സര്‍ക്കാര്‍ നിലപാട് സ്വീകാര്യമല്ല, സമരം തുടരും: ഭൂസംരക്ഷണ സമിതി
Saturday, November 23, 2024 2:20 AM IST
മുനമ്പം: മുനമ്പത്തെ ഭൂമിപ്രശ്‌നത്തില്‍ സര്‍ക്കാര്‍ നിലപാട് സ്വീകാര്യമല്ലെന്നും സമരം ശക്തമായി തുടരുമെന്നും ഭൂസംരക്ഷണ സമിതി. ജുഡീഷല്‍ കമ്മീഷനെ നിയമിക്കാനുള്ള സര്‍ക്കാര്‍ തീരുമാനം പ്രശ്നം പരിഹരിക്കുന്നതിന് സഹായകമാകില്ല. ഇതിനായിരുന്നുവെങ്കില്‍ മുഖ്യമന്ത്രി ഒരു യോഗം വിളിക്കേണ്ടതില്ലായിരുന്നു.
നേരത്തെ സര്‍ക്കാര്‍ നിയമിച്ച ഒരു കമ്മീഷനാണ് മുനമ്പത്ത് കാര്യങ്ങള്‍ വഷളാക്കിയത്. ആ കമ്മീഷനെത്തുടര്‍ന്നാണ് മുനമ്പത്ത് ജനങ്ങളുടെ ഭൂമിക്ക് റവന്യു അവകാശങ്ങള്‍ ഇല്ലാതായത്. കമ്മീഷന്‍റെ കണ്ടെത്തലുകള്‍ പുറത്തറിയാന്‍ 14 വര്‍ഷം വേണ്ടിവന്നു. ഇപ്പോള്‍ നിയമിക്കുന്ന കമ്മീഷന്‍റെ കാര്യത്തിലും അതുതന്നെയായിരിക്കും അവസ്ഥ എന്ന ആശങ്ക മുനമ്പത്ത് ജനങ്ങള്‍ക്കുണ്ട്.
ഭാവിപരിപാടികള്‍ തീരുമാനിക്കുന്നതിന് ഇന്നു വൈകുന്നേരം മുനമ്പത്ത് യോഗം ചേരുമെന്നും സമിതി കണ്‍വീനര്‍ ജോസഫ് ബെന്നി പറഞ്ഞു.
പ്രതിഷേധമിരമമ്പി
മുനമ്പം: സര്‍ക്കാര്‍ വിളിച്ച യോഗത്തില്‍ അനുകൂല തീരുമാനം ഉണ്ടാകാത്തതില്‍ മുനമ്പത്ത് പ്രതിഷേധമിരമ്പി. തിരുവനന്തപുരത്തെ യോഗ തീരുമാനം പുറത്തുവന്നയുടന്‍ സമരസമിതി പ്രവര്‍ത്തകര്‍ സമരപ്പന്തലില്‍ ഒരുമിച്ചുകൂടി പന്തംകൊളുത്തി പ്രകടനം നടത്തി. സ്ത്രീകള്‍ ഉള്‍പ്പെടെ നിരവധി പേര്‍ പ്രതിഷേധത്തില്‍ പങ്കെടുത്തു.