മസ്കുമായുള്ള ഇടിപ്പോരാട്ടത്തിൽനിന്ന് സക്കർബർഗ് പിന്മാറുന്നു
Tuesday, August 15, 2023 12:58 AM IST
സാൻ ഫ്രാൻസിസ്കോ: ശതകോടീശ്വരൻ ഇലോണ് മസ്കുമായുള്ള ഇടിപ്പോരാട്ടത്തിൽനിന്നു മെറ്റ മേധാവി മാർക്ക് സക്കർബർഗ് പിന്മാറുന്നു.
പോരാട്ടത്തെ മസ്ക് ഗൗരവമായി കാണുന്നില്ലെന്നും വിഷയം ഉപേക്ഷിക്കാൻ സമയമായെന്നും സക്കർബർഗ് പറഞ്ഞു. ത്രെഡ്സിൽ പുറത്തുവിട്ട കുറിപ്പിലാണു സക്കർബർഗ് നിലപാട് വ്യക്തമാക്കിയത്.
മസ്കിനെ പോരാട്ടത്തിന്റെ തീയതി അറിയിച്ചിരുന്നെന്നും എന്നാൽ മസ്ക് ഓരോ കാരണങ്ങൾ ചൂണ്ടിക്കാട്ടി ഒഴിഞ്ഞുമാറുകയാണെന്നും സക്കർബർഗ് പറയുന്നു. അതേസമയം, തിങ്കളാഴ്ച പോരാട്ടത്തിനു തയാറാണെന്നു മസ്ക് കഴിഞ്ഞ ദിവസം പറഞ്ഞിരുന്നു.
ജൂണിലാണു മസ്കും സക്കർബർഗും തമ്മിലുള്ള വാക്പോരിന്റെ തുടക്കം. രണ്ടു കോടിപതികൾ തമ്മിലുള്ള ഏറ്റുമുട്ടലായതിനാൽ വിഷയത്തിനു വലിയ വാർത്താപ്രാധാന്യം ലഭിച്ചു.
എന്നാൽ, കൃത്യമായ ഒരു തീയതി രണ്ടുപേരും പ്രഖ്യാപിച്ചില്ല. ചാരിറ്റിയുടെ ഭാഗമായി പോരാട്ടത്തിന് ഇറ്റലി വേദിയൊരുക്കാമെന്ന് അവിടത്തെ സാംസ്കാരിക മന്ത്രി കഴിഞ്ഞ ദിവസം നിർദേശിച്ചിരുന്നു. ഇതിനു പിന്നാലെയാണു സക്കർബർഗിന്‍റെ പിന്മാറ്റം.