വഖഫില്‍ കുരുങ്ങി ദളിത് കുടുംബവും : Deepika.com Kerala News |

Click here for detailed news of all items

വഖഫില്‍ കുരുങ്ങി ദളിത് കുടുംബവും

Friday, November 15, 2024 2:15 AM IST

സിജോ പൈനാടത്ത്

കൊച്ചി: വര്‍ഷങ്ങളായി താമസിക്കുന്ന സ്വന്തം പേരിലുള്ള കിടപ്പാടങ്ങള്‍ വഖഫ് ഭൂമിയാണെന്ന അവകാശവാദത്തില്‍ പ്രതിസന്ധിയിലായിരിക്കുകയാണ് ആറ് കുടുംബങ്ങള്‍. കൊടുങ്ങല്ലൂർ താലൂക്കിലെ മതിലകം കൂളിമുട്ടം വില്ലേജിലാണ് ദളിത് കുടുംബമുള്‍പ്പടെയുള്ള താമസക്കാര്‍ വഖഫ് അവകാശവാദത്തിന്‍റെ പേരില്‍ കുടിയിറക്കുഭീഷണി നേരിടുന്നത്.

പ്രദേശവാസിയായ അഹമ്മദ്കുട്ടി വാത്തിയേടത്തിൽനിന്നു നിയമപരമായി വാങ്ങിയ 2.16 ഏക്കര്‍ ഭൂമിയുടെ പേരിലാണ് വഖഫ് അവകാശവാദമെന്നു താമസക്കാര്‍ പറയുന്നു. ആറ് വീട്ടുകാരുടേതിനു പുറമെ, സമീപത്തെ പതിനഞ്ച് പേരുടെ ഭൂമിയും വഖഫാണെന്ന അവകാശവാദം വഖഫ് ട്രൈബ്യൂണലിൽ ബോർഡ് ഉന്നയിച്ചിട്ടുണ്ട്. അഹമ്മദ്കുട്ടിയുടെ മകൻ ഹംസയുടെ ഭൂമിയിലുമുണ്ട് വഖഫ് അവകാശവാദം.

അഹമ്മദ്കുട്ടി തന്‍റെ പേരിലുള്ള ഏതാനും ഏക്കർ ഭൂമി നേരത്തെ പള്ളി നിര്‍മിക്കാനും അനുബന്ധ ആവശ്യങ്ങൾക്കുമായി മഹല്ല് കമ്മിറ്റിക്ക് കൈമാറിയിരുന്നു. ഇതിനു പുറമേയുള്ള ഭൂമിയാണ് ഇപ്പോഴത്തെ താമസക്കാരുൾപ്പടെയുള്ളവർക്കു റവന്യു അവകാശങ്ങളോടെ നിയമപരമായി രജിസ്‌ട്രേഷന്‍ നടത്തി കൈമാറിയതെന്നു ഹംസ പറയുന്നു.

രണ്ടര സെന്‍റ് മുതല്‍ 32 സെന്‍റ് വരെ സ്വന്തമായുള്ള കുടുംബങ്ങള്‍ ഇവിടെ വഖഫ് കുരുക്കിലുണ്ട്. സ്വന്തം വീടും സ്ഥലവും വില്‍ക്കാനോ കൈമാറാനോ സാധിക്കാത്ത സ്ഥിതിയിലാണു തങ്ങളെന്നു ഭൂവുടമകള്‍ പറയുന്നു.

2.16 ഏക്കറിലുള്ള വഖഫ് ബോര്‍ഡിന്‍റെ അവകാശവാദത്തിനെതിരേ ഹംസ വഖഫ് ട്രൈബ്യൂണലിൽ പരാതി നല്‍കിയിരുന്നു. മഹല്ല് കമ്മിറ്റിയോടും വഖഫ് ബോര്‍ഡിനോടും സ്ഥലം വഖഫാണെന്നു തെളിയിക്കുന്ന രേഖകള്‍ ഹാജരാക്കാന്‍ ട്രൈബ്യൂണല്‍ ആവശ്യപ്പെട്ടെങ്കിലും ഇതുവരെയും നല്‍കിയിട്ടില്ലെന്നു ഹംസ ചൂണ്ടിക്കാട്ടുന്നു. ഇരിങ്ങാലക്കുട സബ് കോടതിയിലും ഹൈക്കോടതിയിലും ഇതു സംബന്ധിച്ച കേസുകള്‍ നിലവിലുണ്ട്.

കൂളിമുട്ടത്ത് ജനകീയ സമിതിയും പ്രക്ഷോഭരംഗത്തുണ്ട്. കൂളിമുട്ടം വില്ലേജിലെ വിവിധ പ്രദേശങ്ങളിൽ വഖഫ് അവകാശവാദത്തിന്‍റെ പേരിൽ പ്രതിസന്ധിയിലായ ഭൂവുമുടകളുണ്ടെന്നു സമിതി പ്രവർത്തകനായ റിജേഷ് ചൂണ്ടിക്കാട്ടി.

മുനന്പം സമരത്തിന് ഐക്യദാർഢ്യമറിയിക്കാനെത്തിയ കൂളിമുട്ടം ജനകീയ സമിതി സംഘത്തിലുൾപ്പെട്ട ആറാട്ടുകടവ് തറയിൽ ബാലൻ (75) മടക്കയാത്രയിൽ കുഴഞ്ഞുവീണു മരിച്ചത് കഴിഞ്ഞ ദിവസമാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.