പിഎസ്‌സിക്കെതിരേ സുപ്രീംകോടതി
Tuesday, January 28, 2025 3:14 AM IST
ന്യൂഡൽഹി: കേരള പബ്ലിക് സർവീസ് കമ്മീഷനെതിരേ വീണ്ടും സുപ്രീംകോടതി. റാങ്ക് പട്ടിക വിപുലീകരിക്കാനുള്ള സർക്കാർ നിർദേശം പിഎസ്‌സി തള്ളുന്നത് അധികാരപരിധി കടക്കലാണെന്ന കോടതിയുടെ മുൻ ഉത്തരവ് പിൻവലിക്കണമെ‌ന്ന ആവശ്യം തള്ളിക്കൊണ്ടാണു കോടതിയുടെ വിമർശനം. ഉദ്യോഗാർഥികളെ തെരഞ്ഞെടുക്കുന്നതിനുള്ള ഭരണം മാത്രമാണ് പിഎസ്‌സിക്ക് ഉള്ളതെന്ന് ജസ്റ്റീസ് വിക്രം നാഥ് അധ്യക്ഷനായ ബെഞ്ച് ആവർത്തിച്ചു.
സർക്കാർ നിശ്ചയിക്കുന്ന മാനദണ്ഡത്തിനനുസരിച്ച് തെരഞ്ഞെടുപ്പ് പ്രക്രിയ നടത്തി റാങ്ക് പട്ടിക തയാറാക്കൽ മാത്രമാണു പിഎസ്‌സിയുടെ ചുമതലയെന്ന് കോടതി നേരത്തെ വ്യക്തമാക്കിയിരുന്നു. എന്നാൽ, തങ്ങളുടെ നിലപാട് കേൾക്കാതെയാണ് സുപ്രീംകോടതി മുൻ ഉത്തരവ് പുറപ്പെടുവിച്ചതെന്നും അതിനാൽ ആ ഉത്തരവ് തിരികെ വിളിക്കണമെന്നും ആവശ്യപ്പെട്ടാണ് പിഎസ്‌സി വീണ്ടും കോടതിയെ സമീപിച്ചത്.