കൊ​ടു​ങ്ങ​ല്ലൂ​ർ: മ​ക​രസം​ക്ര​മ​സ​ന്ധ്യ​യി​ൽ 1001 ക​തി​ന​ക​ൾ മു​ഴ​ങ്ങി​യ​തോ​ടെ കൊ​ടു​ങ്ങ​ല്ലൂ​ർ താ​ല​പ്പൊ​ലി മ​ഹോ​ത്സ​വ​ത്തി​ന് തു​ട​ക്ക​മാ​യി. മ​ക​രസം​ക്ര​മദി​ന​മാ​യ ഇന്നലെ സ​ന്ധ്യ​ക്കാ​ണ് ഒ​ന്നു കു​റെ ആ​യി​രം യോ​ഗ​ത്തിന്‍റെ നേ​തൃ​ത്വ​ത്തി​ൽ ക​തി​ന​ക​ൾ മു​ഴ​ങ്ങി​യ​ത്.

ഇ​നി നാ​ലു​നാ​ൾ കൊ​ടു​ങ്ങ​ല്ലൂ​ർ കു​രും​ബക്കാ​​വ് ഉ​ത്സ​വത്തി​മ​ർ​പ്പി​ൽ ആ​റാ​ടും. ഒ​ന്നാം താ​ല​പ്പൊ​ലി നാ​ളാ​യ ഇന്ന് കു​ഡും​ബി സ​മു​ദാ​യ​ക്കാ​രു​ടെ ആ​ടി​നെ ന​ടത​ള്ള​ലും സ​വാ​സി​നി​പൂ​ജ​യും ന​ട​ക്കും. വ്ര​താ​നു​ഷ്ഠാ​ന​ങ്ങ​ളോ​ടെ ഇ​രു​മു​ടിക്കെ​ട്ടു​മാ​യി എ​ത്തു​ന്ന മ​ല​യ​ര​യ​ൻ​മാ​ർ പ്ര​ത്യേ​ക പൂ​ജ​ക​ൾ ന​ട​ത്തും.

ഉ​ച്ച​യ്ക്ക് ഒ​ന്നി​ന് തെ​ക്കേന​ട​യി​ലെ കു​രും​ബാ​മ്മ​യു​ടെ ന​ട​യി​ൽനി​ന്ന് എ​ഴു​ന്ന​ള്ളി​പ്പ് ആ​രം​ഭി​ക്കും. പ​ര​യ്ക്കാ​ട് ത​ങ്ക​പ്പ​മാ​രാ​രു​ടെ നേ​തൃ​ത്യ്വത്തി​ലു​ള്ള പ​ഞ്ച​വാ​ദ്യം അ​ക​മ്പ​ടി​യേ​കു​ന്ന എ​ഴു​ന്ന​ള്ളി​പ്പി​ൽ ആ​ദ്യം മൂ​ന്നാ​ന​ക​ൾ അ​ണി​നി​ര​ക്കും. തു​ട​ർ​ന്ന് എ​ഴു​ന്ന​ള്ളി​പ്പി​ൽ ഒ​മ്പ​താ​ന​ക​ൾ ചേ​രു​മ്പോ​ൾ മേ​ളക​ലാ​നി​ധി കി​ഴ​ക്കൂ​ട്ട് അ​നി​യ​ൻമാ​രാ​രു​ടെ നേ​തൃ​ത്വത്തി​ൽ പാ​ണ്ടി​മേ​ളം കൊ​ട്ടിക്ക​യ​റും.​

വൈ​കീ​ട്ട് 6.15ന് ​ദീ​പാ​രാ​ധ​ന​യും, വെ​ടി​ക്കെ​ട്ടും ഉ​ണ്ടാ​കും. തു​ട​ർ​ന്ന് ഏ​ഴുമു​ത​ൽ പാ​ണി​വാ​ദനര​ത്നം ക​ലാ​മ​ണ്ഡ​ലം ഈ​ശ്വ​ര​നു​ണ്ണി അ​വ​ത​രി​പ്പി​ക്കു​ന്ന ചാ​ക്യാ​ർ​കൂ​ത്ത്, 8.30ന് ​കൊ​ടു​ങ്ങ​ല്ലൂ​ർ സ​പ്ത​സ്വ​ര അ​വ​ത​രി​പ്പി​ക്കു​ന്നഫ്യൂ​ഷ​ൻ, ലോ​ക​മ​ലേ​ശ്വ​രം നോ​ർ​ത്ത് എ​ൻഎ​സ്എ​സ് ക​ര​യോ​ഗം അ​വ​ത​രി​പ്പി​ക്കു​ന്ന തി​രു​വാ​തി​ര, ഇ​രി​ങ്ങാ​ല​ക്കു​ട മാ​ണി​ക്യശ്രീ ​ഭ​ജ​ൻ​സ് അ​വ​ത​രി​പ്പി​ക്കു​ന്ന ഭ​ജ​ന തു​ട​ങ്ങി​യ പ​രി​പാ​ടി​ക​ളും ന​ട​ക്കും.