നീലേശ്വരം: കാസർഗോഡ് ലോക്സഭാ മണ്ഡലം യുഡിഎഫ് സ്ഥാനാർഥി രാജ്മോഹൻ ഉണ്ണിത്താൻ തൃക്കരിപ്പൂർ നിയോജക മണ്ഡലത്തിലെ വിവിധ കേന്ദ്രങ്ങളിൽ ഒന്നാംഘട്ട പ്രചാരണം നടത്തി. നീലേശ്വരം ഗാന്ധി സ്മൃതിമണ്ഡപത്തിൽ പുഷ്പാർച്ചന നടത്തിക്കൊണ്ടാണ് പ്രചാരണത്തിന് തുടക്കമിട്ടത്.
തുടർന്ന് നീലേശ്വരം മാർക്കറ്റ് ജംഗ്ഷൻ മുതൽ കോൺവെന്റ് ജംഗ്ഷൻ വരെ നൂറുകണക്കിന് പ്രവർത്തകർക്കൊപ്പം റോഡ് ഷോ നടത്തി. തുടർന്ന് ഈസ്റ്റ് എളേരി, വെസ്റ്റ് എളേരി, കയ്യൂർ-ചീമേനി, പിലിക്കോട്, തൃക്കരിപ്പൂർ, വലിയപറമ്പ്, പടന്ന പഞ്ചായത്തുകളിലെ പര്യടനത്തിനു ശേഷം വൈകിട്ട് ചെറുവത്തൂരിലെത്തി സമാപിച്ചു.
കുന്നുംകൈ, ഭീമനടി, നർക്കിലക്കാട്, ചിറ്റാരിക്കാൽ, നല്ലോമ്പുഴ, കടുമേനി, മൗക്കോട്, പെരുമ്പട്ട, കാക്കടവ്, ചീമേനി, പിലിക്കോട്, കാലിക്കടവ്, തൃക്കരിപ്പൂര്, ഇടയിലക്കാട്, മാവിലാകടപ്പുറം, പടന്ന എന്നിവിടങ്ങളിൽ സ്ഥാനാർഥിക്ക് ആവേശോജ്ജ്വലമായ വരവേല്പ് നല്കി.
ഡിസിസി പ്രസിഡന്റ് പി.കെ. ഫൈസൽ, കെ.പി. കുഞ്ഞിക്കണ്ണൻ, എ.ജി.സി. ബഷീർ, കെ.കെ. രാജേന്ദ്രൻ, ടോമി പ്ലാച്ചേരി, സെബാസ്റ്റ്യൻ പതാലിൽ, കെ.വി. സുധാകരൻ, സത്താർ വടക്കുമ്പാട്, കരിമ്പിൽ കൃഷ്ണൻ, മഡിയൻ ഉണ്ണികൃഷ്ണൻ, എറുവാട്ട് മോഹനൻ, കാർത്തികേയൻ പെരിയ, പ്രവാസ് ഉണ്ണിയാടൻ എന്നിവർ വിവിധയിടങ്ങളിൽ സംബന്ധിച്ചു.