ADVERTISEMENT

ADVERTISEMENT

കാരമട ഗുഡ് ഷെപ്പേർഡ് ട്രെയിനിംഗ് സെന്‍റർ വെഞ്ചരിപ്പും ഉദ്ഘാടനവും

കോയന്പത്തൂർ : കാരമട ഗുഡ് ഷെപ്പേർഡ് സോഷ്യൽ സെന്‍ററിനോടനുബന്ധിച്ചു പുതുതായി പണി തീർത്ത ട്രെയിനിംഗ് സെന്‍റർ ഉദ്ഘാടനം രാമനാഥപുരം രൂപതാധ്യക്ഷൻ മാർ പോൾ ആലപ്പാട്ട് നിർവഹിച്ചു.

പാലക്കാട് സെറാഫിക് പ്രൊവിൻസിന്‍റെ അസിസ്റ്റന്‍റ് പ്രൊവിൻഷ്യൽ സിസ്റ്റർ ലിറ്റിൽ ഫ്ലവർ, കരമട ഗുഡ് ഷെപ്പേർഡ് ഇടവക വികാരി ഫാ.ജോർജ് ആലപ്പാട്, ഇറ്റലിയിൽ സേവനമനുഷ്ഠിക്കുന്ന ഫാ. ദേവസഹായരാജ്, സിസ്റ്റർ ദീപ്‌തി എഫ്സിസി എന്നിവർ പ്രസംഗിച്ചു. ഗുഡ് ഷെപ്പേർഡ് ഡയറക്ടർ ജനറൽ സിസ്റ്റർ അനില മാത്യു സ്വാഗതവും സിസ്റ്റർ നോബിൾ നന്ദിയും പറഞ്ഞു.

ADVERTISEMENT

പിതാവും മകനും തൂങ്ങിമരിച്ച സംഭവത്തിൽ ദുരൂഹതയില്ലെന്നു പോലീസ്

ഒറ്റപ്പാലം: വാണിയംകുളം മനിശീരിയിൽ പിതാവിനേയും മകനെയും തൂങ്ങിമരിച്ച നിലയിൽ കണ്ടെത്തിയ സംഭവത്തിൽ ദുരൂഹതയില്ലെന്നു പോലീസ്. അസ്വാഭാവികമരണത്തിനാണ് കേസെടുത്തിട്ടുള്ളത്. ജീവനൊടുക്കുന്നതിനു മകനെ അച്ഛൻ പ്രേരിപ്പിച്ചിരിക്കാമെന്നാണ് പോലീസ് പറയുന്നത്. മകൻ മരിച്ചത് ഉറപ്പാക്കിയശേഷം അച്ഛനും തൂങ്ങിമരിച്ചുവെന്നും മകന്‍റേതു കൊലപാതകമല്ലെന്നുമാണ് പോലീസിന്‍റെ വിലയിരുത്തൽ. മനിശീരി കണ്ണമ്മനിലയത്തിൽ കിരൺ (38), മകൻ കിഷൻ (ഒൻപത്) എന്നിവർ മരിച്ച സംഭവത്തിലാണ് ദുരൂഹതയില്ലെന്നു പോലീസ് പറയുന്നത്. ഇരുവരുടെയും പോസ്റ്റുമോർട്ടം തൃശൂർ മെഡിക്കൽ കോളജിലാണ് നടത്തിയത്. കഴിഞ്ഞ മേയ് 14ന് കിരണിന്‍റെ ഭാര്യ അഖീനയെ ഇതേ മുറിയിൽ തൂങ്ങിമരിച്ചനിലയിൽ കണ്ടിരുന്നു. ഇതിൽ മനംനൊന്താണ് കിരണും ജീവനൊടുക്കിയതെന്നും പോലീസ് വിലയിരുത്തുന്നു. ഭാര്യയുടെ മരണത്തിനുശേഷം ഗൾഫിലേക്കുപോയ കിരൺ ഒരുമാസത്തിനുള്ളിൽ തിരിച്ചുവരികയായിരുന്നു. വെള്ളിയാഴ്ച വൈകുന്നേരം അഞ്ചുമണിയോടെയാണ് വീടിലെ മുകൾനിലയിൽ മരിച്ചനിലയിൽ ബന്ധുക്കൾ കണ്ടത്. വീട് പൂട്ടിപ്പോയ കിരണിന്‍റെ സ്കൂട്ടർ റോഡിൽ കണ്ട് വീട് പരിശോധിക്കുകയായിരുന്നു. അപ്പോഴാണ് ഇരുവരെയും തൂങ്ങിമരിച്ച നിലയിൽ കണ്ടെത്തിയത്.

സ്വകാര്യബസ് പണിമുടക്ക്: യാത്രികർ വലഞ്ഞു

പാലക്കാട്: സ്വകാര്യബസ് പണിമുടക്ക് വലച്ചത് ആയിരക്കണക്കിനു യാത്രികരെ. ഈ മാസം 22 മുതൽ ആരംഭിക്കുന്ന അനിശ്ചിതകാല പണിമുടക്കിന്‍റെ മുന്നോടിയായിട്ടാണ് ഇന്നലെ സ്വകാര്യബസുകൾ സൂചനാപണിമുടക്ക് നടത്തിയത്. പാലക്കാട്- തൃശൂർ, പാലക്കാട്- ചെർപ്പുളശ്ശേരി, പാലക്കാട്- ഒറ്റപ്പാലം റൂട്ടുകളിൽ കെഎസ്ആർടിസി സർവീസ് നടത്തി. നിലവിൽ ജില്ലയുടെ വിവിധ ഭാഗങ്ങളിലേക്ക് കെഎസ്ആർടിസിയുടെ 89 പതിവ് സർവീസുകൾക്കു പുറമെ 11 അധിക സർവീസുകളും ഒരുക്കിയിരുന്നു. കൂടുതൽ ബസുകൾ സർവീസ് നടത്തുന്ന കോയമ്പത്തൂർ- തൃശൂർ, കോഴിക്കോട് റൂട്ടുകളിൽ യാത്രക്കാരെ സാരമായി ബാധിച്ചില്ലെങ്കിലും മറ്റുറൂട്ടുകളിൽ യാത്രക്കാർക്കു ദുരിതമേറെയായിരുന്നു. പാലക്കാട് നിന്നും മലമ്പുഴ, റെയിൽവേകോളനി, കോട്ടായി, തോലന്നൂർ, തച്ചങ്കാട്, കൊടുമ്പ്, പെരിങ്ങോട്ടുകുറിശ്ശി, തലപ്പൊറ്റ, വലിയകാട് എന്നിവിടങ്ങളിലേക്കുള്ള യാത്രക്കാർക്കും ലക്ഷ്യസ്ഥാനത്തെത്താൻ പാടുപെട്ടു. സ്വകാര്യ ബസുകൾ ഇല്ലാത്തതിനാൽ പലരും ഓട്ടോറിക്ഷകളിൽ അമിതചാർജ് നൽകിയാണ് ലക്ഷ്യസ്ഥാനത്തെത്തിയത്. സ്വകാര്യ ബസുകൾ പണിമുടക്കിയത് മലയോര ഗ്രാമീണ മേഖലകളെയും സാരമായി ബാധിച്ചു. സ്വകാര്യ ബസുകൾ ഇല്ലാത്തതിനാൽ പ്രധാന ബസ് സ്റ്റാൻഡുകളിലെ വ്യാപാരത്തെയും ബാധിച്ചത് വ്യാപാരികളെയും പ്രതിസന്ധിയിലാക്കി. സ്കൂളുകളും സർക്കാർ സ്ഥാപനങ്ങളുമെല്ലാം പ്രവർത്തിദിനമായതിനാൽ സ്വകാര്യ ബസുകൾ ഇല്ലാത്തതിനാൽ പലർക്കും ഓഫീസുകളിലും സ്കൂളുകളിലുമെത്താൻ ബുദ്ധിമുട്ടേണ്ടിവന്നു.

പോത്തുണ്ടി ഡാമിൽ ജലനിരപ്പുയർന്നു

നെന്മാറ: അന്പത്തിയഞ്ചടി സംഭരണശേഷിയുള്ള പോത്തുണ്ടി ഡാമിൽ നിലവിൽ 46.48 അടിയായി വെള്ളം ഉയർന്നു. ഇതോടെ പുഴയിലേക്കുള്ള സ്പിൽ ഷട്ടറിനുമുകളിൽ അഞ്ചടിയോളം വെള്ളം ഉയർന്നു. കഴിഞ്ഞവർഷം ജൂലൈ ഒന്പതിനു 20.86 അടി വെള്ളമാണുണ്ടായിരുന്നത്. കഴിഞ്ഞ വർഷം സെപ്റ്റംബറിനുശേഷമാണ് അണക്കെട്ടിൽ വെള്ളം സംഭരണശേഷിയുടെ പരമാവധിയിൽ എത്തിയത്. മുൻവർഷത്തെ അപേക്ഷിച്ച് 26 അടി വെള്ളം ജൂലൈ മാസത്തിൽതന്നെ സംഭരിക്കാൻ കഴിഞ്ഞു. ചെറിയ ഡാമുകളെ റൂൾകർവ് നിബന്ധനകളിൽനിന്ന് ഒഴിവാക്കിയതിനെതുടർന്ന് പോത്തുണ്ടി ഡാമിൽ 50 അടിക്കുമുകളിൽ വെള്ളം എത്തിയാൽ മാത്രമേ നിയന്ത്രണവിധേയമായി പുഴയിലേക്ക് വെള്ളംതുറക്കുകയുള്ളൂ. മൂന്നുദിവസമായി മേഖലയിൽ മഴ കുറവായതിനെതുടർന്ന് നെല്ലിയാമ്പതി മലനിരകളിൽനിന്ന് ഡാമിലേക്കുള്ള നീരൊഴുക്കും കുറഞ്ഞിട്ടുണ്ട്. 50 അടിയിൽ വെള്ളം എത്തിയാൽ മാത്രമേ ഡാം തുറക്കുന്നതിനുഒന്നാം മുന്നറിയിപ്പ് നൽകുകയുള്ളൂ.

ഉൾക്കാടുകളിൽ അയ്യായിരം വിത്തുണ്ടകൾ നിക്ഷേപിക്കും

വടക്കഞ്ചേരി: വന്യമൃഗങ്ങൾക്കു വനത്തിൽതന്നെ ഭക്ഷണവും സംരക്ഷണവും ഉറപ്പാക്കുന്നതിന്‍റെ ഭാഗമായി കിഴക്കഞ്ചേരി പഞ്ചായത്തിന്‍റെ അതിർത്തിവരുന്ന പീച്ചി വന്യമൃഗ സംരക്ഷണ കേന്ദ്രത്തിൽ അയ്യായിരം വിത്തുണ്ടകൾ നിക്ഷേപിക്കും. ഇതിന്‍റെ ഉദ്ഘാടനം നാളെ ഉച്ചയ്ക്കുശേഷം മൂന്നിന് പാലക്കുഴി റോഡിൽ പുല്ലംപരുതയിൽ കെ.ഡി. പ്രസേനൻ എംഎൽഎ നിർവഹിക്കും. മാവ്, പ്ലാവ്, ആഞ്ഞിലി, ഞാവൽ, കശുമാവ് തുടങ്ങിയവയുടെ വിത്തുകളാണ് മണ്ണിൽപൊതിഞ്ഞ് ചെറിയ ഉണ്ടകളാക്കി ഉൾവനത്തിലേക്കു വലിച്ചെറിയുക. പുതുമരങ്ങൾ വ്യാപകമാകുന്നതോടെ ആനകൾക്കൊപ്പം മറ്റു മൃഗങ്ങളും കാട്ടിൽനിന്നും നാട്ടിലിറങ്ങുന്ന സ്ഥിതിക്ക് കുറവുണ്ടാകുമെന്നാണു വിലയിരുത്തൽ. പഞ്ചായത്ത് മെംബർ പോപ്പി ജോണിന്‍റെ നേതൃത്വത്തിൽ വനംവകുപ്പിന്‍റെ കൂടി സഹകരണത്തോടെയാണ് ഈ ബൃഹദ് പദ്ധതി വിജയത്തിലെത്തിക്കുന്നതിനുള്ള ശ്രമങ്ങൾ നാട്ടിൽ നടക്കുന്നത്. വചനഗിരി സെന്‍റ് ജോർജ് ഇടവകാംഗങ്ങളും മമ്പാട് സ്കൂളിലെ പ്രധാനാധ്യാപിക വി.കെ. ബിന്ദു ടീച്ചർ, കോ- ഓർഡിനേറ്റർ നീന ടീച്ചർ എന്നിവരുടെ മേൽനോട്ടത്തിൽ വിദ്യാർഥികളും കർഷകരും പാലക്കുഴിയിലെ പ്രതിഭാ വായനശാല അംഗങ്ങളുമെല്ലാം വിത്തുണ്ടകൾ തയാറാക്കുന്നതിന്‍റെ തിരക്കുകളിലാണിപ്പോൾ. ശേഖരിക്കാൻ കഴിയുന്നത്ര വൃക്ഷവിത്തുകൾ ശേഖരിച്ചാണ് നാടുമുഴുവൻ യത്നത്തിൽ പങ്കാളികളാകുന്നത്. കിഴക്കഞ്ചേരിയുടെ മലയോര മേഖലയിൽ വന്യമൃഗശല്യം രൂക്ഷമാണ്. ഇതുകണക്കിലെടുത്താണ് ഘട്ടംഘട്ടമായി കാട്ടിൽ വൃക്ഷങ്ങൾ നിറക്കുന്ന പദ്ധതികൾക്ക് തുടക്കം കുറിക്കുന്നത്. കാട്ടിൽ നിക്ഷേപിക്കുന്ന വിത്തുകൾ മുളച്ച് വളരുന്നതു ഇടക്കിടെ പരിശോധിച്ച് തുടർഘട്ടങ്ങളിൽ വിത്തുണ്ടകൾ നിക്ഷേപിക്കുന്നതിൽ വേണ്ടതായ മാറ്റങ്ങൾ വരുത്തുമെന്നു മെംബർ പോപ്പിജോൺ പറഞ്ഞു.

പുഴയിൽനിന്നും കാട്ടാനക്കുട്ടിയുടെ ജഡം പുറത്തെടുത്തു

കല്ലടിക്കോട്: പാലക്കയം തരിപ്പപതി മുണ്ടനാട് കരിമലപുഴയിൽ കല്ലുംചാട്ടം ഭാഗത്ത് കണ്ടെത്തിയ കാട്ടാനക്കുട്ടിയുടെ ജഡം പോസ്റ്റുമാർട്ടം നടത്തി സംസ്‌കരിച്ചു. ഒരുവയസിൽതാഴെ പ്രായമുള്ള പിടിയാനക്കുട്ടിയാണ്. ജഡത്തിനു നാലുദിവസത്തോളം പഴക്കമുണ്ട്. തിങ്കളാഴ്ച വൈകീട്ടാണ് ആനക്കുട്ടിയുടെ ജഡം വനം ഉദ്യോഗസ്ഥർ കണ്ടത്. ഡോ. ഡാനിയേൽ അബ്രഹാം, ഡോ. സുവർണ, ഡോ.കെ. അബ്ദുൾ റഷീദ്, ഡിഎഫ്ഒ സി. അബ്ദുൾ ലത്തീഫ്, ലിജോ പനങ്ങാടൻ, റേഞ്ച് ഓഫീസർ ഇ. ഇംറോസ് ഏലിയാസ്, നവാസ്, വാർഡ് അംഗം രാജി ജോണി എന്നിവരുടെ നേതൃത്വത്തിലാണ് നടപടികൾ പൂർത്തിയാക്കിയത്.

സർക്കാർ ആതുരാലയങ്ങൾ തകർച്ചയിൽ: രാഹുൽ മാങ്കൂട്ടത്തിൽ എംഎൽഎ

പാലക്കാട്: സംസ്ഥാനത്ത് പ്രാഥമിക കുടുംബാരോഗ്യകേന്ദ്രങ്ങൾ മുതൽ മെഡിക്കൽ കോളജുകൾ വരെ അത്യന്തം ദുരവസ്ഥയിലും തകർച്ചയിലുമാണെന്നും സാധാരണ ജനങ്ങളുടെ ആവശ്യങ്ങൾ കണ്ടറിഞ്ഞു പരിഹരിക്കാൻ തയ്യാറാകണമെന്നും രാഹുൽ മാങ്കൂട്ടത്തിൽ എംഎൽഎ. ആവശ്യത്തിനു കെട്ടിടങ്ങളില്ലാതെയും ഡോക്ടർമാരും ജീവനക്കാരുമില്ലാതെയും ജനങ്ങൾ വലയുമ്പോൾ സംസ്ഥാന ഭരണകൂടം ജനങ്ങളിലേക്കിറങ്ങണമെന്നും അദ്ദേഹം പറഞ്ഞു. പാലക്കാട്- മലമ്പുഴ നിയോജക മണ്ഡലം കോൺഗ്രസ് കമ്മിറ്റികൾ സംയുക്തമായി പാലക്കാട് ജില്ലാ ആശുപത്രിക്കു മുൻപിൽ നടത്തിയ ധർണ ഉദ്ഘാടനം ചെയ്യുകയായിരുന്നു എംഎൽഎ. ആരോഗ്യ മേഖലയിലെ സംസ്ഥാന സർക്കാർ അവഗണനയ്ക്കെതിരെ കെപിസിസിയുടെ ആഹ്വാന പ്രകാരം സംസ്ഥാന വ്യാപകമായി നടത്തുന്ന ധർണയുടെ ഭാഗമായാണ് സമരം സംഘടിപ്പിച്ചത്. പാലക്കാട് ബ്ലോക്ക് കോൺഗ്രസ് പ്രസിഡന്‍റ് സി.വി. സതീഷ് അധ്യക്ഷത വഹിച്ചു. യോഗത്തിൽ കെപിസിസി, ജില്ലാ, ബ്ലോക്ക് കോൺഗ്രസ് ഭാരവാഹികൾ പങ്കെടുത്തു.

ഏറോബിക് കമ്പോസ്റ്റ് യൂണിറ്റുകളെല്ലാം ഉപയോഗശൂന്യം; ലക്ഷങ്ങളുടെ നഷ്ടം

ഒറ്റപ്പാലം: ലക്ഷങ്ങൾ പൊടിച്ച് ഒറ്റപ്പാലം നഗരസഭ നിർമിച്ച ഏറോബിക് കമ്പോസ്റ്റ് യൂണിറ്റുകളെല്ലാം ഉപയോഗശൂന്യം. ഈസ്റ്റ് ഒറ്റപ്പാലം നഗരസഭാ മാർക്കറ്റ് ഷോപ്പിംഗ് കോംപ്ലക്‌സിനു സമീപത്തും കയറംപാറയിലുമടക്കമുള്ള ഏറോബിക് കമ്പോസ്റ്റ് യൂണിറ്റുകളാണ് ഉപയോഗമില്ലാതായി മാറിയത്. പനമണ്ണയിൽ നഗരസഭയുടെ ഖരമാലിന്യ സംസ്കരണ പ്ലാന്‍റിൽ ഓർഗാനിക് വേസ്റ്റ് കൺവെർട്ടർ വന്നതോടെയാണ് യൂണിറ്റിന്‍റെ ആവശ്യമില്ലാതായത്. ദിവസവും എട്ടുമണിക്കൂറിൽ രണ്ടുടൺ മാലിന്യം സംസ്കരിക്കുന്നതിനുള്ള സൗകര്യമാണ് കൺവെർട്ടറിനുള്ളത്. പട്ടണം കേന്ദ്രീകരിച്ച് വ്യാപാര സ്ഥാപനങ്ങൾ, ഹോട്ടലുകൾ, ഫ്ലാറ്റുകൾ തുടങ്ങിയ സ്ഥലങ്ങളിൽ നിന്നാണ് ആദ്യഘട്ടത്തിൽ മാലിന്യം ശേഖരിച്ച് വളമാക്കി മാറ്റുന്നത്. ഇതിനുവേണ്ടി വാഹന സൗകര്യവും ഏർപ്പെടുത്തിയിട്ടുണ്ട്. രണ്ട് മാലിന്യ ബിന്നുകളുള്ള കമ്പോസ്റ്റ് യൂണിറ്റ് നേരത്തെ കുറച്ചുകാലം പ്രവർത്തിച്ചിരുന്നെങ്കിലും പിന്നീട് നിർത്തി. ഇപ്പോൾ വർഷങ്ങളായി വെറുതെ കിടക്കുകയാണ്. ഇതോടെ മൂന്നാമത്തെ യൂണിറ്റാണ് ഉപയോഗശൂന്യമാകുന്നത്. നഗരസഭാ ബസ് സ്റ്റാൻഡിനു പുറകിലുണ്ടായിരുന്ന കമ്പോസ്റ്റ് യൂണിറ്റ് മലിനജല ശുദ്ധീകരണശാല സ്ഥാപിക്കുന്നതിന്‍റെ ഭാഗമായി പൊളിച്ചുനീക്കിയിരുന്നു. കയറംപാറയിൽ റോഡരികിൽ സ്ഥാപിച്ചിരുന്ന യൂണിറ്റ് അടുത്തിടെ പ്ലാസ്റ്റിക് മാലിന്യം ശേഖരിക്കുന്നതിനുള്ള കേന്ദ്രമാക്കി മാറ്റുകയും ചെയ്തു. ബസ് സ്റ്റാൻഡിനു പുറകിൽ നാല് ബിന്നുകളുള്ള യൂണിറ്റ് ആറുലക്ഷംരൂപ ചെലവിലായിരുന്നു 2019 ൽ നിർമിച്ചത്. എട്ടുലക്ഷം രൂപ ചെലവഴിച്ചാണ് നഗരസഭയിലെ ഏറ്റവും വലിയ യൂണിറ്റ് കയറാംപാറയിൽ പാതയരികിൽ നിർമിച്ചത്. ഈസ്റ്റ് ഒറ്റപ്പാലത്തെ രണ്ടു ബിന്നുകളുള്ള യൂണിറ്റ് നാല് ലക്ഷം രൂപ ചെലവിലാണ് പൂർത്തിയാക്കിയിരുന്നത്. വ്യാപാരികൾക്ക് ജൈവമാലിന്യം സംസ്കരിക്കാനുള്ള സൗകര്യമൊരുക്കുന്നതിന്‍റെ ഭാഗമായാണ് യൂണിറ്റുകൾ നിർമിച്ചിരുന്നത്. എന്നാൽ ലക്ഷക്കണക്കിന് രൂപ ഉപയോഗശൂന്യമാക്കുകയാണ് പദ്ധതിയിലൂടെ നഗരസഭ ചെയ്തത്.

വിളയോടി നിലന്പതിപ്പാലത്തിൽ കിടക്കുന്ന മരത്തടി നീക്കണം

ചിറ്റൂർ: വിളയോടി നിലമ്പതിപ്പാലത്തിൽ മഴവെള്ളപ്പാച്ചിലിൽ ഒഴുകിയെത്തിയ മരത്തടി നീക്കം ചെയ്യണമെന്നതാണ് നാട്ടുകാരുടെ ആവശ്യം. പാലത്തിന്‍റെ ഇരുവശങ്ങളിലുമായി നിരവധി പേർ കുളിക്കാനെത്തുന്നുണ്ട്. പുഴയിൽ കൂടുതൽ ഒഴുക്കുണ്ടായൽ മരത്തടി സമീപത്തുള്ള മേൽപ്പാലം പില്ലറിലിടിച്ചാൽ കേടുപാടുകൾ ഉണ്ടാവാനും സാധ്യതയുണ്ട്. കിഴക്കൻ പ്രദേശങ്ങളിൽ ഇടക്കിടെ മഴ പെയ്യുന്നതിനാൽ നിലവിൽ നിലമ്പതി കവിഞ്ഞൊഴുകുകയാണ്. നിലമ്പതിക്ക് താഴെ നൂറുമീറ്റർ അകലെ തടയണയുമുണ്ട്. മരത്തടി ഈ സ്ഥലത്ത് എത്തിയാൽ പുറത്തെടുക്കുന്നത് ഏറെ ശ്രമകരമാവും. തടയണ ഭാഗത്ത് വാഹനസഞ്ചാര മാർഗമില്ലാത്തതിനാൽ കരയിലെത്തിക്കുന്നത് എളുപ്പമല്ല.

കോയന്പത്തൂരിൽ കാറ്റലിസ്റ്റ് കോൺക്ലേവ് നടത്തി

കോയന്പത്തൂർ: നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ടെക്‌നോളജി ബിസിനസ് ഇൻകുബേറ്റർ എൻ‌ജി‌ഐ ടി‌ബി‌ഐ, സ്റ്റാർട്ടപ്പ് ടി‌എന്നുമായി സഹകരിച്ച് കാറ്റലിസ്റ്റ് കോൺക്ലേവ് 1.0 സംഘടിപ്പിച്ചു. തമിഴ്‌നാട്ടിലെ ഉന്നത വിദ്യാഭ്യാസ സ്ഥാപനങ്ങളിലെ പ്രീ-ഇൻകുബേഷൻ സെന്‍ററുകൾ, എം‌എസ്‌എം‌ഇ-എച്ച്‌ഐ യൂണിറ്റുകൾ, ഇഡിസി, ഐ‌ഐ‌സി സെല്ലുകൾ, വ്യാവസായിക ഗവേഷണ വികസന ഹബുകൾ എന്നിവയെ ശാക്തീകരിക്കുകയെന്ന ലക്ഷ്യത്തോടെയുള്ള സംരംഭമാണിത്. എൻ‌ജി‌ഐ ടി‌ബി‌ഐയുടെ പ്രസിഡന്‍റും നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസിന്‍റെ സെക്രട്ടറിയുമായ ഡോ. പി. കൃഷ്ണകുമാർ കോൺക്ലേവിൽ അധ്യക്ഷത വഹിച്ചു. കെ.ഇ. പ്രകാശ് എംപി, സ്റ്റാർട്ടപ്പ് ടി‌എൻ സിഇഒ ശിവരാജ രാമനാഥൻ എന്നിവർ പങ്കെടുത്തു. എൻ‌ജി‌ഐ ടി‌ബി‌ഐയിൽ ഇൻകുബേറ്റ് ചെയ്ത സ്റ്റാർട്ടപ്പുകളുടെ ഉത്പന്ന അനാഛാദനങ്ങളും പരിപാടിയിൽ ഉണ്ടായിരുന്നു.

മംഗലം ഗവ. എൽപി സ്കൂളിലെ എഴുത്തുകൂട്ടം ശ്രദ്ധേയമാകുന്നു

വടക്കഞ്ചേരി: മംഗലം ഗവ. എൽപി സ്കൂളിൽ നടന്നുവരുന്ന എഴുത്തുകൂട്ടം കൂട്ടായ്മ ശ്രദ്ധേയമാകുന്നു. വായനാതല്പരരും എഴുത്തുമോഹികളുമായവരുടെ കൂടിച്ചേരലാണിത്. മാസത്തിൽ ഒരുതവണ ഇവർ ഒത്തുകൂടും. എഴുതിയ കവിതകളും കഥകളും അനുഭവങ്ങളും പങ്കുവയ്ക്കും. വായിച്ച പുസ്തകങ്ങളെ കുറിച്ച് ചർച്ച നടത്തും. സ്വന്തം സൃഷ്ടികൾ കൂട്ടായ്മയിൽ അവതരിപ്പിക്കും. കുറവുകളും മേന്മകളും പരസ്പരം ചൂണ്ടിക്കാട്ടി പ്രോത്സാഹിപ്പിക്കും. കൂട്ടായ്മയിൽ എല്ലാ പ്രായക്കാരുമുണ്ട്. ചെറിയ കുട്ടികൾ മുതൽ വലിയ പ്രായക്കാർ വരെ. വിവിധ രാഷ്ട്രീയ - മത ചിന്തകരുണ്ട്. സമൂഹത്തിലെ വിവിധ തുറകളിൽപ്പെട്ടവരുമുണ്ട്. എന്നാൽ എല്ലാവരും ഒത്തുകൂടുമ്പോൾ മറ്റെല്ലാ ചിന്തകളും മാറ്റിനിർത്തി എഴുത്തിന്‍റെയും വായനയുടെയും സംശുദ്ധിയാണ് പരിഗണിക്കുക. കൂട്ടായ്മയിൽ ആകൃഷ്ടരായി ഓരോ മാസത്തിലും പുതിയ എഴുത്തുകാരും വായനാതല്പരരും എത്തുന്നുണ്ടെന്ന് കൂട്ടായ്മക്ക് നേതൃത്വം നൽകുന്ന സാബു വർഗീസ് മാസ്റ്റർ, അജീഷ് കുമാർ എന്നിവർ പറഞ്ഞു. ഇക്കഴിഞ്ഞ ബഷീർ ദിനത്തിൽ പാലക്കാടിന്‍റെ ഇതിഹാസമുറങ്ങുന്ന തസ്രാക്കിലായിരുന്നു ഒത്തുകൂടൽ. ഒ.വി. വിജയന്‍റെ കഥാപാത്രങ്ങളിലൂടെയുള്ള വിശകലനവും നടന്നു. യുവസാഹിത്യകാരന്മാരായ രാജേഷ് മേനോൻ, സുധി വണ്ടാഴി, കെ.ആർ. രാജേഷ് തുടങ്ങിയവർ അവരുടെ രചനകൾ കൂട്ടായ്മയിൽ പങ്കുവച്ചു.

കേരളത്തിലെ ആരോഗ്യരംഗത്തു നടക്കുന്നത് പിആർ പ്രചാരണംമാത്രം: രമ്യ ഹരിദാസ്

ചിറ്റൂർ: എൽഡിഎഫ് ഭരണത്തിനു കീഴിൽ കേരളത്തിലെ ആരോഗ്യരംഗത്ത് നടക്കുന്നത് പിആർ പ്രചാരണം മാത്രമെന്ന് മുൻ എംപി രമ്യ ഹരിദാസ്. ആരോഗ്യരംഗത്തെ തകർക്കാൻ നേതൃത്വം നൽകിയ മന്ത്രി വീണാ ജോർജ് രാജിവെക്കണമെന്നാവശ്യപ്പെട്ട് കോൺഗ്രസിന്‍റെ ചിറ്റൂർ, കൊഴിഞ്ഞാമ്പാറ, നെന്മാറ, കൊല്ലങ്കോട് ബ്ലോക്ക് കമ്മിറ്റികൾ ചിറ്റൂർ താലൂക്ക് ആശുപത്രിയ്ക്കു മുന്പിൽ നടത്തിയ ധർണ ഉദ്ഘാടനം ചെയ്യുകയായിരുന്നു അവർ. മികവിന്‍റെ കേന്ദ്രങ്ങളായിരുന്ന കേരളത്തിലെ സർക്കാർ ആശുപത്രികളെ തകർക്കുന്ന സമീപനമാണ് എൽഡിഎഫ് സർക്കാരിന്‍റേത്. ഭൗതിക സൗകര്യങ്ങൾ ഇല്ലാത്തതിനാൽ ആരോഗ്യ പ്രവർത്തകർ ബുദ്ധിമുട്ടുകയാണ്. ഡോക്ടർമാർ നിർദേശിക്കുന്ന മുഴുവൻ മരുന്നുകളും സ്വകാര്യകടകളിൽ നിന്നു വാങ്ങേണ്ട ഗതികേടിലാണ് ജനങ്ങളെന്നും രമ്യ ഹരിദാസ് പറഞ്ഞു. കോൺഗ്രസ് ചിറ്റൂർ ബ്ലോക്ക് പ്രസിഡന്‍റ് സച്ചിദാനന്ദ ഗോപാലകൃഷ്ണൻ അധ്യക്ഷനായി. ഡിസിസി വൈസ് പ്രസിഡന്‍റ് സുമേഷ് അച്യുതൻ, ജനറൽ സെക്രട്ടറിമാരായ കെ.എസ്. തണികാചലം, കെ.സി. പ്രീത്, സി.സി. സുനിൽ, കെപിസിസി അംഗം സജേഷ് ചന്ദ്രൻ, ദളിത് കോൺഗ്രസ് ജില്ലാ പ്രസിഡന്‍റ് എം. നാരായണസ്വാമി, പട്ടഞ്ചേരി ഗ്രാമപഞ്ചായത്ത് പ്രസിഡന്‍റ് പി.എസ്. ശിവദാസ്, ബ്ലോക്ക് പ്രസിഡന്‍റുമാരായ കെ.ഗുരുവായൂരപ്പൻ, രഘുനാഥ് തുടങ്ങിയവർ പ്രസംഗിച്ചു.

ഗ്ലോബൽ ഫൊർഗീവ്നസ് ഡേ ആചരിച്ചു

മുണ്ടൂർ: യുവക്ഷേത്ര കോളജിലെ പിജി കൊമേഴ്സ് വിഭാഗത്തിന്‍റെ നേതൃത്വത്തിൽ ഗ്ലോബൽ ഫൊർഗീവ്നസ് ഡേ യോടനുബന്ധിച്ച് സംഘടിപ്പിച്ച ആഘോഷ പരിപാടികളുടെ ഉദ്ഘാടനം വിസ്ഡം വാലെ ഫണ്ടിലേക്ക് ആദ്യ സംഭാവന നല്കി വൈസ് പ്രിൻസിപ്പൽ ഫാ. ഷൈജു പരിയത്ത് നിർവഹിച്ചു. കൊമേഴ്സ് വിഭാഗം മേധാവി ഡോ.എം.എസ്. കീർത്തി അധ്യക്ഷയായിരുന്നു. പരിപാടിയിൽ പോസ്റ്റർ മേക്കിംഗ് മത്സര വിജയികളെ തെരഞ്ഞെടുക്കുകയും എക്സിബിഷനിൽ പോസ്റ്ററുകളുടെ പ്രദർശനവുമുണ്ടായിരുന്നു. വിദ്യാർഥികളായ എസ്. ഹരിജിത്ത്, ആഗ്നൽ കുര്യാക്കോസ് ആശംസകളർപ്പിച്ചു. ഹാപ്പിനസ് പ്രോജക്റ്റ് കോ-ഓർഡിനേറ്റർ രേഷ്മ പി. വാര്യർ സ്വാഗതവും വിദ്യാർഥിനി എസ്. ലക്ഷ്മി നന്ദിയും പറഞ്ഞു.

കോണ്‍ഗ്രസ് നേതൃത്വം നിലപാട് വ്യക്തമാക്കണം: ആക്ട്സ്

പാലക്കാട്: മദ്യനിർമാണശാല സംബന്ധിച്ച് കോണ്‍ഗ്രസ് നേതൃത്വം നിലപാട് വ്യക്തമാക്കണമെന്ന് ആക്ട്സ് ആവശ്യപ്പെട്ടു. മണ്ണൂക്കാട്ടെ സ്വകാര്യ മദ്യനിർമാണശാലയെ എതിർക്കുകയും മേനോൻപാറയിലെ സർക്കാർ മദ്യനിർമാണ ശാലയെ അനുകൂലിക്കുകയും ചെയ്യുന്നത് ഗാന്ധിജിയെ ആദരിക്കുന്ന കോണ്‍ഗ്രസുകാർക്ക് ഭൂഷണമല്ലെന്ന് ആക്ട്സ് ജനറൽ സെക്രട്ടറി ജോർജ് സെബാസ്റ്റ്യൻ പറഞ്ഞു. ഏതു മേഖലയിൽ ഉത്പാദിപ്പിക്കുന്ന മദ്യവും വിഷമാണെന്ന യാഥാർഥ്യം സാമൂഹ്യ പ്രതിബദ്ധതയുള്ളവർ വിസ്മരിക്കരുത്. ഇക്കാര്യത്തിൽ ജനവികാരം മാനിച്ച് നിലപാട് സ്വീകരിച്ച എലപ്പുള്ളി പഞ്ചായത്ത് പ്രസിഡന്‍റ് രേവതി ബാബുവിനെയും അംഗങ്ങളെയും കോണ്‍ഗ്രസിന്‍റെയും ബിജെപിയുടെയും പ്രാദേശിക നേതൃത്വത്തെയും സംഘടന അഭിനന്ദിച്ചു. ജലചൂഷണത്തിനും അപ്പുറം മനുഷ്യ മനസിന്‍റെ ദൗർബല്യത്തെ ചൂഷണം ചെയ്യുന്നതിനെകൂടി എതിർക്കുവാനുള്ള തന്‍റേടം മനുഷ്യനന്മ ആഗ്രഹിക്കുന്ന പൊതുപ്രവർത്തകർ കാട്ടണമെന്നും ജോർജ് സെബാസ്റ്റ്യൻ പറഞ്ഞു.

നിരത്തുകളിൽ സ്വകാര്യബസുകളുടെ മരണപ്പാച്ചിൽ; യാത്രക്കാർ ഭയാശങ്കയിൽ

ഒറ്റപ്പാലം: മരണപ്പാച്ചിൽ നടത്തുന്ന സ്വകാര്യബസുകൾ റോഡുകളിൽ ഭീതി ജനിപ്പിക്കുന്നു. അമിതവേഗതയിലുള്ള സഞ്ചാരമാണ് പൊതുജനങ്ങൾക്ക് ഭീഷണിയാവുന്നത്. സ്വകാര്യബസുകളിൽ യാത്രചെയ്യുന്നവരും ശ്വാസമടക്കിപിടിച്ചാണ് ഇരിപ്പുറപ്പിക്കുന്നത്. അതേസമയം മറ്റ് സ്വകാര്യ ബസുകളുമായുള്ളസമയത്തെച്ചൊല്ലിയുള്ള തർക്കവും യാത്രക്കാരെ ബുദ്ധിമുട്ടിക്കുന്നുണ്ട്. ഇവർ തമ്മിലുള്ള കൊമ്പുകോർക്കൽ മരണപ്പാച്ചിലായി മാറുന്ന സ്ഥിതിയുമുണ്ട്. അമിതവേഗതയിൽ സഞ്ചരിക്കുന്നതും സമയത്തെച്ചൊല്ലി ഇടയ്ക്ക് നിർത്തിയിട്ട് ജീവനക്കാർ തമ്മിൽ തർക്കിക്കുന്നതും ഇത് പിന്നീട് കയ്യാങ്കളിയിലേക്ക് എത്തുന്നതുമെല്ലാം യാത്രക്കാർക്ക് ബുദ്ധിമുട്ടുണ്ടാക്കുന്നുണ്ട്. കഴിഞ്ഞദിവസം ഇരുബസുകൾ തമ്മിലുണ്ടായ തർക്കത്തിനിടെ ബസ് കണ്ടക്ടർ കുഴഞ്ഞുവീണ് മരിച്ചിരുന്നു. സമയക്രമം പാലിക്കാൻ മത്സരിച്ച് ഓടുന്ന ബസുകളിൽ യാത്രക്കാർക്ക് ജീവൻ കൈയിൽ പിടിച്ചിരിക്കേണ്ട ഗതികേടാണ്. ഭീതിയോടെ ഇരിക്കുന്ന യാത്രക്കാർക്ക് പാതിവഴിയിൽ ഇറങ്ങേണ്ട സ്ഥിതിവരെ ഉണ്ടാകുന്നുവെന്നും പരാതിയുണ്ട്. ദീർഘദൂരബസുകൾ സമയം തെറ്റിച്ചു പായുന്നതും ലിമിറ്റഡ് സ്‌റ്റോപ്പ് മാനദണ്ഡങ്ങൾ ലംഘിക്കുന്നതുമാണ് പ്രശ്നമാകുന്നത്. എല്ലാ ബസുകളും എല്ലാ സ്റ്റോപ്പിലും നിർത്തി യാത്രക്കാരെ കയറ്റുന്നത് ഹ്രസ്വദൂര ബസുകളുടെ വരുമാനത്തെ ബാധിക്കുന്നുവെന്നും പരാതിയുണ്ട്. ബസ് ഉടമകൾക്കും ഇത് പ്രയാസം സൃഷ്ടിക്കുന്നുണ്ട്. ലിമിറ്റഡ് സ്റ്റോപ്പ് ബസിന് പാലക്കാട്ടുനിന്ന് ഒറ്റപ്പാലത്തേക്ക് ഒരു മണിക്കൂർ 10 മിനിറ്റ് സമയമാണ് അനുവദിച്ചത്. എന്നാൽ ബസുകൾ ഒരുമണിക്കൂറിൽ ഓടിയെത്തുകയാണ് പതിവ്. ഇതാണ് ഉൾപ്രദേശങ്ങളിലൂടെ സഞ്ചരിച്ച് പാലക്കാട്-കുളപ്പുള്ളി പാതയിൽ എത്തുന്ന ബസുകളുമായി തർക്കത്തിന് ഇടയാക്കുന്നത്. പ്രധാനപാതയിൽ ഹ്രസ്വദൂര ബസുകൾക്ക് അനുവദിക്കപ്പെട്ട സമയത്ത് ദീർഘദൂര ബസുകൾ എത്തുമ്പോൾ വരുമാനം കുത്തനെ കുറയുന്നതായാണ് ഉടമകളുടെ ആക്ഷേപം. പെർമിറ്റ് മാനദണ്ഡങ്ങൾ പാലിച്ച് ഓടണമെന്ന ഹൈക്കോടതി ഉത്തരവുകൾപോലും ദീർഘദൂര ബസുകൾ പാലിക്കുന്നില്ലെന്നും ആക്ഷേപമുണ്ട്. കഴിഞ്ഞദിവസം പാലക്കാട് -പട്ടാമ്പി റൂട്ടിൽ ഓടുന്ന ബസും പത്തിരിപ്പാല-ഒറ്റപ്പാലം റൂട്ടിൽ സർവീസ് നടത്തുന്ന ബസും തമ്മിൽ സമയത്തെച്ചൊല്ലി തർക്കമുണ്ടായി. പാലപ്പുറം ചിനക്കത്തൂർകാവ് സ്റ്റോപ്പിൽ നിർത്തിയിട്ടായിരുന്നു തർക്കം. ഇതിനിടെയാണ് പെരിങ്ങോട്ടുകുറുശി നടുവത്ത്പാറ സ്വദേശിയായ കണ്ടക്ടർ കുഴഞ്ഞുവീണു മരിച്ചത്. ട്രാൻസ്പോർട്ട് വകുപ്പ് അധികൃതരുടെയും പോലീസിന്‍റെയും ഇടപെടലുകൾ തീരെ കുറയുന്നതും പ്രശ്നത്തിന്‍റെ ഗൗരവം വർധിപ്പിക്കുന്നുണ്ട്.

കരിന്പനയുടെ ഉത്പന്നങ്ങൾ മൂല്യവർധനവ് നടത്തി കർഷകർക്കു മികച്ച വരുമാനം ലഭ്യമാക്കണം

എലപ്പുള്ളി: പനങ്കാവ് പദ്ധതിയിലൂടെ കരിന്പനയുടെ ഉത്പന്നങ്ങൾ മൂല്യവർധനവ് നടത്തിയും സോഷ്യൽ മാർക്കറ്റിംഗ് നടത്തിയും കർഷകർക്കും ചെറുകിട സംരംഭകർക്കും നല്ല വരുമാനം ലഭ്യമാക്കണമെന്ന് നബാർഡ് മുൻ ചീഫ് ജനറൽ മാനേജർ ജയകൃഷ്ണൻ ജി. മേനോൻ അഭിപ്രായപ്പെട്ടു. പനങ്കാവ് പദ്ധതിയുടെ ഭാഗമായി കരിന്പന സംരക്ഷണ കൂട്ടായ്മയായ കരിന്പനകൂട്ടവും പാലക്കാട് വിക്ടോറിയ കോളജ് എൻഎസ്എസ് യൂണിറ്റും രാമശേരി ഗാന്ധി ആശ്രമവും ചേർന്ന് ഗാന്ധിആശ്രമത്തിൽ സംഘടിപ്പിച്ച കരിന്പന വിത്ത് നടൽ പരിപാടി കരിന്പന വിത്ത് എൻഎസ്എസ് വോളന്‍റിയർ എച്ച്. അൽഫ ഷെറിന് നൽകി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കലപ്പയുടെ തണ്ടും നുകക്കോലും കരിന്പനയുടെ തടികൊണ്ടാണ് ഉണ്ടാക്കിയിരുന്നത്. വീടിന്‍റെയും കന്നുകാലി തൊഴുത്തിന്‍റെയും ഉത്തരവും കഴുക്കോലും എല്ലാം കരിന്പനയുടെ തടികൊണ്ടാണ് നിർമിച്ചിരുന്നത്. കരിന്പനയുടെ തടി നെല്ല് അളക്കാനുള്ള പറയുണ്ടാക്കാനും ഉലക്ക ഉണ്ടാക്കാനും പൂർവികർ ഉപയോഗിച്ചിരുന്നു. പനന്പഴം ചുട്ട് ഭക്ഷണമായി ഉപയോഗിച്ചിരുന്നു. സുഖശീതളമായ പനയോല മേഞ്ഞ വീട് പാലക്കാടിന്‍റെ മുഖമുദ്രയായിരുന്നു. പനയോല കൊണ്ട് ഉണ്ടാക്കിയ വിശറി അടുത്ത കാലത്ത് വരെ ഉപയോഗിച്ചിരുന്നു. പനനൊങ്ക്, കരിന്പനയുടെ കള്ള്, പനംചക്കര, പനംകൽക്കണ്ടം, പനമണ്ട, പനംകിഴങ്ങ്, കരിന്പനവേര്, പനയുടെ കൂന്പ്, പൂക്കൾ, കുല തുടങ്ങിവയെല്ലാം ഒൗഷധമായി ഉപയോഗിച്ചിരുന്നു. രാമശേരി ഗാന്ധി ആശ്രമം ട്രസ്റ്റി പുതുശേരി ശ്രീനിവാസൻ അധ്യക്ഷനായി.

ജലന്ധർ രൂപതയുടെ നിയുക്ത ബിഷപ്പിനു വടക്കഞ്ചേരിയുമായി അടുത്ത ബന്ധം

വടക്കഞ്ചേരി: പഞ്ചാബിലെ ജലന്ധർ രൂപതയുടെ നിയുക്ത ബിഷപ്പ് മോൺ.ഡോ. ജോസ് സെബാസ്റ്റ്യൻ തെക്കുംചേരിക്കുന്നേലിനു വടക്കഞ്ചേരിയുമായി അടുത്ത ബന്ധം. വടക്കഞ്ചേരി ഫൊറോന പള്ളിയിലെ മുൻവികാരി ഫാ. ജോസ് പൊട്ടേപറമ്പിലിന്‍റെ കാലംമുതൽ 25 വർഷത്തിലേറെയായി ബിഷപ്പിന് വടക്കഞ്ചേരിയും പള്ളിയുമായും ബന്ധമുണ്ട്. ബിഷപ്പിന്‍റെ ഒരു സഹോദരൻ സാക്ഷരതാ മിഷൻ തൃശൂർ ജില്ലാ കോ- ഓർഡിനേറ്റർ കൂടിയായ ഡോ. മനോജ് സെബാസ്റ്റ്യൻ വടക്കഞ്ചേരി ലൂർദ് മാതാ ഇടവകാംഗമാണെന്നതും വടക്കഞ്ചേരിയുമായി കൂടുതൽ അടുക്കാനുള്ള കാരണമായി. മിക്കവാറും എല്ലാവർഷവുംതന്നെ ബിഷപ് വടക്കഞ്ചേരിയിൽ വരാറുണ്ടെന്നു മനോജ് പറഞ്ഞു. വരുമ്പോഴൊക്കെ വടക്കഞ്ചേരി ഫൊറോന പള്ളിയിൽ ദിവ്യബലിയർപ്പിക്കുകയും ഇടവകാംഗങ്ങളുമായി സൗഹൃദം പങ്കുവയ്ക്കുകയും ഇടവകയിലെ വിവിധ സ്ഥാപനങ്ങൾ സന്ദർശിക്കുകയും ചെയ്യും. വടക്കഞ്ചേരിയിൽ വന്നാൽ മേലാർക്കോടും നെന്മാറയിലുമുള്ള കുടുംബബന്ധങ്ങൾ പുതുക്കിയാണ് തിരിച്ചുപോവുക. പാലക്കാട് രൂപതയിലെ ബിഷപ്പുമാരുമായും ബന്ധം പുലർത്തിയിരുന്നു. ഈ മാസം 12ന് രാവിലെ പത്തിനു ജലന്ധറിലെ ട്രിനിറ്റി കോളജ് കാമ്പസിൽ നടക്കുന്ന മെത്രാഭിഷേക തിരുകർമങ്ങളിൽ പങ്കെടുക്കാനും വടക്കഞ്ചേരിക്കാരുടെ സന്തോഷം കൈമാറാനുമായി വടക്കഞ്ചേരി ലൂർദ്മാതാ ഫൊറോന വികാരി ഫാ.അഡ്വ. റെജി പെരുമ്പിള്ളിൽ, ഒലിപ്പാറ പള്ളിവികാരി ഫാ. സേവ്യർ വളയത്തിൽ, കത്തോലിക്ക കോൺഗ്രസ് രൂപത ജനറൽ സെക്രട്ടറി ആന്‍റണി കുറ്റിക്കാടൻ ഉൾപ്പെടെ മനോജും കുടുംബവുമടങ്ങുന്ന സംഘം ബുധനാഴ്ച രാവിലെ ജലന്ധറിലേക്കുപോകും. വടക്കഞ്ചേരിയിലെ മുൻവികാരി ഫാ. ജെയ്സൺ കൊള്ളന്നൂരും ജലന്ധറിലെത്തും. പാലക്കാട് രൂപതയിൽനിന്നും പഞ്ചാബിൽ മിഷൻ പ്രവർത്തനം നടത്തിവരുന്ന വൈദികരും ജലന്ധർ രൂപതയുടെ പ്രവർത്തനങ്ങളിൽ സജീവ സാന്നിധ്യമുള്ള വടക്കഞ്ചേരി ഇടവകാംഗം നിക്സൺ അബ്രഹാം തോലാനിക്കലും മെത്രാഭിഷേക ചടങ്ങുകളിൽ പങ്കെടുക്കുന്നുണ്ട്. വലിയ ദൈവാനുഗ്രഹത്തിന്‍റെ സന്തോഷത്തിലാണ് മനോജിന്‍റെ കുടുംബത്തോടൊപ്പം വടക്കഞ്ചേരി ഇടവകക്കാരും. വടക്കഞ്ചേരിയുമായി അടുത്ത ബന്ധം സൂക്ഷിക്കുന്ന മോൺ. ജോസച്ചൻ ബിഷപ് ആകുന്നതിൽ സന്തോഷങ്ങളും ചെറുതല്ല. ജലന്ധർ രൂപതയുടെ ഫിനാൻഷ്യൽ അഡ്മിനി്ട്രേറ്ററായി സേവനം ചെയ്തുവരുന്ന മോൺ ഡോ. തെക്കുംചേരികുന്നേൽ അവിടുത്തെ മേജർ സെമിനാരിയിലെ വിസിറ്റിംഗ് പ്രഫസർ കൂടിയാണ്. 1991 മുതൽ ജലന്ധർ രൂപതയിൽ വിവിധ സ്ഥാനങ്ങളിൽ വൈദികനായി സേവനം ചെയ്തു വരികയാണ്. പഞ്ചാബിലെ 14 ജില്ലകൾക്കു പുറമെ ഹിമാചൽപ്രദേശിലെ നാലു ജില്ലകളിലുമായി വ്യാപിച്ചുകിടക്കുന്ന വലിയ ഭൂപ്രദേശമാണ് ജലന്ധർ രൂപത. പാലാ കാളക്കെട്ടി തെക്കുംചേരിക്കുന്നേൽ പരേതനായ ദേവസ്യ - ഏലിക്കുട്ടി ദമ്പതികളുടെ പത്തുമക്കളിൽ ആറാമത്തെയാളാണ് നിയുക്ത ബിഷപ്. വള്ളിയോട് പടിഞ്ഞാറെക്കാടാണ് പത്തുമക്കളിലെ ഒമ്പതാമത്തെയാളായ മനോജും കുടുംബവും താമസിക്കുന്നത്. ഭാര്യ കുറ്റിക്കാടൻ കുടുംബാംഗം ലിറ്റി,മംഗലം ഗാന്ധി സ്മാരക യുപി സ്കൂളിലെ അധ്യാപികയാണ്. മക്കളിൽ മൂത്തയാൾ ഡോ. ലിസ ബിഡിഎസ് കഴിഞ്ഞ് ഹൗസ് സർജൻസി ചെയ്യുന്നു. ഇളയ മകൾ ലിൻഡ അടൂർ മൗണ്ട് സിയോൺ മെഡിക്കൽ കോളജിൽ എംബിബിഎസ് ഒന്നാംവർഷ വിദ്യാർഥിനിയാണ്.

മണ്ണാർക്കാട് നഗരസഭയിൽ ആയുർവേദ ഡിസ്പെൻസറി കെട്ടിടമൊരുങ്ങി

മണ്ണാർക്കാട്: നഗരസഭയിൽ ആധുനിക സംവിധാനങ്ങളുള്ള സർക്കാർ ആയുർവേദ ഡിസ്പെൻസറി കെട്ടിടം ഒരുങ്ങി. മുക്കണ്ണം പാലത്തിനു സമീപമാണ് ഇരുനിലകളുള്ള കെട്ടിടം ഒരുങ്ങിയത്. കിടത്തിച്ചികിത്സ, ഉഴിച്ചിൽ തുടങ്ങിയവയെല്ലാം ഇനി പുതിയ കെട്ടിടത്തിൽ തുടങ്ങാനാവും. നിലവിൽ മുൻസിപ്പൽ ബസ് സ്റ്റാന്‍റിനകത്തെ കെട്ടിടത്തിൽ ശോചനീയാവസ്ഥയുടെ നടുവിലാണ് ആയുർവേദ ആശുപത്രി പ്രവർത്തിക്കുന്നത്. മണ്ണാർക്കാട് പഞ്ചായത്തായിരിക്കെ പുതിയ കെട്ടിടത്തിനുവേണ്ടി മുറവിളി ആരംഭിച്ചതാണ്. നഗരസഭയായതോടെ ആശുപത്രി കെട്ടിടത്തിനു രണ്ടുകോടിരൂപ മാറ്റിവയ്ക്കുകയായിരുന്നു. സർക്കാർ അനുമതി നൽകുകയാണെങ്കിൽ പുതിയ കെട്ടിടത്തിൽ ആയുർവേദ മൾട്ടി സ്പെഷാലിറ്റി ആശുപത്രിതന്നെ തുടങ്ങുമെന്നു നഗരസഭാ ചെയർമാൻ സി. മുഹമ്മദ് ബഷീർ ദീപികയോടു പറഞ്ഞു. നഗരസഭയുടെ സ്വപ്നപദ്ധതിയാണു ആയുർവേദ ആശുപത്രിയെന്നും ആയിരക്കണക്കിനു രോഗികൾക്ക് ഇതു ഉപകാരപ്രദമാവുമെന്നും ചെയർമാൻ പറഞ്ഞു. ടിപ്പുസുൽത്താൻ റോഡുകൂടി നവീകരിച്ചതോടെ നഗരത്തിൽനിന്നും അഞ്ചുമിനിറ്റിനുള്ളിൽ ആശുപത്രിയിൽ എത്താനാവും. രാജീവ് ഗാന്ധി സ്മാരക സർക്കാർ ആയുർവേദ ഡിസ്പെൻസറി എന്നാണ് പുതിയ കെട്ടിടത്തിനു പേര് നൽകിയിരിക്കുന്നത്.

പാലക്കയം ഇരുന്പാമുട്ടി പുഴയിൽ കാട്ടാനയുടെ അഴുകിയ ജഡം

കല്ലടിക്കോട്: പാലക്കയം തരിപ്പപ്പതിയിൽ ഇരുമ്പാമുട്ടിപുഴയിൽ ആനയുടെ അഴുകിയ ജഡം കണ്ടെത്തി. ജഡത്തിനു നാലുദിവസം പഴക്കമുണ്ട്. പുഴയിലൂടെ ഒഴുകിവന്ന് കല്ലിൽ തടഞ്ഞുനിൽക്കുന്ന നിലയിലാണ് ജഡം കണ്ടെത്തിയത്. കാൽവഴുതി പുഴയിൽ വീണതാണെന്നു സംശയിക്കുന്നു. ഫോറസ്റ്റ് ഉദ്യോഗസ്ഥർ സ്ഥലത്തെത്തിയെങ്കിലും നടപടികൾ സ്വീകരിക്കാൻ സാധിച്ചില്ല. പുഴയിലെ വെള്ളവും പ്രതികൂല കാലാവസ്ഥയുംമൂലം ജഡം പുഴയിൽനിന്ന് കരയ്ക്കെത്തിക്കാൻ സാധിച്ചിട്ടില്ല. കാഞ്ഞിരപ്പുഴ ഡാമിലേക്കാണ് പുഴയൊഴുകുന്നത്. കുടിവെള്ള പന്പിംഗിനായി ഉപയോഗിക്കുന്ന പുഴവെള്ളം കൂടിയായതിനാൽ എത്രയുംവേഗം കാട്ടാനയുടെ ജഡം പുറത്തെടുത്തു സംസ്കരിക്കണമെന്ന് ആവശ്യം ശക്തമാണ്. കുറെ നാളുകളായി പ്രദേശത്ത് കാട്ടാനകളുടെ ശല്യം രൂക്ഷമായിരുന്നു. ഇന്നലെയും പാലക്കയം അച്ചലേട്ടി ഭാഗത്ത് കാട്ടാനക്കൂട്ടം കൃഷിയിടങ്ങളിൽ എത്തിയിരുന്നു.

കെ.പി. ലോറൻസ് ഫൗണ്ടേഷൻ പ്രവർത്തനത്തിനു തുടക്കം

വടക്കഞ്ചേരി: മുതിർന്ന കോൺഗ്രസ് നേതാവും സാമൂഹ്യ പ്രവർത്തകനുമായിരുന്ന മേലാർകോട് കെ.പി. ലോറൻസിന്‍റെ സ്മരണാർഥം ചാരിറ്റബിൾ ഫൗണ്ടേഷൻ സ്ഥാപനത്തിനും പ്രവർത്തനത്തിനും തുടക്കമായി. വടക്കഞ്ചേരി ഡയാന ടവറിൽ മുൻമന്ത്രി വി.സി. കബീർ മാസ്റ്ററുടെ അധ്യക്ഷതയിൽ നടന്ന യോഗത്തിൽ ഫൗണ്ടേഷനു രൂപം നൽകി. കോൺഗ്രസ് നേതാക്കളായ എ. ഗോപിനാഥൻ മാസ്റ്റർ, കെ.വി. കണ്ണൻ, ചിറ്റിലഞ്ചേരി എംഎൻകെഎം ഹയർ സെക്കൻഡറി സ്കൂൾ മാനേജർ എം.എൻ. സുബ്രഹ്്മണ്യൻ, കേരകേസരി സി.ആർ. ഭവദാസ്, സരസ്വതി രാമചന്ദ്രൻ , ചിദംബരംകുട്ടി മാസ്റ്റർ, ചെന്താമരാക്ഷൻ എലവഞ്ചേരി, സുന്ദരൻ പന്നിയങ്കര, എം.കെ. അശോക് കുമാർ, കെ.എൽ. വിൻസന്‍റ് പ്രതാപ് പ്രസംഗിച്ചു. ഈ മാസം 31ന് അനുസ്മരണ പരിപാടികളും നിർധനർക്കുള്ള സഹായവിതരണവും നടക്കുമെന്നു ഫൗണ്ടേഷൻ ഭാരവാഹികൾ അറിയിച്ചു. ഭാരവാഹികളായി വി. കെ. ശ്രീകണ്ഠൻ എംപി, മുൻ മന്ത്രി വി.സി. കബീർ മാസ്റ്റർ, മുൻ എംഎൽഎ കെ.എ. ചന്ദ്രൻ- രക്ഷാധികാരികൾ, എ. ഗോപിനാഥൻ മാസ്റ്റർ- പ്രസിഡന്‍റ്, വി.കെ. ഭാമ ടീച്ചർ, ചെന്താമര എലവഞ്ചേരി, കെ.എൽ. വിൻസന്‍റ് പ്രതാപ്- വൈസ് പ്രസിഡന്‍റുമാർ. മേലാർകോട് പഞ്ചായത്ത് മെംബറും കോൺഗ്രസ് നേതാവുമായ കെ.വി. കണ്ണൻ- സെക്രട്ടറി, സരസ്വതി രാമചന്ദ്രൻ, എം.കെ. അശോക് കുമാർ, ഗോപകുമാർ മാസ്റ്റർ- ജോയിന്‍റ് സെക്രട്ടറിമാർ, കെ.എൽ. ഫ്രാൻസിസ്- ഖജാൻജി, കെ.ആർ. രാജു- ഓഡിറ്റർ എന്നിവരെ തെരഞ്ഞെടുത്തു.

മാലിന്യപ്രശ്നത്തിനു പരിഹാരമില്ല

വടക്കഞ്ചേരി: ടൗണിൽ കിഴക്കഞ്ചേരി റോഡിലുള്ള തിരക്കേറിയ ബസ് കാത്തിരിപ്പുകേന്ദ്രത്തിനുമുന്നിൽ പുഴുനിറഞ്ഞ മാലിന്യക്കൂമ്പാരം ഒഴിവാക്കാൻ നടപടിയായില്ല. മഴ പെയ്യുമ്പോൾ വെള്ളത്തിലൂടെ ഈ മാലിന്യകൂമ്പാരത്തിൽ നിന്നുള്ള അഴുക്കുവെള്ളം ബസ് കാത്തിരിപ്പുകേന്ദ്രത്തിനു മുന്നിലൂടെ ഒഴുകും. ദുർഗന്ധവും പുഴുക്കളും ഈച്ചയുമായുള്ള ഈ മലിനജലത്തിൽ ചവിട്ടി കടന്നുവേണം യാത്രക്കാർക്ക് ബസിൽ കയറിപ്പറ്റാൻ. മാലിന്യച്ചാക്കുകൾ തള്ളുന്നതും ഇപ്പോൾ ഇവിടെയായി. അഴുക്കുചാലുകൾ യഥാസമയം വൃത്തിയാക്കാത്തതിനാൽ മലിനജലം മുഴുവൻ റോഡിൽ പരന്നൊഴുകാൻ കാരണമാവുകയാണ്. ബസ് കാത്തിരിപ്പുകേന്ദ്രം മാലിന്യക്കൂമ്പാരമായതോടെ യാത്രക്കാർ മുന്നോട്ടും പിറകോട്ടും മാറിനിന്നാണ് ബസിൽ കയറുന്നത്.

മണ്ണാർക്കാട്- ചിന്നത്തടാകം റോഡ്: വിവാദം പുകയുന്നു

നവീകരണം വൈകുന്നതിനു കാരണം എംഎൽഎയും കരാറുകാരനും: സിപിഎം അഗളി: മണ്ണാർക്കാട്- ചിന്നത്തടാകം റോഡ് നവീകരണം സമയബന്ധിതമായി പൂർത്തീകരിക്കാൻ കഴിയാത്തതിനു കാരണം എംഎൽഎയും കരാറുകാരനുമാണെന്നു സിപിഎം അട്ടപ്പാടി ഏരിയ സെക്രട്ടറി സി.പി. ബാബു പത്രക്കുറിപ്പിലൂടെ അറിയിച്ചു. നവീകരണത്തിന്‍റെ ആദ്യഘട്ടം നെല്ലിപ്പുഴ മുതൽ ആനമൂളിവരെ എട്ടു കിലോമീറ്റർ നവീകരണത്തിന് 44.4 കോടി രൂപയ്ക്കാണ് ലീഗ് അനുകൂലിയായ കരാറുകാരൻ ഏറ്റെടുത്തത്. 2023 ഓഗസ്റ്റിൽ പ്രവർത്തനമാരംഭിച്ച നവീകരണപ്രവൃത്തികൾ 15 മാസത്തിനുള്ളിൽ പൂർത്തീകരിക്കേണ്ടതാണ്. ആകെയുള്ള എട്ടുകിലോമീറ്ററിൽ നാലര കിലോമീറ്ററാണ് രണ്ടര വർഷത്തിനുള്ളിൽ ടാറിംഗ് നടത്തിയിട്ടുള്ളത്. ഇക്കാലയളവിൽ എംഎൽഎ ഇടപെട്ട് രണ്ടുതവണയായി ജൂലൈ 31 വരെ കാലാവധി നീട്ടിക്കൊടുത്തിട്ടുണ്ട്. പണിപൂർത്തിയാക്കിയതിന് കരാറുകാരൻ സമർപ്പിച്ച ഇടക്കാല ബില്ലുകൾക്ക് കിഫ്ബി പണം അനുവദിച്ചിട്ടുമുണ്ട്. കള്ളപ്രചരണം നടത്തി കിഫ്ബിക്കും സർക്കാരിനെതിരെ ജനരോഷം ഇളക്കിവിടാൻ എംഎൽഎ അടക്കമുള്ളവരുടെ ബോധപൂർവമുള്ള ശ്രമമാണ് നടന്നുവരുന്നത്. എംഎൽഎ ഇടപെട്ട് കരാറുകാരനെ ബ്ലാക്ക് ലിസ്റ്റിൽ പെടുത്തണമെന്നും പണികൾ വേഗത്തിൽ നടത്താൻ കഴിവുള്ള മറ്റൊരു കരാറുകാരനെ നിയമിക്കണമെന്നും സി.പി. ബാബു ആവശ്യപ്പെട്ടു. വൈകലിനു കാരണം സർക്കാരും കിഫ്ബിയും: എംഎൽഎ അഗളി: അട്ടപ്പാടിയിൽ കിഫ്‌ബി ഏറ്റെടുത്തു നടപ്പാക്കുന്ന റോഡ് നവീകരണ കാലതാമസത്തിന് ഉത്തരവാദി സർക്കാരും കിഫ്ബിയുമാണെന്നു എംഎൽഎ എൻ. ഷംസുദ്ദീൻ. സിപിഎം അട്ടപ്പാടി ഏരിയ കമ്മിറ്റി തനിക്കെതിരെ ഇറക്കിയ പത്രക്കുറിപ്പിനോടു പ്രതികരിക്കുകയായിരുന്നു എംഎൽഎ. പൊതുമരാമത്ത് മന്ത്രിയും ധനകാര്യമന്ത്രിയുമാണ് കിഫ്ബി വർക്കുകൾ കൃത്യസമയത്ത് നോക്കി നടപ്പാക്കേണ്ടത്. കരാറുകാരനെ തെരഞ്ഞെടുക്കുന്നതും കിഫ്ബിയാണ്. ജൂലൈ 31 വരെ കാലാവധി നീട്ടിനൽകിയതും കിഫ്ബി തന്നെയാണ്. കരാറുകാരൻ ആവശ്യപ്പെട്ട പ്രകാരം വാട്ടർ പൈപ്പ്, ഇലക്ട്രിസിറ്റി മാറ്റിക്കൊടുക്കൽ, മരങ്ങൾ മുറിച്ചുനീക്കൽ, വകുപ്പുതലത്തിലുള്ള തർക്കങ്ങൾ എന്നിവയെല്ലാം താൻ ഇടപ്പെട്ട് പരിഹരിച്ചുനൽകി. ഷെഡ്യൂൾ പ്രകാരം മേയ് 31നകം നവീകരണ പ്രവർത്തനങ്ങൾ പൂർത്തീകരിക്കേണ്ടതാണ്. എന്നാൽ കരാറുകാരൻ ഫെബ്രുവരി മുതൽ ഉണർന്നു പ്രവർത്തിച്ചില്ല എന്നതാണ് വസ്തുത. ഇത് സംബന്ധിച്ച് കരാറുകാരനെതിരേ കിഫ്‌ബിയിൽ പരാതിയും നൽകിയിട്ടുണ്ട്. അട്ടപ്പാടി റോഡ് വികസനം സംബന്ധിച്ച് അസംബ്ലിയിൽ 10 തവണ സബ്മിഷൻ അവതരിപ്പിച്ചിട്ടുണ്ട്. നവീകരണ കാലതാമസത്തിന് കാരണം എംഎൽഎ ആണെന്ന് വാദം വിചിത്രമാണ്. 2002 ഡിസംബർ ആദ്യവാരം പൊതുമരാമത്ത് മന്ത്രി മുഹമ്മദ് റിയാസ് ചുരംറോഡ് സന്ദർശിക്കുകയും ഒരുവർഷത്തിനകം റോഡ് നിർമ്മാണം പൂർത്തീകരിക്കുമെന്നും ഓരോ മാസവും നിർമാണ പ്രവർത്തനങ്ങൾ വിലയിരുത്തുമെന്നും ഉറപ്പുനൽകിയെങ്കിലും ഒന്നും നടപ്പായില്ലന്നു എംഎൽഎ ചൂണ്ടിക്കട്ടി. നിലവിൽ സർക്കാരിന്‍റെ പോരായ്മ മറക്കാൻ തന്നെ കരുവാക്കുകയാണെന്നും എംഎൽഎ പറഞ്ഞു.

നീലഗിരി വനത്തിലേക്ക് വിനോദസഞ്ചാരികളെ നിയമവിരുദ്ധമായി കൊണ്ടുപോകുന്നു; അപകടഭീഷണി

കോയന്പത്തൂർ: നീലഗിരി ജില്ലയിലെ മസിനഗുടി, മുതുമല റിസർവുകളിലെ നിരോധിത പ്രദേശങ്ങളിലേക്ക് വിനോദസഞ്ചാരികളെ സ്വകാര്യ വാഹനങ്ങളിൽ കൊണ്ടുപോകുന്നുവെന്ന് ആക്ഷേപം. ജഗന്നാറൈ, മായാർ എന്നീ രണ്ട് ആനപ്പാതകളുണ്ട്. ആനകൾ ജനവാസ മേഖലകളിലേക്കും കൃഷിഭൂമികളിലേക്കും പ്രവേശിക്കുന്ന സംഭവങ്ങൾ വർധിച്ചു. നീലഗിരി ജില്ലയിലെ കുറുമ്പടി, ജഗന്നാറൈ റൂട്ടിലെ ജഗന്നാറൈ, മായാർ റൂട്ടിലെ സിരിയൂർ, മസിനഗുഡി, ബൊക്കപുരം, സിംഗാര, മാവനല്ല, വാഴൈത്തോട്ടം എന്നിവിടങ്ങളിലായി നൂറിലധികം സ്വകാര്യ ഹോട്ടലുകൾ ഉണ്ട്. പ്രകൃതി ടൂറിസത്തിന്‍റെ പേരിൽ നിരോധിത വനപ്രദേശങ്ങളിലേക്ക് റിസോർട്ട് മാനേജ്മെന്‍റ് കൊണ്ടുപോകുന്നു. അവർ നിബിഡവനത്തിൽ മൃഗങ്ങളെ കാണിച്ച് ഗണ്യമായ തുക ഈടാക്കുന്നു. 2013-ൽ സിംഗാര വന സംരക്ഷണ കേന്ദ്രത്തിലെ അച്ചകരൈ പ്രദേശത്ത് ഫോട്ടോ എടുക്കുകയായിരുന്ന ഇംഗ്ലണ്ടിൽ നിന്നുള്ള കോളിൻ എന്ന ടൂറിസ്റ്റും കുറച്ച് വർഷങ്ങൾക്ക് മുമ്പ് ഒരു ജർമൻ വനിതാ ടൂറിസ്റ്റും ആനയുടെ ആക്രമണത്തിൽ കൊല്ലപ്പെട്ടു. വനം വകുപ്പിന്‍റെ അനുമതിയില്ലാതെ റിസോർട്ട് മാനേജ്മെന്‍റ് വിദേശികളെ അനധികൃതമായി കാട്ടിലേക്ക് കൊണ്ടുപോകുകയായിരുന്നു. മസിനഗുഡിയിൽ നിരോധനം ലംഘിച്ച് വനം വകുപ്പ് വിനോദസഞ്ചാരികളെ കാട്ടിലേക്ക് കൊണ്ടുപോകുന്നത് സാധാരണമാണ്. അതിക്രമിച്ചു കയറുന്ന വിനോദസഞ്ചാരികൾക്ക് പിഴ ചുമത്തുകയും അവരുടെ വാഹനങ്ങൾ പിടിച്ചെടുക്കുകയും ചെയ്യുനമെന്ന് വനംവകുപ്പ് ഉദ്യോഗസ്ഥർ അറിയിച്ചു.

നന്ദിയോട് കനാൽപ്പാലത്തിന്‍റെ കൈവരി തകർന്നു

വണ്ടിത്താവളം: നന്ദിയോട് മൂലത്തറ ഇടതുകനാൽപ്പാലത്തിന്‍റെ കൈവരി നിലംപതിച്ചു. നന്ദിയോട് ഹൈസ്കൂളിലേക്ക് എത്തുന്ന വിദ്യാർഥികളും പ്രദേശത്തെ താമസക്കാരും നന്ദിയോട് ജംഗ്ഷനിൽ എത്തണമെങ്കിൽ കൈവരി തകർന്ന പാലം കടക്കണം. കനാലിൽ പൂർണതോതിൽ ജലമിറക്കിയാൽ പിന്നീട് പാലത്തിലൂടെ വിദ്യാർഥികളും പ്രായാധിക്യമുള്ളവരുടെ സഞ്ചാരവും തീർത്തും സുരക്ഷയില്ലാതെയാണ്. മേൽപ്പാടത്ത് താമസക്കാരായ 50 കുടുംബങ്ങളിലുള്ളവർ നന്ദിയോട് എത്തി വേണം ബസ് യാത്ര നടത്താൻ. എട്ട് മാസം മുന്പാണ് ബലക്ഷയം ഉണ്ടായ പാലത്തിന്‍റെ പടിഞ്ഞാറുവശത്തെ കൈവരി വീണ്ടുകീറി ദ്വാരമുണ്ടായത്. പാലത്തിന്‍റെ ദുർബലാവസ്ഥ ബന്ധപ്പെട്ട ജലസേചനവകുപ്പ് മേധാവികളെ ധരിപ്പിച്ചിരുന്നു. സ്ഥലം സന്ദർശിച്ച വകുപ്പ് ജീവനക്കാർ സംരക്ഷണ നടപടികൾ സ്വീകരിക്കുമെന്ന് പറഞ്ഞെങ്കിലും ഒന്നും സംഭവിച്ചില്ല. 1977 ൽ നിർമിച്ച പാലത്തിന്‍റെ അടിഭാഗം കോൺക്രീറ്റ് ഇളകി തുരുന്പിച്ച കമ്പികൾ തള്ളിയ നിലയിലാണുള്ളത്.

യൂത്ത് കോണ്‍ഗ്രസ് മണ്ഡലം കണ്‍വൻഷൻ

കാഞ്ഞിരപ്പുഴ: യൂത്ത് കോണ്‍ഗ്രസ് കാഞ്ഞിരപ്പുഴ മണ്ഡലം കമ്മിറ്റിയുടെ നേതൃത്വത്തിൽ മണ്ഡലം കണ്‍വൻഷൻ സംഘടിപ്പിച്ചു. മണ്ഡലം പ്രസിഡന്‍റ് പി.എം. സുനിൽ അധ്യക്ഷനായ പരിപാടി കെപിസിസി ജനറൽ സെക്രട്ടറി കെ.എ. തുളസി ഉദ്ഘാടനം ചെയ്തു. യൂത്ത് കോണ്‍ഗ്രസ് ജില്ലാ പ്രസിഡന്‍റ് കെ.എസ്. ജയഘോഷ്, ഡിസിസി ജനറൽ സെക്രട്ടറി സി. അച്യുതൻ, യൂത്ത് കോണ്‍ഗ്രസ് സംസ്ഥാന സെക്രട്ടറിമാരായ ഷഫീക്ക് അത്തിക്കോട്, ജിതേഷ് നാരായണൻ, ജില്ലാ ഭാരവാഹികളായ ഗിസാൻ മുഹമ്മദ്, ഇ.കെ. ജസീൽ, പി.ടി. അജ്മൽ, സേവാദൾ ജില്ലാ പ്രസിഡന്‍റ് ചെറൂട്ടി മുഹമ്മദ്, കോണ്‍ഗ്രസ് മണ്ഡലം കമ്മിറ്റി പ്രസിഡന്‍റ് ജോയ് ജോസഫ്, ചെറുകര ബേബി, ബ്ലോക്ക് പഞ്ചായത്ത് മെംബർ ബിജി ടോമി, പഞ്ചായത്ത് മെംബർമാരായ രാജൻ പുത്തൻവീട്ടിൽ, റീന സുബ്രഹ്മണ്യൻ, ശരത് കുമാർ, ടി.കെ. റഫീഖ്, ബാലചന്ദ്രൻ, ലിറാർ, കെ.എം. സുദേവൻ പാലേരി, കെ. രഞ്ജിത്, ഭാഗ്യപ്പൻ ഇരുന്പകച്ചോല, മണികണ്ഠൻ കാഞ്ഞിരം, ബിബു അക്കിയംപാടം, ടി. അനഘ, ഭരത് ടി. അക്ഷയ് തുടങ്ങിയവർ പ്രസംഗിച്ചു.

ബഷീർ ദിനാഘോഷം

മണ്ണാർക്കാട്: ചങ്ങലീരി ജാസ്മിൻ പൊതുജനവായനശാലയുടെ വായനപക്ഷാചരണത്തോടനുബന്ധിച്ച് ചങ്ങലീരി എയുപി സ്കൂൾ ലൈബ്രറിയിലേക്ക് ബഷീർ ദിനത്തിൽ വായനശാല വനിതാവേദിയുടെ ആഭിമുഖ്യത്തിൽ പുസ്തകങ്ങൾ നൽകി. ലൈബ്രറി കൗണ്‍സിൽ താലൂക്ക് പ്രസിഡന്‍റ് ഹബീബുള്ള മാസ്റ്റർ ഉദ്ഘാടനം ചെയ്തു. വൈക്കം മുഹമ്മദ് ബഷീർ അനുസ്മരണം ഹരിദാസൻ മാസ്റ്റർ നിർവഹിച്ചു. പൊതുവിദ്യാഭ്യാസവകുപ്പുമായി ചേർന്ന് ലൈബ്രറി കൗണ്‍സിൽ നടപ്പിലാക്കുന്ന എന്‍റെ പുസ്തകം, എന്‍റെ കുറിപ്പ്, എന്‍റെ എഴുത്തുപെട്ടി ഉദ്ഘാടനം വായനശാല ജോയിന്‍റ് സെക്രട്ടറി കെ. കൂളിക്കൻ വിദ്യാരംഗം സാഹിത്യവേദി കണ്‍വീനർ പ്രഭാവ് മാസ്റ്റർക്ക് നൽകി നിർവഹിച്ചു. ബഷീർ ക്വിസ് മത്സരം വിജയികൾക്കുള്ള സമ്മാനവിതരണം സ്കൂൾ മാനേജർ സിസ്റ്റർ ജനറ്റ് നിർവഹിച്ചു. സ്കൂൾ ലൈബ്രറിയിലേക്കുള്ള പുസ്തകവിതരണം വനിതാവേദി കണ്‍വീനർ ഒ.യു. സിന്ധു നിർവഹിച്ചു. വായനശാല പ്രസിഡന്‍റ് ഒ. സാബു സ്വാഗതം പറഞ്ഞു. ചങ്ങലീരി എയുപി സ്കൂൾ ഹെഡ്മിസ്ട്രസ് ജയലക്ഷ്മി അധ്യക്ഷത വഹിച്ചു. ഒ.യു. രതീഷ് നന്ദി പറഞ്ഞു. വായനശാല കമ്മിറ്റി അംഗങ്ങൾ ആയ കെ. അബ്ദുൾ അസീസ്, ശില്പ, നളിനി ലൈബ്രേറിയൻ ധന്യ എന്നിവരും പങ്കെടുത്തു.

അങ്കണവാടി വർക്കർ നിയമനത്തിൽ ക്രമക്കേടെന്ന് പരാതി

ശ്രീകൃഷ്ണപുരം: കരിമ്പുഴ ഗ്രാമപഞ്ചായത്തിലെ വിവിധ അങ്കണവാടികളിലേക്കുള്ള വർക്കർമാരുടെ നിയമനത്തിൽ വ്യാപകമായ ക്രമക്കേട് ഉള്ളതായി പരാതി. 548 പേർ പങ്കെടുത്ത ഇന്‍റർവ്യൂവിൽ നിന്നും 62 പേരുടെ ലിസ്റ്റ് കഴിഞ്ഞ ദിവസം പ്രസിദ്ധീകരിച്ചിരുന്നു. ഈ ലിസ്റ്റിലാണ് അഴിമതിയും സ്വജനപക്ഷപാതവും ഉള്ളതായി കാണിച്ച് രാഷ്ട്രീയപാർട്ടിക്കാരും ഉദ്യോഗാർഥികളും രംഗത്തുവന്നത്. മാനദണ്ഡങ്ങൾ എല്ലാം കാറ്റിൽ പറത്തി യുഡിഎഫ് അനുഭാവികളെ ആദ്യ പേരുകാരാക്കിയാണ് ലിസ്റ്റ് പ്രസിദ്ധീകരിച്ചതെന്ന് സിപിഎം ആരോപിച്ചു. മുൻപരിചയം ഉള്ളവർ, അങ്കണവാടിക്ക് സ്ഥലം നൽകിയവർ, വിധവകൾ, പട്ടികജാതിക്കാർ തുടങ്ങിയ അർഹത മാനദണ്ഡങ്ങൾ ലംഘിച്ച് ഇന്‍റർവ്യൂ ബോർഡിലുള്ള മുസ്ലിം ലീഗ് നേതാവിന്‍റെ കുടുംബക്കാരെ ആദ്യ പേരുകാരായി നൽകിയാണ് റാങ്ക് ലിസ്റ്റ് പ്രസിദ്ധീകരിച്ചിട്ടുള്ളതെന്നും സിപിഎം ആരോപിച്ചു. മാനദണ്ഡങ്ങൾ പാലിക്കാതെ തയ്യാറാക്കിയ ലിസ്റ്റ് റദ്ദാക്കണമെന്ന് ബ്ലോക്ക് കോൺഗ്രസ് പ്രസിഡന്‍റ് സുരേഷ് തെങ്ങിൻതോട്ടം ആവശ്യപ്പെട്ടു. നിലവിലെ ലിസ്റ്റുമായി മുന്നോട്ടു പോയാൽ കോടതിയെ സമീപിക്കുമെന്നും അദ്ദേഹം പറഞ്ഞു. പരാതികൾ പരിഹരിക്കണം ശ്രീകൃഷ്ണപുരം: കരിമ്പുഴ പഞ്ചായത്തിലെ അങ്കണവാടി വർക്കർമാരുടെ റാങ്ക് ലിസ്റ്റുമായി ബന്ധപ്പെട്ട ഉദ്യോഗാർഥികളുടെ പരാതികൾ പരിഹരിക്കണമെന്നും ലിസ്റ്റ് പുനഃപരിശോധിക്കണമെന്നും മുസ്ലിംലീഗ് പഞ്ചായത്ത് കമ്മിറ്റി ആവശ്യപ്പെട്ടു. ഇന്‍റർവ്യു ബോർഡിൽ ഒരാൾ മാത്രമാണ് മുസ്ലിംലീഗ് നേതൃനിരയിൽ നിന്നുള്ളത്. ബാക്കിയുള്ളവർ പഞ്ചായത്തിലെ വിവിധ രാഷ്ട്രീയ പാർട്ടി പ്രതിനിധികളും ഉദ്യോഗസ്ഥരുമാണ്. റാങ്ക് ലിസ്റ്റിൽ പിഴവ് സംഭവിച്ചിട്ടുണ്ടെങ്കിൽ പരിഹരിച്ച് മുന്നോട്ടു പോവണമെന്നും മുസ്ലിംലീഗ് കരിമ്പുഴ പഞ്ചായത്ത് പ്രസിഡന്‍റ് എൻ.ഹംസ, ജനറൽ സെക്രട്ടറി പി.മുഹമ്മദ് അലി എന്നിവർ ആവശ്യപ്പെട്ടു. ആരോപണങ്ങൾ തെറ്റിദ്ധാരണാജനകം: പഞ്ചായത്ത് പ്രസിഡന്‍റ് ശ്രീകൃഷ്ണപുരം: കരിമ്പുഴ ഗ്രാമപഞ്ചായത്തിൽ അങ്കണവാടി വർക്കർ റാങ്ക് ലിസ്റ്റുമായി ബന്ധപ്പെട്ട് നടക്കുന്ന ആരോപണങ്ങൾ തെറ്റിദ്ധാരണാജനകമാണെന്ന് കരിമ്പുഴ ഗ്രാമപഞ്ചായത്ത് പ്രസിഡന്‍റ് കെ.എം. ഹനീഫ പറഞ്ഞു. പഞ്ചായത്ത് ഭരണസമിതിയാണ് അങ്കണവാടി വർക്കർമാർക്കുള്ള ഇന്‍റർവ്യൂ നടത്തിയത് എന്ന പ്രചാരണം അടിസ്ഥാന രഹിതമാണ്. 9 അംഗ ഇന്‍റർവ്യു ബോർഡിൽ ഭരണസമിതിയിൽ നിന്നും ഗ്രാമപഞ്ചായത്ത് പ്രസിഡന്‍റ് എന്ന നിലക്ക് താൻ മാത്രമാണ് അംഗമായിട്ടുള്ളത്. മറ്റുള്ള അംഗങ്ങൾ പ്രമുഖ രാഷ്ട്രീയപാർട്ടി പ്രതിനിധികളും ഉദ്യോഗസ്ഥരുമാണ്. ഉദ്യോഗാർഥികളുടെ കൂടിക്കാഴ്ചയ്ക്ക് ശേഷം മാർക്ക് ലിസ്റ്റ് ഐസിഡിഎസ് അധികാരികളെ ഏൽപ്പിച്ചു. അവരാണ് മാർക്ക് ക്രോഡീകരിച്ച് ലിസ്റ്റ് തയ്യാറാക്കി പ്രസിദ്ധീകരിച്ചത്. പഞ്ചായത്ത് പ്രസിഡന്‍റിനെതിരേയും ഭരണസമിതിക്കെതിരേയും ഉള്ള ആരോപണങ്ങൾ അടിസ്ഥാനരഹിതം ആണെന്ന് പ്രസിഡന്‍റ് പറഞ്ഞു.

ചോലക്കാട് അമ്പലം പ്രദേശത്ത് കുടിവെള്ളമെത്തി

അഗളി: അട്ടപ്പാടി ചോലക്കാട് അമ്പലം പ്രദേശത്തെ 30 കുടുംബങ്ങൾക്ക് കുടിവെള്ള വിതരണം സാധ്യമായി. അഗളി ഗ്രാമപഞ്ചായത്ത് 17 ലക്ഷം രൂപ ചെലവഴിച്ചാണ് പദ്ധതി നടപ്പാക്കിയത്. ഗ്രാമപഞ്ചായത്ത് പ്രസിഡന്‍റ് അംബിക ലക്ഷ്മണൻ ഉദ്ഘാടനം ചെയ്തു. വാർഡ് മെംബർ സുമിത കൃഷ്ണകുമാർ അധ്യക്ഷയായി. വൈസ് പ്രസിഡന്‍റ് ശ്രീലക്ഷ്മി ശ്രീകുമാർ, പഞ്ചായത്ത് അംഗങ്ങളായ ജോസ് പനക്കമറ്റം, പരമേശ്വരൻ, നിത്യ ഷിജു, സിന്ധു ബാബു എന്നിവർ പ്രസംഗിച്ചു. ബിനോയ് സ്വാഗതവും സുനിൽ നന്ദിയും പറഞ്ഞു.

ഹൈടെക് മാർക്കറ്റ് കർഷകർക്ക് വൻസാധ്യതകൾ തുറക്കും: മന്ത്രി

പാലക്കാട്: ഹൈടെക് മാർക്കറ്റ് കർഷകർക്ക് വലിയ സാധ്യതകൾ തുറക്കുമെന്ന് മന്ത്രി എം.ബി രാജേഷ്. പെരുമാട്ടിയിൽ ഹൈടെക് മാർക്കറ്റ് ആൻഡ് അഗ്രോ പ്രൊസസിംഗ് യൂണിറ്റ് നിർമാണോദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. കർഷകർക്ക് ന്യായവില ഉറപ്പാക്കാനും കാർഷികമേഖലക്ക് ഉണർവേകാനും പദ്ധതിയിലൂടെ കഴിയും. മൊത്തവ്യാപാര മാർക്കറ്റ്, കാർഷിക ഉത്പന്നങ്ങളുടെ തരംതിരിക്കൽ, പാക്കിംഗിനുള്ള കേന്ദ്രം, മൂല്യവർധിത കാർഷിക ഉത്പന്നങ്ങൾക്കുള്ള കേന്ദ്രം എന്നീ സൗകര്യങ്ങൾ ഹൈടെക് മാർക്കറ്റിലൂടെ സാധ്യമാക്കുമെന്നും മന്ത്രി പറഞ്ഞു. മായം കലർത്താത്ത കൃഷിരീതി നടപ്പിലാക്കി പദ്ധതി മുന്നോട്ടുകൊണ്ടുപോകണമെന്ന് അധ്യക്ഷ പ്രസംഗത്തിൽ മന്ത്രി കെ.കൃഷ്ണൻകുട്ടി പറഞ്ഞു. പ്രാദേശിക കാർഷികോത്പന്നങ്ങൾക്ക് പുതിയ വിപണി സാധ്യതകളും കർഷകർക്ക് മികച്ച വരുമാനവുമാണ് ഹൈടെക് മാർക്കറ്റ് ആൻഡ് അഗ്രോ പ്രൊസസിംഗ് യൂണിറ്റിന്‍റെ പ്രധാന ലക്ഷ്യമെന്നും മന്ത്രി പറഞ്ഞു. പ്രാദേശിക കർഷകരുടെ ഉന്നമനം, ഗുണമേന്മയുള്ള കാർഷിക ഉത്പന്നങ്ങളുടെ ഉത്പാദനം, കർഷകരുടെ ജീവിതനിലവാരം മെച്ചപ്പെടുത്തൽ, കാർഷിക വിഭവങ്ങൾ അന്താരാഷ്ട്ര നിലവാരത്തിൽ കയറ്റുമതി ചെയ്യാനുള്ള സാധ്യതകളെല്ലാം ഹൈടെക് മാർക്കറ്റിലൂടെ സാധ്യമാകുമെന്നും മന്ത്രി കൂട്ടിച്ചേർത്തു. കെ.ബാബു എംഎൽഎ മുഖ്യാതിഥിയായി. ചീഫ് എൻജിനീയർ കെ.ജി. സന്ദീപ് റിപ്പോർട്ട് അവതരിപ്പിച്ചു. 2020-21 സാന്പത്തിക വർഷത്തെ ബജറ്റിൽ ഉൾപ്പെടുത്തി 10 കോടി രൂപ വിനിയോഗിച്ചാണ് ഹൈടെക് മാർക്കറ്റ് ആൻഡ് അഗ്രോ പ്രൊസസിംഗ് യൂണിറ്റിന്‍റെ ഒന്നാംഘട്ട നിർമാണ പ്രവർത്തനം നടത്തുന്നത്.

അഗളി ആശുപത്രിക്കുമുന്നിൽ കോൺഗ്രസ് പ്രതിഷേധം

അഗളി: കെട്ടിട അവശിഷ്ടങ്ങൾക്കിടയിൽപ്പെട്ട് വീട്ടമ്മയുടെ ജീവൻനഷ്ടമായ സംഭവത്തിൽ അഗളി കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ സർക്കാർ ആശുപത്രിക്കുമുമ്പിൽ പ്രതിഷേധയോഗം നടത്തി. സർക്കാരിന്‍റെയും ആരോഗ്യ വകുപ്പിന്‍റെയും ഗുരുതര അനാസ്ഥയാണ് സംഭവത്തിനു കാരണമെന്നു യോഗം ചൂണ്ടിക്കാട്ടി. മണ്ഡലം പ്രസിഡന്‍റ് ജോബി കൂരിക്കാട്ടിൽ ഉദ്ഘാടനം ചെയ്തു. കെപിസിസി അംഗം പി.സി. ബേബി,നേതാക്കളായ എൻ.കെ. രഘുത്തമൻ, ഷിബു സിറിയക്, കെ.ടി. ബെന്നി, യു.എ. മത്തായി, ജയ്സൺ ആന്‍റണി, ബിജു ജോസഫ്, ഷൈജു ജോസഫ്, സഫിൻ അട്ടപ്പാടി, മണികണ്ഠൻ, ഷാജി പോത്തനാമൂഴി, ചിത്ര തുടങ്ങിയവർ പങ്കെടുത്തു.

കത്തോലിക്ക കോൺഗ്രസ് മംഗലംഡാം ഫൊറോന സമിതി അനുമോദനം- 2025

മംഗലംഡാം: കത്തോലിക്ക കോൺഗ്രസ് മംഗലംഡാം ഫൊറോന സമിതിയുടെ നേതൃത്വത്തിൽ അനുമോദനം- 2025 സംഘടിപ്പിച്ചു. പത്താം ക്ലാസിലും പ്ലസ്ടുവിനും ഫുൾ എപ്ലസ് നേടിയ വിദ്യാർഥികളേയും വ്രതവാഗ്ദാനത്തിന്‍റെ സുവർണ ജൂബിലി ആഘോഷിക്കുന്ന സിസ്റ്റർ മേരി ആനി ( ഡൊട്ടേഴ്സ് ഓഫ് സെന്‍റ്പോൾ, മുംബൈ), സിഎ പൂർത്തിയാക്കിയ ടോണി ജേക്കബ് കാടൻകാവിൽ തുടങ്ങിയവരെ അനുമോദിച്ചു. വിദ്യാഭ്യാസ പ്രോത്സാഹനത്തിന്‍റെ ഭാഗമായി വിദ്യാർഥികൾക്ക് കാഷ് അവാർഡും മൊമെന്‍റോയും നൽകി. മംഗലംഡാം ഫൊറോന പള്ളി പാരീഷ് ഹാളിൽ നടന്ന അനുമോദന സമ്മേളനം ഫൊറോന വികാരി ഫാ. സുമേഷ് നാല്പതാംകളം ഉദ്ഘാടനം ചെയ്തു. ഫൊറോന പ്രസിഡന്‍റ് ബെന്നി മറ്റപ്പള്ളിൽ അധ്യക്ഷത വഹിച്ചു. ഫൊറോന ഡയറക്ടർ ഫാ. സജി വട്ടുകുളം മുഖ്യപ്രഭാഷണം നടത്തി. രൂപത ജനറൽ സെക്രട്ടറി ആന്‍റണി കുറ്റിക്കാടൻ, രൂപത എക്സിക്യൂട്ടീവ് അംഗം ബിനു മുളമ്പള്ളിൽ, രൂപത സെക്രട്ടറി സേവ്യർ കലങ്ങോട്ടിൽ, പഞ്ചായത്ത് മുൻ മെംബർ ബെന്നി ജോസഫ് പ്രസംഗിച്ചു.

നിപ്പ: ജില്ലയിൽ കനത്ത ജാഗ്രത

പാലക്കാട്: ജില്ലയിൽ നിപ്പ രോഗം സ്ഥീരീകരിച്ച സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്നു അധികൃതർ. പ്രത്യേക ജാഗ്രതാ നിർദേശവും പുറപ്പെടുവിച്ചിട്ടുണ്ട്. കണ്ടെയ്മെന്‍റ് സോണിലുള്ളവർ അനാവശ്യമായി കൂട്ടം കൂടരുത്. എൻ-95 മാസ്ക് നിർബന്ധമായും ധരിക്കണം. കണ്ടെയിൻമെന്‍റ് സോണിൽ നിന്നും പുറത്തേക്കുള്ള യാത്രകൾ ഒഴിവാക്കണം. ഐസൊലേഷൻ, ക്വാറന്‍റൈനിൽ കഴിയുന്നവർ നിർബന്ധമായും എൻ-95 മാസ്ക് ധരിക്കേണ്ടതാണ്. കൃത്യമായും ക്വാറന്‍റൈൻ മാനദണ്ഡങ്ങൾ പാലിക്കണം. ശുചിമുറിയുള്ള റൂമിൽതന്നെ ക്വാറന്‍റൈനിൽ ഇരിക്കുക. ആരുമായും സമ്പർക്കത്തിൽ വരാതെ പ്രത്യേകം ശ്രദ്ധിക്കണം. അവരെ പരിചരിക്കുന്ന വീട്ടിലുള്ള എല്ലാവരും മാസ്ക് എപ്പോഴും ധരിക്കണം. കൈകൾ ഇടയ്ക്കിടയ്ക്ക് സോപ്പും വെള്ളവും ഉപയോഗിച്ചോ സാനിറ്റൈസർ ഉപയോഗിച്ചോ അണുവിമുക്തമാക്കേണ്ടതാണ്. പനി, ചുമ, തലവേദന, ശ്വാസതടസം, മാനസിക വിഭാന്ത്രി, ബോധക്ഷയം തുടങ്ങിയ രോഗലക്ഷണങ്ങളുള്ളവർ ഉടൻതന്നെ വിവരം അടുത്തുള്ള ആരോഗ്യ പ്രവർത്തകരെ ഫോൺ മുഖാന്തിരം അറിയിക്കുകയോ കൺട്രോൾ റൂം നമ്പറിലേക്ക് 0491 - 2504002 വിളിക്കുകയോ ചെയ്യണമെന്നും നിർദേശമുണ്ട്. തച്ചനാട്ടുകര പഞ്ചായത്തിൽ വാർഡ്-7 (കുണ്ടൂർക്കുന്ന്) വാർഡ്- 8 (പാലോട് ) വാർഡ്- 9 (പാറമ്മൽ) വാർഡ്- 11 (ചാമപറമ്പ്) കരിമ്പുഴ പഞ്ചായത്തിൽ വാർഡ്- 17 (ആറ്റശ്ശേരി ) വാർഡ്- 18 ( ചോളക്കുറിശ്ശി) എന്നിവയാണ് നിലവിലെ കണ്ടെയ്ൻമെന്‍റ് സോണുകൾ.

നിരത്തുകൾ കീഴടക്കി തെരുവുനായ്ക്കൂട്ടം

കല്ലടിക്കോട്: ചെറുറോഡുകൾ കൈയടക്കി തെരുവുനായ്ക്കൂട്ടം. പത്തും ഇരുപതും നായകളാണ് കൂട്ടമായി വഴികളിലൂടെ സഞ്ചരിക്കുന്നത്. ഇവ ആളുകളെ ആക്രമിക്കുന്നതും പതിവാണ്. കരിമ്പ പഞ്ചായത്തിലെ കല്ലടിക്കോട്, ടിബി, ദീപ, മാപ്പിളസ്കൂൾ, ഇരട്ടക്കൽ, കൂരിക്കുന്ന്, വാക്കോട്, പാങ്ങ്, ചുങ്കം, കല്ലടി തുടങ്ങി നിരവധി സ്ഥലങ്ങളിലും തെരുവുനായ്ക്കളുടെ ശല്യം രൂക്ഷമാണ്. കഴിഞ്ഞ രണ്ടാഴ്ച മുൻപ് വാക്കോട് ഉന്നതിയിൽ വീട്ടിലെ പശുവിനെ കടിച്ചു പരിക്കേൽപ്പിച്ചിരുന്നു. ഇപ്പോഴും പശുവിനു പ്രതിരോധ കുത്തിവയ്പ്പുകൾ തുടരുകയാണ്. ഉന്നതിയിൽ വളർത്തുന്ന മറ്റു നായകൾക്കെല്ലാം പ്രതിരോധ കുത്തിവയ്പ്പെടുക്കുകയും ചെയ്‌തു. രണ്ടുദിവസങ്ങൾക്കു മുമ്പാണ് സ്കൂളിൽനിന്നും മടങ്ങുകയായിരുന്ന യുവതിയെ നായകടിച്ചത്. രാവിലെ മദ്രസ്സയിലേക്കുപോകുന്ന കുട്ടികൾക്കെതിരെയും നായകളുടെ അക്രമമുണ്ടാകുന്നുണ്ട്, സ്കൂൾ വിദ്യർഥികളും ഇരുചക്ര വാഹനയാത്രികരും ഭയന്നാണ് യാത്ര ചെയ്യുന്നത്. ശക്തമായ നടപടി എടുക്കണമെന്നാണു നാട്ടുകാരുടെ ആവശ്യം.

സ്മാര്‍ട്ട് അങ്കണവാടികളുടെയും വിവിധ റോഡുകളുടെയും നിർമാണോദ്ഘാടനം

ആലത്തൂർ: കാവശ്ശേരി ഗ്രാമപഞ്ചായത്തിലെ വിവിധ റോഡുകളുടെയും, സ്മാര്‍ട്ട് അങ്കണവാടികളുടെയും നിർമാണോദ്ഘാടനം പി.പി സുമോദ് എംഎൽഎ നിർവഹിച്ചു. 2023-24 സാമ്പത്തിക വര്‍ഷത്തിലെ സംസ്ഥാന ബജറ്റില്‍ 20 ശതമാനം ടോക്കണ്‍ പ്രൊവിഷനില്‍ ഉള്‍പ്പെടുത്തിയാണ് ഈ പദ്ധതികള്‍ക്കു തുടക്കം കുറിക്കുന്നത്. ഒരുകോടിരൂപ ചെലവില്‍ ചുണ്ടക്കാട്, കുമ്പാരത്തറ പുഴക്കല്‍ റോഡുകളാണ് നവീകരിക്കുന്നത്. മൂന്നുകോടി രൂപ ചെലവില്‍ തെക്കുമണ്ണ്, കോങ്ങാട്ടുമുറി, ചികോട് എന്നിവിടങ്ങളില്‍ അത്യാധുനിക സൗകര്യങ്ങളോടുകൂടിയ സ്മാര്‍ട്ട് അങ്കണവാടികളും നിര്‍മിക്കുമെന്നു എംഎൽഎ പറഞ്ഞു. ചടങ്ങിൽ കാവശ്ശേരി ഗ്രാമപഞ്ചായത്ത് പ്രസിഡന്‍റ് സി. രമേഷ് കുമാര്‍ അധ്യക്ഷത വഹിച്ചു. ചുണ്ടക്കാട് തീപ്പെട്ടിക്കമ്പനി അങ്കണത്തില്‍ നടന്ന പരിപാടിയിൽ ആലത്തൂർ ബ്ലോക്ക് പഞ്ചായത്ത് മെംബർമാരായ എസ്. ജയകൃഷ്ണൻ, ആസാദ് സുലൈമാൻ, വാസുദേവൻ തെന്നിലാപുരം, കാവശ്ശേരി ഗ്രാമപഞ്ചായത്ത് വൈസ് പ്രസിഡന്‍റ് ഉഷാദേവി സതീശൻ, സ്റ്റാന്‍റിംഗ് കമ്മിറ്റി ചെയർമാൻമാരായ മണി വാവുള്ളിപ്പതി, ഗിരിജ രാജൻ, ബീന ഗോപി, കാവശ്ശേരി ഗ്രാമപഞ്ചായത്ത് മെംബർമാരായ സുചിത്ര,കേശവദാസ് മാസ്റ്റർ, ചാത്തൻ മാസ്റ്റർ, നിത്യ,ടി. കാവശ്ശേരി ഗ്രാമ പഞ്ചായത്ത് സെക്രട്ടറി മാലതി വേലായുധൻ, ഐസിഡിഎസ് സൂപ്പർവൈസർ നിമിഷ പങ്കെടുത്തു.

മാർ ഈവാനിയോസ് അനുസ്മരണവും പദയാത്രയും

കല്ലടിക്കോട്: പുനരൈക്യ പ്രസ്ഥാനത്തിന്‍റെ പ്രണേതാവും മലങ്കര സുറിയാനി കത്തോലിക്ക സഭയുടെ സ്ഥാപകനുമായ ധന്യൻ മാർ ഈവാനിയോസ് പിതാവിന്‍റെ എഴുപത്തിരണ്ടാമത് ഓർമപ്പെരുന്നാൾ കരിമ്പ മേഖലയുടെ ആഭിമുഖ്യത്തിൽ കരിമ്പ നിർമലഗിരി സെന്‍റ്മേരീസ് മലങ്കര സുറിയാനി കത്തോലിക്ക തീർഥാടന പള്ളി അങ്കണത്തിൽ നടത്തി. കൂരിയ ബിഷപ് ഡോ. ആന്‍റണി മാർ സിൽവാനോസ് എപ്പിസ്കോപ്പ തിരുനാളിനു മുഖ്യകാർമികത്വം വഹിച്ചു. ഭക്തിനിർഭരമായ പദയാത്ര കാഞ്ഞിക്കുളം ഹോളി ഫാമിലി പള്ളി അങ്കണത്തിൽ നിന്നും ചിറക്കൽപ്പടി സെൻറ് ജോർജ് ദേവാലയം അങ്കണത്തിൽ നിന്നും ആരംഭിച്ചു നിർമ്മലഗിരി മരിയൻ തീർത്ഥാടന പള്ളി അങ്കണത്തിൽ സംഗമിച്ചു. മേഖല ഫാ. ചെറിയാൻ ചെന്നിക്കര, ഫാ. പൗലോസ് കിഴക്കനേടത്ത്, ഫാ. കുര്യാക്കോസ് മാമ്പ്രക്കാട്ട്, ഫാ.മരിയ ജോൺ, ഫാ.ജോസഫ് പുല്ലുകാലായിൽ, ഫാ. ജേക്കബ് കൈലാത്ത്, ഫാ.പൗലോസ് പരിയാരത്ത് എന്നിവർ നേതൃത്വം നൽകി. വിവിധ ഭക്തസംഘടനകളുടെ സംയുക്താഭിമുഖ്യത്തിൽ സംഘടിപ്പിച്ച അനുസ്മരണ പദയാത്രയിലും ആഘോഷമായ വിശുദ്ധ കുർബാനയിലും പൊതുസമ്മേളനത്തിലും കോയമ്പത്തൂർ സെന്‍റ് തോമസ്, ആരോഗ്യമാത മിഷൻ, ഒലവക്കോട്, കോങ്ങാട്, കാഞ്ഞിക്കുളം, ജെല്ലിപ്പാറ,ചിറക്കൽപ്പടി, ഇരുമ്പാമുട്ടി,മണ്ണാർക്കാട്, കരിമ്പ ഇടവകകളിൽ നിന്നുമുള്ള വിശ്വാസികൾ പങ്കെടുത്തു. സൺഡേ സ്കൂളിലും പൊതു പരീക്ഷകളിലും മികച്ച നേട്ടങ്ങൾ കൈവരിച്ചവരെയും ആദരിച്ചു. മലങ്കര കത്തോലിക്ക യുവജന പ്രസ്ഥാനം കരിമ്പ മേഖല 2025-26 വർഷ കർമ പദ്ധതികളുടെ പ്രഖ്യാപനവും നടത്തി. ആശിർവാദത്തിനുശേഷം സ്നേഹ വിരുന്നോടുകൂടി അനുസ്മരണ സമ്മേളനം സമാപിച്ചു.

സുരക്ഷാ പദ്ധതിയുമായി കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ

വടക്കഞ്ചേരി: കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ വടക്കഞ്ചേരി യൂണിറ്റിന്‍റെ നേതൃത്വത്തിൽ സുരക്ഷാ പദ്ധതി വിശദീകരണ യോഗവും ബോണ്ട് വിതരണവും നടന്നു. അംഗങ്ങൾക്ക് പത്തുലക്ഷം രൂപയുടെ സാമ്പത്തിക സുരക്ഷ ഉറപ്പാക്കുന്ന ഈപദ്ധതി മരണപ്പെടുന്ന അംഗങ്ങളുടെ ആശ്രിതർക്ക് വലിയൊരു കൈത്താങ്ങാകുമെന്നു ഭാരവാഹികൾ പറഞ്ഞു. റോയൽ ജംഗ്ഷനിലെ ഷാ പാലസ് ഹോട്ടൽ ഹാളിൽ നടന്ന പരിപാടി സംസ്ഥാന സെക്രട്ടറിയും സുരക്ഷാ പദ്ധതി സംസ്ഥാന ചെയർമാനുമായ പി.എം. ഷിനാജ് റഹ്്മാൻ ഉദ്ഘാടനം ചെയ്തു. യൂണിറ്റ് പ്രസിഡന്‍റ് പി.ജി. ഗോപിനാഥ് അധ്യക്ഷത വഹിച്ചു. അസോസിയേഷൻ ജില്ലാ പ്രസിഡന്‍റ് സി. സന്തോഷ് മുഖ്യപ്രഭാഷണം നടത്തി. സുരക്ഷാ പദ്ധതി ജില്ലാ ചെയർമാൻ എം. കുഞ്ചപ്പൻ, ജില്ലാ വർക്കിംഗ് പ്രസിഡന്‍റ് സഫീർ, യൂണിറ്റ് സെക്രട്ടറി എ.അബ്ദുൾ നാസർ പ്രസംഗിച്ചു.

വിദ്യാർഥികളെ അനുമോദിച്ച് കോരഞ്ചിറ സൗഹൃദ ചാരിറ്റബിൾ സൊസൈറ്റി

വടക്കഞ്ചേരി: കോരഞ്ചിറ സൗഹൃദ ചാരിറ്റബിൾ സൊസൈറ്റിയുടെ നേതൃത്വത്തിൽ എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാർഥികളെ അനുമോദിച്ചു. കിഴക്കഞ്ചേരി പഞ്ചായത്ത് പ്രസിഡന്‍റ് കവിത മാധവൻ ഉദ്ഘാടനം ചെയ്തു. ടി.സി. ഗീവർഗീസ് മാസ്റ്റർ, അഡ്വ.വി.കെ.സണ്ണി, മജീഷ്യൻ പ്രേംദാസ്, ഭാരവാഹികളായ എൽദോസ് മാത്യു, ഫൈസൽ, കെ.കെ. മത്തായി, ബൈജു പോൾ പ്രസംഗിച്ചു. ഒരു കൂട്ടം ചെറുപ്പക്കാർ രൂപംകൊടുത്ത സൗഹൃദ ചാരിറ്റബിൾ സൊസൈറ്റി കിടപ്പുരോഗികൾക്ക് കട്ടിൽ, എയർബെഡ്, വീൽചെയർ, വാക്കർ, എന്നീ ഉപകരണങ്ങൾ ആവശ്യക്കാർക്ക് ലഭ്യത അനുസരിച്ച് കൊടുക്കുന്നുണ്ടെന്നു ഭാരവാഹികൾ പറഞ്ഞു. വിമാനയാത്ര സ്വപ്നമായി മനസിൽ സൂക്ഷിക്കുന്നവർക്കും സൗഹൃദയുടെ സഹായമുണ്ട്. ആഗ്രഹമുള്ളവരെ കണ്ടെത്തി വിമാനയാത്രയും കൂട്ടായ്മ സംഘടിപ്പിക്കുന്നുണ്ട്.

ആരോഗ്യമന്ത്രി രാജിവയ്ക്കണമെന്നാവശ്യപ്പെട്ട് കോട്ടോപ്പാടം ആരോഗ്യകേന്ദ്രം ഉപരോധിച്ചു

കോട്ടോപ്പാടം: ആരോഗ്യമന്ത്രി രാജിവയ്ക്കണമെന്നാവശ്യപ്പെട്ട് കോട്ടോപ്പാടം ഫാമിലി ഹെൽത്ത് സെന്‍ററിലേക്ക് കോൺഗ്രസ് പ്രതിഷേധമാർച്ച് നടത്തി. മാർച്ച് ബ്ലോക്ക് കോൺഗ്രസ് പ്രസിഡന്‍റ് അസീസ് ഭീമനാട് ഉദ്ഘാടനം ചെയതു. മണ്ഡലം കോൺഗ്രസ് പ്രസിഡന്‍റ് മനച്ചിതൊടി ഉമ്മർ അധ്യക്ഷനായി. പി. മുരളീധരൻ, ബ്ലോക്ക് കോൺഗ്രസ് വൈസ് പ്രസിഡന്‍റുമാരായ കെ.ജി. ബാബു, സി.ജെ. രമേഷ്. സി. എം. അസീസ്, നാസർ വേങ്ങ, ഷിഹാബ് കുന്നത്ത്, കൃഷ്ണ പ്രസാദ്, അൻവർ സാജി, സുകുമാരൻ, അഷറഫ് ഭീമനാട്, ശശി ഭീമനാട്, എ.വി. മത്തായി, സി.എം. മജീദ്, കെ.കെ. സെയതലവി, അസൈനാർ മണലടി, മൊയ്തു കാഞ്ഞിരംകുന്ന്, വേണു കച്ചേരിപറമ്പ്, എ. ദീപ, കെ. വിനീത. അസീസ് ആലായൻ, വി. ചന്ദ്രൻ, വി. സാറ, നിജോ വർഗീസ്, ഉസമാൻ അമ്പലപ്പാറ, അലി ചുങ്കൻ, സി.ടി. ഉമ്മർ, ടി. കുഞ്ഞിപ്പ, സാനിർ ബാബു എന്നിവർ പ്രസംഗിച്ചു.

കയറാടി മൃഗാശുപത്രിയിൽ ഡോക്ടറുടെ സേവനം നിലച്ചിട്ടു മൂന്നുമാസം

നെന്മാറ: അയിലൂർ കയറാടി മൃഗാശുപത്രിയിൽ മൃഗഡോക്ടറുടെ സേവനം നിലച്ചിട്ടു മൂന്നുമാസം കഴിഞ്ഞു. അയിലൂർ പഞ്ചായത്തിലെ കാലിവളർത്തൽകാരുടെ പ്രധാന ചികിത്സാകേന്ദ്രമായിരുന്നു കയറാടിയിൽ പ്രവർത്തിച്ചിരുന്ന മൃഗാശുപത്രി. അയിലൂർ പഞ്ചായത്തിലെ ഏക മൃഗാശുപത്രിയാണ് കയറാടിയിൽ സ്ഥിതിചെയ്യുന്നത്. പ്രദേശത്തെ അടിപ്പെരണ്ട, കല്ലംപറമ്പ്, മാങ്കുറശ്ശി, കയറാടി, അയിലൂർ എന്നീ അഞ്ചു ക്ഷീരസഹകരണ സംഘങ്ങളിലെ കർഷകർ പ്രധാനമായും ആശ്രയിച്ചിരുന്ന കേന്ദ്രമാണിത്. നിലവിൽ അത്യാവശ്യമരുന്നുവിതരണവും കുത്തിവയ്പ്പുകളും മാത്രം നടത്താൻ ഒരു ലൈവ് സ്റ്റോക്ക് ഇൻസ്പെക്ടറുടെ സേവനം മാത്രമാണ് നിലവിൽ ലഭ്യമായിരിക്കുന്നത്. ക്ഷീരകർഷകരുടെ ഉരുക്കളുടെ ചികിത്സയും ഗൃഹസന്ദർശനവും, പഞ്ചായത്ത് മുഖേന നടപ്പാക്കുന്ന വിവിധ മൃഗസംരക്ഷണ പദ്ധതികളുടെ നടത്തിപ്പും ആനുകൂല്യ വിതരണവും നടത്തേണ്ട സ്ഥാപനമാണ് ഡോക്ടർ ഇല്ലാത്തതു മൂലം ബുദ്ധിമുട്ടിലായത്. ക്ഷീരകർഷകർ പശു, എരുമ എന്നിവയുടെ പ്രസവ ചികിത്സയ്ക്കുപകരം സംവിധാനം ഇല്ലാതെ വലയുകയാണ്. സ്ഥലംമാറിയ ഡോക്ടർക്കു പകരം പുതിയ ഡോക്ടറെ നിയമിച്ചില്ല. പോത്തുണ്ടി മൃഗാശുപത്രി ഡോക്ടർക്കാണ് അധിക ചുമതല. ആഴ്ചയിൽ ഒരിക്കൽ ഡോക്ടർ എത്തണമെന്നാണ് ഉത്തരവെങ്കിലും ഡോക്ടറുടെ സേവനം അപൂർവ്വം. മുൻ ഡോക്ടർ സ്ഥലംമാറ്റംവാങ്ങി പോകുമ്പോഴാണ് 15 കിലോമീറ്റർ അകലെയുള്ള പോത്തുണ്ടി മൃഗാശുപത്രി ഡോക്ടർക്കു അധിക ചുമതല നൽകിയത്.

ജനപ്രതിനിധികളും വകുപ്പ് തലവന്മാരുമില്ലാതെ താലൂക്ക് വികസനസമിതി യോഗം പ്രഹസനം

ചിറ്റൂർ: ജനപ്രതിനിധികളും പ്രധാനപ്പെട്ട വകുപ്പുദ്യോഗസ്ഥരും ഇല്ലാതെ വികസന സമിതി യോഗം പ്രഹനനമാവുന്നതായി കഴിഞ്ഞ ദിവസം നടന്ന താലൂക്ക് വികസനസമിതി യോഗത്തിൽ ആരോപണം. വിവിധ വകുപ്പുകളിൽ നിന്നും വിരലിലെണ്ണാവുന്ന ഉദ്യോഗസ്ഥർ മാത്രമാണ് യോഗത്തിൽ പങ്കെടുക്കുന്നത്. പങ്കെടുക്കാതിരുന്ന ഉദ്യോഗസ്ഥർ വിശദീകരണം രേഖാമൂലം അറിയിക്കണമെന്നു തഹസിൽദാർ പതിവു നടപടി ആവർത്തിച്ചു. തുടർന്ന് ചടങ്ങിനുമാത്രമായി വിവിധ വകുപ്പുകളിലെ പ്രശ്നങ്ങൾ ചോദിച്ചറിഞ്ഞ് യോഗം അവസാനിപ്പിച്ചു. കഴിഞ്ഞ താലൂക്ക് വികസന സമിതി യോഗത്തിൽ ഉന്നയിച്ച പ്രശ്നങ്ങളിൽ നടത്തിയ ഇടപെടലുകളെക്കുറിച്ച് ശനിയാഴ്ച ചേർന്ന യോഗത്തിൽ ചർച്ച ചെയ്തെങ്കിലും നടപടിയെടുത്ത വിഷയങ്ങൾ കുറവായിരുന്നു. കഴിഞ്ഞ താലൂക്ക് വികസനസമിതി യോഗത്തിൽ കനാൽ ബണ്ട് പൊട്ടി വെള്ളമൊഴുകി പുരയിടത്തിൽ എത്തുന്നതു തടയണമെന്ന അത്തിക്കോട് സ്വദേശി ഗണേഷ് ബാബു പരാതി നൽകിയിരുന്നു. കനാൽ ബണ്ടിന്‍റെ വശങ്ങൾകെട്ടി സംരക്ഷിക്കുന്നതിനായി 15 ലക്ഷം രൂപയുടെ എസ്റ്റിമേറ്റ് കണക്കാക്കി അനുമതിക്കുവേണ്ടി സമർപ്പിച്ചിട്ടുണ്ടെന്നും തുക ലഭിക്കുന്ന മുറയ്ക്കു നടപടിയുണ്ടാവുകയുള്ളൂവെന്നും വാട്ടർ അഥോറിറ്റി അസിസ്റ്റന്‍റ് എൻജിനീയറുടെ വിശദീകരണം. യോഗത്തിൽ കെ. ബാബു എംഎൽഎ അധ്യക്ഷനായി. തഹസിൽദാർ എം.പി. ആനന്ദകുമാർ, ഭൂരേഖ തഹസിൽദാർ കെ.വി.സനൽകുമാർ, ഡെപ്യൂട്ടി തഹസിൽദാർ ആർ. രമേശ് തുടങ്ങിയവർ ചർച്ചയിൽ പങ്കെടുത്തു.

ബഷീർ കഥാപാത്രങ്ങളായി പേഴുംകര മോഡൽ ഹൈസ്കൂളിലെ കുരുന്നുകൾ

പാലക്കാട്: ബഷീർ ദിനത്തോടനുബന്ധിച്ച് പേഴുംകര മോഡൽ ഹൈസ്കൂളിൽ മലയാളംക്ലബിന്‍റെ ആഭിമുഖ്യത്തിൽ വിവിധ പ്രവർത്തനങ്ങൾ നടത്തി. മൂന്ന്, നാല് ക്ലാസുകളിലെ കുട്ടികൾ ബഷീർ കഥാപാത്രങ്ങളായി അണിനിരന്നു. ബഷീർ, പാത്തുമ്മ , സാറാമ്മ, ആനവാരി രാമൻ നായർ, ഖദീജ, സൈനബ എന്നീ കഥാപാത്രങ്ങളായാണ് കുട്ടികൾ അരങ്ങുവാണത്. പ്രസംഗം, പാട്ട്, പുസ്തകപരിചയം, ചിത്രരചന എന്നിവയും സംഘടിപ്പിച്ചു. പ്രിൻസിപ്പൽ എം.പി. പുഷ്പരാജ് , അഡ്മിനിസ്ട്രേറ്റർ ഡി.എം. മുഹമ്മദ് ഷെരീഫ് , മാനേജർ എൻ.പി. മുഹമ്മദ് അഷ്റഫ്, ദിവ്യ, ഫൗസിയ, സൗമ്യ, റംസാന, ഷഹാന, ഹസ്മാബി, ഷാഹിന, വിജയശ്രീ എന്നീ അധ്യാപകർ നേതൃത്വം നൽകി.

ഔദ്യോഗിക പാന്പുപിടിത്തക്കാരായി 73 പേർകൂടി

പാലക്കാട്: ജില്ലയിൽ ഔദ്യോഗിക പാന്പുപിടിത്തക്കാരായി 73 പേർ കൂടി. വനമഹോത്സവത്തിന്‍റെ ഭാഗമായി സോഷ്യൽ ഫോറസ്ട്രി വിഭാഗം സംഘടിപ്പിച്ച പരിശീലനത്തിൽ പങ്കെടുത്ത 84 പേരിൽ നിന്ന് വിജയകരമായി പൂർത്തിയാക്കിയവരാണ് പുതിയതായി ജില്ലയിൽ മിഷൻ സർപ്പയുടെ ഭാഗമായത്. പരിശീലന പരിപാടിയുടെ സമാപനവും തെരഞ്ഞെടുത്ത വോളന്‍റിയർമാർക്കുള്ള റസ്ക്യൂ കിറ്റ് വിതരണവും ജില്ലാകളക്ടർ ജി. പ്രിയങ്ക നിർവഹിച്ചു. ഈസ്റ്റേൺ സർക്കിൾ ചീഫ് ഫോറസ്റ്റ് കൺസർവേറ്റർ കെ. വിജയാനന്ദൻ അധ്യക്ഷത വഹിച്ചു. അസിസ്റ്റന്‍റ് സൂപ്രണ്ട് ഓഫ് പോലീസ് രാജേഷ്കുമാർ വിശിഷ്ടാതിഥിയായി. പാലക്കാട് ഡിഎഫ്ഒ രവികുമാർ മീണ, അസിസ്റ്റന്‍റ് ഫോറസ്റ്റ് കൺസർവേറ്റർമാരായ വൈ. മുഹമ്മദ് അൻവർ, സി.പി. അനീഷ്, സുമു സ്കറിയ, റേഞ്ച് ഫോറസ്റ്റ് ഓഫീസർ കെ.പി. ജിനേഷ്, അനന്യ എന്നിവർ പ്രസംഗിച്ചു. റേഞ്ച് ഫോറസ്റ്റ് ഓഫീസർമാരായ വി. വിവേക് , കെ.ജി. ജെറിൻ ആന്‍റണി, ഗ്രേഡ് ഡെപ്യൂട്ടി റേഞ്ച് ഓഫീസർ ബി.എസ്. ഭദ്രകുമാർ എന്നിവർ പരിശീലനത്തിനു നേതൃത്വം നൽകി.

വന്യജീവികൾ എത്താതിരിക്കാൻ ആധുനിക സൗകര്യം ഒരുക്കണം

അഗളി: വന്യജീവികൾ ജനവാസകേന്ദ്രത്തിൽ കടക്കാത്തവിധം ആധുനികസംവിധാനം ഏർപ്പെടുത്തണമെന്നു സിപിഐ ജില്ലാ അസിസ്റ്റന്‍റ് സെക്രട്ടറി പൊറ്റശ്ശേരി മണികണ്ഠൻ. അട്ടപ്പാടിയിൽ വർധിച്ചുവരുന്ന വന്യജീവി ആക്രമണത്തിൽ പ്രതിഷേധിച്ച് സിപിഐ അട്ടപ്പാടി മണ്ഡലം കമ്മിറ്റിയുടെ നേതൃത്വത്തിൽ മുക്കാലിയിൽ സംഘടിപ്പിച്ച പ്രതിഷേധയോഗം ഉദ്ഘാടനം ചെയ്യുകയായിരുന്നു അദ്ദേഹം. വന്യജീവി ആക്രമണത്തിൽ കൂടുതൽ ആൾക്കാർ കൊല്ലപ്പെട്ടതു അട്ടപ്പാടിയിലാണ്. വന്യജീവി ആക്രമണത്തിൽ കൃഷിനാശം സംഭവിച്ചവർക്കു വർഷങ്ങളായി നഷ്ടപരിഹാരങ്ങൾ നൽകുന്നില്ല. വന്യജീവി ആക്രമണത്താൽ ജീവിതം വഴിമുട്ടി നിൽക്കുന്ന അട്ടപ്പാടിയെ നിവാസികളെ രക്ഷിക്കാൻ അടിയന്തര നടപടിയെടുക്കണമെന്നും യോഗം ആവശ്യപ്പെട്ടു. സിപിഐ മണ്ഡലം സെക്രട്ടറി ഡി. രവി, ജില്ലാ എക്സിക്യൂട്ടീവ് അംഗം സി. രാധാകൃഷ്ണൻ, അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ, എഐവൈഎഫ് മണ്ഡലം സെക്രട്ടറി കെ.സി. സിനോജ് തുടങ്ങിയവർ പ്രസംഗിച്ചു.

നെന്മാറ ബ്ലോക്ക് പഞ്ചായത്ത് ഒരുക്കിയതു 45 പച്ചത്തുരുത്തുകൾ

നെന്മാറ: ബ്ലോക്ക് പഞ്ചായത്തിന്‍റെ നേതൃത്വത്തിൽ ഏഴു പഞ്ചായത്തുകളിലായി 45 പച്ചത്തുരുത്തുകൾ സ്ഥാപിച്ചു. 2019 മുതലുള്ള കണക്കാണിത്. ജൂണ്‍ അഞ്ചുമുതൽ സെപ്റ്റംബർ 30 വരെയുള്ള വൃക്ഷവത്കരണ കാന്പയിനിന്‍റെ ഭാഗമായി സ്ഥാപിച്ച ഒന്പതു പച്ചതുരുത്തുകൾകൂടി ഇതിൽ ഉൾപ്പെടും. പുതുതായി മൂന്നു പച്ചത്തുരുത്തുകൾ കൂടി സ്ഥാപിക്കാനുള്ള ശ്രമത്തിലാണ് ബ്ലോക്ക് പഞ്ചായത്ത്. പേര, സപ്പോട്ട, ചാന്പക്ക, നാരകം, നാട്ടു മാവ്, പ്ലാവ്, തുടങ്ങി ഇരുപത്തിയഞ്ചോളം തൈകൾ നട്ടുപിടിപ്പിച്ചാണ് പച്ചത്തുരുത്തുകൾ നിർമിച്ചിരിക്കുന്നത്. നെന്മാറ ഗ്രാമപഞ്ചായത്തിൽ ചാത്തമംഗലം പാലത്തിനടുത്ത് ചപ്പാത്തിപ്പുഴയിലെ മൂന്നു പച്ചത്തുരുത്തുകൾ, എലവഞ്ചേരിയിൽ തൂറ്റിപാട് വാതക ശ്മശാനത്തിനടുത്ത് ഗായത്രി പുഴയ്ക്ക് തീരത്തെ രണ്ടു പച്ചത്തുരുത്തുകൾ, പല്ലശ്ശനയിലെ വാമല, ചെട്ടിയാർപാടം, തല്ലുമന്നം എന്നിവിടങ്ങളിലായി നാലു പച്ചത്തുരുത്തുകൾ, മേലാർക്കോട് ആറ്റാലക്കടവിൽ ഒരു പച്ചത്തുരുത്ത് തുടങ്ങിയവയാണ് പ്രധാന പച്ചതുരുത്തുകൾ. കൂടാതെ വിവിധ സ്കൂളുകളിലും പച്ചത്തുരുത്തുകൾ നിർമിച്ചിട്ടുണ്ട്. ഓക്സിജൻ കൂടുതൽ ഉൽപാദിപ്പിക്കുന്ന ഈറ്റ, മുരിങ്ങ, ലൗലോലി, മുളളാത്ത, കടച്ചക്ക, കൈത, കരിന്പന തുടങ്ങിയ വൃക്ഷങ്ങളും പച്ചത്തുരുത്തുകളിൽ ഉൾപ്പെടുത്തിയിട്ടുണ്ട്. പനപർവ്വം പദ്ധതിയുടെ ഭാഗമായി പല്ലശ്ശനയിൽ വാമലയ്ക്ക് താഴെ കരിന്പനകളുടെ കായ്കൾ ശേഖരിച്ച് മുളപ്പിച്ച് നട്ടുപിടിപ്പിക്കുന്നുണ്ട്.

വാണിയംകുളത്തിനു ഫുട്ബോളാണു ലഹരി

ഷൊർണൂർ: കായിക പ്രേമികൾക്കായി വാണിയംകുളം ഗ്രാമപഞ്ചായത്തിലൊരുക്കുന്ന സിന്തറ്റിക് ഫുട്ബോൾ ടർഫ് നിർമാണം അന്തിമ ഘട്ടത്തിൽ. ഗ്രാമപഞ്ചായത്തിന്‍റെ ഒരുഏക്കർ സ്ഥലത്താണ് വിശാലമായ കളിസ്ഥലം ഒരുങ്ങുന്നത്. സംസ്ഥാന സ്പോർട്സ് കൗണ്‍സിലിന്‍റെ 4.32 കോടി രൂപ വിനിയോഗിച്ചാണ് ടർഫ് നിർമിക്കുന്നത്. നിർമാണപ്രവൃത്തി പൂർത്തീകരിച്ചാൽ മേൽനോട്ട ചുമതല ഗ്രാമപഞ്ചായത്തിനു കൈമാറും. കാണികൾക്ക് കളി ആസ്വദിക്കുന്നതിനായി വിശാലമായ ഗാലറി കെട്ടിടം, കളിക്കാർക്കു വിശ്രമിക്കാൻ 1500 സ്ക്വയർ ഫീറ്റ് വിസ്തീർണത്തിൽ പ്രത്യേകംമുറി, ശുചിമുറി എന്നിവയും തയാറാക്കിയിട്ടുണ്ട്. ടർഫിനുചുറ്റും ഫെൻസിംഗ് നിർമാണം, ഇന്‍റർലോക്ക് വിരിക്കുന്ന പ്രവൃത്തി എന്നിവ പുരോഗമിക്കുകയാണ്. കഴിഞ്ഞ സർക്കാറിന്‍റെ കാലത്താണ് പഞ്ചായത്തിൽ ഫുട്ബോൾ ടർഫ് ആരംഭിക്കുന്നതിനുള്ള പ്രഖ്യാപനം നടന്നത്. തുടർന്ന് 2021 ൽ നിർമാണ പ്രവർത്തനങ്ങളും ആരംഭിച്ചു.

ബൈക്കുകൾ കൂട്ടിയിടിച്ച് മുൻ പഞ്ചായത്ത് അംഗം മരിച്ചു

അഗളി: അട്ടപ്പാടി പുതൂർ പഞ്ചായത്തിൽ ചീരക്കടവിൽ ബൈക്കുകൾ കൂട്ടിയിടിച്ച് മുൻ ഗ്രാമപഞ്ചായത്തംഗം മരിച്ചു. ചീരക്കടവ് ഉന്നതിയിലെ പരേതനായ മല്ല മൂപ്പന്‍റെ മകൻ മുരുകൻ (44) ആണ് മരിച്ചത്. ശനിയാഴ്ച രാത്രി ചീരക്കടവിലായിരുന്നു അപകടം. സംസ്കാരം നടത്തി. മാതാവ്: വസന്ത. ഭാര്യ: കുപ്പമ്മ (പുതൂർ ഗ്രാമപഞ്ചായത്ത് മുൻ അംഗം). മക്കൾ: വിനീത്, ശ്രീജ. മരുമകൻ: സന്ദീപ്. (സിപിഐ ചീരക്കടവ് ബ്രാഞ്ച് സെക്രട്ടറി). കൃഷിയിടത്തിൽ കാലിമേയ്ക്കുന്നതിനിടെ കഴിഞ്ഞമാസം കാട്ടാന ആക്രമണത്തിലാണ് മല്ല മൂപ്പൻ മരിച്ചത്.

നെന്മാറ മേഖലയിൽ പച്ചക്കറി വിളവെടുപ്പ് സജീവം

നെന്മാറ: നെന്മാറ, അയിലൂർ പഞ്ചായത്തുകളിൽ പച്ചക്കറിവിളവെടുപ്പ് സജീവം. വിഎഫ്പിസികെയുടെ കീഴിൽ പ്രവർത്തിക്കുന്ന സ്വാശ്രയ കർഷക സമിതികളുള്ള നെന്മാറ - വിത്തനശേരി, അയിലൂർ -പാളിയമംഗലം കേന്ദ്രങ്ങളിലൂടെയാണ് കർഷകർ പ്രധാനമായി പച്ചക്കറികൾ വിപണനം നടത്തുന്നത്. പ്രധാനമായും പാവൽ, പടവലം തുടങ്ങിയവയുടെ വിളവെടുപ്പാണ് തുടങ്ങിയത്. മഴയെത്തുടർന്ന് 25 ദിവസം വൈകിയാണ് വിളവിറക്കിയത്. തരക്കേടില്ലാത്ത വില ഇപ്പോൾ ലഭിക്കുന്നുണ്ടെന്നു കർഷകർ പറയുന്നു. നാടൻ പാവലിന് കിലോയ്ക്ക് 40 രൂപയാണ്. ഹൈബ്രിഡിന് 32 രൂപയും. പടവലത്തിന്‍റെ വില 10 രൂപ കുറഞ്ഞ് 30 രൂപയായത് കർഷകർക്ക് അടിയായി. പീച്ചിങ്ങ 40, പയർ 55 എന്നിങ്ങനെയാണ് നിലവിലെ വില. വിഎഫ്പിസികെയുടെ പ്രധാന സംഭരണ വിതരണ കേന്ദ്രങ്ങളായ പാളിയമംഗലം, വിത്തനശേരി എന്നിവിടങ്ങളിൽ നിന്ന് ആലുവ, കൊച്ചി, കോട്ടയം, തൃശൂർ, ആലപ്പുഴ, പെരുമ്പാവൂർ മാർക്കറ്റുകളിലേക്കും തുടങ്ങി ഗൾഫ് രാജ്യങ്ങളിലേക്കുള്ള കയറ്റുമതിക്കുമായി വിഎഫ്പിസികെ കേന്ദ്രങ്ങളിൽ നിന്നും കർഷകരിൽ നിന്ന് നേരിട്ടുമായി ദിവസേന അഞ്ചും ആറും ടൺ പച്ചക്കറിയാണ് കൊണ്ടുപോകുന്നത്. പ്രമുഖ വാണിജ്യ കേന്ദ്രങ്ങളിലെ കമ്മീഷൻ ഏജന്‍റുമാർ പാവൽ, പടവലം, പയർ എന്നിവ കർഷകരുടെ വിളവെടുപ്പ് കേന്ദ്രങ്ങളിൽ നിന്നുതന്നെ അതിരാവിലെ സംഭരിക്കുന്നുണ്ട്. മറ്റു കർഷകർ വിഎഫ്പിസികെ കേന്ദ്രങ്ങൾ മുഖേനയാണ് വ്യാപാരികൾക്ക് വിൽക്കുന്നത്. പയർ, പീച്ചിങ്ങ, ചുരയ്ക്ക, മുളക്, കുമ്പളം, മത്തൻ, വെണ്ട, വഴുതിന തുടങ്ങിയവയും അയിലൂർ നെന്മാറ പഞ്ചായത്തിലെ വിവിധ പ്രദേശങ്ങളിൽ ഒന്നാംവിള നെല്ല് ഒഴിവാക്കി വിളയിക്കുന്നുണ്ട്. അമിതമഴ വിളവെടുപ്പിനെയും ഉത്പാദനത്തെയും നേരിയ തോതിൽ ബാധിച്ചിട്ടുണ്ടെങ്കിലും തരക്കേടില്ലാത്ത വിളവ് ലഭിക്കുന്നുണ്ടെന്ന് കർഷകർ പറയുന്നു. വിത്തനശേരിയിൽ187 ഏക്കറിലാണ് പച്ചക്കറിക്കൃഷി. 180 കർഷകരുണ്ട്. അയിലൂർ പാളിയമംഗലത്ത് ഒരുമാസം മുൻപ് വിളവെടുപ്പ് തുടങ്ങി. ആഴ്ചയിൽ രണ്ടും മൂന്നും ദിവസം ഇടപെട്ട് പാവൽ, പടവലം, പയർ എന്നിവ വിളവെടുക്കുന്നുണ്ട്.

തെരുവുനായ്ക്കളുടെ ആക്രമണം : കർശനനടപടി ആവശ്യപ്പെട്ട് വ്യാപാരികൾ പ്രക്ഷോഭത്തിലേക്ക്‌

കല്ലടിക്കോട്‌: തെരുവ്‌നായ്ക്കളുടെ ആക്രമണം വ്യാപകമായതോടെ നടപടിയെടുക്കണമെന്നാവശ്യപ്പെട്ട്‌ കല്ലടിക്കോട്ടെ വ്യാപാരികൾ പ്രക്ഷോഭത്തിലേക്ക്‌. മേഖലയിൽ തെരുവ്‌നായ്ക്കളുടെ കടിയേറ്റ്‌ നിരവധിപേരാണ് ചികിത്സയിലുള്ളത്‌. കഴിഞ്ഞദിവസം സ്കൂളിൽ ഉച്ചഭക്ഷണം തയ്യാറാക്കാനെത്തിയ അമ്മയെ സഹായിക്കാൻ വന്ന മകളെ തെരുവ്‌നായ കടിച്ച്‌ പരിക്കേൽപ്പിച്ചിരുന്നു. കഴിഞ്ഞ ആഴ്ച കുന്നേമുറി ഉന്നതിയിൽ വളർത്തുപശുവിനെയടക്കം തെരുവ്‌നായ്ക്കൾ കടിച്ചിരുന്നു. രാത്രിയും പകലുമെന്നില്ലാതെ നായ്ക്കൾ കൂട്ടമായി റോഡിലൂടെ നടന്ന് കടികൂടുന്നതും കാൽനടയാത്രക്കാരുടേയും ഇരുചക്രവാഹനങ്ങളോടിക്കുന്നവരേയും ഓടിച്ചിട്ട്‌ കടിക്കുന്നതും പതിവാണ്. കാലത്ത്‌ മദ്രസയിൽ പോകുന്നവരേയും പള്ളിയിൽ പോകുന്നവരെയും നായ്ക്കൾ കടിക്കാൻ ഓടിക്കുന്നതും പതിവാണ്. നായ ഓടിക്കുമ്പോൾ കടയിലേക്ക്‌ ഓടിക്കയറുന്ന ആളുകളുടെ പിന്നാലെ കുരച്ചുകൊണ്ട്‌ വരുന്നതും സ്ഥിരമാണ്. തെരുവ്‌നായ്ക്കളെ പിടിച്ചുകൊണ്ടുപോയി നാട്ടിൽ സുരക്ഷിതത്വം ഉറപ്പുവരുത്തണെമെന്നാവശ്യപ്പെട്ട്‌ കേരള വ്യാപാരി വ്യവസായി ഏകോപന സമിതി കല്ലടിക്കോട്‌ യൂണിറ്റ്‌ അധികാരികൾക്ക്‌ നിവേദനം കൊടുക്കാനും ശക്തമായ പ്രക്ഷോഭത്തിലേക്ക്‌ നീങ്ങാനും തീരിമാനിച്ചിട്ടുണ്ട്‌. ഏകോപന സമിതി യൂണിറ്റ്‌ പ്രസിഡന്‍റ് അജോ മഞ്ഞാടിക്കൽ അധ്യക്ഷത വഹിച്ചു.

തെരുവുനായ്ക്കൾ വീട്ടുവളപ്പിലും ഭീതി പരത്തുന്നു

കൊഴിഞ്ഞാമ്പാറ: റോഡുകളിൽ മാത്രം തമ്പടിച്ചിരുന്ന തെരുവുനായ്ക്കൾ കൂട്ടമായി വീടുകളിലേക്കും വരുന്നത് ഭീതിപരത്തുന്നു. മുന്പ് കല്ലെറിഞ്ഞാൽ തിരിഞ്ഞോടിയിരുന്ന നായ്ക്കൾ ഇപ്പോൾ ആക്രമണത്തിനു മുന്നോട്ടു പാഞ്ഞുവരികയാണ്. വീടുകളിലെ ആട്, കോഴി ഉൾപ്പെടെ വളർത്തുമൃഗങ്ങൾക്കും ശുനകപ്പട ഭീഷണിയാവുന്നുണ്ട്. ഇത് കാരണം പലരും വളർത്തുമൃഗങ്ങളെ ഇരുമ്പ് കൂടുകളിലാണ് രാത്രി സമയങ്ങളിൽ കെട്ടുന്നത്. വീട്ടുവളപ്പിൽ കോഴികളെ തെരുവുനായ്ക്കൾ ആക്രമിച്ച സംഭവങ്ങൾ സ്ഥിരമാകുന്നു. വീടുകളിലെ വളർത്തുനായ്ക്കളേയും അലഞ്ഞുതിരിഞ്ഞു നടക്കുന്ന നായ്ക്കൾ കടിച്ച് പരിക്കേൽപ്പിക്കുന്നുണ്ട്. അതിനാൽ വളർത്തുമൃഗങ്ങൾക്ക് പേവിഷബാധ ഉണ്ടാകുമോ എന്ന ഭീതിയും നിലനിൽക്കുന്നു. കുട്ടികൾ വരാന്തകളിൽ കളിക്കുന്നതു പോലും രക്ഷിതാക്കൾ വിലക്കുകയാണ്. തെരുവുനായ്ക്കൾ ഇരുചക്ര വാഹനം ഓടിക്കുന്നവരേയും വെറുതെ വിടുന്നില്ല. ഒരു കിലോമീറ്റർ ദൂരം വരെ ഇവ പിറകേ ഓടിവരുന്ന സ്ഥിതിയുണ്ട്. ഇതുകാരണം വാഹനം മറിഞ്ഞ് യാത്രക്കാർക്ക് പരിക്കേൽക്കാറുമുണ്ട്.

ആരോഗ്യമന്ത്രിക്കെതിരേ കോൺഗ്രസ്, യൂത്ത് കോൺഗ്രസ് പ്രതിഷേധം

തച്ചന്പാറ: കോട്ടയം മെഡിക്കൽ കോളജ് കെട്ടിടം തകർന്നുവീണ് ഒരു ജീവൻ നഷ്ടപ്പെട്ടതിൽ ആരോഗ്യമന്ത്രിയുടെ കുറ്റകരമായ അനാസ്ഥയിൽ പ്രതിഷേധിച്ച് യൂത്ത് കോണ്‍ഗ്രസ് തച്ചന്പാറ മണ്ഡലം കമ്മിറ്റിയുടെ നേതൃത്വത്തിൽ തച്ചന്പാറയിൽ വീണാ ജോർജിന്‍റെ കോലം കത്തിച്ചു. യുഡിഎഫ് കോങ്ങാട് നിയോജകമണ്ഡലം ചെയർമാൻ പി.എസ്. ശശികുമാർ പ്രതിഷേധപ്രകടനം ഉദ്ഘാടനം ചെയ്തു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് സച്ചു ജോസഫ് അധ്യക്ഷനായി. മണ്ഡലം പ്രസിഡന്‍റ് റിയാസ് തച്ചന്പാറ, പഞ്ചായത്ത് പ്രസിഡന്‍റ് നൗഷാദ് ബാബു, ബ്ലോക്ക് കോണ്‍ഗ്രസ് സെക്രട്ടറി രാമചന്ദ്രൻ, സക്കീർ, നൗഫൽ പൂന്തൊടി എന്നിവർ പ്രസംഗിച്ചു. വടക്കഞ്ചേരി: ആരോഗ്യവകുപ്പിന്‍റേയും ആരോഗ്യമന്ത്രിയുടെയും നിരുത്തരവാദിത്വപരമായ സമീപനത്തിനെതിരെ കോൺഗ്രസ് വണ്ടാഴി മണ്ഡലം കമ്മിറ്റിയുടെ നേതൃത്വത്തിൽ പ്രകടനം നടത്തി. കർഷക കോൺഗ്രസ്‌ ജില്ലാ സെക്രട്ടറി കെ.സി. അരവിന്ദാക്ഷൻ മാസ്റ്റർ ഉദ്ഘാടനം ചെയ്തു. കോൺഗ്രസ് മണ്ഡലം വൈസ് പ്രസിഡന്‍റ് വി. മനോജ്‌ അധ്യക്ഷത വഹിച്ചു. ഡിസിസി മെംബർ കെ. രാമകൃഷ്ണൻ, കോൺഗ്രസ് ബ്ലോക്ക്, മണ്ഡലം ഭാരവാഹികളായ എം. സുരേഷ്‌കുമാർ, പ്രമോദ് തണ്ടാലോട്, ഗഫൂർ മുടപ്പല്ലൂർ, എൻ.വിഷ്ണു, കെ.പി. കൃഷ്ണൻ, എ.എ. അബ്ദുൾ ലത്തീഫ്, എസ്. ലാലു യൂത്ത് കോൺഗ്രസ് മണ്ഡലം പ്രസിഡന്‍റ് ആർ. അനീഷ്, ഷൗക്കത്ത് വണ്ടാഴി, എം.പി. അരുൺ, കണ്ടമുത്തൻ എന്നിവർ പ്രസംഗിച്ചു. കൊഴിഞ്ഞാമ്പാറ: യുവതി മരിച്ച സംഭവം ആരോഗ്യമന്ത്രിയുടെയും സർക്കാരിന്‍റേയും അനാസ്ഥയാണെന്നും ഇതിനെതിരെ നടപടിയെടുക്കണമെന്നും ആവശ്യപ്പെട്ട് കൊഴിഞ്ഞാമ്പാറ മണ്ഡലം കോൺഗ്രസ് കമ്മിറ്റി പ്രതിഷേധിച്ചു. കൊഴിഞ്ഞാമ്പാറ ബസ് സ്റ്റാൻഡ് പരിസരത്ത് നടന്ന പ്രതിഷേധം ഡിസിസി ജനറൽ സെക്രട്ടറി കെ.എസ്. തണികാചലം ഉദ്ഘാടനം ചെയ്തു. മണ്ഡലം കമ്മിറ്റി പ്രസിഡന്‍റ് എം. രാമകൃഷ്ണൻ അധ്യക്ഷനായി. കെ.എം. സുരേഷ് ബാബു, എ.ടി. ശ്രീനിവാസ്, എസ്. ഷാഹുൽഹമീദ്, സി. ആനന്ദ്, എസ്.സലിം, എ. സെന്തിൽകുമാർ എച്ച്. ഹക്കീം എന്നിവർ പ്രസംഗിച്ചു. കൊല്ലങ്കോട്: കേരളത്തിലെ ആരോഗ്യ സംവിധാനത്തിന്‍റെ കെടുകാര്യസ്ഥതയിൽ പ്രതിഷേധിച്ച് പല്ലശന മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ തല്ലുമന്ദം മുതൽ ചിറാക്കോട് വരെ പ്രതിഷേധപ്രകടനവും ആരോഗ്യ വകുപ്പ് മന്ത്രി വീണ ജോർജിന്‍റെ കോലംകത്തിച്ച് പ്രതിഷേധിച്ചു. പ്രതിഷേധയോഗം ഡിസിസി ജനറൽ സെക്രട്ടറി അഡ്വ. സി.സി. സുനിൽ ഉദ്ഘാടനം ചെയ്തു. മണ്ഡലം പ്രസിഡന്‍റ് പി.എസ്. രാമനാഥൻ അധ്യക്ഷത വഹിച്ചു. യുഡിഎഫ് നെന്മാറ നിയോജകമണ്ഡലം ചെയർമാൻ എസ്. പത്മകുമാർ, യൂത്ത് കോൺഗ്രസ് നെന്മാറ നിയോജകമണ്ഡലം പ്രസിഡന്‍റ് മനു പല്ലാവൂർ, ബ്ലോക്ക് വൈസ് പ്രസിഡന്‍റ് സുധീർ പാറക്കളം, ഐഎൻടിയുസി റീജണൽ പ്രസിഡന്‍റ് എസ്. ഹനീഫ, ദളിത് കോൺഗ്രസ് നിയോജകമണ്ഡലം പ്രസിഡന്‍റ് കൃഷ്ണൻ പടിഞ്ഞാമുറി, ഗ്രാമപഞ്ചായത്ത് അംഗങ്ങളായ എസ്. അശോകൻ, ആർ. ജയനാരായണൻ, യൂത്ത് കോൺഗ്രസ് ജില്ലാ ജനറൽ സെക്രട്ടറി ശ്യാം ദേവദാസ്, എസ്.ബാബു, പി.സി. ശശീന്ദ്രൻ, വി.അനിൽ, വിഷ്ണു കുണ്ടുപറമ്പ് എന്നിവർ പ്രതിഷേധപ്രകടനത്തിന് നേതൃത്വം നൽകി. ആലത്തൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ദേശീയ മൈതാനിയിൽ പൊതുസമ്മേളനവും ടൗൺ ചുറ്റി പ്രകടനവും നടത്തി . മണ്ഡലം പ്രസിഡന്‍റ് ഹാരിസിന്‍റെ അധ്യക്ഷതയിൽ കൂടിയ ചടങ്ങിൽ ഐഎൻടിയുസി ജില്ലാ സെക്രട്ടറി തൃപ്പാളൂർ ശശി, ഷെരീഫ് സൈദ് മുഹമ്മദ്, ഷാഹിദ് ആലത്തൂർ, എ. അലാവുദ്ദീൻ, ജബ്ബാർ, ജയൻ, ശ്രീജിത്ത്, കുഞ്ഞഹമ്മദ്, ജാഫർ പൊട്ടിമട എന്നിവർ പ്രസംഗിച്ചു. ആലത്തൂർ‌: എരിമയൂർ മണ്ഡലം കോൺഗ്രസ്‌ കമ്മിറ്റിയുടെ ആഭിമുഖ്യത്തിൽ പ്രതിഷേധ പ്രകടനം നടത്തി. കെപിസിസി മെംബർ വി. സുദർശൻ ഉദ്ഘാടനം ചെയ്തു. മണ്ഡലം കോൺഗ്രസ്‌ പ്രസിഡന്‍റ് കെ.പി. മുരളീധരൻ അധ്യക്ഷത വഹിച്ചു. സംസ്കാര സാഹിതി നിയോജകമണ്ഡലം ചെയർമാൻ സജീവ് ചിറ്റിലഞ്ചേരി, ബ്ലോക്ക്‌ കോൺഗ്രസ്‌ കമ്മിറ്റി സെക്രട്ടറിമാരായ കെ.സി. രാമകൃഷ്ണൻ, കെ.കെ. രാധാകൃഷ്ണൻ, ടി. കെ. അപ്പു, സതീഷ് പുള്ളോട്, ഉണ്ണികൃഷ്ണൻ ആറുഴി, എ. കെ. വാസു, നാരായണൻ കൊള്ളക്കപ്പാടം, കെ. കൃഷ്ണൻ, പ്രകാശൻ, രാജൻ എന്നിവർ പങ്കെടുത്തു. ആലത്തൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധപ്രകടനം നടത്തി. മുൻ ബ്ലോക്ക് കോൺഗ്രസ് പ്രസിഡന്‍റ് സി. മാധവൻകുട്ടി പ്രതിഷേധപ്രകടനം ഉദ്ഘാടനം ചെയ്തു. മണ്ഡലം കോൺഗ്രസ് വൈസ് പ്രസിഡന്‍റ് വി. വിജയമോഹനൻ അധ്യക്ഷത വഹിച്ചു. വടക്കഞ്ചേരി ബ്ലോക്ക് കോൺഗ്രസ് വൈസ് പ്രസിഡന്‍റ് എൻ. രവി, പഞ്ചായത്ത് വൈസ് പ്രസിഡന്‍റ് ഉഷാദേവി സതീശൻ, പഞ്ചായത്ത് മെംബർ പി. കേശവദാസ്, മണ്ഡലം വൈസ് പ്രസിഡന്‍റ് പി. ശിവദാസൻ, ബ്ലോക്ക് കോൺഗ്രസ് സെക്രട്ടറി എസ്. സേതുമാധവൻ പ്രസംഗിച്ചു. കണ്ണന്പ്ര: കാരപ്പൊറ്റയിൽ നടന്ന പ്രകടനം ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. മന്ധലം പ്രസിഡന്‍റ് സുദേവൻ അധ്യക്ഷത വഹിച്ചു. കെ.വി. ഗംഗാധരൻ, ജയരാജൻ കൊന്നഞ്ചേരി, സന്തോഷ് കുമാർ ആറുങ്കൽപ്പാടം, ഉമ്മലു ഹനീഫ, ടി.മോഹൻദാസ് പ്രസംഗിച്ചു. കിഴക്കഞ്ചേരി: കുണ്ടുകാട്ടിൽ നടന്ന പ്രതിഷേധ പ്രകടനവും യോഗവും ഡിസിസി സെകട്ടറി ഡോ. അർസലൻ നിസാം ഉദ്ഘാടനം ചെയ്തു. മണ്ഡലം പ്രസിഡന്‍റ് സി. ചന്ദ്രൻ അധ്യക്ഷത വഹിച്ചു. എം.കെ. ശ്രീനിവാസൻ, വി.ജെ. ജോസഫ്, ലീലാമ്മ ജോസഫ്, ടി.കെ. ഷാനവാസ്, കെ.കെ. പൗലോസ്, സുനിൽ എം.പോൾ, ബിജു മാസ്റ്റർ, സി.കെ. ഉസനാർ പ്രസംഗിച്ചു. വടക്കഞ്ചേരി: ടൗണിൽ ഡിസിസി സെക്രട്ടറി ഡോ. അർസലൻ നിസാം ഉദ്ഘാടനം ചെയ്തു. മണ്ഡലം വൈസ് പ്രസിഡന്‍റ് ബെന്നി പുതുശേരി അധ്യക്ഷത വഹിച്ചു. റെജി കെ. മാത്യു, കെ.മോഹൻദാസ്, കെ.ദേവദാസ്, ശ്രീനാഥ് വെട്ടത്ത്, ബാബു മാധവൻ, വി.എച്ച്. ബഷീർ, ഭാസ്കരൻ, വി.എ. മൊയ്‌തു, കാരയങ്കാട് ശിവരാമകൃഷ്ണൻ, നന്ദകുമാർ, ജോണി ഡയൻ, എ. ജോസ്, സുനിൽ ചുവട്ടുപാടം, പി.എസ്. മുജീബ് പ്രസംഗിച്ചു.

യൂത്ത് കോണ്‍ഗ്രസ് ഡിഎംഒ ഓഫീസിലേക്കു നടത്തിയ മാർച്ചിൽ സംഘർഷം

പാലക്കാട്: ആരോഗ്യമന്ത്രി രാജിവെക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് ഡിഎംഒ ഓഫീസിലേക്ക് നടത്തിയ മാർച്ചിൽ സംഘർഷം. സമരക്കാർക്ക് നേരെ പോലീസ് ലാത്തിവീശി. ലാത്തിച്ചാർജിൽ ജില്ലാ പ്രസിഡന്‍റ് കെ.എസ്. ജയഘോഷ്, എൻ. സുബ്രഹ്മണ്യൻ, അന്പിളി മോഹൻദാസ്, സോനു പ്രണവ്, അഖിൽ ജോണ്‍, സുനിൽ ചുവട്ടുപാടം എന്നിവർക്ക് പരിക്കേറ്റു. ഉദ്ഘാടനത്തിന് ശേഷം മുദ്രാവാക്യം വിളിച്ച സമരക്കാരും പോലീസും തമ്മിൽ ഉന്തും തള്ളുമുണ്ടായി. തുടർന്നാണ് ലാത്തിവീശിയത്. നേരത്തെ ഡിസീസ് ഓഫീസിൽ നിന്നും ആരംഭിച്ച മാർച്ച് സിവിൽ സ്റ്റേഷന് മുന്പിൽ പോലീസ് തടഞ്ഞു. സമരം യൂത്ത് കോണ്‍ഗ്രസ് സംസ്ഥാന ജനറൽ സെക്രട്ടറി ഡോ. സോയ ജോസഫ് ഉദ്ഘാടനം ചെയ്തു. ആരോഗ്യമന്ത്രി വീണാ ജോർജ് രാജിവെക്കുംവരെ യൂത്ത് കോണ്‍ഗ്രസ് സമരം നടത്തുമെന്ന് അവർ വ്യക്തമാക്കി. ആരോഗ്യമേഖല തകർന്നതിന്‍റെ ഉത്തരവാദിത്വം മന്ത്രി വീണാ ജോർജിനും വകുപ്പിനുമാണ്. സിസ്റ്റം തകരാറിലായതുകൊണ്ടാണ് കോട്ടയത്ത് ദുരന്തം ഉണ്ടായത് എന്നാണ് മന്ത്രി തന്നെ വ്യക്തമാക്കിയത്. ഭരണപക്ഷത്തിന്‍റെ പിടിപ്പുകേടാണ് ഇത് ചൂണ്ടിക്കാണിക്കുന്നത്. ആരോഗ്യരംഗം അത്യാസന്നമായ നിലയിൽ എത്തിയതിന്‍റെ ഉത്തരവാദിത്വത്തിൽനിന്നും മന്ത്രിക്ക് ഒഴിഞ്ഞുമാറാനാവില്ല. ഭരണം നിർവഹിക്കാൻ കഴിയാത്ത ആരോഗ്യമന്ത്രി അറിയാവുന്ന പണിക്ക് പോകുന്നതാണ് നല്ലതെന്നും സോയാ ജോസഫ് പറഞ്ഞു. ജില്ലാ പ്രസിഡന്‍റ് കെ.എസ്. ജയഘോഷ് അധ്യക്ഷനായി. സംസ്ഥാന ഭാരവാഹികളായ ഷഫീഖ് അത്തിക്കോട്, പ്രതീഷ് മാധവൻ, വിനോദ് ചെറാട്, ജിതേഷ് നാരായണൻ, അരുണ്‍കുമാർ പാലക്കുറുശി, എൻ.സുബ്രഹ്മണ്യൻ, ജില്ലാ ഭാരവാഹികളായ ലിജിത്ത് ചന്ദ്രൻ, പി.ടി. അജ്മൽ, ശ്യാം ദേവദാസ്, രതീഷ് പുതുശേരി, സതീഷ് തിരുവാലത്തൂർ, ഇജാസ്, അന്പിളി മോഹൻദാസ്, എ. ഷഫീഖ്, വി.വത്സൻ, ഡി. ദിലീപ്, നിയോജകമണ്ഡലം പ്രസിഡന്‍റുമാരായ ടി.എം നഹാസ്, ജയശങ്കർ കൊട്ടാരത്തിൽ, വിനോദ് കളത്തൊടി, നസീർ മാസ്റ്റർ, നവാസ്, കെ.സാജൻ, മനു പല്ലാവൂർ, റിനാസ് യൂസഫ്, കഐസ്യു ജില്ലാ പ്രസിഡന്‍റ് നിഖിൽ കണ്ണാടി, സംസ്ഥാന ജനറൽ സെക്രട്ടറി അജാസ് കുഴൽമന്ദം, ഗൗജ വിജയകുമാർ എന്നിവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]