യവിരുദ്ധരും ലഹരിസംഘങ്ങളും മുതലെടുക്കുകയാണെന്ന് ആക്ഷേപവും വ്യാപകമായിരിക്കുകയാണ്. പുലിയെ കണ്ടെന്ന പേരിൽ പല സ്ഥലങ്ങളിലും നടക്കുന്ന പ്രചാരണത്തിന് പിന്നിൽ ലഹരികടത്ത് സംഘങ്ങളും മോഷ്ടാക്കളുമാണോയെന്ന സംശയവുമുണ്ട്. വന്യമൃഗശല്യം അതിരൂക്ഷമാണെന്ന് പറയുന്ന മലയോര മേഖലയിൽനിന്നു രാത്രികാലങ്ങളിൽ വ്യാപകമായി തടി അടക്കമുള്ളവ കടത്തുന്നുണ്ടെന്നും പറയപ്പെടുന്നു. ഒരുവശത്ത് വന്യജീവികളും മറുവശത്ത് മോഷ്ടാക്കളും മലയോര ജനതയുടെ സ്വൈരജീവിതം കെടുത്തുകയാണ്.

105 പേരുടെ ജീവൻ രക്ഷിച്ച കരിമ്പനാൽ അപ്പച്ചൻ ഓർമയായി

കാഞ്ഞിരപ്പള്ളി: 105 പേരുടെ ജീവൻ രക്ഷിച്ച കരിമ്പനാൽ അപ്പച്ചൻ എന്ന ടി.ജെ. കരിമ്പനാൽ (87) ഓർമയായി. 1986 നവംബറിലായിരുന്നു സംഭവം. പ്ലാന്‍ററായിരുന്ന ടി.ജെ. കരിമ്പനാൽ ചെറുവള്ളിക്കുളത്തെ എസ്റ്റേറ്റിൽനിന്നു കാഞ്ഞിരപ്പള്ളിയിലേക്ക് വരികയായിരുന്നു. ഈ സമയമാണ് ബ്രേക്ക് നഷ്ടപ്പെട്ട് നിയന്ത്രണംവിട്ട കെഎസ്ആർടിസി ബസിലെ യാത്രക്കാരുടെ നിലവിളി കേട്ടത്. നിറയെ ശബരിമല തീർഥാടകരുണ്ടായിരുന്ന ബസിന്‍റെ ബ്രേക്ക് പോയതാണെന്ന് മനസിലാക്കിയ ഡ്രൈവർ ഗിയർ ഡൗൺ ചെയ്തും കല്ലുകളുടെ മുകളിൽ കയറ്റിയുമൊക്കെ ബസ് നിർത്താൻ ശ്രമിക്കുന്നുണ്ടായിരുന്നു. മെക്കാനിക്കൽ എൻജിനിയറിംഗിൽ ബിരുദവും കരാട്ടെ ബ്രൗൺ ബെൽറ്റുമുണ്ടായിരുന്ന ടി.ജെ. കരിമ്പനാൽ അസാമാന്യ ധൈര്യശാലിയായിരുന്നു. ഉടൻതന്നെ അദ്ദേഹം ബസിനെ ഓവർടേക്ക് ചെയ്ത ശേഷം ഫോർ വീൽ ഡ്രൈവ് മോഡിലാക്കി വേഗം കുറച്ചുകുറച്ചു വന്നു ബസിന്‍റെ മുൻഭാഗം ജീപ്പിന്‍റെ പിന്നിൽ ഇടിക്കാൻ അവസരം കൊടുത്തു. ജീപ്പിന്‍റെ പിന്നിൽ ബസ് ഇടിച്ചതോടെ ജീപ്പ് ബ്രേക്ക് ചെയ്ത് സാവധാനം ബസും ജീപ്പും നിന്നു. കുമളിയിൽനിന്ന് എരുമേലിയിലേക്കു 105ഓളം തീർഥാടകരുമായി പോകുകയായിരുന്ന പൊൻകുന്നം ഡിപ്പോയിലെ കെഎസ്ആർടിസി ബസായിരുന്നു അപകടത്തിൽപ്പെട്ടത്. തിരുവനന്തപുരം സിഇടി കോളജിൽനിന്നു മെക്കാനിക്കൽ എൻജിനിയറിംഗ് പഠനം കഴിഞ്ഞ് ടി.ജെ. കരിമ്പനാൽ ജർമനിയിൽ എൻജിനിയറായി ജോലിയിൽ പ്രവേശിച്ചു. സഹോദരന് അപകടമുണ്ടായതോടെ ഒരു വർഷത്തിനു ശേഷം തിരിച്ചു നാട്ടിലേക്കു മടങ്ങി. കോളജ് പഠനകാലം മുതലേ കൃഷിയിൽ താത്പര്യമുണ്ടായിരുന്ന ടി.ജെ. പിന്നീടു മുഴുവൻസമയ പ്ലാന്‍ററായി. സംസ്കാരം ഇന്ന് രാവിലെ 10.30ന് സെന്‍റ് ഡൊമിനിക്സ് കത്തീഡ്രലിൽ നടക്കും.

മഹിളാ സാഹസ് കേരള യാത്രയ്ക്ക് സ്വീകരണം

കൂരാലി: അഡ്വ. ജെബി മേത്തർ എംപി നയിക്കുന്ന മഹിളാ സാഹസ് കേരള യാത്രയ്ക്ക് എലിക്കുളത്ത് സ്വീകരണം നൽകി. ഡിസിസി പ്രസിഡന്‍റ് നാട്ടകം സുരേഷ് ഉദ്ഘാടനം ചെയ്തു. മഹിളാ കോൺഗ്രസ് മണ്ഡലം പ്രസിഡന്‍റ് ഗീതാ സജി അധ്യക്ഷത വഹിച്ചു. മദ്യത്തിന്‍റെയും മയക്കുമരുന്നിന്‍റെയും ഹബ്ബായി കേരളത്തെ മാറ്റിയ ഇടതുസർക്കാരിനെ ജനങ്ങൾ ആട്ടിപ്പുറത്താക്കുമെന്ന് ജെബി മേത്തർ എംപി പറഞ്ഞു. സംസ്ഥാന ജനറൽ സെക്രട്ടറി ജയലക്ഷ്മി ദത്തൻ, ജില്ലാ പ്രസിഡന്‍റ് ബെറ്റി ടോജോ എന്നിവർ മുഖ്യപ്രഭാഷണം നടത്തി. ഗീതാ രാജു, അനുപമ വിശ്വനാഥ്, ആനി ബിജോയി, ലൂസി ജോർജ്, എൻ. സുരേഷ്, പി.ജെ. തോമസ് പാലക്കുഴ, ജിഷ്ണു പറപ്പള്ളിൽ, യമുനാ പ്രസാദ്, സിനിമോൾ കാക്കശേരി, ജയിംസ് ചാക്കോ ജീരകത്തിൽ തുടങ്ങിയവർ പ്രസംഗിച്ചു.

പൊതുപണിമുടക്ക്: സംയുക്ത ട്രേഡ് യൂണിയൻ ജാഥ നടത്തി

കാഞ്ഞിരപ്പള്ളി: ഒന്പതിന് നടത്തുന്ന അഖിലേന്ത്യാ പണിമുടക്കിന്‍റെ പ്രചാരണാർഥം സംയുക്ത ട്രേഡ് യൂണിയൻ കാഞ്ഞിരപ്പള്ളി നിയോജകമണ്ഡലം കമ്മിറ്റി ജാഥ നടത്തി. കാഞ്ഞിരപ്പള്ളി പേട്ടക്കവലയിൽ സിഐടിയു അഖിലേന്ത്യ വർക്കിംഗ് കമ്മിറ്റിയംഗം കെ.ജെ. തോമസ് ജാഥാ ക്യാപ്റ്റൻ സി.ജി. ജ്യോതിരാജിന് പതാക കൈമാറി ഉദ്ഘാടനം ചെയ്തു. ഡി. ബൈജു അധ്യക്ഷത വഹിച്ചു. വൈസ്‌ ക്യാപ്റ്റൻ പി.കെ. നസീർ, മാനേജർ സണ്ണിക്കുട്ടി അഴകമ്പ്രായിൽ, വി.പി. ഇസ്മായിൽ, വി.പി. ഇബ്രാഹിം, ജെസി ഷാജൻ, സിജോ പ്ലാത്തോട്ടം, ഷമീം അഹമ്മദ്, ടി.കെ. ജയൻ, വി.എൻ. രാജേഷ് എന്നിവർ പ്രസംഗിച്ചു. പൊന്തൻപുഴ, മണിമല, പത്തനാട്, നെടുംകുന്നം, കറുകച്ചാൽ, കൊടുങ്ങൂർ, പള്ളിക്കത്തോട് എന്നിവിടങ്ങളിൽ പര്യടനം നടത്തി പൊൻകുന്നം ടൗണിൽ പൊതുസമ്മേളനത്തോടെ സമാപിച്ചു. സമാപനസമ്മേളനം എം.എ. ഷാജി ഉദ്ഘാടനം ചെയ്തു. എഐടിയുസി മണ്ഡലം കമ്മിറ്റിയംഗം പി. പ്രജിത്ത് അധ്യക്ഷത വഹിച്ചു. ഹേമലത പ്രേംസാഗർ, അജി കാരുവാക്കൽ, രാജൻ ചെറുകാപ്പള്ളി, ശരത് മണിമല, ഫസൽ മാടത്താനി തുടങ്ങിയവർ പ്രസംഗിച്ചു.

ഹൈക്കോടതിവിധി ഇന്നു വരാനിരിക്കേ എരുമേലിയിലെ വാപുര ക്ഷേത്രം പൊളിച്ചു

എരുമേലി: ടൗണിന് സമീപം നിർമാണം ആരംഭിച്ച വാപുര ക്ഷേത്രം അനധികൃത നിർമാണമെന്ന പരാതിയിൽ ഇടക്കാല വിധി നൽകിയ ഹൈക്കോടതി ഇന്ന് ഹർജി പരിഗണിക്കാനിരിക്കേ ക്ഷേത്രം പൊളിച്ചു. ഇന്ന് ക്ഷേത്രത്തിൽ പ്രതിഷ്ഠാച്ചടങ്ങുകൾ നടക്കാനിരിക്കെയാണ് ഇന്നലെ പുലർച്ചെ പൊളിച്ച നിലയിൽ കണ്ടത്. ബാലാലയ പ്രതിഷ്ഠയായി ഉയർന്ന തറയിൽ ചെറിയ ഒരു മുറി ആണ് ക്ഷേത്ര നിർമാണ ഭാഗമായി നിർമിച്ചിരുന്നത്. തറ ഒഴികെ ബാക്കി ഭാഗം പൂർണമായും ഇടിച്ചു പൊളിച്ചിട്ട നിലയിലാണ്. സംഭവം സംബന്ധിച്ച് ക്ഷേത്ര നിർമാണവുമായി ബന്ധപ്പെട്ടവർ ആരും തന്നെ പരാതി നൽകിയിട്ടില്ലെന്ന് എരുമേലി പോലീസ് പറഞ്ഞു. എരുമേലി ടൗണിൽ പഴയ അയ്യപ്പാസ് സിനിമ തിയറ്റർ പ്രവർത്തിച്ച സ്ഥലത്താണ് ക്ഷേത്രനിർമാണം ആരംഭിച്ചിരുന്നത്. ഇതിനെതിരേ നോർത്ത് പറവൂർ സ്വദേശി പദ്മനാഭൻ നൽകിയ ഹർജിയിലാണ് കഴിഞ്ഞ ദിവസം ഹൈക്കോടതി ഇടക്കാല വിധി നൽകിയത്. നിർമാണം അനുമതി തേടാതെയാണെന്ന് ഹർജിയിൽ ഹൈക്കോടതി തേടിയ വിശദീകരണത്തിന് മറുപടിയായി എരുമേലി പഞ്ചായത്ത്‌ അറിയിച്ചിരുന്നു. ക്ഷേത്ര നിർമാണവുമായി ബന്ധമില്ലെന്ന് വിശ്വഹിന്ദു പരിഷത്ത് ഹൈക്കോടതിയുടെ ചോദ്യത്തിന് മറുപടി നൽകിയിരുന്നു. ഇതേത്തുടർന്ന് നിർമാണം തടഞ്ഞ നടപടികൾക്ക് പോലീസ് സംരക്ഷണം അനു വദിച്ച കോടതി ഇന്ന് കേസ് പരിഗണിക്കുമെന്ന് അറിയിച്ചിരുന്നത്.

പെരിങ്ങുളം സ്കൂളിൽ ഇംഗ്ലീഷ് ക്ലബ് തുടങ്ങി

പെരിങ്ങുളം: കുട്ടികൾക്ക് രസകരവും ആകര്‍ഷകവുമായ പഠനമേഖല സൃഷ്ടിക്കാനുള്ള ലക്ഷ്യത്തോടെ പെരിങ്ങുളം സെന്‍റ് അഗസ്റ്റിൻസ് ഹൈസ്കൂളിൽ ഇംഗ്ലീഷ് ക്ലബ്ബിന്‍റെ ഉദ്ഘാടനവും സ്പോക്കൺ ഇംഗ്ലീഷ് വർക്ക്ഷോപ്പും സ്കൂള്‍ മാനേജര്‍ ഫാ. ജോര്‍ജ് മടുക്കാവിൽ നിർവഹിച്ചു. പ്രോഗ്രാമിന്‍റെ പ്രധാന ആകര്‍ഷണം അമേരിക്കയില്‍നിന്നുള്ള വിദഗ്ധ റിസോഴ്‌സ് പേഴ്‌സണ്‍മാരായ ക്രിസ്റ്റന്‍ ജോഷി, ആന്‍റണ്‍ ജോഷി, ഇസബല്‍ ജോഷി, ജയ്റോണ്‍ ജോഷി എന്നിവരുടെ പങ്കാളിത്തമാണ്. ഇവര്‍ വിദ്യാര്‍ഥികളുമായി സംവദിച്ച് ഇംഗ്ലീഷ് പഠനത്തിലെ നവീനരീതികള്‍ പരിചയപ്പെടുത്തി. രസകരമായ ഗെയിമുകള്‍, ഗ്രൂപ്പ് ചർച്ചകൾ, ട്യൂട്ടറിംഗ് സെഷനുകള്‍, മികച്ച പഠനോപകരണങ്ങളുടെ ലഭ്യത എന്നിവ ശ്രദ്ധേയമായി. റിസോഴ്‌സ് ടീം വിദ്യാര്‍ഥികളെ സംഘപ്രവർത്തനങ്ങളിൽ പങ്കെടുക്കാനും രസകരമായ രീതികളിലൂടെ പുതിയ പഠനമാര്‍ഗങ്ങള്‍ അന്വേഷിക്കാനും പ്രോത്സാഹിപ്പിച്ചു.

കുടുംബ കൂട്ടായ്മ ഭാരവാഹികൾക്ക് പരിശീലനമൊരുക്കി ഇഗ്‌നൈറ്റ്-2025

കുറവിലങ്ങാട്: ഇടവകയിലെ കൂടംബകൂട്ടായ്മ പ്രവർത്തനങ്ങൾ സജീവമാക്കാനായി കൂട്ടായ്മ ഭാരവാഹികൾക്കായി ഇഗ്‌നൈറ്റ്-2025 എന്ന പേരിൽ പഠനപരിശീലന കളരിയൊരുക്കി. ഇടവകയിലെ യോഗപ്രതിനിധികൾ, കൂട്ടായ്മ സമ്മേളനങ്ങളിൽ പങ്കെടുക്കുന്ന സന്യാസിനിമാർ, 81 കൂട്ടായ്മ യൂണിറ്റുകളിലെ പ്രസിഡന്‍റുമാർ, സെക്രട്ടറിമാർ എന്നിവർ പരിശീലന പരിപാടിയിൽ പങ്കെടുത്തു. പരിപാടി ആർച്ച്പ്രീസ്റ്റ് റവ.ഡോ. തോമസ് മേനാച്ചേരി ഉദ്ഘാടനം ചെയ്തു. ഒരുവ ർഷത്തേക്കുള്ള കർമപരിപാടികളുടെ ചർച്ചയും പ്രവർത്തന രൂപീകരണവും നടത്തി. കൂട്ടായ്മ ഡയറക്ടർ അസി. വികാരി ഫാ. പോൾ കുന്നുംപുറത്ത് അധ്യക്ഷത വഹിച്ചു. സീനിയർ അസി.വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, കൂട്ടായ്മ ജനറൽ ലീഡർ ബോബിച്ചൻ നിധീരി, ഡോ. സിമിമോൾ സെബാസ്റ്റ്യൻ, സിസ്റ്റർ റീജ മരിയ, ബിജു താന്നിക്കതറപ്പേൽ എന്നിവർ പ്രസംഗിച്ചു. കുടുംബകൂട്ടായ്മ രൂപത റിസോഴ്സ് ടീം അംഗങ്ങളായ സണ്ണി വടക്കേടത്ത്, ലിജോ മുക്കത്ത്, പള്ളിയോഗം സെക്രട്ടറി ബെന്നി കോച്ചേരി എന്നിവർ ക്ലാസിന് നേതൃത്വം നൽകി. സോൺ ഭാരവാഹികളായ ഷൈജു പാവുത്തിയേൽ, ജിയോ കരികുളം, ജോസ് സി. മണക്കാട്ട്, സണ്ണി വെട്ടിക്കാട്ടിൽ, ജോളി ടോമി എണ്ണംപ്രായിൽ, ഷൈനി സാബു മഞ്ഞപ്പള്ളിൽ, സ്മിത ഷിജു പുതിയിടത്ത്, ആശ വിക്‌ടർ കുന്നുമല എന്നിവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]