ക​ടു​ത്ത ചൂ​ടി​ൽ മ​യ്യി​ച്ച​ക്കാ​ർ വോ​ട്ട് ചെ​യ്ത​ത് ടെ​ന്‍റി​ൽ
Saturday, April 27, 2024 1:52 AM IST
ചെ​റു​വ​ത്തൂ​ർ: സ്കൂ​ളി​ലോ സ​ർ​ക്കാ​ർ നി​യ​ന്ത്രി​ത സ്ഥാ​പ​ന​ങ്ങ​ളി​ലോ മാ​ത്ര​മാ​ണ് ഏ​തു തെ​ര​ഞ്ഞെ​ടു​പ്പി​ലും വോ​ട്ടെ​ടു​പ്പ് ന​ട​ക്കാ​റു​ള്ള​ത്. എ​ന്നാ​ൽ മ​യ്യി​ച്ച​യി​ലെ വോ​ട്ട​ർ​മാ​ർ വോ​ട്ടു ചെ​യ്ത​ത് താ​ത്കാ​ലി​ക​മാ​യി കെ​ട്ടി​യു​ണ്ടാ​ക്കി​യ ടെ​ന്‍റി​ൽ. തൃ​ക്ക​രി​പ്പൂ​ർ അ​സം​ബ്ലി മ​ണ്ഡ​ല​ത്തി​ലെ 92-ാം ബൂ​ത്താ​യ മ​യ്യി​ച്ച​യി​ലെ ഗ​വ. എ​ൽ​പി സ്‌​കൂ​ളി​ലെ​ത്തി വ​ർ​ഷ​ങ്ങ​ളാ​യി വോ​ട്ട് ചെ​യ്തു വ​രു​ന്ന​വ​രാ​ണ് ഇ​ന്ന​ലെ ക​ടു​ത്ത ചൂ​ടി​ൽ ടെ​ന്‍റി​ന് മു​ന്നി​ൽ വ​രി നി​ന്ന് വോ​ട്ടു ചെ​യ്യേ​ണ്ടി വ​ന്ന​ത്.

ഡ്യൂ​ട്ടി​ക്ക് എ​ത്തി​യ ഉ​ദ്യോ​ഗ​സ്‌​ഥ​രും ക്ര​മ​സ​മാ​ധാ​ന ചു​മ​ത​ല​യു​ള്ള പോ​ലീ​സു​കാ​രും ഈ ​ടെ​ന്‍റി​ൽ ക​ഴി​ച്ചു​കൂ​ട്ടി. മ​യ്യി​ച്ച​യി​ലെ ഏ​ക ഗ​വ.​സ്കൂ​ൾ പൊ​ളി​ച്ചു മാ​റ്റി​യി​ട്ട് ര​ണ്ട് വ​ർ​ഷം ക​ഴി​ഞ്ഞു. പു​തി​യ കെ​ട്ടി​ടം ഇ​തു​വ​രെ പ​ണി​തി​ട്ടി​ല്ല. ഇ​തി​നി​ട​യി​ൽ വ​ന്ന ആ​ദ്യ തെ​ര​ഞ്ഞെ​ടു​പ്പി​ലാ​ണ് ടെ​ന്‍റ് കെ​ട്ടി ബൂ​ത്ത് ഒ​രു​ക്കി​യ​ത്.

ക​ടു​ത്ത ചൂ​ടി​ൽ ഇ​തി​ന​ക​ത്തി​രു​ന്ന ഉ​ദ്യോ​ഗ​സ്‌​ഥ​രും ഏ​ജ​ന്‍റു​മാ​രും വോ​ട്ട​ർ​മാ​രും ശ​രി​ക്കും വ​ല​ഞ്ഞു. മ​യ്യി​ച്ച​യി​ലെ 92-ാമ​ത് ബൂ​ത്തി​ൽ 1057 വോ​ട്ട​ർ​മാ​രാ​ണ് ഉ​ണ്ടാ​യി​രു​ന്ന​ത്.

Copyright @ 2022 , Rashtra Deepika Ltd.