ADVERTISEMENT

ADVERTISEMENT

ജോഷ്വാ മാർ ഇഗ്നാത്തിയോസിന്‍റെ പ്രവർത്തനങ്ങൾ മാതൃകാപരം: വി.എം. സുധീരൻ

മാവേലിക്കര: സമൂഹനന്മയ്ക്കുവേണ്ടിയുള്ള ജോഷ്വാ മാർ ഇഗ്നാത്തിയോസിന്‍റെ പ്രവർത്തനങ്ങൾ മാതൃകാപരമാണെന്ന് വി.എം. സുധീരൻ പറഞ്ഞു. ഡോ. ജോഷ്വ മാർ ഇഗ്നാത്തിയോസിനു സ്നേഹാദരം സമർപ്പണ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
എം.എസ്. അരുൺകുമാർ എംഎൽഎ അധ്യക്ഷനായി.

കൊടിക്കുന്നിൽ സുരേഷ് എംപി പൗരാവലിയുടെ ഉപഹാര സമർപ്പണം നടത്തി. കെ. ജയകുമാർ സദ്‌കീർത്തിപത്രം സമർപ്പണം നടത്തി. ഡോ. ജോഷ്വ മാർ ഇഗ്നാത്തിയോസ് മറുപടി പ്രസംഗം നടത്തി. പുനലൂർ സോമരാജൻ, സ്വാമിഗീതാനന്ദൻ, നഗരസഭ അധ്യക്ഷൻ നൈനാൻ സി. കുറ്റിശേരി, ചുനക്കര ജനാർദനൻ നായർ, ഇമാം അബ്ദുൽ സത്താർ അൽഖാസിമി, സ്വാഗതസംഘം ചെയർമാൻ മുരളീധരൻ തഴക്കര, ജനറൽ കൺവീനർ സുരേഷ് കുമാർ കുറത്തികാട്, നൗഷാദ് മാങ്കാംകുഴി, ഷെമീർ ബിസിസി തുടങ്ങിയവർ പ്രസംഗിച്ചു.

ADVERTISEMENT

ചുവട് ദ്രവിച്ച മരം ഭീഷണിയാകുന്നു

മാവേലിക്കര: കായംകുളം-തിരുവല്ല സംസ്ഥാന പാതയില്‍ തട്ടാരമ്പലം ജംഗ്ഷനു തെക്ക് ഭാഗത്തായി റോഡരികില്‍ ചുവട് ഭാഗം ദ്രവിച്ചു നില്‍ക്കുന്ന കൂറ്റൻ മരം ഭീഷണി ഉയര്‍ത്തുന്നു. പ്രദേശവാസികള്‍ മരത്തിന്‍റെ അവസ്ഥ അധികാരികളെ പലതവണ അറിയിച്ചിട്ടും യാതൊരു നടപടിയും സ്വീകരിച്ചിട്ടില്ല. വേരിനോട് ചേര്‍ന്ന ചുവട്ഭാഗം ദ്രവിച്ച് വലിയ പൊത്ത് പോലെ രൂപപ്പെട്ട നിലയിലാണ്. ഇടയ്ക്കിടെയുണ്ടാകുന്ന ശക്തമായ മഴയിലും കാറ്റിലും മരം നിലംപൊത്തുമോയെന്ന ഭയത്തിലാണ് നാട്ടുകാര്‍. മഴക്കാലം എത്തുന്നതോടെ ഭീതി ഇരട്ടിയാകും. മഴക്കാലത്തിനു മുന്‍പ് അധികൃതര്‍ മരം മുറിച്ചുമാറ്റി ജനങ്ങളുടെ സുരക്ഷ ഉറപ്പാക്കിയില്ലെങ്കില്‍ ശക്തമായ പ്രതിഷേധം ഉണ്ടാകുമെന്നും നാട്ടുകാര്‍ പറയുന്നു.

ഗ്രന്ഥശാലാ പ്രസ്ഥാനം ഉണർന്നു പ്രവർത്തിക്കണം: രമേശ്‌ ചെന്നിത്തല

ഹരിപ്പാട്: നന്മയുടെ പ്രതീകങ്ങളാകേണ്ട നമ്മുടെ യുവജന സമൂഹത്തെ നേരായ വഴിയിലൂടെ മുന്നോട്ട് സഞ്ചരിക്കാൻ വേണ്ട കരുത്തുനൽകുവാൻ കേരളത്തിലെ ഗ്രന്ഥശാലാ പ്രസ്ഥാനം പ്രതിജ്ഞാബദ്ധമാണെന്ന് രമേശ്‌ ചെന്നിത്തല എംഎൽഎ പറഞ്ഞു. കേരളത്തിൽ ആകമാനം ഇത്തരം പ്രവർത്തനങ്ങൾക്ക് നേതൃത്വം നൽകുന്ന ഒരാൾ എന്നനിലയിൽ തനിക്കു ബോധ്യമായ ഒരുകാര്യം ധാരാളം യുവാക്കൾ സഹകരിക്കാൻ തയാറാണെങ്കിലും ഇതിന്‍റെ നേതൃത്വം ഏറ്റെടുക്കുന്നവരുടെ നിലപാടുകൾ അവരെ പിന്നോട്ട് നയിക്കുന്നുവെന്നാണ്. അവിടെ ഗ്രന്ഥശാലാ പ്രസ്ഥാനം പോലെയുള്ള സുസമ്മത സംഘടനകൾ ഇതിന്‍റെ നേതൃത്വം ഏറ്റെടുത്താൽ നമുക്ക് വലിയ നേട്ടം കൈവരിക്കുവാൻ കഴിയുമെന്നും രമേശ്‌ ചെന്നിത്തല പറഞ്ഞു. ചിങ്ങോലി യുവജനസമാജം ഗ്രന്ഥശാല ബാലവേദിയുടെ നേതൃത്വത്തിലുള്ള കളിമുറ്റം അവധിക്കാല പഠനക്കളരി ഉദ്ഘാടന ചെയ്യുകയായിരുന്നു അദ്ദേഹം. ഗ്രന്ഥശാലാ പ്രസിഡന്‍റ് മുഞ്ഞിനാട്ട് രാമചന്ദ്രൻ അധ്യക്ഷനായി. ജില്ലാ പഞ്ചായത്തംഗം ജോൺ തോമസ്, ഗ്രന്ഥശാലാ സെക്രട്ടറി എം.എ. കലാം, പഞ്ചായത്ത്‌ വൈസ് പ്രസിഡന്‍റ് ജി. സജിനി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ അനീഷ്‌ എസ്. ചേപ്പാട്, കെ. ശ്രീകുമാർ, അഡ്വ.വി. ഷുക്കൂർ, അഡ്വ.ആർ. കിരൺകുമാർ, അരവിന്ദ് പെല്ലത്ത്‌, ടി. ചന്ദ്രൻ, എസ്. ആനന്ദവല്ലി, പി.കെ. പദ്മാകരൻ, എസ്. സോമൻപിള്ള എന്നിവർ പ്രസംഗിച്ചു.

ഗവർണർമാരെ അത്താഴവിരുന്നിനു ക്ഷണിച്ചത് സിപിഎം-ബിജെപി അന്തർധാര: അനൂപ് ജേക്കബ്

ആലപ്പുഴ: മലയാളികൾ അടക്കമുള്ള മൂന്നു ബിജെപി ഗവർണർമാരെ മുഖ്യമന്ത്രി പിണറായി വിജയൻ അത്താഴവിരുന്നിനു ക്ഷണിച്ചത് സിപിഎം-ബിജെപി അന്തർധാരയാണ് തുറന്നുകാട്ടുന്നതെന്ന് കേരള കോൺഗ്രസ്-ജേക്കബ് ലീഡർ അനൂപ് ജേക്കബ് എംഎൽ എ. മുഖ്യമന്ത്രിയുടെ മകൾ ഉൾപ്പെട്ട മാസപ്പടി കേസ് നിർണായക ഘട്ടത്തിലെത്തിനിൽക്കവേ ഗവർണർമാരെ ഡിന്നറിനു ക്ഷണിച്ച സംഭവം അരിയാഹാരം കഴിക്കുന്ന എല്ലാവർക്കും മനസിലാകുമെന്നും മുഖ്യമന്ത്രിക്കും മകൾക്കുമെതിരെയുള്ള വിവിധ കേസുകളുടെ ഒത്തുതീർപ്പിന്‍റെ ഭാഗമായിട്ടാണ് അത്താഴവിരുന്നിന്‍റെ ഉദേശ്യമെന്നും അദ്ദേഹം പറഞ്ഞു. കോട്ടയത്ത് നടക്കുന്ന സംസ്ഥാന സമ്മേളനത്തോടനുബന്ധിച്ചുള്ള പാർട്ടി ആലപ്പുഴ ജില്ലാ നേതൃയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പാർട്ടി ജില്ലാ പ്രസിഡന്‍റ് തങ്കച്ചൻ വാഴച്ചിറ അധ്യക്ഷത വഹിച്ചു. പാർട്ടി ചെയർമാൻ വാക്കനാട് രാധാകൃഷ്ണൻ മുഖ്യപ്രഭാഷണം നടത്തി. പാർട്ടി സംസ്ഥാന ഭാരവാഹികളായ ബാബു വലിയവീടൻ, കോശി തുണ്ടുപറമ്പിൽ, ഉന്നതാധികാരസമിതി അംഗങ്ങളായ തോമസ് ചുള്ളിക്കൻ, നൈനാൻ തോമസ്, ഷാജി വാണിയപ്പുരയ്ക്കൽ, ഷാജി സക്കറിയ, എം. മോഹനൻ നായർ, ജോൺ പാപ്പി, രാജൻ തെക്കേവിള, ഏബ്രഹാം കുഞ്ഞാപ്പച്ചൻ, ജോൺസൻ എണ്ണയ്ക്കാട്, ജില്ലാ ഭാരവാഹികളായ അനീഷ് ആറാട്ടുകുളം, സാബു വള്ളപ്പുരയ്ക്കൽ, കെ.എൻ. സാംസൺ, പി.ബി. സപ്രു, ബെന്നി വാത്യറ, പി.എസ്. ഗോപിനാഥപിള്ള എന്നിവർ പ്രസംഗിച്ചു. സംസ്ഥാന സമ്മേളനത്തിന് ആലപ്പുഴ ജില്ലയിൽനിന്നും മൂവായിരം പാർട്ടി പ്രവർത്തകർ പങ്കെടുക്കും.

എടത്വ പള്ളി തിരുനാള്‍: ഫോഗിംഗ് നടത്തി ആരോഗ്യവകുപ്പ്

എടത്വ: ആരോഗ്യവകുപ്പിന്‍റെ നേതൃത്വത്തില്‍ എടത്വ പള്ളി തിരുനാളിനോടനുബന്ധിച്ച് കൊതുക് നശീകരണത്തിനായി ഫോഗിംഗ് നടത്തി. പള്ളി പരിസരം, വ്യാപാര പന്തല്‍, സെന്‍റ് മേരീസ് ഗേള്‍സ് ഹൈസ്‌കൂള്‍, സെന്‍റ് അലോഷ്യസ് ഹൈസ്‌കൂള്‍, ജോര്‍ജിയാന്‍ സ്‌കൂള്‍, എടത്വ മാര്‍ക്കറ്റ് എന്നിവിടങ്ങളിലാണ് ഫോഗിംഗ് നടത്തിയത്. ഹെല്‍ത്ത് ഇന്‍സ്‌പെക്ട്ര്‍ റ്റി.വി. ദിലീപ്, കെ. മഞ്ജു, യു. രേവതി എന്നിവരുടെ മേല്‍നോട്ടത്തിലാണ് ശുചീകരണപ്രവര്‍ത്തം നടന്നത്. ജനറല്‍ കണ്‍വീനവര്‍ തോമസ് ജോര്‍ജ് ആലപ്പാട്ട് പറത്തറ, ആരോഗ്യ കണ്‍വീനര്‍ കെ.പി. കുഞ്ഞുമോന്‍, ദിലീപ്‌മോന്‍ വര്‍ഗീസ്, ജോബി കണ്ണംപള്ളി, ലിജി വര്‍ഗീസ് എന്നിവര്‍ നേതൃത്വം നല്‍കി. എടത്വ പള്ളിയിൽ ഇന്ന് എടത്വ സെന്‍റ് ജോര്‍ജ് ഫൊറോന പള്ളിയില്‍ രാവിലെ 4.30 ന് വിശുദ്ധ കുര്‍ബാന (തമിഴ്)-ഫാ. സൈമണ്‍, 5.45ന് സപ്ര, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ജോസഫ് കറുകയില്‍, 7.45ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -ഫാ. മാത്യു ചൂരവടി. 10ന് വിശുദ്ധ കുര്‍ബാന (തമിഴ് സീറോ മലബാര്‍)-ഫാ. ഡെന്‍സി മുണ്ടുനടയ്ക്കല്‍, വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -ഫാ. ഫ്രാന്‍സിസ് കരിവേലില്‍, ആറിന് വിശുദ്ധ കുര്‍ബാന (തമിഴ്) - ഫാ. ദുരൈസ്വാമി, ഏഴിന് മധ്യസ്ഥപ്രാര്‍ഥന (കുരിശടിയില്‍).

വ്യാജ ലൈസൻസുമായി ആസാം സ്വദേശി പിടിയിൽ

ചേർത്തല: മകന്‍റെ ലൈസൻസ് ഉപയോഗിച്ച് വ്യാജ ലൈസൻസ് നിർമിച്ച ആസാം സ്വദേശി പിടിയിലായി. കുത്തിയതോട് ഭാഗത്ത് വാഹന പരിശോധനയ്ക്കിടെ എയ്സ് വാഹന ഡ്രൈവറായ ആസാം റാവ്മാരി നഗൂൺ അഹിദുൾ ഇസ്ലാമി (50) നെയാണ് മോട്ടോർ വാഹന ഉദ്യോഗസ്ഥരുടെ നേതൃത്വത്തിൽ പിടികൂടിയത്. ചോദ്യം ചെയ്യുന്നതിനിടെയാണ് ലൈസൻസ് വ്യാജമായി ആസാമിൽ നിർമിച്ചതാണെന്ന് അഹിദുൾ ഇസ്ലാം സമ്മതിച്ചത്. മകന്‍റെ അസൽ ലൈസൻസിൽ ഫോട്ടോ, ഒപ്പ്, പേര്, ജനനത്തീയതി എന്നിവ തിരുത്തിയാണ് നിർമിച്ചത്. ആക്രി സാധനങ്ങൾ എടുത്ത് വിൽപ്പന നടത്തുന്ന ഇയാൾ വാടകയ്ക്ക് എടുത്ത ഓട്ടോയ്ക്ക് ഫിറ്റ്നസ് സർട്ടിഫിക്കറ്റ് ഇല്ലാത്തതിന് ആർസി ഓണർക്കെതിരേ നടപടിയെടുത്തതായും തുടർ അന്വഷണത്തിനായി കേസ് പോലീസിന് കൈമാറിയതായും മോട്ടോർ വെഹിക്കിൾ ഇൻസ്പെക്ടർ എ.ആർ. രാജേഷ് പറഞ്ഞു.

മോഷണക്കേസ് പ്രതികൾ പിടിയിൽ

തുറവൂർ: തിരുമലഭാഗം മഹാദേവക്ഷേത്രം കാണിക്കവഞ്ചി കുത്തിത്തുറന്ന് മോഷണം നടത്തിയ പ്രതികൾ പിടിയിൽ. പറയകാട് സ്വദേശി അനന്തു, പട്ടണക്കാട് സ്വദേശികളായ മുഹമ്മദ് ഫൈസൽ, തൻസീർ എന്നിവരാണ് കുത്തിയതോട് പോലീസിന്‍റെ പിടിയിലായത്. കഴിഞ്ഞദിവസം രാത്രിയിലാണ് മഹാദേവ ക്ഷേത്രത്തിലെ കാണിക്കവഞ്ചി കുത്തിത്തുറന്ന് മോഷണം നടത്തിയത്. പ്രതികളുമായി തെളിവെടുപ്പ് നടത്തി. കുത്തിയതോട് സിഐ അജയ് മോഹന്‍റെ നേതൃത്വത്തിൽ എസ്ഐ സാലി, എഎസ്ഐ സാജു ജോസഫ്, സിപിഒമാരായ കലേഷ്, മനു, അമൽ, രഞ്ജിത്ത് എന്നിവരടങ്ങുന്ന സംഘമാണ് പ്രതികളെ പിടികൂടിയത്.

വാഹനപരിശോധനയ്ക്കിടെ ആക്രമണം; മൂന്നുപേർ അറസ്റ്റിൽ

ഹരിപ്പാട്: വാഹന പരിശോധനയ് ക്കിടയിൽ എക്സൈസ് സംഘത്തിനുനേരേ ആക്രമണം. മൂന്നു ഉദ്യോഗസ്ഥർക്കു പരുക്ക്. കാർത്തികപ്പള്ളി എക്സൈസ് ഓഫീസിലെ സിഇഒമാരായ അഗസ്റ്റിൻ ജോസ്, ആർ. രഞ്ജിത്, ടി.എം. മഹേഷ് എന്നിവർക്കാണ് ആക്രമണത്തിൽ പരിക്കേറ്റത്. തുലാംപറമ്പ് വടക്ക് സ്വദേശികളായ പരുത്തിക്കാട്ടിൽ വീട്ടിൽ അൻഷാദ്, താമരേത്ത് പടീറ്റതിൽ ശ്യാം പ്രസാദ്, പരുത്തിക്കാട്ടിൽ വീട്ടിൽ ബാദുഷ എന്നിവരെയാണ് ഹരിപ്പാട് പോലീസ് അറസ്റ്റ് ചെയ്തത്. ഹരിപ്പാട് ആർ കെ ജംഗ്ഷനു സമീപം ഞായറാഴ്ച വൈകുന്നേരം ഏഴിനാണ് സംഭവം. എക്സൈസ് കമ്മീഷണറുടെ നിർദേശാനുസരണം ഓപ്പറേഷൻ ക്ലീൻ രണ്ടാം ഘട്ടത്തിന്‍റെ ഭാഗമായി സംശയാസ്പദമായ സാഹചര്യത്തിൽ കണ്ട കാറിൽ പരിശോധന നടത്തിയതിനെ ത്തുടർന്നാണ് ആക്രമണം ഉണ്ടായത്. എക്സൈസ് ജീവനക്കാർ അക്രമികളെ തടഞ്ഞുവച്ചശേഷം പോലീസിൽ വിവരമറിയിക്കുകയായിരുന്നു. തുടർന്ന് സംഭവസ്ഥലത്തെത്തിയ പോലീസ് ഉദ്യോഗസ്ഥരുടെ നേതൃത്വത്തിൽ അക്രമികളെ കസ്റ്റഡിയിലെടുത്തു. പ്രതികളെ കോടതിയിൽ ഹാജരാക്കി.

കണ്ണാടി സെന്‍റ് ജോസഫ്സ് പള്ളിയിൽ വിശുദ്ധ യൗസേപ്പിതാവിന്‍റെ തിരുനാൾ

കണ്ണാടി: സെന്‍റ് ജോസഫ്സ് പള്ളിയിൽ വിശുദ്ധ യൗസേപ്പിതാവിന്‍റെ തിരുനാൾ മേയ് ഒന്നു മുതൽ നാലുവരെ ആഘോഷിക്കും. ഒന്നിന് വൈകുന്നേരം നാലിന് വികാരി ഫാ. ആന്‍റണി തലച്ചെല്ലൂർ കൊടിയേറ്റ് കർമം നിർവഹിക്കും. തുടർന്ന് മധ്യസ്ഥപ്രാർഥന, വിശുദ്ധ കുർബാന, വചനസന്ദേശം-ഫാ. റ്റിബിൻ ഒറ്റാറയ്ക്കൽ. തുടർന്ന് ഇടവകദിന സമ്മേളനം, വാർഷികം, സ്നേഹവിരുന്ന്. രണ്ടിന് വൈകുന്നേരം അഞ്ചിന് മധ്യസ്ഥപ്രാർഥന, വിശുദ്ധ കുർബാന, വചനസന്ദേശം-ഫാ. ജോബിൻ ആനക്കല്ലുങ്കൽ, പ്രദക്ഷിണം-ഫാ. ജേക്കബ് കാട്ടടി. സെമിത്തേരി സന്ദർശനം, പൂർവസ്മൃതി വെഞ്ചരിപ്പ്. മൂന്നിന് വൈകുന്നേരം 5.30ന് മധ്യസ്ഥപ്രാർഥന, വിശുദ്ധ കുർബാന-ഫാ. മാത്യു തെക്കേടത്ത്, വചനസന്ദേശം-ഫാ. ജോസഫ് പള്ളിച്ചിറയിൽ. ഏഴിന് പ്രദക്ഷിണം-ബ്രദർ സെബാസ്റ്റ്യൻ മേനാച്ചേരി. തിരുനാൾ ദിനമായ നാലിന് രാവിലെ 9.45ന് സപ്ര, വിശുദ്ധ കുർബാന-ഫാ. സിനു വേളങ്ങാട്ടുശേരി, തിരുനാൾ സന്ദേശം-ഫാ. ജോൺ പ്ലാത്താനം. തുടർന്ന് പ്രദക്ഷിണം, കൊടിയിറക്ക്, ലേലം.

മോഷണം പോയ ബൈക്ക് കാവിനുള്ളിൽ ഉപേക്ഷിച്ച നിലയിൽ

ഹരിപ്പാട്: വീട്ടിൽനിന്നു മോഷണം പോയ ബൈക്ക് കാവിനുളളിൽ ഉപേക്ഷിച്ച നിലയിൽ. ചിങ്ങോലി സ്വദേശിയുടെ ബൈക്കാണ് മുതുകുളം കൊല്ലകൽ ക്ഷേത്രത്തിന് വടത്തുഭാഗത്തുള്ള കുടുംബക്കാവിൽനിന്ന് കിട്ടിയത്. പ്രായപൂർത്തിയാകാത്ത രണ്ടു പേരാണ് കടത്തിക്കൊണ്ടുപോയത്. തിങ്കളാഴ്ച രാവിലെ മൂന്നു യുവാക്കളെ കാവിനു സമീപം സംശയാസ്പദമായി പരിസരവാസികൾ കണ്ടു. ചോദിച്ചപ്പോൾ ബൈക്ക് എടുക്കാൻ വന്നതാണെന്ന മറുപടിയാണ് നൽകിയത്. ബൈക്കിന്‍റെ നമ്പർ പ്ലേറ്റ് എവിടെയെന്ന് തിരക്കിയപ്പോൾ വർക്ക് ഷോപ്പിൽനിന്ന് കൊണ്ടുവന്നതാണെന്ന് പറഞ്ഞു തട്ടിക്കയറി. തുടർന്ന്, പൊതുപ്രവർത്തകനായ കെ. ഹരികൃഷ്ണൻ എത്തിയതോടെ പന്തികേടു തോന്നിയ മോഷ്ടാക്കൾ അവിടെനിന്നു കടന്നു. പിന്നാലെ, കനകക്കുന്ന്, കരീലക്കുളങ്ങര പോലീസ് സ്ഥലത്തെത്തി പരിശോധന നടത്തി. ഇതിനിടെ, ബൈക്ക് മോഷണം പോയതു കാണിച്ച് ഉടമ കരീലക്കുളങ്ങര പോലീസിൽ പരാതി നൽകിയിരുന്നു. പിന്നീട്, നടത്തിയ അന്വേഷണത്തിൽ പ്രായപൂർത്തിയാകാത്ത രണ്ടു പേരാണ് കടത്തിക്കൊണ്ടു പോയതെന്ന് വ്യക്തമായി. പരാതി ഇല്ലാത്തതിനാൽ കേസെടുത്തില്ല.

തോട്ടപ്പള്ളി സ്പില്‍വേയുടെ ഷട്ടറുകള്‍ ദ്രവിച്ച നിലയില്‍

അമ്പലപ്പുഴ: അറ്റകുറ്റപ്പണികള്‍ കൃത്യസമയത്തു നടത്താത്തതിനെത്തുടര്‍ന്ന് തോട്ടപ്പള്ളി സ്പില്‍വേയുടെ ഷട്ടറുകള്‍ തുരുമ്പെടുത്ത നിലയില്‍. വെള്ളപ്പൊക്ക കാലത്ത് ഒഴുകിയെത്തുന്ന വെള്ളം കടലിലേക്ക് ഒഴുകിപ്പോകാന്‍ സഹായിക്കുന്നതാണ് തോട്ടപ്പള്ളി സ്പില്‍യുടെ ഷട്ടറുകള്‍. നാല്പതു ഷട്ടറുകളാണ് സ്പില്‍വേയ്ക്കുള്ളത്. ഇതില്‍ 39 ഷട്ടറുകളും തുറന്നിട്ടുണ്ട്. അഞ്ചു വര്‍ഷം മുമ്പ് ഒരു ഷട്ടര്‍ തകര്‍ന്നിരുന്നു. ഏഴാം നമ്പര്‍ ഷട്ടറാണ് തകര്‍ന്നത്. വര്‍ഷങ്ങള്‍ക്കു മുമ്പു തകര്‍ന്ന ഷട്ടര്‍ ഇതുവരെ നന്നാക്കിയിട്ടില്ല. അന്നുമുതല്‍ ആ ഷട്ടര്‍ തുറക്കാനായിട്ടില്ല. കൂടാതെ ബാക്കിയുള്ളവയില്‍ അഞ്ചോളം ഷട്ടറുകളുടെ അയണ്‍ റോപ്പ് പൊട്ടിയിട്ടുമുണ്ട്. പുതിയ റോപ്പുകള്‍ വാങ്ങിയിട്ടുണ്ടെങ്കിലും ജലവകുപ്പിലെ മെക്കാനിക്കല്‍ വിഭാഗം ഇതുവരെ റോപ്പുകള്‍ ഘടിപ്പിച്ചിട്ടില്ല. ഇക്കാര്യങ്ങള്‍ ഉടന്‍ പരിഹരിക്കുമെന്ന് ജലവകുപ്പ് അധികൃതര്‍ പറയാന്‍ തുടങ്ങിയിട്ട് കാലം കുറെയായെങ്കിലും ഇതുവരെ അറ്റകുറ്റപ്പണികള്‍ ആരംഭിച്ചിട്ടില്ല. 2016-17 കാലത്താണ് പുതിയ ഷട്ടറുകള്‍ സ്ഥാപിച്ചത്. പിന്നീട് അധികൃതര്‍ തിരിഞ്ഞു നോക്കിയിട്ടേയില്ല. പകുതിയില്‍ അധികം ഷട്ടറുകള്‍ ദ്രവിച്ച നിലയിലാണ്. ഇവയുടെ മോട്ടറുകളും പ്രവര്‍ത്തന സജ്ജമല്ല. പ്രവര്‍ത്തനമുള്ള ഷട്ടറുകളുടെ മോട്ടറുകളില്‍ നിന്ന് വൈദ്യുതിലൈന്‍ വലിച്ചാണ് തകരാറിലായ മോട്ടറുകളുള്ള ഷട്ടറുകള്‍ ഉയര്‍ത്തുകയും താഴ്ത്തുകയും ചെയ്യുന്നത്. കാലവര്‍ഷം ശക്തി പ്രാപിച്ചു കഴിഞ്ഞാല്‍ ലീഡിംഗ് ചാനല്‍ വഴി ഒഴുകിയെത്തുന്ന വെള്ളം കടലിലേക്ക് ഒഴുക്കി വിടേണ്ടത് ഈ ഷട്ടറുകള്‍ വഴിയാണ്.

ചെന്നിത്തല പള്ളിയിൽ തിരുനാൾ

മാന്നാര്‍: ചെന്നിത്തല സെന്‍റ് ജോർജ് ഓർത്തഡോക്‌സ് വലിയപള്ളിയില്‍ ഗീവര്‍ഗീസ് സഹദായുടെ തിരുനാളിനു കൊടിയേറി. വികാരി ഫാ. ജോണ്‍ വര്‍ഗീസ് കൂടാരത്തില്‍ കൊടിയേറ്റ് നിർവഹി ച്ചു. നാലിന് വൈകിട്ട് ആറിന് കുടുംബസംഗമം, വചനശുശ്രൂഷ ഫാ. ജേക്കബ് മഞ്ഞളി. അഞ്ചിന് വൈകിട്ട് ആറിന് വചനശുശ്രൂഷ ഫാ. ഡോ. ജോര്‍ജി ജോസഫ്. ആറിന് വൈകിട്ട് ആറിന് വചനശുശ്രൂഷ ഫാ. എബി ഫിലിപ്പ് കാര്‍ത്തികപ്പള്ളി, കാന്‍ഡില്‍ പ്രയര്‍, പിതൃസ്മൃതി. ഏഴിന് രാവിലെ 6.55ന് വിശുദ്ധ കുര്‍ബാന ഫാ. ഉമ്മന്‍ പോള്‍ കോട്ടുവിളയില്‍, വൈകിട്ട് 6.30ന് പ്രദക്ഷിണം. എട്ടിന് രാവിലെ 7.45ന് ഡോ. സഖറിയാസ് മാര്‍ അപ്രേമിന്‍റെ മുഖ്യകാര്‍മികത്വത്തില്‍ വിശുദ്ധ മൂന്നിന്മേല്‍ കുര്‍ബാന, പ്രദക്ഷിണം.

വോളിബോള്‍ സ്റ്റേഡിയവും അക്രലിറ്റിക് കോര്‍ട്ടും ഉദ്ഘാടനം

ചേര്‍ത്തല: വയലാര്‍ ഗ്രാമത്തില്‍ പുതുതലമുറയുടെ കായിക മികവിനായി പ്രവര്‍ത്തിക്കുന്ന വയലാര്‍ പിആര്‍സിയില്‍ അന്താരാഷ്ട്ര മികവില്‍ സൗകര്യങ്ങളാകുന്നു. പുതുതായി നിര്‍മിച്ച മേല്‍ക്കൂരയുള്ള വോളിബോള്‍ സ്റ്റേഡിയവും അക്രലിക് വോളീബോള്‍ കോര്‍ട്ടും ഒന്നിനു തുറക്കും. പരിശീലനം തേടിയെത്തുന്ന കുട്ടികള്‍ക്ക് മഴഭീഷണിയില്‍ വര്‍ഷത്തില്‍ ആറുമാസവും പരിശീലനം മുടങ്ങുന്ന സ്ഥിതിയാണ്. ഈ സാഹചര്യത്തിലാണ് സ്ഥിരം മേല്‍ക്കൂരയ്ക്കായി ശ്രമങ്ങള്‍ നടത്തിയതെന്ന് സംഘാടകസമിതി ചെയര്‍മാന്‍ കെ.പി. നടരാജന്‍, കണ്‍വീനര്‍ എ.കെ. അജയകുമാര്‍, പഞ്ചായത്ത് സ്ഥിരം സമിതി അധ്യക്ഷന്‍ യു.ജി. ഉണ്ണി, പി.എസ്. മുരളീധരന്‍ എന്നിവര്‍ പത്രസമ്മേളനത്തില്‍ അറിയിച്ചു. മുന്‍കേന്ദ്രമന്ത്രി വയലാര്‍ രവിയുടെ പ്രാദേശിക വികസന ഫണ്ടില്‍നിന്നുള്ള 45 ലക്ഷം രൂപ വിനിയോഗിച്ചാണ് അന്താരാഷ്ട്ര മാനദണ്ഡപ്രകാരമുള്ള മേല്‍ക്കൂരയുള്ള വോളീബോള്‍ സ്‌റ്റേഡിയം ഒരുക്കിയത്. സ്‌പോര്‍ട്സ് കേരള ഫൗണ്ടേഷനാണ് അക്രലിക് വോളിബോള്‍ കോര്‍ട്ടിനായി 25 ലക്ഷം അനുവദിച്ചത്. മെയ് ഒന്നിനു വൈകുന്നേരം അഞ്ചിനു പിആര്‍സി മൈതാനിയില്‍ നടക്കുന്ന സമ്മേളനം മന്ത്രി പി. പ്രസാദ് ഉദ്ഘാടനം ചെയ്യും. മുന്‍ കേന്ദ്രമന്ത്രി വയലാര്‍രവി സ്റ്റേഡിയവും മന്ത്രി സജി ചെറിയാന്‍ അക്രലിക് കോര്‍ട്ടും ഉദ്ഘാടനം ചെയ്യും. കെ.സി. വേണുഗോപാല്‍ എംപി മുഖ്യപ്രഭാഷണം നടത്തും. സമ്മേളനത്തിനുശേഷം ഏഴിന് ബിപിസിഎല്‍ കൊച്ചിയും കെഎസ്ഇബി തിരുവനന്തപുരവും തമ്മിലുള്ള പ്രദര്‍ശന മത്സരം.

ആർട്ടിസ്റ്റ് കെ.കെ. വാര്യർ അനുസ്മരണം

ചേർത്തല: ആർട്ടിസ്റ്റ് കെ.കെ. വാര്യരുടെ മൂന്നാം ചരമവാർഷികത്തോടനുബന്ധിച്ചു ചിത്രരചനാ മത്സരവും ചിത്ര പ്രദർശനവും നടന്നു. ടൗൺ എൽ പി സ്കൂളിൽ നടന്ന സമ്മേളനം കൃഷിമന്ത്രി പി. പ്രസാദ് ഉദ്ഘാടനം ചെയ്തു. ആർട്ടിസ്റ്റ് റ്റി. ബേബി അധ്യക്ഷത വഹിച്ച ചടങ്ങിൽ സ്റ്റേറ്റ് ക്രൈം റെക്കോർഡ് ബ്യൂറോ ഇൻസ്പെക്ടർ അനന്ത ലാൽ മുഖ്യപ്രഭാഷണം നടത്തി. ചേർത്തല മുനിസിപ്പൽ വൈസ് ചെയർമാൻ അജയകുമാർ, ആലപ്പി ഋഷികേശ്, റ്റി.ആർ സുരേഷ്, ആർട്ടിസ്റ്റ് വരദൻ, ആർട്ടിസ്റ്റ് സുനിൽ പങ്കജ് എന്നിവർ പ്രസംഗിച്ചു. കെ.കെ. അനിൽകുമാർ സമ്മാനദാനം നിർവഹിച്ചു.

ഒടുവില്‍ വേടരപ്ലാവ് -പണയില്‍ റോഡ് സഞ്ചാരയോഗ്യമായി

ചാരുംമൂട്: നാട്ടുകാരുടെ പ്രതിഷേധത്തിനും മൂന്നുവര്‍ഷത്തെ പഞ്ചായത്തിന്‍റെ നിയമ പോരാട്ടത്തിനും ഒടുവില്‍ താമരക്കുളം വേടരപ്ലാവ് സ്‌കൂള്‍ ജംഗ്ഷന്‍-പണയില്‍ മാര്‍ത്തോമ്മപ്പള്ളി റോഡിന്‍റെ ടാറിംഗ് പൂര്‍ത്തിയാക്കി സഞ്ചാരയോഗ്യമാക്കി. ഇതോടെ യാത്രാദുരിതത്തില്‍നിന്നും ജനങ്ങള്‍ക്ക് മോചനമായി. മൂന്നുവര്‍ഷങ്ങള്‍ക്കു മുമ്പേ നവീകരണത്തിനു വേണ്ടി റോഡ് കുത്തിപ്പൊളിച്ചിട്ടതോടെ ഇതുവഴിയുള്ള യാത്ര ദുരിതമായി മാറിയിരുന്നു. ഇതേത്തുടര്‍ന്ന് നാട്ടുകാരുടെ പ്രതിഷേധം ശക്തമായപ്പോള്‍ താമരക്കുളം പഞ്ചായത്ത് കോടതിയെ സമീപിക്കുകയായിരുന്നു. ഹൈക്കോടതി നല്‍കിയ ഉത്തരവിനെത്തുടര്‍ന്ന് സംസ്ഥാന ഗ്രാമീണ റോഡ് വികസന ഏജന്‍സി പുതിയ ടെണ്ടര്‍ വിളിച്ചാണ് റോഡിന്‍റെ അവസാനഘട്ട നിര്‍മാണം പുതിയ കരാറുകാരന് നല്‍കി പൂര്‍ത്തിയാക്കിയത്. റോഡിന്‍റെ ടാറിംഗ് പൂര്‍ത്തിയാക്കി വശങ്ങളില്‍ മണ്ണിട്ട് കോണ്‍ക്രീറ്റ് ചെയ്യുന്നതുമായ അവസാനഘട്ട ജോലികള്‍ പുരോഗമിക്കുകയാണ്. പിഎംജിഎസ്‌വൈ പദ്ധതിയില്‍ ഉള്‍പ്പെടുത്തി 4.65 കിലോമീറ്റര്‍ നീളമുള്ള റോഡിന് 2.70 കോടി രൂപയാണ് 2019ല്‍ അനുവദിച്ചിരുന്നത്. കേരള സംസ്ഥാന ഗ്രാമീണ റോഡുവികസന ഏജന്‍സിക്കായിരുന്നു നിര്‍മാണച്ചുമതല. ടെന്‍ണ്ടര്‍ നടപടികള്‍ പൂര്‍ത്തിയാക്കി ഒന്നാംഘട്ട നിര്‍മാണപ്രവര്‍ത്തനങ്ങള്‍ നടത്തിവരുന്നതിനിടയിലാണ് കരാറുകാരന്‍ നിര്‍മാണം നിര്‍ത്തിവച്ചത്. ഇതോടെ മെറ്റല്‍ നിരത്തി ഗ്രാവലിട്ടുറപ്പിച്ച റോഡ് ഇളകി കാല്‍നട യാത്രപോലും ദുഷ്‌ക്കരമായി. തുടര്‍ന്നാണ് നാട്ടുകാര്‍ പ്രതിഷേധം ശക്തമാക്കുകയും പഞ്ചായത്ത് ഹൈക്കോടതിയെ സമീപിക്കുകയും ചെയ്തത്.

ജൂണിയർ സംസ്ഥാന ബാസ്കറ്റ്ബോൾ; ജില്ലാ ടീമുകളെ തെരഞ്ഞെടുത്തു; ബ്ലെസൻ, ടെസ ക്യാപ്റ്റന്മാർ

ആലപ്പുഴ: വയനാട്ടിൽ 29 മുതൽ മേയ് നാലുവരെ നടത്തുന്ന 49-ാമത് ജൂണിയർ സംസ്ഥാന ബാസ്കറ്റ് ബോൾ ചാമ്പ്യൻഷിപ്പിൽ പങ്കെടുക്കാനുള്ള ആലപ്പുഴ ജില്ലാ ടീമുകളെ തെരെഞ്ഞെടുത്തു. ജൂണിയർ ആൺകുട്ടികൾ: ബ്ലെസൻ വി.എസ്. - ക്യാപ്റ്റൻ, വിനായക് എം., നിയോ ജോൺ വിൻസെന്‍റ്, അഭയ് എസ്., അൽജോ ജോർജ് തോമസ്, റോമൽ കെ. റോയ്, ആദിത്യൻ പി., അഭിഷേക് കെ., അശോക്, ജോനാഥൻ ജി, സാൽവിൻ തോമസ്, അക്ഷയ് അലക്സ്, മഷൂദ്. സ്റ്റാൻഡ് ബൈ: ആലാപ്, പ്രദീഷ് പി. നായർ. പരിശീലകർ: പ്രവീൺകുമാർ യു., ജോസഫ് തോമസ്. മാനേജർ: ഫാ. അരുൺ. ജൂണിയർ പെൺകുട്ടികൾ: ടെസ ഹർഷൻ - ക്യാപ്റ്റൻ, സുഭദ്ര ജയകുമാർ, ഗംഗ രാജഗോപാൽ, അനീഷ ഷിബു, നിള ശരത്, മനീഷ മനോജ്, ശിവാനി അജിത്, ഹൃദ്യ എസ്., സൽമ നൗറിൻ, ലയ മിൽട്ടൻ, നാദിയ നവാസ്, സമഹ സലിം. സ്റ്റാൻഡ് ബൈ: മീനാക്ഷി. പരിശീലകർ: എസ്. ഷഹബാസ്, നരേഷ്. മാനേജർ: നിമ്മി ശരത്. ടീം അംഗങ്ങൾക്കുള്ള ജേഴ്‌സികൾ എഡിബിഎ പ്രസിഡന്‍റ് ജേക്കബ് ജോസഫ് വിതരണം ചെയ്തു. പി.ജെ. സണ്ണി, റോണി മാത്യു, സെൻ കല്ലുപുര, ജോൺ ജോർജ്, ബി. സുഭാഷ്, ജോസ് സേവ്യർ, തോമസ് മത്തായി കരിക്കംപള്ളിൽ, ബ്രിജിറ്റ് ജോസഫ്, ജയിൻ ജോസ്, ഹസീന അമൻ, എം. ബിനു തുടങ്ങിയവർ പങ്കെടുത്തു. എൻ.സി. ജോൺ ഫൗണ്ടേഷനാണ് ജേഴ്‌സി സ്പോൺസർ ചെയ്തത്.

ചെങ്ങന്നൂർ മോട്ടോർ ഡ്രൈവിംഗ് സ്കൂൾ അസോ. ലഹരിവിരുദ്ധ പോരാട്ടത്തിന് ഒരുങ്ങുന്നു

ചെങ്ങന്നൂര്‍: യഥാര്‍ഥ്യങ്ങളില്‍ നിന്നൊളിച്ചോടി, ഉത്തരവാദിത്തങ്ങളില്‍നിന്നകന്ന് നാടിനും വീടിനും ഭാരമായി മാറുന്ന ഭ്രാന്തന്‍ യുവത്വത്തെ സൃഷ്ടിക്കാന്‍ വെമ്പല്‍കൊള്ളുന്ന ലഹരിമാഫിയകള്‍ക്കും ദേശവിരുദ്ധ ശക്തികള്‍ക്കും ലാഭക്കൊതിയന്മാര്‍ക്കുമെതിരേ ഒരുമയുടെ പ്രതിരോധമുയര്‍ത്തുകയാണ് ചെങ്ങന്നൂരിലെ മോട്ടോര്‍ ഡ്രൈവിംഗ് സ്‌കൂള്‍ അസോസിയേഷന്‍. കേരളത്തിലെ മോട്ടോര്‍ ഡ്രൈവിംഗ് സ്‌കൂള്‍ ചരിത്രത്തില്‍ത്തന്നെ ആദ്യമായി ചെങ്ങന്നൂര്‍ മോട്ടോര്‍ ഡ്രൈവിംഗ് സ്‌കൂള്‍ അസോസിയേഷന്‍റെ നേതൃത്വത്തില്‍ ലഹരിവിരുദ്ധ പ്രതിജ്ഞയും ലഹരിവിരുദ്ധ സന്ദേശ വാഹനപ്രചാരണ യാത്രയും നടത്തും. 30ന് ഉച്ചകഴിഞ്ഞ് മൂന്നിന് ചെങ്ങന്നൂര്‍ സബ് ആര്‍ടി ഓഫീസ് അങ്കണത്തില്‍നിന്ന് വാഹന പ്രചാരണ സന്ദേശയാത്രയ്ക്ക് തുടക്കമാകും. ചെങ്ങന്നൂര്‍ ജോയിന്‍റ് ആര്‍ടിഒ ആര്‍. പ്രസാദ് ലഹരിവിരുദ്ധ പ്രതിജ്ഞ ചൊല്ലിക്കൊടുക്കുകയും പതാക വീശി യാത്രയുടെ ഉദ്ഘാടനം നിര്‍വഹിക്കുകയും ചെയ്യും. മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എസ്. അഭിലാഷ് ലഹരിവിരുദ്ധ സന്ദേശം നല്‍കും. അസിസ്റ്റന്‍റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എം. ശ്യാംകുമാര്‍ പ്രസംഗിക്കും. തുടര്‍ന്ന് കാരയ്ക്കാട്, പുത്തന്‍ കാവ്, ചെങ്ങന്നൂര്‍ ടൗണ്‍, കല്ലിശേരി, പ്രാവിന്‍കൂട്, തിരുവന്‍വണ്ടൂര്‍, പാണ്ടനാട്, മാന്നാര്‍, ബുധനൂര്‍, പുലിയൂര്‍,ചെറിയനാട് എന്നീ പ്രദേശങ്ങളിലൂടെ സന്ദേശവാഹനം സ ഞ്ചരിച്ച് കൊല്ലകടവില്‍ സമാപിക്കും. തുടര്‍ന്ന് വൈകിട്ട് 6ന് നടക്കുന്ന സമാപന സമ്മേളനം ബ്ലോക്ക് പഞ്ചായത്ത് പ്രസിഡന്‍റ് കെ.എം. സലിം ഉദ്ഘാടനം ചെയ്യും. അറുപത് വാഹനങ്ങളിലായി നൂറില്‍പരം ആളുകള്‍ സന്ദേശയാത്രയില്‍ പങ്കെടുക്കുമെന്ന് മോട്ടോര്‍ ഡ്രൈവിംഗ് സ്‌കൂള്‍ അസോസിയേഷന്‍ ചെങ്ങന്നൂര്‍ പ്രസിഡന്‍റ് സണ്ണി യോഹന്നാന്‍, വൈസ് പ്രസിഡന്‍റ് പി. സാബു, സെക്രട്ടറി സുനില്‍ ഡി. വള്ളിയില്‍, ജോയിന്‍റ് സെക്രട്ടറി പി.ജി. ജയലാല്‍, ട്രഷറര്‍ എസ്. സന്തോഷ് കുമാര്‍ എന്നിവര്‍ അറിയിച്ചു.

ഫ്രാന്‍സിസ് മാര്‍പാപ്പയ്ക്ക് സ്മരണാഞ്ജലി അര്‍പ്പിച്ചു

ചേര്‍ത്തല: ഫ്രാന്‍സിസ് മാര്‍പാപ്പയ്ക്ക് സ്മരണാഞ്ജലി അര്‍പ്പിച്ച് മരിയന്‍ തീര്‍ഥാടന കേന്ദ്രമായ മുട്ടം സെന്‍റ് മേരീസ് ഫൊറോനാ പള്ളിയില്‍ അനുസ്മരണ ദിവ്യബലിയര്‍പ്പിച്ചു. തുടര്‍ന്ന് നഗരത്തില്‍ മൗനറാലിയും പള്ളിയങ്കണത്തില്‍ പുഷ്പാര്‍ച്ചനയും നടത്തി. പള്ളിയില്‍ നടന്ന തിരുക്കര്‍മങ്ങള്‍ക്ക് വികാരി റവ. ഡോ.ആന്‍റോ ചേരാംതുരുത്തി, സഹവികാരി ഫാ. ബോണി കട്ടയ്ക്കകത്തൂട്ട്, ഫാ. ജോസ് പാലത്തിങ്കല്‍ എന്നിവര്‍ കാര്‍മികത്വം വഹിച്ചു. റാലിയിലും പുഷ്പാര്‍ച്ചനയിലും നിരവധി വിശ്വാസികള്‍ പങ്കെടുത്തു. കൈക്കാരന്മാരായ സി.ഇ. അഗസ്റ്റിന്‍ ചെറുമിറ്റം, അഡ്വ. ജാക്‌സണ്‍ മാത്യു, പാരിഷ് ഫാമിലി യൂണിയന്‍ വൈസ് ചെയര്‍മാന്‍ സാബു ജോണ്‍ പാലയ്ക്കല്‍, ജനറല്‍ സെക്രട്ടറി ജോമോന്‍ കണിശേരി, മനോജ് മാളിയേക്കല്‍ തുടങ്ങിയവര്‍ നേതൃത്വം നല്‍കി.

ചെങ്ങന്നൂരിലെ ഗതാഗതക്കുരുക്കിനു പരിഹാരം; പരിഷ്‌കാരങ്ങള്‍ മേയ് ഏഴുമുതല്‍

ചെങ്ങന്നൂര്‍: ഗതാഗതക്കുരുക്ക് മൂലം ചെങ്ങന്നൂര്‍ നഗരവാസികള്‍ അനുഭവിക്കുന്ന ദുരിതം ചെറുതൊന്നുമല്ല. കാലങ്ങളായി ഈ ദുരിതവും പേറിയാണ് ഇവര്‍ ജീവിക്കുന്നത്. ഇക്കാര്യം പരിഹരിക്കുന്നതില്‍ ഭരണാധികാരികളും തയാറായിരുന്നില്ല. എന്തായാലും നഗരത്തിലെ ഗതാഗതക്കുരുക്ക് ഒഴിവാക്കാനായി നടപ്പാക്കുന്ന ഗതാഗത പരിഷ്‌കാരം മേയ് ഏഴു മുതല്‍ പ്രാബല്യത്തില്‍ വരുമെന്നാണ് ഇപ്പോള്‍ ലഭിച്ചിരിക്കുന്ന വിവരം. മന്ത്രി സജി ചെറിയാന്‍റെ നിര്‍ദേശപ്രകാരം ചെങ്ങന്നൂര്‍ ടൗണില്‍ വാഹനങ്ങളുടെ പാര്‍ക്കിംഗ്, സ്വകാര്യ ബസുകളുടെ സ്റ്റോപ്പ്, ഓട്ടോറിക്ഷാ സ്റ്റാന്‍ഡുകളുടെ മാറ്റം എന്നിവ നടപ്പാക്കുകയാണെന്ന് അധികൃതര്‍ അറിയിച്ചു. മന്ത്രിയുടെ അധ്യക്ഷതയില്‍ ഓട്ടോറിക്ഷാ തൊഴിലാളികളുമായും പ്രൈവറ്റ് ബസ് ഓപ്പറേറ്റേഴ്‌സ്, വ്യാപാരി വ്യവസായി പ്രതിനിധികള്‍, ഉദ്യോഗസ്ഥര്‍ എന്നിവരുമായി നടത്തിയ ചര്‍ച്ചകളുടെയും അഭിപ്രായങ്ങളുടെയും അടിസ്ഥാനത്തിലാണ് പരിഷ്‌കാരം നടപ്പിലാക്കാന്‍ ഇപ്പോള്‍ അധികൃതര്‍ തയാറായിരിക്കുന്നത്. ജോയിന്‍റ് ആര്‍ടിഒ ആര്‍. പ്രസാദ്, എഎംവിഐമാരായ എം.ശ്യാംകുമാര്‍, വിശാഖ് ബി.എസ്.പിള്ള, ട്രാഫിക് എസ്‌ഐ ടി.എ. അബ്ദുല്‍ സത്താര്‍, പിഡബ്ല്യുഡി അസി. എന്‍ജിനിയര്‍ എം.എസ്. സച്ചിന്‍ എന്നിവരുടെ നേതൃത്വത്തിലാണ് പരിഷ്‌കാരം നടപ്പിലാക്കുന്നത്. നഗരത്തില്‍ ഏറ്റവുമധികം ഗതാഗതക്കുരുക്കും വാഹനത്തിരക്കും അനുഭവപ്പെടുന്നത് എംസി റോഡിലാണ്. ഇവിടെ കാറുകള്‍ ഉള്‍പ്പെടെയുള്ള ചെറുവാഹനങ്ങള്‍ കല്ലിശേരി-മംഗലം-മുളക്കുഴ സെഞ്ച്വറി ജംഗ്‌ഷന്‍വഴി എംസി റോഡുമായി ബന്ധിപ്പിക്കുന്ന ബൈപാസ് റോഡുവഴി പോകണമെന്നതാണ് പുതിയ പരിഷ്‌കാരം. ബൈപാസ് റോഡിന്‍റെ പുനര്‍നിര്‍മാണം പൂര്‍ത്തിയാക്കി പരീക്ഷണ ഓട്ടം വിജയകരമായി പൂര്‍ത്തിയാക്കിയിരുന്നു. ഭാരമുള്ള വലിയ വാഹനങ്ങള്‍ എംസി റോഡുവഴിയും കടന്നു പോകണം. ബൈപാസ് ഫേസ് 1 എന്നു സൂചിപ്പിക്കുന്ന ബോര്‍ഡുകള്‍ എംസി റോഡില്‍ ഇതിനകം സ്ഥാപിച്ചു കഴിഞ്ഞു. ബൈപാസ് റോഡിലും ബോര്‍ഡുകള്‍ സ്ഥാപിച്ചു. പ്രധാന തീരുമാനങ്ങള്‍ എംസി റോഡില്‍ ഗവ. ആശുപത്രി ജംഗ്ഷനില്‍ ബസ്‌ബേയില്‍ ഓട്ടോ സ്റ്റാന്‍ഡ് പാടില്ല. 4മാമ്മന്‍ മെമ്മോറിയല്‍ ആശുപത്രിക്ക് എതിര്‍വശമുള്ള ഓട്ടോ സ്റ്റാന്‍ഡിലെ ഓട്ടോറിക്ഷകള്‍ സൈനിക് റെസ്റ്റ് ഹൗസിന്‍റെ ഗേറ്റ് കഴിഞ്ഞു പിന്നിലേക്കു നീക്കി പാര്‍ക്ക് ചെയ്യണം. ഇവിടെ നിലവിലുള്ള കാത്തിരിപ്പു കേന്ദ്രത്തിനോടുചേര്‍ന്ന് ഓട്ടോ സ്റ്റാന്‍ഡ് പ്രവര്‍ത്തിക്കാന്‍ പാടില്ല. വെള്ളാവൂര്‍ ജംഗ്ഷനില്‍ ബസ് കാത്തിരിപ്പു കേന്ദ്രത്തിനു മുന്നില്‍ ഓട്ടോറിക്ഷകള്‍ പാര്‍ക്ക് ചെയ്യുവാന്‍ പാടുള്ളതല്ല. ഈ ഭാഗം ബസ് ബേ ആയി ഉപയോഗിക്കണം. കല്ലിശേരി ജംഗ്ഷനില്‍ ഓതറ റോഡില്‍ പാര്‍ക്ക് ചെയ്തിരിക്കുന്ന ഓട്ടോറിക്ഷകള്‍ പടിഞ്ഞാറു ഭാഗത്തു കടവിലേക്കുള്ള പഴയ റോഡിലേക്ക് മാറ്റി പാര്‍ക്ക് ചെയ്യണം. മുനിസിപ്പല്‍ പെര്‍മിറ്റുള്ള ഓട്ടോറിക്ഷകള്‍ മാത്രം ടൗണില്‍ പെര്‍മിറ്റ് അനുവദിച്ചിട്ടുള്ള സ്റ്റാന്‍ഡില്‍ ഓടണം. സര്‍വീസിനായി ഒറ്റതിരിഞ്ഞ് ഓട്ടോറിക്ഷകള്‍ ടൗണില്‍ പാര്‍ക്ക് ചെയ്യാതിരിക്കുക. തിരുവല്ല ഭാഗത്തുനിന്നു വരുന്ന ബസുകള്‍ എച്ച്പി പമ്പിന് എതിര്‍വശത്തു നിര്‍ത്തുന്നതു മൂലം വെള്ളാവൂര്‍ ജംഗ്ഷനില്‍ ഗതാഗതക്കുരുക്ക് ഉണ്ടാകുന്നതിനാല്‍ ബസുകള്‍ നവരത്‌ന ഹോട്ടലിന് സമീപത്തേക്കു മാറ്റി നിര്‍ത്തണം. ചെങ്ങന്നൂര്‍ ടൗണില്‍ രാത്രി സര്‍വീസിനു ടൗണ്‍ പെര്‍മിറ്റുള്ള ഓട്ടോറിക്ഷകള്‍ മാത്രമേ പാടുള്ളൂ. ബസ്‌ബേ ഉള്ളിടത്തു മാത്രം ബസുകള്‍ നിര്‍ത്തുക . എല്ലാ സ്വകാര്യ ബസുകളും സ്വകാര്യ ബസ് സ്റ്റാന്‍ഡില്‍ പ്രവേശിക്കണം. നന്ദാവനം ജംഗ്ഷനില്‍ സ്വകാര്യ ബസുകള്‍ യാത്രക്കാരെ കയറ്റി ഇറക്കുന്നതിനല്ലാതെ കൂടുതല്‍ സമയം നിര്‍ത്തിയിടുന്നത് ഴിവാക്കണം. നന്മ മാര്‍ക്കറ്റ് ജംഗ്ഷനിലുള്ള ബസ് ബേയില്‍ മാത്രം ബസുകള്‍ നിര്‍ത്തണം. എംസി റോഡില്‍ ടൗണിലെ കിഴക്കു ഭാഗത്തു പാര്‍ക്കിംഗ് പാടില്ല. നന്മ ടൗണില്‍ വാഹനത്തിനുള്ളിലോ അല്ലാതെയോ ഉള്ള വഴിയോരക്കച്ചവടം പാടില്ല . മാര്‍ക്കറ്റില്‍ നടപ്പാത കയ്യേറിയുള്ള കച്ചവടം പാടില്ല. ബഥേല്‍ ജംഗ്ഷന്‍ മുതല്‍ ത്രിവേണിവരെ വണ്‍വേ ആയിരിക്കും. ബഥേല്‍ ജംഗ്ഷനില്‍ തിരുവല്ല ഭാഗത്തുനിന്നും വരുന്ന വാഹനങ്ങള്‍ വലതു വശത്തേക്ക് തിരിഞ്ഞു പോകുന്നത് ഒഴിവാക്കണം. ട്രെയിന്‍/ബസ് യാത്രക്കാരുടെ വാഹനങ്ങള്‍ ടൗണില്‍ പൊതുസ്ഥലത്തു പാര്‍ക്ക് ചെയ്യാന്‍ പാടില്ല. ചെങ്ങന്നൂര്‍ നഗരത്തില്‍ നിലവിലുള്ള വണ്‍വേ സംവിധാനങ്ങള്‍ (ആല്‍ത്തറ ജംഗ്ഷന്‍ മുതല്‍ നന്ദാവനം ജംഗ്ഷന്‍ വരെയും ബഥേല്‍ ജംഗ്ഷന്‍ മുതല്‍ ആല്‍ത്തറ ജംഗ്ഷന്‍ വരെയും) കര്‍ശനമായി പാലിക്കണം.

ഭീകരതയ്ക്കെതിരേ ഐക്യദാർഢ്യം

മാന്നാർ: സെന്‍റ് കുറിയാക്കോസ് ഓർത്തഡോക്സ് യുവജന പ്രസ്ഥാനത്തിന്‍റെ ആഭിമുഖ്യത്തിൽ ഭീകരതയ്ക്കെതിരേ ഐക്യദാർഡ്യ സമ്മേളനവും തിരിതെളിച്ച് ഭീകരവിരുദ്ധ പ്രതിജ്ഞയും നടത്തി. കൗൺസിൽ അംഗവും ഇടവക ട്രസ്റ്റിയുമായ തോമസ് മണലേൽ ഉദ്ഘാടനം ചെയ്തു. വികാരി ഫാ. ഗീവർഗീസ് ശാമുവൽ അധ്യക്ഷത വഹിച്ചു. ഭദ്രാസന ഇടവക സെക്രട്ടറി തോമസ് പുഞ്ചോട്ടിൽ, യുവജനപ്രസ്ഥാനം സെക്രട്ടറി അജോ ഏബ്രഹാം, ജോഷ്വാ ജോസ്, ജോയൽ, ബൻസൺ വർഗീസ്, ജോജോ എന്നിവർ പ്രസംഗിച്ചു.

അനധികൃത പാർക്കിംഗ്; കേസെടുത്ത എസ്ഐക്കും പോലീസുകാരനും ഉന്നത പോലീസുദ്യോഗസ്ഥന്‍റെ പീഡനം

അമ്പലപ്പുഴ: അനധികൃത പാർക്കിംഗിനെതിരേ കേസെടുത്ത എസ്ഐക്കും പോലീസുകാരനുമെതിരേ ഉന്നത പോലീസുദ്യോഗസ്ഥന്‍റെ പീഡനം. അമ്പലപ്പുഴ എസ്ഐ, സിവിൽ പോലീസ് ഓഫീസർ എന്നിവരെയാണ് പൊലീസ് ഹെഡ് ക്വാർട്ടേഴ്സിലെ ഉന്നതോദ്യോഗസ്ഥനായ പൊലീസുകാരൻ മാനസികമായി പീഡിപ്പിക്കുന്നത്. വിഷുദിനം ഉച്ചയോടെ അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിന് തെക്കേനടയിലായിരുന്നു സംഭവം. ക്ഷേത്രത്തിലെത്തുന്ന ഭക്തരുടെ തിരക്ക് കണക്കിലെടുത്ത് പുലർച്ചെ മുതൽ ഇവിടെ പോലീസ് ഗതാഗത നിയന്ത്രണമേർപ്പെടുത്തിയിരുന്നു. ക്ഷേത്രത്തിന് തെക്കേനടയിലെ റോഡിൽ അനധികൃതമായി പാർക്ക് ചെയ്ത വാഹനമുടമയോട് കാർ മാറ്റാൻ ആവശ്യപ്പെട്ടു. വാഹനമുടമയായ യുവാവ് എസ്ഐയോട് തട്ടിക്കയറുകയും അനാവശ്യം പറയുകയുമായിരുന്നു. യുവാവ് മദ്യപിച്ചിരുന്നതായി സംശയം തോന്നിയതിനാൽ പരിശോധനയ്ക്കു പോകാൻ ജീപ്പിൽ കയറാൻ ആവശ്യപ്പെട്ടു. ഈ സമയം എസ്ഐക്കും ഒപ്പമുണ്ടായിരുന്ന പോലീസുകാരനുനേരേയും തട്ടിക്കയറിയ യുവാവ് കൈയേറ്റത്തിനും മുതിർന്നതായി ദൃക്സാക്ഷകൾ പറഞ്ഞു. പിന്നീട് സ്റ്റേഷനിലെത്തിച്ച യുവാവിനെതിരേ കേസെടുത്തു. എന്നാൽ ദിവസങ്ങൾക്കുശേഷം പോലീസ് ഹെഡ് ക്വാർട്ടേഴ്സിൽനിന്ന് എസ്ഐയും സംഭവസമയം ഒപ്പമുണ്ടായിരുന്ന പോലീസുകാരനും കേസുമായി ബന്ധപ്പെട്ട ഫയലുകളുമായി തിരുവനന്തപുരത്തെ ഹെഡ്ക്വാർട്ടേഴ്സിൽ എത്താനായിരുന്നു നിർദേശം. ഇവിടെയെത്തിയ ഇരുവരെയും ഹെഡ്ക്വാർട്ടേഴ്സിലെ ഉന്നത പോലീസുദ്യോഗസ്ഥൻ ശകാരിക്കുകയും മാനസികമായി പീഡിപ്പിക്കുകയും ചെയ്തതായാണ് വിവരം. ഹെഡ് ക്വാർട്ടേഴ്സിലെ ഉന്നത പോലീസ് ഉദ്യോഗസ്ഥന്‍റെ അടുത്ത ബന്ധുവാണ് വാഹനമുടമയായ യുവാവ് എന്നാണ് വിവരം. നിയമം നടപ്പാക്കിയതിന്‍റെ പേരിൽ പോലീസുദ്യോഗസ്ഥനിൽനിന്ന് എസ്ഐയേയും പോലീസുകാരനെയും അനാവശ്യമായി ശകാരിക്കുകയും മാനസികമായി പീഡിപ്പിക്കുകയും ചെയ്ത ഉന്നത പോലീസുദ്യോഗസ്ഥന്‍റെ നടപടിയിൽ പോലീസ് സേനയ്ക്കുള്ളിൽ പ്രതിഷേധമുയരുകയാണ്.

പാപ്പാ നഗര്‍ പാപ്പായ്ക്ക് ഏകിയത് ഹൃദയത്തില്‍തൊട്ട യാത്രാമൊഴി

ആലപ്പുഴ: പാപ്പാ നഗര്‍ എന്ന പേരുവഹിക്കുന്ന ലോകത്തെതന്നെ അപൂര്‍വ നാടായ ആലപ്പുഴ കുതിരപ്പന്തിയിലെ പാപ്പാ നഗറില്‍ ജാതിമതഭേദമില്ലാതെ തങ്ങളുടെ ജനകീയ പാപ്പായുടെ ചിത്രവും വഹിച്ച് പ്രദക്ഷിണം നടത്തിയും പാപ്പായുടെ സ്‌നേഹസ്പര്‍ശങ്ങള്‍ ഓര്‍ത്തെടുത്തും ദീപം തെളിച്ചുമെല്ലാമാണ് ഫ്രാന്‍സിസ് പാപ്പായുടെ സാംസ്‌കാരദിന സായാഹ്നം ജനങ്ങള്‍ വ്യത്യസ്തമാക്കിയത്. 1986ല്‍ ജോണ്‍പോള്‍ രണ്ടാമന്‍ മാര്‍പാപ്പ ഇന്ത്യ സന്ദര്‍ശിച്ചതിന്‍റെ ഓര്‍മയ്ക്കായി അന്ന് നാമകരണം ചെയ്തതാണ് കുതിരപ്പന്തിയിലെ പാപ്പാ നഗര്‍. ബസ്‌സ്റ്റോപ്പായി അംഗീകരിച്ചിട്ടുള്ള ഇവിടം ജാതിമത ഭേദമെന്യേ ഒരുമയോടെ പ്രവര്‍ത്തിക്കുന്ന ജനകീയ സാംസ്‌കാരികകേന്ദ്രംകൂടിയാണ്. മെഴുകുതിരിപോലെ ഉരുകി ഉരുകി സഹജീവികള്‍ക്ക് പ്രകാശം പരത്താന്‍ പറഞ്ഞ പാപ്പായുടെ ചിത്രവും വഹിച്ച് മോണ്‍. റവ. ഡോ. ജോയ് പുത്തന്‍വീട്ടിലിന്‍റെ നേതൃത്വത്തില്‍ കത്തിച്ച മെഴുകുതിരികളുമായി വിലാപയാത്രയെ അനുസ്മരിപ്പിച്ച പ്രദക്ഷിണം പാപ്പാ നഗറില്‍ എത്തിച്ചേര്‍ന്നു. തുടര്‍ന്നുനടന്ന സമ്മേളനത്തില്‍ എല്ലാ ജീവജാലങ്ങള്‍ക്കുമുള്ള പൊതുഭവനമാണ് ഭൂമി എന്ന ഫ്രാന്‍സിസ്പാപ്പായുടെ സന്ദേശം ഓര്‍മിപ്പിച്ചു കൊണ്ടുള്ളതായിരുന്നു വികാരി ജനറാൾ മോണ്‍. റവ. ഡോ. ജോയ് പുത്തന്‍വീട്ടിലിന്‍റെ ഉദ്ഘാടന പ്രസംഗം. തെരുവോരങ്ങളിലെ സാധാരണക്കാരുടെ ജീവിതത്തെ കൂടുതല്‍ സ്‌നേഹിച്ച മിഷനറിയായ പാപ്പായെ അനുസ്മരിക്കുവാന്‍ പാപ്പാ നഗറിലെ തെരുവോരത്തുതന്നെ അനുസ്മരണം സംഘടിപ്പിക്കുന്നതിനുള്ള ഔചിത്യം മഹത്തരമാണെന്ന് ഫ്രാന്‍സിസ് പാപ്പായുടെ ആത്മകഥ മലയാളത്തിലേക്ക് പരിഭാഷപ്പെടുത്തിയ സാഹിത്യകാരന്‍ പി.ജെ.ജെ. ആന്‍റണി പറഞ്ഞു. ക്രൈസ്തവര്‍ മാത്രമല്ല എല്ലാ മതസ്ഥരും എന്നനിലയില്‍ ഫ്രാന്‍സിസ് മാര്‍പാപ്പയെ സ്‌നേഹിക്കുന്നതായി അമ്പലപ്പുഴ എസ്എന്‍ഡിപി യൂണിയന്‍ കൗണ്‍സിലര്‍ പി.കെ. സോമന്‍ പറഞ്ഞു. ജോയി സാക്‌സിന്‍റെ നേതൃത്വത്തിലുള്ള സെന്‍ട്രല്‍ ക്വയര്‍ അംഗങ്ങളായ സിസ്റ്റര്‍ ലിന്‍ഡാ, എഡ്‌നാ, ടാനിയ, സെബാസ്റ്റ്യന്‍ റോബിന്‍ എന്നിവര്‍ പേപ്പല്‍ ആന്തം ആലപിച്ചപ്പോള്‍ ജനങ്ങള്‍ പാപ്പായുടെ ചിത്രത്തില്‍ പുഷ്പാര്‍ച്ചന നടത്തി അന്തിമോപചാരം അര്‍പ്പിച്ചു. ജോയി സാക്‌സ്, ലിജി സെബാസ്റ്റ്യന്‍, മധു മധുരിമ, അജി, രാജീവ്, സിസ്റ്റര്‍ പുതേന്‍സിയ, സിസ്റ്റര്‍ അംബി, ഡെന്നി ആന്‍റണി, സെബാസ്റ്റ്യന്‍ കെ. സേവ്യര്‍, ജോസഫ്, ലീമ, ജാന്‍സി, ക്വീറ്റസ് വെളിയില്‍, ഉദയപ്പന്‍, എ.കെ. സെബാസ്റ്റ്യന്‍ ഫിലിപ്പ് തുടങ്ങിയവര്‍ പ്രാര്‍ഥനകള്‍ക്കു നേതൃത്വം നല്‍കി.

എടത്വ പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് കൊടിയേറി

എടത്വ: പ്രസിദ്ധ തീര്‍ഥാടന കേന്ദ്രമായ എടത്വ സെന്‍റ് ജോര്‍ജ് ഫൊറോനാ പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് തുടക്കം കുറിച്ച് കൊടിയേറി. ഇന്നലെ രാവിലെ 5.45ന് മധ്യസ്ഥ പ്രാര്‍ഥന, ലദീഞ്ഞ്, വിശുദ്ധ കുര്‍ബാന എന്നിവയ്ക്കുശേഷം എട്ടിന് പതിനായിരങ്ങളെ സാക്ഷിനിര്‍ത്തി ഫൊറോനാ വികാരി ഫാ. ഫിലിപ്പ് വൈക്കത്തുകാരന്‍ കൊടി ആശീര്‍വദിച്ച് ഉയര്‍ത്തിയതോടെ എടത്വ തിരുനാള്‍ ആഘോഷങ്ങള്‍ക്കു തുടക്കം കുറിച്ചു. ദിവ്യബലിക്കുശേഷം പൊന്‍, വെള്ളി കുരിശുകളുടെയും മെഴുകുതിരികളുടെയും മുത്തുക്കുടകളുടെയും അകമ്പടിയോടെ വിശ്വാസസാഗരത്തെ സാക്ഷിയാക്കിയായിരുന്നു ആശീര്‍വദിച്ച കൊടി ഉയര്‍ത്തിയത്. പട്ടുനൂല്‍കൊണ്ട് പിരിച്ചെടുത്ത കയറില്‍ കൊടി മുകളിലേക്ക് ഉയര്‍ന്നതോടെ വിശുദ്ധ ഗീവര്‍ഗീസേ ഞങ്ങള്‍ക്കുവേണ്ടി അപേക്ഷിക്കണമേ എന്ന് ആയിരങ്ങളുടെ നാവില്‍നിന്ന് ഉയര്‍ന്ന തീക്ഷ്ണമായ പ്രാർഥനയുടെ നിറവില്‍ എടത്വ പെരുനാളിന് തുടക്കമായി. ഇനിയുള്ള നാളുകള്‍ പുണ്യഭൂമിയായ എടത്വ ലക്ഷക്കണക്കിന് തീര്‍ഥാടകരുടെ ആശാകേന്ദ്രമായിരിക്കും. തിരുനാളില്‍ പങ്കെടുക്കാനായി തീര്‍ഥാടകര്‍ ശനിയാഴ്ച മുതലേതന്നെ പള്ളിയില്‍ എത്തിയിരുന്നു. തമിഴ്‌നാട്ടില്‍നിന്നുള്ള തീര്‍ഥാടകരാണ് ഏറെയും എത്തുന്നത്. പള്ളിയിലെ തിരുക്കര്‍മങ്ങളില്‍ പങ്കെടുക്കാന്‍ കന്യാകുമാരി, രാജാക്കമംഗലം, മാര്‍ത്താണ്ഡം തുറക്കാര്‍ പള്ളി പരിസരങ്ങളില്‍ തമ്പടിച്ചു തുടങ്ങി. തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍, അസിസ്റ്റന്‍റ് വികാരിമാരായ ഫാ. കുര്യന്‍ പുത്തന്‍പുര, ഫാ. തോമസ് കാരക്കാട്, ഫാ. കുര്യാക്കോസ് പീടിയേക്കല്‍, ഫാ. സെബാസ്റ്റ്യന്‍ മഞ്ചേരിക്കളം, ഫാ. ജോസഫ് കാമിച്ചേരി, ഫാ. സെബാസ്റ്റ്യന്‍ മനയത്ത്, ഫാ. ജോസഫ് വെമ്പേനിക്കല്‍ എന്നിവര്‍ സഹകാര്‍മികരായിരുന്നു. കൊടിക്കുന്നില്‍ സുരേഷ് എംപി, ജില്ലാ പഞ്ചായത്ത് വികസന സ്ഥിരംസമിതി അധ്യക്ഷ ബിനു ഐസക്ക് രാജു എന്നിവരും ചടങ്ങില്‍ പങ്കെടുത്തു. കൈക്കാരന്മാരായ പി.എസ്. ടോമിച്ചന്‍ പറപ്പള്ളി, കെ.എം. ജയിംസ് കളത്തൂര്‍, വിന്‍സെന്‍റ് പഴയാറ്റില്‍, ജനറല്‍ കണ്‍വീനര്‍ തോമസ് ജോര്‍ജ് ആലപ്പാട്ട് പറത്തറ, പബ്ലിസിറ്റി കണ്‍വീനര്‍ സോജന്‍ സെബാസ്റ്റ്യന്‍ കണ്ണന്തറ, ജോയിന്‍റ് കണ്‍വീനര്‍മാരായ റോബിന്‍ ടി. കളങ്ങര, ജയിന്‍ മാത്യു, സെക്രട്ടറി ആന്‍സി ജോസഫ് മുണ്ടകത്തില്‍, കണ്‍വീനര്‍മാരായ ജോണ്‍ ചാക്കോ വടക്കേറ്റം പുന്നപ്ര, റിന്‍സി ജോസഫ് കണ്ടത്തില്‍പറമ്പില്‍, സാം സഖറിയ വാതല്ലൂര്‍, ജയിംസുകുട്ടി കന്നേല്‍ തോട്ടുകടവില്‍, ചാക്കോ ആന്‍റണി പുത്തന്‍വീട്, ബിനോയി ഉലക്കപ്പാടില്‍, റ്റോം ജെ. കൂട്ടക്കര എന്നിവര്‍ നേതൃത്വം നല്‍കി. മേയ് ഏഴുവരെ എല്ലാ ദിവസവും 4.30ന് തമിഴ് കുര്‍ബാന, 5.45ന്, 7.45ന്, 10ന്, വൈകുന്നേരം നാലിന്, ആറിന് മധ്യസ്ഥ പ്രാര്‍ഥന, ലദീഞ്ഞ്, കുര്‍ബാന, രാത്രി ഏഴിന് കുരിശടിയില്‍ മധ്യസ്ഥ പ്രാര്‍ഥന എന്നിവ നടക്കും. മേയ് മൂന്നിന് വിശുദ്ധന്‍റെ തിരുസ്വരൂപം പരസ്യവണക്കത്തിനായി ദേവാലയ കവാടത്തില്‍ പ്രതിഷ്ഠിക്കുന്നതോടെ തിരുനാളിന് തിരക്കേറും. പ്രധാന തിരുനാള്‍ മേയ് ഏഴിനാണ്. അന്ന് ഉച്ചകഴിഞ്ഞ് നാലിന് വിശുദ്ധന്‍റെ തിരുസ്വരൂപവും വഹിച്ചുകൊണ്ടുള്ള ചരിത്ര പ്രസിദ്ധമായ പ്രദക്ഷിണം പള്ളിക്കുചുറ്റും നടക്കും. തിരുനാള്‍ ദിനത്തില്‍ പ്രദക്ഷണത്തിന് രൂപങ്ങള്‍ വഹിക്കുന്നതും നേതൃത്വം നല്‍കുന്നതും തമിഴ്‌നാട്ടില്‍നിന്നുള്ള ഭക്തജനങ്ങളാണ്. നൂറ്റാണ്ടുകളായി പരകോടി വിശ്വാസികളുടെ ജീവിതത്തിന് വഴിയും വെളിച്ചവുമായ വിശുദ്ധന്‍റെ തിരുസ്വരൂപം പരസ്യവണക്കത്തിനായി മേയ് മൂന്നിന് രാവിലെ ഒന്‍പതിന് ദേവാലയ കവാടത്തില്‍ പ്രതിഷ്ഠിക്കും. മെയ് 14ന് എട്ടാമിടം. അന്ന് ചെറിയ രൂപവും എഴുന്നെള്ളിച്ചുകൊണ്ടുള്ള പ്രദക്ഷിണം കുരിശടി ചുറ്റി പള്ളിയില്‍ മടങ്ങിയെത്തുന്നതോടെ കൊടിയിറക്കും. രാത്രി ഒന്‍പതിന് തിരുസ്വരൂപം നടയില്‍ പ്രതിഷ്ഠിക്കുന്നതോടെ തിരുനാള്‍ കാലത്തിന് സമാപനമാകും. ഇത്തവണത്തെ തിരുനാളിന് പാലക്കാട് സുല്‍ത്താന്‍പേട്ട് രൂപത ബിഷപ് റവ. ഡോ. പീറ്റര്‍ അബീര്‍ അന്തോനിസ്വാമി, സീറോ മലബാര്‍ കുരിയാ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍, തിരുവല്ല അതിരൂപത ആര്‍ച്ച്ബിഷപ് തോമസ് മാര്‍ കൂറിലോസ്, തക്കല രൂപത മത്രാന്‍ മാര്‍ ജോര്‍ജ് രാജേന്ദ്രൻ, പാളയംകോട്ട് ബിഷപ് എമരിറ്റസ് റവ. ഡോ. ജൂഡ് പോള്‍ രാജ്, ചങ്ങനാശേരി അതിരൂപത ആര്‍ച്ച്ബിഷപ് എമരിറ്റസ് മാര്‍ ജോസഫ് പെരുന്തോട്ടം, തൂത്തുക്കുടി രൂപത ബിഷപ് റവ. ഡോ. സ്റ്റീഫന്‍ ആന്‍റണി പിള്ളൈ എന്നിവരുടെ സാന്നിധ്യമുണ്ടാകും.

തീരദേശ പാതയിൽ ട്രെയിനുകൾ കുറവ്; യാത്രക്കാർ ദുരിതത്തിൽ

കായംകുളം: തീരദേശ പാതയില്‍ ആലപ്പുഴ വഴിയുള്ള ട്രെയിനുകളുടെ കുറവ് യാത്രക്കാരെ ദുരിതത്തിലാക്കുന്നു. കോവിഡിനുശേഷം പാസഞ്ചര്‍ ട്രെയിന്‍ നിര്‍ത്തലാക്കിയതും ട്രെയിനുകളുടെ സ്റ്റോപ്പുകള്‍ വെട്ടിക്കുറച്ചതും ദുരിതത്തിന് കാരണമായി. ദേശീയപാതയില്‍ നിര്‍മാണം നടക്കുന്നതിനാല്‍ യാത്ര ദുഷ്‌കരമായതിനാല്‍ യാത്രക്കാര്‍ കൂടുതലായും ട്രെയിനുകളിലാണ് യാത്രചെയ്യുന്നത്. ഹരിപ്പാടുനിന്നു രാവിലെ 11.30നുള്ള നേത്രാവതി എക്‌സ്പ്രസ് പോയതിനുശേഷം അടുത്ത ട്രെയിന്‍ ഏഴു മണിക്കൂറിനുശേഷം വൈകിട്ട് 6.30നാണുള്ളത്. ഇതിനിടയില്‍ ഹരിപ്പാട്, അമ്പലപ്പുഴ സ്റ്റേഷനുകളില്‍ സ്റ്റോപ്പില്ലാത്ത നിരവധി ട്രെയിനുകള്‍ കടന്നുപോകുന്നുണ്ട്. തിങ്കള്‍, ചൊവ്വ ദിവസങ്ങളില്‍ ജാംനഗര്‍ എക്‌സ്പ്രസ്, വ്യാഴം ഗാന്ധിധാം ഹംസഫര്‍ എക്‌സ്പ്രസ്, വെള്ളി ഇന്‍ഡോര്‍ എക്‌സ്പ്രസ്, ഞായറാഴ്ച പോര്‍ബന്ധര്‍ എക്‌സ്പ്രസ് ഇങ്ങനെ അഞ്ചു ദിവസങ്ങളില്‍ ഉച്ചയ്ക്ക് 2.45ന് കായംകുളം, ആലപ്പുഴവഴി എറണാകുളത്തേക്ക് ട്രെയിനുകള്‍ ഉണ്ട്. എന്നാല്‍ ഇവയ്‌ക്കൊന്നും ഹരിപ്പാട്, അമ്പലപ്പുഴ തുടങ്ങിയ സ്റ്റേഷനുകളില്‍ സ്റ്റോപ്പില്ല. ചൊവ്വാഴ്ചകളില്‍ വൈകിട്ട് 3.45നുള്ള നിസാമുദീന്‍ സ്വര്‍ണജയന്തി എക്‌സ്പ്രസ്, വ്യാഴാഴ്ചകളില്‍ 4.13 നുള്ള നിസാമുദീന്‍ സൂപ്പര്‍ഫാസ്റ്റ് എക്‌സ്പ്രസ് എന്നിവയ്ക്കും കായംകുളം കഴിഞ്ഞാല്‍ പിന്നീട് സ്റ്റോപ്പ് ആലപ്പുഴയാണ്. കോവിഡിന് മുമ്പ് ഉച്ചയ്ക്ക് ഒന്നരയ്ക്ക് കായംകുളത്തുനിന്ന് ആരംഭിക്കുന്ന പാസഞ്ചര്‍ ട്രെയിന്‍ ഉണ്ടായിരുന്നു. ഇത് ഇപ്പോള്‍ നിര്‍ത്തലാക്കിയിരിക്കുകയാണ്. ആലപ്പുഴയില്‍നിന്ന് ആരംഭിക്കുന്ന ആലപ്പുഴ ചെന്നൈ എക്‌സ്പ്രസ്, ആലപ്പുഴ കണ്ണൂര്‍ എക്‌സിക്യൂട്ടീവ് എന്നീ ട്രെയിനുകള്‍ക്ക് പോകണ്ട യാത്രക്കാര്‍ക്ക് എത്തിച്ചേരാനുള്ള ആശ്രയമായിരുന്നു പാസഞ്ചര്‍ ട്രെയിന്‍. എന്നാല്‍, ഇപ്പോള്‍ ഹരിപ്പാട്, അമ്പലപ്പുഴ ഉള്ള യാത്രക്കാര്‍ക്ക് നേരിട്ട് സ്റ്റേഷനില്‍ എത്തുകയേ മാര്‍ഗമുള്ളൂ. രാത്രിയിലെ അവസ്ഥയും ദയനീയമാണ്. രാത്രി 9.30ന് മാവേലി എക്‌സ്പ്രസ് ഹരിപ്പാടുനിന്നു പോയതിനുശേഷം പിന്നീട് എറണാകുളത്തേക്ക് പോകണമെങ്കില്‍ നേരിട്ടുള്ള ട്രെയിന്‍ രാവിലെ 5.30നുള്ള ഏറനാട് എക്‌സ്പ്രസ് ആണ്. അമ്പലപ്പുഴ സ്റ്റേഷന്‍റെയും അവസ്ഥ ഇതുതന്നെയാണ്. അതായത് എട്ടുമണിക്കൂറോളം സമയം ട്രെയിനുകള്‍ ഇല്ല. എന്നാല്‍, ദിവസേന രാത്രി 2.30 ഓടെ ഇതുവഴി കടന്നുപോകുന്ന ചെന്നൈ ഗുരുവായൂര്‍ എക്‌സ്പ്രസ് ഉണ്ട്. ഹരിപ്പാടും അമ്പലപ്പുഴയും ഇതിന് കോവിഡിന് മുമ്പ് സ്റ്റോപ്പുകള്‍ ഉണ്ടായിരുന്നതാണ്. ഇത് പുനസ്ഥാപികയാണെങ്കില്‍ പുലര്‍ച്ചെ എറണാകുളത്തുനിന്നു പോകുന്ന ദീര്‍ഘദൂര ട്രെയിനുകള്‍ക്ക് എത്തേണ്ടവര്‍ക്ക് വലിയ സഹായമാകും. നിലവില്‍ രാത്രി 8ന് എറണാകുളത്തുനിന്നുള്ള മെമു കഴിഞ്ഞാല്‍ 1.50നുള്ള മാവേലി എക്‌സ്പ്രസാണുള്ളത്. ആറു മണിക്കൂറോളമാണ് ട്രെയിനുകള്‍ തമ്മിലുള്ള ഇടവേള. അതുപോലെ എറണാകുളത്തുനിന്നു രാവിലെ 6.30 നുള്ള തിരുവനന്തപുരം ഇന്റര്‍സിറ്റിക്ക് ശേഷം ദിവസേന അടുത്ത ട്രെയിന്‍ 12.30നുള്ള നേത്രാവതിയാണ്. എന്നാല്‍ ഞായര്‍, ചൊവ്വ, ബുധന്‍, ശനി ദിവസങ്ങളില്‍ രാവിലെ 11ന് എറണാകുളത്തെത്തി അമ്പലപ്പുഴ, ഹരിപ്പാട് വഴി തിരുവനന്തപുരം പോകുന്ന ട്രെയിനുകള്‍ ഉണ്ട്. എന്നാല്‍ ഇവ മൂന്നും നാലും ദിവസങ്ങള്‍ ഓടിയാണ് എറണാകുളം എത്തുന്നത്. അതിനാല്‍തന്നെ പലപ്പോഴും മണിക്കൂറുകള്‍ വൈകിയാണ് ഇവയുടെ യാത്ര. തീരദേശ പാതയിലെ പ്രധാന റെയില്‍വേ സ്റ്റേഷനുകള്‍ ഏറെനേരവും ട്രെയിനുകള്‍ ഇല്ലാതെ വിജനമായി കിടക്കുകയാണ്. കൂടുതല്‍ ട്രെയിനുകള്‍ അനുവദിച്ചും സ്റ്റോപ്പുകള്‍ അനുവദിച്ചും യാത്രാദുരിതം ഒഴിവാക്കണമെന്നും പാത ഇരട്ടിപ്പിക്കല്‍ വേഗത്തല്‍ ആക്കണമെന്നുമാണ് യാത്രക്കാരുടെ ആവശ്യം.

മണ്ണിനെ പൊന്നാക്കുന്ന കർഷകൻ: കെ.ജി. രാജന്‍റെ ജീവിതം കൃഷിയിലൂടെ

മാത്യു സി. ജോസഫ് ചെങ്ങന്നൂര്‍: ആലപ്പുഴയുടെ മണ്ണില്‍, ചെങ്ങന്നൂരിന്‍റെ ഹൃദയത്തില്‍, ആല പഞ്ചായത്തിലെ കോടുകുളഞ്ഞി എന്ന ഗ്രാമം ഒരു കര്‍ഷകന്‍റെ കഠിനാധ്വാനത്തിന് സാക്ഷ്യംവഹിക്കുകയാണ്. കിടായികുഴിയില്‍ കെ.ജി. രാജന്‍ എന്ന നാമം, മണ്ണിനെ സ്നേഹിച്ചും വിയര്‍പ്പൊഴുക്കിയും ജീവിതം പടുത്തുയര്‍ത്തിയ കര്‍ഷകന്‍റെ പ്രതീകമാണ്. നഷ്ടക്കണക്കുകള്‍ മാത്രം പറയുന്ന ലോകത്തിനു മുന്നില്‍, രാജന്‍ തന്‍റെ കൃഷിത്തോട്ടത്തിലൂടെ മറുപടി പറയുകയാണ് -മണ്ണിനെ പൊന്നാക്കിയ ഒരു ജീവിതഗാഥ. അച്ഛന്‍ കെ.ജി. ജോര്‍ജിന്‍റെ പാത പിന്തുടര്‍ന്ന്, മുപ്പത് വര്‍ഷം മുന്‍പ് മണ്ണില്‍ വിത്തിറക്കിയ അന്നുമുതല്‍ രാജന്‍ അതിനെ സ്വന്തം മക്കളെപ്പോലെ ലാളിച്ചു. 1989ല്‍ കോടുകുളഞ്ഞി ജെഎംഎച്ച്എസില്‍നിന്നു പത്താം ക്ലാസ് പാസായ രാജൻ കുടുംബത്തിന്‍റെ സാമ്പത്തികഭാരം താങ്ങാനായി കൂലിപ്പണിക്ക് പോവേണ്ടിവന്നു. പിന്നീട് മണ്ണിന്‍റെ മാന്ത്രികത തിരിച്ചറിഞ്ഞ അദ്ദേഹം അന്നുമുതല്‍ കൃഷി ജീവിതമാര്‍ഗമാക്കി. മൂന്നര ഏക്കര്‍ പാട്ടഭൂമിയില്‍ രാജന്‍ തന്‍റെ സ്വപ്നങ്ങള്‍ വിളയിക്കുന്നു. കപ്പയും ഏത്തവാഴയും ചേനയുമെല്ലാം ഇവിടെ തലയുയര്‍ത്തി നില്‍ക്കുന്നു. ആയിരത്തി എഴുനൂറു മൂട് കപ്പയും ആയിരം ഏത്തവാഴകളും നൂറ്റിയിരുപത് ചേനകളും ഈ കര്‍ഷകന്‍റെ അധ്വാനത്തിന്‍റെ ഫലമാണ്. ഓണവിപണി ലക്ഷ്യമാക്കി പടവലവും പാവലും വെള്ളരിയും പയറുമെല്ലാം ഈ മണ്ണില്‍ സമൃദ്ധമായി കായ്ക്കുന്നു. അടുത്ത മാസം ചേമ്പ് കൃ ഷിക്ക് ഒരുങ്ങുന്ന ഈ കര്‍ഷകന്‍, സ്വന്തമായുള്ള അന്‍പത് സെന്‍റ് പുരയിടത്തില്‍ പാളയംകോടനും ഞാലിപ്പൂവനും പൂവനുമെല്ലാം നട്ട് പരിപാലിക്കുന്നു. ജാതിയും കമുകുമെല്ലാം ഈ മണ്ണിന് സൗന്ദര്യവും വരുമാനവും നല്‍കുന്നു. കൃഷിയില്‍നിന്ന് ലഭിക്കുന്ന വരുമാനമാണ് രാജന്‍റെ ഭാര്യ ജൂലിയും നഴ്സിംഗ് വിദ്യാര്‍ഥികളായ ലിജിയും ജിനിയും പ്ലസ്ടു വിദ്യാര്‍ഥിയായ ജിബിനും ഉള്‍പ്പെടുന്ന കുടുംബത്തിന്‍റെ ആശ്രയം. വിളവെടുത്ത ഉത്പന്നങ്ങള്‍ കോടുകുളഞ്ഞി വിപിസികെയില്‍ എത്തിച്ചാണ് വില്പന നടത്തുന്നത്. മണ്ണിനോടുള്ള സ്നേഹത്തിനും കഠിനാധ്വാനത്തിനും ലഭിച്ച അംഗീകാരമായി ആല പഞ്ചായത്തും ആലപ്പുഴ ജില്ലയും കോടുകുളഞ്ഞി വിപിസികെയും നല്‍കിയ മികച്ച കര്‍ഷകനുള്ള പുരസ്‌കാരങ്ങളും രാജന്‍റെ ഷെല്‍ഫിലുണ്ട്. കൃഷി മാത്രമല്ല, രണ്ട് പശുക്കളെയും ഈ കര്‍ഷകന്‍ പരിപാലിക്കുന്നു. അത് കുടുംബത്തിന് ഒരു അധിക വരുമാന സ്രോതസാണ്. പ്രതിസന്ധികളെ പുഞ്ചിരിയോടെ നേരിട്ടും മണ്ണിനെ പൊന്നുപോലെ സ്‌നേഹിച്ചുമുള്ള രാജന്‍റെ ജീവിതം, കൃഷി നഷ്ടമാണെന്ന് വിലപിക്കുന്നവര്‍ക്ക് ഒരു പാഠപുസ്തകമാണ്.

നീലക്കുറിഞ്ഞി ക്വിസ്: മുതുകുളം ബ്ലോക്ക്തല വിജയികളെ കണ്ടെത്തി

ഹരിപ്പാട്: ഹരിത കേരള മിഷന്‍റെ നേതൃത്വത്തിൽ സംഘടിപ്പിക്കുന്ന ജൈവവൈവിധ്യ പഠനോത്സവത്തിന്‍റെ ഭാഗമായി നടന്ന നീലക്കുറിഞ്ഞി ക്വിസ് മത്സരത്തിന്‍റെ മുതുകുളം ബ്ലോക്ക്തല വിജയികളെ തെരഞ്ഞെടുത്തു. മുതുകുളം ബ്ലോക്ക് പഞ്ചായത്ത് ഹാളിൽ നടന്ന മത്സരത്തിൽ 32 കുട്ടികൾ പങ്കെടുത്തു. മത്സരത്തിൽ വിഷ്ണു നമ്പൂതിരി, എസ്. ശാരിക, എസ്. ഹരിനാരായണൻ, ഡി. വിവേക് എന്നിവർ ഒന്ന്, രണ്ട്, മൂന്ന്, നാല് സ്ഥാനങ്ങൾ നേടി. മുതുകുളം ബ്ലോക്ക് പഞ്ചായത്ത് പ്രസിഡന്‍റ് ഡി. അംബുജാക്ഷി സർട്ടിഫിക്കറ്റുകൾ വിതരണം ചെയ്തു. മുതുകുളം ജോയിന്‍റ് ബിഡിഒ മുഹമ്മദ് ഇസ്മയിൽ, ക്വിസ് മാസ്റ്റർ സി.കെ. ഉണ്ണിത്താൻ, ഹരിത കേരള മിഷൻ റിസോഴ്സ് പേഴ്സൺ അശ്വതി കൃഷ്ണൻ തുടങ്ങിയവർ പങ്കെടുത്തു. ഇടുക്കി അടിമാലിയിൽ നീലക്കുറിഞ്ഞി ജൈവവൈവിധ്യവിജ്ഞാനകേന്ദ്രത്തിന്‍റെ കമ്യൂണിറ്റിതല പരിപാടികളുടെ ഭാഗമായി സംഘടിപ്പിക്കുന്ന പഠനോത്സവത്തിൽ പങ്കെടുക്കുന്നതിന് വിദ്യാർഥികളെ തെരഞ്ഞെടുക്കുന്നതിനായാണ് ക്വിസ് മത്സരം സംഘടിപ്പിച്ചത്. 29ന് ജില്ലാതല ക്വിസ് മത്സരം നടക്കും. ജില്ലാതല വിജയികളെ പങ്കെടുപ്പിച്ച് മേയ്16,17,18 തീയതികളിൽഅടിമാലിയിലും മൂന്നാറിലുമായി പഠനോത്സവ ക്യാമ്പ് നടക്കും. 7, 8, 9 ക്ലാസുകളിലെവിദ്യാർഥികളാണ് മത്സരത്തിൽ പങ്കെടുത്തത്. പരിസ്ഥിതി, ജൈവവൈവിധ്യം എന്നീ വിഷയങ്ങളെ മുൻനിർത്തിയായിരുന്നു ക്വിസ് മത്സരം.

സൗജന്യ മെഗാ മെഡിക്കൽ ക്യാമ്പ് സംഘടിപ്പിച്ചു

ഹരിപ്പാട്: ഏവൂർ തെക്ക് നന്മ ചാരിറ്റബിൾ സൊസൈറ്റിയും ചെങ്ങന്നൂർ കല്ലിശേരി ഡോ. കെ.എം. ചെറിയാൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ഹോസ്പിറ്റലും സംയുക്തമായി സൗജന്യ മെഗാ മെഡിക്കൽ ക്യാന്പ് സംഘടിപ്പിച്ചു. മെഡിക്കൽ ക്യാമ്പ് ജുഡീഷൽ ഫസ്റ്റ് ക്ലാസ് മജിസ്ട്രേറ്റ് ദൃശ്യ ബാലകൃഷ്ണൻ ഉദ്ഘാടനം ചെയ്തു. നന്മ പ്രസിഡന്‍റ് രഞ്ജിത്ത് ഗോപാൽ അധ്യക്ഷനായി. പത്തിയൂർ പഞ്ചായത്ത് പ്രസിഡന്‍റ് എൽ. ഉഷ മുഖ്യാതിഥിയായി. പഞ്ചായത്തംഗം ലീലാ ഗോകുൽ, നന്മ രക്ഷാധികാരി യു. നാസറുദീൻ, സെക്രട്ടറി ഡി. കിരൺ, ഡോ. വൈശാഖ്, കെ.എസ്. ഗോപകുമാർ, രാജേഷ് എന്നിവർ പ്രസംഗിച്ചു.

ശമ്പളപരിഷ്കരണം നടപ്പാക്കണമെന്ന്

ചേർത്തല: ശമ്പളപരിഷ്‌കരണം ഉടൻ നടപ്പാക്കണമെന്ന് കെഎസ്എഫ്ഇ സ്റ്റാഫ് അസോസിയേഷൻ-സിഐടിയു 25ാമത് ആലപ്പുഴ ജില്ലാ സമ്മേളനം ആവശ്യപ്പെട്ടു. ചേർത്തലയിൽ നടന്ന സമ്മേളനം സിഐടിയു ജില്ലാ സെക്രട്ടറി പി. ഗാനകുമാർ ഉദ്ഘാടനം ചെയ്തു. ശാഖകളിലെ ജീവനക്കാരുടെ ക്ഷാമം പരിഹരിക്കുക, പിഎസ്‌സി നിയമനം ത്വരിതപ്പെടുത്തുക, ഇടക്കാലാശ്വാസം അനുവദിക്കുക, 2014 നു ശേഷം ജോലിയിൽ പ്രവേശിച്ചവർക്ക് പെൻഷൻ പദ്ധതി നടപ്പാക്കുക തുടങ്ങിയ ആവശ്യങ്ങളും സമ്മേളനം ഉന്നയിച്ചു. ജില്ലാ പ്രസിഡന്‍റ് എ. കൃഷ്ണൻ അധ്യക്ഷത വഹിച്ചു. ജില്ലാ സെക്രട്ടറി എസ്. ഉല്ലാസ് സ്വാഗതം പറഞ്ഞു. സംസ്ഥാന ട്രഷറർ എ. ഷാഹിമോൾ, സംസ്ഥാന ജോയിന്‍റ് സെക്രട്ടറിമാരായ വി.എൽ. പ്രദീപ്, എൻ. ഉണ്ണിക്കൃഷ്ണൻ, ആർ. ഷീജ, ജില്ലാ ട്രഷറർ രശ്മി എസ്. ബാലൻ, സിഐടിയു ചേർത്തല ഏരിയ സെക്രട്ടറി പി. ഷാജിമോഹൻ എന്നിവർ പ്രസംഗിച്ചു. സി.ടി. രഞ്ജിത്ത്, സി.വി. സുഗമ്യ, പി. വിനീതൻ, പി.എം. മനോജ് എന്നിവർ പങ്കെടുത്തു. തുടർന്ന് പ്രതിനിധി സമ്മേളനവും ചർച്ചയും നടന്നു. സമ്മേളനത്തിൽ ജില്ലാ പ്രസിഡന്‍റായി എ. കൃഷ്ണനെയും ജില്ലാ സെക്രട്ടറിയായി എസ്. ഉല്ലാസിനെയും ജില്ലാ ട്രഷററായി രശ്മി എസ്. ബാലനെയും തെരഞ്ഞെടുത്തു. മറ്റ് ഭാരവാഹികൾ: സി.വി. സുഗമ്യ, സജീഷ് സോളമൻ, ടി.വി. അശോകൻ, വിഷ്ണു, നീറ്റ എസ്. ആനന്ദ്, പയസ് ജോസഫ്, ആർ. ഷീജ (ജോയിന്‍റ് സെക്രട്ടറിമാർ), പി.ജി. കവിതമോൾ, ഉമാദേവി, എസ്. കലേഷ്, പാർവതി, കെ. മായ, കൃഷ്ണപ്രിയ, ബൈറ മുഹമ്മദ് (വൈസ് പ്രസിഡന്‍റുമാർ).

പാതിരാമണൽ ദ്വീപ് വികസനം: മന്ത്രി ഗണേഷ്കുമാർ സന്ദർശിക്കും

മുഹമ്മ: പാതിരാമണല്‍ ദ്വീപ് വികസനവുമായി ബന്ധപ്പെട്ട് ജലഗതാഗത വകുപ്പ് ഡയറക്ടര്‍ ഷാജി വി. നായര്‍ പാതിരാമണല്‍ സന്ദര്‍ശിച്ചു. പാതിരാമണലിലേക്ക് കൂടുതല്‍ സഞ്ചാരികളെ ആകര്‍ഷിക്കുന്നത്തിന് പുതിയ പദ്ധതികള്‍ ആസൂത്രണം ചെയ്യുന്നതിന്‍റെ ഭാഗമായാണ് സന്ദര്‍ശനം. ആലപ്പുഴയില്‍നിന്നു കുട്ടനാട് ചുറ്റി പാതിരാമണലിലൂടെ പോകുന്നതിനായി ജലഗതാഗത വകുപ്പിന്‍റെ കുട്ടനാട് സഫാരി ബോട്ട് പുതുതായി ആരംഭിക്കുമെന്നും മന്ത്രി കെ.ബി. ഗണേഷ് കുമാര്‍ അടുത്ത ദിവസം പാതിരാമണല്‍ സന്ദര്‍ശിക്കുമെന്നും അദ്ദേഹം പറഞ്ഞു. അനന്തമായ സാധ്യതകളാണ് പാതിരാമണലുമായി ബന്ധപ്പെടുള്ളത്. ആലപ്പുഴ ജില്ലയ്ക്കും ജലഗതാഗത വകുപ്പിനും ഏറെ നേട്ടം ഇപ്പോഴുണ്ട്. ഇതിനാല്‍ കൂടുതല്‍ വികസന പദ്ധതികളാണ് മുഹമ്മ പഞ്ചായത്തും ജലഗതാഗത വകുപ്പും ചേര്‍ന്ന് ആസൂത്രണം ചെയ്യുന്നത്. പ്രകൃതിഭംഗി നിലനിര്‍ത്തി കൂടുതല്‍ വികസനപ്രവര്‍ത്തനങ്ങള്‍ നടപ്പിലാക്കാനാണ് പദ്ധതി. അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനാണ് മുന്‍തൂക്കം. ആലപ്പുഴയില്‍നിന്നുള്ള വേഗ, സി- കുട്ടനാട് ബോട്ടുകളുടെ കളക്ഷന്‍ കഴിഞ്ഞ വര്‍ഷം മൂന്ന് കോടി രൂപയാണ്. മുഹമ്മ ജെട്ടിയില്‍നിന്നു സ്‌പെഷല്‍ ബോട്ട് സര്‍വീസ് വഴി 10 ലക്ഷം രൂപ വേറേയും ലഭിച്ചു. ആലപ്പുഴയിലേക്ക് കൂടുതല്‍ പേരെ ആകര്‍ഷിക്കാനായാണ് പുതിയ കുട്ടനാട് സഫാരി ബോട്ട് ആരംഭിക്കുന്നത്. പദ്ധതികള്‍ യാഥാര്‍ത്ഥ്യമാകുന്നതോടെ കോട്ടയം ജില്ലയിലെയും ആലപ്പുഴ ജില്ലയിലെയും ടൂറിസം മേഖലയ്ക്ക് പുത്തന്‍ ഉണര്‍വ് ഉണ്ടാകുമെന്നും ടൂറിസം മേഖലയില്‍ കൂടുതല്‍ തൊഴില്‍ സാധ്യതകള്‍ ഉണ്ടാകുമെന്നും ജലഗതാഗത വകുപ്പ് ഡയറക്ടര്‍ പറഞ്ഞു. കൂടാതെ കോട്ടയം, മുഹമ്മ ജെട്ടികളില്‍നിന്നും പാതിരാമണല്‍ ദ്വീപ് , തണ്ണീര്‍മുക്കം ബണ്ട്, കുമരകം വഴി പുതിയ ടുറിസം ബോട്ട് സര്‍വീസ് ആരംഭിക്കുമെന്ന് ഡയറക്ടര്‍ അറിയിച്ചു. മുഹമ്മ പഞ്ചായത്ത് പ്രസിഡന്‍റ് സ്വപ്ന ഷാബു, വൈസ് പ്രസിഡന്‍റ് എന്‍.ടി. റെജി, പഞ്ചായത്ത് അംഗം നസീമ, സെക്രട്ടറി മഹീധരന്‍, ജല ഗതാഗത വകുപ്പ് ഫിനാന്‍സ് ഓഫീസര്‍ പി. മനോജ്, മെക്കാനിക്കല്‍ എന്‍ജിനിയര്‍ എം.വി. അരുണ്‍, ട്രാഫിക് സൂപ്രണ്ട് എം. സുജിത്, സീനിയര്‍ സൂപ്രണ്ട് സിനി, മുഹമ്മ സ്റ്റേഷന്‍ മാസ്റ്റര്‍ ഷാനവാസ് ഖാന്‍, പ്രോജക്ട് കോണ്‍സള്‍ട്ട് നവീന്‍, പ്രവീണ്‍ എന്നിവര്‍ അദ്ദേഹത്തിനൊപ്പമുണ്ടായിരുന്നു.

ചെറിയനാട് റെയിൽവേ അടിപ്പാതയിലെ ദുരിതത്തിന് അറുതിയില്ല; യാത്രക്കാർ വലയുന്നു

ചെങ്ങന്നൂര്‍: മാവേലിക്കര-കോഴഞ്ചേരി റോഡിലെ ചെറിയനാട് റെയില്‍വേ അടിപ്പാതയിലെ വെള്ളക്കെട്ട് യാത്രക്കാരുടെ പേടിസ്വപ്നമായി തുടരുകയാണ്. ലക്ഷങ്ങള്‍ മുടക്കി പഞ്ചായത്ത് ഓട നിര്‍മിച്ചിട്ടും ഈ ദുരിതത്തിന് ഒരു ശാശ്വത പരിഹാരം കാണാന്‍ അധികൃതര്‍ക്ക് കഴിഞ്ഞിട്ടില്ല എന്നതു വ്യാപകമായ പ്രതിഷേധത്തിനു കാരണമാകുന്നു. ചെറിയ മഴയില്‍പോലും അടിപ്പാതയില്‍ വെള്ളം നിറയുന്നതു പതിവായതോടെയാണ് ചെറിയനാട് പഞ്ചായത്ത് എട്ടു ലക്ഷം രൂപ ചെലവഴിച്ച് ഓട നിര്‍മിച്ചത്. നിര്‍ഭാഗ്യവശാല്‍ ഈ ഓടയിലേക്കു വെള്ളം ഒഴുകിയെത്താനുള്ള ഒരു സംവിധാനംപോലും അധികൃതര്‍ ഒരുക്കിയിട്ടില്ല. ഇതോടെ ഈ ശ്രമം വിഫലമായി. അടിപ്പാതയുടെ വശങ്ങള്‍ ചെരിച്ച് കോണ്‍ക്രീറ്റ് ചെയ്ത് വെള്ളം ഓടയിലേക്ക് എത്തിച്ചാല്‍ ഈ വെള്ളക്കെട്ട് ഒഴിവാക്കാന്‍ സാധിക്കുമെന്നാണ് വിദഗ്ധാഭിപ്രായം. എന്നാല്‍, അറ്റകുറ്റപ്പണികള്‍ നടത്താന്‍ റെയില്‍വേ തയാറാകുന്നില്ലെന്ന് പഞ്ചായത്ത് അധികൃതര്‍ കുറ്റപ്പെടുത്തുന്നു. വെള്ളം കെട്ടിനിന്നിരുന്നതിനാല്‍ രൂപപ്പെട്ട വലിയ കുഴികളും അടിപ്പാതയില്‍ നിറയെയാണ്. വലിയ കുഴികളും വെള്ളക്കെട്ടും ഒഴിവാക്കാന്‍ ചെങ്ങന്നൂര്‍ ഭാഗത്തുനിന്നു വരുന്ന വാഹനങ്ങള്‍ വലതുവശം ചേര്‍ന്നുപോകുന്നത് അപകടസാധ്യത വര്‍ധിപ്പിക്കുന്നു. അഞ്ചുവര്‍ഷം മുന്‍പ് എം.കെ. റോഡ് നവീകരിച്ചതിനു ശേഷമാണ് പാലത്തിന്‍റെ ഇരുവശവും ഉയര്‍ന്നത്. ഇതാണ് ഇരുവശങ്ങളില്‍ നിന്നുമുള്ള വെള്ളം പാലത്തിന്‍റെ അടിയിലേക്ക് ഒഴുകിയെത്തുന്നതിനും വെള്ളക്കെട്ട് രൂപപ്പെടുന്നതിനും പ്രധാന കാരണം. ഇതു കണ്ടെത്തി ഏകദേശം പതിനഞ്ചു മാസങ്ങള്‍ക്കു മുന്‍പ് ഈ ഭാഗം ലെവല്‍ ചെയ്ത് ടാര്‍ ചെയ്തിരുന്നു. ചെറിയ മഴയില്‍പോലും ഇവിടെ വെള്ളം കെട്ടിനില്‍ക്കുകയും അടിപ്പാതയില്‍ വലിയ കുഴികള്‍ രൂപപ്പെടുകയും ചെയ്യുന്നു. ഈ കുഴികളില്‍ വീണ് ഇരുചക്ര വാഹന യാത്രക്കാര്‍ ഉള്‍പ്പെടെ നിരവധി പേര്‍ക്ക് അപകടങ്ങള്‍ സംഭവിച്ചിട്ടുണ്ട്. അടിപ്പാതയില്‍ എത്തുന്ന വെള്ളം ഒഴുകിപ്പോകാന്‍ ശരിയായ ഒരു സംവിധാനം ഇല്ലാത്തതാണ് ഇവിടത്തെ പ്രധാന പ്രശ്‌നം. ചെളിവെള്ളം തെറിച്ച് ഇരുചക്രവാഹന യാത്രക്കാരുടെയും കാല്‍നടയാത്രക്കാരുടെയും ദേഹത്തു വീഴുന്നത് ഇവിടെ പതിവു കാഴ്ചയാണ്. ഇതു പലപ്പോഴും തര്‍ക്കങ്ങള്‍ക്കും വഴിവയ്ക്കാറുണ്ട്. ഇരുഭാഗത്തുനിന്നും വളഞ്ഞു വരുന്ന വാഹനങ്ങള്‍ പെട്ടെന്നാണ് വെള്ളക്കെട്ട് കാണുന്നത്. റോഡ് പരിചയമില്ലാത്ത ഡ്രൈവര്‍മാര്‍ പെട്ടെന്ന് ബ്രേക്ക് ചെയ്യുമ്പോള്‍ പിന്നാല വരുന്ന വാഹനങ്ങള്‍ ഇടിച്ചുണ്ടാകുന്ന അപകടങ്ങളും ഇവിടെ വര്‍ധിച്ചു വരുന്നു. മാവേലിക്കര-കോഴഞ്ചേരി റോഡിലെ ചെങ്ങന്നൂര്‍, തഴക്കര എന്നീ റെയില്‍വേ അടിപ്പാതകളിലെ വെള്ളക്കെട്ടിന് പരിഹാരം കണ്ടിട്ടും ചെറിയനാട്ടെ വെള്ളക്കെട്ടിന് പരിഹാരം കാണാത്തത് പ്രതിഷേധാര്‍ഹമാണെന്ന് നാട്ടുകാര്‍ പറയുന്നു. അധ്യയന വര്‍ഷം ആരംഭിക്കുമ്പോള്‍ ശ്രീവിജേശ്വരി ഹൈസ്‌കൂള്‍, ദേവസ്വം ബോര്‍ഡ് ഹയര്‍ സെക്കന്‍ഡറി സ്‌കൂള്‍, സെന്‍റ് ജോസഫ് ഇംഗ്ലീഷ് മീഡിയം സ്‌കൂള്‍, ആല ഗവ. ഹയര്‍സെക്കന്‍ഡറി സ്‌കൂള്‍, ചെറിയനാട് എസ്എന്‍ ട്രസ്റ്റ് ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളിലെ കുട്ടികള്‍ സൈക്കിളിലും കാല്‍നടയായിട്ടും പോകുന്ന ഈ വഴിയിലെ ദുരിതം എത്രയും പെട്ടെന്നു പരിഹരിച്ചില്ലെങ്കില്‍ വന്‍അപകടങ്ങള്‍ സംഭവിക്കാന്‍ സാധ്യതയുണ്ട്. എംകെ റോഡിന്‍റെ പരിപാലന ചുമതല പിഡബ്ല്യുഡി നേരിട്ടല്ല നിര്‍വഹിക്കുന്നത്. പിഡബ്ല്യുഡി മെയിന്‍റനൻ‍സ് വിഭാഗത്തിനാണ് ഇതിന്‍റെ ചുമതല. റെയില്‍വേയും ഈ വിഭാഗവും ഒരുമിച്ച് ചേര്‍ന്ന് ഈ ഗുരുതരമായ പ്രശ്‌നത്തിന് എത്രയും പെട്ടെന്നു ശാശ്വത പരിഹാരം കാണണമെന്നാണ് യാത്രക്കാരുടെയും നാട്ടുകാരുടെയും ആവശ്യം. നേതാക്കൾ പ്രതികരിക്കുന്നു മാവേലിക്കര കോഴഞ്ചേരി റോഡില്‍ ചെറിയനാട് റെയില്‍വേ അടിപ്പാതയില്‍ വെള്ളം കെട്ടിക്കിടക്കുന്നതു മൂലം ഉണ്ടാകുന്ന യാത്രാദുരിതം അടിയന്തരമായി ഇടപെട്ട് പരിഹരിക്കണമെന്നു ചൂണ്ടിക്കാട്ടി ഡിവിഷണല്‍ മാനേജര്‍ ഡോ. മനീഷ് തപ്ലയാലിന് കത്തു നല്‍കിയിട്ടുണ്ട്. തദ്ദേശ സ്ഥാപനങ്ങളും പൊതുജനങ്ങളും പലതവണ നിവേദനം നല്‍കിയിട്ടും പ്രശ്നം പരിഹരിക്കപ്പെടാതെ കടുത്ത അസൗകര്യം സൃഷ്ടിക്കുകയും ഗുരുതരമായ സുരക്ഷാപ്രശ്നങ്ങള്‍ ഉയര്‍ത്തുകയും ചെയ്യുന്നു. റെയില്‍വേ അടിപ്പാതയ്ക്കു കീഴിലുള്ള സ്‌ട്രെച്ച് റെയില്‍വേയുടെ പരിധിയില്‍ വരുന്നതിനാല്‍ റെയില്‍വേ അടിയന്തരമായി ഇടപെട്ട് വിഷയത്തില്‍ പരിഹാരം ഉണ്ടാക്കേണ്ടതാണ്. റെയില്‍വേക്ക് ജോലി ഏറ്റെടുക്കാന്‍ കഴിയാത്ത പക്ഷം, നിരക്ഷേപപത്രം നല്‍കിയാല്‍ ഉടന്‍തന്നെ ജോലി ഏറ്റെടുത്ത് നടപ്പിലാക്കാന്‍ സംസ്ഥാന പൊതുമരാമത്ത് വകുപ്പ് തയാറാണ്. വകുപ്പ് റോഡ് മെയിന്‍റനന്‍സ് ഡിവിഷന്‍ എക്സിക്യൂട്ടീവ് എന്‍ജിനിയര്‍ ഇക്കാര്യം സൂചിപ്പിച്ച് റെയില്‍വേക്കു കത്ത് അയച്ചിട്ടുണ്ടെന്നും മന്ത്രി പറഞ്ഞു. സജി ചറിയാന്‍ (ചെങ്ങന്നൂര്‍ എംഎല്‍എ, സാംസ്‌കാരിക വകുപ്പ് മന്ത്രി) മാവേലിക്കര കോഴഞ്ചേരി റോഡില്‍ ചെറിയനാട് ജംഗ്ഷനു വടക്കുഭാഗത്തുള്ള റെയില്‍വേ അടിപ്പാതയില്‍ വെള്ളം കെട്ടിനില്‍ക്കുന്നത് പ്രതിഷേധാര്‍ഹമാണ്. പഞ്ചായത്ത് എട്ടു ലക്ഷം രൂപ മുടക്കി ഓട നിര്‍മിച്ചിട്ടും ഈ ദുരവസ്ഥയ്ക്കു പരിഹാരം കാണാത്തത് റെയില്‍വേ അധികൃതരുടെ കെടുകാര്യസ്ഥതയാണ് വ്യക്തമാക്കുന്നത്. റെയില്‍വേ അടിപ്പാതയിലെ മഴവെള്ളം ഓടയിലേക്ക് ഒഴുക്കാനുള്ള ശരിയായ സംവിധാനം ഇല്ലാത്തതാണ് ഇപ്പോഴും ഇവിടെ വെള്ളക്കെട്ട് രൂപപ്പെടാന്‍ കാരണം. ഇതു യാത്രക്കാര്‍ക്കും നാട്ടുകാര്‍ക്കും ഒരുപോലെ ദുരിതമുണ്ടാക്കുന്നു. ഈ വിഷയത്തില്‍ റെയില്‍വേ അധികൃതര്‍ അടിയന്തരമായി ഇടപെട്ട് ഓടയിലേക്കു വെള്ളം ഒഴുകുന്നതിനുള്ള സംവിധാനം ഏര്‍പ്പെടുത്തണം. അല്ലാത്തപക്ഷം, നാട്ടുകാരെ സംഘടിപ്പിച്ച് ശക്തമായ സമരപരിപാടികള്‍ നടത്തും. ഒ.ടി. ജയമോഹന്‍ (ചെറിയനാട് പഞ്ചായത്ത് നാലാം വാർഡ് മെംബര്‍)

കൂട്ടുംവാതുക്കൽക്കടവ് പാലം കാമറ നിരീക്ഷണത്തിൽ

കായംകുളം: വർണവെളിച്ചത്തിന്‍റെ പ്രഭയിൽ വിസ്മയം തീർക്കുന്ന കൂട്ടുംവാതുക്കൽക്കടവ് പാലത്തിൽ നിരീക്ഷണ കാമറകൾ സ്ഥാപിച്ചു. യു. പ്രതിഭ എംഎൽഎയുടെ പ്രത്യേക വികസനനിധിയിൽനിന്ന് അഞ്ചു ലക്ഷം രൂപ വിനിയോഗിച്ച് ഏഴു നിരീക്ഷണ കാമറകളാണ് പാലത്തിൽ സ്ഥാപിച്ചത്. 40 കോടി രൂപ വിനിയോഗിച്ച് കണ്ടല്ലൂർ പഞ്ചായത്തിനെയും ദേവികുളങ്ങര പഞ്ചായത്തിനെയും തമ്മിൽ ബന്ധിപ്പിക്കുന്ന കൂട്ടംവാതുക്കൽക്കടവ് പാലം വർണപ്പൊലിമയിൽ സഞ്ചാരികളുടെ ഇഷ്ടകേന്ദ്രമായി ഇപ്പോൾ മാറിയിരിക്കുകയാണ് . 75.50 ലക്ഷം രൂപ വിനിയോഗിച്ച് കേരളത്തിൽ ആദ്യമായി നിറം മാറ്റാൻ കഴിയുന്ന സംവിധാനമുള്ള ഫസാർഡ് ലൈറ്റാണ് കൂട്ടുംവാതുക്കൽക്കടവ് പാലത്തിന്‍റെ പ്രധാന ആകർഷണം. ഏകദേശം അഞ്ചുലക്ഷത്തോളം കളറുകൾ മാറ്റിമറിച്ച് പ്രകാശം പരത്താൻ ഈ സംവിധാനത്തിന് കഴിയും. 325 മീറ്റർ നീളമുള്ള പാലത്തിൽ 25 സോളാർ സ്ട്രീറ്റ് ലൈറ്റുകളും പാലത്തിന്‍റെ ഇരുവശങ്ങളിലുമായി സോളാർ മിനി മാസ്റ്റ് ലൈറ്റുകളും സ്ഥാപിച്ചിട്ടുണ്ട്. കഴിഞ്ഞ എൽഡിഎഫ് സർക്കാരിന്‍റെ കാലത്താണ് പാലം നിർമാണം പൂർത്തിയാക്കി നാടിന് സമർപ്പിച്ചത്. അഞ്ചു കമാനങ്ങളിലായി ബഹുവർണ കോമ്പിനേഷനിൽ ലഭ്യമാക്കുന്ന പാലത്തിലെ ദീപവിസ്മയം ആസ്വദിക്കാൻ വൈകുന്നേരങ്ങളിൽ അനേകം പേരാണ് ഇവിടേക്ക് ‌എത്തുന്നത്.

ഹൈബ്രിഡ് കഞ്ചാവ് കേസ്: കുറ്റപത്രം ഒരുമാസത്തിനുള്ളിലെന്ന് അന്വേഷണസംഘം

ആലപ്പുഴ: രണ്ടു കോടി വിലമതിക്കുന്ന മൂന്നു കിലോ ഹൈബ്രിഡ് കഞ്ചാവുകേസുമായി ബന്ധപ്പെട്ട കുറ്റപത്രം ഒരുമാസത്തിനുള്ളില്‍ കോടതിയില്‍ സമര്‍പ്പിക്കാന്‍ എക്‌സൈസ് അന്വേഷണസംഘം. പ്രതികളായ തസ്‌ലീമ സുല്‍ത്താന (ക്രിസ്റ്റീന -41), ഇവരുടെ ഭര്‍ത്താവും മുഖ്യസൂത്രധാരനുമായ സുല്‍ത്താന്‍ അക്ബര്‍ അലി (43), കൂട്ടാളി കെ. ഫിറോസ് (26) എന്നിവരുടെ ചോദ്യം ചെയ്യലില്‍നിന്ന് പ്രാഥമിക തെളിവുകളും വിവരങ്ങളും ലഭിച്ചു. എന്നാല്‍, ഇതിനു ബലമേകുന്ന ശാസ്ത്രീയ തെളിവുകള്‍ കൂടി സമാഹരിച്ച് കുറ്റപത്രം നല്‍കാനാണ് നീക്കം. പ്രതികളുടെ മൊബൈല്‍ ഫോണുകള്‍, അതിലെ രേഖകള്‍, ബാങ്ക് ഇടപാടുകള്‍ അടക്കമുള്ള വിവരങ്ങള്‍ ശാസ്ത്രീയമായി പരിശോധിക്കാന്‍ അയച്ചിട്ടുണ്ട്. ഇതു റിപ്പോര്‍ട്ടായി ലഭിക്കുമ്പോള്‍ കൃത്യതയോടെയും കുറ്റമറ്റതായും കോടതിയില്‍ സമര്‍പ്പിക്കാനാകും. ഇതിനായി വിവിധ പരിശോധനകളുടെ ശാസ്ത്രീയ പരിശോധനാ റിപ്പോര്‍ട്ട് വേഗത്തിലാക്കും. നടന്‍മാരായ ഷൈന്‍ ടോം ചാക്കോ, ശ്രീനാഥ് ഭാസി, കൊച്ചിയിലെ മോഡല്‍ എന്നിവരോട് തിങ്കളാഴ്ച ആലപ്പുഴ എക്‌സൈസ് ഡി.സി ഓഫിസില്‍ ഹാജരാകാന്‍ നോട്ടീസ് നല്‍കിയിട്ടുണ്ട്. ഇതുമായി ബന്ധമുള്ള റിയാലിറ്റി ഷോ താരവും സിനിമയിലെ അണിയറ പ്രവര്‍ത്തകനും ചൊവ്വാഴ്ച എത്തുമെന്നാണ് അന്വേഷണസംഘം നല്‍കുന്ന വിവരം. ഇതോടെ, കേസുമായി ബന്ധപ്പെട്ട് അഞ്ചു പ്രമുഖരെ ചോദ്യംചെയ്യും. ഇതിനു മുന്നോടിയായി കേസുമായി ബന്ധപ്പെട്ട് ഒട്ടേറെയാളുകളെ കസ്റ്റഡിയിലെടുത്ത് ചോദ്യംചെയ്ത് വിട്ടയച്ചു. വെള്ളിയാഴ്ചയും ലഹരി ഇടപാടുമായി ബന്ധപ്പെട്ട ചിലരെ വിളിപ്പിച്ചിരുന്നു. തസ്‌ലീമ പല പെണ്‍കുട്ടികളെയും പ്രമുഖര്‍ക്കായി എത്തിച്ചതായിട്ടാണ് വിവരം. ഇതിനൊപ്പം കഞ്ചാവ് ഇടപാടുകളും നടന്നതായിട്ടാണ് അന്വേഷണസംഘത്തിന്‍റെ കണ്ടെത്തല്‍.

പരുമലയിലും കാട്ടുപന്നി; പ്രദേശവാസികൾ ആശങ്കയിൽ

മാന്നാർ: മലയോര മേഖലകളിലെ കാട്ടുപന്നി ശല്യം കേട്ടറിവാണങ്കിൽ വനമേഖലയല്ലാത്തയിടങ്ങളിലും കാട്ടുപന്നിശല്യം രൂക്ഷമായിരിക്കുകയാണ്. പരുമലയുടെ പല ഭാഗങ്ങളിലും കാട്ടുപന്നി ശല്യം പതിവാണ്.പരുമലയിൽ തെരുവുനായ ശല്യം മൂലം പൊറുതിമുട്ടിയിരിക്കുമ്പോഴാണ് ഇപ്പോൾ കാട്ടുപന്നി ഭീഷണി ഉണ്ടായിരിക്കുന്നത്. പരുമല തിക്കപ്പുഴ ഭാഗത്താണ് കഴിഞ്ഞ ദിവസം വലിയ കാട്ടുപന്നിയെ കണ്ടത്. തിക്കപ്പുഴ എള്ളിട്ടക്കാട്ടിൽ വിനോദിന്‍റെ വീട്ടുമുറ്റത്താണ് കഴിഞ്ഞ ദിവസം പുലർച്ചെ കാട്ടുപന്നിയെ കണ്ടത്. പ്രഭാത സവാരിക്കായി ഇറങ്ങിയപ്പോൾ അസാധാരണമായി നായകൾ കുരയ്ക്കുന്നത് ശ്രദ്ധിച്ചപ്പോഴാണ് വീടിന്‍റെ മുറ്റത്ത് കാട്ടുപന്നി നിൽക്കുന്നതായി കണ്ടതെന്ന് വിനോദ് പറഞ്ഞു. ലൈറ്റിട്ട് വിനോദ് പുറത്തേക്കിറങ്ങിയപ്പോൾ കാട്ടുപന്നി തൊട്ടടുത്ത റബർത്തോട്ടത്തിലേക്ക് ഓടിമറഞ്ഞു. പിന്നീട് പ്രഭാത സവാരിക്കിറങ്ങിയ പലരും കാട്ടുപന്നിയെ കണ്ടതായി പറഞ്ഞു. പരുമലയിൽ കാട്ടുപന്നിയെ കണ്ടതോടെ പ്രദേശവാസികൾ ആശങ്കയിലാണ് .

പെൺകുട്ടികളുടെ നഗ്നഫോട്ടോകളും വിഡിയോകളും ഫോണിൽ: യുവാവ് പിടിയിൽ

ഹരിപ്പാട്: വിവിധ സമൂഹമാധ്യമങ്ങളിൽ വ്യാജ പ്രൊഫൈൽ നിർമിച്ച് പ്രായപൂർത്തിയാകാത്ത പെൺകുട്ടികളുടെ ഉൾപ്പെടെ ചിത്രങ്ങൾ മോർഫ് ചെയ്ത് പ്രചരിപ്പിക്കുന്ന സംഘത്തിലെ ഒരാളെ പോലീസ് അറസ്റ്റ് ചെയ്തു. വൈക്കം ടിവി പുരം ചെമ്മനത്തുകര നെടിയത്ത് വീട്ടിൽ എൻ.എ. അരുണാണ് (35) അറസ്റ്റിലായത്. ഹരിപ്പാട് സ്വദേശികളായ എട്ടുപേർ നൽകിയ പരാതിയിലാണ് അറസ്റ്റ്. ഫേസ് ബുക്ക് അക്കൗണ്ടിൽനിന്ന് ഫോട്ടോകൾ എടുത്ത് മോർഫ് ചെയ്ത് നഗ്നഫോട്ടോയാക്കി സോഷ്യൽ മീഡിയ വഴി പ്രചരിപ്പിക്കുന്നു എന്നാണ് പരാതി. പ്രായപൂർത്തിയാകാത്ത പെൺകുട്ടികളുടെയും വീട്ടമ്മമാരുടെയും ഫോട്ടോയാണ് മോർഫ് ചെയ്ത് പ്രചരിപ്പിച്ചത്. പോലീസ് സൈബർ സെല്ലിന്‍റെ സഹായത്തോടെ നടത്തിയ പരിശോധനയിൽ, ഇത്തരം ചിത്രങ്ങൾ പ്രചരിപ്പിച്ച വ്യാജ ഫേസ് ബുക്ക് അക്കൗണ്ടുകൾ ഉപയോഗിക്കുന്നത് അരുൺ ആണെന്ന് കണ്ടെത്തി. 2020 മുതൽ ഇയാൾ മോർഫ് ചെയ്ത നഗ്നഫോട്ടോകൾ പ്രചരിപ്പിച്ചിരുന്നതായി പോലീസ് കണ്ടെത്തിയിട്ടുണ്ട്. ഇയാളുടെ മൊബൈൽ ഫോണിൽ ആയിരത്തിലധികം പെൺകുട്ടികളുടെ മോർഫ് ചെയ്ത നഗ്ന ഫോട്ടോകളും വീഡിയോകളും ഉണ്ടെന്ന് പോലീസ് പറഞ്ഞു.

112ൽ പോലീസിനെ വിളിച്ച് വട്ടംചുറ്റിച്ച യുവാവ് അറസ്റ്റിൽ

ആലപ്പുഴ: എമർജൻസി കോൾ നമ്പറായ 112ൽ പോലീസിനെ വിളിച്ച് വട്ടംചുറ്റിച്ച യുവാവ് അറസ്റ്റിൽ. അമ്പലപ്പുഴ കരുമാടി പുത്തൻചിറയിൽ ധനീഷാണ് (33) അറസ്റ്റിലായത്. കഴിഞ്ഞ ദിവസം രാത്രി 12നാണ് പോലീസ് സഹായം തേടി ഫോൺ ചെയ്തത്. ഓച്ചിറയിലെ സൂപ്പർ മാർക്കറ്റിന് എതിർവശത്തെ ലോഡ്ജിൽ തന്നെ പൂട്ടിയിട്ടിരിക്കുന്നതായാണ് 112ൽ വിളിച്ചറിയിച്ചത്. ഈ വിവരം അവർ കായംകുളം സിആർവിക്ക് കൈമാറുകയും നിമിഷ നേരത്തിനുള്ളിൽ വാഹനം അവിടെ എത്തിയപ്പോൾ ലോഡ്ജ് അകത്തുനിന്നു പൂട്ടിയ നിലയിലുമായിരുന്നു. ലോഡ്ജിന്‍റെ ചുമതലക്കാരനെ ബന്ധപ്പെടാൻ ശ്രമിച്ചെങ്കിലും നടന്നില്ല. ഉദ്യോഗസ്ഥർ ധനുഷിനെ വീണ്ടും ബന്ധപ്പെട്ടപ്പോൾ മുറിയിലുണ്ടെന്ന് അറിയിച്ചു. തുടർന്ന് അഗ്നിരക്ഷാ സംഘത്തിന്‍റെ സഹായത്തോടെ പൂട്ട് അറുത്തുമാറ്റി അകത്തുകടന്ന് പരിശോധിച്ചെങ്കിലും ആരെയും കണ്ടെത്താനായില്ല. വീണ്ടും 112 ഫോൺവിളി വന്നതിനെത്തുടർന്ന് അന്വേഷണം നടത്തിയ എസ്ഐ രതീഷ് ബാബുവിന്‍റെ നേതൃത്വത്തിലുള്ള സംഘം മറ്റൊരു ലോഡ്ജിൽനിന്ന് ധനീഷിനെ കസ്റ്റഡിയിൽ എടുക്കുകയായിരുന്നു.

മാർപാപ്പയ്ക്കുവേണ്ടി പ്രാര്‍ഥനയും അനുസ്മരണ സമ്മേളനവും

ആലപ്പുഴ: ആലപ്പുഴ രൂപതയുടെ നേതൃത്വത്തില്‍ ഫ്രാന്‍സിസ് മാര്‍പാപ്പയ്ക്കുവേണ്ടി വിശുദ്ധബലി അര്‍പ്പണവും അനുസ്മരണ സമ്മേളനവും 25ന് വൈകുന്നേരം 4.30ന് ആലപ്പുഴ മൗണ്ട് കാര്‍മല്‍ കത്തീഡ്രലില്‍ നടത്തി. വികാരി ജനറാൾ മോണ്‍. ജോയ് പുത്തന്‍വീട്ടില്‍ മുഖ്യകാര്‍മികനായും രൂപതയിലെ മുഴുവന്‍ വൈദികരും സഹകാര്‍മികരായും വിശുദ്ധബലി അര്‍പ്പിച്ചു. ഫാ. യേശുദാസ് കാട്ടൂങ്കല്‍തയ്യില്‍ വചനപ്രഘോഷണം നടത്തി. രൂപതയിലെ ഇടവകകളില്‍നിന്നുമുള്ള പ്രതിനിധികള്‍ വിശുദ്ധ ബലിയില്‍ പങ്കുചേർന്നു. തുടര്‍ന്ന് മാര്‍പാപ്പയുടെ ചിത്രത്തിനു മുന്നില്‍ വിവിധ മതനേതാക്കളും സംഘടനാ ഭാരവാഹികളും പുഷ്പാര്‍ച്ചന നടത്തി. അനുസ്മരണ സമ്മേളനത്തില്‍ കൃഷി മന്ത്രി പി. പ്രസാദ്, ചിത്തരഞ്ജന്‍ എംഎൽഎ, കളക്ടര്‍ അലക്‌സ് വര്‍ഗീസ്, ഫാ. ബിജു കെ. ജോര്‍ജ്, മദര്‍ സിസ്റ്റർ ലീല ജോസ്, മദര്‍ സിസ്റ്റർ മാര്‍ഗരറ്റ് പീറ്റര്‍, കെ.ജി. ജഗദീശന്‍, പി.ജെ.ജെ. ആന്‍റണി, അലിയാര്‍ എം. മാക്കിയില്‍ എന്നിവര്‍ അനുസ്മര പ്രസംഗങ്ങള്‍ നടത്തിയതായി പിആര്‍ഒ ഫാ. സേവ്യര്‍ കുടിയാംശേരി അറിയിച്ചു.

മാര്‍പാപ്പയുടെ സ്മരണാര്‍ഥം സമൂഹബലി

ആലപ്പുഴ: പൂങ്കാവ് പള്ളിയില്‍ ഫ്രാന്‍സിസ് മാര്‍പാപ്പയുടെ സ്മരണാര്‍ഥം സമൂഹബലി നടത്തി. വൈദികര്‍ കറുപ്പു തിരുവസ്ത്രങ്ങളും സന്യാസിനികളും വിശ്വാസികളും കറുപ്പു ബാഡ്ജും അണിഞ്ഞാണ് ചടങ്ങുകളില്‍ പങ്കെടുത്തത്. വിശുദ്ധ കുര്‍ബാനയ്ക്ക് പൂങ്കാവ് പള്ളി വികാരി ഫാ. സേവ്യര്‍ ചിറമേല്‍ മുഖ്യ കാര്‍മികത്വം വഹിച്ചു. ഫാ. സേവ്യര്‍ ജിബിന്‍ കരിമ്പുറത്ത്, ഫാ. ജോസഫ് ബെനസ്റ്റ് ചക്കാലയ്ക്കല്‍, ബ്രദര്‍ ജോസഫ് സിറാജ്, ബ്രദര്‍ വി.വി. അഗസ്റ്റിന്‍ (ഇടുക്കി തങ്കച്ചന്‍) എന്നിവര്‍ പങ്കെടുത്ത ചടങ്ങില്‍ അന്യദേശങ്ങളില്‍നിന്നെത്തിയ വിശ്വാസികള്‍ അനുശോചനം രേഖപ്പെടുത്തി. വിശുദ്ധ കുര്‍ബാനയ്ക്കു ശേഷം നടന്ന മൗന ജാഥയിലും നിരവധിയാളുകള്‍ പങ്കെടുത്തു.

ഓട നിര്‍മാണം ഇഴയുന്നു; വേനല്‍മഴയില്‍ മുങ്ങി അരൂര്‍ ക്ഷേത്രം കവല

തുറവൂര്‍: അരൂര്‍-തുറവൂര്‍ ദേശീയപാതയില്‍ ഓടകളുടെ നിര്‍മാണം ഇഴയുന്നു. ഇതിനെത്തുടര്‍ന്നു കഴിഞ്ഞ ദിവസം പെയ്ത മഴയില്‍ അരൂര്‍ ക്ഷേത്രം കവലയില്‍ വലിയ വെള്ളക്കെട്ടാണ് രൂപപ്പെട്ടത്. ഇനിയും മഴ തുടാനുള്ള സാധ്യത നിലനില്‍ക്കേ ഇവിടുത്തെ ജനജീവിതം ദുഃസഹമായി. കഴിഞ്ഞ ദിവസങ്ങളില്‍ ജനങ്ങള്‍ മുട്ടൊപ്പം വെള്ളത്തിലാണ് സഞ്ചരിച്ചത്. കഴിഞ്ഞ രണ്ടു ദിവസമായി പെയ്ത മഴയിലാണ് കനത്ത വെള്ളക്കെട്ട് രൂപപ്പെട്ടത്. ദേശീയപാതയില്‍ അരൂര്‍-തുറവൂര്‍ ഉയരപ്പാത പണി നടക്കുന്നയിടങ്ങളില്‍ വെള്ളക്കെട്ട് രൂക്ഷമായി. അരൂര്‍, ചന്തിരൂര്‍, കൊച്ചുവെളിക്കവല, എരമല്ലൂര്‍, കോടംതുരുത്ത് എന്നിവിടങ്ങളിലാണ് ദുരിതമേറെയും. വെള്ളക്കെട്ട് ഒഴിവാക്കാന്‍ അരൂര്‍ മുതല്‍ തുറവൂര്‍ വരെ ഓട നിര്‍മിക്കാന്‍ ഉയരപ്പാത നിര്‍മാണവുമായി ബന്ധപ്പെട്ടു പദ്ധതിയുണ്ട്. എന്നാല്‍ പഞ്ചായത്തുകളുടെ അലംഭാവം മൂലം ഓട നിര്‍മാണം എങ്ങുമെത്തിയിട്ടില്ല. അരൂര്‍ മുതല്‍ തുറവൂര്‍ വരെ 12.75 കിലോമീറ്റര്‍ പാതയില്‍ 6.5 കിലോമീറ്ററും അരൂര്‍ പഞ്ചായത്തിന്‍റെ പരിധിയിലൂടെയാണ് കടന്നുപോകുന്നത്. എന്നിട്ടും പഞ്ചായത്ത് അധികൃതര്‍ വെള്ളക്കെട്ട് കണ്ടില്ലെന്നു നടിക്കുകയാണെന്നു ജനങ്ങള്‍ കുറ്റപ്പെടുത്തി.

പ്ലാസ്റ്റിക് മാലിന്യങ്ങള്‍ കൂട്ടിയിട്ട് കത്തിച്ചു; മൂന്നു സ്ഥാപനങ്ങള്‍ക്ക് പിഴ ചുമത്തി

കൊല്ലക്കടവ് : തദ്ദേശ സ്വയംഭരണ വകുപ്പ് ജില്ല എന്‍ഫോഴ്‌സ്മെന്‍റ് സ്‌ക്വാഡ് ചെറിയനാട് പഞ്ചായത്ത് പരിധിയില്‍ നടത്തിയ പരിശോധനയില്‍ നിയമ ലംഘനങ്ങള്‍ കണ്ടെത്തിയതിനെ തുടര്‍ന്ന് മൂന്ന് സ്ഥാപനങ്ങള്‍ക്ക് പിഴ ചുമത്തി. പ്ലാസ്റ്റിക് മാലിന്യങ്ങള്‍ കൂട്ടിയിട്ട് കത്തിച്ചു, അജൈവമാലിന്യങ്ങള്‍ അലക്ഷ്യമായി വലിച്ചെറിഞ്ഞു, മാലിന്യങ്ങള്‍ ശരിയായ രീതിയില്‍ സംസ്‌കരിച്ചില്ല തുടങ്ങിയ നിയമ ലംഘനങ്ങളാണ് എന്‍ഫോഴ്‌സ്മെന്‍റ് സ്‌ക്വാഡ് പരിശോധനയില്‍ കണ്ടെത്തിയത്. സ്ഥാപനങ്ങളിൽ നിന്ന് 15000 രൂപ പിഴ ഈടാക്കാനാണ് സ്‌ക്വാഡ് ശിപാര്‍ശ ചെയ്തത്. 15 സ്ഥാപനങ്ങളില്‍ നടത്തിയ പരിശോധനയില്‍ 31 കിലോ ഒറ്റത്തവണ ഉപയോഗ പ്ലാസ്റ്റിക് ഉത്പന്നങ്ങളും പിടികൂടി. ഏഴ് സ്ഥാപനങ്ങള്‍ക്ക് നോട്ടീസ് നല്‍കി. ജോയിന്റ് ബിഡിഒ ബിന്ദു വി നായര്‍, ശുചിത്വമിഷന്‍ റിസോഴ്സ് പേഴ്സണ്‍ എം.ബി. നിഷാദ്, പൊല്യൂഷന്‍ കണ്‍ട്രോള്‍ ബോര്‍ഡ് ഉദ്യോഗസ്ഥന്‍ ടി. യമുനേശന്‍, വില്ലേജ് എക്സ്റ്റന്‍ഷന്‍ ഓഫീസര്‍ പി.എസ്. സച്ചുമോന്‍ തുടങ്ങിയവര്‍ പരിശോധനയ്ക്ക് നേതൃത്വം നല്‍കി.

പ്രായപൂർത്തിയാകാത്ത പെൺകുട്ടിക്ക് പീഡനം: മാതാവും രണ്ടാനച്ഛനും അറസ്റ്റിൽ

മാന്നാർ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച സംഭവത്തിൽ രണ്ടാനച്ഛനും കുട്ടിയുടെ മാതാവും അറസ്റ്റിൽ. ചെന്നിത്തലയിൽ വാടകയ്ക്കു താമസിക്കുന്ന യുവതിയെയും രണ്ടാം ഭർത്താവിനെയുമാണ് അറസ്റ്റ് ചെയ്തത്. 2024 സെപ്റ്റംബറിലാണ് സംഭവം. പെൺകുട്ടി വീട്ടിൽ സിനിമ കണ്ടുകൊണ്ടിരുന്ന സമയത്താണ് രണ്ടാനച്ഛൻ കുട്ടിയെ പീഡിപ്പിച്ചത്. ഈ വിവരം മാതാവിനോടു കുട്ടി പറഞ്ഞെങ്കിലും യാതൊരുവിധമായ നടപടിയും മാതാവ് കൈക്കൊണ്ടിരുന്നില്ല. തുടർന്ന് രണ്ടാനച്ഛന്‍റെ ഭാഗത്തുനിന്നു കുട്ടിയെ മാനസികമായി തളർത്തുന്ന തരത്തിലുള്ള പെരുമാറ്റം തുടർന്നു വരികയായിരുന്നു. ഈ സംഭവവും കുട്ടി മാതാവിനോടു പറഞ്ഞെങ്കിലും കുട്ടിക്ക് അനുകൂലമായ നിലപാടൊന്നും ഉണ്ടായില്ല. ഈ മനോവിഷമത്തിൽ കുട്ടി നേരിട്ട് മാന്നാർ പോലീസ് സ്റ്റേഷനിൽ എത്തുകയും മുൻപു നടന്ന പീഡന വിവരം ഉൾപ്പടെ പറഞ്ഞു പരാതി നൽകുകയുമായിരുന്നു. തുടർന്ന് മാന്നാർ പോലീസ് ഇൻസ്പെക്ടർ രജീഷ് കുമാറിന്‍റെ നേതൃത്വത്തിൽ നടത്തിയ അന്വേഷണത്തിൽ എസ്ഐ ഗിരീഷ്കുമാർ, പ്രൊബേഷൻ എസ്ഐ ജോബിൻ, വനിതാ എഎസ്ഐ മാരായ സ്വർണരേഖ , രജിത , സിനിയർ സിപിഒ സുധീഷ്, സിപിഒ ഹരിപ്രസാദ് എന്നിവർ ചേർന്നാണ് പ്രതികളെ അറസ്റ്റ് ചെയ്തത്.

എഡിബിഎ: റോണി മാത്യു പ്രസിഡന്‍റ്, ജോണ്‍ ജോര്‍ജ് സെക്രട്ടറി

ആലപ്പുഴ: 2025-29-ലേക്കുള്ള ആലപ്പി ഡിസ്ട്രിക്ട് ബാസ്‌കറ്റ്ബോള്‍ അസോസിയേഷന്‍ (എഡിബിഎ) എക്‌സിക്യൂട്ടീവ് കമ്മിറ്റിയെ തെരെഞ്ഞെടുത്തു. ഭാരവാഹികളായി റോണിമാത്യു-പ്രസിഡന്‍റ്, അഡ്വ. പ്രിയദര്‍ശന്‍ തമ്പി, സെന്‍ കല്ലുപുര, ബിനു എം-വൈസ് പ്രസിഡന്‍റുമാർ, ജോണ്‍ ജോര്‍ജ്-സെക്രട്ടറി, ഹസീന അമന്‍-ജോയിന്‍റ് സെക്രട്ടറി, ജയിന്‍ ജോസ്-ട്രഷറര്‍, ബിബു പുന്നൂരാന്‍-കെബിഎ നോമിനി, ജോസ് സേവ്യര്‍- ഡിഎസ്‌സി നോമിനി, സി. ജയചന്ദ്രന്‍, എസ്. ഷഹബാസ്, ബി. സുഭാഷ്-എക്സിക്യൂട്ടീവ് കമ്മിറ്റി അംഗങ്ങള്‍. തോമസ് മത്തായി കരിക്കംപള്ളില്‍ നാമനിര്‍ദേശം നടത്തുകയും ബ്രിജിറ്റ് ജോസഫ് പിന്തുണയ്ക്കുകയും ചെയ്തു. അഡ്വ.പി.വി. തോമസ് റിട്ടേണിംഗ് ഓഫീസറായിരുന്നു. തെരെഞ്ഞെടുക്കപ്പെട്ട പ്രസിഡന്‍റ് സെക്രട്ടറിയും നേരത്തേ ആലപ്പുഴ വൈഎംസിഎ സെക്രട്ടറിമാരായി പ്രവര്‍ത്തിച്ചിട്ടുണ്ട്.

കൊല്ലം-തേനി ദേശീയപാത 183 വീതികൂട്ടൽ: അലൈൻമെന്‍റിൽ മാറ്റം വേണമെന്ന്

‌ചെങ്ങന്നൂർ: കൊല്ലം - തേനി ദേശീയപാത 183 വീതികൂട്ടുന്നതിന്‍റെ ഭാഗമായി ദേശീയപാത വികസന അഥോറിറ്റിയുടെ നിർദേശങ്ങൾ നടപ്പിലാക്കിയാൽ ചെങ്ങന്നൂർ മണ്ഡലത്തിൽ കൊല്ലകടവ് മുതൽ പ്രാവിൻകൂട് ജംഗ്ഷൻ വരെയുള്ള ഭാഗത്ത് ജനങ്ങൾക്കുണ്ടാകുന്ന ബുദ്ധിമുട്ടുകൾ പരിഹരിക്കാൻ അലൈൻമെന്‍റിൽ ആവശ്യമായ മാറ്റം വരുത്തണമെന്നു മന്ത്രി സജി ചെറിയാൻ നിർദേശിച്ചു. ദേശീയപാത വികസനവുമായി ബന്ധപ്പെട്ട് ചെങ്ങന്നൂർ മണ്ഡലത്തിലെ പ്രദേശവാസികളുടെ ആശങ്ക ചർച്ച ചെയ്യാനായി മന്ത്രി സജി ചെറിയാൻ പൊതുമരാമത്ത് വകുപ്പു മന്ത്രി പി.എ. മുഹമ്മദ് റിയാസുമായി കൂടിക്കാഴ്ച നടത്തി. പൊതുമരാമത്ത് വകുപ്പ് മന്ത്രിയുടെ ചേംബറിൽ ചേർന്ന യോഗത്തിൽ ദേശീയപാത അഥോറിറ്റിയും പൊതുമരാമത്ത് വകുപ്പ് ഉദ്യോഗസ്ഥരും പങ്കെടുത്തു. ചെങ്ങന്നൂര്‍ നഗരം ഒഴിവാക്കി പദ്ധതി നടപ്പാക്കാന്‍ ബദല്‍ നിര്‍ദേശങ്ങള്‍ പരിഗണിക്കണമെന്ന ആവശ്യം ശക്തമായി. ചെങ്ങന്നൂര്‍മുതല്‍ കോട്ടയംവരെ രണ്ടാം റീച്ചാണെങ്കിലും ഏറ്റവും ഒടുവിലായിരിക്കും പണിയുക. വ്യാപാരികളുടെയും തൊഴിലാളികളുടെയും ജീവിതമാര്‍ഗമടയുമെന്നതിനാല്‍ ബദല്‍ നിര്‍ദേശങ്ങള്‍ പരിഗണിക്കണമെന്നാണ് വ്യാപാരി സംഘടനകളും സിപിഎം, സിപിഐ സംഘടനകളും ആവശ്യപ്പെടുന്നത്. അതേസമയം ചെങ്ങന്നൂര്‍ നഗരത്തിലൂടെ വരുന്ന റോഡുവികസനത്തെക്കുറിച്ച് ദേശീയപാത വിഭാഗം ചര്‍ച്ച നടത്തിയില്ലെന്നാണ് വ്യാപാരി സംഘടനകളടക്കമുള്ളവര്‍ ഉന്നയിക്കുന്ന പ്രധാന വിമര്‍ശനം.

ബോധവത്കരണവും അനുമോദനവും

ഹരിപ്പാട്: ശ്രീനാരായണ ധർമപരിപാലനവേദി കാട്ടിൽ മാർക്കറ്റ് ആത്മവിദ്യാസംഘം ഗവ. എൽപി സ്കൂളിൽ ലഹരിവിരുദ്ധ ബോധവത്കരണ ക്ലാസും വിവിധ മേഖലകളിൽ മികവു തെളിയിച്ചവർക്ക് അനുമോദനവും സംഘടിപ്പിച്ചു. സീനിയർ സിവിൽ ജഡ്‌ജി പ്രമോദ് മുരളി ഉദ്ഘാടനം ചെയ്തു. കുമാരപുരം പഞ്ചായത്തംഗം വി. പ്രസന്ന അധ്യക്ഷയായി. കാർത്തികപള്ളി എക്സൈസ് ഇൻസ്പെക്ടർ വി. അരുൺ കുമാർ ക്ലാസെടുത്തു. ഹരിപ്പാട് സിപിഒ എ. നിഷാദ്, എംബിബിഎസ് വിജയി ഡോ. ഐശ്വര്യ എസ്. രാജേന്ദ്രൻ, എംബിബിഎസ് പ്രവേശനം ലഭിച്ച രോഹിത് പ്രമോദ്, വിവിധ പുരസ്കാരങ്ങൾ നേടിയ അമൃത വർഷിണി, വി. ശ്രേയസ്, ഗൗരിനന്ദ, എ.കെ. മധു തുടങ്ങിയവർ പ്രസംഗിച്ചു.

മേക്കാട് ക്ഷേത്രത്തിൽ കലശ മഹോൽസവം

മുഹമ്മ: മുഹമ്മ കാട്ടിപ്പറമ്പ് മേക്കാട് ഭദ്രകാളി-ഘണ്ഠാകർണ ക്ഷേത്രത്തിലെ കലശമഹോത്സവം തുടങ്ങി. 30ന് സമാപിക്കും. ദേവസ്വം പ്രസിഡന്‍റ് എൻ. കുഞ്ഞുമോൻ ഭദ്രദീപം തെളിച്ചു. ക്ഷേത്രം തന്ത്രി മാമണ്ണൂർ മനയിൽ സുരേഷ് നമ്പൂതിരിയുടെയും ക്ഷേത്രം മേൽശാന്തി ഹരീഷ് നമ്പൂതിരിയുടേയും മുഖ്യകാർമികത്വത്തിലാണ് ചടങ്ങുകൾ നടന്നത്. ദേവസ്വം പ്രസിഡന്‍റ് എൻ. കുഞ്ഞുമോൻ, സെക്രട്ടറി എസ്. സുജിത്, മാനേജൻ എൻ. രവീന്ദ്രൻ, ട്രഷറർ സുദർശന കുമാരി എന്നിവർ നേതൃത്വം നൽകി. തുടർന്ന് നാരായണീയം പാരായണം നടന്നു. 30 വരെ രാവിലെ ആറുമുതൽ ഭാഗവത പാരായണം. 30ന് കലശമഹോത്സവം, രാവിലെ എട്ടു മുതൽ കലശപൂജ, 11ന് കലശാഭിഷേകം, ഉച്ചയ്ക്ക് അന്നദാനം, വൈകിട്ട് 5.30 ന് നടതുറക്കൽ, 6.30ന് തിരുവാഭരണം ചാർത്തി ദീപാരാധന, രാത്രി ഏഴിന് മുഹമ്മ ശ്രീരഞ്ജിനി സ്കൂൾ ഓഫ് ഡാൻസ് അവതരിപ്പിക്കുന്ന നൃത്തസന്ധ്യ, എട്ടിന് അത്താഴപൂജ തുടർന്ന് വടക്കുപുറത്തു ഗുരുതി.

എവറസ്റ്റ് ബേസ് ക്യാമ്പ് കീഴടക്കിയ മോൻസി ജോണിനെ ആദരിച്ചു

മാങ്കാംകുഴി: ഹിമാലയവും എവറസ്റ്റ് ബേസ് ക്യാമ്പും കീഴടക്കി അഭിമാന നേട്ടം കൈവരിച്ച വ്യാപാരിയും പരിസ്ഥിതി സംരക്ഷണ പ്രവർത്തകനുമായ വെട്ടിയാർ ജെയ്മി ഭവനത്തിൽ മോൻസി ജോണിനെ കേരള വ്യാപാരി വ്യവസായി ഏകോപന സമിതി മാങ്കാംകുഴി യൂണിറ്റ് കമ്മിറ്റിയുടെ നേതൃത്വത്തിൽ അദ്ദേഹത്തിന്‍റെ വീട്ടിലെത്തി ആദരിച്ചു. അനുമോദന യോഗത്തിന്‍റെ ഉദ്‌ഘാടനവും മോൻസി ജോണിനുള്ള ഉപഹാര സമർപ്പണവും സംസ്ഥാന പ്രസിഡന്‍റ് രാജു അപ്സര നിർവഹിച്ചു.യൂണിറ്റ് പ്രസിഡന്‍റ്, ടി.എൻ. ദേവരാജ്‌കുമാർ അധ്യക്ഷത വഹിച്ചു. യൂണിറ്റ് ഭാരവാഹികളായ ശിവജി അറ്റ്‌ലസ്, നൗഷാദ് മാങ്കാംകുഴി, കെ.ആർ. പ്രഭാകരകുറുപ്പ്, രാജശേഖരൻപിള്ള, ടി. ഷാനുൽ, രാജഗോപാൽ, പി. അനീഷ്, മധുസൂദനൻ പിള്ള തുടങ്ങിയവർ പ്രസംഗിച്ചു.

മൂക്കുതുരുത്തി പാലം പുനർനിർമിക്കണം: ചമ്പക്കുളം വികസന സമിതി

മങ്കൊമ്പ്: ചമ്പക്കുളം പഞ്ചായത്ത്‌ പതിമൂന്നാം വാർഡിൽ കോയിക്കരിയിലുള്ള മൂക്കുതുരുത്തി പാലം പുനർനിർമിക്കണമെന്ന് ചമ്പക്കുളം വികസനസമിതി ആവശ്യപ്പെട്ടു. മാധവശേരി തോടിനു കുറുകെ മൂക്കുതുരുത്തി മോട്ടോർതറയ്ക്കു സമീപം വർഷങ്ങളായി നിലവിലുണ്ടായിരുന്ന പാലം പൊളിച്ചുനീക്കി പുതിയ പാലം നിർമിക്കുന്നതിന് നിരവധി വാർഷിക പദ്ധതികൾ കഴിഞ്ഞെങ്കിലും പാലം നിർമാണം ഇതുവരേയും ആരംഭിച്ചിട്ടില്ല. നിത്യേന നിരവധി ആളുകൾ യാത്ര ചെയ്തിരുന്നതും ഇരുചക്ര വാഹനങ്ങൾ ഉൾപ്പെടെ കടന്നു പൊയ്ക്കൊണ്ടിരുന്നതുമായ പാലം നിർമിക്കാത്തതുമൂലം പ്രദേശവാസികൾ അടയ്ക്കാമരവും മുളയുംകൊണ്ട് നിർമിച്ച പാലത്തിലൂടെയാണ് യാത്രചെയ്യുന്നത്. പാലം നിർമിക്കുന്നതിൽ കരാറുകരനും ബന്ധപ്പെട്ട അധികാരികളും കുറ്റകരമായ അനാസ്ഥ കാണിക്കുന്നതായി സമിതി ആരോപിച്ചു. പ്രഡിഡന്‍റ് ഡി. തങ്കച്ചന്‍റെ അധ്യക്ഷതയിൽ ചേർന്ന യോഗത്തിൽ അഗസ്റ്റിൻ ജോസ്, രാജു കോലപ്പള്ളി, ബി. ഹരികുമാർ, കെ.പി. ബാബു, എ.എസ്. സിന്ധുമോൾ എന്നിവർ പ്രസംഗിച്ചു.

എടത്വ പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് ഇന്നു കൊടിയേറും

എടത്വ: പ്രസിദ്ധ തീര്‍ഥാടനകേന്ദ്രമായ എടത്വ സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് ഇന്നു കൊടിയേറും. മേയ് 14ന് എട്ടാമിടത്തോടെ തിരുനാള്‍ സമാപിക്കും. പ്രധാന തിരുനാള്‍ മേയ് ഏഴിനാണ്. അന്ന് ഉച്ചകഴിഞ്ഞ് നാലിന് വിശുദ്ധന്‍റെ തിരുസ്വരൂപവും വഹിച്ചുള്ള ചരിത്രപ്രസിദ്ധമായ പ്രദക്ഷിണം പള്ളിക്കുചുറ്റും നടക്കും. എട്ടാമിടത്തിന് കുരിശടിയിലേക്കും പ്രദക്ഷിണമുണ്ടാകും. കേരളത്തിനു പുറമേ തമിഴ്‌നാട്, കര്‍ണാടകം, ആന്ധ്രാപ്രദേശ് തുടങ്ങിയ സംസ്ഥാനങ്ങളില്‍നിന്നുള്‍പ്പെടെയുള്ള ആയിരക്കണക്കിന് തീര്‍ഥാടകര്‍ തിരുനാളില്‍ പങ്കെടുക്കാനായി ഇന്നു മുതല്‍ എടത്വ പള്ളിയിലേക്ക് എത്തിച്ചേരും. മേയ് മൂന്നിനു രാവിലെ 5.45ന് ചങ്ങനാശേരി അതിരൂപത ആര്‍ച്ച്ബിഷപ് മാര്‍ തോമസ് തറയിലിന്‍റെ മുഖ്യകാര്‍മികത്വത്തില്‍ നടക്കുന്ന വിശുദ്ധ കുര്‍ബാനയ്ക്കു ശേഷം വിശുദ്ധ ഗീവര്‍ഗീസ് സഹദായുടെ തിരുസ്വരൂപം പള്ളിയുടെ പ്രധാനകവാടത്തില്‍ സ്ഥാപിക്കുന്നതോടെ പെരുന്നാളിന് തിരക്കേറും. ഇന്നു പുലര്‍ച്ചെ 5.45ന് മധ്യസ്ഥപ്രാര്‍ഥന, വിശുദ്ധ കുര്‍ബാന. തുടർന്ന് വികാരി ഫാ. ഫിലിപ് വൈക്കത്തുകാരന്‍റെ മുഖ്യകാര്‍മികത്വത്തില്‍ കൊടിയേറ്റും. നാളെ മുതല്‍ തിരുനാള്‍ ദിവസങ്ങളില്‍ എല്ലാ ദിവസവും 4.30ന് തമിഴ് കുര്‍ബാന, 5.45ന്, 7.45ന്, 10ന്, വൈകുന്നേരം നാലിന്, ആറിന് മധ്യസ്ഥ പ്രാര്‍ഥന, ലദീഞ്ഞ്, കുര്‍ബാന, രാത്രി ഏഴിന് കുരിശടിയില്‍ മധ്യസ്ഥ പ്രാര്‍ഥന എന്നിവ നടക്കും. മേയ് ഒന്നു മുതല്‍ എല്ലാ ദിവസവും ഉച്ചയ്ക്ക് 2.30ന് തമിഴില്‍ വിശുദ്ധ കുര്‍ബാനയും നടക്കും. മൂന്നിന് പാലക്കാട് സുല്‍ത്താന്‍പേട്ട് രൂപത ബിഷപ് റവ. ഡോ. പീറ്റര്‍ അബീര്‍ അന്തോനിസ്വാമിയുടെ കാര്‍മികത്വത്തിലും നാലിന് സീറോ മലബാര്‍ കുരിയാ ബിഷപ്പ് മാര്‍ സെബാസ്റ്റ്യന്‍ വാണിയപ്പുരയ്ക്കലിന്‍റെ കാര്‍മികത്വത്തിലും അഞ്ചിനു രാവിലെ 7.45ന് തിരുവല്ലാ അതിരൂപത ആര്‍ച്ച്ബിഷപ് തോമസ് മാര്‍ കുറിലോസിന്‍റെ മുഖ്യകാര്‍മികത്വത്തിലും ആറിനു രാവിലെ ഒന്‍പതിന് തക്കല രൂപത മത്രാന്‍ മാര്‍ ജോര്‍ജ് രാജേന്ദ്രന്‍റെ കാര്‍മികത്വത്തിലും ഉച്ചകഴിഞ്ഞ് 3.45ന് പാളയംകോട്ട് ബിഷപ് എമിരിറ്റസ് റവ. ഡോ. ജൂഡ് പോള്‍ രാജിന്‍റെ കാര്‍മികത്വത്തിലും ഏഴിനു രാവിലെ 5.45ന് ചങ്ങനാശേരി അതിരൂപത ആര്‍ച്ച്ബിഷപ് എമിരിറ്റൂസ് മാര്‍ ജോസഫ് പെരുന്തോട്ടത്തിലിന്‍റെ കാര്‍മികത്വത്തിലും മധ്യസ്ഥപ്രാര്‍ഥന, വിശുദ്ധ കുര്‍ബാന എന്നിവ നടക്കും. ആറിനു വൈകുന്നേരം അഞ്ചിന് ചെറിയ രൂപവും എുന്നള്ളിച്ചുള്ള പ്രദക്ഷിണം. പ്രധാന തിരുനാള്‍ദിനമായ ഏഴിന് വൈകുന്നേരം മൂന്നിന് തമിഴ് തിരുനാള്‍ വിശുദ്ധ കുര്‍ബാന - തൂത്തുക്കുടി രൂപത ബിഷപ് റവ. ഡോ. സ്റ്റീഫന്‍ ആന്‍റണി പിള്ളൈ കാര്‍മികത്വം വഹിക്കും. നാലിന് വിശുദ്ധ ഗീവര്‍ഗീസ് സഹദായുടെ അദ്ഭുത തിരുസ്വരൂപം വഹിച്ചുള്ള തിരുനാള്‍ പ്രദക്ഷിണം നടക്കും. ഫാ. ആന്‍ഡ്രൂസ് കുന്നത്ത് കാര്‍മികത്വം വഹിക്കും. ഏഴിനു വിശുദ്ധനെ വണങ്ങി അരി, മലര്‍, ഉപ്പ്, നല്ലമുളക്, കഴിനൂല്‍ എന്നീ നേര്‍ച്ചകള്‍ സ്വീകരിച്ച് തമിഴ്‌നാട്ടുകാര്‍ മടങ്ങുമ്പോള്‍ നാട്ടുകാരുടെ പെരുന്നാള്‍ തുടങ്ങും. 14ന് എട്ടാമിടത്തോടെ തിരുനാള്‍ സമാപിക്കും. 14ന് ഉച്ചയ്ക്ക് രണ്ടിന് ചങ്ങനാശേരി അതിരൂപത വികാരി ജനറാള്‍ റവ. ഡോ. സ്‌കറിയ കന്യാകോണിലിന്‍റെ കാര്‍മികത്വത്തില്‍ മധ്യസ്ഥപ്രാര്‍ഥന, ലദീഞ്ഞ്, കുര്‍ബാന. വൈകുന്നേരം നാലിന് കുരിശടിയിലേക്കു പ്രദക്ഷിണവും കൊടിയിറക്കവും. രാത്രി 9.30ന് വിശുദ്ധ ഗീവര്‍ഗീസ് സഹദായുടെ തിരുസ്വരൂപം തിരുനടയില്‍ പ്രതിഷ്ഠിക്കുന്നതോടെ തിരുനാള്‍ സമാപിക്കും. എടത്വ പള്ളിയില്‍ ഇന്ന്‌ എടത്വ സെന്‍റ് ജോര്‍ജ് ഫൊറോന പള്ളിയില്‍ രാവിലെ 5.45ന് സപ്രാ, മധ്യസ്ഥപ്രാര്‍ഥന, വിശുദ്ധ കുര്‍ബാന, തുടര്‍ന്ന് കൊടിയേറ്റ് - ഫാ. ഫിലിപ്പ് വൈക്കത്തുകാരന്‍ (വികാരി), 7.45 ന് മധ്യസ്ഥ പ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. സെബാസ്റ്റ്യന്‍ ചാമക്കാല, 10ന് വിശുദ്ധ കുര്‍ബാന (തമിഴ് സീറോ മലബാര്‍) - ഫാ. പീറ്റര്‍ കിഴക്കേതില്‍, ‌ഫാ. അജിന്‍ സി. ജോസഫ്, ഉച്ചയ്ക്ക് രണ്ടിന് വിശുദ്ധ കുര്‍ബാന (തമിഴ്) - ഫാ. സൈമണ്‍, വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. ജേക്കബ് കുഴിപ്പള്ളി, ആറിന് വിശുദ്ധ കുര്‍ബാന (തമിഴ്) - ഫാ. ദുരൈസ്വാമി, ഏഴിന് മധ്യസ്ഥപ്രാര്‍ഥന (കുരിശടിയില്‍).

എടത്വ സെന്‍റ് അലോഷ്യസ് 1974-75 എസ്എസ്എല്‍സി ബാച്ച് വീണ്ടും ഒത്തുകൂടി

എടത്വ: എടത്വ സെന്‍റ് അലോഷ്യസ് ഹൈസ്‌കൂള്‍ 1974-75 എസ്എസ്എല്‍സി ബാച്ചില്‍ പഠിച്ചവരും പഠിപ്പിച്ചവരും അതേ സ്‌കൂളില്‍ വീണ്ടും ഒത്തുകൂടി. പഠിച്ചിറങ്ങി 50 വര്‍ഷം തികഞ്ഞതിന്‍റെ ജൂബിലി ആഘോഷം സ്‌കൂളില്‍നിന്ന് എടത്വവരെ പൂര്‍വവിദ്യാര്‍ഥി മെഗാ സംഗമ വിളംബരജാഥ പുറപ്പെട്ടു തിരികെ പഠിച്ച അതേ സ്‌കൂളിന്‍റെ അങ്കണത്തില്‍ പൂര്‍വവിദ്യാര്‍ഥി ജൂബിലി മഹാസംഗമ പരിപാടിക്കായി അണിനിരന്നു. സ്‌കൂള്‍ മാനേജര്‍ ഫാ. ഫിലിപ്പ് വൈക്കത്തുകാരന്‍ ജൂബിലി മഹാസമ്മേളനം ഉദ്ഘാടനം നിര്‍വഹിച്ചു. മുന്‍ അധ്യാപകരായ തോമസുകുട്ടി കിളിരൂര്‍, കെ.ജെ. മത്തായി കറുകയില്‍, എം.എല്‍. ജേക്കബ് മെതിക്കളം, ജോര്‍ജുകുട്ടി കാവിലവീട്ടില്‍ എന്നിവരെ ആദരിച്ചു. 1975 എസ്എസ്എല്‍സി ബാച്ച് പൂര്‍വവിദ്യാര്‍ഥി അസോസിയേഷന്‍ പ്രസിഡന്‍റ് അഡ്വ. ഐസക് രാജു അധ്യക്ഷത വഹിച്ചു. ഉപഹാരമായി ലാപ്‌ടോപ് സ്‌കൂള്‍ ഹെഡ്മാസ്റ്റര്‍ ജിനോ ജോസഫിന് കൈമാറി. മുന്‍ അധ്യാപകന്‍ തോമസുകുട്ടി കിളിരൂര്‍, ഹെഡ്മാസ്റ്റര്‍ ജിനോ ജോസഫ്, അസോസിയേഷന്‍ സെക്രട്ടറി ജി.കെ. ജോസ് കളപ്പുരക്കല്‍, വൈസ് പ്രസിഡന്‍റ് തോമസ് കളങ്ങര, ജോയിന്‍റ് സെക്രട്ടറി എം.ജെ. മാത്യു മുണ്ടകത്തില്‍, ട്രഷറര്‍ സക്കറിയ പറപ്പള്ളില്‍, മോടി തോമസ്, എം.ജെ. ചെറിയാന്‍, ജോര്‍ജുകുട്ടി കളത്തില്‍ കോനാട്ട്, കെ.കെ. വിജയന്‍, വി. ഗ്രിഗറി, പി.ജെ. ചാക്കോ, എ.സി. ചാക്കോ, സേവ്യര്‍ ജോസഫ്, സാജന്‍ നൈനാന്‍, ഷാജി തോട്ടുകടവില്‍, ചെറിയാന്‍ ദേവസ്യ, ജോസ് വള്ളാംപറമ്പ്, എ.ഡി. ആന്‍റണി കൈനകരി, ആര്‍. മോഹനന്‍, ലോനപ്പന്‍ കുട്ടനാട് എന്നിവര്‍ പ്രസംഗിച്ചു. തുടര്‍ന്നു നടന്ന കുടുംബസംഗമ പരിപാടി ജില്ലാ പഞ്ചായത്ത് വികസന സ്ഥിരംസമിതി അധ്യക്ഷ ബിനു ഐസക് രാജു ഉദ്ഘാടനം ചെയ്തു. ഡയറക്ടറി പ്രകാശനം തകഴി പഞ്ചായത്ത് പ്രസിഡന്‍റ് എസ്. അജയകുമാര്‍ നിര്‍വഹിച്ചു. കലാപരിപാടികളും സ്‌നേഹവിരുന്നും നടത്തി.

നെഹ്‌റു ട്രോഫി വള്ളംകളി കൂടുതല്‍ പ്രഫഷണലാക്കും

ആലപ്പുഴ: നെഹ്‌റു ട്രോഫി വള്ളംകളി കൂടുതല്‍ പ്രഫഷണല്‍ ആകുന്നു. സ്റ്റാര്‍ട്ടിംഗ്, ഫിനിഷിംഗ് സംവിധാനങ്ങള്‍ കുറ്റമറ്റതാക്കാന്‍ ഇത്തവണ പ്രത്യേക നടപടികളുണ്ടാകും. തുടര്‍ച്ചയായ വര്‍ഷങ്ങളില്‍ പരാതികളുണ്ടാവുന്നത് ഇത്തവണ മത്സരം നേരത്തേ തുടങ്ങുന്നതു തുടങ്ങി നിരവധി വിഷയങ്ങളില്‍ കളക്ടര്‍ അലക്‌സ് വര്‍ഗീസ് വിളിച്ചു ചേര്‍ത്ത യോഗത്തില്‍ ചര്‍ച്ച ചെയ്തു. മുന്‍വര്‍ഷങ്ങളില്‍ ഉണ്ടായ അനുഭവങ്ങളാണ് യോഗം നേരത്തേ ചേരാന്‍ പ്രേരിപ്പിച്ചത്. സ്റ്റാര്‍ട്ടിംഗ് സംവിധാനത്തില്‍ പിഴവു സംഭവിക്കാനുള്ള സാധ്യതയാണ് ഏറ്റവും പ്രധാനമായി ചര്‍ച്ചചെയ്തത്. അടുത്ത തവണ ട്രാക്കുകളും പന്തലുകളും ഉള്‍പ്പെടെ ഉയര്‍ന്ന നിലവാരത്തിലുള്ളതാക്കാന്‍ ആലോചനയുണ്ട്. വിവിധ ചുമതലകളുള്ളവര്‍ക്കു യൂണിഫോം ഏര്‍പ്പെടുത്തിയേക്കും. വള്ളംകളി നടത്തിപ്പിന്‍റെ വിവിധ മേഖലകളില്‍ ആധുനിക ഉപകരണങ്ങള്‍ ഉപയോഗിക്കണമെന്ന നിര്‍ദേശം യോഗത്തിലുണ്ടായി. കഴിഞ്ഞ തവണ സ്റ്റാര്‍ട്ടിംഗിനെയും ഫിനിഷിംഗിനെയും സംബന്ധിച്ച് ഉയര്‍ന്ന പരാതികള്‍ വളരെ സൂക്ഷ്മമായി ചര്‍ച്ച ചെയ്തു. മത്സരം തുടങ്ങുന്ന സമയത്തു ട്രാക്കില്‍ ഒഫിഷ്യലുകളുടെ ബോട്ട് ഉണ്ടായിരുന്നെന്നും അതു മാറ്റാതെ സ്റ്റാര്‍ട്ടിംഗ് അനുവദിക്കരുതെന്നും പറഞ്ഞിട്ടും അതു പാലിച്ചില്ലെന്നു പരാതിയുണ്ടായി. ഫൈനലിലെ ഫിനിഷിംഗ് സമയം കണക്കാക്കിയതിനെപ്പറ്റിയുണ്ടായ പരാതി കോടതിയിലുമെത്തി. ഇത്തരം പ്രശ്‌നങ്ങള്‍ ഇത്തവണ ഒഴിവാക്കും. സ്റ്റാര്‍ട്ടിംഗ് സംവിധാനം നിലവിലുള്ള രീതിയില്‍ തന്നെയാകും ഘടിപ്പിക്കുന്നതെങ്കിലും വള്ളങ്ങളുടെ ചുണ്ട് ഒരേപോലെയാക്കിയ ശേഷമാകും സ്റ്റാര്‍ട്ടിംഗ്. കഴിഞ്ഞ വര്‍ഷത്തെപ്പോലെ ഒന്നിലേറെ വള്ളങ്ങള്‍ ഒരേ സമയം ഫിനിഷ് ചെയ്താല്‍ സൂക്ഷ്മതയ്ക്കായി സെക്കന്‍ഡിന്‍റെ നൂറിലൊരു അംശമാണോ ആയിരത്തിലൊന്നാണോ കണക്കാക്കേണ്ടത് എന്ന കാര്യത്തില്‍ നേരത്തേ വ്യക്തത വരുത്തും. ഇതുള്‍പ്പെടെ ഫിനിഷിംഗിനു മാനദണ്ഡങ്ങളുണ്ടാക്കാന്‍ വിദഗ്ധരുടെ സമിതി രൂപീകരിക്കും. തര്‍ക്കമുണ്ടായാല്‍ സമിതി പരിശോധിച്ച ശേഷമായിരിക്കും ഫലം പ്രഖ്യാപിക്കുക. സ്റ്റാര്‍ട്ടിംഗ് ഉള്‍പ്പെടെ സമിതി പരിശോധിക്കും. ഇത്തരം സാങ്കേതിക വശങ്ങളെല്ലാം ബന്ധപ്പെട്ടവര്‍ ക്യാപ്റ്റന്‍സ് ക്ലിനിക്കില്‍ വിശദീകരിക്കും. സബ് കലക്ടര്‍ സമീര്‍ കിഷന്‍, കെ.കെ. ഷാജു, സി.കെ. സദാശിവന്‍, ഇറിഗേഷന്‍ എക്‌സിക്യൂട്ടീവ് എന്‍ജിനിയര്‍ എം.സി. സജീവ് കുമാര്‍, തോമസ് ജോസഫ്, ആര്‍.കെ. കുറുപ്പ്, എസ്.എം ഇക്ബാല്‍ തുടങ്ങിയവര്‍ ചര്‍ച്ചകളില്‍ പങ്കെടുത്തു.

കെ. ഷിബുരാജന്‍ ആശാവര്‍ക്കേഴ്‌സ് കോണ്‍. സംസ്ഥാന വൈസ് പ്രസിഡന്‍റ്

ചെങ്ങന്നൂർ: ചെങ്ങന്നൂർ നഗരസഭാ വൈസ് ചെയർമാനും ഐഎൻടിയുസി ജില്ല സെക്രട്ടറിയുമായ കെ. ഷിബുരാജനെ ആശാ വർക്കേഴ്സ് കോൺഗ്രസ് സംസ്ഥാന വൈസ് പ്രസിഡന്‍റായി സംസ്ഥാന പ്രസിഡന്‍റ് ആർ. ചന്ദ്രശേഖരൻ നോമിനേറ്റ് ചെയ്തു. നാലു തവണ ചെങ്ങന്നൂർ കൗൺസിലർ, മുൻ നഗരസഭാ ചെയർമാൻ, നില വിൽ യുഡിഎഫ് പാർലമെന്‍ററി പാർട്ടിലീഡർ എന്നീ നിലകളിൽ പ്രവർത്തിക്കുന്ന ഇദ്ദേഹം വിദ്യാർഥി രാഷ്ട്രീയത്തിലൂടെ വളർന്നുവന്ന വ്യക്തിയാണ്. വിവിധ തൊഴിലാളിസംഘ ടനകളിലും സാംസ്കാരിക രംഗത്തും സജീവമായ ഇദ്ദേഹം കഴിഞ്ഞ 19 വർഷ മായി ആലപ്പുഴ ഡിസിസി അംഗമാണ്. മാധ്യമ പ്രവർത്തകരുടെ സംഘടനയായ ചെങ്ങന്നൂർ മീഡിയ സെന്‍ററിന്‍റെ പ്രസിഡന്‍റുമാണ് കെ. ഷിബുരാജൻ.

തിരുനാളാഘോഷവും വാർഷികധ്യാനവും

മങ്കൊമ്പ് : കൈനകരി തോട്ടുവാത്തല തിരുഹൃദയ പള്ളിയിൽ ഇടവകത്തിരുനാൾ മേയ് ഒന്നു മുതൽ നാലുവരെ നടക്കും. തിരുനാളിനു മുന്നോടിയായി ഫാ. ജോസഫ് പുത്തൻപുരയിൽ നയിക്കുന്ന വാർഷിക ധ്യാനത്തിനു തുടക്കമായി. പുളിങ്കുന്ന് ഫൊറോന വികാരി റവ.ഡോ. ടോം പുത്തൻകളം ധ്യാനം ഉദ്ഘാടനം ചെയ്തു. 30 വരെ ദിവസവും വൈകുന്നേരം 4.15ന് തിരുഹൃദയ ജപമാല, മധ്യസ്ഥപ്രാർഥന, വിശുദ്ധ കുർബാന, പ്രംസംഗം. 30ന് വൈകുന്നേരം 4.15ന് വിശുദ്ധ കുർബാന, പ്രസംഗം കർദിനാൾ മാർ ജോർജ് ആലഞ്ചേരി. തുടർന്ന് കലാസന്ധ്യ. മേയ് ഒന്നിന് വൈകുന്നേരം 4.15ന് തിരുഹൃദയ ജപമാല, കൊടിയേറ്റ് വികാരി ഫാ. സാവിയോ മാനാട്ട്. മധ്യസ്ഥപ്രാർഥന, ലദീഞ്ഞ്, വിശുദ്ധ കുർബാന, പ്രസംഗം, ഫാ.തോമസ് കാഞ്ഞിരവേലിൽ, രണ്ടിന് വൈകുന്നേരം 4.15ന് തിരുഹൃദയ ജപമാല, മധ്യസ്ഥപ്രാർഥന, ലദീഞ്ഞ്, വിശുദ്ധ കുർബാന, പ്രസംഗം ചങ്ങനാശേരി അതിരൂപത ആർച്ച്ബിഷപ് മാർ തോമസ് തറയിൽ. തുടർന്ന് സെമിത്തേരി സന്ദർശനം. മൂന്നിന് രാവിലെ 7.15ന് സപ്ര, ആഘോഷമായ വിശുദ്ധ കുർബാന സ്വീകരണം. ഫാ. ജയിംസ് മാളിയേക്കൽ, പ്രസംഗം ഫാ. ജോസഫ് ഏറത്ത്, 5.30ന് ആഘോഷമായ റംശാ, ഫാ. അനൂപ് കരിങ്ങാട്, തുടർന്ന് തിരുനാൾ പ്രദക്ഷിണം, 6.30ന് വചനപ്രഘോഷണം ചങ്ങനാശേരി അതിരൂപത വികാരി ജനറാൾ ഫാ. ആന്‍റണി ഏത്തയ്ക്കാട്, ആകാശവിസ്മയം, പ്രധാന തിരുനാൾ ദിനമായ നാലിന് രാവിലെ 9.30ന് സപ്ര, ആഘോഷമായ റാസ, ഫാ. ഷാജി തുമ്പേച്ചിറയിൽ. പ്രസംഗം ഫാ. ജിസൺ പോൾ വേങ്ങാശേരി. തിരുനാൾ പ്രദക്ഷിണം ഫാ. സോണി പള്ളിച്ചിറ, കൊടിയിറക്ക്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]