സംസാരവിഷയമായി ഡീപ്സീക്ക്
Wednesday, January 29, 2025 12:36 AM IST
ന്യൂയോർക്ക്: ടെക് ലോകത്തും ഓഹരി വിപണിയിലും സംസാര വിഷയമായിരിക്കുകയാണ് ചൈനീസ് എഐ ഡെവലപ്പറായ ഡീപ്സീക്ക്. ഡീപ്സീക്കിന്‍റെ പുതിയ ആർട്ടിഫിഷ്യൽ ഇന്‍റലിജൻസ് മോഡലായ ഡീപ്സീക്ക് ആർ1ന്‍റെ കടന്നുവരവ് അമേരിക്കൻ ടെക് ഭീമന്മാരുടെ വിപണിമൂല്യത്തിൽ കനത്ത ആഘാതമാണ് ഏൽപ്പിച്ചത്.
അമേരിക്കൻ ടെക് ഭീമന്മാർ എഐ ചിപ്പ് നിർമാണത്തിന് വൻ തുക ചെലവഴിക്കുന്പോൾ താരതമ്യേന കുറഞ്ഞ ചെലവിലാണ് ഡീപ്സീക്കിന്‍റെ പുതിയ എഐ ചാറ്റ്ബോട്ടിനെ അവതരിപ്പിച്ചിരിക്കുന്നത്. ആപ്പിൾ പ്ലേ സ്റ്റോറിൽ ചാറ്റ് ജിപിടിയെക്കാൾ പ്രചാരം ലഭിച്ചുവെന്ന വാർത്തകൾക്ക് പിന്നാലെ ഓഹരി വിപണിയിലും വൻ ചലനമുണ്ടാക്കി.
എൻവിഡിയ കോർപറേഷൻ സഹസ്ഥാപകൻ ജെൻസൻ ഹുവാങ്ങ് അടക്കം എഐയുമായി ബന്ധമുള്ള ലോകത്തിലെ ധനികരായ 500 പേർക്ക് തിങ്കളാഴ്ച നഷ്ടപ്പെട്ടത് 108 ബില്യണ്‍ ഡോളർ. ഡീപ്സീക്കിന്‍റെ പുതിയ എഐ മോഡലുകൾ ഓപ്പണ്‍ എഐയുടെ ചാറ്റ് ജിപിടിക്കും മെറ്റ എഐയ്ക്കും അടക്കം കനത്ത വെല്ലുവിളിയാണ് ഉയർത്തുന്നത്.
ആർട്ടിഫിഷ്യൽ ഇന്‍റലിജൻസുമായി ബന്ധമുള്ള ശതകോടീശ്വരൻമാരാണ് ഏറ്റവും കൂടുതൽ നഷ്ടം നേരിട്ടത്. ഹുവാങ്ങിന്‍റെ സന്പത്തിൽ 20.1 ബില്യണ്‍ ഡോളർ ഇടിഞ്ഞു. അതായത് 20 ശതമാനത്തിന്‍റെ നഷ്ടമാണുണ്ടായത്. ഒറാക്കിൾ കോർപ്പറേഷൻ സഹസ്ഥാപകൻ ലാറി എല്ലിസണിന്‍റെ സന്പ ത്തിന്‍റെ 22.6 ബില്യണ്‍ ഡോളറിന്റെ കുറവുണ്ടായി.
12 ശതമാനത്തിന്‍റെ ഇടിവാണുണ്ടായതെന്ന് ബ്ലൂംബെർഗ് ബില്യണേഴ്സ് ഇൻഡക്സ് പറയുന്നു. ഡെൽ സ്ഥാപകൻ മൈക്കിൾ ഡെല്ലിന് 13 ബില്യണ്‍ ഡോളറും ബിനാൻസ് ഹോൾഡിംഗ്സ് ലിമിറ്റഡ് സഹസ്ഥാപകൻ ചാംഗ്പെംഗ് ഷാവോയ്ക്ക് 12.1 ബില്യണ്‍ ഡോളറുമാണ് ആവിയായത്.
ടെക് കന്പനികളുടെ യുഎസിലെ സൂചികയായ നാസ്ഡാക്ക് കഴിഞ്ഞ ദിവസം 3.1 ശതമാനം തിരിച്ചടി നേരിട്ടു. എസ് ആൻഡ് പി 500 സൂചികയാകട്ടെ 1.5 ശതമാനം താഴ്ന്നു. പ്രമുഖ ചിപ്പ് നിർമാതാക്കളായ ഡീപ്സീക്കിന്‍റെ അതിവേഗത്തിലുള്ള വളർച്ച, എഐ ചിപ്പ് നിർമാണത്തിൽ യുഎസിന് മേധാവിത്വം നിലനിർത്താൻ കഴിയുമോ എന്ന കാര്യത്തിൽ നിക്ഷേപകർക്കിടയിൽ ആശങ്ക സൃഷ്ടിച്ചിട്ടുണ്ട്.
പ്രമുഖ ചിപ്പ് നിർമാതാക്കളായ എൻവിഡിയയുടെ ഓഹരി മൂല്യത്തിന് തിങ്കളാഴ്ച 17 ശതമാനത്തിന്‍റെ ഇടിവാണ് നേരിട്ടത്. അതായത് യുഎസ് ചരിത്രത്തിലെ ഒരു പൊതു കന്പനിയുടെ ഒരു ദിവസത്തെ ഏറ്റവും വലിയ ഇടിവ് (593 ബില്യണ്‍ ഡോളർ).
വിപണിയിലെ വീഴ്ച എൻവിഡിയയിൽ മാത്രം ഒതുങ്ങുന്നതായിരുന്നില്ല. മൈക്രോസോഫ്റ്റ്, ആൽഫബെറ്റ്, ഡെൽ ടെക്നോളജീസ് തുടങ്ങിയ വന്പന്മാർക്കും തിരിച്ചടിയേറ്റു. സെമികണ്ടക്ടർ ഭീമനായ ബ്രോഡ്കോമിന്റെ ഓഹരികൾ 17.4% ഇടിഞ്ഞു. എഐ കേന്ദ്രീകൃത ഇൻഫ്രാസ്ട്രക്ചർ കന്പനികളായ ഡിജിറ്റൽ റിയാലിറ്റി, വെർട്ടിവ് ഹോൾഡിംഗ്സ് എന്നിവയും തകർന്നു.
എഐയുമായി ബന്ധപ്പെട്ട ജാപ്പനീസ് കന്പനികളായ അഡ്വാൻടെസ്റ്റ്, സോഫ്റ്റ്ബാങ്ക്, ടോക്കിയോ ഇലക്ട്രോണ് എന്നിവയുൾപ്പെടെയുള്ള കന്പനികളുടെ ഓഹരികൾ കുത്തനെ ഇടിഞ്ഞു. ഇത് നിക്കി 225 നെ 1.4 ശതമാനം താഴ്ത്തി. യൂറോപ്പിലെ എഎസ്എംഎല്ലിനും നഷ്ടത്തിന്‍റെ ദിനമായിരുന്നു.
ലോകത്തിലെ ഏറ്റവും വലിയ എഐ പദ്ധതിക്ക് 5000 കോടി ഡോളർ അമേരിക്കൻ പ്രസിഡന്‍റ് ഡോണൾഡ് ട്രംപ് പ്രഖ്യാപിച്ചിരിക്കേയാണ് ചൈനയിൽനിന്നുള്ള എഐ ആപ്പിന്‍റെ വരവ്.
യുഎസ് ടെക് വ്യവസായത്തിന് ‘വേക്ക് അപ് കോൾ’: ട്രംപ്
ചൈനീസ് സ്റ്റാർട്ടപ്പ് കന്പനിയായ ഡീപ്സീക്കിന്‍റെ ഉയർച്ചയെ യുഎസ് ടെക് വ്യവസായത്തിന് ‘ഉണരാനുള്ള ആഹ്വാന’മാണ് നല്കിയതെന്ന് യുഎസ് പ്രസിഡന്‍റ് ഡോണൾഡ് ട്രംപ് വിശേഷിപ്പിച്ചു. ഡീപ്സീക്കിന്‍റെ ആർട്ടിഫിഷ്യൽ ഇന്‍റലിജൻസ് (എഐ) മോഡലിന്റെ ആവിർഭാവം അമേരിക്കൻ വിപണിയെ പിടിച്ചുകുലുക്കി.
എൻവിഡിയ പോലുള്ള പ്രമുഖ ടെക് സ്ഥാപനങ്ങളുടെ ഓഹരികൾ കുത്തനെ ഇടിഞ്ഞു.
ഡീപ്സീക്കിന്‍റെ ആർ1 മോഡൽ കുറഞ്ഞ ചെലവിലാണ് നിർമിച്ചതെന്ന കന്പനിയുടെ അവകാശവാദമാണ് വ്യവസായത്തെ പിടിച്ചുകുലുക്കിയിരിക്കുന്നത്.
അമേരിക്കയുടെ എഐ ആധിപത്യത്തിന്‍റെ ഭാവിയെക്കുറിച്ചും എഐ നിർമാണത്തിന് യുഎസ് സ്ഥാപനങ്ങളുടെ ആസൂത്രണത്തെക്കുറിച്ചും ചോദ്യങ്ങൾ ഉയരുകയാണ്.
ലോഞ്ച് ചെയ്ത് ഒരാഴ്ചയ്ക്കുള്ളിൽ യുഎസിൽ ഏറ്റവും കൂടുതൽ ഡൗണ്ലോഡ് ചെയ്യപ്പെടുന്ന സൗജന്യ ആപ്പായി ഡീപ്സീക്ക് മാറി.
ഓപ്പണ്‍ എഐ സിഇഒ സാം ഓൾട്ട്മാൻ ഡീപ്സീക്കിന്‍റെ ആർ1 എഐ മോഡലിനെ പ്രശംസിച്ചു.
ഡീപ്സീക്കിന്‍റെ നേട്ടം എൻവിഡിയ അംഗീകരിച്ചെങ്കിലും തങ്ങളുടെ ചിപ്പുകൾ എഐ വികസനത്തിന് നിർണായകമാണെന്ന് അവകാശപ്പെട്ടു.
ഡീപ്സീക്കിന്‍റെ വർധിച്ചുവരുന്ന ഉപയോക്തൃ അടിത്തറയ്ക്ക് ഇപ്പോഴും ഗണ്യമായ പ്രോസസിംഗ് പവർ ആവശ്യമാണ്. ഉയർന്ന പ്രകടനമുള്ള എൻവിഡിയ ജിപിയുകൾക്ക് മാത്രമേ ഇതു നൽകാൻ കഴിയൂ- കന്പനി ചൂണ്ടിക്കാട്ടി.