കുട്ടിക്കാനം രാജ്യാന്തര ചലച്ചിത്രമേള 14ന്
Saturday, November 9, 2024 2:09 AM IST
കുട്ടിക്കാനം: മരിയന്‍ കോളജിലെ മാധ്യമ പഠന വിഭാഗവും കുട്ടിക്കാനം മെഡിയോസ് ടോക്കീസ് ഫിലിം സൊസൈറ്റിയും ചേർന്ന് സംസ്ഥാന ചലച്ചിത്ര അക്കാഡമിയുടെയും ഫെഡറേഷന്‍ ഓഫ് ഫിലിം സൊസൈറ്റീസ് ഓഫ് ഇന്ത്യയുടെയും പങ്കാളിത്തത്തോടെ 14, 15 തീയതികളില്‍ മരിയന്‍ കോളജില്‍ നടത്തുന്ന ഏഴാമത് കുട്ടിക്കാനം രാജ്യാന്തര ചലച്ചിത്ര മേള സിനിമാതാരം വിന്‍സി അലോഷ്യസ് ഉദ്‍ഘാടനം ചെയ്യും.
സ്ത്രീപക്ഷ സിനിമകള്‍ ആസ്പദമാക്കി ‘ഷീ’ (സ്റ്റോറീസ് ഓഫ് ഹെര്‍ എംപവര്‍മെന്‍റ് ) എന്നാണ് കിഫിന്‍റെ ഇത്തവണത്തെ പതിപ്പിനു പേര് നല്‍കിയിരിക്കുന്നത്. വാഴൂര്‍ സോമന്‍ എംഎല്‍എ, കോളജ് പ്രിന്‍സിപ്പല്‍ പ്രഫ. ഡോ. അജിമോന്‍ ജോര്‍ജ്, കോളജ് അഡ്മിനിസ്‌ട്രേറ്റര്‍ ഫാ. ജോസഫ് പൊങ്ങന്താനത്ത്, സംസ്ഥാന ചലച്ചിത്ര അക്കാദമി കോട്ടയം റീജണല്‍ കോ-ഓര്‍ഡിനേറ്റര്‍ ഷാജി അമ്പാട്ട് തുടങ്ങിയവര്‍ പ്രസംഗിക്കും.
വിവിധ രാജ്യങ്ങളില്‍ നിന്നുള്ള പതിനഞ്ചോളം ചിത്രങ്ങള്‍ മേളയുടെ ഭാഗമാകും. മേളയോടനുബന്ധിച്ച് പതിവായി നടത്തിവരുന്ന ഹ്രസ്വചിത്ര മത്സരവും ഡോക്യുമെന്‍ററി മത്സരവും ഇത്തവണയും ഉണ്ടായിരിക്കും.
മികച്ച ഹ്രസ്വ ചിത്രത്തിന് 10000 രൂപയും മികച്ച ഡോക്യൂമെന്‍ററി ചിത്രത്തിന് 5000 രൂപയും പ്രശസ്തിപത്രവും ഉള്‍പ്പെടുന്ന പുരസ്‌കാരവും നല്‍കുന്നു.
മേളയില്‍ പങ്കെടുക്കാന്‍ ആഗ്രഹിക്കുന്നവര്‍ക്ക് https://forms.gle/VC2umzLcVmMn CCu-D-A എന്ന ലിങ്ക് വഴി രജിസ്റ്റര്‍ ചെയ്യാം. ഫോണ്‍: 9061396337, 9562779455.