ADVERTISEMENT

ADVERTISEMENT

എബനേസറില്‍ കലോത്സവം

മൂവാറ്റുപുഴ: വീട്ടൂര്‍ എബനേസര്‍ ഹയര്‍ സെക്കന്‍ഡറി സ്‌കൂളില്‍ കലോത്സവം നൂപുരത്തിന് തുടക്കമായി. സ്‌കൂള്‍ മാനേജര്‍ കമാന്‍ഡര്‍ സി.കെ. ഷാജി ഉദ്ഘാടനം നിര്‍വഹിച്ചു. പിടിഎ പ്രസിഡന്‍റ് മോഹന്‍ദാസ് സൂര്യനാരായണന്‍ അധ്യക്ഷത വഹിച്ചു.

അഞ്ച് വേദികളിലായി ആയിരത്തോളം വിദ്യാര്‍ഥികള്‍ വിവിധയിനങ്ങളില്‍ മാറ്റുരയ്ക്കും. എംപിടിഎ പ്രസിഡന്‍റ് രേവതി കണ്ണന്‍, പിടിഎ വൈസ് പ്രസിഡന്‍റ് എന്‍.എം. നാസര്‍, പ്രധാനാധ്യാപിക ജീമോള്‍ കെ. ജോര്‍ജ്, പ്രിന്‍സിപ്പല്‍ ബിജുകുമാര്‍ എന്നിവര്‍ പ്രസംഗിച്ചു.

ADVERTISEMENT

ടാക്സി കാർ ഡ്രൈവറെ മരിച്ചനിലയിൽ കണ്ടെത്തി

മരട്: ടാക്സി കാർ ഡ്രൈവറെ വാടകവീട്ടിൽ മരിച്ചനിലയിൽ കണ്ടെത്തി. തൃശൂർ കൊടുങ്ങല്ലൂർ സ്വദേശി വിഷ്ണു (26) ആണ് മരിച്ചത്. നെട്ടൂർ അറേബ്യൻ അസ്ക ഹോട്ടലിന് പിൻവശത്തെ വാടകവീട്ടിലാണ് തൂങ്ങി മരിച്ച നിലയിൽ കണ്ടെത്തിയത്. ഇന്നലെ രാവിലെ ഫോണിൽ ബന്ധപ്പെട്ടിട്ട് കിട്ടാത്തതിനെ തുടർന്ന് സഹപ്രവർത്തകർ വന്ന് മുറി പരിശോധിച്ചപ്പോഴാണ് മരിച്ചനിലയിൽ കണ്ടത്. പനങ്ങാട് പോലീസ് സ്ഥലത്തെത്തി നടപടികൾ സ്വീകരിച്ച് മൃതദേഹം ജനറൽ ആശുപത്രി മോർച്ചറിയിലേക്ക് മാറ്റി. രണ്ട് ദിവസം മുൻപാണ് ഇയാൾ നാട്ടിൽ നിന്നെത്തിയത്.

യുവാവ് ട്രെയിൻ തട്ടി മരിച്ചു

കളമശേരി: കളമശേരി എച്ച്എംടി ജംഗ്ഷനു സമീപം യുവാവ് ട്രെയിൻ തട്ടി മരിച്ചു. ചൊവ്വാഴ്ച വൈകുന്നേരം 5.30 ഓടെയായിരുന്നു അപകടം. കളമശേരി അറക്കൽ വീട്ടിൽ ബെന്നിയുടെ മകൻ എബിൻ ബെന്നി(38) ആണ് മരിച്ചത്. മൃതദേഹം പോലീസ് നടപടികൾക്കുശേഷം ചൊവ്വാഴ്ച തന്നെ മെഡിക്കൽ കോളേജിലേക്ക് മാറ്റിയിരുന്നു. ഇന്നലെ പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടു നൽകി.സംസ്കാരം നടത്തി. അമ്മ: ബേബി ബെന്നി, സഹോദരൻ: ജിതിൻ ബെന്നി. സഹോദര ഭാര്യ: ടീന ജിതിൻ.

പിക്അപ് വാനിടിച്ച് വിദ്യാർഥി മരിച്ചു

കല്ലൂർക്കാട്‌ : റോഡു മുറിച്ചു കടക്കവെ, പിക്അപ് വാനിടിച്ച് സ്കൂൾ വിദ്യാർഥി മരിച്ചു. കല്ലൂർക്കാട് കുഴികണ്ടത്തിൽ കെ.എ. മണിയുടെ മകൻ കാശിനാഥ് കെ.മണി (10) യാണ് മരിച്ചത്. വാഴക്കുളം സെന്‍റ് ലിറ്റിൽ തെരേസാസ് ഹൈസ്കൂൾ അഞ്ചാം ക്ലാസ് വിദ്യാർഥിയാണ്. ഇന്നലെ വൈകുന്നേരം ആറരയോടെ മൂവാറ്റുപുഴ -തേനി ഹൈവേയിൽ കോട്ടക്കവലയ്ക്കു സമീപമായിരുന്നു അപകടം. വീടിനു സമീപമുള്ള കടയിൽനിന്ന് സാധനങ്ങൾ വാങ്ങുന്നതിനായി റോഡു മുറിച്ചു കടക്കുന്പോൾ മൂവാറ്റുപുഴ ഭാഗത്തേക്കു പോവുകയായിരുന്ന പിക്അപ് വാൻ ഇടിക്കുകയായിരുന്നു. ഗുരുതരമായി പരിക്കേറ്റ കുട്ടിയെ മുവാറ്റുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മാതാവ്: ആതിര. സഹോദരി: ദേവിക (പ്ലസ് വൺ വിദ്യാർഥിനി).

അമ്മയുടെ പേരിൽ ഒരു മരം; പദ്ധതിക്ക് ഏഴക്കരനാട് സ്കൂളിൽ തുടക്കം

പിറവം: അമ്മയുടെ പേരിൽ ഒരു മരം പദ്ധതിക്ക് മണീട് ഏഴക്കരനാട് ഗവൺമെന്‍റ് യുപി സ്കൂളിൽ തുടക്കമായി. വിദ്യാർഥികളിലും യുവജനങ്ങളിലും പ്രകൃതി സംരക്ഷണ ബോധവത്ക്കരണത്തിന്‍റെ ഭാഗമായാണ് പദ്ധതി നടപ്പാക്കുന്നത്. മേരാ യുവ ഭാരത് ജില്ലാ ഘടകത്തിന്‍റെയും, ഏഴക്കരനാട് സൂര്യ ക്ലബിന്‍റെയും നേതൃത്വത്തിലാണ് പരിപാടി സംഘടിപ്പിച്ചിരിക്കുന്നത്. സ്കൂൾ വളപ്പിൽ മരം നടുകയും, പരിപാലന ചുമതല വിദ്യാർഥികൾ വഹിക്കുകയും ചെയ്യുന്നതാണ് പദ്ധതി. സ്കൂൾ അവധി സമയത്ത് മരങ്ങളുടെ മേൽനോട്ടം ക്ലബ് അംഗങ്ങൾ വഹിക്കും. റംമ്പൂട്ടാൻ, പേര, മാവ് തുടങ്ങിയവയാണ് നട്ടിരിക്കുന്നത്. മരങ്ങൾ മൃഗങ്ങളും മറ്റും നശിപ്പിക്കുന്നത് ഒഴിവാക്കുന്നതിനായി സംരക്ഷണവേലിയും ചുറ്റും നിർമിച്ചിട്ടുണ്ട്. പദ്ധതിയുടെ ഉദ്ഘാടനം പഞ്ചായത്ത് ഭരണസമിതി അംഗം രഞ്ജി സുരേഷ് ഉദ്ഘാടനം ചെയ്തു. പ്രധാന അധ്യാപകൻ ബാബു കുര്യാക്കോസ് അധ്യക്ഷത വഹിച്ചു. മേരാ യുവ ഭാരത് ജില്ലാ ഓഫീസർ വിവേക് ശശിധരൻ, പിടിഎ പ്രസിഡന്‍റ് ജോസ് മാത്യു, സൂര്യ ക്ലബ് അംഗങ്ങളായ പ്രദീപ് നാരായണൻ, ബേസിൽ ബിജു എന്നിവർ പ്രസംഗിച്ചു.

മെഴുകുതിരി തെളിച്ചു പ്രതിഷേധിച്ചു

കോതമംഗലം: ഭരണഘടന ദുരുപയോഗവും ന്യൂനപക്ഷ വേട്ടയും അവസാനിപ്പിക്കുണം എന്നാവശ്യപെട്ട് കേരള കോൺഗ്രസ് എം കോതമംഗലം നിയോജക മണ്ഡലം കമ്മറ്റി ചെറിയ പള്ളിത്താഴത്ത് മെഴുകുതിരി ജ്വാല തെളിച്ച് പ്രതിഷേധിച്ചു. ന്യൂനപക്ഷങ്ങളെ അടിച്ചമർത്താൻ മത പരിവർത്തനവും മനുഷ്യക്കടത്തും പേരു പറഞ്ഞ് ഭരണഘടനയുടെ അന്തസത്ത ഇല്ലാതാക്കുന്ന നടപടികൾക്ക് ഉദാഹരണമാണ് കഴിഞ്ഞ 25ന് നടന്ന സിസ്റ്റർ പ്രീതി മേരിയുടെയും സിസ്റ്റർ വന്ദന ഫ്രാൻസീസിന്‍റെയും അറസ്റ്റ്. ഇതിൽ യോഗം പ്രതിക്ഷേധിച്ചു. സംസ്ഥാന കമ്മറ്റി അംഗം പോൾ മുണ്ടയ്ക്കൽ അധ്യക്ഷത വഹിച്ചു. പാർട്ടി നിയോജകമണ്ഡലം പ്രസിഡന്‍റ് എൻ.സി. ചെറിയാൻ ഉദ്ഘാടനം ചെയ്തു. ജിജോ പീച്ചാട്ട്, റോണി മാത്യു, തോമസ് വട്ടപ്പാറ, ജോസ് വർഗീസ്, ശ്രീദേവി ബാബു, ലിസി ജോസഫ്, ഗണേഷ് വി. പുനത്തിക്കുടി, ബെന്നി ചിറ്റൂപ്പറമ്പിൽ, ജോർജ്ജ് വേങ്ങത്താനം, എന്നിവർ പ്രസംഗിച്ചു.

കുട്ടമ്പുഴയിൽ ഊരുകൂട്ട ജില്ലാതല സംഗമം

കോതമംഗലം: പട്ടികവർഗ വികസന വകുപ്പിന്‍റെ സുവർണ ജൂബിലി ആഘോഷങ്ങളുടെ ഭാഗമായി ഊരുകൂട്ട ജില്ലാതല പ്രതിനിധി സംഗമം കുട്ടമ്പുഴയിൽ നടത്തി. കുട്ടമ്പുഴ പഞ്ചായത്ത് ടൗൺ ഹാളിൽ സംഘടിപ്പിച്ച ജില്ലാതല സംഗമത്തിന്‍റെ ഉദ്ഘാടനം ആന്‍റണി ജോൺ എംഎൽഎ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ അധ്യക്ഷത വഹിച്ചു. മൂവാറ്റുപുഴ ട്രൈബൽ ഡെവലപ്മെന്‍റ് ഓഫീസർ കെ.ജി. മനോജ്, പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ, ബ്ലോക്ക് പഞ്ചായത്ത് അംഗം കെ.കെ. ഗോപി, പഞ്ചായത്ത് വൈസ് പ്രസിഡന്‍റ് സൽമ പരീത്, പഞ്ചായത്ത് സ്ഥിരം സമിതി ചെയർമാൻമാരായ കെ.എ. സിബി, മിനി മനോഹരൻ തുടങ്ങിയവർ പങ്കെടുത്തു. സംഗമത്തോടനുബന്ധിച്ച് പട്ടിക വർഗ വികസനം-ഇന്നലെ ഇന്ന് നാളെ എന്ന വിഷയത്തിൽ സെമിനാർ നടന്നു. കുടുംബശ്രീ മിഷൻ ജില്ലാ പ്രോഗ്രാം മാനേജർ പൊന്നി കണ്ണൻ, അടിമാലി ട്രൈബൽ ഡെവലപ്മെന്‍റ് ഓഫീസർ ജൂനിയർ സൂപ്രണ്ട് പി. രാജീവ് എന്നിവർ ക്ലാസുകൾ നയിച്ചു. പട്ടികവർഗ വികസന വകുപ്പിന്‍റെ സുവർണ ജൂബിലിയുടെ ഭാഗമായി ഒരു വർഷക്കാലം നീണ്ടു നിൽക്കുന്ന ആഘോഷ പരിപാടികളാണ് സംസ്ഥാനത്ത് സംഘടിപ്പിക്കുവാൻ തീരുമാനിച്ചിട്ടുള്ളത്. തദേശീയ ജനതയുടെ അന്തർദേശീയ ദിനമായ ഒൻപതിന് സുവർണ ജൂബിലി ആഘോഷങ്ങൾക്ക് സംസ്ഥാനത്ത് തുടക്കമാകും.

ചെക്ക് മേറ്റ് ഫിയസ്റ്റ സംഘടിപ്പിച്ചു

മൂവാറ്റുപുഴ: മൂവാറ്റുപുഴ ചെസ് ക്ലബിന്‍റെ ആഭിമുഖ്യത്തില്‍ നിര്‍മല കോളജ് ഓഡിറ്റോറിയത്തില്‍ ഓള്‍ കേരള ഓപ്പണ്‍ ചെസ് ടൂര്‍ണമെന്‍റ് ചെക്ക് മേറ്റ് ഫിയസ്റ്റ സംഘടിപ്പിച്ചു. മുന്‍ കേരള സ്റ്റേറ്റ് ചാമ്പ്യന്‍ യു.സി. മോഹനന്‍, നാഷണല്‍ അണ്ടര്‍ 14 വനിതാ ചാമ്പ്യന്‍ അനുപം എം, ശ്രീകുമാര്‍ എന്നിവര്‍ കരുക്കള്‍ നീക്കി മത്സരം ഉദ്ഘാടനം ചെയ്തു. വിവിധ ജില്ലകളില്‍ നിന്നായി 275 ഓളം മത്സരാര്‍ഥികള്‍ ടൂര്‍ണമെന്‍റില്‍ പങ്കെടുത്തു. ആര്‍ബിറ്റര്‍ കെ.എ. യൂനസിന്‍റെ നേതൃത്വത്തില്‍ ആറോളം ആര്‍ബിറ്റര്‍മാര്‍ മത്സരം നിയന്ത്രിച്ചു. 15 മിനിറ്റ് പ്ലസ് 5 സെക്കൻഡ് റാപിഡ് ഫോര്‍മാറ്റില്‍ നടന്ന മത്സരത്തില്‍ ഓരോ മത്സരാര്‍ഥികള്‍ക്കും ഏഴ് മത്സരങ്ങള്‍ ഉണ്ടായിരുന്നു. വൈകുന്നേരം നടന്ന സമാപന സമ്മേളനത്തില്‍ മാത്യു കുഴല്‍നാടന്‍ എംഎല്‍എ സമ്മാനവിതരണം നിർവഹിച്ചു. ഓപ്പണ്‍ കാറ്റഗറി വിജയി എബിന്‍ ബെന്നി, ഫസ്റ്റ് റണ്ണര്‍ അപ്പ് സിദ്ധാര്‍ഥ് സാന്‍ജോയ് എന്നിവര്‍ക്ക് എംഎല്‍എ സമ്മാനങ്ങള്‍ നല്‍കി. അണ്ടര്‍ 15 കാറ്റഗറിയില്‍ ആദിനാഥ് എആര്‍, അണ്ടര്‍ 10 കാറ്റഗറിയില്‍ അര്‍ണവ് ആനന്ദും ചാമ്പ്യന്മാരായി. വിജയികള്‍ക്ക് 42,000 രൂപ ക്യാഷ് പ്രൈസും ട്രോഫികളും സമ്മാനമായി നല്‍കി. ഏറ്റവും കൂടുതല്‍ പോയിന്‍റ് നേടിയ മൂവാറ്റുപുഴ വിമലഗിരി സ്‌കൂളിനും ഒന്നാം സ്ഥാനവും, മേരിലാൻഡ് പബ്ലിക് സ്‌കൂളിനു രണ്ടാം സ്ഥാനവും ലഭിച്ചു. മൂവാറ്റുപുഴ ചെസ് ക്ലബ് പ്രസിഡന്‍റ് ബിനീഷ് കോട്ടമുറിക്കല്‍ അധ്യക്ഷത വഹിച്ചു. ചടങ്ങില്‍ നിര്‍മല കോളജ് പ്രിന്‍സിപ്പല്‍ ഫാ. ഫ്രാന്‍സിസ് കണ്ണാടന്‍, ജില്ലാ പഞ്ചായത്ത് അംഗം ഉല്ലാസ് തോമസ്, ട്രാഫിക് എസ്ഐ കെ.പി. സിദ്ദിഖ്, ജില്ലാ സ്പോര്‍ട്സ് കൗണ്‍സില്‍ എക്സിക്യൂട്ടീവ് അംഗം പി.പി. തോമസ് എന്നിവര്‍ പങ്കെടുത്തു.

സൗത്ത് സോൺ ആർച്ചറി ചാമ്പ്യൻഷിപ്പിൽ വാഴക്കുളം കാർമലിന് സ്വർണം

വാഴക്കുളം: മഹാരാഷ്ട്രയിലെ പൂനയിൽ നടന്ന സിബിഎസ്ഇ സൗത്ത് സോൺ ആർച്ചറി ചാമ്പ്യൻഷിപ്പിൽ 19 വയസിൽ താഴെയുള്ള ആൺകുട്ടികളുടെ ഇന്ത്യൻ ബൊ ടീം വിഭാഗത്തിൽ വാഴക്കുളം കാർമൽ സിഎംഐ പബ്ലിക് സ്കൂൾ ടീമിന് സ്വർണ മെഡൽ. ഗോവിന്ദ് അരുൺ, അലൻ ജോർജ് മേജോ, ആലൻ ജൂഡ് കുര്യാക്കോസ്, ബിയോൺ ബെൻ ബൈറ്റോ,മാധവ് ആർ.കൃഷ്ണ എന്നിവരാണ് ഇന്ത്യൻ ബൊ ടീം വിഭാഗത്തിൽ മത്സരിച്ചത്. വ്യക്തിഗത ഇനം 30 മീറ്റർ വിഭാഗത്തിൽ ഗോവിന്ദ് അരുൺ വെള്ളി മെഡലും 50 മീറ്റർ ഇനത്തിൽ ആൽഫി മരിയ പ്രദീപ് വെങ്കലവും നേടി. പെൺകുട്ടികളുടെ ടീം വിഭാഗത്തിൽ റിതിക ഡിക്കിൻസും പങ്കെടുത്തു. മിക്സഡ് ടീം വിഭാഗത്തിൽ അലൻ ജോർജ് മേജോ, ആൽഫി മരിയ പ്രദീപ് എന്നിവരുടെ ടീം സ്വർണമെഡൽ കരസ്ഥമാക്കി. പൂനെ ട്രിനിറ്റി ഇന്‍റർനാഷണൽ സ്കൂളിൽ നടന്ന സിബിഎസ്ഇ സൗത്ത് സോൺ അമ്പെയ്ത്തു മത്സരത്തിൽ കാർമൽ സ്കൂൾ ടീം ഒൻപത് മെഡലുകളാണ് നേടിയത്. ഇതോടെ പഞ്ചാബിൽ നടക്കുന്ന സിബിഎസ്ഇ നാഷണൽ ചാമ്പ്യൻഷിലേക്ക് വാഴക്കുളം കാർമൽ പബ്ലിക് സ്കൂൾ ആർച്ചറി ടീം അർഹത നേടി. അജിത് ബാബു, നിഖിൽ സാജൻ എന്നിവരാണ് ആർച്ചറി ടീമിന്‍റെ പരിശീലകർ.

മൂവാറ്റുപുഴ ജനറല്‍ ആശുപത്രി വികസന പ്രവര്‍ത്തനങ്ങള്‍ അട്ടിമറിക്കാന്‍ ശ്രമം

മൂവാറ്റുപുഴ: ജനറല്‍ ആശുപത്രി വികസന പ്രവര്‍ത്തനങ്ങള്‍ അട്ടിമറിക്കാന്‍ യുഡിഎഫ് ഭരിക്കുന്ന നഗരസഭ ശ്രമിക്കുന്നതായി ആരോപണം. നഗരസഭാധ്യക്ഷന്‍ അധ്യക്ഷനായ ആശുപത്രി മാനേജിംഗ് കമ്മിറ്റി (എച്ച്എംസി) കൃത്യമായി വിളിച്ച് ചേര്‍ത്ത് ആശുപത്രിയുടെ വികസന പ്രവര്‍ത്തനങ്ങള്‍ക്ക് നേതൃത്വം കൊടുക്കാന്‍ തയാറാകുന്നില്ലെന്നാണ് എല്‍ഡിഎഫ് നേതാക്കളുടെ ആരോപണം. യുഡിഎഫ് നഗരസഭ ഭരണ നേതൃത്വം ഏറ്റെടുത്തതിനു ശേഷം ആശുപത്രിയുടെ എച്ച്എംസി യോഗം ചേരുന്നത് തന്നെ മാസങ്ങള്‍ കഴിഞ്ഞാണ്. കഴിഞ്ഞ നാല് മാസങ്ങള്‍ക്ക് ശേഷം ഇന്നലെ വിളിച്ചുചേര്‍ത്ത് യോഗത്തില്‍ എച്ച്എംസി അംഗങ്ങളായ യുഡിഎഫ് നേതാക്കള്‍ പങ്കെടുക്കാത്തത് കൊണ്ട് ക്വാറം തികയാതെ യോഗം കൂടാനായില്ല. മൂവാറ്റുപുഴ ജനറല്‍ ആശുപത്രി വികസനം അട്ടിമറിക്കാനുളള നീക്കങ്ങള്‍ക്കെതിരെ ശക്തമായ പ്രതിഷേധം ഉയരണമെന്നും എല്‍ഡിഎഫ് നേതാക്കള്‍ ആവശ്യപ്പെട്ടു.

സർക്കാർ നൽകിയ ഉറപ്പു പാലിക്കണം: വി.പി. സജീന്ദ്രൻ

കോലഞ്ചേരി: അങ്കണവാടി എംപ്ലോയീസ് ഫെഡറേഷൻ (ഐഎൻടിയുസി) സെക്രട്ടറിയേറ്റിനു മുന്നിൽ നടത്തിയ അനിശ്ചിതകാല സമരം അവസാനിപ്പിക്കുന്നതിന് സംസ്ഥാന സർക്കാർ അങ്കണവാടി ജീവനക്കാർക്ക് സർക്കാര് നൽകിയ ഉറപ്പുകൾ നടപ്പാക്കണമെന്നു കെപിസിസി വൈസ് പ്രസിഡന്‍റ് വി.പി. സജീന്ദ്രൻ ആവശ്യപ്പെട്ടു. പുത്തൻകുരിശ് ഐസിഡിഎസ് ഓഫീസിനു മുന്നിൽ അങ്കണവാടി ജീവനക്കാർ നടത്തിയ പ്രധിഷേധ സമരം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. യൂണിയൻ പ്രോജക്ട് ചെയർമാൻ സി.എൻ. വത്സലൻ പിള്ള അധ്യക്ഷത വഹിച്ചു.

യുഡിഎഫ് കുതിരക്കച്ചവടത്തിനെതിരേ എൽഡിഎഫ് പ്രതിഷേധം

കൂത്താട്ടുകുളം: നഗരസഭ ഭരണസമിതിയെ കുതിരക്കച്ചവടത്തിലൂടെ അട്ടിമറിച്ച യുഡിഎഫ് നടപടിക്കെതിരേ വൻ ജനപങ്കാളിത്തത്തോടെ എൽഡിഎഫ് പ്രതിഷേധ പ്രകടനവും യോഗവും നടത്തി. നഗരസഭ കാര്യാലയത്തിനു മുന്നിൽനിന്നും ആരംഭിച്ച പ്രകടനം നഗരം ചുറ്റി സെൻട്രൽ കവലയിൽ സമാപിച്ചു. തുടർന്നു നടന്ന യോഗത്തിൽ സിപിഎം ഏരിയ സെക്രട്ടറി പി.ബി. രതീഷ്, മറ്റ് നേതാക്കളായ സി.എൻ. പ്രഭകുമാർ, സണ്ണി കുര്യാക്കോസ്, ഫെബീഷ് ജോർജ്, അരുൺ അശോകൻ, എ.എസ്. രാജൻ, കെ. ചന്ദ്രശേഖരൻ, ബിജോ പൗലോസ്, എം.എം. അശോകൻ, വിജയ ശിവൻ എന്നിവർ പ്രസംഗിച്ചു.

സ്പെഷല്‍ സ്‌കൂളിന്‍റെ സംരക്ഷണ ഭിത്തിയിടിഞ്ഞു

മൂവാറ്റുപുഴ: ശക്തമായ മഴയില്‍ മൂവാറ്റുപുഴ നിര്‍മല സദന്‍ സ്പെഷല്‍ സ്‌കൂളിന്‍റെ സംരക്ഷണ ഭിത്തിയിടിഞ്ഞു. ചൊവ്വാഴ്ച രാവിലെ പത്തോടെയാണ് നിര്‍മല സദനിലെ ബിഎഡ് കോളജിന്‍റെ മുറ്റത്തിന്‍റെ സംരക്ഷണഭിത്തി ഇടിഞ്ഞത്. എട്ട് അടിയോളം ഉയരത്തിലും അമ്പതോളം മീറ്റര്‍ നീളത്തിലുമാണ് സംരക്ഷണഭിത്തി ഇടിഞ്ഞിരിക്കുന്നത്. വലിയ ശബ്ദത്തോടെയാണ് മുറ്റത്ത് നിരത്തിയിരിക്കുന്ന കട്ടകളും, മതിലും, മതിലുകളില്‍ സ്ഥാപിച്ചിരുന്ന പൂച്ചെട്ടികളും ഉള്‍പ്പെടെ തകര്‍ന്നു വീണത്. മുറ്റത്തിന്‍റെ സംരക്ഷണ ഭിത്തിയിടിഞ്ഞതോടെ മറ്റ് മതിലുകള്‍ക്കും വിള്ളലുകള്‍ വീണിട്ടുണ്ട്. നിര്‍മലാ സദന്‍ സ്പെഷല്‍ സ്‌കൂളിലെ കുട്ടികളെ പഠിപ്പിക്കുന്നതിനായി പരിശീലനം നേടുന്ന 135 ഓളം അധ്യാപക വിദ്യാര്‍ഥികളാണ് ഇവിടെയുള്ളത്.

ഹരിത ജനശ്രീ വാർഷികാഘോഷം

കാലടി: മറ്റൂർ ഹരിത ജനശ്രീയുടെ 13-ാം വാർഷികാഘോഷം നടത്തി. പുതുക്കാട് പ്രജ്യോതി നികേതൻ കോളജ് പ്രിൻസിപ്പൽ ഡോ. സിമി വർഗീസ് ഉദ്ഘാടനം ചെയ്തു. ചെയർമാൻ എം.എ. ഡേവിസ് അധ്യക്ഷത വഹിച്ചു. എം.ഇ. ജോയ്സൺ, മാർട്ടിൻ ചെന്പകശേരി, എം.എ. ഡേവിസ്, പി.വി. ആന്‍റണി, എം. കുട്ടപ്പൻ, സി.വി. റോയ്, കെ.വി. ആന്‍റണി, രാജേഷ് കുമാർ എന്നിവർ പ്രസംഗിച്ചു. വിവിധ മേഖലകളിൽ മികവു തെളിയിച്ചവരെ ആദരിച്ചു.

കന്യാസ്ത്രീകളെ അറസ്റ്റുചെയ്ത സംഭവം: പ്രതിഷേധ കൂട്ടായ്മ സംഘടിപ്പിച്ചു

കൊച്ചി: ഛത്തീസ്ഗഡില്‍ കന്യാസ്ത്രീകളെ അറസ്റ്റ് ചെയ്ത് ജയിലിലടച്ചതിനെതിരെയും ന്യൂനപക്ഷവേട്ടയ്‌ക്കെതിരെയും ആള്‍കൂട്ട വിചാരണക്കെതിരെയും ഭരണകൂട ഭീകരതയ്ക്കെതിരെയും വര്‍ക്കിംഗ് വുമണ്‍ കോ ഓര്‍ഡിനേഷന്‍ കേരള സംസ്ഥാന കമ്മിറ്റിയുടെ നേതൃത്വത്തില്‍ പ്രതിഷേധ കൂട്ടായ്മ സംഘടിപ്പിച്ചു. സിഐടിയു ദേശീയ വൈസ് പ്രസിഡന്‍റ് ജെ. മേഴ്‌സിക്കുട്ടിയമ്മ ഉദ്ഘാടനം ചെയ്തു. സിഐടിയു ദേശീയ സെക്രട്ടറി ദീപ കെ. രാജന്‍ അധ്യക്ഷത വഹിച്ചു.

വിദ്യാര്‍ഥികള്‍ തമ്മില്‍ സംഘട്ടനം: ഒരാള്‍ക്ക് പരിക്ക്

ആലങ്ങാട്: കൊങ്ങോര്‍പ്പിള്ളി ഗവ. ഹയര്‍സെക്കന്‍ഡറി സ്‌കൂളിലെ പ്ലസ്ടു വിദ്യാര്‍ഥികള്‍ തമ്മിലുണ്ടായ വാക്കേറ്റത്തെ തുടര്‍ന്ന് നടന്ന സംഘട്ടനത്തില്‍ ഒരാള്‍ക്കു പരിക്ക്. പാനായിക്കുളം സ്വദേശിയായ വിദ്യാർഥിക്കാണ് പരിക്കേറ്റത്. ഇന്നലെ വൈകുന്നേരം നാലരയോടെയാണു സംഭവം. വിദ്യാർഥിയുടെ തലയ്ക്കു കല്ലു കൊണ്ടിടിച്ചു പരിക്കേല്‍പ്പിച്ചതായി മൊഴിയില്‍ പറയുന്നു. തലയ്ക്കും മൂക്കിനും ഗുരുതര പരിക്കേറ്റ വിദ്യാര്‍ഥിയെ ആലുവ കാരോത്തുകുഴി ആശുപത്രിയില്‍ പ്രവേശിപ്പിച്ചു. ബിനാനിപുരം പോലീസ് അന്വേഷണമാരംഭിച്ചു.

ചെങ്ങമനാട് ഗവ. ഹയർ സെക്കൻഡറി സ്കൂളിൽ സ്ട്രീം എക്കോസിസ്റ്റം പ്രവർത്തനമാരംഭിച്ചു

നെടുമ്പാശേരി: ചെങ്ങമനാട് ഗവ. ഹയർ സെക്കൻഡറി സ്കൂളിൽ വിദ്യാർഥികളിൽ ഗവേഷണ തൽപ്പരതയും ഇന്നവേഷൻ മനോഭാവവുംജീവിത നൈപുണികളും വളർത്തിയെടുക്കുകയെന്ന ലക്ഷ്യത്തോടെ തുടക്കം കുറിച്ച സ്ട്രീം എക്കോസിസ്റ്റം (സ്ട്രീം ലാബ്) പ്രവർത്തനമാരംഭിച്ചു. ആധുനിക സംവിധാനങ്ങളോടെ ഇലക്ട്രോണിക്സ്, സയൻസ്,ക്രാഫ്റ്റ് ആൻഡ് ടൂൾസ്, ഡിജിറ്റൽ ഫേബ്രിക്കേഷൻ, മീഢിയ ലാബുകൾക്കാണ് തുടക്കം കുറിച്ചിരിക്കുന്നത്. മൈക്രോസ്കോപ്പ്, വിവിധതരം ഇലക്ട്രോണിക് കമ്പോണൻസ്, ടൂൾസ്, ക്രാഫ്റ്റ് ഐറ്റംസ്, ത്രീഡി പ്രിൻ്റർ, വി.ആർ എന്നിങ്ങനെ നിരവധി ആധുനിക സംവിധാനങ്ങൾ സ്ട്രീം ഹബ്ബിൽ വിദ്യാർഥികൾക്ക് ലഭ്യമാണ്. അസി. ജില്ലാ കളക്ടർ പാർവതി ഗോപകുമാർ ഉദ്ഘാടനം ചെയ്തു. വിദ്യഭ്യാസ അവാർഡുകളും വിതരണം ചെയ്തു. ഗ്രാമ പഞ്ചായത്ത് വൈസ് പ്രസിഡന്‍റ് സി.എസ്. അസീസ് മുഖ്യ പ്രഭാഷണം നടത്തി. പിടിഎ പ്രസിഡന്‍റ് എം.എച്ച്. അബ്ദുസമദ് അധ്യക്ഷത വഹിച്ചു.

സാമൂഹ്യ വിരുദ്ധർ ഇരിപ്പിടം തകർത്തു

മരട്: നെട്ടൂരിൽ അന്താരാഷ്ട്ര പച്ചക്കറി മാർക്കറ്റിലേയ്ക്കുള്ള റോഡിന് സമീപം സ്ഥാപിച്ച ഇരിപ്പിടം സാമൂഹ്യ വിരുദ്ധർ തകർത്തു. കഴിഞ്ഞ ദിവസം രാത്രിയാണ് തല്ലത്തകർത്തത്. രണ്ട് ഇരിപ്പിടങ്ങളിൽ ഒരെണ്ണമാണ് തകർന്നത്. കൗൺസിലർ എ.കെ. അഫ്സൽ പനങ്ങാട് പോലീസിൽ പരാതി നൽകിയതിനെ തുടർന്ന് സിഐയുടെ നേതൃത്വത്തിൽ സ്ഥലത്തെത്തി സമീപത്തെ സിസിടിവികൾ കേന്ദ്രീകരിച്ച് അന്വേഷണമാരംഭിച്ചു. റോഡ് നവീകരണത്തിന്‍റെ ഭാഗമായി സ്പോൺസർമാരെ കണ്ടെത്തി ചെടികളും ഇരിപ്പിടവും ഒരുക്കി മനോഹരമാക്കിയിരുന്നതായിരുന്നു ഇവിടം.

കാൻസർ കാരണങ്ങളും പ്രതിരോധ മാർഗങ്ങളും: പുസ്തകം പ്രകാശനം ചെയ്തു

കൊച്ചി: വിപിഎസ് ലേക്‌ഷോർ ആശുപത്രിയിലെ ഓങ്കോളജിസ്റ്റായ ഡോ. റോജ ജോസഫ് രചിച്ച "കാൻസർ: കാരണങ്ങളും പ്രതിരോധ മാർഗങ്ങളും' എന്ന പുസ്തകം ആശുപത്രി മാനേജിംഗ് ഡയറക്ടർ എസ്.കെ. അബ്ദുള്ള പ്രകാശനം ചെയ്തു. കാൻസറുകളുടെ കാരണങ്ങൾ, ലക്ഷണങ്ങൾ, പ്രതിരോധമാർഗങ്ങൾ എന്നിവയെക്കുറിച്ചുള്ള ഉൾക്കാഴ്ചകളാണു പുസ്തകത്തിന്‍റെ ഉള്ളടക്കം.

താന്തോണിത്തുരുത്തിനു ചുറ്റിലും വെള്ളം; പക്ഷേ കുടിവെള്ളത്തിനായി നെട്ടോട്ടം

കുടിവെള്ളം മുടങ്ങിയിട്ട് രണ്ടുമാസം കൊച്ചി: നാലു വശവും വെള്ളത്താല്‍ ചുറ്റപ്പെട്ടതാണെങ്കിലും താന്തോണിത്തുരുത്ത് നിവാസികള്‍ നേരിട്ടുന്ന വലിയ പ്രതിസന്ധികളിലൊന്നാണ് കുടിവെള്ള പ്രശ്‌നം. വാട്ടര്‍ അഥോറിറ്റിയുടെ കുടിവെള്ളത്തെ മാത്രം ആശ്രയിക്കുന്ന തുരുത്ത് നിവാസികള്‍ക്ക് കൊച്ചി കോര്‍പറേഷന്‍റെ ജനകീയാസൂത്രണ പദ്ധതിയില്‍ ഉള്‍പ്പടുത്തി അഞ്ച് വര്‍ഷം മുന്‍പ് വാട്ടര്‍ കണക്ഷന്‍ ലഭിച്ചെങ്കിലും കഴിഞ്ഞ രണ്ടു മാസത്തിലേറെയായി ഈ പൈപ്പുകളില്‍ നിന്ന് ഒരിറ്റ് വെള്ളം പോലും കിട്ടുന്നില്ല. പരാതികള്‍ നിരന്തരം വാക്കാലും നിവേദനമായും നല്‍കിയെങ്കിലും ഒരു ഫലവും ഉണ്ടായില്ല. ഒടുവില്‍ തുരുത്തിലെ 45 ഓളം വരുന്ന കുടുംബങ്ങള്‍ക്ക് വാട്ടര്‍ അഥോറിറ്റി ഓഫീസ് ഉപരോധിക്കേണ്ടിവന്നു. തമ്മനം പമ്പ് ഹൗസില്‍ നിന്നുള്ള വെള്ളമാണ് കായലിനടിയിലൂടെ സ്ഥാപിച്ച പൈപ്പുകള്‍ വഴി തുരുത്ത് നിവാസികളിലെത്തുന്നത്. രണ്ട് മാസമായി കുടിവെള്ളം കിട്ടാക്കനിയായതോടെ പെരുംമഴയില്‍ പോലും വഞ്ചിയില്‍ മറുകരയിലെത്തി വെള്ളം ശേഖരിക്കേണ്ട ദുരിതത്തിലാണ് ഇവര്‍. കരയിലൂടെ സ്ഥാപിച്ച പിവിസി പൈപ്പ് പൊട്ടിയോ അടഞ്ഞോ തടസം ഉണ്ടായതാകാമെന്നാണ് പ്രദേശവാസികള്‍ പറയുന്നത്. എന്നാല്‍ പച്ചാളത്ത് താത്കാലിക പമ്പ്‌സെറ്റ് സ്ഥാപിച്ച് പമ്പ് ചെയ്യുമ്പോള്‍ വെള്ളം ലഭിക്കുന്നുണ്ട്. നേരിട്ടുള്ള പമ്പിംഗിലാണ് പ്രശ്‌നം. അതു കണ്ടെത്താന്‍ വാട്ടര്‍ അഥോറിറ്റിക്ക് കഴിയുന്നുമില്ല. കുടിവെള്ള പ്രശ്‌നത്തിന് പരിഹാരം ആവശ്യപ്പെട്ട് ഇന്നലെ ദ്വീപിലെ സ്ത്രീകളടക്കം പള്ളിമുക്ക് വാട്ടര്‍ അഥോറിറ്റി ഓഫീസിലെത്തി പ്രതിഷേധിച്ചതോടെ വേഗം പരിഹാരം ഉണ്ടാക്കാമെന്ന ഉറപ്പ് നല്‍കിയിരിക്കുകയാണ് ഉദ്യോഗസ്ഥര്‍. താത്കാലിക പരിഹാരമായി ഇന്നലെ ടാങ്കറില്‍ വെള്ളം എത്തിച്ചു. മുന്ന് ദിവസത്തിനുള്ളില്‍ പ്രശ്‌നം പരിഹരിക്കാമെന്നാണ് ഉറപ്പ്. അതുവരെ താത്കാലികാശ്വാസമായി ടാങ്കറില്‍ വെള്ളമെത്തിക്കാന്‍ ഡിവിഷന്‍ കൗണ്‍സിലറോട് ഉദ്യോഗസ്ഥര്‍ ആവശ്യപ്പെട്ടിട്ടുണ്ട്.

കളമശേരിയിൽ പോഷക സമൃദ്ധം പ്രഭാതം പദ്ധതിക്കു തുടക്കം

കളമശേരി: സ്കൂൾ വിദ്യാർഥികൾക്ക് പ്രഭാത ഭക്ഷണം നൽകുന്ന സംസ്ഥാനത്തെ ആദ്യ പദ്ധതിയായ കളമശേരി മണ്ഡലം "പോഷക സമൃദ്ധം പ്രഭാതം' പദ്ധതിയുടെ നാലാം വർഷത്തെ വിതരണം ആരംഭിച്ചു. വ്യവസായ മന്ത്രി പി. രാജീവിന്‍റെ നേതൃത്വത്തിൽ നടപ്പാക്കുന്ന സ്കൂൾ വിദ്യാർഥികൾക്കുള്ള പ്രഭാത ഭക്ഷണ പരിപാടിയാണ് പോഷക സമൃദ്ധം പ്രഭാതം പദ്ധതി. മണ്ഡലത്തിലെ എല്ലാ സർക്കാർ-എയ്ഡഡ് പ്രൈമറി സ്കൂളുകളിലുമാണ് വിദ്യാർഥികൾക്ക് പ്രഭാത ഭക്ഷണം നൽകുന്നത്. പരിപാടിയുടെ ഉദ്ഘാടനം കളമശേരി എച്ച്എംടി കോളനി എൽപി സ്കൂളിൽ മന്ത്രി പി. രാജീവ് നിർവഹിച്ചു. മണ്ഡലത്തിലെ എല്ലാ സർക്കാർ-എയ്ഡഡ് സ്കൂളുകളിലേയും വിദ്യാർഥികൾക്ക് ശുദ്ധജലം നൽകുന്നതിന് മൂന്ന് കോടി രൂപ ചെലവഴിച്ച് റിവേഴ്സ് ഓസ്മോസിസ് പ്ളാന്‍റുകൾ സ്ഥാപിച്ചതായി പി.രാജീവ് പറഞ്ഞു. നിയോജകമണ്ഡലത്തിലെ 39 സർക്കാർ-എയ്ഡഡ് സ്കൂളുകളിലെ എൽപി, യുപി വിദ്യാർഥികൾക്കാണ് സൗജന്യമായി പ്രഭാതഭക്ഷണം ഒരുക്കുന്നത്. ഓരോ ദിവസവും എട്ടായിരത്തോളം കുട്ടികൾക്കാണ് പ്രഭാത ഭക്ഷണം നൽകുന്നത്. ബിപിസിഎൽ കൊച്ചി റിഫൈനറിയുടെ പിന്തുണയോടെയാണ് പ്രഭാത ഭക്ഷണ പദ്ധതി നടപ്പാക്കുന്നത്. നഗരസഭാ ചെയർപേഴ്സൺ സീമാ കണ്ണൻ അധ്യക്ഷയായി. ജില്ലാ കളക്ടർ എൻ.എസ്.കെ. ഉമേഷ്, ബിപിസിഎൽ കൊച്ചി റിഫൈനറി എക്സിക്യൂട്ടീവ് ഡയറക്ടർ എം. ശങ്കർ, ഡിപിസി അംഗം ജമാൽ മണക്കാടൻ, കെ.കെ. ശശി, റാണി രാജേഷ്, റഷീദ് അയ്യമ്പ്രത്ത്, കെ.എ. അൻവർ തുടങ്ങിയവർ സംസാരിച്ചു.

കൊച്ചിയിലെ ചെളി നീക്കം അവതാളത്തിൽ : സിൽട്ട് പുഷർ നഗരസഭയ്ക്ക് ബാധ്യതയെന്ന്

ഫോർട്ടുകൊച്ചി: സിൽട്ട് പുഷർ ചെളിനീക്കം ചെയ്യൽ നഗരസഭയ്ക്ക് വൻ ബാധ്യതയെന്ന് പ്രതിപക്ഷം. നഗരത്തിലെ തോടുകളിലെ ചെളിനീക്കം ചെയ്യാൻ സിഎസ്എംഎൽ പദ്ധതിയിൽ കോടികൾ മുടക്കി വാങ്ങിയ സില്‍ട്ട് പുഷർ മെഷീൻ ഉപയോഗിച്ച് ഫലപ്രദമായി ചെളി നീക്കം ചെയ്യാൻ കഴിയുന്നില്ലെന്ന് ഉദ്യോഗസ്ഥർ തന്നെ പറയുന്നു. സില്‍ട്ട് പുഷർ ഉപയോഗിച്ച് ചെളി നീക്കം ചെയ്യുന്നതിൽ പുരോഗതിയില്ലാത്തതിനാൽ തോടുകളിലെ ചെളിനീക്കം ചെയ്യാൻ ഇപ്പോൾ കരാർ നൽകുകയാണ്. നഗരത്തിലെ വെള്ളക്കെട്ട് പരിഹരിക്കുന്നതിന് സിൽട്ട് പുഷർ യന്ത്രം ഉപയോഗിച്ച് ചെളി നീക്കം ചെയ്യാൻ കഴിയുന്നില്ലെന്ന് മാത്രമല്ല, ഭീമമായ തുക ഇതിന്‍റെ പ്രവർത്തനത്തിനും പരിപാലനത്തിനുമായി ചെലവഴിക്കേണ്ടിയും വരുന്നു. ഇതുപയോഗിച്ച് 63 മണിക്കൂർ കൊണ്ട് 502 ക്യൂബിക് മീറ്റർ ചെളി നീക്കം ചെയ്യുന്നതിന് 5,16,273 രൂപയാണ് ബില്ല് നൽകിയത്. സിൽട്ട് പുഷർ ഉപയോഗിച്ച് ഒരു ക്യൂബിക് മീറ്റർ ചെളി നീക്കം ചെയ്യുന്നതിന് 1,016 രൂപയാണ് നൽകേണ്ടി വരുന്നത്. എന്നാൽ നഗരസഭ ടെൻഡർ നടപടികളിലൂടെ ചെളിനീക്കം ചെയ്തതിന് ഒരു ക്യൂബിക് മീറ്ററിന് 247 രൂപ മാത്രമാണ് നൽകുന്നത്. സിൽട്ട് പുഷർ കൊണ്ട് നീക്കം ചെയ്യുന്ന ചെളി ബ്രഹ്മപുരത്ത് എത്തിക്കേണ്ടത് നഗരസഭയുടെ ഉത്തരവാദിത്വം കൂടിയാണ്. 580 മണിക്കൂർ കൊണ്ട് 5,052 ക്യൂബിക് മീറ്റർ ചെളി മാത്രമാണ് നീക്കം ചെയ്തിട്ടുള്ളത്. മണിക്കൂറിൽ ഏറ്റവും കുറഞ്ഞത് 23 ക്യൂബിക് മീറ്റർ ചെളി എങ്കിലും നീക്കം ചെയ്യണമെന്നാണ് ഉദ്യോഗസ്ഥർ പറയുന്നത്. എന്നാൽ മണിക്കൂറിൽ എട്ട് ക്യൂബിക് മീറ്റർ ചെളി മാത്രമാണ് സിൽട്ട് പുഷർ ഉപയോഗിച്ച് നീക്കം ചെയ്തിട്ടുള്ളത്. ചെളി കോരി പണം പാഴാക്കുന്നുവെന്ന് ആക്ഷേപം നിലനിൽക്കുമ്പോഴും അതിനെയെല്ലാം വെല്ലുന്ന രീതിയിൽ നഗരസഭയുടെ പണം പാഴാക്കുന്ന തരത്തിലാണ് സിൽട് പുഷറിന്‍റെ ഉപയോഗ രീതി. കോടികൾ മുടക്കി വാങ്ങിയ മെഷീൻ നഗരസഭയ്ക്ക് ധനനഷ്ടം ഇല്ലാതെ ഉപയോഗിക്കുന്ന രീതിയിൽ കരാർ ഉണ്ടാക്കണം. അല്ലെങ്കിൽ വരും കൗൺസിലുകൾക്ക് ഇതു വലിയ ബാധ്യതയായി തീരുമെന്ന് പ്രതിപക്ഷ നേതാവ് അഡ്വ. ആന്‍റണി കുരീത്തറയും പാർലമെന്‍ററി പാർട്ടി സെക്രട്ടറി എം.ജി. അരിസ്റ്റോറിലും പറഞ്ഞു.

നവീകരിച്ച ചാപ്പലിന്‍റെ ആശീർവാദം ഇന്ന്

മലയാറ്റൂർ : ദിവ്യകാരുണ്യ മിഷനറി സഭാംഗം ഫാ. ജോർജ് കുറ്റിക്കലച്ചൻ സ്ഥാപിച്ച ആകാശ പറവകളുടെ കൂട്ടുകാരുടെ 33-ാം സ്ഥാപക ദിനവും നവീകരിച്ച ചാപ്പലിന്‍റെ ആശീർവാദവും ഈശോയുടെ രൂപാന്തരീകരണ തിരുനാൾ ആലോഷങ്ങളും ഇന്ന് നടക്കുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. ബിഷപ് മാർ ജോസഫ് അരുമച്ചാടത്ത് മുഖ്യകാർമികത്വം വഹിക്കും. മലയാറ്റൂർ മാർവാലാഹ് ആശ്രമത്തിൽ ഉച്ചകഴിഞ്ഞ് മൂന്നിന് കരുണയുടെ ജപമാല. തുടർന്ന് ബിഷപ്പിന് സ്വീകരണവും ചാപ്പൽ ആശീർവാദവും. വൈകുന്നേരം അഞ്ചിന് നടക്കുന്ന പൊതു സമ്മേളനം റോജി എം. ജോൺ എംഎൽഎ ഉദ്ഘാടനം ചെയ്യും. ബിഷപ് മാർ ജോസഫ് അരുമച്ചാടത്ത് അനുഗ്രഹ പ്രഭാഷണം നടത്തും. മലയാറ്റൂർ പള്ളി വികാരി ഫാ. ജോസ് ഒഴലക്കാട്ട് മുഖ്യ പ്രഭാഷണം നടത്തും. മലയാറ്റൂർ നീലീശ്വരം ഗ്രാമ പഞ്ചായത്ത് പ്രസിഡന്‍റ് ജോയി അവോക്കാരൻ ആദരിക്കൽ ചടങ്ങ് നടത്തും.

തെരുവുനായ ശല്യം: നിവേദനം നൽകി

നെടുമ്പാശേരി: നെടുമ്പാശേരി പഞ്ചായത്തിലെ തെരുവുനായ ശല്യത്തിന് പരിഹാരം കാണണമെന്നാവശ്യപ്പെട്ട് യൂത്ത് കോൺഗ്രസ്‌ നെടുമ്പാശേരി മണ്ഡലം കമ്മിറ്റി പഞ്ചായത്ത്‌ സെക്രട്ടറിക്ക് നിവേദനം നൽകി. കോൺഗ്രസ്‌ നെടുമ്പാശേരി മണ്ഡലം പ്രസിഡന്‍റ് എൽദോ പൈനാടൻ നേതൃത്വം നൽകി. കോൺഗ്രസ്‌ മണ്ഡലം പ്രസിഡന്‍റ് പി.ജെ. ജോയി,ബ്ലോക്ക്‌ കോൺഗ്രസ്‌ കമ്മിറ്റി സെക്രട്ടറിമാരായ എ.കെ. ധനേഷ്, ജോസ് പൈനാടത്ത് തുടങ്ങിയവർ പങ്കെടുത്തു.

വിമെൻ ഇൻ ബിസിനസ് കോൺക്ലേവ്

ആലുവ: സ്ത്രീ സംരംഭകരെ പ്രോത്സാഹിപ്പിക്കുന്നതിനും ബിസിനസിൽ വനിതകളുടെ പങ്കാളിത്തം വിപുലപ്പെടുത്തുന്നതും ലക്ഷ്യമിട്ട് സെന്‍റ് സേവ്യേഴ്സ് കോളജ് ഫോർ വിമെൻ, ആലുവയിൽ വിമെൻ ഇൻ ബിസിനസ് കോൺക്ലെവ് സംവാദവേദി സംഘടിപ്പിച്ചു. ഐഇഡിസി യുടെയും ഐഐസി യുടെയും കൊമേഴ്സ് വിഭാഗത്തിന്‍റെയും ആഭിമുഖ്യത്തിൽ ഇന്‍റർനാഷണൽ കൊമേഴ്സ് ദിനത്തോടനുബന്ധിച്ച് നടന്ന പരിപാടിയിൽ കോസ്റ്റ് അക്കൗണ്ടന്‍റ് പുഷ്പി മുറിക്കൻ മോഡറേറ്ററായി.വിവിധ വ്യവസായ മേഖലകളിൽ വിജയം നേടിയ സ്ത്രീകൾ വേദിയിൽ അനുഭവങ്ങൾ പങ്കുവെച്ചു. ആഷ സുരേഷ് (ഡയറക്ടർ, മിസ്റ്റി മൗണ്ടൻ റിസോർട്ട്),ലൈല സുധീഷ് (കെയർ ഫോർ യു സർവീസസ്),റെനു നവിൻ (നിതാര സ്റ്റുഡിയോ), വി.ജെ. രാജി( ഇന്ത്യൻ വോഗ്), ദീപ മത്തായി (അൽസ്കെയ്പ്പ്),ഡോ. മുംതാസ് ഖാലിദ് ഇസ്മായിൽ (ടോട്ടൽ ന്യൂട്രിഷ്യൻ പ്ലസ്)എന്നിവരാണ് പാനൽ ചർച്ചയിൽ പങ്കെടുത്തത്.

നെടുമ്പാശേരി സഹ. ബാങ്ക് പ്രസിഡന്‍റ് അവിശ്വാസത്തിൽ വീണു

നെടുമ്പാശേരി : നെടുമ്പാശേരി സഹകരണ ബാങ്ക് പ്രസിഡന്‍റ് അവിശ്വാസ പ്രമേയത്തിലൂടെ പുറത്തായി. 13 അംഗ ഭരണ സമിതിയിൽ പ്രസിഡൻ്റ് പി.പി. ഐസക്കിനെതിരായ അവിശ്വാസ പ്രമേയത്തെ ഒൻപത് അംഗങ്ങളാണ് അനുകൂലിച്ചത്. പ്രമേയത്തെ എതിർക്കാൻ ഡയറക്ടർ ബോർഡ് അംഗങ്ങളിൽ ഒരാൾ പോലും യോഗത്തിനെത്തിയില്ല. ഡയറക്ടർ ബോർഡിലെ എല്ലാ അംഗങ്ങളും കോൺഗ്രസിൽ നിന്നാണ്. വിഭാഗീയതയെ തുടർന്നാണ് പ്രസിഡന്‍റിനെ അവിശ്വാസത്തിലൂടെ പുറത്താക്കിയത്. പ്രശ്നം പരിഹരിക്കാൻ ഡിസിസി, ബ്ലോക്ക്, മണ്ഡലം നേതൃത്വങ്ങൾ ഇടപെട്ട് നിരവധി ശ്രമങ്ങൾ നടത്തിയെങ്കിലും ഫലമുണ്ടായില്ല. ഭരണസമിതിയുടെ കാലാവധി അവസാനിക്കാൻ രണ്ട് വർഷം കൂടി അവശേഷിക്കുമ്പോഴാണ് പ്രസിഡന്‍റ് പുറത്താകുന്നത്. ഭരണസമിതി തെരഞ്ഞെടുപ്പിന് ശേഷം ആദ്യ രണ്ട് വർഷം പ്രസിഡന്‍റായിരുന്ന സി.വൈ. ശാബോർ കോൺഗ്രസിലെ ധാരണയുടെ അടിസ്ഥാനത്തിൽ രാജിവച്ചതിനെ തുടർന്ന് ഒരു വർഷം മുൻപാണ് പി.പി. ഐസക്ക് പ്രസിഡന്‍റായത്. കോൺഗ്രസിലെ ഒരു വിഭാഗം നേതാക്കളുടെ ഗ്രൂപ്പ് താൽപര്യങ്ങളാണ് തന്നെ പുറത്താക്കാൻ കാരണമെന്ന് പി.പി. ഐസക് വാർത്താസമ്മേളനത്തിൽ കുറ്റപ്പെടുത്തി. ഡയറക്ടർ ബോർഡ് അംഗങ്ങളെ യോജിപ്പിച്ച് മുന്നോട്ട് നയിക്കുന്നതിൽ പരാജയപ്പെട്ടതിനെ തുടർന്ന് ബാങ്ക് പ്രസിഡന്‍റിനോട് രാജി വെയ്ക്കാൻ പാർട്ടി ആവശ്യപ്പെടുകയായിരുന്നെന്ന് കോൺഗ്രസ് ബ്ലോക്ക് പ്രസിഡന്‍റ് കെ.എം. കൃഷ്ണകുമാർ പറഞ്ഞു.

കൂനമ്മാവ് ചാവറ സ്‌പെഷല്‍ സ്‌കൂളില്‍ ചില്‍ഡ്രന്‍സ് വില്ലേജ്

വരാപ്പുഴ: സിഎംസി വിമല പ്രോവിന്‍സിന്‍റെ നേതൃത്വത്തിലുള്ള കൂനമ്മാവ് ചാവറ സ്‌പെഷല്‍ സ്‌കൂളില്‍ ചില്‍ഡ്രന്‍സ് വില്ലേജ് ആരംഭിക്കുന്നു. ചാവറ സ്‌പെഷല്‍ സ്‌കൂള്‍, പ്രാര്‍ഥന ഫൗണ്ടേഷന്‍, ചിറ്റിലപ്പിള്ളി ഫൗണ്ടേഷന്‍ എന്നിവയുടെ സഹകരണത്തോടെയാണിത്. 12 വയസു വരെയുള്ള കുട്ടികൾക്ക് ആധുനിക സൗകര്യങ്ങളോടെ ക്രമീകരിച്ചിട്ടുള്ള വിവിധ തെറാപ്പികളിലൂടെ പരിശീലനം നല്കും. ബുദ്ധി, ചലന, കാഴ്ച, ശ്രവണ പരിമിതികളെ ലഘൂകരിക്കുന്നതിനുള്ള ഫിസിയോ തെറാപ്പി, സ്പീച്ച് തെറാപ്പി, ഒക്യുപ്പേഷണല്‍ തെറാപ്പി, ബിഹേവിയര്‍ തെറാപ്പി തുടങ്ങിയ സേവനങ്ങള്‍ ആണ് നല്‍കുന്നത്. ചെറുപ്പത്തിലെ തന്നെ ഭിന്നശേഷിക്കാരായ കുട്ടികളുടെ പരിമിതികള്‍ കണ്ടെത്തി പരിശീലനത്തിലൂടെ ലഘൂകരിക്കാനാണു ചില്‍ഡ്രന്‍സ് വില്ലേജ് ലക്ഷ്യമിടുന്നതെന്നു ചാവറ പ്രിന്‍സിപ്പല്‍ ഫാ.ജോബി കോഴിക്കോട് പറഞ്ഞു. ചില്‍ഡ്രന്‍സ് വില്ലേജിന്‍റെ ഉദ്ഘാടനം നാളെ വൈകുന്നേരം നാലിനു ഹൈക്കോടതി ജഡ്ജി ദേവന്‍ രാമചന്ദ്രന്‍ നിര്‍വഹിക്കും. പ്രതിപക്ഷനേതാവ് വി.ഡി. സതീശന്‍ അധ്യക്ഷത വഹിക്കും. 1991ലാണ് ചാവറ സ്‌പെഷല്‍ സ്‌കൂള്‍ ആരംഭിച്ചത്. ചാവറ വൊക്കേഷണല്‍ ട്രെയ്‌നിംഗ് സെന്‍റര്‍, ചാവറ ഭവന്‍ ബോര്‍ഡിംഗ് എന്നിവിടങ്ങളിലായി മുന്നൂറോളം ഭിന്നശേഷിക്കാര്‍ ഇവിടെ പരിശീലനം നേടുന്നുണ്ട്. പെണ്‍കുട്ടികള്‍ക്കായി ചാവറഭവന്‍ ബോര്‍ഡിംഗ് സ്‌കൂളും ഉണ്ടെന്ന് സിസ്റ്റര്‍ ജില്‍സി, സിസ്റ്റര്‍ ജെസ്ലിന്‍, സിസ്റ്റര്‍ ജിത, പ്രാര്‍ഥന ഫൗണ്ടേഷന്‍ കോ-ഓർഡിനേറ്റര്‍ ജീജ കുര്യന്‍, മേഘ യു.ബോള്‍ഡിന്‍ എന്നിവര്‍ അറിയിച്ചു.

മാടവനയിൽ സിഗ്നൽ തെറ്റിച്ച് പിക്കപ്പ് വാൻ കാറിലിടിച്ചു

മരട്: മാടവന ജംഗ്‌ഷനിൽ സിഗ്നൽ തെറ്റിച്ചു വന്ന പിക്കപ്പ് വാൻ കാറിലിടിച്ചു. അപകടത്തിൽ ആർക്കും പരിക്കില്ല. ഇന്നലെ പുലർച്ചെയായിരുന്നു സംഭവം. പൊള്ളാച്ചിയിൽ നിന്ന് പച്ചക്കറിയുമായി വരികയായിരുന്ന പിക്കപ്പാണ് കാറിലിടിച്ചത്. പനങ്ങാട് പോലീസ് സ്റ്റേഷനിൽ എത്തിച്ചു നടത്തിയ പരിശോധനയിൽ പിക്കപ്പ് ഡ്രൈവർ മദ്യപിച്ചിരുന്നെന്ന് തെളിഞ്ഞു.

കവളങ്ങാട് പഞ്ചാ‌യത്തിൽ പ്രസിഡന്‍റും വൈസ് പ്രസിഡന്‍റും അയോഗ്യർ

കോതമംഗലം: കവളങ്ങാട് പഞ്ചായത്തില്‍ കൂറുമാറിയ പ്രസിഡന്‍റും വൈസ് പ്രസിഡന്‍റും ഉൾപ്പെടെ മൂന്ന് വിമത കോണ്‍ഗ്രസ് അംഗങ്ങളെ തെരഞ്ഞെടുപ്പ് കമ്മീഷൻ അയോഗ്യരാക്കി. പഞ്ചായത്ത് പ്രസിഡന്‍റ് സിബി മാത്യു, വൈസ് പ്രസിഡന്‍റ് ലിസി ജോളി, ക്ഷേമകാര്യ സ്ഥിരം സമിതി അധ്യക്ഷ ഉഷ ശിവന്‍ എന്നിവരാണ് അയോഗ്യരാക്കപ്പെട്ടത്. കോണ്‍ഗ്രസിന്‍റെ വിപ്പ് ലംഘിച്ച്, യുഡിഎഫ് ഭരണസമിതിയെ അട്ടിമറിച്ചാണ് ഇവർ എല്‍ഡിഎഫിനൊപ്പം ചേര്‍ന്ന് ഭരണം പിടിച്ചത്. പ്രസിഡന്‍റായിരുന്ന സൈജന്‍റ് ചാക്കോ കോണ്‍ഗ്രസിലെ ധാരണപ്രകാരം രാജിവച്ചശേഷമുണ്ടായ പ്രസിഡന്‍റ് തെരഞ്ഞെടുപ്പിലാണ് കൂറുമാറ്റമുണ്ടായത്.18 അംഗ ഭരണസമിതിയില്‍ യുഡിഎഫിന് പത്തും എല്‍ഡിഎഫിന് എട്ടും അംഗങ്ങളാണുണ്ടായിരുന്നത്. 2023 ഓഗസ്റ്റ് എട്ടിന് നടന്ന പ്രസിഡന്‍റ് തെരഞ്ഞെടുപ്പില്‍ സിബി മാത്യുവും ലിസി ജോളിയും ഉഷ ശിവനും എത്തിയതോടെ എല്‍ഡിഎഫിന്‍റെ അംഗബലം 11 ആകുകയും എൽഡിഎഫ് ഭരണം പിടിച്ചെടുക്കുകയും ആയിരുന്നു. വിപ്പ് ലംഘനത്തിന്‍റെ വ്യക്തമായ തെളിവുകളുമായാണ് മുന്‍ പ്രസിഡന്‍റ് സൈജന്‍റ് ചാക്കോ തെരഞ്ഞെടുപ്പ് കമ്മീഷനെ സമീപിച്ചത്. പരാതി നല്‍കി രണ്ട് വര്‍ഷമാകാന്‍ ദിവസങ്ങള്‍ മാത്രമുള്ളപ്പോഴാണ് അയോഗ്യരാക്കികൊണ്ടുള്ള ഉത്തരവുണ്ടായത്. അതേസമയം ഭരണസമിതിയിലെ അംഗങ്ങളുടെ എണ്ണം പതിനഞ്ചായി ചുരുങ്ങുമ്പോഴും ഭൂരിപക്ഷം എല്‍ഡിഎഫിന് തന്നെയാകും. എട്ട് അംഗങ്ങള്‍ എല്‍ഡിഎഫിന് ഇപ്പോഴുണ്ട്. യുഡിഎഫിന് ഏഴ് അംഗങ്ങളും. ഇതുമൂലം ഭരണത്തില്‍ തുടരാന്‍ എല്‍ഡിഎഫിന് കഴിയും. അയോഗ്യരാക്കപ്പെട്ടവര്‍ കോടതിയില്‍ നിന്ന് അനുകൂല വിധി സമ്പാദിച്ചില്ലെങ്കില്‍ അടുത്ത രണ്ട് തെരഞ്ഞെടുപ്പിലും ഈ മൂന്ന് പേര്‍ക്കും മത്സരിക്കാനാവില്ല.അടുത്ത പ്രസിഡന്‍റ് തെരഞ്ഞെടുപ്പ് നടക്കുന്നതുവരെ വികസന സ്ഥിരം സമിതി ചെയര്‍മാനായ സിപിഐയിലെ റ്റി.എച്ച്. നൗഷാദ് പ്രസിഡന്‍റിന്‍റെ ചുമതല വഹിക്കും. പ്രസിഡന്‍റ് തെരഞ്ഞെടുപ്പിന്‍റെ കാര്യത്തില്‍ തെരഞ്ഞെടുപ്പ് കമ്മീഷനാണ് തീരുമാനമെടുക്കേണ്ടത്. പൊതുതെരഞ്ഞെടുപ്പ് അടുത്തതിനാല്‍ അയോഗ്യരാക്കപ്പെട്ടവരുടെ വാര്‍ഡുകളില്‍ ഉപതെരഞ്ഞെടുപ്പ് നടക്കില്ല.

ഇരുട്ടി വെളുത്തപ്പോള്‍ കൊച്ചി വെള്ളക്കെട്ടില്‍

കൊച്ചി: ഇന്നലെ പുലര്‍ച്ചെ മണിക്കൂറോ ളം നിന്നുപെയ്ത ശക്തമായ മഴയില്‍ കൊച്ചി നഗരം വെള്ളത്തിലായി. താഴ്ന്ന പ്രദേശങ്ങളിലെല്ലാം വെള്ളം കയറി. പലയിടങ്ങളിലും ഗതാഗതം തടസപ്പെട്ടു. കിഴക്കന്‍ മേഖലകളില്‍ മരങ്ങള്‍ ഒടിഞ്ഞുവീണ് വൈദ്യുതി കമ്പികള്‍ പൊട്ടി. കുണ്ടുംകുഴിയുമായ പള്ളിമുക്ക്-പുന്നല റോഡില്‍ ആക്‌സില്‍ ഒടിഞ്ഞു വാഹനം വെള്ളക്കെട്ടില്‍ കുടുങ്ങി. തീരമേഖലയിൽ കടല്‍കയറ്റവും വെള്ളക്കെട്ടും ജനജീവിതം ദുരിതത്തിലാക്കി. കെഎസ്ആര്‍ടിസി ബസ് സ്റ്റാന്‍ഡിലും സൗത്ത് റെയില്‍വേ സ്റ്റേഷന്‍റെ പ്രവേശ കവാടത്തിനു മുന്നിലും വെള്ളക്കെട്ടിൽ യാത്രക്കാര്‍ വലഞ്ഞു. പരമാര റോഡ്, കലാഭവന്‍ റോഡ്, കാരിക്കാമുറി പ്രദേശം, പാലാരിവട്ടം സെന്‍റ് മാര്‍ട്ടിന്‍ പള്ളിക്ക് മുന്‍വശം, ഇടപ്പള്ളി ചങ്ങമ്പുഴ പാര്‍ക്കിന് മുന്‍വശം, സ്റ്റേഡിയം ലിംഗ് റോഡ്, കടവന്ത്ര, ഇടപ്പള്ളി ടോള്‍, കളമശേരി പ്രീമിയര്‍ ഭാഗങ്ങളിലെല്ലാം വെള്ളക്കെട്ട് രൂക്ഷമായിരുന്നു. മഴയുടെ ശക്തി കുറഞ്ഞതോടെ വെള്ളക്കെട്ട് ഒഴിവായി. വെള്ളക്കെട്ട് ഒഴിവാക്കാൻ ഡീ വാട്ടറിംഗ് പമ്പ് കൊച്ചി: നഗരത്തിലെ വെള്ളക്കെട്ടിന് പരിഹാരമേകാന്‍ കൂറ്റന്‍ ഡീ വാട്ടറിംഗ് പമ്പുകളുമായി ജില്ലാ ദുരന്ത നിവാരണ അഥോറിറ്റി. ഓപ്പറേഷന്‍ ബ്രേക്ക് ത്രൂവുമായി ബന്ധപ്പെട്ട പ്രവര്‍ത്തനങ്ങള്‍ക്ക് ഉപയോഗിക്കുന്നതിനായി കിര്‍ലോസ്‌കര്‍ കമ്പനിയുടെ നാല് പമ്പുകളാണ് 2.17 കോടി രൂപ ചെലവഴിച്ച് ജില്ലാ ദുരന്ത നിവാരണ അഥോറിറ്റി വാങ്ങിയത്. ശക്തമായ വെള്ളക്കെട്ട് ഉണ്ടായാല്‍ വെള്ളം പമ്പ് ചെയ്ത് മാറ്റാന്‍ തക്ക ശേഷിയുള്ളതാണ് ഈ പമ്പുകള്‍. കടവന്ത്ര ഗാന്ധിനഗര്‍ അഗ്‌നിരക്ഷാ നിലയത്തില്‍ നടന്ന ചടങ്ങില്‍ കൊച്ചി മേയര്‍ എം. അനില്‍കുമാര്‍, ജില്ലാ കളക്ടര്‍ എന്‍.എസ്.കെ. ഉമേഷ് എന്നിവര്‍ ചേര്‍ന്ന് അഗ്‌നിരക്ഷാസേന റീജിയണ്‍ ഫയര്‍ ഓഫീസര്‍ ജെ.എസ.് സുനില്‍ കുമാറിന് പമ്പുകള്‍ കൈമാറി. തൃപ്പൂണിത്തുറയാകെ മുങ്ങി തൃപ്പൂണിത്തുറ: ഇന്നലെ പുലര്‍ച്ചെ മുതല്‍ പെയ്ത കനത്ത മഴയില്‍ തൃപ്പൂണിത്തുറയിലെ താഴ്ന്ന പ്രദേശങ്ങളെല്ലാം വെള്ളത്തിലായി. കോട്ടയ്ക്കകം-വടക്കേക്കോട്ട റോഡില്‍ സമീപകാലത്തുണ്ടായതില്‍ ഏറ്റവും രൂക്ഷമായ വെള്ളക്കെട്ടായിരുന്നു ഇന്നലത്തേത്. ബസുകളും മറ്റും കടന്നു പോകുമ്പോള്‍ റോഡിനിരുവശവുമുള്ള വീടുകളിലേക്കും കടകളിലേക്കും വെള്ളം അടിച്ചു കയറി. ഇവിടെ വെള്ളക്കെട്ട് ഒഴിവാക്കാനായി കാനകള്‍ പുതുക്കി നിർമിച്ചെങ്കിലും ഫലം കണ്ടില്ല. കോട്ടയ്ക്കകത്ത് പൂര്‍ണത്രയീശ ക്ഷേത്രത്തിന് സമീപത്തുള്ള കടകളിലും വെള്ളം കയറി. പുതുശേരി റോഡില്‍ വെള്ളമുയര്‍ന്നതോടെ റോഡിന്‍റെ തുടക്ക ഭാഗത്ത് തോടിനോട് ചേര്‍ന്നുള്ള രണ്ട് വീടുകളില്‍ വെള്ളം കയറി. അഗ്‌നിരക്ഷാസേനയെത്തിയാണ് വീട്ടുകാരെ സുരക്ഷിത സ്ഥാനത്തേക്ക് മാറ്റിയത്. പുതുശേരി നഗറില്‍ 35 വീടുകളില്‍ വെള്ളം കയറി. ശുചിമുറി മാലിന്യമുള്‍പ്പെടെ ഒഴുകിയെത്തിയതോടെ 15ഓളം വീടുകളില്‍ നിന്ന് ആളുകളെ മാറ്റി. പള്ളിപ്പറമ്പ് കാവ്, വാരിയംപുറം, കോണ്‍വന്‍റ് റോഡുകളെല്ലാം വെള്ളത്തില്‍ മുങ്ങി. കാനയും റോഡും തിരിച്ചറിയാകാനാകാത്ത വിധമാണ് വെള്ളമുയര്‍ന്നത്. സീപോര്‍ട്ട്-എയര്‍പോര്‍ട്ട് റോഡില്‍ വിളക്ക് ജംഗ്ഷനടുത്തും കരിങ്ങാച്ചിറയിലും രൂക്ഷമായ വെള്ളക്കെട്ട് ഉണ്ടായി. എരൂരിന്‍റെ താഴ്ന്ന പ്രദേശങ്ങളിലെ റോഡുകളിലും വീടുകളിലും വെള്ളം കയറി. തൃപ്പൂണിത്തുറ-പേട്ട റോഡ്, മരട്-പേട്ട റോഡ്, താമരശേരി റോഡ്, പനക്കല്‍ റോഡ്, കണിയാമ്പുഴ റോഡ് എന്നിവിടങ്ങളിലും വെള്ളക്കെട്ട് രൂക്ഷമായിരുന്നു. റെഡ് അലര്‍ട്ട് പ്രഖ്യാപിച്ചിരുന്നെങ്കിലും വിദ്യാലയങ്ങള്‍ക്ക് അവധിയി നല്കാതിരുന്നതിനാല്‍ വിദ്യാര്‍ഥികള്‍ മുട്ടോളം വെള്ളത്തിലൂടെ നടന്നാണ് പോയത്. പലയിടങ്ങളിലും പുറത്തിറങ്ങാന്‍ പറ്റാത്ത സാഹചര്യമായിരുന്നതിനാല്‍ കുട്ടികള്‍ സ്വയം അവധിയെടുത്തു. ഓട അടഞ്ഞു; കെഎസ്ആർടിസി ഡിപ്പോ കുളമായി പിറവം: തോരാമഴ പിറവം കെഎസ്ആർടിസി ഡിപ്പോയെ വെള്ളത്തിലാക്കി. ഓട അടഞ്ഞതാണ് വിനയായത്. സ്റ്റേഷൻ വരാന്തയിലേക്കും സ്റ്റേഷൻ മാസ്റ്ററുടെ ഓഫീസ് അടക്കമുള്ള മുറികളിലേക്കും വെള്ളം കയറി. വെള്ളം ഉയരുന്നതു കണ്ട് ഡിപ്പോ ഓഫീസിന് മുന്നിലുണ്ടായിരുന്ന കെഎസ്ആർടിസി ബസുകൾ മാറ്റി പാർക്ക് ചെയ്തു. ഇതുമൂലം യാത്രാ തടസമൊന്നും ഉണ്ടായില്ലെന്ന് ഡിപ്പോ അധികൃതർ അറിയിച്ചു. ഡിപ്പോ സ്ഥിതി ചെയ്യുന്നയിടം താഴ്ന്ന ഭാഗമാണ്. മഴവെള്ളം ഒഴുകിപ്പോകാനായി പിൻഭാഗത്ത് കാന നിർമിച്ചിട്ടുണ്ട്. ഈ കാന ചപ്പുചവറുകൾ വന്നടിഞ്ഞ് അടഞ്ഞു പോയതുമൂലം വെള്ളത്തിന്‍റെ ഒഴുക്കു നിലച്ചു. വൈകുന്നേരത്തോടെയാണ് കാനയുടെ തടസം നീക്കി വെള്ളം ഒഴുക്കിക്കളഞ്ഞത്.

പെരുമഴയിലും അവധിയില്ല കളക്ടര്‍ക്ക് ട്രോള്‍ മഴ

കൊച്ചി: ജില്ലയില്‍ ഇന്നലെ റെഡ് അലര്‍ട്ട് പ്രഖ്യാപിച്ചെങ്കിലും സ്കൂളുകള്‍ക്ക് അവധി നല്‍കാത്തതിനെ തുടര്‍ന്ന് എറണാകുളം ജില്ലാ കളക്ടറുടെ ഫേസ്ബുക്ക് പേജില്‍ ട്രോള്‍ പെരുമഴ. ജില്ലാ കളക്ടറുടെ എഫ്ബി പേജില്‍ മഴ അവധി ആവശ്യപ്പെട്ട് നിരവധി വിദ്യാര്‍ഥികളും രക്ഷിതാക്കളുമാണ് കമന്‍റിട്ടത്. വിഷയത്തിന്‍റെ ഗൗരവം ചൂണ്ടിക്കാട്ടുന്നതാണ് പല രക്ഷിതാക്കളുടെയും കമന്‍റ്. കനത്ത മഴയായതിനാല്‍ ഇന്ന് കുട്ടികളെ സ്‌കൂളിലേക്ക് അയക്കുന്നില്ല. വിദ്യാര്‍ഥികളുടെ സുരക്ഷ ഭരണസമിതികളുടെ ഉത്തരവാദിത്വമാണ്. അത് ഉചിതമായി ചെയ്യുമെന്ന് പ്രതീക്ഷിക്കുന്നു-എന്നാണ് ഒരു രക്ഷിതാവിന്‍റെ കമന്‍റ്. എറണാകുളം മൊത്തം കുളമാണ്. ഞാന്‍ എന്‍റെ മോനെ ഇന്നു സ്‌കൂളില്‍ വിട്ടില്ല. കുട്ടിയെ വച്ച് റിസ്‌ക് എടുക്കാന്‍ ഒരു അമ്മയായ എനിക്ക് വയ്യ എന്നാണ് മറ്റൊരു കമന്‍റ്. അതേസമയം, 2022 ഓഗസ്റ്റ് നാലിലെ അവധി പ്രഖ്യാപനത്തിന്‍റെ പോസ്റ്റ് ജില്ലാ കളക്ടറുടെ പേജില്‍ നിന്ന് ആരോ കുത്തിപ്പൊക്കി വാട്ട്സ്ആപ്പ് ഗ്രൂപ്പുകളില്‍ ഷെയര്‍ ചെയ്തതും പലരിലും ആശയക്കുഴപ്പത്തിന് ഇടയാക്കി.

വെള്ളക്കെട്ട്: ഗൂഗിൾ മാപ്പിട്ട് പോയ കാർ കാനയിൽ വീണു

തൃപ്പൂണിത്തുറ: കനത്ത മഴയ്ക്കിടെ പേട്ടയിൽ യൂബർ ടാക്സി കാര്‍ കാനയിൽ വീണു. ഗൂഗിൾ മാപ്പിട്ട് യാത്രക്കാരെ കയറ്റാൻ വരുന്നതിനിടെ വഴി തെറ്റി കാർ തിരിക്കുന്നതിനിടെയാണ് റോഡിനോട് ചേര്‍ന്നുള്ള കാനയിലേക്ക് വീണത്. പേട്ട താമരശേരി റോഡിൽ ഇന്നലെ പുലർച്ചെ 5.45ഓടെയായിരുന്നു അപകടം. പുലർച്ചെ മുതൽ പെയ്ത ശക്തമായ മഴയിൽ കാനയും റോഡും തിരിച്ചറിയാൻ കഴിയാത്ത വിധം ഇവിടെ വെള്ളം കയറിയിരുന്നു. അപകട സമയം ഡ്രൈവര്‍ മാത്രമാണ് കാറിലുണ്ടായിരുന്നത്. വഴിയാണെന്ന് തെറ്റിദ്ധരിച്ച് കാര്‍ തിരിച്ചപ്പോൾ കാനയിൽ വീഴുകയായിരുന്നു. ഉടൻ ഡോറിന്‍റെ ഗ്ലാസ് താഴ്ന്ന് കിടന്ന വിടവിലൂടെ കാറിനുള്ളിൽ നിന്ന് ഡ്രൈവർ പുറത്തിറങ്ങി. പിന്നീട് നാട്ടുകാരുടെ ഏറെ നേരത്തെ ശ്രമത്തിനൊടുവിൽ രാവിലെ 10ഓടെയാണ് റിക്കവറി വാഹനം ഉപയോഗിച്ച് കാർ പുറത്തെടുത്തത്. ഇതിന് മുമ്പും ഇവിടെ അപകടമുണ്ടായിട്ടുണ്ടെന്ന് പ്രദേശവാസികൾ പറഞ്ഞു. രണ്ട് തവണ ബൈക്കും ഒരു തവണ ഓട്ടോറിക്ഷയും ട്രാവലറും കാനയിൽ വീണിട്ടുണ്ട്. മരട് നഗരസഭയും കൊച്ചി കോർപറേഷനും അതിർത്തി പങ്കിടുന്ന തോടാണ് ഇവിടം. തോടും റോഡും തമ്മിൽ വേര്‍തിരിച്ചുള്ള സുരക്ഷാ സംവിധാനങ്ങളോ സ്ലാബിട്ട് മൂടുകയോ ചെയ്യാത്തതാണ് അപകടങ്ങൾക്ക് കാരണമാകുന്നതെന്ന് പ്രദേശവാസികൾ പറഞ്ഞു.

കൂത്താട്ടുകുളം നഗരഭരണം ഇടതിനു നഷ്ടമായി

യുഡിഎഫ് അവിശ്വാസത്തെ പിന്തുണച്ച് ഇടതു കൗൺസിലർ കൂത്താട്ടുകുളം: മാസങ്ങൾക്കു മുന്പ് കൗൺസിലറെ തട്ടിക്കൊണ്ടുപോയതടക്കം ഏറെ നാടകീയ സംഭവങ്ങൾക്കു സാക്ഷ്യം വഹിച്ച കൂത്താട്ടുകുളം നഗരസഭയിൽ, ചെയർപേഴ്സൺ വിജയ ശിവനെതിരെയും വൈസ് ചെയർമാൻ സണ്ണി കുര്യാക്കോസിനെതിരെയും യുഡിഎഫ് കൊണ്ടുവന്ന അവിശ്വാസം എൽഡിഎഫ് കൗൺസിലറുടെ പിന്തുണയോടെ പാസായി. ഇതോടെ എൽഡിഎഫിന് നഗരഭരണം നഷ്ടമായി. രാവിലെ 11നു കൗൺസിൽ ഹാളിൽ നടന്ന അവിശ്വാസ പ്രമേയ അവതരണത്തിന് ശേഷം നടന്ന വോട്ടെടുപ്പിലാണ് ചെയർപേഴ്സന് സ്ഥാനം നഷ്ടമായത്. ഉച്ചകഴിഞ്ഞ് മൂന്നിനാണ് വൈസ് ചെയർമാനെതിരെയുള്ള അവിശ്വാസം ചർച്ചയ്ക്ക് എടുത്തത്. രാവിലെയും ഉച്ചകഴിഞ്ഞും വോട്ടെടുപ്പിൽ നിന്ന് 12 എൽഡിഎഫ് കൗൺസിലർമാർ വിട്ടുനിന്നു. 11 യുഡിഎഫ് കൗൺസിലർമാരും 15-ാം വാർഡിൽനിന്നുള്ള എൽഡിഎഫ് കൗൺസിലർ കലാ രാജുവും ഒരു സ്വതന്ത്ര സ്ഥാനാർഥിയും അവിശ്വാസപ്രമേയത്തെ പിന്തുണച്ചു. മറ്റ് 13 അംഗങ്ങളും രഹസ്യ ബാലറ്റിലൂടെയാണ് വോട്ട് രേഖപ്പെടുത്തിയത്. തദ്ദേശസ്വയംഭരണ ജോയിന്‍റ് ഡയറക്ടർ വിധു എ.മേനോനായിരുന്നു വരണാധികാരി. എൽഡിഎഫ് കൗൺസിലർ കലാ രാജു യുഡിഎഫിന് അനുകൂലമായി വോട്ട് രേഖപ്പെടുത്തിയെങ്കിലും ബാലറ്റിലെ ചോദ്യോത്തരങ്ങളിൽ ഒന്നിൽ നൽകിയ മറുപടി ആശയക്കുഴപ്പം ഉണ്ടാക്കി. തുടർന്ന് വോട്ട് അസാധുവാക്കണമെന്ന് ആവശ്യപ്പെട്ട് എൽഡിഎഫ് അംഗങ്ങൾ രംഗത്ത് വന്നുവെങ്കിലും ഭരണാധികാരിയുടെ വിവേചന അധികാരം ഉപയോഗിച്ച് വോട്ട് അംഗീകരിക്കുകയായിരുന്നു. നഗരസഭയുടെ കെടുകാര്യസ്ഥതയും ഭരണസ്തംഭനവും ചൂണ്ടിക്കാട്ടി, നഗരസഭാ ചെയർപേഴ്സൺ വിജയ ശിവനെതിരെ പ്രതിപക്ഷ നേതാവ് പ്രിൻസ് പോൾ ജോണാണ് അവിശ്വാസം പ്രമേയം അവതരിപ്പിച്ചത്. കൗൺസിലർ ബേബി കീരാന്തടം പ്രമേയത്തെ പിന്താങ്ങി. ഉച്ചകഴിഞ്ഞ് വൈസ് ചെയർമാൻ സണ്ണി കുര്യാക്കോസിനെതിരെ നടന് അവിശ്വാസം കൗൺസിലർ ബോബൻ വർഗീസ് അവതരിപ്പിക്കുകയും സി.എ. തങ്കച്ചൻ പിന്താങ്ങുകയും ചെയ്തു. പുത്തൻകുരിശ് ഡിവൈഎസ്പി വി.ടി. ഷാജിന്‍റെ നേതൃത്വത്തിൽ കൂത്താട്ടുകുളം, മൂവാറ്റുപുഴ, പിറവം, രാമമംഗലം പോലീസ് സ്റ്റേഷനുകളിൽ നിന്നുള്ള ഉദ്യോഗസ്ഥരുടെ സംഘമാണ് ക്രമസമാധാനം ഉറപ്പുവരുത്തിയത്. ഹൈക്കോടതി ഉത്തരവിന്‍റെ അടിസ്ഥാനത്തിൽ നഗരസഭാ കൗൺസിലർ കലാ രാജുവിനും പി.ജി. സുനിൽകുമാറിനും പ്രത്യേക പോലീസ് സുരക്ഷ ഏർപ്പെടുത്തിയിരുന്നു. യുഡിഎഫ് മുന്പ് നൽകിയ അവിശ്വാസ പ്രമേയം മേയ് 18ന് ചർച്ചയ്ക്ക് എടുക്കാൻ കഴിഞ്ഞിരുന്നില്ല. എൽഡിഎഫ് കൗൺസിലർ കലാ രാജു യുഡിഎഫിന് പിന്തുണ നൽകി യുഡിഎഫ് നേതാക്കൾക്കൊപ്പം കൗൺസിലിൽ എത്തിയതിനെ തുടർന്ന് വലിയ സംഘർഷം ഉണ്ടാവുകയും ചെയ്തു. ഇതിനിടെ കലാ രാജുവിനെ സിപിഎം നേതൃത്വത്തിന്‍റെ സഹായത്തോടെ നഗരസഭാ ചെയർപേഴ്സന്‍റെ വാഹനത്തിൽ തട്ടിക്കൊണ്ടു പോവുകയും ചെയ്തിരുന്നു. സംഭവത്തെ തുടർന്ന് അന്ന് യുഡിഎഫിന്‍റെ അവിശ്വാസ പ്രമേയം അവതരിപ്പിക്കാൻ കഴിയാതെ നിലവിലുള്ള ഭരണസമിതി ഭരണം തുടരുകയായിരുന്നു. ആറു മാസത്തിനുശേഷം രണ്ടാമത് യുഡിഎഫ് നൽകിയ അവിശ്വാസ പ്രമേയമാണ് ഇന്നലെ ചർച്ചയ്ക്കെടുത്തതും വോട്ടിനിട്ടതും. ഇലക്ഷൻ കമ്മീഷന്‍റെ നിർദദേശമനുസരിച്ച് 21 ദിവസങ്ങൾക്ക് ശേഷം പുതിയ ചെയർമാൻ, വൈസ് ചെയർമാൻ തെരഞ്ഞെടുപ്പിനുള്ള തീയതി പുറത്തുവിടും. ഈ ദിവസം വരെ നഗരസഭ ഭരണ ചുമതല സെക്രട്ടറിക്ക് ആയിരിക്കും. യുഡിഎഫിന്‍റേത് കുതിരക്കച്ചവടം: സണ്ണി കുര്യാക്കോസ് കലാ രാജു പാർട്ടിക്കെതിരെ വോട്ട് ചെയ്തത് സംബന്ധിച്ച് എന്ത് ചെയ്യണമെന്നത് പാർട്ടി പിന്നീട് തീരുമാനിക്കുമെന്ന് വൈസ് ചെയർമാൻ സണ്ണി കുര്യാക്കോസ്. നിലവിൽ നടന്നിട്ടുള്ളത് യുഡിഎഫിന്‍റെ കുതിരക്കച്ചവടമാണ്. യുഡിഎഫ് കലാ രാജുവിനെ പണം നൽകി വിലയ്ക്കെടുത്തിട്ടുള്ളതാണ്. തുടർന്നുള്ള ദിവസങ്ങളിൽ കൂത്താട്ടുകുളം നഗരസഭയിൽ കടുത്ത ഭരണസ്തംഭനം ഉണ്ടാകുമെന്നും ജനങ്ങളുടെ ആവശ്യം നടപ്പാക്കാൻ കഴിയാത്ത അവസ്ഥ ആയിരിക്കും വരാൻ പോകുന്നതെന്നും അദ്ദേഹം പറഞ്ഞു. ജനാധിപത്യ ധ്വംസനങ്ങൾക്കുള്ള തിരിച്ചടി: മുഹമ്മദ് ഷിയാസ് അധികാരത്തിന്‍റെ തണലിൽ സിപിഎം നടത്തിവന്ന ജനാധിപത്യ ധ്വംസനങ്ങൾക്കെതിരെയുള്ള തിരിച്ചടിയാണ് കൂത്താട്ടുകുളം നഗരസഭയിലെ അവിശ്വാസ പ്രമേയത്തിലെ വിജയമെന്ന് ഡിസിസി പ്രസിഡന്‍റ് മുഹമ്മദ്‌ ഷിയാസ്. ആറു മാസം മുൻപ് നടന്ന അവിശ്വാസ പ്രമേയ ചർച്ചയ്ക്കെത്തിയ, കലാ രാജുവെന്ന വനിതാ കൗൺസിലർക്കെതിരെ സിപിഎം നടത്തിയ സ്ത്രീ വിരുദ്ധ നിലപാട് കേരളത്തിന്‍റെ മനുഷ്യ മനസാക്ഷിയെ ഞെട്ടിക്കുന്നതായിരുന്നു. കലാ രാജുവെന്ന സ്ത്രീയുടെ നിശ്ചയദാർഢ്യത്തിന്‍റെ വിജയം കൂടിയാണിത്. വരാൻ പോകുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ, കൂത്താട്ടുകുളത്തും ജില്ലയിലും ഉജ്ജ്വലമായ വിജയം നേടിയെടുക്കുന്നതിനുള്ള പോരാട്ടങ്ങളുടെ തുടക്കമാണിതെന്നും മുഹമ്മദ്‌ ഷിയാസ് പറഞ്ഞു. ഇനിയങ്ങോട്ട് യുഡിഎഫിനൊപ്പം ഉറച്ചുനിൽക്കും: കലാ രാജു ഒരു സ്ത്രീക്കും സഹിക്കാൻ കഴിയാത്ത പ്രവർത്തികളാണ് പാർട്ടിയുടെ ഭാഗത്തുനിന്നും ണ്ടായിട്ടുള്ളതെന്ന് യുഡിഎഫിന്‍റെ അവിശ്വാസത്തെ പിന്തുണച്ച എൽഡിഎഫ് കൗൺസിലർ കലാ രാജു. പൊതുജനമധ്യത്തിൽ വച്ച് തന്നെ വസ്ത്രാക്ഷേപം വരെ ചെയ്തിട്ടുള്ള സിപിഎമ്മിനൊപ്പം ഇനി തുടരാൻ കഴിയില്ല. പാർട്ടി ചോദിച്ചു വാങ്ങിയ പരാജയമാണ് കൂത്താട്ടുകുളത്ത് സംഭവിച്ചിരിക്കുന്നത്. സ്വന്തം മനസാക്ഷിക്ക് നിരക്കുംവിധമാണ് വോട്ട് രേഖപ്പെടുത്തിയിട്ടുള്ളത്. ജനാധിപത്യത്തെ കശാപ്പ് ചെയ്തിരിക്കുന്നത് എൽഡിഎഫ് നേതൃത്വം ആണ്. ഇനി മുന്നോട്ട് യുഡിഎഫിനൊപ്പം ഉറച്ചുനിൽക്കും. തുടർന്നുണ്ടാവുന്ന ഏതു നിയമനടപടിയും നേരിടാൻ തയാറാണെന്നും അവർ പറഞ്ഞു.

പ്രഭാത സവാരിക്കിടെ വയോധികൻ വാഹനമിടിച്ച് മരിച്ചു

ആലുവ: പ്രഭാതസവാരിക്കിറങ്ങിയ വയോധികൻ വാഹനമിടിച്ച് മരിച്ചു. ആലുവ മുനിസിപ്പൽ പാർക്കിന് സമീപം തളിയത്ത് ബോബി ജോർജ് ( എറണാകുളം ട്രൈഡെന്‍റ് കോർപറേഷൻ പാർട്ണർ - 73) ആണ് മരിച്ചത്. ഇന്നലെ രാവിലെ 5.15ന് ആലുവ പാലസ് റോഡിൽ മോർ സൂപ്പർ മാർക്കറ്റിന് മുന്നിലായിരുന്നു സംഭവം. ഇടിച്ചിട്ട വാഹനം നിർത്താതെ പോയി. സംസ്കാരം പിന്നീട്. സമീപത്തെ സിസിടിവി ദൃശ്യങ്ങളുടെ സഹായത്താൽ പോലീസ് അന്വേഷണം ആരംഭിച്ചു. ഭാര്യ: ചേച്ചമ്മ. മക്കൾ: ജോർജ് (എച്ച്ഡിഎഫ്സി ബാങ്ക് ചെന്നൈ), ടിനു (യുഎസ്എ). മരുമക്കൾ : അന്ന സിറിയക് (ആർകിടെക്ട്), ജോബി ബാബു (യുഎസ്എ).

മത്സ്യബന്ധനത്തിനിടെ ഇതരസംസ്ഥാന തൊഴിലാളി അപകടത്തിൽ മരിച്ചു

ചെറായി: മത്സ്യബന്ധനത്തിടെ ഉണ്ടായ അപകടത്തിൽ ഇതരസംസ്ഥാന തൊഴിലാളി മരിച്ചു. ബോട്ടിലെ കപ്പി കൊണ്ട് അബദ്ധത്തിൽ പക്കിന് അടി കൊണ്ടാണ് മരിച്ചത്. വെസ്റ്റ് ബംഗാൾ കലീന നഗർ സ്വദേശിയായ സിതുൾദാസ്(36) ആണ് മരിച്ചത്. ചൊവ്വാഴ്ച രാവിലെ എട്ടരയോടെ എടവനക്കാട് ഭാഗത്തായിരുന്നു അപകടം. കപ്പി ഇടതുപക്കിന് വന്നടിച്ചതിനെ തുടർന്ന് പരിക്കേറ്റ ഇയാളെ ബോട്ട് തിരിച്ചടുപ്പിച്ച് ഉച്ചയ്ക്ക് ഒന്നോടെ പറവൂർ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മുനമ്പത്ത് നിന്നും മത്സ്യബന്ധനത്തിന് പോയ കുഞ്ഞിത്തൈ പാലിയത്ത് വീട്ടിൽ ജെയിംസ് ജിത്തുവിന്‍റെ ഉടമസ്ഥതയിലുള്ള സെയ എന്ന മത്സ്യബന്ധന ബോട്ടിലെ തൊഴിലാളിയാണ്. മൃതദേഹം പറവൂർ താലൂക്ക് ആശുപത്രിയിൽ.

ലോറി ഇടിച്ച് ബൈക്ക് യാത്രക്കാരൻ മരിച്ചു

മരട്:കുണ്ടന്നൂർ - തേവര പാലത്തിൽ ലോറിയിടിച്ച് ബൈക്ക് യാത്രക്കാരൻ മരിച്ചു. വൈറ്റില പൊന്നുരുന്നി കാച്ചപ്പിള്ളി റോഡിൽ അത്തം ലൈനിൽ തുരുത്തിപ്പറമ്പിൽ ടി.എസ്.ജോസഫ് (ജോണി 60) ആണ് മരിച്ചത്. ഇന്നലെ രാവിലെ ഏഴോടെയായിരുന്നു അപകടം. തേവരയിൽ നിന്നും കാറെടുക്കാൻ പോകുന്നതിനിടെ കുണ്ടന്നൂർ-തേവര പാലത്തിന് നടുവിലായി എതിർ ദിശയിൽ നിന്ന് വന്ന ലോറിയിടിക്കുകയായിരുന്നു. ലോറി ജോസഫിന്‍റെ ശരീരത്തിലൂടെ കയറി ഇറങ്ങി. മൃതദേഹം എറണാകുളം ജനറൽ ആശുപത്രിയിൽ പോസ്റ്റ്മോർട്ടത്തിനുശേഷം വൈകിട്ട് തൈക്കൂടം സെന്‍റ് റാഫേൽ പള്ളിയിൽ സംസ്കാരം നടത്തി. ഭാര്യ: ലിസി. മക്കൾ: സിറിൾ, ഡെർഫിൻ. മരുമക്കൾ: ബെൻസി, ചിഞ്ചു.

കീരംപാറ നെടുംപാറയില്‍ ഇടിമിന്നലില്‍ രണ്ടു വീടിന് നാശനഷ്ടം

കോതമംഗലം: കീരംപാറ പഞ്ചായത്തിലെ നെടുംപാറയില്‍ ശക്തമായ ഇടിമിന്നലില്‍ രണ്ട് വീടുകള്‍ ഭാഗികമായി തകര്‍ന്നു. ആളപായമില്ല. നെടുംപാറ കണിയാംകുടി കുര്യാക്കോസ്, സമീപത്ത് താമസിക്കുന്ന സഹോദരന്‍ മത്തായി എന്നിവരുടെ വീടുകള്‍ക്കാണ് കേടുപാട് ഉണ്ടായത്. വയറിംഗ് കത്തിപ്പോവുകയും ഇലക്ട്രിക് ഉപകരണങ്ങള്‍ക്ക് കേടുപാടുകൾ സംഭവിക്കുകയും ചെ‌യ്തു. ഞായറാഴ്ച വൈകിട്ട് മഴയ്ക്ക് തൊട്ടുമുമ്പായിരുന്നു ഇടിമിന്നലിന്‍റെ വലിയ ശബ്ദം കേട്ടത്. എന്താണ് സംഭവിച്ചതെന്ന് പെട്ടെന്നാര്‍ക്കും മനസിലായില്ല. മിന്നലേറ്റ് കെഎസ്ഇബി ട്രാന്‍സ്‌ഫോര്‍മറും കത്തിപ്പോയി. പ്രദേശത്തെ വൈദ്യുതിയും നിലച്ചിരുന്നു. മിന്നലേറ്റ് കുര്യാക്കോസിന്‍റെ വീട്ടില്‍ രണ്ട് ലക്ഷത്തോളം രൂപയുടെ നാശനഷ്ടം ഉണ്ടായതായി വീട്ടുകാര്‍ പറഞ്ഞു. വീട്ടുകാര്‍ സംഭവ സമയത്ത് സ്ഥലത്തില്ലായിരുന്നു. വയറിംഗ് പൂര്‍ണമായും കത്തി നശിച്ചു. വൈദ്യുതി മീറ്ററും മെയിന്‍സ്വിച്ചും ഫ്യൂസുകളും ബള്‍ബുകളും എല്ലാം തെറിച്ച് പോയി. ടിവി, ഫ്രിഡ്ജ് തുടങ്ങിയവയ്ക്കും കേടുപാടുകളുണ്ട്. വീടിന്‍റെ കോണ്‍ക്രീറ്റ് മേല്‍ക്കൂരയ്ക്കും പൊട്ടലുണ്ടായി. ആസ്ബസ്റ്റോസ് മേഞ്ഞ ഷീറ്റുകള്‍ ഇളകിമാറിയ നിലയിലാണ്. മിന്നലിന്‍റെ ആഘാതത്തില്‍ വീടിന്റെ അടുക്കള ഭാഗത്ത് മുറ്റത്ത് കുഴി രൂപപ്പെടുകയും ചെയ്തിട്ടുണ്ട്. കുര്യാക്കോസും കുടുംബവും എറണാകുളത്തെ ബന്ധുവീട്ടില്‍ പോയിരിക്കുകയായിരുന്നു. പരിസരവാസികള്‍ അറിയിച്ചപ്രകാരം രാത്രിയില്‍ തിരിച്ചെത്തിയപ്പോഴാണ് നാശനഷ്ടത്തിന്‍റെ തീവ്രത മനസിലായത്. സമീപത്ത് താമസിക്കുന്ന സഹോദരന്‍ മത്തായിയുടെ വീട്ടിലെയും വയറിംഗ് കത്തിപ്പോവുകയും ജനാല ചില്ലുകള്‍ പൊട്ടിത്തെറിക്കുകയും ചെയ്തു. ആന്‍റണി ജോണ്‍ എംഎല്‍എ, പഞ്ചായത്ത് പ്രസിഡന്‍റ് ഗോപി മുട്ടത്ത് എന്നിവര്‍ സ്ഥലം സന്ദര്‍ശിച്ച് സ്ഥിതിഗതി വിലയിരുത്തി. റവന്യു വകുപ്പ് നാശനഷ്ടത്തിന്‍റെ കണക്കെടുത്തിട്ടുണ്ട്.

അങ്കണവാടിയിലെ അലമാരയിൽ ഉഗ്രവിഷമുള്ള മൂർഖൻ

കരുമാലൂർ: തടിക്കക്കടവിൽ നെൽപ്പാടങ്ങൾക്കു നടുവിൽ സ്ഥിതി ചെയ്യുന്ന അങ്കണവാടിയുടെ അലമാരയിൽ ഉഗ്രവിഷമുള്ള മൂർഖനെ കണ്ടെത്തി. വെളിയത്തുനാട് ആറ്റിപ്പുഴക്കാവ് അങ്കണവാടിയിൽ ഇന്നലെ രാവിലെ 10.30യോടെയായിരുന്നു സംഭവം. എട്ടോളം വിദ്യാർഥികളായിരുന്നു ഇന്നലെ അങ്കണവാടിയിലെത്തിയത്. പ്രഭാത പ്രാർഥന കഴിഞ്ഞ് ഇവർക്ക് കളിക്കാനായി അധ്യാപിക ഷെൽഫിൽനിന്നു കളിപ്പാട്ടത്തിന്‍റെ പെട്ടി എടുക്കുമ്പോഴാണ് മൂർഖനെ കണ്ടത്. ഭാഗ്യത്തിനാണ് അധ്യാപിക വിഷപ്പാന്പിന്‍റെ കടിയേൽക്കാതെ രക്ഷപ്പെട്ടത്. ഇവർ ബഹളംകൂട്ടിയതോടെ ജീവനക്കാരിയും അകത്തേക്ക് ഓടിവന്നു. ഇരുവരും ചേർന്ന് കുട്ടികളെ സുരക്ഷിതമായി പുറത്തേക്ക് മാറ്റി.നാട്ടുകാരും പഞ്ചായത്ത് അംഗവും സംഭവസ്ഥലത്തെത്തിയതോടെ വനംവകുപ്പിനെ വിവരമറിയിച്ചു. പാമ്പുപിടുത്ത വിദഗ്ധൻ രേഷ്ണുവിന്‍റെ സഹായത്തോടെ പാമ്പിനെ പിടികൂടി. അങ്കണവാടിക്കു ചുറ്റും നെൽപ്പാടങ്ങളാണ്. കെട്ടിടത്തിന്‍റെ ജനൽ ഗ്ലാസ് കഴിഞ്ഞദിവസം ഇളകി പോയിരുന്നു. ഇതിന്‍റെ അറ്റകുറ്റപ്പണി നടത്തിയിരുന്നില്ല. അതിനാൽ ഇതുവഴിയാകാം വിഷപ്പാമ്പ് അകത്തു കയറിയതെന്നാണു നിഗമനം.

ബോട്ടുകൾ തിരികെയെത്തി; കിളിയും കിനാവള്ളിയുമായി

വൈപ്പിൻ: ട്രോളിംഗ് നിരോധനത്തെ തുടർന്ന് 52 ദിവസത്തെ വിശ്രമത്തിനു ശേഷം കടലിൽപോയ മത്സ്യബന്ധന ബോട്ടുകൾ തിരിച്ചെത്തിയത് നിറയെ കിളിമീനും കിനാവള്ളിയുമായി.മുനമ്പം,കാളമുക്ക് ഹാർബറുകളിലായി 60ൽ പരം ബോട്ടുകളാണ് കഴിഞ്ഞ ദിവസം തീരത്തടുത്തത്. ഇവ കൂടാതെ കുറഞ്ഞ തോതിൽ കരിക്കാടി ചെമ്മീനും കൂന്തലും കണവയും ഉണ്ടായിരുന്നു. ആദ്യ ദിവസങ്ങളിലായതിനാൽ മീനിനു നല്ല വില ലഭിച്ചു.പടയപ്പ എന്ന പേരിൽ അറിയപ്പെടുന്ന വലിയ കിളിമീനിന് കിലോവിന് 100 രൂപ മേൽ വിലവീണു. പൊട്ടൻ കിളി എന്നതിൽപ്പെടുന്ന ചെറിയ കിളിക്ക് 50 മുതൽ 80 രൂപ വരെ ഹാർബറിൽ ലേലം വിളി നടന്നു. ഏതാനും ചില ബോട്ടുകൾക്ക് രണ്ട് ലക്ഷത്തിലധികം രൂപയ്ക്കു വരെ മീൻ ലഭിച്ചു. കിളിമീനുമായി ഇന്നും നാളെയുമായി കൂടുതൽ ബോട്ടുകൾ എത്തുമെന്നാണ് പ്രതീക്ഷ.

അഞ്ചുകിലോ കഞ്ചാവുമായി ഒഡീഷ സ്വദേശികൾ പിടിയിൽ

പെരുമ്പാവൂർ: അഞ്ച് കിലോയോളം കഞ്ചാവുമായി രണ്ട് ഒഡീഷ സ്വദേശികൾ പിടിയിൽ. ചന്ദ്രൻ കാന്ത സാഹു(29), കരുണാകർ മാലിക്(30) എന്നിവരെയാണ് പെരുമ്പാവൂർ പോലീസ് പിടികൂടിയത്. രഹസ്യവിവരത്തെ തുടർന്ന് അല്ലപ്ര ഭാഗത്തുനിന്നാണ് ഇവരെ കസ്റ്റഡിയിലെടുത്തത്. പോലീസിനെ കണ്ട് രക്ഷപ്പെടാൻ ശ്രമിച്ച ഇവരെ പിന്തുടർന്നാണ് പിടികൂടുകയായിരുന്നു. ഇതര സംസ്ഥാന തൊഴിലാളികൾക്കിടയിലാണ് ഇവർ കഞ്ചാവ് വില്പന നടത്തിയിരുന്നത്. സിഐ ടി.എം. സൂഫി, എസ്ഐമാരായ റിൻസ് എം. തോമസ്, എസ്.ശിവകുമാർ, എഎസ്ഐ ഷിജ, സീനിയർ സിപിഒ മാരായ രജിത്ത് രാജൻ, ജയന്തി എന്നിവരാണ് അന്വേഷണ സംഘത്തിലുയിരുന്നത്.

ബസിടിച്ച് വീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു

കളമശേരി: സൗത്ത് കളമശേരി മേല്‍പ്പാലത്തിനു സമീപം ബസ് ബൈക്കിലിടിച്ച് തെറിച്ചുവീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു. കൊടുങ്ങല്ലൂര്‍ അഴിക്കോട് കളത്തിപ്പറമ്പില്‍ പരേതനായ അബൂബക്കറിന്‍റെ മകൻ സലിം (42) ആണ് മരിച്ചത്. ഓണ്‍ലൈന്‍ ഫുഡ് ഡെലിവറി ജീവനക്കാരനായിരുന്നു. ഇന്നലെ രാവിലെ ഒന്‍പതിനായിരുന്നു അപടകം. ബൈക്കിൽ ആലുവ ഭാഗത്തേക്ക് പോവുകയായിരുന്നു സലിം. ബസ് ബൈക്കിനെ മറികടക്കുന്നതിനിടെ വാതില്‍ഭാഗം തട്ടി ബൈക്ക് നിയന്ത്രണംവിട്ട് മറിയുകയായിരുന്നു. ബസിനിടിയിലേക്ക് തെറിച്ചുവീണ സലീമിന്‍റെ ശരീരത്തിലൂടെ ബസ് കയറിയിറങ്ങി. പോലീസ് മേൽനടപടികൾ സ്വീകരിച്ചു. മൃതദേഹം മെഡിക്കല്‍ കോളജിൽ പോസ്റ്റുമോർട്ടത്തിനു ശേഷം ഖബറടക്കം നടത്തി. ഭാര്യ: റജുല. മക്കൾ : തൗഫീഖ്, ഷമീല നസ്രിൻ, ഹാജറ നൗറീൻ, റിഫ ഫാത്തിമ. സംഭവത്തിൽ ബസ് ഡ്രൈവർ കൃഷ്ണദാസിനെനെതിരേ കേസെടുത്തു. ഇയാളെ കസ്റ്റഡിയിലെടുത്തിട്ടുണ്ട്.

കസ്റ്റഡിയിൽ നിന്ന് രക്ഷപ്പെട്ട പ്രതി മണിക്കൂറുകൾക്കുള്ളിൽ പിടിയിൽ

ആലുവ: ജില്ലാ ആശുപത്രിയിൽ എത്തിച്ച മോഷണക്കേസ് പ്രതി പോലീസ് കസ്റ്റഡിയിൽ നിന്ന് ഓടി രക്ഷപ്പെട്ടെങ്കിലും മണിക്കൂറുകൾക്കുള്ളിൽ പിടിയിലായി.ആസാം സ്വദേശി സുഖു അലി (26) ആണ് കസ്റ്റഡിയിൽ നിന്ന് ഓടി രക്ഷപ്പെടാൻ ശ്രമിച്ചത്. ഇയാളെ പിന്നീട് രണ്ട് കിലോമീറ്റർ ദൂരെയുള്ള പുളിഞ്ചോട് റെയിൽവേ പാളത്തിന് സമീപത്തുനിന്ന് പിടികൂടി. കാലടി പോലീസ് സ്‌റ്റേഷനിൽ രജിസ്റ്റർ ചെയ്ത മോഷണക്കേസിൽ ആലുവ സബ് ജയിലിൽ റിമാൻഡിലായിരുന്ന പ്രതി ശ്വാസംമുട്ട് അഭിനയിക്കുകയും എയ്ഡ്സ് രോഗമുണ്ടെന്ന് പറയുകയും ചെയ്തതിനെതുടർന്നാണ് ഇന്നലെ രാവിലെ 11ഓടെ ആലുവ ജില്ലാ ആശുപത്രിയിൽ പോലീസ് അകമ്പടിയോടെ വൈദ്യപരിശോധനയ്ക്കെത്തിച്ചത്. അത്യാഹിത വിഭാഗം കെട്ടിടത്തിലെ ശുചിമുറിയിൽ കയറിയ പ്രതി വെന്‍റിലേറ്റർ വഴി പുറത്തേക്കു ചാടിയാണ് ഓടിയത്. പ്രതി തിരിച്ചിറങ്ങാതെ വന്നപ്പോഴാണ് ഇയാൾ രക്ഷപ്പെട്ട വിവരം പോലീസ് അറിയുന്നത്.ഗവ.ആശുപത്രി ജംഗ്ഷനിൽനിന്ന് നസ്രത്ത് റോഡിലൂടെ ഓടി ചീരക്കട ക്ഷേത്രത്തിന് സമീപത്തെ റെയിൽ പാളത്തിലേക്ക് എത്തുകയായിരുന്നു. ആലുവ പോലീസ് ഇൻസ്‌പെക്ടർ വി.എം.കെഴ്‌സന്‍റെ നേതൃത്വത്തിൽ നടത്തിയ തെരച്ചിലിലാണ് രണ്ടു മണിക്കൂറിനുശേഷം പുളിഞ്ചോട് റെയിൽവേ ട്രാക്കിനടുത്ത് പിടികൂടിയത്. പ്രതിയെ വീണ്ടും ജില്ലാ ആശുപത്രിയിലെത്തിച്ച് വൈദ്യപരിശോധന നടത്തി കോടതിയിൽ ഹാജരാക്കി റിമാൻഡ് ചെയ്തു. പ്രതിയെ ആശുപത്രിയിലേക്ക് കൊണ്ടുപോയ പോലീസ് സേനാംഗങ്ങൾക്കെതിരെ വകുപ്പുതല അന്വേഷണം പ്രഖ്യാപിച്ചിട്ടുണ്ട്.രക്ഷപ്പെടാൻ ശ്രമിച്ചതിന് പ്രതിക്കെതിരെ ആലുവ പോലീസ് കേസെടുത്തു.

വീട്ടമ്മ മരിച്ചനിലയിൽ; മകൻ കസ്റ്റഡിയിൽ

മുളന്തുരുത്തി: വീട്ടമ്മയെ മരിച്ചനിലയിൽ കണ്ടെത്തി. ദുരൂഹതയെ തുടർന്ന് മകൻ അഭിജിത്തിനെ പോലീസ് കസ്റ്റഡിയിലെടുത്തു. വെളുത്താംകുന്ന് അരയങ്കാവ് അടയ്ക്കാപറമ്പിൽ അംബുജാക്ഷന്‍റെ ഭാര്യ ചന്ദ്രിക (58) യെയാണ് വീട്ടിലെ കിടപ്പുമുറിയിൽ മരിച്ചനിലയിൽ കണ്ടെത്തിയത്. തിങ്കളാഴ്ച രാവിലെ ആറോടെയാണ് സംഭവം. ഭർത്താവ് നേരത്തെ മരിച്ചിരുന്നു. മകൻ അഭിജിത്തും ചന്ദ്രികയും മാത്രമാണ് വീട്ടിൽ താമസം. ചന്ദ്രികയും മകനും തമ്മിൽ പണത്തിന്‍റെ പേരിൽ വഴക്ക് പതിവായിരുന്നെന്നും ഞായറാഴ്ചയും ഇരുവരും തമ്മിൽ വഴക്കുണ്ടായതായും കസേര കൊണ്ട് അടിച്ചതായും അയൽവാസികൾ പറയുന്നു. ഇതിന് മുമ്പും നിരവധി തവണ മകൻ അമ്മയെ മർദിച്ചിട്ടുള്ളതായും പറയുന്നുണ്ട്. തിങ്കളാഴ്ച രാവിലെ 6.45 ഓടെ സമീപത്തെ വീട്ടിലേക്ക് ഫോൺ വിളിച്ച് മകൻ അഭിജിത്ത്, ചന്ദ്രിക ഫാനിൽ തൂങ്ങിമരിച്ചെന്നും താൻ അഴിച്ച് കട്ടിലിൽ കിടത്തിയെന്നും പറയുകയായിരുന്നു. മകന്‍റെ മദ്യപാനവും ലഹരി ഉപയോഗവും ആഡംബര ജീവിതവും കാരണം വീട്ടിൽ നിരന്തരം വഴക്കുണ്ടാകാറുണ്ടെന്ന് പറയപ്പെടുന്നു. ലഹരി ഉപയോഗം മൂലം മാനസികനില തകരാറിലായതോടെ അമ്മയെ മർദിക്കുകയും മറ്റും ചെയ്തതിനെ തുടർന്ന് അഭിജിത്തിനെ രണ്ടു മാസം മുൻപ് ഡീ അഡിക്ഷൻ സെന്‍ററിലാക്കിയിരുന്നു. ഇവിടെനിന്നും തിരിച്ച് വീട്ടിലെത്തിയിട്ട് ഒരു മാസമേ ആയുള്ളൂ. മുളന്തുരുത്തി പോലീസ് കേസെടുത്ത് അന്വേഷണമാരംഭിച്ചു. മൃതദേഹം ഇൻക്വസ്റ്റ് നടപടികൾക്ക് ശേഷം ആശുപത്രിയിലേക്ക് മാറ്റി. കളമശേരി മെഡിക്കൽ കോളജിൽ പോസ്റ്റ്മോർട്ടത്തിന് ശേഷം ഇന്ന് ഒന്നിന് തോട്ടറ പൊതുശ്മശാനത്തിൽ സംസ്കരിക്കും. മകൾ: അപർണ.

തദ്ദേശ സ്ഥാപനങ്ങളിലെ ഹെല്‍ത്ത് ഗ്രാന്‍റ് പദ്ധതിക്ക് അംഗീകാരം

കൊച്ചി: ജില്ലയിലെ അഞ്ച് തദ്ദേശ സ്ഥാപനങ്ങളിലെ ഹെല്‍ത്ത് ഗ്രാന്‍റ് പദ്ധതിക്ക് അംഗീകാരം. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍റെ അധ്യക്ഷതയില്‍ ചേര്‍ന്ന ജില്ലാ ആസൂത്രണ സമിതി യോഗത്തിലാണ് അംഗീകാരമായത്. കൂവപ്പടി ബ്ലോക്ക് പഞ്ചായത്ത്, മണീട് ഗ്രാമപഞ്ചായത്ത്, ഞാറക്കല്‍ ഗ്രാമപഞ്ചായത്ത്, വേങ്ങൂര്‍ ഗ്രാമപഞ്ചായത്ത്, കളമശേരി നഗരസഭ എന്നീ തദ്ദേശ സ്ഥാപനങ്ങളിലെ ഹെല്‍ത്ത് ഗ്രാന്‍റ് പദ്ധതിക്കാണ് അംഗീകാരം ലഭിച്ചത്. ഇതോടൊപ്പം 2025-26 വാര്‍ഷിക പദ്ധതി ഭേദഗതിക്കായി അംഗീകാരം തേടിയിരുന്ന എട്ട് തദ്ദേശ സ്ഥാപനങ്ങള്‍ക്കും ആസൂത്രണ സമിതി യോഗത്തില്‍ അംഗീകാരം ലഭിച്ചു. കൂവപ്പടി ബ്ലോക്ക് പഞ്ചായത്ത്, മുളന്തുരുത്തി ഗ്രാമപഞ്ചായത്ത്, പൈങ്ങോട്ടൂര്‍ ഗ്രാമപഞ്ചായത്ത്, പോത്താനിക്കാട് ഗ്രാമപഞ്ചായത്ത്, ഏലൂര്‍ നഗരസഭ, കളമശ്ശേരി നഗരസഭ, ആലുവ നഗരസഭ, അങ്കമാലി നഗരസഭ എന്നീ തദ്ദേശസ്ഥാപനങ്ങള്‍ക്കാണ് അംഗീകാരം ലഭിച്ചത്. ജില്ലാ കളക്ടര്‍ എന്‍.എസ്.കെ. ഉമേഷ്, ജില്ലാ പ്ലാനിംഗ് ഓഫീസര്‍ ടി. ജ്യോതിമോള്‍, ജില്ലാ ആസൂത്രണ സമിതി അംഗങ്ങള്‍ വിവിധ തദ്ദേശ സ്വയംഭരണ സ്ഥാപനങ്ങളിലെ പ്രതിനിധികള്‍ എന്നിവര്‍ പങ്കെടുത്തു.

വാറന്‍റി കാലയളവിൽ സൗരോർജ പ്ലാന്‍റ് തകരാറിലായി; നഷ്ടപരിഹാരം 2.5 ലക്ഷം

കൊച്ചി: വാറന്‍റി കാലവിനുള്ളില്‍ തകരാറിലായ സൗരോർജ പ്ലാന്റിന്‍റെ തകരാർ പരിഹരിക്കുന്നതിൽ വീഴ്ചവരുത്തിയതിന് ഉപഭോക്താവിന് സ്ഥാപനം 2.5 ലക്ഷം രൂപ നഷ്ടപരിഹാരം നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്കപരിഹാര കോടതി. എറണാകുളം തേവരയിലെ വിദ്യോദയ സ്‌കൂള്‍ തൃശൂര്‍ ആസ്ഥാനമായി പ്രവര്‍ത്തിക്കുന്ന സൗര നാച്ചുറല്‍ എനര്‍ജി സൊലൂഷന്‍സ് ഇന്ത്യ പ്രൈവറ്റ് എന്ന സ്ഥാപനത്തില്‍ നിന്ന് 2018ല്‍ 13,36,677 രൂപ നല്‍കി 30 കിലോവാട്ട് ശേഷിയുള്ള സൗരോര്‍ജ പ്ലാന്റ് സ്ഥാപിച്ചിരുന്നു. പ്ലാന്റ് കമ്മീഷന്‍ ചെയ്ത 2018 ഒക്ടോബര്‍ മുതല്‍ അഞ്ച് വര്‍ഷത്തെ വാറന്റിയും കമ്പനി നല്‍കിയിരുന്നു. എന്നാല്‍, വാറന്റി അവസാനിക്കുന്നതിന് തൊട്ടുമുമ്പ്, 2023 ഒക്ടോബര്‍ മാസത്തില്‍ പ്ലാന്റിന്‍റെ ഇന്‍വെര്‍ട്ടര്‍ തകരാറിലായി. സ്‌കൂള്‍ അധികൃതര്‍ ഉടന്‍ തന്നെ വിവരം കമ്പനിയെ അറിയിക്കുകയും ചെയ്തു. കമ്പനിയുടെ ടെക്‌നീഷ്യന്‍മാര്‍ തകരാര്‍ സ്ഥിരീകരിച്ചെങ്കിലും ഇന്‍വെര്‍ട്ടര്‍ നന്നാക്കുകയോ മാറ്റി നല്‍കുകയോ ചെയ്തില്ല. പിന്നീട്, നിരന്തര ശ്രമങ്ങളെത്തുടര്‍ന്ന് കമ്പനി ഇന്‍വെര്‍ട്ടര്‍ കൊണ്ടുപോയെങ്കിലും വാറന്റി കാലഹരണപ്പെട്ടു എന്ന് ചൂണ്ടിക്കാട്ടി ശരിയാക്കുന്നതിന് അന്യായമായി പണം ആവശ്യപ്പെടുകയായിരുന്നു. കമ്പനി തങ്ങളുടെ വാറന്റി വ്യവസ്ഥകള്‍ പാലിക്കുന്നതില്‍ പരാജയപ്പെട്ടെന്നും ഇത് സേവനത്തിലെ ഗുരുതരമായ വീഴ്ചയാണെന്നും കോടതി കണ്ടെത്തി. എതിര്‍കക്ഷികള്‍ കരാര്‍ ലംഘിക്കുക മാത്രമല്ല, ഉപഭോക്താവിന്റെ ആവര്‍ത്തിച്ചുള്ള അപേക്ഷകള്‍ അവഗണിക്കുകയും ചെയ്തു എന്ന് ഡിബി ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവരുടെ ബെഞ്ച് വിലയിരുത്തി. സേവനത്തിലെ വീഴ്ച, ആധാര്‍മിക വ്യാപാര രീതി, ഉപഭോക്താവിനുണ്ടായ മാനസികാഘാതം, സാമ്പത്തിക നഷ്ടം എന്നിവ പരിഗണിച്ച്, പരാതിക്കാരായ സ്‌കൂളിന് 2,50,000 രൂപ നഷ്ടപരിഹാവും കൂടാതെ, കോടതി ചെലവായി 5,000 രൂപയും 45 ദിവസത്തിനകം നല്‍കണമെന്ന് എതിര്‍കക്ഷികള്‍ക്ക് കോടതി ഉത്തരവിട്ടു. പരാതിക്കാര്‍ക്ക് വേണ്ടി അഡ്വ. ജിയോ പോള്‍ കോടതിയില്‍ ഹാജരായി.

തെരുവുനായ ആക്രമണം: മൂന്നുപേര്‍ക്ക് പരിക്ക്

മൂവാറ്റുപുഴ: മൂവാറ്റുപുയിൽ തെരുവുനായയുടെ ആക്രമണത്തില്‍ മൂന്നുപേര്‍ക്ക് പരിക്ക്. മൂവാറ്റുപുഴ കബനി ബാറിലെ സെക്യൂരിറ്റി ജീവനക്കാരന്‍ ജോസ്, തൃക്കളത്തൂരിൽ താമസിക്കുന്ന ഇതര സംസ്ഥാന തൊഴിലാളി റാഫി മുഹമ്മദ്, മാറാടി സ്വദേശിനി ഇടമനപ്പെട്ടമലയില്‍ ജിന്‍സി എന്നിവര്‍ക്കാണ് ഇന്നലെ പരിക്കേറ്റത്. രാവിലെ കെഎസ്ആര്‍ടിസി ജംഗ്ഷനു സമീപത്തുനിന്ന് ജോസിനെയും, റാഫിയെയും ആക്രമിച്ച തെരുവുനായ പിന്നീട് മാറാടി ഭാഗത്തുവച്ച് ജിന്‍സിയെ ആക്രമിക്കുകയായിരുന്നു. പരിക്കേറ്റ മൂന്നുപേരും മൂവാറ്റുപുഴ ജനറല്‍ ആശുപത്രിയിലെത്തി വാക്‌സിന്‍ എടുത്തു. നഗരത്തില്‍ തെരുവുനായ ശല്യം രൂക്ഷമായതായി പരാതിയുണ്ട്.

46 വില്ലേജുകളിൽ പുതിയ ഓഫീസര്‍മാർ

കാക്കനാട്: ജില്ലയില്‍ 46 വില്ലേജുകളില്‍ പുതിയ ഓഫീസര്‍മാരെ നിയമിച്ചു. ഹുസൈന്‍ പതുവന- വാഴക്കാല, ആര്‍.കലാദേവി-തൃക്കാക്കര നോര്‍ത്ത്, കെ.ആര്‍.ജ്യോതി-തിരുവാങ്കുളം, എം.എന്‍. ബിനോയ്- ഇടപ്പള്ളി സൗത്ത്, പി.സിജു-ആമ്പല്ലൂര്‍, കെ. സരിത- കൈപ്പട്ടൂര്‍, എന്‍.കെ. അനൂപ്- മണകുന്നം, ടി.എസ്. സൂരജ്- മുളവുകാട്,മനു ജോസഫ് ഇമ്മാനുവല്‍ -കടമക്കുടി, കെ.എം.നജ്മ-ഞാറയ്ക്കല്‍, എം.മനോജ്-പുതുവൈപ്പ്, ആര്‍.റോഷ്‌നി-കുഴുപ്പിള്ളി, കെ.ബി.സുജി-എടവനക്കാട്, സി.സന്തോഷ്-തോപ്പുംപടി, എസ്.വിനില്‍ കുമാര്‍- ചെല്ലാനം,സി.എം.മിനി-മഞ്ഞപ്ര,ഡിന്‍റോ എസ്തപ്പാനു-അങ്കമാലി, ജി.മഞ്ജു-ആലുവ വെസ്റ്റ്, ജെ.സജി-ആലുവ ഈസ്റ്റ്, സി.ആര്‍.രാജേഷ്- മറ്റൂര്‍, ആര്‍.രാജീവ്-മൂക്കന്നൂര്‍, എ.അഞ്ജലി-നെടുമ്പാശേരി, വി.ആര്‍.രാഗേഷ്- വടക്കുംഭാഗം,പി.എ.രാജീവ്- പാറക്കടവ്, ജ്യോതിസ് സത്യന്‍-കീഴ്മാട്, പി.കെ.കവിത-ചൊവ്വര,ജി.മഹേഷ്-തുറവൂര്‍, പ്രോമി തിലകന്‍-പട്ടിമറ്റം, എം.എച്ച്.ജയന്‍- തിരുവാണിയൂര്‍,ഡി.അജിത്ത്കുമാര്‍-ഐക്കരനാട് സൗത്ത്,പി.കെ.സന്തോഷ്- ഐരാപുരം,കെ.ആര്‍.ബിബീഷ- വെങ്ങോല, കെ.ബി.അഭിലാഷ്-ഐക്കരനാട് നോര്‍ത്ത്,ഒ.ദീപ്തി-കൊമ്പനാട്,സീന ബാഹുലേയന്‍-കോതമംഗലം, പി.കെ.മഞ്ജു-നേര്യമംഗലം, പ്രിയ സലോമി സാമുവല്‍- കീരംപാറ, സി.എസ്. സന്ധ്യ-പല്ലാരിമംഗലം, എം.പി.മുസ്തഫ-പിണ്ടിമന,സി.അനൂപ്കുമാര്‍-കടുങ്ങല്ലൂര്‍, പി.വി.രഞ്ജിത്ത്കുമാര്‍-പുത്തന്‍വേലിക്കര, പി.ജെ. ആന്‍റണി - മൂത്തകുന്നം, ആര്‍.മിനി-മൂവാറ്റുപുഴ, സിജോ ആന്‍റണി - മേമുറി,എം.ഷഹ്നാസ്- കോടനാട്,എം.പി.ഷാജി- അശമന്നൂര്‍.

സ്‌കൂട്ടര്‍ നിയന്ത്രണംവിട്ട് കനാലിലേക്ക് മറിഞ്ഞു; രണ്ടു പേർക്ക് പരിക്ക്

മൂവാറ്റുപുഴ: നിയന്ത്രണംവിട്ട സ്‌കൂട്ടര്‍ 25 അടിയോളം താഴ്ചയുള്ള കനാലിലേക്ക് മറിഞ്ഞ് സ്കൂട്ടർയാത്രികരായ രണ്ടു പേര്‍ക്ക് പരിക്കേറ്റു. മേക്കടമ്പ് സ്വദേശികളായ മറ്റത്തില്‍ സുകുമാരന്‍ (65), പൂച്ചക്കുഴി വടക്കേക്കര ബിബിന്‍ (37) എന്നിവര്‍ക്കാണ് പരിക്കേറ്റത്. വാളകം മനക്കപ്പീടികയില്‍ ഇന്നലെ ഉച്ചയ്ക്ക് 2.30ഓടെയായിരുന്നു അപകടം. സ്‌കൂട്ടര്‍ റോഡിലെ ചെളിയില്‍പെട്ട് തെന്നി കനാലിലേക്ക് മറിയുകയായിരുന്നു. മൂവാറ്റുപുഴ അഗ്നിശമന സേനയെത്തിയാണ് ഇരുവരെയും കരയ്ക്കെത്തിച്ചത്. തുടർന്ന് ഇരുവരെയും ആശുപത്രിയില്‍ പ്രവേശിപ്പിച്ചു. ഗ്രേഡ് എസ്‌ടിഒ കെ.സി. ബിജുമോന്‍, എസ്എഫ്ആര്‍ഒ അനീഷ് കുമാര്‍, അനിബന്‍ കുര്യാക്കോസ്, ടി.ആര്‍. റെനീഷ്, നിബിന്‍ ബോസ്, ആര്‍. വിഷ്ണു, ജയസിങ് എന്നിവരാണ് രക്ഷാപ്രവര്‍ത്തനം നടത്തിയത്.

കുടിവെള്ളക്ഷാമം : മരടിൽ ചീഫ് എൻജിനീയറുടെ ഓഫീസ് ഉപരോധിച്ചു

മരട്: മരട് നഗരസഭാ പരിധിയിലെ രൂക്ഷമായ കുടിവെള്ള ക്ഷാമത്തെത്തുടർന്ന് നഗരസഭാ ചെയർപേഴ്സൺ ആന്‍റണി ആശാംപറമ്പിലിന്‍റെയും പാർലമെന്‍ററി ലീഡർ സി.ആർ. ഷാനവാസിന്‍റെയും നേതൃത്വത്തിൽ വാട്ടർ അഥോറിറ്റി ചീഫ് എൻജിനീയറുടെ ഓഫീസ് ഉപരോധിച്ചു. ചീഫ് എൻജിനീയറുടെ അഭാവത്തിൽ ഡെപ്യൂട്ടി ചീഫ് എൻജിനീയർ കെ. സുരേഷ്, എക്സി. എൻജിനീയർ രാജേഷ് ലക്ഷ്മൺ എന്നിവരെ ഉപരോധിക്കുകയായിരുന്നു. തിങ്കളാഴ്ച്ച രാവിലെ 10ന് തുടങ്ങിയ സമരം ആറ് മണിക്കൂർ പിന്നിട്ടിട്ടും ഫലമില്ലാതായതോടെ ഡെപ്യൂട്ടി ചീഫ് എൻജിനീയറെ ക്യാമ്പിനകത്ത് പൂട്ടിയിട്ട് സമരക്കാർ പ്രതിഷേധം കടുപ്പിച്ചു. പിന്നീട് വൈകുന്നേരം ആറോടെ സൂപ്രണ്ടിംഗ് എൻജിനീയറും ചീഫ് എൻജിനീയറും ചർച്ച ചെയ്തതിന്‍റെ അടിസ്ഥാനത്തിൽ വരും ദിവസങ്ങളിൽ എല്ലാ ദിവസവും തുടർച്ചയായി പമ്പിംഗ് ചെയ്യാമെന്നും വളന്തകാട് ദ്വീപ്, കുണ്ടന്നൂരിലെ എൻ.എക്സ്. ജോസഫ് റോഡ് എന്നിവിടങ്ങളിലെ മോശമായ പഴകിയ പൈപ്പ് അടിയന്തിരമായി മാറ്റി ഡിവിഷൻ 1, 21, 29, 30, 33 എന്നീ ഡിവിഷനുകളിലെ കുടിവെള്ള പ്രശ്നം അടിയന്തിരമായി പരിഹരിക്കാമെന്നും രേഖാമൂലം ഉറപ്പു നൽകിയതോടെ സമരം അവസാനിപ്പിക്കുകയായിരുന്നു. ഡെപ്യൂട്ടി ചെയർപേഴ്സൺ അഡ്വ. രശ്മി സനിൽ, സ്ഥിരം സമിതി അധ്യക്ഷന്മാർ, കൗൺസിലർമാർ തുടങ്ങിയവർ സമരത്തിൽ പങ്കെടുത്തു. കഴിഞ്ഞ ഒരു മാസത്തിലധികമായി മരട് നഗരസഭാ പരിധിയിൽ വിവിധയിടങ്ങളിലായി കുടിവെള്ളം ലഭിക്കാതിരുന്നതിനെ തുടർന്ന് നടത്തിയ ചർച്ചകളിലും പരിഹാര മാർഗങ്ങളിലും യാതൊരു പ്രയോജനവുമില്ലാതിരുന്നതോടെയാണ് ചീഫ് എൻജിനീയറുടെ ഓഫീസിൽ ജനപ്രതിനിധികൾ ഉപരോധം സംഘടിപ്പിച്ചത്.

കന്യാസ്ത്രീകൾക്കെതിരേയുള്ള കേസ്; പ്രതിഷേധം തുടരുന്നു

പാലാരിവട്ടം: ഛത്തീസ്ഗഡിലെ ദുർഗിൽ സിസ്റ്റർ പ്രീതി മേരിയെയും സിസ്റ്റർ വന്ദന ഫ്രാൻസിനും എതിരെ ചുമത്തപ്പെട്ട കേസുകൾ അടിയന്തരമായി റദ്ദാക്കണമെന്ന് ആവശ്യപ്പെട്ട് പാലാരിവട്ടം സെന്‍റ് ജോൺ ദി ബാപ്റ്റിസ്റ്റ് പള്ളി വികാരി ഫാ. ജോജി കുത്തുകാട്ടിൽ തിരി കത്തിച്ച് വെളിച്ചമേകി അമ്മമാർക്കൊപ്പം ഞങ്ങളും കൂടെയുണ്ട് എന്ന് പ്രഖ്യാപിച്ചു. പ്രതിഷേധ ജ്വാലയിൽ ഫാ. എഡിസൺ, ഫാ. ഷൈജു എന്നിവരും ഇടകളിലെ സന്യാസിനിമാരും ഇടവക ജനങ്ങളും പങ്കുകാരായി. ഫോർട്ടുകൊച്ചി: കന്യാസ്ത്രീകൾക്കെതിരെയുള്ള കേസ് റദ്ദ് ചെയ്യണമെന്നാവശ്യപ്പെട്ട് മാനാശേരി സെന്‍റ് മൈക്കിൾസ് പള്ളിയിൽ പ്രതിഷേധ ധർണ സംഘടിപ്പിച്ചു. കെഎൽസിഎ രൂപത സമിതി അംഗം പി.ജെ. പ്രദീപ് അധ്യക്ഷത വഹിച്ചു. സിസ്റ്റർ ഷിബി, സിസ്റ്റർ സോളി, യൂണിറ്റ് പ്രസിഡന്‍റ് ടി.ജെ.ജേക്കബ് എന്നിവർ സംസാരിച്ചു. അരൂർ: കന്യാസ്ത്രീകളെ അറസ്റ്റ് ചെയ്ത സംഘപരിവാർ ഭീകരതയ്ക്കെതിരെ എൽഡിഎഫ് അരൂർ മണ്ഡലം കമ്മിറ്റി വല്ലേത്തോട്ടിൽ പ്രതിഷേധ സായാഹ്നം സംഘടിപ്പിച്ചു. സിപിഎം സംസ്ഥാന കമ്മിറ്റി അംഗം സി.ബി. ചന്ദ്രബാബു ഉദ്ഘാടനം ചെയ്തു.എം.കെ. ഉത്തമൻ അധ്യക്ഷനായി. പറവൂർ: കന്യാസ്ത്രീകളെ കള്ളക്കേസെടുത്ത് തുറുങ്കിലടച്ചതിൽ പ്രതിഷേധിച്ച് കെഎൽസിഎ ഏഴിക്കര -കടക്കര യൂണിറ്റിന്‍റെ നേതൃത്വത്തിൽ ധർണ നടത്തി. കോട്ടപ്പുറം രൂപത പ്രസിഡന്‍റ് അനിൽ കുന്നത്തൂർ ഉദ്ഘാടനംചെയ്തു. അലക്സ് താളൂപ്പാടത്ത്, ഫാ. മിഥുൻ മെൻഡസ്, ജിജോ കല്ലറയ്ക്കൽ, ജിനു നെടുംപറമ്പിൽ, സോണി കൊടിയന്ത്ര, തോമസ് പാറയ്ക്കൽ എന്നിവർ സംസാരിച്ചു.

കൊച്ചി അഴിമുഖത്ത് അപകട ഭീഷണിയുയർത്തി മത്സ്യബന്ധനയാനങ്ങൾ

ഫോർട്ടുകൊച്ചി: അഴിമുഖത്ത് യാത്രാ ബോട്ടുകൾക്കും ടൂറിസ്റ്റ് ബോട്ടുകൾക്കും അപകട ഭീതിയുണർത്തി വീണ്ടും മത്സ്യബന്ധന യാനങ്ങൾ. ഫോർട്ട്കൊച്ചി കമാലക്കടവിൽ ഇന്ധനം നിറക്കുന്നതിനും തൊഴിലാളികളെ ഇറക്കുന്നതിനുമായി എത്തുന്ന യാനങ്ങളാണ് അപകടത്തിന് കാരണമാകുന്നത്. ഈ യാനങ്ങൾ നിയന്ത്രണം വിടുന്നത് ഇവിടത്തെ ചീനവലകൾക്കും ഭീഷണിയായി മാറുന്ന സാഹചര്യമാണ്. നേരത്തേ നിയന്ത്രണം വിട്ട യാനം ഇടിച്ച് ചീനവല തകർത്തിരുന്നു. അന്ന് ജീവഹാനിയുണ്ടാകാതിരുന്നത് ഭാഗ്യം കൊണ്ട് മാത്രമാണ്. യാനങ്ങൾ നിയന്ത്രണം വിട്ട് ടൂറിസ്റ്റ് ജെട്ടിയിൽ ഇടിച്ച് ജെട്ടി തകർന്നത് രണ്ട് തവണയാണ്. ടൂറിസ്റ്റ് ജെട്ടിക്ക് സമീപം കെട്ടിയിട്ടിരിക്കുന്ന മത്സ്യബന്ധന ബോട്ടുകൾ കെട്ടഴിഞ്ഞ് പോകുന്നതും കൊച്ചി അഴിമുഖത്ത് ടൂറിസ്റ്റ് ബോട്ടുകൾക്ക് അപകട ഭീഷണിയാകുന്നുന്നുണ്ട്. 10 ൽ കൂടുതൽ ബോട്ടുകളാണ് ഒരേ സമയം ടൂറിസ്റ്റ് ബോട്ടുജെട്ടിക്ക് സമീപമുള്ള പെട്രോൾ പമ്പിന് സമീപം നിരന്നു കിടക്കുന്നത്. ഇത് പലപ്പോഴും കയറ് പൊട്ടി അപകടകരമായ അന്തരീഷമുണ്ടാക്കാറുണ്ട്. ഇത് മൂലം വിനോദ സഞ്ചാരികളുടെ ബോട്ടുകൾക്ക് പ്രവേശിക്കാൻ ബുദ്ധിമുട്ടുണ്ടാകുകയും മത്സബന്ധന ബോട്ടുകളുടെ യന്ത്രങ്ങൾ ഒരുമിച്ച് പ്രവർത്തിക്കുന്നത് മൂലമുണ്ടാകുന്ന ഓളങ്ങളിൽ ആടിയുലയുന്ന സാഹചര്യവുമുണ്ട്. സ്കൂളുകളിൽ നിന്ന് വിനോദ സഞ്ചാരത്തിന് വരുന്ന കുട്ടികൾ ഉൾപെടെയുള്ളവരാണ് ടൂറിസ്റ്റ് ബോട്ടുകളിൽ ഉണ്ടാകുന്നത്. ഭീകരാന്തരീഷം തരണം ചെയ്താണ് അവർ ടൂറിസ്റ്റ് ബോട്ട് ജെട്ടിയിൽ ഇറങ്ങുന്നത്. ഈ ഭാഗത്ത് തന്നെയാണ് 2015-ൽ മത്സ്യബന്ധന ബോട്ട് യാത്രാ ബോട്ടിലിടിച്ച് 11 പേരുടെ ജീവനുകൾ നഷ്ടമായത്.

കളമശേരി വനിതാ പോളിടെക്നിക് കെട്ടിട സമുച്ചയങ്ങളുടെ ഉദ്ഘാടനം നടത്തി

കളമശേരി: കളമശേരി വനിതാ പോളിടെക്നിക്കിൽ പുതുതായി നിർമിച്ച കെട്ടിട സമുച്ചയത്തിന്‍റെ ഉദ്ഘാടനം നടത്തി. രാവിലെ നടന്ന ചടങ്ങിൽ ഉന്നത വിദ്യാഭ്യാസ വകുപ്പ് മന്ത്രി ആർ.ബിന്ദു ഉദ്ഘാടനം നിർവഹിച്ചു. വ്യവസായ മന്ത്രി പി.രാജീവ് അധ്യക്ഷനായി. നഗരസഭാ ചെയർപേഴ്സൺ സീമ കണ്ണൻ, സാങ്കേതിക വിദ്യാഭ്യാസ ഡയറക്ടർ ഡോ. പി. ജയപ്രകാശ്, പൊതുമരാമത്ത് സൂപ്രണ്ടിംഗ് എൻജിനീയർ എസ്.ആർ. അനിതാകുമാരി, പ്രിൻസിപ്പൽ രാധിക സജു, വാർഡ് കൗൺസിലർമാരായ നെഷീദ സലാം, ശശി തുടങ്ങിയവരും ഉദ്യോഗസ്ഥരും പങ്കെടുത്തു.

തകർന്ന് തരിപ്പണമായി ഓള്‍ഡ് വല്ലം റോഡ്; തിരിഞ്ഞുനോക്കാതെ അധികൃതർ

പെരുമ്പാവൂര്‍: കോട്ടയം, ഇടുക്കി, പത്തനംതിട്ട ജില്ലകളില്‍ നിന്നും നെടുമ്പാശേരി അന്താരാഷ്ട്ര വിമാനത്താവളത്തിലേയ്ക്ക് വരുന്ന യാത്രക്കാര്‍ക്ക് കാലടിയിലെ ഗതാഗതക്കുരുക്കില്‍ നിന്ന് മോചനം നേടാനും എയര്‍പോര്‍ട്ടിലേക്ക് വേഗത്തില്‍ എത്തിച്ചേരാനും സാധിക്കുന്ന എംസി റോഡില്‍ പെരുമ്പാവൂര്‍ കടുവാളില്‍ നിന്ന് ആരംഭിക്കുന്ന ഓള്‍ഡ് വല്ലം റോഡ് പൊട്ടിപ്പൊളിഞ്ഞ് താറുമാറായിട്ടും അധികൃതർ അനാസ്ഥ കാട്ടുന്നതായി പരാതി. ഈറോഡ് വികസിപ്പിച്ച് ബിഎം ആന്‍ഡ് ബിസി നിലവാരത്തില്‍ ടാര്‍ ചെയ്ത് സഞ്ചാരയോഗ്യമാക്കുമെന്ന് പൊതുമരാമത്ത് മന്ത്രി നിയമസഭയില്‍ എല്‍ദോസ് കുന്നപ്പിള്ളി എംഎല്‍എയ്ക്ക് ഉറപ്പ് നൽകിയിരുന്നു. എന്നാൽ നാളിതുവരെയായിട്ടും ഈ ഉറപ്പ് പാലിക്കപ്പെട്ടിട്ടില്ല. വല്ലംകടവ്-പാറപ്പുറം പാലം യാഥാര്‍ഥ്യയമായതിന് പിന്നാലെയാണ് ഇത് പ്രയോജനപ്പെടുത്തി പുതിയ എയര്‍പോര്‍ട്ട് റോഡ് എന്ന ആവശ്യം ഉയര്‍ന്നുവന്നത്. പെരിയാറിന്‍റെ ഇരു കരകളിലുമുള്ള കാഞ്ഞൂര്‍ സെന്‍റ് മേരീസ് പള്ളി, പുതിയേടം ക്ഷേത്രം, തിരുവൈരാണിക്കുളം ക്ഷേത്രം, ചേലാമറ്റം ക്ഷേത്രം തുടങ്ങിയ തീര്‍ഥാടന കേന്ദ്രങ്ങളിലേക്കുള്ള യാത്രയും റോഡ് നവീകരിക്കുന്നതിലൂടെ സുഗമമാകും. പ്രദേശത്തെ ജനങ്ങളുടെ പ്രതിഷേധത്തെ തുടര്‍ന്ന് കഴിഞ്ഞ ദിവസം രണ്ട് ലോഡ് പാറപ്പൊടി അടിച്ച് വലിയ കുഴികള്‍ മൂടിയത് ഒഴിച്ചാല്‍ പൊതുമരാമത്ത് വകുപ്പ് ഉദ്യോഗസ്ഥര്‍ ഇവിടേയ്ക്ക് തിരിഞ്ഞ് നോക്കിയിട്ടുപോലും ഇല്ലത്രേ. താലൂക്ക് വികസന സമിതിയില്‍ നിരവധി തവണ ഈ ആവശ്യമുന്നയിച്ചിട്ടും പുല്ലുവിലയാണ് ഉദ്യോഗസ്ഥര്‍ നല്‍കുന്നതെന്ന് മുനിസിപ്പല്‍ ചെയര്‍മാന്‍ പോള്‍ പാത്തിക്കല്‍ കുറ്റപ്പെടുത്തി. തകര്‍ന്ന കടുവാള്‍-എയര്‍പോര്‍ട്ട് റോഡ് ഉടന്‍ സഞ്ചാരയോഗ്യമാക്കിയില്ലെങ്കില്‍ ജനങ്ങളെ അണിനിരത്തി പൊതുമരാമത്ത് വകുപ്പ് ഓഫീസിലേയ്ക്ക് ജനകീയ മാര്‍ച്ച് സംഘടിപ്പിക്കുമെന്ന് കോണ്‍ഗ്രസ് നേതാക്കളായ ഷാജി കുന്നത്താന്‍, അബ്ദുല്‍ നിസാര്‍, താരിശ് ഹസന്‍, പി.എസ്. അബൂബക്കര്‍, സാദിഖ് അമ്പാടന്‍ എന്നിവര്‍ അറിയിച്ചു.

കൂത്താട്ടുകുളം നഗരസഭ: അവിശ്വാസപ്രമേയം ജനങ്ങളോടുള്ള വെല്ലുവിളിയെന്ന് എൽഡിഎഫ്

കൂത്താട്ടുകുളം: യുഡിഎഫിന്‍റെ നേതൃത്വത്തിൽ കൂത്താട്ടുകുളം നഗരസഭയിൽ അവതരിപ്പിക്കുന്ന അവിശ്വാസപ്രമേയം ജനങ്ങളോടുള്ള വെല്ലുവിളിയാണെന്ന് എൽഡിഎഫ് നഗരസഭ സമിതി പത്ര സമ്മേളനത്തിൽ അറിയിച്ചു. ഭരണസമിതിയുടെ കാലാവധി തീരാൻ ആഴ്‌ചകൾ മാത്രം ബാക്കിയിരിക്കെ ഭരണ പ്രതിസന്ധി സൃഷ്ടിച്ച് വികസന പ്രവർത്തനങ്ങളെ തടയുക എന്നതാണ് ലക്ഷ്യം. ഈ ഭരണസമിതിയുടെ കാലത്തെ അവസാന സാമ്പത്തിക വർഷം മാത്രം 20 കോടി രൂപയുടെ വികസന പദ്ധതികളാണ് നടപ്പാക്കുന്നത്. ഈ പദ്ധതികളെ ഇല്ലാതാക്കാനാണ് യുഡിഎഫ് ശ്രമിക്കുന്നത്. യുഡിഎഫ് കൗൺസിലർമാർ പോലീസ് സംരക്ഷണം ആവശ്യപ്പെടില്ലെന്നും സംഘടന ശേഷി കൊണ്ട് സംരക്ഷണം ഒരുക്കുമെന്നും എംഎൽഎമാരായ അനൂപ് ജേക്കബ്ബും, മാത്യു കുഴൽ നാടനും പത്ര സമ്മേളനത്തിൽ അറിയിച്ചത്. ഇന്നലെ രാവിലെ ഹൈക്കോടതിയിൽ മാത്യു കുഴലനാടൻ പ്രൊട്ടക്ഷന് ഹർജി നൽകുകയും ചെയ്തു. ഇത്തരം നിലപാടില്ലായ്മയുടെ പ്രതിരൂപമായി യുഡിഎഫ് മാറിയെന്നും സിപിഎം നേതാക്കൾ പറഞ്ഞു. പത്രസമ്മേളനത്തിൽ സിപിഎം ഏരിയ സെക്രട്ടറി പി.ബി.രതീഷ്, സി.എൻ. പ്രഭകുമാർ, സണ്ണി കുര്യാക്കോസ്, കെ. ചന്ദ്രശേഖരൻ, ബിജോ പൗലോസ്, വിജയ ശിവൻ, ഫെബീഷ് ജോർജ്, അരുൺ അശോകൻ എന്നിവർ പങ്കെടുത്തു. സിപിഎം ഏരിയ സെക്രട്ടറി പറഞ്ഞത് വാസ്തവ വിരുദ്ധമെന്ന് കോൺഗ്രസ് കൂത്താട്ടുകുളം: സിപിഎം ഏരിയ സെക്രട്ടറി പത്രസമ്മേളനത്തിൽ മാത്യു കുഴലനാടൻ എംഎൽഎ യുഡിഎഫ് കൗൺസിലർമാർക്ക് വേണ്ടി കോടതിയിൽ ഹാജരായി പോലീസ് പ്രൊട്ടക്ഷൻആവശ്യപ്പെട്ടു എന്ന് പറഞ്ഞത് വാസ്തവ വിരുദ്ധമാണ്. ഹൈക്കോടതിയിൽ പ്രാക്ടീസ് ചെയ്യുന്ന ഒരു വക്കീൽ എന്ന നിലയിൽ അദ്ദേഹം അദ്ദേഹത്തെ സമീപിച്ച ഏതെങ്കിലും വ്യക്തികൾക്ക് വേണ്ടി കോടതിയിൽ ഹാജരായിട്ടുണ്ടാവാം പക്ഷേ അതിൽ ഒരു യുഡിഎഫ് കൗൺസിലറും ഉൾപ്പെടുന്നില്ല എന്ന് യുഡിഎഫ് പാർലമെന്‍ററി പാർട്ടി ലീഡർ പ്രിൻസ് പോൾ ജോൺ പത്രസമ്മേളനത്തിന് മറുപടിയായി അറിയിച്ചു.

നിയന്ത്രണംവിട്ട കാർ ലോറിയിലും മതിലിലും ഇടിച്ചു

വാഴക്കുളം: ലോറിയെ മറികടക്കുന്നതിനിടെ കാർ നിയന്ത്രണം വിട്ട് ലോറിയുടെ മുമ്പിലും സമീപത്തെ വീടിന്‍റെ മതിലിലും ഇടിച്ചു.ആർക്കും പരിക്കില്ല.ആനിക്കാട് തിരുവുംപ്ലാവിൽ ക്ഷേത്രത്തിനു സമീപം ഇന്നലെ രാവിലെ 11.30 ഓടെയായിരുന്നു അപകടം. തൊടുപുഴയിലെ വസ്ത്ര വ്യാപാര സ്ഥാപനത്തിൽ ജീവനക്കാരനായ തൃശൂർ സ്വദേശി സഞ്ചരിച്ചിരുന്ന സ്വിഫ്റ്റ് ഡിസയർ കാർ തൊടുപുഴ ഭാഗത്തേക്ക് ചരക്കെടുക്കാൻ പോവുകയായിരുന്ന ലോറിയെ മറികടക്കാൻ ശ്രമിക്കുന്നതിനിടെയാണ് അപകടമുണ്ടായത്. എതിർദിശയിൽ വന്ന വാഹനത്തിൽ ഇടിക്കാതിരിക്കാൻ വെട്ടിച്ചപ്പോൾ ലോറിയുടെ മുൻഭാഗത്ത് ഇടിക്കുകയായിരുന്നു. ലോറിയിൽ ഇടിച്ച് നിയന്ത്രണം നഷ്ട‌പ്പെട്ട കാർ ആനിക്കാട് നിരപ്പേൽ പ്രദീപിന്‍റെ വീടിന്‍റെ മതിലിലും ഇടിച്ചു. ഇടിയുടെ ആഘാതത്തിൽ കാറിന്‍റെ മുൻഭാഗം തകർന്നു. വീടിനും ഭാഗികമായ നാശനഷ്ടം നേരിട്ടു. മൂവാറ്റുപുഴ പോലീസ് സ്ഥലത്തെത്തി മേൽനടപടികൾ സ്വീകരിച്ചു.

മുണ്ടക്കൈ ചൂരല്‍മല ദുരന്തം : 6 സഹപ്രവര്‍ത്തകര്‍ക്ക് വീടൊരുക്കി വര്‍ക്ക്‌ഷോപ് സംഘടന

മൂവാറ്റുപുഴ: അസോസിയേഷന്‍ ഓഫ് ഓട്ടോമൊബൈല്‍ വര്‍ക്ക്‌ഷോപ് കേരള മുണ്ടക്കൈ ചൂരല്‍മല ദുരന്തത്തില്‍ വീട് നഷ്ടപ്പെട്ട ആറ് സഹപ്രവര്‍ത്തകര്‍ക്ക് വീടൊരുക്കി നല്‍കി. സംസ്ഥാനത്തെ തങ്ങളുടെ എല്ലാ അംഗങ്ങളില്‍ നിന്നും സ്വരൂപിച്ച ഫണ്ട് ഉപയോഗിച്ചാണ് ദുരന്തത്തില്‍ വീട് നഷ്ടപ്പെട്ട ആറ് സഹപ്രവര്‍ത്തകര്‍ക്ക് 30 സെന്‍റ് സ്ഥലം വാങ്ങി വീട് നിര്‍മിച്ചു നല്‍കിയത്. നിര്‍മിച്ച ആറു വീടുകളുടെ താക്കോല്‍ദാനം മന്ത്രി വി.എൻ. വാസവന്‍ നിര്‍വഹിച്ചു. മുട്ടില്‍ പരിയാരം ചെലഞ്ഞിച്ചാലില്‍ അഞ്ച് സെന്‍റില്‍ 850 സ്‌ക്വയര്‍ഫീറ്റ് വിസ്തീര്‍ണത്തിലാണ് വീടുകള്‍ നിര്‍മിച്ചിരിക്കുന്നത്. രണ്ടു കിടപ്പുമുറികള്‍, അടുക്കള, ഹാള്‍, ശുചിമുറി സൗകര്യങ്ങളോടെയുള്ള വീടുകളിലേക്ക് പൊതുകിണര്‍ നിര്‍മിച്ച് കുടിവെള്ള സൗകര്യവും ഉറപ്പാക്കിയിട്ടുണ്ട്. 10 മാസം കൊണ്ടാണ് വീടുകളുടെ നിര്‍മാണം പൂര്‍ത്തിയാക്കിയത്.

രാസമാലിന്യം ഒഴുക്കിയ പ്ലൈവുഡ് കമ്പനിക്ക് നോട്ടീസ്

മൂവാറ്റുപുഴ: പണ്ടപ്പിള്ളിയില്‍ എംവിഐപി കനാലിലേക്ക് രാസമാലിന്യം ഒഴുക്കിയ പ്ലൈവുഡ് കമ്പനിക്ക് മൂവാറ്റുപുഴ വാലി ഇറിഗേഷന്‍ പ്രോജക്ട് (എംവിഐപി) നോട്ടീസ് നല്‍കി. മാലിന്യം ഒഴുക്കിയാല്‍ നിയമനടപടി സ്വീകരിക്കുമെന്നും അറിയിച്ചു. കമ്പനിയില്‍നിന്ന് 50,000 രൂപ പിഴ ഈടാക്കാനും കമ്പനിക്ക് സ്റ്റോപ്പ് മെമ്മോ നല്‍കാനും ആരക്കുഴ പഞ്ചായത്ത് കമ്മിറ്റി തീരുമാനിച്ചിരുന്നു. ഇതനുസരിച്ച് സ്റ്റോപ്പ് മെമ്മോ നല്‍കിയിട്ടുണ്ട്. പ്ലൈവുഡ് കമ്പനി രാസമാലിന്യം ഒഴുക്കിയതുമായി ബന്ധപ്പെട്ട് പരാതി ഉയര്‍ന്നതിനെത്തുടര്‍ന്ന് ആരക്കുഴ പഞ്ചായത്ത് സെക്രട്ടറിയും ആരോഗ്യ വിഭാഗവും നടത്തിയ പരിശോധനയില്‍ കമ്പനിയുടെ വീഴ്ചകള്‍ കണ്ടെത്തിയിരുന്നു. തുടര്‍ന്നാണ് പിഴയീടാക്കാനും സ്റ്റോപ്പ് മെമ്മോ നല്‍കാനും പഞ്ചായത്ത് ഭരണസമിതി അടിയന്തര യോഗം ചേര്‍ന്ന് തീരുമാനിച്ചത്. നൂറുകണക്കിനാളുകളുടെ ജലസ്രോതസാണ് എംവിഐപി പ്രധാന കനാല്‍ ഇതിലേക്കാണ് ചുവന്ന നിറത്തിലുള്ള രാസമാലിന്യം ഒഴുക്കിയത്. കമ്പനിക്ക് പ്രവര്‍ത്തനാനുമതി നല്‍കിയപ്പോള്‍ നിര്‍ദേശിച്ച നിബന്ധനകള്‍ പാലിക്കാതെയാണ് പ്രവര്‍ത്തിക്കുന്നതെന്നും കണ്ടെത്തിയിരുന്നു.

കന്യാസ്ത്രീകള്‍ക്കുനേരേ നടന്ന അതിക്രമങ്ങളില്‍ പ്രതിഷേധിച്ചു

മൂവാറ്റുപുഴ: കന്യാസ്ത്രീകള്‍ക്കുനേരേ നടന്ന അതിക്രമങ്ങളില്‍ പ്രതിഷേധിച്ച് കാരക്കുന്നം സെന്‍റ് മേരീസ് കത്തോലിക്ക പള്ളിയിലെ വിവിധ സംഘടനകളുടെ നേതൃത്വത്തിൽ വായ്മൂടിക്കെട്ടി പ്രതിഷേധ റാലി സംഘടിപ്പിച്ചു. വികാരി ഫാ. ജോർജ് വള്ളോംകുന്നേല്‍ നേതൃത്വം നൽകി. കൂടാതെ അസിസ്റ്റന്‍റ് വികാരി ഫാ. അലന്‍ വെട്ടിക്കുഴി, കൈക്കാരന്മാരായ ജോസ് പുല്ലന്‍പ്ലാവില്‍, ഷിബു ചാത്തന്‍കണ്ടം, രാജു കുഴികണ്ടത്തില്‍, വിവിധ സംഘടനകളുടെ ഭാരവാഹികള്‍ എന്നിവർ നേതൃത്വം നൽകി. പ്രതിഷേധ സംഗമം കോതമംഗലം: മതന്യൂനപക്ഷപീഡനത്തിനും ഭരണഘടന വിരുദ്ധതക്കും എതിരെ ഗ്രീൻവിഷൻ കേരളയുടെ നേതൃത്വത്തിൽ കോതമംഗലം കോഴിപ്പിള്ളി ജംഗഷനിൽ പ്രതിഷേധസംഗമം നടത്തി. കീരംപറ പഞ്ചായത്ത് മുൻ പ്രസിഡന്‍റ് മാമച്ചൻ ജോസഫ് ഉദ്ഘാടനം ചെയ്തു. എകെസിസി രൂപത സെക്രട്ടറിയും ഗ്രീൻവിഷൻ കേരള സംസ്ഥാന ട്രഷറാറുമായ ജിജി പുളിക്കൽ അധ്യക്ഷത വഹിച്ചു. മദ്യവിരുദ്ധ സമിതി മധ്യമേഖല പ്രസിഡന്‍റ് ജെയിംസ് കോറമ്പേൽ മുഖ്യ പ്രഭാഷണം നടത്തി. കല്ലൂർക്കാട്: ഛത്തീസ്ഗഡിൽ കള്ളക്കേസിൽ കുടുക്കി അന്യായമായി കന്യാസ്ത്രീകളെ ജയിലിലടച്ച ഭരണകൂട ഭീകരതക്കെതിരേ കോൺഗ്രസ് കല്ലൂർക്കാട് മണ്ഡലം കമ്മിറ്റി പ്രതിഷേധ കൂട്ടായ്മ സംഘടിപ്പിച്ചു. മാത്യു കുഴൽനാടൻ എംഎൽഎ ഉദ്ഘാടനം ചെയ്തു. മണ്ഡലം പ്രസിഡന്‍റ് ബിജു ജോസഫ് അധ്യക്ഷത വഹിച്ചു. ജോയിസ് മേരി ആന്‍റണി മുഖ്യപ്രഭാഷണം നടത്തി. ജോർജ് ഫ്രാൻസിസ്, ജാൻസി ജോമി, തോമസ് മംഗലാമഠം, കെ.കെ. ദിലീപ്, സണ്ണി സെബാസ്റ്റ്യൻ തുടങ്ങിയവർ പ്രസംഗിച്ചു. കോതമംഗലം: ഭരണഘടന മൂല്യങ്ങൾ സംരക്ഷിക്കുക, ന്യൂനപക്ഷ വേട്ട അവസാനിപ്പിക്കുക എന്നീ ആവശ്യങ്ങൾ ഉന്നയിച്ച് എൽഡിഎഫ് കോതമംഗലം നിയോജക മണ്ഡലമം കമ്മറ്റിയുടെ നേതൃത്വത്തിൽ കോതമംഗലം ചെറിയ പള്ളിത്താഴത്ത് പ്രതിക്ഷേധ സംഗമം നടത്തി. ഛത്തീസ്ഗഡിൽ മലയാളി കന്യാസ്ത്രീകളെ കള്ളക്കേസിൽ കുടുക്കി ജയിലിലടച്ച സംഭവം അപലപനീയമാണെന്നും എൽഡിഎഫ് യോഗം വ്യക്തമാക്കി. ആന്‍റണി ജോൺ എംഎൽഎ പ്രതിഷേധ സംഗമം ഉദ്ഘാടനം ചെയ്തു. നിയോജക മണ്ഡലം ചെയർമാൻ പി.ടി. ബെന്നി അധ്യക്ഷത വഹിച്ചു.

ബൈക്കപകടത്തിൽ യുവാവ് മരിച്ചു

മരട്: കൂട്ടൂകാരന്‍റെ മകന്‍റെ പിറന്നാളാഘോഷം കഴിഞ്ഞ് മടങ്ങുകയായിരുന്ന യുവാവ് ബൈക്കപകടത്തിൽ മരിച്ചു. പാലാരിവട്ടം ലിറ്റിൽ ഫ്ലവർ ലെയ്ൻ വെളുത്തേടത്ത് പരേതനായ സുധീറിന്‍റെയും ജിൻസിയുടെയും മകൻ സിദ്ധാർഥ് (20) ആണ് മരിച്ചത്. ഞായറാഴ്‌ച രാത്രി 11ഓടെ കുണ്ടന്നൂർ മേൽപ്പാലത്തിലായിരുന്നു അപകടം. പാലത്തിന്‍റെ വടക്കേയറ്റത്ത് റോഡുമായി ചേരുന്ന ഭാഗത്തെ അപകടകരമായ കട്ടിംഗ് കണ്ട് പെട്ടെന്ന് ബ്രേക്കിട്ട പിക്കപ്പ് വാനിന്‍റെ പിന്നിൽ ബൈക്ക് ഇടിക്കുകയായിരുന്നെന്ന് പോലീസ് പറഞ്ഞു. ഇടിയുടെ ആഘാതത്തിൽ തെറിച്ചുവീണ സിദ്ധാർഥിനെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി.

ബസിടിച്ച് വീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു

കളമശേരി: സൗത്ത് കളമശേരി മേല്‍പ്പാലത്തിനു സമീപം ബസ് ബൈക്കിലിടിച്ച് തെറിച്ചുവീണ ബൈക്ക് യാത്രികൻ അതേ ബസിനടിയിൽപ്പെട്ട് മരിച്ചു. കൊടുങ്ങല്ലൂര്‍ അഴിക്കോട് കളത്തിപ്പറമ്പില്‍ മുഹമ്മദ് സലിം (42) ആണ് മരിച്ചത്. ഓണ്‍ലൈന്‍ ഫുഡ് ഡെലിവറി ജീവനക്കാരനായിരുന്നു. ഇന്നലെ രാവിലെ ഒന്‍പതിനായിരുന്നു അപടകം. ബൈക്കിൽ ആലുവ ഭാഗത്തേക്ക് പോവുകയായിരുന്നു മുഹമ്മദ് സലിം. ബസ് ബൈക്കിനെ മറികടക്കുന്നതിനിടെ വാതില്‍ഭാഗം തട്ടി ബൈക്ക് നിയന്ത്രണംവിട്ട് മറിയുകയായിരുന്നു. ബസിനിടിയിലേക്ക് തെറിച്ചുവീണ മുഹമ്മദ് സലീമിന്‍റെ ശരീരത്തിലൂടെ ബസ് കയറിയിറങ്ങി. പോലീസ് മേൽനടപടികൾ സ്വീകരിച്ചു. മൃതദേഹം മെഡിക്കല്‍ കോളജിലേക്ക് മാറ്റി. സംഭവത്തിൽ ബസ് ഡ്രൈവർ കൃഷ്ണകുമാറിനെതിരേ കേസെടുത്തു.

അജ്ഞാത മൃതദേഹം

ആലുവ: ജൂലൈ 28ന് ആലുവയിൽ ട്രെയിൻതട്ടി മരിച്ച യുവാവിനെ തിരിച്ചറിഞ്ഞിട്ടില്ല. ഏകദേശം 25 വയസ് പ്രായം തോന്നിക്കുന്ന യുവാവിന്‍റെ മൃതദേഹം ആലുവ ജില്ലാ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. എന്തെങ്കിലും വിവരം ലഭിക്കുന്നവർ ആലുവ ഈസ്റ്റ് പോലീസ് സ്റ്റേഷനുമായി ബന്ധപ്പെടണം. ഫോൺ: 0484-2624006.

സ്വകാര്യ ബസ് സമരം ഏഴിന്; അനുരഞ്ജന യോഗം ഇന്ന്

വൈപ്പിൻ: പറവൂർ - വൈപ്പിൻ, മൂത്തകുന്നം - ഇടപ്പള്ളി മേഖലയിലെ സ്വകാര്യ ബസ് ഉടമകളും തൊഴിലാളി യൂണിയനുകളും ചേർന്ന സംയുക്ത സമരസമിതി ഏഴു മുതൽ പ്രഖ്യാപിച്ച സമരം പിൻവലിപ്പിക്കാൻ ഇന്ന് രാവിലെ 11ന് അനുരഞ്ജന യോഗം ചേരും. മുനമ്പം ഡിവൈഎസ്‌പിയുടെ നേതൃത്വത്തിൽ പറവൂർ ഡിവൈഎസ്‌പി ഓഫീസിലാണ് യോഗം. യോഗത്തിൽ സംയുക്ത സമരസമിതി പ്രതിനിധികളും നാഷണൽ ഹൈവേ അഥോറിറ്റി ഉദ്യോഗസ്ഥരും പങ്കെടുക്കും. ഗോശ്രീ സമാന്തര പാലത്തിന്‍റെയും ദേശീയപാതയിൽ മൂത്തകുന്നം മുതൽ ഇടപ്പള്ളി വരെയുമുള്ള റോഡുകളുടെ അറ്റകുറ്റപ്പണികൾ യുദ്ധകാലാടിസ്ഥാനത്തിൽ പൂർത്തീകരിക്കണമെന്ന് സമരസമിതി ആവശ്യപ്പെട്ടു. ഈ ആവശ്യവുമായി കഴിഞ്ഞ ഒന്നിന് സ്വകാര്യ ബസുകൾ പണിമുടക്കിയിരുന്നു. ഏഴു മുതൽ മൂത്തകുന്നം - ഇടപ്പള്ളി മേഖലയിൽ പൂർണമായും, വൈപ്പിൻ-എറണാകുളം മേഖലയിൽ സ്വകാര്യ ബസുകൾ നഗരം ബഹിഷ്കരിച്ചുള്ള സമരവുമാണ് പ്രഖ്യാപിച്ചിരുന്നത്. ഇതിനിടെ എറണാകുളം സിറ്റി പോലീസ് അസിസ്റ്റന്‍റ് കമ്മീഷണർ വിളിച്ചുചേർത്ത യോഗത്തിൽ ഗോശ്രീ പാലത്തിന്‍റെ അറ്റകുറ്റപ്പണികൾ 25 ദിവസത്തിനകം തീർക്കും എന്ന് ഉറപ്പ് ലഭിച്ചിരുന്നു. എന്നാൽ ദേശീയപാതയുടെ കാര്യത്തിൽ ഉറപ്പ് ലഭിച്ചില്ല. ഈ സാഹചര്യത്തിൽ സിറ്റി പോലീസ് അസിസ്റ്റന്‍റ് കമ്മീഷണറുടെ ആവശ്യപ്രകാരമാണ് മുനമ്പം ഡിവൈഎസ്‌പി യോഗം വിളിച്ചത്.

കാര്യമായ ക്യാച്ചിംഗ് ഇല്ലാതെ മത്സ്യബന്ധന ബോട്ടുകൾ തിരിച്ചെത്തിത്തുടങ്ങി

വൈപ്പിൻ: ട്രോളിംഗ് നിരോധനം കഴിഞ്ഞ് കടലിൽ പോയ മത്സ്യബന്ധന ബോട്ടുകൾ പലതും തിരിച്ചെത്തി തുടങ്ങി. പ്രതീക്ഷിച്ച പോലെ കാര്യമായ ക്യാച്ചിംഗ് നടന്നില്ലെന്ന് തൊഴിലാളികൾ പറഞ്ഞു. മുനമ്പത്ത് ഇരുപതോളം ബോട്ടുകളാണ് അടുത്തത്. ഭൂരിഭാഗം ബോട്ടുകളിലും കിളിമീനുകളാണ് ഉള്ളത്. ഇവ ഇന്ന് പുലർച്ചെ ഹാർബറുകളിൽ ഇറക്കി കച്ചവടം നടത്തും. ഇന്നും നാളെയുമായി കൂടുതൽ ബോട്ടുകൾ എത്തുമെന്നാണ് പ്രതീക്ഷ.

23.3 ഗ്രാം എംഡിഎംയുമായി യുവാവ് പിടിയിൽ

പള്ളുരുത്തി: എംഡിഎംഎയുമായി പള്ളുരുത്തി കോണത്ത് റോഡ് കുട്ടത്തറപ്പറമ്പ് റിയാസി(32)നെ പള്ളുരുത്തി പോലീസ് അറസ്റ്റ് ചെയ്തു. പള്ളുരുത്തി കടേഭാഗത്ത് നിന്നാണ് പ്രതിയെ പിടികൂടിയത്. ഇയാളുടെ പക്കൽനിന്ന് 23.3 ഗ്രാം എംഡിഎംഎ കണ്ടെടുത്തു. ആഡംബര വാഹനങ്ങളിൽ സഞ്ചരിച്ചായിരുന്നു കച്ചവടം. പ്രതി സഞ്ചരിച്ചിരുന്ന കാറും പിടിച്ചെടുത്തു. കൂട്ടാളികൾക്കായുള്ള തെരച്ചിൽ ഊർജിതമാക്കി. പ്രതിയെ റിമാൻഡ് ചെയ്തു.

കൊച്ചി മെട്രോ: ടിക്കറ്റ് വെന്‍ഡിംഗ് മെഷീനുകളില്‍ യുപിഐ സൗകര്യവും

കൊച്ചി: യാത്രക്കാര്‍ക്ക് ക്യൂ നില്‍ക്കാതെ ടിക്കറ്റ് എടുക്കാന്‍ മെട്രോ സ്റ്റേഷനുകളില്‍ സജ്ജീകരിച്ച ടിക്കറ്റ് വെന്‍ഡിംഗ് മെഷീനുകളില്‍ ഇനി യുപിഐ സൗകര്യവും. ക്യൂആര്‍ കോഡ് സ്‌കാന്‍ ചെയ്തു പണമടച്ച് ടിക്കറ്റ് ലഭ്യമാക്കുന്ന സേവനം നാളെ മുതല്‍ എല്ലാ മെട്രോ സ്റ്റേഷനുകളിലെയും ടിക്കറ്റ് വെന്‍ഡിംഗ് മെഷീനുകളില്‍ ലഭിക്കും. പദ്ധതിയുടെ ഉദ്ഘാടനം ഇന്ന് ഉച്ചകഴിഞ്ഞ് മൂന്നിന് ജെല്‍എന്‍ സ്റ്റേഡിയത്തില്‍ കെഎംആര്‍എല്‍ എംഡി‍ ലോക്‌നാഥ് ബഹ്‌റ നിര്‍വഹിക്കും. തിരക്കേറിയ സമയങ്ങളില്‍ ക്യൂ നിന്ന് ടിക്കറ്റെടുക്കുക വഴി യാത്രക്കാര്‍ക്കുണ്ടാകുന്ന ബുദ്ധിമുട്ട് ഒഴിവാക്കുന്നതിനാണ് മെട്രോ സ്റ്റേഷനുകളില്‍ ടിക്കറ്റ് വെന്‍ഡിംഗ് മെഷീനുകള്‍ ക്രമീകരിച്ചത്. യുപിഐ സൗകര്യം വരുന്നതോടെ ഗുഗിള്‍ പേ, ഫോണ്‍പേ പോലുള്ള യുപിഐ അപ്പിലെ ക്യൂആര്‍ കോഡ് സൗകര്യം ഉപയോഗപ്പെടുത്തി ടിക്കറ്റ് എടുക്കാനുള്ള സൗകര്യമാണ് കെഎംആര്‍എല്‍ ഒരുക്കുന്നത്. മെഷീനിലെ ടച്ച് സക്രീനില്‍ ആദ്യം ഭാഷ തെരഞ്ഞെടുക്കണം. പിന്നീട് യാത്ര ചെയ്യേണ്ടതായ സ്ഥലം എന്‍റര്‍ ചെയ്യണം. അപ്പോള്‍ സ്‌ക്രീനില്‍ ടിക്കറ്റ് നിരക്ക് തെളിയും. ഒപ്പം ക്യൂആര്‍ കോഡും. മൊബൈല്‍ ഫോണിലെ ക്യുആര്‍ കോഡ് ഓപ്പണ്‍ ചെയ്ത് സ്‌കാന്‍ ചെയ്താല്‍ അക്കൗണ്ടില്‍ നിന്ന് ടിക്കറ്റിനുള്ള പണം നേരിട്ട് ലഭിക്കും. പെയ്‌മെന്‍റ് നടപടികള്‍ പൂര്‍ത്തിയാകുന്നതോടെ ടിക്കറ്റും മെഷീനില്‍ നിന്ന് ലഭിക്കും. നിലവില്‍ പണം നല്‍കിയാണ് മെഷീനില്‍ നിന്ന് ടിക്കറ്റ് ലഭിച്ചിരുന്നത്. പണം വയ്ക്കുന്നതിനുള്ള പ്രത്യേക ഭാഗം മെഷീനിലുണ്ട്. ബാലന്‍സ് പണം ഉണ്ടേല്‍ അതും മെഷീന്‍ തിരികെ നല്‍കും. ടിക്കറ്റ് വെന്‍ഡിംഗ് മെഷീന്‍ കൂടാതെ വാട്‌സ് ആപ്പ്, മെട്രോ കാര്‍ഡ് എന്നിവ ഉപയോഗിച്ചും ടിക്കറ്റ് എടുക്കാനുള്ള സൗകര്യവും മെട്രോ ഒരുക്കിയിട്ടുണ്ട്.

കോട്ടപ്പടിയിൽ കാട്ടാന കിണറ്റിൽ വീണ സംഭവം :പ്രതിഷേധക്കാർക്കെതിരായ കേസ് പിൻവലിക്കാൻ ഉത്തരവായി: എംഎൽഎ

കോതമംഗലം: കോട്ടപ്പടിയിൽ കാട്ടാന കിണറ്റിൽ വീണതിനെ തുടർന്നുണ്ടായ ജനങ്ങളുടെ പ്രതിഷേധത്തിന്‍റെ പേരിൽ കോട്ടപ്പടി പോലീസ് എടുത്ത കേസ് പിൻവലിക്കാൻ സർക്കാർ ഉത്തരവായതായി ആന്‍റണി ജോൺ എംഎൽഎ അറിയിച്ചു. 2024 ഏപ്രിൽ 24ന് പുലർച്ചെ കോട്ടപ്പടി പഞ്ചായത്ത് മൂന്നാം വാർഡിൽ കൂലാത്തി പത്രോസിന്‍റെ പുരയിടത്തിലെ കിണറ്റിൽ കാട്ടാന വീണതിനെ തുടർന്നുണ്ടായ ജനങ്ങളുടെ സ്വാഭാവിക പ്രതിഷേധത്തിനെതിരെ കോട്ടപ്പടി പോലീസ് രജിസ്റ്റർ ചെയ്ത കേസാണ് പിൻവലിക്കാൻ ഉത്തരവായത്. പ്രദേശത്ത് നിരന്തരമായി ഉണ്ടാകുന്ന വന്യമൃഗ ശല്യത്തിനെതിരായി സ്വാഭാവികമായ പ്രതിഷേധം മാത്രം ഉയർത്തിയിട്ടുള്ള പ്രദേശ വാസികൾക്കെതിരെയാണ് കേസെടുത്തിരുന്നത്. കാട്ടാന വീണ കിണർ കുടുംബം മാത്രമല്ല പ്രദേശവാസികളെല്ലാം കുടിവെള്ളത്തിനും മറ്റ് ആവശ്യങ്ങൾക്കുമായി ആശ്രയിച്ചിരുന്നതാണ്. പ്രദേശവാസികളായ ഒന്പതു പേർക്കും കണ്ടാൽ അറിയാവുന്ന പത്തോളം പേർക്ക് എതിരായി ഉണ്ടായിട്ടുള്ള പ്രോസിക്യൂഷൻ നടപടികൾ കോട്ടപ്പടി പോലീസ് സ്റ്റേഷൻ പിൻവലിക്കണമെന്ന് ആവശ്യപ്പെട്ട് മുഖ്യമന്ത്രിക്ക് എംഎൽഎ കത്ത് നൽകിയിരുന്നു. ഈ അപേക്ഷ പരിഗണിച്ചാണ് കേസ് പിൻവലിക്കാൻ അനുമതി നൽകി സർക്കാർ ഉത്തരവിട്ടത്.

തലമുറകളുടെ മാഷിന് വിട

കൊച്ചി: പ്രാസംഗികനായി പലകുറി എത്തിയിരുന്ന എറണാകുളം ടൗണ്‍ ഹാളിലേക്ക് ഇക്കുറി മലയാളത്തിന്‍റെ പ്രിയ സാനുമാഷ് എത്തിയത് നിശ്ചലനായി അന്ത്യയാത്രയ്ക്കായിരുന്നു. ഒപ്പം സമയം ചെലവഴിച്ചവരും പ്രിയപ്പെട്ടവരും ശിഷ്യരുമെല്ലാം മാഷിന്‍റെ അരികില്‍ ഒരിക്കല്‍ക്കൂടി ഒത്തുകൂടിയപ്പോള്‍ തങ്ങളുടെ പ്രിയപ്പെട്ട മാഷ് ഇല്ലെന്ന വേദന മാത്രമാണ് പങ്കുവയ്ക്കാനുണ്ടായിരുന്നത്. മൃതദേഹം പൊതുദര്‍ശനത്തിനായി വീട്ടില്‍ നിന്ന് ടൗണ്‍ ഹാളിലേക്ക് എത്തിക്കുന്നതിന് മുമ്പ് തന്നേ ടൗണ്‍ ഹാളും പരിസരവും തിങ്ങിനിറഞ്ഞു. കര്‍മമേഖലയില്‍ ഊര്‍ജസ്വലനായി നടന്നുനീങ്ങിയ പാതകള്‍ പലതും പിന്നിട്ടത് അറിയാതെ ഒടുവില്‍ ഒരിക്കല്‍കൂടി സാനുമാഷ് ടൗണ്‍ ഹാളില്‍ വന്നുപോയി. പഠിപ്പിച്ചിട്ടില്ലെങ്കിലും ശിഷ്യരായവരെല്ലാം ഗുരുവിനെ ഒരുനോക്ക് കാണാന്‍ ഓടിയെത്തി. വേദിയില്‍ പ്രത്യേകം തയാറാക്കിയ സ്ഥലത്തായിരുന്നു പൊതുദര്‍ശനം. മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് വി.ഡി. സതീശന്‍, മന്ത്രിമാരായ റോഷി അഗസ്റ്റിന്‍, എം.ബി. രാജേഷ്, കെ. രാജന്‍, പി. രാജീവ്, വി.എന്‍. വാസവന്‍, ആര്‍. ബിന്ദു, എംപിമാരായ ഹൈബി ഈഡന്‍, ബെന്നി ബഹനാന്‍, എംഎല്‍എമാരായ ടി.ജെ. വിനോദ്, കെ.ജെ. മാക്‌സി, റോജി എം. ജോണ്‍, കെ. ബാബു, ആന്‍റണി ജോണ്‍, ചാണ്ടി ഉമ്മന്‍, ഉമ തോമസ്, എല്‍ദോസ് കുന്നപ്പള്ളി, മേയര്‍ എം. അനില്‍കുമാര്‍, ജില്ലാ കളക്ടര്‍ എന്‍.എസ്.കെ. ഉമേഷ്, സംസ്ഥാന സര്‍ക്കാരിന്‍റെ ഡല്‍ഹി പ്രതിനിധി കെ.വി. തോമസ്, സിപിഎം ജനറല്‍ സെക്രട്ടറി എം.എ. ബേബി, സംസ്ഥാന സെക്രട്ടറി എം.വി. ഗോവിന്ദന്‍, എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപി, വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍, എഴുത്തുകാരായ സി. രാധാകൃഷ്ണന്‍, എം. തോമസ് മാത്യു, സുനില്‍ പി. ഇളയിടം, കെ.ആര്‍. മീര, രാഷ്ട്രീയ നേതാക്കളായ വി.എം. സുധീരന്‍, വൈക്കം വിശ്വന്‍, എം. സ്വരാജ്, ഡോ. നീലലോഹിത ദാസ് നാടാര്‍, പി.എസ്. ശ്രീധരന്‍പിള്ള, കെ.എസ്. രാധാകൃഷ്ണന്‍, എ.എന്‍. രാധാകൃഷ്ണന്‍, പി.സി. ചാക്കോ, നടന്മാരായ ദേവന്‍, സിദ്ദിഖ്, കൈലാഷ്, സിപിഎം ജില്ലാ സെക്രട്ടറി എസ്. സതീഷ്, സിപിഎം സംസ്ഥാന സെക്രട്ടേറിയറ്റ് അംഗം സി.എന്‍, മോഹനന്‍, ഡിസിസി പ്രസിഡന്‍റ് മുഹമ്മദ് ഷിയാസ്, സംവിധായകരായ അമല്‍നീരദ്, രഞ്ജിത്ത്, തിരക്കഥാകൃത്തും സംവിധായകനുമായ രൺജി പണിക്കര്‍, നടി നവ്യ നായര്‍, സംഗീത സംവിധായകന്‍ ബേണി, ജസ്റ്റീസ് പി. ഷംസുദ്ദീന്‍, ട്രേഡ് യൂണിയന്‍ നേതാവ് തമ്പാന്‍ തോമസ്, കൊച്ചി മെട്രോ എം.ഡി. ലോകനാഥ് ബെഹ്റ, വ്യവസായ വകുപ്പ് പ്രിന്‍സിപ്പല്‍ സെക്രട്ടറി എ.പി.എം. മുഹമ്മദ് ഹനീഷ് തുടങ്ങി വിവിധ മേഖലകളിലെ നിരവധി പേര്‍ പ്രഫ. എം.കെ. സാനുവിന് അന്ത്യാഞ്ജലി അര്‍പ്പിക്കാനെത്തി. മഹാരാജാസ് കോളജ് ഓള്‍ഡ് സ്റ്റുഡന്‍റ്സ് അസോസിയേഷന്‍റെ നേതൃത്വത്തില്‍ പ്രിയ ഗുരുനാഥന് അന്തിമോപചാരം അര്‍പ്പിച്ചു. വൈകുന്നേരം നാലോടെ പൊതുദര്‍ശനം പൂര്‍ത്തിയാക്കി മൃതദേഹം ശ്മശാനത്തിലേക്ക് കൊണ്ടുപോകുന്നതിന് മുമ്പ് എറണാകുളം സെന്‍ട്രല്‍ എസിപി സിബി ടോമിന്‍റെ സാന്നിധ്യത്തില്‍ പോലീസിന്‍റെ ഗാര്‍ഡ് ഒഫ് ഓണര്‍ നല്‍കി. നാലരയോടെ രവിപുരം ശ്മശാനത്തിലേക്ക് കൊണ്ടുവന്നു. തുടര്‍ന്ന് ഔദ്യോഗിക ബഹുമതികളോടെ മൃതദേഹം സംസ്‌കരിച്ചു. മൂത്തമകന്‍ എം.എസ്. രഞ്ജിത്താണ് ചിതയ്ക്ക് തീ കൊളുത്തിയത്. മൗനംപൂണ്ട് "സന്ധ്യാ' മുറ്റം കൊച്ചി: വായനയും എഴുത്തുമായി സജീവമായിരുന്ന സന്ധ്യയുടെ ഇറയത്തേക്ക് അവസാനമായി എം.കെ. സാനു എത്തിയപ്പോള്‍ മുമ്പ് അക്ഷരങ്ങളാല്‍ ശബ്ദമുഖരിതമായിരുന്ന വീട് ഇന്നലെ നിശബ്ദമായിരുന്നു. തലമുറകള്‍ വായിച്ച പല കൃതികളും രചിക്കപ്പെട്ട സന്ധ്യയില്‍ ഇനി സാനു മാഷ് ഇല്ലെന്ന യാഥാര്‍ഥ്യം ഉള്‍ക്കൊണ്ട പോലെ വീടും പരിസരവും മൗനമായിരുന്നു. ശനിയാഴ്ച വൈകുന്നേരം അമൃത ആശുപത്രിയിലെ പൊതുദര്‍ശത്തിനുശേഷം ഇന്നലെ രാവിലെ 8.30ഓടെയാണ് സാനു മാഷിന്‍റെ മൃതദേഹം വീട്ടിലേക്ക് എത്തിച്ചത്. നൂറുകണക്കിന് ആളുകൾ കാരിക്കാമുറി റോഡിലെ സന്ധ്യയിലേക്ക് ഒഴുകിയെത്തി. മന്ത്രി റോഷി അഗസ്റ്റിന്‍, എം. സ്വരാജ് തുടങ്ങിയവര്‍ വീട്ടിലെത്തി ആദരാഞ്ജലികള്‍ അര്‍പ്പിച്ചു.

കർഷക കൂട്ടായ്മക്കു പരിശീലനം

വാഴക്കുളം: മഞ്ഞള്ളൂർ പഞ്ചായത്ത് കൃഷിഭവന്‍റെ ആഭിമുഖ്യത്തിൽ പോഷക സമൃദ്ധി മിഷന്‍റെ ഭാഗമായി കർഷക കൂട്ടായ്മയ്ക്ക് പരിശീലനം നൽകി. ആത്മ പദ്ധതിയുടെ കീഴിൽ 10 ഏക്കറിൽ കൃഷി ചെയ്തുവരുന്ന തെരഞ്ഞെടുത്ത 20 കർഷകരുടെ എസ്‌സി കർഷക കൂട്ടായ്മക്കാണ് പരിശീലനം നൽകിയത്. പച്ചക്കറി, ഫലവൃക്ഷ കൃഷിയും വിളപരിപാലന മുറകളും എന്ന വിഷയത്തിൽ റിട്ട. കൃഷി അസി. ഡയറക്ടർ ബിജുമോൻ സക്കറിയ ക്ലാസ് നയിച്ചു. പദ്ധയിൽ ഉൾപ്പെട്ട കർഷകർക്ക് മുവാറ്റുപുഴ ബ്ലോക്ക് പഞ്ചായത്തിൽ നിന്നുള്ള നടീൽ വസ്തുക്കളും ജൈവ വളവും ഇതോടനുബന്ധിച്ച് വിതരണം ചെയ്‌തു. പഞ്ചായത്ത് പ്രസിഡന്‍റ് ആൻസി ജോസ് വിതരണോദ്ഘാടനം നിർവഹിച്ചു. വൈസ് പ്രസിഡന്‍റ് ടോമി തന്നിട്ടാമാക്കൽ അധ്യക്ഷത വഹിച്ചു. സ്ഥിരംസമിതി അധ്യക്ഷ സെലിൻ ഫ്രാൻസിസ്,പഞ്ചായത്തംഗം കെ.വി. സുനിൽ, സിഡിഎസ് ചെയർപേഴ്‌സൺ കെ.ജി. തങ്കമണി,കൃഷി ഓഫീസർ ടി.കെ. ജിജി, കൃഷി അസിസ്റ്റന്‍റുമാരായ റസീന അസീസ്,പ്രദീപ്,ഫീൽഡ് അസിസ്റ്റന്‍റ് ദിനേഷ് തുടങ്ങിയവർ പങ്കെടുത്തു.

ഉമ്മൻ ചാണ്ടി അനുസ്മരണം

പിറവം: മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാമത് ചരമവാർഷികത്തോടനുബന്ധിച്ച് പിറവത്ത് അനുസ്മരണ സദസ് സംഘടിപ്പിച്ചു. മന്ന ചാരിറ്റബിൾ ട്രസ്റ്റും, അമേരിക്കൻ മലയാളി അസോസിയേഷന്‍റെ മുഖ്യ സംഘടനയായ ഫോമയും ചേർന്നാണ് ചടങ്ങ് സംഘടിപ്പിച്ചത്. കക്കാട് ക്രിസ്തുരാജ പ്രെയർ സെന്‍ററിന്‍റെ അഭയകേന്ദ്രത്തിൽ നടന്ന അനുസ്മരണം മന്ന ചാരിറ്റബിൾ ട്രസ്റ്റ് ഡയറക്ടർ ഡോ. മറിയ ഉമ്മൻ ഉദ്ഘാടനം ചെയ്തു. മുൻ നഗരസഭാ ചെയർമാൻ സാബു കെ. ജേക്കബ് അധ്യക്ഷത വഹിച്ചു. റോട്ടറിയുടെ ഗിഫ്റ്റ് ഓഫ് ലൈഫ് നാഷണൽ കോ-ഓർഡിനേറ്റർ ഡോ. എ.സി. പീറ്റർ, പാമ്പാക്കുട സർവീസ് സഹ. ബാങ്ക് പ്രസിഡന്‍റ് പ്രഫ. എബി എൻ. ഏലിയാസ് എന്നിവർ പ്രസംഗിച്ചു. ചടങ്ങിൽ നിർധനർക്ക് ഭക്ഷ്യധാന്യ കിറ്റുകൾ വിതരണം ചെയ്തു. തമ്പി പുതുവാക്കുന്നേൽ, കുര്യൻ പുളിക്കൽ, പോൾ കൊമ്പനാല്‍, ഏലിയാസ് വെട്ടുകുഴിയിൽ, രവി സ്രാമടത്തിൽ, ബേബിച്ചൻ തോമസ്,സെന്‍റർ ഡയറക്ടർ ബ്രദർ ജയ്സൺ സ്കറിയ, കോമളം ഷാജി തുടങ്ങിയവർ പങ്കെടുത്തു.

ഓലിപ്പാറ കുടിവെള്ള പദ്ധതി: വാട്ടർ ടാങ്കിന്‍റെ നിർമാണം ആരംഭിച്ചു

കോതമംഗലം: നെല്ലിക്കുഴിയിൽ ബ്ലോക്ക് പഞ്ചായത്ത് നിർമിക്കുന്ന ഓലിപ്പാറ കുടിവെള്ള പദ്ധതിയുടെ വാട്ടർ ടാങ്കിന്‍റെ നിർമാണം ആരംഭിച്ചു. ബ്ലോക്ക് പ്രസിഡന്‍റ് പി.എ.എം. ബഷീർ ഉദ്ഘാടനം നിർവഹിച്ചു. നെല്ലിക്കുഴി പഞ്ചായത്തിലെ 21ാം വാർഡിൽ നിലവിൽ മണ്ണ് നിരപ്പിൽ ചെറിയ ടാങ്ക് ആണ് ഉണ്ടായിരുന്നത്. ഇതിൽനിന്നും എല്ലാ കുടുംബങ്ങൾക്കും കുടിവെള്ളം ലഭിക്കാതെ വന്നതോടെയാണ് ബ്ലോക്ക് പഞ്ചായത്ത് 2025 - 26 വാർഷിക പദ്ധതിയിൽ 15 ലക്ഷം രൂപ വകയിരുത്തി നിർമാണം ആരംഭിച്ചത്.ഇവിടെ ഉയരത്തിൽ ടാങ്ക് നിർമിക്കുന്നതിലൂടെ നൂറിൽപരം കുടുംബങ്ങൾക്ക് കുടിവെള്ളം ലഭ്യമാകും. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. ബ്ലോക്ക് പഞ്ചായത്ത് സ്ഥിരംസമിതി അധ്യക്ഷന്മാർ,ബ്ലോക്ക് പഞ്ചായത്തംഗങ്ങൾ തുടങ്ങിയവർ പ്രസംഗിച്ചു.

യൂത്ത് കോൺഗ്രസ് പ്രതിഷേധ ധർണ നടത്തി

കൂത്താട്ടുകുളം :യൂത്ത് കോൺഗ്രസ് കൂത്താട്ടുകുളം മണ്ഡലം കമ്മിറ്റിയുടെ നേതൃത്വത്തിൽ മാരുതി ജംഗ്ഷനിൽ ധർണ നടത്തി.പാലാ റോഡിന്‍റെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ട് നടത്തിയ ധർണ നഗരസഭാ പ്രതിപക്ഷ നേതാവ് പ്രിൻസ് പോൾ ജോൺ ഉദ്ഘാടനം ചെയ്തു. മംഗലത്തുതാഴം മുതൽ രാമപുരം കവല വരെയുള്ള പാലാ - രാമപുരം റോഡ് നിർമാണം പൂർത്തിയായി ഒരാഴ്ചയ്ക്കുള്ളിൽ തകർന്നതായി പ്രിൻസ് പോൾ ജോൺ ചൂണ്ടിക്കാട്ടി. ഇത് സംബന്ധിച്ച് നിരവധി പരാതികൾ വിജിലിൻസിനും സർക്കാരിനും നൽകിയെങ്കിലും തുടർ നടപടികളുണ്ടായില്ലെന്നും അദ്ദേഹം പറഞ്ഞു. യൂത്ത് കോൺഗ്രസ്‌ മണ്ഡലം പ്രസിഡന്‍റ് ജിനിഷ് വൻനിലം അധ്യക്ഷത വഹിച്ചു. കോൺഗ്രസ് മണ്ഡലം പ്രസിഡന്‍റ് റെജി ജോൺ മുഖ്യപ്രഭാഷണം നടത്തി. ബ്ലോക്ക് ഭാരവാഹികളായ കെ.സി. ഷാജി, ജിജോ ടി. ബേബി, റോയ് ഇരട്ടയാനി, മാർക്കോസ് ഉലഹന്നാൻ, ജിൻസ് പൈറ്റക്കുളം, സുമേഷ് ഗോപി, എ.ജെ. കാർത്തിക്, ഗ്രിഗറി ഏബ്രഹാം,അജി തോമസ്, പ്രകാശ് ഭാസ്കർ, വിമൽ രാജ്, രാഫൽ ജോൺ, ലൂക്ക ഇട്ടിയവരെ, ബെൻ മാത്യു തുടങ്ങിവർ പ്രസംഗിച്ചു.

കർഷകദിനം : കണ്ണീർദിനമായി ആചരിക്കുമെന്ന് കോ-ഓർഡിനേഷൻ കമ്മിറ്റി

കോതമംഗലം: വന്യമൃഗ ശല്യവും പ്രകൃതിക്ഷോഭം മൂലവും കൃഷികൾ നശിച്ച് കടക്കെണിയിലായ കർഷകരെ രക്ഷിക്കാൻ കേന്ദ്ര -സംസ്‌ഥാന സർക്കാരുകൾ ഒരു നടപടിയും സ്വീകരിക്കാത്ത സാഹചര്യത്തിൽ കർഷകദിനം കണ്ണീർദിനമായി ആചരിക്കാൻ കർഷക കോ-ഓർഡിനേഷൻ കിഴക്കൻ മേഖലാ നേതൃസംഗമം തീരുമാനിച്ചു. വിവിധ മേഖലകളിൽ മികവ് പുലർത്തിയ കർഷകരെയും, വിവിധ മേഖലകളിൽ വ്യക്തിമുദ്ര പതിപ്പിച്ച പ്രമുഖരെയും കോ-ഓർഡിനേഷൻ സ്വന്തം നിലയിൽ ആദരിക്കും. വന്യമൃഗ ശല്യം, പ്രകൃതിക്ഷോഭം, കർഷക പെൻഷൻ, റബർ സബ്സിഡി, യുവാക്കളുടെ ക്ഷേമനിധി ആനുകൂല്യങ്ങൾ എന്നീ ഇനങ്ങളിൽ കോതമംഗലം, മൂവാറ്റുപുഴ, പെരുമ്പാവൂർ, അങ്കമാലി തുടങ്ങിയ കിഴക്കൻ മേഖലകളിൽ മാത്രം 25 കോടി രൂപയുടെ കുടിശികയാണ് സർക്കാർ നൽകാനുള്ളത്. കോതമംഗലം നിയോജക മണ്ഡലത്തിൽ 10 കോടിയോളം രൂപ ലഭിക്കാനുണ്ട്. ഈ കുടിശിക തുക മുഴുവനായും ഓണത്തിനു മുൻപ് കർഷകരുടെ കൈകളിൽ എത്തിയില്ലെങ്കിൽ ശക്തമായ സമരപരിപാടികൾ സംഘടിപ്പിക്കാനും യോഗം തീരുമാനിച്ചു. നേതൃസംഗമം യുഡിഎഫ് ജില്ലാ കൺവീനറും കോ-ഓർഡിനേഷൻ കമ്മിറ്റി ചെയർമാനുമായ ഷിബു തെക്കുംപുറം ഉദ്ഘാടനം ചെയ്തു. ജനറൽ കൺവീനർ ജെയിംസ് കോറേമ്പേൽ അധ്യക്ഷത വഹിച്ചു. കർഷ കോൺഗ്രസ് സംസ്ഥാന ജനറൽ സെക്രട്ടറി പി.സി. ജോർജ്, കർഷക യൂണിയൻ സംസ്ഥാന ഭാരവാഹികളായ ജോണി പുളിന്തടം, ആന്‍റണി ഓലിയപ്പുറം, സ്വതന്ത്ര കർഷക യൂണിയൻ ജില്ലാ പ്രസിഡന്‍റ് എം.എം. അബ്ദുൾ റഹ്മാൻ, വിവിധ കർഷക സംഘടന നേതാക്കളായ എം.എം. അഷറഫ്, പി.എം. സിദ്ധിഖ്, എം.സി. അയ്യപ്പൻ, സജി തെക്കേക്കര, പി.പി. മത്തായി , ആന്‍റണി കോട്ടപ്പടി, രാജൻ ടി. തോമസ്, പി.എം. സുഗതൻ, പി.എം ഹസൻ , ഷംസുദീൻ മക്കാർ, എം.പി. എസ്തപ്പാനോസ്, ബേബി മൂലയിൽ എന്നിവർ പ്രസംഗിച്ചു.

ഊന്നുകല്ലിൽ കാര്‍ തോട്ടിലേക്ക് ചരിഞ്ഞു; കുഞ്ഞടക്കം യാത്രക്കാര്‍ അദ്ഭുതകരമായി രക്ഷപ്പെട്ടു

കോതമംഗലം: ഊന്നുകല്ലിൽ കനത്ത മഴയില്‍ വെള്ളത്തില്‍ മുങ്ങിയ റോഡിലൂടെ സഞ്ചരിച്ച കാര്‍ റോഡരികിലെ തോട്ടിലേക്ക് ചെരിഞ്ഞു. കുഞ്ഞടക്കം യാത്രക്കാര്‍ അദ്ഭുതകരമായി രക്ഷപ്പെട്ടു. ഊന്നുകല്‍ തേങ്കോട് റോഡില്‍ ഇന്നലെ രാത്രി 8.30 ഓടെയാണ് സംഭവം. പാലക്കാട് വടക്കുംതറ സ്വദേശി ചോണയില്‍ ആഷിഖും ഭാര്യയും കുഞ്ഞും സഞ്ചരിച്ച കാറാണ് അപകടത്തില്‍പ്പെട്ടത്. ബന്ധുവീട്ടില്‍ പോയി മടങ്ങുംവഴിയായിരുന്നു അപകടം. റോഡ് നിറഞ്ഞ് വെള്ളമായതിനാൽ ദിശതെറ്റി കാറിന്‍റെ പിന്‍വശം തോട്ടിലേക്ക് ചരിഞ്ഞു. പെട്ടെന്ന് ഡോര്‍ തുറന്ന് കുട്ടിയെ എടുത്ത് രണ്ടുപേരും പുറത്തേക്ക് ചാടിയിറങ്ങിയതിനാൽ രക്ഷപ്പെട്ടു. കാറിനുള്ളിലേക്ക് വെള്ളം കയറി. സംഭവം അറിഞ്ഞ് ഓടികൂടിയ നാട്ടുകാര്‍ അറിയിച്ചതനുസരിച്ച് പോലീസും അഗ്നി രക്ഷാസേനയും എത്തി ക്രെയിന്‍ സഹായത്തോടെയാണ് കാര്‍ ഉയര്‍ത്തി മാറ്റിയത്.

കോലഞ്ചേരി നഗരത്തിൽ നടപ്പാതകൾ കൈയേറിയുള്ള കച്ചവടം തകൃതി

നട്ടംതിരിഞ്ഞ് കാൽനട യാത്രികർ കോലഞ്ചേരി: കോലഞ്ചേരി നഗരത്തിൽ നടപ്പാതകൾ കൈയേറിയുള്ള വഴിയോര കച്ചവടം പൊടിപൊടിക്കുന്പോൾ നട്ടംതിരിഞ്ഞ് കാൽനട യാത്രികർ. കൊച്ചി-ധനുഷ്കോടി ദേശീയപാതയിലെ കോലഞ്ചേരി ടൗണിന്‍റെ ഹൃദയഭാഗത്തുള്ള നടപ്പാതകളാണ് വഴിയോര കച്ചവടക്കാർ കൈയേറിയത്. കോലഞ്ചേരിയിൽ നിന്ന് മൂവാറ്റുപുഴയിലേക്ക് പോകാനായി നിൽക്കേണ്ട ബസ് കാത്തിരിപ്പു കേന്ദ്രത്തിനു മുന്നിലുള്ള തിരക്കേറിയ സ്ഥലത്താണ് വഴിയോരകച്ചവടക്കാർ കൂട്ടമായി തമ്പടിച്ചിരിക്കുന്നത്. വൈകുന്നേരത്തോടെ വഴിയോര കച്ചവടക്കാരും ചെറു തട്ടുകടകളും തുറന്ന് പ്രവർത്തിക്കുന്നതിനാൽ സ്ഥലത്ത് വൻതിരക്കാണ് അനുഭവപ്പെടുന്നത്. ബസ് കയറാൻ എത്തുന്ന വിദ്യാർഥികൾക്കും സ്ത്രീകളടക്കമുള്ള യാത്രക്കാർക്കും നടപ്പാത വിട്ട് ദേശീയപാത റോഡിലൂടെ വളഞ്ഞുചുറ്റി ബസ് കാത്തിരിപ്പ് സ്ഥലത്ത് എത്തേണ്ട സ്ഥിതിയാണ്. ഇത് അപകടം വരുത്തിവയ്ക്കാനും ഇടവരുത്തും. അടിയന്തിര നടപടി വിഷയത്തിൽ ഉണ്ടാകണമെന്നാണ് യാത്രക്കാർ ആവശ്യപ്പെടുന്നത്.

കുമ്പളങ്ങി പള്ളിയിൽ ധർണ നടത്തി

ഫോർട്ടുകൊച്ചി: കന്യാസ്ത്രീകൾക്ക് ജാമ്യം ലഭിച്ചെങ്കിലും കേസ് റദ്ദ് ചെയ്യണമെന്നാവശ്യപ്പെട്ട് കുമ്പളങ്ങി സെന്‍റ് ജോസഫ്സ് ഇടവകയിൽ പ്രതിഷേധം സംഘടിപ്പിച്ചു. വികാരി ഫാ. ആന്‍റണി നെടുംപറമ്പിൽ പ്രതിഷേധ പരിപാടികൾ ഉദ്ഘാടനം ചെയ്തു. സഹവികാരി ഫാ. എയ്ഡ്രിൻ ഡിസൂസ , മദർ സുപ്പീരിയർ സിസ്റ്റർ റെജീന എന്നിവർ പ്രസംഗിച്ചു. പാസ്റ്ററൽ കൗൺസിൽ സെക്രട്ടറി അഗസ്റ്റിൻ ജോസഫ്, കൺവീനർ ജോബ് വെളിപറമ്പിൽ, സെക്രട്ടറി മെറ്റിൽഡാ മൈക്കിൾ, വി.ജെ. ആന്‍റണി , സൂസൻ ജോസഫ്, ബിജു മാണിയാംപൊഴി, നിഷ ജോബോയ്, മേയ്മി ജോസഫ്, ഷേബസെൻസി എന്നിവർ പ്രതിഷേധ പരിപാടിക്ക് നേതൃത്വം നല്കി

കൈപ്പട്ടൂരിൽ പ്രതിഷേധ ജ്വാല

കാലടി: ഛത്തീസ്ഗഡില്‍ അന്യായമായി കന്യാസ്ത്രീകളെ ജയിലില്‍ അടച്ച കേസില്‍ എഫ്‌ഐആര്‍ റദ്ദ് ചെയ്യണമെന്നാവശ്യപ്പെട്ട് കത്തോലിക്കാ കോണ്‍ഗ്രസ് കൈപ്പട്ടൂര്‍ യൂണിറ്റിന്‍റെ നേതൃത്വത്തില്‍ പ്രതിഷേധ ജ്വാല സംഘടിപ്പിച്ചു. കൈപ്പട്ടൂര്‍ ഇടവക വികാരി ഫാ. മാത്യു മണവാളന്‍ ഉദ്ഘാടനം ചെയ്തു. ഓള്‍ ഇന്ത്യ കാത്തലിക് യൂണിയന്‍ സംസ്ഥാന വര്‍ക്കിംഗ് പ്രസിഡന്‍റ് ജോസ് ആന്‍റണി, എകെസിസി യൂണിറ്റ് പ്രസിഡന്‍റ് ഷാജന്‍ കോച്ചാപ്പിള്ളി, സെക്രട്ടറി മേരി ജോയ്, ട്രഷറര്‍ കെ.കെ. ജോര്‍ജ്, രൂപതാസമിതി അംഗങ്ങളായ ടെന്‍സി അവറാച്ചന്‍, കെ.പി. ജോസ്, എക്‌സിക്യൂട്ടീവ് അംഗം രജിത ജസ്റ്റിന്‍, കൈക്കാരന്‍ എം.വി. ജോയ് തുടങ്ങിയവർ പങ്കെടുത്തു.

കന്യാസ്ത്രീകൾക്കെതിരെയുള്ള കേസുകൾ ഉടൻ റദ്ദാക്കണം: മാർ തോമസ് ചക്യത്ത്

ആലുവ: ഛത്തീസ്ഗഡിലെ ദുർഗിൽ സിസ്റ്റർ പ്രീതി മേരിയെയും സിസ്റ്റർ വന്ദന ഫ്രാൻ‌സിസിനുമെതിരേ ചുമത്തപ്പെട്ട കേസുകൾ അടിയന്തരമായി റദ്ദാക്കണം എന്ന് ബിഷപ് മാർ തോമസ് ചക്യത്ത് ആവശ്യപ്പെട്ടു. ഇനി ഇങ്ങനെ ഒരു സംഭവം ഭാരതത്തിൽ ന്യൂന പക്ഷങ്ങൾക്ക് നേരെ ഉണ്ടാവാതിരിക്കാൻ മുൻകരുതലുകൾ പ്രധാനമന്ത്രി സ്വീകരിക്കണമെന്നും അദ്ദേഹം ആവശ്യപ്പെട്ടു. ആലുവ മേഖലയിലെ വിവിധ ദേവാലയങ്ങളുടെയും സന്യസ്ത സമൂഹങ്ങളുടെയും നേതൃത്വത്തിൽ നടന്ന പ്രതിഷേധ റാലിയും സമ്മേളനവും ഉദ്ഘാടനം ചെയ്തു സംസാരിക്കുകയായിരുന്നു ബിഷപ്. ആലുവ സെന്‍റ് ഡൊമിനിക് പള്ളി വികാരി ഫാ. ജോസഫ് കരുമത്തി അധ്യക്ഷത വഹിച്ചു. എറണാകുളം-അങ്കമാലി അതിരൂപത വൈദിക സമിതി സെക്രട്ടറി ഫാ. കുര്യാക്കോസ് മുണ്ടാടൻ മുഖ്യ പ്രഭാഷണം നടത്തി. ബെന്നി ബെഹനാൻ എംപി, അൻവർ സാദത്ത് എംഎൽഎ, ആലുവ മുനിസിപ്പൽ ചെയർമാൻ എം.ഒ. ജോൺ, എറണാകുളം ഗ്രാൻഡ് മസ്ജിദ് ഇമാം ഫൈസൽ അസ്ഹരി, ഫാ. പോൾ നെടുഞ്ചാലിൽ, സിസ്റ്റർ നവ്യ മരിയ, സിസ്റ്റർ റോസ് അനിത എന്നിവർ സംസാരിച്ചു. ആയിരങ്ങൾ പങ്കെടുത്ത പ്രതിഷേധ റാലി മുൻ അതിരൂപത പ്രൊക്കുറേറ്റർ ഫാ. പോൾ മാടശേരി സെന്‍റ് ഡൊമിനിക് പള്ളിയങ്കണത്തിൽ ഫ്ലാഗ് ഓഫ് ചെയ്തു. ഡൊമിനിക് കാവുങ്കൽ, ജെമി കെ. അഗസ്റ്റിൻ, ബാബു കൊല്ലമാപറമ്പിൽ, ജോളി പടമാട്ടുമ്മേൽ, സജി നെറ്റിക്കാടൻ, ജോർജ് മുട്ടംതോട്ടിൽ, ബാബു കാടപ്പറമ്പിൽ, ഫാ. ജെയിംസ് തൊട്ടിയിൽ, ഫാ. ജെറിൻ കുരിശിങ്കൽ, ഫാ. നിഖിൽ മുളവരിക്കൽ, ഫാ. ജേക്കബ് കോറോത്ത്, ഫാ. സെബാസ്റ്റ്യൻ കളപ്പുരക്കൽ, ഫാ. സെബാസ്റ്റ്യൻ വടക്കുംപാടൻ, ഫാ. ജോസ് ചോലിക്കര, ഫാ. സനീഷ് കോയിക്കര, ഫാ. സാജു ചിറക്കൽ,ഫാ. സജോ പടയാട്ടിൽ,ബേസിൽ ആന്‍റണി , ടോമി വർഗീസ്, ഫാ. സജി തെക്കേകൈതക്കാട്ട്, ഫാ. പോൾ കന്നപ്പിള്ളി എന്നിവർ റാലിക്ക് നേതൃത്വം നൽകി.

തിളക്കം-2025 വിദ്യാഭ്യാസ പദ്ധതിക്കു തുടക്കം

നെടുമ്പാശേരി : നെടുമ്പാശേരി മേഖലാ മർക്കന്‍റയിൽ കോ -ഓപ്പറേറ്റീവ് സൊസൈറ്റിയുടെ നേതൃത്വത്തിൽ വിദ്യാഭ്യാസ രംഗത്ത് നടപ്പിലാക്കുന്ന തിളക്കം -2025 പദ്ധതികൾക്ക് തുടക്കമായി. മർക്കന്‍റെയിൽ കോ-ഓപ്പറേറ്റീവ് സൊസൈറ്റിയുടെ നേതൃത്വത്തിൽ സഹകരണ രംഗത്ത് നടപ്പിലാക്കിയ തിളക്കം പദ്ധതിയുടെ ഉദ്ഘാടനവും പ്രതിഭാ സംഗമവും ആലുവ സർക്കിൾ സഹകരണ യൂണിയൻ ചെയർമാൻ അഡ്വ. വി. സലിം ഉദ്ഘാടനം ചെയ്തു. സംഘം പ്രസിഡന്‍റ് സി.പി. തരിയൻ അധ്യക്ഷനായിരുന്നു. വിവിധ രംഗങ്ങളിൽ അംഗീകാരം നേടിയ വിദ്യാർഥി പ്രതിഭകളെ കേരള വ്യാപാരി വ്യവസായി ഏകോപന സമിതി ജില്ലാ ട്രഷറർ സി.എസ്. അജ്മൽ ആദരിച്ചു. കെ.ബി. സജി, ആർ. സരിത, ഷാജു സെബാസ്റ്റ്യൻ, എ.വി. രാജഗോപാൽ,ടി.എസ്. മുരളി, കെ.ജെ. ഫ്രാൻസിസ്,പി.പി. അശോക് കുമാർ,വി.എ. ഖാലിദ്, കെ.കെ. ബോബി,ബിന്നി തരിയൻ, പി.പി. ബാബുരാജ്, ഷാബു വർഗീസ്, കെ.ജെ. പോൾസൺ, എം.ജെ. പരമേശ്വരൻ നമ്പൂതിരി, ഷാജി മേത്തർ, മായ പ്രകാശൻ, ആനി റപ്പായി, അജിത സഹദേവൻ, ആനി ഫ്രാൻസിസ്, മറിയാമ്മ പൗലോസ്, പ്രിൻസി വിൻസൺ, മഞ്ജു സാബു, റാണി പോൾസൺ, മേരി പൗലോസ് തുടങ്ങിയവർ പ്രസംഗിച്ചു.

കെസിവൈഎം അംഗത്വ മാസാചരണം

ഫോർട്ടുകൊച്ചി: കെസിവൈഎം കൊച്ചി രൂപതയുടെ അംഗത്വമാസാചരണം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. സുവർണ ജൂബിലിയുടെ നിറവിലായിരിക്കുന്ന പ്രസ്ഥാനത്തിന് അദ്ദേഹം ആശംസകൾ നേർന്നു. കൊച്ചി രൂപത പ്രസിഡന്‍റ് ഡാനിയ ആന്‍റണിക്ക് അംഗത്വ ഫോം കൈമാറി. കെസിവൈഎം കൊച്ചി രൂപത ഡയറക്ടർ ഫാ. മെൽറ്റസ് ചാക്കോ കൊല്ലശേരി, പ്രഥമ പ്രസിഡന്‍റ് എം.എം. ഫ്രാൻസിസ്, രൂപത യുവജന കമ്മീഷൻ സെക്രട്ടറി കാസി പൂപ്പന, രൂപതാ ട്രഷറർ ജോർജ് ജിക്സൺ, സംസ്ഥാന സിൻഡിക്കേറ്റ് അംഗം അന്ന സിൽഫ സെബാസ്റ്റിൻ, എക്സിക്യൂട്ടീവ് അംഗം അരുൺ പീറ്റർ എന്നിവർ സന്നിഹിതരായിരുന്നു.

ആംഗ്ലോ ഇന്ത്യന്‍ ദിനാചരണം

കൊച്ചി: ആംഗ്ലോ ഇന്ത്യന്‍ എഡ്യുക്കേഷണല്‍ ആന്‍ഡ് ചാരിറ്റബിള്‍ സൊസൈറ്റിയും ഫെഡറേഷന്‍ ഓഫ് ആംഗ്ലോ ഇന്ത്യന്‍ അസോസിയേഷന്‍സ് ഇന്‍ ഇന്ത്യയും ഒരുമിച്ചുള്ള വേള്‍ഡ് ആംഗ്ലോ ഇന്ത്യന്‍ ദിനം എറണാകുളം ഇന്‍ഫന്‍റ് ജീസസ് പാരിഷ് ഹാളില്‍ സൊസൈറ്റി രക്ഷാധികാരി റവ. ഡോ. ഡഗ്ലാസ് പിന്‍ഹീറോ ഉദ്ഘാടനം ചെയ്തു. പ്രസിഡന്‍റ് ഡോ. ചാള്‍സ് ഡയസ് അധ്യക്ഷത വഹിച്ചു. സതേണ്‍ കോളജ് ഓഫ് എന്‍ജിനീയറിംഗ് മാനേജിംഗ് ഡയറക്ടര്‍ ഹെതര്‍ ലൂയിസിന് ബിസിനസ് ലീഡര്‍ഷിപ്പ് എക്‌സലന്‍സ് അവാര്‍ഡ് നല്‍കി ആദരിച്ചു. ഹോക്കി കളിക്ക് നല്‍കിയ സംഭാവനയ്ക്കായി ഗ്ലാഡിനസ് ലെവിസിന് കെവിനും എംഎ പരീക്ഷയില്‍ രണ്ടാം റാങ്ക് നേടിയ കാലിസ്‌റ്റൈന്‍ ലെവീസിനും പുരസ്‌കാരം സമ്മാനിച്ചു. അഡ്വ. മാനുവല്‍ വിവേര, ജെയിംസ് ഗന്ധര്‍, ഓബ്രി റോഡരികസ്, ബെറോ ഡികോത്തോ എന്നിവര്‍ പ്രസംഗിച്ചു.

ഡോക്ടർമാരുടെ ക്ഷാമം രോഗികളെ വലയ്ക്കുന്നു

പറവൂർ: പുത്തൻവേലിക്കര ഗവ. താലൂക്കാശുപത്രിയിൽ പനി രോഗികളുടെ എണ്ണം വർധിച്ചു. പകൽ സമയത്തേക്കാൾ രോഗം മൂർച്ചിച്ച് രാത്രിയിലാണ് രോഗികൾ കൂടുതലായി എത്തുന്നത്. വൈകുന്നേരങ്ങളിൽ എത്തുന്ന നൂറിലധികം രോഗികളെ പരിശോധിച്ച് മരുന്ന് നിശ്ചയിക്കാൻ ഒരു ഡോക്ടർ മാത്രമാണുള്ളത്. പരിശോധനയ്ക്കിടെയെത്തുന്ന അത്യാഹിതങ്ങൾ കൂടി കൈകാര്യം ചെയ്യാൻ ഡോക്ടർ എഴുന്നേറ്റ് പോകുന്നതോടെ ഡോക്ടറെ കാണാൻ ക്യൂവിൽ നിൽക്കുന്നവർ മണിക്കൂറുകളോളം നിന്ന് ക്ലേശിക്കുകയാണ്. പലരും ഡോക്ടറെ കാണാതെ മടങ്ങിപ്പോകുന്ന സ്ഥിതിയുണ്ട്. രാത്രി സമയത്ത് ആശുപത്രിയിൽ ഒരു ഡോക്ടറുടെ കൂടി സേവനം കൂടി ലഭ്യമാക്കണമെന്നാണ് രോഗികളുടെ ആവശ്യം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]