ശ്രീലങ്ക വിട്ടയച്ച മത്സ്യത്തൊഴിലാളികള്‍ ഇന്ത്യയില്‍ തിരിച്ചെത്തി
Friday, January 31, 2025 2:50 AM IST
ചെന്നൈ: ശ്രീലങ്കയിലെ ജയിലില്‍നിന്നു മോചിതരായ ആറ് മത്സ്യത്തൊഴിലാളികള്‍ തിരിച്ചെത്തി.തമിഴ്നാട്ടിലെ രാമേശ്വരത്തുനിന്നുള്ള മത്സ്യത്തൊഴിലാളികളാണ് ജയില്‍ മോചിതരായത്.ഇവർ ചെന്നൈ വിമാനത്താവളത്തില്‍ എത്തിയതായി അധികൃതര്‍ അറിയിച്ചു.
കഴിഞ്ഞ 12ന് മത്സ്യബന്ധനത്തിനു പോയ ഇവരെ സമുദ്രാതിര്‍ത്തി ലംഘിച്ചുവെന്നാരോപിച്ച് ലങ്കന്‍ കോസ്റ്റ് ഗാര്‍ഡ് അറസ്റ്റ് ചെയ്യുകയും അവരുടെ കപ്പല്‍ പിടിച്ചെടുക്കുകയും ചെയ്തു. ഇവരെ പിന്നീട് കോടതിയില്‍ ഹാജരാക്കി റിമാന്‍ഡ് ചെയ്തു.
അറസ്റ്റിലായവരെ മോചിപ്പിക്കാന്‍ കേന്ദ്രത്തിന്‍റെ അടിയന്തര ഇടപെടല്‍ ആവശ്യപ്പെട്ട് തമിഴ്‌നാട് മുഖ്യമന്ത്രി എം.കെ. സ്റ്റാലിന്‍ കേന്ദ്ര വിദേശകാര്യ മന്ത്രി എസ്. ജയശങ്കറിന് കത്തയച്ചിരുന്നു.