പിന്തുണയില്ല...; നടന്മാര്‍ക്കെതിരേയുള്ള പരാതികളിൽനിന്ന് പിന്മാറുന്നുവെന്ന് യുവതി
Saturday, November 23, 2024 2:20 AM IST
കൊച്ചി: സര്‍ക്കാരില്‍നിന്ന് പിന്തുണ കിട്ടിയില്ലെന്നാരോപിച്ച് നടന്മാര്‍ക്കെതിരേ ഉന്നയിച്ച പീഡനപരാതികളില്‍നിന്നു പിന്മാറുന്നുവെന്ന് പരാതിക്കാരിയായ നടി.
നടന്മാരായ എം. മുകേഷ് എംഎല്‍എ, മണിയന്‍പിള്ള രാജു, ജയസൂര്യ, ഇടവേള ബാബു, ബാലചന്ദ്രമേനോന്‍ തുടങ്ങി ചലച്ചിത്രമേഖലയിലെ ഏഴു പേര്‍ക്കെതിരേ നല്‍കിയ പരാതി പിന്‍വലിക്കുന്നതായാണ് ആലുവ സ്വദേശിനിയായ നടി വ്യക്തമാക്കിയത്.
കേസില്‍ അന്വേഷണം ആരംഭിച്ചതിനു പിന്നാലെയാണ് നടിയുടെ പിന്മാറ്റം. നടന്മാര്‍ക്കു പുറമെ ചലച്ചിത്രമേഖലയിലെ നോബിള്‍, ബിച്ചു, കോണ്‍ഗ്രസ് അഭിഭാഷക സംഘടനയിലെ അഡ്വ. ചന്ദ്രശേഖരന്‍ എന്നിവര്‍ക്കുമെതിരേയായിരുന്നു കേസ്.
കേസുകള്‍ പിന്‍വലിക്കണമെന്നാവശ്യപ്പെട്ട് പ്രത്യേക അന്വേഷണ സംഘത്തിന് ഉടന്‍ ഇ- മെയില്‍ അയയ‌്ക്കുമെന്ന് നടി പറഞ്ഞു. മാധ്യമങ്ങളില്‍ നിന്നുപോലും പിന്തുണ കിട്ടാത്തതിനാലാണു പരാതികള്‍ പിന്‍വലിക്കാന്‍ തീരുമാനിച്ചതെന്നും നടി പറഞ്ഞു.
അതേസമയം, പരാതിക്കാരി കേസ് പിന്‍വലിക്കുന്നുവെന്നതു സംബന്ധിച്ച് രേഖാമൂലം അറിയിപ്പ് ഒന്നും തന്നിട്ടില്ലെന്ന് കേസിന്‍റെ അന്വേഷണച്ചുമതലയുള്ള എഐജി ജി. പൂങ്കുഴലി പറഞ്ഞു.
കേസന്വേഷണം അന്തിമഘട്ടത്തിലാണെന്നും കോടതിയായിരിക്കും തുടര്‍ന്നുള്ള കാര്യങ്ങളില്‍ തീരുമാനമെടുക്കുകയെന്നും എഐജി വ്യക്തമാക്കി.