ഉമ്മൻചാണ്ടി നീറ്റിലിറക്കിയ അച്ചാംതുരുത്തിക്കാരുടെ പാലിച്ചോൻ വള്ളം : Deepika.com Nattu Visesham

KASARAGOD

ഉമ്മൻചാണ്ടി നീറ്റിലിറക്കിയ അച്ചാംതുരുത്തിക്കാരുടെ പാലിച്ചോൻ വള്ളം

Sunday, November 10, 2024 8:06 AM IST

ചെറുവത്തൂർ: ചെറുവത്തൂർ പഞ്ചായത്തിലെ വേറിട്ട തുരുത്തായ അച്ചാംതുരുത്തിക്കാരുടെ സ്വകാര്യ അഭിമാനങ്ങളിലൊന്നാണ് മുൻ മുഖ്യമന്ത്രി ഉമ്മൻ ചാണ്ടി ആഘോഷപൂർവം നീറ്റിലിറക്കിയ പാലിച്ചോൻ ബോട്ട് ക്ലബിന്‍റെ ചുരുളൻ വള്ളം.

വടക്കൻ കേരളത്തിലെ ഒട്ടുമിക്ക വള്ളംകളി മത്സരങ്ങളിലും അച്ചാംതുരുത്തിക്കാർ മുന്നേറുന്നത് ആലപ്പുഴക്കാരെപ്പോലെ വെള്ളവും വള്ളവും കണ്ടുവളർന്നവരുടെ കൈക്കരുത്തും മനക്കരുത്തും കൊണ്ടാണ്. വ്യത്യസ്ത ജോലികൾ ചെയ്യുന്നവരാണെങ്കിലും തുഴച്ചിലറിയാത്ത പുരുഷൻമാരും സ്ത്രീകളും ഇവിടെ കുറവാണ്. പുരുഷ-വനിതാ ടീമുകൾ വൈകുന്നേരം അഞ്ചരയോടെ അച്ചാംതുരുത്തി കടവിൽ ഒത്തുചേർന്നാണ് മത്സര വള്ളംകളികൾക്കായി തുഴച്ചിൽ പരിശീലനം നടത്തുന്നത്. ഒന്നര മണിക്കൂറോളം നീളുന്ന പരിശീലനം കഴിഞ്ഞ് കരകയറുമ്പോഴേക്കും നാട്ടുകാർ ഇവർക്ക് ഭക്ഷണമൊരുക്കി കാത്തിരിക്കുന്നുണ്ടാകും.

മുൻ മുഖ്യമന്ത്രി ഉമ്മൻ ചാണ്ടി 2017 ൽ നീറ്റിലിറക്കിയ 25 ആൾ തുഴയും വള്ളത്തിൽ ഇവരുടെ ടീം ഇതുവരെ തോൽവിയറിഞ്ഞിട്ടില്ല. തേജസ്വിനിപ്പുഴയിൽ നടക്കുന്ന ഉത്തരമലബാർ ജലോത്സവത്തിലെ നിലവിലുള്ള ചാമ്പ്യൻമാരാണ് അച്ചാംതുരുത്തി ടീം.

വള്ളുവൻകടവ്, തളിപ്പറമ്പ് കുപ്പം മംഗലശേരി, തൃക്കരിപ്പൂർ മെട്ടമ്മൽ, പഴയങ്ങാടി പുഴ, ചാലിയാർ പുഴ എന്നിവിടങ്ങളിൽ നടന്ന ജലോത്സവങ്ങളിലെല്ലാം ജേതാക്കളായി. തലശേരി ധർമടത്ത് നടന്ന ജലോത്സവത്തിൽ മുന്നിലെത്തിയെങ്കിലും സംഘാടകർ സമയക്രമം അംഗീകരിക്കാത്തതുകൊണ്ട് മടങ്ങേണ്ടിവന്നു.

വരുന്ന 17 ന് നടക്കുന്ന ഉത്തര മലബാർ ജലോത്സവത്തിൽ പുരുഷൻമാരുടെ 25 ആൾ തുഴയുന്ന വിഭാഗത്തിൽ രണ്ടു ടീമുകളെയാണ് അച്ചാംതുരുത്തി ക്ലബ് ഇറക്കുന്നത്. പി. മധു, ജിഷ്ണു എന്നിവരുടെ നേതൃത്വത്തിൽ എ ടീമും കെ.കെ. ദിനേശൻ, പി. അതുൽനാഥ് എന്നിവരുടെ നേതൃത്വത്തിൽ ബി ടീമും. വനിതകളുടെ ടീം വേറെയുമുണ്ട്.