യുപിഐ സൗണ്ട് ബോക്സ് ഫീച്ചറിൽ പുതുമയുമായി ജിയോ
Friday, January 31, 2025 6:21 AM IST
ന്യൂഡൽഹി: കച്ചവടസ്ഥാനങ്ങളിലെ യുപിഐ സൗണ്ട് ബോക്സ് വിപണി കൈയടക്കാൻ റിലയൻസ് ജിയോ ഒരുങ്ങുന്നു.
ജിയോ ഭാരത് ഫോണുള്ള കച്ചവടക്കാർക്ക് പണം അക്കൗണ്ടിൽ ലഭിക്കുന്പോൾ സൗണ്ട് ബോക്സിലേതിനു സമാനമായ അറിയിപ്പ് (സൗണ്ട് പേ ഫീച്ചർ) ഫോണിൽ തന്നെ ലഭിക്കും. സൗണ്ട് ബോക്സ് ഇല്ലെങ്കിലും കാര്യം നടക്കുമെന്ന് ചുരുക്കം.
പുതിയ സേവനം ആജീവനാന്തം സൗജന്യമായി നൽകുമെന്നാണ് ജിയോ അറിയിച്ചിരിക്കുന്നത്. നിലവിൽ ഓരോ വർഷവും ഏകദേശം 1,500 രൂപ നൽകിയാണ് വ്യാപാരികൾ പല കന്പനികളുടെയും സൗണ്ട് ബോക്സുകൾ റീചാർജ് ചെയ്യുന്നത്.
699 രൂപ അടച്ചാൽ ജിയോ ഭാരത് ഫോണുകൾ ലഭിക്കും. സൗണ്ട് ബോക്സിനായി പണമടയ്ക്കുന്ന അഞ്ചു കോടി വ്യാപാരികൾക്കെങ്കിലും ഇതിന്‍റെ ഗുണം ലഭിക്കുമെന്ന് കന്പനി ചൂണ്ടിക്കാട്ടി.