ADVERTISEMENT

ADVERTISEMENT

ഹരിതകർമസേന ത്രിതല പഞ്ചായത്ത് ജനപ്രതിനിധികളെ ആദരിച്ചു

ചപ്പാരപ്പടവ്: ചപ്പാരപ്പടവ് ഗ്രാമപഞ്ചായത്ത് ഹരിതകർമസേനയുടെ ആഭിമുഖ്യത്തിൽ ത്രിതല പഞ്ചായത്ത് ജനപ്രതിനിധികളെ ആദരിച്ചു. ജില്ലാ പഞ്ചായത്ത് മെംബർ തോമസ് വക്കത്താനം ഉദ്ഘാടനം ചെയ്തു. ഹരിതകർമസേന കൺസോർഷ്യം ചെയർമാൻ ജെസി ജോസഫ് അധ്യക്ഷത വഹിച്ചു.

പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ, വൈസ് പ്രസിഡന്‍റ് പി.കെ അബ്ദുറഹ്മാൻ, എം. മൈമൂനത്ത്, തങ്കമ്മ സണ്ണി, ഫസീല ഷംസീർ, പി.കെ. ഉനൈസ്, ഷീജ കൈപ്രത്ത്, കെ.വി. രാഘവൻ, സെക്രട്ടറി സി.കെ. ശ്രീകുമാർ, അസിസ്റ്റന്‍റ് സെക്രട്ടറി ജി. അജയകുമാർ, ഹരിത കേരളം മിഷൻ ആർപി വി. സഹദേവൻ, ജാൻസി ജോർജ് എന്നിവർ പ്രസംഗിച്ചു.

ADVERTISEMENT

പേരട്ടയിൽ കാട്ടാന വീട്ടുമുറ്റത്ത്

ഇരിട്ടി: കേരള -കർണാടക അതിർത്തി ഗ്രാമമായ പേരട്ടയിൽ കാട്ടാനയിറങ്ങി ഭീതി വിതച്ചു. ഇന്നലെ പുലർച്ചെ എത്തിയ കാട്ടാന പേരട്ട സെന്‍റ് ആന്‍റണീസ് പള്ളിക്ക് സമീപമുള്ള കരിനാട്ട് ജോസ്, കുഞ്ഞുകൃഷ്ണൻ തെക്കനാട്ട്, ഐസക് കൊതുമ്പുചിറ, സജി കരിനാട്ട്, ജോർജ് തൊണ്ടുങ്ങൽ എന്നിവരുടെ കൃഷികൾ നശിപ്പിക്കുകയും വീട്ടുമുറ്റം വരെ എത്തുകയും ചെയ്തു. പുലർച്ചെ ഒന്നോടെയാണ് കാട്ടാന ജനവാസ മേഖലയിൽ ഇറങ്ങിയത്. കർണാടക ബ്രഹ്മഗിരി വന്യജീവി സങ്കേതത്തിൽനിന്ന് ഇറങ്ങുന്ന കാട്ടാനകളാണ് മേഖലയിൽ ഭീതി വിതയ്ക്കുന്നത്. ആന എത്തിയതിന് സമീപത്താണ് സ്കൂളുകളും ആരാധനാലയങ്ങളും സ്ഥിതി ചെയ്യുന്നത്. കഴിഞ്ഞദിവസം കൂട്ടുപുഴ പാലത്തിൽ എത്തിയ കൊമ്പൻ തന്നെയാണ് ജനവാസ മേഖലയിലെ വീടുകൾക്ക് സമീപം എത്തിയതെന്നാണ് നാട്ടുകാർ പറയുന്നത്. റോഡ് മുറിച്ചുകടന്നാണ് ആന വീടിന്‍റെ മുറ്റത്ത് എത്തിയത്. രാത്രി വൈകിയതുകൊണ്ട് മാത്രമാണ് ഇതുവഴി വാഹങ്ങൾ ഒന്നും വരാതിരുന്നത്. വീടിന്‍റെ പോർച്ചിൽ നിർത്തിയിട്ടിരുന്ന കാറുകൾക്ക് സമീപം എത്തിയ ആന പിന്തിരിഞ്ഞു പോകുകയായിരുന്നു. കേരളത്തോട് ചേർന്ന കർണാടക ബ്രഹ്മഗിരി വനമേഖലയിൽ ഒമ്പതോളം ആനകൾ ഉണ്ടെന്നാണ് കർണാടക വനം വകുപ്പ് പറയുന്നത്. കർണാടക - കേരള അതിർത്തിയിൽ 400 മീറ്റർ ഭാഗമാണ് സോളാർ തൂക്കുവേലി സ്ഥാപിക്കാനുള്ളത്. ഇതുവഴിയാണ് ആനകൾ ജനവാസ മേഖലയിൽ പ്രവേശിക്കുന്നതെന്നാണ് പ്രദേശവാസികൾ പറയുന്നത്. സോളാർ വേലി ഉണ്ടെങ്കിലും ഭൂരിഭാഗവും പ്രവർത്തനക്ഷമമല്ലാത്തതും ആനകളുടെ വരവ് വർധിക്കുന്നതിന് കാരണമാകുന്നു. രാത്രിയിൽ വീണ്ടും കാട്ടാന കൂട്ടുപുഴ, പേരട്ട, കല്ലൻതോട് ഭാഗങ്ങളിൽ ഇന്നലെ രാത്രിയിലും കാട്ടാനയിറങ്ങിയതായി പ്രദേശവാസികൾ. രാത്രി എട്ടരയോടെ കാട്ടാനയിറങ്ങിയതായാണ് പ്രദേശവാസികൾ പറയുന്നത്. ആന ഇറങ്ങിയതോടെ സമൂഹ മാധ്യമങ്ങളിലൂടെ ജനങ്ങൾ വിവരം കൈമാറി ജാഗ്രത പാലിക്കാൻ നിർദേശം നൽകുകയുമായിരുന്നു. രാത്രിയിലും കാട്ടാനയിറങ്ങിയത് പ്രദേശത്തെ ജനങ്ങളെ കടുത്ത ഭീതിയിലാക്കിയിട്ടുണ്ട്. പ്രതിരോധം പാളി വനം വകുപ്പ് കൃഷിഭൂമിയിൽ നാശം വിതയ്ക്കുന്ന കാട്ടാനകളെ നിയന്ത്രിക്കുന്നതിന് വനംവകുപ്പിന് കഴിയുന്നില്ല. സ്ഥലം സന്ദർശിക്കാൻ എത്തേണ്ട വനംവകുപ്പ് അധികൃതർക്ക് കൃത്യമായ വാഹനം ഇല്ലെന്നാണ് ലഭിക്കുന്ന വിവരം. വാർഡ് മെംബർ ബിജു വെങ്ങലപള്ളിയുടെ നേതൃത്വത്തിൽ ജനകീയ സമിതി ചേർന്ന് കാടുകയറി പ്രവർത്തിക്കാതെ കിടക്കുന്ന തൂക്കുവേലി നേരേയാക്കാനുള്ള പ്രവർത്തനം ആരംഭിച്ചുകഴിഞ്ഞു. കഴിഞ്ഞ ദിവസം തൊണ്ടുങ്ങൽ എലിസബത്ത്, കരിനാട്ട് ഷീബ, ഷെഫീക്ക് തുടങ്ങിയവരുടെ കൃഷികൾ ആന നശിപ്പിച്ചിരുന്നു. ആറളം പുനരധിവാസ മേഖലയിലും ആനക്കൂട്ടം ഇരിട്ടി: കലിയടങ്ങാതെ ആറളം പുനരധിവാസ മേഖലയിലെ ആദിവാസികളുടെ അതിജീവനമാർഗം ചവിട്ടി മെതിക്കുകയാണ് ആനക്കൂട്ടം. തിങ്കളാഴ്ച രാത്രി ബ്ലോക്ക് 11 ൽ കൈതകൊല്ലിയിൽ സുമ ചന്ദ്രന്‍റെ പറമ്പിലെ തെങ്ങുകളാണ് കാട്ടാന നശിപ്പിച്ചത്.

ബ്ലോക്ക് 10 ൽ കഴിഞ്ഞ ദിവസം വെള്ളം ശേഖരിക്കാൻ പോയ ഭാര്യയെയും ഭർത്താവിനെയും കാട്ടാന ഓടിച്ചിരുന്നു. ഇതിന് പിന്നാലെയാണ് ബ്ലോക്ക് 11 വീണ്ടും കാട്ടാനയുടെ പരാക്രമം. ജീവനും സ്വത്തിനും സുരക്ഷിതത്വമില്ലാതെ ആദിവാസികൾ പോരാടുകയാണ്.

ബസും സ്കൂട്ടറും കൂട്ടിയിടിച്ച് രണ്ടുപേർക്ക് പരിക്ക്

കണ്ണൂർ: നാറാത്ത് ആലിൻകീഴിൽ ബസും സ്കൂട്ടറും കൂട്ടിയിടിച്ച് സ്കൂട്ടർ യാത്രികരായ രണ്ടുപേർക്ക് പരിക്ക്. തിങ്കളാഴ്ച വൈകുന്നേരം 6.15 നാണ് അപകടം. കണ്ണൂരിൽനിന്ന് മയ്യിലേക്ക് വരുന്ന സ്വകാര്യബസും ആലിൻകീഴ് ചേരിക്കൽ റോഡിൽനിന്ന് പ്രധാനറോഡിലേക്ക് വന്ന സ്കൂട്ടറുമാണ് അപകടത്തിൽപ്പെട്ടത്. സ്കൂട്ടർ യാത്രിക വാരം സ്വദേശിനി നുസൈബ (28), മകൾ നൈസ (4) എന്നിവർക്കാണ് പരിക്കേറ്റത്. യുവതിയും മൂന്ന് മക്കളുമാണ് സ് കൂട്ടറിലുണ്ടായിരുന്നത്. യുവതിയെ കണ്ണൂരിലെ സ്വകാര്യആശുപത്രിയിൽ പ്രവേശിപ്പിച്ചു.

എയർ ഇന്ത്യ എക്‌സ്പ്രസിന്‍റെ വെട്ടിക്കുറച്ച സർവീസുകൾ പുനരാരംഭിച്ചില്ല

മട്ടന്നൂർ: കണ്ണൂർ രാജ്യാന്തര വിമാനത്താവളത്തിൽ നിന്ന് വെട്ടിക്കുറച്ച സർവീസുകൾ പുനരാരംഭിക്കാൻ നടപടിയായില്ല. ശൈത്യകാല ഷെഡ്യൂളിലാണ് എയർ ഇന്ത്യ എക്‌സ്പ്രസ് സർവീസുകൾ വെട്ടിക്കുറച്ചത്. കേരളത്തിൽ നിന്ന് ഗൾഫ് രാജ്യങ്ങളിലേക്കുള്ള സർവീസുകൾ വെട്ടിക്കുറച്ചതിനെ തുടർന്ന് മുഖ്യമന്ത്രി ഉൾപ്പടെ ഇടപെട്ട് നടത്തിയ ചർച്ചയിൽ സർവീസുകൾ പുനരാരംഭിക്കുമെന്ന് വിമാനക്കമ്പനി പ്രതിനിധികൾ അറിയിച്ചിരുന്നു. എന്നാൽ, തിരുവനന്തപുരത്ത് നിന്നുള്ള രണ്ട് സർവീസുകൾ മാത്രമാണ് പുനഃസ്ഥാപിച്ചത്. സർവീസ് ക്രമീകരണത്തിന്‍റെ ഭാഗമായാണ് കുറവ് വരുത്തിയതെന്നും വരുന്ന ഷെഡ്യൂളുകളിൽ സർവീസുകൾ വീണ്ടും തുടങ്ങുമെന്നുമാണ് എയർ ഇന്ത്യ എക്‌സ്പ്രസ് അധികൃതർ പറയുന്നത്. ഇക്കാര്യത്തിൽ കിയാൽ അധികൃതർ വിമാനക്കമ്പനിയുമായി ചർച്ച നടത്തുന്നുണ്ട്. കണ്ണൂരിൽ നിന്ന് പ്രതിമാസം 168 അന്താരാഷ്‌ട്ര സർവീസുകളുടെ കുറവാണ് ശൈത്യകാല ഷെഡ്യൂൾ പ്രസിദ്ധീകരിച്ചപ്പോഴുള്ളത്. ബഹ്‌റൈൻ, കുവൈത്ത്, ദമാം, ജിദ്ദ എന്നീ സെക്ടറുകളിലേക്ക് കണ്ണൂരിൽ നിന്ന് എയർ ഇന്ത്യ എക്‌സപ്രസിന്‍റെ നേരിട്ടുള്ള സർവീസുകളുണ്ടാകില്ല. ദുബായ്, ഷാർജ, റാസൽഖൈമ, മസ്‌ക്കറ്റ് എന്നിവിടങ്ങളിലേക്കുള്ള സർവീസുകളും കുറച്ചിട്ടുണ്ട്. അബുദാബിയിലേക്കുള്ള സർവീസുകൾ ആഴ്ചയിൽ 10 ൽ നിന്ന് ഏഴായും ദുബായിലേക്ക് എട്ടിൽ നിന്ന് ഏഴായും കുറച്ചു. ഷാർജയിലേക്ക് 12ൽ നിന്ന് ഏഴായും മസ്‌കറ്റിലേക്ക് ഏഴിൽ നിന്ന് നാലായും കുറച്ചിട്ടുണ്ട്. റാസൽഖൈമയിലേക്ക് പ്രതിവാരം മൂന്നു സർവീസുള്ളത് രണ്ടാക്കി. ആഴ്ചയിൽ 42 സർവീസുകളുടെ കുറവാണ് ഉണ്ടാകുക. അതേ സമയം ആഭ്യന്തര സെക്ടറിൽ ബംഗളൂരുവിലേക്ക് എയർ ഇന്ത്യ എക്‌സ്പ്രസ് ആഴ്ചയിൽ നാലു സർവീസുള്ളത് പ്രതിദിനമാക്കി ഉയർത്തി. തിരുവനന്തപുരത്തേക്ക് രണ്ടു സർവീസുള്ളത് അഞ്ചാക്കി വർധിപ്പിച്ചിട്ടുണ്ട്. ഇൻഡിഗോ മുംബൈ, ഡൽഹി എന്നിവിടങ്ങളിലേക്ക് പ്രതിദിന സർവീസ് നടത്തും. അന്താരാഷ്ട്ര സർവീസുകളും മാറ്റമില്ലാതെ തുടരുന്നുണ്ട്. വിമാന സർവീസ് പുനരാരംഭിക്കാനുള്ള ചർച്ച അടുത്ത ദിവസം വീണ്ടും നടക്കുമെന്നാണ് വിവരം. സർക്കാരും വിമാനകമ്പനി അധികൃതരുമാണ് ചർച്ച നടക്കുക. എയർ ഇന്ത്യ എക്‌സ്പ്രസ് സർവീസ് കുറച്ചതോടെ കണ്ണൂർ വിമാനത്താവളത്തിനെയാണ് ഏറ്റവുമധികം ബാധിക്കുന്നത്. വിമാനത്താവളം പ്രവർത്തനം ആരംഭിച്ച് ഏഴു വർഷം പിന്നിട്ടിട്ടും എയർ ഇന്ത്യ എക്‌സ്പ്രസും ഇൻഡിഗോയും മാത്രമാണ് കണ്ണൂരിൽ നിന്ന് സർവീസ് നടത്തുന്നത്. സർവീസുകൾ വൻതോതിൽ കുറയുന്നത് യാത്രക്കാരുടെ എണ്ണത്തെയും കിയാലിന്‍റെ വരുമാനത്തെയും ബാധിക്കും. രണ്ടു വർഷം മുമ്പ് ഗോഫസ്റ്റ് സർവീസ് അവസാനിപ്പിച്ചപ്പോൾ ഉണ്ടായതിന് സമാനമായ പ്രതിസന്ധിയാണിത്. കഴിഞ്ഞ ജൂലൈ, ഓഗസ്റ്റ് മാസങ്ങളിൽ കണ്ണൂർ വിമാനത്താവളത്തിൽ നിന്നുള്ള യാത്രക്കാരുടെ എണ്ണം ഒരു ലക്ഷം പിന്നിട്ടിരുന്നു. വരുമാനത്തിലും ക്രമമായ വർധന വരുത്തിക്കൊണ്ടുവരുമ്പോഴാണ് ഈ തിരിച്ചടി.

ഉളിയിൽ പാലത്തിലെ ബിഎസ്എൻഎൽ കേബിൾ കോപ്പർ മോഷണം പോയി

മട്ടന്നൂർ: ഉളിയിൽ പാലത്തിൽ ബിഎസ്എൻഎൽ സ്ഥാപിച്ച കേബിൾ പൈപ്പുകൾ മുറിച്ച് കോപ്പർ കവർന്നു. കഴിഞ്ഞ ദിവസമാണ് സംഭവം. പഴയ പാലത്തിന് മുകളിലാണ് ഇരുമ്പ് കവചത്തോടു കൂടിയ പൈപ്പ് മുറിച്ചുമാറ്റി അതിനകത്തെ വൻ വിലവരുന്ന കേബിൾ കോപ്പർ മോഷ്ടിച്ചത്. നാട്ടുകാർ വിവരമറിയിച്ചതനുസരിച്ച് മട്ടന്നൂർ ജൂണിയർ ടെലികോം ഓഫീസർ സ്ഥലത്തെത്തി.1,75,000 രൂപയുടെ നഷ്ടം കണക്കാക്കുന്നതായി മട്ടന്നൂർ പോലീസിൽ നൽകിയ പരാതിയിൽ പറയുന്നു. മാസങ്ങൾ മുമ്പ് ഈ ഭാഗത്തെ സോളാർ ലൈറ്റുകളുടെ ബാറ്ററിയുൾപ്പടെ മോഷണം പോയിരുന്നു. ബാറ്ററികളും കേബിൾ കോപ്പറുകളും മോഷ്ടിക്കുന്ന ഗൂഢസംഘം തന്നെ മേഖലയിൽ പ്രവർത്തിക്കുന്നതായാണ് നാട്ടുകാരുടെ പരാതി.

കോടതിയിൽ മൊബൈൽ ഷൂട്ടിംഗ്: സിപിഎം വനിതാ നേതാവിന് തടവും 1,000 രൂപ പിഴ‌യും

തളിപ്പറമ്പ്: കോടതി നടപടികൾ മൊബൈൽ ഫോണിൽ പകർത്തിയതിന് സിപിഎം ഏരിയാ കമ്മിറ്റിയംഗമായ വനിതാ നേതാവിനെ കോടതി പിരിയുംവരെ തടവിനും ആയിരം രൂപ പിഴയ്ക്കും ശിക്ഷിച്ചു. പയ്യന്നൂർ മുനിസിപ്പാലിറ്റി മുൻ വൈസ് ചെയർപേഴ്സണും സിപിഎം പയ്യന്നൂർ ഏരിയ കമ്മിറ്റിയംഗവുമായ വെള്ളൂർ സ്വദേശിനി കെ.പി. ജ്യോതിയെയാണ് തളിപ്പറന്പ് അഡീഷണൽ സെഷൻസ് ജഡ്ജി കെ.എൻ. പ്രശാന്ത് ഇന്നലെ ശിക്ഷിച്ചത്. പയ്യന്നൂരിലെ ധനരാജ് വധക്കേസിന്‍റെ രണ്ടാംഘട്ട വിചാരണ ഇന്നലെ തളിപ്പറന്പ് അഡീഷണൽ സെഷൻസ് കോടതിയിൽ നടന്നുവരവേ ഉച്ചയക്ക് 12 ഓടെ ജ്യോതി കോടതി നടപടികൾ മൊബൈലിൽ ചിത്രീകരിക്കുകയായിരുന്നു. കൊല്ലപ്പെട്ട ധനരാജിന്‍റെ ഭാര്യ സജിനിയെയായിരുന്നു വിചാരണ ചെയ്തിരുന്നത്. സ്‌പെഷല്‍ പ്രോസിക്യൂട്ടറും ഹൈക്കോടതി അഭിഭാഷകനുമായ സി.കെ. ശ്രീധരന്‍റെ വാദത്തിനുശേഷം പ്രതികളായ 19 പേരെ തിരിച്ചറിയാനായി പ്രതികള്‍ നില്‍ക്കുന്ന ഭാഗത്തേക്ക് സജിനി നടന്നുപോകുന്നതാണ് കോടതിയുടെ പുറത്തെ ഇടനാഴിയില്‍നിന്നുകൊണ്ട് ജ്യോതി മൊബൈലില്‍ പകര്‍ത്തിയത്. ഇതു ശ്രദ്ധയില്‍പെട്ട ജഡ്ജി പ്രശാന്ത് ഡ്യൂട്ടിയിലുണ്ടായിരുന്ന പോലീസുകാരനോട് ഇവരുടെ മൊബൈല്‍ കസ്റ്റഡിലെടുക്കാന്‍ ഉത്തരവിട്ടു. മൊബൈല്‍ പരിശോധിച്ച് കോടതി നടപടികള്‍ ചിത്രീകരിച്ചതായി ബോധ്യപ്പെട്ടതോടെ ജഡ്ജി തളിപ്പറമ്പ് ഡിവൈഎസ്പി കെ.ഇ. പ്രേമചന്ദ്രനെ കോടതിയിലേക്കു വിളിച്ചുവരുത്തി. ജ്യോതിയെ പോലീസ് കസ്റ്റഡിയില്‍ സൂക്ഷിക്കാനും എഫ്ഐആര്‍ രജിസ്റ്റര്‍ ചെയ്യാനും നിർദേശിച്ചു. ഉച്ചകഴിഞ്ഞ് 2.20 ന് ഉച്ചഭക്ഷണത്തിനു പിരിഞ്ഞ കോടതി മൂന്നരയ്ക്കു വീണ്ടും ചേര്‍ന്നപ്പോള്‍ ജഡ്ജി ഇവരുടെ പെരുമാറ്റത്തിലെ ഗൗരവകുറ്റം ചൂണ്ടിക്കാണിച്ച് 1000 രൂപ പിഴ ചുമത്തുകയും കോടതി പിരിയുംവരെ തടവു വിധിക്കുകയുമായിരുന്നു. പിഴയടയ്ക്കാൻ ഇപ്പോൾ കൈയിൽ പണമില്ലെന്ന് ജ്യോതി കോടതിയെ അറിയിച്ചു. എങ്കിൽ ഒരു മാസത്തെ തടവാണു വിധിക്കേണ്ടതെന്നായിരുന്നു രൂക്ഷവിമർശനത്തോടെ കോടതി മറുപടി നൽകിയത്. ഇതോടെ തന്‍റെ അറിവില്ലായ്മ കൊണ്ടാണ് അങ്ങനെ പറഞ്ഞതെന്നും കോടതി മാപ്പാക്കണമെന്നും ജ്യോതി അപേക്ഷിച്ചു. മാപ്പ് വെറുതെ പറഞ്ഞാല്‍ പേരെന്നും രേഖാമൂലം നല്‍കണമെന്നും കോടതി ഉത്തരവിട്ടു. തുടര്‍ന്ന് രേഖാമൂലം മാപ്പപേക്ഷ നല്‍കുകയും 1,000 രൂപ പിഴയടയ്ക്കുകയും വൈകുന്നേരം അഞ്ചിനു കോടതി പിരിയുന്നതുവരെ കോടതിയിൽ തടവ് അനുഭവിക്കുകയുമായിരുന്നു.

"ദീപിക കളർ ഇന്ത്യ' സമ്മാനദാനവും ഡിസിഎൽ പ്രവർത്തന ഉദ്ഘാടനവും

കണ്ണൂർ: ദീപിക കളർ ഇന്ത്യ കണ്ണൂർ ജില്ലാതല ചിത്രരചനാ മത്സര വിജയികൾക്കുള്ള സമ്മാനദാനവും ദീപിക ബാലസഖ്യം (ഡിസിഎൽ) കണ്ണൂർ പ്രവിശ്യാതല പ്രവർത്തനോദ്ഘാടനവും നടന്നു. പയ്യാമ്പലം ഉർസുലൈൻ സീനിയർ സെക്കഡറി സ്കൂളിൽ നടന്ന പരിപാടി കണ്ണൂർ ജില്ലാ ചൈൽഡ് വെൽഫെയർ പോലീസ് ഓഫീസർ കെ. കെ. ഷഹീഷ് ഉദ്ഘാടനം ചെയ്തു. ഡിസിഎൽ ദേശീയ അധ്യക്ഷൻ ഫാ. റോയി കണ്ണംചിറ സിഎംഐ (കൊച്ചേട്ടൻ ) അധ്യക്ഷത വഹിച്ചു. ചടങ്ങിൽ ചൈൽഡ് ആൻഡ് പോലീസ് കോ-ഓർഡിനേറ്റർ സുനോജ് കുമാർ, ഉർസുലൈൻ സ്കൂൾ പ്രിൻസിപ്പൽ സിസ്റ്റർ അർച്ചന യുഎംഐ, ഡിസിഎൽ കണ്ണൂർ പ്രവിശ്യ രക്ഷാധികാരി റവ. ഡോ. റെജി സ്കറിയ സിഎസ്ടി എന്നിവർ പ്രസംഗിച്ചു. ദീപിക അസിസ്റ്റന്‍റ് റസിഡന്‍റ് മാനേജർ ഫാ. വിപിൻ വെമ്മേനിക്കട്ടയിൽ സ്വാഗതവും ദീപിക അസിസ്റ്റന്‍റ് ജനറൽ മാനേജർ ജോർജ് തയ്യിൽ നന്ദിയും പറഞ്ഞു.

കാറിൽ കടത്തിയ എംഡിഎംഎയുമായി യുവാവ് പിടിയിൽ

കൂത്തുപറമ്പ്: മട്ടന്നൂര്‍ എടയന്നൂരില്‍ കാറില്‍ കടത്തുകയായിരുന്ന 8.5 ഗ്രാം എംഡിഎംഎയുമായി യുവാവ് പിടിയില്‍. ഇരിട്ടി ഉളിക്കല്‍ നുച്യാട് സ്വദേശി എ.കെ. ഫവാസിനെ(25) യാണ് പിണറായി റേഞ്ച് എക്‌സൈസ് ഇന്‍സ്‌പെക്ടര്‍ കെ.എസ്. കണ്ണനും സംഘവും പിടികൂടിയത്. കമ്മീഷണര്‍ സ്‌ക്വാഡ് അംഗം കെ. ബിനീഷിന് ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ രണ്ടാഴ്ചക്കാലമായി സ്‌ക്വാഡിന്‍റെ നിരീക്ഷണത്തിലായിരുന്നു ഫവാസ്. ബംഗളൂരുവിൽ നിന്നും കണ്ണൂര്‍ ടൗണിലേക്ക് കടത്തുകയായിരുന്ന എംഡിഎംഎയാണ് പിടികൂടിയത്. ലഹരി കടത്താന്‍ ഉപയോഗിച്ച വാഗൺആർ കാറും എക്‌സൈസ് കസ്റ്റഡിയിലെടുത്തു.

എല്ലാ ആരോഗ്യ കേന്ദ്രങ്ങളിലും നിർണയ ലാബ് ആരംഭിക്കും: മന്ത്രി വീണാ ജോർജ്

മലപ്പട്ടം: കുടുംബാരോഗ്യ കേന്ദ്രങ്ങൾ ഉൾപ്പെടെ സംസ്ഥാനത്തെ എല്ലാ ആശുപത്രികളിലും വിവിധ ലാബ് പരിശോധനകൾ ലഭ്യമാക്കുന്ന നിർണയ ലാബ് ആരംഭിക്കുമെന്ന് മന്ത്രി വീണാ ജോർജ് . മലപ്പട്ടം കുടുംബാരോഗ്യകേന്ദ്രത്തിന്‍റെ പുതിയ കെട്ടിടം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. പ്രാഥമികാരോഗ്യ, കുടുംബാരോഗ്യ കേന്ദ്രങ്ങളിലെ ലാബുകളിൽ സംവിധാനമില്ലാത്ത പരിശോധനകൾക്ക് സാമ്പിളുകൾ ജില്ലാ ലാബുകളിലേക്ക് അയച്ച് പരിശോധനാഫലം ബന്ധപ്പെട്ടവരുടെ മൊബൈൽ നമ്പറിൽ ലഭ്യമാക്കും വിധമാണ് നിർണയ സംവിധാനം സജ്ജമാക്കിയിരിക്കുന്നതെന്നും മന്ത്രി പറഞ്ഞു. ഇരിക്കൂർ ബ്ലോക്ക് പഞ്ചായത്ത് പ്രസിഡന്‍റ് റോബർട്ട് ജോർജ്, മലപ്പട്ടം പഞ്ചായത്ത് പ്രസിഡന്‍റ് കെ.പി. രമണി, ജില്ലാ മെഡിക്കൽ ഓഫീസർ എം. പീയുഷ്, എൻഎച്ച്എം ജില്ലാ പ്രോഗ്രാം ഓഫീസർ പി.കെ. അനിൽകുമാർ, ആർദ്രം ജില്ലാ നോഡൽ ഓഫീസർ സി.പി. ബിജോയ്, പഞ്ചായത്ത് വൈസ് പ്രസിഡന്‍റ് ഇ..ചന്ദ്രൻ, ജനപ്രതിനിധികൾ, രാഷ്‌ട്രീയപാർട്ടി പ്രതിനിധികൾ എന്നിവർ പങ്കെടുത്തു.

സ്വർണവുമായി മുങ്ങിയ ബംഗാൾ സ്വദേശിക്കെതിരേ കേസെടുത്തു

കണ്ണൂര്‍: സ്വര്‍ണാഭരണങ്ങള്‍ നിര്‍മിച്ചുനല്‍കാനായി കൈമാറിയ 160 ഗ്രാം സ്വര്‍ണവുമായി പശ്ചിമബംഗാള്‍ സ്വദേശി മുങ്ങി. വില്ലുസ്മാന്‍പൂര്‍ പോലീസ് പരിധിയില്‍ താമസക്കാരനായ ജാക്കില്‍ അലി ഡഫേദാറാണ് പശ്ചിംബംഗാളിലെ സൗത്ത് 24 പര്‍ഗാന ജില്ലയിലെ ഗോപാല്‍ഗഞ്ച് സ്വദേശിയായ ഗിയാസുദ്ദീന്‍ ഷേക്കിന്‍റെ സ്വര്‍ണവുമായി മുങ്ങിയത്. പള്ളിക്കുന്ന് ചാലാട് മുള്ളന്‍കണ്ടിപാലത്ത് പ്രവര്‍ത്തിക്കുന്ന ആര്‍. ജി ഗോര്‍ഡ് വര്‍ക്‌സ് എന്ന സ്ഥാപനത്തിന്‍റെ മാനേജരായ ഷേക്കിനോട് ആഭരണം നിര്‍മിച്ചു തരാമെന്ന് പറഞ്ഞാണ് 19 ന് സ്വര്‍ണം കൈപ്പറ്റിയത്. കണ്ണൂര്‍ ടൗണ്‍പോലീസ് കേസെടുത്തു അന്വേഷണമാരംഭിച്ചിട്ടുണ്ട്.

ഡയാലിസിസ് രോഗികളുടെ കൈത്താങ്ങിനായി റാപ് മ്യൂസിക് ഷോ നവംബർ ഒമ്പതിന് കണ്ണൂരിൽ

ചെമ്പേരി: മലയോര മേഖലയിലെ ഡയാലിസിസ് രോഗികൾക്ക് ആശ്രയമേകി കഴിഞ്ഞ ഏഴ് വർഷക്കാലമായി ചെമ്പേരിയിൽ പ്രവർത്തിച്ചുവരുന്ന ഡയാലിസിസ് സെന്‍ററിന്‍റെ വിപുലീകരണത്തിനായുള്ള ധനശേഖരണാർത്ഥം യംഗ് മൈൻഡ്സ് ഇന്‍റർനാഷണൽ (വൈഎംഐ) ചെമ്പേരി ടൗൺക്ലബിന്‍റെ ആഭിമുഖ്യത്തിൽ റാപ് സംഗീത മേള സംഘടിപ്പിക്കുന്നു. നവംബർ ഒന്പതിന് വൈകുന്നേരം ആറിന് കണ്ണൂർ കളക്ടറേറ്റ് മൈതാനിയിലാണ് 'സോൾ ഫുൾ ബീറ്റ്സ് 2025' എന്ന പേരിൽ സംഗീത മേള സംഘടിപ്പിക്കുന്നത്. പ്രശസ്ത റാപ് മ്യൂസിക് താരങ്ങളായ വേടൻ, എംസി കൂപ്പർ, വിമൽ സ്റ്റിക്ക് എന്നിവരടങ്ങിയ ഗായകരാണ് പരിപാടി അവതരിപ്പിക്കുകയെന്ന് സംഘാടക സമിതി ഭാരവാഹികൾ പത്രസമ്മേളനത്തിൽ അറിയിച്ചു. മലയോര സിരാകേന്ദ്രമായ ചെമ്പേരിയിൽ ഏഴ് വർഷം മുമ്പ് ആരംഭിച്ച ഡയാലിസിസ് സെന്‍ററിൽ സാധാരണക്കാരിൽ നിന്ന് നാമമാത്രമായ തുക ഈടാക്കിയും നിർധനരായ വൃക്ക രോഗികൾക്ക് സൗജന്യമായുമാണ് ചികിത്സ നൽകുന്നത്. കഴിഞ്ഞ ഏഴ് വർഷങ്ങൾക്കിടയിൽ 15,000 സൗജന്യ ഡയാലിസിസുകളാണ് ഈ സെന്‍ററിൽ നടത്തിയത്. 15000 ആളുകൾക്ക് സംഗീതവിരുന്ന് ആസ്വദിക്കാൻ കഴിയുന്ന രീതിയിൽ കേരളത്തിൽ വളരെ അപൂർവമായി ഒരുക്കുന്ന അതിനൂതന സംവിധാനങ്ങളോടെയുള്ള സൗണ്ട് സിസ്റ്റം, ലൈറ്റ് ഷോ ഉൾപ്പെടെയുള്ള ക്രമീകരണങ്ങളോടെ പരിപാടിയുടെ നടത്തിപ്പ് ചുമതല ബിആർജെ അസോസിയേറ്റ്സ് എന്ന ഇവന്‍റ് മാനേജ്മെന്‍റ് ടീമിനാണ്. പ്രവേശന ടിക്കറ്റുകൾ ഓൺലൈൻ ആപ്പുകൾ മുഖേനയും ലഭ്യമായിരിക്കുമെന്ന് സംഘാടകർ അറിയിച്ചു. ചെമ്പേരി വൈഎംഐ ക്ലബ് പ്രസിഡന്‍റ് സാജു മണ്ഡപത്തിൽ, സംഘാടക സമിതി ജനറൽ കൺവീനർ ഫാ.ജോമോൻ ചെമ്പകശേരി, ജോയിന്‍റ് കൺവീനർമാരായ ബിജു പേണ്ടാനത്ത്, ജോമി ചാലിൽ, വിവിധ കമ്മിറ്റി കൺവീനർമാരായ രഞ്ജൻ മാത്യു, മാത്തുക്കുട്ടി ഉറുമ്പിൽ, പ്രകാശ് ജോൺ, ഷിനോ ചേന്നാട്ട്, അനീഷ് തോണക്കര, ജിൽസൺ വെളിയത്ത്, ജെറിൻ ജോസ്, റോയി തുറുവേലിൽ എന്നിവർ പത്രസമ്മേളനത്തിൽ പങ്കെടുത്തു.

തലശേരി ജോസ്ഗിരി ആശുപത്രിയിൽ രക്തദാന ക്യാമ്പ് ന‌ടത്തി

തലശേരി: 66 ാമത് പോലീസ് അനുസ്മരണ ദിനത്തിന്‍റെ ഭാഗമായി തലശേരി പോലീസ് സബ് ഡിവിഷനും ജോസ്ഗിരി ആശുപത്രിയും ചേർന്ന് രക്തദാന ക്യാമ്പ് ന‌ടത്തി. ജോസ്ഗിരി ആശുപത്രിയിൽ നടന്ന ക്യാമ്പ് തലശേരി ടൗൺ പോലീസ് സബ് ഇൻസ്പെക്ടർ ഷമീൽ ഉദ്ഘാടനം ചെയ്തു. ടൗൺ എസ്ഐ കെ. അശ്വതി, എഎസ്ഐ ജയകൃഷ്ണൻ, അഡ്മിനിസ്ട്രേറ്റർ ഡോ. സിസ്റ്റർ അഞ്ജലി അറക്കൽ, ലാബ് ഇൻ ചാർജ് സിസ്റ്റർ അനേറ്റ്, ബ്ലഡ് ബാങ്ക് ടെക്നീഷ്യ സിസ്റ്റർ ലിനോ, നഴ്സിംഗ് സൂപ്രണ്ട് സിസ്റ്റർ സ്റ്റെല്ല എന്നിവർ പ്രസംഗിച്ചു. തലശേരി സബ്ഡിവിഷനിൽ ഉൾപ്പെട്ട പോലീസുകാരാണ് രക്തദാനം നടത്തിയത്.

ജില്ലയില്‍ ഡിജിറ്റല്‍ സര്‍വേ ആദ്യം പൂര്‍ത്തിയാക്കി കണ്ണൂര്‍-2 വില്ലേജ്

കണ്ണൂർ: ഡിജിറ്റല്‍ സര്‍വേ നടപടികള്‍ പൂര്‍ത്തിയാക്കിയ ജില്ലയിലെ ആദ്യത്തെ വില്ലേജായ കണ്ണൂര്‍-2 വില്ലേജ് പുതിയ ഭൂമിരേഖകള്‍ റവന്യുവകുപ്പിനു കൈമാറി. കളക്ടറേറ്റ് കോണ്‍ഫറന്‍സ് ഹാളില്‍ നടന്ന പരിപാടി ജില്ലാ കളക്ടർ അരുണ്‍ കെ. വിജയന്‍ ഉദ്ഘാടനം ചെയ്തു. ജില്ലയില്‍ ഇതിനോടകം മൂന്ന് ഘട്ടങ്ങളിലായി 50 വില്ലേജുകളിലാണ് സർവേ ജോലികള്‍ ആരംഭിച്ചത്. അവയില്‍ 30 വില്ലേജുകള്‍ പ്രാഥമിക സര്‍വേ ജോലികള്‍ പൂര്‍ത്തിയാക്കി സര്‍വേ അതിരടയാള നിയമം 9(2) പ്രകാരം പൊതുജനങ്ങള്‍ക്ക് പരിശോധിക്കുന്നതിനായി പ്രദര്‍ശിപ്പിച്ചിട്ടുണ്ട്. ഘട്ടം ഘട്ടമായി വരും ദിവസങ്ങളില്‍ ഈ വില്ലേജുകള്‍ റവന്യു വകുപ്പിന് കൈമാറും. അതോടെ നികുതി പിരിവ് ഉള്‍പ്പെടെയുള്ള ഭൂമി സംബന്ധമായ എല്ലാ സേവനങ്ങളും പുതിയ റിക്കാര്‍ഡുകളുടെ അടിസ്ഥാനത്തിലായിരിക്കും ലഭ്യമാവുക. ജനങ്ങള്‍ക്കു ഭൂമി കൈമാറ്റം, ഭൂമി തരംതിരിക്കല്‍, കരം അടക്കല്‍ ഉള്‍പ്പെടെയുള്ള സേവനങ്ങള്‍ 'എന്‍റെ ഭൂമി' പോര്‍ട്ടലില്‍ ലഭിക്കും. ഇവിടുത്തെ ഭൂ ഉടമകള്‍ക്ക് 'എന്‍റെ ഭൂമി' പോര്‍ട്ടലില്‍ മൊബൈല്‍ നമ്പര്‍ വഴി രജിസ്റ്റര്‍ ചെയ്ത് ഭൂവിവരങ്ങള്‍ പരിശോധിക്കാം. സർവേ പൂര്‍ത്തീകരണത്തിന് നേതൃത്വം നല്‍കിയ പയ്യന്നൂര്‍ ഡിജിറ്റല്‍ സര്‍വേ സൂപ്രണ്ട് സിജി തോമസിനെയും കണ്ണൂര്‍ അസിസ്റ്റന്‍റ് ഡയറക്ടര്‍ ഓഫീസ് ടെക്നിക്കല്‍ അസിസ്റ്റന്‍റ് കെ.എം പീതാംബരനെയും ജില്ലാ കളക്ടര്‍ അനുമോദിച്ചു. അസിസ്റ്റന്‍റ് കളക്ടർ എഹ്തെദാ മുഫസിര്‍, ഡെപ്യൂട്ടി കളക്ടര്‍ (എല്‍ ആര്‍) ലതാദേവി, ടെക്നിക്കല്‍ അസിസ്റ്റന്‍റ് കെ.എം പീതാംബരന്‍, ഹെഡ് ഡ്രാഫ്റ്റ്മാന്‍ വി.ആര്‍ സുധീര്‍ കുമാര്‍ എന്നിവര്‍ പങ്കെടുത്തു.

വീരമൃത്യു വരിച്ചവരെ അനുസ്മരിച്ച് പോലീസിന്‍റെ റൺ ഫോർ ദ ബ്രേവ്

കണ്ണൂർ: രാജ്യത്തിനും ജനങ്ങൾക്കും വേണ്ടി വീരമൃത്യു വരിച്ചവരെ അനുസ്മരിച്ച് 66-ആമത് പോലീസ് കമ്മെമറേഷൻ ദിനാചാരണത്തിന്‍റെ ഭാഗമായി കണ്ണൂർ സിറ്റി പോലീസ് റൺ ഫോർ ദ ബ്രേവ് എന്ന പേരിൽ 6.6 കിലോമീറ്റർ ഓട്ടം സംഘടിപ്പിച്ചു. രാവിലെ ആറിന് കണ്ണൂർ പോലീസ് പരേഡ് ഗ്രൗണ്ടിൽ കണ്ണൂർ റേഞ്ച് ഡിഐജി ജി.എച്ച്. യതീഷ് ചന്ദ്ര ഫ്ലാഗ് ഓഫ് ചെയ്തു. സിറ്റി പോലീസ് കമ്മീഷണർ നിധിൻരാജ്, അഡീഷണൽ സൂപ്രണ്ട് ഓഫ് പോലീസ് സജേഷ് വാഴളാപ്പിൽ, എഎസ്പി പി.ബി.കിരൺ, എസിപിമാരായ എ.വി.ജോൺ, പ്രദീപൻ കണ്ണിപൊയിൽ, കെ.വി.പ്രമോദൻ,പി. രാജേഷ്, എം.ടിജേക്കബ് എന്നിവർ പങ്കെടുത്തു. റണ്ണിൽ പോലീസ് ഉദ്യോഗസ്ഥർ, റിട്ട പോലീസ് ഉദ്യോഗസ്ഥർ, മാധ്യമപ്രവർത്തകർ, കായികതാരങ്ങൾ, അധ്യാപകർ, വിദ്യാർഥികൾ, പൊതുജനങ്ങൾ എന്നിവർ പങ്കെടുത്തു. പുതിയ ബസ് സ്റ്റാൻഡ്, പ്രഭാത് ജംഗ്ഷൻ, ഗസ്റ്റ് ഹൗസ്, പയ്യാന്പലം, എസ്.എൻ.പാർക്ക്, മുനീശ്വരൻ കോവിൽ, പഴയ ബസ് സ്റ്റാൻഡ്, കാൽടെക്സ് വഴി റൺ പോലീസ് പരേഡ് ഗ്രൗണ്ടിൽ സമാപിച്ചു. പുരുഷ വിഭാഗത്തിൽ ഇരിങ്ങാലക്കുട ക്രൈസ്റ്റ് കോളജിലെ അതുൽ ഒന്നാം സ്ഥാനം നേടി. ഇരിട്ടി സ്വദേശി ആദർശ് ഗോപി, പാലാ സെന്‍റ് തോമസ് കോളജ് വിദ്യാർഥി മനോജ് എന്നിവർ യഥാക്രമം രണ്ടും മൂന്നും സ്ഥാനങ്ങൾ നേടി. വനിതാ വിഭാഗത്തിൽ മലബാർ സ്പോർട് അക്കാഡമിയിലെ ശ്രീനന്ദ ജേതാവായി. ജിവിഎച്ച്എസ്എസ് സ്പോർട്സ് കണ്ണൂരിലെ ഷിഫാ മോൾ, പി. വിശ്രുത എന്നിവർ യഥാക്രമം രണ്ടും മൂന്നും സ്ഥാനങ്ങൾ നേടി. ജേതാക്കൾക്ക് ഡിഐജി യതീഷ് ചന്ദ്ര കാഷ് പ്രൈസ് സമ്മാനിച്ചു. 100 ഹാഫ് മാരത്താൺ നൂറു ദിവസം കൊണ്ട് പൂർത്തിയാക്കിയ റിട്ട. എസ്ഐ മരിയ ജോസിനെ ഉപഹാരം നൽകി ആദരിച്ചു. റണ്ണിൽ പങ്കെടുത്ത എല്ലാവർക്കും ‌ടീ ഷർട്ടും ഫിനിഷ് ചെയ്ത എല്ലാവർക്കും മെഡലുകളും നൽകി.

നിരോധിത പുകയില ഉത്പന്നങ്ങൾ പിടികൂടി

ഇരിട്ടി: പായം പഞ്ചായത്തിൽ ആരോഗ്യവകുപ്പിന്‍റെയും എക്സൈസിന്‍റെയും സംയുക്ത പരിശോധനയിൽ കടത്തുംകടവിലെ അസൈൻ സ്റ്റോറിൽ നിന്ന് നിരോധിത പുകയില ഉത്പന്നങ്ങൾ പിടികൂടി. സ്ഥാപനം അടച്ചുപൂട്ടി ഉടമയിൽ നിന്ന് പിഴ ഈടാക്കി. ഹെൽത്ത് ഇൻസ്പെക്ടർ ബിനോജ് സി. കുട്ടിയാനി, സിജു കേളോത്ത്, സന്ദീപ് സുധാകരൻ. എക്സൈസ് അസിസ്റ്റന്‍റ് ഇൻസ്പെക്ടർ ഉമ്മർ, ഷൈബി കുര്യൻ, നെൽസൺ ടി. തോമസ്, പി.ജി. അഖിൽ‌, പി.വി. അഭിജിത്ത് എന്നിവർ പരിശോധനയ്ക്ക് നേതൃത്വം നൽകി. പെരുവംപറമ്പിൽ മാനദണ്ഡങ്ങൾ പാലിക്കാതെ പ്രവർത്തിക്കുന്ന ബാബൂസ് കുലുക്കി സർബത്ത് കടയും അടച്ചുപൂട്ടി.

ആസ്റ്റര്‍ മിംസിൽ ഹാഫ് ബര്‍ത്ത് ഡേ ആഘോഷം സംഘടിപ്പിച്ചു

കണ്ണൂര്‍: ആറുമാസം പ്രായമായ കുഞ്ഞുങ്ങളുടെ ഹാഫ് ബര്‍ത്ത് ഡേ ആഘോഷവുമായി കണ്ണൂര്‍ ആസ്റ്റര്‍ മിംസ് ആശുപത്രി. കണ്ണൂര്‍ ആസ്റ്റര്‍ മിംസിനോടൊപ്പം ഇന്ത്യന്‍ അസോസിയേഷന്‍ ഓഫ് പീഡിയാട്രിക്‌സ്, നിയോനാറ്റോളജി ഫെഡറേഷന്‍ എന്നിവരും സംയുക്തമായാണ് പരിപാടി സംഘടിപ്പിച്ചത്. നവജാത ശിശുക്കളുടെ ജീവിതത്തിലെ ഏറ്റവും നിര്‍ണണായക മായ വഴിത്തിരിവാണ് ആറാമത്തെ മാസം. ഭക്ഷണരീതിയില്‍ ഉള്‍പ്പെടെ ക്രമാനുഗതമായ മാറ്റങ്ങള്‍ വരുത്തേണ്ടതും ആരോഗ്യകാര്യങ്ങളില്‍ സവിശേഷമായ ശ്രദ്ധപതിപ്പിക്കേണ്ടതുമായ കാലയളവ് എന്ന നിലയിലാണ് ആറ്മാസം പ്രായമായ കുഞ്ഞുങ്ങളുടെ ഹാഫ് ബര്‍ത്ത് ഡേ എന്ന സംഗമത്തിന് വേദിയൊരുക്കിയത്. ആറ് മാസത്തിന് ശേഷം കുട്ടികള്‍ക്ക് ആവശ്യമായ പോഷകാഹാര ക്രമീകരണം ഏത് രീതിയില്‍ നടത്തണം, ശരിയായ ആഹാരക്രമങ്ങള്‍ എന്തൊക്കെയാണ് എന്നിവയുമായി ബന്ധപ്പെട്ട ബോധവ ത്കരണ ക്ലാസുകള്‍ക്ക് പുറമെ ഡോക്ടര്‍മാരുടെ നേതൃത്വത്തില്‍ കുഞ്ഞുങ്ങളുടെ ശാരീരിക വളര്‍ച്ചയും ബുദ്ധിവികാസവും വിലയിരുത്തുന്നതിനായുള്ള പരിശോധനകളും, മാതാപിതാക്കളുടെ സംശയങ്ങളും ആശങ്കകളും പങ്കുവയ്ക്കുവാനുള്ള ചര്‍ച്ച സദസും ഇതിന്‍റെ ഭാഗമായി സംഘടിപ്പിച്ചു. പരിപാടി ഡോ. ജുബൈരിയത്ത് ഉദ്ഘാടനം ചെയ്തു. കണ്ണൂര്‍ ആസ്റ്റര്‍ മിംസിലെ പീഡിയാട്രിക്‌സ്, നിയോനറ്റോളജി വിഭാഗം മേധാവി ഡോ. നന്ദകുമാർ. ഡോ. വീണ കുമാരി, ഡോ. അമൃത, നീയോനറ്റൊളജി വിഭാഗം ഡോ. ശ്രീകാന്ത് സി നായനാര്‍ , ഡോ. ഗോകുല്‍ദാസ് പീഡിയാട്രിക്ക് ന്യൂറോളജി വിഭാഗം ഡോ. കാർത്തിക, പീഡിയാട്രിക് ഓർത്തോപടിക് വിഭാഗത്തിവലെ ഡോ. ഷഫീഖ് എന്നിവര്‍ നേതൃത്വം നല്കി.

അത്യാഹിത വിഭാഗം, ഓപ്പറേഷൻ തിയേറ്റർ കോംപ്ലക്‌സ് പ്രവൃത്തി ഉദ്ഘാടനം ചെയ്തു

തളിപ്പറന്പ്: അത്യാഹിത വിഭാഗം, ഓപ്പറേഷൻ തിയേറ്റർ കോംപ്ലക്‌സ് എന്നിവ പൂർത്തിയാകുന്ന തിലൂടെ തളിപ്പറമ്പ് താലൂക്ക് ഹെഡ് ക്വാട്ടേഴ്സ് ആശുപത്രിയിൽ വലിയ വികസന പദ്ധതിക്ക് തുടക്കമാകുമെന്ന് ആരോഗ്യ മന്ത്രി വീണ ജോർജ്. തളിപ്പറമ്പ് താലൂക്ക് ആശുപത്രിയുടെ അത്യാഹിത വിഭാഗം, ഓപ്പറേഷൻ തിയേറ്റർ കോംപ്ലക്‌സ് എന്നിവയുടെ കെട്ടിട നിർമാണോദ്ഘാടനം നിർവഹിച്ച് പ്രസംഗികയായിരുന്നു മന്ത്രി. ഡയാലിസിസ് രോഗികളുടെ ആവശ്യം കണക്കിലെടുത്ത് എംഎൽഎയുടെ ഇടപെടൽ പ്രകാരം ആശുപത്രിയിലേക്ക് ഭാരത് പെട്രോളിയം കോർപറേഷൻ ലിമിറ്റഡ് മുഖേന പത്ത് ഡയാലിസിസ് മെഷീനുകൾ കൂടി അനുവദിക്കും. ഇതുവഴി സ്വകാര്യ ആശുപത്രികളിലെ ഭീമമായ ചികിത്സാ ചെലവിൽ നിന്ന് സാധാരണക്കാർക്ക് ആശ്വാസം ലഭിക്കുമെന്നും മന്ത്രി പറഞ്ഞു. ആരോഗ്യവകുപ്പിന്‍റെ അഞ്ചു വർഷത്തെ പ്രവർത്തനങ്ങളുടെ വികസന രേഖ എം.വി. ഗോവിന്ദൻ എംഎൽഎയ്ക്ക് നല്കി മന്ത്രി പ്രകാശനം ചെയ്തു. ഐഎസ്ഒ സർട്ടിഫിക്കേഷൻ ലഭിച്ച തളിപ്പറമ്പ് നഗരസഭ കുടുംബശ്രീ, കുറുമാത്തൂർ പഞ്ചായത്ത് കുടുംബശ്രീ തുടങ്ങിയവരെ മന്ത്രി ആദരിച്ചു. എൻഎച്ച്എം വാർഷിക പദ്ധതിയിൽ ഉൾപ്പെടുത്തി ആധുനിക സൗകര്യങ്ങളുള്ള അത്യാഹിത വിഭാഗത്തിനായി 4.94 കോടി രൂപയും ഓപ്പറേഷൻ തിയേറ്റർ കോംപ്ലക്‌സിനായി കിഫ്ബി മുഖേന 19.53 കോടി രൂപയുമാണ് അനുവദിച്ചത്. ജനറൽ സർജറി, ഇഎൻടി, ഓർത്തോ വിഭാഗങ്ങൾക്കായുള്ള പ്രത്യേക ഓപ്പറേഷൻ തിയേറ്റർ, സർജറി രോഗികൾക്കായുള്ള വാർഡ്, എച്ച്ഡിയു സൗകര്യം, എക്‌സ്‌റേ, അൾട്രാ സൗണ്ട്, സിടി സ്‌കാനിംഗ് തുടങ്ങിയ റേഡിയോളജി സൗകര്യങ്ങളും ഇതിൽ ഉൾപ്പെടും. ആശുപത്രി പരിസരത്ത് നടന്ന പരിപാടിയിൽ എം.വി. ഗോവിന്ദൻ എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി, തളിപ്പറമ്പ് നഗരസഭ ചെയർപേഴ്‌സൺ മുർഷിദ കൊങ്ങായി, ആന്തൂർ നഗരസഭ ചെയർമാൻ പി. മുകുന്ദൻ, തളിപ്പറമ്പ് നഗരസഭ വൈസ് ചെയർമാൻ കല്ലിങ്കീൽ പദ്മനാഭൻ, തളിപ്പറമ്പ് നഗരസഭ സ്ഥിരം സമിതി അംഗങ്ങളായ നബീസ ബീവി, എം.കെ ഷബിത, പി.പി. മുഹമ്മദ് നിസാർ, നഗരസഭ സെക്രട്ടറി കെ.പി. സുബൈർ, വിവിധ രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

മഴ: ചെറുപുഴ മേഖലയിൽ കനത്ത നാശനഷ്ടം

ചെറുപുഴ: കഴിഞ്ഞ ദിവസമുണ്ടായ കനത്ത മഴയിൽ ചെറുപുഴ മേഖലയിൽ പലയിടത്തും മണ്ണിടിച്ചിലും കനത്ത നാശനഷ്ടവും. തിരുമേനി-കോക്കടവ് തീരദേശ റോഡിൽ മണ്ണിടിഞ്ഞ് കൂറ്റൻ കരിങ്കല്ല് റോഡിലേയ്ക്ക് വീണു. റോഡിൽ ആളുകളോ വാഹനങ്ങളോ ഇല്ലാതിരുന്നതിനാലാണ് വൻ ദുരന്തം ഒഴിവായത്. കല്ല് വീണതിനെ തുടർന്ന് ഇരുചക്രവാഹനത്തിന് പോലും കടന്നു പോകാൻ കഴിയാത്ത വിധം ഗതാഗതം തടസപ്പെട്ടു. ചട്ടിവയൽ - ചൂരപ്പടവ് റോഡിലും കല്ലും മണ്ണും വീണ് ഗതാഗതം തടസപ്പെട്ടു. കക്കോട് - കിഴക്കേക്കര റോഡ്, തിരുമേനി - കോറാളി റോഡ് എന്നിവിടങ്ങളിലും മണ്ണിടിച്ചിലുണ്ടായി. പ്രാപ്പൊയിലിലെ പൂങ്കാവനം ജയേഷ്, പ്രാപ്പൊയിൽ ഈസ്റ്റിലെ പറമ്പിൽ ഏബ്രഹാം, ഇടക്കര ജോണി എന്നിവരുടെ വീടുകളുടെ മതിൽ തകർന്നു. ഏബ്രഹാമിന്‍റെ മതിൽ തൊട്ടടുത്ത താമസക്കാരനായ ഇടക്കര ജോണിയുടെ വീട്ടുമുറ്റത്തേക്കാണ് ഇടിഞ്ഞു വീണത്. ജോണിയുടെ വിടിന്‍റെ മുറ്റവും ഇടിഞ്ഞു.കണിയാംപറമ്പിൽ ജോസഫിന്‍റെയും വീടിന്‍റെ മുറ്റം ഇടിഞ്ഞ നിലയിലാണ്. ചൂരപ്പഴ മോളിയുടെ വീടിന്‍റെ രണ്ടു വശങ്ങളിലും മണ്ണിടിച്ചിൽ ഉണ്ടായി. നിരവധി പേരുടെ കൈയാലകളും തകർന്നു. മണ്ണിടിച്ചിലിനൊപപ്പം കൃഷിയിടങ്ങളിൽ വെള്ളം കുത്തിയൊലിച്ചതിനെ തുടർന്നും വ്യാപക നഷ്ടം സംഭവിച്ചിട്ടുണ്ട്. മണ്ണിടിച്ചിലിനൊപ്പം പലയിടത്തും വാട്ടർ ടാങ്കുകളും പൈപ്പുകളും തകർന്നിട്ടുമുണ്ട്. തിരുമേനി തോടിന് കുറുകെ മുളപ്രയിലെ തടയണയുടെ പാർശ്വഭിത്തിയും തകർന്നു. മണ്ണിടിച്ചിലിൽ നിലം പതിച്ച കൂറ്റൻ പനയുൾപ്പടെയുള്ള മരങ്ങൾ തടയണയിൽ തങ്ങി നിൽക്കുകയാണ്. ശക്തമായ മിന്നൽ വീട്ടിൽ പതിച്ചതിനെ തുടർന്ന് രണ്ടു പേർക്ക് പരിക്കേൽക്കുകയും വീട്ടുപകരണങ്ങൾ നശിക്കുകയും ചെയ്തു. കക്കോട്ടോ തോറ്റിയാട്ടിൽ ടി. മോഹനന്‍റെ വീടിനാണ് മിന്നലേറ്റത്. മോഹനന്‍റെ അമ്മ മാധവി, പുഷപ്വല്ല എന്നിവർക്കാണ് പരിക്കേറ്റത്. വീട്ടിലെ വയറിംഗ് പൂർണമായും കത്തി നശിച്ച നിലയിലാണ്. നാശനഷ്ടമുണ്ടായ പ്രദേശങ്ങൾ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടറുടെ നേതൃത്വത്തിൽ പഞ്ചായത്തംഗങ്ങൾ സ്ഥലം സന്ദർശിച്ചു.

ആലക്കോട് -മോറാനി പാലം; ശിലാസ്ഥാപനം നടത്തി

ആലക്കോട്: ജില്ലാ പഞ്ചായത്തും ആലക്കോട് പഞ്ചായത്തും സംയുക്ത പദ്ധതിയായി നടപ്പിലാക്കുന്ന ആലക്കോട്- മോറാനി പാലത്തിന്‍റെ ശിലാസ്ഥാപന കർമം ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി നിർവഹിച്ചു. ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട് അ ധ്യക്ഷത വഹിച്ചു. ജില്ലാ പഞ്ചായത്തംഗം തോമസ് വെക്കത്താനം മുഖ്യപ്രഭാഷണം നടത്തി. ആലക്കോട് പഞ്ചായത്ത് വൈസ് പ്രസിഡന്‍റ് പി.സി. ആയിഷ, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ജോൺസൺ താരാമംഗലം, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം.എ. ഖലീൽ റഹ്മാൻ, മെംബർമാരായ മാത്യു പുതിയേടം, പി.ആർ. നിഷ, സാലി വാണിശേരി, കെ.പി. സാബു, രാഷ്‌ട്രീയ പാർട്ടി പ്രതിനിധികളായ ബാബു പള്ളിപ്പുറം, കെ. സാജൻ, കെ. ജോസഫ്, വി.ജി. സോമൻ, ഡെന്നീസ് വാഴപ്പള്ളി, ബിജു പുതുക്കള്ളി, സി.ജി. ഗോപൻ, കൃഷണൻ കൂലേരി, എ.ഇ. ലിജി എന്നിവർ പ്രസംഗിച്ചു. ജില്ലാ പഞ്ചായത്ത് 37.5 ലക്ഷം രൂപയും ആലക്കോട് പഞ്ചായത്ത് 40 ലക്ഷം രൂപയും പദ്ധതിക്ക് വകയിരുത്തി. മൊത്തം 77.5 ലക്ഷം രൂപയുടെ പ്രവൃത്തിക്കാണ് അനുമതി നൽകിയിട്ടുള്ളത്.

പയ്യാവൂർ-കുന്നത്തൂർ-കാഞ്ഞിരക്കൊല്ലി റോഡ് വികസനം കടലാസിൽ ഒതുങ്ങി

പയ്യാവൂർ: പയ്യാവൂർ-കുന്നത്തൂർ-കാഞ്ഞിരക്കൊല്ലി റോഡ് വികസന പദ്ധതി പതിറ്റാണ്ട് പിന്നിട്ടിട്ടും ഫയലിൽ ഉറങ്ങുന്നു. 12 വർഷങ്ങൾക്കു മുന്പ് യുഡിഎഫ് സർക്കാരിന്‍റെ കാലത്ത് റോഡ് വികസന പദ്ധതിയുമായി ബന്ധപ്പെട്ട് ചില നടപടികൾ ആരംഭിച്ചെങ്കിലും മുന്നോട്ടി പോയില്ല. വീതിയില്ലാത്ത കാടുകയറിയ അരിക് ഇടിഞ്ഞ റോഡിലൂടെയുള്ള ദുരിതയാത്രക്ക് ഇനിയെങ്കിലും പരിഹാരം വേണമെന്നാണ് നാട്ടുകാരുടെ ആവശ്യം. മലയോര മേഖലയിലെ പഴക്കം ചെന്ന റോഡുകളിൽ ഒന്നാണിത്. തകർന്നു കിടക്കുന്ന റോഡിന്‍റെ അറ്റകുറ്റപണിയും ചുകപ്പ് നാടയിൽ കുടുങ്ങിക്കിടക്കുകയാണ്. വിനോദ സഞ്ചാര കേന്ദ്രങ്ങളായ അളകാപുരി വെള്ളച്ചാട്ടം, ശശിപ്പാറ എന്നിവിടങ്ങളിലേക്ക് എത്തുന്ന സഞ്ചാരികൾ ആശ്രയിക്കുന്ന പ്രധാന പാതയായിട്ടും റോഡ് നവീകരിക്കാൻ ബന്ധപ്പെട്ടവർ തയാറാകുന്നില്ല. മുത്തപ്പന്‍റെ ആരൂഢസ്ഥാനമായ കുന്നത്തൂർപ്പാടി, മീനപ്പൊങ്കാല മഹോത്സവം നടക്കുന്ന ചാമക്കാൽ ഭഗവതി ക്ഷേത്രം, പാടാൻക വല മദർതെരേസ തീർഥാടന ദേവാലയം എന്നിവിടങ്ങളിലേക്ക് എളുപ്പം എത്തിച്ചേരാവുന്ന വഴിയും നിരവധി ഉന്നതികളിലെ താമസക്കാർ ആശ്രയിക്കുന്ന റോഡും കൂടിയാണിത്. കെഎസ്ആർടിസി ഉൾപ്പെടെ അഞ്ചു ബസുകൾ ഇതുവഴി സർവീസ് നടത്തുന്നുണ്ട്. മരുതുംചാൽ, ചാമക്കാൽ മുത്താറിക്കുളം, കുന്നത്തൂർ എന്നിവിടങ്ങളിലെല്ലാം റോഡ് തകർന്ന് കിടക്കുകയാണ്. കുന്നത്തൂർപാടിയിലെ കയറ്റമാണ് റോഡിനെ അപകടാവസ്ഥയിലാക്കുന്ന പ്രധാന ഭാഗം. കഴിഞ്ഞ വർഷം ഉത്സവത്തിന് ബസ് നിയന്ത്രണം വിട്ട് മറിഞ്ഞിരുന്നു. അന്ന് ഭാഗ്യത്തിനാണ് യാത്രക്കാർ പരിക്കേൽക്കാതെ രക്ഷപ്പെട്ടത്. ചെറുവാഹനങ്ങൾ അപകടത്തിൽ പ്പെടുന്നതും പതിവാണ്. ഡിസംബർ 17 മുതൽ ഒരുമാസം നീളുന്ന ഈ വർഷത്തെ കുന്നത്തൂർപ്പാടി മുത്തപ്പൻ ദേവസ്ഥാനം മഹോത്സവവും ആരംഭിക്കും.

തദ്ദേശ തെരഞ്ഞെടുപ്പ്: കോർപറേഷൻ, ജില്ലാ പഞ്ചായത്ത് സംവരണ വാർഡുകൾ നറുക്കെടുത്തു

കണ്ണൂർ: തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി കണ്ണൂർ മുനിസിപ്പൽ കോർപറേഷന്‍റെ സംവരണ വാർഡുകളുടെ നറുക്കെടുപ്പ് നടത്തി. കോഴിക്കോട് ടൗൺഹാളിലായിരുന്നു നറുക്കെടുപ്പ്. 56 വാർഡുകളുള്ള കോർപറേഷനിൽ 26 എണ്ണം വനിതാ സംവരണമാണ്. പട്ടികജാതി വനിതാ സംവരണമായി രണ്ട് വാർഡുകളും പട്ടികജാതി സംവരണമായി ഒരു വാർഡുമാണ് നറുക്കെടുപ്പിലൂടെ നിശ്ചയിച്ചത്. വനിത സംവരണ വാർഡുകൾ, വാർഡ് നന്പർ, പേര് എന്നീ ക്രമത്തിൽ. ഒന്ന് പള്ളിയാംമൂല, നാല് പളളിക്കുന്ന്, എട്ട് കൊറ്റാളി, ഒന്പത് അത്താഴക്കുന്ന്, 17 ചേലോറ, 18 മാച്ചേരി, 21 എളയാവൂർ നോർത്ത്, 23 മുണ്ടയാട്, 27 മേലെചൊവ്വ, 28 താഴെചൊവ്വ, 29 കീഴ്ത്തളളി, 31 ആറ്റടപ്പ, 32 ചാല, 35 ആലിങ്കീൽ, 36 കിഴുന്ന, 37 തോട്ടട, 39 കാഞ്ഞിര, 41 പടന്ന, 43 നീർച്ചാൽ, 44 അറയ്ക്കൽ, 47 സൗത്ത് ബസാർ, 48 ടെമ്പിൾ, 49 തായത്തെരു, 52 കാനത്തൂർ, 53 പയ്യാമ്പലം, 55 ചാലാട്. പട്ടികജാതി വനിതാ സംവരണം: 16 വലിയന്നൂർ, 22 എളയാവൂർ സൗത്ത്. പട്ടികജാതി സംവരണം: 11 തുളിച്ചേരി. ജില്ലാ പഞ്ചായത്ത് വനിതാ സംവരണ വാർഡുകൾ: ഒന്ന് കരിവെള്ളൂർ, രണ്ട് മാതമംഗലം, അഞ്ച് പടിയൂർ, ആറ് പേരാവൂർ, എട്ട് കോളയാട്, പത്ത് പാട്യം, 11 പന്ന്യന്നൂർ, 12 കതിരൂർ, 13 പിണറായി, 15 അഞ്ചരക്കണ്ടി, 16 കൂടാളി, 22 ചെറുകുന്ന്, 25 കുഞ്ഞിമംഗലം. പട്ടികജാതി സംവരണം: 20 കല്യാശേരി. പട്ടികവർഗ സംവരണം: 17 മയ്യിൽ. കളക്ടറേറ്റ് കോൺഫറൻസ് ഹാളിൽ നടന്ന നറുക്കെടുപ്പിൽ തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടർ ടി.ജെ അരുൺ, ഇലക്ഷൻ ഡെപ്യൂട്ടി കളക്ടർ കെ.കെ ബിനി, തദ്ദേശസ്ഥാപന വകുപ്പ് ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

തളിപ്പറമ്പിൽ അന്താരാഷ്‌ട്ര സ്റ്റേഡിയം നിർമിക്കും: മന്ത്രി

തളിപ്പറന്പ്: തളിപ്പറമ്പ് കില ആസ്ഥാനമാക്കി മുപ്പതിനായിരം പേരെ ഉൾക്കൊള്ളാവുന്ന, 52 കോടി രൂപയുടെ അന്താരാഷ്ട്ര നിലവാരത്തിലുള്ള ഫുട്ബോൾ സ്റ്റേഡിയം നിർമിക്കുമെന്ന് മന്ത്രി വി. അബ്ദുറഹിമാൻ. നിർമാണ പ്രവൃത്തി ഡിസംബറിൽ ആരംഭിക്കുമെന്നും മന്ത്രി അറിയിച്ചു കല്യാശേരി കെ.പി.ആർ ഗോപാലൻ സ്മാരക ഗവ. ഹയർ സെക്കൻഡറി സ്‌കൂൾ കായിക അടിസ്ഥാന സൗകര്യ വികസന പദ്ധതിയുടെ ഭാഗമായി നിർമാണം പൂർത്തികരിച്ച ഫുട്ബോൾ ടർഫ്, സ്കൂൾ ഗ്രൗണ്ട്, ജിംനേഷ്യം കോർട്ട് എന്നിവയുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. എം വിജിൻ എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത്‌ പ്രസിഡന്‍റ് കെ.കെ. രത്നകുമാരി, ജില്ലാ പഞ്ചായത്ത്‌ അംഗം പി.പി ദിവ്യ, കല്യാശേരി ബ്ലോക്ക്‌ പഞ്ചായത്ത് പ്രസിഡന്‍റ് പി.പി ഷാജിർ, പഞ്ചായത്ത് പ്രസിഡന്‍റ് ടി.ടി ബാലകൃഷ്ണൻ,ജനപ്രതിനിധികൾ, ഉദ്യോഗസ്ഥർ, രാഷ്‌ട്രീയപാർട്ടി പ്രതിനിധികൾ എന്നിവർ പങ്കെടുത്തു.

സ്വീകരണവും അനുമോദന റാലിയും നടത്തി

ചെറുപുഴ: റവന്യൂ ജില്ലാ സ്‌കൂൾ കായികമേളയിൽ ഓവറോൾ ചാമ്പ്യൻഷിപ്പ് കരസ്ഥമാക്കിയ പ്രാപ്പൊയിൽ ഗവ. ഹയർ സെക്കൻഡറി സ്‌കൂൾ കായികതാരങ്ങൾക്കും കായികാധ്യാപകനും പരിശീലകനുമായ സുനീഷ് ജോർജിനും ചെറുപുഴ ടൗണിൽ സ്വീകരണം നൽകി. ജനപ്രതിനിധികൾ, പിടിഎ, മദർ പിടിഎ, സ്‌കൂൾ മാനേജ്മെന്‍റ് കമ്മിറ്റി, മുൻ കായികതാരങ്ങൾ എന്നിവരുടെ നേതൃത്വത്തിലായിരുന്നു സ്വീകരണം.ചെറുപുഴ ഗ്രാമപഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. ബാലകൃഷ്‌ണൻ അനുമോദന സമ്മേളനം ഉദ്ഘാടനം ചെയ്തു. പിടിഎ പ്രസിഡന്‍റ് കെ.സി. ലക്ഷമണൻ അധ്യക്ഷത വഹിച്ചു. സ്‌കൂൾ പ്രിൻസിപ്പൽ കെ.വി. സജി, എസ്എംസി ചെയർമാൻ കെ.എസ്. ദിലീഷ് കുമാർ, പിടിഎ വൈസ് പ്രസിഡന്‍റ് അലിയാർ കുട്ടി, മദർ പിടിഎ പ്രസിഡന്‍റ് ലീന അഭിലാഷ്, ഹെഡ്മാസ്റ്റർ കെ.വി. രാജൻ, കായികാധ്യാപകൻ സുനീഷ് ജോർജ്, സ്റ്റാഫ് സെക്രട്ടറി ജോമേഷ് ജോൺ എന്നിവർ പ്രസംഗിച്ചു.

തളിപ്പറമ്പ് നോർത്ത് ഉപജില്ല സാമൂഹ്യ-ശാസ്ത്രമേള സമാപിച്ചു

തളിപ്പറമ്പ്: തളിപ്പറമ്പ് നോർത്ത് ഉപജില്ല സാമൂഹ്യശാസ്ത്രമേള ജിഎച്ച്എസ് കുറ്റ്യേരിയിൽ നടന്നു. എൽപി വിഭാഗത്തിൽ സിഎച്ച്എം എൽപിഎസ്, നടുവിൽ എൽപിഎസ് എന്നിവർ ചാമ്പ്യൻമാരായി. ഇരിങ്ങൽ യുപിഎസ്, ജിഎച്ച്എസ് കുറ്റ്യേരി എന്നിവർ യഥാക്രമം രണ്ടും മൂന്നും സ്ഥാനം നേടി. യുപി വിഭാഗത്തിൽ പട്ടുവം യു പിയാണ് ചാന്പ്യൻ. കരിപ്പാൽ എസ് വിയുപി രണ്ടാം സ്ഥാനം നേടി. പുലിക്കുരുമ്പ എസ്ജെയുപി , നടുവിൽ എച്ച്എസ്എസ് എന്നിവർ മൂന്നാം സ്ഥാനം പങ്കിട്ടു. ഹൈസ്കൂൾ വിഭാഗത്തിൽ ടാഗോർ വിദ്യാനികേതൻ ചാമ്പ്യൻമാരായി. സീതി സാഹിബ് എച്ച്എസ് എസ്, മൂത്തേടത്ത് എച്ച്എസ്എസ് എന്നിവർ രണ്ടും മൂന്നും സ്ഥാനം നേടി. ഹയർ സെക്കൻൻഡറി വിഭാഗത്തിൽ ടാഗോർ വിദ്യാനികേതനാണ് ചാന്പ്യൻമാർ. സർസയ്യിദ് ഹയർ സെക്കൻഡറി, സെന്‍റ് ജോസഫ്സ് എച്ച്എസ്എസ് വായാട്ടുപറന്പ് എന്നിവർ രണ്ടും മൂന്നും സ്ഥാനങ്ങൾക്കർഹരായി. വിവിധ മത്സരയിനങ്ങളിലായി അഞ്ഞൂറോളം കുട്ടികൾ മത്സരത്തിൽ പങ്കെടുത്തു. സമാപന സമ്മേളനത്തിന്‍റെ ഉദ്ഘാടനവും സമ്മാനദാനവും പരിയാരം പഞ്ചായത്ത് പ്രസിഡന്‍റ് ടി. ഷീബ നിർവഹിച്ചു. സ്റ്റാൻഡിംഗ് കമ്മിറ്റി ചെയർപേഴ്സൺ ടി.പി രജനി അധ്യക്ഷത വഹിച്ചു. എഇഒ കെ മനോജ്, മുഖ്യാധ്യാപകൻ കെ.വി ഷാജി, സോഷ്യൽ സയൻസ് ക്ലബ് സെക്രട്ടറി കെ.ഫാറൂഖ്, എം. ചന്ദ്രൻ, പ്രഭാകരൻ, എൻ.വി.ശിവദാസൻ, ടി.സ്വപ്ന, അരുണ, പി.സോന, എൻ.പി.പ്രീജ എന്നിവർ പ്രസംഗിച്ചു.

തദ്ദേശ തെരഞ്ഞെടുപ്പ്: കോർപറേഷൻ, ജില്ലാ പഞ്ചായത്ത് സംവരണ വാർഡുകൾ നറുക്കെടുത്തു

കണ്ണൂർ: തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി കണ്ണൂർ മുനിസിപ്പൽ കോർപറേഷന്‍റെ സംവരണ വാർഡുകളുടെ നറുക്കെടുപ്പ് നടത്തി. കോഴിക്കോട് ടൗൺഹാളിലായിരുന്നു നറുക്കെടുപ്പ്. 56 വാർഡുകളുള്ള കോർപറേഷനിൽ 26 എണ്ണം വനിതാ സംവരണമാണ്. പട്ടികജാതി വനിതാ സംവരണമായി രണ്ട് വാർഡുകളും പട്ടികജാതി സംവരണമായി ഒരു വാർഡുമാണ് നറുക്കെടുപ്പിലൂടെ നിശ്ചയിച്ചത്. വനിത സംവരണ വാർഡുകൾ, വാർഡ് നന്പർ, പേര് എന്നീ ക്രമത്തിൽ. ഒന്ന് പള്ളിയാംമൂല, നാല് പളളിക്കുന്ന്, എട്ട് കൊറ്റാളി, ഒന്പത് അത്താഴക്കുന്ന്, 17 ചേലോറ, 18 മാച്ചേരി, 21 എളയാവൂർ നോർത്ത്, 23 മുണ്ടയാട്, 27 മേലെചൊവ്വ, 28 താഴെചൊവ്വ, 29 കീഴ്ത്തളളി, 31 ആറ്റടപ്പ, 32 ചാല, 35 ആലിങ്കീൽ, 36 കിഴുന്ന, 37 തോട്ടട, 39 കാഞ്ഞിര, 41 പടന്ന, 43 നീർച്ചാൽ, 44 അറയ്ക്കൽ, 47 സൗത്ത് ബസാർ, 48 ടെമ്പിൾ, 49 തായത്തെരു, 52 കാനത്തൂർ, 53 പയ്യാമ്പലം, 55 ചാലാട്. പട്ടികജാതി വനിതാ സംവരണം: 16 വലിയന്നൂർ, 22 എളയാവൂർ സൗത്ത്. പട്ടികജാതി സംവരണം: 11 തുളിച്ചേരി. ജില്ലാ പഞ്ചായത്ത് വനിതാ സംവരണ വാർഡുകൾ: ഒന്ന് കരിവെള്ളൂർ, രണ്ട് മാതമംഗലം, അഞ്ച് പടിയൂർ, ആറ് പേരാവൂർ, എട്ട് കോളയാട്, പത്ത് പാട്യം, 11 പന്ന്യന്നൂർ, 12 കതിരൂർ, 13 പിണറായി, 15 അഞ്ചരക്കണ്ടി, 16 കൂടാളി, 22 ചെറുകുന്ന്, 25 കുഞ്ഞിമംഗലം. പട്ടികജാതി സംവരണം: 20 കല്യാശേരി. പട്ടികവർഗ സംവരണം: 17 മയ്യിൽ. കളക്ടറേറ്റ് കോൺഫറൻസ് ഹാളിൽ നടന്ന നറുക്കെടുപ്പിൽ തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടർ ടി.ജെ അരുൺ, ഇലക്ഷൻ ഡെപ്യൂട്ടി കളക്ടർ കെ.കെ ബിനി, തദ്ദേശസ്ഥാപന വകുപ്പ് ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

ഇരിട്ടി നഗരസഭ വികസന സദസ് നടത്തി

ഇരിട്ടി: ഇരിട്ടി നഗരസഭ വികസന സദസ് സ്പീക്കർ എ.എൻ. ഷംസീർ ഉദ്ഘാടനം ചെയ്തു. നാടിന്‍റെ വികസനത്തിൽ പൊതുജനങ്ങളുടെ പങ്കാളിത്തം ഉറപ്പാക്കുകയാണ് വികസന സദസിലൂടെ ലക്ഷ്യമാക്കുന്നതെന്ന് സ്പീക്കർ പറഞ്ഞു. മുനിസിപ്പൽ ചെയർപേഴ്‌സൺ കെ ശ്രീലത അധ്യക്ഷത വഹിച്ചു. റിസോഴ്‌സ് പേഴ്‌സൺ ടി.വി സുഭാഷ് സംസ്ഥാനതല വികസന റിപ്പോർട്ടും നഗരസഭ സെക്രട്ടറി കെ. അൻഷിദ് നഗരസഭാ വികസന റിപ്പോർട്ടും അവതരിപ്പിച്ചു. നഗരസഭയുടെ പ്രോഗ്രസ് റിപ്പോർട്ട്, ജനകീയ വികസന പത്രിക എന്നിവയുടെ പ്രകാശനവും നഗരസഭ നടപ്പാക്കിയ ഇന്‍റലിജന്ഡസ് പ്രോപ്പർട്ടി മാനേജ്‌മെന്‍റ് സിസ്റ്റത്തിന്‍റെ ലോഞ്ചിംഗും സ്പീക്കർ നിർവഹിച്ചു. ഹരിതകർമ സേന, സംസ്ഥാന അവാർഡ് നേടിയ കൂൺകൃഷി സംരംഭകൻ രാഹുൽ ഗോവിന്ദൻ എന്നിവരെ ആദരിച്ചു. വികസന സദസിന്‍റെ ഭാഗമായി നടന്ന ചർച്ചയിൽ നഗരസഭാ റോഡിന്‍റെ വശങ്ങളിൽ ഓട നിർമിക്കുക, നഗരസഭയുടെ തനതുവരുമാനം വർധിപ്പിക്കാനുള്ള പദ്ധതികൾ ആവിഷ്‌കരിക്കുക, ബഡ്‌സ് സ്‌കൂൾ സ്ഥാപിക്കുക, നഗരസഭയുടെ വിവിധ പദ്ധതികൾക്കായി സ്വന്തം സ്ഥലം കണ്ടെത്തുക തുടങ്ങിയ നിർദേശങ്ങൾ ഉയർന്നു. മുനിസിപ്പൽ വൈസ് ചെയർപേഴ്സൺ പി.പി ഉസ്മാൻ, സ്റ്റാൻഡിംഗ് കമ്മിറ്റി ചെയർപേഴ്സൺമാരായ കെ.സോയ, ടി.കെ.ഫസീല, കെ.സുരേഷ്, കൗൺസിലർ യു.കെ ഫാത്തിമ, ആസൂത്രണ സമിതി ഉപാധ്യക്ഷൻ കെ.ആർ അശോകൻ, സൂപ്രണ്ട് പി.വി. നിഷ എന്നിവർ പ്രസംഗിച്ചു.‌

മലബാർ കാൻസർ സെന്‍റർ ആരോഗ്യ ഭൂപടത്തിൽ കൈമുദ്ര പതിപ്പിച്ചു: മന്ത്രി

തലശേരി: രാജ്യത്തിന്‍റെ ആരോഗ്യഭൂപടത്തിൽ കൈമുദ്ര പതിപ്പിച്ച സ്ഥാപനമാണ് മലബാർ കാൻസർ സെന്‍ററെന്ന് മന്ത്രി വീണാ ജോർജ്. എരഞ്ഞോളി ഗ്രാമപഞ്ചായത്ത് കുടുംബാരോഗ്യ കേന്ദ്രത്തിന്‍റെ കെട്ടിടോദ്ഘാടനം നിർവഹിച്ചു പ്രസംഗിക്കുകയായിരുന്നു അവർ. രാജ്യത്തുതന്നെ അപൂർവമായിട്ടാണ് സർക്കാർ സംവിധാനത്തിൽ കാർ ടി സെൽ ചികിത്സ ലഭ്യമാക്കുന്നത്. കാർ ടി സെൽ തെറാപ്പിയിൽ അഭിമാനകരമായ നേട്ടം കൈവരിച്ച് രാജ്യത്തെ ഏറ്റവും മികച്ച കാൻസർ ചികിത്സാകേന്ദ്രമായി മലബാർ കാൻസർ സെന്‍റർ മാറിയിരിക്കുകയാണെന്നും മന്ത്രി പറഞ്ഞു. സ്പീക്കർ എ.എൻ ഷംസീർ അധ്യക്ഷത വഹിച്ചു.

പെൻഷൻ പരിഷകരണ നടപടികൾ ഉടൻ ആരംഭിക്കണം: കെഎസ്എസ്പിഎ

പേരാവൂർ: 2024 ജൂലൈ ഒന്നിന് പ്രാബല്യത്തിൽ വരേണ്ട ശമ്പള പെൻഷൻ പരിഷ്കരണത്തിനുള്ള നടപടികൾ ഉടൻ ആരംഭിക്കുക, ഓപ്ഷൻ സൗകര്യത്തോടെ മെഡിസെപ്പ് പദ്ധതി കുറ്റമറ്റ രീതിയിൽ നടപ്പിലാക്കുക, ക്ഷാമാശ്വാസം മുൻകാല പ്രാബല്യത്തോടെ നടപ്പിലാക്കുക തുടങ്ങിയ ആവശ്യങ്ങൾ കെഎസ്എസ്പിഎ പേരാവൂർ മണ്ഡലം സമ്മേളനം ആവശ്യപ്പെട്ടു. തൊണ്ടിയിൽ സീന ഓഡിറ്റോ റിയത്തിൽ നടന്ന മണ്ഡലം സമ്മേളനം കെപിസിസി ജനറൽ സെക്രട്ടറി ചന്ദ്രൻ തില്ലങ്കേരി ഉദ്ഘാടനം ചെയ്തു. പേരാവൂർ മണ്ഡലം പ്രഡിഡന്‍റ് ടി.ജെ. എൽസമ്മ അധ്യക്ഷത വഹിച്ചു. മിസ് കേരള സുവർണ ബെന്നിക്കുള്ള ഉപഹാരം ചന്ദ്രൻ തില്ലങ്കേരി നല്കി. ഉന്നത വിജയികൾക്ക് ഉപഹാര വിതരണം നടത്തി. സംസ്ഥാന വൈസ് പ്രസിഡന്‍റ് പി.സി. വർഗീസ് മുഖ്യപ്രഭാഷണം നടത്തി. എം.ജി. ജോസഫ്. പി. സുഖദേവൻ, മോഹനൻ, പി.എം. മോഹനൻ, എൻ. നാരായണൻ, സി.വി. കുഞ്ഞ നന്ദൻ, നാരായണൻ കോയിറ്റി, പി.വി. അന്നമ്മ, വി.ടി. അന്നമ്മ, ഒ. മാത്യു എന്നിവർ പ്രസംഗിച്ചു. പുതിയ ഭാരവാഹികളായി പി.എൻ. മോഹനൻ -പ്രസിഡന്‍റ്, വി.ഡി. ജോസഫ്, വി.ടി. അന്നമ്മ -വൈസ് പ്രസിഡന്‍റുമാർ, എ.വി. ചിത്ര ലേഖ, വി.അനിൽ കുമാർ, പി.ഒ. മറിയം - ജോയിന്‍റ് സെക്രട്ടറിമാർ, പി.കെ. സന്തോഷ്‌ -ട്രഷറർ എന്നിവരേയും 56 അംഗ നിയോജക മണ്ഡലം മെംബർമാരേയും സമ്മേളനം തെരഞ്ഞെടുത്തു.

പാറക്കണ്ടിയിൽ മധ്യവയസ്ക മരിച്ച നിലയിൽ

കണ്ണൂർ: കണ്ണൂർ പാറക്കണ്ടിയിൽ സ്ത്രീയെ ദുരൂഹസാഹചര്യത്തിൽ മരിച്ച നിലയിൽ കണ്ടെത്തി. തോട്ടട സമാജ് വാദി കോളനിയിലെ ശെൽവിയാണ് (50) മരിച്ചത്. ബീവറേജ് ഔട്ട്‌ലെറ്റിന് സമീപത്തെ കടവരാന്തയിലാണ് ഇന്നലെ രാവിലെ മൃതദേഹം കണ്ടെത്തിയത്. സംഭവം കണ്ടവർ സ്ത്രീ ബോധമില്ലാതെ കിടക്കുന്നതായുള്ള വിവരം പോലീസിൽ അറിയിക്കുകയായിരുന്നു. 108 ആംബുലൻസ് സ്ഥലത്തെത്തിയെങ്കിലും തിരിച്ചുപോവുകയായിരുന്നു. സംഭവമറിഞ്ഞ് ബന്ധുക്കൾ ഉൾപ്പെടെയുള്ളവർ സ്ഥലത്തെത്തി. ടൗൺ എസ്ഐ വി.വി. ദീപ്തിയുടെ നേതൃത്വത്തിൽ പോലീസ് സംഘം സ്ഥലത്തെത്തി പരിശോധന നടത്തി. സമീപത്തെ സിസി ടിവി ദൃശ്യങ്ങൾ പോലീസ് പരിശോധിച്ചുവരികയാണ്. സനോജ്, സജിത എന്നിവരാണ് മരിച്ച ശെൽവിയുടെ മക്കൾ.

കുടം എടുക്കുന്നതിനിടയിൽ കിണറ്റിൽ വീണുമരിച്ചു

പയ്യന്നൂർ: കിണറ്റിൽ വീണ കുടം എടുക്കുന്നതിനിടെ മധ്യവയസ്കൻ കിണറ്റിൽ വീണു മരിച്ചു. രാമന്തളി ക്ഷീര വ്യവസായ സഹകരണ സംഘത്തിലെ പാൽ വിതരണക്കാരൻ വില്ലേജ് ഓഫീസിന് സമീപത്തെ കൊയിത്തട്ട മീത്തലെ വീട്ടിൽ രവീന്ദ്രനാണ് (64) മരിച്ചത്. പയ്യന്നൂർ പോലീസ് ഇൻക്വസ്റ്റ് നടത്തിയ മൃതദേഹം കണ്ണൂർ ഗവ. മെഡിക്കൽ കോളജിൽ പോസ്റ്റ്മോർട്ടം നടത്തി. ഇന്നലെ രാവിലെ പത്തേമുക്കാലോടെയാണ് സംഭവം. അയൽവാസിയായ തമ്പാന്‍റെ വീട്ടിലെ 17 കോൽ ആഴമുള്ള കിണറിൽ വീണ കുടം എടുക്കാൻ ഇറങ്ങുമ്പോൾ അബദ്ധത്തിൽ കിണറ്റിൽ വീഴുകയായിരുന്നു. പയ്യന്നൂരിൽ നിന്നെത്തിയ ഫയർ സ്റ്റേഷൻ ഓഫീസർ സി.പി. രാജേഷിന്‍റെ നേതൃത്വത്തിലുള്ള ഫയർഫോഴ്സ് സംഘം വെള്ളത്തിനടിയിൽനിന്നും മുങ്ങിയെടുത്ത ഇയാളെ കരയ്ക്ക് എത്തിക്കുമ്പോഴേക്കും മരിച്ചിരുന്നു. ഭാര്യ: കെ.വി. ജാനകി. മക്കൾ: സത്യജിത്ത്, ദീപിക (ഇരുവരും യുഎഇ). മരുമകൻ: ബിജു (യുഎഇ). സഹോദരങ്ങൾ: ലക്ഷ്മണൻ, ബാലാമണി, രമേശൻ. സംസ്കാരം ഇന്നു 10 ന് രാമന്തളി സമുദായ ശ്മശാനത്തിൽ നടക്കും.

തീ കൊളുത്തി വയോധിക മരിച്ചു

പയ്യന്നൂർ: സ്വയം തീ കൊളുത്തിയ വയോധിക മരിച്ചു. മാത്തിൽ വടവന്തൂരിലെ വേലിയാട്ട് തമ്പായി (79) ആണ് മരിച്ചത്. ഇന്നലെ രാവിലെ എട്ടരയോടെയായിരുന്നു സംഭവം. വീടിനകത്തുനിന്ന് തീ കൊളുത്തിയതിലൂടെ പൊള്ളലേറ്റ നിലയിൽ കണ്ടെത്തിയ ഇവരെ ബന്ധുക്കൾ കണ്ണൂർ ഗവ. മെഡിക്കൽ കോളജിലെത്തിച്ചപ്പോഴേക്കും മരിച്ചിരുന്നു. ഭർത്താവ്: പരേതനായ മാണിയാടൻ കണ്ണൻ. മക്കൾ: കമലാക്ഷൻ, പരേതനായ സുരേഷ്, ശൈലജ. മരുമക്കൾ: ചിത്ര, ശ്യാമള, പരേതനായ സുരേന്ദ്രൻ.

കോട്ടൂർ സിഎസ്ടി ആശ്രമ കൺവൻഷൻ സമാപിച്ചു

ശ്രീകണ്ഠപുരം: വിശുദ്ധ കൊച്ചുത്രേസ്യയുടെ വിശുദ്ധ പദവിയുടെ നൂറാം വാർഷികത്തോടനുബന്ധിച്ച് ഫാ. മാത്യു വയലാമണ്ണിൽ സിഎസ്ടി നയിച്ച കോട്ടൂർ സിഎസ്ടി ആശ്രമ കൺവൻഷൻ സമാപിച്ചു. ദൈവത്തിനു വേണ്ടി സമയം ചെലവഴിക്കാത്തവർ ജീവിതം നഷ്ടപ്പെടുത്തുന്നു എന്ന വിശുദ്ധ കൊച്ചുത്രേസ്യായുടെ അദ്ധ്യാത്മിക പ്രബോധനത്തിലൂന്നി തലശേരി ആർച്ച്ബിഷപ് മാർ ജോസഫ് പാംപ്ലാനി അനുഗ്രഹ പ്രഭാഷണം നടത്തി. മലബാറിന്‍റെ മലയോര മേഖലയിൽ നിന്നും അനേകായിരങ്ങൾ കൺവൻഷനിൽ പങ്കെടുത്തു. ചെറുപുഷ്പ സഭ സെന്‍റ് തോമസ് പ്രൊവിൻസ് അസിസ്റ്റന്‍റ് പ്രൊവിൻഷൽ ഫാ. ജിനോ പെരിഞ്ചേരി, കൗൺസിലർ ഫാ. ജോഷി വാളിപ്ലാക്കൽ, കോട്ടൂർ സെന്‍റ് തോമസ് ആശ്രമ സുപ്പീരിയർ ഫാ. ജോൺ കൊച്ചുപുരയ്ക്കൽ, ബൈബിൾ കൺവൻഷൻ കോ-ഓർഡിനേറ്റർ സെക്രട്ടറി ഫാ. ജോഫിൻ കുരുവമാക്കൽ എന്നിവർ ബൈബിൾ കൺവൻഷന് നേതൃത്വം നൽകി.

കാർത്തികപുരം പച്ചത്തുരുത്തിന് അനുമോദനപത്രം ലഭിച്ചു

കാർത്തികപുരം: ഉദയഗിരി പഞ്ചായത്തിലെ കാർത്തികപുരം പച്ചത്തുരുത്തിന് അനുമോദനപത്രം ലഭിച്ചു. എം.വി. ഗോവിന്ദൻ എംഎൽഎയിൽ നിന്നും അനുമോദന പത്രം പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ, വൈസ് പ്രസിഡന്‍റ് ബിന്ദു ഷാജു എന്നിവർ ഏറ്റുവാങ്ങി. തളിപ്പറമ്പ് ബ്ലോക്ക് പഞ്ചായത്ത് പ്രസിഡന്‍റ് സി.എം. കൃഷ്ണൻ അധ്യക്ഷത വഹിച്ചു. നവകേരള കർമപദ്ധതി സംസ്ഥാന അസിസ്റ്റന്‍റ് കോ-ഓർഡിനേറ്റർ ടി.പി. സുധാകരൻ, പഞ്ചായത്ത് പ്രസിഡ‌ന്‍റുമാർ, വൈസ് പ്രസിഡന്‍റുമാർ, മെംബർമാർ, സെക്രട്ടറിമാർ തുടങ്ങിയവർ പങ്കെടുത്തു. ഹരിത കേരളം മിഷൻ ആവിഷ്കരിച്ച പച്ചത്തുരുത്ത് പദ്ധതിയിൽ 2025 ലെ സംസ്ഥാന പുരസ്‌കാര നിർണയത്തിൽ പങ്കാളിയായി പച്ചത്തുരുത്ത് നിർമിക്കുകയും പരിസ്ഥിതി പുനഃസ്ഥാപന പ്രവർത്തനങ്ങൾ മാതൃകാപരമായി നടത്തുകയും ചെയ്തതിനാണ് അനുമോദന പത്രം ലഭിച്ചത്.

ചപ്പാരപ്പടവ് -കുപ്പം പുഴ സംരക്ഷണം രണ്ടാം ഘട്ടം ഉടൻ

ചപ്പാരപ്പടവ്: മങ്കര പബ്ലിക് ലൈബ്രറിയിൽ ചേർന്ന പരിസ്ഥിതി പ്രവർത്തകരുടെ കൂട്ടായ്മ ചപ്പാര പ്പടവ്-കുപ്പം പുഴയുടെ സംരക്ഷണത്തിന് രണ്ടാംഘട്ട പ്രവർത്തനങ്ങൾക്ക് തുടക്കം കുറിക്കാൻ തീരുമാനിച്ചു.1999 ആരംഭിച്ച പുഴ സംരക്ഷണ പ്രവർത്തനങ്ങൾ 26 വർഷം പൂർത്തിയാകുന്ന സന്ദർഭത്തിലാണ് പുതിയ തീരുമാനം. രണ്ടാംഘട്ട പ്രവർത്തനം പഞ്ചായത്ത് തലത്തിൽ നടപ്പിലാക്കാൻ വേണ്ട കരട് നിർദേശങ്ങൾ തയാറാ ക്കി ഡിസംബറിൽ ചുമതല ഏല്ക്കുന്ന പഞ്ചായത്ത് ഭരണസമിതിക്ക് നല്കാനാണ് തീരുമാനം. പുതിയ ഭരണസമിതി നിലവിൽ വന്നാൽ ഉടൻതന്നെ പഞ്ചായത്ത് തല പരിസ്ഥിതി കൂട്ടായ്മ സംഘടിപ്പിക്കാ നും യോഗം നിർദേശിച്ചു. പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ ചെയർപേഴ്സണായും ലൈബ്രറി പ്രസിഡന്‍റ് ടി.ജെ. ആഗസ്തി കൺവീനറുമായി 21 അംഗ കമ്മിറ്റിയെ യോഗം കരട് നിർദേശങ്ങൾ സമർപ്പിക്കാൻ തെരഞ്ഞെടുത്തു. പരിസ്ഥിതി കൂട്ടായ്മ ഗ്രാമപഞ്ചായത്ത് പ്രസിഡന്‍റ് സുനിജ ബാലകൃഷ്ണൻ ഉദ്ഘാടനം ചെയ്തു. വാർഡ് മെംബർ പി.പി. വിനീത അധ്യക്ഷത വഹിച്ചു. ഡോ.പി.പി. ബാലൻ മുഖ്യപ്രഭാഷണം നടത്തി. കായക്കൂൽ മമ്മു, ടി. പ്രഭാകരൻ, സി.കെ. പുരുഷോത്തമൻ, ഡി.പി. ജോസ്, ലൂക്കോസ് പറത്താനം എന്നിവർ പ്രസംഗിച്ചു.

മലയോര മേഖലകളിൽ എൽഡിഎഫ്‌ കൂടുതൽ കരുത്താർജിക്കും: കേരള കോൺഗ്രസ്-എം

ചെമ്പേരി: തദ്ദേശ തെരഞ്ഞെടുപ്പോടെ മലയോര മേഖലയിൽ ഇടത് പക്ഷം കൂടുതൽ ശക്തി പ്രാപിക്കുമെന്ന് കേരള കോൺഗ്രസ്-എം. ഇതിനായി പാർട്ടി പ്രവർത്തകർ ശക്തമായി രംഗത്തിറങ്ങണമെന്നും കേരള കോൺഗ്രസ്-എം രാഷ്ട്രീയകാര്യ സമിതിയംഗം ജോസ് ചെമ്പേരി ആവശ്യപ്പെട്ടു. ചെമ്പേരി റോട്ടറി ഹാളിൽ ചേർന്ന കേരളാ കോൺഗ്രസ്-എം എരുവേശി മണ്ഡലം നേതൃയോഗത്തിൽ പ്രസംഗിക്കുകയായിരുന്നു അദ്ദേഹം. കേരളത്തിലെ മലയോര മേഖലകളിലെ പ്രധാന വിഷയങ്ങളായ വന്യമൃഗസംരക്ഷണ നിയമത്തിൽ കൊണ്ടുവന്ന ഭേദഗതി, ഭൂ പതിവ് ചട്ടങ്ങളിൽ വരുത്തിയ മാറ്റം, ഏക കിടപ്പാട സംരക്ഷണ നിയമം, റീസർവേ പ്രകാരം അധികഭൂമിയുള്ളത് ഉടമസ്ഥന് പതിച്ച് നൽകുന്നതിനുള്ള തീരുമാനം, തുടങ്ങിയവ വർഷങ്ങളായി നിലനിന്ന മലയോര ജനതയുടെ മുഖ്യആവശ്യങ്ങളായി പരിഗണിക്കാനും പരിഹരിക്കാനും തയാറായ സർക്കാർ തീരുമാനം ഏറെ പ്രതീക്ഷ നൽകുന്നതാണെന്ന് യോഗം വിലയിരുത്തി. ഇടതുപക്ഷത്തിനോടൊപ്പം നിന്ന് ജനകീയ വിഷയങ്ങൾ പരിഹരിക്കാനുള്ള കേരള കോൺഗ്രസ്-എം നേതൃത്വത്തിന്‍റെ പരിശ്രമങ്ങൾ മലയോര മേഖലയിൽ ഇടതുപക്ഷത്തെ കൂടുതൽ ശക്തിപ്പെടുത്തുവാൻ സഹായകരമാകുമെന്നും യോഗം ചൂണ്ടിക്കാട്ടി. ഏരുവേശി മണ്ഡലം പ്രസിഡന്‍റ് ടോമി ആനിക്കൂട്ടം അധ്യക്ഷത വഹിച്ചു. കണ്ണൂർ ജില്ലാ പ്രസിഡന്‍റ് ജോയി കൊന്നയ്ക്കൽ മുഖ്യപ്രഭാഷണം നടത്തി. ജില്ലാ സെക്രട്ടറിമാരായ സി.ജെ. ജോൺ, ബിനു ഇലവുങ്കൽ, നിയോജക മണ്ഡലം പ്രസിഡന്‍റ് ബിജു പുതുക്കള്ളിൽ, സിബി പന്തപ്പാട്ട്, രാജു ചെരിയൻകാല, ജോയി മുക്കുഴി, ഷോണി അറയ്ക്കൽ, ജോസ് കരിക്കാട്ടുകണ്ണിയിൽ, ജോസഫ് പൂതക്കാട്ടിൽ, സണ്ണി മുക്കുഴി, തുളസീധരൻ നായർ എന്നിവർ പ്രസംഗിച്ചു.

പച്ചത്തുരുത്തുകൾ ഒരുക്കൽ സാമൂഹിക മത്സരമാകണം: എം.വി. ഗോവിന്ദൻ

തളിപ്പറന്പ്: കേരളമെന്ന വലിയൊരു പച്ചത്തുരുത്തിനെ കാത്തു സൂക്ഷിക്കാനുള്ള മത്സരമാണ് പ്രദേശങ്ങളും ജില്ലകളും ചെറിയ ചെറിയ പച്ചത്തുരുത്തുകൾ ഒരുക്കി നടത്തേണ്ടതെന്നും അങ്ങിനെയൊരു മത്സരത്തിലൂടെയേ ദൈവത്തിന്‍റെ സ്വന്തം നാട് എന്ന ഖ്യാതി നിലനിർത്താൻ കഴിയൂ എന്നും എം.വി. ഗോവിന്ദൻ എംഎൽഎ. പച്ചത്തുരുത്ത് സംസ്ഥാനതല നോമിനേഷൻ നേടിയ തദ്ദേശ ഭരണ സ്ഥാപനങ്ങൾ, പച്ചത്തുരുത്തുകൾ ഒരുക്കാൻ കൂടെ നിന്ന വ്യക്തികൾ എന്നിവർക്ക് ഹരിത കേരളം മിഷൻ തളിപ്പറമ്പ് ബ്ലോക്ക് പഞ്ചായത്ത് ഹാളിൽ നൽകിയ ആദരവ് - അനുമോദന പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തളിപ്പറമ്പ് ബ്ലോക്ക് പഞ്ചായത്ത് പ്രസിഡന്‍റ് സി.എം. കൃഷ്ണൻ അധ്യക്ഷത വഹിച്ചു. സംസ്ഥാന തല പച്ചത്തുരുത്ത് പുരസ്കാര നോമിനേഷൻ ലഭിച്ച 37 പച്ചത്തുരുത്തുകൾക്ക് ചടങ്ങിൽ അനുമോദന പത്രം സമ്മാനിച്ചു. ഒരു തൈ നടാം - ഒരു കോടി തൈകൾ എന്ന കാന്പയിനിൽ ഏറ്റവും കുടുതൽ വൃക്ഷ തൈകൾ ശേഖരിച്ച് നട്ടുപിടിപ്പിച്ച കുടുംബശ്രീ സിഡിഎസുകൾക്കുള്ള പുരസ്കാരങ്ങൾമുൻ എംപി പി.കെ. ശ്രീമതി സമ്മാനിച്ചു. 32 കുടുംബശ്രീ സിഡിഎസുകൾക്കാണ് പുരസ്കാരം നൽകിയത്. 937357 വൃക്ഷ തൈകൾ നട്ട് സംസ്ഥാനത്ത് ഒന്നാം സ്ഥാനം നേടിയ ജില്ല ലക്ഷ്യം നേടിയതായുള്ള പ്രഖ്യാപനം നവകേരളം കർമ്മ പദ്ധതി രണ്ട് സംസ്ഥാന അസി. കോ-ഓർഡിനേറ്റർ ടി.പി. സുധാകരൻ നിർവഹിച്ചു. ഹരിത കേരള മിഷൻ ജില്ലാ കോ-ഓർഡിനേറ്റർ ഇ.കെ. സോമശേഖരൻ, കുടുംബശ്രീ ജില്ലാ മിഷൻ കോ-ഓർഡിനേറ്റർ എം.പി. ജയൻ, വി.സി. ബാലകൃഷ്ണൻ, സ്നേഹ, ബ്ലോക്ക് കോ-ഓർഡിനേറ്റർ വി. സഹദേവൻ എന്നിവർ പ്രസംഗിച്ചു.

ഇടിമിന്നലേറ്റ് വീടിന് കനത്തനാശം

പയ്യാവൂർ: മഴയില്ലാതിരുന്ന സമയത്തുണ്ടായ ശക്തമായ ഇടിമിന്നലേറ്റ് വീടിനും വൈദ്യുതോപകരണങ്ങൾക്കും കനത്ത നാശം. പയ്യാവൂർ ഇരൂടിലെ റിട്ട. അധ്യാപകൻ കാക്കനാട്ട് ജോണിന്‍റെ വീടിന് കഴിഞ്ഞ ശനിയാഴ്ച വൈകുന്നേരം നാലരയോടെയാണ് അപ്രതീക്ഷിതമായി ഇടിമിന്നലേറ്റത്. വീടിനുള്ളിൽ തനിച്ചായിരുന്ന ജോൺ പരിക്കൊന്നുമേൽക്കാതെ രക്ഷപ്പെട്ടു. വീടിന്‍റെ പുറത്തെ ഭിത്തിയിലെ വൈദ്യുതി മീറ്റർ ദൂരത്തേക്ക് തെറിച്ചുപോയി. മീറ്റർ ബോർഡ് കത്തിക്കരിഞ്ഞ് ഭിത്തിയിലെ പ്ലാസ്റ്ററിംഗടക്കം അടർന്നുവീണു. വീടിനുള്ളിലെ വയറിംഗിന് തീപിടിച്ച് സ്വിച്ച് ബോർഡുകൾ പൊട്ടിത്തെറിച്ചു. ഇടിമിന്നലിന്‍റെ ആഘാതത്തിൽ മുറ്റത്തെ ഇന്‍റർലോക്ക് കട്ടകളും ഇളകിത്തെറിച്ചു. സമീപ വീടുകളിലെ ടിവി, ഫാൻ തുടങ്ങിയവയ്ക്കും നാശമുണ്ടായിട്ടുണ്ട്.

പയറ്റ്ചാൽ വളവിൽ അപകടം ഒഴിവാക്കാൻ നടപടി വേണം

ചെമ്പേരി: ശ്രീകണ്ഠപുരം- ചേപ്പറമ്പ്-ചെമ്പേരി റോഡിലുള്ള പയറ്റ്ചാൽ ഇറക്കത്തിലെ വളവിൽ വാഹനങ്ങൾക്ക് നേരിടേണ്ടിവരുന്ന അപകടാവസ്ഥ ഒഴിവാക്കാൻ സത്വര നടപടി വേണമെന്ന് പ്രദേശവാസികൾ ആവശ്യപ്പെടുന്നു. ഇവിടെ നിരവധി അപകടങ്ങളാണ് ഇതിനകം സംഭവിച്ചിട്ടുള്ളത്. അടുത്ത കാലത്തായി കണ്ടെയ്നർ ലോറിയടക്കമുള്ള വലിയ പാഴ്സൽ വാഹനങ്ങൾ അപകടത്തിൽപ്പെടുന്നത് പതിവായിട്ടുണ്ട്. മലയോര മേഖലയിൽ പ്രവർത്തിക്കുന്ന മൊത്തവ്യാപാര ഗോഡൗണുകളിലേക്ക് സാധനങ്ങളുമായി വരുന്ന അന്യസംസ്ഥാന വാഹനങ്ങളാണ് കൂടുതലായും ഇവിടെ അപകടത്തിൽപ്പെടുന്നത്. കുത്തനെ ഇറക്കവും വളവുമുള്ള ഈ റോഡിൽ മുൻപരിചയമില്ലാതെ എത്തുന്നവർ അപകടത്തിനിരയാകാൻ സാധ്യതയേറെയാണ്. ഇവിടെ റോഡരികിൽ താഴ്ചയുള്ളയിടങ്ങളിൽ സംരക്ഷണ വേലികളും വാഹന ഡ്രൈവർമാരുടെ ശ്രദ്ധയാകർഷിക്കുന്ന രീതിയിലുള്ള കർശന സുരക്ഷാ മുന്നറിയിപ്പ് ബോർഡുകളും സ്ഥാപിച്ചാൽ അപകടങ്ങൾ നിയന്ത്രിക്കാൻ സാധിക്കുമെന്ന് നാട്ടുകാർ പറയുന്നു.

കോടതികളിലെ ഒഴിഞ്ഞുകിടക്കുന്ന തസ്തികകളിൽ നിയമനം നടത്തണം: ജുഡീഷൽ സ്റ്റാഫ്‌ ഓർഗനൈസേഷൻ

തലശേരി: കോടതികളിലെ താൽകാലിക നിയമനങ്ങൾ നിർത്തലാക്കി ഒഴിഞ്ഞുകിടക്കുന്ന തസ്തികകളിൽ നിയമനം നടത്തണമെന്ന് കേരള സിവിൽ ജുഡീഷൽ സ്റ്റാഫ്‌ ഓർഗനൈസേഷൻ (കെസിജെഎസ്ഒ) ജില്ലാ സമ്മേളനം ആവശ്യപ്പെട്ടു. കോടതികൾ കടലാസ് രഹിത സംവിധാനത്തിലേക്ക് മാറുന്നതിന്‍റെ ഭാഗമായുള്ള അടിസ്ഥാന സൗകര്യങ്ങൾ പൂർണ രൂപത്തിലേക്കാക്കുക, അടിസ്ഥാന സൗകര്യങ്ങൾ വർധിപ്പിക്കുക, ഒ ആൻഡ് എം റിപ്പോർട്ട്‌ പ്രകാരം പുതിയ തസ്തികകൾ അനുവദിക്കുക, അഡ്വാൻസ് ഇൻക്രിമെന്‍റിനെതിരേ സർക്കാർ ഹൈകോടതിയിൽ നൽകിയ അപ്പീൽ പിൻവലിക്കുക, വനിതാ ജീവനക്കാരുടെ പ്രശ്നങ്ങൾ പരിഹരിക്കുക തുടങ്ങിയ ആവശ്യങ്ങളും സമ്മേളനം ഉന്നയിച്ചു. തലശേരി ജില്ലാ കോടതി കോംപ്ലക്സിൽ അഡീഷനൽ ജില്ലാ ജഡ്ജി ഫിലിപ്പ് തോമസ് ഉദ്‌ഘടനം ചെയ്തു. അഡീഷനൽ ഡിസ്ട്രിക്ട് ജഡ്ജി ടിറ്റി ജോർജ് മുഖ്യാതിഥിയായി. ജില്ലാ പ്രസിഡന്‍റ് പി.പി. മനോഹരൻ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് സണ്ണി ജോസഫ് മുഖ്യപ്രഭാഷണം നടത്തി. കെ. വിശ്വൻ, കെ.എം. ബാലകൃഷ്ണൻ, ജില്ലാ കോടതി ശിരസ്തദാർ വി. മനോജ്‌ കുമാർ, രജിത്കുമാർ, ഷിനോബ് കുമാർ, വി. പ്രജിത്ത്, ഉദയകുമാർ തുടങ്ങിയവർ പ്രസംഗിച്ചു. ജില്ലാ സെക്രട്ടറി കെ.വി. കമറുദ്ദീൻ സ്വാഗതവും ജില്ല ട്രഷറർ എം. സന്തോഷ്‌ കുമാർ നന്ദിയും പറഞ്ഞു. ഉന്നത വിജയം നേടിയ ജീവനക്കാരുടെ മക്കൾക്കുള്ള എക്സലൻസ് അവാർഡ് വിതരണം ചെയ്തു. ദേശീയ സിവിൽ കായിക മേളയിൽ പങ്കെടുത്ത ജീവനക്കാരെയും വിരമിച്ച ജീവനക്കാരെയും ആദരിച്ചു. ഭാരവാഹികളായി പി. ഷിനോബ് കുമാർ -പ്രസിഡന്‍റ്, കെ.വി. കമറുദ്ദീൻ -സെക്രട്ടറി, എം. സന്തോഷ്‌ കുമാർ -ട്രഷറർ എന്നിവരെ തെരഞ്ഞെടുത്തു.

പൂർവ വിദ്യാർഥി സംഗമം നടത്തി

ഇരിട്ടി: എടത്തൊട്ടി ഡി പോൾ കോളജ് 1983 -85 കാലഘട്ടത്തിലെ പ്രീഡിഗ്രി മൂന്നാം ബാച്ച് പൂർവ വിദ്യാർഥി സംഗമം കായികതാരം കെ.എം. ഗ്രീഷ്മ ഉദ്ഘാടനം ചെയ്തു. വിദേശത്തു നിന്നും സ്വദേശത്തു നിന്നുമായി എഴുപതോളം വിദ്യാർഥികൾ സംഗമത്തിൽ പങ്കെടുത്തു. പൂർവ വിദ്യാർഥി ജോൺസൺ അധ്യക്ഷത വഹിച്ചു.1981 കാലഘട്ടത്തിൽ ഡിപോൾ കോളേജ് ആരംഭിക്കുകയും പിന്നീട് അമേരിക്കയിലും ഓസ്‌സ്ട്രേലിയയിലും ജോലി നോക്കിയിരുന്ന അന്നത്തെ പ്രിൻസിപ്പൽ ഡോ. ഫാ. സെബാസ്റ്റ്യൻ മാപ്പിളപ്പറമ്പിൽ, മലയാളം അധ്യാപിക ഡോ. സിസ്റ്റർ ആൻസി, ചരിത്ര അധ്യാപിക ശൈലജ, കൊമേഴ്‌സ് അധ്യപകൻ പി.ജെ. ജോസഫ്, വിനോദൻ, സെലസ്റ്റിൻ ജോൺ, സോമസുന്ദരം തുടങ്ങിയവർ പ്രസംഗിച്ചു. ഗുരുനാഥന്മാരെ പൊന്നാടയണിയിച്ച് ആദരിച്ചു. പ്രിൻസിപ്പലായ റവ.ഡോ പീറ്റർ ഊരോത്തിന് കോളജിനുള്ള ഉപഹാരം കൈമാറി.

കാൻസർ പരിശോധന ക്യാന്പും ബോധവത്കരണവും നടത്തി

കണ്ണൂർ: ലോക സ്തനാർബുദ മാസാചരണത്തിന്‍റെ ഭാഗമായി കണ്ണൂർ മലബാർ കാൻസർ കെയർ സൊസൈറ്റി നടത്തുന്ന ഒരു മാസം നീണ്ടുനിൽക്കുന്ന തീവ്ര സ്തനാർബുദ ബോധവത്കരണ പരിപാടിയുടെ ഭാഗമായി അലവിൽ ലയൺ ക്ലബ്ബിന്‍റെ സഹകരണത്തോടെ കാൻസർ പരിശോധന ക്യാമ്പും ബോധവത്കരണ ക്ലാസും നടത്തി. എംസിസിഎസ് മാനേജിംഗ് കമ്മിറ്റി അംഗം സിദ്ധാർഥർ വണ്ണാരത്ത് ഉദ്ഘാടനം ചെയ്തു. അലവിൽ ലയൺസ് ക്ലബ് പ്രസിഡന്‍റ് എം.കെ. സുരേഷ്ബാബു അധ്യക്ഷത വഹിച്ചു. ഡോ. ഹർഷ ഗംഗാധരൻ, ഡോ. നീലാഞ്ജന ആർ. നാഥ് എന്നിവർ ക്യാന്പിന് നേതൃത്വം നൽകി.സോൺ ചെയർപേഴ്സൺ നിത്യ റിച്ചു വിഷയാവതരണം നടത്തി. എസ്ബിഐ റിട്ട. ഓഫീസേഴ്സ് അസോസിയേഷന്‍ പ്രസിഡന്‍റ് കെ. ചന്ദ്രഭാനു, സെക്രട്ടറി കെ. മുരളീധരൻ, എ.വി. സുരേഷ് ബാബു കെ. വിശ്വനാഥൻ, ലയൺസ് ക്ലബ്ബ് സെക്രട്ടറി രാജലക്ഷ്മി എന്നിവർ പ്രസംഗിച്ചു. ഇന്ന് അത്താഴക്കുന്ന് അംബേദ്കർ സാംസ്കാരിക നിലയത്തിന്‍റെ സഹകരണത്തോടെ ബോധവത്കരണ ക്ലാസ് നടത്തും. ഉച്ച കഴിഞ്ഞ് 2.30 മുതൽ 3.30 വരെ ആകാശവാണി കണ്ണൂർ എഫ്എം നിലയത്തിലൂടെ കാൻസറിനെ ആധാരമാക്കിയുള്ള ഫോൺ ഇൻ ക്വിസ് പരിപാടിയും സംഘടിപ്പിക്കും.

ആറളം ഫാം കോൺഗ്രസ്‌ കമ്മിറ്റി പദയാത്ര നടത്തി

ഇരിട്ടി: ആറളം ഫാം പുനരുധിവാസ മേഖലയിലെ ആന മതിൽ നിർമാണം വൈകിക്കുന്ന സർക്കാർ നടപടിക്കും, പുനരധിവാസ പ്രക്രിയ അട്ടിമറിക്കാൻ ശ്രമിക്കുന്ന ഭരണ കൂട ഭീകരതയ്ക്കും, പുനരധിവാസ മേഖലയിലെ വികസന മുരടിപ്പിനും, ഗ്രാമ പഞ്ചായത്ത് ഫാമിനോട് കാണിക്കുന്ന അവഗണനയ്ക്കും എതിരേ ആറളം ഫാം കോൺഗ്രസ് കമ്മിറ്റിയുടെ നേതൃത്വത്തിൽ പദയാത്ര നടത്തി. ഫാം ബ്ലോക്ക് 13 ആര്‍ആർടി ഓഫീസിന് സമീപത്തുനിന്ന് ആരംഭിച്ച പദയാത്ര കെപിസിസി ജനറൽ സെക്രട്ടറി ചന്ദ്രൻ തില്ലങ്കേരി ജാഥാ ലീഡർ ഡിസിസി സെക്രട്ടറി കെ. വേലായുധന് കൈമാറി ഉദ്ഘാടനം ചെയ്തു. കെ.എം. സോമൻ അധ്യക്ഷത വഹിച്ചു. നേതാക്കളായ വി.ടി. തോമസ്, സാജു യോമസ്, ജിമ്മി അന്തിനാട്ട്, ജോഷി പാലമറ്റം, വി. ശോഭ, ഷിജി നടുപറമ്പിൽ, അമൽ മാത്യു തുടങ്ങിവർ പ്രസംഗിച്ചു. വളയൻചാലിൽ നടന്ന സമാപന സമ്മേളനം കെപിസിസി മെംബർ ലിസി ജോസഫ് ഉദ്ഘാടനം നിർവഹിച്ചു.

വിളമന സെന്‍റ് ജൂഡ് പള്ളി തിരുനാളിന് തുടക്കമായി

ഇരിട്ടി: വിളമന സെന്‍റ് ജൂഡ് പള്ളിയിൽ 19 മുതൽ 28 വരെ നീളുന്ന തിരുനാളിന് വികാരി ഫാ. ജോസഫ് കൊളുത്താപ്പള്ളി കൊടിയേറ്റി. തിരുനാൾ ദിവസങ്ങളിൽ വൈകുന്നേരം 5.30 നും ഞായറാഴ്ചകളിൽ രാവിലെ എട്ടിനും വൈകുന്നേരം നാലിനും നടക്കുന്ന ജപമാലയ്ക്കും തിരുക്കർമങ്ങൾക്കും ഫാ. ഡൊമിനിക് മുരിയംകാലായിൽ, ഫാ. തോമസ് ചെരുവിൽ, ഫാ. മാത്യു പോത്തനാമല, ഫാ. ജോർജ് പുഞ്ചത്തറപ്പേൽ, ഫാ. ജോസഫ് കുളത്തറ, ഫാ. ഏലിയാസ് എടൂക്കുന്നേൽ, ഫാ. വർഗീസ് മണ്ണാപറമ്പിൽ, മോൺ. ഡോ. ജോസഫ് കാക്കരമറ്റത്തിൽ എന്നിവർ കാർമികത്വം വഹിക്കും. പ്രധാന തിരുനാൾ ദിനമായ 28 ന് വൈകുന്നേരം നടക്കുന്ന തിരുകർമങ്ങൾക്ക് റവ. ഡോ. ജോസ് വെട്ടിക്കൽ കാർമികത്വം വഹിക്കും.

കൂട്ടുപുഴ കല്ലന്തോട്ടിൽ കാട്ടാന കൃഷി നശിപ്പിച്ചു

ഇരിട്ടി: പേരട്ടയിലും പരിസരത്തും കാട്ടാന ഇറങ്ങി കൃഷി നശിപ്പിച്ചു. പേരട്ട സെന്‍റ് ആന്‍റണീസ് പള്ളിയുടെ സമീപത്ത് തൊണ്ടുങ്ങൽ എലിസബത്ത്, കരിനാട്ട് ഷിബ, ഷെഫീഖ് തുടങ്ങിയവരുടെ കൃഷിയിടത്തിലാണ് കാട്ടാന ഇറങ്ങിയത്. ഇന്നലെ പുലർച്ചയോടെയാണ് കാട്ടാന കൃഷിയിടത്തിൽ ഇറങ്ങി വിളകൾ നശിപ്പിച്ചത്. പുലർച്ചെ നാലിന് ജോലിസ്ഥലത്തേക്ക് പോകുവാൻ ഇറങ്ങിയ ഹോട്ടൽ ജീവനക്കാരനായ ഷെഫീഖ് ശബ്ദം കേട്ട് ശ്രദ്ധിച്ചപ്പോഴാണ് വീടിനു സമീപത്ത് കാട്ടാനയെ കണ്ടത്. കൃഷിയിടത്തിലെ വാഴയും മറ്റ് കൃഷികൾക്കും നാശം വരുത്തിയ ശേഷം ആന തിരികെ പോയി. കർണാടക ബ്രഹ്മഗിരി വന്യജീവി സങ്കേതത്തിൽ നിന്നും ഇറങ്ങിയ ആനയാണ് കേരളത്തിലെ കൃഷിയിടത്തിൽ എത്തി കൃഷികൾ നശിപ്പിച്ചത്. ഒരാഴ്ച മുന്പാണ് വന്യജീവി സങ്കേതത്തിൽ നിന്നും ഇറങ്ങിയ ആന അന്തർ സംസ്ഥാന പാതയിൽ കൂട്ടുപുഴ പാലത്തിന് മുകളിൽ നിലയുറപ്പിച്ച സംഭവം ഉണ്ടായത്. മേഖലയിൽ സോളാർ തൂക്കുവേലി ഉണ്ടെങ്കിലും ഇത് തകർത്താണ് ആന ജനവാസ മേഖലയിൽ ഇറങ്ങുന്നത്.

ശബരിമലയെ വിവാദമാക്കാൻ സംഘപരിവാർ ശ്രമിക്കുന്നു: പിണറായി വിജയൻ

കണ്ണൂർ: ശബരിമലയെ വലിയൊരു വിവാദമാക്കാൻ സംഘപരിവാർ ശ്രമിക്കുകയാണെന്ന് മുഖ്യമന്ത്രി പിണറായി വിജയൻ. സിപിഎം കണ്ണൂർ ജില്ലാ കമ്മിറ്റി ഓഫീസായ അഴീക്കോടൻ മന്ദിരത്തിന്‍റെ തളാപ്പിൽ പുതുതായി നിർമിച്ച കെട്ടിടത്തിന്‍റെ ഉദ്ഘാടനം നിർവഹിച്ച് ടൗൺ സ്ക്വയറിൽ പ്രസംഗിക്കുകയായിരുന്നു അദ്ദേഹം. നമ്മൾ കാണുന്ന ശബരിമലയിൽ അയ്യപ്പനൊപ്പം വാവരുണ്ട്. ഇതു സംഘപരിപാറിന് ഇഷ്ടം അല്ല. വാവരെ കൊള്ളാത്ത ഒരാളായി ഇവർ ചിത്രീകരിക്കുന്നു. വാവരല്ല മറ്റൊരു പേരാണ് അയ്യപ്പന്‍റെ കൂടെയുള്ളതെന്ന് ഇവർ പറയുന്നു. സംഘപരിപാർ തങ്ങളുടെ സങ്കുചിത ചിന്തകൾ അടിച്ചേൽപ്പിക്കുന്നു. ബിജെപിക്ക് നല്കുന്ന ഓരോ വോട്ടും കേരളത്തിന്‍റെ തനിമയെ നഷ്‌ടപ്പെടുത്തുമെന്നും പിണറായി വിജയൻ പറഞ്ഞു. അടുത്തിടെ, കേരളത്തിലെത്തിയ അമിത്ഷാ പറയുകയുണ്ടായി. വരാനിരിക്കുന്ന തദേശതെരഞ്ഞെടുപ്പിൽ ഞങ്ങൾ 25 ശതമാനം വോട്ട് നേടുമെന്നും നിയമസഭാ തെരഞ്ഞെടുപ്പിൽ ഭൂരിപക്ഷം ലഭിക്കുമെന്നും. എന്നാൽ, കേരളീയ സമൂഹം ശ്രദ്ധിക്കണം. ആർഎസ്എസ് തത്വം നടപ്പിലാക്കിയാൽ കേരളം ഇങ്ങനെ നിലനിൽക്കില്ല. ആർഎസ്എസിന് ആധിപത്യം ഇല്ലാത്തതിനാൽ കേരളത്തിൽ ഇഷ്‌ടമുള്ള ഭക്ഷണം കഴിക്കാം, ഇഷ്‌ടമുള്ള ആരാധനാലയങ്ങളിൽ പോകാം. ആർഎസ്എസ് കടന്നുവന്നാൽ ഓണത്തിന് നമ്മൾക്ക് മഹാബലിയെ നഷ്‌ടമാകും. അവിടെ വാമനൻ കടന്നുവരും. മനുഷ്യരുള്ള പാർട്ടിയാണ് കമ്മ്യൂണിസ്റ്റ് പാർട്ടി. മനുഷ്യർക്ക് തെറ്റു പറ്റാം. തെറ്റ് പറ്റുന്നവർക്കെതിരേ കൃത്യമായ നിലപാട് പാർട്ടി സ്വീകരിക്കും. ഇതൊക്കെയാണ് കമ്മ്യൂണിസ്റ്റ് പാർട്ടിയെ മറ്റുള്ള പാർട്ടികളിൽനിന്ന് വ്യത്യസ്തനാക്കുന്നത്. കേരളത്തിൽ ഏറ്റവും അധികം വേട്ടയാടപ്പെട്ട പാർട്ടിയാണ് കമ്മ്യൂണിസ്റ്റ് പാർട്ടി. ആദ്യം കോൺഗ്രസായിരുന്നു ആക്രമിച്ചത്. അടുത്തഘട്ടത്തിൽ ആർഎസ്എസ് രംഗത്ത് വന്നു. കമ്മ്യൂണിസ്റ്റ് പ്രസ്ഥാനത്തെ തകർക്കുകയായിരുന്നു ഇവരുടെ ലക്ഷ്യം. ഇതിനായി ഇവർ പരസ്പരം സഹായിക്കും. അടുത്തിടെ, കോൺഗ്രസ് നേതാവ് ആർഎസ്എസ് ശാഖക്ക് കാവൽ നിന്ന കാര്യം അഭിമാനത്തോടെ പറയുന്നത് നമ്മൾ കേട്ടതാണ്. ആർഎസ്എസിന്‍റെയും കോൺഗ്രസിന്‍റെയും ആക്രമണങ്ങളെ നേരിടാൻ സിപിഎമ്മിന് കഴിഞ്ഞു. ഇതിനിടയിൽ, ധീരരായ ഒരുപാട് സഖാക്കളെ നഷ്‌ടമായി. എല്ലാവിധ എതിർപ്പുകളും നേരിട്ട് മുന്നോട്ട് പോകാൻ കമ്മ്യൂണിസ്റ്റ് പ്രസ്ഥാനത്തിന് കഴിഞ്ഞിട്ടുണ്ടെന്നും പിണറായി വിജയൻ പറഞ്ഞു. സംസ്ഥാന സെക്രട്ടറി എം.വി. ഗോവിന്ദൻ എംഎൽഎ അധ്യക്ഷത വഹിച്ചു. സിപിഎം കേന്ദ്രകമ്മിറ്റി അംഗങ്ങളായ പി.കെ. ശ്രീമതി, ഇ.പി. ജയരാജൻ, കെ.കെ. ശൈലജ എംഎൽഎ, സംസ്ഥാന സെക്രട്ടേറിയറ്റംഗം എം.വി. ജയരാജൻ, നേതാക്കളായ പി. ജയരാജൻ, പി. ശശി, കഥാകൃത്ത് ടി. പദ്മനാഭൻ, കണ്ണൂർ ബിഷപ് ഡോ. അലക്സ് വടക്കുംതല, സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷ് എന്നിവർ പങ്കെടുത്തു.

ബിന്ദു ജ്വല്ലറിയുടെ പുതിയ ഷോറൂം മംഗളൂരുവില്‍ പ്രവര്‍ത്തനമാരംഭിച്ചു

മംഗളൂരു: ബിന്ദു ജ്വല്ലറിയുടെ പുതിയ ഷോറൂം മംഗളൂരുവിലെ ബെണ്ടൂരിൽ പ്രവർത്തനമാരംഭിച്ചു. സിനിമാതാരം സ്‌നേഹ പ്രസന്ന ഉദ്ഘാടനം നിര്‍വഹിച്ചു. ചടങ്ങിൽ ദക്ഷിണ കന്നഡ എംപി ക്യാപ്റ്റന്‍ ബ്രിജേഷ് ചൗട്ട, മംഗളൂരു സിറ്റി സൗത്ത് എംഎല്‍എ ഡി.വേദവ്യാസ് കാമത്ത്, മംഗളൂരു നോര്‍ത്ത് എംഎല്‍എ ഡോ. ഭരത് ഷെട്ടി, കർണാടക സ്റ്റേറ്റ് അല്ലൈഡ് ആന്‍ഡ് ഹെല്‍ത്ത്‌കെയര്‍ കൗണ്‍സില്‍ ചെയര്‍മാന്‍ ഡോ. യു.ടി. ഇഫ്തികാര്‍ ഫരീദ്, സെന്‍റ് അലോഷ്യസ് ഡീംഡ് ടു ബി യൂണിവേഴ്‌സിറ്റി വൈസ് ചാന്‍സലര്‍ റവ. ഡോ. പ്രവീണ്‍ മാര്‍ട്ടിസ് എസ്‌ജെ, മംഗളൂരു രാമകൃഷ്ണ മഠത്തിലെ സ്വാമി യുഗേഷാനന്ദജി, കെസിസിഐ പ്രസിഡന്‍റ് മിഥുന്‍ എം.റായ്, പി.ബി. അഹമ്മദ് മുദസറര്‍ (കെസിസിഐ, മംഗളൂരു) എന്നിവർ വിശിഷ്ടാതിഥികളായിരുന്നു. ബിന്ദു ജ്വല്ലറി ആവിഷ്‌കരിക്കുന്ന "മൈ ബ്ലൂ ഡയമണ്ട്', "സ്വര്‍ണ ബിന്ദു സിഎസ്ആര്‍' എന്നിവയുടെ ലോഗോ പ്രകാശനവും ഉദ്ഘാടന ചടങ്ങില്‍ നിര്‍വഹിച്ചു. ബിന്ദു ജ്വല്ലറിയുടെ സാമൂഹിക പ്രതിബദ്ധതയുടെയും ഉപഭോക്താക്കളോടുള്ള അചഞ്ചലമായ കടപ്പാടിന്‍റെയും അടയാളങ്ങളാണ് ഈ പദ്ധതികളെന്ന് മാനേജ്മെന്‍റ് അറിയിച്ചു. യശശരീരനായ കെ.വി കുഞ്ഞിക്കണ്ണനാണ് സംശുദ്ധമായ ആഭരണങ്ങള്‍ ഉപഭോക്താക്ക് ലഭ്യമാക്കുക എന്ന ലക്ഷ്യവുമായി 1982ല്‍ ബിന്ദു ജ്വല്ലറിക്ക് തുടക്കമിട്ടത്. ഇന്ന് കേരളത്തിലും കർണാടകയിലും അറിയപ്പെടുന്ന ജൂവല്ലറി ബ്രാന്‍ഡാക്കി ബിന്ദു ജ്വല്ലറിയെ അദ്ദേഹത്തിന്‍റെ മക്കളായ കെ.വി. അഭിലാഷ്, ഡോ. കെ.വി അജിതേഷ് എന്നിവർ വളർത്തിയെടുത്തിട്ടുണ്ട്. മംഗളൂരിലെ ഉപഭോക്താക്കള്‍ക്കായി എല്ലാ മുഹൂര്‍ത്തങ്ങള്‍ക്കും അനുയോജ്യമായ ആഭരണങ്ങള്‍, ഏറ്റവും മികച്ച ഡിസൈനില്‍ അവതരിപ്പിക്കാനാണ് ബിന്ദു ജ്വല്ലറി ലക്ഷ്യമിടുന്നതെന്ന് മാനേജിംഗ് ഡയറക്ടര്‍ അഭിലാഷ് അറിയിച്ചു.

വൃക്ക നൽകാമെന്നു പറഞ്ഞ് തട്ടിപ്പ്; ആറു ലക്ഷം തട്ടിയെടുത്തു

ഇരിട്ടി: വൃക്ക നൽകാമെന്നു വൃക്കരോഗിയേയും ചികിത്സാസഹായ നിധിക്കായി രൂപീകരിച്ച കമ്മിറ്റിയേയും പറഞ്ഞു വിശ്വസിപ്പിച്ച് ആറു ലക്ഷം തട്ടിയെടുത്തതായി പരാതി. പട്ടാനൂർ സ്വദേശി ഷാനിഫിന് (30) വൃക്ക നൽകാമെന്ന് പറഞ്ഞു വിശ്വസിപ്പിച്ചാണ് ആറു ലക്ഷം തട്ടിയെടുത്തത്. വീർപ്പാട് സ്വദേശി നൗഫൽ എന്ന സത്താർ, കൂട്ടു പ്രതികളായ നിബിൻ എന്ന അപ്പു , ഗഫൂർ എന്നിവർക്കെതിരേയാണ് ഷാനിഫ് ആറളം പോലീസിൽ പരാതി നൽകിയത്. 2024 ഡിസംബർ മുതൽ ഒക്ടോബർ വരെയുള്ള കാലയളവിലായിരുന്നു തട്ടിപ്പ്. ഡോണറെ നൽകാമെന്ന് പറഞ്ഞു വിശ്വസിപ്പിച്ച ഇവർ മൂന്നു ലക്ഷം പണമായും ബാക്കി മൂന്നു ലക്ഷം ബാങ്കുവഴിയുമാണ് കൈപ്പറ്റിയത്. കൂട്ടുപ്രതി നിബിനെ ഡോണറായി പരിചയപ്പെടുത്തിയായിരുന്നു തട്ടിപ്പ്. തട്ടിപ്പ് ആസൂത്രണം ചെയ്ത മുഖ്യപ്രതി നൗഫൽ ഒളിവിലാണ്. കേസ് രജിസ്റ്റർ ചെയ്ത ആറളം എസ്ഐ കെ. ഷുഹൈബിന്‍റെ നേതൃത്വത്തിൽ അന്വേഷണം ആരംഭിച്ചു. തട്ടിയത് നാട്ടുകാർ പിരിച്ചെടുത്ത പണം ചാരിറ്റി സംഘടനകളിലൂടെ നന്മമരമായി ചമഞ്ഞ് പല സ്ഥലങ്ങളിലും നൗഫൽ തട്ടിപ്പ് നടത്തിയതായി പോലീസ് പറയുന്നു. വൃക്ക തകാരാറിലായ ഷാനിഫിന് ആദ്യം നടത്തിയ ശസ്ത്രക്രിയ പരാജയപ്പെട്ടിരുന്നു. ഉമ്മയുടെ വൃക്ക ആയിരുന്നു ആദ്യ ശസ്ത്രക്രിയയിലൂടെ മാറ്റിവച്ചത്. വീണ്ടും അസുഖം കൊണ്ടുവലഞ്ഞതോടെ നാട്ടുകാർ ചേർന്ന് ചികിത്സാ സഹായ നിധി രൂപീകരിച്ച് പണം പിരിച്ചുനൽകുകയായിരുന്നു. ചികിത്സാ സഹായ കമ്മിറ്റിയുമായും ബന്ധപ്പെട്ട് കമ്മിറ്റി ഭാരവാഹികളിൽനിന്ന് മൂന്നു ലക്ഷം കൈപ്പറ്റുകയായിരുന്നു. സമാഹരിച്ച പണം നഷ്ടപ്പെട്ടതോടെ ഷാനിഫ് ഒരു വർഷത്തോളമായി അസുഖത്താൽ വലയുകയാണ്.

എടൂർ ഓവറോൾ ചാന്പ്യൻ

തലശേരി: ചെറുപുഷ്പ മിഷൻ ലീഗ് തലശേരി അതിരൂപതയുടെ ആഭിമുഖ്യത്തിൽ ചെമ്പേരി നിർമല ഹയർസെക്കൻഡറി സ്കൂളിൽ നടത്തിയ മിഷൻ കലോത്സവത്തിൽ എടൂർ മേഖല ഓവറോൾ ചാന്പ്യന്മാരായി. പേരാവൂർ, പൈസക്കരി മേഖലകൾ യഥാക്രമം രണ്ടും മൂന്നും സ്ഥാനങ്ങൾ നേടി. കലോത്സവം അതിരൂപത പ്രീസ്റ്റ് ഹോം ഡയറക്ടർ ഫാ. തോമസ് ആമക്കാട്ട് ഉദ്ഘാടനം ചെയ്തു. അതിരൂപത പ്രസിഡന്‍റ് ഷിജോ സ്രായിൽ അധ്യക്ഷത വഹിച്ചു. ഡയറക്ടർ ഫാ. ജിതിൻ വയലുങ്കൽ സ്വാഗതവും സെക്രട്ടറി ബിജു കൊച്ചുപൂവക്കോട്ട് നന്ദിയും പറഞ്ഞു. പ്രസംഗം, സംഗീതം, ബൈബിൾ വായന, മിഷൻ ക്വിസ് എന്നീ ഇനങ്ങളിൽ സബ്ജൂണിയർ, ജൂണിയർ, സീനിയർ, സൂപ്പർ സീനിയർ, എൽഡേഴ്സ് എന്നീ വിഭാഗങ്ങളിലായി പത്തു വേദികളിലായി ആയിരത്തോളം മിഷൻ പ്രതിഭകളാണ് മത്സരത്തിൽ മാറ്റുരച്ചത്. സമാപന സമ്മേളനത്തിൽ അതിരൂപത വികാരി ജനറാൾ മോൺ. മാത്യു ഇളംതുരുത്തിപടവിൽ വിജയികൾക്ക് ട്രോഫികളും സമ്മാനങ്ങളും സർട്ടിഫിക്കറ്റുകളും വിതരണം ചെയ്തു. അതിരൂപത വൈസ് ഡയറക്ടർ സിസ്റ്റർ ട്രീസാ എഫ്സിസി, അതിരൂപത എക്സിക്യൂട്ടീവ് അംഗങ്ങൾ എന്നിവർ നേതൃത്വം നൽകി.

ബാഡ്മിന്‍റൺ, വോളിബോൾ മത്സരങ്ങൾ നടത്തി

ചെമ്പേരി: തലശേരി അതിരൂപത വൈദിക കൂട്ടായ്മയുടെ കായികമേള "സൗഹൃദോത്സവം' സമാപിച്ചു. ഇരിട്ടി, ചെമ്പേരി, ചെറുപുഴ, കാസർഗോഡ് എന്നിങ്ങനെ നാല് റീജണുകളിൽ നിന്നുള്ള വൈദികർ പങ്കെടുത്തു. ചെന്പേരി വിമൽജ്യോതി എൻജിനിയറിംഗ് കോളജിൽ സംഘടിപ്പിച്ച സൗഹൃദോത്സവത്തിന്‍റെ രണ്ടാം ഘട്ടമായി ഇന്നലെ വോളിബോൾ, ബാഡ്മിന്‍റൺ മത്സരങ്ങളാണ് നടന്നത്. ബാഡ്മിന്‍റൺ സീനിയർ വിഭാഗത്തിൽ ഫാ. ബിജു ചേന്നോത്ത്-ഫാ. ആന്‍റണി മഞ്ഞളാംകുന്നേൽ എന്നിവർ അടങ്ങിയ ചെമ്പേരി റീജൺ ടീം ജേതാക്കളായി.ഫാ. മാത്യു ശാസ്താംപടവിൽ- ഫാ. തോമസ് തടത്തിൽ എന്നിവർ അടങ്ങിയ ഇരിട്ടി റീജണിനാണ് രണ്ടാം സ്ഥാനം. ജൂണിയർ വിഭാഗത്തിൽ ഫാ. അമൽ പഞ്ഞിക്കുന്നേൽ- ഫാ. സുനീഷ് പുതുക്കുളങ്ങര എന്നിവരടങ്ങുന്ന കാസർഗോഡ് റീജൺ ഒന്നാം സ്ഥാനം നേടി. ഫാ. ഷിന്‍റോ പുലിയുറുമ്പിൽ- ഫാ. വർഗീസ് വെട്ടിയാനിക്കൽ എന്നിവരടങ്ങുന്ന ചെമ്പേരി റീജണിനാണ് രണ്ടാം സ്ഥാനം. ബാഡ്മിന്‍റൺ സീനിയർ വിഭാഗത്തിൽ ഫാ. ബിജു ചേന്നോത്തും ജൂണിയർ വിഭാഗത്തിൽ ഫാ. ഷിന്‍റോ പുലിയുറുമ്പിലും ബെസ്റ്റ് പ്ലേയർ പുരസ്‌കാരങ്ങൾക്കർഹരായി.വോളിബോൾ മത്സരത്തിൽ ചെറുപുഴ- കാസർഗോഡ് റിജണുകളാണ് ചാന്പ്യൻമാർ. മികച്ച പ്രകടനം കാഴ്‌ചവച്ച ഫാ. ജസ്റ്റിൻ വട്ടക്കുന്നേൽ ഒഎഫ്‌എം പ്ലേയർ ഓഫ് ദി ടൂർണമെന്‍റായി തെരഞ്ഞെടുക്കപ്പെട്ടു. ആർച്ച് ബിഷപ് മാർ ജോസഫ് പാംപ്ലാനി വിജയികൾക്ക് ട്രോഫികൾ സമ്മാനിച്ചു. കായിക മത്സരങ്ങൾ വൈദികർക്കിടയിലെ സൗഹൃദം വർധിപ്പിക്കാനും ആരോഗ്യം നിലനിർത്താനും സഹായിക്കുമെന്ന് സമ്മാനദാനം നിർവഹിച്ചുകൊണ്ട് ആർച്ച് ബിഷപ് പറഞ്ഞു. വികാരി ജനറാൾമാരായ മോൺ. സെബാസ്റ്റ്യൻ പാലാക്കുഴി , മോൺ. മാത്യു ഇളംതുരുത്തിപ്പടവിൽ എന്നിവർ പ്രസംഗിച്ചു. വികാരി ജനറാൾമാരായ മോൺ. ആന്‍റണി മുതുകുന്നേൽ, മോൺ. സെബാസ്റ്റ്യൻ പാലാക്കുഴി, മോൺ. മാത്യു ഇളംതുരുത്തിപടവിൽ എന്നിവരടങ്ങിയ അതിരൂപത ടീമാണ് മത്സരങ്ങളുടെ സംഘാടനം നിർവഹിച്ചത്. ഫാ. ജോജി കാക്കരമറ്റത്തിൽ, ഫാ. ബിജു മുട്ടത്തുകുന്നേൽ, ഫാ. സുബിൻ റാത്തപ്പള്ളി, ഫാ. ജിൻസ് പ്ലാവുനിൽക്കുംപറമ്പിൽ, ഫാ.അഖിൽ മുക്കുഴി, ഫാ. ആൽബിൻ തെങ്ങുംപള്ളി എന്നിവർ അടങ്ങിയ സംഘാടക സമിതി നേതൃത്വം നൽകി. രണ്ടു ഘട്ടങ്ങളായി നടന്ന സൗഹൃദോത്സവത്തിൽ നൂറുകണക്കിന് വൈദികർ പങ്കെടുത്തു. വിമൽ ജ്യോതി എൻജിനിയറിംഗ് കോളജ്, സാൻജോസ് അക്കാഡമി, രാഷ്‌‌ട്ര ദീപിക ലിമിറ്റഡ് എന്നിവരാണ് വിജയികൾക്കുള്ള സമ്മാനങ്ങൾ സ്പോൺസർ ചെയ്തത്.

"ദീപിക കളർ ഇന്ത്യ' സമ്മാനദാനവും ഡിസിഎൽ പ്രവർത്തന ഉദ്ഘാടനവും ഇന്ന്

കണ്ണൂർ: ദീപിക കളർ ഇന്ത്യ കണ്ണൂർ ജില്ലാതല ചിത്രരചനാ മത്സര വിജയികൾക്കുള്ള സമ്മാനദാനവും ഡിസിഎൽ കണ്ണൂർ പ്രവിശ്യാതല പ്രവർത്തനോദ്ഘാടനവും ഇന്നു നടക്കും. രാവിലെ 11 ന് പയ്യാന്പലം ഉർസുലൈൻ സീനിയർ സെക്കൻഡറി സ്കൂളിലാണ് പരിപാടി. അസിസ്റ്റന്‍റ് കമ്മീഷണർ ഓഫ് പോലീസ് പ്രദീപൻ കണ്ണിപ്പൊയിൽ ഉദ്ഘാടനംചെയ്യും. ഡിസിഎൽ ദേശീയ അധ്യക്ഷന്‍ (കൊച്ചേട്ടൻ) ഫാ. റോയ് കണ്ണംചിറ സിഎംഐ അധ്യക്ഷത വഹിക്കും. ഉർസുലൈൻ സ്കൂൾ പ്രിൻസിപ്പൽ സിസ്റ്റർ അർച്ചന യുഎംഐ, ശ്രീകണ്ഠപുരം മേരിഗിരി സീനിയർ സെക്കൻഡറി സ്കൂൾ പ്രിൻസിപ്പൽ ബ്രദർ റെജി സ്കറിയ എന്നിവർ പ്രസംഗിക്കും. ദീപിക കണ്ണൂർ അസിസ്റ്റന്‍റ് റസിഡന്‍റ് മാനേജർ ഫാ. വിപിൻ വെമ്മേനിക്കട്ടയിൽ സ്വാഗതവും അസിസ്റ്റന്‍റ് ജനറൽ മാനേജർ ജോർജ് തയ്യിൽ നന്ദിയും പറയും.

കനത്തമഴയിൽ ചെറുപുഴ മേഖലയിൽ വൻ നാശനഷ്ടം

ചെറുപുഴ: കനത്ത മഴയിൽ ചെറുപുഴ മേഖലയിൽ വൻ നാശനഷ്ടം. രയറോം-എയ്യൻകല്ല് റോഡിൽ നിന്ന് മലവെള്ളം കുത്തിയൊഴുകി എതിർവശത്തുള്ള പറമ്പിൽ ആന്‍റണിയുടെ വീടിന്‍റെ മതിൽ ഇടിഞ്ഞു. വീടിനുള്ളിൽ അരമീറ്ററോളം വെള്ളം കയറി. വീട്ടുപകരണങ്ങൾ നശിച്ചു. സമീപത്ത് വാടകയ്ക്ക് താമസിക്കുന്ന പുതിയപുരയിൽ അജീഷിന്‍റെ വീടിനകത്തും വെള്ളം കയറി. തിരുമേനിയിലെ ഓരത്താനിയിൽ ബാബുവിന്‍റെ വീടിന് പിന്നിലെ മൺതിട്ടയിടിഞ്ഞു. ഓടിക്കൂടിയ നാട്ടുകാർ ചേർന്ന് മരങ്ങൾ മുറിച്ചു മാറ്റി. സമീപത്തെ പന്തലാനിക്കൽ സെബാസ്റ്റ്യന്‍റെ വീടിന് പിന്നിലെ മൺതിട്ടയിടിഞ്ഞ് ശുചിമുറിയുടെ മുകളിൽ വീണു. പ്രാപ്പോയിൽ ഈസ്റ്റിലെ കണിയാംപറമ്പിൽ ജോസഫിന്‍റെ മുറ്റം ഇടിഞ്ഞു. തിരുമേനി തോട് കരകവിഞ്ഞ് മുളപ്ര പാലത്തിന് മുകളിൽ വെള്ളം കയറി. മലമുകളിൽ നിന്നും മണ്ണും കല്ലും ഒഴുകിയെത്തി റോഡുകളിൽ അടിഞ്ഞു കൂടി. ഇത് വാഹനയാത്രയ്ക്ക് ബുദ്ധിമുട്ടുണ്ടാക്കി.

ബൈക്ക് അപകടത്തിൽ യുവാവ് മരിച്ചു; സുഹൃത്തിന് ഗുരുതര പരിക്ക്

തളിപ്പറമ്പ്: ഓട്ടോ ബൈക്കിലിടിച്ച് യുവാവ് മരിച്ചു. സുഹൃത്തിന് ഗുരുതരമായി പരിക്കേറ്റു. കുപ്പം മദീനനഗറിലെ കുട്ടുക്കന്‍ പാറപ്പുറത്ത് കെ.എം. ഷമില്‍ മുഹമ്മദ് (19) ആണ് മരിച്ചത്. സുഹൃത്ത് സയ്യിദ്‌നഗറിലെ ഫസലിനെ ഗുരുതരമായി പരിക്കേറ്റ നിലയില്‍ കണ്ണൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം രാത്രി 11.45 ഓടെ തളിപ്പറമ്പ്-ആലക്കോട് റോഡില്‍ അണ്ടിക്കളം കയറ്റത്തില്‍ ബുള്ളറ്റിൽ സഞ്ചരിക്കുകയായിരുന്ന ഇവരെ ഓട്ടോ ഇടിച്ചുവീഴ്ത്തുകയായിരുന്നു. ഓട്ടോ പോലീസ് കസ്റ്റഡിയിലെടുത്തു. കുപ്പത്തെ കെ.എം. അബൂബക്കര്‍ സിദ്ദിഖ്-ഞാറ്റുവയല്‍ സ്വദേശിനി മുംതാസ് ദന്പതികളുടെ മകനാണ് മരിച്ച ഷമിൽ മുഹമ്മദ്. സഹോദരന്‍: ഷെജില്‍ മുഹമ്മദ്.

വീട്ടമ്മ കിണറ്റിൽ മരിച്ചനിലയിൽ

കൂത്തുപറമ്പ്: വീട്ടമ്മയെ വീട്ടുകിണറ്റിൽ മരിച്ച നിലയിൽ കണ്ടെത്തി. വട്ടോളി കോയ്യാറ്റിലെ കേടിച്ചാലിൽ അറിഞ്ഞി സുലോചന (59) യാണ് മരിച്ചത്. സുലോചന വീട്ടിൽ തനിച്ചാണ് താമസം. ഇന്നലെ രാവിലെ സുലോചനയെ കാണാത്തതിനാൽ നാട്ടുകാർ നടത്തിയ തെരച്ചിലിലാണ് കിണറ്റിൽ മരിച്ചനിലയിൽ കണ്ടത്തിയത്. കൂത്തുപറമ്പ് അഗ്നിരക്ഷാ സേനയെത്തി മൃതദേഹം പുറത്തെടുത്തു. പരേതരായ എറക്കോടൻ കൊട്ടന്‍റെയും അറിഞ്ഞി കല്ലുവിന്‍റെയും മകളാണ്. ഭർത്താവ്: പരേതനായ ശശി കടമ്പത്തിൽ. മക്കൾ: അശ്വതി, അജിത്ത് (ഗൾഫ്), പരേതനായ അഖിൽ. മരുമകൻ: രമീഷ്. സഹോദരങ്ങൾ: ദേവകി (തൊടീക്കളം), പരേതനായ മുകുന്ദൻ. സംസ്കാരം ഇന്ന് ഉച്ചയ്ക്ക് 12ന് വലിയവെളിച്ചം ശാന്തിവനത്തിൽ.

മരം മുറിക്കുന്നതിനിടെ വീണുമരിച്ചു

മാലോം: മരം മുറിക്കുന്നതിനിടെ താഴെവീണ് തൊഴിലാളി മരിച്ചു. നാട്ടക്കല്ലിലെ പുലിക്കോടൻ വിജയൻ (55) ആണ് മരിച്ചത്. ഇന്നലെ ഉച്ചയ്ക്ക് 1.40ഓടെ നാട്ടക്കല്ലിലെ ഒരു വീടിനു മുകളിലേക്ക് ചാഞ്ഞ മരം മുറിക്കുന്നതിനിടെയാണ് അപകടമുണ്ടായത്. ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: ലക്ഷ്മി. മക്കൾ: വിജില, വിജയശ്രീ, വിശാഖ്. സഹോദരങ്ങൾ: കുമാരൻ, ബാലൻ, തമ്പാൻ.

പയ്യാവൂർ മാംഗല്യത്തിന് തുടക്കമായി; ആദ്യതാലികെട്ട് പാനൂരിൽ

പയ്യാവൂർ: ഒരു നാട്ടിലെ ഒരുപാട് പേരുടെ കാത്തിരിപ്പിന് വിരാമമിട്ട് പയ്യാവൂർ മാംഗല്യത്തിന് തുടക്കമായി. ആദ്യതാലികെട്ട് പാനൂരിലാണ് നടന്നത്. പാനൂർ സ്വദേശി ഷാജിയും പയ്യന്നൂർ സ്വദേശി ബിന്ദുവും തമ്മിലുള്ള വിവാഹം ഇന്നലെ പാനൂർ ശ്രീനാരായണഗുരു മന്ദിരത്തിൽ നടന്നു. വധുവിന്‍റെ ബന്ധുവിന്‍റെ മരണത്തെത്തുടർന്നാണ് വിവാഹം പാനൂരിലേക്ക് മാറ്റിയതെന്ന് പയ്യാവൂർ പഞ്ചായത്ത് വൈസ് പ്രസിഡന്‍റ് പ്രീത സുരേഷ് പറഞ്ഞു. വിവാഹ ചടങ്ങിൽ പയ്യാവൂർ പഞ്ചായത്ത് പ്രസിഡന്‍റ് സാജുസേവ്യർ, വൈസ് പ്രസിഡന്‍റ് പ്രീത സുരേഷ്, മെംബർമാരായ പ്രഭാവതി മോഹനൻ, രജനി സുന്ദരൻ, സിഡിഎസ് അംഗങ്ങളായ ബിന്ദു ശിവദാസൻ, ബിന്ദുരാജൻ, ജില്ലാ സിംഗിൾ വുമൺ അസോസിയേഷൻ ഭാരവാഹി പി.വി. ശോഭന തുടങ്ങി നിരവധി പേർ പങ്കെടുത്തു. പയ്യാവൂർ പഞ്ചായത്തിലേക്ക് വിവാഹം കഴിക്കാൻ അപേക്ഷകളുടെ കുത്തൊഴുക്കാണ് ഇപ്പോഴും. "പയ്യാവൂർ മാംഗല്യം" പദ്ധതി പഞ്ചായത്ത് പ്രഖ്യാപിച്ചതോടെയാണ് ആയിരക്കണക്കിന് അപേക്ഷകൾ എത്താൻ തുടങ്ങിയത്. ഇതുവരെ ലഭിച്ച നാലായിരത്തോളം അപേക്ഷകരിൽ 90 ശതമാനവും പുരുഷന്മാരാണെന്നതാണ് പഞ്ചായത്തിനെ കുഴപ്പിക്കുന്നത്. കുടുംബശ്രീ അംഗങ്ങൾ പഞ്ചായത്തിലേക്കെത്തുന്ന ഓരോ അപേക്ഷകളും വിവിധ മത, സമുദായങ്ങൾക്കനുസരിച്ച് തരംതിരിക്കുകയാണ്. അതിൽ അനുയോജ്യരായവരെ കൂട്ടിയിണക്കാൻ ശ്രമിക്കുകയാണ് പഞ്ചായത്ത്. അപേക്ഷകളിലെ അസന്തുലിതാവസ്ഥ പരിഹരിയ്ക്കാൻ വിവിധ പഞ്ചായത്തുകളുമായി സഹകരിക്കാനാണ് പയ്യാവൂർ പഞ്ചായത്തിന്‍റെ നീക്കം. പയ്യാവൂർ ഗ്രാമപഞ്ചായത്തിന്‍റെ നേതൃത്വത്തിൽ ജില്ലാ സിംഗിൾ വുമൺ അസോസിയേഷനുമായി ചേർന്നാണ് പയ്യാവൂർ മാംഗല്യം' എന്ന പേരിൽ പദ്ധതി ആവിഷ്കരിച്ചത്. അവിവാഹിതരും പുനർ വിവാഹിതരും ഉൾപ്പെടെ ജാതി ഭേദമന്യേ സ്ത്രീ പുരുഷന്മാർക്ക് വിവാഹിതരാകാനുളള അവസരമാണ് പദ്ധതിയിലൂടെ ഒരുക്കുന്നത്.

രാജ്യാന്തര ചലച്ചിത്രമേളയ്ക്ക് കൊടിയിറങ്ങി

കണ്ണൂർ: ചലച്ചിത്രമേളകളുടെ ഭൂപടത്തിൽ തലശേരിയെ അടയാളപ്പെടുത്തി രാജ്യാന്തര ചലച്ചിത്രമേളയ്ക്ക് തിരശീല വീണു. കഴിഞ്ഞ നാലു ദിവസങ്ങളായി ലോകസിനിമയുടെ മായാദൃശ്യങ്ങൾ മനസിൽ പതിപ്പിച്ച് കേരള സംസ്ഥാന ചലച്ചിത്ര അക്കാദമി സംഘടിപ്പിച്ച പ്രഥമ തലശേരി രാജ്യാന്തര ചലച്ചിത്രമേളയുടെ സമാപനസമ്മേളനം മന്ത്രി ഒ.ആർ. കേളു ഉദ്ഘാടനം ചെയ്തു. നമ്മുടെ നാടിനെ ഇന്നത്തെ കേരളമായി മാറ്റിയെടുക്കാൻ സാധിച്ചതിൽ ചലച്ചിത്രം വലിയ പങ്ക് വഹിച്ചിട്ടുണ്ടെന്നും അതിനെ ശക്തിയോടെ പരിപോഷിപ്പിക്കേണ്ടതുണ്ടെന്നും മന്ത്രി പറഞ്ഞു. ദേശീയ അവാർഡ് ജേതാവ് നടൻ വിജയരാഘവനെ നിയമസഭാ സ്പീക്കർ എ.എൻ. ഷംസീർ ആദരിച്ചു. ചലച്ചിത്ര അക്കാദമി ചെയർപേഴ്സൺ പ്രേംകുമാർ, സെക്രട്ടറി സി. അജോയ് എന്നിവർക്കുള്ള സംഘാടക സമിതിയുടെ സ്നേഹോപഹാരവും സ്പീക്കർ നൽകി. തലശേരിയുടെ അഭിമാനമായ സംഗീത സംവിധായകൻ കെ.രാഘവൻ മാസ്റ്ററുടെ 12-ാം ചരമവാർഷികദിനത്തിൽ പ്രണാമമർപ്പിച്ച് സമാപനസമ്മേളന വേദിയിൽ ചലച്ചിത്ര അക്കാദമി സെക്രട്ടറി സി. അജോയ് അനുസ്മരണപ്രമേയം അവതരിപ്പിച്ചു. കഴിഞ്ഞ വർഷം ലോകത്ത് നിർമിക്കപ്പെട്ട ഏറ്റവും മികച്ച 55 ദൃശ്യവിസ്‌മയങ്ങൾ തലശേരി ലിബർട്ടി തീയേറ്റർ സമുച്ചയത്തിൽ മറ്റൊരു ലോകം തന്നെ തീർക്കുകയായിരുന്നു. ലിബർട്ടി തീയേറ്റർ സമുച്ചയത്തിലെ ലിറ്റിൽ പാരഡൈസിൽ നടന്ന ഉദ്ഘാടന ചടങ്ങിൽ തലശേരി നഗരസഭ ചെയർപേഴ്സൺ കെ.എം. ജമുനാറാണി അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റുമാരായ പി.പി. സനിൽ, എം.കെ. സെയ്‌തു, സി.കെ. രമ്യ, നിർമാതാവ് ലിബർട്ടി ബഷീർ, ബീനിഷ് കോടിയേരി, ടി.എം. ദിനേശൻ തുടങ്ങിയവർ പങ്കെടുത്തു.

അപകടത്തിൽപ്പെട്ട നായക്കുട്ടിക്ക് ബംഗളൂരുവിൽ വിദഗ്ധ ചികിത്സ

മട്ടന്നൂർ: കൂടാളി ഗണപതി ക്ഷേത്രത്തിനു സമീപം വാഹനമിടിച്ച് അവശതയിലായ നായക്കുട്ടിയുടെ രക്ഷയ്ക്ക് കൂടാളി പഞ്ചായത്ത് പ്രസിഡന്‍റ് പി.കെ. ഷൈമയും മൃഗസ്നേഹികളും ഒത്തുചേർന്നു. തക്കസമയത്തെ ഇടപെടലിൽ വിദഗ്‌ധ ചികിത്സ നൽകി രക്ഷപ്പെടുത്തി. വാഹനമിടിച്ച് പിടയുന്ന നാലുമാസം പ്രായമായ നായക്കുഞ്ഞിനെ രക്ഷിക്കാൻ വനംവകുപ്പ്, പോലീസ് തുടങ്ങി പലരെയും വിളിച്ചു. റസ്ക്യൂ ടീം ഡോ. സുഷമ പ്രഭുവിന്‍റെ നിർദേശത്തിൽ പഞ്ചായത്ത് പ്രസിഡന്‍റ് പട്ടിക്കുഞ്ഞിന് വെള്ളവും ഭക്ഷണവും നൽകി സമീപത്തെ വീട്ടിലാക്കി. പിന്നീട് ഡോ. സുഷമ പ്രഭുവിന്‍റെ നേതൃത്വത്തിലുള്ള പീപ്പിൾ ഫോർ ആനിമൽ വെൽഫെയർ എന്ന സംഘടനയുടെ പ്രവർത്തകർ ആംബുലൻസിൽ ബംഗളൂരുവിലെ ആർഎസ് വെറ്ററിനറി ക്ലിനിക്കിലെത്തിച്ച് നട്ടെല്ലിനു ശസ്ത്രക്രിയ നടത്തി. ശസ്ത്രക്രിയയ്ക്ക് 40,000 രൂപ ചെലവായി.

സംഘാടനത്തിലെ പിഴവ്; ചാമ്പ്യൻസ് ബോട്ട് ലീഗ് നിർത്തിവച്ചു

ചെറുവത്തൂർ: സംസ്ഥാന ടൂറിസം വകുപ്പ് ചെറുവത്തൂർ അച്ചാംതുരുത്തിയിൽ സംഘടിപ്പിച്ച പ്രഥമ ചാമ്പ്യൻസ് ബോട്ട് ലീഗ് സംഘാടനത്തിലെ പിഴവ് മൂലം നിർത്തിവച്ചു. മികച്ച സമയം കാഴ്ച വയ്ക്കുന്ന ടീമുകളെ കണ്ടെത്തി ഫൈനൽ നടത്തുന്നതായിരുന്നു സിബിഎൽ രീതി. ചെറുവത്തൂരിലെ അച്ചാംതുരുത്തി - കോട്ടപ്പുറം പാലത്തിന് സമീപം ഇന്നലെ ഉച്ചകഴിഞ്ഞ് മൂന്നോടെ ഹീറ്റ്സ് മത്സരങ്ങൾ ആരംഭിച്ചിരുന്നു. എന്നാൽ രണ്ടാമത്തെ ഹീറ്റ്സ് നടന്നപ്പോൾ സ്റ്റാർട്ടിംഗ് വേളയിൽ വെടിയൊച്ചക്കൊപ്പം പ്രവർത്തിക്കേണ്ട ടൈമർ നിലച്ചതാണ് തർക്കങ്ങൾക്ക് തുടക്കമിട്ടത്. തുടർന്ന് നടന്ന ഹീറ്റ്സുകളിൽ സാധാരണ പോലെ ടൈമർ പ്രവർത്തിക്കുകയും ചെയ്തു. ഇതോടെ തർക്കമുണ്ടായ ഹീറ്റ്സ് വീണ്ടും നടത്തണമെന്ന ആവശ്യം മറ്റു ടീമുകളിൽ നിന്നുയർന്നു. സംഘാടകരും ജനപ്രതിനിധികളും നടത്തിപ്പിന്‍റെ ചുക്കാൻ പിടിച്ച ടൂറിസം വകുപ്പ് ഉദ്യോഗസ്ഥരും തർക്കമുണ്ടായ ഹീറ്റ്സിലെ ടീമുകളുടെ മാനേജർമാരെ വിളിച്ച് വീണ്ടും മത്സരം നടത്താൻ ആവശ്യപ്പെട്ടുവെങ്കിലും രണ്ടു ടീമുകൾ പിന്മാറുകയായിരുന്നു. ഇതോടെ മറ്റു ടീമുകൾ പ്രതിഷേധമറിയിക്കുകയും വീണ്ടും യോഗം ചേർന്നപ്പോൾ ഓരോ ഹീറ്റ്സിലും പങ്കെടുത്ത രണ്ടു ടീമുകളെ പങ്കെടുപ്പിക്കാമെന്ന നിർദേശം ഉയർന്നെങ്കിലും ഭൂരിഭാഗം ടീമുകളും എതിർപ്പറിയിച്ചതോടെ ചാമ്പ്യൻസ് ബോട്ട് ലീഗ് മത്സരം നിർത്തിവയ്ക്കുന്നതായി സാങ്കേതിക വിഭാഗത്തിന്‍റെ ചുമതല വഹിക്കുന്ന ടൂറിസം വകുപ്പിലെ അഭിലാഷ് അറിയിച്ചു. ഹീറ്റ്സ് മത്സരങ്ങൾ ഉൾപ്പെടെ വീണ്ടും നടത്തുന്നതിന് സംഘാടകർ നിർദേശം മുന്നോട്ടുവച്ചെങ്കിലും ടീമുകൾ തയാറായില്ല. അതേസമയം ചാമ്പ്യൻസ് ബോട്ട് ലീഗ് മത്സര നിബന്ധന അംഗീകരിക്കാത്ത ടീമുകളെ ഒഴിവാക്കി തുടർന്നുള്ള മത്സരം നടത്തണമെന്ന് മികച്ച സമയം കുറിച്ച പാലിച്ചോൻ അച്ചാംതുരുത്തി ടീം ഭാരവാഹികൾ അറിയിച്ചു. ചാമ്പ്യൻസ് ബോട്ട് ലീഗ് ടൂറിസം മന്ത്രി പി.എ. മുഹമ്മദ് റിയാസ് ഓൺലൈനായി ഉദ്ഘാടനം ചെയ്തു. എം. രാജഗോപാലൻ എംഎൽഎ അധ്യക്ഷത വഹിച്ചു. രാജ്മോഹൻ ഉണ്ണിത്താൻ എംപി ഫ്ലാഗ് ഓഫ് ചെയ്തു. ജില്ലാ കളക്ടർ കെ. ഇമ്പശേഖർ, ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ, നീലേശ്വരം നഗരസഭ ചയർ ടി.വി. ശാന്ത, ചെറുവത്തൂർ പഞ്ചായത്ത് പ്രസിഡന്‍റ് സി.വി. പ്രമീള, വൈസ്പ്രസിഡന്‍റ് പി.വി. രാഘവൻ, ബ്ലോക്ക് പഞ്ചായത്ത് പ്രസിഡന്‍റ് മാധവൻ മണിയറ, ജില്ലാ പഞ്ചായത്തംഗം സി.ജെ. സജിത്ത്, ടൂറിസം വകുപ്പ് ഡെപ്യൂട്ടി ഡയറക്ടർ എ.നസീർ, ഡിടിപിസി സെക്രട്ടറി ജെ.കെ.ജിജേഷ് കുമാർ എന്നിവർ സംബന്ധിച്ചു. കേരളത്തിലെ വിവിധ വള്ളംകളി മത്സരങ്ങളെ ഏകീകരിച്ച് സംസ്ഥാന ടൂറിസം വകുപ്പ് നടത്തി വരുന്ന ചാമ്പ്യൻസ് ബോട്ട് ലീഗിന്‍റെ മൂന്നാമത് മത്സരമാണ് ചെറുവത്തൂരിലെ അച്ചാംതുരുത്തി പുഴയിൽ സംഘടിപ്പിച്ചത്.

കോശി കമ്മീഷൻ റിപ്പോർട്ടിൽ സർക്കാർ ഒളിച്ചുകളി അവസാനിപ്പിക്കണം: ബിഷപ് അലക്സ് വടക്കുംതല

കണ്ണൂർ: ക്രൈസ്തവരുടെ അവസ്ഥ പഠിക്കാൻ നിയോഗിച്ച ജെ.ബി. കോശി കമ്മീഷൻ റിപ്പോർട്ട് സമർപ്പിച്ചു രണ്ടരവർഷം കഴിഞ്ഞിട്ടും തുടർനടപടികൾ കൈക്കൊള്ളാത്ത സർക്കാരിന്‍റെ ഒളിച്ചുകളി അവസാനിപ്പിച്ചില്ലെങ്കിൽ ലത്തീൻ സമുദായം പ്രത്യക്ഷ സമരപരിപാടികളുമായി മുന്നിട്ടിറങ്ങുമെന്ന് കണ്ണൂർ ബിഷപ് ഡോ. അലക്സ് വടക്കുംതല. കണ്ണൂർ ചേംബർ ഹാളിൽ കേരള ലാറ്റിൻ കാത്തലിക് അസോസിയേഷൻ (കെഎൽസിഎ) കണ്ണൂർ രൂപത സമിതിയുടെ ആഭിമുഖ്യത്തിൽ സംഘടിപ്പിച്ച സമുദായ ജനസമ്പർക്ക പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ലത്തീൻ സമുദായം രാഷ്‌‌ട്രീയമായും സാമൂഹികമായും അവഗണിക്കപ്പെടുന്ന സാഹചര്യമാണ് നിലവിലുള്ളതെന്നും തീരദേശമേഖലയിലും വിദ്യാഭ്യാസ മേഖലയിലും ഉൾപ്പെടെ സമുദായം നേരിടുന്ന പ്രതിസന്ധികൾക്ക് ഉത്തരം ലഭിച്ചേ മതിയാകുവെന്നും ബിഷപ് പറഞ്ഞു. സമുദായ സർട്ടിഫിക്കറ്റ്, വിദ്യാഭ്യാസ സ്കോളർഷിപ്പുകൾ, ഉദ്യോഗ സംവരണം, ഭരണഘടനാപരമായ പൊതുവായ അവകാശ നിഷേധങ്ങൾ എന്നിവ ഉയർത്തിയാണ് ജനസമ്പർക്ക പരിപാടി സംഘടിപ്പിച്ചത്. കെഎൽസിഎ രൂപത പ്രസിഡന്‍റ് ഗോഡ്സൺ ഡിക്രൂസ് അധ്യക്ഷത വഹിച്ചു. കെപിസിസി പ്രസിഡന്‍റ് സണ്ണി ജോസഫ് എംഎൽഎ മുഖ്യാതിഥിയായി. കണ്ണൂർ രൂപത സഹായ മെത്രാൻ ഡോ. ഡെന്നിസ് കുറുപ്പശേരി അനുഗ്രഹ പ്രഭാഷണം നടത്തി. കെഎൽസിഎ സംസ്ഥാന പ്രസിഡന്‍റ് ഷെറി ജെ. തോമസ് വിഷയാവതരണം നടത്തി. സംസ്ഥാന ജനറൽ സെക്രട്ടറി ബിജു ജോസി, സംസ്ഥാന ട്രഷറർ രതീഷ് ആന്‍റണി, സംസ്ഥാന മുൻ പ്രസിഡന്‍റ് ആന്‍റണി നൊറോണ, രൂപത ഡയറക്ടർ ഫാ. ആൻസിൽ പീറ്റർ, ഫൊറോന വികാരി ഫാ. ബെന്നി മണപ്പാട്ട്, കെഎൽസിഡബ്ല്യുഎ സംസ്ഥാന പ്രസിഡന്‍റ് ഷേർളി സ്റ്റാൻലി, രൂപത ജനറൽ സെക്രട്ടറി ശ്രീജൻ ഫ്രാൻസിസ്, സംസ്ഥാന സെക്രട്ടറി ജോൺ ബാബു, സംസ്ഥാന വൈസ് പ്രസിഡന്‍റ് നൈജു അറയ്ക്കൽ, ഫാ. മാർട്ടിൻ രായപ്പൻ, ആനിമേറ്റർ സിസ്റ്റർ പ്രിൻസി ആന്‍റണി, പ്രീത സ്റ്റാൻലി, ഫ്രാൻസിസ് സി. അലക്സ് എന്നിവർ പ്രസംഗിച്ചു.

പാലിയേറ്റീവ് നഴ്‌സസ് അസോസിയേഷൻ ജില്ലാ സമ്മേളനം

കണ്ണൂർ: ജില്ലാ പാലിയേറ്റീവ് നഴ്‌സസ് അസോസിയേഷൻ ജില്ലാ സമ്മേളനം കണ്ണൂരിൽ സി. കണ്ണൻ സ്മാരക ഹാളിൽ നടന്നു. സിഐടിയു ജില്ലാ സെക്രട്ടറി കെ. ധനഞ്ജയൻ സമ്മേളനം ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് ഒ.സി. ബിന്ദു അധ്യക്ഷത വഹിച്ചു. ജില്ലാ സെക്രട്ടറി കെ. നിഷ പ്രവർത്തന റിപ്പോർട്ടും ഫെഡറേഷൻ സംസ്ഥാന ജോയിന്‍റ് സെക്രട്ടറി പ്രസന്ന സുരേഷ് സംഘടനാ റിപ്പോർട്ടും അവതരിപ്പിച്ചു. സിഐടിയു സംസ്ഥാന സെക്രട്ടറി കെ.പി. സഹദേവൻ, ജില്ലാ സഹഭാരവാഹി ഒ. കാർത്യായനി എന്നിവർ പ്രസംഗിച്ചു. ഭാരവാഹികൾ: ഒ.സി. ബിന്ദു-പ്രസിഡന്‍റ്, കെ. നിഷ-സെക്രട്ടറി, കെ. റോജ-ട്രഷറർ.

സിപിഎമ്മിന്‍റെ ചട്ടലംഘനങ്ങൾ കോർപറേഷൻ അധികൃതർ കണ്ടില്ലെന്ന് നടിക്കുന്നു: ബിജെപി

കണ്ണൂർ: സിപിഎമ്മിന്‍റെ പുതിയ ഓഫീസ് ഉദ്ഘാടനവുമായി ബന്ധപ്പെട്ട് കണ്ണൂർ നഗരത്തിൽ ചട്ടങ്ങൾ കാറ്റിൽ പറത്തിക്കൊണ്ട് ഉയർത്തിയ കൊടി തോരണങ്ങളും പ്രചാരണ സാമഗ്രികളും കോർപറേഷൻ അധികൃതർ കണ്ടില്ലെന്ന് നടിക്കുകയാണെന്ന് ബിജെപി കണ്ണൂർ നോർത്ത് ജില്ലാ അധ്യക്ഷൻ കെ.കെ. വിനോദ് കുമാർ ആരോപിച്ചു. പൊതുസ്ഥലങ്ങളിൽ കൊടി തോരണങ്ങളും പ്രചാരണ സാമഗ്രികളും ഉയർത്തണമെങ്കിൽ അധികൃതരുടെ മുൻകൂർ അനുമതി വേണമെന്ന് കോടതി തന്നെ വ്യക്തമാക്കിയ താണ്. എന്നാൽ മുൻകൂട്ടി ഒരു അനുമതിയും വാങ്ങാതെയാണ് മുഖ്യമന്ത്രി പിണറായി വിജയൻ പങ്കെടുക്കുന്ന പരിപാടിയുടെ ഭാഗമായുള്ള കൊടി തോരണങ്ങൾ കണ്ണൂർ നഗരത്തിൽ ഉയർത്തിയിട്ടുള്ളത്. ഇതിൽ നിരോധിത പ്ലാസ്റ്റിക്കുകളും ഫ്ലക്സുകളും ഉൾപ്പെടെ ഉണ്ടെന്നുള്ളത് ആശങ്ക ഉണ്ടാക്കുന്നതാണ്. ഇത്തരത്തിലുള്ള നിയമലംഘനങ്ങൾ നടത്തിയാൽ കോർപറേഷൻ അധികൃതർ തന്നെ നേരിട്ട് എത്തി ഇത്തരം പ്രചാരണ സാമഗ്രികൾ അഴിച്ചു മാറ്റുകയാണ് പതിവ്. അനുമതി വാങ്ങിയിട്ടില്ലെങ്കിൽ പിഴ ഈടാക്കുകയും ചെയ്യാറുണ്ട്. കോടതി ഉത്തരവിന്‍റെ പേരും പറഞ്ഞ് ബിജെപിയുടെ പ്രചാരണസാമഗ്രികൾ പലതവണയായി കോർപറേഷൻ അധികൃതർ നീക്കം ചെയ്തിരുന്നു. എന്നാൽ സിപിഎമ്മിന്‍റെ മാടമ്പി രാഷ്ട്രീയത്തിൽ ഭയം പൂണ്ട കോൺഗ്രസ് നേതൃത്വം നല്കുന്ന കോർപറേഷൻ ഭരിക്കുന്ന യുഡിഎഫ് നടപടി സ്വീകരിക്കാൻ വിമുഖത കാട്ടുകയാണെന്നും വിനോദ് കുമാർ ആരോപിച്ചു.

ലഹരി വിരുദ്ധ ബോധവത്കരണവും അവാർഡ് വിതരണവും

മട്ടന്നൂർ: ഏഷ്യാ ബുക്ക് ഓഫ് റെക്കോർഡ്സിൽ ഇടം പിടിച്ച മട്ടന്നൂർ എയർപോർട്ട് സ്റ്റേഷൻ എഎസ്ഐ ടി. രാജീവൻ വേങ്ങാടിനുള്ള ഔദ്യോഗിക അവാർഡ് വിതരണം മട്ടന്നൂർ പിആർ എൻഎസ്എസ് കോളേജിൽ നടന്നു. കൂത്തുപറമ്പ് എസിപി കെ.വി. പ്രമോദൻ ഉദ്ഘാടനം ചെയ്തു. ചുരുങ്ങിയ സമയം കൊണ്ട് കൂടുതൽ ലഹരി വിരുദ്ധ ബോധവത്കരണ ക്ലാസുകൾ നടത്തിയതിലൂടെയാണ് രാജീവൻ ഏഷ്യാ ബുക്ക് ഓഫ് റെക്കോർഡ്സിൽ ഇടം പിടിച്ചത്. ഔദ്യോഗിക ജോലിക്കിടയിലും ലഹരി വിരുദ്ധ ബോധവത്കരണ പ്രവർത്തനങ്ങൾക്ക് ശക്തമായ നേതൃത്വം നൽകുന്നയാളാണ് രാജീവൻ. ബോധവത്കരണ പ്രവർത്തനം കൂടുതൽ ആഴത്തിൽ പതിയാൻ മാജിക് ഷോയിലൂടെയാണ് പ്രധാനമായും ബോധവത്കരണ പരിപാടി സംഘടിപ്പിക്കുന്നത്. എസിപി കെ.വി. പ്രമോദൻ അവാർഡ് വിതരണം ചെയ്തു. കോളജ് പ്രിൻസിപ്പൽ ഇൻ ചാർജ് ഡോ ആർ.കെ. ബിജു അധ്യക്ഷത വഹിച്ചു. വിമാനത്താവള സ്റ്റേഷൻ സിഐ ടി.വി. പ്രദീഷ്, എൻസിസി ഓഫീസർ പി.വി. അനിൽ, എൻസിസി ഓഫീസർമാരായ കെ.സി. ജയന്തി, ഡോ.വി.പി. സജിനേഷ്, ആന്‍റി ഡ്രഗ്സ് കമ്മിറ്റി കൺവീനവർ ഡോ.അഖിൽ കെ. ശ്രീധർ, ഡോ. സുചിത്ര സുധീർ, റിട്ട. മിലിറ്ററി ഓഫീസർ ഗംഗാധരൻ, വിമാനത്താവള സ്റ്റേഷൻ എസ്ഐ കെ. രമേഷ്,കോളജ് യൂണിയൻ ചെയർമാൻ നിധി ദിനേശ് എന്നിവർ പ്രസംഗിച്ചു. തുടർന്ന് ലഹരി വിരുദ്ധ ബോധവൽക്കരണ മാജിക്കും നടന്നു.

സിപിഎം അണികളും കവർച്ച തുടങ്ങിയെന്ന് രാജീവൻ എളയാവൂർ

കണ്ണൂർ: പിണറായി വിജയൻ സ്വർണക്കടത്തിനും സ്വർണ കവർച്ചയ്ക്കും ഒത്താശ നല്കുമ്പോൾ അണികളും സ്വർണ കവർച്ചയും പിടിച്ചുപറിയും തുടങ്ങിയിരിക്കുകയാണെന്നും അതിന്‍റെ ഉദാഹരണ മാണ് കൂത്തുപറമ്പിൽ സിപിഎം കൗൺസിലർ വയോധികയുടെ സ്വർണമാല കവർച്ച ചെയ്തതെന്ന് കെപിസിസി മെംബർ രാജീവൻ എളയാവൂർ ആരോപിച്ചു. ഓൾ കേരള പെയിന്‍റേഴ്സ് കോൺഗ്രസ് കണ്ണൂർ ജില്ലാ മെംബർഷിപ്പ് കാമ്പയിനും തൊഴിലാളികൾക്കുള്ള ഐഡന്‍റിറ്റി കാർഡ് വിതരണവും ഡിസിസി ഓഡിറ്റോറിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ കോ-ഓർഡിനേറ്റർ കബീർ പയ്യന്നൂർ അധ്യക്ഷത വഹിച്ചു. ജില്ലാ ജനറൽ സെക്രട്ടറി എ. ടി. നിഷാത്ത് മുഖ്യപ്രഭാഷണം നടത്തി. പെയിന്‍റിംഗ് മേഖലയിലെ തൊഴിലാളികൾക്ക് ആരോഗ്യ-അപകട ഇൻഷ്വറൻസ് നടപ്പിലാക്കുന്നതിന് സർക്കാർ തയാറാവണമെന്നും, മുടങ്ങിക്കിടക്കുന്ന 20 മാസത്തെ പെൻഷൻ അടിയന്തരമായി വിതരണം ചെയ്യാൻ നടപടി ഉണ്ടാകണമെന്നും, പെയിന്‍റിംഗ് മേഖലയിൽ കുത്തകകളുടെ കടന്നു കയറ്റം തടയണമെന്നും കൺവൻഷൻ സർക്കാറിനോട് ആവശ്യപ്പെട്ടു.അനൂപ് മാവിലായി, മനോഹരൻ കേളകം, ജോജി ജോസഫ്, ഹരീഷ് കുമാർ മുള്ളിക്കാട്ടിൽ, ദീപേഷ് മമ്മാങ്കുന്ന് എന്നിവർ പ്രസംഗിച്ചു.

ആരും തിരിഞ്ഞുനോക്കാതെ മട്ടന്നൂർ ടൗൺ സ്‌ക്വയർ

മട്ടന്നൂർ: നഗരത്തിലെത്തുന്നവർക്കുള്ള വിനോദ-വിശ്രമ കേന്ദ്രമെന്ന നിലയിൽ നിർമിച്ച മട്ടന്നൂർ ടൗൺസ്‌ക്വയറിൽ ആളനക്കമില്ല. ടൂറിസം വകുപ്പിന്‍റെ നേതൃത്വത്തിലാണ് കോടികൾ ചെലവഴിച്ച് നഗരമധ്യത്തിലെ ഐബി പരിസരത്ത് ടൗൺ സ്‌ക്വയർ നിർമിച്ചത്. മരങ്ങൾക്കിടയിൽ പ്രകൃതി സൗഹൃദ രീതിയിലാണ് കേന്ദ്രം ഒരുക്കിയിട്ടുള്ളത്. എന്നാൽ വളരെ കുറവ് ആളുകൾ മാത്രമാണ് ഇവിടെ എത്തിച്ചേരുന്നത്. കാര്യമായി പൊതുപരിപാടികളും ഇവിടെ നടത്താറില്ല. ആളുകളെത്താത്ത ടൗൺ സ്‌ക്വയറിൽ വാഹനങ്ങൾ പാർക്ക് ചെയ്തിരിക്കുകയാണ്. മുമ്പ് കോവിഡ് ലോക്ക്ഡൗൺ കാലത്ത് അടച്ചിട്ട ഇവിടം കാടുകയറുകയും ഇരിപ്പിടങ്ങൾ ഉൾപ്പടെയുള്ളവ നശിക്കാൻ തുടങ്ങുകയും ചെയ്തിരുന്നു. പ്രതിഷേധം ഉയർന്നതോടെയാണ് ടൗൺ സ്‌ക്വയർ ശുചീകരിച്ചത്. കുട്ടികളുടെ പാർക്കും മറ്റും ആരും ഉപയോഗിക്കാതെ കിടക്കുകയാണ്. ടൗൺ സ്‌ക്വയറിന്‍റെ നടത്തിപ്പ് ഡിടിപിസി മുമ്പ് ലേലത്തിലൂടെ ഒരു സൊസൈറ്റിക്ക് നൽകിയിരുന്നു. ഇവരുടെ നേതൃത്വത്തിലുള്ള ഹോട്ടൽ പ്രവർത്തിക്കുന്നുണ്ട്. നഗരസഭയുടെ ഓപ്പൺ ഓഡിറ്റോറിയത്തിന്‍റെ നിർമാണം ബസ് സ്റ്റാൻഡ് പരിസരത്ത് പുരോഗമിക്കുകയാണ്. ഇത് പൂർത്തിയാകുന്നതോടെ പരിപാടികൾ നടത്താനും ടൗൺ സ്‌ക്വയർ വേണ്ടാതാകും. വൈകുന്നേരവും മറ്റും കനത്ത വെയിൽ അനുഭവപ്പെടുന്നതും ടൗൺ സ്‌ക്വയറിൽ ആളുകൾ എത്തിച്ചേരുന്നതിന് തടസമാകുന്നുണ്ട്. മരങ്ങളും മറ്റും പരിപാലിക്കേണ്ടതിനാൽ മേൽക്കൂര നിർമിച്ചിട്ടില്ല. പരിപാടികൾ നടത്തുന്നതിനുള്ള സ്റ്റേജ് സൗകര്യവും ഇരിപ്പിടങ്ങളും ശൗചാലയവും ഇവിടെയുണ്ട്. സമീപത്ത് കുട്ടികളുടെ പാർക്കും നിർമിച്ചിട്ടുണ്ട്. ഓരോ തദ്ദേശസ്ഥാപനങ്ങളിലും ടൂറിസം കേന്ദ്രം ഒരുക്കാനുള്ള നടപടികളുമായി സർക്കാർ മുന്നോട്ടുപോകുമ്പോഴാണ് നഗരമധ്യത്തിലുള്ള ടൗൺ സ്‌ക്വയർ ആർക്കും വേണ്ടാതെ കിടക്കുന്നത്.

കീഴല്ലൂർ പഞ്ചായത്ത് വികസന സദസ്

മട്ടന്നൂർ: കീഴല്ലൂർ പഞ്ചായത്ത് വികസന സദസ് നടത്തി. എടയന്നൂർ ഗവ.ഹയർ സെക്കൻഡറി സ് കൂളിൽ സംഘടിപ്പിച്ച വികസന സദസ് കെ.കെ. ശൈലജ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.വി. മിനി അധ്യക്ഷത വഹിച്ചു. വികസന പ്രവർത്തനങ്ങളുടെ വീഡിയോ കെ.കെ. ശൈലജ എംഎൽഎ പ്രകാശിപ്പിച്ചു. കേരള സർക്കാരിന്‍റെ വികസന നേട്ടങ്ങളുടെ അവതരണം ഇരിട്ടി ബ്ലോക്ക് പഞ്ചായത്ത് ജോയിന്‍റ് ബിഡിഒ കെ.ബി. പ്രശാന്ത് നിർവഹിച്ചു. വികസന രേഖ എൻ.വി. ചന്ദ്രബാബു എംഎൽഎക്ക് നൽകി പ്രകാശിപ്പിച്ചു. പഞ്ചായത്ത് സെക്രട്ടറി എസ്. അജി റിപ്പോർട്ട് അവതരിപ്പിച്ചു. വിവിധ മേഖലകളിൽ മികവ് തെളിയിച്ചവരെ ആദരിച്ചു. ഇരിട്ടി ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. രതീഷ്, കണ്ണൂർ ജില്ലാ പഞ്ചായത്ത് അംഗം ചന്ദ്രൻ കല്ലാട്ട്, കെ.കെ. പ്രഭാകരൻ, കെ.വി. ഷീജ, കെ. മനോഹരൻ, പി.കെ. ജിഷ, എം. രാജൻ, സി. സജീവൻ, വൈസ് പ്രസിഡന്‍റ് കെ. അനിൽകുമാർ, അസി. സെക്രട്ടറി കെ.വി. രജനി എന്നിവർ പ്രസംഗിച്ചു. തുടർന്ന് നടന്ന ഓപ്പൺ ഫോറത്തിൽ പഞ്ചായത്തിൽ നടപ്പാക്കേണ്ട വികസനങ്ങളും ജനങ്ങൾ നേരിടുന്ന പ്രശ്നങ്ങളും ചർച്ചയായി.

ആറളം പഞ്ചായത്ത് വികസന സദസ്

ഇരിട്ടി : ആറളം പഞ്ചായത്ത് വികസന സദസ് ഡോ. ശിവദാസൻ എംപി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.പി. രാജേഷ് അധ്യക്ഷത വഹിച്ചു. കണ്ണൂർ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ മുഖ്യാഥിതി ആയി. പഞ്ചായത്ത് സെക്രട്ടറി ബാലകൃഷ്ണൻ റിപ്പോർട്ട് അവതരിപ്പിച്ചു. പഞ്ചായത്തിനായി സൗജന്യമായി ഭൂമി വിട്ടു നൽകിയവരെയും ഹരിത കർമ സേന, റോഡ് സ്വീപ്പർമാർ എന്നിവരെയും ആദരിച്ചു. പഞ്ചായത്ത് വൈസ് പ്രസിഡന്‍റ് കെ.ജെ. ജെസി മോൾ, ഇരിട്ടി ജോയിന്‍റ് വിഡിഒ കെ. രമേശൻ, ആസൂത്രണ സമിതി ഉപാധ്യക്ഷൻ വൈ.വൈ. മത്തായി, ഹരിതകേരള മിഷൻ റിസോഴ്സ് പേഴ്സൺ ജയപ്രകാശ് പന്തക്ക, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഇ.സി. രാജു, പഞ്ചായത്ത് അംഗങ്ങളായ യു.കെ. സുധാകരൻ, ഇ.പി. മേരിക്കുട്ടി, ഷീബ രവി, ഷൈൻ ബാബു, യു.എസ്. ബിന്ദു, മിനി ദിനേശൻ എന്നിവർ പ്രസംഗിച്ചു.

അയ്യൻകുന്ന് വില്ലേജിൽ റീ സർവേ നടപടികൾക്ക് ജീവൻ വയ്ക്കുന്നു

ഇരിട്ടി : അയ്യൻകുന്ന് വില്ലേജിലെ റീസർവേ പ്രവൃത്തികൾക്കുള്ള നടപടികൾ ഉടൻ തുടങ്ങും. ഇതുമായി ബന്ധപ്പെട്ട് അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേലിന്‍റെ അധ്യക്ഷതയിൽ ഈ ആഴ്ച യോഗം ചേരും. സർവേയുടെ പ്രാരംഭ നടപടികൾ പൂർത്തിയാക്കാനാണ് ആദ്യയോഗം. 33 വർഷം മുന്പുള്ള ആവശ്യം ഇവിടുത്തെ ജനങ്ങളുടെ വർഷങ്ങളായുള്ള ആവശ്യമായിരുന്നു റീസർവേ. വനമേഖലയോട് അതിർത്തി പങ്കിടുന്ന അയ്യൻകുന്ന് പഞ്ചായത്തിലെ കുടിയേറ്റ കർഷകരുടെ ഭൂമി കൈമാറ്റം ചെയ്യണമെങ്കിൽ നിരാക്ഷേപപത്രം വേണമെന്ന വനംവകുപ്പിന്‍റെ ഉത്തരവിനെ തുടർന്ന് 1992 ൽ ആണ് പ്രദേശവാസികൾ ആദ്യമായി കർമസമിതി രൂപീകരിക്കുന്നത്. ഫോറസ്റ്റ് ജണ്ട കണക്കാക്കി സർവേ നടത്തി കർഷകരുടെ ഭൂമി വനം വകുപ്പിന്‍റെ നിമയത്തിൽനിന്നും ഒഴിവാക്കിത്തരണം എന്നായിരുന്നു ഇവരുടെ ആവശ്യം. അന്നത്തെ എംഎൽഎ ആയിരുന്ന കെ.പി. നൂറുദീന്‍റെ നേതൃത്വത്തിൽ പി.സി. ജോസ് കൺവീനർ ആയി കർമസമിതി പ്രവർത്തനം ആരംഭിക്കുന്നത്. അന്നത്തെ റവന്യൂ മന്ത്രി ആയിരുന്ന കെ.എം. മാണിയെ നേരിൽക്കണ്ട് കാര്യങ്ങൾ ധരിപ്പിച്ചു. തുടർന്നും നിരന്തര പരാതികളുടെ ഫലമായി 1995 ൽ 10 അംഗ പ്രത്യേക സർവേ സംഘത്തെ അയ്യൻകുന്നിലേക്ക് നിയമിക്കുന്നു. ഇതിന്‍റെ എല്ലാം പിന്നിൽ തിരുവനന്തപുരം മുതൽ കണ്ണൂർ വരെ നിരന്തരമായ നിരവധി ഓഫീസുകൾ കയറി ഇറങ്ങേണ്ടി വന്നിട്ടുണ്ട്. മൂർഖൻ പറമ്പിലേക്കും ബാരാപോളിലേക്കും മാറ്റുന്നു അയ്യൻകുന്നിൽ എത്തിയ സർവേ സംഘം പ്രവർത്തനം തുടങ്ങി മാസങ്ങൾക്ക് ഉള്ളിലാണ് ഇവരെ മൂർഖൻ പറമ്പിലേക്കും ബാരാപോളിലേക്കും സർവേ നടപടികൾക്കായി മാറ്റിക്കൊണ്ടുള്ള ഉത്തരവ് വരുന്നത്. ഏറെ പ്രതീക്ഷയോടെ തുടങ്ങിയെങ്കിലും മുളയിലേ നുള്ളിയ ആവശ്യം ഉപേക്ഷിക്കാൻ കർമസമിതിയുടെ അമരക്കാരനായ പി.സി.ജോസ് തയാറായിരുന്നില്ല. പിന്നീട് പലതവണ അനുകൂല ഉത്തരവുകൾ വന്നെങ്കിലും സാങ്കേതിക പ്രശ്നങ്ങൾ തടസമായി. 2021 വീണ്ടും അയ്യൻകുന്നിൽ റീസർവേ നടപടികൾ ആരംഭിക്കാൻ നടപടികൾ പൂർത്തിയായി. അങ്ങാടിക്കടവിൽ ക്യാമ്പ് ഓഫീസ് ആരംഭിച്ചെങ്കിലും വെമ്പുഴ പുഴ പുറമ്പോക്ക് വിവാദത്തിൽപെട്ട് വീണ്ടും സർവേ നടപടികൾ നിലച്ചു. പിന്നീട് അയ്യൻകുന്ന് വില്ലേജ് വിഭജിച്ച് അങ്ങാടിക്കടവ്, കരിക്കോട്ടക്കരി വില്ലേജുകൾ നിലവിൽവന്നു. ഇതിൽ കരിക്കോട്ടക്കരി വില്ലേജിൽ മാത്രം റീ സർവേ നടപടികൾ പൂർത്തിയായെങ്കിലും പ്രശ്നം നിലനിൽക്കുന്ന അങ്ങാടിക്കടവ് വില്ലേജിൽ പഴയ സ്ഥിതി തുടർന്നു. മുഖ്യമന്ത്രിക്ക് പരാതി നൽകി ധർമടത്ത് നടന്ന പരിപാടിയിൽ റീസർവേ ആവശ്യവുമായി പി.സി. ജോസ് മുഖ്യമന്ത്രിക്ക് പരാതി നൽകി. ഇതിന്‍റെ തുടർനടപടിയായാണ് വീണ്ടും അയ്യൻകുന്നിൽ റീസർവേ ആരംഭിക്കുന്നതിന്‍റെ പ്രാരംഭ പ്രവൃത്തികൾ തുടങ്ങിയത്. ആറു മാസം കൊണ്ട് സർവേ നടപടികൾ പൂർത്തിയാക്കാനാണ് പദ്ധതി. സർവേ കൃത്യമായി പൂർത്തിയാക്കുന്നതിന് ഭൂഉടമകളുടെ സഹകരണം കൂടി അധികൃതർ ആവശ്യപ്പെട്ടിട്ടുണ്ട് . ഇതിനായി സ്ഥലത്തിന്‍റെ അതിർത്തികൾ തെളിച്ചുനൽകണം. വസ്തുവിന്‍റെ ആധാരം, ആധാർ കാർഡ് തുടങ്ങിയ രേഖകൾ സർവേ അധികൃതർക്ക് ഭൂ ഉടമകൾ നൽകണമെന്നും അധികൃതർ അറിയിച്ചു.1992 ആരംഭിച്ച കർമസമിതിയുടെ കമ്മിറ്റിക്കാരിൽ നാലുപേർ മാത്രമാണ് ഇന്ന് അവശേഷിക്കുന്നത്.

തളിപ്പറന്പ് കൗൺസിൽ യോഗത്തിൽ പ്രതിപക്ഷ പ്രതിഷേധം

തളിപ്പറമ്പ്: ആക്രി വില്പനയില്‍ ക്രമക്കേട് നടത്തിയെന്ന് ആരോപണവുമായി ബന്ധപ്പെട്ട വിഷയത്തിൽ നഗരസഭാ കൗൺസിൽ യോഗത്തിൽ പ്രതിപക്ഷ കൗൺസിലർമാർ പ്ലക്കാര്‍ഡുകൾ ഉയര്‍ത്തി പ്രതിഷേധിച്ചു. സംഭവത്തിൽ സസ്‌പെന്‍റ് ചെയ്യപ്പെട്ട ജീവനക്കാരന്‍റെ വിശദീകരണം ഇന്നലെ നടന്ന കൗണ്‍സില്‍ യോഗം പരിഗണിച്ചിരുന്നു.ഇതേ ചൊല്ലി ഭരണ-പ്രതിപക്ഷാംഗങ്ങള്‍ തമ്മിൽ വാക്ക് തർക്കം നടന്നിരുന്നു. ഇതിനിടയിലാണ് പ്രതിപക്ഷ കൗൺസിലർമാർ പ്ലക്കാര്‍ഡുകല്‍ ഉയര്‍ത്തി പ്രതിഷേധിച്ചത്. പ്രശ്‌നവുമായി ബന്ധപ്പെട്ട് നഗരസഭ ക്ലാര്‍ക്ക് വി.വി. ഷാജിയെ മുന്‍സിപ്പല്‍ ജോയിന്‍റ് ഡയറക്ടര്‍ അന്വേഷണ വിധേയമായി സസ്‌പെന്‍റ് ചെയ്തിരുന്നു. പ്രശ്‌നം ചര്‍ച്ചയ്ക്ക് വന്ന ഉടന്‍ പ്രതിപക്ഷ കൗണ്‍സിലര്‍മാര്‍ സ്‌ക്രാപ് ലേലം അഴിമതിയുടെ പങ്കുപറ്റിയവര്‍ രാജിവയ്ക്കുക എന്ന പ്ലക്കാര്‍ഡുകല്‍ ഉയര്‍ത്തി പ്രതിഷേധിക്കുകയായിരുന്നു. പ്രതിപക്ഷത്തെ സിപിഎം അംഗം സി.വി. ഗിരീശനും വൈസ് ചെയര്‍മാന്‍ കല്ലിങ്കീല്‍ പദ്മനാഭനും മറ്റ് കൗൺസിൽ അംഗങ്ങളും തമ്മിൽ ഇതിന്‍റെ പേരില്‍ വാക്ക് തർക്കവും നടന്നു. ഒടുവില്‍ പ്രതിപക്ഷ ത്തിന്‍റെ വിയോജനക്കുറിപ്പോടെ അജൻഡ് അംഗീകരിച്ചു.

കർഷക പ്രതിഷേധ വാഹന ജാഥ സമാപിച്ചു

ഇരിട്ടി: കാർഷിക മേഖലയിലെ കർഷകരുടെ ബുദ്ധിമുട്ടുകൾ തുറന്നു കാട്ടിയും , കേന്ദ്ര-സംസ്ഥാന സർക്കാരുകൾ കർഷകരോട് കാണിക്കുന്ന അവഗണനയിൽ പ്രതിഷേധിച്ചും കർഷക കോൺഗ്രസ് കണ്ണൂർ ജില്ലാ പ്രസിഡന്‍റ് ജോസ് പൂമല നയിച്ച കർഷക പ്രതിഷേധ വാഹന ജാഥ ഇരിട്ടിയിൽ സമാപിച്ചു. കാർഷിക മേഖലയുടെ അധ:പതനം രാജ്യത്തിന്‍റെ സമ്പദ്ഘടനയെ തകർക്കുമെന്ന് കെപിസിസി ജനറൽ സെക്രട്ടറി സോണി സെബാസ്റ്റ്യൻ പറഞ്ഞു. ഇരിട്ടിയിൽ നടന്ന യോഗത്തിൽ കർഷക കോൺഗ്രസ് പേരാവൂർ നിയോജക മണ്ഡലം പ്രസിഡന്‍റ് അഗസ്റ്റിൻ വടക്കേൽ അധ്യക്ഷത വഹിച്ചു. കെപിസിസി ജനറൽ സെക്രട്ടറി ചന്ദ്രൻ തില്ലങ്കേരി, ഇരിട്ടി കോൺഗ്രസ് ബ്ലോക്ക് പ്രസിഡന്‍റ് പി.എ. നസീർ, തോമസ് വർഗീസ്, എം.ഒ. ചന്ദ്രശേഖരൻ, എ.ജെ. തോമസ്, ജോണി മുണ്ടയ്ക്കൽ, ജോയ് വേളുപുഴ, സോമൻ ആറളം, ടെൻസൻ ജോർജ്, ബിജു സാമുവേൽ, ബിനു സാമ്പ്രിക്കൽ, എം.വി. ശിവദാസൻ, റോയി ഈറ്റക്കൽ, എം. ദാസൻ, എം. രാജു തുടങ്ങിയവർ പ്രസംഗിച്ചു.

പഞ്ചായത്ത് വികസന സദസുകൾ നടത്തി

പെരിങ്ങോം: ഭരണസമിതിയുടെ അഞ്ചു വർഷത്തെ വികസന നേട്ടങ്ങൾ അവതരിപ്പിച്ച് സംഘടിപ്പിച്ച പെരിങ്ങോം-വയക്കര ഗ്രാമപഞ്ചായത്ത് വികസന സദസ് മുൻ എംഎൽഎ കെ.പി. സതീഷ് ചന്ദ്രൻ ഉദ്ഘാടനം ചെയ്തു. ഇനി നടപ്പിലാക്കേണ്ട പദ്ധതികളും കൂടുതൽ മെച്ചപ്പെടുത്തേണ്ട മേഖലകളും വികസന പരിപാടി കളും ഓപ്പൺ ഫോറത്തിൽ ഉയർന്നുവന്നു. സദസിന്‍റെ ഭാഗമായി കെ സ്മാർട്ട് സേവനം ലഭ്യമാക്കി യിരുന്നു. പഞ്ചായത്ത് പരിസരത്ത് നടന്ന പരിപാടിയിൽ പഞ്ചായത്ത് പ്രസിഡന്‍റ് വി.എം. ഉണ്ണികൃഷ്ണൻ അധ്യക്ഷത വഹിച്ചു. പയ്യാവൂർ : പയ്യാവൂർ പഞ്ചായത്ത് വികസന സദസ് ഉദ്ഘാടനവും വികസന രേഖ പ്രകാശനവും കണ്ണൂർ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ നിർവഹിച്ചു. പഞ്ചായത്ത് പ്രസിഡന്‍റ് സാജു സേവ്യർ അധ്യക്ഷത വഹിച്ചു. പയ്യാവൂർ ബസ് സ്റ്റാൻഡ് പരിസരത്ത് നടത്തിയ പരിപാടിയിൽ പഞ്ചായത്ത് വൈസ് പ്രസിഡന്‍റ് പ്രീത സുരേഷ്, സ്ഥിരം സമിതി അധ്യക്ഷരായ മോഹനൻ, ഷീന ജോൺ, ആസൂത്രണ സമിതി ഉപാധ്യക്ഷൻ കെ.ടി. അനിൽകുമാർ, രാഷ്ട്രീയ കക്ഷി പ്രതിനിധികൾ എന്നിവർ പങ്കെടുത്തു. കാങ്കോൽ: കാങ്കോല്‍- ആലപ്പടമ്പ് ഗ്രാമപഞ്ചായത്ത് വികസന സദസ് ടി.ഐ. മധുസൂദനന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് ഓഡിറ്റോറിയത്തില്‍ പ്രസിഡന്‍റ് എം.വി. സുനില്‍ കുമാര്‍ അധ്യക്ഷത വഹിച്ചു. പഞ്ചായത്തിന്‍റെ വികസന നേട്ടങ്ങള്‍ ഉള്‍ക്കൊള്ളിച്ച 'പടവുകള്‍' പ്രോഗ്രസ് റിപ്പോര്‍ട്ട് എംഎല്‍എ ഗ്രാമപഞ്ചായത്ത് മുന്‍ വൈസ് പ്രസിഡന്‍റ് കെ.പി. രാഘവനു നല്‍കി പ്രകാശനം ചെയ്തു. പരമ്പരാഗത ജലസ്രോതസുകളുടെ പുനരുദ്ധാരണം, എല്ലാ വാര്‍ഡുകളിലും പച്ചത്തുരുത്ത്, വനവത്കരണം, പൊതു കുളങ്ങളുടെ നിര്‍മാണം, 'പാതയോരം മനോഹരം' പദ്ധതി നടപ്പാക്കല്‍, നീര്‍ച്ചാലുകളുടെ നവീകരണം, തോടുകളുടെ പാര്‍ശ്വഭിത്തി നിര്‍മാണം എന്നിങ്ങനെയുള്ള പദ്ധതികളും കൂടുതല്‍ മെച്ചപ്പെടുത്തേണ്ട മേഖലകളും ശ്രദ്ധയൂന്നേണ്ട വികസന പരിപാടികളും ഓപ്പണ്‍ ഫോറത്തില്‍ ഉയര്‍ന്നുവന്നു.

കെഎസ്എസ്പിഎ നിടിയേങ്ങ മണ്ഡലം വാർഷിക സമ്മേളനം

നിടിയേങ്ങ: കെഎസ്എസ്പിഎ നിടിയേങ്ങ മണ്ഡലം വാർഷിക സമ്മേളനത്തിന്‍റെയും പുതിയ ഭാരവാഹികളെ തെരഞ്ഞെടുക്കൽ ചടങ്ങിന്‍റേയും ഉദ്ഘാടനം ശ്രീകണ്ഠപുരം നഗരസഭാധ്യക്ഷ ഡോ.കെ.വി. ഫിലോമിന നിർവഹിച്ചു. നിടിയേങ്ങ മണ്ഡലം പ്രസിഡന്‍റ് കെ.വി. കുഞ്ഞിരാമൻ അധ്യക്ഷത വഹിച്ചു. കെ. രാമകൃഷ്ണൻ മുഖ്യ പ്രഭാഷണം നടത്തി. ജോസ് സക്കറിയ ക്ലാസുകൾ നടത്തി. സി.വി. ലക്ഷ്മണൻ, പി.പി. ചന്ദ്രാഗദൻ, അപ്പു കണ്ണാവിൽ, എം.പി. കുഞ്ഞിമൊയ്‌ദീൻ, ജോസഫീന വർഗീസ്, ജിയോ ജേക്കബ് എന്നിവർ പ്രസംഗിച്ചു.

ചെറുപുഴയിൽ യംഗ് ഇന്ത്യ ജില്ലാതല ഉദ്ഘാടനം

ചെറുപുഴ: യൂത്ത് കോൺഗ്രസ് സംഘടനാ സംവിധാനം ശക്തിപ്പെടുത്തുന്നതിനും പഞ്ചായത്ത് തെരഞ്ഞെടുപ്പിന്‍റെ ഒരുക്കങ്ങൾ വിലയിരുത്തുന്നതിനും വേണ്ടി യൂത്ത്‌ കോൺഗ്രസ് കണ്ണൂർ ജില്ലാ കമ്മിറ്റിയുടെ നേതൃത്വത്തിൽ നടത്തുന്ന യംഗ് ഇന്ത്യ 2.0 എന്ന പരിപാടിക്ക് ചെറുപുഴയിൽ തുടക്കമായി. യൂത്ത്‌ കോൺഗ്രസ് ദേശീയ സെക്രട്ടറി ഷംസീർ അൻസാരി ഖാൻ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് നവനീത് നാരായണൻ അധ്യക്ഷത വഹിച്ചു. ജില്ലാ പ്രസിഡന്‍റ് വിജിൻ മോഹനൻ, മുതിർന്ന കോൺഗ്രസ്‌ നേതാവ് വി. കൃഷ്ണൻ, മഹേഷ്‌ കുന്നുമ്മൽ, കെ.കെ. സുരേഷ് കുമാർ, ഉമ്മർ പെരിങ്ങോം, ടി.പി. ചന്ദ്രൻ, രവി പൊന്നംവയൽ, എ.കെ. രാജൻ, പ്രണവ് തട്ടുമ്മൽ, പ്രണവ് കരേള, ഡെൽജോ എം. ഡേവിഡ്, വൈശാഖ് ഏറ്റുകുടുക്ക, അരുൺ ആലയിൽ, ദിലിൻ വിത്തൻ തുടങ്ങിയവർ പ്രസംഗിച്ചു.

ഉണ്ണിമിശിഹാ പള്ളിക്ക് തറക്കല്ലിട്ടു

ശ്രീകണ്ഠപുരം: ശ്രീകണ്ഠപുരം ഉണ്ണിമിശിഹാ തീർഥാടന പള്ളിയുടെ തറക്കല്ലിടൽ കർമവും സമ്പൂർണ മാതൃവേദി ഇടവക പ്രഖ്യാപനവും നടന്നു. തിരുക്കർമങ്ങൾക്ക് തലശേരി ആർച്ച് ബിഷപ് മാർ. ജോസഫ് പാംപ്ലാനി മുഖ്യകാർമികത്വം വഹിച്ചു. തലശേരി അതിരൂപത ചാൻസലർ ഫാ. ജോസഫ് മുട്ടത്ത്കുന്നേൽ, വികാരി ഫാ. ജോസഫ് മഞ്ചപ്പിള്ളിൽ, അസി. വികാരി ഫാ. മാർട്ടിൻ പാഴൂപ്പറമ്പിൽ എന്നിവർ സഹകാർമികരായിരുന്നു. 2010 ൽ സ്ഥാപിതമായ ശ്രീകണ്ഠപുരം ഇടവകയുടെ അനേക നാളുകളായുള്ള സ്വപ്നമാണ് യാഥാർഥ്യമാകുന്നത്. ഇടവകയിലെ മുഴുവൻ അമ്മമാരേയും മാതൃവേദിയിൽ അംഗങ്ങളാക്കി എന്ന അപൂർവ നേട്ടവും സ്വന്തമാക്കുകയാണ് ശ്രീകണ്ഠപുരം ഇടവക. തിരുക്കർമങ്ങൾക്ക് ശേഷം സ്നേഹവിരുന്നും ഉണ്ടായിരുന്നു.

കരുവഞ്ചാൽ-കുറ്റിപ്പുഴ-നെല്ലിപ്പാറ റോഡ് തകർന്നു

ആലക്കോട്: രണ്ടു പതിറ്റാണ്ട് മുന്പ് പൊതുമരാമത്ത് വകുപ്പ് ഏറ്റെടുത്ത് നിർമിച്ച കരുവഞ്ചാൽ-കുറ്റിപ്പുഴ- നെല്ലിപ്പാറ റോഡ് തകർന്നു. എട്ടുകിലോ മീറ്ററുള്ള റോഡ് തകർന്നിട്ടും അറ്റകുറ്റപ്പണികൾ നടത്തി സഞ്ചാരയോഗ്യമാക്കാൻ അധികൃതർ തയാറാകുന്നില്ലെന്നാണു നാട്ടുകാർ പറയുന്നത്. നിരവധി തവണ പരാതി നൽകിയിട്ടും അധികൃതർ തിരിഞ്ഞു നോക്കുന്നില്ലെന്ന ആക്ഷേപമുണ്ട്. തുടർച്ചയായുള്ള മഴ റോഡിൽ കുഴികൾ രൂപപ്പെട്ട് അപകടാവസ്ഥയ്ക്ക് കാരണമാവുന്നുണ്ട്. ഇരുചക്രവാഹനങ്ങൾ അപകടത്തിൽപ്പെടുന്നത് നിത്യസംഭവമായിരിക്കുന്നു. റോഡ് റീടാറിംഗ് നടത്തി എത്രയും വേഗം നവീകരിക്കണമെന്നും ഗ്രാമീണ മേഖലയിലൂടെ കടന്നുപോകുന്ന ഈ റോഡിലൂടെ ബസ് സർവീസ് ആരംഭിക്കണമെന്നുമാണ് നാട്ടുകാരുടെ ആവശ്യം.

കാണാതായ യുവാവിനെ പുഴയിൽ മരിച്ച നിലയിൽ കണ്ടെത്തി

മട്ടന്നൂർ: കാണാതായ യുവാവിനെ പുഴയിൽ മരിച്ച നിലയിൽ കണ്ടെത്തി. ആയിപ്പുഴ ബസ് സ്റ്റോപ്പിനു സമീപത്തെ കെ.വി ഹൗസിൽ വി. മർസൂക്ക്-കെ.വി. നസീമ ദമ്പതികളുടെ മകൻ കെ.വി. സഫ്രാനെയാണ് (29) മരിച്ചനിലയിൽ കണ്ടെത്തിയത്. കഴിഞ്ഞ 16ന് രാത്രി 7.30ന് പുറത്തു പോയി വരാമെന്നു പറഞ്ഞു വീട്ടിൽ നിന്ന് ഇറങ്ങിയതായിരുന്നു. തിരിച്ചെത്താത്തതിനെ തുടർന്നു വീട്ടുകാർ മട്ടന്നൂർ പോലീസിൽ പരാതി നൽകി. ബന്ധുക്കളും പോലീസും ചേർന്ന് അന്വേഷണം നടത്തുന്നതിനിടെയാണ് പട്ടാന്നൂർ നിടുകുളം പുഴയോരത്ത് മൃതദേഹം കണ്ടെത്തിയത്. ഇന്നലെ രാവിലെയാണു വെള്ളത്തിൽ പൊങ്ങിക്കിടക്കുന്ന നിലയിൽ മൃതദേഹം കണ്ടത്. മട്ടന്നൂർ പോലീസ് സ്ഥലത്തെത്തി ഇൻക്വസ്റ്റ് നടത്തി. വിദേശത്തായിരുന്ന സഫ്രാൻ രണ്ടുവർഷം മുമ്പാണു നാട്ടിലെത്തിയത്. ലോഡിംഗ് തൊഴിൽ ചെയ്തു വരികയായിരുന്നു. സഹോദരങ്ങൾ: അഫ്ത്താർ, സഫ്രീന.

പ്രാപ്പൊയിലിന്‍റെ പവറിൽ പയ്യന്നൂരിന് കിരീടം

തലശേരി: ജില്ലാ കായിക മേളയില്‍ പ്രാപ്പൊയില്‍ സ്‌കൂളിന്‍റെ പവറിൽ പയ്യന്നൂര്‍ ഉപജില്ല തുടര്‍ച്ചയായി ചാന്പ്യന്‍ഷിപ്പ് നിലനിര്‍ത്തി. എതിരാളികള്‍ക്കു പോലും പിന്തുടരാന്‍ കഴിയാതെ 27 സ്വര്‍ണവും 16 വെള്ളിയും16 വെങ്കല്ലവും കരസ്ഥമാക്കി 230 പോയിന്‍റുകള്‍ നേടിയാണ് പയ്യന്നൂർ കിരീടം നിലനിര്‍ത്തിയത്. ഒമ്പത് സ്വര്‍ണവും ഏഴു വെള്ളിയും ഒമ്പതു വെങ്കല്ലവുമായി 81.25 പോയിന്‍റുള്ള മട്ടന്നൂര്‍ ഉപജില്ല രണ്ടാംസ്ഥാനവും, ആറ് സ്വർണവും 10 വെള്ളിയും 12 വെങ്കല്ലുമായി 74 പോയിന്‍റോടെ ഇരിട്ടി ഉപജില്ല മൂന്നാമതെത്തി. 11 സ്വര്‍ണവും നാല് വെള്ളിയും ഒരു വെങ്കല്ലവുമായി 68 പോയിന്‍റിനേടി സ്‌കൂള്‍ തലത്തില്‍ പയ്യന്നൂര്‍ പ്രാപ്പൊയില്‍ ഗവ. എച്ച്എസ്എസ് ഒന്നാം സ്ഥാനം കരസ്ഥമാക്കി ഒന്നാമതായി. പയ്യന്നൂര്‍ ഉപജില്ലയ്ക്ക് തുടര്‍ച്ചയായി കിരീടം നിലനിര്‍ത്താന്‍ പ്രാപ്പൊയില്‍ സ്‌കൂളിന്‍റെ പോരാട്ടം നിര്‍ണായകമായി. എട്ട് സ്വര്‍ണവും മൂന്നു വെള്ളിയും രണ്ട് വെങ്കല്ലവുമായി 51 പോയിന്‍റുമായി മട്ടന്നൂര്‍ എച്ച്എസ്എസ് രണ്ടാംസ്ഥാനവും, ആറ് സ്വര്‍ണവും ഒരു വെള്ളിയും രണ്ട് വെങ്കല്ലവുമായി 35 പോയിന്‍റുകള്‍ നേടി കരിവെള്ളൂര്‍ എ.വി.എസ് ഗവ. ഹയര്‍സെക്കന്‍ഡറി സ്‌കൂള്‍ മൂന്നാം സ്ഥാനവും കരസ്ഥമാക്കി. മൂന്നു ദിനങ്ങളിലായി നടന്ന കായിക മേളയില്‍ 22 റിക്കാർഡുകളാണ് പഴങ്കഥയായത്. സമാപന സമ്മേളനം ഉദ്ഘാടനവും സമ്മാന വിതരണവും തലശേരി നഗരസഭ വൈസ് ചെയര്‍മാന്‍ എം.വി. ജയരാജന്‍ നിര്‍വഹിച്ചു. കണ്ണൂര്‍ വിദ്യാഭ്യാസ ഉപഡയറക്ടര്‍ ഡി. ഷൈനി അധ്യക്ഷത വഹിച്ചു. നഗരസഭാ അംഗങ്ങളായ കെ.എം. ശ്രീശന്‍, ടി.വി. റാഷിദ, ജില്ലാ വിദ്യാഭ്യാസ ഓഫിസര്‍ പി. ശകുന്തള, കണ്ണൂര്‍ ആര്‍ഡിഎസ്ജിഎ സെക്രട്ടറി എന്‍.പി. ബിനീഷ്, തലശേരി നോര്‍ത്ത് ഉപജില്ലാ വിദ്യാഭ്യാസ ഓഫിസര്‍ എ. പ്രശാന്ത് എന്നിവർ പ്രസംഗിച്ചു. സമാപനദിനത്തില്‍ റിക്കാർഡ് മഴ തലശേരി: ജില്ലാ റവന്യൂ സ്‌കൂള്‍ കായികമേളയുടെ സമാപനദിനത്തില്‍ പിറന്നത് 10 മീറ്റ് റിക്കാർഡുകള്‍. സബ് ജൂണിയര്‍ ആണ്‍കുട്ടികളുടെ ഡിസ്‌കസ്‌ ത്രോയില്‍ കൂത്തുപറമ്പ് റാണി ജയ് എച്ച്എസ്എസ് എട്ടാം ക്ലാസ് വിദ്യാര്‍ഥി വി.വി മുഹമ്മദ് ജസാഹ്. 35.15 മീറ്റര്‍ എറിഞ്ഞാണ് മീറ്റ് റിക്കാർഡ് തകര്‍ത്തത്. സീനിയര്‍ പെണ്‍കുട്ടികളുടെ മൂന്ന് കിലോമീറ്റര്‍ നടത്തത്തില്‍ മാത്തില്‍ ഗവ. ഹയര്‍സെക്കന്‍ഡറി സ്‌കൂള്‍ പ്ലസ് ടു വിദ്യാര്‍ഥിനി പി.വി നിരഞ്ജന 15 മിനിറ്റ് 26.44 സെക്കന്‍ഡിലാണ് റിക്കാർഡ് മറികടന്നത്. സീനിയര്‍ ആണ്‍കുട്ടികളുടെ ട്രിപ്പിള്‍ ജന്പിൽ കുതിപ്പുമായി പേരാവൂര്‍ സെന്‍റ് ജോസഫ് എച്ച്എസ്എസിലെ അല്‍ബിന്‍ ഇമ്മാനുവല്‍ ഷൈജന്‍. 2014 ല്‍ കണ്ണാടിപ്പറമ്പ് ജിഎച്ച്എസ്എസിലെ വി. രാഹുലിന്‍റെ 13.31 മീറ്റര്‍ നേട്ടമാണ് ആല്‍ബിന്‍ തിരുത്തിയത്. 13.54 മീറ്ററാണ് പുതിയ നേട്ടം. പേരാവൂര്‍ ചേരുംതടത്തില്‍ സി. ഷൈജന്‍റേ യും സിജിയുടെയും മകനാണ് ആല്‍ബിന്‍. മൂന്ന് റിക്കാർഡുകളുടെ തിളക്കത്തിലാണ് കരിവള്ളൂര്‍ എവിഎസ്ജിഎച്ച്എസ്എസിലെ പ്ലസ് വണ്‍ വിദ്യാര്‍ഥി കെ. അഭിനവ്. ജൂണിയര്‍ വിഭാഗം 400 മീറ്റര്‍ ഓട്ടം, 400 മീറ്റര്‍ ഹര്‍ഡില്‍സ്, 110 മീറ്റര്‍ ഹര്‍ഡില്‍സ് എന്നിവയിലാണ് നേട്ടം കൊയ്തത്. പയ്യന്നൂര്‍ കണ്ടോത്ത് കാഞ്ഞിരക്കില്‍ കെ. വിജയ കുമാറിന്‍റെയും ടി. പ്രവീണയുടെയും മകനാണ്. സബ്ജൂണിയര്‍ പെണ്‍കുട്ടികളുടെ ഡിസ്‌കസ് ത്രോയില്‍ റിക്കോർഡിട്ട് മമ്പറം എച്ച്എസ്എസിലെ എട്ടാം ക്ലാസ് വിദ്യാര്‍ഥിനി ബി.കെ അന്‍വിക. 34.75 മീറ്റര്‍ ആണ് പുതിയ റിക്കാർഡ്. ആണ്‍കുട്ടികളുടെ ജൂണിയര്‍ ബോയ്‌സ് ത്രിപ്പിള്‍ ജംപ് മത്സരത്തില്‍ ജിഎച്ച്എസ്എസ് പ്രപൊയില്‍ 10 ക്ലാസ് വിദ്യാര്‍ഥി അഭിനവ് മനോജ് 13.01 സെക്കൻഡില്‍ റിക്കാർഡ് നേടി. സബ് ജൂണിയര്‍ ബോയ്‌സ് 200 മീറ്റര്‍ ഓട്ടത്തില്‍ തിരുവങ്ങാട് ഗവ എച്ച്എസ്എസിലെ കെ.കെ ഇഷാന്‍ മീറ്റ് റിക്കാർഡോടെ സ്വര്‍ണം നേടി. സീനിയര്‍ ബോയ്‌സ് 400 മീറ്റര്‍ ഹഡില്‍സില്‍ തോട്ടട എസ്എന്‍ ട്രസ്റ്റ് എച്ച്എസ്എസിലെ സങ്കീര്‍ത്ത് വിനോദ് 54.3 സെക്കൻഡ് കൊണ്ട് മീറ്റ് റിക്കാർഡ് മറികടന്നു. സീനിയര്‍ ബോയ്‌സ് 200 മീറ്റര്‍ ഓട്ടത്തില്‍ മമ്പറം എച്ച്എസ്എസിലെ എ.എം ഷാരോണ്‍ കൃഷ്ണ 22.59 സെക്കൻഡ് കൊണ്ട് മോറാഴ ജിവിഎച്ച്എസ്എസിലെ പി.പി വിനീത് 2012 ല്‍ സ്ഥാപിച്ച 22.75 എന്ന മീറ്റ് റിക്കോർഡ് മറികടന്നു.ജൂണിയർ ഗേൾസ് 200 മീറ്റർ ഓട്ടത്തിൽ തലശേരി സായിയിലെ 25. 16 സെക്കൻഡ് മീറ്റ് റിക്കാർഡിട്ടു. സായിയിലെ തന്നെ ഡെൽന ഫിലിപിന്‍റെ 26. 48 സെക്കൻഡാണ് തിരുത്തിയത്.

വെസ്റ്റേൺ ഇന്ത്യ പ്ലൈവുഡ്സിന്‍റെ മരമില്ലിൽനിന്ന് കാൽക്കോടിയുടെ യന്ത്ര ഭാഗങ്ങൾ കവർന്ന പ്രതികൾ അറസ്റ്റിൽ

തലശേരി: വെസ്റ്റേൺ ഇന്ത്യ പ്ലൈവുഡ്സിന്‍റെ മരമില്ലിൽ നിന്ന് കാൽക്കോടിയുടെ യന്ത്രഭാഗങ്ങൾ കവർന്ന കേസിലെ പ്രതികൾ അറസ്റ്റിൽ. കൊടുവള്ളി വീനസ് കോർണറിലെ സിറ്റി സെന്‍ററിന് പിറകിലുള്ള സതേൺ വിനീയേഴ്സ് ആൻഡ് വുഡ് വർക്സ് സ്ഥാപനത്തിൽ നടത്തിയ കവർച്ചയിലാണ് സെക്യൂരിറ്റി ജീവനക്കാരൻ കതിരൂർ ആറാം മൈലിലെ കനകരാജ് (64 ), പാട്യത്തെ മാരി ശെൽവം (30), വടകര പുറമേരിയിലെ വി. സന്തോഷ് കുമാർ (29), എന്നിവർ അറസ്റ്റിലായത്. പ്രതികളെ കോടതി റിമാൻഡ് ചെയ്തു.ദീർഘകാലമായി അടച്ചിട്ട സ്ഥാപനത്തിലാണ് കവർച്ച നടന്നത്. പരാതി രജിസ്റ്റർ ചെയ്ത പോലീസ് രണ്ടുദിവസം കൊണ്ട് പ്രതികളെ പിടികൂടുകയായിരുന്നു. കഴിഞ്ഞ ദിവസമാണ് 25 ലക്ഷം രൂപ വില വരുന്ന മെഷീനറികൾ കാണാനില്ലെന്ന് കാണിച്ച് കമ്പനി മാനേജർ പിണറായി പാണ്ട്യാല മുക്കിലെ ശ്രുതിലകത്തിൽ രാജഗോപാലൻ നായർ പരാതി നല്കിയത്. കഴിഞ്ഞ ഓഗസ്റ്റ് 30 നും ഒക്ടോബർ 13 നും ഇടയിലുള്ള ഏതോ സമയത്താണ് കളവ് നടന്നതെന്നായിരുന്നു സൂചന. കമ്പനിയിൽ മരങ്ങൾ ഈർച്ച നടത്താൻ വേണ്ടി തടികൾ മെഷീനിലേക്ക് ഉരുട്ടിക്കൊണ്ടുപോകുന്ന റെയിലിന്‍റെ ഒരു ഭാഗവും മരം ഉരുട്ടാൻ ഉപയോഗിക്കുന്ന ഇരുമ്പിന്‍റെ നാല് ടയറുകളും സ്റ്റാൻഡും ഉൾപ്പെടെയുള്ള അനുബന്ധ ഉരുപ്പടികളുമാണ് കവർച്ച നടത്തിയതായി കണ്ടെത്തിയത്. ഒന്നിൽ കൂടുതൽ പേർ എത്തിയാൽ മാത്രമേ ഏറെ ഭാരമുള്ള യന്ത്രഭാഗങ്ങൾ കടത്തിക്കൊണ്ടുപോകാനാവു എന്ന നിഗമനത്തിൽ ആദ്യം കമ്പനിയിലെ സെക്യൂരിറ്റിക്കാരനെയാണ് ചോദ്യം ചെയ്തത്. ചില സൂചനകൾ ലഭിച്ചതോടെ ആക്രിക്കച്ചവടക്കാരായ മറ്റ് പ്രതികളിലേക്കും അന്വേഷണസംഘം നീങ്ങുകയായിരുന്നു. തൊണ്ടി മുതലുകളിൽ ഒരു ഭാഗം വടകര പുറമേരി വെള്ളൂരിലെ ആക്രിക്കടയിൽ നിന്നും പോലീസ് വീണ്ടെടുത്തു. പ്രമുഖ പ്ലൈവുഡ് വ്യവസായിയായിരുന്ന എ.കെ. കാദർകുട്ടി സാഹിബായിരുന്നു മരമില്ലിന്‍റെ സ്ഥാപകൻ.

ചാലോട് ചൈതന്യം മുത്തപ്പൻ മടപ്പുരയിൽ ഭണ്ഡാരം തകർത്തു മോഷണം

മട്ടന്നൂർ: ചാലോട് ചൈതന്യം മുത്തപ്പൻ മടപ്പുരയിൽ ഭണ്ഡാരം തകർത്ത് മോഷണം. ക്ഷേത്രത്തിലെ രണ്ടു ഭണ്ഡാരങ്ങളുടെ പൂട്ടു പൊളിച്ചാണു പണം കവർന്നത്. ചാലോട് ടൗണിൽ ഇരിക്കൂർ റോഡിലെ ചൈതന്യം മുത്തപ്പൻ മടപ്പുരയിലാണു വ്യാഴാഴ്ച രാത്രി മോഷണം നടന്നത്. ക്ഷേത്രത്തിനോടു ചേർന്നു മുന്നിൽ സ്ഥാപിച്ച ഭണ്ഡാരത്തിലെയും റോഡിനോടു ചേർന്ന് മതിലിൽ സ്ഥാപിച്ച ഭണ്ഡാരത്തിലെയുമാണു പണം കവർന്നത്. ഇന്നലെ രാവിലെ ക്ഷേത്രം ഭാരവാഹികൾ സ്ഥലത്തെത്തിയപ്പോഴാണു മോഷണം ശ്രദ്ധയിൽപെട്ടത്. ഒരുമാസത്തോളമായി ഭണ്ഡാരം തുറക്കാത്തതെന്ന് ക്ഷേത്രം ഭാരവാഹികൾ പറഞ്ഞു. മുമ്പും ക്ഷേത്രത്തിലെ ഭണ്ഡാരം പൊളിച്ചു മോഷണം നടത്തിയിരുന്നു. ക്ഷേത്രം ഭാരവാഹികൾ പരാതി നൽകിയതിനാൽ മട്ടന്നൂർ പോലീസ് സ്ഥലത്തെത്തി അന്വേഷണം ആരംഭിച്ചു.

മട്ടന്നൂരിൽ വൻ എംഡിഎംഎ വേട്ട; ഒരാൾ അറസ്റ്റിൽ

മട്ടന്നൂർ: ലക്ഷങ്ങൾ വിലമതിക്കുന്ന എംഡിഎംഎയുമായി യുവാവ് മട്ടന്നൂർ പോലീസിന്‍റെ പിടിയിലായി. ന്യൂമാഹി സ്വദേശി യു.കെ. റിഷാബിനെ (31) ആണ് 52 ഗ്രാമോളം എംഡിഎംഎയുമായി അറസ്റ്റു ചെയ്തത്. ഇന്നലെ പുലർച്ചെ അഞ്ചരയോടെ മട്ടന്നൂർ-ഇരിട്ടി റോഡിൽ പാലോട്ടുപള്ളിയിൽ നിന്നാണ് ഇയാളെ പിടികൂടിയത്. രഹസ്യവിവരത്തിന്‍റെ അടിസ്ഥാനത്തിൽ മട്ടന്നൂർ എസ്ഐ സി.പി. ലിനേഷും സംഘവും നടത്തിയ വാഹന പരിശോധനയിലാണു യുവാവ് എംഡിഎംഎയുമായി പിടിയിലായത്. ബംഗളൂരുവിൽ നിന്നു തലശേരിയിലേക്കു വരികയായിരുന്ന ബസിൽ വന്ന യുവാവ് പാലോട്ടുപള്ളി സ്റ്റോപ്പിൽ ഇറങ്ങിയപ്പോഴാണു പോലീസ് പിടികൂടിയത്. എംഡിഎംഎ വില്പന നടത്താനായി കൊണ്ടുപോകുന്നതിനിടെയാണ് ഇയാൾ പിടിയിലായതെന്നു പോലീസ് അറിയിച്ചു. യുവാവിന്‍റെ അറസ്റ്റ് രേഖപ്പെടുത്തി വൈകുന്നേരത്തോടെ മട്ടന്നൂർ കോടതിയിൽ ഹാജരാക്കി.

കൊളപ്പ ചിത്രാരിയിൽ വാഹനാപകടം; രണ്ടു പേർക്ക് പരിക്ക്

മട്ടന്നൂർ: ചാലോട് -ഇരിക്കൂർ റോഡിൽ കൊളപ്പ ചിത്രാരിയിൽ വാഹനാപകടം. രണ്ടു പേർക്ക് പരിക്കേറ്റു. ശനിയാഴ്ച രാത്രി എട്ടോടെ ചിത്രാരി ആക്രി പീടികയ്ക്ക് സമീപമായിരുന്നു അപകടം. ചാലോട് ഭാഗത്ത് നിന്ന് ഇരിക്കൂർ ഭാഗത്തേക്ക് പോകുകയായിരുന്ന കാറും എതിരേ വന്ന പാഴ്സൽ വാനുമാണ് കൂട്ടിയിടിച്ചത്. ഇരുവാഹനങ്ങളിലുമുള്ളവർക്കാണ് പരിക്കേറ്റത്. ഇവർ ആശുപത്രിയിൽ ചികിത്സ തേടി. അപകടത്തിൽ കാറിന്‍റേയും പാഴ്സൽ വാനിന്‍റേയും മുൻ ഭാഗം തകർന്നു. മട്ടന്നൂർ പോലീസ് സ്ഥലത്തെത്തി അപകടത്തിൽപ്പെട്ട വാഹനങ്ങൾ റോഡിൽ നിന്ന് നീക്കി.

ഓൺലൈൻ തട്ടിപ്പ്: നഷ്‌ടമായത് അഞ്ചേമുക്കാൽ ലക്ഷം

പയ്യന്നൂർ: രണ്ടുപേരിൽ നിന്ന് ഓൺലൈൻ തട്ടിപ്പിലൂടെ അഞ്ചേമുക്കാൽ ലക്ഷം രൂപ തട്ടിയെടുത്തെന്ന പരാതികളിൽ പയ്യന്നൂർ പോലീസ് കേസെടുത്തു. കോറോം സ്വദേശി സ്വാസ്തിക് നാരായണൻ, ഏഴിമല നാവിക അക്കാഡമിയിലെ ജീവനക്കാരൻ സൗമ്യ രാജൻ ദാസ് എന്നിവരുടെ പരാതികളിലാണ് പോലീസ് കേസെടുത്തത്. ഇൻസ്റ്റാഗ്രാമിലൂടെ പാർട്ട് ടൈം ജോലി വാഗ്ദാനം ചെയ്തായിരുന്നു സ്വാസ്തിക് നാരായണനെ ചതിച്ചത്. തട്ടിപ്പുകാർ നൽകിയ ടാസ്കുകൾ ചെയ്തതിലൂടെ കഴിഞ്ഞ ഓഗസ്റ്റ് 27, 29 ദിവസങ്ങളിലായി ഇയാളുടെ അക്കൗണ്ടിൽ നിന്ന് തട്ടിപ്പുകാരിലേക്ക് ഒഴുകിപ്പോയത് 2,52,000 രൂപയാണ്. ഇതേ തുടർന്നാണ് മുതലും വാഗ്ദാനം നൽകിയ ലാഭവും നൽകാതെ വഞ്ചിച്ചെന്ന പരാതിയിൽ പോലീസ് കേസെടുത്തത്. ആർബിഎൽ ക്രെഡിറ്റ് കാർഡ് വിഭാഗം കസ്റ്റമർ കെയറിൽ നിന്നെന്ന വ്യാജേനയെത്തിയ ഫോൺ സന്ദേശമാണ് നാവിക അക്കാഡമി ജീവനക്കാരനെ കുടുക്കിയത്. ഫോണിലൂടെ അയയ്ക്കുന്ന ഫയൽ ഇൻസ്റ്റാൾ ചെയ്യാനായിരുന്നു ആവശ്യപ്പെട്ടത്. ഈ ഫയൽ ഇൻസ്റ്റാൾ ചെയ്തപ്പോഴേക്കും പരാതിക്കാരന്‍റെ രണ്ടു ക്രെഡിറ്റ് കാർഡുകളിലുണ്ടായിരുന്ന 3,28,663 രൂപയാണ് തട്ടിപ്പുകാർ കൈക്കലാക്കിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]