കോൺഗ്രസ് ജാതിരാഷ്‌ട്രീയത്തെ കൂട്ടുപിടിക്കുന്നു: എം.വി. ഗോവിന്ദൻ
Wednesday, November 13, 2024 12:51 AM IST
കണ്ണൂർ: നാലു വോട്ടിനുവേണ്ടി കോൺഗ്രസ് ജാതിരാഷ്‌ട്രീയത്തെ കൂട്ടുപിടിക്കുകയാണെന്നു സിപിഎം സംസ്ഥാന സെക്രട്ടറി എം.വി. ഗോവിന്ദൻ.
ജാതിബോധമല്ല, രാഷ്‌ട്രീയ ബോധമുള്ളവരാണ് കേരളത്തിലെ വോട്ടർമാർ. അവർക്ക് ഇതെല്ലാം മനസിലാകും. പാലക്കാട്ട്‌ മത്സരം എൽഡിഎഫും യുഡിഎഫും തമ്മിലാണെന്നു കോൺഗ്രസിന്‍റെ മുതിർന്ന നേതാവ് കെ. മുരളീധരൻതന്നെ പറഞ്ഞിട്ടുണ്ട്.
ബിജെപിയുടെ പ്രധാന വക്താവായി മാറിയതുകൊണ്ടാണ് വി.ഡി. സതീശൻ അതിനെ തള്ളിപ്പറയുന്നത്‌. കോൺഗ്രസിന്‍റെയും ബിജെപിയുടെയും ഒട്ടേറെ വോട്ടുകൾ ഇത്തവണ എൽഡിഎഫിനു കിട്ടും.
കഴിഞ്ഞ തവണ ഷാഫിക്കു കിട്ടിയ മതനിരപേക്ഷ വോട്ടുകൾ ഇക്കുറി ഡോ. പി. സരിനു ലഭിക്കും. എൽഡിഎഫിന് ഏറെ അനുകൂലമായ അന്തരീക്ഷമാണുള്ളത്‌. ലോക്സഭാ തെരഞ്ഞെടുപ്പിലെ പരാജയത്തിൽനിന്ന് വലിയ തിരിച്ചുവരവാകും എൽഡിഎഫിന് ഇത്തവണ ഉണ്ടാകുകയെന്നും എം.വി. ഗോവിന്ദൻ പറഞ്ഞു.