കോഴിച്ചാൽ തുരുത്ത് പാലം ഉദ്ഘാടനം ചെയ്തു

ചെറുപുഴ: കാര്യങ്കോട് പുഴയ്ക്ക് കുറുകെ നിർമിച്ച കോഴിച്ചാൽ തുരുത്ത് പാലം ഉദ്ഘാടനം ചെയ്തു. 14 ലക്ഷം രൂപ ചെലവഴിച്ച് ചെറുപുഴ പഞ്ചായത്ത് നിർമിച്ച സ്റ്റീൽ പാലത്തിന്‍റെ ഉദ്ഘാടനം ടി.ഐ. മധുസൂദനൻ എംഎൽഎ നിർവഹിച്ചു.

ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ അധ്യക്ഷത വഹിച്ചു.
വൈസ് പ്രസിഡന്‍റ് റെജി പുളിക്കൽ, ബ്ലോക്ക് പഞ്ചായത്തംഗം എ.സി. പൗലോസ്, പഞ്ചായത്തംഗങ്ങളായ സിബി എം. തോമസ്, മാത്യു കാരിത്താങ്കൽ, രജിത സജി, സജിനി മോഹൻ, വി. ഭാർഗവി, മുൻ പഞ്ചായത്തംഗം ജോയിസ് പുത്തൻപുര എന്നിവർ പ്രസംഗിച്ചു.

ADVERTISEMENT

മൂക്കിലൂടെ വിസിലടിച്ച് ആറു വയസുകാരൻ

കേളകം: ഹൃദയ് എന്ന ആറു വയസുകാരൻ പുറപ്പെടുവിക്കുന്ന വിസിലടി ശബ്ദം കേൾക്കുന്നവർക്കും കാഴ്ചക്കാർക്കും അദ്ഭുതമാകുന്നു. മിക്കവരും ചുണ്ടുകളുടെ പ്രത്യേകരീതിയിലുള്ള ഉപയോഗത്തിലൂടെയാണ് വിസിൽ അടിക്കുന്ന ശബ്ദം ഉണ്ടാക്കുന്നതെന്നിരിക്കെ ഹൃദയ് ചുണ്ടുകൾ ചലിപ്പിക്കാതെയാണ് വിസിൽ ശബ്ദം കേൾപ്പിക്കുന്നത്. മൂക്കിലൂടെ ശ്വാസക്രമീകരണത്തിലൂടെയാണ് ഹൃദയിന്‍റെ വിസിലടി. കേൾക്കുന്നവർക്ക് ഇത് ഒറിജിനൽ വിസിൽ ശബ്ദമാണെന്നോ തോന്നൂ. കൊട്ടിയൂരിലെ ചുങ്കക്കുന്ന് കോടൂർ ആതിര-രഞ്ജിത്ത് ദമ്പതികളുടെ മകനാണ് ഹൃദയ്. ചുണ്ടുകൾ ചലിപ്പിക്കാതെ ചൂളം അടിക്കുന്ന ശബ്ദംകേട്ട് മാതാപിതാക്കൾ ആദ്യം പരിഭ്രമിച്ചെങ്കിലും ശ്വാസം അടക്കിപ്പിടിച്ച് മൂക്കുപയോഗിച്ചാണ് ശബ്ദമുണ്ടാക്കുന്നതെന്ന് മനസിലായതോടെ പരിഭ്രമം അദ്ഭുതത്തിന് വഴിമാറി. കഴിഞ്ഞ തിരുവോണ ദിവസമാണ് ബന്ധുക്കൾ ഹൃദയിന്‍റെ ഈ കഴിവ് ശ്രദ്ധിക്കുന്നത്. ഉടൻതന്നെ സോഷ്യൽ മീഡിയയിൽ പോസ്റ്റ് ചെയ്തു. പിന്നാലെ നെഗറ്റീവ് കമന്‍റസും വരാൻ തുടങ്ങി. കുഞ്ഞു ഹൃദയ്ക്ക് അസുഖമാണെന്നും ഉടൻതന്നെ ഡോക്ടറെ സമീപിക്കണമെന്നുള്ള കമന്‍റുകൾ അമ്മ ആതിരയെ അസ്വസ്ഥയാക്കിയിരുന്നു. എന്നാൽ ഡോക്ടർമാരുമായി സംസാരിച്ചപ്പോൾ പേടിക്കാനൊന്നുമില്ലെന്ന മറുപടി ലഭിച്ചതോടെയാണ് സമാധാനമായത്. കൊട്ടിയൂർ ചുങ്കക്കുന്ന് ഗവ. യുപി സ്കൂളിലെ ഒന്നാം ക്ലാസ് വിദ്യാർഥിയാണ് ഹൃദയ്. അച്ഛൻ രഞ്ജിത്ത് ഇലക്ട്രീഷ്യനാണ്.

വിധിയില്‍ തളരാത്ത രാധിക പുതുജീവിതത്തിലേക്ക്

പിലാത്തറ: കളിക്കൂട്ടുകാരനായിരുന്ന പ്രജിലിന്‍റെ കൈപിടിച്ച് രാധിക പുതുജീവിതത്തിലേക്ക് വലതുകാല്‍വെച്ച് കയറിയപ്പോള്‍ അത് വിധിക്കെതിരെ പോരാടി നേടിയ വിജയം കൂടിയായി. പഴയങ്ങാടി നെരുവമ്പ്രത്തെ ലോട്ടറി കച്ചവടക്കാരനായിരുന്ന ശേഖരന്‍റെയും പാചകതൊഴിലാളിയായ റാണി മേരിയുടെയും മൂന്നു മക്കളില്‍ മൂത്തവളായ രാധികയാണ് നിശ്ചയദാര്‍ഢ്യം കൊണ്ട് വിധിക്കെതിരെ പോരാടി നേടിയ വിജയവുമായി വിവാഹ ജീവിതത്തിലേക്ക് പ്രവേശിച്ചത്. വലതു കാല്‍മുട്ടിനു താഴെ വളര്‍ച്ചയില്ലാത്ത നിലയിലായിരുന്നു രാധികയുടെ ജനനം. സ്വന്തമായി വീടുപോലും ഇല്ലാതിരുന്ന നിര്‍ധന കുടുംബത്തിന് രാധികയുടെ ചികിത്സയും വിദ്യാഭ്യാസവും വെല്ലുവിളിയായിരുന്നു. എല്‍പി സ്‌കൂളില്‍ ചേര്‍ത്തപ്പോള്‍ അമ്മയുടെ ഒക്കത്തുകയറിയായിരുന്നു സ്‌കൂളിലേക്കുള്ള പോക്കും വരവും. രാധികയുടേയും കുടുംബത്തിന്‍റെ അവസ്ഥ മനസിലാക്കിയ പിലാത്തറ ഹോപ്പ് ചാരിറ്റബിള്‍ ട്രസ്റ്റിന്‍റെ സഹായത്തോടെ വലതു കാല്‍മുട്ടിന് താഴെ ശസ്ത്രക്രിയ നടത്തി കൃത്രിമകാല്‍ വച്ചുപിടിപ്പിച്ചത് ജീവിതത്തിലെ വഴിത്തിരിവായി. ‌ കൃത്രിമക്കാലിൽ പിച്ചവയ്ക്കാന്‍ ആരംഭിച്ച രാധിക പരസഹായമില്ലാതെ വിദ്യാഭ്യാസവും ഇഷ്ടമേഖലയായ നൃത്തപഠനവും തുടര്‍ന്നു. വിദ്യാഭ്യാസ ചെലവുകള്‍ ഹോപ്പ് ചാരിറ്റബിള്‍ ട്രസ്റ്റ് വഹിച്ചതോടെയാണ് പഠനം മുന്നേറിയത്. സ്‌കൂള്‍- ഹയര്‍ സെക്കന്‍ഡറി വിദ്യാഭ്യാസം മാടായി സ്‌കൂളിലും തുടര്‍ന്ന് ഡിഗ്രി പഠനം മാടായി കോളേജിലുമായി പൂർത്തിയാക്കി. ഒപ്പം കംപ്യൂട്ടർ ഡാറ്റാ എന്‍ട്രിയില്‍ പരിശീലനവും നേടി. ഇനി ജീവിതം പച്ചപിടിപ്പിക്കാനായി സ്വന്തമായി ഒരു ജോലി വേണമെന്ന ആഗ്രഹവുമായി കഴിയുമ്പോഴാണ് ബാല്യകാല സുഹൃത്തും സമീപവാസിയുമായ പ്രജില്‍ രാധികയെ ജീവിതത്തിലേക്ക് ക്ഷണിച്ചത്. തന്‍റെ പോരായ്മകള്‍ ബോധ്യമുണ്ടായിരുന്നതിനാല്‍ രാധിക വിസമ്മതിക്കുകയായിരുന്നു. ‌എന്നാല്‍ രാധികയുടെ ശാരീരിക സാമ്പത്തിക പോരായ്മകള്‍ പ്രശ്‌നമല്ലെന്ന നിലപാടില്‍ പ്രജിലും വീട്ടുകാരും ഉറച്ചുനിന്നതോടെ രാധിക നിലപാട് മാറ്റി. ഇതോടെ സന്തോഷകരമായി മനസമ്മതവും നടന്നു. ഇതിനിടയിലാണ് ജന്മനാ കൂടപ്പിറപ്പായിരുന്ന വിധി വീണ്ടും രാധികയെ വെല്ലുവിളിച്ചത്. എപ്പോഴും താങ്ങും തണലുമായി രാധികയുടെ കൂടെ നിന്നിരുന്ന അച്ഛന്‍ ശേഖരനെ ഹൃദയാഘാതത്തിന്‍റെ രൂപത്തിലെത്തിയ മരണം തട്ടിയെടുത്തത് രാധികയ്ക്ക് കനത്ത ആഘാതമായി. അപ്പോഴും സഹായങ്ങളുമായി കൂടെ നിന്നിരുന്ന പ്രജിലും കുടുംബവുമാണ് ആശ്വാസമായത്. ജീവിതത്തിന് കരുത്തായി മാറിയ ഹോപ്പില്‍ തന്നെ വിവാഹം നടത്താമെന്ന ആഗ്രഹം പ്രകടിപ്പിച്ചപ്പോൾ ഹോപ്പ് അധികൃതര്‍ സന്തോഷത്തോടെ ആ ദൗത്യം ഏറ്റെടുക്കുകയായിരുന്നു. ക്ഷണിക്കപ്പെട്ട സാമൂഹിക-സാംസ്‌കാരിക പ്രമുഖരുടെ സാന്നിധ്യത്തിലായിരുന്നു വിവാഹം. ഇനിയൊരു തൊഴിൽ എന്നതാണ് രാധികയുടെ ആഗ്രഹം. തൊഴില്‍ നല്‍കാന്‍ ഏതെങ്കിലുമൊരു തൊഴില്‍ദാതാവ് മുന്നോട്ടുവരുമെന്നാണ് പ്രതീക്ഷ.

കണ്ണൂർ വാരിയേഴ്സിന്‍റെ വിദേശ താരങ്ങൾക്ക് സ്വീകരണം നൽകി

കണ്ണൂര്‍: കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബിന്‍റെ രണ്ടാം സീസണിലെ വിദേശതാരങ്ങള്‍ക്ക് വിമാനത്താവളത്തില്‍ വാരിയേഴ്സ് ക്ലബ് ആരാധകുടെ കൂട്ടായ്മയായ റെഡ് മറൈനേഴ്സ് സ്വീകരണം നൽകി. സെനഗലില്‍ നിന്നുള്ള സ്‌ട്രൈക്കര്‍ അബ്ദുകരിം സാംബ് ആണ് ആദ്യം എത്തിയത്. ശനിയാഴ്ച രാത്രി 8.20 ന് എത്തിയ താരത്തെ ടീം മാനേജര്‍ അല്‍ഫിന്‍ ടീമിന്‍റെ പെനന്‍റ് (ഹാന്‍ഡ് ഫ്‌ളാഗ്) നൽകി സ്വീകരിച്ചു. തുടര്‍ന്ന് ആരാധകരില്‍ നിന്ന് രണ്ടുപേര്‍ താരത്തെ സ്‌കാഫ് അണിയിച്ചു. താരത്തെ കാത്ത് ഇരുപതോളം ആരാധകര്‍ വിമാനത്താവളത്തില്‍ എത്തിയിരുന്നു. സ്വാഗതം ചെയ്ത് കൊണ്ടുള്ള ബാനറിനു പിന്നില്‍ എല്ലാവരും അണിനിരന്ന് കൈയടികളോടെ ഉച്ചത്തിലുള്ള ചാന്‍റുകള്‍ ചൊല്ലിയാണ് താരത്തെ വരവേറ്റത്. ഇന്നലെ പുലർച്ചെ 2.30 ന് മധ്യനിര താരം ടുണീഷ്യയില്‍ നിന്നുള്ള നിദാല്‍ കോഴിക്കോട് വിമാനത്താവളത്തിലിറങ്ങി. തുടര്‍ന്ന് കാർമാര്‍ഗം കണ്ണൂരിലെത്തി. വൈകുന്നേരം 5.45 ന് സ്പാനിഷ് താരങ്ങളായ അസിയര്‍, അഡ്രിയാന്‍ എന്നിവരും കണ്ണൂര്‍ വിമാനത്താവളത്തിലെത്തി. ആദ്യ സീസണില്‍ ടീമിന് വേണ്ടി മികച്ച പ്രകടനം കാഴ്ചവച്ച താരങ്ങളായത് കൊണ്ട് തന്നെ നിരവധി ആരാധകരാണ് വിമാനത്താവളത്തിലെത്തിയത്. ഇന്നു മുതല്‍ നാല് താരങ്ങളും ടീമിനൊപ്പം പരിശീലനം ആരംഭിക്കും. മുഖ്യപരിശീലകനും രണ്ട് വിദേശതാരങ്ങളുമാണ് ഇനി ടീമിനൊപ്പം ചേരാനുള്ളത്. കണ്ണൂര്‍ പോലീസ് പരേഡ് ഗ്രൗണ്ടിലാണ് പരിശീലനം. ഇന്ത്യയില്‍ നിന്നുള്ള എല്ലാ താരങ്ങളും നിലവില്‍ ടീമിനൊപ്പമുണ്ട്. 2024 ല്‍ കണ്ണൂർ വാരിയേഴ്സ് ക്ലബ് രൂപീകരിച്ച സമയത്താണ് റെഡ് മറൈനേഴ്‌സ് എന്ന ആരാധക കൂട്ടായ്മയും സ്ഥാപിതമായത്. കളിയാവേശം വിതറുന്നതിനൊപ്പം വിവിധ സമൂഹ്യസേവന പ്രവര്‍ത്തനങ്ങളിലും റെഡ് മറൈനേഴ്സ് സജീവമാണ്. ആദ്യ സീസണില്‍ കോഴിക്കോട് ഹോം സ്‌റ്റേഡിയം ആയിരുന്നപ്പോള്‍ കണ്ണൂരില്‍ നിന്ന് കോഴിക്കോട് എത്തിയാണ് റെഡ് മറൈനേഴ്‌സ് ടീമിന് ആവേശം പകർന്നത്.

ടിസിഎസ് റൂറല്‍ ഐടി ക്വിസ് രജിസ്‌ട്രേഷന്‍ ആരംഭിച്ചു

കണ്ണൂർ: ബംഗളൂരു ടെക് സമ്മിറ്റ് 2025-ന്‍റെ ഭാഗമായി കര്‍ണാടക സര്‍ക്കാരിന്‍റെ ഇലക്ട്രോണിക്-ഐടി വകുപ്പും ടാറ്റാ കണ്‍സല്‍ട്ടന്‍സി സര്‍വിസും സംയുക്തമായി ചെറുനഗരങ്ങളില്‍ നടത്തുന്ന റൂറല്‍ ഐടി ക്വിസിന്‍റെ രജിസ്‌ട്രേഷന്‍ ആരംഭിച്ചു. കേരളത്തില്‍ കണ്ണൂർ, മലപ്പുറം എന്നീ രണ്ടു കേന്ദ്രങ്ങൾ മാത്രമാണുള്ളത്. ഓണ്‍ലൈന്‍ ടെസ്റ്റുകള്‍, വിർച്വല്‍, ഫിസിക്കല്‍ ക്വിസ് എന്നിവ അടങ്ങിയതായിരിക്കും മത്സരം. എട്ടു മുതല്‍ 12 വരെ ക്ലാസുകളിലെ വിദ്യാർഥികൾക്കായാണ് മത്സരം. സിറ്റി, കോര്‍പറേഷന്‍ പരിധികളിലെ സ്‌കൂളുകളിലെ വിദ്യാർഥികൾക്ക് പങ്കെടുക്കാനാകില്ല. ടെക്നോളജി എന്‍വയോണ്‍മെന്‍റ്, ബിസിനസ്, അതിലെ വ്യക്തികൾ, ആര്‍ട്ടിഫിഷ്യല്‍ ഇന്‍റലിജന്‍സും ക്ലൗഡ് കംപ്യൂട്ടിംഗ് ഉള്‍പ്പെടെയുള്ള പുതിയ പ്രവണതകള്‍ തുടങ്ങി സാങ്കേതികവിദ്യാ ഉപയോഗത്തിന്‍റെ വിവിധ മേഖലകളിലേക്ക് ഫോക്കസ് ചെയ്തുള്ള ചോദ്യങ്ങളുണ്ടാകും. ബാങ്കിംഗ്, വിദ്യാഭ്യാസം, വിനോദം, റോബോട്ടിക്സ്, പുസ്തകങ്ങള്‍, മള്‍ട്ടീമീഡിയ, സംഗീതം, സിനിമ, ഇന്‍റര്‍നെറ്റ്, പരസ്യം, കായിക മേഖല, ഗെയിമിംഗ്, സാമൂഹ്യമാധ്യമങ്ങള്‍ തുടങ്ങിയ ഐടി സ്വാധീനം ചെലുത്തുന്ന മേഖലകളും ക്വിസിന്‍റെ പരിധിയിൽ വരും. രാജ്യത്താകമാനം എട്ട് മേഖലാ ഫൈനലുകൾ നടക്കും. മേഖലാ ഫൈനലുകളിലെ വിജയികളാണ് നവംബറിൽ ബംഗളൂരുവിൽ നടക്കുന്ന ദേശീയ ഫൈനലിൽ പങ്കെടുക്കുക. മേഖലാ ജേതാക്കൾക്ക് 10,000 രൂപയുടെ ഗിഫ്റ്റ് വൗച്ചറുകളും രണ്ടാം സ്ഥാനക്കാര്‍ക്ക് 7,000 രൂപയുടെ വൗച്ചറുകളും ലഭിക്കും. മത്സരത്തിലെ ദേശീയ ജേതാവിന് ഒരു ലക്ഷം രൂപയുടെ ടിസിഎസ് എഡ്യുക്കേഷന്‍ സ്‌കോളര്‍ഷിപ് സമ്മാനമായി ലഭിക്കും. ദേശീയ തലത്തിലെ രണ്ടാം സ്ഥാനക്കാര്‍ക്ക് 50,000 രൂപയുടെ സ്‌കോളര്‍ഷിപ്പും ലഭിക്കും. പങ്കെടുക്കുന്നതിനായി htt ps://iur.ls/tcsruralitquiz2025reg എന്ന വെബ്‌സൈറ്റിലൂടെ സെപ്റ്റംബര്‍ 30 ന് മുന്പായി രജിസ്റ്റര്‍ ചെയ്യണം. കഴിഞ്ഞ വര്‍ഷത്തെ ടിസിഎസ് റൂറല്‍ ഐടി ക്വിസില്‍ 28 സംസ്ഥാനങ്ങളില്‍ നിന്നും നാലു കേന്ദ്ര ഭരണ പ്രദേശങ്ങളില്‍ നിന്നുമായി 5.6 ലക്ഷത്തിലധികം കുട്ടികള്‍ പങ്കെടുത്തിരുന്നു.

പൂജാ അവധിക്ക് ബംഗളൂരു, മൈസൂരു റൂട്ടിൽ കെഎസ്ആർടിസി സ്പെഷൽ സർവീസ്

കണ്ണൂർ: പൂജാ അവധി പ്രമാണിച്ച് ബംഗളൂരു, മൈസൂരു എന്നിവിടങ്ങളിൽ നിന്ന് കേരളത്തിലേക്കും തിരിച്ചും കെഎസ്ആർടിസി 20 അധിക സർവീസ് നടത്തും. ചെന്നൈയിലേക്ക് രണ്ട് അധിക സർവീസും നടത്തും. 25 മുതൽ ഒക്ടോബർ വരെയാണ് സർവീസ് നടത്തുന്നത്. ഏഴ് സൂപ്പർ ഫാസ്റ്റുകളും 15 സൂപ്പർ ഡീലക്സ് ബസുകളും അധിക സർവീസിനായി വിനിയോഗിക്കും. കോഴിക്കോട്- ബംഗളൂരു റൂട്ടിലും തിരിച്ചും കുട്ട- മാനന്തവാടി- മൈസൂരു വഴി നാലു വീതം സൂപ്പർ ഫാസ്റ്റ് സർവീസുകൾ ദിവസവും ഉണ്ടാകും. ബംഗളൂരു- മലപ്പുറം റൂട്ടിലും കുട്ട വഴി സൂപ്പർ ഫാസ്റ്റ് സർവീസ് നടത്തും.‌ എറണാകുളം (രണ്ട്), തൃശൂർ, തിരുവനന്തപുരം, കോട്ടയം, കൊല്ലം, അടൂർ, കൊട്ടാരക്കര, പുനലൂർ, ചേർത്തല, ഹരിപ്പാട്, എന്നിവിടങ്ങളിലേക്കും തിരിച്ചും സൂപ്പർ ഡീലക്സ് ബസുകൾ കോയന്പത്തൂർ, പാലക്കാട് വഴി സർവീസ് നടത്തും. ഇരിട്ടി - മട്ടന്നൂർ വഴി കണ്ണൂരിലേക്കും തിരിച്ചും രണ്ട് സൂപ്പർ ഫാസ്റ്റുകളും ചെറുപുഴ വഴി പയ്യന്നൂരിലേക്കും കാഞ്ഞങ്ങാട്ടേക്കും തിരിച്ചും ഓരോ സൂപ്പർ ഡീലക്സ് ബസ് സർവീസും നടത്തും. ബംഗളൂരുവിൽ നിന്നും ചെന്നൈയിൽ നിന്നും തിരുവനന്തപുരത്തേക്കും തിരിച്ചും നാഗർകോവിൽ വഴി ഓരോ സൂപ്പർ ഡീലക്സ് ബസുകളും അധിക സർവീസ് നടത്തും. ചെന്നൈയിൽ നിന്ന് എറണാകുളത്തേക്കും തിരിച്ചും സേലം നാഗർകോവിൽ വഴി ഒരു സൂപ്പർ ഡീലക്സ് ബസ് സർവീസ് നടത്തും. ബംഗളൂരുവിൽ നിന്ന് വൈകുന്നേരം അഞ്ചിനുശേഷമാണ് മുഴുവൻ ബസുകളും പുറപ്പെടുക. അധിക സർവീസിലെ അവസാന ബസ് രാത്രി 11.15 നാകും ബംഗളൂരുവിൽ നിന്ന് കോഴിക്കോട്ടേക്ക് പുറപ്പെടുക. ഇതോടൊപ്പം നിലവിലുള്ള സ്കാനിയ, വോൾവോ, സ്വിഫ്റ്റ് ബസുകൾ അറ്റകുറ്റപ്പണി നടത്തി ഉടൻ സർവീസിന് സജ്ജമാക്കി മുഴുവൻ അന്തർ സംസ്ഥാന സർവീസുകളും ഓപ്പറേറ്റ് ചെയ്യാൻ നിർദേശിച്ചിട്ടുണ്ട്. യാത്രാതിരക്ക് അനുസരിച്ച് സമയക്രമത്തിൽ മാറ്റം വരുത്താനും റൂട്ട് ക്രമീകരിക്കാനും നിർദേശം നൽകിയിട്ടുണ്ട്. തിരക്കിന് അനുസരിച്ച് ഫ്ളക്സി നിരക്ക് ഈടാക്കും. ഓൺലൈനായി സീറ്റുകൾ റിസർവ് ചെയ്യാനാകും.

രാജ്യത്ത് മതേതരത്വ-പൗരാവകാശങ്ങൾ നിഷേധിക്കപ്പെടുന്നു: കത്തോലിക്ക കോൺഗ്രസ്

തലശേരി: ഇന്ത്യൻ ഭരണഘടനയുടെ കടയ്ക്കൽ കത്തിവയ്ക്കുന്ന രീതിയിൽ മതേതരത്വ അവകാശങ്ങൾ നിഷേധിക്കപ്പെടുകയും ഓരോ പൗരന്‍റെയും അവകാശങ്ങൾ ഇല്ലാതാക്കുകയും ചെയ്യപ്പെടുന്ന അതീവ പ്രതിസന്ധിഘട്ടമാണ് രാജ്യം അഭിമുഖീകരിക്കുന്നതെന്ന് കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ. കത്തോലിക്ക കോൺഗ്രസ് തലശേരി അതിരൂപത എക്സിക്യൂട്ടീവ് കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ലോക്കപ്പ് മർദനത്താലും വന്യജീവികളാലും തെരുവ് നായ്ക്കളാലും പൗരന്‍റെ അവകാശങ്ങൾ നിഷേധിക്കപ്പെടുന്നതിനൊപ്പം മൃഗങ്ങളോടുള്ള പരിഗണന പോലും മനുഷ്യന് നിഷേധിക്കപ്പെടുകയും ചെയ്യുന്നു. നീതി നിഷേധത്തിനെതിരെ കത്തോലിക്ക കോൺഗ്രസിന്‍റെ ആഭിമുഖ്യത്തിൽ ഒക്ടോബർ 13 മുതൽ 24 വരെ കാസർഗോഡ് നിന്നും തിരുവനന്തപുരത്തേക്ക് പൗരാവകാശ സംരക്ഷണ ജാഥ നടത്തുമെന്നു പ്രഫ. രാജീവ് കൊച്ചുപറന്പിൽ അറിയിച്ചു. ഒട്ടനവധി നീതി നിഷേധങ്ങളും പൗരാവകാശം ലംഘനങ്ങളും മത ന്യൂനപക്ഷങ്ങളുടെ അവകാശങ്ങളും ചൂണ്ടിക്കാട്ടിയാണ് പൗരാവകാശ സംരക്ഷണ ജാഥ നടത്തുന്നതെന്നു ഗ്ലോബൽ ഡയറക്ടർ റവ.ഡോ.ഫിലിപ്പ് കവിയിൽ വ്യക്തമാക്കി. കാസർഗോഡ് പനത്തടിയിൽ ഒക്ടോബർ 13 ന് തലശേരി അതിരൂപത ആർച്ച്ബിഷപ്പ് മാർ ജോസഫ് പാംപ്ലാനി ജാഥ ഉദ്ഘാടനം ചെയ്യും. 24 ന് തിരുവനന്തപുരം സെക്രട്ടേറിയറ്റിനു മുന്നിൽ വൻ റാലിയോടെ സമാപിക്കും. കണ്ണൂർ, കാസർഗോഡ് ജില്ലകളിലായി തലശേരി അതിരൂപതയിലെ ആറ് കേന്ദ്രങ്ങളിലൂടെ കടന്നുപോകുമ്പോൾ ആയിരക്കണക്കിന് ആളുകൾ പങ്കെടുത്ത് പൗരാവകാശ സംരക്ഷണ യാത്രയ്ക്ക് സ്വീകരണം നൽകുമെന്ന് യോഗത്തിൽ അധ്യക്ഷത വഹിച്ച അതിരൂപത പ്രസിഡന്‍റ് ഫിലിപ്പ് വെളിയത്ത് പറഞ്ഞു. ജനറൽ സെക്രട്ടറി ജിമ്മി ആയിത്തമറ്റം, ഗ്ലോബൽ ട്രഷറർ ടോണി ജോസഫ് പുഞ്ചക്കുന്നേൽ, അതിരൂപത ട്രഷറർ സുരേഷ് കാഞ്ഞിരത്തിങ്കൽ, ആലക്കോട് മേഖല ഡയറക്ടർ ഫാ. ജിബിൻ വട്ടംകാട്ടേൽ, ഗ്ലോബൽ ഭാരവാഹികളായഷീജ കാറുകുളം, പീയൂസ് പറയിടം, ബെന്നി പുതിയാമ്പുറം, ഐ.സി.മേരി, ടോമി കണയങ്കൽ, സെബാസ്റ്റ്യൻ ജാതികുളം, ബേബി കോയിക്കൽ, ജയ്സൺ അട്ടാറിമാക്കൽ, ജോളി ജോസഫ് എരിഞ്ഞേരിയിൽ, തോമസ് വർഗീസ് വരമ്പുങ്കൽ, ബിജു ഒറ്റപ്ലാക്കൽ, സാജു പുത്തൻപുര, തോമസ് ഒഴുകയിൽ, ഷാജൻ, ജോസഫ് മാത്യു കൈതമറ്റം, ബിജു മണ്ഡപത്തിൽ, മാത്യു വള്ളോംകോട്ട് എന്നിവർ പ്രസംഗിച്ചു.

ഫണ്ട് അനുവദിച്ചിട്ടും പേരട്ട-കുറ്റിയാട്കുന്ന് റോഡ് നവീകരണം വൈകുന്നു

ഇരിട്ടി: ഉളിക്കൽ -പായം പഞ്ചാത്തുകളിലൂടെ കടന്നുപോകുന്ന പേരട്ട -മട്ടിണി - കുറ്റിയാട്ട്കുന്ന് റോഡ് നവീകരണത്തിന് ജില്ലാ പഞ്ചായത്ത് ഫണ്ട് അനുവദിച്ചിട്ടും നവീകരണ പ്രവൃത്തികൾ ആരംഭിച്ചില്ല. ഫണ്ട് അനുവദിച്ചതോടെ തങ്ങൾ അനുഭവിക്കുന് യാത്രാ ക്ലേശം ഉടൻ പരിഹരിക്കപ്പെടുമെന്ന് കരുതിയ ജനങ്ങൾ ഇതോടെ കടുത്ത നിരാശയിലാണ്. അഞ്ചു കിലോമീറ്ററിൽ അധികം ദൂരം വരുന്ന റോഡിന്‍റെ അറ്റകുറ്റ പണികൾക്കായി 30 ലക്ഷം രൂപയാണ് അനുവദിച്ചത്. സ്കൂൾ, ആരാധനാലയങ്ങൾ എന്നിവയടക്കമുള്ള പ്രദേശത്തെ റോഡിന്‍റെ നവീകരണമാണ് അധികൃതരുടെ അനാസ്ഥയിൽ വൈകുന്നത്. ബസ് സർവീസ് ഇല്ലാത്ത റോഡിൽ ഓട്ടോറിക്ഷ ഉൾപ്പെടെയുള്ള ടാക്സി സംവിധാനങ്ങൾ ആണ് ജനങ്ങൾ ഉപയോഗിക്കുന്നത് . റോഡ് പൂർണമായും തകർന്നതോടെ ഓട്ടോറിക്ഷകൾ ഇതുവഴി ട്രിപ്പ് വരാൻ മടിക്കുന്നതായും നാട്ടുകാർ പറഞ്ഞു. പേരട്ട - മട്ടിണി ഭാഗത്തെ ഒരു കിലോമീറ്റർ ദൂരത്തിലാണ് റോഡ് പൂർണമായും തകർന്നു കിടക്കുന്നത്. നവീകരണ പ്രവൃത്തി ഏതു പഞ്ചായത്തിൽ നിന്നാരംഭിക്കണം എന്ന കാര്യത്തിൽ തീരുമാനമെടുക്കാനാവാത്തതാണ് പ്രവൃത്തി വൈകാൻ കാരണമെന്നും പറയപ്പെടുന്നു.

സോഷ്യല്‍വര്‍ക്ക് വിദ്യാര്‍ഥികളുടെ സഹവാസ ക്യാമ്പിന് തുടക്കം

ചെറുകുന്ന്: ഗ്രാമീണ ജീവിതത്തെ നേരിട്ട് പരിചയപ്പടുക, സാമൂഹ്യ ഉത്തരവാദിത്യം വളര്‍ത്തുക തുടങ്ങിയ ലക്ഷ്യത്തോടെ സെന്‍റ് ജോസഫ്‌സ് കോളജ് പിലാത്തറ രണ്ടാം വര്‍ഷ സാമൂഹിക പ്രവര്‍ത്തനവിഭാഗം വിദ്യാര്‍ഥികളുടെ സഹവാസ ക്യാമ്പിന് കട്ടക്കുളം സെന്‍റ് ജോസഫ്‌സ് പള്ളിയിൽതുടക്കമായി. ചെറുകുന്ന് പഞ്ചായത്ത് വൈസ് പ്രസിഡന്‍റ് പി.വി. സജീവൻ ഉദ്ഘാടനം ചെയ്തു. സെന്‍റ് ജോസഫ്സ് കോളജ് മാനേജർ ഫാ. രാജൻ ഫൗസ്തോ അധ്യക്ഷത വഹിച്ചു. കട്ടക്കുളം ഇടവക വികാരി ഫാ. ജോളി അൽഫോൻസ്, വകുപ്പ് മേധാവി ജയ്സ് ആന്‍റണി ക്യാന്പ് അവതരണം നടത്തി. അസി. പ്രഫ. ആർ. ജോസ്, പഞ്ചായത്ത് സ്റ്റാൻഡിംഗ് കമ്മിറ്റഇ ചെയർപേഴ്സൺ സി എച്ച് പ്രദീപ് കുമാര്‍, വാർഡ് മെംബർ കൃഷ്ണന്‍, ഇടവക പാരിഷ് സെക്രട്ടറി കെ.ആന്‍റോ, സ്റ്റുഡന്‍റ് കോ-ഓർഡിനേറ്റർ അക്ഷയ് എന്നിവർ പ്രസംഗിച്ചു.

പഴശി ആയുർവേദ ആശുപത്രി ഡിസംബറിൽ തുറക്കും

മട്ടന്നൂർ: പഴശി കന്നാട്ടുംകാവിൽ നിർമിക്കുന്ന സർക്കാർ ആയുർവേദ ആശുപത്രി ഡിസംബറോടെ പൂർത്തിയാകും.17 കോടി ചെലവഴിച്ചാണ് 50 കിടക്കകളുള്ള ആയുർവേദ ആശുപത്രി നിർമിക്കുന്നത്. ഇന്‍റ ഗ്രേറ്റഡ് ഹെൽത്ത് സെന്‍റർ എന്ന നിലയിൽ നിർമിക്കുന്ന ആശുപത്രി കെട്ടിടത്തിന് അഞ്ചു നിലകളാണുള്ളത്. കെ.കെ. ശൈലജ എംഎൽഎയുടെ നേതൃത്വത്തിൽ ആശുപത്രിയുടെ നിർമാണ പുരോഗതി വിലയിരുത്തി. ആയുർവേദത്തിനാണ് പ്രാധാന്യമെങ്കിലും മറ്റു വിഭാഗങ്ങളിലെ ഡോക്ടർമാരുടെ സേവനവും ഇവിടെയുണ്ടാകും. പാവപ്പെട്ടവർക്ക് സൗജന്യമായും മറ്റുള്ളവർക്ക് പണം നൽകിയും ആധുനിക ആയുർവേദ ചികിത്സ ലഭ്യമാക്കും. വിമാനത്താവളത്തിനു തൊട്ടടുത്ത പ്രദേശമായതിനാൽ കേരളത്തിന്‍റെ പാരമ്പര്യ ചികിത്സയായ ആയുർവേദത്തെ തേടി വരുന്ന ആഭ്യന്തര-വിദേശ യാത്രികർ കൂടി ഇവിടെ എത്തുമെന്നാണ് പ്രതീക്ഷിക്കുന്നത്. താഴത്തെ നിലയിൽ ഒപി അടക്കമുള്ള സംവിധാനങ്ങളും ഒന്നും രണ്ടും നിലകളിൽ വാർഡുകളുമാണ് ഉണ്ടാകുക. കേന്ദ്രപദ്ധതി പ്രകാരം ആദ്യം ഒൻപതു കോടി രൂപയാണ് പദ്ധതിക്കായി അനുവദിച്ചത്. ഇത് തികയാതെ വന്നതോടെ രണ്ടു കോടി കൂടി സംസ്ഥാന സർക്കാർ അനുവദിച്ചു. പിന്നീട് കേന്ദ്ര-സംസ്ഥാന വിഹിതമായി ആറു കോടിയും ചേർന്ന് 17 കോടി ചെലവിലാണ് ആശുപത്രി നിർമിക്കുന്നത്. കെ.കെ. ശൈലജ ആരോഗ്യ മന്ത്രിയായിരുന്ന കാലത്താണ് മട്ടന്നൂരിന്‍റെ ആരോഗ്യ രംഗത്തിന് കരുത്തേകാൻ ആയുർവേദ ആശുപത്രി അനുവദിച്ചത്. ആയുർവേദത്തിന്‍റെ പരമ്പരാഗത ചികിത്സാ രീതികൾക്കൊപ്പം അധുനിക സംവിധാനങ്ങളും ഉപയോഗപ്പെടുത്തിയുള്ള ചികിത്സാ സംവിധാനമാണ് ലഭ്യമാക്കുക. നിർമാണം പൂർത്തിയാകുന്നതോടെ പഴശി ബഡ്‌സ് സ്‌കൂൾ കെട്ടിടത്തിൽ പ്രവർത്തിക്കുന്ന ആയുർവേദ ആശുപത്രി ഇവിടേക്ക് പ്രവർത്തനം മാറും. ദേശീയ ആയുഷ് മിഷന്‍റെയും സംസ്ഥാന സർക്കാരിന്‍റെയും നേതൃത്വത്തിലാണ് ആശുപത്രിക്കുള്ള പദ്ധതി തയാറാക്കിയത്. പിന്നീട് ഇന്‍റഗ്രേറ്റഡ് ഹെൽത്ത് സെന്‍റർ എന്ന നിലയിൽ വിപുലപ്പെടുത്തുകയായിരുന്നു.

കഥകളി മഹോത്സവത്തിന് തിരി തെളിഞ്ഞു

ഇരിട്ടി: കഥകളിയുടെ ജന്മനാട്ടിൽ നടക്കുന്ന സൗത്ത് സോൺ കഥകളി ഉത്സവത്തിന് മൃദംഗ ശൈലേശ്വരി ക്ഷേത്രമുറ്റത്ത് തിരിതെളിഞ്ഞു. കേന്ദ്ര സാംസ്ക്കാരിക വകുപ്പ് തഞ്ചാവൂർ സൗത്ത് സോൺ കൾച്ചറൽ സെന്‍റർ മൃദംഗ ശൈലേശ്വരി ക്ഷേത്രവുമായി സഹകരിച്ചാണ് ഏട്ടു ദിവസം നീണ്ടുനിൽക്കുന്ന കഥകളി ഉത്സവം നടത്തുന്നത്. പ്രശസ്ത കഥകളി നടൻ സദനം ബാലകൃഷ്ണൻ തിരികൊളുത്തി ഉദ്ഘാടനം ചെയ്തു. സൗത്ത് സോൺ കൾച്ചർ സെന്‍റർ ഡയറക്ടർ കെ.കെ. ഗോപാലകൃഷ്ണൻ അധ്യക്ഷത വഹിച്ചു. കഥകളി സ്കൂൾ ഡയറക്ടർ കലാമണ്ഡലം ഗോപാലകൃഷ്ണൻ, ക്ഷേത്രം ചെയർമാൻ എ. കെ. മനോഹരൻ, മെമ്പർമാരായ പ്രേമരാജൻ, പി. നാരായണൻ, രഘു എന്നിവർ പങ്കെടുത്തു. കോട്ടയത്ത് തമ്പുരാന്‍റെ നാട്ടിൽ നടക്കുന്ന കഥകളി ഉത്സവത്തിൽ തമ്പുരാന്‍റെ വിഖ്യാത ആട്ടക്കഥകളാണ് പൂർണ രൂപത്തിൽ അരങ്ങേറുന്നത്. കഥകളി രംഗത്തെ സംസ്ഥാനത്തിനകത്തും പുറത്തുമുള്ള കലാകാരന്മാർ ഉത്സവത്തിന്‍റെ ഭാഗമാകും.

സൗജന്യമായി ട്രാവൽ കാർഡുകൾ നൽകി

ആലക്കോട്: മാനന്തവാടി-ആലക്കോട് - ബന്തടുക്ക റൂട്ടിൽ പുതുതായി സർവീസ് ആരംഭിച്ച കെഎസ്ആർടിസി ബസിലെ സ്ഥിരം യാത്രക്കാർക്ക് സൗജന്യമായി ട്രാവൽ കാർഡുകൾ നൽകി. മലയോര മേഖലാ പാസഞ്ചേർസ് അസോസിയേഷൻ കൃപാ ഏജൻസിയുടെ സഹകരണത്തോടെയാണ് ട്രാവൽ കാർഡുകൾ നൽകിയത്. സ്ഥിരം യാത്രക്കാരെ കെഎസ്ആർടിസിയിലേക്ക് ആകർഷിക്കുകയും, പുതിയതായി തുടങ്ങുന്ന സർവീസുകൾ മികച്ച വരുമാനമുള്ളതാക്കുകയുമാണ് ലക്ഷ്യം. ആലക്കോട് നടത്തിയ ട്രാവൽ കാർഡ് വിതരണോദ്ഘാടനം ബസ് പാസഞ്ചേർസ് അസോസിയേഷൻ കൺവീനർ എം.വി.രാജു കെവിവിഇഎസ് പ്രസിഡന്‍റ് കെ. എം. ഹരിദാസിന് കൈമാറി നിർവഹിച്ചു. ആലക്കോട് പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർമാൻ ഖലീൽ റഹ്മാൻ, കെ വിവിഇഎസ് ഭാരവാഹികളായ ജോൺ പടിഞ്ഞാത്ത്, എൻ.എം. മൊയ്‌തീൻ, ടി.സി. പ്രകാശ്,പ്രജി, ഷഫീക് എന്നിവർ പ്രസംഗിച്ചു.

136 പേരെ രക്ഷകരാക്കി ജലസുരക്ഷാ കാമ്പയിന്‍ സമാപിച്ചു

പയ്യന്നൂര്‍: ഏഴ് ഘട്ടങ്ങളിലായി കവ്വായി കായലിന്‍റെ ഭാഗമായ രാമന്തളി ഏറന്‍ പുഴയില്‍ ചാള്‍സണ്‍ സ്വിമ്മിംഗ് അക്കാദമി ഏഴിമല എകെജി സ്മാരക കലാകായിക വേദിയുടെ സഹകരണത്തോടെ നടത്തിവന്ന ജല സുരക്ഷാ കാമ്പയിന്‍ സമാപിച്ചു. 136 പേര്‍ക്ക് സിപിആര്‍ ഉള്‍പ്പെടെയുള്ള ജീവന്‍ രക്ഷാ പ്രവര്‍ത്തന പരിശീലനം നല്‍കിയാണ് കാമ്പയിൻ സമാപിച്ചത്. ലോക മുങ്ങിമരണ നിവാരണ ദിനാചരണത്തോടനുബന്ധിച്ച് കഴിഞ്ഞ ജൂലൈ 25-നാണ് കവ്വായി കായലിന്‍റെ ഭാഗമായ രാമന്തളി ഏറന്‍ പുഴയില്‍ ജില്ലാ പഞ്ചായത്ത് മുന്‍ പ്രസിഡന്‍റ് പി.പി. ദിവ്യ ജല സുരക്ഷാ കാമ്പയിൻ ഉദ്ഘാടനം ചെയ്തു. തുടര്‍ന്ന് ഏഴ് ഘട്ടങ്ങളിലായാണ് കാമ്പയിന്‍റെ ഭാഗമായുള്ള വിവിധ പരിശീലനങ്ങള്‍ ഡോ. ചാള്‍സണ്‍ ഏഴിമലയ്‌ക്കൊപ്പം നടന്നത്. തിരുവനന്തപുരം വിന്നര്‍ലാൻഡ് സ്‌പോട്‌സ് അക്കാദമിയുടെയും ഭാരതീയ ലൈഫ് സേവിംഗ് സൊസൈറ്റിയുടെയും ചീഫ് ട്രെയിനര്‍ ഡോ. ബി. സാനുവും പരിശീലനങ്ങള്‍ക്ക് നേതൃത്വം നൽകി. രണ്ട് കിലോമീറ്റര്‍ കായല്‍ ക്രോസിംഗ് നീന്തല്‍, കയാക്കിംഗ് പരിശീലനം, നാടന്‍ വള്ളം തുഴയല്‍, യന്ത്രവല്‍കൃത യാനങ്ങളില്‍ പരിശീലനം, ജീവന്‍ രക്ഷാപ്രവര്‍ത്തന പരിശീലനം, സിപിആര്‍ ഉള്‍പ്പെടെയെയുള്ള പ്രാക്ടിക്കല്‍ ക്ലാസുകള്‍ എന്നിവയിലാണ് ഈ ദിവസങ്ങളില്‍ പരിശീലനം നല്‍കിയത്. ശാരീരിക, മാനസിക പരിമിതികളുള്ള ആറുവയസുകാരന്‍ മുതല്‍ അന്‍പതുകാരി വരെയുള്ളവരാണ് പരിശീലനം പൂര്‍ത്തിയാക്കിയത്. സമാപന പരിപാടിയുടെ ഉദ്ഘാടനം ടി.ഐ. മധുസൂദനന്‍ എംഎല്‍എ നിര്‍വഹിച്ചു. ഡോ. ചാള്‍സണ്‍ ഏഴിമല, വാര്‍ഡ് മെമ്പര്‍ കെ.പി. ദിനേശന്‍, ഒ.കെ. ശശി, സി.ഡി. ഷിജൊ, പി. സന്തോഷ് എന്നിവര്‍ പ്രസംഗിച്ചു.

വരുമാനരഹിത ഭൂവുടമകളുടെ ക്ഷേമ പെൻഷൻ തടയരുത്: കെഎസ്‌സിഎഫ്

നടുവിൽ: വസ്തു നികുതി അടയ്ക്കാൻ പോലും വരുമാനമില്ലാതെ വിഷമിക്കുന്ന തീർത്തും ആദായമില്ലാത്ത ഭൂമി പരിധിയിൽ കവിഞ്ഞ അളവിൽ കൈവശമുണ്ട് എന്ന കാരണത്താൽ മുതിർന്ന പൗരന്മാരുടെ വാർധക്യകാല ക്ഷേമപെൻഷൻ തടയാനുള്ള നീക്കം ഉപേക്ഷിക്കണമെന്ന് കേരള സീനിയർ സിറ്റിസൺ ഫോറം (കെഎസ് സിഎഫ്) തളിപ്പറമ്പ് ഈസ്റ്റ് ബ്ലോക്ക് പ്രവർത്തകസമിതി യോഗം സർക്കാരിനോടാവശ്യപ്പെട്ടു. ബ്ലോക്ക് കമ്മിറ്റി ചെയർമാൻ ശശികുമാർ ഗിരിമന്ദിരം അധ്യക്ഷത വഹിച്ചു. കൺവീനർ കെ.സി.ഈപ്പൻ റിപ്പോർട്ട് അവതരിപ്പിച്ചു. മാത്യു ചാണക്കാടൻ, കെ.ജി.ഓമന, അഗസ്റ്റിൻ കുളത്തൂർ, അന്നമ്മ അഗസ്റ്റിൻ, നാരായണൻ തലവിൽ, സത്യാനന്ദൻ, ഏബ്രഹാം ഈറ്റയ്ക്കൽ, ജോസഫ് വട്ടക്കോട്ടയിൽ, കെ.എൻ.ചന്ദ്രൻ എന്നിവർ പ്രസംഗിച്ചു.

‘സ്റ്റെം അറ്റ് സ്കൂൾ' മൂന്നാംഘട്ട പരിശീലനം നടത്തി

പയ്യാവൂർ: മടമ്പം പികെഎം കോളജ് ഓഫ് എഡ്യൂക്കേഷൻ സൃഷ്ടി റോബോട്ടിക്സ് ആൻഡ് ടെക്നോളജീസുമായി സഹകരിച്ച് നടപ്പാക്കിയ അക്കാഡമിക് പ്രോജക്ടായ 'സ്റ്റെം അറ്റ് സ്‌കൂൾ' പദ്ധതിയുടെ ഭാഗമായി സ്കൂൾ വിദ്യാർഥികൾക്കായുള്ള മൂന്നാം ഘട്ട പരിശീലന നടത്തി. കോളജ് സ്റ്റെം ലബോറട്ടറിയിൽ കോഴ്സ് ഡയറക്ടർ പ്രശാന്ത് മാത്യു ഉദ്ഘാടനം ചെയ്തു. പൊതുവിദ്യാഭ്യാസ രംഗത്ത് റോബോട്ടിക്സിന് കൈവന്ന പ്രാധാന്യം കണക്കിലെടുത്ത് ആറു മുതൽ ഒന്പത് വരെ ക്ലാസുകളിൽ പഠിക്കുന്ന ഇരുപത്തൊന്ന് വിദ്യാർഥികൾക്കാണ് റോബോട്ടിക്സ്, കോഡിംഗ് എന്നിവയിൽ പരിശീലനം നൽകിയത്. പരിശീലകരായ പതിമൂന്ന് സ്റ്റെം മെന്‍റേഴ്സും മേരിഗിരി ഇംഗ്ലീഷ് മീഡിയം സ്കൂൾ അറ്റൽ ടിങ്കറിംഗ് ലാബ് ഇൻസ്ട്രക്ടർ രേഷ്‌മി ബെഞ്ചമിനും ചേർന്ന് ടെക്നിക്കൽ സെഷൻസുകൾ നയിച്ചു. സ്റ്റെം അറ്റ് സ്കൂൾ കോ-ഓർഡിനേറ്റർ എം.ഫാത്തിമത്തുൽ സുഹ്‌റ നേതൃത്വം നൽകി.

ജീവൻരക്ഷാ പരിശീലന ക്ലാസ് സംഘടിപ്പിച്ചു

പുലിക്കുരുമ്പ: സ്പർശം പാലിയേറ്റീവ് കെയറിന്‍റെ ആഭിമുഖ്യത്തിൽ ജീവൻരക്ഷ പരിശീലന ക്ലാസ് സംഘടിപ്പിച്ചു. പുലിക്കുരുമ്പ സെന്‍റ് അഗസ്റ്റിൻസ് പള്ളി വികാരി ഫാ. തോമസ് പൈമ്പള്ളിൽ ഉദ്ഘാടനം ചെയ്തു. പാലിയേറ്റീവ് കെയർ യൂണിറ്റ് പ്രസിഡന്‍റ് വി.ഡി. സ്റ്റീഫൻ അധ്യക്ഷത വഹിച്ചു. ഫോർമീസ് തെള്ളിക്കുന്നേൽ ആമുഖ പ്രഭാഷണവും ശ്രീകണ്ഠപുരം സമരിറ്റൻ ഹോം ഡയറക്ടർ ഫാ. അനൂപ് നരിമറ്റത്തിൽ അനുഗ്രഹ പ്രഭാഷണവും നടത്തി. കെ.വി. ശശിധരൻ ക്ലാസെടുത്തു. ഡോ. ലില്ലി, കെ.വി. ശശിധരൻ, അൽഫോൻസ മരുതുംകുഴിയിൽ എന്നിവർ പ്രസംഗിച്ചു. വീടുകളിൽ നിന്ന് ശേഖരിച്ച മരുന്നുകൾ ശ്രീകണ്ഠപുരം സമരിറ്റൻ ഹോമിന് കൈമാറി .

തളിപ്പറന്പ്-ഇരിട്ടി സംസ്ഥാന പാതയിലെ കുഴികൾ അപകടഭീഷണി ഉയർത്തുന്നു

മടമ്പം: സംസ്ഥാന പാതയോരം തകർന്നത് ഗതാഗത തടസത്തിനും അപകടങ്ങൾക്കും ഇടയാക്കുന്നു. തളിപ്പറമ്പ്–ഇരിട്ടി സംസ്ഥാന പാതയിലെ മടമ്പം,തുമ്പേനി, കണിയാർവയൽ, പെരുവളത്തുപറമ്പ്,നിലാമുറ്റം, ഇരിക്കൂർ, പെരുമണ്ണ് എന്നിവിടങ്ങളിലാണ് മെക്കാഡം ചെയ്ത റോഡിന്‍റെ വശങ്ങൾ തകർന്നത്. പലയിടത്തും വലിയ കുഴികൾ രൂപപ്പെട്ടിട്ടുണ്ട്. ഇത്തരം ഇടങ്ങളിൽ എതിരേ വരുന്ന വാഹനങ്ങൾക്ക് സൈഡ് കൊടുക്കാൻ കഴിയാതെ വാഹനങ്ങൾ നിർത്തിയിടേണ്ടി വരുന്നത് കാരണം ഗതാഗത തടസം ഉണ്ടാകുന്നുണ്ട്. വലിയ വളവുകളും വീതി കുറവുളള ഭാഗങ്ങളിലെ കുഴികൾ വലിയ അപകട ഭീഷണിയുമാണ് ഉയർത്തുന്നത്.

കാട്ടാമ്പള്ളിയിൽ സ്കൂ‌ട്ടറുകൾ കൂട്ടിയിടിച്ച് വ്യാപാരി മരിച്ചു

വളപട്ടണം: കാട്ടാമ്പള്ളിയിൽ സ്കൂ‌ട്ടറുകൾ തമ്മിൽ കൂട്ടിയിടിച്ചുണ്ടായ അപകടത്തിൽ വയോധികനായ വ്യാപാരി മരിച്ചു. കാട്ടാമ്പള്ളി അബൂബക്കർ സ്റ്റോർ ഉടമ കണ്ണാടിപ്പറമ്പ് ആറാംപീടികയിൽ പള്ളേരി മുംതാസ് മൻസിലിൽ കടവൻപറമ്പിൽ കെ.പി. അബൂബക്കറാണ് (75) മരിച്ചത്. ഇന്നലെ പുലർച്ചെ 5.10 ഓടെ കാട്ടാമ്പള്ളി പള്ളിക്ക് മുന്നിലായിരുന്നു സംഭവം. സുബഹ് നിസ്കാരത്തിന് പള്ളിയിലേക്ക് പോയ അബൂബക്കർ സഞ്ചരിച്ച സ്കൂട്ടറിൽ മറ്റൊരു സ്കൂട്ടർ ഇടിച്ചാണ് അപകടമുണ്ടായത്. റോഡിൽ തെറിച്ചുവീണ അബൂബക്കറിനെ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വളപട്ടണം പോലീസ് ഇൻക്വസ്റ്റ് നടത്തി. ഭാര്യമാർ: പുതിയപുരയിൽ മുംതാസ്, പരേതയായ മുക്രി മറിയം. മക്കൾ: റമീസ്, റൈഹാനത്ത്, നജ്മ, നയിമ. സഹോദരങ്ങൾ: ആയിഷ, പരേതരായ മുഹമ്മദ് കുഞ്ഞി, കുഞ്ഞിമറയം, ഫാത്തിമ.

പരിയാരം മദർഹോം; ആത്മീയനിറവിൽ വാർഷികാഘോഷം

പരിയാരം: തലശേരി അതിരൂപത യ ുടെ ധ്യാനകേന്ദ്രമായ മദര്‍ ഹോ മിന്‍റെ 21-ാംവാര്‍ഷികവും രാപ്പകല്‍ ആരാധനയുടെ ആയിരം ദിവസത്തിന്‍റെ ആഘോഷവും നടന്നു. വാര്‍ഷിക ദിനത്തില്‍ നടന്ന ശുശ്രൂഷകള്‍ക്ക് തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി നേതൃത്വം നല്കി. കഴിഞ്ഞ 21 വര്‍ഷങ്ങളിലെ വ്യത്യസ്തങ്ങളായ ധ്യാന, ആത്മീയ ശുശ്രൂഷകള്‍വഴി വിവിധ തിന്മകളില്‍ അകപ്പെട്ടുപോയ അനേകരെ തിരിച്ചുകൊണ്ടുവരാനും മാനസാന്തരപ്പെടുത്താനും നന്മയുടെ വഴിയിലേക്ക് നയിക്കാനും സാധിച്ചിരുന്നു. 2004 സെപ്റ്റംബര്‍ എട്ടിന് തലശേരി അതിരൂപതയിലെ പ്രമുഖ ധ്യാന ഗുരുവായ ഫാ. മാത്യു ആശാരിപറമ്പിലാണ് മദര്‍ ഹോം ധ്യാനകേന്ദ്രത്തിന് തുടക്കം കുറിച്ചത്. നിരവധി വിശ്വാസികൾ ആഘോഷത്തിലും ശുശ്രൂഷാ ചടങ്ങിലും പങ്കെടുത്തു. മദർ ഹോം ഡയറക്‌ടർ ഫാ. ബെന്നി പുത്തൻനട, അഡ്മിനിസ്‌ട്രേറ്റര്‍ ഫാ. മൈക്കിള്‍ മഞ്ഞക്കുന്നേല്‍, സ്പിരിച്വല്‍ ഡയറക്ടര്‍ ഫാ. പോള്‍ പുലിമല, എന്നിവർ ചടങ്ങുകൾക്ക് നേതൃത്വം നല്കി.

ആക്രമണത്തിന് മൂര്‍ച്ച കൂട്ടാന്‍ അര്‍ഷാദും വാരിയേഴ്‌സില്‍

കണ്ണൂര്‍: സൂപ്പര്‍ ലീഗ് കേരളയില്‍ കിരീടം ലക്ഷ്യമിടുന്ന കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബ് ആക്രമണത്തിന് മൂര്‍ച്ചകൂട്ടാന്‍ വിംഗര്‍ എ. അര്‍ഷാദിനെയും ടീമിലെത്തിച്ചു. ഇടതും വലതും വിംഗില്‍ ഒരേപോലെ കളിക്കാന്‍ സാധിക്കുന്ന താരമാണ് അര്‍ഷാദ്. 2024-25 സീസണില്‍ ദേവഗിരി സെന്‍റ് ജോസഫ്‌സ് കോളജിന് വേണ്ടി കേരള പ്രീമിയര്‍ ലീഗ് കളിച്ച താരം നാല് ഗോളും മൂന്ന് അസിസ്റ്റും നേടിയിട്ടുണ്ട്. രണ്ടു മത്സരത്തിലെ മികച്ച താരത്തിനുള്ള അവാര്‍ഡും സ്വന്തമാക്കി. 2023 ല്‍ നടന്ന റിലയന്‍സ് സൗത്ത് സോണ്‍ യൂത്ത് ചാമ്പ്യന്‍ഷിപ്പില്‍ ദേവഗിരി കോളജ് കിരീടം നേടിയപ്പോള്‍ ചാമ്പ്യന്‍ഷിപ്പിലെ ടോപ് സ്‌കോററും അര്‍ഷാദായി രുന്നു. അഞ്ച് ഗോളാണ് താരം ടൂര്‍ണമെന്‍റിൽ നേടിയത്. 2021 മുതല്‍ 2023 വരെ ലൂക്ക സോക്കര്‍ ക്ലബിന് വേണ്ടി കളിച്ച താരം കേരള പ്രീമിയര്‍ ലീഗ്, യൂത്ത് സോക്കര്‍ ലീഗ്, കെഎഫ്എ അണ്ടര്‍ 14 ജില്ലാ ലീഗ് തുടങ്ങിയ ടൂര്‍ണമെന്‍റുകളിലും കളിച്ചു. 2022 ല്‍ നടന്ന യൂത്ത് സോക്കര്‍ ലീഗില്‍ ലൂക്ക സോക്കര്‍ ക്ലബ് ചാമ്പ്യന്‍മാരും ആയി. ചാമ്പ്യന്‍ഷിപ്പിലെ ടോപ് സ്‌കോററും അര്‍ഷാദ് ആയിരുന്നു. ലൂക്ക സോക്കര്‍ അക്കാദമിയിലൂടെയാണ് താരം ഫുട്‌ബോള്‍ കരിയര്‍ ആരംഭിച്ചത്. മലപ്പുറം മേലങ്ങാടി സ്വദേശിയാണ്.

തലശേരി ഇന്‍റര്‍നാഷണല്‍ ഫിലിം ഫെസ്റ്റിവല്‍ ഒക്ടോബര്‍ 16 മുതല്‍

കണ്ണൂർ: കേരള സംസ്ഥാന ചലച്ചിത്ര അക്കാദമി ഒക്ടോബര്‍ 16, 17, 18, 19 തീയതികളില്‍ തലശേരി ലിബര്‍ട്ടി തിയേറ്റര്‍ സമുച്ചയത്തില്‍ സംഘടിപ്പിക്കുന്ന തലശേരി ഇന്‍റര്‍നാഷണല്‍ ചലച്ചിത്രമേളയുടെ (ടിഐഎഫ്എഫ്) സംഘാടക സമിതി രൂപീകരിച്ചു. യോഗം നിയമസഭ സ്പീക്കർ എ.എൻ. ഷംസീർ ഉദ്ഘാടനം ചെയ്തു. ചലച്ചിത്ര അക്കാദമി ചെയർമാൻ പ്രേംകുമാർ അധ്യക്ഷത വഹിച്ചു. മേളയിൽ അന്താരാഷ്‌‌ട്ര നിലവാരമുള്ള 55 സിനിമകൾ പ്രദർശിപ്പിക്കും. ഒരേ സമയം മൂന്നു തിയേറ്ററുക ളി ലായി 1200 പേർക്ക് സിനിമകൾ കാണാനുള്ള അവസരം ഒരുക്കും. ഡെലിഗേറ്റ് ഫീസ് 354 രൂപയും വിദ്യാർഥികൾക്ക് 177 രൂപയും ആണ്. മുഖ്യരക്ഷാധികാരികളായി മുഖ്യമന്ത്രി പിണറായി വിജയൻ, മന്ത്രിമാരായ സജി ചെറിയാൻ, കടന്നപ്പള്ളി രാമചന്ദ്രൻ എന്നിവരെ തെരഞ്ഞെടുത്തു. രക്ഷാധികാരികൾ: ഷാഫി പറമ്പിൽ എംപി, കെ.പി. മോഹനൻ എംഎൽഎ. സംഘാടകസമിതി ചെയർപേഴ്സണായി സ്പീക്കർ എ.എൻ. ഷംസീർ, ഫെസ്റ്റിവൽ ഡയറക്ടറായി കേരള ചലച്ചിത്ര അക്കാദമി ചെയർമാൻ പ്രേംകുമാർ, ജനറൽ കൺവീനറും ഫെസ്റ്റിവൽ എക്സിക്യൂട്ടീവ് ഡയറക്ടറുമായി ചലച്ചിത്ര അക്കാദമി സെക്രട്ടറി സി. അജോയ് എന്നിവരെയും തെരഞ്ഞെടുത്തു. കേരള സംസ്ഥാന ചലച്ചിത്ര അക്കാദമി ജനറൽ കൗൺസിൽ അംഗം പ്രദീപ് ചൊക്ലി, കെഎസ്എഫ്ഡിസി ബോർഡ് അംഗം ജിത്തു കോളയാട്, എസ്.കെ. അർജുൻ എന്നിവർ കൺവീനർമാരാണ്. പ്രോഗ്രാം കമ്മിറ്റി ചെയർപേഴ്സണായി ബീനിഷ് കോടിയേരി, റിസ്പഷൻ കമ്മിറ്റി ചെയർപേഴ്സണായി തലശേരി നഗരസഭ ചെയർപേഴ്സൺ ജമുനറാണി, മീഡിയ കമ്മിറ്റി ചെയർപേഴ്സണായി ജില്ലാ ഇൻഫർമേഷൻ ഓഫീസർ പി.പി. വിനീഷ് തുടങ്ങിയവരേയും തെരഞ്ഞെടുത്തു. തലശേരി കോസ്‌മോപൊളിറ്റന്‍ ക്ലബില്‍ നടന്ന യോഗത്തിൽ കേരള സംസ്ഥാന ചലച്ചിത്ര അക്കാദമി ചെയർമാൻ പ്രേംകുമാർ, തലശേരി സബ് കളക്ടർ കാർത്തിക് പാണിഗ്രഹി, എഎസ്പി പി.ബി. കിരൺ, നഗരസഭ വൈസ് ചെയർമാൻ എം.വി. ജയരാജൻ, സി.അജോയ്, ലിബർട്ടി ബഷീർ, നടൻ സുശീൽ കുമാർ തിരുവങ്ങാട്, പ്രദീപ്‌ ചൊക്ലി എന്നിവർ പ്രസംഗിച്ചു.

മലയോരത്തിന് ആവേശം പകർന്ന് റൺ പാലക്കയംതട്ട് മിനി മാരത്തൺ

പയ്യാവൂർ: ഇരിക്കൂര്‍ നിയോജക മണ്ഡലത്തിലെ ടൂറിസം കേന്ദ്രങ്ങളെ ലോകശ്രദ്ധയിലേക്കെത്തിക്കാനായി സജീവ് ജോസഫ് എംഎൽഎയുടെ നേതൃത്വത്തിൽ ഡിടിപിസിയും ഇരിക്കൂര്‍ ടൂറിസം ആന്‍ഡ് ഇന്നൊവേഷന്‍ കൗണ്‍സിലും സംയുക്തമായി സംഘടിപ്പിച്ച ‘റൺ പാലക്കയംതട്ട് ഇരിക്കൂർ ടൂറിസം രാജ്യാന്തര മിനി മാരത്തൺ’ വൻ വിജയം. മലയോര മേഖലയിലെ പ്രധാന ടൂറിസം കേന്ദ്രങ്ങളായ പാലക്കയംതട്ടിന്‍റെയും പൈതൽമലയുടെയും താഴ്‌വാരത്തിലൂടെ മാരത്തൺ താരങ്ങൾ മാറ്റുരച്ചപ്പോൾ മലയോരജനതയ്ക്ക് അത് ആവേശത്തിന്‍റെ പുത്തനനുഭവമായി. പയ്യാവൂരിൽനിന്ന് ആരംഭിച്ച്, പുലിക്കുരുന്പയിൽ സമാപിച്ച മിനി മാരത്തണിൽ പുരുഷ,വനിത, ട്രാൻസ്ജെൻഡർ വിഭാഗങ്ങളിലായി നടത്തിയ മിനി മാരത്തണിൽ വിദേശികളും സ്വദേശികളുമുൾപ്പെടെ ആയിരത്തോളം അത്‌ലറ്റുകൾ പങ്കെടുത്തു. പയ്യാവൂരിൽനിന്ന് പുലിക്കുരുമ്പയിലേക്ക് നടത്തിയ മിനി മാരത്തണിന്‍റെ ഫ്ലാഗ് ഓഫ് കെ.പി. മോഹനൻ എംഎൽഎ, കണ്ണൂർ കോർപറേഷൻ മേയർ മുസ്‌ലിഹ് മഠത്തിൽ, ജില്ലാ കളക്ടര്‍ അരുണ്‍ കെ.വിജയന്‍, സിറ്റി പോലീസ് കമ്മീഷണര്‍ പി. നിധിൻ രാജ്, മുൻ ഇന്ത്യൻ ഫുട്ബോൾ താരം സി.കെ. വീനിത്, ധ്യാൻചന്ദ് പുരസ്കാര ജേതാവും അന്തർദേശീയ ബോക്സിംഗ് താരവുമായ കെ.സി. ലേഖ, കോമൺവെൽത്ത് ഗെയിംസ് മെഡൽ ജേതാക്കളായ ടി.കെ. പ്രിയ, സിനി ജോസ്, ടിയാന മേരി തോമസ്, മുന്‍ ഇന്ത്യന്‍ വോളിബോള്‍ താരം മനു ജോസഫ് എന്നിവർ ചേർന്ന് നിർവഹിച്ചു. സജീവ് ജോസഫ് എംഎൽഎ അധ്യക്ഷത വഹിച്ചു. ജില്ലാ കളക്ടർ അരുൺ കെ. വിജയൻ, സിറ്റി പോലീസ് കമ്മീഷണർ പി. നിധിൻ രാജ് എന്നിവർ മിനി മാരത്തണിൽ പങ്കാളികളായി 12.5 കിലോമീറ്റർ ദൂരം ഓടുകയും ചെയ്തു. മിനി മാരത്തൺ ആരംഭിച്ച പയ്യാവൂർ, സമാപന വേദിയായ പുലിക്കുരുന്പ എന്നിവിടങ്ങളിൽ ജില്ലാ മെഡിക്കൽ ഓഫീസർ പീയൂഷ് നമ്പൂതിരിപ്പാട്, ഡിടിപിസി സെക്രട്ടറി സൂരജ്, ഇരിക്കൂർ ടൂറിസം കൗൺസിൽ ചെയർമാൻ പി.ടി. മാത്യു, ശ്രീകണ്ഠപുരം മുനിസിപ്പൽ ചെയർപേഴ്സൺ കെ.വി. ഫിലോമിന, ബ്ലോക്ക് പഞ്ചായത്ത് പ്രസിഡന്‍റ് റോബർട്ട് ജോർജ്, ഫാ. തോമസ് പയ്യമ്പള്ളി, ഫാ. ജോസഫ് കാവനാടി, ഫാ. ആന്‍റണി മഞ്ഞളാംകുന്നേൽ, ഫാ. ബിബിൻ അഞ്ചെന്പിൽ, പഞ്ചായത്ത് പ്രസിഡന്‍റുമാരായ ബേബി ഓടംപള്ളിൽ, മിനി ഷൈബി, സാജു സേവ്യർ, കണ്ണൂർ കോർപറേഷൻ സ്റ്റാൻഡിംഗ് കമ്മിറ്റി ചെയർപേഴ്സൺ സുരേഷ് ബാബു എളയാവൂർ, ഉണ്ണികൃഷ്ണൻനമ്പൂതിരി, സി.വി.എൻ. യാസ്റ, ചാക്കോ പാലക്കലോടി , ബേബി തോലാനി, സോജൻ കാരാമയിൽ, ജയിംസ് തുരുത്തേൽ, പി.ആർ. രാഘവൻ, ജോഷി കണ്ടത്തിൽ, മധു തൊട്ടിയിൽ, പ്രീത സുരേഷ് , ഇ.കെ. കുര്യൻ , ടി.പി. അഷ്റഫ്, ടെൻസൻ കണ്ടത്തിങ്കര, ബാബു മണ്ടളം, ജോസ് പരത്തനാൽ, സന്ദീപ് പാണപ്പുഴ, നൗഷാദ് ബ്ലാത്തൂർ, പി.ആർ. സനീഷ്, റെജി, റോബിൻ പുലിക്കുരുമ്പ, ഷാജി, വിവിധ രാഷ്‌ട്രീയപാർട്ടി നേതാക്കൾ, സംഘടന പ്രതിനിധികൾ എന്നിവർ പങ്കെടുത്തു. ആരോഗ്യ വകുപ്പ്, പോലീസ്, വിവിധ സർക്കാർ സംവിധാനങ്ങളുടെ എന്നിവരുടെ വിപുലമായ സഹകരണവും ലഭിച്ചിരുന്നു. മത്സര ഫലങ്ങൾ 18-35 വയസ് പുരുഷ വിഭാഗത്തിൽ എം.പി.നെബീൽ ഷാഹി (കോഴിക്കോട്), സതീഷ്കുമാർ( കോയമ്പത്തൂർ), ബെഞ്ചമിൻ ബാബു (ഇടുക്കി) എന്നിവർ യഥാക്രമം ഒന്ന്, രണ്ട്, മൂന്ന് സ്ഥാനങ്ങൾ നേടി. വനിതാ വിഭാഗത്തിൽ റീബ അന്നാ ജോർജ്(പത്തനംതിട്ട) ശിവാനി( ഉത്തർ പ്രദേശ്), അഞ്ജു മുകുന്ദൻ( ഇടുക്കി) എന്നിവർ വിജയികളായി. 36-45 വയസുകാരുടെ വിഭാഗത്തിൽ പുരുഷന്മാരിൽ നഞ്ചപ്പ (തമിഴ്നാട്), വിനോദ് കുമാർ(ഊട്ടി), ജഗദീശൻ (തമിഴ്നാട്) എന്നിവർ യഥാക്രമം ഒന്നും രണ്ടും മൂന്നും സ്ഥാനങ്ങൾക്ക് അർഹരായി. വനിതാ വിഭാഗത്തിൽ ആശ പത്രേയ(ബംഗളൂരു) ജിനി ചെറിയാൻ (കണ്ണൂർ) എന്നിവർ വിജയികളായി. 46 വയസിനു മുകളിൽ പുരുഷന്മാരിൽ ജോസ് ഇല്ലിക്കൽ(വയനാട്), ഷറഫുദ്ദീൻ(വയനാട്), എൻ.പി.ഷാജി (കോഴിക്കോട് )എന്നിവർ ജേതാക്കളായി. വനിതാ വിഭാഗത്തിൽ പി.എ. ജസീല (തൃശൂർ), കെ.കെ.രമ (എറണാകുളം), ജ്യോതി പ്രവ (ആസാം) എന്നിവർ ആദ്യ മൂന്ന് സ്ഥാനങ്ങൾ നേടി. ഫൺ റൺ മത്സരത്തിൽ പുരുഷവിഭാഗത്തിൽ ഷിബിൻ ആന്‍റോ (കോട്ടയം), ആദർശ് ഗോപി (കണ്ണൂർ), അതുൽ (വടകര), റജിൽ ബാബു(ചങ്ങനാശേരി) എന്നിവരും സ്ത്രീകളിൽ ജി. ജിൻസി( പാലക്കാട്), വി. അഞ്ജന (പാലക്കാട്), എസ്.കെ. വിജയലക്ഷ്മി (കർണാടക), നിയാമോൾ തോമസ് (ചെറുപുഴ )എന്നിവർ വിജയികളായി. വിജയികൾക്ക് കാഷ് അവർഡുൾപ്പെടെയുള്ള സമ്മാനങ്ങൾ നൽകി. 60 വയസിനു മുകളിലുള്ള മത്സരാർഥികൾക്കും പ്രത്യേകം കാഷ് പ്രൈസ് നൽകി ആദരിച്ചു.

വൈദിക സൗഹൃദ ടൂർണമെന്‍റ്: കാസർഗോഡും ചെന്പേരിയും ജേതാക്കൾ

ചെമ്പേരി: തലശേരി അതിരൂപതയുടെ ആഭിമുഖ്യത്തിൽ സൗഹൃദോത്സവം എന്ന പേരിൽ സംഘടിപ്പിച്ച വൈദിക സൗഹൃദ ടൂർണമെന്‍റിലെ ക്രിക്കറ്റ്, ബാസ്ക്കറ്റ് ബോൾ മത്സരങ്ങൾ ചെമ്പേരി വിമൽ ജ്യോതി എൻജിനിയറിംഗ് കോളജ് സ്റ്റേഡിയത്തിൽ നടന്നു. അതിരൂപതയിലെ ഫൊറോനകളെ ഇരിട്ടി, ചെമ്പേരി, ചെറുപുഴ, കാസർഗോഡ് എന്നീ നാല് റീജണുകളായി തിരിച്ചാണ് ടൂർണമെന്‍റ് സംഘടിപ്പിച്ചത്. ക്രിക്കറ്റിൽ ഇരിട്ടിയെ പതിനൊന്ന് റൺസിന് പരാജയപ്പെടുത്തി കാസർഗോഡ് ജേതാക്കളായി. ബാസ്ക്കറ്റ് ബോളിൽ ചെന്പേരിയാണ് ജേതാക്കൾ. ഇരിട്ടിയാണ് റണ്ണേഴ്സ് അപ്പ്. 21 പോയിന്‍റു കൾക്കെതിരെ 35 പോയിന്‍റ ുകൾ നേടിയാണ് ചെന്പേരി വിജയി കളായത്. ബാസ്കറ്റ് ബോൾ മത്സരത്തിൽ ബെസ്റ്റ് പ്ലെ്ലയറായി ഫാ. ജെറിൻ പന്തല്ലൂപറമ്പിലും സീനിയർ വിഭാഗത്തിൽ ഫാ. മാത്യു ശാസ്താംപടവിലും തെരഞ്ഞെടുക്കപ്പെട്ടു. ക്രിക്കറ്റിൽ ഫാ. പ്രവീൺ കായംകാട്ടിൽ മാൻ ഓഫ് ദി മാച്ച് പുരസ്കാരം നേടി. വികാരി ജനറാൾമാരായ മോൺ. ആന്‍റണി മുതുകുന്നേൽ, മോൺ. സെബാസ്റ്റ്യൻ പാലക്കുഴി, മോൺ. മാത്യു ഇളംതുരുത്തിപടവിൽ എന്നിവർ മത്സരങ്ങൾക്ക് നേതൃത്വം നൽകി. സമാപന സമ്മേളനം ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്തു. ആർച്ച്ബിഷപ് എമരിറ്റസ് മാർ ജോർജ് വലിയമറ്റം സമ്മാനദാനം നിർവഹിച്ചു. ടൂർണമെന്‍റിലെ വോളിബോൾ, ഷട്ടിൽ ബാഡ്മിന്‍റൺ‍ (ഡബിൾസ്) മത്സരങ്ങൾ ഒക്ടോബർ 20ന് നടക്കും. വൈദികരുടെ ഇടയിൽ പരസ്പര സൗഹൃദവും കായിക ക്ഷമതയും വർധിപ്പിക്കുന്നതിനായാണ് സൗഹൃദോത്സവം സംഘടിപ്പിച്ചത്. വിവിധ ഇടവക പള്ളികളുടെ ഭാരിച്ച ഉത്തരവാദിത്വങ്ങൾ അല്പ സമയത്തേക്ക് മാറ്റിവച്ച് പഴയ സെമിനാരി കാലത്തെ സൗഹൃദ ങ്ങളിലേക്കുള്ള തിരിച്ചുപോകൽ കൂടി യായിരുന്നു സൗഹൃദോത്സവം മത്സരങ്ങൾ.

ഓടയിലൂടെ മാലിന്യം പുഴയിലേക്ക് ഒഴുക്കുന്നു

ആലക്കോട്: ടൗണിലെ മാലിന ജലത്തിനൊപ്പം മാലിന്യങ്ങളും ഓ‌ടയിലൂടെ പുഴയിലേക്ക് ഒഴുക്കി വിടുന്നു. ഒറ്റത്തെ റോഡിലാണ് മാലിന്യവും മലിനജലവും പുഴയിലേക്ക് ഒഴുക്കുന്നത്. ആലക്കോട് ടൗണിലെ ശുദ്ധജല വിതരണത്തിന് ഉപയോഗിക്കുന്നതും നിരവധി ആളുകൾ കുടിവെള്ളത്തിനും കുളിക്കാനും ആശ്രയിക്കുന്ന പുഴയിലേക്കാണ് മാലിന്യം തുറന്നു വിടുന്നത്. ഇത് ഗുരുതരമായ ആരോഗ്യ പ്രശ്നങ്ങൾക്ക് ഇടയാക്കും. ഓടയുടെ തുറന്നു വച്ച ഭാഗത്ത് മാലിന്യങ്ങൾ കെട്ടിക്കിടക്കുന്നുണ്ട്. ഇതു കാരണം ഓട നിറഞ്ഞ് കൊതുകുകളും പെരുകുയിട്ടുണ്ട്. ജലജന്യ രോഗങ്ങൾ പെരുകുന്പോൾ ആരോഗ്യവകുപ്പ് നിരന്തരം ജാഗ്രതാ നിർദേശം നൽകി വരുന്പോൾ തന്നെയാണ് അധികൃതർ പരസ്യമായി മലിനജലം പുഴയിലേക്ക് ഒഴുക്കി വിട്ടു കൊണ്ടിരിക്കുന്നത്.

മലയോരത്ത് വിയറ്റ്നാം മോഡൽ കുരുമുളക് കൃഷി പരീക്ഷണം

ചെറുപുഴ: വിയറ്റ്നാം മോഡൽ കുരുമുളക് കൃഷിയിലേക്ക് തിരിഞ്ഞ് മലയോര കർഷകർ. കുറഞ്ഞ സ്ഥലത്ത് കൂടുതൽ കൃഷിയെന്ന ഹൈഡെൻസിറ്റി എന്ന ശാസ്ത്രീയ കൃഷി രീതിയാണ് വിയറ്റ്നാം മോഡലിന്‍റെ പ്രത്യേകത. ചെറുപുഴ-കടുമേനി റോഡരികിൽ വെണ്യക്കരയിൽ തോമസ് പാറശേരിൽ തന്‍റെ 17 സെന്‍റിൽ 145 കുരുമുളക് വള്ളികളാണ് വിയറ്റ്നാം മോഡലിൽ കൃഷി ചെയ്യുന്നുണ്ട്. നാലിഞ്ച് വണ്ണവും രണ്ടര മീറ്റർ ഉയരവുമുള്ള പിവിസി പൈപ്പിലാണ് തൈകൾ പിടിപ്പിച്ചിരിക്കുന്നത്. ഇനിയും രണ്ടര മീറ്റർ കൂടി പിവിസി പൈപ്പിന് ഉയരം കൂട്ടും. ഏഴരയടി സമചതുരത്തിലാണ് പിവിസി പൈപ്പുകൾ നാട്ടുന്നത്. ഇതിൽ കൂമ്പുങ്കൻ, വിജയ്, പന്നിയൂർ വൺ എന്നീ മൂന്നിനങ്ങളാണ് നട്ടിരിക്കുന്നത്. തോട്ടത്തിൽ കാടുപിടിക്കാതിരിക്കാൻ വീഡ് മാറ്റ് വിരിച്ചിട്ടുണ്ട്. ഇതുകാരണം വെള്ളം നന്നായി മണ്ണിലിറങ്ങും. അടിസ്ഥാന വളമായി ബംഗളൂരു ഐസിഎആറിന്‍റെ ശിപാർശയോടെ തയാറാക്കിയ ചകിരി കമ്പോസ്റ്റും ചാണകവും ഇട്ടാണ് തൈകൾ നട്ടത്. ഇതുകാരണം ചുവട് ഇളകുകയേ ഇല്ല. ഫോളിയാർ രൂപത്തിൽ സസ്യങ്ങൾക്കാവശ്യമായ മൂലകങ്ങൾ സ്പ്രേ ചെയ്തു കൊടുക്കുന്നതാണ് ഈ കൃഷി രീതിയുടെ മറ്റൊരു പ്രത്യേകത. കീടങ്ങളിൽ നിന്നും സംരക്ഷണം കിട്ടുന്നതിനായി തോട്ടത്തിന് ചുറ്റും ചെണ്ടുമല്ലിയും നട്ടിട്ടുണ്ട്. കടുമേനി ഫാർമേഴ്സ് ഗ്രൂപ്പംഗമാണ് തോമസ്. തോമസ് ഉൾപ്പെടെ 10 ഗ്രൂപ്പംഗങ്ങളും വിയറ്റ്നാം മോഡൽ കൃഷിയിൽ സജീവമാണ്. കുരുമുളക് ചെടികൾക്കിടയിൽ പച്ചക്കറികളും നടും. തൈകൾ നട്ട് ആറുമാസമാകുന്പോഴേക്കും തിരിയിടും. നാലുവർഷം കൊണ്ട് മുടക്കുമുതൽ തിരിച്ച് കിട്ടുമെന്ന് കർഷകനായ തോമസ് പറഞ്ഞു.

ചെങ്ങളായി-അഡൂർ പാലം നിർമാണം പുനരാരംഭിച്ചു

ശ്രീകണ്ഠപുരം: പണി നിർത്തിവച്ചിരുന്ന ചെങ്ങളായി-അഡൂർ പാലത്തിന്‍റ നിർമാണം പുനരാരംഭിച്ചു. നിർമാണ സാമഗ്രികൾ എത്തിക്കാനാവാത്തതിനെ തുടർന്ന് പാലം പണി നിലച്ചത്. ഇത് ദീപിക റിപ്പോർട്ട് ചെയ്തിരുന്നു. ഇതിനു പിന്നാലെയാണ് കരാറുകാരൻ സാമഗ്രികളെത്തിച്ച് പണിയാരംഭിച്ചിരിക്കുന്നത്. ശക്തമായ മഴയും പ്രവൃത്തി സ്തംഭിക്കാൻ കാരണമായിരുന്നു.12 കോടി രൂപ ചെലവിലാണ് അഡൂർക്കടവിൽ പാലം നിർമിക്കുന്നത്. 2018-19 വർഷത്തെ ബജറ്റിൽ 9.50 കോടിരൂപ പാലം നിർമാണത്തിന് അനുവദിച്ചിരുന്നു. സമീപന റോഡ് നിർമാണത്തിനായി നാട്ടുകാർ സൗജന്യമായി സ്ഥലം നൽകുകയും ചെയ്തിരുന്നു. എന്നാൽ, 2018-19 വർഷങ്ങളിലുണ്ടായ വെള്ളപ്പൊക്കത്തെ തുടർന്ന് പൊതുമരാമത്തുവകുപ്പ് പാലത്തിന്‍റെ പ്ലാനിലും എസ്റ്റിമേറ്റിലും റീകാസ്റ്റിംഗ് വരുത്തി. ഇതോടെയാണ് തുടർനടപടികൾ നിലച്ചത്. പിന്നീട് എസ്റ്റിമേറ്റ് പുതുക്കി ഭരണാനുമതി നൽകുകയായിരുന്നു. നിലവിൽ ചെങ്ങളായി ഭാഗത്താണ് പ്രവൃത്തി പുരോഗമിക്കുന്നത്. തളിപ്പറമ്പ്-ഇരിട്ടി സംസ്ഥാന പാതയിൽ ചെങ്ങളായി ഭാഗത്തുനിന്ന് കടവിലേക്കുള്ള അനുബന്ധ റോഡാണ് ആദ്യം ഒരുക്കിയത്. പിന്നാലെ തൂൺ നിർമാണവും തുടങ്ങി. പൊതുമരാമത്ത് വകുപ്പധികൃതർ കഴിഞ്ഞദിവസം സ്ഥലത്തെത്തി നിർമാണ പ്രവൃത്തികൾവിലയിരുത്തി. ഊരാളുങ്കൽ സൊസൈറ്റിക്കാണ് നിർമാണച്ചുമതല. നിയമപരമായല്ല ടെൻഡർ നൽകിയതെന്നാരോപിച്ച് ഇരിക്കൂറിലെ നിർമാണ കമ്പനി കേസിനെ തുടർന്ന് നിർമാണം നേരത്തെ ഒരു വർഷത്തോളം സ്തംഭിച്ചിരുന്നു. കേസ് ഹൈക്കോതി തള്ളിയതിനെ തുടർന്നായിരുന്നു പ്രവൃത്തിയാരംഭിച്ചത്.

പ്രകൃതി സംരക്ഷണ ക്ലാസ് നടത്തി

കണ്ണൂർ: കയ്‌റോസ് കണ്ണൂര്‍, കോള്‍പിംഗ് ഇന്ത്യ എന്നിവയുടെ നേതൃത്വത്തില്‍ താവം ഫാത്തിമ മാതാ പള്ളി ഹാളില്‍ പ്രകൃതി സംരക്ഷണ ക്ലാസ് നടത്തി. താവം ഇടവക വികാരി ഫാ. ജീസണ്‍ തണ്ണിക്കോട്ട് ഉദ്ഘാടനം ചെയ്തു. കോള്‍പിംഗ് കോ-ഓര്‍ഡിനേറ്റര്‍ കെ. അരുണ്‍ അധ്യക്ഷത വഹിച്ചു. ജൈവ കൃഷിയില്‍ ദേശിയ അവാര്‍ഡ് നേടിയ കെ.ബി.ആര്‍. കണ്ണന്‍ പ്രകൃതി സംരക്ഷണവും, കൃഷിയുടെ പ്രാധാന്യവും, പോഷക ആഹാരങ്ങളെക്കുറിച്ചും ക്ലാസെടുത്തു. അംഗങ്ങള്‍ക്ക് നാടന്‍ പച്ചക്കറി വിത്തുകള്‍ വിതരണം ചെയ്തു. റീജിയണല്‍ കോ-ഓര്‍ഡിനേറ്റര്‍ എം.വി. ചന്ദ്രന്‍, ഫെഡറേഷന്‍ പ്രസിഡന്‍റ് ഷൈമ അഗസ്റ്റിന്‍ എന്നിവർ പ്രസംഗിച്ചു. 30 കോള്‍പിംഗ് മെംബര്‍മാര്‍ പങ്കെടുത്തു.

മണൽ കടത്തിയ വാഹനം പോലീസ് പിന്തുടർന്ന് പിടികൂടി

പഴയങ്ങാടി: മാട്ടൂലിൽ നിന്ന് അനധികൃതമായി കടത്തിക്കൊണ്ടുപോയ പുഴ മണൽ പഴയങ്ങാടി എസ്ഐ കെ. സുഹൈലും സംഘവും പിന്തുടർന്ന് പിടികൂടി. മാട്ടൂൽ സൗത്തിലെ സ്ട്രീറ്റ് നമ്പർ 45 ഭാഗത്ത് നിന്ന് മണലുമായി എത്തിയ ടിപ്പർ ലോറിയെ പോലീസ് സംഘം കൈ കാണിച്ചു. എന്നാൽ, പോലീസ് സംഘത്തെ കണ്ട് ലോറി അമിത വേഗതയിൽ ഓടിച്ചു പോകുകയായിരുന്നു. വാഹനത്തെ പിന്തുടർന്ന് മാട്ടൂൽ മടക്കര പാലത്തിന് സമീപത്തു നിന്ന് പിടികൂടുകയായിരുന്നു. ലോറിയിൽ ഉണ്ടായിരുന്നവർ വാഹനം ഉപേക്ഷിച്ച് രക്ഷപ്പെട്ടു. ഇന്നലെ പുലർച്ചെ മൂന്നോടെ പട്രോളിംഗിനിടെയാണ് സംഭവം. മണലും ടിപ്പർ ലോറിയും സ്റ്റേഷനിലേക്ക് മാറ്റി. ഒരു ഇടവേളക്ക് ശേഷം ഈ ഭാഗങ്ങളിൽ മണൽ കടത്ത് സംഘം പിടി മുറുക്കുകയാണെന്ന ആരോപണം ശക്തമാകുന്നുണ്ട്.

റൺ പാലക്കയംതട്ട്; ഫ്ലാഷ് മോബുമായി മണിക്കടവ് സെന്‍റ് തോമസ് സ്കൂൾ വിദ്യാർഥികൾ

ചെമ്പേരി: പയ്യാവൂരിൽ നിന്ന് പുലിക്കുരുമ്പയിലേക്ക് നടന്ന മിനി മാരത്തണിന്‍റെ ഭാഗമായ പതിനെട്ട് വയസിൽ താഴെയുള്ളവരുടെ "ഫൺ റണ്ണിൽ' ശ്രദ്ധേയമായ പങ്കാളിത്തവുമായി മണിക്കടവ് സെന്‍റ് തോമസ് ഹയർ സെക്കൻഡറി സ്കൂൾ വിദ്യാർഥികൾ. 75 വിദ്യാർഥികളാണ് സ്കൂളിനെ പ്രതിനിധീകരിച്ച് പുലർച്ചെ അഞ്ചോടെ തന്നെ മിനി മാരത്തണിന്‍റെ സ്റ്റാർട്ടിംഗ് പോയിന്‍റായ പയ്യാവൂരിൽ എത്തിച്ചേർന്നത്. ഇവർ ചിയർ ഡാൻസോടു കൂടി മത്സരാർഥികളെ സ്വീകരിച്ചു. ഏറ്റവും കൂടുതൽ വിദ്യാർഥികളെ പങ്കെടുപ്പിച്ച സ്കൂളും സെന്‍റ് തോമസാണ്. വിദ്യാർഥികൾ ഫ്ലാഷ് മോബും ലഹരി വിരുദ്ധ സന്ദേശ പ്രചരണങ്ങളും നടത്തി. എൻഎസ്എസ്, സ്കൗട്ട് ആൻഡ് ഗൈഡ്സ് യൂണിറ്റുകളുടെ നേതൃത്വത്തിൽ ലഹരി വിരുദ്ധ, പ്രകൃതി സംരക്ഷണ സന്ദേശങ്ങളടങ്ങിയ പ്ലക്കാർഡുകളുമായാണ് വിദ്യാർഥികൾ മാരത്തണിൽ പങ്കാളികളായത്. അക്കാഡമിക് രംഗത്തും കല, കായിക, സാംസ്കാരിക പ്രവർത്തനങ്ങളിലും മുന്നേറ്റം നടത്തിവരുന്ന മണിക്കടവ് സെന്‍റ് തോമസ് ഹയർ സെക്കൻഡറി സ്കൂൾ മാരത്തണിലെ പങ്കാളിത്തത്തിലൂടെ തങ്ങളുടെ സാമൂഹിക പ്രതിബദ്ധതയുമാണ് ഒരിക്കൽ കൂടി തെളിയിച്ചിരിക്കുന്നത്.

80 ലേക്ക് കുതിച്ച് ഞാലിപ്പൂവൻ

കേളകം: ഞാലിപ്പൂവൻ പഴത്തിന്‍റെ വില നേന്ത്രൻ പഴത്തിനെ കടത്തിവെട്ടി മുന്പിലെത്തി. കിലോയ്ക്ക് 80 മുതൽ 90 രൂപ വരെയാണ് ഇപ്പോൾ മാർക്കറ്റ് വില. ടൗണിൽ 100 രൂപയിലേക്ക് എത്തുകയാണ്. എന്നാൽ, കൂടുതൽ വില നൽകിയാലും നാട്ടിൽ വിളയിച്ച ഞാലിപ്പൂവൻ കിട്ടാനുമില്ല. കാട്ടുപന്നിയുടെയും കുരങ്ങിന്‍റെയും ശല്യം കാരണം മലയോരത്ത് കൃഷിയിറക്കാൻ കഴിയാത്ത സ്ഥിതിയാണുള്ളത്. ഞാലിപ്പൂവൻ പഴം പ്രധാനമായും കർണാടക, തമിഴ്നാട് എന്നിവിടങ്ങളിൽ നിന്നാണ് എത്തുന്നത്. തമിഴ്നാട്ടിലെയും കർണാടകത്തിലെയും മൊത്ത കച്ചവട വില 65 മുതൽ 70 രൂപ വരെയാണ്. ഒരുകാലത്ത് വ്യാപകമായി ഞാലിപ്പൂവൻ കൃഷി ചെയ്തിരുന്നെങ്കിലും ഇപ്പോൾ നന്നേ കുറവാണ്. വന്യമൃഗ ശല്യമാണ് പ്രധാന കാരണം കൃഷി ചെയ്യാനാകാത്ത സ്ഥിതിയാണ്. നേന്ത്രപഴത്തിന് കിലോയ്ക്ക് 70 മുതൽ 80 രൂപ വരെയാണ് വില. എന്നാൽ, കർണാടകത്തിൽ നിന്നും വയനാട്ടിൽ നിന്നും നേന്ത്രക്കുല വ്യാപകമായി എത്തുന്നതിനാൽ നാടൻ കുലയ്ക്ക് വേണ്ടത്ര ഡിമാൻഡ് ഇല്ലെന്ന് കർഷകർ പറയുന്നു. 40 മുതൽ 50 രൂപ വരെ നിരക്കിൽ കർണാടകത്തിൽ നിന്നും വയനാട്ടിൽ നിന്നും നേന്ത്രക്കുല യഥേഷ്ടം കേരളത്തിലേക്ക് എത്തുന്നുണ്ട്.

ഭ്രാന്തൻ കുറുക്കൻ-തെരുവുനായ ഭീതിയിൽ ഉളിക്കൽ; ഒരാൾക്ക് നായയുടെ കടിയേറ്റു

ഉളിക്കൽ: ഭ്രാന്തൻ കുറുക്കൻ, തെരുവുനായ ഭീഷണിയിൽ ഉളിക്കൽ ടൗണും പരിസര പ്രദേശങ്ങളും. ഇന്നലെ ജോലി കഴിഞ്ഞ് മടങ്ങുകയായിരുന്ന ഹോട്ടൽ തൊഴിലാളിയെ തെരുവുനായ കടിച്ചു പരിക്കേൽപ്പിച്ചു. ഉളിക്കൽ സ്വദേശി ഷണ്മുഖനാണ് (74) കടിയേറ്റത്. ഷണ്മുഖനെ ജില്ലാ ആശുപത്രിയിൽ പ്രവേശിപ്പിച്ചു. തെരുവുനായ വളർത്തു മൃഗങ്ങളെ കടിച്ചിട്ടുണ്ടോ എന്ന കാര്യം വ്യക്തമായിട്ടില്ല. ഇത് രണ്ടാം ദിവസമാണ് ഭ്രാന്തൻ കുറുക്കനും തെരുവുനായയും മേഖലയിൽ ഭീഷണി തീർക്കുന്നത്. ഭ്രാന്തൻ കുറുക്കനും തെരുവുനായ്ക്കളും പുലർച്ചെ ജോലിക്ക് ഇറങ്ങുന്ന ടാപ്പിംഗ് തൊഴിലാളികൾക്കും രാവിലെ മദ്രസയിൽ ഉൾപ്പെടെ പോകുന്ന വിദ്യാർഥികൾക്കും കടുത്ത ഭീഷണി ഉയർത്തുന്നുണ്ട്. ബസ് സ്റ്റാൻഡ് പരിസരങ്ങളിലും ആളൊഴിഞ്ഞ കെട്ടിടത്തിന്‍റ ഭാഗത്തായാണ് തെരുവുനായകൾ പകൽ തന്പടിക്കുന്നത്. രാത്രിയാകുന്നതോടെ ഇവ കൂട്ടത്തോടെ ഇറങ്ങുകയും അക്രമണോത്സുകത പ്രകടിപ്പിക്കുകയുമാണ്. തെരുവുനായകൾക്ക് ഒരാൾ ഭക്ഷണമെത്തിച്ച് നൽകി വരുന്നുണ്ട്. ഇയാളുടെ വീട്ടുപരിസരത്തും നിരവധി നായകളാണ് തന്പടിക്കുന്നത്. ഈ നായകൾ തന്നെയാണ് പലപ്പോഴും അക്രമാസക്തമാകുന്നതെന്ന് നാട്ടുകാർ പറഞ്ഞു.

അമീബിക് മസ്തിഷ്ക ജ്വരം: ജാഗ്രത വേണമെന്ന് ഡിഎംഒ

കണ്ണൂർ: അമീബിക് മസ്തിഷ്ക ജ്വരവുമായി ബന്ധപ്പെട്ട് പൊതുജനങ്ങൾ ആരോഗ്യകരമായ ശീലങ്ങൾ പാലിക്കണമെന്ന് ജില്ലാ മെഡിക്കൽ ഓഫീസർ ഡോ. പിയുഷ്‌ എം. നമ്പൂതിരിപ്പാട് അറിയിച്ചു. കുളിക്കാൻ ഉപയോഗിക്കുന്ന കിണർ വെള്ളം നിർബന്ധമായും ക്ലോറിനേറ്റ് ചെയ്യണം. വെള്ളത്തിലെ അമീബയെ നശിപ്പിക്കാൻ ക്ലോറിനേഷൻ ഫലപ്രദമാണ്. കെട്ടിക്കിടക്കുന്ന വെള്ളത്തിൽ മുങ്ങിക്കുളിക്കുന്നതും ഡൈവ് ചെയ്യുന്നതും ഒഴിവാക്കണമെന്ന് ഡിഎംഒ അഭ്യർഥിച്ചു. നിലവിൽ റിപ്പോർട്ട്‌ ചെയ്ത അമീബിക് മസ്തിഷ്ക ജ്വര കേസുകളിൽ പ്രധാനമായും മൂക്കിലൂടെയാണ് അമീബ തലച്ചോറിലേക്ക് പ്രവേശിച്ചിട്ടുള്ളത് എന്ന് റിപ്പോർട്ട്‌ ചെയ്യപ്പെട്ടിട്ടുള്ളതിനാലാണ് കെട്ടിക്കിടക്കുന്ന വെള്ളത്തിലെ മുങ്ങിക്കുളിയും ഡൈവ് ചെയ്യലും ഒഴിവാക്കാൻ നിർദേശിച്ചിട്ടുള്ളത്. അതോടൊപ്പം ജില്ലയിൽ മസ്തിഷ്ക ജ്വര ലക്ഷണവുമായി ബന്ധപ്പെട്ട കേസുകൾ റിപ്പോർട്ട്‌ ചെയ്യാൻ ജില്ലയിലെ ആശുപത്രികൾക്ക് ഡിഎംഒ നിർദേശം നൽകി. ജില്ലയിൽ ഭയപ്പെടേണ്ട സാഹചര്യം ഇല്ല. ആരോഗ്യ കരമായ ശീലം പാലിക്കുന്നതിലൂടെ പൂർണമായും ഈ രോഗത്തെ അകറ്റി നിർത്താനാവുന്നതാണ്. കുട്ടികൾ കുളിക്കാൻ പോകുന്നതും നീന്തൽ പഠിക്കുന്നതുമായ നീന്തൽ കുളങ്ങൾ ക്ലോറിനേറ്റ് ചെയ്യണം. ക്ലോറിനേഷൻ ചെയ്യാത്ത നീന്തൽക്കുളങ്ങളിൽ ഒരു കാരണവശാലും കുളിക്കരുതെന്ന് ഡിഎംഒ അറിയിച്ചു. രോഗ ലക്ഷണങ്ങൾ തീവ്രമായ തലവേദന, പനി, ഓക്കാനം, ഛർദ്ദി, കഴുത്ത് തിരിക്കാൻ ബുദ്ധിമുട്ട്, വെളിച്ചത്തിലേക്ക് നോക്കാനുള്ള ബുദ്ധിമുട്ട് എന്നിവ. കുഞ്ഞുങ്ങളിൽ കാണപ്പെടുന്ന ലക്ഷണങ്ങൾ ഭക്ഷണം കഴിക്കാനുള്ള വിമുഖത, നിഷ്ക്രിയരായി കാണപ്പെടുക, സാധാരണമല്ലാത്ത പ്രതികരണങ്ങൾ എന്നിവ. രോഗം ഗുരുതരമായാൽ ഓർമക്കുറവ്, അപസ്മാരം, ബോധക്ഷയം എന്നിയുമുണ്ടാകും. രോഗലക്ഷണങ്ങൾ പ്രകടമായാൽ എത്രയും വേഗം ചികിത്സ ലഭ്യമാക്കണം. എന്താണ് അമീബിക് മസ്തിഷ്ക ജ്വരം നേഗ്ലെറിയ ഫൗലേറി, അക്കാന്ത അമീബ, സാപ്പിനിയ, ബാലമുത്തിയ, വെർമീബ എന്നീ അമീബ വിഭാഗത്തിൽപ്പെട്ട രോഗാണുക്കൾ തലച്ചോറിനെ ബാധിക്കുമ്പോഴാണ് അമീബിക് മസ്തിഷ്ക ജ്വരം അഥവാ അമീബിക് എൻസെഫലൈറ്റിസ് ഉണ്ടാകുന്നത്. സാധാരണയായി കെട്ടിക്കിടക്കുന്ന വെള്ളത്തിൽ മുങ്ങിക്കുളിക്കുന്നവരിലും നീന്തുന്നവരിലുമാണ് രോഗബാധ ഉണ്ടാകുന്നത്. മൂക്കിനെയും മസ്തിഷ്ക്കത്തെയും വേർതിരിക്കുന്ന നേർത്ത പാളിയിലുള്ള സുഷിരങ്ങൾ വഴിയോ കർണ പടലത്തിലുണ്ടാകുന്ന സുഷിരങ്ങൾ വഴിയോ അമീബ തലച്ചോറിലേക്ക് കടക്കുകയും ചെയ്യുന്പോഴാണ് മെനിഞ്ചോ എൻസെഫലൈറ്റിസ് ഉണ്ടാകുന്നത്. 97 ശതമാനത്തിലധികം മരണനിരക്കുള്ള രോഗമാണിത്. രോഗം മനുഷ്യരിൽ നിന്നും മനുഷ്യരിലേക്ക് പകരില്ല. രോഗാണുബാധ ഉണ്ടായാൽ അഞ്ചു മുതൽ 10 ദിവസത്തിനുള്ളിൽ രോഗലക്ഷണങ്ങൾ പ്രകടമാകുന്നു.

അക്രമകാരികളായ മൃഗങ്ങളെ കൊല്ലാൻ അനുമതി നൽകുന്ന ബിൽ പാർട്ടിയുടെ വിജയം: ജോസ് കെ. മാണി

ഇരിട്ടി: ജനവാസ മേഖലകളിൽ ഇറങ്ങുന്ന അക്രമകാരികളായ വന്യമൃഗങ്ങളെ കൊല്ലാൻ അനുമതി നൽകുന്ന നിയമ നിർമാണത്തിലേക്ക് സംസ്ഥാനം കടക്കുന്നത് കേരള കോൺഗ്രസ്-എം പാർട്ടി നടത്തിയ പോരാട്ടങ്ങളുടെ വിജയമാണെന്ന് ജോസ് കെ. മാണി എംപി. കേരള കോൺഗ്രസ്-എം ജില്ലാ നേതൃയോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ബില്ലിന് മന്ത്രിസഭ അനുമതി നൽകിയത് അങ്ങേയറ്റം പ്രശംസനീയവും ജനോപകാരപ്രദവുമായ നടപടിയാണ്. മനുഷ്യരുടെ സ്വത്തിനും ജീവനും ഭീഷണിയാകുന്ന വന്യമൃഗത്തെ വെടിവയ്ക്കാനുള്ള ഉത്തരവ് നൽകാൻ ജില്ലാ കളക്ടർമാരെ അധികാരപ്പെടുത്തുന്നത് മനുഷ്യ സുരക്ഷയ്ക്ക് ആവശ്യമായ നടപടികൾ വേഗത്തിലാക്കും. നിയമസഭ ഒറ്റക്കെട്ടായി ഈ ബിൽ പാസാക്കണം. അതിരൂക്ഷമായ വന്യജീവി ആക്രമണങ്ങൾ മൂലം കേരളത്തിലെ വനാതിർത്തി പങ്കിടുന്ന ജനവാസ മേഖലകളിൽ ജനജീവിതം സ്തംഭിച്ചിരിക്കുകയാണ്. കർഷകർക്ക് കൃഷിഭൂമിയിൽ കൃഷി ചെയ്യുന്നതിനോ വിളവെടുക്കുന്നതിനോ സാധിക്കാത്ത അതീവ ഗുരുതരമായ സാഹചര്യമാണ് നിലവിലുള്ളത്. ഏതു നിമിഷവും ഒരു വന്യമൃഗം ആക്രമിച്ചേക്കാമെന്ന ഭീതിയിലാണ് വനമേഖലയോട് ചേർന്നുള്ള ജനവാസമേഖലകളിലെ ആളുകൾ ജീവിക്കുന്നത്. തൊഴിലിടങ്ങളിലേക്ക് പോകാൻ പലയിടങ്ങളിലും കഴിയുന്നില്ല. കുട്ടികൾക്ക് വിദ്യാലയങ്ങളിൽ പോകാനാകാത്ത സാഹചര്യമുള്ള സ്ഥലങ്ങളുമുണ്ട്. വന്യജീവി ആക്രമണങ്ങൾ ഉണ്ടാകുമ്പോൾ പെട്ടെന്ന് തീരുമാനം എടുത്ത് നടപ്പാക്കാൻ കഴിയാത്തത് മൂലം വലിയ നാശനഷ്ടങ്ങളാണ് സംഭവിച്ചുകൊണ്ടിരിക്കുന്നത്. ഇതിനെല്ലാമുള്ള പരിഹാരമാണ് ഇപ്പോൾ സംസ്ഥാന സർക്കാർ മുൻകൈയെടുത്ത് നടപ്പിലാക്കുന്നത്. 1972 ലെ കേന്ദ്ര വന്യജീവി സംരക്ഷണ നിയമം ഭേദഗതികൾ വരുത്തില്ലെന്ന കേന്ദ്രസർക്കാർ നിലപാട് അങ്ങേയറ്റം പ്രതിഷേധാർഹവും ജനവിരുദ്ധവുമാണെന്നും ജോസ് കെ. മാണി എംപി പറഞ്ഞു. ജില്ലാ പ്രസിഡന്‍റ് ജോയി കൊന്നയ്ക്കൽ അധ്യക്ഷത വഹിച്ചു. ജോയിസ് പുത്തൻപുര, മാത്യു കുന്നപ്പള്ളി, സജി കുറ്റ്യാനിമറ്റം, ജോസ് ചെമ്പേരി, കെ.ടി. സുരേഷ്കുമാർ, തോമസ് മാലത്ത്, ബിനു മണ്ഡപം, സി.എം. ജോർജ്, പി.എസ്. ജോസഫ്, സി.ജെ. ജോൺ, മാത്യു പുളിക്കക്കുന്നേൽ, വിപിൻ തോമസ്, ജയിംസ് മരുതാനിക്കാട്ട്, ബിജു പുതുപ്പള്ളി, ജോർജ് മാത്യു, അൽഫോൺസ് കളപ്പുര, അമൽ ജോയി കൊന്നയ്ക്കൽ, റെജി മേച്ചേരിക്കുന്നേൽ, ജയ്സൺ ജീരകശേരി, നോബിസ് ചെരിപുറം, എ.കെ. രാജു, ഡോ. ത്രേസ്യാമ്മ കൊങ്ങോല, ഷോണി അറയ്ക്കൽ, ജെസി മോൾ വാഴപ്പള്ളി എന്നിവർ പ്രസംഗിച്ചു.

അതിഥി തൊഴിലാളി കുഴഞ്ഞുവീണു മരിച്ചു

മട്ടന്നൂർ: അതിഥി തൊഴിലാളി കുഴഞ്ഞുവീണു മരിച്ചു. അസം നാഗോൺ ജോമർമുറിലെ അബ്ദുൾ ജലീലിന്‍റെ മകൻ ടാരജൻ അലി (22) യാണ് മരിച്ചത്. മട്ടന്നൂർ റാറാവീസ് മന്തി ഹൗസിലെ ക്ലീനിംഗ് തൊഴിലാളിയായിരുന്നു. കഴിഞ്ഞ ദിവസം രാത്രിയിലായിരുന്നു കുഴഞ്ഞുവീണത്. പോസ്റ്റ്മോർട്ടത്തിന് ശേഷം വൈകുന്നേരത്തോടെ മട്ടന്നൂരിലെത്തിച്ച മൃതദേഹം റാറാവീസ് മന്തി ഹൗസ് പരിസരത്ത് പൊതുദർശനത്തിന് വച്ച ശേഷം വിമാന മാർഗം നാട്ടിലേക്ക് കൊണ്ടുപോയി.

വളപട്ടണം പോലീസിന്‍െ ജീവൻ രക്ഷാപ്രവർത്തനം: ബിഗ് സല്യൂട്ട്

കണ്ണൂർ: ഡ്യൂട്ടിക്കായി ബൈക്കിൽ പോകുന്നതിനിടെയാണ് വളപട്ടണം പാലത്തിന്‍റെ കൈവരിയിൽ ഷർട്ടില്ലാതെ ഒരു വയോധികൻ നിൽക്കുന്നതായി വളപട്ടണം പോലീസ് സ്റ്റേഷനിലെ എഎസ്ഐ സുജിത്തിന്‍റെയും സിപിഒ മിഥുനിന്‍റെയും ശ്രദ്ധയിൽപ്പെട്ടത്. ഇരുവരും സൂക്ഷിച്ചുനോക്കിയപ്പോൾ ഇയാളുടെ കാലുകൾ മെല്ലെ ഉയർത്തുന്നതായി ശ്രദ്ധയിൽപ്പെട്ടു. ഉടൻ ബൈക്ക് നിർത്തി ഇരുവരും ചാടിയിറങ്ങി ഓടി വയോധികന്‍റെ അടുത്തെത്തി. അടുത്ത കാൽ ഉയർത്തുന്നതിന് മുന്പേ ഇരുവരും ചേർന്ന് പിടിച്ചുമാറ്റി. സെക്കൻഡുകൾ താമസിച്ചിരുന്നെങ്കിൽ അയാൾ പുഴയിലേക്ക് ചാടിയേനെ. കഴിഞ്ഞ ബുധനാഴ്ച ഉച്ചകഴിഞ്ഞ് 3.45 നാണ് സംഭവം. സ്റ്റേഷനിൽനിന്നും പാപ്പിനിശേരി, അരോളി സ്കൂളുകളിൽ എസ്പിസി കേഡറ്റുകൾക്ക് പരിശീലനം നല്കാൻ പോകുന്നതിനിടെയാണ് ഇരുവരും ചേർന്ന് വയോധികനെ രക്ഷപ്പെടുത്തിയത്. ഒറ്റനോട്ടത്തിൽ അയാൾ പുഴയിലേക്ക് ചാടുമെന്ന് മനസിൽ ആരോ തോന്നിപ്പിച്ചതായി എഎസ്ഐ സുജിത്ത് പറഞ്ഞു. ചുറ്റും നോക്കിയപ്പോൾ വയോധികന്‍റെ ബനിയനും ഷർട്ടും നിലത്തു കിടക്കുന്നു. കാലുകൾ കൈവരിയിലേക്ക് ചവിട്ടി കയറുന്നത് കണ്ടപ്പോൾ പുഴയിലേക്ക് ചാടാനാണ് ഭാവം എന്നുററപ്പായി. പിന്നെ, മിന്നൽ വേഗത്തിലായിരുന്നു ഞങ്ങൾ വയോധികന്‍റെ അടുത്തെത്തിയത്. അയാളെ അവിടെനിന്ന് പിന്തിരിപ്പിച്ചപ്പോൾ പേരും സ്ഥലവും മാത്രം പറഞ്ഞു. പിന്നീട്, ഒന്നും ഓർമയില്ലെന്ന് പറ‍യുകയായിരുന്നു. താനെങ്ങനെയാണ് ഇവിടെയെത്തിയെന്നോ, ഇതു പുഴയാണെന്നോ അയാൾക്ക് അറിയില്ലായിരുന്നുവെന്നും സുജിത്ത് പറഞ്ഞു. നേരേ പോലീസ് സ്റ്റേഷനിലേക്ക് കൊണ്ടുപോയി. പല തവണ ചോദിച്ചിട്ടും കൃത്യമായ സ്ഥലം പറഞ്ഞില്ല. ആദ്യം പറഞ്ഞ പഴയങ്ങാടിക്കടുത്ത സ്ഥലം നോക്കി നടത്തിയ അന്വേഷണത്തിലാണ് ബന്ധുക്കളെ പോലീസ് കണ്ടെത്തിയത്. പഴയങ്ങാടി ഏഴോം സ്വദേശിയായ വയോധികൻ പള്ളിയിൽ പോകാൻ വീട്ടിൽനിന്ന് ഇറങ്ങിയതാണെന്ന് വീട്ടുകാർ പറഞ്ഞു. പുഴയിലേക്ക് ചാടാൻ ശ്രമിച്ച വയോധികനെ സമയോചിതമായ ഇടപെടലിലൂടെ രക്ഷപ്പെടുത്തിയ എഎസ്ഐ സുജിത്തിനും സിപിഒ മിഥുനും അഭിനന്ദനപ്രവാഹമാണ്.

പത്ത് പുസ്തകങ്ങളിലൂടെ സഞ്ജയനെ പരിചയപ്പെടുത്തി രമേശൻ ബ്ലാത്തൂർ

സ്വന്തം ലേഖകൻ ശ്രീകണ്ഠപുരം: ചിരിയും ചിന്തകളുമായി മലയാളികളെ സ്വാധീനിച്ച സാഹിത്യകാരൻ മാണിക്കോത്ത് രാമനുണ്ണി നായർ (എം. ആർ. നായർ) എന്ന സഞ്ജയനെ പുതുതലമുറയ്ക്ക് പരിചയപ്പെടുത്തുന്നതിനായി തന്‍റെ സാഹിത്യ പ്രവർത്തനം നീക്കിവച്ച ഒരാളുണ്ട് കണ്ണൂരിൽ. എഴുത്തുകാരനും സാംസ്കാരിക പ്രവർത്തകനുമായ രമേശൻ ബ്ലാത്തൂർ എന്ന സാഹിത്യകാരൻ. ചെറിയ പ്രായം മുതലേ സഞ്ജയനെ വായിച്ചറിഞ്ഞതോടെ രമേശൻ ബ്ലാത്തൂരിന്‍റെ ഹൃദയത്തിൽ ഇദ്ദേഹം ഇടം പിടിക്കുകയായിരുന്നു. പത്തു വർഷത്തിലേറെയുള്ള ശ്രമഫലമായാണ് സഞ്ജയനെ ക്കുറിച്ച് പത്തു പുസ്തകങ്ങൾ ഇദ്ദേഹം തയാറാക്കിയത്. 10 നിരൂപകരായ അവതാരകർ, 10 കാർട്ടൂണിസ്റ്റുകൾ എന്നിവ പുസ്തകങ്ങളെ വ്യത്യസ്ഥമാക്കുന്നു. അയ്യോ കവിത, രുദ്രാക്ഷ മാഹാത്മ്യം, വന്ദേ ഭാര്യാമാതരം, ഞാൻ കുട്ടിച്ചാത്തനായിരുന്നെങ്കിൽ, പൊടിപറ്റുകളും പൊടിപാറ്റികളും, ഇൻജക്ഷൻ, ആളില്ലാത്ത പൊതുയോഗം, ശുനകഗീതം, സഖാവിന്‍റെ ബീച്ച്, ഹാസ്യാഞ്ജലി എന്നീ പേരുകളിലാണ് പുസ്തകങ്ങൾ ഇറക്കിയത്. ചെമ്മനം ചാക്കോ, എൻ.ശശിധരൻ, പ്രഭാകരൻ പഴശി, ഇ.പി.രാജഗോപാലൻ, എം.കെ.സാനു, ഡോ.പി.കെ.രാജശേഖർ ,ഡോ.ഇ.സർദാർകുട്ടി, ഡോ. മ്യൂസ് മേരി, ഡോ.എം.ജി.എസ്.നാരായണൻ, ഡോ. സുകുമാർ അഴീക്കോട് എന്നിവരാണ് അവതാരിക എഴുതിയത്. ഇന്ന് നമുക്ക് ഏറെ പരിചിതമായ ട്രോളുകളും ഫലിത ബിന്ദുക്കളും പാരഡികളും കാർട്ടൂണുകളും സാഹിത്യത്തിലൂടെ ആദ്യമായി മലയാളിക്ക് പരിചയപ്പെടുത്തി അതുല്യ പ്രതിഭയായിരുന്നു സഞ്ജയൻ. 1903 ജൂൺ 13ന് തലശേരി ഒതയോത്ത് തറവാട്ടിൽ മാടാവിൽ കുഞ്ഞിരാമൻ വൈദ്യരുടെയും പാറുവമ്മയുടെയും മകനായി ജനിച്ച സഞ്ജയൻ സാഹിത്യ ലോകത്ത് ഹാസ്യസാഹിത്യം എന്ന പുതുവഴി വെട്ടി എഴുത്തുകാരനായിരുന്നു. അഴിമതിക്കാരായ ഉദ്യോഗസ്ഥർ, മേനി നടിക്കുന്ന സാഹിത്യകാരൻമാർ രാഷ്‌ട്രീയക്കാർ,ഭരണാധികാരികൾ തുടങ്ങിയവരെല്ലാം സഞ്ജയന്‍ തന്‍റെ ഹാസ്യായുധത്തിലൂടെ കീറി മുറിച്ചിരുന്നു. നാൽപതാമത്തെ വയസിൽ മരണത്തിന് കീഴടങ്ങിയ സഞ്ജയന്‍റെ രചനകൾ ശുദ്ധ ഹാസ്യത്തെ സ്നേഹിക്കുന്നവർക്ക് ഇന്നും അമൂല്യ നിധിയാണ്. ‘സഞ്ജയനെ പുതുതലമുറ അറിയണം’ ആധുനിക തലമുറ സഞ്ജയനെ മനസിലാക്കണമെന്ന ലക്ഷ്യത്തോടെയാണ് അദ്ദേഹത്തെക്കുറിച്ച് പുസ്തകങ്ങൾ തയാറാക്കിയത്. മുഴുവൻ സമയവും മൊബൈലിൽ തലപൂഴ്ത്തി കഴിയുന്നവർ കൂടി സഞ്ജയനെ അറിയുകയും മനസിലാക്കുകയും വേണമെന്ന ആഗ്രഹമാണ് പുസ്തകങ്ങൾ ഒരുക്കാൻ പ്രേരണയായത്. സ്കൂൾ പഠനകാലത്ത് രുദ്രാക്ഷ മാഹാത്മ്യം പാഠപുസ്തകത്തിൽ വായിച്ചാണ് രമേശൻ ബ്ലാത്തൂർ ആദ്യമായി സഞ്ജയനെ പരിചയപ്പെടുന്നത്. പലപ്പോഴും ലൈബ്രറികളിൽ അന്വേഷിച്ചപ്പോൾ സഞ്ജയന്റെ സമ്പൂർണ കൃതികൾ പലയിടത്തും കിട്ടാനില്ലായിരുന്നു. ആ സമയത്തു തന്നെയാണ് ജ്യേഷ്ഠൻ രവീന്ദ്രന്‍റെ പുസ്തക അലമാരിയിൽ നിന്നും സഞ്ജയന്‍റെ ഒരു സമാഹാരം ലഭിച്ചത്. ഇതാണ് സഞ്ജയൻ വായനയിലേക്ക് വഴി തുറന്നത്. സഞ്ജയന്‍റെ കൃതികൾക്ക് വേണ്ടിയുള്ള അന്വേഷണം നിരാശാജനകമായിരുന്നു. അന്വേഷിച്ചു തുടങ്ങിയപ്പോഴാണ് സഞ്ജയൻ പത്രാധിപരായിരുന്ന കേരളപത്രികയുടേയോ, സഞ്ജയൻ എന്ന മാസികയുടേയോ പ്രതികൾ സാഹിത്യ അക്കാദമിയിലോ, തൃപ്പൂണിത്തറ ആർക്കൈവ്സിലോ, കോഴിക്കോട് പ്രസിലോ ഒന്നും കിട്ടാനില്ലായിരുന്നു. നീണ്ട അന്വേഷണത്തിന് ഒടുവിലാണ് പ്രഭാഷകൻ വാണിദാസ് എളയാവൂരിന്‍റെ കൈവശം കോപ്പികളുണ്ടെന്ന് അറിയുന്നത്. അത് കൂടാളിയിലെ താഴത്തുവീട്ടിലെ സഹദേവൻ എന്ന എഴുത്തുകാരന്‍റെ ശേഖരത്തിൽ ഉള്ളാണെന്നും അറിഞ്ഞു. അങ്ങനെയാണ് സഞ്ജയൻ മാസികയുടെ പ്രതികൾ തനിക്ക് ലഭിച്ചത്

പരിയാരംകുന്നിലെ ആത്മീയ കേന്ദ്രം; മദര്‍ഹോം ധ്യാനകേന്ദ്രം വാര്‍ഷികം ഇന്ന്

പരിയാരം: മദര്‍ഹോം ധ്യാനകേന്ദ്രം ഇരുപത്തിയൊന്നാം വാര്‍ഷികവും രാപ്പകല്‍ ആരാധനയുടെ ആയിരം ദിവസത്തിന്‍റെ ആഘോഷവും ഇന്നു രാവിലെ 7.30 തിന് മദർ ഹോമിൽ നടക്കും. ഉച്ചകഴിഞ്ഞ് 2.30 വരെയാണ് പരിപാടി. ശുശ്രൂഷകൾക്ക് തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി നേതൃത്വം നല്‍കും. മദർ ഹോം ഡയറക്‌ടർ ഫാ. ബെന്നി പുത്തൻനടയിൽ, അഡ്മിനിസ്‌ട്രേറ്റര്‍ ഫാ. മൈക്കിള്‍ മഞ്ഞക്കുന്നേല്‍, സ്പിരിച്വല്‍ ഡയറക്ടര്‍ ഫാ. പോള്‍ പുലിമലയില്‍, ഫാ.തോമസ് പാറേക്കാട്ടില്‍ എന്നിവരും ശുശ്രൂഷയിൽ പങ്കാളിയാകും. ആത്മീയ നിറവിൽ മൂന്നു ലക്ഷം പേർ 2004 സെപ്റ്റംബർ എട്ടിന് തലശേരി അതിരൂപതയിലെ ധ്യാനഗുരുവായ ഫാ. മാത്യു ആശാരിപറമ്പിലാണ് മദര്‍ ഹോം ധ്യാനകേന്ദ്രത്തിന് തുടക്കം കുറിച്ചത്. 21 വർഷത്തിനിടെ ഏകദേശം മൂന്നുലക്ഷം പേർ ഇവിടെ ധ്യാനത്തിനെത്തി. മലയാളം, കന്നഡ, ഇംഗ്ലീഷ് ഭാഷകളിൽ ധ്യാനവും ശുശ്രൂഷകളും നടത്തുന്നുണ്ട്. പൗർണമി പ്രാർഥന, സിസ്റ്റേഴ്സ് ധ്യാനം, ആത്മീയ ഉപദേശം, വൈദികരുടെ ധ്യാനം, ആന്തരിക-ശാരീരിക സൗഖ്യധ്യാനം, തപസ് ധ്യാനം, കുട്ടികൾക്കുള്ള ധ്യാനങ്ങൾ, ഏകദിന കൺവൻഷനുകൾ, അഖണ്ഡ പ്രാർഥന, ജപമാല റാലി, മരിയൻ പദയാത്ര, പരിശുദ്ധ മറിയത്തിന്‍റെ തിരുനാളാഘോഷം തുടങ്ങിയവയാണ് പ്രധാന ധ്യാനങ്ങളും ശുശ്രൂഷകളും. കിടപ്പുരോഗികൾക്കും ധ്യാനത്തിനുള്ള സൗകര്യമുണ്ട്. രണ്ടാം ശനിയാഴ്ചകളിലാണ് വചനപ്രഘോഷണവും സൗഖ്യശുശ്രൂഷയും. എല്ലാ ശനിയാഴ്ചയും കൗൺസിലിംഗ് സൗകര്യവും ഉണ്ടായിരിക്കും. മാസത്തിൽ രണ്ടു മലയാളം ധ്യാനം, ഒരു കന്നഡ ധ്യാനം, ഇംഗ്ലീഷ് ധ്യാനം എന്നിവയുണ്ടായിരിക്കുമെന്ന് മദർഹോം ഡയറക്‌ടർ ഫാ. ബെന്നി പുത്തൻനടയിൽ പറഞ്ഞു. എല്ലാ ശനിയാഴ്ചകളിലും കൺവൻഷനുകളും ഉണ്ട്. കൂടാതെ സ്പെഷൽ ധ്യാനങ്ങളും ഉണ്ടാകുമെന്നും ഡയറക്‌ടർ അറിയിച്ചു.

പറശിനിക്കടവ്-മാട്ടൂല്‍ റൂട്ടില്‍ ആധുനിക സജ്ജീകരണങ്ങളോടെ ബോട്ട് സര്‍വീസ്

കണ്ണൂർ: പറശിനിക്കടവ് -അഴീക്കല്‍- മാട്ടൂല്‍ റൂട്ടില്‍ സര്‍വീസ് നടത്താന്‍ ഒരുങ്ങുന്ന രണ്ടു ബോട്ടുകള്‍ അഴീക്കല്‍ തുറമുഖത്ത് എത്തി. സംസ്ഥാന ജലഗതാഗത വകുപ്പ് നിര്‍മിച്ച് ആലപ്പുഴയില്‍നിന്നു അഞ്ച് ദിവസം യാത്ര ചെയ്ത് അഴീക്കല്‍ തുറമുഖത്ത് എത്തിയ ബോട്ടുകള്‍ കെ.വി. സുമേഷ് എംഎല്‍എ സന്ദര്‍ശിച്ചു. ബോട്ട് സര്‍വീസ് കാര്യക്ഷമമാക്കുന്നതിനൊപ്പം പാസഞ്ചര്‍ കം ടൂറിസം എന്ന ലക്ഷ്യം കൂടി മുന്നില്‍ക്കണ്ടാണ് ആധുനിക സജ്ജീകരണങ്ങളോടു കൂടിയ ബോട്ടുകള്‍ തയാറാക്കിയതെന്ന് എംഎല്‍എ പറഞ്ഞു. ഇരുബോട്ടുകളിലും അല്പദൂരം യാത്രചെയ്ത എംഎല്‍എ ബോട്ടുകളിലെ ഇരട്ട എന്‍ജിനുകള്‍ ഉള്‍പ്പെടെയുള്ള സംവിധാനങ്ങള്‍ വിലയിരുത്തി. ജില്ലയില്‍ തന്നെ ഏറ്റവുമധികം പേര്‍ ആശ്രയിക്കുന്ന പ്രധാന ബോട്ട് സര്‍വീസായ അഴീക്കല്‍ - മാട്ടൂല്‍ ഫെറി- പറശിനിക്കടവ് അഴീക്കല്‍- മാട്ടൂല്‍ സര്‍വീസ് കാര്യക്ഷമമാക്കുന്നതിനും കാലപ്പഴക്കം സംഭവിക്കുന്ന മരബോട്ടുകള്‍ മാറ്റി ആധുനിക നിലവാരമുള്ള സോളാര്‍ ബോട്ടുകളും കാറ്റമറൈൻ ബോട്ടുകളും അനുവദിക്കണമെന്നും കെ.വി. സുമേഷ് എംഎല്‍എ 2024 ലെ നിയമസഭ സമ്മേളനത്തില്‍ ആവശ്യപ്പെട്ടിരുന്നു. അടുത്ത ദിവസം തന്നെ ബോട്ടുകള്‍ പറശിനിക്കടവ് ബോട്ട് ടെര്‍മിനലില്‍ എത്തുമെന്നും ഗതാഗത മന്ത്രി ഗണേഷ് കുമാര്‍, എം.വി. ഗോവിന്ദന്‍ എംഎല്‍എ എന്നിവര്‍ ഉള്‍പ്പെടെ ചേര്‍ന്ന് സര്‍വീസ് ഉദ്ഘാടനം ചെയ്യുമെന്നും എംഎല്‍എ പറഞ്ഞു. സുഗമവും സുരക്ഷിതവുമായ യാത്രയ്ക്ക് ആറ് ഹള്ളുകള്‍ ഉള്ളതാണ് ബോട്ടുകള്‍. ആറ് ഹള്ളുകളില്‍ ഏതെങ്കിലും ഒന്നില്‍ വെള്ളം കയറിയാല്‍ അലാറം ഉള്‍പ്പെടെ സജ്ജീകരിച്ചിട്ടുണ്ട്. ഉടന്‍തന്നെ വെള്ളം നീക്കം ചെയ്യാനും സാധിക്കും. ഇരട്ട എന്‍ജിനുകള്‍,ഗ്ലോബല്‍ പൊസിഷന്‍ സിസ്റ്റം, ആഴം അറിയാനുള്ള എക്കോ സൗണ്ട്, മ്യൂസിക് സൗണ്ട് സിസ്റ്റം തുടങ്ങിയ സംവിധാനങ്ങളുണ്ട്. സ്ത്രീകള്‍ക്കും പുരുഷന്മാര്‍ക്കുമായി പ്രത്യേകം ടോയ്‌ലറ്റ് സംവിധാനവും ലൈഫ് ജാക്കറ്റുകളും ബോട്ടിലുണ്ട്. ഒരേസമയം 100 യാത്രക്കാര്‍ക്കും അഞ്ചു ജീവനക്കാര്‍ക്കും ബോട്ടില്‍ യാത്ര ചെയ്യാന്‍ സാധിക്കും. ഐആർഎസ് സര്‍ട്ടിഫിക്കറ്റ് ബോട്ടുകള്‍ക്ക് ലഭിച്ചിട്ടുണ്ട്. മുന്നിലും പിറകിലും യാത്രക്കാര്‍ക്ക് നിന്നു കാഴ്ചകള്‍ കാണാന്‍ സാധിക്കുന്ന ഡെക്കുകളാണ് ബോട്ടുകളുടെ മുഖ്യ ആകര്‍ഷണം. ഇരുവശത്തും ഗ്ലാസുകള്‍ ഉള്ളതിനാല്‍ യാത്രക്കാര്‍ക്ക് ഇരുന്നും കാഴ്ചകള്‍ കാണാനാകും. മുകളില്‍ ഇരിപ്പിടങ്ങളും ഒരുക്കിയിട്ടുണ്ട്. ഏറ്റവും ചുരുങ്ങിയ ചെലവില്‍ കാഴ്ചകള്‍ കാണാനും യാത്ര ചെയ്യാനുമുള്ള സൗകര്യമാണ് ലഭ്യമാകു ന്നത്. രാവിലെ 6.30 മുതല്‍ രാത്രി 7.30 വരെയാണ് സര്‍വീസ് നടത്തുക. രാവിലെ 9.30 ന് പറശിനിക്കടവില്‍ തുടങ്ങുന്ന സര്‍വീസ് വളപട്ടണം അഴീക്കല്‍ മാട്ടൂല്‍ തിരിച്ച് ഉച്ചയ്ക്ക് ഒന്നിന് പറശിനിക്കടവ് എത്തും. ഒന്നരമണിക്കൂര്‍ യാത്രയ്ക്ക് 60 രൂപയാണ് ഈടാക്കുന്നത്. ഉച്ചയ്ക്ക് രണ്ടിന് പറശിനിക്കടവ് മുതല്‍ വളപട്ടണം വരെയുള്ള സര്‍വീസിന് 40 രൂപയാണ് ചാര്‍ജ്. വിദ്യാര്‍ഥികള്‍ക്ക് പഠനയാത്രകള്‍ ദിവസേന 50 ഓളം വിദ്യാര്‍ഥികളാണ് ഇതുവഴി ബോട്ട് സര്‍വീസ് ഉപയോഗപ്പെടുത്തുന്നത്. ഇവര്‍ക്ക് പാസ് ഉള്‍പ്പെടെ നല്‍കി യാത്ര ഇളവും ലഭ്യമാക്കുന്നുണ്ട്. ബോട്ടുകള്‍ കൂടുതല്‍ മെച്ചപ്പെടുത്തിയ തോടെ സ്‌കൂളില്‍നിന്നും പഠനയാത്രയ്ക്ക് വരുന്ന വിദ്യാര്‍ഥികള്‍ക്ക് പകുതി വിലയ്ക്കും സര്‍വീസ് നല്കാനാകും. 9847210511, 9447458867 നമ്പറുകളില്‍ പ്രീ ബുക്കിംഗുകള്‍ ചെയ്ത് വിനോദയാത്രകള്‍ നടത്താം.

മികച്ച വിമാനത്താവളത്തിനുള്ള പുരസ്കാരം കണ്ണൂരിന്

മട്ടന്നൂർ: എയർപോർട്ട് ക്വാളിറ്റി സർവേ പ്രകാരമുള്ള മികച്ച വിമാനത്താവളത്തിനുള്ള പുരസ്‌കാരം കണ്ണൂർ രാജ്യാന്തര വിമാനത്താവള അധികൃതർ ഏറ്റുവാങ്ങി. ചൈനയിലെ ഗ്വാങ്ങ്ഷുവിൽ നടന്ന എയർപോർട്ട് കൗൺസിൽ ഇന്‍റർനാഷണൽ എക്‌സ്പീരിയൻസ് സമ്മിറ്റിലാണ് കിയാൽ എംഡി സി. ദിനേശ്കുമാർ, ചീഫ് ഓപ്പറേറ്റിംഗ് ഓഫീസർ അശ്വനികുമാർ എന്നിവർ ചേർന്ന് പുരസ്‌കാരം ഏറ്റുവാങ്ങിയത്. എസിഐ ഡയറക്ടർ ജനറൽ ജസ്റ്റിൻ എർബാക്കി, അമഡിയസ് എഷ്യ-പസഫിക് എയർപോർട്‌സ് ആൻഡ് ബോർഡർ അഥോറിറ്റീസ് സീനിയർ വൈസ് പ്രസിഡന്‍റ് സാറ സാമുവൽ എന്നിവരാണ് അവാർഡ് സമ്മാനിച്ചത്. എഷ്യ-പസഫിക് മേഖലയിലെ പ്രതിവർഷം 20 ലക്ഷം യാത്രക്കാരിൽ താഴെ കൈകാര്യം ചെയ്യുന്ന വിമാനത്താവളങ്ങളുടെ വിഭാഗത്തിലാണ് കണ്ണൂർ വിമാനത്താവളം അവാർഡിന് തെരഞ്ഞെടുക്കപ്പെട്ടത്. ആഗോളവേദിയിൽ ഇത്തരം അംഗീകാരം നേടുന്നത് കണ്ണൂർ വിമാനത്താവളത്തിനും കേരളത്തിനും അഭിമാനമാണെന്ന് കിയാൽ എംഡി സി. ദിനേശ്കുമാർ പറഞ്ഞു. യാത്രക്കാരുടെ നേരിട്ടുള്ള അഭിപ്രായങ്ങൾ അടിസ്ഥാനമാക്കിയാണ് എയർപോർട്ട് കൗൺസിൽ ഇന്‍റർനാഷണൽ എയർപോർട്ട് ക്വാളിറ്റി സർവേ സംഘടിപ്പിക്കുന്നത്. വിമാനത്താവളത്തിലെ ശുചിത്വം, അനുബന്ധ സൗകര്യങ്ങൾ, ജീവനക്കാരുടെ പെരുമാറ്റം, കാര്യക്ഷമത തുടങ്ങിയവയാണ് വിലയിരുത്തുന്നത്.

ബിഷപ് വള്ളോപ്പിള്ളി പ്രതിമ; വെങ്കല വസ്തുക്കൾ കൈമാറി

ചെമ്പന്തൊട്ടി: ബിഷപ് വള്ളോപ്പിള്ളി സ്മാരക കുടിയേറ്റ മ്യൂസിയത്തിനു മുന്നിൽ സ്ഥാപിക്കാനുള്ള മാർ സെബാസ്റ്റ്യൻ വള്ളോപ്പിള്ളിയുടെ വെങ്കല പ്രതിമ നിർമിക്കാനായി പൊതുജനങ്ങളിൽനിന്ന് സംഭാവനയായി സമാഹരിച്ച പഴയ വെങ്കല ഉപകരണങ്ങൾ സജീവ് ജോസഫ് എംഎൽഎ, ചെമ്പന്തൊട്ടി സെന്‍റ് ജോർജ് ഫൊറോന വികാരി ഫാ. ആന്‍റണി മഞ്ഞളാംകുന്നേൽ, ശ്രീകണ്ഠപുരം നഗരസഭാധ്യക്ഷ ഡോ.കെ.വി. ഫിലോമിന എന്നിവരുടെ നേതൃത്വത്തിൽ പ്രശസ്ത ശില്പി ഉണ്ണി കാനായിക്ക് കൈമാറി. പി.ടി. മാത്യു, നഗരസഭ കൗൺസിലർ കെ.ജെ. ചാക്കോ കൊന്നയ്ക്കൽ, കത്തോലിക്ക കോൺഗ്രസ് ചെമ്പന്തൊട്ടി യൂണിറ്റ് പ്രസിഡന്‍റ് ജോയി കരിമ്പുമാലിൽ പാരിഷ് കോ -ഓർഡിനേറ്റർ വിൻസെന്‍റ് കുഴിഞ്ഞാലിൽ, ട്രസ്റ്റിമാരായ ഷാജി കുര്യൻ, ചാക്കോ മാനാമ്പുറം, നിമ്മി വാഴയിൽ, ജിജി മുണ്ടാമ്പള്ളിൽ, വർഗീസ് വയലാമണ്ണിൽ, ജിയോ ജേക്കബ്, ജോസഫ് ചാലുങ്കൽ, ആർ. ശശിധരൻ എന്നിവർ പങ്കെടുത്തു.

വൈദിക സൗഹൃദ ടൂർണമെന്‍റിന് ഇന്ന് ചെന്പേരിയിൽ തുടക്കമാകും

ചെന്പേരി: തലശേരി അതിരൂപതയിലെ വൈദിക സൗഹൃദ ടൂർണമെന്‍റിന് ഇന്ന് ചെന്പേരി വിമൽജ്യോതി എൻജിനിയറിംഗ് കോളജിൽ തുടക്കമാകും. ക്രിക്കറ്റ്, ബാസ്കറ്റ്ബോൾ മത്സരങ്ങളാണ് ഇന്നു നടക്കുന്നത്. വോളിബോൾ, ഷട്ടിൽ ടൂർണമെന്‍റുകൾ (ഡബിൾസ്) ഒക്‌ടോബർ 20ന് നടക്കും. രാവിലെ 10 മുതൽ വൈകുന്നേരം അഞ്ചുവരെയാണു മത്സരങ്ങൾ. തലശേരി അതിരൂപതയെ നാലു റീജണുകളിലായി തിരിച്ചാണ് മത്സരം നടത്തുന്നത്. ഇരിട്ടി, ചെറുപുഴ, ചെന്പേരി, കാസർഗോഡ് എന്നിങ്ങനെയാണ് റീജണുകൾ. ഓരോ റീജണിന്‍റെ കീഴിലും നാലോ, അഞ്ചോ ഫൊറോനകൾ ഉണ്ടായിരിക്കും. ഇന്നുരാവിലെ 10.15 ന് നടക്കുന്ന ബാസ്കറ്റ്ബോൾ മത്സരം പ്രോട്ടോസിഞ്ചെല്ലൂസ് മോൺ. ആന്‍റണി മുതുകുന്നേലും 11.30 ന് നടക്കുന്ന ക്രിക്കറ്റ് ടൂർണമെന്‍റ് വികാരി ജനറാൾ മോൺ. മാത്യു എളംതുരുത്തിപ്പടവിലും ഉദ്ഘാടനം ചെയ്യും. സമ്മാനദാനം ആർച്ച്ബിഷപ് മാർ ജോസഫ് പാംപ്ലാനി നിർവ ഹിക്കും. ബാസ്കറ്റ്ബോൾ മത്സരത്തിൽ ഇരിട്ടി-ചെറുപുഴ റീജണുകളും കാസർഗോഡ്-ചെന്പേരി റീജണുകളും ഏറ്റുമുട്ടും. ക്രിക്കറ്റ് ടൂർണമെന്‍റിൽ ഇരിട്ടി-ചെറുപുഴ റീജണുകളും കാസർഗോഡ്-ചെന്പേരി റീജണുകളും ഏറ്റുമുട്ടും. മാർ ജോർജ് വലിയമറ്റം, മാർ ജോർജ് ഞറളക്കാട്ട് എന്നിവർ ചടങ്ങുകളിൽ പങ്കെടുക്കും. റീജണുകളും ഫൊറോനകളും ഇരിട്ടി (കോ-ഓർഡിനേറ്റർ ഫാ. മാത്യു ശാസ്താംപടവിൽ): പേരാവൂർ, എടൂർ, കുന്നോത്ത്, നെല്ലിക്കാംപൊയിൽ, മണിക്കടവ്. ചെന്പേരി: (കോ-ഓർഡിനേറ്റർ ഫാ. മാത്യു ഓലിക്കൽ): പൈസക്കരി, ചെന്പേരി, വായാട്ടുപറന്പ്, ചെന്പന്തൊട്ടി. ചെറുപുഴ: (കോ-ഓർഡിനേറ്റർ ഫാ. ജേക്കബ് കുറ്റിക്കാട്ടുകുന്നേൽ): തളിപ്പറന്പ്, ആലക്കോട്, മേരിഗിരി, ചെറുപുഴ. കാസർഗോഡ്: (കോ-ഓർഡിനേറ്റർ ഫാ. ജോസഫ് കാഞ്ഞിരത്തിങ്കൽ):തോമാപുരം, വെള്ളരിക്കുണ്ട്, മാലോം, പനത്തടി, കാഞ്ഞങ്ങാട്, കാസർഗോഡ്. സൗഹൃദോത്സവം കൂട്ടായ്മ വളർത്താൻ സഹായിക്കും: മാർ ജോസഫ് പാംപ്ലാനി വൈദികരുടെ കൂട്ടായ്മയും ഒരു മനസോടെയുള്ള പ്രവർത്തനവുമാണ് ഏതൊരു രൂപതയുടെയും വളർച്ചയ്ക്കു പിന്നിലുള്ള ചാലകശക്തി. തലശേരി അതിരൂപത ഇക്കാര്യത്തിൽ ഏറെ മാതൃകാപരമായി പ്രവർത്തിക്കുന്നുണ്ട്. വൈദികരുടെ കൂട്ടായ്മ വളർത്തുന്നതിനും പരസ്പര സഹകരണത്തിന്‍റെ പാതകൾ നവീകരിക്കുന്നതിനുമായാണ് സൗഹൃദോത്സവം സംഘടിപ്പിക്കുന്നത്. കലാ-കായിക രംഗങ്ങളിൽ വൈദികരുടെ കഴിവുകൾ പ്രകടമാക്കുന്ന ഒരു കൂട്ടായ്മയാണ് സൗഹൃദോത്സവം.

മനുഷ്യാവകാശ കമ്മീഷൻ ഇടപെട്ടു: ജില്ലാ ആശുപത്രിയിൽ ഇലക്‌ട്രീഷൻമാരായി

കണ്ണൂർ: ജില്ലാ ആശുപത്രിയിൽ വൈദ്യുതി സംബന്ധിച്ച പരാതികൾ പരിഹരിക്കുന്നതിനായി 24 മണിക്കൂറും ഇലക്‌ട്രീഷന്‍റെ സേവനം ലഭ്യമാക്കിയിട്ടുണ്ടെന്ന് ജില്ലാ പഞ്ചായത്ത് സെക്രട്ടറി മനുഷ്യാവകാശ കമ്മീഷനെ അറിയിച്ചു. കമ്മീഷൻ ജുഡീഷ്യൽ അംഗം കെ. ബൈജുനാഥിന്‍റെ ഇടപെടലിനെ തുടർന്നാണ് നടപടി. ഒരു ഇലക്‌ട്രിക് സൂപ്പർവൈസറെയും മൂന്ന് ഇലക്‌ട്രീഷൻമാരെയും നിയമിച്ചിട്ടുണ്ടെന്നും റിപ്പോർട്ടിൽ പറഞ്ഞു. വാർഡുകളിലെ ഫാനുകൾ പ്രവർത്തിക്കാത്തതു കാരണം രോഗികളും കൂട്ടിരിപ്പുകാരും ബുദ്ധിമുട്ട് അനുഭവിക്കുകയാണെന്ന പരാതിയിലാണ് നടപടികൾ സ്വീകരിക്കാൻ കമ്മീഷൻ ജില്ലാ പഞ്ചായത്ത് സെക്രട്ടറിക്ക് നിർദേശം നല്കിയത്. പൊതുജനങ്ങൾക്കുള്ള കാത്തിരിപ്പ് കേന്ദ്രങ്ങളിലെല്ലാം പുതിയ ഫാനുകൾ സ്ഥാപിച്ചിട്ടുണ്ട്. 2024-25 വർഷത്തെ ജില്ലാ പഞ്ചായത്ത് വാർഷിക പദ്ധതിയിൽ ജില്ലാ ആശുപത്രിയിലെ അടിസ്ഥാന സൗകര്യ വികസനത്തിനായി തുക വകയിരുത്തിയിട്ടുണ്ട്. ദന്തൽ, എക്സറേ, കുടിവെള്ള പദ്ധതി, ജില്ലാ ആശുപത്രി ഓഫീസ് മെച്ചപ്പെടുത്തൽ, അടിയന്തര അറ്റകുറ്റപണികൾ എന്നിവയ്ക്കായി 5,94,73,498 രൂപ വകയിരുത്തിയിട്ടുണ്ട്. റിപ്പോർട്ടിന്‍റെ അടിസ്ഥാനത്തിൽ കേസ് തീർപ്പാക്കി. കടലായി സ്വദേശി എം. ജംഷാദ് സമർപ്പിച്ച പരാതിയിലാണ് നടപടി.

ഏകദിന ശില്പശാല സംഘടിപ്പിച്ചു

ഇരിട്ടി: ആറളം ഫാം, പുനരധിവാസ മേഖല എന്നിവയുടെ സുസ്ഥിരവികസനം ലക്ഷ്യമാക്കി ആറളം ഫാമിംഗ് കോർപറേഷന്‍റെയും ശാസ്ത്ര സാങ്കേതിക പരിസ്ഥിതി കൗൺസിലിന്‍റെയും നേതൃത്വത്തിൽ ഏകദിന ശില്പശാല സംഘടിപ്പിച്ചു. ആറളം വന്യജീവി സങ്കേതത്തിൽ നടന്ന ശില്പശാല ജില്ലാ കളക്ടർ അരുൺ കെ. വിജയൻ ഉദ്ഘാടനം ചെയ്തു. കെഎസ്‌സിഎസ്ടിഇ മെംബർ സെക്രട്ടറി പ്രഫ. എ. സാബു അധ്യക്ഷത വഹിച്ചു. സബ് കളക്‌ടർ കാർത്തിക് പാണിഗ്രഹി, മിനി ദിനേശൻ, ആറളം ഫാം മാനേജിംഗ് ഡയറക്ടർ എസ്. സുജീഷ്, കെഎസ്‌സിഎസ്ടിഇ സീനിയർ പ്രിൻസിപ്പൽ സയന്‍റിസ്റ്റ് ഡോ. പി. ഹരിനാരായണൻ, ആറളം വൈൽഡ് ലൈഫ് വാർഡൻ വി. രതീശൻ, ആറളം ഫാം അഡ്മിനിസ്ട്രേറ്റീവ് ഓഫീസർ ഡോ. കെ.പി. നിതീഷ്കുമാർ, ടിആർഡിഎം സൈറ്റ് മാനേജർ സി. സൈജു, ഡോ. ഇബ്രാഹിം ബാതിസ് എന്നിവർ പ്രസംഗിച്ചു. തുടർന്ന് ആറളം പുനരധിവാസ മേഖല സന്ദർശിച്ച് ഊരു മൂപ്പന്മാരുമായും പുനരധിവാസ മേഖലയിലെ ജനങ്ങളുമായി സംവദിച്ചു. ആറളം വികസന പ്രവർത്തനങ്ങളുടെ വികസന പരിപ്രേക്ഷ ഉൾപ്പെടെ ചർച്ച ചെയ്തു. ജൈവ വൈവിധ്യവും ഉപജീവനമാർഗങ്ങൾ എന്ന വിഷയത്തിൽ ഡോ. വി. ബാലകൃഷ്ണൻ, കാർഷിക മേഖലയിലെ ഇടപെടലുകൾ മുഖേന ഉപജീവനമാർഗം ഉറപ്പുവരുത്തൽ എന്ന വിഷയത്തിൽ ഡോ. കെ. സുനിൽകുമാർ, സ്കിൽ വികസനത്തിലൂടെ ഉപജീവന മാർഗം മെച്ചപ്പെടുത്തൽ എന്ന വിഷയത്തിൽ ഡോ. കണ്ണൻ സി. വാര്യർ എന്നിവരുടെ നേതൃത്വത്തിൽ സമഗ്ര വികസന രേഖ തയാറാക്കാനും തീരുമാനിച്ചു.

ഫിറോസിന്‍റെ അഴിമതിക്കഥകൾ പുറത്തുവിടുന്നത് കൂടെ നിൽക്കുന്നവർ തന്നെയെന്ന് എം.വി. ജയരാജൻ

കണ്ണൂർ: ആരോപണ വിധേയനായ യൂത്ത് ലീഗ് ജനറല്‍ സെക്രട്ടറിയുടെ അഴിമതി വിവരങ്ങൾ കെ.ടി. ജലീലിന് എത്തിച്ചു നൽകിയത് ഫിറോസിനോട് ഏറ്റവും അടുപ്പം നടിക്കുന്നവർ തന്നെയാണെന്ന് സിപിഎം സംസ്ഥാന സെക്രട്ടേറിയറ്റംഗം എം.വി. ജയരാജൻ. ആര് തെറ്റുചെയ്താലും നടപടി സ്വീകരിക്കുന്ന സർക്കാരാണ് കേരളത്തിൽ നിലവിലുള്ളത്. ഇത്തരക്കാർക്ക് ഒരു തരത്തിലുള്ള സംരക്ഷണവും സർക്കാരിൽ നിന്നുണ്ടാവില്ല.114 ഉദ്യോഗസ്ഥരെ സർവീസിൽ നിന്നും പിരിച്ചുവിടപ്പെട്ടത് ഈ നിലപാടിന്‍റെ തെളിവാണ്. സിപിഐ സമ്മേളനത്തിൽ പോലീസിനെതിരായ വിമർശനം ഉയർന്നുവല്ലോ എന്ന ചോദ്യത്തിന് വിമർശനം തിരുത്താനുള്ള നടപടിയാണെന്നും മാധ്യമങ്ങളിൽ വരുന്നത് മുഴുവൻ ശരിയല്ലെന്നുമുള്ള ചരിത്രമാണ് മുൻ കാലങ്ങളിൽ ഉണ്ടായിട്ടുള്ളതെന്നുമായിരുന്നു മറുപടി. കോൺഗ്രസിന് അകത്തുനിന്നു തന്നെ കോൺഗ്രസിനെ ശരിയാക്കുകയാണ് രാഹുൽ മാങ്കൂട്ടത്തിലിന്‍റെ രീതി. നിയമസഭാ സമ്മേളനത്തിൽ പങ്കെടുക്കാൻ രാഹുലിന് അവകാശമുണ്ട്. നിലവിലെ സാഹചര്യത്തിൽ പങ്കെടുക്കണമോ വേണ്ടയോ എന്ന് തീരുമാനിക്കേണ്ടത് രാഹുൽ മാങ്കൂട്ടത്തിലും കോൺഗ്രസുമാണ്. പങ്കെടുത്താൽ പ്രതിഷേധമുണ്ടാകും. വി.ഡി. സതീശന് രാഹുൽ മാങ്കൂട്ടവുമായി സഹോദര സ്നേഹമാണ്. സഹോദരനെ സംരക്ഷിക്കാനാണ് സതീശൻ ശ്രമിച്ചത്. പരാതിക്കാരിയായ പെൺകുട്ടിക്ക് പിതൃതുല്യനാണ് താനെന്നാണ് സതീശൻ പറഞ്ഞത്. രക്തബന്ധം സഹോദരനുമായാണല്ലോ ഉണ്ടാവുകയെന്നും എം.വി. ജയരാജൻ പറഞ്ഞു.

ഇരിട്ടി താലൂക്ക് വികസന സമിതി യോഗത്തിൽ പൊതുമരാമത്ത് വകുപ്പിന് രൂക്ഷ വിമർശനം

ഇരിട്ടി: തലശേരി-വളവുപ്പാറ കെഎസ്ടിപി റോഡിലെ സോളാർ ലൈറ്റുകൾ അപകടാവസ്ഥയിലായിട്ടും യാതൊരു നടപടിയും സ്വീകരിക്കാത്ത പൊതുമരാമത്ത് വകുപ്പിനെതിരേ താലൂക്ക് വികസന സമിതി യോഗത്തിൽ രൂക്ഷ വിമർശനം. പൊതുഖജനാവിൽ നിന്ന്10 കോടി രൂപ ചെലവഴിച്ചൊരുക്കിയ സംവിധാനം ഒരുവർഷത്തിനകം പ്രവർത്തനരഹിതമായിട്ടും കരാറുകാരന് ഒരു നോട്ടീസ് പോലും നല്കാൻ കഴിഞ്ഞില്ലെന്ന് അംഗങ്ങൾ ആരോപിച്ചു. യോഗത്തിൽ സജീവ് ജോസഫ് എംഎൽഎയുടെ പ്രതിനിധി തോമസ് വർഗീസാണ് പ്രശ്‌നം ഉന്നയി ച്ചത്. മറ്റ് അംഗങ്ങളും ഇതേ പ്രശ്‌നം ചൂണ്ടിക്കാട്ടി. എന്നാൽ, റോഡ് നവീകരണം പൂർത്തിയാക്കി പൊതുമരാമത്തെ വകുപ്പിന് കൈമാറിയെന്നും പറഞ്ഞ് തടിയൂരാനായിരുന്നു കെഎസ്ടിപി പ്രതിനിധിയുടെ ശ്രമം. അപകടാവസ്ഥയിലായ മുഴുവൻ സോളാർ ലൈറ്റുകളുടെ ബാറ്ററികൾ അഴിച്ചു മാറ്റുമെന്നും അടുത്ത താലൂക്ക് വികസന സമിതി യോഗത്തിൽ ലൈറ്റുകളുടെ വിവരങ്ങൾ യോഗത്തെ അറിയിക്കാമെന്നുമാണ് പൊതുമരാമത്ത് വകുപ്പ് അസിസ്റ്റന്‍റ് എക്‌സിക്യൂട്ടീവ് എൻജിനിയർ പറഞ്ഞത്. ആറളത്തെ ആനമതിൽ നിർമാണം ഉടൻ പുനരാരംഭിക്കണമെന്ന ആവശ്യവും യോഗത്തിൽ ഉയർന്നു. ടെൻഡർ നടപടികൾ പൂർത്തിയായിട്ടും പ്രവൃത്തി കരാറുകാന് കൈമാറാത്തതിൽ യോഗം ആശങ്ക രേഖപ്പെടുത്തി. കീഴ്പള്ളി റോഡിലെ അപകടാവസ്ഥയിലായ കലുങ്കുകൾ മാറ്റി സ്ഥാപിക്കാൻ നടപടികൾ സ്വീകരിച്ചു വരുന്നതായി പൊതുമരാമത്ത് വകുപ്പ് അധികൃതർ അറിയിച്ചു. തില്ലങ്കേരി പഞ്ചായത്തിന് മുന്നിലെ റവന്യൂവകുപ്പിന്‍റെ കൈവശമുള്ള സ്ഥലത്ത് വാഹന പാർക്കിംഗി നുള്ള സൗകര്യം ഒരുക്കി തരണമെന്ന് പഞ്ചായത്ത് പ്രസിഡന്‍റ് പി. ശ്രീമതി ആവശ്യപ്പെട്ടു. മലയോര ഹൈവേയിൽ പല റീച്ചുകളിലായി പൂർത്തിയാകാതെ കിടക്കുന്ന റോഡിന്‍റെ നവീകരണം ഉടൻ പൂർത്തിയാക്കണമെന്ന ആവശ്യവും യോഗത്തിൽ ഉയർന്നു. യോഗത്തിൽ ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ അധ്യക്ഷത വഹിച്ചു. യോഗം വഴിപാടെന്ന് താലൂക്ക് വികസന സമിതി യോഗം വഴിപാടായി മാറുന്നുവെന്ന് വിവിധ രാഷ്‌ട്രീയ പാർട്ടികൾ ആരോപിച്ചു. ബന്ധപ്പെട്ട ഉദ്യോഗസ്ഥർ, ജനപ്രതിനിധികൾ എന്നിവർ യോഗത്തിൽ പങ്കെടുക്കുന്നില്ല. യോഗത്തിൽ ഉന്നയിക്കുന്ന പ്രധാന ആവശ്യങ്ങൾ പോലും നടപ്പാക്കുന്നതുമില്ല. താലൂക്ക് പരിധിയിലെ പഞ്ചായത്തുകളിലെ ഉന്നത ഉദ്യോഗസ്ഥരും ജനപ്രതിനിധികളും യോഗത്തിൽ എത്താത്തതും തിരിച്ചടിയാണെന്നും നേതാക്കൾ പറഞ്ഞു.

ഭീതിവിതച്ച ഭ്രാന്തൻ കുറുക്കനെ നാട്ടുകാർ തല്ലിക്കൊന്നു

ഉളിക്കൽ: വയത്തൂർ മേഖലയിൽ ഭീതി പരത്തിയ ഭ്രാന്തൻ കുറുക്കനെ നാട്ടുകാർ തല്ലിക്കൊന്നു. മേഖലയിൽ ഭീതിവിതച്ച കുറുക്കനായി പോലീസും വനം വകുപ്പ് ഉദ്യോഗസ്ഥരും പ്രദേശവാസികളും പഞ്ചായത്തിലെ മൂന്ന് ഷൂട്ടർമാരും ചേർന്ന സംഘം തെരച്ചിൽ നടത്തിയെങ്കിലും കണ്ടെത്താൻ കഴിഞ്ഞിരുന്നില്ല. തുടർന്ന് നാട്ടുകാർ പല സംഘങ്ങളായി തിരിഞ്ഞു നടത്തിയ തെരച്ചിലിൽ വൈകുന്നേരം ആറോടെ റബർ നഴ്സറിക്ക് പിൻവശത്തെ കുറ്റികാട്ടിൽ നിന്ന് കുറുക്കനെ തല്ലികൊല്ലുകയായിരുന്നു. മേഖലയിൽ ഭീതിവിതച്ച ഭ്രാന്തൻ കുറുക്കൻ ഇന്നലെ പുലർച്ചെയും പകലുമായി പ്രദേശത്തെ വീടുകളിലെ വളർത്തുമൃഗങ്ങളെയും റബർ നഴ്‌സറി തൊഴിലാളി കാവുങ്കൽ അന്നമ്മയെയും കടിച്ച് പരിക്കേല്പിച്ചിരുന്നു. പി.എസ്. രാജൻ, തളാപ്പേൽ കോറോത്ത് രവീന്ദ്രൻ എന്നിവരുടെ വീടുകളിലെ വളർത്തു പട്ടികളെയും ആക്രമിച്ചു. റബർ നഴ്‌സറിയിൽ ജോലി ചെയ്യുന്നതിനിടെയാണ് അന്നമ്മയ്ക്ക് കടിയേറ്റത്. ഇവരെ കണ്ണൂർ ജില്ലാ ആശുപത്രിയിൽ പ്രവേശിപ്പിച്ചു. പ്രദേശത്ത് ഭീതി പടർന്നതോടെ പഞ്ചായത്ത് പ്രസിഡന്‍റ് പി.സി. ഷാജി, വൈസ് പ്രസിഡന്‍റ് സമീറ പള്ളിപാത്ത്, പഞ്ചായത്തംഗം രതീഭായി ഗോവിന്ദൻ എന്നിവരുടെ നേതൃത്വത്തിൽ ജനപ്രതിനിധികളും നേതാക്കന്മാരും സ്ഥലത്തെത്തി. രാവിലെ മുതൽ പ്രദേശവാസികളെ ഭീതിയിലാഴ്ത്തിയ കുറുക്കനെ പിടികൂടാൻ കഴിഞ്ഞതിന്‍റെ ആശ്വാസത്തിലാണ് നാട്ടുകാർ. കുറച്ചുകാലമായി കുറുക്കന്മാരുടെ എണ്ണം മേഖലയിൽ വ്യാപകമായി വർധിച്ചിട്ടുണ്ടെന്നാണ് നാട്ടുകാർ പറയുന്നത്.

ആര്‍ദ്രകേരളം പുരസ്‌കാരനിറവില്‍ കണ്ണൂര്‍ ജില്ല

കണ്ണൂർ: ആരോഗ്യ മേഖലയില്‍ മികച്ച പ്രവര്‍ത്തനങ്ങള്‍ നടത്തിയ തദ്ദേശ സ്വയംഭരണ സ്ഥാപനങ്ങള്‍ക്കുള്ള 2023-24 വര്‍ഷത്തെ ആര്‍ദ്ര കേരളം പുരസ്‌കാരത്തില്‍ അഭിമാന നേട്ടംകൊയ്ത് കണ്ണൂര്‍ ജില്ല. മുനിസിപ്പാലിറ്റി വിഭാഗത്തില്‍ മട്ടന്നൂര്‍ മുനിസിപ്പാലിറ്റിക്ക് രണ്ടാം സ്ഥാനവും ജില്ലാപഞ്ചായത്ത് വിഭാഗത്തില്‍ കണ്ണൂര്‍ ജില്ലാ പഞ്ചായത്തിന് മൂന്നാം സ്ഥാനവും ലഭിച്ചു. ആരോഗ്യ മന്ത്രി വീണാ ജോര്‍ജാണ് അവാര്‍ഡുകള്‍ പ്രഖ്യാപിച്ചത്. രണ്ടാംസ്ഥാനത്തിന് അഞ്ച് ലക്ഷം രൂപയും മൂന്നാം സ്ഥാനത്തിന് മൂന്ന് ലക്ഷം രൂപയുമാണ് സമ്മാനത്തുക. ജില്ലാതല അവാര്‍ഡുകളില്‍ ഗ്രാമപഞ്ചായത്ത് വിഭാഗത്തില്‍ കോട്ടയം, കതിരൂര്‍, അഞ്ചരക്കണ്ടി ഗ്രാമപഞ്ചായത്തുകള്‍ ആദ്യമൂന്ന് സ്ഥാനങ്ങള്‍ കരസ്ഥമാക്കി. ഇന്‍ഫര്‍മേഷന്‍ കേരള മിഷന്‍റെ സഹായത്തോടെയാണ് പുരസ്‌കാരത്തിനായി പരിഗണിക്കാവുന്ന തദ്ദേശ സ്വയംഭരണ സ്ഥാപനങ്ങളുടെ മുന്‍ഗണനാ പട്ടിക തയാറാക്കിയത്. തദ്ദേശ സ്വയംഭരണ സ്ഥാപനങ്ങള്‍ ആരോഗ്യ മേഖലയില്‍ ചെലവഴിച്ച തുക, സാന്ത്വന പരിചരണ പരിപാടികള്‍, കായകല്‍പ്പ് സ്‌കോര്‍, ഹെല്‍ത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവര്‍ത്തനങ്ങള്‍ എന്നിവ പരിഗണിച്ചാണ് മുന്‍ഗണനാ പട്ടിക തയാറാക്കി പുരസ്‌കാരത്തിനായി തെരഞ്ഞെടുക്കുന്നത്. പ്രതിരോധ കുത്തിവയ്പ്, വാര്‍ഡുതല പ്രവര്‍ത്തനങ്ങള്‍, പ്രാദേശിക ആരോഗ്യ ആവശ്യങ്ങള്‍ക്ക് അനുസൃതമായ നൂതന ഇടപെടലുകള്‍, സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതിക സാഹചര്യങ്ങള്‍ ഒരുക്കല്‍, മോഡേണ്‍ മെഡിസിന്‍, ആയുര്‍വേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും പുരസ്‌കാരത്തിന് വേണ്ടി വിലയിരുത്തിയ ഘടകങ്ങളാണ്.

ആറളത്തെ ആനമതിൽ നിർമാണം ഇഴയുന്നു ; പ്രതിഷേധവുമായി ആദിവാസി സംഘടനകൾ

ഇരിട്ടി: കാട്ടാനയുൾപ്പടെയുള്ള വന്യമൃഗാക്രമണങ്ങളിൽ നിന്ന് ആറളം പുനരധിവാസ മേഖലയിലുള്ളവരുടെ സുരക്ഷിതത്വം ഉറപ്പാക്കാനും ആറളം ഫാം സംരക്ഷണത്തിനുമായുള്ള ആന പ്രതിരോധമതിൽ നിർമാണം ഇഴയുന്നതിൽ പ്രതിഷേധവുമായി ആദിവാസി സംഘടനകൾ. നിർമാണം വൈകുന്നതിനെതിരെ ആദിവാസി സംഘടനകൾ ശക്തമായ പ്രക്ഷോഭവുമായി രംഗത്തിറങ്ങാനുള്ള ഒരുക്കത്തിലാണ്. ഹൈക്കോടതിയും പട്ടികജാതി-പട്ടിക വർഗകമ്മിഷനും മന്ത്രിതലത്തിൽ നിന്നുള്ള ഇടപെടലുകൾ വരെ ഉണ്ടായിട്ടും രണ്ടുവർഷം കൊണ്ട് പത്തു കിലോമീറ്റർ മതിലിന്‍റെ നാലുകിലോമീറ്റർ ഭാഗത്തെ നിർമാണം മാത്രമാണ് പൂർത്തിയാക്കിയത്. പൊതുമരാമത്ത് വകുപ്പ് കെട്ടിട നിർമാണ വിഭാഗമാണ് നിർവഹണ ഏജൻസി. നിലവിലുള്ള കരാറുകാരനെ മാറ്റി പുതിയ കരാർ നൽകിയെങ്കിലും വർക്ക് എഗ്രിമെന്‍റ് വച്ച് കരാറുകാരന് സൈറ്റ് ഇനിയും കൈമാറിയിട്ടില്ല. നേരത്തെ ഒഴിവാക്കിയ കരാറുകാരൻ തന്നെ കരാറിൽ നിന്ന് ഒഴിവാക്കിയതിനെതിരെ ഹൈക്കോടതിയിൽ നൽകിയ ഹർജി തള്ളിയതിനു പിന്നാലെ അപ്പീൽ പോയിരിക്കുകയാണ്. വിഷയം കോടതിയുടെ പരിഗണനയിലായതിനാൽ പുതിയ പ്രവൃത്തി നടത്താൻ കഴിയാത്ത അവസ്ഥയാണ് ഇപ്പോൾ ആനമതിൽ നിർമാണത്തെ സ്തംഭനാവസ്ഥയിലാക്കിയിരിക്കുന്നത്. പ്രവൃത്തി പുതിയ കരാറുകാന് നൽകിയെന്നല്ലാതെ മറ്റ് കാര്യങ്ങളൊന്നും അറിയില്ലെന്നാണ് പൊതുമരാമത്ത് കെട്ടിട നിർമാണ വിഭാഗം അധികൃതർ പറയുന്നത്. ഏപ്രിൽ 30നുള്ളിൽ ആറുകിലോമീറ്ററെങ്കിലും പൂർത്തിയാക്കണമെന്ന നിർദേശം പാലിക്കാത്തതിനെ തുടർന്നായിരുന്നു ആദ്യ കരാറുകാരനെ ഒഴിവാക്കിയത്. മതിലന്‍റെ അലൈൻമെന്‍റിൽ വരുത്തിയ മാറ്റത്തെ തുടർന്ന് പഴയ മതിൽ നിലനിന്ന 4.5 കിലോമീറ്റർ ഭാഗത്തെ മരങ്ങൾ നേരത്തെ മുറിച്ചു നീക്കിയിരുന്നു. മതിൽ പൂർത്തിയാകാത്ത ഭാഗങ്ങളിൽ വനംവകുപ്പ് താത്കാലിക സൗരോർജ വേലി നിർമിച്ചിട്ടുണ്ട്. തുരത്തും, തിരിച്ചെത്തും കാട്ടാന ശല്യം രൂക്ഷമായ ആറളം ഫാം, പുനരധിവാസ മേഖല എന്നിവിടങ്ങളിലെ ആനകളെ പലപ്പോഴായി വനംവകുപ്പ് കാട്ടിലേക്ക് തുരത്തിയെങ്കിലും മതിലിന്‍റെ അഭാവത്തിൽ ഇവ തിരിച്ചെത്തി ഫാമിലും പുനരധിവാസ മേഖലയിലുമായി തന്പടിക്കുകയാണ്. പുനരധിവാസ മേഖലയിലെ ആനകളെ വനത്തിലേക്ക് തുരത്തുന്നതിനായി "ഓപ്പറേഷൻ ഗജമുക്തി' എന്ന പദ്ധതി തന്നെ ആവിഷ്കരിച്ചു നടപ്പാക്കി തുടങ്ങിയിരുന്നു. എന്നാൽ, പ്രതികൂല കാലാവസ്ഥ കാരണം പദ്ധതിക്ക് ലക്ഷ്യം നേടാനായില്ല. വലിയ മോഴയാന, ചെറിയ മോഴയാന, മൊട്ടുക്കൊമ്പൻ, കോരിക്കൊമ്പൻ തുടങ്ങിയ പേരുകളിലറിയപ്പെടുന്ന ഫാം മേഖലയിലെ ആനകളാണ് അതീവ അപകടകാരികൾ. പലപ്പോഴായി നടത്തിയ തുരത്തിലിൽ ഇവയെയും കാട് കയറ്റിയിരുന്നെങ്കിലും നിലവിൽ ഇവ ഫാം മേഖലയിൽ തിരിച്ചെത്തിയിട്ടുണ്ട്.

മുക്കാൽകിലോ കഞ്ചാവുമായി ഒഡീഷ സ്വദേശി പിടിയിൽ

തളിപ്പറമ്പ്: മുക്കാൽ കിലോ കഞ്ചാവുമായി ഒഡീഷ സ്വദേശിയായ യുവാവ് പിടിയിലായി. സുർജയ ബലയാർ സിംഗാണ് (25) 820 ഗ്രാം കഞ്ചാവുമായി എക്സൈസിന്‍റെ പിടിയിലായത്. തളിപ്പറമ്പ് എക്സൈസ് റേഞ്ച് അസി. എക്സൈസ് ഇൻസ്പെക്ടർ അഷറഫ് മലപ്പട്ടവും സംഘവും നടത്തിയ പരിശോധനയിൽ തളിപ്പറമ്പ് ഏഴാംമൈലിൽവച്ചാണ് ഇയാൾ പിടിയിലായത്. തളിപറമ്പിന്‍റെ വിവിധ ഭാഗങ്ങളിൽ വില്പനയ്ക്കായി കൊണ്ടുവന്നതാണ് കഞ്ചാവ്. പരിശോധനാ സംഘത്തിൽ അസി. എക്‌സൈസ് ഇൻസ്‌പെക്ടർ പി.പി. മനോഹരൻ, പ്രിവന്‍റീവ് ഓഫീസർ ഗ്രേഡുമാരായ കെ.വി. നികേഷ്, ഉല്ലാസ് ജോസ്, സിവിൽ എക്സൈസ് ഓഫീസർ പി.ആർ. വിനീത് എന്നിവരുമുണ്ടായിരുന്നു.

സ്കൂൾ ശതാബ്ദി ഗേറ്റിന്‍റെ സമർപ്പണവും പ്രചാരണ ശില്പം അനാച്ഛാദനവും

മാതമംഗലം: പേരൂൽ യുപി സ്കൂൾ ശതാബ്ദി ആഘോഷത്തോടനുബന്ധിച്ച് നിർമിച്ച ശതാബ്ദി ഗേറ്റിന്‍റെ സമർപ്പണവും പ്രചാരണ ശില്പം അനാച്ഛാദനവും എരമം-കുറ്റൂർ പഞ്ചായത്ത് പ്രസിഡന്‍റ് ടി. ആർ. രാമചന്ദ്രൻ നിർവഹിച്ചു. സംഘാടക സമിതി ചെയർമാൻ ടി. തമ്പാൻ അധ്യക്ഷത വഹിച്ചു. ജനറൽ കൺവീനർ ടി.വി. നിഷ, ജനപ്രതിനിധികളായ ടി.കെ. രാജൻ, കെ.വി. രവീന്ദ്രൻ, പിടിഎ പ്രസിഡന്‍റ് പി.വി. രാജേഷ്, കാർഷിക വികസന ബാങ്ക് പ്രസിഡന്‍റ് കെ.വി. ഗോവിന്ദൻ തുടങ്ങിയവർ പങ്കെടുത്തു. ആർടിസ്റ്റ് ശ്രീകുമാർ എരമമാണ് പ്രചാരണശില്പം നിർമിച്ചത്. ശതാബ്ദിയുടെ ഉദ്ഘാടനം 26ന് നിയമസഭാ സ്പീക്കർ എ.എൻ. ഷംസീർ നിർവഹിക്കും.

ഫിറോസിന്‍റെ അഴിമതിക്കഥകൾ പുറത്തുവിടുന്നത് കൂടെ നിൽക്കുന്നവർ തന്നെയെന്ന് എം.വി. ജയരാജൻ

കണ്ണൂർ: ആരോപണ വിധേയനായ യൂത്ത് ലീഗ് ജനറല്‍ സെക്രട്ടറിയുടെ അഴിമതി വിവരങ്ങൾ കെ.ടി. ജലീലിന് എത്തിച്ചു നൽകിയത് ഫിറോസിനോട് ഏറ്റവും അടുപ്പം നടിക്കുന്നവർ തന്നെയാണെന്ന് സിപിഎം സംസ്ഥാന സെക്രട്ടേറിയറ്റംഗം എം.വി. ജയരാജൻ. ആര് തെറ്റുചെയ്താലും നടപടി സ്വീകരിക്കുന്ന സർക്കാരാണ് കേരളത്തിൽ നിലവിലുള്ളത്. ഇത്തരക്കാർക്ക് ഒരു തരത്തിലുള്ള സംരക്ഷണവും സർക്കാരിൽ നിന്നുണ്ടാവില്ല.114 ഉദ്യോഗസ്ഥരെ സർവീസിൽ നിന്നും പിരിച്ചുവിടപ്പെട്ടത് ഈ നിലപാടിന്‍റെ തെളിവാണ്. സിപിഐ സമ്മേളനത്തിൽ പോലീസിനെതിരായ വിമർശനം ഉയർന്നുവല്ലോ എന്ന ചോദ്യത്തിന് വിമർശനം തിരുത്താനുള്ള നടപടിയാണെന്നും മാധ്യമങ്ങളിൽ വരുന്നത് മുഴുവൻ ശരിയല്ലെന്നുമുള്ള ചരിത്രമാണ് മുൻ കാലങ്ങളിൽ ഉണ്ടായിട്ടുള്ളതെന്നുമായിരുന്നു മറുപടി. കോൺഗ്രസിന് അകത്തുനിന്നു തന്നെ കോൺഗ്രസിനെ ശരിയാക്കുകയാണ് രാഹുൽ മാങ്കൂട്ടത്തിലിന്‍റെ രീതി. നിയമസഭാ സമ്മേളനത്തിൽ പങ്കെടുക്കാൻ രാഹുലിന് അവകാശമുണ്ട്. നിലവിലെ സാഹചര്യത്തിൽ പങ്കെടുക്കണമോ വേണ്ടയോ എന്ന് തീരുമാനിക്കേണ്ടത് രാഹുൽ മാങ്കൂട്ടത്തിലും കോൺഗ്രസുമാണ്. പങ്കെടുത്താൽ പ്രതിഷേധമുണ്ടാകും. വി.ഡി. സതീശന് രാഹുൽ മാങ്കൂട്ടവുമായി സഹോദര സ്നേഹമാണ്. സഹോദരനെ സംരക്ഷിക്കാനാണ് സതീശൻ ശ്രമിച്ചത്. പരാതിക്കാരിയായ പെൺകുട്ടിക്ക് പിതൃതുല്യനാണ് താനെന്നാണ് സതീശൻ പറഞ്ഞത്. രക്തബന്ധം സഹോദരനുമായാണല്ലോ ഉണ്ടാവുകയെന്നും എം.വി. ജയരാജൻ പറഞ്ഞു.

ആര്‍ദ്രകേരളം പുരസ്‌കാര നിറവില്‍ കണ്ണൂര്‍ ജില്ല

കണ്ണൂർ: ആരോഗ്യ മേഖലയില്‍ മികച്ച പ്രവര്‍ത്തനങ്ങള്‍ നടത്തിയ തദ്ദേശ സ്വയംഭരണ സ്ഥാപനങ്ങള്‍ക്കുള്ള 2023-24 വര്‍ഷത്തെ ആര്‍ദ്ര കേരളം പുരസ്‌കാരത്തില്‍ അഭിമാന നേട്ടംകൊയ്ത് കണ്ണൂര്‍ ജില്ല. മുനിസിപ്പാലിറ്റി വിഭാഗത്തില്‍ മട്ടന്നൂര്‍ മുനിസിപ്പാലിറ്റിക്ക് രണ്ടാം സ്ഥാനവും ജില്ലാപഞ്ചായത്ത് വിഭാഗത്തില്‍ കണ്ണൂര്‍ ജില്ലാ പഞ്ചായത്തിന് മൂന്നാം സ്ഥാനവും ലഭിച്ചു. ആരോഗ്യ മന്ത്രി വീണാ ജോര്‍ജാണ് അവാര്‍ഡുകള്‍ പ്രഖ്യാപിച്ചത്. രണ്ടാംസ്ഥാനത്തിന് അഞ്ച് ലക്ഷം രൂപയും മൂന്നാം സ്ഥാനത്തിന് മൂന്ന് ലക്ഷം രൂപയുമാണ് സമ്മാനത്തുക. ജില്ലാതല അവാര്‍ഡുകളില്‍ ഗ്രാമപഞ്ചായത്ത് വിഭാഗത്തില്‍ കോട്ടയം, കതിരൂര്‍, അഞ്ചരക്കണ്ടി ഗ്രാമപഞ്ചായത്തുകള്‍ ആദ്യമൂന്ന് സ്ഥാനങ്ങള്‍ കരസ്ഥമാക്കി. ഇന്‍ഫര്‍മേഷന്‍ കേരള മിഷന്‍റെ സഹായത്തോടെയാണ് പുരസ്‌കാരത്തിനായി പരിഗണിക്കാവുന്ന തദ്ദേശ സ്വയംഭരണ സ്ഥാപനങ്ങളുടെ മുന്‍ഗണനാ പട്ടിക തയാറാക്കിയത്. തദ്ദേശ സ്വയംഭരണ സ്ഥാപനങ്ങള്‍ ആരോഗ്യ മേഖലയില്‍ ചെലവഴിച്ച തുക, സാന്ത്വന പരിചരണ പരിപാടികള്‍, കായകല്‍പ്പ് സ്‌കോര്‍, ഹെല്‍ത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവര്‍ത്തനങ്ങള്‍ എന്നിവ പരിഗണിച്ചാണ് മുന്‍ഗണനാ പട്ടിക തയാറാക്കി പുരസ്‌കാരത്തിനായി തെരഞ്ഞെടുക്കുന്നത്. പ്രതിരോധ കുത്തിവയ്പ്, വാര്‍ഡുതല പ്രവര്‍ത്തനങ്ങള്‍, പ്രാദേശിക ആരോഗ്യ ആവശ്യങ്ങള്‍ക്ക് അനുസൃതമായ നൂതന ഇടപെടലുകള്‍, സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതിക സാഹചര്യങ്ങള്‍ ഒരുക്കല്‍, മോഡേണ്‍ മെഡിസിന്‍, ആയുര്‍വേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും പുരസ്‌കാരത്തിന് വേണ്ടി വിലയിരുത്തിയ ഘടകങ്ങളാണ്.

വോട്ടു വേണോ, റോഡ് വേണം

ചെറുപുഴ: കോഴിച്ചാൽ-കുണിയങ്കല്ല്-താബോർ റോഡ് മെക്കാഡം ടാറിംഗ് നടത്തണമെന്നും അല്ലെങ്കിൽ തെരഞ്ഞെടുപ്പ് ബഹിഷകരിക്കുമെന്ന പ്രഖ്യാപനവുമായി നാട്ടുകാർ. 65 വർഷം പഴക്കമുള്ളതും 300 ഓളം കുടുംബങ്ങൾ ആശ്രയിക്കുന്നതുമായ റോഡ് പൊട്ടിത്തകർന്നിട്ടും അധികൃതരുടെ ഭാഗത്ത് നിന്നും ഒരു നടപടിയും ഉണ്ടാകാത്ത സാഹചര്യത്തിലാണ് നാട്ടുകാർ കടുത്ത തീരുമാനത്തിലേക്ക് കടക്കുന്നത്. പയ്യന്നൂർ, ഇരിക്കൂർ നിയോജക മണ്ഡലങ്ങളെയും ചെറുപുഴ, ഉദയഗിരി പഞ്ചായത്തുകളെയും ചെറുപുഴ പഞ്ചായത്തിന്‍റെ വിവിധ ഭാഗങ്ങളിൽ നിന്നും കാസർഗോഡ് ജില്ലയിൽ നിന്നും പരിയാരം, തളിപ്പറന്പ്, കണ്ണൂർ എന്നിവിടങ്ങളിലേക്കും എളുപ്പത്തിലെത്താനുള്ള പാതയാണിത്. തെരുവുമല, താബോർ തുടങ്ങിയ വിനോദ സഞ്ചാര കേന്ദ്രങ്ങളിലേയ്ക്ക് പോകേണ്ട ഏകപാതയും ഇതാണ്. ഇവിടുത്തെ റിസോർട്ടുകളിലുൾപ്പെടെ ധാരാളം വിനോദ സഞ്ചാരികൾ എത്തുന്നുണ്ടെങ്കിലും റോഡിന്‍റെ തകർച്ച ടൂറിസം സാധ്യതകൾക്കു മങ്ങലേൽപ്പിക്കുകയാണ്. ചെറുപുഴ പഞ്ചായത്തിലെ കോഴിച്ചാൽ മുതൽ ഉദയഗിരി പഞ്ചായത്തിലെ താബോർ വരെ 4.7 കിലോമീറ്ററാണ് റോഡിന്‍റെ നീളം. ആറുമീറ്റർ വീതിയുള്ള റോഡിന്‍റെ പലയിടത്തും ടാറിംഗ് പൊട്ടിപ്പൊളിഞ്ഞു. ഓവുചാലുകളില്ലാത്തതിനാൽ റോഡിലൂടെ വെള്ളമൊഴുകുന്നതും റോഡിന്‍റെ തകർച്ചയ്ക്ക് കാരണമാകുന്നു. വീതി കുറവായതിനാൽ എതിർദിശയിൽ നിന്നും വരുന്ന വാഹനങ്ങൾ കടന്നുപോകുന്നത് ഏറെ ബുദ്ധിമുട്ടിയാണ്. നിലവിലുള്ള അവസ്ഥയിൽ രണ്ടുമാസത്തിനകം റോഡ് പൂർണമായും തകരുമെന്നാണ് പ്രദേശവാസികൾ പറയുന്നത്. റോഡിന്‍റെ ശോച്യാവസ്ഥകാരണം വിദ്യാർഥികളാണ് ഏറ്റവും കുടുതൽ ബുദ്ധിമുട്ടനുഭവിക്കുന്നത്. രാവിലെയും വൈകുന്നേരവുമായി സ്കൂൾ കുട്ടികളെയും കൊണ്ട് ജീപ്പ് 16 ട്രിപ്പ് വരെ ഓടുന്നുണ്ട്. 2500 രൂപ മുതൽ 3000 രൂപ വരെയാണ് ഒരു കുട്ടിക്ക് യാത്രാ ചെലവായി വരുന്നത്. ഇത് രക്ഷിതാക്കൾക്ക് വലിയ സാന്പത്തിക ചെലവിനിടയാക്കുന്നുണ്ട്. വാഹന സൗകര്യത്തിന്‍റെ കുറവ് കാരണം പല കുടുംബങ്ങളും താബോർ മേഖലയിൽ നിന്നും താഴെ ഭാഗത്ത് വീടുകൾ വാടകയ്ക്കെടുത്ത് മാറുകയാണ്. റോഡ് നവീകരിക്കണമെന്നാവശ്യപ്പെട്ട് പഞ്ചായത്തുതലം മുതൽ എംഎൽഎമാർ, എംപിമാർ തുടങ്ങി മന്ത്രിതലത്തിൽ വരെ നിരവധി നിവേദനങ്ങൾ നൽകിയിട്ടും നടപടികൾ ഉണ്ടാകാത്ത സാഹചര്യത്തിലാണ് തെരഞ്ഞെടുപ്പ് ബഹിഷ്കരണം ഉൾപ്പടെയുള്ള കടുത്ത തീരുമാനത്തിലേക്ക് നീങ്ങുന്നതെന്ന് നാട്ടുകാർ പറഞ്ഞു. പി.ജെ. മാത്യു പാഴൂർ, ജയിംസ് അഗസ്റ്റ്യൻ ചെറുതാനിക്കൽ, ദീപു പോൾ കൂട്ടുങ്കൽ, രാധാകൃഷ്ണൻ നായർ കഷ്ണിക്കുന്നേൽ, ജോസ് കൂട്ടുങ്കൽ എന്നിവരുടെ നേതൃത്വത്തിലാണ് നാട്ടുകാർ പ്രതിഷേധ പരിപാടികൾക്ക് തയാറെടുക്കുന്നത്. എംപി, എംഎൽഎ ഫണ്ടുകൾ ഉപയോഗപ്പെടുത്തണം ഒരുപാട് സാധ്യതകളുള്ള ഒരു റോഡാണ് കോഴിച്ചാൽ-കുണിയൻകല്ല്-താബോർ റോഡ്. റോഡ് മെക്കാഡം ടാറിംഗ് നടത്തുകയാണ് വേണ്ടത്. ഇതിനായി എംപി, എംഎൽഎ ഫണ്ടുകൾ വിനിയോഗിക്കണം. വിനോദ സഞ്ചാര കേന്ദ്രങ്ങളിലേയ്ക്കും കരുവഞ്ചാൽ, പരിയാരം തുടങ്ങിയ ആശുപത്രികളിലേയ്ക്കും എളുപ്പത്തിൽ എത്താൻ കഴിയുന്ന റോഡാണിത്. എങ്കിലും അധികൃതരുടെ അവഗണന തുടരുന്നത് ഏറെ പ്രതിഷേധാർഹമാണ്. ഒരു നാടിന്‍റെ വികസന സ്വപ്നങ്ങളാണ് ഇവിടെ അസ്തമിക്കുന്നത്. -പി.ജെ. മാത്യു പാഴൂർ (റിട്ട. അധ്യാപകൻ)

ഓട്ടോഡ്രൈവർ ട്രെയിൻ തട്ടി മരിച്ച നിലയിൽ

പഴയങ്ങാടി: പഴയങ്ങാടി കോഴി ബസാർ പാലത്തിന് സമീപമുള്ള ഓട്ടോ ഡ്രൈവർ കോഴിബസാറിലെ പി.പി. അംബുജാക്ഷനെ (59) ട്രെയിൻ തട്ടി മരിച്ച നിലയിൽ കണ്ടെത്തി. ഇന്നലെ പുലർച്ചെയുള്ള മംഗളൂരു- ചെന്നൈ വെസ്റ്റ് കോസ്റ്റ് എക്സ്പ്രസ് തട്ടിയാണ് പഴയങ്ങാടി റെയിൽവേ സ്റ്റേഷന് സമീപം അപകടമുണ്ടായത്. മാടായിലെ പരേതരായ കൈപ്രത്ത് വളപ്പിൽ കുഞ്ഞിരാമന്‍റെയും പുതിയപുരയിൽ മാധവിയുടെയും മകനാണ്. ഭാര്യ: ഇന്ദു ( കീച്ചേരി). മക്കൾ: ലയ,മിയ ( ഇരുവരും വിദ്യാർഥികൾ). സഹോദരങ്ങൾ: നന്ദിനി, ഗോമതി, ലളിത, പങ്കജാക്ഷൻ, ജലജയക്ഷൻ, പരേതനായ അരവിന്ദാക്ഷൻ.

റോഡ് മുറിച്ചുകടക്കവെ ബുള്ളറ്റിടിച്ച് പരിക്കേറ്റയാൾ മരിച്ചു

പിലാത്തറ: റോഡ് മുറിച്ചു കടക്കുന്നതിനിടയില്‍ ബുള്ളറ്റ് ബൈക്കിടിച്ച് പരിക്കേറ്റ് ചികിത്സയില്‍ കഴിഞ്ഞിരുന്നയാള്‍ മരിച്ചു. പെരിങ്ങത്തൂര്‍ പുല്ലൂക്കര സ്വദേശി ചന്ദനപ്പുറത്ത് സി.പി. സലിമാണ് (54) ചികിത്സക്കിടയില്‍ മരിച്ചത്. കഴിഞ്ഞ ചൊവ്വാഴ്ച രാത്രി ഏഴരയോടെ പിലാത്തറ കെഎസ്ടിപി റോഡിലാണ് അപകടം. കാസർഗോഡ് കുമ്പളയിലെ ചടങ്ങില്‍ പങ്കെടുത്ത് വരികയായിരുന്നു സലീം ഉള്‍പ്പെടെയുള്ള കുടുംബം. പിലാത്തറയിലെത്തിയപ്പോള്‍ വാഹനം റോഡിലൊതുക്കി മറുഭാഗത്തെ ഹോട്ടലിലേക്ക് പോകാന്‍ റോഡ് മുറിച്ചു കടക്കുന്നതിനിടയിലായിരുന്നു അപകടം. ഇതിനിടയിലെത്തിയ ബുള്ളറ്റ് സലീമിനെ ഇടിച്ച് തെറുപ്പിക്കുകയായിരുന്നു. അപകടത്തില്‍ ഗുരുതരമായി പരിക്കേറ്റ ഇയാള്‍ കണ്ണൂരിലെ സ്വകാര്യ ആശുപത്രിയിലെ വെന്‍റിലേറ്ററില്‍ ചികിത്സയിലായിരുന്നു. അപകടമുണ്ടാക്കിയശേഷം നിര്‍ത്താതെ പോയ ബുള്ളറ്റ് പിറ്റേന്ന്തന്നെ പോലീസ് കസ്റ്റഡിയിലെടുത്തിരുന്നു. കെഎംസിസിയുടെ സജീവ പ്രവർത്തകനായിരുന്നു സലീം. പരേതനായ മുഹമ്മദിന്‍റെയും കുഞ്ഞാമിനയുടേയും മകനാണ്. ഭാര്യ: ജസീല. മക്കൾ: ജസീർ, ജഫ്ന, സനഫാത്തിമ. സഹോദരങ്ങൾ: നിസാർ(കുവൈറ്റ്), ജാഫർ(സൗദി), മൈമുന(പെരിങ്ങത്തൂർ).

വിപുലമായ സുരക്ഷാസംവിധാനം

മാരത്തണിന്‍റെ വിജയകരമായ നടത്തിപ്പിനായി വിപുലമായ സുരക്ഷ സംവിധാനങ്ങളും കായികതാരങ്ങള്‍ക്കു വേണ്ട സൗകര്യങ്ങളും ഉറപ്പുവരുത്തിയതായി റണ്‍ പാലക്കയംതട്ട് - ഇരിക്കൂര്‍ ടൂറിസം - മിനി മാരത്തണ്‍ മുഖ്യസംഘാടകന്‍ കൂടിയായ സജീവ് ജോസഫ് എംഎല്‍എ അറിയിച്ചു. എന്‍സിസി, എസ്പിസി, വിമുക്ത ഭടന്‍മാര്‍, യുവജന സംഘടനകള്‍, മറ്റു വിവിധ സംഘടനകള്‍ -ക്ലബുകളില്‍നിന്നുമായി തെരഞ്ഞെടുത്ത ഇരുന്നൂറോളം വോളണ്ടിയര്‍മാര്‍ മാരത്തണ്‍ റൂട്ടില്‍ മത്സരാര്‍ഥികള്‍ക്ക് സൗകര്യം ഒരുക്കുന്നതിന് അണിനിരക്കും. മത്സരത്തിന്‍റെ സ്റ്റാര്‍ട്ട് , ഫിനിഷ് ലൈന്‍, യൂടേണുകള്‍ എന്നിവ കായിക അധ്യാപകരുടെ നേതൃത്വത്തില്‍ നീരിക്ഷിക്കുകയും ആരോഗ്യസുരക്ഷ ക്രമീകരണവുമായി ബന്ധപ്പെട്ട് ഡോക്ടര്‍മാരടങ്ങിയ അത്യാധുനിക സൗകര്യത്തോടു കൂടിയ ആംബുലൻസ് മാരത്തണിന്‍റെ മുന്നിലും പുറകിലുമായി സജ്ജമാക്കും. മാരത്തണ്‍ റൂട്ടില്‍ രണ്ടു കിലോമീറ്റര്‍ ഇടവിട്ട് വാട്ടര്‍ പോയിന്‍റും ഫസ്റ്റ് എയ്ഡ് സംവിധാനവും ഉറപ്പുവരുത്തും. കൂടാതെ, മാരത്തണ്‍ റൂട്ടിലുളള മുഴുവന്‍ വോളണ്ടിയര്‍മാരുടെ കൈവശവും കുടിവെളളവും മറ്റ് ആവശ്യ സേവനങ്ങളും ഉറപ്പുവരുത്തും. സുരക്ഷാ സംവിധാനങ്ങളുടെ ഭാഗമായി പോലീസ് , ഫയര്‍ഫോഴ്സ് തുടങ്ങിയ സേനാവിഭാഗങ്ങളുടെയും സഹായവും തേടിയിട്ടുണ്ട്. രാജ്യത്തിനകത്തും പുറത്തും നിന്നുമായി എത്തിച്ചേരുന്ന ആയിരത്തിലധികം കായികതാരങ്ങള്‍ക്ക് മാരത്തണ്‍ പോയിന്‍റായ പയ്യാവൂരില്‍ എത്തിച്ചേരുന്നതിന് റൂട്ട് മാപ്പ് പ്രസിദ്ധീകരിക്കുകയും താമസ സൗകര്യം ഏര്‍പ്പെടുത്തുകയും ചെയ്തിട്ടുണ്ട്. ഇതിന്‍റെ ഭാഗമായി പയ്യാവൂരില്‍ ഇന്നു രാവിലെ 10 മുതല്‍ ഹെല്‍പ്പ് ഡെസ്ക് പ്രവര്‍ത്തനം തുടങ്ങും. ഇന്നു രാത്രി തന്നെ മത്സരാര്‍ഥികള്‍ക്ക് ജഴ്സിയും ചെസ്റ്റ് നമ്പറും നല്‍കും. ‌മത്സരത്തിനു േഷം മാരത്തണിന്‍റെ ഭാഗമായ മുഴുവന്‍ പേര്‍ക്കും ഭക്ഷണവും കായിക താരങ്ങള്‍ക്ക് പുലിക്കുരുമ്പയില്‍ നിന്ന് പയ്യാവൂരില്‍ എത്തിച്ചേരാനുളള വാഹന സൗകര്യവും ഏര്‍പ്പെടുത്തിയതായി സംഘാടകര്‍ പത്രസമ്മേളനത്തില്‍ അറിയിച്ചു. ശ്രീകണ്ഠപുരത്ത് നടന്നപത്രമ്മേളനത്തില്‍ ഇരിക്കൂർ ഇന്നവേഷന്‍ കൗൺസിൽ ചെയർമാൻ പി.ടി. മാത്യു, നടുവിൽ പഞ്ചായത്ത് പ്രസിഡന്‍റ് ബേബി ഓടംപള്ളി, പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ, എരുവേശി പഞ്ചായത്ത് പ്രസിഡന്‍റ് മിനി ഷൈബി തുടങ്ങിയവര്‍ പങ്കെടുത്തു.

ഇരിക്കൂര്‍ ടൂറിസം ലോകമറിയാൻ രാജ്യാന്തര മിനി മാരത്തണ്‍ നാളെ

ശ്രീകണ്ഠപുരം: ഇരിക്കൂർ നിയോജകമണ്ഡലത്തിലെ പ്രകൃതിഭംഗിയെയും വിനോദ സഞ്ചാര കേന്ദ്രങ്ങളെയും ലോകശ്രദ്ധയിലേക്ക് ഉയര്‍ത്തുന്നതിന് സജീവ് ജോസഫ് എംഎല്‍എയുടെ നേതൃത്വത്തില്‍ കണ്ണൂര്‍ ഡിടിപിസിയും ഇരിക്കൂര്‍ ടൂറിസം ആൻഡ് ഇന്നൊവേഷന്‍ കൗണ്‍സിലും സംയുക്തമായി നടത്തുന്ന റണ്‍ പാലക്കയംതട്ട് ഇരിക്കൂര്‍ ടൂറിസം രാജ്യാന്തര മിനി മാരത്തൺ നാളെ നടക്കും. രാജ്യത്തിനകത്തും പുറത്തുനിന്നുമായി ആയിരത്തിലധികം ആളുകള്‍ പങ്കെടുക്കും. പുലർച്ചെ ആറിന് പയ്യാവൂരില്‍ എംഎല്‍എമാര്‍ ചേര്‍ന്ന് ഫ്ലാഗ് ഓഫ് ചെയ്യുന്നതോടെ മാരത്തണ്‍ ആരംഭിക്കും. പുലിക്കുരുമ്പയില്‍ നടക്കുന്ന സമാപന സമ്മേളനത്തില്‍ സണ്ണി ജോസഫ് എംഎല്‍എ വിജയികള്‍ക്ക് സമ്മാനദാനം നിര്‍വഹിക്കും. മത്സരത്തില്‍ പങ്കെടുത്ത് മാരത്തണ്‍ പൂര്‍ത്തിയാക്കുന്ന മുഴുവന്‍ പേര്‍ക്കും മെഡലും സര്‍ട്ടിഫിക്കറ്റും നല്‍കുമെന്നും മത്സരം പൂര്‍ത്തികരിക്കുന്ന 60 വയസിന് മുകളിലുളളവര്‍ക്ക് കാഷ് പ്രൈസ് സമ്മാനിക്കുമെന്നും സംഘാടകര്‍ അറിയിച്ചു. പയ്യാവൂരിൽനിന്ന് പുലിക്കുരുന്പയിലേക്ക് പയ്യാവൂരില്‍ ആരംഭിച്ച് പുലിക്കുരുമ്പയിലാണ് മാരത്തണിന്‍റെ സമാപനം. പയ്യാവൂർ ബസ്‌സ്റ്റാൻഡിന് സമീപമുള്ള മൈതാനത്തുനിന്നാണ് മാരത്തൺ ആരംഭിക്കുന്നത്. 12.5 കിലോമീറ്റര്‍ മിനി മാരത്തണില്‍ എതോപ്യ, നേപ്പാള്‍ അടക്കമുളള വിദേശരാജ്യങ്ങളില്‍ നിന്നും മധ്യപ്രദേശ്, രാജസ്ഥാന്‍, ഛത്തീസ്ഗഡ്, കര്‍ണാടക, തമിഴ്നാട് തുടങ്ങിയ സംസ്ഥാനങ്ങളില്‍നിന്നും കേരളത്തിലെ എല്ലാ ജില്ലകളില്‍ നിന്നുമായി നൂറുകണക്കിന് അത്‌ലറ്റുകള്‍ വ്യത്യസ്ത കാറ്റഗറികളിലായി ‌പങ്കെടുക്കും. പ്രാദേശിക പങ്കാളിത്തം ഉറപ്പുവരുത്തി എല്ലാ വിഭാഗക്കാരും പങ്കെടുക്കുന്ന പയ്യാവൂരില്‍ ആരംഭിച്ച് പൂപ്പറമ്പ് അവസാനിക്കുന്ന നാലുകിലോമീറ്റര്‍ റണ്‍ ഫോര്‍ ഫണും മാരത്തണിന്‍റെ ഭാഗമായി നടക്കും. സ്ത്രീ, പുരുഷന്‍, ട്രാന്‍സ്ജെൻഡര്‍ വിഭാഗത്തിലുമായി നടത്തുന്ന മിനി മാരത്തണില്‍ 18 വയസ് മുതല്‍ 35വയസ് വരെയും 36 വയസ് മുതല്‍ 45 വയസ് വരെയും 46 വയസ് മുതല്‍ മുകളിലോട്ടുമായി കാറ്റഗറി തിരിച്ചാണ് മത്സരം സംഘടിപ്പിക്കുന്നത്. ഓടാൻ വിഐപികളും ജനപ്രതിനിധികളും രണ്ടരലക്ഷം രൂപയുടെ കാഷ് പ്രൈസ് സമ്മാനിക്കുന്ന രാജ്യത്തിനകത്തും പുറത്തുനിന്നുമായി നൂറുകണക്കിന് പ്രമുഖരായ അത്‌ലറ്റുകൾ അണിനിരക്കുന്ന ഈ മിനി മാരത്തണില്‍ ജനപ്രതിനിധികള്‍ ഉൾപ്പെടെയുള്ള രാഷ്‌ട്രീയ -സാമൂഹ്യ-കലാ-കായിക രംഗത്തെ പ്രമുഖരും പങ്കെടുക്കും. കെ.പി.മോഹനന്‍, ചാണ്ടി ഉമ്മന്‍, കെ.വി. സുമേഷ് , ടി. സിദ്ദിഖ്, ടി.ഐ. മധുസൂദനന്‍, എന്‍.എ. നെല്ലിക്കുന്ന്, ഐ.സി. ബാലകൃഷ്ണന്‍, എം. വിജിന്‍ തുടങ്ങിയ എംഎല്‍എമാരും കണ്ണൂർ ജില്ലാ പഞ്ചായത്ത് പ്രസിഡന്‍റ് അഡ്വ. കെ.കെ. രത്നകുമാരി, കണ്ണൂർ മേയർ മുസ്‌ലിഹ് മഠത്തിൽ, ഇരിക്കൂർ നിയോജക മണ്ഡലത്തിലെ എല്ലാ നഗരസഭ /പഞ്ചായത്ത് പ്രസിഡന്‍റുമാരും മുന്‍ ഇന്ത്യന്‍ ഫുട്ബോള്‍ താരം സി.കെ.വീനിത്, മുന്‍ ഇന്ത്യന്‍ വോളിബോള്‍ താരം മനു ജോസഫ് , അന്തര്‍ദേശീയ ബോക്സിംഗ് താരവും ധ്യാന്‍ചന്ദ് പുരസ്കാര ജേതാവുമായ കെ.സി. ലേഖ, കോമൺവെൽത്ത് ഗെയിംസ് മെഡൽ ജേതാക്കളും കായിക താരങ്ങളുമായ ടി.കെ. പ്രിയ, സിനി ജോസ്, ടിയാന മേരി തോമസ് തുടങ്ങിയ പ്രമുഖര്‍ക്കൊപ്പം കണ്ണൂര്‍ കളക്ടര്‍ അരുണ്‍ കെ. വിജയന്‍, സിറ്റി പോലിസ് കമ്മീഷണർ പി. നിധിൻ രാജ് തുടങ്ങിയവരും പങ്കെടുക്കുന്നുണ്ട്.

മാലിപ്പറമ്പിൽ പുരസ്കാരം ഫാ.ആന്‍റണി തെക്കേമുറിയിലിന്

ആലക്കോട്: "ദൈവം തന്ന അംഗീകാരമാണിത്. നാലു പതിറ്റാണ്ടായുള്ള വൈദിക ജീവിതത്തിനിടയിൽ നിരവധി പുരസ്കാരങ്ങളും അവാർഡുകളും ലഭിച്ചിട്ടുണ്ടെങ്കിലും മനസിന് ഇത്രയധികം സംതൃപ്തി തന്ന അംഗീകാരം മറ്റൊന്നില്ല, അതും കുട്ടികളുടെ സംഘടനയെ നയിച്ചതിന്‍റെ പേരിലുള്ള അവാർഡ് ആകുന്പോൾ അതിനെ ഇരട്ടി അംഗീകാരമായാണ് കാണുന്നത്.കുട്ടികളോടുകൂടെ ആയിരിക്കുക, കുഞ്ഞുങ്ങളിൽ ഒരാളായിരിക്കുക എന്നത് ഏറെ സംതൃപ്തിയുള്ള കാര്യമാണ്..' ചെറുപുഷ്പ മിഷൻലീഗിന്‍റെ പ്രഥമ ഡയറക്ടറായ ഫാ. ജോസഫ് മാലിപ്പറമ്പിലിന്‍റെ സ്മരണാർത്ഥം സംസ്ഥാന കമ്മിറ്റി നൽകുന്ന മാലിപ്പറന്പിൽ പുരസ്കാരത്തിന് അർഹനായ ഫാ. ആന്‍റണി തെക്കേമുറിയിൽ "ദീപിക'യോട് പറഞ്ഞു. തലശേരി അതിരൂപതയിലെ മുതിർന്ന വൈദികനായ ഫാ. ആന്‍റണി തെക്കേമുറിയിൽ 37 വർഷമായി വിവിധതലങ്ങളിൽ ചെറുപുഷ്പ മിഷൻലീഗിനെ നയിക്കുകയാണ്. മിഷൻലീഗിന്‍റെ ശാഖ ഡയറക്ടറിൽ തുടങ്ങി മേഖല, അതിരൂപത, സംസ്ഥാന, ദേശീയ ഡയറക്ടർ, പ്രഥമ ഇന്‍റർനാഷണൽ ഡയറക്ടർ വരെയുള്ള പദവികൾ വഹിച്ചിട്ടുണ്ട്. നാലു വർഷമായി സിഎംഎൽ ഇന്‍റർനാഷണൽ എക്സിക്യൂട്ടീവ് അംഗമാണ്. 1978ല്‍ തോമാപുരം ഫൊറോന ഡയറക്ടറായി പ്രവർത്തനമാരംഭിച്ച ഫാ. ആന്‍റണി തെക്കേമുറിയിൽ 18 ഇടവകകളിൽ ശുശ്രൂഷ ചെയ്തിട്ടുണ്ട്. നിരവധി പള്ളികളും കുരിശുപള്ളികളും സ്കൂൾ, കോളജ്, സെമിത്തേരികൾ എന്നിവയടക്കമുള്ള നിർമണങ്ങൾക്ക് നേതൃത്വം നൽകി. മിഷൻലീഗിന്‍റെ പ്രവർത്തന മേഖലകളിൽ തീക്ഷ്ണതയോടെ പ്രസംഗിക്കുന്നതിനൊപ്പം സെമിനാരികളിലും സന്യാസിഭവനങ്ങളിലും ക്ലാസുകളുമെടുക്കാറുണ്ട്. വിദേശരാജ്യങ്ങളിലടക്കം ക്ലാസുകൾ നയിച്ചിട്ടുണ്ട്. നേതൃത്വപാടവത്തിനൊപ്പം മികച്ച സംഘാടകനുമായ ആന്‍റണിയച്ചൻ സാമൂഹ്യ സാംസ്കാരിക രംഗത്തും സജീവ സാന്നിധ്യമാണ്. അതിരൂപതാ മതബോധന അസിസ്റ്റന്‍റ് ഡയറക്ടർ, ക്യൂരിയ റോട്ടറി, ദൈവവിളി ഡയറക്ടർ, പരിശുദ്ധാത്മാവ് വർഷ ഡയറക്ടർ, പാസ്റ്റർ കൗൺസിൽ അംഗം എന്നീ നിലകളിലും മികവുറ്റ പ്രവർത്തനങ്ങൾ നടത്തി. ഇപ്പോൾ രയറോം സെന്‍റ് സെബാസ്റ്റ്യൻസ് പള്ളി വികാരിയാണ്.

സീഡ് ബോൾ നിർമിച്ച് പേരട്ട സെന്‍റ് ജോസഫ് സ്കൂൾ വേൾഡ് റിക്കാർഡ് നേട്ടത്തിൽ

ഇരിട്ടി: വന്യമൃഗങ്ങൾക്ക് കാട്ടിനകത്ത് ഭക്ഷണമുറപ്പാക്കുന്നതിനുള്ള പദ്ധതിക്കായുള്ള സീഡ് ബോൾ നിർമാണത്തിൽ വേൾഡ് റിക്കാർഡ് നേട്ടവുമായി പേരട്ട സെന്‍റ് ജോസഫ്സ് സ്കൂൾ. സിസ്റ്റേഴ്സ് ഓഫ് സെന്‍റ് ജോസഫ് ഓഫ് ആനെസിയുടെ വിശാഖപട്ടണം പ്രോവിൻസിന്‍റെ 375ാം വാർഷികത്തോടനുബന്ധിച്ച് നടത്തിയ മത്സരത്തിലാണ് പേരട്ട സെന്‍റ് ജോസഫ്സ് സ്കൂൾ വിദ്യാർഥികൾ ഈ നേട്ടം കൈവരിച്ചത്. സിസ്റ്റേഴ്സ് ഓഫ് സെന്‍റ് ജോസഫ് ഓഫ് ആനെസിയുടെ കീഴിലുള്ള സ്കൂളുകൾക്കായി സംഘടിപ്പിച്ച മത്സരത്തിൽ വിവിധ സംസ്ഥാനങ്ങളിൽനിന്നുള്ള 15 സ്കൂളുകളാണ് വേൾഡ് റിക്കാർഡ് നേട്ടത്തിനായി മത്സരിച്ചത്. പാഠപുസ്തകങ്ങളിലെ അറിവുകൾക്കുമപ്പുറം പ്രകൃതിയെ സ്നേഹിക്കുന്നതുമായി ബന്ധപ്പെട്ടായിരുന്നു മത്സരങ്ങൾ ഒരുക്കിയത്. കളിമണ്ണും മണ്ണും വെള്ളത്തിൽ കുഴച്ച് ഉണ്ടാക്കുന്ന മൺ ബോളുകൾക്കുള്ളിൽ ഫലൃക്ഷത്തിന്‍റെ വിത്ത് നിക്ഷേപിച്ചാണ് സീഡ് ബോളുകൾ നിർമിക്കുന്നത്. ഇത്തരത്തിലുള്ള 20010 സീഡ് ബോളുകളാണ് കുട്ടികൾ തയാറാക്കിയത്. 15 സ്കൂളുകളിൽ നിന്നായുള്ള വിദ്യാർഥികൾ ഒരു മണിക്കൂറിനുള്ളിൽ ആകെ 11,90796 ബോളുകളാണ് നിർമിച്ചത് . സൂം മീറ്റിംഗിലൂടെയായിരുന്നു മത്സരം. ഒരു മണിക്കൂറായിരുന്നു മത്സര സമയം. മത്സരത്തിൽ സ്കൂളിലെ 173 വിദ്യാർഥികൾ ചേർന്നാണ് നിശ്ചിത സമയത്തിനകം 20010 സീഡ് ബോളുകൾ നിർമിച്ചത്. വനംവകുപ്പുമായി ആലോചിച്ച് വിദ്യാർഥികൾ നിർമിച്ച സീഡ് ബോളുകൾ കാട്ടിൽ നിക്ഷേപിക്കും. മത്സരത്തിൽ പങ്കെടുത്ത വിദ്യാർഥികളെ സ്കൂൾ മാനേജ്മെന്‍റ് അഭിനന്ദിച്ചു. മുഖ്യാധ്യാപിക സിസ്റ്റർ ടെക്സി മാത്യു, ഉളിക്കൽ പഞ്ചായത്തംഗവും പിടിഎ പ്രസിഡന്‍റുമായ ബിജു വെങ്ങലപ്പള്ളി എന്നിവർ പ്രസംഗിച്ചു. മാനേജ്മെന്‍റിന്‍റെയും അധ്യാപകരുടെയും വിദ്യാർഥികളുടെയും കൂട്ടായ പ്രവർത്തനമാണ് സ്കൂളിന്‍റെ നേട്ടത്തിനു കാരണമായത്.

കാട്ടുപന്നി കുറുകെ ചാടി സ്കൂട്ടർ മറിഞ്ഞ് വീട്ടമ്മയ്ക്ക് പരിക്ക്

ഇരിട്ടി: കാട്ടുപന്നി കുറുകെ ചാടി സ്കൂട്ടർ മറിഞ്ഞ് വീട്ടമ്മയ്ക്ക് പരിക്കേറ്റു. കാക്കയങ്ങാട് പാല അങ്ങാടിച്ചാൽ സ്വദേശി പി. ജിജിക്കാണ് (42) അപകടത്തിൽ പരിക്കേറ്റത്. പനി ബാധിച്ച നാലുവയസുകാരിയായ മകളെ ഇരിട്ടിയിലെ സ്വകാര്യ ആശുപത്രിൽ കാണിച്ച് മരുന്നുവാങ്ങി സ്കൂട്ടറിൽ മടങ്ങുകയായിരുന്നു ജിജി. നാലുവയസുകാരി പരിക്കേൽക്കാതെ അദ്ഭുതകരമായി രക്ഷപ്പെട്ടു. തിങ്കളാഴ്ച രാത്രി എട്ടോടെയായിരുന്നു അപകടം. ഇടതുകാലിന് സാരമായി പരിക്കേറ്റ ജിജിയെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.

വൈറലായി കണ്ണൂരിലെ മിനി ഗുണാ കേവ്; നിയന്ത്രണം വേണമെന്ന് നാട്ടുകാർ

പയ്യാവൂർ (കണ്ണൂർ): പയ്യാവൂർ ഉളിക്കൽ റോഡിൽ കുഞ്ഞിപ്പറമ്പിലുള്ള മിനി ഗുണാ കേവ് എന്ന ് നാട്ടുകാർ വിളിക്കുന്ന ഗുഹ വൈറലാവുന്നു. ഓണം റിലീസായെത്തി വൻ വിജയമായ 'ലോക ചാപ്റ്റർ വൺ-ചന്ദ്ര' സിനിമയിലെ നായികയ്ക്ക് സൂപ്പർ പവർ കിട്ടുന്ന ഗുഹയുടെ ചിത്രീകരണത്തോടെയാണ് കുഞ്ഞിപ്പറമ്പിലെ ഗുഹ താരമായി മാറിയത്. ഡൊമിനിക് അരുൺ സംവിധാനം ചെയ്ത സിനിമയിലെ ഫ്ലാഷ് ബാക്ക് സീനിലാണ് ഗുഹയുടെ ഉൾവശം കാണിക്കുന്നത്. എറണാകുളത്തെ മറ്റൊരു ഗുഹയിലും ഈ സീനിന്‍റെ ചില ഭാഗങ്ങൾ ഷൂട്ട് ചെയ്തിട്ടുണ്ട്. ഐതിഹ്യമാല ആസ്പദമാക്കി നിർമിച്ച സിനിമയ്ക്കായി കഴിഞ്ഞ വർഷം ഡിസംബറിലായിരുന്നു കുഞ്ഞിപ്പറന്പിലുള്ള രംഗങ്ങൾ ചിത്രീകരിച്ചത്. 15 ദിവസം ഇവിടെ ക്യാന്പ് ചെയ്ത ഷൂട്ടിംഗ് സംഘം മൂന്നു ദിവസം കൊണ്ടാണ് സീൻ പൂർത്തിയാക്കിയത്. സംസ്ഥാനത്തിനകത്തും പുറത്തും നിന്നായി നിരവധി പേരാണ് ഇവിടെ എത്തുന്നത്. ജനത്തിരക്ക് നിയന്ത്രിക്കാൻ കഴിയാത്ത അവസ്ഥയാണ്. കുഞ്ഞിപറമ്പിലെ ഗുഹയുടെ മുൻവശം കഴിഞ്ഞ ജൂലൈ 26ന് കനത്തമഴയിൽ ഇടിഞ്ഞിരുന്നു. ഇതുകാരണം അതീവ അപകടാവസ്ഥ തരണം ചെയ്താണ് സന്ദർശകർ ഗുഹയിലേക്ക് കടക്കുന്നത്. ഈ സാഹചര്യത്തിൽ സന്ദർശകർക്ക് നിയന്ത്രണമൊരുക്കണമെന്നാണ് നാട്ടുകാർ ആവശ്യപ്പെടുന്നത്. സഞ്ചാരികൾക്ക് അത്രയൊന്നും പരിചിതമല്ലാതിരുന്ന കുഞ്ഞിപ്പറമ്പ് ഗുഹ സിനിമയുടെ വിജയത്തോടെ സമൂഹ മാധ്യമങ്ങളിൽ ചർച്ചയാണ്. നേരത്തേ 'കുമാരി' എന്ന സിനിമയും ഇവിടെ ഷൂട്ട് ചെയ്തിരുന്നു. പയ്യാവൂർ സ്വദേശി പി.ഉമ്മറിന്‍റെ റബർ തോട്ടത്തിലാണ് ഏകദേശം അരകിലോമീറ്ററോളമുള്ള ഗുഹയുള്ളത്. പ്രകൃതിദത്തമായി രൂപപ്പെട്ട ഗുഹയാണിത്. ശരാശരി അഞ്ചു മുതൽ 15 മീറ്റർ വരെ ഉയരവുമുള്ള ഗുഹയ്ക്ക് ഏകദേശം പത്ത് മീറ്ററാണ് വീതി. ചിലയിടങ്ങളിൽ 15 മീറ്റർ വരെ ഉയരമുള്ള ഗുഹയുടെ ചില ഭാഗങ്ങളിലെ ഉയരം ഒരു മീറ്ററായി ഒതുങ്ങുന്നുമുണ്ട്. ഒരു മീറ്റർ മാത്രമുള്ള സ്ഥലം കൂടി മുട്ടിലിഴഞ്ഞാണ് കടക്കുക. ഇരുട്ട് മൂടിയ ഗുഹയിലൂടെ ഏകദേശം 150 മീറ്റർ ഉള്ളിലേക്ക് നടന്നാൽ മുകളിൽ ഒരുവലിയ ദ്വാരം കാണാം. അതിൽനിന്ന് പ്രകാശം ഉള്ളി ലേക്ക് പതി ക്കുന്നതാണ് ഇവിടുത്തെ ആകർഷമായ കാഴ്ച. ഇൻസ്റ്റഗ്രാം റീലുകളിലും സഞ്ചാരികളുടെ വ്ലോഗിലും കുഞ്ഞിപ്പറമ്പ് ഗുഹ ഇടംപിടിച്ചിട്ടുണ്ട്. ഒരു കല്യാണ ആൽബത്തിലും ഗുഹ താരമായി. സ്ഥലമുടമ വിട്ടുനൽകിയാൽ കവാടത്തിലെ തടസം നീക്കാനും നവീകരിച്ച് ടൂറിസ്റ്റ് കേന്ദ്രമാക്കാനും പയ്യാവൂർ പഞ്ചായത്ത് ആലോചിക്കുന്നുണ്ട്. കുഞ്ഞിപ്പറന്പ് ഗുഹയെ പ്രദേശവാസികൾ മിനി ഗുണ കേവ് എന്നും പേരിട്ട് വിളിക്കുന്നുണ്ട്. കണ്ണൂർ ടൗണിൽ നിന്ന് 46 കിലോമീറ്ററാണ് കുഞ്ഞിപറന്പ് ഗുഹയിലേക്കുള്ള ദൂരം. അപകടം ഒഴിവാക്കാനായി രാത്രി ഗുഹ കാണാൻ വരുന്നവർക്ക് നാട്ടുകാർ നിലവിൽ വിലക്ക് ഏർപ്പെടുത്തിയിരിക്കുകയാണ്.

കാട്ടുപന്നി ഏക്കറു കണക്കിന് കൃഷി നശിപ്പിച്ചു

ഇരിട്ടി: വളോര, വട്ടക്കയം, പന്നിമൂല ഭാഗങ്ങളിൽ കാട്ടുപന്നി ശല്യം രൂക്ഷമായി. പന്നിക്കൂട്ടം നെല്ല്, വാഴ, പച്ചക്കറി, മരച്ചീനി എന്നീ കൃഷികൾ വ്യാപകമായി നശിപ്പിക്കുകയാണ്. വളോരയിലെ പി.കെ. ബിജുവിന്‍റെ രണ്ട് ഏക്കറോളം വരുന്ന നെൽകൃഷിയാണ് പൂർണമായും നശിപ്പിച്ചു. പി.കെ. സജേഷിന്‍റെ മൂന്ന് ഏക്കറിലധികം വരുന്ന പച്ചക്കറി കൃഷി, സുരേഷ്, ബിജു, അനിൽകുമാർ, അസൈനാർ, ഇബ്രാഹിം കുട്ടി, പ്രശാന്തൻ, വിജയൻ, തമ്പാൻ, ഉണ്ണികൃഷ്ണൻ എന്നിവരുടെ കാർഷിക വിളകളും നശിപ്പിച്ചു. കാട്ടുപന്നി ശല്യം രൂക്ഷമായിട്ടും ഇതിനെതിരേ നടപടി ബന്ധപ്പെട്ടവരുടെ ഭാഗത്ത് നിന്ന് ഉണ്ടാവാത്തതിൽ കടുത്ത പ്രതിഷേധമാണ് ഉയരുന്നത്. നഗരസഭയിൽ പന്നികളെ വെടിവച്ച് കൊല്ലാന്് തോക്ക് ലൈസൻസുള്ളവർ ഉണ്ടെങ്കിലും ഇവർക്ക് വേതനം നൽകാനുള്ള സംവിധാനമില്ല, നേരത്തെ രണ്ടു തവണ പന്നികളെ വെടിവെക്കാൻ എത്തിയ ഷൂട്ടർമാരുടെ വേതനവും ഇതുവരെ നൽകിയിട്ടില്ലെന്നും ആക്ഷേപമുണ്ട്.

സൗജന്യ പൊതിച്ചോറ് വിതരണ പദ്ധതി കാരുണ്യ സ്പർശം ഉദ്ഘാടനം ചെയ്തു

കേളകം: കേളകം സെന്‍റ് തോമസ് ഹയർ സെക്കൻഡറി സ്കൂൾ നാഷണൽ സർവീസ് സ്കീമും സ്കൗട്ട് ആൻഡ് ഗൈഡ്സും ചേർന്നു തെറ്റുവഴി കൃപ ഭവനിലേക്ക് സൗജന്യമായി പൊതിച്ചോറ് വിതരണം ചെയ്യുന്ന കാരുണ്യ സ്പർശം പദ്ധതി ആരംഭിച്ചു. കേളകം പഞ്ചായത്ത് അംഗം സുനിത വാത്യാട്ട് ഉദ്ഘാടനം ചെയ്തു. സ്കൂൾ പിടിഎ പ്രസിഡന്‍റ് ജിൽസ് വർഗീസ് അധ്യക്ഷത വഹിച്ചു. സ്കൂൾ പ്രിൻസിപ്പൽ എൻ.ഐ. ഗീവർഗീസ്, സ്റ്റാഫ് സെക്രട്ടറി പി.ജെ. വിജി, സ്കൗട്ട് മാസ്റ്റർ കെ.വി. ബിജു, എൻഎസ്എസ് പ്രോഗ്രാം ഓഫീസർ ബോബി പീറ്റർ, കൃപാഭവൻ പിആർഒ സുനിൽ രാജ് തുടങ്ങിയവർ പ്രസംഗിച്ചു. സ്കൂളിലെ എൻഎസ്എസ് വോളന്‍റിയർമാരും സ്കൗട്ട് ആൻഡ് ഗൈഡ്സ് വിദ്യാർഥികളും ചേർന്ന് നൂറ്റിയമ്പത് പൊതിച്ചോറുകൾ വീതം എല്ലാ വ്യാഴാഴ്ചകളിലും സൗജന്യമായി വിതരണം ചെയ്യുന്ന പദ്ധതിയാണിത്.

റോഡിന്‍റെ ശോച്യാവസ്ഥ: മുട്ടുകുത്തിനിന്ന് പഞ്ചായത്തംഗത്തിന്‍റെ പ്രതിഷേധം

കേളകം: കേളകം- മണത്തണ മലയോര ഹൈവേയുടെ ഇരുവശങ്ങളിലേയും കുഴികൾ നികത്തണമെന്നാവശ്യപ്പെട്ട് റോഡിൽ മുട്ടുകുത്തിനിന്ന് പഞ്ചായത്തംഗത്തിന്‍റെ ഒറ്റയാൾ പ്രതിഷേധം. കേളകം പഞ്ചായത്ത് അംഗം ജോണി പാന്പാടിയാണ് റോഡിൽ മുട്ടുകുത്തി നിന്ന് പ്രതിഷേധിച്ചത്. വാഹനങ്ങൾ സൈഡ് നൽകുമ്പോൾ കുഴിയിൽ വീണ അപകടത്തിൽപ്പെടുന്നത് പതിവാണ്. കുഴിയിൽ വീണ് കാൽനടയാത്രക്കാർക്കും പരിക്കേറ്റിരുന്നു. കേളകം സാൻജോസ് പള്ളിയിൽ പോകുന്നവരും വിദ്യാർഥികളും കടുത്ത ദുരിതമാണ് അനുഭവിക്കുന്നത്. കുടിവെള്ള പൈപ്പിടാനും മറ്റം റോഡരിക് കീറുന്നത് കൃത്യമായ രീതിയിൽ മണ്ണിട്ട് മൂടാത്തതാണ് കുഴികൾ രൂപപ്പെടാൻ കാരണമെന്ന് പ്രദേശവാസികൾ ചൂണ്ടിക്കാട്ടി.

വീട്ടിലേക്ക് വഴി വേണം; കളക്ടറേറ്റിന് മുന്നിൽ നില്പു സമരവുമായി വിധവയായ വീട്ടമ്മ

കണ്ണൂർ: വീട്ടിലേക്കുള്ള വഴി ശരിയാക്കി തരാമെന്ന് പറഞ്ഞു പണം വാങ്ങിയതിന് ശേഷം അയൽവാ സികൾ ചതിച്ചതായി കാണിച്ചു വിധവയായ വയോധിക കണ്ണൂർ കളക്ടറേറ്റിന് മുന്നിൽ നില്പു സമരം നടത്തി. പായം പഞ്ചായത്തിലെ കിളിയന്തറ മുപ്പത്തിരണ്ടാം മൈലിലെ അച്ചാമ്മ ആന്‍റണിയാണ് ഇന്നലെ രാവിലെ മുതൽ കളക്ടറേറ്റിനു മുന്നിൽ ഒറ്റയാൾ നില്പു സമരം നടത്തിയത്. താൻ വാർധ്യക്യ സഹജമായ വിവിധ രോഗങ്ങളാൽ പ്രയാസപ്പെടുകയാണെന്നും മൂന്ന് സെന്‍റ് സ്ഥലത്തുള്ള ചെറിയ വീട്ടിലാണ് താമസിക്കുന്നതെന്നും അവർ പറഞ്ഞു. വീട്ടിലേക്ക് സ്ഥിരമായി നടന്നു പോകുന്ന ഏക വഴി ശരിയാക്കിത്തരാമെന്നു പറഞ്ഞ് അയൽവാസി കളായ മൂന്നുപേർ ചേർന്ന് പണം പിരിക്കുകയും എന്നാൽ അവരുടെ സൗകര്യത്തിനു വേണ്ടി തന്‍റെ വീട്ടിലേക്കുള്ള വഴി അടച്ചു കോൺക്രീറ്റ് ചെയ്തു വഴി മുടക്കുകയുമായിരുന്നു. ഇതോടെ താൻ കുടിവെള്ളം എടുക്കുന്ന അയൽവാസിയുടെ വീട്ടിൽ പോകാൻ പോലും ഇപ്പോൾ ഗോവണി വച്ച് കയറുകയും ഇറങ്ങുകയും ചെയ്യേണ്ട ഗതികേടിലാണെന്നും അവർ പറയുന്നു.ഈ വിഷയം ചൂണ്ടിക്കാട്ടി പായം പഞ്ചായത്ത് പ്രസിഡന്‍റിനും കളക്ടർക്കും പരാതി നല്കിയെങ്കിലും യാതൊരു നടപടിയും സ്വീകരിക്കാത്ത സാഹചര്യത്തിലാണ് ഒറ്റയാൾ സമരവുമായി രംഗത്തിറങ്ങിയതെന്നും അച്ചാമ്മ പറഞ്ഞു.

മുടിക്കയം താഴ്‌വാരത്തെ കുടുംബങ്ങൾ ഭീഷണിയിൽ

ഇരിട്ടി: 2018 ലുണ്ടായ പ്രളയത്തിൽ കച്ചേരികടവ് മുടിക്കയത്ത് മലഞ്ചെരിവിലെ പാറകൾ ഇളകി നീങ്ങിയത് ഏഴു വർഷമായിട്ടും നീക്കാത്തത് താഴ്‌വാരത്തെ കുടുംബങ്ങളുടെ ജീവനും സ്വത്തിനും ഭീഷണിയാകുന്നു. അടുത്തടുത്തായി അടുക്കുപോലെ ചേർന്നുനിന്നിരുന്ന മൂന്ന് കൂറ്റൻ പാറകളിൽ ഒന്നാണ് 2018ലെ പ്രളയത്തിൽ നിരങ്ങി നീങ്ങിയ നിലയിലായത്. പാറയുടെ മുകൾഭാഗം അരയടിയും താഴ്ഭാഗം നേരിയ അകലത്തിലും നിന്നിരുന്ന പാറക്കൂട്ടത്തിൽ നിന്നാണ് ഒരെണ്ണം പ്രളയകാലത്ത് ഇളകി മാറിയത്. മറ്റു രണ്ടു പാറകളിൽ നിന്ന് വേറിട്ട് മുകൾവശത്ത് ഇപ്പോൾ ഏഴടിയുടെയും താഴ്ഭാഗത്ത് നാലടിയുടെയും അകലത്തിലാണ് പാറ. പാറകളുടെ വിടവിലൂടെ ഉറവയും രൂപപ്പെട്ടിട്ടുണ്ട്. നേരത്തെ പ്രദേശവാസികൾ കുടിവെള്ളത്തിനായി ആശ്രയിച്ചിരുന്ന ജലസ്രോതസ് പാറയക്ക് ഇളക്കം തട്ടിയതോടെ അടഞ്ഞു നീരുറവയായി മാറുകയായിരുന്നു.നിരന്തരം വെള്ളമൊഴുകുന്നതിനാൽ മണ്ണിന്‍റെ ബലം കുറഞ്ഞ് പാറ ഏതു സമയത്തും താഴേക്ക് പതിച്ചേക്കാമെന്ന കടുത്ത ആശങ്കയാണ് ഉയരുന്നത്. താഴ്‌വാരത്തെ താമസക്കാരായ എളന്പിലക്കാട് മേരി, ബിജു, സിജു, ബൈജു, ജോണി, ഡാർജി കപ്പിലുമാക്കൽ, ഷിജി കുഴിമറ്റം, ജോസ് കോലാക്കൽ, കുഞ്ഞ് പള്ളിപ്പറമ്പിൽ എന്നീ കുടുംബങ്ങളാണ് ഭീതിയിൽ കഴിയുന്നത്. പാറ ഇളകിയതിനു ശേഷം എല്ലാ മഴക്കാലത്തും അധികൃതർ ഈ കുടുംബങ്ങളെ മാറ്റിപ്പാർക്കുകയാണ് ചെയ്യുന്നത്. സണ്ണി ജോസഫ് എംഎൽഎ അടക്കം കുടുംബങ്ങളുടെ ഭീതി ചൂണ്ടിക്കാട്ടി അധികൃതർക്ക് പരാതി നൽകിയെങ്കിലും നടപടി ഉണ്ടായിട്ടില്ല. സ്ഥലം സന്ദർശിച്ച ‌അധികൃതർ തന്നെ പാറ അപകട ഭീഷണി ഉയർത്തുന്നതാണെന്നും പൊട്ടിച്ചു നീക്കണമെന്നും അഭിപ്രായപ്പട്ടിരുന്നെങ്കിലും നടപടികൾ ഒന്നുമുണ്ടായില്ലെന്ന് അയ്യൻകുന്ന് പഞ്ചായത്ത് പാലത്തും കടവ് അംഗം ബിജോയ് പ്ലാത്തോട്ടം പറഞ്ഞു. സ്ഥലത്തേക്ക് വാഹനങ്ങൾക്ക് എത്തിച്ചേരാൻ സൗകര്യമില്ലാത്തതും സ്ഫോടക വസ്തു ഉപയോഗിച്ച് പൊട്ടിച്ചാൽ ചിതറിത്തെറിച്ച് വീടുകൾക്ക് കേടുപാടുകൾ വരുമെന്നതും പാറ പൊട്ടിക്കലിനെ പ്രതിസന്ധിയിലാക്കുന്ന ഘടകങ്ങളാണ്. ഈ സാഹചര്യത്തിൽ ദുരന്ത നിവാരണ നിയമ പ്രകാരമുള്ള നടപടികൾ സ്വീകരിച്ച് പാറ മുറിച്ചു നീക്കണമെന്നാണ് പ്രദേശവാസികൾ ആവശ്യപ്പെടുന്നത് ജിയോളജി വകുപ്പിനോട് റിപ്പോർട്ട് തേടി കഴിഞ്ഞദിവസം വിവിധ വകുപ്പുകൾ ക്രോഡീകരിച്ചു രൂപീകരിച്ച ഉദ്യോഗസ്ഥ സംഘം അപകട ഭീഷണി ഉയർത്തുന്ന പാറയും പരിസരപ്രദേശവും സന്ദർശിച്ച് സ്ഥിതിഗതികൾ വിലയിരുത്തിയിട്ടുണ്ട്. പാറയുടെ ഭൂമിക്കടിയിലേക്കുള്ള താഴ്ചയും മറ്റ് സുരക്ഷാ സാഹചര്യങ്ങളും പരിശോധിച്ചു റിപ്പോർട്ട് നൽകാൻ ജിയോളജി വിഭാഗത്തെ ചുമതലപ്പെടുത്തിയിരിക്കുകയാണ്. റിപ്പോർട്ട് റിപ്പോർട്ട് ലഭിക്കുന്ന മുറയ്ക്ക് പാന നീക്കം ചെയ്യാനുള്ള നടപടി സ്വീകരിക്കുമെന്ന് ഇരിട്ടി തഹസിൽദാർ സി.വി. പ്രകാശൻ അറിയിച്ചു. "ഇതൊന്ന് മാറ്റിത്തരുമോ’ ഇളകി മാറിയ പാറ ചെറുതായിട്ട് ഒന്ന് അനങ്ങിയാൽ പോലുമുണ്ടാകുന്ന വലിയ അപകട സാധ്യതയുടെ തൊട്ടു കീഴിലാണ് താനും കുടുംബവും താമസിക്കുന്നത്. ഇളകിയ പാറ വീടിന് മുകളിലാണ്. ജീവൻ പണയം വച്ചാണ് ഓരോ നിമിഷവും തള്ളി നീക്കുന്നത്. ഏഴു വർഷമായി ഓരോ മഴക്കാലത്തും എല്ലാ കുടുംബങ്ങളും ഭീതിയോടെയാണ് കഴിയുന്നത്. ഇരുട്ടി വെളുക്കുമ്പോൾ ഞങ്ങളിൽ ആരെല്ലാം അവശേഷിക്കും എന്നതും വലിയ ചോദ്യമാണ്.

കരിങ്കൽകുഴിയിൽ ഓക്സിജൻ സിലിണ്ടർ കയറ്റിവന്ന വാഹനം മറിഞ്ഞ് അപകടം

കൊളച്ചേരി: കരിങ്കൽക്കുഴി-പാടിക്കുന്ന് റോഡിൽ ഓക്സിജൻ സിലിണ്ടർ കയറ്റിവന്ന വാഹനം മറിഞ്ഞ് അപകടം. പറശിനി ഭാഗത്തുനിന്ന് വരികയായിരുന്ന വാഹനം പാടിക്കുന്ന് ഇറക്കത്തിൽ കരിങ്കൽക്കുഴി റോഡിലേക്ക് കയറുന്നതിനിടെയാണ് അപകടമുണ്ടായത്. ബ്രേക്ക് നഷ്ടപ്പെട്ട് നിയന്ത്രണം വിട്ട വാഹനം റോഡരികിലെ വൈദ്യുത തൂണിലിടിച്ച് മറിയുകയായിരുന്നു. ഇന്നലെ ഉച്ചയ്ക്ക് 12 ഓടെയായിരുന്നു അപകടം. വാഹനത്തിലുണ്ടായിരുന്ന സിലിണ്ടറുകൾ റോഡിലേക്ക് ചിതറിവീണു. അപകടസമയത്ത് സമീപത്ത് ചെറിയ വാഹനങ്ങളും യാത്രക്കാരും ഇല്ലാത്തിരുന്നതിനാൽ വൻ അപകടം ഒഴിവായി. വാഹനത്തിലുണ്ടായിരുന്ന ഡ്രൈവറും ഒപ്പമുണ്ടായിരുന്നയാളും പരിക്കേൽക്കാതെ രക്ഷപ്പെട്ടു.

ഹയര്‍ സെക്കന്‍ഡറി തുല്യതാ പരീക്ഷ: മികച്ച നേട്ടവുമായി ജില്ല; മട്ടന്നൂരില്‍ 100 മേനി

കണ്ണൂർ: സംസ്ഥാന സാക്ഷരത മിഷന്‍ ഹയര്‍ സെക്കന്‍ഡറി തുല്യത പരീക്ഷയില്‍ 83.42 ശതമാനം വിജയവുമായി ജില്ലയ്ക്ക് മികച്ച നേട്ടം. നൂറുശതമാനം വിജയം കൈവരിച്ച് മട്ടന്നൂര്‍ പഠനകേന്ദ്രം ജില്ലയില്‍ ഒന്നാമതെത്തി. കണ്ണൂര്‍ മുന്‍സിപ്പല്‍ ഹയര്‍ സെക്കന്‍ഡറി പഠനകേന്ദ്രത്തിലെ രഹന കക്കറയില്‍ എല്ലാ വിഷയത്തിലും എ പ്ലസ് നേടി. ജില്ലയില്‍ 923 പേര്‍ പരീക്ഷ എഴുതിയതില്‍ 770 പേര്‍ വിജയിച്ചു. പട്ടികവര്‍ഗ വിഭാഗത്തില്‍പ്പെട്ട 25 പേരും പട്ടികജാതി വിഭാഗത്തില്‍പ്പെട്ട 34 പേരും വിജയിച്ചു. 71 വയസുള്ള കണ്ണൂര്‍ കോര്‍പറേഷനിലെ പി. ഓമനയാണ് ഏറ്റവും പ്രായമുള്ള പഠിതാവ്. ഇരിട്ടി കീഴൂര്‍ പഠന കേന്ദ്രം 53, കൂത്തുപറമ്പ് ഹയര്‍ സെക്കന്‍ഡറി സ്‌കൂള്‍- 57, മാത്തില്‍ ഹയര്‍ സെക്കന്‍ഡറി സ്‌കൂള്‍ -25, പേരാവൂര്‍-64, ഇരിക്കൂര്‍ -41, മട്ടന്നൂര്‍ - 45, കണിയന്‍ചാല്‍ - 36, പാനൂര്‍ - 40, പള്ളിക്കുന്ന് -49, തളിപ്പറമ്പ്- 67, മാടായി -82, തലശേരി ബ്രണ്ണന്‍ ഹയര്‍ സെക്കന്‍ഡറി സ്‌കൂള്‍ -59, കണ്ണൂര്‍ മുന്‍സിപ്പല്‍ ഹയര്‍ സെക്കന്‍ഡറി സ്‌കൂള്‍ -72, തലശേരി ഗേള്‍സ് ഹയര്‍ സെക്കന്‍ഡറി സ്‌കൂള്‍- 24, മൗവ്വഞ്ചേരി-30, സിഎച്ച്എം ഹയര്‍ സെക്കന്‍ഡറി സ്‌കൂള്‍ എളയാവൂര്‍ -26 എന്നിങ്ങനെ യാണ് വിവിധ പഠനകേന്ദ്രങ്ങളിലെ വിജയികളുടെ എണ്ണം. വിജയികളില്‍ നഗരസഭാധ്യക്ഷ‌ ഉൾപ്പെടെ എട്ട് ജനപ്രതിനിധികളും കണ്ണൂർ: ഹയര്‍ സെക്കഡറി തുല്യത പരീക്ഷയില്‍ മികച്ച വിജയം നേടി ജില്ലയിലെ വിവിധ തദ്ദേശസ്ഥാപന മേധാവികളും ജനപ്രതിനിധികളുമടക്കം എട്ടുപേർ. ഇരിട്ടി മുനിസിപ്പൽ ചെയര്‍പേഴ്‌സണ്‍ കെ. ശ്രീലത, പിണറായി പഞ്ചായത്ത് പ്രസിഡന്‍റ് കെ.കെ.രാജീവൻ, ഇരിട്ടി മുനിസിപ്പൽ സ്റ്റാൻഡിംഗ് കമ്മിറ്റി ചെയർപേഴ്സൺ സോയ കാരായി, പാനൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് ടി.ടി. റംല, , ചിറ്റാരിപ്പറമ്പ് ഗ്രാമപഞ്ചായത്ത് വൈസ് പ്രസിഡന്‍റ് എം.സിജ, പാനൂര്‍ മുനിസിപ്പല്‍ കൗണ്‍സിലര്‍ കെ.നസീല, തളിപ്പറമ്പ് മുനിസിപ്പല്‍ കൗണ്‍സിലര്‍ എ.പി.സജീറ, പടിയൂര്‍ ഗ്രാമപഞ്ചായത്ത് അംഗം കെ.സുനിത എന്നിവരാണ് മികച്ച വിജയം നേടിയ ജനപ്രതിനിധികൾ. ഇരിക്കൂര്‍ പഞ്ചായത്ത് സിഡിഎസ് ചെയർപേഴ്സൺ ടി.പി. ജുനൈദും തുല്യതാ പരീക്ഷയില്‍ മികച്ച വിജയം നേടി.

വെള്ളക്കെട്ട് ദുരിതമാകുന്നു

മടമ്പം: തളിപ്പറമ്പ് ശ്രീകണ്ഠപുരം ഇരിക്കൂർ സംസ്ഥാനപാതയിൽ തൃക്കടമ്പിൽ റോഡരികിലെ വെള്ളക്കെട്ട് കാൽനടയാത്രക്കാർക്കും വാഹനങ്ങൾക്കും ദുരിതമാവുന്നു. തൃക്കടമ്പ് മിൽമ ബസ് സ്റ്റോപ്പിന് സമീപമാണ് വെള്ളക്കെട്ട് രൂപപ്പെട്ടത്. വെള്ളക്കെട്ടുള്ള ഭാഗത്തു കൂടെ നടന്നു പോകുന്നവർക്ക് വാഹനങ്ങൾ കടന്നു വരുന്പോൾ മാറി നിൽക്കാൻ പോലും സ്ഥലമില്ല. ഇരുവശങ്ങളിൽ നിന്ന് വാഹനങ്ങൾ കടന്നു വരുന്പോൾ ഒരു ഭാഗത്തെ വാഹനം വെള്ളക്കെട്ടിലേക്ക് ഇറക്കേണ്ട അവസ്ഥയുമുണ്ട്. ആഴ്ചകൾക്ക് മുന്പ് വൈദ്യുത കേബിൾ ഇടാൻ റോഡ് വെട്ടിക്കീറിയപ്പോൾ വാട്ടർ അഥോറിറ്റിയുടെ പൈപ്പ് പൊട്ടിയതാണോ വെള്ളക്കെട്ടിന് കാരണമെന്ന് സംശയിക്കുന്നു. വെള്ളക്കെട്ട് ഒഴിവാക്കാൻ ബന്ധപ്പെട്ടവർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

പീപ്പിള്‍സ് മിഷന്‍ പുസ്തകവണ്ടിയെ സ്വീകരിച്ചു

കണ്ണൂർ: എല്ലാ വാര്‍ഡിലും വായനശാല എന്ന ലക്ഷ്യവുമായി പ്രവര്‍ത്തിക്കുന്ന പീപ്പിള്‍സ് മിഷന് പ്രസാധകരായ പാന്‍ മക്മില്ലന്‍ സംഭാവന ചെയ്ത പുസ്തകങ്ങളുടെ ശേഖരം കണ്ണൂരിലെത്തി. ജില്ലയി ലുടനീളമുള്ള പൊതു, കമ്യൂണിറ്റി ലൈബ്രറികള്‍ക്കായി വരുംദിവസങ്ങളില്‍ ഈ പുസ്തകങ്ങള്‍ വിതരണം ചെയ്യും. ജില്ലയില്‍ പുതിയതായി തുടങ്ങുന്ന എല്ലാ വായശാലകള്‍ക്കും പതിനായിരം മുതല്‍ 25,000 രൂപ വരെ വിലവരുന്ന പുസ്തകങ്ങളാണ് മിഷന്‍ നല്കുന്നത്. വായനശാലയുടെ ഔപചാരിക ഉദ്ഘാടനം നടത്തിയതിന്‍റെ നോട്ടീസ് സഹിതം മിഷന്‍ ഓഫീസില്‍ പുസ്തകത്തിനായി അപേക്ഷി ക്കണം. ഡല്‍ഹിയില്‍ നിന്ന് അയച്ച പുസ്തകങ്ങള്‍ വ്യാഴാഴ്ച്ച രാവിലെയോടെയാണ് കണ്ണൂരിലെത്തിയത്. ഡോ. വി. ശിവദാസന്‍ എംപി, കണ്ണൂര്‍ ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി, വൈസ് പ്രസിഡന്‍റ് ബിനോയ് കുര്യന്‍, സംസ്ഥാന യുവജന കമ്മീഷന്‍ ചെയര്‍മന്‍ എം. ഷാജര്‍, കെ.കെ. പവിത്രന്‍, ശ്രീജിത്ത് എന്നിവര്‍ ചേര്‍ന്ന് പുസ്തകങ്ങള്‍ ഏറ്റുവാങ്ങി. എല്ലാ വാര്‍ഡിലും വായനശാലകളെന്ന സംരംഭത്തിന് പിന്തുണയായി പുസ്തകകെട്ടുകള്‍ സൗജന്യമായി ചുമട്ടു തൊഴിലാളികള്‍ ഇറക്കികൊടുത്തു. കണ്ണൂര്‍ ജില്ലയുടെ സമ്പൂര്‍ണ വായനശാല പ്രഖ്യാപനത്തിനുള്ള സംഘാടക സമിതിയോഗം 27ന് വൈകുന്നേരം ജില്ലാ പഞ്ചായത്ത് ഹാളില്‍ ചേരും. ഒ ക്ടോബര്‍ രണ്ടിന് പി. സായ്‌നാഥ് ജില്ലയിലെ വായനശാലകളിലൂടെ യാത്രയും സംഘടിപ്പിക്കുന്നുണ്ട്.

മാത്തിൽ ഗുരുദേവ് കോളജിൽ റിസേർച്ചേഴ്‌സ് അക്കാഡമി ഉദ്ഘാടനവും എക്സലൻസ് പുരസ്കാര സമർപ്പണവും നടത്തി

ചെറുപുഴ: മാത്തിൽ ഗുരുദേവ് കോളജിൽ ഗ്ലോബൽ യംഗ് റിസേർച്ചേഴ്‌സ് അക്കാഡമി ഉദ്ഘാടനവും അക്കാഡമിക് എക്സെലൻസ് അവാർഡ് ദാനവും നടന്നു. കോളജിലെ 2024-25 അധ്യയന വർഷത്തെ മികച്ച വിദ്യാർഥികൾക്കുള്ള അക്കാഡമിക് എക്സെലൻസ് അവാർഡ് ദാനമാണ് നടത്തിയത്. ബത്തേരി ബിഷപ് ജോസഫ് മാർ തോമസ് ഉദ്ഘാടനം നിർവഹിച്ചു. മികച്ച വിദ്യാർഥികൾക്കുള്ള ഉപഹാരങ്ങളും കോളജ് രക്ഷാധികാരികൂടിയായ ബിഷപ് സമ്മാനിച്ചു. കോളജ് പ്രിൻസിപ്പൽ റവ. ഡോ. സാമുവൽ പുതുപ്പാടി അധ്യക്ഷത വഹിച്ചു. കാങ്കോൽ ആലപ്പടമ്പ് പഞ്ചായത്ത്‌ പ്രസിഡന്‍റ് എം.വി. സുനിൽകുമാർ മുഖ്യപ്രഭാഷണവും കോളജ് ചീഫ് ബർസാർ റവ. ഡോ. വർഗീസ് താന്നിക്കാക്കുഴി അനുഗ്രഹ പ്രഭാഷണവും നടത്തി. റിസർച്ച് ആൻഡ് ഇന്നൊവേഷൻ എന്ന വിഷയത്തിൽ അമേരിക്ക ആസ്ഥാനമായി പ്രവർത്തിക്കുന്ന ഗ്ലോബൽ യംഗ് റിസർച്ച് അക്കാഡമിയിലെ ശാസ്ത്രഞ്ജൻ ഡോ. വിപിൻ ദേവ് ആദത് പ്രഭാഷണം നടത്തി. നാലുവർഷ ബിരുദ പ്രോഗ്രാമുകളുടെ ഗവേഷണ സാധ്യതകളെക്കുറിച്ച് അദ്ദേഹം ക്ലാസെടുത്തു. കോളജ് വൈസ് പ്രിൻസിപ്പൽ പി.വിനോദ് കുമാർ, കരിയർ പ്ലേസ്മെന്‍റ് ഓഫീസർ കെ.വി. ചന്ദ്രശേഖരൻ, കോളജ് കോ-ഓർഡിനേറ്റർ എ. മൃദുല, ഐക്യൂഎസി കോ-ഓർഡിനേറ്റർ സി.കെ.സൗമ്യ, എഫ് വൈയുജിപി കോ-ഓർഡിനേറ്റർ കെ. സുമേഷ്, സ്റ്റാഫ്‌ സെക്രട്ടറി കെ.യു. സന്തോഷ്‌ എന്നിവർ പ്രസംഗിച്ചു.

കാണാതായ വയോധികയുടെ മൃതദേഹം ആറളം പുഴയിൽ കണ്ടെത്തി

ആറളം: കാണാതായ വയോധികയുടെ മൃതദേഹം ആറളം പുഴയിൽ കണ്ടെത്തി. ആറളം പറമ്പത്തെ കണ്ടിയിലെ പുത്തൻവീട്ടിൽ മാധവിയമ്മയുടെ (85) മൃതദേഹമാണ് ആറളം പാലത്തിന് സമീപം കണ്ടെത്തിയത്. മാധവിയമ്മയെ കഴിഞ്ഞദിവസം വൈകുന്നേരം മുതൽ കാണാതാകുകയായിരുന്നു. ബന്ധുക്കളും നാട്ടുകാരും ചേർന്ന് വിവിധയിടങ്ങളിൽ തെരച്ചിൽ നടത്തിയിരുന്നു. പുഴയിൽ ഉണ്ടോയെന്ന് തിരച്ചിൽ നടത്തുന്നതിനിടയിലാണ് ആറളം റെസ്ക്യൂ ടീം ആറളം പാലത്തിനു സമീപത്തായി മൃതദേഹം കണ്ടെത്തുന്നത്. ഭർത്താവ്: പരേതനായ നാരായണൻ. മക്കൾ: മോഹനൻ, ബാബു, ശാന്ത, പുഷ്പവല്ലി, ബിന്ദു.

ചട്ടിവയൽ സ്നേഹഭവൻ സിൽവർ ജൂബിലി ആഘോഷം സമാപിച്ചു

തിരുമേനി: ചട്ടിവയൽ സ്നേഹഭവൻ വൃദ്ധസദനത്തിന്‍റെ സിൽവർ ജൂബിലി സമാപന സമ്മേളനവും സിസ്റ്റർ കീർത്തനയുടെ ഗോൾഡൻ ജൂബിലിയും സംയുക്തമായി ആഘോഷിച്ചു. ടി.ഐ. മധുസൂദനൻ എംഎൽഎ ഉദ്ഘാടനം ചെയ്തു. ഫാ. ജോർജ് നെല്ലുവേലി അധ്യക്ഷത വഹിച്ചു. ചെറുപുഴ സെന്‍റ് മേരീസ് ഫൊറോന പള്ളി വികാരി ഫാ. ഫിലിപ്പ് ഇരുപ്പക്കാട്ട്, തിരുമേനി സെന്‍റ് ആന്‍റണീസ് പള്ളി വികാരി ഫാ. ജോർജ് എളൂക്കുന്നേൽ, താബോർ സെന്‍റ് ജോസഫ്സ് പള്ളി വികാരി ഫാ. തോമസ് പൂവൻപുഴ, ഫാ. ജസ്റ്റിൻ വട്ടക്കുന്നേൽ, ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ, പഞ്ചായത്തംഗം കെ.കെ. ജോയി, സിസ്റ്റർ റോസ് മാത്യു, സിസ്റ്റർ ജൂലിയ എസ്എംഎസ്, സിസ്റ്റർ റോസി എന്നിവർ പ്രസംഗിച്ചു.

അധ്യാപകദിനാഘോഷം നടത്തി

വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് യുപി സ്കൂളിൽ അധ്യാപക ദിനം മുഖ്യമന്ത്രിയുടെ പോലീസ് മെഡൽ ജേതാവ് ആലക്കോട് പോലീസ് സ്റ്റേഷനിലെ സബ് ഇൻസ്പെക്ടർ പി. രവീന്ദ്രൻ ഉദ്ഘാടനം ചെയ്തു. സ്കൂൾ അസിസ്റ്റന്‍റ് മാനേജർ ഫാ. നോയൽ ആനിക്കുഴിക്കാട്ട് അധ്യക്ഷത വഹിച്ചു. മുഖ്യാധ്യാപകൻ ബെന്നി മാത്യു, സ്റ്റാഫ് പ്രതിനിധി ഫാ. റിമൽ ചെമ്പനാനിക്കൽ, പിടിഎ പ്രസിഡന്‍റ് അജേഷ് എന്നിവ പ്രസംഗിച്ചു. അധ്യാപക ദിനാചരണത്തോടനുബന്ധിച്ച് കുട്ടികളുടെയും അധ്യാപകരുടെയും വിവിധ കലാപരിപാടികൾ അരങ്ങേറി. ചെമ്പേരി: നിർമല ഹയർ സെക്കൻഡറി സ്കൂളിൽ അധ്യാപക ദിനം ആചരിച്ചു. റോവർ റേഞ്ചർ, എൻഎസ്എസ് വിദ്യാർഥികളുടെ നേതൃത്വത്തിൽ പൂച്ചെടികൾ നൽകി അധ്യാപകരെ ആദരിച്ചു. സ്കൂൾ പ്രിൻസിപ്പൽ സി.ഡി.സജീവ്, സീനിയർ അസിസ്റ്റന്‍റ് കെ.എം. ആഗ്നസ്, സ്റ്റാഫ് സെക്രട്ടറി സി.എം. ജോൺസൺ, ഫാ. ബിജു ജോൺ, സ്കൂൾ ചെയർപേഴ്സൺ ആൻ ഗ്രെയ്സ് അനീഷ്, റോവർ റേഞ്ചർ സ്റ്റുഡന്‍റ്സ് ലീഡർമാരായ ഋതുൽ ജോസഫ് ഷാജി, അബി അനീഷ്, റോസ് ബിജു, ദേവനന്ദ ബിജു, എൻഎസ്എസ് ലീഡർമാരായ സത്യജിത്ത്, റോസ് മരിയ എന്നിവർ പ്രസംഗിച്ചു. എൻഎസ്എസ് പ്രോഗ്രാം ഓഫീസർ ഷിജോ ആന്‍റണി, റോവർ റേഞ്ചർ ലീഡർമാരായ ട്വിങ്കിൾ ജേക്കബ്, ജെറിൻ ജോസ് എന്നിവർ നേതൃത്വം നൽകി. മധുരപലഹാരങ്ങളും വിതരണം ചെയ്തു.

തളിപ്പറന്പ് നഗരസഭാ സെക്രട്ടറിയെ കോൺഗ്രസ് ഉപരോധിച്ചു

തളിപ്പറമ്പ്: വോട്ടർ പട്ടികയിൽ ക്രമക്കേട് നടത്തുന്നതിന് മുനിസിപ്പൽ ഓഫീസ് ജീവനക്കാർ കൂട്ടു നിൽക്കുന്നവെന്ന് ആരോപിച്ച് കോൺഗ്രസ് പ്രവർത്തകർ തളിപ്പറന്പ് നഗരസഭാ സെക്രട്ടറി സുബൈറിനെ ഓഫീസിൽ ഉപരോധിച്ചു. ഇന്നലെ ഉച്ചയോടെയായിരുന്നു സംഭവം. ഉപരോധത്തെ തുടർന്ന് പ്രവർത്തകരും മുനിസിപ്പൽ ജീവനക്കാരും തമ്മിൽ വാക്കേറ്റമുണ്ടായി. രജനി രമാനന്ദ്, രാഹുൽ വെച്ചിയോട്ട്, ഇർഷാദ് സൈദാരകത്ത് എന്നിവരുടെ നേതൃത്വത്തിലായിരുന്നു ഉപരോധം. വോട്ടർ പട്ടിക സംബന്ധിച്ച പരാതികൾ ഉണ്ടെങ്കിൽ ബന്ധപ്പെട്ട കേന്ദ്രത്തിൽ സമർപ്പിക്കുകയാണ് വേണ്ടതെന്ന് സെക്രട്ടറി സമരക്കാരെ അറിയിച്ചു. ഏറെ നേരെ ഓഫീസിൽ കുത്തിയിരിപ്പ് സമരം നടത്തിയ പ്രവർത്തകർ പിന്നീട് സമരം മതിയാക്കി മടങ്ങുകയായിരുന്നു.

കുടുംബശ്രീ നാനോ ഫിഷ് കിയോസ്ക് തുടങ്ങി

ശ്രീകണ്ഠപുരം: നഗരസഭാ കുടുംബശ്രീ സംരംഭമായ നാനോ ഫിഷ് കിയോസ്ക് കോട്ടൂർ പെട്രോൾ പമ്പിനു സമീപം നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. കുടുംബശ്രീ സിഡിഎസ് ചെയർപേഴ്സൺ എ. ഓമന അധ്യക്ഷത വഹിച്ചു. നഗരസഭയുടെ വിവിധ സ്ഥലങ്ങളിലായി പ്രവർത്തിക്കുന്ന കുടുംബശ്രീയുടെ സംരംഭങ്ങളിൽ മീൻ വിപണനം ആദ്യമായാണ് ആരംഭിക്കുന്നത്. വൈസ് ചെയർമാൻ കെ. ശിവദാസൻ, നഗരസഭ സ്ഥിരം സമിതി അധ്യക്ഷന്മാരായ ജോസഫീന വർഗീസ്, കെ.സി. ജോസഫ്, ത്രേസ്യാമ്മ മാത്യു, കൗൺസിലർമാരായ കെ.വി. ഗീത, കെ.ഒ. പ്രദീപൻ, കെ.ടി. ലീല, സെക്രട്ടറി ടി.വി. നാരായണൻ, ഹെൽത്ത് ഇൻസ്പെക്ടർ വി. പ്രേമരാജൻ, സിഡിഎസ് വൈസ് ചെയർപേഴ്സൺ ടി.പി. രജിത, സിറ്റി മിഷൻ മാനേജർ പി.പി. സുലൈമാൻ, ശശിധരൻ തുടങ്ങിയവർ പ്രസംഗിച്ചു.

സ്പോർട്സ് ക്ലബുകൾക്ക് കിറ്റ് നൽകി

കാർത്തികപുരം: ഉദയഗിരി പഞ്ചായത്തിലെ സ്പോർട്സ് ക്ലബുകൾക്ക് ഓണ സമ്മാനമായി സ്പോർട്സ് കിറ്റുകൾ വിതരണം ചെയ്തു. വിതരണോദ്ഘാടനം പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ നിർവഹിച്ചു. ബിന്ദു ഷാജു ഏറത്തേൽ അധ്യക്ഷത വഹിച്ചു. എം.എൻ. ബിന്ദു, സൂര്യ പ്രകാശ്, ജുബി ജോസഫ്‌ ,പി.എസ്.ഷിജു, പി.ആർ.രഞ്ജിത്, എം.സി. ജനാർദനൻ ,എം.കെ . മനു എന്നിവർ പ്രസംഗിച്ചു.

കോൺഗ്രസ് പോലീസ് സ്റ്റേഷനു മുന്നിൽ ജനകീയ പ്രതിഷേധ സദസ് സംഘടിപ്പിച്ചു

കണ്ണൂർ: ഒന്പത് വർഷം കൊണ്ടുള്ള ഭരണം കൊണ്ട് മുഖ്യമന്ത്രി പിണറായി വിജയനും സിപിഎമ്മും പോലീസ് സേനയെ പാർട്ടിയുടെ ക്രിമിനൽ സംഘങ്ങളാക്കി മാറ്റിയെന്ന് ഡിസിസി പ്രസിഡന്‍റ് മാർട്ടിൻ ജോർജ്. കുന്നംകുളത്ത് യൂത്ത് കോൺഗ്രസ് നേതാവ് സുജിത്തിനെ അതിക്രൂരമായി മർദിച്ച പോലീസ് ഉദ്യോഗസ്ഥരെ സർവീസിൽ നിന്ന് പിരിച്ചു വിടണമെന്ന് ആവശ്യപ്പെട്ട് ജില്ലയിലെ പോലീസ് സ്റ്റേഷനുകളുടെ മുന്നിൽ കോൺഗ്രസ് നടത്തിയ പ്രതിഷേധ സദസിന്‍റെ ജില്ലാതല ഉദ്ഘാടം കണ്ണൂർ ടൗൺ സ്റ്റേഷനു മുന്നിൽ നിർവഹിച്ചു പ്രസംഗിക്കുകയായിരുന്നു അദ്ദേഹം. തികച്ചും മനുഷ്യത്വരഹിതമായാണ് പോലീസ് പെരുമാറുന്നത്. പിണറായി വിജയൻ ആഭ്യന്തര വകുപ്പ് കൈകാര്യം ചെയ്യാൻ തുടങ്ങിയതിൽ പിന്നെ 17 ഓളം കസ്റ്റഡി മരണങ്ങളാണ് സംഭവിച്ചത്. കാക്കിയിട്ട് എന്ത് തെമ്മാടിത്തവും ചെയ്യാമെന്നതിന് പ്രോത്സാഹനം നൽകുന്ന രീതിയിലാണ് ആഭ്യന്തര വകുപ്പ് പ്രമോഷനും സ്ഥലം മാറ്റവും നൽകുന്നത്. പൊതുജനങ്ങൾക്ക് നിർഭയം എപ്പോഴും കടന്നു ചെല്ലാവുന്ന ജനമൈത്രി പോലീസ് സ്റ്റേഷനുകൾ പോലും മൃഗീയ മർദന കേന്ദ്രങ്ങളാക്കി മാറ്റി. പാർട്ടിക്കു വേണ്ടി ക്വട്ടേഷൻ ഏറ്റെടുത്തു നടത്തുന്ന തരത്തിൽ പോലീസ് മാറിയന്നും മാർട്ടിൻ ജോർജ് ആരോപിച്ചു. പി. അനൂപ് അധ്യക്ഷത വഹിച്ചു. ഡെപ്യൂട്ടി മേയർ പി. ഇന്ദിര, കോർപറേഷൻ സ്റ്റാൻഡിംഗ് കമ്മിറ്റി ചെയർപേഴ്സൺമാരായ സുരേഷ് ബാബു എളയാവൂർ, എംപി. രാജേഷ്, മണ്ഡലം പ്രസിഡന്‍റുമാരായ പ്രദീപൻ, റഫീഖ്, രഞ്ജിത്ത്, നേതാക്കളായ പി.വി. പുരുഷോത്തമൻ, രാഹുൽ കായക്കൂൽ, ഫർഹാൻ മുണ്ടേരി, ലക്ഷ്മണൻ തുണ്ടിക്കോത്ത് എന്നിവർ പ്രസംഗിച്ചു. ആലക്കോട്: ആലക്കോട്, ഉദയഗിരി, തേർത്തല്ലി, കരുവഞ്ചാൽ മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ ആലക്കോട് പോലീസ് സ്റ്റേഷനു മുന്നിൽ ജനകീയ പ്രതിഷേധ സദസ് സംഘടിപ്പിച്ചു. ആലക്കോട് ടൗണിൽ നിന്നു നൂറുകണക്കിന് കോൺഗ്രസ് പ്രവർത്തകർ പ്രകടനമായി അരങ്ങത്തെ പോലീസ് സ്റ്റേഷനിലേക്ക് മാർച്ച് നടത്തി. യുഡിഎഫ് ജില്ലാ ചെയർമാൻ പി.ടി. മാത്യു ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് ജോസ് വട്ടമല അധ്യക്ഷത വഹിച്ചു. ഡിസിസി സെക്രട്ടറി തോമസ് വെക്കത്താനം, മണ്ഡലം കോൺഗ്രസ് കമ്മിറ്റി പ്രസിഡന്‍റുമാരായ ബാബു പള്ളിപ്പുറം, ജോയിച്ചൻ പള്ളിയാലിയിൽ, പഞ്ചായത്ത് പ്രസിഡന്‍റ് ജോജി കന്നിക്കാട്ട് തുടങ്ങിയവർ പ്രസംഗിച്ചു. ചെറുപുഴ: ചെറുപുഴ പോലീസ് സ്റ്റേഷനു മുന്നിൽ സംഘടിപ്പിച്ച പ്രതിഷേധ സദസ് ചെറുപുഴ ബ്ലോക്ക് കോൺഗ്രസ് പ്രസിഡന്‍റ് മഹേഷ് കുന്നുമ്മൽ ഉദ്ഘാടനം ചെയ്തു. മണ്ഡലം പ്രസിഡന്‍റ് ടി.പി. ചന്ദ്രൻ അധ്യക്ഷത വഹിച്ചു. ഇരിട്ടി: ഉളിക്കൽ, നുച്യാട് മണ്ഡലം കോൺഗ്രസ് കമ്മറ്റികളുടെ നേതൃത്വത്തിൽ ഉളിക്കൽ പോലീസ് സ്റ്റേഷന് മുമ്പിൽ സംഘടിപ്പിച്ച ജനകീയ പ്രതിഷേധ സദസ് സജീവ് ജോസഫ്എംഎൽഎ ഉദ്ഘാടനം ചെയ്തു. ഉളിക്കൽ മണ്ഡലം പ്രസിഡന്‍റ് ടോമി മുക്നോലിക്കലി അധ്യക്ഷത വഹിച്ചു. ഇരിക്കൂർ: ഇരിക്കൂർ,പടിയൂർ കല്യാട് മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ ഇരിക്കൂർ പോലീസ് സ്റ്റേഷനിലേക്ക് നടത്തിയ മാർച്ചും ധർണയും ഡിസിസി ജനറൽ സെക്രട്ടറി ജോഷി കണ്ടത്തിൽ ഉദ്ഘാടനം ചെയ്തു. ഇരിക്കൂർ മണ്ഡലം പ്രസിഡന്‍റ് കെ.കെ. ഷഫീഖ് അധ്യക്ഷത വഹിച്ചു. തളിപ്പറമ്പ്: തളിപ്പറന്പ് പോലീസ് സ്റ്റേഷനിലേക്ക് നടത്തിയ മാർച്ചും പ്രതിഷേധ കൂട്ടായ്മയും കെപിസിസി ജനറൽ സെക്രട്ടറി സോണി സെബാസ്റ്റ്യൻ ഉദ്ഘാടനം ചെയ്തു. എം.എൻ. പൂമംഗലം അധ്യക്ഷത വഹിച്ചു. പെരിങ്ങേം: പെരിങ്ങോം, വയക്കര മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ പെരിങ്ങോം പോലീസ് സ്റ്റേഷന് മുന്നിൽ ജനകീയ പ്രതിഷേധ സദസ് സംഘടിപ്പിച്ചു. ഡിസിസി ജനറൽ സെക്രട്ടറി റഷീദ് കവ്വായി ഉദ്ഘാടനം ചെയ്തു. പെരിങ്ങോം മണ്ഡലം പ്രസിഡന്‍റ് എ.കെ. രാജൻ അധ്യക്ഷത വഹിച്ചു. പയ്യാവൂർ: പയ്യാവൂർ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ പയ്യാവൂർ പോലീസ് സ്റ്റേഷനു മുന്നിൽ ജനകീയ പ്രതിഷേധ സദസും നടത്തി. സജീവ് ജോസഫ് എംഎൽഎ ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ഇ.കെ. കുര്യൻ അധ്യക്ഷത വഹിച്ചു. ഇരിക്കൂർ ബ്ലോക്ക് പഞ്ചായത്ത് മെംബർ പി.ആർ.രാഘവൻ, കോൺഗ്രസ് ബ്ലോക്ക് ജനറൽ സെക്രട്ടറിമാരായ കെ.വി.ഫ്രാൻസിസ്, ബേബി മുല്ലക്കരി തുടങ്ങിയവർ പ്രസംഗിച്ചു.

സൂപ്പര്‍ ലീഗ് കേരള: കണ്ണൂര്‍ വാരിയേഴ്‌സ് പരിശീലനം തുടങ്ങി

കണ്ണൂര്‍: സൂപ്പര്‍ ലീഗ് കേരളയുടെ ആദ്യ സീസണില്‍ സെമി ഫൈനലില്‍ കാലിടറിയ കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബ് ഇത്തവണ കിരീടം ലക്ഷ്യമിട്ട് പരിശീലനമാരംഭിച്ചു. സെപ്റ്റംബര്‍ ഒന്നു മുതല്‍ കണ്ണൂര്‍ പോലീസ് പരേഡ് ഗ്രൗണ്ടില്‍ മുഖ്യപരിശീലകന്‍ സ്‌പെയിനില്‍ നിന്നുള്ള മനോലോ സാഞ്ചസിന്‍റം നിര്‍ദേശാനുസരണം സഹപരിശീലകന്‍ ഷഫീഖ് ഹസന്‍റെ നേതൃത്വത്തിലാണ് പരിശീലനം നടക്കുന്നത്. കഴിഞ്ഞ സീസണിലും ഇരുവരും ഒന്നിച്ചായിരുന്നു പ്രവർത്തിച്ചത്. മുഖ്യപരിശീലകനും വിദേശ താരങ്ങളും വരും ദിവസങ്ങളില്‍ ടീമിനൊപ്പം ചേരും. ആദ്യ സീസണില്‍ ടീമിനായി തിളങ്ങിയ അസിയര്‍ ഗോമസ്, ലവ്‌സാംബ, അഡ്രിയാന്‍ സര്‍ഡിനേറോ എന്നിവര്‍ക്ക് പുറമെ ഫോര്‍സാ കൊച്ചിയില്‍ മിന്നും പ്രകടനം കാഴ്ചവച്ച നിദാല്‍ സൈയ്ദുമാണ് നിലവില്‍ കണ്ണൂര്‍ വാരിയേഴ്‌സിലെത്തിയ വിദേശ താരങ്ങള്‍. കൂടാതെ സെന്‍റർ ബാക്ക്, സ്‌ട്രൈക്കര്‍ പൊസിഷനിലേക്ക് പുതിയ വിദേശ താരങ്ങളുമെത്തും. ഇവരുടെ പേരുവിവരങ്ങള്‍ ഇതുവരെ പുറത്തുവിട്ടിട്ടില്ല. നിലവില്‍ കണ്ണൂര്‍ വാരിയേഴ്‌സിന്‍റെ എല്ലാ ഇന്ത്യന്‍ താരങ്ങളും ടീമിനൊപ്പമുണ്ട്. കൂടാതെ ഗെയിം ചേഞ്ചര്‍ ത്രിദിന പരിശീലന പരിപാടിയില്‍ നിന്ന് തെരഞ്ഞെടുത്ത പത്ത് താരങ്ങളും പരിശീലനത്തിലുണ്ട്. അവസാനഘട്ടത്തില്‍ ടീം 25 പേരായി ചുരുങ്ങും. ഒക്ടോബര്‍ ആദ്യവാരം മത്സരങ്ങള്‍ ആരംഭിക്കും. കണ്ണൂര്‍ വാരിയേഴ്‌സിന്‍റെ ഹോം മത്സരങ്ങള്‍ കണ്ണൂര്‍ മുനിസിപ്പൽ ജവഹര്‍ സ്റ്റേഡിയത്തില്‍ നടക്കും. ആദ്യ സീസണില്‍ സ്വന്തമായി ഹോം സ്‌റ്റേഡിയം ഇല്ലാതെയാണ് കണ്ണൂര്‍ വാരിയേഴ്‌സ് മത്സരിച്ചത്. അന്ന് കോഴിക്കോട് കോര്‍പറേഷന്‍ സ്റ്റേഡിയത്തില്‍ കാലിക്കട്ട് എഫ്‌സിക്കെപ്പം ഹോം സ്‌റ്റേഡിയം പങ്കിടുകയായിരുന്നു.

ഫാ. സ്കറിയ വടശേരിലിന് ഡോക്ടറേറ്റും പേറ്റന്‍റും

കണ്ണൂർ: തലശേരി അതിരൂപത കോർപറേറ്റ് മാനേജർ റവ.ഡോ. സ്കറിയ(സോണി) വടശേരിലിന് മാനേജ്മെന്‍റിൽ ഡോക്ടറേറ്റും പ്രബന്ധത്തിന്‍റെ ഭാഗമായി അദ്ദേഹം വികസിപ്പിച്ചെടുത്ത ലേണബിലിറ്റി കോഷ്യന്‍റ് സൈക്കോമെട്രിക് സ്കെയിലിന് ഇന്ത്യൻ സർക്കാരിന്‍റെ പകർപ്പവകാശവും പേറ്റന്‍റും ലഭിച്ചു. ബംഗളൂരു ക്രൈസ്റ്റ് യൂണിവേഴ്സിറ്റിയിൽനിന്നാണ് "ദി റോൾ ഓഫ് ലേർണബിലിറ്റി കോഷ്യന്‍റ് ആൻഡ് സ്പിരിച്വൽ ഇന്‍റലിജൻസ് ഓൺ എംപ്ലോയബിലിറ്റി എമംഗ് ദി എഡ്യുക്കേറ്റഡ് ഇൻ സൗത്ത് ഇന്ത്യ' എന്ന വിഷയത്തിൽ ഡോക്ടററേറ് നേടിയത്. മാനേജ്മെന്‍റ് റിസേർച്ച് രംഗത്ത് പുതിയ കാഴ്ചപ്പാടുകൾ നല്കാനുതകുന്ന ഡോക്ടറൽ പ്രബന്ധമാണിതെന്ന് യൂണിവേഴ്സിറ്റി മാനേജ്മെന്‍റ് വിഭാഗം സാക്ഷ്യപ്പെടുത്തി. പാണത്തൂർ വടശേരിൽ വർക്കി-മേരി ദന്പതികളുടെ മകനാണ് . എംബിഎ പഠനത്തിനുശേഷം വിമൽജ്യോതി എൻജി. കോളജിലും സാൻജോസ് അക്കാഡമിയിലും സേവനം ചെയ്തിരുന്നു.

പോലീസ് മർദനത്തിന്‍റെയും കള്ളക്കേസിന്‍റെയും വെളിപ്പെടുത്തലുമായി ആറളം സ്വദേശി

കണ്ണൂർ: പത്തുവർഷം മുന്പ് പോലീസിൽനിന്ന് നേരിടേണ്ടി വന്ന ക്രൂരമർദനത്തെക്കുറിച്ചും പോലീസ് തനിക്കെതിരെ വധശ്രമത്തിന് കള്ളക്കേസ് എടുത്ത് വർഷങ്ങളോളം പീഡിപ്പിച്ചതും വെളിപ്പെ‌ടുത്തി സർക്കാർ ജീവനക്കാരനും അമ്മയും. ആറളം സ്വദേശിയും വടകര നഗരസഭയിലെ സീനിയർ ക്ലർക്കുമായ ആശാരിപറന്പിൽ എ.എസ്. വിനീതും (44) അമ്മ രമണിയുമാണ് പോലീസ് ക്രൂരതയുടെ കാര്യങ്ങൾ വെളിപ്പെടുത്തിയിരിക്കുന്നത്. 10 വർഷത്തെ നിയമ പോരാട്ടത്തിന് ഒടുവിൽ പോലീസ് ഉന്നയിച്ച കൊലപാതക കേസ് കെട്ടിച്ചമച്ചതായിരുന്നു എന്ന് കോടതിക്ക് ബോധ്യപ്പെട്ട സാഹചര്യത്തിൽ കഴിഞ്ഞ മാസം 26 ന് തലശേരി കോടതി വിനീതിനെ വെറുതെ വിടുകയായിരുന്നു. 2015 സെപ്റ്റംബർ 12 ന് എടൂരിൽ വച്ചായിരുന്നു കേസിനും തുടർന്നുള്ള പോലീസ് മർദനത്തിനും ആസ്പദമായ സംഭവം. അന്ന് ആറളം ഗ്രാമ പഞ്ചായത്ത് ക്ലർക്കായിരുന്ന വിനീത് കടയിൽനിന്ന് സാധങ്ങൾ വാങ്ങി ഇറങ്ങുന്നതിനിടെ മദ്യപിച്ച് വാഹനം ഓടിച്ചുവെന്ന് ആരോപിച്ച് അന്നത്തെ ആറളം എസ് ഐ കെ.വി. സ്മിതേഷ് കേസെടുത്തു. തുടർന്നുള്ള വാക്കുതർക്കത്തിൽ എസ്‌ഐ ടോർച്ചുകൊണ്ട് തലയ്ക്ക് അടിച്ചു പരിക്കേൽപ്പിക്കുകയും ചെയ്തു. ‌എന്നാൽ എസ്ഐയെ കൈയേറ്റം ചെയ്തുവെന്ന് കാണിച്ച് ഇരിട്ടി സിഐയുടെ നിർദേശപ്രകാരം അന്നത്തെ ഇരിട്ടി എസ്ഐ സുധീർ കല്ലന്‍റെ നേതൃത്വത്തിലുള്ള സംഘം വിനീതിനെ കസ്റ്റഡിയിലെടുത്ത് ആറളം പോലീസ് സ്റ്റേഷനിൽ കൊണ്ടു പോയി. സ്റ്റേഷനിലേക്കുള്ള യാത്രാമധ്യേ പോലീസ് വാഹനത്തിൽവച്ചും മർദിച്ചു. വധശ്രമക്കേസ് ഉൾപ്പെടെ ഏഴു ക്രിമിനൽ കേസുകൾ‌ എസ് ഐയെ കൊല്ലാൻ ശ്രമിച്ചെന്ന് ആരോപിച്ച് കസ്റ്റഡിയിൽ എടുത്ത പ്രതിയുമായി സ്റ്റേഷനിലേക്ക് പോകുന്നതിനിടെ പ്രതി വാഹനത്തിൽ വച്ച് പോലീസുകാരെ ആക്രമിച്ചുവെന്നും പോലീസ് വാഹനം കാനയിലേക്ക് മറിഞ്ഞ് പോലീസുകാർക്ക് മരണംവരെ സംഭവിക്കാവുന്ന തരത്തിലുള്ള കാര്യങ്ങളാണ് പ്രതി ചെയ്തതെന്നും രേഖപ്പെടുത്തിയാണ് പോലീസ് കേസ് ചാർജ് ചെയ്തത്. കൊലപാതക ശ്രമം ഉൾപ്പെടെ ജാമ്യമില്ലാ വകുപ്പുകൾ ചുമത്തിയാണ് കേസുകൾ എടുത്തത്. തുടർന്ന് ദൃക്സാക്ഷികൾ ഉൾപ്പെടെ 300 ഓളം നാട്ടുകാർ പോലീസ് സ്റ്റേഷനിൽ എത്തി വിനീതിനെ വൈദ്യപരിശോധനയ്ക്ക് ഹാജരാക്കണമെന്നാവശ്യപ്പെട്ടു. ഇതേത്തുടർന്ന് വൈദ്യപരിശാധനയ്ക്ക് ഇരിട്ടിയിലേക്ക് കൊണ്ടു പോകുന്നതിനിടെയും പോലീസിനെ മർദിച്ചു. വൈദ്യപരിശോധന സമയത്ത് ഡോക്ടറുൾപ്പടെയുള്ളവരെയും ഭീഷണിപ്പെടുത്തിയെന്നും പ്രതിയുടെ ആക്രമണത്തിൽ ഏഴു പോലീസുകാർക്ക് പരിക്കേറ്റെന്നും കാണിച്ചായിരുന്നു പോലീസ് കേസെടുത്തത്. പ്രതിയുടെ ആക്രമണത്തിൽ ഏഴു പോലീസുകാർക്ക് പരിക്കേറ്റിട്ടുണ്ടെന്ന് കാണിച്ച് ഡോക്ടറുടെ സർട്ടിഫിക്കറ്റും പോലീസ് നേടിയെടുത്തു. തുടർന്ന് ഇരിട്ടി സ്റ്റേഷനിൽ എത്തിച്ച് അടിവസ്ത്രം മാത്രം ധരിപ്പിച്ച് വിലങ്ങുവച്ച ശേഷം എല്ലാവരും ചേർന്ന് ചവിട്ടിയും അടിച്ചും മർദിച്ചുവെന്നാണ് വിനീത് പറയുന്നത്. പോലീസുകാരനെ കത്തികാണിച്ച് കൊല്ലാൻ ശ്രമിച്ചു, കൈകാണിച്ചിട്ട് വാഹനം നിർത്താതെപോയി ഉൾപ്പെടെ ഏഴോളം കേസുകളാണ് ചുമത്തിയത്. മുളക് തേച്ചും പീഡനം കസ്റ്റഡി മർദനത്തെ തുടർന്ന് അവശനായി കിടന്നുപോയ തന്‍റെ ശരീരത്തിൽ ജോസഫ് എന്ന പോലീസുകാരൻ അരച്ച മുളകുമായി വന്നു കണ്ണിലും മുഖത്തും തേച്ചു. കോടതിയിൽ ഹാജരാക്കാതെ അന്ന് പകൽ മുഴുവൻ സ്റ്റേഷനിലെ സെല്ലിൽ കിടത്തിയ ശേഷം രാത്രിയിൽ മജിസ്‌ട്രേറ്റിന്‍റെ വീട്ടിൽ ഹാജരാക്കി. മജിസ്ട്രേറ്റ് റിമാൻഡ് ചെയ്തതിനെ തുടർന്ന് നാലാം ദിവസം കോടതി സ്വാഭാവിക ജാമ്യം അനുവദിക്കുകയായിരുന്നു. പോലീസ് മർദനത്തിൽ ഗുരുതരമായി പരിക്കേറ്റതിനെ തുടർന്ന് ജയിൽ സൂപ്രണ്ടുതന്നെ ജില്ലാ ആശുപത്രിയിൽ എത്തിച്ച് നാലു ദിവസത്തോളം ചികിത്സ നൽകുകയായിരുന്നു. പിന്നീട് ജാമ്യത്തിൽ ഇറങ്ങിയപ്പോൾ മുളക് തേച്ച പോലീസുകാരനെ ഇരിട്ടി ടൗണിൽ വച്ച് കത്തികൊണ്ട് കുത്തിക്കൊല്ലാൻ ശ്രമിച്ചെന്ന മറ്റൊരു കള്ളക്കേസു കൂടി പോലീസ് ചുമത്തിയെന്നും വിനീത് പറഞ്ഞു. പോലീസുകാരനെതിരെ കേസ് കൊടുത്തതിന്‍റെ വൈരാഗ്യം 2015 ഫെബ്രുവരി 12 ന് ഭാര്യാ ബന്ധുവായ ശ്രീഗീത് എന്ന പോലീസുകാരനെതിരെ അവിഹിതത്തിന് പരാതി നല്കാൻ താനും അമ്മയും കരിക്കോട്ടക്കരി പോലീസ് സ്റ്റേഷനിൽ എത്തിയതു മുതൽ പോലീസ് വൈരാഗ്യബുദ്ധിയോടെ പ്രവർത്തിച്ചു തുടങ്ങിയെന്നാണ് വിനീത് പറയുന്നത്. സ്റ്റേഷനിൽ വച്ചുതന്നെ മൂന്നു പോലീസുകാർ തന്നെയും അമ്മയെയും മർദിച്ചു. പിന്നീടൊരിക്കൽ റേഷൻ വാങ്ങി ബൈക്കിൽ വീട്ടിലേക്ക് പോകുന്നതിനിടെ ആറളം എസ്ഐ ഉണ്ണികൃഷ്ണനും ചില പോലീസുകാരും വാഹന പരിശോധന എന്ന പേരിൽ വാഹനം തടഞ്ഞു നിർത്തി. ചെറിയ മൊബൈൽ ഫോൺ ചേർത്ത് പിടിച്ച് ചെവിയടക്കി അടിച്ചു പരിക്കേൽപ്പിച്ചു. കർണപുടത്തിന് തകരാറ് സംഭവിച്ചതിനെ തുടർന്ന് കേൾവി ശക്തി പൂർണമായും നഷ്ടപ്പെടുകയും ചെയ്തു. തന്നെ ആക്രമിച്ച പോലീസുകാർക്ക് എതിരെ സ്വകാര്യ അന്യായം ഫയൽ ചെയ്ത വിനീത് കഴിഞ്ഞ 10 വർഷമായി നിയമ പോരാട്ടത്തിന്‍റെ വഴിയിലാണ്. പോലീസ് വാദങ്ങൾ പൊളിയുന്നു‌ 2015 ലെ സംഭവത്തിൽ പോലീസ് ഉന്നയിച്ച കൊലപാതക ശ്രമം ഉൾപ്പടെ പ്രതിക്ക് നേരെ ആരോപിച്ച കുറ്റങ്ങളും തെളിവുകളും എല്ലാം കെട്ടിച്ചമച്ചതായിരുന്നുവെന്നാണ് കോടതിയുടെ കണ്ടെത്തൽ. 2015 സെപ്റ്റംബർ രാത്രി 11.30 ന് വിനീതിനും ഏഴു പോലീസുകാരെയും ഒരേപോലെ പരിശോധിച്ച് സർട്ടിഫിക്കറ്റുകൾ നൽകിയതു മുതൽ ഓവുചാൽ ഇല്ലാത്ത സ്ഥലത്ത് വാഹനം ഓവുചാലിലേക്ക് മറിഞ്ഞ് അപകടം സംഭവിക്കുമായിരുന്നു എന്നതുൾപ്പെടെ വ്യാജമായി തീർത്ത തെളിവുകൾ ആണെന്ന് കോടതി കണ്ടെത്തി. പോലീസ് ആദ്യം ചുമത്തിയ മൂന്നു കേസുകൾ വിചാരണയ്ക്ക് പോലും എടുക്കാതെ കോടതി തള്ളി. ബാക്കിയുള്ള കേസുകളിൽ പോലീസുകാർ ഹാജരാകാത്തതിനാൽ കേസ് നീണ്ടു പോകുകയാണ്. ഇതുസംബന്ധിച്ച് ഡിജിപിക്കും മുഖ്യമന്ത്രിക്കും പരാതി നൽകിയിട്ടും നടപടികളുണ്ടായില്ല. തന്നെ ഉപദ്രവിച്ചവരിൽ പലരും സർവീസിൽനിന്ന് വിരമിച്ചു. മർദനത്തിലെ പ്രധാന പ്രതിയായ കെ.വി. സ്മിതേഷിനെതിരെ സമാന രീതിയിലുള്ള നിരവധി സ്വകാര്യ അന്യായങ്ങളും എഫ്ഐആറും ഉണ്ടെന്ന് വിനീത് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]