ADVERTISEMENT

ADVERTISEMENT

ചെറുകാട്ടൂരിൽ ശുചീകരണയജ്ഞം നടത്തി

ചെറുകാട്ടൂർ: "സ്വച്ഛ്താ ഹി സേവാ’ കാന്പയിനിന്‍റെ ഭാഗമായി സെന്‍റ് ജോസഫ്സ് സ്കൂളിന്‍റെ നേതൃത്വത്തിൽ ശുചീകരണയജ്ഞം സംഘടിപ്പിച്ചു. എസ്റ്റേറ്റുമുക്ക് മുതൽ ചെറുകാട്ടൂർ ടൗണ്‍ വരെ റോഡിന്‍റെ ഇരുവശവും വൃത്തിയാക്കി.

പനമരം പഞ്ചായത്ത് വൈസ് പ്രസിഡന്‍റ് തോമസ് പാറക്കാലായിൽ ഉദ്ഘാടനം ചെയ്തു. സ്കൂൾ മാനേജർ സിസ്റ്റർ മേരി, പ്രിൻസിപ്പൽ സിസ്റ്റർ ലൗലി, വൈസ് പ്രിൻസിപ്പൽ സിസ്റ്റർ ഡിറ്റി ജോസ് തുടങ്ങിയവർ നേതൃത്വം നൽകി.

ADVERTISEMENT

പെണ്‍കുട്ടികൾക്കുനേരേ ലൈംഗികാതിക്രമം: 67കാരൻ അറസ്റ്റിൽ

മാനന്തവാടി: രണ്ട് പെണ്‍കുട്ടികൾക്കുനേരേ ലൈംഗികാതിക്രമം നടത്തിയ കേസിൽ 67കാരൻ അറസ്റ്റിൽ. തലപ്പുഴ താഴെ ചിറക്കര മലക്കപ്പാടം അപ്പുക്കുട്ടനെയാണ്(67)തലപ്പുഴ പോലീസ് അറസ്റ്റുചെയ്തത്. കുട്ടികളുടെ മൊഴിയിൽ പോക്സോ നിയമത്തിലേതടക്കം വകുപ്പുകൾ പ്രകാരം രജിസ്റ്റർ ചെയ്ത രണ്ട് കേസുകളിലാണ് ഇയാളെ അറസ്റ്റുചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ഫുഡ് ഫെസ്റ്റിവൽ ആരംഭിച്ചു

കൽപ്പറ്റ: വൈവിധ്യങ്ങളായ ഭക്ഷണം അതിന്‍റെ തനതുരുചിയിലും ഗുണനിലവാരത്തിലും വയനാടിനെ അറിയിക്കുവാൻ ഓഷിൻ ഹോട്ടൽസ് ആൻഡ് റിസോർട്സ് ഫുഡ് ഫെസ്റ്റിവൽ ഓഷിൻ ഹോട്ടലിൽ ആരംഭിച്ചു. നാനാവിധ വിഭവങ്ങൾക്കൊപ്പം അവിടുത്തെ ശൈലികളും ഉപകരണങ്ങളും സന്ദർശകരെ പരിചയപ്പെടുത്തും. ഇത്തവണ കേരളത്തിന്‍റെ നെല്ലറയായ കുട്ടനാടാണ് പശ്ചാതലം. ഇതിനു മുൻപ് മലബാർ തക്കാരം ഫുഡ് ഫെസ്റ്റ് വളരെ വിജയകരമായി ചെയ്തിരുന്നു. വിവിധ രാജ്യങ്ങളുടെ വ്യത്യസ്തങ്ങളായ ആഹാരങ്ങളും രീതികൾ മനസിലാക്കാൻ കഴിയുമെന്നതിലുപരി വയനാടിന്‍റെ ടൂറിസ സാധ്യതകൾ ഉയർത്തുക എന്ന പരമായ ലക്ഷ്യം മുൻനിർത്തിയാണ് ഫുഡ് ഫെസ്റ്റിവൽ നടത്തുന്നതെന്ന് ഓഷിൻ ഗ്രൂപ്പ് മാനേജിംഗ് ഡയറക്ടർ ടി. ഷിഹാബും കോർപ്പറേറ്റ് ജനറൽ മാനേജർ യാക്കൂബ്, ഓഷിൻ ജനറൽ മാനേജർ മനോജ് കുമാർ, കുലിനറി ഡയറക്ടർ ഫൈസൽ, എക്സിക്യുട്ടീവ് ഷെഫ് റെജി എന്നിവർ അവകാശപ്പെട്ടു.

ജില്ലയിലെ ബാങ്കുകൾ നാലാം പാദത്തിൽ 8,332 കോടി വായ്പ നൽകി

കൽപ്പറ്റ: ജില്ലയിലെ ബാങ്കുകൾ നടപ്പുസാന്പത്തിക വർഷം നാലാം പാദത്തിൽ 8,332 കോടി രൂപ വായ്പ നൽകി. മുൻഗണനാ വിഭാഗത്തിൽ 6,374 കോടിയും മറ്റു വിഭാഗത്തിൽ 1,958 കോടിയും രൂപയാണ് വിതരണം ചെയ്തത്. കാർഷിക വായ്പയായി 4,855 ഉം സൂക്ഷ്മ-ചെറുകിട-ഇടത്തരം സംരംഭങ്ങൾ ഉൾപ്പെടുന്ന നോണ്‍ ഫാർമിംഗ് സെക്ടറിൽ 1,022 ഉം മറ്റ് മുൻഗണനാ വിഭാഗങ്ങളിൽ 497 ഉം കോടി രൂപ വായ്പ നൽകി.

വന്യജീവി സങ്കേതത്തിൽ രണ്ടിടങ്ങളിൽ റേഞ്ച് ഓഫീസർമാരില്ല

സുൽത്താൻബത്തേരി: കാട്ടാനശല്യം വർധിക്കുന്പോഴും വന്യജീവി സങ്കേതത്തിൽ രണ്ടിടങ്ങളിൽ രണ്ട് മാസമായി റേഞ്ച് ഓഫീസർമാരില്ല. ബത്തേരി റേഞ്ചിലും എലഫന്‍റ് സ്ക്വാഡ് ആൻഡ് ആർആർടി റേഞ്ചിലുമാണ് ഓഫീസർമാരില്ലാത്തത്. ജില്ലയിൽ ഏറ്റവും കൂടുതൽ കാട്ടാനശല്യം നേരിടുന്നതാണ് ബത്തേരി റേഞ്ചിന് പരിധിയിലുള്ള പ്രദേശങ്ങൾ. കാട്ടാനകൾ ജനവാസ കേന്ദ്രങ്ങളിലെത്തി വിളനാശവും ആക്രമണവും നടത്തുന്പോൾ വേഗത്തിലെത്തി സേവനം നൽകേണ്ട വിഭാഗമാണ് എലഫന്‍റ് സ്ക്വാഡ് ആൻഡ് ആർആർടി. കുറിച്യാട് അസിസ്റ്റന്‍റ് വൈൽഡ് ലൈഫ് വാർഡനാണ് രണ്ട് മാസമായി ബത്തേരി റേഞ്ചിന്‍റെ ചുമതല. ആർആർടി റേഞ്ച് ഓഫീസർ മേപ്പാടി റേഞ്ചിലേക്ക് സ്ഥലംമാറിയതോടെ ചുമതല മുത്തങ്ങ അസിസ്റ്റന്‍റ് വൈൽഡ് ലൈഫ് വാർഡനാണ്. സ്വന്തം റേഞ്ചുകളുടെ ഭാരിച്ച ഉത്തരവാദിത്വം ഉള്ളപ്പോഴാണ് ഇവർക്ക് മറ്റ് റേഞ്ചുകളുടെ ചുമതല കൂടി വഹിക്കേണ്ടിവരുന്നത്. ഇത് നാല് റേഞ്ചുകളിലും പ്രവർത്തനതാളം തെറ്റുന്നതിന് കാരണമാകുകയാണ്.

കെപിസിസി പുനഃസംഘടന തെരഞ്ഞെടുപ്പ് പ്രവര്‍ത്തനങ്ങളുടെ ലോഞ്ചിംഗ്: വി.ഡി. സതീശന്‍

പുല്‍പ്പള്ളി: കോണ്‍ഗ്രസിന്റെ തെരഞ്ഞെടുപ്പ് പ്രവര്‍ത്തനങ്ങളുടെ ലോഞ്ചിംഗ് ആണ് കെപിസിസി പുനഃസംഘടനയിലൂടെ നടന്നതെന്ന് പ്രതിപക്ഷ നേതാവ് വി.ഡി. സതീശന്‍. സീതാമൗണ്ടില്‍ മാധ്യമപ്രവര്‍ത്തകരുമായി സംസാരിക്കുകയായിരുന്നു അദ്ദേഹം. പുനഃസംഘടനയിലൂടെ തെരഞ്ഞെടുത്തത് മികച്ച ടീമിനെയാണ്. ഇത് കോണ്‍ഗ്രസിന്റെയും യുഡിഎഫിന്റെയും ഐതിഹാസികമായ തിരിച്ചുവരവിന് വഴിയൊരുക്കും. കെപിസിസി ഭാരവാഹികളെ പ്രഖ്യാപിച്ചപ്പോള്‍ എല്ലാവര്‍ക്കും സന്തോഷം തോന്നി. കൂടിയാലോചനകള്‍ക്കു ശേഷമാണ് പുനഃസംഘടന നടത്തിയത്. സണ്ണി ജോസഫ് കരുത്തനായ നേതാവാണ്. ഡിസിസി പ്രസിഡന്‍റ്, പാര്‍ലമെന്‍റേറിയന്‍, അഭിഭാഷകന്‍, പൊളിറ്റിക്കല്‍ അഫയേഴ്സ് കമ്മിറ്റി അംഗം, സംഘാടകന്‍ എന്നീ നിലകളില്‍ ശ്രദ്ധേയമായ പ്രവര്‍ത്തനം നടത്തിയ വ്യക്തിയാണ് അദ്ദേഹം. 2026ലെ നിയമസഭാ തെരഞ്ഞെടുപ്പില്‍ യുഡിഎഫ് നൂറിലധികം സീറ്റുകള്‍ നേടി അധികാരത്തില്‍ വരാനുള്ള പദ്ധതിയുമായാണ് കോണ്‍ഗ്രസ് മുന്നോട്ടുപോകുന്നത്. ഇതിന് പാര്‍ട്ടിയിലെ മുതിര്‍ന്നവരും യുവാക്കളും വനിതകളും ഉള്‍പ്പെടെയുള്ളവരുടെ കൂട്ടായ പരിശ്രമമാണ് നടക്കുന്നത്. കെ. സുധാകരന്‍ പാര്‍ട്ടിയുടെ മുന്‍നിരയില്‍ത്തന്നെയുണ്ടാകും. സുധാകരനും താനും നല്ല സുഹൃത്തുക്കളാണ്. ഒരിക്കല്‍പോലും അദ്ദേഹവുമായി പിണങ്ങിയിട്ടില്ല. മാധ്യമങ്ങള്‍ എത്രയോ വാര്‍ത്തകളുണ്ടാക്കി. അപ്പോഴെല്ലാം അദ്ദേഹം ഇതെന്താണെന്ന് വിളിച്ച് അന്വേഷിക്കുമായിരുന്നുവെന്നും സതീശന്‍ പറഞ്ഞു.

നടപ്പാതയിലെ വേലിയുടെ ഇരുന്പുബാറിൽ തട്ടി കുട്ടിയുടെ മുഖത്ത് മുറിവേറ്റു

മീനങ്ങാടി: നടപ്പാതയിലെ വേലിയിൽ അലങ്കാരത്തിന്‍റെ ഭാഗമായി സ്ഥാപിക്കുന്ന പൂച്ചെടികൾ കാൽനട യാത്രക്കാർക്ക് ഭീഷമിയായി. ഇന്നലെ ഉച്ചയ്ക്ക് ടൗണിൽ പൂച്ചെടിയോടനുബന്ധിച്ചുള്ള ഇരുന്പുബാറിൽ തട്ടി പുഴങ്കുനി സ്വദേശിയായ ആണ്‍കുട്ടിയുടെ മുഖത്ത് ആഴത്തിൽ മുറിവേറ്റു. കുട്ടിക്ക് കമ്മ്യൂണിറ്റി ഹെൽത്ത് സെന്‍ററിൽ ചികിത്സ നൽകി. നടപ്പാത വേലിയിലെ അപകടസാധ്യത ഒഴിവാക്കാൻ ബന്ധപ്പെട്ടവർക്ക് നിർദേശം നൽകിയതായി പഞ്ചായത്ത് ഭരണസമിതി അംഗവും കോണ്‍ഗ്രസ് നേതാവുമായ ബേബി വർഗീസ് പറഞ്ഞു.

പുഞ്ചിരിമട്ടം ദുരന്തം: യോഗക്ഷേമസഭ നിർമിച്ച വീടിന്‍റെ കൈമാറ്റം 12ന്

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിത കുടുംബത്തിന് യോഗക്ഷേമസഭ കണിയാന്പറ്റ ചീക്കല്ലൂരിൽ നിർമിച്ച വീടിന്‍റെ(ശങ്കരഭവനം) കൈമാറ്റം 12ന് രാവിലെ 11ന് സഹകരണ, തുറമുഖ, ദേവസ്വം മന്ത്രി വി.എൻ. വാസവൻ നിർവഹിക്കും. യോഗക്ഷേമസഭ സംസ്ഥാന പ്രസിഡന്‍റ് അക്കീരമണ്‍ കാളിദാസ ഭട്ടതിരിപ്പാട് അധ്യക്ഷത വഹിക്കും. ടി. സിദ്ദിഖ് എംഎൽഎ മുഖ്യപ്രഭാഷണം നടത്തും. യോഗക്ഷേമസഭ സംസ്ഥാന ജനറൽ സെക്രട്ടറി കൊടുപ്പുന്ന കൃഷ്ഷൻ പോറ്റി, ട്രഷറർ പി.എം. ദാമോദരൻ നന്പൂതിരി, മനോജ് കൊട്ടാരം, കണിയാന്പറ്റ പഞ്ചായത്ത് പ്രസിഡന്‍റ് കെ.വി. രജിത തുടങ്ങിയവർ പങ്കെടുക്കും. ചീക്കല്ലൂരിൽ അഞ്ച് സെന്‍റ് സ്ഥലം വിലയ്ക്കുവാങ്ങി 23 ലക്ഷം രൂപ ചെലവിലാണ് 750 ചതുരശ്ര അടി വിസ്തീർണമുള്ള വീടിന്‍റെ നിർമാണം പൂർത്തിയാക്കിയതെന്ന് യോഗക്ഷേമസഭ ജില്ലാ പ്രസിഡന്‍റും ഭവന നിർമാണ സമിതി കണ്‍വീനറുമായ മധു എസ്. നന്പൂതിരി, പി. ഈശ്വരൻ നന്പൂതിരി എന്നിവർ വാർത്താസമ്മേളനത്തിൽ പറഞ്ഞു. തരുവണയ്ക്കു സമീപം നിർധന കുടുംബത്തിന് യോഗക്ഷേമസഭ നിർമിച്ചുനൽകുന്ന വീടിന്‍റെ ശിലാസ്ഥാപനം 11ന് രാവിലെ 11ന് സംസ്ഥാന പ്രസിഡന്‍റ് നിർവഹിക്കുമെന്ന് അവർ അറിയിച്ചു.

മസിനഗുഡിയിൽ 16 കാമറകൾ സ്ഥാപിക്കുന്നു

ഗൂഡല്ലൂർ: മുതുമല വന്യജീവി സങ്കേതത്തിലെ മസിനഗുഡിയിൽ 16 നവീന കാമറകൾ സ്ഥാപിക്കുന്നു. വനമേഖല നിരീക്ഷിക്കുന്നതിന് വേണ്ടിയാണിത്. പോലീസിന്‍റെ നേതൃത്വത്തിലാണ് കാമറകൾ സ്ഥാപിക്കുന്നത്. പ്രവൃത്തികളുടെ ഉദ്ഘാടനം ജില്ലാ പോലീസ് സൂപ്രണ്ട് എം.എസ്. നിഷ നിർവഹിച്ചു. ഗൂഡല്ലൂർ ഡിവൈഎസ്പി വസന്തകുമാർ, എസ്ഐ ശിവകുമാർ തുടങ്ങിയവർ സംബന്ധിച്ചു.

കാൻവാസ് ചിത്രരചന നടത്തി

പുൽപ്പള്ളി: പഹൽഗാമിലെ ഭീകരാക്രമണത്തിന് കനത്ത തിരിച്ചടി നൽകിയ ഇന്ത്യൻ സേനയ്ക്ക് അഭിവാദ്യമർപ്പിച്ച് പുൽപ്പള്ളി പ്രസ് ക്ലബിന്‍റെ നേതൃത്വത്തിൽ പുൽപ്പള്ളി ടൗണിൽ ബിഗ് കാൻവാസ് ചിത്ര രചന നടത്തി. കുട്ടികളുൾപ്പെടെയുള്ള കലാകാരൻമാർ ചിത്രരചനയിൽ പങ്കുചേർന്നു. വിമുക്ത ഭടൻമാരും പരിപാടിയിൽ പങ്കെടുത്തു. പുൽപ്പള്ളി ബസ് സ്റ്റാൻഡ് പരിസരത്താണ് ബിഗ് കാൻവാസ് ഒരുക്കിയത്. പഞ്ചായത്ത് പ്രസിഡന്‍റ് ടി.എസ്. ദിലീപ്കുമാർ ഉദ്ഘാടനം ചെയ്തു. പ്രസ് ക്ലബ് പ്രസിഡന്‍റ് ബെന്നി മാത്യു അധ്യക്ഷത വഹിച്ചു. സെക്രട്ടറി ബാബു വടക്കേടത്ത്, പി.പി. സണ്ണി, എം.ടി. ബിനു, സി.ഡി. ബാബു, പി.ആർ. ഗിരീഷ്, അരവിന്ദ് സി. പ്രസാദ്, മാത്യു മത്തായി ആതിര, ബൈജു നന്പിക്കൊല്ലി, കെ.ഡി. ഷാജിദാസ്, ബേബി കാലിക്കാത്തടം, ലിയോ ജോണി, അജേഷ് കുമാർ, ലിയോ ടോം എന്നിവർ പ്രസംഗിച്ചു.

സിജി കമ്മ്യൂണിറ്റി ഡവലപ്മെന്‍റ് സെന്‍റർ ഉദ്ഘാടനം നാളെ

കൽപ്പറ്റ: സെന്‍റർ ഫോർ ഇൻഫർമേഷൻ ആൻഡ് ഗൈഡൻസ് ഇന്ത്യയുടെ(സിജി) നേതൃത്വത്തിൽ മേപ്പാടി ആസ്ഥാനമായി കമ്മ്യൂണിറ്റി ഡവലപ്മെന്‍റ് സെന്‍ററർ പ്രവർത്തനം തുടങ്ങുന്നു. സാന്പത്തികമായും സാമൂഹികമായും പിന്നാക്കം നിൽക്കുന്നവരും പാർശ്വവത്കരിക്കപ്പെട്ടവരുമായ ജനവിഭാഗങ്ങളുടെ ഉന്നമനം ലക്ഷ്യമാക്കി ആരംഭിക്കുന്നതെന്ന് പ്രോഗ്രാം കോ ഓർഡിനേറ്റർ സുഫൈദ് കൊടക്കൽ, സിജി ജില്ലാ പ്രസിഡന്‍റ് ഡോ. ബാവ കെ. പാലുകുന്ന്, എസ്. ഉമ്മർ, മജീദ് തെനേരി എന്നിവർ വാർത്താസമ്മേളനത്തിൽ അറിയിച്ചു. സെന്‍ററിന്‍റെ ഉദ്ഘാടനം നാളെ രാവിലെ 10ന് മേപ്പാടി അക്ഷര ലൈബ്രറി ഹാളിൽ ടി. സിദ്ദിഖ് എംഎൽഎ നിർവഹിക്കും. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ പദ്ധതിരേഖ പ്രകാശനം ചെയ്യും. മേപ്പാടി പഞ്ചായത്ത് പ്രസിഡന്‍റ് കെ. ബാബു ലോഗോ പ്രകാശനം നിർവഹിക്കും. ജില്ലാ പഞ്ചായത്ത് വൈസ് പ്രസിഡന്‍റ് എസ്. ബിന്ദു, മൂപ്പൈനാട്പഞ്ചായത്ത് പ്രസിഡന്‍റ് ആർ. ഉണ്ണിക്കൃഷ്ണൻ, സിജി എക്സിക്യൂട്ടീവ് കമ്മിറ്റി അംഗം എ.പി. നിസാം, പ്രോജക്ട് ഡയറക്ടർ കെ. മുഹമ്മദ് ഷാ, മുഹമ്മദ് അലി ഓവിങ്ങൽ, പി.ടി. അഷ്റഫ് തുടങ്ങിയവർ പ്രസംഗിക്കും. തൊഴിൽ സംരംഭകത്വ പരിശീലനം, ഉപരിപഠന മാർഗനിർദേശം, സാന്പത്തിക സാക്ഷരത, ആരോഗ്യ ബോധവത്കരണം തുടങ്ങിയ മേഖലകളിൽ സൗജന്യ സേവനം സെന്‍റർ മുഖേന ലഭ്യമാക്കും. ദിവസ വേതന തൊഴിലാളികൾ, കുറഞ്ഞ വരുമാനക്കാരായ കുടുംബങ്ങൾ, സ്ത്രീകൾ, ഭിന്നശേഷിക്കാർ എന്നിവരുടെ ജീവിത നിലവാരം മെച്ചപ്പെടുത്തുന്നതിന് സർക്കാർ, സർക്കാർ ഇതര ഏജൻസികൾ, വിദ്യാഭ്യാസ സ്ഥാപനങ്ങൾ, പൊതു സംരംഭങ്ങൾ എന്നിവയുമായി സഹകരിച്ച് പദ്ധതികൾ നടപ്പാക്കും.

ന്യൂ ഇന്ത്യ ലിറ്ററസി പ്രോഗ്രാം ജില്ലാതല റിസോഴ്സ് പേഴ്സണ്‍ പരിശീലനം നടത്തി

കൽപ്പറ്റ: സാക്ഷരതാ മിഷന്‍റെ നേതൃത്വത്തിൽ നടത്തുന്ന ന്യൂ ഇന്ത്യ ലിറ്ററസി പ്രോഗ്രാം പഞ്ചായത്ത്തല റിസോഴ്സ് പേഴ്സണ്‍മാർക്കുള്ള ജില്ലാതല പരിശീലനം ജില്ലാ പഞ്ചായത്ത് വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ഉഷ തന്പി ഉദ്ഘാടനം ചെയ്തു. ന്യൂ ഇന്ത്യ ലിറ്ററസി പ്രോഗ്രാമിന്‍റെ മൂന്നാം ഘട്ടത്തിലേക്ക് 16 തദ്ദേശ സ്വയംഭരണ സ്ഥാപനങ്ങളെയാണ് നിലവിൽ തെരഞ്ഞെടുത്തിട്ടുള്ളത്. തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടർ കെ.കെ. വിമൽരാജ് അധ്യക്ഷത വഹിച്ച പരിപാടിയിൽ ജില്ലാ പഞ്ചായത്ത് സെക്രട്ടറി ബെന്നി ജോസഫ് മുഖ്യപ്രഭാഷണം നടത്തി. റിസോഴ്സ് പേഴ്സണ്‍മാരായ കെ.കെ. ചന്ദ്രശേഖരൻ, കെ.വി. വത്സല, ബൈജു ഐസക്, ജില്ലാ കോഓർഡിനേറ്റർ പി. പ്രശാന്ത്കുമാർ, സ്റ്റാഫ് പി.വി. ജാഫർ എന്നിവർ പങ്കെടുത്തു.

സമഗ്ര ഗുണമേൻമ വിദ്യാഭ്യാസ പദ്ധതി ഉദ്ഘാടനം

വെള്ളമുണ്ട: കുട്ടികളിലെ അക്കാദമിക് മികവും ഗുണനിലവാരവും കൂടുതൽ മെച്ചപ്പെടുത്തുന്നതിനു സർക്കാർ നടപ്പാക്കുന്ന സമഗ്ര ഗുണമേൻമ വിദ്യാഭ്യാസ പദ്ധതിയുടെ എയുപി സ്കൂൾതല ഉദ്ഘാടനം ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി നിർവഹിച്ചു. വിദ്യാർഥികൾക്ക് തുല്യതയിൽ ഉൗന്നിയുള്ള വിദ്യാഭ്യാസം ഉറപ്പുവരുത്തുാൻ പദ്ധതിയിലൂടെ സാധിക്കുമെന്നു അദ്ദേഹം പറഞ്ഞു. പിടിഎ വൈസ് പ്രസിഡന്‍റ് കെ. മമ്മൂട്ടി അധ്യക്ഷത വഹിച്ചു. ഹെഡ്മിസ്ട്രസ് ഷൈല പുത്തൻ പുരയ്ക്കൽ, എ. രാജഗോപാൽ, പി. അബ്ബാസ്, വി. സന്ധ്യ, വി.എം. രോഷ്നി എന്നിവർ പ്രസംഗിച്ചു. പനമരം: ഗവ.ഹയർ സെക്കൻഡറി സ്കൂളിൽ സമഗ്ര ഗുണമേൻമ വിദ്യാഭ്യാസ പദ്ധതി സമിതി രൂപീകരണ യോഗം ജില്ലാ പഞ്ചായത്ത് അംഗം ബിന്ദു പ്രകാശ് ഉദ്ഘാടനം ചെയ്തു. പിടിഎ പ്രസിഡന്‍റ് സി.കെ. മുനീർ അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം സജീഷ് സെബാസ്റ്റ്യൻ, വാർഡ് അംഗം എം. സുനിൽകുമാർ, പ്രിൻസിപ്പൽ രമേഷ്കുമാർ, ഹെഡ്മിസ്ട്രസ് ഷീജ ജയിംസ്, പിടിഎ പ്രതിനിധികൾ, എസ്എംസി, ബിആർസി അംഗങ്ങൾ തുടങ്ങിയവർ പങ്കെടുത്തു. സമഗ്ര ഗുണമേൻമ പദ്ധതി രൂപരേഖ തയാറാക്കി.

കുറുവ ദ്വീപിൽ സന്ദർശകത്തിരക്കേറുന്നു

മാനന്തവാടി: വിഖ്യാത പരിസ്ഥിതി സൗഹൃദ വിനോദസഞ്ചാരകേന്ദ്രമായ കുറുവ ദ്വീപിൽ സന്ദർശകത്തിരക്കേറുന്നു. കഴിഞ്ഞ ആറുമാസത്തിനിടെ ഏകദേശം 50 ലക്ഷം രൂപയാണ് കേന്ദ്രത്തിൽ വരുമാനം. വന സംരക്ഷണ സമിതി ജീവനക്കാരൻ പാക്കം വെള്ളച്ചാലിൽ പോൾ കാട്ടാന ആക്രമണത്തിൽ കൊല്ലപ്പെട്ടതിനെത്തുടർന്ന് അടച്ചിട്ട കുറുവ വിനോദ സഞ്ചാര കേന്ദ്രം സന്ദർശകരുടെ എണ്ണം നിയന്ത്രിച്ചും പ്രവേശന ടിക്കറ്റ് നിരക്ക് വർധിപ്പിച്ചും 2024 ഒക്ടോബർ 15നാണ് തുറന്നത്. ഇതിനുശേഷം ഇതുവരെ ഡിടിപിസി നിയന്ത്രണത്തിലുള്ള പാൽവെളിച്ചം വഴി മാത്രം 37,928 പേർ ദ്വീപ് സന്ദർശിച്ചു. റാഫ്റ്റിംഗ് ഇനത്തിൽ 23,58,200 രൂപയും കയാക്കിംഗ് ഇനത്തിൽ 3,10,200 രൂപയും വരുമാനം ലഭിച്ചു. മധ്യവേനലവധി ആരംഭിച്ച ഏപ്രിലിൽ 7,171 പേർ ദ്വീപ് സന്ദർശിച്ചു. 11,48,835 രൂപ വരുമാനം ലഭിച്ചു. ദ്വീപിൽ പ്രവേശനത്തിന് നികുതി ഉൾപ്പെടെ മുതിർന്നവർക്ക് 220 ഉം കുട്ടികൾക്ക് 100 ഉം രൂപയാണ് ഫീസ്. കയാക്കിംഗ് രണ്ടുപേർക്ക് 300 ഉം റാഫ്റ്റിംഗിനു 100 ഉം രൂപയാണ് നിരക്ക്. പാക്കം ചെറിയമല വഴിയും പാൽവെളിച്ചം വഴിയും ദിവസം 244 പേരെയാണ് ദ്വീപിൽ പ്രവേശിപ്പിക്കുന്നത്. നിയന്ത്രണങ്ങളിൽ ഇളവുവരുത്തി കൂടുതൽ സഞ്ചാരികൾക്ക് പ്രവേശനം അനുവദിക്കുന്നതിന് നടപടി വേണമെന്ന ആവശ്യം പൊതുവേ ഉയരുന്നുണ്ട്.

മഴക്കാല മുന്നൊരുക്കം : ദുരിതാശ്വാസ ക്യാന്പുകൾക്കു സ്കൂൾ ഇതര കെട്ടിടങ്ങൾ കണ്ടെത്തണമെന്ന് ജില്ലാ കളക്ടർ

കൽപ്പറ്റ: മഴക്കാലത്ത് ആളുകളെ മാറ്റിപാർപ്പിക്കാൻ സ്കൂളുകൾ അല്ലാത്ത സുരക്ഷിത കെട്ടിടങ്ങൾ പഞ്ചായത്തുകൾ കണ്ടെത്തണമെന്ന് ജില്ലാ കളക്ടർ ഡി.ആർ. മേഘശ്രീ. കളക്ടറേറ്റിൽ മഴക്കാല മുന്നൊരുക്ക അവലോകന യോഗത്തിൽ അധ്യക്ഷത വഹിച്ചു സംസാരിക്കുകയായിരുന്നു അവർ. ദുരിതാശ്വാസ ക്യാന്പുകളായി ഉപയോഗപ്പെടുത്തുന്നതിന് കണ്ടെത്തിയ 251 ഇടങ്ങളിൽ അധികവും സ്കൂൾ കെട്ടിടങ്ങളാണ്. വിദ്യാലയങ്ങളിൽ ക്യാന്പ് പ്രവർത്തിക്കുന്നത് കുട്ടികളുടെ പഠനം മുടങ്ങുന്നതിന് കാരണമാകും. ഈ സാഹചര്യം ഒഴിവാക്കണം. സുരക്ഷിതമായ മറ്റു കെട്ടിടങ്ങൾ കണ്ടെത്തുന്നതിന് തദ്ദേശഭരണ ജോയിന്‍റ് ഡയറക്ടർ പഞ്ചായത്തുകളുടെ യോഗം വിളിച്ചശേഷം റിപ്പോർട്ട് നൽകണമെന്ന് കളക്ടർ ആവശ്യപ്പെട്ടു. ജില്ലയിൽ പൊതുമരാമത്ത് റോഡുകളിലെ കുഴി അടയ്ക്കുന്ന പ്രവൃത്തി 80 ശതമാനം പൂർത്തിയായതായി പൊതുമരാമത്ത്(റോഡ്)വിഭാഗം ഉദ്യോഗസ്ഥർ അറിയിച്ചു. ബാക്കി പ്രവൃത്തി മഴക്കാലത്തിനു മുന്പ് തീർക്കും. വൈദ്യുത ലൈനുകളിലേക്ക് ചാഞ്ഞ മരങ്ങളും ചില്ലകളും വെട്ടിമാറ്റുന്നത് ഹൈടെൻഷൻ ലൈനിൽ 80 ശതമാനം പൂർത്തിയായതായി കഐസ്ഇബി ഉദ്യോഗസ്ഥർ വ്യക്തമാക്കി. കെഎസ്ഇബിയുടെ 18 സെക്ഷനുകളിലും അതത് പഞ്ചായത്ത് പ്രതിനിധികളെ ഉൾപ്പെടുത്തി യോഗം ചേർന്ന് അപകടാവസ്ഥയിലുള്ള മരങ്ങളും ചില്ലകളും മുറിച്ചുമാറ്റിയെന്ന് ഉറപ്പുവരുത്തണമെന്ന് കളക്ടർ നിർദേശിച്ചു. അപകടാവസ്ഥയിലുള്ള കെട്ടിടങ്ങളുടെ പട്ടിക പഞ്ചായത്തുതലത്തിൽ ശേഖരിക്കണം. കുളം നവീകരണം, ബണ്ട് നിർമാണം എന്നിങ്ങനെ ജലസ്രോതസുകൾ ശുദ്ധീകരിക്കുന്ന 411 പ്രവൃത്തികൾ തൊഴിലുറപ്പ് പദ്ധതിയിൽ ഉൾപ്പെടുത്തി ഏപ്രിലിനുശേഷം നടത്തിയതായി താഴിലുറപ്പ് വിഭാഗം ഉദ്യോഗസ്ഥർ അറിയിച്ചു. പടിഞ്ഞാറത്തറ ഡാം അറ്റകുറ്റപ്പണി പൂർത്തിയാക്കിയതായി അവർ വ്യക്തമാക്കി. ഗ്രാമീണ റോഡുകൾ ജലവിതരണ പദ്ധതിക്കായി പൊളിച്ചശേഷം കുഴി മണ്ണിട്ട് മൂടാത്തത് ഭീഷണിയാണെന്ന് അന്പലവയൽ പഞ്ചായത്ത് പ്രസിഡന്‍റ് ടി.കെ. ഹഫ്സത്ത് ചൂണ്ടിക്കാട്ടി. അപകടാവസ്ഥയിലുള്ള മരങ്ങൾ മുറിക്കുന്നതിൽ പൊതുമരാമത്ത് വിഭാഗം കാലവിളംബം വരുത്തുന്നതായി മേപ്പാടി പഞ്ചായത്ത് പ്രസിഡന്‍റ് കെ. ബാബു പറഞ്ഞു. ഉൾക്കാടുകളിൽ പെയ്യുന്ന മഴയുടെ വിവരം ലഭ്യമാക്കണമെന്ന് ജില്ലാ കളക്ടർ വനം വകുപ്പിന് നിർദേശം നൽകി. സുഗന്ധഗിരി ഭാഗത്ത് മൊബൈൽ കവറേജ് പ്രശ്നം ഉള്ളതിനാൽ ആശയ വിനിമയത്തിന് ബദൽ സംവിധാനമുണ്ടാക്കണം. പുഞ്ചിരിമട്ടം ഉരുൾപൊട്ടലിന്‍റെ അവശിഷ്ടങ്ങൾ മഴക്കാലത്ത് അപകടങ്ങൾ വരുത്താതിരിക്കാൻ നടപടികൾ സ്വീകരിക്കണമെന്നു കളക്ടർ നിർദേശിച്ചു. കഴിഞ്ഞ വർഷങ്ങളിൽ ജില്ലയിൽ ലഭിച്ച മഴ, സംഭവിച്ച ഉരുൾപൊട്ടൽ, മണ്ണിടിച്ചിൽ, കാലാവസ്ഥാമാറ്റം, ജനസംഖ്യാ വർധന, അപകട ഭീഷണിയുള്ള സ്ഥലങ്ങൾ, പ്രതിരോധ നടപടികൾ എന്നിവ വിശദീകരിച്ച് ഹ്യൂം സെന്‍റർ ഫോർ ഇക്കോളജി ആൻഡ് വൈൽഡ്ലൈഫ് ബയോളജി ഡയറക്ടർ സി.കെ. വിഷ്ണുദാസ് അവതരണം നടത്തി. ജില്ലയിലെ 21 ശതമാനം പ്രദേശങ്ങളിൽ ഉരുൾപൊട്ടലിന് സാധ്യതയുണ്ട്. 48 ശതമാനം പ്രദേശങ്ങൾ ശരാശരി സാധ്യതയുള്ള വിഭാഗത്തിലും 30 ശതമാനം പ്രദേശങ്ങൾ സാധ്യത കുറഞ്ഞ വിഭാഗത്തിലുമാണെന്ന് വിഷ്ണുദാസ് ചൂണ്ടിക്കാട്ടി. ജൂണ്‍ മുതൽ ജില്ലയിലെ ഓരോ മലനിരകളിലും പെയ്യുന്ന മഴ കൃത്യമായി നിരീക്ഷിക്കേണ്ടതുണ്ട്. നിലവിൽ ജില്ലയിൽ 260 മാപിനികളിൽനിന്നു മഴയുടെ തോത് ദിവസേന ശേഖരിക്കുന്നുന്നുണ്ടെന്നു വിഷ്ണുദാസ് പറഞ്ഞു. എഡിഎം കെ, ദേവകി, സബ് കളക്ടർ മിസാൽ സാഗർ ഭരത്, തദ്ദേശസ്വയംഭരണ ജോയിന്‍റ് ഡയറക്ടർ കെ. കെ. വിമൽരാജ് തുടങ്ങിയവരും യോഗത്തിൽ പങ്കെടുത്തു.

എൻ.എസ്. ജസിയെ ആദരിച്ചു

പുൽപ്പള്ളി: കവയിത്രിയും അധ്യാപികയുമായ എൻ.എസ്. ജസിയെ വയനാട് സിറ്റി ക്ലബിന്‍റെ നേതൃത്വത്തിൽ ആദരിച്ചു. ചെതലയത്ത് റേഞ്ച് ഫോറസ്റ്റ് ഓഫീസർ എം.കെ. രാജീവ്കുമാർ ഉദ്ഘാടനം ചെയ്തു. മെമന്‍റോ സമർപ്പണം അദ്ദേഹം നിർവഹിച്ചു. ബെന്നി മാത്യു അധ്യക്ഷത വഹിച്ചു. സി.ഡി. ബാബു, പി.എ. ഡീവൻസ്, ജോണ്‍സൻ വിരിപ്പാമറ്റത്തിൽ എന്നിവർ പ്രസംഗിച്ചു.

സൈന്യത്തെ അഭിനന്ദിച്ചു

കൽപ്പറ്റ: കാഷ്മീരിലെ പഹൽഗാമിൽ 26 സഞ്ചാരികളെ വധിച്ച ഭീകരർക്കും അവരെ പിന്തുണച്ച പാക്കിസ്ഥാനും ഓപ്പറേഷൻ സിന്ദൂർ എന്ന പേരിൽ ചുട്ട മറുപടി നൽകിയ ഇന്ത്യൻ സൈന്യത്തെ സീനിയർ സിറ്റിസണ്‍സ് കോണ്‍ഗ്രസ് ജില്ലാ കമ്മിറ്റി അഭിനന്ദിച്ചു. പ്രസിഡന്‍റ് കെ.വി. പോക്കർ ഹാജി അധ്യക്ഷത വഹിച്ചു. ഡിസിസി പ്രസിഡന്‍റ് എൻ.ഡി. അപ്പച്ചൻ മുഖ്യപ്രഭാഷണം നടത്തി. ജോർജ് മുണ്ടയ്ക്കൽ, സി.പി. വർഗീസ്, എൻ.ആർ. സോമൻ, വി.എ. മജീദ്, ഇ.വി. ഏബ്രഹാം, എം.എം. ശാന്തകുമാരി, സി. രാജീവ്, ആർ. രാജൻ, സെയ്ത് മേപ്പാടി എന്നിവർ പ്രസംഗിച്ചു.

നഴ്സസ് വാരാഘോഷം തുടങ്ങി

കൽപ്പറ്റ: ഒരാഴ്ച നീളുന്ന നഴ്സസ് വാരാഘോഷത്തിന് ജില്ലയിൽ തുടക്കമായി. ബത്തേരി അസംപ്ഷൻ കോളജ് ഓഫ് നഴ്സിംഗ് ഓഡിറ്റോറിയത്തിൽ ജില്ലാ നഴ്സിംഗ് ഓഫീസർ ബിനിമോൾ തോമസ് പതാക ഉയർത്തി. എംസിഎച്ച് ഓഫീസർ മജോ ജോസഫ് നഴ്സസ് പ്രതിജ്ഞ ചൊല്ലിക്കൊടുത്തു. ജില്ലാ മെഡിക്കൽ ഓഫീസർ ഡോ.ടി. മോഹൻദാസ് ഉദ്ഘാടനം ചെയ്തു. അസംപ്ഷൻ കോളജ് ഓഫ് നഴ്സിംഗ് പ്രിൻസിപ്പൽ പ്രഫ.സ്മിതാറാണി, വിനായക ആശുപത്രി മാനേജിംഗ് ഡയറക്ടർ ഡോ. മധുസൂദനൻ, ജില്ലാ എഡ്യുക്കേഷൻ ആൻഡ് മീഡിയ ഓഫീസർ കെ.എം. മുസ്തഫ, വിനായക ആശുപത്രി നഴ്സിംഗ് സൂപ്രണ്ട് പി.പി. സിസിലി, അസംപ്ഷൻ ആശുപത്രി അഡ്മിനിസ്ട്രേറ്റർ സിസ്റ്റർ ആൻസി മരിയ, മീനങ്ങാടി പബ്ലിക് ഹെൽത്ത് നഴ്സ് സൂപ്രണ്ട് എസ്. സുലേഖ, ബത്തേരി താലൂക് ഹെഡ് ക്വാർട്ടേഴ്സ് ആശുപത്രി പബ്ലിക് ഹെൽത്ത് നഴ്സ് പി. നിർമല, കൈനാട്ടി ജനറൽ ആശുപത്രി പബ്ലിക് ഹെൽത്ത് നഴ്സ് സുബൈറത്ത്, കെജിജെപിഎച്ച്എൻ പ്രസിഡന്‍റ് കെ. ബിന്ദു, കെജിഎൻഎ പ്രസിഡന്‍റ് വി. എസ്. റഷീദ, ബത്തേരി താലൂക്ക് ഹെഡ് ക്വാർട്ടേഴ്സ് ആശുപത്രി നഴ്സിംഗ് ഓഫീസർ രശോബ് കുമാർ, ഓൾ കേരള എംഎൽഎസ്പി അസോസിയേഷൻ പ്രതിനിധി സിനി ഐസക്, അലോണ, ക്രിസ്റ്റീന ബിനോയ് എന്നിവർ പങ്കെടുത്തു. ’നമ്മുടെ നഴ്സുമാർ, നമ്മുടെ ഭാവി, നഴ്സുമാർക്കുള്ള പരിചരണം, സന്പദ് വ്യവസ്ഥകളുടെ ശക്തീകരണം’ എന്നതാണ് ഈ വർഷത്തെ അന്താരാഷ്ട്ര നഴ്സസ് ദിന പ്രമേയം. 12 വരെ നടക്കുന്ന വാരാഘോഷത്തിന്‍റെ ഭാഗമായി കലാ-കായിക-സാഹിത്യ മത്സരങ്ങൾ, മികച്ച പ്രവർത്തനം കാഴ്ചവച്ച നഴ്സുമാർക്കുള്ള അനുമോദനം എന്നിവ നടക്കും. 12ന് പനമരത്ത് മന്ത്രി ഒ.ആർ. കേളു സമാപന സമ്മേളനം ഉദ്ഘാടനം ചെയ്യും.

64-ാം വയസിലും യുവത്വത്തിന്‍റെ പ്രസരിപ്പുമായി തോമസ്

കൽപ്പറ്റ: ലഹരിക്കെതിരേ പോരാടി വിജയിച്ച ഒരു വയനാട്ടുകാരന്‍റെ അസാധാരണ കഥയുടെ ചുരുളഴിയുന്ന കാഴ്ചയ്ക്കാണ് കായിക വകുപ്പിന്‍റെ നേതൃത്വത്തിൽ സംഘടിപ്പിച്ച ലഹരിവിരുദ്ധ സന്ദേശയാത്രയോടനുബന്ധിച്ച് നടന്ന മാരത്തണ്‍ സാക്ഷ്യം വഹിച്ചത്. പനമരം മുതൽ വള്ളിയൂർക്കാവ് ജംഗ്ഷൻ വരെ നടന്ന മാരത്തണിൽ പങ്കെടുത്ത തോമസ് പള്ളിത്താഴത്ത് എന്ന 64കാരന്‍റെ ജീവിതം ലഹരിയുടെ നീരാളിപ്പിടുത്തത്തിൽനിന്നു ആരോഗ്യകരമായ ജീവിതത്തിലേക്കുള്ള മാറ്റത്തിന്‍റെ നേർക്കാഴ്ചയാണ്. മുംബൈയിൽനിന്നു ഡൽഹി, കൊൽക്കത്ത, ആസാം തുടങ്ങിയ സ്ഥലങ്ങളിലേക്ക് ചരക്കുമായി പോകുന്ന ട്രക്ക് ഡ്രൈവറായിരുന്നു ചെറുപ്പത്തിൽ തോമസ്. ചില ദുശീലങ്ങൾ അദ്ദേഹത്തിനുണ്ടായിരുന്നു. 50-ാം വയസിൽ ആരോഗ്യപ്രശ്നങ്ങൾ അലട്ടിത്തുടങ്ങിയതോടെയാണ് തോമസ് ജീവിതത്തെക്കുറിച്ച് ഗൗരവമായി ചിന്തിച്ചുതുടങ്ങിയത്. മക്കളുടെ വിദ്യാഭ്യാസം കഴിയുന്നതുവരെയെങ്കിലും ജോലി ചെയ്യണമെന്ന ആഗ്രഹവും അതിന് ആരോഗ്യം അനിവാര്യമാണെന്ന തിരിച്ചറിവും അദ്ദേഹത്തെ ഓട്ടത്തിന്‍റെ ലോകത്തേക്ക് കൈപിടിച്ചുയർത്തി. ആദ്യഘട്ടത്തിൽ മുംബൈയിലോ ഡൽഹിയിലോ ലോറി നിർത്തിയിട്ട് ഒന്നോ രണ്ടോ കിലോമീറ്റർ ഓടിത്തുടങ്ങിയ തോമസ്, പതിയെ മാരത്തണ്‍ ഓട്ടക്കാരനായി മാറി. ഈ മാറ്റം ഹോബിയിൽ ഒതുങ്ങിയില്ല. ടാറ്റാ മുംബൈ മാരത്തോണിൽ 60 വയസിനു മുകളിലുള്ളവരുടെ വിഭാഗത്തിൽ 21 കിലോമീറ്റർ മീറ്റ് റെക്കോർഡോടെ സ്വർണം നേടാൻ തോമസിന് കഴിഞ്ഞു. മക്കളുടെ വിദ്യാഭ്യാസം പൂർത്തിയായി, അവർക്ക് ജോലിയായി, സ്വന്തമായി വീടായി എന്ന ഘട്ടമെത്തിയപ്പോൾ 60-ാം വയസിൽ തോമസ് വീണ്ടും പഴയ ജീവിതശൈലിയിലേക്ക് വഴുതിപ്പോയിരുന്നു. വല്ലപ്പോഴുമുള്ള മദ്യപാനം ആരോഗ്യത്തെ ബാധിച്ചു. ഓരോ മാരത്തണിലും പ്രകടനം മോശമാകുന്നത് അദ്ദേഹം തിരിച്ചറിഞ്ഞു. ഈ സമയത്താണ്, ന്ധ80 കഴിഞ്ഞാലും നിങ്ങൾ വൃദ്ധനാകുന്നില്ല, നിങ്ങളുടെ ചിന്തകൾക്ക് വാർധക്യം ബാധിച്ചാൽ മാത്രമേ നിങ്ങൾ വൃദ്ധനാകൂന്ധ എന്ന വാചകം അദ്ദേഹത്തിന്‍റെ ശ്രദ്ധയിൽപ്പെട്ടത്. ലഹരി പൂർണമായും ഉപേക്ഷിച്ചും ഭക്ഷണശീലങ്ങളിൽ മാറ്റംവരുത്തിയും തോമസ് വീണ്ടും ട്രാക്കിലേക്ക് ശക്തമായി തിരിച്ചുവന്നു. 55-ാം വയസിൽ ഓടിയതിനേക്കാൾ മികച്ച സമയത്തിൽ 21 കിലോമീറ്ററും 42 കിലോമീറ്ററും ഓടാൻ ഇപ്പോൾ കഴിയുന്നുണ്ടെന്ന് തോമസ് പറയുന്നു. പ്രായം മനസിനെ തളർത്താത്തിടത്തോളം ശരീരത്തെയും അത് ബാധിക്കില്ല എന്നതിനു ജീവിക്കുന്ന തെളിവാണ് തോമസ്. ഒരു ലോക മീറ്റിൽ മെഡൽ വയനാട്ടിലെത്തിക്കുക എന്ന ലക്ഷ്യത്തോടെ തോമസ് കഠിന പരിശീലനം തുടരുകയാണ്. എഴുത്തുവഴിയിലും തോമസ് കയ്യൊപ്പ് ചാർത്തിയിട്ടുണ്ട്. ‘ട്രക്കിലും ട്രാക്കിലും’ എന്ന പേരിൽ അദ്ദേഹം രചിച്ച പുസ്തകം സന്തോഷ് ജോർജ് കുളങ്ങരയാണ് പ്രകാശനം ചെയ്തത്. ഇപ്പോൾ രണ്ടാമത്തെ പുസ്തകത്തിന്‍റെ പണിപ്പുരയിലാണ്. കായികവകുപ്പ് സംഘടിപ്പിച്ച ലഹരി വിരുദ്ധ സന്ദേശയാത്രയിലും മാരത്തണിലും പങ്കെടുക്കാനായതിൽ അതീവ സന്തോഷമുണ്ടെന്ന് തോമസ് പറഞ്ഞു.

ലഹരിക്കെതിരേ ചുവടുവയ്പ്: സൂംബ നൃത്തം ശ്രദ്ധേയമായി

മാനന്തവാടി: കായിക വകുപ്പിന്‍റെ നേതൃത്വത്തിൽ സംഘടിപ്പിച്ച ലഹരി വിരുദ്ധ സന്ദേശയാത്രയുടെ ഭാഗമായി മീനങ്ങാടി അത്ലറ്റിക്സ് അക്കാദമിയിലെ കുട്ടികൾ അവതരിപ്പിച്ച സൂംബ നൃത്തം ശ്രദ്ധേയമായി. അന്പതോളം കുട്ടികളാണ് നൃത്തം അവതരിപ്പിച്ചത്. കുരുന്നുകൾ മുതൽ കൗമാരക്കാർ വരെ ചടുല ചുവടുകളുമായി നൃത്തത്തിൽ പങ്കാളികളായി. സൂംബ പോലുള്ള വ്യായാമ മുറകൾ കുട്ടികൾക്ക് വേഗത്തിൽ പഠിക്കാനും ആസ്വദിക്കാനും സാധിക്കുന്നതും ശരീരത്തിന് വലിയ അളവിൽ ഉൗർജം നൽകുന്നതും ആണെന്ന് പരിശീലക ജ്യോതികുമാർ പറഞ്ഞു. ലഹരിവിരുദ്ധ പ്രചാരണം വീടുകളിൽ ആരംഭിക്കണമെന്ന് അവർ അഭിപ്രായപ്പെട്ടു.

ജില്ലയിൽ നാല് കേന്ദ്രങ്ങളിൽ ’ഓപ്പറേഷൻ അഭ്യാസ്’ വിജയകരമായി നടത്തി

കൽപ്പറ്റ: ജില്ലയിൽ നാല് കേന്ദ്രങ്ങളിൽ സിവിൽ ഡിഫൻസ് മോക് ഡ്രിൽ(ഓപ്പറേഷൻ അഭ്യാസ്) വിജയകരമായി നടത്തി. മാനന്തവാടി മെഡിക്കൽ കോളജ് ആശുപത്രി, ചൂണ്ടേൽ കിൻഫ്ര വ്യവസായ പാർക്ക്, അന്പലവയൽ മേഖലാ കാർഷിക ഗവേഷണ കേന്ദ്രം, വൈത്തിരി എൻ ഉൗര് വിനോദസഞ്ചാരകേന്ദ്രം എന്നിവിടങ്ങളിലാണ് മോക് ഡ്രിൽ സംഘടിപ്പിച്ചത്. മെഡിക്കൽ കോളജ് ആശുപത്രിയിൽ ’ബോംബ് ആക്രമണ’മാണ് നടന്നത്. വൈകുന്നേരം നാലിനുണ്ടായ ’ആക്രമണ’ത്തിൽ രണ്ടു പേർ ’മരണപ്പെട്ടു’. പരിക്കേറ്റ എട്ടു പേരെ അപകട അലാം മുഴങ്ങിയ ഉടൻ ആശുപത്രിയിലെ അത്യാഹിത വിഭാഗത്തിലെ ട്രയാജ് മേഖലയിലേക്ക് മാറ്റി ചികിത്സ ലഭ്യമാക്കി. 24 സിവിൽ ഡിഫൻസ് വോളണ്ടിയർമാരും 22 എൻസിസി കേഡറ്റുകളും അഗ്നി-രക്ഷാസേനയിലെ ഏഴു പേരും രണ്ട് ഹോം ഗാർഡുകളും ആരോഗ്യ വിഭാഗത്തിൽനിന്ന് 52 പേരും പോലീസിലെ 15 പേരും പട്ടാളത്തിലെ മൂന്നുപേരും ഒരു എൻസിസി ഓഫീസറും രക്ഷാദൗത്യത്തിൽ പങ്കാളികളായി. മൂന്നു ആംബുലൻസുകൾ രക്ഷാപ്രവർത്തനത്തിന് ഉപയോഗിച്ചു. മാനന്തവാടി തഹസിൽദാർ എം.ജെ. അഗസ്റ്റിൻ ഇൻസിഡന്‍റ് കമാൻഡറായിരുന്നു. ’മിസൈൽ ആക്രമണ’ത്തിൽ ഒരു വ്യവസായ യൂണിറ്റിൽ ’തീപിടിച്ചുണ്ടായ’ അത്യാഹിതമായിരുന്നു കിൻഫ്ര പാർക്കിൽ. അഗ്നി-രക്ഷാ നിലയത്തിൽനിന്നു വാഹനങ്ങൾ എത്തി തീയണച്ചു. പരിക്കേറ്റ അഞ്ചു പേരെ വൈത്തിരി താലൂക്ക് ആശുപത്രിയിലേക്ക് മാറ്റി. ഫയർ ആൻഡ് റസ്ക്യൂ കൽപ്പറ്റ സ്റ്റേഷൻ ഓഫീസർ പി.കെ. ബഷീർ ഇൻസിഡന്‍റ് കമാൻഡറായിരുന്നു. ആർഎആർഎസ് കാന്പസിലും എൻ ഊരിലും ആക്രമണ സൂചന ലഭിച്ചാലുള്ള തയാറെടുപ്പാണ് പരീക്ഷിച്ചത്. ആർഎആർഎസ് കാന്പസൽ ആകാശം വഴിയുള്ള ആക്രമണത്തിന്‍റെ അലാം മുഴങ്ങിയപ്പോൾ പരിസരത്ത് ഉണ്ടായിരുന്ന 150 പേരെ നാല് ഗ്രൂപ്പായി തിരിച്ച് ക്ലാസ് മുറികളിലേക്ക് മാറ്റി. മുറികളുടെ ജനലുകളും വാതിലും അടച്ചു. വിളക്ക് അണച്ചു. ബത്തേരി തഹസിൽദാർ എം.എസ്. ശിവദാസനായിരുന്നു ഇൻസിഡന്‍റ് കമാൻഡർ. എൻ ഊരിൽ നിന്ന് 82 പേരെ 21 വാഹനങ്ങളിലായി അലാം മുഴങ്ങി മിനിറ്റുകൾക്കുള്ളിൽ സമീപത്തെ മോഡൽ റസിഡൻഷ്യൽ സ്കൂളിലേക്ക് മാറ്റി. ഇവിടെ 32 സിവിൽ ഡിഫൻസ് വോളണ്ടിയർമാരും 30 പോലീസുകാരും 19 എൻസിസി കേഡറ്റുകളും സ്പെഷൽ ഓപ്പറേഷൻ ഗ്രൂപ്പ് അംഗങ്ങളും 10 റവന്യു ജീവനക്കാരും അഗ്നി-രക്ഷാസേനയിലെ ആറു പേരും രണ്ട് ഹോംഗാർഡുമാരും എൻ ഉൗരിലെ 70 ജീവനക്കാരും രക്ഷപ്രവർത്തനത്തിൽ പങ്കാളികളായി. വൈത്തിരി തഹസിൽദാർ വി. കുമാരി ബിന്ദു ഇൻസിഡന്‍റ് കമാൻഡറായി. വൈത്തിരി പോലീസ് ഇൻസ്പെക്ടർ സി.ആർ. അനിൽകുമാർ, അഗ്നിരക്ഷാ സേന അസി.സ്റ്റേഷൻ ഓഫീസർ കെ. സതീഷ് ബാബു, ഡെപ്യൂട്ടി തഹസിൽദാർ കെ. അശോകൻ എന്നിവർ പ്രവർത്തനം ഏകോപിപ്പിച്ചു. മോക് ഡ്രില്ലിന് ജില്ലാ കളക്ടർ ഡി.ആർ. മേഘശ്രീ മേൽനോട്ടം വഹിച്ചു.

ജാത്യധിക്ഷേപം: കോണ്‍ഗ്രസ് മുള്ളൻകൊല്ലി മണ്ഡലം പ്രസിഡന്‍റ് രാജിവയ്ക്കണമെന്ന്

പുൽപ്പള്ളി: പ്രവർത്തകയ്ക്കെതിരേ ജാത്യധിക്ഷേപം നടത്തിയ കോണ്‍ഗ്രസ് മുള്ളൻകൊല്ലി മണ്ഡലം പ്രസിഡന്‍റ് ഷിനോ കടുപ്പിൽ രാജിവയ്ക്കണമെന്ന് മഹിളാ കോണ്‍ഗ്രസ് നേതാക്കൾ വാർത്താസമ്മേളനത്തിൽ ആവശ്യപ്പെട്ടു. മണ്ഡലം പ്രസിഡന്‍റിനെതിരേ ഒരാഴ്ചയ്ക്കുള്ളിൽ പാർട്ടിതല നടപടിയുണ്ടായില്ലെങ്കിൽ മണ്ഡലം കമ്മിറ്റി ഓഫീസിന് മുന്പിൽ കുടിൽകെട്ടി സമരം നടത്തുമെന്നു നേതാക്കൾ പറഞ്ഞു. ദളിത് കോണ്‍ഗ്രസ് മണ്ഡലം സെക്രട്ടറിയും കോണ്‍ഗ്രസ് ബ്ലോക്ക് നിർവാഹക സമിതിയംഗവുമായ നന്ദിനി സുരേന്ദ്രനെയാണ് പാർട്ടി പ്രവർത്തകരുടെ മുന്പിൽ ജാതിപ്പേരുവിളിച്ച് അപമാനിച്ചത്. രണ്ട് മാസം മുന്പ് മുള്ളൻകൊല്ലിയിൽ ജെബി മേത്തർ എംപിയുടെ പരിപാടിയുമായി ബന്ധപ്പെട്ട് നടന്ന യോഗത്തിനിടെയാണ് നന്ദിനിക്ക് ദുരനുഭവം. ഇതിനെതിരേ കെപിസിസി, ഡിസിസി അധ്യക്ഷൻമാർക്കടക്കം പരാതി നൽകിയെങ്കിലും നടപടിയുണ്ടായില്ല. വിഷയത്തിൽ ആവശ്യമെന്നുകണ്ടാൽ നിയമനടപടി സ്വീകരിക്കുമെന്നും മഹിളാ കോണ്‍ഗ്രസ് ഭാവാഹികൾ പറഞ്ഞു. ഷീജ ജയിംസ്, നന്ദിനി സുരേന്ദ്രൻ, മിനി റോജി, ജലജ സജി, ത്രേസ്യാമ്മ കീരിക്കുന്നേൽ എന്നിവർ പങ്കെടുത്തു. ആരോപണം അടിസ്ഥാന രഹിതം: ഷിനോ കടുപ്പിൽ പുൽപ്പള്ളി: വനിതാ പ്രവർത്തകയെ താൻ ജാതിപ്പേരുവിളിച്ച് അധിക്ഷേപിച്ചെന്ന ആരോപണം അടിസ്ഥാന രഹിതമാണെന്ന് കോണ്‍ഗ്രസ് മുള്ളൻകൊല്ലി മണ്ഡലം പ്രസിഡന്‍റ് ഷിനോ കടുപ്പിൽ പ്രസ്താവനയിൽ പറഞ്ഞു. ആരോപണത്തിനുപിന്നിൽ രാഷ്ട്രീയ ഗൂഢാലോചനയുണ്ട്. താൻ അപമാനിച്ചതായി ചിലർ പറയുന്ന വനിതയെ പരിചയമില്ല. ഇവർ മഹിളാ കോണ്‍ഗ്രസിലുണ്ടോയെന്ന് അറിയില്ല. ആരോപണങ്ങൾ കള്ളക്കഥ മാത്രമാണ്. കഴിഞ്ഞ ഫെബ്രുവരിയിൽ ജെബി മേത്തർ എംപിയും പാർട്ടി സംസ്ഥാന, ജില്ലാ നേതാക്കളും പങ്കെടുത്ത ചടങ്ങിൽ താൻ വേദിയിലിരിക്കുകയോ അഭിപ്രായ പ്രകടനം നടത്തുകയോ ചെയ്തിട്ടില്ല. മാന്യമായി പൊതുപ്രവർത്തനം നടത്തുന്ന തന്നെ അപമാനിക്കാൻ ഗൂഢാലോചന നടത്തിയവർക്കെതിരേ നിയമ നടപടി സ്വീകരിക്കുമെന്നും ഷിനോ കടുപ്പിൽ പറഞ്ഞു.

യുഡിടിഎഫ് കണ്‍വൻഷൻ

കൽപ്പറ്റ: വിവിധ ആവശ്യങ്ങൾ തൊഴിലാളി സംഘടനകൾ 20ന് നടത്തുന്ന ദേശീയ പണിമുടക്ക് വിജയിപ്പിക്കാൻ യുഡിടിഎഫ് ജില്ലാ കണ്‍വൻഷൻ തീരുമാനിച്ചു. എസ്ടിയു ജില്ലാ പ്രസിഡന്‍റ് സി. മൊയ്തീൻകുട്ടി ഉദ്ഘാടനം ചെയ്തു. ഐഎൻടിയുസി ജില്ലാ പ്രസിഡന്‍റ് പി.പി. ആലി അധ്യക്ഷത വഹിച്ചു. ഉമ്മർ കുണ്ടാട്ടിൽ, ഗിരീഷ് കൽപ്പറ്റ, സി. മുഹമ്മദ് ഇസ്മയിൽ, കെ.കെ. രാജേന്ദ്രൻ, അബ്ദുള്ള മാടക്കര, കെ. അജിത, പാറക്ക മമ്മൂട്ടി, ജിനി തോമസ്, ഹർഷൽ കോന്നാടൻ, അബു ഗൂഡലായി, ഒ.ഭാസ്കരൻ, തൈത്തൊടി ഇബ്രാഹിം, ടി. ഉഷാകുമാരി, മോഹൻദാസ് കോട്ടക്കൊല്ലി, എം. അലി, ജ്യോതിഷ് കുമാർ വൈത്തിരി, ആർ. ഉണ്ണിക്കൃഷ്ണൻ, ഫൗസി, എസ്. മണി, സി. കെ. ഹുസൈൻ, കെ.യു. മാനു, അയ്യൂബ് പള്ളിയാൽ, സി.എ. ഗോപി, ഏലിയാമ്മ മാത്തുക്കുട്ടി എന്നിവർ പ്രസംഗിച്ചു.

വള്ളിയൂർക്കാവ് ആഴ്ചച്ചന്ത പദ്ധതി 30നകം പ്രവർത്തനസജ്ജമാകും

കൽപ്പറ്റ: വള്ളിയൂർക്കാവ് ക്ഷേത്രത്തിന്‍റെ ചരിത്രവും പൈതൃകവും പുനഃസ്ഥാപിക്കുന്ന ആഴ്ചച്ചന്ത (വള്ളിയൂർക്കാവ് ഡെവലപ്മെന്‍റ് ഓഫ് മാർക്കറ്റ് ആൻഡ് എക്സിബിഷൻ സ്പേസ്) പദ്ധതി 30നകം പ്രവർത്തനസജ്ജമാകും. തലശേരി പൈതൃക ടൂറിസം പദ്ധതിയുടെ ഭാഗമായി ആഴ്ചച്ചന്തയ്ക്ക് 4.87 കോടി രൂപ ചെലവിൽ നിർമിച്ച കെട്ടിടം തുറന്നു പ്രവർത്തിക്കാൻ കളക്ടറേറ്റിൽ പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളുവിന്‍റെ അധ്യക്ഷതയിൽ ചേർന്ന യോഗം തീരുമാനിച്ചു. എഡിഎം കെ. ദേവകി, ജില്ലാ വ്യവസായ കേന്ദ്രം ജനറൽ മാനേജർ ആർ. രമ, മലബാർ ദേവസ്വം ബോർഡ് ഡെപ്യൂട്ടി കമ്മീഷണർ(അഡ്മിനിസ്ട്രേഷൻ) പി.ടി. വിജയി, എക്സിക്യുട്ടീവ് ഓഫീസർ പി.വി. വിജയൻ, മാനന്തവാടി നഗരസഭാ കൗണ്‍സിലർ കെ.സി. സുനിൽകുമാർ, ഡിടിപിസി പ്രതിനിധികളായ പി.എം. രതീഷ്ബാബു, പി.പി. പ്രവീണ്‍, വള്ളിയൂർക്കാവ് ക്ഷേത്രം ട്രസ്റ്റിമാരായ ഏച്ചോം ഗോപി, ഇ. പദ്മനാഭൻ തുടങ്ങിയവർ പങ്കെടുത്തു. മലബാർ ദേവസ്വം ബോർഡിനാണ് പദ്ധതി നടത്തിപ്പു ചുമതല. വരുമാനത്തിൽ 80 ശതമാനം മലബാർ ദേവസ്വം ബോർഡിനും 20 ശതമാനം വിനോദസഞ്ചാര വകുപ്പിനും ലഭിക്കും. ഇതിനുള്ള ധാരണാപത്രത്തിൽ ഇരുകൂട്ടരും ഒപ്പുവയ്ക്കും. 43 സ്റ്റാളുകളാണ് ചന്തയിൽ ഉണ്ടാകുക. ഓരോ സ്റ്റാൾ ദേവസ്വം ബോർഡിനും വിനോദസഞ്ചാര വകുപ്പിനും നൽകും. ബാക്കി സ്റ്റാളുകൾ പട്ടികവർഗ വിഭാഗത്തിനും സ്ത്രീകൾക്കും ഭിന്നശേഷി വിഭാഗത്തിനും സംവരണം ഉറപ്പാക്കി ലേലം ചെയ്യും. ആഴ്ചച്ചന്തയ്ക്ക് കെട്ടിട നന്പർ മാനന്തവാടി മുനിസിപ്പാലിറ്റി ഉടൻ നൽകും. വൈദ്യുതി കണക്‌ഷൻ വൈകാതെ ലഭ്യമാക്കും. പരിപാലനത്തിന് സുരക്ഷാ ജീവനക്കാരെയും ശുചീകരണത്തൊഴിലാളികളെയും നിയമിക്കും. കാർഷികോത്പന്നങ്ങൾ, ഗോത്രവർഗക്കാരുടെ തനത് ഉത്പന്നങ്ങൾ, കാർഷികയന്ത്രങ്ങൾ, ഉപകരണങ്ങൾ, വെജിറ്റേറിയൻ വിഭവങ്ങൾ, കരകൗശല, കൈത്തറി, കുടുംബശ്രീ, മുള ഉത്പന്നങ്ങൾ, വിത്തുകൾ, തൈകൾ തുടങ്ങിയവയുടെ വിപണനം സ്റ്റാളുകളിൽ നടക്കും. വിനോദസഞ്ചാരികളെ ആകർഷിക്കുന്നതിന് തത്സമയ ഡെമോണ്‍സ്ട്രഷൻ ഉണ്ടാകും.

സ്റ്റുഡന്‍റ്സ് മാർക്കറ്റ് ജില്ലാതല ഉദ്ഘാടനം നടത്തി

കൽപ്പറ്റ: കണ്‍സ്യൂമർഫെഡ് ത്രിവേണി സ്റ്റുഡന്‍റ്സ് മാർക്കറ്റ് ജില്ലാതല ഉദ്ഘാടനം ത്രിവേണി സൂപ്പർമാർക്കറ്റ് അങ്കണത്തിൽ പട്ടികജാതി-വർഗ ക്ഷേമ മന്ത്രി ഒ.ആർ. കേളു നിർവഹിച്ചു. കണ്‍സ്യൂമർഫെഡ് ഡയറക്ടർ ഗോകുൽദാസ് കോട്ടയിൽ അധ്യക്ഷത വഹിച്ചു. ഡയറക്ടർ രുക്മിണി സുബ്രഹ്മണ്യൻ ആദ്യ വിൽപന നടത്തി. കണ്‍സ്യൂമർഫെഡ് ഉദ്യോഗസ്ഥരായ പി. അജീഷ്, ബി. സുനീർ, അബ്ദുൾ ഗഫൂർ, എം.പി. മുഹമ്മദ് മുസ്തഫ, പി. അനീഷ്, ഷൈന, ശ്രീജ തുടങ്ങിയവർ പങ്കെടുത്തു. റീജണൽ മാനേജർ പി.കെ. അനിൽകുമാർ സ്വാഗതവും മാർക്കറ്റിംഗ് മാനേജർ വേലുസാമി നന്ദിയും പറഞ്ഞു. ജില്ലയിൽ 10 കേന്ദ്രങ്ങളിലാണ് കണ്‍സ്യൂമർഫെഡ് സഹകരണ സംഘങ്ങളുടെ സഹകരണത്തോടെ സ്റ്റുഡന്‍റ്സ് മാർക്കറ്റുകൾ ആരംഭിക്കുന്നത്. ഗുണമേൻമയുള്ള പഠനോപകരണങ്ങൾ മാർക്കറ്റുകളിൽ വിലക്കുറവിൽ ലഭിക്കും. ജൂണ്‍ 15 വരെ പ്രവർത്തിക്കും.

വെർച്വൽ റിയാലിറ്റി എഡ്യുക്കേഷൻ ഉദ്ഘാടനം

സുൽത്താൻ ബത്തേരി: സ്കൈ ബ്ലൂ കോളജ് ഓഫ് ഏവിയേഷനിൽ വെർച്ച്വൽ റിയാലിറ്റി എഡ്യുക്കേഷൻ ഉദ്ഘാടനം ഒന്പതിന് രാവിലെ 10.30ന് നിയമസഭാ ഡെപ്യൂട്ടി സ്പീക്കർ ചിറ്റയം ഗോപകുമാർ നിർവഹിക്കുമെന്ന് പ്രിൻസിപ്പൽ ഇ.എൻ. ശിവദാസ്, എൻ.കെ. ജനീഷ്, ഡയറക്ടർ എം.എസ്. ശ്രീജ എന്നിവർ വാർത്താസമ്മേളനത്തിൽ അറിയിച്ചു. ഐ.സി. ബാലകൃഷ്ണൻ എംഎൽഎ അധ്യക്ഷത വഹിക്കും. മുനിസിപ്പൽ ചെയർമാൻ ടി.കെ. രമേശ്, ഡിഎംഒ മോഹൻദാസ്, മുനിസിപ്പൽ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ടോം ജോസ്, കൗണ്‍സിലർ കെ.എസ്. പ്രമോദ്, എംഇഎസ് ഹോസ്പിറ്റൽ സെക്രട്ടറി യൂസഫ് ഹാജി, യൂണിവേഴ്സിറ്റി കോ ഓർഡിനേറ്റർ മഞ്ജുനാഥ് തുടങ്ങിയവർ പങ്കെടുക്കും. വിദ്യാഭ്യാസത്തിൽ ജില്ലയിൽ ആദ്യമായി വെർച്വൽ റിയാലിറ്റി സാങ്കേതിക വിദ്യ ഉപയോഗപ്പെടുത്തുന്ന സ്ഥാപനമാണ് സ്കൈ ബ്ലൂവെന്ന് പ്രിൻസിപ്പൽ പറഞ്ഞു.

ഫുട്ബോള്‍ കാര്‍ണിവൽ: ചലഞ്ചേഴ്സ് എഫ്സി വെള്ളമുണ്ട മാനന്തവാടി ബ്ലോക്കുതല ജേതാക്കള്‍

തലപ്പുഴ: ലഹരിക്കെതിരേ ജില്ലാ പോലീസ് ’നോക്ക് ഔട്ട് ഡ്രഗ്സ്’ എന്ന പേരില്‍ നടത്തുന്ന ഫുട്ബോള്‍ കാര്‍ണിവലിന്റെ മാനന്തവാടി ബ്ലോക്കുതല മത്സരത്തില്‍ ചലഞ്ചേഴ്സ് എഫ്സി വെള്ളമുണ്ട ജേതാക്കളായി. ജോളി എഫ്സി തലപ്പുഴയ്ക്കാണ് രണ്ടാംസ്ഥാനം. എട്ട് ടീമുകള്‍ പങ്കെടുത്തു. 44ാം മൈല്‍ ഗ്രൗണ്ടില്‍ തവിഞ്ഞാല്‍ പഞ്ചായത്ത് പ്രസിഡന്‍റ് എല്‍സി ജോയി ഉദ്ഘാടനം ചെയ്തു. വെള്ളമുണ്ട എസ്ഐ സാദിര്‍ തലപ്പുഴ അധ്യക്ഷത വഹിച്ചു. ജില്ലാ പഞ്ചായത്ത് അംഗം മീനാക്ഷി രാമന്‍, ബ്ലോക്ക് പഞ്ചായത്ത് അംഗം അസീസ് വാളാട്, ഫുട്ബോള്‍ കോച്ച് റസാഖ് എന്നിവര്‍ പ്രസംഗിച്ചു. ജില്ലാ ജനമൈത്രി അസി.നോഡല്‍ ഓഫീസര്‍ എസ്ഐ കെ.എം. ശശിധരന്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. സമാപനച്ചടങ്ങില്‍ മാനന്തവാടി ഡിവൈഎസ്പി വിശ്വംഭരന്‍ ട്രോഫികള്‍ വിതരണം ചെയ്തു. വാര്‍ഡ് മെമ്പര്‍ ഷബിത, അജീബ് കോമാച്ചി, മുഹമ്മദ് തൂവക്കുന്ന്, എസ്ഐമാരായ പ്രകാശന്‍, സാജു എന്നിവര്‍ പങ്കെടുത്തു. എക്സൈസ് ഓഫീസര്‍ മന്‍സൂര്‍, ജനമൈത്രി ബീറ്റ് ഓഫീസര്‍ സി.എം. അലി. സിവില്‍ പോലീസ് ഓഫീസര്‍ കെ.എം. ഷദീര്‍, പി. സാജര്‍ എന്നിവര്‍ നേതൃത്വം നല്‍കി.

അഷ്റഫിന്‍റെ വീട്ടില്‍ സിപിഎം നേതാക്കള്‍ സന്ദര്‍ശനം നടത്തി

പുല്‍പ്പള്ളി: മംഗളൂരുവില്‍ ആള്‍ക്കൂട്ടം തല്ലിക്കൊന്ന സന്ദീപനിക്കുന്നിലെ അഷ്റഫിന്‍റെ വീട്ടില്‍ സിപിഎം ജില്ലാ സെക്രട്ടറി കെ. റഫീഖ്, സംസ്ഥാന കമ്മിറ്റിയംഗം സി.കെ. ശശീന്ദ്രന്‍, ഏരിയ സെക്രട്ടറി ബൈജു നമ്പിക്കൊല്ലി, ഏരിയ കമ്മിറ്റിയംഗങ്ങളായ പി.എ. മുഹമ്മദ്, പി.ജെ. പൗലോസ്, സി.പി. വിന്‍സന്റ്, അജിത് കെ. ഗോപാല്‍, ലോക്കല്‍ സെക്രട്ടറിമാരായ കെ.പി. ഗിരീഷ്, ശരത് തുടങ്ങിയവര്‍ സന്ദര്‍ശനം നടത്തി. അഷ്റഫിന്റെ പിതാവ് കുഞ്ഞീതുകുട്ടി, മാതാവ് റുഖിയ ഉള്‍പ്പെടെ കുടുംബാംഗങ്ങളെ നേതാക്കള്‍ അനുശോചനം അറിയിച്ചു. അഷ്റഫിന്റെ മരണത്തില്‍ വിശദാന്വേഷണം നടത്തി കുറ്റക്കാരായ മുഴുവന്‍ ആളുകള്‍ക്കും ശിക്ഷ ഉറപ്പുവരുത്തണമെന്ന് കര്‍ണാടക സര്‍ക്കാരിനോട് ആവശ്യപ്പെടുമെന്ന് അവര്‍ പറഞ്ഞു.

ലഹരിവിരുദ്ധ സന്ദേശയാത്രയ്ക്ക് വയനാട്ടിൽ ഉജ്ജ്വ സ്വീകരണം

മാനന്തവാടി: സംസ്ഥാന കായിക വകുപ്പ് ’കിക്ക് ഡ്രഗ്സ്, സേ യെസ് ടു സ്പോർട്സ്’ എന്ന പേരിൽ സംഘടിപ്പിച്ച ലഹരിവിരുദ്ധ സന്ദേശയാത്രയ്ക്ക് ജില്ലയിൽ ഉജ്വല സ്വീകരണം. കായികമന്ത്രി വി. അബ്ദുറഹ്മാൻ നയിക്കുന്ന യാത്രയുടെ മൂന്നാം ദിവസത്തെ പ്രയാണത്തിന് മാനന്തവാടിയിലായിരുന്നു തുടക്കം. യാത്രയ്ക്ക് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു അഭിവാദ്യം അർപ്പിച്ചു. യാത്രയുടെ ഭാഗമായി രാവിലെ പനമരം ടൗണിൽനിന്നു വള്ളിയൂർക്കാവ് ജംഗ്ഷനിലേക്ക് നടന്ന മാരത്തണ്‍ ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഫ്ളാഗ് ഓഫ് ചെയ്തു. കുട്ടികളും മുതിർന്നവരും അടക്കം നൂറിലധികം ആളുകൾ പങ്കെടുത്തു. വള്ളിയൂർക്കാവ് ജംഗ്ഷനിൽനിന്നു ഗാന്ധി പാർക്കിലേക്ക് നടന്ന വാക്കത്തോണിൽ കലാകായിക രൂപങ്ങളുടെ പ്ലോട്ടുകളുമായി നിരവധിയാളുകൾ അണിനിരന്നു. സുംബ നൃത്തത്തോടെയാണ് മാരത്തണും വാക്കത്തോണും ആരംഭിച്ചത്. ഗാന്ധിപാർക്കിൽ കായികമന്ത്രി വി.അബ്ദുറഹ്മാൻ ലഹരി വിരുദ്ധസന്ദേശയാത്ര ജില്ലാതല പ്രയാണം ഉദ്ഘാടനം ചെയ്തു. മനുഷ്യവിപത്തായ ലഹരിയെ നിർമാർജനം ചെയ്യുന്നതിന് ഒറ്റക്കെട്ടായ പോരാട്ടം അനിവാര്യമാണെന്ന് മന്ത്രി പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി,നഗരസഭാ ചെയർപേഴ്സണ്‍ സി.കെ രത്നവല്ലി, പനമരം പഞ്ചായത്ത് പ്രസിഡന്‍റ് ലക്ഷ്മി ആലക്കമറ്റം, സംഘാടകസമിതി കണ്‍വീനർ പി.ടി. ബിജു, സംസ്ഥാന സ്പോർട്സ് കൗണ്‍സിൽ അംഗവും സിപിഎംജില്ലാ സെക്രട്ടറിയുമായ കെ. റഫീഖ്, ജില്ലാ സ്പോർട്സ് കൗണ്‍സിൽ പ്രസിഡന്‍റ് എം. മധു, വൈസ് പ്രസിഡന്‍റ് രഞ്ജിത്ത്, സ്റ്റാൻഡിംഗ് കമ്മിറ്റി അംഗങ്ങളായ രഞ്ജു സുരേഷ്, വി.കെ. സനോജ് എന്നിവർ പങ്കെടുത്തു.

പുൽപ്പള്ളിയിൽ അഖില വയനാട് ചിത്രരചനാ മത്സരം ഒന്പതിന്

പുൽപ്പള്ളി: ട്രേഡേഴ്സ് ക്ലബിന്‍റെ നേതൃത്വത്തിൽ ഒന്പതിന് സെന്‍റ് ജോർജ് യുപി സ്കൂൾ ഓഡിറ്റോറിയത്തിൽ എൽപി, യുപി വിദ്യാർഥികൾക്ക് അഖില വയനാട് ചിത്രരചനാ മത്സരം നടത്തും. രജിസ്ട്രേഷൻ രാവിലെ ഒന്പതിന് ആരംഭിക്കും. 10ന് സ്കൂൾ മാനേജർ ഫാ. ചാക്കോ ചേലന്പറന്പത്ത് ഉദ്ഘാടനം ചെയ്യും. രണ്ട് മണിക്കൂറാണ് മത്സര സമയം. ’എന്‍റെ ഗ്രാമം എന്‍റെ അഭിമാനം’ എന്നതാണ് യുപി വിദ്യാർഥികളുടെ മത്സര വിഷയമെന്ന് ക്ലബ് പ്രസിഡന്‍റ് കെ.എൽ. ജോണി, ജനറൽ സെക്രട്ടറി എം.ടി. ബിനു, സിജോ മേക്കാട്ടിൽ, പി.ജി. ഷിനോജ്, മനു എം. പോൾ എന്നിവർ വാർത്താസമ്മേളനത്തിൽ പറഞ്ഞു. എൽപി വിഭാഗത്തിന് പ്രത്യേക വിഷയമില്ല. പങ്കെടുക്കുന്നവർ വയസ് തെളിയിക്കുന്ന രേഖകൾ കരുതണം. രചനയ്ക്ക് ഇഷ്ടമുള്ള നിറങ്ങൾ ഉപയോഗിക്കാം. സീൽഡ് പേപ്പർ സംഘാടകർ നൽകും. യുപി വിഭാഗത്തിൽ ഒന്ന്, രണ്ട്, മൂന്ന് സ്ഥാനക്കാർക്ക് യഥാക്രമം 3,000, - 2,000, - 1,000 രൂപ വീതമാണ് സമ്മാനം. എൽപി വിഭാഗത്തിൽ ഒന്ന്. രണ്ട്, മൂന്ന് സ്ഥാനം നേടുന്ന വിദ്യാർഥിക്ക് യഥാക്രമം 2,000, - 1,500, - 1,000 രൂപയുമാണ് സമ്മാനം.

പുൽപ്പള്ളി സെന്‍റ് ജോർജ് സിംഹാസന കത്തീഡ്രലിൽ തിരുനാൾ

പുൽപ്പള്ളി: സെന്‍റ് ജോർജ് സിംഹാസന കത്തീഡ്രലിൽ പരിശുദ്ധ ഗീവർഗീസ് സഹദായുടെ തിരുനാൾ തുടങ്ങി. വികാരി ഫാ.പൗലോസ് പുത്തൻപുരയ്ക്കൽ കൊടിയേറ്റി. സന്ധ്യാപ്രാർഥന, ആനപ്പാറ കുരിശിങ്കലേക്ക് പ്രദക്ഷിണം എന്നിവ നടന്നു. ഫാ.സോജൻ വാണാക്കുടി സന്ദേശം നൽകി. ഇന്നു രാവിലെ ഏഴിന് പ്രഭാത പ്രാർഥന. എട്ടിന് വിശുദ്ധ കുർബാന, പ്രത്യേക മധ്യസ്ഥ പ്രാർഥന. 9.30ന് സന്ദേശം. 10ന് പ്രദക്ഷിണം. 10.30ന് ആശീർവാദം, നേർച്ച.

എൽസ്റ്റണ്‍ എസ്റ്റേറ്റിലെ തൊഴിലാളികൾക്ക് ആനുകൂല്യവും പുനരധിവാസവും ഉറപ്പുവരുത്തണം: ടി. സിദ്ദിഖ് എംഎൽഎ

കൽപ്പറ്റ: പുഞ്ചിരിമട്ടം ഉരുൾദുരന്തബാധിതരുടെ പുനരധിവാസത്തിന് ഉപയോഗപ്പെടുത്തുന്ന എൽസ്റ്റൻ എസ്റ്റേറ്റിലെ തൊഴിലാളികൾക്ക് ആനുകൂല്യങ്ങളും പുനരധിവസവും ഉറപ്പുവരുത്തണമെന്ന് ടി. സിദ്ദിഖ് എംഎൽഎ സർക്കാരിനോട് ആവശ്യപ്പെട്ടു. ടൗണ്‍ഷിപ്പിന് ഏറ്റെടുത്ത പുൽപ്പാറ ഡിവിഷനിലെ 100 പേർ അടക്കം എസ്റ്റേറ്റിലെ മൂന്നു ഡിവിഷനുകളിൽ 274 തൊഴിലാളികളാണുള്ളത്. ഇതിൽ 150 പേർ വിരമിച്ചവരാണ്. 2014 മുതൽ തൊഴിലാളികളിൽനിന്ന് ഈടാക്കിയ പിഎഫ് വിഹിതം അക്കൗണ്ടിൽ അടച്ചിട്ടില്ല. ഉടമ അടയ്ക്കേണ്ട വിഹിതവും അക്കൗണ്ടിൽ എത്തിയില്ല. വിരമിച്ച തൊഴിലാളികൾക്ക് ഗ്രാറ്റുവിറ്റി ലഭിച്ചിട്ടില്ല. ഒരു വർഷത്തെ ലീവ് വിത്ത് വേജസ്, രണ്ട് വർഷത്തെ ബോണസ് ഏഴു വർഷത്തെ മെഡിക്കൽ ആനുകൂല്യം, വെതർ പ്രൊട്ടക്ടീവ് ആനുകൂല്യം, രണ്ട് ഘട്ടങ്ങളിലായി കൂലി പുതുക്കിയപ്പോഴത്തെ കുടിശിക എന്നിവയും തൊഴിലാളികൾക്ക് കിട്ടാനുണ്ട്. തൊഴിൽ നഷ്ടപ്പെടുന്ന നിലയിലാണ് തൊഴിലാളികൾ. സർക്കാർ തോട്ടം ഏറ്റെടുക്കുന്പോൾ നഷ്ടപരിഹാരമായി ലഭിക്കുന്ന തുകയിൽനിന്നു തൊഴിലാളികൾക്ക് ആനുകൂല്യം ലഭ്യമാക്കുമെന്ന് തോട്ടം മാനേജ്മെന്‍റ് വ്യക്തമാക്കിയിരുന്നു. എന്നാൽ തുടർ നടപടികൾ ഉണ്ടാകുന്നില്ല. നിലവിൽ എസ്റ്റേറ്റിൽ താമസിക്കുന്ന തൊഴിലാളികൾക്ക് വേറേ താമസ സൗകര്യമില്ല. എസ്റ്റേറ്റ് പാടിയിൽനിന്നു ഇറങ്ങേണ്ടിവരുന്പോൾ എവിടേക്കുപോകുമെന്ന ആശങ്കയിലാണ് അവരെന്ന് എഎംഎൽഎ പറഞ്ഞു.

എൽസ്റ്റൻ എസ്റ്റേറ്റിലെ കുഴിക്കൂർ ചമയങ്ങൾ: നടപടികൾ പൂർത്തിയാക്കി

കൽപ്പറ്റ: പുഞ്ചിരിമട്ടം ഉരുൾ ദുരന്തം അതിജീവിതർക്ക് ടൗണ്‍ഷിപ് നിർമിക്കാൻ സർക്കാർ ഏറ്റെടുത്ത എൽസ്റ്റൻ എസ്റ്റേറ്റ് ഭൂമിയിലെ കുഴിക്കൂർ ചമയങ്ങളുമായി ബന്ധപ്പെട്ട നടപടി ക്രമങ്ങൾ പൂർത്തിയായി. എസ്റ്റേറ്റിലെ വാസയോഗ്യമല്ലാത്ത നാല് കെട്ടിടങ്ങൾ റവന്യു വകുപ്പ് ഏറ്റെടുത്തു. ഫാക്ടറി, ഓഫീസ് കെട്ടിടം, എസ്റ്റേറ്റ് ബംഗ്ലാവ് എന്നിവയാണ് ഏറ്റെടുത്തത്. ആൾത്താമസമുള്ള നാല് കെട്ടിടങ്ങൾ ഏറ്റെടുക്കൽ നടപടി ക്രമങ്ങളിൽനിന്നു താത്കാലികമായി ഒഴിവാക്കി. ഇതിൽ ഒരു കെട്ടിടം ബന്ധപ്പെട്ടവർ രേഖകൾ നൽകുന്ന മുറയ്ക്ക് ഏറ്റെടുക്കും. ജില്ലാ കളക്ടർ ഡി.ആർ. മേഘശ്രീയുടെ നിർദേശപ്രകാരം നടപടികൾ പൂർത്തിയാക്കിയത്.

ഐ.സി. ബാലകൃഷ്ണന്‍ എംഎല്‍എ സ്ഥാനം രാജിവയ്ക്കണം: സിപിഎം ജില്ലാ സെക്രട്ടറി

കല്‍പ്പറ്റ: ഐ.സി. ബാലകൃഷ്ണന്‍ എംഎല്‍എ സ്ഥാനം രാജിവയ്ക്കണമെന്ന് സിപിഎം ജില്ലാ സെക്രട്ടറി കെ. റഫീഖ് ആവശ്യപ്പെട്ടു. ബത്തേരി അര്‍ബൻ ബാങ്ക് നിയമനക്കോഴ വിവാദത്തില്‍ ഐ.സി. ബാലകൃഷ്ണനെതിരേ കേസെടുക്കാന്‍ അന്വേഷണസംഘം വിജിലന്‍സ് ഡയറക്ടര്‍ക്ക് ശിപാര്‍ശ നല്‍കിയിരിക്കയാണ്. ബാങ്കില്‍ നിയമനം വാഗ്ദാനം ചെയ്തു നടത്തിയ സാമ്പത്തിക ഇടപാടുകളുമായി ബന്ധപ്പെട്ട് എംഎല്‍എയ്ക്ക് എതിരേ ഉയര്‍ന്ന ആരോപണങ്ങളില്‍ കാമ്പുണ്ടെന്നാണ് വിജിലന്‍സ് ഡിവൈഎസ്പി ഷാജി വര്‍ഗീസ് മേലധികാരിക്കു സമര്‍പ്പിച്ച റിപ്പോര്‍ട്ടിൽ. ഈ സാഹചര്യത്തില്‍ എംഎല്‍എയായി തുടരാന്‍ ബാലകൃഷ്ണന് അര്‍ഹതയില്ല. സഹകരണ ബാങ്കുകളില്‍ നിയമനം നല്‍കാമെന്ന് വിശ്വസിപ്പിച്ച് പലരില്‍നിന്നായി കോടിക്കണക്കിനു രൂപയാണ് ജില്ലയിലെ കോണ്‍ഗ്രസ് നേതാക്കള്‍ തട്ടിയെടുത്തത്. തട്ടിപ്പുകളുമായി ബന്ധപ്പെട്ട പ്രശ്നങ്ങളാണ് ഭിന്നശേഷിക്കാരനായ മകനൊപ്പം ജീവനൊടുക്കാന്‍ ഡിസിസി ട്രഷറര്‍ എന്‍.എം. വിജയനു പ്രേരണയായതെന്നു റഫീഖ് കുറ്റപ്പെടുത്തി.

ലഹരിവിരുദ്ധ സന്ദേശ യാത്ര: ഫ്ളാഷ് മോബ് അവതരിപ്പിച്ചു

കൽപ്പറ്റ: കായിക മന്ത്രിയുടെ നേതൃത്വത്തിൽ ഇന്ന് ജില്ലയിൽ നടത്തുന്ന ലഹരി വിരുദ്ധ സന്ദേശ യാത്ര വിളംബരം ചെയ്ത് പിണങ്ങോട് ഡബ്യുഒ എച്ച്എസ്എസ് വിദ്യാർഥികൾ ജില്ലയുടെ വിവിധ ഭാഗങ്ങളിൽ ഫ്ളാഷ് മോബ് അവതരിപ്പിച്ചു. ജില്ലാ കളക്ടർ ഡി.ആർ. മേഘശ്രീ ഫ്ളാഗ് ഓഫ് ചെയ്തു. സ്പോർട്സ് കൗണ്‍സിൽ ജില്ലാ പ്രസിഡന്‍റ് എം. മധു, വൈസ് പ്രസിഡന്‍റ് സലിം കടവൻ, യുവജനക്ഷേമ ബോർഡ് ജില്ലാ കോ ഓർഡിനേറ്റർ കെ. എം. ഫ്രാൻസിസ് തുടങ്ങിയവർ പങ്കെടുത്തു.

കമ്മ്യൂണിക്കോർ പദ്ധതി: രണ്ടാംഘട്ട ബാച്ചിന്‍റെ ജില്ലാതല ഉദ്ഘാടനം നടത്തി

കാട്ടിക്കുളം: തദ്ദേശീയ ജനതയെ ഉന്നത വിദ്യാഭ്യാസ, തൊഴിൽ രംഗങ്ങളിൽ മികവിന്‍റെ പാതയിലെത്തിക്കുന്നതിന് കുടുബശ്രീ മിഷൻ നടപ്പാക്കുന്ന കമ്മ്യൂണിക്കോർ പദ്ധതി രണ്ടാംഘട്ട ബാച്ചിന്‍റെ ജില്ലാതല ഉദ്ഘാടനം തിരുനെല്ലി പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർ പേഴ്സണ്‍ റുഖിയ സൈനുദ്ദീൻ നിർവഹിച്ചു. തിരുനെല്ലി സിഡിഎസ് ചെയർപേഴ്സണ്‍ സൗമിനി അധ്യക്ഷത വഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ പി.കെ. ബാലസുബ്രഹ്മണ്യൻ, വാർഡ് അംഗം പ്രഭാകരൻ, കുടുംബശ്രീ ജില്ലാ മിഷൻ അസിസ്റ്റന്‍റ് കോ ഓർഡിനേറ്റർ കെ.കെ. ആമീൻ, സ്പെഷൽ പ്രോജക്ട് കോ ഓർഡിനേറ്റർ സായി കൃഷ്ണ എന്നിവർ പ്രസംഗിച്ചു. ഉന്നത വിദ്യാഭ്യാസ, തൊഴിൽ മേഖലകളിൽ തദ്ദേശീയ ജനവിഭാഗത്തിന് അവസരങ്ങൾ ഉറപ്പാക്കാൻ സഹായകമാകുന്നതാണ് കമ്മ്യൂണിക്കോർ ഇംഗ്ലീഷ് ഭാഷാനൈപുണ്യ പരിശീലന പദ്ധതി. തിരുനെല്ലിയിൽ രണ്ട് ബാച്ചുകളിലും നൂൽപ്പുഴയിൽ ഒരു ബാച്ചിലുമാണ് പദ്ധതി നടപ്പാക്കുന്നത്. ഓരോ ബാച്ചിലും 35 വിദ്യാർഥികൾ ഉണ്ടാകും.

ഗുരുവിന്‍റെ ലഹരിവിരുദ്ധ സന്ദേശങ്ങള്‍ക്ക് പ്രസക്തിയേറി: മന്ത്രി ഒ.ആര്‍. കേളു

മാനന്തവാടി: ലഹരി ഉപയോഗം സമൂഹിക വിപത്തായി മാറിയ കാലത്ത് ശ്രീനാരായണഗുരുവിന്‍റെ ലഹരിവിരുദ്ധ സന്ദേശങ്ങള്‍ക്ക് വര്‍ധിച്ച പ്രസക്തിയാണുള്ളതെന്ന് പട്ടികജാതിവര്‍ഗപിന്നാക്ക ക്ഷേമ മന്ത്രി ഒ.ആര്‍. കേളു. 10, 11, 12 തീയതികളില്‍ ശിവഗിരിമഠത്തില്‍ നടക്കുന്ന ശ്രീനാരായണ ധര്‍മ മീമാംസ പരിഷത്തിനു മുന്നോടിയായി ഗുരുധര്‍മപ്രചാരണസഭ, മാതൃസഭ, യുവജനസഭ ജില്ലാ കമ്മിറ്റികള്‍ സംയുക്തമായി ഗാന്ധി പാര്‍ക്കില്‍ സംഘടിപ്പിച്ച വിളംബര സംഗമം ഉദ്ഘാടനം ചെയ്യുകയായിരുന്നു അദ്ദേഹം. ജാതിമതഭേദങ്ങള്‍ക്കും ലഹരിക്കും എതിരേയാണ് ഗുരു ഏറ്റവും ശക്തമായി പറഞ്ഞത്. എന്നാല്‍ ഗുരു പറഞ്ഞതിന് വിരുദ്ധമായിസമൂഹം മാറുകയാണ്. മാതാപിതാക്കളെ അനുസരിക്കാത്ത തലമുറ വളര്‍ന്നുവരുന്നത് വലിയ വിപത്തായിത്തീരും. ലഹരിക്കെതിരേ പോരാട്ടത്തിന് നേതൃത്വം നല്‍കാന്‍ ആത്മീയനേതൃത്വം മുന്നോട്ടുവരണം. സര്‍ക്കാര്‍ നടത്തുന്ന ലഹരി വിരുദ്ധ കാമ്പയിന്‍ ഗുരുദര്‍ശനം ചേര്‍ത്തുപിടിച്ചാണ് മുന്നോട്ടുപോകുന്നതെന്നും മന്ത്രി പറഞ്ഞു. ഗുരുധര്‍മ പ്രചാരണസഭ ജില്ലാ പ്രസിഡന്‍റ് കെ.ആര്‍. ജയരാജ് അധ്യക്ഷത വഹിച്ചു. ശിവഗിരി മഠം സന്യാസിനി സ്വാമിനി മാതാ നാരായണ ചൈതന്യമയി അനുഗ്രഹപ്രഭാഷണം നടത്തി. ബ്ലോക്ക് പഞ്ചായത്ത് പ്രസിഡന്റ് ജസ്റ്റിന്‍ ബേബി ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ജില്ലാ പഞ്ചായത്ത് ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ജുനൈദ് കൈപ്പാണി ഗുരുഗാന്ധി സംഗമ ശതാബ്ദി പ്രഭാഷണം നടത്തി. കണ്ണൂര്‍ യൂണിവേഴ്സിറ്റി ടീച്ചര്‍ എഡ്യുക്കേഷന്‍ സെന്റര്‍ ഡയറക്ടര്‍ ഡോ.എന്‍.പി. അനില്‍ ശ്രീനാരായണധര്‍മ മീമാംസ സന്ദേശം നല്‍കി. കേരള സാഹിത്യ അക്കാദമി ജനറല്‍ കൗണ്‍സില്‍ അംഗവും കവിയുമായ സുകുമാരന്‍ ചാലിഗദ്ദ ’ഗുരുവും കേരള നവോഥാനവും’ എന്ന വിഷയത്തില്‍ പ്രഭാഷണം നടത്തി. സാംസ്കാരിക പ്രവര്‍ത്തകനും മുന്‍ അധ്യാപകനുമായ പി.കെ. റെജി ഗുരുദര്‍ശന പ്രഭാഷണവും ഗുരുധര്‍മപ്രചാരണസഭ കേന്ദ്ര സമിതി അംഗം എന്‍. അശോകന്‍ ആര്‍.ശങ്കര്‍. അനുസ്മരണവും നടത്തി. കേരള വിദ്യാഭ്യാസ സംരക്ഷണ സമിതി സംസ്ഥാന സെക്രട്ടറി കെ.പി. ശശികുമാര്‍, എന്‍.എന്‍. ചന്ദ്രബാബു, കെ.ആര്‍. ഗോപി, പി. പുഷ്പവല്ലി, നിഷ രാജന്‍, സരസു നാരായണന്‍കുട്ടി, സജിനി ഷാജി, സത്യന്‍ ചുള്ളിയോട്, ദിവാകരന്‍ മാനന്തവാടി, വിജയന്‍ പാലക്കുഴി, ടി.കെ. വിശ്വംഭരന്‍, പവിത്രന്‍ അമരക്കുനി, കെ. ആര്‍. ജയറാം, ശിവരാമന്‍ പാറക്കുഴി, കൃഷ്ണന്‍കുട്ടി പനവല്ലി, കമലേശന്‍ സീതാലയം, ഓമന ബഷി, പി. ജനാര്‍ദനന്‍, സഹദേവന്‍ വാളവയല്‍ എന്നിവര്‍ പ്രസംഗിച്ചു. സഭാ പ്രവര്‍ത്തകര്‍ ഗാന്ധി പ്രതിമയില്‍ പുഷ്പാര്‍ച്ചന നടത്തി. ലഹരിവിരുദ്ധ പ്രവര്‍ത്തനങ്ങളുടെ ഭാഗമായി ജില്ലാതലത്തില്‍ നടത്തിയ മത്സരങ്ങളില്‍ വിജയികളായ ആര്യനന്ദ, വി.എസ്. ദേവര്‍ഷ്, പി.എസ്. അഭിഷ്മ, പൂജ പ്രദീപ്, ലക്ഷ്മി കെ. ജയേഷ്, അളകനന്ദ, സൗപര്‍ണിക രാജ്, സാന്ദ്ര സന്തോഷ് എന്നിവര്‍ക്ക് മന്ത്രി ഒ.ആര്‍. കേളു സമ്മാനങ്ങള്‍ നല്‍കി.

ലഹരിക്കെതിരേ ജനകീയ കാവല്‍: ജില്ലതല ഉദ്ഘാടനം നടത്തി

പനമരം: ’ലഹരിവിരുദ്ധ, അക്രമ രഹിത കലാലയം’ എന്ന ലക്ഷ്യത്തോടെ ഓള്‍ കേരള സ്കൂള്‍ ടീച്ചേഴ്സ് യൂണിയന്‍ നടപ്പിലാക്കുന്ന ’ലഹരിക്കെതിരേ ജനകീയ കാവല്‍’ പ്രചാരണ പരിപാടിയുടെ ജില്ലതല ഉദ്ഘാടനം ലയണ്‍സ് ഹാളില്‍ സിപിഐ ജില്ലാ സെക്രട്ടറി ഇ.ജെ. ബാബു നിര്‍വഹിച്ചു. എകഐസ്ടിയു ജില്ലാ പ്രസിഡന്റ് വി.ആര്‍. പ്രകാശ് അധ്യക്ഷത വഹിച്ചു. സംസ്ഥാന പ്രസിഡന്‍റ് കെ.കെ. സുധാകരന്‍ മുഖ്യാതിഥിയായി. ‌സിപിഐ ജില്ലാ എക്സിക്യുട്ടീവ് കമ്മിറ്റി അംഗം വി.കെ. ശശി, വനിതാ കലാസാഹിതി ജില്ലാ പ്രസിഡന്‍റ് എം.എം. മേരി, കേരള മഹിളാസംഘം ജില്ലാ പ്രസിഡന്‍റ് തെരേസ ജോസഫ്, സിപിഐ ജില്ലാ കൗണ്‍സില്‍ അംഗം കെ.എം. ബാബു, അഖിലേന്ത്യ കിസാന്‍സഭ ജില്ലാ കമ്മിറ്റി അംഗം ജോസഫ് മുട്ടുമന, ജോയിന്റ് കൗണ്‍സില്‍ ജില്ലാ സെക്രട്ടറി ടി.ഡി. സുനില്‍മോന്‍, കെജിഒഎഫ്. ജില്ലാ സെക്രട്ടറി അമല്‍ വിജയ്, കൃഷ്ണദാസന്‍, സുധ സുരേഷ്, സി.പി. ജിത്തുരാജ്, സുനില്‍ അഗസ്റ്റിന്‍ എന്നിവര്‍ പ്രസംഗിച്ചു. യൂണിയന്‍ ജില്ലാ സെക്രട്ടറി ശ്രീജിത്ത് വാകേരി സ്വാഗതവും സെക്രട്ടേറിയറ്റ് അംഗം ബെന്നി തോമസ് നന്ദിയും പറഞ്ഞു.

തെരുവുനായ ആക്രമണം: 500 ഓളം കോഴികള്‍ ചത്തു

പടിഞ്ഞാറത്തറ: തെരുവുനായ ആക്രമണത്തില്‍ 500 ഓളം കോഴികള്‍ ചത്തു. കാവര ദിനേശ്കുമാറിന്റെ ഫാമിലെ കോഴികളാണ് ചത്തത്. കഴിഞ്ഞ ദിവസം രാത്രിയാണ് സംഭവം. ഫാമിലെ പൈപ്പുകളും മറ്റുപകരണങ്ങളും നശിപ്പിച്ചു. ഒരു ലക്ഷം രൂപയുടെ നഷ്ടം കണക്കാക്കുന്നതായി ദിനേശ്കുമാര്‍ പറഞ്ഞു.

പുലിയെ പിടിച്ച് ജനങ്ങളുടെ ആശങ്ക അകറ്റണം: എന്‍.ഡി. അപ്പച്ചന്‍

സുല്‍ത്താന്‍ബത്തേരി: ചീരാലിലും സമീപപ്രദേശങ്ങളിലും ശല്യം ചെയ്യുന്ന പുലിയെ പിടികൂടി ജനങ്ങളുടെ ആശങ്കയകറ്റാന്‍ വനംവന്യജീവി സംരക്ഷണ വകുപ്പ് തയാറാകണമെന്ന് ഡിസിസി പ്രസിഡന്റ് എന്‍.ഡി. അപ്പച്ചന്‍. കല്ലിങ്കര വാര്‍ഡ് കോണ്‍ഗ്രസ് കുടുംബ സംഗമം ഉദ്ഘാടനം ചെയ്യുകയായിരുന്നു അദ്ദേഹം. രണ്ടാഴ്ചയ്ക്കിടെ അഞ്ച് വളര്‍ത്തുമൃഗങ്ങളെ പുലി കൊന്നു. ജനവാസമേഖലകളില്‍ വിവിധ സ്ഥലങ്ങളില്‍ പുലിയെ കണ്ടതായാണ് നാട്ടുകാര്‍ പറയുന്നത്. വന്യജീവി പ്രതിരോധത്തിന് ഫലപ്രദമായ പദ്ധതികള്‍ നടപ്പാക്കണം. നഷ്ടപരിഹാരത്തിന് കര്‍ഷകര്‍ നല്‍കിയ അപേക്ഷകള്‍ കെട്ടിക്കിടക്കുന്ന സാഹചര്യം ഒഴിവാക്കണം. വന്യമൃഗ ആക്രമണത്തില്‍ പരിക്കേറ്റവര്‍ക്ക് ചികിത്സ ഉറപ്പുവരുത്തണം. വന്യജീവി സങ്കേതത്തിലെ മുത്തങ്ങ റേഞ്ചില്‍പ്പെട്ട ചീരാല്‍ പ്രദേശം മേപ്പാടി റേഞ്ചിനു കീഴിലാക്കിയത് വിചിത്ര നടപടിയാണെന്നും അപ്പച്ചന്‍ പറഞ്ഞു. സി.എം. ഷിജു അധ്യക്ഷത വഹിച്ചു. വി.ടി. ബേബി, ജെ.എ. രാജു, കെ.സി.കെ. തങ്ങള്‍, ലളിത, ചന്ദ്രന്‍ കലംകുഴി, പി.ടി. പദ്മനാഭന്‍, കെ. സുകുമാരന്‍, കൊടപ്പുള്ളി സുജാത, ടി.കെ. രാധാകൃഷ്ണന്‍ എന്നിവര്‍ പ്രസംഗിച്ചു.

സമുദായ ദിനാഘോഷം നടത്തി

മൂലങ്കാവ്: കത്തോലിക്ക കോണ്‍ഗ്രസിന്‍റെ നൂറ്റിയേഴാം ജൻമദിനത്തോടനുബന്ധിച്ച് സമുദായ ദിനാഘോഷം മൂലങ്കാവ് യൂണിറ്റിൽ നടന്നു. യൂണിറ്റ് ഡയറക്ടർ ഫാ. അനീഷ് കാട്ടാങ്കോട്ടിൽ പതാക ഉയർത്തി. യൂണിറ്റ് പ്രസിഡന്‍റ് ഡേവി മാങ്കുഴ അധ്യക്ഷത വഹിച്ചു. അവകാശങ്ങൾ നേടിയെടുക്കാൻ പരസ്പര സ്നേഹത്തോടും ഐക്യത്തോടും വർത്തിക്കണമെന്നും ഭീകരതയ്ക്കെതിരേ ഒറ്റക്കെട്ടായി നിൽക്കണമെന്നും അദ്ദേഹം ഉദ്ബോധിപ്പിച്ചു. തോമസ് പട്ടമന, മോളി മാമൂട്ടിൽ, ക്ലമന്‍റ് കുഴികണ്ടത്തിൽ, ബാബു കുന്നത്തേട്ട്, തോമസ് വളയംപള്ളി, ജോഷി കോട്ടേകുടി എന്നിവർ പ്രസംഗിച്ചു.

കത്തോലിക്ക കോണ്‍ഗ്രസ് ഫൊറോന സമിതി യോഗം ചേർന്നു

സുൽത്താൻ ബത്തേരി: കത്തോലിക്ക കോണ്‍ഗ്രസ് ബത്തേരി ഫൊറോന സമിതി യോഗം അസംപ്ഷൻ എ യു.പി സ്കൂളിൽ ചേർന്നു. ഫൊറോന പ്രസിഡന്‍റ് ഡേവി മാങ്കുഴ അധ്യക്ഷത വഹിച്ചു. ഫൊറോന ഡയറക്ടർ ജോസ് മെച്ചേരിൽ ഉദ്ഘാടനം ചെയ്തു. മതന്യൂനപക്ഷ ഭീകരതയിലും മയക്കുമരുന്നിന്‍റെ വ്യാപനത്തിലും യോഗം ഉത്കണ്ഠ രേഖപ്പെടുത്തി. സഭയുടെയും സമുദായത്തിന്‍റെയും കാവലാളാകുവാൻ കത്തോലിക്ക കോണ്‍ഗ്രസിന് കഴിയുമെന്ന് യോഗം വിലയിരുത്തി. കത്തോലിക്ക കോണ്‍ഗ്രസ് ബത്തേരി ഫോറോന കണ്‍വെൻഷൻ ജൂണ്‍ എട്ടിന് നടത്താൻ തീരുമാനിച്ചു. സമുദായ ദിനാഘോഷത്തോടനുബന്ധിച്ച് രൂപത, ഫൊറോന, യൂണിറ്റ് നേതാക്കൻമാരെ ആദരിച്ചു. തോമസ് പട്ടമന, സാജു പുലിക്കോട്ടിൽ, ജോസ് ചുണ്ടാട്ട്, ആന്‍റണി പള്ളിക്കാത്തൊട്ടി, ബേബി മഠത്തിൽ, ജോഷി കാരക്കുന്നേൽ, ജേക്കബ് മുക്കത്ത്, ചാൾസ് വടശേരിൽ, ബേബി മഠത്തിൽ, ജോയി പുളിക്കൽ, ലൂക്കോച്ചൻ ബത്തേരി, മോളി മാമൂട്ടിൽ, ഫിലോമിന മുതുകുളം എന്നിവർ പ്രസംഗിച്ചു.

പിണറായി വിജയൻ ഇനി പ്രതിപക്ഷ നേതാവുപോലും ആകില്ല: കെ. മുരളീധരൻ

കൽപ്പറ്റ: ആരു തലകുത്തിനിന്നാലും മൂന്നാംതവണ പിണറായി വിജയൻ മുഖ്യമന്ത്രിയാകില്ലെന്ന് കെപിസിസി മുൻ പ്രസിഡന്‍റ് കെ. മുരളീധരൻ. മുഖ്യമന്ത്രിയുടെ രാജി ആവശ്യപ്പെട്ട് ജില്ലാ കോണ്‍ഗ്രസ് കമ്മിറ്റി സംഘടിപ്പിച്ച കളക്ടറേറ്റ് മാർച്ചിന്‍റെ സമാപനയോഗം ഉദ്ഘാടനം ചെയ്യുകയായിരുന്നു അദ്ദേഹം. ഇനിയും പിണറായി അധികാരത്തിൽ വന്നാൽ പാർട്ടി ഇല്ലാതാകുമെന്നാണ് സാധാരണക്കാരായ സിപിഎം പ്രവർത്തകർ പറയുന്നത്. പ്രതിപക്ഷ നേതാവാകാനുള്ള യോഗംപോലും ഇനി പിണറായിക്ക് ലഭിക്കില്ല. മുഖ്യമന്ത്രിയുടെ മകളുടെ എക്സാലോജിക് കന്പനി യാതൊരു സേവനവും നൽകാതെയാണ് സിഎംആർഎല്ലിൽനിന്നു രണ്ടു കോടി രൂപ കൈപ്പറ്റിയത്. എസ്എഫ്ഐഒ അന്വേഷണം നടത്തി, ചെയ്യാത്ത സേവനത്തിന് പണം വാങ്ങിയതായുള്ള കണ്ടെത്തൽ കോടതിയിൽ സമർപ്പിച്ചിരിക്കുകയാണ്. മകൾ കേസിൽ പ്രതിയായ സാഹചര്യത്തിൽ മുഖ്യമന്ത്രി രാജിവയ്ക്കേണ്ടതാണ്. ഒന്നാം പിണറായി സർക്കാരിന്‍റെ കാലത്ത് പ്രിൻസിപ്പൽ സെക്രട്ടറി ശിവശങ്കർ സ്വർണക്കടത്ത് കേസിൽ പ്രതിയായി ജയിലിലായി. കേസ് ഇപ്പോഴും നിലനിൽക്കുകയാണ്. രണ്ടാം പിണറായി സർക്കാരിന്‍റെ കാലത്ത് പ്രിൻസിപ്പൽ സെക്രട്ടറി കെ.എം. ഏബ്രഹാം വരവിൽ കവിഞ്ഞ സ്വത്ത് സന്പാദിച്ചതായി കണ്ടെത്തിയിരിക്കയാണ്. ഹൈക്കോടതി സിബിഐ അന്വേഷണം ഉത്തരവിട്ടെങ്കിലും സാങ്കേതിക കാരണങ്ങളാൽ സുപ്രീം കോടതി സ്റ്റേ നൽകി. എന്നാൽ കേസിന്‍റെ മെറിറ്റിലേക്ക് കടന്നിട്ടില്ല. പ്രതിപ്പട്ടികയിൽ ഇപ്പോഴും പ്രിൻസിപ്പൽ സെക്രട്ടറിയുണ്ട്. സ്ത്രീകളുടെ കണ്ണീർ വീഴ്ത്തിയ സർക്കാരാണ് കേരളം ഭരിക്കുന്നത്. ആശാ വർക്കർമാരുടെ സമരം 90 ദിവസം പിന്നിടുന്പോഴും ഓണറേറിയം ഒരു രൂപ പോലും വർധിപ്പിക്കാൻ സർക്കാർ തയാറാകുന്നില്ല. സെക്രട്ടേറിയേറ്റിനു മുന്പിൽ വനിതാ പോലീസ് ഉദ്യോഗാർഥികളുടെയും കണ്ണീർ വീണു. സിപിഎം നേതാവ് പി.കെ. ശ്രീമതിയുടെ കണ്ണീരും കേരളം കണ്ടു. സ്ത്രീകളുടെ കണ്ണീർ വീണാൽ സാമ്രാജ്യങ്ങൾ അടക്കം തകരുമെന്നതിന് എത്രയോ ഉദാഹരണങ്ങളുണ്ട്. പുരാണവും ചരിത്രവും പരിശോധിച്ചാൽ അത് മനസിലാകും. മാർപാപ്പയുടെ ദേഹവിയോഗത്തിലും പഹൽഗാമിൽ ഭീകരവാദി ആക്രമണത്തിൽ 26 പേർ കൊല്ലപ്പെട്ടതിലും ഹൃദയം നീറി ജനം നിൽക്കുന്പോൾ എകെജി സെന്‍റർ ഉദ്ഘാടനം നടത്തിയവരാണ് സിപിഎമ്മുകാർ. പോളിറ്റ് ബ്യൂറോ അംഗം മാത്രമായ മുഖ്യമന്ത്രി ദേശീയ സെക്രട്ടറി എം.എ. ബേബിയെ മൂന്നാം നിരയിലിരുത്തിയാണ് ഉദ്ഘാടനം നിർവഹിച്ചത്. കോഴിക്കോട് മെഡിക്കൽ കോളജ് ആശുപത്രിയിലെ അത്യാഹിത വിഭാഗത്തിലുണ്ടായ തീപിടിത്തത്തെത്തുടർന്നു നാലു പേരാണ് മരിച്ചത്. ഹൃദയാഘാതം മൂലമാണ് മരണമെന്നാണ് സർക്കാർ ഭാഷ്യം. എല്ലാ രോഗികളും മരിക്കുന്നത് ഹൃദയത്തിന്‍റെ പ്രവർത്തനം നിലയ്ക്കുന്പോഴാണ്. ഈ മരണങ്ങളുടെ മൂലകാരണം തീപിടിത്തമാണ്. കഴിഞ്ഞദിവസവും മെഡിക്കൽ കോളജ് ആശുപത്രിയിൽ തീപിടിത്തമുണ്ടായി. മെഡിക്കൽ കോളജ് ആശുപത്രിയിലെ അത്യാഹിത വിഭാഗത്തിലെത്തിയാൽ വലിയ താമസമില്ലാതെ പരലോകത്തേക്ക് പോകാമെന്നാണ് ആളുകൾ പറയുന്നത്. പാവപ്പെട്ട മൂന്ന് കുട്ടികളാണ് പേവിഷബാധയ്ക്കെതിരേ വാക്സിനെടുത്തിട്ടും സംസ്ഥാനത്ത് അടുത്തിടെ മരിച്ചത്. വാക്സിൻ യോജ്യമായ രീതിയിലാണോ സൂക്ഷിച്ചതെന്നതടക്കം കാര്യങ്ങൾ പരിശോധിക്കണം. എന്നാൽ ആരോഗ്യമന്ത്രി ഇതൊന്നും കാണുന്നില്ല. മുഖ്യമന്ത്രി രാജിവയ്ക്കുന്നതിനു മുന്പ് ആരോഗ്യമന്ത്രിയെ പുറത്താക്കണണം. കേരള ഹൗസിൽ ധനമന്ത്രി നിർമല സീതാരാമനുമായി മുഖ്യമന്ത്രി നടത്തിയ ചർച്ച ഡീലാണ്. ഗവർണറും കെ.വി. തോമസുമാണ് ഒപ്പമുണ്ടായിരുന്നത്. ഇത് അന്തർധാരയുടെ ഭാഗമാണ്. 2026ൽ സിപിഎമ്മിനെ വിജയിപ്പിച്ചാൽ 2031ൽ ബിജെപിയെ അധികാരത്തിലെത്തിക്കുമെന്നതാണ് ആ ഡീലെന്നും മുരളീധരൻ പറഞ്ഞു. ഡിസിസി പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു. നേതാക്കളായ പി.കെ. ജയലക്ഷ്മി, കെ.എൽ. പൗലോസ്, പി.പി. ആലി, സി.പി. വർഗീസ്, എൻ.കെ. വർഗീസ്, ടി.ജെ. ഐസക്, കെ.കെ. വിശ്വനാഥൻ, കെ. ഇ. വിനയൻ, സംഷാദ് മരക്കാർ, ഒ.വി. അപ്പച്ചൻ, എം.എ. ജോസഫ്, വി.എ. മജീദ്, കെ.വി. പോക്കർ ഹാജി, എം.ജി. ബിജു, ബിനു തോമസ്, എൻ.സി. കൃഷ്ണകുമാർ, കമ്മന മോഹനൻ, ഡി.പി. രാജശേഖരൻ, സി. ജയപ്രസാദ്, പി.ഡി. സജി, പി.കെ. അബ്ദുറഹ്മാൻ, ശോഭനകുമാരി, ചിന്നമ്മ ജോസ്, എൻ.യു. ഉലഹന്നാൻ, ബീന ജോസ്, ജി. വിജയമ്മ, പി.വി. ജോർജ്, പി. വിനോദ്കുമാർ, എച്ച്.ബി. പ്രദീപ്, ഒ.ആർ. രഘു, നജീബ് കരണി, മോയിൻ കടവൻ, പോൾസണ്‍ കൂവക്കൽ, വർഗീസ് മൂരിയൻകാവിൽ എന്നിവർ പ്രസംഗിച്ചു.

നെല്ലാക്കോട്ടയിൽ കാട്ടാന ആക്രമണം: നാട്ടുകാർ റോഡ് ഉപരോധിച്ചു

ഗൂഡല്ലൂർ: ഗൂഡല്ലൂർ-സുൽത്താൻ ബത്തേരി അന്തർ സംസ്ഥാന പാതയിലെ നെല്ലാക്കോട്ട ടൗണിൽ കാട്ടാനയുടെ പരാക്രമം. സംഭവത്തിൽ പ്രതിഷേധിച്ച് നാട്ടുകാർ റോഡ് ഉപരോധിച്ചു. ഇന്നലെ രാവിലെ 7.30ഓടെയാണ് സംഭവം. വനത്തിൽ നിന്ന് റോഡിലേക്ക് ഇറങ്ങിയ ആന റോഡരികിൽ പാർക്ക് ചെയ്തിരുന്ന നെല്ലാക്കോട്ട സ്വദേശിയും വ്യാപാരിയുമായ ജനീറിന്‍റെ കാർ തകർത്തു. കാട്ടാനയെ കണ്ട് ഭയന്നോടുന്നതിനിടെ നിലത്ത് വീണ് മധ്യവയസ്കന് പരിക്കേറ്റു. നെല്ലാക്കോട്ട സ്വദേശി ഷൗക്കത്ത് (62) ആണ് പരിക്കേറ്റത്. (മുസ്ലിം ജമാഅത്ത് നെല്ലാക്കോട്ട സർക്കിൾ സെക്രട്ടറിയാണ്). ഇദ്ദേഹത്തെ ഗൂഡല്ലൂർ താലൂക്ക് ആശുപത്രിയിലും തുടർന്ന് സുൽത്താൻ ബത്തേരിയിലെ സ്വകാര്യ ആശുപത്രിയിലും പ്രവേശിപ്പിച്ചു. റോഡിന്‍റെ അരികിൽ നിൽക്കുകയായിരുന്ന ഇദ്ദേഹത്തിന് നേരെ കാട്ടാന പാഞ്ഞടുക്കുകയായിരുന്നു. ഭാഗ്യം കൊണ്ടാണ് രക്ഷപ്പെട്ടത്. തുടർന്ന് റോഡിന്‍റെ താഴ്ഭാഗത്തിലേക്ക് ഇറങ്ങിയ ആന പ്രദേശവാസിയായ സൈതലവിയുടെ വീട് തകർത്തു. വീടിന്‍റെ ടറസിന് മുകളിൽ കയറുകയും ചെയ്തു. പിന്നീട് ജനങ്ങൾ ശബ്ദം ഉണ്ടാക്കിയാണ് ആനയെ വനത്തിലേക്ക് തുരത്തിയത്. നെല്ലാക്കോട്ട ടൗണിൽ കാട്ടാനയുടെ വിളയാട്ടമാണ്. പലതവണ കാട്ടാനയുടെ ആക്രമണം ഉണ്ടായിട്ടുണ്ടെങ്കിലും വനംവകുപ്പ് യാതൊരു നടപടിയും സ്വീകരിച്ചിട്ടില്ല. വനംവകുപ്പിന്‍റെ അനാസ്ഥ കാരണമാണ് ഇത്തരം സംഭവങ്ങൾ ആവർത്തിക്കുന്നതെന്ന് നാട്ടുകാർ ആരോപിച്ചു. കാട്ടാനയുടെ ആക്രമണത്തിന് ശാശ്വത പരിഹാരം കാണണമെന്ന് ആവശ്യപ്പെട്ട് നാട്ടുകാർ പോലീസ് സ്റ്റേഷന് സമീപത്ത് ഗൂഡല്ലൂർ-സുൽത്താൻ ബത്തേരി അന്തർ സംസ്ഥാന പാത ഉപരോധിച്ചു. രാവിലെ എട്ട് മുതൽ 9.30വരെയാണ് ഉപരോധ സമരം നടത്തിയത്. സ്ത്രീകൾ ഉൾപ്പെടെയുള്ള നൂറുക്കണക്കിന് പേർ സമരത്തിൽ പങ്കെടുത്തു. വിവരമറിഞ്ഞ് ദേവാല ഡിവൈഎസ്പി ജയപാലൻ, വനംവകുപ്പ് ഉദ്യോഗസ്ഥരായ കറുപ്പ, രവി എന്നിവരുടെ നേതൃത്വത്തിലുള്ള സംഘം സ്ഥലത്തെത്തി സമരക്കാരുമായി ചർച്ച നടത്തി. വനാതിർത്തിയിൽ കിടങ്ങ് നിർമിക്കുമെന്നും ആക്രമണത്തിൽ മതിയായ നഷ്ടപരിഹാരം നൽകുമെന്നും അറിയിച്ചതോടെയാണ് സമരം അവസാനിപ്പിച്ചത്. കാട്ടാന ശല്യം കാരണം ജനങ്ങൾ പൊറുതിമുട്ടിയിരിക്കുകയാണ്. വനംവകുപ്പിനെതിരെ ജനരോഷം ഉയർന്നു. സമരം കാരണം റോഡിന്‍റെ ഇരുവശങ്ങളിലും നൂറുക്കണക്കിന് വാഹനങ്ങളാണ് കുടുങ്ങി കിടന്നിരുന്നത്.

സാമൂഹ്യ മൂല്യച്യുതിക്കെതിരേ സാംസ്ക്കാരിക പ്രവർത്തകർ രംഗത്തിറങ്ങണം: എൻ.ഡി. അപ്പച്ചൻ

കൽപ്പറ്റ: സാമൂഹ്യ മൂല്യുതിക്കെതിരെ സാംസ്ക്കാരിക പ്രവർത്തകർ രംഗത്തിറങ്ങണമെന്ന്ഡിസിസി പ്രസിഡന്‍റ് എൻ.ഡി. അപ്പച്ചൻ പറഞ്ഞു. കെപിസിസി സംസ്ക്കാര സാഹിതി ജില്ലാ നേതൃസംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം . ജില്ലാ പ്രസിഡന്‍റ് സുരേഷ് ബാബു വാളൽ അധ്യക്ഷം വഹിച്ചു. മെന്പർഷിപ്പ് വിതരണ ഉദ്ഘാടനം സംസ്ഥാന ജനറൽ സെക്രട്ടറി സുനിൽ മടപ്പള്ളി നിർവഹിച്ചു. ലഹരി വിരുദ്ധ പ്രതിജ്ഞ ഡിസിസി വൈസ് പ്രസിഡന്‍റ് ഒ.വി. അപ്പച്ചൻ ചൊല്ലിക്കൊടുത്തു. കണ്‍വീനർ സി.കെ. ജിതേഷ്, എം.വി. രാജൻ, സുന്ദർരാജ് എടപ്പെട്ടി, സലീം താഴത്തൂർ, കെ. പത്മനാഭൻ, ഡോ. സീനതോമസ്, ആയിഷ പള്ളിയാൽ, ഏബ്രഹാം കെ. മാത്യു, കെ.കെ. രാജേന്ദ്രൻ, ഒ.ജെ. മാത്യു, ഗിരിജ സതീഷ്, ഉമ്മർ പൂപ്പറ്റ, കെ. വിജയൻ, വന്ദന ഷാജു, വിനോദ് തോട്ടത്തിൽ, ബെന്നി വട്ടപ്പറന്പിൽ, വി.കെ. ഭാസ്കരൻ, വി.പി. പ്രേംദാസ്, കെ.സി.കെ. തങ്ങൾ, ജിൻസ് ഫാന്‍റസി, എൻ. മജീദ്, സി.എസ്. പ്രഭാകരൻ, എം.ജി. ഉണ്ണി, മുരളീദാസ് എന്നിവർ പ്രസംഗിച്ചു.

ജില്ലയിൽ അതിദരിദ്ര പട്ടികയിൽ അവശേഷിക്കുന്നത് 409 കുടുംബങ്ങൾ മാത്രം

കൽപ്പറ്റ: ജില്ലയിലെ അതിദരിദ്ര പട്ടികയിൽ ഇനി അവശേഷിക്കുന്നത് 409 കുടുംബങ്ങൾ മാത്രം. നാല് വർഷം മുൻപ് തുടങ്ങിയ അതിദരിദ്ര ലഘൂകരണ യജ്ഞത്തിലൂടെ 2045 കുടുംബങ്ങളെയാണ് മുക്തരാക്കിയത്. ഇവർക്ക് ആവശ്യമുള്ള ആരോഗ്യം, പാർപ്പിടം, ഭക്ഷണം, വരുമാനം എന്നിവ എത്തിച്ചുനൽകിയാണ് ഇത്രയും കുടുംബങ്ങളെ അതിദരിദ്ര പട്ടികയിൽ നിന്നും മോചിപ്പിച്ചത്. 2021 ൽ ജില്ലയിൽ ആകെ 2931 കുടുംബങ്ങൾ ആയിരുന്നു പട്ടികയിൽ ഉണ്ടായിരുന്നത്. 201 പട്ടികജാതി കുടുംബങ്ങളും 1028 പട്ടികവർഗ കുടുംബങ്ങളും 1695 ജനറൽ വിഭാഗം കുടുംബങ്ങളും ഉൾപ്പെടെയാണിത്. ഇതിൽ സർക്കാർ സേവനങ്ങൾ ആവശ്യമുള്ളവർ 2454 കുടുംബങ്ങൾ ആയിരുന്നു. ബാക്കി സർക്കാർ രേഖകൾ കൈവശം ഇല്ലാത്തവരും മരണപ്പെട്ടവരും മറ്റും ആയിരുന്നു. ഈ 2454 കുടുംബങ്ങൾക്ക് വേണ്ട വിധമുള്ള മൈക്രോ പ്ലാൻ തയാറാക്കിയാണ് അവരിൽ 2045 പേരെ അതിദരിദ്ര ലഘൂകരണ യജ്ഞത്തിലൂടെ പട്ടികയിൽ നിന്ന് മോചിപ്പിച്ചത്. നിലവിൽ ആരോഗ്യം, ഭക്ഷണം, വരുമാനം എന്നിവ ആവശ്യമുള്ള ഒരു കുടുംബം പോലും ജില്ലയിലെ അതിദാരിദ്യ്ര പട്ടികയിലില്ല. നിലവിൽ പട്ടികയിലുള്ള 409 കുടുംബങ്ങൾക്കും വേണ്ടത് പാർപ്പിടമാണ്. ഇതിനുവേണ്ടിയുള്ള നടപടികൾ ദ്രുതഗതിയിൽ പുരോഗമിക്കുകയാണ്. ഈ വർഷം നവംബറോടെ സന്പൂർണ അതിദാരിദ്യ്ര മുക്തമാകുകയാണ് സംസ്ഥാന സർക്കാരിന്‍റെ ലക്ഷ്യം. ഗ്രാമപഞ്ചായത്ത് തലത്തിൽ തരിയോട് 100 ശതമാനം അതിദാരിദ്യ്ര മുക്തമായി. തൊണ്ടർനാട് (97.8ശതമാനം), വെങ്ങപ്പള്ളി (97.72ശതമാനം), മീനങ്ങാടി (97.40 ശതമാനം), പൊഴുതന (94.73 ശതമാനം), തിരുനെല്ലി (94.33 ശതമാനം) എന്നീ ഗ്രാമപഞ്ചായത്തുകൾ തൊട്ടുപുറകിലുണ്ട്.

ഡിജിറ്റൽ സർവേ ക്യാന്പ് ഓഫീസ് ഉദ്ഘാടനം ചെയ്തു

വെങ്ങപ്പള്ളി: ഡിജിറ്റൽ സർവേ വില്ലേജ് ക്യാന്പ് ഓഫീസ് പുഴമുടിയിൽ പഞ്ചായത്ത് പ്രസിഡന്‍റ് ഇ.കെ. രേണുക ഉദ്ഘാടനം ചെയ്തു. ഡിജിറ്റൽ സർവേ അസി.ഡയറക്ടർ കെ. ബാലകൃഷ്ണൻ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് പി.എം. നാസർ മുഖ്യപ്രഭാഷണം നടത്തി. വാർഡ് അംഗങ്ങളായ ദീപ രാജൻ, ശ്രീജ ജയപ്രകാശ്, പുഷ്പ, വി.കെ. ശിവദാസൻ, കെ.പി. രാമൻ, കെ.പി. അൻവർ, അനിത, ടെക്നിക്കൽ അസിസ്റ്റന്‍റ് രാധാമണി, വില്ലേജ് ഓഫീസർ നിഷ, രാജേന്ദ്രൻ എന്നിവർ പ്രസംഗിച്ചു. റീസർവേ സൂപ്രണ്ട് മുഹമ്മദ് ഷെരീഫ് സ്വാഗതവും ഡിജിറ്റൽ സർവേ ചാർജ് ഓഫീസർ കെ.കെ. പ്രമോദ് നന്ദിയും പറഞ്ഞു.

കോണ്‍ഗ്രസ് നേതൃത്വം മറുപടി പറയാൻ തയാറാകണം: രാഷ്ട്രീയ യുവജനതാദൾ

കൽപ്പറ്റ: ഡിസിസി ട്രഷറർ എൻ.എം. വിജയന്‍റെയും മകന്‍റെയും ആത്മഹത്യക്ക് കാരണക്കാരായ സഹകരണ ബാങ്ക് നിയമനവുമായി ബന്ധപ്പെട്ട സാന്പത്തിക വിഷയം പരിഹരിക്കുന്നത് അടക്കമുള്ള വിഷയത്തിൽ അടിയന്തരമായി പ്രശ്നം പരിഹരിക്കുമെന്ന് ഉറപ്പുനൽകിയ കോണ്‍ഗ്രസ് നേതാക്കൾ തിരിഞ്ഞു നോക്കുന്നില്ലെന്ന് എൻ.എം. വിജയന്‍റെ മകൻ വിജേഷും മരുമകൾ പത്മജയും നിലനിൽപ്പ് തന്നെ വഴിമുട്ടി മാധ്യമങ്ങളോട് തുറന്നു പറയേണ്ടി വന്നു. വീട്ടിലെത്തി എല്ലാ സഹായവും പ്രശ്നപരിഹാരവും ഉറപ്പ് നൽകിയ പ്രിയങ്ക ഗാന്ധിയെ നിലവിൽ കാണാൻ പോലും അവസരം കുടുംബത്തിന് നൽകുന്നില്ല. നാട്ടിലെ എല്ലാ വിഷയങ്ങളിലും ചാടിപ്പുറപ്പെട്ട് അഭിപ്രായം പറയുന്ന പ്രതിപക്ഷ നേതാവും പാർട്ടിക്കാരെ സംരക്ഷിക്കുന്നവനാണ് താനെന്ന് പ്രസംഗിച്ചു നടക്കുന്ന കെപിസിസി പ്രസിഡന്‍റും അടക്കമുള്ള കോണ്‍ഗ്രസ് നേതാക്കൾ കുടുംബം ഉന്നയിച്ച വിഷയങ്ങളിൽ മറുപടി പറയാൻ തയാറാകണമെന്ന് രാഷ്ട്രീയ യുവജനതാദൾ ജില്ലാ പ്രസിഡന്‍റ് പി.പി. ഷൈജൽ ആവശ്യപ്പെട്ടു. ജീവിതം മുഴുവൻ കോണ്‍ഗ്രസിന് വേണ്ടി മാറ്റിവച്ച എൻ.എം. വിജയനോടും കുടുംബത്തോടും കൊടും ക്രൂരതയാണ് കോണ്‍ഗ്രസ് കാണിക്കുന്നത്. എൻ.എം. വിജയനും മകനും ആത്മഹത്യ ചെയ്ത സമയത്ത് വിഷയങ്ങളെല്ലാം തുറന്നുപറഞ്ഞ് രംഗത്തെത്തിയ കുടുംബത്തെ കോണ്‍ഗ്രസ് നേതൃത്വം അനുനയിപ്പിച്ച് കൂടെ നിർത്തി ആരോപണ വിധേയരായ പ്രതിസ്ഥാനത്തുള്ള ഡിസിസി പ്രസിഡന്‍റ് അടക്കമുള്ള നേതാക്കളെയും എംഎൽഎയെയും പാർട്ടി തലത്തിൽ നടപടി എടുക്കാന്നതും എംഎൽഎ സ്ഥാനം രാജിവയ്ക്കേണ്ടതുമായ സാഹചര്യം മറികടന്നു. തങ്ങളുടെ പ്രതിസന്ധിയും പ്രശ്നങ്ങളും മറികടന്ന് കഴിഞ്ഞപ്പോൾ വീണ്ടും കുടുംബത്തെ ബലിയാടാക്കുന്ന അവസ്ഥയാണ് കോണ്‍ഗ്രസ് നേതൃത്വം ചെയ്തു കൊണ്ടിരിക്കുന്നതെന്നും രാഷ്ട്രീയ യുവജനതാദൾ ജില്ലാ കമ്മിറ്റി പറഞ്ഞു.

കാർഷിക സ്റ്റാർട്ടപ്പുകൾക്ക് മികച്ച അവസരവുമായി കാർഷിക സർവ്വകലാശാല

കൽപ്പറ്റ: കാർഷിക സർവകലാശാലയുടെ അഗ്രിപ്രണർഷിപ്പ് ഓറിയന്‍റേഷൻ പ്രോഗ്രാം, സ്റ്റാർട്ട് അപ്പ് ഇൻക്യൂബേഷൻ പ്രോഗ്രാം എന്നിവയിലേക്ക് ഇപ്പോൾ അപേക്ഷിക്കാം. സ്മാർട്ട് കൃഷി രീതികൾ, കാർഷിക ഉത്പാദനത്തിനുള്ള അസംസ്കൃത വസ്തുക്കൾ, പുതിയ മൂല്യവർധിത ഉത്പന്നങ്ങൾ, കാർഷിക യന്ത്രങ്ങൾ, മാലിന്യ സംസ്കരണ മാർഗങ്ങൾ എന്നിങ്ങനെ മണ്ണു മുതൽ വിണ്ണിൽ പറക്കുന്ന ഡ്രോണ്‍ വരെ കാർഷിക ആശയം ഏതുമാകട്ടെ പുതുമയുള്ളതാണെങ്കിൽ കാർഷിക സ്റ്റാർട്ടപ്പുകളാക്കാം. കേരള കാർഷിക സർവകലാശാലയിലെ അഗ്രിബിസിനസ് ഇൻക്യുബേറ്ററിൽ, കേന്ദ്ര കാർഷിക കർഷകക്ഷേമ മന്ത്രലയത്തിന്‍റെ കീഴിലുള്ള ആർകെവിവൈ ആർഎഎഫ്ടിഎഎആർ പദ്ധതിയിലൂടെയാണ് കാർഷിക ആശയങ്ങൾക്ക് അവസരങ്ങളൊരുക്കുന്നത്. കെഎയുറെയ്സ്, കെഎയു പെയ്സ് എന്നിങ്ങനെ രണ്ടിന പ്രോഗ്രാമുകളിലായി ഇക്കഴിഞ്ഞ ആറ് വർഷത്തിൽ ഇരിനൂറ്റി നാൽപ്പത്തിയഞ്ചോളം നവസംരംഭകരെയാണ് കെ.എ.യു. റാഫ്ത്താർ അഗ്രിബിസിനസ്‌സ് ഇൻക്യുബേറ്റർ വളർത്തിയെടുത്തത്. ഇതിൽ നിന്നും തിരഞ്ഞെടുക്കപ്പെട്ട 98 സംരംഭകർക്ക് 12.23 കോടി രൂപയുടെ ഗ്രാന്‍റിന് കേന്ദ്ര കാർഷിക കർഷകക്ഷേമ മന്ത്രലയത്തിൽ നിന്നും അംഗീകാരം ലഭിച്ചു. നൂതന ആശയങ്ങളുള്ള കാർഷിക മേഖലയിൽ സംരംഭം തുടങ്ങാൻ ആഗ്രഹിക്കുന്നവർക്കും വിദ്യാർഥികൾക്കും നവസംരംഭകർക്കും പ്രോഗ്രാമുകളിലേക്കായി അപേക്ഷിക്കാം. കാർഷിക മേഖലയിൽ വേറിട്ട ആശയങ്ങളുള്ളവരും വിദ്യാർഥികളും അവ പ്രോട്ടോടൈപ്പുകളായി വികസിപ്പിച്ചെടുക്കുന്നതിനായി അഗ്രിപ്രണർഷിപ്പ് ഓറിയന്േ‍റഷൻ പ്രോഗ്രാമിലേക്കും (കഐയു റെയ്സ് 2025), നിലവിൽ സംരംഭം തുടങ്ങിയവർ പ്രാട്ടോടൈപ്പുകളുടെ വിപുലീകരണത്തിനും വാണിജ്യവത്കരണത്തിനുമായി സ്റ്റാർട്ട് അപ്പ് ഇൻക്യുബേഷൻ പ്രോഗ്രാമിലേക്കുമാണ് (കെഎസ്യു പേസ് 2025) അപേക്ഷിക്കേണ്ടത്. കെഎയു റെയ്സ് 2025 പ്രോഗ്രാമിലേക്ക് തെരഞ്ഞെടുക്കപ്പെടുന്നവർക്ക് ഒരു മാസം നീണ്ടു നിൽക്കുന്ന പരിശീലന പരിപാടിയും പരിശീലനം വിജയകരമായി പൂർത്തിയാക്കിയവരിൽ നിന്ന് തെരഞ്ഞെടുക്കുന്നവർക്ക് അഞ്ച് ലക്ഷം രൂപ വരെ ഗ്രാന്‍റിനും അവസരമൊരുക്കുന്നു. നൂതന ആശയങ്ങളുള്ള വിദ്യാർഥികളിൽ സംരംഭകത്വം പ്രോത്സാഹിപ്പിക്കുന്നതിനും അവരുടെ ആശയങ്ങൾ സംരംഭമായി വികസിപ്പിക്കുന്നതിനുമായി നാല് ലക്ഷം രൂപ വരെയുള്ള ധനസഹായവും പദ്ധതിയിലൂടെ ലഭ്യമാക്കുന്നു. കെഎസ്‌യു പെയ്സ് 2025 പ്രോഗ്രാമിലേക്ക് തെരഞ്ഞെടുക്കപ്പെടുന്നവർക്ക് പ്രോട്ടോടൈപ്പുകളുടെ വാണിജ്യവത്കരണത്തിനായുള്ള വിദഗ്ദ മാർഗ നിർദേശങ്ങളും സാങ്കേതിക സാന്പത്തിക സഹായവും 15 ദിവസത്തെ അധിക ഇൻക്യുബേഷൻ വർക്ക്ഷോപ്പും അഗ്രിബിസിനസ് ഇൻക്യൂബേഷൻ സൗകര്യം ഉപയോഗപ്പെടുത്തുവാനുള്ള അവസരവും ലഭ്യമാക്കുന്നു. വിവിധ ഘട്ട സ്ക്രീനിംഗുകൾക്കു ശേഷം തെരഞ്ഞെടുക്കപ്പെടുന്ന സ്റ്റാർട്ടപ്പുകൾക്ക് പരമാവധി 25 ലക്ഷം രൂപ വരെ ഗ്രാന്‍റും ലഭ്യമാകുന്നതാണ്. കൂടുതൽ വിവരങ്ങൾക്ക്rabi.kau.in എന്ന വെബ്സൈറ്റ് സന്ദർശിക്കുകയോ കൊടുത്തിരിക്കുന്ന ഫോണ്‍ നന്പറുകളിൽ ബന്ധപ്പെടുകയോ ചെയ്യാവുന്നതാണ്. നിശ്ചിത മാതൃകയിൽ പൂരിപ്പിച്ച അപേക്ഷകൾ ൃമയശ@സമൗ.ശി എന്ന ഇ മെയിൽ വിലാസത്തിലേക്കോ അഗ്രിബിസിനസ് ഇൻക്യബേറ്ററിലേക്ക് പോസ്റ്റ് വഴിയോ ഗൂഗിൾ ഫോം മുഖേനയോ അയക്കാവുന്നതാണ്. അപേക്ഷകൾ സ്വീകരിക്കുന്ന അവസാന തീയതി 30. വിലാസം: ഡോ.കെ.പി. സുധീർ, അഗ്രിബിസിനസ് ഇൻക്യുബേറ്റർ മേധാവി, കാർഷിക എൻജിനിയറിംഗ് വിഭാഗം, കാർഷിക കോളജ്, കേരള കാർഷിക സർവകലാശാല, വെള്ളാനിക്കര, തൃശൂർ 680656. ഫോണ്‍: 9778436265/ 0487 2438332/ 8330801782/ 9496108185. email: [email protected].

കെബിസിടി ഫുട്ബോൾ ടൂർണമെന്‍റ് ആരംഭിച്ചു

ചേനംകൊല്ലി: കെബിസിടി വായനശാല ആൻഡ് ക്ലബ്ബ് ന്ധഫുട്ബോളാണ് ലഹരി’ എന്ന സന്ദേശം പ്രചരിപ്പിച്ചുകൊണ്ട് 10 വരെ പതിനാറ് ടീമുകളെ പങ്കെടുപ്പിച്ചു നടത്തുന്ന മൂന്നാമത് സൂപ്പർ സിക്സ് ഫുട്ബോൾ ടൂർണമെന്‍റ് താഴെമുട്ടിൽ പ്ലേ സ്റ്റേഷൻ ടർഫിൽ ആരംഭിച്ചു. ജില്ലാ സ്പോർട്സ് കൗണ്‍സിൽ എക്സിക്യുട്ടീവ് അംഗം കെ.പി. വിജയി ഉദ്ഘാടനം ചെയ്തു. കെബിസിടി വായനശാല പ്രസിഡന്‍റ് സി.എം. സുമേഷ് അധ്യക്ഷത വഹിച്ചു. വായന ശാല സെക്രട്ടറി കെ. ഫിനോസ് കമാൽ, ട്രഷറർ ഷഫീഖ്, മുഹമ്മദ് ആസിഫ്, മുഹമ്മദ് റിസാൽ, പി.ടി. ഉസ്മാൻ, അൻവർ സാദിഖ്, ഫാസിൽ ജഹാംഗീർ, ഇ.കെ. സാബിത് എന്നിവർ പ്രസംഗിച്ചു.

നിരോധിത പ്ലാസ്റ്റിക് ക്യാരി ബാഗുകൾ ഉപയോഗിച്ചതിന് പിഴ

കൽപ്പറ്റ: നിരോധിത പ്ലാസ്റ്റിക് ക്യാരി ബാഗുകൾ ഉപയോഗിച്ചതിന് മാനന്തവാടി ലോട്ടസ് റവാ സ്റ്റോർ, അപ്പോളോ ടയേഴ്സ്, സിറ്റി ഫ്രൂട്ട്സ്, ബീഫ്സ്റ്റാൾ നന്പർ 14 എന്നീ സ്ഥാപനങ്ങൾക്ക് ജില്ലാ എൻഫോഴ്സ്മെന്‍റ് സ്ക്വാഡ് 35,000 രൂപ പിഴയിട്ടു. ജില്ലാ എൻഫോഴ്സ്മെന്‍റ് സ്ക്വാഡ് ലീഡർ ടി.കെ. സുരേഷ്, സ്ക്വാഡ് അംഗം എം.ബി. ലീബ, സിയാബുദ്ദീൻ, മാനന്തവാടി ഹെൽത്ത് ഇൻസ്പെക്ടർ സുനിൽകുമാർ എന്നിവർ പരിശോധനയ്ക്ക് നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]