ADVERTISEMENT

ADVERTISEMENT

പുകയില വിരുദ്ധദിനാചരണം

പത്തനംതിട്ട: കേരള ശാന്തി സമിതി ജില്ലാ കമ്മിറ്റിയുടെ നേതൃത്വത്തിൽ ഇന്നു ലോക പുകയില വിരുദ്ധദിനം ആചരിക്കും. രാത്രി 8.15ന് വീഡിയോ കോൺഫറൻസിൽ ശാന്തി സമിതി സംസ്ഥാന പ്രസിഡന്‍റ് ജസ്റ്റീസ് പി.കെ. ഷംസുദീൻ ഉദ്ഘാടനം ചെയ്യും. റഷീദ് ആനപ്പാറ അധ്യക്ഷത വഹിക്കും.

ADVERTISEMENT

ഭാരതീയ നാഗരിക നിയമസംഹിതയിലും മാറ്റങ്ങൾ വേണ്ടിവരും: ആസിഫലി

പത്തനംതിട്ട: പുതുതായി നിലവിൽ വന്ന ഭാരതീയ നാഗരിക നിയമ സംഹിതയിൽ തിരുത്തൽ വരുത്തേണ്ട പല നിയമ വ്യവസ്ഥകളും ഉണ്ടെന്ന് മുൻ ഡയക്ടർ ജനറൽ ഓഫ് പ്രോസിക്യൂഷൻ ടി. ആസഫലി. ഇന്ത്യൻ ലോയേഴ്‌സ് കോൺഗ്രസ്‌ സംഘടിപ്പിച്ച പുതിയ ക്രിമിൽനൽ നിയമം സംബന്ധിച്ച സെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ക്രിമിനൽ കേസിൽ പെടുന്നവരെ കയ്യാമം വയ്ക്കാൻ പോലീസിന് അമിതാധികാരം നൽകുന്ന പുതിയ നാഗരിക് സുരക്ഷാസൻ ഹിതയിൽ വ്യവസ്ഥ ഭരണഘടന ഉറപ്പു നൽകുന്ന അന്തസോടു കൂടി ജീവിക്കുവാനുള്ള വ്യക്തിയുടെ മൗലികാവകാശത്തിന്‍റെ ലംഘനമാണ്. ആയതു നിയമപരമായും ഭരണഘടനാപരമായും നിലനില്കുന്നതല്ലെന്ന് ആസിഫലി ചൂണ്ടിക്കാട്ടി. കൊലപാതകക്കുറ്റമുൾപ്പെടെയുള്ള ഏതൊരു കുറ്റവും ചുമത്തപ്പെട്ട പിടികിട്ടാ പ്രതിയായി പ്രഖ്യാപിക്കപ്പെട്ടവരുടെ കുറ്റവിചാരണ പ്രതിയുടെ അസാന്നിധ്യത്തിൽ നടത്തി ശിക്ഷ വിധിക്കുന്ന പുതിയ ബിഎൻഎസ്എസിലെ വ്യവസ്ഥ ഭരണഘടന ഉറപ്പു നല്കുന്ന നീതിയുക്ത കുറ്റവിചാരണയെന്ന ഭരണഘടനാവകാശത്തിന്‍റെയും ലംഘനമാണ്. വാഹനമോടിച്ച് ജീവഹാനി ഉണ്ടാക്കി നിർത്താതെ വാഹനമോടിക്കുന്നവർക്ക് 10 വർഷംതടവ് വ്യവസ്ഥ ചെയ്യുന്ന ന്യായ സൻ ഹിതയിലെ വകുപ്പ്106(2) നടപ്പിലാക്കാതെ മരവിപ്പിച്ച കേന്ദ്ര സർക്കാർ നടപടി കാപട്യമാണന്നും ആയത് പുനഃപരിശോധിച്ച് ഉടൻ നടപ്പിലാക്കണമെന്നും ആസഫലി ആവശ്യപ്പെട്ടു മാത്യൂസ് ഏബ്രഹാം അധ്യക്ഷത വഹിച്ചു. കെപിസിസി ജനറൽ സെക്രട്ടറി പഴകുളം മധു, അഭിഭാഷകരായ ഏബ്രഹാം മാത്യു പനച്ചമൂട്ടിൽ, കെ. ജയവർമ, വേണു മുളക്കുഴ, ലാലു ജോൺ, വെട്ടൂർ ജ്യോതിപ്രസാദ്, എ. സുരേഷ്‌കുമാർ, സുനിൽ എസ്. ലാൽ,അനിൽ തോമസ് ജോമോൻകോശി, ജ്യോതിരാജ്, ശശി ഫിലിപ്പ്, ഏബ്രഹാം മാത്യു, അലക്സാണ്ടർ കൊയ്‌ക്കപറമ്പിൽ, പി. ഉണ്ണികൃഷ്ണൻ, ജോർജ് വറുഗീസ്, സൈമൺ ഏബ്രഹാം, ശ്യാം ടി. മാത്യു, സാബു തോമസ്, റോഷൻ നായർ എന്നിവർ പ്രസംഗിച്ചു.

സഹകരണ സ്ഥാപനങ്ങൾ വിശ്വാസ്യത നഷ്ടമാക്കി: ഡിസിസി പ്രസിഡന്‍റ്

പത്തനംതിട്ട: കേരളത്തിലെ സഹകരണ പ്രസ്ഥാനങ്ങൾ വിശ്വാസ്യതയും സല്‍പേരും നഷ്ടപ്പെടുത്തിയതായി ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. കേരള കോ-ഓപ്പറേറ്റീവ് എംപ്ലോയീസ് ഫ്രണ്ട് 37-ാമത് പത്തനംതിട്ട ജില്ലാ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഒരു കാലത്ത് നമ്മുടെ നാട്ടിലെ സാധാരണക്കാരന്‍റെ അഭയമായിരുന്ന സംഘങ്ങള്‍ സിപിഎമ്മിന്‍റെ കുല്‍സിത ശ്രമങ്ങളുടെ ഭാഗമായി പ്രതിസന്ധികളെ നേരിടുന്നതായി അദ്ദേഹം ആരോപിച്ചു. നഷ്ടപ്പെട്ട സല്‍പേര് തിരികെ പിടിക്കുവാന്‍ ജീവനക്കാരും സഹകാരികളും രംഗത്തിറങ്ങണമെന്നും സതീഷ് കൊച്ചുപറന്പിൽ ആവശ്യപ്പെട്ടു. ജില്ലാ പ്രസിഡന്‍റ് ആക്കിനാട്ട് രാജീവ് അധ്യക്ഷത വഹിച്ചു. ഡിസിസി വൈസ് പ്രസിഡന്‍റുമാരായ എ. സുരേഷ് കുമാര്‍, അനില്‍ തോമസ്, ഡിസിസി ജനറല്‍ സെക്രട്ടറിമാരായ ജി. രഘുനാഥ്, ബിജിലി ജോസഫ്, യൂണിയന്‍ സംസ്ഥാന ഭാരവാഹികളായ റെജി പി. സാം, ബി. പ്രേം കുമാർ, എസ്. അര്‍ച്ചന, ഉഷ ഗോപിനാഥ്, ഓമനക്കുട്ടന്‍ കൊല്ലം, അഖില്‍ ഓമനകുട്ടന്‍, എം.പി. രാജു, സുധീഷ് റ്റി. നായർ, അനില്‍ സാമുവേല്‍, ബി. അനില്‍കുമാര്‍, പി.എസ്. സുമേഷ്, സതീഷ് തോമസ്, മനു സാമുവല്‍ എന്നിവര്‍ പ്രസംഗിച്ചു. പുതിയ ജില്ലാ പ്രസിഡന്‍റായായി ബിജു തുമ്പമണ്ണിനെയും ജനറല്‍ സെക്രട്ടറിയായി അഖില്‍ ഓമനക്കുട്ടനെയും തെരഞ്ഞെടുത്തു.

ഭക്തിസാന്ദ്രം; ചന്ദനപ്പള്ളി ചെമ്പെടുപ്പിന് ജനസാഗരം

ചന്ദനപ്പള്ളി: ഭക്തിയുടെയും ആവേശത്തിന്‍റെയും അലകളുയർത്തി വിശ്വാസ സാഗരത്തെ സാക്ഷിയാക്കി ചന്ദനപ്പള്ളി സെന്‍റ് ജോർജ് ഓർത്തഡോക്സ് വലിയപള്ളിയിലെ ചെമ്പെടുപ്പ് സമാപിച്ചു. തിരുശേഷിപ്പ് കബറിടത്തിൽ പ്രാർഥനകൾ അർപ്പിക്കുന്നതിനും ചെമ്പിൽ അരി സമർപ്പിക്കുന്നതിനുമായി ആയിരക്കണക്കിനു വിശ്വാസികൾ ഒഴുകിയെത്തിയത് ചന്ദനപ്പള്ളിയെ ഭക്തിസാന്ദ്രമാക്കി. രാവിലെ അങ്ങാടിക്കൽ മേക്കാട്ട് കുടുംബ കാരണവർ ആദ്യം ചെമ്പിൽ അരി ഇട്ടു. തുടർന്നു വിശ്വാസികളും നേർച്ച സമർപ്പിച്ചു. പാതി വേവിച്ച ചോറ് തയ്യാറാക്കാൻ ചെമ്പിൽ ആദ്യ കുടം വെള്ളം ട്രസ്റ്റി വർഗീസ് കെ. ജയിംസ് , സെക്രട്ടറി ഷാജി തോമസ് എന്നിവർ പകർന്നു. വികാരി ഫാ. സുനിൽ ഏബ്രഹാമും സഹവികാരി ഫാ. ജോബിൻ യോഹന്നാനും അടുപ്പിൽ വിറകിടീൽ നടത്തി അഗ്നി ജ്വലിപ്പിച്ചു. മൂന്നിന്മേൽ കുർബാനയ്ക്ക് ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്കാ ബാവ മുഖ്യകാർമികത്വം വഹിച്ചു. കുര്യാക്കോസ് മാർ ക്ലീമിസ് വലിയ മെത്രാപ്പോലിത്ത, ഡോ. യൂഹാനോൻ മാർ ദിമത്രയോസ്, ഡോ. ഏബ്രഹാം മാർ സെറാഫിം എന്നിവർ സഹകാർമികത്വം വഹിച്ചു. തുടർന്നു നടന്ന തീർഥാടക സംഗമം കാതോലിക്കാ ബാവ ഉദ്ഘാടനം ചെയ്തു. ഡോ. ഏബ്രഹാം മാർ സെറാഫിം അധ്യക്ഷത വഹിച്ചു. ജീവ കാരുണ്യ പ്രവർത്തനങ്ങളുടെ ഉദ്ഘാടനം ഡെപ്യൂട്ടി സ്പീക്കർ ചിറ്റയം ഗോപകുമാർ നിർവഹിച്ചു. ചലച്ചിത്ര സംവിധായകൻ ബ്ലസിക്ക് ഓർഡർ ഓഫ് സെന്‍റ് ജോർജ് നൽകി ആദരിച്ചു.‌ വൈകുന്നേരം ദേവാലയത്തിൽ നിന്നും ചന്ദനപ്പള്ളി ജംഗ്ഷനിലേക്ക് പകൽ റാസ നടന്നു. പൊൻ വെള്ളികുരിശുകളും മുത്തുക്കുടകളും വാദ്യമേളങ്ങളും റാസക്ക് നിറപ്പകിട്ടേകി. ചന്ദനപ്പള്ളി ജംഗ്ഷനിൽ മന്ത്രി പി. പ്രസാദ് മുഖ്യസന്ദേശം നൽകി. അനിൽ പി. വർഗീസ്, ഡോ. ജോർജ് വർഗീസ് കൊപ്പാറ, ജസ്റ്റസ് നാടാവള്ളിൽ, ജേക്കബ് ജോർജ് കുറ്റിയിൽ, റോയി വർഗീസ്, ആരോൺ ജി. പ്രീത്, സെബിൻ ബാബു എന്നിവർ നേതൃത്വം നൽകി. തുടർന്നായി രുന്നു പ്രസിദ്ധമായ ചെന്പെടുപ്പ്. കുര്യൻ വർഗീസ് കോർ എപ്പിസ്കോപ്പ, ഫാ. ഇടിക്കുള്ള ഡാനിയേൽ, ഫാ. ജേക്കബ് ബേബി, ഫാ. ജേക്കബ് ഡാനിയേൽ, ഫാ. ഷൈജു ചെറിയാൻ, ഫാ. എബിൻ സജി, ഫാ. റിനിൽ പീറ്റർ എന്നിവർ ആശീർവദിച്ചു. 11 ന് കൊടിയിറക്കോടെ പെരുന്നാൾ ചടങ്ങുകൾ സമാപിക്കും.

കലഞ്ഞൂരിലെ വിവിധ വികസന പദ്ധതികളുടെ ഉദ്ഘാടനം ഇന്ന്

പത്തനംതിട്ട: കലഞ്ഞൂർ ഗ്രാമപഞ്ചായത്തിലെ വിവിധ വികസന പ്രവർത്തനങ്ങളുടെ ഉദ്ഘാടനം ഇന്നു നടക്കും. കലഞ്ഞൂർ സ്കൂൾ മൈതാനിയിൽ വൈകുന്നേരം നാലിനു ചേരുന്ന യോഗത്തിൽ മന്ത്രി കെ. എൻ. ബാലഗോപാൽ പദ്ധതികളടെ ഉദ്ഘാടനം നിർവഹിക്കും. വിവിധ മേഖലകളിലായി പൂർത്തീകരിച്ചിട്ടുള്ളതും തുടക്കം കുറിക്കുന്നതുമായ നിരവധി പദ്ധതികളുടെ ഉദ്ഘാടനവും നിർമാണോദ്ഘാടനവുമാണ് ധനമന്ത്രി നിർവഹിക്കുന്നതെന്ന് ഗ്രാമപഞ്ചായത്ത് പ്രസിഡന്‍റ് ടി.വി. പുഷ്പവല്ലി പത്രസമ്മേളനത്തിൽ പറഞ്ഞു. മൂന്ന് കോടി രൂപ അനുവദിച്ച് കലഞ്ഞൂർ മാർക്കറ്റിൽ നിർമിക്കുന്ന ഷോപ്പിംഗ് കോംപ്ലക്സ്, 4.84 കോടി രൂപ ചെലവിൽ ഉന്നത നിലവാരത്തിൽ നിർമിക്കുന്ന ഉദയ ജംഗ്ഷൻ മലനട റോഡ്, രണ്ടു കോടി രൂപ അനുവദിച്ച കലഞ്ഞൂർ സ്കൂൾ ഹയർ സെക്കൻഡറി ബ്ലോക്ക്, 50 ലക്ഷം രൂപ അനുവദിച്ചു നിർമിക്കുന്ന കലഞ്ഞൂർ സ്കൂൾ ആധുനിക സയൻസ് ലാബ്, 20 ലക്ഷം രൂപ അനുവദിച്ച് കലഞ്ഞൂർ ഗവ.എൽപിഎസിന് ക്ലാസ് മുറികൾ, എംഎൽഎ ഫണ്ടിൽ നിന്നും 45 ലക്ഷം രൂപ അനുവദിച്ച് പുനലൂർ - മൂവാറ്റുപുഴ റോഡിന് കുറുകെ നിർമിക്കുന്ന കലഞ്ഞൂർ സ്കൂൾ കാൽനട മേൽപ്പാലം, എംഎൽഎ ഫണ്ടിൽ നിന്നും 25 ലക്ഷം രൂപ അനുവദിച്ച കലഞ്ഞൂർ സ്കൂൾ ബസ് കൈമാറ്റം, 25 ലക്ഷം രൂപ അനുവദിച്ചു നിർമിക്കുന്ന മൂഴി - അമ്പോലിൽ - പുതുവൽ റോഡ്, 30 ലക്ഷം രൂപ അനുവദിച്ചു നിർമിക്കുന്ന കൊല്ലൻമുക്ക് - പറയൻകോട് - മാമ്മൂട് റോഡ്, 5.25 ലക്ഷം രൂപ അനുവദിച്ചു നർമിക്കുന്ന ഇലവന്താനംപടി- അർത്ഥനാൽ പടി റോഡ് എന്നിവയുടെ നിർമാണോദ്ഘാടനവും 40 ലക്ഷം രൂപ ചെലവഴിച്ചു നിർമാണം പൂർത്തീകരിച്ച കീച്ചേരി പാലത്തിന്‍റെ ഉദ്ഘാടനവുമാണ് പ്രധാന പരിപാടികൾ. യോഗത്തിൽ കെ. യു. ജനീഷ് കുമാർ എംഎൽഎ അധ്യക്ഷത വഹിക്കും. ആന്‍റോ ആന്‍റണി എംപി മുഖ്യാതിഥിയായിരിക്കും. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, കളക്ടർ എസ്. പ്രേംകൃഷ്ണൻ, മുൻ എംഎൽഎ രാജു ഏബ്രഹാം, പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം.പി. മണിയമ്മ തുടങ്ങിയവർ മുഖ്യപ്രഭാഷണം നടത്തും. കലഞ്ഞൂർ വില്ലേജിലെ വികസന പദ്ധതികളുടെ ഉദ്ഘാടനം മാത്രമാണ് ഇന്ന് നടക്കുകയെന്ന് പ്രസിഡന്‍റ് പറഞ്ഞു. കൂടൽ വില്ലേജ് പരിധിയിലെ വിവിധ പദ്ധതികളുടെ ഉദ്ഘാടനം പിന്നാലെ നടക്കും. വൈകുന്നേരം ആറു മുതൽ പാലാ ഫോർ യു ഇവന്‍റ് നേതൃത്വത്തിലുള്ള ഗാനമേളയും ഉണ്ടാകും. സംഘാടക സമിതി ജനറൽ കൺവീനർ എസ്. രാജേഷും പത്രസമ്മേളനത്തിൽ പങ്കെടുത്തു.

വൃക്കരോഗികൾക്ക് സഹായവുമായി വൈഎംസിഎയുടെ ഡയാലിസിസ് പദ്ധതി

പത്തനംതിട്ട: ഇന്ത്യൻ വൈഎംസിഎ വൃക്ക രോഗികൾക്ക് സഹായവുമായി സഹായതാ ഡയാലിസിസ് യോജന പദ്ധതി നടപ്പാക്കുന്നു. ഭാരതത്തിലൂടനീളമുള്ള യൂണിറ്റ് വൈഎംസിഎകളിലൂടെയാണ് പദ്ധതി നടപ്പാക്കുന്നത്. ഒരു ലക്ഷം സൗജന്യ ഡയാലിസിസ് ലക്ഷ്യമിട്ടുകൊണ്ടുള്ള പദ്ധതി കേരളത്തിലും നടപ്പിൽ വരുത്തുകയാണെന്ന് ദേശീയ ട്രഷറാർ റെജി ജോർജ് പത്രസമ്മേളനത്തിൽ പറഞ്ഞു. സാമ്പത്തികമായി ബുദ്ധിമുട്ടനുഭവിക്കുന്ന രോഗികളെ യൂണിറ്റ് വൈഎംസിഎ കണ്ടെത്തുകയും ഇങ്ങനെയുള്ള രോഗികൾ ക്ക് സൗജന്യ ഡയാലിസിസ് നൽകുവാൻ ദേശീയ കൗൺസിൽ കേരള റീജിയൻ കമ്മിറ്റിയുടെ സഹകരണത്തോടെ പദ്ധതി തയാറാക്കുകയുമാണ് ചെയ്തിരിക്കുന്നത്. കേരള റീജിയൻ ഡയാലിസിസ് സഹായ ബോർഡ് നേതൃത്വം നൽകും. ഡയാലിസിസ് സഹായത യോജന പദ്ധതിക്കായി 50 ലക്ഷം രൂപയാണ് ഇന്ത്യൻ വൈഎംസിഎ ബജറ്റിൽ വകയിരുത്തിയിരിക്കുന്നത്. പ്രാദേശികമായി യൂണിറ്റ് വൈഎംസിഎ കളിലൂടെ സമാഹരിക്കുന്ന 50 ലക്ഷം രൂപയും ചേർത്ത്‌ ഒരു കോടി രൂപയാണ് പദ്ധതിത്തുക. തെരഞ്ഞെടുക്കപ്പെട്ട ആശുപത്രികളുമായി വൈഎംസിഎ കരാറിൽ ഏർപ്പെട്ടുകൊണ്ടാണ് പദ്ധതി നടപ്പാക്കുന്നത്. പദ്ധതിയുടെ സംസ്ഥാനതല ഉദ്ഘാടനം അടൂർ വൈഎംസിഎയിൽ 11 ന് ഉച്ചകഴിഞ്ഞ് 2.30നു നടക്കും. വൈഎംസിഎ കേരളാ റീജിയൺ ചെയർമാൻ പ്രഫ. അലക്സ് തോമസ് അധ്യക്ഷത വഹിക്കും. ദേശീയ പ്രസിഡന്‍റ് വിൻസെന്‍റ്ജോർജ് പദ്ധതിയുടെ ഉദ്ഘാടനം നിർവഹിക്കും. ഡെപ്യൂട്ടി സ്പീക്കർ ചിറ്റയം ഗോപകുമാർ സമ്മേളനം ഉദ്ഘാടനം ചെയ്യും. ദേശീയ ട്രഷറാർ റെജി ജോർജ്, ദേശീയ ജനറൽ സെക്രട്ടറി എൻ. വി എൽദോ, പദ്ധതിയുടെ ദേശീയ ചെയർമാൻ സാജു ചാക്കോ, വൈ എംസി എ കേരളാ റീജിയൻ വൈസ് ചെയർമാൻമാരായ ജയൻ മാത്യു, കുര്യൻ തൂമ്പുങ്കൽ, സംസ്ഥാന ട്രഷറർ അനിൽ ജോർജ്, കേരള റീജിയൻ ഡയാലിസിസ് സഹായത ബോർഡ്‌ ചെയർമാൻ റ്റി ബിനുരാജ്, മൗണ്ട് സിയോൺ ഗ്രൂപ്പ് ചെയർമാൻ ഡോ.ഏബ്രഹാം കലമണ്ണിൽ, റീജിയണൽ സെക്രട്ടറി ഡേവിഡ് സാമുവൽ, പ്രോജക്റ്റ് കോഓർഡിനേറ്റർ സാംസൺ മാത്യു എന്നിവർ പ്രസംഗിക്കും. റീജിയൻ വൈസ് ചെയർമാൻമാരായ ജയൻ മാത്യു, കുര്യൻ തൂമ്പുങ്കൽ, റീജിയൻ അസോസിയേറ്റ് സെക്രട്ടറി സാംസൺ മാത്യു, തോമസ് മാത്യു എന്നിവരും പത്രസമ്മേളനത്തിൽ പങ്കെടുത്തു.

ചിറ്റാറിലെ വിവിധ പദ്ധതികളുടെ ഉദ്ഘാടനം ഇന്ന്

ജില്ലാ സ്പെഷാലിറ്റി ആശുപത്രിയുടെ നിർമാണവും ഉദ്ഘാടനം ചെയ്യും ചിറ്റാർ: ഗ്രാമ‌പഞ്ചായത്ത് പരിധിയിൽ സംസ്ഥാന സർക്കാർ സഹായത്തോടെ ഏറ്റെടുത്തിട്ടുള്ള വിവിധ പദ്ധതികളുടെ ഉദ്ഘാടനം ഇന്ന് നടക്കും.ചിറ്റാറിലെ നിർദിഷ്ട അമ്മയുടെ കുഞ്ഞും ജില്ലാ സ്പെഷാലിറ്റി ആശുപത്രിയുടെ നിർമാണോദ്ഘാടനവും ഇതോടൊപ്പമുണ്ടാകും. നിർദിഷ്ട സ്പെഷാലിറ്റി ആശുപത്രി പരിസരത്തു വൈകുന്നേരം ആറിനു നടക്കുന്ന യോഗത്തിൽ മന്ത്രിമാരായ കെ.എൻ. ബാലഗോപാൽ, കെ. രാജൻ, വീണാ ജോർജ്, ഒ.ആർ. കേളു, ജി.ആർ. അനിൽ തുടങ്ങിയവർ പങ്കെടുക്കും. കെ. യു. ജനീഷ് കുമാര്‍ എംഎല്‍എ അധ്യക്ഷത വഹിക്കും. ചിറ്റാര്‍ സാമൂഹികാരോഗ്യ കേന്ദ്ര ഉദ്ഘാടനവും ആധുനിക ഐസിയു ആംബുലന്‍സ് സമർപ്പണവും നീലിപിലാവ് - ചിറ്റാര്‍ റോഡ് നിര്‍മാണോദ്ഘാടനം, മണക്കയം - ചിറ്റാര്‍ ബസ്‌സ്റ്റാൻഡ് റോഡ് നിര്‍മാണോദ്ഘാടനം, കാരിക്കയം ചതുരക്കള്ളിപ്പാറ കുടിവെള്ള പദ്ധതി, പാമ്പിനി പട്ടികവര്‍ഗ ഉന്നതി, കോതയാട്ടു പാറ പട്ടികജാതി ഉന്നതി നവീകരണം, സ്വകാര്യ വ്യവസായ പാര്‍ക്ക് ഉദ്ഘാടനം, ചിറ്റാര്‍ സര്‍ക്കാര്‍ ഹയർ സെക്കൻഡറി സ്‌കൂള്‍ ഓഡിറ്റോറിയം, ആധുനിക ലാബ്, സ്‌കൂള്‍ ബസ്, ചിറ്റാര്‍ സര്‍ക്കാര്‍ എല്‍ പി സ്‌കൂള്‍ കെട്ടിട നിര്‍മാണം, ഡിജിറ്റല്‍ സര്‍വേ നടപടികളുടെ ഉദ്ഘാടനം, വയ്യാറ്റുപുഴ - പുലയന്‍പാറ റോഡ്, വാലേല്‍പ്പടി - കൊടുമുടി - പടയണിപ്പാറ റോഡ്, വിവിധ ഗ്രാമീണറോഡുകളുടെ നിര്‍മാണോദ്ഘാടനം, കാട്ടാനയെ തടയാന്‍ സോളാര്‍ വേലി എന്നിവയാണ് പദ്ധതികൾ. ആന്‍റോ ആന്‍റണി എംപി, ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, ജില്ലാ കളക്ടര്‍ എസ് പ്രേം കൃഷ്ണന്‍ തുടങ്ങിയവർ പങ്കെടുക്കും.

കുട്ടവഞ്ചി സവാരി കേന്ദ്രത്തിൽ ജീവനക്കാരെ പിരിച്ചുവിട്ടു സമരം പ്രഖ്യാപിച്ച് തൊഴിലാളികൾ

കോന്നി: ‌ അടവി കുട്ടവഞ്ചി സവാരി കേന്ദ്രത്തിലെ തൊഴിലാളികളെ മുന്നറിയിപ്പില്ലാതെ പിരിച്ചു വിട്ടു. പ്രതിഷേധിച്ച് കുട്ടവഞ്ചി സവാരി കേന്ദ്രത്തിലെ തൊഴിലാളികൾ അനിശ്ചിതകാല സമരം തുടങ്ങി. 60 വയസ് കഴിഞ്ഞവരെ പിരിച്ചുവിടുന്നതായുള്ള അറിയിപ്പ് ബുധനാഴ്ച വൈകുന്നേരമാണ് തൊഴിലാളികൾക്ക് ലഭിക്കുന്നത്. മുന്നറിയിപ്പ് ഇല്ലാതെയും യാതൊരു ആനുകൂല്യങ്ങൾ നൽകാതെയും തൊഴിലാളികളെ പിരിച്ചുവിടുന്നതിനെതിരേ സംയുക്ത തൊഴിലാളി യൂണിയൻ നേതൃത്വത്തിൽ ഇന്നലെ മുതൽ അടവിയിൽ സമരവും തുടങ്ങി. ഇക്കോ ടൂറിസം കേന്ദ്രമായ അടവിയിൽ കുട്ടവഞ്ചി തുഴച്ചിൽക്കാർ ഉൾപ്പെടെ 40 ഓളം പേരാണ് ജോലി ചെയ്യുന്നത്. ഇവരിൽ പലരും കുട്ടവഞ്ചി സവാരിയുടെ ആരംഭകാലം മുതുള്ളവരാണ്. കുട്ടവഞ്ചി സവാരിയുമായി മുൻപരിചയമുള്ളവരും പരിശീലനം സിദ്ധിച്ചവരുമാണ്. തൊഴിലാളികൾ സമരം പ്രഖ്യാപിച്ചതോടെ അടവിയിലെത്തിയ സഞ്ചാരികളും നിരശരായി. നിരവധി വിനോദ സഞ്ചാരികൾ ഇന്നലെ വാഹനങ്ങളിൽ അടവിയിൽ എത്തിയിരുന്നു. ഇവർക്ക് കുട്ടവഞ്ചി സവാരി ആസ്വദിക്കാനായില്ല. അടവി ഇക്കോ ടൂറിസം കേന്ദ്രത്തെ തകർക്കാനാണ് ഉദ്യോഗസ്ഥർ ശ്രമിക്കുന്നതെന്ന് തൊഴിലാളികൾ ആരോപിച്ചു. വിവിധ യൂണിയൻ പ്രതിനിധികളായ പ്രവീൺ പ്രസാദ്, ബിജു മാത്യു, മോഹനൻ, സന്തോഷ് , മുരളി എന്നിവർ പ്രസംഗിച്ചു.

നാലു വയസുകാരന്‍റെ ദാരുണാന്ത്യം: ഇക്കോ ടൂറിസം ജീവനക്കാരെ തിരികെയെടുത്തു

തിരികെയെടുക്കാൻ രാഷ്ട്രീയ സമ്മർദം പത്തനംതിട്ട: കോന്നി ആനത്താവളത്തിലെ ഇക്കോ ടൂറിസം കേന്ദ്രത്തിൽ സന്ദർശകനായെത്തിയ നാലു വയസുകാരൻ കോൺക്രീറ്റ് തൂണ് പിഴുതുവീണ് മരിക്കാനിടയായ സംഭവത്തിൽ സസ്പെൻഷനിലായ അഞ്ച് വനംവകുപ്പ് ജീവനക്കാരെയും തിരികെയെടുത്തു. ഇവരെ സർവീസിൽ തിരികെ എടുക്കാനുള്ള ഉത്തരവ് കഴിഞ്ഞദിവസം അഡീഷണൽ പ്രിൻസിപ്പൽ ചീഫ് ഫോറസ്റ്റ് ഓഫീസറിൽ നിന്നുണ്ടായി. ഡെപ്യൂട്ടി റേഞ്ച് ഓഫീസർ (ഗ്രേഡ്) ആർ. അനിൽ കുമാർ, ബീറ്റ് ഫോറസ്റ്റ് ഓഫീസർമാരായ എം.എസ്. സലിം, ആർ. സതീഷ്, ബി. സജിനി, സുമയ്യ ഷാജി എന്നിവരെയാണ് തിരികെയെടുത്ത് ഉത്തരവായത്. കഴിഞ്ഞ ഏപ്രിൽ 18നാണ് ഇക്കോ ടൂറിസം സെന്‍ററിൽ സന്ദർശകനായെത്തിയ കടന്പനാട് സ്വദേശി അഭിരാം (നാല്) മരിച്ചത്. ആനത്താവളം പരിസരത്തെ കോൺക്രീറ്റ് തൂണിൽ പിടിച്ച് കളിക്കുന്പോൾ ഇത് പിഴുത് കുട്ടിയുടെ ദേഹത്തേക്ക് വീഴുകയായിരുന്നു. കാലപ്പഴക്കമുള്ള തൂണ് പെയിന്‍റടിച്ച് വച്ചിരിക്കുകയായിരുന്നുവെന്ന് പ്രാഥമികാന്വേഷണത്തിൽ കണ്ടെത്തി. ഡെപ്യൂട്ടി റേഞ്ച് ഓഫീസറുൾപ്പെടെയുള്ളവരെ സസ്പെൻഡ് ചെയ്യുകയും റേഞ്ച് ഓഫീസറെ സ്ഥലംമാറ്റുകയും ചെയ്തിരുന്നു. നടപടിയിൽ വനപാലകരുടെ സംഘടന അന്നുതന്നെ പ്രതിഷേധവുമായി രംഗത്തെത്തി. നടപടി പിൻവലിക്കണമെന്നാവശ്യപ്പെട്ട് വനംമന്ത്രിക്കു പരാതിയും ലഭിച്ചു. രാഷ്ട്രീയ സമ്മർദവും ഏറിയതോടെയാണ് രണ്ടാഴ്ചയ്ക്കുള്ളിൽ തന്നെ നടപടി പിൻവലിച്ചത്. ഇക്കോ ടൂറിസം കേന്ദ്രം പരിസരത്തെ സുരക്ഷാ വീഴ്ച പ്രകടമായ സംഭവത്തിൽ ഉദ്യോഗസ്ഥരെ സംരക്ഷിക്കുന്ന സമീപനമാണ് വനംവകുപ്പ് ഉന്നതരും സ്വീകരിച്ചത്. അപകടത്തിനുശേഷം ഇവരാരും തന്നെ ആനത്താവളം സന്ദർശിച്ചില്ല. പിന്നീട് സ്ഥലം എംഎൽഎ വിളിച്ചുചേർത്ത യോഗത്തിൽ പങ്കെടുക്കാനാണ് ഉന്നത ഉദ്യോഗസ്ഥരെത്തിയത്. അച്ചടക്ക നടപടി തുടരുമെന്ന് ആനത്താവളത്തിലെ അപകടത്തേ തുടർന്ന് സസ്പെൻ‌ഷനിലായവരെ തിരിച്ചെടുത്തെങ്കിലും ഇവർക്കെതിരേയുള്ള അച്ചടക്ക നടപടി അവസാനിപ്പിച്ചിട്ടില്ലെന്നാണ് വനംവകുപ്പിന്‍റെ വിശദീകരണം. ഇക്കോ ഡവലപ്മെന്‍റ് ആൻഡ് ട്രൈബൽ വെൽഫെയർ അഡീഷണൽ പ്രിൻസിപ്പൽ ചീഫ് ഫോറസ്റ്റ് കൺസർവേറ്ററുടേതാണ് നിർദേശം. കുട്ടിയുടെ മരണത്തേ തുടർന്ന് അടച്ചിട്ട ആനത്താവളം കഴിഞ്ഞ ഒന്നു മുതൽ തുറന്നു പ്രവർത്തിച്ചു തുടങ്ങിയെങ്കിലും ജീവനക്കാരുടെ കുറവ് ദൈനംദിന പ്രവർത്തനങ്ങളെ ബാധിക്കുന്നതായും റിപ്പോർട്ടുണ്ട്. സസ്പെൻഷനിലായവരെ തിരിച്ചെുക്കാൻ ഇതും ഒരു കാരണമായി ചൂണ്ടിക്കാണിക്കപ്പെടുന്നു. വർധിച്ചുവരുന്ന വന്യജീവി സംഘർഷം നേരിടുന്നതിലും വനപാലകരുടെ കുറവുണ്ട്. സസ്പെൻഷനെതിരേ ജീവനക്കാരുടെ സംഘടന രംഗത്തുവരികയും പ്രത്യക്ഷ സമരപരിപാടികളിലേക്ക് അവർ കടക്കുകയും ചെയ്താൽ വകുപ്പിന്‍റെ ദൈനംദിന പ്രവർത്തനത്തെയും ബാധിച്ചേക്കാമെന്ന ആശങ്കയും ഉയർന്നിരുന്നു.

ബ്ലോക്ക് ലെവല്‍ ബാങ്കേഴ്‌സ് കമ്മിറ്റി

പത്തനംതിട്ട: ലീഡ് ബാങ്ക് ബ്ലോക്ക് ലെവല്‍ ബാങ്കേഴ്‌സ് കമ്മിറ്റി യോഗങ്ങൾ ഇന്ന് ആരംഭിക്കും. ബ്ലോക്ക്, തീയതി, സമയം, വേദി എന്നീ ക്രമത്തിൽ: പറക്കോട് - ഇന്ന് ഉച്ചകഴിഞ്ഞ് മൂന്നിന് അടൂര്‍ എസ്ബിഐ മെയിന്‍ ബ്രിഡ്ജ് പരിസരം, പന്തളം- ഇന്നു രാവിലെ 11ന് വയപ്പര്‍ ഭവന്‍, കുളനട. പുളിക്കീഴ്- 12ന് ഉച്ചകഴിഞ്ഞ് മൂന്നിന്, പുളിക്കീഴ് ബ്ലോക്ക് ഓഫീസ്, മല്ലപ്പള്ളി - 12നു രാവിലെ 11ന്, റോട്ടറി ക്ലബ്, മല്ലപ്പള്ളി, കോയിപ്രം - 13ന് ഉച്ചയ്ക്ക് മൂന്നിന്, ബ്ലോക്ക് കമ്യൂണിറ്റി ഹാൾ, പുല്ലാട്, ഇലന്തൂർ- 15നു രാവിലെ 11ന്, വയപ്പാര്‍ ഭവന്‍, കോഴഞ്ചേരി, റാന്നി - 13നു രാവിലെ 11നും കോന്നിയില്‍ 15ന് ഉച്ചകഴിഞ്ഞ് മൂന്നിനും യോഗങ്ങൾ ചേരും.

ഐക്യദാർഢ്യം പ്രഖ്യാപിച്ചു

ആറന്മുള: ജമ്മു കാശ്മീരില്‍ പാകിസ്ഥാന്‍ നടത്തിയ ഭീകര ആക്രമണത്തിന് തിരിച്ചടി നല്‍കിയ ഇന്ത്യന്‍ സൈനികര്‍ക്ക് കേരള കോണ്‍ഗ്രസ് - ബി ഐക്യദാര്‍ഢ്യം അര്‍പ്പിച്ചു. ആറന്മുള വീരജവാന്‍ സ്മാരകത്തിന് മുമ്പില്‍ ചേര്‍ന്ന യോഗം ജില്ലാ പ്രസിഡന്‍റ് മനോജ് മാധവശേരില്‍ ഉദ്ഘാടനം ചെയ്തു. പി.സി. സ്‌കറിയ അധ്യക്ഷത വഹിച്ച യോഗത്തില്‍ സത്യന്‍ കണ്ണങ്കര, മുരളീധരന്‍ നായര്‍ കല്ലൂപ്പാറ, ശ്രീകുമാര്‍ ആലക്കാട്ടില്‍, സുരേഷ് ബാബു ആറന്മുള, രാജഭാസ് മണിയാറ്റ്, സുലോചനന്‍ കിടങ്ങിൽ, സാംകുട്ടി പാലക്കാമണ്ണില്‍ തുടങ്ങിയവർ പ്രസംഗിച്ചു.

റെഡ്ക്രോസ്ദിനം ആചരിച്ചു

പത്തനംതിട്ട: അന്തർദേശീയ റെഡ് ക്രോസ് ദിനം പത്തനംതിട്ട ജില്ലാ കമ്മിറ്റിയുടെ നേതൃത്വത്തിൽ അടൂരിൽ വിപുലമായ പരിപാടികളോടെ ആചരിച്ചു. പൊതുസമ്മേളനം സംസ്ഥാന കമ്മിറ്റി അംഗം സുനിൽ മാത്യു വള്ളക്കാലിൽ ഉദ്ഘാടനം ചെയ്തു. ചെയർപേഴ്സൺ വത്സമ്മ സുകുമാരൻ അധ്യക്ഷത വഹിച്ചു. കേന്ദ്രസർക്കാരിന്‍റെ ക്ഷയരോഗ നിർമാർജന പദ്ധതിയുടെ ഭാഗമായി രോഗികൾക്ക് റെഡ് ക്രോസ് സൊസൈറ്റി നൽകുന്ന പോഷകാഹാര കിറ്റുകൾ നോഡൽ ഓഫീസർ ഡോ. നിരൺ ബാബു ഏറ്റുവാങ്ങി. വിവിധ സ്കൂളുകളിൽ നിന്നുള്ള ജെആർസി കേഡറ്റുകൾ , ജില്ലയിലെ ഹോം നേഴ്സുമാർ , റെഡ്ക്രോസ് അംഗങ്ങൾ എന്നിവരെ പങ്കെടുപ്പിച്ച് പ്രഥമ ശുശ്രൂഷ, മോക്ഡ്രിൽ സംബന്ധിച്ച ക്ലാസ് നടന്നു. ഡോ. റോജി പി. ഉമ്മൻ ക്ലാസ് നയിച്ചു. റെഡ് ക്രോസ് സൊസൈറ്റി ജില്ലയിൽ നടത്തുന്ന പദ്ധതികളെ സംബന്ധിച്ചു ജില്ലാ സെക്രട്ടറി പി. കെ. ജോസഫ് വിശദീകരിച്ചു. സമ്മേളനത്തിൽ ട്രഷറർ വർഗീസ് മാത്യു, താലൂക്ക് കോഓർഡിനേറ്റർമാരായ ഏഴംകുളം അജു, എസ്. വി. പ്രസന്നകുമാർ, സണ്ണി മാത്യു, ജെആർസി കൺവീനർ പീ. ശ്രീജ, വർഗീസ് പി. മാത്യു , മുരളീധരൻ ആചാരി, ഗോപകുമാർ തുടങ്ങിയവർ പ്രസംഗിച്ചു.

അപകടത്തിൽ മരിച്ചയാളെ പ്രതിയാക്കിയ കുറ്റപത്രം കോടതി തള്ളി : വാഹനാപകട നഷ്ടപരിഹാര കേസിൽ വിധിയായത് 3.68 കോടി

പത്തനംതിട്ട: കെഎസ്ആർടിസി സൂപ്പർ ഫാസ്റ്റ് ബസ് ദന്പതികൾ സഞ്ചരിച്ച കാറിലിടിച്ചുണ്ടായ അപകടത്തിൽ ഭർത്താവ് മരിക്കുകയും ഭാര്യയ്ക്കു ഗുരുതരമായി പരിക്കേൽക്കുകയും ചെയ്ത സംഭവത്തിൽ 3.68 കോടി രൂപ നഷ്ടപരിഹാരം അനുവദിച്ച് ഹൈക്കോടതി ഉത്തരവ്. നേരത്തേ വാഹനാപകട നഷ്ടപരിഹാര ട്രിബ്യൂണൽ പുറപ്പെടുവിച്ച വിധി അംഗീകരിച്ച ഹൈക്കോടതി പോലീസ് തയാറാക്കിയ കുറ്റപത്രം തള്ളിക്കളയുകയും ചെയ്തു. 2016 മാർച്ച് 27നു രാവിലെ 9.20നു എംസി റോഡിൽ പന്തളം ചിത്ര ആശുപത്രിക്കു സമീപം കെഎസ്ആർടിസിയുടെ നെടുമങ്ങാട് - പാലക്കാട് സൂപ്പർഫാസ്റ്റ് ബസ് കാറിൽ ഇടിച്ചുണ്ടായ അപകടത്തിൽ ചെങ്ങന്നൂർ പെണ്ണുക്കര മണ്ണിൽ പ്രദീപ് (41) മരിക്കുകയും ഭാര്യ സോണി പ്രദീപിന് (34) ഗുരുതരമായി പരിക്കേൽക്കുകയും ചെയ്തിരുന്നു. എതിർദിശയിൽ വന്ന കാറിൽ അമിതവേഗത്തിലെത്തിയ കെഎസ്ആർടിസി ബസ് ഇടിച്ചാണ് അപകടമുണ്ടായത്. അപകടത്തേ തുടർന്ന് പന്തളം പോലീസ് തയാറാക്കിയ എഫ്ഐആറിൽ കെഎസ്ആർടിസി ഡ്രൈവറെ ഒന്നാം പ്രതിയും മരിച്ച പ്രദീപിനെ രണ്ടാംപ്രതിയുമാക്കിയാണ് കേസെടുത്തത്. വാഹനം ഇടിച്ചു മരിച്ചാൽ ചേർക്കേണ്ട വകുപ്പുകൾ ഒഴിവാക്കുകയും ചെയ്തു. ബസിലെ യാത്രക്കാരിലൊരാളും നെടുമങ്ങാട് സ്റ്റേഷൻ മാനേജരും വിചാരണ വേളയിൽ നൽകിയ മൊഴികൾ നിർണായകമായ വഴിത്തിരിവായി മാറുകയും ബസിന്‍റെ അമിത വേഗവും ഡ്രൈവറുടെ അശ്രദ്ധയുമാണ് അപകടകാരണമെന്ന നിഗമനത്തിലേക്ക് കോടതി എത്തുകയും ചെയ്തു. മരിച്ച പ്രദീപിനെ കുറ്റക്കാരനാക്കിയാണ് കെഎസ്ആർടിസിയും ഇൻഷ്വറൻസ് കന്പനിയും വാദം നടത്തിയത്. എന്നാൽ പോലീസ് സമർപ്പിച്ച കുറ്റപത്രം തള്ളിയ കോടതി കെഎസ്ആർടിസിയും ഇൻഷ്വറൻസ് കന്പനിയും നഷ്ടപരിഹാരം നൽകണമെന്നു വിധിക്കുകയായിരുന്നു. ട്രിബ്യൂണൽ അനുവദിച്ച നഷ്ടപരിഹാരത്തുക വർധിപ്പിക്കാനായി ഹൈക്കോടതിയെ പ്രദീപിന്‍റെ കുടുംബം സമീപിച്ചപ്പോൾ തന്നെ ഇൻഷ്വറൻസ് കന്പനി വിധിക്കെതിരേ അപ്പീലും നൽകി. ഇരുവിഭാഗത്തിന്‍റെയും വാദങ്ങൾ കേട്ട ഹൈക്കോടതി അധിക തുക നഷ്ടപരിഹാരമായി നൽകാൻ ഉത്തരവിടുകയായിരുന്നു. വിചാരണക്കോടതി ഭാര്യ സോണിക്കുണ്ടായ പരിക്കുമായി ബന്ധപ്പെട്ട് അനുവദിച്ച നഷ്ടപരിഹാരം അപര്യാപ്തമാണെന്നും ഹൈക്കോടതി കണ്ടെത്തി. അപകടത്തിൽ ഗുരുതരമായി പരിക്കേൽക്കുകയും ജീവിതകാലം മുഴുവൻ രണ്ട് ശുശ്രൂഷകരുടെ ആവശ്യം ഇവർക്കുണ്ടാകുകയും ചെയ്തിരിക്കുന്ന സാഹചര്യത്തിൽ ട്രിബ്യൂണൽ അനുവദിച്ച തുക അപര്യാപ്തമാണെന്ന നിഗമനത്തിൽ ശുശ്രൂഷകൾക്കായി അനുവദിച്ച തുക ഉൾപ്പെടെ 74.50 ലക്ഷം രൂപ അനുവദിച്ചു. ഇരു കോടതികളും കൂടി അനുവദിച്ച നഷ്ടപരിഹാരം പ്രദീപ് മരിച്ച കേസിൽ 1,21,81,665 രൂപയും ഭാര്യ സോണി പ്രദീപിനുണ്ടായ പരിക്കുമായി ബന്ധപ്പെട്ട് 2,36,92,307 രൂപയും കെട്ടിവയ്ക്കാനാണ് ഇൻഷ്വറൻസ് കന്പനിക്കു നൽകിയിരിക്കുന്ന ഉത്തരവ്. ഹർജിക്കാർക്കുവേണ്ടി അഭിഭാഷകരായ മാത്യു ജോർജ്, എ.എൻ. സന്തോഷ് എന്നിവർ ഹാജരായി.

തുന്നിക്കെട്ടിയ മുറിവിൽ ഉറുമ്പ്; റിപ്പോർട്ട് തേടി ആരോഗ്യ വകുപ്പ് ഡയറക്ടർ

പത്തനംതിട്ട: റാന്നി താലൂക്ക് ആശുപത്രിയിൽ രോഗിയുടെ മുറിവിനുള്ളിൽ ഉറുമ്പിനെ കണ്ടെത്തിയെന്ന പരാതിയിൽ ആരോഗ്യ വകുപ്പ് ഡയറക്ടർ റിപ്പോർട്ട് തേടി. സംഭവത്തിൽ അന്വേഷണം നടത്തി റിപ്പോർട്ട് സമർപ്പിക്കുവാൻ പത്തനംതിട്ട ജില്ലാ മെഡിക്കൽ ഓഫീസറെ ചുമതലപ്പെടുത്തി. റാന്നി ബ്ലോക്ക്പടി സ്വദേശി സുനിൽ ഏബ്രഹാമിന്‍റെ മുറിവിലാണ് ഉറുന്പിനെ കണ്ടത്. കഴിഞ്ഞ മാർച്ച് അവസാനമായിരുന്നു സംഭവം. രക്തസമ്മർദ്ദം കുറഞ്ഞതിനേ തുടർന്ന് വീണു നെറ്റിയിൽ പരിക്കേറ്റാണ് സുനിൽ മാർച്ച് 31നു രാത്രി ഏഴോടെ താലൂക്ക് ആശുപത്രിയിലെത്തിയത് . മുറിവിൽ അഞ്ച് തുന്നലുകൾ ഇട്ട ശേഷം സിടി സ്കാനെടുക്കുവാൻ റാന്നി താലൂക്ക് ആശുപത്രിയിൽ നിന്ന് രോഗിയെ പത്തനംതിട്ട ജനറൽ ആശുപത്രിയിലേക്ക് അയച്ചിരുന്നു. യാത്രയ്ക്കിടെ തുന്നലിട്ട ഭാഗത്ത് അസഹനീയമായ വേദന അനുഭവപ്പെട്ടു. തുടർന്ന് സ്കാനിംഗിൽ ഉറുമ്പുകളെ കണ്ടെത്തി. ജനറൽ ആശുപത്രിയിലെ ഡോക്ടർമാർ തുന്നൽ ഇളക്കി ഉറുമ്പുകളെ നീക്കിയ ശേഷം വീണ്ടും മുറിവ് തുന്നിക്കെട്ടുകയായിരുന്നു. റാന്നി താലൂക്ക് ആശുപത്രി അധികൃതർ സംഭവം നിഷേധിച്ചതോടെ വിഷയം വിവാദമായി. ഇതേ തുടർന്ന് ഹൈക്കോടതി അഭിഭാഷകനും പൊതു പ്രവർത്തകനുമായ കുളത്തൂർ ജയ്‌സിംഗ് വിഷയത്തിൽ ഇടപെട്ട് റാന്നി താലൂക്ക് ആശുപത്രി അധികൃതർക്ക് എതിരേ ആരോഗ്യ വകുപ്പ് ഡയറക്ടർക്ക് പരാതി നൽകിയിരുന്നു. ഇതിൽ അന്വേഷണം നടത്തി റിപ്പോർട്ട് സമർപ്പിക്കുവാനാണ് ആരോഗ്യ വകുപ്പ് ഡയറക്ടർ നിർദ്ദേശിച്ചിരിക്കുന്നത്.

ഇരുന്പുതോട്ടി വൈദ്യുത ലൈനിൽ തട്ടി ഷോക്കേറ്റ് യുവാവ് മരിച്ചു

റാന്നി: ഇരുമ്പു തോട്ടി ഉപയോഗിച്ച് മാങ്ങ പറിക്കുന്നതിനിടയിൽ 11 കെവി വൈദ്യുത ലൈനിൽ നിന്നു ഷോക്കേറ്റ് യുവാവു മരിച്ചു. വെച്ചൂച്ചിറ മണ്ണടി ശാല പാറയ്ക്കൽ മോഹനന്‍റെ മകൻ അഭിജിത്താണ് (28) മരിച്ചത്. ബുധനാഴ്ച രാത്രി പത്തോടെയാണ് സംഭവം. മണ്ണടിശാലയിലെ കടമുറിയുടെ മുകളിൽ കയറി മാങ്ങ പറിക്കുന്നതിനിടയിൽ തോട്ടി വഴുതി സമീപത്തുകൂടി പോകുന്ന 11 കെവി ലൈനിലേക്ക് വീഴുകയായിരുന്നു. നാട്ടുകാർ ഉടനെ സ്വകാര്യ ആശുപത്രിയിലെത്തിച്ചെങ്കിലും മരണം സംഭവിച്ചു സംസ്കാരം ഇന്ന് 12 ന് വീട്ടുവളപ്പിൽ. മാതാവ്: ലീലാമ്മ. സഹോദരങ്ങൾ: അജിത്, അനുജിത്ത്.

സർപ്പക്കാവ് നശിപ്പിച്ചതായി പരാതി

പത്തനംതിട്ട: പെരുനാട് കുറുങ്ങാലില്‍ ശ്രീ മഹാദേവ, ഭഗവതി, ശാസ്താ ക്ഷേത്രത്തിന്‍റെ ഭാഗമായ രണ്ട് ഏക്കര്‍ വരുന്ന സര്‍പ്പക്കാവ് കൈയേറി തീയിട്ടു നശിപ്പിച്ചതായി ക്ഷേത്ര ഭാരവാഹികള്‍ പത്രസമ്മേളനത്തില്‍ പറഞ്ഞു. എവിടി കമ്പനി മാനേജറുടെ കാവ് നശിപ്പിച്ചതെന്നും ഇവർ ആരോപിച്ചു. ഇത് സംബന്ധിച്ച് പരാതി നല്‍കിയിട്ടും കേസെടുക്കാന്‍ പോലീസ് തയാറായിട്ടില്ലെന്ന് ക്ഷേത്ര ഭരണസമിതി പ്രസിഡന്‍റ് ശശീന്ദ്രന്‍, രക്ഷാധികാരി എന്‍.ശശി, ഖജാന്‍ജി വിദ്യാധരന്‍ എന്നിവര്‍ പറഞ്ഞു.

വധശ്രമക്കേസ്: നഗരസഭാ ചെയർമാനെ പ്രതിയാക്കി എഫ്ഐആർ; പോലീസിനെതിരേ സിപിഎം

പത്തനംതിട്ട: മുന്‍ ബ്രാഞ്ച് സെക്രട്ടറിയെ വെട്ടിയ കേസില്‍ പത്തനംതിട്ട നഗരസഭാ ചെയര്‍മാനടക്കം ഏഴു പേരെ പ്രതികളാക്കി കേസെടുത്ത പോലീസ് നടപടിയിൽ കടുത്ത അമർഷവുമായി സിപിഎം. കഴിഞ്ഞയിടെ സിപിഎം വിട്ടു സിപിഐയില്‍ ചേര്‍ന്ന കൊടുന്തറ സ്വദേശി റോബിന്‍ വിളവിനാലിനാണ് കഴിഞ്ഞദിവസം രാത്രി വെട്ടേറ്റത്. വീടിനടുത്ത കടയുടെ സമീപത്ത് നില്‍ക്കുകയായിരുന്ന റോബിനെ മങ്കിക്യാപ് ധരിച്ച് ഹിറോ ഹോണ്ട പാഷന്‍ ബൈക്കില്‍ വന്ന മൂന്നംഗ സംഘമാണ് ആക്രമിച്ചെന്നാണ് പരാതി. തൊട്ടടുത്ത് ബൈക്ക് വന്നു നിന്നപ്പോള്‍ പന്തികേട് തോന്നിയ റോബിന്‍ ഓടിരക്ഷപ്പെടാന്‍ ശ്രമിച്ചുവെന്നും പിന്തുടര്‍ന്നെത്തിയ സംഘം തലയ്ക്കടിച്ച് വീഴ്ത്തിയ ശേഷം വെട്ടുകയായിരുന്നുവെന്നുമാണ് ആക്ഷേപം. ഒഴിഞ്ഞു മാറിയപ്പോള്‍ ആ വെട്ട് താടിക്കാണ് കൊണ്ടത്. നഗരസഭ ചെയര്‍മാന്‍ സക്കീര്‍ഹുസൈനെതിരേ പോസ്റ്റ് ഇടുമല്ലേടാ എന്നായിരുന്നു അക്രമികള്‍ ചോദിച്ചതെന്ന് റോബിന്‍ പറയുന്നു. റോബിന്‍റെ മൊഴിപ്രകാരം നഗരസഭ ചെയര്‍മാന്‍ സക്കീര്‍ഹുസൈൻ, കൗണ്‍സിലര്‍ ആര്‍. സാബു, സിപിഎം പ്രാദേശിക നേതാക്കളായ നവീന്‍ വിജയൻ, അജിന്‍, കണ്ടാലറിയാവുന്ന മൂന്നു പേര്‍ എന്നിവരെ പ്രതികളാക്കിയാണ് പത്തനംതിട്ട പോലീസ് എഫ്‌ഐആര്‍ രജിസ്റ്റര്‍ ചെയ്തത്. ചെയര്‍മാനും കൗണ്‍സിലര്‍മാരും ആക്രമണത്തില്‍ നേരിട്ട് ബന്ധപ്പെട്ടില്ലെങ്കിലും ഗൂഢാലോചനയില്‍ പങ്കാളികളാണെന്നാണ് റോബിന്‍റെ ആരോപണം. നരഹത്യാശ്രമം അടക്കമുള്ള വകുപ്പുകള്‍ ചുമത്തിയിട്ടുണ്ട്. റോബിന്‍ ജനറല്‍ ആശുപത്രിയില്‍ ചികിത്സയിലാണ്. കഴിഞ്ഞയിടെ മന്ത്രി വീണാ ജോര്‍ജിനെതിരേ എസ്ഡിപിഐ നേതൃത്വത്തില്‍പത്തനംതിട്ടയില്‍ സമരം നടന്നിരുന്നു. ഇതിനു പിന്നില്‍ നഗരസഭ ചെയര്‍മാന്‍ സക്കീര്‍ ഹുസൈനാണെന്ന് റോബിന്‍ ഫേസ്ബുക്ക് പോസ്റ്റിട്ടിരുന്നു. ഇതിന്‍റെ വിരോധമാണ് ആക്രമണത്തിന് കാരണമെന്ന് റോബിന്‍ പറഞ്ഞു. എന്നാൽ തനിക്കെതിരേയുള്ള കേസ് എന്തടിസ്ഥാനത്തിലാണെന്നും മനസിലാകുന്നില്ലെന്ന് സക്കീർ ഹുസൈൻ പറഞ്ഞു. പ്രാഥമികാന്വേഷണം പോലും നടത്താതെ ഒരാൾക്കെതിരേ എഫ്ഐആറിടുന്ന പോലീസ് നടപടി നീതിന്യായ വ്യവസ്ഥയോടുള്ള വെല്ലുവിളിയാണ്. പൊതുപ്രവർത്തകരെ മനഃപൂർവം ആക്ഷേപിക്കാനുള്ള ഗൂഢലക്ഷ്യമാണ് ഇതിനു പിന്നിലെന്നും അദ്ദേഹംപറഞ്ഞു. പോലീസ് നടപടിയിൽ സിപിഎം നേതാക്കളും കടുത്ത അതൃപ്തിയിലാണ്.

ഡിസിസി ഓഫീസിൽ പാന്പിൻ കുഞ്ഞുങ്ങൾ

പത്തനംതിട്ട: ഡിസിസി ഓഫീസിന്‍റെ താഴത്തെ നിലയിലെ ഹാളിൽ പെരുന്പാന്പിന്‍റെ കുഞ്ഞുങ്ങളെ കണ്ടെത്തി. ഇന്നലെ ഉച്ചകഴിഞ്ഞ് കർഷക കോൺഗ്രസ് യോഗം നടക്കുന്നതിനിടെയാണ് പാന്പിൻ കുഞ്ഞുങ്ങളെ കണ്ടത്. യോഗം കഴിഞ്ഞ ഉടൻ വനപാലകരെ വിളിച്ചുവരുത്തി ഇവയെ പിടികൂടുകയായിരുന്നു. ഇരുന്പുവലകൾക്കുള്ളിലൂടെ അകത്തുകടന്ന പാന്പുകൾ മുകൾ ഭാഗത്തായി തങ്ങുകയായിരുന്നു. കോന്നിയിൽ നിന്നും എത്തിയ വനപാലക സംഘം ഇവയെ പിടികൂടി. ഒരാഴ്ച മുന്പാണ് ഡിസിസി ഓഫീസ് നവീകരിച്ച് ഉദ്ഘാടനം ചെയ്തത്. ഓഫീസും പ്രധാന കോൺഫറൻസ് ഹാളും നവീകരിച്ച് ഉദ്ഘാടനം ചെയ്തപ്പോഴും താഴത്തെ നിലയിലെ ഹാൾ ശ്രദ്ധിച്ചിരുന്നില്ല. ഇതിനു പിന്നിലായി കാട് വളർന്നു നിൽക്കുകയാണ്. കുഞ്ഞുങ്ങളെ കണ്ട സാഹചര്യത്തിൽ പെരുന്പാനപ് സമീപ പ്രദേശത്തു കാണുമെന്ന നിഗമനത്തിലാണ് വനപാലകർ.

വയോധികയുടെ മാല മുറിച്ചെടുത്ത കേസില്‍ മുഖ്യപ്രതി പിടിയില്‍

കോഴഞ്ചേരി: വയോധികയുടെ കഴുത്തിലെ മാല കട്ടര്‍ ഉപയോഗിച്ച് മുറിച്ചെടുക്കുകയും, തടയാന്‍ ശ്രമിച്ചപ്പോള്‍ വസ്ത്രം വലിച്ചുകീറി അപമാനിക്കുകയും ചെയ്ത കേസില്‍ മുഖ്യപ്രതി അറസ്റ്റിൽ. കൊല്ലം പട്ടാഴി കന്നിമേല്‍ പന്തപ്ലാവ് ചിത്രാലയം വീട്ടില്‍ എസ്. ശരതാണ് (33) കോയിപ്രം പോലീസിന്‍റെ പിടിയിലായത്. ജില്ല പോലീസ് സൈബര്‍ സെല്ലിന്‍റെ സഹായത്തോടെ കുളക്കട തുരുത്തിയമ്പലത്തിലെ ബന്ധുവീട്ടില്‍ നിന്നുമാണ് ശരത്തിനെ പിടികൂടിയത്. പ്രതിയില്‍ നിന്നും 1,70,000 രൂപ വിലവരുന്ന മാല കണ്ടെടുത്തു. സംഭവത്തില്‍ ഉള്‍പ്പെട്ട രണ്ടാം പ്രതി പട്ടാഴി പന്തപ്ലാവ് ശംഭു ഭവനത്തില്‍ ആദര്‍ശ് രവീന്ദ്രൻ(26) നെ നേരത്തെ അറസ്റ്റ് ചെയ്തിരുന്നു. ഇടപ്പാവൂര്‍ ക്ഷേത്രത്തിന് സമീപമുള്ള ഇടവഴിയില്‍ കൂടി നടന്ന് പോയ ഇടപ്പാവൂര്‍ സ്വദേശിനിയായ 63 കാരിയുടെ സ്വര്‍ണമാലയാണ് സ്‌കൂട്ടറിലെത്തിയ മോഷ്ടാക്കള്‍ കവര്‍ന്നെടുത്തത്. സ്ഥലത്തെ ഒരു വീട് അന്വേഷിക്കാനെന്ന വ്യാജേന ഇവരെ സമീപിച്ച പ്രതികളില്‍ സ്‌കൂട്ടറിനു പിന്നില്‍ ഇരുന്നു യാത്ര ചെയ്ത ശരതാണ് ആക്രമിച്ചത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു. കോയിപ്രം ഇന്‍സ്പെക്ടര്‍ ജി. സുരേഷ് കുമാറിന്‍റെ നേതൃത്വത്തില്‍ എസ്ഐ ഷൈജു, എസ് സിപിഒമാരായ നെബു, ഷെബാന, സിപിഒമാരായ അനന്തു സാബു, വിഷ്ണു, അരുണ്‍കുമാര്‍, അക്ഷയ് എന്നിവരാണ് പോലീസ് സംഘത്തില്‍ ഉണ്ടായിരുന്നത്.

ഫ്രാൻസിസ് മാർപാപ്പ ലോക സമാധാനത്തിന്‍റെ സന്ദേശവാഹകൻ: മുല്ലക്കര രത്നാകരൻ

പത്തനംതിട്ട: മതത്തിന്‍റെ അതിർ വരമ്പുകൾക്കപ്പുറം ലോകത്തിലെ എല്ലാവിഭാഗം ജനങ്ങളെയും ചേർത്തുനിർത്തിയ മാനവികതയുടെയും സമാധാനത്തിന്‍റെയും സന്ദേശവാഹകനായിരുന്നു ഫ്രാൻസിസ് മാർപാപ്പയെന്ന് മുൻമന്ത്രി മുല്ലക്കര രത്നാകരൻ. ഇന്ത്യൻ സോസൈറ്റി ഫോർ കൾച്ചർ കോ ഓപ്പറേഷൻ ആൻഡ് ഫ്രണ്ട്ഷിപ്പ് (ഇസ്കഫ് )പത്തനംതിട്ട ജില്ലാ കമ്മിറ്റി സംഘടിപ്പി മാർപാപ്പ അനുസ്മരണ സമ്മേളനത്തിൽ മുഖ്യസന്ദേശം നൽകുകയായിരുന്നു അദ്ദേഹം. ജില്ലാ പ്രസിഡന്‍റ് ശ്യാം റ്റി. മാത്യുവിന്‍റെ അധ്യക്ഷതയിൽ മലങ്കര കത്തോലിക്കാ സഭ പത്തനംതിട്ട രൂപതാധ്യക്ഷൻ ഡോ. സാമുവേൽ മാർ ഐറേനിയസ്, ഓർത്തഡോക്സ് സഭ തുമ്പമൺ ഭദ്രാസനാധിപൻ ഡോ. ഏബ്രഹാം മാർ സെറാഫിം, സംസ്ഥാന ലൈബ്രറി കൗൺസിൽ വൈസ് പ്രസിഡന്‍റ് എ. പി. ജയൻ, നഗരസഭ ചെയർമാൻ ടി. സക്കീർ ഹുസൈൻ, രേഖ അനിൽ, വി. കെ. പുരുഷോത്തമൻ പിള്ള, കെ. എൻ. സത്യാനന്ദ പണിക്കർ, ജോസ് തയ്യിൽ, എ. ജയകുമാർ, സിജു സാമൂവേൽ എന്നിവർ പ്രസംഗിച്ചു.

ഫിലിപ്പോസ് മാർ ക്രിസോസ്റ്റം അനുസ്മരണം നടത്തി

തിരുവല്ല: സമന്വയ മത സൗഹൃദ വേദിയുടെ ആഭിമുഖ്യത്തിൽ ഫിലിപ്പോസ് മാർ ക്രിസോസ്റ്റം വലിയ മെത്രാപ്പോലീത്തയുടെ നാലാമത് ചരമവാർഷികവും, അനുസ്മരണ യോഗവും നടത്തി. അനുസ്മരണ യോഗം ഡോ.ഗീവറുഗീസ് മാർ കൂറിലോസ് ഉദ്ഘാടനം ചെയ്തു. യോഗത്തിൽ ആർ.ജയകുമാർ അധ്യക്ഷത വഹിച്ചു.ഫാ.ഡോ.ഏബ്രഹാം മുളമൂട്ടിൽ, പി.എം.അനീർ, വർഗീസ് മാമ്മൻ, എം.സലീം, വിനോദ് തിരുമൂലപുരം, മാത്യൂസ് ജേക്കബ്‌, കെ.പ്രകാശ് ബാബു, ഷാജി തിരുവല്ല ,ഷെൽട്ടൺ വി റാഫേൽ എന്നിവർ പ്രസംഗിച്ചു.

അടൂർ പ്രകാശിന്‍റെ കൺവീനർ സ്ഥാനം: ജില്ലയ്ക്ക് അഭിമാനം

പത്തനംതിട്ട: അടൂർ പ്രകാശ് എംപിക്കു ലഭിച്ച യുഡിഎഫ് കൺവീനർ സ്ഥാനം പത്തനംതിട്ട ജില്ലയ്ക്ക് അഭിമാനമായി. ജില്ലയിൽ നിന്നൊരാൾ യുഡിഎഫ് സംസ്ഥാന നേതൃരംഗത്ത് എത്തപ്പെടുന്നത് ഇതാദ്യമായാണ്. ആന്‍റോ ആന്‍റണി എംപിക്ക് കെപിസിസി അധ്യക്ഷ സ്ഥാനം അവസാന നിമിഷം ലഭ്യമാകാതെ പോയെങ്കിലും അടൂർ പ്രകാശ് യുഡിഎഫ് കൺവീനർ സ്ഥാനത്തെത്തിയത് പത്തനംതിട്ടയ്ക്ക് നേട്ടമായി. വിദ്യാർഥി, യുവജന രാഷ്ട്രീയത്തിലൂടെ പൊതുരംഗത്തെത്തിയ അടൂർ പ്രകാശ് യൂത്ത് കോൺഗ്രസിന്‍റെ പത്തനംതിട്ട ജില്ലയുടെ പ്രഥമ അധ്യക്ഷനാണ്. അടൂർ ബാറിൽ അഭിഭാഷകനായിരുന്ന പ്രകാശ് കോന്നി നിയമസഭ മണ്ഡലത്തിൽ 1996ൽ സീറ്റ് ലഭിച്ചതോടെ കോൺഗ്രസ് രാഷ്ട്രീയത്തിൽ സംഘടനാ രംഗത്തും ഭരണമേഖലയിലും പടവുകൾ ചവിട്ടിക്കയറി. നിലവിൽ ആറ്റിങ്ങൽ എംപി കൂടിയായ അദ്ദേഹം 1996 മുതൽ 2019 വരെ കോന്നി എംഎൽഎ ആയിരുന്നു. ഇക്കാലയളവിൽ ഉമ്മൻ ചാണ്ടിയുടെ രണ്ട് മന്ത്രിസഭകളിലായി ഭക്ഷ്യ, സിവിൽ സപ്ലൈസ്, ആരോഗ്യം, റവന്യൂ വകുപ്പുകളുടെ മന്ത്രിയായി. പത്തനംതിട്ട ഡിസിസി വൈസ് പ്രസിഡന്‍റ്, കെപിസിസി സെക്രട്ടറി സ്ഥാനങ്ങളും സംഘടനാ തലത്തിൽ വഹിച്ചു. മികച്ച സംഘാടകൻ എന്ന നിലയിൽ അടൂർ പ്രകാശ് ഇതിനോടകം ശ്രദ്ധേയനായിട്ടുണ്ട്. കോന്നി എംഎൽഎ എന്ന നിലയിൽ മണ്ഡലത്തിന്‍റെ വികസനത്തിന് ഏറെ പ്രവർത്തിക്കാനായി.

കാഞ്ഞിരപ്പള്ളി രൂപതാദിനം: ഒരുക്കങ്ങള്‍ പൂര്‍ത്തിയായി

കാഞ്ഞിരപ്പള്ളി: കാഞ്ഞിരപ്പള്ളി രൂപതാദിനത്തോടനുബന്ധിച്ചുള്ള പ്രതിനിധി സമ്മേളനം, നേതൃസംഗമം എന്നിവയ്ക്കായി അണക്കര ഫൊറോന ഒരുങ്ങി. കാഞ്ഞിരപ്പള്ളി രൂപതയുടെ നാല്‍പ്പത്തിയെട്ടാമത് രൂപതാദിനാഘോഷത്തിനാണ് അണക്കര സെന്‍റ് തോമസ് ഫൊറോന പള്ളി വേദിയാകുന്നത്. 1977ലാണ് ചങ്ങനാശേരി അതിരൂപതയുടെ കിഴക്കന്‍ മേഖല വിഭജിച്ച് കാഞ്ഞിരപ്പള്ളി രൂപത സ്ഥാപിതമാകുന്നത്. നാല്പത്തിയെട്ടാമത് രൂപതാദിനാചരണ പ്രതിനിധി സംഗമദിനമായ 12ന് രാവിലെ 9.30ന് രൂപതാധ്യക്ഷന്‍ മാര്‍ ജോസ് പുളിക്കലിന്‍റെ കാര്‍മികത്വത്തില്‍ അര്‍പ്പിക്കുന്ന വിശുദ്ധ കുര്‍ബാനയില്‍ രൂപതയിലെ വൈദിക സമൂഹം, സന്യസ്തർ, വിവിധ തലങ്ങളിലുള്ള പ്രതിനിധികള്‍ എന്നിവര്‍ പങ്കുചേരും. തുടര്‍ന്ന് നടത്തപ്പെടുന്ന പ്രതിനിധി സമ്മേളനത്തില്‍ മലങ്കര സഭയുടെ പത്തനംതിട്ട രൂപതാധ്യക്ഷന്‍ സാമുവൽ മാർ ഐറേനിയോസ് മുഖ്യാതിഥിയായിരിക്കും. മാര്‍ മാത്യു അറയ്ക്കല്‍ സന്ദേശം നല്‍കും. രൂപതയിലെ വിശ്വാസിസമൂഹത്തെ പ്രതിനിധീകരിച്ചെത്തുന്ന വൈദികർ, സന്യസ്തര്‍, പാസ്റ്ററല്‍ കൗണ്‍സില്‍ അംഗങ്ങൾ, സംഘടനകളുടെയും പ്രസ്ഥാനങ്ങളുടെയും രൂപതാതല ഭാരവാഹികൾ, ഇടവകകളില്‍ നിന്നു തെരഞ്ഞെടുക്കപ്പെട്ട പ്രതിനിധികള്‍ എന്നിവരാണ് പ്രതിനിധി സമ്മേളനത്തില്‍ പങ്കെടുക്കുന്നത്. സുവര്‍ണ ജൂബിലിക്കൊരുങ്ങുന്ന കാഞ്ഞിരപ്പള്ളി രൂപതയില്‍ യുവജന വര്‍ഷമായി പ്രഖ്യാപിച്ച് നടപ്പിലാക്കപ്പെട്ട കര്‍മപദ്ധതികളുടെ പൂര്‍ത്തീകരണവും അടുത്തവര്‍ഷത്തെ പദ്ധതികളുടെ പ്രഖ്യാപനവും രൂപതാധ്യക്ഷന്‍ മാര്‍ ജോസ് പുളിക്കല്‍ നിര്‍വഹിക്കും. സഭയ്ക്കും സമൂഹത്തിനും പ്രയോജനകരമായ നേട്ടങ്ങൾ കൈവരിച്ചവരെ ആദരിക്കും. 11ന് നടത്തപ്പെടുന്ന നേതൃസംഗമത്തിൽ അണക്കര ഫൊറോനയിലെ ഇടവകകളില്‍ നിന്നുമുള്ള പാരിഷ് കൗണ്‍സില്‍ അംഗങ്ങള്‍, കുടുംബക്കൂട്ടായ്മ ലീഡര്‍മാര്‍ എന്നിവരുടെ സംഗമം രാവിലെ ഒമ്പതിന് വിശുദ്ധ കുര്‍ബാനയോടെ ആരംഭിച്ച് ഉച്ചയ്ക്ക് സമാപിക്കും. ചങ്ങനാശേരി അതിരൂപതാംഗവും വചന പ്രഘോഷകനുമായ ഫാ. ജിസൺ പോൾ വേങ്ങരേരി നേതൃസംഗമം നയിക്കും. രൂപതാദിനത്തിനൊരുക്കമായി അണക്കര ഫൊറോനയിലെ ഇടവകകളിലെ ഭവനങ്ങളില്‍ രൂപതയിലെ വൈദിക വിദ്യാര്‍ഥികൾ സന്ദര്‍ശനം പൂര്‍ത്തിയാക്കി. രൂപത വികാരി ജനറാൾ റവ.ഡോ. ജോസഫ് വെള്ളമറ്റത്തിന്‍റെ അധ്യക്ഷതയിൽ അണക്കര ഫൊറോന വികാരി ഫാ. ജേക്കബ് പീടികയിൽ ജനറൽ കൺവീനറായും രൂപത പാസ്റ്ററൽ ആനിമേഷൻ ഡയറക്ടർ ഫാ. സ്റ്റാൻലി പുള്ളോലിക്കൽ, പാസ്റ്ററൽ കൗൺസിൽ സെക്രട്ടറി ഡോ. ജൂബി മാത്യു, വിവിധ കമ്മിറ്റികൾ എന്നിവർ ക്രമീകരണങ്ങൾക്ക് നേതൃത്വം നൽകും.

കരിങ്ങാലി പാടത്ത് കൊയ്ത്ത് എങ്ങുമെത്തിയില്ല; വേനൽമഴ ചതിച്ചു

പന്തളം: തുടർച്ചയായി പെയ്യുന്ന ശക്തമായ മഴയ്ക്കിടെ കരിങ്ങാലി പാടത്തെ കൊയ്ത്ത് താളം തെറ്റുന്നു. കരിങ്ങാലിപ്പാടത്തിന്‍റെ ഭാഗമായ ചിറ്റിലപ്പാടത്തെ കൊയ്ത്താണ് തടസപ്പെട്ടത്. കൊയ്ത്ത് തുടങ്ങി ദിവസങ്ങൾ പിന്നിട്ടതോടെ കൊയ്ത്തു മെതി യന്ത്രം ഇറക്കാനാകാത്ത സ്ഥിതിയിൽ മഴ ശക്തിപ്പെട്ടു. വെള്ളക്കെട്ടു കാരണം യന്ത്രങ്ങൾ പുതയുന്ന സ്ഥിതിയാണ്. കൂടുതൽ യന്ത്രങ്ങൾ എത്തിച്ചു കൊയ്ത്ത് പൂർത്തീകരിക്കാൻ നടത്തിയ ശ്രമങ്ങളും പാളി. ആറ് യന്ത്രങ്ങളാണ് ഇത്തവണ ചിറ്റിലപ്പാടത്ത് എത്തിച്ചിരുന്നത്. ഇതിൽ രണ്ടെണ്ണം കേടായി. ഒന്ന് ചെളിയിൽ പുതഞ്ഞു. അവശേഷിച്ച മൂന്നെണ്ണം ചെളി കാരണം പ്രവർത്തിപ്പിക്കാനാകാത്ത സ്ഥിതിയിലാണ്. 145 ഏക്കറിലാണ് കൊയ്ത്ത് നടത്താനുള്ളത്. അഞ്ചുദിവസം കൊണ്ട് കൊയ്തെടുക്കാമെന്ന പ്രതീക്ഷയായിരുന്നു കർഷകർക്കുണ്ടായിരുന്നത്. ആറ് യന്ത്രങ്ങൾ എത്തിച്ചിട്ടും ഇതു പൂർത്തിയാക്കാനായില്ല. യന്ത്രവാടക താങ്ങാനാകില്ല കൊയ്ത്ത്, മെതി യന്ത്രത്തിന് ഒരു മണിക്കൂറിന് 2000 രൂപയിലധികമാണ് വാടക. കർഷകർക്ക് താങ്ങാവുന്നതിലുമപ്പുറമാണ് ഇത്. സ്വകാര്യ കന്പനികളുടേതാണ് യന്ത്രങ്ങളേറെയും. ഇത് വാടക നൽകി എത്തിക്കുന്പോഴേക്കും കർഷകർക്ക് ഭാരമേറും. ജില്ലാ പഞ്ചായത്തിന്‍റേതടക്കം കൊയ്ത്ത്, മെതി യന്ത്രങ്ങൾ മുന്പുണ്ടായിരുന്നവയെല്ലാം തകരാറിലായി. വേനൽമഴ കർഷകർക്ക് വൻ നഷ്ടമാണ് വരുത്തിവച്ചത്. പാടങ്ങളിൽ വൻ നഷ്ടമുണ്ടായി. ചിറ്റിലപ്പാടത്തു തന്നെ ഒരു ഭാഗം കാറ്റുവീഴ്ചയിൽ നിലംപൊത്തി. വെള്ളം പുറത്തേക്ക് ഒഴുക്കാനാകാത്തതിനാൽ വെള്ളക്കെട്ട് രൂപപ്പെട്ടതും കർഷകരെ വലയ്ക്കുന്നു. മാവര പാടത്തും വെള്ളക്കെട്ട് പന്തളം തെക്കേക്കര പഞ്ചായത്തിലെ മാവര പാടത്തെ 10 ഹെക്ടർ പാടം പൂർണമായും വെള്ളത്തിലാണ്. വിളഞ്ഞുകിടക്കുന്ന നെല്ല് ഈയാഴ്ച കൊയ്യാനുള്ള തയ്യാറെടുപ്പിലായിരുന്നു കർഷകർ. ഇതിനായി കൊയ്ത്ത് മെതി യന്ത്രവും എത്തിച്ചിരുന്നു. എന്നാൽ വളരെക്കുറച്ചുമാത്രം വെള്ളമുണ്ടായിരുന്ന പാടത്ത് വെള്ളം നിറഞ്ഞു കിടക്കുന്നതിനാൽ യന്ത്രം ഇറക്കാനാകുന്നില്ല. പാടവും സമീപത്തുള്ള നീർച്ചാലും തോടുകളുമെല്ലാം വെള്ളം നിറഞ്ഞുകിടക്കുകയാണ്. ഇത് ആറ്റിലേക്കൊഴുക്കിവിട്ടുകളഞ്ഞാൽ നെൽകൃഷിയെ രക്ഷിക്കാൻ കഴിയുമെങ്കിലും പുല്ലും പോളയും നിറഞ്ഞുകിടക്കുന്ന തോട്ടിലൂടെ വെള്ളം ഒഴുകിപ്പോകുന്നതിന് തടസമുണ്ട്. തോട് ആഴംകൂട്ടി വൃത്തിയാക്കുന്നജോലികൾ മൂന്ന് വർഷം മുമ്പ് നടത്തിയിരുന്നെങ്കിലും ഫലപ്രദമായില്ല.

കസ്തൂർബാ ഗാന്ധി ദർശൻ വേദി നേതൃത്വ പഠന ശിബിരം ബോധിഗ്രാമിൽ

പത്തനംതിട്ട: കേരള പ്രദേശ് ഗാന്ധിദർശൻ വേദിയുടെ വനിതാ വിഭാഗമായ കസ്തൂർബാ ഗാന്ധി ദർശൻവേദി സംസ്ഥാന നേതൃത്വ പരിശീലന ക്യാന്പ് 10, 11 തീയതികളിൽ അടൂർ തുവയൂർ ബോധിഗ്രാമിൽ നടക്കുമെന്ന് സംസ്ഥാന ജനറൽ കൺവീനർ കെ.എസ്. ബീന പത്രസമ്മേളനത്തിൽ അറിയിച്ചു. സംസ്ഥാനത്തെ 14 ജില്ലകളിൽ നിന്നുമുള്ള സംസ്ഥാന, ജില്ലാ ഭാരവാഹികൾ ക്യാന്പിൽ പങ്കെടുക്കും. പത്തിനു രാവിലെ 9.30ന് സംസ്ഥാന ചെയർപേഴ്സൺ ഡോ.പി.വി. പുഷ്പജ പതാക ഉയർത്തും. പത്തിനു കെപിസിസി ജനറൽ സെക്രട്ടറി ദീപ്തി മേരി വർഗീസ് ക്യാന്പ് ഉദ്ഘാടനം ചെയ്യും. സ്വാഗതസംഘം ജനറൽ കൺവീനർ ബിനു എസ്. ചക്കാലയിൽ ആമുഖ പ്രഭാഷണം നടത്തും. ഡിസിസി പ്രസിഡന്‍റ് പ്രഫ.സതീഷ് കൊച്ചുപറന്പിൽ മുഖ്യാതിഥിയായിരിക്കും. ഗാന്ധിദർശൻ വേദി സംസ്ഥാന ചെയർമാൻ ഡോ.എം.സി. ദിലീപ് കുമാർ മുഖ്യപ്രഭാഷണം നടത്തും. വിവിധ വിഷയങ്ങളിൽ ഡോ.ജെ.എസ്. അടൂർ, സ്റ്റെല്ലാ തോമസ്, ഡോ. സെലിൻ എന്നിവർ ക്ലാസുകൾ നയിക്കും. 11ന് ഉച്ചകഴിഞ്ഞ് 2.30ന് സമാപന സമ്മേളനം എഐസിസി വർക്കിംഗ് കമ്മിറ്റിയംഗം രമേശ് ചെന്നിത്തല ഉദ്ഘാടനം ചെയ്യും. ഡോ.പി.വി. പുഷ്പജ അധ്യക്ഷതവഹിക്കും. കസ്തൂർബ ഗാന്ധിയുടെ ആശയങ്ങളും അവർ മുന്നോട്ടുവച്ച ദർശനങ്ങളും സ്വാതന്ത്ര്യ സമരത്തിനു നൽകിയ പിന്തുണയും അടിസ്ഥാനമാക്കി രൂപീകരിച്ച സംഘടന സ്ത്രീകളുടെ ഉന്നമനത്തിനായി നടത്തിവരുന്ന പ്രവർത്തനങ്ങളുടെ ഭാഗമായാണ് ക്യാന്പ് സംഘടിപ്പിച്ചിരിക്കുന്നതെന്ന് ഭാരവാഹികൾ പറഞ്ഞു. ജില്ലാ, നിയോജക മണ്ഡലം തലങ്ങളിൽ തുടർന്ന് ഇത്തരം ക്യാന്പുകൾ നടത്തും. സംസ്ഥാന കൺവീനർമാരായ അനിത സജി, എലിസബേത്ത് അബു, ജില്ലാ വൈസ് ചെയർപേഴ്സൺ ഷൈനി ജോർജ്, ഗാന്ധിദർശൻ വേദി ജില്ലാ ചെയർമാൻ കെ.ജി. റെജി എന്നിവരും പത്രസമ്മേളനത്തിൽ പങ്കെടുത്തു. ‌

അധിവര്‍ഷാനുകൂല്യം നല്‍കി

പത്തനംതിട്ട: കേരള കര്‍ഷകത്തൊഴിലാളി ക്ഷേമനിധി ബോര്‍ഡിന്‍റെ നേതൃത്വത്തില്‍ അധിവര്‍ഷാനുകൂല്യ വിതരണത്തിന്‍റെ ജില്ലാതല ഉദ്ഘാടനം പത്തനംതിട്ട നഗരസഭാ ഹാളില്‍ പ്രഫ. എം. ടി. ജോസഫ് നിർവഹിച്ചു. ക്ഷേമനിധി ബോര്‍ഡ് ചീഫ് എക്സിക്യുട്ടീവ് ഓഫീസര്‍ കെ. എസ്. മുഹമ്മദ് സിയാദ് അധ്യക്ഷത വഹിച്ചു. 1367 പേര്‍ക്ക് 77,15,848 രൂപ വിതരണം ചെയ്തു. ജില്ലാ എക്‌സിക്യൂട്ടീവ് ഓഫീസര്‍ ടി. ആര്‍. ബിജുരാജ്, കെഎസ്കെടിയു സംസ്ഥാന വൈസ് പ്രസിഡന്‍റ് എസ്. രാധാകൃഷ്ണൻ, ജില്ലാ പ്രസിഡന്‍റ് പി. എസ്. കൃഷ്ണകുമാര്‍, പി. ടി. രാജു, തങ്കന്‍ കുളനട, ജിജി സാം തുടങ്ങിയവര്‍ പങ്കെടുത്തു.

വയോധികയുടെ മാല അപഹരിച്ച യുവാവ് അറസ്റ്റില്‍

പത്തനംതിട്ട: വയോധികയുടെ കഴുത്തിലെ മാല കട്ടര്‍ ഉപയോഗിച്ച് മുറിച്ചെടുക്കുകയും തടയാന്‍ ശ്രമിച്ചപ്പോള്‍ വസ്ത്രം വലിച്ചുകീറി അപമാനിക്കുകയും ചെയ്ത മോഷ്ടാക്കളില്‍ ഒരാളെ കോയിപ്രം പോലീസ് അറസ്റ്റ് ചെയ്തു. കൊല്ലം പട്ടാഴി പന്തപ്ലാവ്, ശംഭു ഭവനത്തില്‍ ആദര്‍ശ് രവീന്ദ്രനാണ് (26) അറസ്റ്റിലായത്. കഴിഞ്ഞ അഞ്ചിനു രാത്രി ഏഴോടെ വീട്ടമ്മ ഭര്‍ത്താവിന്‍റെ കുടുംബ വീട്ടില്‍ നിന്നും പുറത്ത് റോഡിലേക്ക് ഇറങ്ങിയപ്പോഴാണ് ഇയാളും കൂട്ടുപ്രതിയും സ്‌കൂട്ടറിലെത്തി കഴുത്തില്‍ കിടന്ന 16 ഗ്രാം തൂക്കം വരുന്ന സ്വര്‍ണമാല മുറിച്ചെടുത്തത്. കവര്‍ച്ച തടയാന്‍ ശ്രമിച്ച വയോധികയുടെ ബ്ലൗസ് ഇയാള്‍ വലിച്ച് കീറി അപമാനിക്കുകയും ചെയ്തു. ആദര്‍ശിനെ വയോധികയുടെ മകന്‍ സന്ദീപ് ഓടിച്ചിട്ട് പിടികൂടി, എന്നാല്‍ കൂടെയുണ്ടായിരുന്നയാള്‍ രക്ഷപ്പെട്ടു.

കളിക്കളം ആകട്ടെ ലഹരി; കായിക മത്സരങ്ങൾ ഇന്നു മുതൽ

തിരുവല്ല: കേരള കോൺഗ്രസ്‌ - എം ജില്ലാ കമ്മിറ്റിയുടെ ആഭിമുഖ്യത്തിൽ കളിക്കളം ആകട്ടെ ലഹരി എന്ന മുദ്രാവാക്യവുമായി മധ്യവേനൽ അവധിക്കാലത്ത്‌ സംഘടിപ്പിച്ചിരിക്കുന്ന കായിക മത്സങ്ങൾക്ക് ഇന്ന് തിരുവല്ലയിൽ തുടക്കമാകും. ഉച്ചകഴിഞ്ഞ് മൂന്നിന് മന്നൻകരച്ചിറ അബുദാബി ടർഫിൽ ഫുട്ബോൾ മത്സരം നടക്കും. എട്ട് ടീമുകൾ പങ്കെടുക്കും. സംഘാടക സമിതി ചെയർമാൻ സാം കുളപ്പള്ളി അധ്യക്ഷത വഹിക്കും. ജോബ് മൈക്കിൾ എംഎൽഎ ഉദ്ഘാടനം ചെയ്യും. മുൻ ഇന്ത്യൻ ഗോൾ കീപ്പർ കെ. ടി. ചാക്കോ മുഖ്യാതിഥി ആയിരിക്കും. പാർട്ടി ജില്ലാ പ്രസിസന്‍റ് സജി അലക്സ്‌ സമ്മാനദാനം നിർവഹിക്കും. ഏബ്രഹാം വാഴയിൽ, ജോർജ് ഏബ്രഹാം, സോമൻ താമരച്ചാലിൽ, റിന്‍റോ തോപ്പിൽ, പോൾ മാത്യു, മനോജ്‌ മടത്തുംമുട്ടിൽ, തോമസ് വർഗീസ് തുടങ്ങിയവർ നേതൃത്വം നൽകും. ഒന്നാം സ്ഥാനം നേടുന്നവർക്ക് മുൻ എംഎൽഎ മാമ്മൻ മത്തായി മെമ്മോറിയൽ എവറോളിംഗ് ട്രോഫിയും ജേക്കബ് മാമ്മൻ വട്ടശ്ശേരിൽ സ്പോൺസർ ചെയ്യുന്ന 3000 രൂപ കാഷ് പ്രൈസും രണ്ടാം സ്ഥാനം നേടുന്നവർക്ക് പോൾ മാത്യു കോഴിയടിയിൽ എവറോളിംഗ് ട്രോഫിയും രാജീവ്‌ വഞ്ചിപ്പാലം സ്പോൺസർ ചെയ്യുന്ന 2000 രൂപ കാഷ് പ്രൈസും നൽകും.

മഹാകവി വെണ്ണിക്കുളം പുരസ്കാര സമർപ്പണം നാളെ

വെണ്ണിക്കുളം: പ്രവാസി സംസ്കൃതി അസോസിയേഷന്‍റെ 2024 ലെ മഹാകവി വെണ്ണിക്കുളം ഗോപാലക്കുറുപ്പ് സ്മാരക പുരസ്കാര സമർപ്പണം നാളെ നടക്കും. ലെഫ്റ്റനന്‍റ് കേണൽ ഡോ. സോണിയ ചെറിയാന്‍റെ സ്നോ ലോട്ടസ് എന്ന നോവലിനാണ് ഇത്തവണത്തെ പുരസ്കാരം നൽകുന്നത്. 10,001 രൂപയും മഹാകവിയുടെ പേരുള്ള ശില്പവും പ്രശസ്തി പത്രവും അടങ്ങുന്ന പുരസ്കാരം മഹാകവി അധ്യാപകനായിരുന്ന വെണ്ണിക്കുളം സെന്‍റ് ബഹനാൻസ് ഹയർ സെക്കൻഡറി സ്കൂളിൽ രാവിലെ പത്തിനു നടക്കുന്ന ചടങ്ങിൽ കേരള ഗവൺമെന്‍റ് ചീഫ് വിപ്പ് ഡോ. എൻ. ജയരാജ് സമ്മാനിക്കുമെന്ന് പ്രവാസി സംസ്കൃതി അസോസിയേഷൻ സംസ്ഥാന ജനറൽ സെക്രട്ടറി ബിജു ജേക്കബ് കൈതാരം അറിയിച്ചു.

അലുമ്‌നി അസോസിയേഷന്‍ വാർഷികം നടത്തി

കോഴഞ്ചേരി: സെന്‍റ് തോമസ് കോളജിലെ കായിക പ്രതിഭകളെ ദേശീയ, അന്തര്‍ദേശീയ നിലവാരത്തിലേക്ക് വളര്‍ത്തിയെടുക്കുന്നതിന് നേതൃത്വം നല്‍കിയ അന്തരിച്ച മുന്‍ കോളജ് കായിക വിഭാഗം മേധാവി പി.റ്റി. ചാക്കോയെ അനുസ്മരിക്കുന്നതിനും കോളജ് മാനേജ്‌മെന്‍റും അലുമ്‌നി അസോസിയേഷനും കൂടി സ്‌പോര്‍ട്‌സ് കോംപ്ലക്‌സ് നിർമിക്കാനും അലുംമ്‌നി വാര്‍ഷിക സമ്മേളനം തീരുമാനിച്ചു. കോളജ് അലുമ്‌നി അസോസിയേഷന്‍ വാര്‍ഷിക സമ്മേളനം കോളജ് ഗവേണിംഗ് ബോര്‍ഡ് ട്രഷറാര്‍ ഡോ. ജോര്‍ജ് ജോസഫ് പൊയ്യാനില്‍ ഉദ്ഘാടനം ചെയ്തു. യോഗത്തില്‍ ചെയര്‍മാന്‍ വിക്ടര്‍ റ്റി. തോമസ് അധ്യക്ഷത വഹിച്ചു. കോളജ് പ്രിന്‍സിപ്പല്‍ ഡോ. ജോര്‍ജ് കെ. അലക്‌സ് ആമുഖ പ്രസംഗം നടത്തി. ഐഎസ്ആര്‍ഒ സീനിയര്‍ ശാസ്ത്രജ്ഞന്‍ ഡോ. റ്റി.ആർ. ഗോപാലകൃഷ്ണന്‍ നായര്‍ മുഖ്യ സന്ദേശം നല്‍കി. വികാരി ജനറാള്‍ റവ. ജോര്‍ജ് മാത്യു അനുഗ്രഹ പ്രഭാഷണം നടത്തി. അലുമ്‌നി അസോസിയേഷന്‍ ജനറല്‍ സെക്രട്ടറി റെജി താഴമൺ, ട്രഷറര്‍ കെ.ആർ. അശോക് കുമാര്‍, എലിസബത്ത് റോയി, വില്‍സണ്‍ കരിമ്പന്നൂർ തുടങ്ങി യവർ പ്രസംഗിച്ചു.

ഡെങ്കിപ്പനി പ്രതിരോധ പ്രവർത്തനങ്ങൾ വേഗത്തിലാക്കണം: പ്രമോദ് നാരായൺ

റാന്നി: വെച്ചൂച്ചിറ പഞ്ചായത്തിൽ ഡെങ്കിപ്പനി ബാധിതരുടെ എണ്ണം വർധിക്കുന്ന സാഹചര്യത്തിൽ പ്രതിരോധ പ്രവർത്തനങ്ങൾ വേഗത്തിലാക്കണമെന്ന് പ്രമോദ് നാരായൺ എംഎൽഎ നിർദേശം നൽകി. നിലവിൽ 45 പേർക്ക് വെച്ചൂച്ചിറ ഗ്രാമപഞ്ചായത്തിൽ ഡെങ്കിപ്പനി സ്ഥിരീകരിച്ചിട്ടുണ്ട്. ഡെങ്കിപ്പനി പടരുന്ന സാഹചര്യം അറിഞ്ഞപ്പോൾതന്നെ ജില്ലാ മെഡിക്കൽ ഓഫീസർക്ക് നൽകിയ നിർദേശത്തിന്‍റെ അടിസ്ഥാനത്തിൽ പഞ്ചായത്തിൽ യോഗം ചേർന്ന് പ്രതിരോധ നടപടികൾ സ്വീകരിച്ചിരുന്നുവെങ്കിലും പഞ്ചായത്ത് ആരോഗ്യവകുപ്പും ഏകോപിത പ്രവർത്തനത്തിലൂടെ വ്യാപനം തടയുന്നതിനുള്ള നടപടി സ്വീകരിക്കണമെന്ന് എംഎൽഎ ആവശ്യപ്പെട്ടു. ഇതിനായി ആശുപത്രി മാനേജ്മെന്‍റ് കമ്മിറ്റി വിളിച്ചുചേർക്കുകയും ചെയ്തു. പ്രദേശങ്ങളിൽ ഫോഗിംഗ് ശക്തമാക്കാനും കൂടുതൽ നിരീക്ഷണം ഏർപ്പെടുത്താനും യോഗത്തിൽ തീരുമാനിച്ചു. ഉറവിടം കണ്ടെത്തിയതിനായി വോളണ്ടിയർമാരുടെ സേവനം അടിയന്തരമായി ലഭ്യമാക്കുവാൻ പഞ്ചായത്തിലും നിർദേശം നൽകി.

റോഡ് ഉദ്ഘാടനം ചെയ്തു

റാന്നി: എംഎൽഎ ഫണ്ട് ഉപയോഗിച്ച് നിർമിച്ച കോളാമല - കോട്ടക്കുഴി റോഡ് പ്രമോദ് നാരായൺ എംഎൽഎ ഉദ്ഘാടനം ചെയ്തു. പെരുനാട് പഞ്ചായത്തിന്‍റെ ജനവാസ മേഖലയിലൂടെ കടന്നുപോകുന്ന റോഡ് പുനരുദ്ധരിക്കുന്നതിനായി 10 ലക്ഷം രൂപയാണ് എംഎൽഎ ഫണ്ടിൽ നിന്നും ചെലവഴിച്ചത്. ഗ്രാമപഞ്ചായത്ത് പ്രസിഡന്‍റ് പി. എസ്. മോഹനൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് കെ. എസ്. ഗോപി, പഞ്ചായത്ത് വൈസ് പ്രസിഡന്‍റ് ഡി. ശ്രീകല, പഞ്ചായത്തംഗം കെ. രാജം ,റോബിൻ കെ. തോമസ്, പി. കെ. അനിൽകുമാർ, പ്രദീപ് ഷീജ എന്നിവർ പ്രസംഗിച്ചു. റാന്നി: പെരുനാട് പഞ്ചായത്തിൽ എംഎൽഎ ആസ്തി വികസന ഫണ്ട് ചെലവഴിച്ച് നിർമാണം പൂർത്തിയാക്കിയ ആതിരപ്പടി - അച്ചൻതോട്ടം - കുമ്പഴ ഭാഗം റോഡ് പ്രമോദ് നാരായൺ എംഎൽഎ ഉദ്ഘാടനം ചെയ്തു. എംഎൽഎ ഫണ്ടിൽ നിന്നും റോഡിന്‍റെ നിർമാണത്തിനായി 10 ലക്ഷം രൂപയാണ് ചെലവഴിച്ചത്. ഗ്രാമപഞ്ചായത്ത് പ്രസിഡന്‍റ് പി. എസ്. മോഹനൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് കെ. എസ്. ഗോപി, പഞ്ചായത് വൈസ് പ്രസിഡന്‍റ് ഡി. ശ്രീകല, റോബിൻ കെ. തോമസ്, പി. കെ. അനിൽകുമാർ, രാധാ പ്രസന്നൻ, മനോജ് നാരായണൻ എന്നിവർ പ്രസംഗിച്ചു.

മാർ യോഹാൻ മെത്രാപ്പോലീത്തയുടെ ഒന്നാം ചരമവാർഷികാചരണം ഇന്നും നാളെയും

തിരുവല്ല: ബിലീവേഴ്സ് ഈസ്റ്റേൺ ചർച്ച് പ്രഥമ അധ്യക്ഷൻ മാർ യോഹാൻ മെത്രാപ്പോലീത്തയുടെ ഒന്നാം ചരമവാർഷികത്തോടനുബന്ധിച്ച് സ്മൃതി 2025. ഇന്നും നാളെയുമായി സഭാ ആസ്ഥാനത്ത് നടത്തും. ഇന്ന് രാവിലെ ആറിന് ബിലീവേഴ്സ് സെന്‍റ് തോമസ് കത്തീഡ്രലിൽ കുർബാന തുടർന്ന് ധൂപ പ്രാർഥന.10.30 ന് സ്മൃതി 2025 ബീഹാർ ഗവർണർ ആരിഫ് മുഹമ്മദ് ഖാൻ ഉദ്ഘാടനം ചെയ്യും. ബിലീവേഴ്സ് ഈസ്റ്റേൺ ചർച്ച് അധ്യക്ഷൻ മാർ സാമുവൽ തെയോഫിലോസ് അധ്യക്ഷത വഹിക്കും. സ്വാമി ഗുരുരത്നം ജ്ഞാന തപസ്വി മുഖ്യാതിഥി ആയിരിക്കും. ഡോ. ജോസഫ് മാർ ബർന്നബാസ് സഫ്രഗൻ മെത്രാപ്പോലീത്ത മുഖ്യപ്രഭാഷണം നടത്തും. മലബാർ സ്വതന്ത്ര സുറിയാനി സഭാധ്യക്ഷൻ സിറിൾ മാർ ബസേലിയോസ് അനുസ്മരണ പ്രഭാഷണം. വിവിധ സഭകളിലെ മെത്രാപ്പോലീത്തമാർ പങ്കെടുക്കും. വൈകുന്നേരം അഞ്ചിന് രമേശ് ചെന്നിത്തല എംഎൽഎ അനുസ്മരണ പ്രഭാഷണം ഉദ്ഘാടനം ചെയ്യും. മാർ സാമുവൽ തെയോഫിലോസ് അധ്യക്ഷത വഹിക്കുന്ന സമ്മേളനത്തിൽ എസ്എൻഡിപി യോഗം വൈസ് പ്രസിഡന്‍റ് തുഷാർ വെള്ളാപ്പള്ളി മുഖ്യപ്രഭാഷണം നടത്തും. ഡോ. ഗീവർഗീസ് മാർ കൂറിലോസ്, സ്വാമി ഗുരുരത്നം ജ്ഞാന തപസ്വി, ഡോ. സിറിയക് തോമസ് എന്നിവർ പ്രസംഗിക്കും. നാളെ രാവിലെ ഒന്പതിന് യോഹാൻ കാരുണ്യ സ്മൃതി മന്ത്രി വി.എൻ. വാസവൻ ഉദ്ഘാടനം ചെയ്യും. മാർ സാമുവൽ തെയോഫിലോസ് അധ്യക്ഷത വഹിക്കും. ഡോ. തിയഡോഷ്യസ് മാർത്തോമ്മ മെത്രാപ്പോലീത്ത മുഖ്യപ്രഭാഷണം നടത്തും. സ്കോളർഷിപ്പ് പദ്ധതികളുടെ ഉദ്ഘാടനം ആർച്ച് ബിഷപ് കുര്യാക്കോസ് മാർ സേവേറിയോസ് നിർവഹിക്കും. ക്ഷേമപദ്ധതികളുടെ ഉദ്ഘാടനം കൽദായ ആർച്ച് ബിഷപ് മാർ ഔഗിൻ കുര്യാക്കോസ് നിർവഹിക്കും.

ഹോമിയോപ്പതി ഡിസ്പെൻസറി ഉദ്ഘാടനം നടത്തി

തിരുവല്ല : പെരിങ്ങര സാമിപാലം ജംഗ്ഷനിൽ സ്ഥിതി ചെയ്യുന്ന നവീകരിച്ച പെരിങ്ങര ഗ്രാമപഞ്ചായത്ത് ഗവൺമെന്‍റ് ഹോമിയോപ്പതി ഡിസ്പെൻസറിയുടെ ഉദ്ഘാടനം പഞ്ചായത്ത് പ്രസിഡന്‍റ് ഏബ്രഹാം തോമസ് നിർവഹിച്ചു. പഞ്ചായത്ത് വൈസ് പ്രസിഡന്‍റ് ഷീന മാത്യു അധ്യക്ഷത വഹിച്ച യോഗത്തിൽ എം.സി. ഷൈജു, ചന്ദ്രു എസ്. കുമാർ, അശ്വതി രാമചന്ദ്രൻ, സനൽകുമാരി, സുഭദ്ര രാജൻ, ശർമിള സുനിൽ, ഡോ.ഡി. ജയചന്ദ്രൻ, എച്ച്എംസി അംഗങ്ങൾ എന്നിവർ പ്രസംഗിച്ചു.

ചന്ദനപ്പള്ളി ഓർത്തഡോക്സ് പള്ളിയിൽ ചെന്പെടുപ്പ് റാസ ഇന്ന്

ചന്ദനപ്പള്ളി: സെന്‍റ് ജോർജ് ഓർത്തഡോക്സ് വലിയ പള്ളിയിൽ വിശുദ്ധ ഗീവർഗീസ് സഹദായുടെ ഓർമപ്പെരുന്നാളിനോടനുബന്ധിച്ച ചെന്പെടുപ്പ് റാസ ഇന്ന്. പെരുന്നാളിന്‍റെ പ്രധാന ദിനമായ ഇന്നു രാവിലെ നടക്കുന്ന വിശുദ്ധ മൂന്നിന്മേൽ കുർബാനയ്ക്ക് സഭാധ്യക്ഷൻ ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്കാ ബാവ മുഖ്യകാർമികത്വം വഹിക്കും. ഇന്നലെ രാവിലെ കുര്യക്കോസ് മാർ ക്ലീമിസ് വലിയ മെത്രാപ്പോലീത്തയുടെ മുഖ്യ കാർമികത്വത്തിൽ മൂന്നിന്മേൽ കുർബാനയും പൊന്നിൻകുരിശ് സമർപ്പണവും നടന്നു. തുടർന്ന് കൽക്കുരിശിങ്കൽ നിന്ന് വിശ്വാസികൾ സെന്‍റ് ജോർജ് ഷ്റൈൻ എഴുന്നള്ളിച്ചു പള്ളിയിൽ പ്രതിഷ്ഠിച്ചു. വികാരി ഫാ. സുനിൽ ഏബ്രഹാം, ഫാ. ജോബിൻ യോഹന്നാൻ, ഫാ, റീനിൽ പീറ്റർ എന്നിവർ മധ്യസ്ഥ പ്രാർഥന നടത്തി. പദയാത്ര സംഗമത്തിന് ശേഷം മെത്രാപ്പോലീത്തമാരുടെ കാർമികത്വത്തിൽ സന്ധ്യാ നമസ്കാരവും ശ്ലൈഹിക വാഴ്‌വും നടന്നു. വർണാഭമായ രാത്രി റാസയ്ക്കു പൊൻ വെള്ളിക്കുരിശുകളും മുത്തുക്കുടകളും വാദ്യമേളങ്ങളും നിറപ്പകിട്ടേകി. ദേശത്തിന്‍റെ നാല് അതിർത്തികളെയും അനുഗ്രഹിച്ചു നടത്തിയ റാസ ആശീർവാദത്തോടെ പള്ളിയിൽ സമാപിച്ചു. സെബിൻ ബാബു, ഫിലിപ്പ് തോമസ്, ജോയൻ ജോർജ്, ജിജോ ജോസഫ്, റോഹൻ വി റോയി, സന്തോഷ് സാബു എന്നിവർ നേതൃത്വം നൽകി. തുടർന്ന് ലൈറ്റ് ഷോയും ഗാനമേളയും നടത്തി. ഇന്നു രാവിലെ ആറിനു ചെന്പിൽ അരിയിടീൽ കർമം അങ്ങാടിക്കൽ മേക്കാട്ട് കുടുംബത്തിലെ കാരണവർ നിർവഹിക്കും. കുർബാനയേ തുടർന്ന്, 11 ന് തീർഥാടക സംഗമം ബംഗാൾ ഗവർണർ ഡോ. സി. വി. ആനന്ദബോസ് ഉദ്ഘാടനം ചെയ്യും. കാതോലിക്കാ ബാവ അധ്യക്ഷത വഹിക്കും. ചലച്ചിത്ര സംവിധായകൻ ബ്ലെസിക്ക് ഓർഡർ ഓഫ് സെന്‍റ് ജോർജ് പുരസ്കാരം നൽകി ആദരിക്കും. മൂന്നിനു ചെമ്പെടുപ്പ് റാസ, ജംഗ്ഷനിൽ മന്ത്രി പി. പ്രസാദ് സന്ദേശം നൽകും. അഞ്ചിനാണ് ചരിത്ര പ്രസിദ്ധമായ ചന്ദനപ്പള്ളി ചെമ്പെടുപ്പ്. 11 ന് കൊടിയിറക്കോടെ പെരുന്നാൾ ചടങ്ങുകൾ സമാപിക്കും.

തിരുവല്ല - മല്ലപ്പള്ളി - ചേലക്കൊമ്പ് റോഡ് സ്ഥലമെടുപ്പിന് വിജ്ഞാപനമായി

തിരുവല്ല: തിരുവല്ല - മല്ലപ്പള്ളി - ചേലക്കൊമ്പ് റോഡ് സ്ഥലമെടുപ്പിന് 11(1) പ്രകാരമുള്ള വിജ്ഞാപനം പുറപ്പെടുവിച്ച് ഉത്തരവായി. തിരുവല്ല, കുറ്റപ്പുഴ, പായിപ്പാട്, കുന്നന്താനം, കല്ലൂപ്പാറ, മല്ലപ്പള്ളി, ആനിക്കാട്, നെടുംകുന്നം വില്ലേജുകളിലായി സെക്ഷൻ 4 പ്രകാരം നിശ്ചയിച്ച സ്ഥലങ്ങളുടെ സാമൂഹ്യാഘാത പഠനത്തിനും വിദഗ്ധ സമിതിയുടെ പരിശോധനയ്ക്കും ശേഷമാണ് 5.89 ഏക്കർ ഭൂമി എറ്റെടുക്കുന്നതിനുള്ള വിജ്ഞാപനം പുറപ്പെടുവിച്ചിട്ടുള്ളത്. ഏപ്രിൽ 28ന് റവന്യൂ മന്ത്രിയുടെയും മാത്യു ടി. തോമസ് എംഎൽഎയുടെയും നേതൃത്വത്തിൽ നടന്ന ബന്ധപ്പെട്ട ഉദ്യോഗസ്ഥരുടെ യോഗത്തിൽ ഇത് സംബന്ധിച്ച് സമയക്രമം നിശ്ചയിച്ചിരുന്നു. അധികമായി ഏറ്റെടുക്കണമെന്ന് കണ്ടെത്തിയ 0.93 ഏക്കർ ഭൂമി സംബന്ധിച്ചുള്ള സാമൂഹിക ആഘാത പഠനവും നടന്നുവരികയാണ്. ഇതു സംബന്ധിച്ച ഹിയറിംഗ് 15ന് മല്ലപ്പള്ളി ഗ്രാമപഞ്ചായത്ത് ഓഫീസിൽ നടത്തുന്നതിന് നിശ്ചയിച്ചിട്ടുണ്ട്. വിജ്ഞാപനത്തിലുൾപ്പെട്ട ഭൂമിയുടെ വിശദമായ സർവേകൾ ആരംഭിച്ചു കഴിഞ്ഞിട്ടുണ്ട്. തിരുവല്ല, കുറ്റപ്പുഴ വില്ലേജുകളിലായി സർവേ നടപടികൾ നടന്നുവരികയാണ്. ഇതോടൊപ്പം തന്നെ ഏറ്റെടുക്കുന്ന സ്ഥലത്തിന്‍റെയും കെട്ടിടങ്ങളുടെയും വൃക്ഷങ്ങൾ ഉൾപ്പെടെയുള്ളവയുടെയും വില നിശ്ചയിക്കുന്നതിനുള്ള നടപടികളും നടത്തുന്നതിനാണ് തീരുമാനിച്ചിരിക്കുന്നത്. തിരുവല്ല മുതൽ ചേലക്കൊമ്പ് വരെയുള്ള ഇരുവശങ്ങളിലെ ഭൂമിയുടെ ഏറ്റെടുക്കൽ നടപടികളാണ് പൂർത്തിയാക്കേണ്ടതെന്ന് മാത്യു ടി.തോമസ് എംഎൽഎ അറിയിച്ചു.

അത്തിക്കയം റോഡിൽ അപകട ഭീഷണി ഉയർത്തി വൈദ്യുതി പോസ്റ്റുകൾ

റാന്നി: ചെത്തോങ്കര - അത്തിക്കയം റോഡിലെ മാറ്റിസ്ഥാപിക്കാത്ത വൈദ്യുതി പോസ്റ്റുകൾ അതീവ അപകടകാരികൾ. ഇതുകാരണം മരണം ഉൾപ്പെടെ അപകടങ്ങൾ നടന്നിട്ടും അനങ്ങാപ്പാറ നയവുമായി പിഡബ്ല്യുഡിയും വൈദ്യുതി വകുപ്പ് ഉദ്യോഗസ്ഥരും മുന്നോട്ടു പോകുകയാണെന്ന് നാട്ടുകാരും യാത്രക്കാരും പറയുന്നു. ശബരിമലയിലേക്കുള്ള പ്രധാന അനുബന്ധ പാതകളിലൊന്നാണ് ചെത്തോങ്കര - അത്തിക്കയം റോഡ്. ബിഎം ബിസി നിലവാരത്തിൽ ഏതാണ്ട് ഒരു വർഷത്തിലേറെയായി നിർമാണ പ്രവർത്തനങ്ങളും വീതികൂട്ടലും നടന്ന റോഡിൽ പ്രത്യേകിച്ചും വളവുകളിൽ ഇപ്പോൾ അപകടകരമായി നിലകൊള്ളുന്ന പോസ്റ്റുകളുണ്ട്. അവ മാറ്റി സ്ഥാപിക്കാനുള്ള പണം കെഎസ്ഇബി മുൻകൂറായി കൈപ്പറ്റിയിട്ടും മാറ്റിയിടാത്തതാണെന്ന് റോഡു വിഭാഗം ഉദ്യോഗസ്ഥർ പറയുന്നു. കക്കുടിമൺ മുതൽ കണ്ണംപള്ളി സെന്‍റ് മാത്യൂസ് സ്കൂളിന് സമീപവും ചക്കിട്ടവളവിലും പഴയ ഹെൽത്ത് സെന്‍ററിനു സമീപവുമാണ് പോസ്റ്റുകൾ റോഡിലേക്ക് ഏറെ ഇറങ്ങി നിൽക്കുന്നത്. സർവീസ് ബസുകളും സ്കൂൾ വാഹനങ്ങളും സ്വകാര്യ വാഹനങ്ങളും ഇടതടവില്ലാതെ സഞ്ചരിക്കുന്ന റോഡിലെ വൈദ്യുതി തൂണ് ഇതേ നിലയിൽ തുടർന്നാൽ വീണ്ടും അപകടങ്ങൾക്കു കാരണമാകുമെന്ന് നാട്ടുകാർ ചൂണ്ടിക്കാട്ടുന്നു. കണ്ണംപള്ളി സ്കൂളിനു സമീപത്തെ പോസ്റ്റ്കാരണം മാസങ്ങൾക്കു മുമ്പ് ബൈക്ക് യാത്രക്കാരൻ അപകടത്തിൽപ്പെട്ട് മരണപ്പെട്ടിരുന്നു.

ഗവി ഉല്ലാസയാത്ര ലാഭകരമെങ്കിലും ഓടിക്കാൻ നല്ല ബസുകളില്ല

പത്തനംതിട്ട: കെഎസ്ആർടിസിയുടെ ടൂറിസം പാക്കേജിൽ ഏറ്റവും ലാഭകരമായി ഓടുന്ന ഗവി യാത്രയ്ക്ക് സംസ്ഥാനത്തെ എല്ലാ ഡിപ്പോകളിലും മികച്ച പ്രതികരണം ലഭിക്കുന്പോഴും ഓടിക്കാൻ നല്ല ബസുകളില്ല. പത്തനംതിട്ട കെഎസ്ആർ‌ടിസി ഡിപ്പോ കേന്ദ്രീകരിച്ചുള്ള ഗവി യാത്രാ പാക്കേജാണ് കെഎസ്ആർടിസിയെ ടൂറിസം യാത്രകൾക്കുതന്നെ പ്രേരിപ്പിച്ചത്. എന്നാൽ 70 കിലോമീറ്റർ കാനനപാതയിലൂടെ സഞ്ചരിക്കേണ്ടതിനാൽ കട്ട് ചെയ്സ് ബസുകളാണ് ഗവി യാത്രയ്ക്ക് വേണ്ടത്. എന്നാൽ ഇത്തരം ബസുകൾ കെഎസ്ആർടിസി പുതുതായി വാങ്ങുന്നില്ല. നിലവിലുള്ള കട്ട് ചെയ്സ് ബസുകൾ പത്തനംതിട്ട ഡിപ്പോ കേന്ദ്രീകരിച്ച് ടൂറിസം പാക്കേജിനായി ഉപയോഗിച്ചു വരികയാണ്. ഇതിനൊപ്പമാണ് പത്തനംതിട്ടയിൽ നിന്നും കുമളിയിൽ നിന്നും ഗവി വഴി പ്രതിദിനം രണ്ട് ഷെഡ്യൂളുകൾ നടത്തുന്നത്. സംസ്ഥാനത്തെ എല്ലാ ഡിപ്പോകളിൽ നിന്നും ഗവി യാത്രാ പാക്കേജ് കെഎസ്ആർടിസി നടപ്പാക്കുന്നുണ്ട്. പത്തനംതിട്ടയിലെത്തിച്ച് ഇവിടെനിന്ന് കട്ട് ചെയ്സ് ബസുകൾ ലഭ്യമെങ്കിൽ അവയിൽ യാത്രക്കാരെ കയറ്റി അയയ്ക്കുകയാണ് പതിവ്. എന്നാൽ യാത്രയ്ക്ക് അനുയോജ്യമായ ബസുകൾ പലപ്പോഴും പത്തനംതിട്ട ഡിപ്പോയിലുണ്ടാകാറില്ല. ഇങ്ങനെയുള്ള സാഹചര്യത്തിൽ ഇതര ഡിപ്പോകളിൽ നിന്നും വരുന്ന ബസുകൾ തന്നെ ടൂർ പാക്കേജിൽ അയയ്ക്കുകയാണ് പതിവ്. ഗവി യാത്രയ്ക്കു പോകുന്ന ബസുകൾ കഴിഞ്ഞ ഒരു മാസത്തിനിടെ മൂന്നു തവണ കാനനപാതയിൽ കുടുങ്ങിയതോടെയാണ് ഈ റൂട്ടിൽ ഉപയോഗിക്കുന്ന ബസുകളുടെ സ്ഥിതിയെ സംബന്ധിച്ച അന്വേഷണമുണ്ടായത്. പത്തനംതിട്ട, കുമളി ഡിപ്പോകളുടെ പ്രതിദിന സർവീസുകൾക്ക് ഉപയോഗിക്കുന്ന ബസുകൾക്കു തന്നെ കാലപ്പഴക്കം ഏറെയുള്ളതാണ്. ഈ ബസുകൾ പലപ്പോഴും വഴിയിൽ കിടക്കാറുണ്ട്. കഴിഞ്ഞ രണ്ടുതവണയും പ്രതിദിന സർവീസുകളാണ് വഴിയിൽ കേടായത്. ടൂർ പാക്കേജിൽ വന്നവരിൽ ചാത്തന്നൂർ ഡിപ്പോയിൽ നിന്നുള്ള യാത്രക്കാരാണ് കുടുങ്ങിയത്. ഗവി ഉല്ലാസ യാത്ര കെഎസ്ആർടിസിക്കു ലാഭകരമാണെങ്കിലും പുതിയ ബസുകൾ നിരത്തിലിറക്കാത്തതാണ് ജീവനക്കാരെ കുഴയ്ക്കുന്നത്. മുൻകൂറായി പണം വാങ്ങി യാത്രയ്ക്കായി കൊണ്ടുപോകുന്ന സഞ്ചാരികളെ പാതിവഴിയിൽ മടക്കേണ്ട സാഹചര്യം പലതവണ ഉണ്ടായെന്ന് ജീവനക്കാർ പറയുന്നു. ആങ്ങമൂഴിയിൽ നിന്നാരംഭിക്കുന്ന കാനനപാതയിലൂടെ മൂഴിയാർ, കൊച്ചുപന്പ, ഗവി, വള്ളക്കടവ് വഴി വണ്ടിപ്പെരിയാറിലെത്തി കെകെ റോഡിലൂടെ സഞ്ചരിച്ച് പരുന്തുംപാറയിലുമെത്തി തിരികെ കൊണ്ടുവരുന്നതാണ് കെഎസ്ആർ‌ടിസിയുടെ പാക്കേജ്. ഒരുദിവസം നീളുന്ന പാക്കേജ് സംസ്ഥാനത്തെ എല്ലാ ഡിപ്പോകളും നടപ്പാക്കുന്നുണ്ട്. നല്ല കണ്ടീഷനുകളുള്ള ബസുകൾ ഗവി യാത്രയ്ക്കു നൽകണമെന്ന് കെഎസ്ആർടിസി പ്രത്യേക ഉത്തരവ് നൽകിയിരുന്നു. എന്നാൽ മലയോര മേഖലയിലെ കാനനപാതയിലൂടെയുള്ള യാത്രയ്ക്ക് അനുയോജ്യമായത് കട്ട് ചെയ്സ് ബസുകളാണ്. ഇവ ഇപ്പോൾ കെഎസ്ആർടിസി വാങ്ങാറില്ല. പത്തനംതിട്ട ഡിപ്പോയിൽ നിലവിലുള്ള ഇത്തരം ബസുകൾ കാലപ്പഴക്കത്താലും തകരാറുകളാലും യാത്രയ്ക്ക് അനുയോജ്യവുമല്ല.

ലഹരിക്കെതിരേ ഹോട്ടൽ ആൻഡ് റസ്റ്ററന്‍റ് അസോസിയേഷൻ

പത്തനംതിട്ട: ഉണരട്ടെ കേരളം ഒടുങ്ങട്ടെ ലഹരി മയക്കുമരുന്ന് എന്ന മുദ്രാവാക്യവുമായി കേരള ഹോട്ടൽ ആൻഡ് റസ്റ്ററന്‍റ് അസോസിയേഷൻ നടത്തുന്ന ജനകീയ ക്യാമ്പിന്‍റെ ഭാഗമായി പത്തനംതിട്ട യൂണിറ്റ് കമ്മിറ്റിയുടെ പോസ്റ്റർ പ്രകാശനം നഗരസഭ ചെയർമാൻ എ. സക്കീർ ഹുസൈൻ നിർവഹിച്ചു. ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജെറി അലക്സ്, കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ സംസ്ഥാന വൈസ് പ്രസിഡന്‍റ് കെ.എം. രാജാ, യൂണിറ്റ് പ്രസിഡന്‍റ് നവാസ് തനിമ, സെക്രട്ടറി സുധി, സുബയ്യ റെഡ്ഡിയാർ, ഷാജി പാറയിൽ, ബാബു മൂലക്കട, എന്നിവർ പങ്കെടുത്തു.

നഴ്സസ് വാരാഘോഷം കായിക മത്സരങ്ങൾ

പത്തനംതിട്ട: നഴ്സസ് വാരാഘോഷത്തോടനുബന്ധിച്ചു നടന്ന കായിക മത്സരങ്ങൾ ജില്ലാ സ്പോർട്സ് കൗൺസിൽ പ്രസിഡന്‍റ് കെ. അനിൽകുമാർ ഉദ്ഘാടനം ചെയ്തു. കാതോലിക്കേറ്റ് കോളജ് പ്രിൻസിപ്പൽ ഡോ.സിന്ധു ജോൺസ്, നഴ്സിംഗ് ഓഫീസർ ലാലി തോമസ്, നഴ്സസ് അസോസിയേഷൻ ജില്ലാ പ്രസിഡന്‍റ് എ.എസ്. നിഷാദ് എന്നിവർ പ്രസംഗിച്ചു. തുടർന്ന് വിവിധ കായിക മത്സരങ്ങൾ നടന്നു.

സിപിഎം വിട്ടു സിപിഐയിലെത്തിയ മുൻ ബ്രാഞ്ച് സെക്രട്ടറിയെ വെട്ടി പരിക്കേല്പിച്ചു

പത്തനംതിട്ട: സിപിഎം വിട്ടു സിപിഐയിലെത്തിയ മുൻ ബ്രാഞ്ച് സെക്രട്ടറിയെ ഫേസ് ബുക്കിൽ പോസ്റ്റിട്ടതിനെച്ചൊല്ലിയുള്ള പ്രശ്നത്തെത്തുടർന്ന് വെട്ടി പരിക്കേല്പിച്ചു. പത്തനംതിട്ട വിളവിനാൽ ഗ്രെയ്സ് ഭവനിൽ റോബിൻ ജോണിനെയാണ് (39) വെട്ടി പരിക്കേല്പിച്ചത്. പരിക്കേറ്റ റോബിൻ പത്തനംതിട്ട ജനറൽ ആശുപത്രിയിൽ ചികിത്സയിലാണ്. വടിവാളുകൊണ്ടുള്ള വെട്ട് ഒഴിഞ്ഞുമാറിയതിനാൽ മാത്രമാണ് കഴുത്തിൽ കൊള്ളാതെ രക്ഷപ്പെട്ടതെന്ന് റോബിൻ പറയുന്നു. കഴിഞ്ഞദിവസം രാത്രി 9.30 ഓടെയായിരുന്നു സംഭവം. വീടിന് സമീപത്തുള്ള കടയുടെ മുമ്പിൽ നിൽക്കുകയായിരുന്നു റോബിൻ. ഈ സമയത്താണ് മങ്കി ക്യാപ്പ് ധരിച്ച മൂന്നംഗ സംഘം ബൈക്കിൽ ഇവിടെയെത്തിയത്. അപകടം മണത്ത റോബിൻ ഓടി രക്ഷപ്പെടാൻ ശ്രമിച്ചെങ്കിലും പിന്തുടർന്നെത്തിയ സംഘം വീടിന്‍റെ പിൻവശത്തുവച്ച് തലയുടെ പിൻവശത്ത് അടിച്ച് വീഴ്ത്തുകയായിരുന്നു. തുടർന്ന് വടിവാൾ കൊണ്ട് കഴുത്തിന് വെട്ടിയെങ്കിലും തല വെട്ടിച്ച് മാറ്റിയതിനാൽ താടിയിൽ കൊള്ളുകയായിരുന്നു. റോബിൻ ബഹളം വച്ചതോടെ അക്രമികൾ ഓടി രക്ഷപ്പെട്ടു. റോബിന്‍റെ മൊഴിയുടെ അടിസ്ഥാനത്തിൽ പത്തനംതിട്ട പോലീസ് കണ്ടാലറിയാവുന്ന നാലുപേർക്കെതിരേ കേസെടുത്തു. സിപിഎമ്മിന്‍റെ നഗരത്തിലെ പ്രമുഖരായവരുടെ പേരുകൾകൂടി ഉൾപ്പെടുത്തിയാണ് റോബിൻ മൊഴി നൽകിയതെന്ന് പറയുന്നു. കഴിഞ്ഞയിടെ മന്ത്രി വീണാ ജോര്‍ജിനെതിരേ എസ്ഡിപിഐ നേതൃത്വത്തില്‍ പത്തനംതിട്ടയിൽ സമരം നടന്നിരുന്നു. ഇതിനു പിന്നില്‍ നഗരസഭാ ചെയര്‍മാന്‍ സക്കീര്‍ ഹുസൈനാണെന്ന് റോബിന്‍ ഫേസ്ബുക്കിൽ ഇട്ട പോസ്റ്റാണ് പ്രകോപനകാരണമായതെന്നു പറയുന്നു. നഗരസഭയിലെ എസ്ഡിപിഐ ബാന്ധവമാണ് താൻ സിപിഎം വിടാൻ കാരണമായതെന്നും റോബിൻ പറഞ്ഞു. എസ്ഡിപിഐ പിന്തുണയോടെയാണ് സിപിഎം നഗരസഭ ഭരിക്കുന്നതെന്ന് അദ്ദേഹം ആരോപിച്ചു. കുറ്റക്കാരെ അറസ്റ്റ് ചെയ്യണം: സിപിഐ പത്തനംതിട്ട: മന്ത്രി വീണാ ജോർജിന്‍റെ ഓഫീസിലേക്ക് ചിലര്‍ നടത്തിയ പ്രതിഷേധ മാർച്ച് രാഷ്ട്രീയ ഗൂഢാലോചനയാണെന്നു ഫേസ്ബുക്ക് പോസ്റ്റിട്ട സിപിഐ പ്രവർത്തകനും മോട്ടോർ തൊഴിലാളി യൂണിയൻ (എഐടിയുസി) ജില്ലാ കമ്മിറ്റി അംഗവുമായ റോബിൻ വിളവിനാലിനെ വെട്ടി പരിക്കേൽപിച്ച സംഭവത്തിലെ മുഴുവന്‍ പ്രതികളെയും ഇതിനു പിന്നില്‍ ഗൂഢാലോചന നടത്തിയവരെയും ഉടന്‍ അറസ്റ്റ് ചെയ്ത് നിയമ നടപടികള്‍ സ്വീകരിക്കണമെന്ന് സിപിഐ മണ്ഡലം സെക്രട്ടറി ബി. ഹരിദാസ് ആവശ്യപ്പെട്ടു.

യുഡിടിഎഫ് ജില്ലാ കൺവൻഷൻ നടത്തി

പത്തനംതിട്ട: സംസ്ഥാനത്തെ തൊഴിൽ മേഖലയുടെ സാഹചര്യം കൂടി കണക്കിലെടുത്താകണം ദേശീയ സമരത്തെ സമീപിക്കാനെന്ന് യുടിയുസി സംസ്ഥാന ജനറൽ സെക്രട്ടറി ടി.സി. വിജയൻ. യുഡിടിഎഫ് ജില്ലാ കൺവൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തൊഴിലാളി യോഗങ്ങളിൽ ചങ്ങാത്ത മുതലാളിത്തത്തിനെതിരേ വാ തോരാതെ പ്രസംഗിക്കുകയും ഇതു പിന്തുടരുന്ന സംസ്ഥാന സർക്കാരിനെ പിന്തുണയ്ക്കുകയും ചെയ്യുന്ന തൊഴിലാളി യൂണിയനുകളുടെ സമീപനം ഇരട്ടത്താപ്പാണ്. സംസ്ഥാനത്ത് ക്ഷേമ ബോർഡുകൾ ആകെ തകർന്നു. തൊഴിലുറപ്പ് തൊഴിലാളികളുടെ കൂലി വിതരണം മുടങ്ങിയിട്ട് മാസങ്ങളായി. 20 ന് രാജ്യ വ്യാപകമായി കേന്ദ്ര ട്രേഡ് യൂണിയനുകൾ പ്രഖ്യാപിച്ചിട്ടുള്ള പൊതു പണിമുടക്കിൽ ഇത്തരം വിഷയങ്ങളും ചർച്ച ചെയ്യപ്പെടുമെന്ന് വിജയൻ പറഞ്ഞു. ജില്ലാ ചെയർമാൻ ജ്യോതിഷ് കുമാർ മലയാലപ്പുഴ അധ്യക്ഷത വഹിച്ചു. പി. കെ . ഗോപി, ഹരി കുമാർ പൂതങ്കര,തോട്ടുവാ മുരളി, പി. കെ. ഇഖ്ബാൽ,സമദ് മേപ്പുറത്തു, അയൂബ് കുമ്മണൂർ, കെ. പി. മധുസുദനൻ പിള്ള, തങ്കമ്മ രാജൻ, തോമസ് കുട്ടി, സി. സിറാജ്ദീൻ എന്നിവർ പ്രസംഗിച്ചു.

മോഷണശ്രമത്തിനിടെ മൂന്നുപേർ പിടിയിൽ

കോട്ടയത്തുനിന്നു മോഷ്ടിച്ച ബൈക്കും കണ്ടെത്തി തിരുവല്ല: മോഷ്ടിച്ച ബൈക്കുമായി തിരുവല്ലയിലെത്തി മോഷണശ്രമം നടത്തിയ കൗമാരക്കാരനടങ്ങിയ മൂവർ സംഘത്തെ തിരുവല്ല പോലീസ് സംഘം പിടികൂടി കോട്ടയം പോലീസിന് കൈമാറി. കഴിഞ്ഞദിവസം രാത്രി പെരുന്തുരുത്തിയിൽ ഒരു ഫർണിഷിംഗ് ഷോപ്പിനോടുചേർന്നുള്ള മുറിയുടെ പൂട്ട് തല്ലിപ്പൊളിക്കുന്നതായുള്ള വിവരം തിരുവല്ല പോലീസിൽ ലഭിച്ചതുപ്രകാരം, സ്ഥലത്തെത്തിയ പോലീസ് സംഘമാണ് ഇവരെ പിടികൂടിയത്. പൂട്ടുപൊളിക്കുന്നത് ശ്രദ്ധയിൽപെട്ട കടയിലെ ജീവനക്കാരൻഓടിയെത്തിയപ്പോഴേക്കും മോഷണസംഘത്തിലെ രണ്ടുപേർ ഓടി രക്ഷപ്പെട്ടു. ഒരാളെ പിടികൂടി തടഞ്ഞുവച്ചു. തുടർന്ന് സ്ഥലത്തെത്തിയ പോലീസ് ഇയാളെ കസ്റ്റഡിയിലെടുക്കുകയായിരുന്നു. പിന്നീട് മറ്റുള്ളവരെയും ഓടിച്ചിട്ടു പിടികൂടി. പന്തളം കൂരമ്പാല സൗത്ത് തെങ്ങുംവിളയിൽ വീട്ടിൽ അഭിജിത്(21), പന്തളം കടയ്ക്കാട് പണ്ടാരത്തിൽ തെക്കെപ്പാറ വീട്ടിൽ ജിഷ്ണു (19), കൗമാരക്കാരൻ (17) എന്നിവരെയാണ് പിടികൂടിയത്. എറണാകുളം ഈസ്റ്റ്‌ പോലീസ് രജിസ്റ്റർ ചെയ്ത ബൈക്ക് മോഷണ കേസിൽ അറസ്റ്റിലായി റിമാൻഡിൽ കഴിഞ്ഞശേഷം ഈയിടെയാണ് അഭിജിത് പുറത്തിറങ്ങിയത്. പന്തളത്തും പരിസരപ്രദേശങ്ങളിലും ബ്ലാക്ക്മാൻ മോഡൽ മോഷണപരമ്പര നടത്തി ജനങ്ങളെ ഭയചകിതരാക്കി ഉറക്കം കെടുത്തിയ കേസിൽ ഒന്നാം പ്രതിയുമാണ്. 17 കാരനും അഭിജിത് പ്രതിയായ ഈ മോഷണ കവർച്ചാ പരമ്പര കേസുകളിൽ ഉൾപ്പെട്ടിരുന്നു. ഇയാൾ മുമ്പ് മൊബൈൽ മോഷണത്തിന് തിരുവല്ല പോലീസെടുത്ത കേസിലും ഉൾപ്പെട്ടു. ജിഷ്ണു പന്തളം പോലീസ് രജിസ്റ്റർ ചെയ്ത കഞ്ചാവ് കേസിൽ പ്രതിയായിട്ടുള്ളതായും അന്വേഷണത്തിൽ വ്യക്തമായി. ഇവർ മോഷ്ടിച്ചു കടത്തിക്കൊണ്ടുവന്ന ബൈക്ക് സമീപത്തു വച്ചിരുന്നു. കോട്ടയത്തുനിന്നും മോഷ്ടിച്ചതായിരുന്നു ഹീറോ ഹോണ്ട സ്‌പ്ലെണ്ടർ മോട്ടോർ സൈക്കിൾ. വിശദമായി പരിശോധിച്ചപ്പോൾ മുന്നിലെയും പിന്നിലെയും നമ്പർ പ്ലേറ്റുകളിൽ ഓരോ അക്കം ചുരണ്ടി മാറ്റിയ നിലയിലായിരുന്നു. കോട്ടയത്തുനിന്നും വന്ന വഴിക്ക് തിരുവല്ലയിൽ മോഷണ ശ്രമം നടത്തിയതാണെന്ന് ചോദ്യം ചെയ്യലിൽ സമ്മതിച്ചു. ചെങ്ങന്നൂരിൽ നിന്നും ട്രെയിനിൽ കയറിയ സംഘം കോട്ടയത്ത് ഇറങ്ങി, ബൈക്ക് മോഷ്ടിച്ചശേഷം തിരുവല്ലയ്ക്ക് കടക്കുകയായിരുന്നു. പോലീസ് ഇൻസ്‌പെക്ടർ എസ്. സന്തോഷിന്‍റെ മേൽനോട്ടത്തിലാണ് നടപടികൾ കൈക്കൊണ്ടത്.

മുൻ കഞ്ചാവ് കേസ് പ്രതിയെ കഞ്ചാവുമായി വീണ്ടും പിടികൂടി

പത്തനംതിട്ട: മുൻ കഞ്ചാവ് കേസിലെ പ്രതിയും കഞ്ചാവ് വില്പന സംഘത്തിലെ മുഖ്യ കണ്ണിയുമായ പഴകുളം മലഞ്ചെരുവിൽ ഷഫീഖ് മൻസിലിൽ ഷഫീഖിനെ 815 ഗ്രാം കഞ്ചാവുമായി പത്തനംതിട്ട എക്സൈസ് നാർകോട്ടിക് സ്പെഷൽ സ്ക്വാഡ് പിടികൂടി. ഇതുമായി ബന്ധപ്പെട്ട് മയക്കുമരുന്ന് കേസ് രജിസ്റ്റർ ചെയ്ത് അനേഷണം ആരംഭിച്ചു. പത്തനംതിട്ട എക്‌സൈസ് സ്പെഷൽ സ്‌ക്വാഡ് സർക്കിൾ ഇൻസ്‌പെക്ടർ എ. സെബാസ്റ്റ്യന്‍റെ നേതൃത്വത്തിൽ, പന്തളം, പൂഴിക്കാട് ഭാഗങ്ങളിൽ നടത്തിയ പരിശോധനയിലാണ് 815 ഗ്രാം കഞ്ചാവ് കണ്ടെടുത്തത്. ഇയാൾ സഞ്ചരിച്ച ബൈക്കും കസ്റ്റഡിയിലെടുത്തു. ബൈക്കിൽ ഒപ്പം ഉണ്ടായിരുന്ന പഴകുളം സ്വദേശി അലിമിയാൻ ഓടി രക്ഷപെട്ടു. കേസിലെ രണ്ടാം പ്രതിയാണ് ഇയാളെന്ന് എക്സൈസ് സംഘം അറിയിച്ചു. ഷഫീഖിനെതിരേ പത്തനംതിട്ട നാർകോട്ടിക് സ്പെഷൽ സ്ക്വാഡ് ഓഫീസിൽ മുന്പും കേസുകൾ രജിസ്റ്റർ ചെയ്തിട്ടുണ്ട്.

ഫ്രാൻസിസ് മാർപാപ്പയുടെ സ്മരണയിൽ ചന്ദനപ്പള്ളി തിരുനാൾ

ചന്ദനപ്പള്ളി: സെന്‍റ് ജോർജ് മലങ്കര കത്തോലിക്കാ ദേവാലയത്തിലെ തിരുനാളിനോടനുബന്ധിച്ച് ഇന്നലെ ഫ്രാൻസിസ് മാർപാപ്പയ്ക്ക് ആദരാഞ്ജലി അർപ്പിച്ച് അനുസ്മരണ റാലി ചന്ദനപ്പള്ളിയിൽ നടന്നു. ദേവാലയത്തിൽ നിന്നാരംഭിച്ച റാലി ജംഗ്ഷനിലെത്തി തിരികെ പള്ളിയിൽ സമാപിച്ചു. അനുസ്മരണ സമ്മേളനം ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. സിപിഎം ജില്ലാ സെക്രട്ടറി രാജു ഏബ്രഹാം, ബിജെപി ജില്ലാ പ്രസിഡന്‍റ് വി. എ. സൂരജ്, ജില്ലാ പഞ്ചായത്തംഗം റോബിൻ പീറ്റർ, ബ്ലോക്ക് പഞ്ചായത്ത് പ്രസിഡന്‍റ് എം. പി. മണിയമ്മ, ഡിവൈഎസ്പി ജി. സന്തോഷ് കുമാർ, ഡോ. കെ. ബി. ജഗദീഷ്, തോമസ് ജോസ് അയ്യനേത്ത്, വികാരി ഫാ. ബെന്നി നാരകത്തിനാൽ തുടങ്ങിയവർ അനുസ്മരണ പ്രസംഗം നടത്തി. ആചാരപരമായി ചെന്പെടുപ്പ് ചന്ദനപ്പള്ളി കത്തോലിക്കാ പള്ളി തിരുനാളിന് ആഘോഷങ്ങൾ ഒഴിവാക്കിയിരുന്നതിനാൽ ഇത്തവണ ചെന്പെടുപ്പും ആചാരപരമായി മാത്രമായിരുന്നു. പുരുഷന്മാരും സ്ത്രീകളും നേതൃത്വം നൽകിയ ചെമ്പെടുപ്പ് റാസ ദേവാലയത്തിനു ചുറ്റുമായി തുടർന്നു നേർച്ചവിതരണവും നടന്നു. ഇന്നലെ രാവിലെ വള്ളിക്കോട്, വെള്ളപ്പാറ, കുടമുക്ക്, ഇടത്തിട്ട , തട്ട, കൈപ്പട്ടൂർ ഗ്രാമ പ്രതിനിധികൾ ചെന്പിൽ അരി സമർപ്പിച്ചു. പത്തനംതിട്ട രൂപതാധ്യക്ഷൻ സാമുവൽ മാർ ഐറേനിയോസ് മെത്രാപ്പോലീത്തയുടെ മുഖ്യ കാർമികത്വത്തിൽ കുർബാനയും പ്രഥമ ദിവ്യകാരുണ്യ സ്വീകരണവും നടന്നു. ഭവന, വിദ്യാഭ്യാസ, വിവാഹ, ചികിത്സ, പദ്ധതികളുടെ വിതരണം കേന്ദ്രമന്ത്രി ജോർജ് കുര്യൻ നിർവഹിച്ചു. ജോസ് ചന്ദനപ്പള്ളിയുടെ മഹാരക്തസാക്ഷി വിശുദ്ധഗീവർഗീസും ചന്ദനപ്പള്ളിയും എന്ന പുസ്തകത്തിന്‍റെ പ്രകാശനം ഡോ.സാമുവേൽ മാർ ഐറേനിയോസ് മെത്രാപ്പോലീത്തയും കേന്ദ്രമന്ത്രി ജോർജ് കുര്യനും ചേർന്നു നിർവഹിച്ചു. ഉച്ചയ്ക്ക് നടന്ന വെച്ചൂട്ടിൽ നൂറുകണക്കിന് വിശ്വാസികൾ പങ്കെടുത്തു. തിരുനാളിനു സമാപനം കുറിച്ച് 11നു രാവിലെ 8.30 ന് ഖസാഖിസ്ഥാനിലെ വത്തിക്കാൻസ്ഥാനപതി ആർച്ച് ബിഷപ് മാർ ജോർജ് പനംതുണ്ടിൽ കുർബാനയ്ക്കു മുഖ്യ കാർമികത്വം വഹിക്കും. ഇടവക വികാരി ഫാ. ബെന്നി നാരകത്തിനാൽ, സഹവികാരി ഫാ. സനു സാം തെക്കേകാവിനാൽ, ട്രസ്റ്റി വിൽസൺ പാലവിള, സെക്രട്ടറി ഫിലിപ്പ് കിടങ്ങിൽ, പ്രോഗ്രാം കൺവീനർ ബാബു കെ. പരുമല, ഫെബിൻ സാം എന്നിവർ നേതൃത്വം നൽകി.

വനിതാ ജീവനക്കാരെ കബളിപ്പിച്ച് പണം അപഹരിച്ചു

റാന്നി: റാന്നി മാമുക്കിലെ തുണിക്കടയിൽ എത്തിയ അപരിചിതൻ വനിതാ ജീവനക്കാരെ കബളിപ്പിച്ച് തുകയുമായി കടന്നു കളഞ്ഞതായി പരാതി. ഇന്നലെ വൈകുന്നേരം 4.30 ഓടെയാണ് സംഭവം. കടയുടമ അവിടെ ഇല്ലാത്ത സമയത്ത് കടയിലെത്തിയ മധ്യവയസ്കൻ തനിക്ക് നൽകാൻ ഇവിടെ ഒരാൾ തുക ഏല്പിച്ചിട്ടുണ്ടോ എന്ന ചോദ്യവുമായി വനിതാ ജീവനക്കാരെ സമീപിക്കുകയായിരുന്നു. ഇല്ലെന്നു പറഞ്ഞെങ്കിലും ഒരാൾ എനിക്കു തരാൻ 5300 രൂപയുമായി ഉടൻ വരുമെന്നും ഒരാൾക്ക് കൊടുക്കാൻ അത്യാവശ്യമുള്ളതിനാൽ അത്രയും പണം ഇവിടെ നിന്നു തന്ന് സഹായിക്കണമെന്നും അയാൾ പണവുമായി വരുമ്പോൾ മറക്കാതെ വാങ്ങണമെന്നും വിശ്വസിപ്പിച്ച് ഇത്രയും തുകയും വാങ്ങി ഉടൻ മുങ്ങുകയായിരുന്നു. ഏറെ നേരം കാത്തിട്ടും ആരും പണവുമായി എത്താത്തതിനേത്തുടർന്ന് ജീവനക്കാർ ഉടമയെ വിവരം അറിയിക്കുകയായിരുന്നു. ഇതു സംബന്ധിച്ച് പോലീസിൽ പരാതി നൽകിയിട്ടുണ്ട്.

ബര്‍ക്ക്മാന്‍സ് ഡിഫന്‍സ് അക്കാഡമി വെബിനാര്‍

കോട്ടയം: എസ്ബി കോളജില്‍ പ്രവര്‍ത്തിക്കുന്ന ബര്‍ക്ക്മാന്‍സ് ഡിഫന്‍സ് അക്കാഡമിയുടെ (ബിഇഡിഎ) നേതൃത്വത്തില്‍ ഡിഫന്‍സ് സര്‍വീസുകളിലെ പഠന-തൊഴില്‍ സാധ്യതകള്‍ പരിചയപ്പെടുത്തുന്ന വെബിനാര്‍ സംഘടിപ്പിക്കുന്നു. നാളെ രാത്രി 7.15 മുതലാണ് വെബിനാര്‍. പ്രവേശനം സൗജന്യമാണ്. 10 മുതല്‍ പിജി ആദ്യ വര്‍ഷ വിദ്യാര്‍ഥികള്‍ക്കും മാതാപിതാക്കള്‍ക്കും വെബിനാറില്‍ പങ്കെടുക്കാം. മേജര്‍ ജനറല്‍ ഇയാന്‍ കാര്‍ഡോസോ, മെറിന്‍ ജോസഫ്, ദിവ്യ എസ്. അയ്യര്‍, ബ്രിഗേഡിയര്‍ ഒ.എ. ജയിംസ്, കമാന്‍ഡര്‍ അനില്‍ ജോസഫ് എന്നിവര്‍ വെബിനാറില്‍ പ്രസംഗിക്കും. ഉന്നത ഉദ്യോഗസ്ഥരുമായി സംവദിക്കുവാനും തൊഴില്‍ സാധ്യതകള്‍ മനസിലാക്കാനും അവസരമുണ്ട്.

അതിരൂപത ദിനാചരണം വിളംബര ദീപം തെളിഞ്ഞു

ചങ്ങനാശേരി: 20ന് മെത്രാപ്പോലീത്തന്‍ പള്ളിയങ്കണത്തില്‍ നടക്കുന്ന 139-ാമത് ചങ്ങനാശേരി അതിരൂപത ദിനാചരണത്തിനു മുന്നോടിയായി നടന്ന വിളംബര സമ്മേളനം അതിരൂപത വികാരി ജനറാള്‍ മോൺ. ആന്‍റണി എത്തയ്ക്കാട്ട് ഉദ്ഘാടനം ചെയ്തു. മെത്രാപ്പോലീത്തന്‍ പള്ളിയില്‍ നടന്ന ചടങ്ങില്‍ വികാരി ഫാ. ജോസഫ് വാണിയപ്പുരയ്ക്കല്‍ അധ്യക്ഷത വഹിച്ചു. അതിരൂപത ദിന കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍, ഫൊറോന കൗണ്‍സില്‍ സെക്രട്ടറി സൈബി അക്കര തുടങ്ങിയവര്‍ പ്രസംഗിച്ചു. പരിപാടികളുടെ വിജയത്തിനായി വികാരി ജനറാള്‍ ജനറല്‍ മോണ്‍. ആന്‍റണി എത്തയ്ക്കാട്ട് ജനറല്‍ കണ്‍വീനറായി 501 അംഗ സ്വാഗതസംഘത്തിനു രൂപം നല്‍കിയിട്ടുണ്ട്. ഫാ. ജോബിന്‍ ആനക്കല്ലുങ്കല്‍, ഫാ. ചെറിയാന്‍ കക്കുഴി, ഫാ. ജിന്‍സ് ചോരേട്ട് ചാമക്കാല, (കോ-ഓർഡിനേറ്റര്‍മാര്‍), മെത്രാപ്പോലീത്തന്‍പള്ളി വികാരി ഫാ. ജോസഫ് വാണിയപ്പുരയ്ക്കല്‍, ഫാ. ജോഷി പുത്തന്‍പുരയ്ക്കല്‍, ഫാ. മാത്യു നടമുഖത്ത്, ഫാ. ഐബിന്‍ പകലോമറ്റം, ഫാ. തോമസ് കൊറ്റത്തില്‍, ഫാ. മിന്‍റു മൂന്നുപറയില്‍, ഫാ. ജിന്‍റോ മുര്യങ്കരി, ഫാ. ജേക്കബ് പാറയ്ക്കല്‍, ഫാ. ജിജോ മാറാട്ടുകളം തുടങ്ങിയവര്‍ വിവിധ കമ്മിറ്റികളുടെ കണ്‍വീനർമാരാണ്.

ആശ പ്രവർത്തകരുടെ രാപകൽ സമരയാത്രയ്ക്കു സ്വീകരണം

പത്തനംതിട്ട: കേരള ആശ ഹെൽത്ത് വർക്കേഴ്സ് അസോസിയേഷൻ സംസ്ഥാന ജനറൽ സെക്രട്ടറി എം. എ. ബിന്ദു നയിക്കുന്ന ആശാ പ്രവർത്തകരുടെ രാപകൽ സമര യാത്രയെ സ്വീകരിക്കാനുള്ള സ്വാഗതസംഘ രൂപീകരണം 10 നു നടക്കും. രാവിലെ 10 ന് പത്തനംതിട്ട ടൗൺ വൈഎംസിഎ ഹാളിൽ ചേരുന്ന യോഗം ഡോ. ഗീവർഗീസ് മാർ കൂറിലോസ് ഉദ്ഘാടനം ചെയ്യും, ജോസഫ് സി. മാത്യു മുഖ്യപ്രഭാഷണം നടത്തും. അഞ്ചിന് കാസർഗോഡു നിന്ന് ആരംഭിച്ച സമര യാത്ര ജൂൺ 9,10 തീയതികളിലാണ് ജില്ലയിൽ പര്യടനം നടത്തുന്നത്. 87 ദിവസം പിന്നിട്ട സെക്രട്ടേറിയറ്റ് പടിക്കലെ ആശാവർക്കർമാരുടെ സമരത്തിന് വലിയ ജനപിന്തുണയാണ് ലഭിച്ചുകൊണ്ടിരിക്കുന്നത്. ഇതേ മാതൃകയിൽ അസോസിയേഷൻ പ്രഖ്യാപിച്ച സമര യാത്രയെ സ്വീകരിക്കാനും പൊതുസമൂഹം മുന്നോട്ടു വരുന്നുണ്ടെന്ന് ഭാരവാഹികൾ പറഞ്ഞു.

മാർപാപ്പ അനുസ്മരണം ഇന്ന്

പത്തനംതിട്ട: ആഗോള കത്തോലിക്കാ സഭയുടെ പരമാധ്യക്ഷനായിരുന്ന ഫ്രാൻസിസ് മാർപാപ്പ അനുസ്മരണം ഇന്ത്യൻ സോസൈറ്റി ഫോർ കൾച്ചർ കോ ഓപ്പറേഷൻ ആൻഡ് ഫ്രണ്ട്ഷിപ്പ് (ഇസ്കഫ് )പത്തനംതിട്ട ജില്ലാ കമ്മിറ്റി ഇന്ന് പത്തനംതിട്ട വൈഎംസിഎ ഹാളിൽ നടത്തും. ജില്ലാ പ്രസിഡന്‍റ് ശ്യാം റ്റി. മാത്യുവിന്‍റെ അധ്യക്ഷതയിൽ ഇസ്കഫ് പ്രസീഡിയം ചെയർമാനും മുൻ മന്ത്രിയുമായ മുല്ലക്കര രത്നാകാരൻ, ബിഷപ്പുമാരായ ഡോ. സാമുവേൽ മാർ ഐറേനിയോസ്, ഡോ. ഏബ്രഹാം മാർ സെറാഫിം, സംസ്ഥാന ലൈബ്രറി കൗൺസിൽ വൈസ് പ്രസിഡന്‍റ് എ. പി. ജയൻ, നഗരസഭ ചെയർമാൻ ടി. സക്കീർ ഹുസൈൻ, ലാലു ജോൺ, രേഖ അനിൽ, വി. കെ. പുരുഷോത്തമൻ പിള്ള, കെ. എൻ. സത്യാനന്ദ പണിക്കർ, ജോസ് തയ്യിൽ, എ. ജയകുമാർ, സിജു സാമുവേൽ തുടങ്ങിയവർ പ്രസംഗിക്കും.

സുരക്ഷാ അവബോധത്തിന് മോക്ഡ്രിൽ; ജില്ലയിൽ ഏഴിടങ്ങളിൽ മുന്നറിയിപ്പ് സൈറൺ

പത്തനംതിട്ട: ഏതു സുരക്ഷാ ഭീഷണിയെയും ഒറ്റക്കെട്ടായി നേരിടണമെന്നുള്ള ആഹ്വാനത്തോടെ ജില്ലയിലും മോക്ഡ്രിൽ. അത്യാഹിതങ്ങളുണ്ടായാൽ അവയെ നേരിടാനുള്ള തയാറെടുപ്പുകൾ അവതരിപ്പിച്ച് പൊതുസമൂഹത്തെ ജാഗരൂകരാക്കുന്നതിന്‍റെ ഭാഗമായാണ് സിവിൽ ഡിഫൻസ് മോക്ഡ്രില്ലുകൾ നടന്നത്. രാജ്യമൊട്ടാകെ നടന്ന തയാറെടുപ്പിന്‍റെ ഭാഗമായി പത്തനംതിട്ട ജില്ലയിലെ ഏഴിടങ്ങളിലാണ് വൈകുന്നേരം നാലിന് മുന്നറിയിപ്പ് സൈറണുകൾ മുഴങ്ങിയത്. ഇത്തരം സ്ഥലങ്ങളിലും സമീപത്തെ സർക്കാർ ഓഫീസുകളിലും ആവശ്യമായ ക്രമീകരണങ്ങളോടെ മോക്ഡ്രിൽ അരങ്ങേറി. അത്യാഹിതം ഉണ്ടായാൽ അവയെ എങ്ങനെ നേരിടണമെന്നതായിരുന്നു വിവിധ വകുപ്പുകളുടെയും സന്നദ്ധ സേനാംഗങ്ങളുടെയും സഹകരണത്തിൽ അവതരിപ്പിച്ച മോക്ഡ്രിൽ. ആക്രമണ സമയത്ത് സ്വീകരിക്കേണ്ട നടപടി സംബന്ധിച്ച് ഉദ്യോഗസ്ഥരെയും പൊതുജനങ്ങളെയും തയാറാക്കുക, പരിശീലനവും സംരക്ഷണവും നല്‍കുക, നാശനഷ്ടം പരമാവധി കുറയ്ക്കുക, സായുധ സേനകളുടെ പ്രവര്‍ത്തനത്തെ സഹായിക്കുക എന്നിവയാണ് സിവില്‍ ഡിഫന്‍സിലൂടെ ലക്ഷ്യമിട്ടത്. പത്തനംതിട്ട കളക്ടറേറ്റ്, തിരുവല്ല റവന്യൂ ടവർ, കടപ്ര കണ്ണശ സ്മാരക സ്കൂൾ, കീക്കൊഴൂർ ഗവ. എച്ച്എസ്എസ്, കോഴഞ്ചേരി ഗവൺമെന്‍റ് എച്ച്എസ്എസ്, ചിറ്റാർ - കൊടുമുടി കമ്യൂണിറ്റി സ്റ്റഡ‌ി സെന്‍റർ, അച്ചൻകോവിൽ പ്രീമെട്രിക് ഹോസ്റ്റൽ എന്നിവിടങ്ങളിലാണ് മുന്നറിയിപ്പ് സൈറണുകൾ മുഴങ്ങിയത്. കളക്ടറേറ്റിൽ മൂന്ന് ഘട്ടങ്ങളിലായി മോക്ഡ്രിൽ കേന്ദ്ര ആഭ്യന്തര മന്ത്രാലയത്തിന്‍റെ നിര്‍ദേശപ്രകാരം ജില്ലാ ഭരണകൂടത്തിന്‍റെ നേതൃത്വത്തില്‍ കളക്ടറേറ്റില്‍ നടന്ന സിവില്‍ ഡിഫന്‍സ് മോക്ഡ്രില്‍ മൂന്ന് ഘട്ടങ്ങളിലായിരുന്നു ക്രമീകരിച്ചത്. വ്യോമാക്രമണം, തീപിടിത്തം, കെട്ടിടം തകരല്‍ എന്നീ അപകടസാഹചര്യങ്ങളില്‍ സ്വീകരിക്കേണ്ട മുന്‍കരുതല്‍ സംബന്ധിച്ച് ഉദ്യോഗസ്ഥര്‍ക്ക് ബോധവത്കരണം നല്‍കുകയായിരുന്നു ലക്ഷ്യം. വ്യോമാക്രമണ ഭീഷണി മുന്‍നിര്‍ത്തി വൈകുന്നേരം നാലിന് അപായ സൂചന നല്‍കുന്ന ആദ്യ സൈറണ്‍ തുടര്‍ച്ചയായി മൂന്ന് തവണ മുഴങ്ങി. മൈക്കിലൂടെ നിര്‍ദേശം ലഭിച്ചതോടെ കളക്ടറേറ്റ് ജീവനക്കാര്‍ ഓഫീസിനുള്ളില്‍ വാതിലുകളും ജനലുകളും അടച്ച് വെളിച്ചം പൂര്‍ണമായും കെടുത്തി സുരക്ഷിത ഇടങ്ങളിലേക്ക് മാറി. വ്യോമാക്രമണം ഉണ്ടാകുമ്പോള്‍ ശത്രുവിനെ വഴിതെറ്റിക്കാനായി കെട്ടിടങ്ങള്‍ പൂര്‍ണമായി മറച്ച് സംരക്ഷിക്കുന്ന കൊഫ്‌ളോജും അവതരിപ്പിച്ചു. തീപിടിത്തതില്‍നിന്ന് എങ്ങനെ രക്ഷ നേടാം എന്നതായിരുന്നു രണ്ടാംഘട്ടം. 4.30 ന് മുന്നറിയിപ്പ് സൈറണ്‍ മുഴങ്ങി. എല്ലാ ഓഫീസുകളിലെയും ജീവനക്കാര്‍ താത്കാലികമായി ഒരുക്കിയ സുരക്ഷിത ഇടത്തേക്ക് മാറി. കെട്ടിടം തകരുമ്പോള്‍ ഉള്ളില്‍ അകപ്പെട്ടവരെ രക്ഷിക്കുന്നതും അവതരിപ്പിച്ചു. അഗ്നിസുരക്ഷ സേനയുടെ നേതൃത്വത്തിലായിരുന്നു രക്ഷാപ്രവര്‍ത്തനം. അപകടത്തിൽപെട്ടവരെ താത്കാലിക ആശുപത്രിയിലേക്ക് സുരക്ഷിതമായി മാറ്റുന്നതും ചിത്രീകരിച്ചു. റവന്യൂ, പോലീസ്, ആരോഗ്യം, തദ്ദേശസ്വയം ഭരണം, വൈദ്യുതി, ഭക്ഷ്യസുരക്ഷാ വകുപ്പുകള്‍ മോക്ഡ്രില്ലുമായി സഹകരിച്ചു. ജില്ലാ കളക്ടര്‍ എസ്. പ്രേംകൃഷ്ണന്‍, എഡിഎം ബി. ജ്യോതി, ഡെപ്യൂട്ടി കളക്ടര്‍മാരായ ആര്‍. രാജലക്ഷ്മി, ബീനാ എസ്. ഹനീഫ്, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]