ADVERTISEMENT

ADVERTISEMENT

സ്റ്റുഡന്‍റ്സ് മാർക്കറ്റിനു തുടക്കമായി

അമ്പലപ്പുഴ: കൺസ്യൂമർ ഫെഡ് ആലപ്പുഴ ഗവ. സർവന്‍റ്സ് സഹകരണ ബാങ്കുമായി ചേർന്ന് നടത്തുന്ന സ്റ്റുഡന്‍റ്സ് മാർക്കറ്റിനു തുടക്കമായി. വിദ്യാർഥികൾക്ക് ആവശ്യമായ വിവിധ കമ്പനികളുടെ സ്കൂൾ കോളജ് ബാഗുകൾ, നോട്ടുബുക്കുകൾ, ടിഫിൻ ബോക്സ്, വാട്ടർ ബോട്ടിൽ ഉൾപ്പെടെയുള്ള വിവിധങ്ങളായ ഗുണമേന്മയുള്ള സാധനങ്ങൾ പൊതുവിപണിയിൽനിന്നു ലഭിക്കുന്നതിനേക്കാൾ വില കുറച്ചാണ് ഇവിടെനിന്ന് ലഭ്യമാക്കുക.

കളക്‌ടറേറ്റ് ജംഗ്ഷന് വടക്കുഭാഗത്തെ കണ്ണൻവർക്കി പാലത്തിനു സമീപത്തെ കയർഫെഡിന്‍റെ കയർ ക്രാഫ്റ്റ് ഷോറൂമിലാണ് ജൂൺ 30 വരെ സ്കൂൾ മാർക്കറ്റ് പ്രവർത്തിക്കുക. എച്ച്. സലാം എംഎൽഎ സ്കൂൾ മാർക്കറ്റ് ഉദ്ഘാടനം ചെയ്തു. നഗരസഭാ ചെയർപേഴ്സൺ കെ.കെ. ജയമ്മ ആദ്യവിൽപ്പന നടത്തി. കയർ ക്രാഫ്റ്റ് അങ്കണത്തിൽ ചേർന്ന സമ്മേളനത്തിൽ ആലപ്പുഴ ഗവ. സർവന്‍റ്സ് കോ -ഓപ്പറേറ്റീവ് ബാങ്ക് പ്രസിഡന്‍റ് ജിജോ ജോസഫ്, സഹകരണ ജോയിന്‍റ് രജിസ്റ്റാർ (ജനറൽ) വി.കെ. സുബിന, അസി. രജിസ്ട്രാർ വി.സി. അനിൽകുമാർ, എൻജിഒ യൂണിയൻ ജില്ലാ സെക്രട്ടറി സി. ഡിലീഷ്, കെഎസ്ടിഎ ജില്ലാ സെക്രട്ടറി പി.ഡി. ജോഷി തുടങ്ങിയവർ പ്രസംഗിച്ചു.

ADVERTISEMENT

വേനല്‍മഴ: കൊയ്ത നെല്ല് വെള്ളത്തില്‍

പള്ളിപ്പാട്: കഴിഞ്ഞദിവസം വൈകിട്ട് പെയ്ത കനത്ത മഴയിലും കാറ്റിലും പള്ളിപ്പാട്ട് വിവിധ പാടശേഖരങ്ങളിലെ നെല്ല് മുഴുവന്‍ വെള്ളത്തിലായി. കോയിക്കലേത്ത് കിഴക്ക്, വൈപ്പിന്‍കാട് തെക്ക് പാടശേഖരങ്ങളിലെ കര്‍ഷകർക്കാണ് കൂടുതല്‍ ദുരിതം. കോയിക്കലേത്ത് കിഴക്ക് പാടശേഖരത്തില്‍ കൂലി വര്‍ധന ആവശ്യപ്പെട്ട തൊഴിലാളികളുമായുള്ള തര്‍ക്കം കഴിഞ്ഞ ദിവസം പരിഹരിച്ചു. എന്നാല്‍, കനത്ത മഴയില്‍ ചാക്കില്‍ കെട്ടിവച്ചിരുന്ന നെല്ലുപോലും വെള്ളം കയറി മുങ്ങിയത് കര്‍ഷകര്‍ക്ക് ഇരുട്ടടിയായി. സംഭരണത്തിനു മില്ലുകാര്‍ എത്തിയെങ്കിലും നനഞ്ഞ നെല്ല് എടുക്കാന്‍ അവര്‍ തയാറായില്ല. നെല്ല് വീണ്ടും ഉണക്കി നല്‍കേണ്ട അവസ്ഥയിലാണ്. മില്ലുകാര്‍ ആവശ്യപ്പെട്ട കിഴിവ് നല്‍കാന്‍ സമ്മതിച്ച നെല്ലാണ് തൊഴില്‍ തര്‍ക്കം മൂലം കരയ്ക്കു കയറ്റാന്‍ രണ്ടു ദിവസം വൈകിയത്. കൃഷിയുടെ വിളവു കുറഞ്ഞതുമൂലം നിരാശയിലായിരുന്ന കര്‍ഷകര്‍ക്ക് ഇതുമൂലം നഷ്ടത്തിന്‍റെ ആഴം വര്‍ധിച്ചു. നെല്ല് ഉണക്കി എടുക്കാനുള്ള ചെലവുകൂടി ആകുമ്പോള്‍ കൃഷി വന്‍ സാമ്പത്തിക ബാധ്യതയായി. കഴിഞ്ഞവര്‍ഷം ഒരേക്കറില്‍ 20 മുതല്‍ 25 ക്വിന്‍റല്‍ വരെ നെല്ല് ലഭിച്ച പാടശേഖരങ്ങളില്‍ ഈ വര്‍ഷം എട്ടുമുതല്‍ 12 ക്വിന്‍റല്‍ വരെയാണ് ശരാശരി വിളവ്. ഇതു ചെലവിനു പോലും തികയാത്ത അവസ്ഥയും. സര്‍ക്കാര്‍ നിശ്ചയിച്ചതിലും കൂടുതല്‍ ചുമട്ടുകൂലി കൊടുക്കാന്‍ കര്‍ഷകര്‍ നിര്‍ബന്ധിതരായി. പാടശേഖരത്തില്‍ കിടക്കുന്ന നെല്ല് കരയ്ക്കു കയറ്റാനുള്ള തത്രപ്പാടിലാണ് കര്‍ഷകര്‍. വൈപ്പിന്‍കാട് തെക്ക് പാടശേഖരത്തില്‍ കിടക്കുന്ന നെല്ല് ഇനിയും പൂര്‍ണമായി കരയ്ക്ക് എത്തിക്കാന്‍ കഴിഞ്ഞിട്ടില്ല. നഷ്ടം കുറയ്ക്കാന്‍ നെല്ല് വില വര്‍ധിപ്പിക്കുകയും മില്ലുകാര്‍ക്ക് നല്‍കുന്ന നെല്ലിന്‍റെ വില താമസിക്കാതെ ലഭിക്കാന്‍ നടപടി സ്വീകരിക്കുകയും വേണമെന്നാണ് കര്‍ഷകരുടെ ആവശ്യം.

അവശതകള്‍ ശരീരത്തെ കീഴ്‌പ്പെടുത്താന്‍ നോക്കി, പക്ഷേ, അഭയന്‍റെ യാത്ര തുടരും

പൂച്ചാക്കല്‍: അവശതകള്‍ ശരീരത്തെ കീഴ്‌പ്പെടുത്താന്‍ പലവട്ടം ശ്രമിച്ചിട്ടും പിടികൊടുക്കാതെ അറുപതാമത്തെ വയസിലും അഭയന്‍ എന്ന ചുമട്ടുതൊഴിലാളി ഇന്നും ഉന്‍മേഷവാനാണ്. പുലര്‍ച്ചെ അഞ്ചിന് ഉണര്‍ന്ന് കുളികഴിഞ്ഞ് വീട്ടിലുള്ള കൃഷ്ണ വിഗ്രഹത്തില്‍ മാലചാര്‍ത്തി കീര്‍ത്തനവും ചൊല്ലിക്കഴിഞ്ഞാല്‍ പിന്നെ പൂച്ചാക്കലിലാ ണ് തൈക്കാട്ടുശേരി പഞ്ചായത്ത് നാലാം വാര്‍ഡില്‍ ദേവീസദനത്തില്‍ കെ. അഭയന്‍റെ ലോകം. 35 വര്‍ഷമായിട്ട് പൂച്ചാക്കല്‍ ടൗണില്‍ തലച്ചുമട് തൊഴിലാളിയാണ് അഭയന്‍. രണ്ടുവര്‍ഷം മുമ്പ് ലോറിയില്‍നിന്നു പഞ്ചസാര ഇറക്കുമ്പോള്‍ കാലില്‍ പഞ്ചസാര ചാക്ക് വീണ് കാലിന് ഗുരുതരമായി പരിക്കു പറ്റിയിരുന്നു. ഒരുവര്‍ഷത്തോളം ജോലിക്കൊന്നും പോകാന്‍ പറ്റാത്ത അവസ്ഥയായിരുന്നു. എന്നിരുന്നാലും വിശ്രമിക്കാന്‍ അഭയന് സമയം ഉണ്ടായിരുന്നില്ല. കുടുംബം മുന്നോട്ടുപോകണമെങ്കില്‍ അഭയന്‍ പണിക്കുപോയെ പറ്റു. ചെറുപ്പത്തിലെ കാലുകള്‍ക്കു പോളിയോ ബാധിച്ച ഭാര്യ ജൈലജയുടെയും തിരുവനന്തപുരം ശ്രീ ഉത്രാടം തിരുനാള്‍ ആശുപത്രിയില്‍ ജനറല്‍ മെഡിസിനു പഠിക്കുന്ന മകള്‍ ഭാഗ്യശ്രീയുടെയും പ്രതീക്ഷകള്‍ അച്ഛന്‍ അഭയന്‍ മാത്രമാണ്. അപകടത്തെത്തുടര്‍ന്നു കാലുകള്‍ക്ക് ചെറിയ സ്വാധീനക്കുറവ് ഉണ്ടെങ്കിലും ചുമട് എടുക്കുന്ന കാര്യത്തില്‍ അഭയന്‍ മുന്‍പന്തിയിലുണ്ട്. ഭാര്യ ജൈലജ ലോട്ടറി വിറ്റുകിട്ടുന്ന ചെറിയ വരുമാനവും അഭയന് ആശ്വാസമാണ്. ഐക്യമില്ലാതെ തൊഴിലാളികള്‍ പരസ്പരം വഴക്കിട്ടും ഭിന്നിച്ചും നിന്നിരുന്ന കാലത്ത് തൊഴിലാളികളെ സംഘടിപ്പിച്ചതും ഈ തൊഴിലാളിയാണ്.

അരയ്ക്കു താഴേക്കു തളർന്ന യുവാവ് വേമ്പനാട്ടുകായൽ നീന്തി കീഴടക്കി

വൈക്കം: രണ്ടര വയസിൽ പോളിയോ ബാധിച്ച് അരയ്ക്ക് താഴേക്കു തളർന്ന നാല്പതുകാരൻ വേമ്പനാട്ടുകായൽ നീന്തി കീഴടക്കി. ആലുവ മേത്തശേരി പുഷ്കരൻ-ലളിത ദമ്പതികളുടെ മകൻ രതീഷാണ് ആലപ്പുഴ ചേർത്തല വടക്കുംകര അമ്പലക്കടവിൽ നിന്നും കോട്ടയം വൈക്കം ബീച്ചിലേക്ക് ഏഴു കിലോമീറ്റർ നീന്തി ചരിത്രം കുറിച്ചത്. ഞായറാഴ്ച രാവിലെ 7.31ന് അർജുന അവാർഡ് ജേതാവ് ക്യാപ്റ്റൻ സജി തോമസ് ഫ്ലാഗ് ഓഫ് ചെയ്ത നീന്തൽ 9.31 നാണ് അവസാനിച്ചത്. വൈക്കം കായലോര ബീച്ചിലേക്ക് നീന്തിക്കയറിയ രതീഷിനെ വൈക്കം നഗരസഭാ ചെയർപേഴ്സൺ പ്രീത രാജേഷ്, വൈസ് ചെയർമാൻ പി.ടി. സുഭാഷ്, വാർഡ് കൗൺസിലർ ബിന്ദു ഷാജി എന്നിവർ ചേർന്ന് സ്വീകരിച്ചു. ശാരീരിക പരിമിതികളെ മനക്കരുത്തുകൊണ്ട് പരാജയപ്പെടുത്തിയ രതീഷിനെ പരിശീലകൻ സജി വാളശേരി, മാതാവ് ലളിത, മകൻ ഇഷാൻ, രതീഷിന്‍റെ സുഹൃത്തുക്കൾ തുടങ്ങിയവർ അഭിനന്ദിച്ചു. വൈക്കം നഗരസഭാ അധികൃതർ, ഫയർ ഫോഴ്സ് ഉദ്യോഗസ്ഥർ, രതീഷിന്‍റെ സുഹൃത്തുക്കൾ, വാളശേരി റിവർ സ്വിമ്മിംഗ് ക്ലബ് അംഗങ്ങൾ എന്നിവർ ഉപഹാരങ്ങൾ നൽകി അനുമോദിച്ചു. നീന്തൽ പരിശീലകൻ സജി വാളശേരിയെ നഗരസഭ വൈസ്ചെയർമാൻ പി.ടി. സുഭാഷ് പൊന്നാട അണിയിച്ചു. നീന്തുന്നതിന് ശാരീരിക പരിമിതികൾ തടസമായില്ലെന്നും ഏറെ സന്തോഷത്തോടെയാണ് കായൽ നീന്തിയതെന്നും രതീഷ് പറഞ്ഞു. 15000 ലധികം പേരെ സൗജന്യമായി നീന്തൽ അഭ്യസിപ്പിച്ചിട്ടുണ്ടെങ്കിലും രതീഷിന്‍റെ വിജയം തന്നെ ഏറെ സന്തോഷിപ്പിക്കുന്നതായി പരിശീലകൻ സജി വാളാശേരി പറഞ്ഞു.

വഴിത്തർക്കം: യുവാവിനെ മർദിച്ച പ്രതികൾ പിടിയിൽ

ഹരിപ്പാട്: വഴിത്തര്‍ക്കത്തെ ത്തുടര്‍ന്ന് യുവാവിനെ മര്‍ദിച്ച പ്രതികള്‍ പിടിയില്‍. പള്ളിപ്പാട് തെക്കേക്കര കിഴക്ക് ശ്രീകുമാര്‍ (44), വെട്ടിയാര്‍ ഗായത്രി നിവാസില്‍ രാഗേഷ് (39) എന്നിവരെയാണ് ഹരിപ്പാട് പോലീസ് അറസ്റ്റ് ചെയ്തത്. പള്ളിപ്പാട് കിഴക്കേക്കര മുണ്ടുചിറയില്‍ അനീഷി(39) നാണ് ഏപ്രില്‍ ഒന്നിന് രാത്രി മര്‍ദനമേറ്റത്. പ്രതിയായ രാഗേഷ് അനീഷിനെ ചുറ്റികകൊണ്ട് തലയ്ക്കു അടിക്കുകയും ശ്രീകുമാര്‍ ദേഹോപദ്രവം എല്പിക്കുകയും ചെയ്തു. തലയ്ക്കു ഗുരുതരമായി പരിക്കേറ്റ അനീഷിനെ ഹരിപ്പാട് താലൂക്ക് ആശുപത്രിയിലും തുടര്‍ന്ന് വണ്ടാനം മെഡിക്കല്‍ കോളജിലും പ്രവേശിപ്പിച്ചു. ആക്രമണത്തിനുശേഷം ഒളിവിലായിരുന്നു പ്രതികളെ ഇന്നലെ ഉച്ചയോടെ പള്ളിപ്പാടുനിന്നാണ് പോലീസ് പിടികൂടിയത്. ഹരിപ്പാട് എസ്എച്ച്ഒ മുഹമ്മദ് ഷാഫി, എസ്‌ഐഷൈജു, സിപിഓമാരായ അനന്തു, അനില്‍ കുമാര്‍, ഹരികുമാര്‍, നിഷാദ്, സജാദ് എന്നിവര്‍ ചേര്‍ന്നാണ് അന്വേഷണം നടത്തി പ്രതികളെ പിടികൂടിയത്.

ഹെല്‍ത്ത് സെന്‍റര്‍ ആരംഭിച്ചു

എടത്വ: എടത്വ മഹാജൂബിലി മെമ്മോറിയല്‍ ഹോസ്പിറ്റലിന്‍റെ നേതൃത്വത്തില്‍ ഹെല്‍ത്ത് സെന്‍റര്‍ പ്രവര്‍ത്തനം ആരംഭിച്ചു. വികാരി ഫാ. ഫിലിപ്പ് വൈക്കത്തുകാരന്‍ ഉദ്ഘാടനം ചെയ്തു. തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍, കൈക്കാരന്മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, വിന്‍സെന്‍റ് പഴയാറ്റില്‍, ആരോഗ്യ കമ്മിറ്റി കണ്‍വീനര്‍ കെ.പി. കുഞ്ഞുമോന്‍, ലിജി വര്‍ഗീസ്, റോബിന്‍ കളങ്ങര, സാം സക്കറിയാസ്, ജോബി കണ്ണമ്പള്ളി, ബാബു പള്ളിത്തറ, സാജു കൊച്ചുപുരയ്ക്കല്‍, ജോബിന്‍ മണലേല്‍, സിബിച്ചന്‍ തെക്കേടം, ഡോ. ബിനോയ് റസല്‍, മഹാജൂബിലി ഹോസ്പിറ്റല്‍ സിസ്റ്റേഴ്‌സ് എന്നിവര്‍ പങ്കെടുത്തു.

സര്‍ക്കാരിന്‍റെ നാലാം വാര്‍ഷികാഘോഷം; ജില്ലയിലെ വാര്‍ഷികാഘോഷം 6 മുതല്‍ 12 വരെ

ആലപ്പുഴ: സര്‍ക്കാരിന്‍റെ നാലാം വാര്‍ഷികാഘോഷങ്ങളുടെ ഭാഗമായുള്ള ജില്ലയിലെ ആഘോഷം 6 മുതല്‍ 12 വരെ ആലപ്പുഴ ബീച്ചില്‍ നടക്കും. പിണറായി വിജയന്‍ പങ്കെടുക്കുന്ന ജില്ലാതല യോഗം ആറിന് രാവിലെ 10.30ന് ആലപ്പുഴ പാതിരപ്പള്ളിയിലെ കാമിലോട്ട് കണ്‍വന്‍ഷന്‍ സെന്‍ററിലും നടക്കും. ജില്ലാതല യോഗത്തില്‍ ക്ഷണിക്കപ്പെട്ട 500 വ്യക്തികള്‍ പങ്കെടുക്കും. സര്‍ക്കാര്‍ സേവനങ്ങളുടെ ഗുണഭോക്താക്കള്‍, ട്രേഡ് യൂണിയന്‍, തൊഴിലാളി പ്രതിനിധികള്‍, യുവജനത, വിദ്യാര്‍ഥികള്‍, സാംസ്‌കാരിക, കായിക രംഗത്തെ പ്രതിഭകള്‍, പ്രൊഫഷണലുകള്‍, വ്യവസായികള്‍, പ്രവാസികള്‍, സാമുദായിക നേതാക്കള്‍ തുടങ്ങിയവര്‍ യോഗത്തില്‍ പങ്കെടുക്കും. ഇവരുമായി മുഖ്യമന്ത്രി സംവദിക്കും. ജില്ലയില്‍ നിന്നുള്ള മന്ത്രിമാരായ പി. പ്രസാദ്, സജി ചെറിയാന്‍, എംപിമാര്‍, എംഎല്‍എമാര്‍ തുടങ്ങിയവരും യോഗത്തില്‍ പങ്കെടുക്കും. പ്രദര്‍ശന വിപണനമേള സര്‍ക്കാര്‍ വാര്‍ഷികാഘോഷങ്ങളുടെ ഭാഗമായി 6 മുതല്‍ 12 വരെ ആലപ്പുഴ ബീച്ചില്‍ സംഘടിപ്പിക്കുന്ന എന്‍റെ കേരളം പ്രദര്‍ശന വിപണനമേളയില്‍ 200 ശീതീകരിച്ച സേവന- വാണിജ്യ സ്റ്റാളുകള്‍, ഭക്ഷ്യമേള, സിനിമ പ്രദര്‍ശനം, തീം സ്റ്റാള്‍ എന്നിവ സജ്ജീകരിച്ചിട്ടുണ്ട്. വിവിധ വകുപ്പുകളുടെ നേതൃത്വത്തില്‍ വ്യത്യസ്ത വിഷയങ്ങളില്‍ സെമിനാറുകള്‍, പ്രമുഖ കലാകാരന്മാരുടെ കലാസന്ധ്യ തുടങ്ങിയവയും അരങ്ങേറും. രാവിലെ 10 മുതല്‍ രാത്രി 9 വരെ നടക്കുന്ന മേളയില്‍ പ്രവേശനം സൗജന്യമാണ്. കൃഷി മന്ത്രി പി. പ്രസാദ് ചെയര്‍മാനും മന്ത്രി സജി ചെറിയാന്‍ കോ-ചെയര്‍മാനും ജില്ലാ കളക്ടര്‍ അലക്‌സ് വര്‍ഗീസ് ജനറല്‍ കണ്‍വീനറുമായ ജില്ലാതല സംഘാടകസമിതിയാണ് പരിപാടിക്കു നേതൃത്വം നല്‍കുന്നത്. ഉദ്ഘാടന സമ്മേളനം ആറിന് ആറിനു വൈകിട്ട് മൂന്നിന് മന്ത്രി പി. പ്രസാദ് എന്‍റെ കേരളം പ്രദര്‍ശന വിപണനമേളയുടെ ഉദ്ഘാടനം നിര്‍വഹിക്കും. മന്ത്രി സജി ചെറിയാന്‍ അധ്യക്ഷനാകും. ജില്ലാ കളക്ടര്‍ അലക്‌സ് വര്‍ഗീസ്, എംപിമാരായ കെ.സി. വേണുഗോപാല്‍, കൊടിക്കുന്നില്‍ സുരേഷ്, എംഎല്‍എമാരായ പി.പി. ചിത്തരഞ്ജന്‍, എച്ച്. സലാം, രമേശ് ചെന്നിത്തല, തോമസ് കെ. തോമസ്, യു. പ്രതിഭ, ദലീമ ജോജോ, എം.എസ്. അരുണ്‍കുമാര്‍, ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി, നഗസഭാ ചെയര്‍പേഴ്‌സണ്‍ കെ.കെ. ജയമ്മ, ജില്ലാ പോലീസ് മേധാവി എം.പി. മോഹനചന്ദ്രന്‍ തുടങ്ങിയവര്‍ പങ്കെടുക്കും. വിളംബരജാഥ അഞ്ചിന് മേളയുടെ പ്രചരണാര്‍ഥം സംഘടിപ്പിക്കുന്ന വിളംബരജാഥ അഞ്ചിന് തിങ്കളാഴ്ച്ച വൈകിട്ട് 4.30ന് കളക്ടറേറ്റില്‍ നിന്നാരംഭിച്ച് ആലപ്പുഴ ബീച്ചില്‍ അവസാനിക്കും. മന്ത്രി സജി ചെറിയാന്‍ ജാഥ ഫ്ളാഗ് ഓഫ് ചെയ്യും. മന്ത്രി പി. പ്രസാദ് പങ്കെടുക്കും. ദിവസവും സെമിനാറുകള്‍, കലാപരിപാടികള്‍ മേയ് ഏഴിന് രാവിലെ 10 മുതല്‍ കൃഷിവകുപ്പിന്‍റെ മാറുന്ന കാലം, മാറേണ്ട കൃഷിരീതി എന്ന വിഷയത്തില്‍ നടക്കുന്ന സെമിനാര്‍ എച്ച്. സലാം എംഎല്‍എ ഉദ്ഘാടനം ചെയ്യും. ഉച്ചയ്ക്കുശേഷം വനിതാ വികസനവകുപ്പിന്‍റെ നേതൃത്വത്തില്‍ സ്ത്രീകളിലെ ആത്മഹത്യ പ്രവണത എന്ന വിഷയത്തില്‍ സംഘടിപ്പിക്കുന്ന സെമിനാര്‍ ദലീമ ജോജോ എംഎല്‍എ ഉദ്ഘാടനം ചെയ്യും. വൈകിട്ട് ഏഴു മുതല്‍ മര്‍സി ബാന്‍ഡ് അവതരിപ്പിക്കുന്ന മ്യൂസിക് ഷോ നടക്കും. എട്ടിന് രാവിലെ പത്തുമുതല്‍ സംഘടിപ്പിക്കുന്ന സെമിനാര്‍ ജില്ലാ കളക്ടര്‍ അലക്‌സ് വര്‍ഗീസ് ഉദ്ഘാടനം ചെയ്യും. വൈകിട്ട് ഏഴുമുതല്‍ പ്രമോദ് വെളിയനാടും സംഘവും അവതരിപ്പിക്കുന്ന കേരള സംഗീത നാടക അക്കാദമി അവാര്‍ഡ് നേടിയ നാടകം മാടന്‍ മോക്ഷം അരങ്ങേറും. ഒമ്പതിന് രാവിലെ 10 മുതല്‍ കരിയര്‍ ഓറിയന്‍റേഷന്‍ പ്രോഗ്രാം തോമസ് കെ. തോമസ് എംഎല്‍എ ഉദ്ഘാടനം ചെയ്യും. ഉച്ചയ്ക്ക് രണ്ടുമുതല്‍ സാമൂഹ്യനീതിവകുപ്പിന്‍റെ നേതൃത്വത്തില്‍ ലഹരിയും കുറ്റകൃത്യങ്ങളും -സാമൂഹ്യപ്രതിരോധ പരിപാടികളില്‍ യുവജന പങ്കാളിത്തം എന്ന വിഷയത്തില്‍ സംഘടിപ്പിക്കുന്ന സെമിനാര്‍ നഗരസഭാ വൈസ് ചെയര്‍പേഴ്‌സണ്‍ പി.എസ്.എം. ഹുസൈന്‍ ഉദ്ഘാടനം ചെയ്യും. വികസന പ്രശ്‌നോത്തരി 10ന് ഉച്ചയ്ക്ക് 12 മുതല്‍ 1.30 വരെ ഡോ. ആര്‍ സേതുനാഥിന്‍റെ നേതൃത്വത്തില്‍ എന്‍റെ കേരളം വികസന പ്രശ്‌നോത്തരി നടക്കും. സര്‍ക്കാരിന്‍റെ വികസനവുമായി ബന്ധപ്പെട്ട പ്രശ്‌നോത്തരിയില്‍ ഹൈസ്‌കൂള്‍ വിദ്യാര്‍ഥികള്‍ക്ക് പങ്കെടുക്കാം. വിജയികള്‍ക്ക് ക്യാഷ് അവാര്‍ഡും പങ്കെടുക്കുന്നവര്‍ക്ക് സര്‍ട്ടിഫിക്കറ്റും ലഭിക്കും. ഭക്ഷ്യമേള മേളയില്‍ എത്തുന്നവര്‍ക്ക് രുചികരമായ ഭക്ഷണം ഒരുക്കാന്‍ 10,000 ചതുരശ്ര അടിയില്‍ കുടുംബശ്രീ അടക്കമുള്ള ഫുഡ് കോര്‍ട്ടുകളും ഒരുക്കിയിട്ടുണ്ട്. ഫുഡ് കോര്‍ട്ടില്‍ ഒരേസമയം 300 പേര്‍ക്ക് ഇരുന്ന് ഭക്ഷണം കഴിക്കാന്‍ കഴിയും. പുറത്തുനിന്നുള്ള പ്രമുഖ ഹോട്ടലുകളും ഭക്ഷ്യമേളയില്‍ പങ്കെടുക്കും. ബീച്ചില്‍ ക്രമീകരണങ്ങള്‍ അവസാനഘട്ടത്തില്‍ 72,000 ചതുരശ്ര അടിയില്‍ അത്യാധുനിക ജര്‍മന്‍ ഹാംഗറിലാണ് പ്രദര്‍ശനമേളയ്ക്കുള്ള പവലിയന്‍ ഒരുക്കുന്നത്. പന്തല്‍ ശീതീകരിച്ചതാണ്. സന്ദര്‍ശകര്‍ക്ക് ആശയക്കുഴപ്പമില്ലാതെ സ്റ്റാളുകള്‍ ചുറ്റിനടന്നു കാണാന്‍ പാകത്തിനാണ് പവലിയനുള്ളിലെ ക്രമീകരണങ്ങള്‍. ഭിന്നശേഷിക്കാരായ സന്ദര്‍ശകര്‍ക്ക് സുഗമമായി സഞ്ചരിക്കുന്നതിന് പ്രത്യേക റാമ്പും ലഭ്യമാക്കിയിട്ടുണ്ട്. എല്ലാ ദിവസവും വൈകിട്ട് നടക്കുന്ന കലാപരിപാടികള്‍ക്കായി 8000 ചതുരശ്ര അടിയിലുള്ള വിശാലമായ സദസും 2048 ചതുരശ്രയടി വിസ്തൃതിയുള്ള സ്റ്റേജും ഒരുക്കിയിട്ടുണ്ട്. പ്രദര്‍ശനമേളക്കെത്തുന്ന കുട്ടികള്‍ക്കായി 5000 ചതുരശ്ര അടിയില്‍ വിശാലമായ കളിസ്ഥലവും ഒരുക്കിയിട്ടുണ്ട്. 200 സ്റ്റാളുകള്‍ക്കു പുറമേ കിഫ്ബി, പിആര്‍ഡി, കൃഷി, ടൂറസം തുടങ്ങിയ വിവിധ വകുപ്പുകളുടെ വകുപ്പുകളുടെ തീം സ്റ്റാളും ഉണ്ട്. രാവിലെ 10 മുതല്‍ രാത്രി 9 വരെയാണ് പ്രദര്‍ശനസമയം. അഗ്നിരക്ഷാസേന, പോലീസ്, ആംബുലന്‍സ്, ആരോഗ്യ പ്രവര്‍ത്തകരുടെ സേവനം, കുടിവെള്ളം, ശുചിമുറി സംവിധാനം എന്നിവയും പ്രദര്‍ശന വേദിയില്‍ ഒരുക്കിയിട്ടുണ്ട്. സിനിമാസ്വാദകര്‍ക്കായി തിയറ്ററും കഴിഞ്ഞ വര്‍ഷങ്ങളില്‍നിന്ന് വ്യത്യസ്തമായി ഇത്തവണ 1500 ചതുരശ്ര അടിയിലുള്ള സിനിമ തിയറ്ററും പ്രദര്‍ശനമേളയിൽ ഒരുക്കുന്നുണ്ട്. കേരള സംസ്ഥാന ചലച്ചിത്ര വികസന കോര്‍പറേഷനും ചലച്ചിത്ര അക്കാദമിയും ചേര്‍ന്നാണ് ചലച്ചിത്ര പ്രദര്‍ശനം നടത്തുന്നത്. കൂടാതെ സര്‍ക്കാരിന്‍റെ വികസനപ്രവര്‍ത്തനങ്ങളുടെ വീഡിയോകളും ഇവിടെ പ്രദര്‍ശിപ്പിക്കും. സമാപനസമ്മേളനം 12ന് മേയ് 12ന് വൈകുന്നേരം ആറിന് നടക്കുന്ന സമാപന സമ്മേളനത്തില്‍ ജില്ലാ കളക്ടര്‍ അലക്‌സ് വര്‍ഗീസ് സ്വാഗതം ആശംസിക്കും. മന്ത്രി സജി ചെറിയാന്‍ ഉദ്ഘാടനം ചെയ്യും. മന്ത്രി പി. പ്രസാദ് അധ്യക്ഷനാകും.

എടത്വ പള്ളിയില്‍ എക്യുമെനിക്കല്‍ സംഗമം

എടത്വ: സെന്‍റ് ജോര്‍ജ് ഫൊറോനാ പള്ളിയിലെ വിശുദ്ധ ഗീവര്‍ഗീസ് സഹദായുടെ തിരുനാളിനോടനുബന്ധിച്ച് എക്യുമെനിക്കല്‍ സംഗമം നടന്നു. വിവിധ ക്രിസ്തീയ സഭകളെ പ്രതിനിധീകരിച്ച് സഭാ മേലധ്യക്ഷന്മാരും വൈദികരും ഇടവക പ്രതിനിധികളും പങ്കെടുത്തു. മാവേലിക്കര ഭദ്രാസനാധ്യക്ഷന്‍ ജോഷ്വാ മാര്‍ ഇഗ്‌നാത്തിയോസ് ഉദ്ഘാടനം ചെയ്തു. മലങ്കര ഓര്‍ത്തഡോക്‌സ് സുറിയാനി സഭ മെത്രാപ്പോലീത്ത മാത്യൂസ് മാര്‍ തേവോദോസിയോസ് അനുഗ്രഹ പ്രഭാഷണം നടത്തി. ഫൊറോന വികാരി ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. സിഎസ്‌ഐ മധ്യകേരള ഇടവക മുന്‍ ബിഷപ് റവ. തോമസ് കെ. ഉമ്മന്‍ പ്രാര്‍ഥനാ ശുശ്രൂഷ നിര്‍വഹിച്ചു. ഫാ. ജോസഫ് കെ. ജോര്‍ജ്, ഫാ. ബിജി ഗീവര്‍ഗീസ്, ഫാ. മാത്യു പി. ജോര്‍ജ്, ഫാ. ജേക്കബ് തോമസ് മുണ്ടിയതറ, ഫാ. ലിജു പി. ചെറിയാന്‍, ഫാ. ടോം വര്‍ഗീസ്, ഫാ. കെ. റോബിന്‍, ഫാ. ഏലിയാസ് കരിക്കണ്ടത്തില്‍, ജനറല്‍ കണ്‍വീനര്‍ തോമസ് ജോര്‍ജ് ആലപ്പാട്ട് പറത്തറ, ഫാ. അനീഷ് കമിച്ചേരി, ഫാ. തോമസ് കാരയ്ക്കാട്ട്, കൈക്കാരന്‍മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, വിന്‍സെന്‍റ് പഴയാറ്റില്‍, എക്യുമെനിക്കല്‍ കോ-ഓര്‍ഡിനേറ്റര്‍ റോബിന്‍ റ്റി. കളങ്ങര, സെക്രട്ടറി ആന്‍സി ജോസഫ് എന്നിവര്‍ പ്രസംഗിച്ചു.

എടത്വ പള്ളിയിലേക്ക് തീര്‍ഥാടക പ്രവാഹം

എടത്വ: സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് തീര്‍ഥാടക പ്രവാഹം. എട്ടാം ദിനമായ ഇന്നലെ പള്ളിയും പരിസരവും ഭക്തജനങ്ങളെക്കൊണ്ടു നിറഞ്ഞു കവിഞ്ഞു. തമിഴ് വിശ്വാസികളാണ് അധികവും. തമിഴ് കുര്‍ബാനയില്‍ പങ്കെടുക്കാന്‍ അഭൂതപൂര്‍വമായ തിരക്കാണ് അനുഭവപ്പെടുന്നത്. കഴിഞ്ഞദിവസം പരസ്യവണക്കത്തിനായി തിരുസ്വരൂപം ദേവാലയ കവാടത്തില്‍ പ്രതിഷ്ഠിച്ചതു മുതല്‍ തീര്‍ഥാടകരുടെ നിലയ്ക്കാത്ത ഒഴുക്കാണ്. തിരുസ്വരൂപം വണങ്ങാന്‍ ദക്ഷിണേന്ത്യയിലെ ഒട്ടുമിക്ക സംസ്ഥാനങ്ങളില്‍ നിന്നും ഭക്തജനങ്ങള്‍ എത്തുന്നുണ്ട്. പാര്‍ക്കിംഗ് സൗകര്യം ഏര്‍പ്പെടുത്തിയിരുന്ന സെന്‍റ് അലോഷ്യസ് കോളജ്, സെന്‍റ് മേരീസ് ഗേള്‍സ് ഹൈസ്‌കൂള്‍, ജോര്‍ജിയന്‍ പബ്‌ളിക് സ്‌കൂള്‍ എന്നീ ഗ്രൗണ്ടുകള്‍ വാഹനങ്ങള്‍ കൊണ്ട് നിറഞ്ഞുകവിഞ്ഞു. എടത്വ തിരുനാളിന് തിരക്കു കൂടിയതോടെ ടൗണില്‍ ഗതാഗതക്കുരുക്കും രൂക്ഷമായി. കെഎസ്ആര്‍ടിസിയുടെ താത്കാലിക ഡിപ്പോ സെന്‍റ് അലോഷ്യസ് കോളജ് ഗ്രൗണ്ടില്‍ പ്രവര്‍ത്തനം ആരംഭിച്ചിട്ടുണ്ട്.

ചെത്തിപ്പുഴ സര്‍ഗക്ഷേത്രയില്‍ ഇന്നുമുതല്‍ നാടകോത്സവം

ചങ്ങനാശേരി: സര്‍ഗക്ഷേത്ര-ഇടിമണ്ണിക്കല്‍ അഖില കേരള പ്രഫഷണല്‍ നാടക മത്സരം യവനിക സീസണ്‍ ഫോര്‍ ഇന്നാരംഭിക്കും. സര്‍ഗക്ഷേത്ര അങ്കണത്തില്‍ തയാറാക്കിയ പന്തലില്‍ കേരളത്തിലെ പ്രമുഖ നാടക സമിതികളുടെ നാടകങ്ങള്‍ ദിവസവും വൈകുന്നേരം 6.30ന് അരങ്ങേറും. ഫൈന്‍ ആര്‍ട്‌സ് സൊസൈറ്റി അംഗങ്ങള്‍ക്കും പുതുതായി അംഗത്വം സ്വീകരിക്കുന്നവര്‍ക്കും പ്രവേശന പാസ് വാങ്ങുന്നവര്‍ക്കും നാടകോത്സവത്തില്‍ പങ്കെടുക്കാം. സര്‍ഗക്ഷേത്ര കള്‍ച്ചറല്‍, ചാരിറ്റബിള്‍, അക്കാദമിക്, മീഡിയ സെന്‍ററിന്‍റെ നേതൃത്വത്തില്‍ ഭവനരഹിതയായ വിധവയ്ക്ക് വീട് നിര്‍മ്മിച്ചു നല്‍കുന്ന സര്‍ഗ ഭവനം പദ്ധതിയും നാടകോത്സവത്തിന്റെ ഭാഗമായി നടക്കും. ഇന്ന് വൈകുന്നേരം 6.15 ന് ചലച്ചിത്ര താരങ്ങളായ സ്മിനു സിജോ, കോട്ടയം രമേശ് എന്നിവര്‍ ചേര്‍ന്ന് നാടകോത്സവം ഉദ്ഘാടനം ചെയ്യും. സര്‍ഗക്ഷേത്ര രക്ഷാധികാരി ഫാ. തോമസ് കല്ലുകളം സിഎംഐ അധ്യക്ഷത വഹിക്കും. പാലാ കമ്യൂണിക്കേഷന്‍സിന്‍റെ ലൈഫ് ഈസ് ബ്യൂട്ടിഫുള്‍ എന്ന നാടകം അവതരിപ്പിക്കും.

കർഷകർക്ക് കനത്ത തിരിച്ചടി: കൊട്ടടയ്ക്ക വില കുറയുന്നു

പൂച്ചാക്കല്‍: കര്‍ഷകരുടെ പ്രതീക്ഷയ്ക്ക് മങ്ങലേല്‍പ്പിച്ച് കൊട്ടടയ്ക്കയുടെ വില താഴോട്ട്. ഈ സീസണില്‍ കിലോ 350-400 രൂപ വരെ ലഭിച്ചിരുന്ന സ്ഥാനത്ത് 300-305 രൂപയാണ് ഇപ്പോള്‍ വില. രണ്ടു വര്‍ഷം മുന്‍പ് 450-500 രൂപ വരെയും വില ലഭിച്ചിരുന്നു. വില കൂടിയതോടെ ധാരാളം കര്‍ഷകര്‍ കവുങ്ങ് കൃഷിയിലേക്ക് ഇറങ്ങിയിരുന്നു. പഴക്കടക്ക കിലോക്ക് 80 രൂപയും പച്ച അടയ്ക്ക 60 രൂപയുമാണ് വില. ഈ വര്‍ഷം എല്ലാ തോട്ടങ്ങളിലും വിളവുണ്ടായിട്ടുണ്ടെങ്കിലും മഹാളി ഉള്‍പ്പെടെയുള്ള രോഗങ്ങള്‍ മൂലം കവുങ്ങുകള്‍ വ്യാപകമായി നശിക്കുകയാണ്. ഇതേത്തുടര്‍ന്ന് അടയ്ക്കയുടെ വരവ് മുന്‍ വര്‍ഷങ്ങളെ അപേക്ഷിച്ച് കുറവാണ്. വിദേശ രാജ്യങ്ങളില്‍നിന്ന് വന്‍തോതില്‍ ഇറക്കുമതി തുടങ്ങിയതോടെ ആറു മാസമായി അടയ്ക്ക വില ഇടിയുകയായിരുന്നു. വില വര്‍ധിക്കുമെന്ന കണക്കുകൂട്ടലില്‍ കഴിഞ്ഞ വര്‍ഷം വന്‍തോതില്‍ അടയ്ക്ക കരുതി വച്ച കര്‍ഷകര്‍ക്കും വിലയിടിവ് തിരിച്ചടിയായി. മഹാളി രോഗത്തിനു പുറമേ മഞ്ഞളിപ്പ്, കൂമ്പുചീയല്‍, കായ്ചീയല്‍, ചുവട് ചീയല്‍, പൂങ്കുലയുണങ്ങല്‍ എന്നിവയും കവുങ്ങ് കൃഷിക്ക് വെല്ലുവിളിയാണ്. ഇതുമൂലം അടയ്ക്ക ഉത്പാദനം കുറഞ്ഞതിനിടെയാണ് ഇരുട്ടടിയായി വിലയും താഴ്ന്നത്. മ്യാന്‍മാര്‍, ശ്രീലങ്ക, ഇന്‍ഡോനേഷ്യ എന്നിവിടങ്ങളില്‍നിന്ന് ഇറക്കുമതി ചെയ്യുന്ന അടയ്ക്ക പാന്‍ മസാല വ്യവസായികള്‍ വന്‍തോതില്‍ ഉപയോഗിക്കുന്നുണ്ട്. കഴിഞ്ഞവര്‍ഷം സംസ്‌കരിച്ച് ഉണക്കി സൂക്ഷിച്ച അടയ്ക്കാണ് കര്‍ഷകര്‍ ഇപ്പോള്‍ വിപണിയിലെത്തിക്കുന്നത്. കവുങ്ങില്‍ കയറി അടയ്ക്ക ശേഖരിക്കാന്‍ കയറ്റക്കാരെ കിട്ടാത്തതും വളക്കുറവ് മൂലമുള്ള ഉത്പാദനക്കുറവും കര്‍ഷകര്‍ അനുഭവിക്കുന്ന മറ്റ് പ്രശ്‌നങ്ങളാണ്.

വേനല്‍ മഴ കനത്തു: കൊയ്ത്ത് ഉപേക്ഷിച്ച് കര്‍ഷകര്‍

മാന്നാര്‍: തുടര്‍ച്ചയായി പെയ്ത മഴ മൂലം ചെന്നിത്തല നേന്ത്രവേലി പാടശേഖരത്തിലെ 110 ഏക്കറിലെ കൊയ്യാനിരുന്ന നെല്ലുമുങ്ങി, കൊയ്ത്ത് ഉപേക്ഷിച്ച് കര്‍ഷകര്‍. കഴിഞ്ഞ പത്തു ദിവസമായി പെയ്ത മഴ കാരണമാണ് നൂറുമേനി വിളവ് ലഭിച്ച നെല്ലു പൂര്‍ണമായും മുങ്ങിയത്. ഇവിടത്തെ 29 കര്‍ഷകരാണ് ഇക്കുറി നേന്ത്രവേലി പാടശേഖരത്തില്‍ കൃഷിയിറക്കിയത്. ചെന്നിത്തല തൃപ്പെരുന്തുറ കൃഷിഭവന്‍റെ പരിധിയില്‍ വരുന്ന ചെന്നിത്തല 14 ാം ബ്ലോക്ക് (നേന്ത്രവേലി) പാടശേഖരത്തിലെ ബണ്ടിന്‍റെ ബലക്ഷയവും തണ്ണീര്‍മുക്കം ബണ്ട് തുറന്നതും പാടത്തില്‍ വെള്ളം കയറാന്‍ കാരണമായെന്നു കര്‍ഷകര്‍ പറഞ്ഞു. പുറം ബണ്ടിന്‍റെ ബലക്ഷയം കാരണം നേരിയ തോതില്‍ ആദ്യം വെള്ളം കയറി. സ്ഥിതി രൂക്ഷമായപ്പോള്‍ പാടശേഖരസമിതിയുടെ നേതൃത്വത്തില്‍ പമ്പിംഗ് നടത്തിയെങ്കിലും ശക്തമായ മഴ കാരണം പമ്പിംഗ് വിജയം കണ്ടില്ല. ഇത്രയും വെള്ളം പൂര്‍ണമായി വറ്റിയാല്‍ പോലും കൊയ്ത്ത് യന്ത്രം ഇറക്കാന്‍ കഴിയില്ലെന്നും അതിനാല്‍ കൊയ്ത്ത് ഉപേക്ഷിക്കുകയാണെന്നും പാടശേഖര സമിതി അറിയിച്ചു.

മുതുകുളത്തെ വിറപ്പിച്ച് തെരുവുനായ്ക്കൾ

മുതുകുളം: തെരുവുനായ്ക്കളുടെ ശല്യവും ആക്രമണവും വർധിച്ചതോടെ മുതുകുളം പഞ്ചായത്തിൽ ജനങ്ങൾ ഭീതിയിലാണ്. കഴിഞ്ഞ ദിവസം മുതുകുളം ഗ്രാമപഞ്ചായത്തിലെ നാല്, അഞ്ച് വാർഡുകളിലെ പത്തോളം പേർക്ക് തെരുവുനായ്ക്കളുടെ കടിയേറ്റു. വളർത്തുമൃഗങ്ങളെയും നായ്ക്കൾ കൂട്ടമായി ആക്രമിക്കുന്നതു പതിവായി. തെരുവുനായശല്യത്തിനെതിരേ പഞ്ചായത്ത് ഇടപെടാത്തതിൽ പ്രതിഷേധം ശക്തമാണ്. കഴിഞ്ഞ ഒരു വർഷത്തിനുള്ളിൽ നിരവധി പേർക്കാണ് തെരുവുനായ്ക്കളുടെ കടിയേറ്റത്. സാമൂഹികാരോഗ്യകേന്ദ്രം, മുതുകുളം പാണ്ഡവർകാവ്, ഷാപ്പുമുക്ക്, പുത്തൻചന്ത, കൊല്ലകൽ, ഇലങ്കം, വാരണപ്പള്ളിൽ, വെട്ടത്തുമുക്ക് തുടങ്ങിയ ഭാഗങ്ങളിലെല്ലാം തെരുവുനായശല്യം രൂക്ഷമാണ്. നായ്ക്കൂട്ടത്തെ പേടിച്ച് കുട്ടികളെ മുറ്റത്തേക്കിറക്കാൻ പോലും വീട്ടുകാർ ഭയപ്പെടുകയാണ്. മുതിർന്നവർ വടിയുമായാണ് പുറത്തേക്കിറങ്ങുന്നത്. മൂന്നു മാസം മുമ്പ് മുതുകുളത്തിന്‍റെ വടക്കൻ പ്രദേശത്ത് അഞ്ചുപേർക്ക് നായയുടെ കടിയേറ്റു. കൂടാതെ പാണ്ഡവർകാവ് ദേവീ ക്ഷേത്രത്തിലേക്കുവന്ന ഭക്തയെ തെരുവുനായ കടിച്ചു. ഏതാനും മാസം മുമ്പ് ക്ഷേത്രത്തിലെത്തിയ കൊച്ചുകുട്ടിക്കുനേരേ നായ്ക്കൂട്ടം പാഞ്ഞടുത്തെങ്കിലും അവിടെയുണ്ടായിരുന്ന യുവാക്കൾ രക്ഷകരായി. അഞ്ചാം വാർഡ് ആലുംചുവടിനു കിഴക്കു ഭാഗത്ത് തെരുവുനായയുടെ ആക്രമണത്തിൽനിന്ന് രക്ഷപ്പെടാൻ ശ്രമിക്കവേ സൈക്കിളിൽനിന്ന് വീണ് അഞ്ചാം ക്ലാസുകാരനു പരിക്കേറ്റ സംഭവവും ഉണ്ടായിട്ടുണ്ട്. കുട്ടി സമീപത്തെ വീട്ടിലേക്ക് ഓടിക്കയറിയാണ് നായ്ക്കൂട്ട ആക്രമണത്തിൽനിന്ന് രക്ഷപ്പെട്ടത്. ഇരുചക്രവാഹനക്കാർക്കും തെരുവുനായ്ക്കൾ വലിയ ഭീഷണി ഉയർത്തുന്നുണ്ട്. അപ്രതീക്ഷിതമായി റോഡിനു കുറുകെ ചാടുന്ന നായ്ക്കളെ ഇടിച്ച് ഒട്ടേറെ അപകടങ്ങളാണുണ്ടാകുന്നത്. മുമ്പ് മുതുകുളം സ്റ്റാർ ജംഗ്ഷനു സമീപം നായയെതട്ടി സ്കൂ‌ട്ടർ മറിഞ്ഞ് അമ്മയ്ക്കും മകൾക്കും പരിക്കേറ്റിരുന്നു. വന്ദികപ്പള്ളി പെട്രോൾ പമ്പിനു മുന്നിൽ സമാനമായ രീതിയിൽ ബൈക്ക് യാത്രക്കാരായ അമ്മയ്ക്കും മകനും അപകടമുണ്ടായിട്ടുണ്ട്. വെട്ടത്തുകടവ് റോഡിൽ രണ്ടു തവണ നായയെതട്ടി സ്‌കൂട്ടർ മറിഞ്ഞ് സ്ത്രീകൾക്കു സാരമായി പരിക്കേറ്റിട്ടുമുണ്ട്. കൂടാതെ, കോഴികൾ ഉൾപ്പെടെയുള്ള വളർത്തുപക്ഷികളെയും നായ്ക്കൂട്ടം കടിച്ചുകൊല്ലുന്നു. വീടിനു പുറത്തു സൂക്ഷിക്കുന്ന ഇരുചക്രവാഹനങ്ങളുടെ സീറ്റും കേബിളുമെല്ലാം കടിച്ചുകീറി നശിപ്പിക്കുകയും ചെയ്യുന്നുണ്ട്. മുതുകുളത്ത് തെരുവുനായ ശല്യം രൂക്ഷമായിട്ടും നിയന്ത്രിക്കാൻ യാതൊരു നടപടിയുണ്ടാകാത്തതു നാട്ടുകാരുടെ പ്രതിഷേധത്തിന് ഇടയാക്കുകയാണ്.

രോഗപ്രതിരോധ കുത്തിവയ്പ് വാരാചരണം സമാപിച്ചു

ആലപ്പുഴ: രോഗപ്രതിരോധ കുത്തിവയ്പ് വാരാചരണ സമാപനം ആലപ്പുഴ ജനറൽ ആശുപത്രിയിൽ നടത്തി. കുത്തിവയ്പുകളുടെ പ്രാധാന്യവും ആവശ്യകതയും വ്യക്തമാക്കുന്ന പോസ്റ്റർ പ്രദർശനം, പൊതുജനങ്ങൾക്കായി ബോധവത്കരണ ക്ലാസ് എന്നിവയും നടത്തി. ഡോ. കെ. വേണുഗോപാൽ പോസ്റ്റർ പ്രദർശനം ഉദ്ഘാടനം ചെയ്തു. മികച്ച പോസ്റ്റർ തയാറാക്കിയ ഡോ. ഗോവിന്ദിന് സൂപ്രണ്ട് ഡോ. ആർ. സന്ധ്യ ഉപഹാരം നൽകി. പിപി യൂണിറ്റ് മെഡിക്കൽ ഓഫീസർ ഡോ. എം. പ്രവീൺ ബോധവത്കരണ ക്ലാസ് നയിച്ചു. ആർഎംഒ ഡോ. എം. ആശ, എആർഎംഒ ഡോ. സെൻ, നഴ്സിംഗ് സൂപ്രണ്ട് റസി ബേബി, ജെപിഎച്ച്എൻമാരായ പ്രമീള, ഷൈനി എന്നിവർ പ്രസംഗിച്ചു.

രാസലഹരിയുടെ നീരാളിപ്പിടിത്തത്തിന്‍റെ ഉത്തരവാദിത്വം ഇടതുസര്‍ക്കാരിന്: സി.ആര്‍. മഹേഷ് എംഎല്‍എ

മാവേലിക്കര: രാസലഹരിയുടെ നീരാളിപ്പിടിത്തത്തില്‍ കേരളത്തിലെ യുവതയെ എത്തിച്ചതിന്‍റെ ഉത്തരവാദിത്വം ഇടതു സര്‍ക്കാരിനെന്ന് സംസ്‌കാര സാഹിതി സംസ്ഥാന ചെയര്‍മാന്‍ സി.ആര്‍. മഹേഷ് എംഎല്‍എ. കോണ്‍ഗ്രസ് മാവേലിക്കര ബ്ലോക്ക് കമ്മിറ്റി സംഘടിപ്പിച്ച ലഹരിവിരുദ്ധ സമ്മേളനം ഉദ്ഘാടനം ചെയ്യുകയായിരുന്നു എംഎൽഎ. കേരളത്തിലേക്ക് വന്‍തോതില്‍ ഇറക്കുമതി ചെയ്യപ്പെടുന്ന മയക്കുമരുന്നുകളുടെ ഉറവിടം കണ്ടെത്തി കുറ്റവാളികളെ നിയമത്തിന്‍റെ മുന്നില്‍ കൊണ്ടുവരുവാന്‍ സര്‍ക്കാര്‍ പരാജയപ്പെട്ടു. പ്രതിഭാധനരായ യുവത്വത്താല്‍ സമ്പന്നമായ കേരളത്തിന്‍റെ ഭാവിയെ തന്നെ ചോദ്യം ചെയ്യുന്ന തരത്തില്‍ ലഹരി വില്പന അനുദിനം വര്‍ധിക്കുവാന്‍ സംസ്ഥാന സര്‍ക്കാര്‍ മൗനാനുവാദം നല്‍കിയിരിക്കുന്നത് കേരള ജനതയ്ക്ക് പൊറുക്കുവാന്‍ പറ്റാത്ത തെറ്റാണെന്നും അതിനുള്ള മറുപടി അവര്‍ കരുതി വച്ചിരിക്കുകയാണെന്നും അദ്ദേഹം പറഞ്ഞു. ബ്ലോക്ക് പ്രസിഡന്‍റ് അനി വര്‍ഗീസ് അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് കെ.ആര്‍. മുരളീധരന്‍, നഗരസഭാ ചെയര്‍മാന്‍ നൈനാന്‍ സി. കുറ്റിശേരില്‍, വൈസ് ചെയര്‍പേഴ്‌സണ്‍ ടി. കൃഷ്ണകുമാരി, കെപിസിസി അംഗം കുഞ്ഞുമോള്‍ രാജു, യുഡിഎഫ് നിയോജകമണ്ഡലം ചെയര്‍മാന്‍ കെ. ഗോപന്‍, കോണ്‍ഗ്രസ് നൂറനാട് ബ്ലോക്ക് പ്രസിഡന്‍റ് ജി. ഹരിപ്രകാശ്, ലളിത രവീന്ദ്രനാഥ്, എം.കെ. സുധീര്‍ തുടങ്ങിയവര്‍ പ്രസംഗിച്ചു.

സഹകരണമേഖലയെ തകര്‍ക്കാന്‍ കേന്ദ്രശ്രമം: കെസിഇസി ജില്ലാ സമ്മേളനം

ചേർത്തല: സഹകരണ മേഖലയെ ഇല്ലാതാക്കാനായി കേന്ദ്രസർക്കാർ നടത്തുന്ന ആസൂത്രിത നീക്കങ്ങളെ ചെറുത്തു തോൽപ്പിക്കുന്നതിനുള്ള ഇടപെടലുകൾ നടത്താൻ കേരള കോ-ഓപ്പറേറ്റീവ് എംപ്ലോയീസ് കൗൺസിൽ (എഐടിയുസി) ജില്ലാ സമ്മേളനം തീരുമാനിച്ചു. കേരളത്തിലെ ബാങ്കിംഗ് പ്രവർത്തനത്തിന്‍റെ 40 ശതമാനത്തിന് മുകളിൽ കൈകാര്യം ചെയ്യുന്നത് സഹകരണ മേഖലയാണ്. സഹകരണ മേഖലയെ തകർത്തു കേരളത്തിന്‍റെ സാമ്പത്തിക ഭദ്രത ഇല്ലാതാക്കാനും ഈ രംഗം കോർപറേറ്റുകൾക്ക് എഴുതിക്കൊടുക്കാനുമായുള്ള കേന്ദ്രത്തിന്‍റെ ശ്രമത്തിന്‍റെ ഭാഗമാണ് ഈ ഇടപെടലുകളെന്ന് ബോധ്യപ്പെടും വിധമാണ് കേന്ദ്രം പ്രവർത്തിക്കുന്നത്. സംസ്ഥാന സർക്കാർ നടപ്പിലാക്കുന്ന ജനക്ഷേമ പ്രവർത്തനങ്ങൾക്ക് പൂർണ പിന്തുണ നൽകുന്ന സഹകരണ മേഖലയിലെ ജീവനക്കാരെ അവഗണിക്കുന്ന സമീപനമാണ് സർക്കാർ കൈക്കൊള്ളുന്നതെന്ന് സമ്മേളനം ആരോപിച്ചു. കെസിഇസി സംസ്ഥാന ജനറൽ സെക്രട്ടറി വിൽസൺ ആന്‍റണി സമ്മേളനം ഉദ്ഘാടനം ചെയ്തു. ജില്ലാ പ്രസിഡന്‍റ് ഗോപികൃഷ്ണൻ അധ്യക്ഷത വഹിച്ചു. സംഘാടക സമിതി ചെയർമാൻ എ.പി. പ്രകാശൻ സ്വാഗതം പറഞ്ഞു. ജില്ലാ സെക്രട്ടറി വി.എൻ. സുരേഷ്ബാബു കണക്കും റിപ്പോർട്ടും അവതരിപ്പിച്ചു. ഭാരവാഹികളായി വി.ഡി. ഷൂബിമോൻ (പ്രസിഡന്‍റ്), പി.ആർ. രതീഷ് (സെക്രട്ടറി), സനൽകുമാർ (ട്രഷറർ).

മാവേലിക്കര ടൗണ്‍ വികസനത്തിലെ അനിശ്ചിതാവസ്ഥ പരിഹരിക്കണം

മാവേലിക്കര: സമീപ നിയോജകമണ്ഡലത്തിലെ ടൗണുകളെല്ലാം കാലാനുസൃതമായി വികസന പാതയില്‍ സഞ്ചരിക്കുമ്പോള്‍ മാവേലിക്കര ടൗണിലെ വികസനം അനിശ്ചിതാവസ്ഥയില്‍ തുടരുന്നതില്‍ കേരള കോണ്‍ഗ്രസ്-ജേക്കബ് മാവേലിക്കര നിയോജകമണ്ഡലം കമ്മിറ്റി പ്രതിഷേധിച്ചു. വികസന കാര്യങ്ങളിലെ അലംഭാവം അവസാനിപ്പിച്ച് ടൗണ്‍ വികസനത്തിന്‍റെ മാസ്റ്റര്‍പ്ലാന്‍ തയാറാക്കി നടപ്പില്‍ വരുത്താനുള്ള ആര്‍ജവം കാട്ടണമെന്നും മണ്ഡലം കമ്മിറ്റി ആവശ്യപ്പെട്ടു. നിയോജകമണ്ഡലം കണ്‍വന്‍ഷന്‍ സംസ്ഥാന ജനറല്‍ സെക്രട്ടറി കോശി തുണ്ടുപറമ്പില്‍ ഉദ്ഘാടനം ചെയ്തു. നിയോജമണ്ഡലം പ്രസിഡന്‍റ് രാജന്‍ തെക്കേവിള അധ്യക്ഷത വഹിച്ചു. അഡ്വ. ഗോപകുമാര്‍, ബിജു മാത്യു ഗ്രാമം, ലിയോ തരകന്‍, മാത്യു ജോണ്‍ പ്ലാക്കട്ട്, അനില്‍ ജോര്‍ജ്, അജി നടവള്ളില്‍ എന്നിവര്‍ പ്രസംഗിച്ചു. ഒൻപത്, പത്ത് തീയതികളില്‍ കോട്ടയത്ത് നടക്കുന്ന പാര്‍ട്ടി സംസ്ഥാന സമ്മേളനം വിജയിപ്പിക്കുന്നതിന് യോഗം തീരുമാനിച്ചു.

നാഗ്പൂരിലെ തലച്ചോറിൽനിന്നുത്ഭവിക്കുന്ന തീരുമാനങ്ങളാണ് പാർലമെന്‍റിൽ നിയമങ്ങളായി മാറുന്നതെന്ന് എംപി

അന്പലപ്പുഴ: നാഗ്പൂരിലെ തലച്ചോറിൽനിന്നുത്ഭവിക്കുന്ന തീരുമാനങ്ങളാണ് പലപ്പോഴും പാർലമെന്‍റിൽ നിയമങ്ങളായി മാറുന്നതെന്ന് കെ.സി. വേണുഗോപാൽ എം പി. ഭരണാഘടനാ വിരുദ്ധമായ വഖ്ഫ് ഭേദഗതി പിൻവലിക്കണമെന്നാവശ്യപ്പെട്ട് അമ്പലപ്പുഴ താലുക്ക് ദക്ഷിണ മേഖലാ ജമാ അത്ത് അസോസിയേഷന്‍റെ നേതൃത്വത്തിൽ വളഞ്ഞവഴിയിൽ നടന്ന പ്രതിഷേധ സമ്മേളനം ഉദ്ഘാടനം ചെയ്യുകയായിരുന്നു എംപി. സ്നേഹമെന്ന വാക്കിനെ വെറുപ്പാക്കി മാറ്റിയിരിക്കുകയാണ് മോദി സർക്കാർ. ഭരണാധികാരികൾ തലച്ചോറു കൊണ്ടല്ല ഹൃദയം കൊണ്ടാണ് നിയമം നിർമിക്കേണ്ടത്. തലച്ചോറുകൊണ്ടു നിർമിക്കുന്ന നിയമത്തിൽ മനുഷ്യത്വം കാണില്ലെന്നും എം പി. പറഞ്ഞു. അസോസിയേഷൻ പ്രസിഡന്‍റ് സി.എ. സലിം ചക്കിട്ടപ്പറമ്പിൽ അധ്യക്ഷത വഹിച്ചു. വൈകിട്ട് പുന്നപ്ര വണ്ടാനം ഷറഫുൽ ഇസ്‌ലാം മസ്ജിദ് അങ്കണത്തിൽനിന്നാരംഭിച്ച റാലിയിൽ പതിനായിരത്തോളം പേർ പങ്കെടുത്തു. റാലി വളഞ്ഞവഴിയിൽ സമാപിച്ചു. എച്ച്. സലാം എംഎൽഎ മുഖ്യാതിഥിയായിരുന്നു. എൻ. അലി അബ്ദുള്ള മുഖ്യപ്രഭാഷണം നടത്തി. അസോസിയേഷൻ ജനറൽ സെക്രട്ടറി ടി.എ. താഹ പുറക്കാട്, ട്രഷറർ ഇബ്രാഹിംകുട്ടി വിളക്കേഴം, സി.ആർ.പി. അബ്ദുൾ ഖാദർ, നവാസ് പൊഴിക്കര, എച്ച്. ബഷീർ, യു. നാസർ, സലിം പഴയങ്ങാടി, വഹാബ് പറയൻ തറ, ലത്തീഫ് തോട്ടപ്പള്ളി, സാദിഖ് മുസ്ലിയാർ കരുമാടി എന്നിവർ പ്രസംഗിച്ചു.

അരൂര്‍-തുറവൂര്‍ സമാന്തരപാത ; അറ്റകുറ്റപ്പണിക്ക് അനുവദിച്ച തുക ചെലവഴിക്കുന്നതില്‍ ഗുരുതര അനാസ്ഥ: കെ.സി. വേണുഗോപാല്‍ എംപി

തുറവൂർ: ദേശീയപാത പുനര്‍നിര്‍മാണത്തിന്‍റെ ഭാഗമായി ഉയരപ്പാത നിര്‍മാണം നടക്കുന്ന അരൂര്‍-തുറവൂര്‍ മേഖലയില്‍ ദേശീയപാതയ്ക്കു സമാന്തരപാത ശക്തിപ്പെടുത്താന്‍ ദേശീയപാതാ അഥോറിറ്റി അനുവദിച്ച തുക രണ്ടു മാസമായിട്ടും ചെലവഴിക്കാത്തത് പൊതുമരാമത്തു വകുപ്പിന്‍റെ ഗുരുതര അനാസ്ഥയാണെന്ന് കെ.സി. വേണുഗോപാല്‍ എംപി. എട്ടരക്കോടി രൂപയാണ് ഇക്കഴിഞ്ഞ ഫെബ്രുവരി മാസത്തില്‍ ദേശീയപാതാ അഥോറിറ്റി സംസ്ഥാന പൊതുമരാമത്ത് വകുപ്പിനു കൈമാറിയത്. ഉയരപ്പാത നിര്‍മാണമേഖലയില്‍ ഗതാഗതക്കുരുക്കും അപകടമരണങ്ങളും പതിവായതോടെയാണ് കെ.സി. വേണുഗോപാല്‍ എംപി പ്രശ്‌നപരിഹാരത്തിനായി യോഗം വിളിച്ചുചേര്‍ത്തത്. സമാന്തരപാതകള്‍ അറ്റകുറ്റപ്പണികള്‍ നടത്തി ഗതാഗതം വഴിതിരിച്ചുവിടാന്‍ യോഗത്തില്‍ തീരുമാനമെടുത്തിരുന്നു. തുറവൂര്‍ - കുമ്പളങ്ങി റോഡും തുറവൂര്‍ - മാക്കേക്കടവ് റോഡും ശക്തിപ്പെടുത്തി പകരം ഗതാഗതമാര്‍ഗം തുറക്കാന്‍ തീരുമാനമെടുത്തെങ്കിലും പണം തടസമായി. ഇതിനിടെ വേണുഗോപാൽ ചെയർപേഴ്സണായ പബ്ലിക് അക്കൗണ്ട്സ് കമ്മിറ്റി അരൂർ - തുറവൂർ മേഖലയിൽ സന്ദർശനം നടത്തി നിർമാണ പ്രവർത്തനങ്ങളിലെ പ്രശ്നങ്ങൾ പഠിക്കുകയും ഗതാഗതക്കുരുക്ക് ഒഴിവാക്കാനുള്ള അടിയന്തര നടപടികൾ സ്വീകരിക്കാൻ ഗതാഗത മന്ത്രാലയത്തിന് നിർദേശം നൽകുകയും ചെയ്തിരുന്നു. കഴിഞ്ഞദിവസം ചേര്‍ന്ന ദേശീയപാതാ പുനര്‍നിര്‍മാണ അവലോകന യോഗത്തില്‍ എം.പി. ഇതിനെതിരേ രൂക്ഷമായ ഭാഷയില്‍ പ്രതികരിച്ചു. ദിവസേന ഒന്നരമണിക്കൂര്‍ വരെ നീളുന്ന ഗതാഗതക്കുരുക്കും നിരന്തരം ഉണ്ടാകുന്ന അപകടങ്ങളും കുറയ്ക്കാന്‍ തുക ലഭിച്ചിട്ടും ചെലവഴിക്കുന്നതില്‍ ഗുരുതരമായ അനാസ്ഥയാണ് പൊതുമരാമത്ത് വകുപ്പിന് ഉണ്ടായിരിക്കുന്നതെന്ന് എംപി കുറ്റപ്പെടുത്തി. ഉദ്യോഗസ്ഥരുടെ ഭാഗത്ത് ഗുരുതരമായ കൃത്യവിലോപമാണ് ഉണ്ടായതെന്നും സമാന്തരപാതകള്‍ ശക്തിപ്പെടുത്താന്‍ അടിയന്തര നടപടികള്‍ സ്വീകരിക്കണമെന്നും എംപി യോഗത്തില്‍ ആവശ്യപ്പെട്ടു.

കെഎസ്ആര്‍ടിസി താത്കാലിക ബസ് സ്റ്റാന്‍ഡ് ആരംഭിച്ചു

എടത്വ: എടത്വ പള്ളി തിരുനാളിനോടനുബന്ധിച്ച് തീര്‍ഥാടകര്‍ക്ക് യാത്രാസൗകര്യം ഒരുക്കുന്നതിന്‍റെ ഭാഗമായി എടത്വ കോളജ് മൈതാനത്ത് കെഎസ്ആര്‍ടിസി താത്കാലിക ബസ് സ്റ്റാന്‍ഡ് ആരംഭിച്ചു. ബസ് സ്റ്റാന്‍ഡിന്‍റെ പ്രവർത്തനോ ദ്ഘാടനം തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍ നിര്‍വഹിച്ചു. ജനറല്‍ കണ്‍വീനര്‍ തോമസ് ജോര്‍ജ് പറത്തറ അധ്യക്ഷത വഹിച്ചു. എടത്വ, ആലപ്പുഴ, കോട്ടയം, ഹരിപ്പാട് തുടങ്ങിയ സര്‍വീസുകള്‍ക്ക് പുറമേ തിരുവനന്തപുരം, പൂവാര്‍, കൊല്ലം, എറണാകുളം, ഇടുക്കി, കളിയിക്കാവിള തുടങ്ങിയ സ്ഥലങ്ങളിലേക്കും കെഎസ്ആര്‍ടിസിയുടെ സ്‌പെഷല്‍ സര്‍വീസ് ഉണ്ടായിരിക്കുമെന്നു കണ്‍വീനര്‍ കെ.പി. വിന്‍സെന്‍റ് അറിയിച്ചു. കൈക്കാരന്‍ വിന്‍സെന്‍റ് പഴയാറ്റില്‍, ഫാ. അനീഷ് കാമിച്ചേരി, കണ്‍ട്രോളിംഗ് ഇന്‍സ്പെക്ടര്‍ രശ്മിനാഥ്, ഓഫീസ് ഇന്‍ ചാര്‍ജ് മനോജ് കുമാര്‍, സ്റ്റേഷന്‍ മാസ്റ്റര്‍ അയ്യപ്പദാസ്, റോബിന്‍ കളങ്ങര, ജോബി കണ്ണമ്പള്ളി, ബാബു പള്ളിത്തറ എന്നിവര്‍ പങ്കെടുത്തു.

ദൈവദാസന്‍ പുത്തന്‍പറമ്പില്‍ തൊമ്മച്ചന്‍ ഇന്‍ഫര്‍മേഷന്‍ സെന്‍റര്‍ പ്രവര്‍ത്തനം ആരംഭിച്ചു

എടത്വ: എടത്വ പള്ളി തിരുനാളിനോടനുബന്ധിച്ച് തീര്‍ഥാടകര്‍ക്കായി ദൈവദാസന്‍ പുത്തന്‍ പറമ്പില്‍ തൊമ്മച്ചന്‍ ഇന്‍ഫര്‍മേഷന്‍ സെന്‍റര്‍ പള്ളിയുടെ വടക്കു വശത്തായി ആരംഭിച്ചു. ചങ്ങനാശേരി അതിരൂപത മെത്രാപ്പോലീത്താ മാര്‍ തോമസ് തറയില്‍ ഉദ്ഘാടനം നിര്‍വഹിച്ചു. വികാരി ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. ദൈവദാസന്‍ പുത്തന്‍പറമ്പില്‍ തൊമ്മച്ചന്‍ നാമകരണ നടപടി വൈസ്‌ പോസ്റ്റുലേറ്റര്‍ ഫാ. അനീഷ് കുടിലില്‍, എടത്വ റീജിയന്‍ പ്രസിഡന്‍റ് സാബു കരിക്കംപള്ളി, അംഗങ്ങളായ അജി വാഴപ്പറമ്പില്‍, മനോജ് മാത്യു പുത്തന്‍വീട്ടില്‍, ഷാജി കാഞ്ഞൂപ്പള്ളില്‍, സിബിച്ചന്‍ വേളാശേരി, റൂബി കരിക്കംപള്ളി, മേഴ്‌സി ഷാജി കാഞ്ഞൂപ്പള്ളില്‍, ജോസ് ആമ്പക്കാട്, കൈക്കാരന്മാരായ പി.എസ്. ടോമിച്ചന്‍ പറപ്പള്ളി, കെ.എം. ജയിംസ് കളത്തൂര്‍, വിന്‍സെന്‍റ് പഴയാറ്റില്‍, ജനറല്‍ കണ്‍വീനര്‍ തോമസ് ജോര്‍ജ് ആലപ്പാട്ട് പറത്തറ, പബ്ലിസിറ്റി കണ്‍വീനര്‍ സോജന്‍ സെബാസ്റ്റ്യന്‍ കണ്ണന്തറ എന്നിവര്‍ പ്രസംഗിച്ചു. ദൈവദാസൻ തൊമ്മച്ചന്‍റെ ജീവചരിത്രം, സഭാപ്രവര്‍ത്തനം എന്നിവയെക്കുറിച്ചുള്ള പുസ്തകങ്ങള്‍, ലഘുലേഖകള്‍ എന്നിവ ഈ കൗണ്ടറില്‍ നിന്നു ലഭിക്കും. എടത്വ പള്ളിയില്‍ ഇന്ന് എടത്വ സെന്‍റ് ജോര്‍ജ് ഫൊറോന പള്ളിയില്‍ രാവിലെ 4.30ന് വിശുദ്ധ കുര്‍ബാന (തമിഴ്) - ഫാ. സൈമണ്‍. 5.45ന് സപ്ര, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - മാര്‍ സെബാസ്റ്റ്യന്‍ വാണിയപ്പുരയ്ക്കല്‍ (സീറോ മലബാര്‍ കുരിയ ബിഷപ്). 7.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. സ്‌കറിയ സ്രാമ്പിക്കല്‍. 10.00ന് വിശുദ്ധ കുർബാന (തമിഴ് സീറോ മലബാര്‍) - ഫാ. തോമസ് പൗവത്തുപറമ്പില്‍. ഉച്ചകഴിഞ്ഞ് 2.30ന് വിശുദ്ധ കുര്‍ബാന (തമിഴ്) - ഫാ. ദുരൈസ്വാമി. വൈകുന്നേരം 4.00ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - റവ ഡോ. ജേക്കബ് പുതുമനമൂഴിയില്‍. 6.00ന് വിശുദ്ധ കുര്‍ബാന (തമിഴ്) - ഫാ. സൈമണ്‍. 7.00ന് മധ്യസ്ഥപ്രാര്‍ഥന (കുരിശടിയില്‍).

"ചെങ്ങന്നൂര്‍-ആലപ്പുഴ-എറണാകുളം ബോട്ട് സർവീസ് പുനരാരംഭിക്കണം'

ചെങ്ങന്നൂര്‍: മൂന്നു പതിറ്റാണ്ടുകള്‍ക്കു മുമ്പ് നിര്‍ത്തലാക്കിയ ചെങ്ങന്നൂര്‍-ആലപ്പുഴ-എറണാകുളം ബോട്ട് സര്‍വീസ് പുനരാരംഭിക്കണമെന്ന നാട്ടുകാരുടെ ആവശ്യം ശക്തമാകുന്നു. സീ കുട്ടനാട് മാതൃകയിലുള്ള വിനോദസഞ്ചാര പദ്ധതികളുമായി ബന്ധപ്പെടുത്തി ഈ ജലപാത പുനരുജ്ജീവിപ്പിക്കണമെന്നാണ് പ്രധാന ആവശ്യം. ഒരു കാലത്ത് ചങ്ങനാശേരി, ആലപ്പുഴ, എറണാകുളം എന്നിവിടങ്ങളിലെ യാത്രക്കാര്‍ക്കും വ്യാപാരികള്‍ക്കും ഒരുപോലെ ആശ്രയമായിരുന്ന ഈ ബോട്ട് സര്‍വീസ് 1992ലാണ് നിര്‍ത്തലാക്കിയത്. പിന്നീട് ഈ റൂട്ട് കാടുകയറി നശിച്ചു. ജലഗതാഗത വകുപ്പിന്‍റെ കല്ലിശേരിയിലെ സ്റ്റേഷന്‍ ഓഫീസ് കെട്ടിടവും ബോട്ട് ജെട്ടിയും കാലപ്പഴക്കത്തില്‍ ഇല്ലാതായി. പുതിയ ഇറപ്പുഴ പാലം നിര്‍മാണത്തിന് സ്ഥലം ഏറ്റെടുത്തപ്പോള്‍ ഓഫീസ് കെട്ടിടം പൂര്‍ണമായും പൊളിച്ചുമാറ്റി. ഈ ജലപാതയുടെ പ്രാധാന്യം തിരിച്ചറിഞ്ഞ നാട്ടുകാര്‍ ബോട്ട് സര്‍വീസ് പുനരാരംഭിക്കുന്നതിനായുള്ള ശ്രമങ്ങള്‍ പലപ്പോഴും നടത്തിയിരുന്നു. ചെങ്ങന്നൂരിന്‍റെയും കുട്ടനാടിന്‍റെയും ടൂറിസം സാധ്യതകള്‍ക്ക് പുതിയൊരു ഉണര്‍വ് നല്‍കാന്‍ ഈ ബോട്ട് സര്‍വീസിന് സാധിക്കുമെന്നാണ് അവരുടെ പ്രതീക്ഷ. സീ കുട്ടനാട് ടൂറിസം പദ്ധതിയുടെ മാതൃകയില്‍ ഈ റൂട്ടിനെയും വികസിപ്പിച്ചാല്‍ അത് സഞ്ചാരികള്‍ക്ക് ഒരു പുതിയ അനുഭവമായിരിക്കും. കായലുകളുടെയും പുഴകളുടെയും മനോഹരമായ കാഴ്ചകളിലൂടെയുള്ള യാത്രയും കുട്ടനാടിന്‍റെ ഗ്രാമീണ ജീവിതവും അടുത്തറിയാനുള്ള അവസരവും ഇതിലൂടെ ലഭിക്കും. ഈ ആവശ്യം അധികാരികളുടെ ശ്രദ്ധയില്‍ എത്തിക്കുന്നതിനായി നാട്ടുകാര്‍ ഒരു കൂട്ടായ്മ രൂപീകരിച്ച് പ്രവര്‍ത്തിക്കുന്നുണ്ട്. ജനപ്രതിനിധികളും ഈ വിഷയത്തില്‍ അനുകൂലമായ നിലപാട് സ്വീകരിച്ചാല്‍ വൈകാതെ തന്നെ ഈ സ്വപ്നം യാഥാര്‍ഥ്യമാകുമെന്ന പ്രതീക്ഷയിലാണ് നാട്ടുകാര്‍. കാലം കാത്തുവച്ച ഈ ജലപാതയുടെ പുനരുജ്ജീവനം ചെങ്ങന്നൂരിന്‍റെയും കുട്ടനാടിന്‍റെയും വിനോദ സഞ്ചാര മേഖലയ്ക്ക് ഒരു മുതല്‍ക്കൂട്ടു തന്നെയായിരിക്കും.

താത്കാലിക പോലീസ് സ്റ്റേഷന്‍ ആരംഭിച്ചു

എടത്വ: എടത്വ പള്ളി തിരുനാളിനോടനുബന്ധിച്ച് പള്ളി കോമ്പൗണ്ടില്‍ താത്കാലിക പോലീസ് സ്റ്റേഷന്‍ ആരംഭിച്ചു. പോലീസ് സ്റ്റേഷന്‍റെയും സിസിടിവിയുടെയും ഉദ്ഘാടനം എടത്വ സര്‍ക്കിള്‍ ഇന്‍സ്പെക്ടര്‍ എം. അന്‍വര്‍ നിര്‍വഹിച്ചു. വികാരി ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍, കണ്‍വീനര്‍ ജോച്ചന്‍ ജോസഫ്, ഫാ. അജോ പീടികയില്‍, കൈക്കാരന്മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, വിന്‍സെന്‍റ് പഴയാറ്റില്‍, ജനറല്‍ കണ്‍വീനര്‍ തോമസ് ജോര്‍ജ് പറത്തറ, സിസിടിവി കണ്‍വീനര്‍ ഷൈജു മണക്കളം, ജെയിന്‍ കറുകയില്‍, റോബിന്‍ കളങ്ങര, ജോസി പരുമൂട്ടില്‍, ബാബു പള്ളിത്തറ, പി.വി. ജെറോം, ടോം ജെ. കൂട്ടക്കര, ജിന്‍സി ജോളി, ജോബി കണ്ണമ്പള്ളി, കെ.പി. കുഞ്ഞുമോന്‍, കെ.പി. വിന്‍സെന്‍റ്, സ്റ്റീഫന്‍ പറപ്പള്ളി, വറീച്ചന്‍ വേലിക്കളം എന്നിവര്‍ പ്രസംഗിച്ചു. ക്രമസമാധാന ചുമതലയ്ക്കായി 400 പോലീസുകാരുടെ സേവനം തിരുനാള്‍ കാലത്ത് ലഭ്യമാക്കിയിട്ടുണ്ട്.

ലഹരിക്കെതിരേ ഡ്രൈവിംഗ് സ്കൂൾ അസോസിയേഷൻ

ചെങ്ങന്നൂർ: ലഹരി മാഫിയകൾക്കെതിരേ പൊതുസമൂഹം വൻമതിൽ പണിയണമെന്ന് ചെങ്ങന്നൂർ ജോയിന്‍റ് ആർടിഒ ആർ. പ്രസാദ്. തലമുറകളെ ഇല്ലാതാക്കുക എന്ന ഗൂഢലക്ഷ്യത്തോടെ പ്രവർത്തിക്കുന്ന ക്ഷുദ്ര ശക്തികൾക്കെതിരേ പല്ലും നഖവും ഉപയോഗിച്ച് ഓരോ വ്യക്തിയും പ്രതിരോധിക്കണമെന്ന് അദ്ദേഹം പറഞ്ഞു. ചെങ്ങന്നൂരിലെ ഡ്രൈവിംഗ് സ്കൂൾ അസോസിയേഷന്‍റെ സാമൂഹ്യ പ്രതിബദ്ധതയോടെയുള്ള ഇത്തരം പ്രവർത്തനങ്ങൾ മാതൃകാപരമാണന്ന് അദ്ദേഹം കൂട്ടിച്ചേർത്തു. ചെങ്ങന്നൂർ മോട്ടോർ ഡ്രൈവിംഗ് സ്കൂൾ അസോസിയേഷന്‍റെ നേതൃത്വത്തിൽ നടന്ന ലഹരിവിരുദ്ധ വാഹന സന്ദേശയാത്രയുടെ ഉദ്ഘാടനത്തോടനുബന്ധിച്ച് പ്രസംഗിക്കുകയായിരുന്നു അദ്ദേഹം. തുടർന്ന് ലഹരിവിരുദ്ധ പ്രതിജ്ഞ ചൊല്ലിക്കൊടുക്കുകയും യാത്ര ഫ്ളാഗ്ഓഫ് ചെയ്യുകയും ചെയ്തു. മോട്ടോർ വെഹിക്കിൾ ഇൻസ്പെക്ടർ എസ്. അഭിലാഷ് ലഹരിവിരുദ്ധ സന്ദേശം നൽകി. അസിസ്റ്റന്‍റ് മോട്ടോർ വെഹിക്കിൾ ഇൻസ്പെക്ടർ എം. ശ്യാംകുമാർ, അസോസിയേഷൻ പ്രസിഡന്‍റ് സണ്ണി യോഹന്നാൻ, സെക്രട്ടറി സുനിൽ ഡി. വള്ളിയിൽ തുടങ്ങിയവർ പ്രസംഗിച്ചു. കാരയ്ക്കാട്, പുത്തൻകാവ്, ചെങ്ങന്നൂർ ടൗൺ, കല്ലിശേരി, പ്രാവിൻകൂട്, തിരുവൻവണ്ടൂർ, പാണ്ടനാട്, മാന്നാർ, ബുധനൂർ, പുലിയൂർ, ചെറിയനാട് എന്നീ പ്രദേശങ്ങളിലൂടെ സഞ്ചരിച്ച സന്ദേശയാത്ര കൊല്ലകടവിൽ സമാപിച്ചു.

ബന്ധുവീട്ടിലെത്തിയ യുവാവ് മുങ്ങി മരിച്ചു

എടത്വ: ബന്ധുവീട്ടിലെത്തിയ യുവാവ് പമ്പാനദിയില്‍ കുളിക്കുന്നതിനിടെ മുങ്ങി മരിച്ചു. തൃശൂര്‍ കൊടുങ്ങല്ലൂര്‍ ശങ്കരന്‍കുളത്തിയില്‍ ജിതിന്‍ മാത്യു (36) ആണ് മരിച്ചത്. ഇന്നലെ വൈകുന്നേരം 5.15ന് എടത്വ മങ്ങാട്ട് കടവിലാണ് അപകടം. ഭാര്യവീടായ നിരണത്ത് എത്തിയ ശേഷം ബന്ധുവായ എടത്വ പഞ്ചായത്ത് ഏഴാം വാര്‍ഡ് കുന്തിരിക്കല്‍ പള്ളിക്ക് സമീപം കല്ലൂപ്പറമ്പ് ബിനുവിന്‍റെ വീട്ടില്‍ ഇന്നലെ രാവിലെ എത്തിയതാണ് ജിതിന്‍ മാത്യു. സമീപത്തെ മങ്ങാട്ട് കടവില്‍ കുളിക്കുന്നതിനിടെ കാല്‍ വഴുതി ആഴത്തിലേക്ക് താഴ്ന്നു പോകുകയായിരുന്നു. ബന്ധുക്കളും നാട്ടുകാരും ചേര്‍ന്ന് നടത്തിയ തെരച്ചിലില്‍ ജിതിനെ നദിയില്‍നിന്ന് കണ്ടെത്തി എടത്വയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. എടത്വ പോലീസ് മേല്‍നടപടി സ്വീകരിച്ചു. ഇന്ന് വണ്ടാനം മെഡിക്കല്‍ കോളജില്‍ പോസ്റ്റ്മോര്‍ട്ടത്തിന് ശേഷം മൃതദേഹം ബന്ധുക്കള്‍ക്ക് വിട്ടുനല്‍കും. ഭാര്യ: ജാന്‍സി.

ചങ്ങനാശേരി അതിരൂപത 139-ാമത് ദിനാഘോഷം 20ന്

ചങ്ങനാശേരി: ചങ്ങനാശേരി അതിരൂപത 139-ാമത് ദിനാഘോഷം 20ന് രാവിലെ 9.30 മുതല്‍ 1.30 വരെ ചങ്ങനാശേരി മെത്രാപ്പോലീത്തന്‍ പള്ളിയിലെ കര്‍ദിനാള്‍ മാര്‍ ആന്‍റണി പടിയറ നഗറില്‍ നടക്കും. കേരളത്തിലെ അഞ്ച് ജില്ലകളില്‍ മുന്നൂറോളം ഇടവകകളിലായി എണ്‍പതിനായിരത്തോളം കുടുംബങ്ങളിലെ അഞ്ചുലക്ഷത്തോളം വരുന്ന വിശ്വാസികളുടെ പ്രതിനിധികളും വൈദികരും സന്യസ്തപ്രതിനിധികളും പരിപാടികളില്‍ പങ്കെടുക്കും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. അതിരൂപത നൽകുന്ന പരമോന്നത ബഹുമതിയായ എക്‌സലന്‍സ് അവാര്‍ഡ് അന്നു സമ്മാനിക്കും. തങ്ങളുടെ പ്രത്യേകമായ ഇടപെടല്‍കൊണ്ട് സഭയിലും സമൂഹത്തിലും ശ്രദ്ധേയമായ സംഭാവനകള്‍ നൽകിയവരെയും സംസ്ഥാന, ദേശീയ, അന്തര്‍ദേശീയ തലങ്ങളില്‍ അംഗീകാരം നേടിയ അതിരൂപതാംഗങ്ങളെയും പ്രത്യേകമായി ആദരിക്കും. അതിരൂപതയെ സംബന്ധിക്കുന്ന വിവിധ പ്രഖ്യാപനങ്ങളും അന്നു നടക്കും. 18ന് ഇടവകതല ആഘോഷങ്ങള്‍ അതിരൂപതാദിനത്തിന് മുന്നോടിയായി 18ന് അതിരൂപതയിലെ എല്ലാ പള്ളികളിലും ഇടവകതല ആഘോഷങ്ങള്‍ നടക്കും. അന്ന് ആഘോഷമായ വിശുദ്ധ കുര്‍ബാനയ്ക്കുശേഷം അതിരൂപത ദിനം വിളംബരം ചെയ്ത് പേപ്പല്‍ പതാക ഉയര്‍ത്തുകയും അതിരൂപത ആന്തം ആലപിക്കുകയും അതിരൂപതാദിന പ്രതിജ്ഞ ചൊല്ലുകയും ചെയ്യും. 19ന് ഛായാചിത്ര, ദീപശിഖാ പ്രയാണങ്ങള്‍ 19ന് കര്‍ദിനാള്‍ മാര്‍ ആന്‍റണി പടിയറയുടെ മാതൃ ഇടവകയായ മണിമല സെന്‍റ് ബേസില്‍ പള്ളിയില്‍നിന്നു ഛായാചിത്രപ്രയാണവും ധന്യന്‍ മാര്‍ തോമസ് കുര്യാളശേരിയുടെ കബറിടത്തിങ്കല്‍നിന്നു ദീപശിഖാ പ്രയാണവും അതിരൂപത യുവദീപ്തി എസ്എംവൈഎം, മിഷന്‍ ലീഗ് എന്നീ സംഘടനകളുടെ ആഭിമുഖ്യത്തില്‍ ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയിലേക്കു ക്രമീകരിച്ചിട്ടുണ്ട്. തുടര്‍ന്ന് ആഘോഷമായ സായാഹ്ന പ്രാര്‍ഥന. പരിപാടികളുടെ വിജയത്തിനായി അതിരൂപതാദിന ജനറല്‍ കണ്‍വീനര്‍ മോണ്‍. ആന്‍റണി എത്തയ്ക്കാട്ട്, മെത്രാപ്പോലീത്തന്‍ പള്ളി വികാരി ഫാ. ജോസഫ് വാണിയപ്പുരയ്ക്കല്‍, കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍ എന്നിവരുടെ നേതൃത്വത്തില്‍ വിവിധ കമ്മിറ്റികള്‍ പ്രവര്‍ത്തിച്ചുവരുന്നു.

പെട്രോൾ പമ്പിന് നേരേ ആക്രമണം: രണ്ടു പ്രതികൾ അറസ്റ്റിൽ

കായംകുളം: കൊറ്റുകുളങ്ങര പുത്തൻ റോഡ് ജംഗ്ഷന് സമീപം പെട്രോൾ പമ്പിൽ ആക്രമണം നടത്തിയ കേസിൽ രണ്ടു പ്രതികൾ പിടിയിലായി. കായംകുളം പത്തിയൂർ എരുവ പടിഞ്ഞാറ് കപ്പകശേരിത്തറയിൽ മുഹമ്മദ് റാഫി (23), കരുവറ്റുംകുഴി വടക്കോട്ട് വീട്ടിൽ വാടകയ്ക്ക് താമസിക്കുന്ന കൊറ്റുകുളങ്ങര കൂട്ടേത്ത് തെക്കതിൽ ബിലാദ് (23) എന്നിവരെയാണ് അറസ്റ്റ് ചെയ്തത്. കഴിഞ്ഞ ബുധനാഴ്ച പുലർച്ചെ ഒന്നോടെയായിരുന്നു സംഭവം. രണ്ടു ബൈക്കുകളിലായി അഞ്ചുപേർ പെട്രോൾ പമ്പിൽ എത്തി. ഇവർ 50 രൂപയ്ക്ക് പെട്രോൾ നിറച്ചതിനുശേഷം പണം ആവശ്യപ്പെട്ടപ്പോൾ പണം നൽകാതെ ജീവനക്കാരെ മർദിക്കുകയായിരുന്നു. സംഭവശേഷം പ്രതികൾ ഒളിവിൽപ്പോയിരുന്നു.

കാറ്റിലും കോളിലും വള്ളം തകർന്നു

മുഹമ്മ: ശക്തമായ കാറ്റിലും കോളിലും മത്സ്യബന്ധന വള്ളം ഭാഗികമായി തകർന്നു. മത്സ്യവലകളും നശിച്ചു. മുഹമ്മ പഞ്ചായത്ത് എട്ടാം വാർഡ് കൊച്ചുചിറയിൽ ഷൈജുമോന്‍റെ വള്ളമാണ് അപകടത്തിൽപ്പെട്ടത്. വെള്ളിയാഴ്ച വൈകുന്നേരം മുഹമ്മ ജെട്ടിക്കു വടക്കുവശം വല ഇടുന്നതിനിടെയാണ് തിരയിൽപ്പെട്ടത്. ജലഗതാഗത വകുപ്പ് ജീവനക്കാരനാണ് ഷൈജുവിനെ രക്ഷിച്ച് കരയിൽ എത്തിച്ചത്.

തീരദേശ ഹൈവേയുടെ പേരിൽ ആശങ്കയെന്ന് ജനകീയ കൂട്ടായ്‌മ

ആലപ്പുഴ: തീരദേശ ഹൈവേ പ്രാഥമിക വിജ്ഞാപനം ഉടൻ വരുമെന്നുള്ള അധികൃതരുടെ വെളിപ്പെടുത്തൽ തീരദേശജനത ആശങ്കയോടെയാണ് നോക്കിക്കാണുന്നതെന്ന് ജനകീയ കൂട്ടായ്‌മ. റോഡിന്‍റെ ഇരുവശങ്ങളിൽനിന്നും സമമായി സ്ഥലം ഏറ്റെടുക്കണമെന്നാണ് ജനങ്ങൾ ആവശ്യപ്പെടുന്നത്. വിഷയത്തിൽ തീരദേശ ഹൈവേ ജനകീയ കൂട്ടായ്‌മയുമായും ചർച്ച നടത്താമെന്ന കിഫ്ബി അധിക്യതരുടെ വാക്കും നാളിതുവരെ ഫലം കണ്ടിട്ടില്ല. റോഡിന്‍റെ ഒരുവശത്ത് 5.5 മീറ്ററും മറുവശത്ത് അര മീറ്റർ, ഒരു മീറ്റർ എന്നിങ്ങനെയാണ് ഇപ്പോൾ പിങ്ക് കല്ലുകൾ സ്ഥാപിച്ചിരിക്കുന്നത്. എന്നാൽ തെക്ക് അമ്പലപ്പുഴ മുതലുള്ള സ്ഥലമെടുപ്പിന് തീരുമാനം ആയിട്ടില്ലെന്നാണ് തീദേശജനത മനസിലാക്കുന്നത്. സ്ഥലം ഏറ്റെടുക്കുന്നതിനുമുമ്പ് പ്രദേശവാസികളുമായി ചർച്ചയ്ക്ക് അധികൃതർ തയാറാകണമെന്നും ഡിപിആർ എത്രയുംവേഗം പുറപ്പെടുവിക്കണമെന്നും തീരദേശ ഹൈവേ ജനകീയ കൂട്ടായ്‌മയുടെ പൊതുയോഗം ആവശ്യപ്പെട്ടു. യോഗത്തിൽ ജനറൽ കൺവീനർ സോളമൻ അറക്കൽ അധ്യക്ഷത വഹിച്ചു. എ.എക്സ്. ബേബി അരേശേരിൽ, പോളി ആന്‍റണി, ബൈജു കാരളശേരിൽ എന്നിവർ പ്രസംഗിച്ചു.

മാതൃവേദി-പിതൃവേദി പ്രവര്‍ത്തന വര്‍ഷോദ്ഘാടനം

ആലപ്പുഴ: പുത്തനങ്ങാടി സെന്‍റ് ജോര്‍ജ് പള്ളിയിൽ ഇന്നു രാവിലെ എട്ടിന് മാതൃവേദി-പിതൃവേദി പ്രവര്‍ത്തന വര്‍ഷോദ്ഘാടനം, മാര്‍ഗരേഖ പ്രകാശനം, സത്യപ്രതിജ്ഞ എന്നിവ നടക്കും. യൂണിറ്റ് പ്രസിഡന്‍റ് റോയി വേലിക്കെട്ടില്‍ അധ്യക്ഷത വഹിക്കും. ചങ്ങനാശേരി അതിരൂപത ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാവക്കാല ഉദ്ഘാടനം ചെയ്യും. ഫാ. ജോബിന്‍ തൈപ്പറമ്പില്‍ അനുഗ്രഹ പ്രഭാഷണം നടത്തും. ചങ്ങനാശേരി അതിരൂപത പിതൃവേദി പ്രസിഡന്‍റ് റോയി കപ്പാങ്കല്‍ മാര്‍രേഖ പ്രകാശനം ചെയ്യും. യൂണിറ്റ് സെക്രട്ടറി ജൂനിയ റിപ്പോര്‍ട്ട് അവതരിപ്പിക്കും. ഫൊറോന പ്രസിഡന്‍റ് ജിമ്മിച്ചന്‍, സെക്രട്ടറി ഷിബു ജോര്‍ജ്, അഞ്ജു ജോഷ് എന്നിവര്‍ പ്രസംഗിക്കും.

കരുവാറ്റ സെന്‍റ് ജോസഫ് പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാളിന് തുടക്കം

കരുവാറ്റ: സെന്‍റ് ജോസഫ് പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാളിന് ഭക്തിനിര്‍ഭരമായ തുടക്കം. തിരുനാള്‍ 11ന് സമാപിക്കും. ഇന്നു രാവിലെ ഏഴിന് വിശുദ്ധ കുര്‍ബാന. അഞ്ചുമുതല്‍ എട്ടുവരെ രാവിലെ 6.15ന് സപ്ര, 6.30ന് മധ്യസ്ഥ പ്രാര്‍ഥന, വിശുദ്ധ കുര്‍ബാന. ഒമ്പതിന് വൈകുന്നേരം 4.30ന് വികാരി ഫാ. ജയിംസ് പുളിച്ചുമാക്കല്‍ എംസിബിഎസ് കൊടിയേറ്റും. തുടര്‍ന്ന് പൂര്‍വികരുടെ അനുസ്മരണം, 5.15ന് മധ്യസ്ഥ പ്രാര്‍ഥന, വിശുദ്ധ കുര്‍ബാന - ഫാ. മാത്യു അഞ്ചല്‍. ഫാ. ജോര്‍ജ് തൈച്ചേരിയില്‍ വചനസന്ദേശം നല്‍കും. പത്തിന് രാവിലെ 6.15ന് സപ്ര, 6.30ന് മധ്യസ്ഥ പ്രാര്‍ഥന, ഏഴിന് തിരുനാള്‍ കുര്‍ബാന. ചങ്ങനാശേരി അതിരൂപത വികാരി ജനറാള്‍ ഫാ. ആന്‍റണി എത്തയ്ക്കാട്ട് മുഖ്യകാര്‍മികത്വം വഹിക്കും. പുന്നപ്ര കാര്‍മല്‍ എന്‍ജിനിയറിംഗ് കോളജ് ഡയറക്ടര്‍ ഫാ. ജസ്റ്റിന്‍ ആലുക്കല്‍ സിഎംഐ വചനപ്രഘോഷണം നടത്തും. വൈകുന്നേരം നാലിന് വചന പ്രഘോഷണവും ദിവ്യകാരുണ്യ പ്രദക്ഷിണവും. മല്ലപ്പള്ളി ദിവ്യകാരുണ്യ മരിയഭവന്‍ അസി. ഡയറക്ടര്‍ ഫാ. ജൂഡ് കൂലിപ്പറമ്പില്‍ എംസിബിഎസ് വചനസന്ദേശം നല്‍കും. ചങ്ങനാശേരി ചാസ് അസി. ഡയറക്ടര്‍ ഫാ. ജിന്‍സ് ചോരേട്ടു ചാമക്കാല ദിവ്യകാരുണ്യ പ്രദക്ഷിണത്തിന് കാര്‍മികത്വം വഹിക്കും. ഏഴിന് പാലാ കമ്യൂണിക്കേഷന്‍സ് അവതരിപ്പിക്കുന്ന ഗാനമേള. 11നു വൈകുന്നേരം നാലിന് ആഘോഷമായ റാസ കുര്‍ബാന. ചങ്ങനാശേരി അതിരൂപത യുവദീപ്തി എസ്എംവൈഎം ഡയറക്ടര്‍ ഫാ. ജോബിന്‍ ആനകല്ലുങ്കല്‍ മുഖ്യകാര്‍മികത്വം വഹിക്കും. ഫാ. ജോ കിഴക്കേമുറി വചനസന്ദേശം നല്‍കും. തുടര്‍ന്ന് തിരുനാള്‍ പ്രദക്ഷിണം, കൊടിയിറക്ക്, സ്‌നേഹവിരുന്ന്.

കൊച്ചുമകളുടെ റീൽസ് ഗോപിനാഥൻപിള്ളയെ എത്തിച്ചത് മോഹൻലാലിനൊപ്പം

ചെങ്ങന്നൂർ: തരുൺമൂർത്തിയുടെ സംവിധാനത്തിൽ മോഹൻലാൽ നായകനായി ഇറങ്ങിയ തുടരും സിനിമയിൽ അഭിനയിച്ചതിന്‍റെ സന്തോഷത്തിലാണ് 83 കാരനായ ഗോപിനാഥൻപിള്ള. ചെങ്ങന്നൂർ കല്ലിശേരി ഉമയാറ്റുകരയിലെ വള്ളിയിൽ വീട്ടിലിരുന്നു ഗോപിനാഥൻപിള്ള ആദ്യമായി സിനിമയിൽ അഭിനയിച്ചതിന്‍റെ ത്രില്ലിലാണ് സംസാരിക്കുന്നത്. ടാക്സി ഡ്രൈവറായ മോഹൻലാലിന്‍റെ അംബാസിഡർ കാറിൽ യാത്ര ചെയ്യുന്ന ഒരു സാധാരണക്കാരന്‍റെ വേഷത്തിലാണ് ഗോപിനാഥൻ പിള്ള അഭിനയിക്കുന്നത്. സിനിമയിലെ അദ്ദേഹത്തിന്‍റെ ഒരു ഡയലോഗ് ഇതിനോടകം ശ്രദ്ധ നേടിക്കഴിഞ്ഞു -ഈ വണ്ടിക്കൊരു കുലുക്കമാണെന്നും അടുത്ത പ്രാവശ്യം ഊബർ വിളിക്കത്തൊള്ളന്നു.- ഇതിനു മറുപടിയായി-അതെന്താ ഊബർ കുലുങ്ങത്തില്ലേ?- എന്ന് മോഹൻലാൽ ചോദിക്കുന്ന രംഗം രസകരമാണ്. കുറഞ്ഞസമയം മാത്രമാണെങ്കിലും ഗോപിനാഥൻപിള്ളയും മോഹൻലാലും ഒന്നിച്ചുള്ള ഈ രംഗം പ്രേക്ഷക ശ്രദ്ധ നേടി. കൊച്ചുമകൾ മിത്ര അദ്ദേഹം അറിയാതെ പകർത്തിയ ഒരു വീഡിയോയാണ് അദ്ദേഹത്തെ സിനിമയുടെ വെള്ളിത്തിരയിലേക്ക് എത്തിച്ചിരിക്കുന്നത്. മിത്രയുടെ മിത്രം എന്ന പേരിലുള്ള ഇൻസ്റ്റഗ്രാം അക്കൗണ്ടിൽ ഗോപിനാഥൻ പിള്ളയുടെ രസകരമായ നിമിഷങ്ങൾ കൊച്ചുമകൾ റീൽസായി പങ്കുവച്ചിരുന്നു. ഈ റീലുകളാണ് സംവിധായകൻ തരുൺ മൂർത്തിയുടെ ശ്രദ്ധയിൽപ്പെട്ടത്. ഗോപിനാഥൻപിള്ള ഈ സിനിമയിലെ ഒരു കഥാപാത്രത്തിന് അനുയോജ്യനാണെന്നു തോന്നിയ തരുൺ മൂർത്തി ഗോപിനാഥനുമായി ബന്ധപ്പെടുകയായിരുന്നു. സിനിമയിൽ അഭിനയിക്കണമെന്ന് ആഗ്രഹമുണ്ടായിരുന്നെങ്കിലും അപ്രതീക്ഷിതമായി അവസരം ലഭിച്ചപ്പോൾ ഗോപിനാഥൻപിള്ള ഒരല്പം പതറി. എന്നാൽ, ഭാര്യ ഓമനയും മക്കളും മരുമക്കളും കൊച്ചുമക്കളും ഒപ്പം നിന്നതോടെ അദ്ദേഹം സമ്മതം മൂളി. ഷൂട്ടിംഗ് ലൊക്കേഷനിൽ എത്തിയപ്പോൾ, തന്‍റെ ഇഷ്ടതാരങ്ങളിൽ ഒരാളായ മോഹൻലാൽ അടുത്തുവന്ന് സംസാരിച്ചത് ഗോപനാഥൻ പിള്ളയ്ക്ക് പറഞ്ഞറിയിക്കാനാവാത്ത അനുഭവമായിരുന്നു. എവിടെനിന്നാണ് വരുന്നത്, യാത്ര സുഖകരമായിരുന്നോ എന്നിങ്ങനെയുള്ള മോഹൻലാലിന്‍റെ സ്നേഹത്തോടെയുള്ള വാക്കുകൾ അദ്ദേഹത്തിന്‍റെ മനസിനെ സ്പർശിച്ചു. തുടരും സിനിമയിൽ സിനിമയിൽ അഭിനയിച്ച് ഏറെ പരിചയമുള്ള ഒരാളെപ്പോലെയാണ് ഗോപിനാഥൻപിള്ളയുടെ അഭിനയമെന്ന് സിനിമ കണ്ട അദ്ദേഹത്തിന്‍റെ നാട്ടുകാർ പറയുന്നു. മമ്മൂട്ടിയാണ് അദ്ദേഹത്തിന്‍റെ മറ്റൊര ഇഷ്ടനടൻ. സിനിമകളെല്ലാം ഇഷ്ടമാണെങ്കിലും ചെമ്മീൻ എന്ന സിനിമയോട് അദ്ദേഹത്തിന് ഒരല്പം ഇഷ്ടം കൂടുതലാണ്. ഭാര്യ ഓമനയും മകനും ഭാര്യയും കൊച്ചുമക്കളുമൊത്താണ് ജീവിതം.

മുഖഛായ മാറ്റി ജില്ലാക്കോടതിപ്പാലം: പൈലുകളുടെ നിർമാണം പുരോഗമിക്കുന്നു

ആലപ്പുഴ: നഗരത്തിന്‍റെ മുഖച്ഛായ മാറ്റുന്ന ജില്ലാ കോടതിപ്പാലത്തിന്‍റെ പുനർനിർമാണ ജോലികൾ പുരോഗമിക്കുന്നു. 90 മീറ്റർ നീളവും 60 മീറ്റർ വീതിയുമുള്ള പാലത്തിന് ആകെ 168 പൈലുകളാണുള്ളത്. ഇതിൽ 36 എണ്ണത്തിന്‍റെ നിർമാണം പൂർത്തിയാക്കി പൈൽ ക്യാപ് പ്രവൃത്തികൾ ആരംഭിച്ചു. കിഫ്ബി പദ്ധതിയിൽ ഉൾപ്പെടുത്തി വാടക്കനാലിന് കുറുകെ 120.52 കോടി രൂപ ചെലവിലാണ് പാലത്തിന്‍റെ പുനർനിർമാണം. ഇതിൽ സ്ഥലമേറ്റെടുപ്പിനായി 20.58 കോടി രൂപയും യൂട്ടിലിറ്റി ഷിഫ്റ്റിംഗിനായി 3.17 കോടി രൂപയും പ്രവൃത്തികൾക്കായി 3.64 കോടി രൂപയും ലഭ്യമായിട്ടുണ്ട്. പഴയ ജില്ലാ കോടതിപ്പാലം പൊളിച്ചാണ് പുതിയത് നിർമിക്കുന്നത്. വാഹനങ്ങളുടെ വേഗം ക്രമീകരിക്കാനാകുന്ന റൗണ്ട് എബൗട്ട് മാതൃകയിലാണ് നിർമാണം. കനാലിന്‍റെ ഇരുകരകളിലും നാലു വശങ്ങളിലേക്കായി ഫ്ലൈ ഓവറുകളും അടിപ്പാതയും റാംപ് റോഡുകളും എന്ന നിലയിലാണ് രൂപകൽപ്പന. കനാലിന് വടക്കേക്കരയിലാണ് പൈലിംഗ് ആരംഭിച്ചിട്ടുള്ളത്. പാലത്തിന്‍റെ ഗർഡറുകളുടെ പ്രവൃത്തികൾ ഉടൻ ആരംഭിക്കും. നിലവിലെ പാലം പൊളിച്ചതിനാൽ വാഹനഗതാഗതത്തിന് പഴയ പോലീസ് കൺട്രോൾ റൂമിന് കിഴക്ക് വശത്തായി താത്കാലിക സമാന്തര റോഡ് ഒരുക്കിയിട്ടുണ്ട്. ഫ്ലൈ ഓവറുകളുടെ നിർമാണത്തിനായി ജലഗതാഗതവകുപ്പിന്‍റെ ബോട്ട് ജെട്ടിയും ഓഫീസും പൊളിച്ചുനീക്കിയിരുന്നു. നിലവിൽ മാതാ ജെട്ടിയിലാണ് താത്കാലിക ബോട്ട് ജെട്ടിയും ഓഫീസും പ്രവർത്തിക്കുന്നത്.

13 വർഷത്തെ നിയമപോരാട്ടം; അങ്കണവാടിക്ക് സ്വന്തം കെട്ടിടം യാഥാർഥ്യമാക്കി

ചാരുംമൂട്: പതിമൂന്നു വർഷത്തെ നിയമപോരാട്ടത്തിനൊടുവിൽ അനിതകുമാരി അങ്കണവാടി കെട്ടിടം യാഥാർഥ്യമാക്കി. ഐസിഡിസി ഭരണിക്കാവ് ബ്ലോക്കിലെ താമരക്കുളം നലാം വാർഡ് പേരൂർ കാരാഴ്മ ആലുവിള നഗറിലെ 118-ാം നമ്പർ അങ്കണവാടിക്കാണ് സ്വന്തമായി കെട്ടിടം യാഥാർഥ്യമാകുന്നത്. വർഷങ്ങളായി വാർഡിന്‍റെ വിവിധ ഭാഗങ്ങളിൽ വാടകക്കെട്ടിടങ്ങളിലാണ് അങ്കണവാടി പ്രവർത്തിച്ചത്. 2013ൽ ഉമ്മൻ ചാണ്ടി മുഖ്യമന്ത്രിയായിരുന്ന കാലത്താണ് അങ്കണവാടി അധ്യാ പികയായ അനിത സ്വന്തമായി സ്ഥലം കണ്ടെത്തുതിന് ഇറങ്ങിത്തിരിക്കുന്നത്. കല്ലട ഇറിഗേഷന്‍റെ കനാൽ കടന്നുപോകുന്ന ഭാഗത്ത് വെറുതെ കിടക്കുന്ന സ്ഥലം അങ്കണ വാടിക്ക് കെട്ടിടം നിർമിക്കാൻ വേണ്ടി പതിച്ചുനൽകണമെന്ന ആവശ്യവുമായി മുഖ്യമന്ത്രിയായ ഉമ്മൻ ചാണ്ടിയെ നേരിൽ കണ്ടു. ഭൂമി നൽകുന്നതിനാവശ്യമായ അനുമതി മുഖ്യമന്ത്രി നൽകി. അഞ്ചു സെന്‍റ് ഭൂമി അനുദിക്കുകയായിരുന്നു. എന്നാൽ, ഭൂമി അളക്കാൻ സ്ഥലത്ത് എത്തിയ റവന്യു ഉദ്യോഗസ്ഥരെ ഒരു സംഘം ചെറുപ്പക്കാർ തടഞ്ഞു. തുടർന്ന് ചെങ്ങന്നൂർ ഡിവൈഎസ്പിയുടെ നിർദേശപ്രകാരം നൂറനാട് പോലീസ് എത്തി ഭൂമി അളന്ന് തിട്ടപ്പെടുത്തി. പിന്നീട് അയൽവാസി അങ്കണ വാടിക്ക് ലഭിച്ച സ്ഥലത്തിലൂടെയാണ് വീട്ടിലേക്കുള്ള വഴി എന്ന് കാണിച്ച് കേസ് കൊടുത്തു. ഒടുവിൽ നിയമപോരാട്ടത്തിലും വിധി അനിതയ്ക്ക് സഹായമായി. തുടർന്ന് കൊടിക്കുന്നിൽ സുരേഷ് എംപിയുടെ വികസ ഫണ്ടിൽനിന്ന് അനുവദിച്ച 15 ലക്ഷം രൂപ ഉപയോഗിച്ച് നിർമിച്ച ഹൈടക് അങ്കണവാടിയാണ് ഇപ്പോൾ യാഥാർഥ്യമാകുന്നത്. ഈ മാസം ഉദ്ഘാടനം നടത്താനാണ് തീരുമാനിച്ചിട്ടുള്ളതെന്ന് അനിത പറഞ്ഞു.

അശാസ്ത്രീയ ഓട നിര്‍മാണം, നാട്ടുകാര്‍ ദുരിതത്തില്‍

ആലപ്പുഴ: നാട്ടുകാരോ ജനപ്രതിനിധികളോ ആവശ്യപ്പെടാതെ ഒന്നരയടി ഉയരത്തില്‍ അശാസ്ത്രീയമായി ഓട നിര്‍മിച്ചതു മൂലം നാട്ടുകാര്‍ ദുരിതത്തില്‍. കഴിഞ്ഞ നാലു വര്‍ഷവും മഴക്കാലത്ത് അനുഭവിച്ച ദുരിതം ഇത്തവണയും ആവര്‍ത്തിക്കും. തോണ്ടംകുളങ്ങര വാര്‍ഡിലെ കൈചൂണ്ടിമാര്‍ക്കറ്റ് റോഡില്‍ നിര്‍മിച്ചിട്ടുള്ള ഓടയാണ് പ്രദേശത്തെ കുടുംബങ്ങളെയും നാട്ടുകാരെയും കെണിയില്‍ പെടുത്തിയിരിക്കുന്നത്. നാലുവര്‍ഷം മുന്‍പ് നഗരസഭയുടെ ഉപാധിരഹിത ഫണ്ടില്‍നിന്നു എട്ടു ലക്ഷം രൂപ ചെലവഴിച്ചാണ് ഓട നിര്‍മിച്ചത്. കണ്ടത്തില്‍ തോടുമായി ബന്ധിപ്പിക്കാന്‍ എന്ന പേരില്‍ റോഡിനു കുറുകെ ഓട നിര്‍മിച്ചതോടെ സുഗമമായ യാത്രയ്ക്കും തടസമായി. റോഡിന്‍റെ പടിഞ്ഞാറ് വശത്ത് ഒന്നരയടി ഉയരത്തില്‍ നില്‍ക്കുന്ന ഓട ഈ വശത്തെ 5 വീട്ടുകാര്‍ക്ക് പുറത്തേക്കിറങ്ങാന്‍ തടസമായി. ഓടയുടെ വടക്കേയറ്റം ഒരു വീട്ടുകാരുടെ ഗേറ്റിനു മുന്നില്‍ അവസാനിക്കുകയാണ്. മഴക്കാലത്ത് ഇവിടെ അരയ്‌ക്കൊപ്പം വെള്ളം കെട്ടിനില്‍ക്കും. സ്‌കൂള്‍ വിദ്യാര്‍ഥികളും നാട്ടുകാരും നീന്തിയാണ് പോകുന്നതെന്നു വീട്ടുകാര്‍ സങ്കടം പറഞ്ഞു. ഓടയുടെ പൊക്കത്തില്‍ റോഡ് ഉയര്‍ത്തി നിര്‍മിച്ച് വെള്ളക്കെട്ട് പരിഹരിക്കാനാണ് നീക്കം. അങ്ങനെ ചെയ്യുമ്പോള്‍ ഇതിനെക്കാള്‍ വലിയ ഭീഷണി നേരിടേണ്ടിവരും. രണ്ട് വശത്തെ വീടുകളുടെ മുറ്റവും പുരയിടവും കുറഞ്ഞത് ഒന്നരയടി താഴും. വാഹനങ്ങള്‍ റോഡിലേക്ക് ഇറക്കാന്‍ കഴിയാതെ വരും. ഇത് പരിഹരിക്കാന്‍ മുറ്റവും പുരയിടവും ഉയര്‍ത്തുമ്പോള്‍ വീടുകള്‍ താഴും- നാട്ടുകാര്‍ പറഞ്ഞു.

മുഹമ്മ ഫൊറോനാ പള്ളിയിൽ തിരുനാളിനു കൊടിയേറി

മുഹമ്മ: സെന്‍റ് ജോർജ് ഫൊറോനാ പള്ളിയിൽ വിശുദ്ധ ഗീവർഗീസ് സഹദായുടെ തിരുനാൾ വികാരി ഫാ.ആന്‍റണി കാട്ടൂപ്പാറയുടെ കാർമികത്വത്തിൽ കൊടിയേറി. 11 ന് സമാപിക്കും. ഒൻപതുവരെ ദിവസവും ജപമാല, വിശുദ്ധ കുർബാന, മധ്യസ്ഥ പ്രാർഥന എന്നിവ ഉണ്ടാകും. 10ന് കുട്ടികളുടെ വിശുദ്ധ കുർബാന സ്വീകരണം, സപ്ര, വിശുദ്ധ കുർബാന. പ്രധാന തിരുനാൾ ദിനമായ 11ന് രാവിലെ 6.15ന് സപ്ര, വിശുദ്ധ കുർബാന, തിരുനാൾ കുർബാന, തിരുനാൾ പ്രദക്ഷിണം, നേർച്ച വസ്തുക്കളുടെ ലേലം, സ്നേഹവിരുന്ന്.

വെളിയനാട് സെന്‍റ് സേവ്യേഴ്‌സ് പള്ളിയിൽ തിരുനാളിനു കൊടിയേറി

മങ്കൊമ്പ്: വെളിയനാട് സെന്‍റ് സേവ്യേഴ്‌സ് പള്ളിയിൽ വിശുദ്ധ ഫ്രാൻസിസ് സേവ്യറിന്‍റെ തിരുനാളിനു തുടക്കമായി. വികാരി ഫാ. ജോസഫ് കുറിയന്നൂർപറമ്പിൽ കൊടിയേറ്റി. ഇന്നു വൈകുന്നേരം 4.30ന് വിശുദ്ധ കുർബാന-ഫാ. ആന്‍റണി എത്തയ്ക്കാട്ട്. തുടർന്ന് പ്രദക്ഷിണം, ആകാശവിസ്മയം, ലൈറ്റ് ആൻഡ് സൗണ്ട് ഷോ. പ്രധാന തിരുനാൾ ദിനമായ നാളെ രാവിലെ 6.45ന് സപ്ര, വിശുദ്ധ കുർബാന, 9.15ന് റാസ- ഫാ. ജേക്കബ് നടുവിലേക്കളം, വാഹനവെഞ്ചരിപ്പ്, വൈകുന്നേരം അഞ്ചിന് റംശാ, തിരുനാൾ പ്രദക്ഷിണം, കൊടിയിറക്ക്, ലദീഞ്ഞ്, സമാപനാശീർവാദം, നേർച്ചവസ്തുക്കളുടെ ലേലം, രാത്രി ഏഴിന് നാടകം.

എടത്വ പള്ളിയില്‍ എന്‍ക്വയറി ഓഫീസ് പ്രവര്‍ത്തനം ആരംഭിച്ചു

എടത്വ: സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസിന്‍റെ തിരുനാളിനോടനുബന്ധിച്ച് തീര്‍ഥാടകര്‍ക്ക് ആശയവിനിമയം നടത്താനും തിരുനാ ള്‍ സംബന്ധമായ കാര്യങ്ങള്‍ അറിയാനുമായി എന്‍ക്വയറി ഓഫീസിന്‍റെ പ്രവര്‍ത്തനം ആരംഭിച്ചു. വികാരി ഫാ. ഫിലിപ്പ് വൈക്കത്തുകാരന്‍ ഉദ്ഘാടനം ചെയ്തു. കൈകാരന്മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, വിന്‍സന്‍റ് പഴയാറ്റില്‍, ജനറല്‍ കണ്‍വീനര്‍ തോമസ് ജോര്‍ജ് പറത്തറ, കണ്‍വീനര്‍ ബീന കളങ്ങര എന്നിവര്‍ പ്രസംഗിച്ചു. മലയാളത്തില്‍ 53 വര്‍ഷമായി തിരുനാളിന് സ്ഥിര സാന്നിധ്യമായ അപ്പച്ചായി വൈപ്പമഠവും തമിഴില്‍ ജോര്‍ജുമാണ് അനൗണ്‍സ്‌മെന്‍റ് ചെയ്യുന്നത്. എടത്വ പള്ളിയില്‍ ഇന്ന് രാവിലെ 4.30ന് വിശുദ്ധ കുര്‍ബാന (തമിഴ്)- ഫാ. ജെനീസ്, 5.45ന് സപ്ര, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ആർച്ച്ബി ഷപ് മാര്‍ തോമസ് തറയില്‍, തുടര്‍ന്ന് തിരുസ്വരൂപം ദേവാലയകവാടത്തില്‍ പ്രതിഷ്ഠിക്കുന്നു. 7.30 ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ആന്‍റണി കാട്ടൂപ്പാറ. 9.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ജോര്‍ജ് കളങ്ങര, 11ന് വിശുദ്ധ കുര്‍ബാന (തമിഴ് സീറോ മലബാര്‍) -ഫാ. സുബിന്‍ പുത്തന്‍പുരയ്ക്കല്‍, 2.30ന് വിശുദ്ധ കുര്‍ബാന (തമിഴ്)- ബിഷപ് ഡോ. പീറ്റര്‍ അബീര്‍ അന്തോനിസ്വാമി. വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - റവ ഡോ. റ്റോം പുത്തന്‍കളം, ആറിന് വിശുദ്ധ കുര്‍ബാന (തമിഴ്) - ഫാ. സൈമണ്‍, ഏഴിന് മധ്യസ്ഥപ്രാര്‍ഥന.

എടത്വ പള്ളിയില്‍ കുര്‍ബാന പണവും നേര്‍ച്ചകളും ഇനി ഡിജിറ്റല്‍

എടത്വ: എടത്വ പള്ളിയില്‍ കുര്‍ബാന പണം നല്‍കുന്നതും നേര്‍ച്ചകളും എല്ലാം ഇനി ഡിജിറ്റലായി ചെയ്യാം. ഏതുസമയത്തും പണം അടയ്ക്കാൻ പറ്റുന്ന തരത്തില്‍ ഡിജിറ്റല്‍ സെന്‍സര്‍ കിയോസ്‌ക് സ്ഥാപിച്ചു. മലയാളം, തമിഴ്, ഹിന്ദി, ഇംഗ്ലീഷ് ഭാഷകളില്‍ ഉപയോഗിക്കാന്‍ എളുപ്പമുള്ള വോയ്‌സ് അസിസ്റ്റഡ് ഇന്‍റര്‍ഫേസ് ആയതിനാല്‍ ആർക്കും എളുപ്പത്തില്‍ സേവനം ലഭിക്കും. ഭാഷ തെരഞ്ഞെടുത്ത് നമ്മുടെ പേരും അഡ്രസും ടൈപ്പ് ചെയ്ത് നല്‍കിയശേഷം ആവശ്യമുള്ള നേര്‍ച്ച വിവരങ്ങള്‍ നല് കാവുന്നതരത്തിലാണ് കിയോസ്‌ക്കിന്‍റെ പ്രവര്‍ത്തനം. സ്വയം വിവരണാത്മക ടച്ച് സ്‌ക്രീനായതിനാല്‍ കുര്‍ബാന, നൊവേന, ഒപ്പീസ്, മുത്തുക്കുട, നേര്‍ച്ച എണ്ണ, മറ്റ് വഴിപാടുകള്‍, ചാരിറ്റി സഹായങ്ങള്‍, വിദ്യാഭ്യാസം, വിവാഹം, ഭവന നിര്‍മാണം, മെഡിക്കല്‍ സഹായങ്ങള്‍ എന്നിവയ്ക്ക് പ്രത്യേകമായി സംഭാവനകള്‍ ഏതൊരാള്‍ക്കും ആരുടേയും സഹായമില്ലാതെ തന്നെ നല്‍കാനും ബുക്കിംഗും സാധിക്കും. ഗൂഗിള്‍പേ, പേറ്റിഎം പോലുള്ള യുപിഐ പേയ്‌മെന്‍റ് ആയതിനാല്‍ സ്‌ക്രീനില്‍ തെളിയുന്ന യുപിഐ ക്യൂആര്‍ കോഡ് ഉപയോഗിച്ച് പണം അടച്ചാല്‍ ഉടനെ തന്നെ രസീതും ലഭിക്കും. കിയോസ്‌കില്‍ ബുക്ക് ചെയ്യുന്ന എല്ലാ കാര്യങ്ങളും പള്ളിയുടെ കമ്പ്യൂട്ടറില്‍ തരം തിരിച്ച് ലഭിക്കുകയും ചെയ്യും. ഫെഡറല്‍ ബാങ്ക് തലവടി ശാഖയാണ് ഡിജിറ്റല്‍ കിയോസ്‌ക് സ്പോണ്‍സര്‍ ചെയ്തത്. വികാരി ഫാ. ഫിലിപ്പ് വൈക്കത്തുക്കാരന്‍ ഉദ്ഘാടനം നിര്‍വഹിച്ചു. കൈക്കാരന്മാരായ പി.എസ്. ടോമിച്ചന്‍ പറപ്പള്ളി, വിന്‍സന്‍റ് തോമസ് പഴയാറ്റില്‍, കെ.എം. ജയിംസ് കളത്തൂര്‍, തിരുനാള്‍ ജനറല്‍ കണ്‍വീനര്‍ ജോസി പറത്തറ, അക്കൗണ്ടന്‍റ് സാജു മാത്യു, ഫെഡറല്‍ ബാങ്ക് തിരുവനന്തപുരം സോണല്‍ ഹെഡ് കെ.വി. ഷിജു, ആലപ്പുഴ റീജണല്‍ ഹെഡ് വിപിന്‍ വി. ഉണ്ണിത്താന്‍, തലവടി ബ്രാഞ്ച് ഹെഡ് എ.എം. അനുബിസ്, അസി. മാനേജര്‍ സാന്ദ്ര മേരി ഷാജി എന്നിവര്‍ പ്രസംഗിച്ചു.

കായൽപ്പുറം പള്ളിയിൽ തിരുനാൾ

മങ്കൊമ്പ്: കുട്ടനാട്ടിലെ വിശുദ്ധ യൗസേപ്പിതാവിന്‍റെ തീർഥാടന കേന്ദ്രമായ പുളിങ്കുന്ന് കായൽപ്പുറം സെന്‍റ് ജോസഫ് പള്ളിയിൽ വിശുദ്ധ യൗസേപ്പിതാവിന്‍റെ മധ്യസ്ഥ തിരുനാൾ അഞ്ചു മുതൽ 11 വരെ നടക്കും. പ്രാരംഭദിനമായ അഞ്ചിന് വൈകുന്നേരം 4.45 നു കൊടിയേറ്റ്- വികാരി ഫാ. അഗസ്റ്റിൻ പൊങ്ങനാംതടത്തിൽ. തുടർന്ന് വിശുദ്ധ കുർബാന, വചനസന്ദേശം, മധ്യസ്ഥപ്രാർഥന, തിരുനാൾ ദിനങ്ങളിൽ രാവിലെ 6.15നു സപ്ര, വിശുദ്ധ കുർബാന, വൈകുന്നേരം 4.30ന് ജപമാല, വിശുദ്ധ കുർബാന. ആറിന് വൈകുന്നേരം 4.30ന് ജപമാല, വിശുദ്ധ കുർബാന, വചനസന്ദേശം, മധ്യസ്ഥപ്രാർഥന, ലദീഞ്ഞ്, പ്രദക്ഷിണം. ഏഴിന് വൈകുന്നേരം നാലിന് സമർപ്പിത സംഗമം, തുടർന്ന് ജപമാല, ജൂബിലി തീർഥാടനം, 5.30ന് വിശുദ്ധ കുർബാന, വചനസന്ദേശം, മധ്യസ്ഥപ്രാർഥന, ചങ്ങനാശേരി ആർച്ച്ബിഷപ് മാർ തോമസ് തറയിൽ. ഏഴിന് ഇടവക ദിനാഘോഷം ചങ്ങനാശേരി അതിരൂപത വികാരി ജനറാൾ ഫാ. ആന്‍റണി എത്തയ്ക്കാട്ട് ഉദ്ഘാടനം ചെയ്യും. ഒൻപതിന് വൈകുന്നേരം 4.30ന് ജപമാല, വിശുദ്ധ കുർബാന, സന്ദേശം, മധ്യസ്ഥപ്രാർഥന, രാത്രി ഏഴിന് നാടകം. പത്തിന് വിശുദ്ധ കുർബാന സ്വീകരണം, രാവിലെ 6.45ന് സപ്ര, വിശുദ്ധ കുർബാന, സന്ദേശം, വൈകുന്നേരം മൂന്നിന് തിരുസ്വരൂപം പ്രധാന കവാടത്തിൽ എഴുന്നള്ളിച്ചുവയ്ക്കുന്നു. തുടർന്ന വാഹനവെഞ്ചരിപ്പ്, 3.30ന് ജപമാല, വിശുദ്ധ കുർബാന, ദിവ്യകാരുണ്യ ആരാധന, 5.30ന് ദിവ്യകാരുണ്യ പ്രദക്ഷിണം, തുടർന്ന മധ്യസ്ഥപ്രാർഥന, ലദീഞ്ഞ്, തുറവശേരി ജംഗ്ഷനിലേക്ക് പ്രദക്ഷിണം. പ്രധാന തിരുനാൾ ദിനമായ 11ന് രാവിലെ ആറിന് വിശുദ്ധ കുർബാന, വചനസന്ദേശം, ഫാ. ജയ്‌സൺ മാവേലിൽ, എട്ടിനും 12നും വൈകുന്നേരം 3.30നും നടക്കുന്ന വിശുദ്ധ കുർബാനകൾക്ക് റവ.ഡോ. ടോം പുത്തൻകളം, ഫാ. ജോബി പരുവപ്പറമ്പിൽ, ഫാ. ജേക്കബ് കാട്ടടി എന്നിവർ മുഖ്യകാർമികത്വം വഹിക്കും. 10ന് തിരുനാൾ കുർബാന-ഫാ. ജിജോ കുറിയന്നൂർപറമ്പിൽ, വൈകുന്നേരം അഞ്ചിന് മധ്യസ്ഥപ്രാർഥന, തിരുനാൾ പ്രദക്ഷിണം, ഫാ. ജയിംസ് കണിക്കുന്നേൽ, ആറിന് കൊടിയിറക്ക്, നേർച്ചസാധനങ്ങളുടെ ലേലം. പത്രസമ്മേളനത്തിൽ വികാരി ഫാ. അഗസ്റ്റിൻ പൊങ്ങനാംതടത്തിൽ, കൈക്കാരൻ ജോസഫ് ജോസഫ് തെക്കേവയലാറ്റ്, തിരുനാൾ കമ്മിറ്റി പ്രസിഡന്‍റ് സാബു കോയിപ്പള്ളി, ട്രഷറർ സാബു പുന്നൂർ, പബ്ലിസിറ്റി-ട്രാൻസ്‌പോർട്ട് കമ്മിറ്റി ഭാരവാഹികളായ ജോസ്് ആക്കാത്തറ, അനോജ് മൂലേപ്പറമ്പിൽ എന്നിവർ പങ്കെടുത്തു.

പുതിയ കെട്ടിടം യാഥാര്‍ഥ്യായി; പുതുചിരിയുമായി ഗവ. ഡെന്‍റല്‍ കോളജ്

ആലപ്പുഴ: ഒരു പതിറ്റാണ്ട് കാലത്തെ വാടകക്കെട്ടിട മേല്‍വിലാസത്തിന് അവസാനം കുറിച്ച് ഗവ. ഡെന്‍റല്‍ കോളജ് സ്വന്തം കെട്ടിടത്തിലേക്ക്. 3.85 കോടി രൂപ ചെലവില്‍ മൂന്നുനിലകളിലായി നിര്‍മിച്ച കെട്ടിടം ഇന്ത്യന്‍ ഡെന്‍റല്‍ കൗണ്‍സില്‍ നിര്‍ദേശിച്ച എല്ലാ മാനദണ്ഡങ്ങളും അനുസരിച്ചാണ് നിര്‍മിച്ചിരിക്കുന്നത്. പഠനത്തിനും പരിശീലനത്തിനും ആവശ്യമായ എല്ലാ സൗകര്യങ്ങളും സമ്പൂര്‍ണമായി ഇവിടെ ഒരുക്കിയിട്ടുണ്ട്. നാല് ക്ലാസ് മുറി, ക്ലിനിക്, 50 പേര്‍ക്ക് ഒരേസമയം പരീക്ഷ എഴുതാന്‍ കഴിയുന്ന ഹാള്‍, 500 പേര്‍ക്ക് ഇരിക്കാന്‍ കഴിയുന്ന ഓഡിറ്റോറിയം, വിശാലമായ ലൈബ്രറി, പ്രിന്‍സിപ്പലിനും അധ്യാപകര്‍ക്കും ജീവനക്കാര്‍ക്കും നഴ്സുമാര്‍ക്കായി പ്രത്യേകം മുറികള്‍ തുടങ്ങിയ സൗകര്യങ്ങളാണ് കെട്ടിടത്തില്‍ ഒരുക്കിയിട്ടുള്ളത്. നിലവില്‍ വിദ്യാര്‍ഥികളുടെ ക്ലാസുകള്‍ ഇങ്ങോട്ട് മാറ്റിയിട്ടുണ്ട്. ശേഷിക്കുന്ന അവസാനഘട്ട നടപടികളെല്ലാം പൂര്‍ത്തിയാക്കി കെട്ടിടം ഉടന്‍ ഉദ്ഘാടനം ചെയ്യാനുള്ള ഒരുക്കത്തിലാണ് അധികൃതര്‍. ഒരു ക്ലാസില്‍ 50 കുട്ടികള്‍ വീതം ആറു ബാച്ചുകളാണ് കോള ജിലുള്ളത്. ഓറല്‍ മെഡിസിന്‍ ആന്‍ഡ് റേഡിയോളജി, കൃത്രിമ ദന്തരോഗ വിഭാഗം, മോണരോഗവിഭാഗം, കണ്‍സര്‍വേറ്റീവ് ഡെന്‍റിസ്ട്രി ആന്‍ഡ് എന്‍ഡോഡോണ്‍ടിക്സ്, ദന്തരോഗ വിഭാഗം, ഓറല്‍ ആന്‍ഡ് മാക്സിലോഫേഷ്യല്‍ സര്‍ജറി, കുട്ടികളുടെ ദന്തരോഗ വിഭാഗം, സാമൂഹിക ദന്തരോഗ വിഭാഗം, ഓറല്‍ പത്തോളജി തുടങ്ങിയ ഒമ്പത് വിഭാഗങ്ങളാണ് മെഡിക്കല്‍ കോളജില്‍ ഉള്ളത്. ദിവസം രണ്ടു മണിക്കൂര്‍ തിയറി ക്ലാസുകളും ബാക്കി സമയം പ്രാക്ടിക്കല്‍ ക്ലാസുകളും നടക്കും. അടിസ്ഥാന സൗകര്യങ്ങള്‍ കൂടുതല്‍ മെച്ചമാക്കുന്നതിന്‍റെ ഭാഗമായി ഹോസ്റ്റലുകളും ക്വാര്‍ട്ടേഴ്സുകളും അടുത്ത ഘട്ടത്തില്‍ പൂര്‍ണമാക്കാനുള്ള നടപടികള്‍ പുരോഗമിക്കുകയാണ്.

നിര്‍മാണം പൂര്‍ത്തീകരിച്ച് തൃക്കുന്നപ്പുഴ പാലം ഓഗസ്റ്റ് 31നകം തുറന്നുകൊടുക്കും

ആലപ്പുഴ: തൃക്കുന്നപ്പുഴ ലോക്ക് കം ബ്രിഡ്ജിന്‍റെ ടോപ് സ്ലാബ്, ബീം എന്നിവയുടെ നിര്‍മാണപ്രവര്‍ത്തനങ്ങള്‍ പൂര്‍ത്തീകരിച്ച് ഓഗസ്റ്റ് 31 നകം ഗതാഗതത്തിനു തുറന്നുകൊടുക്കാന്‍ തീരുമാനം. പാലത്തിന്‍റെ നിര്‍മാണ പുരോഗതി വിലയിരുത്തുന്നതിന് ജില്ലാകളക്ടര്‍ അലക്സ് വര്‍ഗീസിന്‍റെ അധ്യക്ഷതയില്‍ കളക്ടറുടെ ചേംബറില്‍ ചേര്‍ന്ന യോഗത്തിലാണ് തീരുമാനം. നിലവില്‍ ഇരുകരകളിലുമുള്ള അബെറ്റ്മെന്‍റ് പൂര്‍ത്തീകരിച്ചിട്ടുണ്ട്. മധ്യത്തിലുള്ള തൂണിന്‍റെ കോണ്‍ക്രീറ്റിംഗ് ജോലി 31 നകം പൂര്‍ത്തീകരിക്കും. അപ്രോച്ച് റോഡിന്‍റെ നിര്‍മാണപ്രവര്‍ത്തനത്തിനു മുന്നോടിയായുള്ള മണ്ണ് പരിശോധന തിരുവനന്തപുരം എന്‍ജിനിയറിംഗ് കോളജ് പൂര്‍ത്തിയാക്കിയിട്ടുണ്ട്. റിപ്പോര്‍ട്ട് ഉടന്‍ ലഭ്യമാകും. തുടര്‍ന്ന് അപ്രാച്ച് റോഡ് നിര്‍മാണപ്രവൃത്തി ഉടന്‍ ആരംഭിക്കും. തൃക്കുന്നപ്പുഴ ലോക്ക് കം ബ്രിഡ്ജിന്‍റെ ശേഷിക്കുന്ന പ്രവൃത്തികളും പൂര്‍ത്തീകരിച്ച് ഡിസംബര്‍ 31 നകം ജലഗതാഗതത്തിനു തുറന്നുകൊടുക്കാനും യോഗത്തില്‍ തീരുമാനിച്ചു. തൃക്കുന്നപ്പുഴ പഞ്ചായത്തിലെ കടലാക്രമണഭീഷണി പ്രതിരോധിക്കുന്നതിനുള്ള ജിയോബാഗ് തയാറാക്കുന്നതിനാവശ്യമായ മണല്‍ കെഎംഎല്ലില്‍നിന്ന് അടിയന്തരമായി ലഭ്യമാക്കാനും ജില്ലാ കളക്ടര്‍ യോഗത്തില്‍ നിര്‍ദേശം നല്‍കി. രമേശ് ചെന്നിത്തല എംഎല്‍എയുടെ നിര്‍ദേശപ്രകാരം ചേര്‍ന്ന യോഗത്തില്‍ ജില്ലാ പഞ്ചായത്ത് ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പെഴ്സണ്‍ ടി.എസ്. താഹ, ജില്ലാ പഞ്ചായത്തംഗം ജോണ്‍ തോമസ്, തൃക്കുന്നപ്പുഴ പഞ്ചായത്ത് പ്രസിഡന്‍റ് എസ.് വിനോദ്കുമാര്‍, ആരോഗ്യസ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ സിയാര്‍ തൃക്കുന്നപ്പുഴ, മേജര്‍ ഇറിഗേഷന്‍ എക്സിക്യൂട്ടീവ് എന്‍ജിനിയര്‍ എംഡി സജീവ് കുമാര്‍, അസി. എന്‍ജിനിയര്‍ കെ.വി. വിപിന്‍ എന്നിവര്‍ പങ്കെടുത്തു.

350 കിലോ നിരോധിത പ്ലാസ്റ്റിക് ഉത്പന്നങ്ങള്‍പിടികൂടി

ആലപ്പുഴ: തദ്ദേശ സ്വയംഭരണവകുപ്പ് ജില്ല എന്‍ഫോഴ്‌സ്മെന്‍റ് സ്‌ക്വാഡ് കണ്ടല്ലൂര്‍ പഞ്ചായത്ത് പരിധിയില്‍ നടത്തിയ പരിശോധനയില്‍ 350 കിലോ സര്‍ക്കാര്‍ നിരോധിത പ്ലാസ്റ്റിക് ഉത്പന്നങ്ങള്‍ പിടികൂടി. അറഫാ സ്റ്റോഴ്സ്, എ.എസ്. ട്രേഡേഴ്സ്, രവി സ്റ്റോര്‍, നിര്‍മണ്‍, പ്രകാശ് സ്റ്റോഴ്സ്, കമലാ സ്റ്റോര്‍, ഹോളിഡേ സൂപ്പര്‍ മാര്‍ക്കറ്റ് എന്നി സ്ഥാപനങ്ങളില്‍നിന്നാണ് നിരോധിത പ്ലാസ്റ്റിക് ഉത്പന്നങ്ങള്‍ പിടികൂടിയത്. ഈ സ്ഥാപനങ്ങളില്‍നിന്ന് 40,000 രൂപ പിഴ ഈടാക്കാന്‍ സ്‌ക്വാഡ് ശുപാര്‍ശ ചെയ്തു. 19 സ്ഥാപനങ്ങളില്‍ നടത്തിയ പരിശോധനയില്‍ നിയമലംഘനങ്ങള്‍ കണ്ടെത്തിയതിനെത്തുടര്‍ന്ന് ഒമ്പത് സ്ഥാപനങ്ങള്‍ക്ക് നോട്ടീസ് നല്‍കി. ജോയിന്‍റ് ബിഡിഒ ബിന്ദു വി. നായര്‍, സീനിയര്‍ എക്സ്റ്റന്‍ഷന്‍ ഓഫീസര്‍ കെ.എസ്. വിനോദ്, ശുചിത്വ മിഷന്‍ പ്രതിനിധി നിഷാദ്, മലിനീകരണ നിയന്ത്രണ ബോര്‍ഡ് സാങ്കേതിക വിദഗ്ധന്‍ അഖില്‍, പഞ്ചായത്ത് അസി. സെക്രട്ടറി രാജഗോപാല്‍ തുടങ്ങിയവര്‍ പരിശോധനയ്ക്കു നേതൃത്വം നല്‍കി. വരും ദിവസങ്ങളിലും പരിശോധന ശക്തമാക്കുമെന്ന് ജില്ലാ എന്‍ഫോഴ്സ്മെന്‍റ് സ്‌ക്വഡ് അറിയിച്ചു.

ചെങ്ങന്നൂരിലെ ഗതാഗതപരിഷ്‌കാരം അശാസ്ത്രീയമെന്ന് വ്യാപക പരാതി

ചെങ്ങന്നൂര്‍: ശാസ്ത്രീയമായ പഠനമോ കൃത്യമായ ആസൂത്രണമോ ഇല്ലാതെ നഗരത്തിലെ ഗതാഗതക്കുരുക്കഴിക്കാന്‍ നടപ്പാക്കുന്ന പരിഷ്‌കാരം ഫലപ്രദമാകില്ലെന്ന് ആക്ഷേപം. നിര്‍ദേശങ്ങളില്‍ പലതും പ്രായോഗികമല്ലെന്നും ആക്ഷേപമുണ്ട്. പ്രധാനമായും കല്ലിശേരിയില്‍നിന്നു വാഹനങ്ങള്‍ വഴി തിരിച്ചുവിടുന്നതിലെ അവ്യക്തത യാത്രക്കാര്‍ക്കു തലവേദനയാകും. കാറുകള്‍ ഉള്‍പ്പെടെയുള്ള ലൈറ്റ് മോട്ടര്‍ വാഹനങ്ങള്‍ (എല്‍എംവി) കല്ലിശേരിമംഗലം ബൈപാസ് വഴി പോകണമെന്നാണ് കല്ലിശേരിയില്‍ സ്ഥാപിച്ച ദിശാബോര്‍ഡിലെ നിര്‍ദേശം. എന്നാല്‍, ദീര്‍ഘദൂര യാത്രക്കാരെ ഉദ്ദേശിച്ചാണ് ഈ മാര്‍ഗമെന്നും കല്ലിശേരി ഭാഗത്തു നിന്നു ചെങ്ങന്നൂര്‍ നഗരത്തിലെത്തേണ്ട നാട്ടുകാര്‍ ഉള്‍പ്പെടെയുള്ള ഹ്രസ്വദൂര യാത്രക്കാര്‍ ഇതു കണക്കിലെടുക്കേണ്ടെന്നുമാണു മോട്ടോര്‍ വാഹനവകുപ്പിന്‍റെ വിശദീകരണം. കല്ലിശേരി, തിരുവന്‍വണ്ടൂര്‍, പ്രാവിന്‍കൂട് ഭാഗത്തുള്ളവര്‍ക്കു ടൗണില്‍ പ്രവേശിക്കാന്‍ എംസി റോഡ് ഉപയോഗിക്കാം. മുളക്കുഴ, പന്തളം, കൊട്ടാരക്കര, തിരുവനന്തപുരം ഭാഗത്തേക്കു പോകേണ്ട ലൈറ്റ് മോട്ടര്‍ വാഹനങ്ങള്‍ (കാര്‍, പിക്കപ് വാന്‍) ബൈപാസിലൂടെ തന്നെ കടന്നുപോകണം. പക്ഷേ നാട്ടുകാരല്ലാത്ത യാത്രക്കാര്‍ക്ക് ഇക്കാര്യം മനസിലാകണമെങ്കില്‍ ടൗണിലേക്കു പോകാന്‍ ഇതുവഴി എന്ന് ബോര്‍ഡ് കൂടി സ്ഥാപിക്കണമെന്നാണ് ആവശ്യം. ബഥേല്‍ ത്രിവേണി റോഡില്‍ വണ്‍വേ സമ്പ്രദായം നടപ്പാക്കുമ്പോള്‍ ഈ റോഡരികിലെ താമസക്കാര്‍ക്ക് ഇളവു നല്‍കിയിട്ടുണ്ട്. ഇക്കാര്യം നടപ്പാക്കാനും പ്രായോഗിക ബുദ്ധിമുട്ടുണ്ട്. പേരിശേരി മഠത്തുംപടി ഭാഗത്തുനിന്നെത്തുന്നവര്‍ വെള്ളാവൂര്‍ ജംഗ്ഷനിലെത്തി എംസി റോഡില്‍ കടക്കണമെന്നാണു നിര്‍ദേശം.

കുമാരകോടിയിലേക്ക് അക്ഷരതീർഥയാത്ര

ഹരിപ്പാട്: ചിങ്ങോലി യുവജന സമാജം ഗ്രന്ഥശാലയിൽ പ്രവർത്തിക്കുന്ന ബാലവേദിയുടെ നേതൃത്വത്തിൽ നടന്നുവന്ന ത്രിദിന കളിമുറ്റം അവധിക്കാല പഠനകളരിയുടെ സമാപനദിവസം മഹാകവി കുമാരനാശാൻ അന്ത്യവിശ്രമം കൊള്ളുന്ന പല്ലന കുമാരകോടിയിലേക്ക് അക്ഷരതീർഥയാത്ര സംഘടിപ്പിച്ചു. ക്യാമ്പിൽ പങ്കെടുത്ത 103 കുട്ടികളും അവരുടെ രക്ഷകർത്താക്കളും പങ്കെടുത്തു. കുമാരകോടിയിൽ ആശാൻ കവിതകളുടെ ആസ്വാദ്യത എന്ന വിഷയത്തിൽ സെമിനാർ നടത്തി. അമ്പലപ്പുഴ കുഞ്ചൻ നമ്പ്യാർ സ്മാരക സമിതയംഗം മുഞ്ഞിനാട്ട് രാമചന്ദ്രൻ അധ്യക്ഷനായി. ജില്ലാ പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷൻ ടി.എസ്. താഹ ഉദ്ഘാടനം ചെയ്തു. സാഹിത്യകാരൻ സജിദ്ഖാൻ പനവേലിൽ, എം.എ. കലാം, അനീഷ് എസ്. ചേപ്പാട്, ഗംഗാദേവി കുഞ്ഞമ്മ, പ്രഫ. വസന്തകുമാരി, ഗോകുൽ പല്ലന എന്നിവർ പ്രസംഗിച്ചു.

മീൻകുളത്തിലെ മലിനജലം വിനയായി; നെൽകർഷകരുടെ വിള ചീഞ്ഞുനശിച്ചു

അന്പലപ്പുഴ: മീൻ വളർത്തൽ കുളത്തിലെ മലിനജലം പാടശേഖരത്തെത്തിയതോടെ കൃഷി നശിച്ചു. കൊയ്ത്ത് ഉപേക്ഷിച്ച് കർഷകർ. മാസങ്ങൾ നീണ്ട കർഷകരുടെ അധ്വാനം പാഴായി. അമ്പലപ്പുഴ വടക്ക് പഞ്ചായത്ത് കഞ്ഞിപ്പാടം കാട്ടുകോണം പാടശേഖരത്തെ കർഷകർക്കാണ് ലക്ഷങ്ങളുടെ നഷ്ടം സംഭവിച്ചത്. പാടശേഖരത്തിന്‍റെ തൊട്ടടുത്തുതന്നെ ഏതാനും വർഷമായി സ്വകാര്യവ്യക്തി കുളത്തിൽ മീൻ വളർത്തുകയാണ്. 380 ഏക്കറുള്ള പാടശേഖരത്ത് കൃഷി 120 ദിവസം കഴിഞ്ഞതോടെ കർഷകർ കൊയ്ത്തിനു തയാറെടുക്കുമ്പോഴാണ് മീൻകുളത്തിൽ വെള്ളം നിറച്ചത്. ഇതിലെ മലിനജലം ഉറവയായി പാടശേഖരത്തിൽ എത്തിയതോടെ നെല്ല് ചീഞ്ഞു തുടങ്ങി. പത്തേക്കറോളം കൃഷിസ്ഥലം എണ്ണമയം നിറഞ്ഞുകിടക്കുകയാണ്. കഴിഞ്ഞദിവസം കൊയ്ത്തിന് യന്ത്രമുൾപ്പെടെ എത്തിച്ചപ്പോഴാണ് നെല്ല് ചീഞ്ഞത് കണ്ടത്. ഇനി ഇത് കൊയ്തെടുക്കാൻ കഴിയില്ലെന്നാണ് കർഷകർ പറയുന്നത്. ഏക്കറിന് 50,000 രൂപയോളം ചെലവഴിച്ചാണ് കർഷകർ കൃഷി പൂർത്തിയാക്കിയത്. മണ്ണിൽ പൊന്നുവിളയിക്കുന്ന കർഷകരുടെ മാസങ്ങൾ നീണ്ട അധ്വാനവും പാഴായിരിക്കുകയാണ്. കൊയ്ത്ത് ഉപേക്ഷിച്ചതോടെ ലക്ഷങ്ങളുടെ നഷ്ടമാണ് കർഷകർക്കുണ്ടായിരിക്കുന്നത്. മീൻ വളർത്തൽ കുളത്തിലെ മലിനജലം കഴിഞ്ഞ കൊയ്ത്തുകാലത്തും ഇതേരീതിയിൽ പാടശേഖരത്ത് ഒഴുകിയെത്തിയിരുന്നു. ഇതിനെതിരേ കൃഷിവകുപ്പിന് പരാതി നൽകിയിട്ടുണ്ടെന്നും കർഷകർ പറഞ്ഞു.

മാവേലിക്കര ജില്ലാ ആശുപത്രിയിൽ പുതിയ പേ വാർഡ് നിർമിക്കാൻ നടപടിയായി

മാവേലിക്കര: ജില്ലാ ആശുപത്രിയിൽ അത്യാധുനിക നിലവാരത്തിലുള്ള പുതിയ പേവാർഡ് നിർമാണം ഉടൻ ആരംഭിക്കുമെന്ന് എം.എസ്. അരുൺകുമാർ എംഎൽഎ അറിയിച്ചു. കേരള ഹെൽത്ത് റിസർച്ച് ആൻഡ് വെൽഫെയർ സൊസൈറ്റി അഞ്ചു കോടി രൂപ വിനിയോഗിച്ചാണ് പേവാർഡ് നിർമിക്കുന്നത്. ഗ്രൗണ്ട് ഫ്ലോർ ഉൾപ്പെടെ അഞ്ചു നിലകളോടുകൂടിയ കെട്ടിടമാണ് നിർമിക്കുക. അമ്പതോളം എസി ഡീലക്സ് റൂമുകളാണ് നിർമിക്കുന്നത്. ഗ്രൗണ്ട് ഫ്ലോർ പാർക്കിംഗിനായിരിക്കും. ഓരോ റൂമിലും പേഷ്യൻസ് ബെഡ്, ബൈ സ്റ്റാൻഡർ ബെഡ്, ഓവർ ഹെഡ് ടേബിൾ, ബെഡ് സൈഡ് ലോക്കർ, ഐ.വി സ്റ്റാൻഡ്, സെൻട്രലൈസ്ഡ് ഓക്സിജൻ, മേശ കസേര, ടോയ്‌ലറ്റ്, സോളാർ വാട്ടർ ഹീറ്റർ എന്നിവ ഉണ്ടാകും. കൂടാതെ നഴ്സിംഗ് സ്റ്റേഷൻ, ഡ്രസിംഗ് റൂം, ലിഫ്റ്റ്, റാമ്പ്, സോളാർ പാനൽ, ജനറേറ്റർ, യുപിഎസ് എന്നിവയും ഉണ്ടാകും. 1978ൽ നിർമിച്ച നിലവിലെ പേ വാർഡ് പൊളിച്ചുനീക്കും. ഡയാലിസിസ് സെന്‍റർ പ്രവർത്തിക്കുന്ന കെട്ടിടത്തിനു പിന്നിൽ കാന്‍റീൻ കെട്ടിടത്തിനു സമീപം വരെയാണ് പേ വാർഡ് കെട്ടിടം നിർമിക്കുക. പേ വാർഡ് നിർമാണവുമായി ബന്ധപ്പെട്ട് എംഎൽഎ വിളിച്ചുചേർത്ത യോഗത്തിൽ കേരള ഹെൽത്ത് റിസർച്ച് ആൻഡ് വെൽഫെയർ സൊസൈറ്റി റീജണൽ മാനേജർ അൻസാർ. കെ.കെ, അസി. എൻജിനിയർ ശാലിനി, ജില്ലാ ആശുപത്രി സൂപ്രണ്ട് ഡോ. ജിതേഷ് കെ.എ, ഇൻഫ്രാസ്‌ട്രക്ചർ നോഡൽ ഓഫീസർ ഡോ. വിനീഷ്. പി. വി, ലേ സെക്രട്ടറി ടെസി ഏബ്രഹാം എന്നിവർ പങ്കെടുത്തു.

ജീവന്‍റെ മൂല്യം അറിയിച്ച് ഫിയാത്ത് മിഷന്‍ കോണ്‍ഗ്രസില്‍ പ്രോലൈഫ് എക്‌സിബിഷന്‍

ചങ്ങനാശേരി: ചെത്തിപ്പുഴ പ്ലാസിഡ് സ്‌കൂള്‍ ഗ്രൗണ്ടില്‍ ക്രമീകരിച്ചിരിക്കുന്ന ഫിയാത്ത് ഗ്രാന്‍ഡ് കോണ്‍ഫറന്‍സ് എക്‌സിബിഷനില്‍ ജീവന്‍റെ മൂല്യം പ്രതിപാദിക്കുന്ന പ്രൊലൈഫ് എക്‌സിബിഷന്‍ ജനശ്രദ്ധയാകര്‍ഷിച്ചിരിക്കുന്നു. 27 വര്‍ഷമായി പ്രോലൈഫ് രംഗത്ത് സജീവമായി കേരളം ഒട്ടാകെ പ്രവര്‍ത്തിക്കുന്ന ചങ്ങനാശേരി കൃപ പ്രോലൈഫേഴ്‌സാണ് എക്‌സിബിഷന്‍ ക്രമീകരിച്ചിരിക്കുന്നത്. മനുഷ്യ ജീവന്‍റെ ആരംഭ നിമിഷം മുതല്‍ സ്വാഭാവിക മരണംവരെ ജീവന് ഭീഷണിയായി നില്‍ക്കുന്ന എല്ലാ വിഷയങ്ങളും ഈ എക്‌സിബിഷനില്‍ കാണാം. മദ്യം, മയക്കുമരുന്ന്, പുകവലി, സിന്തറ്റിക് ഡ്രഗ്‌സ്, മൊബൈല്‍ അഡിക്‌ഷന്‍, ആത്മഹത്യ, ലോകത്തിനു ഭീഷണിയായിരിക്കുന്ന ജനസംഖ്യയിലെ ഇടിവ്, ലൈംഗിക മേഖലകളിലെ തിന്മയുടെ പുതിയ പ്രവണതകള്‍ തുടങ്ങിയവയും ഗര്‍ഭപാത്രത്തില്‍ ഉരുവായ നിമിഷം മുതല്‍ ഗര്‍ഭസ്ഥ ശിശുവിന്‍റെ വളര്‍ച്ചയുടെ വിവിധ ഘട്ടങ്ങള്‍, ഗര്‍ഭഛിദ്രം, വന്ധ്യംകരണം, കൃത്രിമ കുടുംബ സംവിധാനങ്ങള്‍ ഇവയിലൂടെ നടക്കുന്ന അധാര്‍മിക തിന്മകള്‍ ഇവയെക്കുറിച്ചുമെല്ലാം വിശദീകരണം പ്രത്യേക സ്റ്റാളുകളിലായി ക്രമീകരിച്ചിരിക്കുന്നു. ഗര്‍ഭസ്ഥ ശിശുവിന്‍റെ വിവിധ പ്രായത്തിലുള്ള സ്‌പെസിമെനുകളും ഈ എക്‌സിബിഷനില്‍ നിങ്ങള്‍ക്കു കാണാം. അമ്മയുടെ ഉദരത്തില്‍ ആയിരിക്കുന്ന ഗര്‍ഭസ്ഥ ശിശുവിനെ വധിക്കുന്ന വിവിധ രീതികളുടെ ക്രൂരതകള്‍ എക്‌സിബിഷനില്‍ വരച്ചുകാട്ടുന്നു. നാലുവരെ രാവിലെ പത്തുമുതൽ രാത്രി ഏഴുവരെ പ്രോലൈഫ് എക്‌സിബിഷന്‍ കാണാന്‍ പൊതുജനങ്ങള്‍ക്ക് അവസരം ഉണ്ടായിരിക്കും.

ഡോ. റാണി മരിയ തോമസ് അസംപ്ഷന്‍ കോളജ് പ്രിന്‍സിപ്പല്‍

ചങ്ങനാശേരി: അസംപ്ഷന്‍ കോളജിന്‍റെ 18-ാമത്തെ പ്രിന്‍സിപ്പലായി ഡോ. റാണി മരിയ തോമസ് നിയമിതയായി. റവ.ഡോ. തോമസ് പാറത്തറ പ്രിന്‍സിപ്പല്‍ സ്ഥാനത്തുനിന്നു വിരമിച്ചതിനെത്തുടര്‍ന്നാണ് പുതിയ നിയമനം. കോളജിലെ സാമ്പത്തികശാസ്ത്ര വിഭാഗം മേധാവിയായിരുന്ന ഡോ. റാണി മരിയ കഴിഞ്ഞ രണ്ടുവര്‍ഷക്കാലായി വൈസ് പ്രിന്‍സിപ്പലായി സേവനം അനുഷ്ഠിച്ചുവരികയായിരുന്നു. 1995ല്‍ അധ്യാപികയായി നിയമിതയായ ഇവര്‍ ഐക്യുഎസി കോ-ഓര്‍ഡിനേറ്റര്‍, മാനേജിംഗ്‌ ബോര്‍ഡംഗം, ഗവേണിംഗ്‌ ബോഡിയംഗം, ഓള്‍ കേരള വിമന്‍സെല്‍ കോഓര്‍ഡിനേറ്റര്‍ തുടങ്ങിയനിലകളില്‍ പ്രവര്‍ത്തിച്ചിട്ടുണ്ട്. അസംപ്ഷന്‍ വിദ്യാര്‍ഥിയായിരുന്ന റാണി 1992ല്‍ എംജി സര്‍വകലാശാലയില്‍നിന്നും ബിഎ ഇക്കണോമിക്‌സിന് ഒന്നാംറാങ്കും എസ്ബി കോളജില്‍ വിദ്യാര്‍ഥിയായിരിക്കെ 1994ല്‍ എംഎ ഇക്കണോമിക്‌സിന് രണ്ടാംറാങ്കും കരസ്ഥമാക്കി. ഹൈദരാബാദ് സെന്‍ട്രല്‍ സര്‍വകലാശാലയില്‍നിന്നും എംഫിലും മുംബൈ ഐഐടിയില്‍നിന്നു പിഎച്ച്ഡിയും നേടിയിട്ടുണ്ട്. എസ്ബി കോളജ് റിട്ടയേർഡ് പ്രഫസർ തോമസ് കണയംപ്ലാവന്‍-ഓമന ദമ്പതികളുടെ മകളും വീല്‌ഹെമ്‌സണ്‍ ഷിപ്പ് മാനേജ്‌മെന്‍റ് പ്രൊക്യുര്‍മെന്‍റ് ഡിവിഷന്‍ മുന്‍ റീജണല്‍ഹെഡ് ആഞ്ഞിലിപ്പറമ്പില്‍ ജിജോ കുര്യാക്കോസിന്‍റെ ഭാര്യയുമാണ്.

കൃപാസനം ദണ്ഡവിമോചന തീര്‍ഥാടന കേന്ദ്രമായി പ്രഖ്യാപിച്ചു

ചേര്‍ത്തല: കലവൂര്‍ കൃപാസനം മരിയന്‍ മിഷന്‍ സെന്‍ററിനെ ദണ്ഡവിമോചനത്തിനുള്ള മഹാജൂബിലി തീര്‍ഥാടനകേന്ദ്രമായി ആലപ്പുഴ രൂപതാധ്യക്ഷന്‍ ഡോ. ജയിംസ് റാഫേല്‍ ആനാപറമ്പില്‍ പ്രഖ്യാപിച്ചു. ദണ്ഡവിമോചനം സാധ്യമായുള്ള കുമ്പസാരത്തിനുള്ള ക്രമീകരണങ്ങള്‍ കൃപാസനത്തിന് എതിര്‍വശം മിഷന്‍ സെന്‍ററില്‍ ക്രമീകരിച്ചിട്ടുണ്ട്. ജൂബിലിയുടെ ദൈവകൃപ സ്വീകരിക്കാനുള്ള കുമ്പസാരചാപ്പലിന്‍റെ ആശീര്‍വാദം ബിഷപ് ഡോ. ജയിംസ് റാഫേല്‍ ആനാപറമ്പില്‍ നിര്‍വഹിച്ചു. കൃപാസനം ഡയറക്ടര്‍ റവ.ഡോ.വി.പി. ജോസഫ് വലിയവീട്ടില്‍, കൃപാസനം സ്പിരിച്വല്‍ ആനിമേറ്റര്‍ ഫാ. അലക്‌സ് കൊച്ചീക്കാരന്‍വീട്ടില്‍, മാനേജര്‍ സണ്ണി പരുത്തിയില്‍, സിസ്റ്റര്‍ ജോമോള്‍ ജോസഫ്, സിസ്റ്റര്‍ ജീന, മനോജ് കുരിശിങ്കല്‍ എന്നിവര്‍ പ്രസംഗിച്ചു.

പെട്രോൾ പമ്പിൽ ജീവനക്കാർക്കുനേരേ ഗുണ്ടാ ആക്രമണം: രണ്ടു പേർക്കു പരിക്കേറ്റു

കായംകുളം: പെട്രോൾ പമ്പിൽ ജീവനക്കാർക്കുനേരേ ഗുണ്ടാ ആക്രമണം. രണ്ടു ജീവനക്കാർക്കു പരിക്കേറ്റു. കായംകുളം പുത്തൻറോഡ് ജംഗ്‌ഷനിലെ ടി.എ പെട്രോൾ പമ്പിൽ കഴിഞ്ഞദിവസം രാത്രിയായിരുന്നു സംഭവം. പെട്രോൾ അടിക്കാനെത്തിയ ഒരുകൂട്ടം യുവാക്കൾ 50 രൂപക്ക് പെട്രോൾ ചോദിച്ചു. പെട്രോൾ അടിച്ചശേഷം പണമില്ലെന്നു പറഞ്ഞു. പിന്നാലെ ജീവനക്കാരുമായി തർക്കം ഉണ്ടാകുകയും മർദിക്കുകയുമായിരുന്നു എന്നാണ് മർദനമേറ്റ ഉണ്ണികൃഷ്ണൻ പറയുന്നത്. ലഹരിക്കടിമയായ ആളുകളാണ് അക്രമം നടത്തിയതെന്നു പമ്പ് ഉടമയും വ്യാപാരി വ്യവസായി ഏകോപന സമിതി സംസ്ഥാന വൈസ് പ്രസിഡന്‍റുമായ എ.ജെ. ഷാജഹാൻ പറഞ്ഞു. സംഭവത്തിൽ കായംകുളം പോലീസ് അന്വഷണം ആരംഭിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]