ADVERTISEMENT

ADVERTISEMENT

വ്യവസായ മേഖലയിലൂടെ ചാർളി പോൾ

കിഴക്കമ്പലം: ട്വന്‍റി 20 സ്ഥാനാർഥി ചാർളി പോളിന്‍റെ തെരഞ്ഞെടുപ്പ് പ്രചാരണം അങ്കമാലി മണ്ഡലത്തിലെ വ്യവസായ മേഖലകളിലൂടെ.

ആലുവ മണ്ഡലം പ്രസിഡന്‍റ് ജോസ് മാവേലി ഒപ്പമുണ്ടായിരുന്നു. തുടർന്ന് പവിഴം റൈസ് ആൻഡ് റൈസ് പ്രോഡക്ടസ് ഓഫീസ്, അകനാട് കാരീസ് ആഗ്രോടെക്, കാരീസ് പൈപ്പ്സ് ആൻഡ് ട്യൂബ്സ്, ക്ലോറോപ്ലാസ്റ്റ് എന്നീ പ്ലാന്‍റുകൾ സന്ദർശിച്ചു.

ശേഷം മലയാറ്റൂർ മേഖലയിലെ വോട്ടർമാരോട് വോട്ടുതേടി.

ADVERTISEMENT

13 കുടുംബങ്ങൾക്ക് ഭൂമി വിതരണം ചെയ്തു

പോത്താനിക്കാട്: പഞ്ചായത്തിലെ ഭൂരഹിതരായ 13 കുടുംബങ്ങൾക്ക് ഭൂമി വിതരണം ചെയ്തു. പ്രവാസിയായ പുളിന്താനം മഠത്തിക്കുടിയിൽ ബേബി ജോസഫ് പോത്താനിക്കാട് ഗ്രാമപഞ്ചായത്തിന് വിട്ടുനൽകിയ ഒരേക്കർ 10 സെന്‍റിൽ നിന്ന് 50 സെന്‍റ് സ്ഥലമാണ് ലൈഫ് ഭവന പദ്ധതിയിൽ ഉൾപ്പെട്ട അർഹരായ 13 പേർക്ക് വിതരണം ചെയ്തത്. മാത്യു കുഴൽനാടൻ എംഎൽഎ യോഗം ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് സജി കെ. വർഗീസ് അധ്യക്ഷത വഹിച്ചു. കളക്ടർ എൻ.എസ്.കെ. ഉമേഷ് ഗുണഭോക്താക്കൾക്ക് ഭൂമിയുടെ രേഖകൾ കൈമാറി. വൈസ് പ്രസിഡന്‍റ് ആശ ജിമ്മി, സ്ഥിരംസമിതി അംഗങ്ങളായ ജിനു മാത്യു, മേരി തോമസ്, ഫിജിന അലി, പഞ്ചായത്തംഗങ്ങളായ ജോസ് മേലേത്ത്, ബിസ്നി ജിജോ, സുമ ദാസ്, ഡോളി സജി, വിൻസൻ ഇല്ലിക്കൽ, സാബു മാധവൻ, സിഡിഎസ് അധ്യക്ഷ സിജി ജോർജ്, എ.ബി. മൈതീൻ എന്നിവർ പ്രസംഗിച്ചു. സൗജന്യമായി ലഭിച്ച സ്ഥലത്തിൽ നിന്ന് 60 സെന്‍റ് ട്രീറ്റ്മെന്‍റ് പ്ലാന്‍റിന്‍റെ നിർമാണത്തിനായി വാട്ടർ അഥോറിറ്റിക്ക് കൈമാറിയിരുന്നു.

വാൻ വൈദ്യുത പോസ്റ്റിലിടിച്ച് ഡ്രൈവർക്ക് പരിക്ക്

കൂത്താട്ടുകുളം: എംസി റോഡ് രാമപുരം കവലയിൽ ഗുഡ്സ് വാനിന്‍റെ നിയന്ത്രണം നഷ്ടപ്പെട്ട വൈദ്യുത പോസ്റ്റിലിടിച്ച് ഡ്രൈവർക്ക് പരിക്ക്. പട്ടിക്കാട് സ്വദേശി കോനാരത്ത് ഷാനവാസിനാണ് പരിക്കേറ്റത്. ശനിയാഴ്ച രാത്രി 12.30ഓടെയായിരുന്നു അപകടം. തൃശൂർ ഭാഗത്തുനിന്നു വരികയായിരുന്ന വാഹനമാണ് അപകടത്തിൽപെട്ടത്. അപകടത്തെ തുടർന്ന് വാഹനത്തിനുള്ളിൽ കുടുങ്ങിയ ഡ്രൈവറെ കൂത്താട്ടുകുളം അഗ്നിശമന രക്ഷാസേനയെത്തിയാണ് പുറത്തെടുത്തത്. ഷാനവാസിനെ കൂത്താട്ടുകുളത്തെ സ്വകാര്യ ആശുപത്രിയിൽ പ്രവേശിപ്പിക്കുകയും പിന്നീട് വിദഗ്ധ പരിശോധനയ്ക്കായി കോട്ടയം മെഡിക്കൽ കോളജ് ആശുപത്രിയിലേക്ക് മാറ്റുകയും ചെയ്തു.

വാഹനാപകടം : കാർ മീഡിയനിലേക്ക് ഇടിച്ചുകയറി

മൂവാറ്റുപുഴ: നിയന്ത്രണംവിട്ട കാർ മീഡിയനിലേക്ക് ഇടിച്ചുകയറി. വെള്ളൂർക്കുന്നം ബസ് കാത്തിരിപ്പു കേന്ദ്രത്തിനു സമീപം ഇന്നലെ രാവിലെ ഏഴോടെയായിരുന്നു അപകടം. തൊട്ടുപിന്നാലെ എത്തിയ ലോറി കാറിന് പിന്നിൽ ഇടിച്ചുകയറുകയും ചെയ്തു. കൃത്യമായ ദിശാ ബോർഡുകൾ സ്ഥാപിക്കാത്തതിനെത്തുടർന്ന് നഗരത്തിലെ മീഡിയനുകളിൽ വാഹനങ്ങൾ ഇടിച്ചു കയറി അപകടം ഉണ്ടാകുന്നത് പതിവായിരിക്കുകയാണ്. രാത്രികാലങ്ങളിലാണ് അപകടങ്ങൾ കൂടുതലും.

പിറവത്ത് വയോധികനെ തെരുവു നായ്ക്കൾ കൂട്ടമായി ആക്രമിച്ചു

പിറവം: പാലച്ചുവടിനടുത്ത് വയോധികന് തെരുവുനായ്ക്കളുടെ ആക്രമണത്തിൽ ഗുരുതര പരിക്കേറ്റു. പാലച്ചുവട് ക്ഷീരസംഘത്തിനു സമീപം താമസിക്കുന്ന തോട്ടുപുറത്ത് ടി.വി. ജോർജി(75) നാണ് നായ്ക്കുട്ടത്തിന്‍റെ ആക്രമണത്തിൽ പരിക്കേറ്റത്. ഇന്നലെ വൈകുന്നേരം നാലരയോടെയായിരുന്നു സംഭവം. പാലച്ചുവട് കവലയിൽ പോയ ശേഷം വീട്ടിലേക്ക് മടങ്ങുന്ന വഴിയാണ് ആക്രമണം. ഒരു നായ കുരച്ച് ചാടി ആക്രമിക്കുകയായിരുന്നു. റോഡിലേക്ക് വീണുപോയ വയോധികനെ സമീപത്തുണ്ടായിരുന്ന മറ്റു നായ്ക്ക്ളെത്തി കടിച്ചു നാശമാക്കി. മൂന്നോ നാലോ നായ്ക്കൾ ഉണ്ടായിരുന്നുവെന്ന് സംഭവം കണ്ട് ഓടിക്കൂടിയവർ പറഞ്ഞു. നാട്ടുകാർ ഒച്ചവച്ച് നായ്ക്കളെ ഓടിക്കാൻ ശ്രമിച്ചെങ്കിലും ഫലമുണ്ടായില്ല. ഒടുവിൽ തെങ്ങിൻ മടലുകൊണ്ട് തല്ലിയാണ് നായ്ക്കളെ ഓടിച്ചത്. നായ മടലിലും കുടിച്ചു തൂങ്ങിയിരുന്നു. ജോർജിന് കൈകാലുകളിലും മുഖത്തുമെല്ലാം സാരമായി പരിക്കേറ്റു. പിറവം താലൂക്ക് ആശുപത്രിയിലെത്തി പ്രഥമ ശുശ്രൂഷ നൽകിയശേഷം കോട്ടയം മെഡിക്കൽ കോളജിലേക്ക് മാറ്റി. പിറവത്ത് തെരുവ് നായ്ക്കളുടെ ശല്യം വ്യാപകമായിരിക്കുകയാണ്. പിറവം ടൗണിലൂടെ നായക്കൾ പലപ്പോഴും കൂട്ടമായി പോകുന്നത് കാണാം. പാലച്ചുവട് കവലയിലും ശല്യം പെരുകിയിരിക്കുകയാണ്.

"കുറിയടിച്ചാൽ‌ പുസ്തകം' : പുസ്തകക്കുറി പദ്ധതിയുമായി കെപിസിസി വിചാർ വിഭാഗ്

കൊച്ചി: വായനയെ പ്രോത്സാഹിപ്പിക്കാൻ കെപിസിസി വിചാർ വിഭാഗ് എറണാകുളം ജില്ലാ കമ്മിറ്റിയുടെ പുസ്തകക്കുറി പദ്ധതിക്ക് തുടക്കം. സാഹിത്യകാരൻ എൻ.എസ്. മാധവൻ ഉദ്ഘാടനം ചെയ്തു. അഞ്ഞൂറു രൂപ വീതം കുറിയിൽ നിക്ഷേപിക്കുന്നവരിൽ നിന്നു നറുക്കെടുപ്പിലൂടെ ഭാഗ്യശാലിക്കു 7800 രൂപയുടെ പുസ്തകങ്ങൾ നൽകുന്നതാണു പദ്ധതി. നിലവിൽ 50 ഓളം പേർ പുസ്തകക്കുറിയിൽ ചേർന്നതായി കെപിസിസി വിചാർവിഭാഗ് ജില്ലാ ചെയർമാൻ ഷൈജു കേളന്തറ അറിയിച്ചു.

ശതാബ്ദിമന്ദിരം ആശീർവദിച്ചു

കൊച്ചി: ചേരാനല്ലൂര്‍ ലിറ്റില്‍ ഫ്ലവര്‍ സ്‌കൂൾ ശതാബ്ദിമന്ദിരം ആശീര്‍വദിച്ചു. വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ ആശീർവാദവും ഉദ്ഘാടനവും നിര്‍വഹിച്ചു. അതിരൂപത കോര്‍പറേറ്റ് എഡ്യുക്കേഷണല്‍ ഏജന്‍സി ജനറല്‍ മാനേജര്‍ ഫാ. ജയന്‍ പയ്യപ്പിള്ളി അധ്യക്ഷത വഹിച്ചു. ഹൈബി ഈഡന്‍ എംപി, ടി.ജെ. വിനോദ് എംഎല്‍എ, ജില്ലാ പഞ്ചായത്തംഗം യേശുദാസ് പറപ്പിള്ളി, ബ്ലോക്ക് പഞ്ചായത്ത് പ്രസിഡന്‍റ് സരിത സനിൽ, പഞ്ചായത്ത് പ്രസിഡന്‍റ് കെ.ജി. രാജേഷ്, സ്‌കൂള്‍ മാനേജര്‍ ഫാ. ഫെലിക്‌സ് ചക്കാലക്കല്‍, ഹെഡ്മാസ്റ്റര്‍ ജോണി തൈക്കൂട്ടത്തിൽ തുടങ്ങിയവർ പ്രസംഗിച്ചു.

പള്ളുരുത്തി ബോസ്‌കോ നിലയത്തില്‍ യോഗദിനാചരണം

കൊച്ചി: ലഹരിയുടെ അമിത ഉപയോഗം മൂലം അപകട സാഹചര്യത്തില്‍പ്പെട്ട കുട്ടികളുടെ സംരക്ഷണ കേന്ദ്രമായ പള്ളുരുത്തി ബോസ്‌കോ നിലയം ഷെല്‍ട്ടര്‍ ഹോമില്‍ യോഗദിനം ആചരിച്ചു. ഡോണ്‍ ബോസ്‌കോ ബോയ്‌സ് ഹോം ഡയറക്ടറും പ്രമുഖ സാമൂഹിക പ്രവര്‍ത്തകനുമായ ഫാ. ജോണ്‍ മുട്ടത്ത്പാടത്ത് മുഖ്യ പ്രഭാഷണം നടത്തി. യോഗ ട്രെയിനര്‍ അഭിരാജ് മുക്കത്തിന്റെ നേതൃത്വത്തില്‍ കുട്ടികള്‍ക്ക് യോഗ പരിശീലനം നല്‍കി. ഷെല്‍ട്ടര്‍ ഹോം ഡയറക്ടര്‍ ഫാ. അഭിലാഷ് പാലക്കുടിയില്‍, ഐസക് ജോസഫ്, അലന്‍ ഡേവിസ്, ഭാവന തുടങ്ങിയവര്‍ പങ്കെടുത്തു.

എക്കോ നാച്വറൽ പ്രോഡക്ട് യൂണിറ്റ് ഉദ്ഘാടനം ചെയ്തു

കാഞ്ഞൂർ: കാഞ്ഞൂർ പഞ്ചായത്തിലെ ഏഴാം വാർഡിൽ എം.എസ്. സ്വാമിനാഥൻ റിസർച്ച് ഫൗണ്ടേഷനും (എംഎസ്എസ്ആർഎഫ്) എച്ച്ഡിഎഫ്സി ബാങ്ക് സമഗ്ര ഗ്രാമ വികസന പദ്ധതിയും ചേർന്നു നടപ്പാക്കുന്ന എക്കോ നാച്വറൽ പ്രോഡക്ട് യൂണിറ്റ് ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പ്രിയ രഘു അധ്യക്ഷത വഹിച്ചു. എംഎസ്എസ്ആർഎഫ് പ്രോജക്ട് കോ-ഓർഡിനേറ്റർ സിജോ തോമസ്, ജില്ലാ പഞ്ചായത്തംഗം ശാരദ മോഹൻ, പഞ്ചായത്ത് സ്റ്റാൻഡിംഗ് കമ്മിറ്റി ചെയർ‌പേഴ്സൺ സിമി ടിജോ, ബ്ലോക്ക് പഞ്ചായത്തംഗങ്ങളായ കെ.വി. അഭിജിത്ത്, ആൻസി ജിജോ, സർവീസ് സഹകരണ ബാങ്ക് പ്രസിഡന്‍റ് ടി.ഐ. ശശി, കോ-ഓർഡിനേറ്റർ ദീപ ബിജൻ, യൂണിറ്റ് പ്രസിഡന്‍റ് വൽസ സേവ്യർ, ജോളി ജോസ് എന്നിവർ പ്രസംഗിച്ചു. കിഴക്കുംഭാഗം വില്ലേജിലെ ക്ഷീരകർഷക വനിതാസംഘത്തിന്‍റെ നേതൃത്വത്തിൽ പ്രവർത്തിക്കുന്ന യൂണിറ്റിൽ പാലുത്പന്നങ്ങൾ, ചിപ്സുകൾ, അച്ചാറുകൾ എന്നിവ നിർമിച്ചു വിപണിയിലെത്തിക്കുന്നുണ്ട്.

ആന്‍റിബയോട്ടിക്കുകളുടെ ദുരുപയോഗം വിനാശകരം: ഡോ. സൗരവ് ശേഖര്‍ പോള്‍

കൊച്ചി: ആന്‍റിബയോട്ടിക്കുകളുടെ അമിത ഉപയോഗവും ദുരുപയോഗവും കാരണം ലോകം നിശബ്ദ മഹാമാരിയെ നേരിടുകയാണെന്ന് രാജഗിരി ആശുപത്രിയിലെ ഇന്‍ഫെക്ഷ്യസ് ഡിസീസസ് കണ്‍സള്‍ട്ടന്‍റ് ഡോ. സൗരവ് ശേഖര്‍ പോള്‍. ആന്‍റിബയോട്ടിക്കുകളുടെ അമിത ഉപയോഗത്തിന്‍റെ ഭാഗമായ ആന്‍റിമൈക്രോബിയല്‍ റെസിസ്റ്റന്‍സ് (എഎംആര്‍) സാധാരണ അണുബാധകളെ പോലും മാരകമാക്കുന്നതിലേക്ക് നമ്മെ എത്തിച്ചേക്കാമെന്നും അദ്ദേഹം പറഞ്ഞു. നിലവില്‍ ഇന്ത്യയിലെ ബാക്ടീരിയ അണുബാധകളില്‍ 60 ശതമാനവും സാധാരണയായി ഉപയോഗിക്കുന്ന ആന്‍റിബയോട്ടിക്കുകളോട് പ്രതിരോധം കാണിക്കുന്നുണ്ട്. ഈ ഭീഷണി തടയാന്‍ ബഹുമുഖ സമീപനം ആവശ്യമാണെന്ന് ഡോ. പോള്‍ പറഞ്ഞു. ആത്യാവശ്യമില്ലാത്തപ്പോള്‍ ആന്‍റിബയോട്ടിക്കുകള്‍ ഒഴിവാക്കുകയാണ് പ്രധാനം. ആരോഗ്യ വിദഗ്ധര്‍, നയരൂപ കര്‍ത്താക്കള്‍, ഫാര്‍മസ്യൂട്ടിക്കല്‍ കമ്പനികള്‍, പൊതുജനങ്ങള്‍ എന്നിവരുടെ കൂട്ടായ പ്രയത്‌നം ഇതിന് അത്യന്താപേക്ഷിതമാണ്. ആന്‍റിബയോട്ടിക്കുകളുടെ ഉപയോഗത്തില്‍ കര്‍ശന നിയന്ത്രണങ്ങള്‍ ഏര്‍പ്പെടുത്തുക, പുതിയ ആന്‍റിബയോട്ടിക്കുകളുടെ ഗവേഷണത്തിലും വികസനത്തിലും കൂടുതല്‍ നിക്ഷേപം നടത്തുക, ഉത്തരവാദിത്വമുള്ള ആന്‍റിബയോട്ടിക് ഉപയോഗത്തെക്കുറിച്ച് ജനങ്ങളെ ബോധവത്കരിക്കുക എന്നിവയും ഈ പ്രതിസന്ധി മറികടക്കാന്‍ അനിവാര്യമാണെന്നും അദ്ദേഹം ചൂണ്ടിക്കാട്ടി.

കിഴക്കേ കടുങ്ങല്ലൂർ റോഡ് വികസനം: ഉദ്യോഗസ്ഥ സംഘം സ്ഥലം സന്ദർശിച്ചു

ആലുവ: കിഴക്കേ കടുങ്ങല്ലൂർ റോഡ് വീതി കൂട്ടുന്നതിന് മുന്നോടിയായി ഉദ്യോഗസ്ഥതല പരിശോധന നടന്നു. എറണാകുളം എൽഎ വിഭാഗം ഡെപ്യൂട്ടി കളക്ടർ എസ്. റജീനയുടെ നേതൃത്വത്തിലാണ് ഉദ്യോഗസ്ഥ സംഘം എത്തിയത്. ആലുവ നഗരസഭാ പരിധിയിൽ വരുന്ന തോട്ടക്കാട്ടുകര മുതൽ കടുങ്ങല്ലൂർ വരെയുള്ള പെരിക്കപ്പാലം റോഡ്, കടുങ്ങല്ലൂർ പഞ്ചായത്തിൽ ഉൾപ്പെടുന്ന ആലങ്ങാട് വരെയുള്ള കിഴക്കേ കടുങ്ങല്ലൂർ റോഡ് എന്നിവയാണ് വീതി കൂട്ടുന്നത്. ഇരുവശത്തു നിന്നും രണ്ടു മീറ്റർ എടുത്ത് 12 മീറ്ററായാണ് റോഡ് വീതി കൂട്ടുന്നത്. ഏഴ് മീറ്റർ വീതിയിലുള്ള ടാർ റോഡിനൊപ്പം സർവീസ് റോഡ്, ഡ്രെയിൻ കം ഫുട്പാത്ത്, കേബിൾ ഡക്ട് എന്നിവ ഉൾപ്പെടെയാണ് 12 മീറ്റർ വീതിയുണ്ടാവുക. വീടുകൾ, കടകൾ തുടങ്ങിയവ ഒഴിയേണ്ടി വന്നവരുടെ കണക്കാണ് ഇന്നലെ എടുത്തത്. ഭൂമിയുടെയും കെട്ടിടങ്ങളുടെയും വിലനിർണയിക്കുന്നതിനുള്ള നടപടികളും അവസാന ഘട്ടത്തിലാണ്. പുനരധിവാസ പാക്കേജും ഉടൻ പ്രഖ്യാപിക്കും. കഴിഞ്ഞ വർഷം ജൂണിൽ പുറത്തിറങ്ങിയ വിജ്ഞാപന പ്രകാരമാണ് പൊന്നുംവില ഓഫീസറായി പി ഡബ്ല്യുഡി ലാൻഡ് അക്വിസിഷൻ സ്പെഷൽ തഹസീൽദാറെ നിയമിച്ചത്. അങ്കമാലിയിലാണ് ഓഫീസ് പ്രവർത്തിക്കുന്നത്. അങ്കമാലി എൽഎ പിഡബ്ല്യുഡി സ്പെഷൽ തഹസിൽദാർ എം.കെ. ഗിരീഷ് ലാൽ, ഡെപ്യൂട്ടി തഹസിൽദാർ കെ.കെ. ബഷീർ, കളക്ടറേറ്റ് എൽഎ വിഭാഗം ജൂനിയർ സൂപ്രണ്ട് ധന്യ, റവന്യു ഇൻസ്പെക്ടർ ജിജോ പോൾ, പി.സി.മുരളീധരൻ എന്നിവരും സംഘത്തിലുണ്ടായിരുന്നു.

യോഗദിനാചരണം

കാർമൽ കോളജ് ഓഫ് നഴ്സിംഗിൽ ആലുവ: കാർമൽ കോളജ് ഓഫ് നഴ്സിംഗിലെ എസ്എസ്ജിപി സെല്ലും കോളജ് യൂണിയനും എസഎൻഎയും സംയോജിതമായി അന്താരാഷ്ട്ര യോഗ ദിനം ആചരിച്ചു. യു ജി കോ ഓർഡിനേറ്ററും എസ്എസ്ജിപി നോഡൽ ഓഫീസറുമായ ഡോക്ടർ ദീപ ജോർജ് ആശാലക്ഷ്മി എന്നിവർ പ്രസംഗിച്ചു. അമൃതയിൽ യോഗ ദിനാചരണം കൊച്ചി: കൊച്ചി അമൃത ഹെൽത്ത് സയൻസ് കാന്പസിൽ വിവിധ സ്കൂളുകളുടെയും അയുദ്ധിന്‍റെയും നേതൃത്വത്തിൽ നടന്ന അന്താരാഷ്ട്ര യോഗദിനാചരണം സിറ്റി പോലീസ് കമ്മീഷണർ പുട്ട വിമലാദിത്യ ഉദ്ഘാടനം ചെയ്തു. സ്വാമി അനഘാമൃതാനന്ദപുരി, യോഗാചാര്യൻ സുകുമാരൻ, ഡോ. മനോരഞ്ജിനി സുരേഷ് എന്നിവർ പ്രസംഗിച്ചു. യോഗാചാര്യന്മാരെ ആദരിച്ചു ആലുവ: മുപ്പത്തടം ഹോട്ടല്‍ ദ്വാരകയില്‍ അന്താരാഷ്ട്ര യോഗദിനം ആചരിച്ചു. യോഗാചാര്യന്മാരായ എസ്. ആന്‍റണിയും ടി.എ. ജോയിയും കെ.ഡി. വാസന്തിയും ചേര്‍ന്ന് ഭദ്രദീപം തെളിച്ചു. ചടങ്ങിൽ മൂന്നു യോഗാചാര്യന്മാരേയും ശ്രീമന്‍ നാരായണന്‍ ആദരിച്ചു.

ഭാരതമാതാ കോളജിൽ"വായന മഴ'

തൃക്കാക്കര: ഭാരതമാതാ കോളജിൽ മലയാള വിഭാഗത്തിന്‍റെ ആഭിമുഖ്യത്തിൽ വായന വാരാചരണം ( വായന മഴ) 26നു സമാപിക്കും. വിവിധ ദിനങ്ങളിലായി പ്രഫ. എം.കെ. സാനുവിന്‍റെ വസതി സന്ദർശനം, കാവ്യാലാപനം, സാഹിത്യ കൃതികളെ പരിചയപെടുത്തൽ, വിവിധ മത്സരങ്ങൾ, നാടൻപാട്ടും വർത്തമാനവും തുടങ്ങിയ പരിപാടികൾ നടക്കും. കവി ഒ. അരുൺകുമാർ ഉദ്ഘാടനം ചെയ്തു. പ്രിൻസിപ്പൽ ഡോ. സൗമ്യ തോമസ് മുഖ്യപ്രഭാഷണം നടത്തി. മലയാളം വകുപ്പ് മേധാവി ഡോ. അനീഷ് പോൾ അധ്യക്ഷത വഹിച്ചു. ഡോ. തോമസ് പനക്കളം, ഡോ. വർഗീസ് പോൾ തുടങ്ങിയവർ പ്രസംഗിച്ചു.

കരുമാലൂർ-കുന്നുകര കുടിവെള്ള പദ്ധതി നിർമാണോദ്ഘാടനം നടത്തി

കരുമാലൂർ: അടുത്ത 50 വർഷത്തേക്ക് കുന്നുകര, കരുമാലൂർ പഞ്ചായത്തുകളിലെ മുഴുവൻ ജനങ്ങൾക്കും ആവശ്യമായ കുടിവെള്ള ലഭ്യത ഉറപ്പാക്കുന്നതാണ് കുന്നുകര-കരുമാലൂർ കുടിവെള്ള പദ്ധതിയെന്ന് വ്യവസായ മന്ത്രി പി. രാജീവ്. പദ്ധതി സമയബന്ധിതമായി പൂർത്തിയാക്കും. മുപ്പത്തടം ജലശുദ്ധീകരണശാലയുടെ ശേഷി 20 എംഎൽഡി ആയി വർധിപ്പിക്കുന്നതോടെ ആലങ്ങാട് പഞ്ചായത്തിലേക്കും കൂടുതൽ കുടിവെള്ളമെത്തിക്കാൻ കഴിയുമെന്നും അദ്ദേഹം പറഞ്ഞു. കളമശേരി നിയമസഭാ മണ്ഡലത്തിലെ കുടിവെള്ള ലഭ്യത ഉറപ്പാക്കുന്ന പ്രധാന പദ്ധതികളിൽ ഒന്നായ കരുമാല്ലൂർ - കുന്നുകര കുടിവെള്ള വിതരണ കിഫ്ബി പദ്ധതിയുടെ നിർമാണ ഉദ്ഘാടനച്ചടങ്ങിൽ സംസാരിക്കുകയായിരുന്നു മന്ത്രി. കുന്നുരയിൽ നടന്ന ചടങ്ങിൽ ജലവിഭവ മന്ത്രി റോഷി അഗസ്റ്റിൻ നിർമാണോദ്ഘാടനം നിർവഹിച്ചു. വ്യവസായമന്ത്രി പി. രാജീവ് അധ്യക്ഷനായി. കൊച്ചിയിൽ നടപ്പാക്കുന്ന എഡിബി പദ്ധതിയിൽ ആലുവയിലെ 190 എംഎൽഡി പദ്ധതിയും ഉൾപ്പെടുത്തിയതോടെ കുടിവെള്ളക്ഷാമത്തിന് പരിഹാരമാവുകയാണെന്ന് റോഷി അഗസ്റ്റിൻ പറഞ്ഞു. സംസ്ഥാന സർക്കാർ 51.30 കോടി രൂപയാണ് കിഫ്ബി മുഖേന കുന്നുകര - കരുമാല്ലൂർ പദ്ധതിക്കായി അനുവദിച്ചത്. ടെൻഡർ പൂർത്തിയാക്കി 48.52 കോടി രൂപയുടെ ഭരണാനുമതി നൽകി. ബ്ലോക്ക് പഞ്ചായത്ത് പ്രസിഡന്‍റുമാരായ ടി.വി. പ്രദീഷ്, രമ്യ തോമസ്, ഗ്രാമ പഞ്ചായത്ത് പ്രസിഡൻ്റുമാരായ സൈനബാബു സബിത നാസർ തുടങ്ങിയവർ സംസാരിച്ചു.

ഗോശ്രീ വഴിയുള്ള ബസ് സർവീസ് നിർത്തുമെന്ന്

വൈപ്പിന്‍: ഗതാഗതതടസം മൂലം ഗോശ്രീപാലം വഴിയുള്ള സ്വകാര്യബസുകള്‍ സര്‍വീസ് നിര്‍ത്തിവയ്ക്കുമെന്ന് ബസുടമാ സംഘത്തിന്‍റെ മുന്നറിയിപ്പ്. ടാറിംഗിനായി പൊളിച്ചിട്ടിരിക്കുന്ന ഗോശ്രീ രണ്ടാം പാലത്തിനു സമാന്തരമായുള്ള പാലത്തിന്‍റെ അപ്രോച്ച്‌റോഡ് സമയബന്ധിതമായി ടാറിംഗ് നടത്താത്തതാണ് വിനയായിരിക്കുന്നത്. ഇതുമൂലം രണ്ടാം പാലത്തിലൂടെയാണ് വാഹനങ്ങൾ അങ്ങോട്ടുമിങ്ങോട്ടും കടന്നു പോകുന്നത്. ഇതോടെ തിരക്കേറിയ രാവിലെയും വൈകിട്ടും ഗതാഗതക്കുരുക്ക് നിത്യസംഭവമായിരിക്കുകയാണിവിടെ. വല്ലാര്‍പാടത്ത് മണിക്കൂറുകൾ നീളുന്ന ഗതാഗതതടസം മൂലം ബസുകള്‍ക്കു സമയനിഷ്ഠ പാലിക്കാന്‍ കഴിയുന്നില്ല. ഇതിനാൽ ട്രിപ്പുകൾ റദ്ദാക്കേണ്ടിവരുന്നു. ഇതാകട്ടെ സാമ്പത്തിക നഷ്ടത്തിനിടയാക്കുന്നതുമൂലം സര്‍വീസ് തുടര്‍ന്നു കൊണ്ടുപോകാനാവാത്ത സ്ഥിതിയാണിപ്പോഴെന്ന് പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ പ്രസിഡന്‍റ് പി.കെ. ലെനില്‍, സെക്രട്ടറി എ.ജെ. ഓജന്‍, പി.പി. വര്‍ഗീസ്, സി.കെ. പ്രദീപ് എന്നിവര്‍ ചൂണ്ടിക്കാട്ടി.

കുമ്പളങ്ങി പടന്നക്കരി സ്ലൂയിസ് തുറന്നു

മട്ടാഞ്ചേരി : കുമ്പളങ്ങി പഞ്ചായത്തിലെ പടന്നക്കരി സ്ലൂയിസിന്‍റെയും അപ്പ്രോച്ച് റോഡിന്‍റെയും ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. കെ.ജെ. മാക്സി എംഎൽഎ അധ്യക്ഷത വഹിച്ചു. വർഷങ്ങളായി കുമ്പളങ്ങി പഞ്ചായത്തിന് ലേലത്തിലൂടെ ലക്ഷങ്ങൾ നേടി കൊടുക്കുന്ന സ്ലൂയിസാണ് പടന്നക്കരി, എന്നാൽ സ്ലൂയിസ് തകർന്നതുമൂലം പഞ്ചായത്തിന്‍റെ വരുമാന മാർഗം നിലയ്ക്കുകയും പാടശേഖരത്തിലെ 152 ഏക്കറോളം ഭൂമി കൃഷി ചെയ്യുവാൻ സാധിക്കാതെ വരികയും ചെയ്തു. ഈ പ്രദേശത്ത് യാത്രാക്ലേശവും ഓര് വെള്ള പ്രശ്നവും ഇതുമൂലം ഉണ്ടായി. ജലവിഭവവകുപ്പിന്‍റെ 1.53 കോടി രൂപയും എംഎൽഎ ഫണ്ടിൽനിന്ന് 25 ലക്ഷം രൂപയും അനുവദിച്ചാണ് സ്ലൂയിസും അപ്പ്രോച്ച് റോഡ് നിർമാണവും നിർവഹിച്ചിരിക്കുന്നത്. സ്ലൂയീസ് യഥാർഥ്യമായതോടെ പടന്നക്കരി നിവാസികളുടെ യാത്രാ ക്ലേശത്തിനും കുമ്പളങ്ങിയിലെ പടിഞ്ഞാറൻ മേഖലയിലെ ഓരു വെള്ളക്കെട്ടിനും പരിഹാരമാകും. ബ്ലോക്ക് പഞ്ചായത്ത് പ്രസിഡന്‍റ് ബേബി തമ്പി, പഞ്ചായത്ത് പ്രസിഡന്‍റ് സൂസൻ ജോസഫ്, പി.എ. പീറ്റർ, ജയ്സൺ ടി. ജോസ്, എം.എം. ഫ്രാൻസിസ് തുടങ്ങിയവർ സംസാരിച്ചു.

ഹൈ സ്പീഡ് ട്രെയിൻ പദ്ധതി: സിൽവർ ലൈൻ പദ്ധതിയെ ഒളിച്ചു കടത്താൻ ശ്രമമെന്ന്

സിൽവർ ലൈൻ വിരുദ്ധ സമിതി വീണ്ടും സമരപാതയിൽ ആലുവ: കേന്ദ്ര അംഗീകാരം ലഭിക്കില്ലെന്ന് ഉറപ്പായപ്പോൾ നേരിയ വ്യത്യാസം വരുത്തി ഹൈ സ്പീഡ് ട്രെയിൻ പദ്ധതി എന്ന പേരിൽ സിൽവർ ലൈൻ പദ്ധതിയെ ഒളിച്ചു കൊണ്ടുവരാൻ ശ്രമമെന്ന് സിൽവർ ലൈൻ വിരുദ്ധ ജനകീയ സമിതി. ഇതിനെതിരെ 28 ന് സംസ്ഥാന വ്യാപകമായി എല്ലാ യൂണിറ്റുകളിലും പ്രതിഷേധ ദിനമായി ആചരിക്കും. 30ന് തിരുവനന്തപുരത്ത് സെക്രട്ടറിയേറ്റ് നടയിൽ പ്രതിഷേധ സംഗമം സംഘടിപ്പിക്കുമെന്ന് സംഘാടകർ അറിയിച്ചു. ഇ. ശ്രീധരൻ നിർദ്ദേശിച്ച ഹൈ സ്പീഡ് ട്രെയിൻ പദ്ധതി നേരത്തെ സർക്കാർ പരിഗണിക്കുകയും കേരളത്തിന്‍റെ സാമ്പത്തിക, പാരിസ്ഥിതിക, സാമൂഹ്യ സാഹചര്യത്തിൽ പ്രായോഗികമല്ലെന്ന് കണ്ടെത്തി ഉമ്മൻചാണ്ടി സർക്കാർ വേണ്ടെന്ന് വെച്ചതാണെന്ന് ആലുവയിൽ ചേർന്ന കെ - റെയിൽ സിൽവർ ലൈൻ വിരുദ്ധ ജനകീയ സമിതി സമ്മേളനം ചൂണ്ടിക്കാട്ടി. ഒന്നാം പിണറായി സർക്കാരും ഇക്കാര്യത്തിൽ സമാന തീരുമാനമാണ് കൈക്കൊണ്ടത്. ബ്രോഡ്ഗേജ് അല്ലാത്ത ഒരു പാതയും സ്വീകാര്യമല്ലെന്ന് കഴിഞ്ഞ മാസവും റെയിൽവേ ബോർഡ് ആവർത്തിച്ച് വ്യക്തമാക്കി. എന്നിട്ടും സംസ്ഥാന സർക്കാർ ഹൈ സ്പീഡ് പദ്ധതിക്ക് വേണ്ടി ശ്രമങ്ങൾ നടത്തുന്നത് യാത്രാസൗകര്യം വർദ്ധിപ്പിക്കുക എന്ന സദുദ്ദേശത്തോടെയല്ലെന്നും വിദേശ വായ്പയിൽ കണ്ണ് വച്ചാണെന്നും സമ്മേളനം അഭിപ്രായപ്പെട്ടു. കെ - റെയിൽ സിൽവർ ലൈൻ വിരുദ്ധ ജനകീയ സമിതി സംസ്ഥാന ചെയർമാൻ എം.പി. ബാബുരാജ് അധ്യക്ഷത വഹിച്ചു. കേരള കോൺഗ്രസ് വൈസ് ചെയർമാൻ ജോസഫ് എം. പുതുശേരി സമ്മേളനം ഉദ്ഘാടനം ചെയ്തു. സമിതി സംസ്ഥാന ജനറൽ കൺവീനർ എസ്. രാജീവൻ, ചന്ദ്രംഗതൻ മാടായി, എം.ടി. തോമസ്, പ്രൊഫ. കുസുമം ജോസഫ്, ബാബു കുട്ടൻചിറ, വിനു കുര്യാക്കോസ്, ശിവദാസ് മഠത്തിൽ, ടി. സി. രാമചന്ദ്രൻ, മിനി കെ. ഫിലിപ്പ്, മുരുകേഷ് നടക്കൽ, എൻ.എ. രാജൻ, എ.ഓ.പൗലോ, കെ.എം.തോമസ്, സി.കെ.ശിവദാസൻ, മാരിയ അബു, കെ. പി. സാൽവിൻ, എ. ഷൈജു, ബി. രാമചന്ദ്രൻ, മധു ചെങ്ങന്നൂർ, കെ. ആർ. പ്രസാദ് എന്നിവർ പ്രസംഗിച്ചു.

മുനമ്പം ഭൂസംരക്ഷണ സമിതിക്ക് ഐക്യദാര്‍ഢ്യവുമായി ലീജിയന്‍ ഓഫ് മേരി അംഗങ്ങള്‍

കൊച്ചി: കത്തോലിക്കാ സഭയിലെ അന്താരാഷ്ട്ര പ്രസ്ഥാനമായ ലീജിയന്‍ ഓഫ് മേരിയുടെ വരാപ്പുഴ അതിരൂപത എറണാകുളം മേഖല മുനമ്പം ഭൂസംരക്ഷണ സമിതിക്ക് ഐക്യദാര്‍ഢ്യവുമായി സമരപ്പന്തലിലെത്തി. മുനമ്പം തീരജനത അനുഭവിക്കുന്ന കഷ്ടപ്പാടുകളും ദുരന്തങ്ങളും മനസിലാക്കാനും അവരുടെ പോരാട്ടത്തിന് പിന്തുണ നല്‍കാനുമാണ് ഇവർ മുനമ്പം സമരപ്പന്തലില്‍ എത്തിയത്. ഭൂസംരക്ഷണസമിതി രക്ഷാധികാരി ഫാ. ആന്‍റണി സേവ്യര്‍ തറയില്‍ സമരസേനാനികള്‍ക്ക് ഷാളണിയിച്ച് നിരാഹാര സമരം ഉദ്ഘാടനം ചെയ്തു. സമാപന സമ്മേളനത്തിന്‍റെ എറണാകുളം മേഖല പ്രസിഡന്‍റ് ബ്രദര്‍ ഗാസ്പര്‍ നിര്‍വഹിച്ചു. വൈസ് പ്രസിഡന്‍റ് ടി.എം. വര്‍ഗീസ്, സെക്രട്ടറി ഡെന്‍സി സേവ്യര്‍, വേളാങ്കണ്ണി മാതാ പള്ളി അസിസ്റ്റന്‍റ് വികാരി ഫാ. മോന്‍സി വര്‍ഗീസ് അറക്കല്‍, ഭൂസംരക്ഷണ സമിതി ചെയര്‍മാന്‍ ജോസഫ് റോക്കി പാലക്കല്‍, സമരസമിതി കണ്‍വീനര്‍ ജോസഫ് ബെന്നി കുറുപ്പശേരി തുടങ്ങിയവര്‍ പ്രസംഗിച്ചു.

ആലുവ ബ്രിഡ്ജ് റോഡിൽ കുടിവെള്ളം ലഭിച്ചിട്ട് ആറുനാൾ : വാട്ടർ അഥോറിറ്റി ഓഫീസ് ഉപരോധിച്ചു

ആലുവ: നഗരമധ്യത്തിൽ ബാങ്ക് ജംഗ്ഷൻ മുതൽ ബൈപാസ് വരെ കുടിവെള്ളം കിട്ടാതെ ആലുവ നിവാസികൾ ദുരിതത്തിൽ. ആറ് ദിവസമായി കുടിവെള്ളം കിട്ടാത്തതിൽ പ്രതിഷേധിച്ച് ആലുവ താലൂക്ക് പൗരാവകാശ സരക്ഷണ സമിതിയുടെ നേതൃതത്തിൽ വാട്ടർ അഥോറിട്ടി അസിസ്റ്റന്‍റ് എക്സിക്യൂട്ടീവ് എൻജിനീയറെ ഉപരോധിച്ചു. പുതിയ പൈപ്പ് സ്ഥാപിച്ച് കുടിവെള്ള പ്രശ്നം പരിഹരിക്കാമെന്ന എക്സിക്യൂട്ടീവ് എഞ്ചിനീയറുടെ ഉറപ്പിനെ തുടർന്നാന്ന് ഉപരോധം അവസാനിപ്പിച്ചത്. അമ്പത് വർഷത്തിലധികമായി പഴക്കമുള്ള ആസ്ബസ്റ്റോസ് നിർമിതമായ ഭൂഗർഭ പൈപ്പുകൾ മാറ്റണമെന്ന സംസ്ഥാന മനുഷ്യാവകാശ കമ്മീഷന്‍റെ 2023 ഉത്തരവ് നടപ്പിലാക്കണമെന്ന് പൗരസമിതി സെക്രട്ടറി സാബു പരിയാരത്ത് ആവശ്യപ്പെട്ടു. ആലുവ ജലശുദ്ധീകരണ ശാലയുടെ ഒരു കിലോമീറ്റർ മാത്രം ചുറ്റളവിലുള്ള ആലുവ ബാങ്ക് ജംഗ്ഷൻ, ബ്രിഡ്ജ് റോഡ്, കോഡർ ലൈൻ, പേരേക്കാട്ട് റോഡ് എന്നീ മേഖലകിലാണ് ഞായറാഴ്ച മുതൽ കുടിവെള്ളം ഇല്ലാതായത്. എന്നാൽ എന്താണ് സംഭവിച്ചതെന്നോ എവിടെയാണ് പമ്പിംഗിൽ തടസം വന്നതെന്നോ കണ്ടെത്താനാകുന്നില്ലെന്നാണ് ഉദ്യോഗസ്ഥരുടെ വിശദീകരണം. നഗരത്തിൽ ജലവിതരണം ചെയ്യുന്ന ആസ്ബസ്റ്റോസ് പൈപ്പുകൾ പാലസ് റോഡിൽ ബാങ്ക് ജംഗ്ഷവൻ വരെ മൂന്ന് വർഷം മുമ്പ് മാറ്റിയിട്ടുണ്ട്. എന്നാൽ ബാങ്ക് ജംഗ്ഷൻ മുതൽ ബൈപാസ് വരെ പണമില്ലെന്ന പേരിൽ മാറ്റാതിരിക്കുകയായിരുന്നു. ഇന്നലെ ഉപരോധം നടത്തിയതോടെ ഇതിനായി ഫണ്ട് അനുവദിക്കാമെന്നും പൊതുമരാമത്ത് വകുപ്പിൽ നിന്ന് അനുമതി മേടിക്കാമെന്നും ഉദ്യോഗസ്ഥർ സമരക്കാരെ അറിയിച്ചു.

ചെല്ലാനത്തെ കടലാക്രമണത്തിന് ശാശ്വത പരിഹാരം കാണണം: സിപിഎം

കൊച്ചി: ചെല്ലാനത്ത് പുത്തന്‍തോടു മുതല്‍ മാനാശേരി വരെയുള്ള പ്രദേശങ്ങളിലെ കടലാക്രമണത്തിന് ശാശ്വത പരിഹാരം കാണണമെന്ന് സിപിഎം ജില്ലാ സെക്രട്ടേറിയറ്റ് ആവശ്യപ്പെട്ടു. കടലാക്രമണം മുമ്പെങ്ങുമില്ലാത്തവിധം രൂക്ഷമാണ്. തീരം കടലെടുത്തു എന്നു മാത്രമല്ല ഒമ്പത് വീടുകള്‍ പൂര്‍ണമായും നിരവധി വീടുകള്‍ ഭാഗികമായും തകര്‍ന്നു. തീരമേഖലയില്‍ കടലാക്രമണത്തെ പ്രതിരോധിക്കാന്‍ ഒരുവിധ സഹായവും നല്കാത്ത കേന്ദ്രസര്‍ക്കാര്‍ നടപടി ജനവിരുദ്ധമാണ്. പ്രശ്‌നത്തിന് ശാശ്വതമായ പരിഹാരം കാണാന്‍ സത്വര നടപടി സ്വീകരിക്കണമെന്നും ജില്ലാ സെക്രട്ടേറിയറ്റ് ആവശ്യപ്പെട്ടു.

കടലാക്രമണം: മന്ത്രി റോഷിക്കെതിരെ യൂത്ത് കോൺഗ്രസ്‌ പ്രതിഷേധം

കൊച്ചി: കൊച്ചി തീരത്തു കടലേറ്റം രൂക്ഷമായിട്ടും നടപടികൾ സ്വീകരിച്ചില്ലെന്ന് ആരോപിച്ചു മന്ത്രി റോഷി അഗസ്റ്റിനെതിരെ യൂത്ത് കോൺഗ്രസ് പ്രതിഷേധം. കൊച്ചിയിൽ വാട്ടർ അഥോറിറ്റിയുടെ പരിപാടിയിൽ പങ്കെടുക്കാനെത്തിയ മന്ത്രിക്കു നേരെ കരിങ്കൊടിയുമായി പ്രവർത്തകർ പ്രതിഷേധിച്ചു. ചെല്ലാനം, കണ്ണമാലി, ചെറിയ കടവ് പ്രദേശങ്ങളിൽ കടലേറ്റം രൂക്ഷമായ സാഹചര്യത്തിലായിരുന്നു പ്രതിഷേധം. പരിപാടിയുടെ ഉദ്ഘാടന ചടങ്ങിനിടെ വേദിയിലേക്ക് യൂത്ത് കോൺഗ്രസ്‌ പ്രവർത്തകർ കരിങ്കൊടിയുമായി എത്തുകയായിരുന്നു. സ്റ്റേജിനു സമീപം നിലയുറപ്പിച്ച പ്രവർത്തകരെ പോലീസ് എത്തി ബലമായി അറസ്റ്റ് ചെയ്തു നീക്കി. യൂത്ത് കോൺഗ്രസ്‌ ജില്ലാ പ്രസിഡന്‍റ് സിജോ ജോസഫ്, നിയോജകമണ്ഡലം പ്രസിഡന്‍റ് ജെർജസ് വി. ജേക്കബ്, നിയോജകമണ്ഡലം ഭാരവാഹികളായ അനീഷ് ചേനക്കര, ബി. അഷ്‌റഫ്‌ എന്നിവരെയാണ് പോലീസ് അറസ്റ്റ് ചെയ്തു നീക്കിയത്.

പുതിയ വാട്ടര്‍ പ്യൂരിഫയറിന് തകരാർ; കന്പനി നഷ്ടപരിഹാരം നല്‍കണമെന്ന് ഉപഭോക്തൃ കോടതി

കൊച്ചി: പുതിയ വാട്ടര്‍ പ്യൂരിഫയര്‍ ഇന്‍സ്റ്റാള്‍ ചെയ്തതിലെ അപാകത കാരണം പ്രവര്‍ത്തിക്കാതിരുന്നതിന് നഷ്ടപരിഹാരം നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്ക പരിഹാര കോടതി. ഭിന്നശേഷിക്കാരനും പെയിന്‍റിംഗ് തൊഴിലാളിയുമായ കെ.എ. ആഗസ്റ്റിന്‍ യുറേക്ക ഫോർബ്സിനും ഇന്‍സ്റ്റലേഷന്‍ സര്‍വീസ് സെന്‍ററിനുമെതിരെ സമര്‍പ്പിച്ച പരാതിയിലാണ് ഉത്തരവ്. കൊച്ചിയിലെ പ്രമുഖ ഗൃഹോപകരണ സ്ഥാപനത്തില്‍ നിന്ന് 10,200 രൂപയ്ക്കാണ് വാട്ടര്‍ പ്യൂരിഫയര്‍ വാങ്ങിയത്. ഉത്പന്നം സ്ഥാപിച്ചതിനുശേഷം ഇതുവരെയും ശരിയായി പ്രവര്‍ത്തിച്ചിട്ടില്ല. നിരവധി തവണ എതിര്‍കക്ഷികളെ സമീപിച്ചിട്ടും നപടികള്‍ ഉണ്ടായില്ലെന്നും പരാതിയിൽ പറയുന്നു. ഉപകരണം ശരിയായ രീതിയില്‍ ഇന്‍സ്റ്റാള്‍ ചെയ്യുന്നതില്‍ പരാജയപ്പെട്ടതായി ഡി.ബി. ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവര്‍ അംഗങ്ങളായ ബെഞ്ച് കണ്ടെത്തി. പരാതിക്കാരന് പുതിയ വാട്ടര്‍ പ്യൂരിഫയര്‍ നല്‍കുകയോ 10,200 രൂപ തിരികെ നല്‍കുകയും ചെയ്യണം. കൂടാതെ നഷ്ടപരിഹാരം കോടതി ചെലവ് ഇനങ്ങളില്‍ 10,000 രൂപയും 45 ദിവസത്തിനകം നല്‍കാന്‍ എതിര്‍കക്ഷികള്‍ക്ക് കോടതി ഉത്തരവ് നല്‍കി.

പണപ്പിരിവ് അവസാനിപ്പിക്കണം: കെഎസ്‌യു

കൊച്ചി: എറണാകുളം മഹാരാജാസ് കോളജിന്‍റെ ശതോത്തര സുവര്‍ണ ജൂബിലി ആഘോഷത്തിനായി വിദ്യാര്‍ഥികളില്‍ നിന്ന് പണപ്പിരിവ് നടത്തുന്നത് അവസാനിപ്പിക്കണമെന്ന് കെഎസ്‌യു. സര്‍ക്കാര്‍ കലാലയങ്ങളില്‍ അനധികൃത പിരിവ് നിരോധിച്ചിട്ടും പുതിയതായി അഡ്മിഷന്‍ എടുക്കുന്ന വിദ്യാര്‍ഥികളിൽനിന്ന് 500 രൂപ വീതമാണ് പിരിക്കുന്നത്. കോളജ് അഡ്മിനിസ്‌ട്രേഷന്‍റെ കഴിവുകേടിനെ വിദ്യാര്‍ഥികളുടെ ചുമലില്‍ കെട്ടിവയ്ക്കാന്‍ അനുവദിക്കില്ല. പ്രിന്‍സിപ്പലിന് പരാതി നല്‍കിയിട്ടുണ്ട്. മതിയായ കാരണം പറയാതെ പണപ്പിരിവ് തുടര്‍ന്നാല്‍ സമരപരിപാടികളുമായി മുന്നോട്ട് പോകുമെന്നും കെഎസ്‌യു യൂണിറ്റ് പ്രസിഡന്‍റ് രാജീവ് പാട്രിക് പറഞ്ഞു.

കാപ്പ ലംഘനം: യുവതി അറസ്റ്റിൽ

ഉദയംപേരൂർ: കാപ്പ ഉത്തരവ് ലംഘിച്ച കരിങ്ങാച്ചിറ പാലത്തിങ്കൽ സൂര്യപ്രഭ(21)യെ ഉദയംപേരൂർ പോലീസ് അറസ്റ്റ് ചെയ്തു. ഉദയംപേരൂർ, ഹിൽപാലസ് പോലീസ് സ്റ്റേഷനുകളിലെ നിരവധി കേസിൽ പ്രതിയായ ഇവരെ കാപ്പ ഉത്തരവ് പ്രകാരം എറണാകുളം ജില്ലയിൽനിന്ന് നാടുകടത്തിയിരുന്നു. ഉത്തരവ് ലംഘിച്ചെത്തിയ യുവതിയെ വലിയകുളം ഭാഗത്ത് നിന്നാണ് കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മലയാറ്റൂരിൽ കാട്ടാന ശല്യം രൂക്ഷം: ഫോറസ്റ്റ് ഓഫീസ് ഉപരോധിച്ച് ജനപ്രതിനിധികളും നാട്ടുകാരും

കാലടി: മലയാറ്റൂർ തേക്കുംതോട്ടം - ആറാട്ടുകടവ് ഭാഗത്ത് കാട്ടാനകളുടെ ആക്രമണം രൂക്ഷമായതോടെ ജനങ്ങൾ ഭീതിയിലാണ്. ഇതിൽ പ്രതിഷേധിച്ച് ജനപ്രതിനിധികളുടെ നേതൃത്വത്തിൽ പ്രദേശവാസികൾ ഇന്നലെ മലയാറ്റൂർ ഫോറസ്റ്റ് ഓഫീസ് ഉപരോധിച്ചു. തുടർന്ന് എസിഎഫ് ഡെൽറ്റ മറോക്കിയുമായി നടത്തിയ ചർച്ചയിൽ ലഭിച്ച ഉറപ്പിൻമേൽ നാട്ടുകാർ സമരം അവസാനിപ്പിക്കുകയായിരുന്നു. അടിക്കാട് വെട്ടും, ആവശ്യമുള്ള സ്ഥലങ്ങളിൽ ട്രഞ്ച് നിർമിക്കും, നാശനഷ്ടം സംഭവിച്ചവർക്ക് നഷ്ടപരിഹാരം നൽകുമെന്നും എസിഎഫ് നാട്ടുകാർക്ക് ഉറപ്പു നൽകി. ഗ്രാമപഞ്ചായത്ത് പ്രസിഡന്‍റ് ജോയി അവോക്കാരൻ, ജില്ലാ പഞ്ചായത്തംഗം അനിമോൾ ബേബി, ബ്ലോക്ക് പഞ്ചായത്തംഗം മനോജ് മുല്ലശേരി വാർഡ് മെമ്പർമാരായ വിജി സെബാസ്റ്റ്യൻ, സേവ്യർ വടക്കുംചേരി എന്നിവരാണ് സമരത്തിന് നേതൃത്വം നല്കിയത്. കഴിഞ്ഞ രാത്രിയിൽ കാട്ടാനക്കൂട്ടം വീടുകൾ ആക്രമിക്കുകയും വലിയ നാശനഷ്ടം വരുത്തുകയും ചെയ്തിരുന്നു. നാശനഷ്ടമുണ്ടായ വീടിന് അടിയന്തര ധനസഹായം നൽകുന്നതിനുള്ള നടപടികൾ ഊർജിതമാക്കുമെന്നും രാത്രികാല പരിശോധന ശക്തമാക്കുമെന്നും എസിഎഫ് ഉറപ്പു നല്കി. മലയാറ്റൂർ നീലിശ്വരം പഞ്ചായത്തിലെ 6, 7, 8 വാർഡുകളിൽ കാട്ടാന ആക്രമണം പതിവാണ്. രാത്രികളിൽ വീട്ടിനു ചുറ്റും ആനകൾ എത്തുന്നതിനാൽ ഉറങ്ങാൻ പോലും കഴിയുന്നില്ലെന്ന് നാട്ടുകാർ പറയുന്നു. വെള്ളിയാഴ്ച രാത്രി എട്ടാം വാർഡിൽ തേക്കുംതോട്ടം ഭാഗത്ത് പല വീടുകളിലും ആന നാശനഷ്ടം ഉണ്ടാക്കി. മതിലുകളും ഗേറ്റുകളും കൃഷികളും വലിയ തോതിൽ നശിപ്പിച്ചു. വനം-വന്യജീവി വകുപ്പിന്‍റെ ഭാഗത്ത് നിന്ന് അടിയന്തര ഇടപെടലുകൾ ഉണ്ടാകണമെന്ന് നാട്ടുകാർ ആവശ്യപ്പെട്ടു.

നെടുന്പാശേരിയിൽ മോഹൻലാലിന്‍റെ നേതൃത്വത്തിൽ യോഗ പരിശീലനം

നെടുമ്പാശേരി: ലഹരിക്കെതിരെ യോഗ എന്ന സന്ദേശവുമായി നടൻ മോഹൻലാൽ സ്ഥാപിച്ച വിശ്വശാന്തി ഫൗണ്ടേഷന്‍റെ നേതൃത്വത്തിൽ കൊച്ചി അന്താരാഷ്ട്ര വിമാനത്താവളം (സിയാൽ) കൺവൻഷൻ സെന്‍ററിൽ അന്താരാഷ്ട്ര യോഗ ദിനത്തിൽ കൂട്ടായ യോഗ പരിശീലനം നടത്തി. നാർക്കോട്ടിക് കൺട്രോൾ ബ്യൂറോയുടെ സഹകരണത്തോടെ ഒരു വർഷം നീണ്ടുനിൽക്കുന്ന ലഹരിക്കെതിരെയുള്ള ത്രീവ്രയജ്ഞത്തിനാണ് ഇവിടെ തുടക്കം കുറിച്ചത്. മോഹൻലാൽ മുഖ്യപ്രഭാഷണം നടത്തി. ഫൗണ്ടേഷൻ മാനേജിംഗ് ഡയറക്ടർ മേജർ രവി, നാർക്കോട്ടിക് കൺട്രോൾ ബ്യൂറോ കൊച്ചി സോണൽ ഡയറക്ടർ വേണുഗോപാൽ ജി. കുറുപ്പ് , ഡോ. ടെസി ഗ്രേസ് മാത്യൂസ്, ഗിരിജ ബി. നായർ എന്നിവർ പ്രസംഗിച്ചു. മോഹൻലാലിനൊടൊപ്പം വിദ്യാർഥികളും അധ്യാപകരും സിയാൽ ഉദ്യോഗസ്ഥൻമാരും ഉൾപ്പെടെ ആയിരത്തോളം പേർ യോഗയിൽ പങ്കെടുത്തു.

ഗവർണർ ഇന്ന് കുസാറ്റിൽ

കളമശേരി: കേരള ഗവർണറും കൊച്ചി ശാസ്ത്ര സാങ്കേതിക സർവകലാശാല(കുസാറ്റ്)യുടെ ചാൻസലറുമായ രാജേന്ദ്ര വിശ്വനാഥ് അർലേക്കർ ഇന്ന് സർവകലാശാലയിലെത്തും. കുഞ്ഞാലി മരക്കാർ സ്‌കൂൾ ഓഫ് മറൈൻ എൻജിനീയറിംഗിന്‍റെ 18-ാം ബാച്ച് ബിടെക് മറൈൻ എൻജിനീയറിംഗ് വിദ്യാർഥികളുടെ പാസിംഗ് ഔട്ട് പരേഡ് അദ്ദേഹം ഉദ്ഘാടനം ചെയ്യും. ഉച്ചകഴിഞ്ഞ് മൂന്നിന് കുസാറ്റ് സെമിനാർ കോംപ്ലക്സിൽ നടക്കുന്ന ചടങ്ങിൽ ഉന്നതവിജയം നേടിയ വിദ്യാർഥികൾക്ക് പുരസ്‌കാരങ്ങൾ നൽകും.

വീണ്ടും വാട്‌സ്ആപ്പ് പണം തട്ടിപ്പ്; ശ്രദ്ധിച്ചില്ലേല്‍ കാശ് പോകും

കൊച്ചി: ഒരിടവേളയ്ക്കു ശേഷം ജില്ലയില്‍ വാട്‌സ്ആപ്പ് ഹാക്ക് ചെയ്തുള്ള പണം തട്ടിപ്പ്. ഗായിക അമൃത സുരേഷിനാണ് ഒടുവില്‍ ഇത്തരത്തില്‍ 45,000 രൂപ നഷ്ടമായത്. വാട്‌സ്ആപ്പ് അക്കൗണ്ട് ഹാക്ക് ചെയ്തശേഷം ഉടമയുടെ കോണ്‍ടാക്ട് ലിസ്റ്റിലുള്ളവരോടും ഗ്രൂപ്പുകളിലുള്ളവരോടും പണം ആവശ്യപ്പെടുന്നതാണ് രീതി. വാട്‌സ്ആപ്പ് അക്കൗണ്ടിലെ സന്ദേശങ്ങള്‍, ചിത്രങ്ങള്‍, വീഡിയോകള്‍ എന്നിവ തട്ടിയെടുത്ത് ഭീഷിപ്പെടുത്താനും ശ്രമങ്ങള്‍ ഉണ്ടായേക്കാമെന്ന് സൈബര്‍ വിദഗ്ധര്‍ മുന്നറിയിപ്പു നല്‍കുന്നു. ഒടിപി നമ്പര്‍ ആവശ്യപ്പെട്ട് പരിചിതര്‍ സന്ദേശം അയച്ചാലും നേരിട്ട് വിളിച്ച് ഉറപ്പുവരുത്താതെ ഇത് പങ്കുവയ്ക്കരുതെന്ന് പോലീസും മുന്നറിയിപ്പ് നല്‍കുന്നു. തട്ടിപ്പ് ഇങ്ങനെ മുമ്പ് വാട്‌സ്ആപ്പിലേക്ക് എത്തിയ ഒടിപി നമ്പര്‍ പങ്കുവയ്ക്കുന്നതിലൂടെയാണ് തട്ടിപ്പ് നടന്നിരുന്നതെങ്കില്‍ നിലവില്‍ റിപ്പോര്‍ട്ട് ചെയ്തിട്ടുള്ള കേസില്‍ പരിചിതരായവര്‍ നേരിട്ട് പണം ആവശ്യപ്പെടുന്ന രീതിയാണ്. തട്ടിപ്പ് ആണെന്ന് മനസിലാക്കാതെ പലരും പണം കൈമാറുന്നു. പിന്നീട് നേരിട്ട് വിളിച്ച് അന്വേഷിക്കുന്നതോടെയാണ് തട്ടിപ്പിനിരയായ വിവരം മനസിലാകുന്നത്. അമൃത സുരേഷിന് പണം നഷ്ടമായത് ഇങ്ങനെ ഇഎംഐ അടയ്ക്കാനാണെന്നും ഒരു മണിക്കൂറിനകം തിരിച്ച് തരാമെന്നും കാണിച്ച് കസിന്‍ സിസ്റ്ററിന്‍റെ വാട്‌സ്ആപ്പില്‍ നിന്ന് 45,000 രൂപ ആവശ്യപ്പെട്ട് സന്ദേശം എത്തുന്നു. അമൃത പണം കൈമാറുന്നു, പിന്നാലെ 30,000 രൂപ കൂടി ആവശ്യപ്പെടുന്നു. പണം കൈയില്‍ ഇല്ലാത്തതിനാല്‍ അമൃത ഇവരെ വീഡിയോ കോള്‍ വിളിക്കുന്നു. കോള്‍ കട്ട് ചെയ്യുന്നു. പിന്നീട് നോര്‍മല്‍ കോള്‍ വിളിക്കുമ്പോഴാണ് യഥാര്‍ഥ വ്യക്തി ഇതറിഞ്ഞിട്ടില്ലെന്നും അയാളുടെ വാട്‌സ്ആപ്പ് ഹാക്ക് ചെയ്‌തതാണെന്നും വ്യക്തമാകുന്നത്. സംഭവത്തില്‍ അമൃത പോലീസിൽ പരാതി നല്‍കി. തട്ടിപ്പിന് ഇരയാകാതിരിക്കാന്‍ വാട്‌സ്ആപ്പ് ഹാക്ക് ചെയ്യപ്പെട്ട് കഴിഞ്ഞാൽ ഇതിന്‍റെ നിയന്ത്രണം തിരികെ കിട്ടാന്‍ ചുരുങ്ങിയത് ഒരാഴ്ചയെങ്കിലും സമയമെടുക്കും. അതിന് വാട്‌സ്ആപ്പ് തന്നെ വിചാരിക്കുകയും വേണം. വഞ്ചിതരാകാതിരിക്കാന്‍ ശ്രദ്ധിക്കേണ്ടതില്‍ പ്രധാനം രണ്ടു കാര്യങ്ങളാണ്. ഒന്ന് വാട്‌സ്ആപ്പ് അക്കൗണ്ടുകളില്‍ ടു സ്റ്റെപ് വെരിഫിക്കേഷന്‍ ആക്ടിവേറ്റാക്കുക. രണ്ട് ആറക്ക വെരിഫിക്കേഷന്‍ കോഡ് ആര് ചോദിച്ചാലും നല്‍കാതിരിക്കുക. പണം ആവശ്യപ്പെടുന്നത് പരിചയക്കാരാണെങ്കിലും നേരില്‍ വിളിച്ച് വിവരം തിരക്കുക. സജ്ജരാണ് ഉദ്യോഗസ്ഥര്‍ സംസ്ഥാനത്തെ നല്ലൊരു ശതമാനം സൈബര്‍ കുറ്റകൃത്യങ്ങളും രജിസ്റ്റര്‍ ചെയ്യപ്പെടുന്ന കൊച്ചിയില്‍ തട്ടിപ്പുകള്‍ക്ക് തടയിടാന്‍ സൈബര്‍ പോലീസ് സര്‍വ സജ്ജമാണ്. കൊച്ചി സിറ്റിയില്‍ ഒരു ഡിവൈഎസ്പി, മൂന്ന് ഇന്‍സ്‌പെക്ടര്‍മാര്‍, രണ്ട് എസ്‌ഐ, ഒരു എഎസ്‌ഐ, ഏഴ് എസിസിപിഒ, 11 സിപിഒ, എസ്‌ഐ(ടെലി) രണ്ട്, എച്ച്‌സി(ടെലി) രണ്ട്, പിസി(ടെലി) ഒന്ന്, പിസി (ഡ്രൈവര്‍) ഒന്ന് എന്നിങ്ങനെയും, എറണാകുളം റൂറലില്‍ ഒരു ഇന്‍സ്‌പെക്ടര്‍, രണ്ട് എസ്‌ഐമാര്‍, നാല് എസ്‌സിപിഒ, എസ്‌ഐ(ടെലി) രണ്ട്, എഎസ്‌ഐ(ടെലി) ഒന്ന്, പിസി (ടെലി) എന്നിങ്ങനെയുമാണ് ഉദ്യോഗസ്ഥരുടെ കണക്ക്.

മദ്യം മറിച്ചു വില്‍ക്കാന്‍ ശ്രമം; നേവി ഉദ്യോഗസ്ഥർ അടക്കം മൂന്നുപേര്‍ പിടിയില്‍

കൊച്ചി: ക്വാട്ടയില്‍ ലഭിച്ച വിദേശമദ്യം മറിച്ചുവിൽക്കുന്നതിനിടെ രണ്ട് നേവി ഉദ്യോഗസ്ഥരടക്കം മൂന്നുപേര്‍ പിടിയിലായി. രണ്ട് ഉത്തരേന്ത്യന്‍ സ്വദേശികളും ഒരു എറണാകുളം സ്വദേശിയുമാണ് അറസ്റ്റിലായത്. ഇവരുടെ പക്കല്‍നിന്നു 14 കുപ്പി മദ്യം പോലീസ് കസ്റ്റഡിയിലെടുത്തു. മൂവരുടെയും പേരുവിവരങ്ങള്‍ വെളിപ്പെടുത്തിയിട്ടില്ല. വെള്ളിയാഴ്ച രാത്രിയിലായിരുന്നു സംഭവം. നാവികസേന ആഭ്യന്തര അന്വേഷണം ആരംഭിച്ചു. നാവിക ആസ്ഥാനത്തുനിന്നു മദ്യം ബാഗില്‍ ഒളിപ്പിച്ചാണ് ഇവര്‍ പുറത്തെത്തിച്ചത്. തുടർന്ന് പെരുമാനൂരിലെത്തി എറണാകുളം സ്വദേശിക്ക് മദ്യം കൈമാറുന്നതിനിടെ പോലീസിന്‍റെ പിടിയിലാകുകയായിരുന്നു. അറസ്റ്റുവിവരം നാവികസേനയെ അറിയിച്ചു. പ്രതികളെ കോടതിയില്‍ ഹാജരാക്കി.

കുമ്പളങ്ങിയിൽ ഒഴിഞ്ഞപറമ്പില്‍ തലയോട്ടി കണ്ടെത്തി

പള്ളുരുത്തി: കുമ്പളങ്ങിയിൽ ഒഴിഞ്ഞ പറമ്പില്‍നിന്ന് മനുഷ്യന്‍റെ തലയോട്ടി കണ്ടെത്തി. കണ്ണമാലി സ്വദേശി ഫ്രാന്‍സിസ് മണ്ണാളിയുടെ ഉടമസ്ഥതയിലുള്ള പറമ്പ് വൃത്തിയാക്കുന്നതിനിടെയാണ് വർഷങ്ങൾ പഴക്കമുള്ള തലയോട്ടി കണ്ടെത്തിയത്. നാളുകളായി കാടുപിടിച്ചുകിടന്ന സ്ഥലം ഇതരസംസ്ഥാന തൊഴിലാളികൾ വൃത്തിയാക്കുന്നതിനിടെ തലയോട്ടി കണ്ടെത്തുകയായിരുന്നു. ഉടമയെ വിവരം അറിയിച്ചതിനെ തുടർന്ന് കുമ്പളങ്ങി പോലീസ് സ്ഥലത്തെത്തി. തലയോട്ടി കണ്ടെത്തിയ പറമ്പിന് 50 മീറ്റർ സമീപത്തായി സെമിത്തേരി സ്ഥിതി ചെയ്യുന്നുണ്ട്. സെമിത്തേരി വൃത്തിയാക്കുന്നതിനിടെ തലയോട്ടി ഇവിടെ എത്തിപ്പെട്ടതാണോയെന്ന് പോലീസ് അന്വേഷിക്കുന്നു. തലയോട്ടി കൂടാതെ മറ്റ് ശരീരഭാഗങ്ങൾ പറമ്പിലുണ്ടോയെന്ന് വിശദമായി പരിശോധന നടത്തുമെന്നും പോലീസ് അറിയിച്ചു. ഫോറൻസിക് വിദഗ്ധർ എത്തി തലയോട്ടി പരിശോധനയ്ക്കായി കൊണ്ടുപോയി.

അനധികൃത മത്സ്യബന്ധനം : 11 ഫൈബർ വള്ളങ്ങൾ കസ്റ്റഡിയിലെടുത്തു

വൈപ്പിൻ: ട്രോളിംഗ് നിരോധനം നിലനിൽക്കെ ചട്ടം ലംഘിച്ച് സമുദ്രത്തിലെ അടിത്തട്ട് മത്സ്യങ്ങൾ പിടികൂടിയ 11 ഫൈബർ വള്ളങ്ങൾ കൊച്ചി തീരത്ത് നിന്ന് ഫിഷറീസ് എൻഫോഴ്സ്മെന്‍റ് കസ്റ്റഡിയിലെടുത്തു. അമ്മ, വിൽസൺ, സിലുവിയാ തുണൈ, ഉണ്ണിയേശു, വടിപ്പെട്ടി മാതാ, സിന്ധു യാത്രമാതാ, സെന്‍റ് മൈക്കിൾ, മാതാ തുണൈ, സെൽവൻ, കുരിയച്ചൻ തുടങ്ങിയ ഫൈബർ വള്ളങ്ങളാണ് കസ്റ്റഡിയിലെടുത്തത്. ട്രോളിംഗ് നിരോധന കാലത്ത് പരമ്പരാഗത മത്സ്യബന്ധന യാനങ്ങൾക്ക് സമുദ്രോപരിതല മത്സ്യബന്ധനം മാത്രമേ അനുവദിച്ചിട്ടുള്ളു. ഇതു ലംഘിച്ച് അടിത്തട്ടിൽ വലകൾ ഇട്ട് കിളിമീൻ ഉൾപ്പെടെയുള്ള അടിത്തട്ട് മത്സ്യങ്ങളെ പിടികൂടുന്നത് ശ്രദ്ധയിൽപ്പെട്ടതോടെയാണ് നടപടിസ്വീകരിച്ചതെന്ന് ഫിഷറീസ് സ്റ്റേഷൻ അസി. ഡയറക്ടർ എം.എഫ്. പോൾ അറിയിച്ചു. ഫിഷറീസ് ഡെപ്യൂട്ടി ഡയറക്ടർ മാജ ജോസിന്‍റെ നിർദേശ പ്രകാരം വള്ളങ്ങൾക്ക് മൊത്തം ഒരു ലക്ഷം രൂപ പിഴയീടാക്കി. മത്സ്യങ്ങൾ കണ്ടുകെട്ടി വിറ്റവകയിൽ 36,300 രൂപയും സർക്കാരിലേക്കടച്ചു. പരിശോധനയ്ക്ക് മറൈൻ എൻഫോഴ്സ്മെന്‍റ് ഇൻസ്പെക്ടർ പി.എസ്. മഞ്ജിത്ത് ലാൽ നേതൃത്വം നൽകി.

നാളെ വിശ്വാസ ദീപശിഖാ പ്രയാണം

ആലങ്ങാട് : ആലങ്ങാട് കുന്നേൽ അത്ഭുത ദിവ്യ ഉണ്ണീശോയുടെ പുതിയ ദേവാലയത്തിന്‍റെ ‌‌ ശിലാസ്ഥാപന കർമത്തിന് മുന്നോടിയായി നാളെ വിശ്വാസ ദീപശിഖാ പ്രയാണം നടത്തും. ഞായറാഴ്ച വൈകിട്ട് നാലിന് പറവൂർ കോട്ടയ്ക്കാവ് പള്ളിയിൽ നിന്നും വിശ്വാസ ദീപ വാഹനാ യാത്ര മാതൃ ദേവാലയമായ ആലങ്ങാട് സെന്‍റ് മേരീസ് പള്ളിയിലെത്തും. ശിലാസ്ഥാപന കർമത്തിലുള്ള കല്ലുകൾ ഫാ. പോൾ ചുള്ളിയുടെ നേതൃത്വത്തിൽ വെഞ്ചിരിപ്പിക്കും. വാഹനജാഥയോടെ കുന്നേൽ പള്ളിയിലേക്ക് എത്തും. തുടർന്ന് ദിവ്യബലിയും നൊവേനയും നടക്കും. ഇതിന്‍റെ മുന്നോടിയായി 23 മുതൽ 28 വരെ കുന്നേൽപള്ളിയിൽ ഒരുക്ക പ്രാർഥനകൾ നടക്കും. രാവിലെ 6.30ന് ദിവ്യബലി തുടർന്ന് ആരാധന വൈകിട്ട് ഏഴിന് പൊതു ആരാധന, നൊവേന, ദിവ്യകാരുണ്യ ആശീർവാദം ,നേർച്ച ഭക്ഷണം എന്നിവ ഉണ്ടായിരിക്കുന്നതാണ്. ശിലാസ്ഥാപന കർമദിവസമായ 29ന് രാവിലെ 9.30ന് ദിവ്യബലിയും നൊവേനയും തുടർന്ന് 11ന് ശിലാസ്ഥാപന കർമം ബിഷപ് മാർ തോമസ് ചക്യത്ത് നിർവഹിക്കും. രാഷ്ട്രീയ സാമൂഹ്യ പ്രവർത്തകർ പങ്കെടുക്കും. ഇടവക വികാരി ഫാ. ജൂലിയസ് കറുകന്തറ , ട്രസ്റ്റി മാരായ സജ്ജു ജോസഫ് കളപ്പറമ്പത്ത്, സനിൽ അഗസ്റ്റിൻ കൈതാരത്ത്, നിർമാണ കൺവീനർ ജോസ് പോൾ കളപ്പറമ്പത്ത് എന്നിവർ വാർത്താസമ്മേളനത്തിൽ പങ്കെടുത്തു.

പള്ളിപ്പുറം മഞ്ഞുമാത ബസിലിക്കയിൽ തിരുനാൾ

ചെറായി: പള്ളിപ്പുറം മഞ്ഞുമാത ബസിലിക്കയിൽ ഈശോയുടെ തിരുഹൃദയ തിരുനാളിന് ബസിലിക്ക റെക്ടർ റവ. ഡോ. ആന്‍റണി കുരിശിങ്കൽ കൊടിയേറ്റി. തുടർന്ന് നടന്ന ദിവ്യബലിക്ക് കോട്ടപ്പുറം രൂപത വികാർ ജനറൽ മോൺ. റോക്കി റോബിൻ കളത്തിൽ കാർമികത്വം വഹിച്ചു. നാളെയാണ് തിരുനാൾ. വൈകീട്ട് 5.30 ന് ആഘോഷമായ തിരുനാൾ ദിവ്യബലി. ഫാ. ബിനു മുക്കത്ത് കാർമികത്വം വഹിക്കും. ഫാ. ജോസ് തോമസ് വചനപ്രഘോഷണം നടത്തും.

ഡിസ്റ്റിൽ മെഗാ ജോബ് ഫെയർ സംഘടിപ്പിച്ചു

അങ്കമാലി: ഡി പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയുടെയും ഫ്ലോറൻസ് എജുക്കേഷൻ കൺസൾട്ടൻസിയുടെയും ആഭിമുഖ്യത്തിൽ ആലുവ ടൗൺ എംപ്ലോയ്മെന്‍റ് എക്സ്ചേഞ്ചും നാഷണൽ കരിയർ സർവീസും സഹകരിച്ച് ഉദ്യോഗ് 25 മെഗാ ജോബ് ഫെയർ ഡിസ്റ്റ് കാമ്പസിൽ നടന്നു. ജൂണിയർ എംപ്ലോയ്മെന്‍റ് ഓഫീസർ പി.വി. സിന്ധു ഉദ്ഘാടനം ചെയ്തു. കോളജ് പ്രിൻസിപ്പൽ ഡോ.ജോണി ചാക്കോ മംഗലത്ത് അധ്യക്ഷത വഹിച്ചു. ഡിസ്റ്റ് അധ്യാപകരായ ജോസഫ് പോൾ, ഡോ. ജാസ്മിൻ ബേബി, ഫ്ലോറൻസ് എഡ്യൂക്കേഷൻ കൺസൾട്ടൻസ് ഡയറക്ടർ ഉമേഷ് കൃഷ്ണ തുടങ്ങിയവർ സംസാരിച്ചു. നിപ്പോൺ ടൊയോട്ട, മുത്തൂറ്റ് മൈക്രോ ഫിനാൻസ്, ലാസാ ഐസ്ക്രീംസ് തുടങ്ങി 50ലധികം പ്രമുഖ കമ്പനികൾ ജോബ് ഫെയറിൽ പങ്കെടുത്തു. ഉദ്യോഗാർഥികൾക്ക് വിവിധ മേഖലകളിൽ തൊഴിൽ അവസരങ്ങൾ കണ്ടെത്താനുള്ള മികച്ച വേദിയായി മെഗാ ജോബ് ഫെയർ.

വയസ് 105: യോഗ ഉപേന്ദ്രനാചാരിയുടെ ജീവവായു

വൈപ്പിൻ : യോഗ ജീവ വായുവാക്കിയ ഉപേന്ദ്രനാചാരിക്ക് നൂറ്റിയഞ്ചിലും ഊർജം യോഗ തന്നെ. ഭക്ഷണം ആവശ്യത്തിനു മാത്രം. 1920 ൽ ജനിച്ച ആചാരി തന്‍റെ 37-ാം വയസു മുതൽക്കാണ് യോഗ ചെയ്തു തുടങ്ങിയത്. പിന്നീട് ആറര പതിറ്റാണ്ട് പിന്നിട്ട ഈ തപസ്യ ഇപ്പോഴും തുടരുകയാണ്. ഇതിനിടയിൽ ഈ യോഗാചാര്യൻനിരവധി ആളുകളെ യോഗ അഭ്യസിപ്പിച്ചു. പലയിടങ്ങളിലും യോഗ ക്ലാസുകൾ നടത്തി. ജന്മനാടായ ചെറായിയിൽ യോഗ പഠന കേന്ദ്രവും തുടങ്ങി. ഇപ്പോൾ105 ന്‍റെ നിറവിലും എല്ലാ ഓർമകളും നിലനിർത്തിപ്പോരുന്ന ആചാരി ദിവസവും യോഗ ചെയ്യും. ഇതാണ് തന്‍റെ ഊർജ്ജവും ജീവവായുവുമെന്നാണ് ആചാരി പറയുന്നത്. പക്ഷേ ഇദ്ദേഹത്തിന്‍റെ മനസിൽ ഇപ്പോഴും ഒരു ആഗ്രഹം ബാക്കിയുണ്ട്. പ്രധാനമന്ത്രി നരേന്ദ്ര മോദിയെ ഒന്നു നേരിൽ കാണണം. യോഗയെ കുറിച്ച് താൻ എഴുതിയ പുസ്തകങ്ങൾ അദ്ദേഹത്തിനു സമർപ്പിക്കണം. മാത്രമല്ല സ്കൂളുകളിലും മറ്റു പഠന കേന്ദ്രങ്ങളിലുമെല്ലാം യോഗ നിർബന്ധമാക്കുകയും ഇതിനായി പരിശീലകരെ നിയമിക്കുകയും വേണമെന്ന് അദ്ദേഹത്തോട് ആവശ്യപ്പെടണം. തന്‍റെ അഭ്യുദയകാംക്ഷികളോടാണ് ആചാരി ഈ ആഗ്രഹങ്ങൾ പങ്ക് വച്ചിട്ടുള്ളത്. ഇതറിഞ്ഞ് ഇവർ ഇതിനുള്ള ശ്രമങ്ങൾ നടത്തുന്നുണ്ടെങ്കിലും പ്രധാനമന്ത്രിയെ പോലെ ഒരാളെ നേരിൽ കാണുക എന്നതിലെ കടമ്പകൾ ഇവരുടെ ശ്രമത്തെ എത്രത്തോളം വിജയത്തിലെത്തിക്കുമെന്ന കാര്യത്തിൽ ഉറപ്പില്ല.

ലയൺസ് ക്ലബ് ഓഫ് കൊച്ചിൻ മിഡ്ടൗണിന് പുതിയ ഭാരവാഹികൾ

കൊച്ചി: മോഡൽ ലയൻസ് ക്ലബ് ഓഫ് കൊച്ചിൻ മിഡ്ടൗണ്‍ ന്‍റെ 2025-26 വർഷത്തെ ഭാരവാഹികളായി ലയൺ സിബി ചാക്കോ (പ്രസിഡന്‍റ്), ലയൺ ബിനോ പോൾ (സെക്രട്ടറി), രഹ്ന റിയാസ് (ട്രഷറർ) എന്നിവർ സ്ഥാനമേറ്റു. ഡിസ്ട്രിക്ട് ഗവർണർ ലയണ്‍ രാജൻ എൻ. നന്പൂതിരി, വൈസ് ഡിസ്ട്രിക്ട് ഗവർണർ (ഇലക്ട്) ലയണ്‍ കെ.പി. പീറ്റർ, മുൻ ഗവണ്‍ർമാർ, ലയൻസ് ക്ലബ് ഇന്‍റർനാഷണൽ ഫൌണ്ടേഷൻ 318 ആൻഡ് 317 ചെയർമാൻ ലയണ്‍ വി. അമർനാഥ് , വിവിധ സോണ്‍, റീജണൽ ഭാരവാഹികളും പങ്കെടുത്തു. ചടങ്ങിൽ തൃപ്പൂണിത്തുറ ലയൺസ് ആശുപത്രിയിൽ ഡയാലിസിസ് ഉപകരണം വാങ്ങുന്നതിനു ഒരു ലക്ഷം രൂപയും നാലു സ്കൂളുകളിലെ അർഹതപ്പെട്ട കുട്ടികൾക്കായി ബാഗും ബുക്കുകളും സ്കൂളുകളിൽ സാനിറ്ററി നാപ്കിൻ ഡിസ്പോസിബിൾ ഉപകരണം സ്ഥാപിക്കുന്നത്തിനുള്ള പദ്ധതിയും ലയണ്‍ വി. അമർനാഥ് പ്രഖ്യാപിച്ചു.

ആലുവ റെയിൽവേ ഓവർബ്രിഡ്ജ് : തകരാറിലായ കൈവരികൾ മാറ്റിത്തുടങ്ങി

ആലുവ: വർഷങ്ങളായി തകർന്നു കിടക്കുന്ന ആലുവ റെയിൽവേ ഓവർ ബ്രിഡ്ജിലെ കൈവരി നിർമാണം ആരംഭിച്ചു. ആലുവ ജില്ലാ ആശുപത്രി ജംഗ്ഷനേയും കാരോത്തുകുഴി ജംഗ്ഷനും റെയിൽവേ ട്രാക്കിന് മുകളിലൂടെ ബന്ധിപ്പിക്കുന്ന ഓവർ ബ്രിഡ്ജിന്‍റെ കൈവരികളാണ് പുനർനിർമിക്കുന്നത്. വീതി കുറവായതിനാൽ കണ്ടെയ്നർ ലോറികളുടെ വശങ്ങൾ ഇടിച്ചാണ് കൈവരികൾ പലപ്പോഴും തകരുന്നത്. താത്ക്കാലികമായി കോൺക്രീറ്റ് വയ്ക്കുകയും അവ ഏതാനും ദിവസങ്ങൾക്കുള്ളിൽ തകരുകയുമാണ് ചെയ്യുന്നത്. നടപ്പാതയിൽ ഒരു ഭാഗത് ഇന്‍റർനെറ്റ്, ടെലിഫോൺ കേബിളുകൾ വലിയ പൈപ്പുകൾക്ക് ഉള്ളിലാക്കി ഇട്ടിരിക്കുന്നതിനാൽ നടക്കാൻ കഷ്ടപ്പാടാണ്. കൂടാതെ മഴ പെയ്താൽ ചെളിവെള്ളവും കെട്ടിക്കിടക്കും. ഇതു കാരണം നടപ്പാത ഒഴിവാക്കിയാണ് കാൽനടയാത്രക്കാർ കടന്നു പോകുന്നത്. നടപ്പാതയിലെ കേബിളുകൾ മാറ്റി സ്ഥാപിക്കാനും സമാന്തരമായി ഒരു പാലം കൂടി നിർമിക്കാനും ബന്ധപ്പെട്ടവർ തയ്യാറാകണമെന്നാണ് പ്രദേശവാസികൾ ആവശ്യപ്പെടുന്നത്. ഒരു പാലം കൂടി നിർമിക്കുകയാണെങ്കിൽ ഗതാഗതക്കുരുക്ക് ഒഴിവാക്കാനാകുമെന്ന് വ്യാപാരികളും പറഞ്ഞു.

പൊങ്ങം ആര്‍കെഐ പദ്ധതി ഉദ്ഘാടനം ചെയ്തു

അങ്കമാലി: അങ്കമാലി നഗരസഭ 21-ാം വാര്‍ഡില്‍ നിര്‍മാണം പൂര്‍ത്തീകരിച്ച പൊങ്ങം ആര്‍കെഐ വികസന പദ്ധതിയുടെ ഉദ്ഘാടനം റോജി എം. ജോണ്‍ എംഎല്‍എ നിര്‍വഹിച്ചു. 50 ലക്ഷം രൂപ ചെലവഴിച്ച് പൊങ്ങം റോഡിലെ ശോചനീയാവസ്ഥയിലായിരുന്ന പൊട്ടിപ്പൊളിഞ്ഞ കാന സമീപമുള്ള സമീപവാസികള്‍ ഭൂമി സൗജന്യമായി വിട്ട് തന്നു കൊണ്ട് കോണ്‍ക്രീറ്റിംഗ് നടത്തി. ലോഡിംഗ് സ്ലാബ് സ്ഥാപിച്ച് മൂന്നു വണ്ടകള്‍ക്ക് അനായാസം കടന്നുപോകാവുന്ന രീതിയില്‍ സഞ്ചാര യോഗ്യമാക്കി. പൊങ്ങം റോഡിന്‍റെ മുഴുവന്‍ റീ-ടാറിംഗ് പ്രവര്‍ത്തികളടക്കം റോഡിന് കുറുകെ കലുങ്ക് നിര്‍മാണവും നടത്തി. ചടങ്ങില്‍ നഗരസഭാ ചെയര്‍മാന്‍ അഡ്വ. ഷിയോപോള്‍ അധ്യക്ഷത വഹിച്ചു. വാര്‍ഡ് കൗണ്‍സിലര്‍ ബാസ്റ്റിന്‍ ഡി. പാറയ്ക്കല്‍, മുന്‍ നഗരസഭാ ചെയര്‍മാന്‍ മാത്യു തോമസ്, ആരോഗ്യ സ്ഥിരം സമിതി അധ്യക്ഷന്‍ മനു നാരായണന്‍, സാജു നെടുങ്ങാടന്‍, ലിസി പോളി ടീച്ചര്‍, ജാന്‍സി അരീയ്ക്കല്‍, മുന്‍ ചെയര്‍മാന്‍ ദേവച്ചന്‍ കോട്ടയ്ക്കല്‍, ചര്‍ച്ച് നഗര്‍ അസോസിയേഷന്‍ പ്രസിഡന്‍റ് ഡാന്‍റി കാച്ചപ്പിള്ളി എന്നിവര്‍ പ്രസംഗിച്ചു.

ജിയയ്ക്ക് തല ചായ്ക്കാൻ ജനകീയ പങ്കാളിത്തത്തിൽ വീടൊരുങ്ങുന്നു

വൈപ്പിൻ: ജിയാ നെൽസനു തലചായ്ക്കാനായി കാരുണ്യത്തിന്‍റെ തണലിൽ തെക്കൻ മാലിപ്പുറത്ത് സുരക്ഷിത ഭവനമൊരുങ്ങുന്നു. എ.എൻ. ഉണ്ണിക്കൃഷ്ണൻ എംഎൽഎയുടെ നേതൃത്വത്തിൽ ജനകീയ പങ്കാളിത്തത്തോടെയാണ് വീടു നിർമിക്കുന്നത്. ശാരീരിക, മാനസിക വെല്ലുവിളികൾ നേരിട്ടു ശയ്യാവലംബയായ 27 കാരി ജിയയും അമ്മ ഹേനയും പിതാവ് നെൽസനും സ്വന്തമായി വീടില്ലാതെ 25 വർഷത്തിലേറെയായി വാടക വീട്ടിലാണ് താമസിച്ചു വന്നിരുന്നത്. ഇതിനിടെ കുടുംബത്തിൻരെ ഏക ആശ്രയമായിരുന്ന പിതാവിന്‍റെ വേർപാട് ജിയയേയും അമ്മയേയും അനാഥമാക്കി. ഇതോടെ ജിയയുടെ ചികിത്സ പോലും മുടങ്ങി. ഇതിനിടയിലാണ് ജനകീയ പങ്കാളിത്തത്തോടെയുള്ള ഭവന പദ്ധതിയുമായി എംഎൽഎ മുന്നോട്ടു വന്നത്. വീടിന്‍റെ ശിലാസ്ഥാപനം കഴിഞ്ഞ ദിവസം എംഎൽഎയും സാജ് ഗ്രൂപ്പ് എംഡി സാജൻ വർഗീസും ചേർന്ന് നിർവഹിച്ചു. പി.പി.ജെയിംസ്, പഞ്ചായത്ത് പ്രസിഡന്‍റ് രസികല പ്രിയരാജ്, ബ്ലോക്ക് പഞ്ചായത്ത് അംഗം ക്ലാര സൈമൺ, ഭവന മേൽനോട്ട സമിതി ജനറൽ കൺവീനർ ആൽബി കളരിക്കൽ, റസിഡന്‍റ്സ് അസോസിയേഷൻ പ്രസിഡന്‍റ് മറ്റത്തിൽ ഹെൻസൻ ജോസഫ് എന്നിവർ സംസാരിച്ചു.

സെമിനാർ നടത്തി

കൊച്ചി: മനുഷ്യന്‍റെ അന്തരംഗങ്ങളില്‍ നിറഞ്ഞു നില്‍ക്കുന്ന ഭാവഭേദങ്ങളാണ് ചാവറയച്ചന്‍റെ രചനയിലൂടനീളമെന്ന് പ്രഫ. എം.കെ. സാനു. മഹാത്മാ ഗാന്ധി സര്‍വകലാശാല ചാവറ ചെയറും ചാവറ കള്‍ച്ചറല്‍ സെന്‍ററും ചേര്‍ന്ന് സംഘടിപ്പിച്ച ഏകദിന സെമിനാറില്‍ പ്രഭാഷണം നടത്തുകയായിരുന്നു അദ്ദേഹം. ചാവറ കള്‍ച്ചറല്‍ സെന്‍റര്‍ ചെയര്‍മാൻ റവ.ഡോ. മാര്‍ട്ടിന്‍ മള്ളാത്ത് ഉദ്ഘാടനം ചെയ്തു. പ്രഫ. ജോര്‍ജ് ജോസഫ്, റാം മോഹന്‍ പാലിയത്ത് എന്നിവര്‍ വിഷയാവതരണം നടത്തി. എംജി യൂണിവേഴ്‌സിറ്റി സ്‌കൂള്‍ ഓഫ് ലെറ്റേഴ്‌സ് ഡയറക്ടര്‍ പ്രഫ. സജി മാത്യു, സെന്‍റ് ജോസഫ് കോളജ് ഓഫ് ടീച്ചര്‍ എഡ്യൂക്കേഷന്‍ പ്രിന്‍സിപ്പല്‍ സിസ്റ്റര്‍ ശാന്തിനി, ചാവറ കള്‍ച്ചറല്‍ സെന്‍റര്‍ ഡയറക്ടര്‍ ഫാ.അനില്‍ ഫിലിപ്പ്, മംഗലപ്പുഴ സെമിനാരി റെക്ടര്‍ ഫാ.സ്റ്റാന്‍ലി പുല്‍പുറയില്‍ എന്നിവര്‍ പ്രസംഗിച്ചു.

നജാത്ത് ആശുപത്രിക്ക് എൻഎബിഎച്ച് അംഗീകാരം

ആലുവ: നജാത്ത് ആശുപത്രിക്ക് ദേശീയ അംഗീകാരമായ നാഷണൽ അക്രഡിറ്റേഷൻ ബോർഡ് ഫോർ ഹോസ്പിറ്റൽസ് (എൻഎബിഎച്ച് ) എൻട്രി ലെവൽ സർട്ടിഫിക്കറ്റ് ലഭിച്ചു. നാളെ ആലുവ ഫെഡറൽ ബാങ്ക് ഓഡിറ്റോറിയത്തിൽ നടക്കുന്ന ചടങ്ങിൽ അൻവർ സാദത്ത് എംഎൽഎ സർട്ടിഫിക്കറ്റ് പ്രകാശനം ചെയ്യും. ആശുപത്രി ഡയറക്ടർ ഡോ. എം. അബ്ബാസ് അധ്യക്ഷനാകും. ചടങ്ങിൽ സേവനരംഗത്ത് വ്യക്തിമുദ്ര പതിപ്പിച്ചവരെ ആദരിക്കും.

കുടിവെള്ളം മുടങ്ങി; മൂലമ്പിള്ളിക്കാര്‍ പ്രക്ഷോഭത്തിലേക്ക്

കൊച്ചി: കണ്ടെയ്‌നര്‍ റോഡില്‍ തെരുവ് വിളക്കുകള്‍ സ്ഥാപിക്കുന്നതിനായി കുഴിയെടുത്തപ്പോള്‍ വാട്ടര്‍ അഥോറിറ്റിയുടെ പൈപ്പ് തകര്‍ന്ന് മൂലമ്പള്ളി പുനരധിവാസ മേഖലയില്‍ കുടിവെള്ളം മുടങ്ങിയിട്ട് ഒരു മാസം പിന്നിടുന്നു. ജനവാസ മേഖലയില്‍ നിന്ന് ഒറ്റപ്പെട്ട് കിടക്കുന്ന നൂറോളം കുടുംബങ്ങളാണ് ദുരിതം പേറുന്നത്. പരാതി നല്‍കിയിട്ടും പഞ്ചായത്ത് അധികൃതരോ കളക്ടറോ പ്രശനത്തില്‍ ഇടപെടുന്നില്ലെന്ന് കാട്ടി മൂലമ്പിള്ളി സമര സമിതിയുടെ നേതൃത്വത്തില്‍ പ്രക്ഷോഭ പരിപാടികള്‍ ആരംഭിക്കാന്‍ തീരുമാനിച്ചതായി ഭാരവാഹികളായ മേരി ഫ്രാന്‍സീസ് പനക്കല്‍, വി.പി. വില്‍സന്‍ തുടങ്ങിയവര്‍ പറഞ്ഞു.

ശ്രേഷ്‌ഠ ബാവയ്ക്ക് പൗരസ്വീകരണം നാളെ

തൃപ്പൂണിത്തുറ: യാക്കോബായ സഭ ശ്രേഷ്‌ഠ കാതോലിക്കാ ബസേലിയോസ് ജോസഫ് ബാവായ്ക്ക് തൃപ്പൂണിത്തുറ പൗരാവലിയുടെ നേതൃത്വത്തിൽ നാളെ സ്വീകരണം നൽകും. വൈകിട്ട് നാലിന് ഇന്ദിര പ്രിയദർശിനി ലായം കൂത്തമ്പലത്തിൽ നഗരസഭാധ്യക്ഷ രമ സന്തോഷ് അധ്യക്ഷത വഹിക്കുന്ന സ്വീകരണ സമ്മേളനം കെ. ബാബു എംഎൽഎ ഉദ്‌ഘാടനം ചെയ്യും. പാലസ് ട്രസ്റ്റ് അഡ്‌മിനിസ്‌ട്രേഷൻ ബോർഡ് പ്രസിഡന്‍റ് എസ്. അനുജൻ പൗരാവലിയുടെ ഉപഹാരം ബാവയ്ക്ക് നൽകും. അനൂപ് ജേക്കബ് എംഎൽഎ, വിവിധ സമുദായ രാഷ്ട്രീയ സാംസ്കാരിക നേതാക്കൾ പ്രസംഗിക്കും.

സെനാറ-2025 മന്ത്രി പി. രാജീവ് ഉദ്ഘാടനം ചെയ്യും

കളമശേരി: കേരള ബിഎസ്‌സി നഴ്സിംഗ് സ്റ്റുഡന്‍റ്സ് അസോസിയേഷന്‍റെ ആഭിമുഖ്യത്തിൽ നടത്തുന്ന സെനാറ-2025 മന്ത്രി പി. രാജീവ് ഉദ്ഘാടനം ചെയ്യും. കളമശേരി ഗവൺമെന്‍റ് മെഡിക്കൽ കോളജ് മൈതാനത്ത് നടക്കുന്ന ചടങ്ങിൽ കെബിഎൻഎസ്എ സ്റ്റേറ്റ് കൗൺസിൽ പ്രസിഡന്‍റ് ജോബിൻ ജോളി അധ്യക്ഷത വഹിക്കും. സിനിമാതാരം ഗണപതി പൊതുവാൾ മുഖ്യാതിഥിയായി പങ്കെടുക്കും. തുടർന്ന് നഴ്സിംഗ് വിദ്യാർഥികൾ അവതരിപ്പിക്കുന്ന വിവിധ കലാപരിപാടികൾ നടക്കും. വാർത്താസമ്മേളനത്തിൽ ഭാരവാഹികളായ ജോബിൻ ജോളി, കീർത്തന സി, ഡിയോൾ ബയ്സിൽ , അബിൻനാഥ് എന്നിവർ പങ്കെടുത്തു.

മുട്ടാർ-ഫാക്ട് റോഡ് വികസനം : ഭൂമി ഏറ്റെടുക്കാൻ സർക്കാർ അനുമതി

ഏലൂർ: ഏലൂർ നഗരസഭയിലെ പ്രധാന റോഡുകളിലൊന്നായ മുട്ടാർ-ഫാക്ട് റോഡിന്‍റെ വികസനത്തിനായി ഭൂമി ഏറ്റെടുക്കാൻ അനുമതി നൽകി സംസ്ഥാന സർക്കാർ ഉത്തരവ് പുറപ്പെടുവിച്ചു. റോഡിന്‍റെ ഒന്നാംഘട്ട വികസനത്തിനായി 410 സെന്‍റ് ഭൂമിയാണ് ഏറ്റെടുക്കുന്നത്. 2013 ലെ ഭൂമി ഏറ്റെടുക്കൽ നിയമപ്രകാരമുള്ള പുനരധിവാസ അവകാശ വ്യവസ്ഥകൾ പാലിച്ച് ഭൂമി ഏറ്റെടുക്കുന്നതിന് ജില്ലാകളക്ടർക്ക് അനുമതി നൽകിയാണ് റവന്യൂ വകുപ്പിന്‍റെ ഉത്തരവ്. 15 മീറ്റർ വീതിയിൽ റോഡ് വീതി കൂട്ടുന്നതിനാണ് അലൈൻമെന്‍റ് പ്ലാനിലൂടെ വ്യവസ്ഥ ചെയ്തിരിക്കുന്നത്. ഭൂമി ഏറ്റെടുക്കൽ ഉത്തരവോടെ റോഡ് വികസന പദ്ധതിയുടെ വേഗം കൂടുമെന്ന് വ്യവസായ മന്ത്രി പി. രാജീവ് പറഞ്ഞു.ഫാക്ട് കവല മുതൽ മുട്ടാർ പാലം വരെയുള്ള റോഡിന്‍റെ ആകെ നീളം 3.509 കിലോമീറ്റർ ആണ്. നിലവിലെ വീതികുറഞ്ഞ റോഡ് രൂക്ഷമായ ഗതാഗതക്കുരുക്കിന് വഴിയൊരുക്കുന്നത് പതിവായിരുന്നു. ഓഫീസ്-സ്കൂൾ സമയങ്ങളിൽ ഗതാഗതക്കുരുക്ക് മൂലമുള്ള പ്രയാസങ്ങളും ഏറെക്കാലമായി അലട്ടുകയായിരുന്നു. റോഡ് വീതി കൂട്ടി വികസിപ്പിക്കുന്നതിന് 2023-24 സംസ്ഥാന ബജറ്റിൽ അഞ്ചു കോടി രൂപ ടോക്കൺ അഡ്വാൻസായി വകയിരുത്തി. മഞ്ഞുമ്മൽ-മുട്ടാർ റോഡ് വീതി കുട്ടി നിർമിക്കുന്നതിനുള്ള അലൈൻമെന്‍റ് പ്ലാനിന് പൊതുമരാമത്ത് വകുപ്പ് അംഗീകാരം നൽക്കുകയും ചെയ്തു. സ്ഥലമേറ്റെടുക്കൽ ഉൾപ്പെടെ റോഡ് വീതി കൂട്ടി വികസിപ്പിക്കുന്നതിനുള്ള അലൈൻമെന്‍റ് പ്ലാനാണ് അംഗീകരിച്ചത്. തുടർ നടപടികൾ വേഗത്തിലാക്കാൻ വ്യവസായ മന്ത്രി പി. രാജീവ് നിർദ്ദേശിച്ചതിനെത്തുടർന്നാണ് ഭൂമി ഏറ്റെടുക്കൽ ഉത്തരവിനായുള്ള നടപടികൾ വേഗത്തിലാക്കിയതും അലൈൻമെന്‍റ് തയാറാക്കിയതും. പ്രദേശത്തെ ജനങ്ങളുടെ ദീർഘ കാലാവശ്യമാണ് യാഥാർഥ്യമാകാൻ അവസരമൊരുങ്ങിയിരിക്കുന്നതെന്ന് മന്ത്രി പി. രാജീവ് പറഞ്ഞു.

പൊക്കാളി വിത്തു വിതച്ചു

പറവൂർ: കോട്ടുവള്ളി പഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തിൽ നടത്തുന്ന പൊക്കാളി വിത ഉദ്ഘാടനം കൈതാരം കെ.ജി. ജോസിയുടെ പൊക്കാളി പാടശേഖരത്തിൽ വിത്ത് വിതച്ച് പറവൂർ ബ്ലോക്ക്‌ പഞ്ചായത്ത്‌ പ്രസിഡന്‍റ് കമല സദാനന്ദനും കോട്ടുവള്ളി പഞ്ചായത്ത് പ്രസിഡന്‍റ് കെ.എസ്. ഷാജിയും ചേർന്ന് നിർവഹിച്ചു. ലതിന സലിംകുമാർ അധ്യക്ഷയായി. ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എസ്. സനീഷ്, വി.പി. സിന്ധു, ആർ. ഗീത, ജിത ജലീൽ, ബേസിൽ ചാക്കോച്ചൻ എന്നിവർ സംസാരിച്ചു. ഏഴിക്കര പഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തിൽ നടത്തുന്ന പൊക്കാളി വിത ഉദ്ഘാടനം കെ.പി. വിൻസന്‍റിന്‍റെ കടക്കര പാടശേഖരത്തിൽ പഞ്ചായത്ത് പ്രസിഡന്‍റ് എം.എസ്. രതീഷ് ഉദ്ഘാടനം ചെയ്തു. കെ.ഡി. വിൻസന്‍റ് അധ്യക്ഷനായി. എ.കെ. മുരളീധരൻ, കെ.എൻ. വിനോദ്, പി.കെ. ശിവാനന്ദൻ, എം.ബി. ചന്ദ്രബോസ്, ജിത ജലീൽ, സജീറ സി. ചാത്തോത്ത് എന്നിവർ സംസാരിച്ചു.

ആലുവ-പറവൂർ റൂട്ടിൽ 24 ലിമിറ്റഡ് സ്റ്റോപ്പ് സർവീസുകൾ തിങ്കളാഴ്ച മുതൽ

ആലുവ: യാത്രാക്ലേശം രൂക്ഷമായ ആലുവ-പറവൂർ ദേശസാത്കൃത റൂട്ടിൽ സ്ഥിരം യാത്രക്കാർക്ക് ആശ്വാസമായായി 24 ലിമിറ്റഡ് സ്റ്റോപ്പ് ബസ് സർവീസുകൾ ആരംഭിക്കുന്നു. 23 ന് പുലർച്ചെ അഞ്ചിന് ആദ്യ സർവീസ് ആലുവ കെഎസ്ആർടിസി ബസ് സ്റ്റാൻഡിൽ നിന്ന് ആരംഭിക്കും. ആകെ 48 സർവീസുകളാണ് പ്രതിദിനം ഉണ്ടാകുക. ആലുവയിൽ നിന്നും പറവൂരിൽ നിന്നും 24 വീതമാണ് ബസുകൾ പുറപ്പെടുക. പ്രധാന സ്റ്റോപ്പുകളിൽ മാത്രമാണ് ബസ് നിർത്തുന്നതെങ്കിലും ഓർഡിനറി ബസ് ചാർജ് തന്നെയായിരിക്കും. ഇതിനിടയിൽ ടൗൺ ടു ടൗൺ ബസ് സർവീസും ആരംഭിക്കണമെന്നാവശ്യവും ശക്തമായിട്ടുണ്ട്. നോർത്ത് പറവൂരിൽ നിന്ന് ആലുവ മേഖലയിൽ തൊഴിലിനായും വിദ്യാഭ്യാസത്തിനായും ദിവസവും യാത്ര ചെയ്യേണ്ടി വരുന്നവർക്ക് വലിയ അനുഗ്രഹമായിരുന്നു ടൗൺ ടു ടൗൺ ബസുകൾ. സ്ഥിരം യാത്രക്കാർ കുറയുന്നുവെന്ന കാരണമാണ് കെഎസ്ആർടിസി അധികൃതർ പറയുന്നത്. നിലവിൽ രാവിലെയും വൈകിട്ടും മാത്രമാണ് രണ്ട് ടൗൺ ലിമിറ്റ് സർവ്വീസുകൾ ഓടുന്നത്. പറവൂർ-കരിങ്ങാം തുരുത്ത്-തത്തപ്പിള്ളി-കൊങ്ങോർപ്പിള്ളി സർക്കുലർ, കയന്‍റിക്കര, മുപ്പത്തടം വഴി കളമശേരി, വയൽക്കര-അടുവാശേരി-കുന്നുകര - അത്താണി എന്നീ സ്ഥലങ്ങളെ ബന്ധപ്പെടുത്തി തൃശൂരിലേക്ക് ദീർഘദൂര സർവീസ് എന്നീ ബസ് സർവീസുകളും കെഎസ്ആർടിസി പരിഗണിക്കുന്നുണ്ട്. യാത്രാദുരിതത്തെക്കുറിച്ച് "ദീപിക'യാണ് ജനപ്രതിനിധികളുടെ ശ്രദ്ധയിൽക്കൊണ്ടുവന്നത്.

സെറ്റുകളില്‍ ലഹരി ഉപയോഗിക്കില്ലെന്ന് സത്യവാങ്മൂലം നല്‍കണമെന്ന് നിര്‍മാതാക്കളുടെ സംഘടന

കൊച്ചി: സിനിമാ സെറ്റുകളില്‍ ലഹരി ഉപയോഗിക്കില്ല എന്ന സത്യവാങ്മൂലം സിനിമാപ്രവര്‍ത്തകരില്‍ നിന്ന് എഴുതി വാങ്ങാനൊരുങ്ങി നിര്‍മാതാക്കളുടെ സംഘടന. സിനിമ ചിത്രീകരണ സമയത്തോ അതുമായി ബന്ധപ്പെട്ട് താമസിക്കുന്ന സ്ഥലങ്ങളിലോ ലഹരി ഉപയോഗിക്കില്ല എന്നാണ് എഴുതി നല്‍കേണ്ടത്. നടീനടന്മാര്‍ അടക്കം എല്ലാവര്‍ക്കും ഇത് ബാധകമാണെന്നും സംഘടന അറിയിച്ചു. വേതന കരാറിനൊപ്പം ഈ സത്യവാങ്മൂലം കൂടി നിര്‍ബന്ധമാക്കിയേക്കും. ലഹരി വിരുദ്ധ ദിനമായ 26 മുതല്‍ നിബന്ധന നടപ്പില്‍ വരുത്തുമെന്നും നിര്‍മാതാക്കളുടെ സംഘടന വ്യക്തമാക്കി.

വയോജന കലാമേള സമാപിച്ചു: മരട് നഗരസഭ ജേതാക്കള്‍

കൊച്ചി: പ്രായം വകവയ്ക്കാതെ നൂറുക്കണക്കിന് വയോജനങ്ങള്‍ മാറ്റുരച്ച വയോജന കലാമേള സമാപിച്ചു. ജില്ലാ പഞ്ചായത്തിന്‍റെ നേതൃത്വത്തില്‍ സാമൂഹിക നീതി വകുപ്പിന്‍റെയും കേരള സാമൂഹിക സുരക്ഷ മിഷന്‍റെയും സഹകരണത്തോടെയാണ് കലാമേള സംഘടിപ്പിച്ചത്. 44 പോയിന്‍റ് നേടിയ മരട് നഗരസഭ ഓവറോള്‍ ചാമ്പ്യന്‍ഷിപ്പ് നേടി. 22 പോയിന്‍റുമായി തൃപ്പൂണിത്തുറ നഗരസഭ രണ്ടാം രണ്ടാം സ്ഥാനവും 20 പോയിന്‍റ് നേടിയ പറവൂര്‍ നഗരസഭ മൂന്നാം സ്ഥാനവും കരസ്ഥമാക്കി. സംസ്ഥാനത്ത് ആദ്യമായാണ് ജില്ലാ പഞ്ചായത്തിന്‍റെ നേതൃത്വത്തില്‍ ജില്ലാ വയോജന കലാമേള നടക്കുന്നത്. 50ലധികം ടീമുകളിലായി 500ല്‍ പ്പരം വയോജനങ്ങള്‍ വിവിധ മത്സരങ്ങളില്‍ പങ്കെടുത്തു. ജില്ലാ പഞ്ചായത്ത് പ്രിയദര്‍ശിനി ഹാളില്‍ രണ്ടു ദിവസമായി നടന്ന വയോജന കലാമേളയുടെ സമാപന സമ്മേളനം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ ഉദ്ഘാടനം ചെയ്തു. വൈസ് പ്രസിഡന്‍റ് എല്‍സി ജോര്‍ജ് അധ്യക്ഷത വഹിച്ചു.

പീഡനക്കേസ് പ്രതി വിമാനത്താവളത്തിൽ പിടിയിൽ

നെടുന്പാശേരി: വിവാഹ വാഗ്ദാനം നൽകി യുവതിയെ പീഡനത്തിനിരയാക്കുകയും നാലു ലക്ഷം രൂപ തട്ടിയെടുക്കുകയും ചെയ്ത കേസിലെ പ്രതിയെ നെടുന്പാശേരി വിമാന ത്താവളത്തിൽനിന്ന് പോലീസ് പിടികൂടി. വെങ്കിടങ്ങ് പാടൂര്‍ തങ്ങള്‍പടിക്കടുത്ത് താമസിക്കുന്ന ചക്കംകണ്ടം അങ്ങാടിത്താഴം സ്വദേശി കറപ്പം വീട്ടില്‍ ആഷികി(38)നെയാണ് എസ്ഐ കെ.ആര്‍. ബിജു അറസ്റ്റ് ചെയ്തത്. 2020ലാണ് കേസിനാസ്പദ മായ സംഭവം നടന്നത്. യുവതിയില്‍നിന്നു പല തവണയായി വാങ്ങിയ നാലു ലക്ഷം രൂപ തിരികെ നല്കാനും പ്രതി തയാറായില്ല. സംഭവത്തിന് ശേഷം വിദേശത്ത് ഒളിവിലായിരുന്ന പ്രതി നാട്ടിലേക്ക് തിരികെ എത്തിയ പ്പോഴാണ് പോലീസിന്‍റെ വല യിൽ കുടുങ്ങിയത്.

കെഎംഎ ഭാരവാഹികളുടെ സ്ഥാനാരോഹണം നടന്നു

കൊച്ചി: കേരള മാനേജ്‌മെന്‍റ് അസോസിയേഷന്‍റെ പുതിയ ഭാരവാഹികളുടെ സ്ഥാനാരോഹണവും 68-ാമത് വാര്‍ഷിക പദ്ധതികളുടെ പ്രഖ്യാപനവും നടന്നു. നേവല്‍ മുന്‍ ചീഫ് അഡ്മിറല്‍ ആര്‍. ഹരികുമാര്‍ മുഖ്യാതിഥിയും ഹാബിറ്റ്‌സ്‌ട്രോംഗ് വാര്‍ട്ടന്‍ സ്ഥാപകൻ രാജന്‍ സിംഗ് വിശിഷ്ടാതിഥിയുമായിരുന്നു. കെഎംഎ പ്രസിഡന്‍റ് കെ. ഹരികുമാർ അധ്യക്ഷത വഹിച്ചു. ലേഖ ബാലചന്ദ്രൻ, ദിലീപ് നാരായണൻ, ഡോ. അനിൽ ജോസഫ്, ബിബു പുന്നൂരാൻ എന്നിവർ പ്രസംഗിച്ചു. അൽജിയേഴ്സ് ഖാലിദ് സ്വാഗതവും കെ.അനിൽ വർമ നന്ദിയും പറഞ്ഞു.

പൊതുസ്ഥലത്ത് മാലിന്യം തള്ളിയ ആൾക്ക് 15,000 പിഴ

കൊച്ചി: പൊതുസ്ഥലത്ത് മാലിന്യം തള്ളിയ സംഭവത്തില്‍ തൃക്കാക്കര സ്വദേശിയില്‍ നിന്ന് കൊച്ചി കോര്‍പറേഷന്‍ ഹെല്‍ത്ത് വിഭാഗം 15,000 രൂപ പിഴ ഈടാക്കി. 37-ാം ഡിവിഷന്‍ ഇടപ്പള്ളി ചെമ്പോക്കടവ് സര്‍വീസ് റോഡില്‍ അണ്ടര്‍ പാസിന് സമീപം രണ്ട് ബോക്‌സുകളിലായി തള്ളിയ മാലിന്യത്തില്‍ നിന്ന് ലഭിച്ച ഫോണ്‍ നമ്പര്‍ ഉപയോഗിച്ചാണ് മാലിന്യം തള്ളിയ ആളെ കണ്ടെത്തിയത്. കഴിഞ്ഞ ബുധനാഴ്ചയാണ് പൊതുസ്ഥലത്ത് മാലിന്യം തള്ളിയതായി കണ്ടെത്തിയത്. തുടര്‍ന്ന് സര്‍ക്കിളിലെ ശുചീകരണ വിഭാഗം ജീവനക്കാരെ നിയോഗിച്ച് മാലിന്യം നീക്കം ചെയ്യുകയും ബോക്‌സുകളില്‍ നടത്തിയ പരിശോധനയില്‍ തൃക്കാക്കര നഗരസഭാ പരിധിയില്‍ താമസിച്ചുവരുന്ന ഒരു വ്യക്തിയുടെ ഫോണ്‍ നമ്പര്‍ അടക്കുള്ള വിവരങ്ങള്‍ ലഭിക്കുകയും ചെയ്തു. തുടര്‍ന്ന് ഇയാളെ ഇടപ്പള്ളി ഹെല്‍ത്ത് ഓഫീസിലേക്ക് വിളിച്ചുവരുത്തി ചോദ്യം ചെയ്തു. വീട് വൃത്തിയാക്കുന്നതിനിടെ ഉണ്ടായ മാലിന്യമാണ് ഇവിടെ നിക്ഷേപിച്ചതെന്ന് ഇയാള്‍ സമ്മതിച്ചു.

ബാലവേലയ്ക്കെതിരെ ബോധവത്കരണവുമായി തൊഴില്‍ വകുപ്പ്

കൊച്ചി: ബാലവേലയ്‌ക്കെതിരെ പ്രതിരോധം ശക്തമാക്കി തൊഴില്‍ വകുപ്പ്. അന്താരാഷ്ട്ര ബാലവേല വിരുദ്ധ ദിനാചരണത്തിന്‍റെ ഭാഗമായി തൊഴില്‍ വകുപ്പിന്‍റെ നേതൃത്വത്തില്‍ ബോധവല്‍ക്കരണ ക്ലാസ് സംഘടിപ്പിച്ചു. 'പുരോഗതി വ്യക്തമാണ്, പക്ഷെ ഇനിയും ഒരുപാട് ചെയ്യാനുണ്ട്,നമുക്ക് ശ്രമങ്ങള്‍ വേഗത്തിലാക്കാം' എന്ന മുദ്രാവാക്യം ഉയര്‍ത്തി കീഴ്മാട് ഗവ. മോഡല്‍ റസിഡന്‍ഷ്യല്‍ സ്‌കൂളിലാണ് പരിപാടി സംഘടിപ്പിച്ചത്. കേരള പോലീസ്, ജില്ലാ പട്ടിക ജാതി വികസന ഓഫീസ് എന്നിവരുടെ സഹകരണത്തോടെ നടന്ന പരിപാടി അഡീഷണല്‍ സൂപ്രണ്ട് ഓഫ് പോലീസ് എം.കൃഷ്ണന്‍ ഉദ്ഘാടനം ചെയ്തു. ജില്ലാ ലേബര്‍ ഓഫീസര്‍(ജനറല്‍) എം.എം. ജോവിന്‍ ക്ലാസ് നയിച്ചു. ആദ്യ ബാലവേല വിമുക്ത ജില്ലയായി എറണാകുളത്തെ മാറ്റാൻ തൊഴില്‍ വകുപ്പ് ഊർജിത ശ്രമങ്ങള്‍ നടത്തുമെന്ന് അദ്ദേഹം പറഞ്ഞു. കുടുംബവുമായി എത്തുന്ന അതിഥി തൊഴിലാളികളുടെ മക്കള്‍ക്ക് ആവശ്യമായ വിദ്യാഭ്യാസം നല്‍കാന്‍ തൊഴില്‍ വകുപ്പ് ശ്രദ്ധേയമായ പ്രവര്‍ത്തനങ്ങള്‍ക്ക് വിവിധ വകുപ്പുകളുടെ സഹായത്തോടെ നേതൃത്വം നല്‍കുമെന്നും അദ്ദേഹം വ്യക്തമാക്കി. ജില്ലാ ലേബര്‍ ഓഫീസര്‍ (എന്‍ഫോഴ്‌സ്‌മെന്‍റ്) പി.ജി. വിനോദ് കുമാര്‍ പരിപാടിയില്‍ അധ്യക്ഷത വഹിച്ചു.

പരമ്പരാഗത വള്ളങ്ങൾക്ക് പ്രതീക്ഷയായി തീരത്ത് ചെമ്മീൻ സാന്നിധ്യം

വൈപ്പിൻ: ട്രോളിംഗ് നിരോധനം ആരംഭിച്ച് പത്തുദിനങ്ങൾ പിന്നിട്ടപ്പോൾ തീരക്കടലിൽ കുറഞ്ഞ പൂവാലൻ ചെമ്മീനിന്‍റെ സാന്നിധ്യം കണ്ടുതുടങ്ങി. ചാകരക്കോളല്ലെങ്കിലും ഇന്നലെ കാളമുക്ക് ഗോശ്രീപുരം ഹാർബറിൽ നിന്നു മത്സ്യബന്ധനത്തിനു പോയ ഏതാനും ചില വള്ളങ്ങൾക്ക് കുറഞ്ഞ തോതിൽ ചെമ്മീൻ കിട്ടുകയും ചെയ്തു. രണ്ടാഴ്ചയോളമായി തകർത്തു ചെയ്യുന്ന മഴ മൂലം പരമ്പരാഗത വള്ളങ്ങൾക്ക് കാര്യമായി മത്സ്യങ്ങൾ ഒന്നും ലഭിച്ചിരുന്നില്ല. ഇന്നലെ അല്പം വെയിൽ തെളിഞ്ഞതോടെയാണ് ജലോപരിതലത്തിൽ ചെമ്മീനിന്‍റെ സാന്നിധ്യം കണ്ടുതുടങ്ങിയതെന്ന് മത്സ്യത്തൊഴിലാളികൾ പറഞ്ഞു.

'വാന്‍ഹായ് 503' തീപിടുത്തം : കപ്പല്‍ ശ്രീലങ്കന്‍ തുറമുഖത്തേക്ക് നീക്കാനുള്ള സാധ്യത തേടുന്നു

കൊച്ചി: ബേപ്പൂരിന് സമീപം പുറംകടലില്‍ തീപിടിച്ച 'വാന്‍ഹായ് 503' ചരക്ക് കപ്പലിലെ തീയണച്ച ശേഷം ശ്രീലങ്കയിലെ ഹമ്പന്‍ടോട്ട തുറമുഖത്തേക്ക് മാറ്റുന്നതിനുള്ള സധ്യതകള്‍ തേടുന്നു. ഇതിനുമുന്നോടിയായി തുറമുഖ അധികൃതരുമായി കപ്പല്‍ കമ്പനി പ്രാഥമിക ചര്‍ച്ച നടത്തി. തുറമുഖ അധികൃതരുടെ അനുമതിക്കായി നിലവില്‍ കാത്തിരിക്കുകയാണ്. ഏകദേശം 480 നോട്ടിക്കല്‍ മൈല്‍ അകലെയാണ് ഹമ്പന്‍ടോട്ട തുറമുഖം. നിലവില്‍ 'വാന്‍ഹായ് 503' ചരക്ക് കപ്പല്‍ കേരള തീരത്തുനിന്ന് 72 നോട്ടിക്കല്‍ മൈല്‍ അകലെയാണ് കപ്പല്‍. അതിനിടെ കപ്പലില്‍ നിന്നു കാണാതായ നാല് ജീവനക്കാര്‍ക്കായുള്ള തെരച്ചില്‍ അവസാനിപ്പിച്ചു. കപ്പലില്‍നിന്ന് പുക ഇപ്പോഴും ഉയരുന്നുണ്ട്. തീയണയ്ക്കാന്‍ പതിമൂന്നംഗ സംഘം കപ്പലിലുണ്ട്. കോസ്റ്റ് ഗാർഡിന്‍റെ സക്ഷം കപ്പലിന്‍റെയും വാട്ടര്‍ ലില്ലി ടഗ്ഗിന്‍റെയും സഹായത്തോടെയാണ് തീയണയ്ക്കല്‍ പുരോഗമിക്കുന്നത്. രണ്ടാമത്തെ ടഗ്ഗിനെ കപ്പലുമായി ബന്ധിക്കാനുള്ള ശ്രമം ആരംഭിച്ചു. കപ്പലിലേക്ക് ടഗ്ഗുകളുടെ സഹായത്തോടെ രണ്ട് ജനറേറ്ററുകള്‍ എത്തിക്കാനുള്ള ശ്രമവും നടന്നുവരികയാണ്. നിലവില്‍ കപ്പലിനെ വലിച്ചുകൊണ്ടുപോകുന്നത് "ബോക്ക വിങ്കര്‍' എന്ന ടഗ്ഗായിരുന്നു. ഈ ദൗത്യം ഓഫ്‌ഷോര്‍ വാരിയര്‍ കപ്പല്‍ ഏറ്റെടുത്തു. കാണാതായ ജീവനക്കാരുടെ വിവരങ്ങള്‍ തേടി കോസ്റ്റല്‍ പോലീസ് കപ്പലില്‍ നിന്ന് കാണാതായ നാലു ജീവനക്കാരുടെ ഡിഎന്‍എ, വിരലടയാള വിവരങ്ങള്‍ നല്‍കാന്‍ കോസ്റ്റല്‍ പോലീസ് കപ്പല്‍ കമ്പനിയോട് ആവശ്യപ്പെട്ടു. ആലപ്പുഴ അര്‍ത്തുങ്കല്‍ തീരത്തടിഞ്ഞ മൃതദേഹങ്ങളില്‍ ഒന്ന്, കാണാതായ ഇന്തോനേഷ്യക്കാരന്‍റേതാണെന്ന് സംശയിക്കുന്നുണ്ട്. ഇതില്‍ വ്യക്തത വരുത്താന്‍ കപ്പല്‍ കമ്പനി ഇന്തോനേഷ്യക്കാരന്‍റെ കുടുംബവുമായി ബന്ധപ്പെട്ടിട്ടുണ്ട്.

മെഗാ ജോബ് ഫെയര്‍ ഇന്ന് പൂത്തോട്ടയിൽ

കൊച്ചി: മോഡല്‍ കരിയര്‍ സെന്‍റര്‍ യൂണിവേഴ്‌സിറ്റി എംപ്ലോയ്‌മെന്‍റ് ഇന്‍ഫര്‍മേഷന്‍ ആന്‍ഡ് ഗൈഡന്‍സ് ബ്യൂറോ കുസാറ്റും സ്വാമി ശാശ്വതീകാനന്ദ കോളജ് പൂത്തോട്ടയും സംയുക്തമായി മെഗാ ജോബ് ഫെയര്‍ നടത്തുന്നു. ഇന്ന് രാവിലെ ഒന്‍പത് മുതല്‍ പൂത്തോട്ട സ്വാമി ശാശ്വതീകാനന്ദ കോളജിലാണ് തൊഴില്‍ മേള. 1000ലേറെ ഒഴിവുകളിലേക്ക് ഇന്‍റര്‍വ്യൂ നടത്തുന്നതാണ്. രജിസ്‌ട്രേഷന് www.sscpoothotta. edu.in. സ്‌പോട്ട് അഡ്മിഷനും ലഭ്യമാണ്.

നായ്ക്കൾ കൂട്ടമായെത്തി ഭയന്ന കുട്ടി തലചുറ്റി വീണു

മരട്: കൂട്ടമായെത്തിയ നായ്ക്കളെ കണ്ട് ഭയന്ന പെൺകുട്ടി തലചുറ്റി വീണു. തൈക്കൂടം മെട്രോ സ്റ്റേഷന് സമീപമായിരുന്നു ആറോളം നായ്ക്കൾ കടിപിടി കൂടി വിദ്യാർഥിനിയുടെ അടുത്തേക്ക് ചീറിപ്പാഞ്ഞ് വന്നത്. പേടിച്ചുപോയ കുട്ടി തല കറങ്ങി വീഴുകയായിരുന്നു. ഇതു കണ്ട് ഓടിയെത്തിയ നാട്ടുകാർ നായ്ക്കളെ ഓടിച്ചശേഷം കുട്ടിക്ക് പ്രഥമ ശുശ്രൂഷ നൽകി. സമീപത്തെ കടയിലെ ജീവനക്കാരൻ റോഡിലിട്ട് വളർത്തുന്ന നായ്ക്കളാണ് ഭീതിദമായ രംഗമുണ്ടാക്കിയതെന്നാണ് നാട്ടുകാർ പറഞ്ഞു. നായ്ക്കൾക്ക് റോഡിൽ ഭക്ഷണം കൊടുത്തു വളർത്തരുതെന്ന് നാട്ടുകാരും കെട്ടിട ഉടമയും നിർദേശം നല്കിയിരുന്നു. എന്നാൽ ഇത് വകവയ്ക്കാത്തതിനാൽ കോവിലകം റോഡിലും മെട്രോ സ്റ്റേഷൻ പരിസരത്തും നായ്ക്കൾ വിഹരിക്കുകയാണെന്നാണ് ആക്ഷേപം. വിദ്യാർഥികൾക്ക് വഴിയിലൂടെ നടക്കാൻ പറ്റാത്ത സ്ഥിതിയാണുള്ളത്. കോർപറേഷൻ അധികൃതർക്ക് പരാതി നൽകാൻ തയാറെടുക്കുകയാണ് നാട്ടുകാർ.

തീവ്രത കുറയുന്നു; പെയ്തിറങ്ങിയത് 439.1 മില്ലിമീറ്റര്‍ മഴ

കൊച്ചി: ജില്ലയില്‍ മഴയുടെ തീവ്രത കുറയുന്നു. രണ്ട് ദിവസത്തോളമായി തീരദേശത്തും മഴയ്ക്ക് ശമനം വന്നതോടെ വെള്ളപ്പൊക്കത്തെ തുടര്‍ന്നുള്ള ദുരിതത്തിന് നേരിയ ആശ്വാസമായി. തുടര്‍ച്ചയായി പെയ്ത ശക്തമായ മഴയില്‍ താഴ്ന്ന പ്രദേശങ്ങളിൽ രൂപപ്പെട്ട വെള്ളക്കെട്ട് മഴ കുറഞ്ഞതോടെ ഒഴിഞ്ഞു തുടങ്ങി. വെള്ളപ്പൊക്ക മുന്നറിയിപ്പിലേക്ക് ഉയര്‍ന്ന ജില്ലയിലെ പുഴകളിലെ ജലനിരപ്പും സാധാരണ നിലയിലേക്ക് മടങ്ങുകയണ്. കഴിഞ്ഞ 20 ദിവസത്തിനിടെ ജില്ലയില്‍ 439.1 മില്ലി മീറ്റര്‍ മഴയാണ് ലഭിച്ചത്. കാലവസ്ഥ കേന്ദ്രങ്ങളുടെ കണക്കനുസരിച്ച് ഇതുവരെ പെയ്ത മഴയില്‍ അഞ്ച് ശതമാനത്തിന്‍റെ കുറവാണ് രേഖപ്പെടുത്തിയിട്ടുള്ളത്. ഈ കാലയളവില്‍ 462.2 മില്ലി മീറ്റര്‍ മഴയാണ് ജില്ലയില്‍ ലഭിക്കേണ്ടിയിരുന്നത്. ഇന്നലെ ആലുവ - 15.0 മില്ലി മീറ്റര്‍, കൊച്ചി -20.2 മില്ലി മീറ്റര്‍, എറണാകുളം സൗത്ത് -14.0 മില്ലി മീറ്റര്‍, സിയാല്‍ -9.0 മില്ലി മീറ്റര്‍, പിറവം -14.3 മില്ലി മീറ്റര്‍, പെരുമ്പാവൂര്‍ -9.0 മില്ലി മീറ്റര്‍ എന്നിങ്ങനെയാണ് വിവിധയിടങ്ങളിൽ പെയ്ത മഴയുടെ അളവ്. വെള്ളക്കെട്ട് ഒഴിഞ്ഞതോടെ വീടുകളിലടക്കം വെള്ളം കയറിയവര്‍ ശുചീകരണ പ്രവര്‍ത്തനങ്ങള്‍ ആരംഭിച്ചു. വീടുകള്‍ തകര്‍ന്നവര്‍ അറ്റകുറ്റപ്പണികള്‍ക്കുള്ള തയാറെടുപ്പിലാണ്.

പനി പടരുന്നു : ജാഗ്രതൈ !

കൊച്ചി: മഴയ്ക്ക് പിന്നാലെ ജില്ലയില്‍ പനി ബാധിതരുടെ എണ്ണവും വര്‍ധിച്ചതോടെ വ്യക്തി ശുചിത്വത്തിലടക്കം ജാഗ്രത പാലിക്കണമെന്ന് ആരോഗ്യവിഭാഗം മുന്നറിയിപ്പ് നല്കി. പനി, ജലദോഷം, ശ്വാസകോശ സംബന്ധമായ രോഗങ്ങള്‍ എന്നിവയുടെ ലക്ഷണങ്ങള്‍ ഉള്ളവര്‍ ജാഗ്രത പുലര്‍ത്തണം. പനി ലക്ഷണങ്ങള്‍ കണ്ടാല്‍ സ്വയം ചികിത്സ ഒഴിവാക്കി യഥാസമയം ചികിത്സ തേടേണ്ടതാണ്. കോവിഡ് രോഗികളുടെ എണ്ണവും ദിനംപ്രതി വര്‍ധിക്കുകയാണ്. ഈ സാഹചര്യത്തില്‍ പനി, ചുമ, ശ്വാസതടസം തുടങ്ങിയ ലക്ഷണങ്ങള്‍ ഉള്ളവര്‍ മാസ്‌ക് ഉപയോഗിക്കണം. രോഗലക്ഷണങ്ങള്‍ ഉള്ളവര്‍ മറ്റുള്ളവരുമായുള്ള സമ്പര്‍ക്കം ഒഴിവാക്കുന്നത് രോഗവ്യാപനം തടയുന്നതിന് സഹായിക്കും. ശ്വാസകോശ സംബന്ധമായ രോഗങ്ങള്‍ ഉള്ളവരും പ്രായമായവരും ഗര്‍ഭിണികളും മറ്റ് ഗുരുതര രോഗങ്ങളുള്ളവരും പ്രത്യേകം ശ്രദ്ധിക്കണമെന്നും ആരോഗ്യവിഭാഗം നിർദേശം നല്കി. ഉറവിടനശീകരണം ഉള്‍പ്പെടെയുള്ള മുന്‍കരുതല്‍ നടപടികളിലൂടെ കൊതുകു നിവാരണം ഉറപ്പാക്കണം. രോഗലക്ഷണങ്ങള്‍ വൈറല്‍ പനി തൊണ്ടവേദനയോടു കൂടിയ ശക്തമായ പനി. മൂന്നു ദിവസം വരെ പനി ഉണ്ടാകാം. ഒപ്പം ശക്തമായ തലവേദന, മൂക്കടപ്പ്, ക്ഷീണം, ചുമ. ഡെങ്കിപ്പനി ശരീരവേദന, സന്ധിവേദന, ക്ഷീണം, വിറയല്‍, ശക്തമായ തലവേദന. എലിപ്പനി ശക്തമായ വിറയല്‍, പനി, തളര്‍ച്ച, കുളിര്, ശരീരവേദന, ഛര്‍ദി, മനംപുരട്ടല്‍, കണ്ണിന് ചുവപ്പ്, വെളിച്ചത്ത് നോക്കാന്‍ പ്രയാസം, കണങ്കാലില്‍ വേദന. മഞ്ഞപ്പിത്തം ചര്‍മത്തിനും കണ്ണുകള്‍ക്കും നഖത്തിനും ഉണ്ടാകുന്ന മഞ്ഞനിറം, വിശപ്പില്ലായ്മ, ഛര്‍ദി, ക്ഷീണം, പനി, ഇരുണ്ട മൂത്രം എന്നിവ രോഗലക്ഷണങ്ങളാണ്. പനിക്ക് ചികിത്സ തേടിയത് 10,154 പേര്‍ ഈ മാസം 18 വരെ ജില്ലയിലെ വിവിധയിടങ്ങളിലായി 10,154 പേരാണ് പനി ബാധിച്ച് ചികിത്സ തേടിയത്. ഇതില്‍ 692 സംശയാസ്പദമായ ഡെങ്കിപ്പനി കേസുകളും സ്ഥിരീകരിച്ച 115 ഡെങ്കിപ്പനി കേസുകളും ഉള്‍പ്പെടുന്നു. ഇതിനു പുറമേ 44 എലിപ്പനി കേസുകളും, 118 ഹെപ്പറ്റൈറ്റിന്-എ കേസുകളും റിപ്പോര്‍ട്ട് ചെയ്തിട്ടുണ്ട്.

എംഎസ്‌സി എല്‍സ3 അപകടം : റിപ്പോര്‍ട്ട് സമര്‍പ്പിക്കാന്‍ കപ്പല്‍ കമ്പനിക്ക് നിര്‍ദേശം

കൊച്ചി: കൊച്ചി പുറംകടലില്‍ മുങ്ങിയ ലൈബീരിയന്‍ ചരക്ക് കപ്പല്‍ എംഎസ്‌സി എല്‍സ3 യില്‍ നിന്നുള്ള എണ്ണ വീണ്ടെടുക്കുന്ന നടപടികള്‍ വൈകുന്നു. നിലവിലുണ്ടായിരുന്ന അമേരിക്കന്‍ സാല്‍വേജ് കമ്പനി ടി ആന്‍ഡ് ടി ദൗത്യത്തില്‍ നിന്ന് പിന്മാറിയതിന് പിന്നാലെ പുതിയ സാല്‍വേജ് കോണ്‍ട്രാക്ടറുടെ കീഴില്‍ പുനരാരംഭിക്കുന്നതിനുള്ള നടപടികള്‍ നടന്നുവരികയാണ്. പുതിയ കമ്പനിയുമായി കരാറില്‍ ഏര്‍പ്പെട്ടതായി ഷിപ്പിംഗ് കമ്പനി ഡിജിഎസിനെ അറിയിച്ചിട്ടുണ്ട്. അതിനിടെ എണ്ണയും കണ്ടെയ്‌നറുകളും വീണ്ടെടുക്കാനുള്ള വിശദമായ റിപ്പോര്‍ട്ട് 48 മണിക്കൂറിനകം കൈമാറണമെന്ന് കപ്പല്‍ ഉടമയ്ക്ക് ഡയറക്ടറേറ്റ് ജനറല്‍ ഓഫ് ഷിപ്പിംഗ് കര്‍ശന നിർദേശം നല്‍കി. തന്ത്രപ്രധാന മേഖലയോടു ചേര്‍ന്ന് 51 മീറ്റര്‍ താഴ്ചയില്‍ കപ്പല്‍ കിടക്കുന്നത് സുരക്ഷയ്ക്കും മലിനീകരണത്തിനും ഒരുപോലെ ദോഷമാണ്. ഈ സാഹചര്യത്തിലാണ് ഡിജിഎസിന്‍റെ നിർദേശം. കപ്പലിലെ എണ്ണച്ചോര്‍ച്ച ടി ആന്‍ഡ് ടി പൂര്‍ണമായും അടച്ചിരുന്നു. കാലവര്‍ഷം ശക്തി പ്രാപിക്കുന്ന സാഹചര്യത്തില്‍ കപ്പലിന്‍റെ അടിത്തട്ടിലെ ടാങ്കില്‍ എണ്ണകിടക്കുന്നത് സുരക്ഷിതമല്ലെന്നാണ് ഡയറക്ടറേറ്റ് ജനറല്‍ ഓഫ് ഷിപ്പിംഗ് വ്യക്തമാക്കുന്നത്. ഇന്ധന ചോര്‍ച്ച പ്രതീക്ഷിക്കുന്നുണ്ടെങ്കിലും അടിയന്തിര ഇടപെടല്‍ ആവശ്യമില്ലെന്നാണ് വിലയിരുത്തല്‍. ടി ആന്‍ഡ് ടി പിന്മാറിയതിന് പിന്നാലെ പ്രാരംഭഘട്ട ക്യാപ്പിംഗും എയര്‍ ഡ്രൈവിംഗും പൂര്‍ത്തിയാക്കി സീമാക്3 ഡൈവിംഗ് മടങ്ങി. പുതിയ ടഗ് ബോട്ടായി കാനറ മേഘിനെ കൊണ്ടുവരുന്നതിനുള്ള നടപടികള്‍ പുരോഗമിക്കുകയാണ്. ദുരിതബാധിത ബീച്ചുകളിലെ ശുചീകരണവും പ്ലാസ്റ്റിക് തരികള്‍ വീണ്ടെടുക്കുന്ന പ്രവര്‍ത്തനങ്ങളും തുടരുന്നു. വോളന്‍റിയേഴ്‌സിന്‍റെ കുറവ് ജോലികളെ സാരമായി ബാധിക്കുന്നുണ്ട്. ശേഖരിക്കുന്ന പ്ലാസ്റ്റിക് തരികള്‍ സൂക്ഷിക്കുന്നത് സംബന്ധിച്ച് ഡിജിഎസ് കസ്റ്റംസുമായി കൂടിയാലോചനകള്‍ നടത്തിവരികയാണ്. ക്യാപ്റ്റന്‍റെ മൊഴി രേഖപ്പെടുത്തി കപ്പല്‍ മുങ്ങിയ സംഭവത്തില്‍ ഫോര്‍ട്ടുകൊച്ചി കോസ്റ്റല്‍ പോലീസ് രജിസ്റ്റര്‍ ചെയ്ത കേസില്‍ എംഎസ്‌സി എല്‍സ3യുടെ ക്യാപ്റ്റന്‍ ഇവാനോവ് അലക്‌സാണ്ടറുടെ മൊഴി പോലീസ് രേഖപ്പെടുത്തി. കോവിഡ് ബാധിച്ച് ക്വാറന്‍റൈനില്‍ കഴിഞ്ഞിരുന്ന ഇയാളുടെ മൊഴി കഴിഞ്ഞ ദിവസമാണ് രേഖപ്പെടുത്തിയതെന്നാണ് വിവരം. ഫസ്റ്റ് ഓഫീസര്‍, സെക്കന്‍ഡ് ഓഫീസറടക്കം അഞ്ചു പേരുടെ മൊഴിയാണ് ഇനി രേഖപ്പെടുത്താനുള്ളത്. ഇവരുടെ പാസ്‌പോര്‍ട്ട് കഴിഞ്ഞ ദിവസം പിടിച്ചെടുത്ത് കോടതിയില്‍ ഹാജരാക്കിയിരുന്നു. ഇവര്‍ക്ക് ഇന്ത്യ വിടണമെങ്കില്‍ കോടതിയെ സമീപിക്കേണ്ടിവരും.

തുക കൈമാറി

വാഴക്കുളം: സെന്‍റ് ജോർജ് ആശുപത്രിയുടെ സഹകരണത്തോടെ വാഴക്കുളം ചാരിറ്റബിൾ ട്രസ്റ്റ് ആരംഭിക്കുന്ന സൗജന്യ ഡയാലിസിസ് സെന്‍ററിലേക്ക് പോത്താനിക്കാട് കൂറ്റപ്പിള്ളിൽ കെ.ജെ. ജോസഫ് ചാരിറ്റബിൾ ട്രസ്റ്റ് എട്ടു ലക്ഷം സംഭാവന നൽകി. കൂറ്റപ്പിള്ളിൽ ചാരിറ്റബിൾ ട്രസ്റ്റ് ചെയർമാൻ കെ.ജെ ജോസഫ് വാഴക്കുളം ചാരിറ്റബിൾ ട്രസ്റ്റ് ചെയർമാൻ സിജു സെബാസ്റ്റ്യന് ചെക്ക് കൈമാറി. ട്രസ്റ്റ് സെക്രട്ടറി ജോണി മെതിപ്പാറ, വാഴക്കുളം സെന്‍റ് ജോർജ് ഫൊറോന പള്ളി വികാരി ഫാ. ജോർജ് പൊട്ടക്കൽ, ഫാ. തോമസ് മഞ്ഞക്കുന്നേൽ, ഡോ. മാത്യൂസ് നന്പേലി, ഡോ. സോണി ജെയിംസ്, സജി കൂറ്റപ്പിള്ളിൽ, ജോമോൻ കുന്നുംപുറം, സാജു ടി. ജോസ്, തോമസ് വർഗീസ്, ജെയിംസ് തോട്ടുമാരിക്കൽ തുടങ്ങിയവർ പങ്കെടുത്തു.

പ്രവേശനോത്സവം നടത്തി

മൂവാറ്റുപുഴ: മോഡൽ വൊക്കേഷൻ ഹയർ സെക്കൻഡറി സ്കൂളിൽ ഒന്നാം വർഷ വിദ്യാർഥികളുടെ പ്രവേശനോത്സവം നാഷണൽ സർവീസ് സ്കീമിന്‍റെയും കരിയർ ഗൈഡൻസിന്‍റെയും നേതൃത്വത്തിൽ നടത്തി. നഗരസഭ ഉപാധ്യക്ഷ സിനി ബിജു ഉദ്ഘാടനം ചെയ്തു. ഇതോടനുബന്ധിച്ച് ലഹരി വിരുദ്ധ കാന്പയിൻ മൂവാറ്റുപുഴ എക്സൈസ് ഇൻസ്പെക്ടർ ടി. ശ്രീജിത്ത് ഉദ്ഘാടനം ചെയ്തു. എൻഎംബിഎ പ്രോഗ്രാം കോ-ഓർഡിനേറ്റർ ഡോ. ജാക്സണ്‍ തോട്ടുങ്കൽ ലഹരിക്കെതിരെ ബോധവത്കരണ ക്ലാസെടുത്തു.

മുക്കുപണ്ടം പണയം തട്ടിപ്പ്: പ്രതിക്ക് മൂന്നുവർഷം കഠിനതടവും പിഴയും

മൂവാറ്റുപുഴ : മുക്കുപണ്ടം പണയം വെച്ച് പണം തട്ടിയ കേസിൽ പ്രതിക്ക് മൂന്നുവർഷം കഠിന തടവും, പതിനായിരം രൂപ പിഴയും വിധിച്ചു. കോട്ടപ്പടി പാനിപ്ര ചിറ്റേത്ത്കുടിയിൽ മക്കാറി(62)നെയാണ് കോതമംഗലം ജുഡീഷ്യൽ ഒന്നാം ക്ലാസ്‌സ് മജിസ്ട്രേറ്റ് കോടതി ശിക്ഷിച്ചത്. 2014 ആഗസ്റ്റിലാണ് കേസിന് ആസ്പദമായ സംഭവം. ദേശസാൽകൃത ബാങ്കിന്‍റെ പോത്താനിക്കാടുള്ള ശാഖയിൽ 60.8 ഗ്രാം മുക്കുപണ്ടം പണയം വച്ച് 1,05,000 രൂപ കൈപ്പറ്റുകയായിരുന്നു. സമാനമായ നിരവധി മുക്കുപണ്ട പണയ കേസുകളിലെ പ്രതിയാണ്. പോത്തിനിക്കാട് പോലീസാണ് കേസ് രജിസ്റ്റർ ചെയ്ത് അന്വേഷണം നടത്തി കുറ്റപത്രം സമർപ്പിച്ചത്. പ്രോസിക്യൂഷനു വേണ്ടി ബെൽജി ഹാജരായി.

ലഹരിക്കെതിരെ ബോധവത്കരണവുമായി സ്പാർക്ക്

കോതമംഗലം: ആധുനിക യുഗത്തിലെ വിദ്യാർഥികളെ ലഹരിയുടെ കൈയിൽ നിന്ന് അകറ്റുകയെന്നത് കാലഘട്ടത്തിന്‍റെ അനിവാര്യതയാണ് നഗരസഭ അധ്യക്ഷൻ കെ.കെ ടോമി. വിമലഗിരി പബ്ലിക് സ്കൂളിൽ സ്പാർക്ക് എന്ന പേരിൽ ആരംഭിച്ച ഓറിയന്‍റേഷൻ പരിപാടി ഉദ്ഘാടനം ചെയ്യുകയായിരുന്നു അദ്ദേഹം. സാമൂഹ്യ നന്മയ്ക്കുതകുന്ന നിരവധി വിഷയങ്ങളെ കുറിച്ച് കുട്ടികളെയും, മാതാപിതാക്കളെയും അധ്യാപകരെയും ബോധവത്കരിച്ച ക്ലാസ് ശ്രദ്ധേയമായിരുന്നു. സ്കൂൾ മാനേജർ ഫാ. കുര്യാക്കോസ് കറുത്തേടത്ത് അധ്യക്ഷത വഹിച്ചു. റിട്ട. സബ് ഇൻസ്പെക്ടർ ഒ.എം ബാബു ട്രാഫിക് ബോധവത്കരണ ക്ലാസ് നടത്തി. പ്രിൻസിപ്പൽ ജിസി സോജൻ, സ്കൂൾ വൈസ് പ്രിൻസിപ്പൽ ടൈറിസ് ടോം, അധ്യാപിക മിനി അംസ്ട്രോങ്, അധ്യാപക പ്രതിനിധി ഉഷാസന്ധ്യ എന്നിവർ പ്രസംഗിച്ചു.

വിദ്യാഭ്യാസ അവാർഡുകൾ വിതരണം ചെയ്തു

മൂവാറ്റുപുഴ: അടൂപ്പറന്പ് ഫുട്ബോൾ ക്ലബിന്‍റെ നേതൃത്വത്തിൽ വിദ്യാഭ്യാസ അവാർഡുകൾ വിതരണം ചെയ്തു. എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം കരസ്ഥമാക്കിയ പ്രദേശത്തെ മുഴുവൻ വിദ്യാർഥികൾക്കും, എംജി സർവകലാശാല ബിഎസ്‌സി ബോട്ടണി പരീക്ഷയിൽ റാങ്ക് നേടിയ ഹസ്ന സുൽഫിക്കറിനെയും മെമന്‍റോ നൽകി ആദരിച്ചു. ആവോലി പഞ്ചായത്ത് മുൻ വൈസ് പ്രസിഡന്‍റ് ജോർജ് വർഗീസ് തെക്കുംപുറം ഉദ്ഘാടനം ചെയ്തു. ചടങ്ങിൽ ക്ലബ് പ്രസിഡന്‍റ് ടി.എച്ച് സുധീർ അധ്യക്ഷത വഹിച്ചു. സെക്രട്ടറി ടി.എം. സുധീർ, വിപിഎസ്ആർ ഷബാബ്, വി.എച്ച്. ഷിനാജ്, വി.എച്ച്. സാലിഹ്, ജലീൽ തടത്തിൽ, ജവാസ് ആര്യങ്കാല തുടങ്ങിയവർ പങ്കെടുത്തു.

മൂവാറ്റുപുഴ പേട്ട റോഡിലെ കലുങ്കിൽ വിള്ളൽ

മൂവാറ്റുപുഴ: നഗരത്തിലെ ഒരു നൂറ്റാണ്ടിലധികം പഴക്കമുള്ള കലുങ്കിൽ വിള്ളൽ. ലതാ പാലത്തിന് സമീപമുള്ള പേട്ട റോഡിലെ കലുങ്കിൽ വിള്ളൽ രൂപപ്പെട്ടതോടെ വാഹനയാത്രികരും പ്രദേശവാസികളും ഭീതിയിലാണ്. തൊടുപുഴ - മൂവാറ്റുപുഴ റൂട്ടിൽ ദിനംപ്രതി നൂറു കണക്കിന് ഭാരവാഹനങ്ങളാണ് കലുങ്കിന് മൂകളിലൂടെ കടന്നുപോകുന്നത്. നഗരത്തിൽ ഗതാഗത നിയന്ത്രണം ഏർപ്പെടുത്തിയതിനാൽ കൂത്താട്ടുകുളം, കോട്ടയം ഭാഗങ്ങളിലേക്കുള്ള നിരവധി വാഹനങ്ങളാണ് പേട്ട റോഡിലൂടെ സഞ്ചരിക്കുന്നത്. മഴ ശക്തിയായി തുടരുന്നതിനാൽ തൊടുപുഴ റോഡിൽ നിന്നുള്ള വെള്ളം കലുങ്കിൽ രൂപപ്പെട്ടിരിക്കുന്ന വിള്ളലിലൂടെ പേട്ട റോഡിലേക്കാണ് ഒലിച്ചിറങ്ങുന്നത്. വെള്ളം ഒലിച്ചിറങ്ങുന്നതോടെ വിദ്യാർഥികളടക്കമുള്ള കാൽനട യാത്രികരും ബുദ്ധിമുട്ടിലാണ്. വർഷങ്ങളുടെ പഴക്കമുള്ള കലുങ്കിന് ബലക്ഷയവുംസംഭവിച്ചിട്ടുണ്ട്. ഇതുസംബന്ധിച്ച് മന്ത്രി മുഹമ്മദ് റിയാസിനും പിഡബ്ല്യുഡി റോഡ് അസിസ്റ്റന്‍റ് എക്സിക്യൂട്ടീവ് എൻജിനീയർക്കും നഗരസഭാംഗം ജാഫർ സാദിഖ് പരാതി നൽകി. ജനങ്ങൾ തിങ്ങിപ്പാർക്കുന്ന പ്രദേശത്തെ വീതി കുറഞ്ഞ റോഡിൽ വാഹനങ്ങളുടെ തിരക്ക് ഒഴിവാക്കുന്നതിനായി കാവുംപടി റോഡിൽ പോലീസ് സ്റ്റേഷന് സമീപത്തുനിന്നും പേട്ട മുസ്ലീം പള്ളിയുടെ സമീപം വരെയുള്ള ഭാഗത്ത് റോഡിന്‍റെ ഉയരം കൂട്ടി നിർമിക്കണമെന്നും ജാഫർ സാദിഖ് നൽകിയ പരാതിയിൽ ആവശ്യപ്പെട്ടിട്ടുണ്ട്. നിരവധി കുടുംബങ്ങളും, യാത്രക്കാരും ആശ്രയിക്കുന്ന റോഡിലെ കലുങ്കിലെ അപകടഭീഷണി ഒഴിവാക്കാൻ ഉടൻ വേണ്ട നടപടി സ്വീകരിക്കണമെന്നാണ് ജനങ്ങളുടെ ആവശ്യം.

തകർന്ന എംസി റോഡ് നവീകരിക്കണമെന്ന്

മൂവാറ്റുപുഴ: കാലവർഷക്കെടുതിയിൽ തകർന്ന എംസി റോഡ് നവീകരിക്കണമെന്ന് മുൻ എംഎൽഎ എൽദോ ഏബ്രഹാം. ഒന്നാം എൽഡിഎഫ് സർക്കാരിന്‍റെ കാലയളവിൽ 2019ൽ ശബരി പാക്കേജിൽ ഉൾപ്പെടുത്തി 15 കോടി ചെലവിൽ മൂവാറ്റുപുഴ-പെരുന്പാവൂർ എംസി റോഡ് നവീകരിച്ചിരുന്നു. കഴിഞ്ഞ ആറു വർഷത്തിനിടെ എംസി റോഡ് പുനരുദ്ധാരണത്തിനായി യാതൊരു നടപടികളും സ്വീകരിച്ചില്ല. കുഴിയടയ്ക്കൽ മാത്രമാണ് നടന്നത്. ആയിരക്കണക്കിന് വാഹനങ്ങൾ ദൈനംദിനം കടന്നുപോകുന്ന റോഡിന്‍റെ പ്രാധാന്യം കണക്കാക്കിയുള്ള പ്രവൃത്തികൾ അധികൃതർ ഏറ്റെടുക്കുന്നില്ല. മഴക്കാലം മുന്നിൽകണ്ട് ഓടകളുടെ ശുചീകരണ പ്രവർത്തനമില്ലാതെ വന്നതിനാൽ വാഴപ്പിള്ളി ജംഗ്ഷൻ, പേഴയ്ക്കാപ്പിള്ളി സബ് സ്റ്റേഷൻ, എസ് വളവ് എന്നിവിടങ്ങളിൽ വെള്ളക്കെട്ട് രൂപപ്പെട്ട് യാത്രയ്ക്ക് തടസമാകുന്ന സ്ഥിതിയാണുള്ളത്. എംസി റോഡിൽ മൂവാറ്റുപുഴ മുതൽ തൃക്കളത്തുർ വരെ റോഡ് പൂർണമായും തകർന്നു. ഇരുചക്ര വാഹന യാത്രക്കാർ കുഴിയിൽ വീണ് അപകടം സംഭവിക്കുന്നത് പതിവായി മാറി. ഉത്തരവാദപ്പെട്ട ജനപ്രതിനിധികളുടെ അശ്രദ്ധയും, അനാസ്ഥയും, ഇടപെടലുകളിലെ പോരായ്മയുമാണ് ഇതിന് കാരണമെന്ന് എൽദോ ഏബ്രഹാം കുറ്റപ്പെടുത്തി.

നീണ്ടപാറയിൽ കാട്ടാനശല്യം രൂക്ഷം ഫോറസ്റ്റ് സ്റ്റേഷൻ ഉപരോധിച്ച് നാട്ടുകാർ

കോതമംഗലം: നീണ്ടപാറയിൽ കാട്ടാനശല്യം രൂക്ഷമായതിനെ തുടർന്നു നാട്ടുകാർ നഗരംപാറ ഫോറസ്‌റ്റ് സ്റ്റേഷൻ ഉപരോധിച്ചു. കഴിഞ്ഞ മൂന്ന് ദിവസമായി നീണ്ടപാറ പള്ളിപ്പടി, ഡബിൾ കുരിശ് ഭാഗത്ത് ആനകൾ വ്യാപക നാശമാണ് ഉണ്ടാക്കിയത്. വ്യാഴാഴ്‌ച രാത്രി ഇറങ്ങിയ ആന ഇന്നലെ രാവിലെ ഇടുക്കി റോഡ് വഴിയാണു പോയത്. ഇതുവഴി പോയ ജയിംസ് കോയിക്കക്കുടി, മേരി പൊട്ടനാനിയിൽ എന്നിവർ തലനാരിഴയ്ക്കാണ് ആനയിൽ നിന്നു രക്ഷപ്പെട്ടത്. ഏക്കർ കണക്കിന് ഭൂമി യിലെ മുഴുവൻ കൃഷികളും കാട്ടാനക്കൂട്ടം നശിപ്പിച്ചു. ഇന്ന് വെളുപ്പിന് പാലുമായി പോയ ഒരു വീട്ടമ്മ കാട്ടാനയുടെ മുമ്പിൽ നിന്നും തലനാരിഴക്കാണ് രക്ഷപ്പെട്ടത്. ആനകളെ തുരത്താൻ ആർആർടിയെ നിയോഗിക്കുമെന്നും ജനകീയ കമ്മിറ്റി ചേരാമെന്നും ഉറപ്പു ലഭിച്ചതോടെയാണു നാട്ടുകാർ സമരം അവസാനിപ്പിച്ചത്. പഞ്ചായത്ത് പ്രസിഡന്‍റ് സിബി മാത്യു, സൈജന്‍റ് ചാക്കോ, പഞ്ചായത്ത് അംഗം സന്ധ്യ ജെയ്‌സൺ, ഫാ. ബേസിൽ ജേക്കബ് പ്ലാലിൽ, ജയ്മോൻ ജോസ്, ഫ്രാങ്കോ ജയിംസ് ജോസഫ്, ജെയ്‌സൺ മാത്യു, ബേസിൽ കുന്നപ്പിള്ളിൽ, മാർട്ടിൻ ചിറയ്ക്കൽ, തോമസ് പറങ്കിമാലിൽ എന്നിവർ ചർച്ചയിൽ പങ്കെടുത്തു.

ആതിര ജ്വല്ലറി തട്ടിപ്പ്: പണം തിരികെക്കിട്ടാൻ നിക്ഷേപകര്‍ പ്രക്ഷോഭത്തിന്

കൊച്ചി: ഹൈക്കോടതി ജംഗ്ഷനില്‍ പ്രവര്‍ത്തിച്ചിരുന്ന ആതിര ഗോള്‍ഡ് ആന്‍ഡ് സില്‍ക്സ് എന്ന സ്ഥാപനം വിവിധ സ്വര്‍ണ സമ്പാദ്യ പദ്ധതികളുടെ മറവില്‍ കോടികൾ തട്ടിയ സംഭവത്തില്‍ പണം തിരികെ ലഭിക്കണമെന്ന് ആവശ്യപ്പെട്ട് നിക്ഷേപകര്‍ പ്രക്ഷോഭത്തിലേക്ക്. ഇതിനു മുന്നോടിയായി പണം നഷ്ടപ്പെട്ടവര്‍ ചേര്‍ന്ന് ഇന്ന് കളക്ടര്‍ക്ക് പരാതി നല്‍കും. സ്ഥാപനത്തിന്റെ വിവിധ നിക്ഷേപ പദ്ധതികളിലൂടെ 5,000 ഓളം പേര്‍ക്കാണ് പണം നഷ്ടമായിട്ടുള്ളത്. സ്വകാര്യ ബാങ്കില്‍നിന്ന് കമ്പനി 19 കോടിയോളം രൂപ വായ്പ എടുത്തിരുന്നു. കഴിഞ്ഞ ഫെബ്രുവരിയില്‍ തിരിച്ചടവ് മുടങ്ങിയതിനെ തുടര്‍ന്ന് ബാങ്ക് എറണാകുളത്തെ ഇവരുടെ സ്ഥാപനം കണ്ടുകെട്ടിയതോടെയാണ് തട്ടിപ്പ് വിവരം പുറത്തറിയുന്നത്. ഈ ബാധ്യത തീര്‍ക്കുന്നതിനായി നിക്ഷേപകരുടെ 12 കോടിയോളം വരുന്ന സ്വര്‍ണം സ്വകാര്യ ബാങ്കിന് അധികൃതര്‍ കൈമാറിയെന്നും, ശേഷിക്കുന്ന തുകയടക്കാന്‍ പൂട്ടിക്കിടക്കുന്ന സ്ഥാപനത്തിലെ കോടികള്‍ വിലവരുന്ന തുണിത്തരങ്ങള്‍ തമിഴ്‌നാട്ടിലെ സംഘത്തിന് വില്‍ക്കാന്‍ ശ്രമിച്ചെന്നും ഇവര്‍ ആരോപിച്ചു. സംസ്ഥാനത്തിന്‍റെ വിവിധ ഭാഗങ്ങളില്‍ നിന്നുള്ളവര്‍ക്ക് പുറമേ ലക്ഷ്വദീപില്‍നിന്നുള്ളവരും തട്ടിപ്പിനിരയായിട്ടുണ്ട്. സര്‍ക്കാര്‍ ഇടപ്പെട്ട് നിക്ഷേപകരുടെ തുക തിരികെ ലഭിക്കുന്നതിനുള്ള നടപടി സ്വീകരിക്കണമെന്ന് നിക്ഷേപകര്‍ പത്രസമ്മേളനത്തില്‍ ആവശ്യപ്പെട്ടു. സ്ഥാപനങ്ങള്‍ക്ക് സ്വര്‍ണ, പണ നിക്ഷേപങ്ങള്‍ സ്വീകരിക്കുന്നതിന് ആര്‍ബിഐയുടെയും സര്‍ക്കാരിന്‍റെയും ലൈസന്‍സ് നിര്‍ബന്ധമാണ്. എന്നാല്‍ ആതിര ഗോള്‍ഡ് ആന്‍ഡ് സില്‍ക്‌സിന് ഇത്തരം ലൈസന്‍സില്ലെന്നും നിക്ഷേപിച്ച തുക തിരികെ ലഭിച്ചില്ലെന്നും കാണിച്ച് നിക്ഷേപകര്‍ പരാതിപ്പെട്ടതോടെ സ്ഥാപനത്തിന്‍റെ എംഡിയായ ആര്‍.ജെ. ആന്‍റണി, ജോസ്, ജോബി, ജോണ്‍സണ്‍ എന്നിവരെ അറസ്റ്റു ചെയ്തിരുന്നു. നിക്ഷേപകരും തട്ടിപ്പിന് ഇരകളുമായ ആര്‍. ജെഫ്രി പിന്‍ഹെയ്‌റോ, ടെസി ഡാല്‍ട്ടന്‍, ഫൈസല്‍ റഹ്‌മാന്‍, കെ.ആര്‍. ഷീല എന്നിവര്‍ പത്രസമ്മേളനത്തില്‍ പങ്കെടുത്തു. 70 ലക്ഷത്തിന്‍റെ നിക്ഷേപതട്ടിപ്പ്: ആതിരക്കെതിരെ പുതിയ കേസ് വൈപ്പിൻ: 70.7 ലക്ഷം രൂപയുടെ നിക്ഷേപ തട്ടിപ്പിൽ ആതിര ജ്വല്ലറി ഉടമയായ പള്ളിപ്പുറം രണ്ടു തൈക്കൽ ആന്‍റണിക്കെതിരെ പുതിയ ഒരു കേസുകൂടി മുനമ്പം പോലീസ് രജിസ്റ്റർ ചെയ്തു. പള്ളിപ്പുറം സ്വദേശിയായ ഗിൽബർട്ട് ആന്‍റണിയുടെ പരാതിയിലാണ് കേസ്. 2019 ഫെബ്രുവരി മുതൽ 2025 ജനുവരി വരെ പലപ്പോഴായി നിക്ഷേപമായി സ്വീകരിച്ചതാണ് 70.7 ലക്ഷം രൂപ. ഉറപ്പിനായി പ്രോമിസറി നോട്ടുകൾ നൽകിയിരുന്നുവത്രേ. കാലാവധി കഴിഞ്ഞിട്ടും നിക്ഷേപം തിരികെ നൽകാതെ വന്നതിനെ തുടർന്നാണ് നിക്ഷേപകൻ മുനമ്പം പോലീസിൽ പരാതി നൽകിയത്. സമാനമായ പരാതികളിൽ പറവൂരും കൊച്ചി സിറ്റിയിലുമായി ഇയാൾക്കെതിരെ കേസ് ഉണ്ടെന്ന് മുനസം പോലീസ് അറിയിച്ചു.

പോക്സോ കേസിൽ യുവാവിന് മൂന്നുവർഷം കഠിനതടവ്

പറവൂർ: 17 കാരിയുടെ നഗ്നചിത്രം വാങ്ങി മൊബൈൽ ഫോണിൽ സൂക്ഷിച്ച കേസിലെ പ്രതി വടക്കാഞ്ചേരി ഓട്ടുപാറ കല്ലോട്ടുകുഴി ചാൾസ് ബേബി(25)യെ മൂന്നുവർഷം കഠിന തടവിന് പറവൂർ അതിവേഗ സ്പെഷൽ കോടതി ജഡ്ജി ടി.കെ. സുരേഷ് ശിക്ഷിച്ചു. 55000 രൂപ പിഴയുമടക്കണം. തുക ഇരയ്ക്കു കൈമാറുവാനും നിർദേശിച്ചു. 2021 നവംബറിലാണ് പ്രതി ഇൻസ്റ്റാഗ്രാം വഴി പെൺകുട്ടിയെ പരിചയപ്പെടുന്നത്. സ്നേഹം നടിച്ച് പലപ്പോഴായി നഗ്ന ചിത്രങ്ങൾ മൊബൈൽ ഫോണിൽ അയച്ചുവാങ്ങി സൂക്ഷിച്ചുവെന്നതാണ് കേസിനാസ്പദമായ സംഭവം. പുത്തൻവേലിക്കര സിഐയായിരുന്ന വി. ജയകുമാറാണ് കുറ്റപത്രം സമർപ്പിച്ചത്. കേസിൽ പ്രോസിക്യൂഷന്‍റെ ഭാഗത്തുനിന്നും കേസിൽ 18 സാക്ഷികളെ വിസ്തരിക്കുകയും, 41 രേഖകളും രണ്ട് തൊണ്ടിമുതലുകളും തെളിവായി കോടതി മുമ്പാകെ ഹാജരാക്കുകയും ചെയ്തിരുന്നു. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ പ്രവിത ഗിരീഷ്കുമാർ ഹാജരായി.

ലഹരി വസ്തുക്കളുമായി യുവാക്കള്‍ പിടിയില്‍

കൊച്ചി: വില്പനക്കായി സൂക്ഷിച്ചിരുന്ന ലഹരി വസ്തുക്കളുമായി യുവാക്കള്‍ അറസ്റ്റില്‍. വയനാട് സുത്താന്‍ബത്തേരി സ്വദേശി കെ.വി. ജിതിന്‍(23), കാക്കനാട് തുതിയൂര്‍ സ്വദേശി അഷിന്‍ ഷിബു(22) എന്നിവരെയാണ് കൊച്ചി സിറ്റി ഡാന്‍സാഫും, തൃക്കാക്കര പോലീസും ചേർന്ന് പിടികൂടിയത്. രഹസ്യവിവരത്തെത്തുടര്‍ന്ന് തൃക്കാക്കര ഓര്‍ക്കിഡ് അവന്യൂ റോഡില്‍ ജിതിന്‍ താമസിച്ചിരുന്ന വീട്ടില്‍ നടത്തിയ പരിശോധനയിലാണ് വില്‍പ്പനക്കായി സൂക്ഷിച്ചിരുന്ന 4.33 ഗ്രാം എംഡിഎംഎയും, 5.048 കിലോ കഞ്ചാവും പിടികൂടിയത്. മയക്കുമരുന്നിന്‍റെ ഉറവിടം സംബന്ധിച്ചു കൂടുതല്‍ അന്വേഷണം നടത്തിവരികയാണ്.

പ്രതികൂല കാലാവസ്ഥ: കോസ്റ്റ് ഗാര്‍ഡിന്‍റെ ഹെലികോപ്റ്റര്‍ ചേലാട് ഇറക്കി

കോതമംഗലം: ശക്തമായ കാറ്റും കനത്ത മഴയെയും തുടര്‍ന്ന് കോസ്റ്റ് ഗാര്‍ഡിന്‍റെ ഹെലികോപ്റ്റര്‍ ചേലാട് സെന്‍റ് ഗ്രിഗോറിയോസ് ദന്തല്‍ കോളജ് ഗ്രൗണ്ടില്‍ മുന്‍കരുതല്‍ ലാന്‍ഡിംഗ് നടത്തി. ഇന്നലെ ഉച്ചയ്ക്ക് 12.40നാണ് ഹെലികോപ്റ്റർ ഇറക്കിയത്. തീരദേശ പട്രോളിംഗ് നടത്തുകയായിരുന്ന കോസ്റ്റ് ഗാര്‍ഡ് (ചേതക്) ഹെലികോപ്റ്റര്‍ തിരികെ മടങ്ങുമ്പോഴാണ് പ്രതികൂല കാലാവസ്ഥ നേരിട്ടത്. ഇതോടെ കോതമംഗലം ചേലാട് സെന്‍റ് ഗ്രിഗോറിയസ് ദന്തല്‍ കോളജിലെ ഫുട്‌ബോള്‍ മൈതാനത്ത് ഹെലികോപ്റ്റര്‍ ഇറക്കുകയായിരുന്നു. അപ്രതീക്ഷിതമായി ഹെലികോപ്റ്റര്‍ താന്ന് പറന്നതും പറന്നിറങ്ങിയതും പ്രദേശവാസികളിലും കോളജില്‍ ഉണ്ടായിരുന്നവരിലും ആശങ്ക ഉണര്‍ത്തിയെങ്കിലും പിന്നീടാണ് കാര്യം വ്യക്തമായത്. കാലാവസ്ഥ അനുകൂലമായതോടെ ഹെലികോപ്റ്റര്‍ വീണ്ടും 1.40ഓടെ പറന്നുയര്‍ന്ന് നെടുമ്പാശേരിയിലെ സിജി എയര്‍ എന്‍ക്ലേവില്‍ സുരക്ഷിതമായി ലാന്‍ഡ് ചെയ്തു. ഇത് മുന്‍കരുതല്‍ ലാന്‍ഡിംഗ് മാത്രം ആണെന്നും അടിയന്തര ലാന്‍ഡിംഗ് അല്ലെന്നും അധിക്യതര്‍ വ്യക്തമാക്കി.

വൈറലെല്ലാം റിയലല്ല! ഷെയര്‍ ചെയ്താൽ പണികിട്ടും!

കൊച്ചി: കൗതുകമുണര്‍ത്തുന്നതും സമൂഹ മാധ്യമങ്ങളില്‍ പൊട്ടിച്ചിരി പടര്‍ത്തുന്നതുമായ, മലയാളികളുടെ രൂപസാദൃശ്യവും പച്ച മലയാളം സംസാരിക്കുന്നതുമായ എഐ വീഡിയോകള്‍ ഷെയര്‍ ചെയ്യാന്‍ വരട്ടെ, നിയമം ലഘിക്കുന്ന ഉള്ളടക്കങ്ങൾ ഉള്ളവയാണെങ്കില്‍ നിങ്ങള്‍ക്കും പണികിട്ടും. ഗൂഗിളിന്‍റെ വിഇഒ3 എന്ന എഐ ടൂളാണ് പ്രധാനമായും ഈ വീഡിയോകള്‍ക്ക് പിന്നില്‍. ടെക്സ്റ്റ്, ശബ്ദം, ചലനങ്ങള്‍ ഒന്നിച്ച് പ്രയോജനപ്പെടുത്തി 10 സെക്കന്‍ഡ് ദൈര്‍ഘ്യമുള്ള ക്ലിപ്പുകള്‍ നിര്‍മിക്കാന്‍ കഴിയുന്ന ടൂളാണിത്. അശ്ലീല പദങ്ങള്‍ ഉപയോഗിച്ചുള്ള പല വീഡിയോകളും, തെറ്റായ ദൃശ്യമാധ്യമ വാര്‍ത്തകളും നിലവില്‍ പ്രചരിക്കുന്നവയുടെ കൂട്ടത്തിലുണ്ട്. ഇത്തരം വീഡിയോകള്‍ കണ്ണുംപൂട്ടി ഷെയര്‍ ചെയ്യുന്നവരോടാണ് സൈബര്‍ വിദഗ്ധരുടെ മുന്നറിയിപ്പ്. വ്യക്തിഹത്യ, മതസ്പര്‍ദ്ധ, കലാപാഹ്വാനം തുടങ്ങിയവയുടെ പരിധിയില്‍ വരുന്ന ഇത്തരം വീഡിയോകള്‍ക്കെതിരെ കേസെടുക്കാന്‍ നിയമമുണ്ട്. വീഡിയോ നിര്‍മിച്ചവര്‍ക്ക് പുറമെ ഇത് പ്രചരിപ്പിച്ചവര്‍ക്കെതിരെയും കേസെടുക്കാം. മഴയുടെ പശ്ചാത്തലത്തില്‍ നിരവധി വീഡിയോകളാണ് കഴിഞ്ഞയിടെ സമൂഹമാധ്യമങ്ങളില്‍ പ്രചരിച്ചത്. ദൃശ്യമാധ്യമങ്ങളുടെ പശ്ചാത്തലത്തില്‍ പ്രചരിക്കുന്ന വ്യാജ വാര്‍ത്തകളാണ് കൂട്ടത്തില്‍ ഏറ്റവുമധികം പ്രശ്‌നങ്ങള്‍ സൃഷ്ടിക്കുന്നത്. ഷെയര്‍ ചെയ്യുന്നവരില്‍ ഭൂരിഭാഗം പേരും മുതിർന്നവരാണ്. നിലവില്‍ പ്രചരിക്കുന്ന വീഡിയോകളില്‍ ഭൂരിഭാഗവും വ്യാജ ഐഡികളില്‍ നിന്ന് പ്രചരിക്കുന്നവയുമാണ്. ഇതിനുപിന്നിലെ നിയമവശങ്ങള്‍ കുട്ടികളിലും മുതിര്‍ന്നവരിലും ഒരുപോലെ ബോധവത്കരണം നടത്തേണ്ടതാണെന്ന് സൈബര്‍ വിദഗ്ധര്‍ ചൂണ്ടിക്കാട്ടുന്നു.

ഉള്‍നാടന്‍ ജലാശയങ്ങളില്‍ ഊത്ത പിടിത്തത്തിന് നിരോധനം

കൊച്ചി: ഉള്‍നാടന്‍ ജലാശയങ്ങളില്‍ ജൂലൈ വരെ അനധികൃതമായി മത്സ്യങ്ങള്‍ പിടികൂടുന്നതിന് നിരോധനമേർപ്പെടുത്തി. മത്സ്യവംശനാശത്തിനും ജലജീവ വൈവിധ്യത്തിന്‍റെ ശോഷണത്തിനും വഴിയൊരുക്കുന്ന സാഹചര്യത്തിലാണ് നിരോധനം. നിയമലംഘനം നടത്തുന്നവര്‍ക്കെതിരെ ആറു മാസം വരെ തടവും 10,000 രൂപ വരെ പിഴയും ചുമത്തും. അടക്കം കൊല്ലി വല, 20 മില്ലിമീറ്ററില്‍ കുറഞ്ഞ കണ്ണിവലിപ്പമുള്ള വല, വൈദ്യുതി, തോട്ട എന്നീ രീതികള്‍ ഉപയോഗിച്ച് കൊണ്ടുള്ള മത്സ്യബന്ധനവും നിരോധിച്ചിട്ടുണ്ട്. ഇത്തരം അനധികൃത മത്സ്യബന്ധനം ശ്രദ്ധയില്‍പ്പെട്ടാല്‍ ജില്ലാ ഫിഷറീസ് ഡെപ്യൂട്ടി ഡയറക്ടറുടെ ഓഫീസിലോ അടുത്തുള്ള മത്സ്യഭവനുകളിലോ അറിയിക്കേണ്ടതാണെന്ന് ജില്ലാ ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു.

അനധികൃത മത്സ്യബന്ധനം: എട്ട് ഫൈബര്‍ ബോട്ടുകള്‍ കസ്റ്റഡിയിലെടുത്തു

കൊച്ചി: ട്രോളിംഗ് നിരോധന കാലയളവില്‍ നിയമവിരുദ്ധ മത്സ്യബന്ധനം നടത്തിയ എട്ട് ഫൈബര്‍ ബോട്ടുകള്‍ ഫിഷറീസ് വകുപ്പ് ഉദ്യോഗസ്ഥര്‍ ഇന്നലെ കസ്റ്റഡിയിലെടുത്തു. കിളി മീന്‍, അരണ മീന്‍ എന്നിവ ഉള്‍പ്പെടെയുള്ള സമുദ്ര മത്സ്യങ്ങള്‍ പിടികൂടിയ ബോട്ടുകളാണ് പിടിച്ചെടുത്തത്. ട്രോളിംഗ് നിരോധനകാലത്തെ വേട്ട മത്സ്യസമ്പത്ത് ക്ഷയിക്കാനും, വ്യവസായ വരുമാനത്തിലും വിദേശനാണ്യ വരുമാനത്തിലും ഗുരുതരമായ നഷ്ടത്തിനും ഇടയാക്കുമെന്ന് അധികൃതര്‍ പറഞ്ഞു. കേരള ട്രോളിംഗ് നിരോധന ചട്ടങ്ങള്‍ക്കും കേരള മറൈന്‍ ഫിഷറീസ് റെഗുലേഷന്‍ ആക്ടിനും കീഴിലാണ് നടപടി. ട്രോളിംഗ് നിരോധന കാലയളവില്‍ ആഴക്കടൽ മത്സ്യബന്ധനം സംസ്ഥാനത്ത് കര്‍ശനമായി നിരോധിച്ചിട്ടുണ്ട്. ട്രോളിംഗ് നിരോധന കാലയളവില്‍ നിയമലംഘനങ്ങള്‍ തടയുന്നതിനായി കര്‍ശന നടപടികളും നിരീക്ഷണവും തുടരുമെന്നും ഫിഷറീസ് വകുപ്പ് അറിയിച്ചു.

മെട്രോപ്പൊളിറ്റന്‍ ആസൂത്രണ സമിതി തെരഞ്ഞെടുപ്പ്: കോര്‍പറേഷനില്‍ എല്‍ഡിഎഫ് വോട്ട് കോണ്‍ഗ്രസ് സ്ഥാനാര്‍ഥിക്ക്

കൊച്ചി: മെട്രോപ്പൊളിറ്റന്‍ ആസൂത്രണ സമിതിയിലേക്ക് കൊച്ചി കോര്‍പറേഷനില്‍ നിന്നുള്ള പ്രതിനിധികളെ കണ്ടെത്താന്‍ നടന്ന തെരഞ്ഞെടുപ്പില്‍ എല്‍ഡിഎഫ് വോട്ട് കോണ്‍ഗ്രസ് സ്ഥാനാര്‍ഥിക്ക്. വനിതാ സംവരണത്തില്‍ നടന്ന മത്സരത്തില്‍ യുഡിഎഫ് സ്ഥാനാര്‍ഥിയായി മത്സരിച്ച കെപിസിസി ജനറല്‍ സെക്രട്ടറി ദീപ്തി മേരി വര്‍ഗീസിനാണ് എല്‍ഡിഎഫില്‍ നിന്ന് വോട്ട് ചോര്‍ന്ന് കിട്ടിയതെന്ന് കോണ്‍ഗ്രസ് അവകാശപ്പെട്ടു. 74 അംഗ കൗണ്‍സിലില്‍ എല്‍ഡിഎഫിന് 38 ഉം യുഡിഎഫിന് 31 ഉം അംഗങ്ങളാണുള്ളത്. മുഴുവന്‍ വോട്ടുകളും ലഭിച്ചാല്‍ എല്‍ഡിഎഫ് സ്ഥാനാര്‍ഥിക്ക് 38 വോട്ട് കിട്ടണം. എന്നാല്‍ വനിതാ സംവരണത്തില്‍ മത്സരിച്ച എല്‍ഡിഎഫ് സ്ഥാനാര്‍ഥി ദീപ വര്‍മയ്ക്ക് ലഭിച്ചത് 34 വോട്ട് മാത്രമാണ്. ദീപ്തി മേരി വര്‍ഗീസിനാകട്ടെ 33 വോട്ടും ലഭിച്ചു. എല്‍ഡിഎഫിന് നഷ്ടമായ നാലില്‍ രണ്ട് വോട്ടാണ് ദീപ്തിക്ക് അധികമായി ലഭിച്ചതെന്നാണ് കോണ്‍ഗ്രസിന്‍റെ അവകാശവാദം. ശേഷിച്ച രണ്ടില്‍ ഒന്ന് അസാധുവാകുകയും ഒരെണ്ണം രേഖപ്പെടുത്താതെ പോകുകയുമായിരുന്നു. യോഗത്തില്‍ എത്താതിരുന്ന എല്‍ഡിഎഫ് അംഗം ടി.കെ. അഷറഫിന്‍റെ വോട്ടാണ് രേഖപ്പെടുത്താതെ പോയത്. ജനറല്‍ കാറ്റഗറിയില്‍ നടന്ന തെരഞ്ഞെടുപ്പില്‍ എല്‍ഡിഎഫ് സ്ഥാനാര്‍ഥി ബെന്നി ഫെര്‍ണാണ്ടസിന് 36 വോട്ടും യുഡിഎഫ് സ്ഥാനാര്‍ഥി എം.ജി. അരിസ്റ്റോട്ടിലിന് 31 വോട്ടും ലഭിച്ചു. അസാധുവായ ഒരു വോട്ടും രേഖപ്പെടുത്താതെ പോയ ഒരു വോട്ടും മാത്രമാണ് ബെന്നി ഫെര്‍ണാണ്ടസിന് നഷ്ടമായത്. അരിസ്റ്റോട്ടിലിനാകട്ടെ യുഡിഎഫിന്‍റെ മുഴുവന്‍ വോട്ടും ലഭിച്ചു. അഞ്ച് അംഗബലമുള്ള ബിജെപിയില്‍ ജനറല്‍ കാറ്റഗറിയില്‍ മത്സരിച്ച രഘുറാം പൈക്കും വനിതാ സംവരണത്തില്‍ മത്സരിച്ച പത്മകുമാരിക്കും നാല് വീതം വോട്ടുകള്‍ ലഭിച്ചു. ബിജെപി അംഗമായ പത്മജ എസ്. മേനോന്‍ യോഗത്തില്‍ പങ്കെടുത്തിരുന്നില്ല. അതാണ് ബിജെപി സ്ഥാനാര്‍ഥികളുടെ വോട്ടില്‍ കുറവ് വന്നത്. ആസൂത്രണ സമിതിയില്‍ കോര്‍പറേഷനില്‍ നിന്ന് നാലുപേരെ മാത്രമേ ഉള്‍പ്പെടുത്താന്‍ കഴിയുകയുള്ളൂ എന്നതിനാല്‍ കുറവ് വോട്ട് ലഭിച്ച ബിജെപി സ്ഥാനാര്‍ഥികള്‍ക്ക് അവസരം ലഭിക്കില്ല.

എസ്ഐയെ വാഹനമിടിച്ച് കൊല്ലാൻ ശ്രമിച്ച കേസ്: തെളിവെടുപ്പ് നടത്തി

മൂവാറ്റുപുഴ: പരിശോധനയ്ക്കിടെ എസ്ഐയെ വാഹനമിടിച്ച് കൊലപ്പെടുത്താൻ ശ്രമിച്ച കേസിൽ കല്ലൂർക്കാട് പോലീസിന്‍റെ കസ്റ്റഡിയിൽവിട്ട ഒന്നാം പ്രതിയെ സംഭവ സ്ഥലത്തെത്തിച്ച് തെളിവെടുപ്പ് നടത്തി. ആനിക്കാട് കന്പനിപ്പടിയിൽ വാടകയ്ക്ക് താമസിക്കുന്ന വാഴത്തോപ്പ് മണിയാറംകുടി മുഹമ്മദ് ഷെരീഫ് ഷംസുദിനെ (25)യാണ് പോലീസ് കസ്റ്റഡിയിൽ വാങ്ങിയശേഷം സംഭവ സ്ഥലമായ വഴിയാഞ്ചിറയിൽ എത്തിച്ച് തെളിവെടുപ്പ് നടത്തിയത്. മൂവാറ്റുപുഴ ജുഡീഷൽ ഫസ്റ്റ് ക്ലാസ് മജിസ്ട്രേറ്റ് കോടതി അഞ്ചു ദിവസത്തേക്കാണ് പോലീസ് കസ്റ്റഡിയിൽ വിട്ടിരിക്കുന്നത്. പരിശോധനയ്ക്കെത്തിയ എസ്ഐ തന്നെ, തന്‍റെ കാറിന്‍റെ സ്റ്റിയറിംഗിൽ പിടിച്ച് തിരിച്ചപ്പോൾ കാലിലൂടെ കയറുകയായിരുന്നുവെന്നാണ് പ്രതി തെളിവെടുപ്പിനിടെ പോലീസിന് മൊഴി നൽകിയിരിക്കുന്നത്. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം മുഹമ്മദിനെ കഴിഞ്ഞ ശനിയാഴ്ച വൈകുന്നേരം വഴിയാഞ്ചിറ ഭാഗത്ത് വാഹന പരിശോധനയ്ക്കിടെ കാർ കയറ്റി കൊലപ്പെടുത്താൻ ശ്രമിച്ചെന്നാണ് കേസ്. കാലിന് പരിക്കേറ്റ എസ്ഐ ഇ.എം മുഹമ്മദ് ചികിത്സയിലാണ്. ബുധനാഴ്ച കോടതിയിൽ കീഴടങ്ങിയ പ്രതിയെ മൂവാറ്റുപുഴ ജുഡീഷൽ ഫസ്റ്റ് ക്ലാസ് മജിസ്ട്രേറ്റ് കോടതി 14 ദിവസത്തേക്ക് റിമാൻഡ് ചെയ്തിരിക്കുകയാണ്.

ഗതാഗത നിയന്ത്രണം : വാഹനങ്ങള്‍ ഓടി തോന്നിയപോലെ

ഓട്ടോമാറ്റിക് സംവിധാനം പരാജയം കൊച്ചി: സ്മാര്‍ട്ട് മിഷന്‍ പദ്ധതിയുടെ ഭാഗമായി ഓട്ടോമാറ്റിക് സംവിധാനത്തിലേക്ക് മാറിയ നഗരത്തിലെ ഗതാഗത നിയന്ത്രണ സംവിധാനം വീണ്ടും പഴയപടിയായി. ഗതാഗത നിയമ ലംഘനങ്ങള്‍ തുടരുമ്പോഴും ഇതിനെതിരെ നടപടി സ്വീകരിക്കാന്‍ ഓട്ടോമാറ്റിക് സംവിധാനത്തിന് കഴിയുന്നില്ലെന്നതാണ് പ്രധാന പോരായ്മ. റെഡ് ലൈറ്റ് ലംഘിക്കുന്നവരെ പിടികൂടുന്ന കാമറകളടക്കം സ്ഥാപിച്ചിട്ടും ഇവയ്ക്ക് പുല്ലുവില നല്‍കിയാണ് വാഹനങ്ങള്‍ ചീറിപ്പായുന്നത്. ടെക്‌നോളജി ബേസ്ഡ് ഇന്‍റഗ്രേറ്റഡ് ട്രാഫിക് മാനേജ്‌മെന്‍റ് സിസ്റ്റം (ഐടിഎംഎസ്) ആണ് പദ്ധതിയുടെ ഭാഗമായി കൊച്ചിയില്‍ ഒരുക്കിയത്. വെഹിക്കിള്‍ ആക്ടുവേറ്റഡ് സിഗ്നലുകള്‍, കാല്‍നടക്കാര്‍ക്കു റോഡ് കുറുകെ കടക്കാന്‍ സ്വയം പ്രവര്‍ത്തിപ്പിക്കാവുന്ന പെലിക്കണ്‍ സിഗ്നല്‍, മൂന്ന് മോഡുകളില്‍ ഏരിയാ ട്രാഫിക് മാനേജ്‌മെന്‍റ്, നിരീക്ഷണ കാമറകള്‍, ചുവപ്പ് ലൈറ്റ് ലംഘനം നടത്തുന്ന വാഹനങ്ങളെ തിരിച്ചറിയാനുള്ള സംവിധാനം തുടങ്ങിയവയാണ് പദ്ധതിയുടെ ഭാഗമായി സജ്ജമാക്കിയിരുന്നത്. എന്നാല്‍ ഇവയില്‍ ഒന്നുംതന്നെ ഇന്ന് പ്രവര്‍ത്തിക്കുന്നില്ല. നഗരത്തിലെ തിരക്കനുസരിച്ചു സ്വയം പ്രവര്‍ത്തിക്കുന്ന വെഹിക്കിള്‍ ആക്ടുവേറ്റഡ് സിഗ്നലുകളാണ് പദ്ധതിയുടെ പ്രധാന ആകര്‍ഷണമായി ഉയര്‍ത്തിക്കാട്ടിയിരുന്നത്. വാഹനങ്ങള്‍ ഉള്ള ട്രാക്കിനും ഇല്ലാത്ത ട്രാക്കിനും വ്യത്യസ്ത പരിഗണന നല്‍കുന്നതായിരുന്നു ഇതിന്‍റെ പ്രത്യേകത. റഡാര്‍ സംവിധാനം ഉപയോഗിച്ച് വാഹനത്തിരക്ക് അനുസരിച്ച് ഓട്ടോമാറ്റിക്കായി സിഗ്നല്‍ സമയം ക്രമീകരിക്കുന്ന ഈ സംവിധാനം നിലവില്‍ പരാജയമാണ്. മഴയെത്തുടര്‍ന്ന് ഗതാഗതക്കുരുക്ക് രൂക്ഷമായ തിരക്കേറിയ ജംഗ്ഷനുകളില്‍ വാഹനങ്ങളുടെ തിരക്കനുസരിച്ച് കടത്തിവിടാന്‍ ഈ സംവിധാനങ്ങള്‍ക്കാകുന്നില്ല. റെഡ് ലൈറ്റ് ലംഘിക്കുന്നവരെ പിടികൂടാനുള്ള നവീന കാമറകളും കണ്ണടച്ച അവസ്ഥയിലാണ്. കാല്‍നടയാത്രക്കാര്‍ക്ക് റോഡ് കുറുകെ കടക്കാന്‍ സ്ഥാപിച്ച പെലിക്കണ്‍ സിഗ്നലുകളുകള്‍ മാത്രമാണ് ഒരുപരിധിവരെ പ്രവര്‍ത്തിക്കുന്നത്. പ്രത്യേകം സംവിധാനം ചെയ്ത സ്വിച്ചിലൂടെ കാല്‍നട യാത്രക്കാര്‍ക്കു തന്നെ ട്രാഫിക് നിയന്ത്രിക്കാമെന്നതാണ് ഇതിന്‍റെ പ്രത്യേകത.

ദീപിക ബാലസഖ്യം യൂണിറ്റ് പ്രവർത്തനോദ്ഘാടനം

വാഴക്കുളം: കുട്ടികളിൽ നന്മയും മൂല്യവും വളരേണ്ടത് കാലത്തിന്‍റെ ആവശ്യമാണെന്നു കോതമംഗലം രൂപത വികാരി ജനറാൾ മോണ്‍. പയസ് മലേക്കണ്ടത്തിൽ. കലൂർ ഐപ്പ് മെമ്മോറിയൽ ഹൈസ്കൂളിൽ ദീപിക ബാലസഖ്യം യൂണിറ്റ് പ്രവർത്തനോദ്ഘാടന സമ്മേളനത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം. കലൂർ സെന്‍റ് ജോണ്‍സ് പള്ളി വികാരി റവ.ഡോ. തോമസ് ചെറുപറന്പിൽ പ്രവർത്തനോദ്ഘാടനം നിർവഹിച്ചു. പിടിഎ പ്രസിഡന്‍റ് സജി പൗലോസ് അധ്യക്ഷത വഹിച്ചു. എസ്എസ്എൽസി പരീക്ഷയിൽ എ പ്ലസ് നേടിയ വിദ്യാർഥികളെ യോഗത്തിൽ ആദരിച്ചു. കല്ലൂർക്കാട് പഞ്ചായത്ത് സ്ഥിരം സമിതി അധ്യക്ഷ ഡെൽസി ലൂക്കാച്ചൻ, സ്കൂൾ മാനേജർ ഐപ്പ് വർഗീസ് കൊച്ചുകുടി, പ്രധാനാധ്യാപകൻ ജോസഫ് സക്കറിയാസ്, എം.കെ. ബിജു, ആർ. രാജേഷ്, ബിൻസി സജി, ജീന ജോർജ് തുടങ്ങിയവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]