ആസ്റ്ററിന് 16 ശതമാനം വരുമാന വർധന
Friday, October 25, 2024 10:39 PM IST
കൊച്ചി: ആസ്റ്റർ ഡിഎം ഹെൽത്ത്കെയറിന്റെ വരുമാനം സെപ്റ്റംബർ 30ന് അവസാനിച്ച രണ്ടാംപാദത്തിൽ 16 ശതമാനം വർധിച്ച് 1086 കോടിയായി.
കഴിഞ്ഞ സാമ്പത്തിക വർഷം സെപ്റ്റംബർ പാദത്തിൽ 934 കോടി രൂപയായിരുന്നു വരുമാനം. അർധവാർഷിക വരുമാനം 18 ശതമാനം വർധിച്ച് 2088 കോടി രൂപയായി. കഴിഞ്ഞ സാമ്പത്തികവർഷത്തിൽ അർധ വാർഷികവരുമാനം 1772 കോടി രൂപയായിരുന്നു.
2024 സാമ്പത്തികവർഷത്തിൽ 16.1 ശതമാനമുണ്ടായിരുന്നപ്രവർത്തന മാർജിൻ ഈ സാമ്പത്തികവർഷം 19.6 ശതമാനമാണ്. നികുതി, പലിശ തുടങ്ങി ബാധ്യതകൾക്കു മുമ്പുള്ള ലാഭം 48 ശതമാനം വർധിച്ച് 233 കോടി രൂപയായി.
2027 സാമ്പത്തികവർഷത്തോടെ രാജ്യത്തു 6800 കിടക്കകൾ എന്നത് മറികടക്കാനാകുമെന്ന് ആസ്റ്റർ ഡിഎം ഹെൽത്ത് കെയർ സ്ഥാപകനും ചെയർമാനുമായ ഡോ. ആസാദ് മൂപ്പൻ പറഞ്ഞു.