എമ്പുരാന്‍: ധൈര്യമില്ലാത്തവര്‍ ഒളിച്ചിരുന്നു കല്ലെറിയുന്നെന്ന് ആസിഫ് അലി
Tuesday, April 1, 2025 1:17 AM IST
തൊടുപുഴ: സിനിമയെ സിനിമയായി കാണണമെന്നു നടന്‍ ആസിഫ് അലി. എമ്പുരാന്‍ സിനിമയുമായി ബന്ധപ്പെട്ട ആരോപണങ്ങളില്‍ തൊടുപുഴയില്‍ മാധ്യമപ്രവര്‍ത്തകരോട് പ്രതികരിക്കുകയായിരുന്നു അദ്ദേഹം. സമൂഹമാധ്യമങ്ങളുടെ അതിപ്രസരം വലിയ പ്രശ്‌നങ്ങള്‍ സൃഷ്‌ടിക്കും.
മൂന്നുമണിക്കൂര്‍ സിനിമ എന്‍റര്‍ടൈന്‍മെന്‍റ് എന്ന നിലയിലാണ് കാണേണ്ടത്. സിനിമ എത്രത്തോളം സ്വാധീനിക്കും എന്നതു നമ്മള്‍ തീരുമാനിക്കണം. നേരിട്ട് അഭിപ്രായം പറയാന്‍ ധൈര്യമില്ലാത്തവര്‍ ഒളിച്ചിരുന്നു കല്ലെറിയുകയാണ്.
സമൂഹമാധ്യമങ്ങളില്‍ കാണുന്നത് ഇതിന്‍റെ മറ്റൊരു വകഭേദമാണ്. സൈബര്‍ ആക്രമണം അനുഭവിക്കുന്നവര്‍ക്കേ മനസിലാകൂ. ന്യായം എവിടെയോ അതിനൊപ്പം നില്‍ക്കുമെന്നും ആസിഫ് അലി പറഞ്ഞു.