ADVERTISEMENT

ADVERTISEMENT

പത്താംകല്ല് വാർഡ്സഭായോഗം

നെടുമങ്ങാട്: നഗരസഭാ പത്താംകല്ല് വാർഡ് സഭായോഗം ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബി. സതീശൻ ഉദ്ഘാടനം ചെയ്തു. നഗരസഭ ചെയർപേഴ്സൺ സി.എസ്. ശ്രീജ അധ്യക്ഷയായ യോഗത്തിൽ വാർഡ് കൗൺസിലർ എസ്. ഷമീർ സ്വാഗതം ആശംസിച്ചു. വാർഡ് സെക്രട്ടറി എ. അജിംഖാൻ, എഡിഎസ് ചെയർപേഴ്സൺ താജുന്നിസ തുടങ്ങിയവർ പ്രസംഗിച്ചു.
എസ്എസ്എൽസി, പ്ലസ്ടു പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയവർക്കും വിജയികൾക്കും ആദരവ് നൽകി.

ADVERTISEMENT

നിർത്തലാക്കിയ സർവീസുകൾ പുനഃസ്ഥാപിക്കണമെന്ന് ആവശ്യം

നെടുമങ്ങാട്: കെഎസ്ആർടിസി നെടുമങ്ങാട് ഡിപ്പോയിൽനിന്ന് വർഷങ്ങളായി രാത്രി എട്ടുമണിക്ക് ഉണ്ടായിരുന്ന വേങ്കവിള- വേട്ടംപള്ളി - മൂഴി സർവീസും, നെടുമങ്ങാടുനിന്നു പുത്തൻ പാലം വഴി മുതുവിളയിലേക്ക് ഉണ്ടായിരുന്ന സർവീസും പുനരാരംഭിക്കണമെന്നാവശ്യപ്പെട്ട് മൂഴി ടിപ്പു കൾച്ചറൽ സൊസൈറ്റിയുടെയും ഗാന്ധിയൻ കർമ്മവേദിയുടെയും ആഭിമുഖ്യത്തിൽ സൊസൈറ്റി ചെയർമാൻ മൂഴിയിൽ മുഹമ്മദ് ഷിബുവിന്‍റെ നേതൃത്വത്തിൽ കെഎസ്ആർടിസി നെടുമങ്ങാട് എടിഒ ആർ.ജെ. ഷെസിനു നിവേദനം നൽകി. നിവേദക സംഘത്തിൽ നെടുമങ്ങാട് മുനിസിപ്പൽ മുൻ ചെയർമാൻ കെ. സോമശേഖരൻ നായർ, പുലിപ്പാറ യൂസഫ്, നെടുമങ്ങാട് ശ്രീകുമാർ, നിബിൻ, ജഗൻ, വി. നിബിൻ എന്നിവരും ഉണ്ടായിരുന്നു.

കുളമ്പുരോഗ പ്രതിരോധം: പഞ്ചായത്തുതല ഉദ്ഘാടനം

നെടുമങ്ങാട്: ദേശീയ ജന്തുരോഗ നിയന്ത്രണ പദ്ധതി - ആറാം ഘട്ട കുളമ്പുരോഗ പ്രതിരോധ കുത്തിവയ്പ്പിന്‍റെ പഞ്ചായത്തുതല ഉദ്ഘാടനം ആനാട് വെറ്ററിനറി ഡിസ്പെൻസറിയിൽ ആനാട് പഞ്ചായത്ത് പ്രസിഡന്‍റ് എൻ. ശ്രീകല, ലൈവ്സ്റ്റോക്ക് ഇൻസ്പെക്ടറായ സരിതയ്ക്ക് വാക്സിൻ കൈമാറിക്കൊണ്ട് നിർവഹിച്ചു. വെറ്ററിനറി സർജൻ ഡോ. എ.ജെ. കീർത്തി പദ്ധതി വിശദീകരണം നടത്തി. പഞ്ചായത്ത്‌ വൈസ് പ്രസിഡന്‍റ് പാണയം നിസാർ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ വേങ്കവിള സജി, ആരോഗ്യ വിദ്യാഭ്യാസ സ്റ്റാൻഡിംഗ് കമ്മറ്റി ചെയർപേഴ്സൺ കെ. ലീലാമ്മ എന്നിവർ സംസാരിച്ചു.

"മെഡിക്കല്‍ കോളജിലെ സിടി സ്‌കാനിംഗ് പഴയ പടിയാക്കണം'

മെഡിക്കല്‍കോളജ്: തിരുവനന്തപുരം മെഡിക്കല്‍ കോളജ് ആശുപത്രിയിലെ റേഡിയോ ഡയഗ്‌നോസിസ് വകുപ്പും ന്യൂറോളജി വകുപ്പും തമ്മില്‍ നിലനില്‍ക്കുന്ന പ്രശ്‌നം പരിഹരിച്ച് നേരത്തെ ഉണ്ടായിരുന്നതുപോലെ ദിവസം 60 പേര്‍ക്ക് സ്‌കാനിംഗ് നടത്താനുള്ള നടപടി സ്വീകരിക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസ്. എടുത്ത നടപടികള്‍ മൂന്നാഴ്ചക്കകം മെഡിക്കല്‍ വിദ്യാഭ്യാസ ഡയറക്ടര്‍ കമ്മീഷനില്‍ സമര്‍പ്പിക്കണം. ആരോഗ്യവകുപ്പ് അഡീഷണല്‍ ചീഫ് സെക്രട്ടറിയും വിഷയത്തില്‍ ഇടപെട്ട് മൂന്നാഴ്ചയ്ക്കകം റിപ്പോര്‍ട്ട് സമര്‍പ്പിക്കണം. മെഡിക്കല്‍ കോളജ് സൂപ്രണ്ടും റിപ്പോര്‍ട്ട് നല്‍കണമെന്നും ജസ്റ്റിസ് അലക്‌സാണ്ടര്‍ തോമസ് വ്യക്തമാക്കി. കമ്മീഷന്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി. രോഗികള്‍ സ്‌കാനിംഗിന് വേണ്ടി മാസങ്ങള്‍ കാത്തിരിക്കേണ്ടതായ ദുരവസ്ഥയിലാണെന്ന് പരാതിയുണ്ട്.

ബൈക്ക് മോഷണക്കേസ്: യുവാവിനെ അറസ്റ്റ് ചെയ്തു

പേരൂര്‍ക്കട: തിരുമല ഷോ പ്പിംഗ് കോംപ്ലക്‌സിനു മുന്‍വശത്തു പാര്‍ക്ക് ചെയ്തിരുന്ന ബൈക്ക് മോഷ്ടിച്ചയാളെ പൂജപ്പുര പോലീസ് അറസ്റ്റുചെയ്തു. തിരുമല സൗമ്യ തിയറ്ററിന് എതിര്‍വശം ഓടാങ്കുഴി ലെയിന്‍ ടി.സി 8/533 (3) മേലെ പുത്തന്‍വീട്ടില്‍ രഞ്ജിത്ത് (40) ആണ് അറസ്റ്റിലായത്. ബുധനാഴ്ച രാവിലെയാണ് സംഭവം. വേട്ടമുക്ക് അബു മന്‍സിലില്‍ അബുവിന്‍റെ ബൈക്കാണ് കവര്‍ച്ച ചെയ്യപ്പെട്ടത്. സിസിടിവി പരിശോധിച്ചപ്പോള്‍ മോഷണബൈക്കുമായി സഞ്ചരിക്കുന്ന രഞ്ജിത്തിന്‍റെ ദൃശ്യങ്ങള്‍ പോലീസിനു ലഭിച്ചു. തിരുവനന്തപുരം സിറ്റിയിലെ ഒരു ആക്രിക്കടയില്‍ ബൈക്ക് വില്‍പ്പനയ്ക്ക് കൊണ്ടുവന്ന രഞ്ജിത്തിനെ ഇവിടെവച്ചാണ് പിടികൂടിയത്. ബൈക്ക് മോഷണത്തിന് ഇയാളെ മുമ്പും പോലീസ് പിടികൂടിയിട്ടുണ്ട്. പൂജപ്പുര സിഐ ഷാജിമോന്‍റെ നേതൃത്വത്തില്‍ എസ്ഐ അഭിജിത്ത്, എസ്സിപിഒ അനുരാഗ്, സിപിഒമാരായ അരുണ്‍, ഉണ്ണികൃഷ്ണന്‍ എന്നിവര്‍ അന്വേഷണ സംഘത്തില്‍ ഉണ്ടായിരുന്നു. കോടതി പ്രതിയെ റിമാ ൻഡു ചെയ്തു.

ലഹരിക്കെതിരെ തീരദേശത്ത് പൊതുജന സമ്പര്‍ക്ക പരിപാടി

പാറശാല: തീരദേശ മേഖലകളില്‍ ഉള്‍പ്പെടെയുള്ള ജനങ്ങള്‍ക്ക് ലഹരിക്കെതിരെയുള്ള സന്ദേശവുമായി പോലീസ് സംഘടിപ്പിച്ച പൊതുജന ബോധവത്കരണ പരിപാടി ശ്രദ്ധേയമായി. തിരുവനന്തപുരം റൂറല്‍ ജില്ലാ പോലീസിന്‍റെ കീഴിലെ പൂവാര്‍ തീരദേശ പോലീസിന്‍റെ നേതൃത്വത്തില്‍ ആയിരുന്നു പരിപാടി. കാഞ്ഞിരംകുളം, പൊഴിയൂര്‍ , പൂവ്വാര്‍ പോലീസ് സ്റ്റേഷനുകളിലെ ജീവനക്കാരും പരിപാടിക്ക് നേതൃത്വം നല്‍കി. തിരുവനന്തപുരം റൂറല്‍ ജില്ലാ മേധാവി കെ.എസ്. സുദര്‍ശനന്‍ ഉദ്ഘാടനം ചെയ്ത പരിപാടിയില്‍ നെയ്യാറ്റിന്‍കര ഡിവൈഎസ്പി ഷാജി അധ്യക്ഷനായി. സ്‌പെഷല്‍ ബ്രാഞ്ച് ഡിവൈഎസ്പി ജയകുമാര്‍, പൂവാര്‍ പഞ്ചായത്ത് പ്രസിഡന്‍റ് ലോറന്‍സ്, കരിംകുളം പഞ്ചായത്ത് പ്രസിഡന്‍റ് ഫ്രീഡാ സൈമണ്‍, കുളത്തൂര്‍ പഞ്ചായത്ത് പ്രസിഡന്‍റ് ഗീതാ സുരേഷ്, ബ്ലോക്ക് പഞ്ചായത്ത് അംഗം ജനറ്റ്, എസ്എച്ചുമാരായ കെ. കണ്ണന്‍, ആസാദ് അബ്ദുല്‍ കലാം, ടി.കെ. മിഥുന്‍. എസ്ഐമാരായ ആല്‍ഫിന്‍ റസല്‍, സാജന്‍ തുടങ്ങിയ ഉദ്യോഗസ്ഥന്മാരും ജനപ്രതിനിധികളും, മത്സ്യത്തൊഴിലാളികളും, മര്‍ച്ചന്‍റ്സ് അസോസിയേഷന്‍ ഭാരവാഹികളും, ബോട്ട് ക്ലബ് പ്രതിനിധികളും പരിപാടിയില്‍ പങ്കെടുത്തു. തുടര്‍ന്നു നടന്ന ചര്‍ച്ചയില്‍ ഭാവി നടപടിക്രമങ്ങള്‍ തീരുമാനിക്കുകയും, നിലവിലെ പരാതികള്‍ കേട്ടു പരിഹാരം കാണുന്നതിനുവേണ്ടിയുള്ള നടപടി കൈക്കൊള്ളുകയും ചെയ്തു. അവധിക്കാലങ്ങള്‍ അവസാനിച്ച് സ്‌കൂള്‍ കോളജുകള്‍ സജീവമാകാന്‍ പോകുന്ന പശ്ചാത്തലത്തില്‍പോലീസിന്‍റെ ഭാഗത്തുനിന്നും ഉള്‍പ്പെടെ കൂടുതല്‍ പരിശോധനകളും പെട്രോളിംഗുകളും ശക്തിപ്പെടുത്താനും പൊതുജന സമ്പര്‍ക്ക പരിപാടിയിലൂടെ തീരുമാനിച്ചു.

എംഎല്‍എ റോഡില്‍ പൈപ്പ് പൊട്ടി ജലം പാഴാകുന്നു

പേരൂര്‍ക്കട: കുടപ്പനക്കുന്ന് എംഎല്‍എ റോഡില്‍ കുടിവെള്ള പൈപ്പ് പൊട്ടി ജലം പാഴാകുന്നു. പേരൂര്‍ക്കടയില്‍നിന്ന് കുടപ്പക്കുന്ന് വഴി പാതിരിപ്പള്ളിയിലേക്കും പേരാപ്പൂര് ഭാഗത്തേക്കും ജലമെത്തിക്കുന്ന പൈപ്പാണ് പൊട്ടിയതെന്നാണു സൂചന. എംഎല്‍എ റോഡിലൂടെ ഏകദേശം നാലു പൈപ്പുകള്‍ കടന്നുപോകുന്നുണ്ട്. ഇതില്‍ പ്രിമോ പൈപ്പും ഉള്‍പ്പെടുന്നു. പ്രിമോയാണോ പിവിസി ലൈനാണോ പൊട്ടിയൊഴുകുന്നതെന്നു വ്യക്തമായിട്ടില്ല. ജോയിന്‍റിലാണ് ലീക്കുണ്ടായതെന്നു കരുതുന്നതായി വാട്ടര്‍ അഥോറിറ്റി വ്യക്തമാക്കി. മൂന്നുദിവസം മുമ്പാണു പൈപ്പ് പൊട്ടിയതെന്നും വാട്ടര്‍ അഥോറിറ്റിയില്‍ അറിയിച്ചിട്ടു നടപടിയുണ്ടാകുന്നില്ലെന്നുമാണ് നാട്ടുകാരുടെ പരാതി. ആഴ്ചകള്‍ക്കുമുമ്പ് കുടപ്പനക്കുന്ന് ജംഗ്ഷനില്‍ പ്രിമോ പൈപ്പ് രണ്ടുതവണ പൊട്ടി കുടിവെള്ളം പൂര്‍ണമായി മുടങ്ങിയിരുന്നു. അതിനിടെയാണു വീണ്ടുമൊരു പൈപ്പ് പൊട്ടല്‍. ടാറിനു മുകളിലൂടെ ജലം പേരാപ്പൂര് റോഡിലേക്കാണു നിലവില്‍ ഒഴുകിക്കൊണ്ടിരിക്കുന്നത്. അടുത്തിടെയാണ് എംഎല്‍എ റോഡ് പൂര്‍ണമായും റീടാര്‍ ചെയ്തത്. വിഷയം ശ്രദ്ധയില്‍പ്പെട്ടിട്ടുണ്ടെന്നും ടാര്‍ കട്ട്‌ചെയ്യുന്നതിനു പി.ഡബ്ല്യുഡിയുടെ അനുമതി ലഭിച്ചിട്ടില്ലെന്നും അതു കിട്ടിയാലുടന്‍ അറ്റകുറ്റപ്പണി ആരംഭിക്കുമെന്നും വാട്ടര്‍ അഥോറിറ്റി പേരൂര്‍ക്കട സെക്ഷന്‍ എഇ അറിയിച്ചു.

അധ്യാപക അവാർഡ് ജേതാവിന് കർഷക കോൺഗ്രസിന്‍റെ ആദരം

നെടുമങ്ങാട്: കൃഷിയിൽ നൂറുമേനി വിളയിച്ച അധ്യാപക അവാർഡ് ജേതാവ് കൂടിയായ റിട്ട. ഹെഡ്മാസ്റ്റർ സത്യജോസിനു കർഷക കോൺഗ്രസ് അരുവിക്കര നിയോജക മണ്ഡലം കമ്മിറ്റിയുടെ നേതൃത്വത്തിൽ ആദരവ് നൽകി. വീടിനു സമീപത്തെ രണ്ടര ഏക്കറിൽ തെങ്ങ്, വാഴ ഇഞ്ചി, കുരുമുളക്, കപ്പ ചേന, മഞ്ഞൾ, ഫല വൃക്ഷങ്ങൾ, കരിമ്പ്, രാമച്ചം തുടങ്ങിയ എല്ലാത്തരം കൃഷികളും ചെയ്തുവരുന്നു. ഒപ്പം കോഴി വളർത്തലും താറാവ് വളർത്തലും കൂടിയുണ്ട്. കർഷക കോൺഗ്രസ്‌ അരുവിക്കര നിയോജകമണ്ഡലം കമ്മിറ്റി പ്രസിഡന്‍റ് പുതുക്കുളങ്ങര മണികണ്ഠന്‍റെ അധ്യക്ഷതയിൽ, ജില്ലാ പ്രസിഡന്‍റ് തോംസൺ ലോറൻസ് സത്യജോസിനെ പൊന്നാട അണിയിച്ച് ആദരിച്ചു. വെള്ളനാട് പഞ്ചായത്ത് മെമ്പർ കടുവാക്കുഴി ബിജു, കർഷക കോൺഗ്രസ്‌ അരുവിക്കര നിയോജക മണ്ഡലം ജനറൽ സെക്രട്ടറി കെ.എസ്. ബിനു, കർഷക കോൺഗ്രസ് വെള്ളനാട് മണ്ഡലം പ്രസിഡന്‍റ് വാളിയറ രാജേഷ്, കർഷക കോൺഗ്രസ് പൂവച്ചൽ മണ്ഡലം പ്രസിഡന്‍റ് രാജഗോപാലൻ നായർ, കർഷക കോൺഗ്രസ് വെള്ളനാട് മണ്ഡലം കമ്മിറ്റി സെക്രട്ടറി കാർത്തികേയൻ തുടങ്ങിയവർ സംസാരിച്ചു.

നാട്യാഞ്ജലി വാര്‍ഷിക ആഘോഷപരിപാടി

പാറശാല: പ്ലാമൂട്ടുകട നാട്യഞ്ജലി ഡാന്‍സ് അക്കാദമിയുടെ എട്ടാം വാര്‍ഷിക ആഘോഷ പരിപാടികള്‍ കെ. ആന്‍സലന്‍ എംഎല്‍എ ഉദ്ഘാടനം ചെയ്തു. ആറയൂര്‍ ഇടവക വികാരി ഫാ. വി.പി. ജോസ് അധ്യക്ഷത വഹിച്ച യോഗത്തില്‍ ഫാ. ഷൈന്‍ അഗസ്റ്റിന്‍, പ്ലാമൂട്ടുക്കട സാംസ്‌കാരിക കൂട്ടായ്മ ചെയര്‍മാന്‍ പി.എസ്. മേഘവര്‍ണന്‍, വിനു ജോസ്, ജോസ് വിക്ടര്‍, ജോണസ് ക്രിസ്റ്റഫര്‍, വത്സല, ശ്രീകുമാര്‍ എന്നിവര്‍ പ്രസംഗിച്ചു.

സിവിള്‍ ഡിഫന്‍സ് മോക്ഡ്രില്‍ നടത്തി അഗ്നിരക്ഷാ സേനയും പോലീസും

വെഞ്ഞാറമൂട്: സിവിള്‍ ഡിഫന്‍സ് മോക്ഡ്രില്‍ നടത്തി അഗ്നിരക്ഷാ സേനയും പോലീസും. വെഞ്ഞാറമൂട് അഗ്നി രക്ഷാ സേനയും കിളിമാനൂര്‍ പോലീസും ചേര്‍ന്നു ചേര്‍ന്ന് കിളിമാനൂര്‍ സിവിള്‍ സ്റ്റേഷനിലാണ് മോക് ഡ്രില്‍ സംഘടിപ്പിച്ചത്. നാലു മണിക്ക് സൈറന്‍ മുഴങ്ങിയതോടെ സർവസജ്ജരായ അഗ്നി രക്ഷാസേനയും കിളിമാനൂര്‍ പോലീസും സിവിൽ സ്റ്റേഷനിലെത്തി. ഇതിനിടയില്‍ പ്രത്യേക സ്ഥലത്ത് ഒത്തുകൂടിയവരില്‍ നിന്നും കൂട്ടത്തിലാരെയെങ്കിലും കാണാതായിട്ടുണ്ടോ എന്ന് അന്വേഷിക്കുന്നതും കൂടി നിന്നവരില്‍ നിന്നും ഒരാളെ കാണാതായിട്ടുണ്ടെന്ന മറുപടിയുടെ അടിസ്ഥാനത്തില്‍ സംഘത്തില്‍ നിന്നും തെരഞ്ഞെടുക്കപ്പെട്ടവര്‍ കെട്ടിടത്തിനുള്ളിലേക്ക് ഓടിക്കയറി അപകടത്തില്‍പെട്ടു കിടക്കുന്നയാളെ സ്ട്രച്ചറില്‍ പുറത്തെത്തിച്ച് നേരത്തെ അറിയിപ്പ് കൊടുത്തു സജ്ജമാക്കിയ ആശുപത്രിയിലേക്ക് ആംബുലന്‍സില്‍ കയറ്റി കൊണ്ടു പോകുന്നതുമാണ് മോക്ഡ്രില്ലില്‍ ഉണ്ടായിരുന്നത്. വെഞ്ഞാറമൂട് അഗ്നിരക്ഷാ നിലയത്തിലെ സ്റ്റേഷന്‍ ഓഫീസര്‍ അനില്‍കുമാര്‍, അസിസ്റ്റന്‍റ് സ്റ്റേഷന്‍ ഓഫീസര്‍, ഫയര്‍ ആൻഡ് റെസ്‌ക്യൂ ഓഫീസര്‍മാര്‍, ഹോം ഗാര്‍ഡ്മാര്‍, സിവില്‍ ഡിഫന്‍സ് അംഗങ്ങള്‍, കിളിമാനൂര്‍ എസ്എച്ച്ഒ ജയന്‍, മറ്റ് പോലീസ് ഉദ്യോഗസ്ഥര്‍, സിവില്‍ സ്റ്റേഷനിലെ വിവിധ വിഭാഗങ്ങളിലെ ജീവനക്കാര്‍ എന്നിവര്‍ മോക് ഡ്രില്ലിന്‍റെ ഭാഗമായി.

കരമനയാറ്റിൻ തീരത്ത് മാലിന്യം തള്ളൽ രൂക്ഷം

കുറ്റിച്ചൽ: കുടിവെള്ള സോത്രസ്സായ കരമനയാറ്റിൻ തീരത്തു മാലിന്യനിക്ഷേപം. കുറ്റിച്ചൽ-ആര്യനാട് പഞ്ചായത്തുകളുടെ അതിർത്തി പ്രദേശമായ അണിയിലകടവ് പാലത്തിനു സമീപമാണ് മാലിന്യനിക്ഷേപം നടത്തുന്നത്. അറവുശാലയിലെ മാലിന്യങ്ങളും ഹോട്ടൽ വേസ്റ്റുകളും നിക്ഷേപിക്കുന്നത് നിത്യസംഭവമായിരിക്കുന്നു. വിജനമായ ഈ പ്രദേശത്ത് പുതിയ പാലത്തിനോടു ചേർന്നു കാടുള്ളതിനാൽ ഇവിടെ രാത്രികാലങ്ങളിൽ വിദൂര സ്ഥലങ്ങളിൽ നിന്നും വാഹനങ്ങളിലാണ് ഇത്തരം വേസ്റ്റ് കൊണ്ടിടുന്നത്. അഴുകിയ ഇറച്ചി വേസ്റ്റും എല്ലിൻ കഷണങ്ങളും തെരുവു നായ്ക്കൾ പ്രധാന റോഡിൽ കൊണ്ടിടുകയാണ്. ഇതു കാരണം ഇരുചക്രവാഹനങ്ങൾ അപകടത്തിലാകുന്നത് നിത്യസംഭവമാണ്. പകൽ സമയങ്ങളിൽ തെരുവുനായ്ക്കൾ കൂട്ടംകൂടി കടിപിടികൂടുന്നത് കാരണം വിദ്യാർഥികൾക്ക് സ്‌കൂളിൽ പോകാൻ ഭയമാണ്. ഇറച്ചി മാലിന്യങ്ങൾ കാക്കകൾ കൊത്തിവലിച്ചു സമീപത്തെ കുടിവെള്ള കിണറുകളിലും കരമനയാറ്റിലും കൊണ്ടിടാറുണ്ട്. അണിയിലകടവിലെ പഴയ കമ്പിപ്പാലത്തിനടിയിലൂടെ ചാക്കിൽ കെട്ടിയ ഇറച്ചി വേസ്റ്റ് ഇടുന്നത്. ദിവസങ്ങൾ കഴിഞ്ഞ് അഴുകി കരമനയാറ്റിലേക്കെത്തുന്നത് ഗുരുതരമായ ആരോഗ്യ പ്രശ്‌നങ്ങൾ സൃഷ്ടിക്കുന്നുണ്ട്. പഞ്ചായത്തുകൾ അടിയന്തിരമായി പാലത്തിനു സമീപം നിരീക്ഷണ ക്യാമറയും മുന്നറിയിപ്പു ബോർഡുകളും സ്ഥാപിക്കണമെന്നുമാണ് നാട്ടുകാരുടെ ആവശ്യം. വിജനമായ ഇവിടെ രാത്രി കാലങ്ങളിൽ സാമൂഹ്യ വിരുദ്ധരുടെ ശല്യവും കൂടുതലാണ്. രാത്രി കാലങ്ങളിൽ പോലീസ് പട്രോളിംഗ് ശക്തമാക്കണമെന്നും സമീപവാസികൾ ആവശ്യപ്പെടുന്നു.

ഓടിക്കൊണ്ടിരുന്ന ബസിനു മുകളില്‍ കൂറ്റൻ മരംവീണു

പേരൂര്‍ക്കട: ഓടിക്കൊണ്ടിരുന്ന ബസിനു മുകളില്‍ മരം വീണു. ബസിനു കേടുപാടുകള്‍ സംഭവിച്ചുവെങ്കിലും ബസിലുണ്ടായിരുന്ന കുട്ടികളെ സുരക്ഷിത സ്ഥാനത്തേക്കു മാറ്റി. ജവഹര്‍ ബാലഭവനിലെ അവധിക്കാല ക്യാമ്പില്‍ പങ്കെടുപ്പിക്കുന്നതിനു കുട്ടികളുമായി സഞ്ചരിക്കുകയായിരുന്ന മിനി ബസിനു മുകളിലാണ് തണല്‍മരത്തിന്‍റെ വന്‍ ശിഖരങ്ങള്‍ വീണത്. ദേവസ്വം ബോര്‍ഡില്‍നിന്ന് കുറവന്‍കോണത്തേക്കു തിരിയുന്ന റോഡില്‍നിന്ന തണല്‍മര ശിഖരങ്ങളാണ് ബസിനു മുകളില്‍ വീണത്. ബസിനുള്ളില്‍ ഡ്രൈവറെയും സഹായിയെയും കൂടാതെ 20-ഓളം കുട്ടികളാണ് ഉണ്ടായിരുന്നത്. തിരുവനന്തപുരം ഫയര്‍‌സ്റ്റേഷനില്‍നിന്നു സീനിയര്‍ ഫയര്‍ ആൻഡ് റസ്‌ക്യൂ ഓഫീസര്‍ സുധീഷ് ചന്ദ്രന്‍റെ നേതൃത്വത്തില്‍ എഫ്ആര്‍ഒമാരായ ദിനുമോന്‍, ഷഹീര്‍, ഷിബിന്‍, എഫ്ആര്‍ഒ ഡ്രൈവര്‍ നന്ദന്‍ എന്നിവരാണ് പ്രവര്‍ത്തനങ്ങള്‍ ഏകോപിപ്പിച്ചത്. ഒരുമണിക്കൂറിലേറെ നീണ്ട പ്രവര്‍ത്തനങ്ങള്‍ക്കുശേഷം ബസ് സംഭവസ്ഥലത്തുനിന്നു നീക്കി.

വാഗ്ദാനത്തിലൊതുങ്ങി നെയ്യാർ ആയുർവേദ വില്ലേജ്

നെയ്യാർഡാം: സംസ്ഥാന സർക്കാർ നടപ്പിലാക്കാൻ ഉദ്ദേശിച്ചിരുന്ന ബജറ്റ് വാഗ്ദാനമായിരുന്ന ആയുർവേദ വില്ലേജ് ഇനിയും യാഥാർഥ്യമായില്ല. 2016 ലും 2021ലും 2024 ലും ബജറ്റ് വാഗ്ദാനമായിരുന്നു നെയ്യാർ ആയുർവേദ വില്ലേജ്. വിശദമായ പഠന റിപ്പോർട്ട് തയാറാക്കി ഇതിനായി നടപടികൾ സ്വീകരിക്കുമെന്നായിരുന്നു വാഗ്ദാനം. ഔഷധ സസ്യങ്ങളുടെ കലവറ എന്നു വിശേഷിപ്പിക്കുന്ന അഗസ്ത്യമലയ്ക്ക് അടിവാരത്തു തന്നെ ആയുർവേദ വില്ലേജ് സ്ഥാപിക്കണമെന്ന വിദഗ്ധ നിർദേശം സർക്കാരിന് മുന്നിൽ സമർപ്പിച്ചിരുന്ന പശ്ചാത്തലത്തിലാണ് പ്രഖ്യാപനം വന്നത്. നെയ്യാർവന്യജീവി സങ്കേതത്തിൽപ്പെടുന്ന അപൂർവവും വംശനാശം നേരിടുന്നതുമായ സസ്യങ്ങളെ സംരക്ഷിക്കാനും നട്ടുവളർത്താനും അതു പുറംനാട്ടിൽ വിൽക്കാനും പഠന-ഗവേഷങ്ങൾക്കുമാണ് പദ്ധതി തയാറാക്കിയത്. അഗസ്ത്യമലയിലെ അപൂർവസസ്യങ്ങൾ ശേഖരിക്കുകയും ആദിവാസികളായ കാണിക്കാരുടെ സഹായത്തോടെ അത് നട്ടുവളർത്താനുമായിരുന്നു പദ്ധതി. ഇതു പ്രകാരം നിരവധി സസ്യങ്ങളാണ് കണ്ടെത്തിയത്. ഇതിനായി ഏതാണ്ട് അഞ്ചു ഹെക്ടറോളം സ്ഥലം വേർതിരിക്കുകയും അവിടെ കമ്പിവേലി കെട്ടി സുരക്ഷിതമാക്കാനും നിർദേശം നൽകിയെങ്കിലും അതു പ്രാഥമിക നടപടിയിൽ തന്നെ നിലച്ചു. കാണിക്കരെ നിയോഗിച്ച് കാട്ടിൽനിന്നും ഔഷധങ്ങളെ കണ്ടെത്തി നാട്ടുകാരെ കൂടി ഉൾപ്പെടുത്തിയുള്ള പദ്ധതിക്കാണ് പ്ലാനിട്ടത്. നിരവധി തൊഴിൽ അവസരങ്ങൾ വാഗ്ദാനം ചെയ്ത പദ്ധതിയായിരുന്നു ഇത്. ആയുർവേദ ഔഷധനിർമാതക്കളെ സമീപിച്ച് ഔഷധങ്ങളുടെ കച്ചവടവും ഉറപ്പിച്ചു. പഠിക്കാനും ഗവേഷണം നടത്താനും പദ്ധതി രേഖയിലുണ്ട്. എന്നാൽ മുടക്കിയ പണം പാഴായി എന്നു മാത്രം. വില്ലേജ് നെയ്യാർവന്യജീവി സങ്കേതത്തിൽ മതിയെന്നു കേന്ദ്ര സർക്കാരും നിഷ്‌കർശിച്ചിരുന്നു. ആ പദ്ധതിയാണ് ഫയലിൽ ഉറങ്ങുന്നത്. ആയുർവേദ വില്ലേജിനായി വേണ്ടത്ര സ്ഥലം ഇവിടെ തന്നെയുണ്ട്. അതിനായി ഭൂമി ഏറ്റെടുക്കേണ്ട കാര്യവുമില്ല. അഗസ്ത്യമലയിലെ അപൂർവവും എന്നാൽ ഔഷധ ഗുണവുമുള്ള മരുന്നു ചെടികൾ നശിക്കുകയും അതു അശാസ്ത്രീയമായി പറിച്ചെടുത്ത് കടത്തുകയും ചെയ്യുകയാണ് ഇപ്പോൾ. അത് ഒഴിവാക്കാൻ കഴിയുമായിരുന്ന പദ്ധതിയാണ് ഇല്ലാതെയായത്. ടൂറിസത്തിനും മുതൽകൂട്ടാകുന്ന ഒന്നായിരുന്നു ആയുർവേദ വില്ലേജ്.

ഹോട്ടലിൽ അതിക്രമം: പരാതി നൽകി

വിളപ്പിൽശാല: യുവതി ഉൾപ്പെടെയുള്ള മൂന്നംഗസംഘം വിളപ്പിൽശാലയിലെ ഹോട്ടലിൽ അതിക്രമം നടത്തിയതായി പരാതി. രാത്രി ഏഴുമണിയോടെയായിരുന്നു സംഭവം. ഹോട്ടലിൽ എത്തിയ യുവതിയും രണ്ട് യുവാക്കളും അടങ്ങിയ സംഘം ജീവനക്കാരോട് തട്ടിക്കയറുകയായിരുന്നു. ഹോട്ടലിലെ ജീവനക്കാരൻ യുവതിക്ക് നൽകിയ പണം തിരികെ ചോദിച്ചതായിരുന്നു പ്രകോപനത്തിനു കാരണം. പിന്നാലെ ജീവനക്കാരനെ മർദിക്കുകയും ഹോട്ടലിലെ സാധനസാമഗ്രികൾ നശിപ്പിക്കുകയും ചെയ്തു. സംഭവത്തിൽ ഇവർക്കെതിരെ കടയുടമ പോലീസിൽ പരാതി നൽകി.

രാഷ്ട്രീയ ജനതാദൾ പൂവാർ പഞ്ചായത്ത്‌ സമ്മേളനം

പൂവാർ: രാഷ്ട്രീയ ജനതാ ദൾ പൂവാർ പഞ്ചായത്ത്‌ സമ്മേളനം 11നു പൂവാറിൽ നടക്കും. വൈകുന്നേരം മൂന്നിന് ഓക്സ് ഫോർഡ് കോളജിൽ നടക്കുന്ന പ്രതിനിധി സമ്മേളനം സംസ്ഥാന സെക്രട്ടറി കോവളം ടി.എൻ. സുരേഷ് ഉദ്ഘാടനം ചെയ്യും. പഞ്ചായത്ത്‌ കമ്മിറ്റി വൈസ് പ്രസിഡന്‍റ് എസ്. സെൽവാനോസ് അധ്യക്ഷത വഹിക്കും. പ്രതിനിധി സമ്മേളനത്തിൽ പുല്ലുവിള ജോയ്, കരിച്ചൽ ഗോപാലകൃഷ്ണൻ, ആർ. ബാഹുലേയൻ, പുല്ലുവിള വിൻസന്‍റ്, ബി.എം. ഹനീഫ തുടങ്ങിയവർ പ്രസംഗിക്കും. വൈകുന്നേരം ആറിന് പാലം ജംഗ്ഷനിൽ നടക്കുന്ന പൊതു സമ്മേളനം രാഷ്ട്രീയ ജനതാദൾ സംസ്ഥാന സെക്രട്ടറി ജനറൽ ഡോ. എ. നീലലോഹിത ദാസ് ഉദ്ഘാടനം ചെയ്യും. പഞ്ചായത്ത്‌ കമ്മിറ്റി പ്രസിഡന്‍റ് അരുമാനൂർ മുരുകന്‍റെ അധ്യക്ഷതയിൽ കൂടുന്ന യോഗത്തിൽ പരശുവയ്ക്കൽ രാജേന്ദ്രൻ, അഡ്വ. ജമീല പ്രകാശം, മലയിൻകീഴ് ചന്ദ്രൻ നായർ, എം. മുബാറക്, എസ്. സുനിൽ ഖാൻ, വിഴിഞ്ഞം ജയകുമാർ, അഡ്വ. ജി. മുരളീധരൻ നായർ, തെന്നൂർകോണം ബാബു, എസ്. നടരാജൻ ആശാരി തുടങ്ങിയവർ സംസാരിക്കും.

സ്റ്റാബോക്ക് ക്രിക്കറ്റ് ടൂർണമെന്‍റ് പത്തുമുതൽ

തിരുവനന്തപുരം: സ്റ്റേറ്റ് ബാങ്ക് ഓഫ് ഇന്ത്യ ഓഫീസേഴ്സ് അസോസിയേഷൻ കേരള സർക്കിളിന്‍റെ കൾച്ചറൽ വിഭാഗമായ സ്റ്റാബോക്ക് (സ്റ്റേറ്റ് ബാങ്ക് ഓഫീസേഴ്സ് ക്ലബ് ), കേരള സർക്കിളിലെ ഓഫീസർമാരെ പങ്കെടുപ്പിച്ചുകൊണ്ടു നടത്തുന്ന പതിനാറാമത് എൻ എസ്‌ മെമ്മോറിയൽ ക്രിക്കറ്റ് ടൂർണമെന്‍റ് തിരുവനന്തപുരം പേരൂർക്കട എസ്‌എപി ഗ്രൗണ്ടിൽ 10, 11 തീയതികളിൽ നടത്തും. കേരളത്തിലെ ആറു മൊഡ്യൂളുകളിൽ നിന്നായി എട്ടു ടീമുകൾ മാറ്റുരയ്ക്കുന്ന ടൂർണമെന്‍റിന്‍റെ ഉദ്ഘാടനം എസ്‌എപി പേരൂർക്കട കമാൻഡന്‍റ് ഷഹൻഷ 10നു രാവിലെ 9.30ന് നിർവഹിക്കും. എസ്‌ബിഐയുടെ ഉന്നത ഉദ്യോഗസ്ഥരും എസ്‌ബിഐ ഓഫീസേർസ് അസോസിയേഷൻ കേരള സർക്കിൾ പ്രസിഡന്‍റ് ടി. ബിജു, ജനറൽ സെക്രട്ടറി എസ്. രാജേഷ് എന്നിവരും പങ്കെടുക്കും.

113 -ാമത് ശാരദ പ്രതിഷ്ഠവാർഷികവും ധർമപതാകാഘോഷയാത്ര സമ്മേളനവും

പൂവാർ: ശ്രീ നാരായണ ഗുരുദേവന്‍റെ സാന്നിധ്യത്താൽ അനുഗ്രഹീതമായ അരുമാനൂർ ശ്രീ നായിനാർ ദേവ ക്ഷേത്രത്തിലെ 113 -ാമത് ശാരദ പ്രതിഷ്ഠയുടെയും 63-ാമത് ശ്രീനാരായണ ധർമ്മമീമാംസ പരിഷത്തിന്‍റെയും വാർഷികത്തോടനുബന്ധിച്ച് ശിവഗിരിയിൽ ഉയർത്തുന്നതിനുള്ള ധർമ്മ പതാക ഘോഷയാത്ര ഇന്നു രാവിലെ ഒന്പതിന് ആരംഭിക്കും. ക്ഷേത്രാങ്കണത്തിൽ നടക്കുന്ന സമ്മേളനം ശ്രീനാരായണ ധർമസംഘം പ്രസിഡന്‍റ് ബസച്ചിദാനന്ദ സ്വാമികൾ ഉദ്ഘാടനം ചെയ്യും. ക്ഷേത്രയോഗം പ്രസിഡന്‍റ് വി.എസ്. ഷിനു അധ്യക്ഷത വഹിക്കും. ഗുരുധർമ പ്രചാരണസഭ സെക്രട്ടറി അസംഗാനന്ദ ഗിരി, ശിവഗിരിമഠം അംബികാനന്ദ എന്നിവർ അനുഗ്രഹപ്രഭാഷണം നടത്തും. ഗുരുധർമ പ്രചാരണസഭ രജിസ്ട്രാർ കെ.ടി. സുകുമാരൻ, ഗുരുധർമ പ്രചാരണ സഭ കോ- ഓർഡിനേറ്റർ അശോകൻ ശാന്തി, എക്സിക്യൂട്ടീവ് അംഗം ആറ്റിങ്ങൽ കൃഷ്ണൻകുട്ടി, ജില്ലാ പ്രസിഡന്‍റ് ഡി. വിശ്വംഭരൻ, ജില്ലാ സെക്രട്ടറി ജി. സുജീന്ദ്ര ബാബു, ക്ഷേത്രം ജനറൽ സെക്രട്ടറി എസ്.പി. സോണി തുടങ്ങിയവർ ആശംസകൾ അർപ്പിക്കും.

പ്രതികൾ റിമാൻഡിൽ

നെയ്യാറ്റിന്‍കര: തമിഴ്നാട് ട്രാന്‍സ്പോര്‍ട്ട് ബസില്‍ കഞ്ചാവുമായി യാത്ര ചെയ്യുന്നതിനിടയില്‍ കഴിഞ്ഞ ദിവസം എക് സൈസ് അറസ്റ്റ് ചെയ്ത രണ്ടു ബംഗാള്‍ സ്വദേശികളെയും റിമാന്‍ഡ് ചെയ്തു. സംഘത്തിലെ മറ്റു അംഗങ്ങളെക്കുറിച്ചും കഞ്ചാവിന്‍റെ കൃത്യമായ ഉറവിടം സംബന്ധിച്ചും വിശദമായി അന്വേഷിക്കുമെന്ന് എക് സൈസ് അധികൃതര്‍ അറിയിച്ചു. നാഗര്‍കോവില്‍ നിന്നും തിരുവനന്തപുരത്തേയ്ക്ക് വരികയായിരുന്ന തമിഴ്നാട് ട്രാന്‍സ്പോര്‍ട്ട് ബസിലെ യാത്രക്കാരായിരുന്ന പരിമള്‍ മണ്ഡല്‍ (54), പഞ്ചനന്‍ മണ്ഡല്‍ (56) എന്നിവരില്‍ നിന്നാണ് എക് സൈസ് സംഘം 4.750 കിലോ കഞ്ചാവ് പിടിച്ചെടുത്തത്. കിലോയ്ക്ക് അന്പതിനായിരം രൂപ എന്ന നിരക്കില്‍ രണ്ടു ലക്ഷത്തിലേറെ രൂപ വിപണിയില്‍ ഈ കഞ്ചാവിനു വിലവരുമെന്ന് എക്സൈസ് അറിയിച്ചു.

ദേശീയ മാധ്യമ സമ്മേളനം: ലോഗോ പ്രകാശനം ചെയ്തു

തിരുവനന്തപുരം: ഓഗസ്റ്റ് 20, 21 തീയതികളിൽ തിരുവനന്തപുരത്തു നടക്കുന്ന മുതിർന്ന മാധ്യമ പ്രവർത്തകരുടെ ദേശീയ സമ്മേളനത്തിന്‍റെ ലോഗോ പ്രകാശനം ചെയ്തു. സമ്മേളന സംഘാടക സമിതി മുഖ്യരക്ഷാധികാരി മന്ത്രി വി. ശിവൻകുട്ടിയാണ് ലോഗോ പ്രകാശനം ചെയ്തത്. സീനിയർ ജേണലിസ്റ്റ്സ് ഫോറം - കേരള ജനറൽ സെക്രട്ടറി കെ.പി. വിജയകുമാർ, വൈസ് പ്രസിഡന്‍റുമാരായ ടി. ശശി മോഹൻ, ഹരിദാസൻ പാലയിൽ, സംസ്ഥാന കമ്മിറ്റി അംഗങ്ങളായ എൻ.പി. ചെക്കുട്ടി, ജേക്കബ് ജോർജ്, പി.പി. അബൂബേക്കർ, എം. സുധീന്ദ്ര കുമാർ, സമ്മേളന സംഘാടക സമിതി ചെയർമാൻ ജോണ്‍ മുണ്ടക്കയം, ജനറൽ കണ്‍വീനർ കരിയം രവി, ജില്ലാ പ്രസിഡന്‍റ് എം. സരിത വർണ തുടങ്ങിയവർ പങ്കെടുത്തു. സീനിയർ ജേണലിസ്റ്റ്സ് ഫോറം - കേരളയാണ് മുതിർന്ന മാധ്യമ പ്രവർത്തകരുടെ ദേശീയ സമ്മേളനത്തിന്‍റെ സംഘാടകർ. വിവിധ സംസ്ഥാനങ്ങളിൽ നിന്നായി തെരഞ്ഞെടുക്കപ്പെട്ട ഇരുനൂറിലേറെ മുതിർന്ന മാധ്യമ പ്രവർത്തകർ സമ്മേളനത്തിൽ പങ്കെടുക്കുമെന്നു സീനിയർ ജേണലിസ്റ്റ്സ് ഫോറം പ്രസിഡന്‍റ് അലക്സാണ്ടർ സാമും ജനറൽ സെക്രട്ടറി കെ.പി. വിജയകുമാറും ദേശീയ കോ-ഓർഡിനേറ്റർ എൻ.പി. ചെക്കുട്ടിയും അറിയിച്ചു.

ഗ്യാസ് ഏജൻസി ഉടമയുടെ പണം തട്ടിയ അഭിഭാഷകൻ അറസ്റ്റിൽ

തിരുവനന്തപുരം: ട്രാവൻടൂർ ഗ്യാസ് ഏജൻസി ഉടമയെ പറ്റിച്ച് 23 ലക്ഷത്തോളം രൂപ തട്ടിയെടുത്ത കേസിൽ മാനേജരായ അഭിഭാഷകൻ അറസ്റ്റിൽ. ഉൗരൂട്ടന്പലം അയണിമൂട് സ്വദേശി അഡ്വ. എം.എസ്. അനിൽ വസാദാണ് അറസ്റ്റിലായത്. ഗ്യാസ് സിലിണ്ടറുകൾ വിതരണം ചെയ്ത വകയിൽ നേരിട്ടും ഗൂഗിൾപേ മുഖേനയും ലഭിക്കേണ്ട 23 ലക്ഷം രൂപ തട്ടിയെടുത്തെന്ന കേസിലാണ് മാനേജർ ആയിരുന്ന അനിൽ വസാദിനെ അറസ്റ്റ് ചെയ്തത്. അക്കൗണ്ടന്‍റായ രണ്ടാം പ്രതിയുമായി ഒത്തുകളിച്ചു പണം തട്ടിയെന്ന കേസിലാണ് വലിയതുറ എസ്ഐയുടെ നേതൃത്വത്തിൽ പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കി 15 ദിവസത്തേക്ക് റിമാർഡ് ചെയ്തു. പ്രതിക്കെതിരെ കന്‍റോണ്‍മെന്‍റ്, തന്പാനൂർ പോലീസ് സ്റ്റേഷനുകളിൽ സമാനമായ കേസ് നിലവിലുണ്ടെന്നു പോലീസ് അറിയിച്ചു.

വനം വകുപ്പുമായി കൈകോർത്ത് യുഎസ്‌ടി

തിരുവനന്തപുരം: പ്രകൃതി-വന സംരക്ഷണത്തിനായുള്ള പ്രവർത്തനങ്ങൾ ശക്തിപ്പെടുത്തുന്നതിനായി ഡിജിറ്റൽ ട്രാൻസ്ഫോർമേഷൻ സൊല്യൂഷൻസ് കമ്പനിയായ യുഎസ്‌ടി, പേപ്പാറ അണക്കെട്ടിനു സമീപം പരുത്തിപ്പള്ളി റേഞ്ചിലുള്ള കുട്ടപ്പാറയിൽ സംഘടിപ്പിച്ച പരിസ്ഥിതി പുനരുജ്ജീവന പദ്ധതിയിൽ പങ്കാളിയായി. കേരള വനംവന്യജീവി വകുപ്പ് ആസൂത്രണം ചെയ്തു നടപ്പാക്കിയ പദ്ധതിയുടെ ഭാഗമായി 2500 വൃക്ഷത്തൈകളാണ് നട്ടുപിടിപ്പിച്ചത്. ഇതിലൂടെ പരിസ്ഥിതി പുനരുജ്ജീവനത്തിനായി കേരള വനം-വന്യജീവി വകുപ്പുമായി കൈകോർക്കുന്ന ആദ്യ കമ്പനി എന്ന ബഹുമതിയും യുഎസ്‌ടി സ്വന്തമാക്കി. പുനരുജ്ജീവന പ്രവർത്തനങ്ങളോടുള്ള പ്രതിബദ്ധത ഉറപ്പാക്കുന്നതിനു വേണ്ടി പ്രാദേശിക സമൂഹത്തെക്കൂടി ഈ പദ്ധതിയുടെ ഭാഗമാക്കാനുള്ള ശ്രമങ്ങൾ നടത്തുന്നുണ്ട്. പരിസ്ഥിതി പുനരുജ്ജീവനത്തിന്‍റെ പ്രാധാന്യവും അതുവഴി സമൂഹത്തിനുണ്ടാകുന്ന ഗുണങ്ങളുടെ ബോധവത്കരണത്തിനും വേണ്ടി യുഎസ്‌ടി വനംവകുപ്പുമായി ചേർന്ന് അവബോധ പരിപാടികളും ശില്പശാലകളും സംഘടിപ്പിക്കും.

ഉള്ളൂര്‍ തോടിന്‍റെ കൈവരി തകർന്ന നിലയില്‍

മെഡിക്കല്‍കോളജ്: ഇടവക്കോടുനിന്നു വന്നു കണ്ണമ്മൂലവഴി വേളി കായലിലേക്കു ചെന്നുചേരുന്ന ഉള്ളൂര്‍ തോട് അപകടാവസ്ഥയില്‍. തോടിന്‍റെ കൈവരികള്‍ ഇടിയുന്നതാണ് പ്രശ്‌നത്തിനു കാരണം. ഉള്ളൂര്‍ ഇടറോഡ് ഇതിനു സമീപത്തുകൂടിയാണ് കടന്നുപോകുന്നത്. തോടിന്‍റെ രണ്ടുഭാഗത്തും സമാന്തരമായി റോഡുകള്‍ ഉണ്ട്. റോഡിലൂടെയുള്ള വാഹനയാത്രികരുടെയും കാല്‍നടയാത്രികരുടെയും സുരക്ഷ ഉറപ്പാക്കുന്നതിനുവേണ്ടിയാണ് 300 മീറ്ററോളം നീളത്തില്‍ കൈവരികള്‍ കെട്ടി ഉയര്‍ത്തിയത്. അധികം ഉയരമില്ലാത്ത കൈവരികള്‍ ഇപ്പോള്‍ ഇടിഞ്ഞുവീണുകൊണ്ടിരിക്കുകയുമാണ്. ഉള്ളൂര്‍ പാലം തുടങ്ങുന്ന ഭാഗത്തുനിന്നു നാലിടങ്ങളിലാണ് കൈവരികള്‍ അപകടാവസ്ഥയിലുള്ളത്. ഒരു സ്ഥലത്ത് കൈവരി രണ്ടായി മുറിഞ്ഞുമാറിയിരിക്കുന്നു. മറ്റൊരിടത്ത് ഒരുമീറ്ററോളം ദൂരത്തില്‍ കൈവരിയിലെ കരിങ്കല്‍ക്കെട്ട് ഇളകി തോട്ടിലേക്ക് വീണുകിടക്കുന്നു. ഇനിയും രണ്ടിടങ്ങളില്‍ കൈവരിയ്ക്കുള്ളില്‍ നിന്നു കല്ലുകളും സിമന്‍റും ഉള്‍പ്പെടെ നഷ്ടപ്പെട്ട അവസ്ഥയിലാണ്. ആരെങ്കിലും കൈവരിയില്‍ ഇരിക്കുകയാണെങ്കില്‍ ഇതു മറിഞ്ഞുവീണ് അപകടം സംഭവിക്കാന്‍ സാധ്യതയുണ്ട്. കൈവരി കെട്ടിയിരിക്കുന്ന ഭാഗത്തെല്ലാം വന്‍മരങ്ങള്‍ വളര്‍ന്നു വരികയാണ്. ഇവരുടെ വേരുകള്‍ കയറുന്നതാണ് കൈവരികള്‍ക്ക് ബലക്ഷയം ഉണ്ടാകാന്‍ കാരണമെന്നാണു സൂചന. കൈവരികള്‍ പുനര്‍നിര്‍മിക്കുകയോ ബലപ്പെടുത്തുകയോ ചെയ്യാത്തപക്ഷം വാഹനയാത്രികര്‍ക്കും വഴിയാത്രികര്‍ക്കും ഭീഷണിയാകും.

ശ്രീചിത്ര തിരുനാൾ ഇൻസ്റ്റിറ്റ്യൂട്ട് ബിരുദദാനം നാളെ

തിരുവനന്തപുരം: ശ്രീചിത്ര തിരുനാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസസ് ആൻഡ് ടെക്നോളജിയിലെ 41-ാമത് ബാച്ചിന്‍റെ ബിരുദദാനവും എട്ടാമത് ജി പാർഥസാരഥി സ്മാരക പ്രഭാഷണവും നാളെ രാവിലെ 9.30നു അച്യുതമേനോൻ സെന്‍റർ ഫോർ ഹെൽത്ത് സയൻസ് സ്റ്റഡീസ് ഓഡിറ്റോറിയത്തിൽ നടക്കും. സീനിയർ റസിഡന്‍റുമാരുൾപ്പെടെ ബിരുദ/ഡിപ്ലോമാ കോഴ് സുകൾ പൂർത്തിയാക്കിയ 139 വിദ്യാർഥികൾ ബിരുദദാനചടങ്ങിൽ സർട്ടിഫിക്കറ്റുകൾ ഏറ്റുവാങ്ങും. ഡിഎം, എംസിഎച്ച്, പിഎച്ച്ഡി, എംപിഎച്ച്, ഡിപ്ലോമ, എംഎസ് കോഴ്സുകൾ പൂർത്തിയാക്കിയവർക്കാണ് സർട്ടിഫിക്കറ്റുകൾ വിതരണം ചെയ്യുന്നത്. ഐഎസ്ആർഒ മുൻ ചെയർമാനും ബഹിരാകാശവകുപ്പ് മുൻ സെക്രട്ടറിയുമായ ഡോ.എസ്. സോമനാഥ് മുഖ്യാതിഥിയായിരിക്കും. അദ്ദേഹം ബിരുദദാന പ്രഭാഷണം നടത്തും. ബിൽ ആൻഡ് മെലിൻഡ ഗേറ്റ്സ് ഫൗണ്ടേഷനിലെ എന്‍റെറിക്, ഡയഗ്നോസ്റ്റിക്സ്, ജീനോമിക്സ് ആൻഡ് എപ്പിഡമോളജി ഡയറക്ടറും ഫരീദാബാദിലെ ട്രാൻസ്‌ലേഷണൽ ഹെൽത്ത് സയൻസസ് ആൻഡ് ടെക്നോളജി ഇൻസ്റ്റിറ്റ്യൂട്ട് മുൻ എക്സിക്യൂട്ടീവ് ഡയറക്ടറും വെല്ലൂർ ക്രിസ്ത്യൻ മെഡിക്കൽ കോളജ് ഗ്യാസ് ട്രോഇന്‍റസ്റ്റൈനൽ വിഭാഗം മുൻ പ്രഫസറുമായ ഡോ. ഗഗൻദീപ് കാങ് എന്നിവർ പ്രസംഗിക്കും. ബംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് ഡയറക്ടർ പ്രഫ. ഗോവിന്ദൻ രംഗരാജൻ ജി. പാർത്ഥസാരഥി സ്മാരക പ്രഭാഷണം നടത്തും. ശ്രീചിത്ര തിരുനാൾ ഇൻസ്റ്റിറ്റ്യൂട്ട് പ്രസിഡന്‍റ് ക്രിസ് ഗോപാലകൃഷ്ണൻ ചടങ്ങിൽ അധ്യക്ഷത വഹിച്ചു ബിരുദദാനം നിർവഹിക്കുകയും ചെയ്യും.

നന്തൻകോട് കൂട്ടക്കൊല: വിധി തിങ്കളാഴ്ച

തിരുവനന്തപുരം: നന്തൻകോട് കൂട്ടക്കൊല കേസിന്‍റെ വിധി പറയുന്നത് തിങ്കളാഴ്ചയിലേക്കു മാറ്റി. തിരുവനന്തപുരം ആറാം അഡീഷണൽ സെഷൻസ് കോടതിയാണു പ്രതി കുറ്റക്കാരൻ ആണോ അല്ലയോ എന്ന് കണ്ടെത്തുക. 2017 ഏപ്രിൽ എട്ടിനാണ് കേഡൽ ജിൻസണ്‍ രാജയുടെ മാതാപിതാക്കളും സഹോദരിയും ബന്ധുവും അതിദാരുണമായി കൊല്ലപ്പെട്ടത്. മുഖ്യപ്രതിയായ കേഡലിനെതിരേ ഗുരുതര കുറ്റങ്ങളാണ് കുറ്റപത്രത്തിൽ ചുമത്തിയിട്ടുള്ളത്. കൊലപാതകം, തെളിവ് നശിപ്പിക്കൽ, മാരകായുധങ്ങൾ ഉപയോഗിച്ച് പരിക്കേൽപ്പിക്കുക, വീട് നശിപ്പിക്കൽ എന്നീ ഇന്ത്യൻ ശിക്ഷാ നിയമത്തിലെ വകുപ്പുകളാണ് പ്രതിക്കെതിരെ ചുമത്തിയിട്ടുണ്ട്. ക്ലിഫ് ഹൗസിനു സമീപത്തുള്ള ബെ യ്ൻസ് കോംപൗണ്ടിലെ 117ാം നന്പർ വീട്ടിലാണ് പ്രഫ. രാജ തങ്കം, ഭാര്യ ഡോ. ജീൻ പത്മ, മകൾ കരോലിൻ, ബന്ധു ലളിത എന്നിവരെ കൊല്ലപ്പെട്ട നിലയിൽ കണ്ടെത്തിയത്

ആമയിഴഞ്ചാൻ തോട്ടിലെ മാലിന്യനീക്കം : മേജർ ഇറിഗേഷൻ വകുപ്പ് നടപടി എടുക്കണം: മനുഷ്യാവകാശ കമ്മീഷൻ

തിരുവനന്തപുരം: മാലിന്യം നീക്കാനിറങ്ങിയ ശുചീകരണ തൊഴിലാളി മരണത്തിനു കീഴടങ്ങിയ ആമയിഴഞ്ചാൻ തോട്ടിൽ വീണ്ടും മാലിന്യം നിറഞ്ഞ് ഒഴുക്ക് തടസപ്പെട്ട സാഹചര്യത്തിൽ മാലിന്യം നീക്കം ചെയ്യാനുള്ള നടപടികൾ മേജർ ഇറിഗേഷൻ വകുപ്പ് അടിയന്തരമായി സ്വീകരിക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ് എക് സിക്യൂട്ടീവ് എൻജിനീയർക്കു നിർദേശം നൽകി. മാലിന്യം നീക്കം ചെയ്തതായി എക്സിക്യൂട്ടീവ് എൻജിനീയർ ഉറപ്പാക്കണം. തോടുശുചീകരിച്ച ശേഷവും മാലിന്യം നിക്ഷേപിച്ചതിന്‍റെ ഉത്തരവാദിത്തം ആർക്കാണെന്നു നഗരസഭാ സെക്രട്ടറി രേഖാമൂലം വിശദീകരണം നൽകണമെന്നും കമ്മീഷൻ ആവശ്യപ്പെട്ടു. മാലിന്യം നിക്ഷേപിക്കുന്നുണ്ടോ എന്നു പരിശോധിക്കാൻ നിയോഗിച്ചിരിക്കുന്ന രാത്രി സ്ക്വാഡിന്‍റെ പ്രവർത്തനം നിർത്താനുള്ള കാരണങ്ങളും റിപ്പോർട്ടിലുണ്ടാവണം. രാത്രി സ്ക്വാഡിന് വാഹനം ഉറപ്പാക്കണം. മാലിന്യം നിക്ഷേപിക്കുന്നത് തടയുന്നതിനുള്ള പരിഹാരമാർഗങ്ങളും സമർപ്പിക്കണമെന്ന് ജസ്റ്റിസ് അലക്സാണ്ടർ തോമസ് നിർദേശിച്ചു. മാലിന്യം നിക്ഷേപിക്കുന്നത് കാരണം മഴയെത്തും മുന്പേ തന്പാനൂർ വെള്ളപ്പൊക്ക ഭീഷണിയിലാണെന്ന പത്രവാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് നടപടി. പത്രവാർത്തയിലെ ആരോപണങ്ങൾ കൂടി മനുഷ്യാവകാശ കമ്മീഷൻ മുഖ്യ അന്വേഷണ ഉദ്യോഗസ്ഥൻ (ഐജി) നടത്തി വരുന്ന അന്വേഷണപരിധിയിൽ ഉൾപ്പെടുത്താൻ കമ്മീഷൻ നിർദേശിച്ചു. ഇപ്പോഴും ആമയിഴഞ്ചാൻ തോട്ടിൽ മാലിന്യം നിക്ഷേപിക്കുന്നതിന്‍റെ ഉത്തരവാദികൾ, ഏതെങ്കിലും സർക്കാർ സ്വകാര്യ സ്ഥാപനങ്ങൾ മാലിന്യം നിക്ഷേപിക്കുന്നുണ്ടോ, അപ്രകാരം നിക്ഷേപിക്കുന്നുണ്ടെങ്കിൽ എന്തു നിയമനടപടിയാണു സ്വീകരിക്കേണ്ടത്, മാലിന്യനിക്ഷേപം തടയുന്നതിന് സ്വീകരിക്കേണ്ട പരിഹാരമാർഗങ്ങൾ എന്നിവ അന്വേഷണപരിധിയിൽ കൊണ്ടുവരണമെന്നും കമ്മീഷൻ നിർദേശിച്ചു. ഇടക്കാല റിപ്പോർട്ട് മൂന്നാഴ്ചയ്ക്കകം ഹാജരാക്കാനും കമ്മീഷൻ ഐജിക്കു നിർദേശം നൽകി.

ജാഗ്രതയിൽ വിഴിഞ്ഞം അന്താരാഷ്‌ട്ര തുറമുഖം : സുരക്ഷയും ശക്തമാക്കി

വിഴിഞ്ഞം: ജാഗ്രതാ നിർദേശത്തിനിടയിലും തടസങ്ങളില്ലാതെ പ്രവർത്തനം തുടർന്ന് വിഴിഞ്ഞം അന്താരാഷ്ട്ര തുറമുഖം. കപ്പലുകളുടെ വരവിനെയും കണ്ടെയ്നർ കൈകാര്യം ചെയ്യുന്നതിന്‍റെയും വലിയ തിരക്കിലാണ് തുറമുഖം. ഇന്നലെ വരെ അടുത്ത 294 കപ്പലുകളിൽ നിന്നായി 6.15 ലക്ഷം കണ്ടെയ്നറുകളും കൈകാര്യം ചെയ്തു. തുറമുഖം യാഥാർഥ്യമായതോടെ ഇന്ത്യയുടെ തന്ത്ര പ്രധാന മേഖലകളിൽ ഒന്നായി മാറിയ വിഴിഞ്ഞത്തിന്‍റെ സുരക്ഷയും പ്രത്യേക സാഹചര്യം കണക്കിലെടുത്ത് വർധിപ്പിച്ചു. കേന്ദ്ര സേനയുടെ സേവനമില്ലാത്തതിനാൽ തുറമുഖ സെക്യൂരിറ്റി ജീവനക്കാരെക്കൊണ്ടു സുരക്ഷ കൂടുതൽ ശക്തമാക്കി. തുറമുഖത്തിനുള്ളിൽ സെക്യൂരിറ്റിക്കാരും പുറത്തു ക്യാമ്പിൽ നിന്നുള്ളപോലീസുകാരും സുരക്ഷക്കായി രംഗത്തുണ്ട്. പുറമേ നിന്നുള്ളവരുടെ സന്ദർശനം പൂർണമായി നിർത്തലാക്കി. ജീവനക്കാരെയും കർശന നിരീക്ഷണത്തിനു ശേഷമാണ് കടത്തിവിടുന്നത്. അദാനിയുടെ ടഗ്ഗിൽ സെക്യൂരിറ്റി ജീവനക്കാർക്കൊപ്പം തീരദേശ പോലീസും സുരക്ഷയൊരുക്കാൻ രംഗത്തുണ്ട്. കൂടാതെ കടലിലെ ഏതു സാഹചര്യവും നേരിടാൻ തയാറെടുത്തു തീര സംരക്ഷണസേന, അവധിയിൽപോയ സേനാംഗങ്ങളെ തിരിച്ച് വിളിച്ചു പൂർണമായ അംഗ സംഖ്യ നിലനിർത്തി. ഇനിയൊരറിയിപ്പ് വരുന്നതുവരെ ആർക്കും അവധി അനുവദിക്കില്ലെന്നും അധികൃതർ അറിയിച്ചു. സൈനികർക്ക് റെ ഡ് അലർട്ടും നൽകിയിട്ടുണ്ട്. കൂറ്റൻ യുദ്ധക്കപ്പലായ അനഘ് ഉൾപ്പെടെ വിഴിഞ്ഞത്തെ പട കപ്പലുകളുടെ പെട്രോളിംഗും ശക്തമാക്കിയിട്ടുണ്ട്. തങ്ങളുടെ അധികാരപരിധിയായ തീരത്തുനിന്ന് 22 നോട്ടിക്കൽ ഉൾക്കടൽ വരെ നിരീക്ഷണം തുടരുന്നതായും അധികൃതർ അറിയിച്ചു. റഡാറിന്‍റെ സഹായത്തോടെ എല്ലാത്തരം കടൽ യാനങ്ങളെയും തീര സംരക്ഷണ സേന നിരീക്ഷിക്കുന്നുണ്ട്. നേവിയുടെ കൂറ്റൻ പടക്കപ്പലുകളുടെ ഉൾക്കടൽ അരിച്ചുപെറുക്കലും തുടരുന്നതായി അധികൃതർ അറിയിച്ചു. കൂടാതെ കോവളം, വിഴിഞ്ഞം മേഖലയിൽ വരുന്ന പ്രധാന സ്ഥാപനങ്ങൾക്കും ജാഗ്രതാ നിർദേശം നൽകിയിട്ടുണ്ട്. കടലിനുപരി കരയും അധികൃതർ നിരീക്ഷണത്തിനു വിധേയമാക്കുന്നുണ്ട്. സംശയകരമായി കാണുന്നവരെ ചോദ്യം ചെയ്യാൻ പോലീസും രംഗത്തിറങ്ങി.

റാപ്പർ വേടന്‍റെ പരിപാടിക്കിടെ അപകടം: ടെക്നീഷ്യൻ ഷോക്കേറ്റ് മരിച്ചു

കിളിമാനൂർ : കിളിമാനൂരിൽ റാപ്പർ വേടന്‍റെ പ്രോഗ്രാമിനായി എൽഇഡി ഡിസ്പ്ലേ സെറ്റ് ചെയ്യുന്നതിനിടെ ടെക്നീഷ്യൻ ഷോക്കേറ്റ് മരിച്ചു. ആറ്റിങ്ങൽ കോരാണി സ്വദേശി ആങ്ങാവിള പോപ്പിൻസ് സ്ഥാപന ഉടമയും വക്കം കോടംപള്ളി തെക്കുവിളാകം വീട്ടിൽ ഗോപിനാഥന്‍റെ മകൻ ലിജു ഗോപിനാഥ് (42) ആണ് മരിച്ചത്. എൽഇഡി ഡിസ്പ്ലേ സെറ്റ് ചെയ്യുന്നതിനിടയിലാണ് ടെക്നീഷ്യന് ഷോക്കേറ്റത്. വൈകുന്നേരം അഞ്ചിനായിരുന്നു അപകടം നടന്നത്. ഉടൻ തന്നെ കിളിമാനൂരിലെ സ്വകാര്യ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാൻ കഴിഞ്ഞില്ല. മൃതദേഹം ചിറയിൽകീഴ് താലൂക്ക് ആശുപത്രിയിലേക്ക് മാറ്റി.

ആമയിഴഞ്ചാന്‍ തോട്ടില്‍ വീണയാള്‍ മരിച്ചു

മെഡിക്കല്‍കോളജ്: തിരുവനന്തപുരം സെന്‍ട്രല്‍ തിയേറ്ററിന് സമീപം ആമയിഴഞ്ചാന്‍ തോട്ടില്‍ വീണയാള്‍ മരിച്ചു. നെയ്യാറ്റിന്‍കര സ്വദേശി സതീഷ് (50) ആണ് മരിച്ചത്. കഴിഞ്ഞദിവസം വൈകുന്നേരം 6.30നാണ് സതീഷ് തോട്ടില്‍ വീണുകിടക്കുന്നത് കാണുന്നത്. തുടര്‍ന്ന് ഫോര്‍ട്ട് പോലീസില്‍ അറിയിക്കുകയായിരുന്നു. തോടിന്‍റെ കൈവരിയില്‍ നിന്ന് അബദ്ധത്തില്‍ വീണതാകാമെന്നു പോലീസ് പറഞ്ഞു. തിരുവനന്തപുരം ഫയര്‍സ്റ്റേഷനില്‍ നിന്ന് സീനിയര്‍ ഫയര്‍ ആൻഡ് റസ്ക്യു ഓഫീസര്‍ സജികുമാറിന്‍റെ നേതൃത്വത്തില്‍ ഉദ്യോഗസ്ഥരും സ്കൂബ ടീമും എത്തിയാണ് മൃതദേഹം പുറത്തെടുത്തത്. സതീഷിന്‍റെ മൃതദേഹം തിരുവനന്തപുരം മെഡിക്കല്‍കോളജ് ആശുപത്രി മോര്‍ച്ചറിയില്‍ സൂക്ഷിച്ചിട്ടുണ്ട്.

കെഎസ്ആർടിസി ബസും ബൈക്കും കൂട്ടിയിടിച്ച് യുവാവിന് ദാരുണാന്ത്യം

കഴക്കൂട്ടം: പള്ളിപ്പുറത്ത് ബൈക്കും കെഎസ്ആർടിസി സൂപ്പർഫാസ്റ്റ് സിഫ്റ്റും കൂട്ടിയിടിച്ചുണ്ടായ അപകടത്തിൽ യുവാവ് മരിച്ചു. ബൈക്ക് യാത്രക്കാരനായ പള്ളിപ്പുറം സിആർപിഎഫ് ബിസ്മി മൻസിൽ ആഷിക് (21) ആണ് മരിച്ചത്. കഴിഞ്ഞദിവസം രാത്രി 12.30 നായിരുന്നു അപകടം. തിരുവനന്തപുരത്തേക്ക് പോയ കെഎസ്ആർടിസി ബസും പള്ളിപ്പുറം ഭാഗത്തേക്ക് വന്ന ബൈക്കും നേർക്കുനേർ ഇടിക്കുകയായിരുന്നു. ആഷിക്കിനെ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. മൃതദേഹം മെഡിക്കൽ കോളജ് മോർച്ചറിയിൽ. പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടു നൽകും.

ഗോള്‍ഡന്‍ പാലസ് ഇന്‍റര്‍നാഷണല്‍ കണ്‍വന്‍ഷന്‍ സെന്‍റര്‍ ഉദ്ഘാടനം 18ന്

നെയ്യാറ്റിന്‍കര: കേരള - തമിഴ്നാട് അതിര്‍ത്തിയില്‍ മണിവിളയ് ക്കു സമീപം ഗോള്‍ഡന്‍ പാലസ് ഇന്‍റര്‍നാഷണല്‍ കണ്‍വന്‍ഷന്‍ സെന്‍റര്‍ 18ന് ഉദ്ഘാടനം ചെയ്യും. പ്രമുഖ വാണിജ്യ വ്യവസായ സംരംഭകരായ ഗോള്‍ഡന്‍ പാലസ് ഗ്രൂപ്പ് ആരംഭിക്കുന്ന സെന്‍ററില്‍ ഒട്ടേറെ സവിശേഷതകളുണ്ട്. 50 മുതല്‍ 5000 വരെ ആളുകളെ ഒരേ സമയം ഉള്‍ക്കൊള്ളാനാവുന്ന വിവിധ ഹാളുകള്‍, 2500 പേര്‍ക്ക് ഇരിക്കാവുന്ന ഓപ്പണ്‍ എയര്‍ ഓഡിറ്റോറിയം, ത്രീ സ്റ്റാര്‍ സൗകര്യത്തോടു കൂടിയ 24 മുറികളുള്ള ഹോട്ടല്‍ ബ്ലോക്ക്, രണ്ടു ഹെലികോപ്റ്ററുകള്‍ക്ക് ഒരേ സമയം ലാന്‍ഡ് ചെയ്യാന്‍ സൗകര്യമുള്ള രണ്ട് ഹെലിപാ‍ഡുകള്‍, പതിനേഴ് ഏക്കറില്‍ നാലായിരം വാഹനങ്ങള്‍ക്കുള്ള പാര്‍ക്കിംഗ് സംവിധാനം അടക്കമുള്ളതാണ് ഈ കണ്‍വന്‍ഷന്‍ സെന്‍റര്‍. ഉദ്ഘാടന ദിവസം എത്തുന്ന പൊതുജനങ്ങളില്‍നിന്നും തെരഞ്ഞെടുക്കപ്പെടുന്ന പത്തു പേര്‍ക്ക് ഹെലികോപ്റ്ററില്‍ ആകാശക്കാഴ്ച കാണാന്‍ അവസരം ലഭിക്കും. താത്പര്യമുള്ളവര്‍ക്ക് ഈ മാസം പത്തു മുതല്‍ ഇതിനായി ഗോള്‍ഡന്‍ പാലസില്‍ നേരിട്ടെത്തി പേരുകള്‍ രജിസ്റ്റര്‍ ചെയ്യാവുന്നതാണ്. ഉദ്ഘാടന ദിവസം ഉച്ചയ്ക്ക് 12 മുതല്‍ ഒന്നു വരെ നടക്കുന്ന നറുക്കെടുപ്പ് വേളയില്‍ സന്നിഹിതരായവര്‍ക്കു മാത്രമേ ഹെലികോപ്റ്റര്‍ യാത്ര അനുവദിക്കുകയുള്ളൂവെന്നും ഗോള്‍ഡന്‍ പാലസ് ഇന്‍റര്‍നാഷണല്‍ കണ്‍വന്‍ഷന്‍ സെന്‍റര്‍ പ്രതിനിധികള്‍ അറിയിച്ചു.

റേഡിയോ കിയോസ്കും കിണറും ഉദ്ഘാടനം ചെയ്തു

നെടുമങ്ങാട്: നഗരസഭ തറട്ട വാർഡിൽ പതിറ്റാണ്ടുകൾ പഴക്കമുള്ള റേഡിയോ കിയോസ്ക് പ്രവർത്തന രഹിതമായി നശിച്ച് കൊണ്ടിരിക്കെ കൗൺസിലറും നാട്ടുകാരും ചേർന്ന് നഗരസഭയുടെ സഹായത്തോടെ റേഡിയോ കിയോസ്ക് പുതുക്കി എഫ് എം റേഡിയോ സ്റ്റേഷനാക്കി മാറ്റി. ഇരുമരം-മുഖവൂരിൽ എഫ്എം റേഡിയോ സ്റ്റേഷന്‍റെ ഉദ്‌ഘാടനം മന്ത്രി ജി.ആർ. അനിൽ നിർവഹിച്ചു. ഇരുമരം ജംഗ്ഷനിലും കാരാന്തയിലും ഒരു നൂറ്റാണ്ടിലേറെ പഴക്കമുള്ള രണ്ടു പൊതുകുടിവെള്ള കിണറുകൾ പുനരുദ്ധരിച്ചു പമ്പ് സെറ്റ് സ്ഥാപിച്ച് മിനി കുടിവെള്ള പദ്ധതിയാക്കിമാറ്റി. ഇരുമരം ജംഗ്ഷനിൽ നശിച്ചു പോയ വെയിറ്റിംഗ് ഷെഡ് പുനരുദ്ധരിച്ച് ഉപയോഗ യോഗ്യമാക്കി. ഈ പദ്ധതികളും മന്ത്രി ഉദ്ഘാടനം ചെയ്തു. നഗരസഭ ചെയർപേഴ്സൺ സി.എസ്. ശ്രീജ അധ്യക്ഷത വഹിച്ചു. വാർഡ് കൗൺസിലർ പി. ഹരികേശൻ നായർ സ്വാഗതം പറഞ്ഞു. വൈസ് ചെയർമാൻ എസ്. രവീന്ദ്രൻ സ്റ്റാൻഡിംഗ് കമ്മിറ്റി ചെയർപേഴ്സൺമാരായ പി. വസന്തകുമാരി, എസ്. അജിത, കൗൺസിലർമാരായ എം.എസ്. ബിനു, ഒ. ഉഷ, വിദ്യവിജയൻ, ബിന്ദു, ശ്രീലത, സിഎസ്ഐ ചർച്ച് അധികാരി പുഷ്പരാജ് എന്നിവർ സംസാരിച്ചു. എഡിഎസ് ചെയർപേഴ്സൺ ജ്യോതിഷ് മതി നന്ദി പറഞ്ഞു. തൊഴിലുറപ്പ് തൊഴിലാളികൾ, ഹരിത കർമ്മസേനാംഗങ്ങൾ, മികവോടെ വാർഷിക പദ്ധതി പൂർത്തീകരിച്ച നഗരസഭ എൻജിനീയറിംഗ് വിഭാഗം ജീവനക്കാർ സംസ്ഥാന പുഷ്പോത്സവത്തിൽ ഒന്നാംസ്ഥാനം കരസ്ഥമാക്കിയ കരുപ്പൂര് സ്വദേശി സതീശൻ എന്നിവരെ മന്ത്രി ആദരിച്ചു. വാർഡിലെ വിവിധ മതസ്ഥാപനങ്ങൾ സർക്കാർ അർധസർക്കാർ സ്ഥാപനങ്ങൾ എന്നിവർക്ക് ഹരിത സർട്ടിഫിക്കറ്റ് നൽകി.

വെള്ളറടയില്‍ തെങ്ങിനു തീപിടിച്ചു

വെള്ളറട: വെള്ളറട ഗവണ്‍മെന്‍റ് യുപി സ്‌കൂളിന് എതിര്‍വശത്തെ സ്വകാര്യ പുരിയിടത്തിൽനിന്ന തെങ്ങിനു തീപിടിച്ചു. തെങ്ങിനു സമീപത്തു കൂടെ പോകുന്ന 11 കെവി ലൈനില്‍നിന്ന് തീ പടര്‍ന്നതാകാമെന്നാണു പ്രാഥമിക നിഗമനം. ഉച്ചതിരിഞ്ഞു പ്രദേശത്ത് ഇടിമിന്നലോടു കൂടിയ മഴ ഉണ്ടായിരുന്നു. ഇത്തരത്തില്‍ തെങ്ങില്‍ ഇടിമിന്നലാ ഏറ്റതാണോ എന്നും സംശയം ഉണ്ട്. നാട്ടുകാര്‍ അറിയിച്ചതിനെ തുടര്‍ന്നു വെള്ളറട കെഎസ്ഇബി അധികൃതര്‍ വൈദ്യുതി ബന്ധം വിച്ഛേദിച്ചു. പാറശാലയില്‍ നിന്നും ഫയര്‍ഫോഴ്‌സെത്തി തീ പടരാതെ നിയന്ത്രണവിധേയമാക്കി.

പെരുമ്പഴുതൂർ-അരുവിപ്പുറം-മാമ്പഴക്കര റോഡ് ബിഎം-ബിസി നിലവാരത്തിലേയ്ക്ക്

െയ്യാറ്റിന്‍കര: പെരുമ്പഴുതൂർ- അരുവിപ്പുറം-കീളിയോട്- മാമ്പഴക്കര റോഡ് ബിഎം- ബിസി നിലവാരത്തിലേയ്ക്ക് നവീകരിക്കുന്നതിന്‍റെ നിര്‍മാണോദ്ഘാടനം മന്ത്രി പി.എ മുഹമ്മദ് റിയാസ് നിര്‍വഹിച്ചു. കെ. ആന്‍സലന്‍ എംഎല്‍എ അധ്യക്ഷത വഹിച്ചു. പെരുന്പഴുതൂര്‍ ജംഗ്ഷനില്‍ ചേര്‍ന്ന ചടങ്ങില്‍ സി.കെ ഹരീന്ദ്രന്‍ എംഎല്‍എ മുഖ്യാതിഥിയായിരുന്നു. നഗരസഭ ചെയര്‍മാന്‍ പി.കെ രാജമോഹനന്‍, സ്റ്റാന്‍ഡിംഗ് കമ്മിറ്റി ചെയര്‍മാന്മാരായ കെ.കെ. ഷിബു, ഡോ. എം.എ സാദത്ത്, ജെ. ജോസ് ഫ്രാങ്ക്ളിന്‍, സിപിഎം ഏരിയാ സെക്രട്ടറി ടി. ശ്രീകുമാര്‍, എല്‍ഡിഎഫ് നിയോജകമണ്ഡലം കണ്‍വീനര്‍ കൊടങ്ങാവിള വിജയകുമാര്‍ തു ടങ്ങിയവർ പങ്കെടുത്തു. നെയ്യാറ്റിൻകര നിയോജക മണ്ഡലത്തിലെ വിവിധ വികസന പ്രവർത്തനങ്ങളുടെ തുടർച്ചയായാണ് പെരുമ്പഴുതൂർ- അരുവിപ്പുറം- കീളിയോട്- മാമ്പഴക്കര റോഡ് ഏഴ് കോടി രൂപ വിനിയോഗിച്ച് ബിഎം- ബിസി നിലവാരത്തിൽ നവീകരിക്കുന്നത്. ആവണി കണ്‍സ്ട്രക്ഷന്‍സ് കരാർ ഏറ്റെടുത്തിരിക്കുന്നത്. ആറര കിലോമീറ്ററാണ് ഈ റോഡുകളുടെ ആകെ ദൈര്‍ഘ്യം. വെള്ളക്കെട്ടുള്ള സ്ഥലങ്ങളില്‍ ജിഎസ്ബി, വെറ്റ്മിക്സ് എന്നിവ ഉപയോഗിച്ച് റോഡ് ഉയര്‍ത്തുന്നതിനും അത്യാവശ്യ സ്ഥലങ്ങളില്‍ ഓട, കള്‍വര്‍ട്ട്, സംരക്ഷണഭിത്തി എന്നിവ നിര്‍മിക്കുന്നതിനും ഉപരിതലം ബി.എം- ബി.സി ഉപയോഗിച്ച് നവീകരിക്കുന്നതിനും കൂടാതെ റോഡ് സുരക്ഷാ പ്രവൃത്തികള്‍ ചെയ്യുന്നതിനുമാണ് എസ്റ്റിമേറ്റില്‍ വിഭാവനം ചെയ്തിട്ടുള്ളത്. എട്ടുമാസമാണ് നിര്‍മാണ കാലാവധി. നിര്‍മാണം പൂര്‍ത്തിയാകുന്നതോടെ ഹൈടെക്ക് റോഡ് എന്ന നാട്ടുകാരുടെ അഭിലാഷം സാക്ഷാത്കരിക്കപ്പെടും.

മോക്ക് ഡ്രിൽ നടത്തി

വിഴിഞ്ഞം: വിഴിഞ്ഞം ഫയർ ആൻഡ് റെസ്ക്യൂ ഫോഴ്സിന്‍റെ നേതൃത്വത്തിൽ വിഴിഞ്ഞം ബസ്റ്റ് സ്റ്റാൻഡ്, മത്സ്യബന്ധന തുറമുഖ കവാടം എന്നിവിടങ്ങളിൽ സിവിൾ ഡിഫൻസ് മോക്ക് ഡ്രിൽ നടത്തി. രാജ്യമാകമാനം നടത്തുന്ന അവയർനസ് മോക് ട്രില്ലിൽ ഭാഗമായി നടത്തപ്പെട്ട പരിപാടിയിൽ പോലീസും, കെഎസ്ആർടിസി അധികൃതരും റവന്യൂ വിഭാഗം ഉദ്യോഗസ്ഥരും പങ്കാളികളായി. ആക്രമണം ഉണ്ടായാൽ ജനങ്ങളുടെ ജീവൻ രക്ഷാപ്രവർത്തനമാണ് പ്രധാനമായി ലക്ഷ്യം വച്ചത്. കൂടാതെജനങ്ങൾക്ക് ബോധവത്കരണം നൽകുകയും ചെയ്തു. വിഴിഞ്ഞം ഫയർ ആൻഡ് റെസ്ക്യൂസ്റ്റേഷൻ ഓഫീസർ വേണുഗോപാലിന്‍റെ നേതൃത്വത്തിൽ 20 ഓളം ഫയർ ആൻഡ് റെസ്ക്യൂ സേനാംഗങ്ങളും 10 ഓളം സിവിൾ ഡിഫൻസ് ആപതാമിത്ര വോളന്‍റിയർമാരും ചേർന്നാണ് മോക്ഡ്രിൽ സംഘടിപ്പിച്ചത്.

സർക്കാർ പ്രസുകൾ അടച്ചുപൂട്ടൽ ഭീഷണിയിൽ: ജി.സുബോധൻ

തിരുവനന്തപുരം: ഇടതുഭരണത്തിൽ സർക്കാർ പ്രസുകൾ അടച്ചുപൂട്ടാനും തസ്തികകൾ മരവിപ്പിക്കാനുമുള്ള ഗൂഢനീക്കം നടക്കുന്നതായി കെപിസിസി ജനറൽ സെക്രട്ടറി ജി. സുബോധൻ പ്രസ്താവിച്ചു. സർക്കാർ പ്രസുകൾ നിർത്തലാക്കുന്നതിന്‍റെ ഭാഗമായി അച്ചടി ജോലികൾ സ്വകാര്യ പ്രസുകൾക്ക് എം പാനൽ ചെയ്ത് വിട്ടുകൊടുത്തിരുന്നു. ഏറ്റവും ഒടുവിൽ പിഎസ്‌സി പരീക്ഷയുടെ ഒഎംആർ ഷീറ്റ് അച്ചടി പോലും സർക്കാർ പ്രസിൽനിന്നും മാറ്റി ഉത്തരവായിരിക്കുന്നു. രഹസ്യ സ്വഭാവമുള്ള പല അച്ചടി ജോലികളും സർക്കാർ പ്രസിൽനിന്ന് മാറ്റിയതിനാൽ സുതാര്യത നഷ്ടപ്പെട്ടിരിക്കുന്നു. ദിവസേന മൂന്നു ഷിഫ്റ്റുകൾ പ്രവർത്തിപ്പിച്ചിരുന്ന തിരുവനന്തപുരത്തെ സ്റ്റാമ്പ് മാനുഫാക്ടറി പ്രസിൽ ഉൾപ്പെടെ ഇപ്പോൾ ഒരു ജനറൽ ഷിഫ്റ്റ് മാത്രമാണ് പ്രവർത്തിപ്പിക്കുന്നത്. തനിക്കു കീഴിൽ ഇങ്ങിനെയൊരു വകുപ്പുതന്നെ ഉണ്ടോയെന്ന് പിണറായി വിജയന് അറിയില്ലെന്നും അദ്ദേഹം കുറ്റപ്പെടുത്തി. കേരള ഗവ. പ്രസ് വർക്കേഴ്സ് കോൺഗ്രസ് ഐഎൻടിയുസി കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. യൂണിറ്റ് പ്രസിഡന്‍റ് വഞ്ചിയൂർ രാധാകൃഷ്ണൻ അധ്യക്ഷത വഹിച്ചു. അനിൽ കരമന, വൈ. സന്തോഷ്,സന്തോഷ് കുമാർ, വി. ബി ജോൺ, റജി വിത്സൻ, സീന പോൾ, ഷാജി, നുജും, അഞ്ചു എസ്. വിൽഫ്രഡ്, കുമാരി ജൈല, അമൃത എന്നിവർ പ്രസംഗിച്ചു. സർവീസിൽനിന്നു വിരമിക്കുന്ന സി. കുമാരി ജൈലയെ ആദരിച്ചു.

യൂത്ത് കോൺഗ്രസ് പ്രചാരണ കാല്‍നട ജാഥ

വെള്ളറട: അഴിമതിക്കും വര്‍ഗീയതയ്ക്കും ലഹരി മാഫിയകൾക്കുമെതിരെ യൂത്ത് കോൺഗ്രസ് ജില്ലാ പ്രസിഡന്‍റ് നേമം ഷജീറിന്‍റെ നേതൃത്വത്തിൽ നടത്തുന്ന പ്രചാരണ കാല്‍നട ജാഥ വെള്ളറടയില്‍ പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്തു. എല്‍ഡിഎഫ് ഭരണം ആരംഭിച്ചതു മുതല്‍ ലഹരി മാഫിയകള്‍ പ്രദേശമാകെ ആക്രമണങ്ങള്‍ അഴിച്ചുവിടുന്നു. കോട്ടയം തിരുവാതില്‍ക്കല്‍ ഭാര്യയെയും ഭര്‍ത്താവിനെയും ലഹരി മാഫിയ വെട്ടിക്കൊന്നു. വയനാട് വെറ്റിനറി കോളജില്‍ സിദ്ധാര്‍ഥിനെ മയക്കുമരുന്നു മാഫിയകള്‍ കൊലപ്പെടുത്തി. നിരവധി ആക്രമണ സംഭവങ്ങളാണ് എല്‍ഡിഎഫ് ഭരണം ആരംഭിച്ചത് മുതല്‍ ഇതുവരെയും നടന്നുകൊണ്ടിരിക്കുന്നതെന്നും അദ്ദേഹം ചൂണ്ടിക്കാട്ടി. എംഎല്‍എമാരായ എം. വിന്‍സന്‍റ്, രാഹുൽ മാങ്കൂട്ടത്തിൽ, മുൻ എംഎൽഎ എ.ടി. ജോര്‍ജ്, മര്യാപുരം ശ്രീകുമാര്‍, നെയ്യാറ്റിന്‍കര സനല്‍, ഡോ. ആര്‍. വത്സലന്‍, ബ്രഹ്മയിന്‍ ചന്ദ്രന്‍, അന്‍സജിതാ റസല്‍, എ.കെ. ശശി, എല്‍.വി. അജയകുമാര്‍, പി. എ. അബ്രഹാം, സോമന്‍കുട്ടി നായര്‍, പാറശാല സുധാകരന്‍, കൊറ്റാമം വിനോദ്, ഗോപു, ആര്‍.ആര്‍. അരുണ്‍, അഡ്വ. ജോണ്‍, അഡ്വ. ഗിരീഷ് കുമാര്‍, കെ. ദസ്തഗീര്‍, ഐര സുരേന്ദ്രന്‍, മാരായമുട്ടം സുരേഷ്, അഡ്വ. അനൂപ്, ജോബിന്‍, കൃഷ്ണകുമാര്‍, സതീഷ് കോട്ടുകോണം, ശ്യാം വെള്ളറട, അജിന്‍, ഗോപന്‍, വിജയശ്രീ, എം. രാജ് മോഹന്‍, കാനക്കോട് അജയന്‍, കോറ്റാമം ലിജിത്, മലയില്‍ രാധാകൃഷ്ണന്‍, കെ.ജി. മംഗള്‍ദാസ, ഷിജുതടത്തില്‍ തുടങ്ങി നിരവധി നേതാക്കള്‍ പ്രസംഗിച്ചു. വെള്ളറടയില്‍ സൈനികര്‍ക്ക് ഐക്യദാര്‍ഢ്യം പ്രഖ്യാപിച്ച് അഭിവാദ്യങ്ങള്‍ അര്‍പ്പിച്ച ശേഷമാണ് യോഗ നടപടികള്‍ ആരംഭിച്ചത്. വെള്ളറടയില്‍ നടന്ന യോഗം ഉദ്ഘാടനം ചെയ്തശേഷം പ്രചാരണ കാല്‍നട ജാഥയുടെ ഫ്ളാഗ് ഓഫ് കര്‍മവും വി.ഡി. സതീശന്‍ നിർവഹിച്ചു.

വസ്തു വാങ്ങിയിട്ട് പതിനഞ്ചുവർഷം : കുറ്റിച്ചലിലെ പൊതുശ്മശാനം ഇന്നും സ്വപ്നങ്ങളിൽമാത്രം

കുറ്റിച്ചൽ: സ്ഥലം വാങ്ങി, ജില്ലാ പഞ്ചായത്ത് ശ്രമങ്ങളും നടത്തി; പക്ഷേ കുറ്റിച്ചലിലെ പൊതുശ്മശാനം ഇന്നും സ്വപ്നം മാത്രമായി തുടരുന്നു. പഞ്ചായത്ത് പരിധിയിൽ ആരെങ്കിലും മരിച്ചാൽ ഇപ്പോഴും മൃതദേഹം സംസ്‌കരിക്കണമെങ്കിൽ വേറെ വഴി തേടണം. കുറ്റിച്ചൽ പഞ്ചായത്തിലെ കോട്ടൂരിൽ ചിലന്തിക്കുഴിയിൽ 50 സെന്‍റ് ഭൂമി പൊതുശ്മശാനത്തിനായി പഞ്ചായത്ത് വാങ്ങിയിട്ടിട്ട് 15 വർഷത്തിലധികമായി. ചിലന്തിക്കുഴിയിലെ ഭൂമിയിലേക്കു വാഹനമെത്തുന്ന വഴിയില്ല എന്നതാണ് പ്രധാന പ്രശ്നം. ഇപ്പോഴുള്ള നടവഴിയിലൂടെ മൃതദേഹങ്ങൾ സംസ്‌കരിക്കാനായി എത്തിക്കണമെങ്കിൽ വളരെ ദൂരം ചുമക്കണം. വഴിയോ, ചുറ്റുമതിലോ, അത്യാവശ്യ സൗകര്യങ്ങളോ ഇല്ലാത്തതിനാൽ അടുത്തുള്ള ഒരു കോളനിക്കാരൊഴികെ മറ്റാരും ഇവിടേക്ക് മൃതദേഹവുമായി എത്താറില്ല. ചുറ്റുമതിൽ ഇല്ലാത്തതിനാൽ മൃതദേഹം സംസ്‌കരിച്ചുകഴിഞ്ഞാൽ കുഴിമാടങ്ങൾ കാട്ടുപന്നി നശിപ്പിക്കുന്നതും പതിവാണ്. കുറ്റിച്ചൽ പഞ്ചായത്തിൽ ശ്മശാനം ഇല്ലാത്തതിനാൽ കോവിഡ് വ്യാപനകാലത്ത് വീട്ടുമുറ്റത്തും വീടിന്‍റെ ഭാഗം പൊളിച്ചും അയൽക്കാരന്‍റെ പറമ്പിലുമൊക്കെ ശവസംസ്‌കാരം നടത്തിയ സംഭവങ്ങളുമുണ്ടായിരുന്നു. പഞ്ചായത്തിന്‍റെ അവഗണനയാണ് പദ്ധതി നടപ്പാക്കാൻ വൈകുന്നതെന്ന് ആക്ഷേപുണ്ട്. മാറനല്ലൂർ പഞ്ചായത്തിൽ നിലവിൽ ഒരു വൈദ്യുതിശ്മശാനമുണ്ട്. ഈ മാതൃകയിൽ ത്രിതല പഞ്ചായത്തുകളുടെയും സ്ഥലം എംഎൽഎയുടെയും ഫണ്ടുകൾ ഉപയോഗിച്ചാൽ വഴിയും മികച്ച സൗകര്യങ്ങളുമുള്ള ശ്മശാനം ഇവിടെ ഒരുക്കാനാകും. 2010ൽ ജില്ലാപഞ്ചായത്ത് ഇതിനായി ചില ശ്രമങ്ങൾ ആരംഭിച്ചിരുന്നെങ്കിലും തുടർനടപടിയുണ്ടായില്ല. സമീപത്തെ പല പഞ്ചായത്തുകളിലും ശ്മശാനം ഒരുക്കാൻ ഭൂമി കണ്ടെത്താൻ ബുദ്ധിമുട്ടുമ്പോൾ ഇവിടെ ഉള്ള ഭൂമി ഉപയോഗപ്പെടുത്താൻ ശ്രമം ഉണ്ടാകുന്നില്ലെന്നാണ് ആക്ഷേപം.

എംഡിഎംഎ സഹിതം യുവാവ് പിടിയില്‍

വലിയതുറ: വില്‍പ്പനയ്ക്കായി എത്തിച്ച 20 ഗ്രാം എംഡിഎംഎ യുമായി യുവാവിനെ തിരുവനന്തപുരം സിറ്റി ഡാന്‍സാഫ് ടീം പിടികൂടി വലിയതുറ പോലീസിനു കൈമാറി. വള്ള ക്കടവ് പുത്തന്‍പാലം സ്വദേശി നഹാസിനെ (34)യാണ് പിടികൂടിയത്. വള്ളക്കടവ് എന്‍എസ് ഡിപ്പോക്ക് സമീപത്ത് നിന്നു ബുധനാഴ്ച ഉച്ചയോടുകൂടിയാണ് ഇയാള്‍ പിടിയിലായത്. ബംഗളൂരുവിൽ നിന്നാണ് എംഡിഎംഎ വാങ്ങി തിരുവനന്തപുരത്ത് എത്തിച്ചതെന്ന് ഇയാള്‍ അധികൃതരോട് പറഞ്ഞു. കഴിഞ്ഞ രണ്ടു വര്‍ഷത്തോളമായി നഹാസ് എംഡി എംഎ അടക്കമുളള ലഹരിമരുന്നുകള്‍ വില്‍ക്കുന്നുണ്ടെന്നും ഡാന്‍സാഫ് ടീം കണ്ടെത്തിയിട്ടുണ്ട്. വര്‍ഷങ്ങള്‍ക്കുമുമ്പു മഞ്ചേരി പോലീസ് ഇയാളെ 50 ഗ്രാം എംഡിഎംഎയുമായി പിടികൂടിയിരുന്നു. ഇയാള്‍ക്കെതിരെ വലിയതുറ പോലീസ് കേസെടുത്തു.

യുസിഎം ഭാരവാഹികള്‍

തിരുവനന്തപുരം: വിവിധ ക്രൈസ്തവ സഭകളുടെ ഐക്യ കൂട്ടായ്മയായ യുണൈറ്റഡ് ക്രിസ്ത്യന്‍ മൂവ്മെന്‍റിന്‍റെ (യുസിഎം) 2025-27 ലേക്കുള്ള പ്രസിഡന്‍റായി ബെയ്‌സി ടി. സഖറിയ (പാറ്റൂര്‍ സെന്‍റ്് ഇഗ്നേഷ്യസ് ക്‌നാനായ ചര്‍ച്ച്), ജനറല്‍ സെക്രട്ടറിയായി ബിജു ഉമ്മന്‍ (കേശവദാസപുരം സെന്‍റ് തോമസ് ഇവാഞ്ചലിക്കല്‍ ചര്‍ച്ച്) എന്നിവരെ തെരഞ്ഞെടുത്തു. മറ്റു ഭാരവാഹികള്‍ : വല്‍സ ജോണ്‍- ട്രഷറര്‍, കുഞ്ഞുകുഞ്ഞമ്മ ഉമ്മന്‍, വല്‍സ ജേക്കബ്, ജോര്‍ജ് മാത്യു കൂരമല -ജോയിന്‍റ് സെക്രട്ടറിമാര്‍, റവ. ഡബ്ല്യു. ലിവിങ്സ്റ്റൺ, റവ. എന്‍. അജി -ആത്മീയ ഉപദേഷ്ടാക്കള്‍, വിവിധ സഭകളെ പ്രതിനിധീകരിച്ച് വൈസ് പ്രസിഡന്‍റുമാരെയും കേന്ദ്ര കമ്മിറ്റി അംഗങ്ങളെയും തെരഞ്ഞെടുത്തു.

പട്ടത്തെ അപകടം: ഡ്രൈവറുടെ ശ്രദ്ധക്കുറവുമൂലമെന്നു പോലീസ്

പേരൂര്‍ക്കട: പട്ടം ജില്ലാ പഞ്ചായത്ത് കാര്യാലയത്തിനു സമീപം ചൊവ്വാഴ്ചയുണ്ടായ അപകടമരണം ബസ്‌ഡ്രൈവറുടെ ശ്രദ്ധക്കുറവുമൂലമെന്നു പോലീസ്. വിശദമായ അന്വേഷണത്തിനുശേഷമാണ് ഈ കണ്ടെത്തല്‍. കേശവദാസപുരത്തുനിന്നു തിരുവനന്തപുരത്തേക്കുവന്ന കരുനാഗപ്പള്ളി ഡിപ്പോയിലെ ബസിടിച്ച് ബൈക്ക് ഓടിച്ചിരുന്ന മലയിന്‍കീഴ് മേപ്പൂക്കട സ്വദേശി ലൗജിത്ത് (42) ആണ് മരണപ്പെട്ടത്. ഒപ്പമുണ്ടായിരുന്ന ബന്ധു പരിക്കേറ്റു തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലാണ്. ജില്ലാപഞ്ചായത്ത് ഓഫീസിനു സമീപത്തെ സീബ്രാലെയിന്‍ മുറിച്ചുകടക്കാന്‍ ഒരു കാല്‍നടയാത്രികന്‍ ശ്രമിച്ചു. ഇതിനെത്തുടര്‍ന്ന് ലൗജിത്ത് ബൈക്ക് പെട്ടെന്നു ബ്രേക്ക് ചെയ്തുവെന്നും തുടര്‍ന്നാണ് പിറകേവന്ന ബസ് ബൈക്കിനു പിന്നിലിടിച്ചതെന്നും പോലീസ് അറിയിച്ചു. ബസ്‌ ഡ്രൈവര്‍ അകലംപാലിക്കാതെ എത്തിയതാണ് പെട്ടെന്നു ബൈക്ക് ബ്രേക്ക് ചെയ്തപ്പോള്‍ ഇടിക്കാന്‍ കാരണമായത്. എന്നാല്‍ ഡ്രൈവറുടെ ശ്രദ്ധക്കുറവിനൊപ്പം വേഗക്കൂടുതലും അപകടത്തിനും മരണത്തിനും ഇടയാക്കി. സംഭവത്തെ തുടര്‍ന്ന് ഓടിരക്ഷപ്പെട്ട ഡ്രൈവറും കണ്ടക്ടറും പിന്നീട് പേരൂര്‍ക്കട പോലീസില്‍ കീഴടങ്ങിയിരുന്നു.

പോക്സോ കേസ് പ്രതിക്ക് 23 വർഷം കഠിനതടവും പിഴയും

കാട്ടാക്കട: 12 വയസുകാരനെ പ്രകൃതിവിരുദ്ധ പീഡനത്തിനിരയാക്കിയ പ്രതിക്ക് 23 വർഷം കഠിന തടവും 55,000 രൂപ പിഴയും ശിക്ഷ വിധിച്ചു. കടകംപള്ളി വെട്ടുകാട്, കൊച്ചു വേളി പൊഴിക്കാരയിൽ ടിസി 80/52 പുതുവൽ വീട്ടിൽ രതീഷ് എന്ന ശേഖരനെ(42)യാണ് കാട്ടാക്കട അതിവേഗ പോക് സോ കോടതി ജഡ്ജി എസ് രമേഷ് കുമാർ ശിക്ഷിച്ചത്. പിഴയൊടുക്കിയില്ലെങ്കിൽ 13 മാസം അധികം കഠിനതടവും അനുഭവിക്കണമെന്ന് വിധി ന്യായത്തിൽ പറയുന്നു. തുക ആപര്യപ്തമായി കണ്ടാൽ ജില്ലാ ലീഗൽ സർവീസ് അഥോറിറ്റി ഇരയായ ആൺകുട്ടിക്ക് അർഹമായ നഷ്ടപരിഹാരം നൽകണമെന്നും വിധി ന്യായത്തിൽ പറയുന്നു. സ്പെഷൽ പബ്ലിക് പ്രോസിക്യൂട്ടർ അഡ്വ. ഡി.ആർ. പ്രമോദ് കോടതിയിൽ ഹാജരായി. പ്രോസിക്യൂഷൻ ഭാഗത്തു നിന്നും 19 സാക്ഷികളെ വിസ്തരിക്കുകയും 26 രേഖകൾ ഹാജരാക്കുകയും ചെയ്തു. അന്നത്തെ വലിയതുറ പോലീസ് സ്റ്റേഷൻ ഇൻസ്പെക്ടർമാരായിരുന്ന ജി.എസ്. രതീഷ്, വി അശോക് കുമാർ എന്നിവരാണ് അന്വേഷണം പൂർത്തിയാക്കി കുറ്റപത്രം നൽകിയത്. പോക്സോ കേസിൽ അറസ്റ്റിലായി നെടുമങ്ങാട്: വളർത്തുമകളെ പീഡിപ്പിച്ചയാളെ ആര്യനാട് പോലീസ് അറസ്റ്റു ചെയ്തു. ഫെയ്സ്ബുക്കു വഴി പരിചയപ്പെട്ടു മടത്തറ എന്ന സ്ഥലത്തു നിന്നും കൂട്ടിക്കൊണ്ടു വന്നു കൂടെ താമസിപ്പിച്ചിരുന്ന സ്ത്രീയുടെ പ്രായപൂർത്തിയാകാത്ത മകളെ ലൈംഗികമായി പീഡിപ്പിച്ച കേസിലാണ് യുവാവിനെ ആര്യനാട് പോലീസ് അറസ്റ്റു ചെയ്തത്. കോടതിയിൽ ഹാജരാക്കിയ പ്രതിയെ ഡിമാൻഡ് ചെയ്തു.

എംഡിഎംഎയുമായി യുവാക്കൾ പോലീസ് പിടിയില്‍

വെള്ളറട: രണ്ടാംഗ സംഘം 2.8 ഗ്രാം എംഡിഎംഎ യുമായി പോലീസ് പിടിയിലായി. പോലീസിനു ലഭിച്ച രഹസ്യ വിവരത്തെ തുടര്‍ന്ന് കേരള തമിഴ്‌നാട് അതിര്‍ത്തിയായ കടുക്കറയില്‍ വാഹന പരിശോധനയ്ക്കിടെയാണ് രണ്ടംഗസംഘം പോലീസിന്‍റെ വലയിലായത്. ചന്ദ്രമംഗലം ഇടയില വീട്ടില്‍ അനീഷ് (26), ആമച്ചല്‍ സ്വദേശി രോഹിണി നിവാസില്‍ അമല്‍ദേവ് (28) എന്നിവരാണ് പോലീസിന്‍റെ വലയിലായത്. നാഗര്‍കോവില്‍വരെ ബസില്‍വന്ന സംഘം അവിടെനിന്ന് ബൈക്കില്‍ എംഡിഎംഎയുമായി എത്തുകയായിരുന്നു. ഡാൻസാഫ് സംഘാംഗമായ എസ്ഐ റസല്‍ രാജ്, ശശികുമാര്‍, പ്രജീഷ്, പ്രദീപ്, ഷൈനു അനീഷ് കുമാര്‍, അരുണ്‍, അനീഷ്, ടി.എല്‍. പത്മകുമാര്‍, പ്രണവ് എന്നിവര്‍ അടങ്ങുന്ന സംഘമാണ് പ്രതികളെ പിടികൂടിയത്. കേസ് രജിസ്റ്റര്‍ ചെയ്തു കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

ബിഎസ്എന്‍എല്‍ മൊബൈല്‍ ക്രോസ്‌ടോക്ക് തലവേദനയാകുന്നു

പേരൂര്‍ക്കട: ബിഎസ്എന്‍എല്‍ മൊബൈല്‍ കണക്‌ഷനുമായി ബന്ധപ്പെട്ടുള്ള ക്രോസ്ടോക്ക് വിഷയം ഉപഭോക്താക്കൾക്കു തലവേദനയാകുന്നു. 9447, 9446, 9495 സീരീസുകളില്‍ ആരംഭിക്കുന്ന ബിഎസ്എന്‍എല്‍ മൊബൈല്‍ കണക്‌ഷനുകളിലാണ് ക്രോസ്ടോക്ക് കൂടുതലും സജീവമായിരിക്കുന്നത്. ഔട്ട്ഗോയിംഗ് കോളുകളിലാണ് ഇപ്രകാരം മറ്റുള്ള കോളുകള്‍ കയറിവരുന്നത്. പുറത്തേക്കു വിളിക്കുമ്പോള്‍ ഫോണ്‍ റിംഗ്ചെയ്യുന്നു. മറുതലയ്ക്കല്‍ കോള്‍ എടുക്കുമ്പോഴാണ് നമ്മള്‍ വിളിച്ചയാളെയല്ല കിട്ടിയിട്ടുള്ളതെന്നു ഉപ ഭോക്താക്കൾക്കു മനസിലാകുന്നത്. വേറെ കോളുകള്‍ കയറിവരുന്നതാണ് പ്രശ്നത്തിനു കാരണം. അതേസമയം ആരെയാണോ വിളിച്ചത് അവര്‍ക്കു കോള്‍ കണക്ടാകുകയും അവര്‍ സംസാരിക്കുകയും ചെയ്യും. എന്നാല്‍ വിളിച്ചയാള്‍ക്ക് ഈ സംസാരം കേള്‍ക്കാനും സാധിക്കില്ല. പകരം ക്രോസ്ടോക്ക് സംഭാഷണമായിരിക്കും കേള്‍ക്കുന്നത്. കഴിഞ്ഞ ഒരുമാസമായി നിരവധി ബി എസ്എന്‍എല്‍ കസ്റ്റമേഴ്സാണ് ഇപ്രകാരം കെണിയില്‍പെട്ടുപോയത്. സ്വകാര്യമൊബൈല്‍ കമ്പനികള്‍ താരിഫ് നിരക്കു കൂട്ടിയതോടെ ലക്ഷക്കണക്കിനു പേരാണ് ബിഎസ്എന്‍എല്‍ നമ്പരിലേക്ക് തങ്ങളുടെ കണക്‌ഷ ന്‍ പോര്‍ട്ട് ചെയ്തത്. കൂടുതല്‍ കസ്റ്റമേഴ്സ് ബിഎസ്എന്‍എല്ലിലെത്തി ട്രാഫിക് വര്‍ധിച്ചതാണോ ക്രോസ്ടോക്ക് പ്രശ്നം അധികരിക്കാനുള്ള കാരണമെന്നാണു ബിഎസ്എന്‍എല്‍ ഉപയോക്താക്കള്‍ ചോദിക്കുന്നത്. താന്‍ വിളിച്ച നമ്പര്‍ മാറിപ്പോയോ എന്നു കസ്റ്റമേഴ്സിനു തോന്നുന്നവിധമാണ് ക്രോസ്ടോക്കുകള്‍ പുരോഗമിക്കുന്നത്. അബദ്ധത്തില്‍ കോള്‍ മാറിയതാണെന്നു കരുതി ഫോണ്‍ കട്ട് ചെയ്ത് വീണ്ടും അതേ നമ്പരില്‍ വിളിക്കുമ്പോള്‍ യഥാര്‍ഥവ്യക്തിയെ കിട്ടുകയും ചെയ്യും. ഞാന്‍ വിളിച്ചപ്പോള്‍ വേറെയാരെങ്കിലുമാണോ ഫോണ്‍ എടുത്തത് എന്നു കസ്റ്റമേഴ്സിന് എതിര്‍കക്ഷിയോട് ചോദിക്കേണ്ടിവരുന്ന അവസ്ഥ ക്രോസ്ടോക്ക് തലവേദന മൂലം ദിനംപ്രതി വര്‍ധിച്ചുവരികയാണ്.

ട്രാന്‍സ്പോര്‍ട്ട് ബസില്‍ കഞ്ചാവ് കടത്താന്‍ ശ്രമം: രണ്ടുപേർ പിടിയിൽ

നെയ്യാറ്റിന്‍കര: തമിഴ്നാട് ട്രാന്‍സ്പോര്‍ട്ട് ബസില്‍ സ്വാമിമാരുടെ വേഷത്തില്‍ കഞ്ചാവ് കടത്താന്‍ ശ്രമിച്ച രണ്ടു ബംഗാള്‍ സ്വദേശികള്‍ എക്സൈസ് ചെക്പോസ്റ്റില്‍ പിടിയിലായി. ഇവരുടെ പക്കല്‍ നിന്നും 4.750 കിലോ കഞ്ചാവും പിടികൂടി. ഇന്നലെ ഉച്ചയ്ക്ക് 12.30 ഓടെ നാഗര്‍കോവിലില്‍നിന്നും തിരുവനന്തപുരത്തേയ്ക്കു വരികയായിരുന്ന തമിഴ്നാട് ട്രാന്‍സ്പോര്‍ട്ട് ബസില്‍ അമരവിള എക് സൈസ് ചെക്പോസ്റ്റ് സംഘം നടത്തിയ പരിശോധനയിലാണ് കഞ്ചാവ് കടത്തു സംഘത്തെ പിടികൂടിയത്. ബംഗാള്‍ സ്വദേശികളായ പരിമള്‍ മണ്ഡല്‍ (54), പഞ്ചനന്‍ മണ്ഡല്‍ (56) എന്നിവരെയാണ് പിടികൂടിയതെന്ന് എക്സൈസ് അധികൃതര്‍ അറിയിച്ചു. ഇവരുടെ പക്കലുള്ള രണ്ടു തുണി സഞ്ചികളിലായി പ്ലാസ്റ്റിക് കവറുകളിലായിരുന്നു കഞ്ചാവ് സൂക്ഷി ച്ചിരുന്നത്. പാച്ചല്ലൂർ ഭാഗത്തേക്കാണു കഞ്ചാവ് കൊണ്ടുവന്നതെന്നു പിടിയിലായവർ പറഞ്ഞതായി എക്സൈസ് അധികൃതര്‍ വ്യക്തമാക്കി. പിടിക്കപ്പെടാതിരിക്കാൻ സ്വാമി വേഷത്തിലുള്ളവരെയാണ് ഹോൾസെയിൽ വ്യാ പാരികൾ വിതരണത്തിനായി ചുമതലപ്പെടുത്തുന്നത്. കിലോയ് ക്ക് 30,000 മുതല്‍ 50,000 രൂപ വരെ വിലയുണ്ട്. 500 ഗ്രാമിന്‍റെ ചെറിയ പായ്ക്കറ്റുകളാക്കിയാണ് നാട്ടിന്‍പുറങ്ങളില്‍ കഞ്ചാവ് വില്‍പ്പനയെന്നും എക്സൈസ് അധികൃതര്‍ കൂട്ടിച്ചേര്‍ത്തു. സർക്കിൾ ഇൻസ്പെക്ടർ ടോണി എസ്. ഐസക്കിന്‍റെ നേതൃത്വത്തില്‍ എക്സൈസ് ഇൻസ്പെക്ടർ ബിനോയ്, സിവിൽ എക്സൈസ് ഓഫീസർ മുഹമ്മദ് അനീസ്, വനിത സിവിൽ എക്സൈസ് ഓഫീസർ സിനിമോൾ എന്നിവരുള്‍പ്പെട്ട സംഘമാണ് കഞ്ചാവ് കടത്ത് സംഘത്തെ പിടികൂടിയത്.

കിടപ്പുരോഗിയെ കുത്തിക്കൊലപ്പെടുത്തിയ സഹോദരനു ജീവപര്യന്തം തടവുശിക്ഷ

തിരുവനന്തപുരം: കിടപ്പുരോഗിയായ ആൾ കൊല്ലപ്പെട്ട കേസിൽ വെറ്ററിനറി ഡോക്ടർ ആയ സഹോദരനു ജീവപര്യന്തം കഠിനതടവും 75,500 രൂപ പിഴയും ശിക്ഷ. വർക്കല മേൽവെട്ടൂരിലെ വീട്ടിൽ കിടപ്പുരോഗിയായ സന്ദീപ് (47) കൊല്ലപ്പെട്ട കേസിലാണ് സഹോദരനും മുൻ വെറ്ററിനറി സർജനുമായ സന്തോഷി(55) നെ ശിക്ഷിച്ചത്. പിഴത്തുക നൽകിയില്ലെങ്കിൽ രണ്ടു വർഷം കൂടി തടവ് അനുഭവിക്കണം. ഏഴാം അഡീഷണൽ സെഷൻസ് കോടതിയാണ് ഉത്തരവു പുറപ്പെടുവിച്ചത്. 2022 സെപ്റ്റംബർ 24 നു പുലർച്ചെയാണ് കേസിനാസ്പദമായ സംഭവം. നെഞ്ചിൽ കത്തി കുത്തിയിറക്കിയ നിലയിലാണ് സന്ദീപിനെ വർക്കല താലൂക്ക് ആശുപത്രിയിൽ എത്തിച്ചത്. ചികിത്സച്ചെലവ് ഇനത്തിൽ വലിയൊരു തുക ചെലവാകുന്നുവെന്നും അതിനാലാണ് കൊലപ്പെടുത്താൻ തീരുമാനിച്ചതെന്നും പ്രതി മൊഴി നൽകിയിരുന്നു. റെയിൽവേയിൽ ജോലി ചെയ്യുന്ന സമയത്തു ചുഴലി രോഗം വന്നു സന്ദീപ് കിടപ്പുരോഗിയായി മാറുകയായിരുന്നു. വീടിനോടു ചേർന്ന ഒൗട്ട്ഹൗസിൽ സന്ദീപ് കെയർടേക്കറുടെ പരിചരണത്തിൽ കഴിയുകയായിരുന്നു. ഒന്നാം സാക്ഷി കൂടിയായ കെയർടേക്കർ സത്യദാസിന്‍റെ മൊഴിയാണ് കേസിൽ നിർണായകമായത്. 2022 ഡിസംബർ 20 നാണ് വർക്കല പോലീസ് കോടതിയിൽ കുറ്റപത്രം സമർപ്പിച്ചത്.

അധ്യാപനത്തോടൊപ്പം കൃഷിയെയും ചേർത്തു പിടിച്ചൊരു കുടുംബം

ആർ സി ദീപു നെടുമങ്ങാട്: അഞ്ചു പതിറ്റാണ്ടിലേറെയായി അധ്യാപനത്തോടൊപ്പം കൃഷിയെയും ജീവിതത്തോടു ചേർത്തു പിടിച്ച കർഷകനാണ് കണിയാർകോണം ജോസ് കോട്ടേജിൽ ഡി. സത്യ ജോസ്. വീടിനോടു ചേർന്നുള്ള സ്ഥലത്തു തെങ്ങ്, വാഴ, കുരുമുളക്, കപ്പ, ചേന, ചേമ്പ്, കാച്ചിൽ, ചെറുകിഴങ്ങ്, ഇഞ്ചി, മഞ്ഞൾ, ഫലവൃക്ഷങ്ങൾ, ഔഷധ സസ്യങ്ങൾ തുടങ്ങിയവ കൃഷി ചെയ്തിരിക്കുന്നു. ഇവയിൽ പ്രധാനം വാഴ തന്നെ. പാളയം കോടൻ, റോബസ്റ്റ, രസകദളി, സ്വർണമുഖി, പൂവൻ, പൂജാകദളി, കരിങ്കദളി, ചിങ്ങൻ, മട്ടി, ചെങ്കദളി, മൊന്തൻ തുടങ്ങി പത്തിലധികം ഇനങ്ങൾ ഇവിടെ ഉണ്ട്. അതു കഴിഞ്ഞാൽ പിന്നെ പ്രധാനം പച്ചക്കറിയാണ്. കുട്ടിക്കാലത്ത് തുടങ്ങിയ കൃഷിപ്പണി 65 വയസ് പിന്നിടുമ്പോഴും നിറഞ്ഞ സംതൃപ്തിയോടെയാണു ഹെഡ്മാസ്റ്റർ ആയി വിരമിച്ച സത്യജോസ് ചെയ്യുന്നത്. പ്രധാനാധ്യാപികയായി വിരമിച്ച ഭാര്യ സുജയും, മക്കളും, കൊച്ചുമക്കളും അധ്വാനത്തിൽ പങ്കുചേരുന്നതോടെ ഇവിടെ കൂട്ടായ്മയുടെ വിജയമാകുകയാണ് കൃഷി. കോഴി വളർത്തലും, താറാവ് വളർത്തലും ഒപ്പമുണ്ട്. ഇവയുടെ കാഷ്ടം പച്ചക്കറികൾക്ക് വളമാകും. തികച്ചും ജൈവരീതിയിലുള്ള കൃഷിയാണേറെയും. പച്ചക്കറി പരമ്പരാഗതമായ നാടൻ ഇനങ്ങൾ സംരക്ഷിച്ച് കൃഷി ചെയ്യുന്നതും ഈ കർഷകന്‍റെ പ്രത്യേകതയാണ്. കപ്പയുടെ ഇനങ്ങളായ കയ്യാലയാടി, കരിയിലപ്പൊതിയൻ, ഞറുക്ക് തുടങ്ങിയവയും കൂട്ടത്തിൽ ഉണ്ട്. ഇപ്പോൾ പച്ചക്കറി കാലമാണ്. വിളവെടുപ്പിനു പാകമായ വെള്ളരിയും, മീറ്റർ പയറും, വഴുതനയും, ചീരയും, വെണ്ടയുമാണ് ഇപ്പോഴുള്ളത്. വെള്ളരി വള്ളികൾക്കൊപ്പം നിറയെ പൂവിട്ടും കായ്ച്ചും നിൽക്കുന്ന മാലി മുളക് ചെടികൾ അധ്വാനത്തിന്‍റെ അടയാളങ്ങളാണ്. വീട്ടുമുറ്റത്തെ ചെടിച്ചട്ടികളിൽ വിളവെടുപ്പിന് പാകമായി നിൽക്കുന്ന ശീതകാല വിദേശ പച്ചക്കറി ഇനമായ ചൈനീസ് കാബേജ് വേറിട്ട കാഴ്ച തന്നെയാണ്. കൂടാതെ ഒരേക്കർ സ്ഥലത്തു മലവേപ്പും കൃഷി ചെയ്തിട്ടുണ്ട്. ഏലം, ചന്ദനം, റംബൂട്ടാൻ, ബയർ ആപ്പിൾ, സീഡ് ലെസ്സ് നാരകം, അവക്കാഡോ, മാങ്കോസ്റ്റിൻ, പീ നട്ട് ബട്ടർ, ഡ്രാഗൺ ഫ്രൂട്ട്, അബിയൂ, പാഷൻ ഫ്രൂട്ട്, വിവിധയിനം പേര, നെല്ലി, ചെറി, ജാതി, ഞാവൽ, വിവിധയിനം ഒട്ടു മാവുകൾ, മുട്ടപ്പഴം, കച്ചോലം, വയമ്പ്, രാമച്ചം, കരിമ്പ്, മുള്ളാത്ത, കവുങ്ങ് തുടങ്ങി മറ്റനേകം സസ്യങ്ങളും ഈ കൃഷിയിടത്തിൽ കാണാം. നാട്ടിലെ വിദ്യാഭ്യാസ, സാംസ്കാരിക പ്രവർത്തനങ്ങളിലും ഇദ്ദേഹം ഒരു സജീവസാന്നിധ്യമാണ്. വെള്ളായണി കാർഷിക കോളജിൽ നിന്നുൾപ്പെടെ ധാരാളം പഠിതാക്കൾ ഈ കൃഷിയിടം സന്ദർശിക്കാൻ എത്തുന്നുണ്ട്. ദേശീയ അധ്യാപക അവാർഡ് ജേതാവ്, വെള്ളനാട് പഞ്ചായത്തിലെ മികച്ച കുടുംബ കർഷകൻ എന്നീ പുരസ്‌കാരങ്ങൾക്ക് സത്യജോസ് അർഹനായിട്ടുണ്ട്. വെള്ളനാട് കൃഷി ഓഫീസർ ഉല്ലാസിൽ നിന്നും, ഗ്രാമപഞ്ചായത്തിൽനിന്നും കൃഷിക്കാവശ്യമായ എല്ലാ പിന്തുണയും ലഭ്യമാകുന്നുണ്ടെന്നും അദ്ദേഹം പറഞ്ഞു.

സുരക്ഷയുടെ സൂചനകൾ വിവരിച്ച് ജില്ലയിലെ കേന്ദ്രങ്ങളിൽ മോക്ഡ്രിൽ

തിരുവനന്തപുരം: ഇന്ത്യ-പാക് സംഘർഷ സാധ്യത നിലനിൽക്കെ ഏതു സാഹചര്യവും നേരിടാൻ പൊതുജനങ്ങളെ സജ്ജരാക്കുന്നതിന്‍റെ ഭാഗമായി സംസ്ഥാന വ്യാപകമായി നടത്തിയ മോക്ഡ്രിൽ തിരുവനന്തപുരം ജില്ലയിലെ വിവിധ കേനന്ദ്രങ്ങളിലും നടന്നു. മോക്ഡ്രില്ലിന്‍റെ ഭാഗമായി ഇന്നലെ വൈകുന്നേരം നാലിനു തിരുവനന്തപുരത്തു ദുരന്തനിവാരണ അഥോറിറ്റി ആസ്ഥാനത്ത് എയർ റെയ്ഡ് സൈറൻ മുഴങ്ങി. ഇതോടെ വിവിധ സേനാവിഭാഗങ്ങളും സിവിൽ ഡിഫൻസ് വോളന്‍റിയർമാരും സുരക്ഷാ ഡ്രില്ലിന്‍റെ ഭാഗമായി. പ്രധാന ഓഫീസുകൾ, പൊതു ഇടങ്ങൾ, സ്കൂളുകൾ എന്നിവിടങ്ങളിലായിരുന്നു അരമണിക്കൂർ നീണ്ട ഡ്രിൽ. അപകടമേഖലയിൽനിന്ന് ആളുകളെ ഒഴിപ്പിക്കേണ്ടതെങ്ങനെയെന്നും വീടുകളിൽ സുരക്ഷിതരായിരിക്കേണ്ടത് എങ്ങനെയെന്നും പ്രാഥമിക ശുശ്രൂഷ ലഭ്യമാക്കേണ്ടരീതിയും വ്യക്തമാക്കുന്നതായിരുന്നു മോക്ഡ്രിൽ. തലസ്ഥാനത്ത് സെക്രട്ടേറിയറ്റ് പൂർണമായും പോലീസിന്‍റെയും അഗ്നിശമന സേനയുടേയും നിയന്ത്രണത്തിലായി. മന്ത്രിമാരുൾപ്പെടെയുള്ളവർക്കും നിയന്ത്രണം ഏർപ്പെടുത്തി. പ്രധാനപ്പെട്ട ഷോപ്പിംഗ് മാളുകൾ, സർക്കാർ, സ്വകാര്യ ഓഫിസുകൾ, സ്കൂളുകൾ, വീടുകൾ തുടങ്ങി പൊതു ജനങ്ങൾ എത്തുന്ന ഇടങ്ങളിലാണ് മോക്ഡ്രിൽ നടത്തിയത്. വിഴിഞ്ഞത്തും ലുലുമാളിലും ഉൾപ്പെടെ മോക് ഡ്രിൽ നടത്തി. അരമണിക്കൂർ നീണ്ടു നില് ക്കുന്ന മോക്ഡ്രിൽ ക്ലോസിംഗ് സൈറണ്‍ 4.28ന് മുഴങ്ങി. അപകടമൊഴിവായെന്നും ഇനി സുരക്ഷിതരായി പുറത്തേക്കിറങ്ങാ മെന്നും അറിയിച്ചുകൊണ്ടാണ് 4.28ന് ക്ലോസിംഗ് സൈറണ്‍ മുഴങ്ങിയത്. ആക്രമണമുണ്ടായാൽ സ്വയം സുരക്ഷ ഉറപ്പാക്കാനുള്ള ബോധവത്കരണമാണ് മോക് ഡ്രില്ലിലൂടെ ഉദ്ദേശിക്കുന്നത്. ജില്ലയിൽ കളക്ടറും ജില്ലാ ഫയർ ഓഫീസർമാരുമാണ് മോക്ഡ്രില്ലിനു നേതൃത്വം നൽകിയത്.

തമിഴ്നാട് ട്രാൻസ്പോർട്ട് ബസിടിച്ച് കെഎസ്ആർടിസി സ്റ്റേഷൻമാസ്റ്റർ മരിച്ചു

പാറശാല: തമിഴ്നാട് വക ട്രാൻസ്പോർട്ട് ബസും ബൈക്കും കൂട്ടിയിടിച്ച് കെഎസ്ആർടിസി സ്റ്റേഷൻമാസ്റ്റർക്ക് ദാരുണാന്ത്യം നെയ്യാറ്റിൻകര മൂന്ന്കല്ലുമ്മൂട് ഊരൂട്ടുകാല കീർത്തനം ഹൗസിൽ ജയശങ്കർ (47) ആണ് മരിച്ചത്. കഴിഞ്ഞ ദിവസം രാത്രി 9.30നായിരുന്നു അപകടം. കെഎസ്ആർടിസി പാറശാല ഡിപ്പോയിലെ സ്റ്റേഷൻമാസ്റ്ററായ ജയശങ്കർ ഡ്യൂട്ടി കഴിഞ്ഞ് വീട്ടിലേക്ക് വരുമ്പോഴായിരുന്നു അപകടം. തിരുവനന്തപുരത്ത് നിന്ന് നാഗർകോവിലിലേക്ക് പോകുകയായിരുന്ന ബസ് പരശുവയ്ക്കൽ പെട്രോൾ പമ്പിന് സമീപം എതിർദിശയിൽ വന്ന ബൈക്കിനെ ഇടിച്ച് തെറിപ്പിക്കുകയായിരുന്നു. ജയശങ്കർ സംഭവസ്ഥലത്ത് തന്നെ മരണപ്പെടുകയായിരുന്നു. മൃതദേഹം നെയ്യാറ്റിൻകര ജില്ലാ ആശുപത്രിയിൽ പോസ്റ്റ്മാർട്ടത്തിന് ശേഷം വീട്ടുവളപ്പിൽ സംസ്കരിച്ചു. ഭാര്യ സംഗീത. മക്കൾ: കീർത്തന, കാർത്തിക്.

ഏകദിന സമ്മര്‍ ക്യാമ്പ് നടത്തി

മെഡിക്കല്‍കോളജ്: മുക്കില്‍ക്കട ആവുക്കുളം ചെല്ലമംഗലം റസിഡന്‍റ്സ് അസോസിയേഷന്‍റെ ബാലസമാജം അംഗങ്ങള്‍ക്കായി ഏകദിന സമ്മര്‍ ക്യാമ്പ് സംഘടിപ്പിച്ചു. അയ്യങ്കാളി നഗര്‍ കമ്മ്യൂണിറ്റി ഹാളില്‍ നടത്തിയ ക്യാമ്പിന്‍റെ ഭാഗമായി വിവിധ കലാ-സാംസ്‌കാരിക മത്സരങ്ങള്‍, ലഹരിവിരുദ്ധ ബോധവത്കരണ ക്ലാസ്, അനുഭവപരിചയങ്ങള്‍ എന്നിവ ഉണ്ടായിരുന്നു. കഴക്കൂട്ടം എക്‌സൈസ് റേഞ്ചിലെ അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ എ. ഷംസുദ്ദീന്‍ ലഹരിവിരുദ്ധ ബോധവത്രണ ക്ലാസ് നയിച്ചു. ചിത്രരചനാ മത്സരം, ട്രഷര്‍ ഹണ്ട്, നാച്ചുറല്‍ സ്‌കാവഞ്ചര്‍ ഹണ്ട് എന്നീ മത്സരങ്ങള്‍ കുട്ടികള്‍ക്കായി സംഘടിപ്പിച്ചു. വിജയികള്‍ക്ക് സമ്മാനങ്ങള്‍ വിതരണം ചെയ്തു. സമാപന സമ്മേളനം ചെല്ലമംഗലം വാര്‍ഡ് കൗണ്‍സിലര്‍ ഗായത്രിദേവി ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ് അഡ്വ. വേണു അധ്യക്ഷത വഹിച്ചു. സെക്രട്ടറി രാജേഷ് രവീന്ദ്രന്‍ സ്വാഗതം പറഞ്ഞു. പൗഡിക്കൊണം വാര്‍ഡ് കൗണ്‍സിലര്‍ അര്‍ച്ചന മണികണ്ഠന്‍, എക്‌സിക്യൂട്ടീവ് അംഗം വിജയേന്ദ്രന്‍ എന്നിവര്‍ പ്രസംഗിച്ചു.

വേനല്‍ക്കൂടാരം അവധിക്കാല ക്യാമ്പ്

പാറശാല: പാറശാല ബ്ലോക്ക് പഞ്ചായത്തിലെ ആറു പഞ്ചായത്തുകളില്‍ നിന്നും തെരഞ്ഞെടുത്ത ഇരുനൂറ്റിഅന്‍പതില്‍പ്പരം വിദ്യാർഥികളെ ഉള്‍പ്പെടുത്തി 'വേനല്‍ക്കൂടാരം' അവധിക്കാല ക്യാമ്പ് പാറശാല ഗവ. വിഎച്ച്എസ് സ്‌കൂളില്‍ സംഘടിപ്പിച്ചു. സി.കെ. ഹരീന്ദ്രന്‍ എംഎല്‍എ ഉദ്ഘാടനം നിര്‍വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. എസ്.കെ. ബെന്‍ഡാര്‍വിന്‍ അധ്യക്ഷത വഹിച്ചു. ജില്ലാ പഞ്ചായത്ത് അംഗം സൂര്യ എസ്. പ്രേം, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ അസ്. ആര്യദേവന്‍, വിനിതകുമാരി, ജെ. ജോജി, ബ്ലോക്ക് അംഗം വൈ. സതീഷ്, പഞ്ചായത്ത് അംഗം എം. സുനില്‍, ബിനില്‍ കുമാര്‍, അജികുമാര്‍, ജി.ഒ. സുജന്‍ ലാല്‍ എന്നിവര്‍ സംസാരിച്ചു. അതിഥി സല്ലാപം പരിപാടിയില്‍ ജില്ലാ പഞ്ചായത്ത് പ്രസിഡന്‍റ് അഡ്വ. എസ്. സുരേഷ് കുമാര്‍ കുട്ടികളുമായി സംവദിച്ചു. വിവിധ മേഖലകളില്‍നിന്നും കവി ഗിരീഷ് പുലിയൂര്‍, എക്‌സൈസ് പ്രിവന്‍റീവ് ഓഫീസര്‍ അജിത്, കാര്‍ട്ടൂണിസ്റ്റ് ഹരി ചാരുത, മജീഷ്യന്‍ ശരത് അരുവിപ്പുറം, വയലിനിസ്റ്റ് അമിത് എന്നിവര്‍ ക്ലാസെടുത്തു. ഇന്നു വൈകുന്നേരത്തോടുകൂടി ക്യാമ്പ് സമാപിക്കും. സമാപന സമ്മേളനം കെ. അന്‍സലന്‍ എംഎല്‍എ ഉദ്ഘാടനം ചെയ്യും.

സിവില്‍സ്റ്റേഷൻ പാര്‍ക്കിന്‍റെ ശുചീകരണം ആരംഭിച്ചു

പേരൂര്‍ക്കട: പൂര്‍ണമായും കാടുമൂടിക്കിടക്കുന്ന കുടപ്പനക്കുന്ന് സിവില്‍സ്റ്റേഷനിലെ പാര്‍ക്കിന്‍റെ ശുചീകരണം ആരംഭിച്ചു. ജില്ലാ കളക്ടറുടെ നിര്‍ദേശപ്രകാരമാണ് പാര്‍ക്ക് ശുചീകരിക്കുന്നത്. പാര്‍ക്കിനുള്ളിലെ ഇരിപ്പിടങ്ങളും ഇന്‍റർലോക്ക് നടപ്പാതയുംവരെ കാടുകയറിയ സാഹചര്യത്തിലാണ് ശുചീകരണത്തിന് അധികൃതര്‍ നിര്‍ബന്ധിതരായത്. കഴിഞ്ഞ ദിവസങ്ങളിലെ ഇടവിടുള്ള ശക്തമായ മഴയും പുല്ലുകള്‍ വളരുന്നതിന് കാരണമായി. സിവില്‍സ്റ്റേഷനിലെ ബി ബ്ലോക്കിനു എതിര്‍വശത്തായി പ്രവര്‍ത്തിക്കുന്ന പാര്‍ക്ക് എല്ലാദിവസവും പൊതുജനങ്ങള്‍ക്കായി തുറന്നുകൊടുക്കുമെങ്കിലും ഇവിടത്തെ ഇരിപ്പിടങ്ങളില്‍ ഒരാള്‍ക്കുപോലും ഇരിക്കാന്‍ സാധിക്കുമായിരുന്നില്ല. കുതിരപ്പുല്ലുകള്‍ ഉള്‍പ്പെടെയാണ് വളര്‍ന്നു പൊങ്ങിയിരുന്നത്. ഇരിപ്പിടങ്ങളില്‍ ചിലത് തിരിച്ചറിയാനാകാത്ത വിധമായിരുന്നു കാടുപടര്‍ന്നിരുന്നത്. പാര്‍ക്കിന്‍റെ പിറകുവശത്തുള്ള ജലസംഭരണിയുടെ പരിസരം പാര്‍ക്കിനെ മറയ്ക്കത്തക്ക വിധത്തില്‍ കാടുകയറിയിരുന്നു. കാടുപിടിച്ചു കിടക്കുന്ന പാര്‍ക്ക് വെറുതെ തുറന്നിടുന്നതിനെതിരേ ജനങ്ങളുടെ ആക്ഷേപം ശക്തമായിരുന്നു. ഇതിനെത്തുടര്‍ന്നാണ് പാര്‍ക്കിന്റെ ശുചീകരണം ആരംഭിച്ചത്. ശുചീകരണത്തിനൊപ്പം ഇന്റര്‍ലോക്ക് നടപ്പാതയുടെ നിര്‍മ്മാണം പൂര്‍ത്തീകരിക്കുന്ന പണിയും നടത്തും. ശുചീകരണ പ്രവര്‍ത്തനങ്ങള്‍ രണ്ടുദിവസത്തിനുള്ളില്‍ പൂര്‍ത്തീകരിക്കുകയാണ് ലക്ഷ്യം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]