ഓട്ടോഡ്രൈവർ ട്രെയിൻ തട്ടി മരിച്ച നിലയിൽ

പഴയങ്ങാടി: പഴയങ്ങാടി കോഴി ബസാർ പാലത്തിന് സമീപമുള്ള ഓട്ടോ ഡ്രൈവർ കോഴിബസാറിലെ പി.പി. അംബുജാക്ഷനെ (59) ട്രെയിൻ തട്ടി മരിച്ച നിലയിൽ കണ്ടെത്തി.

ഇന്നലെ പുലർച്ചെയുള്ള മംഗളൂരു- ചെന്നൈ വെസ്റ്റ് കോസ്റ്റ് എക്സ്പ്രസ് തട്ടിയാണ് പഴയങ്ങാടി റെയിൽവേ സ്റ്റേഷന് സമീപം അപകടമുണ്ടായത്. മാടായിലെ പരേതരായ കൈപ്രത്ത് വളപ്പിൽ കുഞ്ഞിരാമന്‍റെയും പുതിയപുരയിൽ മാധവിയുടെയും മകനാണ്.

ഭാര്യ: ഇന്ദു ( കീച്ചേരി). മക്കൾ: ലയ,മിയ ( ഇരുവരും വിദ്യാർഥികൾ). സഹോദരങ്ങൾ: നന്ദിനി, ഗോമതി, ലളിത, പങ്കജാക്ഷൻ, ജലജയക്ഷൻ, പരേതനായ അരവിന്ദാക്ഷൻ.

ADVERTISEMENT

വളപട്ടണം പോലീസിന്‍െ ജീവൻ രക്ഷാപ്രവർത്തനം: ബിഗ് സല്യൂട്ട്

കണ്ണൂർ: ഡ്യൂട്ടിക്കായി ബൈക്കിൽ പോകുന്നതിനിടെയാണ് വളപട്ടണം പാലത്തിന്‍റെ കൈവരിയിൽ ഷർട്ടില്ലാതെ ഒരു വയോധികൻ നിൽക്കുന്നതായി വളപട്ടണം പോലീസ് സ്റ്റേഷനിലെ എഎസ്ഐ സുജിത്തിന്‍റെയും സിപിഒ മിഥുനിന്‍റെയും ശ്രദ്ധയിൽപ്പെട്ടത്. ഇരുവരും സൂക്ഷിച്ചുനോക്കിയപ്പോൾ ഇയാളുടെ കാലുകൾ മെല്ലെ ഉയർത്തുന്നതായി ശ്രദ്ധയിൽപ്പെട്ടു. ഉടൻ ബൈക്ക് നിർത്തി ഇരുവരും ചാടിയിറങ്ങി ഓടി വയോധികന്‍റെ അടുത്തെത്തി. അടുത്ത കാൽ ഉയർത്തുന്നതിന് മുന്പേ ഇരുവരും ചേർന്ന് പിടിച്ചുമാറ്റി. സെക്കൻഡുകൾ താമസിച്ചിരുന്നെങ്കിൽ അയാൾ പുഴയിലേക്ക് ചാടിയേനെ. കഴിഞ്ഞ ബുധനാഴ്ച ഉച്ചകഴിഞ്ഞ് 3.45 നാണ് സംഭവം. സ്റ്റേഷനിൽനിന്നും പാപ്പിനിശേരി, അരോളി സ്കൂളുകളിൽ എസ്പിസി കേഡറ്റുകൾക്ക് പരിശീലനം നല്കാൻ പോകുന്നതിനിടെയാണ് ഇരുവരും ചേർന്ന് വയോധികനെ രക്ഷപ്പെടുത്തിയത്. ഒറ്റനോട്ടത്തിൽ അയാൾ പുഴയിലേക്ക് ചാടുമെന്ന് മനസിൽ ആരോ തോന്നിപ്പിച്ചതായി എഎസ്ഐ സുജിത്ത് പറഞ്ഞു. ചുറ്റും നോക്കിയപ്പോൾ വയോധികന്‍റെ ബനിയനും ഷർട്ടും നിലത്തു കിടക്കുന്നു. കാലുകൾ കൈവരിയിലേക്ക് ചവിട്ടി കയറുന്നത് കണ്ടപ്പോൾ പുഴയിലേക്ക് ചാടാനാണ് ഭാവം എന്നുററപ്പായി. പിന്നെ, മിന്നൽ വേഗത്തിലായിരുന്നു ഞങ്ങൾ വയോധികന്‍റെ അടുത്തെത്തിയത്. അയാളെ അവിടെനിന്ന് പിന്തിരിപ്പിച്ചപ്പോൾ പേരും സ്ഥലവും മാത്രം പറഞ്ഞു. പിന്നീട്, ഒന്നും ഓർമയില്ലെന്ന് പറ‍യുകയായിരുന്നു. താനെങ്ങനെയാണ് ഇവിടെയെത്തിയെന്നോ, ഇതു പുഴയാണെന്നോ അയാൾക്ക് അറിയില്ലായിരുന്നുവെന്നും സുജിത്ത് പറഞ്ഞു. നേരേ പോലീസ് സ്റ്റേഷനിലേക്ക് കൊണ്ടുപോയി. പല തവണ ചോദിച്ചിട്ടും കൃത്യമായ സ്ഥലം പറഞ്ഞില്ല. ആദ്യം പറഞ്ഞ പഴയങ്ങാടിക്കടുത്ത സ്ഥലം നോക്കി നടത്തിയ അന്വേഷണത്തിലാണ് ബന്ധുക്കളെ പോലീസ് കണ്ടെത്തിയത്. പഴയങ്ങാടി ഏഴോം സ്വദേശിയായ വയോധികൻ പള്ളിയിൽ പോകാൻ വീട്ടിൽനിന്ന് ഇറങ്ങിയതാണെന്ന് വീട്ടുകാർ പറഞ്ഞു. പുഴയിലേക്ക് ചാടാൻ ശ്രമിച്ച വയോധികനെ സമയോചിതമായ ഇടപെടലിലൂടെ രക്ഷപ്പെടുത്തിയ എഎസ്ഐ സുജിത്തിനും സിപിഒ മിഥുനും അഭിനന്ദനപ്രവാഹമാണ്.

പത്ത് പുസ്തകങ്ങളിലൂടെ സഞ്ജയനെ പരിചയപ്പെടുത്തി രമേശൻ ബ്ലാത്തൂർ

സ്വന്തം ലേഖകൻ ശ്രീകണ്ഠപുരം: ചിരിയും ചിന്തകളുമായി മലയാളികളെ സ്വാധീനിച്ച സാഹിത്യകാരൻ മാണിക്കോത്ത് രാമനുണ്ണി നായർ (എം. ആർ. നായർ) എന്ന സഞ്ജയനെ പുതുതലമുറയ്ക്ക് പരിചയപ്പെടുത്തുന്നതിനായി തന്‍റെ സാഹിത്യ പ്രവർത്തനം നീക്കിവച്ച ഒരാളുണ്ട് കണ്ണൂരിൽ. എഴുത്തുകാരനും സാംസ്കാരിക പ്രവർത്തകനുമായ രമേശൻ ബ്ലാത്തൂർ എന്ന സാഹിത്യകാരൻ. ചെറിയ പ്രായം മുതലേ സഞ്ജയനെ വായിച്ചറിഞ്ഞതോടെ രമേശൻ ബ്ലാത്തൂരിന്‍റെ ഹൃദയത്തിൽ ഇദ്ദേഹം ഇടം പിടിക്കുകയായിരുന്നു. പത്തു വർഷത്തിലേറെയുള്ള ശ്രമഫലമായാണ് സഞ്ജയനെ ക്കുറിച്ച് പത്തു പുസ്തകങ്ങൾ ഇദ്ദേഹം തയാറാക്കിയത്. 10 നിരൂപകരായ അവതാരകർ, 10 കാർട്ടൂണിസ്റ്റുകൾ എന്നിവ പുസ്തകങ്ങളെ വ്യത്യസ്ഥമാക്കുന്നു. അയ്യോ കവിത, രുദ്രാക്ഷ മാഹാത്മ്യം, വന്ദേ ഭാര്യാമാതരം, ഞാൻ കുട്ടിച്ചാത്തനായിരുന്നെങ്കിൽ, പൊടിപറ്റുകളും പൊടിപാറ്റികളും, ഇൻജക്ഷൻ, ആളില്ലാത്ത പൊതുയോഗം, ശുനകഗീതം, സഖാവിന്‍റെ ബീച്ച്, ഹാസ്യാഞ്ജലി എന്നീ പേരുകളിലാണ് പുസ്തകങ്ങൾ ഇറക്കിയത്. ചെമ്മനം ചാക്കോ, എൻ.ശശിധരൻ, പ്രഭാകരൻ പഴശി, ഇ.പി.രാജഗോപാലൻ, എം.കെ.സാനു, ഡോ.പി.കെ.രാജശേഖർ ,ഡോ.ഇ.സർദാർകുട്ടി, ഡോ. മ്യൂസ് മേരി, ഡോ.എം.ജി.എസ്.നാരായണൻ, ഡോ. സുകുമാർ അഴീക്കോട് എന്നിവരാണ് അവതാരിക എഴുതിയത്. ഇന്ന് നമുക്ക് ഏറെ പരിചിതമായ ട്രോളുകളും ഫലിത ബിന്ദുക്കളും പാരഡികളും കാർട്ടൂണുകളും സാഹിത്യത്തിലൂടെ ആദ്യമായി മലയാളിക്ക് പരിചയപ്പെടുത്തി അതുല്യ പ്രതിഭയായിരുന്നു സഞ്ജയൻ. 1903 ജൂൺ 13ന് തലശേരി ഒതയോത്ത് തറവാട്ടിൽ മാടാവിൽ കുഞ്ഞിരാമൻ വൈദ്യരുടെയും പാറുവമ്മയുടെയും മകനായി ജനിച്ച സഞ്ജയൻ സാഹിത്യ ലോകത്ത് ഹാസ്യസാഹിത്യം എന്ന പുതുവഴി വെട്ടി എഴുത്തുകാരനായിരുന്നു. അഴിമതിക്കാരായ ഉദ്യോഗസ്ഥർ, മേനി നടിക്കുന്ന സാഹിത്യകാരൻമാർ രാഷ്‌ട്രീയക്കാർ,ഭരണാധികാരികൾ തുടങ്ങിയവരെല്ലാം സഞ്ജയന്‍ തന്‍റെ ഹാസ്യായുധത്തിലൂടെ കീറി മുറിച്ചിരുന്നു. നാൽപതാമത്തെ വയസിൽ മരണത്തിന് കീഴടങ്ങിയ സഞ്ജയന്‍റെ രചനകൾ ശുദ്ധ ഹാസ്യത്തെ സ്നേഹിക്കുന്നവർക്ക് ഇന്നും അമൂല്യ നിധിയാണ്. ‘സഞ്ജയനെ പുതുതലമുറ അറിയണം’ ആധുനിക തലമുറ സഞ്ജയനെ മനസിലാക്കണമെന്ന ലക്ഷ്യത്തോടെയാണ് അദ്ദേഹത്തെക്കുറിച്ച് പുസ്തകങ്ങൾ തയാറാക്കിയത്. മുഴുവൻ സമയവും മൊബൈലിൽ തലപൂഴ്ത്തി കഴിയുന്നവർ കൂടി സഞ്ജയനെ അറിയുകയും മനസിലാക്കുകയും വേണമെന്ന ആഗ്രഹമാണ് പുസ്തകങ്ങൾ ഒരുക്കാൻ പ്രേരണയായത്. സ്കൂൾ പഠനകാലത്ത് രുദ്രാക്ഷ മാഹാത്മ്യം പാഠപുസ്തകത്തിൽ വായിച്ചാണ് രമേശൻ ബ്ലാത്തൂർ ആദ്യമായി സഞ്ജയനെ പരിചയപ്പെടുന്നത്. പലപ്പോഴും ലൈബ്രറികളിൽ അന്വേഷിച്ചപ്പോൾ സഞ്ജയന്റെ സമ്പൂർണ കൃതികൾ പലയിടത്തും കിട്ടാനില്ലായിരുന്നു. ആ സമയത്തു തന്നെയാണ് ജ്യേഷ്ഠൻ രവീന്ദ്രന്‍റെ പുസ്തക അലമാരിയിൽ നിന്നും സഞ്ജയന്‍റെ ഒരു സമാഹാരം ലഭിച്ചത്. ഇതാണ് സഞ്ജയൻ വായനയിലേക്ക് വഴി തുറന്നത്. സഞ്ജയന്‍റെ കൃതികൾക്ക് വേണ്ടിയുള്ള അന്വേഷണം നിരാശാജനകമായിരുന്നു. അന്വേഷിച്ചു തുടങ്ങിയപ്പോഴാണ് സഞ്ജയൻ പത്രാധിപരായിരുന്ന കേരളപത്രികയുടേയോ, സഞ്ജയൻ എന്ന മാസികയുടേയോ പ്രതികൾ സാഹിത്യ അക്കാദമിയിലോ, തൃപ്പൂണിത്തറ ആർക്കൈവ്സിലോ, കോഴിക്കോട് പ്രസിലോ ഒന്നും കിട്ടാനില്ലായിരുന്നു. നീണ്ട അന്വേഷണത്തിന് ഒടുവിലാണ് പ്രഭാഷകൻ വാണിദാസ് എളയാവൂരിന്‍റെ കൈവശം കോപ്പികളുണ്ടെന്ന് അറിയുന്നത്. അത് കൂടാളിയിലെ താഴത്തുവീട്ടിലെ സഹദേവൻ എന്ന എഴുത്തുകാരന്‍റെ ശേഖരത്തിൽ ഉള്ളാണെന്നും അറിഞ്ഞു. അങ്ങനെയാണ് സഞ്ജയൻ മാസികയുടെ പ്രതികൾ തനിക്ക് ലഭിച്ചത്

പരിയാരംകുന്നിലെ ആത്മീയ കേന്ദ്രം; മദര്‍ഹോം ധ്യാനകേന്ദ്രം വാര്‍ഷികം ഇന്ന്

പരിയാരം: മദര്‍ഹോം ധ്യാനകേന്ദ്രം ഇരുപത്തിയൊന്നാം വാര്‍ഷികവും രാപ്പകല്‍ ആരാധനയുടെ ആയിരം ദിവസത്തിന്‍റെ ആഘോഷവും ഇന്നു രാവിലെ 7.30 തിന് മദർ ഹോമിൽ നടക്കും. ഉച്ചകഴിഞ്ഞ് 2.30 വരെയാണ് പരിപാടി. ശുശ്രൂഷകൾക്ക് തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി നേതൃത്വം നല്‍കും. മദർ ഹോം ഡയറക്‌ടർ ഫാ. ബെന്നി പുത്തൻനടയിൽ, അഡ്മിനിസ്‌ട്രേറ്റര്‍ ഫാ. മൈക്കിള്‍ മഞ്ഞക്കുന്നേല്‍, സ്പിരിച്വല്‍ ഡയറക്ടര്‍ ഫാ. പോള്‍ പുലിമലയില്‍, ഫാ.തോമസ് പാറേക്കാട്ടില്‍ എന്നിവരും ശുശ്രൂഷയിൽ പങ്കാളിയാകും. ആത്മീയ നിറവിൽ മൂന്നു ലക്ഷം പേർ 2004 സെപ്റ്റംബർ എട്ടിന് തലശേരി അതിരൂപതയിലെ ധ്യാനഗുരുവായ ഫാ. മാത്യു ആശാരിപറമ്പിലാണ് മദര്‍ ഹോം ധ്യാനകേന്ദ്രത്തിന് തുടക്കം കുറിച്ചത്. 21 വർഷത്തിനിടെ ഏകദേശം മൂന്നുലക്ഷം പേർ ഇവിടെ ധ്യാനത്തിനെത്തി. മലയാളം, കന്നഡ, ഇംഗ്ലീഷ് ഭാഷകളിൽ ധ്യാനവും ശുശ്രൂഷകളും നടത്തുന്നുണ്ട്. പൗർണമി പ്രാർഥന, സിസ്റ്റേഴ്സ് ധ്യാനം, ആത്മീയ ഉപദേശം, വൈദികരുടെ ധ്യാനം, ആന്തരിക-ശാരീരിക സൗഖ്യധ്യാനം, തപസ് ധ്യാനം, കുട്ടികൾക്കുള്ള ധ്യാനങ്ങൾ, ഏകദിന കൺവൻഷനുകൾ, അഖണ്ഡ പ്രാർഥന, ജപമാല റാലി, മരിയൻ പദയാത്ര, പരിശുദ്ധ മറിയത്തിന്‍റെ തിരുനാളാഘോഷം തുടങ്ങിയവയാണ് പ്രധാന ധ്യാനങ്ങളും ശുശ്രൂഷകളും. കിടപ്പുരോഗികൾക്കും ധ്യാനത്തിനുള്ള സൗകര്യമുണ്ട്. രണ്ടാം ശനിയാഴ്ചകളിലാണ് വചനപ്രഘോഷണവും സൗഖ്യശുശ്രൂഷയും. എല്ലാ ശനിയാഴ്ചയും കൗൺസിലിംഗ് സൗകര്യവും ഉണ്ടായിരിക്കും. മാസത്തിൽ രണ്ടു മലയാളം ധ്യാനം, ഒരു കന്നഡ ധ്യാനം, ഇംഗ്ലീഷ് ധ്യാനം എന്നിവയുണ്ടായിരിക്കുമെന്ന് മദർഹോം ഡയറക്‌ടർ ഫാ. ബെന്നി പുത്തൻനടയിൽ പറഞ്ഞു. എല്ലാ ശനിയാഴ്ചകളിലും കൺവൻഷനുകളും ഉണ്ട്. കൂടാതെ സ്പെഷൽ ധ്യാനങ്ങളും ഉണ്ടാകുമെന്നും ഡയറക്‌ടർ അറിയിച്ചു.

പറശിനിക്കടവ്-മാട്ടൂല്‍ റൂട്ടില്‍ ആധുനിക സജ്ജീകരണങ്ങളോടെ ബോട്ട് സര്‍വീസ്

കണ്ണൂർ: പറശിനിക്കടവ് -അഴീക്കല്‍- മാട്ടൂല്‍ റൂട്ടില്‍ സര്‍വീസ് നടത്താന്‍ ഒരുങ്ങുന്ന രണ്ടു ബോട്ടുകള്‍ അഴീക്കല്‍ തുറമുഖത്ത് എത്തി. സംസ്ഥാന ജലഗതാഗത വകുപ്പ് നിര്‍മിച്ച് ആലപ്പുഴയില്‍നിന്നു അഞ്ച് ദിവസം യാത്ര ചെയ്ത് അഴീക്കല്‍ തുറമുഖത്ത് എത്തിയ ബോട്ടുകള്‍ കെ.വി. സുമേഷ് എംഎല്‍എ സന്ദര്‍ശിച്ചു. ബോട്ട് സര്‍വീസ് കാര്യക്ഷമമാക്കുന്നതിനൊപ്പം പാസഞ്ചര്‍ കം ടൂറിസം എന്ന ലക്ഷ്യം കൂടി മുന്നില്‍ക്കണ്ടാണ് ആധുനിക സജ്ജീകരണങ്ങളോടു കൂടിയ ബോട്ടുകള്‍ തയാറാക്കിയതെന്ന് എംഎല്‍എ പറഞ്ഞു. ഇരുബോട്ടുകളിലും അല്പദൂരം യാത്രചെയ്ത എംഎല്‍എ ബോട്ടുകളിലെ ഇരട്ട എന്‍ജിനുകള്‍ ഉള്‍പ്പെടെയുള്ള സംവിധാനങ്ങള്‍ വിലയിരുത്തി. ജില്ലയില്‍ തന്നെ ഏറ്റവുമധികം പേര്‍ ആശ്രയിക്കുന്ന പ്രധാന ബോട്ട് സര്‍വീസായ അഴീക്കല്‍ - മാട്ടൂല്‍ ഫെറി- പറശിനിക്കടവ് അഴീക്കല്‍- മാട്ടൂല്‍ സര്‍വീസ് കാര്യക്ഷമമാക്കുന്നതിനും കാലപ്പഴക്കം സംഭവിക്കുന്ന മരബോട്ടുകള്‍ മാറ്റി ആധുനിക നിലവാരമുള്ള സോളാര്‍ ബോട്ടുകളും കാറ്റമറൈൻ ബോട്ടുകളും അനുവദിക്കണമെന്നും കെ.വി. സുമേഷ് എംഎല്‍എ 2024 ലെ നിയമസഭ സമ്മേളനത്തില്‍ ആവശ്യപ്പെട്ടിരുന്നു. അടുത്ത ദിവസം തന്നെ ബോട്ടുകള്‍ പറശിനിക്കടവ് ബോട്ട് ടെര്‍മിനലില്‍ എത്തുമെന്നും ഗതാഗത മന്ത്രി ഗണേഷ് കുമാര്‍, എം.വി. ഗോവിന്ദന്‍ എംഎല്‍എ എന്നിവര്‍ ഉള്‍പ്പെടെ ചേര്‍ന്ന് സര്‍വീസ് ഉദ്ഘാടനം ചെയ്യുമെന്നും എംഎല്‍എ പറഞ്ഞു. സുഗമവും സുരക്ഷിതവുമായ യാത്രയ്ക്ക് ആറ് ഹള്ളുകള്‍ ഉള്ളതാണ് ബോട്ടുകള്‍. ആറ് ഹള്ളുകളില്‍ ഏതെങ്കിലും ഒന്നില്‍ വെള്ളം കയറിയാല്‍ അലാറം ഉള്‍പ്പെടെ സജ്ജീകരിച്ചിട്ടുണ്ട്. ഉടന്‍തന്നെ വെള്ളം നീക്കം ചെയ്യാനും സാധിക്കും. ഇരട്ട എന്‍ജിനുകള്‍,ഗ്ലോബല്‍ പൊസിഷന്‍ സിസ്റ്റം, ആഴം അറിയാനുള്ള എക്കോ സൗണ്ട്, മ്യൂസിക് സൗണ്ട് സിസ്റ്റം തുടങ്ങിയ സംവിധാനങ്ങളുണ്ട്. സ്ത്രീകള്‍ക്കും പുരുഷന്മാര്‍ക്കുമായി പ്രത്യേകം ടോയ്‌ലറ്റ് സംവിധാനവും ലൈഫ് ജാക്കറ്റുകളും ബോട്ടിലുണ്ട്. ഒരേസമയം 100 യാത്രക്കാര്‍ക്കും അഞ്ചു ജീവനക്കാര്‍ക്കും ബോട്ടില്‍ യാത്ര ചെയ്യാന്‍ സാധിക്കും. ഐആർഎസ് സര്‍ട്ടിഫിക്കറ്റ് ബോട്ടുകള്‍ക്ക് ലഭിച്ചിട്ടുണ്ട്. മുന്നിലും പിറകിലും യാത്രക്കാര്‍ക്ക് നിന്നു കാഴ്ചകള്‍ കാണാന്‍ സാധിക്കുന്ന ഡെക്കുകളാണ് ബോട്ടുകളുടെ മുഖ്യ ആകര്‍ഷണം. ഇരുവശത്തും ഗ്ലാസുകള്‍ ഉള്ളതിനാല്‍ യാത്രക്കാര്‍ക്ക് ഇരുന്നും കാഴ്ചകള്‍ കാണാനാകും. മുകളില്‍ ഇരിപ്പിടങ്ങളും ഒരുക്കിയിട്ടുണ്ട്. ഏറ്റവും ചുരുങ്ങിയ ചെലവില്‍ കാഴ്ചകള്‍ കാണാനും യാത്ര ചെയ്യാനുമുള്ള സൗകര്യമാണ് ലഭ്യമാകു ന്നത്. രാവിലെ 6.30 മുതല്‍ രാത്രി 7.30 വരെയാണ് സര്‍വീസ് നടത്തുക. രാവിലെ 9.30 ന് പറശിനിക്കടവില്‍ തുടങ്ങുന്ന സര്‍വീസ് വളപട്ടണം അഴീക്കല്‍ മാട്ടൂല്‍ തിരിച്ച് ഉച്ചയ്ക്ക് ഒന്നിന് പറശിനിക്കടവ് എത്തും. ഒന്നരമണിക്കൂര്‍ യാത്രയ്ക്ക് 60 രൂപയാണ് ഈടാക്കുന്നത്. ഉച്ചയ്ക്ക് രണ്ടിന് പറശിനിക്കടവ് മുതല്‍ വളപട്ടണം വരെയുള്ള സര്‍വീസിന് 40 രൂപയാണ് ചാര്‍ജ്. വിദ്യാര്‍ഥികള്‍ക്ക് പഠനയാത്രകള്‍ ദിവസേന 50 ഓളം വിദ്യാര്‍ഥികളാണ് ഇതുവഴി ബോട്ട് സര്‍വീസ് ഉപയോഗപ്പെടുത്തുന്നത്. ഇവര്‍ക്ക് പാസ് ഉള്‍പ്പെടെ നല്‍കി യാത്ര ഇളവും ലഭ്യമാക്കുന്നുണ്ട്. ബോട്ടുകള്‍ കൂടുതല്‍ മെച്ചപ്പെടുത്തിയ തോടെ സ്‌കൂളില്‍നിന്നും പഠനയാത്രയ്ക്ക് വരുന്ന വിദ്യാര്‍ഥികള്‍ക്ക് പകുതി വിലയ്ക്കും സര്‍വീസ് നല്കാനാകും. 9847210511, 9447458867 നമ്പറുകളില്‍ പ്രീ ബുക്കിംഗുകള്‍ ചെയ്ത് വിനോദയാത്രകള്‍ നടത്താം.

മികച്ച വിമാനത്താവളത്തിനുള്ള പുരസ്കാരം കണ്ണൂരിന്

മട്ടന്നൂർ: എയർപോർട്ട് ക്വാളിറ്റി സർവേ പ്രകാരമുള്ള മികച്ച വിമാനത്താവളത്തിനുള്ള പുരസ്‌കാരം കണ്ണൂർ രാജ്യാന്തര വിമാനത്താവള അധികൃതർ ഏറ്റുവാങ്ങി. ചൈനയിലെ ഗ്വാങ്ങ്ഷുവിൽ നടന്ന എയർപോർട്ട് കൗൺസിൽ ഇന്‍റർനാഷണൽ എക്‌സ്പീരിയൻസ് സമ്മിറ്റിലാണ് കിയാൽ എംഡി സി. ദിനേശ്കുമാർ, ചീഫ് ഓപ്പറേറ്റിംഗ് ഓഫീസർ അശ്വനികുമാർ എന്നിവർ ചേർന്ന് പുരസ്‌കാരം ഏറ്റുവാങ്ങിയത്. എസിഐ ഡയറക്ടർ ജനറൽ ജസ്റ്റിൻ എർബാക്കി, അമഡിയസ് എഷ്യ-പസഫിക് എയർപോർട്‌സ് ആൻഡ് ബോർഡർ അഥോറിറ്റീസ് സീനിയർ വൈസ് പ്രസിഡന്‍റ് സാറ സാമുവൽ എന്നിവരാണ് അവാർഡ് സമ്മാനിച്ചത്. എഷ്യ-പസഫിക് മേഖലയിലെ പ്രതിവർഷം 20 ലക്ഷം യാത്രക്കാരിൽ താഴെ കൈകാര്യം ചെയ്യുന്ന വിമാനത്താവളങ്ങളുടെ വിഭാഗത്തിലാണ് കണ്ണൂർ വിമാനത്താവളം അവാർഡിന് തെരഞ്ഞെടുക്കപ്പെട്ടത്. ആഗോളവേദിയിൽ ഇത്തരം അംഗീകാരം നേടുന്നത് കണ്ണൂർ വിമാനത്താവളത്തിനും കേരളത്തിനും അഭിമാനമാണെന്ന് കിയാൽ എംഡി സി. ദിനേശ്കുമാർ പറഞ്ഞു. യാത്രക്കാരുടെ നേരിട്ടുള്ള അഭിപ്രായങ്ങൾ അടിസ്ഥാനമാക്കിയാണ് എയർപോർട്ട് കൗൺസിൽ ഇന്‍റർനാഷണൽ എയർപോർട്ട് ക്വാളിറ്റി സർവേ സംഘടിപ്പിക്കുന്നത്. വിമാനത്താവളത്തിലെ ശുചിത്വം, അനുബന്ധ സൗകര്യങ്ങൾ, ജീവനക്കാരുടെ പെരുമാറ്റം, കാര്യക്ഷമത തുടങ്ങിയവയാണ് വിലയിരുത്തുന്നത്.

ബിഷപ് വള്ളോപ്പിള്ളി പ്രതിമ; വെങ്കല വസ്തുക്കൾ കൈമാറി

ചെമ്പന്തൊട്ടി: ബിഷപ് വള്ളോപ്പിള്ളി സ്മാരക കുടിയേറ്റ മ്യൂസിയത്തിനു മുന്നിൽ സ്ഥാപിക്കാനുള്ള മാർ സെബാസ്റ്റ്യൻ വള്ളോപ്പിള്ളിയുടെ വെങ്കല പ്രതിമ നിർമിക്കാനായി പൊതുജനങ്ങളിൽനിന്ന് സംഭാവനയായി സമാഹരിച്ച പഴയ വെങ്കല ഉപകരണങ്ങൾ സജീവ് ജോസഫ് എംഎൽഎ, ചെമ്പന്തൊട്ടി സെന്‍റ് ജോർജ് ഫൊറോന വികാരി ഫാ. ആന്‍റണി മഞ്ഞളാംകുന്നേൽ, ശ്രീകണ്ഠപുരം നഗരസഭാധ്യക്ഷ ഡോ.കെ.വി. ഫിലോമിന എന്നിവരുടെ നേതൃത്വത്തിൽ പ്രശസ്ത ശില്പി ഉണ്ണി കാനായിക്ക് കൈമാറി. പി.ടി. മാത്യു, നഗരസഭ കൗൺസിലർ കെ.ജെ. ചാക്കോ കൊന്നയ്ക്കൽ, കത്തോലിക്ക കോൺഗ്രസ് ചെമ്പന്തൊട്ടി യൂണിറ്റ് പ്രസിഡന്‍റ് ജോയി കരിമ്പുമാലിൽ പാരിഷ് കോ -ഓർഡിനേറ്റർ വിൻസെന്‍റ് കുഴിഞ്ഞാലിൽ, ട്രസ്റ്റിമാരായ ഷാജി കുര്യൻ, ചാക്കോ മാനാമ്പുറം, നിമ്മി വാഴയിൽ, ജിജി മുണ്ടാമ്പള്ളിൽ, വർഗീസ് വയലാമണ്ണിൽ, ജിയോ ജേക്കബ്, ജോസഫ് ചാലുങ്കൽ, ആർ. ശശിധരൻ എന്നിവർ പങ്കെടുത്തു.

വൈദിക സൗഹൃദ ടൂർണമെന്‍റിന് ഇന്ന് ചെന്പേരിയിൽ തുടക്കമാകും

ചെന്പേരി: തലശേരി അതിരൂപതയിലെ വൈദിക സൗഹൃദ ടൂർണമെന്‍റിന് ഇന്ന് ചെന്പേരി വിമൽജ്യോതി എൻജിനിയറിംഗ് കോളജിൽ തുടക്കമാകും. ക്രിക്കറ്റ്, ബാസ്കറ്റ്ബോൾ മത്സരങ്ങളാണ് ഇന്നു നടക്കുന്നത്. വോളിബോൾ, ഷട്ടിൽ ടൂർണമെന്‍റുകൾ (ഡബിൾസ്) ഒക്‌ടോബർ 20ന് നടക്കും. രാവിലെ 10 മുതൽ വൈകുന്നേരം അഞ്ചുവരെയാണു മത്സരങ്ങൾ. തലശേരി അതിരൂപതയെ നാലു റീജണുകളിലായി തിരിച്ചാണ് മത്സരം നടത്തുന്നത്. ഇരിട്ടി, ചെറുപുഴ, ചെന്പേരി, കാസർഗോഡ് എന്നിങ്ങനെയാണ് റീജണുകൾ. ഓരോ റീജണിന്‍റെ കീഴിലും നാലോ, അഞ്ചോ ഫൊറോനകൾ ഉണ്ടായിരിക്കും. ഇന്നുരാവിലെ 10.15 ന് നടക്കുന്ന ബാസ്കറ്റ്ബോൾ മത്സരം പ്രോട്ടോസിഞ്ചെല്ലൂസ് മോൺ. ആന്‍റണി മുതുകുന്നേലും 11.30 ന് നടക്കുന്ന ക്രിക്കറ്റ് ടൂർണമെന്‍റ് വികാരി ജനറാൾ മോൺ. മാത്യു എളംതുരുത്തിപ്പടവിലും ഉദ്ഘാടനം ചെയ്യും. സമ്മാനദാനം ആർച്ച്ബിഷപ് മാർ ജോസഫ് പാംപ്ലാനി നിർവ ഹിക്കും. ബാസ്കറ്റ്ബോൾ മത്സരത്തിൽ ഇരിട്ടി-ചെറുപുഴ റീജണുകളും കാസർഗോഡ്-ചെന്പേരി റീജണുകളും ഏറ്റുമുട്ടും. ക്രിക്കറ്റ് ടൂർണമെന്‍റിൽ ഇരിട്ടി-ചെറുപുഴ റീജണുകളും കാസർഗോഡ്-ചെന്പേരി റീജണുകളും ഏറ്റുമുട്ടും. മാർ ജോർജ് വലിയമറ്റം, മാർ ജോർജ് ഞറളക്കാട്ട് എന്നിവർ ചടങ്ങുകളിൽ പങ്കെടുക്കും. റീജണുകളും ഫൊറോനകളും ഇരിട്ടി (കോ-ഓർഡിനേറ്റർ ഫാ. മാത്യു ശാസ്താംപടവിൽ): പേരാവൂർ, എടൂർ, കുന്നോത്ത്, നെല്ലിക്കാംപൊയിൽ, മണിക്കടവ്. ചെന്പേരി: (കോ-ഓർഡിനേറ്റർ ഫാ. മാത്യു ഓലിക്കൽ): പൈസക്കരി, ചെന്പേരി, വായാട്ടുപറന്പ്, ചെന്പന്തൊട്ടി. ചെറുപുഴ: (കോ-ഓർഡിനേറ്റർ ഫാ. ജേക്കബ് കുറ്റിക്കാട്ടുകുന്നേൽ): തളിപ്പറന്പ്, ആലക്കോട്, മേരിഗിരി, ചെറുപുഴ. കാസർഗോഡ്: (കോ-ഓർഡിനേറ്റർ ഫാ. ജോസഫ് കാഞ്ഞിരത്തിങ്കൽ):തോമാപുരം, വെള്ളരിക്കുണ്ട്, മാലോം, പനത്തടി, കാഞ്ഞങ്ങാട്, കാസർഗോഡ്. സൗഹൃദോത്സവം കൂട്ടായ്മ വളർത്താൻ സഹായിക്കും: മാർ ജോസഫ് പാംപ്ലാനി വൈദികരുടെ കൂട്ടായ്മയും ഒരു മനസോടെയുള്ള പ്രവർത്തനവുമാണ് ഏതൊരു രൂപതയുടെയും വളർച്ചയ്ക്കു പിന്നിലുള്ള ചാലകശക്തി. തലശേരി അതിരൂപത ഇക്കാര്യത്തിൽ ഏറെ മാതൃകാപരമായി പ്രവർത്തിക്കുന്നുണ്ട്. വൈദികരുടെ കൂട്ടായ്മ വളർത്തുന്നതിനും പരസ്പര സഹകരണത്തിന്‍റെ പാതകൾ നവീകരിക്കുന്നതിനുമായാണ് സൗഹൃദോത്സവം സംഘടിപ്പിക്കുന്നത്. കലാ-കായിക രംഗങ്ങളിൽ വൈദികരുടെ കഴിവുകൾ പ്രകടമാക്കുന്ന ഒരു കൂട്ടായ്മയാണ് സൗഹൃദോത്സവം.

മനുഷ്യാവകാശ കമ്മീഷൻ ഇടപെട്ടു: ജില്ലാ ആശുപത്രിയിൽ ഇലക്‌ട്രീഷൻമാരായി

കണ്ണൂർ: ജില്ലാ ആശുപത്രിയിൽ വൈദ്യുതി സംബന്ധിച്ച പരാതികൾ പരിഹരിക്കുന്നതിനായി 24 മണിക്കൂറും ഇലക്‌ട്രീഷന്‍റെ സേവനം ലഭ്യമാക്കിയിട്ടുണ്ടെന്ന് ജില്ലാ പഞ്ചായത്ത് സെക്രട്ടറി മനുഷ്യാവകാശ കമ്മീഷനെ അറിയിച്ചു. കമ്മീഷൻ ജുഡീഷ്യൽ അംഗം കെ. ബൈജുനാഥിന്‍റെ ഇടപെടലിനെ തുടർന്നാണ് നടപടി. ഒരു ഇലക്‌ട്രിക് സൂപ്പർവൈസറെയും മൂന്ന് ഇലക്‌ട്രീഷൻമാരെയും നിയമിച്ചിട്ടുണ്ടെന്നും റിപ്പോർട്ടിൽ പറഞ്ഞു. വാർഡുകളിലെ ഫാനുകൾ പ്രവർത്തിക്കാത്തതു കാരണം രോഗികളും കൂട്ടിരിപ്പുകാരും ബുദ്ധിമുട്ട് അനുഭവിക്കുകയാണെന്ന പരാതിയിലാണ് നടപടികൾ സ്വീകരിക്കാൻ കമ്മീഷൻ ജില്ലാ പഞ്ചായത്ത് സെക്രട്ടറിക്ക് നിർദേശം നല്കിയത്. പൊതുജനങ്ങൾക്കുള്ള കാത്തിരിപ്പ് കേന്ദ്രങ്ങളിലെല്ലാം പുതിയ ഫാനുകൾ സ്ഥാപിച്ചിട്ടുണ്ട്. 2024-25 വർഷത്തെ ജില്ലാ പഞ്ചായത്ത് വാർഷിക പദ്ധതിയിൽ ജില്ലാ ആശുപത്രിയിലെ അടിസ്ഥാന സൗകര്യ വികസനത്തിനായി തുക വകയിരുത്തിയിട്ടുണ്ട്. ദന്തൽ, എക്സറേ, കുടിവെള്ള പദ്ധതി, ജില്ലാ ആശുപത്രി ഓഫീസ് മെച്ചപ്പെടുത്തൽ, അടിയന്തര അറ്റകുറ്റപണികൾ എന്നിവയ്ക്കായി 5,94,73,498 രൂപ വകയിരുത്തിയിട്ടുണ്ട്. റിപ്പോർട്ടിന്‍റെ അടിസ്ഥാനത്തിൽ കേസ് തീർപ്പാക്കി. കടലായി സ്വദേശി എം. ജംഷാദ് സമർപ്പിച്ച പരാതിയിലാണ് നടപടി.

ഏകദിന ശില്പശാല സംഘടിപ്പിച്ചു

ഇരിട്ടി: ആറളം ഫാം, പുനരധിവാസ മേഖല എന്നിവയുടെ സുസ്ഥിരവികസനം ലക്ഷ്യമാക്കി ആറളം ഫാമിംഗ് കോർപറേഷന്‍റെയും ശാസ്ത്ര സാങ്കേതിക പരിസ്ഥിതി കൗൺസിലിന്‍റെയും നേതൃത്വത്തിൽ ഏകദിന ശില്പശാല സംഘടിപ്പിച്ചു. ആറളം വന്യജീവി സങ്കേതത്തിൽ നടന്ന ശില്പശാല ജില്ലാ കളക്ടർ അരുൺ കെ. വിജയൻ ഉദ്ഘാടനം ചെയ്തു. കെഎസ്‌സിഎസ്ടിഇ മെംബർ സെക്രട്ടറി പ്രഫ. എ. സാബു അധ്യക്ഷത വഹിച്ചു. സബ് കളക്‌ടർ കാർത്തിക് പാണിഗ്രഹി, മിനി ദിനേശൻ, ആറളം ഫാം മാനേജിംഗ് ഡയറക്ടർ എസ്. സുജീഷ്, കെഎസ്‌സിഎസ്ടിഇ സീനിയർ പ്രിൻസിപ്പൽ സയന്‍റിസ്റ്റ് ഡോ. പി. ഹരിനാരായണൻ, ആറളം വൈൽഡ് ലൈഫ് വാർഡൻ വി. രതീശൻ, ആറളം ഫാം അഡ്മിനിസ്ട്രേറ്റീവ് ഓഫീസർ ഡോ. കെ.പി. നിതീഷ്കുമാർ, ടിആർഡിഎം സൈറ്റ് മാനേജർ സി. സൈജു, ഡോ. ഇബ്രാഹിം ബാതിസ് എന്നിവർ പ്രസംഗിച്ചു. തുടർന്ന് ആറളം പുനരധിവാസ മേഖല സന്ദർശിച്ച് ഊരു മൂപ്പന്മാരുമായും പുനരധിവാസ മേഖലയിലെ ജനങ്ങളുമായി സംവദിച്ചു. ആറളം വികസന പ്രവർത്തനങ്ങളുടെ വികസന പരിപ്രേക്ഷ ഉൾപ്പെടെ ചർച്ച ചെയ്തു. ജൈവ വൈവിധ്യവും ഉപജീവനമാർഗങ്ങൾ എന്ന വിഷയത്തിൽ ഡോ. വി. ബാലകൃഷ്ണൻ, കാർഷിക മേഖലയിലെ ഇടപെടലുകൾ മുഖേന ഉപജീവനമാർഗം ഉറപ്പുവരുത്തൽ എന്ന വിഷയത്തിൽ ഡോ. കെ. സുനിൽകുമാർ, സ്കിൽ വികസനത്തിലൂടെ ഉപജീവന മാർഗം മെച്ചപ്പെടുത്തൽ എന്ന വിഷയത്തിൽ ഡോ. കണ്ണൻ സി. വാര്യർ എന്നിവരുടെ നേതൃത്വത്തിൽ സമഗ്ര വികസന രേഖ തയാറാക്കാനും തീരുമാനിച്ചു.

ഫിറോസിന്‍റെ അഴിമതിക്കഥകൾ പുറത്തുവിടുന്നത് കൂടെ നിൽക്കുന്നവർ തന്നെയെന്ന് എം.വി. ജയരാജൻ

കണ്ണൂർ: ആരോപണ വിധേയനായ യൂത്ത് ലീഗ് ജനറല്‍ സെക്രട്ടറിയുടെ അഴിമതി വിവരങ്ങൾ കെ.ടി. ജലീലിന് എത്തിച്ചു നൽകിയത് ഫിറോസിനോട് ഏറ്റവും അടുപ്പം നടിക്കുന്നവർ തന്നെയാണെന്ന് സിപിഎം സംസ്ഥാന സെക്രട്ടേറിയറ്റംഗം എം.വി. ജയരാജൻ. ആര് തെറ്റുചെയ്താലും നടപടി സ്വീകരിക്കുന്ന സർക്കാരാണ് കേരളത്തിൽ നിലവിലുള്ളത്. ഇത്തരക്കാർക്ക് ഒരു തരത്തിലുള്ള സംരക്ഷണവും സർക്കാരിൽ നിന്നുണ്ടാവില്ല.114 ഉദ്യോഗസ്ഥരെ സർവീസിൽ നിന്നും പിരിച്ചുവിടപ്പെട്ടത് ഈ നിലപാടിന്‍റെ തെളിവാണ്. സിപിഐ സമ്മേളനത്തിൽ പോലീസിനെതിരായ വിമർശനം ഉയർന്നുവല്ലോ എന്ന ചോദ്യത്തിന് വിമർശനം തിരുത്താനുള്ള നടപടിയാണെന്നും മാധ്യമങ്ങളിൽ വരുന്നത് മുഴുവൻ ശരിയല്ലെന്നുമുള്ള ചരിത്രമാണ് മുൻ കാലങ്ങളിൽ ഉണ്ടായിട്ടുള്ളതെന്നുമായിരുന്നു മറുപടി. കോൺഗ്രസിന് അകത്തുനിന്നു തന്നെ കോൺഗ്രസിനെ ശരിയാക്കുകയാണ് രാഹുൽ മാങ്കൂട്ടത്തിലിന്‍റെ രീതി. നിയമസഭാ സമ്മേളനത്തിൽ പങ്കെടുക്കാൻ രാഹുലിന് അവകാശമുണ്ട്. നിലവിലെ സാഹചര്യത്തിൽ പങ്കെടുക്കണമോ വേണ്ടയോ എന്ന് തീരുമാനിക്കേണ്ടത് രാഹുൽ മാങ്കൂട്ടത്തിലും കോൺഗ്രസുമാണ്. പങ്കെടുത്താൽ പ്രതിഷേധമുണ്ടാകും. വി.ഡി. സതീശന് രാഹുൽ മാങ്കൂട്ടവുമായി സഹോദര സ്നേഹമാണ്. സഹോദരനെ സംരക്ഷിക്കാനാണ് സതീശൻ ശ്രമിച്ചത്. പരാതിക്കാരിയായ പെൺകുട്ടിക്ക് പിതൃതുല്യനാണ് താനെന്നാണ് സതീശൻ പറഞ്ഞത്. രക്തബന്ധം സഹോദരനുമായാണല്ലോ ഉണ്ടാവുകയെന്നും എം.വി. ജയരാജൻ പറഞ്ഞു.

ഇരിട്ടി താലൂക്ക് വികസന സമിതി യോഗത്തിൽ പൊതുമരാമത്ത് വകുപ്പിന് രൂക്ഷ വിമർശനം

ഇരിട്ടി: തലശേരി-വളവുപ്പാറ കെഎസ്ടിപി റോഡിലെ സോളാർ ലൈറ്റുകൾ അപകടാവസ്ഥയിലായിട്ടും യാതൊരു നടപടിയും സ്വീകരിക്കാത്ത പൊതുമരാമത്ത് വകുപ്പിനെതിരേ താലൂക്ക് വികസന സമിതി യോഗത്തിൽ രൂക്ഷ വിമർശനം. പൊതുഖജനാവിൽ നിന്ന്10 കോടി രൂപ ചെലവഴിച്ചൊരുക്കിയ സംവിധാനം ഒരുവർഷത്തിനകം പ്രവർത്തനരഹിതമായിട്ടും കരാറുകാരന് ഒരു നോട്ടീസ് പോലും നല്കാൻ കഴിഞ്ഞില്ലെന്ന് അംഗങ്ങൾ ആരോപിച്ചു. യോഗത്തിൽ സജീവ് ജോസഫ് എംഎൽഎയുടെ പ്രതിനിധി തോമസ് വർഗീസാണ് പ്രശ്‌നം ഉന്നയി ച്ചത്. മറ്റ് അംഗങ്ങളും ഇതേ പ്രശ്‌നം ചൂണ്ടിക്കാട്ടി. എന്നാൽ, റോഡ് നവീകരണം പൂർത്തിയാക്കി പൊതുമരാമത്തെ വകുപ്പിന് കൈമാറിയെന്നും പറഞ്ഞ് തടിയൂരാനായിരുന്നു കെഎസ്ടിപി പ്രതിനിധിയുടെ ശ്രമം. അപകടാവസ്ഥയിലായ മുഴുവൻ സോളാർ ലൈറ്റുകളുടെ ബാറ്ററികൾ അഴിച്ചു മാറ്റുമെന്നും അടുത്ത താലൂക്ക് വികസന സമിതി യോഗത്തിൽ ലൈറ്റുകളുടെ വിവരങ്ങൾ യോഗത്തെ അറിയിക്കാമെന്നുമാണ് പൊതുമരാമത്ത് വകുപ്പ് അസിസ്റ്റന്‍റ് എക്‌സിക്യൂട്ടീവ് എൻജിനിയർ പറഞ്ഞത്. ആറളത്തെ ആനമതിൽ നിർമാണം ഉടൻ പുനരാരംഭിക്കണമെന്ന ആവശ്യവും യോഗത്തിൽ ഉയർന്നു. ടെൻഡർ നടപടികൾ പൂർത്തിയായിട്ടും പ്രവൃത്തി കരാറുകാന് കൈമാറാത്തതിൽ യോഗം ആശങ്ക രേഖപ്പെടുത്തി. കീഴ്പള്ളി റോഡിലെ അപകടാവസ്ഥയിലായ കലുങ്കുകൾ മാറ്റി സ്ഥാപിക്കാൻ നടപടികൾ സ്വീകരിച്ചു വരുന്നതായി പൊതുമരാമത്ത് വകുപ്പ് അധികൃതർ അറിയിച്ചു. തില്ലങ്കേരി പഞ്ചായത്തിന് മുന്നിലെ റവന്യൂവകുപ്പിന്‍റെ കൈവശമുള്ള സ്ഥലത്ത് വാഹന പാർക്കിംഗി നുള്ള സൗകര്യം ഒരുക്കി തരണമെന്ന് പഞ്ചായത്ത് പ്രസിഡന്‍റ് പി. ശ്രീമതി ആവശ്യപ്പെട്ടു. മലയോര ഹൈവേയിൽ പല റീച്ചുകളിലായി പൂർത്തിയാകാതെ കിടക്കുന്ന റോഡിന്‍റെ നവീകരണം ഉടൻ പൂർത്തിയാക്കണമെന്ന ആവശ്യവും യോഗത്തിൽ ഉയർന്നു. യോഗത്തിൽ ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ അധ്യക്ഷത വഹിച്ചു. യോഗം വഴിപാടെന്ന് താലൂക്ക് വികസന സമിതി യോഗം വഴിപാടായി മാറുന്നുവെന്ന് വിവിധ രാഷ്‌ട്രീയ പാർട്ടികൾ ആരോപിച്ചു. ബന്ധപ്പെട്ട ഉദ്യോഗസ്ഥർ, ജനപ്രതിനിധികൾ എന്നിവർ യോഗത്തിൽ പങ്കെടുക്കുന്നില്ല. യോഗത്തിൽ ഉന്നയിക്കുന്ന പ്രധാന ആവശ്യങ്ങൾ പോലും നടപ്പാക്കുന്നതുമില്ല. താലൂക്ക് പരിധിയിലെ പഞ്ചായത്തുകളിലെ ഉന്നത ഉദ്യോഗസ്ഥരും ജനപ്രതിനിധികളും യോഗത്തിൽ എത്താത്തതും തിരിച്ചടിയാണെന്നും നേതാക്കൾ പറഞ്ഞു.

ഭീതിവിതച്ച ഭ്രാന്തൻ കുറുക്കനെ നാട്ടുകാർ തല്ലിക്കൊന്നു

ഉളിക്കൽ: വയത്തൂർ മേഖലയിൽ ഭീതി പരത്തിയ ഭ്രാന്തൻ കുറുക്കനെ നാട്ടുകാർ തല്ലിക്കൊന്നു. മേഖലയിൽ ഭീതിവിതച്ച കുറുക്കനായി പോലീസും വനം വകുപ്പ് ഉദ്യോഗസ്ഥരും പ്രദേശവാസികളും പഞ്ചായത്തിലെ മൂന്ന് ഷൂട്ടർമാരും ചേർന്ന സംഘം തെരച്ചിൽ നടത്തിയെങ്കിലും കണ്ടെത്താൻ കഴിഞ്ഞിരുന്നില്ല. തുടർന്ന് നാട്ടുകാർ പല സംഘങ്ങളായി തിരിഞ്ഞു നടത്തിയ തെരച്ചിലിൽ വൈകുന്നേരം ആറോടെ റബർ നഴ്സറിക്ക് പിൻവശത്തെ കുറ്റികാട്ടിൽ നിന്ന് കുറുക്കനെ തല്ലികൊല്ലുകയായിരുന്നു. മേഖലയിൽ ഭീതിവിതച്ച ഭ്രാന്തൻ കുറുക്കൻ ഇന്നലെ പുലർച്ചെയും പകലുമായി പ്രദേശത്തെ വീടുകളിലെ വളർത്തുമൃഗങ്ങളെയും റബർ നഴ്‌സറി തൊഴിലാളി കാവുങ്കൽ അന്നമ്മയെയും കടിച്ച് പരിക്കേല്പിച്ചിരുന്നു. പി.എസ്. രാജൻ, തളാപ്പേൽ കോറോത്ത് രവീന്ദ്രൻ എന്നിവരുടെ വീടുകളിലെ വളർത്തു പട്ടികളെയും ആക്രമിച്ചു. റബർ നഴ്‌സറിയിൽ ജോലി ചെയ്യുന്നതിനിടെയാണ് അന്നമ്മയ്ക്ക് കടിയേറ്റത്. ഇവരെ കണ്ണൂർ ജില്ലാ ആശുപത്രിയിൽ പ്രവേശിപ്പിച്ചു. പ്രദേശത്ത് ഭീതി പടർന്നതോടെ പഞ്ചായത്ത് പ്രസിഡന്‍റ് പി.സി. ഷാജി, വൈസ് പ്രസിഡന്‍റ് സമീറ പള്ളിപാത്ത്, പഞ്ചായത്തംഗം രതീഭായി ഗോവിന്ദൻ എന്നിവരുടെ നേതൃത്വത്തിൽ ജനപ്രതിനിധികളും നേതാക്കന്മാരും സ്ഥലത്തെത്തി. രാവിലെ മുതൽ പ്രദേശവാസികളെ ഭീതിയിലാഴ്ത്തിയ കുറുക്കനെ പിടികൂടാൻ കഴിഞ്ഞതിന്‍റെ ആശ്വാസത്തിലാണ് നാട്ടുകാർ. കുറച്ചുകാലമായി കുറുക്കന്മാരുടെ എണ്ണം മേഖലയിൽ വ്യാപകമായി വർധിച്ചിട്ടുണ്ടെന്നാണ് നാട്ടുകാർ പറയുന്നത്.

ആര്‍ദ്രകേരളം പുരസ്‌കാരനിറവില്‍ കണ്ണൂര്‍ ജില്ല

കണ്ണൂർ: ആരോഗ്യ മേഖലയില്‍ മികച്ച പ്രവര്‍ത്തനങ്ങള്‍ നടത്തിയ തദ്ദേശ സ്വയംഭരണ സ്ഥാപനങ്ങള്‍ക്കുള്ള 2023-24 വര്‍ഷത്തെ ആര്‍ദ്ര കേരളം പുരസ്‌കാരത്തില്‍ അഭിമാന നേട്ടംകൊയ്ത് കണ്ണൂര്‍ ജില്ല. മുനിസിപ്പാലിറ്റി വിഭാഗത്തില്‍ മട്ടന്നൂര്‍ മുനിസിപ്പാലിറ്റിക്ക് രണ്ടാം സ്ഥാനവും ജില്ലാപഞ്ചായത്ത് വിഭാഗത്തില്‍ കണ്ണൂര്‍ ജില്ലാ പഞ്ചായത്തിന് മൂന്നാം സ്ഥാനവും ലഭിച്ചു. ആരോഗ്യ മന്ത്രി വീണാ ജോര്‍ജാണ് അവാര്‍ഡുകള്‍ പ്രഖ്യാപിച്ചത്. രണ്ടാംസ്ഥാനത്തിന് അഞ്ച് ലക്ഷം രൂപയും മൂന്നാം സ്ഥാനത്തിന് മൂന്ന് ലക്ഷം രൂപയുമാണ് സമ്മാനത്തുക. ജില്ലാതല അവാര്‍ഡുകളില്‍ ഗ്രാമപഞ്ചായത്ത് വിഭാഗത്തില്‍ കോട്ടയം, കതിരൂര്‍, അഞ്ചരക്കണ്ടി ഗ്രാമപഞ്ചായത്തുകള്‍ ആദ്യമൂന്ന് സ്ഥാനങ്ങള്‍ കരസ്ഥമാക്കി. ഇന്‍ഫര്‍മേഷന്‍ കേരള മിഷന്‍റെ സഹായത്തോടെയാണ് പുരസ്‌കാരത്തിനായി പരിഗണിക്കാവുന്ന തദ്ദേശ സ്വയംഭരണ സ്ഥാപനങ്ങളുടെ മുന്‍ഗണനാ പട്ടിക തയാറാക്കിയത്. തദ്ദേശ സ്വയംഭരണ സ്ഥാപനങ്ങള്‍ ആരോഗ്യ മേഖലയില്‍ ചെലവഴിച്ച തുക, സാന്ത്വന പരിചരണ പരിപാടികള്‍, കായകല്‍പ്പ് സ്‌കോര്‍, ഹെല്‍ത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവര്‍ത്തനങ്ങള്‍ എന്നിവ പരിഗണിച്ചാണ് മുന്‍ഗണനാ പട്ടിക തയാറാക്കി പുരസ്‌കാരത്തിനായി തെരഞ്ഞെടുക്കുന്നത്. പ്രതിരോധ കുത്തിവയ്പ്, വാര്‍ഡുതല പ്രവര്‍ത്തനങ്ങള്‍, പ്രാദേശിക ആരോഗ്യ ആവശ്യങ്ങള്‍ക്ക് അനുസൃതമായ നൂതന ഇടപെടലുകള്‍, സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതിക സാഹചര്യങ്ങള്‍ ഒരുക്കല്‍, മോഡേണ്‍ മെഡിസിന്‍, ആയുര്‍വേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും പുരസ്‌കാരത്തിന് വേണ്ടി വിലയിരുത്തിയ ഘടകങ്ങളാണ്.

ആറളത്തെ ആനമതിൽ നിർമാണം ഇഴയുന്നു ; പ്രതിഷേധവുമായി ആദിവാസി സംഘടനകൾ

ഇരിട്ടി: കാട്ടാനയുൾപ്പടെയുള്ള വന്യമൃഗാക്രമണങ്ങളിൽ നിന്ന് ആറളം പുനരധിവാസ മേഖലയിലുള്ളവരുടെ സുരക്ഷിതത്വം ഉറപ്പാക്കാനും ആറളം ഫാം സംരക്ഷണത്തിനുമായുള്ള ആന പ്രതിരോധമതിൽ നിർമാണം ഇഴയുന്നതിൽ പ്രതിഷേധവുമായി ആദിവാസി സംഘടനകൾ. നിർമാണം വൈകുന്നതിനെതിരെ ആദിവാസി സംഘടനകൾ ശക്തമായ പ്രക്ഷോഭവുമായി രംഗത്തിറങ്ങാനുള്ള ഒരുക്കത്തിലാണ്. ഹൈക്കോടതിയും പട്ടികജാതി-പട്ടിക വർഗകമ്മിഷനും മന്ത്രിതലത്തിൽ നിന്നുള്ള ഇടപെടലുകൾ വരെ ഉണ്ടായിട്ടും രണ്ടുവർഷം കൊണ്ട് പത്തു കിലോമീറ്റർ മതിലിന്‍റെ നാലുകിലോമീറ്റർ ഭാഗത്തെ നിർമാണം മാത്രമാണ് പൂർത്തിയാക്കിയത്. പൊതുമരാമത്ത് വകുപ്പ് കെട്ടിട നിർമാണ വിഭാഗമാണ് നിർവഹണ ഏജൻസി. നിലവിലുള്ള കരാറുകാരനെ മാറ്റി പുതിയ കരാർ നൽകിയെങ്കിലും വർക്ക് എഗ്രിമെന്‍റ് വച്ച് കരാറുകാരന് സൈറ്റ് ഇനിയും കൈമാറിയിട്ടില്ല. നേരത്തെ ഒഴിവാക്കിയ കരാറുകാരൻ തന്നെ കരാറിൽ നിന്ന് ഒഴിവാക്കിയതിനെതിരെ ഹൈക്കോടതിയിൽ നൽകിയ ഹർജി തള്ളിയതിനു പിന്നാലെ അപ്പീൽ പോയിരിക്കുകയാണ്. വിഷയം കോടതിയുടെ പരിഗണനയിലായതിനാൽ പുതിയ പ്രവൃത്തി നടത്താൻ കഴിയാത്ത അവസ്ഥയാണ് ഇപ്പോൾ ആനമതിൽ നിർമാണത്തെ സ്തംഭനാവസ്ഥയിലാക്കിയിരിക്കുന്നത്. പ്രവൃത്തി പുതിയ കരാറുകാന് നൽകിയെന്നല്ലാതെ മറ്റ് കാര്യങ്ങളൊന്നും അറിയില്ലെന്നാണ് പൊതുമരാമത്ത് കെട്ടിട നിർമാണ വിഭാഗം അധികൃതർ പറയുന്നത്. ഏപ്രിൽ 30നുള്ളിൽ ആറുകിലോമീറ്ററെങ്കിലും പൂർത്തിയാക്കണമെന്ന നിർദേശം പാലിക്കാത്തതിനെ തുടർന്നായിരുന്നു ആദ്യ കരാറുകാരനെ ഒഴിവാക്കിയത്. മതിലന്‍റെ അലൈൻമെന്‍റിൽ വരുത്തിയ മാറ്റത്തെ തുടർന്ന് പഴയ മതിൽ നിലനിന്ന 4.5 കിലോമീറ്റർ ഭാഗത്തെ മരങ്ങൾ നേരത്തെ മുറിച്ചു നീക്കിയിരുന്നു. മതിൽ പൂർത്തിയാകാത്ത ഭാഗങ്ങളിൽ വനംവകുപ്പ് താത്കാലിക സൗരോർജ വേലി നിർമിച്ചിട്ടുണ്ട്. തുരത്തും, തിരിച്ചെത്തും കാട്ടാന ശല്യം രൂക്ഷമായ ആറളം ഫാം, പുനരധിവാസ മേഖല എന്നിവിടങ്ങളിലെ ആനകളെ പലപ്പോഴായി വനംവകുപ്പ് കാട്ടിലേക്ക് തുരത്തിയെങ്കിലും മതിലിന്‍റെ അഭാവത്തിൽ ഇവ തിരിച്ചെത്തി ഫാമിലും പുനരധിവാസ മേഖലയിലുമായി തന്പടിക്കുകയാണ്. പുനരധിവാസ മേഖലയിലെ ആനകളെ വനത്തിലേക്ക് തുരത്തുന്നതിനായി "ഓപ്പറേഷൻ ഗജമുക്തി' എന്ന പദ്ധതി തന്നെ ആവിഷ്കരിച്ചു നടപ്പാക്കി തുടങ്ങിയിരുന്നു. എന്നാൽ, പ്രതികൂല കാലാവസ്ഥ കാരണം പദ്ധതിക്ക് ലക്ഷ്യം നേടാനായില്ല. വലിയ മോഴയാന, ചെറിയ മോഴയാന, മൊട്ടുക്കൊമ്പൻ, കോരിക്കൊമ്പൻ തുടങ്ങിയ പേരുകളിലറിയപ്പെടുന്ന ഫാം മേഖലയിലെ ആനകളാണ് അതീവ അപകടകാരികൾ. പലപ്പോഴായി നടത്തിയ തുരത്തിലിൽ ഇവയെയും കാട് കയറ്റിയിരുന്നെങ്കിലും നിലവിൽ ഇവ ഫാം മേഖലയിൽ തിരിച്ചെത്തിയിട്ടുണ്ട്.

മുക്കാൽകിലോ കഞ്ചാവുമായി ഒഡീഷ സ്വദേശി പിടിയിൽ

തളിപ്പറമ്പ്: മുക്കാൽ കിലോ കഞ്ചാവുമായി ഒഡീഷ സ്വദേശിയായ യുവാവ് പിടിയിലായി. സുർജയ ബലയാർ സിംഗാണ് (25) 820 ഗ്രാം കഞ്ചാവുമായി എക്സൈസിന്‍റെ പിടിയിലായത്. തളിപ്പറമ്പ് എക്സൈസ് റേഞ്ച് അസി. എക്സൈസ് ഇൻസ്പെക്ടർ അഷറഫ് മലപ്പട്ടവും സംഘവും നടത്തിയ പരിശോധനയിൽ തളിപ്പറമ്പ് ഏഴാംമൈലിൽവച്ചാണ് ഇയാൾ പിടിയിലായത്. തളിപറമ്പിന്‍റെ വിവിധ ഭാഗങ്ങളിൽ വില്പനയ്ക്കായി കൊണ്ടുവന്നതാണ് കഞ്ചാവ്. പരിശോധനാ സംഘത്തിൽ അസി. എക്‌സൈസ് ഇൻസ്‌പെക്ടർ പി.പി. മനോഹരൻ, പ്രിവന്‍റീവ് ഓഫീസർ ഗ്രേഡുമാരായ കെ.വി. നികേഷ്, ഉല്ലാസ് ജോസ്, സിവിൽ എക്സൈസ് ഓഫീസർ പി.ആർ. വിനീത് എന്നിവരുമുണ്ടായിരുന്നു.

സ്കൂൾ ശതാബ്ദി ഗേറ്റിന്‍റെ സമർപ്പണവും പ്രചാരണ ശില്പം അനാച്ഛാദനവും

മാതമംഗലം: പേരൂൽ യുപി സ്കൂൾ ശതാബ്ദി ആഘോഷത്തോടനുബന്ധിച്ച് നിർമിച്ച ശതാബ്ദി ഗേറ്റിന്‍റെ സമർപ്പണവും പ്രചാരണ ശില്പം അനാച്ഛാദനവും എരമം-കുറ്റൂർ പഞ്ചായത്ത് പ്രസിഡന്‍റ് ടി. ആർ. രാമചന്ദ്രൻ നിർവഹിച്ചു. സംഘാടക സമിതി ചെയർമാൻ ടി. തമ്പാൻ അധ്യക്ഷത വഹിച്ചു. ജനറൽ കൺവീനർ ടി.വി. നിഷ, ജനപ്രതിനിധികളായ ടി.കെ. രാജൻ, കെ.വി. രവീന്ദ്രൻ, പിടിഎ പ്രസിഡന്‍റ് പി.വി. രാജേഷ്, കാർഷിക വികസന ബാങ്ക് പ്രസിഡന്‍റ് കെ.വി. ഗോവിന്ദൻ തുടങ്ങിയവർ പങ്കെടുത്തു. ആർടിസ്റ്റ് ശ്രീകുമാർ എരമമാണ് പ്രചാരണശില്പം നിർമിച്ചത്. ശതാബ്ദിയുടെ ഉദ്ഘാടനം 26ന് നിയമസഭാ സ്പീക്കർ എ.എൻ. ഷംസീർ നിർവഹിക്കും.

ഫിറോസിന്‍റെ അഴിമതിക്കഥകൾ പുറത്തുവിടുന്നത് കൂടെ നിൽക്കുന്നവർ തന്നെയെന്ന് എം.വി. ജയരാജൻ

കണ്ണൂർ: ആരോപണ വിധേയനായ യൂത്ത് ലീഗ് ജനറല്‍ സെക്രട്ടറിയുടെ അഴിമതി വിവരങ്ങൾ കെ.ടി. ജലീലിന് എത്തിച്ചു നൽകിയത് ഫിറോസിനോട് ഏറ്റവും അടുപ്പം നടിക്കുന്നവർ തന്നെയാണെന്ന് സിപിഎം സംസ്ഥാന സെക്രട്ടേറിയറ്റംഗം എം.വി. ജയരാജൻ. ആര് തെറ്റുചെയ്താലും നടപടി സ്വീകരിക്കുന്ന സർക്കാരാണ് കേരളത്തിൽ നിലവിലുള്ളത്. ഇത്തരക്കാർക്ക് ഒരു തരത്തിലുള്ള സംരക്ഷണവും സർക്കാരിൽ നിന്നുണ്ടാവില്ല.114 ഉദ്യോഗസ്ഥരെ സർവീസിൽ നിന്നും പിരിച്ചുവിടപ്പെട്ടത് ഈ നിലപാടിന്‍റെ തെളിവാണ്. സിപിഐ സമ്മേളനത്തിൽ പോലീസിനെതിരായ വിമർശനം ഉയർന്നുവല്ലോ എന്ന ചോദ്യത്തിന് വിമർശനം തിരുത്താനുള്ള നടപടിയാണെന്നും മാധ്യമങ്ങളിൽ വരുന്നത് മുഴുവൻ ശരിയല്ലെന്നുമുള്ള ചരിത്രമാണ് മുൻ കാലങ്ങളിൽ ഉണ്ടായിട്ടുള്ളതെന്നുമായിരുന്നു മറുപടി. കോൺഗ്രസിന് അകത്തുനിന്നു തന്നെ കോൺഗ്രസിനെ ശരിയാക്കുകയാണ് രാഹുൽ മാങ്കൂട്ടത്തിലിന്‍റെ രീതി. നിയമസഭാ സമ്മേളനത്തിൽ പങ്കെടുക്കാൻ രാഹുലിന് അവകാശമുണ്ട്. നിലവിലെ സാഹചര്യത്തിൽ പങ്കെടുക്കണമോ വേണ്ടയോ എന്ന് തീരുമാനിക്കേണ്ടത് രാഹുൽ മാങ്കൂട്ടത്തിലും കോൺഗ്രസുമാണ്. പങ്കെടുത്താൽ പ്രതിഷേധമുണ്ടാകും. വി.ഡി. സതീശന് രാഹുൽ മാങ്കൂട്ടവുമായി സഹോദര സ്നേഹമാണ്. സഹോദരനെ സംരക്ഷിക്കാനാണ് സതീശൻ ശ്രമിച്ചത്. പരാതിക്കാരിയായ പെൺകുട്ടിക്ക് പിതൃതുല്യനാണ് താനെന്നാണ് സതീശൻ പറഞ്ഞത്. രക്തബന്ധം സഹോദരനുമായാണല്ലോ ഉണ്ടാവുകയെന്നും എം.വി. ജയരാജൻ പറഞ്ഞു.

ആര്‍ദ്രകേരളം പുരസ്‌കാര നിറവില്‍ കണ്ണൂര്‍ ജില്ല

കണ്ണൂർ: ആരോഗ്യ മേഖലയില്‍ മികച്ച പ്രവര്‍ത്തനങ്ങള്‍ നടത്തിയ തദ്ദേശ സ്വയംഭരണ സ്ഥാപനങ്ങള്‍ക്കുള്ള 2023-24 വര്‍ഷത്തെ ആര്‍ദ്ര കേരളം പുരസ്‌കാരത്തില്‍ അഭിമാന നേട്ടംകൊയ്ത് കണ്ണൂര്‍ ജില്ല. മുനിസിപ്പാലിറ്റി വിഭാഗത്തില്‍ മട്ടന്നൂര്‍ മുനിസിപ്പാലിറ്റിക്ക് രണ്ടാം സ്ഥാനവും ജില്ലാപഞ്ചായത്ത് വിഭാഗത്തില്‍ കണ്ണൂര്‍ ജില്ലാ പഞ്ചായത്തിന് മൂന്നാം സ്ഥാനവും ലഭിച്ചു. ആരോഗ്യ മന്ത്രി വീണാ ജോര്‍ജാണ് അവാര്‍ഡുകള്‍ പ്രഖ്യാപിച്ചത്. രണ്ടാംസ്ഥാനത്തിന് അഞ്ച് ലക്ഷം രൂപയും മൂന്നാം സ്ഥാനത്തിന് മൂന്ന് ലക്ഷം രൂപയുമാണ് സമ്മാനത്തുക. ജില്ലാതല അവാര്‍ഡുകളില്‍ ഗ്രാമപഞ്ചായത്ത് വിഭാഗത്തില്‍ കോട്ടയം, കതിരൂര്‍, അഞ്ചരക്കണ്ടി ഗ്രാമപഞ്ചായത്തുകള്‍ ആദ്യമൂന്ന് സ്ഥാനങ്ങള്‍ കരസ്ഥമാക്കി. ഇന്‍ഫര്‍മേഷന്‍ കേരള മിഷന്‍റെ സഹായത്തോടെയാണ് പുരസ്‌കാരത്തിനായി പരിഗണിക്കാവുന്ന തദ്ദേശ സ്വയംഭരണ സ്ഥാപനങ്ങളുടെ മുന്‍ഗണനാ പട്ടിക തയാറാക്കിയത്. തദ്ദേശ സ്വയംഭരണ സ്ഥാപനങ്ങള്‍ ആരോഗ്യ മേഖലയില്‍ ചെലവഴിച്ച തുക, സാന്ത്വന പരിചരണ പരിപാടികള്‍, കായകല്‍പ്പ് സ്‌കോര്‍, ഹെല്‍ത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവര്‍ത്തനങ്ങള്‍ എന്നിവ പരിഗണിച്ചാണ് മുന്‍ഗണനാ പട്ടിക തയാറാക്കി പുരസ്‌കാരത്തിനായി തെരഞ്ഞെടുക്കുന്നത്. പ്രതിരോധ കുത്തിവയ്പ്, വാര്‍ഡുതല പ്രവര്‍ത്തനങ്ങള്‍, പ്രാദേശിക ആരോഗ്യ ആവശ്യങ്ങള്‍ക്ക് അനുസൃതമായ നൂതന ഇടപെടലുകള്‍, സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതിക സാഹചര്യങ്ങള്‍ ഒരുക്കല്‍, മോഡേണ്‍ മെഡിസിന്‍, ആയുര്‍വേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും പുരസ്‌കാരത്തിന് വേണ്ടി വിലയിരുത്തിയ ഘടകങ്ങളാണ്.

വോട്ടു വേണോ, റോഡ് വേണം

ചെറുപുഴ: കോഴിച്ചാൽ-കുണിയങ്കല്ല്-താബോർ റോഡ് മെക്കാഡം ടാറിംഗ് നടത്തണമെന്നും അല്ലെങ്കിൽ തെരഞ്ഞെടുപ്പ് ബഹിഷകരിക്കുമെന്ന പ്രഖ്യാപനവുമായി നാട്ടുകാർ. 65 വർഷം പഴക്കമുള്ളതും 300 ഓളം കുടുംബങ്ങൾ ആശ്രയിക്കുന്നതുമായ റോഡ് പൊട്ടിത്തകർന്നിട്ടും അധികൃതരുടെ ഭാഗത്ത് നിന്നും ഒരു നടപടിയും ഉണ്ടാകാത്ത സാഹചര്യത്തിലാണ് നാട്ടുകാർ കടുത്ത തീരുമാനത്തിലേക്ക് കടക്കുന്നത്. പയ്യന്നൂർ, ഇരിക്കൂർ നിയോജക മണ്ഡലങ്ങളെയും ചെറുപുഴ, ഉദയഗിരി പഞ്ചായത്തുകളെയും ചെറുപുഴ പഞ്ചായത്തിന്‍റെ വിവിധ ഭാഗങ്ങളിൽ നിന്നും കാസർഗോഡ് ജില്ലയിൽ നിന്നും പരിയാരം, തളിപ്പറന്പ്, കണ്ണൂർ എന്നിവിടങ്ങളിലേക്കും എളുപ്പത്തിലെത്താനുള്ള പാതയാണിത്. തെരുവുമല, താബോർ തുടങ്ങിയ വിനോദ സഞ്ചാര കേന്ദ്രങ്ങളിലേയ്ക്ക് പോകേണ്ട ഏകപാതയും ഇതാണ്. ഇവിടുത്തെ റിസോർട്ടുകളിലുൾപ്പെടെ ധാരാളം വിനോദ സഞ്ചാരികൾ എത്തുന്നുണ്ടെങ്കിലും റോഡിന്‍റെ തകർച്ച ടൂറിസം സാധ്യതകൾക്കു മങ്ങലേൽപ്പിക്കുകയാണ്. ചെറുപുഴ പഞ്ചായത്തിലെ കോഴിച്ചാൽ മുതൽ ഉദയഗിരി പഞ്ചായത്തിലെ താബോർ വരെ 4.7 കിലോമീറ്ററാണ് റോഡിന്‍റെ നീളം. ആറുമീറ്റർ വീതിയുള്ള റോഡിന്‍റെ പലയിടത്തും ടാറിംഗ് പൊട്ടിപ്പൊളിഞ്ഞു. ഓവുചാലുകളില്ലാത്തതിനാൽ റോഡിലൂടെ വെള്ളമൊഴുകുന്നതും റോഡിന്‍റെ തകർച്ചയ്ക്ക് കാരണമാകുന്നു. വീതി കുറവായതിനാൽ എതിർദിശയിൽ നിന്നും വരുന്ന വാഹനങ്ങൾ കടന്നുപോകുന്നത് ഏറെ ബുദ്ധിമുട്ടിയാണ്. നിലവിലുള്ള അവസ്ഥയിൽ രണ്ടുമാസത്തിനകം റോഡ് പൂർണമായും തകരുമെന്നാണ് പ്രദേശവാസികൾ പറയുന്നത്. റോഡിന്‍റെ ശോച്യാവസ്ഥകാരണം വിദ്യാർഥികളാണ് ഏറ്റവും കുടുതൽ ബുദ്ധിമുട്ടനുഭവിക്കുന്നത്. രാവിലെയും വൈകുന്നേരവുമായി സ്കൂൾ കുട്ടികളെയും കൊണ്ട് ജീപ്പ് 16 ട്രിപ്പ് വരെ ഓടുന്നുണ്ട്. 2500 രൂപ മുതൽ 3000 രൂപ വരെയാണ് ഒരു കുട്ടിക്ക് യാത്രാ ചെലവായി വരുന്നത്. ഇത് രക്ഷിതാക്കൾക്ക് വലിയ സാന്പത്തിക ചെലവിനിടയാക്കുന്നുണ്ട്. വാഹന സൗകര്യത്തിന്‍റെ കുറവ് കാരണം പല കുടുംബങ്ങളും താബോർ മേഖലയിൽ നിന്നും താഴെ ഭാഗത്ത് വീടുകൾ വാടകയ്ക്കെടുത്ത് മാറുകയാണ്. റോഡ് നവീകരിക്കണമെന്നാവശ്യപ്പെട്ട് പഞ്ചായത്തുതലം മുതൽ എംഎൽഎമാർ, എംപിമാർ തുടങ്ങി മന്ത്രിതലത്തിൽ വരെ നിരവധി നിവേദനങ്ങൾ നൽകിയിട്ടും നടപടികൾ ഉണ്ടാകാത്ത സാഹചര്യത്തിലാണ് തെരഞ്ഞെടുപ്പ് ബഹിഷ്കരണം ഉൾപ്പടെയുള്ള കടുത്ത തീരുമാനത്തിലേക്ക് നീങ്ങുന്നതെന്ന് നാട്ടുകാർ പറഞ്ഞു. പി.ജെ. മാത്യു പാഴൂർ, ജയിംസ് അഗസ്റ്റ്യൻ ചെറുതാനിക്കൽ, ദീപു പോൾ കൂട്ടുങ്കൽ, രാധാകൃഷ്ണൻ നായർ കഷ്ണിക്കുന്നേൽ, ജോസ് കൂട്ടുങ്കൽ എന്നിവരുടെ നേതൃത്വത്തിലാണ് നാട്ടുകാർ പ്രതിഷേധ പരിപാടികൾക്ക് തയാറെടുക്കുന്നത്. എംപി, എംഎൽഎ ഫണ്ടുകൾ ഉപയോഗപ്പെടുത്തണം ഒരുപാട് സാധ്യതകളുള്ള ഒരു റോഡാണ് കോഴിച്ചാൽ-കുണിയൻകല്ല്-താബോർ റോഡ്. റോഡ് മെക്കാഡം ടാറിംഗ് നടത്തുകയാണ് വേണ്ടത്. ഇതിനായി എംപി, എംഎൽഎ ഫണ്ടുകൾ വിനിയോഗിക്കണം. വിനോദ സഞ്ചാര കേന്ദ്രങ്ങളിലേയ്ക്കും കരുവഞ്ചാൽ, പരിയാരം തുടങ്ങിയ ആശുപത്രികളിലേയ്ക്കും എളുപ്പത്തിൽ എത്താൻ കഴിയുന്ന റോഡാണിത്. എങ്കിലും അധികൃതരുടെ അവഗണന തുടരുന്നത് ഏറെ പ്രതിഷേധാർഹമാണ്. ഒരു നാടിന്‍റെ വികസന സ്വപ്നങ്ങളാണ് ഇവിടെ അസ്തമിക്കുന്നത്. -പി.ജെ. മാത്യു പാഴൂർ (റിട്ട. അധ്യാപകൻ)

റോഡ് മുറിച്ചുകടക്കവെ ബുള്ളറ്റിടിച്ച് പരിക്കേറ്റയാൾ മരിച്ചു

പിലാത്തറ: റോഡ് മുറിച്ചു കടക്കുന്നതിനിടയില്‍ ബുള്ളറ്റ് ബൈക്കിടിച്ച് പരിക്കേറ്റ് ചികിത്സയില്‍ കഴിഞ്ഞിരുന്നയാള്‍ മരിച്ചു. പെരിങ്ങത്തൂര്‍ പുല്ലൂക്കര സ്വദേശി ചന്ദനപ്പുറത്ത് സി.പി. സലിമാണ് (54) ചികിത്സക്കിടയില്‍ മരിച്ചത്. കഴിഞ്ഞ ചൊവ്വാഴ്ച രാത്രി ഏഴരയോടെ പിലാത്തറ കെഎസ്ടിപി റോഡിലാണ് അപകടം. കാസർഗോഡ് കുമ്പളയിലെ ചടങ്ങില്‍ പങ്കെടുത്ത് വരികയായിരുന്നു സലീം ഉള്‍പ്പെടെയുള്ള കുടുംബം. പിലാത്തറയിലെത്തിയപ്പോള്‍ വാഹനം റോഡിലൊതുക്കി മറുഭാഗത്തെ ഹോട്ടലിലേക്ക് പോകാന്‍ റോഡ് മുറിച്ചു കടക്കുന്നതിനിടയിലായിരുന്നു അപകടം. ഇതിനിടയിലെത്തിയ ബുള്ളറ്റ് സലീമിനെ ഇടിച്ച് തെറുപ്പിക്കുകയായിരുന്നു. അപകടത്തില്‍ ഗുരുതരമായി പരിക്കേറ്റ ഇയാള്‍ കണ്ണൂരിലെ സ്വകാര്യ ആശുപത്രിയിലെ വെന്‍റിലേറ്ററില്‍ ചികിത്സയിലായിരുന്നു. അപകടമുണ്ടാക്കിയശേഷം നിര്‍ത്താതെ പോയ ബുള്ളറ്റ് പിറ്റേന്ന്തന്നെ പോലീസ് കസ്റ്റഡിയിലെടുത്തിരുന്നു. കെഎംസിസിയുടെ സജീവ പ്രവർത്തകനായിരുന്നു സലീം. പരേതനായ മുഹമ്മദിന്‍റെയും കുഞ്ഞാമിനയുടേയും മകനാണ്. ഭാര്യ: ജസീല. മക്കൾ: ജസീർ, ജഫ്ന, സനഫാത്തിമ. സഹോദരങ്ങൾ: നിസാർ(കുവൈറ്റ്), ജാഫർ(സൗദി), മൈമുന(പെരിങ്ങത്തൂർ).

വിപുലമായ സുരക്ഷാസംവിധാനം

മാരത്തണിന്‍റെ വിജയകരമായ നടത്തിപ്പിനായി വിപുലമായ സുരക്ഷ സംവിധാനങ്ങളും കായികതാരങ്ങള്‍ക്കു വേണ്ട സൗകര്യങ്ങളും ഉറപ്പുവരുത്തിയതായി റണ്‍ പാലക്കയംതട്ട് - ഇരിക്കൂര്‍ ടൂറിസം - മിനി മാരത്തണ്‍ മുഖ്യസംഘാടകന്‍ കൂടിയായ സജീവ് ജോസഫ് എംഎല്‍എ അറിയിച്ചു. എന്‍സിസി, എസ്പിസി, വിമുക്ത ഭടന്‍മാര്‍, യുവജന സംഘടനകള്‍, മറ്റു വിവിധ സംഘടനകള്‍ -ക്ലബുകളില്‍നിന്നുമായി തെരഞ്ഞെടുത്ത ഇരുന്നൂറോളം വോളണ്ടിയര്‍മാര്‍ മാരത്തണ്‍ റൂട്ടില്‍ മത്സരാര്‍ഥികള്‍ക്ക് സൗകര്യം ഒരുക്കുന്നതിന് അണിനിരക്കും. മത്സരത്തിന്‍റെ സ്റ്റാര്‍ട്ട് , ഫിനിഷ് ലൈന്‍, യൂടേണുകള്‍ എന്നിവ കായിക അധ്യാപകരുടെ നേതൃത്വത്തില്‍ നീരിക്ഷിക്കുകയും ആരോഗ്യസുരക്ഷ ക്രമീകരണവുമായി ബന്ധപ്പെട്ട് ഡോക്ടര്‍മാരടങ്ങിയ അത്യാധുനിക സൗകര്യത്തോടു കൂടിയ ആംബുലൻസ് മാരത്തണിന്‍റെ മുന്നിലും പുറകിലുമായി സജ്ജമാക്കും. മാരത്തണ്‍ റൂട്ടില്‍ രണ്ടു കിലോമീറ്റര്‍ ഇടവിട്ട് വാട്ടര്‍ പോയിന്‍റും ഫസ്റ്റ് എയ്ഡ് സംവിധാനവും ഉറപ്പുവരുത്തും. കൂടാതെ, മാരത്തണ്‍ റൂട്ടിലുളള മുഴുവന്‍ വോളണ്ടിയര്‍മാരുടെ കൈവശവും കുടിവെളളവും മറ്റ് ആവശ്യ സേവനങ്ങളും ഉറപ്പുവരുത്തും. സുരക്ഷാ സംവിധാനങ്ങളുടെ ഭാഗമായി പോലീസ് , ഫയര്‍ഫോഴ്സ് തുടങ്ങിയ സേനാവിഭാഗങ്ങളുടെയും സഹായവും തേടിയിട്ടുണ്ട്. രാജ്യത്തിനകത്തും പുറത്തും നിന്നുമായി എത്തിച്ചേരുന്ന ആയിരത്തിലധികം കായികതാരങ്ങള്‍ക്ക് മാരത്തണ്‍ പോയിന്‍റായ പയ്യാവൂരില്‍ എത്തിച്ചേരുന്നതിന് റൂട്ട് മാപ്പ് പ്രസിദ്ധീകരിക്കുകയും താമസ സൗകര്യം ഏര്‍പ്പെടുത്തുകയും ചെയ്തിട്ടുണ്ട്. ഇതിന്‍റെ ഭാഗമായി പയ്യാവൂരില്‍ ഇന്നു രാവിലെ 10 മുതല്‍ ഹെല്‍പ്പ് ഡെസ്ക് പ്രവര്‍ത്തനം തുടങ്ങും. ഇന്നു രാത്രി തന്നെ മത്സരാര്‍ഥികള്‍ക്ക് ജഴ്സിയും ചെസ്റ്റ് നമ്പറും നല്‍കും. ‌മത്സരത്തിനു േഷം മാരത്തണിന്‍റെ ഭാഗമായ മുഴുവന്‍ പേര്‍ക്കും ഭക്ഷണവും കായിക താരങ്ങള്‍ക്ക് പുലിക്കുരുമ്പയില്‍ നിന്ന് പയ്യാവൂരില്‍ എത്തിച്ചേരാനുളള വാഹന സൗകര്യവും ഏര്‍പ്പെടുത്തിയതായി സംഘാടകര്‍ പത്രസമ്മേളനത്തില്‍ അറിയിച്ചു. ശ്രീകണ്ഠപുരത്ത് നടന്നപത്രമ്മേളനത്തില്‍ ഇരിക്കൂർ ഇന്നവേഷന്‍ കൗൺസിൽ ചെയർമാൻ പി.ടി. മാത്യു, നടുവിൽ പഞ്ചായത്ത് പ്രസിഡന്‍റ് ബേബി ഓടംപള്ളി, പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ, എരുവേശി പഞ്ചായത്ത് പ്രസിഡന്‍റ് മിനി ഷൈബി തുടങ്ങിയവര്‍ പങ്കെടുത്തു.

ഇരിക്കൂര്‍ ടൂറിസം ലോകമറിയാൻ രാജ്യാന്തര മിനി മാരത്തണ്‍ നാളെ

ശ്രീകണ്ഠപുരം: ഇരിക്കൂർ നിയോജകമണ്ഡലത്തിലെ പ്രകൃതിഭംഗിയെയും വിനോദ സഞ്ചാര കേന്ദ്രങ്ങളെയും ലോകശ്രദ്ധയിലേക്ക് ഉയര്‍ത്തുന്നതിന് സജീവ് ജോസഫ് എംഎല്‍എയുടെ നേതൃത്വത്തില്‍ കണ്ണൂര്‍ ഡിടിപിസിയും ഇരിക്കൂര്‍ ടൂറിസം ആൻഡ് ഇന്നൊവേഷന്‍ കൗണ്‍സിലും സംയുക്തമായി നടത്തുന്ന റണ്‍ പാലക്കയംതട്ട് ഇരിക്കൂര്‍ ടൂറിസം രാജ്യാന്തര മിനി മാരത്തൺ നാളെ നടക്കും. രാജ്യത്തിനകത്തും പുറത്തുനിന്നുമായി ആയിരത്തിലധികം ആളുകള്‍ പങ്കെടുക്കും. പുലർച്ചെ ആറിന് പയ്യാവൂരില്‍ എംഎല്‍എമാര്‍ ചേര്‍ന്ന് ഫ്ലാഗ് ഓഫ് ചെയ്യുന്നതോടെ മാരത്തണ്‍ ആരംഭിക്കും. പുലിക്കുരുമ്പയില്‍ നടക്കുന്ന സമാപന സമ്മേളനത്തില്‍ സണ്ണി ജോസഫ് എംഎല്‍എ വിജയികള്‍ക്ക് സമ്മാനദാനം നിര്‍വഹിക്കും. മത്സരത്തില്‍ പങ്കെടുത്ത് മാരത്തണ്‍ പൂര്‍ത്തിയാക്കുന്ന മുഴുവന്‍ പേര്‍ക്കും മെഡലും സര്‍ട്ടിഫിക്കറ്റും നല്‍കുമെന്നും മത്സരം പൂര്‍ത്തികരിക്കുന്ന 60 വയസിന് മുകളിലുളളവര്‍ക്ക് കാഷ് പ്രൈസ് സമ്മാനിക്കുമെന്നും സംഘാടകര്‍ അറിയിച്ചു. പയ്യാവൂരിൽനിന്ന് പുലിക്കുരുന്പയിലേക്ക് പയ്യാവൂരില്‍ ആരംഭിച്ച് പുലിക്കുരുമ്പയിലാണ് മാരത്തണിന്‍റെ സമാപനം. പയ്യാവൂർ ബസ്‌സ്റ്റാൻഡിന് സമീപമുള്ള മൈതാനത്തുനിന്നാണ് മാരത്തൺ ആരംഭിക്കുന്നത്. 12.5 കിലോമീറ്റര്‍ മിനി മാരത്തണില്‍ എതോപ്യ, നേപ്പാള്‍ അടക്കമുളള വിദേശരാജ്യങ്ങളില്‍ നിന്നും മധ്യപ്രദേശ്, രാജസ്ഥാന്‍, ഛത്തീസ്ഗഡ്, കര്‍ണാടക, തമിഴ്നാട് തുടങ്ങിയ സംസ്ഥാനങ്ങളില്‍നിന്നും കേരളത്തിലെ എല്ലാ ജില്ലകളില്‍ നിന്നുമായി നൂറുകണക്കിന് അത്‌ലറ്റുകള്‍ വ്യത്യസ്ത കാറ്റഗറികളിലായി ‌പങ്കെടുക്കും. പ്രാദേശിക പങ്കാളിത്തം ഉറപ്പുവരുത്തി എല്ലാ വിഭാഗക്കാരും പങ്കെടുക്കുന്ന പയ്യാവൂരില്‍ ആരംഭിച്ച് പൂപ്പറമ്പ് അവസാനിക്കുന്ന നാലുകിലോമീറ്റര്‍ റണ്‍ ഫോര്‍ ഫണും മാരത്തണിന്‍റെ ഭാഗമായി നടക്കും. സ്ത്രീ, പുരുഷന്‍, ട്രാന്‍സ്ജെൻഡര്‍ വിഭാഗത്തിലുമായി നടത്തുന്ന മിനി മാരത്തണില്‍ 18 വയസ് മുതല്‍ 35വയസ് വരെയും 36 വയസ് മുതല്‍ 45 വയസ് വരെയും 46 വയസ് മുതല്‍ മുകളിലോട്ടുമായി കാറ്റഗറി തിരിച്ചാണ് മത്സരം സംഘടിപ്പിക്കുന്നത്. ഓടാൻ വിഐപികളും ജനപ്രതിനിധികളും രണ്ടരലക്ഷം രൂപയുടെ കാഷ് പ്രൈസ് സമ്മാനിക്കുന്ന രാജ്യത്തിനകത്തും പുറത്തുനിന്നുമായി നൂറുകണക്കിന് പ്രമുഖരായ അത്‌ലറ്റുകൾ അണിനിരക്കുന്ന ഈ മിനി മാരത്തണില്‍ ജനപ്രതിനിധികള്‍ ഉൾപ്പെടെയുള്ള രാഷ്‌ട്രീയ -സാമൂഹ്യ-കലാ-കായിക രംഗത്തെ പ്രമുഖരും പങ്കെടുക്കും. കെ.പി.മോഹനന്‍, ചാണ്ടി ഉമ്മന്‍, കെ.വി. സുമേഷ് , ടി. സിദ്ദിഖ്, ടി.ഐ. മധുസൂദനന്‍, എന്‍.എ. നെല്ലിക്കുന്ന്, ഐ.സി. ബാലകൃഷ്ണന്‍, എം. വിജിന്‍ തുടങ്ങിയ എംഎല്‍എമാരും കണ്ണൂർ ജില്ലാ പഞ്ചായത്ത് പ്രസിഡന്‍റ് അഡ്വ. കെ.കെ. രത്നകുമാരി, കണ്ണൂർ മേയർ മുസ്‌ലിഹ് മഠത്തിൽ, ഇരിക്കൂർ നിയോജക മണ്ഡലത്തിലെ എല്ലാ നഗരസഭ /പഞ്ചായത്ത് പ്രസിഡന്‍റുമാരും മുന്‍ ഇന്ത്യന്‍ ഫുട്ബോള്‍ താരം സി.കെ.വീനിത്, മുന്‍ ഇന്ത്യന്‍ വോളിബോള്‍ താരം മനു ജോസഫ് , അന്തര്‍ദേശീയ ബോക്സിംഗ് താരവും ധ്യാന്‍ചന്ദ് പുരസ്കാര ജേതാവുമായ കെ.സി. ലേഖ, കോമൺവെൽത്ത് ഗെയിംസ് മെഡൽ ജേതാക്കളും കായിക താരങ്ങളുമായ ടി.കെ. പ്രിയ, സിനി ജോസ്, ടിയാന മേരി തോമസ് തുടങ്ങിയ പ്രമുഖര്‍ക്കൊപ്പം കണ്ണൂര്‍ കളക്ടര്‍ അരുണ്‍ കെ. വിജയന്‍, സിറ്റി പോലിസ് കമ്മീഷണർ പി. നിധിൻ രാജ് തുടങ്ങിയവരും പങ്കെടുക്കുന്നുണ്ട്.

മാലിപ്പറമ്പിൽ പുരസ്കാരം ഫാ.ആന്‍റണി തെക്കേമുറിയിലിന്

ആലക്കോട്: "ദൈവം തന്ന അംഗീകാരമാണിത്. നാലു പതിറ്റാണ്ടായുള്ള വൈദിക ജീവിതത്തിനിടയിൽ നിരവധി പുരസ്കാരങ്ങളും അവാർഡുകളും ലഭിച്ചിട്ടുണ്ടെങ്കിലും മനസിന് ഇത്രയധികം സംതൃപ്തി തന്ന അംഗീകാരം മറ്റൊന്നില്ല, അതും കുട്ടികളുടെ സംഘടനയെ നയിച്ചതിന്‍റെ പേരിലുള്ള അവാർഡ് ആകുന്പോൾ അതിനെ ഇരട്ടി അംഗീകാരമായാണ് കാണുന്നത്.കുട്ടികളോടുകൂടെ ആയിരിക്കുക, കുഞ്ഞുങ്ങളിൽ ഒരാളായിരിക്കുക എന്നത് ഏറെ സംതൃപ്തിയുള്ള കാര്യമാണ്..' ചെറുപുഷ്പ മിഷൻലീഗിന്‍റെ പ്രഥമ ഡയറക്ടറായ ഫാ. ജോസഫ് മാലിപ്പറമ്പിലിന്‍റെ സ്മരണാർത്ഥം സംസ്ഥാന കമ്മിറ്റി നൽകുന്ന മാലിപ്പറന്പിൽ പുരസ്കാരത്തിന് അർഹനായ ഫാ. ആന്‍റണി തെക്കേമുറിയിൽ "ദീപിക'യോട് പറഞ്ഞു. തലശേരി അതിരൂപതയിലെ മുതിർന്ന വൈദികനായ ഫാ. ആന്‍റണി തെക്കേമുറിയിൽ 37 വർഷമായി വിവിധതലങ്ങളിൽ ചെറുപുഷ്പ മിഷൻലീഗിനെ നയിക്കുകയാണ്. മിഷൻലീഗിന്‍റെ ശാഖ ഡയറക്ടറിൽ തുടങ്ങി മേഖല, അതിരൂപത, സംസ്ഥാന, ദേശീയ ഡയറക്ടർ, പ്രഥമ ഇന്‍റർനാഷണൽ ഡയറക്ടർ വരെയുള്ള പദവികൾ വഹിച്ചിട്ടുണ്ട്. നാലു വർഷമായി സിഎംഎൽ ഇന്‍റർനാഷണൽ എക്സിക്യൂട്ടീവ് അംഗമാണ്. 1978ല്‍ തോമാപുരം ഫൊറോന ഡയറക്ടറായി പ്രവർത്തനമാരംഭിച്ച ഫാ. ആന്‍റണി തെക്കേമുറിയിൽ 18 ഇടവകകളിൽ ശുശ്രൂഷ ചെയ്തിട്ടുണ്ട്. നിരവധി പള്ളികളും കുരിശുപള്ളികളും സ്കൂൾ, കോളജ്, സെമിത്തേരികൾ എന്നിവയടക്കമുള്ള നിർമണങ്ങൾക്ക് നേതൃത്വം നൽകി. മിഷൻലീഗിന്‍റെ പ്രവർത്തന മേഖലകളിൽ തീക്ഷ്ണതയോടെ പ്രസംഗിക്കുന്നതിനൊപ്പം സെമിനാരികളിലും സന്യാസിഭവനങ്ങളിലും ക്ലാസുകളുമെടുക്കാറുണ്ട്. വിദേശരാജ്യങ്ങളിലടക്കം ക്ലാസുകൾ നയിച്ചിട്ടുണ്ട്. നേതൃത്വപാടവത്തിനൊപ്പം മികച്ച സംഘാടകനുമായ ആന്‍റണിയച്ചൻ സാമൂഹ്യ സാംസ്കാരിക രംഗത്തും സജീവ സാന്നിധ്യമാണ്. അതിരൂപതാ മതബോധന അസിസ്റ്റന്‍റ് ഡയറക്ടർ, ക്യൂരിയ റോട്ടറി, ദൈവവിളി ഡയറക്ടർ, പരിശുദ്ധാത്മാവ് വർഷ ഡയറക്ടർ, പാസ്റ്റർ കൗൺസിൽ അംഗം എന്നീ നിലകളിലും മികവുറ്റ പ്രവർത്തനങ്ങൾ നടത്തി. ഇപ്പോൾ രയറോം സെന്‍റ് സെബാസ്റ്റ്യൻസ് പള്ളി വികാരിയാണ്.

സീഡ് ബോൾ നിർമിച്ച് പേരട്ട സെന്‍റ് ജോസഫ് സ്കൂൾ വേൾഡ് റിക്കാർഡ് നേട്ടത്തിൽ

ഇരിട്ടി: വന്യമൃഗങ്ങൾക്ക് കാട്ടിനകത്ത് ഭക്ഷണമുറപ്പാക്കുന്നതിനുള്ള പദ്ധതിക്കായുള്ള സീഡ് ബോൾ നിർമാണത്തിൽ വേൾഡ് റിക്കാർഡ് നേട്ടവുമായി പേരട്ട സെന്‍റ് ജോസഫ്സ് സ്കൂൾ. സിസ്റ്റേഴ്സ് ഓഫ് സെന്‍റ് ജോസഫ് ഓഫ് ആനെസിയുടെ വിശാഖപട്ടണം പ്രോവിൻസിന്‍റെ 375ാം വാർഷികത്തോടനുബന്ധിച്ച് നടത്തിയ മത്സരത്തിലാണ് പേരട്ട സെന്‍റ് ജോസഫ്സ് സ്കൂൾ വിദ്യാർഥികൾ ഈ നേട്ടം കൈവരിച്ചത്. സിസ്റ്റേഴ്സ് ഓഫ് സെന്‍റ് ജോസഫ് ഓഫ് ആനെസിയുടെ കീഴിലുള്ള സ്കൂളുകൾക്കായി സംഘടിപ്പിച്ച മത്സരത്തിൽ വിവിധ സംസ്ഥാനങ്ങളിൽനിന്നുള്ള 15 സ്കൂളുകളാണ് വേൾഡ് റിക്കാർഡ് നേട്ടത്തിനായി മത്സരിച്ചത്. പാഠപുസ്തകങ്ങളിലെ അറിവുകൾക്കുമപ്പുറം പ്രകൃതിയെ സ്നേഹിക്കുന്നതുമായി ബന്ധപ്പെട്ടായിരുന്നു മത്സരങ്ങൾ ഒരുക്കിയത്. കളിമണ്ണും മണ്ണും വെള്ളത്തിൽ കുഴച്ച് ഉണ്ടാക്കുന്ന മൺ ബോളുകൾക്കുള്ളിൽ ഫലൃക്ഷത്തിന്‍റെ വിത്ത് നിക്ഷേപിച്ചാണ് സീഡ് ബോളുകൾ നിർമിക്കുന്നത്. ഇത്തരത്തിലുള്ള 20010 സീഡ് ബോളുകളാണ് കുട്ടികൾ തയാറാക്കിയത്. 15 സ്കൂളുകളിൽ നിന്നായുള്ള വിദ്യാർഥികൾ ഒരു മണിക്കൂറിനുള്ളിൽ ആകെ 11,90796 ബോളുകളാണ് നിർമിച്ചത് . സൂം മീറ്റിംഗിലൂടെയായിരുന്നു മത്സരം. ഒരു മണിക്കൂറായിരുന്നു മത്സര സമയം. മത്സരത്തിൽ സ്കൂളിലെ 173 വിദ്യാർഥികൾ ചേർന്നാണ് നിശ്ചിത സമയത്തിനകം 20010 സീഡ് ബോളുകൾ നിർമിച്ചത്. വനംവകുപ്പുമായി ആലോചിച്ച് വിദ്യാർഥികൾ നിർമിച്ച സീഡ് ബോളുകൾ കാട്ടിൽ നിക്ഷേപിക്കും. മത്സരത്തിൽ പങ്കെടുത്ത വിദ്യാർഥികളെ സ്കൂൾ മാനേജ്മെന്‍റ് അഭിനന്ദിച്ചു. മുഖ്യാധ്യാപിക സിസ്റ്റർ ടെക്സി മാത്യു, ഉളിക്കൽ പഞ്ചായത്തംഗവും പിടിഎ പ്രസിഡന്‍റുമായ ബിജു വെങ്ങലപ്പള്ളി എന്നിവർ പ്രസംഗിച്ചു. മാനേജ്മെന്‍റിന്‍റെയും അധ്യാപകരുടെയും വിദ്യാർഥികളുടെയും കൂട്ടായ പ്രവർത്തനമാണ് സ്കൂളിന്‍റെ നേട്ടത്തിനു കാരണമായത്.

കാട്ടുപന്നി കുറുകെ ചാടി സ്കൂട്ടർ മറിഞ്ഞ് വീട്ടമ്മയ്ക്ക് പരിക്ക്

ഇരിട്ടി: കാട്ടുപന്നി കുറുകെ ചാടി സ്കൂട്ടർ മറിഞ്ഞ് വീട്ടമ്മയ്ക്ക് പരിക്കേറ്റു. കാക്കയങ്ങാട് പാല അങ്ങാടിച്ചാൽ സ്വദേശി പി. ജിജിക്കാണ് (42) അപകടത്തിൽ പരിക്കേറ്റത്. പനി ബാധിച്ച നാലുവയസുകാരിയായ മകളെ ഇരിട്ടിയിലെ സ്വകാര്യ ആശുപത്രിൽ കാണിച്ച് മരുന്നുവാങ്ങി സ്കൂട്ടറിൽ മടങ്ങുകയായിരുന്നു ജിജി. നാലുവയസുകാരി പരിക്കേൽക്കാതെ അദ്ഭുതകരമായി രക്ഷപ്പെട്ടു. തിങ്കളാഴ്ച രാത്രി എട്ടോടെയായിരുന്നു അപകടം. ഇടതുകാലിന് സാരമായി പരിക്കേറ്റ ജിജിയെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.

വൈറലായി കണ്ണൂരിലെ മിനി ഗുണാ കേവ്; നിയന്ത്രണം വേണമെന്ന് നാട്ടുകാർ

പയ്യാവൂർ (കണ്ണൂർ): പയ്യാവൂർ ഉളിക്കൽ റോഡിൽ കുഞ്ഞിപ്പറമ്പിലുള്ള മിനി ഗുണാ കേവ് എന്ന ് നാട്ടുകാർ വിളിക്കുന്ന ഗുഹ വൈറലാവുന്നു. ഓണം റിലീസായെത്തി വൻ വിജയമായ 'ലോക ചാപ്റ്റർ വൺ-ചന്ദ്ര' സിനിമയിലെ നായികയ്ക്ക് സൂപ്പർ പവർ കിട്ടുന്ന ഗുഹയുടെ ചിത്രീകരണത്തോടെയാണ് കുഞ്ഞിപ്പറമ്പിലെ ഗുഹ താരമായി മാറിയത്. ഡൊമിനിക് അരുൺ സംവിധാനം ചെയ്ത സിനിമയിലെ ഫ്ലാഷ് ബാക്ക് സീനിലാണ് ഗുഹയുടെ ഉൾവശം കാണിക്കുന്നത്. എറണാകുളത്തെ മറ്റൊരു ഗുഹയിലും ഈ സീനിന്‍റെ ചില ഭാഗങ്ങൾ ഷൂട്ട് ചെയ്തിട്ടുണ്ട്. ഐതിഹ്യമാല ആസ്പദമാക്കി നിർമിച്ച സിനിമയ്ക്കായി കഴിഞ്ഞ വർഷം ഡിസംബറിലായിരുന്നു കുഞ്ഞിപ്പറന്പിലുള്ള രംഗങ്ങൾ ചിത്രീകരിച്ചത്. 15 ദിവസം ഇവിടെ ക്യാന്പ് ചെയ്ത ഷൂട്ടിംഗ് സംഘം മൂന്നു ദിവസം കൊണ്ടാണ് സീൻ പൂർത്തിയാക്കിയത്. സംസ്ഥാനത്തിനകത്തും പുറത്തും നിന്നായി നിരവധി പേരാണ് ഇവിടെ എത്തുന്നത്. ജനത്തിരക്ക് നിയന്ത്രിക്കാൻ കഴിയാത്ത അവസ്ഥയാണ്. കുഞ്ഞിപറമ്പിലെ ഗുഹയുടെ മുൻവശം കഴിഞ്ഞ ജൂലൈ 26ന് കനത്തമഴയിൽ ഇടിഞ്ഞിരുന്നു. ഇതുകാരണം അതീവ അപകടാവസ്ഥ തരണം ചെയ്താണ് സന്ദർശകർ ഗുഹയിലേക്ക് കടക്കുന്നത്. ഈ സാഹചര്യത്തിൽ സന്ദർശകർക്ക് നിയന്ത്രണമൊരുക്കണമെന്നാണ് നാട്ടുകാർ ആവശ്യപ്പെടുന്നത്. സഞ്ചാരികൾക്ക് അത്രയൊന്നും പരിചിതമല്ലാതിരുന്ന കുഞ്ഞിപ്പറമ്പ് ഗുഹ സിനിമയുടെ വിജയത്തോടെ സമൂഹ മാധ്യമങ്ങളിൽ ചർച്ചയാണ്. നേരത്തേ 'കുമാരി' എന്ന സിനിമയും ഇവിടെ ഷൂട്ട് ചെയ്തിരുന്നു. പയ്യാവൂർ സ്വദേശി പി.ഉമ്മറിന്‍റെ റബർ തോട്ടത്തിലാണ് ഏകദേശം അരകിലോമീറ്ററോളമുള്ള ഗുഹയുള്ളത്. പ്രകൃതിദത്തമായി രൂപപ്പെട്ട ഗുഹയാണിത്. ശരാശരി അഞ്ചു മുതൽ 15 മീറ്റർ വരെ ഉയരവുമുള്ള ഗുഹയ്ക്ക് ഏകദേശം പത്ത് മീറ്ററാണ് വീതി. ചിലയിടങ്ങളിൽ 15 മീറ്റർ വരെ ഉയരമുള്ള ഗുഹയുടെ ചില ഭാഗങ്ങളിലെ ഉയരം ഒരു മീറ്ററായി ഒതുങ്ങുന്നുമുണ്ട്. ഒരു മീറ്റർ മാത്രമുള്ള സ്ഥലം കൂടി മുട്ടിലിഴഞ്ഞാണ് കടക്കുക. ഇരുട്ട് മൂടിയ ഗുഹയിലൂടെ ഏകദേശം 150 മീറ്റർ ഉള്ളിലേക്ക് നടന്നാൽ മുകളിൽ ഒരുവലിയ ദ്വാരം കാണാം. അതിൽനിന്ന് പ്രകാശം ഉള്ളി ലേക്ക് പതി ക്കുന്നതാണ് ഇവിടുത്തെ ആകർഷമായ കാഴ്ച. ഇൻസ്റ്റഗ്രാം റീലുകളിലും സഞ്ചാരികളുടെ വ്ലോഗിലും കുഞ്ഞിപ്പറമ്പ് ഗുഹ ഇടംപിടിച്ചിട്ടുണ്ട്. ഒരു കല്യാണ ആൽബത്തിലും ഗുഹ താരമായി. സ്ഥലമുടമ വിട്ടുനൽകിയാൽ കവാടത്തിലെ തടസം നീക്കാനും നവീകരിച്ച് ടൂറിസ്റ്റ് കേന്ദ്രമാക്കാനും പയ്യാവൂർ പഞ്ചായത്ത് ആലോചിക്കുന്നുണ്ട്. കുഞ്ഞിപ്പറന്പ് ഗുഹയെ പ്രദേശവാസികൾ മിനി ഗുണ കേവ് എന്നും പേരിട്ട് വിളിക്കുന്നുണ്ട്. കണ്ണൂർ ടൗണിൽ നിന്ന് 46 കിലോമീറ്ററാണ് കുഞ്ഞിപറന്പ് ഗുഹയിലേക്കുള്ള ദൂരം. അപകടം ഒഴിവാക്കാനായി രാത്രി ഗുഹ കാണാൻ വരുന്നവർക്ക് നാട്ടുകാർ നിലവിൽ വിലക്ക് ഏർപ്പെടുത്തിയിരിക്കുകയാണ്.

കാട്ടുപന്നി ഏക്കറു കണക്കിന് കൃഷി നശിപ്പിച്ചു

ഇരിട്ടി: വളോര, വട്ടക്കയം, പന്നിമൂല ഭാഗങ്ങളിൽ കാട്ടുപന്നി ശല്യം രൂക്ഷമായി. പന്നിക്കൂട്ടം നെല്ല്, വാഴ, പച്ചക്കറി, മരച്ചീനി എന്നീ കൃഷികൾ വ്യാപകമായി നശിപ്പിക്കുകയാണ്. വളോരയിലെ പി.കെ. ബിജുവിന്‍റെ രണ്ട് ഏക്കറോളം വരുന്ന നെൽകൃഷിയാണ് പൂർണമായും നശിപ്പിച്ചു. പി.കെ. സജേഷിന്‍റെ മൂന്ന് ഏക്കറിലധികം വരുന്ന പച്ചക്കറി കൃഷി, സുരേഷ്, ബിജു, അനിൽകുമാർ, അസൈനാർ, ഇബ്രാഹിം കുട്ടി, പ്രശാന്തൻ, വിജയൻ, തമ്പാൻ, ഉണ്ണികൃഷ്ണൻ എന്നിവരുടെ കാർഷിക വിളകളും നശിപ്പിച്ചു. കാട്ടുപന്നി ശല്യം രൂക്ഷമായിട്ടും ഇതിനെതിരേ നടപടി ബന്ധപ്പെട്ടവരുടെ ഭാഗത്ത് നിന്ന് ഉണ്ടാവാത്തതിൽ കടുത്ത പ്രതിഷേധമാണ് ഉയരുന്നത്. നഗരസഭയിൽ പന്നികളെ വെടിവച്ച് കൊല്ലാന്് തോക്ക് ലൈസൻസുള്ളവർ ഉണ്ടെങ്കിലും ഇവർക്ക് വേതനം നൽകാനുള്ള സംവിധാനമില്ല, നേരത്തെ രണ്ടു തവണ പന്നികളെ വെടിവെക്കാൻ എത്തിയ ഷൂട്ടർമാരുടെ വേതനവും ഇതുവരെ നൽകിയിട്ടില്ലെന്നും ആക്ഷേപമുണ്ട്.

സൗജന്യ പൊതിച്ചോറ് വിതരണ പദ്ധതി കാരുണ്യ സ്പർശം ഉദ്ഘാടനം ചെയ്തു

കേളകം: കേളകം സെന്‍റ് തോമസ് ഹയർ സെക്കൻഡറി സ്കൂൾ നാഷണൽ സർവീസ് സ്കീമും സ്കൗട്ട് ആൻഡ് ഗൈഡ്സും ചേർന്നു തെറ്റുവഴി കൃപ ഭവനിലേക്ക് സൗജന്യമായി പൊതിച്ചോറ് വിതരണം ചെയ്യുന്ന കാരുണ്യ സ്പർശം പദ്ധതി ആരംഭിച്ചു. കേളകം പഞ്ചായത്ത് അംഗം സുനിത വാത്യാട്ട് ഉദ്ഘാടനം ചെയ്തു. സ്കൂൾ പിടിഎ പ്രസിഡന്‍റ് ജിൽസ് വർഗീസ് അധ്യക്ഷത വഹിച്ചു. സ്കൂൾ പ്രിൻസിപ്പൽ എൻ.ഐ. ഗീവർഗീസ്, സ്റ്റാഫ് സെക്രട്ടറി പി.ജെ. വിജി, സ്കൗട്ട് മാസ്റ്റർ കെ.വി. ബിജു, എൻഎസ്എസ് പ്രോഗ്രാം ഓഫീസർ ബോബി പീറ്റർ, കൃപാഭവൻ പിആർഒ സുനിൽ രാജ് തുടങ്ങിയവർ പ്രസംഗിച്ചു. സ്കൂളിലെ എൻഎസ്എസ് വോളന്‍റിയർമാരും സ്കൗട്ട് ആൻഡ് ഗൈഡ്സ് വിദ്യാർഥികളും ചേർന്ന് നൂറ്റിയമ്പത് പൊതിച്ചോറുകൾ വീതം എല്ലാ വ്യാഴാഴ്ചകളിലും സൗജന്യമായി വിതരണം ചെയ്യുന്ന പദ്ധതിയാണിത്.

റോഡിന്‍റെ ശോച്യാവസ്ഥ: മുട്ടുകുത്തിനിന്ന് പഞ്ചായത്തംഗത്തിന്‍റെ പ്രതിഷേധം

കേളകം: കേളകം- മണത്തണ മലയോര ഹൈവേയുടെ ഇരുവശങ്ങളിലേയും കുഴികൾ നികത്തണമെന്നാവശ്യപ്പെട്ട് റോഡിൽ മുട്ടുകുത്തിനിന്ന് പഞ്ചായത്തംഗത്തിന്‍റെ ഒറ്റയാൾ പ്രതിഷേധം. കേളകം പഞ്ചായത്ത് അംഗം ജോണി പാന്പാടിയാണ് റോഡിൽ മുട്ടുകുത്തി നിന്ന് പ്രതിഷേധിച്ചത്. വാഹനങ്ങൾ സൈഡ് നൽകുമ്പോൾ കുഴിയിൽ വീണ അപകടത്തിൽപ്പെടുന്നത് പതിവാണ്. കുഴിയിൽ വീണ് കാൽനടയാത്രക്കാർക്കും പരിക്കേറ്റിരുന്നു. കേളകം സാൻജോസ് പള്ളിയിൽ പോകുന്നവരും വിദ്യാർഥികളും കടുത്ത ദുരിതമാണ് അനുഭവിക്കുന്നത്. കുടിവെള്ള പൈപ്പിടാനും മറ്റം റോഡരിക് കീറുന്നത് കൃത്യമായ രീതിയിൽ മണ്ണിട്ട് മൂടാത്തതാണ് കുഴികൾ രൂപപ്പെടാൻ കാരണമെന്ന് പ്രദേശവാസികൾ ചൂണ്ടിക്കാട്ടി.

വീട്ടിലേക്ക് വഴി വേണം; കളക്ടറേറ്റിന് മുന്നിൽ നില്പു സമരവുമായി വിധവയായ വീട്ടമ്മ

കണ്ണൂർ: വീട്ടിലേക്കുള്ള വഴി ശരിയാക്കി തരാമെന്ന് പറഞ്ഞു പണം വാങ്ങിയതിന് ശേഷം അയൽവാ സികൾ ചതിച്ചതായി കാണിച്ചു വിധവയായ വയോധിക കണ്ണൂർ കളക്ടറേറ്റിന് മുന്നിൽ നില്പു സമരം നടത്തി. പായം പഞ്ചായത്തിലെ കിളിയന്തറ മുപ്പത്തിരണ്ടാം മൈലിലെ അച്ചാമ്മ ആന്‍റണിയാണ് ഇന്നലെ രാവിലെ മുതൽ കളക്ടറേറ്റിനു മുന്നിൽ ഒറ്റയാൾ നില്പു സമരം നടത്തിയത്. താൻ വാർധ്യക്യ സഹജമായ വിവിധ രോഗങ്ങളാൽ പ്രയാസപ്പെടുകയാണെന്നും മൂന്ന് സെന്‍റ് സ്ഥലത്തുള്ള ചെറിയ വീട്ടിലാണ് താമസിക്കുന്നതെന്നും അവർ പറഞ്ഞു. വീട്ടിലേക്ക് സ്ഥിരമായി നടന്നു പോകുന്ന ഏക വഴി ശരിയാക്കിത്തരാമെന്നു പറഞ്ഞ് അയൽവാസി കളായ മൂന്നുപേർ ചേർന്ന് പണം പിരിക്കുകയും എന്നാൽ അവരുടെ സൗകര്യത്തിനു വേണ്ടി തന്‍റെ വീട്ടിലേക്കുള്ള വഴി അടച്ചു കോൺക്രീറ്റ് ചെയ്തു വഴി മുടക്കുകയുമായിരുന്നു. ഇതോടെ താൻ കുടിവെള്ളം എടുക്കുന്ന അയൽവാസിയുടെ വീട്ടിൽ പോകാൻ പോലും ഇപ്പോൾ ഗോവണി വച്ച് കയറുകയും ഇറങ്ങുകയും ചെയ്യേണ്ട ഗതികേടിലാണെന്നും അവർ പറയുന്നു.ഈ വിഷയം ചൂണ്ടിക്കാട്ടി പായം പഞ്ചായത്ത് പ്രസിഡന്‍റിനും കളക്ടർക്കും പരാതി നല്കിയെങ്കിലും യാതൊരു നടപടിയും സ്വീകരിക്കാത്ത സാഹചര്യത്തിലാണ് ഒറ്റയാൾ സമരവുമായി രംഗത്തിറങ്ങിയതെന്നും അച്ചാമ്മ പറഞ്ഞു.

മുടിക്കയം താഴ്‌വാരത്തെ കുടുംബങ്ങൾ ഭീഷണിയിൽ

ഇരിട്ടി: 2018 ലുണ്ടായ പ്രളയത്തിൽ കച്ചേരികടവ് മുടിക്കയത്ത് മലഞ്ചെരിവിലെ പാറകൾ ഇളകി നീങ്ങിയത് ഏഴു വർഷമായിട്ടും നീക്കാത്തത് താഴ്‌വാരത്തെ കുടുംബങ്ങളുടെ ജീവനും സ്വത്തിനും ഭീഷണിയാകുന്നു. അടുത്തടുത്തായി അടുക്കുപോലെ ചേർന്നുനിന്നിരുന്ന മൂന്ന് കൂറ്റൻ പാറകളിൽ ഒന്നാണ് 2018ലെ പ്രളയത്തിൽ നിരങ്ങി നീങ്ങിയ നിലയിലായത്. പാറയുടെ മുകൾഭാഗം അരയടിയും താഴ്ഭാഗം നേരിയ അകലത്തിലും നിന്നിരുന്ന പാറക്കൂട്ടത്തിൽ നിന്നാണ് ഒരെണ്ണം പ്രളയകാലത്ത് ഇളകി മാറിയത്. മറ്റു രണ്ടു പാറകളിൽ നിന്ന് വേറിട്ട് മുകൾവശത്ത് ഇപ്പോൾ ഏഴടിയുടെയും താഴ്ഭാഗത്ത് നാലടിയുടെയും അകലത്തിലാണ് പാറ. പാറകളുടെ വിടവിലൂടെ ഉറവയും രൂപപ്പെട്ടിട്ടുണ്ട്. നേരത്തെ പ്രദേശവാസികൾ കുടിവെള്ളത്തിനായി ആശ്രയിച്ചിരുന്ന ജലസ്രോതസ് പാറയക്ക് ഇളക്കം തട്ടിയതോടെ അടഞ്ഞു നീരുറവയായി മാറുകയായിരുന്നു.നിരന്തരം വെള്ളമൊഴുകുന്നതിനാൽ മണ്ണിന്‍റെ ബലം കുറഞ്ഞ് പാറ ഏതു സമയത്തും താഴേക്ക് പതിച്ചേക്കാമെന്ന കടുത്ത ആശങ്കയാണ് ഉയരുന്നത്. താഴ്‌വാരത്തെ താമസക്കാരായ എളന്പിലക്കാട് മേരി, ബിജു, സിജു, ബൈജു, ജോണി, ഡാർജി കപ്പിലുമാക്കൽ, ഷിജി കുഴിമറ്റം, ജോസ് കോലാക്കൽ, കുഞ്ഞ് പള്ളിപ്പറമ്പിൽ എന്നീ കുടുംബങ്ങളാണ് ഭീതിയിൽ കഴിയുന്നത്. പാറ ഇളകിയതിനു ശേഷം എല്ലാ മഴക്കാലത്തും അധികൃതർ ഈ കുടുംബങ്ങളെ മാറ്റിപ്പാർക്കുകയാണ് ചെയ്യുന്നത്. സണ്ണി ജോസഫ് എംഎൽഎ അടക്കം കുടുംബങ്ങളുടെ ഭീതി ചൂണ്ടിക്കാട്ടി അധികൃതർക്ക് പരാതി നൽകിയെങ്കിലും നടപടി ഉണ്ടായിട്ടില്ല. സ്ഥലം സന്ദർശിച്ച ‌അധികൃതർ തന്നെ പാറ അപകട ഭീഷണി ഉയർത്തുന്നതാണെന്നും പൊട്ടിച്ചു നീക്കണമെന്നും അഭിപ്രായപ്പട്ടിരുന്നെങ്കിലും നടപടികൾ ഒന്നുമുണ്ടായില്ലെന്ന് അയ്യൻകുന്ന് പഞ്ചായത്ത് പാലത്തും കടവ് അംഗം ബിജോയ് പ്ലാത്തോട്ടം പറഞ്ഞു. സ്ഥലത്തേക്ക് വാഹനങ്ങൾക്ക് എത്തിച്ചേരാൻ സൗകര്യമില്ലാത്തതും സ്ഫോടക വസ്തു ഉപയോഗിച്ച് പൊട്ടിച്ചാൽ ചിതറിത്തെറിച്ച് വീടുകൾക്ക് കേടുപാടുകൾ വരുമെന്നതും പാറ പൊട്ടിക്കലിനെ പ്രതിസന്ധിയിലാക്കുന്ന ഘടകങ്ങളാണ്. ഈ സാഹചര്യത്തിൽ ദുരന്ത നിവാരണ നിയമ പ്രകാരമുള്ള നടപടികൾ സ്വീകരിച്ച് പാറ മുറിച്ചു നീക്കണമെന്നാണ് പ്രദേശവാസികൾ ആവശ്യപ്പെടുന്നത് ജിയോളജി വകുപ്പിനോട് റിപ്പോർട്ട് തേടി കഴിഞ്ഞദിവസം വിവിധ വകുപ്പുകൾ ക്രോഡീകരിച്ചു രൂപീകരിച്ച ഉദ്യോഗസ്ഥ സംഘം അപകട ഭീഷണി ഉയർത്തുന്ന പാറയും പരിസരപ്രദേശവും സന്ദർശിച്ച് സ്ഥിതിഗതികൾ വിലയിരുത്തിയിട്ടുണ്ട്. പാറയുടെ ഭൂമിക്കടിയിലേക്കുള്ള താഴ്ചയും മറ്റ് സുരക്ഷാ സാഹചര്യങ്ങളും പരിശോധിച്ചു റിപ്പോർട്ട് നൽകാൻ ജിയോളജി വിഭാഗത്തെ ചുമതലപ്പെടുത്തിയിരിക്കുകയാണ്. റിപ്പോർട്ട് റിപ്പോർട്ട് ലഭിക്കുന്ന മുറയ്ക്ക് പാന നീക്കം ചെയ്യാനുള്ള നടപടി സ്വീകരിക്കുമെന്ന് ഇരിട്ടി തഹസിൽദാർ സി.വി. പ്രകാശൻ അറിയിച്ചു. "ഇതൊന്ന് മാറ്റിത്തരുമോ’ ഇളകി മാറിയ പാറ ചെറുതായിട്ട് ഒന്ന് അനങ്ങിയാൽ പോലുമുണ്ടാകുന്ന വലിയ അപകട സാധ്യതയുടെ തൊട്ടു കീഴിലാണ് താനും കുടുംബവും താമസിക്കുന്നത്. ഇളകിയ പാറ വീടിന് മുകളിലാണ്. ജീവൻ പണയം വച്ചാണ് ഓരോ നിമിഷവും തള്ളി നീക്കുന്നത്. ഏഴു വർഷമായി ഓരോ മഴക്കാലത്തും എല്ലാ കുടുംബങ്ങളും ഭീതിയോടെയാണ് കഴിയുന്നത്. ഇരുട്ടി വെളുക്കുമ്പോൾ ഞങ്ങളിൽ ആരെല്ലാം അവശേഷിക്കും എന്നതും വലിയ ചോദ്യമാണ്.

കരിങ്കൽകുഴിയിൽ ഓക്സിജൻ സിലിണ്ടർ കയറ്റിവന്ന വാഹനം മറിഞ്ഞ് അപകടം

കൊളച്ചേരി: കരിങ്കൽക്കുഴി-പാടിക്കുന്ന് റോഡിൽ ഓക്സിജൻ സിലിണ്ടർ കയറ്റിവന്ന വാഹനം മറിഞ്ഞ് അപകടം. പറശിനി ഭാഗത്തുനിന്ന് വരികയായിരുന്ന വാഹനം പാടിക്കുന്ന് ഇറക്കത്തിൽ കരിങ്കൽക്കുഴി റോഡിലേക്ക് കയറുന്നതിനിടെയാണ് അപകടമുണ്ടായത്. ബ്രേക്ക് നഷ്ടപ്പെട്ട് നിയന്ത്രണം വിട്ട വാഹനം റോഡരികിലെ വൈദ്യുത തൂണിലിടിച്ച് മറിയുകയായിരുന്നു. ഇന്നലെ ഉച്ചയ്ക്ക് 12 ഓടെയായിരുന്നു അപകടം. വാഹനത്തിലുണ്ടായിരുന്ന സിലിണ്ടറുകൾ റോഡിലേക്ക് ചിതറിവീണു. അപകടസമയത്ത് സമീപത്ത് ചെറിയ വാഹനങ്ങളും യാത്രക്കാരും ഇല്ലാത്തിരുന്നതിനാൽ വൻ അപകടം ഒഴിവായി. വാഹനത്തിലുണ്ടായിരുന്ന ഡ്രൈവറും ഒപ്പമുണ്ടായിരുന്നയാളും പരിക്കേൽക്കാതെ രക്ഷപ്പെട്ടു.

ഹയര്‍ സെക്കന്‍ഡറി തുല്യതാ പരീക്ഷ: മികച്ച നേട്ടവുമായി ജില്ല; മട്ടന്നൂരില്‍ 100 മേനി

കണ്ണൂർ: സംസ്ഥാന സാക്ഷരത മിഷന്‍ ഹയര്‍ സെക്കന്‍ഡറി തുല്യത പരീക്ഷയില്‍ 83.42 ശതമാനം വിജയവുമായി ജില്ലയ്ക്ക് മികച്ച നേട്ടം. നൂറുശതമാനം വിജയം കൈവരിച്ച് മട്ടന്നൂര്‍ പഠനകേന്ദ്രം ജില്ലയില്‍ ഒന്നാമതെത്തി. കണ്ണൂര്‍ മുന്‍സിപ്പല്‍ ഹയര്‍ സെക്കന്‍ഡറി പഠനകേന്ദ്രത്തിലെ രഹന കക്കറയില്‍ എല്ലാ വിഷയത്തിലും എ പ്ലസ് നേടി. ജില്ലയില്‍ 923 പേര്‍ പരീക്ഷ എഴുതിയതില്‍ 770 പേര്‍ വിജയിച്ചു. പട്ടികവര്‍ഗ വിഭാഗത്തില്‍പ്പെട്ട 25 പേരും പട്ടികജാതി വിഭാഗത്തില്‍പ്പെട്ട 34 പേരും വിജയിച്ചു. 71 വയസുള്ള കണ്ണൂര്‍ കോര്‍പറേഷനിലെ പി. ഓമനയാണ് ഏറ്റവും പ്രായമുള്ള പഠിതാവ്. ഇരിട്ടി കീഴൂര്‍ പഠന കേന്ദ്രം 53, കൂത്തുപറമ്പ് ഹയര്‍ സെക്കന്‍ഡറി സ്‌കൂള്‍- 57, മാത്തില്‍ ഹയര്‍ സെക്കന്‍ഡറി സ്‌കൂള്‍ -25, പേരാവൂര്‍-64, ഇരിക്കൂര്‍ -41, മട്ടന്നൂര്‍ - 45, കണിയന്‍ചാല്‍ - 36, പാനൂര്‍ - 40, പള്ളിക്കുന്ന് -49, തളിപ്പറമ്പ്- 67, മാടായി -82, തലശേരി ബ്രണ്ണന്‍ ഹയര്‍ സെക്കന്‍ഡറി സ്‌കൂള്‍ -59, കണ്ണൂര്‍ മുന്‍സിപ്പല്‍ ഹയര്‍ സെക്കന്‍ഡറി സ്‌കൂള്‍ -72, തലശേരി ഗേള്‍സ് ഹയര്‍ സെക്കന്‍ഡറി സ്‌കൂള്‍- 24, മൗവ്വഞ്ചേരി-30, സിഎച്ച്എം ഹയര്‍ സെക്കന്‍ഡറി സ്‌കൂള്‍ എളയാവൂര്‍ -26 എന്നിങ്ങനെ യാണ് വിവിധ പഠനകേന്ദ്രങ്ങളിലെ വിജയികളുടെ എണ്ണം. വിജയികളില്‍ നഗരസഭാധ്യക്ഷ‌ ഉൾപ്പെടെ എട്ട് ജനപ്രതിനിധികളും കണ്ണൂർ: ഹയര്‍ സെക്കഡറി തുല്യത പരീക്ഷയില്‍ മികച്ച വിജയം നേടി ജില്ലയിലെ വിവിധ തദ്ദേശസ്ഥാപന മേധാവികളും ജനപ്രതിനിധികളുമടക്കം എട്ടുപേർ. ഇരിട്ടി മുനിസിപ്പൽ ചെയര്‍പേഴ്‌സണ്‍ കെ. ശ്രീലത, പിണറായി പഞ്ചായത്ത് പ്രസിഡന്‍റ് കെ.കെ.രാജീവൻ, ഇരിട്ടി മുനിസിപ്പൽ സ്റ്റാൻഡിംഗ് കമ്മിറ്റി ചെയർപേഴ്സൺ സോയ കാരായി, പാനൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് ടി.ടി. റംല, , ചിറ്റാരിപ്പറമ്പ് ഗ്രാമപഞ്ചായത്ത് വൈസ് പ്രസിഡന്‍റ് എം.സിജ, പാനൂര്‍ മുനിസിപ്പല്‍ കൗണ്‍സിലര്‍ കെ.നസീല, തളിപ്പറമ്പ് മുനിസിപ്പല്‍ കൗണ്‍സിലര്‍ എ.പി.സജീറ, പടിയൂര്‍ ഗ്രാമപഞ്ചായത്ത് അംഗം കെ.സുനിത എന്നിവരാണ് മികച്ച വിജയം നേടിയ ജനപ്രതിനിധികൾ. ഇരിക്കൂര്‍ പഞ്ചായത്ത് സിഡിഎസ് ചെയർപേഴ്സൺ ടി.പി. ജുനൈദും തുല്യതാ പരീക്ഷയില്‍ മികച്ച വിജയം നേടി.

വെള്ളക്കെട്ട് ദുരിതമാകുന്നു

മടമ്പം: തളിപ്പറമ്പ് ശ്രീകണ്ഠപുരം ഇരിക്കൂർ സംസ്ഥാനപാതയിൽ തൃക്കടമ്പിൽ റോഡരികിലെ വെള്ളക്കെട്ട് കാൽനടയാത്രക്കാർക്കും വാഹനങ്ങൾക്കും ദുരിതമാവുന്നു. തൃക്കടമ്പ് മിൽമ ബസ് സ്റ്റോപ്പിന് സമീപമാണ് വെള്ളക്കെട്ട് രൂപപ്പെട്ടത്. വെള്ളക്കെട്ടുള്ള ഭാഗത്തു കൂടെ നടന്നു പോകുന്നവർക്ക് വാഹനങ്ങൾ കടന്നു വരുന്പോൾ മാറി നിൽക്കാൻ പോലും സ്ഥലമില്ല. ഇരുവശങ്ങളിൽ നിന്ന് വാഹനങ്ങൾ കടന്നു വരുന്പോൾ ഒരു ഭാഗത്തെ വാഹനം വെള്ളക്കെട്ടിലേക്ക് ഇറക്കേണ്ട അവസ്ഥയുമുണ്ട്. ആഴ്ചകൾക്ക് മുന്പ് വൈദ്യുത കേബിൾ ഇടാൻ റോഡ് വെട്ടിക്കീറിയപ്പോൾ വാട്ടർ അഥോറിറ്റിയുടെ പൈപ്പ് പൊട്ടിയതാണോ വെള്ളക്കെട്ടിന് കാരണമെന്ന് സംശയിക്കുന്നു. വെള്ളക്കെട്ട് ഒഴിവാക്കാൻ ബന്ധപ്പെട്ടവർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

പീപ്പിള്‍സ് മിഷന്‍ പുസ്തകവണ്ടിയെ സ്വീകരിച്ചു

കണ്ണൂർ: എല്ലാ വാര്‍ഡിലും വായനശാല എന്ന ലക്ഷ്യവുമായി പ്രവര്‍ത്തിക്കുന്ന പീപ്പിള്‍സ് മിഷന് പ്രസാധകരായ പാന്‍ മക്മില്ലന്‍ സംഭാവന ചെയ്ത പുസ്തകങ്ങളുടെ ശേഖരം കണ്ണൂരിലെത്തി. ജില്ലയി ലുടനീളമുള്ള പൊതു, കമ്യൂണിറ്റി ലൈബ്രറികള്‍ക്കായി വരുംദിവസങ്ങളില്‍ ഈ പുസ്തകങ്ങള്‍ വിതരണം ചെയ്യും. ജില്ലയില്‍ പുതിയതായി തുടങ്ങുന്ന എല്ലാ വായശാലകള്‍ക്കും പതിനായിരം മുതല്‍ 25,000 രൂപ വരെ വിലവരുന്ന പുസ്തകങ്ങളാണ് മിഷന്‍ നല്കുന്നത്. വായനശാലയുടെ ഔപചാരിക ഉദ്ഘാടനം നടത്തിയതിന്‍റെ നോട്ടീസ് സഹിതം മിഷന്‍ ഓഫീസില്‍ പുസ്തകത്തിനായി അപേക്ഷി ക്കണം. ഡല്‍ഹിയില്‍ നിന്ന് അയച്ച പുസ്തകങ്ങള്‍ വ്യാഴാഴ്ച്ച രാവിലെയോടെയാണ് കണ്ണൂരിലെത്തിയത്. ഡോ. വി. ശിവദാസന്‍ എംപി, കണ്ണൂര്‍ ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി, വൈസ് പ്രസിഡന്‍റ് ബിനോയ് കുര്യന്‍, സംസ്ഥാന യുവജന കമ്മീഷന്‍ ചെയര്‍മന്‍ എം. ഷാജര്‍, കെ.കെ. പവിത്രന്‍, ശ്രീജിത്ത് എന്നിവര്‍ ചേര്‍ന്ന് പുസ്തകങ്ങള്‍ ഏറ്റുവാങ്ങി. എല്ലാ വാര്‍ഡിലും വായനശാലകളെന്ന സംരംഭത്തിന് പിന്തുണയായി പുസ്തകകെട്ടുകള്‍ സൗജന്യമായി ചുമട്ടു തൊഴിലാളികള്‍ ഇറക്കികൊടുത്തു. കണ്ണൂര്‍ ജില്ലയുടെ സമ്പൂര്‍ണ വായനശാല പ്രഖ്യാപനത്തിനുള്ള സംഘാടക സമിതിയോഗം 27ന് വൈകുന്നേരം ജില്ലാ പഞ്ചായത്ത് ഹാളില്‍ ചേരും. ഒ ക്ടോബര്‍ രണ്ടിന് പി. സായ്‌നാഥ് ജില്ലയിലെ വായനശാലകളിലൂടെ യാത്രയും സംഘടിപ്പിക്കുന്നുണ്ട്.

മാത്തിൽ ഗുരുദേവ് കോളജിൽ റിസേർച്ചേഴ്‌സ് അക്കാഡമി ഉദ്ഘാടനവും എക്സലൻസ് പുരസ്കാര സമർപ്പണവും നടത്തി

ചെറുപുഴ: മാത്തിൽ ഗുരുദേവ് കോളജിൽ ഗ്ലോബൽ യംഗ് റിസേർച്ചേഴ്‌സ് അക്കാഡമി ഉദ്ഘാടനവും അക്കാഡമിക് എക്സെലൻസ് അവാർഡ് ദാനവും നടന്നു. കോളജിലെ 2024-25 അധ്യയന വർഷത്തെ മികച്ച വിദ്യാർഥികൾക്കുള്ള അക്കാഡമിക് എക്സെലൻസ് അവാർഡ് ദാനമാണ് നടത്തിയത്. ബത്തേരി ബിഷപ് ജോസഫ് മാർ തോമസ് ഉദ്ഘാടനം നിർവഹിച്ചു. മികച്ച വിദ്യാർഥികൾക്കുള്ള ഉപഹാരങ്ങളും കോളജ് രക്ഷാധികാരികൂടിയായ ബിഷപ് സമ്മാനിച്ചു. കോളജ് പ്രിൻസിപ്പൽ റവ. ഡോ. സാമുവൽ പുതുപ്പാടി അധ്യക്ഷത വഹിച്ചു. കാങ്കോൽ ആലപ്പടമ്പ് പഞ്ചായത്ത്‌ പ്രസിഡന്‍റ് എം.വി. സുനിൽകുമാർ മുഖ്യപ്രഭാഷണവും കോളജ് ചീഫ് ബർസാർ റവ. ഡോ. വർഗീസ് താന്നിക്കാക്കുഴി അനുഗ്രഹ പ്രഭാഷണവും നടത്തി. റിസർച്ച് ആൻഡ് ഇന്നൊവേഷൻ എന്ന വിഷയത്തിൽ അമേരിക്ക ആസ്ഥാനമായി പ്രവർത്തിക്കുന്ന ഗ്ലോബൽ യംഗ് റിസർച്ച് അക്കാഡമിയിലെ ശാസ്ത്രഞ്ജൻ ഡോ. വിപിൻ ദേവ് ആദത് പ്രഭാഷണം നടത്തി. നാലുവർഷ ബിരുദ പ്രോഗ്രാമുകളുടെ ഗവേഷണ സാധ്യതകളെക്കുറിച്ച് അദ്ദേഹം ക്ലാസെടുത്തു. കോളജ് വൈസ് പ്രിൻസിപ്പൽ പി.വിനോദ് കുമാർ, കരിയർ പ്ലേസ്മെന്‍റ് ഓഫീസർ കെ.വി. ചന്ദ്രശേഖരൻ, കോളജ് കോ-ഓർഡിനേറ്റർ എ. മൃദുല, ഐക്യൂഎസി കോ-ഓർഡിനേറ്റർ സി.കെ.സൗമ്യ, എഫ് വൈയുജിപി കോ-ഓർഡിനേറ്റർ കെ. സുമേഷ്, സ്റ്റാഫ്‌ സെക്രട്ടറി കെ.യു. സന്തോഷ്‌ എന്നിവർ പ്രസംഗിച്ചു.

കാണാതായ വയോധികയുടെ മൃതദേഹം ആറളം പുഴയിൽ കണ്ടെത്തി

ആറളം: കാണാതായ വയോധികയുടെ മൃതദേഹം ആറളം പുഴയിൽ കണ്ടെത്തി. ആറളം പറമ്പത്തെ കണ്ടിയിലെ പുത്തൻവീട്ടിൽ മാധവിയമ്മയുടെ (85) മൃതദേഹമാണ് ആറളം പാലത്തിന് സമീപം കണ്ടെത്തിയത്. മാധവിയമ്മയെ കഴിഞ്ഞദിവസം വൈകുന്നേരം മുതൽ കാണാതാകുകയായിരുന്നു. ബന്ധുക്കളും നാട്ടുകാരും ചേർന്ന് വിവിധയിടങ്ങളിൽ തെരച്ചിൽ നടത്തിയിരുന്നു. പുഴയിൽ ഉണ്ടോയെന്ന് തിരച്ചിൽ നടത്തുന്നതിനിടയിലാണ് ആറളം റെസ്ക്യൂ ടീം ആറളം പാലത്തിനു സമീപത്തായി മൃതദേഹം കണ്ടെത്തുന്നത്. ഭർത്താവ്: പരേതനായ നാരായണൻ. മക്കൾ: മോഹനൻ, ബാബു, ശാന്ത, പുഷ്പവല്ലി, ബിന്ദു.

ചട്ടിവയൽ സ്നേഹഭവൻ സിൽവർ ജൂബിലി ആഘോഷം സമാപിച്ചു

തിരുമേനി: ചട്ടിവയൽ സ്നേഹഭവൻ വൃദ്ധസദനത്തിന്‍റെ സിൽവർ ജൂബിലി സമാപന സമ്മേളനവും സിസ്റ്റർ കീർത്തനയുടെ ഗോൾഡൻ ജൂബിലിയും സംയുക്തമായി ആഘോഷിച്ചു. ടി.ഐ. മധുസൂദനൻ എംഎൽഎ ഉദ്ഘാടനം ചെയ്തു. ഫാ. ജോർജ് നെല്ലുവേലി അധ്യക്ഷത വഹിച്ചു. ചെറുപുഴ സെന്‍റ് മേരീസ് ഫൊറോന പള്ളി വികാരി ഫാ. ഫിലിപ്പ് ഇരുപ്പക്കാട്ട്, തിരുമേനി സെന്‍റ് ആന്‍റണീസ് പള്ളി വികാരി ഫാ. ജോർജ് എളൂക്കുന്നേൽ, താബോർ സെന്‍റ് ജോസഫ്സ് പള്ളി വികാരി ഫാ. തോമസ് പൂവൻപുഴ, ഫാ. ജസ്റ്റിൻ വട്ടക്കുന്നേൽ, ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ, പഞ്ചായത്തംഗം കെ.കെ. ജോയി, സിസ്റ്റർ റോസ് മാത്യു, സിസ്റ്റർ ജൂലിയ എസ്എംഎസ്, സിസ്റ്റർ റോസി എന്നിവർ പ്രസംഗിച്ചു.

അധ്യാപകദിനാഘോഷം നടത്തി

വായാട്ടുപറമ്പ്: വായാട്ടുപറമ്പ് സെന്‍റ് ജോസഫ്സ് യുപി സ്കൂളിൽ അധ്യാപക ദിനം മുഖ്യമന്ത്രിയുടെ പോലീസ് മെഡൽ ജേതാവ് ആലക്കോട് പോലീസ് സ്റ്റേഷനിലെ സബ് ഇൻസ്പെക്ടർ പി. രവീന്ദ്രൻ ഉദ്ഘാടനം ചെയ്തു. സ്കൂൾ അസിസ്റ്റന്‍റ് മാനേജർ ഫാ. നോയൽ ആനിക്കുഴിക്കാട്ട് അധ്യക്ഷത വഹിച്ചു. മുഖ്യാധ്യാപകൻ ബെന്നി മാത്യു, സ്റ്റാഫ് പ്രതിനിധി ഫാ. റിമൽ ചെമ്പനാനിക്കൽ, പിടിഎ പ്രസിഡന്‍റ് അജേഷ് എന്നിവ പ്രസംഗിച്ചു. അധ്യാപക ദിനാചരണത്തോടനുബന്ധിച്ച് കുട്ടികളുടെയും അധ്യാപകരുടെയും വിവിധ കലാപരിപാടികൾ അരങ്ങേറി. ചെമ്പേരി: നിർമല ഹയർ സെക്കൻഡറി സ്കൂളിൽ അധ്യാപക ദിനം ആചരിച്ചു. റോവർ റേഞ്ചർ, എൻഎസ്എസ് വിദ്യാർഥികളുടെ നേതൃത്വത്തിൽ പൂച്ചെടികൾ നൽകി അധ്യാപകരെ ആദരിച്ചു. സ്കൂൾ പ്രിൻസിപ്പൽ സി.ഡി.സജീവ്, സീനിയർ അസിസ്റ്റന്‍റ് കെ.എം. ആഗ്നസ്, സ്റ്റാഫ് സെക്രട്ടറി സി.എം. ജോൺസൺ, ഫാ. ബിജു ജോൺ, സ്കൂൾ ചെയർപേഴ്സൺ ആൻ ഗ്രെയ്സ് അനീഷ്, റോവർ റേഞ്ചർ സ്റ്റുഡന്‍റ്സ് ലീഡർമാരായ ഋതുൽ ജോസഫ് ഷാജി, അബി അനീഷ്, റോസ് ബിജു, ദേവനന്ദ ബിജു, എൻഎസ്എസ് ലീഡർമാരായ സത്യജിത്ത്, റോസ് മരിയ എന്നിവർ പ്രസംഗിച്ചു. എൻഎസ്എസ് പ്രോഗ്രാം ഓഫീസർ ഷിജോ ആന്‍റണി, റോവർ റേഞ്ചർ ലീഡർമാരായ ട്വിങ്കിൾ ജേക്കബ്, ജെറിൻ ജോസ് എന്നിവർ നേതൃത്വം നൽകി. മധുരപലഹാരങ്ങളും വിതരണം ചെയ്തു.

തളിപ്പറന്പ് നഗരസഭാ സെക്രട്ടറിയെ കോൺഗ്രസ് ഉപരോധിച്ചു

തളിപ്പറമ്പ്: വോട്ടർ പട്ടികയിൽ ക്രമക്കേട് നടത്തുന്നതിന് മുനിസിപ്പൽ ഓഫീസ് ജീവനക്കാർ കൂട്ടു നിൽക്കുന്നവെന്ന് ആരോപിച്ച് കോൺഗ്രസ് പ്രവർത്തകർ തളിപ്പറന്പ് നഗരസഭാ സെക്രട്ടറി സുബൈറിനെ ഓഫീസിൽ ഉപരോധിച്ചു. ഇന്നലെ ഉച്ചയോടെയായിരുന്നു സംഭവം. ഉപരോധത്തെ തുടർന്ന് പ്രവർത്തകരും മുനിസിപ്പൽ ജീവനക്കാരും തമ്മിൽ വാക്കേറ്റമുണ്ടായി. രജനി രമാനന്ദ്, രാഹുൽ വെച്ചിയോട്ട്, ഇർഷാദ് സൈദാരകത്ത് എന്നിവരുടെ നേതൃത്വത്തിലായിരുന്നു ഉപരോധം. വോട്ടർ പട്ടിക സംബന്ധിച്ച പരാതികൾ ഉണ്ടെങ്കിൽ ബന്ധപ്പെട്ട കേന്ദ്രത്തിൽ സമർപ്പിക്കുകയാണ് വേണ്ടതെന്ന് സെക്രട്ടറി സമരക്കാരെ അറിയിച്ചു. ഏറെ നേരെ ഓഫീസിൽ കുത്തിയിരിപ്പ് സമരം നടത്തിയ പ്രവർത്തകർ പിന്നീട് സമരം മതിയാക്കി മടങ്ങുകയായിരുന്നു.

കുടുംബശ്രീ നാനോ ഫിഷ് കിയോസ്ക് തുടങ്ങി

ശ്രീകണ്ഠപുരം: നഗരസഭാ കുടുംബശ്രീ സംരംഭമായ നാനോ ഫിഷ് കിയോസ്ക് കോട്ടൂർ പെട്രോൾ പമ്പിനു സമീപം നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. കുടുംബശ്രീ സിഡിഎസ് ചെയർപേഴ്സൺ എ. ഓമന അധ്യക്ഷത വഹിച്ചു. നഗരസഭയുടെ വിവിധ സ്ഥലങ്ങളിലായി പ്രവർത്തിക്കുന്ന കുടുംബശ്രീയുടെ സംരംഭങ്ങളിൽ മീൻ വിപണനം ആദ്യമായാണ് ആരംഭിക്കുന്നത്. വൈസ് ചെയർമാൻ കെ. ശിവദാസൻ, നഗരസഭ സ്ഥിരം സമിതി അധ്യക്ഷന്മാരായ ജോസഫീന വർഗീസ്, കെ.സി. ജോസഫ്, ത്രേസ്യാമ്മ മാത്യു, കൗൺസിലർമാരായ കെ.വി. ഗീത, കെ.ഒ. പ്രദീപൻ, കെ.ടി. ലീല, സെക്രട്ടറി ടി.വി. നാരായണൻ, ഹെൽത്ത് ഇൻസ്പെക്ടർ വി. പ്രേമരാജൻ, സിഡിഎസ് വൈസ് ചെയർപേഴ്സൺ ടി.പി. രജിത, സിറ്റി മിഷൻ മാനേജർ പി.പി. സുലൈമാൻ, ശശിധരൻ തുടങ്ങിയവർ പ്രസംഗിച്ചു.

സ്പോർട്സ് ക്ലബുകൾക്ക് കിറ്റ് നൽകി

കാർത്തികപുരം: ഉദയഗിരി പഞ്ചായത്തിലെ സ്പോർട്സ് ക്ലബുകൾക്ക് ഓണ സമ്മാനമായി സ്പോർട്സ് കിറ്റുകൾ വിതരണം ചെയ്തു. വിതരണോദ്ഘാടനം പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ നിർവഹിച്ചു. ബിന്ദു ഷാജു ഏറത്തേൽ അധ്യക്ഷത വഹിച്ചു. എം.എൻ. ബിന്ദു, സൂര്യ പ്രകാശ്, ജുബി ജോസഫ്‌ ,പി.എസ്.ഷിജു, പി.ആർ.രഞ്ജിത്, എം.സി. ജനാർദനൻ ,എം.കെ . മനു എന്നിവർ പ്രസംഗിച്ചു.

കോൺഗ്രസ് പോലീസ് സ്റ്റേഷനു മുന്നിൽ ജനകീയ പ്രതിഷേധ സദസ് സംഘടിപ്പിച്ചു

കണ്ണൂർ: ഒന്പത് വർഷം കൊണ്ടുള്ള ഭരണം കൊണ്ട് മുഖ്യമന്ത്രി പിണറായി വിജയനും സിപിഎമ്മും പോലീസ് സേനയെ പാർട്ടിയുടെ ക്രിമിനൽ സംഘങ്ങളാക്കി മാറ്റിയെന്ന് ഡിസിസി പ്രസിഡന്‍റ് മാർട്ടിൻ ജോർജ്. കുന്നംകുളത്ത് യൂത്ത് കോൺഗ്രസ് നേതാവ് സുജിത്തിനെ അതിക്രൂരമായി മർദിച്ച പോലീസ് ഉദ്യോഗസ്ഥരെ സർവീസിൽ നിന്ന് പിരിച്ചു വിടണമെന്ന് ആവശ്യപ്പെട്ട് ജില്ലയിലെ പോലീസ് സ്റ്റേഷനുകളുടെ മുന്നിൽ കോൺഗ്രസ് നടത്തിയ പ്രതിഷേധ സദസിന്‍റെ ജില്ലാതല ഉദ്ഘാടം കണ്ണൂർ ടൗൺ സ്റ്റേഷനു മുന്നിൽ നിർവഹിച്ചു പ്രസംഗിക്കുകയായിരുന്നു അദ്ദേഹം. തികച്ചും മനുഷ്യത്വരഹിതമായാണ് പോലീസ് പെരുമാറുന്നത്. പിണറായി വിജയൻ ആഭ്യന്തര വകുപ്പ് കൈകാര്യം ചെയ്യാൻ തുടങ്ങിയതിൽ പിന്നെ 17 ഓളം കസ്റ്റഡി മരണങ്ങളാണ് സംഭവിച്ചത്. കാക്കിയിട്ട് എന്ത് തെമ്മാടിത്തവും ചെയ്യാമെന്നതിന് പ്രോത്സാഹനം നൽകുന്ന രീതിയിലാണ് ആഭ്യന്തര വകുപ്പ് പ്രമോഷനും സ്ഥലം മാറ്റവും നൽകുന്നത്. പൊതുജനങ്ങൾക്ക് നിർഭയം എപ്പോഴും കടന്നു ചെല്ലാവുന്ന ജനമൈത്രി പോലീസ് സ്റ്റേഷനുകൾ പോലും മൃഗീയ മർദന കേന്ദ്രങ്ങളാക്കി മാറ്റി. പാർട്ടിക്കു വേണ്ടി ക്വട്ടേഷൻ ഏറ്റെടുത്തു നടത്തുന്ന തരത്തിൽ പോലീസ് മാറിയന്നും മാർട്ടിൻ ജോർജ് ആരോപിച്ചു. പി. അനൂപ് അധ്യക്ഷത വഹിച്ചു. ഡെപ്യൂട്ടി മേയർ പി. ഇന്ദിര, കോർപറേഷൻ സ്റ്റാൻഡിംഗ് കമ്മിറ്റി ചെയർപേഴ്സൺമാരായ സുരേഷ് ബാബു എളയാവൂർ, എംപി. രാജേഷ്, മണ്ഡലം പ്രസിഡന്‍റുമാരായ പ്രദീപൻ, റഫീഖ്, രഞ്ജിത്ത്, നേതാക്കളായ പി.വി. പുരുഷോത്തമൻ, രാഹുൽ കായക്കൂൽ, ഫർഹാൻ മുണ്ടേരി, ലക്ഷ്മണൻ തുണ്ടിക്കോത്ത് എന്നിവർ പ്രസംഗിച്ചു. ആലക്കോട്: ആലക്കോട്, ഉദയഗിരി, തേർത്തല്ലി, കരുവഞ്ചാൽ മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ ആലക്കോട് പോലീസ് സ്റ്റേഷനു മുന്നിൽ ജനകീയ പ്രതിഷേധ സദസ് സംഘടിപ്പിച്ചു. ആലക്കോട് ടൗണിൽ നിന്നു നൂറുകണക്കിന് കോൺഗ്രസ് പ്രവർത്തകർ പ്രകടനമായി അരങ്ങത്തെ പോലീസ് സ്റ്റേഷനിലേക്ക് മാർച്ച് നടത്തി. യുഡിഎഫ് ജില്ലാ ചെയർമാൻ പി.ടി. മാത്യു ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് ജോസ് വട്ടമല അധ്യക്ഷത വഹിച്ചു. ഡിസിസി സെക്രട്ടറി തോമസ് വെക്കത്താനം, മണ്ഡലം കോൺഗ്രസ് കമ്മിറ്റി പ്രസിഡന്‍റുമാരായ ബാബു പള്ളിപ്പുറം, ജോയിച്ചൻ പള്ളിയാലിയിൽ, പഞ്ചായത്ത് പ്രസിഡന്‍റ് ജോജി കന്നിക്കാട്ട് തുടങ്ങിയവർ പ്രസംഗിച്ചു. ചെറുപുഴ: ചെറുപുഴ പോലീസ് സ്റ്റേഷനു മുന്നിൽ സംഘടിപ്പിച്ച പ്രതിഷേധ സദസ് ചെറുപുഴ ബ്ലോക്ക് കോൺഗ്രസ് പ്രസിഡന്‍റ് മഹേഷ് കുന്നുമ്മൽ ഉദ്ഘാടനം ചെയ്തു. മണ്ഡലം പ്രസിഡന്‍റ് ടി.പി. ചന്ദ്രൻ അധ്യക്ഷത വഹിച്ചു. ഇരിട്ടി: ഉളിക്കൽ, നുച്യാട് മണ്ഡലം കോൺഗ്രസ് കമ്മറ്റികളുടെ നേതൃത്വത്തിൽ ഉളിക്കൽ പോലീസ് സ്റ്റേഷന് മുമ്പിൽ സംഘടിപ്പിച്ച ജനകീയ പ്രതിഷേധ സദസ് സജീവ് ജോസഫ്എംഎൽഎ ഉദ്ഘാടനം ചെയ്തു. ഉളിക്കൽ മണ്ഡലം പ്രസിഡന്‍റ് ടോമി മുക്നോലിക്കലി അധ്യക്ഷത വഹിച്ചു. ഇരിക്കൂർ: ഇരിക്കൂർ,പടിയൂർ കല്യാട് മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ ഇരിക്കൂർ പോലീസ് സ്റ്റേഷനിലേക്ക് നടത്തിയ മാർച്ചും ധർണയും ഡിസിസി ജനറൽ സെക്രട്ടറി ജോഷി കണ്ടത്തിൽ ഉദ്ഘാടനം ചെയ്തു. ഇരിക്കൂർ മണ്ഡലം പ്രസിഡന്‍റ് കെ.കെ. ഷഫീഖ് അധ്യക്ഷത വഹിച്ചു. തളിപ്പറമ്പ്: തളിപ്പറന്പ് പോലീസ് സ്റ്റേഷനിലേക്ക് നടത്തിയ മാർച്ചും പ്രതിഷേധ കൂട്ടായ്മയും കെപിസിസി ജനറൽ സെക്രട്ടറി സോണി സെബാസ്റ്റ്യൻ ഉദ്ഘാടനം ചെയ്തു. എം.എൻ. പൂമംഗലം അധ്യക്ഷത വഹിച്ചു. പെരിങ്ങേം: പെരിങ്ങോം, വയക്കര മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ പെരിങ്ങോം പോലീസ് സ്റ്റേഷന് മുന്നിൽ ജനകീയ പ്രതിഷേധ സദസ് സംഘടിപ്പിച്ചു. ഡിസിസി ജനറൽ സെക്രട്ടറി റഷീദ് കവ്വായി ഉദ്ഘാടനം ചെയ്തു. പെരിങ്ങോം മണ്ഡലം പ്രസിഡന്‍റ് എ.കെ. രാജൻ അധ്യക്ഷത വഹിച്ചു. പയ്യാവൂർ: പയ്യാവൂർ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ പയ്യാവൂർ പോലീസ് സ്റ്റേഷനു മുന്നിൽ ജനകീയ പ്രതിഷേധ സദസും നടത്തി. സജീവ് ജോസഫ് എംഎൽഎ ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ഇ.കെ. കുര്യൻ അധ്യക്ഷത വഹിച്ചു. ഇരിക്കൂർ ബ്ലോക്ക് പഞ്ചായത്ത് മെംബർ പി.ആർ.രാഘവൻ, കോൺഗ്രസ് ബ്ലോക്ക് ജനറൽ സെക്രട്ടറിമാരായ കെ.വി.ഫ്രാൻസിസ്, ബേബി മുല്ലക്കരി തുടങ്ങിയവർ പ്രസംഗിച്ചു.

സൂപ്പര്‍ ലീഗ് കേരള: കണ്ണൂര്‍ വാരിയേഴ്‌സ് പരിശീലനം തുടങ്ങി

കണ്ണൂര്‍: സൂപ്പര്‍ ലീഗ് കേരളയുടെ ആദ്യ സീസണില്‍ സെമി ഫൈനലില്‍ കാലിടറിയ കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബ് ഇത്തവണ കിരീടം ലക്ഷ്യമിട്ട് പരിശീലനമാരംഭിച്ചു. സെപ്റ്റംബര്‍ ഒന്നു മുതല്‍ കണ്ണൂര്‍ പോലീസ് പരേഡ് ഗ്രൗണ്ടില്‍ മുഖ്യപരിശീലകന്‍ സ്‌പെയിനില്‍ നിന്നുള്ള മനോലോ സാഞ്ചസിന്‍റം നിര്‍ദേശാനുസരണം സഹപരിശീലകന്‍ ഷഫീഖ് ഹസന്‍റെ നേതൃത്വത്തിലാണ് പരിശീലനം നടക്കുന്നത്. കഴിഞ്ഞ സീസണിലും ഇരുവരും ഒന്നിച്ചായിരുന്നു പ്രവർത്തിച്ചത്. മുഖ്യപരിശീലകനും വിദേശ താരങ്ങളും വരും ദിവസങ്ങളില്‍ ടീമിനൊപ്പം ചേരും. ആദ്യ സീസണില്‍ ടീമിനായി തിളങ്ങിയ അസിയര്‍ ഗോമസ്, ലവ്‌സാംബ, അഡ്രിയാന്‍ സര്‍ഡിനേറോ എന്നിവര്‍ക്ക് പുറമെ ഫോര്‍സാ കൊച്ചിയില്‍ മിന്നും പ്രകടനം കാഴ്ചവച്ച നിദാല്‍ സൈയ്ദുമാണ് നിലവില്‍ കണ്ണൂര്‍ വാരിയേഴ്‌സിലെത്തിയ വിദേശ താരങ്ങള്‍. കൂടാതെ സെന്‍റർ ബാക്ക്, സ്‌ട്രൈക്കര്‍ പൊസിഷനിലേക്ക് പുതിയ വിദേശ താരങ്ങളുമെത്തും. ഇവരുടെ പേരുവിവരങ്ങള്‍ ഇതുവരെ പുറത്തുവിട്ടിട്ടില്ല. നിലവില്‍ കണ്ണൂര്‍ വാരിയേഴ്‌സിന്‍റെ എല്ലാ ഇന്ത്യന്‍ താരങ്ങളും ടീമിനൊപ്പമുണ്ട്. കൂടാതെ ഗെയിം ചേഞ്ചര്‍ ത്രിദിന പരിശീലന പരിപാടിയില്‍ നിന്ന് തെരഞ്ഞെടുത്ത പത്ത് താരങ്ങളും പരിശീലനത്തിലുണ്ട്. അവസാനഘട്ടത്തില്‍ ടീം 25 പേരായി ചുരുങ്ങും. ഒക്ടോബര്‍ ആദ്യവാരം മത്സരങ്ങള്‍ ആരംഭിക്കും. കണ്ണൂര്‍ വാരിയേഴ്‌സിന്‍റെ ഹോം മത്സരങ്ങള്‍ കണ്ണൂര്‍ മുനിസിപ്പൽ ജവഹര്‍ സ്റ്റേഡിയത്തില്‍ നടക്കും. ആദ്യ സീസണില്‍ സ്വന്തമായി ഹോം സ്‌റ്റേഡിയം ഇല്ലാതെയാണ് കണ്ണൂര്‍ വാരിയേഴ്‌സ് മത്സരിച്ചത്. അന്ന് കോഴിക്കോട് കോര്‍പറേഷന്‍ സ്റ്റേഡിയത്തില്‍ കാലിക്കട്ട് എഫ്‌സിക്കെപ്പം ഹോം സ്‌റ്റേഡിയം പങ്കിടുകയായിരുന്നു.

ഫാ. സ്കറിയ വടശേരിലിന് ഡോക്ടറേറ്റും പേറ്റന്‍റും

കണ്ണൂർ: തലശേരി അതിരൂപത കോർപറേറ്റ് മാനേജർ റവ.ഡോ. സ്കറിയ(സോണി) വടശേരിലിന് മാനേജ്മെന്‍റിൽ ഡോക്ടറേറ്റും പ്രബന്ധത്തിന്‍റെ ഭാഗമായി അദ്ദേഹം വികസിപ്പിച്ചെടുത്ത ലേണബിലിറ്റി കോഷ്യന്‍റ് സൈക്കോമെട്രിക് സ്കെയിലിന് ഇന്ത്യൻ സർക്കാരിന്‍റെ പകർപ്പവകാശവും പേറ്റന്‍റും ലഭിച്ചു. ബംഗളൂരു ക്രൈസ്റ്റ് യൂണിവേഴ്സിറ്റിയിൽനിന്നാണ് "ദി റോൾ ഓഫ് ലേർണബിലിറ്റി കോഷ്യന്‍റ് ആൻഡ് സ്പിരിച്വൽ ഇന്‍റലിജൻസ് ഓൺ എംപ്ലോയബിലിറ്റി എമംഗ് ദി എഡ്യുക്കേറ്റഡ് ഇൻ സൗത്ത് ഇന്ത്യ' എന്ന വിഷയത്തിൽ ഡോക്ടററേറ് നേടിയത്. മാനേജ്മെന്‍റ് റിസേർച്ച് രംഗത്ത് പുതിയ കാഴ്ചപ്പാടുകൾ നല്കാനുതകുന്ന ഡോക്ടറൽ പ്രബന്ധമാണിതെന്ന് യൂണിവേഴ്സിറ്റി മാനേജ്മെന്‍റ് വിഭാഗം സാക്ഷ്യപ്പെടുത്തി. പാണത്തൂർ വടശേരിൽ വർക്കി-മേരി ദന്പതികളുടെ മകനാണ് . എംബിഎ പഠനത്തിനുശേഷം വിമൽജ്യോതി എൻജി. കോളജിലും സാൻജോസ് അക്കാഡമിയിലും സേവനം ചെയ്തിരുന്നു.

പോലീസ് മർദനത്തിന്‍റെയും കള്ളക്കേസിന്‍റെയും വെളിപ്പെടുത്തലുമായി ആറളം സ്വദേശി

കണ്ണൂർ: പത്തുവർഷം മുന്പ് പോലീസിൽനിന്ന് നേരിടേണ്ടി വന്ന ക്രൂരമർദനത്തെക്കുറിച്ചും പോലീസ് തനിക്കെതിരെ വധശ്രമത്തിന് കള്ളക്കേസ് എടുത്ത് വർഷങ്ങളോളം പീഡിപ്പിച്ചതും വെളിപ്പെ‌ടുത്തി സർക്കാർ ജീവനക്കാരനും അമ്മയും. ആറളം സ്വദേശിയും വടകര നഗരസഭയിലെ സീനിയർ ക്ലർക്കുമായ ആശാരിപറന്പിൽ എ.എസ്. വിനീതും (44) അമ്മ രമണിയുമാണ് പോലീസ് ക്രൂരതയുടെ കാര്യങ്ങൾ വെളിപ്പെടുത്തിയിരിക്കുന്നത്. 10 വർഷത്തെ നിയമ പോരാട്ടത്തിന് ഒടുവിൽ പോലീസ് ഉന്നയിച്ച കൊലപാതക കേസ് കെട്ടിച്ചമച്ചതായിരുന്നു എന്ന് കോടതിക്ക് ബോധ്യപ്പെട്ട സാഹചര്യത്തിൽ കഴിഞ്ഞ മാസം 26 ന് തലശേരി കോടതി വിനീതിനെ വെറുതെ വിടുകയായിരുന്നു. 2015 സെപ്റ്റംബർ 12 ന് എടൂരിൽ വച്ചായിരുന്നു കേസിനും തുടർന്നുള്ള പോലീസ് മർദനത്തിനും ആസ്പദമായ സംഭവം. അന്ന് ആറളം ഗ്രാമ പഞ്ചായത്ത് ക്ലർക്കായിരുന്ന വിനീത് കടയിൽനിന്ന് സാധങ്ങൾ വാങ്ങി ഇറങ്ങുന്നതിനിടെ മദ്യപിച്ച് വാഹനം ഓടിച്ചുവെന്ന് ആരോപിച്ച് അന്നത്തെ ആറളം എസ് ഐ കെ.വി. സ്മിതേഷ് കേസെടുത്തു. തുടർന്നുള്ള വാക്കുതർക്കത്തിൽ എസ്‌ഐ ടോർച്ചുകൊണ്ട് തലയ്ക്ക് അടിച്ചു പരിക്കേൽപ്പിക്കുകയും ചെയ്തു. ‌എന്നാൽ എസ്ഐയെ കൈയേറ്റം ചെയ്തുവെന്ന് കാണിച്ച് ഇരിട്ടി സിഐയുടെ നിർദേശപ്രകാരം അന്നത്തെ ഇരിട്ടി എസ്ഐ സുധീർ കല്ലന്‍റെ നേതൃത്വത്തിലുള്ള സംഘം വിനീതിനെ കസ്റ്റഡിയിലെടുത്ത് ആറളം പോലീസ് സ്റ്റേഷനിൽ കൊണ്ടു പോയി. സ്റ്റേഷനിലേക്കുള്ള യാത്രാമധ്യേ പോലീസ് വാഹനത്തിൽവച്ചും മർദിച്ചു. വധശ്രമക്കേസ് ഉൾപ്പെടെ ഏഴു ക്രിമിനൽ കേസുകൾ‌ എസ് ഐയെ കൊല്ലാൻ ശ്രമിച്ചെന്ന് ആരോപിച്ച് കസ്റ്റഡിയിൽ എടുത്ത പ്രതിയുമായി സ്റ്റേഷനിലേക്ക് പോകുന്നതിനിടെ പ്രതി വാഹനത്തിൽ വച്ച് പോലീസുകാരെ ആക്രമിച്ചുവെന്നും പോലീസ് വാഹനം കാനയിലേക്ക് മറിഞ്ഞ് പോലീസുകാർക്ക് മരണംവരെ സംഭവിക്കാവുന്ന തരത്തിലുള്ള കാര്യങ്ങളാണ് പ്രതി ചെയ്തതെന്നും രേഖപ്പെടുത്തിയാണ് പോലീസ് കേസ് ചാർജ് ചെയ്തത്. കൊലപാതക ശ്രമം ഉൾപ്പെടെ ജാമ്യമില്ലാ വകുപ്പുകൾ ചുമത്തിയാണ് കേസുകൾ എടുത്തത്. തുടർന്ന് ദൃക്സാക്ഷികൾ ഉൾപ്പെടെ 300 ഓളം നാട്ടുകാർ പോലീസ് സ്റ്റേഷനിൽ എത്തി വിനീതിനെ വൈദ്യപരിശോധനയ്ക്ക് ഹാജരാക്കണമെന്നാവശ്യപ്പെട്ടു. ഇതേത്തുടർന്ന് വൈദ്യപരിശാധനയ്ക്ക് ഇരിട്ടിയിലേക്ക് കൊണ്ടു പോകുന്നതിനിടെയും പോലീസിനെ മർദിച്ചു. വൈദ്യപരിശോധന സമയത്ത് ഡോക്ടറുൾപ്പടെയുള്ളവരെയും ഭീഷണിപ്പെടുത്തിയെന്നും പ്രതിയുടെ ആക്രമണത്തിൽ ഏഴു പോലീസുകാർക്ക് പരിക്കേറ്റെന്നും കാണിച്ചായിരുന്നു പോലീസ് കേസെടുത്തത്. പ്രതിയുടെ ആക്രമണത്തിൽ ഏഴു പോലീസുകാർക്ക് പരിക്കേറ്റിട്ടുണ്ടെന്ന് കാണിച്ച് ഡോക്ടറുടെ സർട്ടിഫിക്കറ്റും പോലീസ് നേടിയെടുത്തു. തുടർന്ന് ഇരിട്ടി സ്റ്റേഷനിൽ എത്തിച്ച് അടിവസ്ത്രം മാത്രം ധരിപ്പിച്ച് വിലങ്ങുവച്ച ശേഷം എല്ലാവരും ചേർന്ന് ചവിട്ടിയും അടിച്ചും മർദിച്ചുവെന്നാണ് വിനീത് പറയുന്നത്. പോലീസുകാരനെ കത്തികാണിച്ച് കൊല്ലാൻ ശ്രമിച്ചു, കൈകാണിച്ചിട്ട് വാഹനം നിർത്താതെപോയി ഉൾപ്പെടെ ഏഴോളം കേസുകളാണ് ചുമത്തിയത്. മുളക് തേച്ചും പീഡനം കസ്റ്റഡി മർദനത്തെ തുടർന്ന് അവശനായി കിടന്നുപോയ തന്‍റെ ശരീരത്തിൽ ജോസഫ് എന്ന പോലീസുകാരൻ അരച്ച മുളകുമായി വന്നു കണ്ണിലും മുഖത്തും തേച്ചു. കോടതിയിൽ ഹാജരാക്കാതെ അന്ന് പകൽ മുഴുവൻ സ്റ്റേഷനിലെ സെല്ലിൽ കിടത്തിയ ശേഷം രാത്രിയിൽ മജിസ്‌ട്രേറ്റിന്‍റെ വീട്ടിൽ ഹാജരാക്കി. മജിസ്ട്രേറ്റ് റിമാൻഡ് ചെയ്തതിനെ തുടർന്ന് നാലാം ദിവസം കോടതി സ്വാഭാവിക ജാമ്യം അനുവദിക്കുകയായിരുന്നു. പോലീസ് മർദനത്തിൽ ഗുരുതരമായി പരിക്കേറ്റതിനെ തുടർന്ന് ജയിൽ സൂപ്രണ്ടുതന്നെ ജില്ലാ ആശുപത്രിയിൽ എത്തിച്ച് നാലു ദിവസത്തോളം ചികിത്സ നൽകുകയായിരുന്നു. പിന്നീട് ജാമ്യത്തിൽ ഇറങ്ങിയപ്പോൾ മുളക് തേച്ച പോലീസുകാരനെ ഇരിട്ടി ടൗണിൽ വച്ച് കത്തികൊണ്ട് കുത്തിക്കൊല്ലാൻ ശ്രമിച്ചെന്ന മറ്റൊരു കള്ളക്കേസു കൂടി പോലീസ് ചുമത്തിയെന്നും വിനീത് പറഞ്ഞു. പോലീസുകാരനെതിരെ കേസ് കൊടുത്തതിന്‍റെ വൈരാഗ്യം 2015 ഫെബ്രുവരി 12 ന് ഭാര്യാ ബന്ധുവായ ശ്രീഗീത് എന്ന പോലീസുകാരനെതിരെ അവിഹിതത്തിന് പരാതി നല്കാൻ താനും അമ്മയും കരിക്കോട്ടക്കരി പോലീസ് സ്റ്റേഷനിൽ എത്തിയതു മുതൽ പോലീസ് വൈരാഗ്യബുദ്ധിയോടെ പ്രവർത്തിച്ചു തുടങ്ങിയെന്നാണ് വിനീത് പറയുന്നത്. സ്റ്റേഷനിൽ വച്ചുതന്നെ മൂന്നു പോലീസുകാർ തന്നെയും അമ്മയെയും മർദിച്ചു. പിന്നീടൊരിക്കൽ റേഷൻ വാങ്ങി ബൈക്കിൽ വീട്ടിലേക്ക് പോകുന്നതിനിടെ ആറളം എസ്ഐ ഉണ്ണികൃഷ്ണനും ചില പോലീസുകാരും വാഹന പരിശോധന എന്ന പേരിൽ വാഹനം തടഞ്ഞു നിർത്തി. ചെറിയ മൊബൈൽ ഫോൺ ചേർത്ത് പിടിച്ച് ചെവിയടക്കി അടിച്ചു പരിക്കേൽപ്പിച്ചു. കർണപുടത്തിന് തകരാറ് സംഭവിച്ചതിനെ തുടർന്ന് കേൾവി ശക്തി പൂർണമായും നഷ്ടപ്പെടുകയും ചെയ്തു. തന്നെ ആക്രമിച്ച പോലീസുകാർക്ക് എതിരെ സ്വകാര്യ അന്യായം ഫയൽ ചെയ്ത വിനീത് കഴിഞ്ഞ 10 വർഷമായി നിയമ പോരാട്ടത്തിന്‍റെ വഴിയിലാണ്. പോലീസ് വാദങ്ങൾ പൊളിയുന്നു‌ 2015 ലെ സംഭവത്തിൽ പോലീസ് ഉന്നയിച്ച കൊലപാതക ശ്രമം ഉൾപ്പടെ പ്രതിക്ക് നേരെ ആരോപിച്ച കുറ്റങ്ങളും തെളിവുകളും എല്ലാം കെട്ടിച്ചമച്ചതായിരുന്നുവെന്നാണ് കോടതിയുടെ കണ്ടെത്തൽ. 2015 സെപ്റ്റംബർ രാത്രി 11.30 ന് വിനീതിനും ഏഴു പോലീസുകാരെയും ഒരേപോലെ പരിശോധിച്ച് സർട്ടിഫിക്കറ്റുകൾ നൽകിയതു മുതൽ ഓവുചാൽ ഇല്ലാത്ത സ്ഥലത്ത് വാഹനം ഓവുചാലിലേക്ക് മറിഞ്ഞ് അപകടം സംഭവിക്കുമായിരുന്നു എന്നതുൾപ്പെടെ വ്യാജമായി തീർത്ത തെളിവുകൾ ആണെന്ന് കോടതി കണ്ടെത്തി. പോലീസ് ആദ്യം ചുമത്തിയ മൂന്നു കേസുകൾ വിചാരണയ്ക്ക് പോലും എടുക്കാതെ കോടതി തള്ളി. ബാക്കിയുള്ള കേസുകളിൽ പോലീസുകാർ ഹാജരാകാത്തതിനാൽ കേസ് നീണ്ടു പോകുകയാണ്. ഇതുസംബന്ധിച്ച് ഡിജിപിക്കും മുഖ്യമന്ത്രിക്കും പരാതി നൽകിയിട്ടും നടപടികളുണ്ടായില്ല. തന്നെ ഉപദ്രവിച്ചവരിൽ പലരും സർവീസിൽനിന്ന് വിരമിച്ചു. മർദനത്തിലെ പ്രധാന പ്രതിയായ കെ.വി. സ്മിതേഷിനെതിരെ സമാന രീതിയിലുള്ള നിരവധി സ്വകാര്യ അന്യായങ്ങളും എഫ്ഐആറും ഉണ്ടെന്ന് വിനീത് പറഞ്ഞു.

സിപിഎം നിയന്ത്രണത്തിലെ മത്സ്യത്തൊഴിലാളി സഹ. സംഘം വായ്പാ തട്ടിപ്പ്: മുൻ സെക്രട്ടറി അറസ്റ്റിൽ

കണ്ണൂർ: ആയിക്കരയിലെ സിപിഎം നിയന്ത്രണത്തിലുള്ള മത്സ്യത്തൊഴിലാളി സഹകരണ സംഘത്തിൽ നടന്ന വായ്പാ തട്ടിപ്പ് കേസിൽ മുൻ സെക്രട്ടറി അറസ്റ്റിൽ. മരക്കാർകണ്ടി ശ്രീ സാന്ദ്രത്തിൽ എൻ. സുനിതയെയാണ് (45) സിറ്റി പോലീസ് അറസ്റ്റ് ചെയ്തത്. വ്യാജമായി നിർമിച്ച സേവിംഗ്സ് അക്കൗണ്ടിലൂടെയും തന്‍റെ ബന്ധുക്കളുടെ പേരിൽ വിവിധ ബാങ്കുകളിൽ തുടങ്ങിയ അക്കൗണ്ടുകളിലൂടെയുമാണ് സുനിത സംഘത്തിന്‍റെ പണം മാറ്റിയത്. സംഭവം വിവാദമായതിനെ തുടർന്ന് ഇവരെ സെക്രട്ടറി സ്ഥാനത്ത് നിന്നും നീക്കുന്നതിന്‍റെ തലേദിവസം വരെ ഇത്തരത്തിലുള്ള ഇടപാടുകൾ നടത്തിയിട്ടുണ്ട്. ക്രമക്കേട് സംബന്ധിച്ച് ഫിഷറീസ് അസിസ്റ്റന്‍റ് രജിസ്ട്രാര്‍ പി.ജി. സന്തോഷ് കുമാര്‍ നടത്തിയ അന്വേഷണ റിപ്പോർട്ടിൽ ഇരുപത് വർഷങ്ങൾക്കു മുന്പ് മരിച്ചവരുടെ പോലും ജാമ്യക്കാരായി ചേർത്ത് വായ്പാ തട്ടിപ്പ് നടത്തിയതായി കണ്ടെത്തി റിപ്പോർട്ട് ചെയ്തിരുന്നു. രണ്ടായിരത്തിലധികം മത്സ്യതൊഴിലാളികൾ അംഗങ്ങളായുള്ള സൊസൈറ്റിയിൽ നിക്ഷേപം നടത്തിയവർ പരാതിയുമായി എത്തിയതിനെ തുടർന്നാണ് പോലീസ് ഇന്നലെ സുനിതയെ അറസ്റ്റ് ചെയ്തത്. അതേ സമയം സുനിതയെ കൂടാതെ ഭരണസമിതി അംഗങ്ങൾക്കും ഇതിൽ പങ്കുണ്ടെന്ന ആരോപണം ഉയരുന്നുണ്ട്. സിറ്റി സ്റ്റേഷൻ എസ്എച്ച്ഒ സനൽകുമാറിന്‍റെ മേൽനോട്ടത്തിൽ എസ്ഐ കെ.കെ.രേഷ്മ, എസ്ഐ രാജീവൻ, എഎസ്ഐ അജിത, സീനിയർ സിവിൽ പോലീസ് ഓഫീസർ മഹേഷ്, സിപിഒ മിഥുൻ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.

മദര്‍ഹോം ധ്യാനകേന്ദ്രം വാര്‍ഷികം 13ന്

പരിയാരം: മദര്‍ ഹോം ധ്യാനകേന്ദ്രം ഇരുപത്തിയൊന്നാം വാര്‍ഷികവും രാപ്പകല്‍ ആരാധനയുടെ ആയിരം ദിവസത്തിന്‍റെ ആഘോഷവും 13ന് നടക്കുമെന്ന് ധ്യാന കേന്ദ്രം ഡയറക്ടർ ഫാ. ബെന്നി പുത്തൻനടയിൽ അറിയിച്ചു. രാവിലെ 7.30 മുതല്‍ ഉച്ചകഴിഞ്ഞ് 2.30 വരെയാണ് പരിപാടി. വാര്‍ഷിക ദിനത്തില്‍ നടക്കുന്ന ശുശ്രൂഷകൾക്ക് തലശേരി ആര്‍ച്ച്ബിഷപ് മാര്‍ ജോസഫ് പാംപ്ലാനി നേതൃത്വം നല്‍കും. 21 വര്‍ഷത്തെ വ്യത്യസ്തങ്ങളായ ധ്യാന, ആത്മീയ ശുശ്രൂഷകള്‍ വഴി വിവിധ തിന്മകളില്‍ അകപ്പെട്ടുപോയ അനേകം പേരെ ജീവിതത്തിലേക്ക് തിരിച്ചെത്തിക്കാനും മാനസാന്തരപ്പെടുത്തി നന്മയുടെ വഴിയിലേക്ക് നയിക്കാനും മദർഹോം ധ്യാനകേന്ദ്രത്തിന് കഴിഞ്ഞുവെന്ന് ഫാ. ബെന്നി പുത്തൻനടയിൽ പത്രസമ്മേളനത്തിൽ പറഞ്ഞു. 2004 സെപ്റ്റംബർ എട്ടിന് തലശേരി അതിരൂപതയിലെ പ്രമുഖധ്യാന ഗുരുവായ ഫാ. മാത്യു ആശാരിപറമ്പിലാണ് മദര്‍ ഹോം ധ്യാനകേന്ദ്രത്തിന് തുടക്കം കുറിച്ചത്. പത്രസമ്മേളനത്തിൽ അഡ്മിനിസ്‌ട്രേറ്റര്‍ ഫാ.മൈക്കിള്‍ മഞ്ഞക്കുന്നേല്‍, സ്പിരിച്വല്‍ ഡയറക്ടര്‍ ഫാ. പോള്‍ പുലിമലയില്‍, ഫാ.തോമസ് പാറേക്കാട്ടില്‍ എന്നിവരും പങ്കെടുത്തു.

വീട്ടിൽ എംഡിഎംഎ; യുവാവ് അറസ്റ്റിൽ

തലശേരി: വീട്ടിൽ എംഡിഎംഎ സൂക്ഷിച്ചു വച്ച യുവാവ് അറസ്റ്റിൽ. നിട്ടൂർ കുന്നോത്ത് ഗുംട്ടിയിലെ ബൈത്തുൽ റുക്സാനയിൽ ഫായിസ് ഇബ്ൻ ഇബ്രാഹിമിനെയാണ് (29) ധർമടം എസ്ഐ ഷജീമിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. വീട്ടിൽനിന്ന് 27. 55 ഗ്രാം എംഡിഎംയും പിടിച്ചെടുത്തു. രഹസ്യവിവരത്തിന്‍റെ അടിസ്ഥാനത്തിൽ പോലീസ് നടത്തിയ പരിശോധനയിൽ വീട്ടിലെ കിടപ്പുമുറിയിലെ അലമാരയിലെ ലോക്കറിൽ സൂക്ഷിച്ച വച്ച നിലയിലാണ് മയക്കുമരുന്ന് കണ്ടെത്തിയത്. മയക്കുമരുന്ന് ഉപയോഗിക്കുന്നതിനുള്ള ഉപകരണങ്ങളും കണ്ടെടുത്തു. വിൽപനയ്ക്കും ഉപയോഗത്തിനുമായാണ് എംഡിഎംഎ സൂക്ഷിച്ചതെന്നാണ് പ്രതി പോലീസിന് മൊഴി നൽകിയത്. പിടികൂടിയ എംഡിഎംഎയക്ക് വിപണിയിൽ ഏകദേശം ഒരു ലക്ഷത്തോളം രൂപ വില വരും. തലശേരി എഎസ്പി പി.ബി. കിരണിന്‍റെ നിർദേശപ്രകാരമായിരുന്നു പോലീസ് വീട്ടിൽ പരിശോധന നടത്തിയത്. എഎസ്ഐമാരായ ഷനോജ്, മുഹമ്മദ്, സീനിയർ സിവിൽ പോലീസ് ഓഫിസർ ഷിനു, സിവിൽ പോലീസ് ഓഫിസർ രമ്യ, ഡാൻസാഫ് ടീമിലെ എഎസ്ഐ ശ്രീജേഷ്, സീനിയർ സിവിൽ പോലീസ് ഓഫിസർ മിഥുൻ, എഎസ്പി സ്വകാഡ് അംഗങ്ങളായ ഹിരൺ, ശ്രീലാൽ എന്നിവരും പരിശോധന സംഘത്തിൽ ഉണ്ടായിരുന്നു.

സിഐഎസ്‌സിഇ ദേശീയ ശില്പശാല തുടങ്ങി

കണ്ണൂർ: കൗൺസിൽ ഫോർ ദി ഇന്ത്യൻ സ്കൂൾ സർട്ടിഫിക്കറ്റ് എക്സാമിനേഷൻ (സിഐഎസ്‌സിഇ)ന്യൂഡൽഹി സംഘടിപ്പിക്കുന്ന ദേശീയതല ദ്വിദിന അധ്യാപക ശില്പശാല തോട്ടട സെന്‍റ് ഫ്രാൻസിസ് സ്കൂളിൽ ആരംഭിച്ചു. ദേശീയ വിദ്യാഭ്യാസപദ്ധതിയുടെ ഭാഗമായി നൈപുണ്യ വികസനം ഊന്നൽ നൽകിയുള്ള വിദ്യാഭ്യാസ പദ്ധതി സിഐഎസ്‌സിഇ വിദ്യാലയങ്ങളിൽ നടപ്പാക്കുന്നതിന്‍റെ ഭാഗമായാണ് ശിലപശാല. മധ്യപ്രദേശ്, മഹാരാഷ്ട്ര, ജാർഖണ്ഡ്, തമിഴ്നാട്, കർണാടക, കേരളം എന്നിവിട ങ്ങളിലെ അമ്പത് അധ്യാപകരാണ് പങ്കെടുക്കുന്നത്. സ്കൂൾ ഓഡിറ്റോറിയത്തിൽ മാനേജർ ബ്രദർ ഡോ. ജോസഫ് ചാരുപ്ലാക്കൽ ഉദ്ഘാടനം ചെയ്തു. പ്രിൻസിപ്പൽ പി.വി. ജോർജ് സ്വാഗതം പറഞ്ഞു. രാമചന്ദ്രൻ ക്ലാസുകൾ നയിച്ചു. ശില്പശാല ഇന്ന് സമാപിക്കും.

മട്ടന്നൂരിൽ ജ്വല്ലറി ഉടമകൾ കോടികൾ തട്ടി മുങ്ങി

മട്ടന്നൂർ: പഴയ സ്വർണം നിക്ഷേപം നടത്തിയാൽ പണം ഈടാക്കാതെ അതേ തൂക്കത്തിൽ പുതിയ സ്വർണം നൽകുമെന്നും ആഴ്ചയിലും മാസത്തിലുമായി നിശ്ചിത തുക നിക്ഷേപിച്ചാൽ മുൻകൂറായി സ്വർണം നൽകുമെന്നും വാഗ്ദാനം ചെയ്ത് ജ്വല്ലറി ഉടമകൾ കോടികൾ തട്ടി മുങ്ങിയതായി പരാതി. പരാതിയിൽ മട്ടന്നൂർ-തലശേരി റോഡിലെ മൈ ഗോൾഡ് ജ്വല്ലറി പാർട്ണർമാരായ മുഴക്കുന്ന് സ്വദേശി തഫ്‌സീർ ഉൾപ്പടെ ആറുപേർക്കെതിരേ മട്ടന്നൂർ പോലീസ് കേസെടുത്തു. തട്ടിപ്പുമായി ബന്ധപ്പെട്ട് രണ്ടു ദിവസത്തിനുള്ളിൽ മട്ടന്നൂർ സ്റ്റേഷനിൽ 56 പരാതികളാണ് ലഭിച്ചത്. നാലു കേസുകൾ രജിസ്റ്റർ ചെയ്തു. പ്രതികൾ ഒളിവിലാണെന്നും ഇവർക്കെതിരെ ലുക്ക്ഔട്ട് നോട്ടീസ് ഉൾപ്പടെ പുറപ്പെടുവിച്ച് അന്വേഷണം ഊർജിതമാക്കുമെന്നും മട്ടന്നൂർ ഇൻസ്‌പെക്ടർ എം.അനിൽ പറഞ്ഞു. 20 കോടിയുടെയെങ്കിലും തട്ടിപ്പ് നടന്നതായാണ് പോലീസിന്‍റെ പ്രാഥമിക നിഗമനം. സ്ഥാപനം ഏതാനും ദിവസങ്ങളായി അടച്ചിട്ടിരിക്കുകയാണ്. കഴിഞ്ഞ ദിവസം ജ്വല്ലറിയിൽ പോലീസ് പരിശോധന നടത്തിയിരുന്നു. സിസിടിവി കാമറകൾ അടക്കം പ്രതികൾ ഇവിടെ നിന്ന് മാറ്റിയതായാണ് വിവരം. മട്ടന്നൂരിലും തൃശൂരിലുമുള്ള ജ്വല്ലറികളിൽ നിന്ന് സ്വർണം വാങ്ങി പണം നൽകാതെ വഞ്ചിച്ചെന്നും പരാതിയുണ്ട്. 98 ലക്ഷം രൂപ വരെ നഷ്ടപ്പെട്ടവർ പരാതിയുമായി എത്തിയിട്ടുണ്ട്.

കെസിവൈഎം ‘യുവോദയം' സംഗമം നടത്തി

തലശേരി: കലാലയങ്ങളിലെ വിദ്യാർഥി യൂണിയൻ തെരഞ്ഞെടുപ്പിൽ മേജർ, മൈനർ സീറ്റുകളിൽ വിജയം നേടിയ തലശേരി അതിരൂപതാംഗങ്ങളായ യുവജനങ്ങളുടെ സംഗമം "യുവോദയം' കെസിവൈഎം, എസ്എംവൈഎം അതിരൂപത സമിതിയുടെ ആഭിമുഖ്യത്തിൽ സംഘടിപ്പിച്ചു. കെസിവൈഎം അതിരൂപത ഡയറക്ടർ ഫാ. അഖിൽ മാത്യു മാത്യു മുക്കുഴി ഉദ്ഘാടനം ചെയ്തു. അതിരൂപത പ്രസിഡന്‍റ് അബിൻ വടക്കേക്കര അധ്യക്ഷത വഹിച്ചു. അതിരൂപത ജനറൽ സെക്രട്ടറി അമൽ പേഴുംകാട്ടിൽ, ഭാരവാഹികളായ ശ്രേയ ശ്രുതിനിലയം, അഖിൽ നെല്ലിയ്ക്കൽ, സാൻജോസ് കളരിമുറിയിൽ, എഡ്‌വിൻ തെക്കേമുറിയിൽ എന്നിവർ നേതൃത്വം നൽകി.

കത്തോലിക്കാ എയ്ഡഡ് സ്കൂളുകളോടുള്ള നീതി നിഷേധത്തിനെതിരേ കളക്ടറേറ്റ് മാർച്ച് 12ന്

കണ്ണൂർ: ഭിന്നശേഷി സംവരണവുമായി ബന്ധപ്പെട്ട് കത്തോലിക്കാ എയ്ഡഡ് സ്കൂളുകളിലെ അധ്യാപകരോട് പുലർത്തുന്ന നീതി നിഷേധത്തിനെതിരേ കേരള കാത്തലിക് ടീച്ചേഴ്സ് ഗിൽഡിന്‍റെ ആഭിമുഖ്യത്തിൽ മാർച്ച് 12 ന് ഉച്ചയ്ക്ക് 2.30-ന് കളക്ടറേറ്റ് മാർച്ച് ന‌ടത്തും. കണ്ണൂർ, കോട്ടയം, തലശേരി അതിരൂപത വിദ്യാഭ്യാസ ഏജൻസികളുടെ ആഭിമുഖ്യത്തിൽ സംഘടിപ്പിക്കുന്ന മാർച്ചിൽ 500 ലേറെ അധ്യാപകർ പങ്കെടുക്കും. സ്റ്റേഡിയം കോർണറിൽ നിന്നാരംഭിക്കുന്ന പ്രതിഷേധറാലി കാൽടെക്സ് ജംഗ്ഷൻ ചുറ്റി കളക്ടറേറ്റ് പടിക്കലെത്തും. തലശേരി അതിരൂപത ആർച്ച്ബിഷപ് മാർ ജോസഫ് പാംപ്ലാനി മാർച്ച് ഉദ്ഘാടനം ചെയ്യും. കണ്ണൂർ രൂപത സഹായ മെത്രാൻ മാർ ഡെന്നിസ് കുറുപ്പശേരി, തലശേരി അതിരൂപത കോർപറേറ്റ് മാനേജർ റവ. ഡോ. സോണി വർഗീസ് വടശേരിൽ, കണ്ണൂർ രൂപത കോർപറേറ്റ് മാനേജർ മോൺ. ക്ലാരൻസ് പാലിയത്ത്, കോട്ടയം അതിരൂപത ശ്രീപുരം പാസ്റ്ററൽ സെന്‍റർ ഡയറക്ടർ ഫാ. ജോയി കട്ടിയാങ്കൽ തുടങ്ങിയവർ പ്രസംഗിക്കും. ഭിന്നശേഷിക്കാർക്ക് നാലു ശതമാനം സംവരണം ഏർപ്പെടുത്തിയതിനെ ചോദ്യം ചെയ്ത് എൻഎസ്എസ് മാനേജ്മെന്‍റ് കോടതിയെ സമീപിക്കുകയും അനുകൂലവിധി നേടുകയും ചെയ്തു. സമാനസ്വഭാവമുള്ള സൊസൈറ്റികൾക്കും വിധി ബാധകമാണെന്ന സുപ്രീംകോടതി ഉത്തരവ് നിലവിലുള്ളതാണ്. നാലു മാസത്തിനകം നിലവിലെ പ്രശ്നത്തിന് പരിഹാരമുണ്ടാക്കണമെന്ന് ഹൈക്കോടതി വിധി നിലവിലുണ്ട്. കോടതി വിധികളെ കാറ്റിൽ പറത്തുന്നതിനെതിരേയാണ് സമരത്തിനിറങ്ങുന്നതെന്ന് കണ്ണൂർ രൂപത കോർപറേറ്റ് മാനേജർ മോൺ. ക്ലാരൻസ് പാലിയത്ത് പത്രസമ്മേളനത്തിൽ അറിയിച്ചു. ഭിന്നശേഷി സംവരണം ന‌ടപ്പാക്കാൻ തയാറാണെന്ന് ക്രിസ്ത്യൻ മാനേജ്മെന്‍റുകൾ സർക്കാരിന് നേരത്തേ സത്യവാങ്മൂലം നൽകിയിട്ടുണ്ട്. കോടതി വിധി പ്രകാരം എംപ്ലോയ്മെന്‍റ് എക്സ്ചേഞ്ച് വഴി ലഭ്യമായവരെ നിയമിക്കുകയും ചെയ്തു. ഭിന്നശേഷി അധ്യാപകരെ പൂർണമായി നിയമിക്കാതെ മാനേജ്മെന്‍റ് നിയമിച്ച അധ്യാപക നിയമനങ്ങൾക്ക് സർക്കാർ അംഗീകാരം നൽകില്ലെന്ന പിടിവാശിക്ക് അടിസ്ഥാനമില്ലെന്ന് അദ്ദേഹം പറഞ്ഞു. 2018 മുതൽ 2021 വരെയുള്ള കാലഘട്ടത്തിലെ അധ്യാപക നിയമനങ്ങൾ താത്ക്കാലികമായാണ് അംഗീകരിച്ചിരിക്കുന്നത്. 2021 നുശേഷം മാനേജ്മെന്‍റ് നിയമിച്ചവരെ ദിവസ വേതനക്കാരായി സർക്കാർ മാറ്റിയിരിക്കുകയാണ്. ആകെ 17000 ത്തോളം അധ്യാപകരാണ് നിയമന പ്രതിസന്ധിയിൽ ബുദ്ധിമുട്ടുന്നത്. മാർച്ചിനും ധർണയ്ക്കും ടീച്ചേഴ്സ് ഗിൽഡ് തലശേരി അതിരൂപത പ്രസിഡന്‍റ് ജിനിൽ മാർക്കോസ്, ടീച്ചേഴ്സ് ഗിൽഡ് കണ്ണൂർ രൂപത പ്രസിഡന്‍റ് ബിജു ഓളാട്ടുപുറം, അതിരൂപത സെക്രട്ടറി റോബിൻ എം. ഐസക്, സംസ്ഥാന സമിതിയംഗം മാത്യു ജോസഫ്, റിൻസി ഏബ്രഹാം, നോർത്ത് സോൺ വൈസ് പ്രസിഡന്‍റ് ജിമ്മി സൈമൺ, തലശേരി അതിരൂപത ട്രഷറർ ജോയ്സ് സക്കറിയാസ് തുടങ്ങിയവർ നേതൃത്വം നൽകും. പത്രസമ്മേളനത്തിൽ ടീച്ചേഴ്സ് ഗിൽഡ് തലശേരി അതിരൂപത സംസ്ഥാന പ്രതിനിധി മാത്യു ജോസഫ്, ടീച്ചേഴ്സ് ഗിൽഡ് അതിരൂപത സെക്രട്ടറി റോബിൻ ഐസക് എന്നിവരും പങ്കെടുത്തു.

പയ്യന്നൂര്‍ പുതിയ ബസ്‌സ്റ്റാന്‍ഡ്: നഗരസഭ ‌അടിയന്തര കൗണ്‍സിലിൽ ബഹളം

പയ്യന്നൂര്‍: പുതിയ ബസ് സ്റ്റാന്‍ഡ് നിര്‍മാണവുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യുന്നതിനായി വിളിച്ചു ചേർത്ത് പയ്യന്നൂർ മുനിസിപാലിറ്റി അടിയന്തര കൗൺസിൽ യോഗത്തിൽ ഭരണ-പ്രതിപക്ഷ കൗൺസിലർമാർ തമ്മിൽ വാക്കേറ്റവും ബഹളവും. നിർമാണ പ്രവൃത്തി ഒരാഴ്ചയ്ക്കകം തുടങ്ങുമെന്ന് ചെയർപേഴ്സൺ യോഗത്തെ അറിയിച്ചതിനു പിന്നാലെയാണ് ബഹളം ആരംഭിച്ചത്. മുപ്പതു വര്‍ഷമായി തുടങ്ങിയ പദ്ധതി ഇന്നും യാഥാര്‍ഥ്യമായിട്ടില്ലെന്ന് പ്രതിപക്ഷ നേതാവ് കെ.കെ.ഫല്‍ഗുനന്‍ ചൂണ്ടിക്കാട്ടി. 2014-ല്‍ ആദ്യഘട്ടം ഉദ്ഘാടനം ചെയ്തു. എന്നാല്‍ പിന്നീട് 2025 - ലാണ് രണ്ടാം ഘട്ടം ഉദ്ഘാടനം ചെയ്യുന്നതെന്നും അദ്ദേഹം പറഞ്ഞു. തുടര്‍ന്ന് വൈസ് ചെയര്‍മാന്‍ പി.വി.കുഞ്ഞപ്പന്‍, സ്ഥിരം സമിതി അധ്യക്ഷന്‍ ടി.വിശ്വനാഥന്‍ തുടങ്ങിയവരും കോണ്‍ഗ്രസ് അംഗം മണിയറ ചന്ദ്രനുമടക്കം സംസാരിക്കാന്‍ തുടങ്ങിയതോടെ യോഗം ബഹളത്തില്‍ മുങ്ങുകയായിരുന്നു. രണ്ടര പതിറ്റാണ്ടിലേറെയായുള്ള സ്റ്റാൻഡിന്‍റെ പ്രവര്‍ത്തനങ്ങള്‍ക്ക് നിരവധി കടമ്പകള്‍ വഴിമുടക്കിയായതും രണ്ടാംഘട്ട പ്രവര്‍ത്തിയുദ്ഘാടനം കഴിഞ്ഞ് അഞ്ച് മാസം കഴിഞ്ഞിട്ടും നിര്‍മ്മാണമാരംഭിക്കാന്‍ കഴിയാത്ത അവസ്ഥയും ദീപിക റിപ്പോർട്ട് ചെയ്തിരുന്നു.

കോൺഗ്രസ് പോലീസ് സ്റ്റേഷനു മുന്നിൽ ജനകീയ പ്രതിഷേധ സദസ് സംഘടിപ്പിച്ചു

കണ്ണൂർ: ഒന്പത് വർഷം കൊണ്ടുള്ള ഭരണം കൊണ്ട് മുഖ്യമന്ത്രി പിണറായി വിജയനും സിപിഎമ്മും പോലീസ് സേനയെ പാർട്ടിയുടെ ക്രിമിനൽ സംഘങ്ങളാക്കി മാറ്റിയെന്ന് ഡിസിസി പ്രസിഡന്‍റ് മാർട്ടിൻ ജോർജ്. കുന്നംകുളത്ത് യൂത്ത് കോൺഗ്രസ് നേതാവ് സുജിത്തിനെ അതിക്രൂരമായി മർദിച്ച പോലീസ് ഉദ്യോഗസ്ഥരെ സർവീസിൽ നിന്ന് പിരിച്ചു വിടണമെന്ന് ആവശ്യപ്പെട്ട് ജില്ലയിലെ പോലീസ് സ്റ്റേഷനുകളുടെ മുന്നിൽ കോൺഗ്രസ് നടത്തിയ പ്രതിഷേധ സദസിന്‍റെ ജില്ലാതല ഉദ്ഘാടം കണ്ണൂർ ടൗൺ സ്റ്റേഷനു മുന്നിൽ നിർവഹിച്ചു പ്രസംഗിക്കുകയായിരുന്നു അദ്ദേഹം. തികച്ചും മനുഷ്യത്വരഹിതമായാണ് പോലീസ് പെരുമാറുന്നത്. പിണറായി വിജയൻ ആഭ്യന്തര വകുപ്പ് കൈകാര്യം ചെയ്യാൻ തുടങ്ങിയതിൽ പിന്നെ 17 ഓളം കസ്റ്റഡി മരണങ്ങളാണ് സംഭവിച്ചത്. കാക്കിയിട്ട് എന്ത് തെമ്മാടിത്തവും ചെയ്യാമെന്നതിന് പ്രോത്സാഹനം നൽകുന്ന രീതിയിലാണ് ആഭ്യന്തര വകുപ്പ് പ്രമോഷനും സ്ഥലം മാറ്റവും നൽകുന്നത്. പൊതുജനങ്ങൾക്ക് നിർഭയം എപ്പോഴും കടന്നു ചെല്ലാവുന്ന ജനമൈത്രി പോലീസ് സ്റ്റേഷനുകൾ പോലും മൃഗീയ മർദന കേന്ദ്രങ്ങളാക്കി മാറ്റി. പാർട്ടിക്കു വേണ്ടി ക്വട്ടേഷൻ ഏറ്റെടുത്തു നടത്തുന്ന തരത്തിൽ പോലീസ് മാറിയന്നും മാർട്ടിൻ ജോർജ് ആരോപിച്ചു. പി. അനൂപ് അധ്യക്ഷത വഹിച്ചു. ഡെപ്യൂട്ടി മേയർ പി. ഇന്ദിര, കോർപറേഷൻ സ്റ്റാൻഡിംഗ് കമ്മിറ്റി ചെയർപേഴ്സൺമാരായ സുരേഷ് ബാബു എളയാവൂർ, എംപി. രാജേഷ്, മണ്ഡലം പ്രസിഡന്‍റുമാരായ പ്രദീപൻ, റഫീഖ്, രഞ്ജിത്ത്, നേതാക്കളായ പി.വി. പുരുഷോത്തമൻ, രാഹുൽ കായക്കൂൽ, ഫർഹാൻ മുണ്ടേരി, ലക്ഷ്മണൻ തുണ്ടിക്കോത്ത് എന്നിവർ പ്രസംഗിച്ചു. ഇരിട്ടി: ഇരിട്ടി പോലീസ് സ്റ്റേഷന് മുമ്പിൽ നടത്തിയ പ്രതിഷേധ സദസ് കെപിസിസി അംഗം ചന്ദ്രൻ തില്ലങ്കേരി ഉദ്ഘാടനം ചെയ്തു. റയീസ് കണിയറക്കൽ അധ്യക്ഷത വഹിച്ചു. ആറളം പോലീസ് സ്റ്റേഷന് മുന്നിൽ നടന്ന പ്രതിഷേധ സദസ് കോൺഗ്രസ് ബ്ലോക്ക് പ്രസിഡന്‍റ് പി.എ. നസീർ ഉദ്ഘാടനം ചെയ്തു. ജിമ്മി അന്തിനാട്ട് അധ്യക്ഷത വഹിച്ചു. കരിക്കോട്ടരി പോലീസ് സ്റ്റേഷന് മുന്നിൽ നടത്തിയ പ്രതിഷേധ സദസ് ഡിസിസി സെക്രട്ടറി ജയ്സൺ കാരക്കാട്ട് ഉദ്ഘാടനം ചെയ്തു. മനോജ് എം. കണ്ടത്തിൽ അധ്യക്ഷത വഹിച്ചു. മുഴക്കുന്ന് പോലീസ് സ്റ്റേഷനു മുന്നിൽ നടന്ന പ്രതിഷേധ സദസ് ഡിസിസി ജനറൽ സെക്രട്ടറി ബൈജു വർഗീസ് ഉദ്ഘാടനം ചെയ്തു. തില്ലങ്കേരി മണ്ഡലം പ്രസിഡന്‍റ് രാകേഷ് തില്ലങ്കേരി അധ്യക്ഷത വഹിച്ചു. ഉളിക്കൽ, നുച്യാട് മണ്ഡലം കോൺഗ്രസ് കമ്മറ്റികളുടെ നേതൃത്വത്തിൽ ഉളിക്കൽ പോലീസ് സ്റ്റേഷന് മുമ്പിൽ സംഘടിപ്പിച്ച ജനകീയ പ്രതിഷേധ സദസ് സജീവ് ജോസഫ്എംഎൽഎ ഉദ്ഘാടനം ചെയ്തു. ഉളിക്കൽ മണ്ഡലം പ്രസിഡന്‍റ് ടോമി മുക്നോലിക്കലി അധ്യക്ഷത വഹിച്ചു. കേളകം: കേളകം കൊട്ടിയൂർ ,കണിച്ചാർ മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ കേളകം പോലീസ് സ്റ്റേഷനിലേക്ക് നടത്തിയ മാർച്ച് കെപിസിസിയംഗം ലിസി ജോസഫ് ഉദ്ഘാടനം ചെയ്തു. കേളകം മണ്ഡലം സന്തോഷ് മണ്ണാർകുളം അധ്യക്ഷത വഹിച്ചു. പേരാവൂർ: പേരാവൂർ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പേരാവൂർ പോലീസ് സ്റ്റേഷനു മുന്നിൽ നടത്തിയ പ്രതിഷേധ സദസ് ഡിസിസി വൈസ് പ്രസിഡന്‍റ് സുധീപ് ജയിംസ് ഉദ്ഘാടനം ചെയ്തു. അഡ്വ. ഷഫീർ ചെക്യാട്ട് അധ്യക്ഷത വഹിച്ചു. കൂത്തുപറമ്പ്: കുന്നംകുളം പോലീസ് മർദനത്തിനിരയായ സുജിത്തിനു നീതി ലഭ്യമാക്കുകയും കുറ്റകാരായ പോലീസ് ഉദ്യോഗസ്ഥരെ സർവീസിൽ നിന്നും പിരിച്ചുവിടണമെന്നും ആവശ്യപ്പെട്ട് കൂത്തുപറമ്പ്, കോട്ടയം, ചെറുവാഞ്ചേരി മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ കൂത്തുപറമ്പ് പോലീസ് സ്റ്റേഷനു മുന്നിൽ ജനകീയ പ്രതിഷേധ സദസ് സംഘടിപ്പിച്ചു. ഡിസിസി ജനറൽ സെക്രട്ടറി കെ.പി. സാജു ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് രജീഷ് കോട്ടയൻ അധ്യക്ഷത വഹിച്ചു.

ഇരിട്ടിയിൽ പൂട്ടിയിട്ട വീട് കുത്തിത്തുറന്ന് മോഷണശ്രമം

ഇരിട്ടി : അടച്ചിട്ട വീടിന്‍റെ പൂട്ടുതകർത്ത് മോഷ്ടിക്കാൻ കയറിയ കള്ളന് ഏറെ നേരം വീടിനകത്ത് അരിച്ചുപെറുക്കിയിട്ടും ഒന്നും ലഭിക്കാതെ മടങ്ങി. ഇരിട്ടി നേരംപോക്ക് താലൂക്ക് ആശുപത്രി റോഡിലെ ഖാദി വത്രാലയത്തിന് മുൻവശമുള്ള ജഗൻ നിവാസിൽ ജഗന്മയന്‍റെ തറവാട്ടു വീട്ടിൽ വാതിൽ പൊളിച്ച് അകത്തുകയറിയ മോഷ്‍ടാവിനാണ് അക്കിടി പറ്റിയത് . ചൊവ്വാഴ്ച രാത്രിയിൽ വീടിന്‍റെ മുൻഭാഗത്തെ കതകിന്‍റെ പൂട്ട് പിക്കാസു കൊണ്ട് പൊളിച്ചാണ് അകത്തു കടന്നത്. പൊളിക്കാൻ ഉപയോഗിച്ച പിക്കാസിന്‍റെ കൈപ്പിടി പൊട്ടിയതോടെ വീടിനകത്തെ മേശപ്പുറത്ത് ഉപേക്ഷിച്ചു. പിന്നീട് വീട്ടിനകത്തെ അലമാര, മേശ ഉൾപ്പെടെ പൂട്ട് പൊളിച്ച് സാധനങ്ങളെല്ലാം വലിച്ചുവാരി നിലത്തിടുകയായിരുന്നു. ബുധനാഴ്ച രാവിലെയാണ് സംഭവം ശ്രദ്ധയിൽപ്പെട്ടത്. ഇരിട്ടി കാരുണ്യ ആശുപത്രിയുടെ ഫാർമസിയിലെ ജീവനക്കാരനായ ജഗന്മയൻ ആഴ്ചയിൽ ചില ദിവസങ്ങളിൽ മാത്രമാണ് ഇവിടെ താമസിക്കാറുള്ളത്. ബുധനാഴ്ച രാവിലെ വീട്ടിലെത്തിയപ്പോഴാണ് വീടിന്‍റെ മുൻവശത്തെ വാതിലിന്‍റെ പൂട്ട് തകർത്ത നിലയിൽ കാണുന്നത്. ഉടൻ ബന്ധുക്കളെയും പോലീസിനെയും വിവരം അറിയിക്കുകയായിരുന്നു. ഇരിട്ടി പോലീസിൽ പരാതി നൽകിയതിനെത്തുടർന്ന് പോലീസ് എത്തി പരിശോധന നടത്തി. സമീപത്തെ വീടുകളിലെ സിസിടിവി ദൃശ്യങ്ങൾ ഉൾപ്പെടെ പരിശോധിച്ചു വരികയാണ്.

ചേംബർ ഡേയും ഓണാഘോഷവും നടത്തി

കണ്ണൂർ: നോർത്ത് മലബാർ ചേംബർ ഓഫ് കൊമേഴ്സിന്‍റെ ആഭിമുഖ്യത്തിൽ ചേംബർ ഡേയും ഓണാഘോഷവും നടത്തി. ചേംബർ പ്രസിഡന്‍റ് ടി.കെ. രമേഷ് കുമാർ ഉദ്ഘാടനം ചെയ്തു. പിന്നണി ഗായകൻ അജയ് ഗോപാൽ വിശിഷ്ടാതിഥിയായിരുന്നു. ചേംബർ അംഗങ്ങളുടെയും കുടുംബാഗങ്ങളുടെയും വിവിധ കലാപരിപാടികളും ഗാനമേളയും നടന്നു. ചേംബർ വനിതാ വിഭാഗത്തിന്‍റെ തിരുവാതിര, കപ്പിൾസ് ഡാൻസ് എന്നിവയും അരങ്ങേറി. വിവിധ കലാ-കായിക പരിപാടികളിൽ വിജയിച്ചവർക്കുള്ള സമ്മാനദാനവും നടന്നു. വൈസ് പ്രസിഡന്‍റ് സച്ചിൻ മഖേച്ച, ഓണററി സെക്രട്ടറി സി. അനിൽകുമാർ, ട്രഷറർ കെ. നാരായണൻ കുട്ടി എന്നിവർ പ്രസംഗിച്ചു.

സ്വകാര്യ ബസിലെ എയർ ഹോൺ അഴിപ്പിച്ചു; പിഴ ഈടാക്കി

ഇരിട്ടി: മോട്ടോർ വാഹന വകുപ്പ് നടത്തിയ പരിശോധനയിൽ സ്വകാര്യ ബസിൽ അനധികൃതമായി സ്ഥാപിച്ച എയർഹോൺ അഴിപ്പിച്ച് പിഴ ഈടാക്കി. കൊട്ടിയൂർ-ഇരിട്ടി മണിക്കടവ് റൂട്ടിലോടുന്ന പ്രസാദം ബസിൽ നിയമവിരുദ്ധമായി സ്ഥാപിച്ച എയർ ഹോണാണ് കണ്ടെത്തി അഴിപ്പിച്ചത്. ബസ് ഉടമയിൽ നിന്നും 2000 രൂപ പിഴ ഈടാക്കി. യാത്രക്കാർക്കും മറ്റു വാഹനങ്ങൾക്കും ജനങ്ങൾക്കും ബുദ്ധിമുട്ടുണ്ടാക്കുന്ന തരത്തിൽ എയർ ഹോൺ മുഴക്കുന്നുവെന്ന പരാതിയുടെ അടിസ്ഥാനത്തിലായിരുന്നു പരിശോധന. ഇരിട്ടി ബസ് സ്റ്റാൻഡിൽ അസി. മോട്ടോർ വെഹിക്കിൾ ഇൻസ്പെക്ടർ ട‌ി.എ. സുമേഷിന്‍റെ നേതൃത്വത്തിലായിരുന്നു പരിശോധന. വരും ദിവസങ്ങളിലും പരിശോധന തുടരുമെന്ന് മോട്ടോർ വാഹനവകുപ്പധികൃതർ അറിയിച്ചു.

തില്ലങ്കേരിയിൽ 27 പേർക്ക് മഞ്ഞപ്പിത്തം; പ്രതിരോധ പ്രവർത്തനം ശക്തമാക്കി

ഇരിട്ടി: തില്ലങ്കേരി പഞ്ചായത്തിൽ വിവിധ വാർഡുകളിൽ മഞ്ഞപ്പിത്തം റിപ്പോർട്ടു ചെയ്ത സാഹചര്യത്തിൽ ആരോഗ്യ വകുപ്പ് പ്രതിരോധ പ്രവർത്തനങ്ങൾ ശക്തമാക്കി. പഞ്ചായത്തിലെ വിവിധ വാർഡുകളിലായി 27 പേർക്കാണ് രോഗം കണ്ടെത്തിയത്. രോഗ ബാധ രൂക്ഷമാകുന്നത് തടയാൻ തില്ലങ്കേരിയിൽ ചേർന്ന ജനകീയ കൂട്ടായ്മയിൽ പ്രതിരോധ പ്രവർത്തനങ്ങൾക്കായി സമഗ്ര മാർഗരേഖ തയാറാക്കി. ഭക്ഷണ-പാനീയ വിതരണത്തിന് നിയന്ത്രണം ഏർപ്പെടുത്താൻ യോഗം തീരുമാനിച്ചു. ഹെൽത്ത് കാർഡില്ലാത്ത മുഴുവൻ ജീവനക്കാരും രണ്ടാഴ്ചക്കുളളിൽ മെഡിക്കൽ ഫിറ്റ്‌നസ് ഹാജരാക്കണം. സ്ഥാപനങ്ങൾക്ക് ആരോഗ്യ പ്രവർത്തകർ മുഖേന ശേഖരിക്കുന്ന വാട്ടർ സാമ്പിൾ റിസൾട്ട് മാത്രമേ സ്വീകരിക്കുകയുള്ളൂ. ഭക്ഷണ വിതരണം നടക്കുന്ന ചടങ്ങുകൾ 20 ദിവസം മുമ്പ് അധികൃതരെ അറിയിക്കണം. മഞ്ഞപ്പിത്ത ബാധയുള്ളവർ അക്കാര്യം ബന്ധുക്കളെയും മറ്റും അറിയിച്ച്‌ സന്ദർശനം വിലക്കണം. സ്‌കൂളുകളിൽ കുട്ടികൾ ഭക്ഷണവും വെള്ളവും പങ്കുവയ്ക്കാൻ പാടില്ല. മുഴുവൻ അങ്കണവാടികളിലും വായനശാലകളിലും ആരോഗ്യബോധവത്കരണ സംഗമങ്ങൾ വിളിച്ചു ചേർക്കണം. എല്ലാ തിങ്കളാഴ്ചകളിലും തില്ലങ്കേരി കുടുംബാരോഗ്യ കേന്ദ്രത്തിൽ ആരോഗ്യവകുപ്പ് അവലോക യോഗങ്ങൾ നടത്തും. സ്‌കൂളുകളിൽ മഞ്ഞപ്പിത്തം സംബന്ധിച്ച ക്വിസ് മത്സരങ്ങൾ സംഘടിപ്പിക്കും. മൈക്ക് അന്നൗൺസ്മെന്‍റും കോർണർ യോഗങ്ങളും സംഘടിപ്പിക്കും. മുഴുവൻ വ്യാപാര സ്ഥാപനങ്ങളിലും നിർദേശങ്ങൾ പാലിക്കുന്നതായി വ്യാപാരി വ്യവസായി സംഘടനകൾ ഉറപ്പുവരുത്തും. സോഷ്യൽ മീഡിയ കാമ്പയിൽ ശക്തിപ്പെടുത്തും. ജനകീയ കൂട്ടായ്മ പഞ്ചായത്ത് പ്രസിഡന്‍റ് പി. ശ്രീമതി ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് അണിയേരി ചന്ദ്രൻ അധ്യക്ഷത വഹിച്ചു. തില്ലങ്കേരി കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. കെ. രസ്‌ന ക്ലാസെടുത്തു. പ്രതിരോധ പ്രവർത്തന മാർഗരേഖ കണ്ണൂർ ജില്ലാ മെഡിക്കൽ ഓഫീസിലെ ടെക്‌നിക്കൽ അസിസ്റ്റന്‍റ് സി.പി. സലീം അവതരിപ്പിച്ചു. പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.കെ. രതീഷ്, അംഗങ്ങളായ പി.ഡി. മനീഷ, എൻ. മനോജ്, രമണി മിന്നി, എം.കെ. ആനന്ദവല്ലി, ഹോമിയോപ്പതി മെഡിക്കൽ ഓഫീസർ ഡോ. സുധീർ , ഹെൽത്ത് ഇൻസ്‌പെക്ടർ ബിനോജ് കുറ്റിയാണി ജൂണിയർ ഹെൽത്ത് ഇൻസ്‌പെക്ടർ അരുൺകുമാർ എന്നിവർ പ്രസംഗിച്ചു.

ഇരിട്ടി ഫെസ്റ്റ് സമാപിച്ചു

ഇരിട്ടി: നഗരസഭയുടെ വാർഷിക പദ്ധതിയിൽ ഉൾപ്പെടുത്തി കഴിഞ്ഞ നാലു ദിവസമായി നായനാർ ഓപ്പൺ ഓഡിറ്റോറിയത്തിൽ നടന്നുവരുന്ന ഇരിട്ടി ഫെസ്റ്റ് 2025 സമാപിച്ചു. സമാപന ദിവസത്തിൽ ഭിന്നശേഷിക്കാരുടെയും വയോജനങ്ങളുടെയും സംഗമം സംസ്ഥാന ന്യൂനപക്ഷ കമ്മിഷൻ അംഗം പി. റോസ ഉദ്ഘാടനം ചെയ്തു. വികസന സ്റ്റാൻഡിംഗ് കമ്മിറ്റി ചെയർപേഴ്സൺ പി.കെ. ബൾക്കീസ് അധ്യക്ഷത വഹിച്ചു. സംസ്ഥാന ഭിന്നശേഷി വികസന കോർപറേഷൻ മാനേജിംഗ് ഡയറക്ടർ മൊയ്തീൻ കുട്ടി പൂമരത്തിൽ മുഖ്യാതിഥിയായിരുന്നു. ഐസിഡിഎസ് സുപ്പർവൈസർ ജിസ്മി അഗസ്റ്റിൻ, കൗൺസിലർമാരായ വി. പുഷ്പ, അബ്ദുൾ ഖാദർ കോമ്പിൽ, വയോജന കമ്മിറ്റി അംഗം എം. രാമചന്ദ്രൻ എന്നിവർ പ്രസംഗിച്ചു. തുടർന്ന് ഭിന്നശേഷിക്കാരുടെയും വയോജനങ്ങളുടെയും കലാപരിപാടികളും നടന്നു. ഇരിട്ടി ഫെസ്റ്റിന് സമാപനം കുറിച്ച് കോഴിക്കോട് മ്യൂസിക്കൽ കഫെയിലെ കലാകാരൻമാർ അണിനിരന്ന സംഗീതസന്ധ്യ അരങ്ങേറി.

കാർ നിയന്ത്രണം വിട്ട് വാഹനങ്ങളിൽ ഇടിച്ചു; സ്കൂട്ടർ യാത്രികയ്ക്ക് ഗുരുതരം

കണ്ണൂര്‍: പെട്രോള്‍ പമ്പിൽ ഇന്ധനം നിറക്കാനെത്തിയ കാര്‍ നിയന്ത്രണംവിട്ട് കാറിലും ഓട്ടോറിക്ഷയിലും സ്കൂട്ടറിലും ഇടിച്ചു. അപകടത്തിൽ സ്കൂട്ടർ യാത്രികയായ യുവതിക്ക് ഗുരുതരമായി പരിക്കേറ്റു. കണ്ണൂർ സ്വദേശിനി റജീനയ്ക്കാണ് (36) പരിക്കേറ്റത്. കാലിന് സാരമായി പരിക്കേറ്റ ഇവരെ ആശുപത്രിയിൽ പ്രവേശിപ്പിച്ചു. കണ്ണൂർ എൽഐസി ഓഫീസിനു സമീപത്തെ പന്പിലായിരുന്നു അപകടം. പള്ളിക്കുന്നിലെ മോഹന കൃഷ്ണൻ എന്നയാൾ ഓടിച്ച കാറാണ് നിയന്ത്രണം വിട്ട് അപകടത്തിനിടയാക്കിയത്. കാർ സ്കൂട്ടറിൽ ഇന്ധനം നിറക്കുകയായിരുന്ന യുവതിയെ ഇടിച്ചു തെറിപ്പിച്ച ശേഷം പമ്പിലെത്തിയ ചെക്കിക്കുളം സ്വദേശിയായ ഗണേശന്‍റെ ഓട്ടോയിലും മറ്റൊരു കാറിലും ഇടിച്ചാണ് നിന്നത്. ഗണേശന്‍ പരിക്കേല്‍ക്കാതെ രക്ഷപ്പെട്ടു. അപകടത്തിനിടെ പെട്രോള്‍ പമ്പിലെ ഇന്ധനം നിറക്കുന്ന നോസിൽ തകർന്നു വീണു. അപകടത്തിൽ പ്രെട്രോള്‍ പമ്പിലെ ജീവനക്കാരന്‍ അഞ്ചാംപീടികയിലെ കെ. അശോകന് കൈക്ക് പരിക്കേറ്റു. കണ്ണൂര്‍ ടൗണ്‍ പോലീസും ട്രാഫിക്ക് പോലീസും സ്ഥലത്തെതിയാണ് അപകടത്തിൽപ്പെട്ട വാഹനങ്ങൾ മാറ്റിയത്.

സ്കൂൾ പരിസരങ്ങളിൽ പരിശോധന നടത്തി

ഇരിട്ടി: ഓണം സ്പെഷൽ ഡ്രൈവിന്‍റെ ഭാഗമായി ഇരിട്ടി എക്സൈസ് റേഞ്ചും പേരാവൂർ സർക്കിൾ ഭക്ഷ്യാസുരക്ഷ വകുപ്പും സംയുക്തമായി സ്കൂൾ പരിസരങ്ങളിലെ കടകളിൽ പരിശോധന നടത്തി. പായം പഞ്ചായത്തിലെ കുന്നോത്ത്, കൂട്ടുപുഴ, പേരട്ട എന്നിവിടങ്ങളിലെ സ്കൂൾ പരിസരങ്ങളിലെ കടകളിലാണ് പരിശോധന നടത്തിയത്. കടകളിൽ പാൻമസാല തുടങ്ങി ലഹരിവസ്തുക്കൾ, കാലാവധി കഴിഞ്ഞ ഭക്ഷ്യവസ്തുക്കൾ എന്നിവ സൂഷിക്കുകയോ വില്ക്കുകയോ ചെയ്യുന്നുണ്ടോയെന്ന് കണ്ടെത്താനായിരുന്നു പരിശോധന. കുറ്റകൃത്യങ്ങൾ കണ്ടെത്തിയാൽ കർശന നടപടി സ്വീകരിക്കുമെന്ന് കടയുടമകൾക്ക് മുന്നറിയിപ്പ് നൽകി. പരിശോധന വരുംദിവസങ്ങളിൽ മറ്റുപഞ്ചായത്തുകളിലും തുടരുമെന്ന് അധികൃതർ അറിയിച്ചു. ഇരിട്ടി റേഞ്ച് ഇൻസ്പെക്ടർ ഇ.പി. വിപിന്‍റെ നേതൃത്വത്തിൽ നടത്തിയ പരിശോധനയിൽ ഭക്ഷ്യസുരക്ഷാ ഓഫീസർ എം.എസ്. മഹേഷ്, അസിസ്റ്റന്‍റ് എക്സൈസ് ഇൻസ്പെക്ടർമാരായ പി.വി. സുലൈമാൻ, സി.എം. ജയിംസ്, സിവിൽ എക്സൈസ് ഓഫീസർ പി.ജി. അഖിൽ, വനിത സിവിൽ എക്സൈസ് ഓഫീസർ വി. ശരണ്യ, സിവിൽ എക്സൈസ് ഓഫീസർ ഡ്രൈവർ കെ.ടി. ജോർജ് എന്നിവർ പങ്കെടുത്തു.

സ്‌നേഹഭവനത്തിന്‍റെ താക്കോൽ കൈമാറി

ഉളിക്കൽ: ഇരിക്കൂർ ബ്ലോക്ക് പഞ്ചായത്തിന്‍റെ ആഭിമുഖ്യത്തിൽ ചിറ്റിലപ്പള്ളി ഫൗണ്ടേഷന്‍റെയും, കുറ്റൂർ സൺറൈസ് കോളജ് എൻഎസ്എസ് യൂണിറ്റിന്‍റെയും സഹായത്തോടെ ഉളിക്കൽ പഞ്ചായത്തിലെ അംബേദ്ക്കർ ഉന്നതിയിൽ നിർമിച്ച വീടിന്‍റെ താക്കോൽദാനം സജീവ് ജോസഫ് എംഎൽഎ നിർവഹിച്ചു. ഇരിക്കൂർ ബ്ലോക്ക് പഞ്ചായത്ത് പ്രസിഡന്‍റ് റോബർട്ട് ജോർജ് അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഒ.എസ്. ലിസി, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ബേബി തോലാനി, ബ്ലോക്ക് പഞ്ചായത്തംഗം ചാക്കോ പാലക്കലോടി, പഞ്ചായത്തംഗം ടോമി മൂക്കനോലിൽ, എൻഎസ്എസ് പ്രോഗ്രാം ഓഫീസർ ജാബിർ എന്നിവർ പ്രസംഗിച്ചു.

ഹജ്ജ് സാങ്കേതിക പഠന ക്ലാസുകൾ നാളെ ആരംഭിക്കും

മട്ടന്നൂർ: സംസ്ഥാന ഹജ്ജ് കമ്മിറ്റി മുഖേന അടുത്ത വർഷത്തെ ഹജ്ജ് കർമത്തിനു തെരഞ്ഞെടുക്കപ്പെട്ട ഹാജിമാർക്കുള്ള ഒന്നാംഘട്ട സാങ്കേതിക പരിശീലന ക്ലാസുകൾ ജില്ലയിൽ നാളെ ആരംഭിക്കും. തളിപ്പറമ്പ് പുഷ്പഗിരി നന്മ ഓഡിറ്റോറിയത്തിൽ രാവിലെ ഒമ്പതിന് ഹജ്ജ് പഠന ക്ലാസുകളുടെ ജില്ലാതല ഉദ്ഘാടനം ഹജ്ജ് കമ്മിറ്റി മെംബർ പി.പി. മുഹമ്മദ്‌ റാഫി നിർവഹിക്കും. ജില്ലാ ട്രെയിനിംഗ് ഓർഗനൈസർ നിസാർ അതിരകം അധ്യക്ഷത വഹിക്കും. ഹജ്ജ് കമ്മിറ്റി മെംബർമാരായ ഒ.വി. ജാഫർ, ഷംസുദ്ദീൻ അറിഞ്ചിറ എന്നിവർ പ്രസംഗിക്കും. പയ്യന്നൂർ, തളിപ്പറമ്പ്, കല്യാശേരി, ഇരിക്കൂർ മണ്ഡലങ്ങളിലെ ഹാജിമാർ പരിശീലനത്തിൽ പങ്കെടുക്കും. 14ന് കണ്ണൂർ, അഴിക്കോട് മണ്ഡലത്തിലെ ഹാജിമാർക്കുള്ള പരിശീലന ക്ലാസ് കണ്ണൂർ ജവഹർ ഓഡിറ്റോറിയത്തിലും മട്ടന്നൂർ, പേരാവൂർ മണ്ഡലത്തിലെ ഹാജിമാർക്കുള്ള ക്ലാസ് മട്ടന്നൂർ കളറോട് മദ്രസ ഓഡിറ്റോറിയത്തിലും 20ന് കൂത്തുപറമ്പ് മണ്ഡലത്തിലെ ഹാജിമാർക്കുള്ള ക്ലാസുകൾ പാനൂർ കൈവേലിക്കൽ എംഇഎസ് സ്കൂളിലും തലശേരി, ധർമടം മണ്ഡലങ്ങളിലെ ഹാജിമാർക്കുള്ള ക്ലാസുകൾ തലശേരി ഓഡിറ്റോറിയത്തിലും നടക്കും. ക്ലാസുകൾക്ക് ഹജ്ജ് ഫാക്കൽറ്റികളായ നിസാർ അതിരകം, സി.കെ. സുബൈർ ഹാജി, താജുദ്ദീൻ മട്ടന്നൂർ, ഗഫൂർ പുന്നാട് എന്നിവർ നേതൃത്വം നൽകും. ക്ലാസുകളിൽ തെരഞ്ഞെടുക്കപ്പെട്ട ഹാജിമാർക്ക് പുറമെ കാത്തിരിപ്പ് പട്ടികയിൽ ഒന്നു മുതൽ 6000 വരെയുള്ള അപേക്ഷകരും അതാതു മണ്ഡലങ്ങളിൽ പങ്കെടുക്കേണ്ടതാണെന്ന് അധികൃതർ അറിയിച്ചു.

ഇൻഡോർ കോർട്ടിലെ ശബ്ദമലിനീകരണം നിയന്ത്രിക്കണം: മനുഷ്യാവകാശ കമ്മീഷൻ

കണ്ണൂർ: തലശേരി എരഞ്ഞോളി നാലാം വാർഡിൽ പ്രവർത്തിക്കുന്ന ഇൻഡോർ കോർട്ട് കാരണം പ്രദേശവാസികൾക്കുണ്ടാകുന്ന ശബ്ദമലിനീകരണവും മറ്റ് നിയമലംഘനങ്ങളും തടയണമെന്ന് മനുഷ്യാവകാശ കമ്മീഷൻ പഞ്ചായത്ത് സെക്രട്ടറിക്ക് നിർദേശം നൽകി. കമ്മീഷൻ ജുഡീഷ്യൽ അംഗം കെ. ബൈജുനാഥ് എരഞ്ഞോളി പഞ്ചായത്ത് സെക്രട്ടറിക്കാണ് നിർദേശം നൽകിയത്. സമാധാനത്തോടെ ജീവിക്കാനുള്ള അവകാശം ഭരണഘടന ഉറപ്പുനൽകുന്ന അടിസ്ഥാന അവകാശമാണെന്നും ഇൻഡോർ സ്റ്റേഡിയത്തിന് സമീപം താമസിക്കുന്ന പരാതിക്കാരന്‍റെയും മറ്റുള്ളവരുടെയും സമാധാനജീവിതം ഉറപ്പാക്കണമെന്നും കമ്മീഷൻ ഉത്തരവിട്ടു. കേരള പഞ്ചായത്ത് രാജ് നിയമം, നോയ്സ് പൊലൂഷൻ റൂൾസ് എന്നിവ പ്രകാരം ലൈസൻസിംഗ് അഥോറിറ്റിയായ എരഞ്ഞോളി പഞ്ചായത്ത് സെക്രട്ടറി നടപടി സ്വീകരിക്കണമെന്നും കമ്മീഷൻ ഉത്തരവിൽ പറഞ്ഞു. 2021 ജനുവരിയിൽ പ്രവർത്തനം ആരംഭിച്ച ഇൻഡോർ കോർട്ട് പഞ്ചായത്തിന്‍റെ ലൈസൻസില്ലാതെ യാണ് പ്രവർത്തിക്കുന്നതെന്ന പി. വിജയന്‍റെ പരാതി വാസ്തവമാണെന്ന് പഞ്ചായത്ത സെക്രട്ടറി കമ്മീഷനെ അറിയിച്ചു. പരാതിയിൽ കഴമ്പുണ്ടെന്നും ശബ്ദം നിയന്ത്രിക്കാൻ ഉടമയ്ക്ക് നിർദേശം നൽകിയിട്ടുണ്ടെന്നും പഞ്ചായത്ത് സെക്രട്ടറി കമ്മീഷനെ അറിയിച്ചു.

വോട്ടർ പട്ടികയിൽ ക്രമക്കേടെന്ന് കോൺഗ്രസ്

കണിച്ചാർ: കണിച്ചാർ പഞ്ചായത്തിലെ വോട്ടർ പട്ടികയിൽ ക്രമക്കേടെന്ന് കോൺഗ്രസ് കണിച്ചാർ മണ്ഡലം കമ്മിറ്റി നേതാക്കൾ. വാർഡുകളുടെ അതിരുകൾ ആരുമറിയാതെ മാറ്റം വരുത്തിയാണ് 11, 14 വാർഡുകളിലെ വോട്ടർപട്ടിക പ്രസിദ്ധീകരിച്ചതെന്ന് മണ്ഡലം പ്രസിഡന്‍റ് ചാക്കോ തൈക്കുന്നേൽ, ഡിസിസി അംഗം സണ്ണി മേച്ചേരി, പഞ്ചായത്തംഗങ്ങളായ ജോജൻ എടത്താഴെ, ലിസമ്മ ജോയിക്കുട്ടി, സുരേഖ സജി എന്നിവർ പത്രസമ്മേളനത്തിൽ പറഞ്ഞു. 15 ദിവസം മുന്പ് സർവ കക്ഷി യോഗത്തിലെ തീരുമാനത്തിന് വിരുദ്ധമായ രീതിയിലാണ് അന്തിമ വോട്ടർപട്ടിക പ്രസിദ്ധീകരിച്ചിരിക്കുന്നത്. ഇക്കാര്യം പഞ്ചായത്ത് സെക്രട്ടറിയെ അറിയിച്ചപ്പോൾ മുന്പ് സെക്രട്ടറിയുടെ ചുമതല വഹിച്ചിരുന്ന ഉദ്യോഗസ്ഥനാണ് കാര്യങ്ങൾ ചെയ്തതെന്നും തനിക്ക് ഒന്നുമറിയില്ലെന്ന നിലപാടാണ് സെക്രട്ടറി പുലർത്തുന്നതെന്നും കോൺഗ്രസ് നേതാക്കൾ പറഞ്ഞു. ഇതു സംബന്ധിച്ച് പഞ്ചായത്ത് ജോയിന്‍റ് സെക്രട്ടറി, ജില്ലാ കളക്ടർ എന്നിവർക്ക് പരാതി നൽകും. പരിശോധന നടത്താതെയും സർവ കക്ഷി യോഗത്തിലെ സമവായത്തിന് വിരുദ്ധമായും എടുത്ത നടപടികൾ പുനഃപരിശോധിക്കണമെന്നും ഇവർ ആവശ്യപ്പെട്ടു.

കാ‌ടുമൂടിയ മുരിക്കുംകരി റോഡ് വെട്ടിത്തെളിക്കാൻ നടപടികളില്ല

കേളകം: കടുവ, പുലി, കാട്ടുപന്നി എന്നിവയുൾപ്പടെയുള്ള വന്യമൃഗങ്ങളിറങ്ങുന്ന ശാന്തിഗിരിയിലെ മുരിക്കുംകരി പാത വെട്ടിത്തെളിച്ച് സഞ്ചാരയോഗ്യമാക്കാൻ നടപടികളുണ്ടാകുന്നില്ല. സഞ്ചാരികളുടെ പറുദീസയെന്ന് വിശേഷിപ്പിക്കുന്ന പാലുകാച്ചിമലയിലേക്കുള്ള പാതയാണ് കാടുമൂടിക്കിടക്കുന്നത്. നൂറുകണക്കിനാളുകൾ സഞ്ചരിച്ചിരുന്ന ഈ പാതയിലെ കാടും വള്ളിപ്പടർപ്പുകളും വെട്ടിമാറ്റി സുഗമമായ സഞ്ചാരം സാധ്യമാക്കണമെന്ന് നാട്ടുകാർ ആവശ്യപ്പെട്ടു. ശാന്തിഗിരി-നാരങ്ങത്തട്ട് പാതയിലെ രണ്ടുകിലോമീറ്റർ ഭാഗമാണ് ഇരുവശങ്ങളിൽ നിന്നും റോഡിലേക്ക് കാടുകയറി യാത്ര ഭീഷണിയിലായത്.

സംഘാടക സമിതി രൂപീകരണം

തളിപ്പറമ്പ്: വിദ്യാരംഗം ജില്ലാ പ്രവർത്തനോദ്ഘാടനവുമായി ബന്ധപ്പെട്ട് സംഘാടക സമിതി രൂപീകരണ യോഗം തളിപ്പറമ്പ് ടാഗോർ വിദ്യാനികേതൻ ജിവിഎച്ച്എസ്എസിൽ നടന്നു. തളിപ്പറമ്പ് നോർത്ത് എഇഒ കെ. മനോജ് അധ്യക്ഷത വഹിച്ചു. ഇന്ദുമതി പാപ്പിനിശേരി, അരുൺജിത്ത് പഴശി, ഫിലൈറ്റ് സ്റ്റീഫൻ, മെഹറൂഫ്, ബിജു മോഹൻ, പി. ഇബ്രാഹിം, ജിഷ ചാലിൽ, കെ.വി. മെസ്മർ എന്നിവർ പ്രസംഗിച്ചു. കെ. സുധാകരൻ എംപി, എം.വി. ഗോവിന്ദൻ എംഎൽഎ, ജില്ലാപഞ്ചായത്ത് പ്രസിഡന്‍റ് കെ.കെ. രത്നകുമാരി, മുനിസിപ്പൽ ചെയർപേഴ്സൺ മുർഷിദ കൊങ്ങായി, വാർഡ് മെംബർ പി. രജുല എന്നിവർ രക്ഷാധികാരികളായി സംഘാടകസമിതി രൂപീകരിച്ചു. ഭാരവാഹികളായി ഡി. ഷൈനി (ഡിഡിഇ, കണ്ണൂർ)-സംഘാടക സമിതി ചെയർമാൻ, എസ്. വന്ദന (ഡിഇഒ), കെ. മനോജ് (എഇഒ, തളിപ്പറമ്പ് നോർത്ത്)-വൈസ് ചെയർമാൻമാർ, പി.ഒ. ഇന്ദുമതി-ജനറൽ കൺവീനർ, പി. ഇബ്രാഹിം-ജോയിന്‍റ് കൺവീനർ, അരുൺജിത്ത് പഴശി-പ്രോഗ്രാം കൺവീനർ, ജിഷ സി. ചാലിൽ-ജോയിന്‍റ് കൺവീനർ എന്നിവരെ തെരഞ്ഞെടുത്തു.

ചികിത്സാ സഹായം കൈമാറി

മാതമംഗലം: ഇരു വൃക്കകളും തകരാറിലായി ചികിത്സയില്‍ കഴിയുന്ന പ്രമുഖ തെയ്യം കലാകാരനും കലാ-സാംസ്കാരിക പ്രവര്‍ത്തകനുമായ മാതമംഗലത്തെ പദ്മനാഭന് വൃക്ക മാറ്റിവയ്ക്കല്‍ ശസ്ത്രക്രിയ നടത്തുന്നതിനായി മാതമംഗലം സി.പി. നാരായണന്‍ സ്മാരക ഹയര്‍ സെക്കൻഡറി സ്കൂള്‍ ചികിത്സാ സഹായം നൽകി. സ്കൂളിലെ പൂർവ വിദ്യാർഥിയായ പദ്മനാഭന്‍റെ ചികിത്സ സഹായ നിധിയിലേക്ക് വിദ്യാർഥികൾ ഉൾപ്പടെയുള്ളവർ സ്വരൂപിച്ച 76295 രൂപയാണ് നൽകിയത്. സ്കൂള്‍ പഠനകാലത്ത് യുവജനോത്സ വേദികളിലെ നിറസാന്നിദ്ധ്യമായിരുന്നു. പഠനത്തിനു ശേഷം തുടര്‍ന്നിങ്ങോട്ട് കഴിഞ്ഞ വര്‍ഷം വരെ നടന്ന യുവജനോത്സവ വേദികളില്‍ സ്കൂള്‍-സബ് ജില്ല, ജില്ലാ, സംസ്ഥാനതലം വരെ പദ്മനാഭന്‍റെ കീഴില്‍ വിവിധ നൃത്തങ്ങളും നാടകവും, മോണോ ആക്‌ടുമെല്ലാം അഭ്യസിച്ച വിദ്യാര്‍ഥികൾ വിജയം നേടിയിരുന്നു. മുഖ്യാധ്യാപിക റീന തുക ചികിത്സ സഹായ കമ്മിറ്റി ചെയര്‍മാന്‍ ടി.പി. മഹമ്മൂദ് ഹാജിക്ക് കൈമാറി. കമ്മിറ്റി ഭാരവാഹികളായ ഹരിത രമേശന്‍, സന്ദീപ് പാണപ്പുഴ എന്നിവരും പങ്കെടുത്തു.

ചന്ദനക്കാംപാറ യുപി സ്കൂൾ സുവർണ ജൂബിലിയാഘോഷത്തിന് തുടക്കം

ചന്ദനക്കാംപാറ: ചെറുപുഷ്പ യുപി സ്കൂൾ സുവർണ ജൂബിലി ആഘോഷങ്ങൾക്ക് തുടക്കമായി. ഉദ്ഘാടനത്തിന് മുന്നോടിയായി നടന്ന വിളംബര ജാഥ പയ്യാവൂർ എസ്ഐ ടോമി തോമസ് ഫ്ലാഗ് ഓഫ് ചെയ്തു. ആഘോഷപരിപാടികൾ സജീവ് ജോസഫ് എംഎൽഎ ഉദ്ഘാടനം ചെയ്തു. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ അധ്യക്ഷത വഹിച്ചു. മുഖ്യാധ്യാപിക വിജി മാത്യു ആമുഖ പ്രഭാഷണവും സ്കൂൾ മാനേജർ ഫാ. ജോസഫ് ചാത്തനാട്ട് അനുഗ്രഹ പ്രഭാഷണവും നടത്തി. ഇരിക്കൂർ ഉപജില്ല വിദ്യാഭ്യാസ ഓഫിസർ കെ. വാസന്തി, ഇരിക്കൂർ ബ്ലോക്ക് പഞ്ചായത്തംഗം പി.ആർ. രാഘവൻ, പ്രഥമ മുഖ്യാധ്യാപകൻ വി.ജെ. ജയിംസ്, സ്കൂൾ അസിസ്റ്റന്‍റ് മാനേജർ ഫാ. ജിൻസ് ചൊള്ളമ്പുഴ, പയ്യാവൂർ പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ ഷീന ജോൺ, വാർഡ് മെംബർമാരായ സിന്ധു ബെന്നി, ജിത്തു തോമസ്, ചന്ദനക്കാംപാറ ചെറുപുഷ്പ ഹൈസ്കൂൾ മുഖ്യാധ്യാപിക മഞ്ജു ജയിംസ്, എൽപി സ്കൂൾ മുഖ്യാധ്യാപിക ടി.എ. റെജീന, യുപി സ്കൂൾ റിട്ട. മുഖ്യാധ്യാപകരായ തോമസ് മാത്യു, ജിൻസ് തോമസ്, പിടിഎ പ്രസിഡന്‍റ് അനിൽ കൊച്ചുകൈപ്പേൽ, മദർ പിടിഎ പ്രസിഡന്‍റ് ജിഷ അജേഷ്, സ്കൂൾ സീനിയർ അസിസ്റ്റന്‍റ് അനു ഇമ്മാനുവൽ എന്നിവർ പ്രസംഗിച്ചു.

ചെമ്പേരി നിർമല സ്കൂളിൽ സ്വയംതൊഴിൽ പരിശീലനം

ചെമ്പേരി: നിർമല ഹയർ സെക്കൻഡറി സ്കൂളിൽ സ്വയംതൊഴിൽ പരിശീലനത്തിന്‍റെ ഭാഗമായി സംഘടിപ്പിച്ച റോവർ റേഞ്ചർ ടീം വിദ്യാർഥികളുടെ ഡിറ്റർജന്‍റ് നിർമാണം സ്കൂൾ പ്രിൻസിപ്പൽ സി.ഡി. സജീവ് ഉദ്ഘാടനം ചെയ്തു. റോവർ റേഞ്ചർ സ്റ്റുഡന്‍റ്സ് ലീഡർമാരായ റിദുൽ ജോസഫ് ഷാജി, അബി അജീഷ്, എർലിൻ റോസ്, ദേവന്ദ ബിജു എന്നിവർ പ്രസംഗിച്ചു. വിദ്യാർഥികൾ നിർമിച്ച ഉത്പന്നങ്ങളുടെ ആദ്യ വില്പന സ്കൂൾ സീനിയർ അസിസ്റ്റന്‍റ് കെ.എം. ആഗ്നസ് ഏറ്റുവാങ്ങി. തുടർന്ന് സ്റ്റാഫ് സെക്രട്ടറി സി.എം. ജോൺസൺ, ഫാ. ബിജു ജോൺ, മറ്റ് അധ്യാപകർ എന്നിവരും വിദ്യാർഥികൾ നിർമിച്ച ഉത്പന്നങ്ങൾ വാങ്ങി അവർക്ക് പ്രോത്സാഹനമേകി. ഡിറ്റർജന്‍റ് നിർമാണ പരിപാടിക്ക് റോവർ റേഞ്ചർ ലീഡർന്മാരായ ജെറിൻ ജോസഫ്, ട്വിങ്കിൾ ജേക്കബ് എന്നിവർ നേതൃത്വം നൽകി. പരിപാടിക്ക് സ്കൂളിലെ മുഴുവൻ വിദ്യാർഥികളുടെയും പങ്കാളിത്തവും സഹകരണവും ഉണ്ടായിരുന്നു.

ഉന്മൂലനം ചെയ്ത പന്നികളുടെ നഷ്‌ടപരിഹാരം കിട്ടാതെ കർഷകർ

ഉദയഗിരി: ആഫ്രിക്കൻ പന്നിപ്പനി റിപ്പോർട്ട് ചെയ്തതിനെ തുടർന്ന ഉദയഗിരി പഞ്ചായത്തിൽ കൊന്നൊടുക്കിയ പന്നികളുടെ നഷ്ടപരിഹാരം ഇനിയും കിട്ടാതെ കർഷകർ. കഴിഞ്ഞ വർഷം ജൂലൈയിലാണ് അരിവിളഞ്ഞപൊയിലിലെ മണ്ണാത്തിക്കുണ്ട് പ്രദേശത്ത് പന്നികളെ കൊന്നൊടുക്കിയത്. മണ്ണാത്തിക്കുണ്ട് ബാബു കൊടക്കനാലിന്‍റെ ഉടമസ്ഥതയിലുള്ള ഫാമിലാണ് ആഫ്രിക്കൻ പന്നിപ്പനി സ്ഥിരീകരിച്ചത്. ഈ ഫാമിലെയും ഇതിന്‍റെ ഒരു കിലോമീറ്റർ ചുറ്റളവിലുള്ള മുഴുവൻ ഫാമുകളിലെയും പന്നികളെയാണ് ഉന്മൂലനം ചെയ്തത്. മൂന്നുവർഷം മുമ്പും സമാനമായ രീതിയിൽ പന്നികളെ കൊന്നൊടുക്കിയിരുന്നു. അന്ന് ജയഗിരി, താളിപ്പാറ, മാമ്പൊയിൽ പ്രദേശങ്ങളിലെ 32 കർഷകരുടെ 554 പന്നികളെയാണ് ദയാവധം ചെയ്‌തത്. പല ഫാമുകളിലെയും പന്നികൾക്ക് രോഗലക്ഷണമില്ലാതിരുന്നിട്ടും രോഗ പ്രതിരോധ മാനദണ്ഡങ്ങൾ പാലിക്കേണ്ടതിനാൽ ഇവയെയും ഉന്മൂലനം ചെയ്യുകയായിരുന്നു. ഏറെ പ്രക്ഷോപങ്ങൾക്കൊടുവിലാണ് ആ കുടുംബങ്ങൾക്ക് കഴിഞ്ഞവർഷം നഷ്ട പരിഹാരം ലഭിച്ചത്. മന്ത്രി ജെ. ചിഞ്ചുറാണി ഉദയഗിരിയിൽ നേരിട്ടെത്തി നഷ്ടപരിഹാരം വിതരണം നടത്തിയ ദിവസം തന്നെയാണ് രണ്ടാമതും പന്നിപ്പനി റിപ്പോർട്ട് ചെയ്തത്. അവിടെ ഒരു മേഖലയിൽ മാത്രമായിരുന്നു രോഗം സ്ഥിരീകരിച്ചത്. അതുകൊണ്ട് തന്നെ കർഷകരുടെ എണ്ണവും ദയാവധം നടത്തിയ പന്നികളുടെ എണ്ണവും കുറവായിരുന്നു. ഇവർക്ക് നഷ്ടപരിഹാരം ഇനിയും കിട്ടിയിട്ടില്ല. നഷ്ടപരിഹാരം ആവശ്യപ്പെട്ട് നിരവധി തവണ മന്ത്രി ജെ. ചിഞ്ചുറാണി, സജീവ് ജോസഫ് എംഎൽഎ, ഉദയഗിരി പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ എന്നിവർക്ക് പരാതി നൽകിയിട്ടും നടപടിയുണ്ടായിട്ടില്ലെന്നും ആക്ഷേപമുണ്ട്. കർഷകരുടെ പ്രശ്നങ്ങൾക്ക് പരിഹാരം വേണം രോഗം മൂലം കൃഷികൾ വ്യാപകമായി നശിച്ചതോടെയാണ് പുതിയ ജീവിതമാർഗമെന്ന നിലയിൽ പലരും പന്നി വളർത്തലിലേക്ക് മാറിയത്. ബാങ്കുകളിൽനിന്നും സഹകരണ സംഘങ്ങളിൽ നിന്നും വായ്‌പകളെടുത്താണ് എല്ലാവരും സംരംഭം ആരംഭിച്ചത്. 10 കിലോയ്ക്ക് മുകളിലുള്ള പന്നിക്കുഞ്ഞുങ്ങളെ വാങ്ങണമെങ്കിൽ 15,000 മുതൽ 20,000 രൂപ വരെ മുടക്കേണ്ടതുണ്ട്. പന്നിക്കുഞ്ഞുങ്ങൾക്കുള്ള പ്രതിരോധ കുത്തിവയ്‌പുകൾ, മരുന്നുകൾ എന്നിവയ്ക്ക് വലിയസാമ്പത്തിക ചെലവും പരിപാലിച്ച് വളർത്തിയെടുക്കാൻ ഏറെ പരിശ്രമവും ആവശ്യമുണ്ട്. 20 മുതൽ 25 വരെ പന്നിക്കുഞ്ഞുങ്ങളെ വാങ്ങിയാണ് മിക്കവരും ഫാം ആരംഭിക്കുന്നത്. ഇവയിൽനിന്ന് കുഞ്ഞുങ്ങളെ ഉത്പാദിപ്പിച്ച് ഫാം നടത്തുന്നവരുമുണ്ട്. പന്നികളെ വളർത്തിയെടുക്കുന്നതിനും പന്നികളെ പ്രജനനം നടത്തി പരിപാലിക്കുന്നതിനും ഭാരിച്ച ചെലവുണ്ട്. രോഗം കാരണം പന്നികളെ കൂട്ടത്തോടെ ഉന്മൂലനം ചെയ്യുമ്പോൾ കർഷകരുടെ ജീവിതമാർഗമാണ് അടയുന്നത്. നഷ്ടപരിഹാരം എത്രയും പെട്ടെന്ന് നൽകണം പന്നികളെ കൊല്ലാൻ കാണിക്കുന്ന ജാഗ്രത നഷ്ടപരിഹാരം ലഭ്യമാക്കുന്നതിലും കാണിക്കണമെന്ന് കർഷകർ ആവശ്യപ്പെടുന്നു ഏതെങ്കിലും ഒരു ഫാമിൽ പന്നിപ്പനി സ്ഥിരീകരിച്ചാൽ പ്രദേശത്തെ ഫാമുകളിലെ പന്നികളെ കൂട്ടത്തോടെ ദയാവധത്തിന് വിധേയമാക്കുന്നതിന് മുന്പ് പ്രത്യേക നിരീക്ഷണത്തിൽ നിർത്തി രോഗമുള്ളവയെ മാത്രം ദയാവധത്തിന് വിധേയമാക്കണമെന്നും കർഷകർ നിർദേശിക്കുന്നു. നഷ്ടപരിഹാരം ലഭിച്ചാൽ മാത്രമേ ബാങ്ക് വായ്‌പ പോലും തിരിച്ചടയ്ക്കാൻ കഴിയൂ എന്ന അവസ്ഥയിലൂടെയാണ് കർഷകർ കടന്നുപോകുന്നത്. നഷ്ടപരിഹാരം നൽകുന്നതിൽ കാലതാമസം വരികയാണെങ്കിൽ സർക്കാർ ഇടപെട്ട് വായ്‌പാ തിരിച്ചടവിന് സാവകാശം ഉറപ്പാക്കണമെന്നാണ് മറ്റൊരാവശ്യം. മുഴുവൻ മുതൽമുടക്കും നഷ്ടപരിഹാരമായി പ്രതി ക്ഷിക്കുന്നില്ലെങ്കിലും. നഷ്ടം വരാത്ത രീതിയിലുള്ള തുകയെങ്കിലും ഉറപ്പാക്കണമെന്നും കർഷകർ പറയുന്നു.

കെവിവിഇഎസ് പയ്യാവൂർ യൂണിറ്റ് വാർഷിക ജനറൽബോഡി

പയ്യാവൂർ: കേരള വ്യാപാരി വ്യവസായി ഏകോപനസമിതി (കെവിവിഇഎസ്) പയ്യാവൂർ യൂണിറ്റ് വാർഷിക ജനറൽബോഡി പയ്യാവൂർ വ്യാപാരഭവൻ ഓഡിറ്റോറിയത്തിൽ നടന്നു. ജില്ലാ ജനറൽ സെക്രട്ടറി പി. ബാഷിത് യോഗം ഉദ്ഘാടനം ചെയ്തു. വ്യാപാരികളുടെ സുഖ ദുഃഖങ്ങളിൽ ഒത്തൊരുമയോടെ ചേർന്നുനിൽക്കുന്ന പ്രസ്ഥാനമാണ് കേരള വ്യാപാരി വ്യവസായി ഏകോപന സമിതിയെന്നും ഓൺലൈൻ വ്യാപാരങ്ങൾ വർധിച്ചുവരുന്നത് ചെറുകിട വ്യാപാര മേഖലയെ തകർക്കുകയാണെന്നും അദ്ദേഹം പറഞ്ഞു. സംസ്ഥാന ജനറൽ സെക്രട്ടറി ദേവസ്യ മേച്ചേരി അധ്യക്ഷത വഹിച്ചു. ജോസുകുട്ടി കുര്യൻ പ്രവർത്തന റിപ്പോർട്ടും, ട്രഷറർ കെ.വി. പ്രകാശൻ വരവുചെലവ് കണക്കും പി.വി. രാമചന്ദ്രൻ അനുശോചന പ്രമേയവും അവതരിപ്പിച്ചു. രജിസ്റ്റർ ചെയ്ത മെംബർമാരെ ഉൾപ്പെടുത്തി നടത്തിയ നറുക്കെടുപ്പിൽ അഞ്ചുപേർക്ക് സമ്മാനങ്ങളും നൽകി. ജില്ലാ സെക്രട്ടേറിയറ്റ് മെംബർ കെ.പി. അയ്യൂബ്, പയ്യാവൂർ എസ്ഐ പി.പി. പ്രഭാകരൻ, പയ്യാവൂർ യൂണിറ്റ് വർക്കിംഗ് പ്രസിഡന്‍റ് കെ. സുരേഷ്‌കുമാർ, ജില്ല ട്രഷറർ എം.പി. തിലകൻ, മേഖല പ്രസിഡന്‍റ് ജോർജ് തോണിയ്ക്കൽ, മേഖല ജനറൽ സെക്രട്ടറി ഷാബി ഈപ്പൻ, ജോയി പുന്നശേരിമലയിൽ, ബെന്നി പുളിയ്ക്കൽ, ബെന്നി മാത്യു, സ്കറിയ പൂവന്നിക്കുന്നേൽ, ആന്‍റണി പള്ളിപ്പുറത്ത്, കെ.സി. അബ്ദുള്ള, ഷൈജു തോമസ്, അബ്ദുൾ ഖാദർ ഹാജി എന്നിവർ പ്രസംഗിച്ചു. വ്യാപാരികളുടെ മക്കളിൽ എസ്എസ്എൽസി, പ്ലസ് ടു പരീക്ഷകളിൽ ഉന്നതവിജയം കരസ്ഥമാക്കിയവർ, പയ്യാവൂർ ടൗണിലെ വ്യാപാരിയായ പോപ്പുലർ തോമസ്‌കുട്ടിയുടെ മകൻ ഡോ. തോമസ് തോമസ്, വിശിഷ്ട സേവനത്തിന് മുഖ്യമന്ത്രിയുടെ അവാർഡ് ലഭിച്ച പയ്യാവൂർ പോലീസ് സബ് ഇൻസ്പെക്‌ടർ പി.പി. പ്രഭാകരൻ, സിവിൽ പോലീസ് ഓഫീസർ കെ. രജീഷ്, ബാല നടനുള്ള ഈ വർഷത്തെ അവാർഡ് നേടിയ നീരജ് കൃഷ്‌ണ എന്നിവരെ സജീവ് ജോസഫ് എംഎൽഎ ആദരിച്ചു. ദീർഘകാലം പയ്യാവൂർ ടൗണിൽ ചുമട്ടുതൊഴിലാളിയായി ജോലിയിൽനിന്ന് വിമരിച്ച ഉണ്ണികൃഷ്‌ണന് യാത്രയയപ്പ് നൽകി. സ്നേഹ വിരുന്നും നടന്നു.

റിസർച്ച് ആൻഡ് സ്കിൽ സെന്‍ററും മീഡിയ റൂമും ഉദ്ഘാടനം ചെയ്തു

ചെറുപുഴ: മാത്തിൽ ഗുരുദേവ് ആർട്സ് ആൻഡ് സയൻസ് കോളജിൽ റിസർച്ച് ആൻഡ് സ്കിൽ സെന്‍ററും മീഡിയ റൂമും ടി.ഐ. മധുസൂദനൻ എംഎൽഎ ഉദ്ഘാടനം ചെയ്തു. വിദ്യാർഥികളുടെ സമഗ്ര വികസനത്തിനായി കോളജ് ചെയ്യുന്ന എല്ലാ പ്രവർത്തനങ്ങളും മാതൃകാപരമാണെന്ന് അദ്ദേഹം പറഞ്ഞു. എല്ലാ മാസങ്ങളിലും പ്രസിദ്ധീകരിക്കുന്ന ഗുരുദേവ് ന്യൂസ്‌ ലെറ്ററിന്‍റെ സ്വിച്ച്ഓൺ കർമവും എംഎൽഎ നിർവഹിച്ചു. കാങ്കോൽ ആലപ്പടമ്പ് പഞ്ചായത്ത് പ്രസിഡന്‍റ് എം.വി. സുനിൽകുമാർ, കോളജ് പ്രിൻസിപ്പൽ റവ. ഡോ. സാമുവൽ പുതുപ്പാടി, കോളജ് ചീഫ് ബർസാർ റവ. ഡോ. വർഗീസ് താന്നിക്കാകുഴി, യുഎസ്എ ആസ്ഥാനമായി പ്രവർത്തിക്കുന്ന ഗ്ലോബൽ യംഗ് റിസേർച്ചേഴ്സ് അക്കാദമിയിലെ ഡോ. വിപിൻദേവ്, മാധ്യമ പ്രവർത്തകൻ ഹരിഹരൻ, കോളജ് വൈസ് പ്രിൻസിപ്പൽ പി. വിനോദ് കുമാർ എന്നിവർ പ്രസംഗിച്ചു.

ബംഗളൂരു എഫ്‌സിയില്‍നിന്ന് രണ്ടു താരങ്ങൾ കണ്ണൂര്‍ വാരിയേഴ്‌സിലേക്ക്

കണ്ണൂര്‍: ഐ ലീഗിലെ സ്‌പോര്‍ട്ടിംഗ് ബംഗളൂരു എഫ്‌സിയില്‍ നിന്ന് രണ്ട് താരങ്ങളെ കണ്ണൂര്‍ വാരിയേഴ്‌സ് ഫുട്‌ബോള്‍ ക്ലബ് ടീമിലെത്തിച്ചു. മധ്യനിരതാരം ഒ.എം. ആസിഫ്, പ്രതിരോധ താരം എസ്. മനോജ് എന്നിവരെയാണ് കണ്ണൂര്‍ വാരിയേഴ്‌സ് സ്വന്തമാക്കിയത്. ആസിഫ് സെന്‍ട്രല്‍ മിഡ്ഫില്‍ഡറായും അറ്റാക്കിംഗ് മിഡ്ഫിള്‍ഡറായും കളിക്കുന്ന താരമാണ്. 2023-24 സീസണില്‍ സ്‌പോര്‍ട്ടിംഗ് ബംഗളൂരു ഐ ലീഗ് രണ്ടാം ഡിവിഷനില്‍ ചാമ്പ്യന്മാരായപ്പോള്‍ മധ്യനിരയില്‍ ആസിഫ് ഉണ്ടായിരുന്നു. കേരള ബ്ലാസ്റ്റേഴ്‌സ് റിസര്‍വ് ടീമിന് വേണ്ടി കേരള പ്രീമിയര്‍ ലീഗില്‍ കളിച്ച താരം 2019-20 സീസണില്‍ ബ്ലാസ്റ്റേഴ്‌സിനെ ചാമ്പ്യന്‍മാരാക്കുന്നതില്‍ നിര്‍ണായ പങ്കു വഹിച്ചു. കേരളത്തിന് വേണ്ടി 2022 -23 സീസണില്‍ സന്തോഷ് ട്രോഫിയും അണ്ടര്‍- 17 വിഭാഗത്തില്‍ ദേശീയ ഫുട്‌ബോള്‍ ചാമ്പ്യന്‍ഷിപ്പില്‍ മൂന്നാം സ്ഥാനവും നേടി. എഫ്സി കേരള, പ്രോഡ്ജി എഫ്എ എന്നിവയ്ക്കു വേണ്ടി ജൂണിയര്‍ ഐ ലീഗും താരം കളിച്ചിട്ടുണ്ട്. കൊച്ചി സ്വദേശിയാണ് ആസിഫ്. ഇടത് വിംഗ്ബാക്കാണ് മനോജ്. കര്‍ണാടക സ്വദേശിയായ മനോജ് 2014 -15 സീസണില്‍ ബംഗളൂരു എഫ്‌സിയുടെ അണ്ടര്‍-19 വിഭാഗത്തില്‍ മത്സരം ആരംഭിച്ച താരം ഐ ലീഗ് രണ്ടാം ഡിവിഷനില്‍ ഫത്തേ ഹൈദരാബാദ്, ഓസോണ്‍ എഫ്‌സി, അറ എഫ്‌സി, ബംഗളൂരു യുണൈറ്റഡ് എഫ്‌സി എന്നിവയ്ക്കു വേണ്ടി കളിച്ചു. കോല്‍ക്കത്തന ലീഗില്‍ പീര്‍ലെസ് ക്ലബിനുവേണ്ടിയും ബൂട്ടുകെട്ടി. 2023 ലാണ് സ്‌പോര്‍ട്ടിംഗ് ക്ലബിലെത്തുന്നത്. പിന്നീട് സ്‌പോര്‍ട്ടിംഗിന് വേണ്ടി ഐ ലീഗ് മൂന്നാം ഡിവിഷന്‍, ഐ ലീഗ് രണ്ടാം ഡിവിഷന്‍, ഐ ലീഗ് എന്നീ മത്സരങ്ങളും കളിച്ചു. ടീം ക്യാപ്റ്റനുമായിരുന്നു. 2022-23 സീസണില്‍ സൗദിയിലെ റിയാദില്‍ നടന്ന സന്തോഷ് ട്രോഫി ഫൈനല്‍ റൗണ്ടില്‍ ചാമ്പ്യന്‍മാരായ കര്‍ണാടക ടീമിന്‍റെ ക്യാപ്റ്റനുമായിരുന്നു.

നിക്‌ഷാനിൽ ഓണം കഴിഞ്ഞും ഓഫർ മൂഡ് തുടരുന്നു

കണ്ണൂർ: ഓണത്തോടനുബന്ധിച്ച് നിക്‌ഷാനിൽ ആരംഭിച്ച ഓഫർ മൂഡ് തുടരുന്നു. ഈ ഓണത്തിന് മറ്റാർക്കും നൽകാനാകാത്ത ഓഫറുകളും വിലക്കുറവുമാണ് നിക്‌ഷാനിൽ ഒരുക്കിയിരുന്നത്. തിരുവോണത്തിരക്കുകൾക്കിടയിൽ ആഗ്രഹിച്ച ഗൃഹോപകരണങ്ങളും ഗാഡ്ജറ്റുകളും സ്വന്തമാക്കാൻ കഴിയാതെ പോയവരുടെ ആഗ്രഹപൂർത്തീകരണം കൂടി മുന്നിൽക്കണ്ടാണ് ഓഫർ മൂഡ് തുടരുന്നത്. ഇന്നുവരെ ആരും നൽകാത്ത ഓഫറുകളും ഡിസ്കൗണ്ടുകളും കോടിക്കണക്കിനു രൂപയുടെ സമ്മാനങ്ങളുമായാണ് നിക്‌ഷാൻ ഓണക്കോടീശ്വരൻ സെയിൽ തുടരുന്നത്. സെയിലിന്‍റെ ഭാഗമായി ബ്രാൻഡഡ് ഗൃഹോപകരണങ്ങളും ഗാഡ്ജറ്റുകളും 75 ശതമാനം വരെ വിലക്കുറവിൽ ഉപഭോക്താവിന് സ്വന്തമാക്കാം. ഉപഭോക്താക്കളുടെ താത്പര്യപ്രകാരമാണ് ഓണം കഴിഞ്ഞിട്ടും ഓഫർ മൂഡ് തുടരുന്നതെന്ന് മാനേജിംഗ് ഡയറക്ടർ എം.എം.വി. മൊയ്തു പറഞ്ഞു. സമ്മാനങ്ങളുടെ മഹാമേള ഈ ഓണക്കാലത്ത് പർച്ചേസ് ചെയ്യുന്ന എല്ലാ ഉപഭോക്താക്കൾക്കും വന്പൻ ഓഫറുകൾക്കൊപ്പം ഉറപ്പായ സമ്മാനങ്ങളും വിഭാവനം ചെയ്തുകൊണ്ടാണ് നിക്ഷാൻ ഓണക്കോടീശ്വരൻ’ സെയിൽ ആവിഷ്കരിച്ചിരിക്കുന്നത്. ലക്കി ഡ്രോയിലൂടെ തെരഞ്ഞെടുക്കപ്പെടുന്ന ഉപഭോക്താവിന് ബന്പർ സമ്മാനമായി ഒരു മഹീന്ദ്ര ബിഇ 6 കാർ നൽകും. രണ്ട് ഹാർലി ഡേവിഡ്സണ്‍ 440 x ബൈക്കുകൾ, നാല് ഏഥർ റിസ്റ്റ ഇലക്ട്രിക് സ്കൂട്ടറുകൾ എന്നിവയുടെ സമ്മാനങ്ങളുടെ നീണ്ട നിരയുമുണ്ട്. കന്പനികൾ നൽകുന്ന കോടിക്കണക്കിന് രൂപയുടെ സമ്മാനങ്ങൾക്കും ഓഫറുകൾക്കും പുറമെയാണിത്. ഉരച്ചോളൂ...ഉറപ്പാണ് സമ്മാനം മൊബൈൽ ഫോണും ലാപ്ടോപ്പും വാങ്ങുന്പോൾ ഉറപ്പായ സമ്മാനങ്ങളുമായി നിക്‌ഷാനിൽ സ്ക്രാച്ച് ആൻഡ് വിൻ ഓഫറുമുണ്ട്. 10000 രൂപയ്ക്ക് മുകളിലുള്ള പർച്ചേസുകൾക്കൊപ്പമാണ് അത്യാകർഷകമായ സമ്മാനങ്ങൾ നൽകുന്നത്. സ്ക്രാച്ച് ആൻഡ് വിൻ ഓഫറിലൂടെ, ഒരു ഇന്‍റർനാഷണൽ ട്രിപ്പ്, ഐഫോണ്‍, 43 ഇഞ്ച് സ്മാർട്ട് ടിവി, റഫ്രിജറേറ്റർ, വാഷിംഗ് മെഷിൻ തുടങ്ങിയ ഒട്ടനവധി ഉറപ്പായ സമ്മാനങ്ങളാണ് ഉപഭോക്താവിനെ കാത്തിരിക്കുന്നത്. ഒപ്പം തന്നെ, ഷോറൂം സന്ദർശിച്ച് വിസിറ്റ് ആൻഡ് വിൻ കൂപ്പണ്‍ നിക്ഷേപിച്ചവർക്കായും നറുക്കെടുപ്പുണ്ട്. നറുക്കെടുപ്പ് ഈ മാസം അവസാനവാരം നടക്കും. 43 ഇഞ്ച് സ്മാർട്ട് ടിവി, സ്മാർട്ട് ഫോണ്‍, സ്മാർട്ട് വാച്ച് എന്നീ സമ്മാനങ്ങളാണ് ഭാഗ്യവാൻമാരെ കാത്തിരിക്കുന്നത്. ഒരു രൂപ പോലും മുടക്കാതെ വാങ്ങാം! ഒരു രൂപ പോലും മുടക്കാതെ ഇഷ്ട ഗൃഹോപകരണങ്ങളും ഗാഡ്ജറ്റുകളും പർച്ചേസ് ചെയ്യാവുന്ന ഏറ്റവും കുറഞ്ഞ ഇഎംഐ സ്കീമുകളാണ് നിക്‌ഷാനിൽ ഒരുക്കിയിരിക്കുന്നത്. ഏതൊരു ഉപഭോക്താവിനും സൗകര്യപ്രദമായ പലിശരഹിത വായ്പാ സൗകര്യത്തോടെ, മികച്ച ഓണം ഓഫറുകളോടെ ഗൃഹോപകരണങ്ങളും ഗാഡ്ജറ്റുകളും സ്വന്തമാക്കാം. കൂടാതെ 45,000 രൂപ വരെ കാഷ് ബാക്കും എക്സ്ട്രാ വാറന്‍റിയും ഇൻസ്റ്റന്‍റ് ഡിസ്കൗണ്ടും ഫ്രീ ഹോം ഡെലിവറിയും ഒരുക്കിയിട്ടുണ്ട്. ഗൃഹോപകരണങ്ങൾ അപ്ഗ്രേഡ് ചെയ്ത് നിലവിലുള്ള എല്ലാ ഓഫറുകളോടും കൂടി പുതുപുത്തൻ ഉത്പന്നങ്ങൾ, ഓണം സ്പെഷൽ എക്സ്ചേഞ്ച് ഓഫറിലൂടെ ഇപ്പോഴും സ്വന്തമാക്കുവാനും സാധിക്കും. പഴയ എയർ കണ്ടീഷണറുകൾ ഏറ്റവും മികച്ച ഓഫറിൽ എക്സ്ചേഞ്ച് ചെയ്ത് പുതിയ എസി സ്വന്തമാക്കുവാനുള്ള സൗകര്യവുമുണ്ട്. ഉപഭോക്താക്കൾക്ക് ഇതിലൂടെ അവരുടെ പഴയ എയർ കണ്ടീഷണറുകൾ, അവ ഏതു കണ്ടീഷനിലായാലും, എക്സ്ചേഞ്ച് ചെയ്ത് പുതുപുത്തൻ എയർകണ്ടീഷണറുകൾ സ്വന്തമാക്കാം. 6000 രൂപ വരെ എക്സ്ചേഞ്ച് ബോണസും ലഭ്യമാണ് എന്നതാണ് ഏറ്റവും ആകർഷകമായ ഘടകം. ട്രെൻഡിംഗ് ഓഫറുകൾ ഹോം അപ്ലയൻസസ്, ഗാഡ്ജറ്റ്സ്, ഹോം എസ്‌സൻഷ്യൽസ് തുടങ്ങിയവയും ഗംഭീര ഓണ ഓഫറുകളോടെ സ്വന്തമാക്കാം. ഓഫറുകളുടെ ഭാഗമായി ആൻഡ്രോയ്ഡ് സ്മാർട്ട് ഫോണുകളും ലാപ്ടോപ്പുകളും 50 ശതമാനം വിലക്കുറവിൽ സ്വന്തമാക്കാം. 4990 രൂപ മുതൽ സ്മാർട്ട് ഫോണിന്‍റെ വില ആരംഭിക്കുന്നത്. മൊബൈൽ ഫോണുകൾ ഓണ്‍ലൈനേക്കാൾ കുറഞ്ഞ വിലയിൽ, ഓണ്‍ലൈനേക്കാൾ കൂടിയ വാറന്‍റിയിലും സ്വന്തമാക്കാം. "ഇത് ഓണത്തിന് നിക്‌ഷാൻ നൽകുന്ന ഓഫർ സമ്മാനം!' പ്രിയ ഉപഭോക്താക്കൾക്കായി നിക്‌ഷാൻ നൽകുന്ന ഓണസമ്മാനമാണ് ഈ ഓഫറുകൾ എന്ന് എംഡി എം.എം.വി. മൊയ്തു പറഞ്ഞു. “ഈ ഓണത്തിന് ഉപഭോക്താക്കൾക്ക് ഏറ്റവും മികച്ച ഓഫറുകളും സേവനവും ലഭ്യമാക്കുക എന്നതാണ് തങ്ങളുടെ ലക്ഷ്യം. ഗുണനിലവാരത്തോടൊപ്പം ഉത്പന്നങ്ങളുടെ വൈവിധ്യവും വിശാലതയും ഉപഭോക്താക്കൾക്ക് മികച്ച ഒരു അനുഭവം നൽകും. ഏതൊരു ഉപഭോക്താവിനും ആവശ്യമായ ഉത്പന്നങ്ങൾ എക്സ്പീരിയൻസ് ചെയ്ത് വാങ്ങുവാനുള്ള സൗകര്യവും നിക്‌ഷാനിൽ ഒരുക്കിയിട്ടുണ്ട്’’ ഫോൺ: 7902818181.

കീഴറയിലെ സ്ഫോടനം: തനിക്ക് ഒന്നും അറിയില്ലെന്ന് ആവർത്തിച്ച് മുഖ്യപ്രതി

പഴയങ്ങാടി: കണ്ണപുരം കീഴറയിൽ സ്ഫോടനത്തിൽ വാടകവീട് തകർന്ന് ഒരാൾ മരിച്ച സംഭവത്തിൽ തനിക്ക് ഒന്നുമറിയില്ലെന്നും താൻ വീട് വാടകയ്ക്ക് എടുത്ത് നൽകുക മാത്രമാണ് ചെയ്തതെന്നും ആവർത്തിച്ച് മുഖ്യപ്രതി അനൂപ് മാലിക്. റിമാൻഡിലായിരുന്ന പ്രതിയെ തിങ്കളാഴ്ച പോലീസ് കസ്റ്റഡിയിൽ വാങ്ങി തെളിവെടുപ്പ് നടത്തിയിരുന്നു. ഇന്നലെ പ്രതിയെ ചോദ്യം ചെയ്തപ്പോഴാണ് മുന്പ് പറഞ്ഞ് മൊഴിയിൽ തന്നെ പ്രതി ഉറച്ച് നിന്നത്. അനൂപ് മാലിക്കിന്‍റെ ഭാര്യാ സഹോദരനായ മുഹമ്മദ് ആഷാം വീട്ടിൽ നടന്ന സ്ഫോടനത്തിൽ മരിച്ചിരുന്നു. മുഹമ്മദ് ആഷാമിന് വീട് വാടകയ്ക്ക് എടുത്തു നൽകിയ എന്നല്ലാതെ മറ്റൊന്നും തനിക്കറിയില്ലെന്ന മൊഴിയിൽ അനൂപ് മാലിക്ക് ഉറച്ചു നിൽക്കുകയാണ്. എന്നാൽ ഇക്കാര്യം പോലീസ് മുഖവിലക്കെടുത്തിട്ടില്ല. നാളെ രാവിലെ 11 വരെയാണ് പ്രതിയെ കോടതി പോലീസ് കസ്റ്റഡിയിൽ വിട്ടു നൽകിയത്.

മയക്കുമരുന്ന് കേസ്: ബുള്ളറ്റ് ലേഡി കരുതല്‍ തടങ്കലില്‍

പയ്യന്നൂര്‍: കഞ്ചാവ് കേസില്‍ ജാമ്യത്തില്‍ കഴിയവേ എംഡിഎംഎയുമായി പിടിയിലായ പയ്യന്നൂരിലെ യുവതി അഭ്യന്തര വകുപ്പ് സെക്രട്ടറിയുടെ ഉത്തരവ് പ്രകാരം കരുതല്‍ തടങ്കലില്‍. ബുള്ളറ്റ് ലേഡിയെന്ന പേരിലറിയപ്പെടുന്ന പയ്യന്നൂര്‍ മുല്ലക്കോട് അണക്കെട്ടിന് സമീപം താമസിക്കുന്ന മുല്ലക്കോട് ഹൗസില്‍ സി.നിഖില( 31)യാണ് കരുതല്‍ തടങ്കലിലായത്. തുടര്‍ച്ചയായി മയക്കുമരുന്ന് കേസില്‍ പിടിക്കപ്പെട്ടതിനെ തുടര്‍ന്ന് കണ്ണൂര്‍ ഡെപ്യൂട്ടി എക്‌സൈസ് കമ്മീഷണറുടെ ശിപാര്‍ശയില്‍ ആഭ്യന്തര വകുപ്പ് സെക്രട്ടറിയാണ് നിഖിലയെ കരുതല്‍ തടങ്കലില്‍ വയ്ക്കുന്നതിനുള്ള ഉത്തരവിട്ടത്. എക്‌സൈസിന്‍റെ ശിപാര്‍ശയില്‍ കണ്ണൂര്‍ ജില്ലയില്‍ അറസ്റ്റ് ചെയ്യുന്ന ആദ്യവ്യക്തിയാണ് നിഖില. 2023 ഡിസംബര്‍ ഒന്നിനാണ് വില്പനക്കായി കൊണ്ടുവന്ന് വീട്ടില്‍ സൂക്ഷിച്ച 1.6 കിലോ കഞ്ചാവുമായി എക്‌സൈസ് സംഘം നിഖിലയെ അറസ്റ്റു ചെയ്തത്. തളിപ്പറമ്പ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ കെ.കെ. ഷിജില്‍കുമാറിന്‍റെ നേതൃത്വത്തില്‍ നടത്തിയ പരിശോധനയിലാണ് വീടിനകത്ത് സൂക്ഷിച്ചിരുന്ന കഞ്ചാവ് കണ്ടെത്തിയത്. കേസില്‍ ജാമ്യത്തില്‍ കഴിഞ്ഞുവരവേ കഴിഞ്ഞ ഫെബ്രുവരി 22ന് ജാമ്യ വ്യവസ്ഥകള്‍ ലംഘിച്ച് നിഖില 4.006 ഗ്രാം മെത്താഫിറ്റമിനുമായി വീണ്ടും അറസ്റ്റിലായി. പയ്യന്നൂര്‍ റേഞ്ച് എക്സൈസ് ഇന്‍സ്പെക്ടര്‍ കെ. ദിനേശന്‍റെ നേതൃത്വത്തിലുള്ള സംഘമാണ് യുവതിയെ മയക്കുമരുന്നുമായി പിടികൂടിയത്. മുല്ലക്കൊടിയിലെ വീട്ടില്‍ നടത്തിയ പരിശോധനയിലാണ് മെത്താഫിറ്റമിന്‍ കണ്ടെത്തിയത്. തുടര്‍ച്ചയായി രണ്ട് കേസുകളില്‍ പ്രതിയായതിന്‍റെ അടിസ്ഥാനത്തിലാണ് നിഖിലയെ കരുതല്‍ തടങ്കലില്‍ വയ്ക്കുന്നതിന് കണ്ണൂര്‍ ഡെപ്യൂട്ടി എക്‌സൈസ് കമ്മീഷണര്‍ ആഭ്യന്തര വകുപ്പ് സെക്രട്ടറിയോട് ശിപാര്‍ശ ചെയ്തത്. ശിപാര്‍ശ പ്രകാരം കഴിഞ്ഞ മാസം 29 ന് കരുതല്‍ തടങ്കലില്‍ പാര്‍പ്പിക്കുന്നതിന് ആഭ്യന്തര വകുപ്പ് സെക്രട്ടറി ഉത്തരവിട്ടിരുന്നു. എന്നാല്‍ പയ്യന്നൂരിലെ വീട്ടില്‍ നിഖിലയെ കണ്ടെത്താനായില്ല. അന്വേഷണത്തില്‍ ലഭിച്ച വിവരത്തിന്‍റെ അടിസ്ഥാനത്തില്‍ തീവ്രവാദ വിരുദ്ധ സ്‌ക്വാഡ് സൂപ്രണ്ട് , കണ്ണൂര്‍ തീവ്രവാദ വിരുദ്ധ സ്‌ക്വാഡ്, എക്‌സൈസ് സൈബര്‍ സെല്‍, സെന്‍ട്രല്‍ ക്രൈം ബ്രാഞ്ച് നര്‍ക്കോട്ടിക് വിംഗ് ബംഗളൂരു, ബംഗളൂരു മടിവാള പോലീസ് എന്നിവരുടെ സഹായത്തോടെയാണ് ബംഗളൂരു വൃന്ദാവന്‍ നഗറില്‍ രഹസ്യമായി താമസിച്ചുവന്ന നിഖിലയെ കണ്ടെത്തിയത്. ഇതേതുടര്‍ന്ന് തളിപ്പറമ്പ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എസ്. സതീഷ്, പ്രിവന്‍റീവ് ഓഫീസര്‍ വി.കെ. വിനോദ്, വനിത സിവില്‍ എക്‌സൈസ് ഓഫീസര്‍മാരായ ജസ്മ പി. ക്ലമന്‍റ്, ശ്രേയ മുരളി എന്നിവർ ഉള്‍പ്പെട്ട സംഘം അറസ്റ്റ് ചെയ്തതു. നിലവില്‍ കരുതല്‍ തടങ്കലിന്‍റെ കാലാവധി ആറുമാസമാണ്. സാഹചര്യങ്ങള്‍ പരിഗണിച്ച് കാലാവധി ദീര്‍ഘിപ്പിക്കാമെന്ന പ്രത്യേകതയുമുണ്ട്. ബുള്ളറ്റില്‍ വിവിധ പ്രദേശങ്ങളില്‍ കഞ്ചാവ് എത്തിച്ചുകൊടുത്തിരുന്നതിനാലാണ് ബുള്ളറ്റ് ലേഡിയെന്ന പേരിലും നിഖില അറിയപ്പെട്ടിരുന്നത്.

ആറളം ഫാം തോ‌ട്ട‌ത്തിൽ പൂക്കൾ വിരിഞ്ഞില്ല; ലക്ഷങ്ങളുടെ നഷ്ടം

ഇരിട്ടി: ഓണവിപണിയും ഫാം ടൂറിസവും ലക്ഷ്യമിട്ട് ആറളം ഫാമിൽ ഏഴ് ഏക്കറിൽ നടത്തിയ പൂകൃഷിയെ കാലാവസ്ഥ ചതിച്ചു. മഴ വില്ലനായതിനെ തുടർന്ന് പൂപ്പാടത്തിലെ ചെടികൾ പൂവിട്ടില്ല. ബ്ലോക്ക് എട്ടിൽ അണുങ്ങോട് സെക്ടറിൽ കഴിഞ്ഞ വർഷം പൂക്കൃഷി നടത്തിയിടത്ത് കൂടുതൽ ഏക്കറിലായി ഇത്തവണ വ്യാപിപ്പിച്ച കൃഷിക്കാണ് കാലാവസ്ഥ വില്ലനായത്. ചെണ്ടുമല്ലി, വിവിധ നിറങ്ങളിലെ ജമന്തി, വാടാമല്ലി എന്നിവയായിരുന്നു കൃഷി ചെയ്തത്. നേരത്തെ എത്തിയ മഴ ആദ്യം തന്നെ ആശങ്ക പരത്തിയെങ്കിലും ഓണത്തോടുപ്പിച്ച് മഴ മാറിനിന്നത് പ്രതീക്ഷ നൽകിയിരുന്നുവെങ്കിലും വിഫലമായി. ഏതാണ്ട് മൂന്ന് ഏക്കറിൽ നടത്തിയ ചെണ്ടുമല്ലിയും രണ്ടേക്കറിലെ ജമന്തിയും രോഗങ്ങളാലും മറ്റും പൂവിടാതെ വന്നതോടെ ഏകദേശം അഞ്ചു ലക്ഷത്തോളം രൂപയുടെ നഷ്ടമാണുണ്ടായത്. കഴിഞ്ഞ വർഷം മൂന്ന് ഏക്കറിലെ പൂക്കൃഷിയിലൂടെ രണ്ട് ലക്ഷത്തിലേറെ രൂപ ലഭിച്ചിരുന്നിടത്താണ് ഇത്തവണ കനത്ത നഷ്ടം സംഭവിച്ചത്. ചിലയിടങ്ങളിൽ പൂക്കളുണ്ടായെങ്കിലും കനത്ത മഴ വിളവെടുപ്പ് പ്രതിസന്ധിയിലാക്കി. ഓണത്തിന് അടുത്ത രണ്ടുദിവസം മാത്രമാണ് വിളവെടുപ്പ് നടത്തിയത്. ഫാം ടൂറിസത്തെയും ബാധിച്ചു കഴിഞ്ഞ വർഷം ഓണം സീസണിൽ വിരിഞ്ഞ ചെണ്ടുമല്ലി പൂക്കൾ കാണാൻ ജില്ലയ്ക്കകത്ത് നിന്നും പുറത്തുനിന്നും ആയിരക്കണക്കിനാളുകളാണ് പൂപ്പാടങ്ങളെത്തിയിരുന്നത്. ഇത്തവണ പൂക്കളില്ലാത്തതിനാൽ സഞ്ചാരികളുടെ വരവും ഉണ്ടായില്ല. കഴിഞ്ഞ വർഷം സന്ദർശകർക്ക് ടിക്കറ്റ് ഏർപ്പെടുത്തി ഫോട്ടോ എടുക്കാനുള്ള സൗകര്യം ഉൾപ്പെടെ ഇവിടെ ഒരുക്കിയിരുന്നു. സന്ദർശകരുടെ നല്ല പ്രതികരണം ലഭിച്ചതോടെ ഇത്തവണ കൂടുതൽ സൗകര്യങ്ങളും പൂക്കളും ഒരുക്കി ആറളം ഫാം മാനേജ്മെന്‍റ് ഫാം ടൂറിസത്തിൽ വലിയ പ്രതീക്ഷയർപ്പിച്ചിരുന്നു. ഇത്തവണ ഉത്പാദന ചെലവിന്‍റെ തുക കണ്ടെത്താൻ പോലും പൃക്കൃഷിക്കായിട്ടില്ല. ഇനിയുള്ള പ്രതീക്ഷ നവരാത്രിയിൽ ഓണവിപണി നഷ്ടപ്പെട്ടതോടെ നവരാത്രിക്കാലത്തെ ആഘോഷത്തിന് പൂക്കളെത്തിച്ചു നൽകാമെന്ന പ്രതീക്ഷയിലാണ് ആറളം ഫാം മാനേജ്മെന്‍റ്. വിജയദശമി വരെ ചെടികൾ സംരക്ഷിച്ച് നിർത്തി പൂക്കൃഷിയിലൂടെ നഷ്ടം നികത്താനുള്ള നടപടികളാണ്. നവരാത്രിക്കാലത്ത് പൂക്കൾക്ക് ആവശ്യക്കാരുണ്ടാകുമെന്നതിനാൽ അതുവരെ ചെടികളെ സംരക്ഷിച്ച് പൂക്കളുടെ വിളവെടുപ്പ് നടത്താനും സന്ദർശകരെ ആകർഷിക്കാനുമുള്ള പദ്ധതികൾ വിഭാവനം ചെയ്തിട്ടുണ്ടെന്ന് ഫാം മാനേജിംഗ് ഡയറക്ടർ എസ്. സുജീഷ് പറഞ്ഞു. നവരാത്രികാലം കഴിഞ്ഞാലെ പൂക്കൃഷി സംബന്ധിച്ച കണക്കുകൾ വ്യക്തമാകുകയുള്ളൂവെന്നും അദ്ദേഹം പറഞ്ഞു.

ആത്മഹത്യാശ്രമം: യുവാവിനും മൂന്നു മക്കൾക്കും രക്ഷകരായി ബേക്കൽ ടൂറിസം പോലീസ്

ബേക്കൽ: കടലിൽ ചാടി ആത്മഹത്യ ചെയ്യാനെത്തിയ യുവാവിനും മൂന്നു മക്കൾക്കും രക്ഷകരായി ബേക്കൽ ടൂറിസം പോലീസ്. കണ്ണൂർ ജില്ലക്കാരനായ ആരോഗ്യവകുപ്പ് ഉദ്യോഗസ്ഥനാണ് ഇസ്രയേലിലുള്ള ഭാര്യയെ ഇന്നലെ രാവിലെ വീഡിയോ കോൾ വിളിച്ച് ആത്മഹത്യ ചെയ്യുകയാണെന്നറിയിച്ചശേഷം മക്കൾക്കൊപ്പം യാത്രതിരിച്ചത്. വിവരമറിഞ്ഞ് പരിഭ്രാന്തയായ ഭാര്യ ഉടൻതന്നെ കണ്ണൂർ ജില്ലയിലെ പോലീസിനെ വിളിച്ച് സഹായം തേടുകയായിരുന്നു. സൈബർ സെല്ലിന്‍റെ സഹായത്തോടെ യുവാവിന്‍റെ മൊബൈൽ ലൊക്കേഷൻ പരിശോധിച്ചപ്പോൾ ഇവർ ബേക്കൽ ഭാഗത്തുണ്ടെന്ന് വ്യക്തമായതോടെ ബേക്കൽ പോലീസിനെ വിവരമറിയിച്ചു. ബേക്കൽ ഇൻസ്പെക്ടർ എം.വി.ശ്രീദാസിന്‍റെ നിർദേശപ്രകാരം ടൂറിസം പോലീസ് എഎസ്ഐ എം.എം.സുനിൽകുമാറിന്‍റെ നേതൃത്വത്തിൽ ഉച്ചയോടെ ബേക്കൽ കോട്ടയുടെ പരിസരപ്രദേശങ്ങളിലും ബീച്ചിലും വ്യാപകമായ തെരച്ചിൽ നടത്തി. ഇവരുടെ കാർ ആളൊഴിഞ്ഞ നിലയിൽ ബേക്കൽ കോട്ടയുടെ പരിസരത്ത് കണ്ടെത്തിയതോടെ ആശങ്കയേറി. എന്നാൽ തൊട്ടുപിന്നാലെ യുവാവിനെയും മക്കളെയും ബേക്കൽ റെഡ്മൂൺ ബീച്ചിൽ കണ്ടെത്തുകയായിരുന്നു. പതിനൊന്നും ഒൻപതും വയസുള്ള രണ്ട് ആൺകുട്ടികളും ആറു വയസുള്ള പെൺകുട്ടിയുമാണ് ഇവർക്കുള്ളത്. പോലീസുദ്യോഗസ്ഥർ യുവാവിനെ അനുനയിപ്പിച്ച് ബേക്കൽ സ്റ്റേഷനിലെത്തിച്ചതോടെ ആശങ്കയ്ക്ക് വിരാമമായി. കണ്ണൂർ പോലീസിന്‍റെ സഹായത്തോടെ ഇവരെ സുരക്ഷിതമായി നാട്ടിലെത്തിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]