സംസ്ഥാനത്തിന്റെ വായ്പാപരിധി ഉയർത്തണമെന്ന നിർദേശം നേരത്തേ തള്ളിയിരുന്നു. ഇതിനു പിന്നാലെ കേരളം സുപ്രീംകോടതിയെ സമീപിച്ചെങ്കിലും ചർച്ച ചെയ്തു പരിഹരിക്കാനായിരുന്നു നിർദേശം. ഇതോടെയാണു സംസ്ഥാനം പ്രത്യേക പാക്കേജ് കേന്ദ്രത്തോട് ആവശ്യപ്പെട്ടത്.
വില്പനനികുതിയിനത്തിൽ ഈടാക്കുന്ന മദ്യം, പെട്രോൾ- ഡീസൽ തുടങ്ങിയവയാണു നിലവിൽ സംസ്ഥാനത്തിന്റെ പ്രധാന തനതു നികുതി വരുമാന മാർഗം. ഇതിനു പുറമേ ഭൂമി കൈമാറ്റത്തിനുള്ള സ്റ്റാംപ് ഡ്യൂട്ടി, രജിസ്ട്രേഷൻ ഫീസ് ഇനത്തിൽ കോടികളാണ് ഖജനാവിലെത്തുന്നത്. എട്ടു ശതമാനം സ്റ്റാംപ് ഡ്യൂട്ടിയും രണ്ടു ശതമാനം രജിസ്ട്രേഷൻ ഫീസുമാണ് ഈടാക്കുന്നത്.
വരുമാന വർധനയ്ക്കായി ഫീസുകളിലും സേവനനിരക്കുകളിലും വർധന വരുത്താൻ നിർദേശിച്ചിട്ടുണ്ട്. വകുപ്പു സെക്രട്ടറിമാർ നൽകുന്ന ഇത്തരം ശിപാർശകൾ വൈകാതെതന്നെ സർക്കാർ പരിശോധിക്കും.
ഇതിനിടെയാണ് സ്റ്റാംപ് ഡ്യൂട്ടിയിൽ കുറവു വരുത്തണമെന്ന കേന്ദ്രനിർദേശംകൂടി എത്തി സംസ്ഥാനത്തിനു തലവേദന സൃഷ്ടിക്കുന്നത്.