ഷഹബാസ് വധം ; കുറ്റാരോപിതരായ വിദ്യാര്‍ഥികള്‍ പ്ലസ് വൺ അഡ്മിഷൻ നേടി
Friday, June 6, 2025 1:02 AM IST
താമരശേരി: ഷഹബാസ് വധക്കേസിലെ കുറ്റാരോപിതരായ അഞ്ച് വിദ്യാര്‍ഥികള്‍ പ്ലസ് വൺ അഡ്മിഷൻ നേടി.
മൂന്നു പേർ താമരശേരി ഗവൺമെന്‍റ് വൊക്കേഷണൽ ഹയർസെക്കൻഡറി സ്കൂളിലും ഒരാൾ സെന്‍റ് ജോസഫ് എച്ച്എസ്എസിലും മറ്റൊരാൾ ഗവ. വിഎച്ച്എസ്എസ് കുറ്റിച്ചിറയിലുമാണ് പ്രവേശനം നേടിയത്.
താമരശേരിയിൽ അലോട്ട്മെന്‍റ് ലഭിച്ച രണ്ടു പേർ താത്കാലികമായും ഒരാൾ സ്ഥിരപ്രവേശനവുമാണു നേടിയത്. സ്വഭാവ സർട്ടിഫിക്കറ്റ് തൃപ്തികരമല്ലെന്ന റിപ്പോർട്ട് ആയിരുന്നു സ്കൂള്‍ അധികൃതര്‍ വിദ്യാര്‍ഥികള്‍ക്കു നൽകിയത്. എന്നാൽ, ഇതുകൊണ്ട് അഡ്മിഷൻ നിഷേധിക്കാനാകില്ല എന്ന നിർദേശമാണ് വിദ്യാഭ്യാസ വകുപ്പിൽനിന്നു സ്‌കൂളിന് ലഭിച്ചത്.
പോലീസ് അകമ്പടിയോടെ കുട്ടികളുമായി എത്തിയ വാഹനം കെഎസ്‌യു, എംഎസ്എഫ് പ്രവർത്തകർ തടഞ്ഞു. ഇവരെ പോലീസ് അറസ്റ്റ് ചെയ്തു നീക്കി.
മൂന്നുപേർ പ്രവേശനം നേടിയ താമരശേരി ഗവ. വൊക്കേഷണൽ ഹയർസെക്കൻഡറി സ്കൂളിനുമുന്നിൽ വിദ്യാർഥിസംഘടനകൾ പ്രതിഷേധിച്ചു. എംഎസ്എഫ്, കെഎസ്‌യു, യൂത്ത് കോൺഗ്രസ് പ്രവർത്തകരെ പോലീസ് അറസ്റ്റ് ചെയ്ത് നീക്കി.
പ്രവേശനം നൽകിയ തീരുമാനം അംഗീകരിക്കാൻ ആകില്ലെന്നും ഇത് തെറ്റായ സന്ദേശമാണ് നൽകുന്നതെന്നും ഷഹബാസിന്‍റെ പിതാവ് ഇഖ്ബാല്‍ പ്രതികരിച്ചു.