ADVERTISEMENT

ADVERTISEMENT

പോഷൻ പക്വാഡാ സംഘടിപ്പിച്ചു

നെടുമങ്ങാട്: നഗരസഭയും വനിതാ ശിശു വികസന വകുപ്പും സംയുക്തമായി നഗരസഭാ മുനിസിപ്പാലിറ്റി ഫസ്റ്റ് സെക്ടർ അങ്കണവാടിയുടെ നേതൃത്വത്തിൽ നഗരസഭ അങ്കണത്തിൽ പോഷൻ പക്വാഡാ നടത്തി. നഗരസഭ ചെയർപേഴ്സൺ സി.എസ്. ശ്രീജ ഉദ്ഘാടനം ചെയ്തു.

നഗരസഭാ വൈസ് ചെയർമാൻ ചെയർമാൻ എസ്. രവീന്ദ്രൻ അധ്യക്ഷത വഹിച്ചു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബി. സതീശൻ സ്വാഗതം പറഞ്ഞു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ അജിത, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ വസന്തകുമാരി,കൗൺസിലർമാരായ ശ്യാമള, ഷീജ, പ്രിയ, ഉഷ, വിനോദിനി, എം.എസ്. ബിനു, ഷമീർ, ബിജു, റഫീഖ്, പുങ്കുമ്മൂട് അജി എന്നിവർ പങ്കെടുത്തു.

ADVERTISEMENT

കാളിമല തീര്‍ഥാടനം മേയ് ആറിനു തുടങ്ങും

വെള്ളറട : കാളിമല ക്ഷേത്രത്തിലെ തീര്‍ഥാടന ഉത്സവം മേയ് ആറിനു തുടങ്ങും. 12ന് ചിത്രാപൗര്‍ണമി പൊങ്കാലയോടെ സമാപിക്കും. തീര്‍ഥാടനത്തിനു മുന്നോടിയായിട്ടുള്ള വിളംബര രഥയാത്ര രണ്ടിനു വൈകുന്നേരം നാലിന് വെള്ളറട താഴെക്കര ഭദ്രകാളി ദേവീക്ഷേത്രാങ്കണത്തില്‍നിന്നു തുടങ്ങും. ചെങ്കല്‍ ശിവക്ഷേത്ര മഠാധിപതി മഹേശ്വരാനന്ദ സരസ്വതി ഭദ്രദീപം തെളിയിക്കും. ഉദയസമുദ്ര ഗ്രൂപ്പ് എംഡി ചെങ്കല്‍ രാജശേഖരന്‍ ഉദ്ഘാടനം ചെയ്യും. രഥയാത്ര അഞ്ചിനു വൈകുന്നേരം കുന്നത്തുകാല്‍ ചിമ്മണ്ടി നീലകേശി ദേവീക്ഷേത്രാങ്കണത്തില്‍ സമാപിക്കും. തുടര്‍ന്ന് അവിടെ നടക്കുന്ന കാളിമല തീര്‍ഥാടന ഉദ്ഘാടന സമ്മേളനത്തിന് സ്വാമി ചൈതന്യാനന്ദ ഭദ്രദീപം തെളിക്കും. വിശ്വഹിന്ദു പരിഷത്ത് സംസ്ഥാന പ്രസിഡന്‍റ് വിജി തമ്പി ഉദ്ഘാടനം ചെയ്യും. മേയ് ആറിന് രാവിലെ 8.30ന് അഗസ്ത്യമഹര്‍ഷി തുടങ്ങി 18 സിദ്ധര്‍ക്ക് സങ്കല്‍പ്പപൂജ, 12.30ന് നാഗരൂട്ട്. എട്ടിന് രാവിലെ ഏഴിന് മൃത്യുഞ്ജയഹോമം. ഒന്‍പതിന് രാവിലെ 8.30ന് ലക്ഷാര്‍ച്ചന, വൈകുന്നേരം നാലിന് ഭദ്രകാളി സഹസ്രനാമം. 12ന് രാവിലെ ഒന്‍പതിന് 48 സെറ്റില്‍മെന്‍റിലെ മൂട്ടുകാണിമാര്‍ക്ക് പൂര്‍ണകുംഭം നല്‍കി സ്വീകരണം. 9.30ന് ചിത്രാപൗര്‍ണമി പൊങ്കാലയുടെ പണ്ടാര അടുപ്പില്‍ ഭദ്രദീപം തെളിയിക്കല്‍ 11ന് അന്നദാനം, 11.45ന് പൊങ്കാലനിവേദ്യം, രാത്രി 12ന് കാളിയൂട്ടോടെ സമാപിക്കും.

കോളജുകളിൽ ഒളിന്പിക്സ് മാതൃകയിലുള്ള കായികമേളകൾ സംഘടിപ്പിക്കണമെന്ന്

തിരുവനന്തപുരം : കോളജുകളിലും സർവകലാശാലകളിലും ഒളിന്പിക്സ് മാതൃകയിലുള്ള കായികമേളകൾ സംഘടിപ്പിക്കാൻ സംസ്ഥാന സർക്കാർ നടപടി സ്വീകരിക്കണമെന്ന് കേരള റീജിയണൽ സ്പോർട്സ് ആൻഡ് ഗെയിംസ് അസോസിയേഷൻ സംസ്ഥാന ചെയർമാനും ശ്രീ നാരായണഗുരു യൂണിവേഴ്സിറ്റി സിൻഡിക്കേറ്റ് അംഗവുമായ അഡ്വ.ജി.സുഗുണൻ ആവശ്യപ്പെട്ടു. സംസ്ഥാനത്തെ സ്കൂളുകളിൽ സ്കൂൾ നിലവാരത്തിലും ജില്ലാനിലവാരത്തിലും ഒളിന്പിക്സ് മാതൃകയിലുള്ള കായിക മത്സരങ്ങൾ സംഘടിപ്പിക്കാൻ പൊതുവിദ്യാഭ്യാസവകുപ്പ് തീരുമാനിച്ചിരിക്കുകയാണ്. വിദ്യാർഥികൾക്ക് ഏറെ ഗുണകരമായ ഈ തീരുമാനം കോളജ് നിലവാരത്തിലും സർവകലാശാല നിലവാരത്തിലും നടപ്പിലാക്കിയാൽ അത് കേരളത്തിലെ കായികമേഖലയുടെ വളർച്ചയ്ക്ക് വളരെ സഹായകരമായിരിക്കുമെന്ന് ജി.സുഗുണൻ പറഞ്ഞു.

വെള്ളനാട് പഞ്ചായത്തിൽ കുടിവെള്ളമില്ല : പഞ്ചായത്ത് പ്രസിഡന്‍റിന്‍റെ നേതൃത്വത്തിൽ വാട്ടർഅഥോറിറ്റി എക്സി.എൻജിനിയറെ ഉപരോധിച്ചു

നെടുമങ്ങാട് : വെള്ളനാട് പഞ്ചായത്തിലെ 18 വാർഡുകളിലെ 12 ഓളം വാർഡുകളിൽ അഞ്ച് ദിവസമായി കുടിവെള്ളമെത്താത്തതിൽ പ്രതിഷേധിച്ച് വെള്ളനാട് പഞ്ചായത്ത് പ്രസിഡന്‍റ് കെ.എസ്. രാജലക്ഷ്മിയുടെ നേതൃത്വത്തിലുള്ള ഭരണ സമിതി അംഗങ്ങൾ അരുവിക്കര വാട്ടർ അഥോറിറ്റി എക്സി. എൻജിനിയർ എം. മനോജിനെ ഉപരോധിച്ചു. കുടിവെള്ളം എത്താത്തതിനെ തുടർന്ന് വീട്ടുകാരുടെ പരാതിയിന്മേൽ മൂന്നാം തവണയാണ് ഇ ഇ യെ ഉപരോധിച്ചത്. പഞ്ചായത്ത് അടിസ്ഥാന സൗകര്യങ്ങൾ ഒരുക്കി നൽകിയെങ്കിലും വാട്ടർ അഥോറിറ്റിയുടെ അനാസ്ഥ കൊണ്ടാണ് കുടിവെള്ളം കിട്ടാത്തതെന്ന് പഞ്ചായത്ത് വൈസ് പ്രസിഡന്‍റ് വെള്ളനാട് ശ്രീകണ്ഠൻ പറഞ്ഞു. 25 ലക്ഷം രൂപ പഞ്ചായത്ത് ഫണ്ടിൽ നിന്നും ഇപ്പോൾ വാട്ടർ അഥോറിറ്റിക്ക് പമ്പ് സ്ഥാപിക്കാൻ വേണ്ടി ഡെപ്പോസിറ്റ് നൽകിയെങ്കിലും ആറ് മാസം ആയി പണികൾ ആരംഭിച്ചിട്ടില്ലെന്നും അദ്ദേഹം പറഞ്ഞു. കുടിവെള്ളമെത്തിക്കാനൂള്ള സാഹചര്യം ഉടൻ പരിഹരിക്കാമെന്ന ഉറപ്പിന്മേൽ സമരം അവസാനിപ്പിച്ചു. കടുവാക്കുഴി ബിജു, സന്തോഷ് കുമാർ എന്നിവർ ഉപരോധത്തിൽ പങ്കെടുത്തു.

കുരുന്നെഴുത്തുകള്‍ മുഖ്യമന്ത്രി ഇന്ന് പ്രകാശനം ചെയ്യും : എഴുത്തുകാരിലൊരാളായി നെയ്യാറ്റിന്‍കര ഗവ. ജെബിഎസിലെ പി.സിദ്ധാര്‍ഥും

ഗിരീഷ് പരുത്തിമഠം നെയ്യാറ്റിന്‍കര : ലോകപുസ്തക ദിനത്തില്‍ കുരുന്നെഴുത്തുകളുടെ പ്രകാശനവേദിയിലേയ്ക്ക് മന്ത്രിയുടെ ക്ഷണം ലഭിച്ചതിന്‍റെ സന്തോഷത്തിലാണ് നെയ്യാറ്റിന്‍കര ഗവ. ജെബിഎസിലെ ഒന്നാം ക്ലാസുകാരനായ പി. സിദ്ധാര്‍ഥ്. വിദ്യാഭ്യാസ മന്ത്രി വി. ശിവന്‍കുട്ടി തനിക്ക് കത്തയച്ചതിന്‍റെ ആഹ്ലാദം കൂട്ടുകാരുമായി നേരില്‍ പങ്കിടാന്‍ അവധിക്കാലമായതിനാല്‍ കഴിയുന്നില്ലായെന്നതിന്‍റെ നേരിയ നിരാശയും ഈ കുരുന്ന് മനസിലുണ്ട്. വിദ്യാലയത്തിനും നാടിനൊന്നാകെയും അഭിമാനകരമായ നേട്ടമാണിതെന്ന് സ്കൂള്‍ അധികൃതർ കൂട്ടിച്ചേര്‍ത്തു. ഒന്നാം ക്ലാസിലെ വിദ്യാര്‍ഥികളുടെ ഡയറിക്കുറിപ്പുകള്‍ ചേര്‍ത്തൊരുക്കിയ സമാഹാരമാണ് മന്ത്രി വി. ശിവന്‍കുട്ടി എഡിറ്ററായ കുരുന്നെഴുത്തുകള്‍. കുഞ്ഞുങ്ങളുടെ ഡയറിക്കുറിപ്പുകൾക്കൊപ്പം രക്ഷിതാക്കളുടെയും അധ്യാപകരുടെയും പ്രതികരണങ്ങളും പുസ്തകത്തിലുണ്ട്. വിദ്യാകിരണം മിഷനാണ് പുസ്തകം പുറത്തിറക്കുന്നത്. കുട്ടികളുടെ സൃഷ്‌ടികൾ ശേഖരിച്ച് പൊതു വിദ്യാഭ്യാസ മന്ത്രി തന്നെ എഡിറ്ററായി പുസ്തകം പുറത്തിറക്കുന്നത് ഒരുപക്ഷെ രാജ്യത്ത് തന്നെ ആദ്യമായാകുമെന്നും വി. ശിവന്‍കുട്ടി സമൂഹ മാധ്യമത്തിലൂടെ ചൂണ്ടിക്കാട്ടിയിട്ടുണ്ട്. തിരുവനന്തപുരം കോട്ടണ്‍ഹില്‍ ഗവ. ഹയര്‍സെക്കന്‍ഡറി സ്കൂളില്‍ ഇന്ന് ഉച്ചയ്ക്ക് 12ന് ചേരുന്ന ചടങ്ങില്‍ മുഖ്യമന്ത്രി പിണറായി വിജയന്‍ കുരുന്നെഴുത്തുകള്‍ പ്രകാശനം ചെയ്യും. ഈ ചടങ്ങിലേക്കാണ് കുരുന്നെഴുത്തുകളിലെ ഒരെഴുത്തുകാരന്‍ കൂടിയായ സിദ്ധാര്‍ഥിനെ മന്ത്രി വി. ശിവന്‍കുട്ടി കത്തിലൂടെ ക്ഷണിച്ചത്. പതിനൊന്നരയോടെ സ്കൂളില്‍ എത്തിച്ചേരാനാണ് നിര്‍ദേശം. ലൈബ്രറികൾക്കും സ്കൂൾ ലൈബ്രറിക്കും പുസ്തക ചന്തയ്ക്കും ജീവൻ വച്ച വർഷമായിരുന്നു 2024-25 അക്കാദമിക് വര്‍ഷമെന്ന് സ്കൂള്‍ ഹെഡ്മിസ്ട്രസ് പ്രഭ `ദീപിക`യോട് പറഞ്ഞു. ഇക്കഴിഞ്ഞ വര്‍ഷത്തെ അക്കാദമിക് മാസ്റ്റർപ്ലാൻ തയാറാക്കിയപ്പോൾ പ്രധാന പ്രവർത്തനം "വായന" യായി ആസൂത്രണം ചെയ്തു. എല്ലാ ക്ലാസിലും ലൈബ്രറി സമയം ക്രമീകരിക്കുകയും വിദ്യാര്‍ഥികള്‍ക്ക് വായനയോട് താൽപര്യം കൂടാനയി വിവിധ ബാലമാസികകളും മറ്റും വാങ്ങി നല്‍കുകയും ചെയ്തുവെന്ന് എച്ച്.എം അറിയിച്ചു. എഴുത്തുകാരി കൂടിയായ ശ്യാമയാണ് സിദ്ധാര്‍ഥിന്‍റെ ക്ലാസ് ടീച്ചര്‍. ജൂൺ ഒന്ന് മുതല്‍ തന്നെ ഒന്നാം ക്ലാസിലെ വിദ്യാര്‍ഥികള്‍ രക്ഷിതാക്കളുടെ സഹായത്തോടെ സംയുക്ത ഡയറി എഴുതാൻ തുടങ്ങി. തുടർന്ന് വിദ്യാര്‍ഥികള്‍ സ്വന്തമായി ഡയറി എഴുതാനും വായിക്കാനും ശ്രമിച്ചു. വിദ്യാര്‍ഥികളുടെ ഡയറി എഴുത്തുകൾ സ്കൂൾ ഗ്രൂപ്പിലും ക്ലാസ് ഗ്രൂപ്പിലും ഒന്നഴകിന്‍റെ സംയുക്ത ഡയറി ഗ്രൂപ്പിലും ഷെയർ ചെയ്തു. ഇവയിൽ മിക്കതും നവമാധ്യമങ്ങളിലും പങ്കിട്ടിരുന്നുവെന്നും ശ്യാമ `ദീപിക`യോട് പറഞ്ഞു.

ഏറ്റവും കൂടുതൽ നേത്രശസ്ത്രക്രിയകൾ നടത്തി ഡോ.ദീപ്തിലാൽ

നെടുമങ്ങാട് : സംസ്ഥാനത്തെ സർക്കാർ ആശുപത്രികളിൽ 2024- 2025 കാലയളവിൽ ഏറ്റവും കൂടുതൽ നേത്രശസ്ത്രക്രിയകൾ നടത്തി നേട്ടം കൈവരിച്ച് നെടുമങ്ങാട് ജില്ലാ ആശുപത്രിയിലെ നേത്രരോഗവിഭാഗം മേധാവി ഡോ. ദീപ്തിലാൽ. 1270 നേത്ര ശസ്ത്രക്രിയകൾ നടത്തിയാണ് ഡോ.ദീപ്തിലാൽ ഈ നേട്ടം കൈവരിച്ചത്. തൊട്ടു പിന്നിലായി പാമ്പാടി താലൂക്ക് ആശുപത്രിയിലെ ഡോ.മാത്തൻ ഫിൻസി എലിസബത്തുമുണ്ട്. ഇവർ 988 ശസ്ത്രക്രിയകളാണ് നടത്തിയത്.കഴിഞ്ഞ വർഷത്തെ കെജിഎംഒയുടെ മികച്ച ഡോക്‌ടർ (സ്പെഷ്വാലിറ്റി കേഡർ) സംസ്ഥാന പുരസ്കാരവും 2023-2024 ഏറ്റവും കൂടൽ ശസ്ത്രക്രിയകൾ നടത്തിയ സർക്കാരിന്‍റെ അംഗീകാരവും ഡോ. ദീപ്തിലാലിനായിരുന്നു. നെടുമങ്ങാട് ജില്ലാ ആശുപത്രിയിൽ എത്തിയ ശേഷം കഴിഞ്ഞ നാലു വർഷത്തിനിടെ 4000 ത്തിലധികം തിമിരശസ്ത്രക്രിയകൾ പൂർത്തിയാക്കി മലയോര മേഖലയായ നെടുമങ്ങാട് ജില്ലാ ആശുപത്രിയിലെ പരിമിതമായ സാഹചര്യങ്ങളിൽ നിന്നുകൊണ്ട് ഒരു ഡോക്‌ടർക്കു കൈവരിക്കാവുന്ന ഏറ്റവും വലിയ നേട്ടമാണിത്. ജില്ലയിലെ വിവിധ ഭാഗങ്ങളിൽ നിന്ന് ഈ ഡോക്‌ടറെ തേടി നൂറുകണക്കിനു രോഗികളാണ് പ്രതിദിനം നെടുമങ്ങാട് ജില്ലാ ആശുപത്രിയിൽ എത്തുന്നന്നത്. ആധുനിക സൗകര്യങ്ങളോടെയാണ് നേത്രപരിശോധനയും ശസ്ത്രക്രിയകളും നടക്കുന്നത്. ഒഫ്താൽമോളജി ടീമിന്‍റെ വലിയ പിന്തുണയാണ് ഈ നേട്ടത്തിന് കാരണമെന്ന് ഡോ.ദീപ്തിലാൽ പറഞ്ഞു.

കിടപ്പുരോഗിയുടെ കിടപ്പാടം ജപ്തി ഭീഷണിയിൽ

വെള്ളറട: വികലാംഗയും കിടപ്പ് രോഗിയുമായ വയോധികയുടെ ദുഃഖം കാണാതെ ജപ്തി നോട്ടീസുമായി ബാങ്കുകാർ എത്തി.വര്‍ഷങ്ങളായി എണീറ്റു നടക്കാന്‍ കഴിയാത്ത വയോധികയെ വീട്ടില്‍ നിന്നും ഒഴിപ്പിക്കുവാന്‍ ജപ്തി നോട്ടീസുമായി ബാങ്ക് എത്തിയത്. വര്‍ഷങ്ങളായി ഭര്‍ത്താവ് ഉപേക്ഷിച്ചു പോയ ദുഃഖത്തിലും ആരോരും തിരിഞ്ഞുനോക്കാന്‍ ഇല്ലാതെ പട്ടിണിയില്‍ കഴിയുകയാണ് വയോധികയായ കാനക്കോട് വടക്കുംകര പ്രിയ ഭവനില്‍ ഗിരിജ (61 ). വിവാഹം കഴിഞ്ഞിട്ട് 38 വര്‍ഷമായി. വിവാഹം കഴിഞ്ഞ് അഞ്ചുവര്‍ഷം കഴിഞ്ഞപ്പോള്‍ തന്നെ ഭര്‍ത്താവ് ഇവരെ ഉപേക്ഷിച്ചു പോയി. അതില്‍ ഒരു മകളുണ്ട്. വിവാഹാനന്തരം ഭര്‍ത്താവിന്‍റെയും ഇവരുടെയും പേരില്‍ എഴുതിവെച്ച 38 സെന്‍റ് ‌വസ്തു ഉണ്ട് ആവസ്തു തിരികെ ലഭിച്ചാലെ രക്ഷയുള്ളു. ഗിരിജയെ ഭര്‍ത്താവ് ഉപേക്ഷിച്ചു പോയി മറ്റൊരു വിവാഹം കഴിച്ചതായി ഗിരിജ പറയുന്നു. നാളിതുവരെ ഇവരെ തിരിഞ്ഞുനോക്കാന്‍ വരാത്ത ഭര്‍ത്താവ് തന്നെ ഉപേക്ഷിച്ചിട്ടും രണ്ടുപേരുടെയും പേരില്‍ എഴുതിവെച്ച വസ്തു തിരികെ എഴുതി നല്‍കാനോ വിവാഹമോചനം നടത്താനോ തയാറായിട്ടില്ല. ഭര്‍ത്താവിന്‍റെ വിഹിതമായ 19 സെന്‍റ് തിരികെ ലഭിച്ചാല്‍ ഗിരിജയുടെവിഹിതമായ 19 സെന്‍റും കൂടി വിറ്റ് കിട്ടുന്ന പണം കൊണ്ട് വീടിന്‍റെ ജപ്തി ഒഴിവാക്കാമായിരുന്നുവെന്ന് ഗിരിജ പറയുന്നു. വികലാംഗ ആയതിനാല്‍ താല്‍ക്കാലിക ജോലിയായി സെക്രട്ടേറിയറ്റില്‍ മൂന്ന് വര്‍ഷം പ്രവര്‍ത്തിച്ചിരുന്നു. അവിടെ നിന്നും ഹൗസിംഗ് കോപ്പറേറ്റീവ് ബാങ്ക് വഴി 25 ലക്ഷം രൂപ വായ്പയെടുത്താണ് സ്ഥലം വാങ്ങി വീട് നിര്‍മിച്ചത്. ബാക്കി തുകയ്ക്കായി കേരള ബാങ്കില്‍ നിന്നും വായ്പ എടുത്തു. ജോലി നഷ്‌ടപ്പെട്ടതോടെ ലോണ്‍ അടക്കാതെയായി. വീടിന്‍റെ ഒരു ഭാഗത്ത് ബാങ്ക് ജപ്തി നോട്ടീസ് ഒട്ടിച്ചിരിക്കുകയാണ്. മറ്റൊരു വരുമാനവും ഇല്ലാതെ ഇവര്‍ നട്ടംതിരിയുകയാണ്. അടിയന്തിരമായി സര്‍ക്കാര്‍ തലത്തില്‍ നടപടിയുണ്ടായി ഉപേക്ഷിച്ച് പോയ ഭര്‍ത്താവിന് നല്‍കിയ വസ്തു തിരികെ ലഭിക്കാന്‍ വേണ്ട നടപടി ഉണ്ടാകണമെന്നാണ് ഗിരിജ പറ‍യുന്നത്.

പ്ലാസ്റ്റിക് മാലിന്യസംഭരണ കേന്ദ്രത്തിന് തീപിടിച്ചു

തിരുവനന്തപുരം :ചിറയിൻകീഴ് അഴൂർ പഞ്ചായത്തിലെ പെരുങ്ങുഴി നാഗർനടയ്ക്ക് സമീപം പ്രവർത്തിച്ചു വന്നിരുന്ന പ്ലാസ്റ്റിക് മാലിന്യസംഭരണ കേന്ദ്രത്തിന് തീപിടിച്ചു. ഇന്നലെ ഉച്ചയ്ക്ക് 12നാണ് തീപിടിച്ചത്. പഴയ കയർ ഫാക്‌ടറിയിലാണ് എംസിഎഫ് പ്രവർത്തിച്ചു വന്നിരുന്നത്. ആറ്റിങ്ങൽ നിലയത്തിലെ രണ്ട് യൂണിറ്റ് വാഹനവും വർക്കല കഴക്കൂട്ടം നിലയങ്ങളിലെ ഓരോ യൂണിറ്റ് വാഹനവും ഉൾപ്പെട്ട 30 പേർ അടങ്ങുന്ന ഫയർ ആൻഡ് റെസ്ക്യൂ സർവീസ് യൂണിറ്റാണ് രണ്ടു മണിക്കൂറോളം പ്രവർത്തിച്ചു തീ പൂർണമായും കെടുത്തിയത്. ആറ്റിങ്ങൽ നിലയത്തിലെ സ്റ്റേഷൻ ഓഫീസർ എസ്.ബി. അഖിൽ , ഗ്രേഡ് സ്റ്റേഷൻ ഓഫീസർ സജു കുമാർ, വർക്കല നിലയത്തിലെ സ്റ്റേഷൻ ഓഫീസർ വേണുഗോപാൽ എന്നിവർ നേതൃത്വം നൽകി.

നെടുമങ്ങാട് കെഎസ്ആർടിസി ബസ് സ്റ്റാൻഡിൽ യാർഡിന്‍റെ നവീകരണം ; ഗതാഗതക്രമീകരണം ഏർപ്പെടുത്തി

നെടുമങ്ങാട് : കെഎസ്ആർടിസി ബസ് സ്റ്റാൻഡിൽ യാർഡിന്‍റെ നവീകരണവുമായി ബന്ധപ്പെട്ട് മന്ത്രി ജി.ആർ.അനിലിന്‍റെ അധ്യക്ഷതയിൽ സെക്രട്ടേറിയറ്റിലെ ചേമ്പറിൽ യോഗം ചേർന്നു. രണ്ടുദിവസത്തിനുള്ളിൽ നിർമാണ പ്രവർത്തികൾ ആരംഭിക്കുന്നതിനും ജൂൺ മാസത്തിൽ വിദ്യാലയങ്ങൾ തുറക്കുന്നതിന് മുമ്പ് നിർമാണ പ്രവർത്തികൾ പൂർത്തികരിക്കുന്നതിനും ഇതിന്‍റെ ഭാഗമായി ഗതാഗത ക്രമീകരണങ്ങൾ കൈക്കൊള്ളുന്നതിനും യോഗത്തിൽ തീരുമാനമായി. എംഎൽഎയുടെ ആസ്തി വികസന ഫണ്ടിൽ നിന്നും 80 ലക്ഷം രൂപ ചിലവഴിച്ചാണ് നവീകരണ പ്രവർത്തനങ്ങൾ നടത്തുന്നത്. ബുധനാഴ്ച -മുതൽ നെടുമങ്ങാട് ബസ് സ്റ്റാൻഡിൽ നിന്നും പുറപ്പെടുന്ന സർവീസുകൾ ചുവടെ ചേർത്തിരിക്കുന്ന പ്രകാരം പുന:ക്രമീകരിച്ചിട്ടുണ്ട്. തിരുവനന്തപുരം, വട്ടപ്പാറ ഭാഗത്തേക്കുള്ള ബസുകൾ നെടുമങ്ങാട് - തിരുവനന്തപുരം റോഡിൽ പുതിയതായി നിർമിച്ച റവന്യൂ ടവർ ബിൽഡിംഗിന്‍റെ എതിർവശവും പഴകുറ്റി വഴി കടന്നുപോകുന്ന വെമ്പായം വഴി മുരുക്കുമ്പുഴ, വെമ്പായം വഴി ആയൂർ,വിതുര, പാലോട്, പുത്തൻപാലം വഴി ആറ്റിങ്ങൽ നെടുമങ്ങാട് - തിരുവനന്തപുരം റോഡിൽ എച്ച്പി പമ്പിന് സമീപവും കാട്ടാക്കട ഭാഗത്തേക്കുള്ള വാഹനങ്ങൾ കുളവിക്കോണം ബസ് സ്റ്റോപ്പിന് മുന്നിലും കരിപ്പൂര് ഭാഗത്തേക്കുള്ള വാഹനങ്ങൾ നെടുമങ്ങാട് - സത്രംമുക്ക് റോഡിൽ ടൗൺ എൽപി സ്കൂളിന് മുൻവശത്തും മഞ്ച-അരുവിക്കര ഭാഗത്തുള്ള ബസുകൾ മഞ്ച വഴിയുള്ള സർവീസുകൾ ചന്തമുക്കിലും നിറുത്തി യാത്രക്കാരെ കയറ്റുകയും ഇറക്കുകയും ചെയ്യണം.

അന്താരാഷ്‌ട്ര തുറമുഖ ഉദ്ഘാടനം : താത്കാലിക റോഡ് നിർമാണം ഉടൻ പൂർത്തിയാക്കും: മന്ത്രി വി.എൻ.വാസവൻ

വിഴിഞ്ഞം : മേയ് രണ്ടിന് കേരളം സാക്ഷ്യം വഹിക്കാൻ പോകുന്നത് ഒരു ചരിത്ര മുഹൂർത്തത്തിനെന്ന് മന്ത്രി വി.എൻ.വാസവൻ. അന്താരാഷ്‌ട്ര തുറമുഖ ഉദ്ഘാടനത്തിന്‍റെ സ്വാഗതസംഘം രൂപീകരണ യോഗത്തിൽ സംസാരിക്കുകയായിരുന്നു അദ്ദേഹം. താത്കാലിക സംവിധാനമായി 1.6 കിലോമീറ്റർ റോഡ് നിർമാണം ഉടനെ പൂർത്തിയാക്കും. അന്താരാഷ്‌ട്ര തുറമുഖത്തിന്‍റെ ഒന്നാംഘട്ടം കമ്മീഷൻ ചെയ്യുന്നതിനൊപ്പം രണ്ടാം ഘട്ടത്തിന്‍റെ നിർമാണ പ്രവർത്തനങ്ങൾ ആരംഭിക്കാൻ കഴിയുമെന്നും അദ്ദേഹം വ്യക്തമാക്കി. മന്ത്രി വി.ശിവൻകുട്ടി യോഗത്തിൽ അധ്യക്ഷനായിരുന്നു. പ്രധാനമന്ത്രിയും മുഖ്യമന്ത്രിയും എത്തുമ്പോൾ മികച്ച വരവേൽപ്പ് ഒരുക്കേണ്ടതുണ്ടെന്നും ഉദ്ഘാടന ചടങ്ങിൽ ജനപങ്കാളിത്തം ഉറപ്പാക്കുകയെന്നത് ഓരോരുത്തരുടെയും ഉത്തരവാദിത്തമാണെന്നും മന്ത്രി വി.ശിവൻകുട്ടി പറഞ്ഞു. തദ്ദേശ സ്ഥാപനങ്ങൾ ഉദ്‌ഘാടന ചടങ്ങിന് വേണ്ട പ്രചാരണം നൽകണമെന്നും ജനപങ്കാളിത്തം ഉറപ്പാക്കണമെന്നും അദ്ദേഹം നിർദേശിച്ചു. മുഖ്യമന്ത്രി പിണറായി വിജയൻ രക്ഷാധികാരിയായി പൊതുസംഘാടക സമിതി രൂപീകരിച്ചതായി വിഴിഞ്ഞം അന്താരാഷ്‌ട്ര തുറമുഖത്തിന്‍റെ മാനേജിംഗ് ഡയറക്ടർ ദിവ്യ.എസ്.അയ്യർ യോഗത്തിൽ അറിയിച്ചു. മന്ത്രി വി.എൻ.വാസവൻ സ്വാഗത സംഘം ചെയർമാനും മന്ത്രിമാരായ സജി ചെറിയാൻ, വി.ശിവൻകുട്ടി, ജി.ആർ.അനിൽ എന്നിവർ രക്ഷാധികാരികളുമായിരിക്കും. ജില്ലയിലെ എംഎൽഎമാരും എംപിമാരും ഉൾപ്പടെ 77 അംഗങ്ങൾ അടങ്ങിയതാണ് സ്വാഗത സംഘം. കൂടാതെ 6 സബ് കമ്മിറ്റികളും രൂപീകരിച്ചിട്ടുണ്ട്. യോഗത്തിൽ എംഎൽഎമാരായ കടകംപള്ളി സുരേന്ദ്രൻ, സി.കെ.ഹരീന്ദ്രൻ, ആന്‍റണി രാജു, ഐ.ബി.സതീഷ്, വി.കെ.പ്രശാന്ത്, മേയർ ആര്യ രാജേന്ദ്രൻ, മുൻമന്ത്രി എം.വിജയകുമാർ, തുറമുഖ വകുപ്പ് സെക്രട്ടറി എൻ.കൗശിഗൻ തുടങ്ങിയവർ പങ്കെടുത്തു.

പ്രധാനമന്ത്രിയുടെ വരവ് : സർക്കാരിന്‍റെ‍യും എസ്പിജിയുടെയും നിർദേശങ്ങൾ കാത്ത് തുറമുഖ അധികൃതർ

എസ്. രാജേന്ദ്രകുമാർ വിഴിഞ്ഞം: ചരിത്രമുഹൂർത്തം കുറിക്കാൻ പ്രധാനമന്ത്രി നരേന്ദ്ര മോദിയുടെ വിഴിഞ്ഞത്തേക്കുള്ള വരവ്, സർക്കാരിന്‍റെയും എസ്പിജിയുടെയും നിർദേശങ്ങളും കാത്ത് തുറമുഖ അധികൃതർ. തുറമുഖ കവാടത്തിന് വലതു ഭാഗത്തായി കൂറ്റൻ പന്തൽ ഒരുക്കാനുള്ള തീരുമാനത്തിലാണ് അധികൃതർ.എസ്പിജി യുടെ പരിശോധനയും നിർദേശങ്ങളും എത്തിയാൽ നിർമാണം ആരംഭിക്കും. കരമാർഗം വിഴിഞ്ഞത്ത് എത്താനുള്ള ഏകപാതയുടെ കാര്യത്തിലും തീരുമാനമുണ്ടാകണം. എയർപോർട്ടിൽ നിന്ന് കഴക്കൂട്ടം- കാരോട് ബൈപ്പാസ് വഴി കോവളത്ത് വന്ന ശേഷം തിരിഞ്ഞ് വിഴിഞ്ഞം കളിയിക്കാവിള തീരദേശ റോഡ് മാർഗം വേണം തുറമുഖത്ത് എത്താൻ ഏറെ വളവും തിരിവുമുള്ള തീരദേശ റോഡുവഴിയുള്ള യാത്രയുടെ സുരക്ഷയും സ്പെഷൻ പ്രൊട്ടക്ഷൻ ഫോഴ്സ് വിലയിരുത്തണം. തുറമുഖത്ത് നിന്ന് ആരംഭിച്ച് ബൈപ്പാസിൽ ബന്ധിപ്പിക്കുന്ന പ്രധാന റോഡിന്‍റെ പണി ഇഴഞ്ഞതാണ് ഇതിനെല്ലാം തിരിച്ചടിയായത്. പ്രധാന റോഡിൽ നിന്ന് താത്കാലിക റോഡ് നിർമിച്ച് കരവഴിയുള്ള കണ്ടെയ്നർ നീക്കത്തിനുള്ള തീരുമാനം നടക്കാതെ പോയതും പ്രശ്നമായി. പിന്നെയുള്ളത് ആകാശമാർഗം ഹെലികോപ്റ്റർ വഴിയുള്ള വരവായിരിക്കും. തുറമുഖത്തിനുള്ളിൽ ഹെലികോപ്റ്റർ ഇറക്കണമെ ങ്കിലും സർക്കാരിന്‍റെ തീരുമാനത്തിൽ പ്രത്യേക സൗകര്യമൊരുക്കണം. ഇനിയുള്ള ഒൻപത് ദിവസത്തിനുള്ളിൽ എല്ലാ സംവിധാനങ്ങളും ത്വരിതഗതിയിൽ പൂർത്തിയാക്കാനുള്ള തിരക്കിലാണ് തുറമുഖ അധികൃതർ. പ്രധാനമന്ത്രിയുടെ വരവിനായുള്ള സ്വാഗതസംഘ രൂപീകരണവും കഴിഞ്ഞ ദിവസം നടന്നു.

അതിര്‍ത്തി പഞ്ചായത്തുകളില്‍ പകര്‍ച്ചവ്യാധികള്‍ പടരുന്നു

പാറശാല: അതിര്‍ത്തി പഞ്ചായത്തുക ളില്‍ പകര്‍ച്ചവ്യാധികള്‍ പടരുന്നു. പനിയും മഞ്ഞപ്പിത്തവും ഡെങ്കിയും ബാധിച്ച് ആരോഗ്യ കേന്ദ്രങ്ങളിലെത്തുന്നവരുടെ എണ്ണം കൂടുകയാണ്. മിക്ക പഞ്ചായത്തുകളിലും മഴക്കാലപൂർവ ശുചീകരണം തുടങ്ങിയിട്ടില്ല. വൈറല്‍ പനി ബാധിതരുടെ എണ്ണം കൂടുകയാണ്. മഴ തുടങ്ങുന്നതിനു മുമ്പു തന്നെ പ്രതിരോധ പ്രവര്‍ത്തനങ്ങള്‍ തദ്ദേശ സ്ഥാപനങ്ങളുടെ നേതൃത്വത്തില്‍ നടത്തിയിരുന്ന ഇടങ്ങളില്‍ പ്രവൃത്തികള്‍ തുടങ്ങിയിട്ടില്ല. പഞ്ചായത്തുകളുടെ നേതൃത്വത്തില്‍ വാര്‍ഡ് തലങ്ങളില്‍ തുടങ്ങേണ്ട പണികള്‍ മഴയ്ക്ക് മുമ്പ് തുടങ്ങുകയാണ് പതിവ് എന്നാല്‍ ഇത്തവണ ഇതുവരെയും ശുചീകരണം തുടങ്ങിയില്ല. ചില പഞ്ചായത്തുകളില്‍ വാര്‍ഡ് തലത്തില്‍ പ്രവര്‍ത്തനങ്ങള്‍ തുടങ്ങിയെങ്കിലും സമഗ്രമായ കമ്മറ്റികള്‍ കൂടിയുള്ള പ്രവൃത്തികള്‍ക്ക് തുടക്കമായില്ല. വെള്ളറടയിലെ മുട്ടയ്‌ക്കോട് കോളനിയില്‍ രണ്ടുപേര്‍ക്ക് ഡെങ്കിപ്പനി ദിവസങ്ങള്‍ക്ക് മുന്‍പ് സ്ഥിരീകരിച്ചിരുന്നു.പാറശാലയിലും കുന്നത്തുകാലിലും റോഡ് നിര്‍മാണം നടക്കുന്ന സ്ഥലങ്ങളിലുള്‍പ്പെടെ മാലിന്യങ്ങള്‍ നീക്കം ചെയ്യാ തെയും ഓടകളിലെ ചെളി കോരാതെയും കിടക്കുകയാണ്. ഓടകളിലും റോഡിലും മലിനജലം കെട്ടിക്കിടക്കുന്നത് കൊതുക് ശല്യം കൂടുന്നതിനും പകര്‍ച്ച വ്യാധി വ്യാപനത്തിനും കാരണമാകുന്നു. മഴക്കാല പൂര്‍വ ശുചീകരണ പ്രവര്‍ത്തനങ്ങള്‍ നടത്താന്‍ സര്‍ക്കാര്‍ പഞ്ചായത്തുകള്‍ക്ക് നിര്‍ദേശം നല്‍കിയിട്ടുണ്ട്. പഞ്ചായത്തുകളുടെ തനത് ഫണ്ട് ഉപയോഗിക്കാനും അനുമതി നല്‍കിയിട്ടുണ്ട്. തദ്ദേശഭരണ സ്ഥാപനങ്ങള്‍ ശുചീകരണ പ്രവര്‍ത്തനങ്ങള്‍ ആരംഭിച്ചില്ലെങ്കില്‍ പ്രദേശത്ത് പകര്‍ച്ചവ്യാധികള്‍ പടരുന്ന നിലയാണ്. കൊതുക് നശീകരണ പ്രവര്‍ത്തനങ്ങള്‍ ഒന്നും തുടങ്ങിയിട്ടില്ല. ഇടയ്ക്ക് പെയ്യുന്ന വേനല്‍മഴ പകര്‍ച്ച വ്യാധികള്‍ പടരാനുള്ള സാധ്യത വർധിപ്പി ക്കുകയാണ്.പാറശാല താലൂക്ക് ആശുപത്രിയിലും കുന്നത്തുകാല്‍, വെള്ളറട ആരോഗ്യ കേന്ദ്രങ്ങളിലും പനിയും പകര്‍ച്ചവ്യാധിയും മൂലം ചികിത്സ തേടുന്നവരുടെ എണ്ണം കൂടുകയാണ്.

പള്ളിച്ചലിൽ തടിമില്ലിന് തീപിടിച്ചു

നേമം : പള്ളിച്ചല്‍ മുക്കംപാലം മൂട്ടില്‍ തടിമില്ലിന് തീപിടിച്ചു. തിങ്കളാഴ്ച പുലര്‍ച്ചെയാണ് സംഭവം. അയണിമൂട് സ്വദേശിയായ ജി.അനില്‍കുമാറിന്‍റെ ഉടമസ്ഥതയിലുള്ള മില്ല് ഇപ്പോള്‍ ഗോപിയാണ് നടത്തിവരുന്നത്. ഏകദേശം പതിനഞ്ച് ലക്ഷത്തിലധികം രൂപയുടെ നഷ്ടം കണക്കാക്കുന്നു. സംഭവം കണ്ട സമീപവാസികളാണ് ഫയർഫോഴ്സിനെ വിവരം അറിയിച്ചത്. നെയ്യാറ്റിന്‍കര, കാട്ടാക്കട സ്റ്റേഷനുകളില്‍ നിന്നുമെത്തിയ യൂണിറ്റുകളാണ് മണിക്കുറുകളോളം പരിശ്രമിച്ച് തീകെടുത്തിയത്. ഷോര്‍ട്ട് സര്‍ക്യൂട്ടാകാം തീപിടിത്തത്തിന് കാരണമെന്ന് കരുതുന്നു.

എം.വിന്‍സന്‍റ് എംഎല്‍എയുടെ ഡ്രൈവർക്ക് മർദനം; രണ്ടു േപർക്കെതിരേ കേസ്

നേമം : എം.വിന്‍സന്‍റ് എംഎല്‍എയുടെ ഡ്രൈവര്‍ക്ക് മർദനം . രണ്ടു പേർക്കെതിരെ നേമം പോലീസ് കേസെടുത്തു. ഡ്രൈവർ വിനോദ് നെട്ടത്താന്നിക്കും സുഹൃത്തിനും നേരെയാണ് ആക്രമണമുണ്ടായത്. തിങ്കളാഴ്ച വൈകുന്നേരം പാപ്പനംകോട് എസ്റ്റേറ്റ് ജംഗ്ഷനിലെ തട്ടുകടയ്ക്ക് സമീപം രാത്രി ഏഴോടുകൂടിയാണ് സംഭവം. ബൈക്കിലെത്തിയ വിനോദും സുഹൃത്തും ചായ കുടിക്കാനായി ഇറങ്ങിയപ്പോഴാണ് ബൈക്ക് മാറ്റി കൊടുക്കാന്‍ ആവശ്യപ്പെട്ട് രണ്ടുപേര്‍ വിനോദിനെയും സുഹൃത്ത് ബാലരാമപുരം കൊടിനട സ്വദേശി അഖിലിനെയും മര്‍ദിച്ചത്. വിനോദിന്‍റെ ഉടുപ്പ് വലിച്ചു കീറുകയും മൊബൈല്‍ ഫോണ്‍ തട്ടിയെടുക്കുകയും ബൈക്ക് കേട് വരുത്തുകയും ചെയ്തതായി നേമം പോലീസിന് നല്‍കിയ പരാതിയില്‍ പറയുന്നു. നിരവധി കേസുകളിലെ പ്രതികളായ സുഭാഷും അജിയും ചേര്‍ന്നാണ് ആക്രമണം നടത്തിയതെന്നും ഇവര്‍ മദ്യപിച്ചിരുന്നതായും പോലീസ് പറഞ്ഞു.

പൊന്മാന്‍ കുഞ്ഞുങ്ങളെ രക്ഷിച്ച് ഫയര്‍ഫോഴ്‌സ് സംഘം

പേരൂര്‍ക്കട: അമ്മപൊന്മാന്‍ ചത്തതിനെത്തുടര്‍ന്ന് മാളത്തില്‍ നിന്നു പുറത്തിറങ്ങാന്‍ കഴിയാതിരുന്ന കുഞ്ഞുങ്ങള്‍ക്ക് തിരുവനന്തപുരം ഫയര്‍ഫോഴ്‌സ് സംഘം രക്ഷകരായി. കുറവന്‍കോണം-നന്തന്‍കോട് റോഡില്‍ സ്ഥിതിചെയ്യുന്ന സാന്തോണ്‍ ലാറ്റക്‌സ് എന്‍റര്‍പ്രൈസസ് എന്ന സ്ഥാപനത്തിന്‍റെ ചുറ്റുമതിലിനുള്ളില്‍ ഏകദേശം ഒന്നരമീറ്റര്‍ ആഴത്തിലുള്ള മാളത്തില്‍ നിന്നാണ് രണ്ട് പൊന്മാന്‍കുഞ്ഞുങ്ങളെ രക്ഷപ്പെടുത്തിയത്. ഇവിടത്തെ ജീവനക്കാരാണ് വിവരം ഫയര്‍ഫോഴ്‌സിനെ അറിയിച്ചത്. അമ്മപൊന്മാനെയും ഒരു കുഞ്ഞിനെയും പൂച്ചപിടിച്ചതോടെയാണ് ഇവ ചത്തുപോയത്. സീനിയര്‍ ഫയര്‍ആൻഡ് റസ്‌ക്യു ഓഫീസര്‍ ഷാഫിയുടെ നേതൃത്വത്തില്‍ ഫയര്‍ആൻഡ് റസ്‌ക്യു ഓഫീസര്‍മാരായ എം.എസ്. ഷഹീര്‍, നന്ദകുമാര്‍, സ്‌നേഹ, അശ്വനി എന്നിവരാണ് പൊന്മാന്‍കുഞ്ഞുങ്ങള്‍ക്ക് രക്ഷകരായത്. വഴുതക്കാടുള്ള അനിമല്‍ റസ്‌ക്യു ടീമിന് പൊന്മാന്‍ കുഞ്ഞുങ്ങളെ പിന്നീട് കൈമാറി.

പൂന്തുറയില്‍ അമ്മയുടെ തല അടിച്ചുപൊട്ടിച്ച മകന്‍ അറസ്റ്റില്‍

പൂന്തുറ: അമ്മയുടെ തല അടിച്ചുപൊട്ടിച്ച മകനെ പൂന്തുറ പോലീസ് അറസ്റ്റ് ചെയ്തു. മുട്ടത്തറ വില്ലേജില്‍ പൂന്തുറ വാര്‍ഡില്‍ സെന്‍റ് ഫിലോമിന സ്‌കൂളിനു സമീപം ടി.സി - 75 / 1372 പഴവാര്‍ വീട്ടില്‍ താമസിക്കുന്ന കണ്ണനെ (26) ആണ് അറസ്റ്റ് ചെയ്തത്. കഴിഞ്ഞദിവസം ഉച്ചയോടുകൂടിയാണ് കേസിനിടയായ സംഭവം നടന്നത്. ജോലി കഴിഞ്ഞെത്തിയ കണ്ണന് വീട്ടിലെത്തിയ ഉടന്‍ ആഹാരം ലഭിക്കാത്തതിലുളള ദേഷ്യത്തില്‍ പാത്രം എടുത്ത് അമ്മയുടെ തലയില്‍ അടിക്കുകയായിരുന്നുവെന്ന് പോലീസ് പറഞ്ഞു. തലയില്‍ സാരമായി പരിക്കേറ്റ അമ്മയെ പൂന്തുറ ആശുപത്രിയിലും തുടര്‍ന്ന് തിരുവനന്തപുരം ജനറല്‍ ആശുപത്രിയിലും പ്രവേശിപ്പിക്കുകയായിരുന്നു. അമ്മ നല്‍കിയ പരാതിയില്‍ കേസെടുത്ത പോലീസ് കണ്ണനെ അറസ്റ്റ് ചെയ്യുകയായിരുന്നു. ഇയാള്‍ക്ക് മാനസിക പ്രശ്‌നമുളളതായി പോലീസ് പറഞ്ഞു. പൂന്തുറ എസ്എച്ച്ഒ നിയാസിന്‍റെ നേതൃത്വത്തില്‍ എസ്ഐ മാരായ സുനില്‍ , ജയപ്രകാശ് എന്നിവരുള്‍പ്പെട്ട പോലീസ് സംഘമാണ് കണ്ണനെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

തകര്‍ന്നു തരിപ്പണമായി നെട്ടയം ഓം നഗര്‍ റോഡ്

പേരൂര്‍ക്കട: 2015-ലെ നഗരസഭാ ഭരണകാലത്ത് മിനുക്കുപണി നടത്തിയ റോഡ് തകര്‍ന്നു തകര്‍ന്നു തരിപ്പണമായി. നെട്ടയം വാര്‍ഡില്‍ ഉള്‍പ്പെടുന്ന ഓം നഗര്‍ റോഡിനാണ് ഈ ദുര്‍ഗതി. കഷ്‌ടിച്ച് ഒരുകിലോമീറ്റര്‍ വരുന്നതാണ് പ്രസ്തുത റോഡ്. എന്നാല്‍ ടാര്‍ ഏതാണ്ട് പൂര്‍ണമായി ഇളകി വാഹനയാത്ര ദുസഹമായി മാറിയിരിക്കുന്നു. നിരവധി കുടുംബങ്ങളാണ് റോഡുവശത്ത് പാര്‍ക്കുന്നത്. ഇന്ദിരാനഗര്‍ റോഡിലൂടെ എത്തി ഓം നഗറില്‍ കയറി തിരികെ മണികണേ്ഠശ്വരത്ത് വാഹനങ്ങള്‍ക്ക് എത്തിച്ചേരാനാകുന്ന റോഡാണ്. 10 ലക്ഷം രൂപയെങ്കിലും ഫണ്ട് അനുവദിച്ചാല്‍ മാത്രമേ റോഡിന്‍റെ അറ്റകുറ്റപ്പണി പൂര്‍ത്തീകരിക്കാന്‍ സാധിക്കുകയുള്ളൂ. ഓടയില്ലാത്തതുമൂലം മഴവെള്ളം കുത്തിയൊലിച്ചാണ് റോഡ് തകർന്നത്.

പ്രസ്ക്ലബ് മീഡിയാ ഫുട്ബോൾ ലീഗ് : സെലിബ്രിറ്റി മത്സരത്തിൽ ജോപോൾ ടീമിന് ജയം

തിരുവനന്തപുരം : പ്രസ്ക്ലബ് മീഡിയാ ഫുട്ബോൾ ലീഗിന്‍റെ സമാപനത്തോടനുബന്ധിച്ച് ചന്ദ്രശേഖരൻ നായർ സ്റ്റേഡിയത്തിൽ നടന്ന മുൻകാല ഫുട്ബോൾ താരങ്ങൾ അണിനിരന്ന സെലിബ്രിറ്റി മത്സരത്തിൽ ഐ.എം. വിജയൻ നയിച്ച ടീമിനെ 2-1 ന് തോൽപ്പിച്ച് ജോപോൾ അഞ്ചേരിയുടെ ടീം ജേതാക്കളായി. ഐ.എം . വിജയന്‍റെ പ്രതിഭയുടെ മിന്നലാട്ടം കണ്ട മത്സരത്തിൽ ജേതാക്കൾക്കായി എബിൻ റോസും ബോണിഫേസും ഗോൾ നേടിയപ്പോൾ വിജയൻ ടീമിന്‍റെ ഗോൾ സുരേഷ് കാസർകോടാണ് നേടിയത്. ഇന്ത്യൻ ടീമിലും സന്തോഷ് ട്രോഫി ടീമുകളിലും ബൂട്ടണിഞ്ഞ മുൻകാല താരങ്ങളാണ് കളത്തിൽ അണിനിരന്നത്. ഐ.എം.വിജയൻ ഇലവനിൽ , കെ.ടി.ചാക്കോ, കുരികേഷ് മാത്യു, ഗണേഷ്, പി.പി.തോബിയാസ്, അലക്സ് ഏബ്രഹാം, സുരേഷ് കുമാർ , സുരേഷ്, മൊയ്ദീൻ ഹുസൈൻ, അജയൻ, സുരേഷ് ബാബു, ജയകുമാർ എന്നിവരും ജോപോൾ അഞ്ചേരി നയിച്ച ടീമിൽ മാത്യു വർഗീസ്, ശിവകുമാർ, വി.പി. ഷാജി, കണ്ണപ്പൻ, ബി.എസ്.ശ്രീഹർഷൻ, ഇഗ്‌നേഷ്യസ്, എബിൻ റോസ്, എസ്.സുനിൽ, ഉസ്മാൻ, ബോണിഫേസ് , ജോബി ജോസഫ്, വി.ജയകുമാർ, വാൾട്ടർ ആന്‍റണി എന്നിവരും കളിക്കളത്തിലിറങ്ങി. മീഡിയ ഫുട്ബോൾ ലീഗിന്‍റെ ഫൈനലിൽ മാധ്യമം ജേതാക്കളായി. നിശ്ചിത സമയത്തും സഡൻ ഡെത്തിലും കേരളകൗമുദിയുമായി സമനില പാലിച്ചതിനെ തുടർന്ന് ടോസിലൂടെയാണ് ജേതാക്കളെ നിശ്ചയിച്ചത്. വനിതകളിൽ അമൃത ടിവി ജേതാക്കളായി. ജനം ടിവി രണ്ടാമതെത്തി. സമാപന സമ്മേളനത്തിൽ പത്മശ്രീ ജേതാവ് ഐ.എം.വിജയനെ ആദരിച്ചു. മുൻ സ്പോർട്സ് മന്ത്രിമാരായ എം. വിജയകുമാർ, പന്തളം സുധാകരൻ, ബിജെപി സംസ്ഥാന സെക്രട്ടറി ജെ.ആർ.പത്മകുമാർ, ഉദയസമുദ്ര ഗ്രൂപ്പ് സിഇഒ രാജഗോപാല അയ്യർ എന്നിവർ പ്രസംഗിച്ചു. യോഗത്തിൽ പ്രസ് ക്ലബ് പ്രസിഡന്‍റ് പി.ആർ.പ്രവീൺ അധ്യക്ഷത വഹിച്ചു. യോഗത്തിൽ സെക്രട്ടറി എം.രാധാകൃഷ്ണൻ, ട്രഷറർ വി.വിനീഷ്, സംഘാടക സമിതി കണ്‍വീനർ ജോയ് നായർ എന്നിവർ പ്രസംഗിച്ചു.

വിളവൂർക്കൽ പഞ്ചായത്തിൽ അനധികൃത കുന്നിടിക്കൽ; നടപടിയെടുക്കാതെ അധികൃതർ

കാട്ടാക്കട: വിളവൂർക്കൽ പഞ്ചായത്തിൽ‌ കുന്നിടിക്കൽ തുടരുന്നു. ജിയോളജി വകുപ്പിന്‍റെയോ പഞ്ചായത്തിന്‍റെയോ അനുമതിയില്ലാതെയാണ് കുന്നിടിക്കൽ. സമീപത്തായി കരമന ആറിന്‍റെ തീരത്തെ സ്ഥലം മണ്ണിട്ട് നികത്തുകയും ചെയ്തു. 2012ലും വിളവൂര്‍ക്കൽ പഞ്ചായത്തിലെ എരിക്കലംകുന്ന് ഇടിച്ചു നിരത്തി മണ്ണ് കടത്തുകയും മണലാക്കി വിൽക്കുകയും ചെയ്തിരുന്നു. സംഭവത്തിൽ പ്രദേശത്തുള്ള നാട്ടുകാരാണ് ദുരിതത്തിലായത്. 2012-ൽ കുന്നിടിക്കൽ വ്യാപകമായപ്പോൾ വൻ പരാതി വന്നിരുന്നു. തുടർന്ന് അന്ന് അധികൃതര്‍ നടപടിയെടുത്തു. എന്നാൽ, വര്‍ഷം 13 കഴിഞ്ഞപ്പോള്‍ അന്ന് മണ്ണെടുത്തതിന്‍റെ തൊട്ടടുത്ത സ്ഥലത്താണിപ്പോള്‍ കുന്ന് ഇടിച്ചു താഴ്ത്തി മണ്ണെടുക്കുന്നത്. ലോഡ് കണക്കിന് മണ്ണാണ് ഇവിടെ നിന്ന് കൊണ്ടു പോയത്.രാത്രിയിലാണ് മണ്ണെടുത്ത് കടത്തുന്നതെന്ന് നാട്ടുകാര്‍ പറഞ്ഞു. നാട്ടുകാര്‍ പോലീസീന് അടക്കം പലവട്ടം വിവരം നൽകിയെങ്കിലും അനധികൃത മണ്ണെടുപ്പ് തുടരുകയാണ്. തിരുവനന്തപുരം ജില്ലാ ജിയോളജി വകുപ്പിൽ നിന്ന് യാതൊരു അനുമതിയും നൽകിയിട്ടില്ലെന്നും പഞ്ചായത്തിൽ നിന്ന് നൽകിയോയെന്ന് അറിയില്ലെന്നുമാണ് ജില്ലാ ജിയോളജിസ്റ്റ് വ്യക്തമാക്കിയത്. ഇതേ കാര്യം പഞ്ചായത്ത് പ്രസിഡന്‍റിനോട് ചോദിച്ചപ്പോഴും അനുമതി കൊടുത്തിട്ടില്ലെന്ന മറുപടിയാണ് ലഭിച്ചത്. വിവരം അറിഞ്ഞ് സ്ഥലത്ത് പോയി നോക്കിയിരുന്നുവെന്നും അനുമതി വാങ്ങിയിട്ടാണോയെന്ന് അന്വേഷിക്കണമെന്നുമാണ് വിളവൂര്‍ക്കൽ വില്ലേജ് ഓഫീസറുടെ മറുപടി.സമീപത്ത് നിലം നികത്തിയതിനെതിരേ വില്ലേജ് ഓഫീസര്‍ കഴിഞ്ഞ മാസം സ്റ്റോപ്പ് മെമ്മോ നൽകിരുന്നു. ജില്ലാ കണ്‍ട്രോള്‍ റൂമിൽ നിന്ന് വിളിയെത്തിയതിന് പിന്നാലെയാണ് വില്ലേജ് ഓഫീസര്‍ നടപടിയെടുത്ത് ആര്‍ഡിഒയെ അറിയിച്ചത്. ചില റിയൽ എസ്റ്റേറ്റ് ലോബികളാണ് കുന്നിടിക്കലിന് നേതൃത്വം നൽകുന്നതെന്ന് ആക്ഷേപമുണ്ട്.

ചിറയിൻകീഴിൽ എംഡിഎംഎയുമായി ഒരാൾ പിടിയിൽ

ആറ്റിങ്ങൽ : എംഡിഎംഎയുമായി ഒരാളെ റൂറൽ ഡാൻസാഫ് സംഘവും ചിറയിൻകീഴ് പോലീസും ചേർന്ന് പിടികൂടി. ശാർക്കര പുളുന്തുരുത്തി പുതുവൽ വീട്ടിൽ സുശാന്ത് ( 34) ആണ് പിടിയിലായത്. ഇയാളിൽ നിന്നും നാല് ഗ്രാമോളം എംഡിഎംഎ കണ്ടെടുത്തു. ഇയാളുടെ താമസ സ്ഥലത്തിന് സമീപ പ്രദേശത്ത് പ്രവർത്തിക്കുന്ന കോളജിലെയും സ്‌കൂളുകളിലെയും വിദ്യാർഥികളെ ലക്ഷ്യംവെച്ചാണ് ഇയാൾ ലഹരി വ്യാപാരം നടത്തി വന്നിരുന്നത്. ഇത് സംബന്ധിച്ച് ജില്ലാ പോലീസ് മേധാവി കെ.എസ്.സുദർശനന് ലഭിച്ച വിവരത്തെ തുടർന്ന് ഇയാൾ ഡാൻസാഫ് സംഘത്തിന്‍റെ രഹസ്യ നിരീക്ഷണത്തിൽ ആയിരുന്നു. നർക്കോട്ടിക്ക് ഡിവൈഎസ്പി കെ. പ്രദീപ്, ആറ്റിങ്ങൽ ഡിവൈഎസ്പി മഞ്ജു ലാൽ എന്നിവരുടെ നിർദേശ പ്രകാരം ചിറയികീഴ് പോലീസ് ഇൻസ്‌പെക്‌ടർ വി. എസ്.വിനീഷ് സബ് ഇൻസ്‌പെക്‌ടർ മനു ഡാൻസാഫ് സബ് ഇൻസ്‌പെക്‌ട ർമാരായ എഫ്. ഫയാസ്, ബി.ദിലീപ്, എഎസ്ഐ രാജീവൻ, സിപിഒ മാരായ സുനിൽരാജ്,റിയാസ് എന്നിവരുടെ നേതൃത്വത്തിലാണ് ഇയാളെ അറസ്റ്റ് ചെയ്തത്. ആറ്റിങ്ങൽ കോടതിയിൽ ഹാജറാക്കിയ ഇയാളെ റിമാൻഡ് ചെയ്തു.

കഞ്ചാവ് കടത്താന്‍ ശ്രമിച്ച യുവാവ് റിമാന്‍ഡില്‍

നെയ്യാറ്റിന്‍കര : കാറില്‍ കഞ്ചാവ് കടത്തുന്നതിനിടയില്‍ എക്സൈസ് സംഘത്തിന്‍റെ പിടിയിലായ യുവാവിനെ റിമാന്‍ഡ് ചെയ്തു. പിടിച്ചെടുത്ത കഞ്ചാവിന് വിപണിയില്‍ ആറു ലക്ഷത്തോളം രൂപ വിലവരുമെന്ന് എക്സൈസ് അധികൃതര്‍. തിരുപുറം എക്സൈസ് റേഞ്ച് ഇന്‍സ്പെക്‌ടര്‍ രതീഷിന്‍റെ നേതൃത്വത്തിലുള്ള സംഘം നടത്തിയ വാഹന പരിശോധനയ്ക്കിടയിലാണ് ബാലരാമപുരം സ്വദേശിയായ ആദര്‍ശ് (22) പിടിയിലായത്. ഇയാളോടൊപ്പമുണ്ടായിരുന്ന കാര്‍ ഡ്രൈവര്‍ ഓടി രക്ഷപ്പെട്ടു. കാറില്‍ നിന്നും പായ്ക്കറ്റുകളിലാക്കിയ നിലയില്‍ 9.085 കിലോഗ്രാം കഞ്ചാവ് കണ്ടെടുത്തു. ബാംഗ്ലൂരില്‍ നിന്നും വാങ്ങി കൊണ്ടുവന്നതാണെന്ന് പ്രതി മൊഴി നല്‍കിയതായി എക്സൈസ് അധികൃതര്‍ അറിയിച്ചു. തിരുവനന്തപുരത്തേയ്ക്ക് കൊണ്ടു പോയതാണെന്നും മുന്‍പ് ഇയാളുടെ പേരില്‍ കേസുകളൊന്നും ഇല്ലായെന്നും എക്സൈസ് അധികൃതര്‍ വ്യക്തമാക്കി. ആദ്യമായാണ് ഇയാള്‍ കഞ്ചാവ് കടത്താന്‍ ശ്രമിച്ചത്. എന്നാല്‍ കഞ്ചാവ് സ്ഥിരം ഉപയോഗിക്കുന്ന ശീലമുണ്ട്. ഇയാള്‍ സഞ്ചരിച്ച വാഹനവും എക്സൈസ് സംഘം പിടിച്ചെടുത്തു. എക്സൈസ് അസി. ഇന്‍സ്പെക്‌ടര്‍ ബിനു, റേ‍ഞ്ചിലെ ഉദ്യോഗസ്ഥരായ ഹരികുമാര്‍, ഹരിപ്രസാദ്, ബൈജു, പ്രശാന്ത് ലാല്‍, വിജേഷ്, രഞ്ജിത്ത് എന്നിവരുള്‍പ്പെട്ട സംഘമാണ് പ്രതിയെ പിടികൂടിയത്.

സിവില്‍ സര്‍വീസ് പരീക്ഷയിൽ 169-ാം റാങ്ക് ; തലസ്ഥാനത്തിന് അഭിമാനമായി രജത്

നേമം : തലസ്ഥാനത്തിന് അഭിമാനമായി രജത്. സിവില്‍ സര്‍വീസ് പരീക്ഷയില്‍ 169-ാം റാങ്ക് നേടിയ നേമം കാരയ്ക്കാമണ്ഡപം കാരയ്ക്കാട്ട് ലെയ്‌നില്‍ ഗ്രീന്‍ ഗാര്‍ഡന്‍സ് ഇന്ദീവരത്തില്‍ ആർ.രജത് (27)ന്‍റെ വിജയം നാടിന് അഭിമാനമായി. പാപ്പനംകോട്ടെ കേന്ദ്ര ഗവേഷണ സ്ഥാപനമായ സിഎസ്‌ഐആര്‍-നിസ്റ്റിലെ സീനിയര്‍ സൂപ്രണ്ടിംഗ് എന്‍ജിനിയര്‍ ആര്‍. രാജീവിന്‍റെയും ബ്രഹ്‌മോസ് സീനിയര്‍ അഡ്മിനിട്രേറ്റീവ് സൂപ്പര്‍വൈസര്‍ ജെ.ആർ രാഗിണിയുടെയും മകനാണ് രജത്. ലയോള സ്‌കൂളിലായിരുന്നു പഠനം. രണ്ടാം തവണത്തെ പരിശ്രമത്തിലാണ് രജതിന്‍റെ വിജയം. പാലക്കാട് ഐഎറ്റിയിലെ 2015-19 ബാച്ചിലെ ഇലക്‌ട്രിക്കലില്‍ എട്ടുപേരടങ്ങുന്ന ബാച്ചിലെ ഏക മലയാളിയായിരുന്നു രജത്. 2019-ല്‍ എംബിഎയ്ക്ക് ചേര്‍ന്ന് പഠനം പൂര്‍ത്തിയായപ്പോള്‍ ടോപ് സ്‌കോററായിരുന്നു. 2021-ല്‍ കാമ്പസ് മള്‍ട്ടി നാഷണല്‍ ബാങ്കില്‍ കാമ്പസ് സെലക്ഷന്‍ ലഭിച്ചു. സീനിയർ സിവില്‍ സര്‍വീസ് ഉദ്യോഗസ്ഥരുടെ ഗ്രൂപ്പിലാണ് പഠനം നടത്തിയത് രജതിന്‍റെ വിജയത്തിന് മാറ്റ് കൂട്ടി. സോഷ്യോളജിയായിരുന്നു സബ്ജക്റ്റ് . പോണ്ടിച്ചേരിയിൽ എംബിബിഎസ് വിദ്യാര്‍ഥിനി രാധികയാണ് സഹോദരി.

വറുതി അകറ്റാൻ കാട്ടുകൂവയില...

കുറ്റിച്ചൽ : വേനൽ തുടങ്ങി. കാട്ടിൽ കിഴങ്ങുകളോ കായ്കനികളോ കിട്ടാത്ത കാലം. അപ്പോൾ ഇവർക്ക് അന്നമൂട്ടുന്നത് കാട്ടുകൂവയിലകളാണ്. കടുത്ത പട്ടിണിയിൽ അവർക്ക് അന്നം കൊണ്ടുവന്നുകൊടുക്കുന്നത് ഈ ഇലകളാണ്. ഒരു നേരെത്ത ആഹാരം കഴിക്കുന്നതും ഇലകൾ ഉപയോഗിച്ച്. കാട്ടുകൂവയില ആദിവാസികളായ കാണിക്കാരുടെ ഒഴിവാക്കാനാകാത്ത കൂട്ടുകാരനാണ്. കാട്ടിൽ പട്ടിണി പിടിമുറുക്കുമ്പോൾ ഇവ ശേഖരിച്ച് നാട്ടിലെത്തിച്ച് നല്ല വിലയ്ക്ക് വിൽക്കും. അങ്ങനെ കിട്ടുന്ന പണം ഇവരുടെ വയർ നിറയ്ക്കും. കാണിക്കാർ ആഹാരം കഴിക്കുന്നതും കൂവയിലയിലാണ്. മൂന്ന് ഇല നിവർത്തി വച്ചാൽ സദ്യ വിശാലമായി ഉണ്ണാം. കാണിക്കാർ തങ്ങളുടെ ദൈവങ്ങൾക്ക് പൂജ ചെയ്യുന്നതും കൂവയില വച്ചാണ്. സാധനങ്ങൾ സൂക്ഷിച്ച് വയ്ക്കാൻ ഇവർ കൂവയില തന്നെ ഉപയോഗിക്കുന്നു. കൂവയില ഉണക്കി അതിനകത്താണ് പണം, നാണയങ്ങൾ, പൊടിച്ച മുളക് പൊടി തുടങ്ങിയവ സൂക്ഷിക്കുന്നത്. മഴയത്ത് പോലും ഈർപ്പം തട്ടാതെ ഇരിക്കുമെന്നതിനാൽ ഇപ്പോൾ മൊബൈൽ ഫോൺ പോലും കൂവയിലയിൽ പൊതിഞ്ഞ് സൂക്ഷിക്കുന്നവരും ധാരാളം. കാണിക്കാർ കൂവയിലയിലാണ് മിക്ക സാധനങ്ങളും സൂക്ഷിക്കുന്നത്. കാട്ടിൽ വിവാഹത്തിനും മറ്റ് ചടങ്ങുകൾക്കും കൂവയില തന്നെ താരം. ഓണ സദ്യ പോലും കൂവയിലയിലാണ്. കാണിക്കാർ വനവിഭവങ്ങളായ കാട്ടുനെല്ലിക്കയും തിനമാവും കാട്ടുനെല്ലിന്‍റെ അവിലും പൊതിഞ്ഞ് നാട്ടിലെത്തിക്കുന്നതും കൂവയിലയിലാണ്. ഇപ്പോൾ നാട്ടിലും ഇത്തരം ഇലകൾക്ക് പ്രിയമാണ്. തലസ്ഥാനത്തുനിന്നും നിരവധി പേർക്ക് കൂവയില നൽകുന്നുണ്ട്. നാടൻ ഭക്ഷണ കടകളിൽ കൂവയിലയിലാണ് ഭക്ഷണം നൽകുന്നത്. കൂവയിലയിൽ പൊതിഞ്ഞ് മീൻ പൊള്ളിച്ചത് ചില ഹോട്ടലുകളിൽ നൽകുന്നുണ്ട്. അതിനും ഈ ഉൾകാട്ടിലെ കാട്ടുകൂവയിലയാണ് ഉപയോഗിക്കുന്നത്. അടുത്തിടെ നഗരത്തിലെ സ്റ്റാർ സൗകര്യമുള്ള നിരവധി ഹോട്ടലുകൾ കൂവയില തേടി ഇവിടെ എത്തിയിരുന്നു. അവർക്കും കാണിക്കാരാണ് ഇല നൽകുന്നത്. ഇതു വഴിയും ഇവർക്ക് ഒരു വരുമാന മാർഗം കിട്ടുന്നു. കാട്ടിൽ സമൃദ്ധമായി വളരുന്ന കൂവയില മഴയത്തും കടുത്ത വേനലിലും കിട്ടും.

കരമനയാറില്‍ പ്ലാസ്റ്റിക് കുപ്പികള്‍ തള്ളുന്നു

പേരൂര്‍ക്കട: പാരിസ്ഥിതിക പ്രശ്‌നം വീണ്ടും സൃഷ്‌ടിച്ചുകൊണ്ട് കരമനയാര്‍ ഒഴുകുന്ന ഭാഗത്ത് പ്ലാസ്റ്റിക് കുപ്പികളുടെ വന്‍ ശേഖരം. മിനറല്‍ വാട്ടര്‍ ബോട്ടിലുകള്‍, മദ്യക്കുപ്പികള്‍, വസ്ത്രങ്ങള്‍ കഴുകുന്നതിനുള്ള ലായനികള്‍ നിറച്ച കുപ്പികള്‍, മരുന്നുകടകളില്‍ നിന്ന് പുറന്തള്ളപ്പെടുന്ന കഫ്‌സിറപ്പുകള്‍ നിറച്ച കുപ്പികള്‍, വീടുകളില്‍ നിന്ന് പുറത്തുകളയുന്ന പ്ലാസ്റ്റിക് കുപ്പികള്‍, പാഴായിപ്പോയ വീട്ടുപകരണങ്ങളുടെ ഭാഗങ്ങള്‍ എന്നിവയാണ് മലമുകള്‍ മണലയം ഭാഗത്ത് കരമനയാര്‍ ഒഴുകുന്ന തീരത്തിനടുത്ത് കിടക്കുന്നത്. മലമുകള്‍ മണലയത്ത് ആറിന്‍റെ ഒഴുക്ക് നിലച്ച ഭാഗത്താണ് ബോട്ടിലുകൾ കൂടിക്കിടക്കുന്നത്. കാര്‍ഷികവൃത്തിക്ക് ഏറെ സാധ്യതകള്‍ കാണുന്ന ഈ ഭാഗത്ത് വെള്ളത്തിന് രൂക്ഷഗന്ധമാണ്. പാറക്കെട്ടുകള്‍ നിറഞ്ഞ ഭാഗത്ത് ജനങ്ങള്‍ കുളിക്കാന്‍ വെള്ളം ഉപയോഗിക്കുന്നുണ്ട്. എന്നാല്‍ കരമനയാര്‍ വീണ്ടും മലിനമാകാന്‍ തുടങ്ങിയതോടെ ഇതും വഴിമുട്ടുമെന്ന അവസ്ഥയാണ്. വന്‍തോതില്‍ ലായനികള്‍ വെള്ളത്തില്‍ കലരുന്നത് മത്സ്യസമ്പത്തിനെ ദോഷകരമായി ബാധിക്കും. അടുത്തിടെ കരമനയാറിന്‍റെ മാലിന്യപ്രശ്‌നം സംബന്ധിച്ച വാര്‍ത്ത ദീപിക റിപ്പോര്‍ട്ട് ചെയ്തിരുന്നു. പ്ലാസ്റ്റിക് ബോട്ടിലുകളുടെ വന്‍ ശേഖരം ഇവിടെനിന്ന് കുറച്ചുനാള്‍ മുമ്പ് നീക്കം ചെയ്തുവെങ്കിലും വീണ്ടും ഇവിടെ പ്ലാസ്റ്റിക് ബോട്ടിലുകൾ കൂടികിടക്കുന്ന അവസ്ഥ യാണ് ഉള്ളത്. കരമനയാറിലെ മത്സ്യസമ്പത്ത് സംരക്ഷിക്കുന്നതിന് ആവശ്യമായ ബോധവത്കരണം ജനങ്ങള്‍ക്കു നല്‍കിയാല്‍ മാത്രമേ ഇതിനു പരിഹാരം കാണാന്‍ സാധിക്കുകയുള്ളൂ.

മറക്കില്ല മാര്‍പാപ്പയെ; തൊഴുക്കലിലെ മണ്‍പാത്ര നിര്‍മാണ തൊഴിലാളികള്‍

നെയ്യാറ്റിന്‍കര : നെയ്യാറ്റിന്‍കര താലൂക്കിലെ തൊഴുക്കല്‍ കളിമണ്‍ ഗ്രാമത്തിലെ കളിമണ്‍ ഉത്പന്ന നിര്‍മാണ തൊഴിലാളികള്‍ മറക്കില്ല ഫ്രാന്‍സിസ് മാര്‍പാപ്പയുടെ സ്നേഹാശംസകള്‍. മാര്‍പാപ്പയെ നേരില്‍ സന്ദര്‍ശിക്കാന്‍ അവസരം ലഭിച്ചപ്പോള്‍ നിംസ് മെഡിസിറ്റി എംഡിയും നൂറുൽ ഇസ്‌ലാം സർവകലാശാല പ്രോ-ചാൻസലറുമായ എം.എസ്. ഫൈസൽഖാൻ സമ്മാനിച്ചത് നെയ്യാറിന്‍റെ മണമുള്ള മണ്‍പാത്രങ്ങളായിരുന്നു. ശ്രീനാരായണഗുരുദേവൻ ആലുവ അദ്വൈതാശ്രമത്തിൽ 1924-ല്‍ സംഘടിപ്പിച്ച സർവമത സമ്മേളനത്തിന്‍റെ ശതാബ്ദി ആഘോഷങ്ങളുടെ ഭാഗമായി ശിവഗിരിമഠത്തിന്‍റെ നേതൃത്വത്തിൽ ആഗോള ക്രൈസ്തവ സഭയുടെ ആസ്ഥാനമായ വത്തിക്കാനിൽ 2024 നവംബര്‍ 29 മുതല്‍ ഡിസംബര്‍ ഒന്നുവരെ നടന്ന ത്രിദിന ലോകമത പാർലമെന്‍റില്‍ സംബന്ധിക്കവെയാണു ഫൈസല്‍ഖാനു മാര്‍പ്പാപ്പയെ നേരില്‍ സന്ദര്‍ശിക്കാന്‍ അവസരം ലഭിച്ചത്. മാര്‍പാപ്പയ്ക്ക് നെയ്യാറ്റിന്‍കര തൊഴുക്കലിലെ മണ്‍പാത്ര നിര്‍മാണ തൊഴിലാളികള്‍ മെനഞ്ഞെടുത്ത മണ്‍പാത്രങ്ങള്‍ സ്നേഹോപഹാരമായി നല്‍കാന്‍ തീരുമാനിച്ചതിനു പിറകില്‍ ദൈനംദിന ചെലവുകൾ നിറവേറ്റാൻ പാടുപെടുന്ന കലാകാരന്‍മാര്‍ കൂടിയായ ആ തൊഴിലാളികളുടെ ഉൽപ്പന്നങ്ങൾ ആഗോളതലത്തിൽ പ്രചരിപ്പിക്കാനുള്ള താത്പര്യം കൂടിയുണ്ടായിരുന്നെന്നു ഫൈസല്‍ഖാന്‍ പിന്നീട് വ്യക്തമാക്കി. മാര്‍പ്പാപ്പയെ ദര്‍ശിക്കുകയും മണ്‍പാത്രങ്ങള്‍ സ്നേഹാദരങ്ങളോടെ കൈമാറുകയും ചെയ്ത സന്ദര്‍ഭത്തെക്കുറിച്ച് ഫൈസല്‍ഖാന്‍ രേഖപ്പെടുത്തുന്നതിങ്ങനെ: "മാർപാപ്പയ്ക്ക് ഈ ഉത്പന്നങ്ങള്‍ സമ്മാനിക്കാൻ കഴിയുമോ എന്നു ചിന്തിച്ചു നീണ്ട ക്യൂവിൽ ഞങ്ങള്‍ കാത്തിരുന്നു.ഒടുവിൽ, ഞങ്ങളുടെ ഊഴം വന്നു, ഗാലറിയിൽനിന്നു ഞങ്ങളുടെ സമ്മാനങ്ങൾ ശേഖരിച്ചു മാർപാപ്പയുടെ അടുത്തേക്ക് നീങ്ങാൻ അവിടുത്തെ ഉദ്യോഗസ്ഥർ നിര്‍ദേശിച്ചു. ഞാൻ ആദ്യം മൺ പ്ലേറ്റിനൊപ്പം മൊമെന്‍റോയും എന്‍റെ ഭാര്യ എർത്ത്‌വെയർ ഡിന്നർസെറ്റും മാർപാ പ്പയ്ക്കു സമ്മാനിച്ചു. അദ്ദേഹം ആ ഉപഹാരങ്ങള്‍ ഓരോന്നും എടുക്കുകയും അവയെക്കുറിച്ച് ചോദിക്കുകയും ചെയ്തു. നാട്ടിലെ കരകൗശല വിദഗ്ധർ ഉണ്ടാക്കിയതാണെന്ന് ഞങ്ങൾ വിശദീകരിച്ചു. തൊഴുക്കലിലെ 450 കരകൗശല തൊഴിലാളികൾക്ക് അദ്ദേഹം ആശംസകൾ അറിയിച്ചു. ഗിരീഷ് പരുത്തിമഠം

ദുഃഖാചരണം പ്രഖ്യാപിച്ച് നെയ്യാറ്റിന്‍കര രൂപത

നെയ്യാറ്റിന്‍കര : ആഗോള കത്തോലിക്കാ സഭായുടെ തലവന്‍ ഫ്രാന്‍സിസ് പാപ്പയുടെ ദേഹവിയോഗത്തെ തുടര്‍ന്നു നെയ്യാറ്റിന്‍കര രൂപതയില്‍ ഏഴു ദിവസത്തെ ദുഃഖാചരണം പ്രഖ്യാപിച്ച് രൂപതാധ്യക്ഷന്‍ ഡോ. വിന്‍സന്‍റ് സാമുവല്‍. ഇന്നലെ രൂപതാ തലത്തില്‍ ദേവാലയങ്ങളില്‍ ആരംഭിച്ച വിഎഫ് എഫ് (വെക്കേഷന്‍ ഫെയ്ത്ത് ഫെസ്റ്റ്) മാറ്റിവച്ചു. അടുത്ത ഏഴു ദിവസങ്ങളില്‍ പള്ളികളിൽ നടത്താനിരുന്ന തിരുനാളുകളും മാറ്റിവച്ചിട്ടുണ്ട്. ഇന്നലെ വൈകു ന്നേരം രൂപതാധ്യക്ഷന്‍ വിന്‍സന്‍റ് സാമുവലിന്‍റെയും സഹമെത്രാന്‍ ഡോ. ഡി സെല്‍വരാജന്‍റെയും നേതൃത്വത്തില്‍ നെയ്യാറ്റിന്‍കര അമലോത്ഭവമാതാ കത്തീഡ്രല്‍ പള്ളിയിൽ പ്രത്യേക അനുസ്മരണ പ്രാര്‍ഥന നടന്നു. അള്‍ത്താരയില്‍ സ്ഥാപിച്ച ഫ്രാന്‍സിസ് പാപ്പയുടെ ചിത്രത്തില്‍ വിശ്വാസികള്‍ പൂക്കള്‍ സമര്‍പ്പിച്ചു. ‌പ ള്ളികളിൽ ദുഃഖമണി മുഴക്കുകയും ദുഃഖസൂചകമായി കരിങ്കൊടികള്‍ സ്ഥാപിക്കുകയും ചെയ്തു. സ്നേഹത്തിന്‍റെ പ്രവാചകന്‍: ആര്‍ച്ച്ബിഷപ് ഡോ. തോമസ് ജെ. നെറ്റോ തിരുവനന്തപുരം: സര്‍വ സാഹോദര്യത്തിന്‍റെയും സ്നേഹത്തിന്‍റെയും പ്രവാചകനായിരുന്നു ഇന്നലെ കാലം ചെയ്ത ഫ്രാന്‍സിസ് മാര്‍പാപ്പയെന്നു തിരുവനന്തപുരം ലത്തീന്‍ അതിരൂപത ആര്‍ച്ച് ബിഷപ് ഡോ. തോമസ് ജെ. നെറ്റോ. ആധുനിക ലോകത്തിനു വേണ്ടതു കരുണയും സ്നേഹവുമാണന്ന് ആവര്‍ത്തിച്ചു പ്രഘോഷിച്ച സമാധാനത്തിന്‍റെ പ്രവാചകനാണ് ദൈവ തിരുസന്നിധിയിലേക്ക് മടങ്ങിയത്. കരുണ വറ്റി ഊഷരമായ ഭൂമിയില്‍ സ്നേഹത്തിന്‍റെ നീര്‍ച്ചാലുകളൊഴുക്കിയ ഫ്രാന്‍സിസ് പാപ്പയുടെ അപ്രതീക്ഷിത ദേഹവിയോഗം ലോകത്തെ കണ്ണീരിലാഴ്ത്തുന്നു. കുടിയേറ്റക്കാരോടും പ്രകൃതി ദുരന്തങ്ങള്‍ നേരിടുന്ന ജനതകളോടും കാണിച്ച കരുണയുടെയും കരുതലിന്‍റെയും, സഹാനുഭൂതിയുടെയും സമീപനം പാപ്പായെ വ്യത്യസ്ഥനാക്കുന്നു. ഫ്രാന്‍സിസ് പാപ്പായുടെ വിയോഗം ലോകമെമ്പാടുമുള്ള സര്‍വ മനുഷ്യര്‍ക്കും തീരാനഷ്ടമാണ്.

ആശമാർക്കായി എല്ലാ തദ്ദേശസ്ഥാപനങ്ങളും ഓണറേറിയം പ്രഖ്യാപിക്കണം: മോൺ. യുജിൻ പെരേര

തിരുവനന്തപുരം: ആശാ വർക്കർമാർക്കായി സംസ്ഥാനത്തെ മുഴുവൻ തദ്ദേശസ്ഥാപനങ്ങളും ഓണറേറിയം പ്രഖ്യാപിക്കാൻ തയാറാകണമെന്ന് ലത്തീൻ അതിരൂപത വികാരി ജനറാൾ മോൺ. യുജിൻ എച്ച്. പെരേര. ബജറ്റിൽ തുക വകയിരുത്തി ആശാ വർക്കേഴ്സിനായി പ്രത്യേക അലവൻസ് നൽകുമെന്ന് പ്രഖ്യാപിച്ച തദ്ദേശ സ്ഥാപനങ്ങളെ ആദരിച്ചുകൊണ്ട് ആശാ സമര സമിതി സംഘടിപ്പിച്ച പരിപാടി ഉദ്ഘാടനം ചെയ്യുകയായിരുന്നു അദ്ദേഹം.അടിത്തട്ടിലുള്ള ഭരണസംവിധാനം ആശാവർക്കർമാർക്കൊപ്പമാണ് എന്ന തിരിച്ചറിവ് ഉൾക്കൊണ്ടെങ്കിലും സംസ്ഥാന സർക്കാർ കണ്ണു തുറക്കേണ്ടതുണ്ട്. അടിസ്ഥാന ജനവിഭാഗത്തിന്‍റെ ന്യായമായ ആവശ്യങ്ങൾ തിരിഞ്ഞ് നോക്കാത്ത ഭരണ സംവിധാനം വരും നാളുകളിൽ ജനകീയ ഇടപെടലുകളുടെ കരുത്ത് മനസിലാക്കും. ആശാവർക്കർമാരുടെ തൊഴിലവകാശങ്ങൾ സ്ഥാപിക്കപ്പെടുന്ന ഒരു സ്ഥിതിവിശേഷം നമ്മുടെ സംസ്ഥാനത്ത് ഉണ്ടാകണമെന്നും അദ്ദേഹം കൂട്ടിച്ചേർത്തു. പ്രതിപക്ഷ പാർട്ടികൾ ഭരിക്കുന്ന പഞ്ചായത്തുകൾ ഉൾപ്പെടെയുള്ള തദ്ദേശ സ്ഥാപനങ്ങളാണ് ആശാ വർക്കേഴ്സിന് പ്രത്യേക അലവൻസ് നൽകുവാനുള്ള പ്രഖ്യാപനം നടത്തിയത്. പ്രത്യേക അലവൻസ് നൽകുമെന്ന് പ്രഖ്യാപനം നടത്തിയ സംസ്ഥാനത്തെ എല്ലാ തദ്ദേശസ്ഥാപനങ്ങൾക്കുമുള്ള ആദരമായിരുന്നു സമരവേദിയിൽ നടന്നത്. ആശമാർ തദ്ദേശസ്ഥാപനങ്ങളിലെ പ്രതിനിധികളെ റോസാ പൂച്ചെണ്ടും കസവുമുണ്ടും നൽകി തങ്ങളുടെ നന്ദി പ്രകാശിപ്പിച്ചു എറണാകുളം മരട് നഗരസഭ ചെയർമാൻ ആന്‍റണി ആശാംപറന്പിൽ, പത്തനംതിട്ട വെച്ചൂച്ചിറ ഗ്രാമപഞ്ചായത്ത് പ്രസിഡന്‍റ് ടി.കെ ജയിംസ്,എറണാകുളം വാരപ്പെട്ടി ഗ്രാമപഞ്ചായത്ത് പ്രസിഡന്‍റ് പി.കെ ചന്ദ്രശേഖരൻ നായർ,കോഴിക്കോട് പെരുവയൽ ഗ്രാമപഞ്ചായത്ത് വൈസ്പ്രസിഡന്‍റ് പി.കെ ഷറഫുദ്ദീൻ,കൊല്ലം നിലമേൽ ഗ്രാമപഞ്ചായത്ത് പ്രസിഡന്‍റ് ഷമീന പറന്പിൽ എന്നിവർ സമരവേദിയിൽ നിന്ന് ആദരവ് ഏറ്റുവാങ്ങി. കഴിഞ്ഞ മാസത്തെ തന്‍റെ ഓണറേറിയം സമരസമിതിക്ക് സംഭാവന ചെയ്ത , എറണാകുളം മരട് നഗരസഭ ചെയർമാൻ ആന്‍റണി ആശാംപറന്പിൽ ഇത്തവണത്തെയും തുക സംഭാവനയായി നൽകി.’നമ്മുടെ തിരുവല്ല’ ചാരിറ്റബിൾ സൊസൈറ്റി പ്രതിനിധി അഡ്വ. ലാലിച്ചൻ, എ കെസിടിഎ കോപ്പറേറ്റിവ് യൂണിയൻ സംസ്ഥാന പ്രസിഡന്‍റ് ജോയി വടക്കൻപാടൻ, കർഷക കോണ്‍ഗ്രസ് സംസ്ഥാന സെക്രട്ടറി പി.സി ജോർജ്,ശശീന്ദ്രൻ, ചെറുമൂട് മോഹനൻ,കുഞ്ഞാലിപറന്പൻ എന്നിവരും സമരവേദിയിൽ എത്തി പിന്തുണ നൽകി.

മുതലപ്പൊഴി: വി. ശശി എംഎൽഎയു‌ടെ ഓഫീസിലേക്ക് കോൺഗ്രസ് മാർച്ച് നടത്തി

തിരുവനന്തപുരം: മുതലപ്പൊഴി വിഷയം പരിഹരിക്കാൻ മുൻകൈയെടുക്കണമെന്നാവശ്യപ്പെട്ട് ചിറയിൽകീഴ് എംഎൽഎ ഓഫീസിലേക്ക് കോൺഗ്രസ് മാർച്ചും, ഉപരോധവും നടത്തി. കേരളത്തിന്‍റെ സ്വന്തം സൈന്യമെന്നു മുഖ്യമന്ത്രി കൊട്ടിഘോഷിച്ച മത്സ്യത്തൊഴിലാളികൾ അവരുടെ ജീവനോപാധികൾ സംരക്ഷിക്കുന്നതിനുവേണ്ടി നടത്തുന്ന സമരത്തെ അധിക്ഷേപിക്കുകയും, മുതലപ്പൊഴി വിഷയം പരിഹരിക്കുന്നതിനു ക്രിയാത്മകമായി ഇടപെടാതിരിക്കുകയും ചെയ്ത സ്ഥലം എംഎൽഎ വി. ശശിയുടെ ചിറയിൻകീഴിലെ ഓഫീസിലേക്കാണു കോൺഗ്രസ് പ്രവർത്തകർ പ്രതിഷേധ മാർച്ച് നടത്തിയത്. ഡികെടിഎഫ് നിയോജക മണ്ഡലം കമ്മിറ്റിയുടെ ആഭിമുഖ്യത്തിൽ നടത്തിയ പ്രതിഷേധ പരിപാടി ഡിസിസി ജനറൽ സെക്രട്ടറി അഡ്വ. എസ്. കൃഷ്ണകുമാർ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് മാടൻവിള നൗഷാദ് അധ്യക്ഷത വഹിച്ചു. നേതാക്കളായ രാജശേഖരൻ നായർ, വെട്ടുറോഡ് സലാം, മനോജ് മോഹൻ, അഡ്വ. എച്ച്.പി. ഹാരിസൻ, എ.ആർ. നിസാർ, കടയറ ജയചന്ദ്രൻ, കഠിനംകുളം ജോയി, കെ. ഓമന, യു. പ്രകാശ്, കാലടി സുരേഷ്, ജി.ആർ. അജിത്ത് കുമാർ എന്നിവർ പ്രസംഗിച്ചു. സംഘർഷത്തിനൊടുവിൽ ഓഫീസ് ഉപരോധിച്ച അഡ്വ. എസ്. കൃഷ്ണകുമാർ, മനോജ് മോഹൻ, പുതുക്കരി പ്രസന്നൻ, എസ്.കെ സുജി, മാടൻവിള നൗഷാദ്, കടക്കാവൂർ അശോകൻ, ഷഹീൻ ഷാ, കെ. ഓമന, മുനീർ കണിയാപുരം, കുഞ്ഞുമോൻ ജർമ്യാസ്, നസിയാ സുധീർ, പ്രദീപ് മണി, സജു വേങ്ങോട് എന്നിവരെ അറസ്റ്റ് ചെയ്തു സ്റ്റേഷനിലേക്ക് മാറ്റി.

അന്പലമുക്ക് വിനീത കൊലക്കേസ്: ശിക്ഷ 24നു പ്രഖ്യാപിക്കും

തിരുവനന്തപുരം: പേരൂർക്കട അന്പലമുക്കിലെ അലങ്കാരച്ചെടി വില്പനശാലയിലെ ജീവനക്കാരിയായിരുന്ന നെടുമങ്ങാട് കരിപ്പൂർ ചരുവള്ളികോണത്ത് വിനീത (38) യെ കുത്തിക്കൊലപ്പെടുത്തിയ കേസിൽ ശിക്ഷ വ്യാഴാഴ്ച വിധിക്കും. പ്രതി കന്യാകുമാരി ജില്ലയിലെ തോവാള വെള്ളമടം രാജീവ് നഗറിൽ ഡാനിയൽ മകൻ രാജേന്ദ്രൻ (40) കുറ്റക്കാരനാണെന്നു കോടതി നേരത്തെ കണ്ടെത്തിയിരുന്നു. ശിക്ഷാവിധിയേക്കുറിച്ചുള്ള വാദം ഇന്നലെ പൂർത്തിയായി. തിരുവനന്തപുരം ഏഴാം അഡിഷണൽ സെഷൻസ് ജഡ്ജി പ്രസൂണ്‍ മോഹനാണു കേസ് പരിഗണിക്കുന്നത്. 70 വയസുള്ള അമ്മയെ നോക്കണമെന്നു പ്രതി രാജേന്ദ്രൻ കോടതി മുന്പാകെ പറഞ്ഞു. പശ്ചാത്താപമുണ്ടോ എന്നു ചോദിച്ചപ്പോൾ തെറ്റു ചെയ്യാത്തതുകൊണ്ടു പശ്ചാത്താപമില്ലെന്നു മറുപടി പറഞ്ഞു. കേസ് അപൂർവങ്ങളിൽ അപൂർവമാണന്നുള്ള പ്രോസിക്യൂഷൻ വാദത്തെ തുടർന്നു പ്രതിയേക്കുറിച്ചുള്ള വിവിധ റിപ്പോർട്ടുകൾ ഹാജരാക്കാൻ കോടതി ഉത്തരവിട്ടിരുന്നു. ഇതനുസരിച്ചു സമർപ്പിച്ച റിപ്പോർട്ടുകൾ പ്രതിക്കെതിരാണ്. പ്രതി പുറത്തിറങ്ങിയാൽ സമാന കുറ്റകൃത്യം ചെയ്തേക്കാമെന്നു ജില്ലാ കളക്ടർ അടക്കമുള്ളവർ സമർപ്പിച്ച റിപ്പോർട്ടിൽ ചൂണ്ടിക്കാട്ടി. കൊടും കുറ്റവാളിയായ പ്രതിക്കു മാനസിക പരിവർത്തനത്തിനു സാധ്യത ഇല്ലെന്നു പോലീസും റിപ്പോർട്ട് നൽകി. കവർച്ചയ്ക്കായി തമിഴ്നാട്ടിലും കേരളത്തിലും പ്രതി കൊലപ്പെടുത്തിയ നാലുപേരിൽ മൂന്നും സ്ത്രീകളായിരുന്നുവെന്നു സ്പെഷൽ പബ്ലിക് പ്രോസിക്യൂട്ടർ എം. സലാഹുദീൻ പറഞ്ഞു. പ്രതിയുടെ പ്രവൃത്തി അതിക്രൂരവും പൈശാചികവും സമൂഹത്തിന്‍റെ മനഃസാക്ഷിയെ ഞെട്ടിക്കുന്നതുമാണ്. ജീവപര്യന്തം ശിക്ഷയാണ് വിധിക്കുന്നതെങ്കിൽ ശിക്ഷാ ഇളവിനു പ്രതി അർഹനാണന്നും ഭാവിയിൽ സമാനമായ കുറ്റകൃത്യങ്ങളിൽ ഏർപ്പെടില്ലെന്ന് ഉറപ്പു വരുത്താനാവില്ലന്നും പ്രോസിക്യൂഷൻ വാദിച്ചു. ഒരു പരന്പര കൊലയാളി എന്ന നിലയിൽ പ്രതി സമൂഹത്തിനു ഭീഷണിയാണ്. നിരപരാധികളെ ദാരുണമായ അന്ത്യത്തിൽ നിന്നു രക്ഷിക്കാനുള്ള ഏക മാർഗം വധശിക്ഷയാണന്നു പ്രോസിക്യൂഷൻ ശക്തമായ നിലപാടെടുത്തു. പ്രതിയുടെ പ്രായം പരിഗണിക്കണമെന്നു പ്രതിഭാഗം അഭിഭാഷകനും പറഞ്ഞു.

കാട്ടുപോത്തിന്‍റെ ആക്രമണത്തിൽ ഗുരുതര പരിക്ക്

വിതുര: കാട്ടുപോത്തിന്‍റെ ആക്രമണത്തിൽ ടാപ്പിംഗ് തൊഴിലാളിക്കു പരിക്കേറ്റു. കല്ലാർ സെക്‌ഷ ൻ പരിധിയിൽ വലിയ മണലി അമ്പിളി വിലാസത്തിൽ രാജേന്ദ്രൻ നായർക്കാണ് ഗുരുതര പരിക്കേറ്റത്. ഇന്നലെ രാവിലെയായിരുന്നു സംഭവം. റബർ ടാപ്പിംഗ് ചെയ്യുന്നതിനിടെ കാട്ടുപോത്ത് ആ ക്രമിക്കുകയായിരുന്നു. ആക്രമണത്തിൽ രാജേന്ദ്രന്‍റെ നെഞ്ചിനു സാരമായി പരിക്കുപറ്റി. ഉടൻ തന്നെ കൂടെയുള്ളവർ നെടുമങ്ങാട് ജില്ലാ ആശുപത്രിയിൽ എത്തിച്ചു. രാജേന്ദ്രന്‍റെ നെഞ്ചിൽ 15ഓളം തുന്നൽ ഉണ്ട്. കാൻസർ രോഗി കൂടിയാണ്ഇയാൾ. ഈ പ്രദേശങ്ങളിൽ കാട്ടാനയുടെയും കാട്ടുപോത്തിന്‍റെയും ആക്രമണവും പതിവാണ്.

തുണിക്കട ഉടമയായ വിമുക്തഭടനുനേരെ ലഹരി സംഘത്തിന്‍റെ ആക്രമണം

വെള്ളറട: തുണിക്കട ഉടമയായ വിമുക്തഭടനു ലഹരി സംഘത്തിന്‍റെ മർദനമേറ്റു. കാര്‍ഗില്‍ യുദ്ധത്തില്‍ പങ്കെടുത്തു കൈയിൽ വെടിയേറ്റ വിമുക്ത ഭടന്‍ സജികുമാര്‍ ആര്യങ്കോട് കുറ്റിയായനിക്കാട്ടു നടത്തിവന്ന മകയീരം തുണിക്കടയിലാണു ലഹരി സംഘം ആക്രമണം നടത്തിയത്. ഞായറാഴ്ച ഉച്ചയോട‌െയാണ് ഇദ്ദേഹത്തിന്‍റെ കടയില്‍ മൂന്നുപേര്‍ എത്തുകയും തോര്‍ത്തു വാങ്ങി ഗൂഗിള്‍ പേ ചെയ്യുന്നതുമായി ബന്ധപ്പെട്ടു തര്‍ക്കമുണ്ടാവു കയും ചെയ്തത്. സജികുമാറിന്‍റെ ഭാര്യയോട് ഇവര്‍ മോശമായി പെരുമാറിയതിനെ തുടര്‍ന്നു തര്‍ക്കവും ഉണ്ടായി. തിരിച്ചുപോയ അക്രമിസംഘം കമ്പിപ്പാരയുമായി വന്നു കട അടിച്ചു തകര്‍ക്കുകയും സജിയെ അക്രമിക്കുകയുംചെയ്തു. തൊട്ടടുത്തുണ്ടായിരുന്ന സജിയുടെ അളിയന്‍ സജി എസ്. നായര്‍ വിഷയത്തില്‍ ഇടപെട്ടതിനെ തുടര്‍ന്ന് അദ്ദേഹത്തിന്‍റെ തലയ്ക്കും കൈക്കും അടിക്കുകയും ചെയ്തു. ഇദ്ദേഹത്തെ ഗുരുതരാവസ്ഥയില്‍ കാട്ടാക്കട സ്വകാര്യ ആശുപത്രിയില്‍ പ്രവേശിപ്പിച്ചശേഷം തിരുവനന്തപുരം മെഡിക്കല്‍ കോളജിലേക്കു കൊണ്ടുപോയി. ആക്രമണത്തിനുശേഷം ഓടി രക്ഷപ്പെടാന്‍ ശ്രമിച്ച പ്രതികളിലൊരാളെ നാട്ടുകാര്‍ പിടികൂടി പോലീസില്‍ ഏല്‍പ്പിച്ചിട്ടുണ്ട്. മണ്ണാംകോണം മൊട്ടലുമൂട് സ്വദേശി ജോജോ (28)യാണ് പിടിയിലായത്. സംഭവത്തില്‍ ആര്യങ്കോട് പോലീസ് കേസെടുത്തു. അക്രമിസംഘത്തിലെ ബാക്കിയുള്ള പ്രതികളായ തെള്ളുക്കുഴി സ്വദേശികള്‍ക്കുവേണ്ടിയുള്ള തിരച്ചില്‍ ഊര്‍ജിമാക്കിയിട്ടുണ്ട്.

അണലി കുഞ്ഞുങ്ങളെ പിടികൂടി

പലോട്: നന്ദിയോടുനിന്ന് 75 ഓളം അണലി കുഞ്ഞുങ്ങളെ പിടികൂടി. നന്ദിയോട് രാഹുൽ ഭവനിൽ ബിന്ദുവിന്‍റെ വീട്ടിൽ നിന്നു സ്നേക്ക് കാച്ചർ നന്ദിയോട് രാജിയാണു അണലി കുഞ്ഞുങ്ങളെ പിടികൂടിയത്. ഇന്നലെ രാവിലെ പത്തോ ടെ പാമ്പിനെ ആരംഭിച്ച പാ ന്പു പിടിത്തം വൈകുന്നേരം ആറോടെയാണ് അവസാനിച്ചത്. കഴിഞ്ഞദിവസം രാത്രിയാണു വീടിനു സമീപത്തായി അണലിയെ കണ്ടത്. തുടർന്നു രാജിയെ വിളിച്ചു നടത്തിയ തെരച്ചിലിനൊടുവിലാണ് 75-ഓളം അണലി കുഞ്ഞങ്ങളെ കണ്ടത്തിയത്. അണലി കുഞ്ഞുങ്ങളെ പാലോട് വനം വകുപ്പിന് കൈമാറും. കേരളത്തിൽ ആദ്യമായി 75 ഓളം പാമ്പിൻ കുഞ്ഞുങ്ങളെ പിടികൂടുന്നതെന്നു പറയപ്പെടുന്നു.

സിപിഎം ജില്ലാ സെക്രട്ടേറിയറ്റ്: സി. ജയൻബാബു ഒഴിവായി; പുതുതായി അഞ്ചു പേർ

തിരുവനന്തപുരം : സിപിഎം തിരുവനന്തപുരം ജില്ലാ സെക്രട്ടേറിയറ്റ് രൂപീകരിച്ചു. ഏറെക്കാലം ജില്ലാ സെക്രട്ടേറിയറ്റംഗമായിരുന്ന സി.ജയൻബാബു ഒഴിവായി. മുൻ എംഎൽഎ ബി.സത്യൻ, സി.കെ. ഹരീന്ദ്രൻ എംഎൽഎ, സി. ലെനിൻ, പി.എസ്. ഹരികുമാർ, ഐ.ബി. സതീഷ് എംഎൽഎ എന്നിവരാണു പുതുതായി ജില്ലാ സെക്രട്ടേറിയറ്റിൽ എത്തിയവർ. വി.ജോയി, സി.അജയകുമാർ, എൻ. രതീന്ദ്രൻ, ബി.പി. മുരളി, ആർ. രാമു, കെ.എസ്. സുനിൽകുമാർ, എസ്. പുഷ്പലത എന്നിവർ ഉൾപ്പെടെ 12 അംഗ ജില്ലാ സെക്രട്ടേറിയറ്റാണ് ഇന്നലെ രൂപീകരിച്ചത്. സിപിഎം സംസ്ഥാന സെക്രട്ടറി എം.വി. ഗോവിന്ദൻ, പാർട്ടി കേന്ദ്ര കമ്മിറ്റി അംഗങ്ങളായ സി.എസ്. സുജാത, പുത്തലത്ത് ദിനേശൻ, സംസ്ഥാന സെക്രട്ടേറിയറ്റംഗങ്ങളായ പി.കെ. ബിജു, കെ.കെ. ജയചന്ദ്രൻ എന്നിവർ ഇന്നലെ ചേർന്ന ജില്ലാ കമ്മിറ്റി യോഗത്തിൽ പങ്കെടുത്തു.

അയൽവാസികൾ തമ്മിലടിച്ചു: ഒരാൾക്ക് കുത്തേറ്റു

വിഴിഞ്ഞം: വസ്തു തർക്കത്തിന്‍റെ പേരിൽ അയൽവാസികൾ തമ്മിലടിച്ചു. ഒരാൾക്ക് കുത്തേറ്റു. രണ്ടുപേർ അറസ്റ്റിൽ.കാഞ്ഞിരംകുളം പനനിന്നയിൽ ആനന്ദ (38) നാണ് കുത്തേറ്റത്. സംഭവവുമായി ബന്ധപ്പെട്ടു സഹോദരങ്ങളായ ഗോപി (69), സുദർശനൻ (53)എന്നിവരെ കാഞ്ഞിരംകുളം പോലീസ് അറസ്റ്റ് ചെയ്തു. ഞായറാഴ്ച രാത്രിയിലായിരുന്നു സംഭവം. കത്തികൊണ്ടുള്ള കുത്തിൽ വയറിൽ ഗുരുതരമായി പരിക്കേറ്റ ആനന്ദിനെ നെയ്യാറ്റിൻകരയിലെ സ്വകാര്യ ആശുപത്രിയിൽ പ്രവേശിപ്പിച്ചു. പ്രതികളെ കോടതിയിൽ ഹാജരാക്കി റിമാൻഡു ചെയ്തു.

പുലിമുട്ടത്ത് ഭഗവതിക്ഷേത്രം പത്താമുദയ മഹോത്സവം

പൂവാർ: കുളത്തൂർ തോണിക്കടവ് പുലിമുട്ടത്ത് ശ്രീഭഗവതി ക്ഷേത്രത്തിലെ 49-ാമത് പത്താമുദയ വാർഷിക മഹോത്സവം തുടങ്ങി. 23 ന് സമാപിക്കും. ഇന്നു രാവിലെ നിർമാ ല്യദർശനം, ഗണപതി ഹോമം, കലശപൂജ, കലശാഭിഷേകം, ഉച്ചയ്ക്കു നാഗരൂട്ട്, സമൂഹസദ്യ, വൈകുന്നേരം ലളിതാസഹസ്രനാമാർച്ചന, ദീപാരാധന, ഭജന, ഭഗവതിസേവ, ദേവി ദേവന്മാർക്ക് പത്മമിട്ടുപൂജ, വിശേഷാൽ പൂജ, രാത്രി മൊഴിയരങ്ങിന്‍റെ താളോത്സവം എന്നിവയുണ്ടാകും. നാളെ രാവിലെ നേർച്ച പൊങ്കാല, പൊങ്കാല നിവേദ്യം, വൈകുന്നേരം താലപ്പൊലി, പിടിപ്പണം നേർച്ചകൾ, രാ ത്രി എട്ടിനു പുഷ്പാഭിഷേകം, രാത്രി 9.30 ന് ട്രിവാൻഡ്രം വോയിസ് അവതരിപ്പിക്കുന്ന ഗാനമേള എന്നിവ ഉണ്ടായിരിക്കു മെന്നു സെക്രട്ടറി എ.കെ. ശ്രീകണ്ഠൻ അറിയിച്ചു.

കുണ്ടമൺകടവ് പാലം പൈതൃക ഇടനാഴിയാക്കാനുള്ള നീക്കം "ഒഴുകിപോയി'

പേയാട് : ഒരു നൂറ്റാണ്ടിലേറെ പഴക്കമുള്ള കുണ്ടമൺകടവ് പാലം പൈതൃക ഇടനാഴിയാക്കാനുള്ള നീക്കം ഏതാണ്ട് ഒഴുകിപ്പോയ മട്ടിലായി. മലയോരപ്രദേശങ്ങളെ തലസ്ഥാനവുമായി ബന്ധപ്പെടുത്തുന്ന, കരമനയാറിന് കുറുകെയുള്ള കുണ്ടമൺകടവ് പാലത്തിന് തൊട്ടുടുത്ത് പുതിയ പാലം ഉയർന്നപ്പോഴാണ് പഴയ പാലത്തെ സംരക്ഷിക്കാൻ നീക്കമുണ്ടായത്. മുല്ലപെരിയാർ ഡാം നിർമാണ ഘട്ടത്തിലാണ് കരമനയാറിനു കുറുകെ പാലം പണിതത്. അതുവരെ ചങ്ങാടം ഉപയോഗിച്ച് യാത്ര നടത്തിയിരുന്നവർക്ക് പാലം ആശ്വാസമായി. ശ്രീമൂലം തിരുനാളാണ് 1898 ൽ പാലം നിർമിച്ചത്. കരമനയാറിൽ പാലം കെട്ടി ഉയർത്തിയ ബ്രിട്ടീഷ് എൻജിനീയർമാരെ ഇവിടെ വരുത്തിയാണ് ബലത്തിൽ ഇരുമ്പ് പാലം കെട്ടി ഉയർത്തിയത്. ഇംഗ്ലണ്ടിൽ നിന്നാണ് പാലത്തിനായി വസ്തുക്കൾ എത്തിച്ചതെന്നു പഴയ രേഖകൾ പറയുന്നു. അതോടെ ഒറ്റപ്പെട്ടു കിടന്ന ഗ്രാമങ്ങളിൽ വികസനം എത്തി. പഴയ കാളവണ്ടികളും പുക തൂകി പായുന്ന ബസുകളും മാറി മറ്റു വണ്ടികൾ വർധിച്ചതോടെ പാലത്തിനു താങ്ങാവുന്നതിൽ അധികം ഭാരം കയറിത്തുടങ്ങി. ടൺ കണക്കിനു ഭാരം താങ്ങുന്ന ലോറികൾ പോയതോടെ പാലം നാശത്തിന്‍റെ വക്കിലായി. ഇടയ്ക്കിടെ അറ്റകുറ്റ പണികൾ നടത്തി അധികൃതർ മടങ്ങും. എന്നാൽ പാലത്തിന്‍റെ പല ഭാഗത്തും വിള്ളലും മറ്റും വന്നു തുടങ്ങി. പാലത്തിന്‍റെ ചുവട്ടിൽനിന്നുപോലും വൻ തോതിൽ മണലൂറ്റൂ നടന്നതോടെ അടിവാരവും ഇളകി തുടങ്ങി. ഇടയ്ക്ക് പാലത്തിന്‍റെ ഒരു ഭാഗം ഇളകി വീഴുകയും ചെയ്തു. ഈ പശ്ചാത്തലത്തിലാണ് ഭാരം താങ്ങാതെ പാലം കിതയ്ക്കാൻ തുടങ്ങിയത്. തുടർന്നാണ് പുതിയ പാലം വന്നത്. അതിനിടെ പഴയ പാലം മാലിന്യങ്ങൾ തള്ളുന്നതിനുള്ള ഇടമായും മാറി. കരമനയാറ്റിൽ മാലിന്യങ്ങൾ ഇടാൻ ആളൊഴിഞ്ഞ പാലം പലരും ഉപയോഗിച്ചു തുടങ്ങിയതോടെയാണു പാലത്തിന്‍റെ സംരക്ഷണം ചർച്ചയായത്. സാംസ്‌കാരിക കൂട്ടായ്മകൾക്കായി പൈതൃക ഇടനാഴിക്കായി സംവിധാനം ഒരുക്കാനുള്ള നീക്കവും ഉദ്ദേശിച്ചിരുന്നു. സിസിടിവി കാമറകൾ സ്ഥാപിക്കാനും നിരീക്ഷണ സമിതികൾ രൂപീകരിക്കാനും ജൈവവൈവിധ്യ ബോർഡിന്‍റെ സഹായത്തോടെ മാസ്റ്റർ പ്ലാൻ നടപ്പിലാക്കാനും തീരുമാനമെടുത്തിരുന്നു. എന്നാൽ അതൊക്കെ കരമനയാറിലെ വെള്ളം ഒഴുകിപോയ മട്ടിലായി മാറി.

ജലവിതരണം ഭാഗികമായി തടസപ്പെടും

തിരുവല്ലം: കേരള വാട്ടർ അഥോറിറ്റിയുടെ വെള്ളയമ്പലത്തുള്ള ശുദ്ധീകരണശാലയിൽ ശുചീകരണ പ്രവർത്തനങ്ങൾ നടത്തുന്നതിനാൽ നാളെ ഉച്ചയ്ക്ക് രണ്ടുമുതൽ രാത്രി 10 കുര്യാത്തി, പാറ്റൂർ സെക്‌ഷൻ പരിധിയിൽ വരുന്ന തമ്പാനൂർ, ഫോർട്ട്, ശ്രീവരാഹം, ചാല, വലിയശാല, കുര്യാത്തി, മണക്കാട്‌, ആറ്റുകാൽ, വള്ളക്കടവ്‌, മുട്ടത്തറ, കമലേശ്വരം, കളിപ്പാൻകുളം, പെരുന്താന്നി, ശ്രീകണ്ഠേശ്വരം തുടങ്ങിയ വാർഡുകളിലും പാറ്റൂർ സെക്‌ഷൻ പരിധിയിൽ വരുന്ന കൈതമുക്ക് പാസ്‌പോർട്ട് ഓഫീസിന്‍റെ ചുറ്റുമുള്ള സ്ഥലങ്ങൾ, ചമ്പക്കട എന്നീ പ്രദേശങ്ങളിലും ശുദ്ധജലവിതരണം ഭാഗീകമായി തടസ്സപ്പെടും. ഉപഭോക്താക്കൾ വേണ്ട മുൻകരുതലുകൾ സ്വീകരിക്കേണ്ടതാണെന്ന്‌ വാട്ടർ അഥോറിറ്റി അറിയിച്ചു.

വോൾട്ടേജ് ക്ഷാമം: നാട്ടുകാർ ട്രാൻസ്ഫോർമറിൽ റീത്തുവച്ചു

നെടുമങ്ങാട്: വോൾട്ടേജ് ക്ഷാമം പരിഹരിക്കാത്തതിൽ പ്രതിഷേധിച്ച് നാട്ടുകാർ ട്രാൻസ്ഫോർമറിൽ റീത്തുവച്ച് പ്രതിഷേധിച്ചു. അരുവിക്കര പഞ്ചായത്തിലെ മൈലമ്മൂട് വാർഡിലെ മുറിവാതുക്കൽ, ഗോതമ്പി പ്രദേശങ്ങളിലെ ജനങ്ങളാണ് മുറിവാതുക്കലിൽ സ്ഥാപിച്ചിരിക്കുന്ന ട്രാൻസ്ഫോർമറിൽ റീത്തുവച്ചത്. പ്രദേശങ്ങളിലെ രൂക്ഷമായ വോൾട്ടേജ് ക്ഷാമം പരിഹരിക്കണമെന്ന നാട്ടുകാരുടെ നിരന്തര ആവശ്യത്തെ തുടർന്ന് എട്ടു മാസം മുമ്പ് വൈദ്യുതി ബോർഡ് അധികൃതർ മുറിവാതുക്കലിൽ ട്രാൻസ്ഫോർമർ സ്ഥാപിച്ചെങ്കിലും നാളിതുവരെ പ്രവർത്തിപ്പിച്ചിട്ടില്ല. ട്രാൻസ്ഫോർമർ അടിയന്തിരമായി പ്രവർത്തിപ്പിക്കണമെന്ന് ആവശ്യപ്പെട്ട് തീരം റെസിഡൻസ് അസോസിയേഷൻ ഭാരവാഹികൾ വൈദ്യുതി ബോർഡിന് പരാതി നൽകിയിരുന്നു. സാമ്പത്തിക പ്രതിസന്ധിമൂലം വൈദ്യുതകമ്പികൾ ലഭ്യമാകാത്തതിനാലാണു ട്രാൻസ്ഫോർമർ പ്രവർത്തിപ്പിക്കാൻ സാധിക്കാത്തതെന്നും പ്രശ്നങ്ങൾ ഉടൻ പരിഹരിക്കുമെന്നും വൈദ്യുതി ബോർഡ് അധികൃതർ അറിയിച്ചു.

കുഞ്ഞിന്‍റെ മരണത്തിൽ ആരോപണവുമായി ബന്ധുക്കള്‍

പേരൂര്‍ക്കട: കുഞ്ഞിന്‍റെ മരണവുമായി ബന്ധപ്പെട്ട് ആശുപത്രിക്കെതിരേ ആരോപണവുമായി രക്ഷിതാക്കള്‍ രംഗത്ത്. മണക്കാട് സ്വദേശി ഷബീഖിന്‍റെ ഒരുവയസും എട്ടുമാസവും പ്രായമുള്ള ആണ്‍കുട്ടിയാണ് തിങ്കളാഴ്ച തൈക്കാട് ഗവ. ആശുപത്രിയില്‍ മരിച്ചത്. കുട്ടിക്ക് കരിമഠം കമ്മ്യൂണിറ്റി സെന്‍ററില്‍ ഏപ്രില്‍ 10നു വാക്‌സിന്‍ എടുത്തിരുന്നു. അതിനുശേഷം പനിബാധയുണ്ടായ കുട്ടിയെ തിങ്കളാഴ്ച പുലര്‍ച്ചെയാണ് തൈക്കാട് ആശുപത്രിയില്‍ പ്രവേശിപ്പിക്കുന്നത്. എന്നാല്‍ കുട്ടിയുടെ ജീവന്‍ രക്ഷിക്കാനായില്ല. കമ്മ്യൂണിറ്റി സെന്‍ററിനെതിരേയും തൈക്കാട് ആശുപത്രിക്കെതിരേയും രക്ഷിതാക്കള്‍ ആരോപണമുന്നയിക്കുന്നുണ്ട്. അതേസമയം കുട്ടിയെ തൈക്കാട് ആശുപത്രിയിലെത്തിച്ചപ്പോള്‍ത്തന്നെ മരണം സംഭവിച്ചിരുന്നുവെന്നാണ് ഡോക്ടര്‍ പറയുന്നത്. അസ്വാഭാവിക മരണത്തിന് ഫോര്‍ട്ട് പോലീസ് കേസെടുത്തിട്ടുണ്ട്.

ഭക്ഷ്യവിഷബാധ; ചികിത്സയിലായിരുന്ന ഭൂരിഭാഗം പേരും ആശുപത്രി വിട്ടു

പേരൂര്‍ക്കട: മണക്കാട്ടെ ഇസ്താന്‍ബുള്‍ റോള്‍സ് ആൻഡ് ഗ്രില്‍സില്‍ നിന്നു ഷവര്‍മ കഴിച്ചു ദേഹാസ്വാസ്ഥ്യവും ഛര്‍ദ്ദിയും അനുഭവപ്പെട്ട് വിവിധ ആശുപത്രികളില്‍ ചികിത്സയിലായിരുന്ന ഭൂരിഭാഗം പേരും വിടുതൽനേടി. വെള്ളിയാഴ്ച വൈകുന്നേരം ഇവിടെനിന്ന് ആഹാരം കഴിച്ചവരില്‍ 86 പേരാണ് ശനി, ഞായര്‍ ദിവസങ്ങളില്‍ സ്വകാര്യാശുപത്രികളിലും ഗവ. ആശുപത്രികളിലുമായി ചികിത്സ തേടിയത്. ഇതില്‍ ഒന്പതുപേര്‍ കുട്ടികളായിരുന്നു. ആരുടെയും നില ഗുരുതരമായിരുന്നില്ല. ഇനി വിവിധ ആശുപത്രികളില്‍ ചികിത്സയിലുള്ളത് 10 പേര്‍ മാത്രമാണെന്നാണു വിവരം. സംഭവത്തെ തുടര്‍ന്ന് ഹെല്‍ത്ത് അധികൃതര്‍ പരിശോധന നടത്തുകയും ആഹാരത്തിന്‍റെ സാമ്പിളുകള്‍ ശേഖരിക്കുകയും ചെയ്തിരുന്നു. ഹോട്ടല്‍ താത്കാലികമായി പൂട്ടിയിരിക്കുകയാണ്.

കപ്പ പുഴുങ്ങി പ്രതിഷേധം

വെഞ്ഞാറമൂട്: അടുക്കളകളെ ആശങ്കയിലാക്കരുതെന്നു കേരളാ ഡെമോക്രാറ്റിക് പാർട്ടി സംസ്ഥാന ട്രഷറർ പ്രദീപ് കരുണാകര പിള്ള ആവശ്യപ്പെട്ടു. പാചകവാതക വിലവർധനവിനെതിരെ കേരള ഡെമോക്രാറ്റിക് പാർട്ടി ജില്ലാ പ്രസിഡന്‍റ് ജെ. നായരുടെ അധ്യക്ഷതയിൽ നടന്ന കപ്പ പുഴുങ്ങി പ്രതിഷേധ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സംസ്ഥാന വർക്കിംഗ് പ്രസിഡന്‍റ് കടകംപള്ളി സുകു, സംസ്ഥാന ജനറൽ സെക്രട്ടറി ലത മേനോൻ, സംസ്ഥാന സെക്രട്ടറി ദീപു രാധാകൃഷ്ണൻ, വനിതാവിഭാഗം സംസ്ഥാന പ്രസിഡന്‍റ് അഡ്വ. സുജാ ലക്ഷ്മി, സംസ്ഥാന കമ്മിറ്റി അംഗങ്ങളായ ഷിബുലാൽ, സിയാദ് കരീം, പനവൂർ ഹസൻ, ജനറൽ സെക്രട്ടറിമാരായ ആർ.പി. ക്ലിന്‍റ്, ആറ്റിങ്ങൽ ശശി, വിജയകുമാരി, ഗഫൂർ, പ്രഭ ടീച്ചർ, സുനിൽ വെട്ടൂർ, എൻ.ജെ. ജോയ്, കോലിചിറ രാജൻ, അരുൺ ചെറിയന്നൂർ, ജയലക്ഷ്മി, ചെമ്പകശേരി ചന്ദ്രബാബു, പോങ്ങനാട് ഷാജി തുടങ്ങിയ നേതാക്കൾ സംസാരിച്ചു.

സംഘാടകസമിതി ഓഫീസ് തുറന്നു

പാറശാല: സിപിഐ മണ്ഡലം സമ്മേളന നടത്തിപ്പിന്‍റെ ഭാഗമായി സംഘാടക സമിതി ഓഫീസ് തുറന്നു. പാര്‍ട്ടി ജില്ലാ കൗണ്‍സില്‍ അംഗവും മഹിളാ സംഘം സംസ്ഥാന കമ്മിറ്റി അംഗവുമായ ലതാ ഷിജു ഓഫീസ് ഉദ്ഘാടനം ചെയ്തു. പരിപാടിയില്‍ മണ്ഡലം സെക്രട്ടറി ജി.എന്‍. ശ്രീകുമാരന്‍, സ്വാഗതസംഘം കണ്‍വീനര്‍ വി.എസ്. സജീവ് കുമാര്‍, ചെയര്‍മാന്‍ എസ്. രാഘവന്‍ നായര്‍, സെക്രട്ടറിയേറ്റ് അംഗങ്ങളായ പി.പി. ഷിജു, വി. ഐ. ഉണ്ണികൃഷ്ണന്‍, എന്‍. സജീവ് കുമാര്‍, ലോക്കല്‍ കമ്മിറ്റി സെക്രട്ടറിമാരായ എം. ശ്രീകാന്ത്, സുരേഷ് കുമാര്‍ തുടങ്ങിയവര്‍ പങ്കെടുത്തു.

കെ.പി. മാധവന്‍ അനുസ്മരണം സംഘടിപ്പിച്ചു

നെടുമങ്ങാട്: സ്വാതന്ത്ര്യസമരസേനാനിയും കോൺഗ്രസ് നേതാവുമായിരുന്ന കെ.പി. മാധവന്‍റെ പതിമൂന്നാമത് ചരമവാർഷികത്തോടനുബന്ധിച്ച് നെടുമങ്ങാട് സൗഹൃദ കൂട്ടായ്മയുടെ ആഭിമുഖ്യത്തിൽ അനുസ്മരണ സമ്മേളനവും ഓർമ്മമരത്തൈകളുടെ വിതരണവും നടത്തി. പ്രസിഡന്‍റ് പുലിപ്പാറ യൂസഫിന്‍റെ അധ്യക്ഷതയിൽ കൂടിയ യോഗത്തിൽ നെടുമങ്ങാട് ശ്രീകുമാർ, കെ. സോമശേഖരൻ നായർ, തോട്ടുമുക്ക് പ്രസന്നൻ, നൗഷാദ് കായ്പാടി, വഞ്ചുവം ഷറഫ്, ഇല്യാസ് പത്താം കല്ല്, തോട്ടുമുക്ക് വിജയൻ, വെമ്പിൽ സജി, എ. മുഹമ്മദ്, അനിൽ ജെ തുടങ്ങിയവർ പങ്കെടുത്തു.

തുളസികുമാർ അനുസ്മരണം

നെടുമങ്ങാട്: സിപിഎം ആട്ടുകാൽ ലോക്കൽ കമ്മിറ്റി സെക്രട്ടറിയായിരിക്കെ അന്തരിച്ച എസ്. തുളസികുമാറിന്‍റെ നാലാമത് ചരമവാർഷികം ആചരിച്ചു. അനുസ്മരണ യോഗം സംസ്ഥാന കമ്മിറ്റി അംഗം ഡി.കെ. മുരളി എംഎൽഎ ഉദ്ഘാടനം ചെയ്തു. ആട്ടുകാൽ ലോക്കൽ കമ്മിറ്റി സെക്രട്ടറി സജീവ് കുമാർ അധ്യക്ഷനായി. ഏരിയാ സെക്രട്ടറി കെ.പി. പ്രമോഷ്, എസ്.എസ്. ബിജു, ടി.എസ്. ബൈജു, എൻ.ആർ. ബൈജു, എം. ഗിരീഷ്കുമാർ, എസ് ആർ ഷൈൻലാൽ, എൽ എസ് ലിജു, എസ്.കെ. ബിജുകുമാർ, എം.എം. അഷറഫ് എന്നിവർ സംസാരിച്ചു. ലോക്കൽ കമ്മിറ്റി അംഗം ശ്രീജു സ്വാഗതവും, ബി. രാജു നന്ദിയും പറഞ്ഞു. അനുസ്മരണ യോഗത്തിനു മുന്നോടിയായി സ്മൃതി കുടീരത്തിൽ പുഷ്പാർച്ചനയും നടന്നു.

ലഹരിവിരുദ്ധ പ്രചാരണ പരിപാടി നടത്തി

നെടുമങ്ങാട്: ലഹരിക്കെതിരെയുള്ള ബോധവത്കരണത്തിന്‍റെ ഭാഗമായി എൻഎസ്എസ് പ്രചാരണ പരിപാടികൾ സംഘടിപ്പിച്ചു. അരുവിക്കര ഭഗവതി വിലാസം എൻഎസ്എസ് കരയോഗത്തിന്‍റെ ആഭിമുഖ്യത്തിൽ സംഘടിപ്പിച്ച ലഹരി വിരുദ്ധ പ്രചാരണ പരിപാടി അരുവിക്കര സർക്കിൾ ഇൻസ്‌പെക്ടർ മുരളീകൃഷ്ണൻ ഉദ്ഘാടനം ചെയ്തു. കരയോഗം പ്രസിഡന്‍റ് രാജേന്ദ്രൻ നായർ അധ്യക്ഷനായി. നെടുമങ്ങാട്‌ ബ്ലോക്ക്‌ പഞ്ചായത്തംഗം വിജയൻ നായർ, പഞ്ചായത്തംഗം ഗീതാഹരികുമാർ, കരയോഗം സെക്രട്ടറി വിശ്വംഭരൻ നായർ, വൈസ് പ്രസിഡന്‍റ് മോഹൻ കുമാർ, മെഡിക്കൽ ഓഫീസർ ഡോ. ജാസ്മിൻ, റിട്ട. സബ് ഇൻസ്‌പെക്ടർ ചന്ദ്രമോഹൻ, ജയവിജയൻ എന്നിവർ സംസാരിച്ചു. നെടുമങ്ങാട്: ചാങ്ങ ദേവീവിലാസം എൻഎസ്എസ് കരയോഗത്തിന്‍റെ ആഭിമുഖ്യത്തിൽ സംഘടിപ്പിച്ച ലഹരിവിരുദ്ധ പ്രചാരണ പരിപാടികൾ കരയോഗം പ്രസിഡന്‍റ് കെ. സുനിൽ ഉദ്ഘാടനം ചെയ്തു. സെക്രട്ടറി എസ്. പ്രദീപ്കുമാർ, വൈസ് പ്രസിഡന്‍റ് ചന്ദ്രൻ നായർ എന്നിവർ പ്രസംഗിച്ചു.

ആറാട്ടോടെ കാട്ടാൽ മുടിപ്പുരയിലെ തൂക്കപറണേറ്റ് ഉത്സവം സമാപിച്ചു

കാട്ടാക്കട: നിലത്തിൽപ്പോരിൽ ദാരികനെ ദേവി വധിക്കുന്ന ചടങ്ങിനുശേഷം ആറാട്ടോടെ കാട്ടാൽ മുടിപ്പുരയിലെ തൂക്ക പറണേറ്റ് ഉത്സവം സമാപിച്ചു. ഇന്നലെ രാവിലെ അഞ്ചിന് ഗണപതിഹോമത്തിനുശേഷമാണ് നിലത്തിൽപ്പോര് തുടങ്ങിയത്. ഏഴുവട്ടം ദാരികനുമായുള്ള പോരിനു നൂറുകണക്കിന് ദേവീഭക്തർ അമ്മേശരണം ദേവീശരണം വിളികളോടെ സാക്ഷികളായി. തുടർന്ന് വൈകുന്നേരം നാലിനു മണ്ഡപത്തിൻകടവ് ആറാട്ടുകടവിലേക്ക് കാട്ടാലമ്മ യാത്രയായി. ആറിനു വാദ്യഘോഷങ്ങളുടെയും തെയ്യം, പൂക്കാവടി, നിശ്ചലദൃശ്യങ്ങൾ എന്നിവയുടെ അകമ്പടിയോടെ ക്ഷേത്രത്തിലേക്ക് തിരിച്ചെഴുന്നള്ളി. ഇതോടെ 18 ദിവസം നീണ്ട ഉത്സവത്തിനു സമാപ്തിയായി. മറുനട തുറക്കുന്ന 25-ന് പൊങ്കാല നടക്കും.

ഫോസ്റ്റര്‍ മെമ്മോറിയല്‍ സിഎസ്ഐ ഇടവകയില്‍ ഈസ്റ്റര്‍ സന്ദേശറാലി

വെള്ളറട: വെള്ളറട ഫോസ്റ്റര്‍ മെമ്മോറിയല്‍ സിഎസ്ഐ ഇടവകയുടെ ഈസ്റ്റര്‍ സന്ദേശ റാലിയില്‍ ആയിരത്തിലതികം പേര്‍ പങ്കെടുത്തു. കിളിയൂര്‍, കോട്ടയാംവിള, ഇരിഞ്ഞിനംപള്ളി മേഖലകളിലെ വിശ്വാസികള്‍ ഒന്നിച്ചുചേര്‍ന്നു ദേവാലയത്തിലേക്ക് മഹാ ഈസ്റ്റര്‍ റാലിയായെത്തി. തുടര്‍ന്നുള്ള ശുശ്രുഷകള്‍ക്ക് ഡിസ്ട്രിക്ട് ചെയര്‍മാന്‍ റവ. ധര്‍മരാജ് , റവ. ഡോ. ഡി. ബര്‍ണബാസ്, സഹശുശ്രൂഷകന്‍ ഷിന്‍റെ സ്റ്റാന്‍ലി എന്നിവര്‍ നേതൃത്വം നല്‍കി. ഇടവക സെക്രട്ടറി ടി. ഫ്രാന്‍സിസ്, അക്കൗണ്ടന്‍റ് ജസ്റ്റിന്‍ ജയകുമാര്‍, ഇടവക കമ്മിറ്റി അംഗങ്ങളായ ഡി.പി. ഷിനോജ്, കുമാര്‍, അതുല്‍ ഷൈന്‍, രാഹുല്‍, ജസ്റ്റിന്‍ വിത്സരാജ്, ധര്‍മ്മരാജ്, സുന്ദരരാജ്, ആര്‍.സി. ശാന്ത, ജിജി സനല്‍ തുടങ്ങിയവര്‍ പങ്കെടുത്തു. യോഗത്തില്‍ ഇടവക ബാലജന സംഘടനയുടെ നേതൃത്വത്തില്‍ രൂപീകരിക്കപ്പെട്ട ബാലജന ഗായക സംഘത്തിന്‍റെ ഉദ്ഘടനവും നടത്തപ്പെട്ടു. ആരാധനക്കുശേഷം പ്രഭാത ഭക്ഷണം ചര്‍ച്ച് ഹാളില്‍ ക്രമീകരിച്ചിരുന്നു.

വിഗ്യാൻ 2025 സയൻസ് ക്യാന്പ് ഇന്നും നാളെയും

നെയ്യാറ്റിൻകര : താലൂക്കിലെ കുട്ടികളുടെ ശാസ്ത്ര- സാങ്കേതിക ബോധം വളർത്തുക എന്ന ലക്ഷ്യത്തോടെ നിംസ് മെഡിസിറ്റിയും നീഷേ ഡീംഡ് യൂണിവേഴ്സിറ്റിയും ബോധി എഡ്യൂക്കേഷന്‍റെ ശാസ്ത്ര ഗവേഷണ സംരംഭമായ ബോധി സയൻസ് സൊസൈറ്റിയും സംയുക്തമായി സംഘടിപ്പിക്കു ന്ന വിഗ്യാൻ 2025 സയൻസ് ക്യാന്പ് ഇന്നാരംഭിക്കും. ഇന്‍ഡ്യയുടെ മിസൈല്‍ വനിത ടെസി തോമസ്, ഡോ. അച്യുത് ശങ്കര്‍, ഡോ. ബിജുകുമാര്‍, ആരോഗ്യ സർവകലാശാല മുൻ വൈസ് ചാന്‍സിലര്‍ ഡോ എം.സി.കെ നായര്‍, സാംബശിവറാവു, ഡോ. മഹേഷ്‌ ഗുരുക്കൾ എന്നിവരുള്‍പ്പെടെ പ്രമുഖ ശാസ്ത്രജ്ഞരും ഗവേഷകരും ടെക്നോ ക്രാറ്റുകളും ക്യാന്പില്‍ വിദ്യാര്‍ഥികളുമായി സംവദിക്കും. വിദ്യാര്‍ഥികൾക്ക് ശാസ്ത്ര രംഗത്തെയും അതിലെ കൂടുതൽ സാധ്യതകളെയും കുറിച്ചുള്ള അറിവുകൾ പങ്കു വയ്ക്കാൻ ഈ അവസരം പ്രയോജനപ്പെടുമെന്ന് സംഘാടകര്‍ അറിയിച്ചു. നിംസ് മെഡിസിറ്റി യില്‍ നടക്കുന്ന രണ്ടു ദിവസത്തെ ക്യാന്പ് നാളെ സമാപിക്കും.

മീന്‍വളര്‍ത്തല്‍ കേന്ദ്രമായിരുന്ന കുളം പായല്‍മൂടിയ നിലയില്‍

പേരൂര്‍ക്കട: വര്‍ഷങ്ങള്‍ക്കുമുമ്പു മത്സ്യകൃഷിയും വിളവെടുപ്പും ആഘോഷമാക്കിയിരുന്ന ഒരു കുളം ഇന്നു പായല്‍മൂടി നാശത്തിന്‍റെ വക്കിൽ. കുടപ്പനക്കുന്ന് കുറ്റിക്കോണം കുളത്തിന്‍റെ അവസ്ഥയാണ് ദയനീയമായ നിലയില്‍ തുടരുന്നത്. വര്‍ഷങ്ങള്‍ക്ക് മുമ്പ് ഗെപ്പി, വരാല്‍, കാര്‍പ്പ് തുടങ്ങിയ നിരവധി മത്സ്യങ്ങളെ കുളത്തില്‍ നിക്ഷേപിച്ച് വളര്‍ത്തുകയും വിളവെടുപ്പ് ആഘോഷമാക്കി നടത്തുകയും ചെയ്തിരുന്നതാണ്. വര്‍ഷങ്ങള്‍ കഴിഞ്ഞതോടെ കുളത്തിന്‍റെ നവീകരണം പേരിലൊതുങ്ങുകയായിരുന്നു. കുടപ്പനക്കുന്ന് ഇരപ്പുകുഴിക്കു സമീപമാണ് കുളമുള്ളത്. കുളത്തിനു ചുറ്റുമുള്ള മണ്ണിടിഞ്ഞു വെള്ളത്തിലേക്കുവീണതും വള്ളിച്ചെടികള്‍ പടര്‍ന്നു വെള്ളത്തിലേക്കു വീണുകിടക്കുന്നതുമാണ് പ്രശ്‌നം സൃഷ്ടിക്കുന്നത്. നാശോന്മുഖമായതോടെ കുളത്തില്‍ മാലിന്യം തള്ളുന്നതും പതിവായിരിക്കുകയാണ്. കുളത്തിലേക്ക് ഇറങ്ങുന്നതിനും വെള്ളമെടുക്കുന്നതിനും കല്‍പ്പടവുകള്‍ നിര്‍മിച്ചിരുന്നതുപോലും ഇന്ന് കാണാനില്ലാത്ത സ്ഥിതിയാണ്. കുളത്തിലെ വെള്ളം ശുദ്ധീകരിക്കല്‍, ചളി വാരിമാറ്റല്‍, പായല്‍ നീക്കല്‍, സംരക്ഷണ ഭിത്തി നിര്‍മിക്കല്‍ തുടങ്ങിയവ പൂര്‍ത്തീകരിച്ചാല്‍ മാത്രമേ കുളം ഇനി ഉപയുക്തമാകൂവെന്നും എത്രയുംപെട്ടെന്ന് അധികൃതർ ഇക്കാര്യങ്ങൾ ചെയ്തു കുളം ഉപയോഗപ്രദമാക്കണമെന്നാണ് പ്രദേശവാസികളുടെ ആവശ്യം.

പുനഃസംഘടനയിൽ പ്രതിഷേധം; ബിജെപി പ്രവർത്തകർ സിപിഐയിൽ

നെടുമങ്ങാട്: ബിജെപി പുനഃസംഘടനയിൽ പിന്നാക്ക വിഭാഗങ്ങളെ വെട്ടിയൊതുക്കുന്നുവെന്നാരോപിച്ച് ബിജെപി ജില്ലാ കമ്മിറ്റിയംഗവും പാലോട് മണ്ഡലം മുൻ ജനറൽ സെക്രട്ടറിയുമായ ആനാട് ആർ.ആർ. ഷാജിയുടെ നേതൃത്വത്തിൽ ഒരു സംഘം പ്രവർത്തകർ ബിജെപി വിട്ട് സിപിഐയിൽ ചേർന്നു. ബിജെപിയിൽ നിന്നു രാജിവച്ച പ്രവർത്തകരെ സിപിഐ ജില്ലാ സെക്രട്ടറി മാങ്കോട് രാധാകൃഷ്ണൻ ചുവപ്പ് ഷാൾ അണിയിച്ച് സ്വീകരിച്ചു. പിന്നാക്ക, പട്ടികജാതി വിഭാഗങ്ങളെ അവഗണിക്കുന്ന ബിജെപിയുടെ നയസമീപനങ്ങളിൽ പ്രതിഷേധിച്ച് തിരുവനന്തപുരം ജില്ലയിൽ വരുംദിവസങ്ങളിൽ കൂടുതൽ നേതാക്കളും പ്രവർത്തകരും രാജിവെച്ച് സിപിഐയിലെത്തുമെന്ന് ആർ.ആർ. ഷാജി പത്രസമ്മേളനത്തിൽ പറഞ്ഞു. സിപിഐ പാലോട് മണ്ഡലം സെക്രട്ടറി ഡി.എ. രജിത് ലാൽ , ജില്ലാ കൗൺസിൽ അംഗം എ.എസ്. ഷീജ, ആനാട് ലോക്കൽ സെക്രട്ടറി വേങ്കവിള സജി എന്നിവരും പത്രസമ്മേളനത്തിൽ പങ്കെടുത്തു.

വെള്ളനാട് സാമൂഹികാരോഗ്യ കേന്ദ്രത്തിൽ മരുന്നു വാങ്ങാനെത്തിയ ആൾക്ക് കോൺക്രീറ്റ് പാളി അടർന്നുവീണ് പരിക്ക്

നെടുമങ്ങാട്: വെള്ളനാട് സാമൂഹികാരോഗ്യ കേന്ദ്രത്തിൽ മരുന്നു വാങ്ങാനെത്തിയയാൾക്ക് കോൺക്രീറ്റ് പാളി അടർന്നു തലയിൽ വീണതിനെ തുടർന്നു പരിക്കേറ്റു. മിത്രാനികേതൻ കരിമൺകോട് തടത്തരികത്തു വീട്ടിൽ കെ. ഗോപാലൻ നാടാർക്ക് (63) ആണ് പരിക്കേറ്റത്. കഴിഞ്ഞ ദിവസം രാവിലെയായിരുന്നു അപകടം. ഭാര്യയ്ക്കു വേണ്ടി ജീവിതശൈലി രോഗങ്ങൾക്കുള്ള ഗുളികകൾ വാങ്ങാൻ എത്തിയതായിരുന്നു ഗോപാലൻ നാടാർ. ആശുപത്രിയിൽ പഴയ അത്യാഹിതവിഭാഗം പ്രവർത്തിച്ചിരുന്ന കെട്ടിടത്തിലാണ് മരുന്നു വിതരണം ചെയ്യുന്നത്. ഗോപാലൻ നാടാർ രാവിലെ മരുന്നു വാങ്ങാനെത്തിയപ്പോൾ നല്ല തിരക്കായിരുന്നു. തുടർന്നു കെട്ടിടത്തിന്‍റെ മുൻവശത്തുള്ള പടിയിൽ ഊഴം കാത്തിരിക്കുമ്പോഴാണു മുകളിലുള്ള കോൺക്രീറ്റ് പാളിയുടെ ഒരുഭാഗം അടർന്നു തലയിൽ വീണത്. സാരമായി പരിക്കേറ്റ ഗോപാലൻ നാടാർ വെള്ളനാട് ആശുപത്രിയിൽ തന്നെ ചികിത്സ തേടി. ആശുപത്രിയിൽ ഉച്ചയ്ക്കുശേഷം വരുന്ന കാഷ്വാലിറ്റിയും ചില ദിവസങ്ങളിലെ സ്പെഷൽ ക്ലിനിക്കുകളും ഈ കെട്ടിടത്തിലാണ് പ്രവർത്തിക്കുന്നത്. കെട്ടിടത്തിന്‍റെ പല ഭാഗത്തും കോൺക്രീറ്റ് പാളികൾ അടർന്നിരിക്കുകയാണ്. ഇത് എപ്പോൾ വേണമെങ്കിലും രോഗികളുടെയും ജീവനക്കാരുടെയും തലയിൽ വീഴുമെന്ന അവസ്ഥയിലാണ്. കെട്ടിടം സംരക്ഷിക്കാനുള്ള നടപടികൾ അടിയന്തിരമായി ഉണ്ടാകണമെന്നു നാട്ടുകാർ ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]