ലോക കേരളസഭ: അമേരിക്കൻ മേഖലാ സമ്മേളനം ഇന്നു തുടങ്ങും : Deepika.com Kerala News |

Click here for detailed news of all items

ലോക കേരളസഭ: അമേരിക്കൻ മേഖലാ സമ്മേളനം ഇന്നു തുടങ്ങും

Friday, June 9, 2023 1:04 AM IST

തിരുവനന്തപുരം: ലോക കേരളസഭ അമേരിക്കൻ മേഖലാ സമ്മേളനം ഇന്നു തുടങ്ങും. സമ്മേളനത്തിൽ പങ്കെടുക്കാനായി മുഖ്യമന്ത്രി പിണറായി വിജയൻ, ധനമന്ത്രി കെ.എൻ ബാലഗോപാൽ, നിയമസഭാ സ്പീക്കർ എ.എൻ ഷംസീർ എന്നിവരടങ്ങിയ സംഘം അമേരിക്കയിലെത്തി. ഇന്നു മുതൽ 11 വരെയാണു സമ്മേളനം.

ന്യൂയോർക്ക് നഗരത്തിന്‍റെ ഹൃദയമായ ടൈംസ് സ്ക്വയറിലെ മാരിയറ്റ് മർക്വേ ഹോട്ടലിൽ മൂന്നു ദിവസങ്ങളായി നടക്കുന്ന സമ്മേളനം നാളെ മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. രണ്ടാം ദിവസമാണ് ലോക കേരള സഭയുടെ പ്രധാന സെഷനുകൾ നടക്കുക.

കേരളത്തെ സംബന്ധിച്ചും പ്രവാസികളെ സംബന്ധിച്ചുമുള്ള പ്രധാന വിഷയങ്ങൾ നാളെ ചർച്ച ചെയ്യും.
ലോക കേരള സഭാ മേഖലാ സമ്മേളനത്തിനുശേഷം അമേരിക്കൻ മലയാളി പൗരാവലിയുടെ സ്വീകരണം ഏറ്റു വാങ്ങുന്ന മുഖ്യമന്ത്രി ന്യൂയോർക്ക് ടൈം സ്ക്വയറിൽ സദസിനെ അഭിസംബോധന ചെയ്യും.

ചർച്ചകൾക്കുശേഷം ലോക കേരള സഭാ ചെയർമാനും മുഖ്യമന്ത്രിയുമായ പിണറായി വിജയൻ മറുപടി പ്രസംഗം നടത്തും. മൂന്നാം ദിവസം മുഖ്യമന്ത്രി അമേരിക്കയിലെ ബിസിനസ് സമൂഹവുമായും മലയാളി സമൂഹത്തിൽ നിന്നുള്ള വിദ്യാർഥികൾ, മുതിർന്ന പൗരന്മാർ, എന്നിവരുമായും കൂടിക്കാഴ്ച നടത്തും.

അമേരിക്കയിൽ വിവിധ മേഖലകളിൽ പ്രവർത്തിക്കുന്ന മലയാളി വനിതകളുമായും മുഖ്യമന്ത്രി കൂടിക്കാഴ്ച നടത്തും. ന്യൂയോർക്കിലെ പരിപാടി കഴിഞ്ഞ് വാഷിംഗ്ടണ്‍ ഡിസിയും ക്യൂബയും സന്ദർശിച്ച ശേഷമാണ് മുഖ്യമന്ത്രി കേരളത്തിലേക്കു മടങ്ങുക.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.