വിശുദ്ധ ചാവറയച്ചന്‍ ക്രാന്തദര്‍ശിയായ സാമൂഹ്യപരിഷ്‌കര്‍ത്താവ്: സച്ചിദാനന്ദന്‍
Tuesday, April 1, 2025 1:17 AM IST
കൊച്ചി: ക്രാന്തദര്‍ശിയായ സാമൂഹ്യ പരിഷ്‌കര്‍ത്താവായിരുന്നു വിശുദ്ധ ചാവറയച്ചനെന്ന് കവിയും കേരള സാഹിത്യ അക്കാദമി പ്രസിഡന്‍റുമായ കെ. സച്ചിദാനന്ദന്‍.
ചാവറ കള്‍ച്ചറല്‍ സെന്‍ററില്‍ വിശുദ്ധ ചാവറയച്ചന്‍ , ജീവിതവും സാഹിത്യ കൃതികളും പ്രകാശനം ചെയ്തു സംസാരിക്കുകയായിരുന്നു അദ്ദേഹം. ശ്രീനാരായണഗുരുവിനുംമുമ്പേ കേരളത്തില്‍ നവോഥാനത്തിന് ചാവറയച്ചന്‍ നേതൃത്വം നല്‍കി.
ശ്രീനാരായണഗുരുവും ചാവറയച്ചനും ഒരേ വഴിയിലായിരുന്നുവെന്നും സച്ചിദാനന്ദന്‍ അഭിപ്രായപ്പെട്ടു. രണ്ടുപേരും കവികളായിരുന്നു. പള്ളിക്ക് പിന്നാലെ പള്ളിക്കൂടമെന്ന ആശയം ചാവറയച്ചന്‍ മുന്നോട്ടുവച്ചപ്പോള്‍ സമുദായത്തിലൂടെ വിദ്യ നേടാനാണ് ഗുരു ആഹ്വാനം ചെയ്തത്.
പ്രകൃതിസ്‌നേഹി, ധ്യാനഗുരു, കവി, ചിന്തകന്‍, സമൂഹ്യ പരിഷ്‌കര്‍ത്താവ് എന്നീ നിലകളില്‍ ചാവറയച്ചന്‍റേത് അതുല്യമായ സംഭാവനകളാണെന്നും അദ്ദേഹം പറഞ്ഞു.
തൃശൂര്‍ ദേവമാതാ പ്രൊവിന്ഷ്യാള് റവ. ഡോ. ജോസ് നന്തിക്കര അധ്യക്ഷത വഹിച്ചു. എംജി സര്‍വകലാശാല മുന്‍ വൈസ് ചാന്‍സലര്‍ ഡോ. സിറിയക് തോമസ് അനുഗ്രഹ പ്രഭാഷണം നടത്തി.
നാഷണല്‍ ബെസ്റ്റ് ടീച്ചേഴ്സ് അവാര്‍ഡ് ജേതാവ് ഭരതന്‍ മാസ്റ്റര്‍, ഇരിങ്ങാലക്കുട ക്രൈസ്റ്റ് കോളജ് പ്രിന്‍സിപ്പല്‍ ഫാ. ജോളി ആന്‍ഡ്രൂസ്, ചാവറ കള്‍ച്ചറല്‍ സെന്‍റര്‍ ഡയറക്ടര്‍ ഫാ. അനില്‍ ഫിലിപ്പ്, ഡോ. വില്‍സണ്‍ തറയില്‍ എന്നിവര്‍ പ്രസംഗിച്ചു.