കെടിഎം ഇന്നു സമാപിക്കും കൊച്ചി: സംസ്ഥാനത്തെ ടൂറിസം മേഖലയ്ക്ക് പുതിയ ദിശാബോധം നല്‍കിയ കേരള ട്രാവല്‍ മാര്‍ട്ട് ഇന്നു സമാപിക്കും.
വെല്ലിംഗ്ടണ്‍ ഐലന്‍ഡിലെ സാഗരസാമുദ്രിക കണ്‍വന്‍ഷന്‍ സെന്‍ററിൽ നടക്കുന്ന മാര്‍ട്ടിലെ പവലിയനുകൾ ഇന്ന് ഉച്ചകഴിഞ്ഞ് ഒന്നുമുതല്‍ പൊതുജനങ്ങള്‍ക്കു സൗജന്യമായി സന്ദര്‍ശിക്കാം. 347 സ്റ്റാളുകളാണ് കെടിഎമ്മിലുള്ളത്.
കേരളത്തിലെ ടൂറിസം മേഖലയുടെ നേര്‍ക്കാഴ്ച ട്രാവല്‍ മാര്‍ട്ടിലൂടെ സന്ദര്‍ശകര്‍ക്കു ദൃശ്യമാകുമെന്ന് സംഘാടകർ പറഞ്ഞു.
76 രാജ്യങ്ങളില്‍നിന്ന് പ്രതിനിധികള്‍ കെടിഎം 2024ല്‍ 76 രാജ്യങ്ങളില്‍നിന്നുള്ള 808 വിദേശ ബയര്‍മാരാണുള്ളത്. ഇതില്‍ 67 പേര്‍ യുകെയില്‍നിന്നും 60 പേര്‍ ഗള്‍ഫില്‍നിന്നും 55 പേര്‍ യുഎസില്‍നിന്നും 34 പേര്‍ റഷ്യയില്‍നിന്നുമുള്ളവരാണ്.
യൂറോപ്പിലെ മറ്റു ഭാഗങ്ങളില്‍നിന്ന് 245 ബയേഴ്‌സാണുള്ളത്. ആഫ്രിക്കയില്‍നിന്ന് 41 ഉം മറ്റുള്ളവര്‍ കിഴക്കന്‍ ഏഷ്യയില്‍നിന്നുമുള്ളവരാണ്. ഇന്ത്യയില്‍നിന്നുള്ള ബയേഴ്‌സില്‍ മഹാരാഷ്‌ട്ര (578) യാണു മുന്നില്‍.