ഇന്ത്യൻ മത്സ്യത്തൊഴിലാളികൾക്കുനേർക്ക് ലങ്കൻ നാവികസേന വെടിവച്ചു
Wednesday, January 29, 2025 3:40 AM IST
ന്യൂഡൽഹി: ശ്രീലങ്കൻ നാവികസേന നടത്തിയ വെടിവയ്പിൽ അഞ്ച് ഇന്ത്യൻ മത്സ്യബന്ധനത്തൊഴിലാളികൾക്കു പരിക്കേറ്റു. പുതുച്ചേരിയില്‍നിന്നു പോയ മത്സ്യത്തൊഴിലാളികളാണ് ആക്രമണത്തിനിരയായത്.
ചൊവ്വാഴ്ച പുലർച്ചെ ഡെല്‍ഫ് ദ്വീപിന് സമീപമാണ് വെടിവയ്പ് നടന്നത്. 13 ഇന്ത്യൻ മത്സ്യത്തൊഴിലാളികൾ അടങ്ങുന്ന സംഘത്തിനു നേരേയായിരുന്നു ആക്രമണം. സാരമായി പരിക്കേറ്റ രണ്ടുപേരുൾപ്പെടെ അഞ്ച് തൊഴിലാളികളെയും ജാഫ്നയിലെ ടീച്ചിംഗ് ആശുപത്രിയിൽ പ്രവേശിപ്പിച്ചിരിക്കുകയാണ്.
സംഭവത്തിൽ ഇന്ത്യ ശക്തമായ പ്രതിഷേധം രേഖപ്പെടുത്തി. ഡൽഹിയിൽ ശ്രീലങ്കൻ ആക്‌ടിംഗ് ഹൈക്കമ്മിഷണറെ വിദേശകാര്യമന്ത്രാലയത്തിലേക്കു വിളിച്ചുവരുത്തി ശക്തമായ പ്രതിഷേധം രേഖപ്പെടുത്തി. പ്രശ്നത്തിന്‍റെ ഗൗരവം കൊളംബോയിലെ ഇന്ത്യൻ ഹൈക്കമ്മീഷൻ ശ്രീലങ്കൻ വിദേശകാര്യമന്ത്രാലയത്തെ ധരിപ്പിക്കുകയും ചെയ്തു.
ജാഫ്നയിലെ ഇന്ത്യൻ കോൺസുലേറ്റ് ഉദ്യോഗസ്ഥർ ടീച്ചിംഗ് ആശുപത്രിയിലെത്തി തൊഴിലാളികളെ കണ്ടു. ക്ഷേമം അന്വേഷിച്ച ഉദ്യോഗസ്ഥർ മത്സ്യത്തൊഴിലാളികള്‍ക്കും കുടുംബങ്ങള്‍ക്കും സാധ്യമായ എല്ലാ സഹായങ്ങളും വാഗ്ദാനം ചെയ്തു.സമുദ്രാതിർത്തി ലംഘിച്ചുവെന്നു കണ്ടത്തിയതിനാലാണ് വെടിവച്ചതെന്നു ശ്രീലങ്കൻ നാവികസേന ന്യായീകരിച്ചു.