ADVERTISEMENT

ADVERTISEMENT

മണ്ണാർക്കാട് ഫൊറോന സുവർണ ജൂബിലി ആഘോഷത്തിനു തുടക്കം

മണ്ണാർക്കാട്: പെരിമ്പടാരി ഹോളി സ്പിരിറ്റ് ഫൊറോന ദേവാലയത്തിൽ സുവർണ ജൂബിലി ആഘോഷങ്ങൾക്കു തുടക്കമായി. പാലക്കാട് രൂപത ബിഷപ് മാർ പീറ്റർ കൊച്ചുപുരയ്ക്കൽ ജൂബിലി തിരി തെളിയിച്ച് തുടക്കംകുറിച്ചു.

ഫൊറോന വികാരി ഫാ. രാജു പുളിക്കത്താഴെ, അസിസ്റ്റന്‍റ് വികാരി ഫാ. മെൽജോ ചിറമേൽ എന്നിവർ സഹകാർമികരായി. കൈക്കാരൻമാരായ ജോൺ ജേക്കബ് ഇരട്ടേപറമ്പിൽ, വിൽസൺ ആലുംമൂട്ടിൽ, ജൂബിലി കമ്മിറ്റി കൺവീനർ ജോസ് വാകശ്ശേരി, ജൂബിലി കമ്മിറ്റിയംഗങ്ങൾ, ഇടവക സംഘടന പ്രസിഡന്‍റുമാർ എന്നിവർ പങ്കെടുത്തു.

ADVERTISEMENT

കോയന്പത്തൂരിൽ കാർഷികമേളയ്ക്കു തുടക്കം

കോയന്പത്തൂർ: ജില്ലയിലെ ഏറ്റവും വലിയ കാർഷിക പ്രദർശനമായ ‘അഗ്രി ഇൻഡക്സ് 2025’ കൊഡീഷ്യ അരീനയിൽ തുടങ്ങി. ഡൽഹി, കേരളം, കർണാടക, ആന്ധ്രാപ്രദേശ്, രാജസ്ഥാൻ തുടങ്ങി ഇന്ത്യയിലെ വിവിധ സംസ്ഥാനങ്ങളിൽ നിന്നും ജപ്പാൻ, ചൈന തുടങ്ങിയ രാജ്യങ്ങളിൽ നിന്നുമുള്ള ആധുനിക കാർഷിക യന്ത്രങ്ങൾ മേളയിൽ പ്രദർശിപ്പിച്ചിട്ടുണ്ട്. കാർഷിക മേഖലയിലെ നിലവിലെ മനുഷ്യശക്തിയുടെ കുറവ് പരിഹരിക്കുന്നതിനായി റിമോട്ടിൽ പ്രവർത്തിപ്പിക്കുന്ന ഉപകരണങ്ങൾ, നെൽകർഷകർക്ക് മണ്ണ് കുഴിക്കുന്നതിനും നിരപ്പാക്കുന്നതിനുമുള്ള ഒറ്റ യന്ത്രങ്ങൾ എന്നിവ ഈ പ്രദർശനത്തിൽ പ്രദർശിപ്പിച്ചിട്ടുണ്ട്. കൂടാതെ ആർട്ടിഫിഷ്യൽ ഇന്‍റലിജൻസ് സാങ്കേതികവിദ്യയിൽ പ്രവർത്തിക്കുന്ന ഉപകരണങ്ങൾ പ്രദർശനം സന്ദർശിച്ചവരുടെ ശ്രദ്ധ പിടിച്ചുപറ്റി.

ചേറ്റൂർ ശങ്കരൻനായരെ അനുസ്മരിക്കാൻ ബിജെപിക്കു യോഗ്യതയില്ല: വി.കെ. ശ്രീകണ്ഠൻ

പാലക്കാട്: ചേറ്റൂർ ശങ്കരൻനായരെ അനുസ്മരിക്കാൻ ബിജെപിക്ക് യാതൊരു യോഗ്യതയുമില്ലെന്ന് വി.കെ. ശ്രീകണ്ഠൻ എംപി പറഞ്ഞു. ഇന്ത്യൻ നാഷണൽ കോണ്‍ഗ്രസ് ബ്രിട്ടീഷ് ആധിപത്യത്തിനെതിരെ സ്വാതന്ത്ര്യസമരം നയിച്ചിരുന്ന ആദ്യ കാലഘട്ടത്തിൽ എഐസിസി പ്രസിഡന്‍റായിരുന്ന പാലക്കാട്ടുകാരനായ മലയാളിയും സ്വാതന്ത്ര്യസമര സേനാനിയുമായിരുന്ന ചേറ്റൂർ ശങ്കരൻ നായരുടെ 169 ാം ജന്മദിനത്തിന്‍റെ ഭാഗമായി ജില്ലാ കോണ്‍ഗ്രസ് ഓഫീസിൽ അദ്ദേഹത്തിന്‍റെ ഛായാചിത്രത്തിന് മുന്നിൽ നിലവിളക്ക് കൊളുത്തിയും പുഷ്പാർച്ചന നടത്തിയും ആചരിച്ചു. തുടർന്ന് ഡിസിസി പ്രസിഡന്‍റ് എ. തങ്കപ്പന്‍റെ അധ്യക്ഷതയിൽ കൂടിയ യോഗം വി.കെ. ശ്രീകണ്ഠൻ എംപി ഉദ്ഘാടനം ചെയ്തു. രാജ്യത്തിന്‍റെ ദേശീയത മുറുകെപിടിച്ച നേതാവാണ് ചേറ്റൂർ. ഭരണഘടനാ സ്ഥാപനങ്ങളെ ദുർബലപ്പെടുത്തിയും ജനങ്ങളെ ഭിന്നിപ്പിച്ചു ഭരണം നടത്തുന്ന ബിജെപിക്ക് ചേറ്റൂരിന്‍റെ ആശയങ്ങളോട് യാതൊരു ബന്ധമില്ലെന്നും ശ്രീകണ്ഠൻ ആരോപിച്ചു. മാത്രമല്ല സ്വാതന്ത്ര്യസമരത്തെ ഒറ്റിക്കൊടുത്തും മാപ്പുപറഞ്ഞ് ജയിൽ മോചിതരായവരും ആണ് പഴയ ജനസംഘക്കാർ. ചേറ്റൂരിന്‍റെ ആശയങ്ങൾ നടപ്പിലാക്കാൻ പ്രവർത്തിക്കുന്നത് കോണ്‍ഗ്രസ് മാത്രമാണ്. നേതാക്കളായ സുമേഷ് അച്യുതൻ, വി. രാമചന്ദ്രൻ, സി.വി. സതീഷ്, സുധാകരൻ പ്ലാക്കാട്ട്, കെ. ഭവദാസ്, ബോബൻ മാട്ടുമന്ത, ജോസ് തോമസ്, എച്ച്. മുബാറക്ക്, എച്ച്.എ. സത്താർ, എം. വത്സകുമാർ, ഹരിദാസ് മച്ചിങ്ങൽ, എം. നാരായണസ്വാമി, സി. പ്രേംനവാസ്, മണ്ഡലം കോണ്‍ഗ്രസ് പ്രസിഡന്‍റുമാരായ ഡി. രമേശ്, എസ്.എം. താഹ, എസ്.സേവിയർ, പി.പ്രസാദ്, പട്ടാന്പി ബ്ലോക്ക് പഞ്ചായത്ത് പ്രസിഡന്‍റ് ഗീത മണികണ്ഠൻ എന്നിവർ പ്രസംഗിച്ചു.

പുനർജനി സുകൃതവനം പദ്ധതി: വിദഗ്ധസംഘം സന്ദർശനം നടത്തി

ചിറ്റൂർ: പട്ടഞ്ചേരി പഞ്ചായത്തിൽ വംശനാശഭീഷണി നേരിടുന്ന വൃക്ഷങ്ങൾ സംരക്ഷിക്കുന്ന പുനർജനി സുകൃതവനം പദ്ധതിയുടെ ഭാഗമായി പീച്ചി കേരള ഫോറസ്റ്റ് റിസർച്ച് ഇൻസ്റ്റിറ്റ്യൂട്ടിൽ നിന്നുമുള്ള വിദഗ്ധസംഘം പഞ്ചായത്തിലെത്തി. വംശനാശ ഭീഷണി നേരിടുന്ന വൃക്ഷങ്ങൾ നട്ടുപിടിപ്പിക്കുന്ന സ്ഥലം സന്ദർശിക്കുന്നതിനായാണ് പഞ്ചായത്തിലെത്തിയത്. പട്ടഞ്ചേരി ഗ്രാമപഞ്ചായത്തും ചിറ്റൂർ ഗവ. കോളജും സംയുക്തമായാണ് ഒമ്പതിനം സസ്യങ്ങളെ സംരക്ഷിക്കുന്ന പദ്ധതിക്ക് തുടക്കമിട്ടത്. പഞ്ചായത്ത് ശ്മശാനത്തോട് ചേർന്ന് പരീക്ഷണാടിസ്ഥാനത്തിൽ 402 തൈകളാണ് നട്ടുപിടിപ്പിക്കുന്നത്. പ്രദേശത്ത് ആദ്യഘട്ടത്തിൽ വനവത്കരണത്തിന് അനുയോജ്യമായ വൃക്ഷങ്ങൾ, മണ്ണിന്‍റെ തരം എന്നിവയും സംഘം പരിശോധിച്ചു. സംഘത്തിന്‍റെ റിപ്പോർട്ടിന്‍റെ അടിസ്ഥാനത്തിലായിരിക്കും തുടർന്നുള്ള വൃക്ഷവത്കരണം നടത്തുക. കെഎഫ് ആർഎ പ്രോജക്ട് അസിസ്റ്റന്‍റ് പി.എസ്. ഗോകുൽ, ആൽവിൻ ഷെറിൻ എന്നിവരാണ് സ്ഥലം സന്ദർശിച്ചത്. കന്നിമാരിയിലുള്ള മിയോവാക്കി വനവും സംഘം സന്ദർശിച്ചു. ജൈവവൈവിധ്യ ആവാസവ്യവസ്ഥ കേന്ദ്രമായി പ്രദേശത്തെ പ്രഖ്യാപിക്കാനുള്ള സാധ്യതയും വിലയിരുത്തി. പട്ടഞ്ചേരി പഞ്ചായത്ത് പ്രസിഡന്‍റ് പി.എസ് ശിവദാസ്, ഭരണസമിതി, ജൈവവൈവിധ്യ പരിപാലന സമിതി എന്നിവരുമായാണ് ചർച്ച നടത്തിയത്. ബിഎംസി കൺവീനർ സന്തോഷ് കുമാർ, ദേശീയ ഹരിതസേന ജില്ലാ കോ-ഓർഡിനേറ്റർ എസ്. ഗുരുവായൂരപ്പൻ എന്നിവരാണ് സംഘാംഗങ്ങൾക്ക് പദ്ധതി പ്രദേശം പരിചയപ്പെടുത്തിയത്.

മികവിന്‍റെ കേന്ദ്രമായി ഒറ്റപ്പാലം ഗവ. ബധിരവിദ്യാലയം

ഒറ്റപ്പാലം: ഗവ.ബധിര വിദ്യാലയത്തിൽ നടപ്പാക്കുന്ന മികവിന്‍റെ കേന്ദ്രം പദ്ധതി പൂർത്തീകരണത്തിലേക്ക്. വിദ്യാലയത്തിന്‍റെ ഭൗതിക അക്കാദമിക് നിലവാരം ഉയർത്തുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്. പൊതുവിദ്യാഭ്യാസവകുപ്പിന്‍റെ 2024-25 വർഷത്തെ പ്ലാൻ ഫണ്ടിൽ നിന്നും 25 ലക്ഷം രൂപ വിനിയോഗിച്ചാണ് പദ്ധതി നടപ്പാക്കുന്നത്. അക്കാദമിക്, ഭൗതികം, സാമൂഹ്യം, സൗന്ദര്യവത്കരണം എന്നിങ്ങനെ നാല് മേഖലകളായി തിരിച്ചാണ് പദ്ധതികൾ യാഥാർഥ്യമാക്കുന്നത്. അക്കാദമിക് നിലവാരം ഉയർത്തുന്നതിന്‍റെ ഭാഗമായി സയൻസ്, കന്പ്യൂട്ടർ, സ്പീച്ച് ലാബുകളും ഓഡിയോളജി, ലൈബ്രറി മുറികളും നവീകരിച്ചു. ശ്രവണ വൈകല്യമുള്ള കുട്ടികൾക്ക് ഗ്രൂപ്പ് ഹിയറിംഗ് സിസ്റ്റം ഉപയോഗിച്ചുള്ള പ്രവർത്തനവും ഓഡിയോഗ്രാം നടത്താനുള്ള പ്രാഥമിക സൗകര്യങ്ങളും ഒരുക്കിയിട്ടുണ്ട്. കുട്ടികൾക്ക് വേണ്ടി കളിസ്ഥലം, പ്രത്യേക പാർക്ക്, ലോംഗ്ജംപ് പിറ്റ് എന്നിവ തയ്യാറാക്കി വിദ്യാലയത്തിന്‍റെ ഭൗതിക സാഹചര്യവും മെച്ചപ്പെടുത്തി. കൂടാതെ വിദ്യാലയത്തിലെ ചുമരുകൾ വർണചിത്രങ്ങളാലും മനോഹരമാക്കിയിട്ടുണ്ട്. പഠനത്തോടൊപ്പം കുട്ടികൾക്ക് സ്വയംപര്യാപ്തത കൈവരിക്കുന്നതിനായി തയ്യൽ പരിശീലനവും വിദ്യാലയത്തിനോട് ചേർന്ന് നടത്തുന്നുണ്ട്. ഹൈസ്കൂൾ, ഹയർസെക്കൻഡറി വിദ്യാർഥികൾക്കും രക്ഷിതാക്കൾക്കുമാണ് തയ്യൽ പരിശീലനം നൽകുന്നത്. പരിശീലനം ലഭിച്ച രക്ഷിതാക്കളാണ് ഈ വർഷത്തെ വിദ്യാർഥികളുടെ യൂണിഫോം തയ്യാറാക്കിയത് എന്നത് പദ്ധതിയുടെ വിജയമാണെന്ന് പ്രധാനാധ്യാപിക മിനികുമാരി പറഞ്ഞു. 30 സെന്‍റിൽ കൃഷിയിടവും വിദ്യാലയത്തിൽ പദ്ധതിയുടെ ഭാഗമായി നടത്തുന്നുണ്ട്. വാഴ, തക്കാളി, പച്ചമുളക്, വഴുതനങ്ങ, ചേന, ചേന്പ് പച്ചക്കറി കൃഷിയിലൂടെ സ്കൂൾ ഉച്ചഭക്ഷണത്തിനുള്ള പച്ചക്കറികൾ ശേഖരിക്കുന്നുണ്ട്. 1934ൽ ആരംഭിച്ച ഗവ. ബധിര വിദ്യാലയത്തിൽ പ്രീ സ്കൂൾ മുതൽ പ്ലസ് ടു വരെ നിലവിൽ 53 കുട്ടികളാണ് പഠിക്കുന്നത്. പദ്ധതിയുടെ ഉദ്ഘാടനം 22ന് കെ. പ്രേംകുമാർ എംഎൽഎ നിർവഹിക്കും. ഒറ്റപ്പാലം നഗരസഭ ചെയർപേഴ്സണ്‍ ജാനകിദേവി അധ്യക്ഷയാകും.

രാസവളം വിലവർധന: കിസാൻസഭ പ്രതിഷേധിച്ചു

മണ്ണാർക്കാട്: കാലാവസ്ഥ വ്യതിയാനത്തിൽ നട്ടംതിരിയുന്ന കർഷകർക്കുമേൽ ഇടിത്തീയായി കേന്ദ്രസർക്കാർ രാസവളത്തിന്‍റെ വിലയും വർധിപ്പിച്ചതിൽ കിസാൻസഭ പ്രതിഷേധിച്ചു. പൊട്ടാഷ്, ഫാക്ടംഫോസ്, ഡിഎപി വളങ്ങൾക്ക് മൂന്നിരട്ടിയിൽ അധികമാണ് വർധനവ്. അത്യാവശ്യ രാസവളമായ യൂറിയ കിട്ടാനേയില്ല. കാർഷിക രാജ്യമായ ഇന്ത്യയിലെ ഭരണകർത്താക്കൾ കർഷകരോട് കാണിക്കുന്ന നിരന്തര പ്രതികാര നടപടികളുടെ ഭാഗമാണ് രാസവള വിലവർധനവ്. ഉത്പാദന ചെലവ് കൂടുമ്പോൾ പിടിച്ചുനിൽക്കാൻ കഴിയാതെ വരികയും തത്ഫലമായി ചെറുകിട കർഷകർ കൃഷിയിൽ നിന്നും പിന്മാറാൻ നിർബന്ധിതരാവുകയും ചെയ്യും. രാസവള വില വർധിപ്പിച്ചതിൽ പ്രതിഷേധിച്ച് കിസാൻസഭ മണ്ണാർക്കാട് മണ്ഡലം കമ്മിറ്റിയുടെ നേതൃത്വത്തിൽ മണ്ണാർക്കാട് പോസ്റ്റ് ഓഫീസിലേക്ക് നടത്തിയ പ്രതിഷേധ മാർച്ച് ജില്ലാ സെക്രട്ടറി മണികണ്ഠൻ പൊറ്റശേരി ഉദ്ഘാടനം ചെയ്തു. മണ്ഡലം പ്രസിഡന്‍റ് എൻ. ചന്ദ്രശേഖരൻ അധ്യക്ഷത വഹിച്ചു. സിപിഐ സംസ്ഥാന കൗൺസിൽ അംഗം പി. കബീർ, നേതാക്കളായ ഭാസ്കരൻ മുണ്ടക്കണ്ണി, സുരേഷ് കൈതച്ചിറ, മഠത്തിൽ കൃഷ്ണകുമാർ, ടി.ടി. അബ്ദുൾ റസാക്ക്, വിനോദ്കുമാർ പ്രസംഗിച്ചു.

അകത്തേത്തറ റെയിൽവേ മേൽപ്പാലം: മനുഷ്യാവകാശ കമ്മീഷൻ ഇടപെടുന്നു

പാലക്കാട്: അകത്തേത്തറ നടക്കാവ് റെയിൽവേ മേൽപ്പാലത്തിന്‍റെ പണികൾ അനന്തമായി നീളുന്നതു തടയാൻ ഇടപെടലുമായി മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ്. നിർമാണം കാരണമുള്ള യാത്രാക്ലേശത്തിന് അടിയന്തരമായി പരിഹാരം കാണണമെന്നും ജസ്റ്റിസ് അലക്സാണ്ടർ തോമസ് ആവശ്യപ്പെട്ടു. റെയിൽവേ ഡപ്യൂട്ടി ചീഫ് എൻജിനീയറും റോഡ്സ് ആന്‍റ് ബ്രിഡ്ജസ് കോർപറേഷൻ സീനിയർ എൻജിനീയറും നിർമാണ സ്ഥലത്ത് സംയുക്ത പരിശോധന നടത്തണമെന്ന് കമ്മീഷൻ ആവശ്യപ്പെട്ടു. റെയിൽവെയും റോഡ്സ് ആന്‍റ് ബ്രിഡ്ജസ് കോർപറേഷനും പൂർത്തിയാക്കാനുള്ള പണികൾ പരിശോധിച്ച് എത്രസമയം വേണ്ടിവരുമെന്ന് വ്യക്തത വരുത്തണം. പരിശോധനാ റിപ്പോർട്ട് ഒരു മാസത്തിനുള്ളിൽ റെയിൽവേ ഡെപ്യൂട്ടി ചീഫ് എൻജിനീയറും റോഡ്സ് ആന്‍റ് ബ്രിഡ്ജസ് കോർപറേഷൻ എംഡിയും കമ്മീഷൻ ഓഫീസിൽ സമർപ്പിക്കണം. മേൽപ്പാല നിർമാണത്തിനുള്ള ചെലവ് സംസ്ഥാന സർക്കാർ വഹിക്കുന്ന സാഹചര്യത്തിൽ ജില്ലാതലത്തിൽ ഒരു അവലോകനയോഗം കളക്ടർ വിളിച്ചു ചേർക്കണം. അവലോകന യോഗത്തിൽ പങ്കെടുക്കാൻ അകത്തേതറ നടക്കാവ് മേൽപ്പാലം ജനകീയ സമിതി കണ്‍വീനർക്ക് നോട്ടീസ് നൽകണം. അവർക്ക് പറയാനുള്ളത് കൂടി കേൾക്കണം. യോഗത്തിന്‍റെ റിപ്പോർട്ട് ആറാഴ്ചക്കുള്ളിൽ ജില്ലാ കളക്ടർ കമ്മീഷനിൽ സമർപ്പിക്കണം. സെപ്റ്റംബർ 24 ന് പാലക്കാട് പൊതുമരാമത്ത് റസ്റ്റ് ഹൗസിൽ നടക്കുന്ന സിറ്റിംഗിൽ ദക്ഷിണ റെയിൽവേ ചീഫ് അഡ്മിനിസ്ട്രേറ്റീവ് ഓഫീസറുടെയും (കണ്‍സ്ട്രക്ഷൻ) ജില്ലാ കളക്ടറുടെയും പ്രതിനിധികൾ ഹാജരായി സ്വീകരിച്ച നടപടികൾ വിശദീകരിക്കണമെന്ന് ജസ്റ്റിസ് അലക്സാണ്ടർ തോമസ് ഉത്തരവിൽ നിർദേശിച്ചു. റെയിൽവെക്കൊപ്പം റോഡ്സ് ആന്‍റ് ബ്രിഡ്ജസ് കോർപറേഷനും പാലത്തിന്‍റെ നിർമാണത്തിൽ പങ്കാളിയാണെന്ന് ദക്ഷിണ റെയിൽവേ ചീഫ് അഡ്മിനിസ്ട്രേറ്റീവ് ഓഫീസർ കമ്മീഷനെ അറിയിച്ചു. എന്നാൽ രണ്ടു സ്ഥാപനങ്ങളുടെയും ഭാഗത്തുനിന്നും കാര്യമായ നിർമാണ പ്രവർത്തനങ്ങൾ നടക്കുന്നില്ലെന്ന് പരാതിക്കാരനായ ജനകീയ സമിതി കണ്‍വീനർ വിപിൻ തേങ്കുറിശി കമ്മീഷനെ അറിയിച്ചു. നിർമാണജോലികൾ എത്രയും വേഗം പൂർത്തിയാക്കാൻ ഹൈക്കോടതി ഉത്തരവുണ്ടെന്നും പരാതിക്കാരൻ അറിയിച്ചു.

വിദ്യാർഥിപ്രതിനിധികളുടെ സ്ഥാനാരോഹണവും വിവിധ ക്ലബ്ബുകളുടെ ഉദ്ഘാടനവും

മംഗലംഡാം: സെന്‍റ് സേവിയേഴ്സ് സെൻട്രൽ സ്കൂളിൽ വിദ്യാർഥിപ്രതിനിധികളുടെ സ്ഥാനാരോഹണചടങ്ങും വിവിധ ക്ലബ്ബു കളുടെ ഉദ്ഘാടനവും നടന്നു. സ്കൂൾഡയറക്ടർ റവ.ഡോ.മാത്യു വാഴയിൽ ഉദ്ഘാടനം ചെയ്തു. സ്കൂൾ ഹെഡ് ബോയ് സാൻജോ ബിജി, ഹെഡ് ഗേൾ റോസ്ന ഷിജോ, അസിസ്റ്റന്‍റ് ഹെഡ് ബോയ് പി.എസ്. അദ്വൈത്, അസിസ്റ്റന്‍റ് ഹെഡ് ഗേൾ ഹന്ന ജെയിംസ്, സ്പോർട്സ് ക്യാപ്റ്റൻ ആൽബിൻ തോമസ്, ആർട്സ് ക്യാപ്റ്റൻ എൽസ ജെ. കൊല്ലത്താഴെ, ഗ്രൂപ്പ് ക്യാപ്റ്റൻമാരും ക്ലാസ് ലീഡേഴ്സും ചുമതലയേറ്റു. പ്രിൻസിപ്പൽ ഫാ. സിബിൻ തോമസ് പ്രതിജ്ഞ ചൊല്ലിക്കൊടുത്തു. സയൻസ്, സോഷ്യൽ സയൻസ്, സ്പോർട്സ്, മാത്ത്സ്, ലിറ്റററി, നേച്ചർ ക്ലബുകളുടെ ഉദ്ഘാടനവും നടന്നു. സ്കൂൾ ജോയിന്‍റ് ഡയറക്ടർ ഫാ. സുമേഷ് നാല്പതാംകളം, സ്കൂൾ പ്രിൻസിപ്പൽ ഫാ. സിബിൻ തോമസ്, ബർസാർ ഫാ. ഷാജു അങ്ങേവീട്ടിൽ, പിടിഎ പ്രസിഡന്‍റ് അജിത്കുമാർ, ജീന ടീച്ചർ, അജിത ടീച്ചർ പ്രസംഗിച്ചു.

പരിസരവാസികളും കർഷകരും ദുരിതത്തിൽ

കല്ലടിക്കോട്: കാഞ്ഞിരപ്പുഴ ഇടതു പ്രധാനകനാലോരത്തു വൻമരങ്ങൾ വളർന്നു നിൽക്കുന്നതു മൂലം വീടുകൾക്കും യാത്രക്കാർക്കും അപകടഭീഷണിയായി. കനാലിന്‍റെ വശങ്ങൾ ഇടിയുന്നതും മരങ്ങൾ കടപുഴകി വീഴുന്നതും നിത്യസംഭവമായി മാറിയിട്ടുണ്ട്. കരിമ്പന, കരിവാക, പൊടുകണ്ണി, മറ്റു വലിയ മരങ്ങളും ഇത്തരത്തിൽ നിൽക്കുന്നുണ്ട്. ഡാമിൽനിന്നും ഒഴുകിയെത്തുന്ന വെള്ളത്തിന്‍റെ നല്ലൊരുഭാഗം മരച്ചുവടുകളിൽ തടസപ്പെടുകയും ഒഴുക്കിന്‍റെ ശക്തികുറയു ന്നുമുണ്ട്. പൂക്കോട്ടുകാവ്, ചളവറ, വല്ലപ്പുഴ, പട്ടാമ്പി തുടങ്ങിയ വാലറ്റമേഖലകളിൽ വെള്ളമെത്തുന്നതിനു ഇത്തരം മരങ്ങൾ തടസമാകുന്നതായി അവിടത്തെ കർഷകരും പറയുന്നു. കനാലിനോടുചേർന്ന പാടശേഖരങ്ങളിൽ നെൽകൃഷി ചെയ്യുന്നവരും പച്ചക്കറികൃഷി ചെയ്യുന്നവരും ഈ വെള്ളത്തെയാണ് ആശ്രയിക്കുന്നത്. സാധാരണ കാഞ്ഞിരപ്പുഴഡാമിലെ വെള്ളം തുറന്നുവിടുന്നതിനു മുന്നോടിയായി തൊഴിലുറപ്പു തൊഴിലാളികളെ ഉപയോഗിച്ചു കനാൽ വൃത്തിയാക്കുക പതിവായിരുന്നു. എന്നാൽ കുറച്ചു വർഷങ്ങളായി ഈ ജോലികൾ ചെയ്യാൻ തൊഴിലുറപ്പു തൊഴിലാളികൾക്കു വിലക്കുണ്ട്. കല്ലടിക്കോട് കീരുപ്പാറ കനാൽറോഡിൽ വളർന്നുപന്തലിച്ചുനിൽക്കുന്ന വാകമരം സമീപത്തെ നാലുവീടുകൾക്കു ഭീഷണിയാണ്. 110 കെവി ഇലക്ട്രിക് ലൈനിന്‍റെ സ്റ്റേ കമ്പി വലിച്ചു കെട്ടിയിരിക്കുന്നതും ഈ വാകമരത്തിലാണ്.

യുവക്ഷേത്ര കോളജിൽ ഇനീസിയോ- 2025 പ്രവേശനോത്സവം

മുണ്ടൂർ: യുവക്ഷേത്ര കോളജ് ഇനീസിയോ - പ്രവേശനോത്സവം 2025 പാലക്കാട് രൂപത ബിഷപ് മാർ പീറ്റർ കൊച്ചുപുരയ്ക്കൽ ഉദ്ഘാടനം ചെയ്തു. ഭാവിജീവിതം സുന്ദരമാക്കാൻ കൊതിക്കുന്ന യുവജനങ്ങളെ കൈപിടിച്ചുനടത്തിക്കുന്ന ഈ സ്ഥാപനത്തിലെ വിദ്യാർഥികൾ ജീവിതത്തെ ഗൗരവമായി കാണണമെന്ന് ബിഷപ് പറഞ്ഞു. പ്രിൻസിപ്പൽ ഡോ. ടോമി ആന്‍റണി അധ്യക്ഷനായിരുന്നു. ഡയറക്ടർ റവ.ഡോ. മാത്യു ജോർജ് വാഴയിൽ മുഖ്യപ്രഭാഷണം നിർവഹിച്ചു. ബർസാർ ഫാ. ഷാജു അങ്ങേവീട്ടിൽ, അസിസ്റ്റന്‍റ് ഡയറക്ടറും ട്രെയിനിംഗ് ആൻഡ് പ്ലേസ്മെന്‍റ് കോ- ഓർഡിനേറ്ററുമായ റവ.ഡോ. ലിനോ സ്റ്റീഫൻ ഇമ്മട്ടി, വൈസ് പ്രിൻസിപ്പൽ ഫാ. ഷൈജു പരിയത്ത്, ഹോസ്റ്റൽ വാർഡൻ ഫാ. റ്റിബിൻ, കെമിസ്ട്രി വിഭാഗം മേധാവി ഡോ.പി. റനില എന്നിവർ പ്രസംഗിച്ചു. പ്രിൻസിപ്പൽ വിദ്യാർഥികൾക്കു പ്രതിജ്ഞാവാചകം ചൊല്ലിക്കൊടുത്തു. പഠനത്തിലും കലാകായിക വിഷയങ്ങളിലും മികച്ച പ്രകടനം കാഴ്ചവച്ച വിദ്യാർഥികളെ ബിഷപ് മൊമെന്‍റോ നല്കി ആദരിച്ചു. വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽ കൂനൽ സ്വാഗതവും കോളജ് സൂപ്രണ്ട് ജോസൻ പി. ജോസ് നന്ദിയും പറഞ്ഞു. വിദ്യാർഥികളുടെ വിവിധ കലാപരിപാടികളുമുണ്ടായിരുന്നു.

പൂക്കോട്ടുകാവ് സ്മാർട്ട് വില്ലേജ് ഓഫീസ് കെട്ടിടം നാടിനു സമർപ്പിച്ചു

പാലക്കാട്: കേരളം ഇന്നേവരെ കണ്ടിട്ടില്ലാത്തവിധം സമഗ്രവും ജനകീയവും ആധുനികവുമായ റവന്യൂ സേവനങ്ങൾ ഒരുക്കുന്നതിൽ സ്മാർട്ട് വില്ലേജ് ഓഫീസുകൾ വലിയ പങ്ക് വഹിക്കുമെന്നു റവന്യൂ- ഭവനനിർമാണ മന്ത്രി കെ. രാജൻ. പൂക്കോട്ടുകാവ് സ്മാർട്ട് വില്ലേജ് ഓഫീസിന്‍റ് ഉദ്ഘാടനം ഓൺലൈനായി നിർവഹിക്കുകയായിരുന്നു അദ്ദേഹം. പരിയാനംപറ്റ ശ്രീഭദ്ര ഓഡിറ്റോറിയത്തിൽ നടന്ന ചടങ്ങിൽ അഡ്വ.കെ. പ്രേംകുമാർ എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് അംഗം പി. മൊയ്തീൻകുട്ടി, ശ്രീകൃഷ്ണപുരം ബ്ലോക്ക് പഞ്ചായത്ത് പ്രസിഡന്‍റ് സുനിത ജോസഫ്, പൂക്കോട്ടുകാവ് ഗ്രാമപഞ്ചായത്ത് പ്രസിഡന്‍റ് പി. ജയശ്രീ, ഡെപ്യൂട്ടി കളക്ടർ (എൽആർ) സക്കീർ ഹുസൈൻ, ഒറ്റപ്പാലം തഹസിൽദാർ അബ്ദുൽ മജീദ് എന്നിവർ ഉൾപ്പെടെയുള്ള ജനപ്രതിനിധികളും ഉദ്യോഗസ്ഥരും പരിപാടിയിൽ പങ്കെടുത്തു.

കുഴികളിൽ "ചാടിച്ചാടി' യാത്രികർ

വടക്കഞ്ചേരി: മംഗലം- ഗോവിന്ദാപുരം സംസ്ഥാനപാതയുടെ സ്ഥിതിയാണിത്. വലിയ കുളങ്ങൾപോലെയാണ് തമിഴ്നാടിനെ ബന്ധിപ്പിക്കുന്ന ഈ പാത. പല ഭാഗത്തും ടാർറോഡ് ഒഴിവാക്കി വശങ്ങളിലൂടെയാണ് വാഹനങ്ങൾ പോകുന്നത്. ഉഴവുകണ്ടം പോലെയാണ് വശങ്ങളും. കുഴികളിൽചാടി വാഹനങ്ങൾ കേടുവന്നും അപകടത്തിൽപ്പെട്ടും യാത്രക്കാർ ഇനി ഭരണസംവിധാനത്തിനെതിരേ പറയാത്ത വാക്കുകളില്ല. അത്രയേറെ ദുരിതയാത്രയാണ് ജനങ്ങൾക്കുണ്ടാകുന്നത്. എണ്ണിയാൽ തീരാത്തവിധം ചങ്ങലക്കണ്ണിപോലെ വാഹനങ്ങൾ പോകുന്ന റോഡാണിത്. പാത തുടങ്ങുന്ന മംഗലംപാലം ബൈപാസ് ജംഗ്ഷൻ മുതൽ വള്ളിയോട് സെന്‍റർ വരെയുള്ള ഒന്നര കിലോമീറ്ററോളം ദൂരം കുഴികളില്ലാത്ത സ്ഥലമില്ല. കുഴികളെണ്ണുന്ന മന്ത്രിമാരുണ്ടെങ്കിൽ വന്നാൽ മതിയെന്നാണ് യാത്രികർ പറയുന്നത്. രണ്ടടിവരെ താഴ്ചയുള്ള കുഴികളുണ്ട് റോഡിൽ. ഒരുമാസത്തിനുള്ളിൽതന്നെ പലതവണ ഇവിടെയെല്ലാം ഓട്ടയടയ്ക്കൽ നടത്തി. മഴയിൽ കുഴിമൂടുന്ന ടാറിംഗ് മിശ്രിതവും കോൺക്രീറ്റ് ഉപയോഗിച്ചും മെറ്റൽനിറച്ചും കുഴിമൂടൽചടങ്ങ് നടത്തി. പക്ഷേ, ഒന്നിനും നിലനിൽപ്പുണ്ടായില്ല. മഴ മാറിനിന്നാൽ കുഴികളിലെ വെള്ളംകുറയും. അപ്പോഴാണ് കുഴികളുടെ യഥാർഥ ആഴം മനസിലാവുക. വേനലിൽതന്നെ കുഴികൾ രൂപപ്പെട്ട റോഡാണിത്. മഴയ്ക്കുമുന്നേ നല്ലരീതിയിൽ കുഴികളടച്ച് ഗതാഗതയോഗ്യമാക്കണമെന്നാവശ്യപ്പെട്ട് നിരവധിതവണ സമരങ്ങളും പരാതികളും ഉയർന്നെങ്കിലും പൊതുമരാമത്ത് വകുപ്പ് അധികൃതർ അതൊന്നും കണ്ടഭാവം നടിച്ചില്ല. മഴക്കാലമായതോടെ ഓട്ടയടയ്ക്കാൻ ഓടിനടക്കുകയാണ് അധികൃതർ.

സ്പോർട്സ് ഹബ്: കെസിഎയും ദേവസ്വവും പാട്ടക്കരാര്‍ ഒപ്പുവച്ചു

ഒലവക്കോട്: പാലക്കാട് സ്‌പോര്‍ട്‌സ് ഹബ് നിര്‍മിക്കുന്നതിനു മുന്നോടിയായി അകത്തേത്തറ ചാത്തന്‍കുളങ്ങര ദേവസ്വവും കേരള ക്രിക്കറ്റ് അസോസിയേഷനും പാട്ടക്കരാര്‍ ഒപ്പുവച്ചു. ഒലവക്കോട് സബ് രജിസ്ട്രാര്‍ ഓഫീസില്‍ നടന്ന ചടങ്ങിലാണ് 30 കോടിരൂപ ചെലവ് പ്രതീക്ഷിക്കുന്ന ബൃഹദ് പദ്ധതിയുടെ പാട്ടക്കരാര്‍ രജിസ്‌ട്രേഷന്‍ പൂര്‍ത്തിയായത്. കെസിഎ സെക്രട്ടറി വിനോദ് എസ്. കുമാറും ക്ഷേത്രം മാനേജര്‍ ആര്‍. മണികണ്ഠനും ചേര്‍ന്നാണ് കരാറില്‍ ഒപ്പുവച്ചത്. ക്ഷേത്രം ട്രസ്റ്റിന്‍റെ ഉടമസ്ഥതയിലുള്ള 21 ഏക്കര്‍ സ്ഥലത്താണ് കെസിഎ സ്‌പോര്‍ട്‌സ് ഹബ് നിര്‍മിക്കുക. എല്ലാ ജില്ലകളിലും അത്യാധുനികസൗകര്യങ്ങളോടുകൂടിയ സ്റ്റേഡിയങ്ങള്‍ നിര്‍മിക്കുകയെന്ന കേരള ക്രിക്കറ്റ് അസോസിയേഷന്‍റെ ലക്ഷ്യത്തിന്‍റെ ഭാഗമായാണ് ഈ പദ്ധതി. ക്ഷേത്രഭൂമി 33 വര്‍ഷത്തേക്കാണ് കെസിഎ പാട്ടത്തിനെടുത്തിരിക്കുന്നത്. ആദ്യഘട്ടനിര്‍മാണം 2026ല്‍ പൂര്‍ത്തിയാക്കാനാണ് തീരുമാനം. രണ്ടാംഘട്ടം 2027 ഏപ്രിലോടെയും പൂര്‍ത്തീകരിക്കും. പദ്ധതിയിലൂടെ ക്ഷേത്രത്തിനു 10 ലക്ഷം രൂപ സെക്യൂരിറ്റി ഡെപ്പോസിറ്റായും പ്രതിവര്‍ഷം 21,35,000 രൂപ പാട്ടയിനത്തില്‍ വരുമാനമായും ലഭിക്കും. ചടങ്ങില്‍ കെസിഎ വൈസ് പ്രസിഡന്‍റ് പി. ചന്ദ്രശേഖരൻ, പാലക്കാട് ജില്ലാ ക്രിക്കറ്റ് അസോസിയേഷന്‍ സെക്രട്ടറി അജിത് കുമാർ, കെസിഎ മുൻ ജോയിന്‍റ് സെക്രട്ടറി സിയാബുദീൻ, പാലക്കാട്‌ ജില്ലാ ക്രിക്കറ്റ്‌ അസോസിയേഷൻ ഭാരവാഹികൾ, ക്ഷേത്രം ട്രസ്റ്റി അംഗങ്ങളായ ബോര്‍ഡ് നന്ദകുമാർ, രാഘവൻ എന്നിവര്‍ ചടങ്ങില്‍ പങ്കെടുത്തു.

കിഴക്കഞ്ചേരിയിൽ കോൺഗ്രസ് മണ്ഡലം കമ്മിറ്റി ഓഫീസ് ഉദ്ഘാടനം നാളെ

വടക്കഞ്ചേരി: കിഴക്കഞ്ചേരിയിൽ കോൺഗ്രസിന്‍റെ മണ്ഡലം കമ്മിറ്റി ഓഫീസ് കെട്ടിട ഉദ്ഘാടനം നാളെ എഐസിസി ജനറൽ സെക്രട്ടറി കെ.സി. വേണുഗോപാൽ എംപി നിർവഹിക്കുമെന്നു മണ്ഡലം കമ്മിറ്റി ഭാരവാഹികൾ പത്രസമ്മേളനത്തിൽ അറിയിച്ചു. ഉച്ചയ്ക്ക് ഒന്നിനു നടക്കുന്ന കെട്ടിട ഉദ്ഘാടന ചടങ്ങിൽ ഡിസിസി പ്രസിഡന്‍റ് എ. തങ്കപ്പൻ, വി. കെ. ശ്രീകണ്ഠൻ എംപി, രാഹുൽ മാങ്കൂട്ടത്തിൽ എംഎൽഎ, കെപിസിസി വൈസ് പ്രസിഡന്‍റ് വി.ടി. ബൽറാം, കെപിസിസി സെക്രട്ടറിമാരായ സി. ചന്ദ്രൻ , പ്രഫ.കെ.എ. തുളസി, മുൻ എംപിമാരായ രമ്യ ഹരിദാസ്, വി.എസ്. വിജയരാഘവൻ, മുൻമന്ത്രി വി.സി. കബീർ മാസ്റ്റർ, ഡിസിസി മുൻ പ്രസിഡന്‍റ് സി. വി. ബാലചന്ദ്രൻ എന്നിവർ പ്രസംഗിക്കും. നേതാക്കളായ സി. പ്രകാശ്, വി. സുദർശനൻ,കെപിസിസി മെംബർ പാളയം പ്രദീപ്, ഡിസിസി സെക്രട്ടറി ഡോ. അർസലൻ നിസാം, കിഴക്കഞ്ചേരി സഹകരണ ബാങ്ക് പ്രസിഡന്‍റ് എം.കെ. ശ്രീനിവാസൻ, കോൺഗ്രസ് ബ്ലോക്ക് പ്രസിഡന്‍റ് കെ.വി. കണ്ണൻ എന്നിവർ സന്നിഹിതരായിരിക്കും. വടക്കഞ്ചേരി തങ്കം ജംഗ്ഷനിൽ നിന്നും ബൈക്ക് റാലിയോടെയാണ് വേണുഗോപാലിനെ കിഴക്കഞ്ചേരിയിലേക്ക് സ്വീകരിക്കുക. കിഴക്കഞ്ചേരി ക്ഷേത്രത്തിനടുത്താണ് കോൺഗ്രസിന്‍റെ പുതിയ ഓഫീസ് കെട്ടിടം. കെട്ടിട ഉദ്ഘാടനം കഴിഞ്ഞ് കുണ്ടുകാട് കമ്യുണിറ്റി ഹാളിലാണ് ഉദ്ഘാടന യോഗം സംഘടിപ്പിച്ചിട്ടുള്ളത്. മണ്ഡലം പ്രസിഡന്‍റ് സി. ചന്ദ്രൻ ,ഡിസിസി സെക്രട്ടറി ഡോ. അർസലൻ നിസാം, മണ്ഡലത്തിന്‍റെ മറ്റു ഭാരവാഹികളായ ബാബു പോൾ, വി.പി.പത്മനാഭൻ ,എസ്.പുഷ്പരാജ് തുടങ്ങിയവർ പത്രസമ്മേളനത്തിൽ പങ്കെടുത്തു.

അധ്യാപകൻ മരിച്ച നിലയിൽ

മണ്ണാർക്കാട്: എംഇഎസ് ഹയർ സെക്കൻഡറി സ്കൂളിലെ മലയാളം അധ്യാപകൻ കെ. ഷിബുവിനെ മരിച്ചനിലയിൽ കണ്ടെത്തി. കുമരംപുത്തൂർ ചുങ്കം ജംഗ്ഷനിലെ സ്വകാര്യ ക്വാർട്ടേഴ്സിലാണ് മരിച്ചനിലയിൽ കണ്ടെത്തിയത്. മണ്ണാർക്കാട് പോലീസ് സ്ഥലത്തെത്തി പരിശോധന നടത്തി. തുടർനടപടികൾക്കായി മൃതദേഹം താലൂക്ക് ആശുപത്രിയിലേക്കു മാറ്റി. സംസ്കാരം ഇന്നു രാവിലെ 11 നു വീട്ടുവളപ്പിൽ. പിതാവ് കുമാരപിള്ള. അമ്മ: ലളിതമ്മ. ഭാര്യ: രേഖ. മകൾ: ശ്രീലക്ഷ്മി.

വടക്കഞ്ചേരി മോർ ഇവാനിയൻ കോളജിൽ പുതിയ അധ്യയനവർഷത്തിന്‍റെ ഉദ്ഘാടനം

വടക്കഞ്ചേരി: ആർട്ടിഫിഷ്യൽ ഇന്‍റലിജൻസ് തുടങ്ങിയ നൂതന സാങ്കേതിക വിദ്യകൾ ക്രിയാത്മകമായി ഉപയോഗിക്കുന്ന പുതുതലമുറയെ രൂപപ്പെടുത്തണമെന്നു കെ. രാധാകൃഷ്ണൻ എംപി. വടക്കഞ്ചേരി തേനിടുക്കിലെ മോർ ഇവാനിയൻ കോളജിലെ പുതിയ അധ്യയനവർഷം ഉദ്ഘാടനം ചെയ്യുകയായിരുന്നു അദ്ദേഹം. മൂവാറ്റുപുഴ രൂപത ബിഷപ് ഡോ. യൂഹാനോൻ മാർ തെയഡോഷ്യസ് അധ്യക്ഷത വഹിച്ചു. പ്രിൻസിപ്പൽ ഫാ. ഷോജി വെച്ചൂർക്കാരോട്ട്, ഡയറക്ടർ ഫാ. ജെസ്വിൻ അറയ്ക്കമ്യാലിൽ, വാർഡ് മെംബർ കെ. ദേവദാസ് പ്രസംഗിച്ചു.

എഴുപത്തിയേഴുകാരി ശ്രീദേവിയമ്മ ഏറ്റവും പ്രായംകൂടിയ പരീക്ഷാർഥി

പാലക്കാട്: സാക്ഷരതാ മിഷൻ പൊതു വിദ്യാഭ്യാസ വകുപ്പുമായി സഹകരിച്ച് നടത്തുന്ന ഹയർ സെക്കൻഡറി തുല്യത പരീക്ഷ ആരംഭിച്ചു. ജില്ലയിൽ 13 പരീക്ഷാകേന്ദ്രങ്ങളിലായി 1661 പേർ ആദ്യ ദിനത്തിൽ പരീക്ഷയെഴുതി. രണ്ടാംവർഷ മലയാളം പരീക്ഷയാണ് ആദ്യദിനത്തിൽ നടന്നത്. പരീക്ഷ എഴുതിയവരിൽ 1403 സ്ത്രീകളും, 258 പുരുഷന്മാരും,പട്ടികജാതി വിഭാഗത്തിലുള്ള 245, പട്ടികവർഗ വിഭാഗത്തിൽ 21 പഠിതാക്കളുമാണുള്ളത്. കുമരംപുത്തൂർ കല്ലടി എച്ച്എസ്എസ് സ്കൂളിലാണ് ജില്ലയിൽ ഏറ്റവും കൂടുതൽ പഠിതാക്കൾ പരീക്ഷ എഴുതിയത്. 303 പേരാണ് എഴുതിയത്. രണ്ടാംവർഷ പരീക്ഷ 27 ന് അവസാനിക്കും. ഹയർസെക്കൻഡറി ഒന്നാം വർഷ പരീക്ഷ ഇന്നാരംഭിച്ച് 28ന് സമാപിക്കും. ജില്ലയിൽ 890 പേരാണ് പരീക്ഷ എഴുതുക. കുമരംപുത്തൂർ കല്ലടി എച്ച്എസ്എസ് സ്കൂളിൽ പരീക്ഷ എഴുതിയ ശ്രീദേവിയമ്മ (77) യാണ് ഹയർസെക്കൻഡറി തുല്യത പരീക്ഷ എഴുതിയതിൽ പ്രായം കൂടിയ പഠിതാവ്. 1968 ൽ 254 മാർക്കോടെ മലപ്പുറം പാണ്ടിക്കാട്, പയ്യപ്പറന്പ് ഹൈസ്കൂളിൽ നിന്നും എസ്എസ്എൽസി പരീക്ഷയെഴുതി വിജയിച്ചെങ്കിലും വിവാഹശേഷം തുടർപഠനത്തിനു ശ്രീദേവിയമ്മയ്ക്കു കഴിഞ്ഞിരുന്നില്ല. പാതിവഴിയിൽ നിലച്ചുപോയ പഠനത്തെ വീണ്ടെടുക്കാൻ പാലക്കാട് പൂളക്കാട് ഹിദായത്ത് നഗറിലെ യുവദന്പതികളായ അബൂതാഹിറും (40), ഭാര്യ തസ്ലീമ (30)യും രണ്ടാംവർഷ മലയാളം പരീക്ഷയെഴുതാൻ ഒരുമിച്ചെത്തി. പാലക്കാട് പിഎംജി സ്കൂളിലാണ് ഇരുവരും രണ്ടാംവർഷ തുല്യതാ പരീക്ഷയെഴുതിയത്.

പീച്ചി ഉൾക്കാട്ടിൽ അയ്യായിരം വിത്തുണ്ടകൾ നിക്ഷേപിച്ചു

വടക്കഞ്ചേരി: വന്യമൃഗങ്ങൾക്കു വനത്തിൽതന്നെ ഭക്ഷണവും സംരക്ഷണവും ഉറപ്പാക്കുന്നതിന്‍റെ ഭാഗമായി കിഴക്കഞ്ചേരി പഞ്ചായത്തിന്‍റെ അതിർത്തി പങ്കിടുന്ന പീച്ചി വന്യമൃഗസംരക്ഷണകേന്ദ്രത്തിൽ അയ്യായിരം വിത്തുണ്ടകൾ നിക്ഷേപിച്ചു. ഇതിന്‍റെ ഉദ്ഘാടനം ഇന്നലെ വൈകുന്നേരം പാലക്കുഴി റോഡിൽ പുല്ലംപരുതയിൽ കെ.ഡി. പ്രസേനൻ എംഎൽഎ നിർവഹിച്ചു. പഞ്ചായത്ത് മെംബർ പോപ്പി ജോൺ അധ്യക്ഷത വഹിച്ചു. പീച്ചി വൈൽഡ് ലൈഫ് വാർഡൻ എം.കെ. രഞ്ജിത്ത് മുഖ്യാതിഥിയായിരുന്നു. പാലക്കുഴി സെന്‍റ് തോമസ് പള്ളി വികാരി ഫാ. ജസ്റ്റിൻ കോലങ്കണി, വചനഗിരി സെന്‍റ് ജോർജ് പള്ളി വികാരി ഫാ. ഹെൽബിൻ മീമ്പിള്ളിൽ, പാലക്കുഴി പ്രതിഭ വായനശാല പ്രസിഡന്‍റ് ജോസ് ഊന്നുപാലം, ചാർളി മാത്യു, ഒളകര ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫിസർ യു. സജീവ് കുമാർ, സെക്്ഷൻ ഫോറസ്റ്റ് ഓഫീസർ കെ.എൽ. ലിൻഡോ എന്നിവർ പ്രസംഗിച്ചു. മാവ്, പ്ലാവ്, ആഞ്ഞിലി, ഞാവൽ, കശുമാവ് തുടങ്ങിയവയുടെ വിത്തുകളാണ് മണ്ണിൽ പൊതിഞ്ഞ് ചെറിയ ഉണ്ടകളാക്കി ഉൾവനത്തിൽ നിക്ഷേപിച്ചത്. പാലക്കുഴി, വചനഗിരി ഇടവകാംഗങ്ങളും മമ്പാട് സ്കൂൾ കുട്ടികൾ, കർഷകർ, പാലക്കുഴിയിലെ പ്രതിഭാ വായനശാല അംഗങ്ങൾ തുടങ്ങിയവരാണ് വിത്തുണ്ടകൾ തയാറാക്കിയത്.

പ്രക്ഷോഭ പരിപാടികൾ ആരംഭിക്കുമെന്നു ബിജെപി

വടക്കഞ്ചേരി: വടക്കഞ്ചേരി ടൗണിലെ കുത്തഴിഞ്ഞ ഭരണ സംവിധാനത്തിനെതിരെ ഈമാസം 15 മുതൽ ശക്തമായ പ്രക്ഷോഭ പരിപാടികൾ ആരംഭിക്കുമെന്നു ബിജെപി നേതാക്കൾ പത്രസമ്മേളനത്തിൽ അറിയിച്ചു. ടൗണിലെ ട്രാഫിക് സംവിധാനം കുറ്റമറ്റതാക്കുക, വഴിയോര കച്ചവടം നിയന്ത്രിക്കുക, നൂറുകണക്കിനു യാത്രക്കാർ എത്തുന്ന ടൗണിലെ ചെറുപുഷ്പം ജംഗ്ഷനിലുള്ള കംഫർട്ട് സ്റ്റേഷന്‍റെ പ്രവർത്തനം ആരംഭിക്കുക, സ്കൂളിനു മുന്നിലെ ബസ് കാത്തിരിപ്പുകേന്ദ്രം പുനർനിർമിക്കുക, സർക്കാർ ആശുപത്രിയിൽ വൈകുന്നേരവും ചികിത്സ ലഭ്യമാകുന്നതിനുള്ള നടപടി സ്വീകരിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരപരിപാടികൾ. 2022 സെപ്റ്റംബർ രണ്ടിന് കൂടിയ ട്രാഫിക് റഗുലേറ്ററി കമ്മിറ്റി തീരുമാനം നടപ്പിലാക്കുന്നതിൽ വീഴ്ചവന്ന സാഹചര്യത്തിൽ വിഷയത്തിൽ എംഎൽഎ ഇടപ്പെടണം. ടൗൺ റോഡുകളിൽ യാത്രക്കാർക്കും വാഹനങ്ങൾക്കും തടസമായി റോഡിൽ നിർത്തിയിടുന്ന കച്ചവട സ്ഥാപനങ്ങൾ നീക്കം ചെയ്യുന്നതിനും ടൗണിൽ പെർമിറ്റില്ലാതെ ഓടുന്ന ഓട്ടോറിക്ഷകൾ പിടികൂടുന്നതിനും നടപടി വേണം. യോഗം തീരുമാനങ്ങൾ എഴുതിവക്കുന്നതിനപ്പുറം നടപ്പിലാക്കുന്നതിനുള്ള യാതൊരു ഇച്ഛാശക്തിയും പഞ്ചായത്തിന്‍റെ ഭാഗത്തുനിന്നുമുണ്ടാകുന്നില്ലെന്ന് നേതാക്കൾ കുറ്റപ്പെടുത്തി. ചെറുപുഷ്പം സ്കൂളിന് മുന്നിൽ പഴയ ബസ് കാത്തിരിപ്പു കേന്ദ്രം പൊളിച്ചുനീക്കിയ സ്ഥലത്ത് പുതിയത് നിർമിക്കണമെന്നും ആവശ്യമുന്നയിച്ചു. നെൽകർഷകരുടെ വിഷയത്തിൽ സർക്കാർ ഇടപെടുന്നില്ലെന്നും പൂട്ടികിടക്കുന്ന ആലത്തൂരിലെ മോഡേൺ റൈസ് മിൽ ഉൾപ്പെടെയുള്ള മില്ലുകൾതുറന്ന് കർഷകരിൽനിന്നും സംഭരിക്കുന്ന നെല്ല് ഇവിടെ തന്നെ അരിയാക്കിമാറ്റാൻ പദ്ധതികൾ വേണം. സംസ്ഥാന സർക്കാർ നെൽകർഷകരെ അവഗണിക്കുന്ന സ്ഥിതി തുടർന്നാൽ കേന്ദ്രസർക്കാർ ഇടപ്പെട്ട് നെല്ലുസംഭരണത്തിനുള്ള വഴികൾ കണ്ടെത്തുമെന്നു് ബിജെപി പാലക്കാട് വെസ്റ്റ് ജില്ലാ പ്രസിഡന്‍റ് പി. വേണുഗോപാൽ വിളിച്ചു ചേർത്ത പത്രസമ്മേളനത്തിൽ പറഞ്ഞു. പാർട്ടിജില്ലാ വൈസ് പ്രസിഡന്‍റ് സി.എസ്. ദാസ്, ജില്ലാ ജനറൽ സെക്രട്ടറി ബാബു പൂക്കാട്ടിരി, മണ്ഡലം പ്രസിഡന്‍റ് അഡ്വ. ശ്രീരാജ് വള്ളിയോട്, സെക്രട്ടറി എൻ. കൃഷ്ണകുമാർ, ബിജെപി വടക്കഞ്ചേരി പഞ്ചായത്ത് പ്രസിഡന്‍റ് പി.കെ. ഗുരു തുടങ്ങിയവരും പത്രസമ്മേളനത്തിൽ പങ്കെടുത്തു.

ചെരുപ്പുമാല പ്രതിഷേധവുമായി കോൺഗ്രസ് പ്രവർത്തകർ

പാലക്കാട്: ടിബി റോഡ് ടൗൺ ബസ് സ്റ്റാൻഡ് റോഡിനെയും ജിബി റോഡിനെയും ബന്ധിപ്പിക്കുന്ന എസ്കലേറ്റർ മാസങ്ങളായി നിശ്ചലമായതിൽ കോൺഗ്രസിന്‍റെ ചെരുപ്പുമാല പ്രതിഷേധം. നഗരസഭാ ചെയർപേഴ്സന്‍റെയും വൈസ് ചെയർമാന്‍റെയും കോലത്തിൽ ചെരുപ്പുമാല അണിഞ്ഞായിരുന്നു പ്രവർത്തകർ പ്രതിഷേധിച്ചത്. പാലക്കാട് ബ്ലോക്ക് കോൺഗ്രസ് കമ്മിറ്റിയാണ് ഈ പ്രതിഷേധം സംഘടിപ്പിച്ചത്. പ്രതിഷേധ സമരം ഡിസിസി ജനറൽ സെക്രട്ടറി വി. രാമചന്ദ്രൻ ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് അധ്യക്ഷത വഹിച്ചു. നേതാക്കളായ കെ. ഭവദാസ്, ഹരിദാസ് മച്ചിങ്ങൽ, ബോബൻ മാട്ടുമന്ത, കെ.ആർ. ശരരാജ്, മണ്ഡലം പ്രസിഡന്‍റുമാരായ അനിൽ ബാലൻ, രമേശ് പുത്തൂർ, എസ്. സേവ്യർ, എസ്.എം. താഹ, നഗരസഭാ അംഗങ്ങളായ എ. കൃഷ്ണൻ, എഫ്.ബി. ബഷീർ പ്രസംഗിച്ചു. പാർട്ടി ഭാരവാഹികളായ എം. പ്രശോഭ്, അബു പാലക്കാടൻ, എസ്. ശെൽവൻ, എം.കെ. സിദ്ധാർഥൻ, ഷാജഹാൻ മേപ്പറമ്പ്, ലക്ഷ്മണൻ പട്ടിക്കര, എസ്. സഞ്ജയ് പങ്കെടുത്തു.

അവഗണനയ്‌ക്കെതിരേ നാടിന്‍റെ ശബ്ദമായി അട്ടപ്പാടി ജനകീയ കൂട്ടായ്മ സംഗമം

അഗളി: അട്ടപ്പാടിയുടെ ആവശ്യങ്ങൾക്കുവേണ്ടി നിലകൊള്ളുന്ന ജനകീയ കൂട്ടായ്മ വോയ്‌സ് ഓഫ് അട്ടപ്പാടിയുടെ നേതൃത്വത്തിൽ രൂപംകൊണ്ട അട്ടപ്പാടി ജനകീയസമിതി നേതൃത്വം നല്കിയ പ്രതിഷേധറാലിയും സംഗമവും ഇന്നലെ അഗളിയിൽ നടന്നു. അട്ടപ്പാടിയിലേക്കുള്ള ഏക യാത്രാമാർഗമായ തകർന്ന റോഡ് അടിയന്തരമായി സഞ്ചാരയോഗ്യമാക്കണമെന്നും വർധിച്ചുവരുന്ന വന്യമൃഗ ആക്രമണത്തിൽനിന്ന് അട്ടപ്പാടിയിലെ ജനങ്ങൾക്കു സംരക്ഷണം നല്കണമെന്നും ജനകീയ കൂട്ടായ്മ ആവശ്യപ്പെട്ടു. കക്ഷിരാഷ്ട്രിയത്തിനു അതീതമായി രൂപപ്പെട്ട ജനകീയ സമിതിയുടെ ആദ്യ പ്രതിഷേധ സംഗമമായിരുന്നു അഗളിയിലേത്. ദേശീയ അവർഡ് ജേതാവ് നഞ്ചിയമ്മ പ്രതിഷേധറാലി ഗൂളിക്കടവിൽ ഉദ്ഘാടനം ചെയ്തു. ഗൂളിക്കടവ് സെന്‍ററിൽ നിന്നാരംഭിച്ച റാലിയിൽ നൂറുകണക്കിനു പൊതുജനങ്ങൾ പങ്കെടുത്തു. അട്ടപ്പാടി സിവിൽ സറ്റേഷന് സമീപത്ത് ചേർന്ന പൊതുയോഗത്തിൽ അട്ടപ്പാടിയുടെ എല്ലാ മേഖലയിൽ നിന്നും ആളുകൾ ഒഴുകിയെത്തി. കഴിഞ്ഞ മൂന്നുവർഷമായി പ്രവർത്തനം ആരംഭിച്ച് പാതിവഴിയിൽ നിലച്ചുപോയ മണ്ണാർക്കാട് തെങ്കര റീച്ചിന്‍റെ പണികൾ പൂർത്തിയാക്കാത്തതിൽ ജനരോഷമിരമ്പി. കഴിഞ്ഞ മാർച്ചിൽ പൂർത്തിയാക്കാമെന്നു എംഎൽഎ നല്കിയ ഉറപ്പു വെറുതെയായെന്നും ഒരുപണിയും നടക്കാത്ത സാഹചര്യത്തിൽ കരാറുകാരനു ജൂലൈ 31 വരെ കരാർ നീട്ടിനല്കിയതിൽ ജനകീയ സമിതി പ്രതിഷേധം രേഖപ്പെടുത്തി. കരാറുകാരനെ കരിമ്പട്ടികയിൽപെടുത്താൻ സർക്കാർ തയാറാകണമെന്നു സംഗമത്തിൽ ആവശ്യമുയർന്നു. അട്ടപ്പാടിയിലെ എല്ലാ വാർഡിലും ആനയും പുലിയും ഇറങ്ങുന്ന സാഹചര്യം സർക്കാർ ഗൗരവമായിക്കാണണം. അട്ടപ്പാടിയിൽ ഇനി വന്യമൃഗം ആക്രമിച്ച് കൊലപ്പെടുത്തുന്നവരുടെ ശരീരഭാഗങ്ങൾ മറവുചെയ്യേണ്ടതില്ലെന്നും അത് മൃഗങ്ങൾക്കു ഭക്ഷണമായി ഉപേക്ഷിക്കാൻ തീരുമാനിച്ചിരിക്കുന്നതായി വനംവകുപ്പിനെ അറിയിക്കുന്നതായി ജനകീയസമിതി സംഘാടകർ അറിയിച്ചു. അട്ടപ്പാടി ജനകീയ കൂട്ടായ്മ ചെയർമാർ റോബിൻ പുതുപ്പറമ്പിൽ അധ്യക്ഷത വഹിച്ച യോഗത്തിൽ ഫാ. സജി വട്ടുകളത്തിൽ മുഖ്യപ്രഭാഷണം നടത്തി. അഗളി ജുമാ മസ്ജിദ് ഖത്തീബ് റഷീദ് അൻവരി, സുധീർ ആനക്കട്ടി ദേവരാജ്, ബാലകൃഷ്ണൻ, ജെയ്സൺ ജെയിംസ്, ഷാജി താവളം എന്നിവർ പ്രസംഗിച്ചു. ജയൻ സ്വാഗതവും ബാബു നന്ദിയും പറഞ്ഞു. നൂറുകണക്കിനാളുകൾ ഒപ്പിട്ട ഹർജി മുഖ്യമന്ത്രിക്കും പൊതുമരാമത്തു വകുപ്പിനും നൽകുമെന്നു സംഘാടകസമിതി അറിയിച്ചു.

വേൾഡ് മലയാളി കൗൺസിൽ തിരുപ്പൂർ ചാപ്റ്റർ രൂപീകരിച്ചു

കോയന്പത്തൂർ: വേൾഡ് മലയാളി കൗൺസിൽ കോയമ്പത്തൂർ സ്ഥാപകദിനം അംഗങ്ങളുടെ കുടുംബസംഗമത്തോടെ ആഘോഷിച്ചു. ഇന്ത്യൻ വ്യോമസേനയിൽ പ്രശസ്ത സേവനത്തിനുള്ള അവാർഡ് നേടിയ ജീന ജോട്ടി കുര്യനെയും കോയമ്പത്തൂർ മലയാളി സമാജത്തിലെ പുതിയ സിഇഒ ഡോ.എസ് സന്ധ്യാ മേനോനെയും ആദരിച്ചു. കുടുംബ സംഗമത്തിന് ആതിഥേയത്വം വഹിച്ച ഗോപകുമാറിനെയും കുടുംബത്തെയും യോഗം ആദരിച്ചു. തുടർന്ന് വേൾഡ് മലയാളി കൗൺസിൽ കോയമ്പത്തൂരിന്‍റെ കീഴിൽ തിരുപ്പൂർ വേള്‍ഡ് മലയാളി കൗൺസിലിന്‍റെ പുതിയ ചാപ്റ്ററിന്‍റെ രൂപീകരണവും നടന്നു. വേൾഡ് മലയാളി കൗൺസിൽ ഇന്ത്യ റീജിയൻ പ്രസിഡന്‍റ് പി. പത്മകുമാർ ചടങ്ങിൽ മുഖ്യാതിഥിയായി പങ്കെടുത്തു. വേൾഡ് മലയാളി കൗൺസിൽ കോയമ്പത്തൂർ പ്രോവിൻസ് ചെയർമാൻ ഡോ. രാജേഷ് കുമാർ, പ്രസിഡന്‍റ് രാജൻ അറുമുഖം, ജനറൽ സെക്രട്ടറി വിജയൻ ചെറുവശേരി, ദേവദാസ് മേനോൻ, വേണു ഗോപാൽ, വനിതാ വിഭാഗം പ്രസിഡന്‍റ് ഡോ. ജയന്തി പ്രദീപ് തുടങ്ങിയവർ പങ്കെടുത്തു.

ഉപയോഗശൂന്യമായ വായനശാല കെട്ടിടം ഗ്രാമപഞ്ചായത്തിന് കൈമാറണം

ചിറ്റൂർ: നല്ലേപ്പിള്ളിയിൽ ജീർണാവസ്ഥയിലെത്തിയ തെക്കേദേശം വില്ലേജ് പ്രവർത്തിച്ചിരുന്ന പഴയകെട്ടിടം ഗ്രാമ പഞ്ചായത്തിന ്കൈമാറി പുനരുദ്ധരിച്ച് ജനക്ഷേമപ്രവർത്തനങ്ങൾക്ക് പ്രയോജനപ്പെടുത്തണമെന്ന് നാട്ടുകാർ ആവശ്യപ്പെട്ടു. പതിറ്റാണ്ടുകൾക്ക് മുമ്പ് ചിറ്റൂർ കാവിന്‍റെ മുമ്പിലുള്ള റവന്യൂ ഡിപ്പാർട്ട്മെന്‍റിന്‍റെ കെട്ടിടത്തിൽ പ്രവർത്തിച്ചിരുന്ന വില്ലേജ് ഓഫീസ് ജനങ്ങളുടെ സൗകര്യത്തിന് വേണ്ടി തെക്കേദേശത്ത് തന്നെ പ്രവർത്തിക്കണമെന്ന ജനങ്ങളുടെ ആവശ്യത്തെ തുടർന്നാണ് പാറക്കാൽ എഎംഎൽപിസ്കൂളിന് മുന്നിലുള്ള വായനശാലയായി പ്രവർത്തിച്ചുവന്നിരുന്ന കെട്ടിടത്തിലേക്ക് മാറ്റിയത്. പതിറ്റാണ്ടുകൾക്ക് ശേഷം പാറക്കാലിൽ തന്നെ റവന്യു പുറമ്പോക്ക് സ്ഥലത്തു ലക്ഷങ്ങൾ മുടക്കി ഒരു പുതിയ കെട്ടിടം നിർമിച്ച് പ്രവർത്തനം തുടങ്ങി. പിന്നീട് ഈ കെട്ടിടം ആൾപ്പെരുമാറ്റം ഇല്ലാതെ ചിതലരിച്ചും ചോർന്നൊലിച്ചും ജീർണാവസ്ഥയിലായി. ഈ കെട്ടിടം ഗ്രാമപഞ്ചായത്തിന് കൈമാറിയാൽ വയോധികർക്ക് പകൽവീടും അങ്കണവാടി തുടങ്ങിയ സ്ഥാപനങ്ങൾക്ക് ഇവിടെ പ്രവർത്തിക്കാൻ കഴിയും. റവന്യൂ ഡിപ്പാർമെന്‍റിന്‍റെ രേഖകളിൽ ഇപ്പോഴും പഴയകാലത്തെ വായനശാലയുടെ പേരിലാണുള്ളത്.

പാട്ടികുളത്ത് സ്ലാബുകൾ തകർന്ന മൂലത്തറ കനാൽബണ്ട് അപകടഭീഷണിയിൽ

ചിറ്റൂർ: പാട്ടികുളത്ത് മൂലത്തറ ഇടതു കനാൽബണ്ട് തകർന്നത് യുദ്ധകാലാടിസ്ഥാനത്തിൽ പുനർനിർമിക്കണമെന്നതാണ് കർഷകരുടെ ആവശ്യം. കിഴക്കേക്കാട്ടിൽ കനാലിന്‍റെ വടക്കുഭാഗം ബണ്ടാണ് സ്ലാബുകൾ വീണ് സംരക്ഷണ ഭിത്തിക്ക് ബലക്ഷയം ഉണ്ടായിരിക്കുന്നത്. മഴ ശക്തമായി കമ്പാലത്തറയിൽ നിന്നും ജലം ഇടതുകനാലിൽ ഇറക്കിവിടാറുണ്ട്. കനാലിൽ പൂർണതോതിൽ വെള്ളമിറക്കിയാൽ മണ്ണിളകി ബണ്ട്പൊട്ടി നെൽവയലുകളിൽ വെള്ളം മുങ്ങാനുള്ള സാധ്യതയുമുണ്ട്. മുന്പ് വണ്ടിത്താവളം പാറമേട്, ഹൈസ്കൂളിനു പിൻഭാഗം എന്നിവിടങ്ങളിൽ ബണ്ട് തകർന്ന് വീടുകൾ, മദ്രസ, കൊയ്യാറായ വയലുകളിൽ വെള്ളം ഇരച്ചുകയറി നാശം വിതച്ചു. കനാൽബണ്ട് പൊട്ടിയ സ്ഥലത്ത് മദ്രസ വിദ്യാർഥികൾ എത്തുന്നതിനു മുന്പ് പ്രഭാതസമയത്താണ് അപകടമുണ്ടായതിനാൽ വൻദുരന്തം വഴിമാറി. വീടുകൾക്കുള്ളിൽ കനാൽ വെള്ളവും മണ്ണും കയറി ഗൃഹോപകരണങ്ങൾക്ക് കേടുപാടുകൾ ഉണ്ടായ സംഭവം നടന്നിരുന്നു. കനാൽ ബണ്ടിനു സമീപവാസികൾ കനാലിന്‍റെ അപകടാവസ്ഥ ബന്ധപ്പെട്ട ജലസേചന വകുപ്പിന് നൽകി മുന്നറിയിപ്പ് അവഗണിച്ചതാണ് ബണ്ട് 15 മീറ്റർ ദൂരത്തിൽ തള്ളിപ്പോവാൻ കാരണമായത്. കിഴക്കേക്കാട്ടിലും സമാനമായ അപകടാവസ്ഥയാണ് നിലവിലുള്ളത്.

ഹൈമാസ്റ്റ് ലൈറ്റുകൾ സ്വിച്ച്ഓൺ ചെയ്തു

മണ്ണാർക്കാട്: എംഎൽഎയുടെ മണ്ണാർക്കാട് നിലാവ് പദ്ധതിയിൽ മണ്ഡലത്തിൽ എട്ട് ഹൈമാസ്റ്റ്, മിനി മാസ്റ്റ് ലൈറ്റുകൾ സ്വിച്ച്ഓൺ ചെയ്തു. സ്വിച്ച് ഓൺ എൻ. ഷംസുദ്ദീൻ എംഎൽഎ നിർവഹിച്ചു. കോട്ടോപ്പാടം ഗ്രാമപഞ്ചായത്തിലെ കണ്ടമംഗലം ക്രിസ്തുരാജ ചർച്ച് പരിസരം, പുറ്റാനിക്കാട് മാമ്പറ്റ ശിവക്ഷേത്ര പരിസരം, കുണ്ട്‌ളക്കാട്, കച്ചേരിപ്പറമ്പ് കുന്നശേരി മെയിൻ സെന്‍റർ, 55 ാം മൈൽ ജംഗ്ഷൻ, വടശേരിപ്പുറം ഹൈസ്കൂൾ പരിസരം, എന്നിവിടെയും കുമരംപുത്തൂർ ഗ്രാമപഞ്ചായത്തിലെ താഴെ അരിയൂർ പിലാപ്പടി ജുമാമസ്ജിദ് പരിസരം, ചങ്ങലീരി സിഎച്ച് മിനി സ്റ്റേഡിയം എന്നിവിടങ്ങളിലുമാണ് സ്വിച്ച് ഓൺ നടന്നത്. കോട്ടോപ്പാടം ഗ്രാമപഞ്ചായത്തിൽ നടന്ന ചടങ്ങിൽ പഞ്ചായത്ത് പ്രസിഡന്‍റ് ജസീന അക്കര അധ്യക്ഷയായി. ബ്ലോക്ക്‌ പഞ്ചായത്ത് മെമ്പർ പടുവിൽ മാനു, മെംബർമാരായ നിജോ വർഗീസ്, റഫീന മുത്തനിൽ, ഹംസ കിളയിൽ, റഷീദ പുളിക്കൽ, അബൂബക്കർ നാലകത്ത്, റജീന, കല്ലടി അബൂബക്കർ, ഫാ. ലിവിൻ ചുങ്കത്ത്, പാറശേരി ഹസൻ, മുനീർ താളിയിൽ, എ.വി. മത്തായി, എ. ഹുസൈൻ, സോണി പ്ലാത്തോട്ടം എന്നിവർ സംബന്ധിച്ചു.

പാലക്കുഴി കൊർണപ്പാറയിലേക്കുള്ള റോഡ് ഗതാഗതയോഗ്യമാക്കും

വടക്കഞ്ചേരി: മലമ്പ്രദേശമായ പാലക്കുഴിയുടെ സർവ സൗന്ദര്യഭാവങ്ങളും നിറഞ്ഞുനിൽക്കുന്ന പാലക്കുഴിയിലെ അഞ്ചുമുക്ക്- കൊർണപ്പാറ റോഡ് ഗതാഗതയോഗ്യമാക്കും. അഞ്ചുമുക്കിൽ നിന്നും തുടങ്ങുന്ന റോഡ് പൂർണമായും കോൺക്രീറ്റ് ചെയ്ത് ബലപ്പെടുത്തുമെന്ന് വാർഡ് മെംബർ പോപ്പി ജോൺ പറഞ്ഞു. ഇതിനായി 25 ലക്ഷം രൂപ കെ.ഡി. പ്രസേനൻ എംഎൽഎ ഫണ്ടിൽ നിന്നും അനുവദിച്ചിട്ടുണ്ട്. നിർമാണപ്രവൃത്തികൾ വൈകാതെ തുടങ്ങും. നിരവധി വിനോദസഞ്ചാരികൾ എത്തുന്ന പ്രദേശമാണ് നന്നങ്ങാടികളുടെ ശേഷിപ്പുകളുള്ള പാലക്കുഴിയിലെ കൊർണപ്പാറ പ്രദേശം. മലയിൽ നിന്നും താഴേക്കുള്ള ദൂരക്കാഴ്ചകൾ അതിമനോഹരമാണ്. വിസ്തൃതമായ പാറപ്പുറങ്ങളും പുൽത്തകിടികളും ഇവിടെയുണ്ട്. പ്രകൃതിസൗന്ദര്യം ആസ്വദിക്കാൻ പോകുന്നവർക്ക് പോലീസ് നിരീക്ഷണ ടവറും ഫോറസ്റ്റ് വാച്ചർ ഷെഡുമുള്ള ഇവിടേക്ക് പ്രവേശനാനുമതിയുണ്ട്. മദ്യപസംഘങ്ങൾക്കും സാമൂഹ്യവിരുദ്ധർക്കും ഇവിടേക്ക് കടക്കാനാകില്ല. പ്ലാസ്റ്റിക് നിരോധിത മേഖല കൂടിയാണ് പ്രദേശം.

മുല്ലക്കര ഉന്നതിയിലെ വീടുകളിൽ ഉടൻ വൈദ്യുതി: മന്ത്രി കെ. കൃഷ്ണൻകുട്ടി

പാലക്കാട്: പുതുപ്പരിയാരം ഗ്രാമപഞ്ചായത്തിലെ മുല്ലക്കര ഉന്നതിയിലെ എല്ലാ വീടുകളിലും 27 നകം വൈദ്യുതി എത്തിക്കുമെന്ന് മന്ത്രി കെ. കൃഷ്ണൻകുട്ടി പറഞ്ഞു. വൈദ്യുതി കുടിശികയെ തുടർന്ന് 20 കുടുംബങ്ങളുടെ വൈദ്യുതി വിഛേദിക്കപ്പെട്ട സാഹചര്യത്തിൽ മുല്ലക്കര ഉന്നതി സന്ദർശിച്ച ശേഷമാണ് മന്ത്രിയുടെ പ്രഖ്യാപനം. വൈദ്യുതി പുനഃസ്ഥാപിക്കുന്നതിനും വീടുകളിലേക്ക് പുതിയ കണക്ഷൻ നൽകുന്നതിനുമായി കേരള ഹൈഡൽ ടൂറിസത്തിന്‍റെ സിഎസ്ആർ ഫണ്ടിൽ നിന്നുളള 5.57 ലക്ഷം രൂപയുടെ ചെക്ക് ജില്ലാ കളക്ടർക്കു വേണ്ടി ജില്ലാ പട്ടികവർഗ വികസന ഓഫീസർ എം. ഷമീനയ്ക്ക് മന്ത്രി കൈമാറി. ഈ തുകയിൽ 3,05974 ലക്ഷം രൂപയാണ് കുടിശിക തീർക്കുന്നതിനുള്ള ഒറ്റത്തവണ തീർപ്പാക്കൽ പദ്ധതിക്കായി ഉപയോഗിക്കുക. ബാക്കിവരുന്ന 2,51,647 രൂപ ഭാഗികമായി തകർന്ന വീടുകളുടെ വയറിംഗിനും നവീകരണത്തിനുമായി വിനിയോഗിക്കും. ഒൻപത് വീടുകൾക്ക് നിലവിലുള്ള സൗകര്യങ്ങളിൽത്തന്നെ വൈദ്യുതി ലഭ്യമാക്കും. വൈദ്യുതി എത്തിക്കുന്നതിനോടൊപ്പം മുല്ലക്കര ഉന്നതിയിലെ ഓരോ വീടുകളിലും ദീർഘകാല വരുമാനം ഉറപ്പുവരുത്തുന്ന രീതിയിലുള്ള പദ്ധതികൾ ആവിഷ്ക്കരിക്കേണ്ടതുണ്ടെന്ന് മന്ത്രി പറഞ്ഞു. ഉന്നതി നിവാസികളുടെ ചെലവും വരുമാനവും കണക്കിലെടുത്ത് അവരുടെ താത്പര്യം അനുസരിച്ച് തെങ്ങ്, കവുങ്ങ് പോലുള്ള തൈകൾ വെച്ചുപിടിപ്പിക്കുന്നതിനും പശു, ആട്, കാട തുടങ്ങിയവ വളർത്തുന്നതിനുമുള്ള സംവിധാനങ്ങൾ ഉണ്ടാകണം. കൂടാതെ, കമ്യൂണിറ്റി ഇറിഗേഷൻ സ്കീം വഴി ഓരോ വീടുകളിലേക്കും വെള്ളം എത്തിക്കണമെന്ന് മന്ത്രി നിർദേശം നൽകി. മുല്ലക്കര ഉന്നതി നിവാസികൾക്ക് തൊഴിലുറപ്പ് പദ്ധതി മുഖേന 100 ദിവസം വരെ തൊഴിൽ നൽകാനും മന്ത്രി നിർദേശിച്ചു. ഹെൽത്ത് ക്യാന്പുകൾ സംഘടിപ്പിക്കണമെന്നും മന്ത്രി പറഞ്ഞു.

അയിലൂർ മേഖലയിൽ നടീൽ കഴിഞ്ഞ നെൽപ്പാടങ്ങളിൽ ഞണ്ട്ശല്യം രൂക്ഷം

നെന്മാറ: നടീൽ കഴിഞ്ഞ നെൽപ്പാടങ്ങളിൽ ഞണ്ട്ശല്യം രൂക്ഷം. നടീൽ കഴിഞ്ഞ് രണ്ടാഴ്ച പ്രായമായ നെൽച്ചെടികളെയാണ് ഞണ്ടുകൾ വെട്ടിമുറിച്ചു കളയുന്നത്. ശക്തമായ മഴയ്ക്കുശേഷം നെൽപ്പാടങ്ങളിലെ വെള്ളം വാർന്നു തുടങ്ങിയതോടെയാണ് നെൽപ്പാടങ്ങളിൽ ഞണ്ട് വെട്ട് കണ്ടുതുടങ്ങിയത്. ചെടികളുടെ ചുവട്ടിൽ മണ്ണ് തുരന്നിരിക്കുന്ന ഞണ്ടിൻ കുഞ്ഞുങ്ങളാണ് നെൽച്ചെടികളെ വെള്ളത്തിനു താഴെ മുറിച്ചിടുന്നത്. ഞണ്ടുകൾ മുറിച്ചിട്ട നെൽച്ചെടികൾ വെള്ളത്തിൽ പാറി വരമ്പിന് സമീപം ഒഴുകി അടിഞ്ഞു തുടങ്ങിയതോടെയാണ് ഞണ്ടു വെട്ടിന്‍റെ രൂക്ഷത കർഷകരുടെ ശ്രദ്ധയിൽപ്പെടുന്നത്. ഞണ്ടുവെട്ട് പ്രതിരോധിക്കുന്നതിനായി വെള്ളം വാർത്തുകളഞ്ഞ് നെൽപ്പാടത്തും വരമ്പിനു ചുറ്റും കീടനാശിനി അടിച്ച് നിയന്ത്രിക്കാനുള്ള തയ്യാറെടുപ്പിലാണ് കർഷകർ. അയിലൂർ പഞ്ചായത്തിലെ തിരുവഴിയാട് പുത്തൻതറ മേഖലകളിലെ നെൽപ്പാടങ്ങളിലാണ് ഞണ്ട് വെട്ട് രൂക്ഷമായി കണ്ടുതുടങ്ങിയത്.

തമിഴ്നാട്ടിൽ ലോറിയും ബൈക്കും കൂട്ടിയിടിച്ച് പരിക്കേറ്റയാൾ മരിച്ചു

മുതലമട: തമിഴ്നാട്ടിൽ ബൈക്കും ലോറിയും കൂട്ടിയിടിച്ച അപകടത്തിൽ പരിക്കേറ്റ മുതലമട സ്വദേശി ചികിത്സയിലിരിക്കെ മരിച്ചു. പോത്തംപാടം തെക്കേക്കാട്ടിൽ പരേതനായ ചാമിയാർ മകൻ മുരുകേശനാണ്(50) മരിച്ചത്. ജൂൺ അഞ്ചിന് രാത്രി 8.30-ഓടെ ഭാര്യ അജിതയുമൊത്ത് പൊള്ളാച്ചിയിൽ നിന്നു വരവെ മുരുകേശൻ ഓടിച്ച ബൈക്ക് ലോറിയുമായി കൂട്ടിയിടിക്കുകയാരുന്നു. ഗോവിന്ദാപുരം- പൊള്ളാച്ചി പാതയിലെ ദിവാൻസാപുതൂർ നാടുകാണിമേട്ടിൽ വച്ചായിരുന്നു അപകടം. സംസ്കാരം നടത്തി. മീങ്കരയിലെ സ്വകാര്യകമ്പനിയിലെ ലോറി ഡ്രൈവറായിരുന്നു. അമ്മ: വിശാലു. മക്കൾ: വൈഷ്ണവ്, വൈഗ. സഹോദരങ്ങൾ: ഹേമലത, മുരളിധരൻ, പ്രസീത.

പാലക്കുഴി ജലവൈദ്യുത പദ്ധതി പൈപ്പ് സ്ഥാപിക്കൽ തുടങ്ങി

വടക്കഞ്ചേരി: പാലക്കുഴി മലയോരവാസികളുടെ സ്വപ്ന പദ്ധതിയായ തിണ്ടില്ലം മിനി ജലവൈദ്യുത പദ്ധതി ഈ വർഷംതന്നെ കമ്മീഷൻ ചെയ്യാൻ ലക്ഷ്യമിട്ടു പ്രവൃത്തികൾ ദ്രുതഗതിയിലാക്കി. പാലക്കുഴി അഞ്ചുമുക്കിലുള്ള ചെക്ക്ഡാമിൽനിന്നും താഴെ കൊന്നക്കൽക്കടവിലുള്ള പവർഹൗസിലേക്ക് പൈപ്പ് സ്ഥാപിക്കുന്ന പ്രവൃത്തികളാണ് ഇപ്പോൾ നടക്കുന്നത്. ഇതിനായി ചെക്ക്ഡാമിനു മുകളിൽ പുഴയുടെ ഒഴുക്കിന്‍റെ ഗതിമാറ്റിവിട്ട് ഷട്ടർ സ്ഥാപിക്കുന്ന വർക്കുകളാണ് നടക്കുന്നത്. വെള്ളം ഒഴിഞ്ഞു പോകാൻ ചെക്ക്ഡാമിന്‍റെ കെട്ടിലുള്ള സ്ളൂയിസിൽ വലിയ പൈപ്പ് സ്ഥാപിച്ചിട്ടുണ്ട്. ഉരുൾപൊട്ടലോ മറ്റൊയുണ്ടായി കൂടുതൽ വെള്ളം ഒഴുകിയെത്തിയാൽ ചെക്ക്ഡാമിലെ ഓവർ ഫ്ളോ വഴിയും വെള്ളം ഒഴുകുമെന്നു അധികൃതർ പറഞ്ഞു. വൻമലയുടെ ചെരിവിലൂടെ പൈപ്പ് സ്ഥാപിക്കലാണ് ശേഷിക്കുന്ന വർക്കുകളിലെ ദുർഘട പണിയായുള്ളത്. ഇതിനായി ഖലാസികളേയും സ്ഥലത്തെത്തിച്ചിട്ടുണ്ട്. വെള്ളച്ചാട്ടത്തിനു താഴെ കൊന്നക്കൽകടവിലെ പവർഹൗസിലെ ജനറേറ്ററുകൾ സ്ഥാപിക്കുന്ന വർക്കുകളും അന്തിമഘട്ടത്തിലാണ്. ഒരു പക്ഷെ, തിണ്ടില്ലം വെള്ളച്ചാട്ടത്തിന്‍റെ മനോഹര കാഴ്ചകൾ ഈ കാലവർഷത്തോടെ ഇല്ലാതാകും.ഇതിനാൽ തന്നെ പൊതുപണിമുടക്കായിരുന്ന ഇന്നലെയും അവധി ദിവസങ്ങളിലുമെല്ലാം നിരവധിയാളുകളാണ് പാലക്കുഴി പുഴയുടെ സൗന്ദര്യം ആസ്വദിക്കാൻ മല കയറുന്നത്. വൈദ്യുതോത്പാദനം തുടങ്ങിയാൽ പിന്നെ പൈപ്പിലൂടെയാകും വെള്ളം താഴെയെത്തുക.വെള്ളച്ചാട്ടം ഓർമയായി മാറും. തൃശൂർ - പാലക്കാട് ദേശീയപാതയിൽ നിന്നു വരെ ഇപ്പോൾ പാലക്കുഴി വെള്ളച്ചാട്ടം കാണാം. പദ്ധതി കമ്മീഷൻ ചെയ്യുന്നതോടെ ഈ കാഴ്ചകളെല്ലാം ഇല്ലാതാകും.

പാലക്കയത്തു ദ്രുതകർമസേനയെ സ്ഥിരമായി നിലനിർത്തണമെന്നു കർഷകർ

പാലക്കയം: കാട്ടാനശല്യം രൂക്ഷമായ പാലക്കയം കുടിയേറ്റ മേഖലയിൽ ദ്രുതകർമസേനയെ വിന്യസിക്കണമെന്ന് പ്രദേശവാസികൾ ആവശ്യപ്പെട്ടു. കാട്ടാനകൾ കൂട്ടമായെത്തി കൃഷിനശിപ്പിച്ച പായപ്പുല്ല്, ഇരുമ്പകചോല ഭാഗങ്ങളിൽ സന്ദർശനത്തിനെത്തിയ കെ. ശാന്തകുമാരി എംഎൽഎയോടാണ് കർഷകർ അവശ്യപ്പെട്ടത്‌. മുണ്ടനാട്‌, തരുപ്പപൊതി, അച്ചിലട്ടി, ചീനിക്കപ്പാറ, വട്ടപ്പാറ, പായപ്പുല്ല്, പത്തായക്കല്ല് തുടങ്ങിയ കാർഷിക മേഖലകളിൽ കാട്ടാനകൾ സ്ഥിരമായി എത്താറുണ്ടെന്നു കർഷകർ പറഞ്ഞു. ആനകളെ പേടിച്ച്‌ രാവിലെ റബ്ബർ ടാപ്പിംഗിനോ പത്രം വിതരണം ചെയ്യാനോ പോലും പുറത്തിറങ്ങാൻ കഴിയാത്ത സാഹചര്യമാണുള്ളത്‌. കട്ടാനകൾക്കുപുറമെ പുലി, കടുവ, കാട്ടുപന്നി, മയിൽ, കുറുക്കൻ തുടങ്ങിയവയും കൃഷിയിടത്തിൽ എത്താറുണ്ടെന്നും കർഷകർ പറഞ്ഞു. ആനകൾ പകലും വനത്തിനുള്ളിലേയ്ക്കു പോകാതെ വനത്തിനോടു ചേർന്ന കൃഷിയിടങ്ങളിൽ തമ്പടിക്കുകയാണ്‌. കാട്ടാനകലെ തുരത്താൻ ദ്രുതകർമസേനയെ പാലക്കയത്ത്‌ സ്ഥിരമായി നില നിർത്തണമെന്നും വൈദ്യുതി വേലികളും ട്രഞ്ചുകളും നിർമിച്ച്‌ ജനങ്ങളുടെ ജീവനും സ്വത്തിനും സംരക്ഷണം നൽകണമെന്നും കർഷകർ ആവശ്യപ്പെട്ടു. കർഷകരുടെ ആവശ്യങ്ങൾ സർക്കാരിനെ അറിയിക്കാമെന്നു എംഎൽഎ ഉറപ്പും നൽകി.

നിപ്പ വൈറസ് രോഗം: ജില്ലയിൽ പ്രതിരോധപ്രവർത്തനം ഊർജിതം

പാലക്കാട്: നിപ്പ വൈറസ് രോഗപ്രതിരോധ പ്രവർത്തനങ്ങൾ ഊർജിതം. ജില്ലയിൽ നിലവിൽ ഒരുരോഗിക്കു മാത്രമാണ് നിപ്പരോഗം സ്ഥിരീകരിച്ചിട്ടുള്ളത്. പാലക്കാട് ഗവ. മെഡിക്കൽ കോളജിൽ അഞ്ചുപേരാണ് ഐസൊലേഷനിൽ കഴിയുന്നത്. നിലവിൽ ജില്ലയിൽ 177 പേരാണ് സമ്പർക്ക പട്ടികയിൽ ഉൾപ്പെട്ടിട്ടുള്ളതെന്നു അധികൃതർ അറിയിച്ചു. നിപ്പ പ്രതിരോധ പ്രവർത്തനങ്ങളുടെ ഭാഗമായി ആരോഗ്യ പ്രവർത്തകർ ആകെ 3020 ഗൃഹസന്ദർശനങ്ങൾ നടത്തിയിട്ടുണ്ട്. ജില്ലാ മാനസികാരോഗ്യ വിഭാഗം ഇതുവരെ 235 പേർക്ക് ടെലഫോണിലൂടെ കൗൺസലിംഗ് സേവനം നൽകിയിട്ടുണ്ട്. പാലക്കാട് ഗവ. മെഡിക്കൽ കോളേജിൽ 24 മണിക്കൂറും പ്രവർത്തിക്കുന്ന കൺട്രോൾ സെല്ലിലേക്ക് 78 കോളുകളെത്തിയതായും അധികൃതർ അറിയിച്ചു. നിപ്പ പ്രതിരോധ പ്രവർത്തന ങ്ങളുടെ ഭാഗമായി ഐസിഎംആര്‍ എൻഐവി പൂനെയിൽ നിന്നുള്ള വിദഗ്ധസംഘം പാലക്കാട് മെഡിക്കൽ കോളജിലെ കൺട്രോൾറൂം സന്ദർശിച്ച് അഡീഷ്ണൽ ഡയറക്ടർ, ജില്ലാ മെഡിക്കൽ ഓഫീസർ എന്നിവരുമായി ചർച്ച നടത്തി. തച്ചനാട്ടുകര പഞ്ചായത്തിലെ 7, 8, 9, 11 വാർഡുകൾ, കഴിമ്പുഴ പഞ്ചായത്തിലെ 17, 18 വാർഡുകൾ കണ്ടെയ്ൻമെന്‍റ് സോണുകളായതിനാൽ പൊതുജനങ്ങളുടെ അനാവശ്യയാത്രകൾക്കു നിയന്ത്രണം ഏർപ്പെടുത്തിയിട്ടുണ്ട്. പൊതുജനങ്ങളിൽനിന്നും വവ്വാലുകളെ ഭയപ്പെടുത്തി ഓടിക്കുവാൻ ശ്രമിക്കുകയോ പ്രകോപനപരമായ പെരുമാറ്റമോ ഉണ്ടാകരുത്. ഇതു വവ്വാലുകളിൽ സമ്മർദങ്ങൾ ഉണ്ടാകുകയും അവയുടെ സ്രവ വിസർജ്യങ്ങൾ വർധിക്കുകയും അതിലൂടെ കൂടുതൽ വൈറസുകളെ പുറംതള്ളുന്നതിനു കാരണമാകുകയും രോഗവ്യാപനത്തിന് ഇടയാക്കുകയും ചെയ്യുമെന്നു ജില്ലാ കളക്ടർ അറിയിച്ചു.

പൊതുപണിമുടക്ക് പൂർണം

പാലക്കാട്: കേന്ദ്ര സർക്കാരിന്‍റെ തൊഴിലാളി വിരുദ്ധനയങ്ങൾക്കെതിരെ വിവിധ തൊഴിലാളി യൂണിയനുകൾ സംയുക്തമായി നടത്തിയ ദേശീയപണിമുടക്ക് ജില്ലയിൽ പൂർണം. സർവമേഖലകളും നിശ്ചലമായി. പണിമുടക്ക് ഓട്ടോ-ടാക്‌സി ജീവനക്കാരെയും വ്യാപാരികളെയും ചെറുകിട കച്ചവടക്കാരെയും ബാധിച്ചു. ഗ്രാമ- നഗര വ്യത്യാസമില്ലാതെ കടകമ്പോളങ്ങൾ അടച്ചിട്ട് വ്യാപാരികളും ദേശീയപണിമുടക്കുമായി സഹകരിച്ചു. പെട്രോൾ പമ്പുകളും അടഞ്ഞുകിടന്നു. നഗരത്തിൽ ചുരുക്കം ചില ബേക്കറികളും ലോട്ടറിക്കടകളും മാത്രമാണ് തുറന്നുപ്രവർത്തിച്ചത്. ആശുപത്രിക്കേസുകൾക്കും കല്യാണം, മരണം തുടങ്ങിയ ആവശ്യങ്ങൾക്കായി ചില സ്വകാര്യ വാഹനങ്ങളും ഇരുചക്രവാഹനങ്ങളും മാത്രമാണ് നിരത്തിലിറങ്ങിയത്. കെഎസ്ആർടിസി സർവീസ് നടത്തിയില്ല. പണിമുടക്കിൽ ഭൂരിഭാഗം സർക്കാർ ജീവനക്കാരും പങ്കാളിയായതോടെ സർക്കാർ ഓഫീസുകളും അടഞ്ഞുകിടന്നു. ജില്ലയിൽ സിവിൽ സ്റ്റേഷനിൽ ഉൾപ്പെടെ ആകെ 10 ശതമാനം ഹാജരാണ് രേഖപ്പെടുത്തിയത്. സ്‌കൂളുകളും കോളജുകളിലും വിരലിൽ എണ്ണാവുന്നയാളുകളാണ് ഹാജരായത്. വിവിധ ട്രേഡ് യൂണിയനുകളുടെ നേതൃത്വത്തിൽ നഗരത്തിൽ പലയിടങ്ങളിലായി സമരാനുകൂലികൾ പ്രകടനം നടത്തി. കഞ്ചിക്കോട് വ്യവസായമേഖലയെയും പണിമുടക്ക് നിശ്ചലമാക്കി. കിൻഫ്ര പാർക്കിൽ ജോലിക്കെത്തിയ ചിലരെ സമരാനുകൂലികൾ തിരിച്ചയച്ചു. തൊഴിലാളി സംഘടനാ നേതാക്കളും ഭാരവാഹികളുമാണ് ജോലിക്കെത്തിയവരെ പണിമുടക്കിന്‍റെ പേരുപറഞ്ഞ് തിരിച്ചയച്ചത്. കെഎസ്ആർടിസി പാലക്കാട് ഡിപ്പോയ്ക്ക് മുന്നിൽ സമരക്കാർ ഒരു ബസ് തടഞ്ഞു. പണിമുടക്കിനെ തുടർന്ന് അനിഷ്ട സംഭവങ്ങളൊന്നും റിപ്പോർട്ട് ചെയ്യപ്പെട്ടിട്ടില്ല.

വിദ്യാർഥികൾക്കു തൊഴിൽ ഉറപ്പാക്കി ഐഐടി പാലക്കാടിന്‍റെ "ഉയരെ'

പാലക്കാട്: ഐഐടി പാലക്കാട് ടെക്നോളജി ഐഹബ് ഫൗണ്ടേഷൻ കേന്ദ്ര ശാസ്ത്ര സാങ്കേതിക വകുപ്പിലെ എൻഎം-ഐസിപിഎസിന്‍റെ സാമ്പത്തിക സഹായത്തോടെ നടപ്പാക്കിയ 'ഉയരെ' യുവ നൈപുണ്യ വികസന പരിപാടി സമാപിച്ചു. പരിശീലന പരിപാടിയിൽ പങ്കെടുത്ത മുഴുവൻ വിദ്യാർഥികൾക്കും പ്ലേസ്മെന്‍റിലൂടെ തൊഴിലും ഉറപ്പാക്കി. പട്ടികവർഗവിഭാഗം വിദ്യാർഥികളുടെ സാങ്കേതിക കണ്ടുപിടിത്തങ്ങളിലും സംരംഭകത്വത്തിലുമുള്ള കഴിവുകൾ ശാക്തീകരിക്കാൻ ലക്ഷ്യമിട്ടുള്ള ആറുമാസ പരിശീലന പരിപാടിയിൽ 15 വിദ്യാർഥികളാണ് ഭാഗമായത്. സമാപനപരിപാടിയിൽ ജില്ലാ കളക്ടർ ജി. പ്രിയങ്ക മുഖ്യാതിഥിയായി. കേവലം നൈപുണ്യ പരിശീലനം നൽകുന്നതിനപ്പുറം വിദ്യാർഥികൾക്ക് തൊഴിൽസാധ്യതകൂടി ഉറപ്പാക്കുന്നത് ഉയരെ പരിപാടിയെ വേറിട്ട് നിർത്തുന്നതായും രാജ്യത്തിന് തന്നെ മാതൃകയാണെന്നും പട്ടികവർഗ വികസനത്തിന്‍റെ ഭാഗമായി ഇത്തരം പരിപാടികൾ തുടർന്നും സംഘടിപ്പിക്കണമെന്നും ജില്ലാ കളക്ടർ പറഞ്ഞു. വിദ്യാർഥികൾ അഞ്ച് സംഘങ്ങളായി തയാറാക്കിയ വിവിധ പ്രോജക്ടുകളുടെ പ്രദർശനവും നടന്നു. പരിശീലനം പൂർത്തിയാക്കിയ വിദ്യാർഥികൾക്ക് സർട്ടിഫിക്കറ്റും ജോബ് ഓഫർ ലെറ്ററും കൈമാറി. ഐഐടി ഡയറക്ടർ പ്രഫ. എ. ശേഷാദ്രി ശേഖർ, ഐഐടി രജിസ്ട്രാർ ബി.വി. രമേഷ്, ഐപിടിഐഎഫ് സിഒഒ സായിശ്യാം നാരായണൻ, ഐപിടിഐഎഫ് പ്രോജക്ട് ഡയറക്ടറും അസിസ്റ്റന്‍റ് പ്രഫസറുമായ ഡോ. വിജയ് മുരളീധരൻ, ഐപിടിഐഎഫ് എച്ച്ആർ മാനേജർ ഡോ.ആർ. രാജേശ്വരി എന്നിവർ‍ പ്രസംഗിച്ചു.

നെന്മാറ- ഒലിപ്പാറ റോഡിൽ വാഴനട്ടു പ്രതിഷേധം

നെന്മാറ: യൂത്ത് കോൺഗ്രസ്‌ അയിലൂർ മണ്ഡലം കമ്മിറ്റിയുടെ നേതൃത്വത്തിൽ നെന്മാറ- ഒലിപ്പാറ റോഡിന്‍റെ ശോച്യാവസ്ഥക്കെതിരേ ഒലിപ്പാറയിൽ വാഴനട്ടു പ്രതിഷേധിച്ചു. ഡിസിസി ജനറൽ സെക്രട്ടറി അഡ്വ.സി.സി. സുനിൽ ഉദ്ഘാടനം ചെയ്തു. യൂത്ത് കോൺഗ്രസ്‌ അയിലൂർ മണ്ഡലം പ്രസിഡന്‍റ് എസ്. സഞ്ജു അധ്യക്ഷത വഹിച്ചു. ബ്ലോക്ക്‌ പ്രസിഡന്‍റ് വിനോദ് ചക്രായി, യൂത്ത് കോൺഗ്രസ്‌ ബ്ലോക്ക്‌ സെക്രട്ടറി ജയേഷ്, യൂത്ത് കോൺഗ്രസ്‌ മണ്ഡലം സെക്രട്ടറി മണികണ്ഠൻ, ഡിസിസി മെംബർ കെ. ഐ. അബ്ബാസ്, ഒലിപ്പാറ വാർഡ് മെംബർ മുഹമ്മദ്‌ കുട്ടി, ഗോപി മാസ്റ്റർ, ശരത് ബാലൻ എന്നിവർ നേതൃത്വം നൽകി.

വണ്ടാഴിയിൽ സ്കൂൾപരിസരം വൃത്തിയാക്കി പൂന്തോട്ടമൊരുക്കി യുവാക്കൾ

വടക്കഞ്ചേരി: വണ്ടാഴി ന്യു ചലഞ്ചേഴ്സ് സ്പോർട്സ് ക്ലബിന്‍റെ നേതൃത്വത്തിൽ സ്കൂൾപരിസരം വൃത്തിയാക്കി പൂന്തോട്ടമൊരുക്കി. മാലിന്യക്കൂമ്പാരങ്ങളും പൊന്തക്കാടുമായി കിടന്നിരുന്ന പ്രദേശമാണ് ചെറുപ്പക്കാർ സംഘടിച്ച് വൃത്തിയാക്കി മനോഹരമാക്കിയത്. ഇവിടെ രണ്ട് വേയ്സ്റ്റ്ബിന്നുകളും സ്ഥാപിച്ചിട്ടുണ്ട്. പൂന്തോട്ട സംരക്ഷണത്തിനും മാലിന്യം നിക്ഷേപിക്കുന്നവർക്ക് ഉപദേശംനൽകി കൃത്യത്തിൽനിന്നും അവരെ പിന്തിരിപ്പിക്കാനും സമീപത്തെ യുവാക്കളെ ചുമതലപ്പെടുത്തിയിട്ടുണ്ട്. മദ്യപ സംഘങ്ങൾ മദ്യക്കുപ്പികൾ വലിച്ചെറിയുന്നതും കവറുകളിലാക്കിയ മാലിന്യങ്ങൾ വലിച്ചെറിയുന്നതും ഇവിടെയായിരുന്നു. ഇതുമൂലം സ്കൂൾ കുട്ടികൾക്കുംമറ്റും വഴി ടക്കാൻപോലും കഴിയാത്ത വിധമായിരുന്നു പ്രദേശം. ശുചീകരണ പ്രവൃത്തികൾ നടത്തിയ യുവാക്കളെ നാട്ടുകാരും അഭിനന്ദിച്ചു.

പീപ്പിള്‍സ് സര്‍വീസ് സൊസൈറ്റിയുടെ തയ്യല്‍ തൊഴില്‍പരിശീലനം തുടങ്ങി

മണ്ണാര്‍ക്കാട്: പീപ്പിള്‍സ് സര്‍വീസ് സൊസൈറ്റിയുടെ നേതൃത്വത്തില്‍ നടത്തുന്ന മൂന്നുമാസം നീണ്ടുനില്‍ക്കുന്ന തയ്യല്‍ തൊഴില്‍പരിശീലനം മണ്ണാര്‍ക്കാട് ഹോളി സ്പരിരിറ്റ് ഫൊറോന പള്ളിയില്‍ ആരംഭിച്ചു. പിഎസ്എസ്പി എക്‌സിക്യൂട്ടീവ് സെക്രട്ടറി ഫാ. സീജോ കരിക്കാട്ടില്‍ അധ്യക്ഷത വഹിച്ച ചടങ്ങില്‍ മണ്ണാര്‍ക്കാട് ഹോളി സ്പിരിറ്റ് ഫോറോന പള്ളി അസിസ്റ്റന്‍റ് വികാരി ഫാ. അരുണ്‍ ഉദ്ഘാടനം നിര്‍വഹിച്ചു. ജെന്‍ഡര്‍ ഡിപ്പാര്‍ട്ട്‌മെന്‍റ് കോ-ഓര്‍ഡിനേറ്റര്‍ കെ.എൽ. അരുണ്‍ സ്വാഗതവും പഠിതാവായ ഹസ്‌നത്ത് നന്ദിയും അറിയിച്ചു. വല്‍സമ്മ പഠിതാക്കള്‍ക്കു ക്ലാസെടുത്തു. മുപ്പതോളം പഠിതാക്കള്‍ പങ്കെടുത്തു. സാമ്പത്തിക അച്ചടക്കം, മോട്ടിവേഷന്‍ ക്ലാസുകള്‍ ഉള്‍പ്പെടുത്തിയാണ് പരിശീലനം.

ചിറ്റൂർ താലൂക്കാശുപത്രി ഒപി പുതിയ ബ്ലോക്കിൽ പ്രവർത്തനം തുടങ്ങി

ചിറ്റൂർ: താലൂക്ക് ആശുപത്രിയിൽ ചികിത്സക്കെത്തുന്നവർക്ക് ആശ്വാസത്തിനു വകനൽകി ഒപി പുതിയ ബ്ലോക്കിലേക്കു പ്രവർത്തനംമാറ്റി ആശുപത്രി കെട്ടിട സമുച്ചയം ഉദ്ഘാടനം കഴിഞ്ഞിട്ടും ചികിത്സയും പരിശോധനകളും പഴയ കെട്ടിടത്തിൽ തുടരുന്നതിരെ ജനകീയ പ്രതിഷേധം ഉയർന്നിരുന്നു. ഇതിനിടെയാണ് പ്രാഥമിക നടപടി എന്ന നിലയിൽ ഒപിയും അനുബന്ധ ചികിത്സാ സൗകര്യങ്ങളും മാത്രം പുതിയ കെട്ടിടത്തിലേക്കു മാറ്റിയിരിക്കുന്നത് . അത്യാഹിത വിഭാഗം ഇപ്പോഴും പഴയ കെട്ടിട ത്തിലാണ് പ്രവർത്തനം. ഇതും പുതിയ ബ്ലോക്കിലേക്ക് മാറ്റാനുള്ള നടപടികളും പുരോഗമിച്ചുവരികയാണ്. പഴയ കെട്ടിടത്തിൽ സ്ഥാപിച്ച ചികിത്സ ഉപകരണങ്ങൾ പുതിയ ബ്ലോക്കിലേക്ക് കൊണ്ടു വരുന്ന ജോലികളും നടന്നു വരികയാണ്. രണ്ടു മാസത്തിനകം എല്ലാ സേവനങ്ങളും പുതിയ ബ്ലോക്കിലേക്കു മാറ്റാൻ കഴിയുമെന്നും അധികൃതർ പ്രതീക്ഷിക്കുന്നു.

പാലക്കാട് നഗരത്തിലെ ട്രാഫിക് തടസങ്ങൾ പരിഹരിക്കുന്നതിനു പ്രത്യേക യോഗം

പാലക്കാട്: ജില്ലാ റോഡ് സേഫ്റ്റി കൗൺസിലിന്‍റെ തീരുമാനപ്രകാരം ജില്ലാ പോലീസ് മേധാവി അജിത് കുമാറിന്‍റെ അധ്യക്ഷതയിൽ പാലക്കാട് നഗരത്തിലെ ട്രാഫിക് തടസങ്ങൾ പരിഹരിക്കുന്നതിനായി കഴിഞ്ഞ ദിവസം യോഗം ചേർന്നു. എസ്പി ഓഫീസിൽ ചേർന്ന യോഗത്തിൽ നഗരത്തിലെ വിവിധ ഇടങ്ങളിൽ പരിശോധന നടത്താൻ തീരുമാനിച്ചു. പരിശോധനയിൽ ശ്രദ്ധിക്കേണ്ട കാര്യങ്ങളെ കുറിച്ച് ആവശ്യമായ നിർദേശങ്ങളും നൽകി. തുടർന്ന് പാലക്കാട് ഐഐടി സിവിൽ എൻജിനീറിംഗ് അസോസിയേറ്റ് പ്രഫസർ ബി.കെ. ഭവത്തിന്‍റെ നേതൃത്വത്തിൽ വിവിധ വകുപ്പുകളുമായി ചേർന്ന് നഗരത്തിലെ വിവിധ സ്ഥലങ്ങളിൽ പരിശോധന നടത്തി. കെഎസ്ആർടിസി ജംഗ്ഷൻ, ഒലവക്കോട് ജംഗ്ഷൻ, കാവിൽപാട്, സുൽത്താൻപേട്ട് ജംഗ്ഷൻ, മുനിസിപ്പൽ ബസ്‌സ്റ്റാൻഡ്, കൽമണ്ഡപം കാലിക്കറ്റ് ബൈപ്പാസ് ജംഗ്ഷൻ തുടങ്ങിയ സ്ഥലങ്ങളിലായിരുന്നു പരിശോധന. സംഘത്തിൽ എഎസ്പി രാജേഷ് കുമാർ, സ്പെഷ്യൽ ബ്രാഞ്ച് ഡിവൈഎസ്പി വിജയകുമാർ, നോർത്ത് സിഐ വിപിൻ, ട്രാഫിക് എഎസ്ഐ ഹാരിസ്, ആർടിഒ സി.യു. മുജീബ്, മോട്ടോർ വെഹിക്കിൾസ് ഇൻസ്പെക്ടർ ഷിബു, അസിസ്റ്റന്‍റ് മോട്ടോർ വെഹിക്കിൾസ് ഇൻസ്പെക്ടർമാരായ പി.വി. സജീവ്, കവിതൻ, അനീഷ്, മുനിസിപ്പൽ എഎക്സ്ഇ സ്മിത, പിഡബ്ല്യുഡി എൻജിനീയർമാരായ സുനിൽ, ഗിരീഷ്, ബാബുരാജ് തുടങ്ങിയവർ പങ്കെടുത്തു. പാലക്കാട് ഐഐടിയിൽ നിന്നുള്ള വിശദമായ റിപ്പോര്‍ട്ട് ലഭിച്ചതിനുശേഷം തുടർ നടപടികൾക്കായി ജില്ലാ റോഡ് സേഫ്റ്റി കൗൺസിലിന്‍റെ പരിഗണനക്കു സമർപ്പിക്കുമെന്ന് ആർടിഒ സി.യു. മുജീബ് അറിയിച്ചു.

നിരോധിത പുകയില, പ്ലാസ്റ്റിക് ഉത്പന്നങ്ങളുടെ വില്പന: പരിശോധന ശക്തമാക്കി

പാലക്കാട്: നിരോധിത പുകയില ഉത്പന്നങ്ങളുടെയും ഒറ്റത്തവണ ഉപയോഗിക്കാവുന്ന പ്ലാസ്റ്റിക് ഉത്പന്നങ്ങളുടെയും അനധികൃത വില്പന തടയുന്നതിനായി അകത്തേത്തറ ഗ്രാമപഞ്ചായത്തിൽ പരിശോധനകൾ ശക്തമാക്കി. ഇതിന്‍റെ ഭാഗമായി ലൈസൻസില്ലാതെ പ്രവർത്തിച്ചുവന്ന ഒരു കട അടക്കാൻ നിർദ്ദേശം നൽകുകയും നിരോധിത ഉത്പന്നങ്ങൾ പിടിച്ചെടുക്കുകയും ചെയ്തു. കഴിഞ്ഞ ദിവസം പറളി എക്സൈസ് റേഞ്ച് ഇൻസ്പെക്ടറുടെ നേതൃത്വത്തിൽ ഹേമാംബിക നഗറിലെ കെ.എസ്. അബ്ബാസിന്‍റെ ഉടമസ്ഥതയിലുള്ള സ്ഥാപനത്തിൽ നടത്തിയ പരിശോധനയിലാണ് നിയമലംഘനങ്ങൾ കണ്ടെത്തിയത്. ഈ കടയ്ക്ക് ലൈസൻസുണ്ടായിരുന്നില്ല. പരിശോധനയിൽ 1.200 കിലോഗ്രാം നിരോധിത പുകയില ഉത്പന്നം പിടിച്ചെടുത്തു. കോട്പാ ആക്ട് 2003 പ്രകാരം കേസെടുത്തതിനെത്തുടർന്ന് എക്സൈസ് റേഞ്ച് ഇൻസ്പെക്ടറുടെ നിർദ്ദേശപ്രകാരം പഞ്ചായത്ത് അധികൃതർ കട പൂട്ടിക്കുകയായിരുന്നു. ഈ സ്ഥാപനത്തിൽ നിന്ന് മുമ്പും ഒറ്റത്തവണ ഉപയോഗിക്കാവുന്ന നിരോധിത പ്ലാസ്റ്റിക് ഉത്പന്നങ്ങൾ പിടികൂടി പിഴ ചുമത്തിയിരുന്നെങ്കിലും ഈ തുക ഇതുവരെ അടച്ചിട്ടില്ലെന്നു പഞ്ചായത്ത് സെക്രട്ടറി അറിയിച്ചു. നിരോധിത പുകയില ഉത്പന്നങ്ങളുടെയും ഒറ്റത്തവണ ഉപയോഗിക്കാവുന്ന പ്ലാസ്റ്റിക് ഉത്പന്നങ്ങളുടെയും വില്പന കർശനമായി തടയുന്നതിനുള്ള നടപടികൾ തുടരുമെന്നു പഞ്ചായത്ത് സെക്രട്ടറി വ്യക്തമാക്കി. പഞ്ചായത്ത് അസിസ്റ്റന്‍റ് സെക്രട്ടറി, ജൂണിയർ സൂപ്രണ്ട്, ജൂണിയർ ഹെൽത്ത് ഇൻസ്പെക്ടർ, പോലീസ് ഉദ്യോഗസ്ഥർ എന്നിവരുൾപ്പെട്ട സംഘമാണ് പരിശോധനകൾക്കു നേതൃത്വം നൽകിയത്.

പാലാട്ട് ബൈപാസ് റോഡിനു സ്ഥലമെടുക്കൽ പൂർത്തിയായി

ഒറ്റപ്പാലം: പാലാട്ട് ബൈപാസ് റോഡ് പദ്ധതി യാഥാർഥ്യത്തിലേക്ക്. പദ്ധതിക്കായി സ്ഥലം ഏറ്റെടുക്കൽ നടപടികൾ പൂർത്തിയായി. ഏറ്റെടുത്ത സ്ഥലത്തിന്‍റെ ഉടമസ്ഥാവകാശ രേഖകൾ ആർബിഡിസിക്ക് കൈമാറി. നിർദ്ദിഷ്ട ബൈപാസ് പ്രദേശത്തെ 222 പേരുടെ ഭൂമിയുടെ ഉടമസ്ഥാവകാശ രേഖകകളാണ് കൈമാറിയത്. ലാൻഡ് അക്വസിഷൻ തഹസിൽദാരും ആർബിഡിസിയിലെ ഉന്നത ഉദ്യോഗസ്ഥരും അന്തിമ സ്ഥലപരിശോധനയും പൂർത്തിയാക്കി. മൂന്നു ഘട്ടങ്ങളായിട്ടാണ് പ്രദേശവാസികളുടെ കൈവശ രേഖകൾ ആർബിഡിസിക്ക് കൈമാറിയത്. കോടതിയിൽ കേസിനു പോയവരുടെ ഉൾപ്പടെയുള്ള റവന്യൂ രേഖകളും കൈമാറിയതായി അധികൃതർ പറഞ്ഞു. പദ്ധതിയുടെ എസ്റ്റിമേറ്റ് നടപടികൾ ആരംഭിച്ചു കഴിഞ്ഞതായി അധികൃതർ വ്യക്തമാക്കി. എസ്റ്റിമേറ്റിന് കിഫ്ബിയുടെ അനുമതി ലദിക്കുന്നതോടെ ആർബിഡിസി ടെൻഡർ നടപടികളിലേക്ക് കടക്കും. കോടതിയിൽ വാദം കേൾക്കുന്ന പരാതികൾ നിലനിൽക്കുമ്പോഴും പദ്ധതി പ്രവർത്തനങ്ങളുമായി മുന്നോട്ടു പോകുന്നതിന് ജില്ലാ ഭരണകൂടത്തിനു തടസമില്ലെന്നാണ് സൂചന. ബൈപാസ് യാഥാർഥ്യമായാൽ ഒറ്റപ്പാലം നഗരത്തിൽ നിലനിൽക്കുന്ന രൂക്ഷമായ ഗതാഗതകുരുക്ക് പരിഹരിക്കപ്പെടുമെന്നാണു വിലയിരുത്തൽ. എന്നാൽ ദീർഘവീക്ഷണം ഇല്ലാത്ത പദ്ധതിയാണ് വിഭാവനം ചെയ്തിരിക്കുന്നതെന്ന വിമർശനവും മറുഭാഗത്ത് നിന്നുയരുന്നുണ്ട്. നഗരത്തിൽ തുടങ്ങി നഗരത്തിൽ തന്നെ അവസാനിക്കുന്ന ബൈപാസ് പദ്ധതികൊണ്ട് ഭാവിയിൽ ഒരു ഗുണവുമുണ്ടാകില്ലെന്നാണ് ഉയർന്നു വരുന്ന വിമർശനം. ഇതിനു പുറമേ ബൈപാസ് പദ്ധതി അവസാനിക്കുന്ന എൽഎസ്എൻ കോൺവന്‍റ് കവലയിൽ നാലും കൂടിയ റോഡാണുള്ളത്. സമീപത്തുള്ള എൻഎസ്എസ് ഹൈസ്കൂളും എൽഎസ്എൻ കോൺവന്‍റും ഓട്ടോറിക്ഷ സ്റ്റാൻഡും മറ്റു കച്ചവടസ്ഥാപനങ്ങളുടെ തിരക്കും ബൈപാസ് പദ്ധതിയെ കൂടുതൽ സങ്കീർണമാക്കുമെന്നാണ് വിമർശനം. ഇതുകൂടാതെ ഈ ഭാഗത്ത് തിരക്ക് വർധിക്കാനുള്ള സാധ്യതയും ചൂണ്ടിക്കാണിക്കപ്പെടുന്നു.

മംഗലംഡാം ടൗൺ മുപ്പത്തിയഞ്ചിൽ റോഡ് റീടാറിംഗ് നടത്തും

മംഗലംഡാം: വഴിനടക്കാനാകാത്ത വിധം തകർന്നു കിടക്കുന്ന മംഗലംഡാം ടൗണിലെ 35 എന്ന പ്രദേശത്തെ റോഡ് റീടാറിംഗ് നടത്തും. ഇതിന്‍റെ ഭാഗമായി റോഡളന്ന് പ്രാരംഭ പ്രവൃത്തികൾക്കു തുടക്കമായി. മഴക്കാലത്തുതന്നെ റോഡ് ബലപ്പെടുത്തുന്ന പണികൾ നടക്കും. മംഗലംഡാം ഉദ്യാനത്തിലേക്കുള്ള പ്രവേശകവാടത്തിനോടു ചേർന്നുള്ള ഇടുങ്ങിയ വഴിയിലൂടെ തുടങ്ങുന്നതാണ് 35 ലേക്കുള്ള റോഡ്. എഴുപതോളം വീടുകളുണ്ട് ഈ പ്രദേശത്ത്. ഇറിഗേഷൻ വകുപ്പിനു കീഴിലുള്ളതാണ് ഈ റോഡ്. വർഷങ്ങൾക്കുമുമ്പ് ഇതു ടാർ റോഡായിരുന്നു. എന്നാൽ ഇപ്പോൾ ടാറിംഗിന്‍റെ ശേഷിപ്പുകൾ മാത്രമേ റോഡിൽ പലയിടത്തുമുള്ളു. മംഗലംഡാം കമ്മീഷൻ ചെയ്തത് മുതൽ 70 വർഷത്തോളമായി പ്രദേശത്തേക്കുള്ള വഴിയും ഇതാണ്. സിസ്റ്റേഴ്സിന്‍റെ കോൺവന്‍റ് ഉൾപ്പെടെ തിങ്ങിനിറഞ്ഞ് വീടുകളുണ്ട് 35 പ്രദേശത്ത്. വീടുകൾക്കു മുന്നിലുള്ള ഇറിഗേഷൻ ഭൂപ്രദേശങ്ങൾ പൊന്തക്കാടായി കിടക്കുന്നതിനാൽ പ്രദേശം മുഴുവൻ പന്നിക്കൂട്ടങ്ങൾ കൈയടക്കിയ നിലയിലാണിപ്പോൾ. ആളുകൾ മാലിന്യം തള്ളുന്നതും പഴയകാലത്ത് പൂന്തോട്ടങ്ങൾ നിറഞ്ഞ സ്ഥലങ്ങളിലാണ്. അപകട ഭീഷണിയായി നിൽക്കുന്ന വഴിയിലെ വൻമരങ്ങൾ മുറിച്ചുമാറ്റി ഭീതിയില്ലാതെ നടന്നു പോകാൻ സൗകര്യമുണ്ടാക്കണമെന്നും 35 ലെ വീട്ടുകാർ ആവശ്യപ്പെട്ടു.

പുഴയിൽ വിദ്യാർഥിനി മുങ്ങിമരിച്ചു

കല്ലടിക്കോട്: പുഴയിൽ കുളിക്കാനിറങ്ങിയ വിദ്യാർഥിനി മുങ്ങിമരിച്ചു. കടമ്പഴിപ്പുറം അമൃതാലയം സന്തോഷ്‌കുമാറിന്‍റെ മകൾ ശിവാനി(14)യാണ് പുലപ്പാറ്റ ചീനിക്കടവ് പുഴയിൽ മുങ്ങിമരിച്ചത്. ശ്രീകണ്ഠേശ്വരം കടവിനുസമീപമാണ് കുട്ടി വെള്ളത്തിൽപ്പെട്ടത്. ഇന്നലെ വൈകുന്നേരം അഞ്ചോടെയാണ് ശിവാനിയും കുടുംബങ്ങളും കുളിക്കാനായി ഈ കടവിൽ എത്തിയത്. കുളിക്കുന്നതിനിടയിൽ ശിവാനിയെ കാണാതായതിനെതുടർന്ന് കൂടെയുള്ളവർ തെരച്ചിൽ നടത്തിയെങ്കിലും കണ്ടുകിട്ടിയില്ല. ഇവരുടെ കരച്ചിൽ കേട്ട് തൊട്ടടുത്തുണ്ടായിരുന്നവർ ഓടിയെത്തി കടവിനരികിലുള്ള കയത്തിൽനിന്നു കുട്ടിയെ പുറത്തെടുക്കുകയായിരുന്നു. ഉടൻതന്നെ ശ്രീകൃഷ്ണപുരം സ്വകാര്യആശുപത്രിയിലും തുടർന്നു വട്ടമ്പലം സ്വകാര്യ ആശുപത്രിയിലും പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. കടമ്പഴിപ്പുറം ഹൈസ്കൂളിൽ ഒൻപതാംക്ലാസ് വിദ്യാർഥിയാണ്. അമ്മ: സൗമ്യ, സഹോദരി: സ്വാസ്തിക.

പിതാവും മകനും തൂങ്ങിമരിച്ച സംഭവത്തിൽ ദുരൂഹതയില്ലെന്നു പോലീസ്

ഒറ്റപ്പാലം: വാണിയംകുളം മനിശീരിയിൽ പിതാവിനേയും മകനെയും തൂങ്ങിമരിച്ച നിലയിൽ കണ്ടെത്തിയ സംഭവത്തിൽ ദുരൂഹതയില്ലെന്നു പോലീസ്. അസ്വാഭാവികമരണത്തിനാണ് കേസെടുത്തിട്ടുള്ളത്. ജീവനൊടുക്കുന്നതിനു മകനെ അച്ഛൻ പ്രേരിപ്പിച്ചിരിക്കാമെന്നാണ് പോലീസ് പറയുന്നത്. മകൻ മരിച്ചത് ഉറപ്പാക്കിയശേഷം അച്ഛനും തൂങ്ങിമരിച്ചുവെന്നും മകന്‍റേതു കൊലപാതകമല്ലെന്നുമാണ് പോലീസിന്‍റെ വിലയിരുത്തൽ. മനിശീരി കണ്ണമ്മനിലയത്തിൽ കിരൺ (38), മകൻ കിഷൻ (ഒൻപത്) എന്നിവർ മരിച്ച സംഭവത്തിലാണ് ദുരൂഹതയില്ലെന്നു പോലീസ് പറയുന്നത്. ഇരുവരുടെയും പോസ്റ്റുമോർട്ടം തൃശൂർ മെഡിക്കൽ കോളജിലാണ് നടത്തിയത്. കഴിഞ്ഞ മേയ് 14ന് കിരണിന്‍റെ ഭാര്യ അഖീനയെ ഇതേ മുറിയിൽ തൂങ്ങിമരിച്ചനിലയിൽ കണ്ടിരുന്നു. ഇതിൽ മനംനൊന്താണ് കിരണും ജീവനൊടുക്കിയതെന്നും പോലീസ് വിലയിരുത്തുന്നു. ഭാര്യയുടെ മരണത്തിനുശേഷം ഗൾഫിലേക്കുപോയ കിരൺ ഒരുമാസത്തിനുള്ളിൽ തിരിച്ചുവരികയായിരുന്നു. വെള്ളിയാഴ്ച വൈകുന്നേരം അഞ്ചുമണിയോടെയാണ് വീടിലെ മുകൾനിലയിൽ മരിച്ചനിലയിൽ ബന്ധുക്കൾ കണ്ടത്. വീട് പൂട്ടിപ്പോയ കിരണിന്‍റെ സ്കൂട്ടർ റോഡിൽ കണ്ട് വീട് പരിശോധിക്കുകയായിരുന്നു. അപ്പോഴാണ് ഇരുവരെയും തൂങ്ങിമരിച്ച നിലയിൽ കണ്ടെത്തിയത്.

സ്വകാര്യബസ് പണിമുടക്ക്: യാത്രികർ വലഞ്ഞു

പാലക്കാട്: സ്വകാര്യബസ് പണിമുടക്ക് വലച്ചത് ആയിരക്കണക്കിനു യാത്രികരെ. ഈ മാസം 22 മുതൽ ആരംഭിക്കുന്ന അനിശ്ചിതകാല പണിമുടക്കിന്‍റെ മുന്നോടിയായിട്ടാണ് ഇന്നലെ സ്വകാര്യബസുകൾ സൂചനാപണിമുടക്ക് നടത്തിയത്. പാലക്കാട്- തൃശൂർ, പാലക്കാട്- ചെർപ്പുളശ്ശേരി, പാലക്കാട്- ഒറ്റപ്പാലം റൂട്ടുകളിൽ കെഎസ്ആർടിസി സർവീസ് നടത്തി. നിലവിൽ ജില്ലയുടെ വിവിധ ഭാഗങ്ങളിലേക്ക് കെഎസ്ആർടിസിയുടെ 89 പതിവ് സർവീസുകൾക്കു പുറമെ 11 അധിക സർവീസുകളും ഒരുക്കിയിരുന്നു. കൂടുതൽ ബസുകൾ സർവീസ് നടത്തുന്ന കോയമ്പത്തൂർ- തൃശൂർ, കോഴിക്കോട് റൂട്ടുകളിൽ യാത്രക്കാരെ സാരമായി ബാധിച്ചില്ലെങ്കിലും മറ്റുറൂട്ടുകളിൽ യാത്രക്കാർക്കു ദുരിതമേറെയായിരുന്നു. പാലക്കാട് നിന്നും മലമ്പുഴ, റെയിൽവേകോളനി, കോട്ടായി, തോലന്നൂർ, തച്ചങ്കാട്, കൊടുമ്പ്, പെരിങ്ങോട്ടുകുറിശ്ശി, തലപ്പൊറ്റ, വലിയകാട് എന്നിവിടങ്ങളിലേക്കുള്ള യാത്രക്കാർക്കും ലക്ഷ്യസ്ഥാനത്തെത്താൻ പാടുപെട്ടു. സ്വകാര്യ ബസുകൾ ഇല്ലാത്തതിനാൽ പലരും ഓട്ടോറിക്ഷകളിൽ അമിതചാർജ് നൽകിയാണ് ലക്ഷ്യസ്ഥാനത്തെത്തിയത്. സ്വകാര്യ ബസുകൾ പണിമുടക്കിയത് മലയോര ഗ്രാമീണ മേഖലകളെയും സാരമായി ബാധിച്ചു. സ്വകാര്യ ബസുകൾ ഇല്ലാത്തതിനാൽ പ്രധാന ബസ് സ്റ്റാൻഡുകളിലെ വ്യാപാരത്തെയും ബാധിച്ചത് വ്യാപാരികളെയും പ്രതിസന്ധിയിലാക്കി. സ്കൂളുകളും സർക്കാർ സ്ഥാപനങ്ങളുമെല്ലാം പ്രവർത്തിദിനമായതിനാൽ സ്വകാര്യ ബസുകൾ ഇല്ലാത്തതിനാൽ പലർക്കും ഓഫീസുകളിലും സ്കൂളുകളിലുമെത്താൻ ബുദ്ധിമുട്ടേണ്ടിവന്നു.

പോത്തുണ്ടി ഡാമിൽ ജലനിരപ്പുയർന്നു

നെന്മാറ: അന്പത്തിയഞ്ചടി സംഭരണശേഷിയുള്ള പോത്തുണ്ടി ഡാമിൽ നിലവിൽ 46.48 അടിയായി വെള്ളം ഉയർന്നു. ഇതോടെ പുഴയിലേക്കുള്ള സ്പിൽ ഷട്ടറിനുമുകളിൽ അഞ്ചടിയോളം വെള്ളം ഉയർന്നു. കഴിഞ്ഞവർഷം ജൂലൈ ഒന്പതിനു 20.86 അടി വെള്ളമാണുണ്ടായിരുന്നത്. കഴിഞ്ഞ വർഷം സെപ്റ്റംബറിനുശേഷമാണ് അണക്കെട്ടിൽ വെള്ളം സംഭരണശേഷിയുടെ പരമാവധിയിൽ എത്തിയത്. മുൻവർഷത്തെ അപേക്ഷിച്ച് 26 അടി വെള്ളം ജൂലൈ മാസത്തിൽതന്നെ സംഭരിക്കാൻ കഴിഞ്ഞു. ചെറിയ ഡാമുകളെ റൂൾകർവ് നിബന്ധനകളിൽനിന്ന് ഒഴിവാക്കിയതിനെതുടർന്ന് പോത്തുണ്ടി ഡാമിൽ 50 അടിക്കുമുകളിൽ വെള്ളം എത്തിയാൽ മാത്രമേ നിയന്ത്രണവിധേയമായി പുഴയിലേക്ക് വെള്ളംതുറക്കുകയുള്ളൂ. മൂന്നുദിവസമായി മേഖലയിൽ മഴ കുറവായതിനെതുടർന്ന് നെല്ലിയാമ്പതി മലനിരകളിൽനിന്ന് ഡാമിലേക്കുള്ള നീരൊഴുക്കും കുറഞ്ഞിട്ടുണ്ട്. 50 അടിയിൽ വെള്ളം എത്തിയാൽ മാത്രമേ ഡാം തുറക്കുന്നതിനുഒന്നാം മുന്നറിയിപ്പ് നൽകുകയുള്ളൂ.

ഉൾക്കാടുകളിൽ അയ്യായിരം വിത്തുണ്ടകൾ നിക്ഷേപിക്കും

വടക്കഞ്ചേരി: വന്യമൃഗങ്ങൾക്കു വനത്തിൽതന്നെ ഭക്ഷണവും സംരക്ഷണവും ഉറപ്പാക്കുന്നതിന്‍റെ ഭാഗമായി കിഴക്കഞ്ചേരി പഞ്ചായത്തിന്‍റെ അതിർത്തിവരുന്ന പീച്ചി വന്യമൃഗ സംരക്ഷണ കേന്ദ്രത്തിൽ അയ്യായിരം വിത്തുണ്ടകൾ നിക്ഷേപിക്കും. ഇതിന്‍റെ ഉദ്ഘാടനം നാളെ ഉച്ചയ്ക്കുശേഷം മൂന്നിന് പാലക്കുഴി റോഡിൽ പുല്ലംപരുതയിൽ കെ.ഡി. പ്രസേനൻ എംഎൽഎ നിർവഹിക്കും. മാവ്, പ്ലാവ്, ആഞ്ഞിലി, ഞാവൽ, കശുമാവ് തുടങ്ങിയവയുടെ വിത്തുകളാണ് മണ്ണിൽപൊതിഞ്ഞ് ചെറിയ ഉണ്ടകളാക്കി ഉൾവനത്തിലേക്കു വലിച്ചെറിയുക. പുതുമരങ്ങൾ വ്യാപകമാകുന്നതോടെ ആനകൾക്കൊപ്പം മറ്റു മൃഗങ്ങളും കാട്ടിൽനിന്നും നാട്ടിലിറങ്ങുന്ന സ്ഥിതിക്ക് കുറവുണ്ടാകുമെന്നാണു വിലയിരുത്തൽ. പഞ്ചായത്ത് മെംബർ പോപ്പി ജോണിന്‍റെ നേതൃത്വത്തിൽ വനംവകുപ്പിന്‍റെ കൂടി സഹകരണത്തോടെയാണ് ഈ ബൃഹദ് പദ്ധതി വിജയത്തിലെത്തിക്കുന്നതിനുള്ള ശ്രമങ്ങൾ നാട്ടിൽ നടക്കുന്നത്. വചനഗിരി സെന്‍റ് ജോർജ് ഇടവകാംഗങ്ങളും മമ്പാട് സ്കൂളിലെ പ്രധാനാധ്യാപിക വി.കെ. ബിന്ദു ടീച്ചർ, കോ- ഓർഡിനേറ്റർ നീന ടീച്ചർ എന്നിവരുടെ മേൽനോട്ടത്തിൽ വിദ്യാർഥികളും കർഷകരും പാലക്കുഴിയിലെ പ്രതിഭാ വായനശാല അംഗങ്ങളുമെല്ലാം വിത്തുണ്ടകൾ തയാറാക്കുന്നതിന്‍റെ തിരക്കുകളിലാണിപ്പോൾ. ശേഖരിക്കാൻ കഴിയുന്നത്ര വൃക്ഷവിത്തുകൾ ശേഖരിച്ചാണ് നാടുമുഴുവൻ യത്നത്തിൽ പങ്കാളികളാകുന്നത്. കിഴക്കഞ്ചേരിയുടെ മലയോര മേഖലയിൽ വന്യമൃഗശല്യം രൂക്ഷമാണ്. ഇതുകണക്കിലെടുത്താണ് ഘട്ടംഘട്ടമായി കാട്ടിൽ വൃക്ഷങ്ങൾ നിറക്കുന്ന പദ്ധതികൾക്ക് തുടക്കം കുറിക്കുന്നത്. കാട്ടിൽ നിക്ഷേപിക്കുന്ന വിത്തുകൾ മുളച്ച് വളരുന്നതു ഇടക്കിടെ പരിശോധിച്ച് തുടർഘട്ടങ്ങളിൽ വിത്തുണ്ടകൾ നിക്ഷേപിക്കുന്നതിൽ വേണ്ടതായ മാറ്റങ്ങൾ വരുത്തുമെന്നു മെംബർ പോപ്പിജോൺ പറഞ്ഞു.

പുഴയിൽനിന്നും കാട്ടാനക്കുട്ടിയുടെ ജഡം പുറത്തെടുത്തു

കല്ലടിക്കോട്: പാലക്കയം തരിപ്പപതി മുണ്ടനാട് കരിമലപുഴയിൽ കല്ലുംചാട്ടം ഭാഗത്ത് കണ്ടെത്തിയ കാട്ടാനക്കുട്ടിയുടെ ജഡം പോസ്റ്റുമാർട്ടം നടത്തി സംസ്‌കരിച്ചു. ഒരുവയസിൽതാഴെ പ്രായമുള്ള പിടിയാനക്കുട്ടിയാണ്. ജഡത്തിനു നാലുദിവസത്തോളം പഴക്കമുണ്ട്. തിങ്കളാഴ്ച വൈകീട്ടാണ് ആനക്കുട്ടിയുടെ ജഡം വനം ഉദ്യോഗസ്ഥർ കണ്ടത്. ഡോ. ഡാനിയേൽ അബ്രഹാം, ഡോ. സുവർണ, ഡോ.കെ. അബ്ദുൾ റഷീദ്, ഡിഎഫ്ഒ സി. അബ്ദുൾ ലത്തീഫ്, ലിജോ പനങ്ങാടൻ, റേഞ്ച് ഓഫീസർ ഇ. ഇംറോസ് ഏലിയാസ്, നവാസ്, വാർഡ് അംഗം രാജി ജോണി എന്നിവരുടെ നേതൃത്വത്തിലാണ് നടപടികൾ പൂർത്തിയാക്കിയത്.

സർക്കാർ ആതുരാലയങ്ങൾ തകർച്ചയിൽ: രാഹുൽ മാങ്കൂട്ടത്തിൽ എംഎൽഎ

പാലക്കാട്: സംസ്ഥാനത്ത് പ്രാഥമിക കുടുംബാരോഗ്യകേന്ദ്രങ്ങൾ മുതൽ മെഡിക്കൽ കോളജുകൾ വരെ അത്യന്തം ദുരവസ്ഥയിലും തകർച്ചയിലുമാണെന്നും സാധാരണ ജനങ്ങളുടെ ആവശ്യങ്ങൾ കണ്ടറിഞ്ഞു പരിഹരിക്കാൻ തയ്യാറാകണമെന്നും രാഹുൽ മാങ്കൂട്ടത്തിൽ എംഎൽഎ. ആവശ്യത്തിനു കെട്ടിടങ്ങളില്ലാതെയും ഡോക്ടർമാരും ജീവനക്കാരുമില്ലാതെയും ജനങ്ങൾ വലയുമ്പോൾ സംസ്ഥാന ഭരണകൂടം ജനങ്ങളിലേക്കിറങ്ങണമെന്നും അദ്ദേഹം പറഞ്ഞു. പാലക്കാട്- മലമ്പുഴ നിയോജക മണ്ഡലം കോൺഗ്രസ് കമ്മിറ്റികൾ സംയുക്തമായി പാലക്കാട് ജില്ലാ ആശുപത്രിക്കു മുൻപിൽ നടത്തിയ ധർണ ഉദ്ഘാടനം ചെയ്യുകയായിരുന്നു എംഎൽഎ. ആരോഗ്യ മേഖലയിലെ സംസ്ഥാന സർക്കാർ അവഗണനയ്ക്കെതിരെ കെപിസിസിയുടെ ആഹ്വാന പ്രകാരം സംസ്ഥാന വ്യാപകമായി നടത്തുന്ന ധർണയുടെ ഭാഗമായാണ് സമരം സംഘടിപ്പിച്ചത്. പാലക്കാട് ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് അധ്യക്ഷത വഹിച്ചു. യോഗത്തിൽ കെപിസിസി, ജില്ലാ, ബ്ലോക്ക് കോൺഗ്രസ് ഭാരവാഹികൾ പങ്കെടുത്തു.

ഏറോബിക് കമ്പോസ്റ്റ് യൂണിറ്റുകളെല്ലാം ഉപയോഗശൂന്യം; ലക്ഷങ്ങളുടെ നഷ്ടം

ഒറ്റപ്പാലം: ലക്ഷങ്ങൾ പൊടിച്ച് ഒറ്റപ്പാലം നഗരസഭ നിർമിച്ച ഏറോബിക് കമ്പോസ്റ്റ് യൂണിറ്റുകളെല്ലാം ഉപയോഗശൂന്യം. ഈസ്റ്റ് ഒറ്റപ്പാലം നഗരസഭാ മാർക്കറ്റ് ഷോപ്പിംഗ് കോംപ്ലക്‌സിനു സമീപത്തും കയറംപാറയിലുമടക്കമുള്ള ഏറോബിക് കമ്പോസ്റ്റ് യൂണിറ്റുകളാണ് ഉപയോഗമില്ലാതായി മാറിയത്. പനമണ്ണയിൽ നഗരസഭയുടെ ഖരമാലിന്യ സംസ്കരണ പ്ലാന്‍റിൽ ഓർഗാനിക് വേസ്റ്റ് കൺവെർട്ടർ വന്നതോടെയാണ് യൂണിറ്റിന്‍റെ ആവശ്യമില്ലാതായത്. ദിവസവും എട്ടുമണിക്കൂറിൽ രണ്ടുടൺ മാലിന്യം സംസ്കരിക്കുന്നതിനുള്ള സൗകര്യമാണ് കൺവെർട്ടറിനുള്ളത്. പട്ടണം കേന്ദ്രീകരിച്ച് വ്യാപാര സ്ഥാപനങ്ങൾ, ഹോട്ടലുകൾ, ഫ്ലാറ്റുകൾ തുടങ്ങിയ സ്ഥലങ്ങളിൽ നിന്നാണ് ആദ്യഘട്ടത്തിൽ മാലിന്യം ശേഖരിച്ച് വളമാക്കി മാറ്റുന്നത്. ഇതിനുവേണ്ടി വാഹന സൗകര്യവും ഏർപ്പെടുത്തിയിട്ടുണ്ട്. രണ്ട് മാലിന്യ ബിന്നുകളുള്ള കമ്പോസ്റ്റ് യൂണിറ്റ് നേരത്തെ കുറച്ചുകാലം പ്രവർത്തിച്ചിരുന്നെങ്കിലും പിന്നീട് നിർത്തി. ഇപ്പോൾ വർഷങ്ങളായി വെറുതെ കിടക്കുകയാണ്. ഇതോടെ മൂന്നാമത്തെ യൂണിറ്റാണ് ഉപയോഗശൂന്യമാകുന്നത്. നഗരസഭാ ബസ് സ്റ്റാൻഡിനു പുറകിലുണ്ടായിരുന്ന കമ്പോസ്റ്റ് യൂണിറ്റ് മലിനജല ശുദ്ധീകരണശാല സ്ഥാപിക്കുന്നതിന്‍റെ ഭാഗമായി പൊളിച്ചുനീക്കിയിരുന്നു. കയറംപാറയിൽ റോഡരികിൽ സ്ഥാപിച്ചിരുന്ന യൂണിറ്റ് അടുത്തിടെ പ്ലാസ്റ്റിക് മാലിന്യം ശേഖരിക്കുന്നതിനുള്ള കേന്ദ്രമാക്കി മാറ്റുകയും ചെയ്തു. ബസ് സ്റ്റാൻഡിനു പുറകിൽ നാല് ബിന്നുകളുള്ള യൂണിറ്റ് ആറുലക്ഷംരൂപ ചെലവിലായിരുന്നു 2019 ൽ നിർമിച്ചത്. എട്ടുലക്ഷം രൂപ ചെലവഴിച്ചാണ് നഗരസഭയിലെ ഏറ്റവും വലിയ യൂണിറ്റ് കയറാംപാറയിൽ പാതയരികിൽ നിർമിച്ചത്. ഈസ്റ്റ് ഒറ്റപ്പാലത്തെ രണ്ടു ബിന്നുകളുള്ള യൂണിറ്റ് നാല് ലക്ഷം രൂപ ചെലവിലാണ് പൂർത്തിയാക്കിയിരുന്നത്. വ്യാപാരികൾക്ക് ജൈവമാലിന്യം സംസ്കരിക്കാനുള്ള സൗകര്യമൊരുക്കുന്നതിന്‍റെ ഭാഗമായാണ് യൂണിറ്റുകൾ നിർമിച്ചിരുന്നത്. എന്നാൽ ലക്ഷക്കണക്കിന് രൂപ ഉപയോഗശൂന്യമാക്കുകയാണ് പദ്ധതിയിലൂടെ നഗരസഭ ചെയ്തത്.

വിളയോടി നിലന്പതിപ്പാലത്തിൽ കിടക്കുന്ന മരത്തടി നീക്കണം

ചിറ്റൂർ: വിളയോടി നിലമ്പതിപ്പാലത്തിൽ മഴവെള്ളപ്പാച്ചിലിൽ ഒഴുകിയെത്തിയ മരത്തടി നീക്കം ചെയ്യണമെന്നതാണ് നാട്ടുകാരുടെ ആവശ്യം. പാലത്തിന്‍റെ ഇരുവശങ്ങളിലുമായി നിരവധി പേർ കുളിക്കാനെത്തുന്നുണ്ട്. പുഴയിൽ കൂടുതൽ ഒഴുക്കുണ്ടായൽ മരത്തടി സമീപത്തുള്ള മേൽപ്പാലം പില്ലറിലിടിച്ചാൽ കേടുപാടുകൾ ഉണ്ടാവാനും സാധ്യതയുണ്ട്. കിഴക്കൻ പ്രദേശങ്ങളിൽ ഇടക്കിടെ മഴ പെയ്യുന്നതിനാൽ നിലവിൽ നിലമ്പതി കവിഞ്ഞൊഴുകുകയാണ്. നിലമ്പതിക്ക് താഴെ നൂറുമീറ്റർ അകലെ തടയണയുമുണ്ട്. മരത്തടി ഈ സ്ഥലത്ത് എത്തിയാൽ പുറത്തെടുക്കുന്നത് ഏറെ ശ്രമകരമാവും. തടയണ ഭാഗത്ത് വാഹനസഞ്ചാര മാർഗമില്ലാത്തതിനാൽ കരയിലെത്തിക്കുന്നത് എളുപ്പമല്ല.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]