നിലവാരമില്ലാത്ത ഉപ്പ്: നിര്‍മാതാക്കൾക്ക് 1.2 ലക്ഷവും വിതരണക്കാര്‍ക്ക് ഒരുലക്ഷവും പിഴ : Deepika.com Kerala News |

Click here for detailed news of all items

നിലവാരമില്ലാത്ത ഉപ്പ്: നിര്‍മാതാക്കൾക്ക് 1.2 ലക്ഷവും വിതരണക്കാര്‍ക്ക് ഒരുലക്ഷവും പിഴ

Sunday, November 17, 2024 1:52 AM IST

കോട്ടയം: ഗുണനിലവാരം ഇല്ലാത്ത ഉപ്പ് വില്‍പനയ്ക്കെത്തിച്ചതായി ഭക്ഷ്യസുരക്ഷാവകുപ്പ് നടത്തിയ പരിശോധനയില്‍ കണ്ടെത്തിയ സംഭവത്തില്‍ വിതരണക്കാര്‍ക്കും ഉത്പാദകര്‍ക്കും പിഴ.

ഗുണനിലവാരമില്ലാത്ത ടാറ്റാ അയഡൈസ്ഡ് ക്രിസ്റ്റല്‍ സോള്‍ട്ട് എന്ന ഉത്പന്നം വിറ്റതിന് ഉത്പാദകരായ മീനാക്ഷി സോള്‍ട്ട് വര്‍ക്ക് പ്രൈവറ്റ് ലിമിറ്റഡ് തൂത്തുക്കുടി എന്ന സ്ഥാപനത്തിന് 1.2 ലക്ഷം രൂപയും മാര്‍ക്കറ്റിംഗ് നടത്തിയ ടാറ്റാ കണ്‍സ്യൂമര്‍ പ്രോഡക്ട്സിന് ഒരു ലക്ഷം രൂപയുമാണ് കോട്ടയം സബ് ഡിവിഷണല്‍ മജിസ്ട്രേറ്റും അഡ്ജുഡിക്കേറ്റിംഗ് ഓഫീസറുമായ ഡി. രഞ്ജിത് പിഴ ഈടാക്കാന്‍ നിര്‍ദേശിച്ചത്.

മറ്റൊരു കേസില്‍ ഗംഗ അയഡൈസ്ഡ് ക്രിസ്റ്റല്‍ സോള്‍ട്ടിന്‍റെ ഉത്പാദനം, വിതരണം എന്നിവ നടത്തിയതിന് ബ്രില്ല്യന്‍റ് സോള്‍ട്ട് റിഫൈനറി തൂത്തുക്കുടി എന്ന സ്ഥാപനം 1,20,000 രൂപയും പിഴ ഈടാക്കാനും ഉത്തരവിട്ടു.

ലേബല്‍ വിവരങ്ങള്‍ തെറ്റായി നല്‍കിയതായി കണ്ടെത്തിയ ഹെര്‍ഷേ സോയാ മില്‍ക്കിന്‍റെ വില്‍പന നടത്തിയതിന് ചങ്ങനാശേരി റിലയന്‍സ് റീട്ടെയില്‍സ് പ്രൈവറ്റ് ലിമിറ്റഡിന് 25,000 രൂപയും ഉത്പാദകരായ ഹെര്‍ഷേ ഇന്ത്യ പ്രൈവറ്റ് ലിമിറ്റഡിന് 1,10,000 രൂപയും പിഴയും ഈടാക്കാന്‍ ഉത്തരവിട്ടു.

ഭക്ഷ്യ സുരക്ഷാ ഓഫീസറുടെ നിര്‍ദേശങ്ങള്‍ പാലിക്കാതെയും ഭക്ഷ്യസുരക്ഷാ ഗുണനിലവാരനിയമം പാലിക്കാതെയും വൃത്തിഹീനമായ സാഹചര്യത്തില്‍ പ്രവര്‍ത്തിച്ചുവെന്നു കണ്ടെത്തിയ കോട്ടയം കുമാരനല്ലൂരുള്ള തലശേരി റസ്റ്ററന്‍റ് എന്ന സ്ഥാപനത്തിന് 96,000 രൂപയും പിഴ ചുമത്തി.

ഭക്ഷ്യസുരക്ഷാ ഓഫീസറുടെ നിര്‍ദേശം പാലിക്കാത്തതിനാല്‍ 60,000 രൂപയും വൃത്തിഹീനമായ സാഹചര്യത്തില്‍ പ്രവര്‍ത്തിച്ചതിന് 25,000 രൂപയും കൃത്രിമ ഭക്ഷ്യനിറങ്ങള്‍ സൂക്ഷിച്ചതിന് 4,500 രൂപയും പ്ലാസ്റ്റിക് കുപ്പിയിലുള്ള കുടിവെള്ളം വെയിലേല്‍ക്കുംവിധം പുറത്ത് സൂക്ഷിച്ചതിന് 2,000 രൂപയും പരിശോധനസമയം ഉണ്ടായിരുന്ന ജീവനക്കാരന് 4,500 രൂപയുമാണ് പിഴ ചുമത്തിയത്.

എല്ലാ ഭക്ഷ്യവ്യവസായികളും തങ്ങളുടെ നിയന്ത്രണത്തിലുള്ള വ്യവസായങ്ങളില്‍ ഉത്പന്നം, സംസ്‌കരണം. ഇറക്കുമതി, വിതരണം, വില്‍പ്പന എന്നിവയുടെ എല്ലാ ഘട്ടത്തിലും ഭക്ഷ്യസുരക്ഷ ഗുണനിലവാരനിയമം 2006 പ്രകാരമുള്ള ചട്ടങ്ങള്‍ പാലിക്കുന്നുണ്ടെന്ന് ഉറപ്പുവരുത്തണമെന്നു കോട്ടയം ഭക്ഷ്യസുരക്ഷാ അസിസ്റ്റന്‍റ് കമ്മീഷണര്‍ എ.എ. അനസ് അറിയിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.