തിരുപ്പതി അപകടത്തിൽ ജുഡീഷൽ അന്വേഷണം
Friday, January 10, 2025 2:10 AM IST
തിരുപ്പതി: തിരുപ്പതി ക്ഷേത്രത്തിലുണ്ടായ അപകത്തെക്കുറിച്ച് ജുഡീഷൽ അന്വേഷണത്തിന് മുഖ്യമന്ത്രി ചന്ദ്രബാബു നായിഡു ഉത്തരവിട്ടു. ജില്ലാ പോലീസ് സൂപ്രണ്ട് ഉള്‍പ്പെടെ മൂന്നു മുതിർന്ന ഉദ്യോഗസ്ഥരെ സ്ഥലംമാറ്റി.
ആറു പേരുടെ മരണത്തിനിടയാക്കിയ, തിരുപ്പതി വൈകുണ്ഠ ദ്വാര മഹോത്സവ ദർശന കൂപ്പൺ വിതരണം ചെയ്ത ബൈരാഗി പട്ടേഡയിലെ എംജിഎം സ്കൂളിൽ മുഖ്യമന്ത്രി നായിഡു ഇന്നലെ സന്ദർശനം നടത്തി.
അപകടത്തിൽപെട്ട് ശ്രീ വെങ്കിടേശ്വര ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽ ചികിത്സയിൽ കഴിയുന്നവരെയും മുഖ്യമന്ത്രി സന്ദർശിച്ചു. ബുധനാഴ്ച രാത്രിയുണ്ടായ ദുരന്തത്തിൽ നാൽപ്പതിലേറെപ്പേർക്ക് പരിക്കേറ്റിരുന്നു. തിരുപ്പതി ക്ഷേത്രത്തിൽ പത്തുദിവസം നീളുന്ന വൈകുണ്ഠ ദ്വാര ദർശനോത്സവം ഇന്ന് ആരംഭിക്കും.
അപകടകാരണത്തെക്കുറിച്ച് അന്വേഷിച്ച് റിപ്പോർട്ട് നല്കാൻ തിരുപ്പതി ദേവസ്ഥാനം ജോയിന്‍റ് എക്സിക്യൂട്ടീവ് ഓഫീസർ എം. ഗൗതമിയോട് മുഖ്യമന്ത്രി നിർദേശിച്ചു.
കൂപ്പൺ വിതരണം ചെയ്യുന്ന സ്കൂൾ ഗ്രൗണ്ടിലേക്കുള്ള ഗേറ്റ് അപ്രതീക്ഷിതമായി തുറന്നതും ആളുകൾ തിക്കിത്തിരക്കിയതും ഒരേ സമയത്തായിരുന്നു. ഈ സമയം സ്കൂൾ വളപ്പിൽ മതിയായ പോലീസ് ഇല്ലാതിരുന്നതാണ് അപകട കാരണമായി ചൂണ്ടിക്കാട്ടപ്പെടുന്നത്.