പത്തനംതിട്ട: ഒരു കിലോയിലധികം കഞ്ചാവുമായി പശ്ചിമബംഗാൾ സ്വദേശി ഉൾപ്പെടെ രണ്ടുപേരെ പോലീസ് അറസ്റ്റ് ചെയ്തു. മുർഷിദാബാദ് ലാൽഗോല രാജാരാംപുർ ചക്മാഹാറം പിന്‍റു ഷെയ്ഖിനെ (28) ഒരു കിലോഗ്രാം കഞ്ചാവുമായി ഏഴാംമൈലിലാണ് അറസ്റ്റു ചെയ്തത്.
ഏനാത്ത് പോലീസും ഡാൻസാഫ് സംഘവും ചേർന്നാണ് ഇയാളുടെ താമസ്ഥലത്തുനിന്നു കഞ്ചാവ് ഉൾപ്പെടെ പിടികൂടുകയായിരുന്നു. ജില്ലാ പോലീസ് മേധാവി സ്വപ്നിൽ മധുകർ മഹാജനു കിട്ടിയ രഹസ്യവിവരത്തിന്‍റെ അടിസ്ഥാനത്തിൽ നർകോട്ടിക് സെൽ ഡിവൈഎസ്പി കെ.എ. വിദ്യാധരന്‍റെ നിർദേശാനുസരണമായിരുന്നു പരിശോധന. റെയ്ഡിൽ എസ്ഐ അനൂപ്, ഏനാത്ത് എസ്ഐ ശ്യാമകുമാരി, സിപിഒമാരായ മനൂപ്, പുഷ്പദാസ്, ഡാൻസാഫ് ടീമിലെ സിപിഒമാരായ മിഥുൻ, ബിനു, അഖിൽ, ശ്രീരാജ് എന്നിവരും പങ്കെടുത്തു.
തിരുവല്ല പോലീസ് സ്റ്റേഷനിൽ കഴിഞ്ഞ ഫെബ്രുവരിയിൽ രജിസ്റ്റർ ചെയ്ത ഒരു കിലോ കഞ്ചാവ് പിടിച്ച കേസിലെ രണ്ടാം പ്രതി തിരുവല്ല വാലുപറമ്പിൽ ലിജോ (24) 10 ഗ്രാമോളം കഞ്ചാവുമായി പിടിയിലായി. ഡാൻസാഫ് സംഘവും തിരുവല്ല പോലീസും ചേര്‍ന്ന് തിരുവല്ല മാർത്തോമ്മ കോളജിനു സമീപത്തുനിന്നാണ് ഇയാളെ കസ്റ്റഡിയിലെടുത്തത്. ഒന്നാം പ്രതി അന്നുതന്നെ അറസ്റ്റിലായിരുന്നു.
തിരുവല്ല പോലീസ് സ്റ്റേഷനിൽ വേറെയും ക്രിമിനൽ കേസിൽ പ്രതിയാണ് ലിജോ. തിരുവല്ല എസ്ഐ നിത്യാ സത്യൻ, സിപിഒമാരായ അവിനാഷ്, വിവേക്, ഡാൻസാഫ് ടീമിലെ എസ്ഐ അനൂപ്, എഎസ്ഐ അജികുമാർ, സിപിഒമാരായ മിഥുൻ, ബിനു, അഖിൽ, ശ്രീരാജ്, സുജിത് എന്നിവരടങ്ങിയ സംഘമാണ് പ്രതിയെ പിടികൂടിയത്.