ADVERTISEMENT

ADVERTISEMENT

മണ്ണാർക്കാട് സബ് ജില്ലാ റെസ്‌ലിംഗ്: എംഇഎസ് സ്കൂൾ ചാമ്പ്യൻമാർ

മണ്ണാർക്കാട്: എംഇഎസ് കോളജിൽ നടന്ന ഉപജില്ലാ റെസ്‌ലിംഗ് ചാമ്പ്യൻഷിപ്പിൽ എംഇഎസ് ഹയർ സെക്കൻഡറി സ്കൂൾ 49 പോയിന്‍റുനേടി ഈ വർഷവും ഓവറോൾ ചാമ്പ്യന്മാരായി. 31 പോയിന്‍റുനേടി കല്ലടി ഹൈസ്കൂൾ രണ്ടാംസ്ഥാനവും കരസ്ഥമാക്കി. ഉദ്ഘാടനം കല്ലടി കോളജ് കായിക വിഭാഗം അധ്യാപകൻ ഡോ. സലീജ് നിർവഹിച്ചു. ഉപജില്ലാ സ്കൂൾ സ്പോർട്സ് ആൻഡ് ഗെയിംസ് ഓർഗനൈസിംഗ് സെക്രട്ടറി കെ.ജെ. സെബാസ്റ്റ്യൻ അധ്യക്ഷനായി. മണ്ണാർക്കാട് എഇഒ അബൂബക്കർ മുഖ്യാതിഥിയായി. സംസ്ഥാന റെസ്‌ലിംഗ് അസോസിയേഷൻ ജോയിന്‍റ് സെക്രട്ടറി ഹംസ, രാജഗോപാലൻ, റെസ്‌ലിംഗ് അസോസിയേഷൻ പ്രസിഡന്‍റ് വിനയൻ പ്രസംഗിച്ചു.

ADVERTISEMENT

പാടൂർ ഹോളിക്രോസ് പള്ളി തിരുനാൾ ഇന്നും നാളെയും

വടക്കഞ്ചേരി: പാടൂർ ഹോളിക്രോസ് ദേവാലയത്തിലെ തിരുനാളിന് തുടക്കമായി. ഇന്നലെ വൈകുന്നേരം വികാരി ഫാ. ആനന്ദ് അമ്പൂക്കൻ തിരുനാളിന് തുടക്കം കുറിച്ച് കൊടിയേറ്റ് കർമം നിർവഹിച്ചു. തുടർന്ന് ലദീഞ്ഞ്, കുർബാന എന്നീ തിരുകർമങ്ങൾ നടന്നു. ഇന്ന് വൈകുന്നേരം നാലിന് രൂപം എഴുന്നള്ളിപ്പ്. അഞ്ചിന് ആഘോഷമായ തിരുനാൾ കുർബാന. സന്ദേശം, ലദീഞ്ഞ് തത്തമംഗലം ഫൊറോന പള്ളി അസിസ്റ്റന്‍റ് വികാരി ഫാ. സൈമൺ കൊള്ളന്നൂർ കാർമികത്വം വഹിക്കും. തുടർന്ന് കുട്ടികളുടെ കലാപരിപാടികൾ. പ്രധാന തിരുനാൾ ദിവസമായ നാളെ വൈകുന്നേരം നാലിന് ആഘോഷമായ തിരുനാൾ കുർബാന. സന്ദേശം, ലദീഞ്ഞ്. തച്ചനടി പള്ളി വികാരി ഫാ. ബിനു പൊൻകാട്ടിൽ കാർമികനാകും. തുടർന്ന് ചീനിക്കോട് ജംഗ്ഷനിലേക്ക് പ്രദക്ഷിണം, കുരിശിന്‍റെ ആശീർവാദം, സ്നേഹവിരുന്ന്. 22ന് രാവിലെ ആറരക്ക് പരേത സ്മരണ. കുർബാന, ഒപ്പീസ് എന്നിവയോടെ തിരുനാളിന് സമാപനമാകും. വികാരി ഫാ. ആനന്ദ് അമ്പൂക്കൻ, കൈക്കാരന്മാരായ ജോസ് തുണിയമ്പ്രാൽ, ഷാജി ഈരേത്ര എന്നിവരുടെ നേതൃത്വത്തിലാണ് തിരുനാൾ പരിപാടികൾ.

വന്യമൃഗങ്ങൾ കൃഷിയിടങ്ങളിലിറങ്ങുന്നതു തടയാൻ സമഗ്രപദ്ധതിയുമായി വനംവകുപ്പ്

വടക്കഞ്ചേരി: വനാതിർത്തികളിൽ വന്യമൃഗശല്യം ലഘൂകരിക്കുന്നതിന്‍റെ ഭാഗമായി വനംവകുപ്പും പഞ്ചായത്തും കൃഷിവകുപ്പ് ഉൾപ്പെടെ വിവിധ വകുപ്പുകളുടെ സംയുക്താഭിമുഖ്യത്തിൽ നടപ്പിലാക്കുന്ന പ്രവർത്തനങ്ങൾ വിശദീകരിച്ച് വനം വകുപ്പ്. മേഖലയിൽ കിഴക്കഞ്ചേരി, വണ്ടാഴി, കണ്ണമ്പ്ര എന്നീ പഞ്ചായത്തുകളിൽപ്പെടുന്ന 10 കിലോമീറ്റർ പീച്ചി വനാതിർത്തികളിലാണ് വന്യമൃഗങ്ങളെ നിയന്ത്രിക്കുന്നതിനുള്ള പ്രവർത്തനങ്ങൾ നടത്തുന്നത്. പാലക്കുഴി പൊന്മുടി മുതൽ കണ്ണമ്പ്ര പഞ്ചായത്തിൽപ്പെടുന്ന പോത്തുചാടി വരെയുള്ള വനാതിർത്തിയാണിത്. പരാതി ലഭിച്ചാൽ ശല്യക്കാരായ പന്നികളെ വെടിവച്ച് നശിപ്പിക്കും. വനാതിർത്തിയിലെ വൈദ്യുതിവേലികളിൽ കാടുകയറി വൈദ്യുതി പ്രവാഹം കുറയുന്നത് തടയാൻ അടിയന്തര നടപടികൾ സ്വീകരിക്കുമെന്ന് റേഞ്ച് ഓഫീസർ എൻ. സുബൈർ പറഞ്ഞു. 9.9 കിലോവാട്ട് വൈദ്യുതി പ്രവാഹം ഉണ്ടെങ്കിലെ വന്യമൃഗങ്ങൾ മാറിപ്പോകൂ. വേലിയിൽ വള്ളിപടർപ്പുകൾ കയറിയാണ് ഇത് കുറയുന്നത്. കാര്യക്ഷമമല്ലാത്ത ബാറ്ററികൾ മാറ്റി സ്ഥാപിക്കും. അതിർത്തികളിലെ പൈനാപ്പിൾ കൃഷി ഒഴിവാക്കി കുരുമുളക്, മഞ്ഞൾ പോലെയുള്ള കൃഷികൾ നടത്തണം. ചക്ക പഴുക്കുന്നതുവരെ കാത്തു നിൽക്കാതെ ഇടിച്ചക്ക പാകത്തിലാകുമ്പോൾ വില്പന നടത്തിയാൽ ആനയെ അകറ്റാനാകും. വനാതിർത്തികളിലെ സ്വകാര്യഭൂമി കാടുപിടിച്ചു കിടക്കുന്നത് വെട്ടിത്തെളിക്കും. ഇത് ഉടമകൾ ചെയ്യുന്നില്ലെങ്കിൽ പഞ്ചായത്ത് പ്രവൃത്തി നടത്തി ഉടമയിൽ നിന്നും തുക ഈടാക്കും. വനാതിർത്തിയിൽ നിന്നും കാടിനുള്ളിലേക്ക് 10 മീറ്റർ ദൂരം വീതിയിൽ അടിക്കാട് വെട്ടിത്തെളിച്ച് വന്യമൃഗങ്ങളുടെ സാന്നിധ്യം അറിയാനുള്ള സൗകര്യം ഒരുക്കും. പന്നികൾ പെരുകുന്നത് കുറയ്ക്കാൻ മാലിന്യ നിക്ഷേപകേന്ദ്രങ്ങൾ ഇല്ലാതാക്കും. പാലക്കുഴി റോഡിൽ പുല്ലംപരുത ഭാഗത്തുനിന്നും മുകളിലേക്ക് നാലര കിലോമീറ്റർ ദൂരം നിലവിലുള്ള വൈദ്യുതവേലിക്കു പുറമെ തൂക്കുവേലി കൂടി സ്ഥാപിക്കും. കടപ്പാറ പപ്പടപ്പാറ, കുഞ്ചിയാർപതി ഭാഗത്തും തൂക്കുവേലി നിർമിക്കും. മലയോരപാതയിൽ പനംകുറ്റി, പോത്തുച്ചാടി ഭാഗത്തെ വിളക്കുകൾ കത്തിക്കും. മംഗലംഡാം, കരിങ്കയം, നന്നങ്ങാടി ഭാഗത്തും ലൈറ്റുകൾ സ്ഥാപിക്കും. മറ്റിടങ്ങളിലും ലൈറ്റുകളുടെ ആവശ്യകത പരിശോധിക്കുമെന്നും റേഞ്ച് ഓഫീസർ എൻ. സുബൈർ പറഞ്ഞു. സ്ഥിരമായി ആനയിറങ്ങുന്ന പനംകുറ്റി ഭാഗത്ത് അടിയന്തരമയി വൈദ്യുതിവേലി പുനസ്ഥാപിക്കും. ഇവിടെ വേലി മെയിന്‍റനൻസിൽ വകുപ്പിന് വീഴ്ചവന്നിരുന്നു. അടുത്തമാസം ബന്ധപ്പെട്ടവരുടെ മീറ്റിംഗ് വിളിച്ചുകൂട്ടി പോരായ്മകളും പരിശോധിക്കുമെന്നും റേഞ്ച് ഓഫീസർ പറഞ്ഞു.

ജില്ലാ സഹോദയ സ്കൂൾ കോംപ്ലക്സ് കലോത്സവത്തിന് ഇന്നു സമാപനം

സെന്‍റ് റാഫേൽസ് മുന്നിൽ, എംഇഎസ് ഇന്‍റർനാഷണൽ രണ്ടാമത് പാലക്കാട്: ഭാരതമാത സിഎംഐ പബ്ലിക് സ്കൂളിൽ നടന്നുവരുന്ന ജില്ലാ സഹോദയ കലോത്സവത്തിലെ രണ്ടാംദിനം പൂർത്തിയായപ്പോൾ കലാകിരീടത്തിനായി സ്കൂളുകൾ ഇഞ്ചോടിഞ്ച് പോരാട്ടം തുടരുന്നു. നൂറിൽപ്പരം ഇനങ്ങൾ പൂർത്തിയായി. കലോത്സവം ഇന്നു സമാപിക്കും. പാലക്കാട് സെന്‍റ് റാഫേൽസ് കത്തീഡ്രൽ സ്്കൂൾ 506 പോയിന്‍റോടെ ഒന്നാം സ്ഥാനത്ത് തുടരുന്നു. 435 പോയിന്‍റോടെ പട്ടാന്പി എംഇഎസ് ഇന്‍റർനാഷണൽ സ്കൂൾ രണ്ടാം സ്ഥാനത്തുണ്ട്. കാറ്റഗറി ഒന്ന് വിഭാഗത്തിൽ പാലക്കാട് സെന്‍റ് റാഫേൽസ് കത്തീഡ്രൽ സ്കൂൾ 67 പോയിന്‍റോടെ ഒന്നാം സ്ഥാനത്താണ്. 61 പോയിന്‍റുമായി പാലക്കാട് ലയണ്‍സ് സ്കൂൾ രണ്ടാമതും 59 പോയിന്‍റുമായി ഷൊർണൂർ കാർമൽ സ്കൂൾ മൂന്നാമതുമാണ്. കാറ്റഗറി രണ്ടിൽ 103 പോയിന്‍റുമായി പട്ടാന്പി എംഇഎസ് ഇന്‍റർനാഷണൽ സ്കൂൾ ഒന്നാമതാണ്. 98 പോയിന്‍റോടെ പാലക്കാട് ഭാരതമാത സിഎംഐ പബ്ലിക് സ്കൂൾ രണ്ടാമതും 96 പോയിന്‍റോടെ സെന്‍റ് റാഫേൽസ് കത്തീഡ്രൽ സ്കൂൾ മൂന്നാമതുമാണ്. കാറ്റഗറി മൂന്നിൽ 151 പോയിന്‍റോടെ സെന്‍റ് റാഫേൽസ് കത്തീഡ്രൽ സ്കൂൾ ഒന്നാമതുണ്ട്. പാലക്കാട് ലയണ്‍സ് സ്കൂൾ 143 പോയിന്‍റോടെ രണ്ടാമതും 139 പോയിന്‍റോടെ പട്ടാന്പി എംഇഎസ് ഇന്‍റർനാഷണൽ സ്കൂൾ മൂന്നാമതുമാണ്. കാറ്റഗറി നാലിൽ 158 പോയിന്‍റോടെ സെന്‍റ് റാഫേൽസ് സ്കൂൾ ഒന്നും 153 പോയിന്‍റോടെ എംഇഎസ് ഇന്‍റർനാഷണൽ സ്കൂൾ രണ്ടും 123 പോയിന്‍റോടെ ലക്ഷ്മിനാരായണ വിദ്യാനികേതൻ മൂന്നാമതുമുണ്ട്. പൊതുവിഭാഗത്തിൽ എംഇഎസ് ഇന്‍റർനാഷണൽ സ്കൂളിന് 40 ഉം മൗണ്ട് സീന പബ്ലിക് സ്കൂളിന് 36 ഉം സെന്‍റ് റാഫേൽസ് സ്കൂളിന് 34 ഉം പോയിന്‍റ് ലഭിച്ചിട്ടുണ്ട്.

ചുള്ളിയാർ ഡാമിൽ അനധികൃതമായി മണ്ണുകടത്തിയെന്നു പരാതി

മുതലമട: ചുള്ളിയാർഡാം റോഡരികിൽ അനധികൃതമായി മണ്ണുകടത്തിയ സംഭവം അന്വേഷിക്കണമെന്നാവശ്യപ്പെട്ട് നാട്ടുകാരുടെ പരാതി. വ്യാഴാഴ്ച പുലർച്ചെയാണ് സമീപവാസികൾ സംഭവം അറിഞ്ഞ് പൊതുമരാമത്ത് അധികൃതരെ അറിയിച്ചത്. പിഡബ്ലിയുഡി അസിസ്റ്റന്‍റ് എൻജിനീയർ സംഭവസ്ഥലത്തെത്തി പരിശോധിച്ചതിൽ മണ്ണുനീക്കംകണ്ടിരുന്നു. എന്നാൽ നിർദിഷ്ടസ്ഥലം പൊതുമരാമത്ത് വകുപ്പിന് കീഴിൽ ഉൾപ്പെട്ടതാണെന്ന് തിട്ടപ്പെടുത്താൽ കഴിയാത്തതിനാൽ റവന്യൂ അധികൃതർക്ക് റിപ്പോർട്ട് നൽകുമെന്ന് അസിസ്റ്റൻഡ് എൻജിനീയർ അറിയിച്ചു. ടിപ്പറുകളിലാണ് മണ്ണ് കടത്തിയിരിക്കുന്നതെന്ന് നാട്ടുകാർ അധികൃതരെ അറിയിച്ചു.

നെഹ്‌റു എഡ്യുക്കേഷണൽ ഇൻസ്റ്റിറ്റ്യൂട്ടിൽ ദേശീയ ഇന്നൊവേറ്റർ സമ്മേളനം

കോയമ്പത്തൂർ: തിരുമലയമ്പാലയം നെഹ്‌റു കോളജിലെ എൻ‌ജി‌ഐ ടി‌ബി‌ഐയിൽ ഡോ.എ.പി.ജെ. അബ്ദുൾ കലാം കാമ്പസിൽ 2025 ലെ ദേശീയ ഇന്നൊവേറ്റർ സമ്മേളനം നടന്നു. ഇന്ത്യൻ ബഹിരാകാശ ഗവേഷണ സംഘടനയുടെ (ഐ‌എസ്‌ആർ‌ഒ) ചെയർമാൻ ഡോ. വി. നാരായണൻ സമാപന ചടങ്ങിൽ മുഖ്യാതിഥിയായിരുന്നു. പി.കെ. ദാസ് സർവകലാശാലയുടെ ചാൻസലറും നെഹ്‌റു എഡ്യുക്കേഷണൽ ഗ്രൂപ്പ് ചെയർമാനും എക്സിക്യൂട്ടീവ് ട്രസ്റ്റിയും ഇന്ത്യ-മൗറീഷ്യസ് ഓണററി ട്രേഡ് കമ്മീഷണറുമായ ഡോ.പി. കൃഷ്ണദാസ് ചടങ്ങിൽ അധ്യക്ഷത വഹിച്ചു. പി.കെ. ദാസ് സർവകലാശാലയുടെ പ്രോ-ചാൻസലറും നെഹ്‌റു എഡ്യുക്കേഷണൽ ഗ്രൂപ്പ് സിഇഒയും സെക്രട്ടറിയുമായ ഡോ.പി. കൃഷ്ണകുമാർ ചടങ്ങിൽ അധ്യക്ഷത വഹിച്ചു. ശാസ്ത്ര സാങ്കേതിക വകുപ്പ് (ന്യൂഡൽഹി), ടെക്‌നോളജി ട്രാൻസ് ലേഷൻ ആൻഡ് ഇന്നൊവേഷൻ യൂണിറ്റിലെ ഗവേഷകൻ ഡോ. രവീന്ദർ കൗർ, വിശിഷ്ടാതിഥിയായി പങ്കെടുത്തു. പി.കെ. ദാസ് യൂണിവേഴ്സിറ്റി നോമിനേറ്റഡ് വൈസ് ചാൻസലർ, നെഹ്രു എഡ്യുക്കേഷണൽ ഗ്രൂപ്പ് അക്കാദമിക് ആൻഡ് അഡ്മിനിസ്ട്രേറ്റീവ് എക്സിക്യൂട്ടീവ് ഡയറക്ടർ ഡോ.എച്ച്.എൻ. നാഗരാജ സ്വാഗത പ്രസംഗം നടത്തി. നേരത്തെ ഉദ്ഘാടന ചടങ്ങിൽ മുഖ്യാതിഥിയും കോയമ്പത്തൂർ എന്‍റർപ്രണേഴ്സ് ഓർഗനൈസേഷൻ പ്രസിഡന്‍റുമായ എം. പ്രേംകുമാർ സ്വാഗത പ്രസംഗം നടത്തി. പി.കെ. ദാസ് യൂണിവേഴ്സിറ്റി നോമിനേറ്റഡ് രജിസ്ട്രാർ ഡോ.പി. അനിരുദ്ധൻ സ്വാഗത പ്രസംഗം നടത്തി. രാജ്യത്തുടനീളമുള്ള ഏകദേശം 1000 സ്റ്റാർട്ടപ്പ് ഇന്നൊവേറ്റർമാർ സമ്മേളനത്തിൽ പങ്കെടുത്തു. 100 ലധികം സ്റ്റാർട്ടപ്പ് ഇന്നൊവേഷനുകൾ പ്രദർശിപ്പിച്ചു. ആരോഗ്യം, പരിസ്ഥിതി, ഗതാഗതം, സാങ്കേതികവിദ്യ തുടങ്ങിയ മേഖലകളിലെ 35 ലധികം നൂതന പദ്ധതികൾ ശ്രദ്ധ നേടി.

ചുള്ളിയാർമേട് പുഴപ്പാലത്തിൽ തകർന്ന കൈവരി പുനർനിർമിക്കണം

മുതലമട: ഗ്രാമപഞ്ചായത്ത് കാര്യാലയത്തിനു സമീപമുള്ള ചുള്ളിയാർ പുഴപ്പാലത്തിന്‍റെ കൈവരി തകർന്ന വശത്ത് വാഹനസഞ്ചാരം അപകടഭീഷണിയിൽ. സ്ഥലത്തെ കൊടുംവളവു തിരിഞ്ഞുവരുന്ന വാഹനങ്ങൾ ഓടിക്കുന്നവർ പെട്ടെന്നാണ് ഇടുങ്ങിയ പുഴപ്പാലം കണ്ട് നിർത്തുന്നത്. പാലത്തിൽ എതിരെ വന്ന വാഹനത്തിനെ കണ്ട് പെട്ടെന്ന് നിർത്തിയ കെഎസ്ആർടിസി ബസ് കൈവരി തകർത്ത് പുഴയിലേക്ക് മൂക്കുകുത്തി നിന്നിരുന്നു. ഇതിനുമുൻപ് ശബരിമല ദർശനം കഴിഞ്ഞ് തമിഴ്നാട്ടിലേക്ക് പോവുകയായിരുന്ന ട്രാവലർ ബസും പുഴയിൽ വീണ് നിരവധി പേർക്ക് ഗുരുതരപരിക്കു പറ്റിയിരുന്നു. റോഡിന്‍റെ വടക്കുഭാഗം കൈവരി പുനർനിർമാണം നടത്തിയിരുന്നു. നിലവിൽ റോഡിന്‍റെ തെക്കുഭാഗം കൈവരിയും തകർന്ന് വർഷങ്ങളായിരിക്കുകയാണ് . ഇതുവഴി കാൽനടയും ഇരുചക്രവാഹന സഞ്ചാരവും അപകടഭീതിയിലാണ്. സ്ഥലത്ത് അപകടാവസ്ഥ സൂചിപ്പിക്കുന്ന ദിശാബോർഡുകളുമില്ല. തെക്ക് ഭാഗത്ത് ജലജീവൻ മിഷൻ കുടിവെള്ള പൈപ്പിൽ ഇടിച്ച് പലതവണ വാഹന അപകടങ്ങൾ ഉണ്ടായിട്ടുണ്ട്. ഓരോതവണ സമാന അപകടങ്ങൾ നടക്കുമ്പോഴും രണ്ടു ദിവസം കഴിഞ്ഞാണ് കുടിവെള്ളം വിതരണം പുനസ്ഥാപിക്കുന്നത്. കാമ്പ്രത്ത്ചള്ള - ഗോവിന്ദാപുരം അന്തർ സംസ്ഥാനപാതയിൽ സർവീസ് ബസുകൾ, വിനോദ സഞ്ചാര, തീർഥാടന വാഹങ്ങൾക്കു പുറമെ വിദ്യാർഥികളുമായി വാഹനങ്ങളും സഞ്ചരിക്കുന്നുണ്ട്. സ്ഥലത്ത് നിലനിൽക്കുന്ന അപകടാവസ്ഥ കണക്കാക്കി അടിയന്തരമായി പാലത്തിന്‍റെ തെക്കുഭാഗം വീതികൂട്ടി കൈവരി നിർമിക്കണമെന്നാണ് ആവശ്യം.

പുത്തൻകുളം നവീകരിക്കാൻ അഞ്ചു ലക്ഷം അനുവദിച്ചു

ആലത്തൂർ: ഗ്രാമപഞ്ചായത്ത് ഏഴാം വാർഡിലെ പുത്തൻ കുളം നവീകരിക്കാൻ 5 ലക്ഷം രൂപ അനുവദിച്ചു. പുതിയങ്കം മേതിൽ ഹരിദാസ് ആലത്തൂർ ഗ്രാമപഞ്ചായത്തിന് സൗജന്യമായി നൽകിയ കുളം തൊഴിലുറപ്പ് പദ്ധതിയിൽ ഉൾക്കൊള്ളിച്ചാണ് നവീകരിക്കുന്നത്. കുളിക്കടവ് കെട്ടുവാനും സൈഡുകൾ വൃത്തിയാക്കി പ്രദേശവാസികൾക്ക് കുളിക്കുവാനും കുട്ടികൾക്ക് നീന്തൽ പഠനം സമീപവാസികൾക്ക് കൃഷിക്ക് വെള്ളം ഉപയോഗിക്കൽ എന്നീ രീതികളിൽ പ്രയോജനകരമാകുന്ന തരത്തിലാണ് കുളത്തിന്‍റെ നവീകരണം. ഇത് പുതിയങ്കം മേതിൽ വീട്ടുകാരുടെ കുടുംബകുളമാണെന്നും ഈ കുളത്തിലേക്ക് വേട്ടയ്ക്കരുമൻ ക്ഷേത്രത്തിൽ നിന്നും 50 മീറ്റർ മാത്രമേ ദൂരമുള്ളൂ എന്നത് കൊണ്ട് ക്ഷേത്രത്തിലേക്ക് വരുന്നവർക്ക് കുളിക്കുവാൻ കൂടി ഇത് ഉപകാരപ്രദമാകുമെന്ന് വാർഡ് മെംബർ ലീല ശശി പറഞ്ഞു.

താലൂക്ക് ആശുപത്രിയിൽ രക്തബാങ്കിന് അനുമതി; ഒറ്റപ്പാലത്തിന്‍റെ സ്വപ്നപദ്ധതിക്കു സാഫല്യം

ഒറ്റപ്പാലം: ഒറ്റപ്പാലത്തിന്‍റെ പതിറ്റാണ്ടുകളായുള്ള ആവശ്യമായിരുന്നു താലൂക്കാശുപത്രിയിൽ രക്തബാങ്ക് വേണമെന്ന കാര്യം. ഏറെക്കാലം ഇതിനായി കാത്തിരിക്കേണ്ടി വന്നുവെങ്കിലും അവസാനം ഈ സ്വപ്നപദ്ധതി പൂവണിഞ്ഞിരിക്കുകയാണ്. പദ്ധതിയുടെ പരീക്ഷണപ്രവർത്തനം വിജയംവരിച്ചതോടെ ആതുരസേവന രംഗത്ത് ഒറ്റപ്പാലത്തിനിത് പുത്തൻ നാഴികകല്ലാവും. വിവിധ ഗ്രൂപ്പുകളിലുള്ള രക്തംസ്വീകരിച്ച് സംഭരിക്കാനാകുമോയെന്ന പരീക്ഷണമാണ് കഴിഞ്ഞ ദിവസം വിജയിച്ചത്. ജില്ലയിലെ കൂട്ടായ്മയായ ബ്ലഡ് സർവീസ് കേരളയിലെ ആറ്‌ പ്രവർത്തകരാണ് പുതിയ രക്തബാങ്കിലേക്കായി ആദ്യമായി രക്തംനൽകിയത്. ഇതോടെ രക്തബാങ്ക് പ്രവർത്തനസജ്ജമായതായി താലൂക്കാശുപത്രി അധികൃതർ അറിയിക്കുകയായിരുന്നു. രക്തംശേഖരിക്കൽ, രക്തത്തിന്‍റെ വിവിധ ഘടകങ്ങൾ വേർതിരിക്കൽ, പ്ലാസ്മ, പ്ലേറ്റ്‌ലെറ്റ് തുടങ്ങിയവയുൾപ്പെടെ സംഭരിക്കൽ എന്നിവയ്ക്കുള്ള യന്ത്രങ്ങളും ജനറേറ്ററുകളുമെല്ലാം പരീക്ഷണപ്രവർത്തനത്തിന് വിധേയമാക്കി. കുട്ടികളുടെ കുത്തിവെപ്പുകേന്ദ്രം പ്രവർത്തിക്കുന്ന കെട്ടിടത്തിലാണ് രക്തബാങ്കിനും സ്ഥലം സജ്ജമാക്കിയത്. ഒരുമാസം 80 യൂണിറ്റ്‌ മുതൽ 100 യൂണിറ്റ്‌വരെ രക്തമാണ് ഇവിടെ സംഭരിക്കാനാവുക. ഒരുദിവസം 50 യൂണിറ്റ്‌വരെ ശേഖരിക്കാം. 24 മണിക്കൂർ പ്രവർത്തിക്കാനാവശ്യമായ സൗകര്യങ്ങളാണ് ഇപ്പോൾ ഒരുക്കിയത്. ദേശീയാരോഗ്യദൗത്യം മുഖാന്തരം ഡോക്ടർ, കൗൺസലർ, സാങ്കേതിക ജീവനക്കാർ എന്നിവരെ നേരത്തേ നിയമിച്ചിരുന്നു. നാല് പുതിയ ജീവനക്കാരെക്കൂടി ഇപ്പോൾ നിയമിച്ചിട്ടുണ്ട്. ഇനി രണ്ടുപേരെക്കൂടി നിയമിക്കും. 24 മണിക്കൂറും പ്രവർത്തനസജ്ജമായാൽ ഏതുസമയത്തും പട്ടാമ്പി, തൃത്താല, ഷൊർണൂർ, ഒറ്റപ്പാലം, ചെർപ്പുളശേരി തുടങ്ങിയ പടിഞ്ഞാറൻ പാലക്കാട് മേഖലയ്ക്ക് രക്തം ലഭ്യമാകും. ജില്ലയിൽ മണ്ണാർക്കാട്ടും പാലക്കാട് ജില്ലാ ആശുപത്രിയിലും മാത്രമാണ് രക്തബാങ്കുള്ളത്. അഞ്ചുവർഷംമുൻപ് പ്രഖ്യാപിച്ച പദ്ധതിയിൽ എംഎൽഎ ഫണ്ടിൽനിന്ന് 74 ലക്ഷം രൂപയാണ് അനുവദിച്ചിരുന്നത്. കഴിഞ്ഞമാസം അവസാനം കേന്ദ്ര ആരോഗ്യ മന്ത്രാലയത്തിന് കീഴിലുള്ള "സെൻട്രൽ ഡ്രഗ്‌സ് സ്റ്റാൻഡേഡ് കൺട്രോൾ ഓർഗനൈസേഷന്‍റെ അനുമതി ലഭിച്ചതോടെയാണ് പരീക്ഷണപ്രവർത്തനം നടത്തിയത്. ബ്ലഡ് സർവീസ് കേരള കൂട്ടായ്മയിലെ അരുൺരാഘവ്, ജയചന്ദ്രൻ, സന്ദീപ്, ശരത്, അരവിന്ദ് എന്നിവരിൽനിന്നാണ് ആദ്യമായി രക്തംശേഖരിച്ചത്.

ബ്ലോക്ക് കോൺഗ്രസ് കമ്മിറ്റി സൂപ്രണ്ടിംഗ് എൻജിനീയറുടെ ഓഫീസ് ഉപരോധിച്ചു

പാലക്കാട്: മലമ്പുഴയിലെ മാലിന്യ സംസ്കരണ കേന്ദ്രം വിഷയത്തിൽ ഇറിഗേഷൻ വകുപ്പ് മൗനം വെടിയണമെന്ന് ആവശ്യപ്പെട്ട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ സൂപ്രണ്ടിംഗ് എൻജിനീയറുടെ ഓഫീസ് ഉപരോധിച്ചു. പദ്ധതി സംബന്ധിച്ച് ഡാം അസിസ്റ്റന്‍റ് എൻജിനീയർ തയ്യാറാക്കിയ റിപ്പോർട്ട് പുറത്തുവിടണമെന്നും റിപ്പോർട്ട് പൂഴ്ത്തിവെച്ച അസിസ്റ്റന്‍റ് എക്സിക്യൂട്ട് എൻജിനീയർക്ക് എതിരെ നടപടി സ്വീകരിക്കണമെന്ന് ആവശ്യപ്പെട്ടായിരുന്നു ഉപരോധം. 2023 മെയ് 16 ന് തഹസിദാർ മാലിന്യ സംസ്കരണ കേന്ദ്രവുമായി ബന്ധപ്പെട്ട കത്ത് നല്കി. 2025 ഏപ്രിൽ 25 ന് റിപ്പോർട്ട് അസി. എക്സി. എൻജിനീയർ ഹെഡ് വർക്ക് സബ് ഡിവിഷൻ മലമ്പുഴക്ക് നൽകിയിട്ടുണ്ടെന്ന് ഡാം അസി എൻജിനീയറുടെ കത്ത് വ്യക്തമാക്കുന്നു. അടിയന്തിരപ്രാധാന്യമുള്ള വിഷയമായിട്ടും താലൂക്ക് സമിതി നിരന്തരമാവശ്യപ്പെട്ടിട്ടും റിപ്പോർട്ട് നല്കാൻ അസി. എക്സി. എൻജിനീയർ, അസി. എൻജിനീയർ എന്നിവർ തയ്യാറാവാത്തത് ദുരൂഹമാണ്. ഭൂമാഫിയയെ സഹായിക്കുന്നതിനു വേണ്ടിയാണ് റിപ്പോർട്ട് പൂഴ്ത്തിയത്. വിഷയത്തിൽ കുറ്റക്കാരായ ഉദ്യോഗസ്ഥർക്കെതിരെ നടപടി വേണമെന്നാവശ്യപ്പെട്ട് ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് പരാതി നൽകി. ബോബൻ മാട്ടുമന്ത, രമേശ് പുത്തൂർ, അനിൽ ബാലൻ, എസ്.എം താഹ, ഹരിദാസ് മച്ചിങ്ങൽ, കെ.ആർ.ശരരാജ്, ഫ്രിന്‍റോ ഫ്രാൻസി, എഫ്.ബി. ബഷീർ, കെ.എൻ. സഹീർ, ഷെറീഫ് റഹ്മാൻ, ആർ. രാമകൃഷ്ണൻ, എസ്. സഞ്ജീവ് എന്നിവർ ഉപരോധസമരത്തിൽ പങ്കെടുത്തു.

കാഞ്ഞിരപ്പുഴ ദേവപ്പാറ ക്വാറിയുടെ പ്രവർത്തനം വീണ്ടും തുടങ്ങുന്നു

മണ്ണാർക്കാട്: 2016 മുതൽ പ്രവർത്തനം മുടങ്ങിക്കിടക്കുന്ന ദേവപ്പാറ ക്വാറി ടെൻഡർ നടപടികൾ പൂർത്തിയാക്കുവാൻ ജലസേചന വകുപ്പ് ഉത്തരവിറക്കി. ടെൻഡർ നടപടികൾ പൂർത്തിയായാൽ ക്വാറി പഴയതുപോലെ പ്രവർത്തിപ്പിക്കാനാവുമെന്ന് അധികൃതർ അറിയിച്ചു. കേന്ദ്ര പരിസ്ഥിതി മന്ത്രാലയ അനുമതി ക്വാറികൾക്ക് നിർബന്ധമാക്കിയതിനെ തുടർന്നാണ് അന്ന് ദേവപ്പാറ ക്വാറിയുടെ പ്രവർത്തനവും നിർത്തേണ്ടി വന്നത്. ടെൻഡർ മുഖേന ക്വാറിയുടെ പ്രവർത്തനം നടത്തണമെന്ന നിർദേശത്തെ തുടർന്നാണ് അക്കൗണ്ടന്‍റ് ജനറൽ നൽകിയ കത്തിന്‍റെ അടിസ്ഥാനത്തിൽ ടെൻഡർ നടത്തുന്നതിനുള്ള ഉത്തരവ് ജലസേചന വകുപ്പ് ഇറക്കിയത്. വർഷങ്ങളായി പ്രദേശത്ത്‌ കരിങ്കല്ല് ക്ഷാമം രൂക്ഷമാണ്. സർക്കാരിന്‍റെ ലൈഫ് മിഷൻ അടക്കമുള്ള പല നിർമാണ പ്രവൃത്തികൾക്കും കരിങ്കല്ല് കിട്ടാത്ത സാഹചര്യം നിലവിലുണ്ട്. ദേവപ്പാറ ക്വാറി പ്രവർത്തന സജ്ജമായാൽ ആവശ്യാനുസരണം കരിങ്കല്ല് ലഭിക്കും. ഇതോടെ കരിങ്കല്ല് ക്ഷാമം ഇല്ലാതാകുകയും പ്രേദേശത്തെ നിരവധി തൊഴിലാളികൾക്ക് തൊഴിൽ ലഭിക്കുന്നതിന് വഴിയൊരുങ്ങുകയും ചെയ്യും. കെ. ശാന്തകുമാരി എംഎൽഎ ക്വാറി തുടങ്ങുന്നതിനുവേണ്ട നിരന്തര ഇടപെടലുകൾ വകുപ്പ് തലത്തിൽ നടത്തിയിരുന്നു. കൂടാതെ നിയമസഭയിൽ സബ്മിഷൻ കൊണ്ടുവരികയും ചെയ്തിരുന്നു. കാഞ്ഞിരപ്പുഴയിൽ നടപ്പിലാക്കുന്ന ടൂറിസം പദ്ധതിക്കും ധാരാളം കരിങ്കല്ല് ആവശ്യമാണ്. ഇതെല്ലാം കണക്കിലെടുത്താണ് ജലസേചനവകുപ്പ് ക്വാറി തുടങ്ങുന്നതിനുള്ള ടെൻഡർ നടപടികൾ വേഗത്തിലാക്കാൻ കഴിഞ്ഞമാസം 30ന് അഡീഷണൽ ചീഫ് സെക്രട്ടറി ഉത്തരവിറക്കിയത്. ടെൻഡർ നടപടികൾ വേഗത്തിലാക്കിയാൽ ക്വാറി പ്രവർത്തനം ഉടൻ ആരംഭിക്കാനാവും. 2024 ഏപ്രിൽ മുതൽ അഞ്ചു വർഷത്തേക്ക് ക്വാറി നടത്തുന്നതിനാവശ്യമായ കേന്ദ്ര പരിസ്ഥിതി മന്ത്രാലയത്തിന്‍റെ അനുമതി ലഭിച്ചിരുന്നു. എക്സ്പ്ലോസീവ് ലൈസൻസ്, ജിയോളജി വകുപ്പ് അനുമതി, മൈനിംഗ് ജിയോളജി അനുമതി, വനംവകുപ്പിന്‍റെ വൈൽഡ് ലൈഫ് ക്ലിയറൻസ് സർട്ടിഫിക്കറ്റ്, മറ്റ് അനുമതികൾ എന്നിവ ഉള്ളവർക്ക് മാത്രമേ ടെൻഡറിൽ പങ്കെടുക്കാൻ കഴിയുകയുള്ളൂവെന്ന് ടെൻഡർ ഉത്തരവിൽ പറയുന്നുണ്ട്. തെരഞ്ഞെടുപ്പ് പ്രഖ്യാപനത്തിന് മുൻപ് ടെൻഡർ നടപടികൾ പൂർത്തിയായില്ലെങ്കിൽ ക്വാറി പ്രവർത്തനം തുടങ്ങുവാൻ ഇനിയും കാലതാമസം ഉണ്ടാകും. ക്വാറിയുടെ പ്രവർത്തനം ഇനിയും ആരംഭിച്ചില്ലെങ്കിൽ കാഞ്ഞിരപ്പുഴ ടൂറിസം വികസനത്തിന് ആവശ്യമായ കരിങ്കൽ കിട്ടാതാവുകയും ഭാരിച്ച വിലയിൽ പുറത്തു നിന്ന് കരിങ്കൽ കൊണ്ടുവരേണ്ട അവസ്ഥ സംജാതമാകുകയും ചെയ്യും. അതുകൊണ്ട് തന്നെ ഈ മാസം അവസാനത്തോടെ ടെൻഡർ നടപടികൾ ആരംഭിക്കാനാണ് അധികൃതർ ഉദ്ദേശിക്കുന്നത്.

സമ്മിശ്രകൃഷിയിൽ വിജയം കൊയ്യാൻ കുറ്റിപ്പള്ളം ശിവദാസ്

ചിറ്റൂർ: സമ്മിശ്രകൃഷിയിൽ വിജയഗാഥ രചിക്കാൻ നല്ലേപ്പിള്ളി പാറക്കാൽ കുറ്റിപ്പള്ളം ശിവദാസ്. നാല് ഏക്കർ നെൽകൃഷിയുണ്ട് ഈ കർ‌ഷകന്. 60 സെന്‍റ് വെണ്ട കൃഷി, വയൽ വരമ്പിൽ തെങ്ങ് കൃഷി, 30 സെന്‍റിൽ ചെണ്ടുമല്ലി കൃഷിയുൾപ്പെടെയുള്ള സമ്മിശ്രകൃഷിയാണ് ശിവദാസ് നടത്തുന്നത്. നെൽകൃഷിയിൽ ഉത്പാദന ചെലവിന് അനുസരിച്ച് വരുമാനം കിട്ടാത്ത അവസ്ഥയും രോഗ-കീട ബാധയും, കൃഷിപ്പണിക്കു ആളെ കിട്ടാത്ത അവസ്ഥയും ബുദ്ധിമുട്ട് സൃഷ്ടിക്കുന്നതായി ശിവദാസ് പറഞ്ഞു. വിളവെടുപ്പ് കഴിഞ്ഞ് അടുത്ത വിളവെടുപ്പായാലും പണം കിട്ടാത്ത അവസ്ഥയിലാണ് ശിവദാസ്. മാവിൻതോട്ടങ്ങൾ കരാറെടുത്തു അച്ചാർമാങ്ങ കോയമ്പത്തുർ, പുതുനഗരം, കൊഴിഞ്ഞാമ്പാറ മാർക്കറ്റുകളിലും നാട്ടിലുള്ളവർക്ക് മാങ്ങാപ്പഴമായുംവിൽക്കുന്നുണ്ട്. ദീപാവലിമാർക്കറ്റ് ലക്ഷ്യമിട്ടാണ് പൂ കൃഷിയിറക്കിയിരിക്കുന്നത് . 30 സെന്‍റിൽ പരീക്ഷണ അടിസ്ഥാനത്തിലാണ് കൃഷി ചെയ്തിരിക്കുന്നത്. നല്ല വിളവ് ലഭിക്കുമെന്ന പ്രതീക്ഷയും ശിവദാസിനുണ്ട്. പൂവിന് നല്ല വില ലഭിക്കുന്നുണ്ട്. ഒരു ദിവസം 25 കിലോ പൂ പറിച്ച് മാർക്കറ്റിലെത്തിക്കാൻ കഴിയുന്നുണ്ട്. കൃഷിചെലവു കുറവ്, മാർക്കറ്റിലുള്ള ഡിമാൻഡ്, കീടരോഗബാധയില്ലാത്തത് എന്നിവ അനുകൂല ഘടകങ്ങളാണ്. പ്രതികൂല കാലാവസ്ഥയിയിലും നഷ്ടം വരുന്നില്ല. എല്ലാവർഷവും നഷ്ടത്തിൽ ചെയ്യുന്ന നെൽകൃഷി വീണ്ടും വീണ്ടും ചെയ്തു കടക്കാരനാകുകയും വന്യമൃഗങ്ങളും കാട്ടുപന്നി അക്രമത്തെയും ഭയപ്പെടാതെ കൃഷിയിറക്കാൻ കഴിയുന്നതുമാണ് സമിശ്രകൃഷി നടത്താൻ ശിവദാസിനെ പ്രേരിപ്പിച്ചത് മകൾ അശ്വനിയും ഭാര്യയുമാണ്. ഏത് വിളകൾ കൃഷിചെയ്യുന്ന കർഷകരെയും സർക്കാരിന്‍റെ വിവിധ വകുപ്പുകൾക്ക് അനുവദിച്ചുകിട്ടുന്ന ഫണ്ട് വനിത, കുടുംബശ്രീ, പട്ടികജാതി, ജനറൽ ഫണ്ടുകളായി നൽകി പ്രോത്സാഹിപ്പിക്കണമെന്ന് കുറ്റിപ്പള്ളം പാടശേഖര സമിതി ജോയിന്‍റ് സെക്രട്ടറി കൂടിയായ ശിവദാസൻ പറയുന്നു.

കനാൽബണ്ടിൽ മാലിന്യംതള്ളുന്നവരെ പിടികൂടണമെന്ന് ആവശ്യം

തത്തമംഗലം: മൂപ്പൻകുളം ഇടതുകനാൽ ബണ്ടിൽ മാലിന്യം തള്ളുന്നവരെ പിടികൂടി പിഴയടപ്പിക്കണമെന്ന് ആവശ്യം. രാത്രിസമയങ്ങളിൽ ഇരുചക്രവാഹനങ്ങളിലാണ് പ്ലാസ്റ്റിക്കും വ്യാപാരസ്ഥാപനങ്ങളിലെ മാലിന്യങ്ങളാണ് കനാൽബണ്ടിൽ തള്ളുന്നത്. മഴ ചാറുന്നതോടെ മാലിന്യം കനാലിലേക്ക് ഒഴുകിയെത്തുകയാണ്. ഇവ വെള്ളമിറക്കുന്ന ബ്രാഞ്ച് കനാലുകൾവഴി നെൽപ്പാടങ്ങളിലാണ് എത്തിച്ചേരുന്നത്. മിക്ക കവറുകളും മണ്ണിൽ ദ്രവിച്ച് പോവാത്ത തരം പ്ലാസ്റ്റിക് കവറുകളാണ്. ബന്ധപ്പെട്ട ഗ്രാമപഞ്ചായത്ത് അധികൃതർ ചില സ്ഥലങ്ങളിൽ റോഡരികിൽ മാത്രമാണ് മാലിന്യം തള്ളുന്നതു ശിക്ഷാർഹമെന്ന് ബോർഡ് വെച്ചിരിക്കുന്നത്. സ്ഥിരമായി മാലിന്യം തള്ളുന്ന സ്ഥലങ്ങളിൽ സോളാർ ലാമ്പുകളും കാമറകളും സ്ഥാപിച്ച് പ്രതികളെ പിടികൂടണമെന്നാണ് ആവശ്യം. മാലിന്യം കുമിയുന്ന സ്ഥലങ്ങളിലെല്ലാം തെരുവുനായ്ക്കളും വ്യാപകമായിട്ടുണ്ട്.

വ്യക്തിത്വ വികസന പാസ്‌വേഡ് ക്യാമ്പ്

വടക്കഞ്ചേരി: സംസ്ഥാന ന്യൂനപക്ഷ ക്ഷേമ വകുപ്പിന്‍റെ ആഭിമുഖ്യത്തിൽ ഹയർ സെക്കൻഡറി വിദ്യാർഥികൾക്കായുള്ള സൗജന്യ ഏകദിന വ്യക്തിത്വ വികസന കരിയർ ഗൈഡൻസ് പരിശീലന പാസ് വേർഡ് (ട്യൂണിംഗ്) ക്യാമ്പ് പുതുക്കോട് സർവജന ഹയർ സെക്കൻഡറി സ്കൂളിൽ സംഘടിപ്പിച്ചു . ജില്ലാ പഞ്ചായത്ത് വൈസ് പ്രസിഡന്‍റ് സി.കെ. ചാമുണ്ണി ക്യാമ്പ് ഉദ്ഘാടനം ചെയ്തു.പിടിഎ പ്രസിഡന്‍റ് ഷൗക്കത്തലി അധ്യക്ഷത വഹിച്ചു . ന്യൂനപക്ഷ യുവജന പരിശീലന കേന്ദ്രം പ്രിൻസിപ്പൽ ഡോ.കെ.വാസുദേവൻ പിള്ള മുഖ്യ പ്രഭാഷണം നടത്തി. വ്യക്തിത്വ വികാസം, കരിയർ ഗൈഡൻസ്‌, നേതൃത്വ പരിശീലനം, ടൈം മാനേജ്മെന്‍റ്, ഗോൾ സെറ്റിംഗ് തുടങ്ങിയ സെഷനുകൾക്ക് ട്രെയ്നർമാരായ കെ.എസ്.അബ്ദുൾ കരീം, എം.പി. മുഹമ്മദ് റാഫി എന്നിവർ നേതൃത്വം നൽകി. നൂറ് വിദ്യാർഥികൾ പങ്കെടുത്ത ക്യാമ്പിൽ നിന്ന് ജില്ലാതല ഫ്ലവറിംഗ് ക്യാമ്പിലേക്ക് 16 പേരെ തെരഞ്ഞെടുത്തു. പ്രിൻസിപ്പൽ ബിജി ബേബി സ്വാഗതവും ക്യാമ്പ് കോ-ഓർഡിനേറ്റർ എം. ശ്രീജ നന്ദിയും പറഞ്ഞു.

കോയന്പത്തൂർ കരകൗശല പ്രദർശന- വില്പനമേളയ്ക്കു തുടക്കം

കോയമ്പത്തൂർ: തമിഴ്‌നാട് ക്രാഫ്റ്റ് കൗൺസിൽ 20 വരെ കോയമ്പത്തൂരിലെ അവിനാശി റോഡിലുള്ള സുകുണ കല്യാണ മണ്ഡപത്തിൽ നടത്തുന്ന ‘ശ്രുതി 2025’ കരകൗശല പ്രദർശന-വില്പന മേളക്ക് തുടക്കമായി. രാവിലെ 10.30 മുതൽ രാത്രി 8 വരെ പൊതുജനങ്ങൾക്ക് പ്രവേശനം അനുവദിക്കും. കഴിഞ്ഞ 27 വർഷമായി കോയമ്പത്തൂരിലെ ജനങ്ങളിൽ നിന്ന് മികച്ച പ്രതികരണമാണ് മേളയ്ക്ക് ലഭിക്കുന്നതെന്ന് ഭാരവാഹികൾ പറഞ്ഞു. കരകൗശല വിദഗ്ധരുടെയും നെയ്ത്തുകാരുടെയും അവരോടൊപ്പം പ്രവർത്തിക്കുന്ന ഡിസൈനർമാരുടെയും അതുല്യമായ സൃഷ്ടികൾ ഇവിടെ പ്രദർശിപ്പിച്ചിരിക്കുന്നു. തദ്ദേശീയ നെയ്ത്തും കരകൗശല വൈദഗ്ധ്യവും ആഘോഷിക്കാൻ ലക്ഷ്യമിടുന്ന മേളയിൽ തുണിത്തരങ്ങൾ, സാരികൾ, പുരുഷന്മാർ, സ്ത്രീകൾ, കുട്ടികൾ എന്നിവരുടെ വസ്ത്രങ്ങൾ, ആഭരണങ്ങൾ, വീട്ടുപകരണങ്ങൾ, വീട്ടുപകരണങ്ങൾ, ജീവിതശൈലി ഉപകരണങ്ങൾ എന്നിവയുൾപ്പെടെ നിരവധി കരകൗശല വസ്തുക്കൾ പ്രദർശിപ്പിക്കും. ഉപഭോക്താക്കളെ ആകർഷിക്കുന്നതിനായി 6 ഭക്ഷണ സ്റ്റാളുകൾ സജ്ജീകരിച്ചിട്ടുണ്ട്. ഈ മേളയിൽ നിന്നുള്ള വരുമാനം കോയമ്പത്തൂരിൽ നടക്കുന്ന വാർഷിക കരകൗശല ബസാറിൽ കരകൗശല വിദഗ്ധർക്കുള്ള സബ്‌സിഡിയായി ഉപയോഗിക്കും. ഒറ്റത്തവണ ഉപയോഗിക്കാവുന്ന പ്ലാസ്റ്റിക് ബാഗുകൾ ഒഴിവാക്കാൻ മേളയിൽ പങ്കെടുക്കുന്നവർ സ്വന്തം ബാഗുകൾ കൊണ്ടുവരണമെന്ന് മേള സംഘാടകർ അഭ്യർഥിച്ചു.

വൈദ്യുതി കുരുക്കുപയോഗിച്ച് മാനിനെ പിടികൂടിയ രണ്ടുപേർ അറസ്റ്റിൽ

നെന്മാറ: മാനിനെ വൈദ്യുത കുരുക്കിൽപെടുത്തി വേട്ടയാടി മാംസമെടുത്ത രണ്ടുപേർ പിടിയിൽ. അയിലൂർ കയറാടി കൈതച്ചിറയിൽ രമേഷ് ബാബു എന്ന മൊട്ട ബാബു (47), കയറാടി സുനീഷ് (36) എന്നിവരെയാണ് അറസ്റ്റുചെയ്തത്. അയിലമുടി വനമേഖലയോടുചേർന്ന് ആൾതാമസമില്ലാത്ത കൈതച്ചിറയിലെ തോട്ടത്തിലെ വൈദ്യുതലൈനിൽനിന്നും അനധികൃതമായി വൈദ്യുതിയെടുത്ത് കുരുക്കുണ്ടാക്കിയാണ് മാനിനെ കെണിയിൽപെടുത്തിയത്. മാനിന്‍റെ ഇറച്ചി വാങ്ങാൻ എത്തിയ ആളാണ് കയറാടി സ്വദേശി സുനീഷ്. കെണിയിൽപ്പെട്ടുചത്ത മാനിന്‍റെ മാംസം പാചകം ചെയ്യുകയും ശേഷിച്ച മാംസം സൂക്ഷിക്കുകയും ചെയ്തത് പോലീസ്, വനം വകുപ്പ് എന്നിവർ കണ്ടെടുത്തു. രാത്രി അനധികൃതമായി വൈദ്യുതി മോഷ്ടിച്ച കുരുക്കുണ്ടാക്കിയതായാണ് അന്വേഷണത്തിൽ കണ്ടെത്തിയത്. പോലീസിനും വനം വകുപ്പിനും ലഭിച്ച രഹസ്യ വിവരത്തിന്‍റെ അടിസ്ഥാനത്തിലുള്ള അന്വേഷണത്തിലാണ് പ്രതികളെ നെന്മാറ പോലീസ് പിടികൂടിയത്. പോലീസ് പിടികൂടിയ പ്രതികളെ വനംവകുപ്പിനു കൈമാറുകയായിരുന്നു. അറസ്റ്റ് രേഖപ്പെടുത്തിയ പ്രതികളെ കോടതിയിൽ ഹാജരാക്കും. വൈദ്യുത ബോർഡ് വിജിലൻസ് സംഘവും സ്ഥലം സന്ദർശിച്ചു.

വന്യജീവി‌സംഘർഷ ലഘൂകരണം: ഹെൽപ്പ് ഡെസ്ക് ആരംഭിച്ചു

നെന്മാറ: മനുഷ്യ- വന്യജീവി സംഘർഷ ലഘൂകരണ തീവ്രയജ്ഞ പരിപാടിക്ക് അയിലൂരിൽ തുടക്കമായി. ഇതിന്‍റെ ഭാഗമായി അയിലൂർ പഞ്ചായത്ത് ഓഫീസിൽ ഹെൽപ്പ് ഡെസ്ക് ആരംഭിച്ചു. ഒക്ടോബർ 30 വരെ വനംവകുപ്പിന്‍റെ നേതൃത്വത്തിൽ പഞ്ചായത്ത്തല ഹെൽപ്പ് ഡെസ്ക് പ്രവർത്തിക്കും. മനുഷ്യ വന്യജീവി സംഘർഷം, കാട്ടാന, മാൻ, കാട്ടുപന്നി, കുരങ്ങ്, മയിൽ, മലയണ്ണാൻ തുടങ്ങി വന്യജീവി ശല്യം നേരിടുന്ന പ്രദേശവാസികൾക്ക് പഞ്ചായത്ത് ഓഫീസിൽ പരാതി നൽകാനുള്ള ഹെൽപ്പ് ഡെസ്ക് പ്രവർത്തനമാണ് ആരംഭിച്ചത്. പരിപാടിയുടെ ഉദ്ഘാടനം അയിലൂർ പഞ്ചായത്ത് പ്രസിഡന്‍റ് എസ്. വിഗ്നേഷ് നിർവഹിച്ചു. നെല്ലിയാമ്പതി റേഞ്ച് ഫോറസ്റ്റ് ഓഫീസർ ഷെരീഫ് തീവ്രയജ്ഞ പരിപാടിയുടെ ഉദ്ദേശലക്ഷ്യങ്ങൾ വിശദീകരിച്ചു. സെക്ഷൻ ഫോറസ്റ്റർ ജയിനുലാബുദ്ധീൻ, പഞ്ചായത്ത് അംഗങ്ങൾ കർഷക പ്രതിനിധികൾ എന്നിവർ പരിപാടികളിൽ പങ്കെടുത്തു. വിള നാശത്തിനുള്ള നഷ്ടപരിഹാരം മുതൽ വനം വകുപ്പുമായി ബന്ധപ്പെട്ട ഏതുതരം പരാതിയും ഹെൽപ്പ് ഡെസ്കിൽ സ്വീകരിക്കുമെന്ന് അധികൃതർ അറിയിച്ചു.

ജില്ലാ സഹോദയ സ്കൂൾ കലോത്സവം സിംഫണി- 2025ന് തുടക്കം

പാലക്കാട്: ജില്ലാ സഹോദയ സ്കൂൾ കലോത്സവം - സിംഫണി 2025ന് ചന്ദ്രനഗർ ഭാരതമാതാ സിഎംഐ പബ്ലിക് സ്കൂളിൽ തുടക്കം. സിനിമാതാരം രമേഷ് പിഷാരടി കലോത്സവം ഉദ്ഘാടനം ചെയ്തു. ജില്ലാ സഹോദയ സ്കൂൾ കോംപ്ലക്സ് പ്രസിഡന്‍റ് ഷാജി കെ. തയ്യിൽ അധ്യക്ഷത വഹിച്ചു. ഭാരതമാത സിഎംഐ സ്കൂൾ പ്രിൻസിപ്പൽ ഫാ. ലിന്‍റേഷ് ആന്‍റണി സ്വാഗതം പറഞ്ഞു. സഹോദയ സ്കൂൾ കോംപ്ലക്സ് വൈസ് പ്രസിഡന്‍റ് ഫാ. ജോഷി പുലിക്കോട്ടിൽ, ഭാരതമാതാ ഹയർസെക്കൻഡറി സ്കൂൾ പ്രിൻസിപ്പൽ ഫാ. ഫിലിപ്സ് പനയ്ക്കൽ എന്നിവർ പ്രസംഗിച്ചു. സഹോദയ സ്കൂൾ കോംപ്ലക്സ് സെക്രട്ടറി കെ. സോണിയ നന്ദി പറഞ്ഞു. മേളയുടെ ആദ്യദിനം അവസാന റിപ്പോർട്ടുകൾപ്രകാരം 191 ഓവറോൾ പോയിന്‍റുമായി പട്ടാന്പി എംഇഎസ് ഇന്‍റർനാഷണൽ സ്കൂളാണ് ഒന്നാംസ്ഥാനത്ത്. 184 പോയിന്‍റുമായി പാലക്കാട് സെന്‍റ് റാഫേൽസ് കത്തീഡ്രൽ സ്കൂളാണ് രണ്ടാംസ്ഥാനത്ത്. പാലക്കാട് ലയണ്‍സ് സ്കൂൾ (180), ഭാരതമാത സിഎംഐ പബ്ലിക് സ്കൂൾ (163), ഷൊർണൂർ കാർമൽ സ്കൂൾ (159) എന്നിവരാണ് തൊട്ടുപിന്നിൽ.

വടക്കഞ്ചേരി ടൗണിൽ ശുദ്ധികലശം: വാഹനങ്ങളിലെ കച്ചവടം നീക്കി

വടക്കഞ്ചേരി: പത്രവാർത്തകളും പരാതിപ്രവാഹങ്ങളുമായപ്പോൾ വടക്കഞ്ചേരി ടൗണിൽ ശുദ്ധികലശം. മെയിൻ റോഡിൽ തിരക്കേറിയ മന്ദം ജംഗ്ഷനിൽ വാഹനങ്ങൾ നിർത്തിയിട്ടുള്ള കച്ചവടം പോലീസ് ഇടപെട്ട് തത്കാലം ഒഴിവാക്കിയിട്ടുണ്ട്. ഇത് എത്ര ദിവസത്തേക്ക് നിലനിൽക്കും എന്നൊക്കെ കണ്ടറിയേണ്ടി വരും. എങ്കിലും സ്വന്തം സ്ഥലംപോലെ റോഡ് കൈയേറി നടത്തിയിരുന്ന കച്ചവടം ഒഴിപ്പിക്കൽതന്നെ വലിയ കാര്യമെന്നാണ് യാത്രക്കാർ പറയുന്നത്. നടപ്പാതയിലും നടപ്പാതയോടുചേർന്ന് ടാർറോഡിലുമുള്ള കച്ചവടങ്ങൾ ഇനിയും നീക്കിയിട്ടില്ല. ഇതൊക്കെ നീക്കാൻ വലിയ ഇടപെടലുകൾ വേണ്ടിവരുമെന്നാണ് സൂചനകൾ. വടക്കഞ്ചേരി ടൗണിൽ നടപ്പാതകളിലൂടെയുള്ള യാത്രയും അത്ര സുഖകരമല്ല എന്ന തലക്കെട്ടിൽ കഴിഞ്ഞ ദിവസം ദീപികയിൽ വാർത്ത നൽകിയിരുന്നു. ഇതിനു പിന്നാലെയാണ് നടപടിയുണ്ടായത്. ടൗൺ റോഡുകളിൽ യാത്രക്കാർക്ക് വഴി നടക്കാനാകാത്ത വിധമാണ് നടപ്പാതയിലും റോഡിലും കച്ചവടം നടന്നിരുന്നത്. ഒരുഭാഗത്ത് ഓട്ടോറിക്ഷകളുടെ നീണ്ട നിരയുമുണ്ടാകും. പെട്ടി ഓട്ടോറിക്ഷകൾ റോഡിൽ നിർത്തിയിടുന്നത് പെർമിറ്റ് ലംഘനമായി കണ്ട് നടപടി എടുക്കുമെന്ന ട്രാഫിക് റഗുലേറ്ററി കമ്മിറ്റി യോഗത്തിലെ തീരുമാനം നടപ്പിലാക്കണമെന്ന ആവശ്യവും ശക്തമായുണ്ട്.

കിഴക്കഞ്ചേരിയുടെ മലയോരങ്ങളിൽ കുരങ്ങ്, പന്നിശല്യം അതിരൂക്ഷം

വടക്കഞ്ചേരി: കിഴക്കഞ്ചേരി പഞ്ചായത്തിലെ മലയോര മേഖലയായ ആരോഗ്യപുരം, കൊന്നക്കൽ കടവ്, കോട്ടെകുളം, ഒടുകിൻചുവട്, നീതിപുരം തുടങ്ങിയ പ്രദേശങ്ങളിൽ കുരങ്ങ്, പന്നി, മലയണ്ണാൻ ശല്യം അതിരൂക്ഷമായി. എഴുപതും നൂറും തെങ്ങുകളുള്ള കർഷകർക്ക് വീട്ടാവശ്യത്തിനുള്ള നാളികേരംപോലും ലഭിക്കുന്നില്ലെന്നാണ് പരാതി. നാളികേരത്തിന് ഉയർന്ന വിലയുണ്ടെങ്കിലും അതിന്‍റെ പ്രയോജനവും കർഷകർക്കില്ല. നാളികേരം കരിക്ക് പ്രായമാകുംമുമ്പേ കുരങ്ങുകൾ എല്ലാം തിന്നുനശിപ്പിക്കും. നൂറിലധികംവരുന്ന വലിയ കൂട്ടങ്ങളാണ് കൃഷിയിടങ്ങളിലെത്തുന്നത്. ഒന്നിച്ചെത്തി ഒന്നും ബാക്കിവയ്ക്കാതെ കൃഷിയിടങ്ങൾ വെളുപ്പിക്കും. ഇത്രയും വലിയ കുരങ്ങു കൂട്ടങ്ങൾ ഇതുവരെ കണ്ടിട്ടില്ലെന്നു ഏഴുപതിറ്റാണ്ടായി കൃഷിരംഗത്തുള്ള കൊന്നക്കൽ കടവ് പതിനാലാം ബ്ലോക്കിലെ തൊണ്ണുറുകാരനായ പാറക്കൽ കുര്യാക്കോസ് പറയുന്നു. ഈ പ്രായത്തിലും കുര്യാക്കോസ് ചേട്ടൻ കൃഷിപ്പണികളിലുണ്ട്. മൂപ്പെത്താത്ത വാഴയ്ക്ക വരെ കുരങ്ങുകൾ തിന്നുതീർക്കുകയാണ്. പാലക്കുഴി മല വഴി പീച്ചി കാട്ടിൽനിന്നാണ് വാനരപ്പടയെത്തുന്നത്. ചക്ക, മാങ്ങ സീസൺ കഴിഞ്ഞതിനാൽ കണ്ണിൽകണ്ടതെല്ലാം തിന്ന് പരക്കംപായുകയാണ് കുരങ്ങുകൾ. കുരങ്ങുകളുടെ കണ്ണിൽപ്പെടാതെ ഏതെങ്കിലും തെങ്ങിൽ നാളികേരം മൂപ്പെത്തിയാൽ അത് തിന്നുനശിപ്പിക്കാൻ മലയണ്ണാൻ പടയുണ്ട്. താഴെ പന്നിക്കൂട്ടങ്ങളും മയിൽ, മുള്ളൻ പന്നി, മാനുകൾ തുടങ്ങിയവയും കർഷകരെ ബുദ്ധിമുട്ടിക്കാനുണ്ട്. ഇതിനാൽ കിഴങ്ങുവർഗങ്ങളുടെ വിളവെടുപ്പും കർഷകനില്ല. എല്ലാം കുത്തിമറിച്ച് തിന്നും. പടക്കം പൊട്ടിച്ചാൽ കർഷകരെ ആക്രമിക്കാൻ കുരങ്ങുകൂട്ടങ്ങൾ പാഞ്ഞെത്തുന്ന സ്ഥിതിയിലേക്കു കാര്യങ്ങൾ മാറിയിട്ടുണ്ട്. മനുഷ്യ- വന്യജീവി സംഘർഷം ലഘൂകരിക്കാനെന്നു പറഞ്ഞ് മലയോര പഞ്ചായത്തുകളിൽ വന്യമൃഗശല്യം തടയാൻ വനംവകുപ്പിന്‍റെ നേതൃത്വത്തിൽ ആരംഭിച്ചിട്ടുള്ള തീവ്രജ്ഞ പരിപാടികൾ വരാനിരിക്കുന്ന തെരഞ്ഞെടുപ്പുകളെ ലക്ഷ്യമിട്ടാകാതെ ആത്മാർഥമായ ഇടപെടലുണ്ടാകണമെന്നാണ് കർഷകരുടെ ആവശ്യം.

ശുചീകരണപ്രവര്‍ത്തനങ്ങള്‍ക്കു ജില്ലയില്‍ തുടക്കമായി

പാലക്കാട്: സ്വച്ഛതാ ഹി സേവാ 2025- ശുചിത്വോത്സവം കാമ്പയിന്‍റെ ഭാഗമായി നടത്തുന്ന ശുചീകരണ പ്രവര്‍ത്തനങ്ങള്‍ക്ക് ജില്ലയില്‍ തുടക്കമായി. 17 മുതല്‍ ഒക്ടോബര്‍ രണ്ടുവരെ നീണ്ടുനില്‍ക്കുന്ന പരിപാടിയുടെ ജില്ലാതല ഉദ്ഘാടനം ജില്ലാ കളക്ടര്‍ എം.എസ്. മാധവിക്കുട്ടി നിര്‍വഹിച്ചു. ജില്ലാതല ലോഗോ പ്രകാശനവും കളക്ടര്‍ നിര്‍വഹിച്ചു. കാന്പയിനിന്‍റെ ഭാഗമായി ഒക്ടോബര്‍ രണ്ടുവരെയുള്ള വിവിധ ദിവസങ്ങളില്‍ പൊതുസ്ഥലങ്ങള്‍ വൃത്തിയാക്കല്‍, ശുചീകരണ തൊഴിലാളികള്‍ക്ക് മെഡിക്കല്‍ ക്യാമ്പ്, ബോധവത്കരണ ക്യാമ്പ്, വിദ്യാലയങ്ങളില്‍ വിവിധ മത്സരങ്ങള്‍ എന്നിവ സംഘടിപ്പിക്കും. കോട്ടമൈതാനിയില്‍ നടന്ന പരിപാടിയില്‍ നഗരസഭാ ചെയര്‍പേഴ്‌സണ്‍ പ്രമീള ശശിധരന്‍ അധ്യക്ഷയായി. വൈസ് ചെയര്‍മാന്‍ ഇ. കൃഷ്ണദാസ്, തദ്ദേശസ്വയംഭരണ വകുപ്പ് ജോയിന്‍റ് ഡയറക്ടര്‍ കെ. ഗോപിനാഥന്‍, ശുചിത്വ മിഷന്‍ ജില്ലാ കോ-ഓര്‍ഡിനേറ്റര്‍ ജി. വരുണ്‍, അസിസ്റ്റന്‍റ് കോ-ഓര്‍ഡിനേറ്റര്‍ സി. ദീപ, പ്രോഗ്രാം ഓഫീസര്‍ എ. ഷെരീഫ്, ഹരിതകര്‍മസേനാംഗങ്ങള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ചിറ്റൂരിൽ എക്സൈസ് കോംപ്ലക്സ് നിർമാണം പുരോഗമിക്കുന്നു

ചിറ്റൂർ: ചിറ്റൂരിലെ പുതിയ എക്സൈസ് റേഞ്ച് ഓഫീസ് കെട്ടിടനിർമാണം പുരോഗമിക്കുന്നു. വിവിധ എക്സൈസ് ഓഫീസുകൾ ഒരുമിച്ച് പ്രവർത്തിക്കുന്ന രീതിയിലാണ് കെട്ടിടത്തിന്‍റെ രൂപകല്പന. 2015-16 കേരള ബജറ്റിൽ പ്രഖ്യാപിച്ച പദ്ധതിയുടെ ഭാഗമായാണ് പുതിയ എക്സൈസ് കെട്ടിടം നിർമാണം. 3.76 കോടി രൂപ വകയിരുത്തിയാണ് നിർമാണം ആരംഭിച്ചിരിക്കുന്നത്. പുതിയ കെട്ടിടം ഗ്രൗണ്ട് ഫ്ലോറും മൂന്ന് നിലകളിലുമായി ആധുനിക സൗകര്യങ്ങളോടു കൂടി 1450 ചതുരശ്ര മീറ്റർ വിസ്തൃതിയിലാണ് നിർമിക്കുന്നത്. താഴത്തെ നിലയിൽ വാഹന പാർക്കിംഗ്, ലോബി, ലോഞ്ച്, ശൗചാലയങ്ങൾ, തൊണ്ടിമുതൽ സൂക്ഷിക്കാനുള്ള മുറി, ലിഫ്റ്റ്, പടിക്കെട്ടുകൾ എന്നിവയുണ്ടാകും. ഒന്നാംനിലയിൽ റേഞ്ച് ഓഫീസിന് ആവശ്യമായ സൗകര്യങ്ങളും, ചെറിയ ലോക്കപ്പ് സൗകര്യവും ഒരുക്കും. രണ്ടാം നിലയിൽ ലോക്കപ്പ് സൗകര്യത്തോടുകൂടിയ എക്സൈസ് സർക്കിൾ ഓഫീസാണ് പ്രവർത്തിക്കുക. മൂന്നാം നിലയിൽ കോണ്‍ഫറൻസ് ഹാൾ, വെയിറ്റിംഗ് ലോഞ്ച്, ശൗചാലയങ്ങൾ എന്നിവ സജ്ജീകരിക്കും.

വോട്ടർപട്ടികയിലെ ആശങ്ക പരിഹരിക്കണം: കോൺഗ്രസ് ജില്ലാ നേതൃയോഗം

പാലക്കാട്: വോട്ടർപട്ടിക 2002 അടിസ്ഥാനമാക്കി സ്‌പെഷ്യൽ റിവിഷൻ നടത്താനുള്ള തെരഞ്ഞെടുപ്പ് കമ്മീഷന്‍റെ തീരുമാനം വോട്ടർമാരിൽ വളരെയധികം ആശങ്ക ഉണ്ടാക്കിയിട്ടുണ്ടെന്നും ഇകറ്റുന്നതിന് ആവശ്യമായ നടപടികൾ തെരെഞ്ഞെടുപ്പ് കമ്മീഷന്‍റെ ഭാഗത്തു നിന്നുണ്ടാകണമെന്നും ജില്ലാ കോൺഗ്രസ് നേതൃയോഗം ആവശ്യപ്പെട്ടു. ബിഹാറിൽ നടത്തിയ സ്‌പെഷ്യൽ റിവിഷനിലൂടെ ലക്ഷകണക്കിന് ആളുകൾക്ക് വോട്ടവകാശം നഷ്ടമായതു പോലെ ഇവിടെയും സംഭവിക്കുമോ എന്ന ആശങ്ക ജനങ്ങൾക്കുണ്ട്. തിരക്കുപിടിച്ച നടപടികൾ സ്വീകരിക്കാതെ എല്ലാ രാഷ്ട്രീയപാർട്ടികളുമായി ചർച്ച നടത്തി സാവകാശം നൽകി മാത്രമേ അന്തിമ പട്ടിക തയാറാക്കാവൂയെന്നും നേതൃയോഗം തെരെഞ്ഞെടുപ്പ് കമ്മിഷനോടാവശ്യപ്പെട്ടു. ഡിസിസി പ്രസിഡന്‍റ് എ. തങ്കപ്പന്‍റെ അധ്യക്ഷതയിൽ നടന്ന യോഗം കെപിസിസി ജനറൽ സെക്രട്ടറി അബ്ദുൽ മുത്തലിബ് ഉദ്ഘാടനം ചെയ്തു. കെപിസിസി ജനറൽ സെക്രട്ടറിമാരായ സി. ചന്ദ്രൻ. കെ.എ.തുളസി, കെപിസിസി സെക്രട്ടറിമാരായ പി.വി. രാജേഷ്, പി. ഹരിഗോവിന്ദൻ, ജില്ലാ സെക്രട്ടറിമാരായ വി. രാമചന്ദ്രൻ, വി.കെ.പി. വിജയനുണ്ണി പ്രസംഗിച്ചു.

മരിച്ചെന്നു രേഖപ്പെടുത്തി വോട്ടർപട്ടികയിൽനിന്ന് പേര് നീക്കംചെയ്തതായി പരാതി

നെന്മാറ: പഞ്ചായത്ത് വോട്ടർപട്ടികയിൽ വോട്ടർമാരെ മരിച്ചതായി രേഖപ്പെടുത്തി നീക്കംചെയ്തതായും വാർഡ് മാറ്റി ലിസ്റ്റ് തയാറാക്കിയതായും പരാതി. ജൂലൈ 23ന് പ്രസിദ്ധീകരിച്ച വോട്ടർപട്ടികയിൽ ഉൾപ്പെട്ടവരെയാണ് ഈ മാസം രണ്ടാംതീയതി പ്രസിദ്ധീകരിച്ച അന്തിമ വോട്ടർപട്ടികയിൽ ഒഴിവാക്കിയത്. കാരണമാരാഞ്ഞപ്പോൾ മരണപ്പെട്ടതായും താമസം മാറ്റിയതായുമാണ് രേഖപ്പെടുത്തിയിരിക്കുന്നത്. അയിലൂർ പഞ്ചായത്തിലെ മൂന്നാംവാർഡ്, പത്താംവാർഡ് എന്നിവിടങ്ങളിലെ നീക്കം ചെയ്ത വോട്ടർമാരും ഇതു സംബന്ധിച്ച് ജില്ലാകളക്ടർക്ക് പരാതി നൽകി. ഇതു സംബന്ധിച്ച് അയിലൂർ മണ്ഡലം കോൺഗ്രസ് കമ്മിറ്റിയും ജില്ലാ കളക്ടർക്ക് പരാതി നൽകി. പത്താം വാർഡിലെ ബീവി ഉമ്മ, യൂസഫ് എന്നിവരെയാണ് മരിച്ചതായി രേഖപ്പെടുത്തി നീക്കം ചെയ്തത്. മൂന്നാം വാർഡിലെ ഷീജ ആതിര എന്നിവരെ നീക്കം ചെയ്ത് നാലാം വാർഡിൽ ഉൾപ്പെടുത്തി ലിസ്റ്റ് പ്രസിദ്ധീകരിച്ചിട്ടുള്ളത്. ഇത്തരത്തിൽ നിരവധിപേരെ വോട്ടർപട്ടികയിൽനിന്ന് അവരറിയാതെതന്നെ നീക്കം ചെയ്തിട്ടുള്ളതായി കോൺഗ്രസ് ആരോപിച്ചു.

അഴിമതി ആരോപണം അടിസ്ഥാനരഹിതം: കുമരംപുത്തൂർ ഗ്രാമപഞ്ചായത്ത് ഭരണസമിതി

മണ്ണാർക്കാട്: കുമരംപുത്തൂർ പഞ്ചായത്തിന്‍റെ പുതിയ കെട്ടിടവുമായി ബന്ധപ്പെട്ട് എൽഡിഎഫ് ആരോപിക്കുന്ന അഴിമതി അടിസ്ഥാനരഹിതമാണെന്ന് ഭരണസമിതി വാർത്താസമ്മേളനത്തിൽ പ്രതികരിച്ചു. കുമരംപുത്തൂർ പഞ്ചായത്തിന്‍റെ കെട്ടിടവുമായി ബന്ധപ്പെട്ട പ്രവൃത്തികൾ 80 ശതമാനവും പൂർത്തീകരിക്കാനാണെന്നും ഇരുപതു ശതമാനം മാത്രമാണ് പൂർത്തീകരിച്ചതെന്നും അംഗങ്ങൾ പറഞ്ഞു. ആറുകോടി പത്തുലക്ഷം രൂപയുടെ പദ്ധതിയാണ്. ഇതിൽ ഒരു കോടി 90 ലക്ഷം രൂപയാണ് ചെലവഴിച്ചിട്ടുള്ളത്. ബാക്കി പ്രവൃത്തി ഇനിയും ചെയ്തുതീർക്കാനുണ്ട്. കെട്ടിടത്തിന്‍റെ ഉദ്ഘാടനവുമായി ബന്ധപ്പെട്ട് ഏതാനും പ്രവൃത്തികൾ പെട്ടെന്ന് പൂർത്തീകരിച്ചിട്ടുണ്ട്. ഈ പ്രവൃത്തി ഏറ്റെടുത്ത് നടത്തുന്നത് സിൽക്ക് എന്ന സർക്കാർ കമ്പനിയാണ്. ഭരണസമിതി അനുമതി നൽകിയ പദ്ധതി പിന്നീട് അതിന്‍റെ നടപടിക്രമങ്ങൾ പൂർത്തീകരിച്ചുതരേണ്ടത് സിൽക്കാണ്. സിൽക്ക് അതിന്‍റെ നടപടിക്രമങ്ങൾ വൈകിപ്പിച്ചതാണ് ടെൻഡർ എന്ന രീതിയിൽ എൽഡിഎഫ് ആരോപിക്കുന്നത്. ഭരണസമിതിക്ക് ഇക്കാര്യത്തിൽ വീഴ്ചയില്ലെന്നും സിൽക്കിന് എന്തെങ്കിലും വീഴ്ച വന്നിട്ടുണ്ടെങ്കിൽ അത് സർക്കാർ പരിഹരിക്കട്ടെയെന്നും ഭരണസമിതി അംഗങ്ങൾ പറഞ്ഞു. ഒരുതവണ പൂർത്തീകരിച്ച പദ്ധതിക്ക് രണ്ടുതവണ ടെൻഡർ വിളിക്കുകയോ പണം നൽകുകയോ ഭരണസമിതി ചെയ്തിട്ടില്ല. ഇന്നലെ ടെൻഡർ വിളച്ച പദ്ധതിക്കും ഭരണസമിതി പണം നൽകിയിട്ടില്ല. ടെൻഡർ നടപടികളെല്ലാം പൂർത്തീകരിച്ച് ബില്ല് പഞ്ചായത്തിനുതരുന്ന മുറയ്ക്ക് പണം നൽകുന്ന കാര്യം തീരുമാനിക്കുമെന്നും പഞ്ചായത്ത് പ്രസിഡന്‍റ് രാജൻ അമ്പാടത്ത്, സഹദ് അരിയൂർ, നൗഫൽ തങ്ങൾ തുടങ്ങിയവർ പറഞ്ഞു.

പോലീസ് മുഖത്തടിച്ചെന്നു വനിതാനേതാവ്

പാലക്കാട്: കാക്കിക്കുള്ളിലെ കാട്ടാളത്തം അവസാനിപ്പിക്കണമെന്നാവശ്യപ്പെട്ട് കെഎസ്‌യു നടത്തിയ ജില്ലാ പോലീസ് സൂപ്രണ്ട് ഓഫീസ് മാര്‍ച്ചിനുനേരേ പോലീസ് അതിക്രമം. വനിതാപ്രവര്‍ത്തകയെ മുഖത്തടിച്ച പോലീസ് സമരക്കാരെ വലിച്ചിഴച്ചാണ് അറസ്റ്റ് ചെയ്തുനീക്കിയത്. നാലുതവണ ജലപീരങ്കി പ്രയോഗിച്ചിട്ടും പിരിഞ്ഞു പോകാതെനിന്ന പ്രവര്‍ത്തകര്‍ക്കുനേരേയാണ് പോലീസ് രൂക്ഷമായ പ്രത്യാക്രമണം നടത്തിയത്. നിരവധി പ്രവര്‍ത്തകര്‍ക്ക് അടിയേറ്റു. ഒരു പ്രവര്‍ത്തകന്‍ ആശുപത്രിയില്‍ ചികിത്സ തേടി. വടക്കാഞ്ചേരിയില്‍ വിദ്യാര്‍ഥിസംഘര്‍ഷവുമായി ബന്ധപ്പെട്ട് അറസ്റ്റുചെയ്ത കെഎസ്‌യു പ്രവര്‍ത്തകരെ വിലങ്ങും മുഖംമൂടിയും അണിയിച്ച് കോടതിയില്‍ ഹാജരാക്കിയ സംഭവം ഉള്‍പ്പടെ ഉയര്‍ത്തിക്കാട്ടി കോട്ടമൈതാനത്ത് നിന്നാരംഭിച്ച മാര്‍ച്ച് എസ്പി ഓഫീസിന് നൂറുവാര അകലെ പോലീസ് ബാരിക്കഡ് തീര്‍ത്ത് തടഞ്ഞു. തുടര്‍ന്ന് പ്രതിഷേധിച്ച വിദ്യാര്‍ഥിനികള്‍ ഉള്‍പ്പെടെയുള്ള സമരക്കാര്‍ ബാരിക്കേഡിനു മുന്നില്‍ കുത്തിയിരുന്നു. സമരം കെപിസിസി മെംബര്‍ റിജില്‍ ചന്ദ്രന്‍ മാക്കുറ്റി ഉദ്ഘാടനം ചെയ്തു. ഉദ്ഘാടനം കഴിഞ്ഞിട്ടും സമരക്കാര്‍ പ്രതിഷേധം ശക്തമാക്കിയതിനെ തുടര്‍ന്നാണ് പോലീസ് ജലപീരങ്കി ഉപയോഗിച്ചത്. ജലപീരങ്കിയില്‍ വനിതാ പ്രവര്‍ത്തകരടക്കം തെറിച്ചു വീണു. പ്രതിരോധം മറികടന്ന് ബാരിക്കേഡുകള്‍ ചാടിക്കടക്കാന്‍ ശ്രമിച്ചവരെ പോലീസ് നീക്കി. അറസ്റ്റിനിടെയാണ് കെഎസ്‌യു നേതാവ് ഗൗജ വിജയകുമാറിന്‍റെ മുടിക്കുത്തിനു പിടിച്ച് പോലീസ് മുഖത്തടിച്ചത്. അറസ്റ്റിന് തയാറായിനിന്ന തന്നെ യാതൊരു പ്രകോപനവുമില്ലാതെ വനിതാ പോലീസ് ഉദ്യോഗസ്ഥ മുഖത്തടിക്കുകയായിരുന്നുവെന്ന് ഗൗജാ വിജയകുമാര്‍ പറഞ്ഞു. മുന്‍പും ഇതേ പോലീസ് ഉദ്യോഗസ്ഥ കെഎസ്യു വിദ്യാര്‍ഥിനികളെ മര്‍ദിച്ചിട്ടുണ്ടെന്നും ഗൗജ ആരോപിച്ചു. കെഎസ്‌യു ജില്ലാ പ്രസിഡന്‍റ് നിഖില്‍ കണ്ണാടി അദ്ധ്യക്ഷത വഹിച്ചു. നേതാക്കളായ ഗൗജ വിജയകുമാര്‍, അജാസ് കുഴല്‍മന്ദം, ഡിജു, സ്മിജാ രാജന്‍, ദിലീപ് നെല്ലിയാമ്പതി, രോഷിത്, നിഥിന്‍ ഫാത്തിമാ. അനുജ് ഹരിദാസ്, ആകാശ് കുഴല്‍മന്ദം, ഷിഫ, യൂത്ത് കോണ്‍ഗ്രസ് ജില്ലാ പ്രസിഡന്‍റ് കെ.എസ്. ജയഘോഷ് തുടങ്ങിയവര്‍ നേതൃത്വം നല്‍കി.

വന്യജീവിശല്യ ലഘൂകരണയജ്ഞത്തിന് കിഴക്കഞ്ചേരി പഞ്ചായത്തിൽ തുടക്കം

വടക്കഞ്ചേരി: വന്യജീവിശല്യം ലഘൂകരിക്കുന്നതിന്‍റെ ഭാഗമായുള്ള തീവ്രയജ്ഞ പരിപാടികൾക്ക് പീച്ചി വനാതിർത്തി വരുന്ന കിഴക്കഞ്ചേരി പഞ്ചായത്തിൽ തുടക്കംകുറിച്ചു. പഞ്ചായത്ത് ഹാളിൽ നടന്ന യോഗം പഞ്ചായത്ത് പ്രസിഡന്‍റ് കവിത മാധവൻ ഉദ്ഘാടനം ചെയ്തു. വൈസ് പ്രസിഡന്‍റ് വി. രാധാകൃഷ്ണൻ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർപേഴ്സൺ മാരായ രാജി കൃഷ്ണൻകുട്ടി , ലതിക മണികണ്ഠൻ, കെ. രവീന്ദ്രൻ, മെംബർ പോപ്പി ജോൺ, കർഷക പ്രതിനിധികളായ ജോൺ ചെറുനിലം, ജോഷി ആന്‍റണി, മണി വിആർടി, മാണിക്യൻ കുണ്ടുകാട്, അഹമ്മദ് കബീർ, ഷൂട്ടർ ബെന്നി പുതുശേരി, ഫോറസ്റ്റർ ലിന്‍റോ തുടങ്ങിയവർ പ്രസംഗിച്ചു. ആലത്തൂർ ഫോറസ്റ്റ് റേഞ്ച് ഓഫീസർ എൻ. സുബൈർ വിഷയാവതരണം നടത്തി. ഈ മാസം 16 മുതൽ ഒക്ടോബർ 30 വരെയുള്ള തീയതികളിൽ മൂന്നുഘട്ടങ്ങളിലായാണ് തീവ്രയജ്ഞ പരിപാടി നടത്തുന്നത്. വനം, കൃഷി, റവന്യു ഉദ്യോഗസ്ഥരും യോഗത്തിൽ പങ്കെടുത്തു. പരാതികളുടെ സ്വഭാവമനുസരിച്ച് ഫോറസ്റ്റ് റേഞ്ച് തലത്തിലും ഡിവിഷൻ തലത്തിലും ജില്ലാതലത്തിലും പരാതികൾക്ക് പരിഹാരം കാണും. സർക്കാർതലത്തിലുള്ള ഇടപെടലുകളും നടപടികളും ആവശ്യമായ പരാതികൾക്ക് അങ്ങനേയും പരിഹാരം കാണുകയാണ് 45 ദിവസത്തെ പരിപാടിയുടെ ലക്ഷ്യം. വന്യമൃഗങ്ങൾ കൃഷി നശിപ്പിച്ചാൽ ലഭിക്കുന്ന നഷ്ടപരിഹാരത്തുക നക്കാപ്പിച്ച രീതിയിലുള്ളതിനാലാണ് വിളനാശമുണ്ടായാൽ കർഷകർ പരാതിപ്പെടാത്തതെന്ന് കർഷകർ. ഇന്നലെ നടന്ന യോഗത്തിലാണ് കർഷകർ നിലവിലെ ദുരവസ്ഥ തുറന്നടിച്ചത്. വിളനാശം സംബന്ധിച്ച് ഇതുവരെ ആറ് അപേക്ഷകൾ മാത്രമാണ് ലഭിച്ചിട്ടുള്ളതെന്നും പഞ്ചായത്തിൽ ഒരൊറ്റ പരാതി പോലും ലഭിച്ചിട്ടില്ലെന്നും റേഞ്ച് ഓഫീസർ ചൂണ്ടിക്കാട്ടിയപ്പോഴാണ് കർഷകർ നിലവിലുള്ള സ്ഥിതി വെളിപ്പെടുത്തിയത്. സമയനഷ്ടവും ലഭിക്കുന്ന നഷ്ടപരിഹാര തുകയേക്കാൾ കൂടുതൽ അത്ുലഭിക്കാൻ ചെലവ് വരുന്നതുമാണ് കർഷകർ പരാതിയിലേക്ക് നീങ്ങാത്തതെന്നുമായിരുന്നു ചർച്ചയിൽ പങ്കെടുത്തവർ പറഞ്ഞത്.

ജനപങ്കാളിത്തം അനിവാര്യമെന്ന് ഫോറസ്റ്റ് റേഞ്ച് ഓഫീസർ

വടക്കഞ്ചേരി: ആന ഉൾപ്പെടെയുള്ള വന്യജീവികൾ നാട്ടിൽ ഇറങ്ങുന്നതു നിയന്ത്രിക്കാൻ ഇനിയും വൈകിയാൽ ഭാവിയിൽ വലിയ വിപത്തുകളുണ്ടാക്കുമെന്ന് ആലത്തൂർ ഫോറസ്റ്റ് റേഞ്ച് ഓഫീസർ എൻ. സുബൈർ. പീച്ചി വനാതിർത്തി പങ്കിടുന്ന കിഴക്കഞ്ചേരി പഞ്ചായത്തിൽ മനുഷ്യ വന്യമൃഗ സംഘർഷ ലഘൂകരണ തീവ്ര യജ്ഞ പരിപാടിക്ക് തുടക്കം കുറിച്ച് പഞ്ചായത്തിൽ നടന്ന ബന്ധപ്പെട്ടവരുടെ യോഗത്തിൽ വിഷയാവതരണം നടത്തി സംസാരിക്കുകയായിരുന്നു റേഞ്ച് ഓഫീസർ. വന്യമൃഗങ്ങൾ നാട്ടിൽ ഇറങ്ങുന്നത് തടയാൻ ശാശ്വത പരിഹാരമില്ല. ലഘൂകരിച്ചു നിർത്താൻ മാത്രമേ കഴിയു. എളുപ്പത്തിൽ തീറ്റ കിട്ടുന്ന സാഹചര്യം വനാതിർത്തിയിലുണ്ടെന്ന് കണ്ടാൽ പിന്നെ ആനകൾ കൂട്ടത്തോടെ നാട്ടിലെത്തും. ഇത് എല്ലാ ജീവികളുടെയും ഒരു സ്വാഭാവിക ആവാസ രീതിയാണ്. ഇതിനാൽ ആനകൾക്ക് ഇഷ്ടപ്പെടുന്നതും പെട്ടെന്ന് മണത്തറിയുന്നതുമായ കൃഷികൾ വനാതിർത്തികളിൽ ഒഴിവാക്കണം. പാലക്കുഴി പൊന്മുടി മുതൽ കണ്ണമ്പ്ര പഞ്ചായത്തിൽപ്പെടുന്ന പോത്തുചാടി വരെയുള്ള 10 കിലോമീറ്റർ ദൂരം പീച്ചി വന്യമൃഗസംരക്ഷണ കേന്ദ്രത്തിന്‍റെ അതിർത്തി പ്രദേശങ്ങളാണ്. ഇതിനാൽ ജനപങ്കാളിത്തത്തോടെ മാത്രമേ വനാതിർത്തി സംരക്ഷണ നടപടികൾ വിജയത്തിലെത്തിക്കാനാകു. കിഴക്കഞ്ചേരി പഞ്ചായത്തിലെ ഹെൽപ്പ് ഡെസ്കിൽ ലഭിച്ച 13 പരാതികളിൽ പതിമൂന്നും പന്നിശല്യത്തിന്‍റേതാണ്. ഇതു നിയന്ത്രിക്കാൻ പഞ്ചായത്തുമായി ആലോചിച്ചു നടപടി സ്വീകരിക്കുമെന്നും റേഞ്ച് ഓഫീസർ പറഞ്ഞു. വനാതിർത്തിയിലെ വൈദ്യുതവേലിയുടെ അറ്റകുറ്റപ്പണികളുടെ കുറവാണ് കിഴക്കഞ്ചേരി മലയോരത്ത് പതിവായി ആനകൾ ഇറങ്ങാൻ കാരണമാകുന്നതെന്ന് പറഞ്ഞ റേഞ്ച് ഓഫീസർ പ്രശ്നം പരിഹരിക്കുന്നതിനു നടപടി സ്വീകരിച്ചിട്ടുണ്ടെന്നും അറിയിച്ചു. പാലക്കുഴി റോഡിൽ പീച്ചി വനാതിർത്തി വരുന്ന പുല്ലംപരുത മുതൽ നാലര കിലോമീറ്റർ ദൂരം മുകളിലേക്ക് നിലവിലുള്ള വേലി പ്രവർത്തനക്ഷമമാക്കുന്നതിനൊപ്പം തൂക്കുവേലി കൂടി സ്ഥാപിക്കും. പ്രൈമറി റെസ്പോൺസ് ടീമിനെ പരിശീലനം നൽകി സജ്ജരാക്കുമെന്നും ആർആർടീമിന്‍റെ സേവനം ഉറപ്പാക്കുമെന്നും റേഞ്ച് ഓഫീസർ ഉറപ്പു നൽകിയിട്ടുണ്ട്.

പൊൽപ്പുള്ളിയിൽ വോട്ടർപട്ടികയിൽ കൂടുതൽ ക്രമക്കേടുള്ളതായി ജില്ലാ കളക്ടർക്കു പരാതി

ചിറ്റൂർ: പൊൽപ്പുള്ളിയിൽ വോട്ടർ പട്ടികയിൽ വ്യാജപേരുകൾ ചേർത്തതായി രണ്ടു പരാതികൾ കൂടി ജില്ലാ കളക്ടർക്ക് നൽകി. 4,7,8,9 വാർഡുകളിലും വോട്ടർപട്ടികയിൽ ക്രമക്കേടുകൾ ഉള്ളതായി പൊൽപ്പുള്ളി മണ്ഡലം കോൺഗ്രസ് പ്രസിഡന്‍റ് പ്രാണേഷ് രാജേന്ദ്രൻ അറിയിച്ചു . രണ്ടു യുവതികളാണ് പരാതി കളക്ടർക്ക് നൽകിയിരിക്കുന്നത്.പൊൽപ്പുള്ളി ആറാം വാർഡിൽ ആൾ താമസമില്ലാത്തതും വീട് പൂർണമായുംനശിച്ചതുമായ വീട്ടുനമ്പറിൽ 41 പേരുകൾ കണ്ടെത്തിയിരുന്നു. ആറുവർഷം മുന്പ് ഈ വീട്ടിൽ താമസിച്ചിരുന്നയാൾ താമസം മാറ്റിയിരുന്നു 6/6 എന്ന വീട്ടുനമ്പറിലാണ് 41 പേരുകൾ ഉൾപ്പെട്ടിരുന്നത്. 41 പേരിൽ പല സമുദായക്കാരുടെ പേരുകൾ ഉൾപ്പെട്ടിരുന്നു. വോട്ടർപട്ടികയിൽ കാണപ്പെട്ട ക്രമക്കടുകൾ ശക്തമായ പ്രതിഷേധത്തിനു കാരണമായിരുന്നു. പ്രാണേഷ് രാജേന്ദ്രൻ ഈ വിഷയം ഉന്നയിച്ച് ജില്ലാകളക്ടർക്കും പരാതി നൽകിയിരുന്നു. പഞ്ചായത്തിലെ മുഴുവൻ വാർഡുകളിലെ വോട്ടർപട്ടികകളും പരിശോധിച്ചുവരുന്നതായും പ്രാണേഷ് രാജേന്ദ്രൻ അറിയിച്ചു.

എൻജിനീയേഴ്‌സ് ദിനം ആഘോഷിച്ചു

പാലക്കാട്: ദി ഇൻസ്റ്റിറ്റ്യൂഷൻ ഓഫ് എൻജിനീയേഴ്സ് ഇന്ത്യ പാലക്കാട് കേന്ദ്രം എൻജിനീയേഴ്‌സ് ദിനം ആഘോഷിച്ചു. ആഘോഷപരിപാടിയിൽ കണ്ണൂർ യൂണിവേഴ്സിറ്റി വൈസ് ചാൻസലർ ഡോ. കെ.കെ. സാജു മുഖ്യാതിഥിയായിരുന്നു. "ഡീപ്ടെക്കും എൻജിനീയറിംഗ് മികവും: ഇന്ത്യയുടെ സാങ്കേതികദശകത്തെ നയിക്കുന്നു’ എന്നവിഷയത്തിൽ മുഖ്യപ്രഭാഷണം നടത്തി. പരിപാടിയിൽ കേന്ദ്ര പൊതുമരാമത്ത് വകുപ്പ് ഐഐടി പാലക്കാട് സോണിന്‍റെ ചീഫ് എൻജിനീയറും എക്സിക്യൂട്ടീവ് ഡയറക്ടറുമായ ദിനേശ് കുമാർ പ്രസംഗിച്ചു. ചടങ്ങിൽ ഐഇഐ പാലക്കാട് കേന്ദ്രം ചെയർമാൻ എ.വി. രാജപ്പൻ അധ്യക്ഷനായിരുന്നു. ഓണററി സെക്രട്ടറി ഡോ. ബി. രാജേഷ് മേനോൻ, ജോയിന്‍റ് സെക്രട്ടറി ഡോ.എ.എസ്. നിഷ, കെ. മദനമോഹൻ, ഡി. അജിത്, കെ. ഉണ്ണികൃഷ്ണൻ, പി. ബാലകൃഷ്ണൻ നായർ, പി.കെ. വസിഷ്ട് എന്നിവർ പ്രസംഗിച്ചു.

കോയമ്പത്തൂർ-അവിനാശി റോഡ് മേൽപ്പാലം ഉദ്ഘാടനം ഒക്ടോബർ 9 ന്

കോയമ്പത്തൂർ: അവിനാശി റോഡ് മേൽപ്പാലം ഒക്ടോബർ 9 ന് തമിഴ്‌നാട് മുഖ്യമന്ത്രി എം.കെ. സ്റ്റാലിൻ ഉദ്ഘാടനം ചെയ്യും. അവിനാശി റോഡ് ഫ്ലൈഓവർ തുറന്നാൽ 10 മിനിറ്റിനുള്ളിൽ വിമാനത്താവളത്തിൽ എത്താൻ കഴിയുമെന്ന് ഹൈവേ ഉദ്യോഗസ്ഥർ പറഞ്ഞു. തമിഴ്‌നാട്ടിലെ നീളം കൂടിയ ഫ്ലൈഓവറാണ് ഈ പാലം. ചെന്നൈയെ അപേക്ഷിച്ച് അണ്ണാശാലൈ പോലെ തിരക്കേറിയ റോഡാണിത്. ഇവിടെ സിഗ്നലുകളുടെ എണ്ണം വളരെ കൂടുതലാണ്. അതുകൊണ്ടാണ് ഒരു ഫ്ലൈഓവർ നിർമിക്കാൻ തീരുമാനിച്ചത്. ഉപ്പിലിപ്പാലയം മുതൽ ഗോൾഡ് വിൻസ് വരെ 10.1 കിലോമീറ്റർ ദൂരത്തിൽ 1,791 കോടി രൂപ ചെലവിലാണ് ഫ്ലൈഓവറിന്‍റെ നിർമാണം ആരംഭിച്ചത്. ഇതിനായി 300 കോൺക്രീറ്റ് തൂണുകൾ നിർമിക്കുകയും അവയിൽ പ്ലാറ്റ്ഫോമുകൾ നിർമിക്കുകയും ചെയ്തു. മേൽപ്പാലത്തിന്‍റെ അവസാന ഘട്ട ജോലികൾ ഇപ്പോൾ പുരോഗമിക്കുകയാണ്. ഫ്ലൈഓവർ തുറന്നാൽ കോയമ്പത്തൂരിൽ നിന്ന് തിരുപ്പൂർ, ഈറോഡ്, സേലം, നാമക്കൽ, ധർമ്മപുരി, കൃഷ്ണഗിരി, ഹൊസൂർ, ചെന്നൈ എന്നിവിടങ്ങളിലേക്ക് എളുപ്പത്തിൽ സഞ്ചരിക്കാൻ കഴിയും. ഉപ്പിലിപ്പാലയത്തിൽ നിന്ന് വിമാനത്താവളത്തിലേക്ക് 10 മിനിറ്റിനുള്ളിൽ എത്താൻ കഴിയുമെന്ന് ഹൈവേ വകുപ്പ് ഉദ്യോഗസ്ഥർ പറഞ്ഞു. എല്ലാത്തരം വാഹനങ്ങളെയും ഫ്ലൈഓവറിൽ അനുവദിക്കുന്നത് പരിഗണിക്കും. പാലത്തിൽ നെയിം ബോർഡ്, സെൻട്രൽ ബാരിയർ, ഫ്ലാഷിംഗ് ലൈറ്റുകൾ തുടങ്ങിയവ സ്ഥാപിക്കും. ആരോഹണ അവരോഹണ പ്ലാറ്റ്‌ഫോം ഉള്ളതിനാൽ എല്ലാ പ്രദേശങ്ങളിലേക്കും എത്തിച്ചേരാൻ ഫ്ലൈഓവർ ഉപയോഗിക്കാം. ഫ്ലൈഓവർ തുറന്നാൽ അവിനാശി റോഡിലെ ഗതാഗതം 50 മുതൽ 60 ശതമാനം വരെ കുറയുമെന്ന് പ്രതീക്ഷിക്കുന്നു.അതേസമയം, കോയമ്പത്തൂരിൽ നിന്ന് പുറത്തേക്ക്പോകുന്ന എല്ലാ വാഹനങ്ങളും ഫ്ലൈഓവർ ഉപയോഗിക്കുന്നതിനാൽ റോഡിനേക്കാൾ കൂടുതൽ വാഹനങ്ങൾ ഫ്ലൈഓവർ ഉപയോഗിക്കാനുള്ള സാധ്യതയുണ്ട്.

അലയാറിൽ വളർന്നുപന്തലിച്ച ചെണ്ടുമല്ലിത്തോട്ടം വിസ്മയക്കാഴ്ചയാകുന്നു

വണ്ടിത്താവളം: അലയാർ റോഡരികിൽ പുത്തുലയുന്ന ജമന്തി, ചെണ്ടുമല്ലിത്തോട്ടം വാഹനസഞ്ചാരികൾക്ക് കൗതുകകാഴ്ചയാവുന്നു. വണ്ടിത്താവളം പച്ചക്കറി വ്യാപാരി സ്വാമിനാഥന്‍റേതാണ് പൂന്തോട്ടം. സ്വാമിനാഥന്‍റെ വീടിനോട് ചേർന്ന വിശാലമായ പറമ്പിലാണ് രണ്ടു വശങ്ങളിലായി ജമന്തിയും ചെണ്ടുമല്ലിയും കൃഷിയിറക്കിയിരിക്കുന്നത്. യാത്രക്കാർ വാഹനങ്ങൾ നിർത്തി പൂന്തോട്ടത്തിൽ നിന്നും സെൽഫിയെടുക്കാറുണ്ട്. ഓണം മറ്റും മഹാനവമി സമയത്താണ് പൂകൃഷി നടത്താറുള്ളത്. മണ്ണിന്‍റെ ഘടന പുഷ്പകൃഷിക്ക് അനുയോജ്യമായതാണ് സമൃദ്ധമായ വിളവിനുകാരണം. നവരാത്രി സമയത്താണ് വിളവെടുപ്പ് നടത്തുന്നത്. സമീപവാസികൾ ഇവിടെയെത്തിയാണ് ചെണ്ടുമല്ലി വാങ്ങുന്നതിനാൽ അധ്വാനത്തിന് തക്ക പ്രതിഫലം ലഭിക്കാറുണ്ടെന്നും സ്വാമിനാഥൻ അറിയിച്ചു.

തത്തമംഗലം ബസ് സ്റ്റാൻഡിൽ ചോർച്ച: യാത്രക്കാർ വലയുന്നു

തത്തമംഗലം: ബസ് സ്റ്റാൻഡ് കെ ട്ടിടത്തിന്‍റെ സൺഷെയ്ഡ് തകർന്ന് മഴവെള്ളം ചോർന്നതിനാൽ വ്യാപാരസ്ഥാപനങ്ങളിലേക്കും വെള്ളംകയറി.സ്റ്റാൻഡിന്‍റെ ഇരുവശത്തെ സൺഷെയ്ഡും മാസങ്ങൾക്കു മുന്പ് തന്നെ പൊട്ടിപ്പൊളിഞ്ഞതിൽ യാത്രക്കാർ പ്രതിഷേധവുമായി രംഗത്തെത്തിയിരുന്നു. മഴപെയ്താൽ ഇനി സ്റ്റാൻഡിൽ നിൽക്കാൻ പോലും കഴിയാത്ത അവസ്ഥയിലായിരിക്കുകയാണ്.സ്റ്റാൻഡിന്‍റെ പിൻവശം പ്രാവിൻകാഷ്ഠം നിറഞ്ഞ് ദുർഗന്ധം വമിക്കുന്ന അവസ്ഥയാണുള്ളത്. സ്റ്റാൻഡ് നവീകരണം നടത്തുമെന്ന് നഗരസ്ഥാ അധികൃതർ അറിയിച്ച് മാസങ്ങൾ കഴിഞ്ഞും അനക്കമില്ലാത്തതിൽ യാത്രക്കാർ ദുരിതത്തിലായിരിക്കുകയാണ്. നിലവിൽ സ്റ്റാൻഡിൽ അഞ്ചു ബസുകളാണ് കയറി ഇറങ്ങുന്നത്. ഇതിൽ യാത്ര ചെയ്യുന്നവരും നിൽക്കാൻ സ്ഥലമില്ലാതെ വലയുകയാണ്.

നിർമാണോദ്ഘാടനം കഴിഞ്ഞ് അഞ്ചുവർഷം; ബൈപാസ് റോഡ് യാഥാർഥ്യമായില്ല

നെന്മാറ: ബസ് സ്റ്റാൻഡ് - അയിനംപാടം ബൈപ്പാസ് റോഡ് നിർമാണം ഉദ്ഘാടനം കഴിഞ്ഞ് അഞ്ചുവർഷം. പ്രഖ്യാപിച്ച നവീകരിച്ച നിർമാണം നടന്നില്ല. നിലവിലെ റോഡ് തകർന്ന് ഗതാഗതയോഗ്യമല്ലാതായി. നെന്മാറ അയിനംപാടം ജലസേചന വകുപ്പ് കനാൽ ബണ്ട് റോഡ് നവീകരിച്ച് വീതി കൂട്ടി അയിനംപാടം ജംഗ്ഷനിൽ നിന്നും അടിപ്പെരണ്ട റോഡ് മുറിച്ചു കടന്ന് നെന്മാറ ബസ് സ്റ്റാൻഡുമായി ബന്ധിപ്പിക്കാനുള്ള പദ്ധതിയാണ് ഉദ്ഘാടനത്തിൽ ഒതുങ്ങിയത്. നിലവിൽ ഉണ്ടായിരുന്ന കനാൽബണ്ട് റോഡ് നെന്മാറ ടൗണിൽ നിന്നുള്ള തിരക്ക് കുറയ്ക്കാനും അയിനംപാടത്തുനിന്ന് നെന്മാറ പുതുഗ്രാമം, പഴയ ഗ്രാമം, ഗേൾസ് ഹൈസ്കൂൾ, വക്കാവ് തുടങ്ങി വിവിധ പ്രദേശങ്ങളിലേക്ക് നെന്മാറ ടൗണിൽ പ്രവേശിക്കാതെ തൃശൂർ റോഡിൽനിന്ന് എത്താമെന്നും നെന്മാറ ടൗണിലെ തിരക്ക് ഇതുമൂലം കുറയ്ക്കാമെന്നുമുള്ള സാധ്യതകണ്ടാണ് നെന്മാറ ഗ്രാമപഞ്ചായത്ത് റോഡ് നിർമാണത്തിന് പദ്ധതി തയ്യാറാക്കിയത്. അതോടൊപ്പം നെന്മാറ ബസ് സ്റ്റാൻഡിൽ നിന്ന് നെന്മാറ ജംഗ്ഷൻ വരെയുള്ള തിരക്ക് കുറയ്ക്കാൻ കഴിയുമെന്നായിരുന്നു പ്രഖ്യാപനം. നെന്മാറ ബസ് സ്റ്റാൻഡിൽ നിന്ന് ക്രിസ്തുരാജ പള്ളിക്കു മുൻവശത്ത് കൂടെ കൃഷിഭവൻ, വില്ലേജ് ഓഫീസ് പരിസരത്ത് കൂടെ കനാല്‍ ബണ്ട് റോഡ് വഴി അയിലൂർ റോഡിൽ എത്തുന്നതാണ് രണ്ട് ഘട്ടമായുള്ള നെന്മാറ പഞ്ചായത്ത് ബൈപ്പാസ് റോഡ്. കഴിഞ്ഞ പഞ്ചായത്ത് തെരഞ്ഞെടുപ്പിന് മുൻപായി അന്നത്തെ ഗ്രാമപഞ്ചായത്ത് പ്രസിഡന്‍റ് കെ. പ്രേമൻ റോഡ് നിർമാണ ഉദ്ഘാടനവും നടത്തിയിരുന്നു. എന്നാൽ ചില സാങ്കേതിക പ്രശ്നങ്ങൾ പിന്നീട് ഉയർന്നു വന്നതോടെയാണ് പദ്ധതി നടപ്പാക്കാതെ പോയതെന്നാണ് അധികൃതർ പറയുന്നത്. രൂക്ഷമായ ഗതാഗതക്കുരുക്ക് അനുഭവപ്പെടുന്ന നെന്മാറ ടൗണിലെ തിരക്ക് ഒഴിവാക്കുന്നതിനായി അയിനംപാടം നെന്മാറ ബസ് സ്റ്റാൻഡ് ബൈപ്പാസ് യാഥാർഥ്യമാക്കണമെന്ന് പ്രദേശവാസികൾ ആവശ്യപ്പെടുന്നു. കനാൽ ബണ്ട് റോഡ് വർഷങ്ങളായി നവീകരണം നടത്താത്തത് മൂലം പ്രദേശവാസികൾക്ക് ഈ റോഡിലൂടെ ഇരുചക്രവാഹനത്തിൽ പോലും സഞ്ചരിക്കാൻ കഴിയാത്ത സ്ഥിതിയായി. നിർമാണ ഉദ്ഘാടനത്തിനുശേഷം പുതിയ പഞ്ചായത്ത് ഭരണസമിതി നിലവിൽ വന്നെങ്കിലും നേരത്തെ ഉണ്ടായിരുന്ന പ്രഖ്യാപനത്തിന് മേൽനടപടികൾ സ്വീകരിച്ചില്ല. പ്രദേശവാസികളുടെ നിരന്തര സമ്മർദ്ദത്തെ തുടർന്ന് അയിനംപാടം ഭാഗത്ത് 50 മീറ്റർ ദൂരം അടുത്തിടെ കോൺക്രീറ്റ് ചെയ്ത് ഗതാഗതയോഗ്യമാക്കിയതും ബൈപ്പാസ് റോഡ് എന്ന ബോർഡ് സ്ഥാപിച്ചതും മാത്രമാണ് അഞ്ചുവർഷം കൊണ്ട് ആകെയുണ്ടായ പുരോഗതി.

കാലംതെറ്റി കണിക്കൊന്ന പൂത്തു

നെന്മാറ: കാലംതെറ്റി കണിക്കൊന്ന പൂത്തു. മാർച്ച്, ഏപ്രിൽ, മെയ് മാസങ്ങളിൽ ഉയർന്ന അന്തരീക്ഷചൂടുള്ളപ്പോൾ മാത്രം പൂക്കാറുള്ള കണിക്കൊന്ന സെപ്റ്റംബറിൽ തന്നെ പൂവണിഞ്ഞു. നെന്മാറ പഞ്ചായത്തിലെ കരിമ്പാറ റോഡിൽ ആറ്റുവായ് പുഴപ്പാലത്തിന് സമീപമാണ് കാലംതെറ്റി കണിക്കൊന്ന പൂവിട്ട് നിൽക്കുന്നത്. ഏതാനും വർഷങ്ങൾ മുമ്പ് സാമൂഹ്യവനവത്കരണത്തിന്‍റെ ഭാഗമായി റോഡരികിൽ നട്ട പലതരം തണൽ മരങ്ങൾക്കിടയിലുള്ള രണ്ടു കണിക്കൊന്നുകളാണ് പൂത്തത്. റോഡരികിലെ ഒരു കണിക്കൊന്ന ഓണത്തോടനുബന്ധിച്ച് രണ്ടാഴ്ച മുമ്പ് ചെറിയതോതിൽ പൂത്തിരുന്നു. ഇപ്പോൾ 10 മീറ്റർ അകലെ രണ്ടാമത് ഒരു കണിക്കൊന്നയിൽ കൂടി പൂക്കൾ നിറഞ്ഞതോടെയാണ് വഴിയാത്രക്കാരിൽ കൗതുകം ഉണർത്തിയത്. കാലാവസ്ഥാ വ്യതിയാനം മൂലം അന്തരീക്ഷത്തിലുള്ള ചൂട് വർധിച്ചതായിരിക്കാം പൂവിടാൻ കാരണമെന്ന് സസ്യശാസ്ത്രജ്ഞർ പറയുന്നു. സാധാരണ കണിക്കൊന്ന പൂവിട്ട് തുടങ്ങുമ്പോൾ ഇലകളെല്ലാം കൊഴിഞ്ഞ് നഗ്നമായ ശിഖരത്തോടെയാണ് നിൽക്കാറുള്ളത്. ഇവിടെ നിറയെ ഇലതഴപ്പുകൾക്കിടയിലൂടെ വസന്തം വിളിച്ചോതി പൂത്ത കണിക്കൊന്ന കണ്ണിന് കുളിർമയായി നിൽക്കുന്നത്. നെന്മാറ കരിമ്പാറ റോഡിലെ നിരവധി യാത്രക്കാർ വാഹനം നിർത്തി കണിക്കൊന്ന പൂത്ത കൗതുക കാഴ്ച കാമറകളിൽ പകർത്തുന്ന തിരക്കിലാണ്.

ചീഫ് ഇലക്ട്രറൽ ഓഫീസർ അട്ടപ്പാടിയിൽ ; സിഇഒ @ ഉന്നതി പദ്ധതിക്കു തുടക്കം

അഗളി: പ്രത്യേക തീവ്ര വോട്ടർപട്ടിക പുതുക്കൽ (എസ്ഐ ആർ) നടപ്പിലാക്കുന്നതിനു മുന്നോടിയായി ചീഫ് ഇലക്ട്രറൽ ഓഫീസർ രത്തൻ യു. ഖേൽക്കറിന്‍റെ നേതൃത്വത്തിൽ സിഇഒ @ ഉന്നതി - ഗെറ്റ് റെഡി ഫോർ എസ്ഐആർ പദ്ധതിക്ക് ജില്ലയിൽ തുടക്കമായി. പദ്ധതിയുടെ ഭാഗമായി സിഇഒ അട്ടപ്പാടി മേഖലയിലെ ഉന്നതികളായ ആനവായ്, ചിണ്ടക്കി ഉന്നതികളാണ് സന്ദർശിച്ചത്. ചീഫ് ഇലക്ട്രറൽ ഓഫീസർ ജനങ്ങളുമായി സംവദിക്കുകയും, ഉന്നതിയിലെ വീടുകളിൽ സന്ദർശനം നടത്തി രേഖകൾ പരിശോധിക്കുകയും ചെയ്തു. ഉന്നതിയിലെ എല്ലാവരുടെയും രേഖകൾ കൃത്യമാണെന്നും ആശങ്ക വേണ്ടെന്നും അദ്ദേഹം ജനങ്ങളെ അറിയിച്ചു. വോട്ട് രേഖപ്പെടുത്തുന്നതിന്‍റെ പ്രാധാന്യത്തെക്കുറിച്ച് ജനങ്ങൾക്ക് അവബോധം നൽകിയ അദ്ദേഹം ഉന്നതിയിലെ കുടുംബശ്രീ യോഗത്തിലും പങ്കെടുത്തു. ഇലക്ട്രറൽ ലിറ്ററസി ക്ലബ്ബുകളുടെ പ്രവർത്തനത്തിന് സംസ്ഥാനത്ത് രണ്ടാംസ്ഥാനം നേടിയ ഐഎച്ച് ആർഡി കോളജ് അഗളി, മികച്ച നേട്ടങ്ങൾ കൈവരിച്ച രാജീവ്‌ ഗാന്ധി മെമ്മോറിയൽ ആർട്സ് ആൻഡ് സയൻസ് കോളജ് കോട്ടത്തറ തുടങ്ങിയ കോളജുകളിൽ മീറ്റ് ദ സിഇഒ പദ്ധതിലും പങ്കെടുത്തു. വിദ്യാർഥികളുമായി സംവദിക്കുകയും, തെരഞ്ഞെടുപ്പുമായി ബന്ധപ്പെട്ട സംശയനിവാരണം നടത്തുകയും ചെയ്തു. ഇത്തരത്തിലുള്ള ബോധവത്കരണ ക്ലാസുകളും കാമ്പയിനുകളും ജനങ്ങൾക്കിടയിൽ കൂടുതൽ വ്യാപിപ്പിക്കണമെന്നും നിർദ്ദേശിച്ചു. അഡീഷണൽ ചീഫ് ഇലക്ട്രറൽ ഓഫീസർ ഷർമിള സി. നായർ, ഇലക്്ഷൻ ഡെപ്യൂട്ടി കളക്ടർ സജീദ്, അട്ടപ്പാടി തഹസിൽദാർ ഷാനവാസ് ഖാൻ, ഇലക്്ഷൻ അസിസ്റ്റന്‍റ് പി.എ. ടോംസ്, പുതൂർ പോലീസ് സ്റ്റേഷൻ സബ് ഇൻസ്പെക്ടർ അബ്ദുൽസലാം തുടങ്ങിയവരും ഒപ്പമുണ്ടായിരുന്നു.

വടക്കഞ്ചേരി ടൗണിലെ നടത്തം അത്ര സുഖകരമല്ല

വടക്കഞ്ചേരി: ടൗണിൽ നടപ്പാതകളിലൂടെയുള്ള യാത്രയും ഇപ്പോൾ അത്ര സുഖകരമല്ല. ഒരുഭാഗത്ത് കച്ചവടസാധനങ്ങളെല്ലാം ഇറക്കിവച്ച് നടപ്പാതയുടെ വീതി നന്നേ ചുരുങ്ങി. ഇതിനിടയിൽ വഴിയോരവാണിഭം എന്ന ഓമനപ്പേരിലുള്ള കച്ചവടക്കാരുടെ സാധനങ്ങൾ നിറയും. നടപ്പാതയുടെ മറുഭാഗത്ത് സ്ഥാപിച്ചിട്ടുള്ള ഹാൻഡ് റെയിലുകളിൽ ഇപ്പോൾ എല്ലാ വിഭാഗങ്ങളുടെയും കൊടികളും തോരണങ്ങളും ബോർഡുകളുമാണ്. പരിപാടി കഴിഞ്ഞാൽപോലും കൊടികൾ അഴിച്ചു മാറ്റാത്തതിനാൽ അതിന്‍റെ അലകുകളും വടികളുമെല്ലാം അലങ്കോലമായികിടന്ന് വഴിനടക്കാനാകാത്ത സ്ഥിതിയായിരിക്കുകയാണ്. മുമ്പൊക്കെ പരിപാടി കഴിഞ്ഞാൽ പിറ്റേദിവസംതന്നെ ബാനറുകളും കൊടികളും അഴിച്ചുമാറ്റുന്ന സാമാന്യമര്യാദ പാലിക്കപ്പെട്ടിരുന്നു. ഇപ്പോൾ അതും ഇല്ലാതായി. എന്തുചെയ്താലും ആരും ചോദിക്കാനോ പറയാനോ ഇല്ലാത്തതിനാൽ നാഥനില്ലാത്ത സ്ഥിതിയിലാണ് വടക്കഞ്ചേരി ടൗൺ. നടപ്പാത വിട്ട് ടാർ റോഡിലേക്കിറങ്ങിയാൽ അവിടെ വാഹനങ്ങൾ നിർത്തിയിട്ടുള്ള വഴിയോര കച്ചവടക്കാരുടെ ബഹളമാണ്. മറുഭാഗത്ത് ഓട്ടോറിക്ഷകളുടെ നീണ്ടനിരയുമുണ്ടാകും. ഇതിനിടയിലൂടെ നൂറുകണക്കിന് ബസുകൾക്കും പോകണം. ടൗണിൽ അത്യാവശ്യങ്ങൾക്ക് വരുന്നവരുടെ വാഹനങ്ങൾക്കും കടന്നു പോകണം. ഇതിനിടയിലൂടെ വേണം കാൽനടയായുള്ളവർക്കു പോകാൻ. ബ്യൂട്ടിഫിക്കേഷൻ പദ്ധതി പാളി 2021ൽ ഓഗസ്റ്റിൽ ബ്യൂട്ടിഫിക്കേഷൻ ഓഫ് ബസാർ റോഡ് എന്ന പേരിൽ മൂന്നര കോടി രൂപ ചെലവഴിച്ച് റോഡ് നിർമാണവും നടപ്പാത നിർമാണവും നടത്തിയപ്പോൾ ടൗണിന്‍റെ മുഖം മിനുങ്ങും എന്നായിരുന്നു എല്ലാവരുടെയും കണക്കുകൂട്ടൽ. എന്നാൽ കോടികൾ ചെലവഴിച്ചതല്ലാതെ അതിന്‍റെ പ്രയോജനം ടൗണിലെത്തുന്നവർക്ക് ലഭ്യമാകുന്നില്ല. പച്ചക്കറികൾ, പഴങ്ങൾ, പച്ചമത്സ്യം തുടങ്ങിയവയുമായി ടൗണിലെ തിരക്കേറിയ റോഡിൽ നിർത്തിയിട്ടാണ് പെട്ടിഓട്ടോറിക്ഷകൾ കച്ചവടം നടത്തുന്നത്. ഒരു വർഷം മുമ്പ് നടന്ന ട്രാഫിക് റെഗുലേറ്ററി കമ്മിറ്റി യോഗത്തിൽ ബന്ധപ്പെട്ട അധികാരികൾ പറഞ്ഞതെല്ലാം പാഴ്‌വാക്കുകളായെന്ന് വ്യാപാരികൾ ഉൾപ്പെടെ മീറ്റിംഗിൽ പങ്കെടുത്തവർ പറയുന്നു. പെട്ടിഓട്ടോറിക്ഷകൾ റോഡിൽ നിർത്തിയിടുന്നത് പെർമിറ്റ് ലംഘനമായികണ്ട് നടപടിയെടുക്കും എന്നൊക്കെയായിരുന്നു യോഗത്തിൽ അധികാരികൾ വിശദീകരിച്ചത്. പക്ഷെ, ഒന്നും നടക്കുന്നില്ല. എവിടെയോ ഇരുന്ന് ചില അദൃശ്യശക്തികൾ അനധികൃത നടപടികൾക്കെല്ലാം പിന്തുണ നൽകുന്നു എന്നാണ് ജനസംസാരം.

കരടിയോട് പാലം ഉദ്ഘാടനത്തിനൊരുങ്ങി

മണ്ണാർക്കാട്: മലയോര ജനതയുടെ സ്വപ്നപദ്ധതിയായ കരടിയോട് പാലം ഉദ്ഘാടനത്തിനൊരുങ്ങി. 19ന് ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ ഉദ്ഘാടനം ചെയ്യും. ജില്ലാ പഞ്ചായത്തിന്‍റെ 40 ലക്ഷം രൂപ ചെലവഴിച്ചാണ് പാലം പൂർത്തീകരിച്ചത്. മലയോര മേഖലയായ കരടിയോട്, തോട്ടപ്പായ് പ്രദേശങ്ങളിലുള്ളവരുടെ സ്വപ്നപദ്ധതിയാണ് കരടിയോട് പാലം. മഴ തുടങ്ങിയാൽ തോട്ടപ്പായ് കരടിയോട് മേഖലകൾ ഒറ്റപ്പെടുക പതിവാണ്. പാലം യാഥാർഥ്യമാകുന്നതോടെ ഈ പ്രശ്നത്തിന് പരിഹാരമാകും. ഇതുകൂടാതെ ഇരട്ടവാരി- കരടിയോട്- കണ്ടമംഗലം സംസ്ഥാനപാതയുടെ പ്രധാന ഭാഗം കൂടിയാണ് കരടിയോട് പാലം എന്നുള്ളത്. സംസ്ഥാനപാതയുടെ നവീകരണവും നാട്ടുകാർ പ്രതീക്ഷിക്കുന്നുണ്ട്. കഴിഞ്ഞവർഷം തോട്ടപ്പായ് മുതൽ 30ഏക്കർവരെ നാട്ടുകാർ സ്ഥലംവിട്ടു നൽകി റോഡ് നവീകരിക്കുന്നതിനു വേണ്ട സൗകര്യമൊരുക്കിയിരുന്നു. പൊതുമരാമത്ത് വകുപ്പ് സർവേ നടത്തുകയും റോഡിന്‍റെ അതിർത്തി നിശ്ചയിക്കുകയും നേരത്തെ ചെയ്തിരുന്നു. എന്നാൽ ഫണ്ടില്ലെന്ന കാരണം പറഞ്ഞ് പ്രവൃത്തിയൊന്നും ഇതുവരെ നടത്തിയിട്ടില്ല. 2009 ൽ പൊതുമരാമത്ത് ഏറ്റെടുത്തതാണ് കണ്ടമംഗലം കരടിയോട് ഇരട്ടവാരി പാത. ഇതേ വർഷം ജില്ലയിൽ 84 റോഡുകൾ പൊതുമരാമത്ത് വിവിധ പഞ്ചായത്തുകളിൽ നിന്നും ഏറ്റെടുത്തിരുന്നു. അതിൽ ഈ പാത മാത്രമാണ് രണ്ടറ്റവും മുട്ടാതെ കിടക്കുന്നത്. ഇതിനെതിരെ പ്രതിഷേധം ശക്തമാണ്.

സ്വന്തം കൈപ്പടയിലെഴുതിയ കത്തുമായി മണപ്പൻ

പാലക്കാട്: തെരഞ്ഞെടുപ്പുബോധം അട്ടപ്പാടിയിലെ ആദിവാസിവിഭാഗത്തിന് അന്യമല്ലെന്ന സാക്ഷ്യവുമായി എൺപത്തിരണ്ടുകാരനായ മുതിർന്ന വോട്ടർ. മുഖ്യതെരഞ്ഞെടുപ്പ് ഓഫീസർ അട്ടപ്പാടിയിലെത്തിപ്പോൾ സ്വന്തം കൈപ്പടയിലെഴുതിയ കത്തുമായാണ് കാവുണ്ടിക്കൽ ഉന്നതിയിലെ മണപ്പനെത്തിയത്. തന്‍റെ ഓർമയിലിന്നുവരെ ഒരുവോട്ടും പാഴാക്കിയില്ലെന്നായിരുന്നു രത്നച്ചുരുക്കം. വോട്ട് അവകാശമാണെന്നും താൻ ജീവിച്ചിരിക്കുന്ന കാലത്തോളം വോട്ടവകാശം പാഴാക്കില്ലെന്നും ഉറപ്പുനൽകുന്നു. ഇപ്പോഴും ഗോത്രമേഖലകളിൽ ആളുകൾക്കു വോട്ടുചെയ്യാൻ വിമുഖതയുണ്ടെങ്കിലും മികച്ച ബോധവത്കരണത്തിലൂടെ അതെല്ലാം മറികടക്കാനാകുമെന്നും ഇവരെ എല്ലാവരെയും വോട്ടിംഗിന്‍റെ ഭാഗമാക്കണമെന്നും മണപ്പൻ കത്തിൽ ആവശ്യപ്പെട്ടു. അട്ടപ്പാടി രാജീവ്ഗാന്ധി കോളജിൽ നടന്ന മീറ്റ് ദി സിഇഒ പരിപാടിയിലാണ് മണപ്പൻ കത്ത് ഓഫീസർക്കു കൈമാറിയത്. അട്ടപ്പാടിയിലെ മുതിർന്ന വോട്ടർമാരിലൊരാളായ മണപ്പനെ കോളജിലെ ഇലക്ടറൽ ലിറ്ററസി ക്ലബ് ചടങ്ങിൽ ആദരിക്കുകയുമുണ്ടായി. എം.വി. വസന്ത്

മണ്ണാർക്കാട് ഉപജില്ലാ കലോത്സവം നവംബറിൽ; സംഘാടകസമിതിയായി

മണ്ണാർക്കാട്: ഉപജില്ലാ സ്കൂൾ കലോത്സവം നവംബർ ഒന്നുമുതൽ അഞ്ചുവരെ മണ്ണാർക്കാട് കെടിഎം ഹൈസ്കൂൾ, എഎൽപി സ്കൂൾ, ജിഎംയുപി സ്കൂൾ എന്നിവിടങ്ങളിലായി നടത്തുവാൻ കെടിഎം ഹൈസ്കൂളിൽ ചേർന്ന സംഘാടകസമിതി യോഗം തീരുമാനിച്ചു. മണ്ണാർക്കാട് ബ്ലോക്ക് പഞ്ചായത്ത് പ്രസിഡന്‍റ് വി. പ്രീത ഉദ്ഘാടനം ചെയ്തു. മണ്ണാർക്കാട് നഗരസഭ വൈസ് ചെയർപേഴ്സൺ പ്രസീദ അധ്യക്ഷത വഹിച്ചു. സംഘാടകസമിതി ചെയർമാനായി മണ്ണാർക്കാട് നഗരസഭ ചെയർമാൻ സി. മുഹമ്മദ് ബഷീറിനെയും ജനറൽ കൺവീനറായി കെടിഎം ഹൈസ്കൂൾ ഹെഡ്മാസ്റ്റർ എ.കെ. മനോജ് കുമാറിനെയും ട്രഷററായി ഉപജില്ലാ വിദ്യാഭ്യാസ ഓഫീസർ സി. അബൂബക്കറെയും തെരഞ്ഞെടുത്തു. യോഗത്തിൽ അക്കാദമിക് കൗൺസിൽ കൺവീനർ എസ്.ആർ. ഹബീബുള്ള ബജറ്റ് അവതരിപ്പിച്ചു. തച്ചമ്പാറ പഞ്ചായത്ത് പ്രസിഡന്‍റ് നൗഷാദ് ബാബു, കരിമ്പ പഞ്ചായത്ത് പ്രസിഡന്‍റ് രാമചന്ദ്രൻ, മണ്ണാർക്കാട് നഗരസഭാ സ്റ്റാൻഡിംഗ് കമ്മിറ്റി ചെയർമാൻമാരായ ബാലകൃഷ്ണൻ, ഹംസ കുറുവണ്ണ, വത്സലകുമാരി, ഷഫീഖ് റഹ്്മാൻ, കൗൺസിലർമാരായ അരുൺകുമാർ പാലകുറിശ്ശി, പുഷ്പാനന്ദ്, മൻസൂർ, ഇബ്രാഹിം, സർഫുന്നീസ, സിന്ധു, ബിപിസിമാരായ മണികണ്ഠൻ, ഭക്തഗിരീഷ്, അധ്യാപക സംഘടന പ്രതിനിധികൾ, ഹെഡ്മാസ്റ്റർമാർ, പിടിഎ ഭാരവാഹികൾ പങ്കെടുത്തു.

തെരുവുനായ കുറുകെച്ചാടി ബൈക്ക് യാത്രികനു പരിക്ക്

ചിറ്റൂർ: നായ കുറുകെച്ചാടി ബൈക്ക് മറിഞ്ഞ് യുവാവിനു പരിക്കേറ്റു. തത്തമംഗലം കടവളവ് ആർഷിദി(26)നാണ് പരിക്കേറ്റത് . ഇന്നലെ വൈകുന്നേരം 6.40 നു ചിറ്റൂർ പുഴപ്പാലം വർക്ക്ഷോപ്പിനു സമീപ ത്താണ് അപകടം. റോഡിൽ വീണുകിടക്കുന്നതായി വഴിയാത്രികർ അറിയിച്ചതിനെ തുടർന്ന ഫയർഫോഴ്സെത്തി യുവാവിനെ ചിറ്റൂർ താലൂക്ക് ആശുപത്രിയിൽ പ്രവേശിപ്പിച്ചു. ബൈക്കിലുണ്ടായിരുന്ന സഹയാത്രികൻ നിസാരപരിക്കോടെ രക്ഷപ്പെട്ടു. ഈ സ്ഥലത്ത് തെരുവുനായശല്യം വർധിക്കുന്നതിനാൽ കാൽനടയാത്രപോലും ഭീതിജനകമെന്നു നാട്ടുകാർ പരാതിപ്പെട്ടു.

ജൂബിലിസ്മാരകമായി നിർമിച്ച ഭവനത്തിന്‍റെ വെഞ്ചരിപ്പ് നാളെ

പാലക്കാട്: രൂപത സുവർണജൂബിലിയുടെയും സൊസൈറ്റി ഓഫ് സെന്‍റ് വിൻസന്‍റ് ഡി പോൾ പാലക്കാട് സെൻട്രൽ കൗൺസിൽ റൂബി ജൂബിലിയുടെയും സ്മാരകമായി നിർമിച്ച പതിനൊന്നാമതു ഭവനം നാളെ വെഞ്ചരിക്കും. അട്ടപ്പാടി താവളം ഏരിയ കൗൺസിലെ അഗളി ഗൂളിക്കടവ് ഫാത്തിമ മാതാ കോൺഫറൻസിൽ വൈകുന്നേരം 4.30 ന് പാലക്കാട് രൂപത ബിഷപ് മാർ പീറ്റർ കൊച്ചുപുരയ്ക്കൽ വെഞ്ചരിപ്പുകർമം നിർവഹിക്കും. ഫാത്തിമമാതാ പള്ളി വികാരിയും സൊസൈറ്റി ആത്മീയ ഉപദേഷ്ടാവുമായ ഫാ. മാർട്ടിൻ ഏറ്റൂമാനുർക്കാരൻ, പാലക്കാട് സെൻട്രൽ കൗൺസിൽ പ്രസിഡന്‍റ് ബ്രദർ ജെയിംസ് പടമാടൻ, ട്രഷറർ ബ്രദർ ടോമി പള്ളിവാതുക്കൽ, സെക്രട്ടറി ബ്രദർ ജോസഫ് കൊള്ളന്നൂർ, വൈസ് പ്രസിഡന്‍റ് ബ്രദർ ജെറോം പഴേപറമ്പിൽ, താവളം ഏരിയ കൗൺസിൽ പ്രസിഡന്‍റ് ബ്രദർ സണ്ണി ഏറനാട്ട്, കോൺഫറൻസ് പ്രസിഡന്‍റ് ബ്രദർ ജിജി മാഞ്ഞൂരാൻ എന്നിവർ പരിപാടികൾക്കു നേതൃത്വം നൽകും.

ഇരട്ടക്കുളം- ഗോപാലപുരം പാത നവീകരണം: പരിഹാരത്തിനു ഹർത്താൽ നടത്താനൊരുങ്ങി നാട്ടുകാർ

കൊഴിഞ്ഞാമ്പാറ: ഇരട്ടക്കുളം - ഗോപാലപുരം പാതയുടെ തകർച്ച മൂലം വാഹന അപകടങ്ങളും തുടർമരണങ്ങളും നിർബാധം തുടരുന്നതിൽ യാത്രക്കാരുടെയും നാട്ടുകാരുടെയും പ്രതിഷേധം വർധിക്കുന്നു. കഴിഞ്ഞ 10 മാസത്തിനിടെ നടന്ന 40 ൽ കൂടുതൽ വാഹന അപകടങ്ങളിൽ നിരത്തിൽ ജീവൻ പൊലിഞ്ഞവരുടെ എണ്ണം പത്തിൽ കൂടുതലാണ്. ഒരു മാസത്തിനു മുന്പ് പത്തു വയസുകാരി പഠിക്കുന്ന കരുവപ്പാറയ്ക്കു സമീപത്തെ സ്കൂളിനു മുന്നിൽ ബസ് അപകടത്തിൽ മരണപ്പെട്ടത് ഏറെ പ്രതിഷേധത്തിനിടവരുത്തിയിരുന്നു. ജനം ദീർഘനേരം മണിക്കൂറുകളോളം റോഡിൽ കുത്തിയിരുന്നു സമരം നടത്തിയിരുന്നു. നിലവിൽ പാലക്കാട്, പാറ, കൂട്ടുപ്പാത ഭാഗത്തു നിന്നും പൊള്ളാച്ചിയിലക്ക് ഇരട്ടക്കുളം വഴി ഗോപാലപുരം ഭാഗത്തേക്ക് വാഹനങ്ങളിൽ സഞ്ചരിക്കാൻ ഭയപ്പെടുന്ന അവസ്ഥയാണ്. റോഡിലുടനീളം പാതാളഗർത്തങ്ങൾ കാരണം നിയന്ത്രണം വിട്ട വാഹനങ്ങൾ നേർക്കുനേർ ഇടിച്ചും താഴെവീണുമാണ് മിക്ക അപകടങ്ങളും നടന്നിട്ടുള്ളത്. റോഡ് സഞ്ചാരയോഗ്യമാക്കണമെന്നാവശ്യപ്പെട്ട് കോൺഗ്രസും ബിജെപിയും പലതവണ പ്രതിഷേധ സമരങ്ങൾ നടത്തിയിരുന്നു. സംഭവസമയത്ത് സ്ഥലത്തെത്തുന്ന പൊതുമരാമത്തു അധികൃതരും പോലീസും അടിയന്തരനടപടി ഉണ്ടാവുമെന്ന് ഉറപ്പുനൽകി പിരിഞ്ഞുപോയാൽ പിന്നീട് വീണ്ടും അപകടം നടക്കുന്പോഴാണ് അധികാരികൾ വീണ്ടും എത്തുന്നത്. നൂറുകണക്കിനു വാഹനങ്ങൾ നിരന്തരം സഞ്ചരിക്കുന്ന ഇരട്ടക്കുട്ടം -ഗോപാലപുരം പാത വീതികൂട്ടി സഞ്ചാരയോഗ്യമാക്കണമെന്നതാണ് യാത്രക്കാരുടെ ആവശ്യം. സമരങ്ങൾ നടന്നാൽ ഗർത്തങ്ങളിൽ എം സാൻഡ് വിതറി പൊതുമരാമത്ത് സ്ഥലംവിടുകയാണ്. ഒരു ചെറുമഴ പെയ്താലും വീണ്ടും ഗർത്തങ്ങൾ ഉണ്ടാവുന്നതു പതിവായിരിക്കുകയാണ്. പൊതുമരാമത്തിന്‍റെ നിരന്തര അവഗണയിൽ പ്രതിഷേധിച്ച് യാത്രക്കാർ കൊഴിഞ്ഞാമ്പാറയിൽ ഹർത്താൽ നടത്താനും തീരുമാനിച്ചിട്ടുണ്ട്.

ജില്ലാ സഹോദയ സ്കൂൾ കലോത്സവം നാളെമുതൽ 20 വരെ

പാലക്കാട്: ജില്ലാ സഹോദയ സ്കൂൾ കലോത്സവം നാളെമുതൽ 20 വരെ ചന്ദ്രനഗർ ഭാരതമാതാ സിഎംഐ പബ്ലിക് സ്കൂളിൽ നടക്കുമെന്നു ഭാരവാഹികൾ പത്രസമ്മേളനത്തിൽ അറിയിച്ചു. എഴുപത്തിരണ്ടോളം സ്കൂളുകളിൽനിന്ന് നാലായിരത്തി മൂന്നൂറോളം വിദ്യാർഥികൾ മൂന്നുദിവസം നീണ്ടുനിൽക്കുന്ന കലോത്സവത്തിൽ പങ്കെടുക്കും. നാല് കാറ്റഗറികളിലായി 140 ഇനം മത്സരങ്ങൾ 21 വേദികളിൽ അരങ്ങേറും. കലോത്സവത്തിന്‍റെ ഉദ്ഘാടനം നാളെ രാവിലെ 9.30 ന് സിനിമാതാരം രമേഷ് പിഷാരടിയും സമാപനസമ്മേളനം ഉദ്ഘാടനം 20 ന് വൈകുന്നേരം 5.30 ന് പിന്നണിഗായകൻ ജി. വേണുഗോപാലും നിർവഹിക്കും. പത്രസമ്മേളനത്തിൽ പാലക്കാട് ഡിസ്ട്രിക്ട് സഹോദയ സ്കൂൾ കോംപ്ലക്സ് പ്രസിഡന്‍റ് ഷാജി കെ. തയ്യിൽ, ട്രഷററും ഭാരതമാതാ സിഎംഐ പബ്ലിക് സ്കൂൾ പ്രിൻസിപ്പലുമായ ഫാ. ലിന്‍റേഷ് ആന്‍റണി സിഎംഐ, ഭാരതമാത സിഎംഐ പബ്ലിക് സ്കൂൾ അഡ്മിനിസ്ട്രേറ്റർ ഫാ. ടി.കെ. അനിൽ സിഎംഐ, പ്രോഗ്രാം കോ- ഓർഡിനേറ്റർമാരായ സിന്ധു നായർ, നിത്യ രാജേഷ്, ലക്ഷ്മിശ്രീ എന്നിവർ പങ്കെടുത്തു.

വ്യാജരേഖ ചമച്ച് ഭൂമി തട്ടിയ സംഭവത്തിൽ നടപടി ആവശ്യപ്പെട്ട് സത്യഗ്രഹസമരം

കൊഴിഞ്ഞാമ്പാറ: വ്യാജരേഖ ഉണ്ടാക്കി പത്ത് ഏക്കർ തട്ടിയെടുത്ത സംഭവത്തിൽ നടപടി ആവശ്യപ്പെട്ട് അവകാശികളായ രണ്ടു കുടുംബങ്ങൾ വടകരപ്പതി വില്ലേജിനു മുന്നിൽ അനിശ്ചിത കാല സത്യഗ്രഹം തുടങ്ങി. പരിശിക്കൽ സത്രം വിജയശീലൻ, മേനോൻപാറ നല്ലുവീട്ടുചള്ള പോൾ രാജ് എന്നിവരുടെ കുടുംബങ്ങളാണ് സത്യഗ്രഹം ആരംഭിച്ചത്. ആറര പതിറ്റാണ്ടായി കൈവശമുള്ള ഭൂമിയാണിത്. 2022-ൽ നികുതിയടയ്ക്കാൻ വില്ലേജ് ഓഫീസിലെത്തിയപ്പോഴാണ് ഭൂമിയിൽ മറ്റാരോ നികുതിയടച്ചതായി അറിയാൻ കഴിഞ്ഞത്. അന്വേഷണത്തിൽ ജയശീലന്‍റെ കുടുംബത്തിന് അവകാശപ്പെട്ട നാല് ഏക്കറിനും പോൾരാജിന്‍റെ കുടുംബത്തിന് അവകാശപ്പെട്ട ആറ് ഏക്കറിനും വ്യാജപട്ടയം ഉണ്ടാക്കിയെന്ന് മനസിലായി. വില്ലേജ് ഉദ്യോഗസ്ഥർ പോക്കുവരവ് ചെയ്തുകൊടുത്തെന്നും ഇവർ ആരോപിക്കുന്നു. നിയമപോരാട്ടത്തി നൊടുവിൽ വ്യാജരേഖകൾ ചമച്ചതാണെന്നും അതിന് വില്ലേജ് ഉദ്യോഗസ്ഥർ കൂട്ടുനിന്നെന്നു തെളിഞ്ഞുവെന്നും എന്നാൽ കൂട്ടുനിന്ന അധികാരികൾക്കെതിരേ അച്ചടക്കനടപടി സ്വീകരിച്ചില്ലെന്നും രണ്ട് കുടുംബങ്ങളും ആരോപിക്കുന്നു.

ത്രിദിന പ്രകൃതിപഠന ക്യാമ്പ് നടത്തി

ആലത്തൂർ: ഭാരത് സേവക് സമാജ് പ്രകൃതി പഠന സംരക്ഷണ കൗൺസിൽ, സംസ്ഥാന വനം വകുപ്പ്, വയനാട് വനം വന്യജീവി സംരക്ഷണ വിഭാഗം എന്നിവയുടെ സഹകരണത്തോടെ വയനാട് തോൽപ്പെട്ടി വന്യ ജീവി സങ്കേതത്തിൽ ത്രിദിന പ്രകൃതി പഠന ക്യാമ്പ് നടത്തി. അസിസ്റ്റന്‍റ് വൈൽഡ് ലൈഫ് വാർഡൻ എ.ടി. ഷിബുകുട്ടൻ ഉദ്ഘാടനം ചെയ്തു. കൗൺസിൽ വൈസ് പ്രസിഡന്‍റ് ഡോ. കെ. വേലായുധൻ അധ്യക്ഷത വഹിച്ചു. സെക്രട്ടറി കെ. പഴനിമല പ്രവർത്തനം വിശദീകരിച്ചു. വൈൽഡ് ലൈഫ് അസിസ്റ്റന്‍റ് രാഹുൽ രവീന്ദ്രൻ ക്ലാസ് നയിച്ചു. ബിഎഫ്ഒ മാരായ ടി.ബി. സജീവൻ, എസ്.ആർ. രാജീവൻ, എൽ.പി. സൗമ്യ , എസ്. ശ്രീഹരി, കെ. അംബിക, പി. പ്രേമലത, എ.എം. ഷഹീദബീഗം, ടി. ബി. രാധ, പി. വിജയൻ, എസ്. രാജേഷ് കുമാർ, കെ. പ്രസാദ്, പി.എം. അബ്ദുൾ കലാം, എം.എ. അനിൽകുമാർ, എസ്. ഗോപി എന്നിവർ പ്രസംഗിച്ചു. എ. ദാവൂദ്. വി. ഭാസി, ബി. ആഷിഖ് അലി, എസ്. ഉണ്ണികൃഷ്ണൻ, സി. പി. ഉമ്മർ, വി. വിജയകുമാർ, വി. രവീന്ദ്രൻ എന്നിവർ നേതൃത്വം നൽകി. തിരുനെല്ലി, ബേഗൂർ ഉൾപ്പെടുന്ന വനമേഖലകളും എൻ ഊർ ഗോത്ര സംസ്കാര കേന്ദ്രവും സന്ദർശിച്ചു. 38 പേർ പങ്കെടുത്തു.

ജെസിഐ പാലക്കാട് ഫോർട്ടിന്‍റെ പ്രിസം വാരാഘോഷം

പാലക്കാട്: ജെസിഐ പാലക്കാട് ഫോർട്ട് സംഘടിപ്പിച്ച പ്രിസം ജെസിഐ പൊതുജനസന്പർക്ക വാരാഘോഷം സമാപിച്ചു. ധോണി ലീഡ് കോളജിൽ നടന്ന സമാപനപരിപാടിയിൽ ജെസിഐ ഇന്ത്യയുടെ ദേശീയ വൈസ്പ്രസിഡന്‍റ്് വി. പ്രജിത് മുഖ്യാതിഥിയായി. പ്രസിഡന്‍റ്് പ്രവീണ്‍ സേതുമാധവൻ അധ്യക്ഷത വഹിച്ച പരിപാടിയിൽ ധോണി ലീഡ് കോളജ് ചെയർമാൻ ഡോ. കെ. തോമസ് ജോർജിനെ പ്രഫഷണൽ മികവിനുള്ള ടോബിപ്പ് പുരസ്കാരവും ടി. കൃഷ്ണദാസിനെ കമൽപത്ര പുരസ്കാരവും നൽകി ആദരിച്ചു. ദേശീയ വനിതാ കോ- ഓർഡിനേറ്റർ അഡ്വ. വർഷ എസ.് കുമാർ, സോണ്‍ വൈസ് പ്രസിഡന്‍റ് മുഹമ്മദ് ആഷിഖ്, സോണ്‍ ഡയറക്ടർ അഭിജിത് രാകേഷ്, സറീന ഹനീഫ എന്നിവർ പ്രസംഗിച്ചു. വാരാഘോഷ കോ- ഓർഡിനേറ്റർ ആർ. വിഷ്ണുശ്രീ നന്ദി പറഞ്ഞു. വാരാചരണത്തിന്‍റെ ഭാഗമായി വിവിധ ദിവസങ്ങളിൽ വനിതകൾക്കായി നൈപുണ്യ പരിശീലനം, വിവിധ സ്കൂളുകളിൽ വ്യക്തിത്വവികസന പരിശീലന പരിപാടികൾ, ആരോഗ്യ ബോധവത്കരണ മാരത്തോണ്‍, യുവാക്കൾക്കായി സ്പോർട്സ് മത്സരങ്ങൾ, ഐക്യരാഷ്ട്ര സംഘടന അംഗീകരിച്ച ഹ്യൂമണ്‍ ഡ്യൂട്ടീസ് ബോധവത്കരണ ഒപ്പു ശേഖരണം തുടങ്ങിയ പരിപാടികൾ സംഘടിപ്പിച്ചു.

ടി.എം. ജേക്കബിന്‍റെ 75-ാം ജന്മദിനം ആചരിച്ചു

പാലക്കാട്: കേരള കോണ്‍ഗ്രസ് ജേക്കബ് സ്ഥാപക നേതാവും മുൻ മന്ത്രിയുമായ ടി.എം. ജേക്കബിന്‍റെ 75 ാം ജന്മദിനം ജില്ലാ കമ്മിറ്റി മേഴ്സി ഓൾഡേജ് ഹോമിലെ അന്തേവാസികൾക്ക് അന്നദാനം നൽകി ആചരിച്ചു. ജില്ലാ പ്രസിഡന്‍റ് വി.ഡി. ഉലഹന്നാന്‍റെ അധ്യക്ഷതയിൽ സംസ്ഥാന വൈസ് ചെയർമാൻ വി.ഡി. ജോസഫ് ഉദ്ഘാടനം ചെയ്തു. വൈസ് പ്രസിഡന്‍റുമാരായ എൻ.കെ. പുരുഷോത്തമൻ, പി.ഒ. വക്കച്ചൻ, ജനറൽ സെക്രട്ടറിമാരായ വി. അനിൽകുമാർ, കെ. ശ്രീജിത്ത് കല്യാണകണ്ടം, ശശികുമാർ പിരായിരി മറ്റു ഭാരവാഹികളായ വി.എ. കേശവൻ, കെ.പി. തങ്കച്ചൻ, ജിജു മാത്യു പെരുപ്പള്ളിൽ, രാജേന്ദ്രൻ, കെ. വാസുദേവൻ എന്നിവർ പ്രസംഗിച്ചു.

കോളജ് മാഗസിൻ പ്രകാശനം

ആലത്തൂർ: ശ്രീനാരായണ കോളജിലെ മാഗസിൻ പ്രകാശനം വ്യത്യസ്തമായി. തങ്ങളുടെ പ്രിയ വിദ്യാലയം ശുചിയായിരിക്കാൻ കഷ്ടപ്പെടുന്ന തൊഴിലാളികളായ അമ്പിളിയും സജിതയും സ്റ്റുഡന്‍റ് എഡിറ്റർ പി. ആഷിനിൽ നിന്നും മാഗസിൻ ഏറ്റുവാങ്ങി പ്രകാശനം നിർവഹിച്ച ു. മാഗസിന്‍റെ ആശയത്തോട് ചേർന്ന് തന്നെ മാഗസിൻ പ്രകാശനവും വേണമെന്ന് ആഗ്രഹമുണ്ടായിരുന്നതുകൊണ്ടാണ് ഇങ്ങനെ പ്രകാശനം നടത്തിയതെന്ന് എഡിറ്റർ പി. ആഷിൻ പറഞ്ഞു. ചെയർപേഴ്സൺ കെ.ആർ.സ്നേഹ, യുയുസിമാരായ ആർ. അവന്തിക, ബി. അഭിനന്ദന, എസ്എഫ്ഐ യൂണിറ്റ് സെക്രട്ടറി അതുൽ എന്നിവർ പങ്കെടുത്തു.

സ്കൂൾകുട്ടികൾക്കു പ്രഭാതഭക്ഷണം പദ്ധതി

പാലക്കാട്: കോട്ടായി ഗ്രാമപഞ്ചായത്തിലെ സ്കൂൾകുട്ടികൾക്കായി നടപ്പാക്കുന്ന പ്രഭാതഭക്ഷണപദ്ധതിക്കു തുടക്കമായി. ഗ്രാമപഞ്ചായത്തിന്‍റെ 2025-26 വാർഷിക പദ്ധതിയിൽ ഉൾപ്പെടുത്തി ആറുലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നത്. പുളിനെല്ലി ജിഎൽപി സ്കൂളിൽ ഗ്രാമപഞ്ചായത്ത് പ്രസിഡന്‍റ് എ. സതീഷ് കുട്ടികൾക്ക് പുട്ടും കടലക്കറിയും വിളന്പി പദ്ധതിക്കു തുടക്കം കുറിച്ചു. ഗ്രാമപഞ്ചായത്തിനുകീഴിലെ സർക്കാർ പ്രൈമറി സ്കൂളുകളായ കോട്ടായി, വറോട്, പുളിനെല്ലി തുടങ്ങിയ വിദ്യാലയങ്ങളിലെ കുട്ടികൾക്കാണ് പ്രഭാതഭക്ഷണം നൽകുന്നത്. സ്കൂൾ അധികൃതർ തയാറാക്കുന്ന ഭക്ഷണം കൃത്യമായ മെനു പ്രകാരമാണ് വിതരണം ചെയ്യുക. പരിപാടിയിൽ കോട്ടായി ഗ്രാമപഞ്ചായത്ത് വൈസ് പ്രസിഡന്‍റ് അനിത, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ വി. വിനിത, രാധ മോഹനൻ, വാർഡ് അംഗം എം.ആർ. രജിത, കുഴൽമന്ദം സിആർസി സി നിഷാന, സീനിയർ അധ്യാപിക ടി.പി. പ്രബിത, പിടിഎ പ്രസിഡന്‍റ് ശശികുമാർ, അധ്യാപകർ, പി. അജയ്, കെ.എസ്. സുപ്രിയ, ആർ. ഇന്ദുലേഖ, കെ. അംബിക എന്നിവർ പങ്കെടുത്തു.

അനധികൃത പടക്കവിപണിക്കെതിരേ നടപടി സ്വീകരിക്കണമെന്നു വ്യാപാരികൾ

പാലക്കാട്: അനധികൃത പടക്കവിപണിക്കെതിരേ ശക്തമായ നടപടി സ്വീകരിക്കണമെന്നു ഫയർവർക്കേഴ്സ് ഡീലേഴ്സ് അസോസിയേഷൻ ഭാരവാഹികൾ പത്രസമ്മേളനത്തിൽ ആവശ്യപ്പെട്ടു. അനധികൃത പടക്കവിപണിയുടെ മറവിൽ ലഹരിവിൽപന ഉൾപ്പെടെ നടക്കുന്നുണ്ടെന്നും ഒറ്റപ്പാലം സൗത്ത് പനമണ്ണയിൽ വാടകക്കെട്ടിടം കേന്ദ്രീകരിച്ച് അനധികൃത പടക്കവിപണന കേന്ദ്രത്തിൽ നിന്ന് വൻതോതിൽ ലഹരിമരുന്നുകൾ പിടിച്ചത് ഇതിന് തെളിവാണെന്നും ഭാരവാഹികൾ ചൂണ്ടിക്കാട്ടി. അനധികൃത വില്പനക്കെതിരേയും ഓണ്‍ലൈൻ വില്പനക്കെതിരേയും നടപടി സ്വീകരിക്കണമെന്ന് അസോസിയേഷൻ നിരവധി തവണ സർക്കാരിനോടും ബന്ധപ്പെട്ട വകുപ്പുകളോടും അസോസിയേഷൻ ആവശ്യപ്പെട്ടിരുന്നു. എന്നാൽ യാതൊരു നടപടിയും ഇതുവരെ സ്വീകരിച്ചിട്ടില്ല. സുപ്രീംകോടതി ഓണ്‍ലൈൻ പടക്കവിപണനം നടത്തുന്നതിനു വിലക്ക് ഏർപ്പെടുത്തിയിട്ടുണ്ട്്. സുപ്രീംകോടതി തീരുമാനം നടപ്പിലാക്കാൻ പോലും സർക്കാർ തയാറാകുന്നില്ലെന്നും ഭാരവാഹികൾ അഭിപ്രായപ്പെട്ടു. പത്രസമ്മേളനത്തിൽ സംസ്ഥാന ട്രഷറർ വി. ഉണ്ണികൃഷ്ണൻ, ജില്ലാ പ്രസിഡന്‍റ് അനിൽ പി. വിൽസൺ, സെക്രട്ടറി സി.എ. ഉണ്ണികൃഷ്ണൻ, ട്രഷറർ എ. നസീർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]