അഖിലേന്ത്യാ സഹകരണ വാരാഘോഷം കളമശേരിയില്‍
Saturday, November 9, 2024 2:09 AM IST
തിരുവനന്തപുരം: 71-ാമത് അഖിലേന്ത്യാ സഹകരണ വാരാഘോഷത്തിന് 14ന് എറണാകുളം കളമശേരിയില്‍ തിരിതെളിയും.
ഒരാഴ്ച നീണ്ടു നില്‍ക്കുന്ന ആഘോഷ പരിപാടികളുടെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയന്‍ നിര്‍വഹിക്കുമെന്നു സംസ്ഥാന സഹകരണ യൂണിയന്‍ ചെയര്‍മാന്‍ കോലിയക്കോട് എന്‍. കൃഷ്ണന്‍ നായര്‍ അറിയിച്ചു.
14നു കളമശേരി ആഷിസ് കണ്‍വന്‍ഷന്‍ സെന്‍ററിനു മുന്നില്‍ സഹകരണ സംഘം രജിസ്ട്രാര്‍ ഡോ.ഡി. സജിത് ബാബു പതാക ഉയര്‍ത്തുന്നതോടെ ചടങ്ങുകള്‍ ആരംഭിക്കും. ഉച്ചകഴിഞ്ഞ് മൂന്നിന് ആരംഭിക്കുന്ന ഉദ്ഘാടന സമ്മേളനത്തില്‍ മന്ത്രി വി.എന്‍. വാസവന്‍ അധ്യക്ഷത വഹിക്കും.
മന്ത്രി പി. രാജീവ് മുഖ്യാതിഥിയായിരിക്കും. പ്രതിപക്ഷ നേതാവ് വി.ഡി. സതീശന്‍, കേരള ബാങ്ക് പ്രസിഡന്‍റ് ഗോപി കോട്ടമുറിക്കല്‍ എന്നിവര്‍ മുഖ്യപ്രഭാഷണം നടത്തും.