സ്‌കൂട്ടര്‍ യാത്രികയെ കാര്‍ കയറ്റി കൊലപ്പെടുത്തിയ കേസ്: പ്രതിക്കു ജാമ്യം : Deepika.com Kerala News |

Click here for detailed news of all items

സ്‌കൂട്ടര്‍ യാത്രികയെ കാര്‍ കയറ്റി കൊലപ്പെടുത്തിയ കേസ്: പ്രതിക്കു ജാമ്യം

Wednesday, November 13, 2024 12:51 AM IST

കൊച്ചി: സ്‌കൂട്ടര്‍ യാത്രക്കാരിയെ കാര്‍ കയറ്റിക്കൊന്ന കേസിലെ പ്രതി കരുനാഗപ്പള്ളി തൊടിയൂര്‍ സ്വദേശി അജ്മലിനു ഹൈക്കോടതി ഉപാധികളോടെ ജാമ്യം അനുവദിച്ചു.

സെപ്റ്റംബര്‍ 16 മുതല്‍ ജുഡീഷല്‍ കസ്റ്റഡിയില്‍ കഴിയുകയാണെന്നതും അന്വേഷണം ഏറെക്കുറെ പൂര്‍ത്തിയായ സാഹചര്യവും വിലയിരുത്തിയാണു ജസ്റ്റീസ് സി.എസ്. ഡയസ് ജാമ്യം അനുവദിച്ചത്.

കരുനാഗപ്പള്ളിയില്‍ വച്ച് രണ്ടു സ്തീകള്‍ സഞ്ചരിക്കുകയായിരുന്ന സ്‌കൂട്ടറില്‍ ഇടിക്കുകയും വീണുകിടന്ന സ്ത്രീകളിലൊരാളുടെമേല്‍ കാര്‍ കയറ്റിയിറക്കിയതിനെത്തുടര്‍ന്ന് മരണപ്പെട്ടുവെന്നുമാണു കേസ്.

അജ്മലിന്‍റെ കൂടെയുണ്ടായിരുന്ന സുഹൃത്ത് ഡോ. ശ്രീക്കുട്ടിയുടെ പ്രേരണയാലാണ് ഇത് ചെയ്തതെന്നാണു കേസ്. എന്നാല്‍, അശ്രദ്ധയോടെ സ്‌കൂട്ടര്‍ യാത്രക്കാര്‍ കുറുകെ കടന്നപ്പോള്‍ ഇടിക്കുകയായിരുന്നെന്നായിരുന്നു ഹര്‍ജിക്കാരന്‍റെ വാദം. രണ്ടാം പ്രതിക്കു കോടതി ജാമ്യം അനുവദിച്ചതായും ചൂണ്ടിക്കാട്ടി.

എന്നാല്‍, മദ്യലഹരിയില്‍ മുന്നോട്ടെടുത്താണു കാര്‍ കയറ്റി കൊലപ്പെടുത്തിയതെന്നായിരുന്നു പ്രോസിക്യൂഷന്‍ വാദം. അജ്മൽ മുമ്പ് എട്ട് കേസുകളില്‍ പ്രതിയാണ്. ജാമ്യത്തില്‍ വിട്ടാല്‍ തെളിവു നശിപ്പിക്കാനും സാക്ഷികളെ സ്വാധീനിക്കാനും സാധ്യതയുണ്ടെന്നും പ്രോസിക്യൂഷന്‍ വാദമുയർത്തി.

എന്നാൽ, 58 ദിവസമായി പ്രതി തടവില്‍ കഴിയുന്നതായി വിലയിരുത്തിയ കോടതി ജാമ്യം അനുവദിക്കുകയായിരുന്നു. ഒരു ലക്ഷം രൂപയുടെ സ്വന്തവും സമാന തുകയ്ക്കുള്ള മറ്റു രണ്ടു പേരുടെയും ജാമ്യ ബോണ്ട് കെട്ടിവയ്ക്കണമെന്നതാണ് പ്രധാന ഉപാധി.

വിചാരണക്കോടതി ആവശ്യപ്പെടുമ്പോള്‍ ഹാജരാകണം, തെളിവ് നശിപ്പിക്കാനോ ഏതെങ്കിലും വ്യക്തികളെ തെളിവു നല്‍കുന്നതില്‍നിന്നു തടയാനോ പാടില്ലെന്നും കോടതി വ്യക്തമാക്കി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.