യുഡിഎഫ് അധികാരത്തിലെത്തിയാൽ രാജപാത തുറക്കും: പി.ജെ.ജോസഫ്
Tuesday, April 1, 2025 1:17 AM IST
കോതമംഗലം: യുഡിഎഫ് അധികാരത്തിലെത്തിയാൽ പഴയ ആലുവ- മൂന്നാർ രാജപാത പൊതുജനങ്ങൾക്കായി തുറന്നുനൽകുമെന്ന് കേരള കോൺഗ്രസ് ചെയർമാൻ പി.ജെ. ജോസഫ് . വിവിധ ആവശ്യങ്ങളുന്നയിച്ചു കേരള കോൺഗ്രസ് സംസ്ഥാനകമ്മിറ്റി കോതമംഗലത്തു നടത്തിയ ഉപവാസസമരം ഉദ്ഘാടനം ചെയ്യുകയായിരുന്നു അദ്ദേഹം.
രാജപാതയിലെ യാത്രയുടെ പേരിൽ ബിഷപ്പിനും ജനപ്രതിനിധികൾക്കുമെതിരേ കേസെടുത്തതു ജനാധിപത്യമര്യാദയ്ക്കു നിരക്കുന്നതല്ല. കേസ് പിൻവലിക്കുന്നതുവരെ ശക്തമായ തുടർസമരത്തിന് നേതൃത്വംനൽകുമെന്നും പി.ജെ. ജോസഫ് പറഞ്ഞു.
ബിഷപ് മാർ ജോർജ് പുന്നക്കോട്ടിലിനും ജനപ്രതിനിധികൾക്കും പൊതുജനങ്ങൾക്കും എതിരേ വനംവകുപ്പ് ചുമത്തിയ വ്യാജ കേസ് പിൻവലിക്കുക, കാലഹരണപ്പെട്ട വനനിയമങ്ങൾ പൊളിച്ചെഴുതുക, രാജപാത തുറന്നുനൽകുക, വന്യമൃഗശല്യത്തിന് ശാശ്വതപരിഹാരം കാണുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം.
മുൻമന്ത്രി ടി.യു. കുരുവിള അധ്യക്ഷത വഹിച്ചു. പാർട്ടി വർക്കിംഗ് ചെയർമാൻ പി.സി തോമസ്, മോൻസ് ജോസഫ് എംഎൽഎ, ജോയ് ഏബ്രഹാം, ഫ്രാൻസിസ് ജോർജ് എംപി, പാർട്ടി ജില്ലാ പ്രസിഡന്‍റ് ഷിബു തെക്കുംപുറം, അപു ജോൺ ജോസഫ്, ഡിസിസി പ്രസിഡന്‍റ് മുഹമ്മദ് ഷിയാസ്, മാത്യു കുഴൽനാടൻ എംഎൽഎ, എം.ജെ. ജേക്കബ്, ജെയ്സൺ ജോസഫ്, പി.എം. ജോർജ്, റോജൻ സെബാസ്റ്റ്യൻ, മാത്യു വർക്കി, ജോബി ജോൺ, കെ.എഫ്. വർഗീസ്, എം.പി. ജോസഫ്, ജോസഫ് എം. പുതുശേരി, കുഞ്ഞു കോശി പോൾ, തോമസ് എം. മാത്തുണ്ണി, സേവി കുരിശുവീട്ടിൽ, ജോണി അരീക്കാട്ടിൽ, ഷീല സ്റ്റീഫൻ, കെ.വി. കണ്ണൻ, ജോൺസ് ജോർജ് കുന്നപ്പള്ളി, വർഗീസ് വെട്ടിയാങ്കൽ, എ.ടി. പൗലോസ്, ജോമി തെക്കേക്കര, സി.കെ. സത്യൻ ,റോയി സ്കറിയ , സിറിയക് കാവില്‍, സന്തോഷ് കാവുകാട്ട്, ബേബി മുണ്ടാൻ, ഷൈസന്‍ പി. മാങ്കുഴ, റാണിക്കുട്ടി ജോർജ്, ജോസ് വെള്ളമറ്റം ,ജോയ് കോഴിപ്പിള്ളി, കെ.എം. ജോർജ് എന്നിവർ പ്രസംഗിച്ചു.